\id NEH - Barai NT and OT portions [bbb] -Papua New Guinea 2006 (DBL -2014) \h Neamaea \toc1 Neamaea \toc2 Neamaea \toc3 Nea \mt1 Neamaea \c 1 \s1 Neamaea fu Jerusareme sidove ije fu iserema ijadufuo ireobo vierafema ijene \p \v 1 Suvuare ige Neamaea e Akaraejado fari fu isoema ijene. E Kini Atekesi fu e aesakae Fesiako ijene samuagiaema ije fu juaevasia tuaedi (20) ijiege furi. Ro juaevasia rane ije furima ijadufuo ubine ijia e Neamaea naeje na sidove ireobo Susano kuavo ijia fi. \v 2 Na ijia fivoga uvia none e Anani fu e bino kaenamiana aesakae Juda ijia urina ruoma na fivo ijia kekei. Areme na urina sidove Jerusareme fu izege namo ijiakiro e Jiusi gue ije bu are Bebironia ijia dibure karina una urina Jerusareme vaeva ije bu izege kariva ijene fiekiro kuariae. \p \v 3 Na ijiege kuariavoga bu kie, E Jiusi bu dibure karina una sakae buone ijia vaeva ije buneka ma isema isejavaekinu karivano kie. Ro Jerusareme isuo bu kiraeva ije buneka mutusevo fune farae ari ro kuke viene fuone boeje bune kara ifaejei. Ro e ae binoko ije bu ivuake irifo ijia karinoeva ije buka no nese guovono kie. \p \v 4-5 Bu ijiege kuarievo na fievo fuka oefiadiemoga na ijia ireobo nimei. Na ijiege rena maza sibaneke naka ire atona Godi saove gufe samuamo ije baname isoe. Na kuae, E Ireobo Godi saove gufe samuamo aeje aka ma e anuigi noka a aguaravo. A irere a rekiro kuaema ije aka totemo baki. Ro aka maza boeje eranebe a oetuana irere a kuariamo ije irinana renoevo ije aka mukoreigia samuagiakinu ma rejiana ifejiamo. \v 6 Ijadufuo baname none ige e oefuo imeno na e Isureroko e ije oefuo imevo ijiebuo mumaza isoevo ige ada irana fiekinu giene. No e Isureroko ige noka orafa nuvuone ijena noneka ma isema rei. \v 7 No nidua one ijia noneka isema rena irere no renoedufuo a kuaruomo ije noka renoevo baki. No akae one a Mosisi e oefuo imeno ije kuaramoga fu isoena abe muema ije noka irinana ijia kenoevo baki. \p \v 8 Ro ni vua izege a e Mosisi kuaraema ije vierafene. A kuae, Ja e Isureroko ije ja naebe maza boeje na iriniena irere na kuariavo ije renoekuva naka ja kame jijiakorega ja e asakae binoko ijena karijavake. \v 9 Ro ja va ijia karinoevo ijia ja una na iriniena irere na kuariavo ijia renoekuva na kaenamia una ruake. Ro bu ja kame are irore igia uniaga ja dabe giegisana vakuva naka uria ijia kaenamiana una ruake. Na kaenamia una roga ja sidove Jerusareme ije ja besu afuina ive none dabe aroedufuo na kiaeva ijia uniakono kiae. \p \v 10 Ijadufuo E Ireobo e ije buka e one bu oefuo imevo. Are umui one ka ma daroki ro daro one ma ireobo ijia bu karauniae. \v 11 Ijadufuo ni ivia baname none igiakiro e one bu oefuo imevo bu oemarekinu a dabe arorakuvejo ijiebuo baname bu isoevo ijene fiejuone. Ni ifejiena baname none ige fie areme abe marejiena kini ige oe fuone ije dabe dakudega fu na giena oefiane abeno kuae. Ro mazani ije naeje na kini ijadufuo do vaeni bu vesena ke ruovo ije samuavo. \c 2 \s1 Kini Atekesi fu Neamaea kuamo fu Jerusareme vaema ijene \p \v 1 Areme Kini Atekesi aesakae ije fu samuama ije fune juaevasia tuaedi (20) abema ijia na asame Efuru ijia are fuone ijia fi. Na ijia fivoga bu kinido do vaeni be jiana abe vuakoga na abena kini makiro vae. Ro oefiane none ije na abenoevo ije kini na naebe kuarae. \v 2 Rove na maza be do abe kini makiro aru vakoga fu giena uri kie, A adame abema baki ro a irerefuo nikubae one ije aka oefiaedaema igeki? Na vierafe oefiane be fuka oe one ijia namono kie. Kini fu ijiege kiemo naka jumei. \v 3 Rove na una kuae, E ireobo na vierafe aeje aka maza boeje kini rena ijia fivake. Ro e ireobo none, oefiane ige na abevo ijadufuo maeje sidove none Jerusareme are ije asaerafa none ijiebuo surive naovo ije e ani nuvuone bu dabe arafiriva ije fuka uria ijiege isema name. Ro kuke sidove viene boeje bune kania tuasena kara ifaejeva ijadufuo na ije oefiane abevono kuae. \p \v 4 Na ijiege kuaravoga kini ije fu una kie, Ijadufuo a irere abekiro vierafemano kie? Fu ijiege kiemoga na migegire una mauike oe none ijia Godi saove gufadufuo ije baname isoe. \v 5 Areme na uri kini kuae, E ireobo a na giega fu oemadakuma ni a isekie vua none ige na kuaravo ije fiena avediene. Areme ni kiega na una Juda ijia Jerusareme sidove ije asaerafa none bu uniaeva ijene va una sano kuae? \p \v 6 Areme kini Atekesikiro bara fuone ije fu fuosiki ijia fido bu vua none ije fie. Ijadufuo kini ije fu urina maza izege na vaekiro una ruadufuo ijadufuo kuariemoga na maza ijene kuarae. Na ijiege kuaravoga kini ije fune uri vua none ije avediena abe marei. \p \v 7 Areme na kuaga fu oemarekuma fu fasi bino isoena vajiega na kena vaekina e mamekanu are Iufureti maza koeno nake samuavo vajiadufuo ijene kuarae. Fu fasi isoena e mamekanu ije mukoe kuariana nijasiaekina bu maza ije na una Juda vakiro vako ije bube irufui bino vajiedufuo na ijadufuo kuarae. \v 8 Areme nane una kuke kini kuavoga fu fasi bedua isoena e Asafi e ije kini ijadufuo tarare bu ijia ine ufuvo ije samuamo ije nijae. Fu isoena kuaraga e Asafi fu fie vierafekina fu ine fae gikikimana na sidove faere bu kiraeva ijadufuo viene ije amaeriadufuo ijene vajiedufuo. Ro kuke gue na e bijaevo ije bu Godido are ijene juo karivo ijiebuo are gikikima ijadufuo viene ijene amaeriake. Ro gue na kari are none na fidufuo ije sadufuo ijene vajieke. Ro Godi fuka na marejiemo ijadufuo kini ije fuka ire boeje na kuaravo ijadufuo fasi ijene isoena vajie. \v 9 Areme fune uri e bijaevo ijiebuo e mamekanu gue ro e buone bijaevo ijiakiro e ose kena bijaevo gue bu na samuagiedufuo ijene uniaejie. Areme nane vakuma Iufureti are maza koeno nake e mamekanu kariva ijia kekena kini Atekesi fasi fu isoema ijene vajiae. \p \v 10 Rove e Bete Orani ijiebuo e ireobo Sanibaretikiro Tobia e Amonaetiko ije bu na una Juda vakiro vako ije fie. Bu fieke e be fu una e Jiusi aesakae Juda kariva ije ifejiakiro vako bu ije fievo buka naebe oemarei. \s1 E Neamaea fu sidove Jerusareme isuo iserema ije ninakoe ijene \p \v 11-12 Nane va Jerusareme kekena ijia fina areme mu inokubeke furikoga na muge be ve ufirema ijia urina e naena vaeva ije gue kaenamiana mauike kekena makave ijia vae. Rove na Godi irere na Jerusaremedo rekiro fu kuariema ije na naebe e be kuarae. Ro fanu doniki bino ijia fuka baki ro fune none besu nare abe oenoevo ijiaru. \p \v 13 Ijadufuo na doniki none ije abena ve fu uria titutema ijia nane viene ije bu kua Amare Vieno kuavo una maza koeno nake ijane kekena makave ijia vae. Areme nane faere irifo ijia ufuaena vakuma mako do jiavo bu kua Siroe Taraekono kuavo ije asina vakuma viene be bu kua Kadure Korevo Vieneno kuavo ijia kekei. Na