\id 1TH - Kaluli Bible 
\h 1 Tesalonaika 
\toc1 Mo꞉fo꞉s Agel We Fo꞉l Eyo꞉ Tesalonaika Kaluka꞉isalemo꞉ Sa꞉sa꞉liga꞉fo꞉ 
\toc2 1 Tesalonaika 
\toc3 1Tes 
\mt2 Mo꞉fo꞉s Agel We Fo꞉l Eyo꞉  
\mt1 Tesalonaika  
\mt2 Kaluka꞉isalemo꞉ Sa꞉sa꞉liga꞉fo꞉  
\imt1 Asuluma꞉no꞉ towo꞉ we  
\ip Fo꞉l eyo꞉ mo꞉fo꞉s we tilidabu kaluka꞉isale Tesalonaika amisa꞉n a꞉namilo꞉ sab o꞉mo꞉ sa꞉sa꞉liga꞉fo꞉. Tesalonaika amisa꞉n a꞉no꞉ Masedonia hen us a꞉na a꞉lab. Ho꞉len Fo꞉l eyo꞉ Filibai amisa꞉no꞉ ta꞉ta꞉sa꞉ga꞉, Tesalonaika ha꞉na꞉ga꞉yo꞉, sa꞉so꞉ a꞉na mo꞉mo꞉do꞉. (Iliga꞉felo꞉ 17.1-9) Fo꞉l eyo꞉ to nafa a꞉no꞉ Tesalonaika kaluka꞉isalemo꞉ widabikiyo꞉, iliyo꞉ Fo꞉l elo꞉ sa꞉lab a꞉no꞉ kudu ha꞉nabiki, Yu kaluwo꞉ ba꞉da꞉sa꞉ga꞉ gadiaki, Folo꞉ Tesalonaika heno꞉ ta꞉ta꞉ga꞉ ane.  
\ip Tif amio꞉ Folo꞉ Kolin amisa꞉n a꞉na ha꞉na꞉ga꞉ sabikiyo꞉, egeledo꞉ nanogdo꞉ dian kalu Timoti a꞉no꞉ Fo꞉ldo꞉wa ha꞉na꞉ga꞉ fa꞉la꞉dowaki, hida꞉yo꞉ Tesalonaika sa꞉s a꞉namilo꞉ fa꞉la꞉dowab a꞉no꞉ ko꞉lo꞉ sio꞉.  
\ip Fo꞉l eyo꞉ Timoti elo꞉ to sa꞉lab a꞉no꞉ da꞉da꞉sa꞉ga꞉yo꞉, Folo꞉ Sales Timotiyo꞉ iliyo꞉ tilidabu kaluka꞉isale Tesalonaika sa꞉s a꞉namilo꞉ sab a꞉no꞉ halale alitaki, mo꞉fo꞉s we a꞉na sa꞉sa꞉liga꞉fo꞉.  
\ip Tesalonaika tilidabu kaluka꞉isaleyo꞉ man nafa kudu ha꞉nab a꞉no꞉ da꞉da꞉sa꞉ga꞉, Fo꞉l e sagalo꞉wo꞉ alan dowa꞉sa꞉ga꞉, a꞉na sa꞉sa꞉liga꞉fo꞉.  
\ip To nowo꞉ we. Tesalonaika tilidabu kaluka꞉isale a꞉no꞉ Ya꞉su Keliso a꞉ma꞉la꞉lo꞉ mia꞉nigab a꞉no꞉ dinafa fanda asuluma꞉ki, Fo꞉l eyo꞉ mo꞉fo꞉s we imo꞉wo꞉ a꞉na sa꞉sa꞉liga꞉fo꞉.  
\ip A꞉la꞉ta꞉ga꞉ Tesalonaika kaluka꞉isaleya꞉lo꞉ dabu ba꞉ba꞉ dowo꞉ a꞉no꞉ nowo꞉ we. Ya꞉suwo꞉ a꞉ma꞉la꞉yo꞉ semo꞉ yalikiyo꞉, tilidabu kalu sowo꞉ a꞉no꞉ e a꞉ma꞉la꞉ dasilia꞉ga꞉ mela꞉no꞉wo꞉ doma꞉iba꞉le? Nowo꞉ we, Ya꞉su Kelisowo꞉ ho꞉leno꞉ iga꞉sa mia꞉iba? Ililo꞉ dabu ba꞉ba꞉ a꞉no꞉ eyo꞉ a꞉ma꞉la꞉ fanda sa꞉laki, Ya꞉su e mia꞉no꞉ yasi silikiyo꞉ iyo꞉ ha꞉sa siliki, tilidabuwa halale dofo꞉melea꞉ki, mo꞉fo꞉s we a꞉na sa꞉sa꞉liga꞉fo꞉.  
\c 1  
\p
\v 1 \x - \xo 1.1 \xt Ilig 17.1-9\x*Fo꞉l ne, Saleso꞉, Timotiyo꞉ niliyo꞉ to we sa꞉sa꞉lakiyo꞉, Do Gode o꞉lia꞉ Alan Ya꞉su Keliso o꞉lia꞉ma꞉ kaluka꞉isale, Tesalonaika sa꞉s usamilo꞉ sab o꞉mo꞉ sa꞉sa꞉liga꞉to꞉l. Godeya꞉ ene ha꞉fo꞉ disa꞉lan man o꞉lia꞉ ha꞉sa mesa꞉no꞉ man a꞉no꞉lia꞉yo꞉ gi o꞉lia꞉ dofo꞉melea꞉ki, Godemo꞉ dulugu so꞉lo꞉l.   
\p
\v 2 Ho꞉leno꞉ tambo niliyo꞉ gio꞉ ko꞉lo꞉ Godemo꞉ dulugu sa꞉lakiyo꞉, mada o꞉m a꞉la꞉sa꞉la꞉sen.  
\v 3 \x - \xo 1.3 \xt 1Kol 13.13, Kolo 1.4-6\x*Giliyo꞉ tilida꞉da꞉ga꞉ man nafale dimida꞉sen, a꞉la꞉ta꞉ga꞉ nol o꞉lia꞉yo꞉ ha꞉fo꞉ disa꞉laki iyo꞉ asuwa꞉ta꞉sen, a꞉la꞉ta꞉ga꞉ Ya꞉su Kelisowo꞉ hendele a꞉ma꞉la꞉ mia꞉nigab a꞉la꞉bo꞉ giliyo꞉ tilida꞉da꞉sa꞉ga꞉ yasila꞉lab ko꞉lo꞉ halale kagaya꞉sen. Niliyo꞉ gililo꞉ dimido꞉ a꞉no꞉ asula꞉liki, Do Godemo꞉ mada o꞉m a꞉la꞉sa꞉la꞉sen.   
