\id 1TH 
\ide UTF-8
\h Tɛsɑlonikɑ I
\mt1 TIRE GBIIKII TE PƆLU
\mt1 U TƐSALONIKAGIBU KUA
\ip Sɑnɑm mɛ Pɔlu u tire te yoruɑ, Tɛsɑlonikɑ yɑ sɑ̃ɑwɑ berɑ ye bɑ mɔ̀ Mɑsedɔnin wuu mɑro ɡe Romuɡibu bɑ mɔ. Gisɔ Tɛsɑlonikɑ ye, yɑ sɑ̃ɑwɑ Gɛrɛkibɑn wuu mɑro yiruse sɔ̃ɔ yɛ̃sɑn nɔm ɡeuɔ. Miyɑ ɡoo nimkusu su rɑ yɔ̃re. Pɔluwɑ u kɑ Lɑbɑɑri ɡeɑ dɑ mi, Gɔrobun Kookoosu 17:10-11. Amɛn biru Yuubɑ bɑ nisinu seewɑ ye bɑ wɑ tɔn tukobu bɑ nɑɑnɛ dokemɔ. Yen wɑhɑlɑ yɑ derɑ Pɔlu u doonɑ Tɛsɑlonikɑn di u dɑ Bereɔ. Yen biruwɑ u Tɛsɑlonikɑɡibun lɑbɑɑri nuɑ sɑɑ win bɔ̃ɔ Timɔten min di, yerɑ u tire te yoruɑ u kɑ bu tɑ̃sisiɑ.
\is1 Tire ten kpunɑɑ
\iq1 1. Tɔbiribu, wiru 1:1.
\iq1 2. Siɑrɑbu, wiru 1:2-10.
\iq1 3. Pɔlun sɔmburu Tɛsɑlonikɑɔ, wiru 2:1n di sere wiru 3:13.
\iq1 4. Kirɔbɑ, wiru 4:1-12.
\iq1 5. Yesun wurɑmɑrun ɡɑri, wiru 4:13n di sere wiru 5:11.
\iq1 6. Tɔbiribu kɑ kirɔ dɑ̃ɑki, wiru 5:12-28.
\ie
\c 1
\s1 Tɔbiribu
\p
\v 1 Bɛɛ Yesun yiɡbɛruɡibu, bɛɛ be i wɑ̃ɑ Tɛsɑlonikɑɔ, bɛɛ be i sɑ̃ɑ Gusunɔ Bɑɑbɑ kɑ Yinni Yesu Kirisiɡibu, nɛ Pɔlu kɑ Silɑsi kɑ Timɔte sɑ bɛɛ tɔburɑ. Durom kɑ ɑlɑfiɑ yɑ n kɑ bɛɛ wɑ̃ɑ.
\s1 Tɛsɑlonikɑɡibun wɑ̃ɑru
\s2 kɑ ben nɑɑnɛ dokebu
\p
\v 2 Sɑ rɑ n Gusunɔ siɑrɑmɔ bɛɛ kpuron sɔ̃, sɑ rɑ n mɑɑ bɛɛ yɑɑye bɑɑdommɑ kɑnɑru sɔɔ. 
\v 3 Sɑ yɑɑyɑ Gusunɔ bɛsɛn Bɑɑbɑn wuswɑɑɔ nɡe mɛ i kɑ bɛɛn nɑɑnɛ dokebu hɑniɑ mɔ̀, kɑ nɡe mɛ bɛɛn kĩrɑ sɔ̃ɔsirɑmɔ bɛɛn sɔm dɑmɡinu sɔɔ, kɑ nɡe mɛ bɛɛn yĩiyɔbu bɛsɛn Yinni Yesu Kirisi sɔɔ bu yɔ̃ dim dim. 
\v 4 Bɛsɛɡibu, bɛɛ be Gusunɔ u kĩ, sɑ yɛ̃ mɑ u bɛɛ ɡɔsɑ wiɡibu. 
