\id 2TH - Au NT [avt] -Papua New Guinea 1982 (DBL -2014) 
\h 2 TESALONAIKA 
\toc1 Tɨwei Pol Kewisɨk Ken Mɨt Ne Wit Tesalonaika - 2 
\toc2 2 Tesalonaika 
\toc3 2 Te 
\mt1 Tɨwei Pol Kewisɨk Ken Mɨt Ne Wit Tesalonaika - 2  
\imt1 Menmen me tɨwei ik  
\io1 Pol katɨp mɨt ne Tesalonaika gude \ior 1:1-2\ior*  
\io1 Maain God kakɨkepai hɨrak skelim mɨt kerek nerekyei menmen enum \ior 1:3-10\ior*  
\io1 Pol kitehi God kakɨkaap mɨt ne Tesalonaika \ior 1:11-12\ior*  
\io1 Hɨm me mɨtɨk enuk kekrehɨr ke God \ior 2:1-12\ior*  
\io1 God kehimɨtenai haiu mɨt nɨrak \ior 2:13-17\ior*  
\io1 Menmen mɨt ne weiwɨk me God hɨr enisesim \ior 3:1-15\ior*  
\io1 Po katɨp mɨt ne Tesalonaika hɨm mɨkaru \ior 3:16-18\ior*  
\c 1  
\p
\v 1 \x * \xo 1:1 \xt 1Te 1:1\x*Hi Pol hetike Silvenes, Timoti, haiu mewis tɨwei im men yi mɨt ne weiwɨk me God yeit wit Tesalonaika. Yi ne God Haai kaiu ketike Mɨtɨk Iuwe Jisas Krais.   
\p
\v 2 \x * \xo 1:2 \xt Ro 1:7\x*Haiu hanhan God Haai kaiu ketike Mɨtɨk Iuwe Jisas Krais han yaaik kɨrakɨt hɨrak kaku kaktikewi yi eiyu werek werek.   
\s1 Pol kitehi God katɨp hɨrak yaaik  
\p
\v 3 \x * \xo 1:3 \xt 1Te 1:2-3; 2Te 2:13\x*Naiu yinan, hekrit hekrit haiu mitehi God haiu metpɨwek haiu han yaaik meriuwerek mentar yi mɨt in. Menmen im yaaim mentar yi mɨt yises God wɨsenum, yi niutɨp niutɨp hanhanan wɨsenum.  
\v 4 \x * \xo 1:4 \xt 2Ko 7:4; 1Te 2:19; Rev 1:9\x*Te haiu hɨras mewenɨpi niuk mi haiu mewepyapɨrem men mɨt ne weiwɨk me God nerer wit wit. Haiu metpor menmen mɨt nerekyiyem enum. Menmen merekyi han enuk au. Yi yises God, te yi eiyu werek werek.   
\s1 Maain God han kitet menmen haiu mɨt mɨrɨakem  
\p
\v 5 \x * \xo 1:5 \xt Fl 1:28\x*Yi yau werek werek me menmen mɨt nerekyi enum meteiknai menmen im. God kewis mɨt hɨr ninɨni naanmɨpri hɨr nerekyi enum nentar yi yɨrɨak menmen mɨrak. Maain hɨrak kakteikɨn mɨt yapɨrwe werek werek hɨr enun, hɨrak kakre yaaik, te yi eiyu eitikerek hɨrak naanmɨpri.  
\v 6 \x * \xo 1:6 \xt Ro 12:19; Rev 18:6-7\x*Maain God kakrɨak menmen yaaim. Hɨrak kakɨwaank mɨt nɨpaa nerekyi enum nentar in ek hɨr neriwaank.  
\v 7 \x * \xo 1:7 \xt Mt 25:31; 1Te 3:13, 4:16\x*Maain God han kitet werek, te menmen enum mamrekyi yetikewai han enuk, hɨram mamnaaiwɨrai haiu mamu werek werek. Menmen im yapɨrwe mamnaiwɨrai me maain Mɨtɨk Iuwe Jisas kaktike mɨt nɨrak ensel nanɨnaiwɨr wit ke God, hɨr nanɨnen nanwepaypɨr hɨras nanɨkre si merhɨhe.  
\v 8 \x * \xo 1:8 \xt Sam 79:6; Ais 66:15; Jer 10:25; Ro 2:8; 1Pi 4:17\x*Hɨrak kakrɨak enum kakɨwaank mɨt kerek nɨnapen nanɨrtei God, o mɨt han kerek nɨnapen nises menmen Mɨtɨk Iuwe Jisas Krais ketpeiyem.  
