\id REV  - Pele-Ata Genesis, Jonah and New Testament [ata] -Papua New Guinea 2009 (DBL -2014) 
\h REVELESEN 
\toc1 Palapalaꞌalixu Noxou Ioanesi Vaikala Lamana 
\toc2 Revelesen 
\toc3 Pal 
\mt2 PALAPALAꞌALIXU NOXOU  
\mt1 IOANESI  
\mt2 VAIKALA LAMANA  
\imt1 Vaikala lamana  
\ip Palapalaꞌalixu noxou Ioanesi ꞌo ne mukaukavunu no mine ta mitema miꞌoxonu masuaneꞌi ta mitema noxou Lataua, xo aneꞌi mimuxaxu taneꞌi lexe Iesu Kalisito anu Tila noxiꞌa. Anu umasaxa lexe uꞌoxonu pekiaꞌa ta mitema noxou Lataua no anu muxamuxaxu taneꞌi noxiꞌa mo sou itulu pekiaꞌa no anu voxo sou tuꞌutuꞌumaxu.  
\ip Lavuku ane ꞌo muaꞌaloxu mimii ane uxali iliꞌi. Ta mitema noxou Lataua male milamana no anu mimii ane ꞌo ia aneꞌi ane ilolotu uasi ne ilamana uasi. Laaxu vaikala tovotovolaꞌi no nano ꞌo aloxo ꞌo. Iesu Kalisito anu Tila mo no avolu la Lataua umamuloneꞌi ta uluau iloꞌa Satani. No mine Iesu ukalusou xaixai noxou la Lataua uꞌitinu ualasiꞌa ta mitema ane mimuxaxu taneꞌi pekiaꞌu xe mitulu pekiaꞌa. La iloꞌa Lataua ixolu mo tuꞌumaxu vile uxalisiꞌa la uasi. Xo Lataua ulosiꞌa ꞌulusou xaixai laixe noxiꞌa mo Anu uꞌoxonu mimii uxali alavua. \fig Laꞌolu Patomosi|alt="port of Patmos with boat" src="HK00373B.TIF" size="col" loc="Intro to book" copy="Horace Knowles © The British & Foreign Bible Society, 1954, 1967, 1972." ref="Revelesen 1:0" \fig*  
\iot Aꞌalo muai no nano aloxo ꞌo  
\io1 Vaikala lamana 1:1-8  
\io1 Malemalei noxou Ioanesi xe uoli voloxu mulai no ꞌa taasou lalotu muxatele tamei 1:9–3:22  
\io1 Puloulou teitexi no opo loxotolo 4-5  
\io1 Sakisaki muxatele tamei 6:1–8:1  
\io1 Xoolau muxatele tamei 8:2–11:19  
\io1 Ta mitema misosovosou mimii iou xe mii maꞌia muxali 12-14  
\io1 Ta angelo muxatele tamei mo tuꞌutuꞌumaxu muxatele tamei 15-16  
\io1 Vaviloni ane loxo sema sou voteꞌi 17:1–19:5  
\io1 Sipsip ꞌOlu utaulaꞌi 19:6-10  
\io1 Iesu Kalisito ulivu uneꞌe 19:11-21  
\io1 Misakisakiinu Satani muxolu tauu ie itemaxu mavulovexa taꞌuve 20:1-6  
\io1 Mikalusou Satani avile 20:7-10  
\io1 Voxo sou ta mitema itulu no anu vaivaikala 20:11-15  
\io1 Loxotolo ilou lia xe Ielusalemu alavua 21:1–22:5  
\io1 Vaikala kaluxusou 22:6-21  
\c 1  
\p
\v 1 \x + \xo 1:1 \xt Pal 22:6\x*Vaivaikala ane ꞌo, Lataua mulosou Iesu Kalisito tei lexe upalaꞌalixu noxiꞌa ta mitema sou xaixai vitanisi noxou sou ilavusou mii maꞌia ane ꞌalaꞌalasi sou uxali maninasou. La sou anu Iesu muavuti, la mupalusou angelo vile noxou sou muneꞌe mulosielixu eni itema sou xaixai vitanisi noxou, ualasilo lexe Ioanesi.  
\v 2 Angelo mulosielixu mimii mukalu, la eni ekaukavunu mimii latala e eni emaisou. No anu kaukavu noxilo ne, eni eaꞌaloxu vaivaikala manina noxou Lataua mo vaivaikala manina noxou e anu Iesu mupalaꞌalixu.  
\v 3 \x + \xo 1:3 \xt Pal 22:7, 10\x*Ia Lataua ualusou ꞌei ane uitisou vaivaikala e anu mutotokalasou, mo anu ualusiꞌa aneꞌi ane ilomusou mii maꞌia ane eni ekaukavunu mo imulaxu no taneꞌi. Xo ꞌalaꞌalaisi sesi sou mimii e eni emaisou ne, uxali manina.   
\s1 Vaivaikala Noxou Lataua Ulai Noxiꞌa ta Mitema Noxou ne Asia  
\p
\v 4 \x + \xo 1:4 \xt Mul 3:14-15; Pal 3:1; 4:5\x*Eni alinga lexe alauna mo opo seꞌisisi noxou Lataua uxolu noxinge ngingi ta mitema noxou no tuala muxatele tamei no xalee lia tila ne Asia. Ia enisisi alinga aloxo ne uasi. Anu ane muxolu tatei mo muxolu vaimomo ꞌo mo iliꞌi la anu uneꞌe iloꞌa ta uleenu muxatele tamei e ixoxolu ꞌalai no paꞌumolu,  
\v 5 \x + \xo 1:5 \xt Lex 89:27; Kol 1:18\x*mo alauna mo opo seꞌisisi noxou Iesu Kalisito uxolu noxinge. Anu muꞌoxonu xaixai laixe sou muaꞌaloxu aꞌalo laixe noxou Lataua mo Anu mumauli tei noxiꞌa ta mitema e misoisoli, xe Anu usaxilaꞌa ta tatanaanu tuatuala no lia ꞌo kalumo.  
\p Iesu tanunenge, la sou musolisinge mo sialuxu munixi sou mululusinge no anu sakisaki sou ꞌiliꞌilixo masumasua.  
\v 6 \x + \xo 1:6 \xt 1Pi 2:9; Pal 5:10; 20:6\x*No anu soli noxou ne, la Anu muꞌuna-lailinenge no anu saxisaxilaꞌu noxou Lataua mo nenge texali loxo ta ailiꞌi sou taxaxai noxou Lataua, anu Maminge. La sou nenge taꞌitinu ualasou mo Anu molu usaxilaꞌinge no anu xavi mo lamana noxou no voxovoxo utotomu mo kaluxu uasi! Manina.   
\p
\v 7 \x + \xo 1:7 \xt Tan 7:13; Sek 12:10; Mat 24:30; Ioa 19:34-37; 1Te 4:17\x*Ngamaisou! Anu a uneneꞌe no anu tamuxala, la ta mitema latala imaisou mine uneneꞌe. Mo aneꞌi ane mitoꞌomolu kalumo imasiou. La ta mitema latala no lia ꞌo ne, itama. Ani, mii ne, uxali manina.   
\p
\v 8 \x + \xo 1:8 \xt Pal 21:6; 22:13\x*Lataua anu Tila mo xaviinu musuku misevile, muxolu tatei mo muxolu vaimomo ꞌo mo iliꞌi la Anu uneꞌe, muvikala lexe, “Eni exolu tatei mo, mo iliꞌi la eni axolu.”   
\s1 Eni Emaisou Kalisito  
\p
\v 9 Eni Ioanesi, eaꞌaloxu vaikala manina noxou Lataua mo eni apalaꞌalixu vaikala noxou Iesu Kalisito, la sou aneꞌi mikusailo elai exolu no laꞌolu vile ilemo lexe Patomosi. Eni vivinge, xo nenge nengeꞌa tamulinu Iesu, la sou nenge taxaxamulinu navunavu, ia taxolu seꞌisisi mo tatulu pekiaꞌinge no anu tuꞌutuꞌumaxu, mo nenge taxomaiou voxo ane Lataua usaxilaꞌinge.  
\v 10 Ia no voxo sou lalotu, la Uleenu Tavuna muꞌanaꞌana noxilo, la elomusou ꞌava tatila no tumalilo loxo itema vile mutaunu xoolau.  
\v 11 La muvikala aloxo ꞌo, “Nakaukavunu no anu mipipinu mii maꞌia ane nini namaisou mo nasova ulai noxiꞌa ta mitema noxou Lataua no tuala muxatele tamei ano, tuala ne Epeso mo ne Sumuna mo ne Peluxamo mo ne Tiatila mo ne Saludesi mo ne Piladelupia xe ne Laodekia.”   
\p
\v 12 Eni elomusou aloxo ne, la exiu sou lexe amaisou ꞌei ane muvikalaleli ne. La emaisou mii sou itulusou telu xoulu no anu muxatele tamei, ia mulalami manina.  
\v 13 \x + \xo 1:13 \xt Tan 7:13; 10:5\x*Ia no taiinu, la emaisou itema vile loxo Itema ꞌOlu mutaa tokolomo veveeni molu teitexi la mulai muxali no lia no tavaꞌu. Mo emaisou utupoko xoulu vile mulamilami no lutunu.  
\v 14 \x + \xo 1:14 \xt Ese 43:2; Tan 7:9; 10:6; Pal 2:18; 19:12\x*Mo emaisou kisou laxusou ne mukea manina loxo sipsip laxusou xe loxo tamuxala mo iou ne uvaxa loxo navu lamixu.  
\v 15 Mo tavaꞌu ne loxo barasi ulamilami e mixutu la mosomoso vile uxolu no anu uasisi. Mo xolunu ne loxo lexa utaloxo no kisou ulu.  
\v 16 \x + \xo 1:16 \xt Eva 4:12; Pal 2:12; 19:15\x*Mo utetelisiꞌa ta oto muxatele tamei no avolu tema, mo lavisou vile anaxu tamei ne anaxu misevile mulaa muuatu no anaxu. Xe iou ne loxo aso e ukaa lailaixe.   
\p
\v 17 \x + \xo 1:17 \xt Ais 44:6; 48:12; Pal 2:8; 22:13\x*Eni emaisou aloxo ne, la elapau loxo itema musoli muluꞌe no tavaꞌu. La sou Anu mumulaxu avolu tema noxilo, la muvikalaleli lexe, “Naꞌume mamu, xo eni exolu tei mo iliꞌi la eni axolu,  
\v 18 mo eni tavaꞌu mauli, la sou eni esoli. Ia namaisou, eni emauli mo umomomo sou asoli la uasi. Mo eni amomomo sou atulusou itema vile musoli mo alaaneꞌi aneꞌi ane mixolu no tualasiꞌa ta mitema misoisoli.   
\p
\v 19 Ioxe, nini nakaukavunu mii maꞌia ane nini nemaisou mo mii maꞌia ane nini namaisou vaimomo ꞌo mo mii maꞌia ane sou uxali iliꞌi.  
