\id ACT - Barai NT and OT portions [bbb] -Papua New Guinea 2006 (DBL -2014) \h EKISI \toc1 EKISI \toc2 Ekisi \toc3 Ek \mt1 EKISI \imt1 Ekisi Vua Amure \ip E Ruki e ije buki Ruki isoema ijare una kuke buki Ekisi ige isoe. Fu izege e Jesudo vua fievo bu Kavene Akae fu oe buone ijia arimoga bu uri vua maeje dabe Jerusareme ijia zinuive kuariana dabe are irore ijia vaeva ijene isoe. E Afasero ije bu urina are binobino ijia oenoekinu ire ka ma uruvana sumiki ije Kavene Akae ijadufuo daro ijia renoekinu nuga binobino renoe. Ro e ije amure Jesudo vua maeje abe e kuarianoema ije e Fitare. Ro ijuone fuone ije e Firifi ro ura Firifido ijuone ije fu Foru. Areme rade e ije Jesu ma vierafevo bu usiaena ae binobino ijia oenoekinu Jesudo vua ije abe kuarianoe. Ro vua amure ije bu abena e Jiusi ijiaru nijasiae. Ro rade Godi fu kiamoga bu vua maeje abena una e Jiusi baki ije kuariavoga budua bu fiena Jesu ma vierafei. \iot Ekisi vua kafare binobino - \io1 1:1-26 Godido Kavene fu ruadufuo ije samuadufuo ijene. \io1 2:1-13 Kavene Akae ije fu ruaema ijadufuo vua ijene. \io1 2:14–8:3 Jerusareme ijia vua maeje abe kuariaeva ijene. \io1 8:4–12:25 Are Judiakiro Sameria ijia vua maeje abe kuariaeva ijene. \io1 13:1–21:16 Foru Godido vua maeje fu abena are irore igia e uruvana kuarianoema ijene. \io1 21:17–28:31 Foru bu abe sidove Jerusaremekiro Sesaria ro Romu ijia dibure nujavo fu finoema ijene. \c 1 \p \v 1-2 Eko, Tiofirasi buki none ije na ude isoeva ije na izege Jesu fu ume igia ire boeje renoekinu nijasianoema ijene isoei. Jesu fu Godido Kavene ijadufuo duvado ijia fu Afasero e vua fuone fiena una e gue kuariavo ijene izege bu redufuo ije kuariama areme fune una saove gufia ajia vae. \v 3 Fu barone areme una urina maza foti ijiege fu vajae fuone abena e vua fuone fievo ije nijasiae. Fuka samadukua nijasiamoga bu gana vierafero fune ma una urimaro bu ijiege vierafe. Ro ve ijia fu uri Godi izege fu e fuone ijiebuo oe ijia samuagiadufuo ijadufuo vua ije nijasiae. \v 4 Bu una besu afuivoga fu vua kuariana kiae, Jade are Jerusareme arena vako. Ro nika ijia karina ire ije asoe none fu nijiako kiaema ije na ude kuariaeva ije samuafo. \v 5 Ijadufuo maeje Joni fu do ijiaru ja ruoriae rove iviama igiebo Godi fu Kavene fuone nujajiakono kiae. \s1 Jesu fu saove ijia ajia vaema ijene \p \v 6 E Afasero bu una besu kariva ijia bu uri Jesu kuae, E Ireobo abe iviama no ifejuona e kini be abe muoga fure e Isureroko ige no samuaguokono kuae? \v 7 Rove Jesu fu una kiae, Ja ire ije Asoe none fu veze redufuo ije jade vierafevo. Ijadufuo maeje ire ije fu veze redufuo ije fune fure fuosukua vierafei. \v 8 Ro ja rade maza ije Godido Kavene fu oe jone ijia arikuma ja ijia daro abena uri vua none ije mukoreigia e nijasianoeke. Ja e sidove Jerusaremekiro sakae Judia ro Sameria ijiakina e are irore boegia karinoeva ije nijasianoekono kiae. \v 9 Jesu fu ijiege kuariama areme bu veriko fu ijia una saove ijia ajia vakoga amite ijare dabe utina vako bu naebe una gae. \p \v 10 Jesu fune vakoga bu irena saove gufia verivo ijia saroruba e inokiro ugone abaeki saeva ije bume ijia buina irei. \v 11 Bu ijia ire areme uri kiae, E Gareriko gurie ja irerefuo irena saove ijia rereve? Iviama ige Jesu fu izege saove gufia ajia vako ja gaeva ije rade fu una ijiege roga ja gakono kiae. \s1 E Mataeasi fu Judasido are abema ijene \p \v 12 Areme e Afasero ijiakiro e gue Jesudo vua fievo ije bune uruo Orivi arena una Jerusareme ijia vae. Ro uruo Orivi ije fu Jerusareme iviake ijia. \v 13 Bune va Jerusareme usiaena gire be bu karijo ijia ajia vae. Ro e ijia vaeva ije Fitakina Jonikina Jemisi ro Edurukiro Firifi ro Tomasi ijene. Ro kuke e Batoromiukiro Matiu ro e Afiasedo fari Jemisi. Ro Saemoni e ije e mamekanu ijena madinamimo ijiakiro Jemisido fari e Judasi ijiebe ijia vae. \v 14 Ro maza boeje bu una besu afuina Godido baname isoevo ije bara Meri Jesudo asie ijiakiro bara gue ro Jesudo uviarafa ije bu buina besu afuivo. \p \v 15-16 Areme mu sibaneke furikoga e boeje Jesu ma vierafevo uvani aderedi tuaedi (120) bu una besu afui. Bu ijiege afuikoga Fita fu urina kiae, Erafano Godido vua bu isuibe isoeva ije funeka riarei. Ro vua ije fune isuibe Godido Kavene ijare e Devidido itire ijia e Judasido kuae fure e ani ijiebuo vame amaeriga bu Jesu tokono kuae. \v 17 Ro e ije fune Jesure mesirima ijadufuo fu noena imei. \v 18 Ro moni ije Judasi fu vame ise ijia abema ije bu abena sakae be fuaevei. Ro sakae ije fu fuaevema ije fu ijia ari kanamoga fu detavuana baronei. \v 19 Ro e boeje are Jerusareme ijia kariva bu vua ije fiena uri are ije bu ive ina kua Akedamano kuae. Ro Akedama ijadufuo maeje Are Kavuane Arimo. \v 20 Ro vua ijadufuo ije bune buki Sami ijia isoena ijiege kuae, \q1 Are fuone ije e be fube ijia fikono kuae. \m Ro kuke vua be bu ijiege isoe, \q1 E be fuka i fuone fu meno ije abeno kuae. \m \v 21 Ijadufuo na vierafe noka e be erare fu maza ije no Jesuna oenoeva ijia fu noena oenoema no e ije abeke. \v 22 Ro kuke e ije fuka maza ije Joni fu e nijasiakinu do ruoriaema ijia ruoma Jesu fu una saove gufia ajia vako fu gaema no e ije abekono kiae. \p \v 23 Ijadufuo bu uri e inokiro kei. E be ive fuone Josofu Basabasi Jasitasi ro be ije e Mataeasi. \v 24-25 Bu e inokiro ije kena Godido baname isoena kuae, E Ireobo a e boeje ijiebuo oe ije are giamo ijadufuo ni e inokiro ige giana e a vierafema ije nijasuone. E Judasi fu vua one abe oenoeno ijia fu i fuone ije arena una are ise ijia vae. Ijadufuo ni erare fu are fuone abedufuo ije nijasuono kuae. \v 26 Areme bune ive buone isoema ke mavua ijia sana una karaeva ije bu Mataeasido ive ije kei. Ijadufuo bu fu abevoga fu una e Afasero ireveni (11) Jesudo vua abe oenoejo ijena mazie. \c 2 \s1 Kavene Akae fu ari ruaema ijene \p \v 1 Areme maza ije bu kua Fenitikosino kuavo ije romoga e boeje Jesu ma vierafevo bu una are besu afui. \v 2 Bu besu kariva ijia saroruba ire be fu saove gufia majaufi ireobo igege uvuina ae guove bu kariva ijia arui. \v 3 Areme bu gake ire be miane igege vujena kikike e besubesu ijiebuo vajae ijia kunae. \v 4 Ijiege rekoga Godido Kavene fu e boeje ijiebuo oe ijia arina nirokiamoga bu uri isama bino bu fievo baki ijia nanuamena kuae. \p \v 5 Ro e Jiusi Godi ma vierafevo bu are irore ijia ruaeva ije bu Jerusareme ijia kari. \v 6-7 Ijadufuo bu ire ije remo ije fiena una besu afui. Ro e binobino bu vua ije bu isama buone ijia kuaevo ije fievo buka oeseradiae. Ijadufuo bu una bue kuae, E gafe vua ijiege kuaevo ije bu e Gareriko. \v 8 Ro e ige nono isama binobino kuaevo rove e Gareriko gafe bu izege isama nuvuone kuaeve? \v 9-10 No e gue no e Fatia ro Mediako ro gue no e Eramaeti ro Mesafotamia ro Judiakiro Kafadosiako. Ro gue no e Fonetasi ro e Eisiakiro Firigiako ro gue e Femefiriako. Ro kuke e gue no e Ijifiti ro e Ribiako are Saerini ivuake ijieko. Ro kuke e gue no e Arebiakiro Romuko ro gue no e Kuritiko. \v 11-12 Ro e gue no e Jiusi ro gue no e Jiusi baki ro nome e Jiusi vame bu kevo no ijiege kenoeve. E boeje no are irore binobino ijia ruae rove e ije bu izege ire maeje Godi fu rema ije dabe isama nuvuone ijia kuaruovono kuae. E boeje bu vua ije fievo buka oeseradiamo bu una bue kuae, Ire ije bu revo ije maeje irereno kuae? \v 13 Ro e gue bu uri e Jesu ma vierafevo ijene kame varaemena kuae, E ije bute do kugi iva ijadufuo bu vua ijiege kuaevono kuae. \s1 Fita fu uri vua kuariaema ijene \p \v 14 Areme Fita fu uri e eleveni gue Jesudo vua abe oenoejo ijena e boeje aramaziana kiae, E Jiusi guriakiro e Jerusareme kariva gurie jame mauike karifo. Ja karike na irere ige iviama rema ijadufuo maeje kuariaga ja fiefo. \v 15 Ja vierafero e ige bu do kugi ivaro ja ijiege vierafe rove ije bu baki ijadufuo maeje iviama ige fu uria suoke naeni kiroki. \v 16-17 Ire ige rema ije fune izege e Joero e Godido vua vierafena kuaemo fu isuibe kuaema fune ijiakuma riarei. Ro vua ije fu kuaema ije bu ijiege isoe, \q1 Godi fu kuae, Na maza radekuma ijia Kavene none ije abe e boeje nujaejiake. Ro ame momokana ro kabaekua jone bu Godido vua ije fiena una e gue kuariake. Ro kuke e nikaki ije bu nimamaeke ro eove ije bu naka naoke. \v 18 Ro e ijuebaki vua none fievo ije na Kavene Akae none abe nujaejiaga bu vua none fiena una e gue kuariake. \v 19 Na ire sumiki mamekanu ja naebe giaeva ije bino kave gufia rekinu ro ume igia reke. Ro ire sumiki ijeja ume igia fu kavuane firake ro kuke miane fu ijia naekega are irore boege fuka miane u ijare iraraeke. \v 20 Ro kuke mazani ije fuka tituteke asame fu una kavuane reke. Ire ijiebe ude rekega rade E Ireobo ijadufuo maza anuiga sanaema ije fu ruadufuo. \v 21 Ro maza ijia erare fu E Ireobo ijadufuo ive ijia kumekuma fu kenujakono kuae. \p \v 22 Ijadufuo e Isureroko gurie vua ige mukoreigia fiefo. Godi fu Jesu e Nasaretiko ije kuamoga fu ire sumiki ro nuga binobino ja ude naebe giaeva ije samadukua remo jane giae. Ijadufuo ja ma vierafega Jesu fune ma Godire kuamo fu ruae. \v 23 Godi fu e ije bu Jesu abe ja miadufuo ije fune isuibe vierafe ro fune oe buone ijia ijiege niri. Ijadufuo ja arekoga bu Jesu abe e ise ije miavo bu abe kurosi kanae. \v 24 Areme Jesu fu isejavaemoga Godire kenujamo fu una uri. Ijadufuo maeje oevo ije fu izege una Jesu faregakuma baki. \v 25 Ijadufuo maeje Devidi fune isuibe ijia Jesudo fu ijiege kuae, \q1 Maza boeje na gaga E Ireobo fuka na nidua ijia manirume. Ro kuke fuka na mukoe samuagiemo ijadufuo fu erare ire ise bino none rekuma baki. \q1 \v 26-27 Ijadufuo naka oemarena vua ije e bu oemaredufuo ije kuaeve. Ro naka uria Godi a ma vierafevo ijadufuo maeje a kavene none abe arega fu baromuna vake. Ro E One maturaema ije ade arega vajae fuone fu mako ijia buraemo. \q1 \v 28 Ro ane are vame ije ma karivako ije nijasie. Ro kuke a nobiki fino ijadufuo naka oe madiemono kuae. \p \v 29 Ijadufuo erafano, vua ige na asae nuvuone e Devidido ije samadukua kuariakuvejo fiefo. Devidi fune isuibe baronemo bune abe mako rui rove mako fuone no iviama uria gave. \v 30 Ro maza ije fu uria fima ije fuje fu e be Godido vua vierafena kuaemo. Ijadufuo Devidi fune izege Godi fu rade ire be fuone rekiro kuaema ije fune vierafei. Ro vua ije Godi fu ijiege kuae, Na asae one ijia e be abega fure uri izege a kini rema ijiege kini rena e boege samuagiakono kuae. \v 31 Ijadufuo Godi fu Devidi samadukua kuaramoga fu vierafero Jesu fu una urikiro fu ijiege vierafei. Ijadufuo fu kuae, \q1 Godi fube e ije fu kua fu ari ruakono kuaema ije arega fu baromuna vake. Ro kuke vajae fuone fube arega fu mako ijia buraekono kuae. \p \v 32 Ijadufuo Godi fune Jesu kuamo fu una urimo e boege none ni nuvuone ijia gae. \v 33 Godi fu Jesu kuamoga fu una fuone sanaema ijia umui maeneke ijia fikoga fu Kavene Akae fu mako kuaema ije abe mae. Ijadufuo irere ige ja iviama giakinu fievo ije fune Jesure Kavene fuone ije abe no nujaejue. \v 34-35 Ro e Devidi fune baronei rove fu naebe saove ijia vae. Ro fume kuae, \q1 E Ireobo fu e ireobo none kuae, Ni umui none maeneke igia fike na e ani one ke a uniaejaga bure ume igia karina oefuo i meno kuae. \p \v 36 Ijadufuo e Isureroko boegie vua ige fuka mano mukoreigia fiefo. Godi fu Jesu e ije ja karauniadufuo ije kuamo fu ari romoga ja dabe kurosi kanae. Rove Godi fu e ije kuaga iviama fu E Ireobo rena fino kiae. \p \v 37 Fita fu vua ijiege kuariamoga vua ijare e boeje ijiebuo oe ije fuka ufusei. Ijadufuo buka urina Fitakiro e Afasero gue ije kiae, Erafano No izege rekono kiae? \v 38 Ijadufuo Fita fu una kiae, E besubesu janika ise jone ije ijuegafia areme una oe kuderiafo. Ja ijiege rega e be fu ja ke Jesudo ive ijia do ruoriaga Godi fu ise jone giana arega ja Kavene Akae ije abefo. \v 39 Ijadufuo maeje Godi ire ije fu rekiro kuaema ije fu e boeje ume igia kariva ije jone rekiro kuae. Ijadufuo jaka anafa jone ijiakiro e mumabo kariva ijiakina e ije eranebe Godi fu kumeno ije jaka fuone vano kiae. \p \v 40 Fita fu vua ijiege kuriaekuriaeki soesoena kuariae. Fu kiae, Janika e ije ise revo ijiebuo vame ije mukoreigia akariakina ja joe karaunianamino kiae. \v 41 Ijadufuo e boeje bu Fitado vua ije fiena ma vierafevoga bu kame do ruoriae. Areme ve ijia e tiri tauseni (3000) bu una e Jesu ma vierafevo ijena mazie. \v 42 Ro maza boeje buka e Afasero ijena besu afuina vua bu nijasiavo ije fiekinu buina goruvevo. Bu ijiege rekinu besu ire ina Godido baname isoekinu ijiege rei. \p \v 43 Godi fuka e Afasero ije daro miamoga bu uri vame sumiki gue revoga e boeje bu giavo buka oeseradiaro sibaneke jumei. \v 44 E ije Jesu ma vierafevo ije buka besu afuina goruvekinu sinuome ivajuonamivo. \v 45 Bu uri sinuome buone ke fuaevena moni abena erare isema fino bu gavo ije ifejakinu ijiege revo. \v 46 Ro maza boeje bu Godido Are ijia afuikinu ro kuke are buone ijia ire besu ina oemareruvo. \v 47 Bu ijiege rekinu Godido oemarega e boeje bu giana vierafero e Jesu ma vierafevo ije buka e maro bu ijiege vierafevo. Ro E Ireobo fu maza besubesu e gue karauniana kaenamiaga bu una e ije ma vierafevo ijena mazieve. \c 3 \s1 Bu e dia garema ije kenujaeva ijene \p \v 1 Areme maza be ve garege vako e bu baname isoevo ijia Fitakiro Joni bu Godido Are ijia vae. \v 2 Ro Godido Are viene be bu kua Viene Irerebarekino kuavo ijia e be dia garema fu ijia fine. Ro e ije maza boeje bu nakusena Godido Are viene ijia nujaga fu ijia fina e ije ruovo ije monifuo sarefiriamo. \v 3 Ijadufuo Fitakiro Joni bu aru vakoga fu giana uri monifuo sarefiriae. \v 4-5 E ije fu ijiege sarefiriamoga bu uri urukeigia veri. Areme Fita fu uri kuae, Eko kame no guono kuamoga fu vierafero bu ire be makuvejoro fuka bu urukeigia veradiae. \v 6 Rove Fita fu kuae, Eko nana moni baki. Rove na vierafe na irere ige na abeva ije na abe make. Ijadufuo na Jesu Kuraesi e Nasaretiko ijadufuo ive ijia kuavono ni uri koro vano kuae. \v 7-8 Areme Fita fu uri umui fuone maeneke ijia e ije umui kei. Fu ijiege umui kenoga e ijadufuo diakiro makamato ije fune saroruba una girenamimoga fu uri arire oenoe. Areme fune uri Fitakiro Jonina Are bu baname isoevo ijia aruna oenoekinu kafiana Godido oemarei. \v 9-10 E ije fu ve ijia ijiege remoga e boeje guove ijia kariva ije bu gae. Bu vierafega e ije fu e gafe Godido Are viene bu kua Viene Irerebarekino kuavo ijia fina e monifuo sarefiriamo ijare. Ro fu izege remoga dia fuone fu una marema ije buka naebe mukore vierafei ijadufuo buka ireobo oeseradiae. \s1 Fita fu Godido Are ijia vua kuariaema ijene \p \v 11 Areme e ije fu uri Fitakiro Joni faradiana ijia maninoga e boeje buka oeseradiamoga bu difurisaena e ije gakuae ruae. Ro are ije bu ireva ije bu kua, Soromonido Banadeno kuavo. \v 12 Ijadufuo Fita fu uri kiae, E Isureroko gurie ja izerega uri urukeigia veraduove? Jade vierafero e gure no daro nuvuone ijia ro izege no maturaeva ijia no kenujavo fu maemaro jade ijiege vierafevo. \v 13 E Jesu fu e ije asaerafa nuvuone e Eburamekiro Aeseki ro e Jekafu ijiebuo Godi ijare sanaema fuone ije abena mae. Rove jare fu dabe e Jiusi ijiebuo e mamekanu ije miae. Areme Faereti fu maza ijia Jesu kenujakuvenoga jaka nidua fuone ijia Jesu ijuemae. \v 14 Fuje fuka e akae ro e maturae rove jaka fu ijuemae. Ijadufuo ja Faereti kuavo fu Jesu abena e ani ije miamo bu kanagaro e Barabasi e ije ka e kaniamo ije ja arevo fu vae. \v 15 Ja e ije fu e boeje ijiebuo vame ije bu ma karivako ije amaerima ije ja arekoga bu kanae. Rove Godire kenujamoga fu una urima ije nore Joniki gae. \v 16 No Jesudo ive ije ma vierafevo ijadufuo no ive ijare e gure dia garema ije kenujae. Ijadufuo fu uri niome jone igifureki oenoeko jane gave. \p \v 17 Ro igia fie, e gure na giaga jaka mukore vierafekinu renoevo baki. Ijadufuo ja e mamekanu jone ijena jare Jesu dabe ijiege rei. \v 18 Godi fu isuibe e ije bu vua fuone vierafena kuaevo ijiebuo itire ijia ijiege kuae, E ije Godi fu kuaga fu ruakuma fuka isejavaekono kuae. Ijadufuo Godi fu arekoga bu ijiege rei. \v 19 Ijadufuo vame ise jone ja renoejo ije nika arena una Godido roga fure ise jone ije fi korejiafo. \v 20 Ja ijiege rekuva Godi fu kavene jone ifejia bu daro abeke. Areme fu Jesu e ije fu kuaga fu nuvuefuo ruakono kuema ije kuaga fu una ruake. \v 21-22 Ro Jesu fu uria kave gufia fike Godi fu ire boege una iviaeko amaeriga fu ijare una ruake. Ro vua ije fune Godire isuibe e vua fuone vierafena kuaevo ijiebuo itire ijia kuae. Ro kuke e Mosisi fudua fu ijiege kuae, \q1 Godi fu e vua fuone fiena e kuariamo be na vareki ije kuaga fu ruake. Ro e ije fu e jone igeko be ijadufuo nika vua irere fu kuariamo ije mukoe fieno kiae. \q1 \v 23 Ro erare fu vua fuone ije naebe mukoe fiena kemo ije fu Godido e ije arena datura fuebe finoega bu rade dabe isekafake. \p \v 24 Ro irere boeje Jesu fu igia rema ije bune e boeje Godido vua vierafena kuaevo ijiebe kuariae. Ro kuke e Samuerokiro e gue Godido vua vierafena kuaevo bu rade ruaeva ijiebe vua ije kuariae. \v 25 E Godido vua vierafena kuaevo ije bu irere Godi fu rekiro kuaema ije fu ja abero asaerafa jone ijiebuo kuae. Ro Godi e Eburame fu kuaema ije fu ijiege kuae, Nare ijiege nirivado na rade uifari one ijiebuo duvado ijia e boeje ume igia oenoevo ije daro miakono kuae. \v 26 Ijadufuo Godi fu ude Jesu e ije e ifejiamo ije kuamoga fu jone ruae. Godi fu vierafe fu Jesu kuaga fu ro ja ifejiaga ja vame ise jone ije arena una vame ma ijia kari vakiro fu ijadufuo kuamo fu ruae. \c 4 \s1 Fitakiro Joni bu koto reva ijene \p \v 1 Fitakiro Joni bu uria vua kuariavo ijia e Godido zinone ifaejevo ijiakiro e Godido Are juokarijo ije samuamo ijiebuo e ireobo ijiakina e Sejusi ije bu ijia usiae. \v 2 E ije bu fieke Fitakiro Joni bu e boeje nijasiana kiavo Jesu fu baronena una urimano kiavo bu ije fie. Ijadufuo bu kuae bigake e boeje bu vierafero e oevo ije bu una urivoro bu ijiege vierafekuvaro bu ijadufuo buka isediae. \v 3 Ijadufuo bu usiae toenamiana ke dibure uniavo bu ijia naoe ijadufuo maeje fune ve titutekuveno ijadufuo bu ijiege rei. \v 4 Rove e uruvana buka Fitado vua ije fiena ma vierafei. Ro e ije Jesu ma vierafeva ije buka e uruvana faeve tauseni (5000) ijiege. \p \v 5 Areme nituame e Jiusi ijiebuo e mamekanu ijiakina e aeko ijiebuo e mamekanu ro e vua akae nijasiavo ije bu una sidove Jerusareme ijia besu afui. \v 6 E mamekanu ije bune e Kaefasikiro Joni ro e Arekisedakina Anasi e ireobo Godido zinone ifaejemo ijiakina erafa fuone ijena ijia afui. \v 7 E boeje bu besu ijia afuima areme uri e Afasero ije kiavo bu niome buone ijia irekoga bu duna kuariae. Bu kiae, Ja erare kiana daro miaema ijadufuo ja ire ijene revono kiae? \p \v 8-9 Areme Fita fuka Kavene ijare niromoga fu urina kiae, E maki gurie ja vierafe jaka ire maeje no izege rena e dia garema ije amaerivo fu una marema ije fiekuae vierafevoga ni areke no kuariaga ja fiefo. \v 10 Na vierafe e boeje gure ja kariva ijiakina e Isureroko boeje jaka vua ige mukoreigia fiedufuo. E ige manino ije fu Jesu e Nasaretiko ije ja kanavo fu baronemoga Godire kuamo fu una urima ijadufuo ive ijia fu mae. \v 11 Ro Godido vua bu isuibe isoeva ijia fu Jesudo ijiege kuae, \q1 E ae savo ije bu tugie ije bu vierafero fu isero bu dabe akoe. Rove fu tugie ijare rade are ukua ije bijuana manikono kuae. \m \v 12 Ijadufuo fu e be erare ja karauniakuma bakiro fune Jesure fuosukua. Ro kuke fu e be erare ive fuone ijia e ume igia kariva ije ja karauniakuma baki ro fune Jesure fuosukuano kiae. \p \v 13 Fita fu ijiege kuariamoga e Jiusi ijiebuo e mamekanu ije bu giana vierafero e gure bu e aeko bu sikuru reva baki. Rove buka uri zinune kuariavo buka oeseradiae. Ro rade bu ijare una vierafero e gure bu Jesuna oenoevaro bu ijiege vierafei. \v 14 Areme bu kuke gake e ije dia garema bu amaeriva ije fu ma ijia buina maninoga bu gavo buka iti giradiae. \v 15 Ijadufuo buka uri Fitakiro Joni kiavo bu are ije bu vua kuaevo ije arena usiae makave ijia vae. Bu usiae vakoga e mamekanu bu una vua ije dabe bue kuae. \v 16 Bu kuae, No e ije note kame izege rekono kuae? Ijadufuo maeje e boeje are Jerusareme ijia kariva ije bu daro ije Fitakiro Joni bu abena ire sumiki ije revo ije bune fie. Ijadufuo nobe kuae vua ije buka kufuimenoevono kuaeke. \v 17 Ijadufuo roga no vua ije bu dabe kuaenoevo ije kuriaerega bu arefo. Ro no arekuva vua ije fuka ireobo rena vake ijadufuo noka kuriaerega bube una Jesudo ive ijia vua kuaenoekono kuae. \p \v 18 Ijadufuo bune Fitakiro Joni kumevo bu una aru vae. Bu aru vakoga buka uri vua kuriaekuriaeki kuariana kiae, Jade una Jesudo ive ijia e vua kuariakinu nijasiano kiae. \v 19 Rove Fitakiro Joni bu una kiae, Ja vierafe no ja iriniakiro Godi no arekuva ije fube mareke. Ni kojo vierafega fune mare ro fu iserejoga ja ije vierafefo. \v 20 No vierafe no ire maeje Jesu fu remo no gakinu fieva no abe kuaenoejo ije nobe arekono kiae. \v 21-22 Ijadufuo e Jiusi ijiebuo e mamekanu ije bu uri vame izege bu Fitakiro Joni kame dibure uniadufuo ije rerega fuka baki. Ijadufuo maeje Godi fu ire sumiki ije remoga e boeje buka una Godido oemarena fu aroe. Ijadufuo maeje e ije bu amaeriva ije fuka e maki fu juaevasia foti (40) ijiege furi. Ijadufuo bume Fitakiro Joni kuriaerena kiae, Jade rade una ijiege renoevono kiana arevo bu usiae vae. \s1 E Jesu ma vierafevo bu besu afuina baname isoeva ijene \p \v 23 Areme Fitakiro Joni bune migegire una usiaena va e kairafa gue Jesu ma vierafevo ijene vua izege e Jiusi ijiebuo e mamekanu bu kuariaeva ije kuariae. \v 24 Ijadufuo kairafa ije bune uri Godido oemarena fuone baname isoe. Bu isoena kuae, E Ireobo ire boege are samuagiamo. Are aesakae igiakiro saove gufe ro davare ije amaeriae areme ire binobino ijia naovo ije amaeriae. \v 25-26 Are isuibe Kavene one ijadufuo duvado ijia asae nuvuone e one imeno e Devidido itire ijia ijiege kuae. \q1 Irerefuo e Jiusi baki ije bu Godido defarure urive. Ro kuke bu irerefuo una Godido oe isema vierafeve? Ro e kini ijiakiro e mamekanu gue aesakae binobino samuagiavo ije bu besu afuina vua kuae irinanamina E Ireobo ije ro E Ije Godi fu kuamo fu ari ruaema ijena bijaekuae vierafevono kuae. \p \v 27 Ro ije funeka ma, e Erodikiro Fonetiasi Faereti ro e Jiusi baki ijiakina e Isureroko boeje buka sidove Jerusareme igia una besu reve. Bu besu rena Jesu Fari one e akae oefuo imeno ije a daro maema ijadufuo vame ije bijukuae sikuanamive. \v 28 Bu ire boeje a daro ro vierafe one ijia ude vierafena kuae bu rekono kuaema bu ijene reve. \v 29 Ijadufuo E Ireobo iviama e uguaeki ije bu nuvuone ire ise bino rekuae kuaeve. Ijadufuo ije fiena e ige no oefuo i mejo ije daro muoga no vua one dabe giriesana darokuma e kuariane. \v 30 Ijadufuo daro one muoga no Fari one e akae ije oefuo imeno ijadufuo ive ijia e adagi ije karauniakinu ro ire sumiki ro nuga binobino rega e boeje bu giano kuae. \p \v 31 E Jesu ma vierafevo bu ijiege Godido baname isoema furikoga are ije bu afuiva ije fuka dabe kuriakuriae. Fu ijiege rekoga e boeje bu Godido Kavene Akae ijare nirokiamoga bu uri Godido vua ije dabe darokuma e kuariae. \s1 E Godi ma vierafevo bu sinuome buone ivajuonamiva ijene \p \v 32 Areme e boeje Godi ma vierafevo ije buka oe besu vierafe areme uri sinuome buone karina ivajuonami. Ro maza ijia e besukua be fu sinuome fuone fu naebe ke ruriae ro bume oemarena vekinu ivajuonami. \v 33 Areme e Afasero ije bu uri Jesu fu baronena una urima ijadufuo vua ije dabe darokuma e kuariavoga Godi fuka e boeje ma rejiae. \v 34-35 Ijadufuo e Jesu ma vierafevo ije bu uri sakae buone ijiakina are buone ije ke fuaevena moni abena una e Afasero ije vajiavo bu kena e sinuome baki ije ivajiavoga e ijiakiro sinuome ije funeka mani. \v 36 Ro e be ire ije rema ije ive fuone Josofu. Fu ijiege remoga E Afasero bu uri ive fuone iviaeko ina Banabasino kuae ijadufuo maeje fuka e gue ifejiamo. Ro e ije fu e Rivaeti fu are Saefurasiko. \v 37 Ro e Banabasi fudua fu aesakae fuone abe fuaevena moni abe e Afasero ije miamo bu abe e sinuome baki ije ivajiae. \c 5 \s1 E Ananaeasikiro bara fuone Safaera ijiebuo vua ijene \p \v 1 Ro e be