\id 2TI - Kaluli Bible 
\h 2 Timoti 
\toc1 Mo꞉fo꞉s Andeb We Fo꞉l Eyo꞉ Timoti Emo꞉ Sa꞉sa꞉liga꞉fo꞉ 
\toc2 2 Timoti 
\toc3 2Tim 
\mt2 Mo꞉fo꞉s Andeb We Fo꞉l Eyo꞉  
\mt1 Timoti  
\mt2 Emo꞉ Sa꞉sa꞉liga꞉fo꞉  
\imt1 Asuluma꞉no꞉ towo꞉ we  
\ip Fo꞉l e dibolo aya silikiyo꞉, e soma꞉no꞉wo꞉ ko꞉na꞉ma dowab a꞉la꞉asulo꞉ ko꞉lo꞉ mo꞉fo꞉s we Timotimo꞉wo꞉ a꞉na sa꞉sa꞉lo꞉. Mo꞉fo꞉s sa꞉sa꞉lo꞉ us a꞉namio꞉ to nolo꞉ da꞉lab. Nowo꞉ hida꞉yo꞉ ko꞉li ko꞉lilo꞉ fa꞉la꞉dowalikiyo꞉, Timoti e Ya꞉su Kelisowa ege dowaki, ene tilidabuwo꞉ halaido꞉ doma꞉kiyo꞉, hagugu sa꞉sa꞉lo꞉. To nowo꞉ we, Timoti e Ya꞉suwa꞉ to nafa a꞉no꞉ dinafa halale wida꞉li ha꞉na꞉melea꞉ki, towo꞉ a꞉na sa꞉sa꞉lo꞉. A꞉la꞉ta꞉ga꞉, to nowo꞉ we. Ya꞉su Kelisowo꞉ sagalema꞉kiyo꞉, Timoti eyo꞉ nanogo꞉ dinafa halale dima꞉ki sa꞉sa꞉lo꞉. A꞉la꞉ta꞉ga꞉ Folo꞉ dibolo aya silikiyo꞉, nolo꞉ e ta꞉ta꞉sa꞉ga꞉ ha꞉nabikiyo꞉, e fo꞉fo꞉dolo꞉ sen ko꞉lo꞉, Timotiyo꞉ e ba꞉ba꞉ mena꞉ki, mo꞉fo꞉s we a꞉na sa꞉sa꞉lo꞉.  
\c 1  
\p
\v 1 Ne Fo꞉l, Ya꞉su Kelisowa꞉lo꞉ iliga꞉felo꞉ kalu nowo꞉ ne. Kaluka꞉isaleyo꞉ Ya꞉su amilo꞉ tilida꞉dab o꞉mo꞉wo꞉ mela꞉no꞉wo꞉ dimia꞉no꞉ a꞉la꞉liki, Godeya꞉ dinali sio꞉ ko꞉lo꞉ ne to a꞉no꞉ walama꞉ki, ne a꞉na da꞉fea꞉sa꞉ga꞉ iliga꞉fo꞉.  
\v 2 \x - \xo 1.2 \xt Ilig 16.1, 1Tim 1.2\x*Timoti ge, ni so꞉wale o꞉ngo꞉ dowo꞉. Mo꞉fo꞉s we gemo꞉ iliga꞉to꞉l. Do Gode o꞉lia꞉ nili Alan Ya꞉su Keliso o꞉lia꞉ma꞉ ha꞉fo꞉ disa꞉lan mano꞉, nofolano꞉ a꞉la꞉ta꞉ga꞉ ha꞉sa dowano꞉ gelo꞉ dima꞉ki, Godemo꞉ dulugu so꞉lo꞉l.   
\s1 Ya꞉suwa꞉ wi amio꞉ mo꞉sende doma꞉ki, halale sio꞉  
\p
\v 3 \x - \xo 1.3 \xt Ilig 23.1\x*Ne ma꞉mu iya꞉lo꞉ Gode kudu ha꞉na꞉sen aumbo꞉, niyo꞉lo꞉ asugo꞉ go꞉go꞉do꞉ dowaki, Godeya꞉ ene nanog dimida꞉likiyo꞉, ho꞉lenowo꞉lo꞉ nuluwo꞉lo꞉ niyo꞉ ge asula꞉likiyo꞉, Godemo꞉ mada o꞉m a꞉la꞉sa꞉la꞉sen.  
\v 4 Gilo꞉ ya꞉lakilo꞉ si ho꞉n ane a꞉no꞉ ne asula꞉liki, ge galima꞉no꞉wo꞉ alan asula꞉sen. Mo꞉wo꞉ niyo꞉ ge ba꞉dakiyo꞉, mada alan sagalema꞉no꞉.  
\v 5 \x - \xo 1.5 \xt Ilig 16.1\x*A꞉la꞉ta꞉ga꞉ gilo꞉ tilidabu hendeleyo꞉ ne asulakiyo꞉, tilidabu a꞉no꞉ tamina gu Lois dia꞉ go꞉ Yunes dia꞉ amio꞉ elen ko꞉lo꞉, o꞉go꞉ ge amio꞉lo꞉ a꞉lab, niyo꞉ a꞉la꞉asulo꞉l.  
\v 6 \x - \xo 1.6 \xt 1Tim 4.14\x*A꞉la꞉fo꞉ko꞉lo꞉ ni dagiya꞉ golab amio꞉, Gode eyo꞉ boba kelego꞉wo꞉ gemo꞉ dimi ko꞉lo꞉, o꞉go꞉ de ko꞉lo꞉ dalifa꞉nigab amilo꞉ folan aumbo꞉, boba kelego꞉ a꞉no꞉ digidalitakiyo꞉, ge nanogo꞉ halale dimida꞉bi.  
\v 7 \x - \xo 1.7 \xt Lom 8.15\x*Gode eyo꞉ tagilan man a꞉no꞉ nimo꞉wo꞉ mo꞉dimi ko꞉sega, nili mamayo꞉ halaido꞉ dowaki, ha꞉fo꞉ disa꞉ma꞉no꞉ man o꞉lia꞉ nili asulo꞉wo꞉ dinafa tilidoma꞉no꞉ man o꞉lia꞉, a꞉no꞉ nimo꞉ dimi.   
