\id REV Revelation MAREV.SCP Ata Manobo Revelation 05-JUL-2000 
\h Impapitow 
\toc1 Ka Impapitow ni Hisus ki Huan 
\toc2 Impapitow 
\toc3 Imp 
\mt2 Ka 
\mt1 Impapitow 
\mt2 ni Hisus ki Huan 
\imt2 Tongod to Soini no Impapitow ni Hisus ki Huan 
\ip Si Hisus ka nigpasulat to soini no impapitow rin ki Huan no suguanon din. Ka tuud to impasulat din oyow ogkabuligan ka goinawa to mgo otow no ogkabaybayaran su tongod to pogtuu ran ki Hisus, woy su oyow songo ogpakapanagana ki oyow kono ki ogkatokawan to poglibong ni Hisus kai to tano woy to oyow kono ki ogkabolongbolong ko songo duon ogkabayaan ta no mgo igkabaybayari no ogligkat to mgo otow no og-usig to ngaran ni Hisus woy ka ngaran to Magboboot. 
\ip No to soini no sulat ni Huan, innangonnangon din ka mgo dakol no igkabaybayari no ogkoumaan uromo kai to soini no kalibutan woy tongod to sikan no mabulut no oghingaranan to magintalunan no ogpakaalap uromo to dakol no kabogbogan ni Satanas no og-atu to Magboboot taman to ogkaroog ni Hisus sikandan no igdogpak on sikandan to hapuy no ogliabliab. Woy impapitow kandin ki Hisu Kristu no noiling to Nati to Karniru no nigsasindog to pinnuuanan to pandatuan to Magboboot. Ian to noiling to Nati to Karniru su ka kandin no lawa ka impakimatoy dongan oyow ogkapangabangan ki to mgo salo ta. Woy impohitaga rin impanoy to duon allow to Magboboot no ogkouyag on ka mgo sakup din no ogbogayan sikandan to igsayo din kandan. Di mohuri ogkootawan ka waro nigpasakup kandin woy ogkabobootan on to logpad no ogkohingaranan to igkaruwa no kamatayon. 
\is1 Ka Ignangon to Soini no Sulat 
\io1 Ka kabinunsuran to insulat ni Huan woy ka an-anayan no impapitow kandin 1:1-20 
\io1 Ka papitu no sulat no igpohondio to papitu no lunsud 2:1 – 3:22 
\io1 Ka nalulun no ogbasoon woy ka papitu no imparokot 4:1 – 8:1 
\io1 Ka papitu no bungag 8:2 – 11:19 
\io1 Ka boi woy ka ulod woy ka daruwa no magintalunan 12:1 – 13:18 
\io1 Ka Nati to Karniru woy ka 144,000 no nigbalukas din 14:1-5 
\io1 Ka poggaani to mgo koot-otawan kai to kalibutan 14:6-20 
\io1 Ka papitu no igkabaybayari woy ka papitu no boung no iglogpad 15:1 – 16:21 
\io1 Ka pogkaroog to Babilunia woy ka duma no usig to Magboboot 17:1 – 20:10 
\io1 Ogkabobootan ka tibo no mgo koot-otawan 20:11-15 
\io1 Ka iam no langit, iam no tano woy ka iam no Hirusalim 21:1 – 22:5 
\io1 Ka katamanan to sikan no insulat ni Huan 22:6-21 
\c 1  
\p  
\v 1 Ka soini no igsulat ku, insalig to Magboboot ki Hisu Kristu no igpohitaga rin dio to mgo suguanon din oyow ogkatagaan dan ka ogkoumaan no konad on ogkalugoy. No nigsugu din ka diwata no suguanon din, no ian impohitaga kanak no si Huan.  
\v 2 No igsulat ku ka tibo no nigkita ku woy igmalogot ku to kinagian ian to Magboboot ka ignangonnangon ku no impohitaga ni Hisu Kristu.  
\v 3 Ogkapulusan ka agad hontow no ogbasa, woy ka ogpamminog woy ogtuman to soini no impanoy innangonnangon to kinagian to Magboboot su magaan on ogkatuman ka soini tibo. 
\s1 Ka Igpangumusta ni Huan to mgo Nigtuu no dio to Papitu no Lunsud 
\p  
\v 4-5 Kanak no si Huan, ogsulatan ku ka mgo otow no nigtuu to Magboboot no dio to sikan no papitu no mgo lunsud dio to probinsia to Asia. 
\p Ogbuyu a to Magboboot oyow ogkohoy-uan kow rin woy to oyow ogkabogayan kow to maawang no goinawa no ogligkat kandin woy to Gimukud din woy ki Hisu Kristu. Agad dongan, woy kuntoon taman to waro katamanan, sikandin do ian ka Magboboot. No ka Gimukud din no ungod og-ugpo dio to tangkaan din, papitu ka igpohitaga to kabogbogan din. Si Hisu Kristu, ian ka ogkasaligan ta to ogmalogot to ignangonnangon din. No sikandin ka an-anayan no ligkat to kamatayon no nouyag on to waro katamanan. Woy sikandin dod ka ogpakaboot to tibo no mgo labow no datu no kai to soini no tano. 
\p Dakol ka goinawa rin kanta su niglipuwasan ki nikandin to mgo salo tanow su ligkat to pogkamatoy rin dio to krus.\f + \fr 1:4-5 \ft Ogkabasa to Salmo 89:27.\f* 
\v 6 Nigbogayan kinow ni Hisus to katondanan oyow ogpakabulig ki to pog-alap din to pandatuan din. Woy nohimu kinow on no mgo talagpanubad dio to tangkaan to Magboboot no ian Magboboot din dod woy Amoy rin. No si Hisu Kristu ka litos no ogkasayo ta woy to og-alap to pandatuan din woy ka kabogbogan din to waro katamanan. Malogot ian ka soini.\f + \fr 1:6 \ft Ogkabasa to Exodo 19:6.\f* 
\p  
\v 7 Nò, panagana kow. Oglibong si Hisu Kristu kai to tano no ogpakaruma to mgo gapun. Tibo no mgo otow, agad ka niglansang kandin dio to krus, ogpakakita kandin. No ka tibo no mgo koot-otawan kai to tano, ogpakapandawot to igkalango tongod kandin. Malogot ian.\f + \fr 1:7 \ft Ogkabasa to Daniel 7:13 woy Zacarias 2:10.\f* 
\p  
\v 8 Ka Magboboot no ian Lagboy no Igbuyag, sikandin ka Mamabogbog to tibo woy sikandin do ian ka Magboboot ligkat dongan no waro pad nohimu ka kalibutan woy sikandin dod ka Magboboot kuntoon woy taman to waro katamanan. Kagi rin to, “Sikanak ka kabinunsuran woy ka katamanan to tibo.” 
\s1 Duon Impapitow ki Huan 
\p  
\v 9 Sikanak no si Huan, sulod now to pogtuu ki Hisus. No nohimu a no duma now to pog-aguanta ta to igkabaybayari no ogligkat to nalagkos kinow to pog-alap din to pandatuan din. Impougpo a to songo pulu to dagat no oghingaranan to Patmus su ligkat to nignangonnangon a to kinagian to Magboboot woy su ligkat to immalogot ku ka in-anad ni Hisus kanak.  
\v 10 No to songo allow to Dominggu no ian allow to pogsimba to Magboboot, nigbobootan a to Gimukud din. No kai to ogkoiniugan ku, duon nigdinog ku no kagi no maagbot lagboy no noiling to daging to bungag no ogbawos.  
\v 11 Kagi rin to, “Isulat nu ka tibo no ogkitoon nu woy ipaalap nu to mgo otow no nigtuu to Magboboot no dio to papitu no lunsud to Episu, ka Ismirna, ka Pirgamu, ka Tiatira, ka Sardis, ka Piladilpia woy ka Laodisia.” 
\p  
\v 12 Pogkarinog ku to sikan no kagi, niglingi a oyow ogpitawon ku ko hontow ka nigkagi kanak. No duon nigkita ku no papitu no bulawan no sabukanan to mgo ilawan.  
\v 13 No dio to taliwaro to sikan no mgo ilawan, duon nigkita ku no ogkoiling to otow. Ka kinabo din, dio taman to paa rin. No duon insalubabat no bulawan dio to sosolobon din.\f + \fr 1:13 \ft Ogkabasa to Daniel 7:13 woy 10:5.\f* 
\v 14 Ka bulbul din, maputi lagboy no ogkoiling to gapas. No ka mata rin, noiling to logdog to hapuy.\f + \fr 1:14 \ft Ogkabasa to Daniel 7:9 woy 10:6.\f* 
\v 15 Ogpangini-kinì ka paa rin no noiling to burunsi no nakasugbuk to hapuy. No ka lagong din, maagbot lagboy no ogkoiling to nigdagunut to sampow.\f + \fr 1:15 \ft Ogkabasa to Ezequiel 43:2.\f* 
\v 16 Dio to kawanan no bolad din, duon papitu no bituon no niggongonan din. Dio to bo-bo din, duon niglibuwas no malayat woy maligdus no balarow no daruwa ka galang. Ka langlanguwan din, malayag lagboy no ogkounawa to layag to allow ko mougtu on.  
\v 17 Pogkakita ku kandin, nahallok a lagboy no napolod a ro duon to tangkaan din no noiling a to namatoy. Di niggongonan a nikandin to kawanan no bolad din woy nigkagi to, “Kono ka ogkahallok su sikanak ka kabinunsuran woy ka katamanan.  
\v 18 Waro kabinunsuran to pogkouyag ku. Namatoy ad nokani di nouyag ad on taman to waro katamanan. No sikanak doka ogpakaboot ko hondoi ku ogpougpaa ka mgo nammatoy. Woy sikanak dod ka duon katondanan to ogpulas to sikan no ugpaan to mgo nammatoy.\f + \fr 1:18 \ft Dio to kinagian to Hinibriu, \fq Hadis\ft ka ighingaranan dan to sikan no ogpougpaan to Magboboot to mgo nammatoy.\f* 
\v 19 Nò, isulat nu ka igpapitow ku koykow no magaan on ogkatuman woy ka ogpakatuman on uromo.  
\v 20 Kuntoon, soini ka kalitukan to sikan no papitu no mgo bituon no nigkita nu no niggongonan ku dio to kawanan no bolad ku woy ka kalitukan to sikan no papitu no bulawan no mgo sabukanan to ilawan. Ka papitu no mgo bituon, ian ka papitu no mgo suguanon to Magboboot no ogtanudtanud to mgo nigtuu no dio to sikan no papitu no lunsud. No ka papitu no mgo sabukanan to mgo ilawan, sikandan ka mgo otow no nigtuu to Magboboot no dio to sikan no papitu no lunsud.”\f + \fr 1:20 \ft To kinagian to Ginirigu, ka sikan no mgo suguanon, ogkalituk to mgo diwata to Magboboot woy ko mgo igbuyag no nohimu no suguanon din to og-alap to sikan no mgo nigtuu.\f* 
\c 2  
\s1 Ka Igpanangon dio to mgo Nigtuu to Episu 
\p  
\v 1 Nigkagi man do sikandin to, “Sulati nu ka suguanon to Magboboot no ogtanudtanud to mgo nigtuu no dio to Ipisu. 
\p No soini ka igsulat nu, “Ka soini no ignangon ku, nigligkat kanak no oggongon to sikan no papitu no mgo bituon kai to kawanan no bolad ku. Woy sikanak dod ka oghihipanow dio to taliwaro to sikan no papitu no bulawan no sabukanan to mgo ilawan.  
\v 2 Nataga a to mgo batasan now. Woy nataga a to sikan no pogpoomot now to oghimuon now kanak, woy ka pog-aguanta now to mgo igkohirapi now. Woy nataga a to kono kow ogbogoy no ogdumaruma kaniu ka oghimu to maroot. No tongod to sikan no mgo otow no ubaton no ognangon to mgo suguanon sikandan ni Hisus, nig-ol-ologan now sikandan woy nigbatukan now to kono man no suguanon din sikandan.  
\v 3 Nataga a to og-aguantoon now ka mgo igkabaybayari now no ogligkat to pogtuu now to kanak no ngaran woy waro kow napogul to pogtuu now. 
\p  
\v 4 Dokad di, duon dod soini no batasan now no kono ku ogkoiniatan. Ian su ka goinawa now kanak woy to mgo duma now, konad on ogkounawa karakol to sikan no goinawa now nokani to kabinunsuran to pogtuu now.  
\v 5 Doromdoma now ka sikan no dakol no goinawa now kanak nokani. Balowbalawi now ka goinawa now woy himua now ka maroyow no nighimu now nokani to kabinunsuran to pogtuu now. Ian su ko kono now ogbalowbalawan ka goinawa now, oghondiaan ku sikaniu no og-awoon ku ka sabukanan to kaniu no ilawan.  
\v 6 Di duon dod oghimuon now no maroyow ku su ka mgo maroot no oghimuon to mgo otow no oghingaranan no Nikolaita no maroot lagboy to goinawa ku, songo immaroot now to kaniu no mgo goinawa. 
\p  
\v 7 Tag sagboka kaniu, ko duon talinga now, og-awoson to ogpamminog kow to soini no ignangon to Gimukud to Magboboot dio to mgo nigtuu. Kagi rin to, 
\p ‘Ka otow no kono ogparoog ki Satanas, ogbogayan ku to katondanan din oyow ogpakakoon sikandin to bogas to sikan no kayu no ogpakabogoy to kouyagan no waro katamanan no ogtulin dio to sikan no ugpaan to Magboboot.’ ”\f + \fr 2:7 \ft Ogkabasa to Genesis 2:9.\f* 
\s1 Ka Igpanangon dio to mgo Nigtuu to Ismirna 
\p  
\v 8 Kagi rin to, “Songo isulat nu ka soini no ipaalap nu dio to suguanon to Magboboot no ogtanudtanud to mgo otow no nigtuu to Magboboot no dio to lunsud to Ismirna. 
\p No soini ka igsulat nu, ‘Sikanak ka kabinunsuran woy ka katamanan. Namatoy ad nokani no nouyag ad on taman to waro katamanan.  
\v 9 Nataga a to mgo igkabaybayari now no ogligkat to pogtuu now kanak. Woy nataga a to noil-iluan kow on to og-awoson to pog-ugpo now kai to tano. Dokad di, nohimu kow on no datu dio to langit. Woy nataga a rod to ogsumpalitan kow to mgo Hudiu no og-abin no mgo sakup sikandan to Magboboot. Dokad di to kono no tu-tuu ian no Hudiu sikandan su mgo sakup naan sikandan ni Satanas.\f + \fr 2:9 \ft Si Satanas, ian igbuyag to mgo busow.\f* 
\v 10 Kono kow ogkahallok to duon igkabaybayari no magaan ogpokouma kaniu. Duon mgo duma now no igpapirisu ni Satanas oyow ogkool-ologan din ka pogtuu now kanak. No ogkabaybayaran kow to sampulu no allow.\f + \fr 2:10 \ft Songo kuwo ko ka sampulu no mgo allow, ogkalituk to kono no malayat no igkabaybayari ran.\f* Di agad ko igkamatoy now ka igkabaybayari now, kono now lokoi ka pogtuu now kanak no ogbogayan ku sikaniu to pogkouyag now no waro katamanan no ian ka igsayo ku kaniu. 
\p  
\v 11 Tag sagboka kaniu, ko duon talinga now, og-awoson now to ogpamminog kow to soini no ignangon to Gimukud to Magboboot dio to mgo nigtuu. Kagi rin to, 
\p ‘Ka otow no kono ogparoog ki Satanas, kono ogkalogparan to oghingaranan to igkaruwa no kamatayon.’ ” 
\s1 Ka Igpaalap dio to mgo Nigtuu no dio to Pirgamu 
\p  
\v 12 Woy kagi rin man do to, “Sulati nu ka sikan no suguanon ku no ogtanudtanud to mgo nigtuu no dio to lunsud to Pirgamu. 
\p No soini ka igsulat nu, ‘Ka soini no kagi, ogligkat kanak no oggongon to malayat woy maligdus no balarow no daruwa ka galang.  
\v 13 Nataga a to dio kow mokougpo to lunsud no ogkabobootan ni Satanas. Di nighirosonan now ro nasi ka pogtuu now to kanak no ngaran. No agad ko nohimatayan on si Antipas no talagmalogot to kinagian ku, waro now ian lokoi ka pogtuu now kanak.  
\v 14 Di duon dod pila no kono ku ogkoiniatan no oghimuon now. Ian su duon mgo duma now no og-unugon ka sikan no in-anad ni Balaam dongan. Ian su duon dalan no in-anad ni Balaam ki Balak to oyow ogpasaloon din ka mgo pinanganak ni Israil. No nigpaayat ni Balaam ka mgo otow to oyow ogkokoon sikandan to ngalap no igkatubad to mgo inotow woy to oyow oghimuon dan ka mgo maroot to kono no asawa ran.\f + \fr 2:14 \ft Ogkabasa to Numeros 25:1-5 woy 31:16 woy Deuteronomio 23:4.\f* 
\v 15 Woy duon dio to kaniu ka og-unug to mgo maroot no batasan no ig-anad to mgo otow no oghingaranan to Nikolaita.  
\v 16 Balowbalawi now ka goinawa now no ongkori now on ka mgo maroot no oghimuon now su ko kono now ogbalowbalawan ka goinawa now, oghondiaan ku sikaniu woy oglogparan ku ka sikan no mgo otow. No ian panganiban ku ka sikan no balarow no ogligkat to bo-bo ku. 
\p  
\v 17 Nò, tag sagboka kaniu ko duon talinga now, og-awoson now to ogpamminog kow to soini no ignangon to Gimukud to Magboboot no ogkagi to, 
\p ‘Ka otow no kono ogparoog ki Satanas, ogbogayan ku sikandan to ogkoon to sikan no oghingaranan to mana no insasabuk dio to langit.\f + \fr 2:17 \fq Ka mana\ft , ian imbogoy to Magboboot no impakoon din to mgo otow dongan no nalugoy nakabayo to holholawan no marulag ogkouranan.\f* Woy ogbogayan ku sikandan to maputi no batu no ogsulatan to iam no ngaran dan. Di waro loin no otow no ogkataga ko nokoy ka igkasulat to sikan no batu su ka otow no ogkabogayan to sikan no batu, ian doka ogkataga ko hontow no ngaran ka igkasulat.’ ” 
\s1 Ka Sulat no Igpaalap dio to mgo Nigtuu to Tiatira 
\p  
\v 18 No kagi rin man do to, “Sulati nu ka sikan no suguanon ku no ogtanudtanud to mgo nigtuu no dio to lunsud to Tiatira. No soini ka igsulat nu, 
\p ‘Ka soini no kagi, ogligkat kanak no ian Anak to Magboboot. Ka mgo mata ku, ogkounawa to layag to hapuy. No ka mgo paa ku, ogkounawa to nalaslasan on no burunsi.  