\p
\v 4-6 \x - \xo 1.4-6 \xt Ilig 17.5-9, 1Kol 2.4-5\x*Godeya꞉ to nafayo꞉ gilo꞉wa fa꞉la꞉dowabikiyo꞉, to ina꞉li fa꞉la꞉dowo꞉ma. To a꞉no꞉ niliyo꞉ hendele tilida꞉da꞉sa꞉ga꞉ halale widakiyo꞉, Godeya꞉ ene halaido꞉ o꞉lia꞉ Mama Malilo꞉ enedo꞉ o꞉lia꞉yo꞉ mio꞉. A꞉la꞉ta꞉ga꞉ nio꞉ gi o꞉lia꞉ silikilo꞉, nililo꞉ man nafale dimido꞉ a꞉no꞉ giliyo꞉ asulufo꞉lab. Alan Ya꞉su o꞉lia꞉ nililo꞉ man nafale dimido꞉ a꞉no꞉lia꞉yo꞉ giliyo꞉ kudu ane. Giliyo꞉ hida꞉yo꞉wo꞉ alan di ko꞉sega, Mama Malilo꞉ a꞉ma꞉ sagalo꞉wa ilikiyo꞉, ene to nafa a꞉no꞉ sagala꞉liki dabu. Ni nao i, Gode eyo꞉ gio꞉ mada alan asula꞉sa꞉ga꞉, gio꞉ eno꞉le doma꞉ki da꞉feyo꞉ niliyo꞉ a꞉la꞉asulo꞉. A꞉la꞉fo꞉ko꞉lo꞉ niliyo꞉ Godemo꞉wo꞉ mada o꞉m a꞉la꞉sa꞉la꞉sen.  
\v 7 O꞉go꞉ tilidabu kaluka꞉isale tambo Masedonia hen o꞉lia꞉ Akaya hen a꞉namilo꞉ sab a꞉ma꞉yo꞉ gililo꞉ man nafale dimido꞉ a꞉no꞉ asula꞉liki, iliyo꞉lo꞉ kudu ha꞉nab.  
\v 8 A꞉la꞉dimida꞉i ha꞉nab ko꞉lo꞉ Alana꞉ towo꞉ ge amilo꞉ handalowab a꞉no꞉ Masedonia hen o꞉lia꞉ Akaya hen o꞉lia꞉ya ane ko꞉mba. Ko꞉sega gililo꞉ Gode amilo꞉ tilidabuka꞉ a꞉la꞉do꞉ sio꞉ to a꞉no꞉ hen nolo꞉lo꞉ da꞉da꞉li ha꞉nab ko꞉lo꞉, niliyo꞉ gililo꞉ tilidabu a꞉no꞉ ko꞉lo꞉ a꞉sa꞉ma꞉no꞉wo꞉ mo꞉ililo꞉.  
\v 9 Mo꞉wo꞉ gililo꞉ dimido꞉ a꞉no꞉ ko꞉lo꞉ ililo꞉ nemo꞉lo꞉ malolo meo꞉ we. Nio꞉ gelo꞉wa fa꞉la꞉dowo꞉ amio꞉ tililiale. A꞉la꞉ta꞉ga꞉ giliyo꞉ madali godeyo꞉ ta꞉ta꞉ga꞉, Gode mela꞉no꞉lelo꞉ a꞉lab a꞉no꞉ tilida꞉da꞉sa꞉ga꞉, ene nanogo꞉ dimidale.  
\v 10 A꞉la꞉ta꞉ga꞉ Godeya꞉ ene So꞉wa ko꞉lo꞉ a꞉ma꞉la꞉ mia꞉no꞉ a꞉no꞉ giliyo꞉ yasila꞉labeka꞉ a꞉la꞉bo꞉, iliyo꞉ nemo꞉wo꞉ malolome ko꞉lo꞉ so꞉lo꞉l. Godeya꞉ ene So꞉wa Ya꞉su e sowa꞉sa꞉ga꞉yo꞉, a꞉ma꞉la꞉ a꞉dasilia꞉ga꞉ Hebene sab. A꞉la꞉ta꞉ga꞉ nio꞉ Godeya꞉lo꞉ gadia꞉sa꞉ga꞉lo꞉ wa꞉ldo꞉ dimiab a꞉no꞉ diabena꞉ki, Ya꞉suwa꞉yo꞉ nio꞉ a꞉ma꞉la꞉ gasilia꞉sen.   
\c 2  
\s1 Fo꞉l elo꞉ Tesalonaikalo꞉ dimido꞉wo꞉ we  
\p
\v 1 Ni nao i, nio꞉ gelo꞉wa ya꞉sa꞉ga꞉ ilikilo꞉ nanog dimido꞉ a꞉no꞉ mo꞉wala꞉.  
\v 2 \x - \xo 2.2 \xt Ilig 16.19-24, 17.1-9\x*Gilo꞉ amio꞉ o꞉mia꞉no꞉ amio꞉, nio꞉ Filibai silikiyo꞉, kaluka꞉isaleya꞉lo꞉ nimo꞉lo꞉ dikidiakilo꞉ dio꞉ge sio꞉ a꞉no꞉ gio꞉ asulo꞉. Ko꞉sega nili Gode eyo꞉ nio꞉ asufa꞉ ko꞉lo꞉, kalu nolba꞉yo꞉ nimo꞉wo꞉ giso꞉ alan dowabikiyo꞉, nio꞉ mo꞉tagilaki Godeya꞉ to nafa a꞉no꞉ gimo꞉wo꞉ ka wida꞉len.  
\v 3 Niliyo꞉ to widakiyo꞉, halayo꞉ mo꞉widaki, asulo꞉ nililo꞉wo꞉ wo꞉no꞉le nowa dia꞉fo꞉likiyo꞉ mo꞉wido꞉l. A꞉la꞉ta꞉ga꞉ dikidakiyo꞉lo꞉ mo꞉wido꞉l.  
