\id AMO 
\ide UTF-8
\h Amɔsu
\mt1 AMƆSU
\ip Amɔsu wi, u sɑ̃ɑwɑ yɑɑ sɑbenun kpɑro. Yɑɑ sɑbe niyɑ u kpɑrɑmɔ Yinni Gusunɔ u kɑ nùn sokɑ u kɑ bwese ni nu kɑ Isirelibɑ sikerenɛ sɔ̃ siri bi Yinni Gusunɔ u koo nu kuɑ. Amɔsun wɑɑti ye sɔɔ, Isirelibɑ bɑ dukiɑ mɔwɑ too, ɑdɑmɑ ben wɑ̃ɑsinɑɑ kɑ Gusunɔ yɑ biru wurɑ. Bɑɑ mɛ bɑ sɑ̃ɑru nɛni, ben ɡɔ̃ru ɡɑ ǹ wɑ̃ɑ te sɔɔ. Bɑ ǹ sɑ̃ɑrobu nɔɔrimɔ. Bɑ bwɛ̃ɛbwɛ̃ɛbu ɡem birɑmɔ. Bɑ tɔmbu tɑki dimɔ tenkurun swɑɑ sɔɔ.
\ip N deemɑ sɑɑ ye sɔɔ, Asiriɡibɑ dɑm mɔ. Amɔsu u Isirelibɑ yɑɑyɑsiɑmɔ woodɑ ye Yinni Gusunɔ u Mɔwisi wɛ̃ ben sɔ̃ kɑ nɡe mɛ u bu yɑrɑmɑ sɑɑ Eɡibitin di. Yen sɔ̃, bɑ̀ kun Gusunɔ sɑ̃ɑmɔ kɑ ɡem, mɛm nɔɔbu sɑrirɑ bɑ mɔ̀. U mɑɑ bu sɔ̃ɔmɔ mɑ Yinni Gusunɔn siribu wee be sɔɔ.
\ip Amɔsu u sɑ̃ɑwɑ Isirelibɑn bwese kɛrɑ wɔkurɑ yiru yen sɔmɔ dɑ̃ɑko wi Gusunɔ u bu ɡɔriɑ Asiriɡibu bu sere bu yoru mwɑ bu kɑ doonɑ.
\is1 Tire ten kpunɑɑ
\iq1 1. Yinni Gusunɔ u koo win tɔmbu kɑ bwese tukunu siri, wiru 1n di sere wiru 2.
\iq1 2. Isirelibɑn torɑnu kɑ kirɔ ye Yinni Gusunɔ u bu kuɑ, wiru 3n di sere wiru 6.
\iq1 3. Kɑ̃sinu nɔɔbu, wiru 7n di sere wiru 9:10.
\iq1 4. Yinni Gusunɔ u koo mɑɑ Isirelibɑ seeyɑ, wiru 9:11-15.
\ie
\c 1
\p
\v 1 Amɔsu u sɑ̃ɑwɑ yɑ̃ɑ kpɑro Tekoɑɔ. Wiyɑ Yinni Gusunɔ u kɑ ɡɑri kuɑ Isirelibɑn sɔ̃, n kuɑ wɔ̃ɔ yiru tem mu sere yĩirɑ. Sɑɑ ye sɔɔ, Osiɑsiwɑ u bɑndu dii Yudɑɔ, mɑ Yeroboɑmu, Yoɑsin bii u mɑɑ bɑndu dii Isireliɔ. 
\v 2 Amɔsu u nɛɛ,
\q1 Yinni Gusunɔn nɔɔ ɡɑ nɔɔrɑmɔ Siɔnin ɡuurɔ Yerusɑlɛmuɔ.
\q1 Yɑkɑsu mɑɑ sɑri kpɑrɑ yenɔ,
\q1 mɑ ɡuu te bɑ mɔ̀ Kɑɑmɛli, ten wii kpiirɑ ɡberɑ.
\s1 Yinni Gusunɔ
\s2 u koo Siriɡibu sɛɛyɑsiɑ
\q1
\v 3 Nɛ, Yinni Gusunɔ nɑ nɛɛ,
\q1 Dɑmɑsiɡibun torɑnu nu kpɛ̃ɑ.
\q1 Yen sɔ̃, nɑ ǹ nɛn himbɑ ɡɔsiɑmɔ.
\q1 Domi bɑ Gɑlɑdiɡibu tɑɑkɑ bɑ munkɑ.
\q1
\v 4 Tɛ̃, kon de dɔ̃ɔ u nɑ u sinɑ boko Hɑsɑɛlin yɛnu wɔri,
\q1 kpɑ u Bɛni Hɑdɑdin sinɑ kpɑɑru di mɑm mɑm.
\q1
\v 5 Kon ben wuu Dɑmɑsin ɡbɑ̃rɑrun ɡɑmbobɑ kɔsuku,
\q1 kpɑ n Bikɑti Afɛnin tɔmbu kpeerɑsiɑ.
\q1 Kpɑ n Bɛti Edɛnin sunɔ ɡo.
\q1 Kpɑ n de bu Siriɡibu yoru mwɛɛri bu kɑ dɑ Kiriɔ.
\q1 Nɛ, Yinni Gusunɔwɑ nɑ yeni ɡeruɑ.
\s1 Yinni Gusunɔ
\s2 u koo Filisitibɑ sɛɛyɑsiɑ
\q1
\v 6 Nɛ, Yinni Gusunɔ nɑ nɛɛ,
\q1 Filisitibɑn torɑnu nu kpɛ̃ɑ.
\q1 Yen sɔ̃, nɑ ǹ nɛn himbɑ ɡɔsiɑmɔ.
\q1 Domi bɑ Isireli dɑbi dɑbinu yoru mwɛɛrɑ
\q1 bɑ Edɔmubɑ nɔmu bɛriɑ.
\q1
\v 7 Mɛyɑ kon de bu ben wuu Gɑsɑ dɔ̃ɔ sɔku,
\q1 kpɑ u yen dii ɡeenu di.
\q1
\v 8 Kon Asidɔdun tɔmbu kɑ Asikɑlonin sunɔ kpeerɑsiɑ.
\q1 Kon Ekoroniɡibu wɔri.
\q1 Kpɑ Filisiti be bɑ tie mi kpuro bu kɑm ko.
\q1 Nɛ, Yinni Gusunɔwɑ nɑ yeni ɡeruɑ.
\s1 Yinni Gusunɔ
\s2 u koo Fenisibɑ sɛɛyɑsiɑ
\q1
\v 9 Nɛ, Yinni Gusunɔ nɑ nɛɛ,
\q1 Fenisibɑn torɑnu nu kpɛ̃ɑ.
\q1 Yen sɔ̃, nɑ ǹ nɛn himbɑ ɡɔsiɑmɔ.
\q1 Domi bɑ Isireli dɑbi dɑbinu yoru mwɛɛrɑ
\q1 bɑ Edɔmubɑ nɔmu bɛriɑ.
\q1 Bɑ ǹ ben ɑrukɑwɑni yibie ye bɑ rɑɑ kɑ bu bɔkuɑ.
\q1
\v 10 Yen sɔ̃, kon de bu ben wuu Tiri dɔ̃ɔ sɔku,
\q1 kpɑ u yen dii ɡeenu di.
\s1 Yinni Gusunɔ
\s2 u koo Edɔmubɑ sɛɛyɑsiɑ
\q1
\v 11 Nɛ, Yinni Gusunɔ nɑ nɛɛ,
\q1 Edɔmubɑn torɑnu nu kpɛ̃ɑ.
\q1 Yen sɔ̃, nɑ ǹ nɛn himbɑ ɡɔsiɑmɔ.
\q1 Domi bɑ ben mɛro bisibu Isirelibɑ nɑɑ swĩi kɑ tɑkobi.
\q1 Bɑ ǹ bu wɔnwɔndu kue.
\q1 Ben mɔru kun mɑɑ sure.
\q1 Mɑ bɑ kɑ bu wɛrɛru sɑ̃ɑ dim dim sɑɑ kpuro.
\q1
\v 12 Yen sɔ̃, kon de bu ben wuu Temɑ dɔ̃ɔ sɔku
\q1 kpɑ u Botisirɑn dii ɡeenu di.