\v 20 Ia, laaxu ta oto muxatele tamei e nini nemaisiꞌa etetelisiꞌa no avolo tema mo mii sou itulusou telu xoulu no anu muxatele tamei ne, aloxo ꞌo. Ta oto muxatele tamei ne, musosovosiꞌa ta angelosiꞌa ta mitema noxou Lataua no tuala muxatele tamei, xe mii sou itulusou telu no anu muxatele tamei ne, musosovosiꞌa ta mitema noxou Lataua no tuala muxatele tamei.”   
\c 2  
\s1 Vaikala Ane ꞌo Ulai Noxiꞌa ta Epeso  
\p
\v 1 \x + \xo 2:1 \xt Pal 1:16\x* “Nini nakaukavu vaivaikala ane ꞌo ulai noxou angelo noxiꞌa ta mitema noxou Lataua ne Epeso. Itema e utetelisiꞌa ta oto muxatele tamei no avolu tema xe umuamuaꞌi no taiinu mii sou itulusou telu xoulu no anu muxatele tamei ane mulamilami ne, uvikala aloxo ꞌo,  
\v 2 \x + \xo 2:2 \xt 1Ioa 4:1\x*‘Eni elavusou ꞌiliꞌilixomengi mo xaixai tatila e ngingi ngeꞌoxonu. Mo eni elavu lexe ngingi ngatulu pekiaꞌinge no anu tuꞌutuꞌumaxu mo ngingi ngamomomo sou ngatulu noxiꞌa ta mitema ta masua la uasi. Mo eni elavusou lexe ngingi ngetovoneꞌi aneꞌi ane mikalavoingengi lexe aneꞌi ta mitema noxou Iesu sou upalupalusiꞌa la ngelavusiꞌa lexe aneꞌi ta mitema sou kalakalavoisi.  
\v 3 Mo ngingi ngetulu pekiaꞌinge mo ngexolu seꞌisisi no anu tuꞌutuꞌumaxu xo ngingi ngemulileli no ualasilo ia ngingi ngatotosa uasi. \fig |alt="seven churches map" src="SevenChurches.pdf" size="col" loc="Rev 2:3" ref="Revelesen 2:3" \fig*   
\p
\v 4 Ia eni akalapuusinge. Xo ngingi tei la ngemasaxailo, ia vaimomo ꞌo la ngamasaxailo uasi.  
\v 5 \x + \xo 2:5 \xt Pal 3:3\x*La sou ngingi ngaxavutalanu ꞌilixo laixe ngingi ngemulinu tei. Ia vaimomo ꞌo ngingi ngelapau! La sou ngingi ngaxiu mo ngamulinu ꞌiliꞌilixo ane ngingi ngeꞌoxoꞌoxo tei sou ngamasaxailo. Lexe ngingi ngaxiu uasi, la eni aneꞌe axexeenu mii sou itulusou telu no anu noxinge no tanixu ne asukunu ulai vaꞌaxu.  
\v 6 Ia eni aꞌiti ualasinge, xo ngingi ngamasaxau ꞌiliꞌilixo noxiꞌa aneꞌi ane mimulinu xavutala noxou Nikolasi uasi manina aloxo eni kalumo.’   
\p
\v 7 \x + \xo 2:7 \xt Tav 2:9; Pal 22:2, 19\x*ꞌEi ane sangalou, la ulomusou vaikala ane Uleenu Tavuna muvikalaneꞌi ta mitema noxou Lataua no anu laixe. Xe anu ane ualulixu ꞌotoꞌoto, la eni apelemasaxanu sou uꞌou ovu sou mauli ngiaxu. Ovu ne, mutulu no nano no tuala laixe noxou Lataua.”   
\s1 Vaikala Ane ꞌo Ulai Noxiꞌa ta Sumuna  
\p
\v 8 “Nini nakaukavu vaivaikala ane ꞌo ulai noxou angelo noxiꞌa ta mitema ne Sumuna. Itema e sokoꞌu mo kaluxu xe musoli ia mumauli la ne, Anu uvikala aloxo ꞌo,  
\v 9 \x + \xo 2:9 \xt 2Ko 11:14-15; Pal 3:9\x*‘Eni elavusou lexe ngingi ngaxamulinu navunavu mo mengi mimii uasi, ia noxou Iesu Kalisito la ngingi mengi mimii tavuꞌalo. Mo eni elavu lexe ta mitema ane aneꞌi ikalavoi lexe aneꞌi ta Iutaia ne, ivikala masuasinge. Ia aneꞌi ta Iutaia manina uasi, aneꞌi ta mitema noxou Satani.  
\v 10 \x + \xo 2:10 \xt 2Ti 4:8; Iak 1:12\x*Ia mamu sou ngaꞌume no anu navunavu e ꞌalaꞌalai sou ngingi ngaxalisou. Eni avikalangengi lexe itema masua anu Satani umulaxaꞌa seꞌi noxinge no nano no taasou navunavu sou utovongengi mo ngingi ngaxolu no anu navunavu ane ne voxo mavulovexa. Ia ngingi ngatulu pekiaꞌinge ulai utalo no voxo ane ngingi ngasoli, la eni alosinge mauli ane kaluxu uasi loxo eni alosou itema e muuli no anu saisale kisivalu.’   
\p
\v 11 \x + \xo 2:11 \xt Pal 20:14; 21:8\x*ꞌEi ane sangalou, la ulomusou vaikala ane Uleenu Tavuna muvika-laneꞌi ta mitema noxou Lataua no anu laixe. Xe anu ane uaulixu ꞌotoꞌoto, la anu umomomo sou uulua no anu soli tameisou uasi.”   
\s1 Vaikala Ane ꞌo Ulai Noxiꞌa ta Peluxamo.  
\p
\v 12 “Nini nakaukavu vaivaikala ane ꞌo ulai noxou angelo noxiꞌa ta mitema ne Peluxamo. Itema e utetelisou laviso anaxu tamei ia laviso ne anaxu misevile ne, uvikala aloxo ꞌo,  
\v 13 ‘Eni elavusou lexe ngingi ngaxoxolu no tani ane ne Satani musaxilaꞌu. Ia ngingi ngamulimulileli kalumo. Xe no voxo ane ta mitema no tualasinge e Satani muxolu no anu ne mivau Antipasi sou musoli, la ngingi ngaxiu tumalingeilo uasi. Io anu ne, anu muꞌoxonu xaixai laixe sou muaꞌaloxu ualasilo.   
\p
\v 14 \x + \xo 2:14 \xt Iti 22:1–25:2; 31:16; 2Pi 2:15\x*Ia eni akalapuusinge no anu mimii moseꞌi, xo ta mitema seꞌi no taiingengi ne mimulinu vaivaikala e Balamu mulosieꞌixu. Tatei, la anu mulosiouxu Balaki sou muꞌoxoneꞌi ta Isilaeli sou misusu la miꞌou laꞌilali e milosiꞌa ta Maliava sou kalakalavoi. Xe miꞌoxonu ꞌiliꞌilixo masumasua sou voteꞌi.  
\v 15 Aloxo ta mitema moseꞌi no taiingengi kalumo mimulinu vaivaikala e Nikolasi mulosieꞌixu.  
\v 16 La sou ngaxiu. Ia lexe ngingi ngaxiu uasi, la eni ꞌalaꞌalai sou alivu aneꞌe noxinge. Aneꞌe la aꞌotoxaꞌa no anu laviso no anaxo.’   
\p
\v 17 \x + \xo 2:17 \xt Mul 16:4, 14-15, 33-34; Ais 62:2; Ioa 6:48-50\x*ꞌEi ane sangalou, la ulomusou vaikala ane Uleenu Tavuna muvika-laneꞌi ta mitema noxou Lataua no anu laixe. Xe anu ane ualulixu ꞌotoꞌoto, la eni aitiu laꞌilali ilemo lexe mana e mitalumeu. Mo eni alosou lavoꞌo kea vile. No anu lavoꞌo kea ne, la mikau-kavunu uala vile alavua no anu, ia anu ane unoꞌu lavoꞌo ane nesi ulavusou.”   
\s1 Vaivaikala Ane ꞌo Ulai Noxiꞌa ta Tiatila  
\p
\v 18 \x + \xo 2:18 \xt Pal 1:14-15\x* “Nini nakaukavu vaivaikala ane ꞌo ulai noxou angelo noxiꞌa ta mitema noxou Lataua ne Tiatila. Lataua ꞌOlu e iou loxo navu lamixu xe tavaꞌu loxo barasi ulamilami ne, uvikala aloxo ꞌo,  
\v 19 ‘Eni elavusou ꞌiliꞌilixomengi mo ꞌilixo sou ngemasaxau Kalisito mo muxamuxaxu tangengi noxou mo xaixai e ngingi ngaꞌoxoꞌoxonu ulai noxiꞌa ta menexinge mo elavu lexe ngingi ngetulu pekiaꞌinge no anu tuꞌutuꞌumaxu. Mo elavu lexe ꞌiliꞌilixo e ngingi ngaꞌoxoꞌoxonu ne muaulixu ꞌilixo ane ngingi ngeꞌoxo tei.   
\p
\v 20 \x + \xo 2:20 \xt 1Ta 16:31; 2Ta 9:22\x*Ia eni akalapuusinge, xo ngingi iengi muvaxaie sema to ne ualasie lexe Iseveli. Ane mele milemele lexe ane sema palomatana vile. Ane milosieꞌixaꞌa ta mitema sou xaixai noxilo vitanisi sou miꞌoxonu ꞌiliꞌilixo masumasua sou voteꞌi mo miꞌou laꞌilali ane milosiꞌa ta Maliava sou kalakalavoi.  
\v 21 Eni elosie voxo moseꞌi sou lexe ixiu no anu ꞌiliꞌilixoie sou voteꞌi ne, ai ane imasaxa uasi.  
\v 22 La sou eni alosie pipiena mo ixamuli navunavu tatila mo iailixu no luusie. Mo eni alosiꞌa aneꞌi ane mitaulaꞌi ia milai noxie navunavu toxoxaꞌa lexe aneꞌi ixiu tumaliꞌau ꞌiliꞌilixo noxie uasi.  
\v 23 \x + \xo 2:23 \xt Lex 7:9; Iel 17:10; Pal 20:12-13\x*Mo eni aveꞌaveꞌa aneꞌi ane mimulimuline isoisoli. La sou ta mitema noxou Lataua ukalusi ne, ilavu lexe eni elavusou manina ta mitema taneꞌi ilou xavutalaiꞌa mo eni akoli ulai noxinge no anu mii maꞌia ngingi vilevilesi ngaꞌoxonu.  
\v 24 Ia eni avikalangengi ngingi ta mitema paꞌusou ne Tiatila e ngingi ngamulinu vaivaikalaie mo ngalavusou mii noxou Satani ane mutalume uasi. Eni amomomo sou alosinge tuꞌutuꞌumaxu seꞌi uasi.  
\v 25 \x + \xo 2:25 \xt Pal 3:11\x*Ia ngatetelisou mii maꞌia ane ngingi ngenoꞌu ulai utalo no mine eni alivu aneꞌe.’   
