\id ROM  - Barai NT and OT portions [bbb] -Papua New Guinea 2006 (DBL -2014) 
\h ROMENI 
\toc1 ROMENI 
\toc2 Romeni 
\toc3 Rom 
\mt1 ROMENI  
\imt1 Romenido Vua Amure  
\ip Buki ige fu Forudo fasi ije fu isoena e Godi ma vierafevo ije bu sidove Romu ijia kariva ije nijiaema ijene. Foru fasi ige fu uria sidove Koriniti fino ijia fu isoe areme rade abe Fibi bara be Godi ma vierafemo ije mamoga fure abena sidove Romu ijia vae. Ro sidove ije fu aesakae Itari ijia are ije e Romuko ijiebuo e ireobo aesakae samuamo e Sisa fu fino ijene. Ro sidove ije fuka ma ireobo. Foru fu vierafe fuka e ijene mukoreigia kuariana nijasiaga bu vierafero e boeje noka ise revo. Ro vame maeje nuvuone no kenoevo ijia bu no karaunuokiro nobe ijiege vierafeke. Ro nome Jesu Kuraesi ma vierafekuva Godire no kame ise nuvuone ije guona areke no e fuone redufuo. Foru fu vierafe fuka va sidove Romu ijia e ije ma vierafevo ijene ifejiana vua maeje nijasiaga bu una daro abekiro fu ije vierafe.  
\iot Romeni ijia vua binobino fu isoema ijeja -  
\io1 1:1-17 Foru fasi ige fu irerefuo isoema fu ijene kuariana nijasiaema ijene  
\io1 1:18–3:20 Bara ro baru bu daro buone ijia giriesakuva bu izege ma karivako ije abekuva baki fu ijene kuariaema ijene.  
\io1 3:21–4:25 Vame ma karivako ije abedufuo ije fu ma vierafevo ijene.  
\io1 5:1–8:39 Noka Kuraesina besu fuina maziena vame iviaeko ma karivako ijia ifenana kevadufuo ijene.  
\io1 9:1–11:36 Maza rade Godi fu e Isurero ije kumega bu una fu ma vierafedufuo ijene.  
\io1 12:1–15:13 E Godi ma vierafevo vame bu karivo ijene.  
\io1 15:14–16:27 Foru fu e gue anadiana vua fuone ije kuaena furima ijene.  
\c 1  
\s1 Foru fasi fu isoena e Romuko ije nijiaema ijene  
\p
\v 1 Erafano, fasi ige e Foru nare isoena e boeje ja are Romu guove ijia kariva ije ja nijiana anadiave. Naeje na e be Jesu Kuraesido i menoevo ro fune Godire na umui datei. Ijadufuo nare e Afasero fuone rena e boeje vua fuone maeje abe kuarianoeve.   
\p
\v 2 Ro Godido vua maeje iviama na abe kuarianoejo ije fune fure korufuo isuibe e vua fuone vierafena kuaevo ijiebuo oe ijia vierafejiamo bune vua ije abe e gue kuariae. Ro kuke bune abe buki akae ijia isoe.  
\v 3-4 Ro vua maeje fu kuaruema ije fu Fari fuone ijadufuo kuarue. Fari fuone e Jesu Kuraesi fu E Ireobo nuvuone ro fuje bu ma ema ijiebe ume igia biete ro kuke fu Kini Devidido agane ijia uinuve ruae. Ro fu baronemoga Godire Kavene Akae ijadufuo duvado ijia kuamo fu una urimoga none gae. Ijadufuo no ma vierafega fuje fu ma Godido Fari ka e daroki ijene.  
\v 5 Jesu ire maeje fu none rema ijia fune na umui datei ijadufuo na fuone akaegue ijia vua fuone abe oenoeve. Na vua fuone abe e boeje kuariaga e fuone aesakae igia kariva ije bu Jesu ma vierafena vua fuone irinake.  
\v 6 Ro e boeje ja sidove Romu ijia kariva ije jadua fune Godire karauniamo jane una Jesu Kuraesido e rei.   
\p
\v 7 Ijadufuo na fasi ige isoena e ije Godi fu oetuamo ja are Romu ijia kariva ije nijiave. Na vierafe naka Godi Asoe nuvuone ro E Ireobo Jesu Kuraesi baname isoena kiaga bu maza boeje ja marejiakinu ifejiaga ja kafaena karinoeke.   
\s1 Foru fu baname isoena una Godido oemarema ijene  
\p
\v 8 Naka joefuo Jesu Kuraesido ive ijia una Godido oemareke. Ijadufuo maeje jone izege ja Jesu Kuraesi ma vierafevo ije e are irore boegia kariva ije bune fie furi.  
\v 9-10 Ro Godi fune izege na oe none ijiakuma Fari fuone ijadufuo vua maeje abena e gue kuariavo ije fune vierafei. Ro kuke na maza boeje joefuo baname isoevo ije fune gie. Ijadufuo na vierafe na baname isoena Godi kuaga fure vame none amaeriga na rade una vua ja giake.  
\v 11 Na ireobo vierafe naka una vua ja ifejiana Godi kuaga fu Kavene Akae ijadufuo daro maeje bino vajiaekina ja daro abedufuo.  
\v 12 Ro vua ige na kuaevo ijadufuo maeje na vierafero noka ifejanamiga nuvuone no ma vierafevo ije buka gikikimana rekiro na ije kuariave.   
\p
\v 13 Ro erafano, na vua ige kuariako fiefo. Maza boeje naka una vua ja giakiro vierafe rove buka ire binobino ijiebe vame none bijuve. Na vierafe na izege na ude e Jiusi baki ije ifejiavoga bu Jesu ma vierafeva ijiege naka una kuke e Romu ijia kariva ije ifejiaga budua Jesu ma vierafeke.  
\v 14 Godi i ije fune na miema ijadufuo na e boeje vua fuone maeje abe kuariakinu nijasiake. Ijadufuo na e ije bu sidove ro taraebo ijia kariva ije nijasiake. Ro kuke na e ije bu vua mukoe vierafevo ijiakiro e ije vua isema vierafenoejo ije nijasiake.  
\v 15 Ijadufuo na oe none ireobo ije na vierafe naka Godido vua maeje dabe e ije ja sidove Romu guove ijia kariva ije kuariakiro vierafe.   
\s1 Godido vua maeje fuka ma daroki  
\p
\v 16 Na ma vierafega Godido vua maeje fuka ma daroki. Ijadufuo e Jiusi ro e Jiusi baki ije erare fu vua ije mukoreigia fiena una Jesu ma vierafekuma Godi fuka e ije karauniake.  
\v 17 Fune Godido vua maeje ijare no ifejuona nijasuoga no Jesu Kuraesi irere fu nuvuefuo rema ijene ma vierafekuva fu karaunuoga no maturaeke. Ijadufuo maeje vua ijadufuo ije bune isuibe buki akae ijia ijiege isoe. Fu kuae,  
\q1 E be erare fu Jesu ma vierafemoga Godi fu kenujaema e ije fu rade ma fivakono kuae.   
\s1 Godi fu izege e ume igia ise renoejo ije kena isekafiamo ijene  
\p
\v 18 E boeje ume igia kariva ije buka ise boeje renoevo ijadufuo ise ijare Godi vame maeje fu remo ije fuka bijukurame. Ijadufuo Godi fu saove ijia ziemo ijadufuo fuka e ume igia ise renoejo ije kame isekafiame.  
\v 19 Ro Godi e ije fu kena isekafiamo ijadufuo maeje vua fuone maeje bu fiedufuo ije fuka samadukua bune vierafe. Ro kuke fune Godire korufuo vua fuone abena ka mukoreigia samadiremo bune gana vierafei. Rove buka naebe mukoreigia mimatana kenoeve.  
\v 20 E boeje bu izege daro fuone ije gakuva baki ro bume ire boeje binobino fu amaeriaema ije giavo ijia bu vierafega Godi fuka ma e daroki. Ijadufuo rade fu una ise buone ke mazie giakiro ruakuma bu izege vua maeje kuarakuva baki.   
\p
\v 21 E ije Godi bune vierafe ijadufuo bu fu dabe aroekinu oemarejabitie fuka mareke. Rove buka fu ijuonevo ijadufuo nigofo buone buka mukoreigia vierafenoevo baki ro buka titutema ijia oenoeve.  
\v 22 Bu kuae, None mukoreigia vierafena kenoevono kuae rove ije buka mukoreigia kenoevo baki.  
\v 23 E ije bu Godi maeje fu maza boeje ijia fivako ije buka ijuonei. Rove bu una ire binobino e umui ijia amaeriaeva ije buone mamekanu baname isoekinu aroriave. Bu ire ije bu emabe kena fanu ro ume igege amaeriaeva ijene kame aroriakinu kafiafiriave.   
\p
\v 24 E ije buka ire ise ijene reganaro Godi buka ijuonei. Ijadufuo Godi fu bu gamemarekoga e ije bu una ire ka ma ise ije bu oe buone ijia vierafenoevo ijene renoevo. Bu ijiege renoekinu una kairafa ijena bukiki ire ise jaeki ijene renoevo.  
\v 25 Bu Godi maeje bu ijuonegaro bu una ire kufui ije ma vierafei. Bu una ire ije Godi fu amaeriaema ije kame naeme aroriagaro Godi maeje fu ire boeje amaeriaema ije bu gana arei.  
\v 26 E boeje bu Godi maeje bu ijuemana una vame ise ijieki ijene renoe. Ijadufuo Godi fu bu giamemarekoga bu una vame ise binobino bu jaediadufuo ijia renoevo. Ro bara ije bu una baru ijena fudaenamivo baki ro buve una bara bukiki fudaenamivo.  
\v 27 Ro kuke e fari ije budua bu bara ijena fudaenamivo baki ro buve una e fari bukiki fudaenamivo. E fari ije bu vame ise ije bu jaediadufuo ijia renoevo ijadufuo buneka korubuo vajae buone kame arafiriavo.   
\p
\v 28 Godi fu giaga e boeje buka naebe vame maeje fu vierafema ijia renoevo. Ijadufuo fu arekoga buka una ire ma ise ijene renoevo.  
\v 29-31 Bu ijiege revo ijadufuo nigofo buone buka ire ise boeje renoekuae vierafei. Bu ire ise e kairafa ijiebuo sinuome giana oetuakinu ro vajae surive ijadufuo ire ise ije ireobo vierafevo. Ro kuke bu e bino be ire gue revone buka giana mauike buesina kuaekinu ro e kaniavo. Ro buka e gue ziegafiakinu vua kufui kuaekinu ire ka ma ise ije renoekuae vierafevo. Ro kuke bu kairafa buone ijene madiakinuro Godi buka ijuonevo. Ro kuke buka kairafa gue kiavo jaeje jaka ise renoevono kiakinu buka aroekarana ive buone kame ajiavo. Ro maza boeje buka ire ise iviaeko bino rekuae vierafekinuro orafa buone iriniavo baki. Ro vierafe buone fuka ma ise ijiaru ro kuke bu Godido akae boeje buka ma vierafena ijia kenoevo baki. Ro bu kairafa buone bu mukoreigia oetuakinu ro kuke giana buone oefiane abevo baki.  
\v 32 Bu Godido akae ije fu kuae erare ire ise ijieki ije rekuma fuka baronekono kuaema ije bune vierafei. Rove buka faememarena una ise binobino ije renoevo. Ro kuke bu giaga e gue bu ise bino revone bu kiavo ije fune maremano kiavo.   
\c 2  
\s1 Godi emabuo ise ije fu kena mazie giamo ijene  
\p
\v 1 Ijadufuo erafano jade karina e guebuo ise bu revo ije giana kiavo. Ijadufuo maeje adua aka besu ijiege ise renoeno. A ijiege ise buone giana kiamo ije aneka koro dabe isekafanamime. Ijadufuo erare a ijiege renoeno ije nika arene ijadufuo maeje Godi fu una ruakuma a izege una fu kuarakuma baki.  
\v 2 No vierafega fune Godire fuosukua daro namo ijadufuo fu e ije bu ire ise ijieki ije revo ije kena isekafiamo ije funeka marei.   
\p
\v 3 Erafano ja e guebuo ise bu revo ije giana kiave rove jadua ja ise besu ije renoejo ijadufuo ni giana arefo. Ro ja uria faememarena ijiege renoekuva ja maza ijia Godi fu una ruomo ije ja izege subinaena sauikuva baki.  
\v 4 Ja Godi fu e ma rejiakinuro oe vafaena naebe migegire kena isekafiamo ije ja bite jaka isediavo. Fu vierafe jaka una oe kuderiana fu ma vierafekiro fu ijadufuo ijiege reme.  
\v 5 Rove nigofo jone buka gireva ijadufuo jaka naebe una oe kuderiana Godido ruakuae vierafe. Ijadufuo na vierafe rade Godi fu una e boeje ijiebuo ise kena besu enafuna mazie giamo ijia ja fuka kena urukeigia isekafiake.  
\v 6 Ijadufuo maeje maza ije Godi fu una ruakuma eranebe bu vame fu vierafema ijia kenoeva ije fu ire ma bino una ve vajiake. Ro eranebe bu buone vierafeva ijia kenoeva ije fu kame isekafiake.   
\p
\v 7 Ijadufuo e gue bu vierafe buka maza boeje mimatana vame maeje ijiaru kenoekuae vierafei. Bu vierafe buka kairafa buone ro e binobino ije ifejiaga Godi fu bu aroriana nidosiakiro bu ije vierafei. E ije ijiege kenoejo ije Godi fu buone oemaremo ijadufuo fu kiaga bu maza rade ma karivake.  
\v 8 Ro e gue bu vame maeje buka ijuonena una buone vierafeva ijia kenoekinu ise binobino renoevo. Ijadufuo e ije bu ijiege renoejo ije Godi fuka bu mukoreigia ziegafiana kame isekafiake.  
\v 9 Godi fuka rade e boeje e Jiusi ro e Jiusi baki ije eranebe bu ume igia ise renoejo ije fuka uria kame isekafiaga bu isejavaekinu vajae fiane abeke.  
\v 10-11 Ro eranebe bu vame Godi fu oemaredufuo ijia kenoevo ije Godi fune giamo ijadufuo fu rade aroriana kiaga bu fuone sanaema ijia kafaena karinoeke. Ijadufuo maeje Godi fu e boeje binobino ije fuka kena besu enafuna nana giamo.   
\p
\v 12 Ro e Jiusi baki ije Godido akae naebe abeva bu ise renoevo ije Godi fuka uria ise buone ijadufuo kame isekafiake. Ro e Jiusi ije akae abeva bu ise renoevo ije Godi fuka uria rade akae fuone ijia nuvena ise buone ije kena mazie giake.  
\v 13 E ije bu vierafero bu Godido akae ije mukoreigia fiena vierafekuva Godi fuka bu oemarejiana kaenamiaga bu una e fuone rekiro bu ijiege vierafe. Rove ije fu baki. Ro bu Godido akae ije fiena abe mimata kenoekuva ijare Godi fu bu kena una vame fuone maeje ijia uniake.   
\p
\v 14 E Jiusi baki ije bu Godido akae ije bu naebe abei. Rove maza gue ire bino bu renoevo ije Godi fu fina giaga bune marei.  
\v 15 E Jiusi baki ije bu ire be Godido akae ijieki ije fu oe buone ijia namo ijadufuo buka vame maeje ijia kenoeve. Ro ire ijeja vierafe maeje ijare oe buone ijia namo ijadufuo ire ijare vame ma ro ise ije nijasiako bu ijia kenoeve.  
\v 16 Ijadufuo Godido vua maeje na kuariavo ja fieva ije ire boeje bu maza ije Godi fu una ruomo ijia reke. Godi fu maza ijia Jesu Kuraesido duvado ijia e boeje ijiebuo oe ije besubesu kena mazie giake.   
\s1 E Jiusi ijiakiro Godido Akae ijene  
\p
\v 17 Ro iviama vua ige na e Jiusi ja kuariakuvejo fiefo. Ja kojo ja kuae nono e Jiusino kuaeve. Ja maza boeje ja Godido akae ijia bijuana karikinu kuae, Nono Godido nidua ijia none vame maeje ijia kenoedo Godi fuka no guona oemarekono kuae.  
\v 18 Ja vame izege ja Godido vierafe ijia kenoedufuo ije jane Godido akae ijia dana vierafei. Ijadufuo ja vame maeje ja kenoedufuo ije jane mukoreigia vierafei.  
\v 19 Ijadufuo jane jare e ije bu naebe vierafeva ije kaenamiaga bu una Godido ruovo. Ro kuke e ije bu titutema ijia kariva ije jare vame sanaema ije abe miavo.  
\v 20 Ro kuke maza boeje jare e ije bu naebe mukoreigia vierafena kenoevo ijiakiro e ije bu uria totenamivo ije nijasiavo. Ja vierafero Godido akae ije jane mukoreigia abei ijadufuo vua boeje ja kuaevo ije jane vua ma ijiaru kuaenoevoro ja ijiege vierafei.   