\v 4 \x - \xo 2.4 \xt Gala 1.10\x*A꞉la꞉bo꞉ mo꞉dimido꞉l. Godeya꞉ to nafayo꞉ sama꞉kiyo꞉, eyo꞉ nio꞉ dibebea꞉sa꞉ga꞉ da꞉feyo꞉ ko꞉lo꞉, niliyo꞉ elo꞉ asulo꞉ o꞉leaumbo꞉ hendele wida꞉lo꞉l. Niliyo꞉ kaluka꞉isaleyo꞉ ko꞉lo꞉ sagale alitaki wido꞉ma. Gode nili asulo꞉lo꞉ dibebeakilo꞉ bo꞉fo꞉lab a꞉no꞉ ko꞉lo꞉ sagale alita꞉sen.  
\v 5 Kelego꞉ gililo꞉ da꞉labko nili diano꞉ a꞉lakiyo꞉, gimo꞉wo꞉ madaliyo꞉ mo꞉dikili sio꞉. A꞉la꞉ta꞉ga꞉ kelego꞉ gililo꞉wo꞉ meselaki mo꞉susuluma꞉ mio꞉. Man nililo꞉ dimida꞉sen a꞉no꞉ giliyo꞉ asulab a꞉la꞉ta꞉ga꞉, Gode elo꞉ mada asulufo꞉lab.  
\v 6-7 Giliyo꞉lo꞉ a꞉la꞉ta꞉ga꞉ kalu nolba꞉yo꞉lo꞉ nio꞉ ko꞉lo꞉ wabulu sama꞉kiyo꞉ mo꞉so꞉lo꞉l. Kelisowa꞉lo꞉ iliga꞉felo꞉ kaluwo꞉ ni ko꞉lo꞉, giliyo꞉ nio꞉ tili doma꞉kiyo꞉ o꞉li sa꞉ma꞉no꞉ dowo꞉ ko꞉sega, a꞉la꞉do꞉ mo꞉gaki, gi o꞉lia꞉ sen amio꞉ nio꞉ ha꞉sa siliki, anowa꞉lo꞉ so꞉wagalin ko꞉lo꞉ bo꞉fo꞉lowan o꞉ngo꞉ dowa꞉sen.  
\v 8 Nio꞉ gimo꞉wo꞉ mada ha꞉fo꞉wo꞉ disa꞉ ko꞉lo꞉, Godeya꞉ to nafayo꞉ gimo꞉ sa꞉ma꞉no꞉wo꞉ sagalo꞉. A꞉la꞉ta꞉ga꞉ niliyo꞉ gimo꞉wo꞉ mada alan asulakiyo꞉, ninin mela꞉no꞉wo꞉ o꞉li wala꞉ma꞉no꞉.  
\v 9 \x - \xo 2.9 \xt Ilig 20.34\x*Ni nao i, nililo꞉ halaido꞉ nanog dimido꞉ a꞉no꞉ gio꞉ mada asulo꞉ ko꞉lo꞉lab. Niliyo꞉ Godeya꞉ to nafa gimo꞉lo꞉ wida꞉len amio꞉, nilo꞉ tili doma꞉no꞉wo꞉ gio꞉ kele asulabena꞉kiyo꞉, niliyo꞉ ho꞉lenowo꞉lo꞉, nuluwo꞉lo꞉ nanogo꞉ dia꞉len.   
\p
\v 10 Nio꞉ tilidabu kaluka꞉isale gi o꞉lia꞉ silikiyo꞉, nio꞉ malilo꞉ man o꞉lia꞉ digalo꞉ man o꞉lia꞉ dimidaki, kalu nolba꞉yo꞉ hala dimido꞉ a꞉la꞉bo꞉ mo꞉sama꞉ki dimida꞉sen. Gio꞉lo꞉ Godeya꞉lo꞉ man nilo꞉ dimido꞉ a꞉no꞉ ba꞉da꞉sa꞉ga꞉ asulo꞉.  
\v 11 \x - \xo 2.11 \xt Ilig 20.31\x*Iyaya꞉lo꞉ ene so꞉wa asulakilo꞉ tilidowan aumbo꞉, gio꞉ ina꞉li ina꞉li a꞉la꞉do꞉ nililo꞉ bo꞉fo꞉len a꞉no꞉ gio꞉ asulo꞉.  
\v 12 A꞉la꞉do꞉ dimida꞉len a꞉namio꞉, giliyo꞉ Godeya꞉lo꞉ asulab man au dimidama꞉kiyo꞉, niliyo꞉ gio꞉ halale alitaki, nofolo꞉ towo꞉ sa꞉la꞉liki, towo꞉ halaido꞉ wida꞉len. Mo꞉wo꞉ Godeya꞉ ene ho꞉ alan usa mesea꞉ki a꞉la꞉ta꞉ga꞉, Elo꞉ bo꞉fo꞉lowan kaluka꞉isale o꞉lia꞉ usa doma꞉ki, Gode Eyo꞉ gio꞉ ho꞉ida꞉lab.   
\p
\v 13 \x - \xo 2.13 \xt 2Tes 2.13\x*Niliyo꞉ Godeya꞉ to wida꞉len amio꞉, gio꞉ kaluwa꞉ to sa꞉lab a꞉la꞉bo꞉ mo꞉dabu ko꞉sega, Godeya꞉ ene to hendele sa꞉labo꞉lo꞉b a꞉la꞉ da꞉da꞉sa꞉ga꞉ tilidabu ko꞉lo꞉, niliyo꞉ Godemo꞉wo꞉ mada o꞉m a꞉la꞉bo꞉ wa꞉ka a꞉la꞉sa꞉la꞉len. A꞉la꞉fo꞉ko꞉lo꞉ Godeya꞉ to a꞉no꞉, tilidabu kaluka꞉isale gi usa dowaki, nanogo꞉ diab.  
\v 14 \x - \xo 2.14 \xt Ilig 17.5\x*Ni nao i, Keliso kaluka꞉isale Yudia hen amilo꞉ sa꞉sen ilo꞉ amilo꞉ hida꞉yo꞉ fa꞉la꞉dowo꞉ aumbo꞉, giliyo꞉lo꞉ o꞉leo꞉ngo꞉ ka di. Yu kaluwa꞉lo꞉ hida꞉yo꞉ imo꞉lo꞉ dimi o꞉leaumbo꞉, giasi kaluwa꞉yo꞉ gimo꞉wo꞉lo꞉ hida꞉yo꞉wo꞉ a꞉la꞉dimi.  