\p
\v 8 A꞉la꞉fo꞉ko꞉lo꞉ gio꞉ Alan Ya꞉suwa꞉ wi ko꞉lo꞉ wala sa꞉ma꞉no꞉wo꞉ sendelowa꞉so꞉bo. A꞉la꞉ta꞉ga꞉ Ya꞉suwa꞉ wi amilo꞉ dibolo to꞉lolo꞉ kalu ne amio꞉ ge sendelowa꞉so꞉bo. Ko꞉sega giyo꞉ Godeya꞉ halaido꞉wa dowakiyo꞉, nilo꞉ to nafa wido꞉ amilo꞉ hida꞉yo꞉ dio꞉l we aumbo꞉ giyo꞉lo꞉ dia꞉niki, ne kudu ya꞉bi.  
\v 9 \x - \xo 1.9 \xt A꞉fe 2.8-9, Tait 3.5\x*Gode eyo꞉ nio꞉ a꞉ma꞉la꞉ gasiliakiyo꞉, nio꞉ mela꞉no꞉ malilo꞉wa mesea꞉ki, da꞉fe alifa꞉. A꞉no꞉ niliyo꞉ elo꞉ dimido꞉ amima ko꞉sega, eyo꞉ nimo꞉wo꞉ ha꞉fo꞉ disa꞉laki, enedo꞉ asulab au da꞉feyo꞉. Henfelo꞉ we o꞉fa꞉la꞉doma꞉no꞉ amio꞉, Gode eyo꞉ Ya꞉suwa꞉lo꞉ dimidama꞉no꞉ a꞉no꞉ asula꞉sa꞉ga꞉, nimo꞉wo꞉ ha꞉fo꞉wo꞉ tamina disa꞉.  
\v 10 \x - \xo 1.10 \xt Hibu 2.14\x*Ko꞉sega o꞉go꞉ ha꞉fo꞉ disa꞉lan a꞉no꞉ fanda asuluma꞉kiyo꞉, nilo꞉ gasilia꞉no꞉, Ya꞉su Keliso, e mio꞉ ko꞉lo꞉, sowan man a꞉no꞉ e bidilaki, to nafayo꞉ nilo꞉wa dia꞉mio꞉. To nafa a꞉ma꞉yo꞉ mela꞉no꞉ mela꞉no꞉ a꞉no꞉ nimo꞉ dima꞉ki, fanda wido꞉.   
\p
\v 11 \x - \xo 1.11 \xt 1Tim 2.7\x*To nafa a꞉no꞉ wala sama꞉ki, Gode eyo꞉ ne Ya꞉suwa꞉lo꞉ iliga꞉felo꞉ kaluwo꞉ a꞉la꞉ta꞉ga꞉ to nafalo꞉ walama꞉no꞉ kaluwo꞉ ne da꞉feyo꞉.  
\v 12 A꞉la꞉do꞉ dimido꞉ amio꞉ ne o꞉go꞉ hida꞉yo꞉ ba꞉da꞉li so꞉l. Ko꞉sega ne mo꞉sendelowaki halale kagafo꞉lo꞉l. Mo꞉wo꞉ kalu nilo꞉ tilida꞉da꞉sa꞉ga꞉lo꞉ o꞉lo꞉l we ne asulo꞉ ko꞉lo꞉, nanog nemo꞉lo꞉ dimi a꞉no꞉ Ya꞉suwa꞉ ene tili dofo꞉ ha꞉na꞉la꞉ga꞉yo꞉, henfelo꞉ welo꞉ edab ami a꞉na ta꞉fa꞉ib, niyo꞉ a꞉la꞉asulo꞉l.  
\v 13 Man digalo꞉ ko꞉lo꞉ nilo꞉ gemo꞉lo꞉ wido꞉ a꞉no꞉, giyo꞉ halale ta꞉li dofo꞉lubi. Ge Ya꞉su Kelisowa dowakiyo꞉, tilidabu man o꞉lia꞉ ha꞉fo꞉ disa꞉lan man a꞉no꞉lia꞉yo꞉ kudu ha꞉na꞉lubi.  
\v 14 \x - \xo 1.14 \xt 1Tim 6.20\x*Godeya꞉ Mamayo꞉ ge o꞉lia꞉ iliki asuwa꞉ta꞉lab ko꞉lo꞉ to nafale ko꞉lo꞉ gemo꞉lo꞉ bo꞉fo꞉melea꞉kilo꞉ dimi a꞉no꞉, giyo꞉ dinafa bo꞉fo꞉lubi.   
\p
\v 15 Kaluka꞉isaleyo꞉ A꞉sia hen amilo꞉ sa꞉sen i a꞉no꞉, Figelus o꞉lia꞉ Hemogenes o꞉lia꞉, iyo꞉ tambo ne ko꞉lo꞉ gola ba꞉ba꞉ a꞉no꞉ giyo꞉ asulufo꞉lab.   
\p
\v 16 Ko꞉sega Ya꞉su eyo꞉ Onesifolus o꞉lia꞉ ene so꞉lo꞉ o꞉lia꞉yo꞉ nofolaki asuwa꞉foma꞉kiyo꞉, niyo꞉ iyo꞉ dulugu so꞉lo꞉l. Mo꞉wo꞉, eyo꞉ ne ha꞉sa doma꞉kiyo꞉ tamin amio꞉ asufa꞉ ko꞉lo꞉, ne dibolowa ane amio꞉, eyo꞉ nemo꞉wo꞉ mo꞉sendelo alifa꞉.  
\v 17 A꞉la꞉ta꞉ga꞉ e Lom fa꞉la꞉dowakiyo꞉, ne mada keda꞉i ya꞉la꞉ga꞉ nelo꞉wa fa꞉la꞉dowo꞉.  