ive fuone Ananaeasi fu bara fuone Safaeraki sakae buone aobe dabe fuaevei. \v 2 Areme fune uri bara fuone ijiaki kuaena moni gue fu kena uriegana gue fu kena va e Afasero ije vajiae. \v 3 Ananaeasi fu moni ije kena vajiamoga Fita fu urina kuae, E Ananaeasi a Setanire nirokamoga a Godido Kavene ije biesiri areme moni gue a una one kei. Areme a una ro vua kufui ije no kuaruona kuo, Na sakae ijadufuo moni ije nane foteke abe ja miaevano kue. \v 4 Rove igia fie, sakae ije fu one ijadufuo a abe fuaevena mani abekuma ije fune marei. Ro kuke a vierafe a moni gue one kegaro gue a e vajiakiro vierafekuma ijeduaku fune marei. Ro a irerefuo no biesiruona vua kufui ije kuarue? Ije a biesiruema ije a no biesiruema baki ro aka Godi biesirimano kuae. \v 5-6 Fita fu vua ijiege kuaramoga e Ananaeasi fu vua ije fiena tua ume ijia dijena baronemoga e nikaki ijiebe ugone ijia abe utima areme dabe usiae mako rui. Areme e boeje bu ire ije rema ije fievo buka ireobo jumei. \p \v 7 Bu ijiege renaro fune maza isekube furikoga bara fuone ije fudua fu bigake ijia aru ruae. \v 8 Fu aru romoga Fita fu uri kuae, Jabe sakae be abe moni ige na nijaeva ijiege fuaevevano kuamoga bara ije fu keno kuae. \v 9 Areme Fita fu una kuae, Ja ino baruki ije ja irerefuo ijiege rei? Vame ije ja reva ije jaka Godido Kavene ijene biesiri. Ijadufuo e nikaki ije bu baru one giena usiae mako ruiva ije bu viene garaeji irei. Ijadufuo iviama bu kuke adua ijia giena usiae vakono kuae. \v 10 Fita fu ijiege kuarako saroruba bara ije fudua fu tuana ume ije Fita manino ijia dijena baronei. Areme e nikaki ije bu aru gake fune baronemaga bu dabe usiae baru fuone bu nujaeva irifo ijia mako rui. \v 11 Areme e ije sosi ijia vako ijiakina e uruvana gue bu vua ije fievo buka ireobo judiae. \s1 E Afasero bu ire sumiki binobino reva ijene \p \v 12 E Afasero ije buka maza boeje ire sumiki binobino e boeje ijiebuo nidua ijia renoe. Ro e boeje Godi ma vierafevo ije bu maza boeje Soromonido banade ijia afuina vua kuaekinu Godido oemarevo. \v 13 Ro e gue bu jumeva ijadufuo bu naebe buina besu afui ro bume vame ije bu revo ije kame aroriakinu nidosiae. \v 14 Ro maza binobino e uruvana baru ro bara bu Jesu ma vierafena una e ije ma vierafevo ijena mazie. \v 15 Ijadufuo e ije buka e adagi ije kaenamiana usiae vame ijia suve riena uniakinu gue bu fatakuma kena ijia uniae. Bu vierafe bu ijia uniaga Fita fu ijia oenoeke kavene fuone fu e ije gue nufiaga bu una madiakuae bu ijiege rei. \v 16 Areme e boeje are Jerusareme ivuake ijia kariva ije bu e adagi ijiakiro e kavene ise nirokiaeva ije kaenamiana ijia rovo bu ifejiavoga bu una madiae. \s1 Bu Afasero ijene kame isekafiaeva ijene \p \v 17-18 E ireobo Godido zinone ifaejemo ijiakiro e fuone Sejusi gue bu e boeje bu e Afasero ijiebuo vako ije fievo buka defarudiae. Ijadufuo bu uri e Afasero ije toenamiana kame dibure uniae. \v 19-20 Rove Godido anera ijiebe muge arina dibure viene ije irana e Afasero ije kaenamia usiae makave ijia vae. Fu kaenamiana usiae makave ijia kiae, Ni va Godido Are ijia aru irena vame iviaeko bu ma karivadufuo ije abe e boeje kuariano kiae. \v 21 Ijadufuo e Afasero ije bune anera ijadufuo itire ije abena suoke mugamia bune va Godido Are ijia aruna e ijene vua nijasiae. \p Bu ijiege revoga e ireobo Godido zinone ifaejemo ijiakiro e gue fu ifejavo ije bu e Jiusi ijiebuo e mamekanu boeje kumevoga bu una besu afui. Areme bu e kiavo bu e Afasero ije bu kena dibure uniaeva ije kaenamiakuae vae. \v 22-23 Bu vakuma gamia usiae gake e ije bu bakigana bu una va e mamekanu buone ije kiae, E game no vaga viene bu bijukurae. Ro kuke e juokarivo ije bu uria makave ijia irei rove viene no dauvena gaga e ije bu bakino kiae. \v 24 Bu ijiege kuariavoga e Godido Are ije juokarivo ijiebuo e ireobo ijiakiro e mamekanu Godido zinone ifaejevo ije bu e Afasero bu izege usiaeva ije bu ije dabe ireobo karina vierafei. \v 25 Bu ijiege vierafevo ijia e be fu aruna kiae, E ije ja kena dibure uniaeva ije bune usiaena Godido Are gami aruna e ije vua nijasiavono kiae. \p \v 26-28 Fu ijiege kuariamoga e juokarivo ijiebuo e ireobo ije fune e fuone ijena vakuma Godido Are ijia usiae. Areme bune aruna e Afasero ije mauike kaenamiana una ruae. Ijadufuo maeje bu vierafero bu kuriaekuriaeki kuariakuva e boeje buka mune tuana kaniakiro bu ijiege rei. Bu kaenamia rovoga e ireobo Godido zinone ifaejemo ije fu urina kiae, E gure no Jesudo ive ije ja dabe e gue kuariana nijasiavo ije noneka kuriaerena vafiae. Rove iviama sidove Jerusareme ije fune vua jone ijare iraraeme. Ja vierafe jaka Jesu fu baronema ije ja dabe no namuokuae ja ijiege vierafevano kiae. \v 29 Bu ijiege kuariavoga Fitakiro e Afasero ije bu urina kiae, No vierafe Godi irere fu kuaruomo ije fuka anuigi ijadufuo noka fu irinadufuo ro ema ije nobe iriniakono kiae. \v 30-31 Ro igia fie, Jesu ije jare dabe kurosi kanavo fu barone. Rove asaerafa nuvuone ijiebuo Godi ijare kuamo fu una urina umui maeneke ijia fine. Ijadufuo iviama Jesu fuje fuka e anuigi ro kuke fuka e karauniamo. Godi fu vierafe e Isureroko ije buka ise buone arena una fuone roga fu giana arekiro fu ijadufuo vame iviaeko ije amaeri. \v 32 Ijadufuo no Godido Kavene ijena Godi irere fu rema ije nore abe kuaenoeve. Ijadufuo erarebe Godi irinavo ije fu Kavene fuone abe nujaejiamono kiae. \p \v 33 Rove e Jiusi ijiebuo e mamekanu ije bu vua ije fievo buka defarudiae ijadufuo bu vierafe buka e Afasero ije kaniaga bu oekuae bu ijiege vierafei. \v 34 Ro e Feresi be ive fuone Gamerio. E ije fu Godido akae ije e nijasiaga e boeje buka fu mukoreigia aguaevo. Ijadufuo fu urina kiamoga bu e Afasero ije maza aokube kaenamiana usiae makave ijia vae. \v 35 Bu usiae vakoga fu urina kiae, E Isureroko gurie irere ja iviama e gafiebuo rekuvejo ije mukoreigia vierafekinu revo. \v 36 Ijadufuo maeje igia fie, ude e Tudasi fu e ijiege biesiriana e ireobo igege renoenoga e boeje (4000) bu uri fu nuvenoe. Rove e guebe uri fu kanavoga e ije fuina oenoejo ije bu dabe giegisa vae. \v 37 Areme rade maza ije gamani bu e ive abenoejo ijia Judasi e Gareriko ije fudua fu kuke uri e gue kaenamiana ijiege renoenoga bu kanavo fu baronei. Fu baronekoga e ije fuina oenoejo ije budua bune dabe giegisa vae. \v 38 Ijadufuo ja vua none ige fiena e ije arega bu vafo. Ijadufuo maeje irere bu rekuae vierafeva ije bume ema ijiebuo vierafekuva ije fu bazuareke. \v 39 Ro gaga vua ije bune Godido vierafe ijia kuariavogakuva ije na vierafe ja izege vame buone bijukuva baki. Ijadufuo arega bu vafo. Ro bakuma na vierafe jabite ja Godina nigaraevono kiae. \p \v 40 Ijadufuo e boeje ijia kariva ije bu e Gameriodo vua ije fiena uri e Afasero ije kumevo bu una aru ruae. Areme bune uri ifiama areme kiae, Jade rade una Jesudo ive ijia oenoekinu e nijasiavono kiana arevoga bu usiae vae. \v 41 Areme e Afasero ije bune usiae e Jiusi ijiebuo are bu afuina vua kuaevo makave ijia Godido ireobo oemarei. Ijadufuo maeje bu vierafega bu Jesudo ive ijia isejavaevo ijadufuo bu ijiege rei. \v 42 Areme maza boeje buka Godido Are ijia aruna e vua nijasiakinu va e ijiebuo are ijia Godido vua maeje nijasiavo. Bu ijiege nijasiakinu kiae, Jesu fu ma e ije Godi fu kuae fu ruakono kuaema ijeno kiae. \c 6 \s1 E Afasero bu e bu ifejiadufuo ije keva ijene \p \v 1 Ro maza ijia e ije Jesu ma vierafevo ije buka ma uruvana revoga e Jiusi gue isama Gurisi kuaevo ijiakina e Jiusi gue isama Arameki kuaevo ije bu urina buina madinami. Ijadufuo maeje bu bara amune buone gue ijia karivo ije bu mukoreigia samuagiana ire ikinu vajiavo baki. \v 2 Ijadufuo e Afasero tuero ije bune uri e boeje Jesu ma vierafevo ije kumevo bu una besu afui. Areme bu uri kiae, No Godido vua ije no dabe e nijasianoejo ije aregaro una ire karina e ifejianoekuva no vierafe fuka naebe marei. \v 3-4 Ijadufuo uviarafano ni e gure ja kariva ijia e uguaeki bino bu Godido Kavene ijare oe buone ijia iraraema bu mukoe vierafevo ije kega bure i ijene mefo. Ro noeje nome Godido baname isoekinu ro vua fuone ijiaru abe e gue kuarianoekono kiae. \p \v 5 E Afasero bu ijiege kuariavoga e boeje bu vua ije fievo buka oemadiae. Ijadufuo bu uri e Sitivini e ka Godi ma vierafemo ro kuke Kavene Akae oe fuone ijia iraraema ijene abei. Areme bune kuke uri e Firifikiro Furakorasi ro e Nikenokiro e Timoti ijene kei. Ro kuke e Famenasikiro Nikorosi e are Enitiokiko fu una e Jiusi ijiena maziema ijene kei. \v 6 Bu e ije kena una e Afasero ije uniaejiavoga bu ke Godido baname isoema areme umui nigofo naejiae. \v 7 Bu ijiege rekoga Godido vua ije fuka ireobo rena vakoga e boeje bu vua ije fie. Ro e Jerusareme kariva ije e uruvana gue bu Jesu ma vierafena una e fuone ijena mazie. Bu ijiege rekoga e Godido zinone ifaejevo uruvana gue budua bu una oe kuderiana Jesu ma vierafei. \s1 Bu Sitivini farena toeva ijene \p \v 8 Ro e Sitivini e ije Godi fu marejiana daro maema ije fu urina ire sumiki boeje rekinu nuga mukore bino e boeje ijiebuo uve ijia renoe. \v 9 Rove e gue bu kuae E Oe Dasu Kenoejono kuaevo ijiebe uri e Sitivini vua ije fu kuaenoeno ijadufuo fuina vua gikikimana kuae. Ro e ije bu e are Saerinikiro Esia ro Arikisedara ro Sirisiako ijiebe. \v 10 Rove Godido Kavene fuka e Sitivini daro mae ijadufuo fuka darokuma kuariae. Ijadufuo bu una ve gue kuarakuvega fuka naebe mani. \v 11 Ijadufuo e ije bu una e gue biesiria kairena ire vajiakinu kiavoga bu uri e Sitivini fuesina kuae. Bu kuae, No fie e Sitivini fuka Mosisikiro Godido ive ije kame buzeimiamo no fievano kuae. \v 12 Bu ijiege kuaevoga e ije bu uri vua ije dabe e mamekanu ijiakiro e akae samuavo ijiakina e boeje kuariae. Ijadufuo vua ijare e boeje ijiebuo oe ije arafiriamoga buka defarudiae. Ijadufuo buka saroruba uri Sitivini farena dabe e Jiusi ijiebuo e mamekanu ije kariva ijia vae. \p \v 13 Areme bune uri e gue kiavo bu usiaena vua kufuimena e Sitivinido kuae. Bu kuae, E ije fuka maza boeje Godido Are maeje dabe buzeikinu vua fuone akae ije kame buzeimiame. \v 14 Ro kuke no fie fu kuae, Jesu e Nasaretiko ije fu Godido Are ije faraekore areme Mosisido vame fu abe muema ije abe una be amaerikono kuaemo no fievano kiae. \v 15 Bu ijiege kuaevo ijia e mamekanu ijiakina e boeje bu gake Sitivinido uikubae ije fuka ire anera ijiebuo uikubae igeki. \c 7 \s1 E Sitivini fu e mamekanu ije vua kuariaema ijene \p \v 1 Areme e ireobo Godido zinone ifaejemo ije fu uri Sitivini kuae, A vierafega vua ige bu oesina kuaevo ije fube mano kuae? \v 2-3 Fu ijiege kuamoga Sitivini fu una kiae, Uviarafa ro asoerafa none gurie, jame igia fiefo. Godi e ije ka sanaema ije fu isuibe asae nuvuone Eburame fu naebe sakae Mesofotamia arena Erani vaema ijia bie. Fu biena kuae, Ni are one igiakina e agane one ije arena uri are be na nijasakuvejo ijia vano kuae. \v 4 Ijadufuo Eburame fune sakae e Karidiako bu kariva ije arena uri va are Erani ijia fikiro vae. Fu va ijia finoena areme asoe fuone fu baronekoga Godi fu kuamoga fu una urina ro aesakae ige ja iviama kariva igia fi. \v 5 Rove maza ijia Godi fu aesakae ao be fu naebe abena Eburame mae. Ro fume kuae, Na rade aesakae ije abena akiro asaerafa one ijena miaga ja abena ijia karikono kuae. Ro maza ijia Eburame fu ame bino naebe nafei. \p \v 6-7 Areme Godi fu kuke Eburame kuae, Asaerafa one bu rade juaevasia fo aderedi (400) ijiege bu ebuo aesakae ijia karina e ijiebuo imeke. Bu e ijiebuo imega bu kame vame ise ijia arafiriaga buka oefiane abeke. Rove naka e ijieko ije kame isekafiaga bu isejavaeke. Areme rade asaerafa one bu aesakae ije arena usiae aesakae ije na abe miadufuo ijia karina una none baname isoekono kuae. \v 8 Areme Godi fu Eburame kuae, Anika ame fari one boeje kena vajae surive buone kaniafuna nuga nane. A ijiege rekina na ijia giana vierafero a vua irere na osiki kuaeva ije a iriniemoro na ijiege vierafekono kuae. Ijadufuo Eburame fu uri fari fuone Aeseki biete areme fune mu eiti furinoga fu abe surive fuone kanafuna nuga nijae. Ro rade Aeseki fu uri Jekafu bietemoga fure uri ame tuero nafei. Ijadufuo ame tuero ije bu asaerafa nuvuone ma zinume ijene. \p \v 9-10 Ro ame gaegi ije bu iviene buone e Josofu ije oe isema vierafei. Ijadufuo bu uri fu dabe e Ijifitiko ijiebuo fuaevejoga fu uri buefuo imei. Ro maza ije Josofu fu imenoema ijia fuka irufui uruvana bino bino biediae rove Godi fuka fu mukoreigia samuakinu irufui fuone dasumae. Areme Kini Fero fu Josofudo vame mukore fu kenoeno ije gana kuamo fu e ireobo rena aesakae Ijifiti samuakinu ire boeje Kini ijadufuo are ije naovo ije samuagiae. \v 11 Areme maza be aesakae Ijifitikiro Keinani ijia fuka vasia ireobo ijia kekei. Ijadufuo e asaerafa nuvuone ire bu ijo ije funeka furinoga buka vasia ireobo abei. \v 12 Areme Jekafu fu fieke aesakae Ijifiti ijia fuka ire zaraema fiena fu uri asaerafa nuvuone ije kiamo bu ijia vae. Ro are ije bu vaeva ije bu buone amure ijia vae. \p \v 13 Ro rade bu una vakoga Josofu fu kekena samadukua biediae. Areme fu kiae, Nana uvia joneno kiana kaenamiana Kini Fero nijaemoga fu giae. \v 14 Josofu ijiege biedia areme kiae, Ni va asoe none Jekafu kuaga fu agane nuvuone foteke ije kaenamiana igia Ijifiti rono kiae. Ro agane fuone ije buka uruvana e seveniti faeve (75) ijiege. \v 15 Ijadufuo Jekafu fune ari va Ijifiti ijia fivakuma areme fune ijia baronekoga asaerafa nuvuone budua ijia kari vakuma areme bune ijia oe furi. \v 16 Bu oevoga surive buone bu kena una va are Sekeme ijia e Eimo ijiebuo munie be Eburame fu fuaevema ijia uniae. \p \v 17 Ro maza ije Godi fu e fuone karauniakiro Eburame kuaraema ije fune ivuaremo ijia e nuvuone are Ijifiti ijia kariva ije buka e uruvana rei. \v 18 Ro rade e Kini be fu Josofudo suvuare naebe mukore vierafema ijare uri aesakae Ijifiti samuae. \v 19 Kini ijare urina asaerafa nuvuone ije kame vame gikikimana ijia samuagiae. Fu ijiege rena uri asaerafa nuvuone ije kuriaeremoga buka ame katiki buone ije kame makave ijia uniavoga bu ijia naovakuma oe. \v 20-21 Bu ijiege rekoga maza ijia bu e Mosisi bietei. Ro Mosisi fu Godido nidua ijia fuka ame mukore. Areme orafa ije bu ame ije dabe samua vakuma asame inokubeke furinoga bu abe makave ijia nujae. Bu ijia nujavoga Kini Ferodo kabae ijare Mosisi abe nifarikena fari fuone igege samuae. \v 22 Mosisi fu Kini ijadufuo are ijia fikoga e Ijifitiko ijiebe vame buone maeje nijaevo fu ubaerena e maki rei. Areme fuka daro abena vua mamekanu ije kuaekinu vame maeje renoe. \p \v 23 Mosisi fu ijiege rena vakuma juaevasia fuone foti (40) ijiege furi. Areme maza be fu e fuone Isureroko ije giakiro vierafei. \v 24 Ijadufuo fu va gake e Ijifitiko ijare e fuone be dabe vame gikikimana ijia arafirimoga Mosisi fu uri e ije babuena e Ijifitiko ije kanamo fu baronei. \v 25 Mosisi fu vierafe fu ijiege rega e fuone bu ijia gana vierafero Godi fu fuone duvado ijia bu karauniakuvenoro bu ijiege vierafekuae fu ije rei. Rove e fuone ije buka naebe mukoreigia fu gana vierafei. \v 26 Ro nituame fu una va giake e Isureroko inokiro bu bue bijaevoga fu giae. Ijadufuo fu keke turaejiakinu kiae, Jaja ino uviaki ro ja izerekuae joe bijaevono kiae? \v 27 Ro e be ije fu uri Mosisi vaja dabe garege akoekinu kuae, A erare kuaga a e maki rena no samuaguome? \v 28 A vierafe a isuome izege a e Ijifitiko ije kanaema ijiege a una na kaniekiro vierafemano kuae? \v 29 Fu ijiege kuamoga Mosisi fu vua ije fiena fune kona are Midiane ijia vae. Fu va ijia fivakuma areme bara abena ame fari inokiro nafei. \p \v 30 Mosisi fu ijia fina juaevasia foti ijiege furikoga fu una uruo Saenae ae sao ijia miane naenoga fu gana va ijia Godido anera ije bie. \v 31-32 Mosisi fu ire ije gamo fuka oesere ijadufuo fu ura ivuake ijia ifiri ije naeno ije gakiro vae. Fu vako ijia fu E Ireobo ijadufuo itire ije fie. Ro E Ireobo fu kume, Naeje na asaerafa one e Eburamekiro Aeseki ro Jekafu ijiebuo Godi ijeno kumei. Fu ijiege kumeno fiena Mosisi fuka turanamina safuimoga fu uri ni fuone dabe nurie. \v 33 Areme E Ireobo fu uri Mosisi kuae, Are ije a manino ije fu akaeno dia surive one a saema ije azo nane. \v 34 Na giaga e none Ijifiti ijia kariva ije buka isejavaeve. Ijadufuo na ije bu aduivo ije fiena ifejiakiro ari ruae. Ijadufuo iviama na kuaga a aesakae Ijifiti ijia vakono kumei. \p \v 35 E Sitivini fu ijiege kuaria vakuma areme una kiae, Mosisi fu e ije e Isureroko bu ijuonena kuae, A erare kuaga a e maki rena no samuaguono kuaeva ijene. Ro Godire anera ije miane rena naeno ijadufuo duvado ijia Mosisi kuamo fu e fuone samuagiana karauniakiro vae. \v 36 Ijadufuo e Mosisi fune va ire sumuki ro nuga binobino aesakae Ijifiti ijia ro kuke Davare Kavuane nafuema ijia rei. Areme fune e Isureroko ije kaenamiana buina juaevasia foti ijiege bu ae sao ijia oenoe. \v 37 E Mosisi ije na kuariaevo ijare e Isureroko ije kiae, Godi fu joefuo e jone ijia e be fu Godido vua vierafena kuaemo ije kuaga fu na ruaeva ijiege ruakono kiae. \v 38 E Mosisi ijare asaerafa nuvuone ijena ae sao ijia besu oenoe. Ro kuke fure uruo Saenae ijia vakoga anera ije fu vua kuarae. Ijadufuo e ijare Godido vua maeje abena una no mue. \p \v 39 Rove e asaerafa nuvuone bu Mosisido vua ije buka naebe irinae. Ro buka fu ijuonena oe buone buka una are Ijifiti ijia vakuae vierafei. \v 40 Ijadufuo bu uri e Eroni kuae, No e Mosisi e ije fu aesakae Ijifiti ijia kaenamuo ruaema ije fu iviama izege vaema ije noka naebe vierafei. Ijadufuo ani godi bino amaeriajuoga bu no samuaguokinu kaenamuona vano kuae. \v 41 Areme bune maza ijia uri ire be mave-kau ame igeki ije amaeri. Areme bune uri fuefuo zinone ifaejekinu iro ina ire ije bu umui buone ijia amaeriva ijadufuo oemarei. \v 42 Ijadufuo Godi fu bu ijuonegafiakoga bu una ire zuvi saove gufia ireva ije buone augesana baname isoe. Rove isuibe e Godido vua vierafena kuaevo ije bu vua be kuaena isoe, \q1 E Isureroko ije ja ae sao ijia juaevasia foti ijiege ijia oenoe. Rove ja fanuve bino ja naebe kaniana na zinone ifaejie. \v 43 Ja ae sao ijia are muvuaka ja godi jone Morokikiro Refanido zuvi ije ja umui jone ijia amaeriaeva ja buone baname isoevo ijene dabe giena ijia oenoe. Ijadufuo na kiaga ja aesakae jone ije arena uri are Bebironi asina ka mumabo ijia vakono kuae. \p \v 44 Asaerafa nuvuone ijiebe Godido Are muvuaka ije dabe giena ae sao ijia karinoe. Ro are ije bu saeva ije bune izege Godi fu Mosisi kuarana nijaema bu ijiege sae. \v 45 Areme rade asaerafa nuvuone bu are muvuaka ije dabe anafa buone ije miavoga bu abe giena e Josuana e ae binoko ijiebuo aesakae ije abekuae vae. Godire e aesakae ijieko ije kania kuriamo bu subinae vae. Ro Godido Are muvuaka ije fume ijia na ruoma e Devidido mazani ijia ruae. \v 46 Ro e Devidido vame fu kenoeno ije fuka mukore ijadufuo Godi fu dabe nidoe. Ijadufuo Devidi fu vierafe fu Godi kuaga fu Are Akae fuone e Isureroko bu ijia baname isoedufuo ije sakiro kuae. \v 47 Rove e Devidi are ije fu naebe sakoga fu e Soromonire are ije sae. \p \v 48 Rove Godi ka E Daroki ije fu are ije emabe savo ijia fino baki. Ijadufuo maeje Godi fu isuibe kuae, \q1 \v 49-50 Saove ije fu are none na ijia fivo ro dia none na ume igia korevo. Ijadufuo ja are izeki ije noefuo sake ro na are izia fike? Ijadufuo maeje ire boege nare umui none igia amaeriavano kuae. \p \v 51 E Sitivini fu suvuare ije kuariama furi areme kiae, E gure ka totenaminoekinu ada girevo gurie. Jaeje na giaga ja asaerafa jone bu keva ijiege jadua jaka Godido Kavene vua fu kuariamo ije tuatimeve. \v 52 E asaerafa jone ijiebe isuibe e ije Godido vua vierafena kuaevo ije kaniae. Areme bu kuke e ije bu E Maturaema fu ruakuveno ijadufuo vua ije kuariavo ije kaniae. Ijadufuo E Ije ruaema ije jare ijuemana kanavo fu baronei. \v 53 Ja Godido akae ije anera bu abe ruaeva ije jane abei rove vua ije jaka naebe irinavano kiae. \s1 Bu mune tuana Sitivini kanaeva ijene \p \v 54 E ije kariva bu Sitivinido vua ije fievo buka uruke defarudiamoga bu uri fu ziegafae. \v 55 Ro Sitivini e ije Kavene Akae ijare oe fuone ijia iraraema ije fu kake saove gufia gake Godi fino ijia fuka sanakoga Jesu fu una Godido umui maeneke ijia fino fu gae. \v 56 Ijadufuo fu uri kume, Na ga saove fu daovekoga Ema ijiebuo Fari ije fu Godido umui maeneke ijia fino na gaevano kumei. \v 57-58 Fu ijiege kumenoga e boeje bu umui ada bijui. Areme e boeje buka uri urukeigia vijekinu biona Sitivini manino ijia usiaena fare dabe meru are makave ijia mune tuana kanae. Ro ugone buone bu ado savo ije bu azo nana vakoga Soru e nikaki ijare samuagiae. \v 59 Ijiege rena bu uria Sitivini kanakoga fu uri kume, Jesu E Ireobo kavene none ige abeno kumei. \v 60 Areme fu uri augesana vijena kume, E Ireobo ise ige bu none revo ije giana areno kumena fune ijia baronei. \c 8 \p \v 1 E ije bu Sitivini dabe ijiege rekoga e Soru fu ijia giana oemare areme kuae magoeno kuae. \s1 E Soru fu e Godi ma vierafevo ije kame isekafiaema ijene \p Areme e boeje bu maza ijia zinuevena uri e Jesu ma vierafevo Jerusareme sosi ijia afuivo ije kame vame ma ise ijia arafiriavo buka isejavae. Ijadufuo e boeje bune dabe giegisana uri sakae Judiakiro Sameria ijia karija vae. Bu ijiege vakoga e Afasero ije bu buosukua Jerusareme ijia kari. \v 2 Areme e Godi ma vierafevo gue bu uri e Sitivini dabe urukeigia niraefirima areme abe mako rui. \v 3 Ro e Soru fuka e Jesu ma vierafevo ije kame arafiriakiro vierafei. Ijadufuo fu oenoekinu gire besubesu ijia ajiana baru ro bara ije umui karana maniaeru kame dibure uniae. \s1 Godido vua maeje bu abe sakae Sameria ijia kuaenoeva ijene \p \v 4 Areme e Jesu ma vierafevo ije bu dabe giegisa vaeva ije bune are irore ijia oenoekinu Jesu Kuraesido vua ije dabe e boeje kuarianoe. \v 5 Bu ijiege rekoga e Firifi fu va sidove be aesakae Sameria guove ijia kekena Jesudo vua ije dabe ijia kuariae. \v 6 Areme e boeje ijia kariva ije buka e Firifido vua ije mukoe fiekinu vame sumiki fu kemo ije gae. \v 7 E Firifi fu ijiege remoga e ije kavene ise nirokiaeva ije bu e ije arena usiae vakoga e vajae gareva ijiakina e ae kirariaeva ije bu una madiae. \v 8 Ijadufuo e boeje sidove ijia kariva ije buka una oemarekinu oenoe. \p \v 9-10 Ro sidove ijia e be adame isekuma fiema ive fuone Saemoni. E ije fuka vame sumiki binobino renoeko e Sameriako bu gavo buka oeseradiavo. Ijadufuo e Sameriako ije bu vierafero fuje fuka e anuigiro bu ijiege vierafei. Ijadufuo e mamekanu abero e aeko boeje buka vua fuone ije mukoreigia fievo. Bu ijiege rekinu kuaevo, E ijadufuo daro ije fuka Godido daro ijiekino kuae. \v 11 Ro kuke e ije buka vua fuone mukoreigia fievo ijadufuo maeje fuka maza jiagadogo ire sumiki renoeko bu gavo ijadufuo buka oeseradiavo. \v 12 Rove maza ijia bu Firifido vua ije Godi fu izege e fuone ijiebuo oe ije samuagiamo ijiakiro Jesudo vame iviaeko ije kuariamoga buka fiena ma vierafei. Ijadufuo Firifi fu uri e ije ma vierafeva bara ro baru ije kaenamiana do ruoriae. \v 13 Fu ijiege rekoga e Saemoni fudua fuka uri Jesu ma vierafemoga e Firifi fu dabe do ruorae. Areme fu una fuobiki finoekinu vame sumiki ije fu kemo ije giamo fuka oeserei. \p \v 14 E Sameriako bu Jesudo vua ije fiena ma vierafevoga e Afasero ije Jerusareme kariva ije bu vua ije fie. Ijadufuo bune urina Fitakiro Joni kiavoga bu ijia vae. \v 15 Bune va Sameria ijia usiaena uri e ije bu do ruoriaeva ijiebuo baname isoe. Bu ijiege baname isoega bu Godido Kavene abekuae bu ijiege rei. \v 16 Ijadufuo maeje e ije bu Kavene bu naebe abe ro bume Jesudo ive ijia do ijiaru ruoriae. \v 17 Areme Fitakiro Joni bu uri e ije umui nigofo naejiavoga bu Godido Kavene ije abei. \p \v 18-19 Ro e Saemoni fu giake e ije Fitakiro Joni bu umui nigofo naejiaeva ije buka Godido Kavene ije abevoga fu giae. Ijadufuo fu uri Fitakiro Joni kiae, Na moni vajiakono ni na daro miega nadua na e umui nigofo naejiaga bu Godido Kavene abeno kiae. \v 20 Fu ijiege kiamoga Fita fu una kuae, A Godido Kavene ije moni ijia fuaevekiro vierafemo ije fuka ma baki. Ro a ijiege rekuma na vierafe a moni one ijiaki jaka are ise miane naeno ijia vake. \v 21 Ijadufuo maeje