\v 19 Nataga a to mgo batasan now: to indakoli now sikanak woy ka mgo duma now to goinawa, woy to nohogot ka pogtuu now kanak. Woy nigtuman now ka mgo insugu ku woy nig-aguanta now ka mgo igkabaybayari no ogligkat to pogtuu now kanak. No ka mgo oghimuon now kuntoon, madmaroyow on to sikan no nighimu now nokani.  
\v 20 Di duon pad kono ku ogkoiniatan no batasan now. Ian su ogbalagaron now ro ka ig-anad to sikan no boi no ogngaranan ki Disabil no og-abin to talagnangon sikandin to kinagian to Magboboot. Dokad di to og-anaron din ka mgo sakup ku to oyow oghimu to maroot to kono no asawa ran woy to oyow ogkoon to sikan no ngalap no ingkatubad to mgo inotow.\f + \fr 2:20 \ft Ogkabasa to 1 Hari 16:31 woy 1 Hari 9:22.\f* 
\v 21 Nigbogayan ku sikandin to mgo allow no igliwak to ogbalbalawan ka goinawa rin, di kono din man og-ongkoran ka mgo maroot no batasan din.  
\v 22 Sikan ian to oglogparan ku sikandin woy ka mgo duma rin no ogmanhimu to mgo maroot. No ogbogayan ku sikandan to dalu no konad on ogpakaonow-onow dio to hibatanan dan. No ogkabaybayaran lagboy sikandan to dalu no igbogoy ku kandan. Magaan ku ogtumanon ka soini no imbohog ku ko kono dan ogbalbalawan ka goinawa ran no og-ongkoran ka mgo maroot no oghimuon dan.  
\v 23 Woy oghimatayan ku ka mgo sakup to sikan no boi. No ka tibo no mgo otow no nigtuu kanak dio to agad hondoi, ogkataga ran to natagaan ku ka tibo to agad nokoy no nakatagu to goinawa to mgo otow woy ko nokoy ka ogkoiniatan dan no oghimuon. No duon igbogoy ku to tag sagboka kaniu ka igsokod to batasan now ko ka igsayo woy ka iglogpad. 
\p  
\v 24 Di sikaniu no duma no ogtuu kanak no dio to Tiatira, waro kow atag nig-unug to sikan no maroot no in-anad to sikan no boi, woy waro kow maanari to sikan no naan to duma no maralom kun no pogsabut ni Satanas. Sikan ian, warad igtimul ku to sikan no mgo sugu no ogtumanon now.  
\v 25 Di soini naan doka igtaloson ku kaniu. Hogoti now ka pogtuu now kanak taman to poglibong ku kai to tano.  
\v 26-28 Ka mgo otow no kono ogparoog ki Satanas woy ogtuman to kanak no ogkoiniatan taman to kamatayon dan, ogbogayan ku sikandan to katondanan to oyow ogpakalagkos kanak to pog-alap ku to mgo dakol no ugpaan kai to tano. No ka katondanan dan, mabogbog lagboy no ogkoiling to sikan no imbogoy to Amoy ku kanak su ogkounawa to putow no ogpakagopang to kuron su waro ogpakaroog kandan. Woy songo ogbogayan ku sikandan to igkarago dan no ogkounawa to kalayag to buntatalo. 
\p  
\v 29 Tag sagboka kaniu, ko duon talinga now, og-awoson now no ogpamminog kow to ignangon to Gimukud to Magboboot dio to mgo otow no nigtuu kandin.” 
\c 3  
\s1 Ka Sulat no Igpaalap dio to mgo Nigtuu to Sardis 
\p  
\v 1 Nò, nigkagi man do sikandin to, “Isulat nu ka soini no igpaalap nu dio to sikan no suguanon ku no ogtanudtanud to mgo otow no nigtuu no dio to lunsud to Sardis. 
\p Soini ka igsulat nu, ‘Ka soini no kagi, ogligkat kanak no duon Gimukud ku no duon papitu no igpohitaga to kabogbogan din. Woy duon to kanak ka papitu no bituon. Nataga a to mgo batasan now. Agad to duon mgo otow no nahan dan to mohogot ka pogtuu now kanak, di nataga a to waro atag mohogot ka pogtuu now. Ian su noiling kow to mgo nammatoy su ogkoiling to waro pogtuu now kanak.  
\v 2 Nò, himata kow on woy hogoti now on ka nasamo to pogtuu now su nabatukan ku ka mgo batasan now to naalang-alang to tangkaan to Magboboot.  
\v 3 Sikan ian, doromdoma now woy tumana now ka nigdinog now woy ka in-anad kaniu. Balowbalawi now ka goinawa now. Ian su ko kono kow oghimata, oghondiaan ku sikaniu to allow no waro now im-imani. Ogtokawon ku sikaniu no ian ogkounawaan ka poglopow to ogpanakow.  
\v 4 Dokad di, duon dod pila buwa kaniu dio to Sardis no waro now maligsomi ka pog-ugpo now su waro kow atag nanhimu to agad nokoy no maroot. Sikaniu ka ogpakaruma kanak uromo no ogpakakikinabo kow to maputi su litos ku ka mgo hinimuan now.  
\v 5 Ka otow no kono ogparoog ki Satanas, ogpakinaboon ku uromo to maputi. Woy kono ku og-awoon ka mgo ngaran dan dio to sulatanan to mgo ngaran to mgo otow no ogbogayan to kouyagan no waro katamanan. No ko dio ad on to tangkaan to Amoy ku no Magboboot woy to tangkaan to mgo suguanon din no mgo diwata, ogtokoron ku to sakup ku sikandan. 
\p  
\v 6 Tag sagboka kaniu, ko duon talinga now, og-awoson to ogpamminog kow to soini no ignangon to Gimukud to Magboboot dio to mgo otow no nigtuu kandin.’ ” 
\s1 Ka Sulat no Igpaalap dio to mgo Nigtuu to Piladilpia 
\p  
\v 7 Nigkagi man do sikandin to, “Isulat nu ka soini no igpaalap nu dio to sikan no suguanon ku no ogtanudtanud to mgo nigtuu no dio to lunsud to Piladilpia. Soini ka igsulat nu, 
\p ‘Ka soini no mgo kagi, ogligkat kanak no matuwarong woy ogkasaligan. Sikanak ka nakapurut to sikan no katondanan no dio dongan ki Dabid. Ko duon ogpulasan ku no gumawan, kono ogkalokoban to agad hontow. Woy ko duon gumawan no oglokoban ku, songo waro otow no ogpakapulas.\f + \fr 3:7 \ft Ogkabasa to Isaias 22:22.\f* 
\v 8 Nataga a to mgo batasan now. Agad kono kow amana no mabogbog, di nigtuman now nasi ka kinagian ku woy waro now ongkori ka pogtuu now kanak. Sikan ian to ogpulasan kud on ka gumawan no ogpakasolod kow on, no kono ogkalokoban to agad hontow.  
\v 9 Nò, pamminog kow to soini. Ka mgo ubaton no og-abin to Hudiu sikandan woy nahan dan no sakup sikandan to Magboboot, dokad di sakup atag ni Satanas sikandan. Uromo, ogpaluhuron ku sikandan dio to tangkaan now su oyow ogkatagaan dan to indakoli ku sikaniu to goinawa ku.  
\v 10 Ian su nigpoomot kow to ogtuman to innangon ku no nig-aguanta now ka mgo igkabaybayari now. Sikan ian, ko ogdatong on ka sikan no dakol ian no igkabaybayari no ig-ol-olog uromo to tibo no mgo otow kai to tano, og-aliguan ku sikaniu.  
\v 11 Magaan ad on oglibong dio to tano. Sikan ian, hogota now ka pogtuu now kanak oyow kono ogkaagow ka sikan no igsayo ku kaniu.  
\v 12 Ka otow no kono ogparoog ki Satanas, ogbogayan ku to oyow ogpokougpo sikandan dio to ugpaan ku dio to langit to waro katamanan. No ian dan ogkounawaan ka mgo suloy to sikan no Baloy no Ampuanan to Magboboot. Kono og-awo sikandan to sikan no baloy. No igsulat ku dio to kandan ka ngaran to Magboboot no ian Igbuyag ku, woy iglagkos ku to igsulat ka ngaran to sikan no dakol no lunsud to Magboboot ku. Sikan ka iam no Hirusalim no ogligkat dio to langit no oglogsad kai to tano. Woy songo iglagkos ku to igsulat kandan ka iam no ngaran ku. 
\p  
\v 13 Tag sagboka kaniu, ko duon talinga now, og-awoson to ogpamminog kow to ignangon to Gimukud to Magboboot dio to mgo nigtuu kandin.’ ” 
\s1 Ka sulat no Igpaalap dio to mgo Nigtuu to Laodisia 
\p  
\v 14 Nigkagi man do sikandin to, “Isulat nu ka soini no igpaalap nu dio to sikan no suguanon ku no ogtanudtanud to mgo otow no nigtuu to Magboboot no dio to lunsud to Laodisia. Soini ka kagi no igsulat nu, 
\p ‘Ka soini no kagi, ogligkat kanak no oghingaranan to Talagmalogot.\f + \fr 3:14 \ft To Ginirigu no kinagian, ka \fq Amin\ft , ogkalituk to “Malogot” woy ko “Talagmalogot.”\f* Woy sikanak dod ka ogkasaligan woy tu-tuu ian ka igmalogot ku. Woy sikanak ka impohimu to Magboboot to tibo to soini no kalibutan woy ka dio to langit.  
\v 15 Natagaan ku ka mgo batasan now su ka goinawa now kanak, kono no moinit woy songo kono amana no mahagsil. Maroyow ku poron ko ogmoinit on ian ka goinawa now kanak. Ko kono, maroyow ko ogmahagsil kow on ian.  
\v 16 Di kuntoon, su magainallow ro man ka goinawa now kanak, ig-ommug ku sikaniu.  
\v 17 Ian su ognangon kow to salapian kow woy to maroyow ka pog-ugpo no waro og-awoson now. Dokad di to waro kow mataga to mokohoy-uhoy-u kow naan lagboy su ian now ogkounawaan ka naayuayu no nalobasan woy nabutud.  
\v 18 Sikan ian to ogtalosonon ku sikaniu to oyow ogboli kow to bulawan no nool-ologan on dio to hapuy no warad on solug no maligsom. Ka sikan, ian ka malogot no pogtuu now woy ka igkaratui now. Woy kua now kai to kanak ka maputi no kinabo now oyow ogkaatangan on ka igkasipod now. Woy hondii kow ka ogpatambal kanak to mata now oyow ogpakakita kow on.  
\v 19 Ka tibo no mgo otow no igdakoli ku to goinawa, ogsaparan ku woy oglogparan ku. Sikan ian, balowbalawi now ka goinawa now woy poomot kow no oghimu to maroyow.\f + \fr 3:19 \ft Ogkabasa to Panultihon 3:12.\f* 
\v 20 Pamminog kow! Ian ku ogkounawaan ka otow no ogsasindog to gumawan no og-umow oyow ogpapulasan. Ko duon otow no ogdinog to pog-umow ku no ogpulasan a rin, ogsolod a to kandin no baloy woy og-amut a kandin to ogkoon.  
\v 21 Ka mgo otow no kono ogparoog ki Satanas, ogbogayan ku sikandan to oyow ogpakalongod kanak to ogpinpinnuu uromo su oyow ogpakabulig kanak to pogboboot ku. No ka sikan, ogkounawa rod kanak no nakaroog a ki Satanas, no songo ogpokoglongod a to Amoy ku no ogpinpinnuu no ogpakabulig a kandin to pogboboot din.\f + \fr 3:21 \fq Si Satanas\ft , ian igbuyag to mgo busow.\f* 
\p  
\v 22 Tag sagboka kaniu, ko duon talinga now, og-awoson now no ogpamminog kow to soini no ignangon to Gimukud to Magboboot dio to mgo nigtuu kandin.’ ” 
\c 4  
\s1 Ka Pogsimba no dio to Langit 
\p  
\v 1 Pogkaponga, duon nigkita ku no gumawan dio to langit no napulasan. Woy nakarinog a to maagbot no kagi no noiling to bungag no sikan dod ka lagong no nigdinog ku to an-anayan. No nigkagi to, “Lopow ka kai su igpapitow ku koykow ka ogpokouma uromo.”  
\v 2 Wa do nigbuloy no nigbobootan ad to Gimukud to Magboboot woy naalap ka gimukud ku dio to langit. No nigkita ku ka pinnuuanan no ogpinpinnu-an to Lagboy no Igbuyag ko ogboboot, woy nigkita a to sikan no nigpinpinnuu to sikan.  
\v 3 Ogpamalosigsig ka langlanguwan to sikan no ogpinpinnuu, no ogkounawa to mgo mahal no batu no oghingaranan to haspi woy ka kurnalina. Woy ka pinnuuanan din, nalingotan to balangow. No ka batok to balangow, moilow no ogkounawa to moilow no batu no oghingaranan to ismiralda.  
\v 4 No ka sikan no pinpinnuanan din, songo nalingotan to kawaan woy hop-at no pinnuuanan. No duon naminpinnuu no songo kawaan woy hop-at no mgo pogbuyagon. Mamaputi ka mgo sabinit dan woy duon bulawan no tangkulu ran.  
\v 5 Ligkat to sikan no pinnuuanan to Lagboy no Igbuyag, ogkikilat woy oglulugung to maagbot. No to tangkaan to sikan no pinnuuanan, duon papitu no mgo ilawan no naparokotan on. Ka sikan, ian ka papitu no igpohitaga to kabogbogan to Gimukud to Magboboot.  
\v 6 Dio to tangkaan to sikan no pinnuuanan to Lagboy no Igbuyag, duon nigkita ku no ogkounawa to dagat no malayag no noiling to lamita no lagboy no mating-ow. 
\p No to marani to sikan no pinnuuanan to Lagboy no Igbuyag, duon hop-at no hinimu no duon goinawa. Dio nigsasindog to songo hop-at no sungguk to ilis. Ka tangkaan woy ka poka to sikan no mgo lawa ran, nigtangkapan to mgo mata.  
\v 7 Ka an-anayan to sikan no hop-at, ogkoiling to liun. Ka dangob, ogkoiling to lukosan no baka. No ka igkatolu, duon langlanguwan din no ogkoiling to langlanguwan to otow. No ka igkohop-at, ogkoiling to kuligi no oglayanglayang.  
\v 8 Tag sagboka kandan, duon man hon-om no mgo pakpak dan no nigtangkapan to mgo mata dio to ampow woy ka dio to saluluan. No to maallow woy marusilom, kono oghagtonghagtong sikandan to pog-opad. Soini ka og-opparon dan, 
\q1 “Ka Magboboot, Lagboy no Igbuyag ta woy Mamabogbog to tibo. Tibulus no maroyow sikandin. Waro salo din woy waro agad nokoy no maroot dio to goinawa rin. Ogkohimu rin ka tibo. Duon on sikandin tahan ligkat dongan, woy kuntoon, woy taman to waro katamanan.”\f + \fr 4:8 \ft Ogkabasa to Isaias 6:2.\f* 
\p  
\v 9 No ka sikan no hop-at no hinimu no duon goinawa, og-oopad sikandan to igsayo woy igtahud woy ogpasalamat to Magboboot no ogpinpinnuu to sikan no pinnuuanan din to pandatuan. No sikandin ka kono ogkamatoy taman to waro katamanan.  
\v 10 Ko og-oopad ka sikan no hop-at, ka kawaan woy hop-at no mgo pogbuyagon, ogluhud to tangkaan to Lagboy no Igbuyag no ogpinpinnuu to sikan no pinnuuan din to pogboboot. Ogsimboon dan sikandin no ian ka kono ogkamatoy taman to waro katamanan. Woy og-awoon dan to ulu ran ka bulawan no mgo tangkulu ran no igpanabuk dan dio to tangkaan to Lagboy no Igbuyag no kagi ran to, 
\q1  
\v 11 Magboboot noy no ian Lagboy no Igbuyag noy, sikoykow ro ka litos no ogsayoon woy to ogtauron woy to ogtokoron noy to mabogbog ka lagboy. Ian su nighimu nu ka tibo. Sikan ian to duon on sikandan woy duon on goinawa ran su ligkat to pogboot nu.” 
\c 5  
\s1 Ka Ingkasulat to Ogbasoon no Nalulun 
\p  
\v 1 Duon nigkita ku no sagboka no ogbasoon no dio to kawanan no bolad to sikan no Lagboy no Igbuyag no ogpinpinnuu dio to pinnuuanan din to ogboboot. No nokoglimang ka sulat to sikan no ogbasoon. Woy duon papitu no imparokot oyow kono ogkabolat.  
\v 2 Woy duon nigkita ku no sagboka no mabogbog no diwata to Magboboot. Nigmaagbot ka kagi rin no nig-inso to, “Hontow ka litos no ogloko to mgo imparokot woy to ogbolat to soini no ogbasoon?”  
\v 3 Di dio to langit woy ka kai to tano woy ka dio to diralom to tano, waro litos to ogbolat woy to ogbasa to sikan no ogbasoon.  
\v 4 Nò, sikanak no si Huan, malayat ka pogsinogow ku su waro agad hontow no litos to ogbolat woy to ogbasa to sikan no ogbasoon.  
\v 5 Di sagboka to sikan no mgo pogbuyagon, nignangon kanak to, “Kono kad on ogsinogow, su si Hisus ka mabantug no oghingaranan to Liun no ian kapunganan ni Huda woy ki Dabid no igbuyag dan dongan. No sikandin ka nakaroog ki Satanas. Sikan ian to duon katondanan din to ogloko to imparokot to sikan no ogbasoon. 
\p  
\v 6 Pogpitow ku, duon Nati no Karniru no nigsasindog dio to tangkaan to sikan no pinnuuanan to pandatuan to Lagboy no Igbuyag. Niglinglingotan sikandin to sikan no hop-at no mgo hinimu no duon goinawa woy to sikan no mgo pogbuyagon. Songo nigkita ku dio to lawa to Karniru ka mgo indanan to nakabayo sikandin to kamatayon dongan. Woy duon papitu no mgo sukat din woy songo papitu ka mgo mata rin. Sikan ka mgo indanan to sikan no papitu no igpohitaga to kabogbogan to Gimukud to Magboboot no impaalap din dio to agad hondoi kai to tano.\f + \fr 5:6 \ft Ogkabasa to Isaias 53:7.\f* 
\v 7 No ka sikan no Nati no Karniru, nigdalapak to pinnuuanan to Lagboy no Igbuyag. Woy nigpurut din ka sikan no ogbasoon no duon to kawanan no bolad to sikan no ogpinpinnuu to pinpinnuuan din to pogboboot.  
