\id NAM 
\ide UTF-8
\h Nɑhumu
\mt1 NAHUMU
\ip Nɑhumu u sɔ̃ɔsimɔ win tireru sɔɔ torɑ ni Ninifuɡibu bɑ mɔ̀. Yen sɔ̃nɑ u bu sɔ̃ɔmɔ mɑ bɑ koo ben wuu ɡe wɔri bu kpeerɑsiɑ. Yenibɑ kpuro sɔɔ, Gusunɔ u koo be bɑ nùn nɑɑnɛ sɑ̃ɑ wɔnwɔndu kɑ durom kuɑ sɑnɑm mɛ u koo Asiriɡibu siri.
\is1 Tire ten kpunɑɑ
\iq1 1. Gɑrin wiru, wiru 1:1.
\iq1 2. Gusunɔn yiiko, wiru 1:2-8.
\iq1 3. Gusunɔn siribu, wiru 1:9n di sere wiru 2:3.
\iq1 4. Ninifu yɑ koo kɑm ko, wiru 2:4n di sere wiru 3:19.
\ie
\c 1
\p
\v 1 Gɑri wee yi Yinni Gusunɔ u ɡeruɑ wuu ɡe bɑ mɔ̀ Ninifun sɔ̃. Nɑhumu Ɛlikosiɡiiwɑ Gusunɔ u derɑ u yi wɑ kɑ̃siru sɔɔ mɑ u yoruɑ.
\s1 Yinni Gusunɔ u do u sɛ̃
\q1
\v 2 Yinni Gusunɔ u sɑ̃ɑwɑ nisinuɡii.
\q1 U rɑ mɔru kɔsie.
\q1 Win mɔru yɑ kpɑ̃.
\q1 U rɑ win yibɛrɛbɑ mɔru kɔsie.
\q1 U ku rɑ bu suuru kue.
\q1
\v 3 U ku rɑ toro deri u kun nùn sɛɛyɑsie.
\q1 Adɑmɑ u ku rɑ mɔru se fuuku.
\q1 Win dɑm mu kpɑ̃.
\q1 Ù n sĩimɔ, woo ɡunɑ yɑ rɑ n seewɑwɑ,
\q1 kpɑ ɡuru winu nu n sɑ̃ɑ nɡe win nɑɑsun tuɑ.
\q1
\v 4 Ù n nim wɔ̃ku ɡbɑ̃re, ɡɑ rɑ ɡberewɑ.
\q1 U rɑ dɑɑnu kpuron nim ɡberɑsiewɑ,
\q1 kpɑ yɑkɑ si su wɑ̃ɑ Bɑsɑniɔ kɑ Kɑɑmɛlin ɡɑ̃ɑnɔ su ɡberɑ,
\q1 kpɑ dɑ̃ɑ wɛ̃ɛ si su wɑ̃ɑ Libɑniɔ su dɛllɑ.
\q1
\v 5 U derɑ ɡuunu bɑ̃ɑrimɔ.
\q1 Mɑ ɡunɡunu diirimɔ.
\q1 Mɑ tem kɑ mɛn tɔmbu bɑ yiiyɑrɑmɔ win wuswɑɑɔ.
\q1
\v 6 Wɑrɑ u koo kpĩ u yɔ̃rɑ u win mɔru mɑ.
\q1 Wɑrɑ u koo kɑ win mɔru ɡɑbirinɑ.
\q1 Win mɔru yɑ rɑ pusiwɑ nɡe dɔ̃ɔ.
\q1 Wee yɑ kpenu bɛsukumɔ.
\q1
\v 7 Yinni Gusunɔ u sɑ̃ɑwɑ tɔn ɡeo.
\q1 U sɑ̃ɑwɑ be bɑ wɑ̃ɑ wɑhɑlɑ sɔɔn kuku yeru.
\q1 Be bɑ nùn nɑɑnɛ sɑ̃ɑ, berɑ u rɑ nɔɔri.
\q1
\v 8 U koo Ninifu kpeerɑsiɑ mɑm mɑm kɑ nim bɑkɑm,
\q1 kpɑ u win yibɛrɛbɑ nɑɑ ɡirɑ sere ɡɔribun wɑ̃ɑ yerɔ yɑm wɔ̃kuru sɔɔ.
