\id 2TH - Kaluli Bible 
\h 2 Tesalonaika 
\toc1 Mo꞉fo꞉s Andeb We Fo꞉l Eyo꞉ Tesalonaika Kaluka꞉isalemo꞉ Sa꞉sa꞉liga꞉fo꞉ 
\toc2 2 Tesalonaika 
\toc3 2Tes 
\mt2 Mo꞉fo꞉s Andeb We Fo꞉l Eyo꞉  
\mt1 Tesalonaika  
\mt2 Kaluka꞉isalemo꞉ Sa꞉sa꞉liga꞉fo꞉  
\imt1 Asuluma꞉no꞉ towo꞉ we  
\ip Tesalonaika sa꞉s kaluka꞉isale a꞉no꞉ Ya꞉su Keliso a꞉ma꞉la꞉lo꞉ mia꞉nigab a꞉no꞉ dinafa mo꞉fanda asulo꞉. Kalu nolba꞉ sa꞉lakiyo꞉, Ya꞉suwa꞉ ho꞉leno꞉ fa꞉la꞉dowo꞉ ko꞉m a꞉la꞉sa꞉labiki, Folo꞉ Sales, Timoti iliyo꞉ Tesalonaika kaluka꞉isale ililo꞉ hala asulab a꞉no꞉ ko꞉lo꞉ digale fanda asuluma꞉ki sa꞉sa꞉lo꞉.  
\ip Fo꞉l e sa꞉lakiyo꞉ Ya꞉sulo꞉ mia꞉no꞉ ho꞉leno꞉ semo꞉fa꞉la꞉dowo꞉ka꞉ a꞉la꞉sio꞉. A꞉la꞉ta꞉ga꞉ ho꞉len a꞉no꞉ semo꞉fa꞉la꞉dowab amio꞉, elelo꞉ gola ba꞉ba꞉no꞉ kalu nowo꞉ fa꞉la꞉dota꞉ga꞉, Ya꞉su Keliso o꞉lia꞉ gis dia꞉ib.  
\ip Fo꞉l eyo꞉ kaluka꞉isalemo꞉ sa꞉lakiyo꞉, tilidabuwo꞉ halale kagayaki, hida꞉yo꞉ yab a꞉no꞉ dima꞉ki sio꞉. A꞉la꞉ta꞉ga꞉ inina꞉ma꞉la꞉yo꞉ dinafa tilidoma꞉ki, a꞉la꞉ta꞉ga꞉ nanog dia꞉no꞉wo꞉ mo꞉bo꞉suluma꞉ki, a꞉la꞉ta꞉ga꞉ kalu nol asuwa꞉foma꞉kiyo꞉, mo꞉fo꞉s we a꞉na sa꞉sa꞉liga꞉fo꞉.  
\c 1  
\s1 Ili tilidabuwo꞉ halaido꞉ dowaki, mada o꞉m a꞉la꞉sio꞉  
\p
\v 1 Fo꞉l ne, Saleso꞉, Timotiyo꞉ niliyo꞉ to we sa꞉sa꞉lakiyo꞉, Do Gode o꞉lia꞉ Alan Ya꞉su Keliso o꞉lia꞉ma꞉ kaluka꞉isale Tesalonaika sa꞉s usamilo꞉ sab o꞉mo꞉ sa꞉sa꞉liga꞉to꞉l.  
\v 2 \x - \xo 1.2 \xt Lom 1.7\x*Gode o꞉lia꞉ Alan Ya꞉su Keliso o꞉lia꞉ma꞉ ha꞉fo꞉ disa꞉lan man o꞉lia꞉ ha꞉sa mesa꞉no꞉ man a꞉no꞉lia꞉yo꞉ gi o꞉lia꞉ dofo꞉melea꞉ki, Godemo꞉ dulugu so꞉lo꞉l.   
\p
\v 3 Ni nao i, gili tilidabuwo꞉ anayaki halaido꞉ fa꞉la꞉ndab a꞉la꞉ta꞉ga꞉ gegelebo꞉ ha꞉fo꞉ disa꞉lan man a꞉no꞉lo꞉ gi usamio꞉ alan dowa꞉i ha꞉nab ko꞉lo꞉ niliyo꞉ ho꞉leno꞉ tambo Godemo꞉ mada o꞉m a꞉la꞉sa꞉la꞉mela꞉niki. A꞉la꞉do꞉ dimida꞉mela꞉no꞉wo꞉ mada nafayo꞉ o꞉m.  