\v 5 Domi bɛsɛn Lɑbɑɑri ɡeɑ yɑ ǹ nɛ bɛɛn mi kɑ ɡɑri tɔnɑ, kɑ mɑɑ yen dɑmɑ yɑ kɑ nɑ kɑ Hunde Dɛɛro sɑnnu kɑ mɑɑ sikɑ sɑriru. Bɛɛn tii i yɛ̃ nɡe mɛ sɑ sĩisinɑ bɛɛn suunu sɔɔ bɛɛn ɑrufɑɑnin sɔ̃. 
\v 6 Mɑ i kuɑ be bɑ bɛsɛn dɑɑ kɑ Yinniɡiɑ sɑɑrimɔ, domi i bɛsɛn Lɑbɑɑri ɡeɑ mwɑ kɑ nuku doo bi Hunde Dɛɛro bɛɛ wɛ̃, bɑɑ mɛ yɑ kɑ bɛɛ nɔni swɑ̃ɑru nɑɑwɑ. 
\v 7 Yen biru bɛɛn tii i kuɑ bèn dɑɑ Mɑsedɔnin nɑɑnɛ dokeobu kɑ Gɛrɛkibɑ bɑ sɑɑrimɔ. 
\v 8 Domi Yinnin ɡɑri yi, yi nɔɔrɑ sɑɑ bɛɛn min di, n ǹ mɔ Mɑsedɔni kɑ Gɛrɛkibɑn tem sɔɔ tɔnɑ, ɑdɑmɑ bɛɛn nɑɑnɛ dokebu Gusunɔ sɔɔ bu sɔ̃ɔsirɑ yɑm kpuro sere n ǹ mɑɑ tilɑsi su bin ɡɑri ɡere. 
\v 9 Bɑ ɡerumɔ nɡe mɛ i sun nɛnusinɑ ye sɑ dɑ bɛɛn mi, kɑ nɡe mɛ i ɡɔ̃ru ɡɔsiɑ i bũu sɑ̃ɑru deri i wurɑ Gusunɔn mi i kɑ nùn sɑ̃, wi u sɑ̃ɑ Yinni wɑso kɑ ɡemɡii, 
\v 10 kɑ mɑɑ nɡe mɛ i win Bii wi u seeyɑ ɡɔrin di swɑɑ dɑki u nɑ wɔllun di. Wiyɑ Yesu, wi u sun yɑkiɑ sɑɑ Gusunɔn mɔru ye yɑ sisin di.
\c 2
\s1 Sɔmbu te Pɔlu kuɑ
\s2 Tɛsɑlonikɑɔ
\p
\v 1 Nɛɡibu, bɛɛn tii i yɛ̃ mɑ bɛsɛn nɑɑru bɛɛn mi tɑ ǹ kue kɑm. 
\v 2 I yɛ̃ mɑ bɑ sun nɔni sɔ̃ɔwɑ bɑ sun tɔ̃yɑ kuɑ Filipiɔ sɑ sere nɑ bɛɛn mi. Kɑ mɛ, Gusunɔ sun wɔruɡɔru wɛ̃ sɑ kɑ win Lɑbɑɑri ɡeɑ kpɑrɑ bɛɛn suunu sɔɔ, bɑɑ mɛ tɔn dɑbirɑ sun yinɑri. 
\v 3 Bɛsɛn wɑɑsu yɑ ǹ sɑ̃ɑ torɑrun ɡɑri, yɑ ǹ mɑɑ mɛnnɛ kɑ bwisiku kɔ̃sunu ɡɑnu ǹ kun mɛ kɑ tɑki. 
\v 4 Adɑmɑ, nɡe mɛ Gusunɔ sun nɑɑnɛ kuɑ u kɑ sun Lɑbɑɑri ɡeɑ nɔmu sɔndiɑ, nɡe mɛyɑ sɑ kɑ ye kpɑrɑmɔ. Sɑ ǹ ye mɔ̀ nɡe mɛ yɑ koo kɑ tɔmbu dore mɑ n kun mɔ Gusunɔ wi u bɛsɛn ɡɔ̃rusu wɛ̃ɛrimɔ. 
