\id 2JN - Awiyaana NT [auy] -Papua New Guinea 1984 (web version -2012 bd) 
\h 2 Yóni 
\toc1 2 Yóni 
\toc2 2 Yóni 
\toc3 2Yn 
\mt1 2 Yóni  
\ip \it Ísu wíyómpaꞌa iyówana Yóni Ísuni kísau-waasi kaumbo-wááí-áátáíyáꞌíyo miyáumai-aatai maisuwéna maanááí agaimái tímakaiye. Tuwímbai sésa aaresáfé-áúfáí agaimái ámakaiye sewasá tuwímbai sésa Fasiꞌaénkóní waási mimbóráfáꞌá túwaandu úmaimo máépaꞌa agaimái tímakaiye wésewe.\it*  
\c 1  
\p
\v 1 Kemá Fasiꞌaénkóní waásiyaꞌa káráwiyaundawi  
\p éꞌa maanáúfáí agai-timúne. Embá kendé-íꞌa úne  
\p séna Maníkómó áántarain-ininkoma ómpo ení iyámpóísonteꞌa awánaaro séꞌa maanáúfáí agai-timúne. Fasiꞌaénkóní éraiꞌ-aai ísaraundasafeꞌa sirumbá timúne. Ímba keyáánifo Fasiꞌaénkóní éraiꞌ-aai ísááwiwaraꞌa tirumbá wétimewe.  
\v 2 Kentááfímbá éraiꞌ-aai waéꞌwaeꞌa éna ímba taiꞌáíndasafeta kentáásirumba timúne.   
\b  
\p
\v 3 Maníkó kentáásifowawe ááninko Ísu Káráísitiyeꞌa úwoi súwaꞌnai esarai tirumbá uwásinkesarai aánoꞌa uwásinkaayata póta éraiꞌ-aaisa séta kentáásirumba timúndasafeꞌa Maníkómpáꞌá inaí súne.   
\b  
\p
\v 4 Tuwímbai ení iyámpói kentáásifowa simásímakaintemba miyáumai éraiꞌ-ampaꞌo kon-ááí isáúnana sirunkó kaweꞌá wéiye.  
\v 5 Aaregóo embá simámeꞌa súne. Fasiꞌaénkóní waási moórá-mora kentirumbá timéꞌa méraaro. Minááí ímba aú-amaamba simátimumpo ááéwara káféꞌwaraꞌa ísaraan-aai simátimune.  
\v 6 Maníkón-aaisaamo taawiyafúndasa mindá Maníkómbá sirumbá amúndasafeta wenáái wétaawiyafune. Maníkónkwárá waásiwaraꞌa tirumbá timéꞌa méraaro Maníkó siyáimba ááéwara káféꞌwaraꞌa wéisaawe.   
\b  
\p
\v 7 Sáwífaꞌ-waasi karoꞌó sen-kwáásí marapáꞌá wénowe. Miwí Ísu Káráísitintafesa sésa ímba waásiyaaniꞌa úmai kunkáiye wésewe. Miwí Káráísitini namuro-wáásí pósa sáwí-ampaꞌa wíwae sésa minkáróꞌ-ááí sefó káráwiyoro.  
\v 8 Maníkóní kísaumo máém-beyamba ímba máéfonifo kaweꞌ-úmai káráwiyeꞌa seyaafáꞌ-méyámbá kaweꞌ-méyámbó maíyantafeꞌa káráwiyoro.   
\b  
\p
\v 9 Ísu Káráísitin-aai ímba taꞌótóráámba minááí tuwésa fíꞌon-ampaꞌo kowí ímba Maníkóeꞌa kááísamai méraawe. Ísu Káráísitin-aai taꞌótokaawi kentáásifowawe wenááninkoeꞌa kááísamai méraawe.  
\v 10 Miyáumai kentópaꞌo tésamo minááímó ímbo simátimesamo fíꞌon-aaimo simátimiyaꞌo éꞌa ímba tiyáámba timéꞌa ímba kentí naaúmpaꞌa mósá tínkáaro.  
\v 11 Miyán-kwáásí tiyáámbo timéꞌo éꞌa minkwáásítí  
\p sáwí-kisau túwaꞌnai ónááwe.   
\b  
\p
\v 12 Ayáátááꞌ-aai simátimenaeꞌa maanáúfáífímbá ímba agáúmpo kentópaꞌa wéꞌa kentúrankaꞌa koméꞌa kosimátíménana kentáásirunkosa áfááraumai kaweꞌá íníye.  
\v 13 Enanaanontáféna kendé-íꞌa úne séna Maníkó áántarain-ininkoe wení iyámpóísonteꞌa kembiwísáfésa sésa kaweꞌ-úmai méraaro wésewe.  
\p \it Kemá Yóni kesáái taíꞌáiye.\it*