\s1 Gɑri yi Gusunɔ u ɡeruɑ
\s2 Yudɑ kɑ Ninifun sɔ̃
\q1
\v 9 Mbɑ i Yinni Gusunɔ bwisikusimɔ.
\q1 Wiyɑ u rɑ kɑm koosie mɑm mɑm.
\q1 Bɑ ku rɑ nɔni swɑ̃ɑru wɑ nɔn yiruse.
\q1
\v 10 Yibɛrɛ be, bɑ sɑ̃ɑ nɡe sɑ̃ki kɔkɔnu,
\q1 bɑ rɑ tɑm nɔ sere mu bu ɡo.
\q1 Kɑ mɛ, bɑ koo dɔ̃ɔ mwɑɑrɑwɑ mɑm mɑm nɡe yɑkɑ ɡbebusu.
\q1
\v 11 Ninifu, wunɛn min diyɑ ɡoo u yɑrɑ
\q1 wi u Gusunɔ kɔ̃sɑ bwisikusimɔ,
\q1 mɑ u kĩ u nùn seesi.
\q1
\v 12 Yinni Gusunɔ u Yudɑbɑ sɔ̃ɔwɑ u nɛɛ,
\q1 bɑɑ bɛɛn yibɛrɛbɑ bɑ̀ n dɑbi ɑmɔ,
\q1 mɑ bɑ dɑm mɔ ɑmɔ,
\q1 kɑ mɛ, kon bu ɡowɑ mɑm mɑm.
\q1 Nɑ bɛɛ sekuru doke.
\q1 Nɑ ǹ mɑɑ wuremɔ n bɛɛ kuɑ nɡe mɛ.
\q1
\v 13 Kon ben yoo te bɑ bɛɛ diisiɑmɔ kpeerɑsiɑ.
\q1 Kon ten yɔni kɑsuku.
\q1
\v 14 Bɛɛ Ninifuɡibu, wee ye nɛ, Yinni Gusunɔ nɑ ɡeruɑ bɛɛn sɔ̃.
\q1 Nɑ nɛɛ, i ǹ bweseru wɑsi
\q1 te tɑ koo bɛɛn yĩsiru sɔbe.
\q1 Kon bɛɛn bwɑ̃ɑroku dɑ̃ɑɡinu kɑ sisuɡinu kpuro wunɑ bɛɛn bũu dirun di,
\q1 kpɑ n bɛɛn sikɑ sɔɔru ko.
\q1 Domi i ǹ sɑ̃ɑ ɡɑ̃ɑnu.
\q1
\v 15 Bɛɛ Yudɑbɑ, wee ɡoo u nɑ ɡuunu wɔllɔ
\q1 u bɔri yɛndun lɑbɑɑri ɡeɑ kpɑrɑmɔ.
\q1 Yen sɔ̃, i bɛɛn tɔ̃ɔ bɑkɑ ni i rɑ rɑɑ di Yinni Gusunɔn sɔ̃ dio.
\q1 I bɛɛn nɔɔ mwɛɛnu yibio.
\q1 Domi tɔn kɔ̃so wi, u ǹ mɑɑ wee bɛɛn suunu sɔɔ.
\q1 Nɑ nùn kpeerɑsiɑwɑ mɑm mɑm.
\c 2
\q1
\v 1 Bɛɛ Ninifuɡibu, kɑm koosio u bɛɛ wɔrim wee.
\q1 Yen sɔ̃, i bɛɛn ɡbɑ̃rɑru mɑruo,
\q1 kpɑ i bɛɛn swɛɛ kɔ̃su.
\q1 I sɔɔru koowo,
\q1 kpɑ i wɔruɡɔru sɔ̃ɔsi kɑ bɛɛn dɑm kpuro.
\q1
\v 2 Wee Yinni Gusunɔ u Yɑkɔbun bweseru, Isirelibɑ ben bɛɛrɛ wesiɑmɔ,
\q1 be, be yibɛrɛbɑ bɑ wɔri bɑ ben yɑ̃nu ɡurɑ
\q1 nɡe mɛ bɑ rɑ resɛm kɑ̃ɑsi yɑkiri.