\v 9 \x * \xo 1:9 \xt Ais 2:10, 19, 21\x*Mɨt nar ik hɨr nanɨt menmen enum mar im. Mɨtɨk Iuwe kakɨpɨri nanɨno nanɨnaaiwɨr ninaan mɨrak metike menmen mɨrak iuwe merhɨhe, hɨr nanɨwaank nanɨt tipmain tipmain enum eik.  
\v 10 \x * \xo 1:10 \xt Kl 3:4; 1Te 3:13\x*Maain menmen im mamnen me wɨ eim Krais hɨrak kaknen, te hɨrak kakɨt niuk iuwe me mɨt kerek nisesik. Hɨr nantike haiu mɨt haiu emwenɨpi niuk mɨrak. Te haiu mɨt miyapɨr kerek haiu misesik, haiu yapɨrwe han yaaik mamriuwerek. Yi mɨ yi eitikeri eirɨak menmen im me wɨ eim eiyɨntar haiu merp nɨmɨn ne yi mɨt haiu metpi hɨm me God, te yi yises hɨm im yaaim.   
\s1 Pol kitehi God kakɨkaap mɨt ne Tesalonaika han tokik nanu  
\p
\v 11 \x * \xo 1:11 \xt Kl 1:9; 1Te 1:2-3\x*Haiu han kitet menmen im te hekrit hekrit haiu mitehi God hɨrak kakɨkepi kakrekyi yi yaain te yi eirɨak menmen yaaim hɨrak kehimɨteni yi eirɨakem. Haiu hanhan hɨrak kakɨkepi yi eiyises menmen yapɨrwe yi hanhan eirɨakem meriuwe menmen mɨrak iuwe hɨrak kewetiyem.  
\v 12 \x * \xo 1:12 \xt Ais 24:15; Mal 1:11\x*Mar im mɨt hɨr nantɨp Mɨtɨk Iuwe Jisas hɨrak yaaik kakɨntar menmen yaaim hɨrak kerekyiyem kekre han ki, hɨrak kaktɨp yi yaain kakɨnterim. Menmen im mamnen mamɨntar God kaiu kaktike Mɨtɨk Iuwe Jisas Krais hanhanai tatkepai.   
\c 2  
\s1 Hɨm me mɨtɨk enuk kakɨkrehɨr ke God  
\p
\v 1 \x * \xo 2:1 \xt 1Te 4:13-17\x*Naiu yinan, in ek haiu hanhan metpi me Mɨtɨk Iuwe kaiu Jisas Krais pɨke kaknen, hɨrak kaktaihis kakɨriyei haiu mamno mamtikerek mamkiyan mamu.  
\v 2 Haiu mitihi yi ap yɨnaain yekre han ki waswas yentar yi yemtau Mɨtɨk Iuwe epei kan. Mɨtɨk hak ketpiyem, o mɨtɨk hak kewepyapɨr menmen hɨrak han kitet God Hɨmɨn Yaaik ketpɨwekem, o mɨtɨk kewis tɨwei kekinaam katɨp haiu mewisiyem. Menmen im au emɨt.  
\v 3 \x * \xo 2:3 \xt 1Ti 4:1; 1Jo 2:18, 4:3; Jo 17:12\x*Yi ap eiwis mɨt hɨr nanwisesiyek nanriuwe hɨm o tɨwei o menmen meiyam mɨt natɨp haiu metpiyem au emɨt! Mɨtɨk Iuwe ap kaknen ere mɨt nerer wit wit hɨr naninɨn nanweikɨn sip nanwet God em, mɨtɨk enuk kises menmen enum keremem hɨrak kaknen kakwepyapɨr hɨrekes, hɨrak kakɨwaank kakɨkre si enum.  
\v 4 \x * \xo 2:4 \xt Dan 11:36; Esi 28:2\x*Hɨrak kakwis hɨrekes kakɨkrehɨr ke God kaktike menmen memipɨn kerek mɨt newenɨpiyem. Hɨrak kaku kakɨkre wɨnak iuwe ke God hɨrak kaktɨp mɨt hɨrekes God. Menmen im epei au, hɨrak Mɨtɨk Iuwe Jisas kaknen.   
\p
\v 5 Yi ap han ekitetim au a? Nɨpaa hi hepu hetikewi hi hetpiyem.  
\v 6 In ek yi yertei menmen mewenek te hɨrak ap kinɨn kewepyapɨr hɨrekes au, ere wɨ God kehimɨtanek.  
\v 7 Menmen enum mɨtɨk enuk kakrɨakem epei man kike, te maain iuwe, te hɨrak hɨrekes kaknen au ere menmen mewenek hɨrekes kaknaiwɨrek kakno.  