\v 5 Domi bɛɛn tii i yɛ̃ sɑ̃ɑ sɑ̃ɑ mɑ sɑ ǹ bɛɛ kɔkurɑ kɑ ɡɑri dure, sɑ ǹ mɑɑ wɑɑsu kue su kɑ bɛɛn ɡobi wɑn sɔ̃. Gusunɔwɑ sɑ̃ɑ bɛsɛn seedɑ. 
\v 6 Sɑ ǹ mɑɑ bɛɛrɛ kɑsu bɛɛn mi ǹ kun mɛ ɡɑbun mi, 
\v 7 bɑɑ mɛ sɑ ko rɑɑ kpĩ su bɛɛ bɛsɛn dɑm sɔ̃ɔsi yèn sɔ̃ sɑ sɑ̃ɑ Kirisin ɡɔrobu. Adɑmɑ sɑ kuɑwɑ kpurɛ kpurɛ bɛɛn suunu sɔɔ nɡe mɛ bii mɛro rɑ win bibu nɔɔri. 
\v 8 Yèn sɔ̃ sɑ bɛɛ kĩ ɡem ɡem sɑ rɑɑ sɔɔru sɑ̃ɑ, n ǹ mɔ su kɑ bɛɛ Gusunɔn Lɑbɑɑri ɡeɑ wɛ̃ tɔnɑ, ɑdɑmɑ kɑ mɑɑ bɛsɛn tiin wɑ̃ɑru, domi bɛɛn kĩrɑ sun nɛni. 
\v 9 Bɛsɛɡibu, i bɛsɛn sɔmburu kɑ bɛsɛn wɑhɑlɑ yɑɑye ye sɑ wɑ. Sɑ sɔmburu kuɑ sɔ̃ɔ sɔɔ kɑ wɔ̃kuru yèn sɔ̃ sɑ ǹ kĩ su bɛɛn ɡoo ɡɔnɡɛrɛ ko sɑnɑm mɛ sɑ Gusunɔn Lɑbɑɑri ɡeɑ kpɑrɑmɔ bɛɛn suunu sɔɔ.
\p
\v 10 Bɛɛyɑ i sɑ̃ɑ bɛsɛn seedɑɡibu kɑ mɑɑ Gusunɔn tii, mɑ bɛsɛn dɑɑ yɑ dɛɛre bɛɛ nɑɑnɛ dokeobun wuswɑɑɔ, yɑ mɑɑ sɑ̃ɑ dee dee, yɑ ǹ tɑɑrɛ ɡɑɑ mɔ. 
\v 11 I mɑɑ yɛ̃ mɑ sɑ kɑ bɛɛ kuɑwɑ nɡe mɛ tundo u rɑ kɑ win bibu ko. 
\v 12 Sɑ bɛɛ dɑm kɑ̃, sɑ mɑɑ bɛɛn ɡɔ̃rusu yɛmiɑsiɑ, sɑ mɑɑ bɛɛ suuru kɑnɑ i n kɑ sĩimɔ nɡe mɛ n weenɛ Gusunɔn wuswɑɑɔ, wi u bɛɛ sokumɔ i n kɑ bɔnu mɔ win yiiko sɔɔ mi u bɑndu swĩi.
\p
\v 13 Sɑ rɑ mɑɑ Gusunɔ siɑre bɑɑdommɑ yèn sɔ̃ sɑnɑm mɛ sɑ bɛɛ wɑɑsu kuɑ i ǹ ɡɑri yi ɡɑrisi tɔnuɡii, i yi wurɑwɑ mɑ yi sɑ̃ɑ Gusunɔɡii. Mɛyɑ yi sɑ̃ɑ kɑ ɡem, mɑ yi sɔmburu mɔ̀ bɛɛ nɑɑnɛ dokeobu sɔɔ. 