\p
\v 21 Jaka vua maeje e gue nijasiavo rove ja irerefuo uria ise binobino renoeve? Ja e gue kuariana kiavo jade iniemevono kiavo rove jadua jabe iniemevo?  
\v 22 Ja e gue kuariana kiavo jade e guebuo bara turavono kiavo rove jadua jabe e guebuo bara turavo? Ja e bino bu godi binobino ume igia amaeriana buone baname isoekinu aroriavo ije jaka kuriaerekinu ziegafiave. Rove jadua jabe Godi binobino e umui ijia amaeriaeva ijiebuo are ijia aruna ire bino iniemevo?  
\v 23 Ja kuae, No Godido akae ije none mukoreigia fiena abevano kuaevo. Rove jadua jabe Godido akae kena tuasekinu ive fuone dabe arafirivo?  
\v 24 Godido akae ije bu isuibe isoeva ijia fu kuae,  
\q1 E Jiusi ije jare vame ise binobino revo ijadufuo e Jiusi baki bu ije giana una vua ise binobino Godisina kuaevono kuae.   
\p
\v 25 Ja Godido akae ije mukoreigia iriniakuva surive jone bu kaniaufuna nuga naeva ije fune marei. Ro ja akae ije ja naebe mukore iriniakuva na vierafe nuga ije bu naejiaeva ije maeje fuka baki.  
\v 26 Ro igia fie, e Jiusi baki be fu vajae fuone ijia nuga be naebe nijae rove fuka Godido akae ije mukoreigia iriniana kenoekuma Godi fuka e ije gana oemareke. Godi fu gana vierafero e Jiusi baki ije fu vajae fuone ijia nuga nijaema igege kenoero fu ijiege vierafeke.  
\v 27 Ijadufuo maza ije Godi fu e boeje ijiebuo ise ije kena mazie giamo ijia fu e Jiusi ije ja vame isema kenoevo ije fu samadukua giake. Ro e Jiusi baki ije bu vame ma ijia kenoeva ije fu kuke samadukua giake. Ijadufuo maeje e Jiusi ije ja vajae surive jone kaniaufuna nuga nae rove Godido akae ije ja mukoreigia irinavo baki. Ro e Jiusi baki ije bu Godido nuga bino bu vajae buone ijia naebe nae rove Godido akae ije buka mukoreigia irinavo.   
\p
\v 28-29 Ijadufuo e ije vajae surive buone kaniaufuna nuga naeva ije bu ma e Jiusi baki. Ro e Jiusi ma ijeja e ije fu Godido Kavene ijare oe fuone ije amaerimo fu una e iviaeko rema ijare. Ijadufuo e ijieki ije bu ema ijiebe aroevo baki ro fu Godire aroemo.   
\c 3  
\p
\v 1 Ro ja vierafe surive buone bu kaniaufuna nuga naeva ije maeje fu irere buefuo remo? Na vierafe e Jiusi ijiebuo vame maeje bu kenoevo ije buka uruvana.  
\v 2 Ro vame maeje be ijeja Godire akae fuone ije abena e Jiusi ije miae.  
\v 3 Ro ja vierafe e Jiusi bino bu naebe Godido vua maeje ma vierafekuva Godi fu izege reke? Jade vierafero e ije bu vua fuone maeje bu naebe ma vierafedo Godi fu ire ma bino fu rade buone rekono kiaema ije fu arekiro jade ijiege vierafevo.  
\v 4 Ro jane vierafe e boeje maza boeje buka vua kufui kuaenoevo. Rove Godido vua kufui kuaemo baki. Ijadufuo maeje buki akae ije bu isuibe isoeva ijia fu ijiege kuae,  
\q1 Maza boeje anika vua ma ijiaru kuaenoega e bu fiene. Ro maza bino e gue bu ise one ijadufuo a kuarakuva ni vua ma ijiaru kuariaga bu fiena areno kuae.   
\p
\v 5 Rove e gue bu kuaevo ise nuvuone no revo ije fuka e gue ifejiako bu Godido vame maeje gana vierafevo. Ijadufuo Godi fu irerefuo ise no reva ijadufuo kame isekafuokono kuaevo?  
\v 6 Bu ijiege kuaenoeve rove na vierafe Godi fu ma ijadufuo no kame isekafuome. Ijadufuo maeje Godido vame fu kemo ije fuka vame ma ijiaru. Ro vua fuone fu kufuikuma Godi fu izege maza rade fina e boegiebuo ise ije kena mazie giake?   
\p
\v 7 Ijadufuo e gue bu kuae, No vua kufui kuaenoekinu ise binobino rekuva ije fune mare. Ijadufuo maeje e gue bu ise nuvuone no renoevo ijia guona migegire vierafero Godido vua ije fu ma ijiaruro bu ijiege vierafevo. Ro vua ijiege bu vierafena kuaenoejo ije fu makuma Godi fu ise nuvuone no reva ijadufuo kame isekafuomo ije fube mare?  
\v 8 E gue bu ijiege vierafevo ijadufuo bu kuaevo, Rono ise binobino rekina no ire ma bino giano kuaevo. Rove vua ijiege bu vierafena kuaevo ije fuka ma baki. E gue bu vierafero na Foru nare vua kufui ijiege vierafena kuaenoevoro bu ijiege vierafena buka vua ise noesina kuaeve. Rove na vierafe eranebe bu noesina ijiege vierafena kuaenoejo ije Godi fu rade kame isekafiake.   
\s1 E be fu erare Godido nidua ijia maturaema baki  
\p
\v 9 Ijadufuo ja izege vierafeve? Ja vierafega e Jiusi noeje none Godido nidua ijia maturae ro e Jiusi baki ije bu baki. Ije na vierafe fuka baki ijadufuo maeje e boeje no Godido nidua ijia no naebe maturae ro noka ise uruvana renoevo. No e Jiusi ije abero e Jiusi baki ije no besu Godido nidua ijia no naebe maturae.  
\v 10 Ro vua ijadufuo ije bune isuibe buki Sami ijia ijiege isoena kuae,  
\q1 E besukua fu naebe Godido nidua ijia maturae.   
\q1
\v 11-12 Ro fu e besu erare Godi ma vierafe ro kuke vame fuone maeje gakiro reremo baki. Ro e boeje buka Godi ijuonena una vame ise ije nuvenoeve. Ro kuke fu besukua be fu erare vame maeje mimatana kenoeno baki.   
\q1
\v 13 Ro itire buone ijia vua bu kuaevo ije buka e guebuo ive kame arafariakinu ro vajae fiane vajiavo. Ro vua buone buka kufui ijiaru kuaevo. Ijadufuo vua buone buka tabare miari igege e gue sakiaga bu oevo.   
\q1
\v 14 Bu kuke itire buone buka ziene vua ijiaru kuaevo.   
\q1
\v 15 Bu vierafe buka migegire e gue kame arafiriaga bu isejavaekinu ro kaniaga bu oekuae bu ije vierafevo.   
\q1
\v 16 Ro maza boeje iziebure bu oenoevo ije buka e gue arafiriaga bu vajae fiane abekinu isejavaevo.   
\q1
\v 17 Bu vame maeje bu kafaena karinoedufuo ije bu vierafenoevo baki.   
\q1
\v 18 Ro kuke bu Godi jumekinu aguaevo baki.  
\m Ro vua ije e ige nore ijiege kuaenoevo ijadufuo Godi fu isuibe ijiege kuaemo bu buki akae isoe.  
\v 19 Ijadufuo Godi fu akae fuone abena e Jiusi boege no nijue. Rove akae fuone noka naebe mukoreigia iriniana kenoeve. Ijadufuo maza ije Godi fu una e boeje ijiebuo ise ije kena mazie giake ruomo ije no izege sauikinu ro vua maeje kuarakuva baki.  
\v 20 E boeje no Godido akae ije noka mukoreigia nuvenoevo baki. Ijadufuo fu erare Godido nidua ijia maturaema baki. Ijadufuo Godido akae ije fu e boeje ise nuvuone no renoejo ije nijasuoga no ijia giana vierafevo.   
\s1 Godi izege fu e karauniamo ijene  
\p
\v 21 Ude no Godido akae ije fiena ijia nuvenoe rove akae fuone fu naebe ifejuomo no Godido nidua ijia maturae. Rove iviama Godi fune una vame be ijia ise nuvuone no renoevo ijia karaunuona kaenamuo una vame fuone maeje ijia unuomo. Godi fu vame ije fu remo ije fune isuibe akae fuone ijia kuarue. Ro kuke fune isuibe e vua fuone vierafena kuaevo ijiebuo oe ijia vierafejiamoga bune kuarue.  
\v 22-23 Godi fu e ije bu Jesu Kuraesi ma vierafevo ijiebuo ise ije fu giana aregaro fu karauniana ke una vame fuone ma ijia uniamo. Ro e boeje nono Godido nidua ijia no binobino baki ijadufuo maeje e boege nono ise boeje renoevo. Ro no uria ise renoekuva nobe Godido sanaema ije gake.  
\v 24 Noeje noka e ise renoevo rove Godi fu Jesu Kuraesido kavuane fu korosi ijia usiaema ijia fume vekinu no ma rejuona karaunue. Areme fu kaenamuona una vame fuone maeje ijia unuome.   
\p
\v 25 Godi fu Jesu Kuraesi kuamo fu e boeje ijiebuo ise ijadufuo barone. Jesu Kuraesi fu korosi ijia baronekina kavuane fuone fu ise nuvuone soejuoke. Ijadufuo eranebe no Jesu ma vierafekuva Godi fu no karaunuoke. Godi fu vame ije fu kema ijia fune vame fuone izege fu maturaena kemo ije dabe e boege no nijasue. Godi fu isuibe e boeje bu ise renoevo ije fu naebe migegire kena isekafiae. Ro fume mauikeigia oe vafaena fi ruae.  
\v 26 Rove iviama fu e boeje bu ise renoejo ije kena isekafiaga bu ijia gana vierafero Godi fuka ma ijiaru kenoenoro bu ijiege vierafeke. Ro eranebe bu Jesu ma vierafevo ije fu karauniana ke una vame fuone maeje ijia uniamo.   
\p
\v 27 Ijadufuo no izege kuaena aroekaradufuo? Ja vierafe no Godido akae ije gue none mukoreigia iriniavo ijadufuo no aroekarake. Ije na vierafe fuka ma baki. Ro no aroekarakuae vierafekuva noka nuvuone izege Jesu no ma vierafevo ijadufuo aroekaradufuo.  
\v 28 Ijadufuo no vierafe e boeje bu Godido akae ije mukoreigia iriniavo ijadufuo bu niome fuone ijia maturaeva baki. Ro bune buone izege bu Jesu ma vierafevo ijia bune Godido nidua ijia bu maturae.   
\p
\v 29-30 Ro ja izege vierafeve? Ja vierafega Godi fu e Jiusi ijiaru samuagiakinu karauniamo? Ije fu baki ro fu kuke e Jiusi baki ijiebuo Godi. Ijadufuo maeje e boege no e ni binobino baki ijadufuo fu e Jiusi abero e Jiusi baki ije fu kena besu samuagiamo. Fu kuke e boeje ijiebuo Godi ijadufuo e Jiusi abero e Jiusi baki eranebe bu Jesu ma vierafevo ije bu nidua fuone ijia bune maturae.  
\v 31 Ro jade vierafero no Jesu ma vierafevo ijadufuo no Godido akae ije nobe mukoreigia iriniakiro jade ijiege vierafevo. Ije fuka baki. Ro no Jesu ma vierafekuva no kuke Godido akae ijedua mukoreigia iriniake.   
\c 4  
\s1 Eburame fu ma vierafema ijia bijana kuaema ijene  
\p
\v 1 Ro ja vierafe asae nuvuone e Eburame fu isuibe Godi ma vierafema ije fu no irere nijasuome?  
\v 2 E Eburame fu ire ma bino renoemabitie fu ijadufuo aroekaradufuo. Rove na vierafe Godi fuka ma maturae ijadufuo Eburame fu izege nidua fuone ijia aroenamikuma baki.  
\v 3 Ro bune isuibe Godido buki akae ijia isoena kuae,  
\q1 E Eburame fu Godi ire ma bino fu fuone rekono kuaema ije fuka dabe ma vierafei. Fu Godido vua ije ma vierafema ijadufuo Godi fu Eburame abena una vame fuone maeje ijia nujaemano kuae.   
\p
\v 4 Na vua be bijana kuariako ni fiefo. E be fu izege mujue a mani vajakuma baki ro aneka i fuone be mekuma fu ijadufuo a mani vajadufuo.  
\v 5 Ro una vame izege Godi fu e karauniamo ije bu ire ma bino fuefuo revo fu ijadufuo karauniamo baki. Ro Godi e ise renoejo fu karauniamo ije bu buone izege bu Godi ma vierafevo fu ijiaru giana karauniamo.  
\v 6 Ro vua ijadufuo maeje fune isuibe e Kini Devidire ijiege kuae, Fu erare ire ma bino Godi fu oemaemo ije remo baki. Ro fune e ije erare fu Godi irere fu rekiro kuaema ije ma vierafekuma Godi fu e ije kenujaga fuka oemaredufuo.  
\v 7-8 Ro Kini Devidi vua ijadufuo maeje fu kuaema ije fu ijiege kuae,  
\q1 Erare fu ise remoga Godi fu gana arema e ije fuka oemaremo. Ro erado ise ije fune Godire okurae ro abe nuriema e ije fudua fuka oemaremo.   
\p
\v 9 Ro vua oemarevo ije e Devidi fu kuaema ije ja izege vierafevo? Jade vierafero Devidi vua ije fu e Jiusi ije bu surive buone kaniaufuna Godido nuga naeva ijiebuo ijiaru kuaemaro jade ijiege vierafevo. Ije fu baki ro vua ije fu e boeje bu nuga nae ro baki ijiebuo foteke kuae. Na ude izege na e Eburamedo kuariaeva ijiege na una kuke kuariako ni fiefo,  
\q1 E Eburame fu Godi ma vierafema ijadufuo Godi fu Eburame kenujana abe vame fuone maeje ijia nujae.   
\m
\v 10-11 Godi fu ude ijiege rekoga Eburame fu rade surive fuone kanaufuna Godido nuga ije nijae. Ro Godi fu Eburame oemarejana kenujaema ije fu nuga fuone ije nijaema ijadufuo kenujaema baki. Ro fuka Godido vua ije fu rade fuone rekiro kuaema ije ma vierafema ijadufuo fu ije kenujae. Ijadufuo erarebe bu Godi ma vierafega fu karauniamo e ijiebe bune ma e Eburamedo uifari.  
\v 12 Ro e Eburame ije fu e Jiusi ije bu surive buone kaniaufuna Godido nuga navo ijiebuo asoe. Ro e Jiusi ije bube vierafero buje bu Godido nuga ije naeva ijadufuo bune ma e Eburamedo uifariro ijiege bube vierafevo. Ro bune buone izege bu Godi ma vierafevo ijia bu una e Eburamedo uifari rei.   
\s1 Godi irere fu rade Eburamedo rekiro kuaema ijene  
\p
\v 13 Godi fu isuibe e Eburamekiro uifari fuone bu rade ruakuvejo ijiebuo fu kuaraema ije fu ijiege kuarae, Na ire boeje aesakae igia naovo ije na kena ja vajiakono kuae. Ro e Eburame fu Godido akae ije mukoreigia iriniaema ijadufuo Godi fu aesakae ige foteke abena uifari fuone ijena bu miaema baki. Ro fune Eburamere Godido vua ije ma vierafema ijadufuo fu Godido nidua ijia fuka maturaemoga Godi fu aesakae foteke ige abe bu miae.  
\v 14 Ro e boeje nome Godido akae ijiaru irinana kenoevabitie no izege irere Godi fu vajuoko kuema ije kedufuo? Ijadufuo nome akae ijiaru irinakuva baki ro noka Godi ma vierafeke.  
\v 15 Godi fu akae fuone ije ijia naema ijadufuo e boeje buka akae fuone ije iriniadufuo. Ro erare fu akae ije kena tuasekuma Godi fuka e ije kame isekafiake. Ro Godi fu akae ije fu naebe naemabitie e boege ise binobino renoejo ije bu izege ise buone bu renoevo ije mukoreigia giana vierafekuva baki.   
\p
\v 16 Ro eranebe bu Jesu ma vierafevo Godi fuka e marejiamo ijadufuo fu e ije karauniana ke vame fuone ma ijia uniamo. Ro ije fu e Jiusi ijiaru ijiege karauniamo baki ro fuka e boege erarebe Godi ma vierafevo fu ije karauniamo. Ijadufuo ni vierafe fune e Eburamere isuibe Godi ma vierafema ijadufuo erare fu iviama ijiege Godi ma vierafemo e ije fu e Eburamedo uifari.  
\v 17 Ijadufuo maeje fune Godire isuibe e Eburamedo ijiege kuae,  
\q1 Aeje nane umui datevado are e boeje bu are irore igia karivo ijiebuo asoe rekono kuae.  
\m Ijadufuo Godido nidua ijia e Eburame fuje fune ma asoe nuvuone ijadufuo maeje fuka Godi ma vierafei. (Ro Godi ije fuka ma e daroki ro fure e ije oevo ije kiaga bu una urivo. Ro kuke ire boeje no giavo baki ije fure amaeriamo).   