\s1 Yinni Gusunɔ
\s2 u koo Amɔnibɑ sɛɛyɑsiɑ
\q1
\v 13 Nɛ, Yinni Gusunɔ nɑ nɛɛ,
\q1 Amɔnibɑn torɑnu nu kpɛ̃ɑ.
\q1 Yen sɔ̃, nɑ ǹ nɛn himbɑ ɡɔsiɑmɔ.
\q1 Domi bɑ ɡuriɡibun nukunu bɛsukɑ Gɑlɑdiɔ,
\q1 sɑɑ ye bɑ Gɑlɑdiɡii ben tem mwɑɑmɔ
\q1 beɡim mu kɑ yɑsiɑn sɔ̃.
\q1
\v 14 Yen sɔ̃, kon de bu ben wuu Rɑbɑ tɑbu wɔri bu ye dɔ̃ɔ sɔku,
\q1 kpɑ u yen dii ɡeenu di mɑm mɑm.
\q1 Sɑɑ ye sɔɔ, tɑbun wurenu koo nɔɔrɑ nɡe woo bɔkɔ.
\q1
\v 15 Kpɑ bu ben sinɑ boko kɑ win tɑbu sinɑmbu yoru mwɛɛri.
\q1 Nɛ, Yinni Gusunɔwɑ nɑ yeni ɡeruɑ.
\s1 Yinni Gusunɔ
\s2 u koo Mɔɑbubɑ sɛɛyɑsiɑ
\c 2
\q1
\v 1 Nɛ, Yinni Gusunɔ nɑ nɛɛ,
\q1 Mɔɑbubɑn torɑnu nu kpɛ̃ɑ.
\q1 Yen sɔ̃, nɑ ǹ nɛn himbɑ ɡɔsiɑmɔ.
\q1 Domi bɑ Edɔmun sinɑ bokon kukunu dɔ̃ɔ mɛni nu kuɑ torom.
\q1
\v 2 Yen sɔ̃, kon de bu Mɔɑbubɑn tem dɔ̃ɔ mɛni
\q1 kpɑ u ben wuu Keriɔtun dii ɡeenu di mɑm mɑm.
\q1 Kpɑ Mɔɑbu be, bu kɑm ko tɑbu ɡberɔ,
\q1 sɑnɑm mɛ tɑbu swĩɑ bɑ kɔbi soomɔ, bɑ kuuki mɔ̀.
\q1
\v 3 Kon ben sinɑ boko kɑ win tɑbu sinɑmbu kpuro kpeerɑsiɑ.
\q1 Nɛ, Yinni Gusunɔwɑ nɑ yeni ɡeruɑ.
\s1 Yinni Gusunɔ
\s2 u koo Yudɑbɑ sɛɛyɑsiɑ
\q1
\v 4 Nɛ, Yinni Gusunɔ nɑ nɛɛ,
\q1 Yudɑbɑn torɑnu nu kpɛ̃ɑ.
\q1 Yen sɔ̃, nɑ ǹ nɛn himbɑ ɡɔsiɑmɔ.
\q1 Domi bɑ nɛn woodɑbɑ yinɑ.
\q1 Bɑ ǹ ye mɛm nɔɔwɛ.
\q1 Mɑ bɑ bũnun weesu swĩi, ni ben bɑɑbɑbɑ bɑ rɑɑ swĩi.
\q1 Mɑ nu derɑ bɑ ɡɛrɑ nɛn swɑɑn di.
\q1
\v 5 Yen sɔ̃, kon de bu ben tem dɔ̃ɔ mɛni.
\q1 Kpɑ u ben wuu Yerusɑlɛmun dii ɡeenu di mɑm mɑm.
\s1 Yinni Gusunɔ
\s2 u koo Isirelibɑ sɛɛyɑsiɑ
\q1
\v 6 Nɛ, Yinni Gusunɔ nɑ nɛɛ,
\q1 bɛɛ Isirelibɑ, bɛɛn torɑnu nu kpɛ̃ɑ.
\q1 Yen sɔ̃, nɑ ǹ nɛn himbɑ ɡɔsiɑmɔ.
\q1 Domi i ɡemɡibu dɔrɑ i kɑ bɛɛn dibu wɑ i mwɑ.
\q1 Mɑ i kɑ sɑ̃ɑrobu bɑrɑnun ɡobi kɔsinɑmɔ.
\q1
\v 7 I rɑ n kĩwɑ i wɔnwɔndobu tɑɑre
\q1 kpɑ bɑ n wiru tuɑ sɑ̃ɑ nuku sɑnkirɑnun sɔ̃.
\q1 Kpɑ i n bwɛ̃ɛbwɛ̃ɛbu dɑm dɔremɔ.
\q1 Bii kɑ bɑɑ bɑ kɑ kurɔ turo mɛnnɑmɔ.
\q1 Nɡe mɛyɑ i kɑ nɛ, Yinni Gusunɔn yĩsi dɛɛrɑru sɑnkumɔ.
\q1
\v 8 I rɑ n kpĩ kpĩ bɛɛn bũnun nuunɔ
\q1 yɑ̃nu wɔllɔ ni i tɔrubɑ mwɑ,
\q1 kpɑ i n tɑm nɔrumɔ mɛ i yokumɑ.
\q1
\v 9 Kɑ mɛ, nɑ Amɔrebɑ kɑm koosiɑ mɑm mɑm bɛɛn sɔ̃,
\q1 be, be bɑ ɡunu nɡe dɑ̃ɑ ye bɑ mɔ̀ sɛduru.
\q1 Mɑ bɑ dɑm mɔ nɡe dɑ̃ɑ dɑmɡiɑ.
\q1
\v 10 Mɛyɑ nɑ bɛɛ yɑrɑmɑ Eɡibitin tem di.
\q1 Mɑ nɑ bɛɛ kpɑrɑ ɡbɑburɔ wɔ̃ɔ weeru
\q1 n kɑ bɛɛ Amɔre ben tem wɛ̃.
\q1
\v 11 Nɑ sɔmɔbu seeyɑ bɛɛn bibu sɔɔ.
\q1 Mɑ nɑ ɡɑbu ɡɔsɑ nɛn sɔ̃ bɛɛn ɑluwɑɑsibɑ sɔɔ,
\q1 mɑ bɑ mɑn tii wɛ̃ bɑ bɔ̃ruɑ bu ku tɑm nɔ.
\q1 Bɛɛ Isirelibɑ ɡeemɑ? Nɡe weesɑ.
\q1 Nɛ, Yinni Gusunɔwɑ nɑ yeni bikiɑmɔ.
\q1
\v 12 I derɑ be nɑ ɡɔsɑ mi, bɑ tɑm nɔrɑ.
\q1 Mɑ i nɛn sɔmɔbu woodɑ wɛ̃ i nɛɛ,
\q1 bu ku mɑɑ tɔmbu nɛn ɡɑri sɔ̃.
\q1
\v 13 Wee tɛ̃, kon bɛɛ munku muku muku
\q1 nɡe mɛ nɑɑ kɛkɛ ye yɑ dĩɑnu sɔɔwɑ yɑ rɑ tem kɔsuku.
\q1
\v 14 Yen dɔmɑ te, wɑsi kɑsɑnuɡibɑ kun mɑɑ kpɛ̃ bu dukɑ su.
\q1 Dɑmɡibɑ kun mɑɑ kpɛ̃ bu ben dɑm dendi bu kɑ ɡɑ̃ɑnu ko.
\q1 Mɛyɑ tɑbu durɔ dɑmɡibɑ kun mɑɑ kpɛ̃ bu ben wɑ̃ɑru wɔrɑ.
\q1
\v 15 Tɛn towobɑ kun mɑɑ kpɛ̃ bu kɑ tii yinɑ.
\q1 Be bɑ mɑɑ nɑɑsu sɑ̃u, bɑ ǹ kisirɑmɔ.
\q1 Mɛyɑ mɑɑsɔbɑ kun mɑɑ kpɛ̃ bu we ben dumin dukin sɑɑbu.
