\id SNG 
\ide UTF-8
\h Womu Duro
\mt1 WOMU GE GA DOBU BO
\ip Kɑ Heberum bɑ tire te sokɑwɑ Womu ɡe ɡɑ dobu bo. Kurɔ kɑ durɔn kĩrun ɡɑriyɑ tɑ mɔ̀.
\ip Yuubɑ bɑ tire ten ɡɑri weesinɑwɑ kɑ kĩi te Gusunɔ u win tɔmbu Isirelibɑ kĩɑ. Mɑ nɑɑnɛ dokeobu bɑ mɑɑ tu weesinɑ kɑ kĩi te Yesu Kirisi u win yiɡbɛru kĩɑ.
\is1 Tire ten kpunɑɑ
\iq1 1. Womu 1, wiru 1.1n di sere wiru 2.7.
\iq1 2. Womu 2, wiru 2.8-17.
\iq1 3. Womu 3, wiru 3.1n di sere wiru 5.1.
\iq1 4. Womu 4, wiru 5.2n di sere wiru 6.3.
\iq1 5. Womu 5, wiru 6.4n di sere wiru 7.11.
\iq1 6. Womu 6, wiru 7.12n di sere wiru 8.5ɑ.
\iq1 7. Womu 7, wiru 8.5b-14.
\ie
\c 1
\p
\v 1 Womu ɡe ɡɑ dobu bo wee. Sɑlomɔɔwɑ ɡɑ kɑ yɑ̃.
\s1 Kurɔ kɑ durɔn fɑɑɡi
\sp Kurɔ u nɛɛ,
\q1
\v 2 ɑ mɑn sɔ̃suo kɑ wunɛn tiin nɔɔ.
\q1 Domi wunɛn kĩrun kookoosu su tɑm dobu kere.
\q1
\v 3 Wunɛn wɑni yi nuburu do.
\q1 A sɑ̃ɑwɑ nɡe turɑre ye yɑ pusɑ.
\q1 Yen sɔ̃nɑ wɔndiɑbɑ bɑ nun kĩ.
\q1
\v 4 A mɑn tii ɡɑwemɑ kpɑ su nun nɑɑ swĩi kɑ dukɑ.
\q1 A sɑ̃ɑwɑ nɛn sunɔ, ɑ kɑ mɑn doo wunɛn wɑ̃ɑ yerɔ.
\q1 Wunɛn sɑɑbuwɑ sɑ nuku dobu mɔ.
\q1 Wunɛn kĩru tɑ tɑm dobu kere.
\q1 Bɑ ɡem mɔ be bɑ nun kĩ.
\q1
\v 5 Yerusɑlɛmun wɔndiɑbɑ, i swɑɑ dɑkio i nɔ.
\q1 Nɑ tĩri, ɑdɑmɑ nɑ sɑ̃ɑ kurɔ burɔ.
\q1 Nɑ tĩri nɡe Kedɑɑn kuu bekuruɡinu,
\q1 ɑdɑmɑ nɑ wɑ̃wɑ nɡe beku kɑrenu ni nu wɑ̃ɑ Sɑlomɔɔn sinɑ kpɑɑrɔ.
\q1
\v 6 I ku mɑn ɡɛm yèn sɔ̃ nɑ tĩri.
\q1 Sɔ̃ɔwɑ u mɑn kuɑ mɛ.
\q1 Nɛn sesubu bɑ kɑ mɑn mɔru kuɑ.
\q1 Bɑ mɑn kuɑ ben reseɛm dɑ̃ɑ ɡbɑɑrun kɔ̃so.
\q1 Adɑmɑ nɑ ǹ nɛn tiiɡiru kɔ̃su.
\q1
\v 7 A mɑn sɔ̃ɔwɔ nɛn kĩnɑsi mi ɑ rɑ wunɛn sɑbenu kpɑre,
\q1 kɑ mi ɑ rɑ de nu sɔ̃ɔ sure.
\q1 Kpɑ nɑ kun mɑɑ sirenɛ wunɛn berusebun sɑbenun suunu sɔɔ.
\sp Yɑ̃ɑ kpɑrobɑ nɛɛ,
\q1
\v 8 wunɛ wi ɑ tɔn kurɔbu kpuro burɑm kere,
\q1 ɑ̀ kun yɑm mi yɛ̃, ɑ doo ɑ yɑ̃ɑ ɡɔ̃ɔn yirɑ swĩi.
\q1 Kpɑ ɑ wunɛn bonu kpɑrɑ kpɑrobun wɑ̃ɑ yerun bɔkuɔ.
\sp Durɔ u nɛɛ,
\q1
\v 9 nɛn kĩnɑsi, ɑ kɑ dum niɑ weenɛ
\q1 ye yɑ Eɡibitin sunɔn tɑbu kɛkɛ ɡɑwɑmɔ.
\q1
\v 10 Wunɛn burɑ yɑ̃nu nu rɑ de wunɛn bɑɑnu nu mɑn wɛ̃re.
\q1 Wunɛn wĩirɑ kɑ ɡoonu wɑ̃.
\sp Yɑ̃ɑ kpɑrobɑ nɛɛ,
\q1
\v 11 sɑ ko nun sɑbɑ kuɑ ye yɑ wurɑ kɑ sii ɡeesu mɛnnɛ.
\sp Kurɔ u nɛɛ,
\q1
\v 12 sɑnɑm mɛ sinɑ boko u sɔ̃ kɑ wiɡibu,
\q1 nɛn turɑren nuburɑ pusɑ.
\q1
\v 13 Nɛn kĩnɑsi u nuburu dowɑ nɡe turɑre ye bɑ mɔ̀ miru,
\q1 ye yɑ sure nɛn tororɔ.
