\id PHP - Barai NT and OT portions [bbb] -Papua New Guinea 2006 (DBL -2014) \h FIRIFIANI \toc1 FIRIFIANI \toc2 Firifiani \toc3 Fir \mt1 FIRIFIANI \imt1 Firifianido Vua Amure \ip Maza ije Foru fu uria dibure fima ijia fu fasi be isoena e ma vierafevo Firifae ijia karivo ije nijiae. Ro are Firifae ije fu sidove anuigi be ro fu Mesedonia guove ijia. Ro fasi ije fu isoema ije fu e Firifaeko ijiebe urina zinune mani buone kena e Ifafurodaetasi vajavoga fu kena ro Foru vajaema fu ije isoe. Ro maza ririkua be Foru vua maeje abe vaema ijia fu fuone amure fu Firifae ijia vua maeje abe bu kuariamoga e gue bu vua ije fiena ma vierafei. Ro e ma vierafevo are Firifae ijia kariva ije bu mani uruke naeva baki. Rove buka urina zinune e ma vierafevo Jerusareme ijia e sinuome baki ijiebuo mani afuikinu ro kuke Foru ifejadufuo ije afui. Foru fu dibure fi rove fuka ireobo oemarei. Ro kuke fu vierafe e Firifaeko ije bu irufui gue biediakuva buka oemaredufuo fu ije isoe. Ro Foru fu bu kabuaekabuaeki ijia karinoedufuo ije kuariae. Ro kuke e ije vua kufuimena nijasiavo ijiebe bu kikekimiaga bu vajae surive buone kania ufudufuo vierafevo ijene ju kuariae. Ro kuke fu vierafe buka Jesu vareki igege karinoedufuo ije ejafiana kuariae. \iot Foru fu vua binobino fu buki Firifiani isoema ijeja - \io1 1:1-11 E Firifaeko ijiebe Foru oetuakinu ifejaeva ijadufuo fu una buone oemarema ijene. \io1 1:12-26 Vame binobino ije bu Forudo reva ijiakiro irere fu renoeno ije fu kuariaema ijene. \io1 1:27–2:18 E Godi ma vierafevo ijiebuo vame bu kenoedufuo ijene. \io1 2:19-30 Timotikiro Ifafurodaetasi bu rade izege redufuo Foru fu ije vame amaerijiaema ijene. \io1 3:1–4:9 Vame maturaema ijiakiro e Godi ma vierafevo bu izege karidufuo ijene. \io1 4:10-20 Foru sinuome bino bu vekinu fu vajaeva ijadufuo buone oemarema ijene. \io1 4:21-23 Ro rade fu bu anadiaema ijene. \c 1 \s1 Foru fasi fu isoena E Firifaeko nijiaema ijene \p \v 1 Na Foru nare ro Timoti e ije no Jesu Kuraesido imenoejo nore fasi ige isoe. \p No isoena Godido e ije ja sidove Firifae ijia karina Jesu Kuraesi ma vierafevo ijiakina e mamekanu jone ijiakina e ije bu e gue ifejiavo ije ja nijiave. \p \v 2 Na baname isoega Godi Asoe nuvuone ijiakiro E Ireobo Jesu Kuraesi bu maza boeje ja ma rejiakinu samuagiaga ja kafaena karinoedufuo. \s1 Foru fu e Firifaeko ije buefuo Godi baname isoema ijene \p \v 3 Maza boeje naka ja vierafevo ijadufuo na joefuo Godi Asoe nuvuone ije fuone oemareve. \v 4-5 Ro maza boeje baname none na e boeje joefuo isoevo ije naka oemarekinu isoeve. Ijadufuo maeje ja iko zinume ijia na Jesu Kuraesido vua maeje kuariavo jaka fie. Ijadufuo ja urina ire binobino naejiekinu bijuakievo ije ja uria rena ruove. \v 6 Ja vua ije na kuariaeva ije jaka fiena abe ma vierafeva ijadufuo na vierafe fune Godire vame maeje jone remo ijadufuo fube areke. Ro fuka uria ijiege ifejiaga ja vame ma ijiaru rekinu vakuma maza radekuma ije