\v 4 \x - \xo 1.4 \xt 2Kol 7.4, 1Tes 2.19\x*Hida꞉yo꞉ o꞉lia꞉ nagalo꞉ o꞉lia꞉yo꞉ gilo꞉wa fa꞉la꞉dowa꞉lab amio꞉, gio꞉ halale kagayaki, tilidabuwo꞉ o꞉ta꞉li sen ko꞉lo꞉ nio꞉ sa꞉s nola ha꞉nakiyo꞉, gio꞉ a꞉la꞉dimida꞉lab a꞉la꞉liki, gili wiyo꞉ wabulu sa꞉la꞉lab.   
\p
\v 5 Giliyo꞉ a꞉la꞉dimido꞉ ko꞉lo꞉ Gode eyo꞉ kaluka꞉isale digalo꞉le aloba꞉da꞉sen a꞉la꞉bo꞉ fanda wida꞉lab. Gio꞉ Godeya꞉ enedo꞉ bo꞉fo꞉lab usa silikiyo꞉, hida꞉yo꞉ ko꞉li ko꞉lilo꞉wo꞉ dia꞉lab ko꞉lo꞉, gio꞉ a꞉na mesa꞉no꞉wo꞉ o꞉li ko꞉lo꞉lab a꞉la꞉liki wido꞉.  
\v 6 \x - \xo 1.6 \xt Lom 12.19\x*Gode eyo꞉ digalo꞉le mo꞉walila꞉sen ko꞉lo꞉, kalu abeyo꞉ gimo꞉lo꞉ hida꞉yo꞉lo꞉ dimia꞉lab o꞉mo꞉wo꞉ Gode eyo꞉ kalu a꞉no꞉ wa꞉deaki hida꞉yo꞉wo꞉ dimia꞉ib.  
\v 7 \x - \xo 1.7 \xt 1Tes 3.13\x*Hida꞉yo꞉lo꞉ dia꞉lab gi a꞉no꞉ a꞉la꞉ta꞉ga꞉ nio꞉lo꞉ Gode eyo꞉ ha꞉salo꞉ mesa꞉no꞉wo꞉ ko꞉lo꞉ dimia꞉ib. Ya꞉su Alan e Hebene a꞉la꞉ta꞉ga꞉ handalowakiyo꞉, ene ma꞉mula꞉ kalu halaido꞉ o꞉lia꞉ de wa꞉sowa o꞉lia꞉lo꞉ yab a꞉namio꞉ ha꞉salo꞉ mesa꞉no꞉wo꞉ a꞉na dimia꞉ib.  
\v 8 \x - \xo 1.8 \xt Ais 66.15\x*Kaluka꞉isale abeyo꞉ Godelo꞉ mo꞉asula꞉sen a꞉no꞉lia꞉ Ya꞉su Alana꞉ to nafalo꞉ mo꞉kudu ane a꞉no꞉lia꞉yo꞉, Eyo꞉ a꞉na wa꞉deaki falasila꞉ma꞉ib.  
\v 9 \x - \xo 1.9 \xt Ais 2.10\x*Imo꞉lo꞉ falasila꞉ma꞉no꞉wo꞉ we. Iyo꞉ Ya꞉su Alan o꞉lia꞉ ene halaido꞉ alan a꞉no꞉lia꞉ma꞉ anib amio꞉ mo꞉mesea꞉ki, ko꞉na꞉le ta꞉fa꞉ib. Gode eyo꞉ iyo꞉ mogagilaki, falasilo꞉ a꞉naka dofo꞉ ha꞉na꞉melea꞉ki ta꞉fa꞉ib.  