\v 18 A꞉la꞉ta꞉ga꞉ ne A꞉fesa꞉s sen amio꞉, elo꞉ ko꞉li ko꞉lilo꞉ asufa꞉ a꞉no꞉, giyo꞉ asulo꞉ ko꞉lo꞉lab. A꞉la꞉fo꞉ko꞉lo꞉ Ya꞉suwa꞉lo꞉ mo꞉walilab ho꞉len a꞉namio꞉, e nofolo꞉ alifoma꞉kiyo꞉, niyo꞉ Ya꞉sumo꞉wo꞉ to so꞉lo꞉l.   
\c 2  
\s1 Ya꞉suwa꞉lo꞉ dimido꞉ au, kudu hamana  
\p
\v 1 Ni so꞉wa Timoti, Ya꞉su Keliso elo꞉ ha꞉fo꞉ disa꞉lan man a꞉ma꞉yo꞉ ge halale alifoma꞉ki doma.  
\v 2 To nilo꞉ kaluka꞉isaleya꞉ siwa꞉l amilo꞉ gimo꞉lo꞉ wido꞉ a꞉no꞉, giyo꞉ digalo꞉ kalu nolbo꞉wo꞉ wida꞉bi. Kalu i a꞉ma꞉yo꞉ gilo꞉ widab a꞉no꞉ da꞉da꞉sa꞉ga꞉yo꞉ nolbo꞉wo꞉ a꞉walama꞉ki, imo꞉wo꞉ to man a꞉no꞉ wida꞉bi.  
\v 3 \x - \xo 2.3 \xt 2Tim 1.8\x*Ge Ya꞉su Kelisowa꞉ ene ame kalu nafale o꞉ngo꞉ dowakiyo꞉, nilo꞉ nanog hida꞉yo꞉ dio꞉l we aumbo꞉, giyo꞉lo꞉ hida꞉yo꞉ a꞉no꞉ ua dia꞉bi.  
\v 4 Ame kalu dowab a꞉ma꞉yo꞉, elo꞉ bo꞉fo꞉lowan misa꞉ kalu alan a꞉no꞉ sagalema꞉kiyo꞉, e amisa꞉n amilo꞉ nanog nolo꞉ mo꞉diaki, nanog imilig a꞉naka halale doma꞉ib.  
\v 5 \x - \xo 2.5 \xt 2Tim 4.8\x*A꞉la꞉ auma꞉ib ko꞉lo꞉, kalu nowo꞉ heyab amio꞉ wa꞉lo꞉ dia꞉no꞉ asulalega, eyo꞉ heyab amilo꞉ ele saefa꞉ a꞉no꞉ kudu ha꞉na꞉ib. Ko꞉sega eyo꞉ ele saefa꞉ a꞉no꞉ mo꞉kudu ha꞉nalega, tiniab amio꞉ wa꞉lo꞉ mo꞉dia꞉ib.  
\v 6 \x - \xo 2.6 \xt 1Kol 9.7\x*A꞉la꞉ta꞉ga꞉ elo꞉ gelan kalu nanogdo꞉ halale diab a꞉ma꞉yo꞉, fowo꞉ tula꞉sa꞉ga꞉, hebo꞉ eneno꞉ tamina bo꞉e dia꞉ib.  
\v 7 Ge nilo꞉ to so꞉lo꞉l we dinafa asula꞉bi. Mo꞉wo꞉ Alan eyo꞉ asulo꞉ nafayo꞉ gemo꞉wo꞉ fanda walama꞉ib.   
\p
\v 8-9 \x - \xo 2.8-9 \xt Lom 1.3, 1Kol 15.4\x*\x - \xo 2.8-9 \xt A꞉fe 3.1,13, Fili 1.12-14\x*Ya꞉su Keliso e sowa꞉sa꞉ga꞉lo꞉ a꞉dasili a꞉no꞉, Da꞉ibida꞉ ema꞉mu ko꞉lo꞉ e asula꞉bi. To nafa a꞉no꞉ ni wida꞉len amio꞉, kalu nolba꞉yo꞉ ne mogago꞉ kalu o꞉ngo꞉ ba꞉da꞉sa꞉ga꞉, hida꞉yo꞉ nolo꞉ nemo꞉ dimiaki, ne sa꞉niya꞉ mela꞉sa꞉ga꞉, dibolowa to꞉lolo꞉. Ko꞉sega Godeya꞉ to nafa a꞉no꞉ sa꞉niya꞉yo꞉ mada mo꞉mele alifa꞉ib.  
\v 10 A꞉la꞉fo꞉ko꞉lo꞉ Godeya꞉ enedo꞉ da꞉feyo꞉ kaluka꞉isaleyo꞉ a꞉ma꞉la꞉ a꞉gasilima꞉kiyo꞉, hida꞉yo꞉ ko꞉li ko꞉lilo꞉ a꞉no꞉ niyo꞉ o꞉li dia꞉no꞉. Ya꞉su Kelisowa꞉ wiya a꞉la꞉ta꞉ga꞉yo꞉ Gode eyo꞉ a꞉gasilia꞉ib ko꞉lo꞉, i a꞉no꞉ Gode o꞉lia꞉ mela꞉no꞉ mela꞉no꞉ mela꞉ib.   
\p
\v 11 \x - \xo 2.11 \xt 2Kol 4.11\x*To we hendele sa꞉ma꞉nigo꞉l.  
\q1 Nio꞉ Ya꞉su o꞉lia꞉ sowo꞉lalega,  
\q2 Nio꞉ e o꞉lia꞉yo꞉ mela꞉no꞉ mesa꞉no꞉.   
\q1
\v 12 \x - \xo 2.12 \xt Madi 10.33\x*Nio꞉ hida꞉yo꞉wo꞉ dia꞉li ha꞉nalega,  
\q2 nio꞉lo꞉ Ya꞉su o꞉lia꞉ misa꞉ kalu mesa꞉no꞉.  
\q1 Nio꞉ e gola ba꞉dalega,  
\q2 Eyo꞉ nio꞉lo꞉ gola ba꞉ba꞉ib.   
\q1
\v 13 \x - \xo 2.13 \xt Lom 3.3-4, Tait 1.2\x*Nio꞉ Ya꞉suwa꞉lo꞉ asulab aumbo꞉ mo꞉kudu ha꞉nalega,  
\q2 Ya꞉su Eyo꞉ ene to saefa꞉yo꞉ ka kudu ha꞉na꞉ib. Mo꞉wo꞉ enedo꞉ man dimida꞉sen a꞉no꞉ mada mo꞉ta꞉fa꞉ib.   