\p
\v 26 \x + \xo 2:26 \xt Lex 2:8-9\x*ꞌEi ane uuaulixu ꞌotoꞌoto mo uꞌoxonu mii maꞌia ane eni emasaxau ulai utalo no anu voxo ane anu usoli ne, la eni alosou xavi sou usaxilaꞌa ta mitema no xalexalee tuatuala ukalusi.   
\p
\v 27 ‘Anu usaxilaꞌa no anu vilaxoxu aeni ane xaviinu musuku sou umamuloneꞌi ta mitema loxo latotope ane miꞌoxonu no anu lia utuxusi aloxo eni enoꞌu xavi noxou Mamilo.  
\v 28 \x + \xo 2:28 \xt Pal 22:16\x*Mo eni alosou xuae sou lamana ukea.’   
\p
\v 29 ꞌEi ane sangalou, la ulomusou vaikala ane Uleenu Tavuna muvikalaneꞌi ta mitema noxou Lataua no anu laixe.”   
\c 3  
\s1 Vaivaikala Ane ꞌo Ulai Noxiꞌa ta Saludesi  
\p
\v 1 \x + \xo 3:1 \xt Pal 1:4, 16\x* “Nini nakaukavu vaivaikala ane ꞌo ulai noxou angelo noxiꞌa ta mitema noxou Lataua ne Saludesi. Itema ane mutetelisiꞌa ta ulee muxatele tamei noxou Lataua mo ta oto muxatele tamei uvikala aloxo ꞌo, ‘Eni elavusou ꞌiliꞌilixomengi. Ta mitema ivikala lexe ngingi loxo ngemauli, ia uasi to ngingi loxo ngesoisoli.  
\v 2 Ngingi ngatulu mo ngaavutunoxou mii maꞌia ane uxoxolu noxinge sio ia ꞌalaꞌalaisou ukalu. Xo eni amaisou ꞌiliꞌilixomenge uxali laixe mo umomomo no iou Lataua noxilo uasi.  
\v 3 \x + \xo 3:3 \xt Mat 24:43-44; 1Te 5:2; Pal 2:5; 16:15\x*La sou ngaxavutalanu mii maꞌia ane ngingi ngelomusou mo ngenoꞌu. La sou ngamulinu mo ngaxiu tumalingeu ꞌiliꞌilixo masumasua. Ia lexe ngingi ngatulu uasi, la eni aneꞌe akulukengengi loxo itema sou pakali uneꞌe. Ia ngingi ngalavusou aso iou ane eni eneꞌe no anu uasisi manina.   
\p
\v 4 \x + \xo 3:4 \xt Iud 1:23\x*Ia ta mitema moseꞌi no taiingengi ne Saludesi ne, aneꞌi mitaanu tokolomo nuniꞌu uasi. Nexi noxiꞌa tatokolomoxu tokolomo kea mo noxiꞌa tamuamuaꞌi takei, xo aneꞌi mimomomo.  
\v 5 \x + \xo 3:5 \xt Mul 32:32-33; Mat 10:32; Luk 12:8\x*Anu ane muuaulixu ꞌotoꞌoto ne, la anu utokolomoxu tokolomo kea loxo aneꞌi. La sou eni umomomo sou aiasou ualasou no anu lavuku sou mauli uasisi manina. Ia eni amoxoꞌu ualasou no iou Mamilo iloꞌa ta angelo noxou.’  
\v 6 ꞌEi ane sangalou, la ulomusou vaikala ane Uleenu Tavuna muvikalaneꞌi ta mitema noxou Lataua no anu laixe.”   
\s1 Vaivaikala Ane ꞌo Ulai Noxiꞌa ta Piladelupia  
\p
\v 7 \x + \xo 3:7 \xt Ais 22:22\x* “Nini nakaukavunu vaivaikala ane ꞌo ulai noxou angelo noxiꞌa ta mitema noxou Lataua ne Piladelupia. Vaivaikala ane ꞌo ne, noxou ane noxou Lataua mo uvikala lexe uꞌoxonu maꞌia la Anu umulinu. Anu utetelisou xavi sou usaxilaꞌu siliko sou aitenga. Loxo Deviti la sou Anu ukisiinu aitenga, la umomomo sou evile utatusou uasi. Xe Anu utatusou aitenga, la umomomo sou evile ukisiinu uasi.  
\v 8 \x + \xo 3:8 \xt 1Ko 16:9\x*Eni elavusou ꞌiliꞌilixomengi, la sou ngamaisou eni ekisiinu aitengasinge mo a ututulu no laxungengi. Aitengasinge ne, umomomosou evile utatusou uasi. Mo eni elavusou lexe ngingi xavi sevile a uxoxolu, la ngingi ngemulinu vaivaikala noxilo mo ngatalume noxilo uasi.  
\v 9 \x + \xo 3:9 \xt Ais 45:14; 49:23; 60:14; Pal 2:9\x*Ia ngamaisou, ta mitema ane ipita noxou Satani aneꞌi meꞌa imoxoꞌa lexe aneꞌi ta Iutaia ia uasi, aneꞌi ta mitema sou kalakalavoi. La eni aꞌoxoneꞌi ineꞌe itangatulu no tavainge mo ilavusou lexe eni emasaxainge.  
\v 10 \x + \xo 3:10 \xt Luk 21:19; 2Ti 2:12\x*Ngingi ngemulinu vaivaikala noxilo mo tuꞌutuꞌumaxu muxalisinge la ngexolu seꞌisisi, la sou eni asaxilaꞌinge no anu voxo sou tovotovo. Voxo sou tovotovo ne, anu ꞌalaꞌalai sou uxali no xalexalee tuatuala no lia ꞌo ukalusi sou utovoneꞌi aneꞌi ane mixolu no lia ꞌo.   
\p
\v 11 Eni ꞌalaꞌalai sou alivu aneꞌe, la sou ngingi ngatetelisou pekiaꞌu mii maꞌia ane ngingi ngenoꞌu, mo sou evile umomomo sou uꞌumenu kisivalu no kisinge muxamuxaxu uasi.  
\v 12 \x + \xo 3:12 \xt Ais 62:2; 65:15; Pal 14:1; 21:2\x*Anu ane muaulixu ꞌotoꞌoto ne, la eni aꞌoxonu loxo atulusou tani tila noxou Lataua noxilo. Anu umomomo sou uxexee uasi mo eni akaukavunu ualasou Lataua noxilo no anu. Mo eni akaukavunu ualasou tuala noxou Lataua noxilo, anu Ielusalemu alavua. Ielusalemu alavua ne, anu molu teitexi noxou Lataua noxilo uluꞌe. Mo eni akaukavunu ualasilo alavua no anu kalumo.  
\v 13 ꞌEi ane sangalou, la ulomusou vaikala ane Uleenu Tavuna muvikalaneꞌi ta mitema noxou Lataua no anu laixe.”   
\s1 Vaivaikala Ane ꞌo Ulai Noxiꞌa ta Laodekia  
\p
\v 14 “Nini nakaukavunu vaivaikala ane ꞌo ulai noxou angelo noxiꞌa ta mitema noxou Lataua ne Laodekia. Vaivaikala ane ꞌo ne, noxou itemasou Manina, Anu uvikala lexe uꞌoxonu mii maꞌia la Anu umulinu vaikala noxou mo Anu muaꞌaloxu aꞌalo laixe noxou Lataua mo Anu usaxilaꞌu mimii latala ane Lataua mukoinu mukalusi.  
\v 15 \x + \xo 3:15 \xt Rom 12:11\x*Ia eni elavusou ꞌiliꞌilixomengi. Ngingi xavingengi malaxo uasi sou ngamulinu vaivaikala noxilo loxo lexa lelemesou xe ialuxu uasi. La sou eni emasaxa lexe ngingi ngaxali loxo lexa ialuxu, xe uasi la ngaxali loxo lexa lelemesou.  
\v 16 Tavaꞌu xo ngingi loxo lexa ialuxu mo lexa lelemesou uasi, ia ngingi loxo lexa ialuxu malaxo uasi, la eni ꞌalaꞌalai sou aexingengi uuatu no anaxo.  
\v 17 \x + \xo 3:17 \xt Luk 12:21; 1Ko 4:8\x*Ia ngingi ngavikala lexe. ‘Eni amitema sou lavuluti. Eni enoꞌu mimii iouiou mukalu, la sou eni emasaxau mii vile la uasi.’ Ia ngingi ngalavusou lexe xoluxolungengi ne masumasua uasi. Ta maula moso ngalavusou lexe ngingi ngexolu vitanisi mo iengi seleveenu xe paxapaxainge uasi.  
\v 18 \x + \xo 3:18 \xt Ais 55:1\x*La sou eni apeletotosinge lexe ngingi ngalotonu xoulu noxilo ane mielaxu no navu mo muxali alavua la sou ngingi ngaxali itema sou lavuluti, la sou ngingi ngalotonu tokolomo kea noxilo mo ngataanu sou utaluxu vasimenge e paxapaxaꞌu, la ngamaela uasi. Mo ngalotonu lamalasile noxilo sou iengi, mo sou ngamalei.  
\v 19 \x + \xo 3:19 \xt 1Ko 11:32; Eva 12:6; Pal 2:5\x*Aneꞌi ane eni emasaxaiꞌa, la eni akaitoloneꞌi mo apuasiꞌa. La sou xavingengi mo ngaxiu ꞌiliꞌilixomengi.  
\v 20 \x + \xo 3:20 \xt Ioa 14:23\x*Ngamaisou! Eni a atutulu no aitenga mo apolopolo. Lexe ꞌei ane ulomusilo mo ukisiinu aitenga, la eni aꞌunalai mo nexi noxou taꞌani tapita. \fig |alt="Jesus knocking on door" src="cn02107B.tif" size="col" loc="Rev 3:20" copy="© 1978 David C. Cook Publishing Co." ref="Revelesen 3:20" \fig*   
\p
\v 21 Noxou anu ane muaulixu ꞌotoꞌoto ane ne, la eni apamatolanu sou nexi noxou taxolu no xavi muxolu no anu, loxo eni euaulixu ꞌotoꞌoto ne la nexi noxou mamilo texolu no luusou.  
\v 22 ꞌEi ane sangalou, la ulomusou vaikala ane Uleenu Tavuna muvikalaneꞌi ta mitema noxou Lataua no anu laixe.”   
\c 4  
\s1 Luusou no Opo Loxotolo  
\p
\v 1 \x + \xo 4:1 \xt Pal 1:1, 10\x*Anu mulosilo vaivaikala ne mukalu xe eni emalei, la emaisou aitenga vile mukisi no opo loxotolo. La eni elomusou itema xolinu loxo xoolau e muvikalaleli tei muvikala aloxo ꞌo, “Natelo mo alosienixu mii maꞌia ane uxali manina iliꞌi no vaivaikala ane elosine.”  
\v 2 \x + \xo 4:2 \xt Ais 6:1\x*Eni elomusou vaivaikala ne mukalusi ka Uleenu Tavuna muꞌanaꞌana noxilo, la emaisou itema vile uxoxolu no luu no opo loxotolo.  
\v 3 \x + \xo 4:3 \xt Ese 1:28\x*La vasimolu ne kaukavuxu loxo lavoꞌo vevesinu xe lauolauoinu. Xe muloxu leleꞌe kaukavuxu vevesinu muxixaonu luu ne.  