\p
\v 18 Godi fu Eburame kuae, Aeje nane umui datevado are e uine uruvana tuanaga bure are irore boege iraraekono kuae. Ijadufuo e Eburame fu Godi ma vierafena maza boeje fuka vua ije Godi fu kuaraema ije vierafenoe. Eburame fune eore rove Godi fu kuae, Bara one fu ame nafega rade uifari one buka ire zuvi gufe a giamo ijiege uruvana rekono kuae. Ijadufuo Eburame fu vua ije dabe oe fuone ijia ma vierafenoe.  
\v 19 E Eburame fune ma eore ro kuke bara fuone Sera fudua fune ma barasire. Ijadufuo bu izege una ame be bietena samuakuva baki. Rove e Eburame fuka Godi vua ije fu kuaraema ije dabe oe fuone ijia ma vierafei. Fu vierafero bara fuone Sera fuka ame bietekiro fu ijiege vierafei.  
\v 20 Ijadufuo fu fuone izege fu ma vierafemo ije fu naebe arei. Ro kuke fu Godi vua ije fu kuaraema ije fu naebe abe kufui igege vierafei. Ijadufuo fuone fu ma vierafemo ije fuka ma gikikimana remoga fu una Godi dabe aroe.  
\v 21 Eburame fu ma vierafero Godi irere fu kuaraema ije fuka rekiro fu ijiege vierafei.   
\p
\v 22 Ijadufuo Godi fu fuone izege fu ma vierafemo ijia gana kenujana abe una vame fuone maeje ijia nujae.  
\v 23-24 Ro igia fie, Godi fu e Eburame fuosukua kenujaema baki. Ro fu kuke erarebe bu vierafero Godire E Ireobo nuvuone Jesu fu baronemoga fu kuamo fu una urimaro bu ijiege ma vierafevo ije Godi fu e ije karauniamo.  
\v 25 Ro Godi fu ise nuvuone no renoejo ijadufuo Jesu abena e ani ije miamo bu kanavo fu baronei. Rove Godi fu Jesu Kuraesi kuamo fu una uri. Fu ijiege una urikina Godi fu no karaunuona ke una vame fuone ma ijia unuodufuo.   
\c 5  
\s1 Jesure no kena una Godido anafa reima ijene  
\p
\v 1 No Jesu ma vierafeva ijadufuo iviama Godi fu E Ireobo nuvuone Jesu Kuraesido duvado ijia no kena una vame fuone maeje ijia unuedo no una fuina besu kafaena karinoeve.  
\v 2 No Jesu Kuraesi ma vierafeva ijadufuo fu vame nuvuone amaerijuomo no Godido vame maeje gae. Ijadufuo iviama none una Godido vame maeje ijia fuina karinoeve. No vierafe Godi fu rade kaenamuoga no fuina fuone sanaema ijia karivakuae noka ijadufuo ireobo oemareve.  
\v 3 No Godi fu rade no kaenamuoga no fuina karidufuo no ijiaru oemarevo baki. Ro no kuke vajae fiane bino no ume igia biediakinu isejavaevo no ijadufuo oemareve. Ijadufuo maeje na vierafega vame ijiege no isejavaevo ije fu no ifejuoga no uria giriesana Godido vame maeje ijia kenoedufuo.  
\v 4 Ro no uria ijiege giriesana vame maeje kenoekuva fu ijanariruoga noka e ije Godi fu oemaremo ije redufuo. Ro kuke no ijiege kenoekuva no ma vierafe Godi fuka rade no mukoreigia samuaguodufuo.  
\v 5 Ro Godi fu no ijiege mukoreigia samuaguokuma nobe oe fiaguma karinoeke. Ijadufuo maeje Godi fu Kavene Akae fuone fune kena oe nuvuone ijia uniaejue. Ijadufuo no vierafega Godi fuka no ireobo oetuame.   
\p
\v 6 Isuibe no oenoeva ijia no vame ije no izege daro abena konuvuo karaunianamidufuo ije fuka baki. Rove Godi fuka ireobo no oetuae ijadufuo fu maza ma ijia Jesu Kuraesi kuamo fu ise nuvuone ijadufuo baronei.  
\v 7 Ro igia fie, na vierafe fu erare una e be fu Godido akae ije mukoreigia iriniamo ije fuefuo baronekuma baki. Ro na bigae e be fute una e mukore be ije fuefuo baroneke. Rove na vierafe fu erare una e ise renoeno ije fuefuo baronekuma baki.  
\v 8 Rove Godi fuka uria vame ijene rei. No isuibe noka ise renoe. Rove Godi fuka ireobo no oetuaema ijadufuo fu Jesu Kuraesi kuamo fu ise nuvuone ijadufuo baronei.  
\v 9 Ijadufuo Jesu Kuraesido kavuane fu kurosi ijia usiaema ijare ise nuvuone fune soejue. Ijadufuo Godi fune Jesudo duvado ijia no karaunuedo maza rade fube no kena isekafuoke.   
\p
\v 10 Ude noka naebe Godina kafaena kari ruae ro noka una e ani fuone rei Rove iviama fune fari fuone Jesure nuvuefuo baronena vame nuvuone amaeri. Ijadufuo none una Godina kafaena kari. Ro kuke no vierafe Jesu Kuraesi fuka rade no foteke karaunuoke.  
\v 11 No Godido ireobo oemareve ijadufuo maeje fure E Ireobo Jesu Kuraesido duvado ijia vame nuvuone amaeri. Ijadufuo iviama none una fuina kafaena karinoeve.   
\s1 E Adamukiro Jesu Kuraesibuo vame no ije giake  
\p
\v 12 Isuibe iko zinume ijia e besu ijare ise rena dabe e boeje ume igia kariva ijene miae. E Adamure ise ije rei ijadufuo Godi fu Adamu dabe isekafamo fu ise fuone ijadufuo baronei. Ro iviama e boege none ise reva ijadufuo noka oedufuo.  
\v 13 Ude fune ise ijare ume igia nakoga e Mosisi fu rade Godido akae ije abena e boege kuariae. Ro maza ije Godido akae fu naebe ruaema ijia e bu ise gue revo ije Godi fu kena isekafiamo baki.  
\v 14 Ro kuke Godido akae ije fu naebe ruaema ijia e ije Adamudo uifari ijia ruoma e Mosisido uifari ijia ruaeva ije buka oekinu kari ruae. E Adamu fu vua ije Godi fu itire fuone ijia korofuo kuaraema ije fuka naebe irinae. Ijadufuo fu dabe isekafamo fu baronei. Ro e Adamudo uifari ije bu oekinu kari ruaeva ije bu Adamu ise fu rema ijieki ije reva baki. Rove buka uria ise buone bu reva ijadufuo oekinu ruae.   
\p
\v 15 E Adamukiro Jesu Kuraesi bu ema rove vame buone bu kenoeva ije buka binobino. Ijadufuo maeje Adamu fu Godido vua ije naebe irinae ro fu Jesure Godi irinae. Godi fu akae besu Adamu kuarae rove fu vua fuone fuka naebe irinae. Ijadufuo ise fuone fu rema ije fune dabe e boege miae. Ijadufuo Godi fu e Adamudo uifari ije kena isekafiamo bu oekinu kari ruae. Rove Godi fuka e boeje marejiamo ijadufuo fume vekinu Jesu Kuraesido duvado ijia e boege marejiae.  
\v 16 E Adamure ise ije abena e boege miae ijadufuo Godi fu kame isekafiamo bu oe. Rove Godi fuka e boege oetuaema ijadufuo fu Jesudo duvado ijia fuone maeje fume vekinu abena e boege miae. Areme fu bu karauniamo buka una nidua fuone ijia maturae.   
\p
\v 17 Ro ije fuka ma fune e besu ijare ise besu rena dabe e boeje miaema ijadufuo bu isejavaekinu oe. Rove ni vierafe Godi fuka e boeje ma rejiamo ijadufuo fu e besu Jesu Kuraesido duvado ijia e boeje karauniame. Ijadufuodo rade noka kini igege rena ire boeje samuagiadufuo.   
\p
\v 18 Ro fune e besu ijare ise besu ije rema ijadufuo fure vame ise fuone ije dabe e boege miamo ijadufuo bu isejavaekinu oeve. Ro kuke fune e besu Jesu Kuraesire maza besu kaginu baronema ijia fu e boege karauniame. Fu ijiege ifejiakinu karauniako bu Godido vame ma karivako ije abeve.  
\v 19 Ro fune Adamure Godido akae ije naebe irinaema ijadufuo fune fure e boeje itabi vajiae. Ijadufuo budua buka ise renoevo ijadufuo Godi fu kame isekafiako bu oeve. Ro kuke fune Jesu Kuraesire fuosukua Godi irere fu vierafema ijia kenoe. Ijadufuo fune fure vame amaerima ijadufuo Godi fu e boege karauniakinu kaenamiana una vame fuone maeje ijia uniame.   
\p
\v 20 Ro fune e Mosisire Godido akae ije abena e boege no mue. Ro fune akae ijare nijasuomo ijadufuo no vierafega noneka ise uruvana rei. Rove vame izege Godi fu e boeje ma rejiakinu ise buone giana aremo ije fuka ma daroki.  
\v 21 Ude noka ise uruvana renoe ijadufuo fune ise ijare no samuaguokinu kaenamuona una vame no oedufuo ijia unue. Rove iviama fune Godido ma rejiamo ijare no samuaguomo ijadufuo noka Godido nidua ijia maturaeve. Ro kuke no E Ireobo nuvuone Jesu Kuraesido duvado ijia no ma karivako ije abeve.   
\c 6  
\s1 No Jesu Kuraesi duvado ijia vame ma karivako ije abeve  
\p
\v 1 Ro ja izege vierafe? Ja vierafe no uria faememarena ise renoekuva Godi fu maza boeje no marejuokinu ise nuvuone guona arekiro ja ijiege vierafe?  
\v 2 Ro ije fuka ma baki. Ro vame isuiko nuvuone no isuibe renoeva ije bune e ije bu oeva ijiege bune oe. Ijadufuo iviama no irerefuo una ise binobino renoeve?  
\v 3 Ro jane vierafe do ije no Jesudo ive ijia rueva ijia none una Jesuna besu rei. Ijadufuo Jesu fu baronema ije nodua none fuina besu oe.  
\v 4 Ro do ije no rueva ijia no vame nuvuone isuiko no oetuana kenoejo ije bune Jesuna besu oevo bu kena fuina mako ruiva ijieki. Rove fune izege Godi fu daro ro sanaema fuone ijia Jesu Kuraesi kuamo fu una urima ijia fu kuke daro besu ijia no kaenamue. Fu no kaenamuona una vame fuone maeje iviaeko no ma karivako ijia unue.   
\p
\v 5 Ro no Jesu fu baronema ijiege nodua no oevabitie no fu una urima ijiege nodua no una urike.  
\v 6-7 Ro none ma vierafega vame nuvuone isuiko no kari ruaeva ije bune Jesuna kurosi ijia oe. Ijadufuo vame nuvuone isuiko ijadufuo daro ije fune Jesure mukoreigia abe tuasemo fune bazuarena bakirei. Ijadufuo iviama ise ijadufuo daro ije fu una no samuaguokuma baki. Ijadufuo maeje e baronema ije fu izege una urina ise renoekuma baki.   
\p
\v 8 Ro vame isuiko nuvuone no kari ruaeva ije bune Jesu Kuraesina besu oeva ijadufuo no ma vierafega maza rade no fuina ma karivake.  
\v 9 Ijadufuo maeje none vierafega Jesu Kuraesi fu baronemoga Godire kuamo fu una urido fube una baroneke. Ijadufuo oevo ijadufuo daro ije fu izege una Jesu samuakuma baki.  
\v 10 Ro Jesu fu baronema ije fume kaginu ise nuvuone ijadufuo baronedo fube una kuke baroneke. Ro iviama fune una urina Godiki fikinu ive fuone sanaema dabe aroeme.  
\v 11 Ijadufuo noka maza boeje vierafero ise ijadufuo daro ije fu izege una no samuaguokuma baki no ijiege vierafedufuo. Ijadufuo iviama no vierafega none Jesuna besu rei. Ijadufuo no vame izege fu rema ije nodua noka ijiege rekinu una vame Godi fu oemaredufuo ijia karinoeke.   
\p
\v 12 Iviama noeje none una Jesu Kuraesina agane besu rei. Ijadufuo noka giriesana vajae nuvuone konuvuo samuadufuo. Ro nobe mamoeke ise ije bu oe nuvuone ijia naona maza boeje no kaenamuona una vame ise ijia vake.  
\v 13 Ro kuke nobe mamoega vajae nuvuone gue bu ise renoedufuo. Ude noeje noneka ise rena oekuvejoga Godire no kaenamuona una vame fuone maeje ijia unue. Ijadufuo vajae jone kena Godi vajaga fure kena fuone fu vierafema ijia i fuone maeje mefo.  
\v 14-15 Ro jade uri mamoena Setanido itire ijiaru fiena ise renoekiro nika giriesana kojo vajae jone samuanamifo. Ijadufuo maeje ja Godido akae ijia bijua kariva baki ro jaka fuone izege fu e marejiamo ijia bijuana kari. Ijadufuo jade vierafero ja una ise rekinu karivakiro jade ijiege vierafevo.   
\s1 Godido i maeje menoedufuo ijene  
\p
\v 16 Ro ja e ije erare kiako ja maza boeje fuefuo imenoevo ije fuje fu e ireobo jone. Ijadufuo vame besu ijiege eranebe ja vierafe ja Setani irinake fure ja samuagiakuva ije jaka iserekinu oeke. Ro eranebe ja vierafe ja Godi irinake fure ja samuagiakuma ja ma karivako ijia abeke.   
\p
\v 17 Ja ude jane Setani irinana i fuone ise ije menoe. Rove iviama jane oe jone boejiakuma Godido vua maeje fiena una e ije bu Jesu Kuraesido vua nijasiaeva ije iriniae. Ja ijiege revo ijadufuo naka ireobo Godido oemareve.  
\v 18 Iviama fune Godire ise ije ja renoevo ijia karauniamoga jane una vame fuone ma ijia ruae. Ijadufuo iviama ja Setanido i mejo baki ro ja Godido i maeje menoeve.  
\v 19 Ro vua ige na ja e mamekanu ijiebuo i medufuo na ijia bijana kuariave. Na vua ijiege bijana kuariaekina ja fiena vierafekiro na ije kuariave. Isuibe ja Jesu Kuraesi naebe ma vierafeva ije jaka naebe vajae jone kojo samuagiae. Ro jaka kena una vame ise binobino uruvana ije renoe. Ijadufuo iviama ni vajae jone foteke kena una Godi vajaga fu ja kena una vame fuone maeje ijia uniaga ja i fuone akae ije menoefo.   
\p
\v 20 Ude ja Setanido vame ije abena jaka i fuone ise binobino menoe. Ijadufuo ja Godido vame maeje fu oemaedufuo ije ja naebe renoekuae vierafei.  
\v 21 Ro ja vierafe vame ise ja ude kenoeva ije maeje fu irere joefuo rei? Ire maeje fuka baki rove kavene jone bume isejavaema oe. Ijadufuo iviama ja una vame ise ije ja kenoeva ije giavone fuka mukoreigia jaediame.  
\v 22 Iviama fune Godire ja karauniae ro fure oe jone samuagiamo ijadufuo jane ise jone ja renoejo ije arena una i fuone menoeve. Jane una e akae fuone reva ijadufuo Godi fune vame ma karivako ije abe miame.  
\v 23 Ro erarebe bu ise renoekuva buka vame baromena vako ijia vake ro bube Godina karivake. Ro no Jesu Kuraesi E Ireobo nuvuone ma vierafekuva Godi fu duvado fuone ijia vame ma karivako ije vekinu abe muoke.   
\c 7  
\s1 Foru fu barabaru maninamivo ijia bijana kuaema ijene  
\p
\v 1 Erafano, emabuo akae ije jane fiena vierafe. Ijadufuo e boeje erare fu ume igia ni uria fino fu akae ije irinana kenoekinu vakuma fu baronemo ijia akae ije fube una fu samuake.  
\v 2 Ro na una akae be bijana kuariako ni fiefo. Bara be fu baru manima ije baru fuone fu uria fino ije fuka akae ije irinana fuosiki finoeke. Ro baru fuone fu baronekuma bara ije fu una baru be manikuma ije fune marei.  
\v 3 Ro bara ije baru fuone fu uria fike fu arena una baru be ijiaki finoekuma ije fuka ise redufuo. Ijadufuo e bu gakuva bu kuako aeje aka ebuo baru turaemono kuake. Ro bara ijadufuo baru ije fune baroneke fu una baru be manikuma ije fu ise remo baki ijadufuo maeje baru fuone fune baronei.   
