\id JOS  - Barai NT and OT portions [bbb] -Papua New Guinea 2006 (DBL -2014) 
\h Josua 
\toc1 Josua 
\toc2 Josua 
\toc3 Jos 
\mt1 Josua  
\c 1  
\s1 E Ireobo fu e Josua kuaema ijene  
\p
\v 1 Mosisi e Godido imeno ije fune baronekoga E Ireobo fu Josua e Nanedo fari ije fu e Mosisi ifejamo ije kuae,  
\v 2 Iviama Mosisi e ije noefuo i meno ije fune baronei. Ijadufuo nika urina e none Isureroko boeje kaenamiana do Jodeni tuana gara aesakae ije na miakiro kuaeva ijia vane.  
\v 3 Ro izege na Mosisi kuaraeva ijiege na are boeje iziebure a e ije kaenamiana diake ijia ura vako sakae ije na abe ja miake.  
\v 4-5 Ro aesakae jone ijadufuo ubine ije fu ae sao ijare irina ari vakuma aesakae Rebanoni ijia vake. Ro ikene gue ije fu do ireobo Iufuretisi ruvaema ijare irina ari vakuma do davare Meditereniani nafuema are ukua ije na abe ja miake. Ro aesakae foteke ije fu e Itaetiko ijiebuo. Ro naeje na izege na e Mosisiki finoeva ijiege naka una obiki finoeke ro nabe a abuejana vake. Ro maza ije a uria fino ije e be fu erare iraraena a asidakuma baki.   
\p
\v 6 Ijadufuo anika giriesa daromena e none boeje kaenamia vaekina bu aesakae ije na ma isuibe asaerafa buone ije miakiro kiaeva ije abeke.  
\v 7 Ro kuke nika giriesa daromena akae none boeje Mosisi fu vajaema ijene iriniakiro ade ijuonemo. Vua boeje anika iriniana urari kenoekiro ade dasuvaesuvaenoeno. A ijiege rekuma ire boeje a renoeno ije buka maredufuo.  
\v 8 Ro maza boeje anika buki akae ige dakinu ro mumaza kena mukoreigia nigofo one ijia vierafenoene. A ijiege rena vua boeje bu isoeva ijene iriniana renoekuma ire boeje a remo ije buka maredufuo.  
\v 9 Ro ude na kuaraeva ijiege nika uri giriesana daro mekiro ade jumekinu oefiane abeno. Ijadufuo maeje E Ireobo Godi one ige naeje naka are iziebureki a oenoeno ije na uria osiki ijia oenoekono kuae.   
\s1 E Isureroko agane maza ajiamo nake ijia karivo bu una agane buone gue ifejakuae kuaeva ijene  
\p
\v 10 Areme Josua fune uri e Isureroko agane binobino ijiebuo e mamekanu ije kiae,  
\v 11 Ni va are muvuaka e bu karivo ijia oenoekinu e ije kiaga bu sinuome buone boeje kanafuina samuafo. Ja maza inokubeke furikuma ja do Jodeni tuana va gara aesakae ije E Ireobo Godi fu abe miaema ijene jone abeno kiae.   
\p
\v 12 Areme Josua fune urina e Rubenikiro Gadi ijiebuo agane ijiakina e Manasado agane gue ije ijiege kuariae.  
\v 13 Fu kia, E boeje ni vua izege Mosisi e Godido imeno fu kuariaema ije vierafefo. Fu kiae, E Ireobo Godi jone fu aesakae be miaga ja ijia oemarekinu dasu karikono kiaema ije igifureki.  
\v 14 Ijadufuo nine agebara ro fanuve jone boeje ijena aesakae Do Jodeni ikene una mazani ajiamo nake Mosisi fu miaema igia karifo. Ja igia karike e bijaevo jone bu juvua magu abena ude vake uviarafa jone bu rade nuvediafo. Bu ijiege vakinu uviarafa jone ifejiana e ani buone ije kaniakuria areme ijia karike.  
\v 15 Bu ijia karikega uviarafa jone bu va aesakae ije E Ireobo fu miakono kiaema ijene abefo. Areme rade nine una do Jodeni tuana va gara maza ajiamo nake ijia aesakae ije Mosisi fu miaema ijia karino kiae.   
\p
\v 16 Josua fu ijiege kuariamoga e Rubenikiro Gadi ijiebuo agane ijiakina e Manasado agane bu urina kuae, No vierafe noka vua irere boeje a kuaruema ije reke. Ro a are iziebure vano kuokuma noka irinana vake. No vierafe noka izege Mosisi no irinaeva ijiege una a irinake.  
\v 17 Ro no vierafe E Ireobo Godi fuka izege fu e Mosisiki finoema ijiege fuka una obiki finoeke.  
\v 18 Ijadufuo anika giriesana daromene. Ro erare fu faememarenoekinu vua one ije karatuakinu ro a naebe irinakuma e ije noka mune tuana kanaga fu baronekono kuae.   
\c 2  
\s1 Bara Reabi fu e ije avaegianoevo ije ifejiaema ijene  
\p
\v 1 E Isureroko bu are Akesia ijia are muvuaka sana kariva ijia e Josua fu e inokiro kiae, Ni va sakae do Jodeni gara ijia sidove ireobo Jeriko ivuake ijia mauike mukoreigia ninakono kiae. Fu ijiege kuariamoga bune vakuma gafia usiaevo funeka ve mumoga bu bara amune Reabi ebuo baru turanoeno ijadufuo are ijia naokuae vae.   
\p
\v 2 Rove e be fu va e Jerikobuo kini ije kuae, E Isureroko bino bune are ige ninakokuae muge ruaevano kuae.  
\v 3 Ijadufuo kini ije fune uri bara Reabi vua ijiege nijana kumei, E ije bu ro are one ijia kariva ije buka ebe kiavo bu vame izege bu ro no kanuodufuo ijene gakuae ruae. Ijadufuo a kaenamiana roga na giano kumei.   
\p
\v 4 Rove bara Reabi fuka fena una kumei, Ije ane ma kuae. E bino bune ma ve nakisirema ijia are none igia ruae. Rove e ije bu e izeko ije naka naebe mukoreigia giae.  
\v 5 Bu ve fune nakisirema sidove viene bu bijuvo ije fune ivuarema ijia bu vae. Ro bu vame izane vaeva ije naka naebe giae. Ijadufuo ja nuvediakuva ja biediakono kuae.  
\v 6 (Bara Reabi fu e ije vua abe ruaeva ijene ijiege kuariae rove fune ude e ije avaegiakuae ruaeva ije fu kaenamiana are fuone ado fu ire firekisi nubuane igeki fu maza uviaema ijia urie.)  
