\id HOS 
\ide UTF-8
\h Osee
\mt1 OSEE
\ip Oseen tire teni, Isirelibɑn bwese kɛri wɔkurɑ tɑ ɡerusimɔ yèn sɔ̃ bɑ kuɑ nɑɑnɛ sɑribɑ Yinni Gusunɔn mi. Osee u tu yoruɑwɑ u kɑ wiɡibu kirɔ ko bu kɑ wɑ bu ɡɔ̃ru ɡɔsiɑ kpɑ bu wurɑ Gusunɔn mi. U sɔ̃ɔsimɔ mɑ Yinni Gusunɔn kĩru tɑ kpɑ̃, tɑ ǹ mɑɑ nɔru mɔ. Tire te, tɑ kĩi te tɑ wɑ̃ɑ Gusunɔ kɑ Isirelibɑn bɑɑ sɔɔ weesinɑmɔwɑ nɡe kĩi te tɑ wɑ̃ɑ durɔ kɑ win kurɔ kɑ ben bibun bɑɑ sɔɔ.
\is1 Tire ten kpunɑɑ
\iq1 1 Oseen kurɔ suɑbu, wiru 1n di sere wiru 3.
\iq1 2. Osee u Isirelibɑ ɡerusimɔ, wiru 4n di sere wiru 13.
\iq1 3. U bu kirɔ mɔ̀ bu ɡɔ̃ru ɡɔsiɑ, wiru 14.
\ie
\c 1
\p
\v 1 Sɑnɑm mɛ sinɑm beni Osiɑsi kɑ Yotɑmu kɑ Akɑsi kɑ Esekiɑsi bɑ bɑndu di di Yudɑn temɔ, kɑ sɑɑ ye Yeroboɑmu Yoɑsin bii u bɑndu dii Isirelin temɔ, sɑnɑm mɛyɑ Yinni Gusunɔ u kɑ Osee Berin bii ɡɑri kuɑ.
\s1 Oseen kurɔ kɑ win bibu
\p
\v 2 Gɑri yi Yinni Gusunɔ u ɡbiɑ u Osee sɔ̃ɔwɑ yi wee. U nɛɛ,
\q1 Osee, ɑ doo ɑ kurɔ suɑ wi u rɑ sɑkɑrɑru ko.
\q1 Bɛɛn bibu bɑ koo mɑɑ win yirɑ swĩi.
\q1 Domi Isirelibɑ bɑ bũnu ɡɑsirimɔ bɑ sɑ̃ɑmɔ
\q1 nɡe kurɔ sɑkɑrɑ wi u durɔbu ɡɑsirimɔ.
\q1 Mɑ bɑ nɛ, Yinni Gusunɔ deri.
\p
\v 3 Mɑ Osee u seewɑ u Gomɛɛ Dibilɑimun bii suɑ kurɔ. Yerɑ u kɑ nùn mɛnnɑ. Mɑ kurɔ wi, u ɡurɑ suɑ u nùn bii tɔn durɔ mɑruɑ. 
\v 4 Mɑ Yinni Gusunɔ u nɛɛ,
\q1 i bii wi yĩsiru kɛ̃ɛyɔ Yisirɛɛli.
\q1 Domi sɑɑ fiiko sɔɔ kon Yehun yɛnuɡibu wɔri
\q1 yèn sɔ̃ bɑ tɔmbun yɛm yɑri Yisirɛɛliɔ,
\q1 kpɑ n Isirelibɑn bɑndu kpeerɑsiɑ.
\q1
\v 5 Tɔ̃ɔ te sɔɔ, kon Isirelibɑn tɑbu durɔbun tɛnnu bɔɔku Yisirɛɛlin wɔwɑɔ.
\p
\v 6 Yenibɑn biru, Gomɛɛ u mɑɑ ɡurɑ suɑ mɑ u bii tɔn kurɔ mɑrɑ. Mɑ Yinni Gusunɔ u Osee sɔ̃ɔwɑ u nɛɛ,
\q1 ɑ nùn yĩsiru kɛ̃ɛyɔ Lo Ruhɑmɑ.
\q1 Yen tubusiɑnɑ bii wi bɑ yinɑ.
\q1 Domi nɑ ǹ mɑɑ Isirelibɑ wɔnwɔndu kuɑmmɛ.
\q1 Nɑ ǹ bu suuru kuɑmmɛ.
\p
\v 7 Adɑmɑ kon Yudɑbɑ wɔnwɔndu kuɑ, kpɑ nɛn tii n bu fɑɑbɑ ko nɛ wi nɑ sɑ̃ɑ Gusunɔ ben Yinni. Adɑmɑ n ǹ mɔ kon kɑ ben yibɛrɛbɑ tɑbu ko. Nɑ ǹ tɛndu dendimɔ ǹ kun mɛ tɑkobi ǹ kun mɛ dumi kɑ yin mɑɑsɔbu.
\p
\v 8 Yenibɑn biru, Gomɛɛ u bii wi bom kɑrɑ. Mɑ u wure u ɡurɑ suɑ u bii tɔn durɔ mɑrɑ. 
\v 9 Mɑ Yinni Gusunɔ u nɛɛ,
\q1 ɑ nùn yĩsiru kɛ̃ɛyɔ Lo Ami.
\q1 Yen tubusiɑnɑ n ǹ nɛn tɔmbu.
\q1 Domi i ǹ mɑɑ sɑ̃ɑ nɛn tɔmbu,
\q1 nɑ ǹ mɑɑ sɑ̃ɑ bɛɛn Yinni.
\s1 Isirelibɑ
\s2 bɑ koo wurɑmɑ nɡe yellu
\q1
\v 10 Yinni Gusunɔ u Osee sɔ̃ɔwɑ u nɛɛ,
\q1 sɑɑ yɑ sisi yè sɔɔ Isirelibɑ bɑ koo dɑbiɑ
\q1 nɡe nim wɔ̃kun yɑni sɛɛri.
\q1 Bɑ ǹ kpɛ̃ bu ben ɡeeru ɡɑri.
\q1 Mi bɑ ku rɑ rɑɑ bu soku nɛn tɔmbu,
\q1 miyɑ bɑ koo bu soku nɛ Gusunɔ, Yinni wɑson bibu.
\q1
\v 11 Yudɑbɑ kɑ Isirelibɑ bɑ koo mɛnnɑ sɑnnu
\q1 kpɑ bu ɡoo ɡɔsi u n sɑ̃ɑ be kpuron sunɔ.
\q1 Domi bɑ koo dɑbiɑ bu tɛriɑ tem mɛ kpuro sɔɔ.
\q1 Yen dɔmɑ te, tɔ̃ɔ bɑkɑrɑ Yisirɛɛliɔ.
\c 2
\q1
\v 1 Bɛɛ Yudɑbɑ kɑ Isirelibɑ, i sɔ̃ɔnɔ mɑ i sɑ̃ɑwɑ nɛn tɔn be nɑ kĩ.
\s1 Isireli u sɑ̃ɑwɑ nɑɑnɛ sɑriruɡii
\q1
\v 2 Nɛn bibu, i bɛɛn mɛro tɑɑrɛ wɛ̃ɛyɔ,
\q1 domi u ǹ mɑɑ sɑ̃ɑ nɛn kurɔ,
\q1 mɛyɑ nɑ ǹ mɑɑ sɑ̃ɑ win durɔ.
\q1 I nùn sɔ̃ɔwɔ u de u win durɔ dɑmɑ nɔni yi wunɑ,
\q1 kpɑ u sɑkɑrɑ kookoosu wunɑ win ɡɔ̃run di.
\q1
\v 3 Mɑ n kun mɛ, kon win yɑ̃nu potiri mɑm mɑm
\q1 kpɑ n nùn yɔ̃su tereru
\q1 nɡe mɛ bɑ kɑ nùn mɑrɑ.
\q1 Kon de u n sɑ̃ɑ nɡe tem
\q1 mi ɡɑ̃ɑnu ku rɑ kpi,
\q1 kpɑ n de nim nɔru ɡu nùn ɡo.
\q1
\v 4 Nɑ ǹ mɑɑ bɛɛ win bibun wɔnwɔndu mɔ̀,
\q1 domi bɛɛn mɛro u sɑ̃ɑwɑ sɑkɑrɑ kowo.
\q1
\v 5 U kurɔ tɑnɑru kɑ sekuru sɑriru dɔrɑ.
\q1 Domi u nɛɛ, u koo win durɔ tɑnɔbu swĩiwɑ
\q1 kpɑ bu nùn nim kɑ dĩɑnu kɑ tɑm kɑ ɡum kɑ yɑ̃nu wɛ̃ ni u koo doke.
\q1
\v 6 Yen sɔ̃, kon win swɑɑ kɛnɛ kɑ sɑ̃ki,
\q1 kpɑ n ye dɑ̃ɑ sɛ̃suku kpɑ u kun mɑɑ win swɑɑ ye swĩi.
\q1
\v 7 Bɑɑ ù n dɑɑ yɑrɑ u win durɔ tɑnɔ be nɑɑ ɡirɑ,
\q1 u ǹ mɑɑ bu nɑɑ turi.
\q1 Bɑɑ ù n bu kɑsu,
\q1 u ǹ mɑɑ bu wɑsi.
\q1 Sɑɑ ye sɔɔrɑ u koo nɛɛ,
\q1 ǹ n mɛn nɑ, ɑ de n wurɑ nɛn durɔ ɡbiikoon mi,
\q1 domi nɑ rɑɑ nuku dobu mɔ win mi n kere tɛ̃.
\q1
\v 8 Mɛyɑ u ǹ dɑɑ ɡie mɑ nɛnɑ nɑ nùn dobi kɑ tɑm kpɑm kɑ ɡum wɛ̃ɛmɔ.
\q1 Mɛyɑ nɑ mɑɑ nùn sii ɡeesu kɑ wurɑ tɑɑsi.
\q1 Adɑmɑ u kɑ ye bũu wi bɑ mɔ̀ Bɑɑli sɑ̃wɑ.
\q1
\v 9 Yen sɔ̃, kon ɡɔsirɑmɑ n nɛn dobi mwɑ yin ɡɛ̃ɛbun sɑɑ sɔɔ,
\q1 kɑ tɑm mɛn sɑɑ sɔɔ kɑ sere yɑ̃ɑ ni u sebuɑ u kɑ win tereru wukiri,
\q1
\v 10 kpɑ n nùn sekuru doke win durɔ tɑnɔbun wuswɑɑɔ.
