\id 1PE - Barai NT and OT portions [bbb] -Papua New Guinea 2006 (DBL -2014) \h 1 FITA \toc1 1 FITA \toc2 1 Fita \toc3 1 Fit \mt1 1 FITA \imt1 1 Fitado Vua Amure \ip Fasi ige fu e Fitare isoena e ije Godi ma vierafevo bu dabe giegisana are binobino ijia karinoeva ije nijiae. Ro maza ije Fita fu fasi ige isoema ije fu sidove Romu fino ijia fu isoe. Ro e ije Jesu Kuraesi ma vierafena fu nuvevo ije buka vame ise binobino e Romuko ijiebe buone reko buka isejavae. Ijadufuo Fita fu vierafe fu bu ifejiana daro miaekina buka uri giriesana irekiro fu ije vierafei. Ro fasi igia Fita fu kuke vua uguare uruvana isoe. Ro vua ije fu isoema ijeja e akae igege karinoedufuo ijiakina barubara bu izege besu karidufuo ijiakina Kuraesido isejavaekuae vierafevo ijiakina e ije Godido are baname isoevo ije samuavo ijiakina Jesu fu una ruomo ijadufuo vua ije isoe. \iot 1 Fitado vua binobino fu isoema ijeja - \io1 1:1-12 Jesu no ma vierafevo ijene. \io1 1:13-25 Noka e akae igege karidufuo ijene. \io1 2:1-10 Jesu fu tugie maeje no ijia biduana karivo ijene. \io1 2:11-17 Godido i medufuo ije noka e ma redufuo ijene. \io1 2:18-25 Izege Kuraesi fu isejavaema ijene. \io1 3:1-7 Barubara bu izege besu afui karidufuo ijene. \io1 3:8–4:19 No Kuraesido vame ijia kenoekuva ije no isejavaedufuo ijene. \c 1 \p \v 1 Na Fita e ije Jesu Kuraesido Afasero rena vua fuone abe oenoevo ije nare fasi ige isoena e ije ja Godi fu iko zinume ijia vierafena ke uniaema ije nijiave. Ja are jone maeje fu saove ijia ro jame ume ijia e binokobuo aesakae Fonetasikina Geresiakina Kafadosiakina Esiakina Bitinia ijia karive. \v 2 Godi fu uria iko zinume ijia ja vierafe ijadufuo fu kena uniae. Ijadufuo maeje fu vierafega jaeje fune Godido Kavene Akae ijare ja kena e akae redo ja Jesu Kuraesi irinake. Ro kuke fune Jesu Kuraesire kavuane fuone ije kurosi ijia joefuo usiaena ise jone fikorejiae. Ro na vierafe Godi fuka maza boeje ma rejiana mukoreigia ifejiakinu samuagiaga ja kafaena karinoedufuo. \s1 Vame ma karivadufuo ije vierafekinu oenoedufuo ijene \p \v 3 No Godi ro e Ireobo Jesu Kuraesido Asoe ije fuone ireobo oemareve. Ro fuone fu no oetuakinu ifejuomo ije fuka ma ireobo ijadufuo fu vame iviaeko no ma karivadufuo ije abe mue. Godi fu Jesu baronemoga fu kenujamo fu una uri ijadufuo no vame fuone iviaeko ijia nuveke. \v 4 Ijadufuo maeje no vierafe maza be no Godi ire ma bino fu kavene nuvuone ijiebuo kave gufia naema no ije keke. Ro ire ije bu izege burae ro isere ro bakiredufuo baki. \v 5 No fu ma vierafe ijadufuo fu daro fuone ijia no mukoreigia samuaguo vakuma maza radekuma ijia fu no karaunuo furike. \p \v 6 Ijadufuo iviama maza aokube ige ja ire binobino ijia isejavaevo ije nika giriesana oemarekinu oenoefo. \v 7 Ijadufuo maeje ire ije bume oe jone ije ja izege ma vierafevo ijene biesiriana giave. Ro igia fie, ire gorodi ije fuka ire mukore rove buka abena miane ijia ifaejena kadure bu kari koregaro maeje bu kevo. Ro ire gorodi ije fu ire anuigi rove rade fuka bakireke. Ro jone ja ma vierafevo ije fuka ma ire anuigi be ijadufuo bu abena ijiege biesiriana gake. Ijadufuo maeje bu ijiege rega jone ja ma vierafevo ije fu ijia navake. Ro rade maza ije Jesu fu una ruomo ijia jone ja ma vierafevo ije fu uria gikikimanakuma Godi fuka ja kame aroriana nidosiake. \v 8 Ja Jesu Kuraesi ja naebe ni jone ijia gae rove jame fu oetuakinu