Jesu Kuraesi fu una ruomo ijia fu ire boeje foteke re furike. \p \v 7 Ro jaeje naka maza boeje oe none igia vierafenoeve. Ijadufuo na vierafe ije fu maredo na ijiege ja vierafekinu finoke. Ijadufuo maeje e boeje jaka na ifejiena i mukore ige Godi fu abe miema ije meve. Ja dibure ige na fijo ijia ro kuke nane kekeva ijia jaka Godido vua maeje ige na vafaena abe kuaenoevo ije ifejie. Ijadufuo e boeje buka vua ije fiena uri giriesana vua ije abe uti farekinu ma vierafeve. \v 8 Rove naka ma kuariave none izege na ja oetuavo ije fune Godire fuonukua giena vierafega izege na ja oetuavo ije funeka Jesu Kuraesido oe ijia ruae. \p \v 9 Ro na baname isoega jone ja oetuanamivo ije fuka ubaerena vaga ja Godi fu e izeki ije mukoreigia gana vierafedufuo. \v 10 Areme ja samadukua vame ma ro ise ijia giana una vame ma ijiaru nuvediana kenoedufuo. Ro kuke maza rade Kuraesi fu una ruomo ijia jabe jaevekiro jaka maturaena fu bieke. \v 11 Ro kuke ja Jesudo daro ijadufuo duvado ijia Godido vame ma ijia kenoega e bu ire maeje ja e guebuo revo ije giana una Godido ive dabe aroeke. \s1 Foru dibure fu fima ijare Godido vua ije ifejiamoga fu ireobo rema ijene \p \v 12 Ijadufuo erafano na vierafe ja vua ige mukoreigia vierafedufuo. Vajae fiane binobino ige na biediavo ije bu ijiebe Godido vua maeje bijukuraema baki ro fuka ifejamoga fu ireobo rena vae. \v 13 Ijadufuo e juo karijo boeje ro e boeje igia kariva ije bu vame ige fu none rema ije gie. Ijadufuo bu ma vierafega nana ma Kuraesido imevo ijadufuo na dibure fivoro bu ijiege vierafei. \v 14 Ijadufuo e uruvana Jesu ma vierafevo bu dibure ige na fivo ije giena buka daro abe. Ijadufuo bu Godido vua maeje bu abe kuaenoevo ije bu jumekinu ro jaevevo baki. \p \v 15 Ro ije fuka ma e gue Kuraesido vua maeje e nijasiavo bu ige na ijiege revo ige giena buka una oe isema na vierafekinu ziegafieve. Ijadufuo maeje Godi fuka na ifejieko e uruvana buka vua none fiena una Jesu ma vierafeve. Ro e gue buka na oetuavo ijadufuo bu vua maeje dabe e kuaeve. \v 16 Bu vierafega na Kuraesido vua maeje vafaevo ijadufuo bu una na ifejieve. \v 17 Ro e ije zienoejo ije bu Jesu Kuraesido vua maeje bu naebe abe ma vierafena e kuariave. Ro bume ive buone kame mamekanu rekuae vierafe. Ijadufuo bu dibure ige na fivo ijia buka una vajae fiane binodua vajiekuae vierafe. \p \v 18 Ro vua ije bu nijasiavo ije bu oe ma vierafena nijasia ro bu oe isema vierafekinu nijasiavo ije na naebe ireobo vierafe. Ro gaga bune ma Jesu Kuraesido vua ije nijasiavoga ije naka ireobo oemareve. \v 19 Ijadufuo maeje na ma vierafe Jesu Kuraesido Kavene ijadufuo daro ijiakiro baname jone ja noefuo isoevo ijiebe irufui none binobino na biediavo ijia kenujieke. \v 20 Ro naka ireobo vierafe iviama ro ba maza boeje vua none na e kuariavo ijia nabe mamoeke. Ro kuke na vierafe na barone ro na uria fivo ijia nabe jume ro jaeveke. Ro naka ireobo oemarekinu oe none boeje ijiakuma Kuraesi dabe