\id GEN  - Barai NT and OT portions [bbb] -Papua New Guinea 2006 (DBL -2014) 
\h Iko Zinume 
\toc1 Iko Zinume 
\toc2 Iko Zinume 
\toc3 Gen 
\mt1 Iko Zinume  
\c 1  
\s1 Izege Godi fu ire boeje amaeriaema ijene  
\p
\v 1-2 Iko zinume ijia Godi fu aesakae igiakiro saove ije amaeriae. Ro ae sakae ado ijia ire bino fuka baki ro fune do ijare ijia nafuekoga ve ireobo fu ijia titute. Ro do ado ijia fune Godido Kavene ijiaru fu ijia oenoene.   
\p
\v 3-5 Areme Godi fune maza ije kuamoga fu are ije titutema ijia sanamoga fu ijene gamo fuka oemae. Ijiege rena fune uri titutema ijene abe atasena sanaema ije fu abe gue nijaga titutema fu abe gue nijae. Ijadufuo fu uri sanaema ije fu kua, Mazareno kuae. Ro titutema ije fu kua, Mugeno kuae. Ro ire ije fu mazani amure ijia amaeria furikoga ve ijia titutei.   
\p
\v 6-8 Areme Godi fune do ije kuamoga fu atana guegue rei. Do gue fu kuamoga fu kabo ijia nakoga gue fu ume ijia nafuemo fu are ririkua ije kua, Saoveno kuae. Fu ijiege amaeriama furikoga ve una ijia titutemo fune mu inokiro rei.   
\p
\v 9 Areme Godi fu una do ume ije nafuema ije kuamoga fu una besu nafuekoga sakae gue fu iriare.  
\v 10 Godi fu are ije iriarema ije fu kua, Sakaeno kuaga are ije do nafuema ije fu kua, Davareno kuae. Bu ijiege revoga fu ije giamo fuka oemae.  
\v 11 Areme Godi fu uri uije ni binobino ije kiamoga bu sakae ado ijia tavuae. Ro ifiri gue sunine bu ijo ijiebe ijia tavuakoga gue bu ire vuiti igeki ijiebe ijia tavuae.  
\v 12-13 Ire boge bu sunine kiravoga Godi ije giamo fuka oemae. Fu ijiege rekoga ve fu ijia titutemo fune una mu inokubeke rei.   
\p
\v 14 Areme Godi fu kuae, Na ire binobino ije kiaga bu kave ijia sanaga are akaegue fu ve titutekiro gue fu sanake. Ro bure irena nijasuoga no maza besubesu ro asame ro juaevasia ro maza mamekanu ije giana vierafekono kuae.  
\v 15 Asame ijiakiro mazani ijiebe kave ijia irena sakae ige sanaejake.  
\v 16 Ijadufuo fune uri ire sanavo inokiro ka mamekanu ije amaeriae. Mazani ije fu maza ijia sanadufuo ro asame ije fu muge sanadufuo ije amaeriae. Fune ijiege rei areme kuke ire zuvi ije amaeriae.  
\v 17-19 Areme fune uri sanaema ije bu sakae ige sanadufuo ije kena kave ijia nae. Fu ijiege rega are akaegue fu ve titutekiro gue fu sanake. Godi fune ire ije bu reva ije giamo fuka oemae. Ijiege rena fune ve titutemoga fune una mu inokiro kiro inokiro rei.   
\p
\v 20 Areme Godi fu kuae, Ni ire oe ruvo binobino do ijia oenoekiro ume binobino bu kave ijia oenoeno kuae.  
\v 21 Ijadufuo Godi fune kuaemoga kijume mamekanu ijiakina ire ni binobino do ijia oenoejo ije bune do ijia oenoe. Ijiege re areme fune kuke kuaemoga ume binobino kave ijia oenoejo ije bune ijia oenoevoga fu ije giamo fuka oemae.  
\v 22-23 Areme fune ire boeje do ijia oenoevo ijiakiro ume kave ijia oenoevo ije daro miana kia, Ni ame nafena boeje reno kiae. Fu ijiege rema furimoga ve ijia titutemo fune una mu umui fague rei.   
\p
\v 24-25 Areme Godi fune fina kuaekoga fanu ni binobino mamekanu ro isesina ni uria tarare ijia ro sidove ijia oenoedufuo ije bu sakae ado ijia oenoe. Bu ijia oenoevoga Godi fu ije giamo fuka oemae.  
\v 26-27 Areme Godi fu kuae, No iviama ema no vareki ije amaeriake. No amaeriaga bure aesakae boeje igia fanu taraeko ro aeko binobino ije samuagiake. Ro kuke bure umekina kijume isesina ro mamekanu ije samuagiake. Fu ijiege kuaena fune e fari ro bara fu vareki ije amaeriae.   
\p
\v 28 Areme Godi fune bu daro miana kia, Ni va ame uruvana tuanaekina bure are irore boeje igia karifo. Bure karina ire boeje sakae igia naovo ije samuagiake. Ro kuke nane daro miaedo jare fanu boeje bu sakae ado igia oenoevo ijiakina ume boeje kave gufia oenoevo ije samuagiake. Ro kuke jare kijume ro ire boeje do ijia oenoevo ije samuagiake.  
\v 29-30 Ro ifo boeje ja idufuo ro ire vuiti igeki ije nane joefuo ijifureki naejiae. Ro kuke fanu boeje binobino ro ume kave ijia oenoevo ijiebuo ire bu idufuo ije na vajomakina ia binobino nane amaeriaevano kiae.  
\v 31 Godi fu ijiege kuaekoga ire boeje bune fu kuaema ijiege rei. Godi fu ire boeje fu amaeriaema ije giamo fuka oemae. Godi fu umui fague ro dikine besu ijia fu aesakae igiakiro saove ro ire boeje amaeria furi.   
\c 2  
\p
\v 1 Ijiege rena Godi fu maza ijia ire boeje ige amaeriama furi.  
\v 2 Ro maza seveni (7) ije Godi fu ire boeje fu amaeriamo ije fu ijia furi.  
\v 3 Maza seveni ije fu abe daro mana fu akae remoga fu abe irigi nijae. Ijadufuo maeje Godi fu maza ijia fu ire boeje ume igia ro saove gufia naovo ije amaeriama furinoga fune ijia arena fi.   
\s1 Adamekiro Ivi  
\p
\v 4-5 Godi fu ijiege fina rekinu ire boeje ume igia ro saove gufia naovo gue no giavo ro giavo baki ije amaeriae. Maza ije Godi fu ire boeje amaeriaema ijia sakae ado ijia ifiri ro ire uije bino bu naebe ijia tavuae. Ijadufuo maeje Godi fu ve be fu naebe kuamo fu dae. Ro kuke fu erare ijia oenoekinu sakae rudufuo ije fuka baki.  
\v 6 Rove do ije fume sakae guove ijia ajiana sakae ije safikirame.  
\v 7 Areme Godi E Ireobo ije fune sakae ijia matuana abe e fari amaeri. Areme fune uri e ijadufuo udo ijia ivua ije fu oerukinu oenoedufuo ijene ufenogana e ije fune ijia uri oeru.   
\s1 Godi juare Ideni fu amaerima ijene  
\p
\v 8 Ijiege rena Godi E Ireobo fune uri juare be are mazani ajiamo naka ijia mena ive ina Ideni kuae. Areme fune e ije fu amaerima ije mesirina juare ijia nujae.  
\v 9 Areme fune juare ijia uije binobino ije kiamo bu ijia tavuana sunine ka ni mukore ije kirae. Ro juare ukua ijia ine inokiro bu ijia irei. Ine be ije e bu nubuna ikuva bu oekuva baki. Ro ine be ije e bu nubu ikuva bu vame binobino ise ro ma bu mukore vierafedufuo ijare ijia manine.   
\p
\v 10 Ro do be fu juare Ideni safikirakiro ijia kanana keke vae. Fu kana kekena dabe atana inokiro kiro inokiro rei.  
\v 11 Do be ije Fisoni fu kanana aesakae Avira ijia vae. (Ro do ijia ire gorodi ije fuka ma uruvana.  
\v 12 Ro kuke ire udi mukore urivo ijiakina mune ni mukore bu moni mamekanu fuaevejo ije bu ijia karivo.)  
\v 13 Ro do be ije Gaeoni fu kanana aesakae Kusi ijia ura vae.  
\v 14 Ro una do be ije Taegirisi fu kanana aesakae Asiria ijia vae. Ro do be ijeja Ufiretisi.   
\p
\v 15 Areme Godi fune e fari ije mesiri juare Ideni ukua ijia nujae. Fu ijia nujaga fure juare ijia ire boeje amaeriakinu samuagiae.  
\v 16 Godi fu e ije mesiri ijia nuja areme kuae, Ine boeje juaru igia ireva ijiebuo fo ije ni nubu ine.  
\v 17 Ro ine besu juare ukua ijia manino ije e bu nubu ina vame ise ro ma ije vierafevo ijiaru sunine fuone ije ade nubu ino. Ro a faememare nubu ikuma aka maza besu ijia baronekono kuae.   
\p
\v 18 Areme E Ireobo Godi fu kuae, E gure na amaeriva ije fu fuosukua oenoekuma na vierafe fuka naebe mareke. Ijadufuo na vierafe naka kai fuone ma be fu ifejadufuo ije amaerikono kuae.   
\p
\v 19 Ijadufuo fune uri sakae ijia matuana fanu ro ume boeje binobino amaeriae. Areme Godi fune kaenamiana e ije fino ije nijaekoga fu giakinu ive buone ije imiae. Ijadufuo fanu ro ume boeje bu vame ijiege rena ive buone ije kei.  
\v 20 Ijiege rena e ije fune uri fanu ijiakina ume boeje ijiebuo ive ije imiae.  
\p Rove ire boeje fu imiaema ijia kai fuone ma besukua be fu naebe ijia gae.  
\v 21 Areme E Ireobo Godi fune e ije kuamo fu una ni ireobo nae. Fu ni naekoga Godi fu uri ikene ane fuone be damukoga surive fuone ije fu una ifekurae.  
\v 22 Godi fune ikene ije abe bara amaeri areme mesirina e ije fino ijia ruae.  
\v 23 Areme e ije fune uri bara ije gama areme kuae, Iviama ijare ire gure na gaga fuka na vareki. Ane fuone ije fu ane none igia abei. Ro kuke birage fu ije fune none igia atae. Ijadufuo fuje na barano kuake ijadufuo maeje fu e fari ijadufuo guove ijia abe amaerimano kuae.  
\v 24 Ijiege reva ijadufuo iviama e fari ije fu asoe ijiakiro asie fuone uniakona va bara fuone ijieki mazievo ijia bune buosiki vajae besu reke.  
\v 25 Ro e fari ijiakiro bara ije buka detaba rove bu naebe vierafe ro kuke bu jaediamo baki.   
\c 3  
\s1 Ema bu Godi naebe irinaeva ijene  
\p
\v 1 Areme E Ireobo Godi fune fanu boeje fu amaeriaema ije uve ijia fu ire tabare ije fuka e biesiriamo ije amaeri. Ijadufuo ire tabare ije fune ro bara ije fino ijia kekei. Fu kekena bara ije biesirina kuae, A Godi fube ma kua ine juare ukua gare manino ije ade fo fuone nubu ino kuae?   
\p
\v 2-3 Fu ijiege kuamoga bara ije fu una kuae, No Godi fu kuo, Ja ine fo boeje ni nubu ikiro ine besu gare manino ijiaru fo fuone jade nubu iro niriaevono kue. Ro ja niriaekuva jaka maza besu ijia oekono kue.   
\p
\v 4-5 Bara ije fu ijiege kuaramoga tabare fu una kuae, Godi fuka kufuimedo ja oekuva baki. Fu vierafero ja nubu ikuva ja fu vareki rekiro fu ijadufuo kuriaere. Ja ikuva ja vame ise ro ma boeje jaka vierafekiro fu ijadufuo ja biesiriaemano kiae.   
\p
\v 6 Bara ije fu vua ije fiemo fuka oeseremo fu una dakude ine ije gae. Fu gake ine ije fuka ma mukore ro kuke fu nubu ikuma fuka maekiro fu ije vierafe. Ro kuke fu vame ise ro ma ije mukore vierafekiro fu ije vierafe. Ijadufuo fune uri ine fo bino nubuna igana gue fu kena baru fuone ije vajamo fudua kena i.  
\v 7 Bu ine sunine ije nubu inama furiko bu ijia Godi fu irerefuo kuriaere bu vua vierafei. Areme bu ijia uri bue ganamigake bune detaba irei. Ijadufuo buka jaedia bu uri suviene turana vajae buone ije okuriae.   
\p
\v 8 Ijiege rena bune kari fieke Godi E Ireobo ije fune ve jiaema ijia juare uvo ijia urana romo bu fiena uri ine ijia ufuaena saui.  
\v 9 Rove E Ireobo Godi fu uri e fari ije kumei, A izieburekino kumei?   
\p
\v 10 Ro e fari ije fu una gue kumei, Na are juare ijia ura romo na fievo naka judie ijadufuo na igi saui. Ijadufuo maeje naka detabaga na kona sauivano kumei.   
\p
\v 11 Fu ijiege kuarao Godi fu kumei, Erare kua a detabano kuae? Abe ifo ije na kuriaereva ije nubuna imano kumei?   
\p
\v 12 Ro e fari ije fu una gue kumei, Na bara ije a abe nujaejiema ijare ifo ije damu igana miemo na abe ivano kumei.   
\p
\v 13 E fari ije fu ijiege kuaramoga Godi fu una bara ije kumei, Ije a irerefuo ijiege remano kumei? Fu ijiege kumenoga bara ije fu una gue kume, Na tabare ijare biesirimoga na ine fo na ijene damuna ivano kumei.   
\s1 Godi fu ema ijiakiro tabare ije kena isekafiama ijene  
\p
\v 14 Ijadufuo Godi fu uri tabare ije kuae, Aka isema kema ijadufuo na a dabe isekafake. A fanu boeje ige na amaeriaeva ijiebuo uve ijia a osukua aka vajae fiane abeke. Godi nare kuaedo a devatua dabe sakaedo ijia medirunoeke. Ro kuke one a fivako ije a sakae kuokuo ijiaru inoeke.  
\v 15 Ro kuke nare kuaedo a maza boeje bara ijiaki zienamikinu karivake. Ro maza boeje uifari one ijiakiro bara ijadufuo uifari ije buka bue nibijaekinu oenoeke. Ro kuke e bu diake utaenamaga a sakiakuma bu kana nigofo one dabe furasekono kuae.   
\p
\v 16 Godi fu tabare ije ijiege kuara areme una bara ije kuae, A ijiege rema ijadufuo a e fudiemo ro ame nafemo ijia aka vajae fiane ma ireobo abena isejavaeke. A ijiege renoeno ijia aka uria baru one ije vierafeke. Ro fure a samuagakinu vua kuarake a ijia fiekinu fivakono kuae.   
\p
\v 17 Ro una e fari ije fu kua, A bara one ijadufuo vua ije fiena irinana una ifo na kuriaereva ije damuna i. A ijiege rema ijadufuo na sakae ige vafuke. Na ijiege rega a koro daro one ijia giriesana me ikinu fivake.  
\v 18 A ijiege rema ijadufuo sakae ige fuka fiene ma ro seki uruvana bu ijia tavuana iraraeke. Ro aeje a taraebo ijia oenoekinu ire one rerena inoeke.  
\v 19 A koro fuare ijiakuma giriesana imega ire ije fu sakae ijia nake. A ijiege rekinu fivakuma baronega bu dabe una sakae ijia mako ruke. Na sakae ijia abena a amaeraeva ijadufuo a una sakae ijia sakae rekono kuae.   
\p
\v 20-21 Areme Godi fune fanuve surive ijia kena saguma areme kena saejiae. Ijiege rekoga Adamu fu ve ijia uri bara ije ive ina Ivi kuae. Ijadufuo maeje fu e uine nijavo ijiebuo asie.   
\s1 Godi fu Adamukiro Ivi rorukuriamo bu juare Ideni arena usiae vaeva ijene  
\p
\v 22 Areme E Ireobo fu kuae, E gure iviama fune una no vareki rei. Fune izege no vua ma ro ise no vierafevo ije fudua fune ijiege vierafe. Ijadufuo no vierafe noka rorukuraga fu juare ige arena keke vake. Na ijiege rekina fube ine fo e bu nubu ina maza boeje ma karivako ije nubu ina ma fivakono kuae.  
\v 23 Ijadufuo E Ireobo Godi fune Adamu rorukuramo fune juare Ideni arena keke vae. Fune kekena va aesakae ije Godi fu abena fu amaerima ijia korufuo ire uije binobino ona amaeriakinu samuakiro vae.  
\v 24 Areme Godi fune juare Ideni irifo are mazani ajiamo nake ijia anera gue ro sime uiki miane igege naeno ije kena ijia nae. Bure ine ije e bu nubu ina ma karivadufuo ije iraraeve.   
\c 4  
\s1 Keini fu uvia fuone kanaema ijene  
\p
\v 1 Areme Adamu fune bara fuone Ivi mesiri oenoena fune e fudie. Fu e fudiena ame fari be bietena kuae, Ivia E Ireobo fuka na mukore ifejiemo na e fari bietevano kuae. Ijadufuo fu uri ame ije abe ive ina Keini kuae.  
\v 2 Ro rade Ivi fu una ame fari be dua bietena abe ive ina Eboro kuae.  
\p Areme e Eboro fune mave-sifi samuagiakoga Keini fu juare mei.  
\v 3 Ro rade maza be Keini fune juare fuone ije masina ire bino kena E Ireobo zinone ufujae.  
\v 4-5 Fu ijiege rekoga Eboro fudua fune mave-sifi amure nafeva ijia be farena abe E Ireobo zinone ifaejae. Eboro fu ijiege remoga E Ireobo fuka Eborokiro zinone fu ifaejema ije oemare. Ro una Keinido zinone ije fu naebe oemarei. Ijadufuo Keini fu ije gamo fuka defarui.   
\p
\v 6-7 Fu ijiege remoga Godi fu kuae, A irerefuo ziema ijadufuo aka naebe oemare? A mukore kemabitie zinone one ije naka oemareke. Rove a ire ise ije rema ijadufuo ise ije fune viene one gumaeji sauina a samua fine. Fu vierafe aka maza boeje fu irinakega fu a samuagakiro fu ije vierafe. Rove ade mamoekiro nika giriesana ise ije iraraenoeno kuae.   
\p
\v 8 Areme maza be Keini fu urina uvia fuone Eboro kuae, Rono juare gamia oenoeke vano kuae. Fu ijiege kuamoga bune va makave ijia oenoevo ijia Keini fu urina ine dabe iviene fuone kanamoga funeka ijia barone.   
\p
\v 9 Areme Godi fu uri Keini kumei, Uvia one Eboro fu izieburekino kumei? Fu ijiege kumemoga Keini fu una gue kumei, Na uvia none ije na nare maza boeje samuavo baki. Ijadufuo fu iziebure oenoeno ije nake naebe gae.   
\p
\v 10 Fu ijiege kumemoga Godi fu kuae, Vame ije a kema ije fuka ma ise. Uvia one a kanaema ijadufuo kavuane ije fu sakaedo ijia usiaema ije nane gae. Kavuane ije fu vierafe na fu vafaekiro fu ije e igege nimena na kurarieme.  
\v 11 A ijiege rema ijadufuo na a vafaedo ame maza boeje ijiege rekinu fivake. Ro maza boeje i one a meno ubae ije fuka iserekinu vake. Fune sakae ijare e igege itire akekoga uvia one ijadufuo kavuane a kana fu usiaena ijia arimo fu i.  
\v 12 Ijadufuo a oenoene sakae ijia juare mekuma ire uije ije bu mukoe tavuakuva baki. Ro kuke a ae besu dasu fikuma baki ro ame diaegia ura oenoekono kuae.   
\p
\v 13 Godi fu ijiege kuaramoga Keini fu una gue kuae, Vajae fiane ije a na dabe ijiege kafiekuveno ije fuka ma gikikimana na izege ijene bijuke?  
\v 14 Na nidua one igia na fivo ije ane rorekuriedo nane va na ebe are sao mumabo ijia ura oenoeke. Na va ijia oenoega erare na biediekuma bu kaniekono kuae.   
\p
\v 15 Keini fu ijiege kuaramoga E Ireobo fu una kuae, Ije fu baki. Erare oenoene a kanakuma na daro maedo are iraraena e uruvana kaniakono kuae. Ijadufuo E Ireobo fune nuga fuone ijene Keinido vajae ijia nijae. Fu ijiege nijaekina e bu oenoene Keini biekuva bube kanake.  
\v 16 Ijadufuo Keini fu E Ireobo ijadufuo nidua ijia fu finoeno ije fune arena uri are mumabo ijia vae. Fune va are maza ajiamo nake are be bu kua, Diaeigia Oenoevono kuavo ijia fikiro vae.   
\s1 E Keinido uifari bu uinuve ruaeva ijene  
\p
\v 17 Ijiege rena e Keini fune bara fuone abena ame fari be bietena abe ive ina e Inoki kuae. Areme Keini fune uri are sidove ireobo be keinama areme abe ame fuone ije nabuikei.  
\v 18 Areme e Inoki fune uri ame fari fuone Irade e Meujaerodo asoe ije bietei. Ro Meujaero fu uriro e Metiusaero e Ramekido asoe ije bietei.   
\p
\v 19 Ro e Rameki fune uri bara fuone inokiro bara Adakiro Zira ijene kei.  
\v 20-22 Ro bara Ada fu uri e Jabaro bietei. Ro e Jabaro fu e ije eranebe bu fanu ro ume binobino samuagiakinu fanu surive ijia are isesina sana karinoejo ijiebuo asae. Ro Jaborodo uvia fuone e Juboro fu e ije eranebe bu bibo ufekinu gita kanavo ijiebuo asae. Ro bara Zira fu uri ame fuone e Tuboro Keini ije nafei. Ro e Tuboro Keini fu ire ajane ni binobino ro sime dudone ijieki ije amaeriamo. Ro maki fuone ije bara Nama.  
\v 23-24 Areme maza be Rameki fu uri bara fuone Adakiro Zira kiae, Vua ige na kuariavo ije fiefo. E be fune na kaniemo na ijadufuo ve kanavo fu baronei. Ro Keini bu kanaeva ijadufuo bu una ve e bino kaniakuva ije na vierafe bu e seveni (7) ijiege kaniake. Ro una irere ige nare reva bu ijadufuo ve kaniekuva ije na vierafe e seveni (7) ije bakiro bu e seveniti seveni (77) ijiege kania bu oekono kiae.   
\s1 E Setikiro Enosi ijene  
\p
\v 25-26 E Adamekiro bara fuone bu ame fari bedua bietei. Areme Ivi fu kuae, Godi fune fari none Eboro e Keini fu kanamo fu baronema ijadufuo una bedua miemano kuae. Ijadufuo fu abe ive ina Seti kuae. Ro e Seti fune uri fari fuone be bietena e Inosi kuae. Ijiege rena maza ijia ema bune uri zinuevena E Ireobo ijadufuo ive akae ije dabe aroekinu baname isoekafana ruae.   
\c 5  
\s1 E uine ije izege Adamedo ijia ruoma Noado ijia kekema ijene  
\p
\v 1-2 Ro e ive ige isoeva ige ijeja e Adamudo uifari ije bu izege uinuvena ruaeva ijene. (Mazani ije Godi fu e amaeriaema ije fune fue ganamikinu ijia e fu vareki ijene amaeriae. Fu baru bara amaeriana uri daro miana ive buone fu kia Eno kuae.)   
\p
\v 3-5 Adamu fu fivakuma juaevasia uvani aderedi teti (130) ijiege furi. Areme Adamu fune ame fari be fu vareki ije bietena abe ive ina Seti kuae. Ro fu kuke ame kabae ro fari bino duaku tuana areme juaevasia naene aderedi teti (930) ijiege furiko fu ijia barone.   
\p
\v 6 Ro fari fuone Seti fu fivakuma juaevasia uvani aderedi faeve (105) ijiege furiko fu ijia fari fuone e Inosi kuavo ije bietei.  
\v 7-8 Seti fu anafa fuone bino duaku tuana areme fune juaevasia naene aderedi tuero (912) ijiege furiko fu ijia baronei.   
\p
\v 9-11 Ro maza ije Inosi fu fima ije fu juaevasia naeniti (90) ijiege furiko fu ijia ame fari be ive fuone e Kenane ije bietei. Ro fu ame bino duaku tuanae areme rade fune juaevasia naene aderedi faeve (905) ijiege furiko fu ijia baronei.   
\p
\v 12-14 Ro e Kenane fu fina vakuma juaevasia seveniti (70) ijiege furiko fu ijia fari fuone e Mararero bietei. Ro Kenane fu ame fuone uruvana tuanae areme rade fune juaevasia naene aderedi teni (910) ijiege furiko fu ijia baronei.   
\p
\v 15-17 Fu baronekoga fari fuone e Mararero fu fivakuma juaevasia sisiti faeve (65) ijiege furikoga fu uri fari fuone e Jaredi bietei. Areme rade e Mararero fu kuke una ame bino duaku tuana areme fu juaevasia eti aderedi naeniti faeve (895) ijiege furiko fu ijia baronei.   
\p
\v 18-20 Areme Jaredi fune fi vakuma juaevasia uvani aderedi sisiti tu (162) ijiege furikoga fu uri fari fuone e Inoki bietei. Ro rade fu juaevasia uruvana fikinu una ame bino duaku tuanama areme juaevasia naeni aderedi sisiti tu (962) ijiege furiko fu ijia baronei.   
\p
\v 21-22 Jaredi fu baronekoga fari fuone e Inoki fu juaevasia sigisiti faeve (65) ijiege furiko fu uri fari fuone e Metusara bietei. Ro rade e Inoki fu juaevasia tiri aderedi (300) fu fi ruaema ije fu una kuke ame bino tuanae. Ro maza ije e Inoki fuka uri Godi mukore oetuana fuosiki maza boeje goruvekinu finoe.  
\v 23-24 Fu ijiege renoena juaevasia tiri aderedi sigisiti faeve (365) ijiege furiko fume ijia bakiremo e bu naebe gae. Ijadufuo maeje fune Godire mesirina vako bu rerega baga bu ijarei.   
\p
\v 25-27 Areme Metusara fune fi vakuma juaevasia uvani aderedi eti seveni (187) ijiege furikoga fu fari fuone e Rameki bietei. Ro fu juaevasia uruvana ijia finoekinu ame bino tuana areme juaevasia naeni aderedi sigisiti naeni (969) ijiege furiko fu ijia baronei.   
\p
\v 28-29 Metusara fu baronekoga fari fuone e Remeki fu juaevasia uvani aderedi eti tu (182) ijiege furiko fu bara abena ame fari be bietei. Remeki fu ame ije bietena ijiege kuae, Ae sakae ige Godi fu abe isekafaema ijia ame igare irufui ige no abekinu isejavaena ruovo ije bijukurakono kuae. Remeki fu ijiege kuaena ame ije abe ive ina Noa kuae.  
\v 30 Areme Remeki fune una juaevasia faeve aderedi naeniti faeve (595) ijiege fikinu ame bino duaku tuanae.  
\v 31 Areme fune juaevasia seveni aderedi seveniti seveni (777) ijiege furiko fu ijia baronei.   
\p
\v 32 Remeki fu baronekoga Noa fune fivakuma juaevasia faeve aderedi (500) ijiege furi. Fu ijiege finoekinu fari fuone inokubeke e Semikina Emikina e Jefeti ije tuanae.   
\c 6  
\s1 E ume igia bu ise uruvana renoeva ijene  
\p
\v 1 Areme maza ijia e uine bu tuanavo ije funeka ma uruvana rekoga ae sakae ige fune e ijare iraraeme. Ro e uine ije bu tuanaeva ijia bu kuke e bara ije uruvana tuanae.  
\v 2 Ijadufuo Kavene adaki bino kave ijia oenoejo ije bu bara ni mukore ije oenoejo ijene giae. Ijadufuo bu arina bara ije bu giana oemarevo ijene bino buone kei.  
\v 3 Areme E Ireobo fu kuae, Iviama igia una gafege vako ijia kavene none ije nabe areke fu ema ijena maza jiamadogo fivake. Ijadufuo maeje bu ema ijadufuo bume juaevasia uruvana (120) ijiege karivake.   
\p
\v 4 Areme maza ijia rade e ije bu kari ruaeva ijia e gue buka e mamekanu. Ijadufuo maeje isuibe ijia bune kavene adaki ije kave gufia oenoevo ijiebe arina bara ume igeko ije kena ame tuanaeva ijadufuo uifari gue buka e daroki ro ka e mamekanu.   
\p
\v 5-6 Maza ijia e boeje aesakae igia oenoevo ije buka maza boeje vame ise ijiaru renoevo. Ro kuke bu maza boeje ise renoejo ijadufuo nigofo buone fune ise ijare irarae. E ije Godi fu amaeriana aesakae igia uniaema ijiebe ijiege revo ijadufuo E Ireobo fu ijene giamo fuka ireobo oefiae.  
\v 7 Ijadufuo fu kuae, Ivia na e boeje na amaeriaeva ijiakina ume ro fanu binobino ije boeje naka uinituga bu furike. Ijadufuo maeje ire boeje nare amaeriaedo bu ijiege renoeko na fina giaga fuka ireobo oefiadiemono kuae.  
\v 8 E Ireobo fu ire boeje fu amaeriaema ijia fu e Noa fuosukua fuone izege fu finoeno ijene gamo fuka ireobo oemarei.   
\s1 E Noado vame ijene  
\p
\v 9 Ro e Noado vame fuone fu kenoekinu finoema suvuare fuone ije ijiege.  
\v 10 Fu bara abei ro anafa fuone inokubeke. Ame be ive fuone ije e Semi ro be ije e Emi ro be e Jefeti.  
\p Maza ijia e Noa fuosukua fuka e mukore. Fu maza boeje Godiki goruvekinu vame maturaema ijiaru kenoe.  
\v 11 Rove e boeje bu una Godido nidua ijia buka vame ise ma uruvana renoekinu bue bijaena kananamikinu ijiege renoe. Ijadufuo ise ijare are irore boege fune irarae.  
\v 12 Godi fu fina gake aesakae ige funeka ise ijare irarae ijadufuo maeje e boeje bu vame ise umigi ije kenoeve.  
\v 13 Godi fu ije gana uri Noa kuae, E boeje na giaga buka ise ma uruvana renoeve. Ijadufuo na e boeje naka kaniana uinituga e besukua be fu naebe una ijia fivake.  
\v 14 Ro aeje ni urina vanage be ine saefurasi ijia kena amaerine. Ro a vanage amaerimo ije ni guove boeje amaeriane. Ro kuke ni vanage ikene guove ro ado ije ni ire kazine tano kuavo ijare abena mukoreigia kamanoena arekina do fu naebe ijia arudufuo.  
\v 15 Ro a amaerikuma ni jiagado fuone ije uvani aderedi fifiti mitasi (150) ijiege amaeri ro kakare ije tuaedi faeve mitasi (25) ijiege amaerine. Ro kuke kabo fuone ije ni fifitini mitasi (15) ijiege amaerine.  
\v 16 Ro nine are ado ije sakurane. Ro kuke ni birune ado ijia tire isekube foti-fo (44) senitamita ijiege amaeri ufuaenoena arene. Ro ni gire be ado ro be ukua ro be rotire ijiege sane. Areme ni ikene ijia viene be umatene.  
\v 17 A vanage amaeri furino ijia na safua ireobo be kuaga fu aesakae igia firana e ro ire boeje oeruvo ije kaniana kame uinituke. Ro ire besukua be fube arega fu aesakae igia oenoeke.  
\v 18 Ro aeje na vierafe na vua be osiki kuaena avenamina abe marekina na agane one ijena karauniake. Ijadufuo ni bara one ijiakina anafa one ro bararafa buone ijena vanage ijia ajiane.  
\v 19-20 Areme nine fanu ro ume ni binobino ijia ubae ro irave ijene kaenamia ajiaekina bube oena uibiteke.  
\v 21 Ro kuke nine ire binobino fanu ijiebuo ro jone ja ikinu karidufuo ijene karina ijia ajiano kuae.   
\p
\v 22 Areme Noa fune urina ire boeje Godi fu kuaraema ijiege rema furi.   
\c 7  
\s1 Safua fu nafuema ijene  
\p
\v 1 Noa fune ire boeje rema furinoga Godi fu kuae, Ni agane one boeje foteke ijene kaenamia vanage ijia ajiane. E boeje aesakae igia oenoeva ijiebuo uve ijia a osukua aka vame maeje na oemadiedufuo ijia kenoe.  
\v 2 A vanage garia ajiakuma ni fanuve ma binobino irave seveni ro ubae seveni ijene kaenamiana ijia ajiane. Ro kuke ni fanu ise Godi fu kuriaerema ije ni binobino irave ro ubae ijene kaenamiana ijia ajiane.  
\v 3 Areme nine kuke ume ni binobino ijia irakiro ubae ijia seveni ijiege giakinu kaenamia ijia uniane. A ijiege rekina bube oefurikiro bu uria karikina una sakae igia uije nijake.  
\v 4 Ro ivia igia vakuma muge seveni furino ijia na ve ireobo kuaga fu muge foti (40) ro maza foti (40) ijiege dake. Na ve ije kuaga fu dana ire boeje na amaeriaeva bu ni uria karina oe ruvo ije arafiriaga buka isejavaema oefurikono kuae.   
\p
\v 5 Ijiege rena e Noa fune ire boeje E Ireobo fu kuaraema ijiege rema furi.  
\v 6 Fu fina ruoma juaevasia sigisi aderedi (600) ijiege furiko aesakae igia safua fu ijia firae.  
\v 7 Safua fu ijiege firamoga e Noa fune bara fuone ijiakina anafa ro bararafa buone ijene kaenamiana bune subinaena vanage ijia ajiae.  
\v 8-10 Noa fune kuke fanukina ume ni binobino irave ro ubae ivo ro ivo baki ijene kaenamiana fuina ijia ajiae. Noa fune ire boeje Godi fu kuaraema ijiege rema furi areme muge seveni furikoga safua ireobo fu ijia firae.   
\p
\v 11 Juaevasia ije safua fu firaema ije Noa fu juaevasia sigisi aderedi (600) ijiege furi. Ro juaevasia ijia asame ririkua ijadufuo fura inokiro ro muge inokubeke furima ijia do ije fume sakae ijia ajiae. Fu ajiakoga ve ma ireobo fu ude naebe aesakae igia daema ijare saove ijia dana ari.  
\v 12 Ve ije fu ijiege dakinu vakuma muge foti (40) ro maza foti ijiege furi.   
\p
\v 13 Ijiege rekoga mazani besu ijia Noa fune bara fuone ro anafa fuone inokubeke e Semikina Emi ro Jefeti ije ro bararafa buone ijena bune vanage ijia ajiae.  
\v 14-16 Bu ajiakoga fanu aeko ro taraeko ni binobino ro ume ni binobino isesina ro mamekanu ije oeruvo ubae ro irave boeje budua Noado ruakoga fu kaenamiana vanage ijia ajiae. Bune izege Godi fu kuaema ijiege rena bune ijia ajiama furikoga Godi fu viene dabe bijukurae.   
\p
\v 17 Areme rena ve ije fune mazani foti (40) ijiege dakoga safua fune aesakae igia nafue.  
\v 18-19 Safua ije fu ijiege firana ajia vakuma nafare mamekanu boeje fune okuriakoga vanage ije fune do ado ijia nanianoene.  
\v 20 Rove safua ije fu naebe ijia iri ro fuka nafuena ajia vakuma nafare ije seveni mita (7) ijiege asidiana ajia vae.  
\v 21 Safua ije fu ijiege nafuekoga ire boeje aesakae igia oerunoejo ije buneka oefuri. Fanu aeko ro taraeko ro ume ni binobino boeje buka oefurikoga e boeje budua oefuri.  
\v 22 Ire boeje aesakae igia oeruvo buka oefuri.  
\v 23 E Ireobo ijare ire boeje fanu ro ume ro e boeje ni uria karijo ijene kame mukoreigia ijiege arafiriamo bu oefuri. Ro fune e Noakiro e ije fu kaenamia vanage ijia ajiaema ijiebe buosukua bu naebe oe.   
\p
\v 24 Ro safua ije nafuema ije fu naebe migegire si ro fu uria ijiege nako vakuma muge uvani aderedi fifiti (150) ijiege furi.   
\c 8  
\s1 Safua fu firaena irima ijene  
\p
\v 1 Rove Godi fu Noakina fanu boeje binobino bu fuina vanage ijia ajiaeva ije fuka maza boeje bu vierafekinu samuagiamo. Ijadufuo Godi fu majaufi ije kuamo fu ufikoga safua ije nafuema fune ijia zinuive sina una ari.  
\v 2-3 Ijiege rekoga do ije sakae guove gumia ajiavo ije bune arekoga ve ije kave gufia damo ije fune ijia tui. Areme do ije fune soneigia sina una ariko vakuma muge uvani aderedi fifiti (150) ijiege furi.  
\v 4 Areme asame umui gue ro dikine inokiro ijadufuo fura inokiro ro muge inokubeke furikoga vanage fu una ari ruoma nafare Ararateno kuavo ijia arei.  
\v 5 Do ije fu ijiege sone sina arikinu vakuma asame umui guegue ijadufuo maza amure ijia nafare kubi ije bu ijia una samadire.   
\p
\v 6-7 Areme maza foti (40) ijiege furikoga Noa fune uri viene daovena ume kadia ijene dabe nujamo fune vae. Ume ije fu vaema fu naebe una ruae. Ro fume kave ijia oenoeko vakuma do ije funeka mukoreigia sina ari.  
\v 8 Areme Noa fune una kuke ume tuvuaeki ijene nujamo fu do ije ninakokiro vae.  
\v 9 Rove do ije fu naebe sina furi ijadufuo ume fu naebe umeke ari. Fu kave ijia afuodinoega iseremo fu una ruoma vanage ije namo ijia romo Noa fu umui abuena dabe una aru vae.  
\v 10 Ijiege rena do ije fuka naebe simoga Noa fu fina maza seveni (7) ijiege furikoga fu una kuke ume tuvuaeki ije dabe nujamo fu vae.  
\v 11 Areme ve nakisirema ijia ume ije fune ine oriveno kuavo ijadufuo a iviaeko ije datura biekunana una ruae. Ijadufuo Noa fu ijia gana vierafero safua ije fune sina furimaro fu ijiege vierafe.  
\v 12 Ro Noa fune una samua fivakuma maza seveni (7) ijiege furinoga fune una kuke ume tuvuaeki ije dabe nujamo fu kekena vae. Ro ume ije fu keke vaema ijare fu naebe una ruae.   
\p
\v 13 Areme Noado mazani bu bieteva ije fune ruoma sigisi aderedi uvuane (601) ijiege abei. Fu ijiege abekoga juaevasia besu ijadufuo mazani amure ijia sakae ijia do ije fune si furi. Do ije fune ijiege simoga Noa fune uri vanage ijia kenifuri gake aesakae boeje funeka iriarei.  
\v 14 Ijiege rena vakuma asame inokiro furikoga do boeje fune mukoreigia si furi.   
\p
\v 15-16 Areme Godi fune uri Noa kuae, Nine bara one ro farirafa one ro bararafa buone ijena vanage ije arena aesakae ijia ari vane.  
\v 17 Ro kuke nine ume ro fanu boeje binobino oeruvo ijiakina fanu binobino aesakae ijia oenoejo ije kaenamiana ari vane. A kaenamia ari vaekina bure nafemanamiga fu aesakae boeje igia iraraeno kuae.   
\p
\v 18 Ijadufuo Noa fune bara fuone ro anafa ro bararafa buone ijene kaenamiana sisime ije arena ari vae.  
\v 19 Ijadufuo fanu ro ume ni binobino ro fanufanu boeje aesakae igia oenoejo ije bune bue maziemaziena una ume ijia ari.   
\p
\v 20 Areme Noa fune uri Godi oemarejakiro zinone ijadufuo fata be ufe. Fu ufema areme uri fanu ro ume ni binobino bu zinone ifaejedufuo Godi fu kuaema ijene kaniana ijia Godi zinone ifaejae.  
\v 21 Noa fu zinone ijiege ifaejemoga E Ireobo fu zinone udi mukore ije fiemo fuka oemae. Ijadufuo fu fue kuae, Na vierafega ema bu katiki ijia vakuma e mamekanu revo ije buka ire ise boeje rekuae vierafenoedufuo. Rove nabe una aesakae ige vafuke. Ro nabe izege na ire binobino ni uria karivo ige na ke arafiriaeva ijiege rade una kuke arafiriake.   
\p
\v 22 Areme fu kuke kuae, Maza boeje aesakae ige fu navako ijia e bu veze ui okinu ro masidufuo ije fu uria ijiege navake. Ro kuke maza veze fu iduane urikinu ro fete uridufuo ro kuke veze fu ve marekinu ro ve dadufuo ije fu uria ijiege navake. Ro kuke ro veze fu ve titutekinu ro ve irasedufuo maza ije bu uria ijiege rekinu nao vake.   
\c 9  
\s1 Godi fu Noaki vua kuaena abe marema ijene  
\p
\v 1 Areme Godi fune Noakina anafa fuone ijene daro mia areme kiae, Nine ame uruvana tuanaga uifari jone ijiebe are irore boegia iraraefo.  
\v 2 Ro fanu boeje bu sakae ado ijia oenoevo ijiakina ume ro kijume davare ijia oenoevo ije buka ja jumekinu oenoeke. Na bu nane kena una daro jone ijia uniae.  
\v 3 Ijadufuo iviama fanukina ume ro kijume ije nine kania buvua ikinu ro ifo ije duaku ni turana inoefo. Ire boeje bune jone ja ijia turana inoekiro na ije arejiae.   
\p
\v 4 Ro ire besu ije fanu birage uria kavuane usiaemo ijiaru jade ivo. Ire ijiaru na kuriaeredo jabe ike ijadufuo maeje jone ja karivako ije fu kavuane ijare reko ja ije karive.  
\v 5 Ro erare ema be kana fu baronekuma e ije bu dabe isekafake. Ro fanu be fu ema be saki fu baronekuma nare ve dabe isekafaga fu baroneke.  
\v 6 Ema ije Godi nare abe na vareki amaeri ijadufuo erare ema be kana fu baronekuma fu duaku bu kana fu baroneke.   
\p
\v 7 Ro jaeje ni ame nafega bu aesakae igia uruvana rena ijia nafemanamino kiae.   
\p
\v 8 Areme Godi fune Noakina anafa fuone ije kiae,  
\v 9-10 Na iviama ja ro uifari jone ije bu rade urivo ije kuke ire boeje binobino ume igia oeruvo ume ro fanu aeko ro taraeko ije bu aena vanage ijia ari ruaeva ijena vua kuaena amaerike.  
\v 11 Na vierafe rade nabe una do kuaga fu firana ire boeje ume igia oenoejo ije buone kari vako ijene kena kave ijia kaniafuke. Ro safua kuaga fu firana aesakae ige abe una arafiriga fu iserekono kiae.   
\p
\v 12 Ijiege rena Godi fu kiae, Vua ije na ja ro ire boeje jaena ume igia oerunoejo ro kuke uifari rade urivo ije jaena kuaena mareva ije na nuga be nijake. Ro vua ije na jaena kuaena mareva ije fu maza boeje ijiege na vake.  
\v 13 Ro nuga ijeja na anuage ijia abena nijake. Ro ije fu nuga none na a ro e boeje are irore igia oenoeva ijena na naebe una do kuaga fu firana ja arafiriadufuo na kuaena nijaeva fu maza boeje ijia na vadufuo ijene.  
\v 14-15 Na ijiege nijaekina na amite kua fu saove garia utike anuage fu ijia samo ijia na vua irere na ude ja ro ume ro fanu binobino ije jaena kuaeva ije vierafeke.  
\v 16-17 Maza ije na anuage ije gavo ijia na una vua none izege na ire boeje umeigia ni uria karinoevo ije jaena kuaena mareva ije vierafeke. Ro anuage ije fu nuga none na ire boeje ume igia oeruvo ije jaena kuaena mareva ijene   
\s1 Noado farirafa ijene  
\p
\v 18 Noado anafa inokubeke ije bu Noana sisime ijia usiae makave ijia vaeva ive buone ijeja Semikina Emikina Jefeti ijene. Ro e Emi fu e Kenanido asoe.  
\v 19 E Noado anafa inokube ije bu e boeje aesakae irore igia karinoeva ijiebuo asaerafa.   