\p
\v 4 Ijadufuo erafano jaeje jane iviama vua ige na bijana kuariaeva jane ijiege rei. Jaeje jane e ije fu baronemoga Godi kuamo fu una urima ijena agane besu rei. Ijadufuo iviama Mosisido akae ije fu ja samuagiamo baki. Ro fune Kuraesire ja kaenamiaedo ja una Godido i maeje meke.  
\v 5 Isuibe noka vajaema nuvuone bu oemadiadufuo ijene ka uruvana vierafenoekinu kenoe. Maza boeje noka uria ire ije Godido akae fu kuriaeremo ijene renoekuae vierafei. No vame ijiege renoevo ijadufuo Godi fuka no kame isekafuokoke no isejavaena oeve.  
\v 6 Rove iviama none ise nuvuone ijadufuo Jesu Kuraesina besu oe. Ijadufuo Godido akae isuiko ije fu una no samuaguomo baki. Ro none una vame iviaeko Kavene Akae fu renoeno no ijia kenoeve.   
\s1 Ise ijiakiro Godido Akae ijiebuo vua ijene  
\p
\v 7 Ro e gue no kuae Godido akae ije fu iseno kuaeve rove fu ise baki ro fuka mukore. Ijadufuo maeje ise revo ije fu akae ijare nijasuomo. Ro Godido akae be fu no muema ije fu kuo, Jade e binobuo sinuome ije giana oe ireobo vierafevono kue. Ro Godi akae ije fu naebe muemabitie no izege vierafero e binobuo sinuome giana oe ireobo vierafevo ije noka ise revoro no ijiege vierafeke.  
\v 8 Rove fune Godido Akae ijare ise boeje no vierafena kenoejo ijiebuo vame amaerijue. Ijadufuo fune ise ijare oe nuvuone kame arafiriakoke noka ise uruvana rekuae vierafei. Ro Godi Akae ije fu naebe abe muemabitie no izege ise no renoejo ije mukore giana vierafekuva baki.   
\p
\v 9 Ude na akae ijadufuo maeje na naebe mukoe vierafeva ijadufuo na ma fina ruae. Ro iviama na akae ijadufuo maeje nane gia furi. Ijadufuo na vierafega oe none fune ise ijare iraraema ijadufuo kavene none fune baronema igeki.  
\v 10 Godi fu vierafero fu akae fuone muoga no mukoreigia fiena iriniakuva noka ma karivakiro fu ijiege vierafe. Rove naka akae fuone kena tuaseva ijadufuo kavene none fune baronei.  
\v 11 Ro kuke fune akae ijare vame amaerima ijadufuo ise boeje bu oe none dabe dakudevo ijadufuo iviama kavene none fune baronema igeki.   
\p
\v 12 Ijadufuo Godi akae ije fu abe muema ije fuka akae ro ka maturaeva ijiaru.  
\v 13 Ro jade vierafero fu akae ije maturaema ijare kavene none dabe arafirimo fu baronemaro ijiege vierafevo. Ije fu baki. Ro fune ise ijare kavene none dabe arafirimo fune baronei. Ro akae ije fu ise na revo ije samadukua nijasiega na giana vierafevo. Ijadufuo no vierafe akae ije fuka mukore. Ijadufuo maeje no akae ijia giana vierafega ise boeje no renoevo ije buka ma omise.   
\s1 Vame inokiro bu oe nuvuone ijia imevo ijene  
\p
\v 14 Ro none vierafe Godido akae ije fu kavene nuvuone ijadufuo akae. Rove nana ema ijadufuo maza boeje na akae ije iriniavo baki ro naka none vierafeva ijia kenoeve. Ijadufuo ise ije fuka uria maza boeje nosiki name ro kuke fure na samuagieme.  
\v 15 Ijadufuo ise ije fuka oe none dabe dakudekoke naka ise binobino na naebe rekiro vierafeva ijene renoeve. Ro kuke na vame maeje na renoekiro vierafeva ije na ijia kenoevo baki.  
\v 16 Na ise gue naka naebe rekiro vierafe rove name uria faememarena ijia renoeve. Ijadufuo na vierafega Godido akae ije fuka ma rove nare naka e ise.   
\p
\v 17 Ro ise ije name nare ijia renoejo baki. Ro fune ise ije fu maza boeje oe none ijia namo ijare kieko na ire ise ije renoeve.  
\v 18-19 Na vierafega vame maeje fu naebe oe none ijia namo ijadufuo na vame ise ije renoeve. Ro kuke vame maeje na kenoedufuo ije nane oe none ijia vierafe rove naka mamoevo ijadufuo na naebe mimatana kenoeve. Na vame maeje nane vierafe rove na una vame ise ije na naebe kenoekiro vierafeva na ijene kenoeve.  
\v 20 Na vame ise ije na naebe ijiege kenoekiro vierafe rove naka uria ijia faememarena vame ise ijene kenoeve. Ijadufuo na vierafe vame ise ije na nare kenoevo baki. Ro fune ise ije fu maza boeje oe none ijia namo ijare kieko na ise ijieki ijene kenoeve.   
\p
\v 21 Ijadufuo na gaga vame be fu oe none ijia i mene. Na vame maeje na kenoedufuo ije nane oe none ijia vierafei. Rove ise ije fu oe none ijia namo ijadufuo na una vame ise ijene kenoeve.  
\v 22 Na oe none guove ije naka irere Godi fu vierafema ijene ma vierafena ireobo oemareve.  
\v 23 Ro kuke na kono vierafega vame inokiro bu oe none ijia naove. Na vierafe naka vame ma ijiaru nuvena renoekiro vierafe rove ise ije fuka giriesana na iviena dabe una vame ise ijia vake. Ijadufuo fune ise ijare na samuagiekoke na vame ise ijene kenoeve.  
\v 24-25 Ijadufuo iviama nanaka oefiane ireobo abeve. Na fuka ise ijare giriesana iviena dabe una vame ise na baronedufuo ijia vake. Ijadufuo erare na turajiena una mesiriena vame ma ijia vake? Na vierafe naka Jesu Kuraesi E Ireobo nuvuone oemareke. Ijadufuo maeje fure na kenujiena mesirie una vame fuone maeje ijia nujiei.  
\p Ijadufuo na vame none na izege kenoeva na ije kuaeve. Na vierafe naka oe none boejiakuma Godido akae ije mukoreigia iriniana vame maeje ijia kenoekiro vierafe. Rove vajae surive none fuka una akae be ije irinana vame ise ije kenoekiro vierafeme.   
\c 8  
\s1 Kavene Akae ijadufuo daro ijia ma karivadufuo ijene  
\p
\v 1 Ro noeje no Jesu Kuraesi ma vierafeva ijadufuo Godi fu no kena una vame fuone ma ijia unue. Ijadufuo erarebe bu Jesu Kuraesina agane besu reva ije Godi fube bu kame isekafiake.  
\v 2 Ude fu ise ijare giriesana no kaenamuona una vame ise ijia vako ijadufuo noka isejavaekinu oe. Rove iviama fune Kavene Akae ijare Jesudo duvado ijia no karaunuona ke una vame fuone maeje iviaeko ijia unue.  
\v 3 Godi fu akae fuone abena no mue rove ise ije bu uria oe nuvuone guove ijia naove. Ijadufuo no izege Godido akae ije mukoreigia irinakuva baki. Rove Godi fuka no karaunuokiro Fari fuone besu ije kuamo fu ema igege ume igia ari ruae. Areme Godi fu arekoga Jesu fu ise nuvuone ijadufuo isejavaema baronei. Ro Godi Jesu fu abena zinone igege ise nuvuone ijadufuo ifaeje.  
\v 4 Godi fu vierafero fu Jesu abe zinone igege ifaejega no ijia gana vierafe areme akae fuone boeje mukoreigia iriniakiro fu ijadufuo ijiege rei. Ro Godido akae ije iriniadufuo ije no vajae surive nuvuone irere bu vierafeva ijia kenoekuva baki. Ro noka Kavene Akae irere fu vierafema ijia kenoekuva ijare no Godido akae ije mukoreigia iriniake.   
\p
\v 5 Ro erare fu maza boeje vajae surive fuone fu oemaedufuo ijia kenoeno ije nigofo fuone funeka ire surive ijadufuo ijiebe uruvana irarae. Ro erare fu maza boeje una vame maeje Godido Kavene fu vierafema ijia kenoeno e ije nigofo fuone fuka Kavene ijadufuo ire maeje ijiebe irarae.  
\v 6 Ro a vajae surive one ije irere fu vierafema a ijia kenoeno ije aneka baromuna vame ijia vake. Ro a oe one ije a Kavene Akae irere fu vierafema ijia kenoeno ije ane Godido vame maeje ro fuone kafaemo ije abene.  
\v 7 Ro erare oe fuone ije fu vajae surive fuone ije irere fu vierafema ijia kenoeno e ije fuka una Godiki nigaraeme. Ro e ije bu ijiege renoejo ije bu Godido akae ije buka naebe nuvediakuae vierafe ijadufuo bu izege akae fuone iriniakuva baki.  
\v 8 Ro e ije bu vajae surive buone ije irere bu vierafeva ijia kenoevo ije Godi fube buone oemareke.   
\p
\v 9 Rove jaeje ja vajae surive jone ije irere bu vierafeva ja ijia kenoevo baki. Ro ja Godido Kavene fune oe jone ijia fivogakuva ije jane irere fu vierafema ijia kenoeve. Ro e ije erare fu Jesu Kuraesido Kavene fu naebe abema e ije fu Jesudo e baki.  
\v 10 Ro erarebe ja Jesu Kuraesido Kavene abeva fu jaena oe jone ijia fino ije kavene jone bu ni uria karive. Ijadufuo maeje Godi fune ja karauniana ke una vame fuone maeje ijia uniae. Rove vajae surive jone buka uria oedufuo ijadufuo maeje jane ude vame ise uruvana kenoe.  
\v 11 Ro Godido Kavene fu oe jone ijia fikuma na vierafe vajae surive jone bu oekuva ije Godi fu kiaga bu una urike. Ijadufuo maeje Godi besu ijare Jesu fu baronemoga fu kuamo fu una uri. Ijadufuo Godi fu Kavene fuone ijadufuo duvado ijia jadua kiaga ja una urike.   
\p
\v 12 Ijadufuo erafano nobe vajae surive nuvuone irere bu vierafeva ijia nuvediana vame ise ije renoeke.  
\v 13 Ro ja vajae surive jone bu vierafeva ijia nuvediana vame ise ije kenoekuva rade jaka isejavaema oeke. Ro ja una Kavene Akae irere fu vierafema ijia nuvena kenoekuva ije ja vame ise jone ije jane kaniavo bune oe. Ijadufuo maza rade Godi fu kiaga ja fuina ma karivake.  
\v 14 Ro erare bu Godido Kavene fu kuariamo ijia nuvena kenoevo e ije bu ma Godido anafa.   
\p
\v 15 Ro erarebe bu Godido Kavene ijare oe buone ijia samuagiako bu oenoejo e ije bube Godi gana jumedufuo. Ijadufuo maeje fune Kavene ijare no kaenamuomo no una Godido anafa rei. Ijadufuo iviama none una fu kua, Ate Asoe nuvuoneno kuave.  
\v 16 Nono vierafe no ma Godido anafa ijadufuo maeje Godido Kavene fu oe nuvuone ijia fine. Fu ijia fina kavene nuvuone ije kiamo jaeje ja Godido anafano kiame.  
\v 17 Noeje no Godido anafa ijadufuo maza rade Godi fu ire maeje fu kena anafa fuone naejiaema ije gue fu kena no vajuoke. Ro ude noka urina Jesu Kuraesi fu isejavaema no ijiege isejavaekuva Godi fu ire maeje fu kena Jesu Kuraesi naejaema ije gue fu kena no vajuoke. Ro kuke no fuone sanaema ije akaegue abedufuo.   
\s1 Maza rade Godido anafa ije bu fuone sanaema ije abedufuo ijene  
\p
\v 18 Na ma vierafega iviama no ire binobino bu nuvuone rega no isejavaevo ije fume isekube. Ro maza rade Godi fuone maeje ijiakiro sanaema ije fu kena no vajuokuveno ijare fuka ma ireobo.  
\v 19 Ro ire boeje Godi fu amaeriaema ije bu maza ije Godi fu una anafa fuone boeje kena samadirega bu giakuae bu ijadufuo ireobo ijafunekinu samuave.  
\v 20 Ire boeje buka isuibe maza ije samuana ruae rove Godi fu fuone vierafema ijia fu ire fuone boeje kame arafiriae. Ijadufuo maeje buka ise uruvana renoe. Ro ire boeje Godi fu amaeriaema ije bu naebe ijiege isejavaekuae vierafei.  
\v 21 Godi fu isuibe vierafega fuka maza rade ire boeje fu amaeriaema ije karauniakiro fu ije vierafei. Fu vierafe ire fuone boeje bu isejavaekinu buraevo ije buka areke. Bu arega fu fuone sanaema ije fu abena anafa fuone ije miaema ijiege fu abena una budua miaekina bu dazena ma karivakiro fu ije vierafei.   
\p
\v 22 Ro ire boeje Godi fu amaeria uniaema ije buka uria isejavaekinu vajae fiane abeve. Bu iviama bu bara ije fu ame nafekiro vajae fiane abeno bu ijiege vajae fiane abena ruove.  
\v 23 Ro bu Godido ire ije fu amaeriaema ijiebe buosuka vajae fiane abevo baki. Ro nodua e ige no Kavene Akae fuone nuga igege ude abeva no rade ire ma bino kedufuo ije noka ijiege isejavaekinu samuave. No samuaekina Godi fu karaunuoga no una anafa fuone rega fu vajae surive nuvuone iviaeko vajuoga no kena ijia ma karivake.  
\v 24 No ire ijene ijiege vierafena samuavo ijadufuo Godi fu no karaunuome. Ro irere no vierafekinu samuavo ije no ni nuvuone ijia giaevabitie no irerefuo ma vierafena samua karikuva baki.  
\v 25 Ro no ire bino no ni nuvuone ijia giavo baki ije ma vierafena samuakuva ije noka sone oe vafaena samua karike.   
\p
\v 26 Ro kuke vierafevo nuvuone ije buka ma garuki ijadufuo Godido Kavene fu no ifejuome. No vame izege Godido baname isoedufuo ije noka naebe vierafe ijadufuo Kavene Akae ije fu no ifejuona nuvuefuo Godido baname isoeme. Ro vua ije Kavene fu Godi kuarakuveno ije fuka itire irufuimo ijadufuo fu isejavaekinu nuvuefuo Godi soesoena kuarame.  
\v 27 Ro Godi fu e boeje ijiebuo oe ije fune giamo ro kuke Kavene Akae ijadufuo vierafe ije fune gae. Ro kuke Kavene Akae ije fudua fu ire boeje Godi fu rekiro vierafemo ije fune vierafe. Ijadufuo fure Godido e ijiebuo akaegue ijia Godi soesoena kuarame.   
\p
\v 28 No vierafega e ije bu Godi oetuavo fu ke uniaema ije buka maza binobino ire ise ro ma ije biediavo. Rove Godi fu ire ije bu biediavo ije fu kena una vame maeje buefuo reme.  
\v 29 Ro e ije Godi fu isuibe kena uniaema ije fu vierafe buka una Fari fuone ijieki rena uri irere fu renoema ijiege renoeke. Ro fure Godido Fari amure rega bu ije bu iviefaru fuone reke.  
\v 30 Ro e ije Godi fune isuibe buefuo ijiege vierafema ijadufuo fu bu kei. Ro kuke e ije Godi fu kema ije fune karauniana ke una vame fuone maeje ijia uniae. Ro e ije Godi fu kena una vame fuone maeje ijia uniaema ije bune fuone sanaema ije abena fuina karive.   
\s1 Godi fu Jesu Kuraesido duvado ijia fuone oetuamo abena muema ijene  
\p
\v 31 Ro vua boege na kuariaeva ije na izege Godi ire boeje fu nuvuone remo na ijene kuariae. Ijadufuo ire ije ja izege vierafei? Godi fune noena rema ijadufuo fu erare no kaenamuona una vame ise ijia vakuma baki.  
\v 32 Ijadufuo maeje Godi Fari fuone ije fu naebe abena rui ro fu Jesu kuamoga fu ise nuvuone ijadufuo baronei. Godi fuka Fari fuone besu ije abena no mue ijadufuo fu kuke ire fuone maeje kena vajuoke.  
\v 33 Noeje fune Godire kena unuema ijadufuo fu erare una no guona kuoko jaka ise revono kuokuva baki. Ro kuke fune Godire ise nuvuone no reva ije guona are areme fune no kaenamuona una vame fuone maeje ijia unue.  
\v 34 Ro kuke fu erare una ise nuvuone no reva ijadufuo guona kuokuva baki. Ijadufuo maeje fune Jesu Kuraesi e ije fu ise nuvuone ijadufuo baronena una urima ijare nuvuefuo Godido baname isoeme. Ro fure iviama Godido umui maeneke ijia fina nuvuefuo Godi soesoena kuarame.   