\v 7 Ijadufuo kinido e ije bune e ije reriana vakuma vame ije bu do Jodeni tuana vako ijia usiae. Bune ijiege usiae reriana vakoga bu gue sidove ijadufuo viene bijui.   
\p
\v 8 E ije bune ijia naokuae kariva ijia muge bara amune Reabi fune ajiana va are ado ijia kekena e ijena vua kuae.  
\v 9 Fu kiae, Na vierafega E Ireobo aesakae ige fune abena e Isureroko ije ja miae. Ro kuke e aesakae igia kariva ije noka ma ireobo ja jumevano kiae.  
\v 10 Ijadufuo maeje none izege ja are Ijifiti arena rovoga E Ireobo fu Davare Kavuane kuamo fu sikoga ja ijia urana ruaeva no ije fie. Ro kuke no izege ja do Jodeni irifo maza ajiamo nake ijia e Amoraetiko ijiebuo kini e Sionikiro Ogi ijiebuo e ije kaniana uinituva no ije fie.  
\v 11 No ire ije ja reva ije fievo fuka oeseraduema ijadufuo noka jumei. Ro kuke e ige bu vua ije fieva ije bu izege uri daro abena bijaekuva baki. Ijadufuo maeje no vierafega E Ireobo Godi jone ije fuka Godi saove gufiakiro ume igadufuo Godi ijene.  
\v 12-13 Ijadufuo ja isekie nika E Ireobo jone ijadufuo ive ijia kurana kieko ja agane none ijena jabe kanuokiro ja karaunuokono kiega na fiefo. Ijadufuo maeje maza ije ja ruaeva ije naka ja marejiae. Ijadufuo na vierafe jaka nuga be nijasiega na ijia gadufuo. Na ijia gana vierafero maza ije ja are ige tuguakuae ruovo ije ja orafa none ijiakina makirafa ro uviarafa ro anafa buone boeje ja karaunuokiro na ijiege vierafeno kiae.   
\p
\v 14 Areme e inokiro ije bune uri kuae, A no ifejuona karaunuokuma nodua no ja karauniake. Ijadufuo a no ruaeva ije a naebe e bino kuariakuma no vua irere no kuaraeva ije nobe toteke. Ro E Ireobo fu aesakae ige abe muokuma no akina agane one boeje karauniakono kuae.  
\v 15-16 Ro bara Reabido are ije fu faere bu mune ijia kirana ajiaeva ijiakuma besu ifena sae. Ijadufuo fune urina kiae, Na vierafe na kaje abe kirana saene ijia abiesega ja ijia ari vake. Ro ja vakuva nine va uruo gafia sauina karifo. Jani maza inokubeke ijia sauina karike e ije bu ja reriana usiae vaeva ije bu una roga nine ijare una e jone kariva ijia vano kiae.   
\p
\v 17-18 Areme e inokiro ije bune vakuae uri vua ijiege bara ije kuarae. Bu kuae, No vua irere no a kuaraeva ije nobe toteke. Ijadufuo igia fiene. A maza ije no are one ige tuguakuae ruovo ijia nika kaje kavuane ijia abena isuo tire ije a kuomo no ariva ijia kirane. Ro orafa one ijiakina makirafa ro uviarafa one ijiebuo agane boeje nika kiaga bu mauike are one guove ijiaru karine.  
\v 19 Ro erare fu are one ije arena keke vame ijia oenoeno bu kanakuva ije funeka korufuo irufui abeke. Ro agane one boeje bu uria are one ijia kariva ijia e bu kaniakuva irufui ije nore abeke.  
\v 20 A irere ige no renoevo ije e bino kuariakuma no vua ige a kuomoga no kua no rekono kuaeva ije nobe rekono kuae.  
\v 21 Bu vua ijiege kuaravoga bara Reabi fune uri kiae, Ije fune maredo nane ijiege rekono kiae. Areme fune e inokiro ije uniamoga bune kaje arina vae. Bu vakoga fu uri kaje kavuane abena isuo tire bu ariva ijia kirae.   
\p
\v 22 Areme e inokiro ije bune arina subinae vakuma uruo ijia maza inokubeke sauina kari. Bu ijia karikoga e ije bune usiae va rerianoega baga bu arena una ruae.  
\v 23 Areme e inokiro ije bune uruo ije arena una do Jodeni tuana gara vae. Bune vakuma Josua e Nanedo fari ije fino ijia usiaena vua boeje izege bu are Jeriko ijia reva ijene Josua kuarae.  
\v 24 Bu kuae, E Ireobo fu aesakae ije fune abena no mue. Ijadufuo maeje no giaga e boeje aesakae ijia kariva ije buka ma ireobo no jumevono kuae.   
\c 3  
\s1 E Isureroko bu do Jodeni tuana vaeva ijene  
\p
\v 1 Areme nituame suoke mugamia Josua fune e Isureroko boeje ijena bune are Akesia arena vakuma do Jodeni irifo ijia usiae. Bu ijia usiaena uri are muvuaka sama areme ijia kari rove bu naebe do tuana gara vae.  
\v 2 Bu uria ijia kari vakuma mu inokubeke furiko ijia e buone mamekanu ije bune oenoekinu e boeje izege bu redufuo ije kuariae.  
\v 3 Bu kiae, Ja karikinu giaga e Rivaeti Godido zinone ifaejevo bu E Ireobo Godi ijadufuo Mavua Akae ije abe giena vaga ni uri are muvuaka jone farae areme sinuome karina bu vako ijia nuvediafo.  
\v 4 Ja vame ije bu vako ije ude ja naebe ijia vae ijadufuo nime bu vako ijia giakinu nuvediana vafo. Ro jade ivuake ijia buina biezinamina vako ro nime sibaneke mumabo ijia nuvediake bu Mavua Akae ije giena ude vano kiae.   
\p
\v 5 Areme Josua fune urina e boeje kiae, Nine uri ise jone ije Godi visu kuarakinu oe jone amaerinamifo. Ijadufuo maeje E Ireobo fuka isuome ire sumiki ka daroki bino nidua jone ijia rega ja giakono kiae.  
\v 6 Areme nituame suoke Josua fune uri e zinone ifaejevo ije kiae, Urina Mavua Akae ije abe giena ude do ije tuana vake e boeje bu nuvediano kiae. Fu ijiege kuariamoga e zinone ifaejevo ije bune fu kuariaema ijiege rena uri Mavua Akae ije abe giena vakoga e boeje bune ijia nuvediana vae.   
\p
\v 7 Areme E Ireobo fune uri Josua kuae, Na ivia zinuevena a abe e Isureroko boeje ijiebuo nidua ijia a arorake. Na ijiege rega bu ijia gana vierafero na izege na Mosisiki oenoeva ijiege na una osiki oenoevoro bu a mukoreigia aguarakinu irinake.  
