\id 1JN - Barai NT and OT portions [bbb] -Papua New Guinea 2006 (DBL -2014) \h 1 JONI \toc1 1 JONI \toc2 1 Joni \toc3 1 Jon \mt1 1 JONI \imt1 1 Jonido Vua Amure \ip Fasi ige Joni fune e orema ijia fu are Efesasi ijia fina isoena e ije ma vierafevo are Esia guove ijia karivo ije nijiae. Joni fu vua inokiro vierafema ijadufuo fu fasi ige isoe. Vua amure ije fu e Jesu ma vierafevo ije soesoega bu giriesana Godikiro Fari fuone Jesu Kuraesi ije buosukua vierafekiro fu ije isoe. Ro bune ude Godi oetuavo ijadufuo fu vierafe bu buone oetuanamikuva fuka mareke. Ro vua be ije fu e ije vua kufui nijasianoejo ijiebuo ju kuariae. Ro e gue bu Jesu fu ma Godido Fari ije bu naebe vierafe. Ijadufuo fu fasi ige isoena e Godi ma vierafevo ije nijiana kia, Jesu Kuraesi fu ma Godido Fari ijeneno kiae. \iot Jonido vua binobino fu isoema ijeja - \io1 1:1-4 Joni fu vua fuone zinuivena kuaema ijene. \io1 1:5–2:29 Godido vame sanaema ijiakiro Setanido vame titutema ijene. \io1 3:1-24 Godido anafa ije bu izege karinodufuo ijene. \io1 4:1-6 E ije vua bu kuaevo ije kena mazie giaga bu Godido kuae ro bu Setanido vua kuaevo ije giadufuo ijene. \io1 4:7–5:21 Kavene ise kufui ijiebuo vua binobino ijiakina Godido oetuamo ijiakina no izege Setani asidufuo ijiakina vame ma karivako ijadufuo vua ijene. \c 1 \s1 Ma karivako ijadufuo vua ijene \p \v 1 Fasi ige no isoena naejiavo ijeja no vua ije ma karivako ijadufuo ijene isoena naejiave. Ro E Ije vua ma karivako ije abe ruaema ije fune isuibe aesakae ige bu naebe amaeriva ijia Godiki besu fi ruae. Ro E Ije no vua fuone abe oenoejo ije no vua fuone ije none fie ro kuke none ni nuvuone igia fu gae. Ro ije fuka ma none ni nuvuone ijia gakinu ro vajae fuone none umui nuvuone ijia farena gae. \v 2 Ro E Ije fu vua ije ma karivako ijadufuo vua ije fune abena e boegiebuo nidua ijia romoga none gae. Ijadufuo no vua fuone abena e boeje kuarianoekinu ro ja kuariave. No ijiege kuariaga ja vua ijene mukoreigia fiena vierafero E Ije fu vua ma karivako ije abe ruaema ije fune isuibe Asoe fuone ijiaki fina ruae. Ro iviama fu nuvuone ruaemaro ja ijiege vierafeke. \v 3 Ijadufuo no irere no giakinu fieva no ijene abena ja kuariave. No ijiege kuariaga ja fiena roga no besu afuina una Asoe nuvuone ijiakiro Fari fuone Jesu Kuraesi ijena besu goruvekinu karivake. \v 4 Ro vua ige no isoena ja nijiavo ijadufuo maeje ja vua ijia dana oemarekinu karinoeke. Ro kuke no izege ije ja oemarevo ije fiekuva nodua noka ijiege oemarekinu karinoedufuo. \s1 Godi fuka sanaema ijene \p \v 5 Ro vua ige no nijasiavo ije no Godido Fari ijare kuaruema no ijene abena ja kuariave. Godi fuje fuka sanaema ijene ro are iziebure fu fino ije fuka sanaema ijiaru ro titutema ije ja ijia gakuva baki. \v 6 Ro no kuae noeje no Godina agane besuno kuae rove vua nuvuone no kuaevo ijiakiro nuvuone no kenoevo ije no uria titutema ijia kenoejogakuva ije noka e iti kufuiki. \v 7 Ro no maza boeje ijiege