\id 2TI - Barai NT and OT portions [bbb] -Papua New Guinea 2006 (DBL -2014) \h 2 TIMOTI \toc1 2 TIMOTI \toc2 2 Timoti \toc3 2 Tim \mt1 2 TIMOTI \imt1 2 Timotido Vua Amure \ip Fasi ige Foru fu sidove Romu ijia dibure fikinu isoena una Timoti nijaema ijene. Fu Jesu Kuraesido vua ije abe kuarianoemoga bu ijadufuo dabe dibure nujae. Timoti fu Foru ifejana buosiki besu imenoevo, ro kuke fu e ije Godi ma vierafevo sidove Efesasi kariva ijiebuo e ireobo ije fure rei. Ijadufuo Foru fu Timoti kua fu Kuraesido vua ije abe kuaenokuma fube jaevemo kuae. Ro kuke fu kua funika Kuraesido e bijaemo maeje rena samuakinu vua maeje ijadufuo isejavaeno kuae. Fu kuke Timoti vua nijaena kua funika e ma rena ro ma vierafena Jesudo i ije meno kuae. \iot 2 Timotido vua binobino fu isoema ijeja - \io1 1:1-3 Timoti fu ma vierafemoga Foru fu oemarema ijene. \io1 1:4-2:13 Timoti fube ijuonekiro fuka giriesana ma vierafekinu i fuone mekuma ije fu mareke. \io1 2:14-26 Izege e Jesu Kuraesido e i mukoe meno redufuo ijene. \io1 3:1-9 Maza radekuma ije e ijiebuo ise ije fuka ma ireobo iseredufuo ijene. \io1 3:10-4:5 Foru fu i ije Timoti fu medufuo ije kuaraema ijene. \io1 4:6-22 Foru vua fuone rade fu kuariaema ijiakiro fu anadiaema ijene. \c 1 \p \v 1 Timoti farino, na Foru e ije na Godire fuone vierafema ijia kiega na Afasero rena Jesu Kuraesido vua maeje nijasianoejo ije nare fasi ige isoe nijave. Ro vua ige na kuaravo ije na izege no rade Jesu Kuraesina besu rena ma karivadufuo na ije kuariave. \v 2 Ro Timoti farino na a oetuavo ijadufuo na baname isoega Godi Asoe ijiakiro Jesu Kuraesi E Ireobo nuvuone ije bu maza boeje one oefiane abekinu ma rejana mukoreigia samuagaga a kafaena finoedufuo. \s1 Foru fu Timoti fuka ma vierafekinu Godido imedufuo kuaraema ijene \p \v 3 Ro Timoti na baname none na mumaza isoevo ije naka a vierafekinu Godido baname isoena oemarevo. Naka asaerafa none izege bu reva nadua nane ijiege oe none ijia mukoreigia vierafekinu fuefuo imenoeve. \v 4 Ro maza ije na a nujana vakoga a nimeno nido one fu arima ije nane vierafei ijadufuo na maza boeje naka a gakiro vierafe. Ijadufuo na una vua a gakuva na vierafe naka ma ireobo oemadiedufuo. \v 5 Na vierafega one izege a ma vierafemo ije fuka asae one Roesikiro asie one Jiunesi bu ma vierafeva ijiege na vierafega adua ane besu ijiege ma vierafeme. \v 6 Ijadufuo na una kuaraga a daro ije Godi fu maza ije na umui nigofo nijakoga fume vekinu maema ije abena darokuma imedufuo. \v 7 Ijadufuo maeje Godi Kavene fuone fu vajuema ije no jumedufuo fu ije vajuema baki. Ro fuka Kavene daroki ije vajue ijadufuo no uri giriesana daromena e boeje oetuana ifejiakinu ro konuvuo mukoe samuanamidufuo ijene vajue. \p \v 8 Ijadufuo ade E Ireobo nuvuone ijadufuo vua ije fu e boeje ifejiana karauniamo ije kuariakiro jaevemo. Ro kuke ade ige na fuefuo imevo ijadufuo na dibure fivo ijadufuo jaevemo. Ro anika izege na Godido vua ije na kuaevo ijadufuo isejavaevo ijiege adua isejavaene. Ro a