\p
\v 20 Noa e ije ire binobino sakae ijia omo ijare ire vaenino kuavo ije amure abe sakae ijia okoga bu ijia uije abena ojana ruae.  
\v 21 Maza be Noa fune do vaeni ina nigofo iseremo fu ugone fuone fu saema ije azosema detaba are fuone ijia name.  
\v 22 Fu ijia nakoga Emi e Kenanido asoe fu aru va gake asoe fuone fu detaba namo fu gae. Fu gana una keke va uviarafa fuone inokiro ijene kuariae.  
\v 23 Areme Semikiro Jefeti bune ugone be abena ijueneke irana guegue farena vae. Bune ijuenijue aru vakuma asoe buone namo ijia usiaena ni gariebure rerekinu ugone dabe nakarae. Bu asoebuo detaba naga bu ga fuka isediakiro bu ijadufuo ijiege rei.   
\p
\v 24-25 Bu ijiege rekoga Noa fu navakuma nigofo fuone fune una maremoga fu ijia fari fuone iviene izege fu rema ije fiemo fuka naebe oemarei. Ijadufuo fuka urina kuravajana kuae,  
\q1 Maza boeje Kenani fu fivako ije fuka ire ise ro irufui uruvana biediakinu vake. Maza boeje Kenani fuka una uviarafa fuone ijiebuo moni baki i mejianoekono kuae.   
\p
\v 26 Ro fu kuke kuae,  
\q1 No Godi E Ireobo ijadufuo oemarejana aroeke. Ijadufuo maeje fu Semido Godi ijene. E Kenani fuka maza boeje e Semido moni baki i mejanoeke.  
\v 27 Ro e Jefeti fuje fu Godire maza boeje daro maga fu aesakae ireobo abedufuo. Ro e Jefetido uifari ije bu maza boeje e Semido uifari ijena besu karinoeke. Ro e Kenanido uifari ije bu kuke maza boeje una e Jefetido uifari ijiebuo moni baki i mejianoekono kuae.   
\p
\v 28-29 Ro safua ije firaema ijuone ijia Noa fu una kuke juaevasia tiri aderedi fifiti (350) ijiege fivae. Ro Noa juaevasia fuone foteke fu fi vaema ije naene aderedi fifiti (950) ijiege furikoga fu ijia baronei.   
\c 10  
\s1 E Semikina Emikina Jefeti ijiebuo uine ijene  
\p
\v 1 Ro ige e Noado anafa inokubeke e Semikina Emikina Jefeti ijiebuo uine ijene. Safua ije fu firaema ijuone ijia ame inokubeke ije bu urina anafa buone ige tuanae.   
\p
\v 2 Ro e Jefetido farirafa ijiebuo ive ijeja e Gomekina Magogikina Madaekina Javanekina Tubarokina Mesekikina e Tirasi ijene. Ro e agane binobino eranebe bu e igiebuo ive ijia nabukaraeva ije bu e ijiebuo uifari ijene.   
\p
\v 3 Ro e Gomedo uifari ijeja e Asekenasi ijiakina e Rifati ro e Togama ijene.   
\p
\v 4 Ro e Javanedo uifari ijeja e Erisako ijiakina e Sifiiniko ijiakina e Saefurasiko ijiakina e Rodiko ijene.  
\v 5 E ijiebuo uifari ijeja e ije bu davare irifo ijia karinoekinu davare ui tura naeva ijia karinoevo ijene. E uifari ije bu e Jefetido ijiebe isama buone binobino kuaenoekinu atana aesakae binobino ijia karinoe.   
\p
\v 6 Ro una e Emido farirafa ijeja e Kusiko ijiakina e Ijifitiko ijiakina e Ribiako ijiakina e Kenaniko ijene. Ro e agane binobino eranebe bu e igiebuo ive ijia nabukaraeva ije bu e ijiebuo ufuifari ijene.   
\p
\v 7 Ro una e Kusido uifari ijeja e aesakae Sibako ijiakina e Avirako ijiakina e Sabetako ijiakina e Ramiako ijiakina e Sabetekako ijene. Ro e Ramado uifari ijeja e Sibako ijiakina e aesakae Dedaniko ijene.   
\p
\v 8 E Kusi fu fari fuone bietena abe Nimiroti kuae. E ijare amure aesakae igia e aesakae binobino ijia karinoeva ijena azo mukore kena e boeje iraraena kaniae.  
\v 9 Fu E Ireobo ijare ifejamo ijadufuo fu e be sume mukoe bijamo rei. Ijadufuo iviama e boeje bu kuaevo, No vierafe E Ireobo ijare a ifejaga a e Nimiroti fu e sume mukoe bijamo ijiege rekono kuae.  
\v 10 Ro amure aesakae ije fu azo ijia iraraena kema ijeja Bebironikina Erikikina Akate ro Karine ijene kei. Ro aesakae inokiro kiro inokiro ije bu ae sakae ireobo Bebironia guove ijia.  
\v 11-12 Fu ijiege re areme va aesakae Asiria ijia kekena sidove mamekanu Nineva ro Reoboteri ro Kara ro Reseni ijene sae. Ro sidove Reseni fu sidove anuigi inokiro Ninevakiro Kara bu kariva ukua ijia.   
\p
\v 13 Ro e Ijifitido uifari ijeja e aesakae Ridiako ro e Anameko ro e Reabiko ro e Nafetuko ijia kariva ijene  
\v 14 Ro kuke e aesakae Fatirusiko ro e Kasiruko ro e Kafito ijia kariva ijene. Ro e Kuriti ijiebuo uifari ijeja e Firisitaeniko ijene.   
\p
\v 15 Ro una e Kenanido fari amure e Saedonikiro iviene fuone e Eti ijiebuo uifari ijeja: e ije eranebe ive buone ijia nabuikaraeva ijene.  
\v 16 Ro kuke e Kenanido uifari gue ijeja e aesakae Jebusaetiko ijiakina e Amoraetiko ro e Gegasaetiko ijene.  
\v 17 Ro kuke e aesakae Ivaetiko ijiakina e Akaetiko ro e Sinaetiko ijene.  
\v 18-19 Ro kuke e aesakae Avadaetiko ijiakina e Zemaraetiko ro e Amataeti ijia karinoeva ijene. E Kenanido uifari ijiebe ma uruvana rena vakuma aesakae Sidoni ikene ijiege vakuma aesakae Gera are Gaza ivuake ijia vae. Ijiege rekoga uifari gue bu una mazani ajiamo nake ijia karija vakuma Sodome ro Gomora ro Atema ro Zeboimi aesakae Rasa ivuake ijia vae.   
\p
\v 20 E uifari ije bu e Emido ijiebe ijiege atana ae sakae buone binobino ijia karikinu ro isama buone binobino ijia kuaeve.   
\p
\v 21 Ro una Semi e Jefetido boge ijadufuo uifari ijeja e Iburuko ijene.   
\p
\v 22 Ro e Semido anafa ijeja e Eramikina Asukina Afakasatikina Rudikina e Arame ijene. Ro e uifari buone ijeja e ije eranebe bu ive buone ijia nabuikaraeva ijene.   
\p
\v 23 Ro una e Aramedo uifari ijeja e Usiko ijiakina e Uruko ijiakina e Getako ro e Miseko ijene.   
\p
\v 24 Ro e Semido fari e Afakasati fu uri fari fuone e Sira bietemoga Sira fu uri fari fuone e Iba bietei.   
\p
\v 25 Ro Iba fu uri anafa inokiro nafena be fu abe ive ina Ferekino kuae. Ro ive Fereki ijadufuo maeje e boeje aesakae igia kariva ije bu maza ijia dabe atana guegue rei. Ro una ame be ije fu abe ive ina e Jokitanino kuae.   
\p
\v 26 Ro e Jokitanido uifari ijeja e Aremodateko ijiakina e Serefiko ijiakina e Asamavetiko e Jerako ijene.  
\v 27-29 Ro kuke uifari gue ijeja e Adoramiko ijiakina e Usavoko ijiakina e Dikiroko ro e Obariko ijene. Ro uifari gue ijeja e Abimaeroko ijiakina e Sibako ijiakina e Ofiko e Avirako e Jobabeko ijene. Ame boeje bu e Jokitanido uifari ijene.  
\v 30 Ro e Jokitanido uifari ijiebe aesakae Mesa ijia karijana una are Sifa nafaeneke mazani ajiamo nake ijia vae.   
\p
\v 31 E uifari ije bu e Semido ijiebe ijiege atana aesakae buone binobino ijia karinoekinu isama buone binobino ijia kuaenoe.   
\p
\v 32 E uifari boeje igia isoena kuaevo ije bu e Noado uifari ijiebe aesakae buone binobino ijia karija vaeva ijene. Safua ireobo ije firaema ije rade Noado anafa inokube ijiebe urina ame uije nijavoga bu ijia tuamanamina uri atana aesakae buone binobino ijia karijana vakinu isama buone binobino kuaena vae.   
\c 11  
\s1 E ije bu Bebironi ijia are jiagadogo saena ajiaeva ijene  
\p
\v 1 Ro iko zinume ijia e boeje ige aesakae boegia karinoeva ije bu isama besu vua kuaena fienamivo.  
\v 2 Ro e gue bu aesakae mazani ajiamo nake ijia oenoena are amarama be gana ijia kari. Ro are amarama ije fu ae sakae Bebironia guove ijia.   
\p
\v 3 Bu aesakae ijia karina bue kuae, Rono ire makoe ijia ire gikikimana mune igeki bu ae sadufuo ijene amaeriano kuae. Ijadufuo bu urina ire mune igeki bu are sadufuo ije amaeria areme uri ire be bu ijia azina naga fu kamadufuo ijene amaeriae.  
\v 4 Bu ijiege re areme kuae, Roga no sidove ireobo be amaerima areme ijia karikinu gire ireobo jiagado be sana ajia vakuma saove gafe niriaefo. No ijiege rekuva no fuka maraduoke ro kuke noka e ifiki reke. No ijiege rekina no naebe dabe giegisa aesakae igia binobino karinoeke.   
\p
\v 5 Bu ijiege kuaena renoejoga E Ireobo Godi fu sidove ireobo bu kena kariva ijiakiro gire jiagado bu saeva ije giakiro arina ruae.  
\v 6 E Ireobo fu ire ije bu revo ije giana kuae, Iviama e gure bune guri isama besu vua kuae fienamive. Ro kuke bune zinuevena are gare save. Ijadufuo no giana areke bu uria ijiege karina sakuva no vierafe bu va rade ire mamekanu binobino rekuae vierafekuva buneka redufuo.  
\v 7 Ijadufuo roga no arina isama buone gume bu besu kuaena fienamivo ijene dabe bieturaejiaga bube rade una vua kuaena fienamino kuae.   
\p
\v 8 Ijadufuo E ireobo fune e ije bu besu afuina kariva ijene dabe jijiae. Fu ijiege remoga bune uri dabe giegisana are irore ijia vagana sidove ireobo ije bu savo ije bu ijia arena vae.  
\v 9 Ro sidove ije bu sakuae reva ije bu kua Babero. Ijadufuo maeje E Ireobo fu sidove ijia arina isama besu bu kuaevo ijene dabe bieturaejiae. Ro kuke fu sidove ijia e ije bu besu afui kariva ijene kame jijiamo bu dabe giegisana are irore igia vae.   
\s1 E Semido uifari ije bu uinivena ruaeva ijene  
\p
\v 10 Ro e Semido uifari ije ijiege. Safua ije nafuema ijueneke ijia juaevasia inokiro furikoga rade Semi fu fi vakuma juaevasia uvani aderedi (100) ijiege furikoga fu ijia ame fari e Afasati ije nafei.  
\v 11 Ro rade e Semi fu una juaevasia faeve aderedi (500) ijiege fikinu una ame bino duaku tuanae.   
\p
\v 12-13 Ro Semido fari e Afasati fu fivakuma juaevasia teti faeve (35) ijiege abeko fu ijia ame fari e Sira ije nafei. Ro rade e Afasati fu una juaevasia fo aderedi tiri (403) ijiege finoekinu ame bino duaku tuanae.   
\p
\v 14-15 Ro e Sira fu fi vakuma juaevasia teti (30) ijiege furiko fu ame fari e Iba nafei. Ro rade Sira fu una kuke juaevasia fo aderedi tiri (403) ijiege finoekinu una ame bino duaku tuanae.   
\p
\v 16-17 Ro e Iba fu fi vakuma juaevasia teti fo (34) ijiege furiko fu ijia ame fari e Fereki biete. Ro rade e Iba fu una kuke juaevasia fo aderedi teti (430) ijiege finoekinu una ame bino duaku tuanae.   
\p
\v 18-19 Ro e Fereki fu fivakuma juaevasia teti (30) ijiege furiko fu ijia ame fari e Reu biete. Ro rade Fereki fu una juaevasia tu aderedi naene (209) ijiege finoekinu una kuke ame bino duaku tuanae.   
\p
\v 20-21 Ro e Reu fu fivakuma juaevasia teti tu (32) ijiege abekoga fu ame fari fuone e Serugi biete. Ro rade Reu fu una kuke juaevasia tu aderedi seveni (207) ijiege finoekinu una kuke ame bino duaku tuanae.   
\p
\v 22-23 Ro e Serugi fu juaevasia teti (30) ijiege abekoga fu uri ame fari fuone e Neo biete. Areme rade Serugi fu una kuke juaevasia tu aderedi (200) ijiege finoekinu una kuke ame bino duaku tuanae.   
\p
\v 24-25 Ro e Neo fu fivakuma juaevasia tuaedi naeni (29) furiko fu ame fari e Tera ije biete. Areme e Neo fu una kuke juaevasia uvani aderedi naenitini (119) ijiege finoekinu una kuke ame bino duaku tuanae.   
\p
\v 26 Ro e Tera fu fivakuma juaevasia seveniti (70) ijiege abeko fu farirafa fuone e Aburamekina Neokina e Erane ije tuanae.   
\s1 E Terado uifari ije bu uinuvena ruaeva ijene  
\p
\v 27 Ro una e Terado uifari ije fu ijiege Terado anafa ijeja e Aburamekina Neokina Erane ijene. Ro e Erane fu uri fari fuone e Roti biete.  
\v 28 Rove e Erane fu asoe fuone Tera fu uria fikoga fu uria e nikaki ijia baronei. Fu sidove fuone isekube bu fu nafeva bu kua Eano kuavo sidove Bebironi guove ijia baronei.  
\v 29-30 Ro e Aburame fu uri bara fuone Sera abekoga Neo fu uri uvia fuone e Eranedo kabae bara Miruka abei. Ro bara Mirukakiro e Isika ijiebuo asoe ijeja e Erane. Ro bara Sera fuje fu debire.   
\p
\v 31 Maza be Tera fune sidove fuone iseke Eano kuavo Bebironi guove ijia fina areme uri fari fuone Aburamekiro bara fuone Sera ije kaenamiana vae. Tera fu ino baraki ijiakiro asaefuo e Eranedo fari Roti ijene kaenamiana fune urina aesakae Kenani ijia vakiro vae. Bu Kenani vakuae vakuma sidove Eraneno kuavo ijia kari.   
\p
\v 32 Bu ijia karivakuma Tera fu juaevasia tu aderedi faeve (205) ijiege abeko fune ijia baronei.   
\c 12  
\s1 Godi fu Aburame kumema ijene  
\p
\v 1 Bu ijia kariva ijia E Ireobo fu Aburame kuae, Ni urina aesakae one ijiakina agane one ijiakina asoe one ijadufuo are ije arena urina vaga nare aesakae be nijasaga a ijia fine.   
\p
\v 2 A ijia vaga na daro maga ame uije one a tuanamo ije buka e uruvana reke. Ro nare a daro mana samuagakinu marejaga a una e uruvana ifejiana marejiake. Ro kuke nare daro mana ive one dabe ma ireobo reke.  
\v 3 Ro nare e ije erarebe bu a marejavo ijene daro miana samuagiakinu marejiake. Ro erarebe bu a kuravajana vafakuva ije nare una ve bu kuravajiana vafiake. Ro e boeje aesakae igia karinoeva ije na one duvado ijia bu marejiake.   
\p
\v 4-5 Ijadufuo Aburame fune fivakuma juaevasia seveniti faeve (75) ijiege abenoga fune izege E Ireobo fu kuaraema ijiege fune sidove Erane arena vakiro uri. Aburame fune zinuivena urina vakoga bara fuone Serakina kaju fuone e Roti bune urina fuina vae. E Aburame fune uri sinuome fuone maeje boeje ro e fuone moni baki imeno ije fu Erane ijia fikinu kema boeje ije kaenamiana vae. Aburame fune ijiege rena agane fuone ijene kaenamiana vakuma Kenani ijia kekei.   
\p
\v 6 Areme fune are ije ukua ijia urana vakuma are akae Sekemi ine anuigi Moreno kuavo ije manino ijia kekei. (Ro maza ijia e Kenaniko bu uria aesakae ijia kariva bu ijia vae.)  
\v 7 Areme E Ireobo fu are ijia arina Aburame biena kuae, Aesakae ije na abena uifari one ije miakiro kuaeva ije ijifurekino kuae. Areme Aburame fune urina are ije E Ireobo fu arina biema ijia fata be fu ijia fuone baname isoedufuo ije mune ijia tuana nana amaeri.   
\p
\v 8 Aburame fune ijiege rei areme rade fune una urina nafaeneke una are ikene ijia vae. Fu urina are sidove Betiero are mazani koeno nake ro sidove Ai una mazani ajiamo nake ije ukua ijia fanu surive ijia ae sana finoe. Aburame fune kuke ijia mune ijia tuana E Ireobo ijadufuo fata amaerima ijia fuone baname isoe.  
\v 9 Ijiege rena Aburame fune ijia fijana una Kenani are ikene bu e Ijifitiko kanikuriaeva ijia vae.   
\s1 Aburame fu una aesakae Ijifiti ijia ari vaema ijene  
\p
\v 10-13 Areme vasia ka ma ireobo fu aesakae Kenani ijia kekemoga Aburame fune biona ari gamia aesakae Ijifiti ijia maza isekube fikiro vae. Ijiege rena Aburame fune vakuma e Ijifitiko bu oenoeva ijia ura vakiro uri bara fuone Sera kuae, Aeje aka bara ni mukore. Ijadufuo e Ijifitiko bu a gakuva buka kanie na baroneke bu a abenamake. Ijadufuo bu a gana kuakuva ni kiako a maki noneno kiaekina bu kaniedufuo ije bu arekiro bume mukoreigia samuaguoga no buina ijia karino kuae.   
\p
\v 14 Fu ijiege kuarana bune vakuma Ijifiti ijia usiaevoga e Ijifiti bune gake Sera fuka bara ni mukore.  
\v 15 Ijadufuo e Kini Ferodo imevo gue bune Sera gana va Kini Fero kuarae. Bu kuaravoga fune kiamo bune bara Sera mesirina are fuone ijia vae.  
\v 16 Kini Fero fu bara Sera gamo fuka oe maemo fuka Aburame dabe mukoreigia oetuana ifejae. Fu ifejana mave-sifi ro kau ro kamero ro doniki iravekiro ubae ro e moni baki imenoevo bara ro baru ijene uruvana vajae.   
\p
\v 17 Rove E Ireobo fu Sera ije fu va Kini Ferodo are ijia fino ijadufuo fuka adame ise ma uruvana ije kiamoga bu Kini ijiakiro e boeje ijia kariva ijiebuo ruae.  
\v 18 Ijadufuo Kini Fero fune kuriaerena kiamo bu Aburame mesiri rovoga fu uri madina kuae, A irere none rema ije kuarie na fiene? A bara gure fu ma onekuma ni ijiege samanukua kuarie na fiekuma.  
\v 19 A irerefuo biesiriena kie fu maki noneno kiemoga na abei? A ma isema rema ijadufuo bara one ije ijifurekino ni una mesirina keke vano kuae.  
\v 20 Kini Fero fune ijiege kuara areme uri e fuone imevo ije kiamoga bune Aburamekiro bara fuone ro ire boeje Aburame fu kema ijiakuma kuriaeremoga bune Ijifiti arena vae.   
\c 13  
\s1 Eburamekiro Roti bu unianamiva ijene  
\p
\v 1 Ijiege rena Aburame fune aesakae Ijifiti ijia urina una ikene ijia ufuaena Kenani ikene ijia fikiro vae. Aburame fune uri bara fuone ijiakiro ire boeje fu kema ijene kaenamiana vae. Fu vakoga e kaju fuone Roti fune fuosiki vae.  
\v 2 E Aburame fuka mave kina kaukina goti uruvana zarae. Ro kuke fuka ire siruvakiro gorodi ma uruvana.  
\v 3-4 Ijiege rena Aburame fune urina ijia fijana una are Betuero nake ijia vae. Fu ijia fijana vakuma are Betuero gue re ro Ai gue rema ukua ije fu ude fata zinone ifaejedufuo fu ufema ijia kekei. Aburame fune ijia kekena uri fata ijia E Ireobo ijene baname isoekafae.   
\p
\v 5 Ro e Roti fu duaku fuka mave kina kaukina goti uruvana sae ro kuke fuka e agane fuone ro e fuone imevo ije uruvana kaenamia vae.  
\v 6 Ijadufuo are kafare e inokiro bu besu karinoedufuo ije fuka naebe mani. Bu besu karike mave-sifi kiro kau buone ije bu vajoma inoedufuo ije fu naebe moni ijadufuo maeje buka fanuve ma uruvana.  
\v 7 Ijadufuo mazani be e ije Rotido imevo ijiakiro Aburamedo ije bu bue madinami. (Ro mazani ije e Kenanaetiko ijiakiro e Ferizaetiko ije bu uria aesakae ijia kariva ijia bu ijiege rei.)   
\p
\v 8 Areme Aburame fu urina Roti kuae, No nosiki nono agane ro e one imevo bu e none ijena madinamivo ije fuka naebe marei.  
\v 9 Ijadufuo roga no va nuvuone binobino karinoene. Ni koro are akare izia a oenoekiro vierafema ijia vakiro na akaegue vane.   
\p
\v 10 Areme Roti fune uri manina are amare do Jodeni fu kana vakuma are Zoa ijia kekema ije rerei. Ro are amare ije fu do uruvana fuka E Ireobo ijare juare mema igeki ro kuke fuka aesakae Ijifiti vareki ijene gae. (Ro maza ije Godi fu are Sodomekiro Gomora fu naebe kena isekafiaema ijia fu ijiege rei.)  
\v 11 Ijadufuo Roti fune uri are Jodeni amare ijene abena ijia fijana una are mazani ajiamo nake ijiege vae. Ijadufuo e ino kajuki ije bu ijiege rena buone unianamina vae.  
\v 12 Ijiege rena Aburame fune are Kenani ijia finokoga e Roti fu urina Jodeni amare ije sidove mamekanu bu karinoeva kafare are Sodome uvuake ijia are muvuaka sana ijia finoe.  
\v 13 Ro e Sodomeko ije buka e omise bu E Ireobo fake ise uruvana revo.   
\s1 Aburame fu biona Eburoni vaema ijene  
\p
\v 14 Ijiege rena Roti fune vakoga rade E Ireobo fu una Aburame kuae, Ije a fino ijia manina are irore boeje rerene.  
\v 15 Nare are ije a rerema ijene akiro uifari one ije miake. Are ije nane abe a maedo fune maza boeje one redufuo.  
\v 16 Ro kuke na uifari one ma uruvana vajaga bu ajare ige e bu dadufuo baki igege reke.  
\v 17 Ijadufuo ni va are foteke ije ganoene ijadufuo maeje sakae ije na abe a madufuo ijeno kuae.  
\v 18 Ijadufuo Aburame fune are faraena biona ine akae Mamureno kuavo bu ireva are Eburoni guove ijia vae Fu va ijia fi areme uri fata be fu zinone ifaejadufuo ije sae.   
\c 14  
\s1 Aburame fu Roti kenujaema ijene  
\p
\v 1-2 Maza ije Aburame fu are Eburoni fima ijia kini inokirokiro inokiro (4) bu urina kini umui fague (5) ijena bijae. Ro kini inokirokiro inokiro ijiebuo ive ijeja Kini Amarafero are Bebironiako ijiakina Kini Arioki are Erasako ijene. Ro Kini Kedorama are Eramiko ijiakina Kini Tidaro are Goemiko ije bu gue rei. Ro kini faeve (5) ije gue reva ijeja Kini Bera are Sodomeko ijiakina Kini Biasa are Gomorako ijiakina Kini Sina are Adimako ro Kini Simeba are Zeboimiko ro Kini are Berako ije bu gue rei.  
\v 3 Ijiege rena kini faeve ije bune are amare Sidimino kuavo ijia e buone bijaevo ijene kena besu afui. (Ro ive Sidimi ijadufuo maeje ijeja Davare Soruki).  
\v 4 Ijadufuo maeje juaevasia tuero (12) guove ije fu kini Kedoramare samuagiakoga bu rotire fuone ijia karinoe. Ro una juaevasia tetini (13) guove ijia bu fu ijuonena una fuina bijae.   
\p
\v 5-6 Bu ijiege re vakuma una juaevasia fotini (14) ijia kini boeje bune uri e bijaevo bune ije kaenamiana una Kini Kedoramana besu rei. Areme bune uri e Refaetiko aesakae Asiteroti Kaneme karijo ijiakina e Zusaetiko ije bu aesakae Emi karijo ijiakina e Emaetiko ije aesakae Save Kiriataemi karijo ijiakina e Oraetiko uruo Sia ivuake ijia karijo ije bure iraraena kaniae. Bu kaniana kame arafiria vakuma are Ero Farane ae sao ijie usiae.  
\v 7 Areme bune una kuderiana ro are Kedesi ijia usiaena e Amarekaetiko ijiebuo aesakae ije iraraena abei. Areme bu uri e Amoraetiko ije bu are Asesoni Tema ijia kariva ije kaniae.   
\p
\v 8-9 Areme are Sodomekina Gomorakina Adimakina Zeboimikina Zoa ijiebuo kini ije bune e bijaevo buone ije kaenamiana are amare Sidimi ijia bijaekuae vae. Bu vakoga kini fo Kedoramakina Taedorokina Emiraferokina kini Arioki ije buina bijae.  
\v 10 Ro are amare ije fuka ire kazine bu kua ta ire tore igeki e kamakiamo ije fuka uruvana ijia. Ijadufuo are Sodomekiro Gomora ijiebuo kini ijiakiro e bijaevo buone buka giriesana subinae vakuae vakuva buka ta ijia urae. Bune ijia urana oekoga kini inokubeke bu e buone bijaevo ijena subinae nafare ijia vae.  
\v 11 Bu subinae vakoga kini inokirokiro inokiro ije bune uri e Sodomekiro Gomorako ijiebuo sinuome ijiakina ire ivo buone boeje buka bune karijiana vae.  
\v 12 Ro e Aburamedo kaju fuone e Roti fu Sodome ijia fino ijadufuo bu uri fu duaku mesiri areme uri sinuome fuone boeje buka karina vae.   
\p
\v 13 Ijiege rekoga e be fu aza uve ijia kona Aburame fino ijia vae. Fu va ijia kekena ire boeje izege rema ijene Aburame e Iburuko ije kuarae. Ro Aburame fu Mamure e Amoraetiko ijiebuo ine sio ije ireva ivuake ijia fino. Ro e Mamurekina uviarafa fuone inokiro e Esikorokiro Ana bu una Aburamena besu rei.  
\v 14 Ijadufuo e Aburame fu fieke kaju fuone e Roti bune tona mesiri vaeva fiena fune uri e bijaevo fuone ije are fuone ijia kariva ijene e tiri aderedi eitini (318) ijiege kaenamiana afui. Areme fune uri kini inokirokiro inokiro ije reriana arafiria vakuma are Dani ijia usiae.  
\v 15 Bu va Dani ijia usiaena fune uri e fuone ije kena atana binobino uniama areme bune mugu e ani ije arafirana kaniae. Bune ijiege kaniana kame arafiriana are Oba Damasikasi ikene ijia vae.  
\v 16 Bu arafiria vakuma faradia areme uri Rotido sinuome boeje kini inokirokiro inokiro ije bu kariva ijene kamaziae. Areme Aburame fune kuke kaju fuone Roti mesiri areme sinuome fuone ijiakina bara bino ro e gue bu toenamiana kaenamia vako ijene kaenamiana una ruae.   
\s1 Mekizideki fu Aburame daro maema ijene  
\p
\v 17 Ijiege rena Aburame fune kini Kedoramakiro kini gue ije iraraena kaniakuriamo bu subi vakoga fu una ruomo ijia fu are Sodomeko kini ije bie. Fu are amare bu kua Kinido Amareno kuavo ijia bie.  
\v 18 Ro kini Mekizideki fu are Seremiko ijiebuo kini ro kuke fu Godi ka E Daroki ijadufuo zinone ifaejemo. Ijadufuo fu keke Aburame biena uri do vaeni ijiakiro burete ije kena vajae.  
\v 19 Areme fu uri Aburame daro ma areme baname isoena kuae,  
\q1 Godi E Daroki aesakae igiakiro saove ije amaeriaema ije fu a daro makono kuae.   
\q1
\v 20 Ro e boeje buka Godi E Daroki ije fu a ifejana daro mamoga a iraraena e ani one ije kaniaema ijadufuo ive dabe aroekono kuae. Areme Aburame fune uri sinuome fu kena ruaema ijene bino (1/10) karina e Mekizideki vajae.   
\p
\v 21 Ijiege rekoga rade e Sodomekobuo kini ije fu uri Aburame kuae, Sinuome boeje a kema ije fu one ijadufuo ni kekiro e boeje ni una ke uniaejieno kuae.   
\p
\v 22-23 Fu ijiege kuaramoga Aburame fu una kua, Na E Ireobo Godi E Daroki ije aesakae igiakiro saove ije amaerima ijadufuo ive ijia kuarana kuaedo na ire one bino nabe kena vake. Na ijiege rekina rade abe noesina kuaeko Aburame fuka e sinuo baki ro na nare ifejavoga fu sinuome zaraemano kuaeke.  
\v 24 Aburame fu ijiege kuara areme kua, Na sinuome one nabe kekiro name irere e none imevo bu iva na ijiaru kedufuo. Ro e ije naena reva e Anakina Esikorokina Mamure ije ni arega bu sinuome irere bino bu bue kekuae vierafeva ijene kena vano kuae.   
\c 15  
\s1 Godi fu Aburameki vua besu kuaena avenamiva ijene  
\p
\v 1 Areme rade e Aburame fu nimamaena fieke E Ireobo fu kumei, Nare ire afiki bino bu one vuakuvejo ijia samuagakinu ro nare ire mamekanu bino kena a vajakuvejo ijadufuo ade jumemono kumei.  
\v 2-3 Fu ijiege kuaramoga Aburame fu una kuae, E Ireobo none iviama nana ame baki. Ro a ame be naebe miemo ije erare ire ije a vajiekuveno ije kena samuagiake? Ijadufuo iviama na Erisa e Damasikasiko fu noefuo moni baki imeno na ije kuaga fure sinuome none boeje kena samuagiakono kuae.   
\p
\v 4 Fu ijiege kuaramoga E Ireobo fu una Aburame kuae, Na vierafe e Eriesa fube sinuome one ije kedufuo. Ro funeka ame ma one ijare sinuome one ije samuagiakono kuae.  
\v 5 Areme E Ireobo fune Aburame mesiri ae makave ijia kekena kuae, Ni kakena saove gafia ire zuvi ije ireva giakinu mimatana da giane. Ire zuvi ije bu zaraeva ijiegero uifari one buka ijiege zaraekono kuae.   
\p
\v 6 E Ireobo fu ijiege Aburame kuaramoga fu vua ije abe ma vierafei. Ijadufuo E Ireobo fu ijene gana oemarema ijadufuo fu kua, Ane maturaemano kuana mesirimo fu kai fuone rei.  
\v 7 Areme E Ireobo fune uri ijiege kuae, Naeje na E Ireobo nare a are Eri aesakae Bebironi guove ijia mesirana igia sakae igene abena maga fu one rekono kuae.  
\v 8 Rove Aburame fu una kuae, E Ireobo ire boeje samuagiamo na izege gana vierafero ae sakae ige fu ma nonero na ijiege vierafekono kuae.  
\v 9 Fu ijiege kuaramoga E Ireobo fu kuae, Ni va fanuve mave-kau be ro goti be ro fanuve mave-sifi be ijene kaniana ke rone. Ro fanu ijeja bu juaevasia inokubeke furiva ijene kaniane. Ro kuke ni ume tuvuaeki be ro ume fisino kuavo ije be ijiege kena rono kuae.   
\p
\v 10 Areme Aburame fune va kekena fanuve ije kaniana ke ukua ijia ufusena kari Godido ruae. Areme fune uri fanuve ije karina inokiro nae. Areme fune uri ume inokiro ijene kena fotikuma ado ijia nae.  
\v 11 Fu ijiege rekoga ume buruome ijiebe arina fanuve ije ikuae rovoga Aburame fu uri kaniakuriamo bu vae.   
\p
\v 12 Areme ve fune titutekuveno ijia Aburame fu ni ireobo nae. Fu ni naena uri gake fune ka ve ireobo titutemoga fuka ireobo jumei.  
\v 13 Fu ijege remoga E Ireobo fu kuae, Aburame ni mukoreigia vierafene uifari one ije bu e aebeko igege ebuo sakae ijia juaevasia fo aderedi (400) ijiege bu moni baki imekinu isejavaeke.  
\v 14 Rove nare e aesakae ijia karina e none kiaga bu buefuo moni baki imevo ije kame isekafiake. Ro e none bu aesakae ije arena una usiae ruakuva bu ka sinuome uruvana karina ruadufuo.  
\v 15 Ro aeje a juaevasia ireobo fivakuma tuvuae bija areme a sone oemarekinu baronega bu abe mako ruke.  
\v 16 Ro uifari one ije bu e binobuo aesakae ijia karivakuma e uifari one bune inokirokiro inokiro ijiege vako ijia bu sone una sakae igia ruake. Ro e Amoraetiko ije na samuake bu ise ma uruvana rekuva na ijia sone kena isekafiakono kuae.   
\p
\v 17 Areme maza fune kona ve titutemo ijia fu gake ire be sukore miane naeno igeki ijare fanuve ado ijia romo fu gae. Ro kuke fuka ire ikuo sae igeki ijare fanuve ije fu buvuana naema ije kafare ijia ruvako fu gae.  
\v 18 Areme maza ijia E Ireobo fune Aburameki vua be kuaena marei. E Ireobo fu kuae, Nare kuaedo na are ije gamia Ijifiti ijia ruoma are do Iufureti fu kana vaema ije na abena uifari one ije miake.  
\v 19-21 Ro kuke na aesakae ige e Kenanaetikobuo ijiakina e Kenizaetikobuo ijiakina e Kedimonaetikobuo ijene kena bu vajiake. Ro kuke na aesakae e Itaetiko ro e Ferizaetiko ro e Refaetiko ro e Amoraetiko ro e Kenanaetiko ijiebuo ije kena una uifari one ije vajiake. Ro kuke na aesakae e Gegazaetiko ijiakina e Jebusaetiko ijiebuo boeje foteke kena uifari one ijia vajiakono kuae.   
\c 16  
\s1 Serakiro Ega bu zienamiva ijene  
\p
\v 1 Ijiege rei ro bara Sera e Aburamedo bara ije ame bino naebe tuanae. Rove fu Ega bara Ijifitiko be fu fuefuo moni baki imeno.  
\v 2 Ijadufuo Sera fu uri Aburame kuae, Naeje fune E Ireobo ijare naebe ifejiena ma rejiema ijadufuo na ame bino naebe tuanae. Ijadufuo na vierafe a bara gare fu noefuo imeno ijiaki naekuma fute ame bino nafe vajiega na samuagiakono kuae. Sera fu ijiege kuaramoga Aburame fu vierafega fu ma kuaramoga fune oemarei.  
\v 3 Ijadufuo Sera fune uri Ega kuamoga fu Aburameki naenoe. (Ro ije fu rema ije Aburame fu Kenane ijia finoena juaevasia teni furikoga fu ijierei).   
\p
\v 4-5 Ijiege rena Aburame fune bara Egaki naenoga fu e fudie. Areme Ega fu gake fune e fudiemaga fuka aroekarana una Sera oe isema vierafei. Ijadufuo Sera fu uri Aburame kuae, Aka isema rema ijadufuo Ega fuka na oe isema vierafe. Fuje na nare kuavoga a fuosiki nae rove iviama fune gaga fuka e fudiema ijadufuo fu una oe isema na vierafeme. Ro ise ije na nare rei ro are rekuma ije fune E Ireobo ijare guona vierafekono kuae.   
\p
\v 6 Sera fu ijiege kuaramoga Aburame fu kuae, Daro ije fu one ro fuje fume rotire one ijia oefuo imeno. Ijadufuo ni izege a vierafema ijia reno kuae. Ijadufuo bara Sera fune uri Ega vame omise ijia ziegafana remoga fune uri kona vae.   
\p
\v 7-8 Bara Ega fune kona vakuma are sao ijia do be sakae tire ijia ajiamo ivuake ijia fine. Ro do ije fu vame ije bu are Sua ijia vako ivuake ijia. Fu ijia finoga E Ireobo ijadufuo anera fu arina ijia bie. Fu biena kuae, Bara gure Serado imeno gure a bara izeko? A izia vakiro ruomono kuae. Fu ijiege kuaramoga fu una kuae, Na bara ije fu na samuagiemo ije gana kona ruovono kuae.  
\v 9-10 Ega fu ijiege kuaramoga anera fu kuae, Ade kona vakiro bano ni una va fuefuo imene. Ro aeje nare ifejana daro maga uifari one ije buka ma uruvana e bu dadufuo baki ijiege reke.   
\q1
\v 11 Ro kuke aeje a ame fari be bietena ive fuone ije a Isimaero kuake. Ijadufuo maeje ige a oefiane abena nimeno ije E Ireobo fune fie.   
\q1
\v 12 Ro fari one Isimaero fuka mave kuriae ijiege renoega e uruvana buka fuina zienamike. Fu ijiege rena fuka agane fuone ije arena va fuebe finoekono kuae.   
\p
\v 13 Areme bara Ega fune uri fue kuae, Naneka ma Godi gae rove na naebe barone na uria igifure fivono kuae. Fu ijiege kuaena uri E Ireobo ije fu vua kuaraema ije fu kua, Godi ije fu fina giemo ijeno kuae.  
\v 14 Bu ijadufuo e ije bu do ije are Kedesikiro Bereti ukua ijia mako bu do jiavo ije bu kua Do Ije E Ije Maza Boeje Ijia Fina Vako Ije Fu Giamo Ijeno kuavo.  
\v 15-16 Ijiege rena bara Ega fune Aburamedo ame fari be bietena abe ive ina Isimaero kuae. Ro maza ije Aburame fu juaevasia eti sigisi (86) ijiege furima ijia fu ijiege rei.   
\c 17  
\s1 Aburamekiro Godi bu vua besu kuaena avenamiva ijene  
\p
\v 1 Areme maza ije Aburame fu juaevasia fu bieteva ije fune naeniti naeni (99) ijiege furikoga ijia E Ireobo fu arina fuone ruae. Fu arina kuae, Naeje na Godi ka e daroki ijene. Ijadufuo ni vua irere ige na kuaravo ije maza boeje fiena iriniakinu vame ma ijiaru kenoeno kuae.  
\v 2 Na osiki vua kuaena marekina rade na ifejana daro maga uifari one ije buka ma uruvana rekono kuae.   
\p
\v 3-4 Areme Aburame fu vua ije fiemo fuka ma ireobo oeserei ijadufuo fu uri Godi aroena tuana nikubae fuone ijia dijei. Fu ijia dijemoga Godi fu kua,  
\q1 Ivia na osiki vua ige kuaena abe mareke. Nare kuaedo a e uruvana aesakae binobino ijia kariva ijiebuo asae reke.  
\v 5 Ro iviama ive one Aburame ro rade ive one ije bu kua Eburameno kuake. Ijadufuo maeje nare ifejana daro maga a e boeje aesakae binobino ijia kariva ijiebuo asae buone reke.  
\v 6 Ro nare uifari one ma uruvana vajaga gue bu kini rekiro gue buka e uruvana rena urina aesakae binobino ijia karinoedufuo.  
\v 7-8 Na akina uifari one ije rade ruovo ijena vua ige na rekiro kuaena abe mareva ije nabe toteke. Ro vua ije fume uria ijia na vadufuo. Ro kuke na akina uifari one ije bu rade ruovo ijiebuo Godi redufuo. Nare aesakae ige Keneni a e aebeko igege ro fino ije abena akina uifari one ije foteke miaga bu buone abena maza boeje ijia karivake na Godi buone rekono kuae.   
\p
\v 9 Areme Godi fu una kuke Eburame kuarana kuae, Na vierafe adua uifari one ije bu rade urivo ijena janika vua irere na ude jaena kuaena mareva ije maza boeje vierafena renoefo.  
\v 10 Anika uifari one ijena ame fari boeje ja nafevo ije ka kena vajae suri kania ufuna nuga nafo.  
\v 11-13 Ijadufuo iviama igia una gafege vako ijia ja ame fari nafega bu mu eiti (8) ijiege furivo ije nika kena vajae suri kania ufu nuga naejiafo. Ro kuke e one moni baki imevo ijiebuo farirafa ije bu gire jone ijia nafevo ijiakina e aebinoko ja fuaevena kaenamiaeva bu are jone ijia karivo ije e fari ije nika vajae suri buone kania ufuna nuga naejiafo. A ijiege rekina e boeje bu ijia giana vierafero vua na osiki kuaena mareva ije fu maza boeje ijiege namoro bu ijiege vierafeke.  
\v 14 Ro e fari eranebe bu naebe vajae suri buone kania ufuvo e ije bu e none baki. Ijadufuo maeje bu vua irere na jaena kuaena mareva ije bu naebe iriniena ijia renoevono kuae.   
\p
\v 15 Areme Godi fu una Eburame kuae, Ivia igia una gafege vako ijia bara one ijadufuo ive ije a naebe una Sarae kuake. Ro ive fuone ije a Sera kuake.  
\v 16 Ijadufuo maeje nare ifejana daro maga fu ame fari be bieteke. Ro nare daro maga fu e aesakae binobino ijia karivo ijiebuo asie redufuo. Ro kuke nare ifejaga uifari fuone ijiebuo uve ijia e gue bu uri kini rekono kuae.   
\p
\v 17 Godi fu ijiege kuaramoga Eburame fu vua ije fiemo fuka ireobo oeseremo fu tuana ume ijia dije. Fu ume ijia nana kikinu fue kuaemo, Eove fu juaevasia uvani aderedi (100) furima ije fu izege ame nafedufuo? Ro kuke Sera fune ma barasire ro juaevasia fuone ije fune naeniti (90) furima ije fu izege ame nafekono kuae.  
\v 18 Areme fune uri Godi kuae, A vierafe fube maredo fari none Isimaero fu sinuome none boeje kena samuakono kuae.   
\p
\v 19 Rove Godi fu una kuae, Nana ijiege rekuva baki. Ro na vierafe naka bara one Sera ifejaga fu ame fari be oefuo bietega ive fuone ije a Aeseki kuake. A ijiege rekina vua irere na kuaena mareva ije fu uria uifari fuone ijena ijia navake.  
\v 20 Ro una Isimaerodo a kuariema ije nane fie. Ijadufuo fuje na daro maga fu ame uruvana tuanaga uifari fuone ije buka ma uruvana reke. Ro nare ifejana daro maga fu ame ifiki tuero (12) ijiebuo asoe reke. Ro nare ifejaga uifari fuone buka ma uruvana rega bu aesakae binobino ijia karinoedufuo.  
\v 21 Ro Sera fu iviane ame fari one e Aeseki nafega na irere na Aesekido rekiro kuaeva ije na ifejaga fu rekono kuae.  
\v 22 Godi fu vua ijiege Eburame kuarama furi areme fune ijia nujana vae.   
\p
\v 23 Fu vakoga mazani besu ijia Eburame fu Godi irinana uri fari fuone Isimaero ijiakina ame fari boeje gire fuone ijia kariva ijene vajae surive buone kania ufuna nuga naejiae. Ro ame fari ije gue bu e ije bu fuefuo moni baki imevo ijiebuo anafa bu gire fuone ijia nafeva ijene. Ro e gue fu ae bino ijia fuaevema bu fuefuo imevo ijene kena vajae surive buone kania ufuna nuga naejiae.  
\v 24-26 Ro Eburame bu bieteva juaevasia ije fune naeniti naeni (99) ijiege furi ro Isimaero fu tetini (13) ijiege furikoga bu mazani besu ijia vajae surive buone kania ufuna nuga nijae.  
