\id ZEP 
\ide UTF-8
\h Sofoni
\mt1 SOFONI
\ip Sofoni u Yudɑbɑ kɑ Yerusɑlɛmuɡibu sɔ̃ɔmɔ mɑ Gusunɔ u koo bu sɛɛyɑsiɑ. Mɑ u mɑɑ tɔn tukobu kirɔ mɔ̀ be bɑ kɑ bu sikerenɛ u nɛɛ, Yinni Gusunɔn siribun tɔ̃rɑ wee. Tɔ̃ɔ te, nɔni swɑ̃ɑruɡirɑ. Adɑmɑ ɑmɛn biru, Isirelibɑn sukum bɑ koo wurɑmɑ Gusunɔn mi kpɑ bu kpɑm Yerusɑlɛmu seeyɑ.
\is1 Tire ten kpunɑɑ
\iq1 1. Gusunɔ u koo Yudɑbɑ kɑ Yerusɑlɛmuɡibu siri, wiru 1:1n di sere wiru 2:3.
\iq1 2. Gusunɔ u koo bwese tukunu kpeerɑsiɑ, wiru 2:4-15.
\iq1 3. Yinni Gusunɔ u koo Yerusɑlɛmu seeyɑ, wiru 3:1-20.
\ie
\c 1
\p
\v 1 Gɑri yiniwɑ Yinni Gusunɔ u Sofoni, Kusin bii sɔ̃ɔwɑ Yosiɑsi, Amɔɔn bii, Yudɑbɑn sinɑ bokon bɑndun wɑɑti sɔɔ. Sofoni wi, u sɑ̃ɑwɑ Gedɑliɑn debubu, Amɑriɑn sikɑdobu, Esekiɑsin yɑ̃ɑsebu.
\s1 Yinni Gusunɔ
\s2 u koo hɑnduniɑ sɛɛyɑsiɑ
\q1
\v 2 Yinni Gusunɔ u nɛɛ,
\q1 kon kpuro kpeerɑsiɑ hɑnduniɑ sɔɔ.
\q1
\v 3 Kon tɔmbu kɑ yɛɛ kɑ ɡunɔsu kɑ swɛ̃ɛ kpeerɑsiɑ
\q1 kɑ sere mɑɑ tɔn kɔ̃sobu kɑ ye yɑ rɑ bu sokurɑsie.
\q1 Kon tɔmbu kpuro kpeerɑsiɑ hɑnduniɑ sɔɔ.
\q1 Nɛ, Yinni Gusunɔwɑ nɑ yeni ɡeruɑ.
\s1 Yinni Gusunɔ u koo Yudɑbɑ
\s2 kɑ Yerusɑlɛmuɡibu sɛɛyɑsiɑ
\p
\v 4 Yinni Gusunɔ u mɑɑ nɛɛ,
\q1 kon Yudɑbɑ kɑ Yerusɑlɛmuɡibu kpuro nɔmɑ doke.
\q1 Kon bũu wi bɑ mɔ̀ Bɑɑlin sɑ̃ɑ yee ni nu tie kpeerɑsiɑ min di.
\q1 Kon yen wiruɡibu kɑ yen yɑ̃ku kowobun yĩsɑ ɡo.
\q1
\v 5 Be bɑ dii tɛɛri wɔllɔ kperi kɑ suru sɑ̃ɑmɔ
\q1 kɑ be bɑ bɔ̃rumɔ kɑ nɛ, Yinni Gusunɔn yĩsiru,
\q1 mɑ bɑ wure bɑ bɔ̃rumɔ kɑ ben bũun yĩsiru,
\q1 be kpurowɑ kon ɡo.
\q1
\v 6 Be bɑ mɑn biru kisi kɑ be bɑ ku rɑ mɑn kɑsu,
\q1 kɑ sere mɑɑ be bɑ ku rɑ mɑn ben ɡɑri sɑɑwɑrɑ ko,
\q1 be kpurowɑ kon ɡo.
\q1
\v 7 I nɔɔ mɑrio wi, Yinni Gusunɔn wuswɑɑɔ.
\q1 Domi win tɔ̃ru tɑ turuku kuɑ.
\q1 U win yɑ̃kuru sɔɔru kuɑ.
\q1 U mɑɑ ɡɔsɑ be bɑ koo tu di.