\q1
\v 14 Nɛn kĩnɑsi u sɑ̃ɑwɑ nɡe dɑ̃ɑ wɛ̃ɛ burɑsu.
\q1 Su rɑ kpiwɑ resɛm dɑ̃ɑ ɡbɑɑrɔ Enɡɛdiɔ.
\sp Durɔ u nɛɛ,
\q1
\v 15 nɛn kĩnɑsi, ɑ sɑ̃ɑwɑ kurɔ burɔ.
\q1 Wunɛn nɔni yi bɑllimɔ nɡe wɑɑ bɑkɑɡii.
\sp Kurɔ u nɛɛ,
\q1
\v 16 nɛn kĩnɑsi, ɑ sɑ̃ɑwɑ durɔ burɔ,
\q1 wunɑ ɑ mɑn wɛ̃re.
\q1 Bɛsɛn kpin yeru tɑ ko n nɔɔ nɛ nɡe yɑkɑ bekusu.
\q1
\v 17 Dɑ̃ɑ ye bɑ mɔ̀ sɛduru, yerɑ bɑ kɑ bɛsɛn dirun dɑ̃ɑ mwɑɑnɑtiɑ kuɑ.
\q1 Mɑ bɑ ten yɑri kuɑ kɑ dɑ̃ɑ ye bɑ mɔ sipɛrɛ.
\c 2
\q1
\v 1 Nɛnɑ nɑ sɑ̃ɑ nɡe ɡunɑrun biibii ye yɑ kpiɑ tem tɛɛrɑɔ.
\q1 Nɑ mɑɑ sɑ̃ɑ nɡe yɑkɑsun biibii ye yɑ wɑ̃ɑ wɔwɑɔ.
\sp Durɔ u nɛɛ,
\q1
\v 2 ɑ̀ n nɛn kĩnɑsi wɑ win wɔndiɑ kpɑɑsibun wuurɔ,
\q1 u rɑ n sɑ̃ɑwɑ nɡe biibii ye yɑ wɑ̃ɑ sɑ̃kin suunu sɔɔ.
\sp Kurɔ u nɛɛ,
\q1
\v 3 ɑ̀ n nɛn kĩnɑsi wɑ ɑluwɑɑsibɑn suunu sɔɔ,
\q1 u sɑ̃ɑwɑ nɡe dɑ̃ɑ te bɑ mɔ̀ pɔmiɛ dɑ̃nun suunu sɔɔ tèn mɑrum mu dibu do.
\q1 Nɑ rɑ kɑ̃ nɑ n sɔ̃ win sɑɑrɔ.
\q1
\v 4 U kɑ mɑn dɑ mi bɑ rɑ tɔ̃ɔ bɑkɑ dĩɑnu di.
\q1 Mɑ u mɑn nɛnuɑ kɑ kĩru.
\q1
\v 5 Wee kĩrɑ mɑn bɑrɔ kuɑ.
\q1 A mɑn dɑm kɛ̃ kɑ kirɑ duronu, kɑ pɔmiɛn mɑrum.
\q1
\v 6 Nɑ kĩ nɑ n nɛn wiru sɔndi win nɔm dwɑrɔ,
\q1 kpɑ win nɔm ɡeu ɡu mɑn bɔkɑsi.
\sp Durɔ u nɛɛ,
\q1
\v 7 bɛɛ Yerusɑlɛmun wɔndiɑbɑ, nɑ bɛɛ sɔ̃ɔmɔ
\q1 kɑ yɛɛ kpiki kɑ nɛnnun yĩsinu,
\q1 i ku nɛn kĩnɑsi yɑmiɑ sɑɑ ye u ǹ kĩ u se.
\s1 Durɔ u wee
\sp Kurɔ u nɛɛ,
\q1
\v 8 nɑ nɛn kĩnɑsin nɔɔ nɔɔmɔ.
\q1 Wɔɔ u ɡuunu sɑrikirɑmɔ u wee.
\q1
\v 9 U sɑ̃ɑwɑ nɡe yɑɑ kpiku ǹ kun mɛ nɡe ɡini kpɛmɑ.
\q1 Wi wee dirun biruɔ,
\q1 u mɑn mɛɛrimɑ fɛnɛntin di.
\q1
\v 10 Mɑ u kɑ mɑn ɡɑri kuɑ u nɛɛ,
\q1 ɑ seewo nɛn kĩnɑsi, kurɔ burɔ, ɑ nɑ.
\q1
\v 11 Wee purɑn sɑɑ yɑ doonɑ,
\q1 mɑ ɡurɑ yɑ yɔ̃rɑ \f + \fr 2:11 \fr*\fk ɡurɑ yɑ yɔ̃rɑ \fk*\ft - Isirelibɑn temɔ, purɑn sɑɑ ɡurɑ rɑ nɛ.\ft*\f*.
\q1
\v 12 Biibii yɑ kpiɑ yɑm kpuro.
\q1 Sɑ ɡunɔ bwese bwesekɑn swĩi nɔɔmɔ.
\q1 Kpɑrukonun swĩi yi nɔɔrɑ bɛsɛn tem sɔɔ.
\q1
\v 13 Dɑ̃ɑ te bɑ mɔ̀ fiɡie tɑ mɑrum torumɔ,
\q1 mɑ resɛm tɔ̃kɑn wɛ̃sun nuburɑ pusɑ.
\q1 A seewo, ɑ nɑ nɛn kĩnɑsi, kurɔ burɔ,
\q1
\v 14 wunɛ wi ɑ sɑ̃ɑ nɡe sɑ̃kusɑ̃ ye yɑ wɑ̃ɑ kpee bɑɑ sɔɔ yɑ kukuɑ.