\v 27 Ijadufuo e fari boeje bu Eburamedo gire ijia karijo ije bune vajae surive buone kania ufuna nuga naejiae.   
\c 18  
\s1 Godi fu Eburame ame fari be makono kuaema ijene  
\p
\v 1 Areme E Ireobo fune ine akae are Mamure ireva ijia Eburame bie. Ro maza ije fu uvuoka manina fuka fete uruime. Ijadufuo Eburame fu are muvuaka fu fanu surive ijia saema viene ijia fine.  
\v 2-3 Fu ijia fine giake e inokubeke bu makave gafia ireva fu giae. Ijadufuo funeka migegire kekena biediakiro difurina vae. Fune vakuma bu ireva ijia auge sana kurituana sakae ijia bija areme kiae, E kusesie jade asidiena vako. Ijadufuo maeje nanaka ja ifejiakiro vierafe.  
\v 4 Ijadufuo ni ine zinume igia karike na do jiajia roga ja dia jone kuokuo ijene sofo. Jaka na aguariena are none igia ruae ijadufuo naka ifejiakiro vierafe.  
\v 5 Na ire bino vajiaga ja i fu deufiaga ja daro abena vano kiae. Eburame fu ijiege kuariamoga bune oemarena kua, Ije fune maredo no ijiege rekono kuae.  
\v 6 Areme Eburame fune migegire va are gafia kekena uri bara fuone Sera kuae, Iviama migegire uri farava one maeje a nijaema ijene abena bino ifaejeno kuae.  
\v 7 Areme fune difuri are fu mave samuagiamo ijia kekena mave-kau saruegi iviama ubaeremo ijene be fare. Areme fune abena e fuone imeno ije mana kuamo fune migegire abe kana buvuana kirakiro vae.  
\v 8 Ijiege rena Eburame fune uri muijekina fanu ije korufuo kena va e ijene ine zinume ijia gorumiavo bu i.   
\p
\v 9 Areme bune urina kuae, Ro bara one Sera fu iziebureno kuae? Bu ijiege kuavoga fu kiae, Fu gafe are muvuaka gari fino kiae.  
\v 10 Fu ijiege kuariamoga e be fu urina kuae, Na vaekina asame naeni (9) furiga na una ruakuva bara one Sera fu ame be bietekono kuae. Fu ijiege kuarako Sera fu viene ivuake ijia fido fu vua ije bu kuaevo ije fie.  
\v 11 Eburamekiro bara fuone Sera buneka ma eoradiae ro kuke Sera fu fue fino ije fune arei.  
\v 12 Ijadufuo fu mauike fue kikinu kuae, Naeje naneka mukoreigia barasirenamie. Ro na baru none ijiaki naedufuo ije na fuka naebe manino kuae.   
\p
\v 13 Areme E Ireobo fune urina Eburame kuae, Sera fu irerefuo kikinu kuae nane barasirenamiedo na izege ame bietekuva bano kuaeme?  
\v 14 A vierafe E Ireobo fuka naebe manido fu ire bino redufuo? E ije fu ijiege kuarama areme fu urina Eburame kuae, Asame naeni ijiege furiga na una ruovo ijia bara one fu ame fari bietekono kiae.   
\p
\v 15 Ro Sera fu kima ije fu kuariakuma fuka jumema ijadufuo fu fena kia, Na naebe kivano kuae. Ro E Ireobo fu urina kuae, Ane ma kimo na gaevano kuae.   
\p
\v 16 Ijiege rena e inokubeke ije bune are be bu irena nese Sodome rerevo ijia vakuae vae. Bune vakoga Eburame fu nuvedia vame unia bu vakega fu una ruakiro fune buina vae.  
\v 17 Areme E Ireobo fu una fue kuae, Na ire bino rekiro vierafekuva nabe Eburame ni sauikurake. Ro naka ude nijae fu vierafeke na rade sone ire bino reke.  
\v 18 Ro rade uifari fuone ije buka e anuigi ro kuke buka e daroki reke. Ro kuke na duvado fuone ijia aesakae boeje marejiana daro miake.  
\v 19 Nare fu abeva ijadufuo fure rade anafa ro uifari fuone ijene kuriaerena kuariaga bu na irinieke. Bu na iriniena ire ma ijiaru rekinu vame ma ijia kenoeke. E boeje bu ijiege renoekuva naka ire boeje na fuefuo rekiro kuaeva ijene rejakono kuae.  
\v 20 Areme E Ireobo fu Eburame kuae, E Sodomekiro Gomorako ise bu revo ije bu kuavo ije na fiega fuka ma omise ro kuke fuka ma ireobo reme.  
\v 21 Ijadufuo naka arina va ise buone e bu buesina kuaega na fievo ije giaga fu kufui ro maga na giakono kuae.   
\p
\v 22 Areme e inokiro ije bu ijia Eburame nujana bune Sodome nake vakoga E Ireobo fu una Eburameki fi.  
\v 23 Ijiege rena Eburame fune E Ireobo kuae, A e ije bu ire ise reva ije ane kaniakuvene. Ro a vierafe fune maredo a e masoki ijiakuma kaniake?  
\v 24 Ro a vierafe e masoki fifiti (50) ijiege bu sidove ijia karikuva abe uria e foteke ijene kaniake? Ro a uria kafiamo ijadufuo e fifiti masoki ije ijia kariva ije a uria karauniake?  
\v 25 Ro na ma vierafega e ise revo ije a kaniakuveno ije abe e masoki ijiakuma kaniake. A ijiege rekuma ije fuka naebe maredufuo. Ro a e ume igeko ijiebuo ise ije a kena mazie giamo ije na vierafe aka mukoreigia vame ma ijia mazie giano kuae.   
\p
\v 26 Eburame fu E Ireobo ijiege kuaramoga fu una kuae, Na e masoki fifiti bu Sodome guove ijia karikuva e ijiakiro sidove ije nabe abe isekafake.   
\p
\v 27 Rove Eburame fuka una kuae, Nanaka ema ro na vua ijiege a kuaradufuo ije naka daro baki. Ijadufuo a isekie ige na una kuke giriesana kuarakuvejo ije nime giena areke na kuarane.  
\v 28 Ro a vierafe e masoki ije bume e sibaneke fotifaeve (45) ijiege sidove ijia karikuva abe uria sidove ijene abe kafakono kuae? Ro E Ireobo fu una kuae, Bu e sibaneke fotifaeve ijiege ijia karikuva na vierafe nabe sidove ijene abe isekafakono kuae.   
\p
\v 29 Fu ijiege kuaramoga Eburame fuka una kuke kuae, Ro bu e sibaneke foti (40) ijiege karikuva a izege rekono kuae? Ro E Ireobo fu una kuae, Bu e sibane foti ijiege karikuva ije dua nabe sidove ijene abe arafiriakono kuae.  
\v 30 Fu ijiege kuaramoga Eburame fuka una kuae, E Ireobo ade na ziegafiemo. Ni areke naka una kuke kuarane. A vierafe bu e sibaneke teti (30) ijiege ijia karikuva ije a izege rekono kuae. Ro E Ireobo fu una kuae, Ije dua na vierafe nabe kena isekafiakono kuae.   
\p
\v 31 Ro Eburame fu una kuke kuae, A isekie naka uria giriesa ijia kuarakuvejone ni giena areke na kuarane. A vierafe bu e tuaedi (20) ijiege karikuva a izege rekono kuae? Ro E Ireobo fu kuae, Bu e tuaedi sidove ijia karikuva ije dua nabe abe isekafakono kuae.  
\v 32 Ro Eburame fu una kuke kuae, E Ireobo a isekie na vua rane igiaru kuarakiro vierafe ijadufuo ade na ziegafiemo. A vierafe bu e sibaneke umui gue gue (10) ijiege karikuva abe uria sidove ijene abe isekafakono kuae? Fu ijiege kuaramoga E Ireobo fu una kuae, Bu e umui gue gue ijiege ijia karikuva sidove foteke ijie nabe abe isekafakono kuae.  
\v 33 E Ireobo fu vua ijiege una Eburameki kuaema furi areme fune ijia nujana vae. Fu vakoga Eburame fune gue una are vae.   
\c 19  
\s1 E Sodomeko buka ise ma uruvana reva ijene  
\p
\v 1-2 Mazani ije E Ireobo ijadufuo anera inokiro bu sidove Sodome ruaeva ije mufuo besu ijia e Roti fu sidove ijadufuo isuo bu kirakuraeva ijadufuo viene ije e bu ro ijia koto revo ijia fine. Roti fu ijia fino bu rovo fune giana ka migegire urina biediakiro vae. Fu va bu ireva ijia auge sana kuri tuakafiana kiae, Ekisesie, naka ja ifejiakiro vierafei. Ijadufuo jabe ro gire none gafia dia jone sonaro muge igiaru naena naoekiro suoke mu gamia nine izege ja vakuae ruovo ijia vano kiae. Rove anera ije bu una kuae, Nobe aena vakiro no vierafe no sidove guove igia naokono kuae.   
\p
\v 3 Bu ijiege kuaravoga Roti fuka faememarena soesoemoga anera ije bune fuina gire fuone ijia vae. Areme Roti fune kekena e fuone imevo ijene kiamoga bune migegireigia uri burete ire isiti usiaeva baki ije ifaejekinu ire ka mukore ije amaerima vajiavoga bu i.  
\v 4-5 Areme bune ni naokuvejo ijia e Sodomeko e fari boeje mumokana ro e baraki ije bu biona ijia ruae. Bu usiae Rotido are ije ninukurana uri kumei, E ije bu a gakuae ruaeva ije bu iziebureki? A iviama e ijene kiaga bu usiae roga no giane. E fari Sodomeko ige buka buina fudaenamina ise rekuae vierafevano kumei.   
\p
\v 6-7 Bu ijiege kumevoga Roti fu fiena keke makave ijia manigana viene dabe bijukuriae. Areme fu kiae, E gurie, kairafano ja isekie vame ije ja rekuae vierafeva ije fuka ma omiseno arefo.  
\v 8 Igia fie, kabaerafa none inokiro kabaekua ije bu gufifureki. Ijadufuo na kia bu usiae roga ni kaenamia va buina irere ja vierafeva ijene refo. Ro e ige naena kariva ije bu na giekuae ruae ijadufuo na vierafe naka bu mukoreigia samuagiakono kiae.   
\p
\v 9 Roti fu ijiege kuariamoga buka ziena kumei, E gare aebeko gare iviama vua ije a kuaemo ije arena garege vane. Aeje a era vareki a vua irere no kuaruokuvene? Vua a kuaemo ije ijia irine ro bakuma aeje no dabe vame ma ise ijia rekono kume. Bu ijiege kuarakinu bune ajia Roti vaja dabe garege akoena bune viene kania tuakuae arafiri.   
\p
\v 10 Rove anera inokiro guove ije kariva ijiebe urina Roti fare dabe una guove ijia nuja areme uri viene dabe kanae.  
\v 11 Bu ijiege re areme uri e boeje makave ijia ireva ijene ni buone kame kuzejiae ijadufuo bu izege ni nafaena viene daovekuva baki.   
\s1 Roti fu Sodome arema ijene  
\p
\v 12 Areme anera inokiro ije bu uri Roti kuae, A anafa one gue ro sibarafa ro uviarafa gue bube sidove igia kari? A e one gue bu igia karivoga no vierafe aka migegire kaenamiana sidove ige arena keke vadufuo.  
\v 13 Ijadufuo maeje no sidove ige abe isekafakuae vierafe. E Ireobo fu e igiebe ire ise ka ma omise ijene reko fu giaga fuka iseme ijadufuo fu kuoga no are ige Sodome abe isekafakuae ruaevano kuae.   
\p
\v 14 Anera bu ijiege Roti kuaravoga fune va e fari inokiro ije bu kabaerafa fuone kekuae revo ijene kiae, Iviama migegire roga no usiae subinae vafo. Ijadufuo maeje E Ireobo fu are ige dabe isekafakuveno kiae. Roti fu ijiege kuariamoga e fari ije bu vierafe ro fu kufuimena varaemenoro bu ijiege vierafei.   
\p
\v 15 Areme suoke ve iko abaesamo ijia anera bu vierafe Roti fuka migegire keke kona vakiro bu uri Roti kuae, Migegire bara one ijiakiro kabaerafa one inokiro ijene kaenamiana are ige arena keke vane. Anika keke kona vaekina sidove ige fu isejavaemo ije adua a naebe ijia baronenono kuae.   
\p
\v 16 Bu ijiege kuaravoga e Roti fuka uri ireobo totenami. Rove E Ireobo fu Roti gamo fuka oefiae. Ijadufuo anera fuone ije bu uri Rotikiro bara fuone ro kabaerafa inokiro ije umui karana sidove ije arena usiae.  
\v 17 Areme anera be fu uri Roti kuae, Ige a vako ije ade va amare ivuake gafiebure fino. Ro kuke ade una dakude manina igia rerekiro anika vajae one ijadufuo kona uruo gafia vaekina a naebe baroneno kuae.   
\p
\v 18-19 Rove Roti fu una kuae, Ja isekie jade no ijiege revo. Ja na ireobo vierafeva ijadufuo janeka mukoreigia na marejiena kenujie. Ro uruo gafe fuka uria mumabo ijadufuo na vakuva na migegire gafia kekekuva baki. Na vierafe na uria vame vako ijia irufui fu biediekuma nane baroneke.  
\v 20 Ro are iseke gare gafo are ije fuka ivuake garifureki. Ijadufuo ja isekie ni arega na ijia vaekina ise ije fube na kaniega na baroneno kiae. Ro are iseke ije bu kua Zoano kuavo ijadufuo maeje fuka are isekube.  
\v 21-22 Ro anera ije fu una kuae, Ije fune maredo na are iseke ije a kiema ije nabe abe isekafake. Ijadufuo ni migegire keke kona vane ijadufuo maeje a uria igia fikuma nabe are ige abe isekafake. Ro na vierafe na samuake ane va gafia kekega na sone are ige isekafakono kuae.   
\s1 E Ireobo fu sidove Sodomekiro Gomora isekafiaema ijene  
\p
\v 23 Areme mazani fune ajia ruomo ijia e Roti fune kona vakuma Zoa are iseke ijia kekei.  
\v 24 Fune iko ijia kekekoga sarorubaigia miane sarufa ijare saove ijia ve igege dana sidove Sodomekiro Gomora ijia ari.  
\v 25 Miane ije fu arina sidove inokiro ijiakiro are boeje amare ijia kariva ijene arafiriae. Miane ijare arina are amare ijia e boeje karinoeva ijene sakiamo bu oe furi. Ijiege rekoga ire uije boeje binobino bu juare ijia ovo ije funeka miane ijare naena arafiriama furi.  
\v 26 Ro Rotido bara ije fu kona vako ijia fu una ire ijene gakiro dakudekuma fune ijia baronena mune rei.   
\p
\v 27 Areme nituame suoke Eburame fune vakuma gafe E Ireobo fu biema ijia kekei.  
\v 28 Fu ijia kekena nese Sodomekiro Gomora bu kariva ijiakina are amare ije gake fune miane ijare udabeme. Miane u ije fu izege bu ire izui ifaejega fu umo ijiege fuka ireobo umo.  
\v 29 Ro maza ije E Ireobo fu are amare Roti fu fino ijene kena isekafiaema ijia Eburame fu naebe totei. Ijadufuo Godi fu kaju fuone Roti kuamo fu keke kona vae.   
\s1 Vame izege e Moabaetiko ijiakiro e Amoraetiko bu iko zinume ijia zinueveva ijene  
\p
\v 30 Ijiege rena e Roti fu are Zoa ijia fikiro fuka jumei. Ijadufuo fune kabaerafa inokiro ije kaenamiana uri uruo gafia ajia vae.  
\v 31 Areme maza be kabae amure ijare una iviene ije kuae, Asoe nuvuone ije fune eoreme. Ro aesakae irore igia e fari ije buka baki ijadufuo fu erare no sanamuoga no ame tuanakuva baki.  
\v 32 Ijadufuo roga no ire vaeni kugi be amaerina asoe nuvuone maga fu ine. Fu ina nigofo iserega no muge fuina naokina no e fudiena ame tuanano kuae.  
\v 33 Areme bune muge do kugi amaerina mavoga fu abena i. Fu vaeni ijene abe ina arekoga kabae fuone amure fu urina asoe fuone ijiaki nae. Ro asoe fuone fuka nigofo iserema ijadufuo vame ijiege bu revo ije fuka naebe mukoe giana vierafe.   
\p
\v 34 Ijiege rena nituame kabae amure ije fune una iviene fuone ije kuae, Na muge nane fuosiki nae. Ijadufuo ni roga no kuke ivia muge do kugi be amaeri maga fu ina nigofo iserene. Fu ijiege rega ni ase muge fuosiki naene. No ijiege rekina no nosiki noka asoe nuvuone ijadufuo ame fudiena nafeno kuae.  
\v 35 Ijadufuo muge ijia bune do vaeni jiana asoe buone vajavo fu ina nigofo iserei. Areme kabae iviene fune uri asoe fuone ijiaki nae. Ro asoe fuone ije fu kuke do ina nigofo iserema ijadufuo ire ije bu revo ije fu naebe giana vierafe.  
\v 36 Ijadufuo Rotido kabaerafa inokiro bu vame ijiege rena asoe buone ijadufuo e fudie.   
\p
\v 37 Areme kabae amure ije fu uri ame fari be bietena abe ive ina e Moabi kuae. Ijadufuo e ije bu e Moabaetiko ije iviama kariva ijiebuo asae.  
\v 38 Ro kabae iviene ije fu dua fu ame fari be bietena abe ive ina e Benami kuae. Ijadufuo e ije fu e Amonaetiko ije iviama kariva ijiebuo asae.   
\c 20  
\s1 Eburamekiro e Abimereki ijiebuo vua  
\p
\v 1-2 Ijiege rena Eburame fune are Mamure ijia fijana una Kenani ikene ijia are Kedesikiro Sua ukua are Gera ijia fijana vae. Fu are Gera ijia maza aokube finoena areme rade e Gerako bu bara fuone Serado kuavo fu kia, Fu maki noneno kiae. Ijadufuo kini Abimereki are Gera samuamo ije fu fiena uri kiamoga bu Sera mesirina fuone vae.   
\p
\v 3 Ro muge be Godi fu Abimereki naka urana kuae, Aka ise rema ijadufuo a baroneke. Ijadufuo maeje a bara baruki ije abemano kuae.  
\v 4 Rove kini Abimereki fu naebe Seraki nae. Ijadufuo fu uri Godi kua, Na bara ijiaki na naebe nae ro kuke fu fake ise be na naebe rei. Ro a vierafe fune maredo a e none igena no a kame isekafuoke?  
\v 5 Ro ije fune Eburamere korufuo kuae, Bara ije fu maki noneno kuae. Ro kuke bara ige fudua fu kuo, Eburame fu maki noneno kuae. Ijadufuo irere na reva ije nane mukoreigia vierafena rei ro na naebe isema revano kuae.   
\p
\v 6 Fu ijiege kuaramoga Godi fu una kuke naka ijia Abimereki kuae, Ije fune mare. A naebe isema rei ijadufuo maeje nare vame a ise redufuo ije bijukuraejae ro kuke nare bara ijadufuo vajae ije a niriaedufuo ije bijukuraevoga a naebe vajae fuone niriae.  
\v 7 Ijadufuo ni iviama bara ije kuaga fu una baru fuone ijadufuo vane. Baru fuone fu e be fu Godido vua vierafemono kuae. Ijadufuo a kuarakuma fure oefuo baname isoega irere a rema ije abe baroneke. Ro bara ije a naebe abe una nujajakuma na igifureki jukuarado a ro e one ijena jaka oekono kuae.   
\p
\v 8 Godi fu naka ijia ijiege kuaramoga kini Abimereki fu suoke mugamia urina e fuone mamekanu ije kumeno bu ijia afui. Bu afuivoga fu vua irere fu muge naka ijia naema ijene kuariamoga buka ireobo jumei.  
\v 9-10 Areme Abimereki fune Eburamedo kiamo bu mesiri rovoga fu kuae, Vame ije a irere ije rei? No afine irere ije e one ijena jone reva ijadufuo a e none igena nuvuone ise rejuokiro vierafe? Ro a irerefuo na ijiege remano kuae?   
\p
\v 11 Kini Abimereki fu ijiege kuaramoga Eburame fu kua, Na vierafero e bino are igia kariva buka Godi jumevo bakiro na ijiege vierafei. Na vierafero na kiako fu bara noneno kiakuva e bute na kaniena bara none abekiro na ijadufuo ijiege rei.  
\v 12 Ro Sera fune ma maki none ijadufuo maeje fu asoe none ijadufuo kabae. Rove asie nuvuone bu binobino ijadufuo na ijene abei.  
\v 13 Ijadufuo mazani ije Godi fu kiemo na asoe none ijadufuo are ije arena aesakae binobino ijia na fija ruaeva ijia fu nane ijiege kuarae, Ane ma na oetuakuma ebe fu noefuo kuakuma ni kuako fu maki noneno kuano kuae.   
\p
\v 14 Eburame fu ijiege kuaramoga kini Abimereki fu ijia uri Sera mesiri una Eburame nujajae. Areme fune kuke uri mave sifikina mave-kaukina e moni baki imenoejo ije gue kena Eburame vajae.  
\v 15 Areme fune uri Eburame kuae, Aesakae foteke ije fune none. Ijadufuo ni koro a izia fikiro vierafekuma ni va ijia fino kuae.   
\p
\v 16 Areme fu una Sera kuae, Maki one ije na ire siriva ma uruvana (1000) ije vajake ijadufuo maeje noka one isema rei. Ro kuke no ijiege vajaga e boeje bu vierafero aja isema rema bakiro bu ijiege vierafekono kuae.   
\p
\v 17-18 Ro Kini Abimereki fune vame ise ije Serado rei ijadufuo E Ireobo fune kini ijadufuo bara ro e fuone imejo ijiebuo bara ije bijukuriamoga bu naebe una ame tuanae. Ijadufuo Eburame fune una Kini Abimerekikiro e fuone boeje ijiebuo baname isoe. Fu baname isoekina Godi fu una Abimereki ifejaga irufui ijia namo ije fu una bakireke kinido bara ijiakina e fuone imevo ijiebuo bara ije bu una ame tuanadufuo.   
\c 21  
\s1 Aeseki bu bieteva ijene  
\p
\v 1-3 Ijiege rena Eburame fune eorema ijia E Ireobo fune izege fu kuaema ijiege rena Sera daro mamoga fu e fudiena ame fari be bietei. Ro Sera ame ije fu bietema ije fune maza ije Godi fu kuaema ijia bietei. Areme Eburame fu ame ije abe ive ina Aeseki kuae.  
\v 4-5 Ro maza ije Aeseki bu bieteva ije Eburamedo juaevasia ije fune uvani aderedi (100) ijiege furi. Ijadufuo fune mu eiti (8) ijiege furikoga Eburame fune izege Godi fu kuaraema ijiege rena uri ame ijene abe surive kanaufuijae.  
\v 6 Ro Sera fu kuae, Godi fu na ifejiema ijadufuo naka oemareve. Ijadufuo e uruvana bu fiega nane barasire rove na una ame bieteva bu ije fiekuva buka naena kikono kuae.  
\v 7 Areme Sera fu kuke kuae, No Eburameki none eoradue rove na uria ame fari bietena abe muije vajavo ijadufuo e bu ije fiekuva buka oeseradiakono kuae.  
\v 8 Areme ame ije fune ubaerena mui atomoga Eburame fu fuefuo iro ma ireobo be i.   
\s1 Egakiro Isimaero bu kiavo bu urina vaeva ijene  
\p
\v 9-10 Areme maza be Sera fu fina gake Ega bara Ijifitiko ijadufuo fari e Isimaero fu uri Aeseki dabe varaemekinu kisamoga Sera fu urina Eburame kuae, Ni bara Ega nuvuefuo imeno ijiakiro fari fuone ije kiaga bu vane. Na bara ijadufuo fari ije fu ire one boeje Aeseki fu kedufuo ije gue kedufuo ije naka isediemono kuae.  
\v 11 Rove e Isimaero fudua fu Eburamedo fari ijadufuo Sera fu vua ije Eburame kuaramoga fu fiemo fuka ireobo oefiae.  
\v 12 Rove Godi fu una Eburame kuae, Ade fari one Isimaerokiro bara Ega ije ireobo vierafekiro nime irere Sera fu kuamo ijiege rene. Ijadufuo maeje na Aesekido duvado ijia uifari one na vajako kuaeva ijene vajake.  
\v 13 Ro Ega bara ije joefuo imeno ijadufuo fari fuone ije fu uria fari one. Ijadufuo na uria ifejaga uifari fuone buka e uruvana rena aesakae be bure abena karikono kuae.   
\p
\v 14 Areme nituame suoke Eburame fune urina irekina kamui ije fanu surive ijia saguiva bu do jiavo ije be abe Ega mae. Areme Aburame fune fari fuone kuamoga fune bara Egaki bune vae. Bara Ega fune vakuma are Biasiba aesao ijia totenamina oenoe.  
\v 15-16 Fu ijia oenoeko do boeje fuka furinoga fune fari fuone mesiri tarare titume ijia nujana fune va mumabo gafia fuebe fi. Fu fina vierafeba urina fue kuae, Fari none fu baronekuma naka izege oemarekinu igia fikuva bakino kuaena fune ijia zinuevena fi nimene.  
\v 17-18 Ijiege rena ame ije fune ijia fina nimenoga Godi fu fie. Ijadufuo Godido anera fu saove gufia Ega vua kuarana kumei, Ega a irerefuo oefiane abene. Ade jumemo ijadufuo maeje Godi fu fari ije fu nimeno ije fune fie. Ijadufuo a fino ije arekiro uri va mesirina ifejaga fu nitene. Na vierafe ame ije na daro mana ifejaga uifari fuone buka ma e uruvana rena aesakae be karikono kuae.  
\v 19 Areme Godi fune Ega ni fuone nafaejaemo fu do ije bu mako guove ijia jiavo ijene gae. Areme fu va kamui fanu surive ijia amaeriva ijene abena do jiamo fu iritoejemo fu abena fari fuone ijae.  
\v 20 Areme ame ije fune are sao Ferani ijia finoeko Godi fu samuako fu ubaerena uri e sume mukore bijamo ije rei.  
\v 21 Areme asie fuone fune uri fuefuo bara Ijifitiko be gana abe mae.   
\s1 Eburamekiro Abimereki bu vua kuaena avenamiva ijene  
\p
\v 22 Areme maza ijia Abimerekikiro Faekoro e bijaevo ijiebuo e ireobo bu vakuma Eburame fino ijia usiaena kuae, Ire boeje a rerenoeno ije fune Godire kuarako a ijia renoene.  
\v 23 Ijadufuo nika Godido nidua ijia akae be nijana kuaekina a naebe na ro anafa none ro uifari none ije biesiruodufuo. Na aeje naka ma rejavo ijadufuo aduaku nika na ro e none igia kariva ige no marejuono kuae.  
\v 24 Areme Eburame fu kuae, Ke ije na vierafe na ijiege rekono kiae.   
\p
\v 25 Areme Eburame fune uri do ije bu mako ijia jiavo ije e Abimerekido imevo ije bu iraraena abeva ijadufuo vafaena uri Abimereki vua kuarae.  
\v 26 Fu ijiege kuaramoga Abimereki fu kuae, Na e ije erare rema ije naka naebe gae. A vua ije a naebe migegire nijasie ro ige a ivia amure kuariega na fievono kuae.   
\p
\v 27 Areme Eburame fu mave kiro kau ije gue kena Abimereki vajae areme e inokiro ije bune ijia vua kuae avenamina abe marei.  
\v 28 Eburame fu ijiege re areme uri mave-sifi fu saema ijadufuo ame irave seveni atana irigi uniae.  
\v 29 Fu ijiege atana uniamoga Abimereki fu urina kuae, A mave-sifi ame seveni gare a kena be uniaema ije a irerefuo ijiege remo ni maeje kuarie na fieno kuae.  
\v 30 Ro Eburame fu kuae, A nime mave-sifi ame seveni ije kene. A mave-sifi ame ige oemarekinu kemo ijia na vierafero mako ige fu nonero na ijiege vierafekono kuae.  
\v 31 Ijadufuo are ije bu e inokiro ijiebe ijiege reva ijadufuo bu ive ina Biasibano kuae. Ijadufuo maeje e inokiro bu ijia vua bue kuae avenamina abe mareva ijene.   
\p
\v 32 Ijiege rena Eburamekiro Abimereki bune are Biasiba ijia vua kuae mare areme rade e Abimerekikiro Faekoro bune una ae sakae Firisitia ijia vae.  
\v 33-34 Areme Eburame fune uri ine tamarisiki ije abena Biasiba ijia o areme uri E Ireobo Godi ijia fivako ijene fuone baname isoena aroe. Areme Eburame fune are Firisitia ijia ka maza jiamadogo fivae.   
\c 22  
\s1 Godi fu e Eburame izege fu irinamo ije biesirigaema ijene  
\p
\v 1 Areme rade maza be Godi fu Eburame izege fu irinamo ijene biesiri gakiro vierafei. Ijadufuo Godi fu urina kume, Eburameno kumenoga fu una gue onukuana kumei, Na igifurekino kumei.  
\v 2 Areme Godi fu kume, Urina Aeseki fari one ka besu a ma ireobo oetuamo ijene mesirina uri are Moraea ijia vane. A ijia vaga na uruo be nijasaga a ijia fari one ije abe kanana na zinone ifaejieno kumei.   
\p
\v 3 Ijadufuo nituame suoke mugamia Eburame fune urina sinuome fuone ro miane fu zinone ifaejedufuo ije bino atama areme karina fanuve doniki ado ijia nana ivia kiriae. Areme fune uri e fuone imejo inokiro ro mave doniki ro fari fuone Aeseki ije kaenamiana bune are ije Godi fu kuaema ijia vae.  
\v 4 Bune vakuma mu inokubeke furikoga fu ijia uruo ije Godi fu kuaema ijene gae.  
\v 5 Areme fune una e fuone imejo inokiro ije kiae, Jani fanu doniki ijena igia karike na ame igiaki no va gafia Godi aroena baname isoe areme una rono kiae.   
\p
\v 6-7 Areme Eburame fune miane fu zinone ifaejedufuo ije karina Aeseki vajamo fu karikoga fuje fu miane ijiakiro sime iseke ije kena bune vae. Bune buosiki uruo ijia ajia vako ijia Aeseki fu uri Eburame kuae, Ate, miane no zinone ifaejedufuo ije none igi karina ruove. Rove mave-ame ije no zinone ifaejedufuo ije izieburekino kuae?  
\v 8-9 Fu ijiege kuaramoga Eburame fu kuae, Farino, mave-ame ije no zinone ifaejedufuo ije fu Godire korufuo muokono kuae. Areme bune vakuma are ije Godi fu kuaema ijia usiae. Bu va ijia usiae areme Eburame fune uri fata zinone ifaejedufuo ije mune ijia kari nana amaerima areme uri miane ije karina fata ado ijia nae. Fune ijiege re areme fune uri fari fuone Aeseki farena toma areme dabena miane ado ijia nijae.   
\p
\v 10-12 Areme fune uri sime abena Aeseki bijakuvenoga Godido anera ije fu saroruba saove ijia kumei, Eburame, Eburame, arene! A fari one ije ade kana ro ire be fuone remo. Ijadufuo maeje iviama na gaga aka Godi mukoreigia aguaekinu irinamo ijadufuo a fari one besu a ireobo oetuamo ije aka uria oemarekinu abe na miekiro vierafemano kumei.  
\v 13 Areme Eburame fu dakude gake mave-kumate ijadufuo nigofo muane ijare kaesa tarare ijia kena saguma manino fu gae. Ijadufuo fune va mave-ije farena dabe una ro kekena ijare abena Godi zinone ifaejegaro fari fuone fu ijare arei.  
\v 14 Ijadufuo Eburame fu are ije ive ina kuae, E Ireobo Korufuo Vajuokono kuae. Ijadufuo iviama are ije bu kua, E Ireobo ijadufuo uruo ijia fu vajuokono kuavo.   
\p
\v 15-17 Areme E Ireobo ijadufuo anera ije fu saove ijia una kuke Eburame kumei, E Ireobo fu kuae, Aka na iriniema ijadufuo a fari one a ma ireobo oetuamo ije abe kanana na zinone ifaejiekiro naebe abe rui. Ijadufuo na ive none ijia kuranamina kuaedo nare daro ka ireobo maga uifari one buka ire zuvi saove gufia ireva ro kuke davare ajare game fu zaraema ijiege buka e uruvana reke. Ro kuke bure e ani buone ije iraraena kaniana aesakae ro sidove buone ije keke.  
\v 18 Ro kuke aka na iriniema ijadufuo na uifari one ijiebuo duvado ijia nare e aesakae binobino ijia kariva ije marejiakono kuae.  
\v 19 Areme Eburamekiro fari fuone ije bune una ari vakuma e fuone imejo ije kariva ijia usiae. Areme fune bu kaenamiana bune besu una are Biasiba ijia vae. Areme Eburame fune Biasiba ijia maza sibaneke ijia finoe.   
\s1 E Neodo anafa fu tuanaema ijene  
\p
\v 20-24 Eburame fu ijia fino ijia rade maza be bu ebe iviene fuone e Neodo bara Miruka ame eiti (8) fu tuanaema ijene kuarae. Ro ame ijiebuo ive ijeja boga ije e Uzi ro uviarafa fuone ije e Buzikina Kemuero e Aramedo asoe ijene. Ro e Kesetikina e Ezokina Firudasikina e Jidirafiki e Betuero bara Ribekado asoe ijene. Eburamedo uvia e Neodo bara Miruka fu ame uije eti (8) ijiege tuanae. Ro e Neo fu una bara Ruma bara ije fu fuefuo imeno ijiaki naenoga fu ame bino duaku tuanae. Ro ame amure ije Teba ro be ije Garami ro be ije e Tarasi ro iviene ije e Maka ijene tuanae.   
\c 23  
\s1 Sera fu baronema ijene  
\p
\v 1-2 Ijiege rena Sera fune juaevasia uvani aderedi tuaedi seveni (127) ijiege fi vakuma areme fune are Eburoni aesakae Kenane guove ijia baronemoga Eburame fu urina fuefuo sisimei.  
\v 3-4 Eburame fu sisimena areme Serado surive fu ijia nakoga fu vakuma e Itaeteko kariva ijia kekena kiae, Naeje na e aebeko na igia jaena fivo. Ijadufuo ni jare sakae be kiega na fuaevena bara none ijadufuo surive abe ijia mako runo kiae.  
\v 5-6 Eburame fu ijiege kuariamoga e Itaetiko bu una gue kuae, E ireobo no ige kuarako ni fiene. Aeje aka e anuigi be a noena igia fino ijadufuo bara one ijadufuo surive ije abena mako nuvuone maeje no ruiva ijia nujane. No vierafe no oe marekinu mako nuvuone ije be kuaga a bara one ije abe ijia nujakono kuae.   
\p
\v 7-8 E Itaetiko bu ijiege kuaravoga Eburame fune uri bu kurituakafia areme uri kiae, Ja vierafega jane oemaredo na bara none abe igia mako rukuva nine ja isekie Efironi e Zorado fari ije kuagafo.  
\v 9 Ja kua fu sakae fuone ubine ijia munie Makeferano kuavo ije kiega na fuaevefo. Ja kuaga fu izege vierafekuma fu iviama e boeje nidua jone igia moni foteke izege fu vierafema ijene kiega na fuaevefo. Na ijiege fuaevena abe none rekina na e none oekuva na kena ijia uniano kiae.   
\p
\v 10 Ro e Efironi e Itaetiko fu sidove viene ije e boeje bu besu afuina vua kuaevo fu ijia fina vua fieme.  
\v 11 E boeje bu karina fievo ijia e Efironi fu urina e Eburame kuae, Na aesakae ao none ije ro mako ije dua na a vajake. Na e none ige bu afuiva nidua buone ijia na sakae ao ijene abe a maga a bara one ijadufuo surive abe munie ijia nujakono kuae.  
\v 12-13 Rove Eburame fu vierafero are e boeje bu fiero fu uri e Itaetiko ijene kurituakafia areme una e Efironi kuae, A isekie ni vua ige na kuarakuvejo ige mukoe fiene. Sakae ao ije a kiemo ije nane fuaeveke. Ijadufuo ni moni izege na vajavo ije nime oemarekinu abeke na bara none ijadufuo surive ije abe ijia mako runo kuae.  
\v 14-15 Eburame fu ijiege kuaramoga e Efironi fu una gue kuae, E ireobo igia fiene. Sakae ao ijadufuo moni ijeja fo aderedi siruva ijiaru. Ro ije a vierafega fune marejoga ni bara one ijadufuo surive abe ijia mako runo kuae.   
\p
\v 16 Ijadufuo Eburame fune siruva fo aderedi ije e Efironi fu e boeje ijiebuo nidua ijia kuaema ijene kanafuina amaeri. Fu siruva ije kena izege e bisinisi bu sinuome sikere revo ijiege sikere giakinu amaeri.  
\v 17-18 Ijadufuo vua ige ijeja izege e Efironi fu sakae fuone ije Makefera are Mamure ivuake ijia namo ijene abe una Eburame mamo fu abe una fuone rema ijene. E Efironi fu sakae ao ijiakina mako ro ine ije fu vakuma izia irima ije foteke fu kena Eburame vajae. Efironi fu ire boeje ijene kena e Itaetiko boeje bu sidove viene ijia afuina vua kuaevo ijiebuo niome ijia kena una Eburame vajae.   
\p
\v 19 Ijiege rena Eburame fune uri bara fuone Serado surive abena aesakae Kenani guove munie Makefera ijia nujae.  
\v 20 Ijadufuo e Itaetiko ijiebuo aesakae ao ijiakiro munie ije sakae ijia namo ije fune una Eburamedo remoga fu abe una e uniadufuo amaeri.   
\c 24  
\s1 Izege e Aeseki fu bara fuone abema ijene  
\p
\v 1 E Eburame fune eore rove E Ireobo fuka uria ire binobino fu renoeno ijia daro makinu marejamo.  
\v 2 Ijadufuo Eburame fu maza be uri e be isuibe fuefuo imeno fu ire boeje Eburamedo are ijia naovo ije samuagiamo ijene kuae, Anika oge none igia faradiena kieko na vua one a kuariemo ije naka rekono kiega na fiene.  
\v 3 Na vierafe aka Godi E Ireobo sakae igiakiro saove gufadufuo ive ijia kurana kiega na fiene. Ni a kie a fari none igadufuo bara ije a naebe e aesakae Kenani igia kariva ijia rereke.  
\v 4 Ro aka va aesakae na nafieva ijia uviarafa none ijia kariva ijiebuo uve ijia fari none ijadufuo bara rerekono kiega na fieno kuae.   
\p
\v 5 Ro e fuone imeno ije fu una gue kuae, Ro na va barafuo kiaga bara be fu naebe are fuone ije arena uri aesakae igia ruakiro vierafekuma na izege reke? Nabe fari one ije kuaga fure una aesakae one ijia vakono kuae?  
\v 6 Fu ijiege kuaramoga Eburame fu una kuae, A fari none ade kuaga fu una aesakae none gamia vako.  
\v 7 Naeje fune E Ireobo Godi saove gufe samuamo ijare mesiriena igia ruae. Na uri igia ruaga asoe none ijadufuo are ijiakiro uviarafa none ijiebuo aesakae ije nane ijia arena ruae. Ro fune ma vierafe fu aesakae ige abena una uifari none ije miakono kie. Ijadufuo E Ireobo fu anera fuone ije kuaga fu ude vake. Fure va vame one ijene amaeri fu marega a bara gamia rerena mesiri una ro fari none nujaejake.  
\v 8 Ro bara kabaekua be fu naebe oemarekinu osiki ruakiro vierafekuma ijare vua ige a kie na rekono kiema ije ame totena ijareke. Ro vame fu iserekuma ade fari none kuaga fu una aesakae none ijia vakono kuae.  
\v 9 Ijadufuo e Eburamedo imeno ije fune uri e fuone ireobo ijadufuo oge ijia farei. Fu ijia farena Eburame kuae, Na vierafe na a kuariemo ijiege rekono kuae.   
\p
\v 10 E Eburamedo imeno ije fune ijiege rena uri e ireobo fuone ijadufuo fanu kamero umui guegue kena uri sinuome maeje gue kena ijia nama areme fune vae. Areme fune vakuma sidove e Neo fu finoema are Mesefotemia una ikene ijia vae.  
\v 11 Fune vakuma sidove ivuake irifo do bu mako ijia jiavo ijia kekei. Areme fune fanu kamero fuone ijene ijia unia bu naoko fu ijia fine. Ro maza ije fune ve jiaema bara bune do jiake ruadufuo ijia fu ijia fine.   
\p
\v 12 Ijiege rena e Eburamedo imeno ije fune urina baname isoe. Fu kuae, E ireobo none ijadufuo Godi E Ireobo nine vua ije a ude e ireobo none ijiaki kuaema ije vierafene. A ije vierafena ifejiega vua irere na ruaeva ije fuka marene.  
\v 13 Iviama nane do ige bara sidove gufia karivo bu ro jiadufuo igia manive.  
\v 14 Bara ije bu roga na bara be kuako, A isekie sukore one a do jiaema ijia do jia mie na ino kuake. Na ijiege kuaga fu kieko, Do ije igifurekino ike na bino jiana fanu kamero one ije vajiano kieke. Fu ijiege kuariemo ijia na vierafero bara ije are Aeseki e oefuo imeno fu abedufuo a vierafema ijene ro na ijiege vierafene. Na ire ije fu iviama rekuma na vierafero vua izege a e ireobo none kuaraema ije fune riaremaro na ijiege vierafeno kuae.   
\p
\v 15 E ije Eburamedo imeno ije fune baname ijiege isoema furikuveno ijia bara Ribeka fune sukore fuone abena ijia kekei. Ro bara Ribeka fu e Betuerodo kabae ro fu e Eburamedo uvia e Neodo fari. Ro e Neodo bara ije Miruka.  
\v 16-17 Rebeka fu bara kabaekua fu baruna naeno baki ro kuke fuka bara ni mukore. Bara ije fune kekena va sukore fuone abe do jiana una vakiro romoga e ije fune kekena bie. Fu biena kuae, Bara gure a isekie, sukore one ijia do be jia miega na ino kuae.  
\v 18 Fu ijiege kuamoga bara ije fune sukore do fu jiaema ijene abe nijakoga fu do ijia i.  
\v 19 E ije fune do ina furinoga bara ije fu uri kuae, Ni manike na do jiana kamero one ijene vajiaga bu ino kuae.  
\v 20 Areme fune migegire do fu jiaema ijene dabe ire ije bu do jia usiaga fanu bu ivo ijia usiae. Areme fune una mako ijia do jiakiro vae. Fu ijiege rekinu do jiana kamero boeje ruoriama furi.   
\p
\v 21 Bara ije fu ijiege rekoga e ije fu mauike manina bara ije veri arega fu bara ije E Ireobo fu vierafe fu biekiro vierafema ijene ro fu bara bega fu ije gakiro vierafe.  
\v 22 Ro bara ije fune do jiana kamero boeje ruoriama furinoga e ije fu ijia gana vierafega bara ije fu bara maeje E Ireobo fu vierafema ijene. Ijadufuo fune uri muki bu gorodi ijia amaeriva bu moni ireobo fuaevejo ijene abena bara Rebeka mae. Areme fune uri madare farane navo inokiro bu gorodi ijia amaeriva ije karana vajae.   
\p
\v 23 E ije fu ijiege rei areme uri kuae, A isekie ni asoe one kua na fiene. Ro are one ije fube manido na e none ijena muge igiaru ijia naekono kuae.  
\v 24 Areme bara ije fu una kuae, Na asoe none ive ije e Betuero. Ro fuje fu e Neokiro bara Miruka ijiebuo fari.  
\v 25 Ro asoe none ijadufuo are fu manido ja va ijia naoke. Ro kuke fanu kamero ijiebuo ire bu ivo ije are nuvuone ijia buka ma uruvanano kuae.   
\p
\v 26 Areme e ije fune uri ijia auge sana E Ireobo dabe aroena baname isoe.  
\v 27 Fu baname isoena ijiege kuae, Naka e ireobo none ijadufuo Godi E Ireobo ijadufuo oemareve. Fu e ireobo none fu maza boeje ifejamo ije fuka naebe totei. Ijadufuo E Ireobo funeka mesirie ruoma e ireobo none ijadufuo agane ije kariva ijia kekemano kuae.  