\s1 Godeya꞉ nanog dian kaluwa꞉ man nafayo꞉ we  
\p
\v 14 \x - \xo 2.14 \xt 1Tim 6.4, Tait 3.9\x*Kaluka꞉isaleyo꞉ to a꞉no꞉ asulufo꞉melea꞉kiyo꞉ wida꞉lubi. Iyo꞉ to amio꞉ egelebo꞉ kegabena꞉ki, Godeya꞉ siwa꞉l amio꞉ giyo꞉ hagugu sa꞉la꞉lubi. Mo꞉wo꞉ to kegab a꞉ma꞉yo꞉ mo꞉asuwa꞉talikiyo꞉, kalu da꞉da꞉likilo꞉ sen a꞉no꞉ mogagila꞉ma꞉ib.  
\v 15 \x - \xo 2.15 \xt 1Tim 4.6\x*Gode eyo꞉ ge nanog dian kalu nafale a꞉la꞉sama꞉kiyo꞉, giyo꞉ ene nanog a꞉no꞉ halale dia꞉bi. A꞉la꞉dimidalikiyo꞉, ge Godeya꞉ towo꞉ hende digalo꞉le widalikiyo꞉ mo꞉sendeloma꞉ib.  
\v 16 \x - \xo 2.16 \xt 1Tim 4.7\x*Ge madali to ko꞉li ko꞉lilo꞉wo꞉ nenelabdo꞉ a꞉namio꞉ uayo꞉ gasa dowa꞉so꞉bo. Mo꞉wo꞉ kaluka꞉isale to o꞉lo꞉ sa꞉lab a꞉no꞉ Godeyo꞉ ta꞉ta꞉ga꞉ ko꞉na꞉ ha꞉na꞉ni ha꞉nab.  
\v 17-18 \x - \xo 2.17-18 \xt 1Tim 1.20\x*Ililo꞉ to man sa꞉lab a꞉no꞉, wagegema꞉ o꞉ngo꞉ silikilo꞉ nanala꞉liki ha꞉nano꞉ a꞉ngab. Himeneus dia꞉ Filetus dia꞉ma꞉yo꞉ a꞉la꞉dimida꞉lab ko꞉lo꞉, iyo꞉ to hendeleyo꞉ ta꞉ta꞉ga꞉ ha꞉nab. A꞉la꞉ma꞉yo꞉ to wida꞉likiyo꞉ a꞉la꞉sio꞉, “Nio꞉ tamina a꞉ma꞉la꞉ dasi ko꞉lo꞉ tif amio꞉ mada mo꞉dasima꞉no꞉” a꞉la꞉wida꞉lab amio꞉, a꞉la꞉ma꞉yo꞉ kaluka꞉isale nolba꞉lo꞉ tilidabu a꞉no꞉ no꞉nolo꞉ alifa꞉.  
\v 19 \x - \xo 2.19 \xt Nam 16.5, Ais 52.11, Yo꞉n 10.14, 1Kol 8.3\x*Ko꞉sega Gode eyo꞉ ene sa꞉so꞉ dima꞉kiyo꞉, aiko꞉ halaido꞉ gelo꞉ ko꞉lo꞉, aiko꞉ a꞉no꞉ mada mo꞉hegema꞉ib. Aiko꞉ a꞉namio꞉ towo꞉ a꞉la꞉sa꞉sa꞉lo꞉, “Kaluka꞉isale eneno꞉le a꞉lab a꞉no꞉ Alan eyo꞉ asulo꞉.” A꞉la꞉ta꞉ga꞉ to nowo꞉ we, “Kaluka꞉isale abeyo꞉ Alana꞉ wilo꞉ dulugu sa꞉la꞉lab a꞉no꞉, mogago꞉wo꞉ wa꞉kabiyo꞉ dimida꞉so꞉bo.”   
\p
\v 20 A alan us amio꞉ fafo o꞉lia꞉ disi ko꞉li ko꞉lilo꞉wo꞉ a꞉na da꞉lab. Nolo꞉ hen o꞉lia꞉ ma꞉na꞉ ful o꞉lia꞉ a꞉na dimido꞉, nolo꞉ go꞉l o꞉lia꞉ silba o꞉lia꞉ a꞉na dimido꞉. Nolo꞉ nanog nafale dimidama꞉no꞉ difa꞉ ko꞉sega, nolo꞉ ba madali wa difa꞉.  
\v 21 A꞉la꞉fo꞉ko꞉lo꞉ kaluka꞉isale abeyo꞉ ene mela꞉no꞉ us amio꞉ wa da꞉lab a꞉no꞉ dilalega, e nafale fa꞉la꞉dowalikiyo꞉, nanog nafaleyo꞉ o꞉li dimidama꞉ib. E malilo꞉ fa꞉la꞉dowab ko꞉lo꞉ Alana꞉yo꞉ ene nanog nafayo꞉ emo꞉ dima꞉ki ta꞉fa꞉ib. \fig A alan usamio꞉ fafo o꞉lia꞉ disi ko꞉li ko꞉lilo꞉wo꞉ a꞉na da꞉lab.|alt="Various vessels" src="HK00143B.TIF" size="col" copy="Horace Knowles © The British & Foreign Bible Society, 1954, 1967, 1972, 1995." ref="2.20" \fig*   
\p
\v 22 \x - \xo 2.22 \xt 1Tim 6.11\x*Uwo꞉ dian man dimidama꞉no꞉ asulan a꞉no꞉ giyo꞉ ta꞉fo꞉ ha꞉na꞉bi. Ho꞉leno꞉ tambo man digalo꞉ o꞉lia꞉ tilidabu man o꞉lia꞉, nowo꞉ asulakilo꞉ ha꞉fo꞉ disa꞉lan mano꞉ a꞉la꞉ta꞉ga꞉ ha꞉salo꞉ doma꞉no꞉ man a꞉no꞉ ko꞉lo꞉ kudu ha꞉na꞉bi. Kaluka꞉isale abeyo꞉ asulo꞉wo꞉ digalo꞉likilo꞉ Godeya꞉ wilo꞉ dulugu sa꞉la꞉lab i a꞉no꞉lia꞉ dowaki, man a꞉no꞉ ko꞉lo꞉ kudu ha꞉na꞉lubi.  