ijia ufuae vakinu sidove Jerusareme isuo ije bu kaniatuana mutuseva ijiakina viene ije bu kara ifaejeva ije ninakona vae. \v 14 Nane ijiege ninakona vakuma viene be bu kua Do Sakae Tire Ijia Ajiamono kuavo ijia kekena vakuma Kini Ijadufuo Do Nafuemano kuavo ijia kekei. Areme na kuke ninakona vagake vame ije nare fanu doniki abena vadufuo ije fuka naebe mani. \v 15 Ijadufuo nane e ije na kaenamia vako ijena none una amare ije bu kua Kidironino kuavo ijia ari. No ijia ari vakinu isuo ije bu matuiva ije ninakona vae. Areme nane ijia dakudena una na vaeva ijane una sidove viene be bu kua Amare Vieneno kuavo na keke vaeva ijane una sidove guove ijia aruna vae. \v 16 Ro ije na ijiege renoevo ije e Isureroko ijiebuo e mamekanu ije besukua be fu irere na renoevo ro na izia vaeva ije buka naebe giena vierafe. Ro irere na vierafena renoevo ije na e zinone ifaejevo ijiakiro e mamekanu ije naka kuariaeva baki. Ro kuke na e bino eranebe isuo ije ifejiena sadufuo ije na kuariaeva baki. \p \v 17 Na mauike nosukua ijiege renoena areme rade na ijare urina e mamekanu ijene kiae, Nine iviama irufui ige no urana kariva ige gafo. Sidove nuvuone Jerusareme buneka e ani nuvuone ijiebe dabe mutuna arafirima areva funeka mukoreigia iserei. Ro kuke viene nuvuone boeje buneka kara ifaejema furi. Ijadufuo roga no sidove Jerusareme isuo ije una kirama arekina e bube una no nese guono kiae. \v 18 Nane e boeje ijiege kuariama areme na ijia sone urina izege Godi fu nosiki oenoekinu ifejiema ijene kuariae. Areme na kuke izege kini fu urina irere na rekiro vierafena kuaravo fu avediena abe marema ijene kuariae. Na ijiege kuariavoga e boeje bu urina kie, Ije fuka maremano ni roga noka urina Jerusareme sidove ijene una sano kie. Areme bune uri i mukore ijene mekuae ire boeje kanafui. \p \v 19 None ijiege kuaena ire boeje kanafuinoekoga e Sanibaretikina Tobiakina e Gesame e Arabiko ije bu ire ije no kanafuinoevo ije fie. Bu vua ije fiena kisuokinu no kame varaemena kuaevo, Ire ije ja irere ije abekuae renoevono kue? \v 20 Ja vierafe ja kini ijena bijaekuae vierafevano kuovoga na kiae, Noeje no e Godi saove gufe samuamo ijadufuo imevo. Ijadufuo are ige no sakuae kuaevo ije no vierafe fu ifejuoga no zinuevena sadufuo. Ja asaerafa jone bu ude Jerusareme igia kariva baki ijadufuo sidove ije fu jone baki. Ijadufuo i ige no mevo ije jabe ifejuokono kiae. \c 3 \s1 Jerusareme isuo bu una kiraeva ijene \pi1 Ro safita 3 ije fume izege e Isureroko eranebe bu agane buone boeje ijena Jerusareme isuo ije una zinuevena kiraeva ijiebuo ive ijene kuae. Ro kuke bu izege isuo ijadufuo viene binobino una amaeriaeva ijene kuae. \pi1 Ro viene bino bu amaeriaeva ije bu ijiege zinuevena amaeriae. Viene be bu kua Sife Vieneno kuavo ije e Iraesabibi e zinone ifaejevo ro kairafa fuone ijiebe amaeri. Areme e Asenado farirafa bu viene be bu kua Viene Kijumeno kuavo ije amaeri. Ro e Joeadakina Mesurame bu viene bu kua Sidove Viene Isuikono kuavo ije amaeri. \pi1 E binobino ro agane binobino bu isuo kafare binobino viene ukua ijia kiriae. Ro e Zanoako bu viene be bu kua Amare Vieneno kuavo bu ije amaeri. Areme e Marikija fu uri viene be bu kua Isua Vieneno kuavo ijene amaeri. Ro viene be bu kua Do Vieneno kuavo ije e Sarome fure amaeri furi. Ro kuke fu do mane be bu kua Do Siromeno kuavo ijadufuo isuo ije amaeri. Ro e Rivaetikina e zinone ifaejevo binobino ije bu isuo kafare bino ije amaeriae. E ka ma uruvana bu viene ro isuo binobino ije giriesana amaeria furi. \p \v 1-32 (-) \c 4 \s1 E ani bu isuo ije e Isureroko bu kiravo ije bijukuriakuae vierafeva ijene \p \v 1-2 Areme e Sanibareti e Sameriako ijiebuo e ireobo fu fieke e Jiusi ije none Jerusareme isuo ije una kiravo fu fie. Fu vua ije fiemo fuka defaruimo fu uri e kairafa ijiakina e Sameriako ijiebuo e azo kevo ijiebuo nidua ijia no kame utifaejena varaemei. Fu kuae, E Jiusi ka e garuki ije bu irere ije rekuae reve? Bu vierafe bu sidove ijene una sakuae vierafe. Bu vierafe bu zinone buone ije ifaejekuva zinone ijare bu ifejiake. Ro kuke bute vierafega bu maza besu sidove ije una sa furikuae bu ijiege vierafe. Mune ije bu kena are ije sakuvejo ije fune miane naena isere ro bu izege una karina sakuae revono kuae? \p \v 3 Ro kuke e Tobia e Amonaetiko ije fudua fune uri e Sanibareti ifejana kuae, Isuo buone bu savo ije siroe fokisi fu furiko mune bu kena nana ajiavo ijia bierekuma bu bite ka tuasena diduekono kuae. \p \v 4 Bu ijiege kuaevoga na fiena uri Godi baname ijiege isoe, O Godi ni vua buone izege bu kuaena no kame varaemevo ije fiene. A ije fie areme ni ifejuoga bu varane buone ije una korubuo gana jaevene. Ro ni e ae binoko kiaga bu ro e ije toenamiana kaenamia vaga bu are buone ijia isejavaene. \v 5 Bu e ige no are ige savo ijene guona kame varae mevo ijadufuo ise buone ade giana are ro totemono kuae. \v 6 Na baname ijiege isoena Godi kuarae rove no naebe arei ro noka fiebarekine areme uri isuo ijene kirae. None isuo ijene kirako fune ajiana ukua ijia vae. Ijadufuo maeje e boeje buneka oemarekinu oe buone ijiakuma i ijene meve. \p \v 7 No ijiege rekoga e Sanibaretikiro Tobiakina e Arebiako gue ro e Amonaetiko ijiakiro e Asidodiko ije bu fieke noneka isuo ije mukoreigia kiravo bu fie. Ro kuke bu fieke none ijiege kirakinu kafare binobino none kirana ausekuvejo bu fievoga buka defarudiae. \v 8 Ijadufuo bune una besu afuina izege bu e Jerusaremeko noena bijaekinu ro ire ise bino nuvuone redufuo ije kuaena amaeri. \v 9 Rove no una Godi nuvuone ije baname isoena oefiane nuvuone ijene kuarae. No ijiege rekinu ro kuke e gue kevo bu no mumaza juo karikinu samuogue. \p \v 10 Ro e Jiusi ije isuo kiravo bu kuae, No irufui abeko noneka aemuome. Ro kuke isuo bu matuseva ubine buka ma uruvana ijadufuo isuo ije no izege kira furikuva bakino kuae. \v 11 Ro maza besu ijia e ani nuvuone bu kuae, Buka naebe guevano rono mauike sauina va kaniaga bu oe furikina isuo ije bu kiravo ije buka areno kuae. \v 12 Rove bune e Jiusi gue bu e ani nuvuone ivuake ijia karivo ijiebe maza binobino ijia ro vua izege bu no kanuokuae kuaena amaerivo ije kuarue. \p \v 13 Ijadufuo na agane besubesu ijia e kevoga bu juvuamagu ro sime buone bu bijaevo ije kena isuo iziebure no uria kirana ajiavo ijia juo karijuokoga no imei. \v 14 Na giake e buka jumekinu revoga na uri e mamekanu ro e aeko ijene vua kuariae. Na kia, Ja e ije bu ja kaniakuvejo ije jade jumevo. Ijadufuo maeje E Ireobo nuvuone ije fuka e daroki e buka fu jumevo. Ijadufuo nika uri giriesana e uviarafa ijiakiro agebara jone ro gire jone ijiebuo bijaeno kiae. \p \v 15 Areme e ani ije bu fieke none vua izege bu mauike