\id COL - Kaluli Bible 
\h Kolosi 
\toc1 Mo꞉fo꞉s We Fo꞉l Eyo꞉ Kolosi Kaluka꞉isalemo꞉ Sa꞉sa꞉liga꞉fo꞉ 
\toc2 Kolosi 
\toc3 Kolo 
\mt2 Mo꞉fo꞉s We Fo꞉l Eyo꞉  
\mt1 Kolosi  
\mt2 Kaluka꞉isalemo꞉ Sa꞉sa꞉liga꞉fo꞉  
\imt1 Asuluma꞉no꞉ Towo꞉ We  
\ip Kolosi amisa꞉n a꞉no꞉ A꞉sia Maina hen a꞉na elen. Amisa꞉n a꞉no꞉ A꞉fesa꞉s amisa꞉n o꞉lia꞉yo꞉ ko꞉na꞉ma dowo꞉. Fo꞉l eyo꞉ Kolosi sa꞉s a꞉no꞉ mo꞉ mo꞉mo꞉do꞉. Ko꞉sega Fo꞉l e A꞉fesa꞉s a꞉na ilikiyo꞉, eyo꞉ kalu nolo꞉ sa꞉s nanog dima꞉ki A꞉sia hen a꞉na iliga꞉felo꞉ ko꞉lo꞉, kalu nolo꞉ Kolosi amisa꞉n a꞉na ha꞉na꞉sa꞉ga꞉, sa꞉s nanogo꞉ a꞉na dia꞉len.  
\ip Tif amio꞉ madalilo꞉ widan kalu nolo꞉ Kolosi sa꞉s us a꞉na tinda꞉sa꞉ga꞉, tilidabu ililo꞉wo꞉ no꞉nolo alitaki, hala wida꞉lab. Ililo꞉ hala wida꞉lab ko꞉lo꞉ sio꞉ a꞉no꞉ da꞉da꞉sa꞉ga꞉, Fo꞉l eyo꞉ tilidabu ililo꞉ a꞉no꞉ ko꞉lo꞉ halale alitakiyo꞉ mo꞉fo꞉s we a꞉na sa꞉sa꞉liga꞉fo꞉.  
\ip Mo꞉fo꞉s sa꞉sa꞉lo꞉ wenamio꞉ Fo꞉l eyo꞉ a꞉la꞉wido꞉. Kelego꞉ tambo da꞉lab wema꞉ misa꞉yo꞉ Keliso E ko꞉lo꞉ a꞉lab. Keliso imilise eyo꞉sa nio꞉ tambo a꞉ma꞉la꞉ gasilia꞉ib, ko꞉lo꞉ ni asuwa꞉fa꞉no꞉ tog nolo꞉ mada aundo꞉ma dowo꞉ ko꞉lo꞉lab. Keliso eya ilikiyo꞉, Gode eyo꞉ kelego꞉ tambo we e fa꞉la꞉do alifa꞉. A꞉la꞉ta꞉ga꞉ Keliso elo꞉ nanog dimido꞉ a꞉namio꞉, Gode eyo꞉ kelego꞉ da꞉lab we tambo a꞉ma꞉la꞉ ene dia꞉ib. Keliso e ni usa a꞉lab, a꞉la꞉ta꞉ga꞉ nio꞉ kaluka꞉isale ho꞉gi ta꞉taki, ene man a꞉no꞉ ko꞉lo꞉ kudu ha꞉na꞉melea꞉ki ta꞉fo꞉.  
\ip Fo꞉l eyo꞉ mo꞉fo꞉s we sa꞉sa꞉la꞉sa꞉ga꞉yo꞉, kalu a꞉la꞉, Tikikus o꞉lia꞉ Onesimus o꞉lia꞉mo꞉ dimi ko꞉lo꞉, a꞉la꞉ma꞉yo꞉ dia꞉ha꞉na꞉sa꞉ga꞉, Kolosi kaluka꞉isalemo꞉ dimi. A꞉la꞉ta꞉ga꞉ Fo꞉l eyo꞉ Onesimus welo꞉ doba꞉da꞉yo꞉ mo꞉fo꞉s nowo꞉ ko꞉lo꞉ sa꞉sa꞉la꞉sa꞉ga꞉ Filemonbo꞉wo꞉ iliga꞉fo꞉.  
\c 1  
\p
\v 1 Ne Fo꞉l, ne Godeya꞉ enedo꞉ asulab a꞉na ilikiyo꞉, Ya꞉su Kelisowa꞉ enedo꞉ iliga꞉felo꞉ kalu nowo꞉ ne ko꞉lo꞉ fa꞉la꞉dowo꞉. Nao Timoti naino꞉ mo꞉fo꞉s we sa꞉sa꞉lo꞉l.   
\p
\v 2 Naino꞉ mo꞉fo꞉s we Godeya꞉ ene malilo꞉ kaluka꞉isale Kolosi amisa꞉n a꞉namilo꞉ sab o꞉mo꞉ sa꞉sa꞉liga꞉to꞉l. Gio꞉ Keliso amio꞉ tilida꞉da꞉sa꞉ga꞉lo꞉, ene nanogdo꞉ dimida꞉labo꞉ gi o꞉m.  
\p Do Gode eyo꞉ ene ha꞉fo꞉ disa꞉lan man o꞉lia꞉ ha꞉salo꞉ mesa꞉no꞉ man a꞉no꞉lia꞉yo꞉ gi o꞉lia꞉ doma꞉ki, dulugu so꞉lo꞉l.   
\s1 Kolosi kaluka꞉isaleyo꞉ Ya꞉su amio꞉ hendele tilidabu  
\p
\v 3 \x - \xo 1.3 \xt A꞉fe 1.15-16\x*Naino꞉ Alan Ya꞉su Kelisowa꞉ iya Godemo꞉ dulugu sa꞉lakiyo꞉, ho꞉leno꞉ tambo gio꞉ ko꞉lo꞉ asulakiyo꞉, mada o꞉m a꞉la꞉sa꞉la꞉sen.  
\v 4 Mada o꞉m a꞉la꞉do꞉ sa꞉la꞉seno꞉ mo꞉wo꞉ we. Gililo꞉ Ya꞉su Keliso amilo꞉ tilidabu a꞉no꞉lia꞉, a꞉la꞉ta꞉ga꞉ gililo꞉ tilidabu kaluka꞉isale nol o꞉lia꞉lo꞉ ha꞉fo꞉ disa꞉la꞉lab a꞉no꞉lo꞉ na꞉no꞉ dabu.  
\v 5-6 \x - \xo 1.5-6 \xt A꞉fe 1.13, 1Bid 1.4\x*Godeya꞉ to nafa a꞉no꞉ gilo꞉wa fa꞉la꞉dowabikiyo꞉, gio꞉ to hendele a꞉no꞉ da꞉da꞉sa꞉ga꞉ a꞉na tilidabu. A꞉la꞉fo꞉ko꞉lo꞉ kelego꞉ nafa ko꞉lo꞉ Godeya꞉lo꞉ dimidalia꞉ga꞉lo꞉ Hebenelo꞉ dia꞉fo꞉lab a꞉no꞉ giliyo꞉ hendele dia꞉no꞉ a꞉laki asula꞉sa꞉ga꞉ ha꞉sa yasisab. A꞉la꞉do꞉ gab a꞉na ilikiyo꞉, gili tilidabu o꞉lia꞉ ha꞉fo꞉ disa꞉lan man a꞉no꞉lia꞉yo꞉ gili asulo꞉ us amio꞉ a꞉na fa꞉la꞉dowa꞉lab. Henfelo꞉ we tambo amio꞉ Godeya꞉ to nafa a꞉no꞉ fa꞉la꞉dowakiyo꞉, fowo꞉ modo꞉ heda꞉lab. Gio꞉ Godeya꞉ ha꞉fo꞉ disa꞉lan man a꞉no꞉ tamina da꞉da꞉sa꞉ga꞉lo꞉ asululiab a꞉na a꞉la꞉ta꞉ga꞉yo꞉, fowo꞉ gi amio꞉lo꞉ heda꞉i ya꞉lab.  