ro ma vierafeve. Ijadufuo jaka oemadiado ja izege una vua ijadufuo kuaekuva baki. \v 9 Ijadufuo maeje Godi fune jone ja ma vierafevo ijia giakinu kavene jone ije karauniame. \p \v 10-11 E Godido vua vierafena kuaevo ijiebe Godi izege fu ja karauniadufuo ijene dabe kuaenoe. Bu ijiege kuaenoekinu karina kuae ire ije fute veze reke ro kuke Godi fu izege e boeje karauniakono kuae. Ijadufuo buka uri giriesana rerenoe. Bu ijiege rerenoevoga Kuraesido Kavene ijare vame izege Kuraesi fu ume igia isejavaena barone areme rade fu una urina Godido sanaema ijia manidufuo ije nijasiae. \v 12 Kavene Akae fu nijasiana kia vua maeje fu isuibe kuariaema ire ije fu mazani buone ijia rekuma baki. Ro fu mazani jone igia rekono kiae. Ijadufuo iviama vua maeje Kuraesi fu izege no karaunuema ije e bu isuibe kuariavo ja fieva ije bu Kavene Akae ije fu kave gufia ari ruaema ijadufuo daro ijia kuariae. Ro Godido kavene adaki ije budua bu vua besu ije fiekuae vierafe. \s1 Godi fu vierafe noka maturaena karidufuo ijene \p \v 13 Ijadufuo jade una oe kuderiana ire binobino vierafenoevo. Ro oe jone nika mukoreigia Jesu izege fu una ro ja marejiadufuo ije vierafekinu karinoefo. \v 14 Ro janika Godido anafa igege e ijuoebaki rena fu irinakiro jade una ire ise binobino ja vierafena re ruaeva ije renoevo. \v 15 Ijadufuo maeje Godi e ije fu ja kena uniaema ije fuka maturae ijadufuo jadua janika e maturaena ire boeje mukoreigia kenoefo. \v 16 Ro kuke Godido vua ije bu isoeva ije fu kuae, \q1 Naeje naka maturae ijadufuo jadua janika maturaena kenoeno kuae. \p \v 17 Ijadufuo igia fie, Godi Asoe jone kave gufia fino ja fuone baname isoevo ije e boeje no fu kena besu enafu mazie guoke. Fu guoga no ma renoe ro no isema renoejo fu ije guodufuo. Ijadufuo maza aoke ige ja karinoevo ije nika e ae binoko igege mukoreigia Godi jumekinu ro fu aguaekinu karinoefo. \v 18 Asaerafa jone ijiebuo vame ije bu kari ruaeva ije fuka ma baki. Ja vierafero vame ije fu ja ifejiana karauniakiro ja ijiege vierafe. \v 19 Rove ije fuka baki ro fune Kuraesire kavuane fuone ka irerebareki ijare abena ise jone ije ja reva ijia karauniae. Kuraesi fuje fuka e maturae fu mave-sifi ame fu vajae matane ro umine baki ije e Jiusi bu kena Godi zinone ifaejavo ijieki. \v 20 Fune Godire uria iko zinume ije fu ire bino naebe amaeriaema ijia fu Jesu e karauniadufuo ije abe nujae. Ro Kuraesi fune iviama maza radekuma igifureki joefuo romo jane gae. \v 21 Ijadufuo iviama jane Godi mukoreigia vierafe ijadufuo maeje Kuraesire vame jone maeje amaeri. Kuraesi fu baronemoga Godire kenujamo fu una urimoga fu dabe aroena nidoe. Ijadufuo iviama oe jone boeje jaka Godi fu rade una ro ifejiadufuo ja ije ma vierafekinu karinoeve. \p \v 22 Godire vua fuone ije fu maza boeje ijia navako ijadufuo duvado ijia vame iviaeko maeje abena miae. Ro ja Godido vua maeje jane mukoreigia irinae ijadufuo oe jone ije fune mukoreigia amaeriae ijadufuo iviama jane una kairafa jone bu Godi ma vierafevo ije oetuave. Ijadufuo iviama nika oe jone ro daro jone ijiakuma jone oetuanamifo. \v 23 Jaeje fune Godire vame iviaeko ije abe miaema ijadufuo iviama jane una anafa fuone rei. Ro vame iviaeko ije fu vame ije asaerafa jone bu abe miaeva fu rade bakiredufuo ijieki ije fu baki. Ro vame ije fu Godido ruaema ijadufuo fu ijia navake. \v 24-25 Ro Godido vua ije bu isuibe buki ijia