\v 8 Ro kuke ni e zinone ifaejevo ije kia, Ja Mavua Akae ije abe vakuma do Jodeni irifo ijia usiaekuva ni ari do ije sibaneke tuana samua ireno kiae.   
\p
\v 9 Areme Josua fu urina e Isureroko ije kiae, Ni e boeje biona ivuake igia irekega E Ireobo jone fu vua izege kuariaga ja fiefo.  
\v 10 Ivia Godi jone ije ni uria fino ije fu ire sumiki be rega ja ije gana vierafero fuje fu maza boeje jaena oenoeno ja ijiege vierafeke. Ro kuke fuka e Kenanaetikiro Itaetiko ijiakina e Ivaetikiro e Ferisaetiko ijiakina e Gegasaetikiro Amoraetiko ro e Jebusaetiko ije iraraena kaniakuriake.  
\v 11 E aesakae irore ijiebuo E Ireobo ijadufuo Mavua Akae ije bu abe ude do Jodeni tuana vaga ja ijia nuveke.  
\v 12 Ro ni e Isureroko ijiebuo agane tuero (12) guove ijia e besubesu kene.  
\v 13 Ro maza ije e zinone ifaejevo bu E Ireobo ijadufuo Mavua Akae ije abena iko do ijia tuakuva Godi fu ire sumiki be joefuo reke. Do ije fu naebe una ruvake ro fuka dabe turasena nafue ajiake ro zinume fu sikono kiae.   
\p
\v 14 Areme e boeje bune uri are muvuaka ijiakina sinuome buone kanafuima bune do Jodeni tua vakuvejoga e zinone ifaejevo ije bu uri Mavua Akae ije abena ude vae.  
\v 15 Ro maza ijia fuka ve vadefuo damo ijadufuo do Jodeni fuka ma ireobo firame. Rove maza ije e zinone ifaejevo bu Mavua Akae ije abe areme dia buone nafena do ijia bierevoga do ije fu ruomo ije fune ijia si.  
\v 16-17 Fu ijiege sikoga do ije fuka ireobo niguna una ajia vakuma are Adame ijia vae. Ro are Adame fuka mumabo ijia ro fu sidove Zaretani ivuake ijia. Ro do Jodeni zinuine fu kanana davare bu kua Do Sorokino kuavo ijia vaema ije duaku funeka si furi. Areme e Mavua Akae abe oenoejo ije bune do Jodeni ukua ijia irekoga e boeje bu Mavua Akae ije fu manino ijia iriaeki asina bune gara vae. Ro do ije bu are Jeriko ivuake ijia tuana vae.   
\c 4  
\s1 Josua fu are Gigaro ijia mune bu ijia gakinu oenoedufuo ije karana besu naema ijene  
\p
\v 1-2 E boeje bune do Jodeni tuana gara va furikoga E Ireobo fu Josua kuae, Ni e boeje ijiebuo agane tuero guove ijia e besubesu kene.  
\v 3 Areme nine kiaga bu do uvuoka ije e zinone ifaejevo bu ireva ivuake ijia arina mune tuero (12) karana va are iziebureki bu naokuvejo ijia besu nano kuae.   
\p
\v 4 Ijadufuo Josua fune urina e boeje ijiebuo agane tuero uve ijia e tuero fu ude kema ije kiamo bu besu afui.  
\v 5 Bu ijia afuivoga fu kiae, E besubesu nine va do Jodeni ukua ije e Mavua Akae abena ireva ijiebuo nidua ijia mune besubesu karana kamudiafo. Ro mune tuero ije ja kara vako ije ja e Isureroko agane tuero ijiebuo akaegue ijia karave.  
\v 6-7 Ro maza rade anafa jone bu giana kiako mune ije bu irerefuo karana ijia naevano kiakuva ni vua maeje kuariafo. Ni kia, Mune ije bu maza ije E Ireobo fu do Jodeni abe ata guegue reko Mavua Akae fuone fu ijia urana vakoga no ijia karae. Ijadufuo mune ije bu karina ijiege naekina e Isureroko bu maza boeje ije giavo ijia bu Godi irere fu rema ije vierafekono kiano kiae.   
\p
\v 8-9 Ijadufuo e ije Josua fu keva ije bune uri vua irere E Ireobo fu Josua kuaramo fu kuariaema ijiege rena uri mune tuero do Jodeni fu sima ukua ijia karae. E tuero ije bune uri E Isureroko agane tuero ijiebuo ive ijia mune tuero karae. Areme bune kame kamudiana vakuma are bu naokuvejo ijia besu nana ajiae. Ijiege rena Josua fune kuke mune tuero ijia besu nana ajiae. Ro mune ije bu naeva ije iviama bu uria ijiege naove.   
\p
\v 10-18 Ijiege rena e zinone ifaejevo ije bu Mavua Akae ije abena uria do Jodeni ukua ije irei. Bu ijia irekoga e ije bune uri ire boeje E Ireobo fu Josua kuaraema ijene rema furi. Ro amure e Rubiniko ijiakina e Gadiko ro Manasako e akaegue ijiebuo e azo kevo ije bune urina juvua magu buone kena ude vakinu e Isureroko gue ije samuagiana kaenamia vakuma do Jodeni gara usiae. Ro e azo kevo ije buka ma uruvana e foti tauseni (40,000) ijiebe ude efunena E Ireobo ijadufuo nidua ijia aesakae Jeriko amare ijia urana vae.  
\p Bune ijiege rena vakoga e Isureroko boeje bu migegire nuvediana do gara vakuma furi. Areme e zinone ifaejevo ije bune rade E Ireobo ijadufuo Mavua Akae ije abena vakuma irifo gara ajiae. Areme do Jodeni fune una izege fu ude firamo ijiege una firae. Ro maza ijia E Ireobo fu e Isureroko ijiebuo nidua ijia e Josua dabe ijiege nidoena aroemoga e boeje bu ijene gae. Ijadufuo bu urina izege bu e Mosisi dabe nidoekinu aguaeva bu ijiege una e Josua dabe nidoena aguaekinu vae.   
\p
\v 19 Ro maza ije e Isureroko ije bu do Jodeni arena vaeva ije bu asame amure ijadufuo mazani teni ijia vae. Bune vakuma sidove Jeriko sakae una maza ajiamo nake ijia usiaena bune are Gigaro ijia are muvuaka buone sae.  
\v 20 Areme Josua fune uri mune tuero ije bu do Jodeni ukua ijia kara vaema ije karina are Gigaro ijia besu nana amaeri.  
\v 21-22 Josua fu ijiege re areme uri e Isureroko ije kiae, Ja maza rade uifari jone bu ja kiako mune ije bu irerefuo ijiege naevano kiakuva ni ijiege kuariafo. Ni kia, No do Jodeni noka iriaeki tuana ruae.  