\q1
\v 16 Be bɑ sɑ̃ɑ tɑbu durɔ dɑmɡibu be sɔɔ dɔmɑ te,
\q1 bɑ koo ben tɑbu yɑ̃nu kɔ̃wɑ bu duki su nɔm dirɑ.
\q1 Nɛ, Yinni Gusunɔwɑ nɑ yeni ɡeruɑ.
\s1 Yinni Gusunɔn tɔmbu
\s2 bɑ koo ben dɑɑ tusiɑ
\c 3
\p
\v 1 I swɑɑ dɑkio i nɔ ye nɛ, Yinni Gusunɔ nɑ ɡerumɔ, bɛɛ Isirelibɑ kpuron sɔ̃, bɛɛ be nɑ yɑrɑmɑ Eɡibitin di.
\q1
\v 2 Hɑnduniɑn bwesenu kpuro sɔɔ, bɛɛ tɔnɑwɑ nɑ ɡɔsɑ.
\q1 Yen sɔ̃nɑ kon bɛɛ sɛɛyɑsiɑ bɛɛn durum ye i kuɑ kpuron sɔ̃.
\s1 Gusunɔ ù n ɡɑri ɡeruɑ,
\s2 Gusunɔn sɔmɔ kun kpɛ̃
\s2 u nɔɔ mɑri
\q1
\v 3 Tɔmbu yiru bɑ koo swɑɑ wɔri sɑnnu
\q1 bɑ kun ɡinɑ nɔɔsinɛ?
\q1
\v 4 Gbee sunɔ ɡɑ rɑ ɡbɑ̃re yɑkɑsɔ
\q1 ɡɑ kun yɑɑ mwɛ ro?
\q1 Gbee sunɔ buu ɡɑ rɑ kukiri ɡen kpin yerun di
\q1 ɡɑ kun yɑɑ wɑ ɡɑ dimɔ?
\q1
\v 5 Gunɔ ɡɑ koo tɑɑ mwɑɑrɑ temɔ
\q1 bɑ kun ye bɛri?
\q1 Tɑɑ yɑ koo se wɔllɔ
\q1 ɡɑ̃ɑnu kun ye kɛsie?
\q1
\v 6 Bɑ rɑ tɑbun kɔbɑ so wuuɔ
\q1 wuuɡibu bɑ kun nɑnde?
\q1 Kɛ̃siru ɡɑru tɑ rɑ koore wuuɔ
\q1 n kun nɛn min di?
\q1
\v 7 Aɑwo, nɑ ku rɑ ɡɑ̃ɑnu ɡɑnu ko
\q1 nɑ kun yè nɛn sɔmɔ sɔ̃ɔwɑ.
\q1
\v 8 Gbee sunɔ ɡɑ̀ n ɡbɑ̃rɑ,
\q1 wɑrɑ ku rɑ nɑnde.
\q1 Nɛ, Yinni Gusunɔ nɑ̀ n ɡɑri ɡeruɑ,
\q1 nɛn sɔmɔ wɑrɑ kun yi kpɑrɑmɔ.
\s1 Yinni Gusunɔ
\s2 u koo Sɑmɑri sɛɛyɑsiɑ
\q1
\v 9 I Asidɔdu kɑ Eɡibitin tem sinɑ kpɑɑnuɡibu nɔɔɡiru sueyo i nɛɛ,
\q1 bu mɛnnɑmɑ Sɑmɑrin ɡuunɔ,
\q1 kpɑ bu wɑ dɑɑ bɛrɛtɛkɛ kɑ dɑm dɔrenɑɑ
\q1 ye yɑ wɑ̃ɑ ben suunu sɔɔ.
\q1
\v 10 Bɑ ku rɑ kɑ̃ bu ɡeɑ ko.
\q1 Mɑ bɑ ɑrumɑni ɡurɑmɔ kɑ dɑm kɑ tɑki,
\q1 bɑ tɑɑsimɔ ben sinɑ kpɑɑnɔ.
\q1
\v 11 Yen sɔ̃nɑ kon de yibɛrɛbɑ bu nɑ
\q1 bu tem mɛ tɑrusi, bu ben dɑm kpeerɑsiɑ.
\q1 Kpɑ bu ben sinɑ kpɑɑnu kɔsuku.
\q1 Nɛ, Yinni Gusunɔwɑ nɑ yeni ɡeruɑ.
\s1 Fɑɑbɑ ye yɑ ǹ nuku dobu mɔ
\q1
\v 12 Wee ye nɑ mɑɑ ɡeruɑ. Nɑ nɛɛ,
\q1 nɡe mɛ yɑ̃ɑ kpɑro u rɑ win sɑbenun sukum wɔre ɡbee sunɔn nɔɔn di,
\q1 nɡe mɛyɑ kon bɛɛ Isirelibɑ wɔrɑ
\q1 bɛɛ be i nɑ i sɔ̃ Sɑmɑriɔ kpin yee burɑnu sɔɔ.
\s1 Kirɔbɑ
\q1
\v 13 I swɑɑ dɑkio i nɔ
\q1 kpɑ i Yɑkɔbun bweseru kirɔ ko
\q1 i bu sɔ̃ ye nɛ Gusunɔ wɔllu kɑ tem Yinni nɑ ɡeruɑ.
\q1
\v 14 Nɑ nɛɛ, sɑnɑm mɛ sɔɔ, kon Isirelibɑ sɛɛyɑsiɑ ben durum sɔ̃.
\q1 Kon Betɛlin yɑ̃ku turɑnu kɔsuku,
\q1 kpɑ nin kɑ̃ɑnu nu bɔɔkirɑ nu wɔruku.
\q1
\v 15 Kon bɛɛn diɑ mi i rɑ n wɑ̃ɑ yɑm susurun sɑɑ kɑ purɑn sɑɑ kɔsuku.
\q1 Kpɑ n bɛɛn sinɑ kpɑɑnu kɑm koosiɑ
\q1 ni, ni bɑ burɑru koosi kɑ suunu donnu,
\q1 kɑ sere dii ɡee ni nu tie.
\q1 Nɛ, Yinni Gusunɔwɑ nɑ yeni ɡeruɑ.
\c 4
\q1
\v 1 Bɛɛ Sɑmɑrin tɔn kurɔbu,
\q1 bɛɛ be i dimɔ i bɔriɑmɔ nɡe Bɑsɑnin nɑɑ ɡbiibi
\q1 yi yi wɑ̃ɑ Sɑmɑrin ɡuurɔ,
\q1 i wɔnwɔndobu dɑm dɔremɔ,
\q1 i bwɛ̃ɛbwɛ̃ɛbu tɑki dimɔ,
\q1 mɑ i bɛɛn durɔbu sɔ̃ɔmɔ bu kɑ tɑm nɑ i nɔ.
\q1 Tɛ̃, i swɑɑ dɑkio i nɔ.
\q1
\v 2 Nɛ, Yinni Gusunɔ nɑ bɔ̃rumɔ kɑ nɛn tiin yĩsi dɛɛrɑru nɑ mɔ̀,
\q1 wee sɑɑ yɑ sisi yè sɔɔ bɑ koo bɛɛ kɑ bɛɛn bibun bweseru kɔkɔnu sɔre bu ɡɑwɑ nɡe swɛ̃ɛ.
\q1
\v 3 Bɛɛn bɑɑwure u koo yɑri kururun di
\q1 kpɑ bu bɛɛ kubɑ sɔ̃ɔ yɛ̃sɑn nɔm ɡeu ɡiɑ.
\q1 Nɛ, Yinni Gusunɔwɑ nɑ yeni ɡeruɑ.
\s1 Isirelibɑn ɡɔ̃ru bɔbunu
\p
\v 4 Yinni Gusunɔ u nɛɛ,
\q1 bɛɛ Isirelibɑ, i doo yɑ̃ku yee ten mi Betɛliɔ,
\q1 kpɑ i n mɑn torɑrimɔ.
\q1 I doo Giliɡɑliɔ,
\q1 kpɑ i n mɑn torɑrimɔ nɡe mɛ̀n nɔɔ i ko kpĩ.