nuvuesina kuaena amaerivo ije none giana vierafevaga bu ije fie. Ijadufuo bu ijia sone una vierafero Godi fune vua buone sauiki ije bu kuaena amaerivo ije fune dabe iserejiaemaro bu ijiege vierafei. Bu ijiege vierafekoga e boeje no una isuo nuvuone iziebure no kiravo ijene kirae. \v 16 Bu ijiege rena ve ijia e none gue bu juvuamagu ro gunuore ije kena una e gue juo karijiako e gue no isuo kirae. Ijiege rena e nuvuone mamekanu ije buka e ije imevo ijene samuagiae. \v 17 Ro e mujue ije isuo kiravo ije umui gue bu juvuamagu faradiakiro umui gue bu mune kari vajiako bu isuo kirae. \v 18 Ro e boeje besubesu eranebe isuo kiravo ije bu sime buone buka kena madare buone ijia bijiana bue samuanakinu imei. Ro e ije fu e ani roga fu vegu ufemo ije fuka maza boeje nosiki oenoeno. \p \v 19 Areme e Neamaea na uri e mamekanu ije abero e buone rotire ijia imevo ro e boeje kuariana kiae, I ige no mevo ije noka ivuake guria besu afuina mevo baki. Ro noka dabe jijiana mumabo ijia nuvuebino menoeve. \v 20 Ijadufuo ja iziebure imenoevo ijia ja vegu fiekuva nika migegire una iziebure na manivo ijia afuifo. Ja ijia afuike Godi nuvuone ije fu nuvuefuo bijaeno kiae. \p \v 21 Ijadufuo maza boeje ve iko irasemo ijia vakuma ve titutemo ije e gue no juo karina samuako gue no isuo kiravo. \v 22 No ijiege renoevo ijia na e boeje kiae, E fari boeje ro e mumokana bu ifejiavo ije nika una besu afuina Jerusareme sidove guove igia naofo. Ja ijiege rekina muge ja no juokarijuokiro ro maza ije ja imeno kiae. \v 23 No ijiege revo ijadufuo nakina uviarafa none ro e none imevo ijiakina e azo kevo bu naena ruaeva ije ugone nuvuone no naebe azo nae. Ro kuke no do ruevo ro iziebure no oenoejo ije sinuome nuvuone no bijaevo ije noneka ijiakuma oenoevo. \c 5 \s1 E Neamaea fu e ije sinuome baki karinoevo ije fu ifejiaema ijene \p \v 1 Areme maza sibaneke furikoga e uruvana bara ro baru buka naebe oemareva ijadufuo bu ziena uri kairafa buone gue ijena madinami. \v 2 E gue bu kuae, No agane gue noka e uruvana ijadufuo no kari vakuae vierafekuva noka ire bino kedufuo. \v 3 Ro e gue bu kuae, Nono ire funeka furima ijadufuo no sakae nuvuone ijiakina ire vaeni juare no oeva ijiakina are nuvuone ije none kame una kaerafa nuvuone buone fuaeve. No vierafe ro no ijiege rekina bu mani vajuoga no kena una ire nuvuone fuaevekiro no ijadufuo ijiege revano kuae. \p \v 4 Ro kuke e gue bu kuae, No duaku no kairafa nuvuone gue kiavoga bu moni buone gue ifejuovoga no juare nuvuone ijiakiro gurefi vaeni juare ijiebuo una gamani takesi fuaevei. \v 5 Noeje no e Jiusi ijena noka besu gaegi ro kuke anafa buone ijiakiro nuvuone ije buka besu. Nonoka besu ijadufuo bu irerefuo ijiege reko no are ijiakiro sakae nuvuone ije kena una buone fuaeveve. Ro kuke noka ame nuvuone ije kiako bu una e guebuo moni baki imenoeve. Ro kabaerafa nuvuone gue noneka kena una kaerafa guebuo fuaevejo bune buefuo moni baki imenoeve. Ro kuke juare nuvuone ijiakiro gurefi vaeni juare nuvuone bune kaerafa nuvuone ijiebe fuaevena una buone kei. Ijadufuo iviama noeje noneka darobirenamue. \p \v 6 Ijadufuo na e ijiebuo vua ije bu ijiege ziena kuaevo ije fievo naka defarudie. \v 7 Ijadufuo na fina izege na redufuo ije vierafei. Areme nane uri e mamekanu ijiakiro e buone rotire ijia imevo ijene kumevo bu una besu afui. Bu afuivoga naka uri vua gikikimana kuariae. Na kia, Ja uviarafa jone maeje jaka isema rena mani bu kiavo ja vajiaeva ije kiakoke binodua kuke ado ijia nana vajiavono kiae. Na ijiege kuaria areme uri e boeje kumevo bu besu afuivoga na irufui ijene buina kuaena amaeri. \v 8 Na kiae, No uviarafa nuvuone e Jiusi ije gue bu korubuo e ae binoko ije kiavoga bune bu fuaevevoga bu buefuo moni baki imenoe. Ro iviama e kairafa ige gue noneka giriesana e ijene fuaevena una kaenamiae. Rove na fiega jaka uria una kuke uviarafa jone maeje kame e guebuo fuaevekoke no ijene una fuaevena kaenamiavono kiae. Na ijiege ka gikikimana kuariavoga e mamekanu bu fieke nane ma kuariavoga bu una izege kuariekuva baga bume kari fie. \p \v 9 Na ijiege kuariama areme kiae, Vame ije ja kevo ije jaka ma isema reve. Ijadufuo ni una Godi jumena fu irinakinu vame maeje renoefo. Ja ijiege renoekina e ani nuvuone ae binoko ije bube ise nuvuone bino guona umui bijuodufuo. \v 10 Na kairafa none ijiakina e none imevo ije noka manikiro kumune nuvuone ije e gue vajiavo. No vajiaekina bu rade una vajuokuae no ijadufuo ijiege re. Rove na vierafe bube una buone bino ado ijia nana vajuodufuo ije buka areke. \v 11 Ijadufuo ja iviama e guebuo juare ijiakina gurefi vaeni juare ro ine orive ro are buone ije ja keva ije nika migegire kena una vajiafo. Ro jade kiaga bu una ire buone binodua ado ijia nana vajiavono kiae. \p \v 12 Na ijiege kuariavoga e mamekanu buka uri avediena ijiege kumei, Ije fune maredo noka ijiege reke. No vierafe noka sinuome buone irere no keva ijene una vajiake. Areme rade no naebe una ire buone bino kiaga bu vajuoke. Ro buje bu irere bu una vajuokono kueva ije no vierafe noka totega fu furino kiae. \p Areme nane uri e zinone ifaejevo ije kiavo bu aru ruae. Bu aruna irekoga na e mamekanu ijiakiro e ije buone rotire ijia imevo ije kiavo bu urina nidua buone ijia samadukua visu kuariana kia, Vua irere no kuaeva ije nobe totekiro noka ijiege rekono kuae. \v 13 Areme nane uri ugone jiagadogo na abiesevo ijadufuo ubine ije abena kanakanae. Na ijiege kanakanakinu kiae, Godire e gure erare a vua ige kuaena naebe abe mimatakuma fu a abena kuokuo ijiege keseke. Ro fure ire one boeje a kema ijiakiro are one ije kamaza vake ame ijiege sinuo baki finoekono kiae. Na ijiege kuariama furikoga e boeje eranebe ijia ruaeva ije bu kumei, Maremano kumena bune uri E Ireobo ije oemarejae. Areme ve ijia e mamekanu ije bune uri vua bu kuaeva ijiege rei. \s1 Neamaea fu naebe fuosukua vierafema ijene \p \v 14 Ijiege rena juaevasia tuaedi (20) ro teti tu (32) ukua ije e Atekesi fu kini rema ijia naeje na juaevasia tuero (12) ijiege e ireobo rena aesakae Juda samuae. Ro maza ijia nakina uviarafa none ije no ire ije e ireobo fu ino ije noka naebe i. \v 15 Ro e mamekanu bino na vareki ude daro kena kari ruaeva ije buka irufui uruvana e aeko buone ije vajiae. Bu karina e aeko boeje kiakoke buka maza gue ire siruvakina irekiro do vaeni bu idufuo ije uruvana karina ro vajiavo. Bu ijiege rekoga e ije rotire buone ijia imevo ije budua buka e aeko ije irufui vajiae. Ro mazani none na daro abena fiva ije na naebe bu reva ijiege rei. Rove naeje naka una vame ni be rei. Ijadufuo maeje naka Godi none ije jumevo ijadufuo na ijiege rei. \v 16 Na maza boeje daro none ije naka abena Jerusareme