\v 23 \x - \xo 2.23 \xt 1Tim 4.7\x*Giyo꞉ mo꞉lo꞉ma kabilo꞉ towa꞉lo꞉ kegakilo꞉ to sa꞉lab a꞉no꞉ tinia꞉sa꞉ga꞉ ko꞉na꞉ dowa꞉bi. Mo꞉wo꞉ to a꞉la꞉do꞉ sa꞉lab a꞉ma꞉yo꞉ hida꞉yo꞉ alano꞉ fa꞉la꞉do alifa꞉ib, a꞉la꞉bo꞉ giyo꞉ asulab.  
\v 24 Alana꞉ ene nanog dian kaluka꞉isale a꞉ma꞉yo꞉ towa꞉yo꞉ kega꞉so꞉bo. Ko꞉sega ene mano꞉ o꞉m. Eyo꞉ kaluka꞉isale tambomo꞉wo꞉ sagale alita꞉sen. Eyo꞉ nolbo꞉wo꞉ mo꞉mo꞉beaki ha꞉sa iliki, dinafa nafale walama꞉no꞉ ko꞉lo꞉ a꞉lab.  
\v 25 Kaluka꞉isale i nolba꞉yo꞉ e o꞉lia꞉yo꞉ gis dimidalikiyo꞉, Godeya꞉ ene nanog dian kaluwa꞉yo꞉ imo꞉wo꞉ ha꞉sa fanda wida꞉sen. Mo꞉wo꞉ Gode eyo꞉ kalu i o꞉mo꞉wo꞉ fogo꞉ o꞉li dimialikiyo꞉, iyo꞉ asulo꞉wo꞉ nodola꞉sa꞉ga꞉, to hendeleyo꞉ o꞉li fanda asuluma꞉ki a꞉laki, eyo꞉ ha꞉sa dowaki wida꞉sen.  
\v 26 Kaluka꞉isale i a꞉no꞉ Sa꞉da꞉na꞉ya꞉ dibolowa disa꞉fo꞉liki, elo꞉ asulab au dimidama꞉ki ta꞉fo꞉len ko꞉sega, iyo꞉ to hendele a꞉no꞉ fanda ba꞉dabikiyo꞉, Sa꞉da꞉na꞉ya꞉ dage amilo꞉ walafo꞉len a꞉no꞉ sili alifa꞉ib.   
\c 3  
\s1 Henfelo꞉ we elema꞉nigalikiyo꞉, hida꞉yo꞉wo꞉ modo꞉ fa꞉la꞉doma꞉ib  
\p
\v 1 \x - \xo 3.1 \xt 1Tim 4.1\x*Ho꞉len we elema꞉nigalikiyo꞉, man mogago꞉lo꞉ dimida꞉lab a꞉ma꞉yo꞉, hida꞉yo꞉wo꞉ modo꞉ fa꞉la꞉do alifa꞉ib ko꞉lo꞉ giyo꞉ asulufo꞉lubi.  
\v 2 Ho꞉len a꞉namio꞉, kaluka꞉isale inina꞉ma꞉la꞉yo꞉ alan asulaki, moleyo꞉ mada alan dia꞉no꞉ asuluma꞉ib. Iyo꞉ to sa꞉lakiyo꞉ kailaki, nolo꞉ wa꞉la꞉ sa꞉ma꞉ib. So꞉waya꞉yo꞉ iya o꞉lia꞉ ano o꞉lia꞉mo꞉wo꞉ a꞉la꞉iyakiyo꞉, kalu nolbo꞉wo꞉ sagalakiyo꞉ mada o꞉m a꞉la꞉bo꞉ towo꞉ mo꞉sa꞉ma꞉ib. Iyo꞉ Godeya꞉lo꞉ asulab aumbo꞉ mo꞉kudu ha꞉na꞉ib.  
\v 3 Kaluka꞉isale iliyo꞉ nol o꞉lia꞉yo꞉ ha꞉fo꞉wo꞉ mo꞉disa꞉ma꞉ib. Kalu nolba꞉lo꞉ mogago꞉ emo꞉lo꞉ dimido꞉ a꞉no꞉ mo꞉ga꞉lila꞉ma꞉ib. Iliyo꞉ nolo꞉lo꞉ sada꞉ba꞉ib. Inin asulo꞉wo꞉ mo꞉tilidoma꞉ib. Kalu nolo꞉ mo꞉nofolakilo꞉ nagalo꞉ dimiab a꞉no꞉ o꞉ligab a꞉la꞉asuluma꞉ib. A꞉la꞉ta꞉ga꞉ iliyo꞉ man nafa o꞉lia꞉yo꞉ gis dia꞉ib.  
\v 4 Kaluka꞉isale iliyo꞉ ene milileyo꞉ ko꞉lo꞉ teledoma꞉ib. A꞉la꞉ta꞉ga꞉ iliyo꞉ mo꞉dinafa asulaki, bo꞉bo꞉gedo꞉ dimidama꞉no꞉ a꞉no꞉ ko꞉lo꞉ asuluma꞉ib. Kailan mano꞉ i amio꞉ alan doma꞉ib. Henfelo꞉ wenamilo꞉ sagalema꞉no꞉ man a꞉no꞉ kudu ha꞉naki, iliyo꞉ Godeyo꞉ mo꞉sagale alifa꞉ib.  
\v 5 \x - \xo 3.5 \xt Madi 7.15,21, Tait 1.16\x*Kaluka꞉isale iyo꞉ do꞉mo꞉wa꞉ Keliso dowaki, tilidabu hendeleyo꞉ halaido꞉wo꞉ aundo꞉ma. A꞉la꞉fo꞉ko꞉lo꞉ kaluka꞉isale i a꞉no꞉lia꞉yo꞉ ko꞉na꞉ dowaki, uayo꞉ gasa dowa꞉so꞉bo.   