\q1 I n bɛɛn yɑ̃kunu mɔ̀ bururu bɑɑtere,
\q1 kpɑ i n kɑ bɛɛn kɛ̃nu nɑɑmɔ sɔ̃ɔ itɑ kɑ sɔ̃ɔ itɑ.
\q1
\v 5 I bɛɛn siɑrɑbun yɑ̃kunu koowo kɑ pɛ̃ɛ ye bɑ seeyɑtiɑ doke.
\q1 Kpɑ i tɔmbu sɔ̃ mɑ i kɛ̃nu kuɑ kɑ kĩru.
\q1 Domi yerɑ bɛɛ Isirelibɑ i kĩru bo.
\q1 Nɛ, Yinni Gusunɔwɑ nɑ yeni ɡeruɑ.
\s1 Kirɔ ye yɑ kɑm kuɑ
\q1
\v 6 N wee nɑ derɑ ɡɔ̃ɔrɑ duɑ bɛɛn wuu mɑrosu kpuro sɔɔ.
\q1 Mɑ i dĩɑnu biɑ bɛɛn yɛnusu kpuro sɔɔ.
\q1 Adɑmɑ kɑ mɛ, i ǹ ɡɔsirɑmɛ nɛn mi.
\q1 Nɛ, Yinni Gusunɔwɑ nɑ yeni ɡeruɑ.
\q1
\v 7 Nɑ yinɑ ɡurɑ yu nɛ ye n tie suru itɑ bu kɑ dĩɑnu ɡɛ̃.
\q1 Nɑ derɑ ɡurɑ yɑ nɑ wusu ɡɑsun mi.
\q1 Mɑ nɑ ǹ wure yu nɛ ɡɑsun mi.
\q1 Nɑ derɑ yɑ nɑ ɡbenu ɡɑnu sɔɔ.
\q1 Mɑ nɑ ǹ wure yu nɛ ɡɑnun mi.
\q1 Mɑ nu ɡberɑ.
\q1
\v 8 Yerɑ bɛɛn wusu ɡɑsun tɔmbu bɑ dɑ wuu ɡɑɡun mi
\q1 bu kɑ nim wɑ bu nɔ.
\q1 Adɑmɑ ben nim nɔru ɡɑ ǹ kpɑ.
\q1 Kɑ mɛ, i ǹ ɡɔsirɑmɛ nɛn mi.
\q1 Nɛ, Yinni Gusunɔwɑ nɑ yeni ɡeruɑ.
\q1
\v 9 Nɑ derɑ bɛɛn dĩɑnu kusenu kuɑ,
\q1 mɑ twee yi nɑ yi bɛɛn ɡbeɑn dĩɑnu kɑ bɛɛn dɑ̃ɑ ɡbɑɑnun wurusu kpuro di.
\q1 Adɑmɑ kɑ mɛ, i ǹ ɡɔsirɑmɛ nɛ Gusunɔ bɛɛn Yinnin mi.
\q1
\v 10 Nɑ mɑɑ bɛɛ kɛ̃si kɛ̃si bɑrɑru sure nɡe mɛ nɑ kuɑ Eɡibitiɔ.
\q1 Nɑ derɑ bɑ bɛɛn ɑluwɑɑsibɑ ɡo tɑbu sɔɔ.
\q1 Mɑ bɑ ben dumi mwɛɛrɑ.
\q1 Nɑ derɑ i bɛɛn tɔn be bɑ ɡun nuburu nuɑ bɛɛn sɑnsɑniɔ.
\q1 Adɑmɑ kɑ mɛ, i ǹ ɡɔsirɑmɛ nɛn mi.
\q1
\v 11 Nɑ bɛɛ surɑ nɑ kɔsukɑ nɡe Sodomu kɑ Gomɔrɑ ye nɑ kɑm koosiɑ.
\q1 Mɑ i kuɑ nɡe dɑ̃ɑ nɔɔ ɡe bɑ wunɑ dɔ̃ɔn di.
\q1 Adɑmɑ kɑ mɛ, i ǹ ɡɔsirɑmɛ nɛ, Yinni Gusunɔn mi.
\q1
\v 12 Yen sɔ̃nɑ bɛɛ Isirelibɑ kon bɛɛ sɛɛyɑsiɑ.
\q1 Ǹ n mɛn nɑ, i n sɔɔru sɑ̃ɑ i n kɑ nɛ Gusunɔ bɛɛn Yinnin siribu mɑrɑ.
\q1
\v 13 Domi nɛnɑ nɑ ɡuunu mɔmɑ,
\q1 mɑ nɑ woo tɑkɑ kuɑ.
\q1 Nɑ rɑ nɛn bwisikunu tɔnu ɡiɑsie.
\q1 Nɑ rɑ mɑɑ yɑm bururɑm ɡɔsie yɑm wɔ̃kuru,
\q1 kpɑ nɑ n sĩimɔ ɡuunu wɔllɔ.
\q1 Nɛn yĩsirɑ Gusunɔ wɔllu kɑ tem Yinni.
\s1 Isirelibɑ, i de i ɡɔ̃ru ɡɔsiɑ
\c 5
\p
\v 1 Bɛɛ Isirelibɑ, i swɑɑ dɑkio i nɔ ɡɔɔ swĩi yi nɑ mɔ̀ bɛɛn sɔ̃.
\q1
\v 2 Bɛɛ be i wɔrumɛ temɔ nɡe wɔndiɑ be bɑ ɡu,
\q1 i ǹ mɑɑ seemɔ.
\q1 Goo sɑri wi u koo bɛɛ seeyɑ.
\q1
\v 3 Domi Yinni Gusunɔ u ɡeruɑ u nɛɛ,
\q1 bɛɛn wuu ɡe ɡɑ tɑbu durɔbu nɔrɔbu (1.000) mɔ,
\q1 bɑ̀ n tɑbu dɑ, tɔmbu wunɔbuwɑ (100) bɑ koo wurɑmɑ.
\q1 Ge ɡɑ mɑɑ tɑbu durɔbu wunɔbu mɔ,
\q1 tɔmbu wɔkurɑ bɑ koo tiɑ.
\s1 I wurɑmɑ Gusunɔn mi
\s2 n sere dɑ̃kuru ko
\q1
\v 4 Wee ye Yinni Gusunɔ u mɑɑ bɛɛ Isirelibɑ sɔ̃ɔmɔ.
\q1 U nɛɛ; ì n kĩ i n wɑ̃ɑ, wiyɑ i ko kɑsu.
\q1
\v 5 I ku mɑɑ sɑ̃ɑru dɑ Betɛliɔ kɑ Giliɡɑliɔ kɑ Beri Sebɑɔ.
\q1 Domi u koo de bu Giliɡɑliɡibu yoru mwɛɛri.
\q1 Kpɑ bu Betɛliɡibu kɑm koosiɑ.
\q1
\v 6-7 Bɛɛ be i rɑ ɡem ɡɔsie weesu,
\q1 kpɑ i kun mu ɡɑrisi ɡɑ̃ɑnu,
\q1 i nɑ wi, Yinni Gusunɔn mi,
\q1 kpɑ i wɑ i n wɑ̃ɑ,
\q1 kpɑ u ku rɑɑ bɛɛ Isirelibɑ wɔri u mwɑ nɡe dɔ̃ɔ.
\q1 Kpɑ i ɡoo biɑ Betɛliɔ wi u koo dɔ̃ɔ wi ɡo.
\q1
\v 8 Yinni Gusunɔwɑ u kperi bwese bwesekɑ kuɑ,
\q1 mɑ u yen bɑɑyere yi yen ɑyerɔ.
\q1 U rɑ yɑm wɔ̃kuru ɡɔsie yɑm bururɑm.
\q1 Kpɑ u de sɔ̃ɔ sɔɔ ɡu tĩrɑ, ɡu ɡɔsiɑ wɔ̃kuru.
\q1 U rɑ nim wɔ̃kun nim mɛnnɛ,
\q1 kpɑ u mu yɛ̃kɑnɑ tem kpuro sɔɔ.
\q1
\v 9 Wiyɑ u rɑ dɑmɡibun dɑm bue.
\q1 Kpɑ u de bu ben wusun ɡbɑ̃rɑnu kɔsuku.
\q1 Kɑ ɡem, win yĩsirɑ Yinni Gusunɔ.