\v 7 \x - \xo 1.7 \xt Kolo 4.12, File 1.23\x*To nafa a꞉no꞉ Ebafelas eyo꞉ gimo꞉wo꞉ wido꞉ ko꞉lo꞉, gio꞉ tambo asululi ko꞉lo꞉lab. Ebafelas e ni o꞉lia꞉lo꞉ madali nanogdo꞉ dian kalu imilig nowo꞉ e ko꞉lo꞉ niliyo꞉ e alan asulo꞉. Eyo꞉ nio꞉, asuwa꞉takiyo꞉ Godeya꞉ nanogo꞉ hendele difo꞉ko꞉ ha꞉na꞉lab.  
\v 8 Eyo꞉ Godeya꞉ Mamayo꞉ giya dota꞉ga꞉lo꞉ tilidabu kaluka꞉isale nol o꞉lia꞉yo꞉ ha꞉fo꞉ disa꞉la꞉sen a꞉no꞉ na꞉nbo꞉wo꞉ malolomeabe.   
\s1 Kolosi kaluka꞉isaleyo꞉ halale alifoma꞉ki, dulugu sio꞉  
\p
\v 9 \x - \xo 1.9 \xt A꞉fe 1.16-17\x*A꞉la꞉go꞉ko꞉lo꞉ ho꞉len gililo꞉ man nafa dimidab a꞉la꞉do꞉ dabulo꞉ a꞉na a꞉la꞉ta꞉ga꞉yo꞉, naino꞉ gio꞉ asulaki, Godemo꞉wo꞉ towo꞉ safo꞉ko꞉ ya꞉lo꞉l. Mama Malilo꞉ eyo꞉ asuluma꞉no꞉ nafayo꞉ gimo꞉ dimiab amio꞉, Godeya꞉ enedo꞉ asulab a꞉no꞉ gi amio꞉ ililita꞉ga꞉ asululima꞉ki dulugu sa꞉la꞉lo꞉l.  
\v 10 A꞉la꞉gab amio꞉ gio꞉ Alan elo꞉ asulab o꞉leau kudu ha꞉na꞉liki, kelego꞉wo꞉ tambo gililo꞉ dimidab amio꞉, e sagalema꞉ki dimidama꞉no꞉ da꞉lab. A꞉la꞉dimidalikiyo꞉ giliyo꞉ man nafa dimidaki, fowo꞉ modo꞉ heda꞉mela꞉ib, a꞉la꞉ta꞉ga꞉ gio꞉ Godeyo꞉ fanda asululia꞉sa꞉ga꞉, ho꞉leno꞉ tambo gi amio꞉ asulufo꞉ko꞉ ha꞉na꞉mela꞉ib.  
\v 11-12 \x - \xo 1.11-12 \xt A꞉fe 1.19, 3.16\x*\x - \xo 1.11-12 \xt A꞉fe 1.11,18\x*Godeya꞉ ene halaido꞉ malilo꞉ a꞉ma꞉yo꞉ gio꞉ halale alitakiyo꞉, hida꞉yo꞉ ko꞉li ko꞉lilo꞉ yab a꞉no꞉ ha꞉sa iliki halale dia꞉sa꞉ga꞉, mo꞉ta꞉taki ha꞉na꞉melea꞉kiyo꞉, naino꞉ Godemo꞉ dulugu sa꞉la꞉sen. A꞉la꞉gab amio꞉ gio꞉ sagala꞉sa꞉ga꞉ Domo꞉wo꞉ sagalo꞉ to sa꞉ma꞉no꞉wo꞉ o꞉li da꞉lab. Eyo꞉ kelego꞉ nafale ko꞉lo꞉ kaluka꞉isale enedo꞉lema꞉no꞉ a꞉la꞉likilo꞉ dimidaefa꞉ a꞉no꞉ gio꞉lo꞉ dima꞉ki ilili alifa꞉. Kaluka꞉isale Godeya꞉ enedo꞉le a꞉no꞉ ho꞉len nafale us a꞉na a꞉lab.  
\v 13 \x - \xo 1.13 \xt Luk 22.53, A꞉fe 2.2\x*Nio꞉ sololi halaido꞉ a꞉ma꞉ ha꞉ga a꞉labiki, Gode eyo꞉ nio꞉ a꞉ma꞉la꞉ gasilia꞉sa꞉ga꞉, ene ha꞉fo꞉lo꞉ disa꞉ So꞉wa a꞉ma꞉ bo꞉fo꞉liki, elo꞉ a꞉lab a꞉na melea꞉ki ta꞉fo꞉.  
\v 14 \x - \xo 1.14 \xt A꞉fe 1.7\x*So꞉wa a꞉na a꞉la꞉ta꞉ga꞉yo꞉, nio꞉ sili alitaki, nili mogago꞉wo꞉ tambo hala꞉sa꞉ga꞉ ga꞉lila꞉ ko꞉lo꞉lab.   
\s1 Keliso e mada wa꞉la꞉bdeyo꞉ E  
\p
\v 15 \x - \xo 1.15 \xt Yo꞉n 1.18, 2Kol 4.4\x*Nio꞉ Godeyo꞉ mo꞉ba꞉ba꞉no꞉ dowo꞉ ko꞉sega Ya꞉su Keliso e Gode enen misido꞉ o꞉ngo꞉ fa꞉la꞉dowo꞉. Godeya꞉ ene so꞉wa wa꞉la꞉bo꞉ E ko꞉lo꞉, Godeya꞉lo꞉ kelego꞉ dimido꞉ we tambo amio꞉, E misa꞉ iliki bo꞉fo꞉lab.  
\v 16 So꞉wa a꞉na a꞉la꞉ta꞉ga꞉yo꞉, Gode eyo꞉ kelego꞉ tambowo꞉ a꞉na fa꞉la꞉do alifa꞉. Hebene kelego꞉wo꞉lo꞉, henfelo꞉ kelego꞉wo꞉lo꞉, kelego꞉ nililo꞉ bo꞉do꞉l welo꞉, kelego꞉ nililo꞉ mo꞉bo꞉do꞉l a꞉no꞉lo꞉, ma꞉mula꞉ kalu o꞉lia꞉, mama ko꞉li ko꞉lilo꞉ halaido꞉lo꞉ a꞉lab a꞉no꞉lia꞉yo꞉ tambo eya a꞉la꞉ta꞉ga꞉ fa꞉la꞉do alifa꞉ ko꞉lo꞉, eno꞉le ko꞉lo꞉lab.  
\v 17 \x - \xo 1.17 \xt Yo꞉n 1.1, 8.58\x*Kelego꞉ tambowo꞉ o꞉semo꞉ fa꞉la꞉dowabikiyo꞉, E ko꞉le elen. Kelego꞉ tambowo꞉ ene digi ta꞉li dofo꞉likiyo꞉, ego꞉le ko꞉lo꞉lab.  
\v 18 \x - \xo 1.18 \xt Ilig 26.23, A꞉fe 1.22-23, Kala 1.5\x*Kaluka꞉isale e amilo꞉ kudo꞉ a꞉no꞉ ene sa꞉s dowo꞉ ko꞉lo꞉ iyo꞉ ene do꞉mo꞉le dowaki, ili misa꞉yo꞉ E ko꞉lo꞉lab. Do꞉mo꞉wa꞉ mela꞉no꞉ mo꞉wo꞉ E. E iwalulo꞉ taminde doma꞉nikiyo꞉, sowa꞉sa꞉ga꞉lo꞉ daido꞉ amilo꞉ a꞉ma꞉la꞉ dasio꞉ wa꞉la꞉bo꞉ E.  