\p
\v 6 Kalu i nolba꞉yo꞉ so꞉lo꞉ nolo꞉ dikidakiyo꞉, ene a usa ha꞉na꞉sa꞉ga꞉ silikiyo꞉, ga asugo꞉ halaido꞉lo꞉ mo꞉a꞉lab a꞉no꞉ elo꞉ asulo꞉ o꞉leo꞉ngo꞉ doma꞉ki, dikili sa꞉ma꞉ib. Ga i a꞉no꞉ ene man mogago꞉ dimida꞉len a꞉no꞉ asulakiyo꞉, sendelowo꞉ a꞉ma꞉ e hida꞉ alitalikiyo꞉, asulo꞉ mogago꞉ ko꞉li ko꞉lilo꞉ a꞉ma꞉yo꞉ e susululia꞉ga꞉ sia꞉lab.  
\v 7 Ga i a꞉no꞉ to man ho꞉gi widab a꞉no꞉ mada sagala꞉li da꞉da꞉sen ko꞉sega, iyo꞉ to hendeleyo꞉ mo꞉fanda asula꞉sen.  
\v 8 \x - \xo 3.8 \xt Kis 7.11\x*Tamin amio꞉ Yanes dia꞉ Yambes dia꞉ma꞉lo꞉ Mo꞉sa꞉s o꞉lia꞉lo꞉ gis di o꞉leaumbo꞉, o꞉go꞉ kalu i wema꞉yo꞉lo꞉ to hendele o꞉lia꞉yo꞉ gis diab. Inin asulo꞉wo꞉ no꞉nolo꞉wo꞉ a꞉gaki, iyo꞉ o꞉ngo꞉mala tilidabu ko꞉lo꞉lab.  
\v 9 Ko꞉sega tamin amilo꞉ kalu a꞉la꞉ma꞉lo꞉ dimido꞉ a꞉namilo꞉ kalaba fa꞉la꞉dowo꞉ aumbo꞉, iyo꞉ no꞉nolaki dimido꞉lo꞉b a꞉la꞉bo꞉ kalaba fa꞉la꞉dowalikiyo꞉, kaluka꞉isale tambowa꞉yo꞉ ba꞉ba꞉ib. A꞉la꞉fo꞉ko꞉lo꞉ ililo꞉ dimido꞉ a꞉no꞉ alano꞉ mo꞉doma꞉ib.   
\s1 Fo꞉l eyo꞉ Timotimo꞉wo꞉ hagugu sio꞉  
\p
\v 10 Timoti ge, nilo꞉ wida꞉seno꞉, ni mano꞉, nilo꞉ man dimidan mo꞉ a꞉no꞉lo꞉, nilo꞉ tilidabuwo꞉, nilo꞉ ha꞉sa dowan mano꞉, nilo꞉ ha꞉fo꞉ disa꞉ma꞉no꞉ mano꞉, ne hida꞉yo꞉ dia꞉ga꞉lo꞉ ha꞉na꞉mela꞉no꞉ man a꞉no꞉ tambo, ge ba꞉da꞉sa꞉ga꞉ asulo꞉.  
\v 11 \x - \xo 3.11 \xt Ilig 13.14-52, 14.5,8-20\x*A꞉la꞉ta꞉ga꞉ Antio꞉g, Aikonium o꞉lia꞉ Lista amisa꞉n a꞉namilo꞉ hida꞉yo꞉ ko꞉li ko꞉lilo꞉ nelo꞉ amilo꞉ fa꞉la꞉dowo꞉ a꞉no꞉ ge asulo꞉. Ko꞉sega Alana꞉yo꞉ hida꞉yo꞉ alan a꞉ma꞉yo꞉ ne mogagilabena꞉ki, eyo꞉ ne dinafa asuwa꞉ta꞉sen.  
\v 12 \x - \xo 3.12 \xt Madi 16.24, Yo꞉n 15.20, Ilig 14.22\x*Hendele, kaluka꞉isale abeyo꞉ Ya꞉su Kelisowa tilida꞉da꞉sa꞉ga꞉lo꞉, Godeya꞉ man digalo꞉lo꞉ kudu ha꞉na꞉no꞉ asulab o꞉mo꞉wo꞉, kaluka꞉isale nolba꞉yo꞉ hida꞉yo꞉ alano꞉ dimia꞉mela꞉ib.  
\v 13 Ko꞉sega kalu mogago꞉le a꞉lab o꞉lia꞉ dikili sa꞉lan kalu o꞉lia꞉ma꞉lo꞉ man dimida꞉lab a꞉no꞉ mada alan dowa꞉i ha꞉na꞉mela꞉ib. Iliyo꞉ kalu nolo꞉ dikidalikiyo꞉, nolba꞉yo꞉ iyo꞉lo꞉ dikida꞉mela꞉ib.   
\p
\v 14 Ko꞉sega gemo꞉lo꞉ to widabilo꞉ tilidabu a꞉no꞉, ge kudu ha꞉na꞉lubi. Mo꞉wo꞉ kaluka꞉isale gemo꞉lo꞉ wido꞉ a꞉no꞉ ge o꞉li fanda asulo꞉.  
\v 15 Ge so꞉wala꞉suwa a꞉la꞉ta꞉ga꞉ mio꞉ amio꞉, Godeya꞉ to sa꞉sa꞉lo꞉ a꞉no꞉ ge fanda asululi ko꞉lo꞉lab. A꞉la꞉ta꞉ga꞉ ge Ya꞉su Kelisowa tilida꞉dabikiyo꞉, Gode eyo꞉ ge gasilima꞉ki, to a꞉ma꞉yo꞉ asulo꞉ nafayo꞉ gemo꞉wo꞉ o꞉li dimia꞉ib.  