\q1
\v 10 Bɛɛ Isirelibɑ, be bɑ bɛɛ sirimɔ dee dee,
\q1 i rɑ n bu tusɑ,
\q1 kpɑ i n kɑ wi u ɡem ɡerumɔ kɔ̃ruɑ.
\q1
\v 11 I rɑ bwɛ̃ɛbwɛ̃ɛbu dɑm dɔre,
\q1 i n ben ɡbeɑn dĩɑnu mwɛɛrimɔ kɑ dɑm.
\q1 Yen sɔ̃, i ǹ sinɑmɔ bɛɛn diɑ sɔɔ
\q1 ye i bɑnɑ kɑ kpee ni i dɑ̃kɑ.
\q1 Mɛyɑ i ǹ mɑɑ bɛɛn resɛm ye i duurɑn bii duronun tɑm nɔrumɔ.
\q1
\v 12 Domi u bɛɛn torɑnu yɛ̃ nu kpɑ̃,
\q1 u mɑɑ yɛ̃ mɑ i durum kuɑ too.
\q1 I ɡemɡibu nɔni sɔ̃ɔmɔ.
\q1 I nɔm birɑn kɛ̃nu mwɑɑmɔ.
\q1 Mɑ i yinɑmɔ bu sɑ̃ɑrobu ben ɡem wɛ̃ siri yerɔ.
\q1
\v 13 Sɑnɑm mɛni, sɑnɑm kɔ̃sumɑ.
\q1 Yen sɔ̃, wi u lɑɑkɑri mɔ, wiyɑ u ko n nɔɔ mɑɑri.
\q1
\v 14 I de i n ɡeɑ mɔ̀ n kun mɔ kɔ̃sɑ.
\q1 Kpɑ i wɑ i n wɑ̃ɑ.
\q1 Nɡe mɛyɑ Gusunɔ wɔllu kɑ tem Yinni u ko n kɑ bɛɛ wɑ̃ɑ nɡe mɛ i rɑ ɡere.
\q1
\v 15 I kɔ̃sɑ tusio kpɑ i ɡeɑ kĩɑ.
\q1 I de ɡem mu siribu di siri yerɔ.
\q1 Sɔrɔkudo Gusunɔ, wɔllu kɑ tem Yinni u koo bɛɛ Isirelibɑn tɔn be bɑ tiɑrɑ wɔnwɔndu kuɑ.
\q1
\v 16 Yen sɔ̃, Gusunɔ wɔllu kɑ tem Yinni u ɡeruɑ u nɛɛ,
\q1 tɔmbɑ koo ɡɔɔ wuri ko yɑm kpuro,
\q1 kpɑ bɑ n sumɔ swɛɛ sɔɔ, bɑ n mɔ̀, wee, wee!
\q1 Bɑ koo ɡbɑɑ wukobu sokumɑ bu ɡɔɔ wooru sinɑ,
\q1 kpɑ bu ɡɔɔ swĩiɡibu mɛnnɑmɑ.
\q1
\v 17 Sɑnɑm mɛ u koo bɛɛ wɔrimɑ,
\q1 kɑ be bɑ wɑ̃ɑ ɡberɔ kpuro bɑ koo ɡɔɔ swĩwɑ.
\q1 Yinni Gusunɔwɑ u yeni ɡeruɑ.
\s1 Yinni Gusunɔn siribun tɔ̃ru
\q1
\v 18 Bɔ̃rurobɑ bɛɛ be i Yinni Gusunɔn siribun tɔ̃ru mɑrɑ.
\q1 Mbɑ i yĩiyɔ i wɑ tɔ̃ɔ te sɔɔ.
\q1 I n yɛ̃ mɑ tɑ ko n sɑ̃ɑwɑ yɑm wɔ̃kuru, n ǹ mɔ yɑm bururɑm.
\q1
\v 19 I ko i n sɑ̃ɑwɑ nɡe tɔnu wi u ɡbee sunɔ dukɑ suurimɔ,
\q1 mɑ u kɑ yɑɑ ɡɔbɑ ɡɑɑ yinnɑ.
\q1 Ye u duɑ win dirɔ u ɡɑnɑ nɛnuɑ,
\q1 mɑ wɑɑ yɑ nùn dɔmɑ.
\q1
\v 20 Yinni Gusunɔn tɔ̃ɔ te, tɑ sɑ̃ɑwɑ yɑm wɔ̃kuru n ǹ mɔ yɑm bururɑm.
\q1 Tɑ tĩriwɑ niki niki, yɑm bururɑm sɑri.
\s1 Sɑ̃ɑ te Yinni Gusunɔ u tusɑ
\q1
\v 21 Yinni Gusunɔ u nɛɛ, u bɛɛn tɔ̃ɔ bɑkɑ ni i rɑ nùn diiye tusɑ.
\q1 U ǹ mɑm mɑɑ kĩ u bɛɛn mɛnnɔsun woo nɔ.
\q1
\v 22 Ì n nùn yɑ̃ku dɔ̃ɔ mwɑɑrɑruɡiru kuɑ kɑ mɑɑ kɛ̃nu,
\q1 u ku rɑ nu mwɛ.
\q1 Mɛyɑ u ku rɑ mɑɑ bɛɛn siɑrɑbun yɑ̃kunu mɛɛri
\q1 ni i rɑ ko kɑ yɑɑ sɑbe ni nu ɡum mɔ.
\q1
\v 23 I kɑ bɛɛn womusun wɔkinu doonɔ win bɔkun di.
\q1 U ǹ mɑɑ kĩ u bɛɛn mɔrɔkunun wurenu nɔ.
\q1
\v 24 Adɑmɑ i de ɡem mu n wɑ̃ɑ bɛɛn suunu sɔɔ,
\q1 mu n kokumɔ nɡe nim mɛ mu ku rɑ kpe.
\p
\v 25 Bɛɛ Isirelibɑ, i kɑ kuɑ wɔ̃ɔ weeru ɡbɑburu sɔɔ, i nùn yɑ̃kunu kɑ kɛ̃nu kuɑre nɡe mɛ? 
\v 26 Bũu wi bɑ mɔ̀ Sɑkutu wi i ɡɑrisi bɛɛn sunɔ kɑ sere kperɑ ye i sɑ̃ɑmɔ i mɔ̀ Kewɑni, i nin bwɑ̃ɑroku ni i tii kuɑ sɔɔre nɡe mɛ i sɔɔwɑ ɡisɔ? Bɛɛn tii i yɛ̃ mɑ i ǹ koore mɛ.
\q1
\v 27 Yen sɔ̃, u koo de bu bɛɛ yoru mwɛɛri
\q1 bu kɑ dɑ sere Dɑmɑsin berɑ ɡiɔ.
\q1 Wi, Gusunɔ wɔllu kɑ tem Yinniwɑ u yeni ɡeruɑ.
\s1 Bɑ koo Isirelibɑ kpeerɑsiɑ
\c 6
\q1
\v 1 Bɔ̃rurobɑ bɛɛ be i wɑ̃ɑ Siɔniɔ bɔri yɛndu sɔɔ,
\q1 kɑ bɛɛ be i sɔ̃ Sɑmɑrin ɡuurɔ kɑ toro sindu.
\q1 Mɑ i tɑmɑɑ i sɑ̃ɑ bwese te tɑ kpɑ̃ɑru bon wiruɡibu.
\q1 Mɑ Isirelibɑ bɑ somiru mɑrɑ bɛɛn min di.
\q1
\v 2 I doo Kɑlinɛɔ i wɑ.
\q1 Min di, kpɑ i dɑ Hɑmɑtiɔ wuu bɔkɔ ɡen mi.
\q1 Kpɑ i sɑrɑ i dɑ Gɑtiɔ Filisitibɑn temɔ.
\q1 Ben wuu si, su bɛɛ Isirelibɑ kɑ Yudɑbɑn wusu ɡeɑ turɑ?
\q1 Ben tem mɛ, mu bɛɛn tem kpɑ̃ɑru turɑ?
\q1
\v 3 Wee i ǹ kĩ wɑhɑlɑn tɔ̃ru tu bɛɛ nɑɑwɑ.