\v 28 Areme bara ije fune una difurina asie fuone ijadufuo are ijia kekena vua boeje izege fu rema ijene kuarae.   
\p
\v 29-30 Ro bara Ribekado maki fuone ije ive fuone Rebani. Ijadufuo Rebani fu uri Ribekado udo muki fu akoema ijiakiro madare farane fu naema ijene giae. Fu ije giae ro kuke fu vua ije e gafe fu Ribeka kuaraema ijene fiena fune kekei. Fune kekena difuri vakuma e gafe fu mako do game kamero bu irifo ijia naoko fu manino ijia kekei.  
\v 31 Areme fune e Eburamedo imeno ijene kuae, Kaeno, E Ireobo fune a marejana ifejae. Ijadufuo a manino arekiro no nobiki vako rone. Are a nae ro kuke kamero one bu naodufuo ije fu manido a ijia naekono kuae.   
\p
\v 32 Areme e Eburamedo imeno ijiakiro e fuone fuina vaeva ije bune are ijia aru vakoga e Rebanido imeno ije fune uri fanu kamero ije dokina ire ije kamero bu ivo ijene vajiae. Areme fune kuke uri do e ije bu dia sodufuo ijene jiana abe ijia nijaejiae.  
\v 33 Ijiege rena bune ire ikuvejo ijia e Eburamedo imeno ije fu kiae, Na vierafe na sone ire idufuo ro iviama na vierafe naka vua na ruaeva ijene kuariana oedasu areme na ijare ire ikono kiae. Fu ijiege kuariamoga Rebani fu kuae, Ke ni vua a vierafema ije kuae na fieno kuae.   
\p
\v 34-35 Ijadufuo e ije Eburamedo imeno fu uri kiae, Naeje na e Eburamedo imejo beno kiana fune ijia uri zinuivena fu vaema ijene kuariae. Fu kia, Na e ireobo none ije fune E Ireobo ijare daro ma ireobo mae. Ijadufuo fuka sinuome zarae ro kuke fu fanu mave-ro goti ro fanu kamero ijiakina doniki ije vajae. Ro kuke fuka ire gorodikina sirivakina e fari ro bara fuone imejo ije vajae.  
\v 36 Ro kuke e ireobo none ijadufuo bara Sera fune barasire rove fu ame fari bietemoga e ireobo none fu sinuome fuone boeje fu samuagiamo ije kena una fari fuone ije vajae.  
\v 37 Na e none ireobo ije fu kiemoga na E Ireobo kuraedo vua irere fu kuariema ije na irinana reke. Fu kie, A fari none ijadufuo bara ije rerekuma ade are Keinani guove ijia reremono kiae.  
\v 38 Ro ni va asoe none ro agane none ijiebuo are ijia bara fuefuo rereno kie.  
\v 39 Fu ijiege kiemoga na una e ireobo none kuae, Ro bara ije fu naebe nosiki ruakiro vierafekuma na izege rekono kuae?  
\v 40 Na ijiege kuaravoga e Eburame fu una ijiege kuarie, E Ireobo none ije na maza boeje irinavo ijare anera fuone kuaga fu obiki vake. Fure ifejana vame samadirejaga a bara migegire bieke. Ro fure ifejaga a e none ro asoe none ijadufuo agane ijia bara fuefuo rerena mesiri nujaejake.  
\v 41 Ro a va agane none giaga bu bara be naebe kuakuva ijare a vua ije a nosiki kuaena marema ije nime totena ijaredufuo.   
\p
\v 42 Ijadufuo na ro mako ije bu do jiavo ijia keke manina mauike oe none ijia baname isoe. Na baname isoena kua, Eburame e ireobo none ijadufuo Godi E Ireobo ni iviama ifejiena irere na rekiro ruaeva ije abena samadirejiene.  
\v 43 Iviama nane mako ige bu do jiavo igi manive. Ro bara nikaki be fu sukore fuone abe do jiakiro roga na kuaga fu sukore fuone ijia do jia miega na ike.  
\v 44 Ro bara ije fu oemarenaro fanu kamero none ijiebuo do jia vajiakuma na vierafero bara ije Godi are e none ireobo ijadufuo fari ijadufuo vierafema ijero na ijiege vierafeno kuae.  
\v 45 Nane baname ijiege isoema furimo ijia na gake bara Ribeka fu sukore fuone abe mako ijia do ijiakiro vuako na gae. Na gana uri kuae, Aesekie ni do be jiana miega na ino kuae.  
\v 46 Na ijiege kuavoga bara ije fune saroruba uri sukore fuone abena ume ijia nijae. Areme fune kie, Do ije ijifurekino ni jia ike na fanu kamero one ijiebuo do jiana vajiamo kie. Areme nane do jia ikoga fune kamero ijiebuo do ijiana vajiako bu i.   
\p
\v 47 Areme na urina kua, Asoe one ije erano kuavoga fu kie, Asoe none ije e Betero fu e Neokiro bara Miruka ijiebuo farino kie. Fu ijiege kuariemoga na uri muki abe udo ijia akoza areme uri madane farane ije naejae.  
\v 48 Na ijiege re areme uri ijia auge sana E Ireobo baname isoe kuae, Naka e ireobo none Aburamedo Godi E Ireobo ijene ireobo oemareve. Ijadufuo maeje aka na mesirie urari ruoma e none ireobo ijadufuo agane ije bie. A mesirie romoga nane uvia fuone ijadufuo asae fuone kabae ijene e none ireobo ijadufuo fari fu abedufuo ijene gae.  
\v 49 Ijadufuo a vierafega a e ireobo none ijene vame maeje fuone rena kabae one ije abe fari fuone ije makuma ni a isekie nine ijiege kuarie na fiene. Ro a bakuma ni bano kiega na una vame be vierafegano kuae.   
\p
\v 50 Areme Rebanikiro Beturero bu una gue kuae, Vua ige fune ma E Ireobo Godi ijadufuo vierafe ijia a ruaejoga no vierafe no una vua irere kuaekuva baki.  
\v 51 Ijadufuo Ribeka fu guaraejifurekino ni mesiri vaga fu izege E Ireobo Godi fu kuaema ijiege fu e ireobo one ijadufuo fari ije manino kuae.  
\v 52 Rebanikiro Betuero bu ijiege kuaravoga e ije Eburamedo imeno fu vua ije fiemo fuka oeseremo fu uri ijia auge sana Godi baname isoena oemarejae.  
\v 53 Areme fu uri uniae tamae ije gorodi ijia amaeriva bu uro kiriavo ijiakina ire siriva ro sinuome fu sadufuo ije bino karana ke Ribeka vajae. Areme fune kuke uri ire bino bu moni mamekanu fuaevejo ije karana ke maki fuone ijiakiro asie fuone ije vajiae.   
\p
\v 54 Areme e Eburamedo imeno ijiakiro e gue ije fuina vaeva ije bune ire ikinu do ina areme bune ijia naoe. Areme nituame suoke bune urivoga e Eburamedo imeno ije fu uri kiae, Na vierafe nane ivia una e none e ireobo fino ijia vakiro vierafevano kiae.  
\v 55 Rove bara Ribekado maki ijiakiro asie fuone ije bu uri kuae, Ije fune mare ro ni areke fu fura besu ro ba inokiro (10) ijiege noena finaro nine sone ijare vano kuae.  
\v 56 Rove e ije fuka uri kiae, Jabe no vafievo. Ijadufuo maeje na ige na ruaeva ije fune E Ireobo Godi ijare irufui none ijene ifejie. Ijadufuo na vierafe nane migegire una e none ireobo ije fino ijia vakono kiae.  
\v 57 Fu ijiege kuariamoga bu kuae, Ke ni areke no kabae nuvuone kumega fu ro vua irere fu vierafema ije kuaruoga no fieno kuae.  
\v 58 Areme bune Ribeka kumevoga fu romo bu kuae, Abe oemaredo a e igiaki vakono kuavoga fu kiae, Ke na vierafe na fuosiki vakono kiae.   
\p
\v 59-60 Ijadufuo bune uri Ribekakiro e fuefuo imeno ije kiavoga bu uri e Eburamedo imeno ijiakiro e ije bu fuina ruaeva ijena vakuvejoga bune uri fu daro mana baname ijiege isoe, No vierafe anafa one a tua namo ijiebuo uije ije buka ma uruvana ajare e bu davo baki ijiege reke. Ro kuke bure e ani buone ije iraraena kaniakuriana sidove buone ije kekono kuae.  
\v 61 Ribekakiro bara kabaekua fuone gue bune uri sinuome buone kari fanu kamero ijadufuo ado ijia nama areme bune uri e Eburamedo imeno ijena vakuae bune vae.   
\p
\v 62 Ro Aeseki fune ruoma ae sao ijia do be bu ruiva bu kua, E ni uria fino fu na giemono kuavo ijia finoene. Ro are ije fu una Kenani ikene ijia.  
\v 63 Ijiege rena Aeseki fune maza be ve nakisirema ijia va oenoeno ijia fu gake fanu kamero bino bu rovo fu giae.  
\v 64 Ro Ribeka fu vakuma Aeseki gana uri fanu kamero ado fu fino ijia umakoena ari.  
\v 65 Fu arina e ije Eburamedo imeno ije kuae, A vierafega e gafe ruomo ije erareno kuae? Fu ijiege kuaramoga e ije fu una kuae, E ije fu e ireobo none ijadufuo fari ijareno kuamoga Ribeka fu uri ugone fuone abe ni fuone okurae.   
\p
\v 66 Areme bune ruoma Aeseki manimo ijia usiaena e Eburamedo imeno ije fune uri vua irere boeje fu rema ijene Aeseki kuarae.  
\v 67 Fu ijiege kuarama furi areme Aeseki fune uri Ribeka mesirina asie fuone Serado are muvuaka ijia vae. Areme Aeseki fune ijia uri Ribeka abena buosiki besu karinoe. Ro Aeseki fu ude asie fuone baronemoga fuka oe fiaeguma finoe ro rade fu Ribeka abena ireobo oetuaema ijadufuo fu una oemarekinu fi vae.   
\c 25  
\s1 Eburamedo uifari ijene  
\p
\v 1 E Eburame fu una bara bedua ive fuone Ketura ijene abei.  
\v 2 Bara Ketura fu ame umui fague ro dikine besu ijiege tuanae. Ro ive buone ijeja e Zimiranikina e Jokisanikina e Medanikina e Midianikina e Isibakikina e Sua ijene.  
\v 3 Ro e Jokisani fu uri ame Sibakiro Dedani nafei. Ro e Dedanido uifari ijeja e Esuraetikina e Retusaetikina e Reumaeti ijene.  
\v 4 Ro e Mediani fu uri ame umui fague nafei ro ive buone ijeja e Ifakina e Efakina e Anokikina e Abidakina e Erida ijene. Ro ame ije bu bara Keturado uifari ijene.   
\p
\v 5 Areme Eburame fune uri sinuome fuone boeje fu samuagiamo ije kena una fari fuone Aeseki vajamo fu samuagiae.  
\v 6 Ro fu uria fino ijia fu uri ame fari ije bara fuone gue ijiebe nafe vajaeva ijene sinuome vajiama areme kiamo bune uri sakae ije Aeseki fu fino ije arena una uri are maza ajiamo nake ijia vae.   
\s1 E Eburame fu baronema ijene  
\p
\v 7-10 E Eburame fune fi vakuma ma eorena juaevasia uvuvani aderedi seveniti faeve (175) ijiege furikoga fune ijia baronei. Ro fu baronemoga anafa fuone e Aesekikiro Isimero bu vajae surive fuone abena va mako be bu kua Mekeferano kuavo are Mamure ivuake ijia nujae. Ro mako ije bu e Eburamedo agane bu oega bu kena ijia uniavo ijene. Ro ae sakae ije fu e Efironi e Zoado fari e Itaetiko ijadufuo sakae ije Eburame fu fuaevema ijene. Ijadufuo Eburame kiro bara fuone Sera bu oevo bu kena sakae ijia uniae.  
\v 11 Eburame fu baronekoga rade Godi fu fari fuone Aeseki daro mamo fu are be bu kua E Ni Uria Fino Fu Na Giemono kuavo ijia fi.   
\s1 E Isimerodo uifari ijene  
\p
\v 12 Ro suvuare ige fu e Isimerodo kuae. Ro e Isimero fu bara Ijifitiko Egano kuavo fu Serado i meno fu nafena Eburame maema ijene.  
\v 13-15 Ro Isimerodo anafa fu tuanaema ijiebuo ive ije ijiege. Ro fari amure e Nebaeotikina e Kedakina e Adebirikina e Mibisamikina e Misimakina e Dumakina e Masa ijene. Ro ame gue ijiebuo ive ijeja e Edatikina e Temakina e Jeturukina e Nafisikina e Kedema ijene.  
\v 16 Ro ive ije ige bu e Isimerodo farirafa tuero (12) ijiebuo ive ijene. Ro ive buone bu i miaeva ije bu sidove buone ijiakiro are muvuaka bu sana karinoevo ije nabuikaramiaeva ijene.  
\v 17 Ro Isimero fu fi vakuma juaevasia uvuvani aderedi teti seveni (137) ijiege furimo fune baronei.  
\v 18 Ijiege rena Isimero fu baroneko rade uifari fuone bu urina are ijia kafare be Avirakiro Seno kiavo ukua ijia kari. Ro are ije fu Ijifiti ivuake ijia ro kuke fu are maza ajiamo nake vame bu are Asiria vako ivuake ijia. E Isimerodo uifari ije bu Eburamedo agane ije uniana va buebino karinoe.   
\s1 Jekafukiro Iso ijiebuo suvuare ijene  
\p
\v 19-20 Ro vua ige fu e Eburamedo fari e Aesekido suvuare. Aeseki fu fi vakuma juaevasia foti (40) ijiege furinoga fu uri bara fuone Ribeka abei. Ro Ribeka fu e Betuerodo kabae ro fu e Rebanido maki ijene. (Ro e Betuerokiro Rebani bu e Aramiako bu aesakae Mesofotemia ijia ruae.)   
\p
\v 21 Bara Ribeka fu ame bino naebe nafekoga fune juaevasia tuaedi (20) ijiege furi. Ijadufuo Aeseki fu uri fuefuo E Ireobo baname isoe. Fu baname isoemoga E Ireobo fu baname fuone ije fiena ifejamoga Ribeka fu e fudie.  
\v 22 Ro ame fu fudiema ije fu ufariki ijadufuo ame inokiro bu devatua fuone ijia bue nigaraevo fu fie. Ijadufuo Ribeka fu una fue kuaemo, Ire ije fu irerefuo ijiege none remono kuae. Ijadufuo fune va Godido baname isoega fu maeje nijaekiro fu ijiege vierafei.  
\v 23 Ijadufuo fune baname isoemoga Godi fu vua ijadufuo maeje Ribeka nijae. Fu nijaena kuae, E mamekanu inokiro bu aesakae inokiro samuadufuo ije bu devatua one ijia kari. Ijadufuo ame ije a nafemo ijiebuo uifari ije bu rade urikuvejo ije bu bue nigaraekinu karike. Ro ame be ije fuka e daroki reke ro be ije fu baki. Ro ame amure ije fu una ame iviene ije fuefuo imekono kuae.   
\p
\v 24-26 Areme maza ije Ribeka fu ame nafedufuo ije romoga fune ame inokiro nafei. Ro ame amure ijadufuo vajae surive fuone fu kavuane ro vajae jau fuone fuka nibe ire ugone igeki. Ijadufuo ive fuone bu Iso kuae. Ro ame be bu bietevo fu ari Isodo dia tare ijia uti fare ijadufuo ive fuone bu Jekafu kuae. Ro Aesekido juaevasia ije fu sigisiti (60) ijiege abema ijia Ribeka fu ame inokiro ije nafei.   
\s1 Iso fu ame amure daro ije bu kevo ije fu abe fuaevema ijene  
\p
\v 27 Ijiege rena ame ino uviaki ije bune besu ubaeradiae. Ro e Iso fuje fu urina e be sume mukoe bijamo rei ijadufuo fu maza boeje fu are ijia dasu fino baki ro fu keke oenoeno. Ro e Jekafu fu ebe mauike are ijiaru fikinu mave-samuagiamo.  
\v 28 Ro e Aeseki fuka fari fuone e Iso ireobo oetuamo. Ijadufuo maeje e Iso fu sume mukoe bijana fanu kania ruoga bu kirana ivo. Rove bara fuone Ribeka fuje fari fuone Jekafu oetuamo.   
\p
\v 29-30 Areme maza be Jekafu fu ire dodoki be kirama fino ijia Iso fu sume bijanoena una vasiakuma ijia keke. Ijadufuo fu uri Jekafu kuae, Naeje naka ireobo vasiorieve. Ijadufuo ire kavuane ije a kiraema ije be afe miega na ino kuae. (E Iso fu ijiege rema ijadufuo i fuone bu kua Idomino kuae.)  
\v 31 Fu ijiege kuamoga Jekafu fu una kua, Ije fune mare rove na vierafe aka daro ije ame amure bu kevo ije a abena una na miekono kiekuma na ije ire ige vajakono kuae.  
\v 32 Ijadufuo Iso fu una gue kuae, Naeje nanaka vasia oriena baronekuvejo ijadufuo daro ije fu irere na ma rejiekuma baki ijadufuo na vierafe naka abena una a makono kuae.   
\p
\v 33 Fu ijiege kuamoga Jekafu fu una kuae, Ije fune mare rove nine iviama akae be nijana kie a daro one a na miekono kiega na fieno kuae. Ijadufuo Iso fune uri Jekafu kuae, Na vierafe na ijiege rekono kuana fune uri daro fuone ije abena una Jekafu mae.  
\v 34 Areme Jekafu fune uri ire burede ijiakiro ire ije fu kiraema ije bino afena Iso vajamo fu ina oemare areme fune vae. Ro vua ige fu izege e Iso fu fari amure daro ije bu abevo ije abe una isekube vierafema ijene.   
\c 26  
\s1 Aeseki fu are Gera ijia fima ijene  
\p
\v 1 Ijiege rekoga vasia be duaku are ijia kekei. Ro vasia ije fu Eburamedo mazani ije fu finoeko fu kekema ijieki. Ijadufuo Aeseki fu una biona are Gera ijia e Firisitaeniko ijiebuo Kini Abimereki fu fino ijia vae.  
\v 2 Fu va ijia finoenoga E Ireobo fu arina Aeseki biena kuae, Ade una gamia Ijifiti vako. Ani sakae ige na kuavo igia fine.  
\v 3 A igia finoene ro naeje nabe a abuozake ro naka maza boeje osiki oenoekinu ifejana daro make. Na vua irere na rekiro Asoe one ije kuaraeva ije nabe areke. Ro naka ire ijene rena are irore ige dabe uifari one ijena ja miake.  
\v 4 Ro kuke na ifejaga uifari one ije buka e ma uruvana ire zuvi saove gufia ireva ijiege rega na aesakae boege abe bu miake. Areme na uifari one ijiebuo duvado ijia na e aesakae boeje igia kariva ije ifejiana daro miake.  
\v 5 Naka a ifejana daro make ijadufuo maeje Eburamere vua boeje na kuaravo ije fuka mukoe iriniekinu ro akae none ije mukoe samuagiaemano kuae.   
\p
\v 6-7 Ijadufuo Aeseki fune are Gera ijia fino ijia e fari ije bu uri bara fuone ijene gana kuarae. Bu kuavoga fu kia, Bara ije fu maki noneno kiae. Ijadufuo maeje Ribeka fuka bara ni mukore ijadufuo fu kiako fu maki nono kiakuma e ijia karivo ije buka kana areme bara fuone ije abekiro fu ijadufuo ijiege kuariae.   
\p
\v 8 Ijiege rena Aeseki fune ijia fivakuma juaevasia sibaneke ijiege furi. Areme maza be Aeseki fu bara fuone Ribeka uimimoga Kini Abimereki fu gire fuone tire bu umateva ijia fina giae.  
\v 9 Areme fune uri kiamoga bune Aeseki mesiri rovoga fu urina kuae, Bara gure fu bara one, rove a irerefuo kuae fu maki nono kuae? Abimereki fu ijiege kuaramoga. Aeseki fu kua, Na vierafero na kiako fu bara nono kiakuva jaka kaniekiro na ijadufuo ijiege kuariaevano kiae.   
\p
\v 10 Fu ijiege kuaramoga Abimireki fu kuae, A vame ije a rema ije a irerefuo ijiege rei? A e none be fu oenoene bara one ije mesiri oenoekuva ise ije aneka koro rei. Ijadufuo maeje are vua kufui kuaema ijadufuo bu ijiege rekono kuae.  
\v 11 Ijadufuo Kini Abimereki fune uri e fari boeje oevisusaejiana kiae, Ja e be jade oenoene e igiakiro bara fuone ije vame ise bino buone revo. Ro ja faememarena ise bino buone rekuva e ije na kia bu kana fu baronekono kiae.   
\p
\v 12 Areme Aeseki fune aesakae ijia juae mena uije oma areme masi. Ro ire ije fu masina kanafuima ije fuka ma uruvana. Fu ire uije sibaneke oe rove fu una kanafui ma ije fuka aderedi (100) asi vae. Ijadufuo maeje E Ireobo fuka fu mukoreigia ifejana daro mae.  
\v 13 Ijadufuo Aeseki maza boeje fuka e anuigi rena uri sinuome zaraezaraeki rena fivae.  
\v 14 Ijadufuo maeje fuka mave-kiro kau ma uruvana sae ro kuke e fuone imevo ije buka ma uruvana. Ijadufuo e Firisitaeniko bu ijene gavo buka naebe oemare ijadufuo buka oe isema fu vierafevo.  
\v 15 Bu ijiege revo ijadufuo bu urina e Eburamedo mako ije fu uria fikoga e fuone imevo bu ruiva bu ijia do jiavo ije buka una afisei.   
\p
\v 16 Ijadufuo Kini Abimereki fu urina Aeseki kuae, Aeje a iviama aneka e daroki rena noeje ane asidue. Ijadufuo ni are ige a fino ije ni arena uri vano kuae.  
\v 17 Ijadufuo Aeseki fune urina are Gera amare ijia are sana maza sibaneke ijia finoe.  
\v 18 Aeseki fu ijia finoekinu mako ije e Firisitaeniko bu afiseva ijene una runa amaeriakinu ive asoe fuone fu ude imiaema ijene una ijiege imiae. Ro mako ije bu e Firisitaeniko ijiebe e Eburame asoe fuone fu iko baroneko bu ijia afikuriaeva ijene.   
\p
\v 19 Areme e Aesekido imevo ije bune uri are Gera amare ijia mako iviaeko be duaku ruma ijia do be gana amaeri.  
\v 20 Bu do ije ruma arevoga e Gerako mave-samuagiavo ije bu usiaena una e Aesekido imevo ijena do ije dabe vafaena madinami. Bu kia, Do ije fu nuvuono kiae. Bu ijiege reva ijadufuo Aeseki do mako ije fu abe ive ina kuae Madinamivano kuae.  
\v 21 Areme e ije Aesekido imevo ije bu una mako be duaku ruma areme ijia do jiavoga bu una kuke ijadufuo vafaena e ijena madinami. Ijadufuo Aeseki fu mako do ijene kake abe ive ina kua Vafaevano kuae.  
\v 22 Ijiege rena Aeseki fune are ije arena una va are be ijia fi areme uri mako be duaku rui. Ro mako ije fu ruima ijare e Gerako ije bu naebe ijia vua bino kuae. Ijadufuo Aeseki fu uri mako do ijene ive ina kua Dazevano kuae. Fu kuae, E Ireobo fune iviama are igeno dazena karinoedufuo ijene no muoe. Ijadufuo no igia karina daro abena ire boeje renoekono kuae.   
\p
\v 23 Ijiege rena Aeseki fune ijia finoena areme fune una urina are Biasiba ijia vae.  
\v 24 Aeseki fu va Biasiba ijia naema E Ireobo fu muge besu ijia ari nakaurana kuae, Naeje na asoe one Eburamedo Godi ijene. Ijadufuo ade jumemo ro naeje nane osiki oenoeve. Nare a daro maga uifari one ije buka ma uruvana zaraeke. Ijadufuo maeje nane ude Eburame e none imeno ijiege ijene ijuina kuaeva ijadufuo na ijiege rekono kuae.   
\p
\v 25 Ijadufuo Aeseki fune uri fata be bu zinone ifaejedufuo ije ufema areme ijia E Ireobo ijene baname isoena aroe. Fu ijiege rena fune are sana ijia finoekoga e fuone imevo ije bune una kuke mako be dua iviaeko do jiadufuo ijene rui.   
\s1 E Aesekikiro Abirimeki bu vua kuaena avenamiva ijene  
\p
\v 26 Areme maza be Kini Abimereki fu Ausati e fuone uguae kuaramo ijiakiro Fikoro e bijaevo ijiebuo e ireobo ijena are Gera ijia urina Aeseki gakuae ruae.  
\v 27 E ije bu ro Aeseki gavoga fu urina kiae, E gure ude jaka naena kai ma reva baki. Jaka na ijuonena rorukurievo na aesakae jone arena uri igia ruae. Ro ja irerefuo una na giekuae ruaevano kiae?  
\v 28-29 Fu ijiege kuariamoga bu urina kuae, No iviama ijare vierafega E Ireobo fuka osiki. Ijadufuo no vierafe noka vua be aena kuaena abe mareke. No vierafe aka iviama samadukua kuaruona kuoko nabe ja kania ro vajae fiane bino vajiakono kuoga no fiene. Ijadufuo maeje no naebe vajae fiane bino a no naebe vajae ro noka marejana kuavoga ame mauike aesakae nuvuone arena uri ruae. Ijadufuo no vierafega fune E Ireobo ijare a daro mana marejaemano kuae.   
\p
\v 30 Bune ijiege kuaema areme Aeseki fune uri ire ka ma ireobo be kanafuima areme bune besu ire ijiakina do ijene i.  
\v 31 Areme nituame suoke e boeje bune urina e Ireobo ive ijia kuarana kuae nobe nuvue ziegafanamikiro noka besu kafae karikono kuaena abe marei. Ijiege rena Aeseki fune uri buina mukoreigia iviene uvia igege ananamima areme bune ijia nujana una aesakae buone ijia vae.   
\p
\v 32-33 Areme ve ijia e ije Aesekido imevo ije bu usiaena mako ije bu do jiadufuo ruiva ijene Aeseki kuarae. Bu kua, No do iviaeko be gaevano kuavoga fu do ije abe ive ina Sibano kuae. Ro Siba ijadufuo maeje ijeja Vua Kuaena Avenami. Ijadufuo iviama sidove ije e bu kua Biasibano kuavo.   
\s1 Isodo bara ae binoko fu abema ijene  
\p
\v 34 Ro e Iso fu fivakuma juaevasia foti (40) ijiege furikoga fu uri bara inokiro aesakae Itaetiko ijene kei. Ro bara be ive fuone ije Jiudi fu e Birido kabae. Ro be ive fuone ije Basemate fu e Eronido kabae.  
\v 35 Bara inokiro ijiebe uri e Aesekikiro bara fuone Rebeka ijiebuo karivo ije buka dabe arafirijiae. Ijadufuo maeje Iso fu bara Itaetiko ije kema ijadufuo bu naebe oemare.   
\c 27  
\s1 Jekafu fu Aesekido daro ije abema ijene  
\p
\v 1-2 Ijiege rena Aeseki fune ma eorena niome fuone fune iserei. Ijadufuo fu uri fari fuone amure e Isodo kiamoga bu mesiri ruae. Bu mesiri romoga asoefuo fu kuae, Farinono kuamoga fu onukuana kuae, Na igifurekino kuae. Areme Aeseki fu kuae, Iviama naeje naneka eoradie ijadufuo maza be na baronedufuo.  
\v 3-4 Ijadufuo ni juvuave one kena va noefuo sume bijana fanuve be kanana abero ire mukore na idufuo ije kirama abe roga na ine. Na ire ije abe ina areme daro none abe una a manaro na baroneno kuae.   
\p
\v 5-6 Aeseki fu vua ijiege Iso kuarako bara fuone Ribeka fu mauike manina vua ije bu kuaevo ije fie. Ijadufuo Iso fune kekena sume bijana vakoga Ribeka fu uri fari fuone iviene e Jekafu vua kuarae. Fu kua, Jekafu farino asoe one fu vua ige uvia one Iso kuaramo na mauike fie.  
\v 7 Fu kuarana kua, Ani va fanuve bino kaniana ro ire mukore be noefuo kirana amaerima miega na ine. Na abe areme na E Ireobo ijadufuo nidua ijia daro none abena una a ma areme rade na barone.  
\v 8 Ijadufuo farino ni mukoreigia vua ige na kuaravo ije fiena ijiege rene.  
\v 9 Ni va mave-goti no samuagiavo ijia ame mukore ubaeradiaeva ijia inokiro kena roga na ire mukore be asoe one fu oemarekinu idufuo ijene amaerina kirane.  
\v 10 Na kiga a abena va asoe one ije maga fu ina areme daro fuone ije a mana rade fu baroneno kuae.   
\p
\v 11 Fu ijiege kuaramoga Jekafu fu una asie fuone kuae, Asieno, uvia none fu vajae jau nae ro naeje nana baki.  
\v 12 Ijadufuo asoe none fu na faradie fiega na biesirivo fu fiekuma na vierafe fube daro mieke. Rove fuka una na kuravajiena vafiekono kuae.  
\v 13 Fu ijiege kuaramoga asie fuone fu kua, Farino fu a kuravajamo ije ni arega ije fu nana na abene. Ro aeje nime va mave-goti na kuaravo ije kena ro vajieno kuae.   
\p
\v 14 Ijadufuo fune va ire ije asie fuone fu kuaraema ije kena ro vajamoga fu kena ire ma mukore Aeseki fu oemarekinu idufuo ijene amaeri.  
\v 15 Areme Ribeka fu urina fari fuone amure e Isodo ugone ni mukore fu are ijia naema ijene kena una ame iviene e Jekafu saejae.  
\v 16 Fu ijiege re areme uri fanuve goti surive ijene kena umui ijiakiro kuri ije okuriaejae.  
\v 17 Areme fune uri ire ma mukore ije fu amaerima ijiakiro burete fu ifaejema ijene kena fari fuone Jekafu vajae.   
\p
\v 18 Fu vajamoga Jekafu fune kena va asoe fuone kuae, Ate asoeno ige abeno kuae. Fu ijiege kuamoga Aeseki fu urina kua, Farinodoe, a e ige a Iso ke a eraneno kuae?  
\v 19 Areme Jekafu fu kuae, Na Iso fari one amure ije nare. Ro ire ije a kiema ije nane kirana abe igifureki ruae. Ijadufuo asoese ni urina fanuve ige na kirana ruaeva ije abe i fu madaga ni daro one ije abe mieno kuae.   
\p
\v 20 Ro Aeseki fu kuae, Farino a ire ije a izege ka migegire kena ruaemono kuae. Ro Jekafu fu biesirina kuae, Na E Ireobo Godi one ijare ifejiemo na kevano kuae.  
\v 21 Fu ijiege kuaramoga Aeseki fu uri Jekafu kuae, Farino, ni biona ivuake igia roga na faradana fiega ane ma Iso ro a erarega na fieno kuae.   
\p
\v 22 Fu ijiege kuaramoga Jekafu fune biona Aeseki fino ivuake ijia vakoga fu fare fie areme kuae, Itire one ige na fiega aka Jekafure kuaemo igeki rove farane one ije na fare fiega fu Isodo farane igekino kuae.  
\v 23-24 Rove Aeseki fu naebe mukoreigia biekudina fie ro fume Jekafudo vajae u ije fare fiero fu Isodo faranero fu ijiege vierafei. Ijadufuo fune oemarena daro makiro vierafeba una kuke kuae, A e ige ane ma Iso areno kuamoga Jekafu fu biesirina kua, Ke ije nane ma Iso nareno kuae.   
\p
\v 25 Areme Aeseki fu kuae, Farino nine ire ije a kena ruaema ije kena roga na ina areme daro none a mano kuae. Fu ijiege kuaramoga Jekafu fune ire ijiakina do vaeni ijene kena asoe fuone ije vajamo fu i.  
\v 26 Areme Aeseki fune uri Jekafu kuae, Farino, ni biona ivuake igia roga na uimidano kuae.  
\v 27 Ijadufuo Jekafu fune biona Aeseki uimimoga fu uri sinuome fu saema udi ije fiena uri daro mae. Fu mana kuae,  
\q1 Fari none ijadufuo udi ije fuka aesakae ije E Ireobo fu daro maema ijieki.   
\q1
\v 28 Ijadufuo Godire saove ijia ve uruvana daga sakae ige fu saruigi rekina uije ma uruvana ro ire vaeni iviaeko buka uruvana tavuake.   
\q1
\v 29 Ro e aesakae gue ijia karivo uruvana bu una oefuo imekinu ro a kurituakafake. Ro are uviarafa one ijiebuo e ireobo rega asie one ijadufuo farirafa ije budua a kurituakafake. Ro erare a kuravajana vafavo ije Godire ve bu kuravajiana vafiake. Ro erare a ifejana daro mamo ije Godire ve daro miana ifejiake.   
\s1 Iso fu Aesekido daro ije abekiro soesoema ijene  
\p
\v 30 Aeseki fu Jekafu daro mamoga fune migegire kekena vakoga uvia fuone Iso fu rade ijia kekei.  
\v 31 Areme fudua fune ire ma mukore be amaerina kirama abe asoe fuone fino ijia ruae. Fu abe kekena kuae, Ate asoeno, ni urina ire ige na oefuo ifaejeva ije abe ina daro one na mieno kuae.   
\p
\v 32 Fu ijiege kuaramoga Aeseki fu kuae, A e gure a erareno kuae? Fu ijiege kuaramoga Iso fu kuae, Na Iso fari one amure ije nareno kuae.   
\p
\v 33 Areme Aeseki fuka ireobo safuikinu uri kua, E ije bite erare fanuve ije kaniana romoga na ina daro none nane abe fu makoga a rade aru ruae? Ijadufuo daro ije nane abe fuone maedo fune maza boeje fuosiki na vadufuo ijadufuo na una izege abekuva baki.   
\p
\v 34 Fu ijiege kuaramoga Iso fu vua ije asoe fuone fu kuaemo ije fiemo fuka ma isei. Ijadufuo fu uri urukeigia vijena nimekinu kuae, Ate asoeno, ni daro ije be duaku na mieno kuae.  
\v 35 Ro Aeseki fu una kuae, Farino daro ije fune uvia one ijare biesiriemoga daro one a abedufuo ije nane abena una fu maevano kuae.   
\p
\v 36 Fu ijiege kuaramoga Iso fu kuae, Ive Jekafu ijadufuo maeje e biesiriamo ro fuje fune ma e ijieki. Ijadufuo maeje ige fu rema ije fu mazani inokiro na ijiege biesirie. Fu ijiege rena daro ame amure bu kevo ije nare abedufuo ije fune fure abei ro ivia fu kuke daro none a miedufuo ijene abejiemano kuae. Fu ijiege uri asoe fuone kuae, Ro a vierafe daro none be fube uria nado a abe na miekono kuae?   
\p
\v 37 Fu ijiege kuaramoga Aeseki fu una kuae, Farinodoe, na daro ije fu e ireobo one redufuo ro e agane fuone boeje bu fuefuo imedufuo ije nane kena fu vajae. Ro kuke nane daro ije fu uije ro ine vaeni uruvana odufuo ije nane kena fu vajae. Ijadufuo farinodoe na ire be na una oefuo redufuo ije fuka ma bakino kuae.  
\v 38 Fu ijiege kuaramoga Iso fu uri asoe fuone soesoena kuae, Asoeno a isekie ni gaga daro be uria navoga ni abena naduaku mieno kuana fune ma urukeigia nimei.   
\p
\v 39 Fu ijiege nimenoga asoe fuone fu kuae,  
\q1 Farino, are ije a finoedufuo ije a sakae saruebaki ro ka iriaeki ijia finoeke. Ro kuke sakae one ije fube ve dajiaeke.   
\q1
\v 40 Ro aeje aka oemarekinu dazena finoekuma baki ro aka una e guena bijaekinu finoeke. Ro kuke aka uvia one ijadufuo moni baki imenoedufuo. A ijiege fuosiki nigaraenoeba uri fu abuena va osukua aebe finoekono kuae.   
\s1 Jekafu fu kona Rebanido vaema ijene  
\p
\v 41 Iso fu daro ije asoe fuone fu abe una Jekafu maema ijadufuo fuka Jekafu ziegafana oe ise vierafe. Ijadufuo fu mauike fue kuae, Na oenoene ate fu barone na nimekiro vako ijia naka Jekafu kanakono kuae.  
\v 42 Ijadufuo Ribeka fu vua ije fiena uri kiamo bu Jekafu mesirina rovoga fu urina kuae, Uvia one ije fuka ziemo ijadufuo fuka naebe oemarei. Ijadufuo fu a biedakuma fuka kanakiro kuaemo na fie.  
\v 43-45 Ijadufuo farino, ni ige na kuaravo ijiege rene. Anike migegire kona va sidove Erani maki none Rebani fino ijia va fuosiki maza sibaneke ijia fine. A maza sibaneke va ijia fike uvia one fu ire a rema ijadufuo defaruiga zienoeno ije fu una totega na ijare vua nijaga ni una rone ijadufuo maeje ame none inokiro ja maza besu ijia ja uniakodufuo ije naka isedie.   
\p
\v 46 Areme Ribeka fu urina Aeseki kuae, Na Isodo bararafa are Itaetiko ije kame miako naneka isedieme. Ijadufuo Jekafu fu una igia bara Itaetiko abekuma na funeka isediedufuo ro bakuma naka baronekono kuae.   
\c 28  
\s1 Aeseki fu Jekafu kuamo fu Rebanido vaema ijene  
\p
\v 1 Areme Aeseki fune Jekafu kumeno fu romo fu anaema areme kuae, A bara abekiro vierafekuma ade bara Kenanaetiko ije abeno.  
\v 2 Ro nika va aesakae Mesofotemia ijia asae one Betuerodo are ijia e Rebani kaju one ijadufuo kabaerafa ijia be abene.  
\v 3 Na baname isoega Godi ka ma e daroki ijare bara ije one a abeno ijadufuo duvado ijia a daro maga a ame uruvana tua nake. A ijiege rekina are e boeje are irore igia karinoeva ijiebuo asoe reke.  
\v 4 Godire izege fu Eburame daro maema ijiege fu a ro uifare one ijene ijiege daro miake. Ro fure daro maga a aesakae ige Godi fu Eburame maema ije ja ijia kariva ijene foteke abe a makono kuae.  
\v 5 Aeseki fune Jekafu ijiege kuarana daro mamoga areme fune are Mesofotemia Rebani fino ijia vae. Ro e Rebani fu e Betuero e Aramiako ijadufuo fari ro kuke fu bara Ribekado maki. Ro Ribeka fuje fu Jekafukiro Isobuo asie.   
\s1 Iso fu una bara beduaku abema ijene  
\p
\v 6-8 Areme rade e Iso fune fieke Aeseki fune Jekafu daro mana kuamo fu are Mesofotemia vaema ijiakiro izege fu bara Kenanaetiko abedufuo ije fu kuriaerena bijuima ijene fie. Ro kuke fu izege Jekafure orafa iriniana are Mesofotemia vaema ijiakiro izege fu bara Kenanaetiko ije fu abedufuo fu naebe oemarema ijene fie.  
\v 9 Ijadufuo fune va e Eburamedo fari e Isimaerodo kabae Marati bara Nebotido uvia ijene abei.   
\s1 Jekafu fu are Betero ijia naka naema ijene  
\p
\v 10 Areme Jekafu fune are Biasiba arena uri zinuevena una are Erani nake ijia vae.  
\v 11 Fune vakuma maza fune kokuveno ijia fu are be ijia kekena ijia naekiro fi. Areme fune uri are fu naedufuo ijene amaerima uri mune be abe adua nijana ijia ni nae.  
\v 12 Fu ijia naema naka nae gake siae ijare umeigia sana saove ijia ajia vakoga Godido anera ijiebe ijia ajia arive.  
\v 13 Areme fu kuke gake E Ireobo fu ivuake ikene fuone ijia manino fu gae. E Ireobo fu ijia manina kuae, Naeje na E Ireobo na Eburamekiro Aeseki ijiebuo Godi nare. Ijadufuo nare ae sakae ige a namo ije abe a ro uifari one ije miake.  
\v 14 Ro uifari one buka kuokuo ije bu dakuva baki ijiege e uruvana reke. Ro bure aesakae igia karijana dabe biona binobino vake. Ro kuke nare a ro uifari one ijiebuo duvado ijia e boeje aesakae irore igia karijo ije daro miake.  
\v 15 Ro ni vierafe iziebure a oenoeno ije nana uria ijia osiki oenoeke. Nare a samuaga oenoena areme mesira una sakae igia ruake. Nabe a abuoza vakiro naka osiki oenoekina irere na kuaraeva ije naka rena furikono kuae.   
\p
\v 16 Areme Jekafu fune urina fue kuae, E Ireobo fuka igia fine! Fu are igia fiko na naebe mukoe gaevano kuae.  
\v 17 Ro Jekafu fuka juimo fu kuae, Are ige fuka are ni be. Na vierafe naka Godido are igia aru five. Are ige fu saove gufadufuo viene fu daovena namo ijeno kuae.   
\p
\v 18 Areme nituame suoke mugamia Jekafu fune mune fu abe nigofo nijaema ije abena nuga fu ijia gakinu oenoedufuo ije sana amaerima areme fune oere abe ado ijia usiana abe una Godi mae.  
\v 19 Fu ijiege re areme are ije fu abe ive ina Betero kuae. Ro ive Betero ijadufuo maeje ijeja Godido Are. Ro are ije ude bu Ruzino kuavo.   
\p
\v 20-21 Ijiege re areme Jekafu fune uri E Ireobo ijiaki vua be kuae avenamina abe marei. Fu kuae, E Ireobo a vame ige na vako ijia mukoreigia samuagiena irekina sinuome ijene ifejiega na oemarekinu oenoena areme una ruoma na asoe none ijadufuo are ijia kekekuva naka maza boeje a oetuakinu baname isoe kafake.  
\v 22 Ro mune ige na abe amaerima sana nuga nijana vako ije e boeje no una are igia a dabe nidosakinu arorana baname isoekafake. Na ijiege re ro uri ire boeje are ifejiena vajiema ije akaegue (1/10) kena una a vajakono kuae.   
\c 29  
\s1 Jekafu fu Rebanido are ijia kekema ijene  
\p
\v 1-2 Ijiege rena Jekafu fune una kuke urina vakuma are be maza ajiamo nake e bino bu karivo ijia vae. Fu ijia kekena gake mako ireobo be bu do jiana mave-buone vajiavo fu ije gae. Ro mave-sifi ije bu atana inokubeke afuima areme bu do ikuae irifo ijia umeke naona ufuaenoena arei. Ro mako ijadufuo itire bune mune ireobo ijia dabe bijukurae.  
\v 3 Ro mazani ije mave-sifi boeje bune ro ijia besu afuivo ijia e ije bu samuagiavo ije bune va mune ireobo ije abe bio nijae. Areme bune do jiana mave-sifi boeje ijiama areme bune mune ije abe una are fuone ijia nijae.   
\p
\v 4 Jekafu fu ire boeje giama areme urina e ije mave-sifi samuagiavo ijene kiae, Kairafano, ja izia ruaevano kiae? Fu ijiege kuariamoga e ije bune una gue kuae, Noeje no are Erani ijia ruaevano kuae.  
\v 5 Bu ijiege kuaravoga Jekafu fu una kuke kiae, Ro ja e Neodo asae e Rebani kuavo ije jabe vierafevano kiae? Fu ijiege kiamoga e ije bu kua, Ke e ije none vierafevano kuae.   
\p
\v 6 Bu ijiege kuaravoga fu kiae, Ro fube ma fino kiamoga bu kua, Fu ma fine. Ro ni garia gane Rebanido kabae Resero fu mave-sifi uruvana kaenamia ruomo ijeno kuae.   
\p
\v 7 Areme Jekafu fu una kiae, Maza ige fuka uria rove jane kaenamia ruove. Ijadufuo ni kaenamia do jia vajia bu iga nine una kaenamia va bu garasi ino kiae.   
\p
\v 8 Fu ijiege kuariamoga bu kuae, Nobe ijiege rekiro no areke boeje bu igia rua furiga no ijare mune abe bio nijaeme do jiana mave-sifi ije ijiakono kuae.   