ijiege isejavaekuva Godi fu daro maga a giriesana renoedufuo. \v 9 Ijadufuo maeje fure no karaunuona kumenoga no e akae rena karinoeve. Ro no nore ire ma bino revoga fu ijadufuo no kumema baki ro fume fure fuone vierafema ijia ro fuone maeje fu no vajuomo ijia no kumei. Ro fuone maeje fu no vajuema ije fune uria iko zinume ijia Jesudo duvado ijia vajue. \v 10 Ro fuone izege fu no marejuema ije fune Jesu Kuraesi e ije fu no karaunuokiro ruaema ijare iviama abena samadire. Ro fune Jesure oevo ijadufuo daro ije abe akoe areme Godido vua maeje nome sanaema ijia karivadufuo ije abe nijasue. \p \v 11 Ro Godi fune na umui date areme daro mie ijadufuo na vua fuone maeje abe e boeje kuariana nijasiakinu kaenamiaga bu Godido e reve. \v 12 Ro na vua fuone ma dabe ijiege kuarianoevo ijadufuo naka vame binobino isejavaeve. Ro na vajae fiane ige na abevo ijadufuo nabe jaeveke. Ijadufuo maeje na Jesu Kuraesi e ije na ma vierafevo ije nane vierafei. Ijadufuo na vierafe fu korofuo i ige fu miega na menoevo ije ka mukoreigia samuana vakuma maza rade fu una ruake. \v 13 Ijadufuo ni vua maeje na nijasavo a fiema ijene kena mukoreigia faradiana samuagiane. Ro kuke giriesana Godi ma vierafekinu e boeje oetuane. Ijadufuo maeje no Jesu Kuraesina besu revo ijia no ire inokiro ije kevo. \v 14 Ijadufuo ni vua maeje Godi fu nijasaema ije Kavene Akae ijadufuo daro ijia kena mukoreigia samuagiane. \p \v 15 Ro ane vierafe e boeje Godi ma vierafevo Esia guove ijia kariva ijiakina e Faejerasikina Emogenisi ije na bune ijuonena vae. \v 16 Rove na vierafe E Ireobo ije fu e Onesiforasido agane boeje fuka ma rejiake. Ijadufuo maeje fu iseko fuka maza boeje na isejavaevo ijia ifejie. Ro kuke fu ige na dibure fivo ije fuka naebe giena jaeve. \v 17 Ro fuka Romu kekena vajae fiaeguma na reriena vuakuma biedie. \v 18 Ijadufuo na vierafe naka fu iseko fuefuo baname isoega E Ireobo fu maza ije fu una ruomo ijia e ije fuone oefiane abena ma rejadufuo. Ijadufuo maeje a izege fu are Efesasi ijia na ifejiema ije ane mukoreigia vierafei. \c 2 \s1 E Jesu Kuraesido imevo ijene \p \v 1 Ro farino, ni Jesudo daro ije fu no vajuomo ijia giriesana fuefuo imene. \v 2 Ro ni vua ije na e boeje bu gieko na nidua buone ijia kuaravo a fiema ije abena e ije mamoevo baki ije kuariaga bu abena una e gue nijasiane. \p \v 3 Ro ni urina irufui ige no abevo ije akaegue abena e azo kevo bu azo kena vajae fiane abevo ijiege rena uri Jesu Kuraesido vua ije abena e gue nijasiakinu vajae fiane abene. \v 4 E azo kemo fu imeno ije fu vierafe fuka e ireobo fuone ije oemarejakiro fuka mukoreigia imeno. Ro fu imekuma fube i bino kena una i fu meno ijiakuma kamana medufuo. \v 5 Vame besu ijiege ro ni kuke e aekevo ije vierafene. E boro kanamo ije fu akae ijia nuvena mukoreigia aekekuma fu rade ire be abeke. Ro fu naebe mukoreigia akae ije nuvediakuma fube ire be abeke. \v 6 Ro kuke e juae meno ije fu giriesana juare fuone mekuma fu ire uije bu amure duivo ije masike. \v 7 Ijadufuo ni