Godi fu sanaema ro fu fino ijiege kari vakuva ije none una besu goruvekinu karinoeve. Ro kuke Fari fuone Jesudo kavuane ije fu ise nuvuone boeje no renoejo ije soejuokinu karaunuome. \p \v 8 Ro no kuae no ise bino renoejo bakino kuaekuva ije noka kufuimeve. Ro kuke vua maeje fu oe nuvuone ijia namo baki. \v 9 Ro no ise nuvuone boeje no renoejo ije Godi kuarakuva fuje fuka naenitua ma renoeno ijadufuo fure ise nuvuone boeje guona areke. Ro kuke fu vame ise no renoejo ije fikorejuoke. \v 10 Ro no kuae no ise renoejo bakino kuaekuva ije noka Godi dabe kufui igege kuaenoeve. Ro kuke vua fuone fu oe nuvuone ijia namo baki. \c 2 \s1 E ije no ifejuomo ije Jesu Kuraesi \p \v 1 Na fasi ige isoena anafa none boeje ja nijiaga vua ije fu ja ifejiaga jabe ise bino renoeke. Ro eranebe bu mamoena ise renoekuva Jesu Kuraesi e ije maturaema ije fu nuvuefuo Asoe nuvuone ije kuaramo ijadufuo fu ise nuvuone guona areke. \v 2 Ijadufuo maeje Jesu fu ise nuvuone ijiakiro e boeje are irore igia karinoeva ijiebuo ise ijadufuo baronei. \p \v 3 Ro no Godido akae boeje fu kuaruema ije mukoreigia fiena renoekuva ije no vierafero none ma fu vierafevoro no ijiege vierafeke. \v 4 Ro e be fu kuae fu Godi ma vierafemano kuae rove akae fuone ije fu naebe mukoreigia vierafekuma e ije fuka kufuimene. \v 5-6 Ro erare fu vua fuone mukoreigia fiena renoekuma fuone izege fu Godi oetuamo ije fuka ma ireobo rena vake. Ro erare fu kuae fu Godiki finoeno kuaekuma e ije fuka Jesu Kuraesi fu fivaema ijiege finoeke. Ro fu ijiege finoekuma no ma vierafero fuka Godiki finoenoro no ijiege vierafeke. \s1 Godido vame iviaeko ijene \p \v 7 Ro kairafano, vua ige na isoe nijiavo ije fu iviaeko baki ro vua ije fuka isuiko. Ro vua ije bune isuibe nijasiavo jane fiena ruaeva ijene. \v 8 Rove na una kuke vua iviaeko be isoena nijiave. Ro vua ijadufuo maeje fune Jesu Kuraesire renoeno jane gae ro kuke jane koejo mimatana renoeve. Ijadufuo titutema ije fune bakirevakoga sanaema ije fune no kariva ijia saname. \p \v 9 Ro erare oenoeno kuaeko fuje fu sanaema ijia finoeno kuaenaro fu una kai fuone be ziegafamo e ije fuka uria titutema ijia finoene. \v 10 Ro kuke erare fu kai fuone mukore oetuakuma e ije fuje fu sanaema ijia oenoene. Ro kuke fu ise bino oe fuone navo baki ijadufuo fube kairafa bino arafiriaga bu ise reke. \v 11 Ro erare fu kairafa fuone maza boeje ziegafiamo ije fuje fuka uria titutema ijia finoene. Ijadufuo maeje ni fuone ije fune titutema ijare mukoreigia okuraema ijadufuo fu izege rerekinu oenoekuma baki. \s1 Vua iviaeko ijadufuo ubine ijene \p \v 12 Ro anafa none na oetuavo igie, fasi ige na isoena nijiavo ijadufuo maeje ise jone boeje fune Jesu Kuraesire joefuo baronena fune abe vae. \v 13 Ro asoerafa none boegie fasi ige na isoena nijiavo ijadufuo maeje E Ije fune romo jane gae. Ro jane mukoreigia vierafega fuje fune iko zinume ijia Godiki fina ruae. Ro e nikaki boegie fasi ige na isoena nijiavo