aroedufuo. \v 21 Ijadufuo na uria ume igia fivo ije ire boeje na renoejo ije naka Kuraesido renoeke. Ro na baronekuva ije na kuke are maeje ijia vadufuo. \v 22 Ro na uria ume igia fikuva ije naka ire uruvana Kuraesido reke. Ro na bigae na barone ro na uria fidufuo ije ire inokiro ije vame izare fuka ma ije na naebe vierafe. \p \v 23 Na ire inokiro ije buka na dabe guegue ivieve. Rove na vierafe na ume ige na fivo ije naka arena va Kuraesiki fikiro vierafe. Ijadufuo maeje are ije Kuraesiki fidufuo ijare fuka ume ige no karivo ije ma asi. \v 24 Rove naka uria ja ifejiakiro vierafe ijadufuo na uria ume igia jaena finoke. \v 25-26 Ijadufuo na ma vierafega Godi fube kie na baronekiro naka uria jaena fikinu ifejiadufuo. Ijadufuo maeje na vierafe naka ja ifejiaga ja giriesana vua na nijasiakinu kuariavo ije ma vierafekina ja e damuiki reke. Na uria jaena fivo ijadufuo jone izege ja Jesu Kuraesi oemarejavo ije fuka oe jone ijia do igege iritoejena ajiauradufuo. \s1 Godido vua maeje vafaedufuo \p \v 27 Ro vua ka ma ireobo ijeja nika Jesu Kuraesido vua maeje na nijasiavo ja fieva ijia kenoekinu karivafo. Ja ijiege kenoekina na ijia vua ro na naebe vuako ijia na oenoekinu izege ja kavene ijia oe besu rena vua maeje ijadufuo vafaevo ije fieke. \v 28 Ijadufuo jade uri e ije bu jaena nigaraevo ije giana jumevo. Ro nika samadukua kuariaga nijasiaga bu ijia giana vierafero Godi rade bu fu kame uinitukiro jaeje fu karauniakiro bu ijiege vierafeke. \v 29 Ijadufuo maeje jaeje fune Godire uria iko zinume ijia ja Jesu Kuraesido imedufuo kei. Ijadufuo ja fu ma vierafedufuo ijiaru bakiro jaka fuefuo vajae fiane binobino biediake. \v 30 Ijadufuo jaeje jane iviama naena vajae fiane besu ijene biediave. Ro vajae fiane ige iviama na biediavo ije fune vajae fiane besu na ude biediavo ja fieva na ijene uria fina biediave. \c 2 \s1 Jesu Kuraesi fu kabuaekabuaeki kenoema ijiege mimatadufuo ijene \p \v 1 Ja Jesu Kuraesi ma vierafevo ijadufuo fu ja daro miakinu oetuana samuagiako ja kafaena karinoeve. Ro jane Godido Kavene ijena besu rena oetuanamikinu jone ifejanamikuae vierafena reve. \v 2 Ijadufuo na ja ejafiana kiavono ni ire gue na oemaredufuo ijene refo. Ro ire ijeja nika nigofo besu vierafena maza boeje jone oetuanamikinu ifejanamifo. \v 3 Ro jade uri aroekarana josukua vierafenoegaro e gue ja giana arevo. Ro nika sone kabuaekabuaekigia oe vafaena buina besu ganamikinu ifejanamifo. \v 4 Ro jade josukua i jone ja mevo ijiaru vierafekiro nika sone una izege ja e gue ifejiadufuo ije ireobo vierafekinu oenoefo. \v 5 Ro kuke oe jone ije nika izege Jesu Kuraesi fu vierafena kenoema jadua ijiege vierafekinu kenoefo. \v 6 Ro Jesu fu kenoema ije fu ijiege kenoe, \q1 Fuje fuka ma Godi ro kuke bu buosiki buka besu. Rove fu naebe una are kabo ije fu Asoefuoki fu fino ijia fikiro vierafe. Ro fume uri ire boeje fu Asoefuoki samuagiamo ije fuka ijuoegafiae. \v 7 Areme fuka una ame isekube