vua na bijiana kuaraeva ije vierafene. Ro na vierafe E Ireobo ijare ifejaga a vua boeje na kuaraeva ije mukoreigia vierafedufuo. \p \v 8 Ro igia fie, Godido vua maeje na abena e boeje kuariavo ije na kia, Jesu Kuraesi fu e Devidido uifari fu baronena una urimano kiave. \v 9 Na vua ijene dabe ijiege nijasiakinu kuariavo ijadufuo na ije isejavaeve. Ijadufuo bu ije na dabe e akae tuavo igege toenamiena dibure igia nujie. Rove Godido vua ije bu naebe abe tona nijae ro buka uria vua ije dabe are irore ijia nijaenaminoeve. \v 10 Ijadufuo naeje na e ije Godi fu umui tuaema ijiebuo akaegue ijia naka ire binobino ijia isejavaeve. Na vierafe na ijiege isejavaekina Jesu Kuraesi fu budua karauniaga bu noena vame ma karivako ije abekiro na ije vierafeve. \v 11 Ro vua ige fuka ma, \q1 Ijadufuo no vierafe vame isuiko nuvuone bu fuina oekuva ije no vierafe no una urina fuina karivake. \q1 \v 12 Ro kuke no uria faememarena giriesakinu isejavaekuva maza rade no fuina ire boeje samuagiadufuo. Ro no fu ijuonena gamemarekuva fudua fu maza rade no guomemareke. \q1 \v 13 Ro no naebe maza boeje e ijuebaki rena vua fuone ije irinavo ije fuje fuka uria e ijuebaki reme. Ijadufuo maeje fuje fuka maza boeje no oetuamo. \s1 E Godido imeno ije Godire abe nidoeke \p \v 14 Ro Timoti ni vua ije na ude kuaraeva ije maza boeje e ije a samuagiamo ije kuariane. Ni Godido ive ijia kiaga bu bue madinamivo ije buka arene. Ijadufuo maeje e ije bu vua buone ije fievo ije fuka bu ifejiamo baki ro fuka bu kame arafiriamo. \v 15 Ro aeje nika koro giriesana Godido nidua ijia izege fu oemaedufuo ijia imene. Fu vierafega aka vua fuone maeje dabe mukoreigia samuakinu nijasiamo ijadufuo a e boeje ijiebuo nidua ijia abe jaeveke. \v 16 Ijadufuo ni e ije bu vua ise ka buzeme ije e nijasianoejo ije mukoreigia akariane. Ijadufuo maeje vua ijieki ije bu kuaenoevo ije buka e gue kaenamiaga bu Godi maeje abuena mumabo vako. \v 17-18 Ro e ijiebuo vua bu nijasiavo ije buka ire matane ige bu vajae surive ije buraena aru vako ijiege reve. Ijadufuo e ije bu vua buone fievo ije bune buone bu ma vierafevo ije arafiriave. Ijadufuo e inokiro e Aemenasikiro Faeritasi ije buka e ijieki. E inokiro ijiebe vua maeje bune arena una vua ni be ije fieve. Ijadufuo bure e guebuo ma vierafe ije kame arafirianoeve. Bu vua kufuimena e gue nijasianoekinu kiavo Jesu fune una ro e ije oeva ije kaenamiana vaemano kiave. \v 19 Rove Godido tugie gikikimana mune ijieki ije fu abena saema ije fuka uria mukoreigia manine. Ijadufuo maeje Godido e ije bu ma vierafevo ije buje bu tugie ijieki. Ro Godi fu e fuone ijiebuo tugie ijadufuo fu ijiege kuae, E Ireobo ije fu eranebe bu e fuone reva ije fune vierafei. Ro kuke vua be fu ijiege kuae, E boeje eranebe bu kuae no E Ireobo ma vierafevono kuaevo ije buka vame ise ije mukoreigia aguariano kuae. \p \v 20 Ro igia fie, are ireobo guove ijia sinuome ijia naovo ije bu tini ro kafusi ire gorodi ijiakiro siriva ijia amaeriaeva ijiaru ijia naovo baki. Ro