isoeva ije fu kuae, \q1 Ema ije bu maza jiamadogo ume igia karivakuva baki. Ro kuke buone sanaema ije bu ire kusare ije bu maza aokube iranaro una guaena asuikisavo igekino kuae. Ro Godido vua ije fube kusare ijiege iraro una migegire saereke. Rove fuka maza boeje ijiege navake. \m Ro vua maeje ige fu ijia navadufuo ije fu vua besu e ije Godido vua abe kuaenoevo ije bu ja kuariaeva ijene. \c 2 \s1 Jesu fu tugie maeje ijia navako ijene \p \v 1 Ro jaeje jane una Godido vame maeje ijia nuvena kenoeve. Ijadufuo ire isekuma ije ja renoejo ije janika arefo. Ro jade e gue biesirianoekinu vua kufui kuariavo. Ro kuke oe jone ije bu uria ise uruvana ijia naoke jade e gue biesiria kia nono ma renoejono kiavo. Ro jade uri e binobuo sinuome ije giana ziekinu vua ise buesina kuaenoejo. \v 2-3 Ijadufuo maeje jane E Ireobo fu ja marejiaema ije jane gana vierafei. Ijadufuo janika ame isesina bu mui ikuae ireobo vierafevo ijiege jadua uri kavene jone ijiebuo Godido vua maeje mui igege ikuae vierafefo. Ja kavene jone ijiebuo Godido vua maeje mui igege ikuva kavene jone bu daro abena karikina rade ja mukoreigia Godina karivake. \p \v 4 Janika Jesudo ruafo. Fuje fuka tugie mukore ijieki rove e boeje buka fu ijuonena abe akoe. Ro Godido nidua ijia fuje fuka tugie mukore irerebareki ijadufuo fure abe nujae. \v 5 Ro jadua jaka tugie mukore ijene ijadufuo Godi fu ja kena are ije Kavene Akae fuone fu ijia fivadufuo ije same. E Jiusi ijiebuo e zinone ifaejevo ije bu Godido Are ijia aruna zinone ifaejevo. Ijadufuo jadua janika ijiege rena oe jone ije kena Jesudo duvado ijia zinone igege Godi vajafo. Ja ijiege rekuva Godi fuka oemaredufuo. \v 6 Ro Godido vua bu isuibe buki akae ijia isoeva ije fu ijiege kuae, \q1 Nane e ireobo none ije abena nujaedo fure e none boeje samuagiake. Ro e ireobo ije fu tugie ije fu are ukua ije farega fu girena manidufuo igeki. Ro eranebe bu fu ma vierafevo ije bube Godido nidua ijia jaevekinu oenoedufuo. \m \v 7 Ro Kuraesi e ije ja ma vierafevo ije fuje fuka irerebareki ijadufuo jaka fu ireobo oetuave. Ro e ije bu fu naebe ma vierafevo ije Godido vua ije bu isuibe isoeva ijia fu buefuo ijiege kuae, \q1 E ije bu tugie ijia are savo bu vierafero tugie ije fu isero bu naebe abe are sae ro buka dabe akoe. Rove iviama fune Godire tugie ije abe una are ukua ijia ru abie. Ijadufuo are ije fune tugie ijare girena fare manine. Ro tugie ije fu kuaema ije fu Jesu Kuraesi E Ireobo ijadufuo kuae. Ijadufuo sosi boeje bu iviama Jesu Kuraesi bijuana karive. \m \v 8 Ro kuke Godido vua ije fu kuae, \q1 Rade e gue bu tugie ijare nizukiaga buka mukoreigia ari kaniakono kuae. \m Ro vua ijadufuo zinume maeje ijeja e ige bu Godido vua maeje naebe ma vierafena renoevo ije buka ari kaniake. Ijadufuo maeje e ije bu ijiege naebe ma vierafevo ije fune Godire ijiege vierafedo fu rade bu kame isekafiadufuo. \p \v 9 Ro e ije ja ma vierafevo ije jaeje ja Godido e. Ro jare e ije bu zinone ifaejevo ijiege rena e anuigi ijadufuo imeve. Ro jaeje ja Godido e ije ja fuefuo imekiro fu ke uniaema ijene. Fure e ije ja uria titutema ijia karivoga fu kaenamiana una fuone maeje sanaema ijia uniae ijadufuo ja vua fuone abe e kuarianoeve. \v 10 Ude ja e anuigi baki rove iviama jane una Godido e anuigi reve. Ro kuke Godi fu ude jone oefiane abena ifejiamo baki rove iviama fuka ja oetuakinu ro jone oefiane abena