\v 19 \x - \xo 1.19 \xt Kolo 2.9\x*Godeya꞉ ene mela꞉no꞉ o꞉lia꞉ ene man o꞉lia꞉ a꞉no꞉, e amilo꞉ ilili alifo꞉lab o꞉leaumbo꞉, ene So꞉wa e amio꞉lo꞉ tambo ilili alifoma꞉kiyo꞉ sagala꞉li ta꞉fo꞉.  
\v 20 \x - \xo 1.20 \xt A꞉fe 1.10\x*Gode eyo꞉ ene So꞉wa a꞉na a꞉la꞉ta꞉ga꞉yo꞉, Hebene kelego꞉ o꞉lia꞉ henfelo꞉ kelego꞉ o꞉lia꞉yo꞉ tambo e o꞉lia꞉ ege doma꞉ki asulo꞉ ko꞉lo꞉, Ya꞉su Kelisowa꞉ ho꞉bo꞉ ko꞉lo꞉ i malan amilo꞉ tulo꞉ a꞉na ilikiyo꞉, Gode eyo꞉ ni o꞉lia꞉yo꞉ ha꞉fo꞉wo꞉ a꞉na disa꞉. \fig Godeya꞉ ene So꞉wa eya a꞉la꞉ta꞉ga꞉yo꞉ kelego꞉wo꞉ tambo fa꞉la꞉dowo꞉.|alt="Creation, Adam, Eve" src="DY01001_gr.tif" size="col" copy="by Carolyn Dyk (SIL)" ref="1.15-16" \fig*   
\p
\v 21 \x - \xo 1.21 \xt Lom 5.10, A꞉fe 2.12\x*Mo꞉luwo꞉ giliyo꞉ man mogago꞉le dimida꞉len ko꞉lo꞉, gio꞉ Gode o꞉lia꞉yo꞉ gis dia꞉liki, alobanala꞉ elen.  
\v 22 \x - \xo 1.22 \xt Lom 5.10, A꞉fe 5.27\x*Ko꞉sega Ya꞉su Keliso sowo꞉ a꞉na ilikiyo꞉, gio꞉ Gode o꞉lia꞉ a꞉ege doma꞉ki dimido꞉ ko꞉lo꞉lab. A꞉la꞉do꞉ go꞉ a꞉na ilikiyo꞉, gio꞉ tililia꞉ga꞉ ene siwa꞉la kagayalikiyo꞉, gio꞉ malilo꞉ dowaki, mogago꞉ o꞉lia꞉ hala dimidan o꞉lia꞉ a꞉no꞉ mada aundo꞉ma elena ba꞉ba꞉ib.  
\v 23 A꞉la꞉go꞉ ko꞉sega gini tilidabu a꞉no꞉ aiko꞉ ko꞉lo꞉ mada halale gelo꞉ o꞉leo꞉ngo꞉ dofo꞉lubi. Gio꞉ to nafa ho꞉gi da꞉dakiyo꞉ tilidabu ko꞉lo꞉, mela꞉no꞉wo꞉ dia꞉nigo꞉l a꞉la꞉asulo꞉ ko꞉lo꞉lab. A꞉la꞉fo꞉ko꞉lo꞉ asulo꞉ a꞉no꞉ sulu ha꞉nabena꞉kiyo꞉, ta꞉li dofo꞉ ha꞉na꞉lubi. To nafa a꞉no꞉ henfelo꞉ kaluka꞉isale tambomo꞉wo꞉ wida꞉li ane ko꞉lo꞉, gio꞉lo꞉ to a꞉no꞉ dabu. A꞉la꞉ta꞉ga꞉ Fo꞉l ne to a꞉ma꞉ ene nanogdo꞉ dian kalu fa꞉la꞉dowo꞉.   
\s1 Fo꞉l eyo꞉ Kolosi sa꞉s a꞉no꞉ asufa꞉  
\p
\v 24 O꞉go꞉ gi asuwa꞉takilo꞉ nagalo꞉ dio꞉l we ne sagalo꞉l. Mo꞉wo꞉ Ya꞉suwa꞉lo꞉ nagalo꞉ di a꞉no꞉ semo꞉ ilili alifa꞉. Sa꞉so꞉ ene do꞉mo꞉ ko꞉lo꞉, a꞉no꞉ asuwa꞉foma꞉kiyo꞉, nagalo꞉ heb o꞉dowab a꞉no꞉ ni do꞉mo꞉ wema꞉ dio꞉l.  
\v 25 \x - \xo 1.25 \xt A꞉fe 3.2,7-8\x*Gode eyo꞉ ne sa꞉s usa nanog diaki, gi asuwa꞉foma꞉ki ene halaido꞉wa꞉ da꞉feyo꞉. Gio꞉ Godeya꞉ towo꞉ tambo da꞉da꞉sa꞉ga꞉ asululima꞉kiyo꞉, ne a꞉na ta꞉fo꞉.  
\v 26 \x - \xo 1.26 \xt Lom 16.25-26, A꞉fe 3.5,9\x*Mo꞉luwo꞉ to a꞉no꞉ wo꞉no꞉le delen ko꞉lo꞉, kaluka꞉isaleyo꞉ ta꞉i mio꞉lo꞉ a꞉namio꞉ tambo mo꞉asulo꞉. Ko꞉sega o꞉go꞉ Gode eyo꞉ kaluka꞉isale enedo꞉sma꞉ siwa꞉l amio꞉ kalaba fa꞉la꞉do alifa꞉.  
\v 27 Gode eyo꞉ to wo꞉no꞉lelo꞉ delen a꞉no꞉ widalikiyo꞉, kelego꞉ nafale to us amilo꞉ da꞉lab a꞉no꞉, Yu kaluka꞉isalema imo꞉wo꞉ kalaba walama꞉no꞉ asulabi wido꞉. To wo꞉no꞉le delen a꞉no꞉ we. Ya꞉su Keliso e gi usa a꞉lab ko꞉lo꞉, gio꞉ e o꞉lia꞉ silikiyo꞉, Godeya꞉lo꞉ dimia꞉no꞉ dinali sio꞉ a꞉no꞉, tambo hendele dia꞉ib.   
\p
\v 28 A꞉la꞉fo꞉ko꞉lo꞉ niliyo꞉ kaluka꞉isalemo꞉wo꞉ Ya꞉su Keliso e ko꞉lo꞉ fanda wida꞉lo꞉l. Niliyo꞉ kaluka꞉isale i a꞉no꞉ tambo, Kelisowa dowaki tilidabuwo꞉ halaido꞉ dowo꞉ a꞉la꞉likiyo꞉, Godelo꞉wa tililia꞉ mia꞉no꞉ asulab ko꞉lo꞉, nio꞉ asulo꞉ nafale kudu ha꞉naki, imo꞉wo꞉ hagugo꞉ to sa꞉lakiyo꞉lo꞉, towo꞉ halaido꞉wo꞉lo꞉ wida꞉lo꞉l.  
\v 29 \x - \xo 1.29 \xt A꞉fe 3.7,20, Fili 4.13\x*A꞉no꞉ fa꞉la꞉doma꞉kiyo꞉, Ya꞉su Kelisowa꞉ ene halaido꞉ ko꞉lo꞉ nemo꞉lo꞉ dimi a꞉na ilikiyo꞉, niyo꞉ nanog halaido꞉ we disugulaki dimida꞉lo꞉l.   
\c 2  
\p
\v 1 Niyo꞉ tilidabu kaluka꞉isale misilo꞉ mo꞉ba꞉dab a꞉no꞉ ko꞉lo꞉ asuwa꞉fa꞉no꞉ a꞉lakiyo꞉, hogo꞉ nanog dia꞉lo꞉l a꞉la꞉bo꞉ gio꞉ asuluma꞉ki asulab. Kaluka꞉isale nelo꞉ mo꞉bo꞉do꞉l a꞉no꞉ gio꞉lo꞉, tilidabu kaluka꞉isale Laodisia hen amilo꞉ sab a꞉no꞉lo꞉, a꞉la꞉ta꞉ga꞉ tilidabu kaluka꞉isale ne misilo꞉ mo꞉ba꞉ba꞉ a꞉no꞉lo꞉, niyo꞉ a꞉la꞉ka asuwa꞉ta꞉sen.  