\v 8 Pogpurut din to sikan no ogbasoon, ka sikan no hop-at no hinimu woy ka kawaan woy hop-at no mgo pogbuyagon, nigluhud dio to tangkaan to sikan no Nati no Karniru oyow ogsimboon dan sikandin. Tag sagboka kandan, duon maroyow no ogparagingon no oghingaranan to alpa. Woy songo duon mgo boung no nanapunu to moomut no igtotomog. Ka ngarog to sikan no obol no moomut, ian ka ig-indan to mgo pog-ampu to mgo sakup to Magboboot.\f + \fr 5:8 \fq Ka alpa\ft , ogkoiling to kudlung di mohon-ing ka tagpos. Ko ogkobliton, ogkopkopon no og-ilingon to saluroy.\f* 
\v 9 No nig-oopad sikandan to iam no opparon no ognangon to, “Sikoykow ka litos no ogpurut to sikan no ogbasoon woy to ogloko to mgo imparokot din. Ian to sikoykow ka litos su namatoy kad on oyow ogbalukasan ka mgo otow to mgo salo dan oyow ogkasakup sikandan to Magboboot. Ka soini no mgo otow no balukasan nud, ogligkat sikandan to tibo no ogkaloinloin no mgo kapunganan woy to mgo kinagian, woy to mgo ugpaan woy dio to agad hondoi no mgo otawa. 
\p  
\v 10 Nighimu nu sikandan no mgo sakup nu woy to mgo talagpanubad no ogsayo to Magboboot no ian Magboboot noy. No ogbogayan nu sikandan to katondanan to ogbulig to pog-alap nu to pandatuan nu kai to tano. 
\p  
\v 11 Nò, pogpitow ku man do, narinog ku ka maagbot no mgo lagong to pila buwa no malan no malan no mgo diwata to Magboboot. No kono man ogkasool. No nanlingutlingut sikandan to sikan no nigpinpinnuuan to Lagboy no Igbuyag woy to sikan no hop-at no mgo hinimu woy to sikan no mgo pogbuyagon.  
\v 12 Woy nigmaagbot ka pog-opad dan to, 
\q1 “Litos no ogkasayo ka Nati no Karniru no nighimatayan nokani. Dakol ka kabogbogan din. Sikandin ka tagtuun to tibo no kalaglagan kai to kalibutan. Woy malayat ka pogdoromdom din. Manokal sikandin no ogtahuron ta, ogsimboon ta woy ogsayoon tanow.” 
\m  
\v 13 No songo nigdinog ku ka tibo no dio to langit woy ka dio to tano, woy ka dio to diralom to tano, woy ka dio to dagat no songo og-oopad to, 
\q1 “Ogsayoon ta ka sikan no ogpinpinnuu to pinnuuanan din to pandatuan woy ka Nati no Karniru. Ogtahuron tanow woy ogdakolon ta ka ngaran dan to waro katamanan su mabogbog lagboy woy ogpakalabow sikandan.” Sikan ka kagi ran. 
\m  
\v 14 No nigtabak ka sikan no hop-at no mgo hinimu. Kagi ran to, “Malogot ian” Woy nigluhud on man doka sikan no mgo pogbuyagon no ogsimboon dan sikandin. 
\c 6  
\s1 Ka Pogloko to mgo Imparokot to Sikan no Ogbasoon 
\p  
\v 1 Pogpitow ku man do to Nati no Karniru no ogloko to an-anayan no imparokot to sikan no ogbasoon. Woy nigdinog ku ka kagi to sagboka to sikan no hop-at no mgo hinimu no duon goinawa. Ka lagong din, noiling to lugung no maagbot. Kagi rin to, “Hondini kad on.”  
\v 2 Pogpitow ku, duon maputi no kuddo. Ka nigpanguddo, niggongon to piot. No nigbogayan sikandin to tangkulu. Nighipanow on sikandin. No ka poghipanow rin, ian ogkounawaan ka bagani no ogpakaroog to mgo usig din. 
\p  
\v 3 No to pogloko to Nati no Karniru to sikan no igkararuwa no imparokot to sikan no ogbasoon, nigdinog ku ka igkararuwa to sikan no hop-at no hinimu no duon goinawa. No kagi rin to, “Hondini kad on.”  
\v 4 Nò, duon dangob no niglibuwas no kuddo no malalab lagboy. Ka nigpanguddo to sikan, nigbogayan to katondanan din to og-alap to samuk kai to soini no kalibutan oyow ogmabunbunuoy ka mgo otow. No nigbogayan sikandin to dakol lagboy no balarow no malayat. 
\p  
\v 5 Nò, pogpitow ku to Nati no Karniru, no nigloko din on ka igkatolu no imparokot to sikan no ogbasoon. Woy nigdinog ku ka igkatolu to sikan no hinimu. Kagi rin to, “Hondini kad on. No duon nigkita ku no moitom no kuddo. Ka nigpanguddo, niggongon to timbangan.  
\v 6 No duon nigdinog ku no lagong no nigligkat dio to taliwaro to sikan no hop-at no hinimu. Kagi rin to, “Ka igkabayad to songo allow to pogtalabau, ogkalitos to tatolu ro no supa no bogas woy ko songo gantang woy tonga no ginaling. Di kono now hilaboti ka mantika woy ka inumanon.” 
\p  
\v 7 Pogpitow ku man do to Nati no Karniru, no nigloko din on ka sikan no igkohop-at no imparokot to sikan no ogbasoon. No nigdinog ku ka igkohop-at to sikan no hinimu no duon goinawa no nigkagi to, “Hondini kad on.”  
\v 8 Pogpitow ku no duon nigkita ku no malunsi-lunsi no kuddo. Ian ngaran to nigpanguddo, si Kamatayon. No duon nigsundul kandin no oghingaranan to Ugpaan to mgo Nammatoy.\f + \fr 6:8 \ft Dio to kinagian to Hinibriu, \fq Hadis\ft ka ighingaran dan to sikan no ogpougpaan to Magboboot to mgo nammatoy.\f* Nigbogayan sikandan to katondanan to ogpanhimatoy to igkohop-at no baad to tibo no mgo otow kai to kalibutan. No ian ka ogpakamatoy kandan, ka mgo samuk, woy mgo ka bitil, woy ka mgo dalu, woy ka mgo mabulut no mgo ulod-ulod no magintalunan.\f + \fr 6:8 \ft Ogkabasa to Ezequiel 14:21.\f* 
\p  
\v 9 No pogpitow ku man do to Nati no Karniru, no ogloko to sikan no igkalalimma no imparokot to sikan no ogbasoon. No dio to diralom to tubaranan, nigkita ku ka mgo gimukud to mgo otow no nigpanhimatayan su nigtuu sikandan to kinagian to Magboboot woy su nasaligan sikandan to immalogot dan to sikan no kinagian din.  
\v 10 No nigdinog ku sikandan to nigpaagbotan dan ka kagi ran to, “Magboboot no ian mabogbog, waro solug no maroot to goinawa nu woy ogkasaligan ka lagboy. Og-inso koy koykow ko kon-u nud on ogbobooti to oglogpad ka mgo otow no nigpanhimatoy kanami?” Sikan ka kagi to mgo gimukud.  
\v 11 Nò, tag sagboka kandan, nigbogayan to maputi no manggad no igpakinabo din. Woy nignangonan sikandan to oyow oghimoloy pad to malopot naan do no mgo allow. Ian su ogpatagaron sikandan ko songo monu pad no mgo duma ran no ogtuu to Magboboot ka songo ogkounawa kandan no ogkohimatayan. 
\p  
\v 12 Pogpitow ku man do to sikan no Nati no Karniru no nigloko din on ka igkohon-om no imparokot to sikan no ogbasoon. Sikan do ian no duon maagbot lagboy no dinug woy nigmoitom on ka allow no ogkounawa to moitom no manggad. Woy nigmalalab on ka bulan no ogkounawa to langosa.\f + \fr 6:12 \ft Ogkabasa to Joel 2:31.\f* 
\v 13 Ka mgo bituon, nonoulug kai to tano. No ian ogkounawaan ka moilow no bogas to kayu no oghingaranan to igira no ogkapadpad to dakol no kalamag.\f + \fr 6:13 \fq Ka igira\ft , malopot no kayu, no ka bogas din, malibuson no ogkoiling to nanam to omisan. Ka sikan, ogkabasa to Isaias 34:4.\f* 
\v 14 Woy naawo on ka langit. No ian ogkounawaan ka papil no ogkalulun on. No ka tibo no mgo bubungan woy ka mgo pulu to dagat, ogkahalin on.  
\v 15 No ka mgo labow no datu to mgo ugpaan kai to tano woy ka mgo mabantug woy ka mgo igbuyag to mgo sundalu woy ka mgo salapianon woy ka mgo uripon woy ka kono no mgo uripon, ogmanholos dio to mgo pilang woy dio to mgo dalama to mgo bubungan.\f + \fr 6:15 \ft Ogkabasa to Isaias 2:19 woy 21.\f* 
\v 16 No ogpangumawon dan ka mgo bubungan woy ka mgo gatung no ogpohoy-uhoy-u, no ogkagi to, “Tobali koy su oyow kono koy ogkitoon to sikan Lagboy no Igbuyag no ogpinpinnuu to pinnuuanan din to pandatuan woy oyow kono koy ogkoumaan  
\v 17 Ian su nigdatong on ka allow to pogdagsang to igkabolu to Magboboot kanami no kono noy ogkaaguanta.”\f + \fr 6:17 \ft Ogkabasa to Joel 2:11.\f* 
\c 7  
\s1 Ka 144,000 no Og-indanan to Magboboot 
\p  
\v 1 Pogkaponga to sikan, duon nigkita ku no hop-at no mgo diwata to Magboboot. Tag sagboka kandan, nigsasindog dio to sikan no hop-at no sungguk to kalibutan, no nig-atangan dan ka kalamag no ogligkat to sikan no hop-at no sungguk oyow kono ogkalamagan ka tano, woy ka dagat woy ka agad nokoy no kayu.\f + \fr 7:1 \fq 144,000\ft , ogkabasa to songo gatus woy kohop-atan woy hop-at no malan. \fq Ka malan\ft , ogkalituk to songo libu.\f* 
\v 2 Sikandan ka nabogayan to katondanan to ogdaat to kalibutan woy ka dagat. No duon nigkita ku no dangob no diwata to Magboboot no nigligkat dio to silaan. Nig-alap sikandin to igpangotob no nigligkat to Magboboot no kono ogkamatoy taman to waro katamanan. No ka sikan no diwata to Magboboot no nigligkat to silaan, nigpaagbotan to nigkagi dio to sikan no hop-at no mgo diwata to Magboboot.  
\v 3 Kagi rin kandan to, “Kono now pa daata ka kalibutan woy ka dagat woy ka mgo kayu taman to ogkapangotoban on ka mgo bukod to tibo no mgo sakup to Magboboot no igpatokod to sikandan ka sakup din.”\f + \fr 7:3 \ft Ogkabasa to Ezequiel 9:4 woy 6.\f* 
\v 4 Sikanak no si Huan, nignangonan a ko songo monu kohon-ing ka ogpangotoban to bukod dan no og-indanan to Magboboot no sakup din. 144,000 tibo ka ogpangotoban no ogligkat to sikan no sampulu woy daruwa no mgo kapunganan ni Israil.  
\v 5-8 Manampulu woy daruwa no malan ka ogpangotoban no ogligkat to tag sagboka no pinanganak ni Israil no si Huda, si Rubin, si Gad, si Asir, si Niptali, si Manasis, si Simion, si Libi, si Isakar, si Sabulun, si Husi, woy si Binhamin. 
\s1 Ka Kohon-ingan no mgo Otow no Nanginabo to Maputi 
\p  
\v 9 Pogkaponga to sikan, nigkita kud ka mohon-ing on ian lagboy no mgo otow no kono ogkasool to agad hontow. Sikandan, nigligkat to agad hondoi no mgo otow woy to agad hondoi no mgo kapunganan woy to mgo ugpaan, woy to tibo to agad hondoi no mgo kinagian. Nanhasindog sikandan dio to tangkaan to sikan no pinnuuanan to pandatuan to Lagboy no Igbuyag woy dio to tangkaan to Nati no Karniru. Tibo kandan, nangikinabo to mamaputi woy nangomkom sikandan to pakow no ogkoiling to dohun to niug.\f + \fr 7:9 \ft Ka sikan no batasan dan to ogpangomkom to mgo pakow no ogkoiling to dohun to niug, ian su igmaganangon to duon dakol no igkarago dan.\f* 
\v 10 No nigpaagbotan dan to nig-ulaloy no kagi ran to, “Ogsayoon tanow ka Magboboot no ogpinpinnuu to pinnuuanan din to pandatuan woy ogsayoon ta ka Nati no Karniru su nigpangabang kanta to mgo salo tanow.”  
\v 11 No ka tibo no mgo diwata to Magboboot, nanlingutlingut to sikan no mgo pogbuyagon woy ka hop-at no hinimu no duon goinawa woy ka Lagboy no Igbuyag no nigpinpinnuu to pinnuuanan din to pandatuan. No tibo kandan, nigluhud to tangkaan din no ogsimboon dan ka Magboboot.  
\v 12 Kagi ran to, “Malogot ian ka soini. Litos to ogkasayo ka Magboboot su sikandin ka mougsob to katouanan din, woy ian ka ogpakagongon to tibo no katondanan woy ka tibo no kabogbogan. Ogpasalamatan ta woy ogdakolon ta ka ngaran din taman to waro katamanan. Malogot ian.” 
\p  
\v 13 Nò, nig-insaan a to sagboka no pogbuyagon. Kagi rin to, “Hontow ka soini no mgo otow no ogpanginabo to mamaputi? Woy taga hondoi sikandan?” 
\p  
\v 14 Nigtabak ku sikandin to, “Igbuyag, sikoykow ka nataga ko hontow sikandan.” Woy nigtabak sikandin to, “Sikandan ka mgo otow no nig-aguanta to dakol no mgo igkabaybayari ran dio to kalibutan no ogligkat to pogtuu ran to Magboboot. Ka mgo salo dan, oglipuwasan to langosa to Nati no Karniru no namatoy on tongod kandan. Ian ogkounawa to niglabaan dan ka mgo manggad dan dio to langosa rin no nigmaputi on ka kinabo dan su naawo on ka mgo salo dan.  
\v 15 Sikan ian to duon on sikandan to tangkaan to sikan no pinnuuanan to pandatuan to Magboboot. No allow woy marusilom, dio ian sikandan to dakol no Ampuanan to Magboboot no ungod dan ogsimboon sikandin. No ka Magboboot no ogpinpinnuu to pogboboot din, ungod ogdumaruma kandan woy ogtantanuran din sikandan.  
\v 16 Konad on ian oggutasan woy konad on ogkamaraan. Woy konad on ogkasakitan to koinit to allow woy to agad nokoy no moinit.  
\v 17 Ian su ka Nati no Karniru no duon to taliwaro to sikan no pinnuuanan to pandatuan, ian ka ogtamong kandan. Woy ogdumaan din sikandan dio to sobsob no woig no ogpokouyag kandan taman to waro katamanan. Woy konad on ogpakasinogow sikandan su og-awoon to Magboboot ka tibo no igmasakit to goinawa ran.”\f + \fr 7:17 \ft Ogkabasa to Isaias 25:8 woy Ezequiel 34:23.\f* 
\c 8  
\s1 Ka Pogloko to Igkapapitu no Imparokot to Sikan no Ogbasoon 
\p  
\v 1 Pogloko to Nati no Karniru to igkapapitu no imparokot to sikan no ogbasoon, waro nigkakagi dio to langit taman to tonga to uras.  
\v 2 Pogpitow ku, duon papitu no mgo diwata to Magboboot. Sikandan ka ogsasindog dio to tangkaan to Magboboot. No nigbogayan sikandan to papitu no bungag. 
\p  
\v 3 Pogkaponga, duon dangob no diwata to Magboboot no nigdatong. Nig-alap sikandin to bulawan no taguanan to igtotomog no moomut no nigsasindog on dio to tangkaan to tubaranan no naakoban to bulawan no ogsabukan to sikan no igbogoy. Woy nigbogayan sikandin to dakol no igtotomog no moomot. Ian su oyow ogtutungon din on dio to sikan no tubaranan no naakoban to bulawan no duon to tangkaan to sikan no pinnuuanan to Lagboy no Igbuyag to pogboboot din. No ka obol to sikan no moomut, iglagkos din on to mgo pog-ampu to mgo sakup to Magboboot. No ka tibo, igbogoy din on to Magboboot.  
\v 4 No ka obol to sikan no igtotomog no moomut, nokog-amut on to mgo pog-ampu to mgo sakup to Magboboot no niglindog on ka obol ligkat to sikan no boung no niggongonan to sikan no diwata no nigsasindog to tangkaan to Magboboot.  
\v 5 Nò, nigpurut to diwata to Magboboot ka taguanan to sikan no igtotomog woy nighiponu din to hapuy no nigligkat to tubaranan. No indogpak din on dio to tano. Inogo on no niglulugung on woy nigkikilat woy nigdirinug. 
\s1 Ka mgo Bungag no Oghiupon 
\p  
\v 6 No ka papitu no diwata to Magboboot, nigpanagana on to oghiup to sikan no bungag no nan-alap dan. 
\p  
\v 7 Ka an-anayan no diwata to Magboboot, nighiup din ka bungag no niggongonan din, nig-uranan ka tano to magakinomu no uran woy nalagkosan to hapuy no nasolugan to langosa. Pogdagsang to sikan, nanasilaban on ka igkatatolu no baad to tano, lagkos to songo nasilaban ka igkatolu no baad to mgo kayu. Woy nasilaban on ka tibo no mgo makamos no pangamuton. 
\p  
\v 8 Nò, ka igkaruwa no diwata to Magboboot, songo nighiup to bungag din, no duon ka ogkoiling to dakol no bubungan no niglogdog no hapuy no ingkatugdo dio to dagat.  
\v 9 No ka igkatolu no baad to woig, nigbaluy on no langosa no nammatoy on ka igkatolu no baad to mgo ngalap no ogman-ugpo to dagat. Woy naraat on ka igkatatolu no baad to tibo no mgo sakayan no dio to dagat. 
\p  
\v 10 Nò, ka igkatolu no diwata to Magboboot, songo nighiup to kandin no bungag, no duon dakol no bituon no noulug ligkat to langit. Ka sikan no bituon, niglogdog, no ian ogkounawaan ka naparokotan no salong. No dio moulug to igkatatolu no baad to tibo no mgo woig woy to mgo sobsob.  
\v 11 Ka ngaran to sikan no bituon, Mapoit. No nigmapoit on ka igkatatolu no baad to tibo no mgo woig. Woy mohon-ing ka mgo otow no ogkamatoy su ligkat to ogpokoinum on to sikan no woig. 
\p  
\v 12 Nò, ka igkohop-at no diwata to Magboboot, songo nighiup on to kandin no bungag, no nigmarusilom ka igkatatolu no baad to allow woy to bulan woy to mgo bituon. Omunaan no kono amana oglayag sikandan ko marusilom woy ko maallow su naawo on ka igkatatolu no baad to layag dan. 
\p  
\v 13 Nò, pogpitow ku no duon dakol no kuligi no oglayanglayang dio to aw-awangan. No nigpaagbotan to nigkagi to, “Kalogon do, kalogon do, kalogon do to tibo no mgo otow no og-ugpo to kalibutan no ogkasalanganan on to poghiup to sikan no mohuri no diwata to Magboboot.” 