\v 23 Ijadufuo maeje E Ireobo Godi nuvuone ijare do Jodeni nuvuefuo bijumo fu sina iriarekoga no ijia urana ruae. Godi fu izege Davare Kavuane ije kuamo fu sikoga no iriaeki urana ruaeva ijiege fu una kuke Do Jodeni ijia ire besu ijene rei.  
\v 24 Fu ijiege rekina e boeje aesakae irore igia kariva bu bite ijia gana vierafero E Ireobo ijadufuo umui ije fuka darokiro bu ijiege vierafeke. Ro kuke fu ijiege rekina jaka maza boeje E Ireobo Godi jone ije aguaekinu irinakono kiae.   
\c 5  
\p
\v 1 Areme e Amoraetiko ijiebuo kini boeje bu do Jodeni irifo una maza koeno nake kariva ijiakiro e Kenanaetiko ijiebuo kini boeje davare irifo ijia kariva ije bu vua ije fie. Bu izege E Ireobo fu do Jodeni kuamo fu sikoga e Isureroko boeje bu ijia urana vaeva bu ije fie. Bu vua ije fievoga buka ma ireobo oeseradiana ane ausiae ijadufuo bu izege uri giriesana e Isureroko ijena bijaekuva baki.   
\s1 E Isureroko bu are Gigaro ijia vajae surive buone kania ufuna nuga naeva ijene  
\p
\v 2 Ijiege rena E Ireobo fu Josua kuae, Ni mune fae ijia kena sime uiki bino amaeria areme kena e Isureroko e fari eranebe bu surive buone naebe kania ufuiva ije kaenamiana nuga naejiano kuae.  
\v 3 Ijadufuo Josua fune sime uiki bino amaeria areme kena are Gibiati Araroti ijia e Isureroko ijiebuo vajae surive ije kania ufuna nuga naejiae.   
\p
\v 4-7 Ro ude e fari bune bijaedufuo maniva ije bu Ijifiti arena usiae ruaeva ije bune vajae surive buone kania ufuna nuga naejiae. Rove e ije bu juaevasia foti (40) ijiege ae sao ijia oenoeva ije buka naebe Godi irinae. Ijadufuo Godi fu kia bube aesakae ije ire uruvana zaraema ije fu abe miakono kiaema ijia vako kiae. Ijadufuo e ije bune ae sao ijia oema furi. Areme E Ireobo fu uri anafa buone kemoga bure una orafa buone ijiebuo are ije abei. Rove e ije bu uria naebe kena nuga naejiae. Ijadufuo Josua fu e ijiebuo vajae surive ije kania ufuna nuga naejiae.   
\p
\v 8 E boeje bune ijiege rena mauike are muvuaka buone ijia kariko vakuma matane buone bu subiema furi.   
\p
\v 9 Areme E Ireobo fu uri Josua kuae, Na ivia Ijifiti ja karina e ijiebuo moni baki imekinu jaeve abeva ije nane abe akoevono kuae. Ijadufuo are ije iviama bu kua Gigarono kuavo.   
\p
\v 10 Ijiege rena bu uria are Gigaro amare are Jeriko ivuake ijia kariva ijia bu asame amure ijadufuo maza fotini ijia iro Fasova ije i. Bu iro ije ikinu izege E Ireobo fu Ijifiti ijia e Isureroko ijene kaenamia keke ruaema ijadufuo oemarei.  
\v 11 Bu iro Fasova ije ima areme nituame bune ire gue aesakae ijia tavuavo ro ire vuiti bu ifaejeva ro kuke ire burete isiti baki bu ifaejeva ijene i.  
\v 12 Bu ire ije kena ima areme rade burete mena ije bu ivo ije fune ve ijia furi. Fu furinoga e Isureroko ije bu rade naebe una burete mena ije inoe ijadufuo maeje bune uri zinuevena ire ije aesakae Kenani ijia tavuavo ijene i.   
\p
\v 13 Areme Josua fune are Jeriko ivuake ijia kekema ijia fu gake e be fu sime farena nikubae fuone ijia manino fu gae. Ijadufuo Josua fune vakuma fu manino ijia kekena kuae, A no ifejuokiro ruae ke a e ani nuvuone ijiebuo ruaemano kuae.  
\v 14 Fu ijiege kuamoga e ije fu kuae, Na e ani ijiebuo ruaeva baki ro na E Ireobo ijadufuo e bijaevo ijiebuo e nigofo rekiro ruaevano kuae. Fu ijiege kuaramoga Josua fuka uri fu aguaena tua uimutumutu sakae ijia dijei. Areme fu uri e ije kuae, Nana E Ireobo ijadufuo imevo. Ro E Ireobo ije fu vua irere noefuo a kuaraemano kuae?   
\p
\v 15 Areme E Ireobo ijadufuo e bijaevo ijiebuo e nigofo ije fu urina kuae, Are ige a manino ije fuka akae. Ijadufuo ni dia surive one a saema ije azona nano kuamoga Josua fune ijiege rei.   
\c 6  
\s1 Are Jeriko isuo ije fu diduena arima ijene  
\p
\v 1 Ro are Jeriko faere ijadufuo viene boeje buka mukoreigia bijukuriaeva ijadufuo e sidove guove ijia karijo bu izege usiae vakinu ro una aru ruakuva baki. Ijadufuo maeje E Jerikoko ije buka e Isureroko ijene jumevo ijadufuo bu ijiege rei.  
\v 2 Areme E Ireobo fu Josua kuae, Iviama na are Jeriko ijiakiro kini fuone ro e bijaevo boeje nane kena a vajado a iraerena kania furike.  
\v 3 Ijadufuo ni e bijaevo one ijena sidove ireobo ije kaginu ufuaenoene. Janika maza besubesu ijiege kaginu ufuaena oenoekinu vakuma maza sigisi ijiege furifo.  
\v 4 Ro nine e zinone ifaejevo seveni ijiege kega bu vegu fanu sife kumate ijiebuo muane ije kena Mavua Akae ije bu abe vako ijia ude vafo. Ro maza seveni ijia ni e zinone ifaejevo ije kiaga bu sidove ireobo ije maza seveni ijiege ufuaenoekinu vegu ufefo.  
\v 5 Ro ja fiega bu vegu ije ufena ka ifenana vako ja fiekuva ni e boeje kiaga buka urukeigia vijena jarekafafo. Ja ijiege rega sidove ijadufuo faere ije fu diduena ariga e fari boeje bu ijia aru vano kuae.   
\p
\v 6 Areme Josua e Nanedo fari ije fune e zinone ifaejevo ije kumeno bu rovoga fu kiae, Ni E Ireobo ijadufuo Mavua Akae ije abefo. Ro e zinone ifaejevo gue seveni ije kiaga bu vegu bino kena Mavua Akae bu abe vako ije uineke ijia vano kiae.  