\v 15-16 \x - \xo 2.15-16 \xt Ilig 9.23,29, 13.45,50, 14.2,5,19\x*Ya꞉su Alan o꞉lia꞉ Godeya꞉ dinali sa꞉lan kalu nolo꞉lo꞉ Yu kalu i a꞉ma꞉yo꞉ sanala꞉. A꞉la꞉ta꞉ga꞉ i a꞉ma꞉yo꞉ nio꞉lo꞉ o꞉lu ga꞉fela꞉sen. Niliyo꞉ Yu kaluka꞉isalema a꞉no꞉ wida꞉lab amio꞉, Gode eyo꞉ iyo꞉ gasiliabena꞉kiyo꞉, Yu kalu i a꞉ma꞉yo꞉ nililo꞉ sa꞉ma꞉no꞉wo꞉ ka꞉ma꞉no꞉ a꞉la꞉li kedo꞉. Ililo꞉ a꞉la꞉do꞉ dimido꞉ a꞉ma꞉yo꞉ Godeyo꞉ ko꞉lo꞉ mo꞉be alifa꞉, a꞉la꞉ta꞉ga꞉ iyo꞉ kaluka꞉isale tambomo꞉wo꞉ giso꞉ alan dowa꞉sen. Inin mogago꞉ dimida꞉len a꞉namio꞉, dibida꞉i ya꞉la꞉ga꞉ wa꞉litab ko꞉lo꞉, Godeya꞉lo꞉ gadio꞉ wa꞉l a꞉no꞉ inibo꞉ o꞉go꞉ dimiab ko꞉m.   
\s1 Fo꞉l eyo꞉ Tesalonaika kaluwo꞉ wa꞉ka ba꞉ba꞉no꞉ asulo꞉  
\p
\v 17 Ni nao i, tamin amio꞉ Yu kaluwa꞉lo꞉ hida꞉yo꞉ dimi a꞉namio꞉, na꞉no꞉ do꞉mo꞉wa꞉yo꞉ alobanaga꞉ta꞉ga꞉ ane ko꞉sega, asulo꞉wo꞉ imilise o꞉dofo꞉likiyo꞉, gio꞉ wa꞉ka galima꞉no꞉ a꞉la꞉liki, niliyo꞉ togo꞉ mada keda꞉len.  
\v 18 Nio꞉ gelo꞉wa mia꞉no꞉ asulo꞉. Fo꞉l ne gelo꞉wa mia꞉no꞉ asulaki togo꞉ keda꞉len ko꞉sega, Sa꞉da꞉na꞉ eyo꞉ nio꞉ ka꞉la꞉lab.   
\p
\v 19 \x - \xo 2.19 \xt Fili 2.15-16, 4.1, 2Tes 1.4\x*Nili Alan Ya꞉su e yaliki, nio꞉ e wo꞉lokana kagayalikiyo꞉, nilo꞉ halale kagama꞉no꞉wo꞉, a꞉la꞉ta꞉ga꞉ nilo꞉ sagale alifa꞉no꞉wo꞉ o꞉ba꞉le? A꞉la꞉ta꞉ga꞉ nilo꞉ nanogo꞉ dimida꞉sa꞉ga꞉ tinio꞉ a꞉la꞉likilo꞉ emo꞉lo꞉ boba walama꞉no꞉wo꞉ o꞉ba? A꞉no꞉ kaluka꞉isale gi o꞉m.  
\v 20 Ni wabudakilo꞉ sagale alitab a꞉no꞉, mada hendeleyo꞉ gi ko꞉lo꞉ dowab.   
\c 3  
\s1 Timoti e Tesalonaika iliga꞉fo꞉  
\p
\v 1-2 \x - \xo 3.1-2 \xt Ilig 17.15\x*\x - \xo 3.1-2 \xt Ilig 16.1-3\x*Niliyo꞉ gio꞉ ba꞉ba꞉no꞉ alan asula꞉li ha꞉na꞉la꞉ga꞉yo꞉, na꞉no꞉ Atens amisa꞉n a꞉na siliki, Timotiyo꞉ gilo꞉wa iliga꞉fa꞉no꞉ a꞉la꞉liki nenela꞉sa꞉ga꞉ saefa꞉. Nili nao Timoti, Gode o꞉lia꞉ nanog diakilo꞉, Ya꞉su Kelisowa꞉ to nafalo꞉ wida꞉li sia꞉seno꞉ nowo꞉ e. A꞉la꞉fo꞉ko꞉lo꞉ tilidabu gililo꞉wo꞉ halale alitaki, gio꞉ halaido꞉ ha꞉na꞉melea꞉kiyo꞉, Timotiyo꞉ gilo꞉wa iliga꞉fo꞉.  
\v 3 \x - \xo 3.3 \xt 2Tim 3.12\x*Hida꞉yo꞉ gililo꞉ diab koma꞉yo꞉, tilidabu gililo꞉wo꞉ babalabena꞉ki, Timotiyo꞉ gilo꞉wa iliga꞉fo꞉. Hida꞉yo꞉ wengo꞉wo꞉ Gode eyo꞉ nimo꞉ dima꞉ki da꞉feyo꞉lo꞉b a꞉la꞉bo꞉ gio꞉ asulo꞉.  
\v 4 Hendele, nio꞉ gi o꞉lia꞉ sen amio꞉, hida꞉yo꞉wo꞉ nilo꞉ amio꞉ fa꞉la꞉doma꞉ib a꞉la꞉bo꞉ gimo꞉wo꞉ sa꞉la꞉len ko꞉lo꞉ ninindo꞉ sa꞉la꞉len aumbo꞉ fa꞉la꞉dowab a꞉no꞉ gio꞉ asulab.  
\v 5 A꞉no꞉ ko꞉lo꞉ asulakiyo꞉, niyo꞉ mo꞉yasilima꞉no꞉ dowo꞉lo꞉biki, Timotiyo꞉ gi tilidabuwo꞉ fanda bo꞉ba꞉kiyo꞉, gelo꞉wa iliga꞉fo꞉ko. Ni asulakiyo꞉, Sa꞉da꞉na꞉ e gilo꞉wa fa꞉la꞉dowa꞉sa꞉ga꞉, tilidabu gililo꞉wo꞉ da꞉feyo꞉lalega, nilido꞉ nanog di a꞉no꞉ o꞉ngo꞉malo꞉ngo꞉ fa꞉la꞉doma꞉iba꞉le, a꞉la꞉asulaki tagilo꞉.   