\q1 Mɑ i sere tii dɑɑ kɔ̃sɑ ɡɑwemɔ.
\q1 Mɑ yɑ bɑndu dii bɛɛn suunu sɔɔ.
\q1
\v 4 Mɑ i kpĩ sɑu kpin yee burɑnu sɔɔ, nì bɑ burɑru kuɑ kɑ suunu donnu.
\q1 I tii yɑ̃ɑ kpɛmminu kɑ nɑɑ kpɛmi yi yi ɡum mɔ ɡɔsiɑmmɛ ɡɔ̃sun di i temmɔ.
\q1
\v 5 I mɔrɔkunu soomɔ i womusu mɔ̀ bwisikunu sɑriru sɔɔ.
\q1 Mɑ i tɑmɑɑ i nin soberu yɛ̃wɑ nɡe Dɑfidi.
\q1
\v 6 I tɑm nɔrumɔ kɑ nɔri bɛkɛ.
\q1 I tii ɡum turɑreɡim sɑwɑmɔ.
\q1 Mɑ i ǹ nuki sɑnkire yèn sɔ̃ bɛɛn bweseru tɑ koo kɑm ko.
\q1
\v 7 Yen sɔ̃nɑ bɑ koo ɡbi bu bɛɛ yoru mwɛɛri bu kɑ doonɑ
\q1 kpɑ bɛɛn nuku dobun kuuki kɑ bɛɛn tɔ̃ɔ bɑkɑ dim mu kpe.
\s1 Sɑmɑri yɑ koo kɑm ko
\q1
\v 8 Gusunɔ wɔllu kɑ tem Yinni u bɔ̃ruɑ kɑ win tiin wɑ̃ɑru u nɛɛ,
\q1 u ǹ bɛɛ Isirelibɑn tii suɑbu kĩ.
\q1 U mɑɑ bɛɛn sinɑ kpɑɑnu tusɑ.
\q1 U koo de bu Sɑmɑri mwɑ kɑ ye yɑ wɑ̃ɑ ye sɔɔ kpuro.
\p
\v 9 Tɔmbu wɔkuru bɑ̀ n tie yɛnu ɡɑɡu sɔɔ, bɑ koo ɡbiwɑ. 
\v 10 Goo ù n win tɔnun ɡoru suɑ yɛnun di u kɑ yɑrɑ u dɔɔ u dɔ̃ɔ mɛni, u koo wi u wɑ̃ɑ yɛnu sɔɔwɔ bikiɑ u nɛɛ, ɡoo mɑɑ tie u wɑ̃ɑ kɑ wunɛ?
\p Kpɑ yɛ̃ro u nùn wisi u nɛɛ, ɡoo sɑri.
\p Kpɑ wini u nɛɛ, ɑ mɑrio. N ǹ weenɛ su Gusunɔn yĩsiru siɑ sɑɑ yeni sɔɔ kpɑ u sun sĩiremɑ.
\q1
\v 11 Domi Yinni Gusunɔ u woodɑ yeni wɛ̃ u nɛɛ,
\q1 u koo yɛnusu kpuro kɔsukuwɑ, bɑkɑsu kɑ piiminu.
\s1 Nɑsɑrɑ kɑm
\q1
\v 12 Bɑ rɑ dumi yɑkie kpee sɑɑrɑ wɔllɔ?
\q1 Bɑ rɑ kɑ nɛɛ wuku mi?
\q1 Adɑmɑ wee bɛɛ i ɡem ɡɔsiɑ dɛ̃ɛ.
\q1 Mɑ i ɡeɑ ɡɔsiɑ ɡɑ̃ɑ sosurɑnu.
\p
\v 13 Bɛɛ i nuku dobu mɔ̀ kɑm sɔɔ, mɑ i ɡerumɔ i mɔ̀, bɛɛn tiin dɑmɑ i kɑ nɑsɑrɑ wɑ. 
\v 14 Yen sɔ̃nɑ Gusunɔ wɔllu kɑ tem Yinni u nɛɛ, u koo de bwese tukuru ɡɑru tu bɛɛ seesi. Kpɑ tu bɛɛ dɑm dɔre sɑɑ Hɑmɑtin duu yerun di sere n kɑ dɑ nim torɑɔ ye yɑ wɑ̃ɑ ɡbɑburun berɑ ɡiɑ mi ɡɑ̃ɑnu ku rɑ kpi.
\s1 Amɔsun kɑ̃siru sɔɔ,
\s2 u twee wɑ yi tɛrie
\c 7
\p
\v 1 Wee ye Yinni Gusunɔ u derɑ nɑ wɑ kɑ̃siru sɔɔ. Tweeyɑ u derɑ yi kɔwɑrɑ dɑbi dɑbinu sɑnɑm mɛ yɑkɑsu kpɑrɑm wee si sinɑ boko u rɑɑ bɔɔrɑ win yɑɑ sɑbenun sɔ̃. 
\v 2 Sɑnɑm mɛ yi tem min yɑkɑ si kpuro di, yerɑ nɑ nɛɛ, Yinni Gusunɔ, ɑ suuru koowo. Amɔnɑ Yɑkɔbun bweseru tɑ ko n kɑ wɑ̃ɑ. Domi tɑ ǹ mɑɑ dɑm mɔ.
\p
\v 3 Mɑ Yinni Gusunɔ u ɡɔ̃ru ɡɔsiɑ kɔ̃sɑ yen di. U nɛɛ, yeni yɑ ǹ mɑɑ koorɑmɔ.
\s1 Amɔsu u mɑɑ dɔ̃ɔ wɑ
\s2 win kɑ̃siru sɔɔ
\p
\v 4 Wee ye Yinni Gusunɔ u mɑɑ derɑ nɑ wɑ kɑ̃siru ɡɑru sɔɔ. U nɛɛ, u koo tɔmbu sɛɛyɑsiɑ kɑ dɔ̃ɔ. Kpɑ u de dɔ̃ɔ wi, u nim mɛ mu wɑ̃ɑ tem sɔɔwɔ ɡberɑsiɑ kpɑ u Isirelibɑn tem kpuro di. 
\v 5 Mɑ nɑ nɛɛ, Yinni Gusunɔ, ɑ ye yɔ̃rɑsio. Amɔnɑ Yɑkɔbun bweseru tɑ ko n kɑ wɑ̃ɑ. Domi tɑ ǹ dɑm mɔ.
\p
\v 6 Mɑ Yinni Gusunɔ u ɡɔ̃ru ɡɔsiɑ kɔ̃sɑ yen di u nɛɛ, yenin tii yɑ ǹ mɑɑ koorɑmɔ.
\s1 Amɔsu u nifoo wɑ
\s2 win kɑ̃siru sɔɔ
\p
\v 7 Wee ye nɑ mɑɑ wɑ kɑ̃siru ɡɑru sɔɔ. Nɑ Yinni Gusunɔ wɑ u yɔ̃ ɡɑnɑɔ mɑ u nifoo nɛni. 
\v 8 Mɑ u mɑn bikiɑ u nɛɛ, mbɑ nɑ wɑɑmɔ mi.
\p Nɑ nùn wisɑ nɑ nɛɛ, nifoo.
\p Mɑ u mɑn sɔ̃ɔwɑ u nɛɛ, nifoowɑ kon kɑ nɛn tɔmbu Isirelibɑ yĩire nɡe ɡɑnɑ. Nɑ ǹ mɑɑ bu suuru kuɑmmɛ.
\q1
\v 9 Kon ben sikɑdo Isɑkin bũu turɑnu kɔsuku,
\q1 kpɑ n Isirelin sɑ̃ɑ yenu suriri,
\q1 kpɑ n Yeroboɑmun bɑndu surɑ kɑ tɑkobi
\q1 n tu kpeerɑsiɑ.
\s1 Amɔsu kɑ yɑ̃ku kowo Amɑsiɑ
\p
\v 10 Yerɑ Amɑsiɑ Betɛlin yɑ̃ku kowo u Yeroboɑmu Isirelibɑn sinɑ boko ɡɔriɑ u nɛɛ, wee Amɔsu u nun seesimɔ Isirelibɑn suunu sɔɔ. Win ɡɑri yi u mɑɑ ɡeruɑ mi, yi tɔmbu kpuro burisinɑ. 