rena ema igege ume igia bietei. Fu ema igege rena una e boeje igiebuo imenoe. \v 8 Godi fu vierafe Jesu fu baroneke ijadufuo Jesu fu kabuaekabuaeki Asoe fuone irinana vua fu kuaraema ije rena vakuma bu dabe kurosi ijia kanavo fu baronei. \v 9 Fu baronemoga Godi fu kuamo fu una urimoga fu dabe aroena abe ka are maeje kabo ijia nujae. Areme Godi fu kuke ive ije ka e boeje ijiebuo ive ije ma asidiaema ije abena fu mae. \v 10 Ro vame ije fune Godire ijiege vierafena niri. Ijadufuo kavene boeje kave gufia kariva ije ro e boeje ume igia ro oena baromuna kariva ije buka Jesu augesana kurituakafakinu ive fuone dabe aroeke. \v 11 Bu ijiege aroekinu baname isoena kuaeko Jesu Kuraesi fu ma E Ireobo nuvuoneno kuaeke. Bu ijiege kuavo ijia bu kuke Godi Asoe ije dabe aroeke. \s1 Godido e ije jaka maza igege aesakae igia sanadufuo ijene \p \v 12 Ijadufuo erafano maza ije na jaena ijia finoeva ije jaka na irinie. Ro iviama nane ja unia ruae ijadufuo ni ijiege ja ude irinieva ijiege una kuke na iriniefo. Ro nika Godi jumekinu giriesana vame ije fu oemaedufuo ijiaru imena vaekina fu ijare ja karanauniafo. \v 13 Ijadufuo maeje fune Godire korofuo oe jone ijia imeno ijadufuo ja maza boeje irere fu vierafe ja redufuo ja ijene renoeke. \p \v 14 Ro i fuone boeje ja menoekuva jade una ijia ziena vua bino kuaekinu ro i ijadufuo madinamivo. \v 15-16 Ja ijiege kenoekuva jaka maturaena oenoeke ro e bube vua bino kena una ja namiake. Ro janika maturaena Godido anafa ijiege renoega e ije bu maza boeje ume igadufuo ise ijiaru renoekuae vierafevo ije bu giake. Ro kuke janika raete ije no kena titutema ijia sana vako ijiege ja e ise revo ijiebuo kafare ijia karikuva ni raete ijiege sanafo. Ja ijiege rekinu Godido vua maeje fu bu karauniadufuo ije nijasiafo. Ro ja ijiege rekuva na maza ije Jesu Kuraesi fu una ruomo ijia naka ma ijadufuo joefuo aroekarake. Ijadufuo maeje na vierafega daro none boeje na akoena imenoeva ije na naebe nisei. \p \v 17-18 Ro jone ja ma vierafevo ijiakiro i ije ja Godido mevo ije ja Godido zinone ifaejavo igeki. Ro bu na kaniebitie kavuane none fu usiaemo ije fu zinone jone ja ufuiva ije akume dabe misoega Godi fu oemaedufuo fu ijiege reke. Ro na joefuo baronekuva ije naka oemare none ije dabe jaena ivajuonamike. Ro jadua na joefuo baronekuva jaka naena besu oemaredufuo. Ijadufuo maeje zinone nuvuone no ifaejekuva Godi fuka gana oemareke. \s1 Timotikina Ifafurodaetasi ijiebuo vua ijene \p \v 19 Ro na vierafe fu E Ireobo ijare ijiege vierafekuma naka Timoti kua fu vua ja giake. Fu vuakuma fure vua jone izege ja karivo ijene giana una ro kuarie na fiekuva na oemadieke. \v 20 E ije fu nosiki oe besu rena noka ireobo joefunevo. \v 21 Ro e boeje gue bu una buone bu oemadiadufuo ijene renoegaro Jesu Kuraesido i ije bu rega fu oemaedufuo ije bu vierafevo baki. \v 22 Ro Timoti fuka e ma ro fure izege ame ije fu asoe fuone ifejamo ijiege fure ifejiemo na Godido vua