\v 2 Nanog nilo꞉ dimido꞉l wema꞉yo꞉, tilidabu gililo꞉wo꞉ halaido꞉ doma꞉ki go꞉. A꞉la꞉ta꞉ga꞉ gio꞉ tambo gegelebo꞉ ha꞉fo꞉wo꞉ disa꞉laki, ua gasa doma꞉ki go꞉. A꞉la꞉gabikiyo꞉ gio꞉ asulo꞉ nafayo꞉ dia꞉sa꞉ga꞉, Godeya꞉ to wo꞉no꞉lelo꞉ delen a꞉ma꞉ ha꞉go꞉ dinafa fanda asululialikiyo꞉, gili tilidabuwo꞉ halaido꞉ doma꞉ki asulo꞉l. To wo꞉no꞉lelo꞉ delen a꞉ma꞉ ha꞉go꞉, Ya꞉su Keliso we.  
\v 3 \x - \xo 2.3 \xt 1Kol 1.24,30\x*Asulo꞉ nafale o꞉lia꞉ asuluma꞉no꞉ nafa o꞉lia꞉yo꞉ tambo Keliso amio꞉, wa꞉lifo꞉ ko꞉lo꞉ a꞉lab.  
\v 4 \x - \xo 2.4 \xt Lom 16.18\x*Kalu noma꞉yo꞉ to nafa ko꞉li nowo꞉ gio꞉ dikili sa꞉lab amio꞉ tili da꞉dabena꞉ki, niyo꞉ to we gimo꞉wo꞉ a꞉na so꞉lo꞉l  
\v 5 \x - \xo 2.5 \xt 1Kol 5.3\x*Mo꞉wo꞉ ne gi o꞉lia꞉yo꞉ mo꞉dofo꞉lo꞉l ko꞉sega, asulo꞉ nilo꞉wo꞉ gi o꞉lia꞉ ua iliki, gio꞉ Keliso amilo꞉ tilida꞉dakilo꞉ halale kagayab a꞉no꞉lia꞉, gegelelo꞉ ege dowab a꞉no꞉lia꞉yo꞉, ne asulaki sagala꞉liki so꞉l.   
\s1 Kaluwa꞉ towo꞉ mo꞉kudu ha꞉naki, Ya꞉su amio꞉ mela꞉no꞉le dia꞉ib  
\p
\v 6 Giliyo꞉ Ya꞉su Kelisowo꞉ gili Alande doma꞉kilo꞉ ta꞉fo꞉ o꞉leaumbo꞉, gio꞉ ho꞉leno꞉ tambo e o꞉lia꞉ iliki ha꞉na꞉lubi.  
\v 7 \x - \xo 2.7 \xt A꞉fe 3.17\x*Gio꞉ i tef ko꞉lo꞉ hen amilo꞉ tiha꞉nan o꞉leaumbo꞉, E amio꞉ a꞉la꞉kudaki bowo꞉ tina꞉bi. A꞉la꞉ta꞉ga꞉ a ko꞉lo꞉ aiko꞉ halaido꞉ wa꞉l amilo꞉ dian o꞉leaumbo꞉ gili tilidabuwo꞉ e wa꞉la dia꞉bi. A꞉la꞉galikiyo꞉, nililo꞉ gimo꞉lo꞉ wido꞉ o꞉leaumbo꞉ gili tilidabuwo꞉ halale anayakiyo꞉, sagalo꞉ towo꞉ gi amio꞉ wa꞉litakiyo꞉ ala handaloma꞉ib.   
\p
\v 8 Gio꞉ dinafa dowa꞉bi. Kalu nolba꞉yo꞉ dikili sa꞉lakiyo꞉, madali to ko꞉li ko꞉lilo꞉ a꞉no꞉ gimo꞉wo꞉ walama꞉ib. To a꞉no꞉ ema꞉muwa꞉ asulo꞉wa a꞉la꞉ta꞉ga꞉ fa꞉la꞉dowakiyo꞉, henfelo꞉ wema꞉ man delen a꞉no꞉ ko꞉lo꞉ kudu ha꞉nakigab. Ililo꞉ to widab a꞉ma꞉yo꞉ gio꞉ dibolo amilo꞉ to꞉lolo꞉wo꞉ auma꞉ib ko꞉lo꞉, gio꞉ to a꞉no꞉ kudu ha꞉nabena꞉ki dinafa dowa꞉bi. To a꞉no꞉ Keliso eya a꞉la꞉ta꞉ga꞉yo꞉ mo꞉fa꞉la꞉dowab.  
\v 9 \x - \xo 2.9 \xt Yo꞉n 1.14,16\x*Keliso e kalu dofo꞉labi, kelego꞉wo꞉ tambo Gode amilo꞉ wa꞉lifo꞉lab a꞉no꞉, e amio꞉lo꞉ wa꞉lifo꞉ ko꞉lo꞉ a꞉lab.  
\v 10 \x - \xo 2.10 \xt A꞉fe 1.21-22\x*Gio꞉ Ya꞉su eya kudufo꞉labikiyo꞉, eyo꞉ gi amio꞉ tambo ilili alifa꞉. Keliso e, mama ko꞉li ko꞉lilo꞉ halaido꞉lo꞉ a꞉lab a꞉ma꞉ misa꞉yo꞉ E ko꞉lo꞉lab.  
\v 11 \x - \xo 2.11 \xt Lom 2.29\x*Gio꞉ eya kudabiki, eyo꞉ gili do꞉go꞉fo꞉ a꞉na hege gede alifa꞉. Elo꞉ dimido꞉ a꞉no꞉ kaluwa꞉lo꞉ do꞉go꞉f hege gedean o꞉mba. Keliso eyo꞉ do꞉mo꞉wa꞉lo꞉ asulakilo꞉ mogago꞉ dimida꞉len man a꞉no꞉, gio꞉ ga꞉li mesea꞉ki sili alifa꞉. Kelisowa꞉lo꞉ do꞉go꞉fo꞉ hege gedean man hendeleyo꞉ o꞉m.  
\v 12 \x - \xo 2.12 \xt Lom 6.4\x*Gio꞉ ho꞉n amilo꞉ to꞉lolab a꞉namio꞉, Ya꞉su o꞉lia꞉ hen daido꞉wa difa꞉. A꞉la꞉ta꞉ga꞉ Ya꞉sulo꞉ dasi alifa꞉ Gode a꞉ma꞉ ene halaido꞉ a꞉namio꞉, gio꞉ tilidabu ko꞉lo꞉, gio꞉lo꞉ e o꞉lia꞉ a꞉ma꞉la꞉ dasi alifa꞉ ko꞉lo꞉lab.  
\v 13 \x - \xo 2.13 \xt A꞉fe 2.1,4-5\x*Tamin amio꞉ gili do꞉mo꞉wa꞉lo꞉ asulakilo꞉ mogago꞉ dimida꞉len man a꞉no꞉ semo꞉ dila꞉ amio꞉, gio꞉ man mogago꞉ dimida꞉liki sowo꞉ o꞉ngo꞉ elen. Ko꞉sega o꞉g a꞉namio꞉ Gode eyo꞉ nili mogago꞉ dimida꞉len a꞉no꞉ tambo hala꞉sa꞉ga꞉ ga꞉lila꞉ ko꞉lo꞉, nio꞉ Keliso o꞉lia꞉ a꞉ma꞉la꞉ dasi alitakiyo꞉, mela꞉no꞉ ta꞉fo꞉.  