\v 11 Domi u nɛɛ,
\q1 wunɛ Yeroboɑmu, bɑ koo nun ɡowɑ tɑbu sɔɔ kɑ tɑkobi.
\q1 Kpɑ bu Isirelibɑ yoru mwɛɛri ben tem di
\q1 bu kɑ dɑ mi n tomɑ.
\p
\v 12 Yen biruwɑ Amɑsiɑ u nɑ Amɔsun mi, u nùn sɔ̃ɔwɑ u nɛɛ, Gusunɔn sɔmɔ wunɛ, ɑ doo Yudɑn tem ɡiɑ, kpɑ ɑ n wunɛn ɡɑri yi mɔ̀ mi, ɑ kɑ wɑ ɑ n dimɔ. 
\v 13 Adɑmɑ ɑ ku mɑɑ Gusunɔn ɡɑri ɡere Betɛli mi, domi yɑ sɑ̃ɑwɑ sinɑ boko kɑ Isirelibɑ kpuron sɑ̃ɑ yeru.
\p
\v 14 Mɑ Amɔsu u nùn wisɑ u nɛɛ, nɑ ǹ sɑ̃ɑ Gusunɔn sɔmɔ. Nɑ ǹ mɑɑ Gusunɔn sɔmɔn bɔ̃ɔ. Nɛ, yɑ̃ɑ kpɑrowɑ. Sikɑmɔrewɑ \f + \fr 7:14 \fr*\fk sikɑmɔre \fk*\ft - Yɑ sɑ̃ɑ dɑ̃ɑ tèn binu bɑ rɑ di.\ft*\f* nɑ rɑ yewe. 
\v 15 Yerɑ Yinni Gusunɔ u mɑn ɡɔsɑ sɑnɑm mɛ nɑ yɑ̃ɑnu kpɑrɑmɔ. U mɑn sɔ̃ɔwɑ u nɛɛ, n doo n win tɔmbu Isirelibɑ win ɡɑri sɔ̃. 
\v 16 Tɛ̃, ɑ swɑɑ dɑkio ɑ Yinni Gusunɔn ɡɑri nɔ. Wunɛ Amɑsiɑ, wunɛ wi ɑ nɛɛ, n ku Isirelibɑ Gusunɔn ɡɑri sɔ̃. 
\v 17 Wee ye Yinni Gusunɔ u ɡeruɑ. U nɛɛ,
\q1 wunɛn kurɔ u koo sɑkɑrɑru ko wuu sɔɔ,
\q1 kpɑ bu wunɛn bibu ɡo tɑbu sɔɔ,
\q1 kpɑ bu wunɛn ɡberu bɔnu ko,
\q1 domi wunɛn tii kɑɑ ɡbi tem tukumɔ mi n tomɑ,
\q1 mi bɑ koo kɑ Isirelibɑ dɑ bu yoru di.
\s1 Amɔsu u bireru wɑ win
\s2 kɑ̃siru sɔɔ tɑ dɑ̃ɑ mɑrum yibɑ
\c 8
\p
\v 1 Wee ye Yinni Gusunɔ u mɑɑ mɑn sɔ̃ɔsi kɑ̃si teni sɔɔ. Nɑ dɑ̃ɑ mɑrum wɑ bireru sɔɔ mɛ mu ye. 
\v 2 Mɑ Yinni Gusunɔ u nɛɛ, mbɑ nɑ wɑɑmɔ mi.
\p Nɑ nùn wisɑ nɑ nɛɛ, dɑ̃ɑ mɑrumɑ nɑ wɑ mɛ mu ye.
\p Yerɑ u mɑɑ mɑn sɔ̃ɔwɑ u nɛɛ,
\q1 sɑɑ yɑ turɑ u kɑ win tɔmbu Isirelibɑ sɛɛyɑsiɑ.
\q1 U ǹ mɑɑ bu suuru kuɑmmɛ.
\q1
\v 3 U mɑɑ nɛɛ, yen tɔ̃ɔ te,
\q1 sinɑ kpɑɑrun womusu koo ɡɔsiɑ nuku sɑnkirɑnun womusu.
\q1 Kpɑ tɔn dɑbinun ɡonu nu n tɛrie bɑɑmɑ.
\q1 Kpɑ yɑm mu n mɑɑri sɔ̃ɔ sɔ̃ɔ.
\s1 Bɑ koo Isirelibɑ sɛɛyɑsiɑ
\p
\v 4 Yinni Gusunɔ u nɛɛ,
\q1 i swɑɑ dɑkio bɛɛ be i sɑ̃ɑrobu dɑm dɔremɔ.
\q1 Mɑ i bwɛ̃ɛbwɛ̃ɛbu kɑm koosiɑmɔ.
\q1
\v 5 I mɔ̀, dommɑ suru kpɑon tɔ̃ɔ bɑkɑrɑ koo kpe.
\q1 Kpɑ su wɑ su bɛsɛn ɑlikɑmɑ dɔrɑ.
\q1 Dommɑ tɔ̃ɔ wɛ̃rɑruɡirɑ koo kpe,
\q1 kpɑ su wɑ su bɛsɛn birɑnu wukiɑ.
\q1 Sɑ ko sɑkɑku kɑwɑ,
\q1 kpɑ su yen ɡobi sosi.
\q1 Sɑ ko kilo ɡɔsiɑ su kɑ tɔmbu ɡbɛni.
\q1 Kpɑ su doo sĩinu dɔrɑ.
\q1
\v 6 Sɑ ko wɔnwɔndobu dwe kɑ ɡobi,
\q1 kpɑ su sɑ̃ɑrobu kɑ bɑrɑnun ɡobi kɔsinɑ.
\q1
\v 7 Nɛ, Yinni Gusunɔ, nɑ bɔ̃ruɑ kɑ nɛn tiin yĩsiru nɑ nɛɛ,
\q1 nɑ ǹ bɛɛ Isirelibɑ kɔ̃sɑ ye i kuɑ duɑrimɔ.
\q1
\v 8 Bɛɛn tem mu koo yĩiri,
\q1 kpɑ bɛɛ nɛn tɔmbu i n ɡɔɔ wooru sɔ̃.
\q1 Tem mɛ kpuro mu koo kuke
\q1 kpɑ mu sure nɡe Eɡibitin dɑɑrun nim.
\q1
\v 9 Yen tɔ̃ɔ te, nɛ, Yinni Gusunɔ kon de sɔ̃ɔ u du sɔ̃ɔ sɔɔ ɡbɑ̃ɑrɑ
\q1 kpɑ yɑm mu tĩrɑ.
\q1
\v 10 Kon bɛɛn tɔ̃ɔ bɑkɑnu ɡɔsiɑ nuku sɑnkirɑnu,
\q1 kpɑ bɛɛn womusu su n sɑ̃ɑ weeweenu.
\q1 Kpɑ bɛɛn bɑɑwure u sɑɑkibɑ doke u n wii pɔɔru pote nuku sɑnkirɑnun sɔ̃.
\q1 Kon de tɔmbu bɑ n nuki sɑnkire tem mɛ sɔɔ
\q1 nɡe be bɑ ben bii teereru bie.
\q1 Tɔ̃ɔ te, tɑ ko n sɑ̃ɑwɑ nɔni swɑ̃ɑruɡiru.
\q1
\v 11 Wee ye nɛ, Yinni Gusunɔ nɑ ɡeruɑ.
\q1 Nɑ nɛɛ, kon de ɡɔ̃ɔru tu du tem mɛ sɔɔ.
\q1 N ǹ mɔ dĩɑnun ɡɔ̃ɔru, n ǹ mɑɑ mɔ nim nɔru.
\q1 Adɑmɑ nɛn ɡɑrin ɡɔ̃ɔru kɑ yin nim nɔruwɑ i ko i n mɔ.