sidove ijadufuo isuo ijene kirae. Ro kuke e ije noefuo imevo ije budua buka naena besu isuo ijene kirae. No ijiege regaro una sakae uruvana fuaevedufuo ijie noka naebe ijiege vierafei. \p \v 17 Ro maza boeje naka e Jiusi uvane aderedi fifiti (150) ijiege ro e mamekanu gue ije kaenamiana fata none ijia ire vajiaga bu ivo. Na e Jiusi ijiaru ijiege ifejiana ire vajiavo baki. Ro na kuke e ae binoko eranebe bu are none ijia ruovo na ije ire vajiaga bu ivo. \v 18 Ro ire ije nare maza boeje kena kira vajiako bu ivo ije ijiege. Na mave-kau besu ro mave-sifi ka mukore sigisi (6) ro kukoruko ka uruvana ijiege kirana vajiavo. Ro kuke na vakuma maza teni (10) ijiege furino ije na do vaeni ka mukore ijia kena vese vajiaga bu ivo. Rove na naebe una e aeko ije kiako bu ire ro vaeni buone izege e mamekanu bu ijo ije bino karina vajie. Ijadufuo maeje na irufui buone ma ireobo ije bu abevo ije nane giana vierafei. \p \v 19 Ijadufuo na baname isoena kuae, O Godi ire boeje na e igiebuo revo ije giena vierafekiro ade totemono kuae. \c 6 \s1 E ani bu uria Neamaea fuesina kuaeva ijene \p \v 1 Areme e Sanebaratekina Tobiakina Gesemi e Arabiko ijiakina e ani nuvuone gue bu fieke isuo kafare bino no naebe arei ro noneka kira furivo bu fie. Ro isuo viene ijadufuo no amaeriaeva ije no uria naebe kena kamae. \v 2 Ro e inokiro e Sanebaratikiro Gesemi bu na vua nijiena kumei. A ni roga no are isekube bu Ono amare ijia kariva ijia bienamina vua kuaeno kumei. Rove na vierafe ije bu na kaniekuae kumei. \v 3 Ijadufuo na una vua nijiana kumei, Nanaka i anuigi be mevo ijadufuo na are mumabo ijieki ije nabe vuake. Na i ige arena ura ja gianoedufuo ije fuka ma bakino kumei. \v 4 Na ijiege kumevoga bu una kuke vua ni besu ijene maza inokiro kiro inokiro ijiena kuarie. Rove maza besubesu naka uria vua besu ijiege kuariae. \p \v 5 Areme e Sanebarati fune una kuke maza be fasi isoena e fuone imeno ije mavoga fu abena ro mie. Ro fasi fu isoema ije fu vierafe e boeje buka vua irere fu isoema ijene fiedufuo ijadufuo fasi ije fu naebe abe mukoreigia okurae. \v 6-7 Ro fasi ije fu ijiege isoe, \q1 E boeje are ivuake no irifo ijia karinoeva ije bu vua be kuaenoevono kie. Ro kuke e Gesemi fudua besu kie. E boeje bu kuae, Aeje a e Jiusi ijena jaka e ije bu no samuaguovo ije buina nigaraekuae vierafei. Ijadufuo a e one ijena isuo ije faraeva ije una same. Ro kuke aeje aka kini buone rekiro e vua kuaevo kiaga bu vua one ijene dabe usiaena Jerusareme ijia e boeje kuariavono kuae. Ijadufuo na vierafe vua ige kini fu rade fiedufuo. Ijadufuo ni roga no nosiki vua ije kuaena amaerino kie. \p \v 8 Areme na una vegue fasi isoe nijana kuae, Vua one ige a isoena kuariema ije aka kufuimena isoe. Nono ijiege vierafena revo baki. Ro vua ije ame are nigofo one ije vierafena kuariemano kuae. \v 9 Bu fasi ijiege isoe ijadufuo maeje bu vierafero noka jumekinu ro mamoedo nobe isuo ije kira furikiro bu ijiege vierafei. Rove naka baname isoena Godi kuae, Godi a ivia na daro miega na giriesana i ige uria meno kuae. \p \v 10 Areme maza be na e Deraeado fari Semaea e Metaberodo asae ije gakiro vae. Ro e ije fume uria gire fuone ijia fino ijia na vae. Na va fuosiki fivoga fu kie, E buka muge be a naebe vierafema ijia ro a kanake. Ijadufuo roga no nosiki mauike subinaena va Godido Are Akae ijia aruna viene kame bijuna ijia karino kie. \v 11 E Semaea fu ijiege kuariemoga na kuae, Nana e giana konoevo baki. A vierafero na kona va Are Akae ijia saui fikuva e bube kaniekiro a ijiege vierafe? Rove na vierafe nabe ijiege rekono kuae. \p \v 12 Na ijiege kuara areme una sone fina vierafega vua ije fu Godire vierafejamo fu kuariema baki. Ro vua ije fu e Sanebaratikiro Tobia ijiebe fu fuaevena kuaga fu vua buone ije kuariemoro na ijiege vierafe. \v 13 Bu vierafero bu ijiege biesiriega na jumekina na ise be rega e bu ise none dabe e boeje kuariaga bu ive none dabe iserekiro bu ijiege rei. \v 14 Rove naka uri baname isoena Godi kuae, Godi e Sanebaratikiro Tobia vame bu kevo ije giane. Ro kuke bara Naodiakiro e gue vua kufuimena e kuariavo ije bu revo ije giane. Ijadufuo maeje bu na biesiriega na jumekiro bu reve ijadufuo ade giana arekiro nika kame isekafiano kuae. \s1 Isuo bu kira furiva ijene \p \v 15 Areme asame Otoba ijadufuo maza tuaedi faeve (25) ijia isuo ijiakiro viene boeje no kiravo ije foteke fune ijia furi. Ro isuo foteke no kiraeva ije no maza fifiti tu (52) ijiege furikoga no ijia kira furi. \v 16 Ijadufuo e ani nuvuone gue sakae nuvuone irifo ijia karinoeva bu vua ijene fievo buka judiae ijadufuo bu una ire be irere rekuva baga bume ijia arei. Ijadufuo maeje bu vierafega fune Godire daro muomoga no isuo ije kiraevaro bu ijiege vierafei. \p \v 17 Ro maza ijia Jiusi e mamekanu gue bu fasi bino isoena e Tobia naejako fu una vegue fasi isoe naejiamo. Ijadufuo maeje e Judako uruvana bune ude izege bu e Tobia ifejadufuo ijene kuaena mareva ijadufuo bu ijiege rei. \v 18 Bu ijiege reva ijadufuo maeje e Tobia fu e Jiusibuo e ireobo be ive fuone Sekania e Arado fari ijadufuo jure. Ro kuke Tobiado fari e Jeonane fu Mesurame e Jiusi ijadufuo kabae ijene abei. Ro e Mesurame fu e Berakaeado fari. \v 19 Ro kuke bu e ijiebe ro na kuariena kie Tobia fuka mukoe kemono kie. Bu ijiege ro kuariekinu ro una va vua none ije fu kuaravo. Tobia fu vierafe fuka fasi ijia vua jujuki isoena kuariega na fiena jumekiro fu ijiege rei. \c 7 \p \v 1 Areme nane uri viene no amaeriaeva kena isuo ijia kamae. Na ijiege re areme uri e sidove ijadufuo viene ije samuadufuo ijiakina e dua uruvo ijiakiro e Rivaeti ije bu i buone medufuo ijene kei. \v 2 Na ijiege re areme uri e inokiro bu sidove Jerusareme samuadufuo ijene kei. Na e uvia none Ananikiro Ananaea e ije fu e juo karijo ijiebuo are bu karijo ije samuamo ijene kei. Ro e Ananae fuka e mukore e buka fu ma vierafevo ro kuke fuka e boeje bu Godi irinavo ije asidiana Godi mukoreigia maza boeje irinamo. \v 3 Na e ije ke areme kiae, Ja suoke jade migegire sidove Jerusareme viene ijene azovo. Jani areke ve fu mukoe irasena maza naga ni sone azofo. Ro mufuo ja una bijuvo ije ni e viene samuavo bu uria imevo ije kiaga bu kena mukoe bijukuriano kiae. Areme nane kuke kiavo bune Jerusareme guove ijia e bino bu ifejiana sidove ijene juo karidufuo ije kei. Bu ijiege kekina e gue bu are iziebure bu juo karidufuo kiaeva bu ijia samuana iredufuo. Ro e gue bu are buone makave juo karino kiae. \s1 E Isureroko ije bu dabe giegisana ebuo aesakae ijia karija vaeva bu una ruaeva ijiebuo ive ijene \p \v 4 Jerusareme sidove ije fuka ma ireobo rove e guove ijia kariva ije buka sibaneke. Ro kuke are uruvana gue buka