\c 9  
\p  
\v 1 Nò, ka igkalima no diwata to Magboboot, nighiup to kandin no bungag. Woy duon nigkita ku no bituon no tahan on no noulug kai to tano ligkat to langit no warad on layag din.\f + \fr 9:1 \ft Dio to Birsikulu 11, ogkasabutan ta to diwata naan ka sikan no bituon.\f* Nigbogayan sikandin to susi no igpulas to bitu no kono ogkatogkad ka karalomi rin.  
\v 2 Nò, nigpulasan to bituon ka sikan no bitu. No duon niglibuwas no makopal lagboy no obol. No ian ogkounawaan ka obol no ogligkat to dakol no ogkasilaban. No nigmarusilom on ka kalibutan woy naatangan ka layag to allow su ligkat to obol no niglibuwas to sikan no bitu.  
\v 3 Poglibuwas to sikan no obol, duon mgo talangas no nanlibuwas on kai to tano. Woy nigbogayan sikandan to kabogbogan to oghisakit to otow no ogkoiling to alas to pogkagat to salipitsipit.  
\v 4 Nigsaparan ka mgo talangas to oyow kono dan ogdaaton ka mgo pangamuton, woy ka mgo kayu, woy ka agad nokoy no mgo pinamula. Di ian dan do oghisakitan ka mgo otow no waro pangotob dio to bukod dan no igpatokod to sakup sikandan to Magboboot.  
\v 5 No nigbogayan ka mgo talangas to oyow ogbayadbayad to mgo otow taman to lalimma no bulan. Di waro bogayi sikandan to oghimatoy to mgo otow. No ka igkabaybayari ran, ian nounawaan ka sikan no igkabaybayari to otow no ogkakagat to salipitsipit.  
\v 6 To sikan no lalimma no bulan, ogkoiniat ka mgo otow no ogkamatoy on porom, di kono ogpakatood no ogkamatoy su ogpamariu man kandan ka kamatayon. 
\p  
\v 7 No ka pogpitow ku to sikan no mgo talangas, no ogkoiling sikandan to mgo kuddo no nigpanagana to dakol no samuk. Woy duon mgo tangkulu no bulawan to mgo ulu ran. No ka mgo langlanguwan dan, ogkoiling to langlanguwan to mgo otow.  
\v 8 Ka bulbul dan, ogkoiling to bulbul to boi. No ka mgo ngipon dan, ogkoiling to ngipon to liun.  
\v 9 Woy duon putow no ig-atang to mgo sosolobon dan no ogkounawa to ongil. Ko oglayang sikandan, ka daging to mgo pakpak dan, ogkoiling to daging to mohon-ing no sakayan no kalisa no ogganuyon to mgo kuddo no og-agpas no pallaguy no ogtangko to usig dan dio to dakol no samuk. 
\p  
\v 10 Duon ikug to sikan no mgo talangas no ogkoiling to ikug to salipitsipit no ogkagat. No ka kabogbogan dan to oghisakitan ka mgo otow taman to lalimma no bulan, duon ian to sikan no mgo ikug dan.  
\v 11 Duon igbuyag dan no ogboboot kandan. Ian ka diwata no nigpulas to sikan no bitu no kono ogkatogkad ka karalomi rin. Ka ngaran din to kinagian to Hinibriu, si Abadun. No to kinagian to Ginirigu, si Apuliun. No to kanta no kinagian, Talag-ubus. 
\p  
\v 12 Napongaan on ka an-anayan no dakol no igkabaybayari to mgo otow. Di duon daruwa pad no dakol no igkabaybayari no ogdatong to mgo otow no waro indanan to impangotob to Magboboot duon to mgo bukod dan. 
\p  
\v 13 Nò, ka igkohon-om no diwata to Magboboot, nighiup din ka bungag no niggongonan din. Poghiup din, duon nigdinog ku no kagi no nigligkat dio to sikan no hop-at no sungguk to sikan no bulawan no tubaranan no duon to tangkaan to Magboboot.  
\v 14 No nigkagian din ka sikan no igkohon-om no diwata no duon bungag to, “Hokari nu ka imbanggut to sikan no hop-at no mgo diwata \em ni Satanas\em* no nigbanggutan dio to dakol no woig no ogkohingaranan to Eupratis.”  
\v 15 Nò, nighokaran on ka sikan no hop-at no diwata oyow ogpanhimatayan ka igkatolu no baad to tibo no mgo otow to kalibutan. Ian su ligkat dongan, noindanan tahan sikandan to oyow sikan ian ka ogkohimu ko ogpokouma on ka sikan ian no uras, to sikan lagboy no allow woy to sikan ian no bulan, woy to sikan ian no tuid.  
\v 16 Nignangonan a to tibo no mgo sundalu ran no nigman-untud to mgo kuddo, 200,000,000.\f + \fr 9:16 \fq 200,000,000\ft , ogkalituk to daruwa no gatus no malan no malan.\f* 
\v 17 Ka pogpitow ku to mgo nigpanguddo, ogkoiling to soini. Duon mgo ig-atang dio to sosolobon to sikan no nigpanguddo. No ka batok to sikan, duon malalab no ogkoiling to hapuy, woy duon malugowlugow no ogkoiling to batok to mahal no batu no oghingaranan to sapiru, woy duon makaluwag no ogkoiling to asupri. Ka ulu to mgo kuddo, ogkoiling to ulu to liun. No duon hapuy, mgo obol woy asupri no oglibuwas to mgo bo-bo dan.\f + \fr 9:17 \ft Lahag ka pulbus to asupri di magalang woy masongot ka ngarog ko ogpakaamut to hapuy no ogpokouwang on.\f* 
\v 18 Ligkat to sikan no hapuy woy ka mgo obol woy ka asupri no oglibuwas to bo-bo to mgo kuddo, ogkakamatoy on ka igkatatolu no baad to tibo no mgo otow no ogman-ugpo kai to tano.  
\v 19 Ian su ka kabogbogan to mgo kuddo to igpanghimatoy to mgo otow, ogligkat to mgo bo-bo dan woy to ikug dan, su dio to koopusan to mgo ikug dan, duon ulu no ogkoiling to ulod no ogpokohisakit to mgo otow. 
\p  
\v 20 Di ka mgo otow kai to tano no kono ogkamatoy to sikan no hapuy ko ka obol ko ka asupri, kono ogman-ongkod to pogsimba ran to sikan no mgo inotow-otow no nanhimu ran. Woy ogparagason dan nasi ka pogsimba ran to mgo busow woy to mgo inotow-otow no nanhimu ran no ogligkat to bulawan, woy ko plata, woy to burunsi, woy to batu, woy to kayu.\f + \fr 9:20 \fq Ka plata\ft , ogkoiling to bulawan di maputi woy kono amana no mahal.\f* No ka sikan no nanhimu ran, kono ogpakakita woy kono ogpakarinog woy kono ogpokohipanow.  
\v 21 Woy songo kono dan og-ongkoran ka mgo maroot no batasan dan. Di ogparagason dan nasi to ogpamunu woy to ogpamulingan no ogsampit to mgo busow, woy to oghilabot to kono no asawa ran woy kono oghagtong to ogpanakow. 
\c 10  
\s1 Ka Diwata no Suguanon to Magboboot no Oggongon to Malintok no Ogbasoon 
\p  
\v 1 Pogpitow ku no duon dangob man do no mabogbog no diwata to Magboboot no ogligkat to langit. Nabukusan ka lawa rin to salagapun woy duon balangow no nakalingut to ulu rin. Ka langlanguwan din, nigpangini-kinì no ogkoiling to kalayag to allow. No ka mgo lison din, ogkounawa to suloy no ogkalogdog.  
\v 2 Dio to bolad din, duon niggongonan din no malintok no ogbasoon no nabolat on. Ka kawanan no paa rin, indiok din to dagat. No ka limang no paa rin, indiok din to tano.  
\v 3 No nigbabansagon sikandin. Ka lagong din, ogkoiling to poghanggol to mabulut no liun. Pogkaponga rin to nigbabansagon, nigtabak ka papitu no lugung.  
\v 4 Nò, to pogtabak to mgo lugung, ogsulat a poron to nigdinog ku. Di duon kagi no nigdinog ku ligkat to langit no nignangon to, “Iholos nud to koykow ro no goinawa ka innangon to mgo lugung. Kono nud isulat.” 
\p  
\v 5 Pogkaponga to sikan, ka diwata to Magboboot no nigkita ku no nigsasindog dio to dagat woy dio to tano, nigkayow rin ka kawanan no bolad din dio to langit.  
\v 6 Woy duon igpangulibot din to ngaran to Magboboot no kono ogkamatoy no ian ka talaghimu to langit woy ka tano woy ka dagat woy ka tibo no duon to sikan. No kagi to diwata to, “Ka ogkohimu on uromo, konad on ogkalugoy no ogkatuman on.  
\v 7 No ko oghiupon on to sikan no igkapitu no diwata to Magboboot ka bungag no oggongonan din, ogkatuman on ka tuud to Magboboot no nokani ingkoholos di impohitaga rin on dongan to mgo suguanon din no talagnangon to kinagian din.” 
\p  
\v 8 Nigdinog ku man doka lagong to kagi no nigligkat dio to langit no nignangon kanak to, “Hondio ka woy puruta nu ka ogbasoon no nabolat on no oggongonan to diwata to Magboboot no ogsasindog dio to dagat woy to tano.” 
\p  
\v 9 Omunaan ian to nigdani a to sikan no diwata to Magboboot su oyow ogbuyuon ku ka sikan no doisok no nabolat on no ogbasoon. Kagi to diwata kanak to, “Tinawaa nud on ka soini no ogbasoon woy koona nud. Ka nanam din, ogkounawa to tonob koomis ko duon pad to bo-bo nu. Di ko ogkaabolong nud on, ogmapoit.” 
\p  
\v 10 Sikan ian no nigtinawo kud on dio to diwata ka sikan no doisok no ogbasoon no nabolat on, woy nigkoon kud on. No ko kai pad to bo-bo ku, moomis no ogkounawa ian to tonob. Di to pog-abolong ku, nigmapoit on.  
\v 11 No nignangonan a to kagi rin to, “Og-awoson to ighutuk nu ignangonnangon ipanoy ka kinagian to Magboboot tongod ko nokoy ka ogkoumaan uromo dio to agad hondoi no mgo otow no dio to agad hondoi no mgo ugpaan woy dio to ogkaloinloin no mgo kinagian dan. Woy songo igkanangonnangon nu dio to mgo igbuyag dan.” 
\c 11  
\s1 Ka Daruwa no Talagmalogot to Kinagian to Magboboot 
\p  
\v 1 Nò, nigbogayan a to sosokoroy no ogkoiling to tukod. No nignangonan a to, “Hondio kad on to dakol no Ampuanan to Magboboot woy sokora nud on. Woy songo sokora nud ka tubaranan, woy soola nud ka tibo no mgo otow no ogmanimba dio.  
\v 2 Di kono nu sokora ka lama to sikan no Dakol no Ampuanan to Magboboot, su igkabogoy pad to mgo otow no waro mogtokod to Magboboot. No taman to kohop-atan woy daruwa no bulan, ogpandaatdaaton dan ka dakol no lunsud to Hirusalim no ian ka lunsud no pig-indanan to Magboboot.  
\v 3 Woy igpohondio ku ka daruwa no otow no talagmalogot to kinagian ku. No igpanangon ku ka kinagian ku taman to 1,260\f + \fr 11:3 \fq 1,260\ft , ogkalituk to songo malan woy daruwa no gatus woy kohon-oman.\f* no allow. Ogkikinabo sikandan to saku no nighimu no kinabo.\f + \fr 11:3 \ft Ka batasan dan to ogkikinabo to manggad no ighimu to saku, ian su igmaganangon to duon dakol no igmasakit woy ko igkasasow to goinawa ran.\f* 
\p  
\v 4 Ka sikan no daruwa no talagmalogot, ian ka ingkapanag-ilingan dongan to sikan no daruwa no kayu no oghingaranan to ulibu. Woy songo ingkapanag-ilingan dod sikandan to daruwa no ilawan no duon to tangkaan to Lagboy no Igbuyag to tibo no mgo otow kai to kalibutan.\f + \fr 11:4 \ft Ogkabasa to Zacarias 4:3 woy 11.\f* 
\v 5 Ko duon agad hontow no oghisakit poron kandan, duon hapuy no oglibuwas to bo-bo dan no ogkatutung ka mgo usig dan no ogkoubus sikandan no ogkamatoy.  
\v 6 Woy tagood to ognangonnangon sikandan to kinagian to Magboboot, ogbogayan sikandan to kabogbogan oyow ogkohimu no ogpakaatang sikandan to mgo kibol oyow kono ogpokouran. Woy ogbogayan sikandan to kabogbogan to ogbaluy on no langosa ka woig. Woy songo ogbogayan to kabogbogan to oyow, agad kon-u ran ogkoiniati to ogboboot, ogkoumaan on ka tano to agad nokoy no igkabaybayari to mgo otow.  
\v 7 Pogkaponga ran to igmalogot to kinagian to Magboboot, oglibuwas on ka makahallokhallok no magintalunan no ogligkat to sikan no bitu no kono ogkatogkad ka karalomi rin. No ogsulungon din ka sikan no daruwa no talagmalogot to kinagian to Magboboot. No ogkaroog din woy oghimatayan din on.  
\v 8 Ka lawa to sikan no daruwa no nammatoy, nakatuus do duon to kalasara to sikan no dakol no lunsud. No dongan, dio ilansang ka Lagboy no Igbuyag ta to krus. Woy ian dod ka lunsud no songo ogpanag-iling to Suduma woy ko Ehipto.\f + \fr 11:8 \ft Ian igpanag-iling to Suduma woy ko Ehipto ka sikan no dakol no lunsud su ka mgo batasan dan, songo ogkoiling to mgo maroot no batasan no nohimu dongan to mgo taga Suduma woy ka mgo taga Ehipto.\f* 
\v 9 Nò, taman to tatolu no allow woy tonga, ka mgo otow no ogligkat to agad hondoi no ogkaloinloin no mgo ugpaan, woy to mgo kapunganan woy ka mgo kinagian, ogtotongtongan dan ka mgo lawa to sikan no daruwa no nammatoy, woy kono dan igbogoy ko iglobong on ka mgo lawa ran.  
\v 10 Lagboy no igkarago to mgo otow ka kamatayon to sikan no daruwa. No oghimu sikandan to ogkaragaan woy ogmabogbogayoy to mgo igkarago no mgo kalaglagan su namatoy ka sikan no daruwa no nakabayadbayad to sikan no mgo otow no og-ugpo kai to soini no tano. 
\p  
\v 11 Di pogligad to sikan no tatolu woy tonga no allow, og-uyagon do sikandan to Magboboot woy ogpakasasindog on. Ka tibo no mgo otow no ogpakakita, ogkakahallok lagboy.  
\v 12 No inogo on no ogdinogon to sikan no daruwa ka maagbot no kagi no ogligkat to langit no ognangon kandan to, “Hondini kow on.” No ogkabatun on sikandan dio to langit. No ogpakatotongtong ka mgo usig dan taman to ogkabukusan on sikandan to mgo salagapun.  
\v 13 No kono do ogbuloy no ogdagsang on ka maagbot lagboy no dinug woy ogkagulak on ka igkasampulu no baad to sikan no dakol no lunsud. Ogkammatoy ka papitu no malan no mgo otow. No ka mgo otow no waro nammatoy, ogkakahallok on lagboy. No ogkasayo dan ka Magboboot no ian mabogbog lagboy no dio to langit.  
\v 14 Napongaan ka igkararuwa no dakol no igkabaybayari to mgo otow, Di magaan on ogdatong ka igkatatolu no dakol no igkabaybayari. 
\s1 Ka Poghiup to Sikan no Igkapapitu no Bungag 
\p  
\v 15 Nò, ka igkapapitu no diwata to Magboboot, nighiup to bungag din. Inogo on no duon maagbot no mgo lagong ligkat dio to langit no nigkagi to, “Ligkat kuntoon taman to waro katamanan, waro loin no ogpakaalap to pandatuan to soini no kalibutan ko kono no ka Lagboy no Igbuyag woy ka Im-imanan to mgo Koot-otawan no pigsugu din no si Kristu.”\f + \fr 11:15 \ft Ogkabasa to Daniel 2:44.\f* 
\v 16 Ka kawaan woy hop-at no pogbuyagon no ogpinpinnuu dio to mgo pinnuuanan dan to pogboboot duon to tangkaan to Magboboot, nanluhud to ogsimboon dan ka Magboboot. No nigkagi sikandan to, 
\q1  
\v 17 “Magboboot no ian Lagboy no Igbuyag noy, Mamabogbog ka to tibo, no sikoykow ka Magboboot dongan woy ka kuntoon woy taman to waro katamanan. Ogpasalamatan noy sikoykow su nigpurut nud on ka pandatuan nu no mabogbog lagboy woy nigbunsud kad on to pog-alap nu to mgo koot-otawan kai to kalibutan. 
\q1  
\v 18 Nabolu lagboy ka mgo otow no waro nigtuu koykow, su nokouma on ka allow to iglogpad nu kandan woy allow rod to ogbobootan nu ka mgo otow no nammatoy. Woy sikan dod ka allow no ogpambogayan nu to igsayo ka mgo suguanon nu woy ka mgo talagnangon to kinagian nu woy ka tibo no ogtahud koykow, agad mabantug woy ka kono no mabantug. No soini rod ka allow no og-ubuson nud on ka tibo no mgo otow no nigdaat to soini no kalibutan.” Sikan ka ignangon to sikan no kawaan woy hop-at no mgo pogbuyagon. 
\p  
\v 19 Pogkaponga, no napulasan on ka dakol no Ampuanan to Magboboot no dio to langit. No dio ku kitaa ka sikan no bulawan no Baul no nataguan to Pogsabut to Magboboot. No ian ka taguanan to mgo ingkasulat dongan no mgo sabut to Magboboot dio to mgo otow.\f + \fr 11:19 \fq Ka Baul to Pogsabut to Magboboot\ft , ian ka nigtaguan dongan to mgo ingkasulat to sikan no sampulu no mgo sugu to Balaod to Magboboot no imbogoy rin ki Moisis oyow songo igkabogoy rin dio to mgo otow.\f* Inogo on no nigkikilat on woy duon maagbot no daging woy nigbabalansì woy nigdinug woy nig-uran on to mabogat no magakinomu no uran. 
\c 12  
\s1 Ka Boi woy ka Dakol no Ulod 
\p  
\v 1 No duon impapitow kanak no sagboka no dakol no kabolbolonganan no dio to langit. Woy duon sagboka no boi. Ian kinabo din ka allow woy nigsasindogan din ka bulan. No duon tangkulu to ulu rin no nigtaguan on to sampulu woy daruwa no mgo bituon.  
\v 2 Ogkaboros ka sikan no boi. No ogpakangangang sikandin su oghayoran on.  