\q1
\v 8 Wi, Yinni Gusunɔn yɑ̃ku ten tɔ̃ru sɔɔ,
\q1 u koo wiruɡibu kɑ sinɑ bokon bibu wɔri,
\q1 kɑ sere mɑɑ be bɑ tɔn tukobun komɑnu swĩi.
\q1
\v 9 Yen tɔ̃ɔ te, be bɑ ku rɑ sɑ̃ɑ yerun kɔnnɔ suuku tɑɑrɑm kɑ̃ nɡe bũu sɑ̃ɔbu,
\q1 kɑ sere be bɑ ben sunɔn yɛnu dukiɑ yibiɑmɔ
\q1 ye bɑ ɡurɑmɑ kɑ ɡbɛnɑ, kɑ dɑm dibu,
\q1 be kpurowɑ u koo wɔri.
\q1
\v 10 Yen tɔ̃ɔ te, bɑ koo wuri nɔ sere kɔnnɔwɔ ɡe bɑ mɔ̀ Swɛ̃ɛ,
\q1 kɑ mɑɑ wuun wɔɔ berɑ ɡɑɑn mi.
\q1 Mɛyɑ nɔni swɑ̃ɑ bɑkɑrɑ ko n wɑ̃ɑ ɡuunu wɔllɔ.
\q1
\v 11 Bɛɛ Mɑkitɛsiɡibu, i wuri koowo.
\q1 Domi tenkubɑ kpuro bɑ koo kɑm ko.
\q1 Be bɑ ɡobi kɔsimɔ kpuro bɑ koo kpeerɑ.
\q1
\v 12 Yen tɔ̃ɔ te, u koo Yerusɑlɛmu bũuri kɑ fitilɑnu.
\q1 U koo tɔmbu wɔrimɑ be bɑ sɔ̃ kpɛtɛɛ nɡe tɑm kɔrɔnu.
\q1 Mɑ bɑ ɡerumɔ ben ɡɔ̃ruɔ bɑ mɔ̀,
\q1 wi, Yinni Gusunɔ u ǹ ɡeɑ mɔ̀, u ǹ mɑɑ kɔ̃sɑ mɔ̀.
\q1
\v 13 Bɑ koo ben ɑrumɑni ɡurɑ kpɑ ben yɛnusu su ko bɑnsu.
\q1 Bɑ koo diɑ bɑni yè sɔɔ bɑ ǹ sinɑmɔ.
\q1 Bɑ koo resɛm duure, ɑdɑmɑ bɑ ǹ yen tɑm nɔrumɔ.
\s1 Yinni Gusunɔn tɔ̃ru
\q1
\v 14 Yinni Gusunɔn tɔ̃ɔ nɑnumɡirɑ tɑ turuku kuɑ.
\q1 Te wee tɑ wee fuuku, tɑ nɔɔɡiru sue.
\q1 Tɑbu durɔ dɑmɡii u koo kuuki ko dɔmɑ te.
\q1
\v 15 Tɔ̃ɔ te, tɑ sɑ̃ɑwɑ mɔrun tɔ̃ru.
\q1 Tɔ̃ɔ te, tɑ sɑ̃ɑwɑ nuku sɑnkirɑnun tɔ̃ru.
\q1 Tɑ sɑ̃ɑwɑ kɑm kobun tɔ̃ru.
\q1 Tɔ̃ɔ te, yɑm wɔ̃kurɑ koo tu wukiriwɑ nɡe bukɔ kɑ ɡuru winu.
\q1
\v 16 Yen tɔ̃ɔ te, tɑbu kowobu bɑ koo kɔbi so
\q1 kpɑ bu kuuki ko bu kɑ wuu si su ɡbɑ̃rɑnu mɔ wɔri.
\q1
\v 17 U koo tɔmbu nuku sɑnkirɑnu kpɛ̃ɛ
\q1 kpɑ bɑ n sĩimɔ nɡe wɔ̃kobu.
\q1 Domi Yinni Gusunɔwɑ bɑ torɑri.
\q1 U koo de ben yɛm mu n tɛrie nɡe tuɑ,
\q1 kpɑ ben ɡonu nu n sɑ̃ɑ nɡe kubɑnu.
\q1
\v 18 Yen dɔmɑ te, ben sii ɡeesu ǹ kun mɛ ben wurɑ,
\q1 yen ɡɑɑ kun kpɛ̃ yu bu wɔrɑ Yinni Gusunɔn mɔru bɑkɑ yen min di.