naebe sae. \v 5 Ijadufuo Godi fu vierafe vajiemoga na e boeje ro e mamekanu buone ije kumevo bu besu afui. Areme na kiavo bu agane besubesu ijiebuo ive ije na isoedufuo ije kuarie. Rove e ije eranebe amure una aesakae Juda igia ruaeva ijiebuo ive nane buki bu e ive isoevo ijia giae. Ro buki ijia vua ije bu isoeva ije bu ijiege isoe: \q1 \v 6 Ro e ive igia isoeva ijeja e Jiusi ije bu maza ije kini Nebukaneja fu toenamiana kaenamia are fuone Bebironi ijia dibure uniaema ijiebuo asaerafa ijiebuo ive. E ijiebe aesakae Bebironi arena una uri sidove buone besubesu Jerusareme ro Juda guove ijia ruae. \b \p \v 7-73 (-) \pi1 Ro safita 7:7-73 ije fu e ije eranebe bu Bebironi ebuo aesakae ijia karina areme una Jerusareme ruaeva ijene isoe. Ro e ije bu una ruaeva foteke ije buka e 42,360 ijiege. E ije una ruaeva ije bu kuke fanu osekina kamerokina doniki buone uruvana 8,136 ijiege kaenamia ruae. E ije ruaeva gue bu Jerusareme sidove ijia karikoga gue bu una va sidove buone binobino Juda guove ijia kari. \c 8 \s1 E Esura fu Mosisido akae ije abe daema ijene \p \v 1-2 Ijiege rena e Isureroko boeje bu asame be romoga bune una sidove buone ijia karijana vae. Areme e boeje bune una Jerusareme ijia besu afui. Bu are viene bu kua Do Vieneno kuavo bu aruvo ijia afui. Areme bune uri Esura e akae isoekinu nijasiamo ije kuavo fu urina buki ije e Isureroko bu iriniadufuo ije E Ireobo fu Mosisi kuamo fu isoema ijene abei. Areme fune uri e boeje barubara ro eranebe bu mukoe fiena vierafevo bu afuiva ije nidua buone ijia mani. \v 3 Fu ijia mani areme uri Buki Akae ijene dabe suoke ve iko irasemo ijia dako vakuma maza uvuoka mani. Ro e boeje ijia kariva ije bu vua asune fuone ijene mukore fiekuae buka mauikeigia karina fiejae. \p \v 4 Ijiege rena Esura fune urina fata ije bu iviama saeva vua kuaedufuo ajia mani. Ro e ije bu fuina fata ijia umui maeneke ijia ireva ijeja e Matitiakina Semakina Anaea ro Uriakiro Irikaea ro e Maseja ijene. Ro e ije una umui aeneke ijia ireva ijeja e Fedaeakina Misero ro e Makijakina Asumi ro Asibadanakina e Zekaraea ro e Mesurame ijene. \v 5 Ro maza ije e Esura fu e boeje asidiana kave ijia ajia manino ije e boeje buka fu veri. Bu ijia karina veri gake fune Buki Akae ijene abe iramoga e boeje buka uri arire irei. \v 6 Areme Esura fune uri E Ireobo ro Godi ka daroki ijadufuo oemarei. Esura fu ijiege Godi oemaremoga e boeje buka uri umui kave ijia korekinu kumei, Mare maremano kumei. Bu ijiege kumena e boeje buka ijia auge sana tua ume ijia dijena E Ireobo dabe aroena baname isoe. \p \v 7 Areme bune una urina irekoga e Rivaeti ijiebe urina akae ijadufuo vua maeje una mukoreigia kuariakoga e boeje bu fie. Ro e Rivaeti ijiebuo ive ijeja e Jesuakina Banikina Serebiakina Jaminikina Akubikina Sabetae ro e Odia ijene. Ro e Maseakina Keritakina Azaraekina Jozabadikina Anani ro e Feraea ijene. \v 8 E ijiebe Godido Akae ije dama areme vua maeje kena una mukoreigia samadukua e boeje kuariae. Bu ijiege kuariaekina bu vua maeje mukoreigia fiena vierafekuae bu ijiege rei. \p \v 9 Areme e boeje bu akae ijare izege kuaemo bu ije fievo buka oe gamia niriakiamoga bu ijia uruvana nirae. Bu ijiege niraevoga e Rivaeti ije vua akae ijadufuo maeje kuariana nijasiavo ijiakina e Neamaeakiro Esura bu urina vafiae. Bu kiae, Mazani ige fuka E Ireobo Godi jone ijadufuo mazani anuigi be ijadufuo jade niraevo. \v 10 Ro nime urina va are jone gafia irekiro do vaeni maeje ja naeva ijene ina oemarefo. Areme ni ire jone mukore gue ja naeva ijene karina una e gue eranebe naebe naeva ijene ivajiafo. Ijadufuo maeje mazani ige fuka E Ireobo jone ijadufuo mazani akae ijadufuo jade karina oefiane abevo. Ro no vierafe E Ireobo fu ifejuoga no oemarekinu oenoevo ijia noka una daro abekono kiae. \p \v 11 Bu ijiege revoga e Rivaeti bu urana oenoekinu e ije niraevo ije vafiae. Bu vafiakinu kiae, Maza igeki fuka akae ijadufuo mauike karikiro ije ja oefiane abekinu niraevo ije areno kiae. \v 12 Ijadufuo e boeje bune una va are buone ijia usiaena iro ina oemarei. Bu ijiege urukeigia oemarekinu uri ire ro sinuome buone maeje bu naeva ijene kena una e gue bu ire baki ijene ivajiae. Bu ijiege reva ijadufuo maeje e Rivaeti bune Godido Buki Akae mukoreigia dana nijasiavoga bu vua asune ije fiena vierafei. \s1 Bu iro Are Muvuaka Sana Karivono kuavo ije una zinueve \p \v 13 Areme nituame agane binobino ijiebuo e mamekanu ijiakina e zinone ifaejevo ro e Rivaeti ije bune una Esura fino ijia vae. Bu vierafe buka va fuina karina akae ije fu irere kuaemo ijene una vua maeje mukoreigia fiekuae vae. \v 14 Bu va karina fievo ijia bu E Ireobo ijadufuo akae be fu Mosisi kuaraema bu ije fie. Ro akae ije fu kuae e Isureroko bu asame seveni abega bu iro bu kua Are Muvuakano kuavo ijene ivo ije buka are muvuaka sana ijia karino kuaema bu ije fie. \v 15 Ro kuke buka vua ijene dabe Jerusaremekina sidove boeje ijia e Isureroko ije kuariana nijasiake. Bu kuariaga e ije buka va uruo gafia ifiri binobino ine orivikina aname ro metorokiro ine gue afare mukore e bu rotire ijia karivo ijiebuo a ijene medufuo. Areme bu karina izege Godido akae fu kuaema ijiege are muvuaka sana ijia karino kiae. \p \v 16 Ijadufuo e Isureroko bune uri ifiri mena are buone besubesu ado ijia ajiana are isesina muvuaka ije sae. Ro gue bu are buone makave ijia are muvuaka sae. Ro gue bu Godido Are ijadufuo makave ijia sae. Ro gue bu viene bu kua, Do Vieno kuavo ro kuke viene be bu kua, Ifuremi Vieno kuavo ijiebuo makave ijia are muvuaka buone sae. \v 17 Ijiege rena e boeje eranebe bu va ebuo are ijia karina una Jerusareme ruaeva ije buka are muvuaka sana ijia karinoe. Ro are muvuaka bu saeva ije e boeje bu oeseradiavo buka oemarekinu ijia aru karinoe. Ijadufuo maeje ude maza ije e Nanedo fari e Josua fu e Isureroko samuagiaema ijia ruoma iviama ige iro ije bu kua Are Muvuaka Sana Karivono kuavo ije bu ivo baki. \p \v 18 Ro mazani amure bu zinuevena iro iva ijia vakuma ubine bu furiva ukua ije e Esura fuka maza besubesu Godido Buki Akae ije dakoga e Isureroko bu fie. Ro kuke iro ije bu oemarekinu ina vakuma mazani seveni (7) ijiege furi. Ro una maza eti (8) ije e boeje bune izege Godido Akae fu kuaema ijiege una besu afui. \c 9 \s1 E Isureroko bu ise buone ije visuiva ijene \p \v 1 Ijiege rena asame besu ijadufuo mazani tuaedi fo (24) ijia e Isureroko ije bune una besu afui. Buka sinuome uki vajae aziziavo ijene sama tuvuare datena nigofo akoena ire atokinu ijiege rei. \v 2 Areme e Isureroko ije bune e aebinoko ije uniana va buebino kari. Areme bune urina ise buone ijiakiro asaerafa buone ijiebuo ise bu reva ijene visuna Godi kuarae. \v 3 