\q1 A mɑn wunɛn wuswɑɑ sɔ̃ɔsio.
\q1 A de n wunɛn nɔɔ nɔ.
\q1 Domi wunɛn dɔkɔrɑ nɔɔbu do.
\q1 Mɛyɑ mɑɑ wunɛn wuswɑɑ rɑ mɑn wɛ̃re.
\sp Kurɔn mɛro u nɛɛ,
\q1
\v 15 i sun dɛmɑku binu mwɛɛrio
\q1 ni nu bɛsɛn resɛm ɡbɑɑru sɑnkumɔ sɑɑ ye yɑ wɛ̃su sɑ̃ɑ.
\sp Kurɔ u nɛɛ,
\q1
\v 16 nɛn kĩnɑsi u sɑ̃ɑwɑ nɛɡii,
\q1 nɑ mɑɑ sɑ̃ɑ wiɡii.
\q1 U win sɑbenu kpɑrɑmɔ yɑkɑsun biibiin suunu sɔɔ.
\q1
\v 17 A de ɑ ɡɔsirɑ, nɛn kĩnɑsi, ɑ n wɑ̃ɑ ɡuunu wɔllɔ
\q1 ɑ n sɑ̃ɑ nɡe yɑɑ kpiku ǹ kun mɛ nɡe ɡini kpɛmɑ,
\q1 sere sɔ̃ɔ u kɑ du sɑɑru tu kpɛ̃ɑ.
\s1 Kurɔ u kɑ win kĩnɑsi dosimɔ
\sp Kurɔ u nɛɛ,
\c 3
\q1
\v 1 wɔ̃ku ɡirirɑ nɑ kpĩ nɛn kpin yeru wɔllɔ.
\q1 Nɑ kɑsu wi nɛn ɡɔ̃ru ɡɑ kĩ.
\q1 Adɑmɑ nɑ ǹ nùn wɑ.
\q1
\v 2 Ǹ n mɛn nɑ, kon sewɑ n bɔsu wuu sɔɔ,
\q1 ɡen swɛɛɔ kɑ ɡen yɑburɔ nɑ n kɑsu wi nɛn ɡɔ̃ru ɡɑ kĩ.
\q1 Nɑ nùn kɑsu kɑsu, ɑdɑmɑ nɑ ǹ nùn wɑ.
\q1
\v 3 Ye wuu ɡen kɔ̃sobɑ bɔsu bɑ wuu mɛɛrimɔ, bɑ mɑn wɑ,
\q1 mɑ nɑ bu bikiɑ nɑ nɛɛ, i nɛn kĩnɑsi wɑ?
\q1
\v 4 Ye nɑ bu deri kese, yerɑ nɑ nɛn kĩnɑsi wi wɑ.
\q1 Nɑ nùn sɛ̃re, nɑ ǹ nùn yɔ̃su
\q1 sere nɑ kɑ nùn dɑ nɛn mɛro wi u mɑn mɑrɑn dirɔ.
\q1
\v 5 Bɛɛ Yerusɑlɛmun wɔndiɑbɑ,
\q1 nɑ bɛɛ sɔ̃ɔmɔ kɑ yɛɛ kpiki kɑ nɛnnun yĩsinu,
\q1 i ku nɛn kĩnɑsi yɑmiɑ sɑɑ ye u ǹ kĩ u se.
\sp Kurɔ u nɛɛ,
\q1
\v 6 wɑrɑ u sɑrɑm wee ɡbɑburun di mɛni nɡe wii tĩɑ.
\q1 U turɑre ye bɑ mɔ̀ miru kɑ turɑre dɛkɑɡiɑ bwese bwesekɑn nuburu mɔ.
\q1
\v 7 Sɑlomɔɔn kpin yerɑ bɑ sɔɔwɑ bɑ kɑ wee,
\q1 Isirelibɑn tɑbu durɔ dɑmɡibu wɑtɑ bɑ nùn swĩi bɑ wɑ̃ɑ ɡɔn ɡɔnkɑ.
\q1
\v 8 Be kpuro bɑ kɑ tɑkobi sɑnnɔ yɛ̃.
\q1 Bɑ sɑ̃ɑwɑ tɑbu durɔbu.
\q1 Ben bɑɑwure u win tɑkobi bɛki win yɛ̃sɑɔ
\q1 u kɑ sɔɔru sɑ̃ɑ bɑɑ yibɛrɛbɑ bɑ̀ n kurɑmɑ wɔ̃kuru.
\q1
\v 9 Sinɑ boko Sɑlomɔɔ u derɑ bɑ nùn ɑmɑkɛɛn kitɑru kuɑ kɑ dɑ̃ɑ ye bɑ kɑ nɑ Libɑnin di.
\q1
\v 10 Mɑ bɑ ten suɑtiɑn dɛki kuɑ kɑ sii ɡeesu.
\q1 Bɑ mɑɑ ten ɡbɑllitiɑ kuɑ kɑ wurɑ.
\q1 Bɑ ten sin yerun leferi beku wunɔmɡiru wukiri
\q1 te Yerusɑlɛmun wɔndiɑbɑ bɑ burɑru kuɑ kĩrun sɔ̃.
\q1
\v 11 I yɑrimɑ bɛɛ Siɔnin wɔndiɑbɑ, i sinɑ boko Sɑlomɔɔ wɑ.
\q1 U win furɔ doke ɡe win mɛro nùn dokeɑ sɑɑ ye u kurɔ kpɑɑru kuɑ.
\q1 Dɔmɑ te, u wɑ̃ɑ nuku dobu sɔɔ.
\sp Durɔ u nɛɛ,
\c 4
\q1
\v 1 ɑ sɑ̃ɑwɑ kurɔ burɔ, nɛn kĩnɑsi.