\q1 Goo sɑri wi u koo nùn wɔrɑ nɛn nɔmɑn di.
\q1
\v 11 Kon win nuku dobu kpuro kpeerɑsiɑ
\q1 kɑ tɔ̃ɔ bɑkɑ ni u rɑ ko suru kɑ suru
\q1 kɑ tɔ̃ɔ wɛ̃rɑruɡiru kɑ sere mɛnnɔ si u rɑ ko sɑ̃ɑrun swɑɑ sɔɔ.
\q1
\v 12 Kon de win resɛm dɑ̃nu kɑ win fiɡiebɑ bu kɑm ko
\q1 be u nɛɛ, u wɑ durɔ tɑnɔbun min di.
\q1 Kon de ɡbee ni, nu ko dɑ̃ɑ sɔ̃ɔ,
\q1 kpɑ ɡbeeku yɛɛ yi dɑ̃ɑ nin mɑrum di.
\q1
\v 13 Kon nùn sɛɛyɑsiɑ yèn sɔ̃ u mɑn deri
\q1 u bũu wi bɑ mɔ̀ Bɑɑli turɑre dɔ̃ɔ dokeɑmmɛ.
\q1 Mɑ u win sɑbɑ kɑ win tɑɑminu doke u dɑ u win durɔ tɑnɔbu swĩi.
\q1 Nɛ, Yinni Gusunɔwɑ nɑ yeni ɡeruɑ.
\q1
\v 14 Adɑmɑ sɑɑ yɑ sisi yè sɔɔ kon nùn kɔkiri n kɑ dɑ ɡbɑburɔ
\q1 kpɑ n kɑ nùn ɡɑri ko kɑ kĩru.
\q1
\v 15 Kon nùn win resɛm ɡbɑɑru wesiɑ
\q1 te tɑ wɑ̃ɑ Akɔɔn wɔwɑɔ.
\q1 Yĩsi ten tubusiɑnɑ nɔni swɑ̃ɑrun wɔwɑ.
\q1 Yerɑ yɑ ko n sɑ̃ɑ win yĩiyɔbun tore,
\q1 kpɑ u womu ko nɡe sɑnɑm mɛ u yɑrimɑ sɑɑ Eɡibitin di win wɔndiɑru.
\s1 Yinni Gusunɔ
\s2 u koo kɑ win tɔmbu dorɑ
\q1
\v 16 Yen tɔ̃ɔ te, u koo mɑn soku win durɔ.
\q1 U ǹ mɑɑ mɑn sokumɔ Bɑɑli win yinni.
\q1
\v 17 Kon de u bũu wi bɑ mɔ̀ Bɑɑlin yĩsiru duɑri
\q1 kpɑ u kun mɑm kpĩɑ u tu siɑ.
\q1
\v 18 Sɑɑ yerɑ kon kɑ ɡbeeku yɛɛ kɑ ɡunɔsu kɑ sere yɛɛ yi yi rɑ kɑbiri ɑrukɑwɑni bɔke
\q1 yi ku kɑ nɛn tɔmbu kɔ̃sɑ ɡɑɑ kuɑ.
\q1 Kon de tɑbu bu kpe, kpɑ bɑ n wɑ̃ɑ bɔri yɛndu sɔɔ.
\q1
\v 19 Isireli, kon mɑɑ nun ko nɡe nɛn kurɔ sere kɑ bɑɑdommɑɔ,
\q1 kpɑ n nun ɡem kɑ wɔnwɔndu kɑ durom sɔ̃ɔsi.
\q1 Bɔrɔkiniru sɔɔrɑ kon kɑ nun ɑrukɑwɑni bɔke.
\q1 Sɑɑ ye sɔɔrɑ kɑɑ wurɑ mɑ nɛnɑ nɑ sɑ̃ɑ Yinni Gusunɔ.
\q1
\v 21 Nɛ, Yinni Gusunɔwɑ nɑ yeni ɡerumɔ.
\q1 Sɑɑ ɡɑɑ sisi yè sɔɔ kon wɔllun kɑnɑnu nɔ,
\q1 kpɑ n tu nim kɛ̃.
\q1 Wɔllɑ koo tem kɑnɑru nɔ kpɑ tu ɡurɑ nɛɛsiɑ.
\q1 Kpɑ tem mu dobi kɑ resɛm kɑ olifin kɑnɑru nɔ
\q1 kpɑ ye kpuro yu kpi.
\q1 Kpɑ yu Yisirɛɛlin bukɑtɑ wunɑnɑ.
\q1
\v 23 Kon de nɛn tɔmbu bu sinɑ tem mɛ kpuro sɔɔ
\q1 kpɑ n bu wɔnwɔndu kuɑ
\q1 be, be nɑ rɑɑ yinɑ n wɔnwɔndu kuɑ.
\q1 Kpɑ be, be bɑ ku rɑ rɑɑ soku nɛn tɔmbu,
\q1 n bu soku nɛn tɔmbu.
\q1 Kpɑ be, bu mɑɑ mɑn soku ben Yinni.
\s1 Osee u win kurɔn
\s2 lɑɑkɑri mɛɛrɑ
\c 3
\p
\v 1 Mɑ Osee u nɛɛ, Yinni Gusunɔ u mɑn sɔ̃ɔwɑ u nɛɛ, n doo n kpɑm nɛn kurɔ wi kĩɑ wi ɡoo u kĩɑ mɑ u sekuru sɑriru mɔ̀. N kurɔ wi kĩɔ nɡe mɛ wi, Yinni Gusunɔ u Isirelibɑ kĩ, bɑɑ mɛ bɑ nùn biru kisi bɑ dɑ bɑ bũnu sɑ̃ɑmɔ mɑ bɑ resɛm kirɑnu kĩ ni bɑ rɑ kɑ bũu ni sɑ̃. 
\v 2 Mɑ nɑ dɑ nɑ kurɔ wi yɑkiɑ kɑ sii ɡeesun ɡobi wɔkurɑ nɔɔbu kɑ sere ɔɔsu \f + \fr 3:2 \fr*\fk ɔɔsu \fk*\ft - Dĩɑ bimi ɡɛɛn bweserɑ yi yi kɑ ɡbɛɛ weenɛ.\ft*\f* ditiri nɑtɑ \f + \fr 3:2 \fr*\fk ditiri nɑtɑ \fk*\ft - Yɑ sɑ̃ɑwɑ sɑɑki nɔɔbɑ yirun sɑkɑ.\ft*\f* (600). 
\v 3 Mɑ nɑ nùn sɔ̃ɔwɑ nɑ nɛɛ, ɑ de ɑ n wɑ̃ɑ nɛn sɔ̃ n kɑ tɛ. A ku mɑɑ sɑkɑrɑru ko. A ku mɑɑ dɑ durɔ ɡoon mi. Nɛn tii kon mɑɑ tii nɛnɛ.
\p
\v 4 Nɡe mɛyɑ Isirelibɑ bɑ ko n wɑ̃ɑ sunɔ sɑri n kɑ tɛ. Mɛyɑ bɑ ǹ ko n mɑɑ wiruɡii mɔ. Bɑ ǹ mɑɑ yɑ̃kunu mɔ̀. Bɑ ǹ mɑɑ bũnu ɡɑnu sɑ̃ɑmɔ. Mɛyɑ yɑ̃ku kowo ɡoo kun ko n mɑɑ wɑ̃ɑ ben suunu sɔɔ u kɑ bu bikiɑru kuɑ. 
\v 5 Yenibɑn biru, bɑ koo wurɑmɑ bu Gusunɔ ben Yinni kɑsu kɑ mɑɑ ben sikɑdo Dɑfidin bɑndu wi u rɑɑ sɑ̃ɑ ben sinɑ boko. Bɑ koo nuku dobu ko bɑ̀ n Yinni Gusunɔ wɑ kɑ win kĩi te u koo bu sɔ̃ɔsi sɑɑ ye sɔɔ.
\s1 Yinni Gusunɔ
\s2 u Isirelibɑ tɑɑrɛ wɛ̃
\c 4
\q1
\v 1 Bɛɛ Isirelibɑ, i nɛ, Yinni Gusunɔ swɑɑ dɑkio.
\q1 Domi nɑ siribu mɔ kɑ bɛɛ tem mɛn tɔmbu
\q1 yèn sɔ̃ wɔnwɔnduɡii ɡoo sɑri bɛɛ sɔɔ,
\q1 ɡemɡii ɡoo mɑɑ sɑri.
\q1 Mɛyɑ bɛɛn ɡoo kun mɑɑ mɑn yɛ̃.
\q1
\v 2 I nɔɔ mwɛɛnu mɔ̀ kɑ bɔ̃ri, ɑdɑmɑ weesɑ i mɔ̀.
\q1 Mɛyɑ i mɑɑ tɔmbu ɡoomɔ, i ɡbɛnimɔ, i sɑkɑrɑru mɔ̀.
\q1 I dɑm dɔrenɑmɔ, mɑ tɔn ɡoberɑ sosimɔ tɑ dɔɔ.
\q1
\v 3 Yen sɔ̃nɑ nɛ, Yinni Gusunɔ, kon de tem mɛ, mu ɡberɑ.
\q1 Bɛɛ be i wɑ̃ɑ mi kpuro, i ko woorɑwɑ
\q1 sɑɑ ɡbeeku yɛɛn di n kɑ dɑ ɡunɔsɔ kɑ wɛɛyɔ,
\q1 ye kpurowɑ yɑ koo kɑm ko.
\s1 Yinni Gusunɔ
\s2 u yɑ̃ku kowobu tɑɑrɛ wɛ̃ɛmɔ
\q1
\v 4 Yinni Gusunɔ u nɛɛ, ɡoo u ku rɑɑ kɑ tii yinɑ
\q1 ǹ kun mɛ u ɡoo ɡerusi.
\q1 Domi wunɛ yɑ̃ku kowo tɔnwerowɑ nɑ kɑ sɑnnɑmɔ.
\q1
\v 5 Sɔ̃ɔ teeru kɑɑ wɔrumɑwɑ sɔ̃ɔ sɔɔ ɡbɑ̃ɑrɑ
\q1 kpɑ wunɛn beruse nɛn sɔmɔ u mɑɑ wɔrumɑ wɔ̃kuru.