\v 7 Areme fune una e Isureroko ije kiae, E boeje nine iviama zinuevena sidove ireobo ijia ufuaenoefo. Ro bu vakuva e bijaevo ije nine Mavua Akae bu abe vako nidua ijia ude vano kiae.   
\p
\v 8 Josua fune ijiege kuariama furinoga e zinone ifaejevo seveni ije vegu seveni keva ije bune E Ireobo ijadufuo nidua ijia zinuivena vae. Bune vakinu vegu buone ufekinu vakoga e zinone ifaejevo gue bu E Ireobo ijadufuo Mavua Akae ije abena rade nuvediae.  
\v 9 Ijiege rena e bijaevo ije bune ude vakoga e zinone ifaejevo ije bune ijuone buone ijia vakinu vegu ije ufena ifenana vae. Ro e bijaevo gue bu E Ireobo ijadufuo Mavua Akae ije bu abe vako ijadufuo ijuone ijia nuvediae.  
\v 10 Ro Josua fune ude uri e boeje kiae, Jade uri urukeigia e bijaevo bu jarekafakinu bijaevo ijiege revo. Ro kuke jade vua kuaekiro nime vaga nare kiako ni vijeno kiaga ni ijare vijeno kiae.  
\v 11 Ijadufuo bune uri E Ireobo ijadufuo Mavua Akae ije abena sidove ireobo ije kaginu ufuaenoe. Areme e boeje bune una va are muvuaka buone ijia naoe.   
\p
\v 12 Areme nituame suoke mugamia Josua fune urimoga e zinone ifaejevo ije bune urina Mavua Akae ije abei.  
\v 13 E zinone ifaejevo seveni bune uri vegu kena Mavua Akae ije bu abe vako uineke ijia ufekinu vae. Bu ijiege vakoga e bijaevo gue bune ude vakoga gue bu Mavua Akae ijuone ijia nuvediae. Ro e ije vegu ufevo ije bu naebe arei ro buka uria ufena ifenakinu vae.  
\v 14 Areme nituame bune una kuke sidove ireobo ije kaginu ufuaenoena areme bune una are buone ijia vae. Bu maza besubesu ijiege rekinu vakuma maza sigisi ijiege furi.   
\p
\v 15 Ro maza seveni ije irasemoga bune mu gamia urina izege bu ude reva ijiege una sidove ireobo ijia ufuaenoe. Ro maza ijiaru buka mazani seveni ijiege sidove ijia ufuaenoe.  
\v 16 Areme bune maza radekumaeje ufuaena vako ijia e zinone ifaejevo ije bu uri vegu buone ufei. Bu ijiege ufekoga Josua fu uri e boeje kumei, E Ireobo sidove ije fune abena ja miae ijadufuo nika urukeigia vijena jarekafafo.  
\v 17 Ro sidove ireobo ijiakiro e ijia karivo ro ire boeje guove ijia naovo ije nika arafiria furidufuo. Ro Reabi bara ije ebuo baru turamo ijiakiro agane fuone eranebe fuina gire besu karivo ije jade kaniavo. Ijadufuo maeje fu e nuvuone bu mauike avaegianoejo ije kena urie.  
\v 18 Ro ire boeje bu E Ireobo ijadufuo sinuome ijadufuo ire bino jade mauike kevo. Ro ja uria faememarena ire ijia bino kekuva jadua buka kaniaga ja oe furike ro kuke e Isureroko boeje noka irufui abekinu ma ireobo isejavaeke.  
\v 19 Ro ire boeje bu siruvakina gorodikina buronisi ro ajane ijia kena amaeriaeva ije buka akae. Ijadufuo no kena E Ireobo ijadufuo are bu ire mukore fuone gue navo ijia nakono kumei.   
\p
\v 20 Areme bune uri vegu ufekoga e boeje buka uruvanaigia vijena jarekafavoga sidove ijadufuo faere ije fuka diduena ari. Fu diduena arimoga e boeje bu ijia urana sidove ireobo ije abei.  
\v 21 Areme bu uri e bara ro baru ro e nikaki ro eove ro barasiki ijiakiro anafa buone ije buka arafiriana furigana ro bara Reabikiro agane fuone ijiaru bu arei. Ro kuke buka mave-sifikina doniki ro kau ijiakina ire buone boeje sidove guove ijia naovo ije buka mukoreigia arafiriana uinitui.   
\p
\v 22 Areme Josua fune e inokiro ije bu mauike va are Jeriko ninakoeva ije kiae, Ni va bara ije ebuo baru turamo ijadufuo are ijia aruna izege ja fu ifejiakono kuaeva ijiege fu ro agane fuone boeje kaenamiana usiaeno kiae.  
\v 23 Ijadufuo e nikaki ije bu are ije mauike ninakonoeva ije bune va bara Reabi mesiri areme uri asie asoe ro makirafa ro e fuone boeje kaenamiae. Areme bune kaenamiana vakuma e Isureroko ijiebuo are muvuaka bu karivo ivuake ijia uniae.   
\p
\v 24 Areme e Isureroko bu uri sidove ireobo ijiakiro ire boeje guove ijia naovo ije foteke ke ifaeje. Ro ire ije bu siruvakina gorodikina buronisi ro ajane ijia amaeriaeva ije bu karina va E Ireobo ijadufuo ire akae bu karina navo ijiakuma besu nae.  
\v 25 Ijiege rena Josua fune Reabi bara ije ebuo baru turamo ijiakiro agane fuone fu naebe kaniae. Ijadufuo maeje Reabire e ije bu mauike are ije ninakokuae ruaeva ije kena urie. Josua fu ijiege Reabikiro agane fuone karauniamoga bu e Isureroko ijena juaevasia uruvana kari vae.   
\p
\v 26 Areme maza ijia Josua fu uri E Ireobo ive ijia kurana vua ijiege kuae, E be erare fu sidove Jeriko una sakiro vierafenoeno e ije fu E Ireobo ijare dabe isekafake. Ro erare fune zinuivena una sidove ije sakiro tugie urumo e ijadufuo ame fari amure ije fu baroneke. Ro kuke erare fu sidove ijadufuo viene mamekanu ije una amaeriakuma e ijadufuo fari iviene fu baronekono kuae.  
\v 27 Ijiege rena E Ireobo fuka Josua marejana daro mamoga e bu ive fuone dabe e sakae ijia kariva ijia kuaena iravae.   