\v 4 \x + \xo 4:4 \xt Pal 3:18\x*Mo no anu luu itemaxu vile mo tamiꞌa ne ta tatila itemaxu vile mo tamiꞌa a mixolu mixixaonu ne la ta tatila itemaxu vile mo tamiꞌa ixoxolu no anu. Mo aneꞌi mitokolomo no anu tokolomo kea xe mitaanu kisivalu miꞌoxo no anu xoulu.  
\v 5 \x + \xo 4:5 \xt Ese 1:13; Sek 4:2; Pal 1:4; 8:5; 11:19; 16:18\x*Ia no luu ane no nixi, la leleꞌe ulamilami xe upaupau la luluxu uvalivalixumu. Xe no talaxu, la telu muxatele tamei ukaakaa. Anu ta ulee noxou Lataua muxatele tamei.  
\v 6 \x + \xo 4:6 \xt Ese 1:5-10, 22; 10:14\x*Mo no talaxu, la emaisou mii vile loxo laxalasi toxoxaꞌa loxo luaki mulamilami. Mo no nixi no luu ne, la eni emaisiꞌa ta mii tamiꞌa mitulu mixixaonu luu ne. Ia aneꞌi ta mitema, ne ieꞌi tavuꞌalo misevile mutaasou vasimeꞌa, iliꞌi xe uꞌuli.  
\v 7 Vile noxiꞌa ne, anu iou loxo laeoni. Tameisou ne, iou loxo bulumakau mulu. Tatalusou ne iou loxo itema xe tamiꞌasou ne, iou loxo nenusuluvi uvavava teitexi. \fig laeoni|alt="male lion" src="HK00046B.TIF" size="col" loc="Rev 4:7" copy="Horace Knowles © The British & Foreign Bible Society, 1954, 1967, 1972." ref="Revelesen 4:7" \fig*  
\v 8 \x + \xo 4:8 \xt Ais 6:2-3; Ese 1:18; 10:12\x*Ta mii tamiꞌa ne, aneꞌi vilevilesi vivisiꞌa muxatele vile, mo ieꞌi tavuꞌalo mutaataasou mukalusi, mo mutaasou vivisiꞌa laalaaxu kalumo. Ia no aso xe no ꞌolovoxo, la aneꞌi imaꞌilasou ivikala aloxo ꞌo uasi. Ivikala lexe,  
\q1 “Lataua malemalenga mo malemalenga mo malemalenga.  
\q2 Anu Tila mo xaviinu musuku misevile.  
\q2 Anu muxolu tei mo vaimomo ꞌo xe iliꞌi la ulivu uneꞌe.”   
\p
\v 9 No mine ta mii ne iꞌitinu ualasou mo itaxaanu xe ilemo laixe noxou anu ane muxolu no luu mo umauli no voxovoxo utotomu mo kaluxu uasi,  
\v 10 \x + \xo 4:10 \xt Pal 19:4\x*la ta tatila itemaxu vile mo tamiꞌa italoxo uluꞌelai no talaxu itema e uxolu no luu sou ilotu noxou ane umauli no voxovoxo utotomu mo kaluxu uasi. Aneꞌi miluvusou kisivaluiꞌa mo mimulaxu no talaxu, la mivikala aloxo ꞌo.   
\q1
\v 11 “Nini Tilasixe xe Lataua noxixe,  
\q2 nini umomomo sou iꞌitinu ualasine mo itaxaneni,  
\q2 xe iꞌosasine sou xavi noxine. Xo nini nekoinu mimii latala mukalusi  
\q2 mo no anu masaxa noxine la aneꞌi mixali mo mixolu.”   
\c 5  
\s1 Kaukavu Ane Mipipinu Xe Sipsip ꞌOlu  
\p
\v 1 \x + \xo 5:1 \xt Ais 29:11; Ese 2:9-10\x*Mo itema uxolu no luu ne ia no avo tema, la eni emaisou kaukavu vile mipipinu muai. Kaukavu ne, mikaukavunu xalee vile xe xalee vile mo misakiinu no anu sakisaki muxatele tamei.  
\v 2 Mo eni emaisou angelo vile xavi misevile muꞌava tatila aloxo ꞌo, “ꞌEi umomomosou ululusou sakisaki mo uxavulalanu kaukavu ne?”  
\v 3 Ia evile uxolu teitexi no opo loxotolo mo no lia ꞌo xe no nano no lia umomomo sou uxavulalanu kaukavu ne mo umaisou uasi.  
\v 4 Eni atatama xo ixalisou evile umomomo sou uxavulalanu kaukavu ne mo umaisou uasi.  
\v 5 \x + \xo 5:5 \xt Tav 49:9; Ais 11:1, 10; Pal 22:16\x*La vile noxiꞌa ta tatila muavuti la muvikalaleli aloxo ꞌo, “Natama uasi. Namaisou! Laeoni molu no anu mata Iudasi mo Anu Deviti uliꞌu muaulixu Satani. La sou Anu mumomomosou ululusou sakisaki muxatele tamei xe uxavulalanu kaukavu ne.”   
\p
\v 6 \x + \xo 5:6 \xt Sek 4:10; Ioa 1:36; Pal 13:8\x*Anu muvikalaleli mukalu, la eni emaisou Sipsip ꞌOlu ututulu no nixi no luu. La ta mii tamiꞌa iloꞌa ta tatila mixixaonu. Sipsip ꞌOlu ne, anu loxo mivau mo sikilinu muxatele tamei xe iou muxatele tamei. Iou muxatele tamei ne, anu ta ulee noxou Lataua muxatele tamei ane mipalusiꞌa miluꞌe no lia ꞌo mukalusi.  
\v 7 Anu muavuti la muneꞌe noxou itema e uxoxolu no luu ne sou munoꞌu kaukavu ane mipipinu muai no avolu tema.  
\v 8 \x + \xo 5:8 \xt Lex 141:2; Pal 8:3-4\x*Anu munoꞌu mukalu, la ta mii tamiꞌa iloꞌa ta tatila itemaxu vile mo tamiꞌa mixolaꞌu tavaꞌu sou milotu noxou. Aneꞌi vilevilesi mitetelisou susapu xe paku miꞌoxo no anu xoulu ia mii iꞌelaxu la tumaꞌu lailaixe muꞌanaꞌana no anu. Tumaꞌu lailaixe ne, anu lakilaka noxiꞌa ta mitema noxou Lataua.  
\v 9 \x + \xo 5:9 \xt Lex 33:3; 40:3; 96:1; 98:1\x*La aneꞌi milexe lexe vile alavua aloxo ꞌo,  
\q1 “Nini nemomomo sou nanoꞌu kaukavu ne mo nalulusou sakisaki,  
\q2 xo nini neuluasiꞌa mo no anu sialuxene,  
\q2 la nini nenoꞌu ulusiꞌa ta mitema noxou Lataua ane mata noxiꞌa iouiou  
\q2 mo vaikalaiꞌa iouiou mo vasimeꞌa kaukavunu iouiou no xalee xalee tuatuala mukalusi.   
\q1
\v 10 \x + \xo 5:10 \xt Mul 19:6; Ais 61:6; Pal 1:6; 20:6\x*Mo nini nesosovosiꞌa mo mixali ta tatanaanu tuala  
\q2 xe ta ailiꞌi sou ixaxai noxou Lataua noxinge.  
\q2 La sou aneꞌi isaxilaꞌa ta mitema latala no lia ꞌo ukalusi.”   
\p
\v 11 \x + \xo 5:11 \xt Tan 7:10; Eva 12:22\x*Milexe mukalu, la emaisiꞌa ta angelo tavuꞌalo mo elomusou xolineꞌi. Ia itiitisiꞌa tavuꞌalo musuku mo umomomosou taꞌitisiꞌa uasi. Aneꞌi mixixaonu luu iloꞌa ta mii tamiꞌa xe ta tatila.  
\v 12 La milexe tatila manina aloxo ꞌo,  
\q1 “Sipsip ꞌOlu anu muulua ne,  
\q2 umomomosou unoꞌu xavi mo lavuluti mo lavulavu noxou Lataua  
\q2 xo Anu xaviinu.  
\q2 Xe nenge tataxaanu mo taꞌiti ualasou mo taꞌosasou.”   
\p
\v 13 Mo elomusiꞌa ta mimii latala mukalusi no opo loxotolo mo no lia ꞌo mo no laaxu lia mo no luaki milexe. Aneꞌi latala mukalusi mixolu no anu ne, milexe aloxo ꞌo.  
\q1 “Itema ane muxolu no luu mo Sipsip ꞌOlu ne,  
\q2 nenge taꞌosasiꞌa mo ta tataxaneꞌi  
\q2 xe taꞌitinu ualasiꞌa no voxovoxo utotomu mo kaluxu uasi,  
\q2 xo aneꞌi xavineꞌi sou isaxilaꞌu mimii latala ukalusi.”   
\p
\v 14 Aneꞌi milexe mukalu, la ta mii tamiꞌa mivikala lexe “Manina,” xe ta tatila mixolaꞌu tavaꞌa sou milotu noxiꞌa.   
\c 6  
\s1 Sakisaki  
\p
\v 1 \x + \xo 6:1 \xt Pal 4:6; 5:1\x*Mo eni emaisou Sipsip ꞌOlu mululusou sakisaki vile no anu sakisaki muxatele tamei. La eni elomusou vile noxiꞌa ta mii tamiꞌa ne muvikalaleli la xolinu loxo leleꞌe upau la luluxu. Muvikala aloxo ꞌo, “Naneꞌe.”  
\v 2 \x + \xo 6:2 \xt Sek 1:8; 6:1-6\x*Eni emalei la oosi kea vile a ututulu no talaxo. Itema ane muxolu no oosi lataanu ne, mutetelisou pasiko mo milosou kisivalu. La anu muiave mulai loxo itema muuliuli no anu ꞌotoꞌoto.   
\p
\v 3 Xe no mine anu mululusou sakisaki tameisou, la eni elomusou tameisou noxiꞌa ta mii tamiꞌa ne muvikala aloxo, “Naneꞌe.”  
\v 4 La oosi vile ane lauolauoinu loxo navu ututulu no talaxo. La itema muxolu no latanu oosi ne, aneꞌi milosou xavi sou uxexeenu opo seꞌisisi noxiꞌa ta mitema no lia ꞌo ukalusi mo sou aneꞌi iveꞌa ngatongatoꞌo isoisoli. Aneꞌi milosou viso vile tatila. \fig oosi|alt="horse" src="LB00032B.TIF" size="col" loc="Rev 6:4" copy="Louise Bass © The British & Foreign Bible Society, 1994." ref="Revelesen 6:4" \fig*   
\p
\v 5 Xe no mine anu mululusou sakisaki tatalusou la eni elomusou tatalu sou noxiꞌa ta mii tamiꞌa ne muvikala aloxo ꞌo, “Naneꞌe.” Eni emalei, la oosi vile ane muxusi a ututulu no talaxo. Itema ane muxolu no oosi latanu ne, mutetelisou mii sou itilovosou no avolu.  