\q1 Kon mɑɑ Isirelin bweseru ɡo te tɑ sɑ̃ɑ nɡe wunɛn mɛro.
\q1
\v 6 Wee nɛn tɔmbɑ ɡbimɔ yèn sɔ̃ bɑ ǹ mɑn yɛ̃.
\q1 Adɑmɑ wunɛn tii, ɑ yinɑ ɑ mɑn wurɑ.
\q1 Yen sɔ̃, kon nun yinɑ kpɑ ɑ kun mɑɑ sɑ̃ɑ nɛn yɑ̃ku kowo tɔnwero.
\q1 Nɡe mɛ ɑ nɛ, Yinni Gusunɔn woodɑbɑ duɑri,
\q1 nɡe mɛyɑ kon mɑɑ wunɛn bibu duɑri.
\q1
\v 7 Nɡe mɛ bɑ dɑbiɑmɔ, nɡe mɛyɑ bɑ mɑn torɑrimɔ bɑ dɔɔ.
\q1 Kon ben bɛɛrɛ kpeesiɑ kpɑ bu sekuru wɑ.
\q1
\v 8 Wee bɑ kuurɑmɔ nɛn tɔmbun torɑnun sɔ̃.
\q1 Mɑ bɑ bu bɔriemɔ bɑ n kɑ torɑmɔ bɑ n dɔɔ.
\q1
\v 9 Yen sɔ̃, sɛɛyɑsiɑ tee biyɑ kon nɛn tɔmbu kɑ ben yɑ̃ku kowobu ko.
\q1 Kon bu sɛɛyɑsiɑwɑ nɡe mɛ ben dɑɑ yɑ nɛ.
\q1 Kon bu kɔsiɑwɑ nɡe mɛ ben kookoosu nɛ.
\q1
\v 10 Bɑ koo di, ɑdɑmɑ bɑ ǹ debumɔ.
\q1 Bɑ koo sɑkɑrɑru ko bũu nuurɔ bu kɑ bibu wɑn sɔ̃.
\q1 Adɑmɑ bɑ ǹ mɑrumɔ yèn sɔ̃ bɑ nɛ, Yinni Gusunɔ biru kisi
\q1 bɑ ǹ nɛn woodɑbɑ swĩi.
\q1
\v 11 Yinni Gusunɔ u nɛɛ, sɑkɑrɑru kɑ tɑmɑ mu nɛn tɔmbun wiru ɡɔsiɑ.
\q1
\v 12 Dɑ̃ɑ kukun miyɑ bɑ rɑ bikiɑru de ɡu kɑ bu ɡɑri sɔ̃.
\q1 Bũu ɡɑsiribu derɑ bɑ kɔ̃ɔrɑ mɑ bɑ kɑ mɑn tondɑ.
\q1
\v 13 Bɑ rɑ de bɑ n yɑ̃kunu mɔ̀ ɡuunu wɔllɔ,
\q1 kpɑ bɑ n turɑre dɔ̃ɔ dokemɔ ɡunɡunu wɔllɔ
\q1 kɑ dɑ̃ɑ bɑkɑ bwese bwesekɑn nuurɔ nìn sɑɑrɑ bu wɛ̃re.
\q1 Yen sɔ̃nɑ ben bii wɔndiɑbɑ bɑ sekuru sɑriru mɔ̀.
\q1 Mɑ ben biiɡii kurɔbu bɑ sɑkɑrɑru mɔ̀.
\q1
\v 14 Nɑ ǹ ben bii wɔndiɑ be, kɑ ben biiɡii kurɔ be sɛɛyɑsiɑmɔ
\q1 ben sekuru sɑri te, kɑ ben sɑkɑrɑ te bɑ mɔ̀n sɔ̃.
\q1 Domi ben mɔwɔbun tii bɑ sɑkɑrɑru mɔ̀ kɑ kurɔ be bɑ wɑ̃ɑ bũu sɑ̃ɑrun sɔ̃.
\q1 Mɑ bɑ mɑɑ yɑ̃kunu mɔ̀ sɑnnu kɑ be.
\q1 Adɑmɑ bɑ n yɛ̃ nɡe mɛ mɔndu ɡɑrɑ ɡeruɑ tɑ nɛɛ,
\q1 tɔn be bɑ ǹ lɑɑkɑri mɔ, bɑ kɑm kobu dɔɔwɑ.
\q1
\v 15 Isirelibɑ bɑ bũnu ɡɑsirimɔ,
\q1 ɑdɑmɑ Yudɑbɑ bu ku rɑɑ bu swĩi.
\q1 Bu ku dɑ Giliɡɑliɔ ǹ kun mɛ Betɛli Afɛniɔ \f + \fr 4:15 \fr*\fk Betɛli Afɛniɔ \fk*\ft yen tubusiɑnɑ dɔ̃ɔn wɑ̃ɑ yeru\ft*\f* bu kɑ yɑ̃kunu ko
\q1 kpɑ bɑ n bɔ̃rumɔ bɑ n mɔ̀,
\q1 sere kɑ Yinni Gusunɔn wɑ̃ɑru.
\p
\v 16 Isirelibɑ bɑ sɑ̃ɑwɑ nɡe nɑɑ ɡbiibɑ ye bɑ kpɑnɑ bu kpɑrɑ. Adɑmɑ tɛ̃, Yinni Gusunɔ u koo bu yɔ̃su bɑtumɑ sɔɔ nɡe yɑ̃ɑnu. 
\v 17 Isirelibɑ bɑ bũnu sɑ̃ɑmɔ. A bu derio mi. 
\v 18 Bɑ̀ n tɑm nɔrɑ bɑ kpɑ, bɑ rɑ n yɑnde dɔɔwɑ bu sɑkɑrɑru ko. Wee ben wiruɡibu bɑ rɑ n kĩwɑ bɑ n wɑ̃ɑ sekuru sɑri kom sɔɔ. 
\v 19 Sɔ̃ɔ teeru woo ɡɑ koo nɑ ɡu bu suɑ ɡu kɑ doonɑ kpɑ bu sekuru wɑ ben yɑ̃ku nin sɔ̃.
\s1 Keu koosio kɔ̃sobu
\c 5
\p
\v 1 Yinni Gusunɔ u nɛɛ,
\q1 bɛɛ yɑ̃ku kowobu, i yenibɑ swɑɑ dɑkio.
\q1 Bɛɛ Isirelibɑ, i swɑɑ dɑkio i nɔ.
\q1 Bɛɛ sinɑ kpɑɑruɡibu, i swɑɑ tem kpĩiyɔ i nɔ.
\q1 Bɛɛyɑ siri bini bu kɑ yɑ̃.
\q1 Domi i kuɑ tɔmbun yinɑ Misipɑɔ,
\q1 mɑ i kuɑ ben tɑɑ Tɑboriɔ.
\q1
\v 2 Mɑ bɑ mɑn biru kisi bɑ numɑ durum sɔɔ.
\q1 Yen sɔ̃, kon bɛɛ kpuro sɛɛyɑsiɑ.
\q1
\v 3 Nɑ Isirelibɑ yɛ̃wɑ sɑ̃ɑ sɑ̃ɑ.
\q1 Ben ɡoo kun mɑn berue.
\q1 Wee bɑ dɑ bɑ bũnu ɡɑsirɑ
\q1 bɑ tii disi doke.
\p
\v 4 Osee u nɛɛ,
\q1 bɑ ǹ kpɛ̃ bu mɑɑ wurɑmɑ ben Yinnin mi ben kookoosun sɔ̃.
\q1 Domi bũu sɑ̃ɑrun ɡɑsiribu ɡinɑ wɑ̃ɑ ben ɡɔ̃ru sɔɔ.
\q1 Mɛyɑ bɑ ǹ mɑɑ wi, Yinni Gusunɔ yɛ̃.
\q1
\v 5 Isirelibɑn tii suɑbu bu sɔ̃ɔsimɔ mɛ bɑ sɑ̃ɑ.
\q1 Bɑ koo wɔrumɑ ben durum sɔ̃.
\q1 Yudɑbɑn tii bɑ koo wɔrumɑ kɑ be sɑnnu.
\q1
\v 6 Sɑnɑm ɡɑm sisi
\q1 mɛ̀ sɔɔ bɑ koo bikiɑru dɑ Yinni Gusunɔn mi,
\q1 kpɑ bu kɑ nùn yɑ̃ɑnu kɑ kɛtɛbɑ yɑ̃kuru kuɑ.
\q1 Adɑmɑ bɑ ǹ nùn wɑsi,
\q1 domi u bu deri.
\q1
\v 7 Beyɑ bɑ nùn tɔnu kɑndu kuɑ.
\q1 Domi bɑ dɑ bɑ bii seeɡebɑ mɑrɑ be bɑ ǹ nùn yɛ̃.
\q1 Tɛ̃, n ǹ tɛɛmɔ u kɑ bu kɑm koosiɑ be kɑ ben ɑrumɑni.
\s1 Gusunɔ u koo de Yudɑbɑ
\s2 kɑ Isirelibɑ bu tɑbu ko
\q1
\v 8 Yinni Gusunɔ u nɛɛ,
\q1 i tɑbun kɔbɑ soowo Gibeɑɔ kɑ Rɑmɑɔ.
\q1 I tɑbun wurenu koowo Betɛli Afɛniɔ.
\q1 Bɛɛ Bɛnyɑmɛɛbɑ, tɑbu durɔbɑ wee bɛɛn birun di.
\q1
\v 9 Gɑri ɡeeyɑ nɑ Isirelibɑ sɔ̃ɔmɔ.
\q1 Dɔmɑ te kon bu sɛɛyɑsiɑ, bɑ koo kɑm kowɑ.
\q1
\v 10 Wee Yudɑbɑn wiruɡibu bɑ sɑ̃ɑwɑ nɡe be bɑ rɑ tem ɡbɛni
\q1 bu kɑ ben tiin tem sosi.
\q1 Yen sɔ̃, kon bu nɛn mɔru wisi nɡe nim torɑ.
\q1
\v 11 Siribu bu Isirelibɑ di, mɑ bɑ bu dɑm dɔremɔ
\q1 yèn sɔ̃ bɑ kɑm nɑɑ ɡire.