\s1 To nafayo꞉ Timoti eyo꞉ a꞉ma꞉la꞉bo꞉ dia꞉mio꞉  
\p
\v 6 \x - \xo 3.6 \xt Ilig 18.5\x*A꞉la꞉fo꞉ko꞉lo꞉ Timoti e gilo꞉ amilo꞉ seno꞉ ta꞉ta꞉ga꞉, o꞉go꞉ nilo꞉ wena fa꞉la꞉dowakiyo꞉, gilo꞉ tilidabu o꞉lia꞉ ha꞉fo꞉ disa꞉la꞉sen man a꞉no꞉lia꞉yo꞉ nimo꞉wo꞉ mada towo꞉ nafa ko꞉lo꞉ malolo meab. Giliyo꞉ nio꞉ asula꞉likiyo꞉, sagalo꞉wo꞉ alan dowa꞉sen ko꞉lo꞉, gio꞉ misio꞉ bo꞉bo꞉losa꞉ a꞉la꞉do꞉ nililo꞉ asula꞉sen aumbo꞉, giliyo꞉lo꞉ nio꞉ bo꞉bo꞉losa꞉ a꞉la꞉asula꞉senka꞉ a꞉la꞉liki, Timoti eyo꞉ nimo꞉wo꞉ malolo meabe.   
\p
\v 7 \x - \xo 3.7 \xt 2Tes 1.4\x*Ni nao i, niliyo꞉ to a꞉no꞉ dabu ko꞉lo꞉ nio꞉ nagalo꞉ o꞉lia꞉ hida꞉yo꞉ alan o꞉lia꞉lo꞉ ba꞉dab us a꞉namio꞉, tilidabu gililo꞉wo꞉ halaido꞉ a꞉lab koma꞉yo꞉ nio꞉ ko꞉lo꞉ halale alitakigab.  
\v 8 Gio꞉ Kalu Alan o꞉lia꞉ oga꞉dita꞉ga꞉ halaido꞉ kagafo꞉lab ko꞉lo꞉, nio꞉ o꞉go꞉ mela꞉no꞉wo꞉ nafale ko꞉lo꞉ dio꞉l.  
\v 9 Giliyo꞉ nio꞉ mada alan sagale alifa꞉ ko꞉lo꞉, niliyo꞉ Godeyo꞉ wabulu sa꞉lakilo꞉ emo꞉wo꞉ mada o꞉m a꞉la꞉sa꞉la꞉sen a꞉no꞉ ko꞉mba.  
\v 10 Gio꞉ wa꞉kabiyo꞉ a꞉ba꞉ba꞉no꞉ a꞉lakiyo꞉, gili tilidabuwo꞉ a꞉halale alifoma꞉kiyo꞉, nuluwo꞉lo꞉ ho꞉lenowo꞉lo꞉ niliyo꞉ Godemo꞉wo꞉ towo꞉ sa꞉la꞉len.   
\p
\v 11 \x - \xo 3.11 \xt 2Tes 2.16-17\x*A꞉la꞉fo꞉ko꞉lo꞉ o꞉go꞉ gio꞉ ba꞉ba꞉ mia꞉no꞉ a꞉la꞉likiyo꞉, Do Gode o꞉lia꞉ nili Alan Ya꞉su o꞉lia꞉ma꞉yo꞉ togo꞉ dinafa walama꞉ki, niliyo꞉ dulugu so꞉lo꞉l.  
\v 12 Nililo꞉ gimo꞉lo꞉ ha꞉fo꞉ disa꞉la꞉sen man a꞉no꞉ ko꞉lo꞉ anayab o꞉leaumbo꞉, gegelebo꞉lo꞉ a꞉la꞉ta꞉ga꞉ nol o꞉lia꞉lo꞉ ha꞉fo꞉ disa꞉lan man a꞉no꞉lo꞉ wa꞉lita꞉ga꞉ alalia꞉ga꞉ hamana꞉ki, Godemo꞉ dulugu so꞉lo꞉l.  
\v 13 A꞉la꞉fo꞉lalikiyo꞉, Gode eyo꞉ asulo꞉ gililo꞉wo꞉ halale alita꞉len ko꞉lo꞉, Ya꞉su Alan o꞉lia꞉ ene malilo꞉ kaluka꞉isale tambo o꞉lia꞉lo꞉ yab amio꞉, gio꞉ hala dimido꞉wo꞉ aundo꞉ma dowaki, malilo꞉ elena bo꞉ba꞉ki, dulugu so꞉lo꞉l.   
\c 4  
\s1 Godeya꞉lo꞉ asulab man a꞉no꞉ ko꞉lo꞉ kudu hamana  
\p
\v 1 Ni nao i, to nolo꞉ a꞉sa꞉ma꞉nigo꞉l. Godelo꞉ sagalema꞉no꞉ man a꞉no꞉ giliyo꞉ kudu hamana꞉ki, niliyo꞉ tamin amio꞉ gimo꞉wo꞉ wido꞉ ko꞉lo꞉, gio꞉ kudu ha꞉na꞉lab. Ko꞉sega o꞉go꞉ gio꞉ man a꞉no꞉ wa꞉ka halale a꞉kudu ha꞉na꞉melea꞉ki, Ya꞉su Alana꞉ wi amio꞉ niliyo꞉ to a꞉no꞉ wa꞉ka halale so꞉lo꞉l.  
\v 2 Nilo꞉ Ya꞉su Alana꞉ wi amilo꞉ to ko꞉lo꞉ fanda wido꞉ a꞉no꞉ giliyo꞉ asulo꞉.  
\v 3 \x - \xo 4.3 \xt 1Tes 5.23, 1Bid 1.16\x*Godeya꞉lo꞉ asulab aumbo꞉ we. Gio꞉ Godeya꞉ eno꞉le dowaki, digalo꞉ dowa꞉bi. Gio꞉ uwo꞉wo꞉ dia꞉so꞉bo.  
\v 4 \x - \xo 4.4 \xt 1Kol 6.13\x*Gio꞉ malilo꞉ man o꞉lia꞉ digalo꞉ man a꞉no꞉lia꞉yo꞉ kudu ha꞉naki, ginin asulo꞉ a꞉no꞉ tilidowa꞉bi.  
\v 5 Ha꞉la꞉ kaluka꞉isaleya꞉lo꞉ Godeyo꞉ mo꞉asulaki, inido꞉ uwo꞉ dia꞉no꞉ asulab aundo꞉ kudu ha꞉na꞉sen o꞉leaumbo꞉ giliyo꞉ dimida꞉so꞉bo.  
\v 6 A꞉la꞉gakiyo꞉, giliyo꞉ Keliso gao nowo꞉mbo꞉wo꞉ mogago꞉wo꞉ mo꞉dimidaki, a꞉la꞉ta꞉ga꞉ inin ingayo꞉ afa dia꞉so꞉bo. Kalu abeyo꞉ man mogago꞉lo꞉ dimidab a꞉no꞉ Gode eyo꞉ e falasila꞉ma꞉ib a꞉la꞉bo꞉ niliyo꞉ tamina hagugu sio꞉.  