\q1 Tem mɛ kpuro mu koo dɔ̃ɔ mwɑɑrɑ win mɔrun sɔ̃.
\q1 U koo mɛn tɔmbu kpuro ɡowɑ subɑru sɔɔ.
\s1 I tii kɑwo
\c 2
\q1
\v 1 Bɛɛ sekuru sɑribɑ,
\q1 i de i sinɑ i bwisiku,
\q1
\v 2 Yinni Gusunɔn himbɑ yu sere koorɑ.
\q1 Kpɑ tɔ̃ɔ te, tu ku rɑɑ bɛɛ sɑmbɑ ko
\q1 nɡe doo sɑko ɡe ɡɑ kɑ woo doonɔ.
\q1 I de i sinɑ i bwisiku
\q1 Yinni Gusunɔn mɔru bɑkɑ yen tɔ̃ru tu sere tunumɑ
\q1 tu bɛɛ deemɑ.
\q1
\v 3 Bɛɛ be i tii kɑwe kpuro tem mɛ sɔɔ,
\q1 i Yinni Gusunɔ kɑsuo.
\q1 Bɛɛ be i nùn mɛm nɔɔwɛ,
\q1 i ɡem kɑsuo, kpɑ i tii kɑwɑ.
\q1 Sɔrɔkudo i ko i yɑri Gusunɔn mɔrun tɔ̃ɔ te sɔɔn di.
\s1 Gusunɔn ɡɑri yi bɑ ɡeruɑ
\s2 bwese tuku ni nu wɑ̃ɑ
\s2 sɔ̃ɔ duu yeru ɡiɑn sɔ̃
\q1
\v 4 Gɑsɑn tem mu koo bɑnsu ko.
\q1 Kpɑ Asikɑloni yu yɔ̃rɑ dirɑ.
\q1 Bɑ koo Asidɔdun tɔmbu ɡirɑ sɔ̃ɔ sɔɔ ɡbɑ̃ɑrɑ.
\q1 Kpɑ bu Ekoronin tɔmbu seeyɑ ben wuun di.
\q1
\v 5 Bɛɛ Keretin bweseru, bɛɛ be i wɑ̃ɑ nim wɔ̃kun ɡoorɔ,
\q1 i kɑm kuɑwɑ.
\q1 Wunɛ mɑɑ Kɑnɑni, wunɛ wi ɑ sɑ̃ɑ Filisitibɑn tem,
\q1 Yinni Gusunɔ u nun ɡerusimɔ.
\q1 U nɛɛ, u koo nun kpeerɑsiɑ.
\q1 Goo kun mɑɑ sinɑmɔ wunɛ sɔɔ.
\q1
\v 6 Nim wɔ̃kun ɡoo te, tɑ koo kowɑ kpɑrɑ yenu,
\q1 mi kpɑrobu bɑ ko n dɑ bɔsu bɑ n ben yɑ̃ɑnu kpɑrɑmɔ.
\q1
\v 7 Domi sɑɑ ye sɔɔ,
\q1 Gusunɔ, Yudɑbɑn Yinni u koo ben be bɑ tie kpɑrɑ
\q1 kpɑ u kɑ ben yobu wurɑmɑ.
\q1 Nim wɔ̃kun ɡoo te, tɑ koo ko beɡiru.
\q1 Miyɑ bɑ ko n dɑ yɑɑ sɑbenu kpɑre,
\q1 kpɑ yokɑ bu kpunɑ Asikɑloniɡibun diɑ mi.
\s1 Gusunɔn ɡɑri yi bɑ ɡeruɑ
\s2 bwese tuku ni nu wɑ̃ɑ
\s2 sɔ̃ɔ yɑri yeru ɡiɑn sɔ̃
\q1
\v 8 U Mɔɑbubɑ kɑ Amɔnibɑn wɔmɑ nuɑ ye bɑ kɑ win tɔmbu sekuru doke.
\q1 Mɑ bɑ tii suɑ bɑ ben tem nɔɔ burɑ yenu susisiɑ.
\q1
\v 9 Yen sɔ̃nɑ wi, Gusunɔ Isirelibɑn Yinni,
\q1 wi, wi u wɔllu kɑ tem mɔ,
\q1 u nɛɛ, sere kɑ win wɑ̃ɑru, u koo de Mɔɑbubɑ bu kɑm ko nɡe Sodomuɡibu,
\q1 kpɑ Amɔnibɑ bu mɑɑ kɑm ko nɡe Gomɔrɑɡibu,
\q1 ben tem mu yɑkɑ kɔ̃susu kpi,
\q1 ǹ kun mɛ mu ɡɔsirɑ bɔru.