\p
\v 9-10 Bu uria ijiege irena Jekafu kuaravo ijia bara Resero fu asoe fuone ijadufuo mave-sifi boeje kaenamiana ijia kekei. Areme Jekafu fu gake kaju fuone e Rebanido kabae Resero fu romoga fune va mako itire bu bijukuraeva ije abe bio nijae. Fu ijiege rei reme fune uri do jiana e Rebanido mave-sifi ijene ijiae.  
\v 11 Areme Jekafu fuka oemaemoga fu uri bara ije abe uimina ireobo nimei.  
\v 12 Fu nimena areme uri kuae, Naeje na asoe one ijadufuo agane bara Ribekado farino kuae. Fu ijiege kuaramoga bara ije fune una difurina va asoe fuone fino ijia kekena vua ije kuarae.   
\p
\v 13 Fu va kuaramoga asoe fuone fu kaju fuone ijadufuo vua ije fiena fune difuri Jekafu biekiro ruae. Fu ro gumia kekena uro urasena uimi areme mesirina una are fuone ijia vae. Areme Jekafu fune uri vua boeje fu izege rena vaema ijene kuarae.  
\v 14 Fu ijiege kuaramoga Rebani fu kuae, Ke, ije ane ma kuarieme ijadufuo aeje ane ma kavuane none besuno kuae.   
\s1 Jekafu fu Rebanido kabaerafa ijiebuo imema ijene  
\p
\v 15 Rebani fu ijiege kuarama arekoga Jekafu fune una asame besu ijia fuosiki fi. Areme maza be Rebani fune Jekafu kuae, Noeje no agane ijadufuo a irerefuo ame ijia noefuo moni baki imedufuo? Ijadufuo a vierafe na moni izege a vajakono kuae?  
\v 16-17 Ro e Rebani fu kabaerafa inokiro ro amure ijadufuo ive ije Ria ro iviene ije bara Resero. Ro bara Riado niome ije fume sibaneke maeje. Ro Resero fuje fuka bara nikubae mukore.  
\v 18 Ijadufuo Jekafu fuka bara Resero ireobo oetuae. Ijadufuo fu uri e Rebani kuae, Na vierafe a kabae one Resero abe miega na juaevasia umui fague ro dikine inokiro (7) ijiege oefuo imejano kuae.   
\p
\v 19 Fu ijiege kuaramoga Rebani fu una kuae, Na bara ige nabe abe e bino miadufuo. Ro na vierafe naka abe a make. Ijadufuo aeje ni nosiki-igia fino kuae.  
\v 20 Rove Jekafu fuka Resero ireobo oetuaema ijadufuo fu juaevasia seveni (7) ijiege fu bara Reserodo imeko mazani fune migegire furikiro ubine ijia ruome.  
\v 21 Ijadufuo Jekafu fune uri Rebani kuae, Maza ije a kiema ije fune furi ijadufuo ni iviama kabae one Resero ijene abe miemo kuae.   
\p
\v 22 Ijadufuo Rebani fune uri iro ije be bu maninamikuae ivo kanafuima areme uri e uruvana kumeno bu iro ije sarei.  
\v 23 Areme muge ijia Rebani fu uri Resero fu aregana una Ria kabae fuone amure ije mesiri nujaejamo fu Jekafuki nae.  
\v 24 Rebani fu ijiege rei areme uri bara kabaekua Zirufano kuavo fu fuefuo imeno ijene mesiri Ria nujaejae fu fuefuo imekiro fu ijiege rei.   
\p
\v 25 Areme nituame suoke ijia Jekafu fu uri gake fu bara Riaki naemaga fuka ireobo zie. Ijadufuo fu va Rebani kuae, Na i boeje na menoeva ije na Resero abekiro na ijadufuo rei. Rove a irerefuo na biesiriena ijiege remano kuae?   
\p
\v 26 Fu ijiege kuaramoga Rebani fu kuae, No vame nuvuoenina no kenoevo ije no kabae iviefari ije no ude ke baru vajiavo baki.  
\v 27 Ijadufuo ni samuake fura ige ja maninamiva ije fu furiga na sone Resero abe mano kuae. Ro na ijiege rekuva ije a una kuke juaevasia seveni (7) ijiege noefuo igia fina imega na Resero abe mano kuae.   
\p
\v 28 Fu ijiege kuaramoga Jekafu fune oemare areme rade fura ije bu maninamiva ije fune furinoga Rebani fu kuke una kabae fuone Resero abena Jekafu mamo fu abei.  
\v 29 Areme Rebani fune bara kabaekua fuone imeno be bara Bira mesiri Resero nujaejamo fu fuefuo imei.  
\v 30 Ijiege rena Jekafu fune bara Resero mesirina fuosiki nae. Ro Jekafu fuka Resero ireobo oetuagaro Ria fume sibaneke oetuae. Areme fune kuke una Rebanido ime vakuma juaevasia seveni ijiege furi.   
\s1 Riakiro Resero ame bu nafe Jekafu vajaeva ijene  
\p
\v 31 Ijiege rena E Ireobo Godi fu gake Jekafu fu Ria sibaneke oetuagaro Resero fuka ireobo oetuamo fu ije gae. Ijadufuo fu Ria oemarejana ifejamo fu ame nafekoga Resero fu debirei.  
\v 32 Areme Ria fune e fudiena ame fari be bieteina abe ive ina Rubeni kuae. Ijadufuo maeje fu kuae, Iviama E Ireobo fune irufui none ije giema ijadufuo na vierafe Jekafu fune una na oetuakono kuae.   
\p
\v 33 Ijiege rena Ria fune una kuke fudiena ame fari be bietei. Areme fu kuae, E Ireobo fu una ame fari bedua mie ijadufuo maeje fu giega Jekafu fu na naebe mukoe oetuamono kuae. Areme fu ame ije abe ive ina Simioni kuae.   
\p
\v 34 Areme Ria fu una kuke e fudiena ame fari be bietei. Ijadufuo fu kuae, Iviama ijare baru none fuka nanaru oetuakinu vierafeke. Ijadufuo maeje na ame fari inokubeke nafevano kuaena fune uri ame ije ive ina Rivae kuae.   
\p
\v 35 Areme fu una kuke e fudiena ame fari be bietei. Areme fu kuae, Iviama naka E Ireobo ijadufuo oemareke. Ijadufuo fu uri ame ije abe ive ina Juda kuae. Areme Ria fu ijia ame fu nafeno ije fune ijia arei.   
\c 30  
\s1 Bara Resero fu ame nafedufuo ireobo vierafema ijene  
\p
\v 1 Ro Resero fu Jekafudo ame bino fu naebe nafe vajae ijadufuo fu uvia fuone ije oe isema vierafena fu ziegafae. Fu ijiege rena uri baru fuone Jekafu kua, A iviama nosiki naega na ame bino nafene ro a bakikuma naka baronekono kuae.   
\p
\v 2 Fu ijiege kuaramoga Jekafu fu vua ije fiemo fuka defarui ijadufuo fu urina Resero kua, Vame ije ame nafedufuo fune Godire fuone vierafema ijia bijukurae. Ro naeje na izege Godi asina vame ijiege rekono kuae?   
\p
\v 3 Fu ijiege kuaramoga Resero fu kuae, Ni Bira bara ije fu noefuo imeno ije fuosiki naega fu ame nafega na fuone duvado ijia ame ijene kena none samuagiano kuae.  
\v 4-5 Areme fune bara Bira kuamoga fu baru fuone Jekafuki naenoga fu efudiena ame be bietei.  
\v 6 Areme Resero fu kua, Iviama Godi fune irere na vierafeva ijene mukoreigia giena na vafarie. Ijadufuo fu baname none fiena ame fari ige miemano kuaena abe ive ina Deni kuae.   
\p
\v 7-8 Areme Bira fu una kuke e fudiena Jekafudo ame fari bedua bietei. Ijadufuo Resero fu kua, Na uvia none ijiaki nigaraena ruoma nane nare iraraena fu asivano kuaena fune uri ame ije abe ive ina Natari kuae.  
\v 9 Areme maza be Ria fu vierafega ame fu nafeno ije fune ijia arei. Ijadufuo fu uri Zirufa bara ije fuefuo imeno ije mesirina Jekafu nujaejamo fu abei.  
\v 10-11 Ijiege rena bara Zirufa fune Jekafudo ame fari be biete. Areme Ria fune uri kuae, Magoeno kuaena uri ame ija abe ive ina Gedino kuae.  
\v 12-13 Ro rade Zirufa fu una kuke Jekafudo ame fari bedua bietei. Ijadufuo Ria fu oemaemo fu kuae, Iviama naeje naneka oemadieme. Ijadufuo bara boeje bu na kieko Bara Oemaremo Ijieno kiekono kuaena fune uri ame ije abe ive ina Ase kuae.   
\p
\v 14 Areme mazani ije juare masivo ijia Rubini fu va juare ijia oenoena ine menidirekino kuavo ije bino giae. (Ro ine menidireki ije bu bara ame nafevo baki ije bu ine ije nafe ikuva bu e fudieke). Ijadufuo Rubini fu ine ije bino nafena kari ro asie fuone Ria vajae. Ro Resero fu uri kuae, Aesekie ni ine manidireki ije ame one fu ke ruaema ije bino na vajieno kuae.  
\v 15 Fu ijiege kuamoga Ria fu una gue kuae, A baru none ane abena one rei. Ro a irerefuo una kuke fari none ijadufuo ine menidireki ije abekuveno kuae. Fu ijiege kuaramoga Resero fu una kuae, A fari one ijadufuo ine menidireki bino vajiekuma ivia muge na kuaga a Jekafuki naekono kuae.   
\p
\v 16 Areme Jekafu fu vuiti juare gamia oenoena mufuo fu una are romoga Ria fu va vame gafia biena kuae, Ivia muge a nosiki naeke. Ijadufuo maeje na fari none ijadufuo ine menidireki nane kena a fuaevevano kuae. Ijadufuo Jekafu fune muge urina Riaki nae.   
\p
\v 17-18 Ijiege rena Godi fune Riado baname ije fiena ifejamoga fune una kuke e fudie. Areme fune ame fari bedua nafenoga fune Jekafudo ame umui fague rei. Areme Ria fu kuae, Godi fune na irerefuo bara ije none imeno ije na abena baru none maeva ijadufuo ve gue una vame maeje none remano kuae. Areme fune ame ije abe ive ina Isakano kuae.   
\p
\v 19-21 Areme Ria fu una kuke Jekafudo ame bedua nafemo fune ame umui fague ro dikine besu rei. Areme fu kuae, Godi fuka ire ma mukore ije na miedo iviama baru none fuka oemarekinu na mesirieke. Ijadufuo maeje nane ame umui fague ro dikine (6) ijiege nafe vajae. Ijadufuo fune ame ije abe ive ina Zeburuni kuae. Areme radekuma ije fu ame kabae be bietena abe ive ina Daenano kuae.   
\p
\v 22 Areme Godi fune Reserodo baname ije fu isoema ijene fie ijadufuo fu ifejamoga fu ame nafei.  
\v 23 Ijadufuo Resero fune e fudiena ame fari be bietei. Areme fu urina kuae, Godi fune iviama oefiane none na abeva ije dasumie ijadufuo fu ame fari ige mie.  
\v 24 Areme fune ame ije abe ive ina Josofuno kua areme kuke kuae, Na vierafe E Ireobo fu una ame fari bedua miekono kuae.   
\s1 Jekafu fu Rebani mave-gotikiro sifi ijadufuo kuaema ijene  
\p
\v 25-26 Ijiege rena Resero fu Josofu bietemoga Jekafu fune urina Rebani kuae, Iviama nane una are none ijia vakiro vierafe. Ro izege na oefuo i mukoreigia mekinu ifejaeva ije ane vierafe. Ijadufuo ni bara none ro ame none boeje na keva ijene vajiega na kaenamiana vano kuae.   
\p
\v 27-28 Rove Rebani fu una kuae, A vierafe a none oemarekuma ni igiafine. Na adame na fieva ijadufuo duvado ijia na gaga E Ireobo fu one duvado ijia ige a nosiki fima ijia funeka na daro miena ifejie. Ijadufuo ni irere a vierafema na naebe vajaeva ije ni kiega na fuaeveno kuae.   
\p
\v 29 Fu ijiege kuaramoga Jekafu fu una kuae, Na vierafe a izege oefuo imekinu fanuve one samuagiavoga buka ma uruvana reva ije ane vierafe.  
\v 30 Ude mave-sifi one bu naebe uruvana rei rove mazani ije na ruaeva ijia buka ma uruvana rei. Ro are boeje iziebure na oenoeva ijia E Ireobo fuka a daro mana mukoreigia ifejamoga ire boeje buka maradiae. Ro naeje na izege reke? Ijadufuo iviama nine irere na rade ijia bijua fidufuo ije vajieno kuae.   
\p
\v 31-32 Fu ijiege kuaramoga Rebani fu kuae, Ro a vierafega na irere ije abena a fuaevekono kuae? Ro Jekafu fu una kuae, A na moni ijia fuaevedufuo ije na isedieme. Ro a oemarekuma ni vua ige na vierafeva ijiege rene. Na vierafe naka uria mave-sifi one ije samuagiake. Na vierafe na mave-sifi ame kazine ro goti ame ni turaeturaeki one boeje karina va none samuagiakiro vierafe. Ijadufuo na vierafe a ire ijiege na fuaevedufuo  
\v 33 Na ijiege rekina maza rade a na gieke vuako ijia a vua giaga mave-sifi ro goti ni bino none baki bu ijia oenoevoga a ijia giana vierafero nane nare iniemevaro a ijiege vierafekono kuae.   
\p
\v 34 Areme Rebani fune una kuae, Vua ije aka ma kuariemo ijadufuo nane oemarei. Ijadufuo nine ije a kuariemo ijiege reno kuae.  
\v 35 Rove Rebani vua ije fu kufuimena kuae ijadufuo maeje rade Jekafu fu vakoga Rebani fu mazani besu ijia kekena goti baru ro bara ni turaeki ro abaeki ro mave-sifi kazine boeje kaenamiana una va ae be ijia uniae. Areme fune farirafa fuone kiamo bu va samuagiae.  
\v 36 Areme Rebani fune urina are be ka ma mumabo ijia vae. Ro are ije fu vaema ije bu muge inokubeke ijiege akoena vako ijia vagana Jekafu fu ijia arena vae. Fune ijiege vakoga Jekafu fu urina mave-sifi gue kazine ro turaeturaeki baki ijene samuagiae.   
\s1 Jekafu fu Rebani ve gue biesirima ijene  
\p
\v 37 Areme maza be Jekafu fune va ine binobino fofirakina amoni ro ine fireni kiaje ikuki bino buvuana surive gue azovo buka turaeturaeki rei.  
\v 38 Fu ijiege rena fune ine kiae ije karina va do ije mave-sifi binobino bu ro ivo ijia urui. Fu ijia uruima ijadufuo maeje mave ijia bu ijia do ikuae ruovo ije bu ine ije rotire ijia bue nakusenamivo.  
\v 39 Ijadufuo maza ije fanu goti bu ro ine ijiebuo rotire ijia nakusenamivo bu ame turaeturaeki ije nafevo.  
\v 40 Ijiege rena Jekafu fune mave-sifikiro goti fuone ije atana ije fu be uniaga goti fu bino uniae. Ro nikubae buone bu una game Rebanido mave-sifi kazine ro goti ni turaeturaeki ije bu ireva ijanake uniae. Ro fu naebe karina Rebanido ijiakuma besu uniae ijadufuo fanu fuone fuka migegire uruvana rei.   
\p
\v 41 Ro maza ije Jekafu fu giaga fanu irave daroki ije bu bue nakusenamikuvejo ije fune uri ine kiaeje turaeturaeki ije karina va do bu ivo ijia urumo. Fu ijiege rekina fanuve bu do ije ikuae ruovo ije bu ine ijiebuo kafare ijia nakusenaminoekiro fu ijiege rei.  
\v 42 Ro fanu garuki ije bu ro do ijia bue nakusenamivo ije Jekafu fu ine kia ije urujiamo baki. Ijadufuo Rebanido fanu boeje buka garuki ijiaru ro Jekafudo ije buka vajae maturaena ubaeradiae.  
\v 43 Ro Jekafu fu Rebani ni sauikurana vame ije rema ijadufuo rade sinuome fuone fuka ma uruvana zarae. Fu sinuome ijiaru zaraema bakiro fu kuke e fuone i mevo ijiakina mave-sifi kina kamerokina doniki ijia ka uruke zarae.   
\c 31  
\s1 Jekafu fu e Rebani arena vaema ijene  
\p
\v 1 Ijiege rena maza be Jekafu fu fieke kaju fuone Rebanido anafa fari ije bu kuae, Iviama Jekafu funeka e anuigi rena sinuome zarae. Ijadufuo maeje fu ire boeje asoe nuvuone fu kema ije fune fure kari furimano kuae.  
\v 2 Ro kuke Jekafu fu oenoekinu gake kaju fuone ije fudua fu naebe izege fu ude oemarekinu renoema ijiege renoeno fu gae.   
\p
\v 3 Areme maza be E Ireobo fu Jekafu kuae, Nine una urina asaerafa one ijiakiro uviarafa one ijiebuo sakae ijia vane. Ro a vako ije naeje na osiki ijia vakono kuae.   
\p
\v 4 Ijadufuo Jekafu fune e fuone imevo ije kiamo bu bara Resorokiro Ria kumevo bu are ije fanu fuone boeje bu afuina oenoevo ijia fu biekuae ruae.  
\v 5 Bu rovoga Jekafu fu urina kiae, Na gaga asoe jone ije fu naebe una ude izege fu nosiki maremo ijiege reme. Rove asoe none ijadufuo Godi ije fuka uria nosiki.  
\v 6 Ro izege na daro mena asoe jone ijadufuo imeva ije bara inokiro gure jane giena vierafe.  
\v 7 Rove fuka uria na biesirikinu ire ije fu vajiekono kiemoga na ijadufuo imeva ije ma uruvana fu naebe kena vajie. Rove Godi fuka na mukoe samuagie ijadufuo fu naebe na kanie ro ire bino rei.  
\v 8 Na mazani ije Rebani fu kie, Na mave goti turaeturaeki ije a vajakono kiemo ije mave goti boeje buka ame turaturaeki uruvana nafevo. Ro fu oenoena una kiemo na goti kazinekiro abare ririseva ije vajakono kiemo ije mave-goti boeje buka ame ni ijieki uruvana nafevo.  
\v 9 Ijadufuo Godi fu ijiege rekinu asoe jone ijadufuo mave boeje funeka karina na vajie.   
\p
\v 10 Ro mazani ije mave goti kumate bu buone nakusenamivo ijia na muge naka naena mave goti kazine ro abaeki iriseva ijiakina turaturaeki ijene giae.  
\v 11 Ro Godido anera ije fu na kie, Jekafuno kiemoga na onukuana kuae, Na igifurekino kuae  
\v 12 Na ijiege onukuavoga fu kie, Mave goti kumate boeje bu nakusenamivo ije buneka turaturaeki ro kazinekiro abaeki ririseva ijiaruno kie. Na ijiege revo ijadufuo maeje na Rebani vame izege fu one remo ije nane gae.  
\v 13 Naeje na Godi ije na are Befuero ijia biedaeva ije nare. Na ijia biedavoga a vua be nosiki kuaena nuga be ijia nijae. Ro nuga ijeja a mune ijia sana amaerima areme oere abe ijia usiae. A ijiege rekina a ijia gakinu oenoekiro a ijiege rei. Ijadufuo iviama sinuome one ije kanafuima areme ni una urina sakae ije bu a bietanaeva ijia vano kiemano kiae.   
\p
\v 14 Jekafu fu ijiege kuariamoga Riakiro Resero bu una kuae, No asoe nuvuone ijadufuo ire ma bino no una irere ijene kekuva baki.  
\v 15 Fu noeje fuka bara ae binoko igege kame fuaevena moni ije fu abema ije fune inama furi.  
\v 16 Ro kuke asoe nuvuone ijadufuo ire boeje ige Godi fu kena una a vajaema ije funeka anafa nuvuone ijena nuvuone. Ijadufuo nine Godi irere fu kuaramo ijia reno kuae.   
\p
\v 17-18 Bu ijiege kuaravoga Jekafu fune una Kenani asoe fuone e Aeseki fino ijia vakiro sinuome fuone kanafui. Areme fune uri ame fuone ijiakiro bararafa fuone ije kaenamiana fanu kamero ijia uniae. Areme fune uri e fuone imevo ije kiamo bu uri ire fuone maeje boeje fu Mesefotemia ijia fikinu karima ijiakina fanu fuone boeje fu saema ijene kaenamiana bune ude vakoga Jekafu rade mani.   
\p
\v 19 Bu uria vakuae sinuome kanafuinoevo ijia Rebani fune kekena are mave fuone fu uniana samuagiamo ijia mave u ijene ufukiro vae. Fu ijia vakoga bara Resero kabae fuone fu are ijia aruna asoe fuone ijadufuo godi kufui fu fuone baname isoemo fu uijaema ijene mauike abei.  
\v 20 Ijiege rena Jekafu fu naebe Rebani nijaemo fu vierafekoga fune mauike kona vae.  
\v 21 Jekafu fune migegireigia urina ire fuone boeje fu kema ijene karima areme fune kona vakuma do Iufureti tuana fune ura Giriedi are uruo ijia vae.   
\s1 Rebani fu Jekafu nuvena dabe arafiri vaema ijene  
\p
\v 22 Areme fune mu inokubeke furikoga bu ijia sone Jekafu fu kona vaema ijene Rebani kuarae.  
\v 23 Ijadufuo Rebani fune uri e gue kaenamiana rade nuvediana vakuma mazani seveni (7) ijiege furiko bu ijia bu uruo Giriedi ijia Jekafu bie.  
\v 24 Rebani fu rade Jekafu bie ro ude fu naemaga Godi fu ari naka urana kuae, A va Jekafu biekuma ade vua ise ro ma bino fu kuarakumano kuae.   
\p
\v 25 Ro Jekafu fune ude uruo be makave ijia kekena are muvuaka fuone sae. Fu ijiege rekoga Rebani fu dua fu e fuone ijena uruo Giriedi erafa fuone bu kariva ijia are muvuaka buone sae.  
\v 26 Areme Rebani fune urina Jekafu kuae, A irerefuo na biesiriena kabaerafa none ijene e dibureko igege kaenamiana kono ruae?  
\v 27 A ruakiro vierafekuma ni kuarie na fieke a ruakuma. A irerefuo ame mauike fekuriena ruae? A ruakiro kuarie bitie naka zaekiro dideve ijia oemarekinu a dua urukafakinu mesira ro vame nujaga a ruake.  
\v 28 A areke na asaerafa none ijiakiro kabaerafa none ijene anadiakinu ui midiaga a kaenamia ruakuma. A vame ije a naebe ijiege rei ro aka isema rei.  
\v 29 Na a dabe isema rena vajae fiane vajae bitie na daro nado na ijiege redufuo. Rove na muge naevaga asoe one ijadufuo Godi ijare naka urana kie, Ade va ire ise bino one remono kie.  
\v 30 Rove na vierafe aka oe ireobo una migegire asoe one ijadufuo are ijia vakiro vierafe ijadufuo a ije kona ruomo ije fune marei. Rove aka godi none na baname isoevo na are ijia nijavo a ijene a iniemejie ruaemano kuae.   
\p
\v 31 Rebani fu ijiege kuaramoga Jekafu fu una kuae, Na vierafero bigake a kabaerafa one ije una tura vakiro na jumena mauike kona ruae.  
\v 32 Nine e boeje no igifure kari gavono ni sinuome nuvuone boeje no naeva ijia rerene. A ijia rerenoega ire one be fu ijia navoga ni abene. Ro e ije erare ire one ije abe ruaema ije nika kana fu baroneno kuae. Rove Resero fu asoe fuone ijadufuo ire fu baname isoemo ije fu iniemena abe ruaema ije Jekafu naebe vierafema ijadufuo fu ijiege kuarae.   
\p
\v 33 Areme Rebani fune urina Jekafu are muvuaka ije fu saema ijia aruna oenoekinu ire fuone ijene rerei. Fi ijiege rerena vakuma Riado are ijiakiro bara inokiro moni baki imevo bu karivo ijia aruna rerei. Fu ire fuone ije ijia rerenoega baga fune kuke kekena kabae fuone Resero fu fino ijia vae  
\v 34 Rebani fu ijiege rerena vuakoga Resero fune uri godi kufui fu abe vaema ije abena kamero ijadufuo kamui ijia kedena ado ijia ajiana fine. Fu dabe ijiege nurie fikoga Rebani fu are boeje rere fune furi.   
\p
\v 35 Areme Resero fu urina asoefuo biesirina kuae, E ireobo nana noe fivo ijadufuo na izege urikuva baki. Ijadufuo ade na ziegafiemono kuae. Ijiege rena Rebani fune are boeje rerenoegake godi fuone fu baname isoemo ije fuka baki.   
\p
\v 36 Fu ijiege rerenoenoga Jekafu fu ije gamo fuka ma ireobo defarui. Ijadufuo fu urina kuriaekuriaeki Rebani kuae, Naeje na ise ije na irere ije rei? Ro akae ije na irere ije abe tuaseva ijadufuo a na reriena dabe arafirie ruae?  
\v 37 Ro a ro sinuome none boeje a ro rerema ijia ire one na abe ruaeva ije ane gana abei? Ane abevoga ni abe samadukua guria nijaga e one ro none bu ijia gana erare fu mukoe rema bu ije vierafedufuo.   
\p
\v 38 Nana osiki finoeko fune juaevasia tuaedi (20) ijiege furi. Nare osiki finoeva ijadufuo mave-kiro goti one buka ma uruvana nafemanami. Ro kuke one a saema ijia be a naebe kiemo na kana i.  
\v 39 Na mave bino bu oenoena siroe kuriae ijiebe sakia i ro bu irufui abega na ro kuaravo ije a fiena amaerimo baki. Ro mave bu ijiege revo ije naneka nosukua irufui ije abevo. Fanu kuriae bu muge ro maza ijia ro mave one sakiaga na ro a kuaravo ije aka una na kiega nare irufui ijene amaeriavo.  
\v 40 Naka maza kekena kanie ro muge iduadiemo ije na fievo baki. Ro naka ijia faememarena oefuo isejavaena ari fi ro ni mukore naevo baki.  
\v 41 Na juaevasia tuaedi (20) na osiki fina ijiege isejavae. Na juaevasia fotini (14) ije na kabaerafa one ijiebuo imekiro sigisi (6) ije na mave one a saema ijiebuo imei. Na ijiege ime rove a uria na biesiriena ire none a vajieko kiemoga na imeva ije ma uruvana a naebe kena vajie.  
\v 42 Ro asaerafa none e Eburame ro Aeseki ijiebuo Godi ije fu naebe nosiki oenoeno bitie naeje ane isuibe rorukuriega nane ikiriasa vadufuo. Rove e Ireobo Godi fu irufui none ijiakiro i ije izege na oefuo menoeva ije fune gie. Ijadufuo fune fure muge noka ijia a samadukua visuna noesina kuaraemano kuae.   
\s1 Jekafukiro Rebani bu vua kuae avenamina abe mareva ijene  
\p
\v 43 Jekafu fune ijiege gikikimana kuarama furinoga Rebani fu una kuae, Ire boeje guraeje a abema ijiakina kabaerafa none inokiro ijiakiro anafa buone ije buneka none ijiaru. A ire none boeje ane ijifureki karima fune furi ijadufuo ro iviama na una izege rena bu kaenamiake?  
\v 44 Ijadufuo na vierafe naka osiki vua kuae avenaminina abe mareke. Ijadufuo roga no mune guria kena sa amaerikina no ije gavo ijia no una vua irere no osiki kuaeva ijene vierafeno kuae.   
\p
\v 45 Areme Jekafu fune urina mune be bu ijia gakinu oenoedufuo ijene abena ijia sana amaerima areme ijia arei.  
\v 46 Jekafu fune ijiege rema areme uri e fuone imevo ijene kiamo bune kuke mune bino kari ijia akoena ajiae. Areme bune ivuake irifo ijia karina Rebanina besu ire ina oemarei.  
\v 47 Bu ijiege reva ijadufuo Rebani are ije fu abe ive ina Jega Saradutano kuae. Rove Jekafu fuje fu abe ive ina kua Garidino kuae.   
\p
\v 48 Areme Rebani fu urina Jekafu kuae, Mune ige no karina naeva ije no osiki ijia gakinu oenoedufuo ijeneno kuae. Jekafu fu Rebaniki vua ijiege kuaeva ijadufuo are ije fu kua Garidino kuae.  
\v 49 Ro kuke are ijadufuo ive be bu kua Mizifaro kuae. Ijadufuo maeje Rebani fu kuke kuae, Na vierafe E Ireobo ijare no osiki iziebure no oenoevo ijia samuaguoko no kuaema ijadufuo bu ijiege kuae.  
\v 50 Rebani fu ijiege kuara areme kuke kuae, Ade bara kabaerafa none ije isema samuagiamo ro ade una bara bino kemo. Ro a ijiege rekuma ni vierafero Godi funeka samadukua guoko no oenoevoro a ijiege vierafene.   
\p
\v 51 Ro ni mune ige na kari naeva igiakiro mune gare a abe saema ije giane.  
\v 52 Mune ije bu nuga nuvuone no ijia giakinu oenoedufuo. Naeje nabe oenoene nuga ige no naeva ijene asina ura a kana ro vajae fiane vajake. Ro a dua abe nuga ije asina na kanie ro vajae fiane vajieke.  
\v 53 Ro no oenoene izege rekuva na vierafe Eburamekiro Neo ijiebuo Godi ro kuke asoe buone ijadufuo Godi ijare no kena mazie guokono kuae. Areme Jekafu fune uri asoe fuone Aesekido Godi ijadufuo ive ijia kurana kuae vua ije fube totekiro fuka uria vierafekinu oenoekono kuae.   
\p
\v 54-55 Bune ijiege kuaena Jekafu fune uri fanu be kana dabe uruo makave ijia Godi oemarejana zinone ifaejei. Areme fune uri ire kirama areme erafa fuone ije kiamo bu ro besu afuina i. Bu ire ije uruo makave ijia ina naoeva suoke Rebani fune uri kabaerafa ijiakiro asaerafa ijene ui midiana anadiama areme fune una are fuone ijia vae.   
\c 32  
\s1 Jekafu fu Iso biekiro kanafuima ijene  
\p
\v 1 Ijiege rena Jekafu fune urina vakiro vakoga Godido anera bino bu arina vame ijia bie.  
\v 2 Fu ijiege biedia areme uri kuae, Are ige Godi fu ijia fino ijeno kuae. Ijadufuo fu uri are ije ive ina kuae, Maranaemino kuae.   
\p
\v 3-4 Ijiege rena Jekafu fune bo fuone e Iso aesakae Idome ijia fino ije vua ijiege nijamoga e vua abe oenoevo ije bu vua ijene abena vae. Ro vua fu ijiege nijana kiae, Ni va e ireobo none Iso kua, Na uvia one Jekafu e ije oefuo imeno ije nare vua ige a kuarave. Na kaju none e Rebaniki finoevo ijadufuo na naebe migegire urina vuae. Ro na fina areme ivia ijare nane una ruove.  
\v 5 Nana mave kau ro ro gotikina donikikina kamero ijene ka uruvana sae. Ro kuke na e none moni baki imevo bara ro baru ije uruvana. Ijadufuo e ireobo none a isekie a na oemarejiekuma ni ijiege kuariega na fieno kuae.   
\p
\v 6 Jekafu fu ijiege kuariamo bu vaeva una usiaena kuae, No vua one abena Iso kuarakuae vae. Rove no vaga uvia one ije fune a biedakiro e fuone uruvana fo aderedi (400) ijiege kaenamiana vame ruomono kuae.   
\p
\v 7 E ije bu vua ijiege Jekafu kuaravoga fu vua ije fiemo fuka oe ireobo fiaemo fu uri jumei. Ijadufuo fune uri e ije fuina vako ije ke atana be uniakinu be uniae. Areme fune uri mave-sifi ro goti ro kau ro fanu kamero ije duaku ke atana binobino uniae.  
\v 8 Fu vierafero Iso fu e fuone ijena ro fu biena uri e guena bijaekuva gue bu subi vakiro fu ijiege rei.   
\p
\v 9 Areme Jekafu fune uri Godi baname isoena kuae, Godi asae none Aesekikiro Eburame ijiebuo Godi baname none ige na isoena kuaravo igene fiene. E Ireobo none a kie, Ni una urina aesakae one ijiakiro e uviarafa one kariva ijia vano kie. A ijia vaga nare a samuagana ifejaga ire boeje fuka mareno kie.  
\v 10 Na nosukua naka izege maza boeje ijuebaki rena ire boeje oetuana mukoreigia ma ijiaru a nijasiema ijiege renoekuva baki. E Ireobo none ude na do Jodeni tuana ruvaeva ije name mudu ijiaru abe bijuasana ruvae. Rove iviama naka una zaraezaraeki ruovo ijadufuo na e igene kame atana igifureki inokiro uniavo ige giene.  
\v 11 Na vierafe uvia none Iso fu ruakuma fuka e boeje ige bara ro baru ije kanuoga noka oe furidufuo. Ijadufuo naka judiemono E Ireobo baname ige na isoena kuaravo igene fiena ifejuone.  
\v 12 A kie nare a samuagana ifejakinu marejaga a mukoreigia e uruvana ire ajare davare irifo gamia naovo e bu dadufuo baki ijiege vajakono kiema ijene vierafeno kuae.   
\p
\v 13-15 Jekafu fune ijiege baname isoema furina fune ijia nae. Areme nituame suoke fune urina uvia fuone Iso subijakiro fuefuo subine mukore ijiaru kanafui. Ijiege rena Jekafu fune uri mave-goti irave tu aderedi (200) ke areme kumate tuaedi (20) ijene kei. Areme fune uri mave-sifi irave tu aderedi (200) ke areme kumate tuaedi ijene kei. Fu ijiege re areme uri fanu kamero teti agi ije ke areme uri mave-kau irave foti (40) ro kumate teni (10) ijiege ke. Areme fune fanu doniki irave tuaedi ke ro kumate teni ijene kei.  
\v 16 Areme Jekafu fune uri mave ijiakiro fanuve ijene ke atana binobino uniae. Areme fune uri e fuone imevo ije kiamo bune kaenamiana ude vae. Fu e be kua, Ni fanu one kaenamia ude oebe datura vakiro e be fu ura fuone ije kaenamia ukua be vano kuae. Fu e fuone boeje ijiege kuariamoga bune fanu buone kaenamiana ijiege vae.  
\v 17 Fu ijiege kuaria areme uri e ije ude vako ije kuae, A vaga uvia none Iso fu ruomo a biedana kuako, E Ireobo one ije era? Ro ja izia vakuae ruo ro kuke fanu guraeje ja erado ijene samuagiavono kiakuma ni vua igene kuarane.  
\v 18-19 Ni kua, Fanu ije fu Jekafu e ije oefuo imeno ijadufuo. Fu kena e ireobo fuone e Iso ije naejaemano kuano kuae. E Jekafu fune vua ijiege e ije ude vako ije kuara areme una e fuone gue rade nuvevo ije vua ni besu ijiege kuariae.   
\p
\v 20 Jekafu fu ijiege kuara areme una e fuone gue ije kiae, Ja Esau biekuva nika mukoreigia kuarana kua, E Jekafu e ije oefuo imeno ije fu rade nuveduoko no ruovono kuano kiae. Ro Jekafu ijiege fu rema ije fu vierafero fu fanu ro mave ijiege Iso naejaga fu ije giana una oe dasuna fuosiki oemarekiro fu ijiege vierafe. Ro kuke fu vierafero Iso fu ire ijene kekuma fu Jekafu vaga fu biekuma fu ise fuone ije gana arekiro fu ijadufuo ijiege rei.  
\v 21 Ijiege rena Jekafu fune subine ijene ijiege kanafuima kiamo bu kena ude vakoga fuje fu una ijia nae.   
\s1 Jekafu fu are Feniero ijia e be fare arafirima ijene  
\p
\v 22 Areme muge besu ijia Jekafu fune uri bararafa fuone ije ro bara inokiro bu fuefuo imevo ijiakina farirafa fuone boeje ireveni (11) ijene kaenamiana ari do Jaboke ijia ifejiamo bune tuana gara vae.  
\v 23 Fu ijiege kaenamia unia areme fune kuke uri sinuome fuone boeje gara vakuma furi areme fune fuosukua do iga fi.  
\v 24 Areme e be fu muge ijia kekena Jekafu fare arafirimo fu dabe daturakiro jiekena renoeko fune vakuma ve irasekiro saname.  
\v 25 Areme e ije fu gake funeka Jekafure iraraena giriesamoga fu uri Jekafu o surimoga funeka o nafe abuemo fune ijia daro furi.  
\v 26 Areme e ije fu uri Jekafu kuae, Ve irasemono abuezeke na vano kuae. Rove Jekafu fu kua, Na a na abuezakuva baki ro a na daro be miekuma na ijare arega a vakono kuae.   
\p
\v 27 Ro e ije fu una Jekafu kuae, Ro ive one ije erano kuamoga fu kua, Na ive none ije Jekafuno kuae.  
\v 28 Areme e ije fu kuae, Ivia ive one ije bu una Jekafu kuanoekuva baki. A Godi fu farada dabe mamoga aka giriesae. Ro kuke ema buka a dabe vame ise ijia arafiravoga aka are iraraena bu asidiae. Ijadufuo ive one ije bu Isurerono kuakono kuae.  
\v 29 E ije fu ijiege kuaramoga Jekafu fu una kuae, Ro a ive one ije eraga ni kie na fieno kuae. Rove e ije fu una kuae, A irerefuo ive none ije fiekiro kiemono kuae. Areme e ije fune uri daro fuone ije Jekafu ma areme fune ijia arena vae.   
\p
\v 30 Ijiege rena Jekafu fu una fue kuae, Na Godi e ije nikubae fuone ije nane gae rove na naebe barone na uria igifureki fivono kuae. Ijadufuo fu are ijene abe ive ina Feniero kuae.  
\v 31 Areme maza fune keke namoga Jekafu fune uri Feniero arena vakiro vagake fuka isere ijadufuo maeje oge fuone ije fu izege mukoe bierekuma baki.  
\v 32 Ijadufuo maza ijia ruoma iviama ige e Isureroko bu fanu oge birage ije bu inoevo baki. Ijadufuo maeje e ije Jekafu farema ije fu oge fuone ijia kanaema ijadufuo bu ijiege revo.   
\c 33  
\s1 Jekafu fu Iso biema ijene  
\p
\v 1 Ijiege rena Jekafu fune ruomo gake uvia fuone Iso fune e fari fo aderedi (400) ijiege kaenamiana vuakoga fu gae. Ijadufuo fune uri anafa fuone boeje ke atana gue Ria uniaejaga gue fu Resero uniaeja gue fu atana bara inokiro fuone imevo ije uniaejiae.  
\v 2 Areme fune bara inokiro fuone imevo ijiakiro anafa buone boeje kiamo bune ude irei. Bu ude irekoga fune uri Riakiro anafa fuone ije kiamo bu ura ijuone buone ijia irekoga fune Reserokiro Josofu kiamo bu ura ijuone ijia irei.  
\v 3 Jekafu fune ijiege kiamo bune ijiege irejavakuma arekoga fune ude vakoga bu rade ijuone fuone ijia merui. Jekafu fuka Iso mukoreigia aguae ijadufuo fu vakinu kukuma kuri tuakafakinu fu ruomo nidua ijia vae.  
\v 4 Rove Iso fuka Rove Iso fuka difurina ruoma keke Jekafu uro urasena dabe ui mi. Areme bune uri buosiki buone niraefiranami.  
\v 5 Bune ijiege niraema areme Iso fune uri bara ije bu ame ije mediruiva ije giama areme uri Jekafu kuae, E boeje gure aena ruaeva ije eranebeno kuae. Iso fu ijiege kuaramoga Jekafu fu kuae, E ijeja Godire fuone izege fu na marejiemo ijia fu e ige vajiema ijeno kuae.   
\p
\v 6 Areme bara inokiro fuone imevo ije bu dua bune anafa buone ije meruna ro Iso manino ijia usiaena auge sana kuri tuakafae.  
\v 7 Bu ijiege rena bune bio vakoga bara Riakiro anafa bu dua bune usiae besu ijiege rena vakoga rane ije Reserokiro Josofu ijiebe usiae Iso kuri tuakafae.   
\p
\v 8 Areme Iso fune uri Jekafu kuae, Ro e gafe gue fanu meru vuako na biediaeva ije eranebe? Bu irere abeva ijadufuo bu buebino ijiege meruna vuakono kuae. Fu ijiege kuaramoga Jekafu fu kuae, Na vierafero na ijiege a subijana naejaga a ije giana una none oemarekiro na ijene ijiege revano kuae.   
\p
\v 9 Rove Iso fu una kuae, Uviano na vierafe ire boeje na fune mani ma ijadufuo ni una one keno kuae.  
\v 10 Ro Jekafu fu una kuae, Uviano a na giega fuka oemadavoga ni a isekie subine ije na a vajavo ije oemarekinu kene. Na nikubae one ije gavo ije naka Godido nikubae igege gave. A iviama aka una nosiki kai mukore rei.  
\v 11 Ijadufuo a isekie ni subine none ije na oefuo kena ruaeva ijene kene. Na fuka Godire na marejiena ire boeje na vierafeva ijene na vajiemano kuae. Jekafu fu Iso dabe ijiege soesoemoga fu ijuone vaba una oemarekinu kari.   
\p
\v 12 Areme Iso fune uri Jekafu kuae, Nine uri sinuome kanafuiga na ude vake a rade nuvedieno kuae.  
\v 13 Fu ijiege kuaramoga Jekafu fu una kuae, Na vierafe ame none buka vajae sakiasakiana fiadiae. Ro kuke mave-none ijiakiro fanu boeje bu ame buone ijiakuma buka naebe manido bu izege giriesana vakuva baki. Na uri meruna una kuke vakuva buneka oe furidufuo.  
\v 14 Ijadufuo a isekie ni are ude vake na sone rade nuvedane. Na agebara ro fanu ije kaenamia sone igia vuakuma Idomi ijia biedano kuae.  
\v 15 Jekafu fu ijiege kuaramoga Iso fu kuae, A ijiege kuaemo ijadufuo ni areke na e none bino a uniaejaga fu sone aena vuano kuae. Rove Jekafu fu una kuae, A ije ade vierafemo na bado vuakono ni vano kuae.   
\p
\v 16-17 Areme Iso fune ve ijia urina fu una Idomi ruakoga Jekafu fu una urina are Sukoti ijia vae. Fu va ijia kekena are fuone ro fanu ijiebuo ijene sama ijia nae. Ijadufuo are ije bu kua Sukotino kuae.  
\v 18 Ijiege rena maza ije Jekafu fu aesakae Mesofotemia arena uri ruaema ije fuka mukoreigia ruoma sidove Sekame aesakae kena ijia kekena fune uri sidove ivuake irifo ijia are muvuaka sae.  
\v 19 Jekafu fune uri e Sekamedo asoe e Emodo uifari ijiebuo sakae ao be ire siruva uvani aderedi ijiege karana fuaeve.  
\v 20 Areme Jekafu fune uri fata zinone ifaejedufuo be ijia sama areme abena e Isureroko ijiebuo Godi ije nabuikena kua, Eroeno kuae.   
\c 34  
\s1 E Sekame fu bara Diana daturaema ijene  
\p
\v 1 Areme maza be bara Daena e Jekafukiro bara Ria ijiebuo kabae ije fu bara Kenanaetiko ije giakiro vae.  
\v 2 Ro e Emodo fari e Sekame fu e Ivaetiko ijiebuo are ije fure samuamo. Ijadufuo fu bara Daena gana umuikeno fu ijuonemo fu faememarena mesiri oenoe.  
\v 3 Sekame fu bara ije gamo fuka mae ijadufuo fuka uri vua fuone bino ijia kuarana oe fuone dabe dakudega Daena fu oe fu vierafekiro fu ijiege rei.  
\v 4 Ijadufuo e Sekame fu uri asoe fuone e Amo kuae, Ani bara ije mesiri miega na abeno kuae.   
\p
\v 5 Ro Jekafu fu gake kabae fuone fuka jaevema ijadufuo fu naebe oemarekinu oenoeno fu gae. Ro ame fari fuone boeje bune mave buone ije kaenamiana usiae vaeva ijadufuo fu naebe vua bino kuae ro ire bino rei. Ro fume ijia arene fikoga ame bu una ruae.  
\v 6 Areme Sekame asoe fuone fune ro Jekafuki vua kuaekiro vae.  