\v 14 \x - \xo 2.14 \xt A꞉fe 2.14-16, 1Bid 2.24\x*Ele difa꞉ a꞉ma꞉yo꞉ nio꞉ mo꞉walila꞉sa꞉ga꞉, nililo꞉ mogago꞉ dimida꞉len a꞉no꞉ kalaba dia꞉taki, nio꞉ mewa꞉l ha꞉g a꞉na elen. Ko꞉sega Gode eyo꞉ mewa꞉l a꞉no꞉ i malana alu alitaki tambo dila꞉.  
\v 15 I malan a꞉na ilikiyo꞉, Gode eyo꞉ mama ko꞉li ko꞉lilo꞉ a꞉lab a꞉ma꞉ ene halaido꞉ a꞉no꞉ o꞉ngo꞉malo꞉ngo꞉ ta꞉fo꞉ ko꞉lo꞉, iyo꞉ tambo tiniakiyo꞉, kaluka꞉isaleya꞉ siwa꞉l amio꞉ sendeloma꞉ki ta꞉fo꞉.   
\s1 Nio꞉ Keliso o꞉lia꞉ sowo꞉ ko꞉lo꞉ henfelo꞉wa꞉ eleyo꞉ mo꞉kudu ha꞉na꞉niki  
\p
\v 16 \x - \xo 2.16 \xt Lom 14.1-13\x*A꞉la꞉fo꞉ko꞉lo꞉ ma꞉n ma꞉no꞉ doba꞉da꞉yo꞉lo꞉, ho꞉n ma꞉no꞉ doba꞉da꞉yo꞉lo꞉, ho꞉len alan amilo꞉ gulugululan a꞉namida꞉yo꞉lo꞉, ele ho꞉gi amilo꞉ gulugululan a꞉no꞉lo꞉, a꞉la꞉ta꞉ga꞉ Ha꞉fo꞉lo꞉ Dowan ho꞉len a꞉no꞉lo꞉, kalu nolba꞉lo꞉ ele dia꞉tab a꞉namio꞉, iliyo꞉ gio꞉ mo꞉alobanama꞉ki dowa꞉bi.  
\v 17 \x - \xo 2.17 \xt Hibu 8.5\x*Ele a꞉ma꞉yo꞉ kelego꞉ tif amilo꞉ fa꞉la꞉doma꞉nigab a꞉no꞉ ko꞉lo꞉ mama dowan o꞉ngo꞉ dedaki dimido꞉. Ko꞉sega hendele a꞉no꞉ Ya꞉su Keliso e ko꞉lo꞉ a꞉lab.  
\v 18 Kalu nolba꞉yo꞉ gilo꞉wa fa꞉la꞉dowakiyo꞉ a꞉la꞉sa꞉ma꞉ib, “Gio꞉ go꞉no꞉n a꞉ma꞉la꞉yo꞉ ha꞉ga dowaki, ma꞉mula꞉ kalumo꞉ gulugululaki wabuluma” a꞉la꞉sa꞉ma꞉ib. Iliyo꞉ a꞉la꞉sa꞉ma꞉ib, “Niyo꞉ Godeya a꞉la꞉ta꞉ga꞉yo꞉ ho꞉le ba꞉ba꞉ ko꞉lo꞉ to nilo꞉ wido꞉l we mada dinafa da꞉da꞉bi,” a꞉la꞉sa꞉ma꞉ib. Ko꞉sega giliyo꞉ kalu o꞉ngo꞉ma꞉yo꞉ gio꞉ wa꞉la꞉ sanama꞉kiyo꞉ ta꞉ta꞉so꞉bo. Kalu i o꞉ngo꞉wo꞉ inido꞉ asulo꞉wa ilikiyo꞉, enena꞉ma꞉la꞉yo꞉ madali kailakigab.  
\v 19 \x - \xo 2.19 \xt A꞉fe 2.21, 4.16\x*Kalu i a꞉no꞉ misa꞉ a꞉namio꞉ mo꞉kudo꞉ ko꞉lo꞉ a꞉lab. Nili misa꞉yo꞉ Ya꞉su Keliso E. Nili do꞉mo꞉ amio꞉ moma o꞉lia꞉ kagoman o꞉lia꞉yo꞉ tambo kudu alifelo꞉ ko꞉lo꞉, nili misa꞉ a꞉na a꞉la꞉ta꞉ga꞉yo꞉ Gode eyo꞉ nili do꞉mo꞉ we halaido꞉wo꞉ dimiab amio꞉ tambo anama꞉ki ta꞉ta꞉sen.   
\p
\v 20 \x - \xo 2.20 \xt Gala 4.3,9, 1Tim 4.3\x*Gio꞉ Keliso o꞉lia꞉ sowabikiyo꞉, eyo꞉ henfelo꞉ man wema꞉yo꞉ gio꞉ mo꞉bo꞉fo꞉melea꞉ki sili alifa꞉. A꞉la꞉fo꞉ko꞉lo꞉ gio꞉ henfelo꞉ man wema꞉ ha꞉g amio꞉ o꞉a꞉lab o꞉ngo꞉ dowakilo꞉ kudu ha꞉nab ko mo꞉wo꞉ ha꞉?  
\v 21 Henfelo꞉ wema꞉ eleyo꞉ we. Kelego꞉ we gola꞉so꞉bo! A꞉no꞉ na꞉so꞉bo! Kelego꞉ nowo꞉ ta꞉lia꞉so꞉bo!  
\v 22 \x - \xo 2.22 \xt Madi 15.9\x*Ele a꞉ma꞉yo꞉ henfelo꞉ kelego꞉ bo꞉elo꞉ mogaila꞉ma꞉no꞉ a꞉namida꞉ sa꞉laki difa꞉. Ele o꞉leo꞉ngo꞉wo꞉ kaluwa a꞉la꞉ta꞉ga꞉ fa꞉la꞉dowo꞉.  
\v 23 Ele o꞉leo꞉ngo꞉wo꞉ kaluka꞉isaleya꞉yo꞉ “We nafa, hendele asuwa꞉fa꞉nigabo꞉lo꞉b” a꞉la꞉asulo꞉. Kaluka꞉isale elelo꞉ kudu ha꞉nab i a꞉ma꞉yo꞉, eleyo꞉ tambo mada dinafa kudu ha꞉na꞉niki a꞉la꞉sa꞉la꞉sen. Inina꞉ma꞉la꞉yo꞉ madali wa꞉la꞉ sa꞉ndaki, eleyo꞉ a꞉na difa꞉. A꞉la꞉ta꞉ga꞉ ini do꞉mo꞉wo꞉ halaido꞉ bo꞉fo꞉melea꞉kiyo꞉, eleyo꞉ ko꞉li ko꞉lilo꞉ dila꞉. Ko꞉sega ele a꞉ma꞉yo꞉ nili mogago꞉ dimidama꞉no꞉ asula꞉sen a꞉no꞉ mada mo꞉ka꞉la꞉lab.   
\c 3  
\s1 Man mo꞉luwo꞉ a꞉no꞉ ta꞉ta꞉sa꞉ga꞉, ho꞉gile dima  
\p
\v 1 \x - \xo 3.1 \xt Mak 12.36, 16.19, A꞉fe 1.20\x*Gode eyo꞉ gio꞉ Keliso e o꞉lia꞉ a꞉ma꞉la꞉ dasi alifa꞉ ko꞉lo꞉, giliyo꞉ kelego꞉ Hebene halomilo꞉ a꞉lab a꞉no꞉ko꞉ mada alan asula꞉lubi. Iwalu halonamio꞉ Keliso e misa꞉ siliki, Godeya꞉ ene dagi ililiba sab.  