Ijiege rena suoke naeni kiroki ijia bune zinuivena E Ireobo Godi buone ijadufuo akae ije abena dako vakuma maza uvuoka abei. Areme maza dakudena maniko bune una kuke ise buone ije visuna Godi kuarakinu fuone baname isoena aroeko vakuma maza fo kiroki abei. \v 4 Bu ijiege aroekoga e Rivaeti ije bu fata ijia irena E Ireobo Godi buone ijadufuo urukeigia baname isoe. Ro e Rivaeti ijeja e Jesuakina Banikina Kadimierokina Sebaniakina Bunikina Serebiakina e Bani ro Kenani ijene. \v 5 Ro e Rivaeti gue bu urina kiae, E boeje ni urina E Ireobo Godi jone maza boeje ijia fivako ijadufuo ive sanaema ije dabe oemareno kiae areme bune kuke baname isoena kuae, \pi1 E Ireobo no vierafega e boeje buka ive one ka anuigi ijene dabe maza boeje aroekinu oemarejake. \v 6 Ro aeje aka ma E Ireobo are saove gufe amaeri areme ire zuvi boeje amaeriae. Are sakae ige amaeri areme ire boeje binobino amaeriana ado ijia uniae. Ro kuke are davare ijiakiro ire boeje guove ijia oenoejo ije amaeriae. Ro are kiaga ire boeje bu maza boeje ijia karivako. Ro anera boeje saove gufia kariva ije buka a baname isoekinu kuri tuakafavo. \pi1 \v 7 Aeje aka Godi E Ireobo ro are aesakae Bebironi guove are Eri ijia e Aburame abe areme mesirina keke vae. Ro kuke are ive fuone ijene abe una iviaeko ina Eburame kuae. \v 8 A gaga funeka maza boeje a irinana e ijuebaki remoga a fuosiki vua kuaena avenami. A kua na e Kenanaeti ro Itaeti ro Amoraeti ro Ferizaeti ro Jebusaeti ro Gegasaeti ijiebuo sakae ije kena una uifari fuone vajakono kuae. A sakae ije kena fu vajaekina uifari fuone bu rade ijia karike. Aka maza boeje vame maturaema ijiaru renoeno ijadufuo vua irere a kuaemo ije a totemo baki ro aka uria vierafemo. \pi1 \v 9 A izege asaerafa nuvuone ije bu Ijifiti ijia isejavaenoevo ije ane giae. Ijadufuo bu Davare Kavuaneno kuavo ijia a ifejiakiro bu kumevoga ane fie. \v 10 A ire ka sumiki daroki ijene kini ijiakiro e mamekanu ro e Ijifitiko boeje ije buone rei. Ijadufuo maeje a giaga buka vame ma ise ijia e one ije kame isekafiana arafiriae. A ijiege rema ijadufuo e buka iviama uria ive one daroki ije dabe kuaenoeve. \v 11 A e one ijiebuo vame amaerina davare ije dabe ata guegue re areme kaenamia sakae iriaeki ijia bierena vae. Ro e ije bu e Isureroko kaniakuae kame arafiriana nuvediavo boeje aka kame davare ijadufuo daro ije fu ufemo ijia koremo bu mune igege do mane ijia arina do ina oe furi. \v 12 Ro maza ije a e Isureroko kaenamia vaema ije a amite rena vako bu ijia nuvedae. Ro una muge a miane rena ude naena sanakinu vako bu ijia gakinu nuvedae. \pi1 \v 13 A Uruo Sanae manino kubi ijia a saove ijia arina e one ije vua kuariae. Areme a uri akae one mukore ijiakiro akae ije a e boeje kena besu enafuna kafiamo ije abe miae. \v 14 A ijiege mia areme kuke uri izege bu mazani one akae mauike karina baname isoevo ije abe mukoreigia samuadufuo ije kuariae. Ro kuke aka akae one binobino bu iriniadufuo ije Mosisi e one imeno ije kuamo fu isoena abe e one miae. \v 15 Buka vasia abevoga a ire burete saove ijia kena vajiamo bu i. Ro kuke bu do duadiamoga a munuage ijia kuamo do fu ijia abiesemoga bu i. A aesakae ije a abe miakono kiaema ije a kia ni va jone abena ijia karino kiae. \pi1 \v 16 Rove asaerafa nuvuone buka aroekarae ro kuke buka nigofo gikikmana rena vua one a kuariaema ije buka naebe irinae. \v 17 Bu a irinadufuo ije buka ijuone ro kuke irere a buefuo rema ije buka naebe una ijene vierafei. Bu vame sumiki daroki boeje a rema ije buka totei ijadufuo buka aroekarana una korubuo e fu bu samuagiadufuo ijene abei. Bu e abega fure kaenamiana una Ijifiti ijia vaga bu e ijiebuo mani baki imekuae bu ijiege rei. Rove aka Godi ije ebuo ise giana aremo ijene. Ro aeje aka Godi ije e marejiakinu ro oetuamo ijene. Ro kuke aka migegire ziemo baki ro kuke one izege a e gia oefiane abeno ije fuka ma ireobo. \v 18 Bu godi kufui ijene ire gorodi ijia mave-kau ame igeki ije amaeri areme kuae fu godi ijare are Ijifiti ijia bu kaenamiana keke ruaemano kuae. Ro kuke buka E Ireobo oesina vua ka omise ije kuae. Rove aka naebe bu ijuenena giamemarei. \pi1 \v 19 Ro ae sao ijia bu oenoeva ijia a naebe bu totena ijuegafiae. Ijadufuo maeje one izege a e giana oefiane abeno ije fuka ma ireobo. Ijadufuo maza ije a amite rena vako bu nuveda ro muge a miane rena naekinu vako bu ijia gakinu nuvedae. \v 20 Ro kuke aka Kavene one maeje fu vame maeje nijasiadufuo ijene abe miae. Ro aka ire mena ijene vajiamo bu i ro do duadiamoga a ifejiamo bu do i. \v 21 Ro juaevasia boeje foti (40) bu are sao ijia urana oenoeva ijia bu ire bino buka naebe nidue ro aka ifejiana irekiro do vajiamo bu i. Ro a ifejiamoga ugone buone bu savo ije buka naebe isuiko rei ro dia buone bu naebe ufiae. \pi1 \v 22 Ro are asaerafa nuvuone ifejiamoga bu e aesakae binobino ijia kariva ijena bijaena bure iraraena kania areme sakae ijiakiro sidove buone ijene kei. Bu kena ijia kari vakuma sakae kiane ubine iziebure bu iriva ijia karijana vae. Ro kuke are ifejiamoga bu kini Saeoni aesakae Esiboni samuamo ijiakiro kini Oge aesakae Basiani samuamo ije iraraena kania areme aesakae buone ije buone kei. \v 23 Ro are ifejiamoga uifari buone ije bu ire zuvi gufe bu ireva ijiege buka e uruvana rei. Areme a kaenamiana romoga bu aesakae ije a asoerafa buone kaenamia roga bu abena ijia karidufuo a kiaema ije abena ijia kari. \pi1 \v 24 Ro are ifejiamoga anafa buone bu e binobino sakae Kenani guove ijia kariva ije iraraena kaniakuria areme aesakae buone ijene kei. Areme a kuke e one ije daro miana ifejiamoga bu e kini Kenaniko ijiakiro e boeje aesakae ijia kariva ijene kena vame izege bu vierafeva ijia arafiriae. \v 25 Areme bu uri e daroki ije bu sidove mamekanu ijia karivo ije iraraena kaniakuria areme sidove buone ije kei. Bu ijiege re areme uri sakae mukore ire boeje ni binobino tavuavo ijene buone kei areme uri are buone bu ire mukore ijia naeva ijene kei. Areme bu kuke uri mako buone ije bu do jiavo bu runa amaeriaeva ijiakina ine orive ro ine bu fo tura ivo ro ire vaeni juare ijene buone kei. Areme bune uri ire maeje bu kariva ijene uruvana ivo buka deufiana ubaeradiae. Aka vame mukore ijene buefuo rema ijadufuo buka una one ireobo oemarei. \pi1 \v 26 Rove bu naebe una a irinae ro buka ijuegafana akae one a kuariaema ije bu naebe ijia nuvei. Ro buka uri e one bu vua one vierafena kuaevo ije bu una oe kuderia one ruadufuo bu umui bijiana uruke kuariavo ije kaniae. Ro kuke buka maza boeje vua ise oesina kuae. \v 27 Ijadufuo a e ani buone kiamoga bu e ije kame vame gikikimana ijia arafiriana vajae fiane vajiae. Rove bu una a kumevoga a saove ijia fina fie. Ro aeje