\v 8 \x * \xo 2:8 \xt Jop 4:9; Ais 11:4; Rev 19:15\x*Epei au, hɨrak mɨtɨk enuk kises menmen enum kakwepyapɨr hɨrekes. Mɨtɨk Iuwe kakɨkɨp kakriuwe nap me hɨm mɨrak, hɨrak Jisas kaknen kakwepyapɨr hɨrekes kaknip mɨtɨk enuk ik hɨrak weinɨk kerekek.  
\v 9 \x * \xo 2:9 \xt Mt 24:24; Rev 13:11-13\x*Hɨrak mɨtɨk enuk kises menmen enum kaknen kakriuwe hɨm me Seten, hɨrak kakrɨak menmen yaaim mirakel kakmipɨn mɨt ap nises hɨm me God. Hɨrak kakrɨak menmen mamnip mɨt nanpɨrpɨr nanɨrem.  
\v 10 Hɨrak kakmipɨn mɨt kakriuwe menmen enum iuwe me Seten. Nɨpaa mɨt in hɨr ap nises God au. Maain hɨr nanwɨwaank nanɨt. Hɨrak kemitorpɨn enum enum kakɨntar hɨr nɨnapen nanises hɨm yaaim hanhan neriuwerem, te hɨram mamkepi hɨr nanu werek werek.  
\v 11 \x * \xo 2:11 \xt 2Ti 4:4\x*Te God kaksiuwe menmen mamitorpɨn, hɨrak kaknipi nanises menmen memipɨn,  
\v 12 te mɨt yapɨrwe niutɨp niutɨp nanɨt menmen enum me God nanɨntar hɨr hanhan menmen enum, nɨnapen nanises hɨm mɨrak.   
\s1 God kehimɨteni yi nɨkerek nɨrak  
\p
\v 13 \x * \xo 2:13 \xt 2Te 1:3; Jo 15:16; Ef 1:4; 1Te 4:7, 5:9\x*Naiu yinan kerek God hanhani, hekrit hekrit haiu mitehi God haiu matɨp hɨrak yaaik kentar yi mɨt. Hɨrak kinɨn kehimɨteni yi nɨrak, hɨrak kekepi yi yɨrɨak menmen yaaim yeriuwe menmen iuwe me God Hɨmɨn Yaaik, te yi yises hɨm mɨrak.  
\v 14 God kehimɨteni me menmen im meriuwe hɨm mɨrak yaaim yi yisesim nɨpaa me wɨ haiu metpiyem. Te yi yayɨt menmen yaaim iuwe me Mɨtɨk Iuwe Jisas Krais.  
\v 15 Naiu yinan, yi han tokik eiyu eiyises hɨm nɨpaa haiu metpiyem meriuwe hɨm mai metike tɨwei haiu mewisiyek.  
\v 16 Haiu hanhan Mɨtɨk Iuwe Jisas Krais hɨrekes ketike Haai kaiu God kerek nɨpaa hɨrakɨt hanhanai hɨrakɨt tekepai tewetai nemɨnk (o hɨpɨn). Te haiu han yaaik emɨmeriyɨwek kaknen kaktaihis,  
\v 17 \x * \xo 2:17 \xt 1Te 3:13\x*hɨrak ektenyi han ki te yi eiyu tokik hɨrak kakɨkepi yi eirɨak menmen yaaim miutɨp miutɨp, yi eitɨp menmen yaaim.   
\c 3  
\s1 Yi eitehi God hɨrak kakɨkaap haiu mɨt  
\p
\v 1 \x * \xo 3:1 \xt 1Te 5:25\x*In ek naiu yinan, yi eiyitehi God ke haiu mɨt, te hɨm me Mɨtɨk Iuwe wen emno waswas emrer wit wit te mɨt nanɨmtewem nanisesim nar ke nɨpaa yi mɨt yisesim.  
\v 2 Yi eiyitɨwekhi te hɨrak kakɨriyei haiu mamnaaiwɨr mɨt enun nepan nɨrɨak enum, yentar mɨt yapɨrwe niutɨp niutɨp ap nises God.   
\p
\v 3 \x * \xo 3:3 \xt 1Te 5:24\x*Te Mɨtɨk Iuwe hɨrak yaaik kakises hɨm mɨrak. Yi yertei hɨrak kakɨkepi yi han tokik eiyu hɨrak naanmɨpri ke Seten.  
\v 4 \x * \xo 3:4 \xt 2Ko 7:16; Ga 5:10; 1Te 4:10\x*Mɨtɨk Iuwe kakrekyei han kaiu tokik me yi mɨt, yi wen yɨrɨak menmen haiu nepei metpiyem, te maain yi wen eirɨakem.   