\q1
\v 12 Nɑ kon bu di nɡe ɡɛmi.
\q1 Kpɑ nɑ n Yudɑbɑ wɑhɑlɑ mɔ̀ nɡe bɑrɑ te tɑ kukunu temmɔ.
\q1
\v 13 Mɛyɑ Isirelibɑ bɑ tii bɑrɑru wɑɑsi.
\q1 Mɑ Yudɑbɑ bɑ ben bosu wɑ.
\q1 Mɑ Isirelibɑ bɑ ɡɔrɑ Asiriɔ
\q1 bu kɑ sinɑ boko Yɑrɛbu somiru kɑnɑ.
\q1 Adɑmɑ u ǹ kpɛ̃ u bu bɛkiɑ
\q1 u sere nɛɛ, u koo ben bosu kpeesiɑ.
\q1
\v 14 Nɑ ko n sɑ̃ɑwɑ nɡe ɡbee sunɔ Isirelibɑ kɑ Yudɑbɑn sɔ̃.
\q1 Kon bu wɔri n yɑɑku kpɑ n bu suɑ n kɑ doonɑ.
\q1 Goo sɑri wi u koo bu wɔrɑ sɑɑ nɛn nɔmɑn di.
\s1 Isirelibɑ bɑ ben durum
\s2 tuubɑ kuɑ kɑ murɑfitiru
\p
\v 15 Yinni Gusunɔ u nɛɛ,
\q1 ǹ n mɛn nɑ, kon bu biru kisi
\q1 kpɑ n wurɑ nɛn wɑ̃ɑ yerɔ
\q1 sere bu kɑ tubu mɑ bɑ torɑ.
\q1 Ben nɔni swɑ̃ɑru tɑ koo de bu mɑn kɑsu
\q1 kpɑ bu mɑn somiru kɑnɑ.
\c 6
\q1
\v 1 Isirelibɑ bɑ sɔ̃ɔnɑ bɑ nɛɛ,
\q1 i nɑ su ɡɔsirɑ Yinni Gusunɔn mi.
\q1 Wee u sun so u mɛɛrɑ kuɑ.
\q1 Adɑmɑ u koo bɛsɛn mɛɛrɑ ye nɔɔri u sun bɛkiɑ.
\q1
\v 2 N ǹ mɑɑ tɛɛmɔ u kɑ sun wɑ̃ɑru wɛ̃,
\q1 kpɑ sɑ n wɑ̃ɑ win wuswɑɑɔ.
\q1
\v 3 I de su kɑsu su nùn ɡiɑ.
\q1 Nɡe mɛ sɑ rɑ n yɛ̃ kɑm kɑm mɑ sɔ̃ɔ u koo yɑri,
\q1 nɡe mɛyɑ sɑ n mɑɑ yɛ̃ mɑ u koo nɑ.
\q1 U koo nɑwɑ nɡe tom buruku ɡurɑ ye yɑ rɑ tem yɛmiɑsie.
\q1
\v 4 Yinni Gusunɔ u nɛɛ,
\q1 bɛɛ Yudɑbɑ kɑ Isirelibɑ, mbɑ kon bɛɛ kuɑ.
\q1 Wee bɛɛn kĩru nɛn sɔ̃ tɑ sɑ̃ɑwɑ nɡe bururun kɑkoru
\q1 ǹ kun mɛ nɡe dirum mɛ mu rɑ yɑrinɛ fuuku.
\q1
\v 5 Yen sɔ̃nɑ kon bɛɛ nɛn sɔmɔbu ɡɔriɑmɑ
\q1 bu bɛɛ sɔ̃ mɑ kon bɛɛ sɛɛyɑsiɑ.
\q1 Kpɑ bu mɑɑ bɛɛ sɔ̃ mɑ kon bɛɛ ɡo.
\q1 Nɛn siribu bu koo sɔ̃ɔsirɑ nɡe yɑm bururɑm.
\q1
\v 6 Domi wɔnwɔndɑ nɑ kĩ, n ǹ mɔ yɑ̃kuru.
\q1 Mɛyɑ nɑ mɑɑ kĩ nɛn tɔmbu bu mɑn ɡiɑ
\q1 n kere bu mɑn yɑ̃ku dɔ̃ɔ mwɑɑrɑruɡinu kuɑ.
\q1
\v 7 Bɑ nɛn ɑrukɑwɑni kusiɑ nɡe mɛ tɔmbu bɑ rɑ n kuɑnɑmmɛ.
\q1 Wee bɑ mɑn tɔnu kɑndu kuɑ.
\q1
\v 8 Gɑlɑdiɡibu bɑ sɑ̃ɑwɑ tɔn kɔ̃sobu
\q1 mɑ bɑ yɛm yɑri bɑɑmɑ.
\q1
\v 9 Nɡe mɛ swɑɑ diobu bɑ rɑ n swɑɑ mɑrɑ,
\q1 nɡe mɛyɑ yɑ̃ku kowobun wuuru tɑ wɑ̃ɑ Sikɛmun swɑɑɔ tɑ tɔmbu ɡoomɔ.
\q1
\v 10 Nɑ ɡɑ̃ɑ kɔ̃sunu wɑ Isireliɔ,
\q1 niyɑ bɑ bũnu ɡɑsirimɔ,
\q1 bɑ tii disi dokemɔ nɡe sɑkɑrɑ kowo.
\q1
\v 11 Sɑɑ yɑ sisi yè sɔɔ kon mɑɑ bɛɛ Yudɑbɑ sɛɛyɑsiɑ.
\s1 Isirelibɑ kɑ bwese tukunu
\q1 Yinni Gusunɔ u nɛɛ,
\q1 sɑnɑm mɛ nɑ kĩ nɛn tɔmbu Isirelibɑ bu wurɑmɑ yorun di,
\c 7
\q1
\v 1 kpɑ n bu bɛkiɑ,
\q1 sɑɑ yerɑ ben durum mɑɑ sɔ̃ɔsirɑ Sɑmɑriɔ.
\q1 Gbɛnɔbu bɑ dumɔ diɑɔ bɑ ɡbɛnimɔ.
\q1 Mɑ ben ɡɑbɑ yibɑ swɛɛ sɔɔ.
\q1
\v 2 Adɑmɑ ben ɡoo sɑri wi u rɑ tii sɔ̃ u nɛɛ,
\q1 nɑ yɑɑye kɔ̃sɑ ye bɑ mɔ̀.
\q1 Tɛ̃, wee bɑ mwɑɑrɑ ben kom kɔ̃sum mɛ sɔɔ.
\q1 Nɑ ye kpuro wɑɑmɔ.
\q1
\v 3 Ben nuku kɔ̃su kookoosu kɑ ben weesu
\q1 su sinɑ boko kɑ ben wiruɡibu nuku dobu wɛ̃ɛmɔ.
\q1
\v 4 Be kpuro bɑ sɑ̃ɑwɑ sɑkɑrɑ kowobu bɑ sum
\q1 nɡe pɛ̃ɛ wɔ̃ɔ yeru te pɛ̃ɛ kowo u dɔ̃ɔ doke u deri.
\q1 Mɑ u dɑ u win pɛ̃ɛ som burɑ u yi sere mu kɑ se.
\q1
\v 5 Bɑ̀ n ben sinɑ bokon tɔ̃ɔ bɑkɑru mɔ̀,
\q1 ben sinɑ ɑsɑkpɔbu kɑ sunɔn tii bɑ rɑ tɑm nɔwɑ
\q1 kpɑ bɑ n tɔmbu yɑɑ kɑsikimɔ.
\q1
\v 6 Be bɑ rɑ nɔɔ tiɑ ko bu kɑ tɔmbu seesi,
\q1 bɑ sɑ̃ɑ nɡe pɛ̃ɛ wɔ̃ɔ yeru.
\q1 Wɔ̃kuru, ben wɔruɡɔru tɑ rɑ yɛmiɛwɑ
\q1 kpɑ yɑm sɑ̃re bururu tu se nɡe bɑ ɡɑ̃ɑnu dɔ̃ɔ doke.
\q1
\v 7 Be kpuro bɑ sumwɑ nɡe dɔ̃ɔ.
\q1 Bɑ rɑ ben kpɑrobu ɡowɑ
\q1 kpɑ ben sinɑmbu bɑ n wɔrukumɔ tiɑ tiɑ.
\q1 Adɑmɑ ben ɡoo ku rɑ mɑɑ mɑn somiru kɑnɛ.
\q1
\v 8 Yinni Gusunɔ u mɑɑ nɛɛ,
\q1 Isirelibɑ bɑ kɑ bwese tukunu mɛnnɑ.
\q1 Mɑ bɑ kuɑ nɡe kirɑ te bɑ ǹ ɡɔsie.
\q1
\v 9 Bwese tuku ni, nu bu dɑm mwɑɑrimɔ.
\q1 Adɑmɑ bɑ ǹ yɛ̃ mɛ.
\q1 Tɔkɔrɑ bu deemɑmɔwɑ,
\q1 ɑdɑmɑ bɑ ǹ tubɑ.
\q1
\v 10 Ben tii suɑbu sɔ̃ɔsirɑmɔ.
\q1 Domi bɑ ǹ ɡɔsirɑmɛ nɛ Gusunɔ ben Yinnin mi.
\q1 Kɑ yen de kpuro, bɑ ǹ mɑn kɑsu.
\q1
\v 11 Bɑ sɑ̃ɑwɑ nɡe totobɛrɛ
\q1 te tɑ ǹ bwisi mɔ.
\q1 Bɑ Eɡibitiɡibu somiru kɑnɑmɔ,
\q1 mɑ bɑ dɑɑmɔ Asiriɔ.
\q1
\v 12 Adɑmɑ bɑ̀ n swɑɑ wɔri nɑ rɑ bu tɑɑ bɛriewɑ
\q1 n bu mwɛɛri nɡe ɡunɔsu.
\q1 Kpɑ n bu sɛɛyɑsiɑ nɡe mɛ bɑ bu nɔɔsiɑ.
\q1
\v 13 Bɑ kɑm kuɑwɑ mi, domi bɑ mɑn dukɑ suurimɔ.
\q1 Bɑ mɑn seesi, bɑ mɑn weesu kuɑ.