\v 7 Ijiege rekoga anafa ije bu una ruovo ijia bu vua ije izege Daena fu rema ije fievo buka oe fiadiae ro ka defarudiae. Ijadufuo maeje Sekame fuka vame ma ome ise ijene rena Daena dabe ijiege arafiri. Ro kuke fuka E Isureroko ijiebuo ive ijene kame arafiriae.  
\v 8 E Emo fune uri Jekafu kuae, Fari none e Sekame fuka kabae one ije oe ireobo fu vierafe. Ijadufuo abe kabae one ije kuaga fu fari none ije manike.  
\v 9 No vierafe jaka kabaerafa nuvuone ije kekiro no ve kabaerafa jone ije kene.  
\v 10 No ijiege rekina ja aesakae nuvuone igia oemarekinu karidufuo. Ja aesakae nuvuone gue fuaevena ijia juae me ro ijia oemarekinu oenoeno kiae.   
\p
\v 11 Ro fari fuone e Sekame fu dua fu uri Jekafukiro farirafa ije anadiana kiae, Ja isekie nika areke na daena abefo. Ja ijiege rekuva naka irere boeje ja vierafeva ije vajiake.  
\v 12 Ro a sinuome irere vierafekuma ni kuariega na fiene. Ro bara ijadufuo moni ije a biona ajia izege a vierafema kiekuma naka uri fuaeveke. Ijadufuo a nime kabae one ijiaru abe miega na abeno kuae.   
\p
\v 13 Rove Jekafudo anafa ije bu vame ka omise ije e Sekame fu Daena fake rema ijare buka ma isediae. Ijadufuo bu uri asoefuoki biesiriana vua ijiege kuariae.  
\v 14 Bu kiae, No maki nuvuone ige nobe kuaga fu e vajae surive buone ije naebe kania ufuna nuga naeva ije maniake. Ijadufuo maeje fu e ijieke ije maniakuma fuka no jaeve dabe muoke ijadufuo vame ije noka iseduo.  
\v 15 Ro ja maki nuvuone ige abekuva no vierafe jaka izege no vajae surive nuvuone kania ufuiva ijiege e fari ije ja dua jaka vajae suri jone kania ufuke.  
\v 16 Areme no ijare ja kabae nuvuone kekiro no ve jone keke. No ijiege re areme no jaena besu rena jaena biezinamina karinoeke.  
\v 17 Ro ja vame nuvuone ige no suri nuvuone kania ufuvo ije ja naebe ijiege rekuae vierafekuva no vierafe none kabae nuvuone mesirina uri vakono kiae.   
\p
\v 18 Ijadufuo Emokiro fari fuone ro e boeje bu fieke vua ije fuka magana bu abe ma vierafei.  
\v 19 Ijadufuo bu naebe saroe ro buka migegire urina vua bu kuariaeva ijiege rei. Ijadufuo maeje Sekame fuka Jekafudo kabae ijene ireobo vierafe. Ro e Sekame fuka e anuigi agane fuone boeje buka fu mukoe aguaekinu irinavo.   
\p
\v 20 Ijiege rena Emokiro Sekame bune va sidove ijadufuo viene ijia e kaerafa buone boeje bu ijia ruaeva ije vua ijene dabe ijia kuariae.  
\v 21 Bu kiae, E ije buka kaerafa nuvuone mukore ijadufuo arega bu jaena oemarekinu ijia ura oenoefo. No sakae nuvuone ije fuka ireobodo bu ijia karinoekuva ije fu mareke. Areme bu kabaerafa nuvuone ige keke no ve buone kedufuo.  
\v 22 No e fari boeje noka izege bu keva ijiege rena vajae suri nuvuone kania ufukuva buka noena besu oemarekinu karinoeke.  
\v 23 Ire boeje bu abeva ijiakiro mave ro fanu boeje bu saeva ije fune nuvuone ijadufuo vua ige ka kuaena avenamiga no kiaga bu noena besu karino kiae.  
\v 24 Areme e boeje sidove guove ijia kariva ije bune urina vua ije e Emokiro fari fuone bu kuaevo ijene avediana abe marei. Areme e fari boeje bune uri vajae suri buone ijene kani ufui.   
\p
\v 25 Areme rade maza inokubeke furima e bu uria matane visina kariva ijia Jekafudo anafa inokiro Simionikiro Rivae bara Daenado makirafa ijiebe urina sime buone bu kena bijaevo ijene kei. Bu kena mauike sidove guove ijia aruna oenoekinu e fari boeje buneka kaniavo bune oe furi.  
\v 26 Bu ijiege re areme uri e Sekamekiro asoe fuone e Emo ije duaku sime ijiebe kame kaniavo bu oe. Bu oekoga Simionikiro Rivae bune va e Sekamedo are ijia aruna maki buone Daena mesirina bune usiae vae.  
\v 27 Bu ijiege vakoga Jekafudo anafa gue bune Daenado ziena uri sidove ijia aruna oenoekinu sinuome boeje buone ije kei. Ijadufuo maeje bu are ijia maki buone dabe vame isema reva ijadufuo.  
\v 28 Bu aruna ire boeje maeje ijia naovo ijiakina mave-kau ro sifi ro doniki ijene buone kei. Areme bune kuke are boeje sidove irifo ijia kariva ije duaku kemiae.  
\v 29 Bu ijiege rena uri bara ro ame boeje kaenamia areme uri kuke sinuome buone boeje binobino ijene karina bune vae.   
\p
\v 30 Bu ijiege revoga Jekafu fu urina kiae, Iviama jane irufui amaerina mie. Ijadufuo e Kenanaetiko ro Feresaetiko ijiakiro e boeje aesakae igeko buneka na ziegafieke. Na e fari ije noka e sibanekuado e boeje igeko bu besu kuae fienamina una naena bijaekuva buneka kanuo noneka oe furidufuono kiae.  
\v 31 Jekafu fu ijiege kuariamoga bu una kuae, No ude vierafe no ijiege rekuva baki. Rove maki nuvuone ije buka dabe bara ome ise be fu vame ijia vajae fuone abe e miako bu dabe arafirivo ijiege arafiri. Ijadufuo no ijene ijiege kevano kuae.   
\c 35  
\s1 Godi fu are Betero ijia Jekafu daro maema ijene  
\p
\v 1 Areme Godi fune Jekafu kuae, Iviama ni migegire biona va are Betero ijia fata be a ijia none baname isoedufuo ije ufene. Naeje na Godi ije a uvia one Iso ga kona are Betero romoga na biedaeva ije nareno kuae.   
\p
\v 2 Ijadufuo Jekafu fune uri agane fuone ijiakina e boeje eranebe fuina kariva ijene kiae, Iviama ni godi jone boeje e ae binoko ijiebuo ije ja naeva ja ma vierafevo ije ka ijuegafiafo. A nine uri jone amaerenamikinu sinuome jone iviaeko ijene safo.  
\v 3 Ivia none are ige no karivo ije arena uri are Betero ijia va Godi none ije fu maza boeje are iziebureki na oenoeva ijia nosiki oenoekinu irufui na biediavo ijia ifejiemo ijadufuo fata no ijia fu zinone ifaejadufuo ije ufeno kiae.  
\v 4 Jekafu fu ijiege kuariamoga e boeje bune uri godi buone binobino bu naeva ijiakina adane gibore buone boeje karina una Jekafu vajae. Bu vajavoga fu karina are Sekame ijia ine okino kuavo ije zinume ijia mako rui.  
\v 5 Areme maza ije Jekafu fune anafa ijena bune urikuvejoga e boeje are isesina sidove irifo ijia kariva ije buka ireobo jumei. Ijadufuo bu naebe urina bu kaniakuae nuvediana kame arafiriae.   
\p
\v 6 Bu arekoga Jekafu fune e fuone ijena vakuma are Ruzi ijia usiae. Ro are ije iviama bu kua Beterono kuavo ro are ije fu Kenani guove ijia.  
\v 7 Ijiege rena Jekafu fune va ijia kekena fata be Godido ufema areme are ije abe ive ina Betorono kuae. Ijadufuo maeje maza ije Jekafu fu uvia fuone Iso gana ko ijia romoga Godi fu ijia arina bie.  
\v 8 Areme rade bara Debora bara ije Rebeka ifejamo ije fu baronemoga bu abena Betero ijia ine Oki ije manino zinume una ikine ijia mako rui. Ijadufuo are ije Jekafu fu abe ive ina kuae, Ine bu ijia niraena oefiane abeva ijeno kuae.   
\p
\v 9 Areme Jekafu fune aesakae Mesofotemia ijia urina una vakiro vako ijia Godi fu una kuke arina bie areme uri daro mae.  
\v 10 Godi fu daro mana kuae, Ivia ive one Jekafu bu kuavo ije fune furi. Ijadufuo ivia una gafege vako ije ive one bu Isurero kuakono kuae.  
\v 11 Areme Godi fune urina kuae, Naeje na Godi ka ma doroki ijene. Ijadufuo ni ame ma uruvana tuanaga bu e uruvana rena bure uri aesakae binobino kena karine. Ro asaerafa one ijiebuo uifari ije gue bu e mamekanu rena aesakae gue samuagiake.   
\p
\v 12 Nare sakae ije na abe Eburamekiro Aeseki miaeva ije abe a madufuo. Ro a baronekuma rade na kuke abe una uifari one rade urivo ije miakono kuae.  
\v 13 Godi fu Jekafu ijiege kuarama areme fune ijia arena vae.  
\v 14-15 Fu vakoga Jekafu fu uri are ije Godi fu ari vua kuaraema ijia mune gue karina fata be fu ijia gakinu oenoedufuo ijene sae. Fu ijiege sa areme uri ine orive oere ijiakiro do vaeni ijene kena ado ijia usiana daro miae. Areme fune are ijene abe ive ina Beterono kuae.   
\s1 Bara Resero fu baronema ijene  
\p
\v 16 Areme Jekafukiro agane fuone bune are Betero arena bune are Efurati vakuae vae. Bu uria vame vako ijia bara Reserodo mazani fu ame bietedufuo ije fune ruae. Ijadufuo Resero fu ijia zinuevena ame arafirina fune ma isejavaeme.  
\v 17 Resero fu ijiege e arafirina vakuma ame ije nafenoga bara ije fu ifejiamo ije fu urina kuae, Aneka ame fari bedua bietemano ade jumemono kuae.  
\v 18 Bara ije fuefuo imeno fu ijiege kuarako Resero fune ijia gue baronena vakuma oe kana ufui. Ro Resero fune baronekuveno ijia fu ame ije abe ive ina Beneni kuae. Rove asoe fuone Jekafu fu una abe ina Bezimanino kuae.  
\v 19 Ijiege rena Resero fune baronemoga Jekafu fu suri fuone ije abena vame ije bu Efurati vako irifo ijia mako rui. Ro are ije iviama bu kua, Beturiemeno kuavo.  
\v 20 Areme Jekafu fune mune be fu ijia gakinu oenoedufuo ijene abe amaerima areme abe ijia sae. Ro mune ije bu abe Reserodo mako viene ije saeva ije iviama fu uria ijia maniga bu gavo.  
\v 21 Ijiege rena Jekafu fune kuke biona vakuma are Ida gire jiagadogo bu sana ajiaeva ije manino ikene una gara ijia are sana ijia finoe.   
\s1 Jekafudo anafa fu tuanaema ijene  
\p
\v 22 Ro maza ije Jekafu fu uria sakae ijia finoeno ijia fari fuone e Reubini fu uri bara Bira asoe fuone ijadufuo imeno ije daturae. Reubini fu ijiege remoga asoe fuone ije fu vua ije fiemo fuka ma ise.   
\p
\v 23 Ro Jekafudo anafa boeje buka ame tuero (12) ijiege. Ro Jekafudo bara Ria ame fu nafena ije amure ijeja e Reubikina ro Simionikina Rivaekina ro e Judakiro Isika ro e Zeburuni ijene.  
\v 24 Ro una bara Reserodo anafa ijeja e Josofukiro Bezimani ijene.  
\v 25 Ro una bara Bira Reserodo imeno ijadufuo anafa ijeja e Denikiro Nafetari ijene.  
\v 26 Ro una Zirufu bara Riado imeno ijadufuo anafa ijeja e Gadikiro Esa ijene. Ame ije boeje bu Jekafudo anafa bu aesakae Mesofotemia ijia karina nafeva ijene.   
\s1 E Aeseki fu baronema ijene  
\p
\v 27 Ijiege rena Jekafu fune una are Mamure are Eburoni ivuake ije asoe fuone e Aeseki fino ijia ruae. Fu una sakae ije asae fuone Eburamekiro Aeseki bu karinoeva ijia ruae.  
\v 28 Ro Aeseki fuje fu fivakuma juaevasia uvani aderedi eti (180) ijiege furiko fu tuvuae bijana barone.  
\v 29 Fu baronemoga anafa fuone e Isokiro Jekafu ijiebe dabe nujae.   
\c 36  
\s1 E Isodo uifari ije bu uinuve ruae ijene  
\p
\v 1 Ijiege ro e ive ige ijeja e Iso ro ive fuone be bu kua, Idomino kuavo ijadufuo uifari ijene.  
\v 2 E Isodo bara fu kema ije fu bara Kenanaetiko ijene kei. Ro bara amure ije Ada fu e Eroni e Ivaetiko ijadufuo kabae. Ro bara be ive fuone ije Oribama fu e Ana e Zibionedo fari are Ivaetiko ijadufuo kabae ijene abei.  
\v 3 Ro bara be ive fuone ijeja Basemati fu e Isimerodo kabae ro kuke fu bara Nebaotido uvia ijene abei.  
\v 4 Areme bara Ada fu uri fari fuone e Erifazi nafekoga bara Basemati fu uri fari fuone e Rejurero nafei.  
\v 5 Fu ijiege nafekoga bara Oribama fu e Jeusikina Jaramekina e Kora ijene nafei. Ame boeje ije bu e Isodo bara ijiebe aesakae Kenani ijia karina nafeva ijene.   
\p
\v 6 Areme Iso fune uri agebara fuone ro e fuone boeje fuina besu karivo ijene merui. Areme fune kuke uri sinuome ro fanu ro mave binobino fu saema ro ire fuone boeje fu sakae Kenani ijia fina abema ijene abenama fune vae.  
\v 7 Fu uvia fuone Jekafuki besu karidufuo ije fu naebe mani ijadufuo maeje sakae ije fuka isekube. Ro kuke buka fanu ro mave ma uruvana saeva ijadufuo bu izege besu karikuva baki.  
\v 8 Ijadufuo fune urina Idome are uruo ijia finoekiro vae.   
\p
\v 9 Ijadufuo e ije aesakae Idome ijia kariva ije bu e Isodo uifari ijiebe.  
\v 10-13 E Isodo bara Ada fu ame besu e Erifazi nafenoga fu urina ame fari umui fague ije nafei. Ro ive buone ijeja e Temanekina Omakina Zefokina e Tatamekina e Kenasi ijene. Ro Iso fu kuke bara be dua Timinano kuavo ije abena ame fari e Amareki ije nafei. Ro e Isodo bara Basemati fari e Rejurero ije fu fina una ame fo (4) ijiege nafe. Ro ame ijiebuo ive ijeja e Nafatikina e Zerakina Samakina e Miza ijene.  
\v 14 Ro Isodo bara Oribama fu ame fari inokubeke e Jeusikina Jaremekiro e Kora ijene nafei.   
\p
\v 15-16 Ro e Isodo uifari ijiebuo e mamekanu ijeja e Temanekina Omakina Zefokina Kenazikina Korakina Gatamekina e Amareki ijene. E ije bu e Isodo bara Ada ijadufuo fari amure e Erifazido farirafa ijene.  
\v 17-19 Ro una e agane Nafatikina Zerakina Samakina ro Miza ije bu Isodo fari e Rejurerodo uifari. Ijadufuo e uifari ije bu bara Basematido anafa ijia uinuvena ruaeva ijene. Ijadufuo uifari boeje ije bu e Isodo bara Oribama e Anado kabae ijadufuo anafa e Jeusikina Jaremekina ro Kora ijiebuo uifari ruaema ijene.   
\s1 E Siado uifari ije bu uinuve ruaeva ijene  
\p
\v 20-21 Ro e ije bu iko zinume ijia sakae Idome abena kariva ije bu e Sia e Oraetiko ijadufuo anafa ijiebuo uifari ijie be ijia kari. Ro e Siado anafa ijeja e Rotamekina Sobarokina Zibionikina Anakina Disonikina Ezakina e Disane ijeja. Ijadufuo e ui ije sakae Idome ijia kariva ije bu e Siado anafa ijiebuo agane ijia uinuve ruaeva ijiebe ijia kari.  
\v 22 Ro e Rotane fu e agane Orikina Emane ijiebuo uifari ijiebuo asae. Ro e Rotanedo maki ijeja bara Timina.  
\v 23 Ro e Sobaro fu e agane Arivanekina Manatikina Ebarokina Sefokina e Onama ijiebuo asae.  
\v 24 Ro kuke e Siado fari e Zibioni fu ame inokiro e Aeakiro Ana ijene tuanae. (E Anare amure ae sao ijia mave doniki ije samuagianoeno ijia fu asoe fuone ijadufuo do bu mako ijia jiavo ijene gae.)   
\p
\v 25-26 Ro e agane Emidanekina Esibanekina Itivanekina Serane ije bu e Anado fari e Disane ijadufuo anafa. Ro kuke e Ana fu e agane ijiebuo asae buone ijene. Ro e Anado maki ije bara Oribama.  
\v 27 Ro e Eza fu e agane Biranekina Zavanekina Akane ijiebuo uifari ijiebuo asae.  
\v 28 Ro e agane Uzikiro Arane ijiebuo asae buone ijeja e Disane.  
\v 29-30 Ijadufuo e Oraetiko ijiebuo uifari ije sakae Idome ijia kariva ijiebuo ive ije ijiege. E Rotanekina Sobarokina Zibionikina Anakina Disonikina ro Ezakina e Disane ijene.   
\s1 Kini binobino bu aesakae Idome samuaeva ijene  
\p
\v 31 Ro ude e Isureroko bu kini bino naebe kevo bu aesakae Isurero samuaeva ijia bu kini igiebe aesakae Idome samuana ruae.  
\v 32 Ro kini amure ijeja kini Bera e Biodo fari are Dinaba ijare samuagiae.  
\v 33 Ro una ijuone fuone ijeja kini Jobabi e Zerado fari are Bozira ijare samuagiae.  
\v 34 Ro ura ijuone fuone ije kini Usame are Temanaetiko ijare.  
\v 35 Ro una ijuone fuone ije kini Adabi e Bedadido fari are Avitiko ijare samuagiae. (Kini ijare e are Midianeko ijena are Moabi ijia bijaema areme fure e fuone ijena iraraena kaniae).  
\v 36-37 Ro ura ijuone ije Kini Samira are Maserekako ijare samuagiae. Ro ura ijuone fuone ije Kini Soro are Rebotiko ije fu do irifo ijia fino ijare samuagiae.  
\v 38 Areme Kini Soro fu baronekoga ura ijuone fuone ije Kini Baranane e Akabo fari ijare samuagiae.  
\v 39 Areme Kini Akabodo fari ije fu baronekoga ijuone fuone ije Kini Adade fure samuagiae. Ro sidove fuone fu kema ive ije Fau ro kini ijadufuo bara ije Metabero. Ro bara Metabero fu e Matiredido kabae ro asae fuone ije e Mezarabi.   
\p
\v 40-43 Ro e Iso fu e agane binobino bu are Idomeko ijia kariva ijiebuo uifari buone ijene. Ro agane ijiebuo ive ijeja e Timinakina Arivakina Jefetikina Oribamakina Erakina Finonekina Kenazikina Temanekina Mibizakina Medierokina Irame ijene. Ro sakae iziebure agane binobino bu kariva ije bune agane buone ijiebuo ive ijia nabuikena ijia kari.   
\c 37  
\s1 Josofudo naka fu naema ijene  
\p
\v 1 Ijiege rena e Jekafu fune una ro Kenani are ije asoe fuone fu finoema ijia finoe.   
\p
\v 2 Ro Jekafukiro agane fuone ijiebuo suvuare ije ijiege. E Jekafudo fari Josofu e ije juaevasia sevenitini (17) ijiege furima ije fu bofari fuone bara Birukakiro Zirufa ijiebuo ame ijena mave-sifi ijiakiro mave-goti ije samuagianoe. (Ame bofari ije bu Jekafudo bara inokiro ijiebuo ame ijene). Josofu fu maza be oenoena ro kekena asoe fuone Jekafu ire ise bino bofari fuone ijiebe renoejo fu giaema ijene kuarae.   
\p
\v 3 Ro Jekafu fu fari fuone e Josofu fuka ma ireobo oetuamo ro ame gue ije fume sibaneke oetuamo. Ijadufuo maeje Jekafu funeka ma eove rema ijia fu Josofu bietema ijadufuo fuka mukoreigia oetuamo. Ijadufuo maza be fu ugone ka ni mukore be saguma dabe mamo fu abiese. Jekafu fu Josofu ijiege oetuagaro ame gue fu naebe uruke oetuamoga bofari bu ije gavo buka defarudiae.  
\v 4 Ijadufuo bofari ije buka Josofu dabe nibijakinu ro vua ma ijiaru kuaravo baki.  
\v 5 Areme maza be Josofu fu naka be naena una bofari ijene naka ijadufuo maeje kuariamo buka una ma urukeigia ziegafae.  
\v 6 Josofu fu urina bofari ije kiae, Ni mauike karike na naka igene kuariaga fiefo.  
\v 7 Na naka naena gaga no besu juaru gafia ire vuiti ije asena ufuanoeve. No ijiege renoejo ijia vuiti none na ufuaeva ije buka uri arire irekoro jone bu una none na ufuaeva ije kurituakafavo na giaevana kiae.   
\p
\v 8 Fu ijiege kuariamoga bofari ije bu urina kuae, Ijiekido a vierafe a are e kini ireobo rena una no samuaguokiro a ijiege vierafemano kuae? Ijadufuo ame bofari ije bune Josofu naka ije fu naema ijiakiro ise ije izege bure redufuo fu kuariaema ijadufuo buka fu urukeigia ziegafae.   
\p
\v 9 Areme rade Josofu fu una kuke naka be duaku nae areme uri bofari ije kuariae. Fu kuariana kiae, Na naka be duaku naevano kiae. Fu kia, Naka ije na nae gake mazani ro asame ro zuvi ireveni (11) ijiege bu una na kurituakafievo na giaevano kiae.   
\p
\v 10 Josofu fu ijiege kuaria areme fune kuke una va asoe fuone ije naka besu ijene kuarae. Fu ijiege kuariamoga asoe fuone fuka uri madima kuriaerena kuae, A naka ije izeki ijene naena ura kuaenoene? A vierafero no e bofari one igiakiro asie one ro asoe one ro na e boeje noka a auge sana kurituakafakiro a ijiege vierafemano kuae?  
\v 11 Ijadufuo bofari ije buka uri Josofu oe isema vierafe rove asoe fuone ije fuka uria naka ije Josofu fu naema ije fu irerefuo naema fu ijene ireobo oenoekinu vierafenoe.   
\s1 Josofudo bofari bu Josofu abe e guebuo fuaeveva ijene  
\p
\v 12 Areme bune oenoena maza be Josofudo bofari ije bune are Sekeme ijia asoe buone ijadufuo mave-sifi ije samuagianoekuae vae.  
\v 13 Areme maza sibaneke furikoga Jekafu fu uri Josofu kuae, Na vierafe a are Sekeme bofari one bu mave-sifi samuagiakuae vaeva ijia nuvediakono kuae. Fu ijiege kuaramoga Josofu fu una kuae, Ate ije fune maredo na nuvedia vakono kuae.   
\p
\v 14-15 Fu ijiege kuaramoga asoe fuone fu uri kuae, Va gafia giaga bofari one bune mukoe oenoe ro kuke mave-sifi bune mukoe oenoevoga ni giana una ro kuarie na fieno kuae. Asoe fuone fune ijiege kuarama areme kuamoga Josofu fune Eburoni isove ijia urina Sekeme nakiro vae. Josofu fu vakuma Sekeme kekena ijia ura bofari fuone ije rerianoe.  
\p Fu ijia rerianoenoga e be fu ruoma keke biena kuae, A ige a irere rerenoeno kuae?  
\v 16 Fu ijiege kuaramoga Josofu fu kuae, Na bofari none ije bu igia mave-sifi samuagianoevo na ijene rerianoeve ro abe giaemano kuae.  
\v 17 Fu ijiege kuaramoga e ije fu kuae, Bofari one ije ige bu baki. Ro na fie bu are Dotani ijia vakuae kuaevo na fievano kuae. Ijadufuo Josofu fune reriana game bofari bu oenoejo ijia vae.  
\v 18 Ro fume uria mumabo gufia vuakoga bofari ije bu gana uri naka ije fu naema ijadufuo fu kanakuae bue kuaena amaeri.   
\p
\v 19 Areme bu gake fune ruoma ivuaremoga bune una bue kuae, E ije naka naema ije fune gafaeji ruome.  
\v 20 Ijadufuo roga no fare kanana dabe mako bu ijia do jiavo fu sima ijia abiesefo. Ro no vaga asoefuo fu kuokuma no kuako fune fanu kuriae taraeko ijiebe sakivano kuake. No ijiege renaro kari gaga naka fuone fu naema ijadufuo maeje fu izege rega no gano kuae.   
\p
\v 21 Bofari gue bu ijie kuaevoga e Rubini uvia fuone be fu una Josofu babuena kiae, Na vierafe no fu kanadufuo ije fu naebe marei.  
\v 22 Rove nime roga fare dabe are etura igia mako ije bu dofuo ruiva ijia abiesekiro jade kanaga fu baronemono kiae. E Rubini vua ije fu ijiege oe vierafena vafaema ije fu vierafe fu ijiege rena Josofu mauike mesirina abe una nujaga fu una asoe fuone ijadufuo ruakiro fu ije ijierei.   
\p
\v 23 Ijiege rena Josofu fune vakuma game bofari bu oenoevo ijia kekemoga bofari bune uri ugone ni mukore jiagadogo ije fu abiesema ijene fare dasuaejae.  
\v 24 Areme bune fare dabe mako be bu dofuo ruiva fune sima ijia abiese.   
\p
\v 25 Areme bune karina ire ivo ijia saroruba bu gake e Isimaraetiko uruvana gue bu aesakae Giriati ijia una gamia Ijifiti vakuae rovo bu giae. Ro e ije bu re udiudiki boeje kena fuaevekuae karina mave kamero buone ado ijia nama ruove.   
\p
\v 26-27 Ijadufuo Josofudo bo buone be e Juda fu urina uviarafa gue kiae, Na vierafe no e Josofu iviene nuvuone ma ije kana fu baronekuma ire maeje noka irere abekuva baki. Ro kuke no ise rena e kana fu baronena kavuane usiaekuma ije no izia sauike? Josofu fuka iviene nuvuone fuka noena kavuane ro vajae besu. Ijadufuo na vierafe no kanana vajae fiane madufuo ije arekiro roga nome dabe e Isimaraeroko ijiebuo fuaeveno kiae. Juda fu ijiege kuariamoga bofari boeje bune oemare.   
\p
\v 28 Ijadufuo e Midianaetiko gue bu vame ijane rovoga Josofudo bofari ije bune mako ijia Josofu umui kevo fu ajiae. Areme bune mesiri usiae e Midianaetiko miagana kiavo bu ire siruva tuaedi (K400) ijiege fu fuaeve. E ije bu Josofu fuaevena bune mesirina gamia aesakae Ijifiti ijia ari vae.   
\p
\v 29 Ijiege rekoga e Rubini fu rade una va mako ije bu Josofu fare abieva ijene gake fu bakiga fuka ma ireobo oefiaemo fu uri sinuome fuone farae.  
\v 30 Areme fu una keke bofari ijene kiae, Ame ije mako gafe fu baki ro ije naeje na izege rekono kiae?   
\p
\v 31 Ijiege rena ame bofari ije bune uri mave-goti be kanana kavuane dabe Josofudo ugone fu abiemo ijene azi.  
\v 32 Bu azima areme abena una va gafia usiaena asoe buone ije nijae. Bu nijaena kuae, Ate kame ugone ige no are sao gamia abeva ige gaga fu fari one Josofudo ro fu eradoga gano kuae.   
\p
\v 33 Areme asoe buone fu gake fune ma fari fuone ijadufuo ugone fu abiemo ijene. Ijadufuo Jekafu fuka uri vijena nimekinu kiae, Ugone ige funeka fari none ijadufuo! Na vierafe buneka fanu kuriae taraeko ijiebe fari none ije bune saki dabe buvuase igana ugone bu dabe ijia aberevano kiae.   
\p
\v 34 Areme Jekafu funeka oefiaemoga fu uri sinuome fuone faradia faraema areme uri ugone ise bu sana oefiane abevo ijene sama areme fuka maza jiamadogo fari fuone ijadufuo oefiane abei.  
\v 35 Jekafu fu ijiege remoga anafa fuone boeje bu fu dasumakinu ifejakuae ruae. Rove fuka ijuonena uri kiae, Na fari none ijadufuo oefiane ige na abevo ije na arekuva baki. Ro oefiane ige na abevo ije na ijiakuma barone vano kiae. Jekafu fune uri fari fuone ijadufuo nimekinu oefiane ma ireobo abei.   
\p
\v 36 Ijiege rekoga e Midianaetiko bune Josofu fuaevena abe va gamia Ijifiti usiae. Bu usiaena buse Josofu abe una e Fotifado fuaeve. Ro e Fotifa fu e ireobo be fu e azo keva gue bu kini ijadufuo are ije juo karijo ije samuagiamo.   
\c 38  
\s1 E Judakiro asae fuone bara Tama ijene  
\p
\v 1 Ijiege rena maza ijia e Juda fu uviarafa fuone bu nafare ijia karijo ije uniana fune urina are isekube Adurameno kuavo ijia e Iraki fikiro vae.  
\v 2-3 Juda fune ijia fivakuma uri e Suado kabae bara kenaneko ijene gana abei. Areme bara fuone fu uri ame fari be nafenoga fu abe ive ina e Eri kuae.  
\v 4 Areme Judado bara ije fune una kuke ame bedua nafenoga fu abe ive ina e Onani kuae.  
\v 5 Areme fu una kuke ame fari be nafenoga Juda fu abe ive ina e Sira kuae. Ro maza ije e Juda fu are Akezibi ijia fino ijia bu ame ije bietei.   
\p
\v 6 Ijiege rena Juda fune ijia fivakuma areme fune uri bara Tama gana mesiri fari fuone boga e Eri ije nujaejamoga fu abei.  
\v 7 Rove e Erido vame fu vierafekinu kenoeno ije fuka ma omise. Ijadufuo E Ireobo fu ije gaga fuka naebe oemaemoga fu kanamo fune baronei.   
\p
\v 8 E Eri fu baronemoga Juda fu una fari fuone ririkua e Erido iviene e Onane kuae, Akae nuvuone fune ijiege namo ijadufuo ni va uvia one ijadufuo bara amune ijene abene. A ijiege rekina bara ijare uvia one ije baronema ijadufuo ame uifari bino tuanano kuae.  
\v 9 Rove e Onane fu vierafero ame ije fu nafekuma bu ma fuone rekuva bakiro fu ijiege vierafe. Ijadufuo maza ije fu kavuare fuone ijiaki naema ije safine fuone ije fu areko fu makave ari. Fu ijiege rekina fube uvia fuone Erido ame tuanakiro fu ijiege rei.  
\v 10 Rove E Ireobo fu Onane vame ije fu rema ije fuka naebe oemarei ijadufuo fu e Onane kuke kanamo fune baronei.   
\p
\v 11 Areme Juda fune uri asaefuo Tama kuae, Nine una va orafa one ijena finokiro ade una baru be manimo. Ani va finoekinu samuake ame none iviene e Sira fu ubaerega ni una ro manino kuae. Ro Juda ijiege fu kuaema ije fu ma kuaema baki. Fu vierafero bigake Godi fu kaniaemo bu oeva ijiege Godi fu fudua kana fu barone bigakiro fu ijadufuo ijiege kuarae. Ijadufuo bara asae fuone Tama fune una urina orafa fuone ijiebuo vae.   
\p
\v 12 Areme juaevasia sibaneke furikoga Judado bara e Suado kabae ije fune baronei. Fu baronemoga Juda fune bara fuone ijadufuo oefiane abenoena furinoga fu uri kai fuone e Ira are Adurameko ijiaki bune are Timina ijia vae.   
\p
\v 13 Juda fu ijia vakoga ebe fiena va bara Tama kuae, Asae one baru ije fune Timina ijia mave-u ufukiro vaemano kuae.  
\v 14 Ro bara Tama fu gake Judado fari iviene e Sira fune e ireobo rei rove asaefuo e Juda fu naebe migegire kuamo fu fari fuone mani. Ijadufuo Tama fune uri ugone bara amune bu savo ije fu saema ijene azose. Areme fune uri ugone fae be abe nikubae ije okura areme fune vae. Fune va vame ije bu are Timina vako ukua ijia sidove iseke Enaemeno kuavo ijadufuo viene bu usiaevo ijia samuana fine.  
\v 15 Fu ijia fikoga e Juda fu ro Tama gana vierafero fu bara be fu vame ijia oenoeno ijero fu ijiege vierafe. Ijadufuo maeje Tama fune ugone fae abena nikubae fuone okuraema ijadufuo fu naebe mukoreigia gana vierafe.  
\v 16 Ijadufuo Juda fune gakinu vame ikene ijia ufuaena vakuma gare fu fino ijia kekei. Areme fu uri kuae, Naka osiki naekiro vierafevano kuae. Juda fu ijiege kuamoga Tama fu una kuae, Ro na osiki naekuva ire maeje a irere ije na miekono kuae?   
\p
\v 17 Ro Juda fu kuae, Na vierafe naka mave goti none gafe na saeva ijia irore maejia abe makono kuae. Ro bara Tama fu una kuae, Ke ije fune mare. Ro nika sinuome one be abe miega na farekina a ije vierafekuma abe arekiro a va mave goti ije fare nijieno kuae.   
\p
\v 18 Bara Tama fu ijiege kuaramoga Juda fu kuae, Ro a vierafe na irere abe maekina naka ijadufuo mave goti fare nijakono kuae. Ro Tama fu kuae, Ni ire guraeje a abe ive one isoema ijiakiro soe fuone ro mudu one ije ke vajieno kuae. Ijadufuo Juda fune uri ire ijene kena vaja areme fune va fuosiki naenoga Tama fu e fudie.  
\v 19 Areme Tama fune una va are fuone gafia kekena ugone fae ije fu abe nikubae okuraema ijene ira nija areme fune uri ugone bara amune bu savo fu azo naema ijene una sae.   
\p
\v 20 Areme Juda fune uri Ira e kai fuone ije kuamo fu mave goti irore ije farena abe bara ije makiro vae. Fu mave-goti ije abe bara ije magaro ire ije fu abe ive fuone isoema ijiakiro mudu ije fu kena vajaema ijene una kekiro vae. Rove e Ira fu va bara ije rerenoega fu baki.  
\v 21 E Ira fu bara ije rerenoega baga fu uri e ijia oenoevo ijia kiae, Bara ije fu vajae fuone abe fuaevenoeno ije fu vame irifo igia fino na gaeva ije fu izieburekino kiae? Fu ijiege kuariamoga e ijia oenoevo ije bu kuae, No bara ije fu ijiege ura vajae fuone abe fuaevenoeno ije are igia fu bakino kuae.  
\v 22 E ije bu ijiege kuaravoga Ira fu una va Juda kuae, Bara ije na va rerenoega fu baki. Ro na e ijia oenoevo ije kiavoga bu kie no are igia bara ijieki ije bu bakino kievo na ruaevano kuae.  
\v 23 Ira e Judado kai ije fu ijiege kuaramoga Juda fu kuae, Na vierafe naka bara ijene fuaevekiro vierafe rove a naebe bie. Ro no uria sinuome none ijene kekiro uri bara ijene rerenoekuva e buka guona kisuodufuo. Ijadufuo sinuome ije ni arega bara ije fu fue keno kuae.   
\p
\v 24 Areme rade asame inokiro furima ijia bu ebe ro Juda kuae, Bara asae one Tama fuka urana v ame igia vajae fuone dabe fuaevenoeno kuae. Fu ijiege renoena areme iviama fune e fudiena fino kuae. E ije bu vua ijiege Juda kuaravoga fu kiae, Ni va bara ije mesiri dabe miane ifaejema ijia ifaejega fu naena baroneno kiae.   
\p
\v 25 Areme e ije bune bara ije mesiri dabe miane ifaejekuae vakoga fu uri vua asae fuone e Juda nijana ijiege kumei, E ige na fudieva ije na e ije fu sinuome ige na faradiaeva ije vajiema ijadufuo fudie. Ijadufuo ni ro ire ige bu abe ive isoevo ijiakiro mudu ige giaga eradoga giano kumei.  
\v 26 Areme Juda fune vierafegake sinuome ije bune ma fuone fure kena bara ije vajae. Ijadufuo fu uri e ije kiae, Bara ije vua ije funeka ma kuae. Na vame maeje na redufuo ije naka naebe ijiege nuvei. Na bara ije naka abe fari none ije madufuo rove naka isema revano kuae areme rade Juda fu naebe una va bara Tamaki nae.   
\p
\v 27 Ijiege rena vakuma maza ije Tama fune e nafekuveno ijia bu gake ame ije bu ufariki.  
\v 28 Areme Tama fune danuna ame nafekuveno ijia ame be fu umui abuemoga bara ije Tamado imeno ije fu ame ijadufuo umui ijia farei. Areme fune uri kaje kavuane ijia abena umui ijia kira areme kuae, Ame ige fu amureno kuae.  
\v 29-30 Rove ame ije fu una umui merukoga uvia fuone ijare ude ari. Ijadufuo bara ije Tamado imeno ije fu kuae, Aneka koro giriesama arimano kuae. Areme fune uri ame amure ije abe ive ina e Ferezi kuae. Ro rade ame ije kaje kavuane kiraeva ije fu arimoga fu abe ive ina Zera kuae.   
\c 39  
\s1 Fotifado bara fu Josofu biesirima ijene  
\p
\v 1 Ijiege rena e Midianaetiko ije bune Josofu fuaevena mesiri ari vakuma gamia Ijifiti usiae. E ije bune usiaena buse Josofu dabe una Fotifa e ije e Ijifitiko ijiebuo kini ijadufuo are ije juo karijo ije samuamo ijiebuo e ireobo ije fuone fuaeve.   
\p
\v 2 Areme e Josofu fune e ireobo fuone e Ijifitiko ijadufuo are ijia fina fuefuo imei. Fu ijia fina imekoga E Ireobo Godi fuka Josofu marejana mukoreigia ifejakoga fu ire boeje mukoreigia renoe.  
\v 3-4 Josofu fu ijiege renoenoga e ireobo fuone ije fu gake Godi fune fu mukoreigia ifejako fu ire boeje mukoreigia renoeno ijadufuo fuka ireobo oemarei. Ijadufuo Fotifa fu Josofu kuamoga fu fuefuo ire boeje samuagiakinu ro e boeje are ijia imevo ije samuagiae.  
\v 5 Maza ije Fotifa fu Josofu kuamo fu fuefuo ire boeje samuagiaema ijia Godi E Ireobo fu Josofudo duvado ijia e Fotifa daro mana fu mukoreigia ifejae. E Ireobo fu ijiege re areme uri ire boeje gire ijia naovo e ijia karivo ije ro aesakae fuone ijene marejana mukoreigia ifejae.  
\v 6-7 Ijadufuo Fotifa fuka uri ire boeje fu abema ije fuka kena una Josofudo umui tare ijia nana kuamoga fure samuagiae. Ro Fotifa fu naebe una ire ijene vierafe ro fume oenoena kiaga bu ire ijiaru vajaga fu inoe.  
\p Ro e Josofu fuka e nikubae mukore ro kuke fuka e daroki. Areme rade maza be e ireobo fuone ijadufuo bara ije fu oenoekinu gaba urina Josofu kuae, Ani ro nosiki naeno kuae.  
\v 8 Fu ijiege kuamoga Josofu fu ijuonena kuae, Na e ireobo none fu ire boeje gire igia naovo ije fuka kena una daro none ijia naejie. Fu na ma vierafema ijadufuo fu naebe una ire ijene uruvana vierafei.  
\v 9 E boeje are guove igia imejo ije bu e anuigi baki. Naeje nare nosukua ire boeje fu vajiema ije samuagiave ro a osukua a bara fuone. Ijadufuo ro na izege uri Godi fu fina gieke na nidua fuone ijia vame ka omise ije rekono kuae?  
\v 10 Bara ije fuka maza boeje Josofuo ijiege kuaru rove fu naebe fuosiki nae ro kuke fu naebe fu ivuake ijia oenoe. Ro fuka una fu aguaena mukoreigia samuae.   
\p
\v 11 Areme maza be Josofu fune una gire ijia i fuone ijene mekiro aru vae. Ro maza ije e gire ijia buka ma baki.  
\v 12 Ijadufuo Josofu fu vakoga bara ije fu urina ugone jiagadogo fu abiema ijia farena uri kuae, Ani ro nosiki naono kuae. Bara ije fu ijiege kuamoga Josofu fu ijuonena keke kona vaga ugone fu ijia arene vakoga bara ijare abei.   
\p
\v 13-14 Ijiege rena Fotifado bara ije fu gake e Josofu fune kona keke makave ijia vake ugone fuone ije fu uria ijia namoga fu vierafeba uri vijena e konamoga e fari gue makave ijia imevo bu dabe abuena ruae. Bu rovoga fu kiae, Kame igia gafo. E Iburuko ije baru none fu fuaevena mesiri are ige fu nujaema ijare vame ige kema ige gafo. E ije fu igia aruna nosiki naekiro umuikiemo na vijevoga fu keke kona vae.  
\v 15 Fu keke kona vaga ugone fuone fu guraeji arena vaemano kiae.   
\p
\v 16 Bara ije fu ijiege kuaria areme ugone fu abe ijia nijana fikoga Josofudo e ireobo fu vaema muge una ijia kekei.  
\v 17 Areme bara ije fu uri vua ijene dabe barufuo kuarae. Fu kuae, E Iburuko ije a fuaevena are igia nujaema ije fuka vame ise ije rena ige na naeva igia aruna na kie.  
\v 18 Rove naka urina uruke vijevoga fu keke kona makave ijia vagana ugone fuone fu igia arena vaemano kuae.   
\p
\v 19 Areme Josofudo e ireobo fu bara fuone ijare vua ijeja kuaramoga fu fiemo fuka defarui.  
\v 20-21 Ijadufuo fu uri e Josofu dabe kini ijadufuo dibure are be bu e dibureko uniana samuagiavo ijia nujae. Rove maza ije Josofu fu dibure fino ijia E Ireobo Godi fuka uria ijia fuosiki fikinu samuae. E Ireobo fuka Josofu marejana ifejakoga fu ire boeje binobino mukoreigia renoe. Ijadufuo e ireobo dibure samuamo ijiakiro e dibureko gue bu vame fuone mukore ije fu kemo ijene gae.  
\v 22 Ijadufuo e ireobo dibure samuamo e ireobo ije fu Josofu abenoga fure una e dibure karivo ije gue samuagiakinu ro ire boeje binobino ijia redufuo fu ije kuariako bu renoe.  
\v 23 Ijadufuo rade e ireobo e dibureko samuagiamo ije fu i fuone fu meno boeje fu abena una Josofudo umui tare ijia nijana fu naebe una ijene ireobo vierafe. Ijadufuo maeje E Ireobo fu Josofuki oenoekinu mukoreigia samuana ifejakoga fu ire boeje mukoreigia renoe.   
\c 40  
\s1 E inokiro Kinido i mevo ijene  
\p
\v 1-2 Areme rade maza be E Ijifitiko ijiebuo kini fu e inokiro kevo bu fuefuo imei. E be fu do vaeni bu kinido vese ruovo fu ije samuamo ro be fu burete ifaejemo. Ijadufuo rade maza sibaneke furikoga e inokiro bu ire be kini fu naebe oemarema ijene rei.  
\v 3 Ijadufuo kini Fero fu e inokiro ijene kena e ireobo e dibureko samuagiamo ije vajamoga fu kena are ije Josofu fu dibure fino ijia uniae.  
\v 4-5 Ijadufuo e ireobo ijare e inokiro ijene kaenamia Josofu uniaejana kuamo fure samuagiae. E inokiro ije kinido burete ifaejemo ijiakiro do vaeni samuamo ije bu dibure ijia kari vakuma rade maza be e inokiro bu naka buone binobino naoe. Ro naka ijiebuo maeje bu binobino.   