\v 10 \x - \xo 1.10 \xt Kolo 3.4\x*Ya꞉su Alan elo꞉ yab ho꞉len a꞉namio꞉, tilidabu kaluka꞉isale enedo꞉ da꞉feyo꞉ i a꞉ma꞉yo꞉ Ya꞉su Alano꞉ wabudakiyo꞉, molo asuluma꞉ib. Nililo꞉ gimo꞉lo꞉ wido꞉ a꞉no꞉ giliyo꞉ tilidabu ko꞉lo꞉ gio꞉lo꞉ i o꞉lia꞉ ua gasama꞉ib.\fig Ya꞉suwo꞉ yakiyo꞉, hida꞉yo꞉lo꞉ dia꞉lab gimo꞉wo꞉ ha꞉salo꞉ mesa꞉no꞉ a꞉no꞉ ko꞉lo꞉ dimia꞉ib.|alt="Receiving reward" src="18_Jb_01_04_RG_gr.tif" size="col" copy="© Sweet Publishing http://sweetpublishing.com, licensed under a CC: BY-SA 3.0 Unported licence." ref="1.7" \fig*   
\p
\v 11-12 \x - \xo 1.11-12 \xt Kolo 1.9, 1Tes 1.2-3\x*Nili Gode o꞉lia꞉ Ya꞉su Keliso Alan o꞉lia꞉ma꞉yo꞉ nio꞉ kanulu alifa꞉ ko꞉lo꞉, Ya꞉suwa꞉lo꞉ mela꞉no꞉ gilo꞉ amilo꞉ dimido꞉ a꞉ma꞉yo꞉ ene wiyo꞉ ko꞉lo꞉ wabudabikiyo꞉, Ya꞉su eyo꞉ gili wiyo꞉lo꞉ wabuluma꞉kiyo꞉, niliyo꞉ ho꞉leno꞉ tambo gio꞉ Godemo꞉ dulugu sa꞉la꞉sen. Godeya꞉lo꞉ gimo꞉lo꞉ man nafa dimidama꞉kilo꞉ ho꞉ido꞉ a꞉no꞉ ililima꞉ki, dulugu sa꞉la꞉sen. A꞉la꞉ta꞉ga꞉ man nafa gililo꞉ dimidama꞉no꞉ asulan a꞉no꞉lia꞉, Godeya tilida꞉da꞉sa꞉ga꞉ ilikilo꞉ nanog dimidama꞉no꞉ a꞉no꞉lia꞉yo꞉, Godeya꞉ ene halaido꞉wa꞉yo꞉ gio꞉ asuwa꞉foma꞉ki, dulugu sa꞉la꞉sen.   
\c 2  
\s1 Gode o꞉lia꞉lo꞉ gisdo꞉ dowa꞉seno꞉ fa꞉la꞉doma꞉ib  
\p
\v 1 Ni nao i, Alan Ya꞉su Kelisowo꞉ a꞉ma꞉la꞉ mia꞉nigab a꞉namio꞉, nio꞉ e o꞉lia꞉lo꞉ gasayakilo꞉ kegenema꞉no꞉ a꞉no꞉ ko꞉lo꞉, niyo꞉ gimo꞉wo꞉ sa꞉ma꞉nigo꞉l.  
\v 2 Kalu Alana꞉ ho꞉leno꞉ o꞉ma fa꞉la꞉dowo꞉ ko꞉m a꞉la꞉likiyo꞉, kalu nolba꞉yo꞉ wida꞉laba꞉le, mo꞉dinali sa꞉la꞉labele, mo꞉ mo꞉fo꞉so꞉ nili iliga꞉fo꞉ka꞉ a꞉la꞉ sa꞉la꞉likilo꞉ agelab a꞉no꞉, gio꞉ dabulalega, iligakiyo꞉ kele asula꞉so꞉bo.   
\p
\v 3 \x - \xo 2.3 \xt 1Tim 4.1, 1Yo꞉n 2.18, 4.3\x*Kalu nolba꞉yo꞉ a꞉la꞉dinali sa꞉lalikiyo꞉ gio꞉ tilida꞉da꞉so꞉bo. Mo꞉wo꞉ Alana꞉ ho꞉leno꞉ o꞉semo꞉fa꞉la꞉dowab amio꞉ kaluka꞉isaleya꞉lo꞉ Gode o꞉lia꞉lo꞉ a꞉la꞉iyakilo꞉ gola ba꞉ba꞉no꞉ ho꞉len a꞉no꞉ fa꞉la꞉doma꞉ib. Ho꞉len a꞉namio꞉ ele saefa꞉lo꞉ gola ba꞉ba꞉no꞉ kalu imilig a꞉no꞉ kalaba fa꞉la꞉doma꞉ib. Kalu a꞉no꞉ deya꞉ mogagila꞉ma꞉ki da꞉fe alifo꞉lab.  