\q1 Gɑ̃ɑnu kun mɑɑ kpiimɔ mi sere kɑ bɑɑdommɑɔ.
\q1 Win tɔn be bɑ tie,
\q1 bɑ koo Mɔɑbu be, kɑ Amɔni be wɔri
\q1 bu ben yɑ̃nu ɡurɑ bu tem tubi di.
\q1
\v 10 Yeniwɑ Gusunɔ u koo de yu bu deemɑ ben tii suɑbun sɔ̃
\q1 kɑ sere mɑɑ ye bɑ wi, Gusunɔ wɔllu kɑ tem Yinnin tɔmbu wɔnwɑ
\q1 bɑ sekuru doke.
\q1
\v 11 Wi, Yinni Gusunɔ, u ǹ kɑ bu wɔnwɔndu mɔ̀.
\q1 U koo hɑnduniɑ kpuron bũnu kɑm koosiɑ.
\q1 Bɑɑ bwese ni nu wɑ̃ɑ tem burenɔ,
\q1 nu koo yiirɑ win wuswɑɑɔ nin wusɔ.
\s1 Gusunɔn ɡɑri yi bɑ ɡeruɑ
\s2 bwese tuku ni nu wɑ̃ɑ
\s2 sɔ̃ɔ yɛ̃si yɛ̃sikɑ ɡiɑn sɔ̃
\q1
\v 12 Bɛɛ Etiopiɡibu, bɑ koo mɑɑ bɛɛ sɔkiri kɑ win tɑkobi bu ɡo.
\q1
\v 13 U koo win nɔmu dɛmiɛ sɔ̃ɔ yɛ̃sɑn nɔm ɡeuɔ
\q1 u Asiriɡibu kɑm koosiɑ,
\q1 kpɑ Ninifu yu ko bɑnsu.
\q1 Gɑ̃ɑnu kun mɑɑ kpiimɔ mi.
\q1
\v 14 Yɑɑ sɑbenɑ nu koo sinɑ mi,
\q1 yɛɛ bwese bwesekɑ ɡesi.
\q1 Boorosu kɑ duuru bɛɛkunɑ nu koo kpunɑ furɔ si bɑ yen ɡberebɑ kuɑn sɔɔwɔ.
\q1 Bɑ koo kuuki nɔ sɑɑ fɛnɛntibɑn di.
\q1 Nɔni swɑ̃ɑrɑ ko n wɑ̃ɑ yen kɔnnɔwɔ.
\q1 Domi dirun burɑ te bɑ kuɑ kɑ sɛdurun dɑ̃ɑ tɑ koo kɛsikirɑ.
\q1
\v 15 Nɡe mɛyɑ wuu ɡe, ɡɑ koo ko,
\q1 ɡe, ɡe ɡɑ rɑɑ tii sue mi,
\q1 mɑ ɡɑ tɑmɑɑ ɡɑ wɑ̃ɑwɑ bɔri yɛndu sɔɔ,
\q1 mɑ ɡɑ tii sɔ̃ɔmɔ ɡɑ mɔ̀,
\q1 ɡerɑ ɡɑ kpuro kere.
\q1 Wee ɡɑ wɔrumɑ ɡɑ bɑnsu kuɑ.
\q1 Gɑ kuɑ yɛɛn wɑ̃ɑ yeru.
\q1 Wi u sɑrɔ mi, u koo wiɑ kowɑ u nɔmɑ kpɑrɑ.
\s1 Yerusɑlɛmuɡibu
\s2 bɑ ǹ Gusunɔn ɡere wure
\c 3
\q1
\v 1 Bɔ̃rurobɑ bɛɛ Yerusɑlɛmuɡibu.
\q1 Domi i sɑ̃ɑwɑ mɛm nɔɔ sɑribɑ,
\q1 mɑ i disi mɔ, i dɑm diinɑmɔ.
\q1
\v 2 I ku rɑ ɡooɡii nɔ.
\q1 I ku rɑ mɑɑ sɛɛyɑsiɑbu wure.
\q1 I ku rɑ Gusunɔ bɛɛn Yinni nɑɑnɛ ko.
\q1 I ku rɑ mɑɑ nùn susi.