\v 3 Pogpitow ku, duon dangob no kabolbolonganan no dio to langit. No nigkita a to malalab no ulod no dakol lagboy no oghingaranan to daragun. Duon papitu no ulu rin, no nalogob to tangkulu. Woy sampulu ka mgo sukat din.\f + \fr 12:3 \fq Ka daragun\ft , ogkoiling kun to ibid woy ko buaya di subla no dakol woy manokal.\f* 
\v 4 Pogpitow ku, niglamposan to ikug din ka igkatatolu no baad to mgo bituon no dio to langit woy indogpak din kai to tano. Pogkaponga to sikan, nigsasindog sikandin dio to tangkaan to boi no nighayuran to oyow ogdawion din on poron ka bato ko iglosut on.  
\v 5 No lukos ka in-anak to boi. No ka sikan no bato, ian ka ogpakaalap to pandatuan to tibo no mgo koot-otowan kai to kalibutan uromo. No ko ogsugu on sikandin, waro agad hontow no ogpakaatu su mabogbog lagboy sikandin no ogkounawa to putow. Nò, nigsakolow ka bato no nig-alap dio to Magboboot woy dio to pinnuuanan din to pandatuan din no dio to langit.  
\v 6 No ka sikan no boi, nakapallaguy on no nokohondio to holholawan no impanagana to Magboboot kandin. No dio tamongi sikandin taman to 1,260 no allow.\f + \fr 12:6 \fq Ka 1,260\ft , ogkabasa to songo malan woy daruwa no gatus woy kohon-oman.\f* 
\p  
\v 7 Pogkaponga, duon on dakol no samuk dio to langit. No si Migil woy ka mgo sakup din no olin diwata to Magboboot, nigpoog-ogotoy to sikan no ulod no oghingaranan to daragun woy to kandin no mgo diwata.  
\v 8 No to pog-inogotoy ran, naroog on ka dakol no ulod woy ka mgo diwata rin woy konad on ogpokohutuk sikandan no oglopow dio to langit.  
\v 9 Ka sikan no dakol no ulod woy ka mgo diwata rin, indogpak kai to tano. No ka sikan no ulod, duon dongan no ian ka igbuyag to mgo busow no oghingaranan ki Satanas woy si Talagbayung. No sikandin ka niggawoy to tibo no mgo koot-otawan kai to soini no kalibutan. 
\p  
\v 10 Nò, duon nigdinog ku no maagbot no lagong no nigligkat to langit no nignangon to, “Kuntoon, nigdatong on ka pogpangabang to Magboboot, woy igpohitaga rin on ka kabogbogan din to og-alap to pandatuan din. Woy impohitaga rin on to si Kristu, no ian ka Im-imanan to mgo Koot-otawan, sikandin ka nigbogayan to Magboboot to katondanan din to og-alap to pandatuan din to soini no kalibutan. Ian su indogpak on si Satanas no ungod ogsasindog to tangkaan to Magboboot to maallow woy ka marusilom no ogbayungbayung to mgo sulod tanow to pogtuu.  
\v 11 No ian to naroog dan si Satanas su ogligkat to nalipuwasan sikandan to langosa ni Hisus no oghingaranan to Nati to Karniru woy su ogligkat to kagi ran no igmalogot to pogtuu ran. Ian su agad ko oghimatayan sikandan, waro dan man ongkori ka pogtuu ran.  
\v 12 Ogkarago kow ka ogman-ugpo dio to langit. Di sikaniu no ogpokougpo to tano woy dio to dagat, kohoy-u kow ro ian lagboy su nakalogsad si Satanas duon to kaniu. Nabolu lagboy sikandin su natagaan din to malopot naan doka allow rin no igliwak din to oghimu to maroot dio to mgo otow.” 
\p  
\v 13 No ka sikan no dakol no ulod no oghingaranan to daragun, pogkataga rin to indogpak on sikandin dio to tano, niggapon din on ka boi no nig-anak to bato no lukos.  
\v 14 Di nigbogayan to Magboboot ka boi to dakol no pakpak to kuligi to oyow ogpakalayang sikandin dio to holholawan no ogtamongan sikandin to Magboboot taman to tatolu woy tonga no tuid oyow kono ogkoumaan sikandin to sikan no dakol no ulod.  
\v 15 Nò, ka sikan no ulod, duon imbugwak din no dakol no woig ligkat to bo-bo din oyow ogkaanlas on poron ka boi.  
\v 16 Di nigpangabangan sikandin to tano su nigpanggintaang no nigsonop on ka dakol no woig no imbugwak to sikan no ulod.  
\v 17 Nò, nabolu lagboy ka ulod to sikan no boi. Sikan ian to ogsulungon din ka duma no mgo anak to boi no ian ka ogpaagad-agad to mgo sugu to Magboboot woy ka ogpamalogot to sikan no impan-anad ni Hisu Kristu.  
\v 18 No dio nigsasindog to pantad to ilis to dagat. 
\c 13  
\s1 Ka Daruwa no Magintalunan 
\p  
\v 1 Pogpitow ku man do no duon magintalunan no niglibuwas dio to dagat. Sampulu ka sukat din woy papitu ka ulu rin. Woy to tag sagboka no sukat din, duon tangkulu. Woy duon ngaran no ingkasulat to sikan no tag sagboka no ulu rin no ogdoot to Magboboot.  
\v 2 No to pogpitow ku to lawa to sikan no magintalunan, ogkoiling to dakol woy mabatok no miow no oghingaranan to liupardu. Ka paa rin, ogkoiling to paa to dakol no magintalunan no oghingaranan to usu. Ka bo-bo din, ogkoiling to bo-bo to liun. No ka ulod no oghingaranan to daragun, nigbogayan din ka sikan no magintalunan to kabogbogan din woy to ogpinpinnuu to pinnuuanan to pandatuan woy to dakol no katondanan din.  
\v 3 Pogpitow ku to sagboka no ulu to sikan no magintalunan, no duon dakol no banos to napalian no ogkoiling to ogpakimatoy no pali, dokad di to noulian on. No ka tibo no mgo otow kai to kalibutan, nabolongbolong no nigpasakup on to sikan no magintalunan.  
\v 4 Nigsimba to mgo otow ka ulod no oghingaranan to daragun su ian ka nigbogoy to katondanan din dio to sikan no magintalunan. Woy songo pigsimba dan ka magintalunan. No kagi ran to, “Waro agad hontow no ogpakalabowlabow to kabogbogan to soini no magintalunan. Woy waro agad hontow no ogpakaatu kandin.” 
\p  
\v 5 Nò, nigbalagad pad to Magboboot ka sikan no magintalunan ko nokoy ka ogkagion din no igparakoldakol woy ka igpandoot to Magboboot. No taman to kohop-atan woy daruwa no bulan, nigbogayan to Magboboot sikandin to liwak to og-alap-alap pad to katondanan.\f + \fr 13:5 \ft Ogkabasa to Daniel 7:25.\f* 
\v 6 Sikan ian no nigtungayow rin on ka Magboboot woy ka langit woy ka tibo no og-ugpo to langit no ian ugpaan to Magboboot.  
\v 7 No songo nigbogayan pad ka magintalunan to liwak din to ogsulung to mgo sakup to Magboboot. No ogpakaroog pad ka magintalunan kandan. Woy ogbogayan pad sikandin to katondanan din to og-alap to tibo no mgo kapunganan woy ka mgo ugpaan no ogkaloinloin no mgo kinagian kai to kalibutan.  
\v 8 No ogsimboon sikandin to tibo no mgo otow to soini no kalibutan no waro ikasulat ka ngaran dan dio to sulatanan to ngaran to mgo otow no ogbogayan to kouyagan no waro katamanan. Ligkat to waro pad nohimu ka soini no kalibutan, tahan on no ingkasulat ka ngaran dan to sikan no sulatanan to Nati to Karniru no nighimatayan nokani. 
\p  
\v 9 Tag sagboka kaniu, ko duon talinga now, og-awoson to ogpamminog kow to soini:  
\v 10 Ka otow no ogkakulisan to ogdakopon sikandin, ogkarakop. No ka otow no ogbunu, songo ogkabunu dod sikandin.” 
\m Omunaan to sikanta no mgo sakup to Magboboot, og-awoson to og-aguantoon ta ka igkabaybayari ta woy ogpoomot kinow to pogtuu ta.\f + \fr 13:10 \ft Ogkabasa to Jeremias 15:2 woy 43:11.\f* 
\p  
\v 11 Pogpitow ku no duon dangob no magintalunan no nigligkat dio to tano. daruwa ka sukat din no ogkoiling to sukat to nati to karniru. Di ka lagong din, ogkoiling to kagi to ulod no oghingaranan to daragun.  
\v 12 Ka katondanan din, songo dio ogligkat to sikan no katondanan to sikan no nokohun-a no magintalunan. No nigpogos din ka tibo no koot-otawan kai to tano to oyow ogsimboon dan ka nokohun-a no magintalunan no duon dakol no pali din no ogpakimatoy poron kandin di noulian on.  
\v 13 Nò, duon mabogbog no mgo kabolbolonganan no oghimuon to sikan no igkaruwa no magintalunan. Ian su ogkohimu rin to ogpoulug to hapuy no ogligkat dio to langit no igpakita to tibo no mgo otow.  
\v 14 Nò, sikan ian to ogkagawayan on ka tibo no mgo koot-otawan to soini no kalibutan su ogbogayan sikandin to ogmanhimu to sikan no mgo kabolbolonganan duon to tangkaan to sikan no nokohun-a no magintalunan. Pogkaponga, ka igkaruwa no magintalunan, ogsugu to mgo otow to oyow oghimu to inotow-otow no ogkoiling to sikan no nokohun-a no magintalunan no duon dakol no pali no ogpakimatoy poron di nouyag do.  
\v 15 No ka nokohun-a no magintalunan no nigligkat to dagat, nigbogoy to kabogbogan din dio to sikan no igkararuwa no magintalunan no nigligkat to tano to oyow ogkabogayan din to goinawa ka sikan no inotow-otow woy to oyow ogpakakagi on woy to oyow ogpakapohimatoy to agad hontow no kono ogsimba kandin.  
\v 16 Woy ka sikan no igkaruwa no magintalunan, ogpogoson din ka tibo no mgo otow, agad ko dakol woy ko doisok ka ngaran dan, ka salapian woy ko publi, ka uripon woy ko waro nouripon to oyow ogkapangotoban sikandan dio to kawanan no bolad dan woy ko dio to bukod dan.  
\v 17 Sikan ian to waro agad hontow no ogpakaboli woy ko ogbaligya ko kono ogpapangotob to ngaran woy ko numiru no igpatokod to ngaran to sikan no nokohun-a no magintalunon no nigligkat to dagat. 
\p  
\v 18 Nò, ian do ogpakasabut to soini ka otow no mougsob to pogdoromdom din. Ian su ko mougsob ka pogdoromdom din, ogpakabatuk to lituk to sikan no numiru to sikan no magintalunan. Su ka numiru, ogpakalituk to ngaran to songo otow. No ka numiru rin, hon-om no gatus, kohon-oman woy hon-om (666). 
\c 14  
\s1 Ka Nati no Karniru woy ka 144,000 no Imbalukas din 
\p  
\v 1 Pogpitow ku man do no nigkita ku ka Nati no Karniru no nigsasindog dio to bubungan no oghingaranan to Sion. No dio to longod din, duon 144,000 no mgo otow. No ka mgo bukod dan, nasulatan to ngaran to Nati no Karniru woy ka ngaran to Amoy rin.\f + \fr 14:1 \fq 144,000\ft , ogkalituk to songo gatus woy kohop-atan woy hop-at no malan.\f* 
\v 2 No duon nigdinog ku no lagong no nigligkat dio to langit no ogkounawa kaagbot to pogdaragunut to dakol no sampow woy ogkounawa rod to pogdagsang no lugung woy songo ogkounawa to mohon-ing no mgo otow no ogkokolit to ogparagingon no oghingaranan to alpa.  
\v 3 No pogpitow ku no ka 144,000 no mgo otow, namansasindog dio to tangkaan to sikan no pinnuuanan to pandatuan to Lagboy no Igbuyag woy to longod to sikan no hop-at no hinimu no duon goinawa woy ka mgo pogbuyagon. No ka sikan no 144,000 no mgo otow, nigman-opad to iam no opparon. Sikandan doka nataga to sikan no opparon su sikandan ka nigligkat to kalibutan no nabalukas on to langosa ni Hisus no oghingaranan to Nati no Karniru.  
\v 4 Sikandan ka waro makasalo to poghilabot to kono no asawa ran su maroyow lagboy ka mgo batasan dan. Woy sikandan dod ka og-ungod ogdumaruma to Nati no Karniru dio to agad hondoi no ogdolog sikandin. No nigbalukasan ligkat to mgo otow dio to kalibutan. No ian dan ogkounawaan ka an-anayan no ogkagaani no bogas no igbogoy dio to Magboboot woy dio to sikan no Nati to Karniru.  
\v 5 Waro mokouubat sikandan no waro solug no maroot no batasan dan. 
\p  
\v 6 Pogpitow ku no duon man do dangob no diwata to Magboboot no nigkita ku no niglayanglayang dio to aw-awangan. Nig-alap sikandin to sikan no Maroyow no Nangnangonon no waro katamanan. No dio din ignangonnangon to tibo no koot-otawan kai to kalibutan no ogkaloinloin to mgo otow, woy to mgo kapunganan woy to mgo kinagian woy to mgo ugpaan.  
\v 7 Nigpaagbotan din to nigkagi to, 
\q1 “Tahura now woy sayaa now ka Magboboot su nigdatong on ka allow to ogbobootan din ka mgo koot-otawan. Simboon now sikandin su ian ka nighimu to langit woy ka kalibutan woy ka dagat woy ka ogligkatan to mgo woig.” 
\p  
\v 8 Woy duon igkararuwa no diwata to Magboboot no nigsundul to sikan no nokohun-a no diwata, no nigkagi to, “Nagulak on. Nagulak on ian lagboy ka mabantug no lunsud no ogkohingaranan to Babilunia. Ian su ka mgo nan-ugpo to sikan no lunsud, nig-ayat dan ka tibo no mgo otow kai to kalibutan to ogmanhimu to maroot. No ian dan ogkounawaan ka boi no maroot so batasan no ogpoinumon to mgo lukos to mabulut no inumanon to oyow ogkaayat din to oghilabot kandin.”\f + \fr 14:8 \ft Ogkabasa to Isaias 21:9 woy Jeremias 51:8.\f* 
\v 9 No, duon igkatatolu man do no diwata to Magboboot no nigsundul to sikan no nokohun-a no daruwa. No nigmaagbot to nigkagi to, “Agad hontow no ogsimboon ka magintalunon woy ka inotow-otow rin woy ka otow no ogpapangotob to mgo bukod dan woy ko kawanan no mgo bolad dan no igpatokod to nigpasakup kandin,  
\v 10 ogdagsangan sikandan to dakol no igkabolu to Magboboot. No ka sikan no iglogpad, kono ogpakasolug to kohoy-u to Magboboot. Di duon do ian to pogpitow ni Hisu Kristu no oghingaranan to Nati no Karniru, woy to pogpitow to mgo diwata to Magboboot, ogkabaybayaran lagboy sikandan dio to hapuy to asupri no ogliabliab.  
\v 11 No taman to waro katamanan, ungod og-oobol no ka sikan no hapuy no igbayadbayad kandan. Agad maallow to marusilom, ogkabaybayaran ka tibo no ogsimba to sikan no magintalunan woy ka inotow-otow rin woy ka agad hontow no ogpapangotob to ngaran din dio to mgo bukod dan woy ko dio to mgo kawanan no bolad dan.” Ian ka innangon to sikan no diwata.  
\v 12 Omunaan sikaniu no mgo sakup to Magboboot no ogpaagad-agad to mgo sugu din woy ogtuu to kinagian ni Hisus, awoson now to og-aguantoon now ka igkabaybayari now no kono kow ogloko to pogtuu now to Magboboot. 
\p  
\v 13 Woy duon narinog ku no lagong ligkat to langit no nigkagi to, 
\p “Isulat nu ka soini. Ligkat kuntoon, ogkapulusan ka mgo otow no ogkoumaan to igkamatoy ran su ligkat to pogtuu ran to Lagboy no Igbuyag ta. No nigtabak ka Gimukud to Magboboot no nigkagi to, “Malogot ian to ogkarago sikandan su ogpokohimoloy on sikandan su warad on ka igkabaybayari ran no nig-aguanta ran tongod to pogtuu ran. Woy ogsayoon sikandan su tongod to mgo maroyow no hinimuan dan.” 
\s1 Ka Poggaani to Kalibutan 
\p  
\v 14 Pogpitow ku man do, no duon nigkita ku ka maputi no sagapun woy duon ka nigpinpinnuu to sikan no ogkoiling to Kakoy to mgo Koot-otawan. Duon tangkulu rin no bulawan woy duon niggongonan din no magalang no likung.  
\v 15 Woy duon dangob no diwata to Magboboot no nigkita ku no niglibuwas to Dakol no Ampuanan. No nigpaagbotan din ka ignangon din to sikan no nigpinpinnuu duon to sagapun. Kagi rin to, “Iggaani nud on ka likung nu su nigdatong on ka tiggaani no nohinug on lagboy ka oggaanion.”  
\v 16 Nò, ka sikan no ogpinpinnuu dio to sagapun, songo pogbolobos din to sikan no likung din no nagaani on ka to tibo to soini no kalibutan. 
\p  
\v 17 Nò, duon dangob man do no diwata to Magboboot no niglibuwas to sikan no Dakol no Ampuanan no dio to langit. No songo duon nig-alap din no magalang no likung. 
\p  
\v 18 Woy duon dangob man do no diwata to Magboboot no niglibuwas ligkat to tubaranan to sikan no Dakol no Ampuanan. Sikandin ka diwata no talagtamong to hapuy. Nigmaagbot to ignangon din to diwata no nig-alap to magalang no likung. Kagi rin to, “Ka sikan no likung nu, iggunu nud to sikan no mgo bogas to mgo pinamula no ubas no dio to kalibutan su nohinug on.”  
\v 19 Sikan ian no niggunu to diwata to Magboboot ka mgo bogas to mgo pinamula no ubas dini to kalibutan. Woy insabuk din dio to dakol no lungag oyow ogkapongaan. No ka sikan, ian igpounawaan to sikan no dakol no poglogpad to Magboboot to mgo maroot no otow to soini kalibutan su dakol ka igkabolu din kandan.  
\v 20 No ka mgo bogas to ubas, dio din pogoa to libuwasan to sikan no lunsud. No langosa ka nigtulalug ligkat to pogoanan. No ka sikan, nohimu on no lanog. \f + \fr 14:20 \ft Ogkabasa to Isaias 63:3.\f* Songo dopa ka karalomi rin. No tatolu no gatus woy kawaan no kilumitru ka kaluagi rin.\f + \fr 14:20 \ft To ligkatan no kinagian, ka karalomi to sikan no langosa, ogtaman to bukaru to kuddo.\f* 
\c 15  
\s1 Ka mgo Diwata to Magboboot woy ka Mohuri no mgo Igkabaybayari 
\p  
\v 1 Pogkaponga to sikan, duon nigkita ku no dakol lagboy no kabolongbolonganan no dio to langit no igpohitaga ko nokoy ka ogdatong on uromo. Woy duon papitu no mgo diwata to Magboboot. Tag sagboka kandan, nig-alap to mgo igbayadbayad to mgo koot-otawan kai to kalibutan. Sikan ka mohuri no mgo igkabaybayari no igdagsang to Magboboot to igkabolu din. 