ijadufuo maeje ja Setani jane jare iraraena asi. Ro anafa none na oetuavo igie fasi ige na isoena nijiavo ijadufuo maeje Asoe jone ije jane mukoe vierafei. \v 14 Ro asoerafa none igie, fasi ige na isoe nijiavo ijadufuo maeje E Ije fu isuibe Godiki fima ije fune romo jane gana vierafei. Ro e nikaki igie fasi ige na isoe nijiavo ijadufuo maeje jaeje jaka e daroki. Ro Godido vua ije fune oe jone ijia namo ijadufuo Setani jane dabe garege akoe. \s1 Ume igadufuo vame jade oetuavo ijene \p \v 15 Ro ume igiakiro ire bino ume igia naovo ije jade uruvana oetuavo. Ja ume igadufuo sinuome ije uruke oetuavo ije ja Godi mukoreigia oetuavo baki. \v 16 Ijadufuo maeje ire isekuma boeje ume igia naovo ije bu Godido ruovo baki. Ro ire ijeja vame ije barabaru oenoevo ije uruke vierafenoevo ijiakina ire ije no niome igia giana ireobo vierafevo ijene. Ro kuke vame izege no sinuome binobino kevo ijadufuo aroekaravo ijene. Ro ire ije bu Godido ruovo baki ro bume ire bino bu ume igia naovo ijene. \v 17 Ume igiakiro ire boege bu ume igia noaga e bu giana oetuavo ije rade buka bakireke. Ro erare fu irere Godi fu vierafema ijiaru renoeno ije fu maza boeje ijia fivake. \s1 E ije Jesuna nigaraevo ijiebuo vua ijene \p \v 18 Anafa none igie, maza ije Jesu Kuraesi fu una ruadufuo ije fune ivuareme. Ro bune isuibe kuariana kia, E ije Jesuki nigaraenoeno ije fu una ruakono kiae. Ro iviama e ijieki ije buneka boeje samadirevo no giae. Ijadufuo no vierafega maza ije fune ivuareme. \v 19 E ije Jesuna nigaraenoejo ije bu naebe noena agane besu rena oenoevo ijadufuo bune no unuona vae. Ro bu noena oe besu revabitie bu uria noena karinoeve. Ro bune no arena vaeva ijadufuo none giana vierafega bu noena oe besu vierafevo baki. \p \v 20 Ro jaeje fune Jesure Godido Kavene ije kena uniaejiae ijadufuo ja vua ma ijiaru vierafenoeve. \v 21 Ro fasi ige na isoe nijiavo ije ja vua maeje naebe vierafeva ijadufuo na ije isoe nijiavo baki. Ro na vierafega vua maeje jane mukoreigia fiena vierafei. Ro kuke jane vierafega vua kufui ije fu Godido ruomo baki. \p \v 22 Ro e ije vua kufuimenoevo ije e ije eranebe? Ro e ijeja e ije fu kuae Jesu fu ma Godido ruaema bakino kuaemo e ijare e iti kufuiki. Ro kuke fure ijiege renoeno ijadufuo fu Asoe nuvuone ijiakiro Fari fuone Jesu fu giana ijuoneme. \v 23 Ro erare fu Fari fuone ije ijuonemo e ije fu kuke Godi Asoe fuone ije ijuoneme. Ro erare fu Fari fuone mukoreigia oetuana mesirimo ije fu kuke Asoe fuone ije oetuana mesirime. \p \v 24 Ro ni vua ije ja iko zinume ijia fiena ruaeva ije mukoreigia oe jone ijia vierafenoefo. Ja vua ije mukoreigia oe jone ijia vierafenoekuva ja Jesukiro Asoe fuone ijena agane besu rena karinoeke. \v 25 Ro Jesu Kuraesi fu korofuo vua maeje abena no muokono kue. Ro ire ije fu abe muoko kuema ijeja fu vame ma karivako ije abena muoke. \p \v 26 Ro vua ige na isoe nijiavo ijeja na e ije bu vua kufuimena nijasiavo ije buka ja kaenamiana una vame