ifejiame. \p \v 11 Ijadufuo kairafano jaeje jame maza isekube ume igia kari. Ro are jone maeje fu uria kave gufia namo ijadufuo na ja ejafiana kiavono ni ume igadufuo ire ise ije mukoreigia akariafo. Ro ire ise ije buka e ani jone igeki ijadufuo bu jaena bijaekuva buka kavene jone kame arafiriake. Ijadufuo nika ire ise ije mukoreigia akariakinu oenoefo. \v 12 Ro ja e ije bu Godi naebe vierafevo ijena oenoekuva ni vame ma ijiaru kenoefo. Ro e ije buka ja madiakinu ro arafiriake. Rove rade maza ije Jesu fu una ruomo ijia bu vame jone maeje ja kevo ije giana una Godi dabe aroeke. \s1 E mamekanu jone iriniadufuo ijene \p \v 13-14 Ro erafano janika e mamekanu ije bu ume igia e gue samuagiavo ije vua bu kuariavo ije iriniafo. Ijadufuo maeje E Ireobo fu vierafega jaka ijiege renoedufuo. Ro kuke janika e Kini ije fu e mamekanu boeje samuagiamo ijiakina e mamekanu ije fu kena uniaema ije iriniafo. Ijadufuo maeje Godi fu vierafe fu bu ke uniaekina bure e ije eranebe ire ise renoejo ije kena isekafiake. Ro eranebe bu ma renoejo ije bu ke aroriadufuo. \v 15 Godi fu vierafe jaka bu iriniakinu mukoreigia kenoedufuo. Ja ijiege kenoekuva e ije nigofo isereva bu naebe mukore vierafekinu kuaenoejo ije bu jone izege ja mukoreigia kenoevo ijia giana bube vua ise bino joesina kuaenoke. \v 16 Ijadufuo janika e mamekanu jone ije iriniana uri ke turana ni bino kenoefo. Ro jade una ise binobino renoekiro nika e bino ja Godido imevo ijiege karinoefo. \v 17 Ro janika e boeje aguariaro e jone ije Kuraesi ma vierafevo ije mukoreigia oetuakinu ro Godi e daroki ije mukoreigia aguaekinu oemarejafo. Ro kuke janika e Kini ije fu e mamekanu ije samuagiamo ije aguaefo. \s1 Kuraesi fu isejavaema ijiege nodua noka isejavaedufuo ijene \p \v 18 Ro e ije ja e mamekanu ijiebuo imevo ije igia fiefo. E mamekanu jone ije buka e anuigi jone. Ijadufuo nika irere bu kuariavo ije iriniakinu mukoreigia aguariafo. Ro jade e ije bu ja marejiakinu vua soesoegi kuariavo ijiaru iriniavo. Ro nika e ije bu ja isema vierafena vua gikikimana kuariavo ijedua iriniafo. \v 19 Bu ja madiakinu ro ire bino ja isejavaedufuo ije jone rekuva nika uria faememarena Godi ma vierafekinu vame maeje renoekuva Godi fuka jone oemareke. \v 20 Ro ja ise bino rega bu kena isekafiaga ja mauike isejavaekuva bu irerefuo ja ke aroriake? Ro ja ire ma ijiaru rega bu kame isekafiaga ja mauikeigia isejavaekuva vame ijiege ja revo ije Godido nidua ijia fuka mukore. \v 21 Ro vame ijiege isejavaevo ije Godido vame ije fu ja miaema ijene. Ijadufuo maeje Kuraesi fu isejavaema ije fu mimatana ja nijasiae ijadufuo jadua ja urina dia fuone makae ijia nuvena kenoefo. \v 22-23 Fu ise bino naebe re ro vua kufui bino naebe kuae. Ro e ije bume uri fu madina vua ise kuarae ro fu naebe una ve gue vua ise kuariae. E ije buka ire ise boeje fuone revoga fuka ijadufuo isejavae. Ro fu naebe ve gue una ijiege buone rekiro vierafe. Ro irufui ije fume abena una Godi e ije fu ise boeje ke mazie giamo ijadufuo umui tare ijia nae. \v 24 Kuraesi fu ijiege rema ijia fu ise nuvuone ijadufuo irufui ije dabe vajae fuone ijia dabena kurosi ijia baronei. Fu ijiege kurosi ijia baronekina ja maza boeje ise ije ja revo ije arena una ma karivakiro fu ijadufuo ijiege rei. Ro ije fu isejavaema ijia fu vame jone ije ja una ni uria karivadufuo ijene amaerijiae. \v 25 Ude ja Kuraesi naebe