\q1
\v 12 I ko i n yɑrinɛwɑ sɑɑ sɔ̃ɔ yɛ̃sɑn nɔm dwɑru ɡiɑn di n kɑ dɑ sɔ̃ɔ duu yerɔ,
\q1 sɑɑ mɑɑ sɔ̃ɔ yɛ̃sɑn nɔm ɡeu ɡiɑn di n kɑ dɑ sɔ̃ɔ yɑri yerɔ,
\q1 i n bɔsu bɑɑmɑ, i n kɑsu i nɛn ɡɑri nɔ.
\q1 Adɑmɑ i ǹ wɑsi i yi nɔ.
\q1
\v 13 Sɑɑ ye sɔɔ, bɛɛn wɔndiɑ burɔbu kɑ bɛɛn ɑluwɑɑsibɑ bɑ koo ɡbi nim nɔrun sɑɑbu.
\q1
\v 14 Be bɑ bɔ̃rumɔ kɑ Sɑmɑriɡibun bũnun yĩsiru bɑ mɔ̀,
\q1 kɑ bũu wi u wɑ̃ɑ Dɑnuɔn wɑ̃ɑru,
\q1 ǹ kun mɛ kɑ sɑ̃ɑ te bɑ mɔ̀ Beri Sebɑɔ,
\q1 be kpurowɑ kon de bu wɔruku,
\q1 kpɑ bu kpɑnɑ bu se.
\s1 Yinni Gusunɔ
\s2 u koo tɔmbu siri
\c 9
\p
\v 1 Amɔsu, u Yinni Gusunɔ wɑ u yɔ̃ sɑ̃ɑ yerun yɑ̃ku yerɔ. Mɑ u nùn sɔ̃ɔwɑ u nɛɛ, u sɑ̃ɑ yerun ɡberebɑ soowo sɑɑ ben wɔllun di kpɑ tem mu diiri,
\q1 kpɑ bu wɔruku bu tɔn be bɑ wɑ̃ɑ mi kpuron winu kɔsuku.
\q1 Kpɑ wi, Yinni Gusunɔ u de bu be bɑ tie ɡo tɑbu sɔɔ kɑ tɑkobi.
\q1 Bɑɑ ben ɡoo kun kpɛ̃ u kisirɑ u doonɑ.
\q1
\v 2 Bɑɑ bɑ̀ n kukuɑ ɡɔriɔ, win nɔmu ɡɑ koo bu yɑrɑmɑ.
\q1 Bɑɑ bɑ̀ n yɔɔwɑ wɔllɔ, u koo bu sɑrɑsiɑmɑ.
\q1
\v 3 Bɑ̀ n dɑ bɑ kukuɑ ɡuu te bɑ mɔ̀ Kɑɑmɛlin wii kpiirɔ, u koo bu kɑsu,
\q1 kpɑ u bu mwɑ.
\q1 Bɑ̀ n numɑ nim wɔ̃kun sɔɔwɔ,
\q1 u koo de wɑɑ bɑkɑ yu bu dwɛ̃ɛ miɡum.
\q1
\v 4 Ben yibɛrɛbɑ bɑ̀ n mɑɑ bu yoru mwɛɛrɑ,
\q1 u koo de yibɛrɛ be, bu bu ɡo kɑ tɑkobi.
\q1 U ko n bu nɔni ɡirɑriwɑ,
\q1 kpɑ u bu kɔ̃sɑ kuɑ, n ǹ mɔ ɡeɑ.
\p
\v 5 Mɑ Amɔsu u nɛɛ,
\q1 Gusunɔ wɔllu kɑ tem Yinni u tem bɑbɑ,
\q1 mɑ mu kɔsikirɑ.
\q1 Mɑ mɛn tɔmbu kpuro bɑ ɡɔɔ wooru sɔ̃.
\q1 Mɛ kpuro mu kukumɔ,
\q1 mɑ mu suremɔ
\q1 nɡe Eɡibitin dɑɑ bɑkɑ te bɑ mɔ̀ Nilun nim.
\q1
\v 6 U win wɑ̃ɑ yeru bɑnɑ wɔllɔ,
\q1 mɑ u derɑ wɔllɑ kuɑ tem ɡirum kpɛɛru.
\q1 U nim wɔ̃kun nim mɛnnɑ,
\q1 mɑ u mu yɛ̃kɑ tem sɔɔ.
\q1 Win yĩsirɑ Yinni Gusunɔ.
\s1 Tɑɑrɛɡibun siribu
\q1
\v 7 Yinni Gusunɔ u mɑɑ nɛɛ,
\q1 bɛɛ Isirelibɑ, i ǹ Etiopiɡibu kere nɛn nɔni sɔɔ.
\q1 Geemɑ, nɑ bɛɛ yɑrɑ Eɡibitin tem di.
\q1 Adɑmɑ nɑ mɑɑ Filisitibɑ yɑrɑ Kɑfitorin di.
\q1 Mɑ nɑ mɑɑ Siriɡibu yɑrɑ Kirin di.
\q1
\v 8 Wee, nɛ, Yinni Gusunɔ nɑ Isirelibɑn bɑndu nɔni ɡirɑri,
\q1 domi tɑ torɑ.
\q1 Kon tu kpeerɑsiɑwɑ hɑnduniɑ sɔɔ.
\q1 Adɑmɑ n ǹ mɔ Isirelibɑ kpurowɑ kon kpeerɑsiɑ.
\q1 Nɛ, Yinni Gusunɔwɑ nɑ yeni ɡeruɑ.
\q1
\v 9 Wee, kon nɛn woodɑbɑ wɛ̃,
\q1 kpɑ n Isirelibɑ sĩire
\q1 bwese tukunun suunu sɔɔ
\q1 nɡe mɛ bɑ rɑ dobi sĩire,
\q1 bɑɑ yen bin teeru tɑ kun kɑ wɔrɑ.
\q1
\v 10 Nɛn tɔn be bɑ durum mɔ̀,
\q1 mɑ bɑ ɡerumɔ bɑ mɔ̀,
\q1 nɑ ǹ bu nɔni swɑ̃ɑru suremɔ,
\q1 bɑ koo be kpuro ɡowɑ tɑbu sɔɔ.
\s1 Isirelibɑn tem koo wurɑmɑ
\s2 nɡe yellu
\q1
\v 11 Tɔ̃ru ɡɑrɑ sisi tè sɔɔ kon Dɑfidin bɑndu seeyɑ
\q1 te tɑ sɑ̃ɑ nɡe yɛnu ɡe ɡɑ bɑnsu kuɑ.
\q1 Kon tu sɔmɛ, kpɑ tu se tu wurɑmɑ nɡe yellu.
\q1
\v 12 Kpɑ bu wɑ bu Edɔmubɑn tem kɑ bwese tuku ni nu rɑɑ mɑn sɑ̃ɑmɔn tem mwɑ.
\q1 Nɛ, Yinni Gusunɔwɑ kon yeni ko.
\q1
\v 13 Wee sɑɑ yɑ sisi yè sɔɔ bɑ̀ n ɡɑ̃, n ǹ tɛɛmɔ bu kɑ kpɑm duure.
\q1 Bɑ̀ n resɛm duurɑ, n ǹ tɛɛmɔ bu kɑ ye ɡɑmɑ.
\q1 Bɑɑ kɑ ɡuunu wɔllɔ resɛm yɑ koo kpiwɑ
\q1 yɑ n tɛrie bu kɑ tɑm ko.
\q1
\v 14 Kon nɛn tɔmbu Isirelibɑ yɑkiɑ yorun di.
\q1 Kpɑ bu wure bu wuu si su rɑɑ bɑnsu kuɑ seeyɑ
\q1 bu sinɑ mi.
\q1 Bɑ koo resɛmbɑ duure,
\q1 kpɑ bu yen tɑm nɔ.
\q1 Bɑ koo dɑ̃ɑ ɡbɑɑnu ko,
\q1 kpɑ bu yen mɑrum di.
\q1
\v 15 Kon den bu ɡirɑwɑ n sire dim dim nɡe dɑ̃ɑ,
\q1 bɑ n wɑ̃ɑ ben temɔ mɛ nɑ bu wɛ̃ mi.
\q1 Goo kun mɑɑ bu wukɑmɔ mɛ sɔɔn di.
\q1 Nɛ, Yinni Gusunɔwɑ nɑ yeni ɡeruɑ.