bu kuke tinine ro kafusi bu ine ro sakae ijia amaeriaeva ijiebe besu ijia naovo. Ro ire ije bu ire gorodi ijiakiro siriva ijia amaeriaeva ije bu vame ro maza ma ijia kena ire bino rekuae nae. Ro ire ije bu ine ro sakae ije amaeriaeva bume kadure numukinu ro ire isesina bino numukuae nae. \v 21 Ijadufuo vame besu ijiege e be fu ise fuone ije korufuo Godi kuaraga fu gana aremo e ije fune una tinine maeje bu gorodi ro siriva ijia amaeriaeva bu kena ire ma bino revo fu ijiege reme. Ijadufuo e are koeki ije fune e ije abena una vame maeje fu izege tinine ro kafusi ije gorodikiro siriva ijia amaeriava fu kena ire binobino remo ijiege imeke. Ijadufuo maeje fuje fune una e ireobo fuone ijadufuo nidua ijia maturaema ijadufuo fu ire ma bino renoeke. \p \v 22 Ro Timoti ni vame ise ije ame momokana bu renoevo ijene mukoreigia akariane. Ro nika E Ireobo ije kuaga fu ifejiaga a izege e maturaedufuo ro e boeje oetuakinu ro Godi ma vierafedufuo ije ro kafaedufuo ije vierafena ijadufuo imenoene. \v 23 Ro vua isekuma ka kufui e bu kuaenoevo ije ka akariane ijadufuo maeje e buka vua ijieki ijadufuo kuaena madinaminoevo. \v 24 Ro e ije fu E Ireobo ijadufuo imeno ije fube e guena madinamikiro fuka e boeje oetuakinu kabuaekabuaeki vua nijasiadufuo. \v 25 Ro e gue eranebe bu vua fuone naebe fievo ije fuka sone oe vafaena kuariadufuo. Ro fuka ma vierafega Godi fu oe buone kame kuderiaga bu una vame maeje vierafedufuo. \v 26 Fu ijiege rekina bu Godido vame maeje vierafekiro ije bu una Setanido vame ije bu irinaga fu kame isekafiakuveno ije bu arena usiae vadufuo. \c 3 \s1 Ire ise ije bu maza radekuma ijia redufuo ijene \p \v 1 Ro Timoti ni igia fiene. Maza radekuma ije Jesu fu una ruomo ijia ire ise ni binobino buka reke. \v 2 E boeje buka uri vajaema buone ije uruvana oetuana uri moni ireobo oetuakinu korubuo kame e mamekanu rena aroekaranoeke. Ro vua buone bu kuaevo ije bube e gue ifejiakinu ro orafa buone iriniake. Ro kuke bube ire ma bino vierafekinu ro una Godido oemarekinu oenoeke. \v 3 Ro kuke buka e gue oetuakinu buone oefiane abekuva baki. Ro e binobuo ise ije bube giana areke ro kuke buka e guebuo vua kufui kuaenoeke. Ro buka maza boeje bue nigaraekinu ro buka fanuve taraeko igege oenoekinu ro vame maeje bino oetuakuva baki. \v 4 Buka kairafa buone ijena vua besu kuaena irinanamike rove rade buka una vua ise buesina kuaeke. Ro ka zabaena ire ijiebure kenoekinu ro ka aroekarana buosukua vierafenoeke. Ro buka ire ije e bu ume igia oemarenoejo ije uruvana oetuake rove una Godido vame ije buka oetuakuva baki. \v 5 Ro bume vajaema ijiaru va guriguri reke rove Godido daro maeje bu abedufuo ije buka ijuoneke. Ijadufuo e ijiege renoejo ije mukoreigia giana akariane. \v 6 E ijieki ijiebe e binobuo gire ijia ajia bara ije ise buone ijiebe kame uti faradiaeva bu izege aredufuo ije bube mukoe vierafekinu samuagiake. Ro buka una vua kufui sumiki buone ije nijasiake. \v 7 Ro bara ije maza boeje buka Godido vua maeje izege fu e boeje