na gaga oe one fu Godido nidua ijia fuka ma baki ijadufuo abe noena besu imeke. \v 22 Ijadufuo vierafe one ka ise ije a Godido Kavene ije monido fuaevekiro vierafemo ije nika arekiro Godi kuaga fu ise one ije gana arene. \v 23 Ijadufuo maeje na gaga aka daro ige no abeva ijare riezaga a ije abekiro vierafei. Rove aeje fune ise one ijare dabe utifaremano kuae. \p \v 24 Bu ijiege kuavoga Saemoni fu una kiae, Ja isekie ni noefuo Godi baname isoega vua ije ja kuarieva ije fube none reno kiae. \v 25 Areme Fitakiro Joni bune uri Godido vua maeje abe e Sameria ijia kariva ije kuariae. Ro kuke bu Godi fu izege vame maeje buone rema ijene nijasiama furinoga bune una Jerusareme vae. Bune una vakinu Jesudo vua maeje abena e are isesina Sameria ijia kariva ije kuariajana vae. \s1 Firifi fu e Itiofiako ijiebuo e ireobo ije biema ijene \p \v 26 Areme Godido anera be fu arina e Firifi kuae, Ani urina vame ije bu Jerusareme ijia una gafia Gaza vako ijane vano kuae. Ro vame ije fuka isuiko e bu ijia oenoejo baki. \v 27-28 Ijadufuo Firifi fune urina vakiro vakuma vame ijia e ireobo be aesakae Itiofiako fu bara Kuini Kedesino kuavo ijadufuo moni samuamo ije bie. E ireobo ije fu are Jerusareme ijia Godido baname isoekiro vaema una romo fu bie. Ro e ije fu fata ije bu ose kena maniaeru oejo ijia ajia fina Asaea e Godido vua vierafena kuaemo ijadufuo vua fu isoema ije dakinu ruome. \v 29 Ro Godido Kavene fu Firifi kuae, Ni fata gare ose fu meru ruvako ije ivuake ijia ura vano kuae. \v 30 Fu ijiege kuamoga Firifi fu difurina ijia vakinu fieke e ije fu Asaeado vua ije damo fu fie. Ijadufuo fu urina e ije kuae, Vua ije a damo ijadufuo maeje abe fiemano kuae. \p \v 31 Firifi fu ijiege kuaramoga e ije fu kuae, Na vua ije na naebe fie. Ijadufuo na vierafe fuka e bese vua ige abe mukoreigia kuariekuma na fiekono kuae. E ije fune Firifi ijiege kuara areme kuamoga fu fuobiki fata ijia ajiana fikoga ose ije fu mediruna bune vae. \v 32 Ro buki ije e ireobo fu daema ijia Godido vua ao be fu ijiege kuae, \q1 E be fuka mave-sifi ije bu kaniaga bu kurivo baki ro jau buone ufuga bu jiekevo baki ijiege bu kanakuva fube vua bino kuariakiro fume mauike itibireke. \v 33 Bu fu farena dabe varaememena vua kufui ije kena fu namana dabe koto rei. Ro fune baronema ijadufuo fu e uifari bakino kuae. (Ro vua ije e ireobo fu daema ije fu e Asaeare ijiege kuaemo bu isoeva fu ije dae). \m \v 34 Ijadufuo e ireobo fu una Firifi kuae, Ro e ije Godido vua vierafena kuaemo ije fu erado ijiege kuae? Fu fuefuo ke fu e befuo kuaemano kuae? \v 35 Areme Firifi fune ijia uri zinuevena vua fu daema ijiakiro Jesudo vua maeje abe kuarae. \v 36 Bu ijiege kuaekinu vame ijane vako ijia bu do be gae. Ijadufuo e ireobo fu uri Firifi kuae, Do be igi ro fube maredo a iviama na abe do ruoriekono kuae. \v 37 Fu ijiege kuamoga Firifi fu una kuae, A oe one boeje a Godi ma vierafekuma na abe do ruorakono kuae. Ijadufuo e ireobo fu una kuae, Ke, ije na ma vierafega Jesu Kuraesi fu ma Godido Farino kuae. \p \v 38 Areme e ireobo ije fune e ije ose abe ruovo ije kiavo bu irekoga Firifi fune ari do ijia kekena e ireobo ije abe do ruorae. \v 39 Areme bune una ajia duome ijia ruovo ijia Godido Kavene ije fune Firifi mesirina vae. Fu vakoga e ireobo ije fu gake Firifi fu baga fu una fata ijia ajia fina Godido oemarekinu fune vae. \v 40 Areme Godido Kavene fune Firifi mesirina una are Ajotasi ijia vae. Fu mesiri ijia vakoga Firifi fu uri are isesina ijia oenoekinu Jesudo vua maeje kuariaeja ruoma are Sesaria ijia kekei. \c 9 \s1 Jesu fu Soru kenujaema ijene \r (Ekisi 22:6-16; 26:12-18) \p \v 1 E Firifi fu ijiege renoekoga maza ijia e Soru fuduaku fuka e Jesu ma vierafevo ije kaniakiro renoe. Ijadufuo fu va e zinone ifaejevo ijiebuo e ireobo ije gae. \v 2 Fu gana kuae, Ni fasi be isoena miega na abena va are Damasikasi ijia e Jiusi e mamekanu ije miane. Na miaga bu kie na e bara ro baru Jesudo vame ije nuvenoevo ije reriana toenamia una igia Jerusareme rono kuae. \p \v 3-4 Areme Soru fune are Damasikasi vakiro vako ijia saroruba kave gufia sanakoga e Soru fuka nimanimoga fu tuana ume ijia dije. Areme fu ijia nana fieke e be fu kume, Soru, Soru, a irerefuo vame ise ije none remono kumei. \v 5 Fu ijiege kumenoga Soru fu una kume, E Ireobo aeje a erareno kumei? Ro fu una kume, Na Jesu e ije a vame ise none remo ijene. \v 6 Ijadufuo ni urina are Damasikasi ijia vaga e be ijia fino fu irere a redufuo ijene kuarano kumei. \v 7 E Soru fu vua ije fiekoga e ije fuina vako ije budua bu vua ije fie rove e maeje buka naebe gae. Ijadufuo bu vua bino naebe kuae ro bume ijia irei. \v 8 Areme Soru fune una urina ni nafae rove ire bino fuka naebe giae ijadufuo bu umui kena mesiri are Damasikasi ijia vae. \v 9 E Soru ni fuone fu ijiege iseremoga mu inokubeke irekiro do ije bino fu naebe i. \p \v 10 Areme e Damasikasiko be ive fuone Ananaeasi fu Jesu ma vierafemo ije fu ijia fino. E ije fu nimamaena gake E Ireobo fu kume, Ananaeasino kumemo fu una gue kuae, E Ireobo na igifurekino kuae. \v 11-12 Fu ijiege kuamo E Ireobo fu kuae, Ni kanaufuima areme urina vame bu kua Arirarino kuavo ijia vane. Va e Judasido are ijia kekena e Soru are Tasasiko ije rerena biene. E ije fu Godido baname isoekinu nimamae gake e be ive fuone Ananaeasi fu ro umui fuone ijia vajae fuone ije niriaemo ni fuone fu una nafaemo fu gaemano kuae. \v 13 Ro Ananaeasi fu una kuae, E Ireobo, e ije fu e one are Jerusareme kariva ije isema rejiamo. \v 14 Ro ige fu ruomo ije fu e mamekanu Godido zinone ifaejevo ije kiaga bu oemarekuva fu Damasikasi igia e one a ma vierafevo ije toenamiakiro ruomono kuae. \v 15 Rove E Ireobo fu una kuae, Ni urina va gane. E ije nare fu noefuo i mekiro na ije abei. Ijadufuo fure ive none ije dabe are irore ijia oenoekinu e kini ijiakina e Jiusi boeje ro e Jiusi baki ije kuariaga bu ive none fie furike. \v 16 E ije fu e none ijadufuo na kono vame izege fu noefuo isejavaedufuo ije nijaega fu vierafekono kuae. \p \v 17 Ijadufuo Ananaeasi fune va are ijia kekena aru umui fuone ijia Soru farena kuae, Soru uviano, na E Ireobo ije a igia ruakiro ruomo vame ijia biema ijare kiemo na ruae. Na ro a ifejaga ni one fu una mareke. Ro kuke a Kavene Akae ije abega fu oe one ijia arina iraraekiro fu ijadufuo kiemo na ruaevano kuae. \v 18-19 E Ananaeasi fu ijiege kuarako saroruba ire be kijume gene igeki ijiebe Sorudo niome ijia azoekisa arikoga ni fuone fu ijia una marei. Areme e Soru fu urina manikoga e Ananaeasi fu do ruoramoga fu ire ina una daro abei. \s1 E Soru fu Jesudo vua ije e Damasikasiko ije kuariaema ijene \p Areme e Soru fune maza sibaneke are Damasikasi ijia e Jesu nuvenoejo ijena finoe. \v 20 E Soru ude fu va e Jiusi ijiebuo are bu afuina vua kuaevo ijia aruna e ije vua kuariana kiae, E Jesu ije fu ma Godido farino kiae. \p \v 21 Fu ijiege kuariamoga e boeje bu vua ije fievo buka oeseradiae. Ijadufuo bu una bue kuae, E ije fute e gafe fu sidove Jerusareme ijia e ije bu Jesu ma vierafevo ije kaniamo ijare. Ro ige fu ruaema ije fu e ige toenamiana kaenamia una va e mamekanu Godido zinone ifaejevo Jerusareme kariva ijia vajiakiro ruaemano kuae. \v 22 Ro e Soru vua fuone fu kuariamo ije fuka ma daroki remoga e boeje are Damasikasi kariva ije bu vua ije fiena ma vierafei. Areme bu ijia vierafero Jesu fune ma Godire kuamo fu ari ruaemaro bu ijiege vierafe. Ro e Jiusi are Damasikasi kariva ije bu izege Sorudo vua ije gue kuarakuva baki. \v 23-25 Areme maza sibaneke furikoga e Jiusi ije bune una bue ijunamina e Soru kanakuae vierafe. Ijadufuo buka mumaza sidove ijadufuo viene ijia samua karinoe rove bune e guebe giana ro Soru kuarae. Ijadufuo e Sorudo vua fievo ije bu mauike mugu uri Soru kuavo fu kamui ijia ari fi. Areme bune dabe faere gama abiena kaje ijia farekoga fu ari vakuma gamia kekena fune vae. \s1 Soru fu Jerusareme vaema ijene \p \v 26 Areme e Soru fune vakuma Jerusareme kekena e Jesudo vua fievo ije biediana buina oenoekuvenoga buka jumei. Ijadufuo maeje bu izege fu una e Jesudo vua fiemo be rema ije bu naebe vierafei. \v 27 Rove fu e Banabasire kekena Soru mesirina abe e Afasero ije nijasiae. Fu ijiege rena uri izege E Ireobo fu Damasikasi vame ijia Soru biema ijiakiro vua fu kuaraema ijene kuariae. Areme fune kuke uri izege Soru fu e Damasikasiko ije Jesudo ive ijia vua darokuma kuariaema ije kuariae. \v 28 Ijadufuo Soru fune Jerusareme ijia e Jesudo vua fievo ijena oenoekinu Jesudo vua ije dabe darokuma e ije kuarianoe. \v 29-30 Soru fu ijiege kuarianoekinu ro e Jiusi ije bu e Guriki ijiebuo isama kuaevo ije buina vua uruvana kuae. Rove e ije buka urina Soru kanakuvejoga e Jesudo vua fievo ije bu gana mesirina are Sesaria ijia vae. Areme bune kuavo fu una are fuone Tasasi ijia vae. \v 31 Areme maza ijia e Jesu ma vierafevo bu are Judiakiro Gareri ro Sameria sosi ijia afuivo ije bu una kafaena Godido baname isoekinu karivoga buka e uruvana rei. Bu ijiege renoekoga Godido Kavene fuka daro miamo buka e damuiki revoga bu uri E Ireobo ije mukoreigia aguae. \s1 Fita fu e Eniasi amaerimo fu una maema ijene \p \v 32-34 Fita fu e Jesu ma vierafevo bu ae binobino kariva ije ifejianoeno ijia fu maza be are Rida ijia Godido e ije giakiro vae. Fu va ijia kekena e Eniasi bie ro e ije fu vajae garema ijadufuo fu juaevasia eiti (8) fu uri oenoeno baki. Ijadufuo Fita fu uri kuae, Eko Eniasi, Jesu Kuraesi fune a amaeradaemano ni ije a namo ije arena urino kuae. Ijadufuo Eniasi fune migegireigia uri areme una Godido oemarei. \v 35 Areme e boeje are Ridakina Seroni kariva ije bu Godi ire ije fu Eniasido rema ije gae. Ijadufuo bune oe kuderia areme uri zinuevena una E Ireobo ijadufuo vame ijia kenoe. \p \v 36 Ro bara be Jesudo vua fiemo ive fuone ije Tabita fu are Jofa ijia fino. Ro ive ije e Guriki ijiebuo isama ijia bu kua Dokasino kuavo. Bara ije naenitua fuka vame maeje renoekinu e isema kariva ije ifejiamo. \v 37 Fu ijiege renoeno ijia fu adame abena vakuma baronei. Ijadufuo bu surive fuone dabe do ruorama areme abe gire guove kabo ijia nijae. \v 38-39 Ro are Rida fu Jofa ivuake ijia ijadufuo e Jesudo vua fievo gue bu fieke Fita fu are Rida ijia oenoeno bu fie. Ijadufuo bu e inokiro kiavo bu Fita mesirikuae vae. Bu vakuma are Rida ijia usiaena Fita kuavo fu migegire urina buina vakuma are Jofa ijia keke. \p Areme bune Fita mesirina gire guove kabo ijia ajia vae. Bu ajia vagake bara amune boeje bu sinuome bino Dokasire buefuo amaeriaema ije kena una bue nijaenamikinu niraefirive. \v 40 Areme Fita fune bara ije kiamo bu usiaekoga fu dakude bara ije baronema ije gakinu augesana Godi baname isoe. Areme fune uri bara ije kuae, Tabita urino kuamoga bara ije fu ni nafaena Fita ga areme fune urina arire fi. \v 41 Bara ije fu ijiege una uri arire finoga Fita fu ifejana umuike nujamo fu uri arire mani. Areme fu uri bara amune ijiakiro e Godi ma vierafevo ijene kiae, Bara ige fune una urimano kiamoga bara boeje buka oeseradiae. \v 42 Fita fu ijiege remoga vua ije funeka migegireigia ifena vakoga e boeje are Jofa kariva ije bu fie furi. Ijadufuo e boeje buka una oe kuderiana E Ireobo ije ma vierafe. \v 43 Areme Fita fu una maza uruvana e Saemoni e ije fanu surive ijia sinuome amaeriamo ijiaki Jofa ijia finoe. \c 10 \s1 Fitakiro Koniriasi ijiebuo vua ijene \p \v 1 Ro are Sesaria ijia e be ive fuone ije Koniriasi fu ijia fino. E ije fu e Romuko ijiebuo e azo kevo ije samuagiamo. Ro e ije azo kevo ijiebuo ive ije bu kua E Itariko e azo kevo ijeno kuavo. \v 2 Ro e Koniriasi fu agebara fuone ijene buka Godi ma vierafevo. E ije fuka e ije bu oefiaeguma karinoejo ije oetuana ire vajiakinu ro maza boeje fuka Godi baname isoemo. \v 3 Fu ijiege re vakuma ve be maza garege vako ijia fu nimamaena gake Godido anera be fu kekena kuae, Koniriasino kuae. \v 4 Fu ije kuamoga Koniriasi fuka jumena uri anera ije uruvana igia veri. Areme fu uri kuae, E Ireobo, a irere abekuveno kuae? Ro anera ije fu una kuae, Koniriasi, Godi fu baname one a isoemo ijiakiro e ije bu oefiane abega a ifejiamo ije Godi fune fie. \v 5 Ijadufuo ni iviama e bino kiaga bu va are Jofa ijia e Saemoni, e ije bu kua Fitano kuavo ije mesiri rone. \v 6 Ro e ije fu e nabure fuone Saemoni e ije fu fanu surive ijia sinuome amaeriamo ijiaki fine. Ro e Saemoni are fuone fu fino ije fu davare irifo ijiano kuae. \v 7 Areme anera ije fune vakoga Koniriasi fu uri e fuone i mejo inokiro ro e azo kemo be Godi ma vierafemo ijene kiamo bu ruae. \v 8 Areme fu uri vua boeje izege fu nimamaena gaema ije kuariae. Fu ijiege kuariama areme kiamo bune are Jofa ijia e Fita mesirikuae vae. \p \v 9 Ro nituame maza uvuoka manino ijia e ije bune vakuma sidove ijia usiaekuae ivuarema ijia Fita fu are ado ijia baname isoekiro ajia vae. \v 10-11 Fita fuka vasiaoema ijadufuo fu ire ikiro vierafe ijadufuo bu fuefuo ire amaerikoga fu ijia nimamae. Fu nimamae gake saove ijia viene fu dauvekoga ire ugone igeki ireobo ijare ijia ari ruome. \v 12 Ro ugone ije fu fanu ni binobino ro tabarekina ume ijiakuma ijia ari ruae. \v 13 Areme vua be fu ijia ijiege kume, Fita, urina fanuve ijiakina ume ije kaniana buvua ino kumei. \v 14 Ro Fita fu una gue kume, E Ireobo fanuve ijieki ije buka ise na ijo baki. Ijadufuo nabe kaniana ikono kumei. \v 15 Ro vua ije fu una kuke kumei, Fanuve ijieki ije fune isuibe Godire amaeriaema ijadufuo buka maturae. Ijadufuo ade kuae ire ije bu iseno kuaemono kumei. \v 16 Fita fu maza inokubeke ire ije ugone ijieki ije fanuve ijiakuma saove ijia ari ruaema ije gakoga fune una meruna saove ijia vae. \p \v 17 Areme Fita fu uria are ado ijia fina ire ije fu nimamaena giaema ije fina vierafeme. Fu ijiege vierafemo ijia e ije Koniriasi fu kiamo bu ruaeva ije bu ro Saemonido are viene ijia irei. \v 18 Bu ijia irena kiae, E Saemoni Fita kuavo ije fube ijia fino kiae? \v 19-20 Ro Fita fu uria ijia fina ire ije fu nimamaena gaema ije vierafemo ijia Godido Kavene fu kuae. Saemoni, e inokubeke bu a reravono ni arina vane. Ro ade buina vakiro ijuemo ijadufuo maeje e ije nare kiavo bu ruaevano kuae. \v 21 Areme Fita fune una ari kekena e ije kiae, E ije ja rerevo ije na igifureki ro ja irerefuo ruaevano kiae? \v 22 Fu ijiege kiamoga bu kuae, No Koniriasi e azo kevo ijiebuo e ireobo ijare kuomo no ruae. Ro e ije fuka e be mukoreigia kenoeno ijadufuo e Jiusi boeje buka fu aguaevo. Ro kuke fuka e be Godi ma vierafemo. Ro maza be Godido anera ijare e Koniriasi kuae, Ni e bino kiaga bu ro a mesira vaga a are fuone ijia vua kuaraga fu fieno kuae. \v 23 Ijadufuo Fita vua ije fiena uri e ije kiamoga bu are guove ijia fuina naoe. \s1 Fita fu Koniriasido are ije vaema ijene \p Areme suoke Fita fune urina buina vakoga e Jofako gue Godi ma vierafevo ije bu fuina vae. \v 24 Bu vakuma nituame bu are Sesaria ijia usiae. Ro e Koniriasi fune uri agane fuone ijiakina kairafa fuone ije kiamo bune besu afuima areme Fita samuana kari. \v 25 Bu ijiege samua kariva ijia Fita fu ijia keke areme iko viene ijia aru vakoga Koniriasi fuka uri fu aguaena nidua fuone auge sae. \v 26 Fu ijiege remoga Fita fu kuae, Eko, naeje name ema nareno urino kuae. \v 27-29 Areme Fita fu Koniriasiki vua kuaekinu aru vagake e uruvana bu are guove ijia kari. Ijadufuo fu uri kiae, Jane vierafe no e Jiusi vame nuvuone no e Jiusi baki ijena besu afuivo baki. Rove Godi fune na kuariena kie, Ade vierafero e Jiusi baki ije bu e ise ro e Jiusi ije bu e maro ade ijiege vierafemono kie. Ijadufuo e ije bu na mesiriekuae vuakoga na naebe ijuone ro naka urina buina ruae. Ijadufuoro ja ireke befuo kievo na igia ruaevano kiae? \p \v 30 Fu ijiege kuariamoga Koniriasi fu una kuae, Na mu inokirokiro inokiro furima ijia na maza tiri kiroki ijia are none ijia fi. Na ijia fina baname isoegake e be ugone zine igege iramo ije saema ijare saroruba nidua none ijia manino na gae. \v 31 E ije fu ijia manina na kie, Koniriasi Godi fune baname one ijiakiro ire ije a e isema karivo ije vajiamo ije fune gana vierafei. \v 32 Ijadufuo ni e kiaga bu va Jofa ijia e Saemoni Fita kuavo ije fu e Saemoni be fu fanu surive ijia sinuome amaeriamo ijiaki davare irifo ijia fino ije mesiri rono kie. \v 33 Ijadufuo na kiavo bu migegire a mesirakuae vuae. Ijadufuo ane magoe ruaemado no Godido nidua ijia karina fiekono ni vua boeje E Ireobo fu kuaraema ije kuaruono kuae. \p \v 34 Ijadufuo Fita fune uri zinuevena vua kuariakiro kiae, Iviama nane vierafega Godi fu e gue oemarejiakiro gue fu ijuonemo baki. \v 35 Ro fume e aesakae binobino ijia eranebe bu fu ma vierafekinu vame maeje kenoevo ije kaenamiaga bu una e fuone revo. \v 36 Ro igia fie, Godi vua ije fu e Isureroko ije nijiaema ije fu ijiege kumei. Jesu Kuraesi fu e boeje ijiebuo E Ireobo. Ro fure manido fu kafaemo ije abe e boeje miaga bu kafaena karike. \v 37-38 Ro ja are Judia ijia fu izege rema ije jane vierafe. E Joni fu Jesu do ruoraema ijia Godi fu Kavene Akae fuone ije kuamo fu Jesu e Nasaretiko ijadufuo oe ijia ari. Ijadufuo fu daro abena vame maeje renoekinu e ije Setani fu daro fuone ijia samuagiamo ije amaeriakinu karauniae. Ro Godido Kavene ije fuka fuosiki oenoeno ijadufuo fu ire ijiege renoe. Ro ire ije Jesu fu renoema ije fu are Gareri ijia zinuevena gafege vae. \p \v 39-40 Ro ire boeje fu sakae Judiakiro Jerusareme ijia renoema ije nore giae. Ro Jesu bu dabe kurosi kanavoga mu inokubeke furiko Godi fu kenujamo fu una urimo e gue bune gae. \v 41 E boeje bu naebe gae ro none e ije Godi fu kuomo no fuina besu oenoeva ije nore gae. Fu una uri areme noena besu irekiro do ino no gae. \v 42 Areme fu no kuaruona kuo, Ni va e boeje kuariana kia, Naeje nane ma Godire kiemado na Godido vua maeje nijasiakinu e ije oeva ro ni uria kariva ije ise buone ke mazie giake. \v 43 E Godido vua vierafena kuaevo ijiebe fuefuo ijiege kuae, Erare fu Jesu ma vierafekuma Godi fu Jesudo ive ijia ise fuone giana arekono kuae. \s1 E Jiusi baki ije bu Godido Kavene abeva ijene \p \v 44 Fita fu uria manina vua kuariamo ijia Godido Kavene fu arina e boeje vua fievo ije nirokiae. \v 45 Ro e Jiusi Godi ma vierafevo ije Fitana ruaeva ije buka oeseradiae. Ijadufuo maeje Godido Kavene fuka arina e Jiusi baki ije nirokiaema ijadufuo buka oeseradiae. \v 46 Ro kuke bu fieke e Jiusi baki ije buka vua nanuamena kuaekinu Godido oemarevo bu fie. \v 47 Ijadufuo Fita fu urina kiae, E ige bune izege Godido Kavene no abeva budua bune ijiege abei. Ijadufuo no kaenamia do ruoriakuva fu erare kuriaerekuma bakino kiae. \v 48 Ijadufuo fu kiamoga bu kame Jesu Kuraesido ive ijia do ruoriae. Areme e Koniriasikiro e Jiusi baki ije bune Fita kuavoga fu mu sibaneke una buina ijia fi. \c 11 \s1 Fita fu Jerusareme Sosi ijia ijiege fu are Sesaria ijia rema ijene nijasiaema ijene \p \v 1 Areme e Afasero ijiakina e Godi ma vierafevo are Judia ijia kariva ije bu fieke e Jiusi baki ije budua bune Godido vua ije abena ma vierafeve. \v 2 Ijadufuo maza ije Fita fu Jerusareme vakoga e Jiusi gue Jesu ma vierafevo ije bu fuesina kuae. \v 3 Bu kuae, A vaema ije aka e Jiusi baki ijena are buone ijia ire inoemano kuae. \v 4 Bu ijiege kuaravoga Fita fu uri vua boeje izege fu rema ije zinume ijia kuaria vakuma ubine ijia kekei. \p \v 5 Fu kiae, Na Jofa sidove ijia fina baname isoevo ijia na nimamae gake ire ugone igeki ije fu saove gufia ari ruoma na fijo ijia ruae. \v 6 Areme na gake ugone ije fuka fanu binobino ro tabarekina ume binobino ijiebe ijia naove. \v 7 Na ire ije gavo ijia na fieke vua be saove gufia ijiege kume, Fita ni urina fanuve ije kania buvua ino kumei. \v 8 Fu ijiege kumenoga na una gue kume, E Ireobo na ire ise ijieki ije na ivo baki ijadufuo nabe kaniana buvua ikono kumei. \v 9 Na ijiege kumevoga fu una kuke kume, Ire ije fune Godire amaeriaema ijadufuo bu maturae. Ijadufuo ade kuae fu iseno kuaemono kumei. \v 10 Vua ije fu maza inokubeke ijiege kuariemo na fiekoga ire ugone igeki ije fune una meruna saove gufia ajia vae. \v 11 Areme maza besu ijia e inokubeke bu na mesiriekuae ro are na fijo viene ijia irei. \v 12-14 Bu ijia irekoga Godido Kavene fu na kie, A e ije ruaeva ije ade giana oe binobino vierafekiro nime buina vano kie. Ijadufuo nane buina vakoga e none Godi ma vierafevo gue bune naena e Koniriasido are ijia vae. Areme none e Koniriasido are ijia aru vakoga fu uri vua izege anera fu are fuone ijia ari kuaraema ije kuarie. Fu kuo anera ije fu kie, ani e one bino kia bu va are Jofa ijia usiaena e Saemoni Fita mesiri rono kie. A mesiri roga fure Godido vua maeje abe kuaraga a agane one ijena vua ije fiega Godi fu ja karauniano kie. \v 15 Areme nane iko zinuevena vua kuaevo ijia Godido Kavene fune izege fu ude oe nuvuone ijia ruaema ijiege fu kuke oe buone ijia ruae. \v 16 Fu ijiege remoga na una izege Jesu fu isuibe kuaema ije vierafe. Fu kuae, Joni fume do ijia abena e ije ruoriae. Ro jare ja Godido Kavene maeje abekono kuaema na ije vierafei. \v 17 Ijadufuo na ma vierafega Godi fune izege fu ude e ige no Godi ma vierafevoga fu Kavene fuone abe muema ijiege fune kuke Kavene fuone abena e Jiusi baki ije bu Godi ma vierafeva ije miae. Ijadufuo na vierafe naka naebe manido nabe Godi irere fu rekiro vierafemo ijene bijukono kiae. \p \v 18 Ijadufuo e ije bu maza ijia vua ije fiena uri kairafa guesina bu kuaevo ije bu ijia arei. Areme bu una Godi dabe aroekinu kuaevo, No vierafega Godi fune e Jiusi baki ije ifejiako bu una oe kuderiana vame ma karivako ije abevono kuae. \s1 E Godi ma vierafevo bu Enitioki sosi ijia afuivo ijene \p \v 19 Areme maza ije bu e Sitivini kanaeva ijia e Godi ma vierafevo ije bu bijaekinu madinamivo ije bu ijia jumei. Ijadufuo bune dabe giegisana uri sakae Fonisiakiro Saefurasi ro Enitioki ijia vae. Bu va ijia oenoekinu Godido vua ije dabe e Jiusi ijiaru kuarianoe. \v 20 Bu ijiege renoekoga e Godi ma vierafevo gue are Saefurasikiro Saerini ijia ruaeva ije bune va are Enitioki ijia vae. Bu va ijia usiaena Jesu E Ireobo ijadufuo vua maeje abena e Jiusi baki ijedua kuariae. \v 21 Ro e ije buka E Ireobo ijadufuo daro ije abeva ijadufuo bu vua ije dabe darokuma kuariae. Ijadufuo buka e uruvana una oe kuderia areme E Ireobo ije ma vierafei. \v 22 Bu ijiege revoga e Jesu ma vierafevo Jerusareme sosi ijia afuivo bu vua ije fie. Ijadufuo e mamekanu ije bune urina e Banabasi kuavoga fu are Enitioki ijia vae. \v 23 Fu vakuma garia kekena izege Godi fu e ije daro miaema ije giamo fuka oemae. Ijadufuo fu uri soesoena kiae, Jade E Ireobo ije ijuonekiro nika maza boeje fu mukoreigia aguaena irinana karinoeno kiae. \v 24 Ro e Banabasi fuka e ma fu Godi ma vierafemo. Ro kuke fuka Kavene Akae ijadufuo daro ijiakuma oenoeno. Ijadufuo fure e uruvana ifejiamoga bu una oe kuderiana E Ireobo ije ma vierafei. \p \v 25 Areme Banabasi fune are Tasasi ijia e Soru rerena vae. \v 26 Fu rerena vakuma bie areme fune mesirina una are Enitioki ijia ruae. Areme bune buosiki juaevasia besu bu sosi ijia oenoekinu e uruvana Jesudo vua ije nijasianoe. Ijadufuo bu are Enitioki ijia zinuevena e ije Jesu ma vierafevo ije bu kia Kurisitinino kiae. (Ro ive ijadufuo maeje Kuraesido e ijene). \v 27 Areme maza besu ijia e Godido vua vierafena kuaevo gue bu are Jerusareme ijia urina are Enitioki ijia vae. \v 28 Ro e Agabasino kuavo ije fu Godido Kavene ijare niromoga fu urina kuae, Aesakae boege fuka vasia kekekono kiae. Areme maza ije e Korodiasi fu e ireobo rema ijia vasia ije fu ijia kekei. \v 29 Ijadufuo e Jesu ma vierafevo are Enitioki ijia kariva ije bu Agabasido vua ije fie. Ijadufuo e besubesu bu vierafe buka giriesana moni buone bino karina e Jesu ma vierafevo sakae Judia kariva ije naejiakuae vierafe. \v 30 Ijadufuo bune urina moni buone karina e Banabasikiro Soru vajiavoga bu karina e mamekanu Jerusareme kariva ije vajiakuae vae. \c 12 \s1 Fita fu dibure ijia kekena vaema ijene \p \v 1 Areme maza ijia Kini Erodi fu vierafe fuka e Jesu ma vierafevo gue toenamia kame isekafiakiro vierafei. \v 2 Ijadufuo fune e fuone azo kevo gue kiamo bu Jemisi e Jonido iviene ije kiamo bu sime dabe bijavo fu baronei. \v 