\v 6 La eni elomusou mii vile xolinu loxo itema no taiineꞌi ta mii tamiꞌa ne. La anu muvikala aloxo ꞌo, “Uiti ngiaxu Lita vile\f + \fr 6:6 \ft Lita vile ne loxo Kilo vile no ꞌa lalaisi.\f* umomomo no anu Denalia\f + \fr 6:6 \ft Denalia vile noxiꞌa ta Romu ane anu uulu sou itema vile unoꞌu sou muxaxai no anu no voxo vile lololi no xai ane lingamo.\f* vile. Xe bali ngiaxu Lita tatalu umomomo no anu Denalia vile. Ia ngaꞌoxo masuanu ueli ilou uaini uasi. Ia ngasaxilaꞌu uulusou laixe.”   
\p
\v 7 Xe no mine anu mululusou sakisaki tamiꞌasou, la eni elomusou kaluxusou noxiꞌa ta mii tamiꞌa ne muvikala aloxo ꞌo, “Naneꞌe.”  
\v 8 \x + \xo 6:8 \xt Iel 15:1-3; Ese 5:12, 17; 14:21\x*Eni emalei, la oosi vile ane kuakuala a ututulu no talaxo. Itema ane muxolu no oosi latanu ne, ualasou lexe soli. La tualasiꞌa ta mitema misoisoli muxolu ꞌalai noxou. Ia Lataua mulosiꞌa xavi sou iveꞌaveꞌa ta mitema no lia ꞌo no xalee tamiꞌasou. Iveꞌaveꞌa no anu viso mo kaetoto xe pipiena masumasua. Mo ta mimii ta vova no lia ꞌo iveꞌaveꞌa.   
\p
\v 9 Xe no mine anu mululusou sakisaki taꞌuvesou, la eni emaisiꞌa ta mitema e miveꞌaveꞌa uleeneꞌi no valovalo laaxu. Aneꞌi miveꞌaveꞌa xo aneꞌi mimulinu vaivaikala noxou Lataua xe mimuxamuxaxu taneꞌi noxou Iesu mulai mutalo no mine misoisoli.  
\v 10 La aneꞌi miꞌava tatila aloxo ꞌo, “Nini Tila e usaxilaixe mo ninisisi Lataua noxixe xe nini itema sou kalavoi uasi. Nexi taxolu voxo taꞌei, la sou nini natulusiꞌa ta mitema ixolu no lia no anu vaivaikala mo nakolinu sialunexe?”  
\v 11 \x + \xo 6:11 \xt Pal 7:9, 13; 19:14\x*La anu mulosiꞌa tokolomo kea vilevilesi mo muvikalaneꞌi lexe, “Ngaxolu maxuvee sevile ꞌo, mo ngaxomaieꞌi ta mitema sou xaixai vitanisi noxilo ane aneꞌi ta vivinge noxou Iesu mo iveꞌa isoisoli ꞌo loxo aneꞌi miꞌoxonu noxinge. Lexe itiitisiꞌa umomomo ukalu, la sou eni akolinu.”   
\p
\v 12 \x + \xo 6:12 \xt Mat 24:29; Apo 2:20; Pal 8:12; 11:13; 16:18\x*Xe no mine anu mululusou sakisaki muxatelevilesou xe eni emalei, laliua toxoxaꞌa muxali. La aso muxali suinu loxo tokolomo vile muximuxi miꞌoxonu no anu mee laxusou mo soꞌio muxali lauolauoinu loxo sialu.  
\v 13 \x + \xo 6:13 \xt Ais 34:4\x*Mo ta oto teitexi no loxotolo milapalapau miluꞌe no lia loxo atume toxoxaꞌa uꞌelesou ovu lovo ngangingangisou la ulapalapau ulai no lia.  
\v 14 \x + \xo 6:14 \xt Pal 16:20\x*Xe loxotolo tasiauxu loxo mipipinu kaukavu, la laxalaxaꞌilu ilou laꞌolaꞌolu no luaki mivulasou tanixaꞌa.   
\p
\v 15 \x + \xo 6:15 \xt Ais 2:10, 19, 21\x*Mimii ne muxali, la ta tatanaanu tuatuala mukalusi iloꞌa ta ꞌiliꞌiliꞌa mo ta tatila sou xaixai noxiꞌa ta mitema sou ꞌotoꞌoto mo ta mitema sou lavuluti mo ta mitema xavixavineꞌi mo ta mitema sou xaixai vitanisi iloꞌa ta mitema ane aneꞌi meꞌa isaxilaꞌa mukalusi no lia ꞌo ne, milai mitalume no taxataxa mo no lavoꞌo laalaaxu.  
\v 16 \x + \xo 6:16 \xt Luk 23:30\x*La aneꞌi miꞌava mulai no laxalaxaꞌilu mo lavolavoꞌo lexe, “Ngalapau uluꞌe mo ngatalumeiou iexi noxou ane ane muxolu no luu mo sou umaisixe uasi mo no anu laꞌia noxou Sipsip ꞌOlu.  
\v 17 \x + \xo 6:17 \xt Ioe 2:11; Mal 3:2\x*Xo voxo toxoxaꞌa sou laꞌia noxiꞌa ilou a muxali ꞌo la ꞌei umomomo sou utuluxu?”   
\c 7  
\s1 Lataua Musosovosiꞌa ta Isilaeli 144,000  
\p
\v 1 \x + \xo 7:1 \xt Iel 49:36; Tan 7:2\x*Anu mululusou sakisaki muxatele vile mukalu, la eni emaisiꞌa ta angelo tamiꞌa mitulutulu no xalee lia kusikusinou tamiꞌa. Aneꞌi mitulutulu sou mitaluxu atume iou tamiꞌa, la uilisou lia mo luaki xe ovuovu uasi.  
\v 2 Mo eni emaisou angelo vile molu no xalee ane aso utelo no anu uneneꞌe la mutetelisou sosovo noxou Lataua ane umauli. Anu muneꞌe la muꞌava toxoxaꞌa mulai noxiꞌa ta angelo tamiꞌa e Lataua mulosiꞌa xavi sou iꞌoxo masuanu lia ilou luaki.  
\v 3 \x + \xo 7:3 \xt Ese 9:4, 6; Pal 9:4\x*Aloxo ꞌo, “Ngingi ngaxolu ꞌo, mo nenge nengeꞌa tateinu sosovo no ꞌalaieꞌi ta mitema sou xaixai vitanisi noxou Lataua noxinge tei ꞌo. Xe ukalu, la sou ngingi ngaꞌoxo masuanu lia ilou luaki mo ovuovu.”  
\v 4 \x + \xo 7:4 \xt Pal 14:1, 3\x*Muꞌava aloxo ne mukalu, la eni elomusou itiitisiꞌa aneꞌi ane minoꞌu sosovo ne muxali loxo 144,000 no anu mata noxiꞌa ta Isilaeli mukalusi.   
\p
\v 5 Mata noxou Iudasi minoꞌu sosovo itiitisiꞌa muxali loxo 12,000.  
\q1 Mo mata noxou Lubeni 12,000 mo mata noxou Gado 12,000.   
\q1
\v 6 Mo mata noxou Aseli 12,000 mo mata noxou Napitali 12,000  
\q1 mo mata noxou Manase 12,000   
\q1
\v 7 mo mata noxou Simeoni 12,000 mo mata noxou Levi 12,000  
\q1 mo mata noxou Isikali 12,000   
\q1
\v 8 mo mata noxou Sevuloni 12,000 mo mata noxou Iosepu 12,000  
\q1 xe mata noxou Beniamini 12,000.   
\s1 Ta Mitema Tavuꞌalo Mitaanu Tokolomo Kea  
\p
\v 9 Eni emaisou itiitisiꞌa ta Isilaeli mukalu xe emalei la, emaisiꞌa ta mitema tavuꞌalo manina umomomo sou taitisiꞌa uasi ane mata noxiꞌa iouiou mo vasimeꞌa kaukavuxu iouiou mo vaikalaiꞌa iouiou no xalexalee tuatuala mukalusi. Aneꞌi mitutulu no talaxaꞌa itema muxolu no luu ne ilou Sipsip ꞌOlu, la mitaanu tokolomo kea mulalusi xe mitetelisou xoolou volovoloxu no avoꞌa.  
\v 10 \x + \xo 7:10 \xt Pal 5:6-7\x*La aneꞌi miꞌava tatila aloxo ꞌo,  
\q1 “Lataua noxinge ane muxolu no luu ilou Sipsip ꞌOlu upamaulinenge.”   
\p
\v 11 Aneꞌi miꞌava tatila aloxo ne, la ta angelo ane mitulu mixixaoneꞌi itema muxolu no luu iloꞌa ta tatila mo ta mii tamiꞌa milapau miluꞌelai no talaxo itema muxolu no luu ne sou milotu noxou Lataua.  
\v 12 \x + \xo 7:12 \xt Pal 5:12\x*Ia mivikala aloxo ꞌo,  
\q1 “Manina lexe nenge taꞌosasou Lataua noxinge mo taꞌitinu ualasou  
\q2 mo talemolu laixe noxou xe ta taxanu no voxovoxo utotomu mo kaluxu uasi.  
\q2 Xo anu itema sou lavulavu mo xavi noxou ne xaviinu misevile.  
\q2 Manina.”   
\p
\v 13 La vile noxiꞌa ta tatila mutaliꞌisilo aloxo ꞌo, “Aneꞌi ta ꞌei e mitaanu tokolomo kea mo meꞌa neꞌei?”  
\v 14 \x + \xo 7:14 \xt Tan 12:1; Mat 24:21\x*La ekolinu aloxo ꞌo, “Tila, nini nelavusiꞌa.” La anu muvikala lexe, “Aneꞌi ta mitema ne, aneꞌi miuaulixu tuꞌutuꞌumaxu toxotoxoxaꞌa la miꞌuinu tokolomoiꞌa no anu sialuxu Sipsip ꞌOlu la muxali kea.  
\v 15 La sou aneꞌi milai mixolu no luu talaxu Lataua sou ixaxai noxou no taasou no aso xe no ꞌolovoxo. La itema ane muxolu no luu ne uxolu noxiꞌa.  
\v 16 \x + \xo 7:16 \xt Ais 49:10\x*La aneꞌi isolixaꞌa mo isoliu lexa la uasi. Mo aso umomomo sou uveꞌa mo ialuxaꞌa la uasi.  
\v 17 \x + \xo 7:17 \xt Lex 23:2; Ais 25:8; Pal 21:4\x*Xo Sipsip ꞌOlu e muxolu no nixi no luu ne anu usaxilaꞌa loxo itema sou usaxilaꞌa ta sipsip mo anu uoleneꞌi ilai no lexa sou mauli iou. Xe Lataua uiasou ieꞌi lexaxu.”   
\c 8  
\s1 Sakisaki Muxatele Tameisou  
\p
\v 1 Xe no mine Sipsip ꞌOlu mululusou sakisaki muxatele tameisou, la teitexi no opo loxotolo ne tani mukii maxuvee sevele.   
\p
\v 2 La eni emaisiꞌa ta angelo muxatele tamei mitulu no talaxu Lataua. Aneꞌi mitulu mukalu, la anu mulosiꞌa xoolau muxatele tamei.   