\p
\v 35 Jesu Kuraesi fuka no ireobo oetuaemo ijadufuo fu erare no kaenamuo una gariebo be unuokuma baki. No maza gue noka isejavaekinu vajae fiane abeve. Ro kuke noeje no Jesu Kuraesido e no fuefuo imejo. Ijadufuo e gue buka nuvuesina kuaekinu ise binobino nuvuone reve. Ro maza bino noka irekiro sinuome baki reve. Ro kuke maza bino e buka no oedufuo ijia kanuove. E buka ire ise ijieki boeje ije nuvuone reve. Rove bu ire ijiebe no maniaeruga no Jesu Kuraesi izege fu no oetuamo ije arena vako baki.  
\v 36 Ro ire ise boeje bu nuvuone ruovo ije bune isuibe Godido buki akae ijia ijiege isoena kuae,  
\q1 Godi noeje no oefuo i mejo ijadufuo maza boeje e bu no ziegafuo ro kanuokuae vierafeke. Noeje bu kame mave-sifi bu kania buvuavo ijiege revono kuae.   
\m
\v 37 Rove bu ire ise boeje ije nuvuone ruovo ijiebe no maniaeruga no Jesu Kuraesi izege fu no oetuamo ije arena vako baki. Ro fuka daro muoga no giriesana ire ise boeje bu nuvuone ruovo ije kame garege koreve.  
\v 38-39 Na ma vierafega Godido oetuamo ije fu maza boeje noena namo. Ijadufuo no ni uria kari ro no oekuva ije Godido oetuamo ije fu uria noena navake. Ro Godido anera ijiakina kavene daroki bino bube Godi fu no oetuamo ije dabe garege akoekuva baki. Ro kuke bu ire bino iviama revo ro rade rekuvejo ro ire bino saove gufia ro ume igia naovo ijiebe Godido oetuamo ije abe garege akoekuva baki. Ro kuke bu ire bino Godire amaeriaema ijiebe fuone fu no oetuamo ije abe garege akoekuva baki. Ro Godi fune E Ireobo nuvuone Jesu Kuraesido duvado ijia no ireobo oetuae. Ijadufuo fu erare izege Godido oetuamo ije fu noena namo ije abe garege akoekuma baki.   
\c 9  
\s1 Godi ro e fuone fu ke uniaema ijene  
\p
\v 1 Erafano na vua bedua kuariakuvejo ni fiefo. Naeje na Jesu Kuraesiki besu reva ijadufuo vua irere na kuaevo ije na kufuimevo baki. Ro kuke vua na kuaevo ije fune Kavene Akae ije fu oe none ijia imeno ijare giena vierafema ijadufuo na kufuimevo baki.  
\v 2 Ijadufuo maeje naeje naka e none Jiusi ijiebuo oefiane ro vajae fiane ireobo abeve.  
\v 3 Buje buka e none rove bune korubuo Jesu Kuraesi bu ijuemaeva ijadufuo maza rade Godi fuka bu kame isekafiaga bu oeke. Na e none Jiusi ijiebuo oefiane ireobo abevo ijadufuo na vierafero Godi fu na abe isekafiero abe gariebo be nujiega na Jesu Kuraesiki besu na mazieva ije naka arekiro na ije vierafe. Na vierafe Godi fuka na dabe ijiege rega e none bu ijia giena una Godi ma vierafekiro na ije vierafei.   
\p
\v 4 Godi fune isuibe e Jiusi ije kena uniae areme fune fuone sanaema ije abe miae. Areme fu kiae, Jaeje jaka anafa nono kiae. Ro kuke Godi fu buone ireobo oemarema ijadufuo fu akae fuone abe miae. Areme fu vame maeje bu izege fu aroenoedufuo ije nijasia areme fu kuke izege fu ifejiaga bu ma karivadufuo ijene visu kuariae. Godi fu ijiege kuariae rove e Jiusi ije buka naebe fu irinae.  
\v 5 E Jiusi ije buka e anuigi Eburamekina Aeseki ro Jekafu ijiebuo agane ijia uinuvena ruae. Ro kuke Jesu Kuraesi e ije Godi kuamo fu ari ruaema ije fu agane besu ijia uinivena ruae. E Jesu Kuraesi fudua fu Godi ro fure ire boeje samuagiamo. Ijadufuo na vierafe noka maza boeje Jesu Kuraesi dabe aroedufuo. Marei.   
\p
\v 6-7 Ro Godi irere fu e Jiusi ijiebuo rekiro kuaema ije fu arekuma baki ro fuka reke. Rove e Isureroko gue bu Godido e reva baki. Godi fu isuibe e Eburame ijiege kuae, Na fari one Aeseki daro maga fure e uifari one na kuaraeva ije tuanakono kuae.  
\v 8 Rove e Eburamedo uifari ijia e gue bu Godido anafa rekuva baki. Ro bune e ije Godi fu isuibe bu umui tuaema ijiebe bu ma Eburamedo uifari reke.  
\v 9 Ro Godi vua ije fu Eburame kuaraema ije fu ijiege kuae,  
\q1 Na maza ije na nijaeva ijia una bara Sera kuaga fu ame fari be bietekono kuae.   
\p
\v 10-13 Areme rade e Aesiki fune ubaeremoga fu bara fuone Ribeka abei. Ro rade Ribeka fu ame fari ufariki nafenoga Godi fu Ribeka ijiege kuae, Na vierafe ame one boga e Iso fu una iviene fuone e Jekafu nidoekinu aguaekono kuae. Ro vua ije Godi fu Ribeka kuaraema ije bune isuibe buki akae ijia ijiege isoena kuae,  
\q1 Na vierafe na e Jekafu fuosukua oetuake ro e Iso na ziegafakono kuae.  
\m Ro Godi vua ije fu kuaema ije Ribeka fu naebe ame ufariki ije nafema ijia fu ijiege kuae. Ro kuke ame inokiro ije bu naebe korubuo uri vame ma ro ise ije giana vierafeva ijia Godi fu vua ijiege ude buefuo kuae. Ro e Isokiro Jekafu bu ire bino ma reva ijadufuo Godi fu bu umui tuaema baki. Rove fune Godire fuone vierafema ijia fu e besu oetuaga be fu ijia arei.   
\p
\v 14 Ijadufuo nobe Godi e ije fu vierafe fuone ijia bu umui tuamo ijadufuo kuake. Ijadufuo maeje fuje fu akaeguekinu remo baki.  
\v 15 Ijadufuo maeje Godi fune isuibe e Jekafudo uifari ijiebuo fu e Mosisi kuae,  
\q1 Na e ije erane na vierafeva ije ise buone na giana areke. Ro kuke na e ije erane na vierafeva ije na buone oefiane abekono kuae.   
\m
\v 16 Ijadufuo e ije Godi fu umui tuamo ije bu bure buone izege bu mukoe vierafevo ro giriesavo ijia Godi fu bu umui tuamo baki. Ro fune Godire izege fu buone oefiane abeno ijia fu ijiege reme.  
\v 17 Ro Godi fu isuibe buki akae bu isoeva ijia fu kini Fero aesakae Ijifiti samuamo ije ijiege kuae,  
\q1 Na a kuaga a kini rekina na daro none ije a nijasiaga e boeje bu ijia gana vierafero naeje naka e darokiro bu ijiege vierafeke. Na ijiege rega e boeje ume igia kariva ije bu ive none dabe kuaenoekinu na aroriekono kuae.   
\m
\v 18 Ijadufuo Godi fu fuone vierafema ijia e gue fu giana buone oefiane abekinu ifejiamo. Ro e gue oe buone fu kame gikikimana rega buka totenaminoevo ijadufuo bu Godido vua ije fiena ma vierafevo baki.   
\s1 Godido ziemo ijiakiro fuone ma rejiamo ijene  
\p
\v 19 Ro e bino ja una na kieko, Fune Godire vierafe fuone ijia no umui tuakinu no guomemaremono kie. Ro Godi fu ijiege remo ije e ige fu erare Godido vierafe ije ijuonemo baki. Rove e ige bu oenoena ise bino revo ije Godi fu irerefuo ise buone kame mazie giakinu kena bu namiamono kie?  
\v 20 Rove erafano jaeje jame ema ijadufuo jabe vua ijiege una Godi kuarake. Ro na ire sukore bu ire kiravo ijia bijana kuariako ni vierafefo. Ire sukore fube una e ije fu amaerima ije kuako, A irerefuo na abe ijiege amaeriemano kuake? Sukore fu una ijiege kuarakuma baki.  
\v 21 Ro e ije sukore amaeriamo ije fu sakae besu ijia abena fuone vierafema ijia sukore inokiro amaeriake. Sukore be fu amaerikina bu maza boeje ijia ire kira ike. Ro sukore be fu amaerikina bu maza mamekanu ijia abe ire kirake.   
\p
\v 22 Ijadufuo vame besu ijiege Godi fudua fu e ije sukore amaeriamo ijiege remo. Fu fuone vierafema ijia fina e Jiusi ije kena vame binobino buone rei. Ijadufuo Godi fu fuone vierafema ijia e ije ise revo ije fu ijuonei. Ro kuke e ije bu ise rega fu kame isekafiaema ije fu daro fuone dabe e boege nijasiae. Ijadufuo erarebe bu Godido nidua ijia ise renoevo ije fuka defaruimo ijadufuo fu kame isekafiamo. Rove fu ijiege remo baki ro fume uria kafiana mauike buina finoe.   
\p
\v 23 Ro Godi fu e ije bu ise reva ije fu kafiana mauike buina fima ijadufuo maeje fu vierafe fu fuone izege fu e marejiamo ije dabe e Jiusi ije miakiro fu ijadufuo ijiege rei. Ro kuke fu vierafe fuka fuone sanaema ije abena e ige no fu isuibe umui tuaema ije muokiro fu ijiege vierafe. Ro kuke fu vierafe fuka nuvuefuo oefiane abena fuone sanaema ije abe muokiro fu ijadufuo noena mauike fine.  
\v 24 Ro Godi vame ije fu remo ije fu e ige no fu umui tuaema ije nuvuone reme. Ro vame ije fu e Jiusi ijiaru ijiege remo baki. Ro fu kuke e Jiusi baki ige nodua ijiege reme.  
\v 25 Ro isuibe e Osia buki fu isoema ijia Godi fu vua be ijiege kuaruomo fu isoe,  
\q1 Na e ije bu naebe e none reva ije na kiaga bu una e none reke. Ro na e ije na naebe bu oetuaeva ije na kiako na ja oetuavono kiake.   
\m
\v 26 Ro kuke buki besu ijia Godi fu e Jiusi baki ije kia,  
\q1 Jaja e none bakino kiaema ije fu una kiako, Jaeje ja Godi ije maza boeje ijia fivako ijadufuo anafano kiae.   
\m
\v 27 Ro kuke buki Asaea ijia Godi fu kuke e Isureroko ijiebuo ijiege kuae,  
\q1 E Jiusi are Isurero ijia kariva ije buka ire ajare bu davo baki ijiege uruvana reke. Rove bu e sibaneke ijiaru bu Godi ma vierafega fu karauniake.  
\v 28 Ro maza ije fune ivuareme ijadufuo fu e boeje ise revo ije fu kame isekafiakono kuae.   
\m
\v 29 Ro kuke e Asaea fu vua be ijiege kuae,  
\q1 Godi e Daroki ije fu naebe uifari nuvuone gue kafiabitie noeje fune izege fu e Sodomekiro Gomorako fu foteke kaniaema ijiege nodua kanuomo none oe furivano kuae.   
\p
\v 30 Ijadufuo none gae, ude e Jiusi baki ije bu Godi izege fu e karauniana kaenamia una vame fuone maeje ijia uniamo ije bu naebe rerena gae. Rove iviama ijare vame ije bune gae. Ijadufuo maeje bu ma vierafega Jesu fu ise buone ijadufuo baronei. Ijadufuo Godi fu Jesudo duvado ijia bu karauniana ke una vame fuone maeje ijia uniame.  
\v 31 Ro e Jiusi ije bu ude Godido vame maeje abekuae giriesaeva ije bu naebe abei. Ijadufuo maeje bu Godido Akae ije bu naebe mukoreigia iriniae.   
\p
\v 32 Bu Godido vame maeje bu naebe abeva ijadufuo maeje bu naebe Godi ma vierafei. Bu vierafero bu Mosisido akae ije mukoreigia iriniavo ijadufuo Godi fu buone oemarekiro bu ijiege vierafei. Bu ijiege vierafekinu renoejo ijadufuo Godi fu buki akae ijia Jesudo ijiege kuae,   
\q1
\v 33 Na are Jerusareme ijia e be abena tugie igege ruabieve. Ro tugie ije fu manino ije e boeje bu dia kame ijia nizukuva buka ari kaniake. Ro erare fu tugie ije ma vierafekuma e ije maza rade fube oefiane abekono kuae.   
\c 10  
\s1 E Isureroko bu Godido vame maeje bune daoveabueva ijene  
\p
\v 1 Erafano, naka oe none ijiakuma e none Jiusi ijiebuo Godido baname isoeve. Na vierafe Godi fuka bu karauniakiro na ije buefuo baname isoeve.  
\v 2 Ro naka ma kuariave e none Jiusi ije buka Godido vame maeje abekuae giriesana rereve. Rove vame ije bu Godi rerena gadufuo ije buka naebe mukore vierafe.  
\v 3 Bu vame maeje Godi fu e karauniamo ije buka naebe gana abei. Rove buka una vame buone bu vierafeva ijene kenoeve. Ijadufuo bu Godido vame maeje fu e karauniamo ije bu naebe abekuae ijafuneve.  
\v 4 Bu vierafero bu korobuo giriesana mukoreigia kenokinu akae ije iriniakuva Godi fu karauniakiro bu ijiege vierafe. Rove ije fuka ma baki. Ro bu Jesu Kuraesi ma vierafekuva Godi fu bu karauniana ke una vame fuone maeje ijia uniadufuo.   
\s1 Godi fuka e boeje karauniakiro vierafema ijene  
\p
\v 5 Ro vame izege Godi fu e karauniana ke una vame fuone maeje ijia uniamo ije fune e Mosisire isuibe buki akae ijia isoe. Ro vua ije fu isoema ije fu ijiege kuae,  
\q1 Erarebe bu Godido akae ije mukoreigia iriniana kenoekuva e ije bu maza rade ma karivakono kuae.   
\m
\v 6 Ro vame izege no ma vierafega Godi fu no karaunuona ke una vame fuone ma ijia unuodufuo ije bune buki akae ijia isoe. Ro vua bu isoeva ije fu ijiege kuae,  
\q1 Jade oe jone ijia vierafena kuaeko erare ajia va saove gufia Jesu Kuraesi mesiri ari roga fu no karaunuono kuaevo.  
\v 7 Ro kuke jade kuaeko, Erare va baromuna ijia Jesu Kuraesi mesiri roga fu no karaunuono kuaevo.  
\v 8 Ro Godi vua maeje fu e karauniakiro kuaemo ije fu ijiege kuae,  
\q1 Vua ije fu ja ivuake ijifureki ro fune oe jone ijia name ro kuke jane itire jone ijia kuaenoevono kuae.  
\m Ro iviama vua ige no kuariavo ije noneka e besu Jesu Kuraesido vua ijene ja kuarianoeve.  
\v 9 Ijadufuo ja e boeje ijiebuo nidua ijia kuaeko, Jesu fu E Ireobono kuaekuva Godi fu ja karauniake. Ro kuke ja oe jone ijia ma vierafero Jesu fu baronemoga Godi kuamo fu una urimaro ja ijiege vierafekuva Godi fu ja karauniake.  
\v 10 Ijadufuo ja oe one ijia ma vierafekuva Godi fu ja kena una vame fuone maeje ijia uniake. Ro kuke ja itire jone ijia e boeje ijiebuo nidua ijia kuaeko Jesu fu E Ireobono kuaekuva Godi fu ja karauniake. Ijadufuo erare fu maza boeje ire inokiro ije renoeno ije Godi fu e ije kenujake.  
\v 11 Ro vua irere bu isuibe buki akae ijia Jesudo kuaena isoeva ije fuka ma. Ro vua ije bu isoeva ije fu ijiege kuae,  
\q1 Erare fu Jesu ma vierafemo e ije fube oefiane abekono kuae.   
\m
\v 12 Ijadufuo Godi fu e Jiusi ijiaru ifejiamo baki ro fu kuke e Jiusi baki ijedua ifejiamo. Godi fuka e boeje ijiebuo Godi ijadufuo erarebe fu kumevo ije fuka ifejiana ire ma ijiaru buone remo.  
\v 13 Ijadufuo maeje Godi fu buki akae bu isuibe isoeva ijia fu ijiege kuae,  
\q1 Erare fu E Ireobo ijadufuo ive ije oe fuone boeje ijiakuma kurana kumekuma Godi fu e ije kenujakono kuae.   
\p
\v 14 Ro eranebe bu naebe ude Jesu Kuraesi ma vierafekuva bu izege fu kurana kumega fu ifejiake? Ro kuke vua fuone bu naebe ude fieva ije bu izege fu ma vierafeke? Ro e bino bu Jesu Kuraesido vua ije bu naebe abe kuariakuva bu izege vua ije fieke?  