\q1 Wunɛn nɔni yi bɑllimɔ nɡe wɑɑ bɑkɑɡii wunɛn sɔnditiɑn wɛ̃rin di.
\q1 Wunɛn seri yi sɑ̃ɑ nɡe boo wuuru te tɑ sɑrɑmɑmɔ Gɑlɑdin ɡuuru wɔllun di.
\q1
\v 2 Wunɛn donnu nu buriri nɡe yɑ̃ɑ nìn sɑnsu bɑ bɔɔrɑ nu nim nɔrum wee.
\q1 Nu mɑɑ nɔɔ nɛwɑ swɛɛ swɛɛ, nin ɡɑrɑ kun kɑnde.
\q1
\v 3 Wunɛn nɔɔ ɡɑ swɛ̃riwɑ nɡe tom,
\q1 mɑ ɡɑ wɑɑbu wɑ̃.
\q1 Wunɛn bɑɑnu nu bɑllimɔwɑ nɡe dire sɔnsɔm biɑ wunɛn sɔnditiɑn wɛ̃rin di.
\q1
\v 4 Wunɛn wĩirɑ wɑ̃wɑ nɡe Dɑfidin dii bwereku ɡɑɡu
\q1 mi bɑ rɑ tɑbu yɑ̃nu bere.
\q1 Wunɛn sɑbɑn bɑtɑnibɑ bɑ sɑ̃ɑ nɡe tɑbu yɑ̃ɑ ni bɑ bwɛ̃ mi.
\q1
\v 5 Wunɛn bwɑ̃su sɑ̃ɑ nɡe yɑɑ kpikun binu yiru ni nu yɑkɑsu dimɔ biibiin suunu sɔɔ.
\q1
\v 6 Sere sɔ̃ɔ u kɑ du sɑɑru tu kpɛ̃ɑ,
\q1 kon dɑ ɡuuru wɔllɔ mi turɑre ye bɑ mɔ̀ miru kɑ turɑre dɛkɑɡiɑ yɑ wɑ̃ɑ.
\q1
\v 7 A sɑ̃ɑwɑ kurɔ burɔ, nɛn kĩnɑsi.
\q1 A ǹ bɑu ɡɑɡu mɔ.
\q1
\v 8 A nɑ su doonɑ sɑɑ Libɑnin ɡuunun di
\q1 kɑ Seniri kɑ Hɛɛmɔɔn ɡuurun di
\q1 mi ɡbee sinɑnsu kɑ musuku yɑmbɑrɔsu rɑ n wɑ̃ɑ.
\q1
\v 9 Bɛsɛn nɔni yì n yinnɑ, ǹ kun mɛ nɑ̀ n wunɛn sɑbɑn bɑtɑni tiɑ wɑ,
\q1 wunɛn kĩrɑ rɑ nɛn ɡɔ̃ru kpuro mwɛwɑ, nɛn sesu, nɛn kurɔ.
\q1
\v 10 Wunɛn kĩru tɑ nuku dobu mɔ nɛn sesu, nɛn kurɔ.
\q1 Wunɛn kĩru tɑ tɑm dobu kere.
\q1 Mɛyɑ mɑɑ wunɛn turɑren nuburu tɑ do tɑ turɑre kpuro kere.
\q1
\v 11 Wunɛn nɔɔ ɡɑ sɔ̃subu do nɡe tim bɑu.
\q1 Tim kɑ bom mu wɑ̃ɑ wunɛn nɔɔ sɔɔ.
\q1 Wunɛn yɑ̃nu nu nuburu dowɑ nɡe dɑ̃ɑ te bɑ mɔ̀ sɛduru Libɑniɔ.
\q1
\v 12 A sɑ̃ɑwɑ nɡe dɑ̃ɑ ɡbɑɑru te bɑ kɑrɑ koosi, nɛn sesu, nɛn kurɔ.
\q1 A sɑ̃ɑwɑ nɡe dɔkɔ ye bɑ kɛnuɑ, ǹ kun mɛ nɡe bwiɑ ye bɑ mɑrɑ.
\q1
\v 13 Wunɛn nim mu dɑ̃ɑ ɡbɑɑrun dɑ̃nu yɛ̃kɑmɔ.
\q1 Nin binu ni bɑ sokumɔ ɡerenɑdi nu do too.
\q1 Mɛyɑ lɑlle kɑ nɑɑdi yɑ mɑɑ kpiɑ mi,
\q1
\v 14 kɑ sɑfɑrɑni, kɑ yɑkɑ si su nuburu do, kɑ kɑnɛli,
\q1 kɑ dɑ̃ɑ ni bɑ rɑ kɑ turɑre dɛkɑɡiɑ ko, kɑ miru, kɑ ɑloɛsi,
\q1 kɑ sere yɑkɑ si su nuburu dobu bo kpuro.
\q1
\v 15 Wunɛ ɑ sɑ̃ɑwɑ nɡe dɑ̃ɑ ɡbɑɑrun dɔkɔ
\q1 ǹ kun mɛ nɡe bwiɑ ye yɑ nim sumɔ
\q1 mɛ mu wee sɑɑ Libɑnin ɡuunun di.
\sp Kurɔ u nɛɛ,
\q1
\v 16 sɔ̃ɔ yɛ̃si yɛ̃sikɑn wosu,
\q1 i seewo i nɛn dɑ̃ɑ ɡbɑɑrun dɑ̃nu kɔ̃,
\q1 kpɑ nin nubu duroru tu yɑri kpuro.
\q1 I de nɛn kĩnɑsi u du win dɑ̃ɑ ɡbɑɑru sɔɔ
\q1 kpɑ u yen dɑ̃ɑ bii ɡeenu di.