\v 7 \x - \xo 4.7 \xt Hibu 12.14, 1Bid 1.15-16\x*Mo꞉wo꞉ Gode eyo꞉ nio꞉ man mogago꞉ dimidama꞉ki ho꞉ido꞉ma. Eyo꞉ nio꞉ man digalo꞉ kudu ha꞉na꞉sa꞉ga꞉, malilo꞉le doma꞉ki ho꞉ido꞉.  
\v 8 \x - \xo 4.8 \xt Luk 10.16, 2Kol 1.22\x*A꞉la꞉fo꞉ko꞉lo꞉ kalu abeyo꞉ to nilo꞉ wido꞉l welo꞉ gola ba꞉dab a꞉no꞉, kaluwa꞉ towo꞉ ko꞉lo꞉ gola ba꞉daba. Malilo꞉ Mama gimo꞉lo꞉ dimia꞉sen Gode E ko꞉lo꞉ gola ba꞉dab.   
\p
\v 9 \x - \xo 4.9 \xt Yo꞉n 13.34\x*Gode eyo꞉ gegeledo꞉ ha꞉fo꞉ disa꞉ma꞉no꞉ man a꞉no꞉ gininbo꞉wo꞉ wido꞉ ko꞉lo꞉, nio꞉ to a꞉no꞉ wa꞉ka sa꞉sa꞉lima꞉no꞉wo꞉ aundo꞉ma.  
\v 10 Hendele, gio꞉ Masedonia hen amilo꞉ nao o꞉lia꞉ nado o꞉lia꞉ ko꞉lo꞉ Keliso sab a꞉no꞉ tambomo꞉wo꞉ ha꞉fo꞉wo꞉ disa꞉la꞉sen. Ko꞉sega ni nao i, gio꞉ man a꞉no꞉ wa꞉ka halale a꞉kudu ha꞉na꞉melea꞉kiyo꞉, niliyo꞉ gimo꞉wo꞉ halale so꞉lo꞉l.  
\v 11 \x - \xo 4.11 \xt A꞉fe 4.28\x*Gio꞉ ha꞉salo꞉ mesa꞉no꞉ man a꞉no꞉ ko꞉lo꞉ kudu ha꞉na꞉bi. Gio꞉ kelego꞉ noma꞉lo꞉ dimidabo꞉ mo꞉sa꞉laki, kelego꞉ go꞉no꞉ndo꞉wo꞉ dinafa tilidowa꞉bi. Gio꞉ bo꞉sulakima, go꞉no꞉n dagiya꞉ nanogo꞉ dimida꞉bi. Nililo꞉ tamin amilo꞉ gimo꞉lo꞉ sio꞉ o꞉leaumbo꞉ wa꞉ka a꞉so꞉lo꞉l.  
\v 12 Gio꞉ a꞉la꞉dimidalikiyo꞉, ha꞉la꞉ kaluka꞉isaleya꞉yo꞉ gililo꞉ man dimido꞉ a꞉no꞉ ba꞉da꞉sa꞉ga꞉, ge hendele digalo꞉ kalu a꞉la꞉asuluma꞉ib. A꞉la꞉ta꞉ga꞉ gio꞉ nowo꞉mbo꞉ asuwa꞉foma꞉kiyo꞉ mo꞉asuluma꞉ib. \fig Gio꞉ ha꞉salo꞉ mesa꞉no꞉ man a꞉no꞉ ko꞉lo꞉ kudu ha꞉na꞉bi.|alt="Villagers going about their day" src="BA03020BW.tif" size="col" copy="used with permission of Louise Bass (SIL)" ref="4.11" \fig*   
\s1 Ya꞉su amilo꞉ tilida꞉da꞉sa꞉ga꞉lo꞉ sowo꞉ kaluka꞉isale  
\p
\v 13 Nao gio꞉, kaluka꞉isale sowab amio꞉, ha꞉la꞉ kalu iliyo꞉ misio꞉ mo꞉ba꞉ba꞉no꞉lo꞉b a꞉lakiyo꞉ nofolo꞉wo꞉ alan dowa꞉sen ko꞉lo꞉, gio꞉ a꞉la꞉bo꞉ dimidabena꞉kiyo꞉, sowab kaluka꞉isale amilo꞉ fa꞉la꞉doma꞉ibo꞉, gimo꞉wo꞉ fanda sa꞉ma꞉nigo꞉l.  
\v 14 \x - \xo 4.14 \xt Lom 14.9, 1Kol 15.3-4,12\x*Nililo꞉ tilidabuwo꞉ we. Ya꞉suwo꞉ sowa꞉sa꞉ga꞉yo꞉, a꞉dasilia꞉gane ko꞉lo꞉, kaluka꞉isale abeyo꞉ eya tilida꞉da꞉sa꞉ga꞉lo꞉ sowa꞉lab a꞉no꞉, Gode eyo꞉ Ya꞉su o꞉lia꞉ tililia꞉ mia꞉ib.  
\v 15 \x - \xo 4.15 \xt 1Kol 15.51-52\x*Ya꞉su Alana꞉lo꞉ to wido꞉wo꞉ we, niliyo꞉ gimo꞉wo꞉ sa꞉ma꞉nigo꞉l. Alando꞉ yab ho꞉len a꞉namio꞉, kaluka꞉isale ni mela꞉no꞉lo꞉ o꞉sab we tamin amio꞉ mo꞉ha꞉na꞉ib. Sowo꞉ kaluka꞉isale i a꞉no꞉ ko꞉le ha꞉na꞉ib.  
\v 16 Ya꞉su Alan e Hebene a꞉la꞉ta꞉ga꞉ yakiyo꞉, eyo꞉ towo꞉ halale ho꞉idaki, ma꞉mul misa꞉ kalu eyo꞉lo꞉ towo꞉ sa꞉laki, a꞉la꞉ta꞉ga꞉ Godeya꞉ belo a꞉no꞉ folalikiyo꞉, Ya꞉suwo꞉ a꞉na tima꞉ib. A꞉la꞉ta꞉ga꞉ kaluka꞉isale e amilo꞉ tilida꞉da꞉sa꞉ga꞉lo꞉ sowo꞉ i a꞉no꞉, ko꞉le dasilia꞉ga꞉ ha꞉na꞉ib.  