ise ijia vakuvejo na ijadufuo isoena nijiave. \v 27 Rove igia fie, jaeje fune Kuraesire Kavene fuone ije kena oe jone ijia uniaejiae. Ro maza ije Kavene fu oe jone ijia samuagiamo ijia e bino bube una ja nijasiadufuo. Ijadufuo maeje fune Kavene Akae ijare ire boeje nijasiame. Ro irere fu nijasiamo ije fu kufui ije nijasiamo baki ro fune vua maeje nijasiame. Ijadufuo ni vua ije fu nijasiamo ije irinana Kuraesina besu karinoefo. \p \v 28 Ro anafa none na oetuavo ije nika Jesu ma vierafena fuina oenoefo. Ijadufuo maeje maza rade fu una ruomo ijia nome zinune jaeve baki uri fu bieke. \v 29 Ro jane vierafega Jesu fuka vame ma ijiaru renoeno. Ijadufuo erare fu vame ma ijiaru renoeno ije ni vierafe e ije fune ma Godido fari. \c 3 \s1 No Godido anafa igege karinoedufuo ijene \p \v 1 Ro ni Asoe nuvuone ije fu izege no oetuaema ije gafo! Fu no oetuaema ije fuka ma ireobo ijadufuo noeje fu kuo, Jaeje ja anafa noneno kue. Ro ije fuka ma noeje noka ma Godido anafa. Ro e ije bu ume igia ise renoejo ije bu Godi bu naebe mukoe vierafe. Ijadufuo noeje no anafa fuone ijiege bu naebe mukore vierafei. \v 2 Ijadufuo e kairafa none ma igie noeje none iviama Godido anafa rei. Ro rade no are fu fino ijia vakuva nobite e izeki redufuo ije noka naebe mukoe vierafei. Ro no vierafega Jesu fu una ruakuma vajae nuvuone ije bu una fuone ijiege rega no gake. Ijadufuo maeje Jesu noka ni nuvuone ijia gake. \v 3 Ro erare fu ma vierafero Jesu fu una ruakuvenoro fu ijiege vierafemo e ije fuka Jesu fu ma ijiaru renoeno fu ijiege renoeke. \p \v 4 Ro erare fu ise renoeno ije fu Godido vierafe ijia renoevo baki. Ro kuke Godido akae ije fu aguaemo baki ijadufuo maza boeje fuka Godido akae ije kame tuaseme. \v 5 Ro jane vierafe Jesu fu ruaema ije fu e ije ise renoejo ijiebuo ise ije abe vakiro ruae. Ro fuje fu ise bino renoema baki. \v 6 Ro erare fu Jesuki maza boeje finoeno ije fube maza boeje ise reruke. Ro erare fu ise fu renoeno ije fu naebe aremo e ije Jesu fu naebe gae ro kuke fu fuosiki maza boeje finoeno baki. \p \v 7 Ijadufuo anafa none igie ni koejo mukoreigia samuanamikinu oenoefo. Ro jade arega e ise binobe ja kaenamia una vame ise ijia vako. Ro erare fu vame ma ijiaru kenoeno e ije fuje fuka Jesu fu maturaema ijiege maturaeme. \v 8 Ro erare fu ise renoeno e ije fuka Setanido e ijadufuo maeje Setani fu iko zinume ijia fu ise rena ruae. Ro Godido Fari ije fu irerefuo ume igia arina ruaema ije fu Setanido i ije dabe tuase garege akoekiro ruae. \p \v 9 Ro erare fu Godido ame rekuma ije fube ise fu ude renoema ije renoeke. Ijadufuo maeje Godi fune kavene iviaeko ije abena e ije mae. Ro kuke fune una Godido ame redo fube una ise renoeke. \v 10 Ro no izege Godido anafa ije no bino giakiro Setanido anafa ije no bino giadufuo vame ije ijiege. Erare fu naebe vame maeje ijia kenoekinu ro kairafa fuone fu naebe mukore oetuamo e ije fu Godido ame baki. Ijadufuo e ije fu ijiege renoejo ije fuje