\p
\v 6-7 Areme nituame suoke Josofu fu giaeja ruoma e inokiro ije giake buka naebe oemarei ro bu oefiaeguma kariva fu giae. Ijadufuo fu uri e inokiro ije kiae, Ja irerefuo iviama uikubae jone ja naebe oemare ro jaka oefiaeguma karivano kiae?   
\p
\v 8 Fu ijiege kiamoga bu kuae, No e inokiro no naka nuvuone bino ivia muge naoe. Rove fu erare naka ijiebuo vua maeje kuaruoga no fiekuva bakino kuae. Bu ijiege kuaravoga fu kiae, Naka ijiebuo vua maeje kena kuaena giadufuo ije fu Godire korufuo redufuo. Ro ni naka izege ja naona irere ja giaeva ije kuarie na fieno kiae.   
\p
\v 9-10 Josofuo fu ijiege kuariamoga e ije Kini Ferodo do vaeni bu amaeria ruoga fu samuamo ijare amure uri naka fuone ijene kuarae. Fu kua, Na nae gake ine bu do vaeni amaeriavo be fu nidua none igia manino na gae. Ro ine ije fu ajiana gome inokubeke atakoro fune migegire vi irasena fune suni kirakiro isuma areme fune fo fuone uruvana kiriavo na giae.  
\v 11 Ro naeje na Kini Ferodo kafusi ijene umui none ijia fare. Ijadufuo nane uri ine ijadufuo fo ijene turana kafusi ijia musama abena Kini mavo fu ino na gaevano kuae.   
\p
\v 12 Fu ijiege kuaramoga Josofu fu kuae, Naka ijadufuo maeje fu ijiege kuae, Ine vaeni gome inokubeke fu ataema ije fu maza inokubeke ijene.  
\v 13 Kini Fero fu maza inokubeke furike fu kuaga a dibure ige arena keke vake. A vaga fu i one ije e bu do vaeni amaeri ruoga a kena kini vajamo ije a ude mema fu ije kuaga a una meke.  
\v 14 Ro fu kuaga a i one una mekuma a isekie ni na ireobo vierafene. Ni noefuo Fero kuarana kuaga fu kenujiega na are ige arena keke vuane.  
\v 15 Naeje na aesakae none ije fu e Iburuko bu oenoejo ijia. Rove bu ebe na naebe oemarejieva ijadufuo bu mesiriena dabe ebuo are igia nujieva na iviama dibure igia five. Nana ire ise be na irere ije reva baki rove bume dabe dibure nijievano kuae.   
\p
\v 16 Josofu fu ijiege kuaramoga e be ije Kinido burete mukore ifaejemo ije fu vua ije fie. Fu fieke Josofu fu naka ijadufuo maeje funeka mukoreigia kuaramoga fu fiena uri naka fuone fu naema ijene kuarae. Ijadufuo fu urina kuae, Na naka nae gake na kamui inokubeke nigofo none igia kei.  
\v 17 Ro kamui be ije na ado ijia nakeva buka burede ni binobino mukore Kini fu idufuo bu ifaejeva ijiebe ijia kari. Rove bune ume ijiebe arina nigofo none ijia ire burede ije bune ifurivano kuae.   
\p
\v 18-19 Fu ijiege kuaramoga Josofu fu kuae, Kamui inokube ije a giaema ijeja maza inokube ijene. Ro iviama igia vakuma maza inokubeke furino ije rade Kini fu kiaga bu a dabe ine ijia kira abieseke. Bu dabe ijiege kira abiesega a baronekuma ume ijiebe ro a dabe buvua ina furikono kuae.   
\p
\v 20 Ro nituame ije fune Kini Ferado mazani bu bieteva ijene. Ijadufuo Fero fune ire ireobo kanafuima areme e fuone imevo mamekanu ije kiamo bu ro i. Fu ijiege kia areme kuke e fuone imevo inokiro burete ifaejemo ijiakiro do vaeni samuamo ijene bie kiae. Ijadufuo bune dibure are ijia e inokiro ijene kaenamia e fuone imevo ijiebuo nidua ijia ruae.  
\v 21 E boeje bu ijia afuikoga Kini fu urina e ije fu do vaeni ije bu ke ruovo ije samuamo ijene i fu meno ije abe una mae.  
\v 22-23 Kini fu ijiege regaro una e be ije fu burete mukore ifaejemo ije fu kiamo bu kaje dabe uro ijia kirana abe ine ijia kira abiese. Bune izege Josofu fu kuariaema ijiege rei. Rove e ije fu Kinido do vaeni bu ke ruovo ije samuamo ije fu naebe una Josofudo vua ije fu Kini kuaradufuo fu kuaraema ije vierafe ro fuka totei.   
\c 41  
\s1 Kini Ferodo naka fu naema ijene  
\p
\v 1-2 Areme vakuma juaevasia inokiro furikoga Kini Fero fu naka be nae. Fu nae gake fu do ireobo Naerono kuavo uvuoka ijia manine. Fu ijia manikoga mave kau seveni ubaeradiana maturaeva ijiebe do guove ijia ajia usiae. Areme bune vajoma ije inoeve.  
\v 3-4 Bu ijiege inoekoga kau una kuke seveni (7) ijiege budua bu una do ijia ajiae. Ro kau rane ije ajiaeva ije buka garuradiana suri nujiama ikene ane ajiausiae. Bu ajiausiaena bune va kau bino ije bu do zinuine ijia vajoma inoejo ije ivuake ijia oenoeve. Bu ijia oenoekinu mave-kau seveni (7) gue ije ubaeradiana maturaeva ije sakiana buvua ivo Fero fu giana uri.   
\p
\v 5-6 Fu ijiege nae areme una kuke naka bedua nae gake kumune seveni (7) ijiege bu ane besu ijia kiraeva fu giae. Ro kumune ome maeje fu bijiaema ije fuka mukoreigia bijanoema arei. Areme fu una kuke gake kumune seveni (7) ijiege bu una kuke ane besu ijia kiriavo fu giae. Ro kumune rane ije ajiaevo fu giaema ije buka isesina ro kuke fune majaufi are mazani ajiamo nake ufemo ijare ufina turakorenoena arei.  
\v 7 Kumune isesina seveni (7) ijiebe una kumune gue ije bune mukoreigia maradiaeva ijene kame ivoga fu giana uri.   
\p
\v 8 Ijiege rena Fero fu naema suoke urina naka ije fu naema ije vierafega fuka naebe marei. Ijadufuo fu kiamogana bu urina aesakae Ijifiti guove ijia e kineki ije ro e mukoe vierafevo ije kiamoga bu kaenamiana ijia afui. E boeje bune ijia afuivoga fune urina naka fu naema ijene kuariae. Rove e besukua be fu naebe naka fuone ijadufuo maeje una kini kuarae.   
\p
\v 9 Areme e ije kini ijadufuo do vaeni bu vese ruovo ije samuamo ije fu urina kini kuae, Na iviama ijare vua be na kuaradufuo na totiemo na areva na ije vierafe.  
\v 10 Na e kai none ije farava mukore ifaejemo ijiakiro na ije no are ude ziegafuona kaenamuo dibure unue. A dibure unuomo no e ije dibure juo karijo ijiebuo e ireobo ijadufuo are ijia kari.  
\v 11 Ro muge be e inokiro ije no naka bino naoe rove naka ije no fuosiki naoeva ijiebuo maeje fuka binobino.  
\v 12 Ro e Iburuko be e dibure juo karijo ijiebuo e ireobo ijadufuo imeno ije fu noena ijia fino. No naka nuvuone besubesu no naoeva ijene kuaravoga fuka naka ijiebuo maeje mukoreigia kuarue.  
\v 13 Ro naka ijiebuo maeje fu kuaruema ije ire maeje buneka izege fure kuaruema ijiege riarei. A i none ije a dasuaejiema ije ane abe una igie mie. Ro una kai none ije ane kiamoga bune kaje dabe uro ijia kirana abe ine ijia kiramo fune baronemano kuae.   
\p
\v 14 Fu ijiege kuaramoga kini Fero fune kiamoga bune migegire dibure ijia Josofu mesirina ruae. Bu mesiri rovoga fune uri do ruema ijia mena areme uri ugone fuone iviaeko sama areme fune kini fino nidua ijia ruae.  
\v 15 Areme Josofu fune ijia manikoga kini fu urina kuae, Na naka be nae rove fu erare maeje kuariekuma baki. Ro na fie bu kie e bu naka naovo vua maeje are kuariamono kievo na fievano kuae.  
\v 16 Kini Fero fu ijiege kuaramoga Josofu fu una gue kuae, Kini e ireobo none, naeje naka baki. Rove Godi fu manido fure naka ijadufuo maeje a fiekiro vierafema ije fure kuarakono kuae.   
\p
\v 17 Areme kini fune urina kuae, Na naka naena gake naeje na do Naero zinuine ijia manive.  
\v 18 Na ijia manina giake mave kau seveni (7) ka ubaeradiana maturaeva ijiebe do ijia ajia usiaena bune vajoma inoeve.  
\v 19 Areme na una giakoga kau seveni (7) ka garuradiana ane samadireva ijiebe una kuke do ijia ajiae. Mave kau ije buka ma omise bu ude aesakae Ijifiti igia oenoevo na giaeva baki ijiebe ijia ajiae.  
\v 20 Kau ise ane ajia usiaeva ije bune uri kau maeje ubaeradiaeva ije kame foteke sae.  
\v 21 Rove kau ije bu kame iva ije bu giaro bu naebe iva igeki. Ijadufuo maeje buje buka ma mukoreigia garuradiana suri nujiama areva na ije giana uri.   
\p
\v 22 Areme na una kuke naka beduaku naena kumune seveni ijene giae. Kumune seveni ije bu ane besu ijia kiriana ome buone buneka mukoreigia bijana duma arei.  
\v 23 Ro na una kuke nae gake kumuve seveni bino dua una ane besu ijia kiriavo na giae. Ro kumune ije buka ane isesina bu majaufi feteki are ine baki ijia ufino ijare ufina nijako buneka garuradiae.  
\v 24 Kumune ije garuradiaeva ijiebe urina una seveni gue ije bu mukore ubaeradiaeva ijene kame ivo na giae. Na naka inokiro ije naena una e kineki ijene kuariae rove maeje bu naebe una kuarievano kuae.   
\p
\v 25 Kini Fero fu ijiege kuaramoga Josofu fu kuae, Naka one inokiro ijiebuo maeje bu ni besu. Ro ije fu Godire izege fu rade redufuo fu ijene kuarae.  
\v 26 Mave kau seveni a giaema ijeja juaevasia seveni ro una kumune seveni ubaeradiaeva ijiebuo maeje fune besu juaevasia seveni ijene.  
\v 27 Ro una kau seveni suri uniama ane ijiaru ije bu do ijia ajiaeva ijiakina kumune garuki ije majaufi ijare nijako bu garuradiaeva ijeja juaevasia seveni fuka vasia kekedufuo ijene.   
\p
\v 28 Naka ije fune izege na kuaraeva fune ijiege redufuo Godi fune irere fu rade rekuveno fu ijene nijasae.  
\v 29 Ijadufuo juaevasia seveni guove ijia aesakae Ijifiti igia ire ije fuka ma zaraeke.  
\v 30 Ro una rade juaevasia seveni ruakuma ije fuka vasia ma ireobo kekena aesakae ige fuka dabe nibe reke. Fu ijiege kekemo ije e bu izege una juaevasia maeje fu ude furima ije vierafekuva baki.  
\v 31 Ijadufuo maeje maza ije fuka ma omise ijare roga vasia ije fu keke are ige miane igege naeke. Fu ijiege kekemo ije bu izege una mazani maeje bu ude biediae ije vierafekuva baki.  
\v 32 Naka inokiro ijiebuo maeje na kuaravo ijeja fune Godire korufuo iviama igiebure rekiro fune ijiege vierafena kanafuido fu arekuma bakiro fu redufuo.   
\p
\v 33 Ijadufuo a arekuma bakiro nika e be mukoe vierafekinu kenoeno ijia abega fure aesakae ige foteke samuaene.  
\v 34 Ro kuke e bino ke areme kiaga bu uije binobino ivo bu ovo ijene bino karinoedufuo. Bu juaevasia seveni guove ije ire zaraemo ijia ijiege karidufuo.  
\v 35 E ije kuariaga buka juaevasia seveni maeje ire zaraemo ijia ire ijene karine. Ani e ijene kena daro miaga bu ire ije karina sidove mamekanu guove ijia ujaka sana ijia nane.  
\v 36 Ire ijeja e aesakae Ijifiti igia karivo ijiebuo. Bu juaevasia seveni Ijifiti igia vasia roga bu idufuo ijene. No ijiege mukoreigia rekuva vasia ije fu naebe aesake ige dabe arafiridufuo.   
\s1 Josofu bu kuavo fu aesakae Ijifiti samuaema ijene.  
\p
\v 37 Josofu fu ijiege kuaramoga kini Ferokiro e mamekanu fuone imevo ije bune vua ijene fiena abe marei.  
\v 38 Areme Fero fune una e fuone kiae, No e mukore be e Josofu vareki fu mukore kemo ije no era abekuva bakino kiae.  
\v 39 Kini Fero fu ijiege kuaria areme una Josofu kuae, Vua boeje ige a kuaema ije funeka Godire korufuo nijasakoga a kuae. Ijadufuo no vierafega e a vareki mukoe vierafena kenoeno ije be igia fuka baki ro ane are osukua.  
\v 40 Ijadufuo na a kuaga are aesakae none igadufuo e ireobo rena samuake. A ijiege samuake e boeje ige bume vua a kuariamo ijia fiekinu kenoeke. A daro none na abeva rotire ijia fina e boeje isesina ro mamekanu ro ire boeje samuagiake.   
\p
\v 41 Ijadufuo ivia na a abega are aesakae Ijifiti foteke samuakono kuae.  
\v 42 Kini ije fune Josofu ijiege kuaraema areme uri umui rini fuone ije fu kini redufuo bu abe daro mana abiesejaeva ijene damui. Fu damuna abe una Josofu umui ijia abiesejae. Areme fune uri ugone ni mukore bu saguiva ijene kiamo bu abe abieseja areme uri uniae be bu zine igege iramo bu ire gorodi ijia amaeriva ijene dabe uro ijia kirajae.  
\v 43 Areme kini Fero fune kiamo bu uri fata sariotino kuavo ije fuone be abena Josofu mamo fu ijia ajia fi. Areme Fero fune uri dabe aroena e juo karijo ijene kiamo bune mesirina usiae vae. Bu ude usiae vakinu kume, Bio vafono kumei. Ijiege rena kini Fero fune Josofu daro mana kuamoga fu aesakae Ijifiti ro ire boeje ijia naovo ijene samuagiae.  
\v 44 Areme Fero fune urina e Josofu kuae, Na kini Fero nare kuaedo e binobino bu Ijifiti igia ire binobino renoekuva buka ude a kuara a giake bu sone rade renoedufuo.  
\v 45 Ijadufuo Fero fune uri Josofu ive be ina e Zafenati Faniano kuae. Areme fune uri e zinone ifaejemo be Ijifitiko ive fuone Fotifera fu sidove ireobo Oni ijia fino ijadufuo kabae fuone Asenati ije dabe mae.   
\p
\v 46 Ijiege rena Josofu fune juaevasia teti (30) ijiege furikoga fu ijia uri zinuevena Fero e ije aesakae Ijifiti ije samuamo ijadufuo imei. Josofu fune kini ijadufuo are ijia fikinu kekena va are binobino ijia gianoekinu i menoe.  
\v 47 Areme juaevasia seveni ije fuka ire ma uruvana igia zarae.  
\v 48 Aesakae ije funeka ire zaraemoga Josofu fu ijia ura oenoekinu kumune gue fuaevena kanafui sidove binobino ijia nanoe. Fu sidove besubesu irifo ijia juare bu menoeva ijia kumune kanafui.  
\v 49 Juaevasia ijia ire ije funeka ma urukeigia zaraemoga Josofu fu sidove besubesu ijia ire ije fu kanafuimo ije funeka ma uruvana ire davare ajare igeki. Ijadufuo Josofu fu ire fu dakinu karinoeno ije fu ijia aregana fume karina afui.   
\p
\v 50 Ro maza ije vasia ireobo fu naebe kekema ijia Josofudo bara Asenati fu ame inokiro nafei.  
\v 51 Areme Josofu fu kuae, Godi fune na ma rejiena ifejiemo ijadufuo nane izege na isejavaeva ijiakiro asoe none ijadufuo agane ije nane totevano kuae. Ijadufuo fune uri fari fuone amure ije abe ive ina Manasano kuae.  
\v 52 Areme fu una kuae, Godi fune aesakae ige na fina isejavaevo igia ame vajie. Ijadufuo fu urina ame iviene ije abe ive ina Ifiremino kuae.   
\p
\v 53-54 Areme juaevasia seveni (7) ije ire zaraema ije fune ruoma ubine ijia kekei. Areme juaevasia seveni (7) ma ise ire daturamo ije fune ijia zinueve. Ro ije fune izege Josofu fu ude kuaema ije riarema ijadufuo aesakae Ijifiti ijia ire ijia fu uria mani. Ro una aesakae gue Ijifiti ivuake ijia karinoeva ije buneka ire daturae.  
\v 55 Ijiege rena vakuma e Ijifitiko bune zinuevena vasia abekinu uri Kini irefuo dabe kuakuae. Bu dabe kuakuavoga fu kiae, Ni una va Josofu fino ijia vaga fu irere kuariaga ijene fiena reno kiae.  
\v 56 Ro vasia ije aesakae Ijifiti ijia funeka ma ireobo kekei ijadufuo Josofu fune uri ire kumune ije fu aesakae binobino ijia kanafui naema ijene karina e Ijifitiko ijiebuo fuaeve.  
\v 57 Vasia ije funeka aesakae irore boejia keke ijadufuo e boeje binobino bune Ijifiti ijia Josofudo kumune fuaevekuae ruae.   
\c 42  
\s1 Josofudo uviarafa bu Ijifiti ijia kumune fuaevekuae vaeva ijene  
\p
\v 1-2 Areme maza be Jekafu fu fieke aesakae Ijifiti ijia e buka ire kumune uruvana ivo fu fie. Ijadufuo fu urina farirafa fuone ije kiae, Ja irerefuo dazena karina vierafeve? E aesakae Ijifiti kariva buka ire kumune uruvana ivo bu kuarievo na fie. Ijadufuo ni va ijia kumune bino fuaeve roga no idufuo ro bakuva noneka isejavaena oekono kiae.   
\p
\v 3 Ijadufuo Josofudo uviarafa teni (10) ije bune urina aesakae Ijifiti ijia kumune fuaevekuae bune vae.  
\v 4 Ro Jekafu fu Josofudo iviene fuone e Bezimani ije fu naebe abena nujaejiae. Ijadufuo maeje fu vierafero fu nujaejia bu mesiri vakuva fu vajae fiane bino biediakumaro fu ijare.  
\v 5 Fu arekoga bofari gue bune e ijena Ijifiti ijia kumune fuaevekuae vae. Ijadufuo maeje Kenani ijia fuka vasia ma ireobo kekei.   
\p
\v 6 Ro maza ije e Josofu fu e ireobo rena aesakae Ijifiti samuamo ijadufuo fure kumune ije riena e boeje ijiebuo fuaeveno. Ijadufuo uviarafa ije bune vakuma gamia usiaena va Josofu fino ijia usiaena uri nidua fuone ijia atogesana kurituakafae.  
\v 7 Bune ijiege revoga Josofu fune samadukua giana vierafe rove fu biesiriana e bino igege vua kuriaekuriaeki kuariae. Fu uri kiae, Ja e gure ja e izekono kiae. Fu ijiege kiamoga bu uri kuae, Noeje no e Kenaniko no igia ire kumune fuaevekuae ruaevano kuae.   
\p
\v 8 Josofu buje fune samadukua giana vierafe rove bofari ije bu naebe mukoe gana vierafe.  
\v 9 Ro Josofu fune naka fuone izege fu naena bu giaema ije fune vierafe. Ijadufuo fu urina kiae, Jaeje jaka kufuimena ura oenoekinu aesakae nuvuone ige no avaeguonoeve. Ja oenoekinu guoga no iziebure mamoena isema renoeko ro iziebure none mukoe revo ja ijene guonoejono kiae.   
\p
\v 10 Fu ijiege kuariamoga bu kuae, E ireobo nonoka baki. Noeje nome e one imejo no kumune fuaevekuae ruae.  
\v 11 Ijadufuo a isekie, no e ige noka gaegi ijiaru ruae. Ro nonoka e ma no biesiriana ro ja avaegianoevo bakino kuae.   
\p
\v 12 Ro Josofu fu una kiae, Jaka kufuimeve. Ja igia oenoekinu are iziebure no naebe samuavo ja ijene guonoevono kiae.   
\p
\v 13 Ro ame ije bu una kuae, No ame tuero (12) ige no e be e Kenaniko ijadufuo anafa ro noeje noka gaegi ijiaru. Ro ame iviene nuvuone be fune baronei ro be ma iviama ije fu uria asoe nuvuone ijiaki gafia fino kuae.   
\p
\v 14 Rove Josofu fuka una kiae, Na vua besu nane kuariave. Jaeje jaka kufuimena ro no avae guonoeve.  
\v 15 Naka kinido ive ijia kurana kuariavono ige fiefo. Ja ame iviene jone gafe ja naebe mesiri igia ro na gakuva jaeje ja una vakuva baki ro jaka igia karidufuo. Na vierafe na ijiege rena giaga ja irerefuo igia ruaeva na ije maeje gake.  
\v 16 Ro e boeje jaeje na kia bu faradia igia karike e be fuka una va ame iviene gafe mesiri ruake. Ja mesiri igia roga na ijare vua jone ja kuarieva maeje gake. Ro bakuma naka kini kuaraedo na vierafe jaka kufuimena no avae guonoevono kiae.   
\p
\v 17 Josofu fu vua ijiege kuariama areme kaenamia dibure ijia uniamo bu mu inokubeke ijia kari.  
\v 18 Areme mu inokube furinoga Josofu fu uri kiae, Naeje na e be Godi ma vierafekinu jumevo. Ijadufuo na vierafe na vame be rerena karauniaga ja vake.  
\v 19 Ijadufuo ja vierafega jane ma kuarievoga na vierafe e besu fu dibure igia fike. Fu igia fike e gure gue ni kumune ije ja fuaeveva ijene kena una va agane jone gafe bu vasia abevo ije vajiafo.  
\v 20 Areme nine iviene jone be ijene mesiri una roga na gafo. Ja ijiege rega na ijia giana vierafero jane ma kuarievo ijadufuo nabe kaniaga ja oekono kiae. Josofu fu ijiege kuariamoga bune oemarena buone avenami.  
\v 21 Areme bu una bue kuae, Iviama vame ige binobino bu nuvuone reko no isejavaevo ije noneka vajae fiane izege no uvia nuvuone Josofu vajaeva ijadufuo no ijene abeve. Noka fu dabe arafirina irufui vajavo fuka vajae fiaemoga fuka no soesoena anadue. Rove vua fuone noka naebe fiejae ijadufuo iviama irufui ige no ijene abevono kuae.   
\p
\v 22 Ro e Josofudo bo fuone be fu urina kiae, Nana ijadufuo ja ame ije kanavoga na vafiavoga jaka naebe fie. Ijadufuo iviama irufui ige no abevo ije no ame ije no kanavo fu baronema ijadufuo irufui ige no ijena abevone kiae.  
\v 23 Ro Josofu fu vua irere bu kuaevo ije fune fie rove bofari ije bu vierafero fu naebe fiemoro bu ijiege vierafei. Ijadufuo maeje bofari ijiebuo vua ije bu Josofu kuaravo ije fu e bese fiena una Josofu kuaramo.   
\p
\v 24 Ijiege rena Josofu fu vua buone bu kuaevo ije fiega funeka oe uruke fiaemoga fu arena va sauina ireobo nimei. Areme fune maemoga fu una kekena e kiamoga bu uri nidua buone ijia e Simioni farena umui kame ijueneke kiriaejae.   
\s1 Josofudo uviarafa gue bu una Kenani vaeva ijene  
\p
\v 25 Areme Josofu fune urina e imevo ije kiamoga bune uri kumune ije karina bofari ijiebuo kamui ije bu kena vaeva ijia riejiae. Ijiege rena fune kuke kiamoga bu uri moni buone bu kumune fuaevekuae kena vaeva ijene karina una e besubesu ijiebuo kamui bu kumune riejiaeva ire ijia kedejiae. Areme fu kiamoga bune kuke uri ire bu ikinu una vadufuo ijiakuma vajiae. Josofu fu ijiege rena ire boeje kiako bune kanafujiama fune furi.  
\v 26 Areme Josofudo bofari ije bune uri kumune bu fuaeveva ije karina mave doniki ado ijia nana saguma areme bune una vae.   
\p
\v 27 Bune una vakuma vame gafia are be ijia naokuae kari. Bu kariva ijia e be fu mave doniki fuone ije ire vajakiro uri kamui doekuma fuka moni fuone fu kumune fuaevema ijene una kamui ire ijia giae.  
\v 28 Areme fu una uviarafa gue ijene kiae, Na moni none na kumune fuaeveva ije e Ijifitiko buka kena una kamui none ire igi kedejieva ige giano kiae. Fu ijiege kuariamoga ame boeje bu vua ije fievo buka urukeigia judiae. Ijadufuo buka safuikinu una bue kuae, Godi vame ije fute irere ije rejuemano kuae?   
\p
\v 29 Bu ijiege reva bune una vakuma Kenane asoe buone Jekafu fino ijia usiaena vua izege bu reva ijene fu kuarae.  
\v 30 Bu kuae, No vakoga e ireobo aesakae Ijifiti samuamo ije fuka vua gikikimana no kuarue. Fu vierafero noeje no mauike aesakae buone ijia ura avae gianoevoro fu ijadufuo no umui bijuona vua gikikimana kuarue.  
\v 31 Fu ijiege kuaruomoga no kuae, Nono are ige ura mauike avae gianoevo baki ro noeje noka e ma.  
\v 32 No ame boeje tuero ije noka gaegi ro asoe nuvuone ije fu besu. Ro ame iviene besu fune baronei ro ma iviene ijiaru fu uria Kenani ijia asoe nuvuone ijiaki fino kuae.   
\p
\v 33 No ijiege kuaravoga e ireobo ije fu kuo, Na vierafe na vame be rena ja biesiria giaga jane ma kuarievo na ije giakono kue. Ro e besu fu igia fikiro gue ni kumune ije karina una agane jone gafe vasia abevo ijene vajiano kue.  
\v 34 Ro ja una ruakuva nika iviene jone ije mesiri una ige na fivo igia ruafo. Ja ijiege rekuva na ma vierafero ja avai guonoevo baki ro jaka e maro na ijiege vierafeke. Areme na uvia jone Simioni abe una nujaejiaga ja ura ire binobino ja vierafeva ije renoeno kuekmano kuae.   
\p
\v 35 Ame ije bu ijiege asoe buone kuarama areme ame boeje bune uri kamui ije bu kumune keva ije kame i kuderiae. Bu ijiege usiasema areme giake e besubesu moni buone bu ke vaeva ije e Ijifitiko ije bu kame una kamui buone ijia kedejiaevaga bu giae. Ame ije bu asoe buone ijena ire ijene giavo buka ireobo judiae.  
\v 36 Ijadufuo Jekafu fu uri kiae, Ja anafa none jare ijiege rena ame none inokiro jane kame izege uniaejie. Ude ja Josofu babue areme una Simioni babue. Ro iviama ja una kuke Bezimani mesiri vakuae kieve. Jaja ijiege abekoke naeje naneka ma urukeigia isejavaevo jabe gievono kiae.   
\p
\v 37 Jekafu fu ijiege kuariamoga e Rubini fu uri asoefuo ijiege kuarae. Ate, ame ije abe nujaejiega nare mesiri vane. Na mesiri vaekina na naebe una mesiri ruakuva nine ve ame fari none inokiro ije kaniaga bu oeno kuae.  
\v 38 Rove Jekafu fu una kuae, Na fari none ige nabe nujaejiake. Ijadufuo maeje uvia fuone Josofu ije fune baronei ro fune fuosukua uria fine. Ro kuke naeje nane eoradie ijadufuo ja mesiri vaga ire ise be fu fuone rekuma jaka una oefiane abe na mieke. Ja oefiane abe miekuva funeka ijare kaniega nane baronekono kiae.   
\c 43  
\s1 Josofudo uviarafa bu Bezimanina una Ijifiti ari vaeva ijene  
\p
\v 1-2 Ro are Kenani ijia fuka vasia ma ireobo kekei ro Jekafudo agane kumune bu Ijifiti ijia fuaevena ke ruaeva ije bune kira ina furi. Ijadufuo Jekafu fu una anafa fuone kiae, Ni una va kumune binodua fuaevoga no ino kiae.  
\v 3-5 Rove Juda fu una Jekafu kuae, Ate e ireobo ije are Ijifiti samuamo ije fuka vua daro darokuma kuaruomo no ruae. Fu kuo no nuvuonukua una vakuva fube kuoga no fu gake. Ro no iviene nuvuone ije mesirina vakuva fu ijare kuoga no va fu gakono kue. Ijadufuo a uvia nuvuone Bezimani mesiri nujaejuo fu noena vakuma no ijare kumune bino fuaevena ruake. Ro fu naebe noena vakuma no kumune bino nobe fuaeve ruakono kuae.   
\p
\v 6 Juda fu ijiege asoe fuone kuaramoga Jekafu fu urina kuae, Ja irerefuo e ireobo ije kua no iviene nuvuone be gafia fino kuae. Vame ije jaka irufui binobino kekena na vajievono kiae.   
\p
\v 7 Ro anafa bu urina kuae, Fune e ijare ka korufuo no abero agane nuvuone ijiebuo duna binobino kuarue. Fu kuo, Ja asoe jone fube uria fi ro kuke jabe iviene jone beno kue. Ro no iviene nuvuone no mesiri vadufuo fu kuaruokuveno ije noka naebe vierafe ijadufuo no ijiege kuarae.   
\p
\v 8 Areme Juda fune urina asoe fuone kuae, Ni e Bezimani nujaejuoga no migegire vaekina no kumune fuaevena una ro ikinu karine. Ro bakuma a ro no ro anafa nuvuone ije boeje noka isejavaena oeke.  
\v 9 Nare kuavo ijadufuo ni nujaejiega na mesiri vaekina no una rone. Ro na naebe mukoreigia mesirina una ruakuva ni irufui ije arega fu maza boeje nosiki navane.  
\v 10 A maza nuvuone no va gamia usiae una ruaekino una vadufuo ije aka dabe fareko funeka saroemono kuae. No ude Bezimani mesiri vaeva bitie iviamaige none ire karina una ruae. Rove no naebe ijiege rei ro noka mazani nuvuone dabe igifure nisevono kuae.   
\p
\v 11 Ro asoe buone fu urina kiae, Ja vierafe Bezimani fu jaena vakuma nine ire ma bino aesakae nuvuone igia naovo ije karina vaekina e ireobo are Ijifiti samuamo ije vajafo. Ni ire oere udi mukore urimo ijiakina munikokina ia udi mukore urimo ijiakina ine fititasi fo ire makame igeki ijiakina ine arimoni ijadufuo fo ijene karina vaekina e ije vajafo.  
\v 12 Ro kuke ni moni ja kumune fuaevedufuo ijene kero bino nime moni ije bu bigiake kena una kamui jone ijia kedeva ijadufuo kena vafo.  
\v 13 Ni ije kena nine uvia jone Bezimani mesirina jaena migegire una vafo.  
\v 14 Na Godi e daroki ije baname isoega fure e ireobo ije are Ijifiti samuamo ije oe fuone dabe dakudega fu ja giana oefiane abeke. Fu oefiane abena e Bezimanikiro uvia one be ijene ke uniaejaga ja kaenamia una ruake. Ro na ijeja ame none gue bu una kuke ijiege oega na oefiane abekuva ije fure marekono kiae.   
\p
\v 15 Areme ame gaegi ije bune urina sinuome buone maeje bino bu kini subijadufuo ro moni ka ma uruvana bino duaku kari Bezimani mesirina bune Ijifiti vae.  
\v 16 Bune vakuma Ijifiti usiaena bune aruna Josofu fino ijia vakoga fu uri Bezamani gae. Fu ga areme uri e fuone imeno ije kuae, Ni e ige kaenamiana are none ijia vane. A kaenamia va ijia unia bu karike ni fanu be kana kiraga bu maza uvuoka manino ijia naena ire ino kuae.   
\p
\v 17 Josofu fu ijiege kuaramoga e fuone imeno ije fune urina ije fu kuaraema ijiege rena fune uviarafa fuone kaenamiana are fuone ijia vae.  
\v 18 Fu kaenamia ijia vakoga buka ireobo jumena una bue kuae, Noeje bu irerefuo kaenamuona igia ruove? Bu bite maza ije no iko igia rovoga bu moni ije kena una kamui nuvuone ijia keva bu ijadufuo kaenamuona ruove. Bu ijadufuo toenamuo ruodo bu no kanuo areme kuoga no fuefuo moni baki imenoeke fu mave doniki nuvuone ije una fuone kekiro remono kuae.   
\p
\v 19-21 Areme bune vakuma kini ijadufuo are gafia usiaena bune va e ije Josofudo imejo ijiebuo e ireobo ije kuae, E ireobo a isekie igia fiene. No ude ro igia Ijifiti kumune fuaevena none una vakuae vae. No vakuma vame gafia ve mumoga no naokuae kariva ijia no kamui nuvuone besubesu ijia moni ije no kumune fuaeveva ije no una kamui ijia kuarae. Ro moni ije no karaeva ije no una kena igie ruaevano kuae.  
\v 22 Ro moni ige no una kuke kumune binodua fuaevekuae no ije kena ruae. Ro moni ije fu erare kena kamui nuvuone ijia kedema ije noka naebe vierafevano kuae.   
\p
\v 23 Ro e ije Josofudo imejo ijiebuo e ireobo ije fu uri kiae, Ije fune ijeno jade una ijadufuo ireobo vierafevo. Moni ije fune Godi jone ije ja asoe jone ijena fuone baname isoevo ijare kena una ijia kedejiae. Ijadufuo maeje na moni jone ja kumune fuaeveva ije nane foteke kevano kiana fune va e Simioni mesirina una ro nujaejiae.   
\p
\v 24 Areme e ije Josofudo imejo ijiebuo e ireobo ije fune kaenamiana va Josofudo are ijia uniamo bu karikoga fune va do jiana ro miamo bu dia buone sokoga fu mave doniki buone ire vajiae.  
\v 25 Ro Josofudo uviarafa ije maza uvuoka bu fuina ire ikono kiaeva ijadufuo bu urina sinuome bu Josofu vajadufuo ijene kanafui.  
\v 26 Areme bune karigake Josofu fune romoga bu uri sinuome ije kena ja vaja areme uri fu aguarana fu manino ijia auge sana kurituakafae.  
\v 27 Bu ijiege revoga Josofu fune izege bu ruaeva ijadufuo kuariama areme urina kiae, Ro asoe jone ja ude ro kuarieva ije fube uria ma fino kiae?   
\p
\v 28 Ro ame gaegi ije bu urina kuae, Ke asoe nuvuone fu oefuo imeno ije fu uria ma fino kuae. Bu ijiege kuara areme una kuke Josofu kurituakafae.   
\p
\v 29 Areme Josofu fune urina ame ije giaeja vakuma e Bezimani iviene fuone maeje asie fuone ijare buobiki nafema ije gae. Fu gana uri kiae, A ame gare fu iviene jone ije ja fuesina kuarieva ijeno kiae. Areme fu uri Bezamani kuae, Farino na vierafe Godire a marejakono kuae.  
\v 30 Fu ijiege kuaramo fuka oefiaemoga fu migegire urina guove fu naeno ijia aruna nimei. Ijadufuo maeje Bezimani fuka ma ireobo oetuamo ro kuke fuka ma iviene fuone.   
\p
\v 31 Fu aru va nimena furi areme uri nikubae fuone do soma areme una keke zinune manimega e fuone imejo ije kiae, Ire ije ja kiraeva ijene vajuo no ino kiae.  
\v 32 Areme Josofu fune fuosukua fata be ijia fina ire ikoga uviarafa fuone fu kiavoga bu buosukua fata be ijia karina ire i. Ro kuke e Ijifitiko ije duaku fu kiamo bu fata be ijia karina ire buone i. Ijadufuo maeje e Ijifitiko ije bu e Iburuko ijena bu besu ire inoevo baki.  
\v 33 Ro Josofudo uviarafa fata ije bu karina ire ivo ije nikubae buone bu una Josofu fino nake ijiege karina ire i. Ro fata ije bu kariva ije bu ame amure ijare fikoga gue bu ijia karijana vakuma areme ame iviene ijare ubine ijia fikoga bu ire i. Bu ijiege karina ire ivo ijia bu uri korubuo izege bu kariva ijene ganamivo buka oeseradiae.  
\v 34 Ro ire buone ije bu ivo ije bu re ije Josofudo fata ijia naeva bu ijia tuana vajiavo bu i. Ro ire ije bu ivo ije e Bezimani buka ire ma uruvana vajae ro ame gue ije bume sibaneke vajiae. Ijiege rena Josofudo uviarafa ije buka maza ma ije abena fuina besu oemarekinu irekina do ijene i.   
\c 44  
\s1 Kafusi ije sauima ijadufuo vua ijene  
\p
\v 1 Areme Josofu fune urina e ije bu fuone imevo ijiebuo e nigofo ije fu are fuone ije samuamo ije vua izege fu redufuo ijene kuarae. Fu kuae, Ni e gure ruaeva ijiebuo kamui ije bu ire ke vadufuo ije vierafekina kumune bino karina ijia riejiane. Areme ni moni buone bu kumune fuaeveva ijene karina una kamui buone ijia abie kedejiane.  
\v 2 Areme ni ame iviene ijadufuo kamui ije kumune diboure rie ro itire ni kafusi none ire siriva ijia amaeriva ije abe ijia kedeno kuae. Josofu fu ijiege e fuone imeno ijene kuaramoga e ije fune ijiege rei.   
\p
\v 3 Areme bune naoeva suoke mugamia bune urina doniki buone kena bune una vakuae vae.  
\v 4 Ijiege rena bune sidove ije sibaneke arena vako ijia Josofu fu urina e fuone imeno ije kuae, Iviama urina e ige vako ijene nuvediane. A nuvedia va biediakuma ni kia, E ireobo none fuka ja marejiae ro ja irerefuo una ise ije fuone rei. Ja irerefuo kafusi fuone bu ire siriva ijia amaeriva ije iniemena abe ruovono kiane.  
\v 5 Ire kafusi ja abe ruovo ije fuka ijia do ino. Ro kuke fu kafusi ijare ire bino bu rekuvejo ije nijaeko fu ijia giamo ja ije abe ruaevano kiane. Vame ije ja reva ije jaka ma ise ije revano kiane.   
\p
\v 6 Ijadufuo e ije Josofudo imeno ije fune nuvediana ja biediana Josofu vua izege fu kuaraema ijiege kuariae.  
\v 7 Rove Josofudo uviarafa ije bu urina kuae, E Ireobo a vua ije irere kuaemo ije no naebe vierafe. Noka E Ireobodo ive kurae no ire ise ijieki ije noka naebe rei.  
\v 8 Ro moni ije kamui nuvuone no kumune keva ire ijia bu kedeva ije none Kenani giana kara una gafia vua vajiae. Ro no irerefuo e ireobo one ijadufuo are ijia ire siriva ro gorodi ije iniemeke?  
\v 9 Ni kamui nuvuone ijia reregaga kafusi ije erare abejoga e ije nika kana fu baronekiro e ige gue noeje ni arega no una oefuo moni baki imeno kuae.   
\p
\v 10 Bu ijiege kuaravoga e Josofudo imeno fune urina kiae, Ije fune maredo nane ja kuarieva ijiege reke. Ijadufuo na vierafe na e ije erare kafusi ije abema ijiaru mesiri una vaga fu noefuo moni baki imekiro e gure gue jaeje ni vano kiae.  
\v 11 Areme ame gaegi ije bune migegire kamui bu keva ijene kari ume ijia na areme bune kamui itire fadia irae.  
\v 12-13 Bu fadiana irakoga e ije Josofudo imeno ije fune urina ame boga ijadufuo kamui ijia zinuivena kafusi ije rerei. Fu rerena ruoma Bezimanido kamui ijia kafusi ije kei. Fu ame iviene ijadufuo kamui ijia kafusi ijene kemoga uviarafa fuone buka ma oefiadiamoga bu urina ugone buone farae. Areme bune doniki buone kena una gamia Ijifiti sidove ijia vae.   
\p
\v 14-15 Juda fune uviarafa fuone kaenamiana una vakuma gamia keke gake Josofu fu uria are fuone ijia fine. Fu ijia fino bu usiaena nikubae fuone ijia tuana ume ijia dijevoga fu urina kiae, Ja izege rega ja una ruove? Ja vierafekuae nabe giakono kuaena ja ijiege revano kiae.   
\p
\v 16 Juda fu urina kuae, E Ireobo no vierafe no vua irere kuarakuva baki. Ro kuke no izege kuaeko ire ije no naebe revano kuaeke? No isema rekuva ije fune Godire guona vierafeke. Ijadufuo ivia e boeje ige none oefuo moni baki imeke. Ro ade e ije fu kafusi abema ijiaru mesiri vakiro nika nodua toenamuono kuae.  
\v 17 Rove Josofu fu urina kiae, Na irerefuo ja kame isekafiakuva baki. Rove name vierafe na e ije erare kafusi ije abema ijiaru mesiriga fure noefuo moni baki imeke. Ro ame gue jaeje nine oemarekinu una are asoe jone fino ijia vano kiae.   
\s1 Juda fu Bezinanido Josofu dabe soesoema ijene  
\p
\v 18 Fu ijiege kuariamoga Juda fu va Josofu fino ijia kekena kuae, E ireobo aka daro ma ireobo kini fu abema a ijiege abei. Ro naeje name e be oefuo imenoevo. Ijadufuo a isekie vua ige na kuaekuvejo ije abe fiena ziemo.  
\v 19 Maza ije no ruaeva ije a kuo, Asoe jone fube uria fino ro jabe ame ivierafa binono kue?  
\v 20 A ijiege kuomoga no kua, Asoe nuvuone fu uria fi ro kuke fune eore ro fu ame iviene besuno kuae. Ro ame ijadufuo bo fuone ije fune baronemano kuae. Ro fune ame ijare uria fine ro asoe fuone fuka ame ije mukoreigia oetuamono kuae.  
\v 21 No ijiege kuaravoga a kuo, Ni va ame ije mesiri roga na gano kuae.  
\v 22 Ro kuke no kua, Ame ije fu asoe fuone ije nujana ruakuma asoe fuone fuka baronekono kuae.  
\v 23 Rove a kuo, Ja iviene jone ja naebe mesiri ruakuva jabe una na giekono kuae.  
\v 24 Ijadufuo no una vaeva vua ije none asoe nuvuone ijene ijiege kuarae.   
\p
\v 25-26 Areme asoe nuvuone fu vierafe no una ro kumune bino fuaevekiro kuomoga no kua nobe una vake. Rove no una vakuva noka iviene nuvuone mesiri vakuva no ijare e ireobo ije gake. Ro no bakuva nobe nidua fuone ijia vake. Ijadufuo no una vakuva iviene nuvuone ije fuka noena vano kuae.   
\p
\v 27-28 Juda fu ijiege kuarana kuae, E ireobo no asoe nuvuone fu kuke kuaruona kuo fu bara ije fu oetuamo ijare ame inokiro ijene nafe vajie. Rove ame bu fune sauimo fu naebe gako funeka maza ireobo furi. Ijadufuo fu bite bune fanu taraeko ijiebe sakina dabe buvua ivaro fu ijiege vierafei.  
\v 29 Ro fu kuke kuo, Iviama naneka eoradieko ja una kuke ame gure mesiri vako ije fu va irufui bino biediakuma ije jane na irufui vajiekuva naneka baroneke.  
\v 30-31 Asoe nuvuone fuka Bezimani ma ireobo oetuamo. Ijadufuoro no una asoe nuvuonedo are ijia usiae ro fu gake Bezimani fu naebe noena ruaeva fuka baronedufuo. Ro irufui ije no noeje no konuvuo amaeri.  
\v 32 Na asoe none na kua na mukoreigia samua vaekina una mesiri ruako kuae. Ro kuke na kua, Na naebe mukoreigia samuaga fu irufui biekuma nare irufui ije abekono kuae.   