karauniamo bu ije gakuae rerevo rove bu gavo baki. \v 8 Ro izege e Jenesikiro Jeburesi bu Mosisi ijuemaeva ijiege e ije vua kufui nijasiavo ije budua buka una Godido maeje ijena nigaraeve. Ijadufuo maeje oe buone buka isema vierafevo ro bu Godido vua maeje ma vierafevo baki. \v 9 Ro ijiege bu renoejo ije bube maza jiamadogo rena vake. Ijadufuo maeje e boeje bu giaga bune e Jenesikiro Jeburesi bu vierafeva ijiege isema vierafei. \s1 Timotido vua radekuma ije fu ijia giana nuvediadufuo ijene \p \v 10 Ro Timoti aeje a e ije na ude kuaraeva ijieki baki. Ro vua none boeje na nijasiavo ijiakiro vame none na fina ruovo ije ane vierafei. Ro kuke ane izege na ma vierafekinu kabuaekabuaeki oenoevo ro izege na e oetuavo ije ane vierafe. Ro kuke a daro none ije na maza boeje giriesana ijuebaki imenoeko e bu vua ise noesina kuaena arafiriega na isejavaevo ije ane giena vierafe. \v 11 Ro ire ije bu are Enitiokikina Aekoniamekina Risitura ijia none revoga naka uruvana isejavae. Rove naka naebe mamoe ijadufuo maeje fu Jesure na ifejiena kenujie. \v 12 Ijadufuo e boeje eranebe bu Jesudo ive ijia Godido vame maeje abevo ije e buka buesina vua ise kuaena arafiriaga bu isejavaevo. \v 13 Ro e ije ise renoejo ije buka biona ise uruvana renoekinu e gue vua kufuimena kuariakinu korubuo arafiranamivo. \p \v 14 Ro Timoti aeje anika Godido vua maeje bu nijasaeva ije mukoreigia giriesana vierafene. Ijadufuo maeje e ije bu a nijasaeva ije buneka mukoreigia nijasiaeva ije ane koro vierafei. \v 15 Ro a uria ame isekube ijia bune Godido vua bu isuibe isoeva ije nijasae. Ro vua ije bu nijasaeva ije fu manido fu e ije bu Jesu Kuraesi ma vierafevo ije karauniake. \v 16-17 Ro vua boeje bu buki akae ijia isoeva ije fune Godire vajiamo bu isoe. Ijadufuo no Godido vua ijia dana vua fuone maeje fiena una e gue nijasiavo. Ro fu vua ijare ise no renoevo ije nijasuoga no ijia giana una mukoregia renoevo. Ro kuke fu vame maeje no kenoedufuo ije nijasuoko no ijia kenoevo. \c 4 \s1 Foru fu Timoti ejafana kuaraga fu Godido vua maeje abe kuaenoedufuo ijene \p \v 1 Na Godikiro Jesu Kuraesi e ije fu maza rade e boeje igiebuo vame ise ro ma bu renoeva ije ke mazie giadufuo ijadufuo ive ijia kuavono nika vua ige no kuaravo ijiege renoene. \v 2 Anika maza boeje Godido vua ije abena mazani ise ro ma ijia e nijasiakinu kaenamiana urari uniane. Ro a maza bino kuariakuma nika kuriaerekinu kabuaekabuaeki oe vafaena kuariane. Ro kuke nika soesoekinu mukoreigia kuariane. \v 3 Ro maza be ruakuma e boeje buka vua maeje ijuonena bube mukoreigia fiedufuo. Ro buka una vajaema ijadufuo ire ije bu vierafeva ije kenoedufuo. Ro buka una e ije bu vua kufui nijasianoevo ijiebuo vaga bu vua irere bu fiekuae vierafevo ije nijasiadufuo. \v 4 Bu Godido vua maeje buka ijuonena una vua suvuae biragi ije fiekuae vierafenoedufuo. \v 5 Ijadufuo Timoti anika koro maza boeje vame bino bu one ruovo ijia samuanamine. Ro maza gue a isejavaemo ije nika oe vafaena isejavaene. Ro kuke