\p  
\v 2 Pogpitow ku man do no duon nigkita ku no ogkoiling to dagat no lamita no nasolugan on to hapuy. Woy nigkita kud ka mgo otow no nakaroog to sikan no magintalunan no nigligkat to dagat woy waro nigsimba to inotow-otow rin woy waro nigpapangotob to numiru no ig-indan to ngaran din. No ka sikan no mgo otow, dio mansasasindog to ilis to sikan no dagat no ogkoiling to lamita. Tag sagboka kandan, nig-alap to ogparagingon no oghingaranan to alpa no imbogoy to Magboboot kandan.  
\v 3 Nig-oopad sikandan to opparon ni Moisis no suguanon dongan to Magboboot woy ka opparon dod ni Hisus no oghingaranan to Nati no Karniru. No soini ka opparon dan: 
\q1 “Magboboot, sikoykow ka Lagboy no Igbuyag no ian ka Mamabogbog to tibo. Maroyow lagboy woy igkabolongbolong noy ka tibo no nighimu nu. Ligkat dongan, sikoykow ka Labow no Datu to tibo no mgo ugpaan. No matuwarong woy malogot ka mgo hinimuan nu. 
\q1  
\v 4 Lagboy no Igbuyag noy, ogkatahud ka woy ogkasayo ka to tibo no mgo otow su sikoykow ro ian ka waro solug no maroot dio to goinawa nu. Tibo no mgo koot-otawan no ogligkat to tibo no mgo ugpaan, ogpakatangko koykow woy ogpakasimba koykow. Ian su tibo kandan, ogpakakita to matuwarong ka mgo hinimuan nu.” Sikan ka in-opad dan.\f + \fr 15:4 \ft Ogkabasa to Salmo 86:9.\f* 
\p  
\v 5 Pogkaponga to sikan, nigkita ku no napulasan on ka Kinaroyawan no Sinabong to Dakol no Ampuanan no dio to langit. No dio to solod, duon ka ingkasulat no sabut to Magboboot.  
\v 6 No ka sikan no papitu no mgo diwata to Magboboot no nan-alap to sikan no papitu no mgo igbayadbayad, nanlibuwas dio to Dakol no Ampuanan to Magboboot. Nigkikinabo sikandan to malayag lagboy no manggad woy duon insagubabat no bulawan dio to mgo sosolobon dan.  
\v 7 Nò ka sagboka to sikan no hop-at no hinimu no duon goinawa, nigbogoy to sikan no papitu no diwata to Magboboot to papitu no boung no bulawan no naponu on to igkabolu to Magboboot no sikandin ka kono ogkamatoy to waro katamanan.  
\v 8 No ka Dakol no Ampuanan, nigsokol to obol no nigligkat to layag woy to kabogbogan to Magboboot. No waro agad hontow no makalopow dio to sikan no ampuanan taman to ogkapongaan on to pogdagsang to ka sikan no papitu no igkabaybayari no nan-alap to sikan no papitu no mgo diwata to Magboboot.\f + \fr 15:8 \ft Ogkabasa to Exodo 40:34 woy 1 Hari 8:10.\f* 
\c 16  
\s1 Ka Boung no Nataguan on to Sikan no Igkabolu to Magboboot 
\p  
\v 1 Nò, duon nigdinog ku no maagbot no lagong no nigligkat dio to Dakol no Ampuanan. No nigkagian din ka papitu no mgo diwata to Magboboot, no kagi rin to, “Hondio kow on woy ibus-ug now dio to kalibutan ka tagu to sikan no papitu no boung no ian ka igkabolu to Magboboot.” 
\p  
\v 2 No nighipanow on ka an-anayan no diwata to Magboboot no nig-alap to kandin no boung. No imbus-ug din ka tagu dio to kalibutan. Pogkaponga, ka mgo otow no duon pangotob to ngaran to sikan no magintalunan no nigligkat dio to dagat woy ka nigsimba to inotow-otow rin, nanggoram on to mgo kogang no ogmasakit lagboy. 
\p  
\v 3 Nò, ka igkaruwa no diwata to Magboboot, imbus-ug din dio to dagat ka tagu to kandin no boung. Pogkaponga to pogbus-ug din, nigbaluy on no langosa ka dagat no ogkounawa to langosa to otow no nammatoy. No ka tibo no oggogoinawa dio to dagat, nammatoy on. 
\p  
\v 4 Pogkaponga to sikan, ka igkatolu no diwata, inbus-ug din ka tagu to kandin no boung dio to mgo woig woy dio to mgo sobsob. No tibo nambaluy no langosa.  
\v 5 No nigdinog ku ka diwata no ogtamong to woig, no nigkagi to, “Magboboot, sikoykow ka matuwarong woy sikoykow rod ka Magboboot dongan woy kuntoon woy taman to waro katamanan. Litos ka soini no mgo imboboot nu no iglogpad nu to mgo otow.  
\v 6 Ian su nighimatayan dan ka mgo otow no nigtuu koykow woy ka mgo talagnangon to kinagian nu. Omunaan no impoinum nud sikandan to langosa su litos ian to ogkasulian sikandan.”  
\v 7 No duon kagi no nigdinog ku no nigligkat to tubaranan no nigkagi to, “Hoo, Magboboot no ian Lagboy no Igbuyag. Mamabogbog ka to tibo. Matuwarong ka no litos ian ka mgo iglogpad no imboboot nu.” 
\p  
\v 8 Ka igkohop-at no diwata to Magboboot, imbus-ug din dio to allow ka tagu to kandin no boung. No nigbogayan on ka allow to ogmoinit on lagboy oyow duon hapuy no ogpakatutung to mgo otow.  
\v 9 Sikan ian no nanatutung on sikandan. No nigtungayawan dan ka ngaran to Magboboot su sikandin ka duon kabogbogan din to ogboboot to sikan no mgo igkabaybayari ran. Dokad di waro dan nasi balbalawi ka goinawa ran woy waro dan sayaa ka kabogbogan to Magboboot. 
\p  
\v 10 Ka igkalima no diwata to Magboboot, songo imbus-ug din ka tagu to kandin no boung dio to pinnuuanan to pandatuan to sikan no magintalunon no nigligkat to dagat. Pogkaponga to pogbus-ug, nigmarusilom lagboy ka pandatuan din. Nò, nanakagat to mgo otow ka mgo dilo dan su masakit lagboy ka nangoram dan.  
\v 11 No nigtungayawan dan ka Magboboot no dio to langit su nabaybayaran sikandan to mgo kogang woy ka mgo masakit dan. Di waro dan ongkori ka mgo maroot no mgo oghimuon dan. 
\p  
\v 12 No ka igkohon-om no diwata to Magboboot, imbus-ug ka tagu to boung din dio to woig no ogkohingaranan to Eupratis. Pogkaponga, ogkootian on. Ian su oyow ogkabayaan on to mgo igbuyag no ogligkat to silaan.\f + \fr 16:12 \ft Ogkabasa to Isaias 11:15.\f* 
\v 13 Pogpitow ku, no duon tatolu no busow no ogkoiling to mgo bakbak. Ka sagboka, dio oglibuwas to bo-bo to sikan no ulod no ogkohingaranan to daragun. Ka dangob, dio niglibuwas to bo-bo to sikan no magintalunan no nigligkat to dagat. No ka igkatolu, oglibuwas to bo-bo to sikan no magintalunan no nigligkat to tano no ian ka ubaton no talagnangon.\f + \fr 16:13 \ft Dio to Ipapitow 19:20, ogkataga ki to, ka ubat-ubat no talagnangon, ian ka sikan no magintalunan no nigligkat to tano.\f* 
\v 14 Ian su mgo busow ka sikan, no duon kabogbogan dan to ogpanhimuon dan to mgo kabolongbolonganan. No nigsugu sikandan dio to tibo no mgo dakol no igbuyag dio to agad hondoi kai to kalibutan oyow ogkalimudlimud on sikandan woy ka mgo sundalu ran. Ian su ko ogdagsang on ka mabantug no allow to pogboboot to Magboboot, ogsulungan dan sikandin no ian ka Mamabogbog to tibo.  
\v 15-16 Sikan ian no ogkalimudlimud on sikandan woy ka mgo sundalu ran dio to tano no ogkohingaranan to kinagian to Hinibriu to Armagidun 
\p “Nò,” kagi ni Hisus to, “Pamminog kow to soini. Ko oglibong a to tano, oghondiaan ku sikaniu no ogtokawon ku sikaniu no ian ogkounawaan ka poglopow to ogpanakow. Maroyow to sikan no otow no ogngilam no waro nigluung woy kono ogkokoirogo su oyow kono kow ogkasipod to ogkatokawan to nalobasan kow on.” 
\p  
\v 17 Nò, ka igkapapitu no diwata to Magboboot, songo imbus-ug din ka tagu to kandin no boung dio to aw-awangan. No duon maagbot no lagong no nigligkat to pinpinuuanan to pogboboot to Lagboy no Igbuyag no duon to Dakol no Ampuanan. Kagi rin to, “Napongaan on.”  
\v 18 Inogo on no nigkikilat no nigdagsang on ka maagbot lagboy no balansì woy duon maagbot lagboy no dinug. Agad dongan to poghimu to an-anayan no otow taman kuntoon, waro pad aligbat no ogkounawa to sikan no kaagbot no dinug no ogkoumaan to tano.  
\v 19 Nò, ka dakol woy mabantug no lunsud to Babilunia, nagulak on no nabaad on to tatolu no baad. No ka mgo dakol no lunsud to tibo no mgo ugpaan, songo nagulak on. Malogot ian to waro malingawi to Magboboot ka mgo salo to mgo otow no nig-ugpo dio to sikan no mabogbog no lunsud to Babilunia. Omunaan to impoinum din sikandan to inumanon duon to boung din no ian ka igdagsang din to sikan no lagboy no igkabolu din.  
\v 20 No nanaawo on ka tibo no mgo pulu to dagat woy warad kitaa ka mgo kabubunganan.  
\v 21 No nonoulugan on ka mgo otow to dagdakol woy mabogat no magakinomu no uran no nigligkat to langit. No songo kuwo ko ogkoumaan to kalimmaan no kilu ka tag manalingboka. Di ka mgo otow, ogpanungayawon dan ka Magboboot su ligkat to sikan no magakinomu no uran no ogdagsang kandan woy su lagboy ogkohirapan to sikan no igkabaybayari ran. 
\c 17  
\s1 Ka Maroot no Boi 
\p  
\v 1 Nò, ka sagboka to sikan no papitu no mgo diwata to Magboboot no nig-alap to sikan no papitu no mgo boung, nigdani kanak woy nignangonan a rin to, “Hondini ka su oyow igpapitow ku koykow ko ogmonuon to iglogpad to sikan no dakol no lunsud no oghingaranan to mabantug no baliuton no boi no duon to marani to tugdaan to mgo woig.  
\v 2 Ka mgo igbuyag to kalibutan, tibo nanhimu to maroot to sikan no boi. Woy ka tibo no koot-otawan, naayat to mgo maroot no hinimuan din. No nalasing sikandan to inumanon to sikan no boi su ligkat to poghimu ran to maroot. 
\p  
\v 3 Sikan ian to nigbobootan a to Gimukud to Magboboot to nig-alap a to sikan no diwata rin dio to holholawan. No pogpitow ku, duon boi no nig-untud to malalab no magintalunan. Ka lawa to sikan, natibaan masulati to mgo dorooti no ngaran no ogsumsumpalit to Magboboot. Papitu ka ulu rin woy sampulu ka sukat din.  
\v 4 Ka kinabo to sikan no boi, nohimu to lagboy no mahal no manggad no malugowlugow woy malalab. Woy nangini-kinì to mgo bulawan woy ka mahal no mgo batu woy ka mgo baliog no oghingaranan to pirlas. No duon niggongon din no boung no naponu to mgo maligsom no ogpakasipod no nigligkat to sikan no maroot no mgo batasan din.  
\v 5 Dio to bukod din, duon ngaran no ingkasulat no ingkoholos ka kalitukan din. Soini ka ingkasulat to: “Babilunia no ian mabantug no lunsud woy inoy to tibo no ogmanhimu to agad nokoy no maroot no batasan kai to kalibutan no ogpakasipod.”  
\v 6 Pogpitow ku to sikan no boi no nalasing sikandin to mgo langosa to mgo otow no sakup to Magboboot woy ka langosa to mgo nigtuu ki Hisus no nighimatayan dan su ligkat to pogtuu ran kandin. Pogpitow ku to sikan no boi no nabolongbolong ad on ian lagboy.  
\v 7 Di ka sikan no diwata to Magboboot, nig-inso kanak to, “Manio to ogbolongbolong ka? Ignangon ku koykow ka ingkoholos no kalitukan to sikan no boi woy ka magintalunan no og-alap kandin no duon papitu no mgo ulu woy sampulu no mgo sukat din.  
\v 8 Ka sikan no magintalunan no nigkita nu, duon pogkootow rin dongan, di warad on kuntoon. Di konad no malugoy no ogpakalibuwas sikandin ligkat to sikan no bitu no kono ogkatogkad ka karalomi rin. Pogkaponga, ogkaalap sikandin dio to ugpaan no ogpakalogpad kandin to waro katamanan. Ka tibo no mgo otow no waro ikasulat ka ngaran dan dio to sikan no sulatanan to mgo ngaran to mgo otow no ogbogayan to kouyagan no waro katamanan ligkat to poghimu to kalibutan, ogkabolongbolong sikandan ko ogkita to sikan no magintalunan su duon dongan, naawo on di mangkuwan duon on man do.” 
\p  
\v 9 Nigparagas to kagi to diwata to, “Ian do ogpakasabut to soini ka otow no mougsob ka pogdoromdom din. Ka kalitukan to sikan no papitu no ulu to sikan no magintalunon, ian ka papitu no bubungan no nigpinpinnuuan to boi no maroot. Woy ogkalituk dod to papitu no mgo igbuyag.  
\v 10 Ka lalimma, naawo on. Ka sagboka, og-alap dod to pandatuan din. No duon dod dangob no igbuyag no ogpokouma uromo no og-alap to pandatuan din, di magaan do ogkatampod.  
\v 11 No ka magintalunan no ingkanangon ganna to duon dongan, di warad on kuntoon, ogkohimu on no igkawawalu no igbuyag. Di sikandin, karumaan dod to sikan no papitu. No songo ogkoumaan dod sikandin to igkalogpari rin. 
\p  
\v 12 Ka sikan no sampulu no sukat no nigkita nud, ian ka sampulu no mgo labow no datu no waro pad mabogayi to katondanan to pog-alap to pandatuan dan. Di ogbogayan sikandan to sikan no katondanan no ogpakalagkos to pandatuan to sikan no magintalunan. Di ka pog-alap dan to pandatuan dan, magaan do ogkatampod no ogkoiling do to songo uras.  
\v 13 Ka sikan no sampulu no mgo igbuyag, og-uyun lagboy no ogkasagboka ro ka tuud dan to igbogoy ran ka kandan no katondanan woy ka kabogbogan dan no igbulig to sikan no magintalunan no ogligkat to dagat.  
\v 14 No ogsulungon dan si Hisus no ian oghingaranan to Nati no Karniru. Di sikandin, lagkos to mgo nigtuu no ian ka nig-alam din woy masalig to ogtuman to kinagian din, ogpakaroog to sikan no mgo igbuyag, su sikandin ka Igbuyag no ogpakalabow to tibo no mgo igbuyag woy sikandin ka Datu no ogpakalabow to tibo no mgo datu. 
\p  
\v 15 No nignangonan a man do to sikan no diwata to Magboboot to, “Ka mgo woig no nigkita nu no nigpinpinnuuan to sikan no boi no maroot so batasan din, ian ka nigkaloinloin no mgo kapunganan woy to mgo kot-ot-otowan woy to ogkaloinloin no mgo ugpaan woy to mgo kinagian.  
\v 16 No ka nigkita nu no sampulu no sukat no ian ka sikan no sampulu no mgo igbuyag woy ka sikan no magintalunan, ogpangusig to sikan no boi no maroot so batasan. No og-agawon dan ka mgo karatuan din no oglobasan dan sikandin woy ogkoonon dan ka sapu din no ogsilaban dan on.  
\v 17 Ian ka oghimuon dan su ka Magboboot ka ogligkatan to pog-uyun dan oyow ogkasagboka ro ka tuud dan. Sikan ian to og-uyun sikandan to igbogoy ran ka pandatuan dan dio to sikan no magintalunan taman to ogkatuman on ka mgo innangon to Magboboot. 
\p  
\v 18 No ka sikan no boi no nigkita nu, ian ka sikan no mabogbog no lunsud no ogboboot to tibo no mgo dakol no igbuyag kai to kalibutan.” 
\c 18  
\s1 Ka Pogkapolod to Dakol no Lunsud to Babilunia 
\p  
\v 1 Pogkaponga to sikan, duon man do nigkita ku no dangob no diwata to Magboboot no niglogsad ligkat to langit. Duon dakol no kabogbogan din, no ka tibo no kalibutan, nabat-awan to kandin no kalayagi.  
\v 2 Nigbabansagon sikandin no kagi rin to, “Nagulakgulak on ka mabantug no lunsud to Babilunia. Nohimu on no ugpaanan to mgo busow woy ka mgo balbal. Woy dio ogman-ugpo ka agad nokoy mgo maligsom woy ka maroot no mgo manukmanuk.\f + \fr 18:2 \ft Ogkabasa to Isaias 21:9.\f* 
\v 3 Ian su tibo no mgo koot-otawan to soini no kalibutan, nokoinum to sikan no inumanon din no ian ka mgo ig-ayat din oyow ogpokounug sikandan to mgo maroot no batasan din. Ka mgo igbuyag to soini no kalibutan, nighulid kandin. No ka mgo otow no ogsasaliu, nasalapian on to igkaratui rin no nigligkat to pogpanhilabot to kono no asawa rin.” 