ma vierafeva ijadufuo jaka uri mave-sifi bu maza boeje sauivo ijiege renoe. Ro iviama jane una kuderiana Kuraesi e ije fu kavene jone samuagiamo ijadufuo ruae. \c 3 \s1 Baru bara maninamiva ijiebuo vua ijene \p \v 1-2 Ro bara ije jadua janika barurafa jone ije mukoreigia iriniafo. Ja ijiege iriniaekina barurafa jone ije eranebe bu Godido vua maeje naebe ma vierafevo ije bu vame jone maeje ja renoejo ijia giana una oe uderiana Godi ma vierafeke. Ro ja vua bino jade kuariavo ro nime Godi aguaena vame jone maeje ja kenoevo ijia bu renoega bu giafo. \v 3 Ro kuke jade vierafero are bu e binobe guokuae uri aroekarana nige bijana uri vajae jone kame mukoreigia amaeriana ugone maeje ni binobino savo. \v 4 Ro ja jone amaerinamikuae vierafekuva ije jaka oe jone ije fu maza boeje ijia navadufuo ije vierafena amaerinamidufuo. Ro jade uri vua gikikimana joe kuaekinu zienamikiro nika mauike oe vafaena kafae karinoefo. Ro bara erare fu ijiege renoekuma kavene fuone ije fuka Godido nidua ijia fuka irerebareki reke. \v 5-6 Ro igia fie, bara ije bu isuibe Godi ma vierafena akae oenoeva ije bume vajae buone ijiaru amaerinamiva baki. Ro buka oe buone ijia amaerinami. Ijadufuo maeje buka barurafa buone ije mukoreigia oetuakinu iriniaeva ijadufuo bu ijiege rei. Ro bara be ije bara Serare ijiege rena baru fuone Eburame irinana kua e ireobono kuae. Ro jaeje ja Serado anafa ijadufuo barurafa jone bu ire bino jone rega jade jumekiro nika vame ma ijiaru renoefo. \p \v 7 Ro kuke e baru ije ja bararafa jone izege samuagiadufuo ije jane vierafe. Ijadufuo ja bara jone ijena karinoekuva nika buina vua soesoegi ijia kuaekinu ro oemarekinu karinoefo. Ijadufuo maeje bara ije bu vajae surive ijia buka bara daro baki. Ro kuke bu izege ja Godido vame ma karivako ije ja abeva budua bu ijiege abeke. Ro ja bara jone ije ijiege oetuakuva Godi fu baname jone ja isoena kuaravo ije fube fiena areke. \s1 Vame ma ijadufuo isejavaevo ijene \p \v 8 Ro igia fie, e boeje janika oe besu rena iviene uvia igege mukoreigia oetuanamifo. Ro oe besu vierafena e guebuo oefiane abena ifejiakinu karinoefo. Ro kuke janika kabuaekabuaeki oenoekinu kairafa jone ijene marejiakinu karinoefo. \v 9 Ro e bino bu ire ise bino jone rega jade una ve gue ise revo. Ro bu vua ise ije joesina kuaega jade una ve gue kuariavo. Bu ijiege revoga nika una buefuo Godi baname isoena kuaga fu ifejiafo. Ro ja ijiege renoekuva Godi fuka ja daro miakinu ifejiake. \v 10 Ro Godido vua ije bu isuibe buki ijia isoeva ije fu ijiege kuae, \q1 Erare fu mukoreigia oemarekinu finoekiro vierafekuma fude vua ise binobino kuaenoekinu ro vua kufui kuaenoeke. \v 11 Ro kuke fube ire ise bino e binobuo renoekiro fuka ire ma ijiaru renoedufuo. Ro fuka vame izege fu e guena kafaedufuo ije giriesana renoedufuo. \v 12 Ijadufuo maeje E Ireobo ije fu fina e ije bu fu ma vierafena vame maeje renoejo ije giakinu baname buone bu isoevo ije fieme. Rove e ije eranebe bu ire ise renoevo ije fu kena isekafiamono kuae. \p \v 13 Ijadufuo ja giriesana uri ire ma ijiaru renoevo ije erare ja kena isekafiake? \v 14 Ro ja ire ma ijiaru renoe ro e ije bu ja kena isekafiaga ja isejavaevo ije Godi fuka jone oemarena ja marejiake. Ijadufuo eranebe ire ise bino jone rega jade ijadufuo uruke vierafena uri oefiane abevo. \v 15 Ro janika oe jone ijia Kuraesi E Ireobo ije aguaena ire boeje fu