\v 16 \x - \xo 3.16 \xt Lom 15.4\x*Godeya꞉ to sa꞉sa꞉lo꞉ a꞉no꞉ tambo Godeya a꞉la꞉ta꞉ga꞉ fa꞉la꞉dowo꞉ ko꞉lo꞉, to a꞉ma꞉yo꞉ kaluka꞉isaleyo꞉ asuwa꞉takiyo꞉, man mogago꞉wo꞉ ele ba꞉da꞉b, a꞉la꞉ta꞉ga꞉ hala dimido꞉ a꞉no꞉ digalela꞉b, a꞉la꞉ta꞉ga꞉ iyo꞉ man digalo꞉ a꞉no꞉ kudu hamana꞉ki, Godeya꞉ to nafa a꞉ma꞉yo꞉ wida꞉len.  
\v 17 Godeya꞉ to a꞉ma꞉yo꞉ a꞉la꞉dimida꞉lab ko꞉lo꞉, Godeya꞉ ene nanogdo꞉ dian kaluka꞉isale a꞉no꞉ ego꞉ dowaki, nanogo꞉ nafale dimidama꞉kiyo꞉, Godeya꞉ to sa꞉sa꞉lo꞉ a꞉ma꞉yo꞉ wida꞉lab. \fig So꞉wagalino꞉ Godeya꞉ to mano꞉ fanda wida꞉lubi.|alt="Teaching children" src="05_De_11_03_RG_gr.tif" size="col" copy="© Sweet Publishing http://sweetpublishing.com, licensed under a CC: BY-SA 3.0 Unported licence." ref="3.15" \fig*   
\c 4  
\p
\v 1 Ya꞉su Keliso e henfelo꞉ welo꞉ bo꞉fo꞉mela꞉nikilo꞉ yab amio꞉, eyo꞉ mela꞉no꞉lo꞉ sab we o꞉lia꞉ sowo꞉ kaluka꞉isale o꞉lia꞉yo꞉ aloba꞉ma꞉ib ko꞉lo꞉, Gode o꞉lia꞉ Ya꞉su o꞉lia꞉yo꞉ da꞉da꞉labiki, niyo꞉ to we gemo꞉ halale sa꞉ma꞉nigo꞉l.  
\v 2 Godeya꞉ towo꞉ wida꞉lubi. Ho꞉leno꞉ tambo dimidalia꞉bi. Giyo꞉ kaluka꞉isaleya꞉lo꞉ hala dimido꞉ a꞉no꞉ digala꞉lubi. A꞉la꞉ta꞉ga꞉ iyo꞉ halale alita꞉lubi. A꞉la꞉dimidakiyo꞉, ge ha꞉sa ha꞉na꞉sa꞉ga꞉ dinafa fanda wida꞉bi.  
\v 3 \x - \xo 4.3 \xt 1Tim 4.1\x*Tif amio꞉ kaluka꞉isale iyo꞉ to digalo꞉ hendeleyo꞉ mo꞉ege da꞉daki, ilo꞉ iligi da꞉ba꞉no꞉lo꞉ to ko꞉li nolo꞉ walama꞉ki, widan kalu modo꞉wo꞉ ho꞉le kegea꞉sa꞉ga꞉ a꞉na da꞉da꞉mela꞉ib.  
\v 4 A꞉la꞉dimidalikiyo꞉, iyo꞉ to hendeleyo꞉ gola ba꞉da꞉sa꞉ga꞉, kandayo꞉ malolab a꞉no꞉ ko꞉lo꞉ tilida꞉daki kudu ha꞉na꞉ib.  
\v 5 Ko꞉sega kelego꞉ tambowo꞉ ge ha꞉sa iliki, aloba꞉da꞉bi. Hida꞉yo꞉ ko꞉li ko꞉lilo꞉ yab a꞉no꞉ dia꞉i ha꞉na꞉bi. Kaluka꞉isalemo꞉wo꞉ giyo꞉ to nafayo꞉ wida꞉bi. A꞉la꞉ta꞉ga꞉ Godeya꞉lo꞉ nanog gemo꞉lo꞉ dimi a꞉no꞉ tambo nafale dia꞉i ha꞉na꞉la꞉ga꞉ kedela꞉bi.   
\p
\v 6 \x - \xo 4.6 \xt Fili 2.17\x*Nilo꞉ so꞉lo꞉l we mo꞉wo꞉, wa ho꞉no꞉ boba meakilo꞉ kolodan aumbo꞉,\f + \fr 4.6 \ft Tamin amio꞉ boba kelego꞉ Godemo꞉ so꞉mea꞉nikiyo꞉, ho꞉len nol amio꞉ iliyo꞉ wa ho꞉n a꞉no꞉ boba wa꞉la tulan. Man a꞉no꞉ ko꞉lo꞉ asulaki bale sio꞉. (Namba 15.1-12)\f* mela꞉no꞉ nilo꞉wo꞉ a꞉la꞉koloda꞉i ha꞉nab ko꞉lo꞉, ne o꞉go꞉ soma꞉no꞉ ho꞉leno꞉ ko꞉na꞉ma fa꞉la꞉dowab.  
\v 7 \x - \xo 4.7 \xt 1Tim 6.12\x*Ne buba꞉li ha꞉nakiyo꞉, mada odo꞉ ba꞉da꞉i ya꞉la꞉ga꞉ kagayo꞉. Godeya꞉lo꞉ nemo꞉lo꞉ dimidama꞉kilo꞉ dimi a꞉no꞉ niyo꞉ dia꞉i ya꞉la꞉ga꞉ kedeto꞉l. A꞉la꞉ta꞉ga꞉ ne tilidabuwo꞉ halale ta꞉li dota꞉ga꞉ mio꞉.   
\p
\v 8 \x - \xo 4.8 \xt 1Kol 9.24-25\x*A꞉la꞉fo꞉ko꞉lo꞉ henfelo꞉ welo꞉ edab amio꞉, digalelo꞉ aloba꞉ma꞉no꞉ kalu, Alan a꞉ma꞉yo꞉ ne man digalo꞉ kudu ane a꞉na wikilakiyo꞉, boba kelego꞉wo꞉ nemo꞉wo꞉ dimia꞉ib. A꞉la꞉ta꞉ga꞉ imilig neko꞉ so꞉lo꞉ba, ko꞉sega kaluka꞉isale abeyo꞉, Ya꞉su a꞉ma꞉la꞉lo꞉ mia꞉nigab a꞉no꞉ sagala꞉likilo꞉ yasilab o꞉mo꞉wo꞉lo꞉ dimia꞉ib.   