\c 7  
\s1 E Eikeni ise fu rema ijene  
\p
\v 1 Rove E Isureroko ije buka ise rena uri sinuome ije bu arafiria furidufuo E Ireobo fu kuariaema ije naebe irinana ijiege rei. Ijadufuo maeje e Eikenino kuavo ije fu sinuome gue mauike kema ijadufuo E Ireobo fuka defaruimoga fu uri e Isureroko ije ziegafiae. Ro e Eikeni ije fu e Kamido fari ro e Kami fu e Zimirido fari ro e Zimiri fu e Zerado fari ro agane boeje ige bu e Judado uifari.   
\p
\v 2 Areme rade Josua fune are Jeriko ijia figa e fuone gue kiamo bu sidove Ai ije mauike ninakokuae vae. Ro sidove Ai fu sidove be Bete Aveni ivuake ijia. Ro kuke fu are Betero una ikene maza ajiamo nake ijia.  
\v 3 Areme e ije bune una ro Josua kuae, Sidove ije a kuomo no vaeva ije no vaga buka e uruvana ijia kariva baki. Ijadufuo e bijaevo boeje foteke no irerefuo vakuva baki ijadufuo nime e tu tauseni (2,000) ro ba tiri tauseni (3,000) ijiaru kiaga bu va e ije kaniano kuae.  
\v 4 Bu ijiege kuaravoga fu uri e tiri tauseni (3,000) ijiege uniamoga bu sidove ije dabe arafirikuae vae. Rove buka e Aiko ijiebe iraraena e ije vaeva ije kame arafiriavo bu una subi vae.  
\v 5 Bu sidove Ai viene ijia e Isureroko ije kame arafiriana vakuma are ije bu mune atavo ijia usiaena e teti sigisi (36) ijiege kaniavo bu oe. Bu ijiege revoga e Isureroko bu ire ije gavo buka urukeigia oeseradiana ka darobitenamiae   
\p
\v 6 Areme Josua fune vame ije bu reva ije gamo fuka ireobo oefiae. Ijadufuo fu uri ugone fuone faradia farae areme tuana uimutumutu Mavua Akae ije namo uineke sakaedo ijia dijena nako vakuma ve mui. Fu ijiege rekoga e Isureroko ijiebuo e mamekanu boeje buduaku oefiane abena uri kuokuo datena nigofo buone ijia akoe.  
\v 7 Areme Josua fu uri kuae, E Ireobo no do Jodeni gare kariva ije fune marema anika arekuma. A irerefuo no kaenamuona do Jodeni tuana igia e Amarakaetiko ije vajiagana bu no kanuove?  
\v 8 Ijadufuo E Ireobo na una vua irere a kuarake? Iviama e Isureroko ige noeje bune e ani nuvuone ijiebe kame arafiruovo no una subinae ruae.  
\v 9 Bu ijiege reva ijadufuo e Kenanaetiko ijiakina e aesakae bino ijia kariva bu ije fiekuva buka e boeje no okuruona kanuo furikuva nobe una aesakae igia karidufuo. Ijadufuo a izege rega e bu naebe ive one anuigi ije dabe arafirikono kuae?   
\p
\v 10 Josua fu ijiege kuaramoga E Ireobo fu una kuae, Ni una urine! A irerefuo sakaedo ijia ijiege name?  
\v 11 E Isureroko ije buka ise rena vua na kuariaeva ije bu naebe irinie. Ro buka uri ire ije na kia karina are none ijia noefuo irigi nano kiaeva ije iniemei. Bu ire ijiaru iniemeva baki ro bu kuke vua kufuimena sinuome ije karina una buone ijiakuma urie.  
\v 12 Bu ire ije reva ijadufuo bu izege e ani buone ije kaniakuva baga buka una kuderiana subinae ruae. Ijadufuo bu naebe e ije eranebe ise reva ije kania bu oefuri ro kuke irere bu keva ijene rere giana kame mutukore furikuva nabe una buina finoekiro na kame isekafiake.   
\p
\v 13 Ijadufuo ni e boeje kuariaga bu ise buone visukinu oe buone ije amaerenami areme isuome ijadufuo samuane. Ijadufuo maeje e Isureroko ijiebuo Godi E Ireobo ije na ige kuariako fiefo. E Isureroko ja ire ije ja iniemeva ije bu uria kari nakuva ja izege uri giriesana e ani jone ije iraraena kaniakuva baki.   
\p
\v 14 Ijadufuo suoke e Isureroko ije nine agane mamekanu jone besubesu ijia usiaena E Ireobo nidua none ijia roga na agane izare ise rema ije abe samadirefo. Areme ni agane guove ijia e gaegi besubesu bu usiaena nidua none ijia roga na agebara fuone ijia erare ise rema ije abe samadirefo. Na ijiege rega e ije fu agebara fuone ijena bu e besubesu usiae nidua none ijia roga na erare ise rema ije abe samadirega ja gafo.  
\v 15 Areme nine e ije ise rena sinuome iniemema ije mesiri areme nine agebara ro sinuome fuone boeje foteke kame fuina miane ijia ifaejefo. Ijadufuo maeje fure vua ije na kuarieva fu naebe irinie ro kuke fuka e Isureroko ijiebuo ive ijia vame omise ijene remano kuae.   
\p
\v 16 Ijadufuo nituame suoke mugamia Josua fune e Isureroko ijiebuo agane besubesu kiamoga bu usiaena E Ireobo ijadufuo nidua ijia ruae. Bu rovoga fu uri e Judado agane ijene abei.  
\v 17 Areme e Judado agane ije bune una kuke agane buone binobino ijia besubesu usiaena rovoga fu uri e Zeraetido e gaegi ijene kei. Areme e gaegi ije bune usiaena rovoga fu e Zimirikiro agebara fuone ijene kei.  
\v 18 Areme e Zimirikiro agebara fuone ije bune e fari ijiaru besubesu usiaena rovoga E Ireobo fu e Eikeni e Kamido fari ijene abei.   
\p
\v 19 Ijiege rena e Josua fune uri e Eikeni kuae, Farino ni E Ireobo e Isureroko ijiebuo Godi ije dabe aroena fu aguaekinu vua maeje ijiaru kuariene. Ro ade na fekuriekiro nika ise one irere a rema ije visuna kuarieno kuae.  
\v 20 Ro Eikeni fu una gue kuae, Na E Ireobo e Isureroko ijiebuo Godi ijadufuo nidua ijia naka ise rei.  
\v 21 Na e Bebironiako ijiebuo ugone ni mukore ijiakina ire siruva tu aderedi (200) ro ire gurodi uvani (1) kirogurami ijiebe ijia naovo na giavo fuka rieziemoga na kei. Ro ire ije na keva ije na kame are muvuaka none rotire ijia mako runa urie. Ro ire siruva ije na abena ugone rotire ijia abiesevano kuae.   