3 E Erodi fu ijiege rekinu gake e Jiusi ije buka vame fu remo ije oemarevoga fu una kuke e Fita toe. (Ro maza ije fu Fita toema ije fu e Jiusi ijiebuo maza ije bu iro Burete Iriaekino kuavo ije bu ivo ijia fu ijiege rei). \v 4-5 Fu Fita tona dabe dibure nuja areme e azo kevo ije kiamoga bu fu samuana kari. E gue bu samua karina maza abega bu vakoke gue buse ro viene ije samuavo. Ro kini Erodi fu vierafero mazani Fasova ije furikuma fu Fita dabe e boeje ijiebuo niome ijia koto rekiro fu ijiege vierafe. Ro maza ije Fita fu dibure ijia fino ije e Jesu ma vierafevo sosi ijia afuivo ije buka urukeigia fuefuo Godido baname isoe. \s1 Anera ijare Fita kenujaema ijene \p \v 6-7 Ro Erodi fu vierafe fu isuome igege Fita mesirina dabe koto rekiro vierafei. Ro Fita bu seni inokiro ijia kena kiriama arevoga fu e inokiro e dibureko samuagiavo ijiebuo ukua ijia nae. Fu ijia naekoga e azo kevo gue bu dibure viene ije samuana irei. Bu ijia ireva ijia saroruba Godido anera be fu arina dibure guove ijia manikoga are ije fuka maza igege sanae. Areme anera ije fu uri Fita samo fu urimoga fu kuae, Migegire urino kuae. Fu ijiege kuakoga seni boeje bu Fita umui ijia kiriaejaeva ije buka iraekisae. \v 8 Areme fu uri kuae, Ni urina sinuome one ijiakiro dia surive one ije kena saro ugone one a ado abiemo ije abe abiesena na vako igia nuvedieno kuae. \v 9 Ijadufuo Fita fune uri sinuome fuone sama areme fune anera ije fu vako ijia nuvei. Rove Fita fu anera vame ije fu remo ije fuka naebe mukoe vierafei. Ijadufuo maeje fu vierafero fu nimamaemaro fu ijiege vierafei. \v 10 Ijiege rena bune usiae e ije viene amure ijiakiro ririkua ije samuavo ije asidiana bune viene rane ijia ruae. Ro viene ije bu ajane ijia amaeriva ije fume korufuo dauvemoga bu ijia usiaena bune makave ijia ruae. Areme bune usiaena vame be ijia vako ijia anera ije fune saroruba ijia Fita nujana vae. \p \v 11 Fu ijia nuja vakoga Fita fu ijia sone izege fu dibure ije arena keke ruaema ije vierafei. Areme fu una fue kuae, Na vierafega ige fu Godire anera fuone kuamo fu na kenujiekiro ruae. Kini Erodikiro e Jiusi ije buka na dabe ire binobino rekuae vierafe ijadufuo fu ije kenujiekiro ruaemano kuae. \v 12-13 Areme fune va bara Meri e Joni Makedo asie ijadufuo are ijia kekei. Ro are guove ije buka e uruvana ijia afuina baname isoeve. Ijadufuo Fita fu viene ijia manina kanakanamoga bara Rodano kuavo ije fu kekena e ije gakiro ruae. \v 14 Fu kekena ruakinu Fitado itire ije fiemo fuka oemaemoga viene fu naebe dauve. Ro fume una difurina aru e ije kiae, Fita fu viene gufi manino kiae. \v 15 Fu ijiege kiamoga bu kuae, No vierafe aka no biesiruomo kuae. Rove bara Roda fuka una kukuma kiae, Nanaka ma kuariave Fita fu viene gafi manino na gaevano kiae. Ro e ije buka una kuae, No vierafe fu Fita bakiro fute kavene fuone ijareno kuae. \p \v 16 Rove Fita fu uria ijia manina kanakanamoga bu uri viene dauve gake fune ma Fitare ijia maninoga buka oeseradiae. \v 17 Areme fune uri umui ijia e ije vafiamo bu mauike karikoga fu uri izege E Ireobo ije fu mesirina dibure ije arena keke ruaema ije kuariae. Areme fu kiae, Ni vua ije va e Jemisikiro e Jesu ma vierafevo ije kuariano kiana fune bu uniana una ae be vae. \v 18 Areme fune ve irasemoga e ije dibure samuavo ije bune uri Fita rerena dabe bue sagui. \v 19 Bu ijiege rekoga Kini Erodi fudua fu kiamo bu uri Fita rere rove buka naebe bie. Ijadufuo fune e azo kevo ije kiamo bu rovoga fu urina duna binobino kuariae. Rove bu vame izege Fita fu keke vaema ije buka naebe vierafe ijadufuo bu arekoga kini Erodi fune kaniakiro kuariae. Areme rade Erodi fu sakae Judia ije arena va Sesaria ijia kekena maza sibaneke fu ijia fi. \s1 Kini Erodi fu baronema ijene \p \v 20 Ro rade Kini Erodi fuka e are Taeakiro Saedoniko ije ziegafiamoga e gue bu besu afuina fu gakuae vae. Bu vierafe buka una Erodina kafaekuae vierafe ijadufuo maeje ire buone bu ijo ije bu Kini ijadufuo aesakae ijia kevo. Ijadufuo bu vierafe buka ude va e Barasitasi kuaga fu oemarega bu va Kini Erodi gakuae bu ije vierafei. Ro e Barasitasi fu Erodido are maeje fu fino ije fure samuamo. \v 21 Ijadufuo Erodi fune maza ije fu nijaema ijia fune ugone fuone kini bu savo ije sama areme fune fata fuone ijia fina e boeje vua kuariae. \v 22 Areme e boeje bu uri kume, E ije fu ema ijare vua kuaruomo baki ro fu e be godi vareki ijare kuaruomono kumei. \v 23 Bu ijiege kumevoga Erodi fu vua ije fie rove fu naebe una Godi aroe ro fume una fuone aronami. Ijadufuo E Ireobo ijadufuo anera ije fuka maza ijia arina Erodi kanamo fu ume ijia dijemoga ire fuine ijiebe fuzavo fu baronei. \v 24 Kini Erodi fu ijiege baronekoga bu Godido vua ije dabe kuae irana are boeje ijia vae. \v 25 Ijiege rekoga e Banabasikiro Soru bune i buone ije mena furi areme bune e Joni Maki mesiri una sidove Jerusareme ijia vae. \c 13 \s1 Banabasikiro Soru bu unianamiva ijene \p \v 1 Ro e gue Godido vua vierafena kuaevo ijiakiro e vua nijasiavo are Enitioki sosi ijia kariva ijiebuo ive ijeja e Banabasikiro Simioni e ije bu kua e kazineno kuavo ijene. Ro kuke e Rusiasi e are Saeriniko ijiakiro e Maneni e Kini Erodido fari ije fu nifarikema ijiakina e Soru ijene. \v 2 E ijiebe maza be ire atona E Ireobo baname isoevoga Godido Kavene ije fu kiae, E Banabasikiro Soru ije kena irigi uniaekina bu i be nare kiaeva ije meno kiae. \v 3 Ijadufuo bune uri ire atokinu Godi baname isoe. Areme bune uri e Banabasikiro Soru umui nigofo naejia areme kiavo bune vae. \s1 Banabasikiro Soru bu aesakae Saefurasi ijia vaeva ijene \p \v 4 E Banabasikiro Soru bune izege Godido Kavene fu kuariaema ijiege bune urina vakuma are Serusia ijia usiae. Areme bune ijia sisime abena aesakae be davare ukua ijia namo bu kua Saefurasino kuavo ijia vae. \v 5 Bune vakuma aesakae Saefurasi ijia arina bune va are Saramisi ijia usiae. Areme maza gue bune va e Jiusi ijiebuo are bu afuina vua kuaevo ijia aruna Godido vua ije dabe e ije kuariae. Ro e Joni Maki fudua fu buina vaema ijadufuo fu ifejiana vua ijene kuariae. \p \v 6 Areme bune are Saramisi arena vakuma are Fefosi ijia usiaena e Ba Jesuno kuavo fu e masirikiamo ije bie. Ro e ije fu e Jiusi ro fu e biesirianoekinu kiamo, Naeje na e be Godido vua vierafena kuaevo ijeno kiamo. \v 7 Ro e Ba Jesu fu e Sejiasi Forasi e ije fu sakae Saefurasi samuamo ijadufuo kai. Ro e Sejiasi Forasi fuka e nigofo ma fu ire boeje mukoreigia vierafemo. Ro e ije fuka Godido vua ije fiekiro vierafe ijadufuo fu Banabasikiro Soru kiamo bu fu fino ijia vae. \v 8 Bu ijia vakoga e Ba Jesu e ije e masirikiamo ro kuke ive fuone be bu kua Erimasino kuavo ije fuka kuriaerei. Areme fu kuke e Sejiasi Forasi oe fuone dabe dakudega fu Godido vua ije bu kuarakuvejo ije fube fiena ma vierafekiro fu ijiege rei. \v 9-10 Fu ijiege rekoga e Soru ro kuke Foruno kuavo ije fu Godido Kavene ijare niroe. Ijadufuo fu urina e ije e masirikiamo ije verima areme kuae, Aeje a Setanido fari. Ijadufuo aka vame maeje bu renoevo ijiebuo e ani. Ro kuke aeje funeka ire isekuma ijiebe ajianamaeva ijadufuo aka naenitua E Ireobo ijadufuo vua maeje dabe kufui igege kuaenoene. \v 11 Ijadufuo iviama E Ireobo fu ire be one rega ni one fuka maza aokube kuzekono kuae. Fu ijiege kuarakoga saroruba ire amite igeki kazine ijare niome fuone ijia okurae. Ijadufuo fu uri ibana fienoe arega e ijiebe fu umuikekiro fu ijiege rei. \v 12 E Erimase fu ijiege remoga e ireobo aesakae ije samuamo ije fu ire sumiki ije rema ijiakiro E Ireobo ijadufuo vua ije bu kuaraeva ije fiemo fuka ireobo oeserei. Ijadufuo fu ve ijia una oe dakudena E Ireobo ma vierafei. \s1 Foru ro e fuone ijena are Enitioki sakae Fisidia guove ijia vaeva ijene \p \v 13 Areme rade Forukiro e ije fuina oenoejo ije bune sisime abe are Fefosi arena vakuma are Fega aesakae Famefiria guove ijia usiae. Bu ijia usiaekoga Joni Maki fune bu uniana una Jerusareme ruae. \v 14 Areme bune are Fega arena nana vakuma are Enitioki aesakae Fisidia guove ijia usiae. Areme maza ije e Jiusi bu mauike karijo ijia bune e Jiusibuo are bu afuina vua kuaevo ijia aru va buina kari. \v 15 Bu ijia kari fiekoga e ije bu urina Godido vua kafare gue dae. Bu dama furikoga e mamekanu e Jiusibuo are ije samuavo ije bune urina Forukiro e ije fuina vaeva ije kiae, Uviarafa nuvuone mae garie, ja vierafega ja vua bino e ige soesoena kuariakuva ni uri kuariano kiae. \p \v 16 Bu ijiege kiavoga Foru fune uri umui ijia vafiamo bu mauike karikoga fune zinuevena vua kuariae. Fu kiae, E Isureroko ijiakiro e Godi ma vierafevo ije vua ige na kuariakuvejo ije mukoreigia fiefo. \v 17 E Isureroko ijiebuo Godi ijare asaerafa nuvuone ije bu aesakae Ijifiti ijia kariva ije ifejiamoga e uine buone buka ma e uruvana rei. Ro kuke Godi besu ijare daro fuone ka ma anuigi ijia kaenamiana are Ijifiti arena keke ruae. \v 18 Areme fu buina juaevasia foti (40) ijiege ae sao ijia finoe. Ro e ije bu vua fuone ije buka naebe fiena irinae rove fuka uria bu mukoreigia samuagiae. \v 19 Godi ijare e seveni isama binobino kuaevo bu aesakae Keinani guove ijia kariva ije boeje kaniamo bu oe furi. Areme fu e fuone fu kaenamia ruomo ije kiamo bu aesakae ije abena ijia kari. \v 20 Bu juaevasia ma uruvana (450) ijiege ijia karikoga Godi fu e mamekanu binobino kiamoga bu e Isureroko boeje samuagiae. Bu samuagiana ruoma Samuero e Godido vua vierafena kuaemo ijadufuo mazani ijia usiae. \p \v 21 Areme e ije buka kini be abekuae vierafe ijadufuo bu Godi kuavoga fu e Soru e Kisido fari ije abe miae. Ro e Kisi fu e Bezimanido uifari be. Ijadufuo e Soru fu juaevasia foti (40) ijiege fu kini buone rena bu samuagiae. \v 22 Soru fu kini rena vakuma Godi fu kuamo fu arekoga fu una e Devidi kuamo fu e Isureroko ijiebuo kini rei. Areme Godi fu e Devidi fuesina ijiege kuae, Na Devidi e Jesido fari ije naka ireobo oetuavo. Ijadufuo maeje na vierafe fure ire boeje na vierafevo ije rekono kuae. \v 23 Ijadufuo Godi fune izege fu kuaema ijiege rena fune e Devidido uifari ijia Jesu e ije fu e Isureroko karauniadufuo ije kuamo fu ruae. \v 24 Jesu fu rade ruae ro Joni fu ude e Isureroko ije kuariana kiae, Ni ise jone boeje ja renoejo ije arena roga na ja do ruoriano kiae. \v 25 Areme Joni fune i fuone ije me furikuveno ijia fu uri e ije kiae, Ja vierafega naeje na era? Nana e ije fu ja karauniadufuo ije baki. Ro e ije fu rade ruomo ije fuka e anuigi ijadufuo na vierafe na naebe manido na dia surive fuone fu saema ije azoejake. \p \v 26 Ro erafano, e Eburamedo uifari guriakiro e Godi ma vierafevo gurie na igia kuariako fiefo. Godi vua ije fu e karauniadufuo fu nijuema ije fu no nijue. \v 27 Ro e are Jerusareme ijia kariva ije abero e mamekanu ije bu e Jesu fu ruaema ije buka naebe ma vierafei. Ro bume uri Jesu dabe kanavo fu baronekuma ijia e ije Godido vua vierafena kuaevo ijiebuo vua ije bu kuaeva ije fune ijiakuma riarei. \v 28 Jesu fu ire ise besukua be fuka naebe rei rove bume uri Faereti kua fu kiaga bu dabe korosi kana fu baronekuae bu ijiege vierafei. \v 29 Bune izege vua boeje bu fuesina buki akae ijia isoena kuaeva ijiege re furi. Areme bune kurosi ijia vajae surive fuone ije nafena abe ari mako ijia nujae. \v 30-31 Rove Godire kenujamo fu una uri areme maza uruvana fu e ije bu fuina are Gareri ijia una Jerusareme vaeva ije biediamoga bu gae. Ijadufuo e ijiebe iviama vua fuone dabe e Isureroko boeje kuarianoeve. \p \v 32-33 Ijadufuo no vua maeje izege Godi fu isuibe asaerafa nuvuone kuariaema ije uifari buone ige no iviama vua ijene dabe ja kuariave. Ro vua maeje no kuariavo ijeja Jesu Kuraesi fune ma una urima ijadufuo no ijene kuariave. Ro kuke vua ijadufuo ije bune isuibe Godido buki Samisino kuavo ijia ijiege isoena kuae, \q1 Aeje a Fari none ro iviama nane una Asoe one revano kuae. \m \v 34 Ro vua ije Godi fu Jesu kenujamo fu una uri ro fu naebe areko surive fuone fu mako ijia buraema ije bune isuibe buki Samisi ijia ijiege isoe, \q1 Ire maeje na Devidido rekiro kuaeva ije fu una one rekono kuae. \m \v 35 Ro kuke buki Samisi kafare be ijia fu samadukua ijiege kuae, \q1 A E One akae fu oefuo i meno ije ade arega fu mako guove ijia buraeno kuae. \m \v 36 Ro maza ije Devidi fu uria fima ijia fu Godido ime ruoma areme baronei. Fu baronemoga bu abe asaerafa fuone bu uniaeva ijia nujae rove vajae surive fuone fune burae. \p \v 37 Ro E Ije Godi fu kenujamo fu una urima ije fu naebe burae. \v 38-39 Ijadufuo e none Isureroko boegie vua ige na kuariavo ije fiefo. Vua ige Godi fu ise jone giana aredufuo no kuariavo ije fu Jesudo duvado ijia reke. Ro fu Mosisido akae ijare ise jone ijia karauniakuma baki. Ijadufuo erare fu Jesu ma vierafekuma Godi fu ise fuone fu isejavaekuveno ijia kenujaga fu una maturaeke. \v 40 Ijadufuo ni kojo mukoreigia samuanamikina vua ije e Godido vua vierafena kuaevo bu kuaeva ije fube jone redufuo. Ro vua ije bu ijiege kuae, \q1 \v 41 E gure Godido vua kania tuavo gurie, ni mukore fiefo. Ja ire sumiki be gakuva jaka oeseradiaga ja oeke. Ijadufuo maeje na maza jone ijia ire sumiki be rega e bu giana kuariakuva jaka ma vierafekuva bakino kuae. \p \v 42 Forukiro Banabasi bu iko are ije e Jiusi bu afuina vua kuaevo ije are usiaevoga e ije bu una kiae, Ni maza be no mauike karijo ijia una ro vua ijieki bino kuaruono kiae. \v 43 Bu ijiege kuaria areme e ije bune vua ije bu kuaevo ije arena usiae vae. Areme e Jiusi ije abero e Jiusi baki ije bu e Jiusi ijiebuo vame ijia kenoevo boeje bune uri Forukiro Banabasi nuvediana vae. Bu nuvedia vakoga e Forukiro Banabasi bu uri soesoena kiae, Ni una va ire maeje Godi fu jone remo ije mukoreigia vierafekinu karinoeno kiae. \p \v 44 Areme e ka ma uruvana sidove guove ijia kariva ije bu maza be e Jiusi bu mauike karivo ijia una E Ireobo ijadufuo vua ije fiekuae besu afui. \v 45 Rove e Jiusi ije bu usiae giake buka e uruvana ijia karivagana buka isediae. Ijadufuo bu uri Forusina kuaena kuae, Vua ije fu kuaemo ije fuka kufuimeno kuae. \v 46 Ijadufuo Forukiro Banabasi buka urina vua ije dabe darokuma e Jiusi ije kuariae. Bu kuariana kiae, Ja Godido vua maeje ige no abe ja kuariavo ije jaka ijuoneve. Ja vierafero jabite ja vame ma karivako ije ja abedufuo ije fuka naebe manimaro ja ijiege vierafe? Rove jane kojo ijuonevo ijadufuo none ja arena una e Jiusi baki ijiebuo vake. \v 47 Ijadufuo maeje fune E Ireobo ijare kuaruona kuo, \q1 Jaeje na ire raete igege kena e Jiusi baki kariva ijia uniaga ja vake. Ja ijia vaekina jare e aesakae boegia kariva ije kaenamia roga na bu karauniano kue. \p \v 48 E Forukiro Banabasi bu ijiege kuariavoga e Jiusi baki bu vua ije fiena buka una E Ireobo ijadufuo vua ije oemarei. Areme ve ijia e ije Godi fu vierafe bu vame ma karivako ije abedufuo ije bu ijia uri Godi ma vierafei. \v 49 Ijiege rekoga E Ireobo ijadufuo vua ije funeka ireobo rena vakoga e boeje aesakae ijia kariva ije buka fie furi. \v 50 Rove E Jiusi sidove ijia kariva ije bu uri e mamekanu buone ijiakina bara ifiki gue Godi ma vierafevo ijiebuo oe ije kame kuderiae. Ijadufuo bu urina Forukiro Banabasi ijuonena rorukuriaevoga bune are ije arena vae. \v 51 E Jiusi ije bu ijiege revoga Forukiro Banabasi buka naebe oemareva ijadufuo bu uri dia sakae buone ijia kanakanae. Areme bune una urina are Ikoniamu ijia vae. \v 52 Ro e Jesudo vua fievo are Enitioki kariva ije buka Godido Kavene ijare oe buone ijia iraraema ijadufuo buka oemarekinu oenoe. \c 14 \s1 Are Ikoniamu ijia ire binobino rema ijene \p \v 1 Ijiege rekoga Forukiro Banabasi bu vakuma are Ikoniamu ijia usiae. Areme bune va are e Jiusi bu afuina vua kuaevo ijia aruna e ije Godido vua maeje dabe darokuma kuariae. Bu ijiege kuariavoga e Jiusi ije abero e Jiusi baki boeje buka Godi ma vierafevoga ire ije are Enitioki ijia rema ije fu una kuke Ikoniamu ijia rei. \v 2 Ijadufuo maeje e Jiusi gue bu Godi naebe ma vierafevo ijiebe e Jiusi baki ijiebuo oe ije ke kuderiavoga bu e ije Godi ma vierafevo ije ziegafiae. \v 3 Areme e Afasero ije bune maza sibaneke uruvana ijia karikinu E Ireobo ijadufuo vua ije dabe ijia darokuma kuariae. Bu ijiege kuariavoga E Ireobo ije fuka daro miamo bu uri ire sumiki ro nuga bino rei. Areme e ije bu ijia giana vierafero Godido vua maeje fu izege e marejiamo ije bu kuaevo ije fuka maro bu ijiege vierafei. \v 4 Ijadufuo e boeje sidove guove ijia kariva ije bu dabe atana gue bu una e Jiusi ijena rekoga gue bu e Afasero ijena rei. \p \v 5 Areme e Jiusi baki ije abero e Jiusi ije bu e mamekanu buone ijena vua kuaema areme bune uri zinuevena e Afasero ije mune tuana kaniakuae kuae. \v 6-7 Ijadufuo e Afasero ije bu vua ije fiena bune subinaena are Raekonia ijia vae. Bune va are isesina Risiturakiro Debi kiavo sakae Raekonia guove ijia kariva ije ivuake ijia oenoekinu Godido vua maeje abe e ije kuariae. \s1 Are Risiturakiro Debi ijia ire binobino rema ijene \p \v 8 Ro e be are Risitura ijia fino ije bu iko bieteva ije fu aekiraema ijadufuo fu korufuo oenoeno baki. \v 9-10 E ije fuka mukoreigia fina Forudo vua ije fiemoga Foru fu ije gae. Fu gake e ije fuka vua fuone ije ma vierafemaga fu kenujakiro vierafei. Ijadufuo fu uri e ije verima areme urukeigia kuae, Eko urina koro arire manino kuae. Foru fu ijiege kuamoga e ije fuka uri furiko ajiakinu korufuo ijia oenoe. \v 11 Ijadufuo e boeje bu izege fu rema ije ga areme uri Raekonia isama ijia kume, Godi nuvuone binobino ije bune una ema rena e ige nuvuone ari ruaevano kumei. \v 12 Areme bune uri Banabasikiro Foru kame ive buone iviaeko imiae. E Banabasi bu dabe Zeusi kuaga Foru bu Emisi kuae. Ijadufuo maeje Forure fuosukua vua uruvana kuarianoeno ijadufuo bu dabe ijiege i. \v 13 Areme e be godi Zeusido zinone ifaejemo fu are bu godi Zeusi baname isoevo sidove ivuake ijia saeva ije samuamo ije fu sidove viene ijia ruae. Fu vierafe fuka e boeje ijena fanu kaukiro kusare ije kena e Afasero ije buone zinone ifaejekiro vierafei. \p \v 14-15 Bu ijiege renoejoga Forukiro Banabasi bu vua ije fiena buka naebe oemarei. Ijadufuo buka uri ugone buone kame farae korena difurisae e boeje bu afuiva uve ijia vae. Bu ijia vakinu kume, E ige ja irerefuo ijiege reve. Noeje nome ema ja vareki ro no Godido vua maeje abe ja kuariaga ja ire ise ije ja renoevo ije arekiro no ijadufuo ruae. No vierafe jaka oe kuderiana una Godi ni uria fino ije fuone vakuae no ije vierafei. Godi ijare sakae igiakiro saove gufe ro davare game amaeri areme ire boeje binobino ije amaeriana ijia uniae. \v 16-17 Ude fu arekoga e boeje buka uri vame buone binobino bu vierafeva ijia renoe. Rove iviama fune korufuo ire maeje rena nijasiamoga ja ijia gana ma vierafero fuje fune ma Godiro ja ijiege vierafei. Ro fure ve ije kuaga fu dakinu ro ire uije binobino ije ifejiako bu mukoreigia tavuana suni kiravo. Ro kuke fure ire vajiakinu ro maza boeje ifejiako ja mukoreigia oemarekinu karivono kiae. \v 18 Forukiro Banabasi bu vua ijiege e boeje kuariae rove bu naebe fie. Ro buka faememarena buone zinone ifaejekuvejoga buka uria giriesana vafiavoga bu ijia arei. \p \v 19 Ro e Jiusi gue are Enitioki aesakae Fisidia guove ijia ro are Ikoniamu ijia ruaeva ijiebe e boeje soesoevoga bu una buina rei. Areme bune uri mune tuana Foru kanana dabe ume ijia meruna sidove ije arena usiae vae. Areme bu vierafero fune baronemaro bu ijiege vierafena ijia arena vae. \v 20 Bu are vakoga e Godi ma vierafevo bu usiae fu namo ijia ire ufuaenoejoga fu una urina sidove ijia vae. Areme nituame fune Banabasiki una are Debi ijia vae. \s1 Forukiro Banabasi bu una Enitioki vaeva ijene \p \v 21 Areme Forukiro Banabasi bune va are Debi ijia usiane Godido vua maeje abena e boeje kuariae. Bu ijiege kuariavoga e Debiko bu vua ije fiena e uruvana gue bu oe kuderiana ma vierafe areme bu una Jesudo e rei. Areme Forukiro Banabasi bune una vakuma are Risitura ijia usiaena vakuma Ikoniamu usiae. Areme bune nana vakuma are Enitioki Fisidia guove ijia usiae. \v 22 Ro Forukiro Banabasi bu vierafe buka e Jesudo vua fievo ije soesoena ejafiaga bu uria giriesana Jesudo vame ijia nuvekuae bu ijiege vierafei. Ijadufuo bu urina vua maeje dabe e ije kuariae. Areme bu kuke nijasiana kiae, Ume igia no karinoejo ije noka irufui uruvana biediakinu isejavaeke. Rove no uria giriesakuva no una e ije Godi fu oe buone ije samuagiamo ijena besu maziekono kiae. \v 23 Areme bune sosi binobino ijia vua kuarianoekinu e mamekanu bino bu e sosi ijia afuivo ije samuagiadufuo ijene kei. Bu ijiege renoekinu ro ire atona buefuo baname isoevoga E Ireobo ije bu ma vierafevo ije fu bu mukoreigia samuagiakiro bu ijiege rei. \p \v 24 Areme bune vakuma aesakae Fisidia ijia usiaena nana vakuma Femefiria ijia usiae, \v 25 Bu ijiege rena bune Godido vua ije abena are Fega ijia e ije kuariama areme bune are Ataria ijia ari vae. \v 26 Areme bune kuke sisime abena una vakuma are Enitioki ijia usiae. Ro e Forukiro Banabasi ije bu e Godi ma vierafevo are Enitioki sosi ijia kariva ijiebe kena uniavoga bu Godido vua ije abena are irore ijia kuariana vae. \v 27 Areme bune uri e sosi ijia kariva boeje kumevo bu una besu afuikoga bu urina izege bu imenoeva ijene kuariae. Ro kuke bune izege Godi fu vame amaerimoga e Jiusi baki ije bu una Jesu ma vierafevoga fu karauniaema ijene kuariae. \v 28 Areme bune maza sibaneke una e Godi ma vierafevo ijena are Enitioki ijia kari. \c 15 \s1 E sosi ijiebuo e mamekanu bu Jerusareme ijia afuina vua kuaeva ijene \p \v 1 Areme e bino bu Judia ijia ro Enitioki ijia usiaena zinueve e Godi ma vierafevo ije vua nijasiae. Bu nijasiana kiae, Mosisido akae ije fu kuae, Janika vajae surive jone kaniaufuna nuga nano kuae. Ro ja naebe ijiege rekuva Godi fube ja karauniakono kiae. \v 2 Bu ijiege kuariavoga Forukiro Banabasi bu vua ijadufuo buina uruvana vua gikikimana kuae. Areme e Godi ma vierafevo bu Enitioki sosi ijia kariva ije bu vierafe bu e gue kiaga bu una Jerusareme vakuae vierafe. Bu va e Afasero ijiakiro e sosi samuavo ijiebuo e mamekanu ijena vua ijene kuaena fiekuae vierafei. Ijadufuo bune urina Forukiro Banabasi ro e gue ijene kiavo bune Jerusareme vae. \p \v 3 Ijadufuo e ije bune aesakae Fonisiakina Sameria guove ijia vakinu vua ije izege e Jiusi baki bu una oe kuderia Godido ruaeva ijene kuariakinu vae. Areme e Godi ma vierafevo ije bu vua ije fiena buka oemarei. \v 4 Ijiege rena e Forukiro Banabasi bune ruoma Jerusareme ijia usiaevoga e sosi ijia kariva ijiakiro e Afasero ijiakina e mamekanu ije buka bu oemarekinu kaenamiae. Areme Forukiro e ije fuina ruaeva ije bune urina vua boeje Godi fu izege buone duvado ijia rema ijene kuariae. \v 5 Ro e gue Godi ma vierafevo bu e Feresi ijena oenoevo ije bu urina kiae, No vierafe e ije buka vajae surive buone ije kaniaufu nuga na areme bu Mosisido akae ije irinano kiae. \p \v 6 Ijadufuo e Afasero ijiakina e mamekanu ije bu vua ije abe kuaena marekuae una besu afui. \v 7 Areme bune vua ijene dabe kuaena saguvoga Fita fu urina kiae, Erafano, jane vierafe isuibe Godi fu vierafe fu uve jone ijia na abekina nare vua fuone maeje abena e Jiusi baki kuariaga bu fiena una Godi ma vierafeke. \v 8 Ro Godi fu e boeje ijiebuo oe ije fune giamo. Ijadufuo fu Kavene Akae fuone kena izege fu no uniaejuema ijiege e Jiusi baki ije uniaejiae. \v 9 E ije bune fu ma vierafeva ijadufuo fu ise buone giana arei. Ijadufuo iviama no vierafega e Jiusi ijiakiro e Jiusi baki ije no Godido nidua ijia noka binobino baki. \v 10 Ijadufuo ja irerefuo Godi dabe defarune vajana irufui kame e Godi ma vierafevo ije kamudiajiave. Ro ire irufui ije bu asaerafa nuvuone ijiebe ude abe rove fuka naebe mani. Ro nodua no irufui ije no izege abekuva baki. \v 11 Ro no ma vierafe Godi fu Jesu Kuraesido ma rejiamo ijadufuo duvado ijia fu no karaunuomo fu vame besu ijiege fu kuke e Jiusi baki ije karauniamono kiae. \p \v 12 Fita fu ijiege kuariamoga e boeje ijia afuiva ije buka mauikeigia karina fiekoga Banabasikiro Foru bu urina vua kuariae. Bu urina ire sumiki ijiakiro nuga boeje Godi fu izege duvado buone ijia e Jiusi baki ijiebuo rema ijene kuariae. \v 13-14 Bu kuariama furikoga Jemisi