\v 4 \x - \xo 2.4 \xt Ese 28.2, Dan 11.36\x*Kalu a꞉no꞉ fa꞉la꞉dowalikiyo꞉, eyo꞉ Gode o꞉lia꞉ madali gode kaluka꞉isaleya꞉lo꞉ wabulu sa꞉la꞉lab o꞉lia꞉mo꞉wo꞉ gis dimidaki, enena꞉ma꞉la꞉yo꞉ kailaki, nol a꞉no꞉ wa꞉la꞉ sa꞉ma꞉ib. A꞉la꞉ta꞉ga꞉ eyo꞉ Godeya꞉ malilo꞉ a usa ha꞉na꞉sa꞉ga꞉ silikiyo꞉, “Godeleyo꞉ neka꞉” a꞉la꞉sa꞉la꞉mela꞉ib.   
\p
\v 5 Ne gi o꞉lia꞉ silikiyo꞉, to a꞉no꞉ wido꞉ ko꞉lo꞉ gio꞉ ga꞉lila꞉ya꞉le?  
\v 6 Ele saefa꞉lo꞉ gola ba꞉ba꞉no꞉ kalu a꞉no꞉ ho꞉lende imilaba kalaba fa꞉la꞉doma꞉kiyo꞉, o꞉go꞉ e kafo꞉lab, a꞉la꞉bo꞉ gio꞉ asulab.  
\v 7-8 \x - \xo 2.7-8 \xt Ais 11.4, Kala 19.15\x*Henfelo꞉ wenamio꞉ a꞉la꞉iyan man a꞉no꞉ nanogo꞉ wo꞉no꞉lebo꞉ dia꞉lab ko꞉sega, nolo꞉ e ka꞉la꞉lab. Tif amio꞉ kafo꞉lab a꞉no꞉ Gode eyo꞉ dila꞉ma꞉ib ko꞉lo꞉, ele saefa꞉lo꞉ gola ba꞉ba꞉no꞉ kalu a꞉no꞉ kalab amio꞉ a꞉na fa꞉la꞉doma꞉ib. E fa꞉la꞉dota꞉ga꞉ a꞉lalikiyo꞉, Alan Ya꞉suwo꞉ a꞉ma꞉la꞉ ya꞉ga꞉yo꞉, ene meho꞉ o꞉lia꞉ ene ho꞉len halaido꞉ so꞉so꞉idab o꞉lia꞉ma꞉yo꞉ kalu a꞉no꞉ sanala꞉ma꞉ib.   
\p
\v 9 \x - \xo 2.9 \xt Kala 13.11-13\x*Kalu a꞉no꞉, Sa꞉da꞉na꞉ya꞉ ene halaido꞉ o꞉lia꞉ fa꞉la꞉doma꞉ib ko꞉lo꞉ halaido꞉ a꞉no꞉ widakiyo꞉, eyo꞉ madali dikidaki, ele ba꞉ba꞉no꞉ o꞉lia꞉ molo ha꞉na꞉no꞉ o꞉lia꞉ ko꞉li ko꞉lilo꞉ dimidama꞉ib.  
\v 10 Kaluka꞉isale mogagila꞉ma꞉no꞉ doba꞉da꞉lo꞉ ha꞉na꞉lab a꞉no꞉ ko꞉lo꞉ dikidaki, kalu a꞉ma꞉yo꞉ man mogago꞉ ko꞉li ko꞉lilo꞉ dimidama꞉ib. Kaluka꞉isale i a꞉no꞉ to hendeleyo꞉ asuluma꞉no꞉wo꞉ gola ba꞉dabiki, Gode eyo꞉ iyo꞉ mo꞉gasiliab ko꞉lo꞉ iyo꞉ mogagila꞉ma꞉no꞉ doba꞉da꞉ ha꞉na꞉lab.  