\q1 N deemɑ nɛnɑ kon dɑɑ bu fɑɑbɑ ko.
\q1
\v 14 Bɑ̀ n mɑn somiru kɑnɑmɔ, bɑ ku rɑ tu ko ɡɔ̃ruɔ.
\q1 Adɑmɑ bɑ rɑ sinɛwɑ bɑ n tii muririmɔ.
\q1 Kpɑ bɑ n yĩiyɔ yeyɑ yɑ koo de ben ɡbeɑ yu ɑlikɑmɑ kɑ resɛm ɡeɑ mɑ.
\q1 Nɡe mɛyɑ bɑ rɑ n mɔ̀ bu kɑ mɑn seesi.
\q1
\v 15 N deemɑ nɛnɑ nɑ bu nɔni doke nɑ bu dɑm wɛ̃.
\q1 Adɑmɑ kɑ mɛ, bɑ mɑn kɔ̃sɑ bwisikusimɔ.
\q1
\v 16 Bɑ ɡɔsirɑ ɡoon mi ɡiɑ.
\q1 Bɑ sɑ̃ɑ nɡe tɛn te tɑ ǹ ɡeɑ sɑ̃ɑ.
\q1 Yen sɔ̃, bɑ koo ben wiruɡibu ɡo tɑbu sɔɔ
\q1 ben ɡɑri kɑm ɡerubun sɔ̃.
\q1 Yerɑ yɑ koo de bu bu yɛ̃ɛ Eɡibitiɔ.
\s1 Ye ɑ duurɑ yerɑ kɑɑ ɡɛ̃
\c 8
\q1
\v 1 Yinni Gusunɔ u nɛɛ,
\q1 i kɔbɑ soowo.
\q1 Wee yibɛrɛbɑ bɑ nɛn sɑ̃ɑ yeru wuusimɑ nɡe kɑsi.
\q1 Domi Isirelibɑ bɑ nɛn ɑrukɑwɑni kusiɑ.
\q1 Mɑ bɑ nɛn sɔ̃ɔsiru yinɑ.
\q1
\v 2 Bɑ koo mɑn nɔɔɡiru suemɑ bu nɛɛ,
\q1 bɑ nɛ ben Yinni yɛ̃.
\q1
\v 3 Adɑmɑ bɑ ɡeɑ deri,
\q1 mɑ yibɛrɛbɑ bɑ koo bu nɑɑ swĩi.
\q1
\v 4 Bɑ tii sinɑmbu kuɑ
\q1 bɑ ǹ mɑn sɑɑwɑrɑ kue.
\q1 Mɑ bɑ bũnu sekɑ kɑ sii ɡeesu kɑ wurɑ.
\q1 Yen sɔ̃nɑ bɑ koo kɑm ko.
\q1
\v 5 Bɛɛ Sɑmɑriɡibu, nɑ bɛɛn nɑɑ wurɑɡiɑ ye tusɑ.
\q1 Nɑ mɑɑ kɑ bɛɛ mɔru mɔ̀.
\q1 Sɑɑ yerɑ̀ i ko i sinɑ bɑ ku n bɛɛ tɑɑrɛ wɛ̃.
\q1
\v 6 Wi u bwɑ̃ɑrokunun sɔmburu yɛ̃ Isirelibɑ sɔɔ
\q1 wiyɑ u nɑɑ wurɑɡiɑ ye kuɑ.
\q1 Yɑ ǹ sɑ̃ɑ Gusunɔ.
\q1 Yen sɔ̃nɑ bɑ koo ye kɔsuku muku muku.
\q1
\v 7 Wee i woo duurɑ,
\q1 yen sɔ̃nɑ i ko i woo bɔkɔ ɡɛ̃.
\q1 Mɔndu ɡɑrɑ nɛɛ, dobi bɛm sɑri ku rɑ n som mɔ.
\q1 I n mɑɑ yɛ̃ mɑ bɛɛn ɡbeɑn dĩɑnu nù n dɑɑ ɡeɑ kuɑ,
\q1 sɔbɑ bɑ koo nu ɡurɑ.
\q1
\v 8 Isirelibɑ bɑ derɑ bɑ bu mwɛ.
\q1 Be wee bwesenu sɔɔ nɡe weke te ɡoo kun mɑɑ kĩ.
\q1
\v 9 Domi bɑ dɑ Asiriɔ nɡe ɡbeeku kɛtɛku ɡe ɡɑ tii kpɑre.
\q1 Bɑ dɑ bɑ somiru kɑsu mi.
\q1
\v 10 Bɑ bwese tukunu ɡobi kɔsiɑ bɑ n kɑ nɔɔ tiɑ sɑ̃ɑ.
\q1 Adɑmɑ kɑ mɛ, kon bu mɛnnɑ,
\q1 kpɑ Asirin sinɑ boko u bu yoo sɔmɑ koosiɑ.
\q1
\v 11 Isirelibɑ bɑ bũu turɑnu kuɑ nu dɑbi.
\q1 Niyɑ nu derɑ bɑ durum mɔ̀.
\q1
\v 12 Bɑɑ nɑ̀ n bu nɛn woodɑbɑ yoruɑ sere kɑ yen ɡɑri piiminɔ,
\q1 bɑ rɑ ye ɡɑrisiwɑ nɡe ye yɑ wee tɔn tukon min di.
\q1
\v 13 Bɑ rɑ yɛɛ ɡo bu kɑ mɑn yɑ̃kuru kuɑ,
\q1 kpɑ bu yin yɑɑ tem.
\q1 Adɑmɑ ben yɑ̃ku ni, nu ǹ mɑn doremɔ.
\q1 Nɑ ǹ ben torɑnu duɑri.
\q1 Kon bu sɛɛyɑsiɑ.
\q1 Yen sɔ̃nɑ bɑ koo ɡɔsirɑ bu dɑ Eɡibitiɔ.
\q1
\v 14 Isirelibɑ bɑ tii sinɑ kpɑɑru bɑniɑ.
\q1 Mɑ bɑ nɛ ben tɑkɑ kowo duɑri.
\q1 Yudɑbɑ bɑ mɑɑ ben wuu dɑbinu ɡbɑ̃rɑru toosi.
\q1 Adɑmɑ kon ben wusu dɔ̃ɔ sɔkiri kpɑ u ben dii ɡeenu di.
\s1 Yinni Gusunɔn tɔmbu
\s2 bɑ koo kpuro biɑ
\c 9
\q1
\v 1 Bɛɛ Isirelibɑ, i ku tɔ̃ɔ bɑkɑru ko ɡɛ̃ɛbun sɑɑ sɔɔ
\q1 nɡe bwese ni nu tie.
\q1 Domi i Yinni Gusunɔ biru kisi.
\q1 Mɑ i dɑ i bũnu ɡɑsirimɔ
\q1 i nu siɑrɑmɔ mi bɑ ɑlikɑmɑ soomɔ kpuro.
\q1
\v 2 Adɑmɑ ɑlikɑmɑ ye bɑ soomɔ kɑ ɡum mɛ bɑ ɡɑmɑmɔ,
\q1 yen ɡɑɑ kun ko n sɑ̃ɑ bɛɛɡiɑ.
\q1 Mɛyɑ i ǹ tɑm kpɑm wɑsi i wunɑ.
\q1
\v 3 Isirelibɑ bɑ ǹ sinɑmɔ tem mɛ Yinni Gusunɔ u bu wɛ̃ sɔɔ.
\q1 Bɑ koo wurɑmɑ Eɡibitiɔ ǹ kun mɛ Asiriɔ.
\q1 Kpɑ bu dĩɑ sesenuɡinu di mi.
\q1
\v 4 Sɑɑ ye sɔɔ, bɑ ǹ mɑɑ kpɛ̃ bu yɑ̃kuru ko kɑ tɑm.
\q1 Bɑɑ bɑ̀ n tu kuɑ,
\q1 tɑ ǹ Gusunɔ wɛ̃remɔ.
\q1 Ben yɑ̃ku dĩɑnu nu ko n sɑ̃ɑwɑ nɡe ɡɔɔ dĩɑnu.
\q1 Wi u nu di, u koo disi duurɑwɑ.
\q1 Dĩɑ ni, nu koo win ɡɔ̃ɔru kpeesiɑ.
\q1 Adɑmɑ bɑ ǹ kɑ ye duɔ Yinni Gusunɔn sɑ̃ɑ yerɔ.
\q1
\v 5 Mbɑ i ko ko Yinni Gusunɔn tɔ̃ɔ bɑkɑnu sɔɔ.
\q1
\v 6 Ì n bɛɛn yɛnusu deri bɑnsu,
\q1 Eɡibitiɡibɑ koo bɛɛ dɑm koosiɑ ben mi.
\q1 Adɑmɑ yen wuu ɡe bɑ mɔ̀ Mɛnfisi ɡɑ ko n sɑ̃ɑwɑ nɡe bɛɛn sikiru.
\q1 Awĩi yi koo bɛɛn ɑrumɑni di.
\q1 Kpɑ sɑ̃ki yi kpi bɛɛn kunɔ.
\q1
\v 7 Sɑɑ yɑ turɑ yè sɔɔ Yinni Gusunɔ u koo siri.
\q1 Sɑɑ yɑ tunumɑ yè sɔɔ u koo bɑɑwure kɔsiɑ ye u kuɑ.
\q1 Bɛɛ Isirelibɑ i ko ye wɑ.
\q1 Wee bɛɛn torɑnu kɑ bɛɛn tusirun kpɑ̃ɑrun sɔ̃,
\q1 i rɑ n tɑmɑɑ Gusunɔn sɔmɔ u wiirɑwɑ.
\q1 Wi, wi Yinni Gusunɔ u kɑ ɡɑri kuɑ u tɑm nɔrɑwɑ.
\q1 N deemɑ bɛɛ, i torewɑ n kpɑ̃, mɑ i nùn tusɑ.
\q1
\v 8 Adɑmɑ sɔmɔ wi u bɛɛ kirɔ mɔ̀,
\q1 u wɑ̃ɑ kɑ Gusunɔ.
\q1 Kɑ mɛ, i nùn yinɑ bɛriɑmmɛ mi u dɔɔ kpuro.
\q1 I rɑ mɑm nùn seesiwɑ Gusunɔ win Yinnin sɑ̃ɑ yerɔ.