kuariamo ije irinana renoefo. Ro maza bino eranebe bu jone ja ma vierafevo ijadufuo zinu maeje fiekuae kiakuva janika samuaekina ja vua ijadufuo zinu maeje kuariafo. \v 16 Ro ja kuariakuva ni sone kabuaekabuaeki bu aguariakinu kuariafo. Ro maza boeje vame ma ijiaru renoefo. Ja ijiege renoevo ijia e ije bu ja vua ise ka gikikimana bino kuariana ive jone ije kame iserevo ije bu una korubuo jaeveke. Ijadufuo maeje ja Kuraesido vame ma ijia nuvena renoeve rove bure vua kufui ije una joesina kuaeve. \v 17 Ro ja ire ise bino rena ijadufuo isejavaekuva ije ja kojo ise reva ijadufuodo ije fune ijene. Ro ja ma ijadufuo renoevo ijia ja isejavaevo ije fune mare. Ijadufuo maeje Godi fu izege vierafema ijadufuo ja ijene ijiege isejavaeve. \p \v 18 Ja vame ijiege renoekuva ije jane Kuraesi fu renoema ja ijiege renoeve. Ro Jesu e ije fu ire ise bino naebe rema ije fu e boeje igiebuo ise ije fikorejiakiro fu maza besu buefuo baronei. Ro fu baronema ije fu ja kaenamiana una Godido ruakiro fu ijadufuo baronei. E ume igia oenoeva ijiebe kanavoga fume vajae surive fuone ijiaru baronei. Rove Kavene Akae ijare kuamo fu una uri. \v 19 Areme fu kuke Kavene Akae ijadufuo daro ijia va e ije oeva ijiebuo kavene ije bu dibure kariva ijene izege fu rema ije kuariae. \v 20 Ro e ije Jesu fu va vua kuariaema ije fu e ije bu maza ije Noa fu sisime sako bu Godido vua ije ijuoneva fu e ijiebuo kavene ije kuariae. Ro maza ije Noa fu sisime ireobo ije amaerikoga e ije bu uria kariva ijia bu Godido vua ije buka naebe irinae. Rove Godi fuka naebe migegire bu kame isekafiae ro fume samuagiae. Ro rade bu e sibaneke e eti (8) ijiege vua fuone ije irinae. Ijadufuo ve ireobo ije fu dana safua nafuemoga e ije bu naebe do i. \v 21 Ro e sibaneke ije bu naebe do iva ije fu do ije ja iviama ruega fu ise jone ijia karauniamo ije bijana nijasiaema igeki. Ro do ije ja rueva ije fu do ige ja ruega fu umine somo ijieki baki. Ro no do ije no rueva ijia no vierafega noeje none daro ije Godi fu Jesu kuamo fu una urima ije daro besu ijia fune no karaunue. Ijadufuo none Godi fu izege rade e kena isekafiadufuo ije none daoveabue. \v 22 Ro iviama Kuraesi fune kave gufia Godido umui maeneke ijia fine. Fu ijia fiko Godido kavene adaki ijiakiro kavene mamekanu bino bu kavene gue samuagiavo ije bu fu irinave. \c 4 \s1 Izege no Godido vame ma ijia kenoedufuo ijene \p \v 1 Kuraesi fuka e ise ijiebuo umui tare ijia vajae fiane ireobo abei. Ijadufuo jadua janika vame besu ije fu vierafena kema ijiege giriesana renoefo. Ijadufuo maeje erare fu vajae fuone ijia vajae fiane bino biediana isejavaekuma ise ijadufuo daro ije fu baki redufuo. \v 2 Ijadufuo ja ume igia karinoevo ijia jade maza boeje ise rekuae vierafenoevo. Ro nika Godi irere fu vierafema ijiaru ireobo vierafenoefo. \v 3 Vua ige na kuariavo ijadufuo maeje e ije bu Godido vua ije naebe fieva ije buka ire ise uruvana renoevo. Ro jadua isuibe jaka ise ijieki ije rena ruae. Jaka uri barubara oenoekinu uri siroe igege e binobuo bara turanoekinu ro do kugi uruvana ina nigofo iserenoe. Ro kuke jaka godi binobino bu e umui ijia amaeriaeva ijiebuo baname isoevo. \v 4 Ro iviama ire ise boeje ja renoejo ije funeka furi. Ijadufuo e ije bu Godido vua bino naebe fievo ije bu giaga ja naebe una bu nuvediavo ije buka oeseradiake. Ijadufuo buka una vua ise ja kuariakinu Godi jone ije ja ma