\v 17 A꞉la꞉ta꞉ga꞉yo꞉ Gode eyo꞉ kaluka꞉isale mela꞉no꞉lo꞉ o꞉lab nio꞉lo꞉ dia꞉ga꞉, ni o꞉lia꞉ sowo꞉ dasilia꞉gane a꞉no꞉lia꞉yo꞉ kola꞉ usa kegea꞉sa꞉ga꞉, Alano꞉ akin amio꞉ ua galilia꞉ib. A꞉la꞉go꞉ko꞉lo꞉ nio꞉ Alan o꞉lia꞉yo꞉ mela꞉no꞉ mela꞉no꞉ mela꞉ib.  
\v 18 A꞉la꞉dimidama꞉ib ko꞉lo꞉, to we gegelebo꞉ asulo꞉wo꞉ halaido꞉ doma꞉ki sa꞉la꞉lubi.   
\c 5  
\s1 Ya꞉su mia꞉nigab a꞉no꞉ dimidalia꞉ga꞉ yasilima꞉no꞉  
\p
\v 1 Nao i, gio꞉ Ya꞉sulo꞉ mia꞉no꞉ ho꞉len o꞉lia꞉ ofa꞉si o꞉lia꞉yo꞉ a꞉na fa꞉la꞉doma꞉ika꞉ a꞉la꞉bo꞉ gimo꞉wo꞉ mo꞉sa꞉sa꞉lima꞉no꞉.  
\v 2 \x - \xo 5.2 \xt Madi 24.42-43, 2Bid 3.10, Kala 3.3\x*Mo꞉wo꞉ Alan e yakiyo꞉, afalo꞉ dian kalu ko꞉lo꞉ nululo꞉ yan au mia꞉ib a꞉la꞉bo꞉, gio꞉ o꞉ma asulufo꞉lab.  
\v 3 \x - \xo 5.3 \xt Madi 24.39, Luk 21.34-35\x*Kaluka꞉isaleya꞉ sa꞉lakiyo꞉, “Nio꞉ hida꞉yo꞉wo꞉ aundo꞉ma, ga꞉li so꞉l,” a꞉la꞉sa꞉la꞉li sen amio꞉, ilo꞉ mogagila꞉ma꞉no꞉wo꞉ wigibole a꞉naka fa꞉la꞉dowaki iligila꞉ma꞉ib ko꞉lo꞉, ga alela꞉sen a꞉ma꞉lo꞉ nagalo꞉ fa꞉la꞉dowan au fa꞉la꞉doma꞉ib ko꞉lo꞉, kaluka꞉isale a꞉no꞉ mada mo꞉yamisuluma꞉ib.   
\p
\v 4 Ko꞉sega nao i, gio꞉ sololiya saba ko꞉lo꞉, ho꞉len a꞉no꞉ fa꞉la꞉dowalikiyo꞉, gio꞉ afalo꞉ dian kalu yab amilo꞉ iligan aumbo꞉ mo꞉iligima꞉ib.  
\v 5 \x - \xo 5.5 \xt Lom 13.12\x*Gio꞉ tambo ho꞉lena꞉ so꞉wa ko꞉lo꞉ ho꞉len usa a꞉lab. Nio꞉ sololi o꞉lia꞉ nulu o꞉lia꞉ma꞉ so꞉wama.  
\v 6 A꞉la꞉fo꞉ko꞉lo꞉ kalu nolo꞉ ko꞉lo꞉ alifo꞉lab o꞉leaumbo꞉, nio꞉ mo꞉dimidama꞉niki. Ko꞉sega nio꞉ sikaga siliki, ninina꞉ma꞉la꞉yo꞉ tilidoma꞉niki.  
\v 7 Mo꞉wo꞉ alilan o꞉lia꞉ aluna꞉ ho꞉no꞉ nakilo꞉ no꞉nolan man a꞉no꞉lia꞉yo꞉, nulu a꞉na dimidan.  
\v 8 \x - \xo 5.8 \xt Ais 59.17, A꞉fe 6.14,17\x*Ko꞉sega nio꞉ ho꞉lena꞉ so꞉wa ko꞉lo꞉, ninina꞉ma꞉la꞉yo꞉ tilidoma꞉niki. Kaluwa꞉lo꞉ bio꞉ ta꞉lian aumbo꞉, niliyo꞉ nol o꞉lia꞉yo꞉ ha꞉fo꞉ disa꞉laki, tilidabuwo꞉ dinafa ta꞉lia꞉niki. A꞉la꞉ta꞉ga꞉ Gode eyo꞉ nio꞉ hendele gasilia꞉ib ko꞉lo꞉ niliyo꞉ a꞉no꞉ ko꞉lo꞉ asula꞉liki yasilima꞉niki. Kaluwa꞉ misa꞉yo꞉ galalakilo꞉ alo sa꞉ga꞉lan o꞉leaumbo꞉, niliyo꞉ asulo꞉ ko꞉lo꞉ halale ta꞉lia꞉niki.  
\v 9 Gode eyo꞉ nio꞉ ene kulufa꞉yo꞉wa꞉lo꞉ falasila꞉ma꞉no꞉ a꞉no꞉ dima꞉ki da꞉feyo꞉ma. Ko꞉sega Gode eyo꞉ nio꞉ gasiliakiyo꞉, Alan Ya꞉su Kelisowa a꞉la꞉ta꞉ga꞉ ene mela꞉no꞉wo꞉ nimo꞉ dima꞉ki da꞉fe alifa꞉.  
\v 10 \x - \xo 5.10 \xt Lom 14.8-9, 1Tes 4.14\x*Nio꞉ o꞉salikiyo꞉lo꞉, sowalikiyo꞉lo꞉ Ya꞉su o꞉lia꞉ mesea꞉kiyo꞉, Ya꞉su e ni asuwa꞉taki sowo꞉.  
\v 11 A꞉la꞉fo꞉ko꞉lo꞉ gio꞉ o꞉gdo꞉ dimida꞉lab o꞉leaumbo꞉, gegelebo꞉ asuwa꞉takiyo꞉, asulo꞉wo꞉ halale alita꞉lubi.   
\s1 Asuluma꞉no꞉ to wido꞉  
\p
\v 12 Ni nao i, kaluka꞉isale gilo꞉ halaido꞉ asuwa꞉tab o꞉lia꞉, gili sa꞉s amilo꞉ bo꞉fo꞉lowan o꞉lia꞉, gi ko꞉lo꞉ hagugakilo꞉ digalo꞉ tolo꞉ sa꞉la꞉lab i a꞉no꞉, giliyo꞉ asulaki, a꞉ma꞉ ha꞉ga dowa꞉bi.  