\v 14 Nɛɡibu, i kɑ Yesu Kirisin yiɡbɛnu weenɑ ni nu sɑ̃ɑ Gusunɔɡinu Yudeɑɔ, domi i nɔni swɑ̃ɑru wɑ sɑɑ bɛɛn temɡibun min di nɡe mɛ tɔn ben tii bɑ wɑ Yuubɑn min di. 
\v 15 Yuu beyɑ bɑ Yinni Yesu kɑ Gusunɔn sɔmɔbu ɡo, bɑ mɑɑ sun nɔni sɔ̃ɔwɑ. Ben dɑɑ kun Gusunɔ wɛ̃re, bɑ mɑɑ kɑ tɔmbu kpuro yibɛrɛ tɛɛru nɛni. 
\v 16 Bɑ mɑm yinɑmɔ su tɔn tukobu wɑɑsu kuɑ bu kɑ fɑɑbɑ wɑ. Nɡe mɛyɑ ben durum yɑ sosimɔ yɑ bɑndɑmɔ. Adɑmɑ Gusunɔn mɔru yɑ den sɑkɛ fuke ben wirɔ.
\s1 Pɔlu u kĩ u kpɑm
\s2 Tɛsɑlonikɑɡibu wɑ
\p
\v 17 Nɛɡibu, nɡe mɛ sɑ bɛɛ biɑ sɔ̃ɔ yiru wɑsi sɔɔ, n ǹ mɔ ɡɔ̃ru sɔɔ, sɑ bɛɛn bɛkɛ mɔ̀ ɡem ɡem sɑ sɛnde su kɑ bɛɛ wɑ. 
\v 18 Sɑ kĩɑ su wurɑmɑ bɛɛn mi. Nɛ Pɔlu nɑ kɑsu nɡe nɔn yiru n kɑ nɑ, ɑdɑmɑ Setɑm sun swɑɑ ɡɑnuɑ. 
\v 19 Dɔmɑ te Yinni Yesu koo wurɑmɑ, mbɑ n ko n sɑ̃ɑ bɛsɛn yĩiyɔbu kɑ bɛsɛn nuku dobu, mbɑ sɑ ko mɑɑ kɑ woo kɑnɑ win wuswɑɑɔ mɑ n kun bɛɛ. 
\v 20 Geemɑ, bɛɛn sɔ̃nɑ sɑ woo kɑnɑmɔ, sɑ mɑɑ nuku dobu mɔ.
\c 3
\p
\v 1 Yen sɔ̃, sɑnɑm mɛ bɛsɛn bwɛ̃rɑ yinɑ yu kpunɑ, sɑ ɡɔ̃ru doke mɑ nɛ nɑ kon sinɑ Atɛniɔ nɛ turo. 
\v 2 Mɑ nɑ bɛsɛɡii Timɔte ɡɔrɑ wi u sɑ̃ɑ Gusunɔn sɔm kowo Kirisin Lɑbɑɑri ɡeɑn sɔ̃. Nɑ nùn ɡɔrɑ bɛɛn mi u kɑ bɛɛ tɑ̃sisiɑ, kpɑ u bɛɛ dɑm kɛ̃ bɛɛn nɑɑnɛ dokebu sɔɔ, 
\v 3 kpɑ bɑɑ bɛɛn turo u ku de nɔni swɑ̃ɑ teni tu nùn nɑndɑ. Domi bɛɛn tii i yɛ̃ mɑ yeni yɑ ǹ koo ko yɑ kun sun deemɛ. 
\v 4 Bɑɑ sɑnɑm mɛ sɑ rɑɑ wɑ̃ɑ kɑ bɛɛ, sɑ bɛɛ sɔ̃ɔwɑ kɔ mɑ bɑ koo sun nɔni sɔ̃. Mɛyɑ n mɑɑ koorɑ nɡe mɛ i yɛ̃ sɑ̃ɑ sɑ̃ɑ. 