fu Setanido ame. \s1 Vua oetuanamivo ijene \p \v 11 Ro vua iko zinume ijia ja fieva ije igene. Noka kairafa nuvuone ijena oetuanamike. \v 12 Ro nobe e Keini fu kema ijiege renoeke. Fuje fuka Setanido e ijadufuo fu uvia fuone kanamo fu baronei. Ro Keini fu irerefuo uvia fuone kanamo fu barone? Ijadufuo maeje Keini vame fuone fu renoeno ije fuka ma ise. Ro uvia fuone fuka vame ma ijiaru renoenoga fu ijadufuo kanamo fu baronei. \p \v 13 Ijadufuo uviarafa none igie e ume igia ise renoejo ijiebe ja ziegafiakuva jade oeseradiavo. \v 14 No kairafa nuvuone ijena oetuanamivo ijadufuo no vierafega no vame ise ije bu no kaenamuo baromuna vako ije none arena una vame ma kari vako ijia ruae. Ro erare fu naebe kairafa fuone ije mukoreigia oetuamo ije fuje fu uria vame baromuna vako ijia vake. \v 15 Ro erare fu kairafa fuone ziegafiamo ije fu e kanianoeno igeki. Ro e ije e kanianoeno ije fu vame ma kari vako ije fu naebe gae. \p \v 16 Jesu fu nuvuefuo baronema ijia none izege fu no oetuamo ije gae. Ijadufuo Godi fu vierafe nodua noka uri kairafa nuvuone ijiebuo oekuva fuka mareke. \v 17 Ro e be fu sinuome uruvana kena finoekinu kuae fu Godi mukoreigia oetuamono kuae. Rove fu naebe kai fuone be isema oenoeno ije ifejamo ije fuka Godi mukore oetuamo baki ro fuka kufuimenoene. \v 18 Ijadufuo anafa none igie jade itire igia kuaeko ja kairafa jone oetuavono kuaevo. Ro nika uri vame ma ijia mukoreigia kenoekinu ro oe jone ijiakuma e ifejiafo. \p \v 19 No kairafa nuvuone ijene ijiege mukoreigia ifejiakinu oetuakuva na vierafe none Jesu Kuraesido makae ije nuvena kenoeve. Ro kuke no Godido nidua ijia oemarekinu oenoeke ro nobe fu gana jumeke. \v 20 Ro no vierafega vame nuvuone no kenoejo ije fu isekuma ije Godi fudua fune vierafega vame ije fuka ise. Ijadufuo maeje fu ire boeje no renoejo ije fune guona vierafemo. \v 21 Ijadufuo erafano maegie ja vierafega ja ire ise bino ja naebe rejoga nika dazena Godido nidua ijia vadufuo. \v 22 Godi fu irere no kuavo ije fuka vajuomo. Ijadufuo maeje no vua fuone ije noka mukoreigia iriniana ire ije fu oemaemo ijia renoeve. \v 23 Ro vua ije Godi fu no kuaruema ije fu kuo janika Fari none ije ma vierafefo. Ro nika izege fu ude kuaruema ijiege rena kairafa jone mukoreigia oetuano kue. \v 24 Ro erare fu Godido vua ije mukoreigia fiena irinamo e ije fuka maza boeje Godiki finoekoro Godi fudua fu fuosiki finoene. Godi fune Kavene fuone kena no uniaejue ijadufuo no ma vierafega Godi fune maza boeje noena finoene. \c 4 \s1 Kavene ma ijiakiro kavene ise ijiebuo vua ijene \p \v 1 Kairafa none maegie ja e binobe oenoene biesiriana kiako, Noeje no kavene maeje abevano kiaga jade vua buone fiena ma vierafevo. Ro nine oenoekinu giaga kavene ije fune ma Godido ijare oe buone ijia fijoga ni ijare vua buone fiefo. Ijadufuo maeje e boeje buka kufuimena oenoekinu kiavo, Noeje no ma Godido vua abe oenoevono kiavo. \v 2 Ro ja vame izege e ije bu Godido kavene