\q1
\v 9 Wee i dɑ i kɔ̃sɑ kuɑ nɡe mɛ i rɑɑ kuɑ Gibeɑɔ.
\q1 Yinni Gusunɔ kun bɛɛn torɑnu duɑri.
\q1 U koo bɛɛ sɛɛyɑsiɑ nin sɔ̃.
\s1 Yinni Gusunɔ u nuki sɑnkirɑ
\q1
\v 10 Yinni Gusunɔ u nɛɛ, sɑnɑm mɛ nɑ ɡbiɑ nɑ Isirelibɑ wɑ,
\q1 nɛn nɔni sɔɔ, bɑ sɑ̃ɑwɑ nɡe resɛm mɑrum
\q1 mɛ bɑ wɑ mi ɡɑ̃ɑnu ku rɑ kpi.
\q1 Mɑ nɑ mɑɑ ben bɑɑbɑbɑ wɑ nɡe fiɡie mɑrum ɡbiikum.
\q1 Adɑmɑ ye bɑ tunumɑ Bɑɑli Peoriɔ,
\q1 miyɑ bɑ tii bũu wi bɑ mɔ̀ Bɑɑli wɛ̃.
\q1 Mɑ nɑ bu tusɑ nɡe bũu wi.
\q1
\v 11 Tɛ̃ Isirelibɑn bɛɛrɛ yɑ koo doonɑ nɡe ɡunɔ mɔrin wuuru.
\q1 Ben kurɔbu bɑ ǹ mɑɑ ɡuri suɑmɔ bu sere mɑ.
\q1
\v 12 Bɑ̀ n mɑɑ bibu seeyɑ, kon de bu ɡbiwɑ bu sere bukurɑ.
\q1 Bɑ koo wɑhɑlɑ bɑkɑ wɑ nɑ̀ n bu biru kisi.
\q1
\v 13 Nɡe mɛ nɑ Isirelibɑ wɑɑsinɑmɔ,
\q1 bɑ sɑ̃ɑwɑ nɡe dɑ̃ɑ
\q1 ni bɑ duurɑ tem ɡem sɔɔ.
\q1 Adɑmɑ bɑ koo ben bibu yibɛrɛbɑ nɔmu bɛriɑ
\q1 be bɑ koo bu ɡo.
\q1
\v 14 Osee u nɛɛ, Yinni Gusunɔ, bɑ̀ n koo Isirelibɑ sɛɛyɑsiɑ,
\q1 sɛɛyɑsiɑ birɑ̀ bɑ koo ɡɔsi.
\q1 A de ben kurɔbu bu nukuru yɑri,
\q1 kpɑ ben bwɑ̃su su ɡberɑ.
\q1
\v 15 Yinni Gusunɔ u nɛɛ,
\q1 ɡeemɑ ben nuku kɔ̃suru kpuro tɑ sɔ̃ɔsirɑ Giliɡɑliɔ.
\q1 Miyɑ nɑ bu wɑ mɑ nɑ bu tusɑ.
\q1 Kon bu ɡirɑ nɛn wuswɑɑn di ye bɑ kuɑn sɔ̃.
\q1 Nɑ ǹ mɑɑ bu kĩ.
\q1 Domi ben sinɑmbu kpurowɑ bɑ mɑn seesimɔ.
\q1
\v 16 Nɑ be, Isirelibɑ sɛɛyɑsiɑ.
\q1 Bɑ sɑ̃ɑ nɡe dɑ̃ɑ te tɑ ɡberɑ nuurun di kpuro.
\q1 Tɑ ǹ mɑɑ binu mɑrumɔ.
\q1 Bɑɑ bɑ̀ n mɑɑ bibu mɑrɑ, kon de bii be bɑ kĩ mi, bu ɡbiwɑ.
\q1
\v 17 Osee u nɛɛ, Gusunɔ nɛn Yinni u bu yinɑ
\q1 yèn sɔ̃ bɑ ǹ win ɡɑri swɑɑ dɑki.
\q1 Bɑ koo kowɑ yɑɑyɑɑre kowobu bwesenun suunu sɔɔ.
\s1 Isirelibɑn bɑndɑ kpɑ
\c 10
\q1
\v 1 Isirelin bweseru tɑ rɑɑ sɑ̃ɑwɑ nɡe resɛm ɡeɑ
\q1 ye yɑ rɑ mɑ too.
\q1 Adɑmɑ nɡe mɛ bɑ dɑbiɑmɔ,
\q1 nɡe mɛyɑ bɑ bũu yenu dɑbiɑsiɑmɔ.
\q1 Nɡe mɛ ben tem mu kuurɑmɔ,
\q1 nɡe mɛyɑ bɑ bũu yenu sɔmmɔ kɑ kpee ɡeenu.
\q1
\v 2 Tɔn be, bɑ sɑ̃ɑwɑ ɡɔ̃rusu yiruɡibu.
\q1 Bɑ koo yen ɑre sɔbe.
\q1 Yinni Gusunɔ u koo ben bũu yee ni kɑ nin kpee ɡeenu kɔsuku.
\q1
\v 3 Bɑ koo tɛ̃ nɛɛ, yèn sɔ̃ sɑ ǹ Gusunɔ nɑsie,
\q1 yen sɔ̃nɑ sɑ ǹ sinɑ boko mɔ.
\q1 Adɑmɑ tɛ̃n wɑ̃ɑ te sɑ wɑ̃ɑ mini,
\q1 mbɑ sinɑ boko koo mɑɑ kpĩ u sun wunɑnɑ.
\q1
\v 4 Wee bɑ ɡɑri kɑm ɡerumɔ,
\q1 mɑ bɑ ɑrukɑwɑni bɔkumɔ kɑ bɔ̃ri weesuɡii.
\q1 Yen sɔ̃, siribu dɑbiɑmɔ nɡe yɑkɑ kɔ̃susu
\q1 si su rɑ kpi ɡbee te bɑ wukɑ sɔɔ.
\q1
\v 5 Kpɑ Sɑmɑriɡii be bɑ nɑɑ buu wurɑɡuu sɑ̃ɑmɔ
\q1 ɡe ɡe wɑ̃ɑ Betɛli Afɛniɔ bu nɑndɑ
\q1 kpɑ bu ɡɔɔ sinɑ ɡen sɔ̃.
\q1 Gen yɑ̃ku kowobu bɑ koo diiri
\q1 bɑ̀ n wɑ ɡen bɛɛrɛ yɑ kpɑ.
\q1
\v 6 Domi bɑ koo kɑ ɡu dɑ Asiriɔ
\q1 bu ɡu ben sinɑ boko wɛ̃.
\q1 Isirelibɑ bɑ koo sekuru wɑ.
\q1 Bɑ koo nɑ̀ n dɑɑ yɛ̃ ko
\q1 ye bɑ kɑ bũu kuɑ ben suunu sɔɔ.
\q1
\v 7 Ǹ n Sɑmɑrin sɔ̃n nɑ, ye kpuro yɑ kpɑwɑ mi.
\q1 Domi bɑ koo kɑ yen sinɑ boko doonɑ
\q1 nɡe dɛkɑ ye nim mu kɑ doonɔ.
\q1
\v 8 Bɑ koo ben bũu yenu kpuro kɔsuku mi bɑ torɑ.
\q1 Kpɑ yɑkɑsu kɑ sɑ̃ki yi kpi mi.
\q1 Sɑɑ ɡɑɑ sisi yè sɔɔ bɑ koo ɡuunu kɑ ɡunɡunu sɔ̃ bu nɛɛ,
\q1 i sun sɛ̃sikio i wukiri.
\s1 Isirelibɑ
\s2 bɑ koo ɡɛ̃ ye bɑ duurɑ
\q1
\v 9 Yinni Gusunɔ u nɛɛ,
\q1 sɑɑ dɔmɑ tèn di Isirelibɑ bɑ durum kuɑ Gibeɑɔ,
\q1 bɑ torɑmɔ bɑ dɔɔwɑ.
\q1 N ǹ weenɛ tɑbu bu tɔn kɔ̃so be wɔri mi?
\q1
\v 10 Nɛ, Yinni Gusunɔ kon bu sɛɛyɑsiɑ nɡe mɛ nɑ kĩ,
\q1 kpɑ bwesenu nu nɔɔ tiɑ ko nu bu wɔri ben torɑ bɑkɑnun sɔ̃.
\q1
\v 11 Isirelibɑ bɑ sɑ̃ɑwɑ nɡe nɑɑ kpɛmi yi yi rɑ dobi tɑɑku.
\q1 Adɑmɑ kon suɡu doke ben wĩi burɑ ni sɔɔ.
\q1 Kon de Yudɑbɑ bu kɔrɔ ko,
\q1 kpɑ be, Yɑkɔbun bweseru bu tem kusɑnu kɔsuku.
\q1
\v 12 Yen sɔ̃ tɛ̃, bɛɛ Isirelibɑ i ɡbee kpɑɑru koowo i ɡem duure.
\q1 Kpɑ i durom ɡɛ̃.
\q1 Domi sɑɑ yɑ turɑ i kɑ ɡɔsirɑmɑ nɛ, Yinni Gusunɔn mi,
\q1 kpɑ n bɛɛ susi n bɛɛ ɡeɑ kuɑ.
\q1
\v 13 Adɑmɑ bɛɛ, i kɔ̃sɑ duurɑ mɑ i kɔ̃sɑ ɡɑ̃.
\q1 Mɑ i bɛɛn weesun ɑre di.
\q1 I bɛɛn nɑɑnɛ doke bɛɛn tiin dɑm
\q1 kɑ tɑbu kowo dɑbi dɑbiru sɔɔ.
\q1
\v 14 Yen sɔ̃nɑ tɑbun wurenu koo nɔɔrɑ bɛɛn suunu sɔɔ.
\q1 Kpɑ bu bɛɛn ɡbɑ̃rɑnu kpuro kɔsuku
\q1 nɡe mɛ Sɑlumɑn sinɑ boko u Bɛti Aribɛli wɔri,
\q1 mɑ u bii mɛrobu kɑ ben bibu munkɑ.
\q1
\v 15 Bɛɛ Betɛliɡibu, wee ye kon bɛɛ kuɑ bɛɛn nuku kɔ̃surun sɔ̃.