\s1 Bɑ Ninifu wɔri
\s2 bɑ yen yɑ̃nu ɡurɑ
\q1
\v 3 Ninifun yibɛrɛbɑn tɑbu durɔ dɑmɡibun tɛrɛnu nu sɔ̃ri.
\q1 Mɑ bɑ yɑ̃ɑ wunɔmɡinu doke.
\q1 Tɑbun tɔ̃ru tɑ̀ n turɑ,
\q1 ben tɑbu kɛkɛ be dumi ɡɑwe
\q1 yi rɑ kurɑmɛwɑ yi n bɑllimɔ nɡe dɔ̃ɔ buri,
\q1 kpɑ bɑ n yɑɑsi fĩɑmɔ.
\q1
\v 4 Bɑ tɑbu kɛkɛbɑ yɑkiɑmɔ swɛɛ sɔɔ nɡe wiirobu.
\q1 Bɑ dɑɑmɔ bɑtumɑ kpuro sɔɔ kɑ dɑm.
\q1 À n bu wɑ, ɑ rɑ n tɑmɑɑ dɔ̃ɔ yɑriyɑ.
\q1 Kpɑ bɑ n duki mɔ̀ nɡe ɡuru mɑɑkinu.
\q1
\v 5 Ninifun sinɑ boko u win tɑbu durɔ dɑmɡibu yɑɑyɑ u sokumɔ.
\q1 Adɑmɑ be wee, bɑ sĩimɔ bɑ bɑ̃ɑrimɔ.
\q1 Ben yibɛrɛbɑ bɑ sɛnde bɑ kɑ dɔɔ wuun ɡbɑ̃rɑru ɡiɑ.
\q1 Mɑ bɑ tii kuku yenu kuɑ.
\q1
\v 6 Subɑru sɔɔ, bɑ dɑɑnun swɛɛ kɛniɑ,
\q1 mɑ sinɑ kpɑɑrɑ wɔrukɑ.
\q1
\v 7 Bɑ Ninifu ye mwɑ bɑ yen yɑ̃nu ɡurɑ bɑ kɑ doonɑ.
\q1 Yen tɔn kurɔbu bɑ sumɔ nɡe kpɑrukonu,
\q1 mɑ bɑ toronu soomɔ.
\q1
\v 8 Ninifu ye, yɑ sɑ̃ɑwɑ nɡe nim bwee bɑkɑru
\q1 tèn nim mu ɡɛ̃ɛrɑ mu doonɑ.
\q1 Mɑ nɔɔɡirɑ nɔɔrɑmɔ tɑ mɔ̀,
\q1 i yɔ̃ro, i yɔ̃ro.
\q1 Adɑmɑ ɡoo kun yɔ̃re.
\q1
\v 9 I sii ɡeesu kɑ wurɑ ɡuro.
\q1 Ben dukiɑ yɑ ǹ nɔru mɔ.
\q1 Dukiɑ bwese bwesekɑwɑ bɑ mɔ.
\q1
\v 10 Bɑ ɡurɑmɔ, bɑ ɡoomɔ, bɑ sɑnkumɔ.
\q1 Tɔmbu kpuron ɡɔmɑ dwiiyɑ.
\q1 Ben dũunu soonɑmɔ, mɑ ben dɑm doonɑ.
\q1 Be kpuron wuswɑɑ burisinɛ.
\s1 Ninifu yɑ sɑ̃ɑwɑ
\s2 nɡe ɡbee sunɔ ɡe bɑ kɑmiɑ
\q1
\v 11 Mɑnɑ Ninifu ye, yɑ wɑ̃ɑ tɛ̃,
\q1 ye, ye yɑ rɑɑ sɑ̃ɑ nɡe ɡbee sinɑnsun wɑ̃ɑ yeru,
\q1 mi ɡbee sunɔ dwɑɑ kɑ ninu kɑ binu nu rɑ n bɔsu,
\q1 ɡoo ku rɑ mɑɑ nu nɑre,
\q1
\v 12 kpɑ dwɑɑ ye, yu yen kurɔbu kɑ yen binu yɑɑ ɡoowɑ,
\q1 kpɑ yu wɑ̃ɑ yee te yɑɑ yibiɑ.