\v 5 Yen sɔ̃nɑ, sɑnɑm mɛ nɛn bwɛ̃rɑ yinɑ yu kpunɑ, nɑ Timɔte ɡɔrɑ bɛɛn mi kpɑ n kɑ ɡiɑ mɛ bɛɛn nɑɑnɛ dokebu sɑ̃ɑ. Nɑ bɛrum kuɑ kɔkuro kun dɑ bɛɛ kɔkurɑ i kɑ durum ko, kpɑ bɛsɛn sɔmburu tɑ n kue kɑm.
\p
\v 6 Adɑmɑ tɛ̃, ye Timɔte u wurɑmɑ bɛɛn min di, u sun bɛɛn nɑɑnɛ dokebu kɑ bɛɛn kĩrun bɑɑru ɡeɑ sɔ̃ɔwɑ. U sun sɔ̃ɔwɑ mɑ i rɑ n sun yɑɑye kɑ kĩru mɑ i kĩ i sun wɑ ɡem ɡem nɡe mɛ bɛsɛn tii sɑ kĩ su bɛɛ wɑ. 
\v 7 Yen sɔ̃nɑ nɛɡibu, bɑɑ mɛ sɑ nɔni swɑ̃ɑru wɑ kɑ wɑhɑlɑ kpuro, bɛsɛn nukurɑ yɛmiɑ kɑ bɛɛ bɛɛn nɑɑnɛ dokebun sɔ̃. 
\v 8 Tɛ̃, bɛsɛn hunde yɑ wurɑmɑ yèn sɔ̃ i yɔ̃ dim dim Yinni sɔɔ. 
\v 9 Amɔnɑ sɑ ko Gusunɔ siɑrɑ n nɛ bɛɛn sɔ̃, kɑ nuku doo bɑkɑ bi i sun wɛ̃ɛmɔ Gusunɔ bɛsɛn Yinnin wuswɑɑɔ. 
\v 10 Bururu kɑ yokɑ sɑ nùn kɑnɑmɔ ɡem ɡem u de su bɛɛ wɑ kpɑm kɑ nɔni, kpɑ su sosi ye n kɔmiɑ bɛɛn nɑɑnɛ dokebu sɔɔ.
\p
\v 11 Kpɑ Gusunɔ bɛsɛn Bɑɑbɑn tii kɑ bɛsɛn Yinni Yesu Kirisi bu sun swɑɑ kuɑ su kɑ nɑ bɛɛn mi. 
\v 12 Kpɑ wi, Yinni u bɛɛn kĩru sosi tu kpɛ̃ɑ bɛɛn tii tiinɛ sɔɔ kɑ mɑɑ tɔmbu kpuron mi nɡe mɛ bɛsɛn kĩrɑ sɑ̃ɑ bɛɛ sɔɔ. 
\v 13 Kpɑ u bɛɛn ɡɔ̃rusu tɑ̃sisiɑ su kɑ dɛɛrɑ su ko tɑɑrɛ sɑriruɡisu Gusunɔ bɛsɛn Bɑɑbɑn wuswɑɑɔ, sɑnɑm mɛ bɛsɛn Yinni Yesu koo wurɑmɑ kɑ wiɡibu kpuro.
\c 4
\s1 Kookoo si su Gusunɔ wɛ̃re
\p
\v 1 Ye n tie nɛɡibu, i ɡiɑ bɛsɛn min di mɛ n weenɛ i n sĩimɔ n kɑ Gusunɔ wɛ̃re, i mɑɑ mɔ̀ mɛ kɔ. Tɛ̃ sɑ yiire sɑ bɛɛ kɑnɑmɔ kɑ Yinni Yesun yĩsiru, i n mɔ̀ mɛ i n dɔɔ. 
\v 2 Domi i yɛ̃ yiire bi sɑ bɛɛ wɛ̃ kɑ Yinni Yesun yiiko. 