\q1 Bururu yɑm sɑ̃reru yɑnde,
\q1 tɑbu sɔɔrɑ bɑ koo bɛɛn sinɑ boko ɡo.
\s1 Yinni Gusunɔ u win tɔmbu kĩ
\s2 bɑɑ mɛ bɑ nùn seesimɔ
\c 11
\q1
\v 1 Yinni Gusunɔ u nɛɛ,
\q1 sɑɑ Isirelin bweserun torubun diyɑ nɑ tu kĩɑ.
\q1 Mɑ nɑ tu yɑrɑmɑ Eɡibitin di nɑ tu sokɑ nɛn bii.
\q1
\v 2 Adɑmɑ nɡe mɛ nɑ bu sokumɔ
\q1 nɡe mɛyɑ bɑ kɑ mɑn tondɑmɔ.
\q1 Bɑ dɑ bɑ bũu ni bɑ mɔ̀ Bɑɑli sɑ̃ɑmɔ.
\q1 Mɑ bɑ nu turɑre dɔ̃ɔ dokeɑmmɛ.
\q1
\v 3 N deemɑ nɛnɑ nɑ bu kpɑre,
\q1 nɑ ben nɔmɑ nɛni.
\q1 Adɑmɑ bɑ ǹ tubɑ
\q1 mɑ nɛnɑ nɑ bu nɔɔrimɔ.
\q1
\v 4 Nɑ bu ɡɑwɑmɑ nɛn mi kɑ kĩru
\q1 mɑ nɑ bu dĩɑnu wɛ̃
\q1 nɡe wi u yɑɑ sɑbenun suɡu yiiyɑmɔ u kɑ nu nɔɔri.
\q1
\v 5 Adɑmɑ bɑ yinɑ bu nɑ nɛn mi.
\q1 Yen sɔ̃nɑ nɑ nɛɛ, bɑ koo dɑ Eɡibitiɔ
\q1 kpɑ Asiriɡii u ko ben sunɔ.
\q1
\v 6 Bɑ koo ben wusu tɑbu wɔri,
\q1 kpɑ bu ben dɑmɡibu kɔsuku
\q1 yèn sɔ̃ bɑ ben tiin kpunɑɑ swĩi.
\q1
\v 7 Wee nɛn tɔmbu bɑ yɔ̃rɑri bu kɑ mɑn tondɑ.
\q1 Bɑ bu sokɑ bu ɡɔ̃ru ɡɔsiɑ bu wurɑmɑ nɛ, Wɔrukoon mi.
\q1 Adɑmɑ ben ɡoo kun wure.
\q1
\v 8 Kɑ mɛ, bɛɛ Isirelibɑ,
\q1 nɑ ǹ kpɛ̃ n bɛɛ deri,
\q1 n bɛɛ tɔnu kɑndu kuɑ.
\q1 Nɑ ǹ kpɛ̃ n bɛɛ kɑm koosiɑ
\q1 nɡe mɛ nɑ wuu si bɑ mɔ̀ Adimɑ kɑ Seboimu kuɑ.
\q1 Wee nɛn ɡɔ̃ru ɡɑ sɑnkire,
\q1 nɛn bwɛ̃rɑ kun kpunɛ.
\q1
\v 9 Nɑ ǹ mɑɑ bɛɛ kpeerɑsiɑmɔ kɑ nɛn mɔru bɑkɑ ye.
\q1 Nɑ ǹ mɑɑ wee n bɛɛ kɑm koosiɑ.
\q1 Domi nɑ sɑ̃ɑwɑ Gusunɔ n ǹ mɔ tɔnu.
\q1 Nɑ sɑ̃ɑwɑ Dɛɛro bɛɛn suunu sɔɔ.
\q1 Nɑ ǹ bɛɛ wɔrim wee kɑ mɔru.
\q1
\v 10 Bɛɛ nɛn bibu, i ko nɛ, Yinni Gusunɔ swĩi
\q1 nɑ̀ n kukurɑ nɡe ɡbee sunɔ
\q1 kpɑ i duki nɑ sɑɑ sɔ̃ɔ duu yerun di.
\q1
\v 11 I ko duki nɑ sɑɑ Eɡibitin di nɡe ɡunɔ mɔri
\q1 kpɑ i nɑ sɑɑ Asirin di nɡe totobɛrɛnu,
\q1 kpɑ n de i sinɑ bɛɛn yɛnusɔ.
\q1 Nɛ, Yinni Gusunɔwɑ nɑ yeni ɡeruɑ.
\s1 Sɑɑ yellun diyɑ Isirelibɑ
\s2 bɑ Gusunɔn nuki sɑnkɑ
\q1
\v 12 Isirelibɑ bɑ rɑ n mɑn weesu kuɑmmɛwɑ,
\q1 kpɑ bɑ n mɑn nɔni wɔ̃kumɔ.
\q1 Adɑmɑ Yudɑbɑ bɑ kɑ nɛ, Yinni Gusunɔ Dɛɛro sĩimɔ dee dee.
\c 12
\q1
\v 1 Isirelibɑ bɑ Eɡibitiɡibu ɡum wɛ̃ɛmɔ.
\q1 Mɑ bɑ kɑ Asiriɡibu ɑrukɑwɑni bɔkumɔ.
\q1 Nɡe mɛyɑ bɑ kɑ kpɑɑsibu kɑsu be bɑ ǹ sɑ̃ɑ ɡɑ̃ɑnu.
\q1 N sɑ̃ɑre bɑ woo nɑɑ ɡire.
\q1 Bɑ ben weesu dɑbiɑsiɑmɔ tɔ̃ɔ bɑɑtere.
\q1 Mɑ bɑ dɑɑ bɔɔbɔyɑ mɔ̀ bɑ dɔɔ.
\q1
\v 2 Nɛ, Yinni Gusunɔ nɑ Yudɑbɑ siribu sokumɔ.
\q1 Kon be Yɑkɔbun bweseru wɔrimɑ ben dɑɑ kɔ̃sɑn sɔ̃.
\q1 Kpɑ n bu ben kɔ̃sɑn ɑre kɔsiɑ.
\q1
\v 3 Ben bɑɑbɑ Yɑkɔbu u win mɔɔn nɑɑ tokuru nɛnuɑ
\q1 sɑɑ win mɛron nukurun di.
\q1 Ye bɑ nùn mɑrɑ u kpɛ̃ɑ,
\q1 mɑ u kɑ nɛ Gusunɔ wɔri kuɑ kɑ win dɑm kpuro.
\q1
\v 4 U kɑ nɛn ɡɔrɑdo wɔri kuɑ, mɑ u kɑmiɑ.
\q1 U swĩ, mɑ u ɡɔrɑdo wi kɑnɑ u nùn domɑru kuɑ.
\q1 Betɛli miyɑ u kɑ nɛ Gusunɔ yinnɑ.
\q1 Mɑ nɑ kɑ nùn ɡɑri kuɑ.
\q1
\v 5 Nɛnɑ Gusunɔ wɔllu kɑ tem Yinni.
\q1 Nɛn yĩsirɑ Wi u rɑ n wɑ̃ɑ.
\q1
\v 6 Bɛɛ Isirelibɑ, i de i wurɑmɑ nɛ bɛɛn Yinnin mi.
\q1 I de i ɡeɑ ko kpɑ i n mɑn nɑɑnɛ sɑ̃ɑ bɑɑdommɑ.
\q1
\v 7 Bɛɛ Isirelibɑ i sɑ̃ɑwɑ nɡe tenku be bɑ kilo weesuɡiɑ nɛni.
\q1 Bɑ rɑ ɡbɛnɑ kɑ̃.
\q1
\v 8 Kpɑ i nɛɛ, kɑ ɡem i ɡobi wɑ, i dukiɑ bɑkɑ ɡurɑ.
\q1 Kɔ̃sɑ ɡɑɑ sɑri ye sɔɔ. Bɛɛn sɔmburun ɑreyɑ.
\q1
\v 9 Adɑmɑ nɛ, Gusunɔ nɑ sɑ̃ɑwɑ bɛɛn Yinni
\q1 sɑɑ mìn di i wɑ̃ɑ Eɡibitiɔ.
\q1 Kon mɑɑ de i wurɑ i n wɑ̃ɑ kuu bekuruɡinu sɔɔ
\q1 nɡe sɑnɑm mɛ nɑ bɛɛ yɑrɑmɑ Eɡibitin di i wɑ̃ɑ ɡbɑburɔ.
\q1
\v 10 Nɛn sɔmɔbɑ nɑ kɑ ɡɑri kuɑ kɑ̃sinu sɔɔ,
\q1 kpɑ be, bu mɑɑ kɑ bɛɛ ɡɑri ko.
\q1 Beyɑ bɑ mɑɑ bɛɛ nɛn himbɑ sɔ̃ɔsi yɑ kɑ ɡisɔ ɡirɑri.
\q1
\v 11 Kɑ mɛ, Gɑlɑdiɡibu bɑ kuɑ tɔn kɔ̃sobu.
\q1 Mɑ bɑ koo kɑm ko.
\q1 Bɑ rɑ kɛtɛ kinɛ dɑbinu ɡo Giliɡɑliɔ.
\q1 Adɑmɑ ben yɑ̃ku yenu nu koo ko kpee subenu ɡbɑɑnun kpĩi sɔɔ.
\q1
\v 12 Yɑkɔbu u kpikiru dɑ Arɑmuɔ.
\q1 Miyɑ u sɔmburu kuɑ u yɑ̃ɑnu kpɑrɑ u kɑ kurɔ wɑ.
\q1
\v 13 Adɑmɑ sɔmɔ ɡoowɑ Yinni Gusunɔ u ɡɔrɑ
\q1 u dɑ u win bweseru Isirelibɑ yɑrɑmɑ Eɡibitin di.
\q1 Sɔmɔ wiyɑ u bu kpɑrɑ.
\q1
\v 14 Adɑmɑ yenibɑ kpuro sɔɔ,
\q1 Isirelibɑ bɑ Yinni Gusunɔ nuki sɑnkɑ too too.
\q1 Yen sɔ̃, u koo de yɛm mɛ bɑ yɑri mi, mu wɔri ben wiru wɔllɔ.
\q1 U koo de bu yen sekuru wɑ.
\s1 Siri dɑ̃ɑki bi bɑ Isirelibɑ kuɑ
\c 13
\q1
\v 1 Yellu Efɑrɑimubɑrɑ bɑ dɑm bo Isirelibɑ sɔɔ.