\q1
\v 13 Gusunɔ wɔllu kɑ tem Yinni u nɛɛ, nɛ wee.
\q1 Nɛnɑ nɑ sɑ̃ɑ yen yibɛrɛ.
\q1 Kon de yen tɑbu kɛkɛbɑ bu dɔ̃ɔ mwɑɑrɑ.
\q1 Kon de bu yen bibu ɡo tɑbu sɔɔ.
\q1 Kon de yu ku mɑɑ tɔmbun yɑ̃nu ɡurɑ.
\q1 Goo kun mɑɑ yen sɔmɔbun nɔɔ nɔɔmɔ.
\s1 Bɑ Ninifu kɑm koosiɑ
\c 3
\q1
\v 1 Ninifuɡibɑ kuɑ bɔ̃rurobu.
\q1 Domi bɑ sɑ̃ɑwɑ tɔn ɡowobu.
\q1 Bɑ weesu yibɑ.
\q1 Mɑ bɑ kuurɑmɔ kɑ ɡbɑnɑ.
\q1 Bɑ rɑ n tɔmbun yɑ̃nu ɡurɑmɔwɑ.
\q1
\v 2 Wee sɛnɑn dɑmusu nɔɔrɑmɔ wuu ɡe sɔɔ.
\q1 Wee tɑbu kɛkɛbɑn uruun wɔkinu nɔɔrɑmɔ,
\q1 mɑ dumi yi yi ɡɑwe yi yɔ̃ɔkumɔ.
\q1
\v 3 Mɑɑsɔbu bɑ wee,
\q1 bɑ tɑkobibɑ kɑ yɑɑsi nɛni yi bɑllimɔ.
\q1 Wee bɑ tɔmbu mɛɛrɑ kuɑ,
\q1 mɑ ɡonu tɛrie bɑɑmɑ, nu ǹ ɡɑrirɔ.
\q1 Mɑ bɑ nu wɔrikimɔ.
\s1 Bɑ Ninifu sekuru doke
\q1
\v 4 Ninifu yɑ sɑ̃ɑwɑ nɡe kurɔ sɑkɑrɑ kowo kpoko.
\q1 Yɑ bwese dɑbinu yoru diisiɑ yen burɑm kɑ yen sɔrorun sɔ̃.
\q1
\v 5 Yen sɔ̃nɑ nɛ Gusunɔ, wɔllu kɑ tem Yinni, kon ye wɔrimɑ.
\q1 Kon yen yɑberu ɡbɑbiɑ n kɑ yen wuswɑɑ wukiri,
\q1 kpɑ n yen tereru bwesenu sɔ̃ɔsi,
\q1 kpɑ yu sekuru wɑ.
\q1
\v 6 Kon ye kubɑnu sure, kpɑ tɔmbu bu ye kɑ.
\q1
\v 7 Sɑɑ yerɑ wi u ye wɑ u koo dukɑ su,
\q1 kpɑ u nɛɛ, Ninifu yɑ kuɑ bɑnsu.
\q1 Wɑrɑ u koo ye wɔnwɔndu kuɑ.
\q1 Mɑnɑ kon bu wɑ be bɑ koo ye nukuru yɛmiɑsiɑ.
\s1 Ninifu yɑ koo kowɑ
\s2 nɡe Tebɛsi
\q1
\v 8 Tebɛsi yɑ wɑ̃ɑ Nilun nim swɛɛ yi bɑ ɡbɑn bɔkuɔ.
\q1 Nim mu kɑ ye sikerenɛ.
\q1 Mɑ mu sɑ̃ɑ yen ɡbɑ̃rɑru.
\q1 Ninifu, ɑ tɑmɑɑ ɑ Tebɛsi ye sɑnɔ kere?
\q1
\v 9 Etiopiɡibu kɑ Eɡibitiɡibɑ bɑ sɑ̃ɑ yen dɑm.
\q1 Putiɡibu kɑ Libiɡibu bɑ sɑ̃ɑwɑ yen somiɔbu.
\q1
\v 10 Kɑ mɛ kpuro, yen tii yɑ yoru dɑ.