\v 3 Wee, ye Gusunɔ u kĩ bɛɛ sɔɔ, yerɑ i n dɛɛre kpɑ i tii kpĩ mɑm mɑm sɑkɑrɑrun kobu sɔɔ. 
\v 4 Kpɑ durɔ bɑɑwure u n yɛ̃ nɡe mɛ wi kɑ win kurɔ bɑ ko n wɑ̃ɑsinɛ dɛɛrɑru kɑ bɛɛrɛ sɔɔ, 
\v 5 n ǹ mɑɑ mɔ kɑ wɑsin binɛn kĩru nɡe mɛ tɔn tukobu bɑ mɔ̀ be bɑ kun Gusunɔ yɛ̃. 
\v 6 Gɑri yini sɔɔ, n ǹ weenɛ ɡoo u win kpɑɑsi torɑri ǹ kun mɛ u nùn tɑki di. Sɑ bɛɛ yenin kirɔ kuɑ kɔ, sɑ bɛɛ sɔ̃ɔwɑ mɑ Yinniwɑ u koo yen mɔru kɔsiɑ. 
\v 7 Domi Gusunɔ kun sun sokɑ su kɑ dɑɑ disinuɡiɑ ko mɑ n kun mɔ sɑ n dɛɛre. 
\v 8 Yen sɔ̃, bɑɑwure wi u sɔ̃ɔsi te yinɑ, n ǹ tɔnun ɡere u yinɑ, Gusunɔn ɡerewɑ u yinɑ wi u bɛɛ win Hunde Dɛɛro kɑ̃.
\p
\v 9 Ye n sɑ̃ɑ nɑɑnɛ dokeobun kĩɑnɑɑ, n ǹ tilɑsi n kɑ bɛɛ ye yoruɑ. Domi Gusunɔ u bɛɛ sɔ̃ɔsi nɡe mɛ n weenɛ i n kĩɑnɛ bɛɛn tii tiinɛ sɔɔ. 
\v 10 Geemɑ, i mɔ̀ mɛ kɑ nɑɑnɛ dokeobu kpuro be bɑ wɑ̃ɑ Mɑsedɔniɔ. Adɑmɑ nɛɡibu, sɑ bɛɛ kɑnɑmɔ, i n mɔ̀ mɛ i n dɔɔ. 
\v 11 I kookɑri koowo i n kɑ nɔɔ tiɑ sɑ̃ɑ, kpɑ i n bɛɛn tiin wunɑnɔsu mɔ̀, i n sɔmburu mɔ̀ nɡe mɛ sɑ rɑɑ bɛɛ yiire. 
\v 12 Nɡe mɛyɑ bɛɛn kookoosu su ko n wɑ̃ be bɑ kun nɑɑnɛ doken mi, kpɑ i kun mɑɑ ɡɑ̃ɑnu ɡɑnun yɑ̃ɑru mɔ.
\s1 Yinnin nɑɑru
\p
\v 13 Nɛɡibu, sɑ kĩ i ɡem ɡiɑ be bɑ ɡun sɔ̃, kpɑ i kun nuki sɑnkire nɡe be bɑ tie be bɑ kun yĩiyɔbu mɔ. 
\v 14 Sɑ nɑɑnɛ doke mɑ Yesu u ɡu, mɑ u kpɑm seewɑ ɡɔrin di. Yen sɔ̃, sɑ nɑɑnɛ sɑ̃ɑ mɑ, be bɑ Yesu nɑɑnɛ doke bɑ kɑ ɡu, Gusunɔ u koo kɑ bu wurɑmɑ kɑ wi sɑnnu.
\p
\v 15 Yeniwɑ Yinnin sɔ̃ɔsi bi sɑ bɛɛ sɔ̃ɔmɔ. Bɛsɛ be sɑ ko n wɑ̃ɑ dɔmɑ te Yinni u koo nɑ, sɑ ǹ ko ɡɔribu ɡbiiyɑ. 