vierafevo ije dabe buzeike. \v 5 Rove Godi iviama fu e ije ni uria kariva ije abero e ije oeva ijiebuo ise ije kame mazie giakiro samuagiana fine. Ijadufuo e ije bu ise ijieki ije renoevo ije bu rade Godido nidua ijia irena vame ise ro ma bu kenoeva ije visu kuarake. \v 6 Ijadufuo Jesu Kuraesi fune kuke vua maeje abena va e ije bu isuibe oeva ijiebuo kavene ije kuariae. Ro e ije bu vajaema ijia bune oe rove bu Jesudo vua ije fiena ijia nuvekuva kavene buone buka izege Godi fu uria finoeno ijiege karinoeke. \p \v 7-8 Ro erafano maza ije ire boeje ume igia naovo bu furidufuo ije fune ivuareme. Ijadufuo ni uri ni nafaekinu kojo mukoreigia samuanamikinu giriesana Godi baname isoekinu karinoefo. Ro ire ka ma ireobo ijeja nika mukoreigia jone oetuanamifo. Ja ijiege oetuanamikuva ja kairafa jone bu ja isema revo ije jaka uria faememarena bu oetuakinu karinoeke. \v 9 Ro kuke nika e sumiki ijene oemarekinu kaenamiana are jone ijia uniakiro jade una ijadufuo kuaevo. \v 10 Godi fuka daro binobino vajuoko no i binobino menoeve. Ijadufuo noka daro ije fu e besubesu vajuomo ije kena una e gue ifejiadufuo. \v 11 Ijadufuo erare a Godido vua ije e gue kuariakuma nika daro fuone ijia vua fuone ma ijiaru kuariane. Ro erare a e gue ifejiakuma ni daro ije fu maema ijia ifejiane. Ja ijiege renoekuva e boeje buka Jesudo ive ijia una Godi dabe nidoeke. Ro na baname isoega sanaema fuone ijiakiro daro fuone ije buka maza boeje ijiege naona vake. Marei. \s1 No Jesu Kuraesido duvado ijia isejavaedufuo ijene \p \v 12 Ijadufuo erafano vajae fiane iviaeko ni binobino ije bu jone ruovo ije bu ja biesiria giakuae ruove. Ijadufuo jade giana oeseradiavo. \v 13 Jaeje jaka vame izege Jesu fu isejavaema jadua ja ijiege isejavaevono nika oemarefo. Ja ijiege rekuva maza rade Jesu fu una ruomo ijia ja Godido sanaema ije fu samadirega jaka uruke oemareke. \v 14 Ja Jesu Kuraesido imenoevo ijadufuo e bu ja madiakinu vua ise kuariakuva janika oemarefo. Ijadufuo maeje Godido Kavene ije ka sanaema ije fuka jaena fino. \v 15 Ijadufuo jade e kania bu oevo ro jade iniemekinu vame ise ije renoevo. Ro kuke jade uri e guebuo i ije iraraena menoevo. Ro ja ire ise ijieki ije renoekinu isejavaekuva ije ja kojo isema renoeve. \v 16 Ro ja Jesudo e revo ijadufuo ja isejavaekuva jade ijadufuo jaevekiro nika una Godido oemarefo. Ijadufuo maeje ijiege ja isejavaevo ije ni vierafero ja Jesudo ive ijadufuo isejavaevoro ja ijiege vierafedufuo. \p \v 17 Ijadufuo maeje maza ije Godi fu ume igia ire binobino no renoevo ije kena mazie guodufuo ije fune ijifureki zinuivene. Ijadufuo Godi fuka amure e fuone bu fu ma vierafevo ije ke mazie giake. Ro Godi fu e ige no fuefuo imejo ije fu amure kena mazie guokuma ije na vierafe e ije bu vua fuone naebe fiena irinavo ije rade fuka vame ma ise ijia isekafiake. \v 18 Ijadufuo maeje Godido vua bu isuibe isoeva ije fu ijiege kuae, \q1 Godi fu e maturaeva ije karauniakiro vierafe rove fu girekuma fu e ije bu Godi ijuonena ise renoejo ije buje fu izege reke? \m \v 19 Ijadufuo e ije bu isejavaevo ije bune Godido vierafe ijia reve. Ijadufuo vame maeje ja revo ije jade arekiro nika vajae jone ro oe jone boeje kena una Godi e ije fu ja amaeriana samuagiamo ije vajafo. \c 5 \s1 Fita fu e sosi samuavo ijiakina e sosi ijia afuivo ije vua kuariaema ijene \p \v 1 Ijadufuo na e mamekanu sosi akae samuavo ije