\q1 Bɑ̀ n bwese kɛri yi yi tie ɡɑri sɔ̃ɔwɑ,
\q1 bɑ rɑ nɑndewɑ.
\q1 Adɑmɑ bɑ bũu wi bɑ mɔ̀ Bɑɑli sɑ̃wɑ,
\q1 mɑ bɑ ɡu.
\q1
\v 2 Wee sere kɑ tɛ̃, bɑ durum mɔ̀ bɑ dɔɔ.
\q1 Bɑ tii bwɑ̃ɑroku sii ɡeesuɡinu kuɑ.
\q1 Ben tiiwɑ bɑ bwisikɑ
\q1 mɑ bɑ nu sekɑ kɑ ben nɔmɑ
\q1 nu kɑ nɑɑ binu weenɛ.
\q1 Mɑ bɑ ɡerumɔ nin sɔ̃ bɑ mɔ̀,
\q1 be bɑ yɑ̃kuru nɑ,
\q1 bu yiiro bu nɑɑ bii ni sɔ̃su.
\q1
\v 3 Yen sɔ̃nɑ bɑ koo doonɑ nɡe bururun kɑkoru
\q1 ǹ kun mɛ nɡe dirum.
\q1 Bɑ sɑ̃ɑ nɡe yɑkɑ si bɑ ɡurɑ bɑ yɑri doo soo yerun di
\q1 su kɑ woo doonɔ
\q1 ǹ kun mɛ nɡe wii si su yɑrimɔ ɡbɑburun di.
\q1
\v 4 Adɑmɑ nɛ, nɑ sɑ̃ɑwɑ Gusunɔ ben Yinni
\q1 sɑɑ mìn di nɑ bu yɑrɑmɑ Eɡibitin di.
\q1 Bɑ ǹ mɑɑ Yinni ɡoo mɔ mɑ n kun mɔ nɛ.
\q1 Fɑɑbɑ kowo mɑɑ sɑri nɛ bɑɑsi.
\q1
\v 5 Nɑ bu kpɑrɑ sɑɑ mìn di bɑ wɑ̃ɑ ɡbɑburɔ
\q1 mi ɡɑ̃ɑnu ku rɑ kpi.
\q1
\v 6 Sɑnɑm mɛ bɑ duɑ tem mɛ sɔɔ,
\q1 bɑ di bɑ debɑ nɡe yɑɑ sɑbe ni bɑ kpɑre,
\q1 mɑ bɑ tii suɑbu toruɑ bɑ mɑn duɑri.
\q1
\v 7 Tɛ̃, ko nɑ n sɑ̃ɑwɑ nɡe ɡbee sunɔ
\q1 nɑ n bu mɑrɑ swɑɑɔ nɡe musuku ɡbeeku.
\q1
\v 8 Kon bu wɔrimɑwɑ nɡe ɡbeeku yɑɑ ɡɔbɑ
\q1 yèn binu bɑ mwɑ.
\q1 Kpɑ n ben toronu bɛsuku.
\q1 Mɛyɑ kon bu kɑsuku
\q1 nɡe mɛ ɡbeeku yɛɛ yi rɑ yɑɑ kɑsuku,
\q1 kpɑ ɡbee sunɔ niu ɡu bu tem.
\q1
\v 9 Isirelibɑ, wee i kɑm kuɑ
\q1 yèn sɔ̃ i mɑn seesi nɛ wi kon kpĩ n bɛɛ somi.
\q1
\v 10 Mɑnɑ bɛɛn sinɑ boko u wɑ̃ɑ.
\q1 I de u bɛɛ fɑɑbɑ ko bɛɛn wusu kpuro sɔɔ.
\q1 Mɑnɑ bɛɛn kpɑrobɑ wɑ̃ɑ be i bikiɑ i nɛɛ,
\q1 bu bɛɛ sinɑmbu kuɑ.
\q1
\v 11 Nɑ rɑɑ bɛɛ sinɑ boko wɛ̃ kɑ mɔru.
\q1 Mɛyɑ kon mɑɑ bɛɛ nùn mwɑɑri kɑ mɔru.
\q1
\v 12 Nɑ Isirelibɑn durum yoruɑ nɑ yii sere sɑɑ ɡɑɑ.
\q1
\v 13 Isirelin bweseru tɑ sɑ̃ɑwɑ nɡe bii wìn mɑrubun sɑɑ yɑ turɑ
\q1 mɑ u kpɑsɑ wɔri mɔ̀,
\q1 ɑdɑmɑ bii wi, u yinɑ u yɑrimɑ.
\q1
\v 14 Kon bu wunɑ sɑɑ ɡɔribun wɑ̃ɑ yerun dɑm di.
\q1 Kpɑ n bu yɑkiɑ ɡɔɔn nɔmɑn di.
\q1 Gɔɔ, ɑ nɑ kɑ wunɛn bɑrɑ te ɑ rɑ kɑ tɔnu ɡo.
\q1 Gɔribun wɑ̃ɑ yeru, ɑ nɑ kɑ wunɛn kɑm kootiɑ.
\q1 Domi nɑ ǹ mɑɑ ben wɔnwɔndu mɔ̀.
\q1
\v 15 Bɑɑ Isirelibɑ bɑ̀ n kuurɑ ɑmɔ,
\q1 beɡibun suunu sɔɔ,
\q1 yibɛrɛbɑ bɑ koo nɑ nɡe woo sum sɑɑ sɔ̃ɔ yɑri yerun di.
\q1 Nɛ, Yinni Gusunɔ nɑ kon bu seeyɑmɑwɑ ɡbɑburun di,
\q1 kpɑ bu dɔkɔbɑ ɡberɑsiɑ.
\q1 Kpɑ bwii yi nim kpe.
\q1 Gɑ̃ɑ ni nu ɡeɑ sɑ̃ɑ kpurowɑ bɑ koo ɡurɑ bu kɑ doonɑ.
\q1
\v 16 Nɑ kon de bu Sɑmɑri sɛɛyɑsiɑ
\q1 yèn sɔ̃ yen tɔmbu bɑ nɛ Gusunɔ ben Yinni seesi.
\q1 Bɑ koo bu ɡowɑ tɑbu sɔɔ
\q1 kpɑ bu ben bii piiminu nɑm.
\q1 Kpɑ bu ben kurɔ be bɑ ɡuri mɔn nukunu bɛsuku.
\c 14
\s1 Osee u Isirelibɑ kɔkirimɔ
\q1
\v 1 Osee u Isirelibɑ sɔ̃ɔwɑ u nɛɛ,
\q1 bu wurɑmɑ Gusunɔ ben Yinnin mi,
\q1 domi bɑ wɔrumɑ ben torɑnun sɔ̃.
\q1
\v 2 Bu wurɑmɑ win mi bu kɑnɑ teni ko
\q1 te tɑ nɛɛ, Yinni Gusunɔ,
\q1 ɑ sun bɛsɛn torɑnu kpuro suuru kuo.
\q1 Kpɑ ɑ sun mɛɛri kɑ nɔnu ɡeu.
\q1 Ye sɑ ko kɑ nun yɑ̃kuru kuɑ,
\q1 sɑ ko nun siɑrɑ.
\q1
\v 3 Asiriɡii wi, u ǹ kpɛ̃ u sun fɑɑbɑ ko.
\q1 Sɑ mɑɑ yɛ̃ mɑ dumi kun sun fɑɑbɑ mɔ̀ tɑbu sɔɔ.
\q1 Sɑ ǹ mɑɑ bwɑ̃ɑroku ni sɑ tii kuɑ sokumɔ bɛsɛn yinnibu pɑi.
\q1 Domi wunɑ ɑ rɑ ɡobekubɑ wɔnwɔndu kue.
\q1
\v 4 Yinni Gusunɔ u nɛɛ,
\q1 kon de nɛn tɔmbu bu kɑ den nɛ turo yɔ̃rɑ
\q1 kpɑ n bu kĩɑ too.
\q1 Nɑ ǹ mɑɑ kɑ bu mɔru mɔ̀.
\q1
\v 5 Ko nɑ n sɑ̃ɑwɑ nɡe kɑkoru be, Isirelibɑn sɔ̃.
\q1 Bɑ ko n wɑ̃wɑ nɡe dɑ̃ɑ wɛ̃su,
\q1 kpɑ bu nuuru ɡirɑ nɡe dɑ̃ɑ ni nu wɑ̃ɑ Libɑniɔ.
\q1
\v 6 Ben kɑ̃ɑsi yi koo tɛriɑwɑ
\q1 kpɑ yi n wɑ̃ nɡe dɑ̃ɑ te bɑ mɔ̀ olifi,
\q1 kpɑ yi n nuburu do nɡe dɑ̃ɑ ni nu wɑ̃ɑ Libɑniɔ.
\q1
\v 7 Bɑ koo ɡɔsirɑmɑ bu sinɑ nɛn kɔkɔrɔ
\q1 kpɑ bu mɑɑ ɑlikɑmɑ duure.
\q1 Bɑ koo kpɑrɑwɑ nɡe resɛm dɑ̃ɑ
\q1 kpɑ bu yĩsiru yɑri nɡe Libɑnin tɑm.
\q1
\v 8 Sɑɑ ye, Isirelibɑ bɑ ǹ mɑɑ bũnu sɑ̃ɑmɔ.
\q1 Domi kon ben kɑnɑru nɔ,
\q1 kpɑ n bu nɔni doke.
\q1 Nɑ kon sɑ̃ɑwɑ nɡe dɑ̃ɑ ye yɑ ku rɑ ɡbere ben sɔ̃.
\q1 Nɛn min diyɑ bɑ koo domɑru wɑ.
\b
\q1
\v 9 Wi u lɑɑkɑri mɔ, u de u n tii sɛ ɡɑri yinin sɔ̃.
\q1 Wi u mɑɑ bwisi mɔ, u de yi nùn yeeri.
\q1 Domi Yinni Gusunɔn swɛɛ yi sɑ̃ɑwɑ dee dee.
\q1 Gemɡibɑ bɑ koo sĩ yi sɔɔ.
\q1 Adɑmɑ be bɑ nùn seesimɔ, bɑ koo wɔrumɑ yi sɔɔ.