\q1
\v 3 Bɛɛn sinɑ ɑsɑkpɔbu bɑ sɑ̃ɑwɑ nɡe ɡbee sinɑn
\q1 si su kukirimɔ wuu ɡe sɔɔ.
\q1 Mɑ bɛɛn siri kowobu bɑ mɑɑ sɑ̃ɑ nɡe yokɑn purukɑ
\q1 ni nu ku rɑ dĩɑnu yi bururun sɔ̃.
\q1
\v 4 Gusunɔn sɔmɔbu bɑ sɑ̃ɑwɑ nɑɑnɛ sɑribɑ.
\q1 Bɑ ku rɑ ɡere ye Gusunɔ u bu sɔ̃ɔwɑ.
\q1 Bɛɛn yɑ̃ku kowobu bɑ Gusunɔn sɑ̃ɑru disi dokemɔ.
\q1 Bɑ ku rɑ woodɑbɑ mɛm nɔɔwɛ.
\q1
\v 5 Adɑmɑ kɑ mɛ, Yinni Gusunɔ u wɑ̃ɑ kɑ bɛɛ.
\q1 U sɑ̃ɑwɑ ɡemɡii, u ku rɑ weesu ko.
\q1 U rɑ win ɡem terɑsiewɑ siribu sɔɔ bururu bɑɑtere.
\q1 U ku rɑ tɔ̃ru bure.
\q1 Adɑmɑ tɔn kɔ̃sobɑ bɑ kɔ̃sɑ mɔ̀, sekurɑ kun bu mɔ̀.
\q1
\v 6 Wi, Yinni Gusunɔ u nɛɛ,
\q1 u bwese ɡirinu ɡo,
\q1 mɑ u nin ɡbɑ̃rɑnu kɑ nin kuku yenu kɔsukɑ.
\q1 U derɑ ɡoo ku rɑ mɑɑ sĩ nin swɛɛ sɔɔ.
\q1 U nin wusu kɔsukɑ, ɡoo kun mɑɑ wɑ̃ɑ mi.
\q1
\v 7 Yerɑ u nɛɛ, bɛɛ Yerusɑlɛmuɡibu, ì n dɑɑ nùn nɑsie,
\q1 mɑ i win sɛɛyɑsiɑbu wurɑmɔ,
\q1 u ǹ dɑɑ bɛɛn wɑ̃ɑ yenu kɔsukumɔ.
\q1 U ǹ dɑɑ mɑɑ bɛɛ sɛɛyɑsiɑmɔ nɡe mɛ u kuɑ,
\q1 ɑdɑmɑ i rɑ n sɛndewɑ kɔ̃sɑn kobu sɔɔ.
\q1
\v 8 Yen sɔ̃, wi, Yinni Gusunɔ u nɛɛ,
\q1 i nùn mɑruo tɔ̃ɔ tè sɔɔ u koo se u bɛɛ wɔrimɑ.
\q1 Domi u ɡɔ̃ru doke u bwesenu kɑ nin sinɑmbu mɛnnɑ
\q1 u bu win mɔru sɔ̃ɔsi kɑ yen dɑm.
\q1 Kpɑ n sɑ̃ɑre nɡe bɑ tem mɛ kpuro dɔ̃ɔ doke win mɔrun sɔ̃.
\s1 Yinni Gusunɔ
\s2 u nɔɔ mwɛɛru kuɑ
\q1
\v 9 Sɑɑ ye sɔɔ, Yinni Gusunɔ u koo tɔmbun yɑri dɛɛrɑsiɑ
\q1 kpɑ bu win yĩsiru soku bu nùn sɑ̃ sɑnnu.
\q1
\v 10 Be bɑ nùn sɑ̃ɑmɔ bɑ yɑrinɛ bɑɑmɑ,
\q1 bɑ koo kɑ nùn kɛ̃nu nɑɑwɑ sɑɑ Etiopin dɑɑnun ɡurun di.
\q1
\v 11 Yen tɔ̃ɔ te, bɛɛ win tɔmbu Isirelibɑ,
\q1 i ǹ sekuru wɑsi bɛɛn dɑɑ kɔ̃sɑ kɑ bɛɛn torɑ ni i kuɑ sɔɔ.
\q1 Domi u koo be bɑ rɑ tii sue bɛɛn suunu sɔɔ wunɑ,
\q1 kpɑ bɛɛn tiin tɔn biɑru tu kpe win ɡuu dɛɛrɑrun wɔllɔ.