maeje abe e gue nijasiae. \v 23 Ijadufuo na vierafe fu vuadufuo ro na samuaga e ireobo akae samuamo ije fu vua none izege kuaega na fie areme sone Timoti kuaga fu vuake. \v 24 Ro na E Ireobo ijare ijiege vierafejiekuma na sone rade kono vua giake. \p \v 25 Ro uvia nuvuone be e Ifafurodaetasi fu Godi ma vierafemo ro fu nosiki besu Godido vua maeje abe e gue nijasiamo. Ro kuke fuka nosiki daromena Godido vua maeje ijadufuo vafaena e guena vua gikikimana kuaemo. Ro fure irufui gue bu none ruovo ije dasumiemo. Ro e ije fu jare kuavoga jone akaegue ijia na ifejiekiro ruaema na ije kuaga fu ja giake vuakiro na ije vierafe. \v 26 Ro e Ifafurodaetasi fuka ja giakiro uruke vierafe. Ro kuke fuka oefiaeme ijadufuo maeje ja adame ireobo ije fu abema ije jane fie. \v 27 Ro ije fuka ma fu adame ireobo abena funeka barone rove Godire ifejaema ijadufuo fu una uri. Ro Godi fu Ifafurodaetasi fuosukua ifejaema baki ro fu kuke nadua ifejie. Ijadufuo maeje fu baronebitie naka ireobo oefiadieke. \p \v 28 Ijadufuo na vierafe na kua fu vuaga ja ga fu oemadiakega oefiane none ije fu furike. \v 29 Ro na kua fu una ja giake vuakuma ni Jesudo ive ijia fu oemarejakinu mesirifo. Ro ni e gue fu vareki bu vuako ijene ijiege arorianakinu kaenamiafo. \v 30 Ijadufuo maeje fuka Kuraesido imena funeka baronema ijia ro fu una uri. Ro kuke fu izege ja na ifejiekuae vierafeva ije fure jone akaegue ijia ifejiena Kuraesido imene. \c 3 \s1 Vame maeje maturaedufuo ijene \p \v 1 Ijadufuo erafano nika E Ireobo ije oemarejafo. Ro igia fie, na vua ude na isoe nijiaeva ije una kuke kuariakuva fu irere ijare iserekuma baki. Ro na vierafe vua ije fuka ja samuagiaga ja e ije bu ja biesiriavo ije giana kekiradufuo. \v 2 Ijadufuo ni e ije mukore giakinu oenoefo ijadufuo maeje buka ise revo. E ije buka mave kuriae bu e sakiavo ijiege oenoekinu ja biesiriana soesoeve. Bu kiavo ja vajae suri jone kaniaufukuva ja Godido anafa rekono kiave. \v 3 Ijadufuo ni e ijieki ije mukoreigia aguariafo. Ijadufuo maeje Godi fu vierafega buje bu nuga fuone maeje abeva baki. Ro no nore ma nuga fuone maeje abei ijadufuo maeje no Kavene Akae ije ma vierafena Godi baname isoevo. Ro kuke no Jesu Kuraesi ire boeje fu nuvuefuo rema ije ma vierafekinu oemarevo. Ijadufuo nobe akae binobino ema ijiebe naeva ije ma vierafekinu iriniana renoeke. Ijadufuo maeje no ijiege renoekuva nobe Godido nidua ijia maturaedufuo. \p \v 4 Ro vame ijiege bu renoevo ije nadua na ude ijiege renoe rove iviama na una vame ije ma vierafevo baki. Ro erare fu iviama ema ijiebuo akae bu naeva ije ma vierafena renoeno ije ni igia fiene. Ire ijieki ije nare ude ja asidiana ka mukoreigia kenoe. \v 5 Ro na bu bietanieva ije fune fura besu furiko bu ijia vajae surive none kanieufu nuga nijaejie. Ro orafa none ije budua bu e Isureroko. Bu e Bezimanido uifari ro asaerafa none ije bu ma e Iburuko. Ro naeje na e Feresi ro kuke Mosisido akae ije naka mukoreigia