\v 11 A꞉la꞉fo꞉ko꞉lo꞉ kaluka꞉isale i a꞉no꞉ madali to sa꞉lab a꞉no꞉ hendele a꞉no꞉ko꞉ tilidabuma꞉kiyo꞉, Gode eyo꞉ iyo꞉ a꞉naka ta꞉fa꞉ib.  
\v 12 A꞉la꞉go꞉ko꞉lo꞉ iyo꞉ to hendele a꞉no꞉ mo꞉tilida꞉daki, man mogago꞉le a꞉no꞉ sagala꞉li dimida꞉i ha꞉na꞉laliki, Gode eyo꞉ iyo꞉ mo꞉walila꞉sa꞉ga꞉ falasila꞉ma꞉ib.   
\s1 Gode eyo꞉ gio꞉ mela꞉no꞉ dima꞉ki da꞉feyo꞉  
\p
\v 13 \x - \xo 2.13 \xt A꞉fe 1.4, 2Tes 1.3\x*Ko꞉sega nao i, Gode eyo꞉ gio꞉ mada alan asulo꞉ ko꞉lo꞉ niliyo꞉ gi a꞉no꞉ asulakiyo꞉, Godemo꞉wo꞉ mada o꞉m a꞉la꞉sa꞉la꞉mela꞉niki. Mo꞉wo꞉ gio꞉ to hendele a꞉no꞉ tilida꞉dabiki, Godeya꞉ Mamaya꞉yo꞉ gio꞉ malilo꞉ melea꞉ki ta꞉takiyo꞉, Gode eyo꞉ a꞉na a꞉ma꞉la꞉ gasili ko꞉lo꞉, a꞉la꞉dimidama꞉no꞉ a꞉laki, Godeya꞉lo꞉ taminde amio꞉ gi ko꞉lo꞉ da꞉feyo꞉.  
\v 14 A꞉no꞉ ko꞉lo꞉ fa꞉la꞉doma꞉kiyo꞉, nio꞉ to nafayo꞉ gimo꞉ wida꞉sa꞉ga꞉, Gode eyo꞉ gio꞉ a꞉na ho꞉ido꞉. A꞉la꞉ta꞉ga꞉ Gode eyo꞉ Alan Ya꞉su Keliso E wabudab o꞉leaumbo꞉, gili wiyo꞉lo꞉ wabulu sama꞉ki, Gode eyo꞉ gio꞉ a꞉na ho꞉leli.  
\v 15 A꞉la꞉fo꞉ko꞉lo꞉ ni nao i, nililo꞉ towa꞉lo꞉ wido꞉ a꞉no꞉lo꞉, mo꞉fo꞉s tamin amilo꞉ sa꞉sa꞉liga꞉fo꞉ a꞉no꞉lo꞉, giliyo꞉ mada dinafa tilida꞉da꞉sa꞉ga꞉, halale ta꞉li dofo꞉lubi.   
\p
\v 16 Nili Alan Ya꞉su Keliso o꞉lia꞉ Do Gode o꞉lia꞉ma꞉yo꞉ nio꞉ alan asula꞉sa꞉ga꞉, ene kanulo꞉ a꞉ma꞉yo꞉ nio꞉ ha꞉sa dofo꞉melea꞉ki ta꞉takiyo꞉, tilidabu a꞉no꞉ ko꞉lo꞉ halale alitaki, sagala꞉li yasilima꞉ki ta꞉fo꞉.  
\v 17 Eyo꞉ gili asulo꞉wo꞉ halale alitakiyo꞉, to nafa gililo꞉ sa꞉la꞉lab o꞉lia꞉ man nafa dimida꞉lab a꞉no꞉lia꞉yo꞉ ego꞉le mada doma꞉ki, niyo꞉ gio꞉ emo꞉wo꞉ dulugu so꞉lo꞉l.   
\c 3  
\s1 Gode eyo꞉ asuwa꞉foma꞉ki, dulugu sa꞉la꞉bi  
\p
\v 1 To nowo꞉ edaki sa꞉ma꞉nigo꞉l. Nao i giliyo꞉ nio꞉ asuwa꞉foma꞉ki, Godemo꞉ dulugu sa꞉la꞉lubi. Alana꞉ to nafa a꞉no꞉ hen we tambo amio꞉ bo꞉bo꞉ge da꞉da꞉i ha꞉nakiyo꞉, gilo꞉ sagala꞉likilo꞉ dabu o꞉leau dabuma꞉ki, Godemo꞉wo꞉ dulugu sa꞉la꞉lubi.  