aka e mukoreigia oetuana marejiamo ijadufuo a e ije kiamo bu va e ani buone ijiebuo umui ijia faradia turana kaenamia usiae ruae. \pi1 \v 28 Bu mazani ije bune una oe dasuna oemarekinu karivo ijia buka una kuke ise renoe. Ijadufuo a una kuke giamemarekoga e ani buone bu iraraena kaenamiana samuagiakinu kame vame gikikimana ijia arafiriae. Rove one izege a e oetuakinu marejiamo ije fuka ma anuigi. Ijadufuo a bu karauniakiro bu oe kuderiana kumevoga aka saove ijia fina fie. Ijadufuo a maza besubesu oefiane ro vajae fiane bu abevo ijia karauniae. \pi1 \v 29 A akae ije bu izege a mukoreigia irinadufuo ije ane umui bijiana urukeigia kuariamo rove buka aroekarana vua one ijuone. Bu akae one izege e bu mukoreigia iriniaga bu ma karivadufuo ije buka dabe tuasei. Ro kuke nigofo buone buka gikikimana reva ijadufuo vua one ije buka naebe fie. \v 30 A juaevasia ma uruvana aka mauike fikinu e vua one vierafena kuaevo ije kiamoga bune e one vua jujuki ije kuariae. Rove buka naebe fiekuae vierafe ijadufuo a arekoga bu e ije bu ivuake ijia karivo ijiebe buina bijaena irarae kaniae. \v 31 Rove aeje aka Godi ije e marejiakinu ro giana oefiane abeno ijene. Ijadufuo a naebe ijuegafiakoga bu e foteke kania furi. \pi1 \v 32 Ro Godi aeje aka Godi anuigi ro ka daroki ijene. Aka e oetuamo ijadufuo irere a rekiro kuaemo ije a totemo baki ro a uria vierafemo. Ijadufuo irufui ige no abevo ije guona ifejuokiro ade aremo. Isuibe e aesakae Asiriako ijiebuo kini ijiebe no kame vame omise ijia arafirue. Ro kuke maza ijia ruoma iviama ige e gue buduaku buka no irufui vajue. Bu kini nuvuone ijiakiro e mamekanu ro e zinone ifaejevo ijiakiro e vua one vierafena kuaevo ro asaerafa nuvuone ro e one boeje kame uruke arafiruovo noka uruvana isejavae. \pi1 \v 33 Rove Godi no maza boeje ise rega a kena isekafuomo ije a isema remo baki. Ijadufuo no a kame ijiege kafuomo ije ane ma rei rove no nore isema rena vua one naebe iriniae. \v 34 Asaerafa nuvuone ijiakina kini ro e mamekanu ro e zinone ifaejevo ije bu akae one ije buka iriniavo baki. Ro kuke buka irere bu redufuo ijiakiro vua jujuki a kuariamo ije buka mukoe fievo baki. \v 35 Ro kuke aka bu daro miana ifejiana sakae maeje saruegi ije abe miamoga bu ijia karina vame one maeje anuigi a buone remo bu ijene oemarekinu karina renoe. Rove buka una oefuo imevo baki ro kuke bu vame buone omise bu kenoevo ije bu naebe arei. \pi1 \v 36 No iviama none sakae saruegi mukore ige a abena asaerafa nuvuone ije miaga bu ire maeje ijia tavuavo ije kekinuro ifo turana idufuo a kiaema no ijia kari. None ijia kari rove no uria una kuke e ijiebuo mani baki imekinu vajae fiane abena isejavaeve. \v 37 Noka ise reva ijadufuo ire maeje nuvuone boeje binobino no sakae ige a muema igia kevo boeje bune kini ije a kiaga bu no samuaguovo ijiebe buone karive. Bu fanuve nuvuone binobino no samuagiavo ije bune karina kame buone bu vierafevo ijia renoeve. Ro kuke noeje bune bure samuaguovo ijadufuo no konuvuo nuvuone oemarevo ijia ire binobino renoevo baki. Ire boeje none buone izege bu vierafevo ijiaru renoevo ijadufuo iviama noneka irufui ma uruvana abeve. \s1 E Isureroko bu Godi irinako kuaeva ijene \p \v 38 No ijiege abena ruaeva ijadufuo iviama e Isureroko ige none igifureki oe besu vierafe kuaena abe isoeve. No nuvuosukua bakiro e nuvuone mamekanu ro e Rivaeti ro e zinone ifaejevo ije budua bune noena vua ije abe isoe nijavo ijene ka abe gikikimana revono kuae. \c 10 \cp 10-12 \pi1 Ro safita 10 ijia fu vua ije bu oe besu vierafe kuaena isoeva ijene. Bu Godido Akae fu Mosisi e fuone imeno fu kuaraema ijene mukoreigia irinakinu ro irere bu redufuo fu kuariaema ijiakiro Akae isesina ro mamekanu ijene mukoreigia iriniakinu nuvediakono kuaema ijene. \pi1 Ro kuke safita 10 ubine ijia vakuma 12 ijia fu vua inokubeke ma anuigi ijene kuae. \li2 1. Vua amure ijeja e Isureroko bu naebe bara ae binoko godi kufui baname isoevo ijena sanamidufuo ijene. \li2 2. Ro be ije bu maza ije bu mauike karina baname isoedufuo ijia naebe moni imedufuo ijene kuae. \li2 3. Ro be ije e Isureroko buka ire buone maeje gue kena una E Ireobo vajakinu e bu Are Akae ijia imevo ije vajiadufuo ijene kuae. \pi1 Ro buki kafare ijia fu kuke vua bino duaku kuae. Fu e ije eranebe bu una Jerusareme karikuae ruaeva ijiebuo ive ijene isoe. Ro kuke fu e zinone ifaejevo ijiakiro e Rivaeti ijiebuo ive ijene isoe. Ro izege bu Jerusareme isuo ije kira furi areme abena Godi baname isoena oemareva ijene kuae. Areme fu kuke e ije bu izege buone mukoreigia kanafui areme Godi baname isoena aroedufuo ijene kuae. \p \v 1-39 (-) \c 11 \p \v 1-36 (-) \c 12 \p \v 1-47 (-) \c 13 \s1 Neamaea fu vame binobino ije una dasuna mukoreigia kema ijene \p \v 1 Areme maza ijia e Isureroko boeje bune besu afuima kari fiekoga e Rivaeti ije bu urina Mosisido akae fu isoema ijene dabe una dae. Bu dakoga e boeje bu fievakuma vua kafare be fu kuae e Amonaetiko ijiakiro e Mobaetiko ije bube una Godido e ijena besu karino kuaema bu ijene fie. \v 2 Ijadufuo maeje isuibe maza ije e Isureroko bu aesakae Ijifiti arena usiae ruaeva ije e Amonaetiko ijiakiro e Mobaetiko ije buka naebe bu oemarejiana irekiro do ifejiana vajiae. Rove buka una e Isureroko ijene ire ise rekuae vierafei. Ijadufuo bu uri moni karana e Berame fuaeve arega fu e Isureroko ije kuravajiana vafiakiro bu ijiege rei. Ro Godi nuvuone fu Beramedo vua ije fu e Isureroko kuravajiakiro vierafema ije fu abe dakudemoga e Berame fume una vua ma ijiaru e Isureroko ijiebuo kuae. \v 3 Ijadufuo e Isureroko boeje bu ve ijia vua ije fiena uri e ae binoko ije kuriaerevoga bu naebe buina besu karinoe. \p \v 4 Ro vame ije bu rade rei ro ude e Iraeasibi e zinone ifaejemo ije fu Godido Are guove be bu ijia ire binobino navo ije samuamo. Ro kuke Iraeasibi fu Godido Are ijia guove be e Tobia mae. Rove e Iraeasibi ije fuka isema rei ijadufuo maeje e Tobia fu e Amonaetiko ro kuke fure ude e Isureroko isuo bu kiravo ijene bijukuriakiro renoe. \v 5 Ro are guove ije bu ude ire vuiti ije e Isureroko bu amure masina ke Godi zinone vajavo ijiakiro ire udi mukore urimo ijene ijia navo. Ro kuke disi bu kena Godido Are ijia imevo ijiakina ire buone maeje binobino bu kena Godido i ijadufuo ruovo ijene ijia navo. Bu ire vuiti ijiakina do vaeni ro oere bu e binobino Godido Are Akae ijia imevo ije vajiakuae ke ruovo ijene navo. \p \v 6 Ro mazani ije bu ijiege karina revo ije Neamaea naeje na Jerusareme ijia na baki. Ijadufuo maeje naeje nane una are Bebironia ijia Kini Atekesi ijene gakiro vae. Ro kini aesakae ije fu samuaema ije fu juaevasia teti tu (32) ijiege furiko na ijia una vae. Areme maza