fu urina kiae, Uviarafano, vua none ige fiefo. E Saemoni fune ude urina Godi izege fu e Jiusi baki ije nidosiana e gue kaenamiamo bu una e fuone reva ije fune kuariae. \v 15 Ijadufuo vua ige Fita fu kuaruema ije fune vua besu izege e Godido vua vierafena kuaevo bu kuaeva ijiekino kiae. Ijadufuo maeje Godido vua bu isuibe isoeva ijia fu ijiege kuae, \q1 \v 16 E Ireobo fu ijiege kuae, Ire ije furikuma na una ruake. Areme na e Devidido are fu tuaema ije una sake. Na ine ubine tuaseva ije karina una are ije una sake. \v 17 Na ijiege rega e gue budua bu na giekuae rerieke. Ro kuke e Jiusi baki aesakae binobino kariva ije na umui tuaeva ije bu una e none rena na nuvedieke. \v 18 E Ireobo fu ijiege kuae. Ro vua ije fu kuaema ije fune isuibe e ije nijasiaemano kuae. \p \v 19 Areme e Jemisi fu kiae, Na vierafe nobe e Jiusi baki ije bu iviama oe kuderiana Godido ruovo ije kena arafiriake. \v 20 Ro noka fasi isoe nijiana kiaga bube ire ije bu godi binobino zinone ifaejiavo ije kena ike. Ro kuke bube ebuo bara ro baru turakinu vame ise ijieki ije renoeke. Ro kuke bube fanu ije bu mauike uro maniaga bu oevo ijiakina fanu kavuane ije ike. \v 21 Ro igia fie, Mosisido akae ije bu dabe juaevasia uruvana sidove binobino ijia kuariavo ije none vierafei. Ro kuke akae ije bu dabe maza ije mauike karivo ijia e Jiusi ijiebuo are bu afuina vua kuaevo ijia davo ije none vierafei. Ijadufuo nome akae sibaneke ijiaru kuariana nijasiaga bu vierafekono kiae. \s1 E mamekanu ijiebe fasi isoena e Jiusi baki ije nijiaeva ijene \p \v 22 Areme e Afasero ijiakiro e mamekanu ro e sosi ijia kariva boeje bu besu afui. Bu vierafe bu e bino kega bu Forukiro Banabasina are Enitioki ijia vakuae bu ijadufuo afui. Ijadufuo bune uri e Saerasikiro Judasi e ije bu kua Basabasino kuavo ije kei. Ro e inokiro ije e Godi ma vierafevo ije buka bu aguariavo. \v 23 Areme bune uri fasi ijiege isoena miae. \q1 Fasi ige no isoena E Afasero ijiakiro e sosi ijiebuo e mamekanu ije ja nijiave. Noeje no jaena besu Jesu Kuraesi ma vierafevo. Ijadufuo nore fasi ige isoena e Jiusi baki ije ja sidove Enitiokikiro sakae Siria ro Sirisia ijia karina Godi ma vierafevo ije nijiana anadiave. \v 24 No fiega e nuvuone gue bu vua ijia usiaena vua gue kuariana jone ja ma vierafevo ije arafiriavo no ije fie. Ro e ije vuaeva ije no nore kiavo bu ijiege rekuae vuaeva baki. \v 25-26 Ijadufuo no ije besu afui vua kuaena e gue ke bu jone vuakuae vierafe. Ijadufuo no e Banabasikiro Foru ro kairafa nuvuone maeje ijene kei. Ro e inokiro ije bu E Ireobo Jesu Kuraesido i mekinu irufui uruvana buka oedufuo ijene biediavo. \v 27 Ijadufuo no e Judasikiro Saerasi kena uniaga bu buina vuake. Ro e ije vuako ije bure vua boeje ige no fasi igia isoeva ije kuariake. \v 28 Ijadufuo maeje fune Godido Kavene Akae ijare kuaruomo no fieva ijadufuo no vierafe nobe irufui uruvana vajiadufuo. Ro no vierafe nome akae anuigi sibaneke ijiaru nijasiaga ja fiena ijia nuvediadufuo. \v 29 Ro akae ije ijiege, Jade ire ije bu godi binobino zinone ifaejiavo ije kena ijo. Ro fanuve ije bu uro maniaeva ijiakiro fanuve kavuane ije jade ijo. Ro kuke jade ebuo bara ro baru turakinu vame ise ijieki ije renoevo. Ja akae ije no kuariavo ije mukoreigia nuvediakuva fuka mareke. Fune ijene, no ja anadiave. \m \v 30 Areme e ije bune fasi ije abena vakuma are Enitioki ijia usiae. Bu ijia usiaena uri e boeje Godi ma vierafevo ije kiavo bu besu afuikoga bu fasi ije abe miae. \v 31 Bu abe miavoga e boeje bune fasi ije abe dama furinoga buka oemarei. Ijadufuo maeje vua ije bu fasi ijia isoeva ije fuka buone ma vierafevo ije ifejiae. \v 32 Ro e Judasikiro Saerasi ije bu e Godido vua vierafena kuaevo ijene. Ijadufuo bune ijia karikinu vua uruvana e Godi ma vierafevo ijene kuariana ejafiakinu daro miae. \v 33-34 Bu ijiege rekinu karinoena areme e sosi ijia kariva ije bune uri Judasikiro Saerasi anadiae. Areme kiae, Ni Godido kafaemo ijiakuma una vano kiana bune uniavoga bu una e mamekanu buone kariva ijia vae. \v 35 Bune vakoga e Forukiro Banabasi bu una maza sibaneke sidove Enitioki ijia karinoekinu e boeje ijena besu E Ireobo ijadufuo vua ije e kuariakinu nijasianoe. \s1 Forukiro Banabasi bu zienamina unianamiva ijene \p \v 36 Areme Foru fune urina Banabasi kuae, Rono una sidove boeje no oenoekinu E Ireobo ijadufuo vua ije no kuariaeva ije gianoega bu izege revoga no ije giano kuae. \v 37-38 Fu ijiege kuamoga Banabasi fune uri e Joni Maki mesiri buina vakiro vierafe rove Foru fu vierafega fu naebe marei. Ijadufuo maeje e Joni Maki fu naebe buina ime vakuma ubine ijia keke. Ro fume are Femefiria ijia uniana una ruaema ijadufuo fu ije ijuonei. \v 39-40 Ijadufuo Banabasikiro Foru bu bue madinamima areme bune ijia unianamina buone binobino vae. E Banabasi fune uri Joni Maki mesirina sisime abena are Saefurasi ijia vae. Bune vakoga Foru fune uri e Saerasi mesirina vakuvenoga e Godi ma vierafevo ije bu anadiana kia, Godi fu ja marejiakono kiana uniavo bune vae. \v 41 Areme Foru fune Saerasi mesirina aesakae Siriakiro Sirisia guove ijia vakinu Godido vua ije abe sosi boeje ijia kuariakinu daro miaejana vae. \c 16 \s1 Timoti fu Forukiro Saerasina vaema ijene \p \v 1 Ijiege rena Forukiro Saerasi bune vakuma are Debikiro Risitura ijia usiae. Ro e be Godi ma vierafemo ive fuone Timoti fu ijia fine. E ije asie fuone fudua fu Godi ma vierafemo ro fuje fu bara Jiusi ro asoe fuone fu e Gurisiko. \v 2 Ro e Godi ma vierafevo are Risiturakiro Ikoniamu kariva ije e Timoti buka dabe nidoevo. \v 3 Ro e Foru fuka Timoti mesirina fuosiki vakiro vierafei. Ijadufuo fu dabe vajae surive fuone kanaufuna nuga nijaejae. Ijadufuo maeje e Jiusi boeje ijia kariva ije bune vierafega Timotido asoe ije fu e Gurikiko. Ro kuke fu naebe surive fuone kanaufuna nuga nijakuma e Jiusi buka naebe oemareke ijadufuo fu dabe surive fuone kanaufui. \v 4 Areme bune sidove binobino ijia vakinu akae ije e Afasero ijiakiro e mamekanu ije bu Jerusareme ijia kuaena naeva ije abe e Godi ma vierafevo ije kuariajana vae. \v 5 Bu ijiege ifejiakinu kuariavoga e sosi boeje ijia karinoeva ijiebuo ma vierafevo ije fuka darokuma ubaerei. Ijadufuo maza besubesu e uruvana buka Godi ma vierafe areme una buina mazie. \s1 Foru fu nimamaena e Mesedoniako ije giaema ijene \p \v 6 Areme Foru fune kairafa fuone kaenamiana aesakae Firigiakiro Garesia guove ijia vako Godido Kavene fu kiae, Ja Godido vua ije jade abena sakae Esia vano kiamoga bu naebe ijia vae. \v 7 Ro bune una vakuma are be Misiano kuavo ubine ijia usiaena nana sakae Bitinia vakuvejoga Jesudo Kavene ije fu ijuonena vame buone bijukurae. \v 8 Ijadufuo bune sakae Misia ijia usiaena nana are Turoasi ijia vae. \v 9 Areme Foru fu muge nimamaena gake e Mesedoniako be fu ijia manina anaena kua, Ni ro Mesedonia ijia no ifejuono kuamo fune gae. \v 10 Foru fu ijiege nimamae areme kuomoga no urina Mesedonia vakuae sinuome nuvuone kanafui. Ijadufuo maeje no vierafe Godi fune no umui tuaema ijadufuo no va ijia usiaena vua fuone maeje abe e ije kuariakiro no ije vierafei. \s1 Godi fu bara Ridia kenujaema ijene \p \v 11 Ijiege rena none sisime abena are Turoasi arena urari vakuma are Samaturasi ijia usiae. Areme nituame none vakuma are Neaforisi ijia usiae. \v 12 None ijia usiaena diake vakuma sidove Firifae ijia usiae. Ro sidove ije fu e Mesedoniako ijiebuo sidove ireobo ije bu e Romuko samuavo no ijia usiaena mu sibaneke ijia kari. \v 13 Areme maza ije bu mauike karijo ijia no sidove ije arena va do irifo ijia oenoe. No vierafero are ije e Jiusi bu baname isoevo ije fu ijiaro no ijadufuo ijia vae. No va gake bara bino bu ijia afui karivaga no usiaena buina vua kuae. \v 14 No buina vua kuaevoga bara Ridia are Taeatirako fu ugone ni mukore sagumo ije fu ijia fido fu fina vua nuvuone fieme. Ro bara ije fuka naenitua Godi baname isoemo ijadufuo E Ireobo fuka nigofo fuone samadirejae. Ijadufuo fu mauikeigia fina Foru vua ije fu kuaemo ije fie. \v 15 Ijadufuo bu uri agane fuone ijena kame do ruoriavoga fu kuomo no are fuone ijia vae. Fu kuo, Ja vierafega naeje nane E Ireobo ije ma vierafejoga ni ro naena are none ijia karino kue. Bara ije fu ijiege kuaruona ka soesoemoga none fuina are fuone ijia vae. \s1 Forukiro Saerasi bu ke dibure uniaeva ijene \p \v 16 Areme mu be no una are bu baname isoevo ijia vakuae vakoga bara be bu monido fuaeveva fu kavene ise ijare niromo ije fu kekena biedue. Ro bara ije fu ire bino bu rade rekuvejo fu ije giana e kuariamo. Fu ijiege giana kuariako e bu moni uruvana karina e fuone fu samuavo ije fuaevejo. \v 17 Bara ijare no Foruna nuveduo ruakinu kume, E ije bu Godi Ireobo kave gufe fino ijadufuo imenoevo. Ijadufuo bu Godi fu izege ja karauniadufuo bu ije kuarianoejono kumei. \v 18 Ro bara ije fuka maza uruvana ijiege kumeno ijadufuo Foru fuka ijuone. Ijadufuo fu una dakude kavene ise ije fu niromo ije kuae, Na Jesu Kuraesido ive ijia kuavono ni bara ije arena keke vano kuae. Fu ijiege kuamoga kavene ise ije fuka ve ijia bara ije arena keke vae. \p \v 19 Areme e ije bara ije samuavo ije bu gake vame buone bu moni abejo ije bune bijui. Ijadufuo bu uri Forukiro Saerasi faradiana kame maniaruna are makave e mamekanu bu koto revo ijia vae. \v 20 Bu kaenamia va e mamekanu koto fievo ije vajiana kiae, E ige bu e Jiusi ro buka sidove nuvuone igia ire ise binobino renoeve. \v 21 Ijadufuo maeje vame buone bu e nijasiavo ije bu e Romuko ige no izege nuvuonina renoevo bu ijiege renoevo bakino kiae. \v 22 Bu ijiege kuariavoga e boeje bune uri Forukiro Saerasi okuriana kaniadufuo kuae. Areme e mamekanu ije bune e buone kiavo bu urina ugone buone bu saeva ije azojia areme ifiae. \v 23 E ije bune Forukiro Saerasi kame vame ise ijia ifiama areme kaenamia dibure ijia uniae. Areme bune e dibure samuamo ije kuavo fu dibure viene dabe mukoreigia bijukuriae. \v 24 E ije dibure samuamo ije fune Forukiro Saerasi kame dibure ma guove ijia uniana uri dia buone guegue kame ine aoge mamekanu ijia kiriaejiae. \p \v 25 Areme ve ufirema ijia Forukiro Saerasi bune karina Godido baname isoekinu dua uruko e dibureko gue bu karina faziave. \v 26 Bu ijiege karina faziavo ijia saroruba sakae ije fuka dabe uvekoga are diburaka ije fuka uruvanaigia uvei. Fu ijiege uvemoga viene boeje buka azoekisakoga ire seni ije bu kena e dibureko toenamiaeva ije boeje buneka iraekisa furi. \v 27 Ro e ije dibure samuamo ije fu uri turanamina gake viene boeje buneka azoevaga fu vierafero e dibureko boeje bune usiae subinae vaevaro fu ijiege vierafe. Ijadufuo fu uri sime fuone ijare dabe fue bijanamikiro vierafe. \v 28 E ije fune ijiege fue kananamikuvenoga Foru fu uri aramazana kuae, E gare noeje no uria igifurekino ade oe kananamikumano kuae. \p \v 29 Fu ijiege aramazana kuamoga e ije dibure samuamo ije fuka urukeigia jumei. Ijadufuo fuka migegireigia raetefuo kumena fune difurina aru tuana Forukiro Saerasi ireva ijia dijei. \v 30 Areme fune kaenamiana keke ae makave ijia kiae, E mamekanu gurie, na irere abekuva Godi fu na kenujiekono kiae? \v 31 Fu ijiege kiamoga bu una kuae, A Jesu E Ireobo ije ma vierafekuma Godi fu a agane one ijena karauniakono kuae. \v 32 Ijadufuo e ije fune kiamo bune are fuone ijia vae. Areme Forukiro Saerasi bune uri E Ireobo ijadufuo vua ije dabe fu ro e fuone boeje are besu ijia kariva ije kuariae. \v 33-34 Areme muge besu ijia e ije dibure samuamo ije fu uri do jiana matane buone soejiama areme ire vajiamo bu i. Bune ire ina furivoga Forukiro Saerasi bu uri fu abero agane fuone boeje kame Jesudo ive ijia do ruoriae. Areme e ije fune agane fuone ijena buka ireobo oemarei. Ijadufuo maeje bu vierafega bune iviama una Godido agane ijena mazie. \s1 Forukiro Saerasi bu dibure arena usiaeva ijene \p \v 35 Areme nituame suoke e mamekanu koto fievo ije bu e buone juo karijo ije vua nijiana kume, Ni e ije kia bu usiae vano kumei. \v 36 Ijadufuo e dibure samuamo ije fu una Foru kuae, E mamekanu koto fievo ije bu kume ni usiae vano kume ijadufuo ni oemarekinu vano kiae. \v 37 Fu ijiege kuaramoga Foru fu una e ije juo karijo ije kiae, Noeje no e Romuko ro no ise bino no naebe rei. Ro bume no kame e boeje ijiebuo nidua ijia ifuoma kame dibure unue. Rove iviama bu vierafe buka no mauikeigia kuoga no usiae vakuae vierafe rove nobe ijiege reke. Ijadufuo maeje no vierafe buka e mamekanu koto fievo ijiebe korubuo ruoma igia usiaena kuoga no ijare usiaena vakono kiae. \v 38 Ijadufuo e juo karijo bu vua ije abena una va e mamekanu koto fievo ije kuariae. Bu ijiege kuariavoga bu fieke Forukiro Saerasi bu e Romukogana buka jumei. \v 39 Ijadufuo bune ro Forukiro Saerasi kiae, No vierafe noka isema reva ijadufuo ni guona areno kiae. Areme bune kaenamia usiae makave ijia kiae, Ja isekie jade una oenoekiro nika sidove ige arena vano kiae. \v 40 Areme Forukiro Saerasi bune dibure ije arena usiae bara Ridiado are ijia vae. Bu vakuma are ijia usiaena e Godi ma vierafevo ije bino biediae. Areme bune urina e ije ifejiakinu ejafiana vua kuariama areme bune sidove ije arena vae. \c 17 \s1 Foru fu sidove Tesaronaeka ijia Godido vua maeje e ije kuariaema ijene \p \v 1 Areme Forukiro Saerasi bune sidove Firifae arena vakuma are Emififorisikiro Aforonia guove ijia usiaena vakuma sidove Tesaronaeka ijia usiae. Ro e Jiusi ijiebuo are bu afuina vua kuaevo ije be fu ijia manine. \v 2 Ro Foru fune izege fu naenitua renoeno ijiege fune are ije e Jiusi bu afuina vua kuaevo ijia vae. Areme fune maza ije e Jiusi bu mauike karijo inokubeke ijia e ijena Godido vua maeje dabe mukoreigia kuariana nijasiae. \v 3 Ijadufuo e ije bu ve ijia vua ije fiena vierafero E Ije Godi kuamo fu ari ruaema ije fu igia nuvuefuo isejavaema barone areme una urimaro bu ijiege vierafei. Ro kuke fu kia, E Jesu na kuariavo ije fu ma E Ije Godi fu kuamo fu ari ruaema ijeno kiaema ijadufuo bu ijiege vierafei. \v 4 Ijadufuo e gue bu vua ijare oe buone ije kemoga bu una Forukiro Saerasina rei. Ro e Gurikiko uruvana Godido baname isoevo ijiakina bara mamekanu gue budua bu una buina rei. \p \v 5 Rove e Jiusi bu giake e boeje buneka una Forukiro Saerasi vame bu kevo ijia nuvediavoga buka zie. Ijadufuo bu urina e ise gue kiavoga bu una buina besu afuima areme bune Forukiro Saerasi kaniakuae kuae. Bu ijiege rena uri e boeje sidove ijia kariva ijene kame oe kuderiavoga buka defarudiae. Ijadufuo bune Forukiro Saerasi reriana e Jesonido are ijia vae. Bu vierafe buka kaenamia e boeje ijiebuo nidua ijia vakuae bu ijadufuo reriana vae. \v 6-7 Bu va rerianoe gake Forukiro Saerasi bu baki. Ijadufuo bu una Jesonikiro e Godi ma vierafevo gue kame maniaeruna e mamekanu kariva ijia vae. Bu va ijia usiaena kume, E ije buka are irore boegia oenoekinu ire ise uruvana renoeve. Ro iviama bu sidove nuvuone igia rovoga e Jesonire kaenamiana are fuone ijia uniae. E ije buka e Romuko ijiebuo kini ijadufuo akae ije dabe tuaseve. Bu ijiege rekinu kuaevo, E Jesu fu kuke e kini beno kuaevono kumei. \v 8-9 Bu ijiege kumevoga e boeje abena e mamekanu sidove ijia kariva ije bu vua ije fievo buka naebe oemarei. Ijadufuo bu urina Jesonikiro e ije gue kiae, Ja iviama moni ige no kiavo ije vajuokuva no kiaga ja vakono kiae. \s1 Forukiro Saerasi bu Beria ijia vaeva ijene \p \v 10 Areme muge besu ijia e Godi ma vierafevo ije bune Forukiro Saerasi kiavo bune are Beria ijia vae. Bu va ijia usiaena bune e Jiusi ijiebuo are bu afuina vua kuaevo ijia vae. \v 11 Ro e Jiusi are ijia karijo ije bu naebe e Tesaronaekako bu reva ijiege rei. Ijadufuo maeje buka Godido vua ije fiekuae ireobo vierafei. Ro buka mumaza Godi vua ije mukoreigia dakinu vua asune fie. Bu ijiege dana giaga Foru vua fu kuariamo ije fune ma kuariavoga bu ije gakuae ijiege rei. \v 12 Ijadufuo e uruvana sidove Beria kariva ije buka Godi ma vierafei. Ro kuke e anuigi gue abero bara Gurikiko ije budua buka ma vierafei. \v 13 Areme e Jiusi sidove Tesaronaeka ijia kariva ije bu fieke Foru fu Godido vua ije abe e Beriako ije nijasiamo bu fie. Ijadufuo bu va garia usiaena e ijiebuo oe ije kame arafiriaga buka uri irufui gue rekuae vierafei. \v 14 Ijadufuo e Godi ma vierafevo ije buka migegireigia urina Foru kuavo fune sidove be davare irifo ijia vae. Ro e Saerasikiro Timoti bu arena una Beria ijia kari. \v 15 Ro e ije Foru mesiri vako ije bune mesirina vakuma are Atenesi ijia nujae. Areme bune una Beria vakuvejoga Foru fu kiae, Ni va Saerasikiro Timoti kiaga bu migegire na vako nuvedieno kiae. \s1 Foru fu Atenesi ijia Godido vua ije kuariaema ijene \p \v 16 Foru fu uria sidove Atenesi ijia fina Saerasikiro Timoti samuagiamo ijia fu giake sidove ije funeka godi binobino bu umui ijia amaeriava ijiebe uruvana revo fu giamo fuka oefiae. \v 17 Ijadufuo fu va e Jiusi ijiebuo are bu afuina vua kuaevo ijia aruna e Jiusi baki ijiakiro e Jiusi ije Godi ma vierafevo ije vua uruvana kuariae. Ro maza boeje fu va sidove makave bu ire fuaevevo ijia e ije ruovo ije vua kuariae. \v 18 Ro e vua nijasiavo gue bu kia Efikurineno kiavo ijiakina e Sitoikino kiavo ije bu usiana Foruna vua gikikimana kuae. E gue bu kuae, E buzeme guraeje fu irerefuo aroekarana vua ijiege kuaemono kuae? Ro gue bu kuae, E ije fute e ae binoko ijiebuo godi ijiebuo kuaemono kuae. Bu ijiege kuaeva ijadufuo maeje Foru fu Jesusina kuariakinu izege fu baronena una urima ije kuariamo ijadufuo bu ijiege kuae. \v 19 Ijadufuo bune Foru mesirina are be e bino bu kia Erofegasino kiavo bu kariva ijia vae. Bu va ijia usiaena kuae, Ni vua iviaeko ije a dabe e boeje kuariamo ijadufuo maeje kuaruoga no fiene. \v 20 No fiega vua bino a kuaruomo ije fuka ni be ijadufuo no vierafe a vua ijadufuo maeje kuaruoga no fieno kuae. \v 21 Ijadufuo maeje e Atenesiko abero e ae binoko buina sidove ijia kariva ije buka maza boeje vua iviaeko kuaenoekinu ro fiekuae vierafevo. \p \v 22 Ijadufuo Foru fune uri e ije bu kia Erofegasino kiavo ije bu afuina vua kuaevo ije kiae. E Atenesiko igie, ja vame jone ja godi binobino baname isoevo ije na giaga jaka naebe totei. \v 23 Na sidove jone igia oenoekinu are boeje ja godi jone baname isoevo ije nane giae. Ro ije guove ijia na giaga ja fata be ja zinone ifaejevo ijia ja vua be Godi ije ja naebe gaeva ijadufuo isoeva na gae. Ja Godi ije ja fuone baname isoevo ije jaka naebe gae ijadufuo na iviama kuariako ni fiefo. \v 24 Godi ijare aesakae boege amaeri areme ire boeje amaeriana ke guove ijia uniae. Ijadufuo fure fuosukua fu saove gufiakiro ume igadufuo E Ireobo ijene. Ro fuje fu are ije bu e umui ijia saeva bu ijia baname isoevo fu ijia fino baki. \v 25 Ro kuke fu ema bu ire ma bino kena fu vajadufuo ije fuka naebe vierafe. Ijadufuo maeje fune fure fuosukua fina ema ume igia oenoevo ije ifejiako bu oe ufekinu oenoevo. Ro kuke fure ire boeje binobino ifejiamo ijadufuo buneka fuone bijana abevo. \v 26 Godi ijare iko zinume ijia e besu amaerimoga e binobino aesakae boegia kariva ije bu fuone uinuvena ruae. Ro fune fure ude e uifari izege bu ume igia ruadufuo ro kuke bu izia karidufuo ije fune vierafei. \v 27 Fu vierafe fu ijiege amaeriakina bu uri fu rerena gake. Ro fuje fu mumabo ijia fuka baki ro fuka no ivuake ijia oenoene. \v 28 Ijadufuo maeje bune e jone guebe bu ijiege kuae, Ema noeje fure amaeruo areme daro muoko no ni uria karikinu oenoevono kuae. Ro kuke e gue bu kuae, Noeje no anafa fuoneno kuae. \v 29 Ijadufuo noeje no Godido anafa ijadufuo nobe vierafero noka ire gorodi ro siriva ro mune ijia kena Godi maeje amaerikiro nobe ijiege vierafedufuo. \v 30 Isuibe e boeje bu Godido maeje buka naebe gae ijadufuo bu ise renoe. Rove fuka naebe ke isekafiakiro vierafei. Ro iviama fune e boege karinoeva ije kiamoga bune vame ise bu renoevo ije arena una oe kuderiana vame ma ijia karinoeve. \v 31 Ro kuke fune maza ije fu fina e boeje kena besu enafu mazie giadufuo ije fune nijae. Ro e ije fu fina e boeje kena mazie giadufuo ije fune baronemoga Godi fu kenujamo fu una urimo none gae. Ijadufuo no vierafe vua ije Godi fu kuaema ije fune ma kuae. \p \v 32 Foru fu maza ijia vua ije e bu oena una urivo ije kuaemoga e gue bu fiena uri fu dabe varaeme. Ro gue bu kuae, No vierafe aka maza be una ro vua ije kuaruo no fieno kuae. \v 33 Bu ijiege kuaevoga Foru funa are ije arena keke vae. \v 34 Ro e gue bu vua ije fiena una E Ireobo ma vierafei. Ro e ijeja e Daeonisi e Erofegasi be ijiakina bara Damarasi ro e gue ijiebe Foruna vae. \c 18 \s1 Foru fu sidove Koriniti ijia vaema ijene \p \v 1 Areme Foru fune sidove Atenesi arena una sidove Koriniti ijia vae. \v 2 Fu va ijia kekena e Jiusi be bu kua Akuirano kuavo ijiakiro bara fuone Firisira ije biediae. Ro e Akuira e Fonitasiko ije fu aesakae Itari ijia fino ro iviama fu una urina sidove Koriniti ijia fikiro ruae. Ijadufuo maeje E Itariko ijiebuo kini e Korodiasire e Jiusi boeje bu are Romu guove ijia karivo ije fuka ijuone. Ijadufuo fu kuriaerena rorukuriaemoga fu bara fuone ijiaki urina sidove Koriniti ijia ruae. \v 3 Ro e Foru i fuone fu meno ije fu fanu surive bu ae savo ije sagumo. Ro ino baraki ije budua i besu ije mevo. Ijadufuo Foru fu maza be bu giakiro va ijia buina fikinu ifejiana fanu surive saguko e bu fuaeve. \v 4 Ro Foru maza boeje fu maza ije bu mauike karivo ijia va e Jiusi ijiebuo are bu afuina vua kuaevo ijia vua kuariamo. Fu vierafe fuka e Jiusi ijiakiro e Jiusi baki ije oe buone kame kuderiaga bu vua fuone ije fiena Godi ma vierafekiro fu ije vierafei. \p \v 5 Ijadufuo maza ije e Saerasikiro Timoti bu aesakae Mesedonia arena uri Koriniti ruaeva ijia Foru fu i ije ino baraki fu ifejiana meno ije fune ijia arei. Areme maza boeje fu va e Jiusi ijene Godido vua ije kuariakinu nijasiame. Fu kia, E Jesu fu ma e ije bu kua Mesaeano kuavo fu ruakono kuaeva ijeno kiae. \v 6 Rove buka uri fu ijuonena vua ise kuaravoga fu uri ugone fuone kuokuo ije nidua buone ijia kananae. Fu kanakanakinu kiae, Ja oenoene maza rade irufui bino biediakuva ije na nare isema reva baki. Ro jane kojo revo ijadufuo ja ije vierafedufuo. Na Godido vua maeje nane kuariae rove ja naebe fie. Ijadufuo ivia nane urina una e Jiusi baki ije nijasiake vakono kiae. \v 7 Ijadufuo fune bu arena uri e Taetiasi Jasitasino kuavo ijadufuo are ijia vae. Ro e Taetiasi fu e be Godi ma vierafemo ro are fuone ije fu e Jiusi ijiebuo are bu afuina vua kuaevo ije ivuake ijia manino. \v 8 Ro e Kurisifasi fu are ije e Jiusi bu afuina vua kuaevo ije samuamo. E ije fu Foru vua ije fu Jesudo kuaemo ije fiena fune agane fuone ijena una E Ireobo Jesu ma vierafei. Fu ijiege rekoga e gue Koriniti ijia kariva ije budua bu vua ije fiena ma vierafevoga bu kaenamia Jesudo ive ijia do ruoriae. \p \v 9 Areme muge be Foru fu nimamaena gake Godi fu kuae, A vua ije a kuariamo ije ade jumena arekiro nika giriesana faememare kuariane. \v 10 Ro naeje naka maza boeje osiki oenoevo ijadufuo e bube a isema redufuo. Ijadufuo maeje e uruvana gue sidove Koriniti ijia kariva ije buka e noneno kuae. \v 11 Foru fu ijiege nimamaena gaema ijadufuo fune oemarekinu Godido vua maeje dabe e ije sidove Koriniti kariva ije nijasiae. Fu juaevasia besu ro asame sigisi ijiege fu ijia fina vua ije nijasiae. \v 12 Ro maza ije e Romuko bu e Gario abevo fu e ije aesakae Akaea kariva ije samuagiamo ijia e Jiusi gue bu besu afuina Foru mesiri koto rekuae ruae. \v 13 Bu usiaena e ireobo Gario kuae, Foru fuka no soesoena kuo, Jani vame nuvuone ije no Godi baname isoevo ijia nuveduono kuome. Rove no vierafe vua ije fu kuaemo ije fuka akae nuvuone abe tuasemono kuae. \p \v 14-16 Areme Foru fune iko uri vua kuariakuveno ijia e Gario fu uri e Jiusi ije kiae, Foru fu ma ire be isema rekuma ije na vierafe na igia fina vua jone fieke. Ro gaga vua ije ja kuaekuvejo ije ja una akae jone ro vua bino ro ive jone ijadufuo kuaekuvejoga ije na vierafe ni kojo kuaena amaerino kiae. Ro naeje na vua ijieki ije na isediemo ijadufuo nabe ifejiana koto jone rekono kiae. Areme fune uri e ije kiamo bu koto ije arena usiae vae. \v 17 Ro e Jiusi ije buka naebe oemareva ijadufuo bu usiaena e Sositeni e ije sosi samuamo ije