\s1 Durɔ u wee
\sp Durɔ u nɛɛ,
\c 5
\q1
\v 1 nɑ duɑ nɛn dɑ̃ɑ ɡbɑɑru sɔɔ,
\q1 nɛn sesu, nɛn kurɔ.
\q1 Nɑ nɛn turɑre ye bɑ mɔ̀ mirun dɑ̃ɑ yorimɔ kɑ kiki si su nuburu do.
\q1 Nɑ nɛn tim bɑun tim dimɔ.
\q1 Nɑ nɛn tɑm kɑ nɛn bom nɔrumɔ.
\sp Yerusɑlɛmun wɔndiɑbɑ bɑ nɛɛ,
\q1 i dio, bɛɛ be i kĩɑnɛ.
\q1 I nɔruo kpɑ i n kĩru bɑrɔ.
\s1 Kurɔ u ɡɑmbo wukiɑ
\s2 ɑdɑmɑ n dɑ̃kuru kuɑ
\sp Kurɔ u nɛɛ,
\q1
\v 2 nɑ dò ɑdɑmɑ nɛn bwɛ̃rɑ yɑ ǹ kpĩ.
\q1 Nɑ kɑ nɛn kĩnɑsi dosimɔ u ɡɑmbo soomɔ.
\sp Durɔ u nɛɛ,
\q1 ɑ mɑn kɛniɔ, nɛn sesu, nɛn kĩnɑsi.
\q1 Wunɛ wi ɑ sɑ̃ɑ nɡe sɑ̃kusɑ̃, ɑ yibɑ.
\q1 Nɛn wirɑ nikererɑ.
\q1 Mɑ nɛn seri nim sɛ̃ɛrɑ.
\sp Kurɔ u nɛɛ,
\q1
\v 3 wee nɑ nɛn yɑberu potɑ.
\q1 Kon mɑɑ kpĩ n se n tu sebe?
\q1 Nɑ nɛn kɔ̃ri kpɑkiɑ kɔ, yerɑ kon mɑɑ se n yi disinu ko?
\q1
\v 4 Yerɑ nɛn kĩnɑsi wi, u win nɔmu kpɛ̃ɛmɑ ɡɑmbon wem di,
\q1 mɑ nɛn bwɛ̃rɑ wurɑ win mi.
\q1
\v 5 Nɑ seewɑ n kɑ nùn kɛniɑ.
\q1 Turɑre ye bɑ mɔ̀ miru yɑ dɑ̃ɑkumɔ nɛn nɔmɑn di ɡɑmbon nɛnutiɑ sɔɔ.
\q1
\v 6 Nɑ nɛn kĩnɑsi kɛniɑ,
\q1 ɑdɑmɑ nɑ deemɑ u doonɑ.
\q1 Nɛn bwɛ̃rɑ rɑɑ wurɑ win mi, sɑnɑm mɛ nɑ win nɔɔ nuɑ.
\q1 Nɑ nùn kɑsu kɑsu, nɑ ǹ nùn wɑ.
\q1 Nɑ nùn sokɑ, u ǹ wure.
\q1
\v 7 Wuu ɡen kɔ̃sobu bɑ kɑ mɑn yinnɑ.
\q1 Bɑ mɑn so bɑ mɛɛrɑ kuɑ.
\q1 Be bɑ ɡbɑ̃rɑru kɔ̃su, bɑ nɛn sɔnditiɑ mwɑ.
\q1
\v 8 Bɛɛ Yerusɑlɛmun wɔndiɑbɑ, nɑ bɛɛ kɑnɑmɔ,
\q1 ì n nɛn kĩnɑsi wɑ, i nùn sɔ̃ɔwɔ win kĩrɑ mɑn bɑrɔ kuɑ.
\sp Yerusɑlɛmun wɔndiɑbɑ bɑ nɛɛ,
\q1
\v 9 wunɛ wi ɑ kurɔbu kpuro burɑm kere,
\q1 mbɑ wunɛn kĩnɑsi wi, u mɔ ye ɡoo kun mɔ ɑ kɑ sun sɔ̃ɔmɔ mɛ.
\sp Kurɔ u nɛɛ,
\q1
\v 10 nɛn kĩnɑsi, tɔn swɑ̃ɔwɑ, win wuswɑɑ bɑllimɔ.
\q1 Tɔmbu nɔrɔbun subɑ wɔkuru (10.000) sɔɔ, wiyɑ kɑɑ wɑɑbu ɡbi.
\q1
\v 11 Win wuswɑɑ yɑ bɑllimɔ nɡe wurɑ ɡeɑ.
\q1 Win seri yi tĩriwɑ nɡe ɡunɔ mɔrɑn sɑnsu.
\q1
\v 12 Win nɔni yi sɑ̃ɑwɑ nɡe wɑɑ bɑkɑɡii ye yɑ wɑ̃ɑ dɑɑrɔ.
\q1 Win nɔni kpiki yi sɑ̃ɑwɑ nɡe bom bekum.
\q1 Nɔni yi, yi kɑ kpee ɡobiɡinu weenɛ ni bɑ doke tɑɑbu sɔɔ.
\q1
\v 13 Win bɑɑnu nu wɑ̃wɑ nɡe turɑre bii yi yi kpiibu wee.
\q1 Win nɔɔ ɡɑ sɑ̃ɑwɑ nɡe biibii yèn min di turɑre yɑ dɑ̃ɑkumɔ.
\q1
\v 14 Win nɔmɑ yɑ kɑ wurɑn sumɑ weenɛ ye bɑ kpee ɡobiɡinu dokeɑ.