\v 2 \x - \xo 3.2 \xt Madi 6.33\x*Henfelo꞉ wenamilo꞉ da꞉lab kelego꞉ we mo꞉asulaki, iwalulo꞉ da꞉lab kelego꞉ halo ko꞉lo꞉ mada asulufo꞉lubi.  
\v 3 Mo꞉wo꞉ gio꞉ sowo꞉ ko꞉lo꞉, gi mela꞉no꞉le a꞉no꞉ Kelisowa wo꞉no꞉le dia꞉fo꞉liki, Gode o꞉lia꞉ dowo꞉ ko꞉lo꞉lab.  
\v 4 Keliso e gili mela꞉no꞉ mo꞉wo꞉ E ko꞉lo꞉, E kalaba fa꞉la꞉dowalikiyo꞉, gio꞉lo꞉ e o꞉lia꞉ ene ho꞉len malilo꞉ o꞉lia꞉ kalaba fa꞉la꞉doma꞉ib.   
\p
\v 5 \x - \xo 3.5 \xt Lom 6.6,11, A꞉fe 4.19, 5.3-6\x*A꞉la꞉go꞉ko꞉lo꞉ gililo꞉ man mogago꞉ dimidama꞉no꞉ asula꞉sen a꞉no꞉ sana sowa꞉bi. Man a꞉no꞉ we. Uwo꞉ dian mano꞉, heyo꞉ mano꞉, do꞉mo꞉wa꞉lo꞉ dimidama꞉no꞉ asulan mano꞉, man mogago꞉ dimidama꞉no꞉ asulan mano꞉, meselan mano꞉, i a꞉no꞉ o꞉m. Meselan man a꞉no꞉ madali Godemo꞉lo꞉ gulugululan o꞉ngo꞉ ko꞉lo꞉ a꞉lab.  
\v 6 Man dimidan a꞉na a꞉la꞉ta꞉ga꞉yo꞉, Godeya꞉ gadio꞉wo꞉ tima꞉nigab.  
\v 7 Tamin amio꞉ gili mela꞉no꞉wo꞉ a꞉na elen ko꞉lo꞉, giliyo꞉ man a꞉no꞉ dimidafo꞉ko꞉ dowa꞉len.  
\v 8 \x - \xo 3.8 \xt A꞉fe 4.25-29, 5.4\x*A꞉la꞉dimida꞉len ko꞉sega, o꞉go꞉ giliyo꞉ man we o꞉ngo꞉wo꞉ tambo dila꞉bi. Gadian mano꞉, kulufa꞉yan mano꞉, nowo꞉mbo꞉lo꞉ mo꞉bean mano꞉, sada꞉dano꞉, a꞉la꞉ta꞉ga꞉ wa꞉sa꞉le sa꞉lano꞉, tambo kata꞉ta꞉bi.  
\v 9-10 \x - \xo 3.9-10 \xt A꞉fe 4.22,24,25\x*A꞉la꞉ta꞉ga꞉ giliyo꞉ gegelebo꞉ madaliyo꞉ dikili sa꞉la꞉so꞉bo. Mo꞉wo꞉ gili mogago꞉ dimidama꞉no꞉ asula꞉sen man a꞉no꞉ tambo dugula꞉sa꞉ga꞉, man ho꞉gile a꞉no꞉ gi amio꞉ kalifa꞉. Gode eyo꞉ gio꞉ ho꞉gi kaluka꞉isale fa꞉la꞉do alifa꞉ ko꞉lo꞉, giliyo꞉ e mada asulufo꞉liki, enen misido꞉ o꞉ngo꞉ fa꞉la꞉doma꞉ki, eyo꞉ asulo꞉wo꞉ gimo꞉wo꞉ dimifo꞉ko꞉ a꞉lab.  
\v 11 \x - \xo 3.11 \xt Gala 3.28\x*Keliso eyo꞉ nio꞉ ho꞉gile fa꞉la꞉do alifa꞉ ko꞉lo꞉, nio꞉ tambo imilo꞉ dowab. Yuda kaluka꞉isale o꞉lia꞉ Gilig kaluka꞉isale o꞉lia꞉ us amio꞉ eleyo꞉ aundo꞉ma. A꞉la꞉ta꞉ga꞉ do꞉go꞉fo꞉ hege gedeo꞉ kalu o꞉lia꞉ mo꞉hege gedeo꞉ kalu o꞉lia꞉yo꞉ ko꞉li a꞉la꞉bo꞉ asula꞉so꞉bo. Ko꞉na꞉ kaluwa꞉le, to ko꞉lilo꞉lo꞉ sa꞉lan kaluwa꞉le, madalilo꞉ nanog dian kaluwa꞉le, enena꞉ma꞉la꞉lo꞉ bo꞉fo꞉lowan kaluwa꞉le, iyo꞉ tambo imilo꞉ dowab. Ko꞉sega alan kelego꞉ a꞉no꞉ mo꞉wo꞉ Ya꞉su Keliso e ko꞉m, a꞉la꞉ta꞉ga꞉ e ni usa tambo a꞉lab.   
\p
\v 12 \x - \xo 3.12 \xt 1Bid 2.9\x*Gode eyo꞉ gi o꞉lia꞉ ha꞉fo꞉wo꞉ disa꞉la꞉sa꞉ga꞉, gio꞉ malilo꞉ kaluka꞉isale dowabiki, eno꞉ a꞉la꞉liki da꞉feyo꞉ ko꞉lo꞉, giliyo꞉ mano꞉ we o꞉ngo꞉ dimida꞉lubi. Nofolano꞉, nowo꞉mbo꞉wo꞉ man nafa dimidano꞉, go꞉no꞉n ge ha꞉ga dowano꞉, no o꞉lia꞉lo꞉ ha꞉sa dowano꞉ a꞉la꞉ta꞉ga꞉ bo꞉ebo꞉ mo꞉iligan mano꞉, gio꞉ a꞉no꞉ ko꞉lo꞉ tambo kudu ha꞉na꞉lubi.  
\v 13 \x - \xo 3.13 \xt A꞉fe 4.2,32\x*A꞉la꞉ta꞉ga꞉ gio꞉ gegelebo꞉ mo꞉mo꞉beaki, kalu noma꞉lo꞉ gemo꞉lo꞉ hala dimidab a꞉no꞉ ga꞉lila꞉lubi. Alan Keliso eyo꞉ gili mogago꞉wo꞉ hala꞉sa꞉ga꞉lo꞉ ga꞉lila꞉ o꞉leaumbo꞉, giliyo꞉lo꞉ a꞉la꞉ halaki ga꞉lila꞉bi.  
\v 14 \x - \xo 3.14 \xt Lom 13.8-10\x*A꞉la꞉ta꞉ga꞉ wa꞉la꞉b kelego꞉wo꞉ we. Giliyo꞉ kalu nol o꞉lia꞉yo꞉ ha꞉fo꞉wo꞉ disa꞉la꞉lubi. Man a꞉ma꞉yo꞉ kaluka꞉isaleyo꞉ ua kegene kudu alitaki, asulo꞉ imilise doma꞉ki ta꞉ta꞉sen.  
\v 15 \x - \xo 3.15 \xt 1Kol 12.27, A꞉fe 4.4, Fili 4.7\x*Gio꞉ tambo Kelisowa꞉ ene do꞉mo꞉ heb ko꞉lo꞉, gegelebo꞉ ha꞉sa doma꞉ki Gode eyo꞉ gio꞉ a꞉na ho꞉ido꞉. A꞉la꞉fo꞉ko꞉lo꞉ Kelisowa꞉ ene ha꞉sa dowan man a꞉ma꞉yo꞉ gio꞉ tambo bo꞉fo꞉melea꞉ki ta꞉ta꞉bi. A꞉la꞉ta꞉ga꞉ giliyo꞉ Godemo꞉wo꞉ mada o꞉m a꞉la꞉sa꞉la꞉lubi.  