\v 15 Ro Godi fu naebe e ije Jesudo vua abe oenoejo ije kiaga bu vua maeje abe usiae vakuva bu izege vua maeje abe e gue kuariake? Rove e ije bu Jesu Kuraesido vua ije bune fie. Ijadufuo maeje vua ijafiki be bune isuibe buki akae ijia ijiege isoena kuae,  
\q1 Magoedo e ije ruovo ije bu Godido vua maeje abe ruovono kuae.   
\p
\v 16 Rove e uruvana Godido vua maeje bu fieva ije bu naebe abe oe buone ijia nijae. Ijadufuo e Asaea fu vua be ijiege isoena kuae,  
\q1 E Ireobo, no vua one maeje none abena e gue kuariae. Rove e uruvana vua one bu naebe fiena ma vierafevano kuae.   
\m
\v 17 Ijadufuo e Godido vua abe oenoejo ije bu Jesu Kuraesido vua ije dabe e gue kuariakuva bu Godido vua maeje fieke. Ro bu Godido vua maeje fiekuva bu fu ma vierafekono kuae.   
\p
\v 18 Rove E Isureroko ije bube Jesu Kuraesido vua ije fie? Na vierafe bune isuibe fie ijadufuo maeje bune isuibe buki akae ijia isoena ijiege kuae,  
\q1 Bu Godido vua boeje bu nijasiakinu kuariaeva ije bune dabe kuaena are irore boegia oenoe. Ro kuke vua ije bu dabe kuaenoevo ije e ae mumabo ijia karinoeva ije bune fie furivano kuae.   
\m
\v 19 Ro e Isureroko bu vua ije bune fiejogakuva bu vua ijadufuo maeje bube vierafei? Na vierafe vua ije bune vierafei. Ijadufuo maeje fune Mosisire isuibe ijiege kuae,  
\q1 E Isureroko ije bu naebe na ma vierafevo ijadufuo na una e Jiusi baki ije na ma vierafevo ije ifejiana karauniake. Na ijiege karauniaga e Isureroko bu ije giaga buka defarudiaga bute ijia una na ma vierafekono kuae.   
\m
\v 20 Ro kuke Godi fu isuibe e Asaea vua ijafiki be vierafejamo fu ijiege kuae,  
\q1 E Jiusi baki ije bu naebe na rerieva ije bu na gieke. Ro kuke e Jiusi baki ije bu naebe naena vua kuaekuae vierafevo ije na kono dabe bu samadirejiaga bu na giekono kuae.   
\m
\v 21 Ro kuke Godi fu isuibe e Isureroko ijiebuo ijiege kuae,  
\q1 Naka maza jiagado e Isureroko ije oemarekinu kaenamiakiro samuagiae. Rove buka na ijuonena una ire ise binobino none revano kuae.   
\c 11  
\s1 Godi fu uria E Isureroko oetuamo ijene  
\p
\v 1 Ro ja vierafe Godi fu e fuone Isureroko ije fune ijuemiae ke fu baki? Ije fuka ma baki! Godi fuka bu ijuemiaema baki. Na ijiege kuariavo ijadufuo maeje nadua nana e Isureroko. Ro kuke naeje na e Eburamedo uifari be na e Bezimanido agane ijia uinuvena ruae.  
\v 2 Ro Godi fu e fuone fu isuibe umui tuaema ije fu naebe bu ijuemiae. Ro ja e Iraeja fu isuibe e aesakae Isurero kariva ije buesina una Godi soesoena kuaraema ije jane vierafei.  
\v 3 E Iraeja fu Godi ijiege kuae,  
\q1 E Ireobo, bu e one vua vierafena kuaevo boeje bune kaniae. Ro kuke bu fata one no ijia zinone ifaejavo ije bune kame kania tuase. Ro e ije a ma vierafevo ije bune furi ro nane nare nosukua uria five. Rove e ije buka uria faememarena na kaniekuae giriesavono kuae.   
\m
\v 4 E Iraeja fu ijiege kuaramoga Godi fu una kuae,  
\q1 Na e seveni tauseni (7,000) bu na ma vierafevo ije bu uria kari. Ro e ije na giaga bu godi kufui Barono kuavo ije fuone baname isoekinu aroevo baki.   
\p
\v 5 Ro Godi fune izege fu isuibe rema ijiege iviama e Jiusi sibaneke ige no ma rejuona karaunue.  
\v 6 Ro Godi fune fuone izege fu e ma rejiamo ijia fu e fuone ije karauniae. Ro bu e ijiebe buone izege bu mukoe kenoejo fu ije giana karauniaema baki. Ro Godi fu buone izege bu mukoe kenoejo ijia giana karauniamobitie fuone ma rejiamo ije fuka marekuma baki.   
\p
\v 7 Ro e Isureroko bu vame maeje Godi fu izege e karauniamo ije buneka giriesana rerei rove bu naebe gae. Ro bune e sibaneke Godi fu umui tuaema ijiebe vame fuone maeje gana abei. Ro e Jiusi gue ije fune Godire vierafe buone ije vafiaema ijadufuo bu Godido vame maeje buka naebe gae.  
\v 8 Ro Godido buki akae bu isuibe isoeve ije fu ijiege kuae,  
\q1 Godire oe buone ro nigofo buone bu vierafevo ije fune mukoreigia vafiae. Rove iviama buka ni kuzei ro adane tuguariaeva ijadufuo bu Godido vua maeje buka fievo baki.   
\m
\v 9 Ro kuke e Devidi fu isuibe vua besu ijadufuo ije ijiege kuae,  
\q1 Godi fu ire maeje boeje vajiaema ijadufuo bu iro ina oemareve. Bu vierafero Godi fune buone oemaremoro bu ijiege reve. Rove Godi fu iro ije bu ina utuotuo abevo ijia kame arafiriaga buka isejavaeke.  
\v 10 Ro Godire niome buone ije fuka okuriaga bu Kavene Akae fuone ijadufuo vame maeje bube giake. Ro kuke bu ise revo ijadufuo ni kame isekafiaga bu maza boeje irufui abenoeno kuae.   
\p
\v 11 Ro ja vierafe e Jiusi buka ise uruvana revo ijadufuo Godi fube bu mukoreigia ijuemiae ke fu baki? Na vierafe ije fuka baki. Ro bu ise reva ijadufuo Godi fu una e Jiusi baki ije ifejiana karauniame. Godi fu ijiege e Jiusi baki ije karauniaga e Jiusi ije bu vame maeje Godi fu buone remo ije giaga buka naebe oemadiakuva bute una oe kuderiana Jesu Kuraesi ma vierafedufuo.  
\v 12 Ro e Jiusi ije bu Jesu Kuraesi ijuoneva ijadufuo Godi fu vua fuone maeje fu abena una e boeje aesakae igia kariva ije kuariae. Ro e Jiusi ije bu una Jesu Kuraesi ma vierafekuva Godi fuka e Jiusi abe ro e Jiusi baki ije kukuma ifejiaga bu vame fuone maeje giake.   
\s1 Godi fu e Jiusi baki ije karauniamo ijene  
\p
\v 13 Ro vua ige na una e Jiusi baki ije ja kuariakuve. Naeje fune Godire e Jiusi baki ije joefuo kiemo na urina jone ruae. Ijadufuo na Godi i irere fu kuariemo na ruaeva na ije ireobo vierafena renoeve.  
\v 14 Ro vua maeje ige na abe jone ruaeva ije na vierafe e none Jiusi bu ije giekuva buka naebe oemareke. Ijadufuo e gue bute una oe kuderia Jesu ma vierafega Godi fu bu karauniake.  
\v 15 Ro Godi fu e Jiusi ije fu ijuonema ijadufuo fu una e boeje aesakae igia karinoeva ije eranebe bu una oe kuderiana fuone ruovo ije karauniame. Ro na bigae Godi fu e Jiusi baki ije ijiege karauniakuma e Jiusi ije bute una e izeki reke? Na vierafe bu una oe kuderiaga Godi fu karauniakuma buka e ije bu oena una urivo igege reke.   
\p
\v 16 Ro e Eburamekiro e ije bu isuibe Godido vua vierafena kuaevo ije bu Godido e rekuva uifari buone ije budua bu Godido e reke. Ro na be bijana kuariako ni fiefo. Ine ijadufuo girege ije fuka ma akaekuma na vierafe ine kiae ije budua buka akae reke.  
\v 17 Ro kuke igia fie, Godi fu e Jiusi ije fune uije bino juare fuone ijia vi subitireva ijiege fune ijuonena nafe korei. Ro una e Jiusi baki ije jaeje fune Godire uije nitasi ije kena una juare fuone maeje ijia oema igekido jaka mukoe tavuana iraseke.  
\v 18 Ro e Jiusi baki igie jade uri kojo kame ajiavo. Ja ijiege rekinu una e Jiusi ije Godi fu uije vi subitireva ijiege nafena korema ije nese giavo. Ro ja ijiege renoekuva ni mukoe vierafefo. Ijadufuo maeje fu uije ijare sakae ije ifejamo baki ro fu sakae ijare uije ifejana safine maga fu mukoreigia tavuana irasemo. Ijadufuo e Jiusi baki ije jaeje ja uije igeki ro e Jiusi ije buje bu ire sakae igeki. Ijadufuo bure ja safine miako ja mukoe tavuana iraseve.   
\p
\v 19 Ro na bigae jate ja vierafero Godi fu e Jiusi ije bu uije ije vi subitireva ijiege fune nafe korei. Ro fune una e Jiusi baki ije uije nitasiko igege kena una juare fuone ijia oedo bure e Jiusi ijiebuo are ije abekiro ja ijiege vierafeve.  
\v 20 Ja ijiege vierafekuva ije fune marei. Ijadufuo maeje e Jiusi ije bu naebe Jesu Kuraesi ma vierafeva ijadufuo Godi fu bu ijuemiae. Rove e Jiusi baki ije jaeje jane Jesu Kuraesi ma vierafei. Ijadufuo Godi fu ja kena una e Jiusi ije bu fu ijuoneva ijiebuo are ijia uniae. Ijadufuo jade aroekarakiro nime jumekinu oenoefo.  
\v 21 Ro e Jiusi ije buje buka Godido uije vi mukore tavuavo ijene rove Godi fu uije ise igege nafe korei. Ro una e Jiusi baki ije jaeje ja uije nitasiko igeki ijadufuo ja aroekarakuva Godi fute jadua nafe koreke.   
\p
\v 22 Ro ni vierafe Godi fuka e mukoreigia oetuakinu ifejiamo. Ro kuke maza bino fuka e kame isekafiaga bu vajae fiane abekinu ro oefiane abevo. Ro Godi e Jiusi ije fu kame isekafiamo ijadufuo maeje bu korubuo fu ijuemaeva ijadufuo fu ijiege rei. Ro e Jiusi baki ije Godi ja naebe ijuemae. Ijadufuo ja fu mukoreigia oetuakinu ma vierafekuva fuka ja mukoreigia oetuakinu ifejiake. Ro ja naebe ijiege rekuva jaeje fu uije ije fu nafe koremo ijiege fu kuke ja nafe koreke.  
\v 23 Ro e Jiusi ije bu una Jesu Kuraesi ma vierafekuva Godi fu bu uije igege kena una juare fuone ijia oke. Ijadufuo maeje Godi fuka e darokido fu una kaenamiaga bu e fuone reke.  
\v 24 Ro e Jiusi baki ije ude jaeje ja Godido anafa reva baki. Rove iviama Godi fune ja kemo ja una e fuone rei. Godi fu ijiege rena ire maeje fu ude kena e Jiusi ije vajiaema ije kena una kuke e Jiusi baki ije ja vajiame. Ro Godi fu una uije fuone fu nafe korema ije una kekiro vierafekuma ije fume samadukua kena una juare fuone ijia oga bu una mukoreigia tavuake.   
\s1 Godi fu e Isureroko boeje karauniadufuo  
\p
\v 25-26 Erafano na vierafe ja vua maeje sauki ige na kuariakuvejo ije mukoreigia fiedufuo. Na ijiege kuariakina jabe aroekarakinu vierafero jaeje jaka e ma ro e Jiusi ije bu e isero ja ijiege vierafedufuo. E Isureroko uruvana buka oe kuderiana una ire ise binobino renoekinu Godi ijuoneke. Bu ijiege uria ise renoeke e Jiusi baki ije Godi fu umui tuaema ije bu una Godido ruoma buneka e uruvana rega fu sone ijare rade e Isureroko ije karauniake. Ro Godido buki akae bu isuibe isoeva ijia vua be fu ijiege kuae,  
\q1 E ije fu ro e boeje karauniadufuo ije Godi fu e fuone Isureroko ijia be kuaga fu ruake. Ro fure e Jekafudo uifari boeje bu vame ise kenoevo ije karauniana kaenamia una Godido vame maeje ijia uniakono kuae.  
\v 27 Ro kuke fu kuae, Na maza ijia ijiege na ise buone giana aredufuo ije buina kuaena avenamikono kuae.   
\m
\v 28 Ro e Jiusi ije bu Godido vua maeje bu naebe mukoe fiekuae vierafevo ijadufuo buje buka Godido e ani reve. Rove Godi fuka uria e Jiusi ije oetuame ijadufuo maeje bune asaerafa buone ijiebe fu ma vierafeva ijadufuo fuka uria bu oetuame.  
\v 29 Ro Godi fuje una oe binobino vierafemo baki. Ro fu ire ma bino kena e bino vajiakiro vierafemo ije fume kena vajiamo. Ro kuke fu e gue kega bu e fuone rekiro vierafemo ije fume ijiege remo.   
\p
\v 30 Ro ude e Jiusi baki ije jaeje ja Godi irinavo baki. Rove Godi fu iviama e Jiusi ije bu naebe Godi irinavo ijadufuo fu una jone oefiane abena ise jone giana arekinu karauniame.  
\v 31 Ro Godi fu rade izege fu jone oe fiane abena karauniamo ijiege fu kuke una e Jiusi ije bu fu ijuonevo ije buone oefiane abena karauniake.  
\v 32 Godi fu vierafe e boeje bu rade ise buone bu renoevo ijia una oe kuderiana fuone roga fu giana oefiane abekinu karauniakiro fu ijiege vierafei. Ijadufuo iviama fu arekoga e boeje bu una vame ise ije kenoe.   
\s1 Godi fuka e daroki ro fuone sanaema ije fuka ma ireobo  
\p
\v 33 Akujie Godi nuvuone ije fu sibeno. Fuone izege fu vierafena kemo ije fuka ma anuigi. Ro kuke ire maeje fuone buka ma uruvana ijadufuo fu erare dakinu ro migiakuma baki. Godi irere fu rekiro vierafemo ijiakiro vame izege fu ire binobino remo ije noka izege giana vierafekuva baki.  
\v 34 Ro vua ijadufuo maeje bune isuibe buki akae ijia isoena ijiege kuae,  
\q1 Fu erare E Ireobo irere fu vierafema ije giana vierafemo baki. Ro kuke fu erare Godi uguae kuaramo baki.  
\v 35 Ro fu erare E Ireobo ije ire ma bino vajaema ijadufuo fu una vegue ire ma bino vajakono kuae?   
\m
\v 36 Ro ire boege fune Godire amaeriaema ijadufuo bu daro fuone ijia ni uria kariko fu samuagiame. Ijadufuo ire fuone boege bu una ive fuone ije dabe aroeve. Ijadufuo na vierafe e boeje bu maza boeje fuone sanaema ije dabe aroeke. Mare!   
\c 12  
\s1 Vame maeje Godi fu vierafema ijia karivadufuo ijene  
\p
\v 1 Ijadufuo erafano, Godi fuka vame binobino ijia oefiane nuvuone guokinu ifejuome. Ijadufuo naka ja soesoena kiavono oe jone boeje ka zinone akae igege kena Godi vajana fuefuo imefo. Ja ijiege rekuva ije jane vame maeje Godi fu oemaedufuo ja ijene renoeve.  
\v 2 Ro jade uri e ume igeko Godi naebe ma vierafevo bu kenoevo ijiege kenoevo. Ro ni arega Godi fu oe jone ije kena una mukoreigia amaeriajiaga ja irere fu vierafemo ijiaru renoedufuo. Ro kuke ja una vame mukore ro ire ije Godi fu oemaedufuo ijiaru vierafenoekinu kenoeke.   
\p
\v 3 Ro Godi fu fuone maeje fuka abena na mie ijadufuo na e besubesu ja kuariavono jade aroekarana kojo ive jone kame ajiavo. Ro nime sone oe vafaena mukoreigia vierafekinu kenoefo. Godi fune e besubesu ma vierafevo ije vajiae ijadufuo ni kojo jone izege ja ma vierafevo ije giakinu kenoefo.  
\v 4 Ro na vua be bija kuariako ni fiefo. E ige vajae nuvuone foteke ije fune besu rove vajae gome buka boeje. Ro vajae gome boeje bu i besu mevo baki ro buka i binobino meve.  