\p  
\v 4 Pogkaponga, duon dangob no lagong no nigdinog ku. Kagi rin to, 
\q1 “Sikaniu no mgo sakup ku, awo kow on to sikan no lunsud oyow kono kow ogkaayat to mgo maroot no batasan din no ogpakasalo kow on no songo ogpakalagkos kow to kandin no logpad.\f + \fr 18:4 \ft Ogkabasa to Isaias 48:20 woy Jeremias 51:6 woy 45.\f* 
\q1  
\v 5 Nokog-ampow-ampow on ka mgo salo din, no ian ogkounawaan ka katikang to langit. No kono ogkalingawan to Magboboot ka mgo pogkamaroot din.\f + \fr 18:5 \ft Ogkabasa to Jeremias 51:9.\f* 
\q1  
\v 6 Sikan ian to ogkabonnalan sikandin no ogkalogparan su ligkat to sikan no mgo maroot no nighimu rin. No ko songo monu ka imbayadbayad din to duma no mgo otow, songo sikan dod ka igbayadbayad dio to kandin. Di ko songo monu kabuluti ka inumanon no impoinum din to duma no mgo otow, ogdangob pad man do to kabuluti ka igkabaybayari no ogpakabalos dio to kandin 
\q1  
\v 7 Nò, su nigmarayandayan sikandin no ian din umalagon ka kandin no ogkoiniatan, ogkoiling dod to sikan ka ogkoumaan to kandin no igkabaybayari. Ian su ka sikan no maroot no boi no ian igpananglitan to sikan no dakol no lunsud, nigkagi to, ‘Sikanak no boi no igbuyag, ogpakaalap to pandatuan ku, no waro igkoil-ilui ku. Kono a ogkoumaan to igpandawot ku su waro a man nabalu.’ 
\q1  
\v 8 Sikan ian, to songo allow ro ogkoumaan on sikandin to mgo igkabaybayari rin, mgo daralu, woy ka mgo igkapandawot din, woy ka mgo bitil, lagkos to ogkasilaban on. Ian su ka Lagboy no Igbuyag no ian ka Magboboot woy mamabogbog to tibo, ian ka oglogpad kandin.” 
\p  
\v 9 Ka mgo dakol no igbuyag to soini no kalibutan no nandumaruma kandin to ogmanhimu to mgo maroot no mgo batasan, ko ogkitoon dan ka obol to hapuy no ogpakasilab kandin, ogmaninsinogow woy ogpandawot.  
\v 10 Di dio do to mariu ogbabantoy su ogkahallok sikandan to ogpakalagkos to kandin no iglogpad. Woy ogpakakagi sikandan to, ‘Kalogon, kohoy-u ro ian lagboy su ka mabantug no lunsud to Babilunia, naraat lagboy su nigdagsangan on to logpad no waro do malingonngon no noubus on.\f + \fr 18:10 \ft To kinagian no Ginirigu, “Songo uras do no noubus on.”\f* 
\p  
\v 11 No agad ka mgo otow kai to kalibutan no talagbaligya songo ogmaninsinogow woy ogpandawot to sikan no ogkoumaan to sikan no dakol no lunsud to Babilunia. Ian su warad ogpakaboli to igbaligya dan poron.  
\v 12 no bulawan, woy ka mgo kalaglagan no nohimu to palata \f + \fr 18:12 \fq Ka plata\ft , ogkoiling to bulawan di maputi. Mahal ko ogbolion.\f* woy ka mgo mahal no batu, woy ka ighimu to baliog no oghingaranan to pirlas. Woy songo waro ogpakaboli to mgo mahal no manggad dan no malugowlugow woy ka malalab woy ka malurok. Woy songo waro ogpakaboli to agad nokoy no mgo kalaglagan no nohimu to mgo bangkil to ilipanti, woy ka nohimu to mahal no batu, woy ka nohimu to mahal no kayu, woy to burunsi, woy to putow, woy mgo to mgo malurok no batu no oghingaranan to marmul.  
\v 13 Woy warad on ogpakaboli to mgo mohomut no ig-anag no ogkohingaranan no sinamun, woy ka mgo paminta, woy ko ka igmohomut to lawa woy ka mohomut no igtomog. Songo waro ogpakaboli to mgo inumanon dan, woy ko lana, woy ka maroyow no harina ran woy ka tirigu, woy ka mgo ayam dan no baka, woy ko karniru, woy ka mgo kalisa ran, woy ko mgo uripon woy ko mgo gimukud to mgo otow.  
\v 14 No,” kagi rod to sikan no mgo talagbaligya to, “Ka tibo no ogkoiniatan nu poron, warad on. Woy ka tibo no karoyawan nu, songo konad on ogkakitaan. Ian ka kagi ran.  
\v 15 No ka tibo to sikan no mgo otow no ogbaligya poron to sikan no mgo kalaglagan, ogsasindog dio to mariu no ogbabantoy no ig-uwang dan to ogsinsinogow woy ogmandawot.  
\v 16 No ogkagi ran to, “Kalogon lagboy to mgo otow to sikan no dakol no lunsud no nokani nakakikinabo to mgo maddoyow woy mahal no manggad no malalab woy malugowlugow, woy duon pad immaroyow rin no bulawan, woy to mgo mahal no batu woy to pirlas no oghimuon no baliog.  
\v 17 No to waro do malingonngon no ka tibo to sikan no igkaratui rin, noubus on.” Sikan ka kagi ran. 
\p No ka tibo no mgo kapitan to mgo sakayan dio to dagat, woy ka mgo ogmanakoy woy ka mgo ogmanalabau to mgo sakayan no dio to sikan woy ka tibo no mgo otow no ogmanalabau dio to dagat, songo ogmansasindog sikandan dio to mariu to sikan no dakol no lunsud ka ogbabantoy.  
\v 18 No ko ogkitoon dan ka obol din to ogkasilaban on, ogpakangangang to kagi ran to, “Waro ogkounawa to kabantug to sikan no lunsud.”  
\v 19 No to pog-amulung dan, nigpanabukan dan ka mgo ulu ran to obol to tano woy ogmaninsinogow sikandan woy ogmandawot lagboy no ogpaagbot to ogkagi to, “Kalogon lagboy su naraat on ka sikan no mabantug no lunsud. Ian su ligkat to kandin no igkaratui, ogpanalapi poron ka tibo no mgo otow no tagtuun to mgo sakayan to dagat. Di to songo uras do, noubus on ka tibo no mgo kalaglagan din.” Sikan ka ogkagion dan. 
\p  
\v 20 Sikaniu no ogman-ugpo dio to langit, woy sikaniu no mgo sakup to Magboboot woy ka mgo suguanon din woy sikaniu no mgo talagnangon to kagi to Magboboot, karagoi now ka pogdaat to sikan no mabantug no lunsud. Ian su niglogparan to Magboboot ka mgo otow to sikan no lunsud no nigbayadbayad kaniu.” 
\p  
\v 21 Pogkaponga, duon mabogbog no diwata to Magboboot no nighonat to dakol no galingan no batu no indogpak din dio to dagat. No kagi rin to, “Ogkounawa to soini ka pogkagulak to sikan no mabantug no lunsud to Babilunia. Konad on ogkohutuk no ogkitoon.  
\v 22 Woy kai to kandin, konad on ogdinogon ka mgo daging to alpa woy ka mgo maroyow no oggung, woy ka daging to pulondag woy ka bungag. Songo konad on ogkakitaan ka mgo otow no ogkatou to agad nokoy no ogpanhimuon. Songo konad on ogdinogon ka daging to mgo galingan.  
\v 23 Songo konad on ogkohutuk no ogkabat-awan to agad nokoy no ilawan. Woy konad on ogdinogon kai ka mgo lagong to mgo iam pad og-asawa. Ka mgo ogpandagang kai to soini no dakol lunsud, mabantug poron lagboy sikandan dio to agad hondoi kai to kalibutan. Di ligkat to pogpamulingan dan no ogpokoubat, nagawayan ka tibo no mgo koot-otawan to soini no kalibutan. 
\p  
\v 24 Sikan ian to niglogparan ka mabantug no lunsud to Babilunia su dio nigtulalug ka mgo langosa to mgo talagnangon to kagi to Magboboot woy ka mgo sakup din woy to tibo no mgo otow no nighimatayan kai to kalibutan.” 
\c 19  
\p  
\v 1 Pogkaponga to sikan, duon nigdinog ku no ogkoiling to kagulub to mohon-ing no mgo otow no dio to langit. No kagi ran to, “Ogsayoon tanow ka Magboboot. Sikandin ka nigpangabang to mgo salo to mgo otow. Mabantug woy mabogbog sikandin.  
\v 2 Malogot woy matuwarong ka pogboboot din. Ian su ka mabantug no boi no maroot so batasan, niglogparan to Magboboot su nig-ayat din ka mgo otow kai to kalibutan to oyow og-ilingan dan ka kandin to mgo maroot no batasan din. Woy niglogparan to Magboboot ka sikan no boi su nighimatayan din ka mgo suguanon to Magboboot.”  
\v 3 Nò, nigdinog ku ka mgo otow dio to langit no nigmaagbot man do to nigkagi to, “Sayoon tanow ka Magboboot su taman to waro katamanan, ungod og-oobol ka hapuy no ogsilab to sikan no mabantug no lunsud to Babilunia.”  
\v 4 Ka kawaan woy hop-at no mgo pogbuyagon woy ka hop-at no mgo hinimu no duon goinawa, nigluhud no ogsimboon dan ka Magboboot no ogpinpinnuu dio to pinnuuanan din to pandatuan. No kagi ran to, “Malogot ian to litos no ogsayoon tanow ka Magboboot.” 
\s1 Ka Pagkoonan to Pogkasal to Nati no Karniru 
\p  
\v 5 Pogkaponga, duon lagong no nigligkat to sikan no pinnuuanan to pandatuan to Lagboy no Igbuyag, no nigkagi to, “Sikaniu no mgo suguanon to Magboboot woy tibo kaniu no ogtahud kandin, agad ko mabantug woy ka kono no mabantug, sayaa now sikandin.”\f + \fr 19:5 \ft Ogkabasa to Salmo 115:13.\f* 
\v 6 Inogo on no duon nigdinog ku no ogkoiling to magulub to mohon-ing no mgo otow woy songo ogkoiling to pogdaragunut to dakol no sampow, woy ogkoiling dod to maagbot no balansì. No kagi ran to, “Ogsayoon ta ka Magboboot no ian ka Lagboy no Igbuyag woy Mamabogbog to tibo su og-alap sikandin to pandatuan din.\f + \fr 19:6 \ft Ogkabasa to Salmo 93:1 woy 97:1 woy 99:1.\f* 
\v 7 Ogtukow kinow to igkarago ta woy ogsayoon tanow sikandin woy ogdakolon ta ka ngaran din. Ian su kuntoon on ka allow to Nati no Karniru no ogkuwon din on ka mgo otow no nigpasakup kandin su nakapanagana on sikandan to og-ugpo dio to kandin. No ka sikan, ian ogkounawaan ka boi no ogkaasawa on  
\v 8 no nigbogayan on to kinabo no igsaluub din no malinis woy malayag.” No ka lituk to sikan no maroyow no manggad, ian ka maroyow no mgo hinimuan to mgo sakup to Magboboot. 
\p  
\v 9 No nignangonan a to diwata to Magboboot to kagi rin to, “Isulat nu ka soini to: Ogkarago ka mgo otow no nig-akat to pogtambung to pagkoonan to pogpangasawa to sikan no ogkohingaranan to Nati no Karniru.” No kagi rin kanak to, “Malogot to nigligkat to Magboboot ka sikan no kagi.” 
\p  
\v 10 Pogkaponga, nigluhud a to tangkaan din oyow ogsimboon ku poron sikandin, di kagi rin kanak to, “Doka, su songo suguanon a rod to Magboboot no ogkounawa a rod koykow woy to mgo duma nu no ogpamalogot to in-anad ni Hisu Kristu. Ian nud ogsimboon ka Magboboot.” No ka igmalogot ki Hisu Kristu, sikan dod ka ingkanangon dongan to mgo talagnangon to kagi to Magboboot. 
\s1 Ka Ogpanguddo to Maputi 
\p  
\v 11 Pogpitow ku no napulasan on ka langit. Nigkita kud ka maputi no kuddo. Ka nigpanguddo, nighingaranan ki Masalig woy Tu-tuu ian. matuwarong ka pogboboot din, woy songo matuwarong ka pogsulung din to mgo usig din.\f + \fr 19:11 \ft Ogkabasa to Salmo 96:13 woy Isaias 11:4.\f* 
\v 12 Ka mata rin, ogkounawa to logdog to hapuy woy mohon-ing ka mgo tangkulu rin. Duon ngaran no ingkasulat to lawa rin, di sikandin doka nataga ko nokoy ka kalitukan to sikan no ngaran.  
\v 13 Ka insaluub din no kinabo, noolod to langosa. No ka nighingaranan kandin, “Ka Kinagian to Magboboot.”  
\v 14 Nò, ka mgo sundalu to langit, nangikinabo to malinis woy mamaputi no manggad, no nanundul kandin  
\v 15 Duon niglibuwas to bo-bo din no magalang woy malayat no balarow no ian ogpakaroog to tibo no mgo koot-otawan. Mabogbog lagboy ka pog-alap din to pandatuan din no ogkounawa to putow, no igpapitow rin ka dakol lagboy no igkabolu to Magboboot no ian ka Mamabogbog to tibo. No ka poglogpad din to sikan no og-atu kandin, ian ogkounawaan ka pogpogo to mgo otow to bogas to ubas oyow ogpakalibuwas ka woig no oghimuon dan no inumanon.  
\v 16 Woy duon ingkasulat no ngaran din dio to kinabo din woy dio to longod to bubun din. No kagi to sulat to, “Datu no ogpakalabow to tibo no mgo datu woy Igbuyag no ogpakalabow to tibo no mgo igbuyag.” 
\p  
\v 17 Pogpitow ku, no duon dangob no diwata to Magboboot no dio nigsasindog to allow. No to maagbot no kagi, nig-umawan din ka tibo no mgo manukmanuk no oglayanglayang dio to aw-awangan. Kagi rin kandan to, “Hondini kow woy limudlimud kow on oyow ogmatugtugonoy kow on to sikan no dakol no pagkoonan to Magboboot.  
\v 18 Koon kow to mgo sapu to mgo igbuyag to mgo ugpaan, woy to mgo pogbuyagon to mgo sundalu, woy to mgo sundalu, woy to mgo ogpanguddo lagkos to kuddo dan. Woy koon kow to mgo sapu to mgo uripon woy ka kono no uripon, woy ka sapu to mgo otow no mabantug woy ka kono no mabantug. 
\p  
\v 19 Pogpitow ku no ka dakol no magintalunan no nigligkat dio to dagat woy ka mgo igbuyag to soini no kalibutan lagkos to mgo sundalu ran, niglimudlimud sikandan tibo su oyow oglusud to sikan no nig-untud to maputi no kuddo woy ka kandin no mgo sundalu.  
\v 20 Di narakop on ka sikan no magintalunan woy ka ubaton no ian talagnangon to kinagian din no nighimu to mgo kabolongbolonganan dio to tangkaan to sikan no magintalunan. No ka sikan no kabolbolonganan, ian din impanggawoy to sikan no mgo otow no nigpangotoban to ngaran to sikan no magintalunan woy ka nigsimba to inotow-otow rin. Nò, to manokal pad sikandan, igdogpak sikandan dio to ogliabliab no hapuy no asupri.  
\v 21 No ka tibo no mgo sundalu ran, ogkamatoy on su ligkat to sikan no balarow no malayat no oglibuwas dio to bo-bo to sikan no nig-untud to maputi no kuddo. Woy nigkokoon on to mgo manukmanuk ka mgo sapu dan. 
\c 20  
\s1 Ka Songo Malan no Tuid 
\p  
\v 1 Nò, pogpitow ku no duon diwata to Magboboot no nigpohulughulug ligkat to langit. Duon nig-alap din no susi to sikan no bitu no kono ogkatogkad ka karalomi rin. Woy songo duon nig-alap din no mabogat no karina.  
\v 2-3 No nigdakop din on ka dakol no ulod no ogkohingaranan to daragun. Sikandin si Satanas no ian igbuyag to mgo busow. No nigbanggutan to diwata ka sikan no ulod woy indogpak din dio to bitu no kono ogkatogkad ka karalomi rin. No niglokoban din woy nigsusian woy duon indanan to bo-bo to sikan no bitu oyow kono ogpakalibuwas woy kono ogkoubatan to ulod ka mgo otow taman to ogkapongaan on ka songo malan no tuid. Di pogkaponga to sikan, ogpalibuwason pad sikandin to magaan do. 
\p  
\v 4 Pogpitow ku no duon mgo otow no nigpinpinnuu dio to mgo pinnuuanan dan to pogboboot. Woy nigkita kud ka mgo gimukud to sikan no mgo otow no nanamporan to mgo liog dan su nigligkat to impamalogot dan ka in-anad ni Hisus woy su nignangonnangon sikandan to kinagian to Magboboot. No ka duma no ligkatan to pog-ogot kandan su waro dan simbaa ka sikan no magintalunan no nigligkat to dagat woy songo waro dan simbaa ka inotow-otow rin, woy su songo waro nigpapangotob to ngaran to sikan no magintalunan dio to mgo bukod dan woy ko dio to mgo bolad dan. No ogkouyag tibo sikandan woy ogbogayan sikandan to katondanan to ogbulig ki Hisu Kristu to pog-alap din to pandatuan din taman to sikan no songo malan no tuid.\f + \fr 20:4 \ft Ogkabasa to Daniel 7:22.\f* 
\v 5 Ka sikan no pogkouyagi ran, ian ka an-anayan no pogkouyagi to mgo nammatoy. Di ka duma no mgo nammatoy, woy on ogkouyag ko ogkataman on ka sikan no songo malan no tuid.  
\v 6 Ka sikan no mgo otow no ogpakalagkos to sikan no an-anayan no pogkouyag to mgo nammatoy, ogkapulusan woy ogkoindanan sikandan to waro igkoogot kandan kono ogpakalagkos to sikan no iglogpad no oghingaranan to igkararuwa no kamatayon dio to ogliabliab no hapuy no waro katamanan. Di ogkohimu on atag sikandan no mgo talagpanubad no ogsasindog to tangkaan to Magboboot woy ki Kristu. Woy ogbogayan sikandan to katondanan to ogbulig ki Kristu to pog-alap din to kandin no pandatuan to sikan no songo malan no tuid. 
\s1 Ka Pogkaroog ki Satanas 
\p  
\v 7 Ko ogkaligad on ka sikan no songo malan no tuid, ogpalibuwason on si Satanas ligkat to sikan no napirisuan din.  
\v 8 Woy oglogoblogobon din ka tibo no mgo ugpaan to kalibutan no oghingaranan to Gog woy Magog oyow ogkagawayan din ka mgo otow. No oglimuron din on sikandan oyow ogman-atu to Magboboot. Mohon-ing lagboy sikandan no ian ogkounawaan ka bayokbok to dagat.\f + \fr 20:8 \ft Ogkabasa to Ezequiel 38:2 woy 9.\f* 
\v 9 No ogtangkap sikandan kai to tano woy oglinglingotan dan ka dakol no lunsud no indakoli to Magboboot to goinawa no nig-ugpaan to mgo sakup din. Dokad di to ogkoulugan sikandan to hapuy no ogligkat to langit no ogkoubus sikandan no ogkamatoy.\f + \fr 20:9 \ft Ogkasabutan ta to ka sikan no dakol no lunsud, ian ka Hirusalim.\f* 
\v 10 No si Satanas no niggawoy kandan, igdogpak sikandin dio to ogliabliab no hapuy to asupri no nigdogpakan to sikan no magintalunan no nigligkat to dagat woy ka talagnangon to kinagian din. No to allow woy to marusilom taman to waro katamanan ka igkabaybayari ran. 