\v 16 \x - \xo 3.16 \xt A꞉fe 5.19\x*Kelisowa꞉ ene to a꞉no꞉ gili asulo꞉ usa amio꞉ ililita꞉ga꞉ doma꞉ki ta꞉foma. Gio꞉ nowo꞉mbo꞉wo꞉ widaki, a꞉la꞉ta꞉ga꞉ gegelebo꞉ digala꞉lubi. A꞉la꞉ta꞉ga꞉ gio꞉ Godemo꞉ sagalakiyo꞉, Godeya꞉ gisalo꞉ bugo꞉ amilo꞉ da꞉lab a꞉no꞉lo꞉, gulugululakilo꞉ gisalo꞉ mo꞉lan a꞉no꞉lo꞉ mo꞉la꞉lubi.  
\v 17 \x - \xo 3.17 \xt 1Kol 10.31, A꞉fe 5.20\x*Gili mego꞉fa꞉ to sa꞉lakiyo꞉lo꞉, nanog dimidakiyo꞉lo꞉, kelego꞉ gilo꞉lo꞉ dimidama꞉no꞉ a꞉no꞉ tambo, Alan Ya꞉su Kelisowa꞉ wiya dimida꞉lubi. A꞉la꞉ta꞉ga꞉ ene wiya ilikiyo꞉, Do Godemo꞉wo꞉ sagalaki, mada o꞉m a꞉la꞉sa꞉la꞉lubi.   
\s1 Kaluka꞉isale no o꞉lia꞉yo꞉ ege doma꞉no꞉ mano꞉ we  
\p
\v 18 \x - \xo 3.18 \xt A꞉fe 5.22\x*Ga indo꞉ giliyo꞉, ge kaluwa꞉ ha꞉ga dowa꞉bi. Kelisowa꞉ siwa꞉l amilo꞉ man nafa ko꞉lo꞉ dimidama꞉no꞉wo꞉ o꞉m.   
\p
\v 19 \x - \xo 3.19 \xt A꞉fe 5.25\x*Kalu galo꞉ di giliyo꞉, ga꞉ gayo꞉ alan asulaki, ha꞉fo꞉wo꞉ disa꞉la꞉bi. Ga꞉ ga o꞉lia꞉yo꞉ ha꞉sa dowaki diboda꞉so꞉bo.   
\p
\v 20 \x - \xo 3.20 \xt A꞉fe 6.1\x*So꞉wale giliyo꞉ go꞉l dia꞉ go꞉lia꞉ma꞉ towo꞉ dinafa kudu ha꞉na꞉lubi. Man a꞉ma꞉yo꞉ Alano꞉ sagale alifa꞉ib.   
\p
\v 21 \x - \xo 3.21 \xt A꞉fe 6.4\x*Iya i giliyo꞉, go꞉no꞉ so꞉wagalino꞉ hida꞉yo꞉wo꞉ dowabena꞉kiyo꞉, giliyo꞉ mo꞉bema꞉no꞉wo꞉ dimida꞉so꞉bo.   
\p
\v 22 \x - \xo 3.22 \xt A꞉fe 6.5-8\x*Madali nanog dian kalu giliyo꞉ gelo꞉ bo꞉fo꞉lowan kaluwa꞉lo꞉ to sa꞉labo꞉ tambo dinafa kudu ha꞉na꞉lubi. Giliyo꞉ nanogo꞉ halaido꞉ dimidakiyo꞉, bo꞉fo꞉lowan kalu eyo꞉ gelo꞉ bo꞉fo꞉lab ho꞉len a꞉namio꞉, e sagale alifa꞉no꞉ a꞉no꞉ko꞉ asulakiyo꞉ nanog dimida꞉so꞉bo. Ko꞉sega elo꞉malamio꞉lo꞉ gio꞉ Gode Alano꞉ tagilaki ha꞉ga dowakiyo꞉, ge nanogo꞉ halaido꞉ dia꞉lubi.  
\v 23 Nanogo꞉ tambo giliyo꞉ dimidakiyo꞉, nanogo꞉ halaido꞉ diaki dimida꞉lubi. Giyo꞉ ne henfelo꞉ kaluwa꞉ nanog dimido꞉l a꞉la꞉bo꞉ mo꞉asulaki, Alan Ya꞉suwa꞉ ene nanog dio꞉l a꞉la꞉asulaki dia꞉bi.  
\v 24 Giliyo꞉ a꞉la꞉asulo꞉, tif amio꞉ Alan eyo꞉ wa꞉l dimiakiyo꞉, kelego꞉ nafaleyo꞉ gemo꞉ dimia꞉ib. Gio꞉ Kelisowa꞉ ene nanog dimida꞉lab ko꞉lo꞉, gi misa꞉ kalu hendeleyo꞉ e ko꞉m.  
\v 25 \x - \xo 3.25 \xt Lom 2.11\x*Kalu abeyo꞉ mogago꞉lo꞉ dimida꞉lab a꞉no꞉ ene mogago꞉ dimido꞉ a꞉ma꞉ wa꞉lo꞉ dia꞉ib. Gode eyo꞉ kaluka꞉isale tambomo꞉wo꞉ mano꞉ imilo꞉ a꞉la꞉ka aloba꞉da꞉sen.   
\c 4  
\p
\v 1 \x - \xo 4.1 \xt A꞉fe 6.9\x*Madali nanogdo꞉ dian kalu a꞉ma꞉ misa꞉ kalu gio꞉, gelo꞉ bo꞉fo꞉mela꞉no꞉ hendeleyo꞉ Hebene a꞉lab a꞉la꞉asulakiyo꞉, go꞉no꞉n nanog dian kalu a꞉no꞉ dinafa bo꞉fo꞉liki, imo꞉wo꞉ man digalo꞉le dimida꞉lubi.   
\s1 Godemo꞉ dulugu sa꞉lakiyo꞉, mano꞉ digalo꞉ kudu ha꞉na꞉lubi  
\p
\v 2 \x - \xo 4.2 \xt A꞉fe 6.18, Fili 4.6\x*Ho꞉leno꞉ tambo giliyo꞉ Godemo꞉lo꞉ to sa꞉lan man a꞉no꞉ halale kudu ha꞉naki dulugu sa꞉la꞉lubi. Giliyo꞉ Godemo꞉ to sa꞉lakiyo꞉, gili asulo꞉wo꞉ mo꞉beo꞉lo꞉ma iliki, sagalaki dulugu sa꞉la꞉bi.  
\v 3 \x - \xo 4.3 \xt Lom 15.30, A꞉fe 6.19\x*A꞉la꞉ta꞉ga꞉ giliyo꞉ Godemo꞉ to sa꞉lakiyo꞉, niyo꞉lo꞉ asuwa꞉foma꞉ki dulugu sa꞉la꞉bi. Niliyo꞉ Kelisowa꞉ ene to tamin amilo꞉ wo꞉no꞉lelo꞉ delen a꞉no꞉ kalab amilo꞉ sa꞉ma꞉no꞉wo꞉ togo꞉ kolaefoma꞉kiyo꞉, dulugu sa꞉la꞉bi. Kalu nolba꞉yo꞉ to a꞉no꞉ da꞉ba꞉no꞉wo꞉ mo꞉beakiyo꞉ iliyo꞉ ne dibolo wena to꞉lolo꞉.  
\v 4 To hendele da꞉lab a꞉no꞉ niyo꞉ fanda sama꞉ki Godemo꞉ dulugu sa꞉la꞉bi.  
\v 5 \x - \xo 4.5 \xt A꞉fe 5.15-16\x*Giyo꞉ ha꞉la꞉ kaluka꞉isale o꞉lia꞉ dowakiyo꞉, asulo꞉ gililo꞉wo꞉ nafale asulaki, mano꞉ digalo꞉le dimida꞉bi. Giliyo꞉ kalu nolbo꞉lo꞉ Godeya꞉ man walama꞉no꞉ a꞉no꞉ ho꞉leno꞉ tambo dimidalia꞉sa꞉ga꞉ a꞉na wida꞉lubi.  