\p
\v 3 \x + \xo 8:3 \xt Mul 30:1-3; Pal 5:8\x*Xe eni emalei, la angelo vile la munoꞌu mii e tumaꞌu lailaixe vexasou miꞌoxo no anu xoulu muneꞌe mutulu no anu valovalo. La Lataua mulosou mii tumaꞌu lailaixe tavuꞌalo manina sou uꞌelaxu ulai noxou ilou lakilaka noxiꞌa ta mitema noxou no anu valovalo e miꞌoxonu no anu xoulu mutulu no talaxu itema muxolu no luu.  
\v 4 No avolu angelo ne, la mii tumaꞌu lailaixe iauxuxu ilou lakilaka noxiꞌa ta mitema noxou Lataua mutelai noxou Lataua.  
\v 5 \x + \xo 8:5 \xt Mul 19:16-19; Liv 16:12; Pal 11:19; 16:18\x*La angelo munoꞌu navu no valovalo ne sou mutaa muꞌuna no anu mii tumaꞌu lailaixe vexasou la muꞌanaꞌana. Mukalu, la anu munoꞌu sou muleanu muluꞌe no lia ꞌo. La leleꞌe ulamilami mo luluxu uvalivalixumu xe laliua ukunikuni.   
\s1 Xoolau  
\p
\v 6 Angelo muꞌoxonu mimii ne mukalu, la ta angelo muxatele tamei e mite-telisou xoolau muxatele tamei ne ꞌalai sou itaunu.  
\v 7 \x + \xo 8:7 \xt Mul 9:23-26; Ese 38:22; Ioe 2:30\x*Angelo vile noxiꞌa mutaunu xoolau noxou, la aesi lavolavonu mo navu mupita ilou sialu muxali mulapalapau muluꞌe no lia ꞌo. La sou ta mitema mo ovuovu no anu xalee tatalusou lia ꞌo mo iaꞌeiaꞌe latala mukalusi muꞌela.   
\p
\v 8 Xe angelo tameisou noxiꞌa mutaunu xoolau noxou, la mii vile loxo laxaꞌilu toxoxaꞌa uꞌeꞌela ia meleanu muluꞌelai no luaki. La xalee tatalusou luaki sialu mukalusi.  
\v 9 Mo ta mimii no luaki xalee tatalusiꞌa misoisoli xe xalee tatalusiꞌa lasipi tavuꞌalo ne mumamumamulo mukalu.   
\p
\v 10 Xe angelo tatalusou noxiꞌa mutaunu xoolau noxou, la oto tatila vile uꞌeꞌela loxo telu molu teitexi no loxotolo mulapau muluꞌe no xalee tatalusou lexalexa mo pupupulu.  
\v 11 \x + \xo 8:11 \xt Iel 9:15\x*Oto ne ulasou lexe sixula. La sou xalee tatalusou lexalexa ne muxali sixula mukalusi xe ta mitema tavuꞌalo miiexu la misoisoli.   
\p
\v 12 \x + \xo 8:12 \xt Ese 32:7; Pal 6:12-13\x*Xe angelo tamiꞌasou noxiꞌa mutaunu xoolau noxou, la xalee tatalusou aso ilou soꞌio mo ta oto ne mivau la muxali isivoxo. La sou xalee tatalusou aso ilou ꞌolovoxo ne lamanasou uasi.   
\p
\v 13 \x + \xo 8:13 \xt Pal 9:12; 11:14\x*Xe eni emalei, la emaisou suluvi nenu vile uvavava teitexi nonixi manina mo elomusou uꞌavaꞌava tatila aloxo ꞌo, “Tuꞌutuꞌumaxu uxali manina noxinge ngingi ane ngaxolu no lia ne. Xo ꞌalaꞌalaisou ta angelo tatalu e itaunu xoolau noxiꞌa uao itaunu.”   
\c 9  
\p
\v 1 \x + \xo 9:1 \xt Pal 20:1\x*Xe angelo taꞌuvesou noxiꞌa mutaunu xoolau noxou, la eni emaisou oto vile molu teitexi no loxotolo mulapau muluꞌe no lia. Anu muluꞌe, la milosou siliko sou ukisiinu aitenga sou taxa e kaluxu uasi.  
\v 2 \x + \xo 9:2 \xt Tav 19:28; Mul 10:12-15; Ioe 2:2, 10\x*Ia no mine anu mukisiinu, la navu umuxu muuatu no anu loxo itauxu saavu toxoxaꞌa. La umuxu isivoxoxu mutaasou aso ilou loxotolo.  
\v 3 La ta musiaꞌe ta taula mixali no anu navu umuxu ne, la xavineꞌi loxo ta tanga sou miluꞌe no lia ꞌo.  
\v 4 \x + \xo 9:4 \xt Pal 7:3\x*La mivikalaneꞌi lexe umomomo sou iꞌoxo masuanu iaꞌeiaꞌe ilou sesesee mo ovuovu no lia ꞌo uasi, ia imaisiꞌa ta mitema ane sosovo noxou Lataua uxolu no ꞌalaieꞌi uasi la ikasiꞌasi.  
\v 5 Aneꞌi milosiꞌa xavi sou iveꞌaveꞌa isoisoli uasi, ia ilosiꞌa navunavusi soꞌio taꞌuve. Xe navunavu ane aneꞌi ixamulinu ne, anu loxo tanga uvenge la taxamulinu.  
\v 6 \x + \xo 9:6 \xt Iop 3:21; Iel 8:3\x*No nano no voxo ane ne, la ta mitema ikakamuli solixaꞌa, ia isoli a loxovaa? Mo aneꞌi imasaxa lexe isoli, ia soli uꞌumeꞌa ulai.   
\p
\v 7 \x + \xo 9:7 \xt Ioe 2:4\x*Ia ta taula ne, ieꞌi loxo ta oosi sou ꞌotoꞌoto. Mo no kisikisiꞌa, la mitaataa loxo kisivalu miꞌoxo no anu xoulu, xe ieꞌi loxo ta mitema.  
\v 8 \x + \xo 9:8 \xt Ioe 1:6\x*Laxusiꞌa ne loxo ta sema laxusiꞌa xe anaxaꞌa loxo laeoni anaxu.  
\v 9 \x + \xo 9:9 \xt Ioe 2:5\x*Xe no anu tokolomoiꞌa, la mii sou siovesou lutuneꞌi miꞌoxonu no anu aeni xe vivisiꞌa luluxu loxo ta oosi mo karisi tavuꞌalo ipasipaa iiave sou ilai iꞌoto.  
\v 10 Xe aneꞌi xelaꞌa loxo tanga e utuvanenge no anu, la xavi no anu xelaꞌa ne umomomo sou ulosiꞌa ta mitema navunavu uxolu soꞌio taꞌuve.  
\v 11 Xe aneꞌi tilasiꞌa kalumo, tila ne anu angelo sou taxa e kaluxu uasi. Ualasou no anu Evalaio la ilemolu lexe Abadoni xe no anu vaikala noxiꞌa ta Xiliki la ilemolu lexe Apolioni.\f + \fr 9:11 \ft Ualasou laaxu ne lexe itema sou umamulo mimii.\f*   
\p
\v 12 La tuꞌutuꞌumaxu vile a mukalu ne. Ia ta tamei la a uxali uao.   
\p
\v 13 Xe angelo muxatele vilesou noxiꞌa mitaunu xoolau noxou, la eni elomusou ꞌava vile muxali no anu sikilinu tamiꞌa utulu no anu valovalo ia miꞌoxonu no anu xoulu no talaxu Lataua.  
\v 14 Anu muvikalanu angelo muxatele vilesou noxiꞌa e utetelisou xoolau ne aloxo ꞌo, “Nalulusiꞌa ta angelo tamiꞌa e misakisakineꞌi mixolu no lexa tila ne ualasou lexe no anu si Iuplatesi.”  
\v 15 La sou ta angelo tamiꞌa e mixolu miloo sou aso ngiou ilou voxo mo soꞌio xe tauu ie ane Lataua musosovosou sou ilulusiꞌa. Lataua ululusiꞌa sou ilai iveꞌaveꞌa xalee tatalusiꞌa ta mitema isoisoli.  
\v 16 La eni elomusou itiitisiꞌa ta mitema sou ꞌotoꞌoto mixolu no lataneꞌi ta oosi mumomomo loxo 200 milioni.   
\p
\v 17 Xe no malemalei noxilo loxo aipiepiena, la eni emaisiꞌa ta mitema sou ꞌotoꞌoto mixolu no lataneꞌi ta oosi aloxo ꞌo. Aneꞌi tokolomoiꞌa ne, mii sou siovesou lutuneꞌi vile vilesi muxolu no lutuneꞌi. Ia mii sou siovesou lutuneꞌi ne, kaukavuxu lauolauoinu manina loxo navu mo ꞌelaꞌela manina xe kuakuala loxo taupea. Mo ta oosi ne, kisiꞌa loxo ta laeoni ia navu ilou umuxu mo taupea ialuxu ulaa no anaanaxaꞌa.  
\v 18 La aneꞌi miveꞌaveꞌa xalee tatalusiꞌa ta mitema no anu mii masumasua tatalu ane navu ilou umuxu mo taupea ialuxu ulaa no anaanaxaꞌa.  
\v 19 Ta oosi ne, xavineꞌi muxolu no anaxaꞌa ilou xelaꞌa mo xelaꞌa iaulu xe kisou a uxolu no anu. La aneꞌi iꞌoxonu masuaneꞌi ta mitema no anu.   
\p
\v 20 \x + \xo 9:20 \xt Lex 115:4-7; 135:15-18; Tan 5:23; Pal 16:9, 11\x*Ia ta mitema ane isoisoli no anu mii masumasua tatalu uasi ne, ixiunu tumaliꞌa no anu mii maꞌia ane aneꞌi miꞌoxonu no avoꞌa uasi. Aneꞌi ikalu no anu ꞌilixo sou ilolotu noxiꞌa ta ulee masumasua sou kalakalavoi iloꞌa ta mimii ane mipuineꞌi no anu xoulu ilou siliva mo barasi xe lavoꞌo ilou ovu uasi. Aneꞌi ta mimii ne, ilavusou imamalei mo ilolomu xe imuamuaꞌi uasi.  
\v 21 Mo aneꞌi ixiunu tumaliꞌa no anu ꞌilixo sou iveꞌa ta mitema isoisoli mo ꞌilixo sou saasaa iouiou mo ꞌiliꞌilixo masumasua iouiou sou voteꞌi xe ꞌilixo sou pakali uasi.   
\c 10  
\s1 Angelo Xe Kaukavu Vile Kituꞌa Mipipinu  
\p
\v 1 Mo eni emaisou angelo vile la xaviinu musuku molu teitexi no opo loxotolo muluꞌe. Anu muluꞌe la tamuxala mutaasou vasimolu mukalusi mo muloxu leleꞌe muxolu no kisou mo iou loxo aso xe tavaꞌu loxo atola navu uꞌaniꞌani no anu.  