\s1 Fo꞉l eyo꞉ Timotiyo꞉ elo꞉wa mena꞉ki sio꞉  
\p
\v 9 Ge nelo꞉ amio꞉ mia꞉nikiyo꞉, togo꞉ bo꞉bo꞉ge keda꞉bi.  
\v 10 \x - \xo 4.10 \xt Ilig 15.37-39, 2Kol 8.23, Kolo 4.14\x*Mo꞉wo꞉ Demas, e asulo꞉wo꞉ henfelo꞉ wena dia꞉fo꞉len ko꞉lo꞉ ne ta꞉ta꞉ga꞉, Tesalonaika a꞉na ane. Kelesenas e Galasia hena ane a꞉la꞉ta꞉ga꞉ Taitus e Dalamasia hena ane.  
\v 11 Luk imilig e, ne o꞉lia꞉ so꞉l.  
\p Ne Godeya꞉ nanog dimidab amio꞉ Mak eyo꞉ o꞉li asuwa꞉fa꞉ib ko꞉lo꞉ ge yakiyo꞉, e tililia꞉ ya꞉bi.  
\v 12 Niyo꞉ Tikikus e A꞉fesa꞉s iliga꞉fo꞉.   
\p
\v 13 \x - \xo 4.13 \xt Ilig 20.6\x*Ne Toloas amisa꞉na sen amio꞉, hido꞉ so꞉go꞉ Kabusdo꞉wa difa꞉ ko꞉lo꞉ ge yakiyo꞉, dia꞉ya꞉bi. A꞉la꞉ta꞉ga꞉ no꞉no꞉n mo꞉fo꞉s bobodo꞉ difa꞉ a꞉no꞉ dia꞉yakiyo꞉, no꞉ do꞉go꞉f amilo꞉ sa꞉sa꞉lo꞉ a꞉no꞉lo꞉ tambowo꞉ mada dia꞉ya꞉bi.   
\p
\v 14 \x - \xo 4.14 \xt Ais 59.18, Lom 2.6\x*Go꞉fo꞉ ki amilo꞉ nanogdo꞉ dian kalu, Alegsanda eyo꞉ nemo꞉wo꞉ mogago꞉ dimidaki ne mogagila꞉ ko꞉lo꞉ Alana꞉yo꞉ elo꞉ dimido꞉ a꞉no꞉ wa꞉lo꞉ wa꞉dema꞉ib.  
\v 15 Kalu a꞉ma꞉yo꞉ nili to mando꞉ widab a꞉no꞉lia꞉yo꞉ gis dowa꞉lab ko꞉lo꞉, gelo꞉ eya ifikidabena꞉kiyo꞉ dinafa dowa꞉bi.   
\p
\v 16 Nelo꞉ mo꞉mo꞉da mo꞉walilo꞉ amio꞉, kalu nolba꞉yo꞉ mo꞉asuwa꞉taki, iyo꞉ tambo ne ta꞉fo꞉gane. Nemo꞉lo꞉ ililo꞉ dimido꞉ a꞉no꞉ Gode eyo꞉ i a꞉no꞉ mo꞉wa꞉dema꞉ki asulab.  
\v 17 Ko꞉sega Alan e ni aniba kagafo꞉liki nemo꞉wo꞉ halaido꞉wo꞉ dimiabiki, Yu kaluka꞉isalema a꞉no꞉ tambo Godeya꞉ to nafayo꞉ dabulima꞉ki, niyo꞉ a꞉na wido꞉. A꞉la꞉ta꞉ga꞉ ne sana soma꞉no꞉ dowo꞉ ko꞉sega, Gode eyo꞉ ne a꞉ma꞉la꞉ gasili ko꞉lo꞉ ga꞉li ane.  
\v 18 Kaluwa꞉lo꞉ man mogago꞉ ko꞉li ko꞉lilo꞉ nemo꞉lo꞉ dimido꞉ a꞉ma꞉yo꞉ ne ta꞉lia꞉no꞉ dowabikiyo꞉, Alana꞉yo꞉ ne a꞉ma꞉la꞉ gasilia꞉sa꞉ga꞉, enedo꞉ bo꞉fo꞉likilo꞉ mesa꞉no꞉ hen, Hebenelo꞉ a꞉lab a꞉na ta꞉fa꞉ni ha꞉na꞉ib. E wi wabudakiyo꞉, mela꞉no꞉ mela꞉no꞉ dowa꞉i ha꞉na꞉mela꞉ib. Hendele o꞉m.   
\p
\v 19 \x - \xo 4.19 \xt Ilig 18.2, 2Tim 1.16-17\x*Bisila o꞉lia꞉ Akwila a꞉la꞉ta꞉ga꞉ Onesifolus ene e so꞉lo꞉ o꞉lia꞉mo꞉wo꞉ sagalo꞉ towo꞉ sa꞉la꞉biyo꞉.  
\v 20 \x - \xo 4.20 \xt Ilig 19.22, 20.4, Lom 16.23\x*Elastus e Kolin amisa꞉n a꞉naka ta꞉fo꞉ mio꞉. A꞉la꞉ta꞉ga꞉ Tolofimus e walaf ko꞉lo꞉ niyo꞉ e Miletus a꞉na ta꞉fo꞉.  
\v 21 Hido꞉ ho꞉leno꞉ o꞉fa꞉la꞉doma꞉nigab amio꞉, ge nelo꞉wa bo꞉e ya꞉bi. Yubulus o꞉lia꞉ Budens o꞉lia꞉ Linus o꞉lia꞉ Kalodia o꞉lia꞉ Keliso kaluka꞉isale tambo gimo꞉wo꞉ sagalo꞉ towo꞉ iliga꞉to꞉l.   
\p
\v 22 Alan e gi o꞉lia꞉ iliki, Godeya꞉ ha꞉fo꞉ disalano꞉ gi o꞉lia꞉ dowa꞉biyo꞉.