\s1 Ka Pogboboot to Magboboot to Mohuri 
\p  
\v 11 Nò, pogpitow ku no duon dakol woy maputi no pinnuuanan to pandatuan, woy duon on ogpinpinnuu to sikan. Nanaawo ka tano woy ka langit dio to tangkaan din, no konad on ogkitoon.  
\v 12-13 Woy nigkita kud ka mgo nammatoy; ka mabantug woy ka kono no mabantug, ka nigligkat to dagat woy ka nigligkat to tano woy ka tibo no mgo gimukud to mgo nammatoy no nokougpo to sikan no ugpaan to mgo nammatoy. No namansasindog sikandan tibo dio to tangkaan to sikan no pinnuuanan to pandatuan. Duon tahan no mgo nasulatan no pigbokad on. Woy duon ingkasulat ka tibo no mgo hinimuan to mgo otow no wa pad nammatoy. Woy duon dangob no pigbokad on. No ian ka nasulatan to mgo ngaran to sikan no ogkabogayan to kouyagan no waro katamanan. No ogkabobootan on sikandan tibo ko nokoy ka ingkasulat no mgo hinimuan dan.  
\v 14 Pogkaponga, ka mgo gimukud to mgo nammatoy no nigligkat to sikan no ugpaan to mgo nammatoy, igdogpak on dio to ogliabliab no hapuy. No sikan ka ogkohingaranan to igkararuwa no kamatayon.  
\v 15 Sikan ian, agad hontow no waro ikasulat ka mgo ngaran dan dio to sikan no sulatanan to ngaran to mgo otow no ogbogayan to kouyagan to waro katamanan, igdogpak on dio to sikan no ogliabliab no hapuy. 
\c 21  
\s1 Ka Iam no Langit woy ka Iam no Tano 
\p  
\v 1 Pogpitow ku no duon on iam no langit woy ka iam on no tano su ka an-anayan no langit woy ka an-anayan no tano, nanaawo on. Woy songo warad on ka dagat.\f + \fr 21:1 \ft Ogkabasa to Isaias 65:17 woy 22.\f* 
\v 2 Songo nigkita ku ka Dakol no Lunsud to Magboboot no ian ka iam no Hirusalim no ogligkat kandin no dio to langit. Ka sikan no lunsud, ian ogkounawaan ka boi no nanginabo to maroyow no ogtagad to pogdatong to sikan no ogpangasawa kandin.\f + \fr 21:2 \ft Ogkabasa to Isaias 52:1 woy 61:10.\f* 
\v 3 Pogkaponga, nigdinog ku ka maagbot no lagong no nigligkat to sikan no pinnuuanan to pandatuan no nigkagi to, “Kuntoon, diad on og-ugpo ka Magboboot to mgo koot-otawan. Ogdumaruma kandan no ogkohimu on sikandan no mgo sakup din. No sikandin, ka ogkohimu no Magboboot dan.\f + \fr 21:3 \ft Ogkabasa to Ezequiel 37:27.\f* 
\v 4 Og-awoon din on ka tibo no igmasakit to goinawa ran su warad kamatayon, warad on igpandawot, warad on ogsinsinogow, su ogpunasan din ka tibo no mgo luwo to mgo mata ran su ka tahan no pog–ugpo to soini no kalibutan, ogkaawo on.”\f + \fr 21:4 \ft Ogkabasa to Isaias 25:8 woy 35:10 woy 65:19.\f* 
\p  
\v 5 Nò, ka ogpinpinnuu to sikan no pinnuuanan to pandatuan, nigkagi to, “Og-iamon kud on ka tibo.” Woy nigkagi to, “Isulat nu ka soini su malogot ian ka soini no ignangon ku woy lagboy no ogkasaligan.”  
\v 6 Woy kagi rin kanak to, “Napongaan on ka tibo. Sikanak ka an-anayan woy ka mohurian. Woy sikanak dod ka kabinunsuran woy ka katamanan to tibo. Ko duon agad hontow no ogkammaraan, ogpoinumon ku sikandin to woig no waro bayad no ogligkat to sobsob no ogpakabogoy to kouyagan no waro katamanan.\f + \fr 21:6 \ft Ogkabasa to Isaias 55:1.\f* 
\v 7 Ka otow no kono ogparoog ki Satanas, ogkohimu a no Magboboot din woy ogkohimu sikandin no anak ku.  
\v 8 Di ka otow no ogkahallok no og-unug kanak, woy ka kono ogkasaligan, woy ka oghimu to mgo maroot, woy ka ogpamunu, woy ka oghimu to maroot to kono no asawa ran, woy ka oghimu to mgo pamulinganon, woy ka ogsimba to mgo inotow-otow, woy ka og-uubat, igdogpak sikandan tibo dio to ogliabliab no hapuy to asupri. No ian ka igkararuwa no kamatayon.” 
\s1 Ka Iam no Hirusalim 
\p  
\v 9 Pogkaponga, nigdani kanak ka sagboka to sikan no papitu no diwata to Magboboot no niggongon to sikan no papitu no mgo boung no nataguan on to sikan no papitu no mohuri no igkabaybayari. Kagi rin to, “Hondini kad su igpapitow ku koykow ka ogkohimu no asawa to sikan no ogkohingaranan to Nati no Karniru.”  
\v 10 Inogo on no nigbobootan ad to Gimukud to Magboboot, no nig-alap a to diwata to Magboboot dio to lipupukan to matikang lagboy no bubungan woy impapitow rin kanak ka Hirusalim no ian ka Dakol no Lunsud to Magboboot no ogpohulughulug dio to tano no ogligkat to langit no ligkat to Magboboot.  
\v 11 Ka sikan no lunsud, oglayag no ogligkat to Magboboot. No ian ogkounawaan ka mahal no batu no marulag tad ogkitoon no ogkohingaranan to haspir no ogmating-ow no ogkoiling to lamita.  
\v 12 No ka alad no impalibut to sikan no lunsud, makopal woy matikang lagboy. Sampulu woy daruwa ka mgo gumawan din. No to tag sagboka to sikan no mgo gumawan, duon diwata to Magboboot no ogbantoy. Woy duon ingkasulat to sikan no mgo gumawan ka mgo ngaran to sikan no sampulu woy daruwa no mgo pinanganak ni Israil.  
\v 13 Duon hop-at no ilis to sikan no lunsud. No to tag sagboka no ilis din, duon tatolu no mgo gumawan. Tatolu ka dio to silaan, woy tatolu ka dio to salopan, woy tatolu ka dio to balabagan no diraya woy songo tatolu ka dio to dibabo.  
\v 14 Ka alad to sikan no lunsud, impountud to sampulu woy daruwa no dagdakol no mgo batu no nasulatan to mgo ngaran to sikan no sampulu woy daruwa no mgo suguanon to sikan no Nati no Karniru.  
\v 15 Nò, ka diwata to Magboboot no nigkagi kanak, nig-alap to sosokoroy no bulawan. No ian din igsokod to sikan no lunsud woy ka mgo gumawan woy ka alad.  
\v 16 No nig-un-unawa ka katikangi woy ka kaluagi woy ka kalayati rin. No ka diwata to Magboboot, ian din insokod to lunsud ka sosokoroy rin no bulawan. No daruwa no malan woy hop-at no gatus no kilumitru ka kalayati, woy ka kaluagi woy ka katikangi rin.  
\v 17 Songo nigsokod din ka alad to sikan no lunsud. No ka sokod din, kohon-oman no mitrus. No ka pogsokod din, nig-un-unawa to sikan no tahan no igsokod to mgo otow.\f + \fr 21:17 \ft To kinagian to Ginirigu, songo gatus woy kohop-atan woy hop-at no siku. Songo kuwo kun ko ian ka kalayati woy ko ka kapokali to alad. No to kanta no sokod, songo kuwo ko ogkohimu on no 60 woy ko 64 no mitrus.\f* 
\v 18 Ka alad to sikan no lunsud, hinimu to mahal no mgo batu no ogkohingaranan to haspir. No ka mgo baloy, hinimu to bulawan no waro solug no ogkoiling to lamita su mating-ow.  
\v 19 Ka mgo batu no nig-unturan to alad to sikan no lunsud, nigpanabukan to nigkaloinloin no mahal no mgo batu. Ka immaroyow to an-anayan no batu, ian ka ogkohingaranan to haspir. No to igkararuwa, sapiru. No ka igkatatolu, agata. No ka igkohop-at, ismiralda.  
\v 20 Ka igkalalimma, unisi. No ka igkohon-om, kurnalina. Ka igkapitu, kirisulitu. Ka igkawawalu, birilu. Ka igkasiam, tupasiu. Ka igkasampulu, karisuparasu. Ka igkasampulu woy sagboka, asintu. No ka igkasampulu woy daruwa, amatista.  
\v 21 No ka tag sagboka to sikan no sampulu woy daruwa no gumawan to lunsud, hinimu to sagboka no ogkoiling to baliog no ogkohingaranan to pirlas. No ka mgo dalan to sikan no lunsud, inhimu to bulawan no waro solug no ogkoiling to lamita su mating-ow. 
\p  
\v 22 Waro nigkita ku no Dakol no Ampuanan dio to sikan no lunsud su ka Magboboot no ian ka Lagboy no Igbuyag woy Mamabogbog to tibo, woy ka Nati no Karniru, ian ka ampuanan dan.  
\v 23 No konad on og-awoson ka allow woy ka bulan su ka layag no ogligkat to Magboboot, ian ka ogpakabat-ow to sikan no lunsud. No ka oghingaranan no Nati no Karniru, ian on ka ogkohimu no ilawan dio.\f + \fr 21:23 \ft Ogkabasa to Isaias 60:19.\f* 
\v 24 Ka mgo Koot-otawan to mgo ugpaan to soini no kalibutan, ogkabat-awan to layag to sikan no lunsud. No ka mgo igbuyag to mgo ugpaan to soini no kalibutan, og-alapon dan ka mgo mahal no kalaglagan dan dio to sikan no lunsud.\f + \fr 21:24 \ft Ogkabasa to Isaias 60:3.\f* 
\v 25 Ka mgo gumawan to sikan no lunsud, ungod ogkapulasan no konad ian oglokoban, su warad on marusilom dio.\f + \fr 21:25 \ft Ogkabasa to Isaias 60:11.\f* 
\v 26 No duon karoyawi woy igkaratui no ogkaalap on dio to sikan no lunsud no ogligkat dio to agad hondoi no ugpaan kai to tano.  
\v 27 Di waro ogpakasolod to sikan no lunsud ka agad nokoy no ogpakaligsom. Waro agad hontow no oghimu to igkasipod ta woy ko og-uubat su ian do ogpakasolod ka mgo otow no ingkasulat ka ngaran dan dio to sikan no sulatanan to Nati no Karniru to ngaran to mgo otow no ogbogayan to kouyagan no waro katamanan. 
\c 22  
\p  
\v 1 Nò, ka sikan no diwata to Magboboot, songo duon impapitow rin kanak no woig no ogpakabogoy to kouyagan. Ka sikan no woig, mating-ow lagboy woy ogpangini-kini. No dio ogligkat to sikan no pinnuuanan to Magboboot to pandatuan din no ian dod ka pinnuuanan to sikan no ogkohingaranan to Nati no Karniru.  
\v 2 Ka sikan no woig, ogkaanlas-anlas dio to taliwaro to dalan to sikan no lunsud. No dio to mgo ilis to sikan no woig, duon kayu no ogpakabogoy to kouyagan. Tag songo bulan ogbogas, no ka sampulu woy daruwa ka pogbogas dan to songo tuid.\f + \fr 22:2 \ft To kinagian to Ginirigu, songo kuwo ko ogkalituk to tag sagboka no bulan, oghutuk man do no ogbogas, woy ko ogkalituk to ogbogas to dangob man do no bogas.\f* No ka mgo dohun din, ogpakabulung to masakit to mgo otow no dio to agad hondoi no mgo ugpaan kai to kalibutan.\f + \fr 22:2 \ft Ogkabasa to Genesis 2:9 woy Ezequiel 47:12.\f* 
\v 3 No to sikan no lunsud, waro agad nokoy no igmasakit no ogligkat to igpanungayow to Magboboot. Ian su ka pinnuuanan to pandatuan to Magboboot woy to sikan no ogkohingaranan to Nati no Karniru, duon to sikan no lunsud. No ka Magboboot ka ogsimboon to tibo no mgo sakup din. 
\p  
\v 4 Woy ogkitoon dan ka langlanguwan din woy igkasulat ka ngaran din dio to mgo bukod dan.  
\v 5 Konad on ogmarusilom dio woy konad on og-awoson ka mgo ilawan woy ko ka layag to allow. Ian su ka Magboboot no ian Lagboy no Igbuyag dan, ian on ka ogpakabat-ow kandan. No ogbogayan sikandan to katondanan to ogbulig to pog-alap to Magboboot to pandatuan din taman to waro katamanan. 
\s1 Ka Poglibong ni Hisu Kristu\f + \fr 22:5 \ft Ogkabasa to Isaias 60:19.\f* 
\p  
\v 6 Nignangon ka diwata to Magboboot kanak to, “Malogot woy ogkasaligan ka soini no ignangon ku. Ka Magboboot no ian Lagboy no Igbuyag, ian ka ogbogoy to Gimukud din dio to mgo talagnangon to kinagian din. No sikandin dod ian ka nigsugu to diwata rin dio to mgo sakup din oyow igpapitow rin kandan ka ogkoumaan no konad on ogkalugoy. 
\p  
\v 7 Nignangon si Hisus to, “Magaan ad on oglibong. No ogkapulusan ka mgo otow no ogtuman to soini no impanoy ku impanangonnangon ku to soini no diblu.” 
\p  
\v 8 Sikanak no si Huan, nigdinog a woy nigkita kud lagboy ka tibo no soini no ignangonnangon ku kai. Pogkaponga ku to pogpitow woy to pogdinog, nigluhud a dio to tangkaan to diwata to Magboboot no nigpapitow kanak to sikan, no ogsimboon ku poron.  
\v 9 Di kagi rin to, “Doka oghimua ka sikan su og-un-unawa ki ro no suguanon to Magboboot. Woy un-unawa ki ro to mgo sulod nu no mgo talagnangon to kagi to Magboboot, woy to tibo no mgo otow ogpaagad-agad to mgo kinagian to soini no diblu. Ian nu ro ogsimboon ka Magboboot.”  
\v 10 Woy kagi rin pad kanak to, “Kono nu igholos ka soini no impanoy innangonnangon to soini no nasulatan su magaan on ogkatuman ka tibo.  
\v 11 Di duon mgo otow no oghimu to maroot woy ka ogpakasipod, no ogparagason dan do duon ka mgo maroot no oghimuon dan. Di ka sikan no mgo otow no oghimu to mgo maroyow, songo ogparagason dan ka poghimu to maroyow. No ka sikan no otow no ogpaagad-agad to Magboboot, songo ogparagason dan to poghimu to igkoiniat din.\f + \fr 22:11 \ft Ogkabasa to Daniel 12:10.\f* 
\p  
\v 12 Nignangon si Hisus to, “Oglibong a to kono no kalugoy. No og-alap a to igbogoy ku no igsayo to tag sagboka no otow ko nokoy ka nighimu rin.\f + \fr 22:12 \ft Ogkabasa to Isaias 40:10 woy 62:11 woy Jeremias 17:10.\f* 
\v 13 Sikanak ka an-anayan woy ka mohurian. Woy sikanak dod ka kabinunsuran woy ka katamanan to tibo.”\f + \fr 22:13 \ft Ogkabasa to Isaias 44:6 woy 48:12.\f* 
\p  
\v 14 Ogkarago lagboy ka sikan no mgo otow no ogpalipuwas to mgo salo dan su sikandan ka ogkabogayan to katondanan to ogkoon to bogas to kayu no ogpakabogoy to kouyagan no waro katamanan woy ogbogayan sikandan to katondanan to pogsolod dio to gumawan to sikan no dakol no lunsud to Magboboot.  
\v 15 Di ka mgo otow no oghimu to ogpakasipod, woy ka oghimu to mgo mamulingan, woy ka ogbunu, woy ka ogsimba to mgo inotow-otow, woy ka oghimu to maroot to kono no asawa ran, woy ka tibo no mgo ubaton, woy ka oggawi to duma ran, kono ogpakasolod dio to sikan no dakol no lunsud to Magboboot. 
\p  
\v 16 Kagi rin, “Sikanak no si Hisus, nigsugu ku ka diwata ku dio to kaniu no nigtuu to Magboboot oyow ogkanangnangonan kow on to soini tibo. Nò, kapunganan a ni Dabid dongan. No sikanak ka ogkohingaranan to malayag no buntatalo.”\f + \fr 22:16 \ft Ogkabasa to Isaias 11:1 woy 10.\f* 
\p  
\v 17 Ka Gimukud to Magboboot woy ka sikan no og-asawoon to sikan no oghingaranan to Nati no Karniru, ogkagi to, “Hondini kow.” Woy songo ognangonan on ka tibo no ogdinog to soini no kinagian to, “Hondini kow.” No agad hontow no ogkamaraan, hondini kow. Tinawaa now on ka woig no waro bayad no ogpakabogoy to kouyagan to waro katamanan.\f + \fr 22:17 \ft Ogkabasa to Isaias 55:1.\f* 
\s1 Ka Mohuri no Igparoromdom 
\p  
\v 18 Sikanak no si Huan, ogbohog a to tibo no ogdinog to impanoy ignangonnangon to soini no nasulatan. Woy soini ka igbohog ku. Ko duon agad hontow no ogtimul to agad nokoy to soini no nasulatan, songo ogtimulan to Magboboot ka iglogpad kandin no mgo igkabaybayari no ingkasulat kai.  
\v 19 Woy agad hontow no ogsalin to ignangonnangon to soini no nasulatan, songo konad on ogbogayan to Magboboot sikandin to ogkoon to bogas to kayu no ogpakabogoy to sikan no kouyagan no waro katamanan. Woy songo og-awoon to Magboboot ka katondanan din to og-ugpo dio to sikan no dakol no lunsud to Magboboot no ingkanangon to soini no nasulatan.\f + \fr 22:19 \ft Ogkabasa to Deuteronomio 4:2 woy 12:32.\f* 
\p  
\v 20 No si Hisus no ogmalogot to tibo no ingkanangonnangon ku kai, ogkagi to, “Tu-tuu ian to magaan ad ian ogpakalibong.” 
\p Nò, songo ogkagi a to, “Hoo ian, Hisus no ian Lagboy no Igbuyag noy, magaan ka ro libong.” 
\p  
\v 21 Nò, ogbuyu a to Lagboy no Igbuyag ta no si Hisus to oyow ogkohoy-uan kow rin tibo no nigtuu to Magboboot.