\v 2 Mo anu mutetelisou kaukavu vile kituꞌa mipipinu muxavutala muai no avolu. Anu mutulusou tavaꞌu tema no luaki xe tavaꞌu ae mutulusou no lia.  
\v 3 Anu mutulu mukalu, la muunga toxoxaꞌa loxo laeoni. No mine anu muunga, la leleꞌe muxatele tamei mukululu sou muvikala.  
\v 4 \x + \xo 10:4 \xt Tan 12:4, 9\x*Xe no mine leleꞌe muxatele tamei muvikala, la eni sou lexe asokoꞌu akaukavunu mii maꞌia ane eni elomusou ne. La ua, eni elomusou ꞌava vile molu teitexi no opo loxotolo muluꞌe noxilo aloxo ꞌo, “Napalaꞌalixu mo nakaukavunu vaikala ane leleꞌe muxatele tamei mulemolu uasi.”   
\p
\v 5 \x + \xo 10:5 \xt Lap 32:40; Tan 12:7\x*La angelo e eni emaisou tavaꞌu vile mutulu no luaki xe vile no lia mutolosou avolu tema mulai teitexi no opo loxotolo,  
\v 6 sou musosovo lexe manina teitexi noxou anu ane umauli utotomu mo kaluxu uasi mo mukoinu loxotolo ilou lia mo luaki iloꞌa ta mimii mixolu no anu. Xe mukalu, la muvikala lexe, “Lataua uvoovoxo la uasi!  
\v 7 \x + \xo 10:7 \xt Amo 3:7\x*Ia no mine angelo muxatele tameisou noxiꞌa utaunu xoolau noxou, la mii maꞌia noxou Lataua e mutalume ne, uxali lamana ukalusi aloxo anu muvikalaneꞌi ta mitema sou xaixai vitanisi noxou ane ta mitema sou palomatana.”   
\p
\v 8 Anu muvikala aloxo ne mukalu, la ꞌava e eni elomusou tei molu teitexi no opo loxotolo muluꞌe noxilo la muvikalaleli la aloxo ꞌo “Nalai mo nanoꞌu kaukavu mipipinu ane muxavulala uai no avolu angelo e tavaꞌu vile mutulu no luaki xe vile no lia ꞌole.”   
\p
\v 9 \x + \xo 10:9 \xt Ese 2:8–3:3\x*La sou eni elai noxou angelo ne sou lexe ulosilo kaukavu kituꞌa ane mipipinu. La anu muvikalaleli aloxo ꞌo “Nanoꞌu mo naꞌou. Naꞌou, la tuꞌaxu no anaxene loxo unuxu ia sixula no oponeni.”  
\v 10 La eni elai enoꞌu kaukavu kituꞌa mipipinu noxou angelo avolu la eꞌou. La tuꞌaxu no anaxo loxo unuxu ia sixula no opoleli.  
\v 11 La anu muvikalaleli lexe, “Nini nalai mo napalomataneꞌi no anu mii maꞌia uxali iliꞌi noxiꞌa ta mitema tavuꞌalo ane mixolu no tuatuala mo, vaivaikalaiꞌa iouiou xe ta tatanaanu tuala.”   
\c 11  
\s1 Ta Mitema Tamei Mipalomatananu  
\p
\v 1 \x + \xo 11:1 \xt Ese 40:3; Sek 2:1-2\x*Angelo muvikalaleli aloxo ne mukalu, la milosilo lukae mautunu vile loxo vilaxo sou itilovosou mimii no anu. La mivikalaleli lexe, “Nalai mo natilovosou tani tila noxou Lataua mo valovalosou xe naitisiꞌa ta mitema ane ilotu no anu.  
\v 2 \x + \xo 11:2 \xt Luk 21:24; Pal 13:5\x*Ia ieni uvaxau mo natilovosou taiinu ane muxolu no ale no tani tila noxou Lataua uasi, xo taiinu ane ne milosiꞌa ta asila. La aneꞌi imaapitasou tuala tila noxou Lataua soꞌio itemaxu tamei mo tamei.  
\v 3 Ia eni apelemasaxaneꞌi ta mitema tamei sou ipalomatana no anu vaikala noxilo voxo 1260. Aneꞌi ilou itokolomoxu tokolomosou tama.”  
\v 4 \x + \xo 11:4 \xt Sek 4:3, 11-14\x*Aneꞌi ilou ane ovu olivu tamei xe mii sou itulusou telu no anu tamei e ututulu no talaxu. Lataua anu tila sou usaxilaꞌa ta mitema no lia ꞌo mukalusi.  
\v 5 \x + \xo 11:5 \xt 2Sa 22:9; Lex 97:3\x*Ia lexe evile utovosou uꞌoxo masuaneꞌi, la navu ulaa no anaxaꞌa sou uꞌelaxaꞌa ta uluaiꞌa. La sou ꞌei ane umasaxa uꞌoxo masuaneꞌi, la anu usolisi.  
\v 6 \x + \xo 11:6 \xt Mul 7:17-20; 1Sa 4:8; 1Ta 17:1\x*La sou aneꞌi ta mitema tamei ne Lataua ulosiꞌa xavi sou itatusou loxotolo la laꞌiua usili uasi no mine aneꞌi ilou ipalomatana no anu vaikala noxou. Mo ulosiꞌa xavi sou ixiunu lexa uxali sialu xe ipuapuasiꞌa ta mitema no lia ꞌo ukalusi no anu tuꞌutuꞌumaxu iouiou alaxu tavuꞌalo no ꞌa masaxa noxiꞌa.   
\p
\v 7 \x + \xo 11:7 \xt Tan 7:21; Pal 12:17; 13:7; 17:8\x*Xe no mine aneꞌi ilou ipalomatana no anu vaikala noxou Lataua ukalu, la mii vova e uxolu no taxa ane kaluxu uasi ne ulaa uuatusou iloꞌa iꞌoto. Iloꞌa iꞌoto la anu xaviinu musuku la uveꞌa ilou isoisoli.  
\v 8 \x + \xo 11:8 \xt Luk 13:34\x*La vasimeꞌa ilou usuꞌanu uai no voteꞌi no tuala tila itovolaꞌinu lexe Sodomu ilee Aixiputo. No anu tuala tila ane ne, la aneꞌi mililixu Tila noxiꞌa ilou no ovu valautu ane.  
\v 9 La ta mitema ane vasimeꞌa kaukavunu iouiou mo mata iouiou mo vaivaikalaiꞌa iouiou no xalexalee tuatuala mukalusi ineꞌe imamaisou vasimeꞌasi voxo tatalu mo paꞌusou, ia imasaxa sou inoꞌu mo iꞌasixu uasi.  
\v 10 Mo aneꞌi ane ixoxolu no lia ꞌo iꞌosasiꞌa la isovaiꞌa mimii ngatongatoꞌo. Xo ta mitema sou palomatana tamei milosiꞌa tuꞌutuꞌumaxu ne misoisoli.   
\p
\v 11 \x + \xo 11:11 \xt Ese 37:5, 10\x*Ia voxo tatalu xe paꞌusou mukalu, la tauuxu Lataua sou mauli muꞌuna noxiꞌa ilou, la ilou mitulu. Aneꞌi mimaisiꞌa ilou aloxo ne, la mimamaꞌu manina misevile.  
\v 12 \x + \xo 11:12 \xt 2Ta 2:11\x*Aneꞌi ilou mitulu mukalu, la milomusou ꞌava toxoxaꞌa molu teitexi no opo loxotolo muluꞌe noxiꞌa ilou aloxo ꞌo, “Ngongou ngatelo.” La aneꞌi ilou mitelai no anu tamuxala, ia ta uluaiꞌa mitulu mimaisiꞌa ilousi.   
\p
\v 13 \x + \xo 11:13 \xt Pal 6:12; 16:18\x*No mine aneꞌi ilou mitelaisi ka laliua toxoxaꞌa manina mukunikuni, la xalee mavulovexasou tuala tila ne mumamulo. Xe ta mitema itiitisiꞌa muxali loxo 7,000 misoisoli no anu. Ia aneꞌi ane isoisoli uasi ne mimamaꞌu la miꞌitinu Lataua uxolu no opo loxotolo ualasou.   
\p
\v 14 \x + \xo 11:14 \xt Pal 9:12\x*La tuꞌutuꞌumaxu tameisou a mukalu ne. Ia tatalusou a ꞌalaꞌalaisi sou uxali.   
\s1 Xoolau Muxatele Tameisou  
\p
\v 15 \x + \xo 11:15 \xt Mul 15:18; Lex 10:16; Tan 2:44; 7:14\x*Xe angelo muxatele tameisou noxiꞌa mutaunu xoolau noxou, la ꞌava tavuꞌalo toxotoxoxaꞌa molu teitexi no opo loxotolo mivikala aloxo ꞌo,  
\q1 “Ta mitema no tuatuala mukalusi no lia ꞌo ne,  
\q2 mixali Tilasinge ta naꞌu mo Kalisito noxou.  
\q2 La Anu usaxilaꞌa no voxovoxo utotomu mo kaluxu uasi.”   
\p
\v 16 La ta tatila itemaxu vile mo tamiꞌa e mixolu no luusiꞌa no talaxu Lataua ne, mitangatulu muluꞌelai no lia sou milotu noxou,  
\v 17 ia mivikala aloxo ꞌo,  
\q1 “Nini Tila mo Lataua xavineni musuku misevile nemauli tei  
\q2 mo nemauli vaimomo ꞌo.  
\q2 Nexi talemolu laixe ulai noxine, xo nini xavineni musuku  
\q2 la sou nini nasaxilaꞌa ta mitema no lia ꞌo.   
\q1
\v 18 \x + \xo 11:18 \xt Lex 110:5; 115:13; Rom 2:5; Pal 20:11-13\x*La aneꞌi ta mitema no lia ꞌo laꞌiaxaꞌa.  
\q2 Ia voxosou laꞌia noxine a muxali.  
\q2 La nini natulusiꞌa ta mitema misoisoli no anu vaivaikala  
\q2 sou nalosiꞌa lakolisou xaixai noxiꞌa aneꞌi ane ta mitema sou xaixai vitanisi  
\q2 ane mipalomatana no anu vaikala noxine iloꞌa ta mitema noxine  
\q2 mo aneꞌi ane inoꞌu uala tila uasi xe aneꞌi ane minoꞌu uala tila la mitoxoneni.  
\q2 Mo nakalusiꞌa aneꞌi ane miꞌoxo masuaneꞌi ta mitema.”   
\p
\v 19 \x + \xo 11:19 \xt Eva 9:4; Pal 8:5; 15:5; 16:21\x*Aneꞌi mivikala aloxo ne mukalu, la tani tila noxou Lataua teitexi no opo loxotolo mukisi. La eni emaisou lavokisi sou vaikala noxou Lataua ane musakii no anu no nano no taasou lalotu noxou Lataua. Mo emaisou leleꞌe ulamilami mo upaupau la luluxu uvalivalixumu. Mo laliua ukunikuni xe aesi lavolavoꞌo toxotoxoxaꞌa ulapalapau.   