\q1 Win wɑsi yi wɔru nɡe suunu don te bɑ wɔriɑsiɑ
\q1 bɑ burɑru koosi kɑ kpee burɑnu ni nu nɔni booɡu mɔ.
\q1
\v 15 Win kɔ̃ri yi sɑ̃ɑwɑ nɡe ɡbere yiru ye bɑ kuɑ kɑ kpee kpikiru.
\q1 Mɑ bɑ ye ɡirɑ wurɑ ɡeɑn wɔllɔ.
\q1 À n nùn mɛɛrɑ, u sɑ̃ɑwɑ nɡe Libɑnin dɑ̃ɑ ni bɑ mɔ̀ sɛduru.
\q1
\v 16 Win nɔɔn ɡɑri do.
\q1 Wi sɔɔrɑ nɛn bwɛ̃rɑ rɑ n wɑ̃ɑ mɑm mɑm.
\q1 Bɛɛ Yerusɑlɛmun wɔndiɑbɑ, mɛ nɛn bɔrɔ kĩnɑsi wi, u sɑ̃ɑwɑ mi.
\sp Yerusɑlɛmun wɔndiɑbɑ bɑ nɛɛ,
\c 6
\q1
\v 1 mɑnɑ wunɛn kĩnɑsi wi, u dɑ,
\q1 wunɛ wi ɑ kurɔbu kpuro burɑm kere.
\q1 Berɑ mɑnɑ u ɡɛre, kpɑ su kɑ nun wi kɑsu.
\sp Kurɔ u nɛɛ,
\q1
\v 2 nɛn kĩnɑsi u dɑwɑ win dɑ̃ɑ ɡbɑɑrɔ,
\q1 mi turɑre bii wɑ̃ɑ yi yi kpiibu wee,
\q1 u kɑ win sɑbenu kpɑrɑ kpɑ u biibii bɔɔri.
\q1
\v 3 Nɑ sɑ̃ɑwɑ nɛn kĩnɑsiɡii, mɑ u mɑɑ sɑ̃ɑ nɛɡii.
\q1 U win sɑbenu kpɑrɑmɔ biibiin suunu sɔɔ.
\s1 Nɡe mɛ kurɔ win wɑsi sɑ̃ɑ
\sp Durɔ u nɛɛ,
\q1
\v 4 ɑ ɡirimɑ mɔ nɡe wuu ɡe bɑ mɔ̀ Tirisɑ.
\q1 Nɛn kĩnɑsi, ɑ wɑ̃ nɡe Yerusɑlɛmu.
\q1 A nɑnum mɔ nɡe tɑbu sĩɑ kɑ yen ɡidi bɔrɑ.
\q1
\v 5 A ku mɑɑ mɑn mɛɛri.
\q1 Domi wunɛn nɔni yi nɛn kĩru seeyɑmɔ.
\q1 Wunɛn seri yi sɑ̃ɑ nɡe boo wuuru
\q1 te tɑ sɑrɑmɑmɔ Gɑlɑdin ɡuurun wɔllun di.
\q1
\v 6 Wunɛn donnu nu buriri nɡe yɑ̃ɑ nìn sɑnsu bɑ bɔɔrɑ
\q1 nu nim nɔrum wee, nu mɑɑ nɔɔ nɛwɑ swɛɛ swɛɛ, nin ɡɑrɑ kun kɑnde.
\q1
\v 7 Wunɛn bɑɑnu nu bɑllimɔwɑ nɡe dire sɔnsɔm biɑ wunɛn sɔnditiɑn wɛ̃rin di.
\q1
\v 8 Sinɑnibun ɡeerɑ sɑ̃ɑwɑ wɑtɑ,
\q1 sinɑ kurɔbu mɑɑ wɛnɛ.
\q1 Wɔndiɑbɑn ɡeerɑ kun nɔru mɔ be.
\q1
\v 9 Adɑmɑ nɛn kĩnɑsi wi, u ǹ bɑu mɔ,
\q1 u sɑ̃ɑwɑ nɛnɛm be sɔɔ.
\q1 U sɑ̃ɑwɑ win mɛron bii wɔndiɑ teereru te u kĩ too.
\q1 Wɔndiɑ be bɑ nùn wɑ, bɑ nɛɛ,
\q1 u sɑ̃ɑwɑ domɑruɡii.
\q1 Sinɑnibu kɑ bɑn sinɑ kurɔbu bɑ mɑɑ nùn siɑrɑ bɑ nɛɛ,
\q1
\v 10 wɑrɑ u yɑrimɑm wee nɡe buruku sɔ̃ɔ.
\q1 Wɑrɑ u wɑ̃ mɛ nɡe suru.
\q1 Wɑrɑ u bɑllimɔ nɡe sɔ̃ɔ.
\q1 U nɑnum mɔ nɡe tɑbu sĩɑ kɑ yen ɡidi bɔrɑ.
\q1
\v 11 Nɑ dɑ dɑ̃ɑ ɡbɑɑrɔ mi dɑ̃ɑ mɑrum wɑ̃ɑ,
\q1 n kɑ wɑ yɑkɑsu sù n kpiɑ wɔwɑɔ,
\q1 kpɑ n wɑ resɛm tɔ̃kɑ yɑ̀ n kpɑrɑ,
\q1 kpɑ n mɑɑ wɑ dɑ̃ɑ te bɑ mɔ̀ ɡerenɑdi tɑ̀ n wɛ̃su sɑ̃ɑ.
\q1
\v 12 Nɑ ǹ kɑ bɑɑru nɛn bwɛ̃rɑ mɑn suɑ,
\q1 yɑ mɑn doke nɛn tɔmbun tɑbu kɛkɛbɑn suunu sɔɔ yi dumi ɡɑwe.