sibaneke furikoga rade na una Jerusareme ruakiro va kuavo fu kiemoga na una Jerusareme ruae. \v 7 Na maza ije na una igia ruaeva ijia na vame ise ije e Iraeasibi fu rena Godido Are guove be e Tobia maema ijene fie. \v 8 Na vua ije fievo naka naebe oemarei ijadufuo na Godido Are ijia aruna e Tobiado sinuome boeje fu guove ijia naema ijene karina makave ijia korei. \v 9 Areme na e ijia i mevo ije kiavoga bu are guove ije una amaerima fu maremoga bu abe Godido baname isoena daro mae. Bu ijiege rema areme uri sinuome binobino bu Godido Are ijia imevo bu kari usiae vaeva ijene karina una guove ijia nae. Areme bu kuke irekina isuni binobino iviaeko e bu karina Godi vajavo ijiakina ire udi mukore urimo ijene karina una are guove ijia nae. \p \v 10 Na ijiege rekinuro fieke bu ire ije bu karina e Rivaeti ije vajiadufuo navo ije bu naebe kena vajiaevo na ijene fie. Ro kuke e Rivaeti ijiakiro e dua uruvo ije bu guriguri ije samuagiavo ije bune i buone bu mevo ije arena una juare buone ijia vaeva na ijene fie. \v 11 Ijadufuo na uri e Isureroko ijiebuo e mamekanu ije vua gikikimana kuariae. Na kiae, Ja Godido are guove ijia i binobino ja mevo ije ja irerefuo arena vaevano kiae? Na ijiege kuariama areme e Rivaetiko ije kumevo bu una besu afuivoga na kiavo bu i buone una mei. \p \v 12 Areme e Judako boeje bune irekina do vaeni iviaeko ro oere ije bu amure masivo ijene karina Godido are guove bu sinuome navo ijia nae. \v 13 Bu kari rovoga na uri Seremia e zinone ifaejemo ijiakina Zadoke e ije akae nijasiamo ijiakina e Rivaeti be ive fuone Fedaea ijene kei. Areme na kiavoga bu Godido Are guove ije bu ire ro sinuome navo ijene samuae. Areme na uri Anane e Mataniado asae ro e Zakudo fari ije abevoga fu buone rotire ijia imei. Ro e ije buka e mukore bu i mukoe mevo e boeje bune giana vierafe. Ijadufuo na e ije kevoga bure ire ije e boeje bu kena Godido are ijia ruovo ijene gue karina e Rivaeti ije ivajiae. \v 14 Areme na uri Godi baname isoena kuae, Godi none ni i mukore igiakiro vame maeje na Godi none ijadufuo are igia mevo ije giena vierafekiro ade totemono kuae. \s1 E Isureroko bu maza akae ije abe tuasevo ijene \p \v 15 Mazani ijia na oenoekinu giake e Judako bu mazani ije bu mauike karina Godi baname isoevo ijia karina ire gurefi ije musana do vaeni amaeriavo na giae. Bu ijiege rekinu uri irekina vaeni ro isunikina ire boeje binobino ijene riena kari fanu doniki ijia nana Jerusareme ijia mani fuaevekuae ruovo na giae. Ijadufuo naka vua gikikimana ju kuariana kiae, Jade Godido mazani ijia ire jone karina fuaevejono kiae. \v 16 Na ijiege kuariakinuro giake e Taerako bu Jerusareme karivo duaku Godido mazani ijia kijumekina ire binobino karina ro Jerusareme guove ijia e Judako ijiebe fuaeveje. \v 17 Bu ijiege revoga na uri e Judako ijiebuo e mamekanu ije vua gikikimana kuariana kiae, Ja irerefuo vame ka omise ije rena mazani akae ije dabe arafirive? \v 18 Ja vierafe asaerafa jone bu izege revoga Godi nuvuone ije fu bu kame isekafiana uri sidove Jerusareme dabe arafiri? Iviama na giaga jaka una vame besu ijiege karina reve. Ja mazani akae ige dabe arafirivo ijadufuo na vierafe Godi fuka una e Isureroko ige no kame isekafuokono kiae. \p \v 19 Ijadufuo na oenoena ve fune tituteko Godido mazani ije fune ivuaremo ije na kiaga bu viene boeje bijuvo. Ro viene boeje na e none imevo gue kiaga bu samuavo ijadufuo e bino bu Godido maza ijia ire karina guove ijia fuaevejo baki. Bu ijiege bijuna karivakuma Godido mazani ije fune furimone na kiaga bu una azovo. \v 20 Na viene ijiege bijuvo rove e gue buka uria ire buone binobino karina fuaevekuae ruove. Ijadufuo ve mumone bu Jerusareme isuo makave gafa naovo. \v 21 Ijadufuo na keke giavo ije naka vua gikikimana kuariana kia, Ja irerefuo ro makave igia ijiege naove? Na rade una ro giaga ja uria ijiege rekuva naka e none imevo ije kiaga bu toenamiakono kiae. Ijadufuo rade e bino bu naebe una maza ije bu mauike karina baname isoevo ijia ire buone binobino karina ro fuaeve. \v 22 Na ijiege re areme uri e Rivaeti ije kiavoga bu va ise buone visu Godi kuarakinu oe buone ijia amaerenami. Bu ijiege rekina bu viene boeje samuaga nobe mazani ije mauike karina baname isoevo ije abe arafirikiro noka mukoreigia samuaga fuka akae reke. \p Areme na uri Godi baname isoena kuae, Godi none one a e oetuamo ije fuka ma ireobo ro fume ijiege navako. Ijadufuo ni kuke vame mukore ige be dua na revo ige giena marejiekiro ade na totemono kuae. \p \v 23 Areme mazani ijia na kuke giake e fari Judako ma uruvana buka bara aesakae binoko Asedodikiro Amani ro Moabiko ije kevo na giae. \v 24 Ijadufuo anafa buone ma uruvana bune e Asedodiko ijiebuo isama ijiakiro e guebuo isama ijene kuaeve. Bune ijiege rena isama nuvuone e Judako igiebuo ije bu kuaevo ije buneka toteve. \v 25 Bu ijiege abevoga naka ziena vua gikikimana kuariae. Ro e gue naka kaniana nigofo jau buone ijene faradiana usi. Areme naka kuriaerevoga bu uri Godi kurana akae gikikimana be nijae. Bu ijiege nijaekina rade bube anafa buone kiaga bu bara ae binoko samiakinu ro baru maniake. Ro kuke e fari ae binoko bube bara Isureroko ije samiake. \p \v 26-27 Ro igia fiefo, e Kini Soromani fuka e mukore ro kuke Godi fuka fu ireobo oetuamo. Fuje fu e ae sakae gue ijiebuo kini ijieki baki. Godi fu Soromani daro mamoga fu e Isureroko ijiebuo kini rei. Rove fu una bara ae binoko ije kemoga bara ijiebe vierafe fuone ijene dabe arafirivo fuka ise ireobo rei. Ijadufuo iviama na giaga jadua janeka una vame ka omise ni besu ijene reve. Ja Godi nuvuone fu maza boeje ja oetuamo ije jane totena ijuegafae. Ijadufuo maeje jane una bara ae binoko ijene keve. \v 28 Ro Joeada e Iraeasibi e ireobo zinone ifaejemo ijadufuo fari ije fu Sanebarate e Oronaetiko ijadufuo kabae ije abei. Ijadufuo na e ijene kuriaerena rorukuravo fu Jerusareme arena una are fuone ijia vae. \p \v 29 O Godi none, e ije bune ise rena e zinone ifaejevo ijiebuo ive kame arafiriae. Ro kuke bu e zinone ifaejevo ijiakiro e Rivaeti ijiebuo vua bu ire bino redufuo kuaena avenamiva ijene kame iserei. Ijadufuo ni vame ije bu kevo ijene giano kuae. \v 30 Areme na ire boeje e ae binoko ijiebuo bu kena ruaeva ijene kari korei. Na ijiege re areme uri e zinone ifaejevo ijiakiro e Rivaeti ije besubesu i fuone irere fu medufuo ijene nijasiae. Areme nane kiavo bu una i buone bu mevo ijene mei. \v 31 Ro na vakuma mazani zinone ifaejedufuo ruomo ije na e gue kiaga buka miane atana kari ruovo. Ro kuke na kiaga bu ire uije binobino bu zinuevena duivo ije karina ro e zinone ifaejevo ije vajiavo. \p Ijadufuo Godi none ni vame maeje na revo ije giena marejiene.