abeva ije giake? Ro vame ije ja izege giadufuo ije ijiege. Erare fu kuaeko Jesu Kuraesi fu Godido ruae ro fu ma emano kuaemo ije ni vierafero e ije fune ma Godido Kavene abemaro ijiege vierafefo. \v 3 Ro ja fiega bu kuaevo, Jesu fu ma ema bakino kuaevoga ni vierafero e ije bu kavene ise ije abevaro ijiege vierafefo. Ijadufuo maeje vua buone bu kuaevo ije fu kavene ise ijare kuariaga bu ije kuaeve. Ijadufuo ja ijia vierafero e ije Jesuki nigaraenoeno ije fu ume igia ruakono kuaeva ije fune ruaemaro ja ijiege vierafeke. Ijadufuo fune kavene ise ijare e ijiebuo oe ijia ariga bu ije kuaevo, Jesu Kuraesi fu ma ema bakino kuaeve. \p \v 4 Ro anafano jaeje jane Godido e rei ijadufuo jane jare e ije bu kufuimena Godido vua ije abe kuaenoevo ije iraraena asidiae. Ijadufuo maeje Kavene ije fu oe jone ijia jaena fino ije fuka ma daroki. Ro kavene be ije fu e ume igia ise renoejo ijena fino ije fuka daro baki. \v 5 Ro e ije ume igia ise renoejo ije bu vua buone bu kuaenoevo ije bu ume igadufuo vua ijene kuaenoeve. Bu ijiege kuaenoekoke e ije ume igia ise renoejo ijiebe vua buone fieve. Ijadufuo maeje vierafe buone ije bu ume igadufuo ije kena kuaenoeve. \v 6 Ro noeje no Godido e. Ijadufuo erare fu vua nuvuone ije mukore fiemo ije fuje fu Godido e. Ro erare fu vua nuvuone naebe mukoreigia fiemo e ije fu Godido e baki. Ijadufuo no ijiege renoekinu giaga kavene ize fu ma Godido ro ize fu kavene ise e biesiriamo no ije giake. \s1 Godi fu oetuanamivo ijadufuo zinume ijene \p \v 7 Kairafa none igie nika roga no nuvuone oetuanamifo ijadufuo maeje oetuanamivo ije fu Godido ruomo. Ro erare fu e gue oetuamo e ije fu ma Godido e ro kuke fu Godi mukoreigia vierafemo. \v 8 Godi fuka e oetuamo. Ijadufuo erare fu naebe kairafa fuone ije oetuamo e ije Godi fuka naebe gae. \v 9 Ro Godi vame izege fu e oetuamo ije fu nijasuema ije fu Fari fuone besu ije kuamo fu ume igia ari ruae. Godi fu vierafero fu Fari fuone kuaga fu ume igia ari roga e ige no Fari fuone ije ma vierafekuva no vame ma karivako ije abekiro fu ijadufuo ijiege rei. \v 10 Ro oetuanamivo ijadufuo zinume maeje no nore Godi oetuaeva baki ro fune fure no mukoreigia oetuamo. Ijadufuo fu Fari fuone kuamo fu arina ise nuvuone ijadufuo zinone igege kurosi ijia baronei. \p \v 11 Ijadufuo kairafano Godi fu no ijiege mukoreigia oetuaejoga na vierafe nodua noka uri nuvuone oetuanamidufuo. \v 12 Ro Godi fu erare gaema baki. Ro no nuvuone oetuanamikuva Godi fuka maza boeje oe nuvuone ijia finoeke. Ro fu noena ijiege finoekuma fure ifejuomo ijadufuo nuvuone izege no e oetuavo ije fuka ireobo rena vake. \p \v 13 Noka ma vierafega Godi fu noena fino ro nodua no fuina karinoeve. Ijadufuo maeje fure Kavene Akae fuone kena no uniaejue. \v 14 Ro kuke fu Fari fuone kuamo fu e boeje karauniakiro ume igia ari ruae. Fu ari romoga none konuvuo ni nuvuone ijia fu gae. Ijadufuo no vua fuone abena e boeje kuarianoeve. \v 15 Ro erare fu kuaeko Jesu