\p
\v 5 Haiu hanhan Mɨtɨk Iuwe kakri han ki te yi eiyɨrtei God hanhan yi mɨt, yi han ekitet nɨpaa menmen enum enum man Krais hɨrak han tokik kepu, te yi eirɨak menmen mar im.   
\s1 Yi mɨt eiyu yain yain au emɨt  
\p
\v 6 \x * \xo 3:6 \xt Mt 18:17; Ro 16:17\x*In ek naiu yinan, haiu metpi hɨm manp mekrehɨr me Mɨtɨk Iuwe Jisas Krais. Keimɨn ke yi mɨt kerek hɨrak kau yain yain ap kises hɨm nɨpaa haiu mewetiyem, yi einepɨn eikeipnɨwek.  
\v 7 \x * \xo 3:7 \xt Fl 3:17; 1Te 1:6\x*Yi eirɨak menmen im eiyɨntar yi hɨras yertei menmen yi eirɨakem te yi eirɨak menmen eiyɨr ke haiu nɨpaa mɨrɨakem. Nɨpaa haiu mau metikewi, haiu mau yain yain au.  
\v 8 \x * \xo 3:8 \xt 1Te 2:9\x*Haiu ap maam menmen me yi mɨt weinɨm au. Wɨtaan wanewik haiu mɨrɨak menmen iuwe, te haiu ap mari menmen mi mamɨm au. Kenmak haiu mɨrɨak menmen im?  
\v 9 \x * \xo 3:9 \xt 1Ko 9:4; 1Te 1:6\x*Haiu mɨrɨak menmen im mentar haiu ap te mamitihi menmen weinɨm a? Taauye! Haiu mɨrɨak menmen im mentar haiu hanhan meteikni menmen yi eirɨakem te yi eiyisɨsai.  
\v 10 \x * \xo 3:10 \xt 1Te 4:11\x*Nɨpaa haiu mau metikewi, haiu metpi hɨm manp mar im: “Keimɨn ap kɨrɨak menmen au, yi ap eiwetɨwek menmen hɨrak kakɨm au.”   
\p
\v 11 \x * \xo 3:11 \xt 1Ti 5:13\x*Haiu metpiyem mentar haiu memtau mɨt han ne yi mɨt hɨr nau yain yain nari hɨm me mɨt han natɨp mɨt han em natɨpan nisesan.  
\v 12 \x * \xo 3:12 \xt 1Te 4:11\x*In ek haiu matɨp mɨt nar ik hɨm manp metpor mekrehɨr ke Jisas Krais, hɨr han ekɨwei nanrɨak menmen nanɨt menmen me hɨras nanɨm. Mɨt han au.   
\p
\v 13 \x * \xo 3:13 \xt Ga 6:9\x*Yi naiu yinan han yi ap han enuk eiriuwe menmen yaaim yi yɨrɨakem au emɨt! Yi wen yairɨakem.  
\v 14 \x * \xo 3:14 \xt 1Ko 5:9, 11\x*Neimɨn nɨnapen nanises menmen haiu metpiyem mekre tɨwei ik e, yi eiyɨhimɨteni einaiwɨri, te hɨr yɨnk enuk.  
\v 15 \x * \xo 3:15 \xt 1Te 5:14\x*Yi han kitet hɨr nɨre mɨt ni enun nepan au. Yi eiyɨtpor eiyɨr ke ni yinan keriyen.   
\s1 Hɨm ham kike mɨkaru  
\p
\v 16 \x * \xo 3:16 \xt 1Te 5:23\x*Haiu hanhan Mɨtɨk Iuwe hɨrekes, hɨrak haai ke kakrɨak mɨt nanu werek werek, te hekrit hekrit menmen yaaim o enum mamnen, hɨrak kakrekyi yi eiyu werek werek. Mɨtɨk Iuwe kakɨkepi yi niutɨp niutɨp yi eiyu werek.   
\p
\v 17 \x * \xo 3:17 \xt 1Ko 16:21\x*Hi Pol hɨrekes ewis hɨm hetpi “gude” mau tɨwei heriuwe his mai. Hi heriuwe menmen im heteikni hi hewis tɨwei ik e. Mar keremem hi hewisɨm mau tɨwei yapɨrwe hi hewis mɨt ek.  
\v 18 Haiu hanhan Mɨtɨk Iuwe kaiu Jisas Krais han yaaik kɨrak kaku kaktikewi niutɨp niutɨp.   
\s1 Mepɨr Keremem