\q1
\v 12 U koo de tɔmbu fiiko bɑ n wɑ̃ɑ bɛɛn suunu sɔɔ
\q1 be bɑ ǹ tii sue.
\q1 Bɑ koo win yĩsiru soku u kɑ bu kɔ̃su.
\q1
\v 13 Isireli be bɑ tie, bɑ ǹ mɑɑ kɔ̃sɑ mɔ̀.
\q1 Bɑ ǹ mɑɑ weesu mɔ̀.
\q1 Gɑri kɔ̃si yi ǹ ko n wɑ̃ɑ ben nɔsɔ.
\q1 Bɑ ko n wɛ̃rewɑ,
\q1 ɡoo kun bu bɑɑsimɔ.
\s1 Yerusɑlɛmuɡibu
\s2 bɑ koo wurɑmɑ
\q1
\v 14 Bɛɛ Siɔniɡibu, i ɡɔ̃ru dobun kuuki koowo.
\q1 Bɛɛ Isirelibɑ kpuro ɡesi, i nuku dobun kuuki koowo.
\q1 Bɛɛ Yerusɑlɛmuɡibu, i yɛ̃ɛrio
\q1 kpɑ i nɑsɑrɑn kuuki ko kɑ bɛɛn ɡɔ̃ru kpuro.
\q1
\v 15 Yinni Gusunɔ u bɛɛn sɛɛyɑsiɑbu kpeesiɑ bi u koo rɑɑ bɛɛ ko.
\q1 U bɛɛn yibɛrɛbɑ yɑrinɑsiɑ.
\q1 Gusunɔ sinɑ boko, bɛɛ Isirelibɑn Yinni, u wɑ̃ɑ bɛɛn suunu sɔɔ.
\q1 I ǹ mɑɑ kɔ̃sɑ ɡɑɑ wɑsi.
\q1
\v 16 Yen tɔ̃ɔ te, bɑ koo bɛɛ Yerusɑlɛmuɡibu sɔ̃ bu nɛɛ,
\q1 i ku bɛrum ko Siɔniɔ.
\q1 I ku de bɛɛn ɡɔmɑ dwiiyɑ.
\q1
\v 17 Gusunɔ bɛɛn Yinni u wɑ̃ɑ bɛɛn suunu sɔɔ.
\q1 U sɑ̃ɑwɑ nɡe tɑbu durɔ wi u rɑ fɑɑbɑ ko.
\q1 U koo nuku doo bɑkɑbu ko bɛɛn sɔ̃.
\q1 U ǹ mɑɑ ɡɑ̃ɑnu ɡerumɔ yèn sɔ̃ u bɛɛ kĩ.
\q1 U ko n nuku doo bɑkɑbu mɔ.
\q1
\v 18 Be bɑ wɑ̃ɑ nuku sɑnkirɑnu sɔɔ
\q1 yèn sɔ̃ bɑ kɑ Yerusɑlɛmu tondɑ,
\q1 bɑ wɑ̃ɑ sekuru sɔɔ te tɑ bu buniɛmɔ nɡe sɔmunu,
\q1 mɑ bɑ ku rɑ mɑɑ win tɔ̃ɔ bɑkɑnu di,
\q1 beyɑ u koo mɛnnɑmɑ.
\q1
\v 19 Yen tɔ̃ɔ te, u koo be bɑ bɛɛ dɑm dimɔ wɔri,
\q1 kpɑ u yɛmɔbu fɑɑbɑ ko.
\q1 U koo be bɑ rɑɑ ɡirɑ mɛnnɑ
\q1 kpɑ u de bu tɔmbu nuku dobu wɛ̃
\q1 kpɑ bu yĩsiru yɑri tem kpuro sɔɔ
\q1 mi ben bɑɑwure u rɑɑ sekuru dimɔ.
\q1
\v 20 Yen tɔ̃ɔ te, u koo de i wurɑmɑ.
\q1 Sɑɑ ye sɔɔ, u koo bɛɛ mɛnnɑ.
\q1 Tɔmbu bɑ koo bɛɛ bɛɛrɛ wɛ̃
\q1 kpɑ i yĩsiru yɑri hɑnduniɑn bwesenu kpuron suunu sɔɔ
\q1 sɑnɑm mɛ u koo kɑ bɛɛn yobu wurɑmɑ i bu wɑ.
\q1 Wi, Yinni Gusunɔwɑ u yeni ɡeruɑ.