fu Godido farino kuaemo e ije fu maza boeje Godiki finoene ro Godi fu fuosiki finoene. \v 16 No vierafega Godido oetuamo ije fuka maza boeje noena navake ijadufuo noka oemarekinu karinoeve. \p Ro Godi fuka e oetuamo. Ijadufuo erare fu kairafa fuone oetuamo e ije fu maza boeje Godiki finoene ro Godi fu fuosiki finoene. \v 17 No Godi mukoreigia oetuakinu ro kairafa nuvuone ije oetuakuva no maza ije Godi fu fina e boeje ke mazie giamo ijia nobe fu gana jumeke. Ijadufuo maeje no Jesu Kuraesi izege fu ume igia oenoema no ijiege oenoeve. \v 18 Ja Godi jone ije mukore oetuakuva jabe jumekinu oenoeke. Ijadufuo maeje ire boeje ja giana jumevo ije fune oetuamo jone ijare okuriaedo jabe una jumekinu oenoeke. Ijadufuo erare fu jumekinu oenoeno e ije Godi fu mukore oetuamo baki. Ro fume Godi izege fu e kena isekafiadufuo ijiaru vierafenoene. \p \v 19 Ro Godi fune isuibe no oetuaema ijadufuo no ije kairafa nuvuone ijene oetuave. \v 20 Ro erare fu kuae fu Godi oetuamono kuae ro fu una kairafa fuone ije ziegafiamo ije fuka kufuimene. Fu kairafa fuone fune giamo ije fu naebe mukoreigia oetuakuma fu izege Godi ije fu naebe gaema ije mukoreigia oetuake? \v 21 Ro Jesu Kuraesi no fu kuaruema ije fu kuo, Erare fu Godi oetuakuma nika kairafa fuone ije mukoreigia oetuano kue. \c 5 \s1 No Godi ma vierafekuva no Setanido vame ije asidufuo ijene \p \v 1 E be erare fu ma vierafero Jesu fu ma Godire kuamo fu ume igia e boeje karauniakiro ari ruaemaro fu ijiege vierafemo e ije fune ma Godido e. Ro erare fu Godi mukore oetuamo e ije fune kuke Fari fuone Jesu mukoreigia oetuame. \v 2 Ro no vierafega none Godi mukoreigia oetuakinu vua fuone boeje iriniavoga ije no vierafe none anafa fuone ijeduaku oetuave. \v 3-4 Ro no Godido vua fuone boeje mukoreigia iriniakuva ije no vierafero none fu mukore oetuavoro no ijiege vierafeke. Ro vua fuone boeje fu kuaruomo ije fuka gikikimana baki. Ijadufuo maeje eranebe bu Godido anafa revo ije bu manido bu vua fuone iriniana Setani ijuegafake. Ro no vierafe no Setanido vame ise fu biesiruomo ije iraraena asidufuo ije noka Jesu ma vierafeke. \v 5 Ro erare fu manido fu Setanido vame ije ijuegafake? Ro e ije fu ijiege redufuo ije fune e ije erare fu vierafero Jesu fu ma Godido Fariro fu ijiege vierafemo e ijare manido fu Setanido vame ije ijuegafadufuo. \s1 Godi fu Jesudo vua maeje abe kuariaema ijene \p \v 6-7 Kairafano vua ige na Jesu Kuraesido kuariave. Jesu fu ume igia ari ruaema ije fu ire inokiro rei. Fu ire ije remoga no ijia gana vierafero fu ma Godido Fariro no ijiege vierafei. Ro ire inokiro ije fu remo no giaeva be ije bu fu abe Godido ive ijia do ruoravo no gae. Ro be ije fu baronemoga kavuane fuone fu ume igia usiaemo none gae. Ro bu abe do ijiaru ruoraeva bakiro fu kuke kavuane fuone abe nuvuefuo ume igia usiae. Ro vame ije fu kema ije fune Godido Kavene Akae ijare no kuaruona kuo, Jesu irere fu ume igia rema ije fune mano kue. \v 8 No Godido