\v 2 A꞉la꞉ta꞉ga꞉ kalu nolo꞉ Alan amio꞉ mo꞉tilidabu ko꞉lo꞉ mogago꞉lo꞉ dimida꞉lab kaluwa꞉ dagi amilo꞉ a꞉lab a꞉no꞉ nio꞉ ga꞉li mesea꞉ki, giliyo꞉ Godemo꞉ dulugu sa꞉la꞉lubi.   
\p
\v 3 Ko꞉sega Alan e gio꞉ mada mo꞉ga꞉lila꞉sen ko꞉lo꞉, gimo꞉wo꞉ halaido꞉ dimiaki, man mogago꞉lelo꞉ dimida꞉sen Sa꞉da꞉na꞉ a꞉ma꞉yo꞉ mogagilabena꞉ki dinafa tilidoma꞉ib.  
\v 4 \x - \xo 3.4 \xt 2Kol 7.16, Gala 5.10\x*A꞉la꞉fo꞉ko꞉lo꞉ gio꞉ Alana tilida꞉daki, nililo꞉ gimo꞉lo꞉ sio꞉ a꞉no꞉ giliyo꞉ dimida꞉lab ko꞉lo꞉, tifamio꞉lo꞉ a꞉no꞉ko꞉ dimida꞉li ha꞉na꞉mela꞉ib a꞉la꞉bo꞉ nio꞉ hendele tili asulo꞉.  
\v 5 Keliso elo꞉ halale kagayab o꞉leau giliyo꞉lo꞉ hida꞉yo꞉ diab amio꞉ halale kagama꞉no꞉ man o꞉lia꞉ Godeya꞉ ene ha꞉fo꞉ disa꞉lan man a꞉no꞉lia꞉yo꞉, Alan eyo꞉ gimo꞉wo꞉ tili walama꞉ki, nio꞉ Godemo꞉ dulugu so꞉lo꞉l.   
\s1 Bo꞉sulakiyo꞉ sa꞉so꞉bo  
\p
\v 6 \x - \xo 3.6 \xt Lom 16.17\x*Nao i, nili Alan Ya꞉su Kelisowa꞉ wiya ilikiyo꞉, niliyo꞉ halaido꞉ we ko꞉lo꞉ gimo꞉ salito꞉l. Kalu abeyo꞉ to nililo꞉ widabikilo꞉ gililo꞉ dabu a꞉no꞉ mo꞉kudu ha꞉naki, ba madali bo꞉sulakilo꞉ sab i o꞉lia꞉yo꞉ uayo꞉ dowa꞉so꞉bo.  
\v 7-8 \x - \xo 3.7-8 \xt Fili 3.17, 1Tes 2.9\x*To a꞉no꞉ ko꞉lo꞉ fanda sa꞉ma꞉nigo꞉l. Nio꞉ gi o꞉lia꞉ silikilo꞉ man dimida꞉len a꞉no꞉ gio꞉ asulo꞉ ko꞉lo꞉, giliyo꞉lo꞉ man o꞉leo꞉ngo꞉ ka kudu ha꞉na꞉bi. Nio꞉ gi o꞉lia꞉ silikiyo꞉ mo꞉bo꞉sulaki, ma꞉no꞉wo꞉ ba madaliyo꞉ mo꞉dia꞉sa꞉ga꞉ na꞉sen. No꞉no꞉n moleya꞉ kililia꞉sa꞉ga꞉ na꞉sen. A꞉la꞉do꞉ dimido꞉ a꞉no꞉, ni tili doma꞉no꞉wo꞉ gio꞉ kele asulabena꞉kiyo꞉, niliyo꞉ ho꞉lenowo꞉lo꞉ nuluwo꞉lo꞉ nanogo꞉ halaido꞉ dimida꞉len.  