fare dabe e boeje ijiebuo nidua ijia kanae. Bu e ije dabe ijiege kanavoga e Gario fu giae rove fu naebe vafiae. \s1 E Akuirakiro Aforasi ro bara Firisira ijiebuo vua ijene \p \v 18 E Foru fu maza sibaneke uruvana fu una are Koriniti ijia e Godi ma vierafevo ijena finoe. Areme fu uri anadiama areme fune e Akuirakiro bara fuone Firisira ijena sisime abena bune are Siria ijia vae. Bu aesakae Siria ijia vakuvejo ijia Foru fu are Senetirae ijia uri Godido ive ijia kurana kiamoga bu nigofo u fuone ije ufujae. \v 19-21 Areme bune ruoma are Efesasi ijia usiae areme Foru fune e Akuirakiro bara Firisira ijene ijia uniae. Fu ijia uniana fune e Jiusi ijiebuo are bu afuina vua kuaevo ijia vae. Fu va ijia kekena e Jiusi ijena vua kuae. Areme bu urina kuae, No vierafe anika maza uruvana noena igia fino kuae. Bu ijiege kuarae rove fu naebe ijia fikiro vierafei. Ijadufuo fu kia, Na vaga Godire kiekuma na sone una giake ruakono kiana fune sisime abena aesakae Judia ijia vae. \v 22 Foru fune sisime abena vakuma are Sesaria ijia kekena fune nana sidove Jerusareme vae. Fu va ijia kekena e sosi ijia kariva ijene anadiama areme fune nana sidove Enitioki ijia vae. \v 23 Foru fune maza isekube sidove Enitioki ijia fikinu e ije bu sosi ijia afuivo ije i izege fu menoema ijene kuariae. Areme fune uri aesakae Garesiakina Firigia ijia oenoekinu e ije Godi ma vierafevo ijene vua nijasiakinu ifejianoeko bu daro abeve. \p \v 24 Ro e Jiusi be ive fuone Aforasi bu are Arekesediria ijia bieteva ije fu are Efesasi ijia ruae. Ro e ije fuka Godido vua ije bu isuibe isoeva ije mukoe kuaekinu vierafemo. \v 25 Ro kuke fu E Ireobo ijadufuo Vame bune nijaevo fune vierafei. Ijadufuo fu Jesudo vua ije fuka mukoreigia kuaekinu vierafemo. Rove fume vame izege e Joni fu e do ruoriamo fu ijiaru vierafei. Ro fu vame iviaeko e bu izege rena Godido Kavene abevo ije fu naebe vierafei. \v 26 E Aforasi fune va e Jiusi ijiebuo are bu afuina vua kuaevo ijia aruna Godido vua ije dabe darokuma kuariae. Fu ijiege kuariamoga e Akuirakiro bara Firisira bu vua ije fiena usiae fu mesirina va are buone ijia usiaena uri Godido Vame ije mukoreigia kuarana nijae. \v 27-28 Areme e Aforasi fune are Gurisi ijia vakiro vierafei. Ijadufuo e Godi ma vierafevo are Efesasi ijia kariva ije buka fu ejafana fasi isoe. Bu isoena uviarafa buone Godi ma vierafevo aesakae Gurisi kariva ije nijiana kuariaga buka Aforasi mukoreigia oemarekinu mesirikuae bu ije isoena nijae. Areme Aforasi fune vakuma are Gurisi kekena uri e ije Godi fu ma rejiana ifejiamoga bu Jesu ma vierafeva ije ifejiae. Ijadufuo maeje fuka e boeje ijiebuo nidua ijia vua gikikimana kuaekinu e Jiusi ijiebuo vua ije fuka kaniatuamo. Fu ijiege rekinu una Godido vua ije bu isuibe isoeva fu kuae, Jesu fu ma E Ije Godi kuaga fu ruakono kuaeva ijene mukoreigia nijasiana kuariae. \c 19 \s1 Foru fu sidove Efesasi ijia vaema ijene \p \v 1-2 Ijiege rena Aforasi fu uria sidove Koriniti ijia fikoga Foru fune aesakae Firigia guove ijia oenoena areme fune vakuma sidove Efesasi ijia kekei. Areme fune va e Jesudo vua fievo ijia kariva ije biediaena kiae, Ja maza ije ja Jesu ma vierafeva ijia jabe Godido Kavene abevano kiae. Ru bu una kuae, No Godido Kavene ije a kuaema ije no naebe vierafevano kuae. \v 3 Ijadufuo Foru fu urina kiae, Ro jaeje bu kaenamiana do ije bu izege ruoriaevano kiae? Foru fu ijiege kuariamoga bu kuae, Noeje bu kaenamuona e Joni do ije fu ruoriaema ijiege ruoruevano kuae. \v 4 Ro Foru fu una kiae, Joni e ije fu kaenamiana do ruoriaema ije bu ise buone bu renoevo ije buneka arevoga fu kaenamiana do ruoriae. Fu ruoriakinu kia, Ni e ije fu rade ruomo ije ma vierafeno kiae. Ro e ije fu kuariaema ije fu e Jesudo kuariaemano kiae. \v 5-7 Areme e ije bune vua ije fiena kuae Jesu fu E Ireobono kuaevoga Foru fu kaenamiana Jesudo ive ijia do ruoriae. Areme fune umui nigofo naejiamoga Godido Kavene ije fu buone ruae. Ijadufuo buka urina isama binobino bu naebe vierafeva ijene kuaekinu ire bino rade rekuveno ijene kuae. Ro e ije ire ije reva ije bu e tuero ijiege. \p \v 8 Areme e Foru fune va e Jiusi ijiebuo are bu afuina vua kuaevo ijia aruna vua e ije vua nijasiae. Fu asame inokube ijia buina finoekinu vua maeje Godi fu izege e fuone ijiebuo oe ije samuagiamo ijene mukoreigia darokuma kuariakinu nijasiae. \v 9 Ro e gue buka nigofo gikikimana ijadufuo bu naebe ma vierafei. Ijadufuo buka uri e boeje nidua ijia Jesudo vame iviaeko ije dabe buzeina vua isema kuae. Bu ijiege revoga Foru fune ijia arena uri e Jesudo vua fievo ije kaenamiana are be bu kua Tiriniasino kuavo bu ijia vua kuaevo ijia vae. Areme maza boeje fu ijia aruna e ijia ruovo ije buina vua kuaemo. \v 10 Fu ijiege rekinu vakuma juaevasia inokiro furikoga e Jiusi ije abero e Jiusi baki aesakae Esia guove ijia kariva ije bu E Ireobo ijadufuo vua ije fie. \s1 E Sikivado anafa ijiebuo vua ijene \p \v 11 Areme maza ijia Godi fuka Foru daro iroebo mamoga fu ire sumiki binobino renoe. \v 12 Ro ire sumiki be ijeja e bu Forudo muko ijiakiro ugone iseke ije kena e adame abevo ije niriakiavo ije adame buone ije buka madiavo. Ro kuke kavene ise ije buka e ije arena usiae vako. \v 13 Ro e Jiusi bino bu ijia oenoekinu kavene ise rorukiavo ije budua bu vierafe buka E Ireobo ijadufuo ive ijia kavene ise ije kiaga bu usiae vakuae bu ijiege vierafei. Ijadufuo bu oenoekinu kavene ise ije kiavo, No Jesu e ije Foru fu kuaenoeno ijadufuo ive ijia kiavono usiae vano kiave. \v 14 E ije bu e Sikiva e Jiusi ijiebuo e anuigi fu Godido zinone ifaejemo ijadufuo farirafa e seveni ijiebe ijiege rei. \v 15 Ijadufuo maza be bu kavene ise ije fu e be niroema ije rorukuravoga fu una kiae, Na Jesukiro Foru ije nane vierafe ro e gure jaeje ja erano kiae? \v 16 Areme e ije kavene ise niroema ije fuka iraraena uri e ije kaniana matane vajiamoga bu detaba subinae vae. \v 17 Areme e boeje sidove Efesasi ijia kariva e Jiusi ro Jiusi baki ije bu vua ije fievo buka dejudia rove bu uria E Ireobo Jesudo ive ije abe aroe. \p \v 18 Ro e uruvana gue bu Godi ma vierafe ijadufuo bu usiaena e boeje ijiebuo nidua ijia ise buone bu renoejo ije visuna Godi kuarae. \v 19 Ro e uruvana gue bu e siga bijiakinu masirikiavo ijiebe buki buone boeje karina ro e boeje nidua ijia miane ifaeje. Ro moni ije bu buki ije akoeva ije fuka ma ireobo fifiti taoseni (50,000). \v 20 Godi fu Forudo duvado ijia vame daroki ijene remoga e bu uri E Ireobo ijadufuo vua ije dabe are irore ijia darokuma kuaena irana vae. \s1 E Efesasiko bu Foruna madinamiva ijene \p \v 21 Areme rade Foru fu Godido Kavene ijare nijaemoga fune aesakae Mesedoniakiro Akaea ijia urana una Jerusareme vakiro vierafei. Ijadufuo fu kuae, Na va Jerusareme fina areme nane una sidove ireobo Romu ijia vakono kuae. \v 22 Ijadufuo fune e inokiro fu ifejavo e Timotikiro Erasitasi ije kiavo bune Mesedonia ijia vae. Bu vakoga fuje fu una maza sibaneke aesakae Esia guove ijia oenoe. \p \v 23 Areme maza ijia e sidove Efesasi kariva ije bu E Ireobo ijadufuo vame iviaeko ijene gavo buka ireobo defarudiae. \v 24 Ro e Dimiturasino kuavo ije fu ire siriva ijia kena ire binobino amaeriamo. Ro ire ije fu amaeriamo ije fu godi be bu kua Atemisino kuavo ijadufuo are bu fu baname isoevo ijieki isesina ije umui fuone ijia amaeriamo. \v 25 Ijadufuo fu e fuone i mejo boeje abero e bino i ijieki mejo ijene kumevo bu besu afui. Bu afuivoga fu uri kiae, E gurie i ige no mejo ije noka moni mukore amaerivo ije jane vierafei. \v 26 Rove iviama jane kojo e ije bu kua Foruno kuavo ije irere fu remo ije jane fiekinu gavo. E ije fu kuae godi ije bu e umui ijia amaeriaevo ije buka godi ma bakino kuae. E ije fuka e boeje ijiege biesirianoekinu kuariakoke e Efesasiko ige abero e aesakae Esia guove ijia kariva ije buka una vua fuone ije abeve. \v 27 Fu ijiege remo ijadufuo na vierafe rade i ige no mevo ije funeka isereke. Ro be ije na vierafe rade are ije godi Atemisi fu fino ije e buka nese gadufuo ro kuke fuone maeje funeka darobitedufuo. Ro e boeje Esia kariva ije abero e aesakae boege bu fuone baname isoevo ijadufuo ire boeje bu ijiege rekuva ije fune mukoe iseredufuo. \p \v 28 Fu ijiege kuariamoga e boeje bu vua ije fievo buka defarudiamoga bu urina kume, E Efesasi ijiebuo godi Atemisi ije fuka ma ireobono kumei. \v 29 Bu ijiege kumevoga e boeje sidove guove ijia kariva ije buka ma ireobo de farudiae. Ijadufuo bu uri e Geasikiro Arisitasi e Mesedoniako ije bu Foruna oenoejo ijene kame maniaeruna are ije e bu afuivo ijia vae. \v 30 Ro Foru fu vierafe fuka e boeje bu afuiva ijia va vua kuariakiro vierafei. Rove e ije Godi ma vierafevo ije buka uri fu kuriaerena vafui. \v 31 Ro kuke kairafa fuone gue bu e mamekanu rena sidove ije samuavo ije budua bu Foru vua nijana kume, A e boeje bu afuiva ije ade ijia vakono kumei. \v 32 Ro e boeje bu are ijia afuiva ije buka uruvana omanive. Ijadufuo maeje e gue bu uri vua bino kuaekoke gue budua bu vua bino kuaevo ijadufuo buka fienamivo baki. Bu ijiege revoga e boeje bu ijia afuiva ije bu irerefuo ijia ruaeva ije buka naebe vierafe. \v 33 Areme e Jiusi ije bune uri e Arekiseda kuana ka kikekemavo fu urina e boeje ijiebuo nidua ijia mani. Fu ijia maninoga e gue bu gana vierafero fute ire be isema remaro bu uri vua nijaena kuarae. Ijadufuo e Arekiseda fune urina umui ijia vafiana vua ije izege fu naebe isema rema ijene kuariakiro vierafe. \v 34 Rove e boeje bu gake fuje fu e Jiusi gana bu uri besu afuina kume, E Efesasi ijiebuo godi Atemisi ije fuka ma ireobono kumei. Bu maza jiamadogo ijiege kumena vakuma sone ijia arei. \p \v 35 Areme sidove ijadufuo e ireobo ije fu e boeje kiamo bu arena una mauike kari. Bu mauike karikoga fu kiae, E Efesasiko igie, e boeje are irore ige bune vierafega fune sidove Efesasire godi ireobo nuvuone Atemisi ijadufuo are ije samuamo. Ro kuke fune sidove ijare mune ije uikubae fuone ijieki ije fu kave gufia kuarina arima ijene samuamo. \v 36 Ijadufuo fu erare vua isema fuesina kuaekuma baki. Ijadufuo nika sone oe vafaekiro jade ire ise bino revo. \v 37 Ro e ige ja kaenamia ruaeva ije bu ire bino godi Atemisido are ijia keva baki. Ro kuke bu vua ise bino godi nuvuone ijadufuo kuaeva baki. \v 38 Ro gaga e Dimiturasikiro e fuone imejo bu vierafega e bino bu isemarekuva ni kiaga bu kaenamia maza ije e mamekanu bu koto fievo ijia va koto redufuo. \v 39 Ro ja giaga ire bino buka mamekanukuva ije ni arekina ja sone va are ije e Efesasiko bu afuina vua kuaevo ijia kuaefo. \v 40 Ro ire ige ivia no reva ije e mamekanu Romu kariva ije bu fiekuva bu vierafero no nuvue bijaevaro bu ijiege vierafeke. Ijadufuo na vierafe e mamekanu bu ro kuokuva noka izege kuariakuva bakino kiae. \v 41 Fu ijiege kuaria areme fune kiamoga e boeje bune una are buone ijia vae. \c 20 \s1 Foru fu aesakae Mesedoniakiro Gurisi ijia vaema ijene \p \v 1 Ijiege rena e boeje bune vakoga rade Foru fune una e Godi ma vierafevo ije kumeno bu besu afui. Areme fune uri ejafiana kuariakinu anadiama areme fune uri aesakae Mesedonia ijia vae. \v 2 Fu va aesakae ijia oenoekinu e boeje ejafiana kuariakinu ruoma aesakae Gurisi ijia kekei. \v 3 Areme asame inokubeke fu ijia fina areme fune una urina are Siria vakiro sinuome kanaufui. Fu ijiege remo ijia fu fieke e Jiusi ije bu fu kanakuae kuaevoga fune ijia arena una Mesedonia vakiro vierafe. \v 4 Ijadufuo fune e gue kaenamiana fuina vae. Ro e ije fu kaenamiana vaema ije e Faerasido fari Sofata e Beriako ijiakina E Tesaronaekako inokiro e Arisitasikiro Sekunedasi ijene. Ro e gue ije Gaeasi e Debiko ijiakiro e Timoti ro kuke e inokiro aesakae Esiako e Tisikasikiro Torofimasi ijene. \v 5 Ro e ije bune ude vakuma are Toroasi ijia usiaena no samuaguona ijia kari. \v 6 Bu ijia karikoga noeje none are Firifae ijia iro ije bu kua Burete Iriaeki Ire Isiti Bakino kuavo ijene i. Areme none sisime abe vakuma maza umui fague furikoga no Toroasi ijia usiae bu biediana none buina fura besu ijia kari. \s1 E Iutikasi fu baronemoga Foru kuamo fu una urima ijene \p \v 7 Ro fura be ijadufuo maza amure ijia no besu afuina kari ire ikoga Foru fu ijia urina e boeje vua kuariae. Foru fu nituame suoke fune vakiro vierafe ijadufuo fune e ije vua kuariako vakuma ve ufirei. \v 8 Ro gire kave guove no afuiva ije buka raete boeje ijia sanave. \v 9 Ro e momokana be ive fuone Iutikasi fu isuo tire bu umateva ijia fina Forudo vua ije fieme. Fu ijia fina vua ije fiekinu nisuitabae vakuma fune ninaenoga fu gire kave ijia ari kanamo fu ari ruoma ume gumia dije. Fu ijia dijemo e gue bu usiae umui kena gake fune baronei. \v 10 Areme Foru fune ari gamia kekena e ije fare urina abe una oeigia nisae. Areme fune urina e ije kiae, E ige fu naebe baronemano jade ireobo vierafevono kiae. \v 11 Foru fu ijiege kuaria areme fune una ajia gire gafia kekena uri burete abe tuana e ijena i. Areme fune una vua fu kuariamo ije kuaena vakuma maza ijia namoga fune bu uniana vae. \v 12 Foru fune vakoga e ije bune uri e ije ari kanaema ije mesirina are fuone ijia vae. Ro e ije ari kanaema ije fu ijiege una urimoga e boeje buka oemarei. \s1 Foru fu e Efesasiko ijiebuo e mamekanu ije anadiana vaema ijene \p \v 13-14 Areme none are Asosi vakuvejoga Foru fu kuo, Jani ude sisime abena va Asosi ijia na biedieno kuona fune diake vae. Fu vakoga none sisime abena vakuma Asosi ijia Foru biena mesiri areme none vakuma are Mitirini ijia usiae. \v 15 Areme nituame none vakuma are Kaeosi ijia usiaena nana vakuma mu besu furikoga no are Samosi ijia usiae. Ro nituame none vakuma are Maeritasi ijia usiae. \v 16 Ro Foru fu vierafe fuka aesakae Efesasi asina vake ro fube maza uruvana ijia oenoedufuo. Ijadufuo maeje fu vierafe fuka migegire Jerusareme vaekina fu maza ije bu kua Fenitikosino kuavo ije buina rekiro vierafei. \p \v 17 Areme Foru fune are Maeritasi ijia figana e mamekanu Efesasi sosi ijia kariva ije vua nijiana kume, Ni ro na gieno kumei. \v 18 Fune ijiege kumenoga e ije bune rovoga fu urina kiae, Ja izege na iko ro aesakae Esia guove igia jaena oenoeva ije jane vierafei. \v 19 Na E Ireobo ijadufuo i ije na menoeva ije naka kabuaekabuaekigia nimenoekinu menoe. Ro maza ijia naka ire ise boeje biediana isejavae. Ijadufuo maeje e Jiusi ijiebe mauike na kaniekuae renoevo ijadufuo na ijiege renoe. \v 20 Ro na vua maeje boeje ja fiedufuo ije naneka vua gire jone besubesu ijia ro kuke are ije e boeje bu afuivo ijia kuariakinu nijasianoe. Ro na vua ma bino ja ifejiadufuo ije na naebe fei. \v 21 Na vua maeje nane abena e Jiusi ije abero e Jiusi baki ije kuariae. Na kia, Ni ise jone ja renoevo ije arekiro una oe kuderia Godido ruakinu E Ireobo nuvuone Jesu Kuraesi ma vierafeno kiae. \v 22 Ijadufuo iviama nane Godido Kavene Akae ije irinana Jerusareme vake. Ro na ijia vaga irerebe none redufuo ije na naebe vierafei. \v 23 Ro na Kavene Akae fu irufui bino bu rade none redufuo ije fune kuariemo nane fie. Ijadufuo sidove binobino na oenoeva ije Kavene Akae fu kie, E buka rade a dabe dibure nujakinuro ire ise bino one rekono kie. \v 24 Rove na irufuo ije bu rade none redufuo ije nabe ireobo vierafeke. Ro na vierafe naka i none E Ireobo Jesu fu miemo na ruaeva na ije me furike. Ro i ije fu miema ije fu kie, Ni va vua maeje Godi fu izege e boeje ma rejiakinu karauniamo ije dabe e kuariano kie. \p \v 25 Ro maza ije na jaena oenoeva ijia nane vua boeje izege Godi fu e fuone ijiebuo oe ije samuagiamo ije kuariae. Ro iviama na vierafe e boeje ja rade una na giekuva baki. \v 26-27 Ijadufuo na ige kuariako fiefo. Na vua boeje Godi fu vierafe na ja kuariadfuo ije nane kuariae. Ro ja Godi ijuonekuva ije na nare isema reva baki. \v 28 Ijadufuo ni kojo samuanamikinu ro e ije Jesu fu kavuane fuone ijia fuaevena Kavene Akae kena uniaejiaema ije mukoreigia samuagiafo. Ni e ijene izege e mave-sifi samuagiamo fu mave fuone samuagiamo ijiege bu mukoe samuagiafo. \v 29 Na vierafe na vakuva rade e ka ise bino bu ro jaena oenoekinu e ije sosi ijia kariva ije izege bu ma vierafevo ijene kame arafiriajiake. \v 30 Ro vakuma maza abekuma e jone gue jaena besu sosi ijia kariva ije buka una e gue biesiriake. Bu biesiriana vua kufui bino kuariakuva e Godi ma vierafevo gue buka una bu nuvediake. \v 31 Ijadufuo nika mukoreigia joe samuanamikinu oenoefo. Ro ni izege na juaevasia inokubeke mumaza nidokuma oenoekinu izege ja joe samuanamidufuo na kuariaeva ije vierafedufuo. \p \v 32 Ro iviama jaeje nane kena una Godido umui tare ijia uniado fure ja mukoreigia samuagiake. Ijadufuo ni izege fu ja marejiaema ije vierafekinu oenoekina ijare ifejiaga ja una Godido e rena ire fuone maeje bino kedufuo. \v 33 Ro nana e binobuo sirivakiro gorodi ro ugone buone na ije kekiro vierafeva baki. \v 34 Ro jane vierafe na ire boeje na e naena oenoejo ijena no vierafeva ije na kono umui none igia imena moni abe ire ije fuaevena vajiae. \v 35 Jane izege na naenitua renoekinu e adagi ifejiaeva ije jane gie. Ijadufuo no E Ireobo Jesu vua fu kuaema ije nobe toteke. Fu kuae, No e gue ire bino vajiavo ije noka ireobo oemarevo. Ro no e guebe una no vajuovo ije no ireobo vierafevo bakino kiae. \p \v 36-37 Foru fu vua ijene kuariama furi areme fune buina augesana baname isoe. Areme e boeje bu uri fu gana niraekinu anaena uimi. \v 38 E boeje bu Foru gavo buka oefiadiae ijadufuo maeje fu kiae, Nabe una giakono kiaema ijadufuo buka oefiadiae. Bu ijiege rena bune fuina sisime ije namo ijia vae. \c 21 \s1 Foru fu sidove ireobo Jerusareme vadufuo ijene \p \v 1 Ijiege rena none bu anadiama areme uniana none sisime abena ruoma are Kosi ijia usiae. Ro nituame no vakuma are Rodesi ijia usiaena nana vakuma are Fatara ijia usiae. \v 2 Areme no gake sisime be fune are Fonisia ijia vakuvenoga none ijia ajiana vae. \v 3 No vakinu are Saefurasi no umui aeneke asina vakuma are Taea aesakae Siria irifo ijia usiae. Areme sisime no vako ije fune sinuome gue karana ijia nakuvenoga no ijia ari. \v 4 No ijia arina e Godi ma vierafevo gue biediana none fura besu buina ijia kari. Ro e ije bune Godido Kavene ijare kuariaema ijadufuo bu Foru fu Jerusareme vadufuo ije bu vafui. \v 5 Areme none bu vakovejoga e boeje bune agebara buone ijena sidove ije arena noena vakuma davare irifo ijia usiae. No ijia usiaena none buina davare tage ijia augesana baname isoe. \v 6 No baname isoema furina nuvuone ananamima areme none sisime ijia ajiana vakoga e ije bune una are buone ijia vae. \p \v 7 None are Taea ijia sisime abena vakuma are Toremasi ijia usiae. Areme none e Godi ma vierafevo gue ijia kariva ije biediana anadiama areme none mu besu ijia buina kari. \v 8 Areme nituame none vakuma are Sesaria ijia usiaena none ijia ari. No ijia arina none va e be Godido vua maeje kuariamo e Firifino kuavo ijadufuo are ijia usiaena fuina kari. Ro e Firifi ije fu e seveni ije bu Jerusareme ijia keva ije fu e be. \v 9 Ro e ije fu kabaerafa fuone inokiro kiro inokiro bu naebe baru maniae ro kuke buka Godido vua ije mukoe vierafena kuaevo. \v 10 No buina mu sibaneke ijia karivaga e Godido vua vierafena kuaemo be e Agabasi kuavo ije fu sakae Judia ijia urina no guokiro ruae. \v 11 Fu ruoma ijia kekena uri Forudo birete ijare dabe diakiro umui fuone ijene kiriae. Areme fune urina kuo, Kavene Akae ije fu na kie e birete igafuo asoe ije bu e Jiusi Jerusareme kariva ijiebe fu dabe ijiege toke. Areme bu mesirina e Jiusi baki ije miakono kue. \p \v 12 Fu ijiege kuaruomoga no fiena uri e boeje ijia kariva ijena Foru kuriaerei. Areme no kuae, A Jerusareme ijia abe vakono kuae. \v 13 Ro Foru fu kuo, Ja irerefuo oefiane abekoke oe none fuka naebe madieme. Naeje nane samuaeva ijadufuo bu na toenamiekuva ije fune mareke. Na Jesu E Ireobo ijadufuo ive ije dabe kuaenoejo ijadufuo bu Jerusareme ijia na kanie na baronekuva ije fu marekono kue. \v 14 Ijadufuo no vafuvo fune faememaremoga no ijia arei. No arena una nuvue kuae, Ni arega E Ireobo fu izege fu vierafema ijia rega no gano kuae. \v 15 Areme none mu sibaneke buina ijia karina none sinuome nuvuone kanafuima uri Jerusareme ijia vae. \v 16 No vakoga e Jesudo vua fievo gue are Sesariako ije bu noena vae. Ijadufuo bune no kaenamuona e ije no fuone vako ijadufuo are ijia vae. Ro e ije ive fuone Nesoni fu e are Saefurasiko ro fu isuibe Godi ma vierafemo. \s1 Foru fu sidove Jerusareme kekema ijene \p \v 17 Areme none vakuma Jerusareme usiaevoga e Godi ma vierafevo gue ijia kariva ije bune oemarekinu anaduona kaenamue. \v 18 Areme nituame Foru fune noena e Jemisi gakuae vae ro maza ije e sosi ijiebuo e mamekanu ije bu ijia besu afuina kari. \v 19 Ijadufuo Foru fune urina bu anadia areme vua boeje izege fu i menoeko Godi fu e Jiusi baki ijiebuo rema ijene e ije kuariae. \v 20 Fu ije kuariamoga e boeje bu vua fuone fiena buka una Godido oemarei. Areme bu una Foru kuae, Uvia nuvuone gare, e Jiusi ma uruvana bu Jesu ma vierafe rove buka uria akae ije oetuana mukoreigia nuveve. \v 21 Bu vua one a kuariamo ije bune fie. Bu fiega are oenoekinu e Jiusi boeje bu e ae binoko ijena kariva ije nijasia kinu kiako bu Mosisido akae ije bu nuvevo ije bu arevo bu ije fie. A ijiege renoekinu ro kuke kiakoke bu anafa buone ije kame surive buone kaniaufuna nuga naejiave. Ro kuke a kiakoke bu e Jiusi ijiebuo vame bu naebe nuvediavo bu ije fie. \v 22-24 Ro igia a ruaema ije bune fiedufuo ijadufuo no izege reke? No vierafe aka vua irere ige no kuaravo ijiege reke. E inokirokiro inokiro igia noena kariva ije bu akae oenoeje. Ijadufuo bu va e boeje ijiebuo nidua ijia ire bino rekuva ni buina va ifejiana moni one ijia fuaevega bu nigofo buone ufu korene. A ijiege rekuma e boeje bu vierafero vua boeje bu oesina kuaevo ije fu ma bakiro bu ijiege vierafeke. Ro kuke bu vierafero a Mosisido akae ije ane mukore vierafekinu nuvediamoro bu ijiege vierafedufuo. \v 25 Ro una e Jiusi baki ije bu Godi ma vierafevo ije none fasi isoe nijiana kuariaedo bube ire ije bu kena godi bino zinone ifaejiaeva ije ike. Ro kuke bube fanu kavuane ijiakiro fanuve ije bu kena mauike uro maniavo ije idufuo. Ro bube bara ro baru turavono kiae. \v 26 Bu ijiege kuaravoga nituame Foru fune e ije kaenamiana bune vae. Bune va e boeje ijiebuo nidua ijia usiaena Foru buina ire bino revoga e ije bu giana vierafero bu akae oenoejoro bu ijiege vierafe. Areme fune va Godido are ijia aruna e Godido zinone ifaejemo ije kuae, No mu sibaneke samua fu furiga no e ije besubesu ijiebuo Godido zinone ifaejekono kuae. \s1 Bu Godido Are ijia Foru farena toeva ijene \p \v 27 Areme fura besu furikuveno ijia e Jiusi gue are Esia guove ijia kariva ije bu ude Foru fu Godido Are ijia oenoeno bune gae. Ijadufuo bu uri e boeje ruaeva ije oe buone kame kuderiavoga bu ziena uri Foru farei. \v 28 Bu farena kume, E Isureroko gurie ifejuofo. E igare are irore ijia oenoekinu e Isureroko ige nuvuesina kuaemo. Fu ijiege kuaenoekinu Mosisido akae ijiakiro Godido Are ijiebuo vua ise kuaenoene. Ro ivia fu kuke Godido Are Akae ige dabe buzeina e ae binoko ijene kaenamiana igia aru ruaemano kumei. \v 29 Ijadufuo maeje e Torofimasi e are Efesasiko ije fu Foruki sidove ijia oenoeno bu gae. Ijadufuo bu vierafero fu Forure e ije mesirina Godido Are ijia aru ruaemaro bu ijadufuo ijiege kumei. \p \v 30 Rove e boeje sidove guove ijia kariva ije buka totenami ijadufuo bume difurisae ijia usiaena uri Foru farei. Bu fare dabe meru usiae Godido Are ijadufuo makave ijia vakoga bune viene boeje kame bijukuriae. \v 31 Areme bune uri Foru kana fu baronekuae renoevoga e be fune difurina vakuma e Romukobuo e ireobo fu fino ijia kekei. Fu kekena kuae, E Jerusaremeko boege buka urukeigia vuakunedo bigake bu karine bijaekono va giano kuae. \v 32 Fu ijiege kuaramoga e ireobo ije fune migegire e azo kevo ijiakiro e mamekanu buone ije gue kaenamiana vakuma e boeje game bu afuiva ijia kekei. Areme e boeje bu gake fu e azo kevo ijena difurisae vuakoga Foru bu kanavo ije bu ijia arei. \v 33 Bu arekoga e ireobo ije fune kekena kiamo bu Foru farena seni inokiro kame toe. Areme fune uri e ije kiae, E ige era fu irere abemano kiae? \v 