\v 13 Iliyo꞉ nanog halaido꞉ dimidabo꞉lo꞉b a꞉la꞉bo꞉, giliyo꞉ dinafa asula꞉sa꞉ga꞉, imo꞉wo꞉ ha꞉fo꞉wo꞉ disa꞉lakiyo꞉, ili ha꞉ga mada dowa꞉bi. A꞉la꞉ta꞉ga꞉ gio꞉ gegelebo꞉ ha꞉sa dowa꞉bi.   
\p
\v 14 \x - \xo 5.14 \xt 2Tes 3.6,11\x*Ni nao i, gio꞉ kaluka꞉isale bo꞉sulakilo꞉ sab imo꞉wo꞉ hagugo꞉wo꞉ sa꞉la꞉bi. Kaluka꞉isale tagilakilo꞉ sab i a꞉no꞉ halale alitaki, towo꞉ sa꞉la꞉lubi. Kaluka꞉isale halaido꞉lo꞉ mo꞉sab a꞉no꞉ asuwa꞉ta꞉bi. A꞉la꞉ta꞉ga꞉ kaluka꞉isale tambomo꞉wo꞉ ha꞉sa dowa꞉bi.  
\v 15 \x - \xo 5.15 \xt Lom 12.17, 1Bid 3.9\x*Kaluka꞉isale nolba꞉yo꞉ man mogago꞉lo꞉ dimidab o꞉mo꞉wo꞉ wa꞉deabena꞉ki, gio꞉ ka꞉la꞉lubi. Ho꞉leno꞉ tambo gegelebo꞉lo꞉, ha꞉la꞉ kalumo꞉wo꞉lo꞉, tambo ha꞉fo꞉wo꞉ disa꞉la꞉lubi.   
\p
\v 16-17 \x - \xo 5.16-17 \xt Fili 4.4\x*Gio꞉ ho꞉leno꞉ tambo sagala꞉lubi. Godemo꞉lo꞉ dulugu sa꞉la꞉i ha꞉na꞉mela꞉no꞉wo꞉ eda꞉so꞉bo.  
\v 18 \x - \xo 5.18 \xt A꞉fe 5.20\x*Gilo꞉ amio꞉ kelego꞉ ko꞉li ko꞉lilo꞉wo꞉ fa꞉la꞉dowalikiyo꞉, Godemo꞉wo꞉ mada o꞉m a꞉la꞉sa꞉la꞉lubi. Gio꞉ Ya꞉su Kelisowa dowo꞉ ko꞉lo꞉, Gode eyo꞉ gio꞉ man o꞉leo꞉ngo꞉wo꞉ ko꞉lo꞉ dimidama꞉ki asulab.  
\v 19 \x - \xo 5.19 \xt A꞉fe 4.30\x*Mamaya꞉lo꞉ nanog dimidama꞉no꞉ a꞉no꞉ de o꞉ngo꞉ ko꞉lo꞉ dalila꞉so꞉bo.  
\v 20 Kaluka꞉isale abeyo꞉ Godeya꞉ wiya a꞉la꞉ta꞉ga꞉ dinali sa꞉lalikiyo꞉, gio꞉ to a꞉no꞉ da꞉ba꞉no꞉wo꞉ mo꞉bea꞉so꞉bo.  
\v 21-22 \x - \xo 5.21-22 \xt 1Yo꞉n 4.1\x*To sa꞉lab a꞉no꞉ tambowo꞉ aloba꞉da꞉sa꞉ga꞉, nafa dowab a꞉no꞉ kudu ha꞉naki, man mogago꞉ a꞉no꞉ tambo tinia꞉li ha꞉na꞉lubi. \fig Giliyo꞉ Godemo꞉wo꞉ dulugu sa꞉la꞉lubi.|alt="Praying" src="44_Ac_12_03_RG_gr.tif" size="col" copy="© Sweet Publishing http://sweetpublishing.com, licensed under a CC: BY-SA 3.0 Unported licence." ref="5.17" \fig*   
\p
\v 23 \x - \xo 5.23 \xt 2Tes 3.3\x*Ha꞉salo꞉ dowan Gode eyo꞉ gio꞉ malilo꞉le tambo ta꞉fo꞉ melea꞉ki, dulugu so꞉lo꞉l. Gode eyo꞉ gili mela꞉no꞉ mama o꞉lia꞉ asulo꞉ o꞉lia꞉, a꞉la꞉ta꞉ga꞉ do꞉mo꞉ o꞉lia꞉ma꞉yo꞉ man mogago꞉wo꞉ mo꞉dimidama꞉ki ta꞉fo꞉ ha꞉na꞉la꞉ga꞉, Alan Ya꞉su Kelisolo꞉ yab amio꞉, hala dofo꞉leno꞉ mo꞉bo꞉ba꞉ki, dulugu so꞉lo꞉l.  
\v 24 Gode gilo꞉ da꞉fe alita꞉lab a꞉ma꞉yo꞉, ene dinali sio꞉ a꞉no꞉ hendele dimida꞉sen ko꞉lo꞉ eyo꞉ mada dimidama꞉ib.   
\p
\v 25 \x - \xo 5.25 \xt Kolo 4.3, 2Tes 3.1\x*Ni nao i, giliyo꞉ nio꞉ Godemo꞉ dulugu sa꞉la꞉biyo꞉.  
\v 26 Gao nol o꞉lia꞉ sagale alitakiyo꞉, ebean aumbo꞉ mimila꞉bi.\f + \fr 5.26 \ft Ili man amio꞉, Keliso ao nowo꞉ galilia꞉ga꞉ sagalakiyo꞉, gidan o꞉le a꞉gakiyo꞉, imilise mimilo꞉. A꞉la꞉ta꞉ga꞉ adowo꞉lo꞉ a꞉la꞉dimida꞉sen.\f*   
\p
\v 27 Alana꞉ wiya iliki, niyo꞉ to halaido꞉ we gimo꞉ so꞉lo꞉l ko꞉lo꞉, giliyo꞉ mo꞉fo꞉s sa꞉sa꞉lo꞉ we, Keliso kaluka꞉isale tambomo꞉wo꞉ agele mea꞉bi.   
\p
\v 28 Nili Alan, Ya꞉su Kelisowa꞉ ene ha꞉fo꞉ disa꞉lan man a꞉no꞉ gi o꞉lia꞉ dowa꞉biyo꞉.