vierafe. Ro kuke na asaerafa nuvuone ijiebuo akae ijiakina vame isuiko buone ije bu nijasieva ije naka mukoreigia iriniana ijia nuvediavo. \v 6 Na vierafero vame ije na renoevo ije Godi fune oemaremoro naka giriesana mukoreigia kenoe. Ijadufuo na uri e ije Jesudo vame maeje nuvenoejo ije naka ziegafiakinu kaniana vajae fiane uruke vajiae. Na vierafero na Mosisido akae ije mukoreigia iriniakuva na Godido nidua ijia maturaekiro na ijadufuo ijiege renoe. \p \v 7 Ro ire ije na ude rekinu ijia bijuana fi ruaeva ije iviama na vierafega buka ma baki. Ijadufuo maeje iviama naeje nane Jesu Kuraesi abena ijadufuo na fuefuo imekiro vierafe. \v 8 Ijadufuo iviama vame binobino ro ire boeje na ude kenoeva ije naneka totei. Ijadufuo maeje na vierafe naka Jesu Kuraesi E Ireobo none ije mukoreigia gana vierafeke. Ijadufuo na fuefuo ire boeje na ude vierafena renoeva ije naneka ire muture igege ijuegafiae. Na vierafe na ijiege rekina naka Kuraesi abekiro na ijadufuo ijiege rei. \v 9 Ro kuke na vierafe naka fuosiki besu reke. Ro iviama na maturaeva ije na akae isuiko ije mukoreigia iriniaeva ijadufuo na maturaeva baki. Ro fune Godire none izege na Jesu Kuraesi ma vierafevo ijia fu na mesirina na nidua fuone ijia maturae. \v 10 Na vierafe naka Kuraesido vame ije ka mukoreigia giana vierafeke. Ro kuke na vierafe na daro fuone ije fu abena mako ijia una urima na daro besu ijene abena fuefuo imeke. Ro kuke naka izege vajae fiane binobino fu abema nadua na ijiege vajae fiane bino abeke. Ro kuke na vierafe vame isuiko none buka izege fu baronema ijiege budua buka oeke. \v 11 Na vame ijiege rena Godido maeje ije mukoreigia vierafekina na baronekuva rade fu kiega na una urike. \s1 Ma karivadufuo vame ije giriesana reredufuo ijene \p \v 12 Ro ije na kuariavo ije na vame boeje nane re furi ro kuke nane Godido nidua ijia maturaeva na ije kuariavo baki. Rove Jesu Kuraesi fune na kenujiema ijadufuo na vierafe na vame izege rega na Godido nidua ijia maturaedufuo na ije uria giriesana arafiri ruove. \v 13 Ijadufuo erafano na vierafega na Jesu Kuraesi ire maeje fu nijaejiema ije na naebe gana abei. Rove ire besu ije na vame isuiko none na kenoevo ije naneka mukoreigia totei. Ro naka Jesu Kuraesi ire maeje fu nijaejiema na ijene giriesana abekiro ruove. \v 14 Ijadufuo naka vame maeje ijiaru mukoreigia kena vakuma ubine ijia kekena ire maeje kedufuo. Ro ire maeje ijeja Godire maza rade na baronena saove ijia vaga fu Jesudo ive ijia vame ma karivako ije abe mieke. \p \v 15 Ijadufuo na vierafega e ije ja Godido Kavene ijia e damuiki reva ije jaka vame na renoejo jadua ja ijiege renoeke. Ro e gue eranebe ja una vame ni be kekuae vierafevo ije fu Godire korufuo ifejiaga ja vame maeje vierafedufuo. \v 16 Ijadufuo ni roga no maza boeje vame maeje no iviama kenoejo ijiaru kena mukoreigia faradiana ke vafo. \p \v 17 Ijadufuo erafano na vierafe maza boeje janika vame none ijiege na kenoeko ja gievo