anika Godido vua ije abena e nijasiakinu ro i ije E Ireobo fu maema ije abena mukoreigia samuakinu menoene. \p \v 6 Ro naeje na maza ije e Romuko bu kanie na baronedufuo ije fune ruae. Ijadufuo na vierafe ume igia na finoejo ije fune furikuvene. \v 7 Naeje nane Godi ma vierafena fu irinana ruoma iviama nane eoradie. Na e ije fu difurimo ijiege naka mukoreigia giriesana difuri ruae. Ro Godido vua maeje nane dabe ma vierafena nijasia ruae. \v 8 Ro ije na giriesana mukoe difuri ruaeva ijadufuo maeje ire ma be fune na samuagie name. Ijadufuo na vierafe E Ireobo maturaema ije fu rade ise nuvuone mazie guodufuo ije fu vame maeje sanaema ma karivako ije abena mieke. Ro fu na nosukua miekuma baki ro fu kuke ire gue kena e ije bu oe buone ijiakuma E Ireobo fu una ruadufuo ije samuavo ije vajiake. \s1 Vua none radekuma ijene \p \v 9 Ro Timoti, ni koro rade giriesana migegire vuane. \v 10 Ijadufuo maeje e Kureseni fu are Garesia vakoga Taetasi fudua fune are Daramesia ijia Godido vua nijasiakiro vae. Ro e Dimasi fu ire ume igadufuo oetuamo ijadufuo fune na abueziena are Tesaronaeka ijia vae. \v 11 Ro iviama fu Rukire fuosukua uria igia nosiki fine. Ijadufuo a ruakuma ni e Maki mesirina roga fure ifejiena i ige mene. \v 12 Ro e Tisikasi nane kuavo fune are Efesasi ijia vae. \v 13 Ro a igia ruakuma ni ugone none na ado abievo ije na are Turoasi e Kafasido are ijia aberena ruaeva ije abejie rone. Ro kuke ni buki none ijiakina fefa ije na isoe naeva ije kejie rone. \p \v 14 Ro e Arekiseda e ije fu ajade ijia ire bino amaeriamo ije fuka ire ise boeje none redo Godire ijadufuo fu dabe isekafake. \v 15 Ijadufuo e ije mukoreigia akarane ijadufuo maeje fu Kuraesido vua no nijasiavo ije fuka mukoreigia giriesana ijuoneme. \p \v 16 Ro igia fie, amure ije bu na abe koto reva ijia e bino bu naebe na ifejiena vua kuaekuae ruae. Ijadufuo na vierafe Godi fu ise buone ije fu giana aredufuo. \v 17 Na E Ireobo ije fuka na ifejiena daro miema ijadufuo na Godido vua maeje dabe e boeje kuariae. Na kuariavoga e Jiusi baki ije sidove Romu are ije no koto revo ijia kariva ije bu vua ije fie. Bu fievoga Godi fu e ije bu na kaniekuae vierafeva ijia kenujie. \v 18 Ro Godi fu maza boeje ire ise boeje binobino none ruovo ijia kenujiemo. Ijadufuo na vierafe fu mesiriena are saove ije fu samuamo ijia vake. Ro na maza boeje baname isoega e boeje are irore igia oenoeva ije bu fu dabe aroeke. Mare. \p \v 19 Ro bara Firisirakiro baru fuone e Akuirakina e boeje bu e Onesiforasido are ijia kariva ije na bu anadiae. \v 20 Ro e Erasitasi fu uria sidove Koriniti ijia fine. Ro e Turofimiasi fu visimo ijadufuo na uria are Maritasi ijia nujana ruae. \v 21 Ro Timoti ve ije fuka ireobo dakuveno ijadufuo ni migegire ruake fu rade dane. Ro e Iuburusikina Fudenisi ro Rinasikina Kurodiakiro e Godi ma vierafevo are igia karijo ije bu a anadae. \v 22 Na vierafe Godido Kavene fu kavene one ijiaki fike Godi fu ma rejiana ifejiaga ja mukoreigia kari vake. \p Fune ijene.