\v 16 Domi u koo de ɡbɑ̃rɑbu bu nɔɔrɑ kɑ Gusunɔn ɡɔrɑdo wiruɡiin nɔɔɡiru kɑ win kɔbɑn wurenu, kpɑ Yinnin tii u sɑrɑmɑ sɑɑ wɔllun di. Wiɡii be bɑ ɡu bɑ koo ɡbi bu se. 
\v 17 Yen biru bɛsɛ be sɑ tie sɑ wɑsi, bɑ koo sun suɑ kɑ be sɑnnu ɡuru winu sɔɔ, kpɑ su kɑ nùn yinnɑ wom dirum sɔɔ. Mɛyɑ sɑ ko n wɑ̃ɑ kɑ wi sɑnnu kɑ bɑɑdommɑ. 
\v 18 Yen sɔ̃, i de i dɑm kɛ̃ɛnɑ kɑ ɡɑri yini.
\c 5
\p
\v 1 Nɛɡibu, n ǹ tilɑsi su kɑ bɛɛ tɔ̃ru kɑ sɑnɑm yoruɑ mɛ̀ sɔɔ yɑbu yeni yɑ koo koorɑ. 
\v 2 Domi bɛɛn tii i yɛ̃ ɡem kɑ ɡem mɑ Yinnin tɔ̃ru tɑ koo nɑwɑ nɡe ɡbɛnɔ wi u sisi wɔ̃kuru. 
\v 3 Sɑnɑm mɛ tɔmbɑ kun kɑ ɡɛɛ nɑnde bɑ mɔ̀, ɑlɑfiɑ wɑ̃ɑ, sɑɑ yerɑ kpeerɑsiɑbu koo tunumɑ suɑru sɔɔ nɡe mɛ mɑru wuriribu bu rɑ ɡurɑɡii deemɛ, bɑ ǹ mɑɑ kpiki yeru wɑsi. 
\v 4 Adɑmɑ bɛɛ nɛɡibu, i ǹ wɑ̃ɑ yɑm wɔ̃kuru sɔɔ, n ǹ mɑɑ weenɛ sɑnɑm mɛ, mu bɛɛ biti mwɑ nɡe ɡbɛnɔn nɑɑru. 
\v 5 Bɛɛ kpurowɑ i sɑ̃ɑ yɑm bururɑm tɔmbu kɑ mɑɑ sɔ̃ɔ sɔɔɡibu. Sɑ ǹ sɑ̃ɑ wɔ̃kuruɡibu be bɑ wɑ̃ɑ yɑm wɔ̃kuru sɔɔ. 
\v 6 Yen sɔ̃, su ku dweeyɑ nɡe be bɑ tie, ɑdɑmɑ n weenɛ su se su yɔ̃rɑ sɑ n kɑ tii sɛ. 
\v 7 Wɔ̃kurɑ tɔmbu bɑ rɑ dweeye, wɔ̃kurɑ tɑm nɔrobu bɑ rɑ mɑɑ tɑm nɔ. 
\v 8 Adɑmɑ bɛsɛ be sɑ sɑ̃ɑ sɔ̃ɔ sɔɔɡibu, n weenɛ sɑ n tii sɛ. Su nɑɑnɛ dokebu kɑ kĩru sebe nɡe tɑrɑkpe, su mɑɑ fɑɑbɑn yĩiyɔbu doke nɡe sii furɔ kɔkɔru. 
\v 9 Domi Gusunɔ u ǹ sun sokɑ su kɑ win mɔru wɑ, u sun sokɑwɑ su kɑ fɑɑbɑ wɑ sɑɑ bɛsɛn Yinni Yesu Kirisin min di 
\v 10 wi u ɡu bɛsɛn sɔ̃, kpɑ sɑ n wɑ̃ɑru dimɔ kɑ wi sɑnnu, sɑ̀ n wɑ̃ɑ hunde sɔɔ ǹ kun mɛ bɑɑ sɑ̀ n ɡu. 