\sp Kurɔbu kɑ wɔndiɑbɑ bɑ nɛɛ,
\q1
\v 13 ɑ ɡɔsirɑmɑ, ɑ ɡɔsirɑmɑ, Sunɛmun bii,
\q1 ɑ ɡɔsirɑmɑ su nun mɛɛri.
\q1 Mbɑn sɔ̃nɑ i nɛ Sunɛmun bii mɛɛrɑ
\q1 nɡe wi u yɑɑmɔ tɔn wuunu yirun bɑɑ sɔɔ.
\c 7
\sp Durɔ u nɛɛ,
\q1
\v 1 wɔndiɑ bɛɛrɛɡii, wunɛn nɑɑsu su wɑ̃ sɑlubɑtɑ sɔɔ.
\q1 Wunɛn pɔrɑ yɑ wɑ̃wɑ nɡe sɑbɑ.
\q1 Wi u ye kuɑ mɔmɔn tiiwɑ.
\q1
\v 2 Wunɛn bwĩirun ɡirɑ yerɑ sɑ̃ɑwɑ bwɛrɛrɛ nɡe nɔrɑn nɔɔ
\q1 ye yɑ ku rɑ tɑm kpe.
\q1 Wunɛn bɔsɔ ɡɑ swɛ̃ri nɡe ɑlikɑmɑ ye bɑ kɑ biibii sikerenɛ.
\q1
\v 3 Wunɛn bwɑ̃su sɑ̃ɑwɑ nɡe yɑɑ kpikun binu yiru.
\q1
\v 4 Wunɛn wĩiru tɑ buririwɑ nɡe suunu donnu.
\q1 Wunɛn nɔni yi dɛɛrewɑ nɡe Hɛsibonin yɛru
\q1 si su wɑ̃ɑ wuu bɔkɔ ɡen kɔnnɔn bɔkuɔ.
\q1 Wunɛn wɛ̃ru tɑ dɛndewɑ mɑm mɑm nɡe Libɑnin kɔ̃su yeru
\q1 te tɑ Dɑmɑsi mɛɛrɑ.
\q1
\v 5 Wunɛn wirɑ suɑrewɑ nɡe ɡuu te bɑ mɔ̀ Kɑɑmɛli.
\q1 Mɑ wunɛn tɑrɑ yɑ bɑllimɔ nɡe beku ɡobiɡiru
\q1 sere yɑ sinɑ bokon bwɛ̃rɑ kpuro mwɑ.
\q1
\v 6 Wunɛn burɑm bɑndɑ, ɑ mɑn wɛ̃re too.
\q1 Wunɛ sɔɔrɑ nɛn kĩru kpuro wɑ̃ɑ.
\q1
\v 7 Wunɛn wɑsi yi dɛndewɑ nɡe kpɑkpɑ bɑ̃ɑ.
\q1 Wunɛn bwɑ̃su su sɑ̃ɑwɑ nɡe dɑ̃ɑ mɑrum swɑɑru.
\q1
\v 8 Nɑ nɛɛ, kon kpɑkpɑ yɔwɑ kpɑ n yen mɑrum nɛnɛ.
\q1 Wunɛn bwɑ̃su su sɑ̃ɑwɑ nɡe resɛm swɑɑru.
\q1 Wunɛn wɛ̃siɑru tɑ nuburu do nɡe dɑ̃ɑ mɑrum mɛ bɑ mɔ̀ pɔmu.
\q1
\v 9 Nɑ̀ n nun sɔ̃su, nɑ rɑ n nuku dobu mɔ nɡe wi u tɑm durom nɔrɑ.
\sp Kurɔ u nɛɛ,
\q1 tɑm mɛ, mu kokuo nɛn kĩnɑsin sɔ̃
\q1 mu du win nɔɔ sɔɔ ù n dweeyɑmɔ.
\q1
\v 10 Nɑ sɑ̃ɑwɑ nɛn kĩnɑsiɡii,
\q1 mɑ win kĩru kpuro wɑ̃ɑ nɛ sɔɔ.
\s1 Kĩɑnɑ sɔɔrɑ nuku dobɑ wɑ̃ɑ
\sp Kurɔ u nɛɛ,
\q1
\v 11 nɛn kĩnɑsi, ɑ yɑrimɑ su dɑ bɑru kpɑɑnɔ kpɑ sɑ n wɑ̃ɑ mi.
\q1
\v 12 Bururu sɑ ko se su dɑ dɑ̃ɑ ɡbɑɑrɔ,
\q1 su wɑ resɛm tɔ̃kɑ kɑ dɑ̃ɑ te bɑ mɔ̀
\q1 ɡerenɑdi yɑ̀ n kpɑre yɑ wɛ̃su sɑ̃ɑ.
\q1 Miyɑ kon nun kĩru sɔ̃ɔsi.
\q1
\v 13 Dɑ̃ɑ te bɑ mɔ̀ mɑndɑrɑɡore tɑ ten turɑre yɛ̃kɑmɔ.
\q1 Bɛsɛn yɛnu kɔnnɔwɔ, sɑ dɑ̃ɑ mɑrum kpuro mɔ mɛ mu dobu bo,
\q1 ɡinɑkuɡim kɑ ɡisɔku ɡeɡim.
\q1 Nɑ mɛ kpuro yii wunɛn sɔ̃ nɛn kĩnɑsi.
\c 8
\q1
\v 1 À n dɑɑ sɑ̃ɑ nɛn sesu mɛro turosi, kon kɑ nun yinnɑ tɔɔwɔ,
\q1 kpɑ n nun bɔkɑsi, ɡoo kun mɑɑ mɑn ɡɛmmɔ.