\v 6 \x - \xo 4.6 \xt A꞉fe 4.29, 1Bid 3.15\x*Giliyo꞉ kalu nol o꞉lia꞉yo꞉ ha꞉fo꞉wo꞉ disa꞉fo꞉liki towo꞉ a꞉na sa꞉lakiyo꞉, kalu nolba꞉yo꞉ sagala꞉likilo꞉ da꞉ba꞉no꞉ a꞉no꞉ ko꞉lo꞉ sa꞉la꞉lubi. A꞉la꞉galikiyo꞉, gilo꞉ a꞉ma꞉la꞉ to sa꞉ma꞉no꞉wo꞉ nafale da꞉ba꞉no꞉ a꞉no꞉ ko꞉lo꞉ o꞉li sa꞉ma꞉ib.   
\s1 Sagalo꞉ to sio꞉  
\p
\v 7 \x - \xo 4.7 \xt A꞉fe 6.21\x*Niyo꞉ Tikikus e gilo꞉wa iliga꞉to꞉l ko꞉lo꞉, eyo꞉ ne amilo꞉ fa꞉la꞉dowo꞉ a꞉no꞉ gimo꞉wo꞉ tambo malolomea꞉ib. Niliyo꞉ nao e mada alan asulo꞉, a꞉la꞉ta꞉ga꞉ e negele nanogo꞉ imilika diaki, Alana꞉ ene nanogo꞉ nafale dia꞉sen.  
\v 8 \x - \xo 4.8 \xt A꞉fe 6.22\x*E gilo꞉wa hamana꞉kilo꞉ iliga꞉to꞉lo꞉ mo꞉wo꞉ we. Eyo꞉ gili tilidabuwo꞉ halale alifoma꞉ki, a꞉la꞉ta꞉ga꞉ nio꞉ a꞉la꞉ sabo꞉lo꞉b a꞉la꞉bo꞉ gio꞉ asuluma꞉ki a꞉na iliga꞉to꞉l.  
\v 9 \x - \xo 4.9 \xt File 1.10-12\x*Niyo꞉ Onesimus e Tikikus o꞉lia꞉ gilo꞉wa iliga꞉to꞉l. Onesimus e gi o꞉lia꞉yo꞉ amisa꞉no꞉ imilise ko꞉lo꞉, e Keliso amio꞉ kudu ha꞉na꞉sen ko꞉lo꞉, negelelo꞉ ha꞉fo꞉ disa꞉ kaluwo꞉ e. A꞉la꞉go꞉ko꞉lo꞉ kalu a꞉la꞉ wema꞉yo꞉ kelego꞉ wilo꞉ fa꞉la꞉dowo꞉wo꞉ gimo꞉wo꞉ tambo malolomea꞉ib.   
\p
\v 10 \x - \xo 4.10 \xt Ilig 12.12, 13.13, 15.37-39, 2Tim 4.11\x*Alistakus e ne o꞉lia꞉ dibolowa siliki, eyo꞉lo꞉ gimo꞉wo꞉ sagalo꞉ towo꞉ saga꞉tab. A꞉la꞉ta꞉ga꞉ Banabasa꞉ eneso꞉g Mak eyo꞉lo꞉ gimo꞉wo꞉ sagalo꞉ towo꞉ saga꞉tab. E gilo꞉ amio꞉ yalega, nilo꞉ to gimo꞉lo꞉ saga꞉fo꞉ o꞉leau dimidaki, e dinafa sagala꞉liki tilidowa꞉bi.   
\p
\v 11 A꞉la꞉ta꞉ga꞉ kalu nowo꞉ Ya꞉su, ene wi nowo꞉ Yastus, eyo꞉lo꞉ gimo꞉wo꞉ sagalo꞉ towo꞉ saga꞉tab. Ne o꞉lia꞉lo꞉ Godeya꞉ ene nanogdo꞉ dia꞉sen kalu us wenamio꞉, kalu otalen a꞉no꞉, Yu kalu ko꞉lo꞉, Ya꞉su amilo꞉ tilidabuwo꞉ i o꞉m. Iliyo꞉ ne asuwa꞉taki, halale alita꞉sen.  
\v 12 \x - \xo 4.12 \xt Kolo 1.7, File 1.23-24\x*Giasi kalu nowo꞉ Ebafelas eyo꞉lo꞉ gimo꞉wo꞉ sagalo꞉ towo꞉ saga꞉tab. Gio꞉ Gode elo꞉ asulab au kudu ha꞉naki, kelego꞉wo꞉ tambo fandalia꞉sa꞉ga꞉ digalo꞉le iliki, tilidabuwo꞉ halaido꞉le doma꞉kiyo꞉, Ebafelas eyo꞉ ho꞉leno꞉ tambo gio꞉ Godemo꞉ dulugu sa꞉la꞉lab.  
\v 13 Eyo꞉ gio꞉lo꞉ a꞉la꞉ta꞉ga꞉ tilidabu kaluka꞉isale Laodisia o꞉lia꞉ Hialabolis amisa꞉n a꞉namilo꞉ sab a꞉no꞉lia꞉ asuwa꞉ta꞉likiyo꞉, nanogo꞉ halaido꞉ dimida꞉lab. A꞉no꞉ ne ba꞉ba꞉ ko꞉lo꞉ so꞉lo꞉l.  
\v 14 A꞉la꞉ta꞉ga꞉ Demas o꞉lia꞉, mulumulo꞉lo꞉ mean kalu, nili mili Luk e o꞉lia꞉ma꞉yo꞉ gimo꞉wo꞉ sagalo꞉ towo꞉ saga꞉tab.  
\v 15 Giliyo꞉ nao i Laodisialo꞉ sab imo꞉wo꞉ sagalo꞉ towo꞉ saga꞉tabeka꞉ a꞉la꞉ sa꞉la꞉biyo꞉. A꞉la꞉ta꞉ga꞉ ga Nifa o꞉mo꞉wo꞉lo꞉, Keliso kaluka꞉isale e ayamilo꞉ kegea꞉sen o꞉mo꞉wo꞉lo꞉ niyo꞉ sagalo꞉ towo꞉ saga꞉tabeka꞉ a꞉la꞉ sa꞉la꞉biyo꞉.   
\p
\v 16 Giliyo꞉ ni mo꞉fo꞉s sa꞉sa꞉lo꞉ iliga꞉to꞉l ko꞉ agela꞉sa꞉ga꞉yo꞉, Laodisia sa꞉s o꞉mo꞉wo꞉lo꞉ agelema꞉ki iliga꞉ta꞉bi. A꞉la꞉ta꞉ga꞉ mo꞉fo꞉s ko꞉lo꞉ nilo꞉ Laodisialo꞉ iliga꞉to꞉l a꞉no꞉ giliyo꞉lo꞉ dia꞉sa꞉ga꞉ agela꞉biyo꞉.   
\p
\v 17 \x - \xo 4.17 \xt File 1.2\x*Giliyo꞉ Akibus emo꞉wo꞉ a꞉la꞉sa꞉la꞉bi, “Alan elo꞉ nanog gemo꞉lo꞉ dima꞉kilo꞉ dimi a꞉no꞉ mada ditandala꞉ma꞉no꞉ asula꞉bi.”   
\p
\v 18 \x - \xo 4.18 \xt 1Kol 16.21\x*Ne Fo꞉l, ni sagalo꞉ to imilise we, no꞉no꞉n dagiya꞉ sa꞉sa꞉liga꞉to꞉l. Giliyo꞉ ne dibolowa o꞉sabo꞉lo꞉b a꞉la꞉asula꞉bi. Godeya꞉ ene ha꞉fo꞉ disa꞉lan a꞉no꞉ gi o꞉lia꞉ dowa꞉biyo꞉.