\v 5 Ijadufuo vame besu ijiege e ije no Jesu Kuraesi ma vierafevo ije noka e uruvana rove no uria vajae besu igeki. Ijadufuo maeje noeje none Jesu Kuraesina agane besu rei. Ijadufuo noka vame binobino ijia nuvuone ganamikinu ifejianamike.   
\p
\v 6 Ro Godi fu i binobino no menoevo ije kena e besubesu no vajuome. Ijadufuo no Godido daro ije fu vajuomo ije kena i fuone ije menoeve. Ijadufuo fu daro muona kuoko janika vua none abena e gue kuariano kuokuma ije noka ijiege reke. No oe nuvuone no ma vierafevo ije Godi fu vajuomo ijia vierafekinu vua fuone abe e gue kuariave.  
\v 7 Ro fu daro muona kuoko jani e gue nijasiano kuokuma ije noka e nijasiake. Ro kuke fu daro muona kuoko jani e gue ifejiano kuokuma ije noka e gue ifejiake.  
\v 8 Ro fu daro muona kuoko jani e gue ejafiana kuaria bu i buone mukoreigia meno kuokuma ije noka ijiege reke. Ro eranebe fu ja daro miana kiako sinuome jone e gue ivajiano kiakuma ni oe jone ijiakuma ivajiafo. Ro eranebe fu ja daro miana kiako ni e jone samuagiano kiakuma ije nika giriesana bu mukoreigia samuagiafo. Ro kuke eranebe fu ja daro miana kiako ni e guebuo oefiane giana ifejiano kiakuma nika oemarekinu ifejiafo.   
\p
\v 9 Ro igia fie, ja e gue oetuakuva jade surive ijia oetuavo ro nika oe jone ijiakuma bu oetuafo. Ro kuke vame ise ije nika mukoreigia giana ijuone areme ni una Godido nidua ijia vame maeje ijiaru ni veradiana kenoefo.  
\v 10 Ro jaeje jane Godina agane besu reva ijadufuo nika mukoreigia jone oetuanamifo. Ro kuke nika izege ja kairafa jone mukoreigia aguariadufuo ije abe ireobo vierafenoefo.  
\v 11 Ro jade mamoekiro nika giriesana E Ireobo ijadufuo i ije menofo. Ro kuke nika oe jone ro kavene jone ijiakuma E Ireobo ijadufuo i ije menoefo.  
\v 12 Ro ja ma vierafega Godi fu rade ire ma bino jone rekuma ije nika oemarekinu samua karinoefo. Ro kuke ja oenoene vajae fiane binobino biediana isejavaekuva ije nika sone oe vafaena biediafo. Rove maza boeje nika giriesana Godido baname isoekinu karinoefo.  
\v 13 Ro ja giaga kairafa jone bino bu sinuome bakikuva ni jone ja naeva ijia bino ivajiafo. Ro kuke ni e ije bu ae mumabo ruovo ije oemarekinu kaenamia gire jone ijia uniafo.   
\p
\v 14 Ro e gue bu ja arafiriana vua ise joesina kuariakuva ni Godi kua fu una e ije buone ma rejiafo. Ro jade Godi kuaga fu bu kame isekafiamo.  
\v 15 Ro maza ije e bu oemarenoevo ije ni buina oemarefo ro bu oefiane abevoga ni buina oefiane abefo.  
\v 16 Ro ja e boejena karinoekuva nika mauike buine kafaena karinoekiro jade aroekaravo. Ro kuke ja i isesina gue menoekuva nika e ijue baki rena oemarekinu menoefo. Ro jade vierafero ja ire boeje jane mukoreigia vierafevaro uri aroekaranoevo.   
\p
\v 17 Ro igia fie, e bino bu ise bino jone rekuva jade una ve gue ise rekuae vierafevo. Ro nika maza boeje e boeje ijiebuo nidua ijia ire ma ijiaru mimatana renoefo.  
\v 18 Ro kuke nika giriesana Godi daro fu miaema ije dabe e ije bu ise revo ije turaejiafo. Ja ijiege rekuva ja e boejena kafae karike.  
\v 19 Ro erafano e bino bu ise bino jone rekuva jade una ve gue ise rekuae vierafevo. Ro ni arega fu Godire e ije ziegafiana kame isekafiafo. Ijadufuo maeje Godi fune buki akae bu isuibe isoeva ijia ijiege kuae,  
\q1 Erare bu ise bino jone rekuva Godi naka e darokido nare una ve gue bu dabe isekafiakono kuae.   
\m
\v 20 Ro kuke fu kuae,  
\q1 Erare fu ja ziegafiamo ije fu vasiaoekuma nika ire bino vajaga fu ifo. Ro fu do duaekuma ni do ijafo. Ja ijiege rekuva e ije ziemo ije fu vame maeje ja fuone revo ije gana una ise fu rema ijadufuo jaeveke.   
\m
\v 21 Ro jade arega e ije ise revo ijiebe iraraena ja asidiavo. Ro nika jare giriesana una e ije bu jone ise revo ije ma rejiaga bu ijia oe kuderia areme ise bu revo ije arefo.   
\c 13  
\s1 E mamekanu binobino iriniadufuo ijene  
\p
\v 1 Ro erafano igia fiefo, e boeje nika e mamekanu jone bu ja samuagiavo ije iriniafo. Ijadufuo maeje fune Godire isuibe bu kena uniaema ijadufuo bu ja samuagiave. Ro Godi daro ije fu naebe bu miaemabitie bu izege e mamekanu rena no samuaguokuva baki.  
\v 2 Ijadufuo eranebe bu e mamekanu ije ijuonena vua buone naebe fievo ije bune kuke Godi irere fu duvado buone ijia rekiro vierafema ije ijuoneve. Ro eranebe bu e mamekanu ije ijuonena vua buone naebe iriniavo ije bu kame isekafiake.  
\v 3 Ro e ije bu mukoe kenoevo ije bube e mamekanu ije Godi fu kena uniaema ije giana jumeke. Ro bune e ije bu ise renoejo ijiebe e mamekanu ije giana jumeke. Ijadufuo erare fu e mamekanu fuone ije naebe giana jumekiro vierafekuma e ije nine vame ma ijiaru kenoene. Ja ijiege kenoekuva e mamekanu jone buka ja kame aroriana nidosiake.   
\p
\v 4 Ro e mamekanu ije fune Godire kena uniaema ijadufuo bu ja mukore samuagiave. Ro ja ire ise bino rekuva ni e jone mamekanu ije jumefo. Ijadufuo maeje buje bu daro nado bu ise jone ja reva ijadufuo kame isekafiake. Ijadufuo maeje buje fune Godire umui tuaema ijadufuo bu Godido i meve.  
\v 5 Ijadufuo jaka e mamekanu jone ije iriniake. Ijadufuo maeje ja naebe bu iriniakuva bu ja kame isekafiake. Ro kuke ja bu iriniakuva ije jane vame maeje renoeve.   
\p
\v 6 Ro e mamekanu jone bu takesi moni ijadufuo ja kiakuva nika oemarekinu vajiafo. Ijadufuo maeje buje bu Godire kena uniaema ijadufuo bu fuefuo imekinu ja samuagiave.  
\v 7 Ro kuke igia fie, ja e mamekanu bu gamani ijia imejo ije bu moni ro ire binofuo kiakuva nika migegire vajiafo. Ro nika e mamekanu jone boeje aguariana bu nidosiakinu aroriafo.   
\s1 E boeje buka oetuanamidufuo ijene  
\p
\v 8 Ijadufuo e bino bu moni ro ire bino kena ja vajiakuva ni migegire una ve kena vajiafo. Ro be ije nika maza boeje e boeje oetuafo. Ijadufuo maeje erarebe bu maza boeje e oetuavo ije fune Godido akae ije ijiakuma riarei.  
\v 9 Ro Godido akae boeje e guebuo bara ro baru turakinu e kania ro iniemekinu ebuo sinuome giana rieziavo ije fu kena Mosisi vajaema ije fune akae besu igare okuriae. Ro akae besu ije fu akae boeje okuriaema ijeja ni izege ja vajae jone ije oetuavo ijiege nika una e boeje oetuafo.  
\v 10 Ro ja e boeje ijiege mukoe oetuakuva jabe ise bino buone redufuo. Ijadufuo eranebe ja ijiege renoevo ije ja Godido akae boeje jane mukore iriniave.   
\s1 Maza ije Jesu Kuraesi fu una ruomo ijene  
\p
\v 11 Ro ja vua boeje na kuariaeva ije jane ijiege renoevo ijadufuo ja ni nisuina kariva baki. Ijadufuo nine ijiege maza boeje ni nafaena karinoefo. Ijadufuo maeje no iko Jesu no ma vierafeva ijia no kuae maza ije Jesu fu una ruomo ije fune ivuaremano kuae. Rove iviama ijare maza ije funeka ma ivuareme.  
\v 12 Ro maza nuvuone ume igia no karina ruovo ije fune ve irasekuveno ijiege furikuvene. Ro maza ije no una Jesu Kuraesido sanaema ije gakuvejo ije fune ivuareme. Ijadufuo noka vame ise boeje e bu mugu renoejo ijiege no renoejo ije ka kena garege koregaro una vame maeje sanaema ijiaru kenoeke.   
\p
\v 13 Ro no uri Jesu Kuraesi fune una nuvuone ruaema igege fuone sanaema ijia karinoekuva fuka mareke. Ro jade uri do kugi ina nigofo iserekinuro ire uruvana ina jiare ufekinu barubara fudaenamina vame ise binobino renoevo. Ro kuke jade uri oe ise vierafekinu joe bijaevo.  
\v 14 Ro nika E Ireobo Jesu Kuraesi abega fu maza boeje oe jone ijia jaena finoefo. Ro jade uri ire ise boeje vajae surive jone bu vierafeva ije kenoevo.   
\c 14  
\s1 Jade kairafa jone ijiebuo ise ije giana kuaevo  
\p
\v 1 Ro e gue Jesu Kuraesi ma vierafevo ije buone ma vierafevo ije buka mamosiave. Ijadufuo nobe e ijieki ije bu buone vierafeva ijia kenoevo ije giana kuaeke. Ro noka oemarekinu bu kaenamiaga bu una noena agane besu reke.  
\v 2 E bino bu buone vierafevo ijia buka ire boeje ijo. Ro e gue bu buone vierafevo ijia bu mamosiavo ijadufuo bu ire gue i ro gue bu baki.  
\v 3 Ijadufuo e ije ire boeje ijo ije jade una e ije ire gue ijo baki ije giana kuaevo. Ro kuke e ije ja ire gue ijo baki ije jade una kairafa jone gue bu ire boeje ijo ije giana kuaevo. Ijadufuo maeje Godi fu e ije bu ire boeje ijo ijiakiro e ije bu ire gue ijo baki ije fu uria bu oemarejiamo.  
\v 4 Ijadufuo jade e ije bu ire boeje ijo ijiakiro e ije bu ire gue ijo baki ije giana arafiriavo. Ijadufuo maeje e ije bu joefuo i mevo baki ro bu Godi E Ireobo buone ijadufuo i meve. Ijadufuo fu korofuo giaga bu isema rero bu ma renoejo ije fure giana vierafei. Ro fure ifejiako bu maza boeje fu ma vierafekinu mukoreigia kenoeve.   
\p
\v 5 Ro kuke e bino bu vierafega fune marema ijadufuo bu maza besukua abena Godi aroeve. Ro e gue bu vierafega fune marema ijadufuo bu maza binobino Godi aroenoeve. Ijadufuo e besubesu irere no renoejo ije no konuvuo vierafena renoeve.  
\v 6 Ro eranebe bu mazani besukua abena Godi aroevo ije bune E Ireobo fu oemaemo ijia renoeve. Ro eranebe bu vierafega fune marema ijadufuo bu fanu ijo ije bune E Ireobo fu oemaemo ijia revo ijadufuo bu Godi oemarejave. Ro kuke eranebe bu fanu naebe ijo ije bu vierafega bune E Ireobo fu oemaemo ijia revo ijadufuo bu una Godi oemarejave.   
\p
\v 7-8 Ro e boeje ume igia oenoevo ije e besukua be fu erare fume fuone vierafema ijia oenoeno baki. Ro kuke e be erare fu oenoena baronemo ije fume fuone vierafema ijia baronemo baki. Ijadufuo ire inokiro ije oevo ijiakiro ni uria karivo ije nome nore nuvuone vierafeva ijia revo baki. Ro noneka E Ireobo fu vierafema no ijia renoeve.   
\p
\v 9 Ijadufuo Jesu Kuraesi fu e boeje oeva ijiakiro ni uria kariva ijiebuo E Ireobo rekiro fu ijadufuo baronena una uri.  
\v 10 Ijadufuo ja irerefuo una kairafa jone gue Jesu ma vierafevo ije buesina kuaekinu ro kuke bu nese giave? Ijadufuo maeje e boeje maza rade noka Godido nidua ijia irega fu ise nuvuone boeje no renoevo ijene kena mazie guoke.  
\v 11 Ijadufuo maeje bune isuibe buki akae ijia ijiege isoena kuae,  
\q1 E Ireobo naeje na uria fivo ijadufuo naka ma kuariave. Maza rade e boeje buka nidua none ijia auge sake. Areme bu kieko, Godi aeje aka e boegiebuo E Ireobono kiekono kuae   
\m
\v 12 Ijadufuo noeje no izege sauikuva baki ro noka Godido nidua ijia irena irere boeje no renoeva ijene visuna kuarake.   
\s1 Jade kairafa gue biesiriaga bu ise revo  
\p
\v 13 Ijadufuo nobe uri ise nuvuone ganamina kuaenoedufuo. Ro nika mukoreigia vierafekinu kenoefo. Ro jade uri ire bino rena kairafa jone ijiebuo ma vierafevo ije arafiriavo.  
\v 14 Ro naeje fune E Ireobo Jesure samadukua nijasiema ijadufuo na vierafe ire boeje Godi fu amaeriaema ije fuka ma no ivo. Rove e gue bu vierafega ire bino bu buefuo fu ise ijadufuo bu ivo baki. Ijadufuo bu ire gue naebe ikuva nobe giana kuaeke.  
\v 15 Ro ja kairafa jone gue ijiebuo nidua ijia ire bino bu ivo baki ije ikuva ije ja vame oetuanamivo ijia kenoejo baki. Ro ja ire ije bu ivo baki ije ikuva jaka e ije Jesu Kuraesi fu buefuo baronema ijiebuo kavene kame arafiriadufuo. Ijadufuo ni mukoreigia vierafekinu jone oetuanamifo.  
\v 16 Ro jabe uri ire bino ja oemadiadufuo ije rega e bu giana una Jesu Kuraesido ive ije dabe arafirivo.  
\v 17 Ro igia fie, Godido vame maeje no kenoedufuo ije noka ire ikinu ro atodufuo ije fuka baki. Ro vame maeje no kenoedufuo ije noka Godido Kavene Akae ije abega fure oe nuvuone ijia fina no samuaguoke. Fure samuaguoga no vame maeje sanaema ije abena kairafa nuvuone ijena oemarekinu kafaena karinoeke.  
\v 18 Ijadufuo erare fu vame maeje Jesu Kuraesi fu vierafema ijia kenoekinu kairafa gue oetuakuma e ije fune vame Godi fu oemaedufuo ijia kenoene. Ijadufuo e buka fuone oemarekinu fu aguaeke.   
\p
\v 19 Ijadufuo ni roga no maza boeje mimatana vame ma ijiaru kenoekinu e kairafa nuvuone Jesu Kuraesi ma vierafevo ijena kafae karinoedufuo. No ijiege kenoekinu nuvuone ifenamiga no ijia daro abena e damuiki redufuo.  
\v 20 Godi fu e kairafa jone irere bu mumaza renoedufuo ije fune vajiae. Ijadufuo bu ire gue i ro gue bu naebe ikuva jade giana kuaevo. Ro ire boeje fune Godire nuvuefuo amaeriama ijadufuo nome idufuo. Ro jade ire ije kairafa jone gue bu ivo baki ijene nidua buone ijia inoevo. Ja ijiege rekuva ja buone bu ma vierafevo ije kame arafiriake.  
\v 21 Ro no faememarena ire binobino inoekinu vame ise bino rekuva noka kairafa nuvuone ijiebuo ma vierafevo ije kame arafiriake.  
\v 22 Ja vierafega vame binobino ja renoejo ije fune marejokuma ije nime mauike josukua oe jone ijia arega Godi fu giafo. Ro ja vierafega ire bino ja renoevo ije bu Godido nidua ijia bune marejokuma ije ja oemaredufuo.  
\v 23 Ro ja vierafega ire bino ja idufuo ije fuka ise rove ja faememarena ikuva ije Godi fube oemareke. Ijadufuo maeje jane vierafega ire ije fu ise rove jaka uria ivo ije jane ise reve.   
\c 15  
\s1 E gue oemarejiakiro jade joe nidoenamivo  
\p
\v 1 Ijadufuo erarebe no giriesana Jesu ma vierafevo ije noka urina kairafa nuvuone ifejiakinu dasumiake. No kairafa nuvuone bu mamoekinu naebe irere Godi fu buefuo vierafejiaema bu naebe renoevo ije ifejiake. Ro nobe uri nuvuosukua vierafena uri irere no oemaduodufuo ijiaru renoeke.  