\q1
\v 2 Kon kɑ nun dɑ nɛn mɛron yɛnuɔ
\q1 kpɑ ɑ mɑn bwisi kɛ̃.
\q1 Kon nun tɑm nubu duroruɡim wɛ̃
\q1 mɛ nɑ kuɑ kɑ dɑ̃ɑ bii ni bɑ mɔ̀ ɡerenɑdi.
\q1
\v 3 Nɑ kĩ nɑ n nɛn wiru sɔndi win nɔm dwɑrɔ,
\q1 kpɑ win nɔm ɡeu ɡu mɑn bɔkɑsi.
\q1
\v 4 Bɛɛ Yerusɑlɛmun wɔndiɑbɑ, nɑ bɛɛ sɔ̃ɔmɔ,
\q1 i ku nɛn kĩnɑsi yɑmiɑ sɑɑ ye u ǹ kĩ u se.
\sp Wɔndiɑbɑ bɑ nɛɛ,
\q1
\v 5 wɑrɑ u wee ɡbɑburun di u win kĩnɑsi ɡbɑlli.
\s1 Kĩrun dɑm
\sp Kurɔ u nɛɛ,
\q1 nɑ nun yɑmiɑ dɑ̃ɑ sɑɑrɔ wunɛn yɛnun bɔkuɔ,
\q1 mi wunɛn mɛro u wunɛn ɡurɑ suɑ u nun mɑrɑ.
\q1
\v 6 A de nɛ turon ɡɑri yi n wɑ̃ɑ wunɛn ɡɔ̃ruɔ.
\q1 A de ɑ n nɛ turo bɔkɑsi.
\q1 Domi kĩru tɑ dɑm mɔwɑ nɡe ɡɔɔ.
\q1 Nisinu nu mɑɑ sɑ̃ɑwɑ ɡɑ̃ɑ ɡɔbunu nɡe ɡɔribun wɑ̃ɑ yeru.
\q1 Nin dɑm mu sɑ̃ɑwɑ nɡe dɔ̃ɔ yɑri.
\q1 Yinni Gusunɔn min diyɑ yi wee.
\q1
\v 7 Nim wɔ̃kun nim kɑ mɛn kpɑ̃ɑru mu ǹ kpɛ̃ mu kĩrun dɔ̃ɔ ɡo.
\q1 Mɛyɑ mɑɑ dɑɑnun nim yiburu tɑ ǹ kpɛ̃ tu kĩi te wukiri.
\q1 Tɔnu wi u win dukiɑ kpuro wɛ̃ bu kɑ nùn kĩɑn sɔ̃,
\q1 u ǹ kĩi te wɑsi.
\q1 Yen kɔkɔrɔ, bɑ koo nùn ɡɛmwɑ.
\sp Kurɔn sesubu bɑ nɛɛ,
\q1
\v 8 sɑ sesu piibu mɔ wi u kun ɡinɑ bwɑ̃ɑ kpiɑ.
\q1 Amɔnɑ sɑ ko nùn kuɑ sɑnɑm mɛ bɑ nùn kĩɑn nɑ.
\q1
\v 9 Ù n sɑ̃ɑ nɡe ɡbɑ̃rɑru,
\q1 sɑ ko tu tɑ̃sisiɑwɑ kɑ sii ɡeesu.
\q1 Ù n mɑɑ sɑ̃ɑ nɡe kɔnnɔ,
\q1 sɑ ko ɡe kɔrewɑ kɑ dɑ̃ɑ ye bɑ mɔ̀ sɛdurun ɡɑmbo.
\sp Kurɔ u nɛɛ,
\q1
\v 10 nɑ sɑ̃ɑwɑ nɡe ɡbɑ̃rɑru,
\q1 mɑ nɛn bwɑ̃ɑ yɑ sɑ̃ɑ nɡe wuu kɔ̃sobun wɑ̃ɑ yeru.
\q1 Nɛn kĩnɑsi u yɛ̃ mɑ nɑ bɔri yɛndu mɔ win mi.
\sp Durɔ u nɛɛ,
\q1
\v 11 Sɑlomɔɔ u resɛm tɔ̃kɑn ɡbɑɑru mɔ Bɑɑli Hɑmɔɔwɔ.
\q1 Mɑ u ɡbɑɑ te kɔ̃sobu nɔmu sɔndiɑ.
\q1 Ben bɑɑwure u rɑ kɑ sii ɡeesun ɡobi nɔrɔbu (1.000) nɛwɑ
\q1 bu sere ɡbɑɑ ten mɑrum sɔri.
\q1
\v 12 Sɑlomɔɔ u win sii ɡeesun ɡobi nɔrɔbu (1.000) suo u n mɔ,
\q1 kpɑ u win ɡbɑɑ kɔ̃sobu yen ɡoobu (200) wɛ̃.
\q1 Nɛnɑ nɑ nɛn tiin resɛm ɡbɑɑru mɔ,
\q1 mɑ nɑ tu kɔ̃su.
\q1
\v 13 A de n wunɛn nɔɔ nɔ nɛn kĩnɑsi,
\q1 wunɛ wi ɑ rɑ n wɑ̃ɑ dɑ̃ɑ ɡbɑɑru sɔɔ.
\q1 Kpɑɑsibɑ kĩ bu ɡu nɔ.
\sp Kurɔ u nɛɛ,
\q1
\v 14 ɑ wɑsi suo nɛn kĩnɑsi,
\q1 kpɑ ɑ n sɑ̃ɑ nɡe yɑɑ kpiku ǹ kun mɛ nɡe ɡini kpɛmɑ
\q1 ye yɑ wɑ̃ɑ ɡuuru wɔllɔ mi yɑkɑ nubu duroruɡisu wɑ̃ɑ.