Kavene ijiakina do ije Jesu fu ruema ijiakina kavuane fuone fu usiaema no ije giaeva ijadufuo no vierafega Jesu fune ma Godido Fari. No ire inokubeke ije fu rema ije giavo ijia no ma vierafero Jesu fune ma Godido Fari. \v 9 No e bino ijiebe Jesudo vua ije abe kuaruovo no ije ma vierafevo. Ro no Godido vua ijare Jesusina kuaruomo ije no fiega fuka ma daroki ijadufuo no vua fuone ma vierafeve. \v 10 Ijadufuo erare fu vierafero Jesu fu Godido Fariro fu ijiege vierafemo e ije fune oe fuone ijia mukoreigia ma vierafeme. Ro erare fu Godido vua ije naebe mukoreigia fiena vierafemo ije Godi fuka dabe kufui igege vierafeme. Ijadufuo maeje fu Godi vua ije fu Fari fuone ijadufuo kuaema ije fu naebe mukore fiena vierafema ijadufuo fu ijiege renoene. \v 11 Ro Godi fu kuaruema ije fu ijiege kuarue. Erare fu Fari none Jesu maza boeje ma vierafekinu fivakuma e ije fu vame makarivako ije abekono kue. \v 12 Ro kuke fu kuo, Erare Fari none abega fu fuosiki finoeno e ije fune vame ma karivako ije abene. Ro erare fu Fari none naebe abega fu fuosiki finoeno e ije fu vame ma karivako ije abeno baki. \s1 Vame ma karivako ijadufuo vua ijene \p \v 13 Ro vua ige na isoe nijiavo jaka mukoreigia vierafero ja Godido Fari ijadufuo vame ma karivako ije jane abevaro ja ijiege vierafekiro na ijene isoe nijiave. \v 14 Ro no ma vierafe no nidua fuone ijia baname isoena irere fu vierafema ije kuarakuva fuka fiena ifejuoke. \v 15 Ro kuke no ma vierafero fu vua nuvuone boeje no kuaravo ije fune fiemoro no ijiege ma vierafekuva ije no vierafega fu ire boeje no kuaravo ije fu fiena vajuoke. \p \v 16 Ro erare fu gaga e kai fuone be fu ise be rena fune vame miane naeno ijia vakoga fuka fuefuo baname isoeke. Fu ijiege isoega Godi fu ise fuone gana aregaro ifejaga fu una vame ma karivako ije abedufuo. Ro erare fu Godi Asoe nuvuone ije mukoreigia ijuegafana Jesu Kuraesido kavuane fu fuefuo usiaema ije dabe omise igege vierafenoeno ije funeka una vame ise miane naeno ijia vake. Ijadufuo fu e ijieki ije fube fuefuo baname isoemo. \v 17 Ro e ije ise boeje binobino bu renoevo ije buka Godido akae ije kame tuaseve. Rove ise gue bu renoevo ije bu vame ise miane naeno ijia vako baki. \p \v 18 Ro none vierafega erare fu una Godido fari remo ije fu maza boeje ise renoeno baki. Ijadufuo maeje e ije fune Godido Fari Jesure samuamo ijadufuo Setani fu e ije dabe vame ise ijia arafirimo baki. \p \v 19 Ro noeje none vierafega no Godido anafa. Ro e ije bu ume igia ise renoejo ije fu Setanire samuagiame. \p \v 20 Ro fune Jesu Godido Fari ijare arina ume igia noena oenoekinu nijasuema ijadufuo no Godi ma vierafeve. Noeje no Godi ma ijiakiro Fari fuone Jesu Kuraesina karinoeve. Godi ije fu Godi ma ro fuje fu vame ma karivako ijene. \p \v 21 Ijadufuo erafano igie nika koejo mukoreigia samuanamikinu karinoefo. Ro jade uri ume igadufuo ire bino kame oe jone ijia uruvana vierafenoegaro Godi maeje ja dabe una ikene nijavo.