ja ejafiana kuariavo fiefo. Nadua na sosi ijadufuo e ireobo be nare Kuraesi fu isejavaema ije gae. Ro kuke maza ije fu una ruomo ijia Godi fu sanaema fuone ije dabe e boeje nijasiamo ijia nadua na jaena sanaema fuone akaegue abeke. \v 2 Ro e sosi samuavo ije ja e gue samuagiavo ije ni e jone mukoreigia samuagiafo. Ni e ije fu mave-sifi ije samuagiamo ijiege Godido e ije samuagiafo. Ro jade vierafero bu ebe kuariake ja ijia fiekinu renoekiro ijiege vierafevo. Ro janika oe jone ijia ma vierafe areme oe vafaena renoefo. Ijadufuo maeje Godi fu vierafe jaka ijiege renoedufuo. Ro jade uri moni ireobo vierafekiro oe jone nika izege ja e gue mukoreigia ifejiadufuo ije vierafena menoefo. \v 3 Ro jade kojo kame e mamekanu regaro buje ja kame e isesina igege vierafevo. Ro nime vame maeje renoekinu nijasiaga bu ijia giana nuvediafo. \v 4 Ja ijiege renoekuva E Ireobo fu maza ije fu una ruomo ijia fu e mamekanu ije ja izege i jone mukoreigia meva ije giakuma fu fuone sanaema maeje fu maza boeje ijia navako ije abe miake. \p \v 5 Ijadufuo e nikaki ije nika e maki jone ije iriniafo. Ro janika maza boeje kabuaekabuaeki oenoekinu mukoreigia jone ifejanamifo. Ijadufuo maeje Godido buki ije bu isuibe isoeva ijia fu ijiege kuae, \q1 Godi fu e ije kabuaekabuaeki oenoejo ije fuka marejiamo ro e ije bu aroekaranoejo ije fu ijuegafiamono kuae. \v 6 Ijadufuo janika Godi anuigi ka e daroki ije fu maza boeje ja ifejiakinu samuagiamo ijadufuo nidua ijia kabuaekabuaeki oenoefo. Ja ijiege renoekina maza ije Godi fu vierafema ijia fu ja kame una e mamekanu reke. \v 7 Ijadufuo oefiane jone boeje nika kena una Godi vajafo. Ijadufuo maeje fuje fuka maza boeje ja vierafekinu samuagiamo. \p \v 8 Ro jade nisuitabaekiro nika uri ni nafaena kojo samuanamikinu ro rerekinu karinoefo. Ijadufuo maeje e ani jone Setani fu fanu raejoni ma kuriae fu e sakia buvua ino ijiege fuka jone izege ja Jesu ma vierafevo ijene kame iserejiakiro oenoene. \v 9 Ijadufuo jone ja ma vierafevo ije jade arevo ro nika dabe gikikimana vierafekinu Setani ijuegafafo. Ijadufuo maeje jane vierafe e bino Jesu ma vierafevo are irore igia karinoeva ije budua bu maza bino vame ise ijieki ijia isejavaeve. \v 10 Ja maza isekube isejavaeke ro rade Godi ije fu maza boeje e marejiamo ije fu vajae fiane boeje ja abena isejavaeva ijene una amaeriajiake. Ro kuke fu daro gikikimana ije ja ijia girena iredufuo ije miaga rade jone ja Jesu ma vierafevo ije jabe areke. Ro jaeje fune Godire ja kumedo ja una Kuraesina besu rega fu sanaema fuone ijia navako ije abe miake. \v 11 Ro na vierafe Godido daro ije fu ire boeje samuagiamo ije fu maza boeje ijia na vake. Marei. \p \v 12 Ro erafano fasi iseke ige na e Saerasire ifejiemo na isoe. Ro e Saerasi fu uvia nuvuone be fu Godi ma vierafemo. Ro fasi ige na isoena nijiavo ije na ja ejafiana kuariave. Ro vua boeje na isoeva ije naka vua maeje Godi fu izege e boeje ma rejiamo na ije isoe. Ijadufuo ni vua ije kena darokuma ma vierafekinu faradiana karivafo. \p \v 13 Ro e ige Godi fu jaena besu ke uniaema bu are Bebironi igia karina Jesu ma vierafevo ijiakiro Maki e ije na ifejiemo ije bu ja anadiae. \v 14 Ijadufuo janika e ije Kuraesi ma vierafevo bu ananamivo ijiege oe jone ijiakuma ananamikinu karinoefo. Ro na vierafe Godi fu e ije ja ijia karina Jesu Kuraesi ma vierafevo ije ifejiaga ja kafaena karinoedufuo.