34 Fu ijiege kiamoga e boeje bune uri vua binobino kuarae. Rove e ireobo ije fu vua maeje fuka naebe mukoe fie. Ijadufuo maeje e boeje bu fienamikinu vua kuaevo baki. Ijadufuo fune e fuone azo kevo ije kiamo bune Foru mesirina una are buone bu ire gikikimana ijia saeva ijia vae. \v 35 Bu mesiri are buone viene ijia ajia vakoga e ije zievo ije buka Foru kanakuvejoga e azo kevo ije buka dabe giena guove ijia aru vae. \v 36 Bu are vakoga e ije zievo ije bu rade nuvedia vakinu kume, E ije ka kana fu baroneno kumei. \s1 Foru fuka korofuo giriesana koto fuone rema ijene \p \v 37 E azo kevo ije bune Foru dabe giena are buone ijia aru vakuvejoga fu urina e ireobo buone ije kuae, E ireobo, a isekie nabe vua be a kuarakono kuae? Fu ijiege kuamoga e ireobo ije fune kuae, Ro abe e Gurisi ijiebuo isama ije kuaemo? \v 38 A e Gurisi ijiebuo isama ije kuaekuma na vierafero a e Ijifitiko bakiro na ijiege vierafeke. E Ijifitiko ije fuka iviama igiebure e uruvana (4000) ijiege kaenamiana ae sao ijia vae. E ije fu vierafe fuka e uruvana kaenamia afuina areme una e Romuko ijena bijaekiro vierafei. Ijadufuo ije abe are ijiege re ke a bakino kuae? \v 39 Fu ijiege kuaramoga Foru fu kuae, Naeje na ma e Jiusi bu sidove ireobo Tasasino kuavo aesakae Sisiria guove ijia bietanie. Ro asekie, abe kiega na e boeje gume vua kuariano kuae. \v 40 Fu ijiege kuamoga e ireobo ije fu kuae, Ije fune maremano ni kuariano kuamoga Foru fune keke viene ijia mani. Areme fune umui ijia e boeje vafiamo bu mauike karikoga fune urina e Iburukobuo isama ijia vua ijiege kuariae. \c 22 \p \v 1 E uviarafa none abero asoerafa none igie, nana ire ise be jone reva baki ijadufuo na vua ige kuariakono ni fieno kiae. \v 2 Areme fu uri e Iburu vua ijia kuariamo bu fievo buka oeseradiamoga bu mauikeigia karina fiekoga fu ijiege kuariae. \v 3 Naeje na e Jiusi bu are Tasasi Sisiria guove ijia bietanie. Areme bu mesiriena igia Jerusareme rovo na e Gameriodo rotire ijia sikuru rei. Ijadufuo na asaerafa nuvuone ijiebuo akae boeje bune mukoreigia nijasievo nane fie. Na Godido i ije ja izege dabe darokuma menoejo ije nadua naka besu ijiege mukoreigia imenoejo. \v 4 Ro ude naeje naka e ije bu Godido vame maeje renoevo ije kame isema rekinu kaniavo gue bu oe. Na ijiege renoekinu bara ro baru ije faradiana kame dibure unianoe. \v 5 Ro ja vierafega vua ige na kufuimena kuariavogakuva ni e Godido zinone ifaejevo ijiebuo e mamekanu ije abero e mamekanu gue ije kia giafo. Ja kiaga na kufuime ro na ma kuariavoga bure kuariaga ja fiefo. Ijadufuo maeje bure fasi isoena na naejiena kievo na va are Damasikasi kekena e Jiusi Jesu ma vierafevo ijia kariva ije toenamiavo. Na ijiege faradiana seni ijia kame toenamiana kaenamia una are Jerusareme ruoga bu kame isekafiavo. \s1 Foru fu izege Jesu fu kenujaema ije kuariaema ijene \r (Ekisi 9:1-19; 26:12-18) \p \v 6 Ijadufuo na maza be e Jesu ma vierafevo are Damasikasi kariva ije toenamiakiro vae. Na vakuma maza uvuoka abeko nane are Damasikasi ivuareva ijia vebu ijare saroruba karakogana are ije na manivo ijia fuka mukoreigia sanae. \v 7 Fu sanamoga na tuana ume ijia dije areme nana fiekoga vua be fu kave gufia ijiege kumei, Soru Soru, a irerefuo none isema remono kumei? \v 8 Fu ijiege kumemoga na una gue kume, E Ireobo a e gufe a erareno kumei? Ro fu una kume, Na Jesu e Nasaretiko ije nare. Rove aka na dabe ire ise bino rekinu vajae fiane vajiemono kumei. \v 9 Ro e boeje ijia naena ireva ije bu ire ije sanaema fu saove gufia sanana ari ruaema ije bune gae. Rove vua ije fu kuariemo ije buka naebe fie. \v 10 Areme na una kume, Ro E Ireobo na izege rekono kumei? Na ijiege kumevoga E Ireobo ije fu una kume, Ni urina are Damasikasi ijia vaga bu i irere Godi fu vierafe a redufuo ije kuarano kumei. \v 11 Areme e ije naena vaeva ijiebe na umuikievoga none Damasikasi ijia vae. Ijadufuo maeje ire ije sanaema ijare ni none fune iserei. \p \v 12 Ro are Damasikasi ijia e Ananaeasi kuavo ije fu ijia fino. Ro e ije fuka e be Godi mukoe vierafekinu akae fuone boeje iriniamo. Ro kuke e boeje are Damasikasi ijia kariva ije buka fu mukoreigia aguaevo. \v 13 Ijadufuo e ijare ruoma na fivo ijia kekei. Fu kekena na ivuake ijia manime kie, Eko Soru uviano ni one fune maremano ni una ni nafaena rereno kie. Fu ijiege kuariekoga naka saroruba una ni nafaena rerei. \v 14 Areme na uri Ananaeasi gavoga fu kie, Soru aeje fune asaerafa nuvuone ijiebuo Godi ijare a umui datedo are ire boeje fu vierafema ije giana mukoe vierafeke. Ro kuke are Jesu e maturaema ije ni one ijia gakinu ro vua fuone fu kuaramo ije fieke. \v 15 Ijadufuo are Jesu irere fu one remo a gakinu fiema ijene dabe are irore ijia oenoekinu e boeje kuariake. \v 16 Ijadufuo a fina saroemo ije arekiro urina Godi baname isoena kuaga fu ise one boeje giana arega bu Jesudo ive ijia a do ruorano kie. \s1 Foru fu uria e mamekanu ije vua fuone kuariama ijene \p \v 17 Fu ijiege kuariemoga nane una va Jerusareme ijia keke areme nana Godido Are ijia aruna baname isoekiro vae. Na va ijia baname isoevo ijia na nimamaena E Ireobo ije gae. \v 18 Na gavo fu kie, Ni migegire Jerusareme arena vane. Ijadufuo maeje e boeje igia kariva ije bu vua none a kuariakuma bube mukoe fiekono kie. \v 19 Fu ijiege kiemoga na una kuae, E Ireobo na maza boeje naka e Jiusibuo are bu afuina vua kuaevo na ijia aruna e ije bu a ma vierafevo ije toenamiakinu kaniavo bune giena vierafei. \v 20 Ro kuke maza ije bu Sitivini e vua one vierafena kuaemo bu kanaeva ije nare buina kuaena irinanami. Ro kuke nare seti buone bu azo naeva ije samuagiakoga bu fu kanaevano kuae. \v 21 Na ijiege kuaravoga E Ireobo fu kie, Aeje nane nare umui datei. Ijadufuo are va e Jiusi baki ije bu mumabo ijia karinoeva ije vua none maeje dabe kuariakono kie. \p \v 22 Ijiege rena e boeje bu karina fiekoga Foru fu vua kuae vakuma areme ijiege kuariae. Rove bu vua ije fievo buka naebe oemarei. Ijadufuo buka uri urukeigia vijena kume, E ije fuka vua isema kuaenoeno. Ijadufuo noka iseduomo kana fu baroneno kumei. \v 23-24 Bu ijiege vijena kumekinu ugone buone azo nana uri sakae kuokuo ije numuna kave ijia korei. Ijadufuo e Romuko ijiebuo e ireobo ije fu uri e azo kevo ije kiamo bu Foru mesirina are gikikimana ije saeva ijia aru vae. Fu kia, Mesiri va ijia ifima areme kuaga fu e Jiusi ije bu irerefuo fu dabe ijiege revo ije kuariaga fieno kiae. \v 25 Areme bune uri ifikuae umui fuone kame tugie ijia kiriae. Bu ijiege kiriavoga Foru fu uri e azo kevo ijiebuo e ireobo ije fu ijia manino ije kuae, A e Romuko be bu kuae fu isema remano kuaevo ije a naebe ude vua fuone fie ro ame kiaga fu dabe ifivo ije fube maremano kuae? \p \v 26 Fu ijiege kuaramoga e ireobo ije fu vua ije fie. Ijadufuo fune va e Romuko ijiebuo e ireobo ije kuae, E gafe no dabe ifikuvejo ije fu e Romuko ijadufuo a izege vierafemano kuae? \v 27 Ijadufuo e Romuko ijiebuo e ireobo ije fune va Foru kuae, A vierafega a e Romukokuma ni kuarie na fieno kuae. Ijadufuo Foru fu una kuae, Ke naeje na ma e Romukono kuae. \v 28 Ro e ireobo ije fu una kuae, Nana ude na e Romuko baki. Rove naka moni ireobo fuaeveva ijadufuo iviama naeje nane una e Romuko revano kuae. Fu ijiege kuaramoga Foru fu una kuae, Ije nadua na e Romuko ijadufuo maeje orafa none ije bu e Romukono kuae. \v 29 Foru fu ijiege kuariamo fiena e ije bu duna binobino kuarakuae ivuake ijia ireva ije buka migegireigia una bio vae. Areme e Romuko ijiebuo e ireobo ije fu vierafega fu e Romuko ije dabe seni kiriaejaevaga fuka jumei. \s1 Foru fu e Jiusi ijiebuo e mamekanu ijena vua kuaema ijene \p \v 30 Areme nituame e Romuko ijiebuo e ireobo ije fu vierafe fuka vua maeje e Jiusi ije bu irerefuo Foru kanakuvejo ije mukoe fiekiro vierafe. Ijadufuo fune kiamo bu Foru seni umui ije bu toeva ije irase. Areme fune kuke e Godido zinone ifaejevo ijiebuo e mamekanu ijiakiro Jiusi e mamekanu boeje kiamo bu besu afui. Areme fune Foru kuamoga fu e ijena vua fuone kuaena irasei. \c 23 \p \v 1 Ijadufuo Foru fu uri e mamekanu ijia kariva ije giama areme kiae, Uviarafano, maza ije na iko oe dakudena Jesu ma vierafeva ijia ruoma iviama ige na vierafe nane vame Godi fu oemaedufuo ijiaru kena ruae. Ijadufuo na Godido nidua ijia na jaevevo baki. \v 2 Rove Ananaeasi e Godido zinone ifaejevo ijiebuo e ireobo ijare uri e ije bu Foru ivuake ijia ireva ije kiamo bu Foru itire mutui. \v 3 Bu ijiege kanavoga Foru fu una Ananaeasi kuae, Adua aka e ma baki ijadufuo Godi fuka rade a ijiege kanake. Ro ivia a e ireobo rena Mosisido akae ijia nuvena koto none fiemo ije fune marei. Rove ige a kiamo bu na kanieva ije na vierafega adua aneka akae dabe tuasemano kuae. \p \v 4 Fu ijiege kuaramoga e bino Foru ivuake ijia ireva ije bu uri Foru kuae, Aeje a e izeki ijadufuo a vua ise ijieki ijene una e ireobo Godido zinone ifaejemo ije kuaramono kuae. \v 5 Ro Foru fu una kiae, Uviarafano na e ije fu e ireobo Godido zinone ifaejemo ije na naebe vierafe ijadufuo na vua ijieki ije kuarae. Ijadufuo maeje Godido vua bu isuibe isoeva ije fu ijiege kuae, \q1 Jade e ireobo jone fu ja samuagiamo ije vua ise bino kuaravono kiae. \m \v 6 Areme Foru fu giake e ije afuiva ije gue bu e Feresi ro gue bu e Sejusi. Ijadufuo fu uri kiae, Erafano naeje na e Feresi ro kuke na e Feresi ijiebuo fari. Ro ige na e mamekanu igiebuo nidua igia manivo ijadufuo maeje na vierafega Godi fu e ije oevo ije fu kiaga bu rade una urikono kiae. \p \v 7 Foru fu ijiege kuariamoga e Feresi ije abero e Sejusi ije bune uri dabe ata guegue rena bue madinami. \v 8 Ijadufuo maeje e Sejusi ije bu vierafero e ije oevo ije bu una urivo bakiro bu ijiege vierafevo. Ro kuke bu vierafero Godido anera ijiakiro kavene ije bu bakiro bu ijiege vierafevo. Rove e Feresi ije bu vierafega e oevo ije bu ma una uridufuo. Ro kuke anera ijiakiro kavene ije buka maga bu ijiege vierafei. \v 9 Ro e Feresi gue e Mosisido akae nijasiavo ije buka uruke zie. Bu ziena kuae, E ije no gaga fuka ire ise bino naebe rei. Ijadufuo no vierafe e ije fute fune ma Godido anera ro ba kavene ijare kuaraga fu kuaemono kuae. \v 10 Areme e Romuko ijiebuo e ireobo ije fu gake e ije buneka urukeigia madinamivo fu giae. Fu vierafero bigake e ije bu ijiege revake uri Foru kana fu baronekiro fu ijiege vierafe. Ijadufuo fu uri e azo kevo ije kiamo bu va e ije afuiva ijia usiaena Foru mesirina una are buone gikikimana bu saeva ijia aru vae. \v 11 Areme muge besu ijia Jesu fu Foru ivuake ijia manina kuae, Vame ije a renoeno ije ade arekiro nika giriesane. Ni vua none maeje izege a dabe Jerusareme igia kuariaema ijiege una kuke va Romu ijia kuariano kuae. \s1 Bu Foru kanakuae vierafeva ijene \p \v 12-13 Areme nituame suoke e Jiusi gue bune mauike bue afuima areme vua kuaena ijunami. Bu akae be nijana kuae, No irekiro do ije nobe ikiro noka ude Foru kana areme no sone rade ikono kuae. Ro e ije afuina vua kuaeva ije buka e foti (40) ijiege. \v 14 Areme bune va e mamekanu Godido zinone ifaejevo ijiakiro e aeko ijiebuo e mamekanu boeje kiae. No akae be nijaedo no Foru kana areme ijare irekiro do ike. \v 15 Ijadufuo ni iviama e mamekanu jone ijena vua e Romuku ijiebuo e ireobo ije biesirina nijaga fu Foru mesirina igia ruafo. Fu mesiri roga ja Foru kuaga fu vua maeje kuaria ja fiedufuo. Ro fu uria igia ruakiro ruomo ijia no vame ijia kanakono kiae. \p \v 16 Bu mauike ijiege kuaenoejoga Foru kaju fuone fu vua ije fie. Ijadufuo fune difirina vakuma e azo kevo ijiebuo are ijia kekena Foru kuarae. \v 17 Ijadufuo Foru fune e azo kevo be kuamo fu romoga fu kuae, E nikaki ige mesirina vaga fu vua be e ireobo one ije kuarano kuae. \v 18 Foru fu ijiege kuaramoga fune e nikaki ije mesirina e ireobo ije fino ijia vae. Fu va ijia kekena kuae, Na e nikaki ige fu vua be a kuarakiro vierafe. Ijadufuo Foru e game dibure fino ije fu kiega na mesirina one ruaevano kuae. \v 19 Ijadufuo e ireobo ije fune uri e nikaki ije umui kena va mauike kuae, A vua irere na kuariekiro vierafemano kuae. \v 20 Ro e nikaki ije fu una kuae, E Jiusi gue bune vua kuaena irinanami. Ijadufuo isuome bu a biesiraga a Foru mesirina game e Jiusi ijiebuo e mamekanu bu kariva ijia vaga bu Forudo vua maeje fiekono kuae. \v 21 Ijadufuo a vua buone ade fiemo ijadufuo maeje e uruvana buka fu kanakuae vame ijia samuana kari. E ije bune akae be nijaedo bu fu kana areme bu sone irekiro do ike. E ije bu vua ijiege kuaeva ijadufuo buneka rekuae vua one fiekuae samuaevano kuae. \v 22 E nikaki ije fu ijiege kuaramoga e ireobo ije fu una kuae, A vua ige a na kuariema ije ade e bino kuariamono kuana fune kuamo fu una vae. \s1 Foru bu mesirina e ireobo Firikisido vaeva ijene \p \v 23 Areme e azo kevo ijiebuo e ireobo ije fune e fuone inokiro kiamo bu ruae. Bu rovoga fu kiae, Ni e azo kevo tu aderedi (200) ro e osedo oenoejo e seveniti (70) ijiege kefo. Ro kuke ni e juvuave ijia bijaevo tu aderedi (200) ijiege ke areme nine ivia muge vakake ijia sidove Sesaria vafo. \v 24 Ro ose bino kena Foru vajaga fu ijia ajia figa ni mukoreigia mesirina e Romuko ijiebuo e ireobo Firikisi fino ijia vano kiae. \v 25 E azo kevo ijiebuo e ireobo ije fu ijiege kuariama areme fune fasi be ijiege isoe. \q1 \v 26 Fasi ige na e Korodiasi Raesiasi nare isoena e ireobo Firikisi ije a nijana anadave. \v 27 E Jiusi boeje bu bue ijunamina e ige Foru kanakuae kuae. Rove na fiega fuje fu e Romuko ijadufuo na e azo kevo none ijena va ifejana kenujae. \v 28 Areme na vua ije bu irerefuo fuesina kuaevo ije fiekiro mesirina e Jiusi ijiebuo e mamekanu kariva ijia vae. \v 29 Ro na va fiega bu uri e Jiusi ijiebuo akae buone fu kuaema ijadufuo vua uruvana fuesina kuae. Bu vierafe Foru fu akae buone tuase ijadufuo bu fu kanakuae vierafe. Ro na gae fu ire ise bino fuka naebe rei ijadufuo na vierafe nabe fu kana ro mesiri dibure nujadufuo. \v 30 Ro rade na fiega e Jiusi ije buka fu kanakuae ijunamivoga na fie. Ijadufuo na migegire kiavo bu mesirina one ruae. Ijadufuo na e ije bu fuesina kuaevo ije kiaga bu vua nidua one ijia vua ije fuina kuaena iraseke. Fune ijene. \m \v 31 Areme e azo kevo ije bune e ireobo buone fu kuariaema ijiege rena uri Foru mesirina mugu vakuma are Enitifatirisi ijia usiaena ijia naoe. \v 32-33 Areme nituame e azo kevo ije diake vako ije bune una are buone ijia vakoga e ije osedo vako ije bune Foru mesirina vakuma are Seseria ijia usiae. Areme bune fasi ije abena e ireobo Firikisi ma areme bune Foru abe ijia fu nujajae. \v 34-35 Areme e ireobo ije fune fasi ije abe dama areme uri Foru kuae, Aeje a e izekono kuae? Fu ijiege kuamoga Foru fu kuae, Naeje na e aesakae Sirisiakono kuae. Ro e ireobo e Firikisi fu uri kuae, Na vierafe na samuaga e ije bu oesina kuaevo bu ruakuva na ijia una koto one rekono kuae. Areme fune e fuone kiamo bu Foru mesirina Firikisido ae maeje Kini Erodi fu sana barone vaema ijia nujae. Areme fune e juo karijo ije kiamo bune Foru mukoreigia samuae. \c 24 \s1 Firikisi fu Foru mesiri koto rema ijene \p \v 1-2 Areme mu umui fague furikoga e Godido zinone ifaejevo ijiebuo e ireobo Ananaeasi fune ruoma are Sesaria ije kekei. E ije fune e aeko ijiebuo e mamekanu ijiakiro e Teturasi e ije akae samuamo ije kaenamiana ijia usiae. Areme bune va Foru mesirina dabe e ireobo Firikisido are ijia aruna koto buone ije rei. Bu Teturasi kumevo fu aruna Forudo vua ije kuae. Ro vua ije fu Forusina kuaema ije fu ijiege, \q1 E ireobo aeje aka e ma ijadufuo a no mukoreigia samuague. Ijadufuo juaevasia uruvana noka naebe bijaekinu zienaminoe ro noka mukoreigia kafaena kari ruae. Ro kuke are no ifejuona vame maeje no ma karivo ije bino a aesakae nuvuone igia rei. \v 3 Ijadufuo no are iziebure no oenoejo ije noka oefuo kuaekinuro maza boeje noka one ireobo oemarevo. \v 4 Ro iviama nobe maza one dabe arafirina vua jiamadogo kuarake. Ijadufuo a isekie nime oemarekinu fina vua nuvuone aokube no kuarakuvejo ige fiene. \v 5-8 No e ige no gaga fuka ire ise boeje renoekinu e Jiusi aesakae boegia karinoeva ije vua ise kuariakoke buka una bue bijaekinu madinamive. Ro fuje fu e bino bu kia Nasarineno kiavo ijiebuo e ireobo be. Ro kuke fuka Godido Are ijia aruna are ije dabe arafirikiro remoga no ijadufuo toe. Ijadufuo no vierafe noka fu dabe una akae nuvuone ijia koto rekuae kuae. Rove fu e Romuko ijiebuo e ireobo e Raesiasire kiamo bu aruna mesirina una igia one ruae. Ro vua ige no kuaravo ije no ma kuara ro no kufuimevo ije a sone vua fuone fu kuaemo ijia fiena ma vierafekono kuae. \v 9 E Teturasi fu ijiege e ireobo Firikisi kuaramoga e Jiusi boeje budua buka uri e Teturasi vua fu kuaemo ije ifejae. Bu kuae, E Teturasi vua ije fu kuaemo ije fu ma kuae. Foru fuka ma ijiege isema renoeno kuae. \p \v 10 Areme e ireobo Firikisi fune Foru umui ijia kuamoga fune urina vua fuone ije ijiege zinuevei. Fu kua, Na vierafe aka juaevasia uruvana akae ije samuana e aesakae igia kariva bu ise revo ije koto buone fiemo. Ijadufuo ivia naka oemarekinu nidua one igia manina vua none ije kuaeke. \v 11 Ro vua none ijeja na mu sibaneke furima ijia na Jerusareme ijia Godido baname isoekiro vae. \v 12 Rove na naebe ijia aruna buina madinami. Ro kuke na naebe are buone bu afuina vua kuaevo ijia ro sidove guove ijia oenoekinu buina madinami. Ro vua ise gue kuariavoga bu ijadufuo bue bijaekinu madinami. \v 13 Ro vua gure bu noesina a kuarakuvejo ije bu izege vua maeje kuaradufuo ije fuka baki. Ijadufuo maeje vua ije bu noesina kuaevo ije na ise bino na naebe rei. \v 14 Ijadufuo igia fie, naeje na asaerafa nuvuone ijiebuo Godi ije baname isoekinu ro Vame ige bu kuae kufuino kuaevo na ijene nuvevo. Na ijiege rekinu ro naka Mosisido akae boeje ijiakiro e Godido vua vierafena kuaevo ijiebuo vua ije ma vierafevo. \v 15 Na izege bu Godi ma vierafevo ije nadua na besu ijiege ma vierafevo. Ro kuke na ma vierafero e boege oeva e ma ro e ise bu una urikiro na ijiege vierafevo. \v 16 Ijadufuo maza boeje naka giriesana Godi ro e ijiebuo nidua ijia vame maeje Godi oemaedufuo ijiaru kenoejo. \p \v 17 Na juaevasia sibaneke uruvana naka Jerusareme arena vae. Ro ivia na moni bino kena una e none ijia kariva ije vajiakinu Godido zinone ifaejekiro ruae. \v 18 Ro maza ije na Godido Are ijia aruna zinone ifaejekiro vaeva ije e bino bu naebe naena ijia aru vae. Na ijia aruna vame izege e Jiusi no rega no una maturaevo na ije rema furi. Rove e bino bu naebe ijia aruna naena zienamikinu bijae. \v 19 Ro maza ijia e Jiusi gue are Esiako ije bu ijia vuae. Ijadufuo izege na reva ije bure giedo bu igia noesina a kuarakuva ije fuka mareke. \v 20 Ro maza ije na Jiusi e mamekanu ijiebuo nidua ijia vua none kuariaeva ije bu fiega na ise bino naebe rei. Ijadufuo ni e gure ireva ije kiaga bure kuaraga a fiene. \v 21 Ro vua besu na ma nidua buone ijia kuaeva ije na ma vierafe e ije oevo ije bu una urivo ijadufuo na ije kuariae. Ijadufuo bu vua ijadufuo ijia kuarakuva ije fune marekono kuae. \p \v 22 Ro e Firikisi fu Jesudo Vame ije fune mukoreigia vierafei ijadufuo fu koto ije bijui. Ijadufuo maeje fu vierafe fuka e ireobo Raesiasire rade ro itire fuone ijia vua maeje kuarage fu fiekiro vierafe. Ijadufuo fu kia, Forudo koto ije na sone rade fiekono kiae. \v 23 Areme fune e juo karijo be Foru samuamo ije kuae, Ni fu mukore samuakiro maza bino ni abuega e fuone bu irere fu vierafema ije bino ifejano kuae. \s1 Foru fu e mamekanu Firikisikiro bara fuone Durusira ijiebuo nidua ijia vua kuaema ijene \p \v 24 Areme mu sibaneke furikoga Firikisikiro bara fuone Durusiraki ije bune karigana kiavo bu Foru mesiri aru ruae. Ro bara Durusira fu bara Jiusi be. Bu Foru mesiri rovoga bune karina fiekoga Foru fune vua ije izege bu Jesu Kuraesi ma vierafedufuo ijene kuarae. \v 25 Foru fune ijiege kuara vakuma areme fune uri vua ije izege no ma renoekinuro nuvue samuanamidufuo ijene kuarae. Areme fune kuke Godi izege fu rade una e boege ume igia oenoevo ije ke mazie giadufuo ije kuarae. Foru fu ijiege kuaramoga Firikisi fu vua ije fiemo fuka jui. Ijadufuo fu uri Foru kuae, Ni keke vakiro vua one na sone rade maza be ijia kumega a una ro kuaeno kuae. \v 26 Areme e Firikisi fu vierafe Foru fuka moni bino vajakiro fu ijiege vierafei. Ijadufuo fuka maza boeje Foru kumeko fu va are fuone ijia fuosiki vua kuaerume. \v 27 Fu ijiege rena vakuma juaevasia inokiro furinoga e Fosiasi Fesitasi fu e Firikisido are abena e Romuko ijiebuo e ireobo rei. Ro e Firikisi fu vierafe fuka vame be rega e Jiusi ije buka oemarekiro fu ije vierafe. Ijadufuo fu naebe Foru kuamo fu dibure ije arena keke ruae. \c 25 \s1 E Romukobuo e ireobo Fesitasi fu Foru mesiri koto rema ijene \p \v 1 Areme e Fesitasi fune ruoma Sesaria guove ijia kekena mu inokubeke furikoga fune urina Jerusareme vae. \v 2 Fu vakuma Jerusareme kekemoga e mamekanu Godido zinone ifaejevo abero e Jiusi e mamekanu bino bune urina Forudo vua ije kuarae. \v 3 E Jiusi ije bune Foru kanakuae ijunamiva ijadufuo bu vierafe buka Fesitasi kuaraga fu e kia bu Foru mesiri Jerusareme ruakiro bu ije viarefena fu soesoe. \v 4 Bu ijiege Fesitasi soesoevoga fu uri e ije kiae, Foru bu abena Sesaria ijia dibure nujae ro naeje na iviama igiebo nane una ijia vake. \v 5 Ijadufuo ni e jone mamekanu ije kia bu naena vaekina bu Sesaria ijia Foruna vua fuone kuaena gano kiae. \p \v 6 Ijiege rena Fesitasi fune mu sibaneke buina fina areme fune una Sesaria ijia vae. Areme nituame fune are ije bu koto revo ijia aruna figana kiamo bu Foru mesiri ijia aru vae. \v 7 Foru fune aru romoga e Jiusi Jerusareme ijia ruaeva ije bune biona fu dabe utikura areme uri vua ka kufui ijene fuesina kuae. \v 8 Rove Foru fuka korufuo uri giriesana vua fuone ije mukoreigia vierafekinu kuariae. Fu kiae, Naeje na e Jiusibuo akae bino na naebe ke tuase ro vua ise bino Godido Are ijadufuo kuae. Ro kuke na vua ise bino na naebe e Romuko ijiebuo e ireobo Sisado kuaevano kiae. \p \v 9 Rove e Fesitasi fuka una e Jiusi ije ifejiakiro vierafe ijadufuo fu uri Foru kuae, A vierafe nobe Jerusareme ijia vaga a nidua none ijia koto one rekono kuae. \v 10 Fu ijiege kuaramoga Foru fu una kuae, Na vierafe naka e Romuko ijiebuo e ireobo ijadufuo are bu koto mamekanu revo ijia oemarekinu vua none kuaeke. Ro ane koro vierafe naeje na ire ise bino e Jiusi ijiebuo reva baki. \v 11 Ro a vierafega na e Jiusi ijiebuo akae bino ke tuasena ire ise bino rejoga a ijadufuo na kaniekuae kuaekuma ije fune mare. Ro a gaga vua ige bu noesina kuaevo ije fu ma bakuma ije na vierafe fu erare na abe bu miaga bu ire bino none reke. Ijadufuo na vierafe na va e Romuko ijiebuo kini ije fuone vua none ije kuae irasekono kiae. \v 12 Foru fu ijiege kuaramoga Fesitasi fu una e mamekanu fu ifejana koto fievo ijena buone afuina vua kuae. Areme fune una kekena Foru kuae, A kie na e Romuko ijiebuo kini ijadufuo vakono kie. Ijadufuo na vierafe nane ivia kuaga a vakono kuae. \s1 Foru fu vua fuone Kini Agirifa kuaraema ijene \p \v 13 Areme rade maza sibaneke furikoga Kini Agirifakiro bara fuone Benesi bune Sesaria ijia e Fesitasi anaekuae ruae. \v 14 Bu ruoma Sesaria usiaena mu sibaneke ijia karina areme Fesitasi fune urina Forudo vua ije una Kini Agirifakiro bara fuone ije kuariae. Fu kia, E be fu e Firikisire dabe dibure nujaema fu igia fine. \v 15 Ro na are Jerusareme ijia vakoga e Godido zinone ifaejevo ijiebuo e mamekanu ijiakina e Jiusi ijiebuo e mamekanu ije bu vua ise bino fuesina na kuarie. Bu kie, Ani no kuoga no e ije kana fu baroneno kie. \v 16 Rove na una kiae, No e Romuko ije no e ijieki ije nobe migegire kena e bino vajiake. Ro no sone samuake bu va koto ijia e ije vua fuesina kuaema ijena vua bue kuaevo. Areme no ijia giaga bu ise bino re ro bu baki ije no ijia giavono kiae. \v 17 Na ijiege kiavoga e Jiusi ije bune igia rovoga na naebe saroe. Ro naka nituame aruna are no koto revo ijia figana kiavo bu Foru mesirina aru ruae. \v 18 Rove e ije bu Forusina kuaeva ije bu ire ise ije na fiekiro vierafeva ije bu naebe kuarie. \v 19 Ro bume vame buone bu izege Godi baname isoevo ijiakiro e Jesu kuavo ije fu baronema ijadufuo kuarie. E