\v 11 Yen sɔ̃, i n dɑm kɛ̃ɛnɑmɔ kpɑ i n tɑ̃sisiɑnɑmɔ nɡe mɛ i mɔ̀ tɛ̃.
\s1 Tɔbiribu kɑ kirɔ dɑ̃ɑki
\p
\v 12 Sɑ mɑɑ bɛɛ kɑnɑmɔ nɛɡibu, i bu bɛɛrɛ wɛ̃ɛyɔ be bɑ sɔmburu mɔ̀ ɡem ɡem bɛɛn suunu sɔɔ, be Yinni u derɑ bɑ bɛɛ kpɑrɑmɔ mɑ bɑ bɛɛ swɑɑ sɔ̃ɔsimɔ. 
\v 13 I n ben kĩru mɔ tɑ n kpɑ̃ kɑ bɛɛrɛ ben sɔmburun sɔ̃. I de i n nɔɔ tiɑ sɑ̃ɑ bɛɛn tii tiinɛ sɔɔ.
\p
\v 14 Sɑ bɛɛ kɑnɑmɔ nɛɡibu, i mɛm nɔɔ sɑriruɡibu kirɔ koowo. I bu dɑm kɛ̃ɛyɔ be bɑ mwiɑ kpɑnɛ. I dɑm sɑriruɡibu somiɔ. I kɑ tɔmbu kpuro tɛmɑnɔ. 
\v 15 I lɑɑkɑri koowo i ku de ɡoo u win beruse kɔ̃sɑ kɔsiɑ, ɑdɑmɑ i n ɡeɑ kuɑnɑmmɛ kɑ mɑɑ be bɑ tie kpuro.
\p
\v 16 I n nuku dobu mɔ sɑnɑm bɑɑmɛre sɔɔ. 
\v 17 I n dɑ n kɑnɑru mɔ̀ sɑɑ bɑɑyere. 
\v 18 I n siɑrɑmɔ bɑɑ ǹ n mɛren nɑ. Yeniwɑ Gusunɔ u kĩ i ko bɛɛ kɑ Yesu Kirisin wɑ̃ɑsinɑɑ sɔɔ.
\p
\v 19 I ku Hunde Dɛɛro yinɑri u sɔmburu ko bɛɛ sɔɔ. 
\v 20 I ku Gusunɔn sɔmɔbun ɡɑri ɡɛm. 
\v 21 Adɑmɑ i ɡɑ̃ɑnu kpuro wɛ̃ɛrio kpɑ i nɛnɛ ni nu sɑ̃ɑ ɡem. 
\v 22 I tii nɛnuɔ kɔ̃sɑ bɑɑyeren di.
\p
\v 23 Kpɑ Gusunɔ, Yinni wi u rɑ ɑlɑfiɑ wɛ̃, u bɛɛ wunɑ i kɑ ko wiɡibu mɑm mɑm, kpɑ u bɛɛn hunde kɑ bɛɛn bwɛ̃rɑ kɑ bɛɛn wɑsi kpuro bere tɑɑrɛ sɑriru sɔɔ sere kɑ bɛsɛn Yinni Yesu Kirisin wurɑmɑrɔ. 
\v 24 Gusunɔ wi u bɛɛ sokɑ u nɑɑnɛ mɔ, u koo mɑɑ ye kpuro ko.
\p
\v 25 Nɛɡibu, i n sun kɑnɑru kuɑmmɛ.
\p
\v 26 I bɛsɛɡibu kpuro tɔbirio kɑ kĩru.
\p
\v 27 Nɑ bɛɛ yiiremɔ kɑ Yinnin yĩsiru, i bɛsɛɡibu kpuro tire teni ɡɑrio.
\p
\v 28 Kpɑ Yinni Yesu Kirisin durom mu n wɑ̃ɑ kɑ bɛɛ.