jadua ijiege kenoefo. Ro kuke e gue ijia kariva ije bune vame izege na kenoejo bu ijia nuvedieve. Ijadufuo ni mukoreigia vame izege bu kenoejo ijia giakinu kenoefo. \v 18 Ijadufuo maeje e gue ijia oenoejo ije vame buone bu kenoejo ije buka be. Ro maza boeje na e ijiebuo naneka kuariavo jane fie ro ivia na una kuke nido none igiakuma kuariave. E uruvana ijia karivo vame buone bu kenoejo ije buka ma ise. E ijieki ije buka Godido vua maeje ijuonekinu Jesu kurosi ijia fu baronema ije buka dabe buzeive. \v 19 Ro buka una ire ije bu jaevedufuo ije maza boeje aroekaranoekinu ire ume igadufuo ije uruvana vierafenoeve. Ijadufuo godi buone ijeja irere vajaema buone bu vierafena kenoejo ijene. Ijadufuo bu oekuva buka are ka ma ise miane naeno ijia vake. \p \v 20 Ro noeje no bu revo ijiege renoejo baki ijadufuo maeje noeje no Godido e. Ijadufuo no E Ireobo nuvuone Jesu Kuraesi fu no karaunuema ije fu saove ijia una arina no kaenamuokiro ruomo no ijene samuakinu karinoke. \v 21 Fu vajae suri nuvuone ige ka garuki ije no iviama kena kariva ije kena una ni be amaeraduoke. Fu ijiege amaeraduoga noka una Jesudo vajae sanaema ije fu iviama abena saove ijia fino ijieki ije kedufuo. Ro vame ije fu redufuo ije fu daro fuone ka ma ireobo ije fu ire boeje samuagiamo ijare abena reke. \c 4 \s1 Foru fu e Firifaeko bu izege besu afui karidufuo kuariaema ijene \p \v 1 Ijadufuo erafano na maza boeje ja oetuavo ijadufuo naka una ja giakiro vierafe. Ro naka jone izege ja mukoe kenoevo na ijadufuo aroekarakinu jone oemareve. Ijadufuo nika oe besu rena jone izege ja Godi ma vierafevo ijia giriesana karifo. \p \v 2 Ro bara Odiakiro Sinitike ja isekie ije ja jone nigaraevo ije nika arefo. Ja bara inokiro jaka Godi besu ije ma vierafevo ijadufuo ni oe besu vierafekinu kafaena karinoefo. \v 3 Ro kuke e kai none be fu ijuebaki nosiki besu imeno ije na vierafe fu va bara ije nigaraevo ije ifejiake. Ijadufuo maeje bara ije buka naena giriesana Godido vua maeje abe e gue kuariae. Ro kuke e Kiremetikiro e gue naena giriesana imenoeva ije budua buka Godido vua maeje dabe e gue kuariae. Ijadufuo ive buone ije fune Godire buki ije fu e ije bu rade ijia karivadufuo fu isoema ijia isoe. \p \v 4 Ro maza boeje nika E Ireobo jone ja ma vierafevo ijadufuo oemarefo. Ro na kuke una kia nika E Ireobo ijadufuo oemarefo! \v 5 Ro kuke nika vame izege bu oe vafaena kenoejo ijiege kenoega e bu giafo. Ijadufuo maeje E Ireobo fune una ruakiro ivuarema ijadufuo ni ije vierafefo. \v 6 Ro jade uri irufui bino bu jone ruovo ije uruke vierafekiro nime baname isoena Godi irere ja vierafeva ije kuarafo. Ro ja baname isoekuva ni maza boeje ire maeje fu vajiamo ijadufuo oemarejafo. \v 7 Ja ijiege rekuva Godido kafaemo ka ma mukore ema bu vierafevo ije ma asidiaema ijare oe jone ja vierafevo ije samuagiake. Ro ja oefiane abekuva fuone kafaemo ijare ifejiaga ja dasu karike. Ijadufuo maeje ja Jesu Kuraesi ma darokuma