\v 9 \x - \xo 3.9 \xt 1Kol 9.4, 1Tes 1.6\x*Nio꞉ gimo꞉wo꞉ ma꞉no꞉wo꞉ madali ka dimina a꞉la꞉sa꞉ma꞉no꞉wo꞉ o꞉li ko꞉sega, a꞉la꞉bo꞉ mo꞉dimidaki, man nafa tifamilo꞉ gililo꞉ kudu ha꞉nakilo꞉ dimidama꞉no꞉, a꞉no꞉ ko꞉lo꞉ widaki go꞉.  
\v 10 Hendele, nio꞉ gi o꞉lia꞉ silikiyo꞉, ele we gimo꞉wo꞉ wido꞉. “Kalu abeyo꞉ nanogo꞉ mo꞉dimidalega, e ma꞉no꞉wo꞉ mo꞉ma꞉ib.”   
\p
\v 11 \x - \xo 3.11 \xt 1Tim 5.13\x*A꞉la꞉wido꞉ ko꞉sega, o꞉go꞉ gi us amio꞉ nolo꞉ bo꞉sulaki ba madali saka꞉ a꞉la꞉dabu. Iyo꞉ inin nanogo꞉ mo꞉diaki, kalu nolba꞉lo꞉ dimidab a꞉no꞉ ko꞉lo꞉ ka꞉ma꞉no꞉ a꞉laki nenela꞉sen.  
\v 12 \x - \xo 3.12 \xt 1Tes 4.11\x*Nio꞉ Alan Ya꞉su Kelisowa꞉ wi amio꞉, to halaido꞉wo꞉ kalu i o꞉ngo꞉mo꞉wo꞉ sa꞉ma꞉nigo꞉l. Gio꞉ ma꞉no꞉wo꞉ ma꞉nikiyo꞉, dinafa ha꞉sa siliki go꞉no꞉no꞉ nanogo꞉ dimida꞉lubi.  
\v 13 \x - \xo 3.13 \xt Gala 6.9\x*Ni nao i, gio꞉ man digalo꞉ dimidama꞉no꞉wo꞉ mo꞉beakiyo꞉ dowa꞉so꞉bo.  
\v 14 Kalu abeyo꞉ to nililo꞉ sa꞉sa꞉liga꞉fo꞉ we mo꞉kudu ha꞉nalega, gio꞉ kalu a꞉no꞉ sahili alitakiyo꞉ e sendeloma꞉ki, e o꞉lia꞉yo꞉ dowa꞉so꞉bo.  
\v 15 \x - \xo 3.15 \xt 1Tes 5.14\x*Ko꞉sega kalu a꞉no꞉ gi o꞉lia꞉yo꞉ gis dowab a꞉la꞉bo꞉ asula꞉so꞉bo. Gili gaole o꞉ngo꞉ dowab ko꞉lo꞉, giliyo꞉ asulo꞉ nafale dimiaki, emo꞉wo꞉ hagugo꞉ towo꞉ sa꞉la꞉lubi.   
\s1 Fo꞉l eyo꞉ sagalo꞉ towo꞉ saga꞉fo꞉  
\p
\v 16 Alan e, ha꞉salo꞉ dowan mo꞉wo꞉ e ko꞉lo꞉, ene ha꞉salo꞉ dowan man a꞉no꞉ ho꞉leno꞉ tambo a꞉la꞉ta꞉ga꞉ kelego꞉ tambo fa꞉la꞉dowab a꞉namio꞉lo꞉, man a꞉no꞉ gi o꞉lia꞉ dofo꞉melea꞉ki so꞉lo꞉l. Alan e gio꞉ tambo amio꞉ dofo꞉mela꞉ib.   
\p
\v 17 Ne Fo꞉l ko꞉lo꞉, sagalo꞉ to we no꞉no꞉n dagileya꞉ sa꞉sa꞉ido꞉. Mo꞉fo꞉s nilo꞉ tambo sa꞉sa꞉lo꞉ a꞉namio꞉, nino꞉lo꞉b a꞉la꞉bo꞉ba꞉kiyo꞉, niyo꞉ a꞉la꞉dimida꞉sen.   
\p
\v 18 Nili Alan, Ya꞉su Kelisowa꞉ ene ha꞉fo꞉ disa꞉lan man a꞉no꞉ gi o꞉lia꞉ tambo dowa꞉biyo꞉.