Jiusi ije bu kuae Jesu fune baronemano kuae rove e Foru fu kuae fu una urimano kuae. \v 20 Rove vua ije bu kuaevo ijadufuo maeje naka naebe mukore vierafe. Ijadufuo na Foru kuae, Abe va Jerusareme ijia koto one rekono kuae? \v 21 Na ijiege kuaravoga Foru fu kie, Na vua none na e Romuko ijiebuo e ireobo Sisa ije fuone koto rekono kie. Ijadufuo na e azo kevo none kiaga bu samuana karido bu mesirina e Sisado vakono kuae. \v 22 E Fesitasi fu ijiege kuaramoga Kini Agirifa fu kuae, Na vierafe naka kono e ijadufuo vua ije fiekiro vierafevano kuae. Ro e Fesitasi fu una kuae, Vua fuone a sone isuome fiekono kuae. \p \v 23 Areme nituame Kini Agirifakiro bara fuone Benesi bune e azo kevo ijiebuo e mamekanu ijiakina e maki sidove ije samuavo ijena are ije bu koto revo ijia aru vae. Bu ijia aru vakoga e boeje buka urina bu bienumiakinu kaenamiae. Areme Fesitasi fune kiamo bu Foru mesirina ijia aru vae. \v 24 Bu aru vakoga Fesitasi fu uri kiae, Kini Agirifakiro e boeje ja ruaeva ije ni e gure manino ije gafo. E ije bu e Jiusi bino igia ruaeva ije abero gue uria Jerusareme kariva ijiebe vua ise bino fuesina na kuarie. Buka uruvana igia vijena kume, E ije fuka baronekono kumei. \v 25 Ro na gaga e gure fu ire ise bino naebe re ijadufuo fube baroneke. Ro kuke fune korufuo kie fu e Romuko ijiebuo e ireobo ije fuone koto rekono kiema ijadufuo nane kiaga bu mesiri fuone vake. \v 26 Ro na ire ise ije fu irere rema ije na naebe fie. Ijadufuo na izege fasi isoena e Romuko ijiebuo e ireobo ije nijakuva baki. Ijadufuo na ije fu mesirina ja abero Kini Agirifa nidua jone ijia aru ruae. Ijadufuo ja vua fuone mukore fiega na sone ijare fasi be isoena e ireobo Sisa nijake. \v 27 Ro na ise irere bu fuesina kuaevo ije na naebe isoegaro name kiaga bu mesiri e Sisado vakuva ije fuka iserekono kiae. \c 26 \s1 Foru fu Kini Agirifa nidua ijia vua fuone kuaema ijene \p \v 1 Areme Agirifa fune uri Foru kuae, No kari fiekono nine urina vua one kuaega no fieno kuae. Fu ijiege kuamoga Foru fune uri umui akoena vua fuone ije ijiege zinuevena kuariae. \v 2 Kini Agirifa, na vua ije e Jiusi bu noesina kuaevo ije kuarako ni fiene. \v 3 A koro ane e Jiusi ijiebuo vame bu kevo ijiakiro vua buone binobino bu kuaena bue madinamivo ije ane mukore vierafe. Ijadufuo iviama na vua none ige kuarakuvejo ije mukore fiene. \v 4 Na uria iseke ije na zinuevena ire boeje na rena ruaeva ije e Jiusi ije bune vierafei. Na izege uria iseke ijia ruoma iviama ige na e none ijena finoekinu ro Jerusareme ijia finoeva ije bune giena vierafei. \v 5 Ro naeje naka ma isuibe e Feresi reva ije bu giena vierafe. Rove bute oemaredo bu a ijiege kuara ke bu baki. \v 6 Ro ivia ige na manina vua kuaevo ijadufuo maeje na vua ije Godi fu isuibe asaerafa nuvuone ije kuariana kia fu rekono kiaema na ije ma vierafevo ijadufuo na igia manive. \v 7 Ijadufuo e agane nuvuone tuero ije bu Godi vua ije fu kuaema ije fiena ma vierafei. Ijadufuo bu mumaza Godi baname isoekinu vua ije fu kuariaema ije samuavo. Ijadufuo Kini Agirifa nadua na vua besu ije e Jiusi bu ma vierafevo na ije ma vierafevo. Rove e Jiusi ije buka una vua binobino noesina kuaekinu na dabe koto renoeve. \v 8 Ro e Jiusi gurie, Godi fu e oeva ije fu kiaga bu una urivo ro ja irerefuo naebe ma vierafeve? \p \v 9 Ude nadua na vierafe naka vame binobino ijia e ije bu Jesu e Nasaretiko ije ma vierafevo ije arafiriakiro vierafe ijadufuo naka buina nigaraenoe. \v 10 Ro vame ije na are Jerusareme ijia zinuevena ijiege rei. Na e ije Godido zinone ifaejevo ijiebe daro mievoga na e ije bu Jesu ma vierafevo ije gue kame dibure uniae. Ro kuke e gue bu kania bu oekuae vua kuaenoeva ije nadua na ijia ifejianoe. \v 11 Na vierafe naka vame bino ijia bu kame arafiriaga bu buone ma vierafevo buka arekiro na ije vierafe. Ijadufuo maza boeje naka are bu afuina vua kuaevo ijia aruna e ije kame vame ise ijia arafiriae. Na e ije naka bu mukoe ziegafiaeva ijadufuo maza gue na va e ae binoko ijiebuo sidove binobino ijia e ije faradiakinu rerianoe. \s1 Foru fu izege Jesure fu kenujaema ije Agirifa kuaraema ijene \r (Ekisi 9:1-9; 22:6-16) \p \v 12 Ijadufuo maza be e Godido zinone ifaejevo ijiebuo e mamekanu ije bu daro miena kievo na are Damasikasi ijia e ije Jesu ma vierafevo ijia reriana vae. \v 13 Rove e ireobo, na are Damasikasi vakiro vako ijia maza uvuoka ijia vebu ijare saove gufia karae. Vebu ije fu karakoga are ije na ro e ije naena vako no ireva ije fuka mukoreigia sanae. \v 14 Ijadufuo e boeje noka tuana ume ijia dijei. Areme na ijia nana fiekoga vua be fu saove gufia e Iburuko ijiebuo isama ijia na ijiege kumei, Soru, Soru, a irerefuo none isema reme? A vame maeje a mukoe nuvemo baki ro aka mave igege adadana una vame ise ijia vakuveno kumei. \v 15 Vua ije fu ijiege kumemoga na una gue kume, E Ireobo a e gufe a erareno kumei? Ro fu una kume, Naeje na Jesu e ije a fuone isema remo ije nare. \v 16 Ijadufuo ni una urina manine. Na a biedaeva ijadufuo maeje nare a umui datedo a noefuo i menoeke. Ro are rade izege na one revo a giakinu fiema ijiakiro ire gue na sone rade nijasadufuo ijene dabe oenoekinu e boeje kuariake. \v 17 Ro rade na kuaga a va e Isureroko ijiakina e Jiusi baki ije kariva ijia oenoega bu ise bino one rekuva nare samuagake. \v 18 Ro are va niome buone kena nafaejiaga bu titutema bu kariva ije bu arena una sanaema ijia ruake. Ro kuke a ifejiaga bu kavene ise Setanido daro ije bu karinoejo ije bu arena una Godido ruake. Bu ijiege rena una na ma vierafekuva Godi fu ise buone giana areke. Areme fu kaenamiaga bu una Godido e ije maturaeva ijena maziekono kie. \p \v 19 Ijadufuo Kini Agirifa, na E Ireobo Jesu vua ije fu saove ijia kuariema ije nane irinae. \v 20 Ijadufuo amure na va Damasikasi ijia vua fuone maeje dabe e ijia kariva ije kuariae. Areme na va e Jerusaremekina sakae Judia guove ijia kariva ijene kuariae. Areme nane kuke vua ije abena va e Jiusi baki ije bu are irore boegia karinoeva ije kuariae. Ro Jesudo vua maeje na abe e boeje kuariaeva ije na kia, Ni ise jone Godi kuara areme una oe kuderiafo. Ja oe kuderia areme uri ire ma bino rega e bu ijia giana vierafero jane ma oe kuderiaevaro bu ijiege vierafeno kiae. \v 21 Na ijiege kuarianoejoga e Jiusi bu ijadufuo bue kuae ijunami. Areme bune Godido Are ijia aruna na kaniekuae vuae. \v 22 Rove Godi fuka na mukore ifejiekinu samuagiena ruae. Ijadufuo ivia na igia manina vua boeje na fiekinu ro gaeva ije dabe e isesina abero e mamekanu ige ja kuariave. Ro vua ige na iviama kuariavo ije bune e Godido vua vierafena kuaevo ijiakina e Mosisi bu kuae fu rade rekono kuaeva na ijene dabe ja kuariave. \v 23 Ro vua ije bu kuaeva ije bu ijiege kuae, E Ije Godi kuamo fu ari ruaema ijare ude vajae fiane abena areme baroneke. Areme fu una urina vua sanaema ije e bu ijia ma karivadufuo ije dabe e Jiusi abero e Jiusi baki ije kuariakono kuae. \p \v 24 Foru fu vua fuone ijiege kuaemoga e Fesitasi fuka urukeigia kumei, Foru aeje aka nigofo iserei. Ijadufuo maeje aka naenitua vua uruvana damo ijadufuo nigofo one funeka mukoreigia iseremano kumei. \v 25 Fu ijiege kumemoga Foru fu una kuae, E ireobo nana nigofo isereva baki. Ro vua none ige na kuariavo ije na kufuimevo baki ro naka ma kuariave. \v 26 Na vierafe Kini Agirifa fu ire boeje bu reva ije fune vierafei. Ijadufuo maeje ire ije bu sauina reva baki ro bune samadukua ijia rei. Ijadufuo na vierafega kini fu ire boeje na kuariaeva ije fune vierafei. \v 27 Ro Kini Agirifa, aeje abe e ije Godido vua vierafena kuaevo ijiebuo vua ije ma vierafe? Na vierafega a vua buone aka ma vierafemono kuae. \v 28 Foru fu ijiege kuaramoga Kini Agirifa fu una kuae, Foru a vierafe aka iviama maza aokube ige a manina vua kuariemo ijia a na dabe oe dakudega na Jesu Kuraesi ma vierafekiro a ijiege vierafemano kuae? \v 29 Ro Foru fu una kuae, Kini Agirifa, Godi fu iviama igia ro fu rade ifejiaga ja fu ma vierafedufuo ije fu korofuo vierafe. Rove na vierafe name joefuo Godi baname isoega fu akina e boegure ja iviama vua ige fievo ije ifejiaga ja na ma vierafevo ijiege jadua jaka Godi ma vierafeke. Ro bu rade ige na ja toenamieva ijiege bu ja toenamiadufuo ije naka isediemono kiae. \p \v 30 Areme Kini Agirifakiro bara fuone Benesi ro e Fesitasi ro e boeje buina kariva ije bune usiae vae. \v 31 Bu usiae vakinu bue kuae, E ije fuka ire ise bino rema baki. Ijadufuo no vierafe fu irerefuo dibure va ro baronekono kuae. \v 32 Ro Agirifa fu una Fesitasi kuae, E ije koto fuone fu Sisado rekono kuaema ije fu arebitie noka ivia kenuja fu vakono kuae. \c 27 \s1 Foru fune sisime abena aesakae Romu vakiro vaema ijene \p \v 1 Areme maza ije no sidove Romu vadufuo ije fune ruae. Ro e Fesitasi fu e Romuko ijiebuo e ireobo be e Juriasi ije kuaedo fu Forukiro e dibureko gue kaenamiana sidove Romu ijia vake. (Ro e Juriasi fu e Sisado e azo kevo ijiebuo e ireobo be). \v 2 Ro sisime be are Anituramitiami ijia ruaema ijia name. Sisime ije fu sakae Esia guove ijia are binobino bu davare irifo ijia kariva ijia oenoekuvenoga no ijia ajiana vae. No vakoga e Arisitasi e ije fu are Tesaronaeka Mesedonia guove ijia ruaema ije fu noena vae. \v 3 Ijiege rena none vakuma nituame no are Saedoni ijia usiae. Ro e Juriasi fune Foru marejana kuamo fune va are Saedoni ijia e kairafa fuone gue giakiro vae. Fu va giaga bu ire bino fu vierafema ije vajakuae fu ijadufuo vae. \v 4 Areme none una sisime abena are Saedoni arena vae. Rove majaufi ije fuka ireobo ufimo ijadufuo no una davare ikene uije be bu kua Saefurasino kuavo majaufi naebe ufimo ijane vae. \v 5 No vakuma sakae Sirisiakiro Femefiria asidiana vakuma are Maera sakae Raesia guove ijia usiae. \v 6 Areme e Romuko ijiebuo e ireobo ije fu gake sisime be are Arekisedirako ije fune are Itari vakuvenoga fu kuomo none ijia ajiana vae. \p \v 7 Sisime ije fune no kaenamuona soneigia ruoma mu sibaneke furiko no are Sinidasi ijia usiae. Ro vame ijia no ruaeva ije noka irufui biedia ijadufuo maeje majaufi ije fuka uruvanaigia ufimo ijadufuo no ijiege rei. No ijia usiaena none nana vakuvega majaufi ije fuka uruvana ufimoga none una uije be bu kua Kuritino kuavo ivuaki ijia ufuaena vakuma are Keifi Saramoni asina vae. \v 8 Ijiege rena none davare irifo ijia ufuaena vakuma davare uije be bu kua Sefi Abosino kuavo ijia usiae. Ro are ije fu sidove Rasea ivuake ijia ro vame ije no vaeva majaufi fuka uruvana ufimo ijadufuo noka isejavaekinu vae. \p \v 9-10 Areme none mu uruvana are Sefi Abosi ijia karina areme none vakuvega funeka ma iserei. Ijadufuo maeje maza ije davare fuka urukeigia ufemo ro kuke davare ijia vadufuo ije funeka saroe. Ijadufuo Foru fune urina e sisime ijia imevo ije kiae, Kairafano na gaga vame no vadufuo ije funeka ma iserei. Ro no vakuva sisime nuvuone ijiakina sinuome nuvuone gue bune davare ijia arike. Ro kuke e gue buka davare ijia oekono kiae. \v 11 Rove e Romuko ijiebuo e ireobo ije fu Foru vua ije fu kuaema ije fuka naebe ma vierafei. Rove fu una e sisime asoe ijiakiro e ije sisime abe oenoeno ijiebuo vua ije fiena ijia nuvei. \v 12 Ro maza ije are Sefi Abosi ijia fuka ve ireobo damo. Ijadufuo e boeje bu vierafe buka davare ado ijia vakuma are Fonikisi usiaekuae vierafei. Ro are ije fu davare uije be bu kua Kuritino kuavo ijadufuo guove ijia. Ro kuke are Fonikisi ijia do ije fu firamo baki ijadufuo bu vierafe bu va ijia karikiro bu ijiege vierafei. \s1 Majaufi ma ireobo ije fu davare ijia ufima ijene \p \v 13 Ro majaufi isekube fume ije no vakuvejo ikene ijia ufimoga e ije bu vierafero vua buone bu kuaeva ije fune marekiro bu ije vierafei. Ijadufuo bune uri kaje ije bu mune kiriana saeva ije maniaeru nama areme bune sisime abena una are Kuriti ijane vae. \v 14 Bune vakoga majaufi ireobo be bu kua Noti Isitano kuavo ije fu davare uije ijane ufina ruae. \v 15 Majaufi ije fuka urukeigia urari ufina sisime vame fu vako ije fune dabe iserei. Fu ijiege remoga noka giriesana sisime abe una majaufi ije ufimo ijiege vaga fuka iseremoga nome ijia kariko majaufi ijare no kena vae. \v 16 No vakuma davare uigi be bu kua Kaudano kuavo ije ikene ijia asina vakoga majaufi ije fune una isekube rei. Fu isekube remoga none giriesana uri vanage iseke be bu sisime ado ijia nijavo ije fu nana uvemo ije dabe mukoreigia kirae. \v 17 Areme bune uri kaje gue karina sisime devatua ijia faradia kiriae. Bu vierafero sisime ije fu vako uri sakae be bu kua Ribiano kuavo ajare ijia afekiro buka jumei. Ijadufuo bu uri varae ije bu kiraeva ije una meru ari. Areme bume ijia karikoga majaufi ijare bu kena vae. \v 18-19 Rove majaufi ireobo ije fuka uria ufimoga nituame bune urina ire ivo bu sisime ijia naeva ije karina davare ijia korei. Ro nituame bu gake majaufi ije fuka uria ufimoga bu una kuke urina sisime ijadufuo sinuome gue irifuimo bu ijia naovo ije vajiamanina davare ijia sae. \v 20 Rove majaufi ije fuka uria uruvanaigia ufimoga no maza ijiakiro zuvi ije noka naebe giako fune mu uruvana furi. No vierafero none davare ijia oevaro no ijiege vierafei. Ijadufuo no naebe vame bino no izege nuvue karaunianamidufuo ije vierafe ro nome ijia karina vae. \p \v 21 Ro e boeje buka vasia abevaga Foru fu urina kiae, E gurie jabe vua na kuariaeva ije mukore fiena are Kuriti ijia karivabitie sisime nuvuone ige fube isereke. Ro kuke sinuome nuvuone gue no davare ijia koreva ije nobe ijiege kari koredufuo. \v 22 Ro iviama naka ja anadiana kiavono nika oe jone ijia giriesana ma vierafefo. Ijadufuo maeje na ma vierafe e besu fu naebe davare ijia aridufuo. Ro fu sisime ijiaru fu davare guove ijia arike. \v 23 Ijadufuo maeje Godi none na maza boeje fuone baname isoevo ije fu ivia muge anera fuone kuamo fu none ruae. \v 24 Fu arina kie, Foru aeje a e Romuko ijiebuo e ireobo Sisado nidua ijia manina koto reke ijadufuo ade jumemo. Ro kuke fune Godire izege fu e marejiamo ijia fu e ije bu aena sisime ijia vako ije samuagiaemano kie. \v 25 Ijadufuo e gurie, nika giriesana oe jone ijia ma vierafefo. Ijadufuo maeje na vierafega vua ije anera fu kuariema ije Godi fu redufuo. \v 26 Ro noeje nobe oekiro nome sisime ado ijia karike majaufi ijare no kaenamuona vaga no davare uije be ijia usiaekono kiae. \p \v 27 Ijiege rena majaufi ije fune no kame ijiege davare Meditorenianino kuavo ijia oenoeko fune vakuma fura inokiro furi. Areme ve ufirema ijia e ije sisime abe vako ije bu vierafega bune aesakae ijia usiaekuae ivuarei. \v 28-29 Ijadufuo bu uri ire irufuimo be dabe do ijia abiena gake do ije fune sibaneke tasama. Areme bune karina maza isekube furiko bu una abiesena gake do ije funeka tasama. Ijadufuo bu vierafero bigake sisime ije fu vako uri mune bino nizukiakiro buka jumei. Ijadufuo bune uri ire ka irufuimo ije inokiro kiro inokiro kena sisime ijuone ijia kiriana do ijia savo sisime ije fu ijia mani. Fu ijia manikoga e ije bune uri ve ije fu migegire irasedufuo ijadufuo baname isoe. \v 30 Areme e sisime ije abe vako ije bune sisime ije arena subinae vakuae vierafei. Ijadufuo bune urina vanage iseke ije dabe biovo fune do guove ijia ari. Areme bune uri e ije biesiriavoga bu vierafero bu ire irufuivo ije gue karina sisime uine ijia kiriana do ijia savoro bu ijiege vierafei. \v 31 Bu ijiege revoga Foru fu urina e Romuko e ireobo ijiakiro e azo kevo fuone ije kiae, E gure sisime abe ruovo ije bu sisime ige arena subinae vakuva jaeje janeka oekono kiae. \v 32 Fu ijiege kuariamoga e azo kevo ije bune kaje ije bu kena vanage iseke ijia kiriana do ijia saeva ijene kania turae. Bu kania turavoga vanage iseke ije fune majaufi ijare abena vae. \p \v 33 Areme ve fune irasekuveno ijia Foru fu urina e boeje anadiana kiae, Ja mu uruvana jaka naebe ire bino i ro jame ijia karina ruae. \v 34 Ijadufuo ire bino ifo ro ja bakuva jaka oeke. Ro igia fie, na vierafe Godi fu e boeje ja sisime igia kariva ije karauniakono kiae. \v 35-36 Foru fune ijiege kuariama furi areme uri burete bino kena nidua buone ijia manina Godido baname isoena oemarei. Areme fune be abe tuasena igana gue fu kena e boeje vajiamoga buka oemarekinu kena i. \v 37 Ro e ije no sisime ijia ajiaeva ije noka e ma uruvana (276) ijiege. \v 38 Areme e boeje bune deufiamoga bu urina farava boeje karina davare ijia korei. Ijadufuo maeje farava ijiebe irufuivo ijadufuo bu kame davare ijia usia korei. \p \v 39 Areme ve fune irasemoga e ije sisime abe vako ije bu sakae izia vako ije bu naebe mukoe vierafei. Ro bume davare irifo ajare ijare abaekiraema bu gana bune sisime abena ijia vakuae vierafei. \v 40 Ijadufuo bune uri ire irufuimo ije bu kena davare ijia saeva ijia kaniaturae. Areme bune kuke kaje ije bu kena sisime ijuone ijia kiriaeva ije irase. Bu ijiege re areme uri varae ije meruna una ajia kave ijia kirae. Bu vierafero majaufi ijare ufina sisime abe bioga bu duome ijia vakiro bu ijiege rei. \v 41 Rove sisime udame ije fune mune ije bu davare guove ijia ireva ijia umakazina funeka girei. Ro sisime ijuone ije fune davare ijare ufena fune kania tuaseme. \p \v 42 Sisime ije fune ijiege remoga e azo kevo ije bune e dibureko ije kaniakuae vierafei. Ijadufuo bu kuae, No kaniaga e be fube jaraekana va irifo ijia kekena ko vakono kuae. \v 43-44 Rove e ireobo buone ije fuka Foru kenujakiro vierafema ijadufuo fu e fuone kuriaeremo bu ijia arei. Areme fune uri e boeje kiae, Erare do jaraekana vierafekuma ni ude jaraekana irifo ijia vafo. Ro e gue ni sisime ijadufuo fae ije tuaseva ijia kunaena vano kiae. \c 28 \s1 Bu are uije be Morotano kuavo ijia usiaeva ijene \p \v 1 No ijiege rena none jaraekana ruoma irifo ijia usiae. Areme rade e davare uije ijia kariva ijiebe kuaruona kuo, Ja are Morota igia ruaevano kuovoga no ijia sone vierafei. \v 2 Ro e ijia kariva ije buka no mukoreigia ifejue. Ro fuka ve dana iduane urimo ijadufuo bune uri miane ifaejema areme kuovo no ijia iruana kari. \v 3 Areme Foru fune miane gaje bino karina ifaejemoga tabare be fu ijia nado miane fu naena feturimoga fu kekena Forudo umui ijia saki. \v 4 Fu sakimoga e ije bune gana uri bue kuae, E gure no vierafe fute e be kana ruaema ijadufuo tabare fu ije saki. E ije fuka davare ijia baronedufuo rove fuka giriesana jaraekana ruae. Ro no vierafe fuka igia baronekono kuae. \v 5 Bu ijiege kuae rove Foru fuka uri tabare ije dabe kuriatemo fu daturako miane ijia nae. \v 6 Areme e ije bu mauike karina Foru ga arega fu vajae ufero ba baronega bu gakuae. Bu kari gaga fu ire bino naebe remoga bu una bue kuae, E ije no vierafe fuka godi beno kuae. \p \v 7 Ro are ije no kariva ivuake ijia sakae ao be fu e Fubirusido. Ro e Fubirusi ije fu e ireobo be sakae davare uije ijia namo ije samuamo. Ijadufuo e ijare oemarekinu kaenamuona vakoga no maza inokubeke are fuone ijia fuina kari. \v 8 Ro e Fubirusido asoe ije fuka adame abena safuiga fu are fuone ijia name. Fu ijia namoga Foru fu aruna fuone baname isoema areme umui nigofo nijamo fu una mae. \v 9 Fu ijiege remoga e adame abeiva boeje davare uije ijia karinoeva ije bu vua ije fiena fuone rovoga fu e boeje karauniae. \v 10 Ijadufuo bune uri sinuome boeje no vajue. Ijiege rena none buina karina asame inokubeke furinoga none sisime abena vakuvejoga bune kuke uri ire boeje no vame ikinu vadufuo ijene vajue. \s1 Foru fu are Morota arena sidove ireobo Romu vaema ijene \p \v 11 Ijiege rena none sisime be bu kua Ino Uviaki Ufake Nafevano kuavo ijia ajiana none vae. Sisime ije fu ve daga fu davare uije ijia nama areme ve maremoga fune no kaenamuona vae. \v 12 None vakuma sidove Sirakusino kuavo ijia usiaena mu inokubeke no ijia kari. \v 13 Areme none urina vakuma sidove Regiamino kuavo ijia usiae. Ro nituame none vakoga majaufi ijare sisime no vako ije dabe ikenike vakuma mu inokiro furiko no are Futeori ijia usiae. \v 14 No ijia usiaevoga e Godi ma vierafevo bino bu ijia karido bune kaenamuovoga no va buina mu sibaneke ijia kari. Areme none urina diake sidove ireobo Romu ijia vae. \v 15 No vakoga e Godi ma vierafevo Romu kariva ije bune no vako ije fiena bune gue are Afiusi Makete ro Tiri Inino kuavo ijia bieduokuae ruae. Bu rovoga Foru fu e ije giamo fuka oemae. Ijadufuo fu uri Godido oemarekoga kavene fuone ije fuka ijia una daro ireobo abei. \s1 Foru fu sidove ireobo Romu ijia fima ijene \p \v 16 Ijiege rena none ruoma Romu usiaevoga Foru bune kuavo fu fuebe naekoga e Romuko ijiebuo e azo kevo be fu fu samuae. \v 17 Bu ijiege samuakinu vakuma mu inokubeke furinoga Foru fune Jiusi ijiebuo e mamekanu ije kumeno bu una besu afui. Bu afuivoga fu urina vua be ijiege kuariae. Fu kiae, Uviarafa none igie nana ire ise bino na naebe e nuvuone igiebuo rei. Ro kuke na vame isuiko asaerafa nuvuone ijiebuo vame bu kenoejo ije bino na naebe kena arafiriae. Ro bume na dabe Jerusareme ijia dibure nujie. Ro ivia bune na mesirina una kuke e Romuko ijiebuo e ireobo ige fino ijia ruae. \v 18 Buka na dabe duna binobino kuarie rove bu fiega na ire ise bino na naebe rei. Ijadufuo e Romuko bu vierafe buka na kenujiega na keke vakiro bu ijiege vierafei. \v 19 Nana vua ise bino e none Jiusi ije buesina kuaeva baki. Rove bu vierafe buka uria na kaniega naka baronekiro bu ije vierafe. Ijadufuo na vierafe e Romuko ijiebuo e ireobo Sisa fuka koto none rekiro na ije vierafei. \v 20 Ijadufuo na ja kumega ja ro naena vua ije kuaena giakiro vierafe. Ro ivia ige na seni ijiakuma manivo ijadufuo maeje na e Jesu Kuraesido vua ijene kuariavo bu na dabe ijiege rei. Ro e Jesu Kuraesi ije fu ma e ije e Isureroko bu samuavo ijeno kiae. \v 21 Foru fu ijiege kuariamoga Jiusi e mamekanu ije bu kuae, No e Judia ijia kariva ije bu fasi bino naebe oesina isoena naejue. Ro kuke e nuvuone gue Godi ma vierafevo bu igia ruae. Rove bu vua ise bino oesina bu naebe kuarue. \v 22 Ro no vierafe nome vua one bino fiekuae vierafe. Ijadufuo maeje no fiega e boege buka e ije bu Jesudo vame ije nuvevo ijadufuo buesina kuaevano kuae. \p \v 23 Bu ijiege kuara areme bune una maza bu fuina kuaedufuo ije nijae. Areme e uruvana bune maza ije bu nijaeva ijia una Foru fino ijia afui. Bu afuivoga Foru fune suoke ijia zinuevena vua ije Godi fu izege e fuone ijiebuo oe ije samuagiamo ije kuaria vakuma ve ijia mui. Fu vierafe fuka Mosisido akae ijiakiro e Godido vua vierafena kuaevo ijiebuo vua ije bu Jesudo kuaeva ijia bijana kuariaga bu Jesu ma vierafekiro fu ijiege rei. \v 24 Foru fu ijiege kuariamoga e gue bu vua fuone fiena ma vierafekoga gue buka vua fuone ijuonei. \v 25 Ijadufuo rade bune una are buone ijia vakinu vua ije Foru fu kuariaema ije dabe bue sagukinu vae. Areme Foru fu giake e gue buka vua ije ijuonevoga fu kiae, Kavene Akae vua ije fu isuibe e Godido vua vierafena kuaemo e Asaea kuaramoga fu kuaema ije fuka ma kuae. Ro vua ije fu kuaema ije bu ijiege isoe, \q1 \v 26 Ni va e ije kia, bu vua ije bu kuariavo ije buka kukuma karina fieke rove vua asuni bube mukoe vierafedufuo. Ro kuke buka kukuma rerenoeke rove vua ijiebuo maeje bube giadufuo. \v 27 Ijadufuo maeje nigofo buone buka ma gikikimana ro adane buone bune korobuo bijui. Ro kuke niome buone bune korobuo okuriae. Ro bu naebe ijiege ni buone okuriaeva bitie bu ninafaena Godi gake. Ro kuke bu ada tire buone bu bijuiva ije ru korekuvabitie bu ijare una vua fieke. Ro kuke nigofo buone fu una samadiremabitie bu vua vierafeke. Areme bubite ijia una oe kuderia none ruakuva na bu karauniakono kuae. \p \v 28-29 Areme Foru fune vua fuone kuaria furikiro kiae, Ni vua ige na kuariakuvejo ije mukoreigia fiefo. Godi vua maeje izege fu e karauniadufuo fu nijuima ije none dabe e Jiusi baki ije kuariae. Ijadufuo na vierafe bune mukoreigia oe marekinu karina fiekono kiae. \v 30 Areme e boeje bune una are buone vakoga Foru fune juaevasia inokiro fu are be fu korofuo fuaevema ijia fi. Ro e ije bu fu gakuae ruovo ije fuka oemarekinu kaenamiamo. \v 31 Fu kaenamianana vua ije Godi fu izege e fuone ijiebuo oe ije samuagiamo ije kuariakinuro izege e Ireobo Jesu Kuraesi irere fu rema ijene kuariamo. Ro vua ije fu kuariamo ije fuka darokuma kuariae rove e bino bu naebe vua fuone ije bijukurae.