\p
\v 33 Ijadufuo e ireobo a isekie, ni ivie none kuaga fu vakiro nare are fuone ije abene. Nare are fuone abena oefuo moni baki imene ro Bezimani fu uviarafa gue ijena una are vadufuo.  
\v 34 Ro Bezimani fu naebe nosiki una vakuma naka izege asoe none ijadufuo niome ije gake? Ro fu oefiane abekuma na izege irufui fuone dasumakuva bakino kuae.   
\c 45  
\s1 Izege Josofu fu korufuo abena uviarafa fuone samadirejiaema ijene  
\p
\v 1 Ijiege rena Josofu fu vua ije fiemo fuka ma ireobo oefiae ijadufuo fu izege rekuma baga fu uri e fuone imevo ije kiamoga bu are guove fu fino ije arena usiae vae. Bu usiae vakoga Josofu fu fuonukua uviarafa fuone ijena manino ijia fu urina ive fuone ijene samadukua visu kuariae.  
\v 2 Fu ijiege kuaria areme uri urukeigia nimeno e Ijifitiko ije bu fiena uri are kini fu fino ijia afuina vua ije dabe kuae.   
\p
\v 3 Ijiege rena Josofu fu urina uviarafa fuone ijene kiae, Naeje na Josofu nare. Ro asoe none fube uria fino kiae? Josofu fu ijiege kuariamoga buka ireobo judiamo ijadufuo bu naebe una ve gue kuarae.  
\v 4 Ijadufuo fu uri uviarafa fuone kiae, Biona ivuake igia ruafo, Naeje na uvia jone Josofu e ije ja abena e Ijifitiko ijiebuo fuaeveva ije nare.  
\v 5 Ro igia fie, jade ije ireobo vierafena abe kuaena jone nanamivo. Fune Godire e boeje ifejiana karauniakiro vierafena ude na abena nujiemoga na igia ruae.  
\v 6 Vasia ige fume juaevasia inokiro ijiaru aesakae igia kekei. Ro una juaevasia umui fague ijiege fu uriado vasia fu ruake. Ro vasia ije fu kekemo ijia fu erare juare iviaeko imekinu ro masikuma baki.  
\v 7 Ijadufuo fune Godire joefuo ude na abe nujiemo na igia ruaevado nare agane jone ifejiaga bu giriesa karivadufuo. Ro fu magoe abe nujiemo na igia ruaevado na vame ijieki ja naebe ma vierafeva ijia ja ro uifari jone ije karauniaga buka e uruvana reke.   
\p
\v 8 Ijadufuo jaeje ja baki ro fune Godire na abe nujiemo na igia ruae. Fune Godire na abena kini Fero e igeko ijadufuo e ka ma ireobo be rei. Ijadufuo nare e Ijifitiko boeje ige ro aesakae ige foteke ijene samuagiave.  
\v 9 Ijadufuo ni migegireigia una va asoe none kua, Fari one Josofu fu kume Godire na kiega na iviama e ireobo rena e Ijifitiko ije samuagiavono kuafo. Ro fube saroekiro nika migegireigia ige na fivo igia rono kuafo.  
\v 10 Ro a ruakuma ni anafa one ijiakina asaerafa one ro mave-ro goti ro mave-kau ro ire jone boeje ja samuagiavo ije kaenamiana na fivo ivuake ijia are Gosonino kuavo ijia fine.  
\v 11 Ro a aesakae Goseni abena ijia fike ro juaevasia umui fague guove ijia vasia kekemo ije nare a samuake. Ro a naebe ruakuma ije a agane one ijiakina fanuve one ije jaka vasia kaniaga ja isejavaena oekono kuafo.   
\p
\v 12 Ro igia fie, iviama uviarafa none boeje gure ireva ro Bezimani a dua jane igifure samadukua gie. Ijadufuo jane ma vierafega nane ma ivie jone Josofu nare kuariave.  
\v 13 Ijadufuo ni va asoe none ijene daro ireobo ige na abena igia Ijifiti fivo ijiakina ire boeje ja giaeva ijene kuarafo. Ja ijiege kuara areme nine migegire mesirina una igia ruano kiae.   
\p
\v 14 Josofu fu vua ijiege kuariama furi areme uri uvia fuone Bezimani farena dabe uimina uri bue niraefiranami.  
\v 15 Ijiege rena Josofu fune nimekinu uri uviarafa fuone boeje faradiana uimidiae. A areme fune va uviarafa fuone ijene besu fina vua kuae.   
\s1 Kini Fero fu Josofudo agane ije oemarekinu kaenamiaema ijene  
\p
\v 16 Bu ijiege rekoga e bune vua ije fiena dabe usiae kinido are fu fino ijia kuaena kuae Josofudo uviarafa ije bune ruaevano kuaevoga kini ro e mamekanu fuone bu vua ije fiena buka oemarei.  
\v 17-18 Areme kini fune urina Josofu kuae, Uviarafa one kiaga bu mave-doniki buone kena una va gamia Kenani usiaena asoe buone ijiakina agane buone kaenamiana una igia ruafo. Bu roga nare Ijifiti guove igia are ma be ije miaga bu ijia karina ire boeje bu ijia tavuavo ijene karina oemarekinu inoeke.  
\v 19 Ro kuke ni uviarafa one kiaga bu fata ije bu ekiro sinuome ije kari ijia nana maniaerunanoevo gue kena vaekina bu ijia anafa ro bararafa buone ijia ijene ijia kaemaniana una Ijifiti rone. Ro kiaga buka bu asoe buone mesirina rone.  
\v 20 Ro bude ire buone boeje bu ijia naovo ije bu arena ruovo ije ireobo vierafevo. Ijadufuo maeje are Ijifiti guove igia ire maeje boeje naovo ije funeka buonedo bu kekono kiane.   
\p
\v 21 E Ijifitiko ijiebuo kini ije fu ijiege kuariamoga Jekafudo anafa ije bune urina ije fu kuariaema ijiege rei. Areme rena Josofu fune urina fata ije e bu kariko bu maniaerunoevo ije karina vajia areme uri ire bu ikinu una vadufuo ijene.  
\v 22 Areme Josofu fune urina ugone bu savo iviaeko bino karina uviarafa fuone ije besubesu vajiae. Ro iviene fuone Bezimani ije fu uri ugone bu savo iviaeko umui fague ro ire siriva tiri aderedi (300) ijiege kena vajae.  
\v 23 Areme fune urina ire ma ije Ijifiti ijia naovo ijene karina asoefuo naejama arevoga doniki teni (10) bu ije kari. Areme Josofu fune kuke kumunekina burete ro ire gue bu ikinu una Kenani vadufuo ijene karina nama arevo doniki teni bu ije kari.  
\v 24 Areme Josofu fune urina kiae, Ja una are vako vame ijia jade na ja abe e igiebuo fuaeveva ijadufuo una jone umui bijanamina madinamivo. Ro ja vakuva nime mauike kafaena vano kiamoga bune una vae.   
\s1 Josofudo uviarafa bune una Jekafu mesirikuae vaeva ijene  
\p
\v 25-26 Areme Josofudo uviarafa ije bune Ijifiti arena una Kenani asoe buone Jekafu fino ijia vae. Bune va gafia usiaena urina asoe buone kuae, Josofu fu naebe barone ro fu uria fine. Fu aesakae Ijifiti ijia e ireobo rena are ije samuamono kuae. Rove asoe buone fu vua ije fiena fuka turanamina oeserei ijadufuo fu vua buone fu naebe ma vierafei.  
\v 27-28 Rove ame bu urina vua boeje Josofu fu kuariaema ijene asoe buone kuarae. Bu ijiege kuaravoga Jekafu fu ije fie areme uri fata ije bu sinuome karina maniaerunoevo ije Josofuo fu kena vajiamo bu ruaeva ije giae. Areme fu ijia sone oe dasu areme uri kiae, Na iviama ijare ma vierafega fari none Josofu fuka uria fine. Ijadufuo na vierafe naka va fu ga areme rade na sone baronekono kiae.   
\c 46  
\s1 Jekafukiro agane fuone bu urina Ijifiti vaeva ijene  
\p
\v 1 Areme Jekafu fune uri anafa fuone kiamoga bu sinuome buone boeje kanafuima areme bune urina Ijifiti vae. Fune vakuma sidove Biasiba ijia kekena uri asoe fuone e Aesekido Godi ije zinone ifaejana fuone baname isoe.  
\v 2 Areme muge ijia Jekafu fu nimamaena gake Godi fu kumei, Jekafu, Jekafuono kumenoga fu una gue onukuae. Fu onukuaena kume, Na igieno kumei.  
\v 3 Areme Godi fu arina kuae, Naeje na Godi besu ije asoe one fu baname isoemo ijene. Ijadufuo a Ijifiti vakiro jumemo ije arene. Ijadufuo maeje nare e uifari one ije ifejiaga buka e uruvana rega bure aesakae be abena karike.  
\v 4 Ro a Ijifiti vakuma na osiki vake ro rade nare a mesira una igia ruake. Ro maza ije a baronemo ije fari one Josofu fu uria a ivuake ijia fina gake a baronekono kumei.   
\p
\v 5-7 Areme Jekafu fune agane fuone ijena urina are Biasiba arena bune Ijifiti vae. Ijiege rena farirafa ije bune urina Jekafukina bararafa ijiakina anafa buone isesina ije kaenamiana fata ije bu sinuome nana maniaerunoevo ije kini fu abe Jekafudo nijaema ijia uniae. Jekafu fune ijiege rena uri uifari fuone boeje funeka merui. Jekafu fu urina farirafa ro kabaerafa fuone ijiakina asaerafa kabae ro fari ije boeje fuka kaenamiae. Areme fune uri fanu fuone boeje binobino fu saema ijiakina sinuome fuone boeje fu Kenani ijia fikinu kema ije funeka karima areme bune Ijifiti vae.   
\s1 Jekafudo anafa fu kaenamiana Ijifiti vaema ijene  
\p
\v 8-10 Ro Jekafudo anafa ije bu urina fuina aesakae Ijifiti vaeva ije ijiege. E Rubini fari fuone boga ije urina fu farirafa fuone e Anokikina Farukina Esironi ro e Kami ijene kaenamiae. Ro fari fuone e Simioni fu urina anafa fuone e Jemuerokina Jaminikina Oadikina Jakinikina e Zoare ro e Soro ije kaenamiana vae. Ro e Sorodo asie ije fu bara Kenanaetiko.   
\p
\v 11-12 Ro Jekafudo bara Riado fari e Rivae fu urina anafa fuone e Gesonikina Koatikina e Merari fu ijene kaenamiana vae. Ro e Juda fu uri farirafa fuone e Sirakina Ferezikina Zera ijene kaenamiae. Ro Judado anafa inokiro e Ekiro Onani ije bune ae sakae Kenani ijia oe. Ro fari fuone e Ferezi ije fu urina anafa fuone e Ezironikiro Amuri ijene kaenamiana vae.   
\p
\v 13-15 Ro bara Riado fari e Isaka fu uri anafa fuone e Torakina Fuvakina Jasubikina e Simironi ije kaenamiae. Ro e Zeburuni fu uri anafa fuone e Seredikina Eronikina e Jariro fu ijene kaenamia vae. Ro Jekafukiro bara fuone Ria ijiebuo anafa ijiakiro kabae buone Daena ro asaerafa ije bu are Padame Arame guove ijia nafeva ije boeje foteke buka e teti tiri (33) ijiege.   
\p
\v 16-18 Ro bu ame ijiaru bakiro Jekafu fu kuke anafa fuone bino duaku nafei. (Ro ame ije fu bara Zirufa fu bara ije e Rebani uria ijia mesirina kabae fuone Ria nujaejaema fu fuefuo imeno ijare nafena Jekafu vajae ijene).  
\p Ijadufuo Jekafukiro bara Zirufa ijiebuo fari e Gadi anafa fuone fu kaenamia vaema ijeja e Zefonikina Agikina Suni ro Ezibonikina e Eri ro Arodi ro Areri ijene. Ro fari buone be e Asa fu uri anafa fuone e Iminakina Isivakina Beraeakina kabae fuone Sera ijene kaenamiana vae. Ro e Beraea fudua fu anafa fuone inokiro e Ebakiro Marakiero ijene kaenamiana vae. Ro ame boeje Zirufa fu nafena Jekafu fu vajaema ije boeje buka sikisitini (16) ijiege.   
\p
\v 19-22 Ro una Jekafudo bara Resero ije fudua fu ame fotini (14) ijiege nafenoga bu uri ame buone bino duaku tuanae. Ro fari buone e Josofu ije fu va Ijifiti ijia fina areme uri bara Asenati e Fotiferado kabae ije abei. Ro e Fotifera fu e Oni ijiebuo e zinone ifaejemo be. Ro Josofukiro bara Asenati bu ame inokiro e Manasakiro Ifuremi ije nafei. Ro e Bezimani fu urina anafa fuone e Berakina Bekakina Asiberokina Gerakina Nemanikina Eikina Resikina Mufimikina Umifikina e Adi ijene nafei.  
\v 23-25 Ro Jekafu fu kuke anafa fuone bino duaku nafei. Ijadufuo maeje bara fuone Resoro fu bara Bira bara ije fuefuo imeno ijene Jekafu kuamo fu abena ame bino nafei. Ro kuke Jekafudo bara Bira fu fuefuo imeno ije e Rebani fu abe kabae fuone Resero maema ije fu ame seveni (7) ijiege nafei.  
\p Ijadufuo anafa buone inokiro e Denikiro Natari ije buduaku anafa bino nafei. Ro e Denido fari ijeja e Usimi. Ro e Natarido farirafa ijeja e Jazierikina Gunikina Jezakina Sireme ijene.   
\p
\v 26-27 Ro Jekafudo agane boeje foteke bu fuina uri Ijifiti vaeva ije bu e sigisiti sigisi (66) ijiege. Ro farirafa ijiebuo bara ije bu naebe dae. Ro Josofukiro bara fuone Asenatikiro anafa buone inokiro ije bu Ijifiti ijia kariva ijiebe una agane ijena besu mazieva ije foteke buka e seveniti (70) ijiege.   
\s1 Josofu fu una asoe fuone biema ijene  
\p
\v 28-29 Ijiege rena bune vame ijia vako ijia Jekafu fune urina fari fuone Juda kuae, Ni are ude va gamia Ijifiti kekena Josofu kuaga fu ro gumia Gosoni bieduono kuamoga fune vae. Juda fune va gamia kekena Josofu kuamoga fune urina fata fuone bu ose ijia kiriaga bu maniarunoevo ijia ajiana fune gafia are Gosoni asoe fuone biekiro vae. Fune vakuma vame gafia asoe fuone biena uri fuosiki uro urasena maza jiagado bue niraefiranami.  
\v 30 Areme Jekafu fune uri Josofu kuae, Na vierafero ane baronemaro na ijiege vierafe. Rove a igifureki uria fine. Ijadufuo na vierafe nane oemarekinu barone vakono kuae.  
\v 31 Jekafu fu ijiege kuaramoga Josofu fu sone ijia urina uviarafa fuone ro e boeje vaeva ije kiae, Na vierafe naka una va kini Fero kuako jane Kenani arena ruaeva iviama jane igia usiaevano kuake.  
\v 32 Ro kuke jaeje ja e mave samuagiavo ijadufuo ja mave-ro goti ro mave-kau ro ire jone boeje ja samuagiavo ije jane ijiakuma ruaevano kuake.  
\v 33-34 Ro ja vuaga kini fu kiako ja are jone ijia ja karinoevo ije ja irere ijene renoevono kiakuva ni kuako, Noeje no e mave-samuagiavono kuafo. Ro kuke no izege asaerafa nuvuone bu mave-samuagiavo ijiege nodua no uria mave samuagiavono kuafo. Ja ijiege kuarakuva fu kiaga ja aesakae Gosoni abena karike. Josofu fu vierafe uviarafa fuone buka ijiege kini Fero kuarake. Ijadufuo maeje e Ijifitiko ije bu e mave-samuagiavo ije ivuake ijia karinoevo baki ijadufuo fu ijiege kuariae.   
\c 47  
\s1 Kini Fero fu aesakae be Josofudo agane ije miaema ijene  
\p
\v 1-2 Ijiege rena Josofuo fune uviarafa fuone umui fague (5) kaenamiana va kini ije gana kuae, E uviarafa none ro asoe none bune iviama Kenani arena urina ruae. Ro buka mave-ro goti ro mave-kau ro sinuome buone boeje bu foteke samuagiavo ije bune kaenamiana igia Gosoni karikuae ruaevano kuae. Areme Josofu fune urina uviarafa fuone ije kaenamiana funekini fino ijia vae.   
\p
\v 3 Bu va ijia usiaevoga kini fune urina kiae, Ja i jone ja mevo ije ja i irere ije menoevono kiae? Ro Josofuodo uviarafa ije bu urina kuae E ireobo, no asaerafa nuvuone ije bu e mave-samuagiavo. Ijadufuo nodua none maza boeje mave-samuagavono kuae.  
\v 4 Bu ijiege kuara areme kuae, No aesakae nuvuone Kenani ije fuka vasia ireobo kekema ijadufuo garasi boeje mave nuvuone bu inoedufuo ije fune saere furima ijadufuo no ije urina igia ruae. Ijadufuo a isekie ni kuoga no aesakae Gosoni ije abena ijia karino kuae.   
\p
\v 5 Areme kini ije fune urina Josofu kuae, Asoe one ro uviarafa one bu ruaeva ije fune ka marei.  
\v 6 Ijadufuo aesakae Ijifiti fu ijifureki ijadufuo ni asoe one ro uviarafa one ije kiaga bu va are ijia karine. Na vierafe are Gosoni fuka sakae mukore ijadufuo bu ijia karidufuo. Ro a vierafega e one gue bu mave-sifi mukoe samuagiavoga ni kiaga bu mave ro goti none ijene samuagiajieno kuae.  
\v 7 Areme Josofuo fune asoe fuone Jekafu mesirina ro kini ije nijaemoga Jekafu fu urina kini ije daro mae.  
\v 8-9 Fu daro mamoga kini fu urina Jekafu juaevasia fu izege fina ruaema ijadufuo kuae. Fu ijiege kuamoga Jekafu fu urina kuae, Na juaevasia none na ae binobino ijia fijana ruaeva ije na juaevasia uvani aderedi teti (130) ijiege. Na juaevasia none buka sibaneke rove naka irufui ma uruvana biediae. Rove orafa none ijiakiro asaerafa none bu kari ruaeva ije buka juaevasia ma uruvana kari ruae rove bume irufui sibaneke biediaevano kuae.  
\v 10 Jekafu fu ijiege kuara areme fune una kuke urina kini ije daro mana fune keke vae.   
\p
\v 11 Areme Josofu fune urina kini vua izege fu kuaraema ijiege rena uri asoe fuone ro uviarafa fuone ije kaenamia Ijifiti guove ijia aesakae ka mukore be are Ramasesi ivuake ijia kiamoga bu va aesakae ije abena ijia kari.  
\v 12 Bu ijia karinoekoga Josofu fu urina asoe fuone ijiakina uviarafa ijiakina e boeje eranabe asoe fuone ijadufuo are ijia kariva ijene ifejiana ire vajiakinu mukoreigia samuagiae.   
\s1 Ijifiti ijia vasia ireobo kekema ijene  
\p
\v 13 Ro are Ijifiti ro Kenane guove ijia fuka vasia ma ireobo kekemoga e boeje buka vasia ireobo abena isejavae.  
\v 14 Ijadufuo Josofu fu urina kumune fu tuana mutuna uijaka ijia naema ije karina e Ijifitiko ijiakiro e Kenaniko ijiebuo fuaeveko bu moni vajavoga fu karina kinido are ijia nae.  
\v 15 Ijiege rekoga E Ijifitiko ije bune manido ire fuaekinu vakuma moni ije funeke furinoga bu una usiaena Josofu kuae, No moni nuvuone funeka furi. Ijadufuo kumune bino nime vajuone ro a bakuma noneka vasia abena oekono kuae.   
\p
\v 16 Ro Josofu fu urina kiae, Ja moni bakikuva ni fanuve jone ja samuagiavo ijia bino kena ro vajiega na kumune vajiano kiae.  
\v 17 Fu ijiege kuariamoga bune va fanuve osekina doniki ro mave-ro goti ije kaemaniana una ro Josofu vajavoga fu ve una kumune karina vajiae. Ijiege rena Josofu fu juaevasia besu guove ijia ijiege rekinu fanu ni binobino ije funeka karima furi.   
\p
\v 18 Areme juaevasia be ijia e Ijifitiko ije bu una ro Josofu fino ijia usiaena kuae, E ireobo noka a biesirakuva baki ro vua ige noneka ma kuarave. No iviama moni nuvuone ijiakiro fanu no samuagiavo boeje bune furi ro una ire bino fuka ma baki. Ro iviama no fune no ro sakae nuvuone ijiaru uria naove.  
\v 19 Ijadufuo ade arega no vasia abena oekega aesakae nuvuone ige fuka ma iseremo. Ro anika kumune bino vajuoga no ikinu ro uije bino vajuoga no one. A ijiege rekina no aesakae nuvuone ige abe una kini ma areme nodua no uri fuefuo moni baki imeno kuae.   
\p
\v 20-22 Areme vasia ije funeka Ijifiti guove ijia ma ireobo kekemoga e Ijifitiko boeje bu uri Josofu soesoe. Bu kuavoga fu urina aesakae buone boeje fuaevena ke una kini vajae areme fu kiamoga e ije bune kini ijadufuo moni baki imei. Ro e ije Godido zinone ifaejevo ijiaru bu sakae buone bu naebe kena fuaeve. Ijadufuo maeje buje bu kini ijare moni bu ire idufuo ije vajiamo.   
\p
\v 23-24 Areme Josofu fu urina e boeje kuariana kiae, Iviama aesakae jone igiakiro jaeje nane fuaevana kena una kini vajavo fune fue kei. Ro jaeje na uije vajiaga ja jone oke rove ja oenoeno masikuva ire gue janika kena ro kini ije vajafo. Ro ire gue ije ni karina uifuo nakiro gue ije ni karina agane jone ijena ino kiae.   
\p
\v 25 Rove e ije bu urina kuae, E ireobo aneka marena no ifejuona karaunuemado noneka oemarekinu kini ijadufuo moni baki imekono kuae.   
\p
\v 26 Bu ijiege kuaravoga Josofu fu uri akae be nijana kiae, Ja kumune korema areme masina kamui faeve (5) ijiege kekuva, ni kamui besu ije abena kini ije makiro fo (4) ije ni jone keno kiae. Bu ijiege rekogaro e ije Godido zinone ifaejevo ije buosukua sakae buone bu naebe kena fuaeve ro bu uria korubuo samuagiae.   
\s1 Jekafu fu ma e orema ijene  
\p
\v 27 Ijiege rena e Isureroko ije bu are Gosoni Ijifiti guove ijia kariva ijia buka sinuome uruvana zaraekoga e uine buka ma e uruvana rei.  
\v 28 Ro Jekafu are Ijifiti fu fima ije fu juaevasia sevenitini (17) ijiege. Ro juaevasia fuone foteke fu fina ruoma e orema ije fu uvani aderedi foti seveni (147) ijiege.  
\v 29 Areme Jekafu fu vierafe fune iviama igiebo baronekiro fu Josofu kumeno fu aru vae. Josofu fu aru vakoga fu urina kuae, A iviama oge none igia faradiena E Ireobo Godido ive ijia kurana kuariega na fiene. Anika kieko a naeje abe abena igia Ijifiti mako rukono kiega na fiene.  
\v 30 Na baronekuva ade na abena Ijifiti igia mako rumo. Ro naeje nika mesiriena una va aesakae Kenani asaerafa none bu uniaeva ijia nujieno kuae. Fu ijiege kuaramoga Josofu fu una gue kuae, Vua irere a kuariemo ije na vierafe na ijiege rekono kuae.   
\p
\v 31 Areme Jekafu fu una kuae, Anika E Ireobo ive ijia kurana kieko a ijiege rekono kiega na fieno kuae. Ijadufuo Josofu fune uri asoe fuone ijadufuo nidua ijia Godido ive ijia kurana kuae, Na ijiege rekono kuae. Areme Jekafu fu ijia tuana vakuma are fu naeno nigedo ijia dijena E Ireobo baname isoena oemarei.   
\c 48  
\s1 Jekafu fu Josofudo farirafa inokiro daromiaema ijene  
\p
\v 1 Ijiege reme maza sibaneke furikoga Josofu fu fieke asoe fuone Jekafu fu adame abema fu fie. Ijadufuo fune uri ame fuone inokiro Manasakiro Ifuremi ije kaenamiana Jekafu gakiro vae.  
\v 2 Josofu fu vakuma gafia kekemoga ebe gana una va Jekafu kuae, Fari one Josofu fu a gakiro ruomono kuae. Bu ijiege kuaramoga Jekafu fu vua ije fiekoga vajae fuone ije fu ijia una naekinemoga fu daro abei. Ijadufuo fune ije fu namo ije fu arena una uri arire fi.   
\p
\v 3 Areme Josofu fune vakuma ijia kekemoga Jekafu fu urina kuae, Maza ije na are Ruzi Kenani guove ijia finoevo ijia Godi ije ka ma daroki ijare ijia ro na biediena daro mie.  
\v 4 Fu daro miena vua be ijiege kuarie. Fu kie, Nare rade anafa one ma uruvana vajaga bure urina anafa ma uruvana tuanaga buka e uruvana reke. Uifari one buka e uruvana rena bure uri aesakae binobino kena karikono kie. Ro kuke fu kie nare aesakae ige abe miaga bu buone abena ijia kari vakono kie.   
\p
\v 5 Ro ame fari one inokiro ije a Ijifiti ijia nafekoga na rade ruaeva ije bu ame none. Na izege na anafa none inokiro e Rubinikiro Simioni na keva ijiege ame one inokiro ije na none keke.  
\v 6 Ro ame bino a rade tuanamo ije naeje na baki ro bune ame one reke. Ro rade ame one gue bu sinuome one gue kekuae vierafekuva bu una va e Ifuremekiro Manasa ijiebuo ijia kedufuo.  
\v 7 Na ijiege kuaevo ijadufuo maeje no aesakae Mesofotemia ijia arena una are Efurati Kenani guove ivuake ijia ruovo ijia asie one Resero fu barone ijadufuo fu naebe una ame bino tuanae. Fu baronemoga naka fuefuo ma ireobo oefiane abei. Areme surive fuone na abena vame ije bu Efurati vako irifo ijia mako ruvano kuae. (Ro are Efurati ije iviama bu kua Beturiemeno kuavo).   
\p
\v 8-10 Ro Jekafu funeka ma e orena ni fuone fune titute ijadufuo fu ame fari inokiro ije fu naebe mukoe giana vierafei. Ijadufuo fu urina Josofu kuae, Ame gure eranebe karivano kuae? Fu ijiege kuamoga Josofu fu kuae, Ame fari inokiro ije bu none fu Godire Ijifiti ijia vajiema ijeno kuae. Fu ijiege kuaramoga Jekafu fu kuae, Ni kaenamia ivuake ige na fivo igia roga na giane. Na vierafe naka daro none bu vajiakiro vierafevano kuae. Ijadufuo Josofu fune uri farirafa fuone inokiro ije kaenamia ivuake ijia vakoga Jekafu fu uri uro urasiana kame uimidiae.  
\v 11 Areme fu una dakudena Josofu kuae, Na aeje naka naebe gako funejuaevasia ma uruvana furi. Ijadufuo na vierafero ane baronedo nabe una a gakiro na ijiege vierafei. Rove Godi fuka na ifejieko na fina ruoma areme ivia nane anafa one inokiro ije giaevano kuae.   
\p
\v 12 Areme Josofu fune anafa fuone inokiro ije kiamo bune Jekafudo oge ado bu kariva ije bu una ari. Bu arikoga fu uri Jekafu nidua ijia auge sana kurituakafano tuana vakuma uimutumutu sakae ijia dije.  
\v 13 Fu ijiege re areme uri ame amure e Manasa fu kuamo fu Jekafudo umui maeneke ijia manikoga ame iviene e Ifuremi fu kuamo fu umui aeneke ijie mani.  
\v 14 Rove Jekafu fune urina umui fuone maeneke ije fu abe una dakude ame iviene e Ifuremido nigofo ijia nijagaro aeneke ije fu abe una Manasa ame boga ijadufuo nigofo ijia nijae.   
\p
\v 15 Areme fune uri daro fuone Josofu mana kuae, Na Godi ije vierafe asaerafa none e Eburamekiro Aeseki ijiebuo Godi ije bu baname isoekinu fuefuo imeva ije fu daro miena ifejieko na fi ruovo ijare ame ige daro miake.  
\v 16 Ro kuke anera fuone ije bu na mukoreigia samuagieko na finoevo ijare bu marejiake. Na vierafe fure ame ige daro miaga bure maza boeje Eburamekiro Aeseki ro na ive nuvuone abe fare karivake. Bure izege no Godi irinakinu ma vierafevo ijiege budua Godi ma vierafekinu kari vake. Ro kuke Godi fu ifejiaga anafa buone ro asaerafa buone buka ma uruvana rekono kuae.   
\p
\v 17 Areme Josofu fu gake Jekafu fu umui fuone maeneke ije fu abena Ifuremido nigofo ijia nijamo fuka naebe oemarei. Ijadufuo fu urina asoe fuone ijadufuo umui maeneke ije abe biona una Manasado nigofo ijia nijakiro rei.  
\v 18 Fu ijiege remoga Josofu fu kuae, Ate ije a isema reme. Ame boga ije fu igieno umui one maeneke ije abena nigofo fuone ijia nijano kuae.   
\p
\v 19 Rove asoe fuone fu kuae, Farino na irere na revo ije nane vierafena reve. Na vierafe Manasado asaerafa buka ma uruvana reke. Rove Ifuremi iviene fuone ijadufuo asaerafa ijiebe fu asina ma e uruvana reke. Bu e uruvana rena bure ka ma e uruvana aesakae mamekanu gue kega karike.  
\v 20 Ijadufuo Jekafu ve ijia ame inokiro ije daro ige miae. Fu daro miana kiae, Maza rade e Isureroko bu bue daro manamikuva bu ive jone ijia kuriakinu reke. Bu kuae, No vierafe Godire izege fu e Ifuremikiro Manasa daro miakinu marejiaema ijiege fu kuke jadua daro miakinu ma rejiakono kuaeke.   
\p
\v 21 Areme Jekafu fu Josofuo kuae, Naeje na baronekuvejo igia giene. Ro na vierafe Godire maza boeje osiki fi vake. Ro fure rade a samuagana mesirana asaerafa one ijiebuo aesakae ijia vake.  
\v 22 Ijadufuo na e Amoraetiko ijiebuo aesakae Sekami na juvua magu none ijia kena iraraena kania kuriana abe a makiro uviarafa one ije bu bakino kuae.   
\c 49  
\s1 Jekafu anafa fuone daro miaema ijene  
\p
\v 1-2 Areme Jekafu fune urina anafa fuone boeje kumeno bu besu afuivoga fu vua kuariae. Fu kiae, Anafano, naeje na Jekafu ro kuke e Isurero asoe jone ijene. Ijadufuo ni ro ige na fivo igia karike na irere fu rade jone ruadufuo ijene kuariafo.   
\p
\v 3 Ro Rubini aeje a fari none amure ijene ijadufuo are daro none amure ije a abeke. Aeje aka ma e daroki ro are anafa none guriebuo uve ijia aeje aka ma aroekaranoeno.  
\v 4 Aeje aka e be naebe mukoe vierafekinu renoeno ro aka e be zabaenoeno. Ro a bara ije fu noefuo imeno ije mesirina fata none na naejo ijia nae ijadufuo a naebe na aguarie. A ijiege rema ijadufuo rade aeje abe e anuigi be rekono kuae.   
\p
\v 5 Areme Jekafu fu uri e Simionikiro Rivae ije buesina kuae, Buje buka ino uviaki. Bu buosiki buka sinuome bu kena bijaenoevo ije kena ura zienoekinu e ije bume ijiebure kanianoeke.  
\v 6 Ijadufuo nabe vua buone bu mauike kuae fienamikinu renoevo ijia buina ijiege renoeke. Ro bu isema vierafena mave-kau ije bu ire ise bino revo baki ije bume kame arafiriana vajae fiane vajiavo.  
\v 7 Buka ma urukeigia ziena mujuebe defarure abenoekinu e gue vame ise ijia kanianoeve. Ijadufuo na bu kame isekafiakinu ro uifari buone naka kame giegisa uniaga bu urina e agane Isureroko ijena biedarena karinoekono kiae.   
\p
\v 8 Areme Jekafu fune una Juda kuae, Aka e ani one kaniakinu are buone iraraega uviarafa one ije buka a dabe arorana kurituakafake.  
\v 9 Ro kuke aeje aka fanu raejoni ige fu kuriaerena efunena e sakia buvua ino ijiege reke. A ijiege remo ijadufuo e buka a jumedufuo.  
\v 10 Juda fuka kini rena ire boege samuagiake ro rade uifari fuone budua bu maza boeje e gue samuagia vaga e anuigi be fu ruake. Bu ijiege rena e boeje aesakae binobino ijia karivo ije bu una e anuigi ije irinana ire ni mukore ije karina ro fu vajake.  
\v 11 Ro mave doniki fuone fu abena vaeni mukore ije baema zinume ijia kirake. Ro sinuome fuone ije fu karina va do vaeni ijia soke.  
\v 12 Ro kuke ni fuone fuka abaeki ijadufuo maeje fu maza boeje ire vaeni ino. Ro fuka maza boeje muje uruvana ino ijadufuo ubae fuone buka abaekirake.   
\p
\v 13 Ro Zeburuni fuje fu davare irifo ijia finoeke. Fu ijia fino ijadufuo sisime bu oemarekinu ro ijia ajiadufuo. Ro ae sakae fuone fu fino ubine fu vakuma Saedoni ijia irike.   
\p
\v 14 Ro Isaka fuje fuka mave doniki igege mauike naemena ijia finoeke.  
\v 15 Ro sakae fu fino ije fu ga fuka ma mukore. Ijadufuo fuka maza boeje oemarekinu e gue ifejiakiro fuka i gikikimana menoeke.   
\p
\v 16 Ro e Deni fure fu e fuone ijene samuagiaga bu una besu e Isureroko ijena karinoeke.  
\v 17 Fu tabare igege ose ijiebuo dia tare ijia sakiaga e ije bu ose kena oenoevo ije bu ari kaniake.  
\v 18 Jekafu fu ijiege kuariama areme urina Godi kuae, E Ireobo naeje name a samuagana figa are no karaunuoga na gakono kuae.   
\p
\v 19 Areme Jekafu fu urina Gedi fari fuone be ijadufuo kuae, Fuje bu e iniemejo ijiebe kanana bu subine vakuva fuka ve nuvediana buina bijaeke.  
\v 20 Ro Asado sakae ijia fuka ire maeje ijiaru bu ijia tavuadufuo. Ro ire ijiebe bu manido e kini ije buka oemarekinu idufuo.   
\p
\v 21 Ro Natari fuje fuka fanuve diano kuavo mave-sifi igeki ijiege difuri oenoedufuo. Ro fure ame ni mukore ije nafedufuo.   
\p
\v 22 Fu ijiege kuaria areme urina Josofu kuae, Fuje fuka ine vaeni maeje fu are isove do irifo ijia tavuana ajia vakinu fo mukoreigia kiramo igege reke.  
\v 23 Ro e ani fuone buka giriesana a kanakuae juvuave buone karina dabe arafirinoeve.  
\v 24 Rove fuone fu manino ije fu Jekafudo Godi ije ka ma daroki ijare ifejiaga fu giriesana manine. Ro Godi e ije fu mave-sifi mukoe samuagiamo ijieki ijare fu mukoreigia samuagame.   
\p
\v 25 Ro E Ije a ifejadufuo ije fu Godi ije asoe one fu baname isoemo ijare a ifejadufuo. Ro Godi E Ireobo ije fuka ma darokido fure ifejaga ve fu ume igia dakinu ro do kiaga bu sakae ijia ajiave. Ro fure ifejaga fanuve one ro ame one buka ma uruvana reke.  
\v 26 Ro asoe one ijadufuo daro ije fuka ma ireobo. Ro daro ijare fuka ire maeje nafare ije isuibino ijia ireva ijia naovo ijene asidiave. Ijadufuo na baname isoega daro ije fu Josofu one roga a e ireobo rena are uviarafa one ije asidiake.   
\p
\v 27 Ro Bezimani fuje fu siroe kuriae igege rena suoke ro mufuo ije fuka e ani fuone ije sakiana kame buvuasekono kuae.   
\p
\v 28 Ro vua mukore ige e Jekafure maza ije fune baronekuveno ijia fu agane fuone tuero (12) ije kuariae. Ro daro ije fu vajiaema ije fune buone izege bu karikuvejo ije giakinu vajiae.   
\s1 E Jekafu fu baronema ijene  
\p
\v 29-31 Areme Jekafu fu urina kiae, Naeje nane iviamagiebo baronedufuo. Ijadufuo na baronekuva surive none ije nika abe una va gamia Makefera munie ijia nujiefo. Ro munie ije fu Eburamere e Efironi e Itaetiko ijadufuo ijene fuaeve. Ijadufuo bu e oevo ije bu ke va ijia uniavo. Ro munie ije fu Mamure are maza ajiamo nake ijia ro fu aesakae Kenani guove ijia. Munie ije bu Eburamekina Sera ro Aesekikiro Rebeka ijiebuo surive ije kena ijia uniae. Ro kuke Ria fu baronema ije na abena mako ijia nujae.  
\v 32 Ro aesakae ijia namo ijiakiro munie tire ije fu e Itaetiko ijiebuo e Eburame fu ijene fuaevemano kiae.  
\v 33 Jekafu fu vua boeje anafa fuone ijene kuariama furimoga fu una fata fuone ijia na areme fune ijia baronei.   
\c 50  
\s1 Josofukiro uviarafa fuone bu Jekafudo surive abena una Kenani nujakuae vaeva ijene  
\p
\v 1 Ijiege rena Jekafu fune baronemoga Josofu fuka tuana asoe fuone ado ijia dijena dabe uimikinu nimefiri.  
\v 2-3 Areme fune kiamoga bu uri e ije bu e oega bu muramura kena vajae buone aziriaga bu naebe buraevo ije kiavoga bu muramura abena Jekafudo vajae surive ijene azirae. Bu ijiege muramura ije abena Jekafudo surive ijene maza besubesu azirakinu nujana kari vakuma mazani foti (40) ijiege furi. Rove e Ijifitiko ijiebe Jekafu fu baronemoga bu dabe mazani seveniti (70) ijiege nuja karikinu fuefuo sisimei.   
\p
\v 4 Bu ijiege fuefuo sisimena furinoga Josofu fu urina e Ijifitiko ijiebuo e mamekanu ije kiae, Ja na oemarejiekuva nine jasekie va noefuo vua ige kini Fero kuarafo.  
\v 5 Ni va kua, Asoe none fu iko baronekiro kie, Na baronekuva vajae surive none ije nika abena una gamia Kenani vano kiae. A abe va munie tire ijia unieno kiemoga nane fuosiki ijiege kuaena marei. Ijadufuo a isekie ni kiega na asoe none abe va Kenani ijia nujana una rono kuano kiae.  
\v 6 Josofu fu ijiege kuariamoga bune va Fero kuaravoga fu urina kiae, Nine una va Josofu kua, Ije fune maremano nine asoe one ijadufuo surive abena va a kuariema ijiege Kenani ijia nujana ni una rono kuano kiae.   
\p
\v 7-9 Ijadufuo Josofu fune asoe fuone abe Kenani ijia nujakiro fune vae. Josofu fu vakoga kini Ferodo e fuone mamekanu fu ifejavo ro e mamekanu gue aesakae ije samuavo ije bune fuina vae. Ro kuke Josofudo e ijiakina uviarafa ijiakina agane buone boeje buka urina fuina vae. Ro kuke e bijaevo gue bu sarioti kekoga gue bu osi kena fuina vae. Ijiege rena e Isureroko ma uruvana bune vagana sinuome buone ijiakina anafa buone ro mave-kau ro ro goti ije bu ijia arena vae.   
\p
\v 10 Bune vakuma do Jodeni tuana gara are bu ire vuiti mutuvo bu kua Atadino kuavo ijia usiaena ireobo oefiane abei. Bu ijiege rekoga Josofu fudua oefiane abena sisimeko vakuma mazani seven (7) ijiege furi.  
\v 11 Areme e Kenanaetiko bu ije giana urina kuae, E Ijifitiko ije buka ma ireobo oefiane abevono kuae. Ijadufuo bu urina are ije abe ive ina kuae, Abero Misiremino kuae.   
\p
\v 12-13 Ijadufuo e Jekafudo anafa ije bune uri izege asoe buone fu kuariaema ijiege rei. Bune urina Jekafudo surive ije abena va Kenani munie tire bu kua Mekeferano kuavo ijia nujae. Ro are ije bu e oega bu kena va ijia uniavo ije fu e Efironi e Itaetiko ijadufuo rove fu Eburamere fuaevei.  
\v 14 Bu Jekafu abe mako ru areme rade Josofu fune uviarafa fuone ro e boeje ijena una Ijifiti vae.   
\s1 Josofu fu uviarafa ijena vua kuaena marema ijene  
\p
\v 15 Ijiege rena Jekafu fune baronemoga Josofudo uviarafa ije buneka jumei. Ijadufuo bu urina bue kuae, No ude Josofu noka ire ise ije fuone revado bigake fuse una ve ise bino nuvuone rekuma no izege rekono kuae?  
\v 16-17 Ijadufuo bu urina vua ige Josofu nijana kumei, Asoe nuvuone fu uria fino ijia fu kuo, Ni va a kuaga a uviarafa one ijiebuo ise ireobo ije bu one reva ije giana areno kue. Ijadufuo a isekie ni e ige no asoe one ijadufuo Godi ijadufuo imevo ije ire ise no ude one reva ije guona areno kuae. Bu vua ijiege Josofu nijavoga fu vua ije fiemo fuka oefiaemo fu uri nimei.   
\p
\v 18 Areme Josofudo uviarafa ije bune ro Josofu fino ijia usiaena uri nidua fuone ijia auge sana kuri tuakafae. Areme bu uri kuae, No vierafe noka ivia oefuo moni baki imekuae vierafevano kuae.  
\v 19 Rove Josofu fu una kiae, Jade na ireobo jumevo. Nana Godi vareki bakido nabe uri ise jone ije gia kame isekafiadufuo.  
\v 20 Ja naeje jaka ire ise ijene none rei rove Godire fuone vierafema ijia fu na abena una ire maeje rei. Fu ire ijene rekina fu e boeje eranebe iviama irufui ige abevo ijia ifejiana karauniakiro fu ijadufuo ijiege rei.  
\v 21 Ijadufuo naneka ma kuariavono jade jumevo. Na iviama naneka ja ro anafa jone ije samuagiakiro vierafevano kiae. Josofu fu vua ijiege kuariamoga uviarafa fuone bu vua ije fievo buka oemadiana vajae naekinenamiae.   
\s1 Josofu fu baronema ijene  
\p
\v 22 Areme Josofu fune uviarafa fuone ijena Ijifiti ijia fina vakuma juaevasia uvani aderedi teni (110) ijiege furiko fu ijia eoremo fu baronei.  
\v 23 Fu fina vakuma e Ifuremido anafa ije bune uri ame buone nafekoga. E Manasado fari Makire fu uri ame fuone nafena bu kaenamiana ro Josofu nijaevoga fu oemarekinu giae.   
\p
\v 24 Areme Josofu fune urina uviarafa fuone ije kiae, Naeje nane iviama igiebo baroneke. Ro na vierafe rade una gafega karivadufuo ije fu Godire ja samuagiake. Fure samuagiana kaenamiaga ja are ige Ijifiti arena uri aesakae ije fu Eburamekiro Aeseki ro Jekafu fu miako kiaema ijia vakono kiae.  
\v 25 Areme Josofu fu kiamoga e fuone ije bune urina Godido ive ijia kurana vua be fuina kuaena avenami. Fu kiae, Ni iviama kieko ja Godi fu kaenamiaga ja una aesakae fu muoko kuema ijia vakuva jaka surive none ije abe ijia vakono kiega na fieno kiae.   
\p
\v 26 Areme fune juaevasi uvani aderedi teni (110) ijiege abenoga fune barone. Fu baronemoga bu uri ire ude mukore urimo ije kena vajae suri fuone ije azima areme abena mavua e oega bu savo ijia abie.