\p
\v 22 Fu ijiege kuaramoga Josua fune e gue kiamo bu difurisaena va are muvuaka fuone ijia usiaena sinuome fu mako runa uriema ijene giae. Areme bu kuke ire siruva ije fu abena sinuome ijiebuo rotire ijia abiesema bu gae.  
\v 23 Areme bune ire ije karina una va Josuakina e Isureroko boeje kariva ije nijasia areme bune kena una E Ireobo ijadufuo nidua ijia ume ijia nae.   
\p
\v 24 Bu ijia navoga Josua fune e Isureroko ijena Eikeni e Zerado fari ije mesiri areme uri anafa fuone kabae ro fari ijene kaenamiae. Areme bu kuke uri ire siruvakiro gurodi ro ugone fu iniemema ijene kari. Bu ire ije kari areme uri mave-kaukina sifikina doniki ro are muvuaka fuone ijiakina ire fuone boeje ijene kena bune are amare bu kua Akono kuavo ijia vae.  
\v 25 Bu va ijia usiaena Josua fune Eikeni kuae, A irerefuo irufui ije abena no mue? A ijiege rema ijadufuo ivia E Ireobo fu irufui ige abena una a koro makono kuae. Fu ijiege kuara areme e Isureroko ije kiamo bu mune karana Eikeni kanavo fu baronei. Areme bu kuke agane fuone ijene mune tuana kaniavo bu oevoga bu kame miane ifaejei.  
\v 26 Areme bune mune ma uruvana tuana Eikenido ado ijia akoena ajiae ro iviama mune ije bu uria ijiege naove. Ro are ije bu Akono kuavo ro ive ijadufuo maeje ijeja Irufui Abeno. Bu ijiege revoga E Ireobo fu ma defaruimo ije fu ijia arei.   
\c 8  
\cp 8-9
\pi1 Safita 8:1-9:27 ge fu izege e Josua fu e Isureroko kaenamiana e Kenanaetiko bu uruo ijia karinoeva ijene kaniakiro vaema ijene. Bu va e sidove Ai ijia kariva ije kaniakuriana areme bue e Gibioniko ijena besu kafaekuae kuaena mareva ijene isoe.  
\p
\v 1-35 (-)   
\c 9  
\p
\v 1-27 (-)   
\c 10  
\cp 10-23
\pi1 Josua safita 10:16-23:16 ige fu izege e Isureroko bu aesakae Kenani akaegue iraraena abeva ijene kuae. Ro kuke fu izege Josua fu sakae ije atasena e Isureroko agane binobino ije vajiaema ijene kuae.  
\p
\v 1-43 (-)   
\c 11  
\p
\v 1-23 (-)   
\c 12  
\p
\v 1-24 (-)   
\c 13  
\p
\v 1-33 (-)   
\c 14  
\p
\v 1-15 (-)   
\c 15  
\p
\v 1-63 (-)   
\c 16  
\p
\v 1-10 (-)   
\c 17  
\p
\v 1-18 (-)   
\c 18  
\p
\v 1-28 (-)   
\c 19  
\p
\v 1-51 (-)   
\c 20  
\p
\v 1-9 (-)   
\c 21  
\p
\v 1-45 (-)   
\c 22  
\p
\v 1-34 (-)   
\c 23  
\p
\v 1-16 (-)   
\c 24  
\s1 E Isureroko bu una Godi vua kuaena avenamiva ijene  
\p
\v 1 Areme Josua fune e Isureroko ijiebuo agane boeje tuero (12) ije kiamo bu are Sekemi ijia besu afui. Fu e Isureroko ijiebuo e maki ro e mamekanu buone ijiakina e koto fievo ro e ifiki buone ije kiavo bu una E Ireobo ijadufuo nidua ijia besu afui.  
\v 2 Bu afuivoga Josua fune urina e boeje vua ijiege kuariae. Fu kiae, E Ireobo e Isureroko ijiebuo Godi ije fu ijiege kuae, Isuibe asaerafa jone ijiakina asae jone be e Tera Aburamekiro Neobuo asoe ije bu do Iufuretisi irifo ijia karinoeva bu godi kufui ijene baname isoekinu arorianoe.  
\v 3 Rove nare asoe jone e Aburame are do irifo fu finoeno ijia mesirina keke are Keinani vae. Areme nare daro mavoga e uine fuone fuka ma uruvana rei.  
\v 4 Nare Aburame ifejavoga fu fari fuone e Aeseki biete areme juaevasia uruvana furiko na kuke e Aeseki ifejavoga fu anafa inokiro e Jekafukiro Iso ijene nafei. Areme na uri aesakae Sia uruo irifo ije abena e Iso mae. Ro e Jekafu fu farirafa fuone ije fu kaenamiana aesakae Ijifiti ijia ari vae.   
\p
\v 5 Areme na e Mosisikiro Eroni kiavo bu sakae Ijifiti ijia vakoga na duvado buone ijia irufui ka ise mamekanu ije e Ijifitiko ije vajia areme na asaerafa jone kaenamiana keke ruae.  
\v 6 Na kaenamiana ruoma do davare irifo ijia rovoga e Ijifitiko bu osekiro sarioti karina ja kame arafiria ruae. Bu nuvedia ruoma Do Kavuane nafuema irifo ijia usiae.  
\v 7 Rove asaerafa jone buka uri E Ireobo na kumevoga na ifejiana karauniae. Nare titutema ije kuavoga fu e Ijifiti ijiakiro asaerafa jone ijiebuo ukua ijia nae. Areme nare kuke do davare ije kuavoga fu e Ijifitiko ije okuriamoga jane ni jone ijia gae. Nare ijiege rei areme kaenamia romoga ja juaevasia ma uruvana aesao ijia karinoe.   
\p
\v 8 Ro kuke nare ja kaenamiana e Amoraetiko ijiebuo aesakae ije bu do Jodeni irifo maza ajiamo nake kariva ijia vae. Ja ijia vakoga bu jaena bijae rove naka nare ifejiavoga ja iraraena e boeje kania furi areme aesakae buone ije kei.  
\v 9 Ro e Moabiko ijiebuo kini Beraki e Zifodo fari ije fuka e Isureroko ije jaena bijaekiro samuae. Ijadufuo fu urina Berame e Biodo fari ije kumeno fu e Isureroko ije ja kuravajiana vafiakiro ruae.  
\v 10 E Berame fu na baname isoena kumenoga na naebe fiena ifejae. Rove naka vierafe fuone ije dabe dakudevoga fu una ja daro miakinu vua ma ijiaru joesina kuaemoga na karauniavo ja irufui ije daoveabue.   
\p
\v 11 Areme jane uri do Jodeni tuana are Jeriko ijia vae. Ro e Jeriko ro Amoraeti ijiakiro e Ferizaeti ro Kenanaeti ijiakiro e Itaeti ro e Gegasaeti ijiakina e Ivaeti ro Jebusaetiko ije bu jaena bijaekuae ruae. Rove na nare ifejiavoga jaka jare giriesana iraraevoga bu subinae vae.  