vierafevo. \p \v 8 Ro kairafa none na oetuavo ije na vua radekuma ige gue kuariako ni fiefo. Janika vua maeje ijiaru vierafekinu ro vame ije Godi fu oemaedufuo ijiaru renoefo. Ro ire ije ja vierafedufuo ijeja vua ma ijiaru vierafevo ijiakina ire ije ja rega e bu nidosiavo ijiakiro ire maturaeva ijiaru vierafevo ijene. Ro barubara oenoevo baki ro kuke vame ije e bu oemadiadufuo revo ro oemaredufuo ijiaru vierafenoefo. \v 9 Janika ire ije na itire none ijia nijasiakiro kenoevo ja gieva ije kena mimatanoefo. Ja ire ije kena mimatakuva Godi fu maza boeje ja ifejiana samuagia ja kafaena karike. \s1 Foru fu e Firifaeko ijiebuo oemarema ijene \p \v 10 Na E Ireobo ijadufuo ireobo oemarevo ijadufuo maeje na iviama moni ije ja mimatana naejieva na ije giavo ijia na vierafega jaka uria na vierafeve. Ja izege ja na vierafevo ije jaka naebe tote rove ja nijasiekuvega vame fu bakiga ja ijia areve. \v 11 Ro vua ige na kuariavo ije ja na ifejiedufuo na ije kuariavo baki. Ro na vierafe irere na kevo ije fune sibane mani. \v 12 Na izege vasiakuma oenoe ro ire ikinu oenoejo ije nane vierafei. Ijadufuo are binobino ijia ro mazani ise ire baki ro mazani ma ire zaraemo ije na uria oemarekinu oenoevo. \v 13 Ijadufuo na Jesu Kuraesido daro ijia ire ma ro ire ise ije bu none ruovo ije naka uria oemarekinu biediavo. \p \v 14 Ro ja irufui none ije ifejievo ije fuka ireobo mare. \v 15 Ro e ije ja sidove Firifae ijia kariva ije ja irere na ude reva ije jane vierafei. Na ude na Godido vua maeje abena ijia ja nijasiama areme na are Mesedonia arena vakoga e sosi gue bu naebe ifejie. Ro jane jare josukua moni bino vekinu na vajie. \v 16 Ro na uria aesakae Mesedonia guove sidove Tesaronaeka ijia fiva ijia ja na ifejiena moni bino kukuma vekinu naejie. \v 17 Ro ije ja ifejieva na kuaevo ije na jare ire binodua vekinu naejiekiro na ije kuaevo baki. Ro na vierafe ja vame izege ja e gue vekinu vajiavo ijia jaka Godido daro ije abekiro na ije vierafe. \p \v 18 Ro ire boeje na vierafeva ije jane iviama naejievo na kevo funeka mani. Ijadufuo maeje fu e Ifaforodaetasire ire boeje ja naejieva ije kena ro vajie. Ro vame ije ja keva ije jaka zinone maeje fu udi mukore uriga Godi fu oemaedufuo ja ijene rei. \v 19 Ijadufuo na vierafe Godi none fu Jesu Kuraesido duvado ijia ire fuone maeje saove gufia naovo ije bu ja ifejiadufuo ije bino vajiake. Fu ijiege vajiaekina jabe una ire binofuo niduedufuo. \v 20 Ro na vierafe e boeje bu maza boeje Godi Asoe nuvuone ije dabe aroedufuo. Marei. \s1 Forudo vua radekuma fu anadiaema ijene \p \v 21 Ro na Godikiro Jesu Kuraesi ijiebuo ive ijia e boeje anadiave. Ro kuke e uviarafa none Godi ma vierafevo igia kariva ije budua bu ja anadiave. \v 22 E boeje Godi ma vierafevo igia sidove Romu kariva ijiakina e ije Sisado are ireobo ijia imejo ije bu ja anadiave. \p \v 23 Na baname isoega E Ireobo nuvuone Jesu Kuraesi fu maza boeje jaena fikinu marejiana samuagiake.