\v 2 Ro e besubesu noka urina vame maeje kairafa nuvuone gue Jesu ma vierafevo bu oemaredufuo ijia ifejiake. No ijiege rekina buone bu Jesu ma vierafevo ije buka gikikimana reke.  
\v 3 Ijadufuo maeje Jesu Kuraesi fuje fu Godi rove vame fuone fu ume igia finoekinu kenoema ije fu naebe fuone fu oemaredufuo ijia kenoe. Rove e ani fuone bume uri fu dabe arafirina vajae fiane vajavoga fuka una Godido oemarei. Ijadufuo maeje bune isuibe buki akae ijia isoena ijiege kuae,  
\q1 E ani ije bu a arafiraeva ije bune na arafirievano kuae.   
\p
\v 4 Ro vua boeje bu isuibe buki akae ijia isoeva ije bu no nijasuokuae isoe ijadufuo no vua ije dana vierafeke. No vua ije ma vierafekuva vua ijiebe no ifejuo ro ejafuoga nobe mamoeke. Ro noka giriesana uri ma vierafero Godi fu maza rade ire ma bino nuvuone rejuokiro no ijiege vierafekinu zinune ke vake.  
\v 5 Na Godi ije fu fuone vierafema ijia maza boeje ifejuokinu ejafuoko no giriesana ma vierafevo ijadufuo baname isoeve. Na baname isoega fure fuone vierafema ijia ja e besubesu ifejiaga ja una oe besu vierafeke. Areme ja uri vame izege Jesu Kuraesi fu kenoema jadua ijiege kenoeke.  
\v 6 Ja ijiege una agane besu re areme uri Godi E Ireobo Jesu Kuraesido Asoe ije aroekinu ive fuone abe ajiake.   
\s1 Godido vua maeje bu abe e Jiusi baki ije kuariaeva ijene  
\p
\v 7 Ro vua boeje na kuariaeva ijadufuo zinume ije ijiege. Jesu Kuraesi fuka ja oetuaema ijadufuo fu ja kaenamiana una agane besu rei. Ijadufuo jadua ni ijiege kairafa jone oetuana kaenamia una jaena agane besu refo. Ja ijiege kenoekuva e gue bu vame maeje ja kenoevo ije giana una Godi dabe nidoekinu fuone sanaema ije aroeke.  
\v 8 Ijadufuo maeje igia fie, Jesu Kuraesi fu ari ruaema ije fu e Jiusi ije Godido vame maeje izege fu vierafena kenoeno ije nijasiakiro ruae. Ro kuke fu Godido vua ije fu isuibe e Jiusi ijiebuo asaerafa ije kuariaema fu ijene abe marekiro ari ruae.   
\p
\v 9 Ro kuke fu e Jiusi baki ije vua fuone maeje Godi fu izege buone oefiane abena karauniadufuo ije kuariakiro ruae. Ro e Devidi fu isuibe vua be ijiege kuaemo bu buki akae ijia isoe. Ro vua ije fu ijiege kuae,  
\q1 Na e Jiusi baki ijena oenoevo ije naka vua one maeje dabe bu kuariake. Ro kuke naka one oemarekinu dua urukafakono kuae.   
\m
\v 10 Ro una kuke buki kafare be ijia fu ijiege kuae,  
\q1 E Jiusi baki ije ni Godido e ijena besu oemareno kuae.  
\v 11 Ro kuke be fu kuae, E Jiusi baki ije nika E Ireobo ije aroefo. Ro e boeje isama binobino kuaevo ije jadua janika fu aroeno kuae.   
\m
\v 12 Ro e Aesaea fudua fu kuke isuibe vua be ijiege kuae.  
\q1 E Jesido agane ijia bu e be bieteke. Ro E Ije fune Godire umui datedo fure e Jiusi baki ije samuagiaga buka una fu ma vierafekono kuae.   
\p
\v 13 Ijadufuo naka joefuo Godido baname isoega fu ifejiaga ja jone ma vierafevo ijia jaka oemarekinu kafaena karivake. Ro kuke fu Kavene Akae ijadufuo daro ijia ifejiaga ja maza boeje ma vierafena kari vake.   
\s1 Foru i fuone fu mema ijene  
\p
\v 14 Ro erafano na ma vierafega jane ire ma ijiaru e kairafa jone ijiebuo reve. Ro kuke jane mukoreigia vierafenoekinu ire binobino Godi fu kuariaema ije renoeve. Ijadufuo na vierafe jane manido ja Godido vua ijene una kairafa jone ijena nijaenamidufuo.  
\v 15-16 Na fasi ige naka vua binobino darokuma samadukua isoena kuariae. Na ijiege kuariakina ja ire maeje ja revo ije jabe arekiro jaka giriesana ijiege revadufuo. Ijadufuo maeje Godi fu fuone izege fu e ma rejiamo ijia fune na abe nujiema ijadufuo na fuefuo i meve. Fu vierafe naeje naka e Jiusi baki ijena finoekinu Jesu Kuraesido vua maeje nijasiake. Na ijiege rekina e Jiusi baki ije buka oe kuderiana una Godido roga fu Kavene Akae abe miakinu bu Godido nidua ijia buka e maturaedufuo.   
\p
\v 17 Ro naeje na Jesu Kuraesido e reva ijadufuo na Godido i mena vua fuone maeje abe e Jiusi baki ije kuariavo. Na ijiege revo ijadufuo naka Godido ireobo oemarekinu aroekarave.  
\v 18 Ro kuke na vierafe naka Jesu Kuraesi i irere fu miema ijiaru abena darodaroki kuaeke. Ro i ije fu miema ije na e Jiusi baki ije ifejiaga bu una Godi ma vierafekinu irinadufuo.  
\v 19 Ro vua gue na kuarianoekinu ro ire bino na renoeva ije na Kavene Akae ijadufuo daro ije abena ire sumiki bino bu giaeva baki ije renoe. Ijadufuo na are Jerusareme ijia urina vakinu Jesu Kuraesido vua maeje abena mukoreigia kuariaeja vakuma are Iririkami ijia keke.   
\p
\v 20 Na vierafe naka Godido vua maeje dabe ijiege e gue kuarianoekiro vierafe. Ro igia fie, naeje e ije bune ude Kuraesido vua ije fieva ije na naebe are buone ijia vakiro vierafe. Ro na vierafe naka e ije bu Jesu Kuraesido vua ije naebe fieva ijiebuo are ijia oenoekinu vua maeje abe kuariake.  
\v 21 Ijadufuo maeje bune isuibe buki akae ijia isoena ijiege kuae,  
\q1 E ije bu Jesu Kuraesido vua ije naebe fieva ije bu Jesu irere fu remo ije bu gake. Ro kuke bu vua fuone mukoreigia fiena ma vierafekono kuae.   
\s1 Foru fu una Romu vakiro vierafema ijene  
\p
\v 22 Ijadufuo naka una jone vuakiro vierafe rove na naebe vuae. Ijadufuo maeje na Godido vua maeje abena una kuke e Jiusi baki gue nijasiave.  
\v 23-24 Ro iviama are boeje bu Jesudo vua maeje bune fie furi. Ro juaevasia uruvana naka ja giakiro vierafe ijadufuo na vierafe na aesakae Sifeni vako ijia na fura sibaneke ijia jaena fike. Na ijia jaena fina oemadiega ja ijia sone ifejiega na una aesakae Sifeni vake.   
\p
\v 25-26 Naka ja giakiro vierafe rove iviama na una are Jerusareme ijia vakuve. Na moni ije e Jesu Kuraesi ma vierafevo are Mesedoniakiro Akaea kariva bu oemarekinu afuiva ijene karina vake. Na karina va Godido e ije gue bu are Jerusareme ijia isema kariva ije vajiake.  
\v 27 Ro moni ije bu afuiva ije bune e ijiebe korubuo ijiege vierafena rei. Ijadufuo maeje bu e Jiusi Godi ma vierafevo are Jerusareme kariva ijiebe Godido vua maeje abena e are Mesedoniako ijiakiro e Akaeako ije miae. Ijadufuo e Jiusi baki ije bu ijadufuo una ve e Jiusi ije isema kariva ije ifejiana moni naejiave.   
\p
\v 28 Ijadufuo na vierafe naka ude moni ije e Jiusi baki bu afuiva ije abena are Jerusareme ijia e Jiusi ije mia areme na sone una jone vuake. Na vierafe na aesakae Sifeni vako ijia na vua ja gia areme na nana are Sifeni vake.  
\v 29 Ro na ja giake vuako ije na vierafe Jesu Kuraesi fuka fuone maeje uruvana vajiega na vua ja mukoreigia ifejiakinu nijasiake.   
\p
\v 30 Ijadufuo erafano ja isekie, ni E Ireobo nuvuone Jesu Kuraesido ive ro Kavene Akae ijadufuo oetuamo ijia noefuo uruvana Godido baname isoefo.  
\v 31 Ja ifejiena noefuo baname isoekina e ije bu Godido vua maeje naebe abeva aesakae Judia kariva ije bube ise bino none reke. Ro kuke ja ijiege baname isoekina na moni ije abena vakuva e Jiusi are Jerusareme ijia isema kariva ije buka oemarekinu abedufuo.  
\v 32 Ja baname isoega Godi fune ijiege vierafekuma na ja giake vuako ijia na maza sibaneke oemarekinu jaena fike.  
\v 33 Ro nadua na baname isoega Godi fu maza boeje ifejiaga ja mukoreigia kafaena karinoeke. Marei!   
\c 16  
\s1 Foru radekuma fu anadiaema ijene  
\p
\v 1 Na vierafe naka bara Fibido kuariaga ja vierafeke. Bara ije fu kai nuvuone be fudua Godi ma vierafemo. Ro fu are Senitiria ijia e ije bu Jesu ma vierafevo ijiebuo i meno.  
\v 2 Na bara ijadufuo kuariaga ja vierafekina fu ijia vuakuma ja fu oemarekinu E Ireobo ijadufuo e igege mesirike. Ro na vierafe ja ire boeje fu vierafedufuo ije jaka oemarekinu ifejake. Ijadufuo maeje bara ije fuka e boeje Jesu ma vierafevo ije ifejiakinu na mukoreigia ifejiemo.   
\p
\v 3-4 Ro be ije na bara Firisirakiro baru fuone Akuira ije anadiave. Ijadufuo maeje buje buka naena Jesu Kuraesido imevo ro kuke buka vame ise bu oedufuo ijia noefuo isejavae. Ijadufuo naka buone ireobo oemareve ijadufuo maeje bu na nosukua ifejieva baki. Ro bu kuke e Jiusi baki ije bu besu afuina Godi aroevo ije duaku mukoreigia ifejiae.   
\p
\v 5 Ro na kuke e ije bu besu are buone ijia afuina Godi baname isoevo ijiakiro Efinitasi e ije na fu oetuavo ije anadiave. Ro e Efinitasi ije fure aesakae Esia guove ijia amure Jesu Kuraesi ma vierafei.  
\v 6 Ro kuke na bara Meri anaeve. Ijadufuo maeje fuje fu bara be jaena oenoekinu giriesana joefuo imeno.  
\v 7 Ro na e Eduronaekasikiro e Jiuniasi anadiave. E inokiro ije buka agane none bu ude naena besu dibure kari. Ro e Afasero ijiebuo uve ijia e inokiro ije budua bu Jesudo i mukoreigia mevo ije e bune giana vierafei. Ro kuke bune bure ude Jesu Kuraesi ma vierafekoga naeje na rade ma vierafei.   
\p
\v 8 Ro kuke na Amifiretasi e ije na fu oetuavo ije anaeve. Ro e ije fudua fuka Godido e be.  
\v 9 Ro na e Ebanasi e ije fu noena Jesu Kuraesido imeno ijiakiro e Sitekisi na ireobo oetuavo ije anadiave.  
\v 10 Ro kuke na e Aferisi anaeve ijadufuo maeje e ije fu Setanire biesiri rove fuka uria giriesana una Jesu Kuraesi ma vierafei. Ro kuke na e Arisitoburasido agane ije anadiave.  
\v 11 Ro na e Erodioni anaeve ro e ije no fuosiki no agane besu. Ro kuke na e Nasisido agane ije anadiave ro budua bu E Ireobo ijadufuo e.   
\p
\v 12 Ro kuke na bara Tirifaenakiro bara Tirifosa ije anadiave. Bara inokiro ije bu E Ireobo ijadufuo i mevo. Ro kuke na e Fesisi e ije na oetuavo ije anaeve. E ije fuka e be fu giriesana E Ireobo ijadufuo i menoeno.  
\v 13 Ro na e Rufasi e ije E Ireobo fu umui datema ijiakiro asie fuone ije anadiave. Ijadufuo maeje bara ijare naeje fuka asie none igege samuagie.  
\v 14 Ro kuke na e Asinikuritasikiro e Firegonikina e Emisi ro e Fatirobasikiro e Emasi ije anadiave. Ro na e ije Jesu ma vierafevo bu buina afuivo ije anadiave.  
\v 15 Ro na e Firorogasikiro bara fuone Juriakina e Neriasikiro maki fuone ije anadiave. Ro kuke na e Orimifasikiro e ije Jesu Kuraesi ma vierafevo bu buina besu afuivo ije anadiave.  
\v 16 Ja isekie, ni e ije bu Jesu ma vierafevo ije bu ananamivo ijiege oe jone ijiakuma ananamikinu karifo. Ro e ige Jesu Kuraesi ma vierafevo bu igia besu afuina Godi baname isoevo ije bu ja anadiave.   
\s1 Foru vua radekuma fu e Romuko nijasiaema ijene  
\p
\v 17 Ro erafano ja isekie, nika mukoreigia jone samuanamikinu karinoefo. Ijadufuo maeje e ise gue jaena ijia karinoejo ije buka vame jone ja agane besu rena afui karinoejo ije kame atasena binobino renoeve. E ije buka vua maeje ja fieva ije kame arafiriakinu una vua buone kufui ije nijasiave. Ijadufuo ni mukoreigia e ijieki ije giana akariakinu oenoefo.  
\v 18 Ijadufuo maeje e ijieki ije bu E Ireobo nuvuone Jesu Kuraesido imevo baki. Ro bume ire ije vajae surive buone bu oemadiavo ije vierafena kenoeve. E ijieki ije buka oenoekinu e ije bu Jesu ma vierafevo baki ije biesiriave. Bu biesiriana vua soesoegi kuariakinu oe buone ije kame kuderiave.   
\p
\v 19 Ro igia fie, e boeje Jesu ma vierafevo aesakae irore igia kariva ije bu izege ja Godido vua maeje irinavo ije bune fie furi. Ijadufuo na irere ja revo ijadufuo naka ireobo Godido oemareve. Rove vua ige na isoena kuariavo ije na vierafe jaka vame maeje mukoreigia giana vierafekinu kenoeke. Ro vame ise ije jaka mukoreigia akariakiro na ije vierafei.  
\v 20 Ro ja ijiege kenoekuva Godi ije maza boeje e ifejiako bu kafaena karinoejo ije fuka ja daro miake. Fu daro miaga jaka uri giriesana Setanido daro ije abe garege akoeke. Ro kuke na vierafe E Ireobo Jesu Kuraesi fuka ma rejiaga ja oemarekinu karinoeke.   
\p
\v 21 Ro Timoti e ije fu nosiki i besu menoeno ijiakiro e agane none e Rusiasikiro e Jesonikina e Sosifata ije bu ja anadiave.   
\p
\v 22 Ro e Tetiasi nadua na E Ireobo ijadufuo ive ijia ja anadiave. Ro fasi ige na Forure kuariekoga na isoena ja nijiave.   
\p
\v 23-24 Ro e Gaeasikiro e boeje are fuone ijia afuina Godi baname isoevo ije budua ja anadiave. Ro Foru naeje na e Gaeasido are ijia fivo. Ro kuke Erasitasi e ije sidove ige no kariva ijadufuo moni ije samuamo ije fu ja anadiame. Ro kuke uvia nuvuone be e Kuotasi ije fudua fu ja anadiame.   
\p
\v 25-26 Noka Godido oemaredufuo ijadufuo maeje Jesu Kuraesido vua maeje na abena e nijasianoejo ije fu manido fu ja ifejiaga jone ma vierafevo ije fuka gikikimana reke. Isuibe Jesu Kuraesido vua maeje fuka ma sauina na ruae. Ro iviama vua ije fune e Godido vua vierafena kuaevo ijiebe abe kuaena samadirevo none gae. Ro vua ije e karauniadufuo ije fune Godi e ije maza boeje ijia fi vako ijare kuae. Ijadufuo noka vua ije dabe are irore igia kuaena samadirega e boeje buka Godi ma vierafedufuo.   
\p
\v 27 Ijadufuo roga no Jesu Kuraesi irere fu rema ijadufuo Godi besu ije fu maza boeje ma ijiaru vierafena kenoeno ije aroefo. Ro kuke na vierafe e boeje buka Godido ive sanaema ije dabe maza boeje aroekinu karivake. Fune ijene, Marei!