\v 12 Ro ja jare daro jone ijia e boeje ijiakiro e Amoraetiko ijiebuo kini inokiro ije juvuamagu jone ijia buina bijaena kaniaeva baki. Ro na nare ude vakoga e ani jone buka ijadufuo ireobo jumekinu ro ka totenamikoga ja kaniakuriae.  
\v 13 Nare aesakae ije ja ijia juae meva baki ro kuke sidove ije ja ijia are saeva baki ijene vajiae. Ro jame are ijia karina ine vaeni juare ijiakiro ine orivi fo ije ja umui jone ijia oeva baki ijene inoeve.   
\p
\v 14 Ijadufuo ni godi kufui ije asaerafa jone bu sakae Mesofotemia do irifo ro sakae Ijifiti ijia karina buone baname isoenoeva ijene kame garege korefo. Ro nika uri E Ireobo ije oetuakinu irinana fuefuo ijuebaki imefo.  
\v 15 Ro ja fu oetuakinu irinadufuo ije ja isediakuva ni ivia samadukua ja era oetuakinu irinadufuo ije kuaefo. Ja vierafe ja asaerafa jone ijiebuo godi kufui ije bu are Mesofotemia do irifo ijia karina buone baname isoeva ije baname isoekuva ni ijiege kuaefo. Ro kuke gaga ja e Amoraetiko ijiebuo godi kufui ije baname isoekuva ni ijiege kuaega na fiefo. Ro naeje na agane none boeje ijena no vierafe no nuvuosukua no uria E Ireobo ije oetuakinu irinakono kiae.   
\p
\v 16 Josua fu vua ijiege kuariamoga e boeje bu urina kuae, No E Ireobo ije ijuogafana una godi kufui ijiebuo baname isoekuva fuka naebe marei.  
\v 17 Ijadufuo maeje fune Godi nuvuone ijare no asaerafa nuvuone ijena Ijifiti ijia karina ebuo moni baki imenoevoga fu ijia karaunuona kaenamuo keke ruae. Ro kuke fuka ire sumiki uruvana nidua nuvuone ijia rei. Fuka vame ijia aesakae boeje no asidiaejana ruaeva ijia mukoreigia samuaguokinu kaenamuo ruae.  
\v 18 Fune E Ireobo ijare nidua nuvuone ijia e aesakae uruvana ijia kariva ijiakiro e Amoraetiko ijene kaniakuriae. Ijadufuo nodua no vierafe noka E Ireobo ije oetuakinu irinake. Ijadufuo maeje fuje fuka ma Godi nuvuone.   
\p
\v 19 Bu ijiege kuaevoga Josua fu kiae, Na vierafe ja fu oetuakinu irinadufuo ije jaka naebe mani. Ijadufuo maeje E Ireobo ije fuka Godi akae. Fu vierafe jaka maza boeje fu fuosukua fuone baname isoedufuo. Ro ja uria faememarena godi kufui ije buone baname isoekuva fuka defaruike. Ro kuke ise jone fube giana areke.  
\v 20 Ro ja E Ireobo ije ijuonena uri e ae binoko ijiebuo godi kufui ije buone baname isoekuva fuka ire ise ro vajae fiane bino vajiake. Fu ude ja fuka marejiae rove ja una ijiege rekuva fuka kaniaga jaka oe furikono kiae.  
\v 21 Rove e boeje buka una Josua kuae, No vierafe nobe ijiege rekiro noka una E Ireobo oetuakinu irinakono kuae.  
\v 22 E boeje bu ijiege kuaevoga Josua fu una kiae, Jane kojo ijifureki itire jone ijia E Ireobo irinakuae kuaevono kiae. Fu ijiege kuariamoga e boeje bu kuae, Ke ije noneka konuvuo kuaedo no ijiege rekono kuae.  
\v 23 Areme Josua fu kiae, Ja ijiege kuaevo ijadufuo nine iviama e ae binoko ijiebuo godi kufui ije ja buone baname isoevo ije nika kena mutu korefo. Ro oe jone ije ka kena una E Ireobo e Isureroko ijiebuo Godi ije vajano kiae.  
\v 24 Ro e boeje bu una Josua kuae, No vierafe noneka E Ireobo Godi nuvuone ijiaru fufuru oetuana irinakinu fuone baname isoekono kuae.   
\p
\v 25 Ijadufuo Josua fune buina vua ijiege kuaena avenami. Areme fune uri e ijiebuo akae gikikimana bino bu ijia giakinu kenoedufuo ijene nae.  
\v 26 Fu akae ije amaeriama areme kena E Ireobo ijadufuo buki bu akae fuone isoeva ijia isoe. Ro akae boeje Josua fu isoema ije fu are Sekeme ijia isoe. Areme fune mune ma ireobo be abena ine sio zinume E Ireobo ijadufuo Are Muvuaka Akae ivuake ijia nijae.  
\v 27 Areme fune uri e boeje kiae, Mune ige fune vua irere E Ireobo fu no kuaruema ije fune fie. Ijadufuo ja oenoeno E Ireobo ijuegafakuva ja mune ije gavo ijia ja una vua irere jare kojo kuaeva ije vierafekono kiae.   
\s1 Josua fu baronema ijene  
\p
\v 28 Areme Josua fune e boeje kiamo bu una aesakae buone ijia vae.  
\v 29 Ro rade juaevasia uvani aderedi teni (110) ijiege furikoga Josua e Nanedo fari E Ireobo ijadufuo imeno ije fu baronei.  
\v 30 Fu baronemoga bu abe sakae fuone Timinate Sera ijia mako rui. Ro sakae ije fu Ifuremi nafare ije ireva ukua ijia ro fu Uruo Gesi manino ivuake ijia.  
\v 31 Ro maza ije Josuakiro e Isureroko ijiebuo e mamekanu bu ire boeje E Ireobo fu rega bu giavo ije bu uria kariva ijia E Isureroko buka E Ireobo ije mukoreigia oetuakinu vua fuone iriniae.   
\p
\v 32 Ro sakae Sekeme ije fu e Jekafure moni uvani aderedi siruva ijia kena Amo e Sekemedo asoe ijadufuo fuaevei. Ro kuke e Josofudo ane E Isureroko bu are Ijifiti ijia karina usiae ruaeva ije bu kena ijia mako rui. Ijadufuo sakae ije fu e Josofudo uifari ijiebuo.  
\v 33 Ro e Eronido fari e Eriza fu baronemoga bu abe are Gibia aesakae Ifuremi uruo ijia mako rui. Ro sakae ije bu isuibe abena e Erizado fari e Finiasi maeva ijene.