\q1 Bɑ ye mwɑ mɑ bɑ yen bibu ɡo swɛɛ kpuro sɔɔ.
\q1 Bɑ yen wiruɡibu tɛtɛ toosi,
\q1 mɑ bɑ yen dɑmɡibu mwɛɛrɑ bɑ yɔni doke.
\q1
\v 11 Wunɛ Ninifu, kɑɑ nɔni sɔ̃ɔrɑwɑ,
\q1 kpɑ ɑ n sɑ̃ɑ nɡe wi u tɑm ɡoore,
\q1 kpɑ ɑ kuku yeru kɑsu yibɛrɛbɑn sɔ̃ ɑ kuke.
\q1
\v 12 Sɑɑ ye sɔɔ, wunɛn ɡbɑ̃rɑnu kpuro nu ko n sɑ̃ɑwɑ nɡe dɑ̃ɑ nìn mɑrum mu ye.
\q1 Bɑ̀ n mu sirɑ kpɑ mu wɔri wi u koo mu din nɔɔwɔ.
\q1
\v 13 Wee wunɛn tɔmbu bɑ sɑ̃ɑ nɡe tɔn kurɔbu wunɛn suunu sɔɔ.
\q1 Wunɛn tem wusun kɔnnɔsu su kɛniɑrɑ mɑm mɑm yibɛrɛbɑn wuswɑɑɔ.
\q1 Mɑ dɔ̃ɔ u sin kɔkɔrɔbɑ di.
\q1
\v 14 Bɛɛ Ninifuɡibu, i nim tɑkirio i yi.
\q1 Domi bɑ koo bɛɛn wuu tɑrusi.
\q1 I bɛɛn ɡbɑ̃rɑrun dɑm sosio.
\q1 I birikibɑ muro kpɑ i sɔndu tɑɑku i kɑ tu bɑni.
\q1
\v 15 Bɑɑ ì n yebɑ kpuro kuɑ,
\q1 kɑ mɛ, dɔ̃ɔ u koo nɑ u bɛɛ di,
\q1 ǹ kun mɛ bu bɛɛ ɡo kɑ tɑkobi.
\q1 Bɑ koo bɛɛ kpeerɑsiɑwɑ nɡe mɛ twee yi rɑ dɑ̃ɑ wurusu di.
\s1 Bɑ Ninifun tɔmbu kpuro ɡo
\q1 Wee, i dɑbiɑ nɡe twee.
\q1
\v 16 Bɛɛn tenkubɑ bɑ kperi dɑbiru kere.
\q1 Adɑmɑ be kpuro bɑ doonɑ
\q1 nɡe twee yi yi yɔ̃ɔwɑ.
\q1
\v 17 Bɛɛn kɔ̃sobu bɑ dɑbi nɡe ɡbɑbu swɛ̃ɛ.
\q1 Bɛɛn sɔm kowobu bɑ dɑbi nɡe twee
\q1 yi yi sinɑ dɑ̃ɑ kikisɔ bururu.
\q1 Adɑmɑ ye sɔ̃ɔ u yɑrɑ mɑ yi yɔ̃ɔwɑ yi doonɑ,
\q1 bɑ ǹ tubɑ mi yi dɑ.
\q1
\v 18 Wunɛ Asirin sinɑ boko,
\q1 wee wunɛn kpɑrobu bɑ dom yĩbirimɔ.
\q1 Wunɛn tɑbu durɔ dɑmɡibu bɑ ǹ mɑɑ wɑsi.
\q1 Mɑ wunɛn tɔmbu bɑ yɑrinɛ yɑm kpuro ɡuunu wɔllɔ,
\q1 ɡoo sɑri wi u koo bu kpɑɑsinɑ.
\q1
\v 19 Goo kun wunɛn mɛɛrɑ ye nɔɔrimɔ.
\q1 Yɑ koo nun ɡowɑ.
\q1 Wi u nuɑ ye yɑ nun deemɑ, u koo tɑkɑ kowɑ nuku dobun sɔ̃.
\q1 Domi ɡoo sɑri wi ɑ ǹ nɔni sɔ̃ɔwɑ.