\c 12  
\s1 Sema Ilou Iaulu Toxoxaꞌa  
\p
\v 1 Mo sosovo vile toxoxaꞌa muxali no opo loxotolo ne aloxo ꞌo. Sema vile mitokolomo no anu aso xe soꞌio no laaxu tavaꞌe mo kisivalu xe ta oto mavulovexa mo mulelia tamei mixolu no anu kisie.  
\v 2 \x + \xo 12:2 \xt Mai 4:10\x*Ane opoone mo voxo sou lavuloꞌo muneꞌe ꞌalai, la miungaunga xo mixamuli navunavu toxoxaꞌa.  
\v 3 \x + \xo 12:3 \xt Tan 7:7\x*Mo sosovo vile la muxali no opo loxotolo la aloxo ꞌo. Iaulu vile toxoxaꞌa ia lauolauoinu mo kisou muxatele tamei mo sikilisou mavulovexa xe kisivaluxu muxatele tamei muxolu no kisou. \fig iaulu toxoxaꞌa|alt="Birney Boydꞌs 7-headed dragon" src="Dragon.tif" size="col" loc="Rev 12:3" ref="Revelesen 12:3" \fig*  
\v 4 \x + \xo 12:4 \xt Tan 8:10\x*La anu muvali xelaꞌu, la xalee tatalusiꞌa ta oto no loxotolo milapalapau miluꞌe no lia. Ia anu muavuti la mulai mutulu no talaxe sema ꞌalaꞌalai sou ivoꞌo sou lexe ane ivoꞌonu keakea ne la anu uꞌou.  
\v 5 \x + \xo 12:5 \xt Lex 2:9; Ais 7:14; 66:7; Pal 19:15\x*Ia sema ne mivoꞌo, la ꞌilie mulu. Anu sou usaxilaꞌa ta mitema no lia ukalusi no anu vilaxoxu miꞌoxonu no anu aeni. La no mine ane mivoꞌonusi ka mitokinu mulai noxou Lataua sou muxolu no luusou.  
\v 6 Ia sema ne, miꞌume milai mixolu no xalee lia vitanisi. Xalee lia ane ne, Lataua mulalaxiinu sou ane ilai ixolu no anu mo anu usaxilaꞌe voxo 1,260.   
\p
\v 7 \x + \xo 12:7 \xt Iud 1:9\x*Ia teitexi no opo loxotolo, la ꞌotoꞌoto toxoxaꞌa muxali no taiineꞌi Mikaeli iloꞌa ta angelo noxou xe iaulu toxoxaꞌa iloꞌa ta angelo noxou.  
\v 8 Ia anu xaviinu uasi, la miꞌumesou tualasiꞌa teitexi no opo loxotolo.  
\v 9 \x + \xo 12:9 \xt Tav 3:1, 14; Luk 10:18; 22:31; Pal 20:2\x*La iaulu toxoxaꞌa iloꞌa ta angelo noxou ne, mileaneꞌi miluꞌe no lia ꞌo. La sou anu uxovulaulaulixaꞌa ta mitema latala mukalusi no lia ꞌo. Anu sinana veveeni muxolu tatei ne ilemolu lexe ulee masua xe Satani.   
\p
\v 10 \x + \xo 12:10 \xt Iop 1:9-11; Sek 3:1\x*La eni elomusou ꞌava toxoxaꞌa molu teitexi no opo loxotolo aloxo ꞌo,  
\q1 “vaimomo ꞌo, voxo sou pamauli mo xavi mo saxisaxilaꞌu noxou Lataua noxinge.  
\q2 Xe xavi noxou Kalisito noxou a muxali.  
\q2 Xo itema sou ukaitoloneꞌi ta vivinge noxou Iesu no iou Lataua  
\q2 no aso xe no ꞌolovoxo ne, mileanu muluꞌe.   
\q1
\v 11 Ia aneꞌi mitaloxolixu no anu sialuxu Sipsip ꞌOlu  
\q2 mo no anu vaikala noxou Lataua ane aneꞌi miaꞌaloxu.  
\q2 Mo aneꞌi ixavutala no anu maulixaꞌa malaxo uasi  
\q2 mo iꞌume uasi ulai utalo no mine soli uxalisiꞌa.   
\q1
\v 12 \x + \xo 12:12 \xt Ais 44:23; 49:13\x*Aloxo ne, la sou ngingi ane ngexolu no opo loxotolo ne ngaꞌosa!  
\q2 Ia tuꞌumaxu ulai noxiꞌa aneꞌi ane mixolu no lia mo no luaki,  
\q2 xo ulee masua muluꞌelai noxinge.  
\q2 Anu maasi, la laꞌiaxu misevile xo anu mulavusou lexe voxo noxou asou ukalu.”   
\p
\v 13 La sou no mine anu mulavusou lexe aneꞌi mileanu muluꞌe no lia, la anu mumulimuline sema e mivoꞌonu keakea mulu sou lexe uvee.  
\v 14 \x + \xo 12:14 \xt Tan 7:25; 12:7\x*Ia sema ne, milosie suluvi nenu toxoxaꞌa vivisou tamei sou lexe ane ivava no anu la ilai ixolu no xalee lia vitanisi ane Lataua mulalaxiinu. Ane ilai ixolu ne no Anu usaxilae, umomomo loxo tauu ie tatalu mo soꞌio muxatele vilesi, mo sou ane ixolu vaꞌaxu noxou sinana veveeni ne.  
\v 15 Ioxe anu iaulu toxoxaꞌa ne muavuti la muꞌexinu lexa mulaa no anaxu loxo lexa muꞌani sou lexe utavulene sema ne ulailixe.  
\v 16 Ia lialia musuꞌuline sema ne la muꞌaꞌa sou mumalukusou lexa e iaulu toxoxaꞌa muꞌexinu ne muꞌuna no lia tanu mukalusi.  
\v 17-18 \x + \xo 12:17-18 \xt Pal 11:7\x*Anu mumaisou aloxo ne la laꞌiaxuie sema ne misevile la sou anu muavuti la mulutu sou mulai uꞌoto noxie sema ne ta ꞌiliꞌilie iloꞌa ta minemine. Aneꞌi ane milomuxu mo mimulimulinu lapuloto noxou Lataua mo mimuxaxu taneꞌi no anu vaikala manina noxou Iesu. La anu iaulu toxoxaꞌa mulai mutulu no tasiꞌi.   
\c 13  
\s1 Ta Mimii ta Vova Tamei  
\p
\v 1 \x + \xo 13:1 \xt Pal 12:3; 17:3, 7-12\x*Ioxe, eni emaisou mimii ne mukalu xe emalei, la emaisou mi vova vile muxali muatu no luaki. Anu kisou muxatele ta tamei mo sikilinu mavulovexa xe kisivalu mavulovexa muxolu teitexi no anu sikiliu ꞌole. Mo kaukavu muxolu no kisou vilevilesi. Kaukavu ne anu vaivaikala masumasua sou Latauasi.  
\v 2 \x + \xo 13:2 \xt Tan 7:4-6\x*Mo eni emaisou mi vova ne, iou loxo pusi vova toxoxaꞌa (ta mii kea ilemolu lexe leopard) mo tavaꞌu loxo mii vile ilemolu \fig bea|alt="Bear" src="LB00048B.TIF" size="col" loc="Rev 13:2" copy="Louise Bass © The British & Foreign Bible Society, 1994." ref="Revelesen 13:2" \fig* lexe bea xe anaxu loxo laeoni. Anu muatu la iaulu toxoxaꞌa ne mulosou xavi mo mulosou puloulou noxou xe xavi tatila sou anu uxaxai loxo anu. \fig leopard|alt="leopard" src="BK00049B.TIF" size="col" loc="Rev 13:2" copy="Horace Knowles revised by Louise Bass © The British & Foreign Bible Society, 1994." ref="Revelesen 13:2" \fig*  
\v 3 \x + \xo 13:3 \xt Pal 17:8\x*No anu kisou muxatele tamei ꞌole la vile iou loxo mivau musoli mo xavaxavanu xe velavelamolusi ia muvesa. Xe ta mitema tavuꞌalo mimaisou aloxo ne la mikuluke, la mimulinu mukalusi.  
\v 4 Mo aneꞌi tavuꞌalo milotu noxou iaulu toxoxaꞌa ne xo anu mulosou mii vova ne xavi tatila, la ta mitema milotu noxou kalumo, la ivivikala lexe, “ꞌEnaꞌei anu aloxo mii vova ne? Mo ꞌenaꞌei umomomo sou uꞌoto noxou?”   
\p
\v 5 \x + \xo 13:5 \xt Tan 7:8, 25; 11:36; Pal 11:2\x*La anu mii vova ne mipelemasaxanu sou utilatila anaxu mo uvivikala sou Lataua masumasua. Anu munoꞌu xavi ne sou uxaxai umomomo loxo soꞌio itemaxu ta tamei mo ta tamei (42).  
\v 6 Aloxo ne la sou anu utilatila anaxu mo uvivikala sou Lataua masumasua mo ualasou mo taasou e anu uxoxolu no anu xe aneꞌi mixolu teitexi no opo loxotolo kalumo.  
\v 7 \x + \xo 13:7 \xt Pal 11:7\x*Mo anu mipelemasaxanu kalumo sou uꞌoto noxiꞌa ta mitema noxou Lataua la uaꞌulixaꞌa. Mo anu munoꞌu xavi sou usaxilaꞌa ta mitema vasimeꞌa kaukavuxunu iouiou mo matamata iouiou mo vaikalaiꞌa iouiou xe xalexalee tuatuala no lia ꞌo ukalusi.  
\v 8 \x + \xo 13:8 \xt Lex 69:28; Pal 17:8; 20:12, 15; 21:27\x*La ta mitema tavuꞌalo e mixolu mimauli no lia ꞌo ukalusi e tei no mine Lataua musokou mukoinu mimii la, ukaukavunu ualasiꞌa uai uasi no nano no anu lavuku sou mauli noxou Sipsip ꞌOlu e mivau ne aneꞌi ilotu noxou mii vova ne.  
\v 9 ꞌEi ane sangalou la ulomusou vaikala ane ꞌo laixe.  
\v 10 \x + \xo 13:10 \xt Iel 15:2; 43:11; Pal 14:12\x*Lexe ꞌei ane sou imulaxu no taasou navunavu, la anu umulaxu ulaisi, mo ꞌei ane sou ivau usoli no anu laviso la anu ivau usoli no anu laviso. La sou lexe mimii ane ꞌo uxali la ta mitema noxou Lataua itulu pekiaꞌu no anu muxamuxaxu taneꞌi.   
\p
\v 11 Ioxe eni emaisou mimii ane ne mukalu la emaisou mii vova vile la muxali mutelo no lia. Mii vova ne sikilinu ta tamei mutulu no kisou loxo Sipsip ꞌOlu mo uvivikala loxo iaulu toxoxaꞌa.  
\v 12 Anu mii vova ne muxali la munoꞌu tanixu mii vova tei sou muxaxai no anu xavi noxou. La muꞌoxonu lia mo ta mimii mixolu no lia ꞌo milotu noxou mii vova e iou loxo mivau musoli mo xavaxavanu xe velavelamolusi ia muvesa ne.  
\v 13 \x + \xo 13:13 \xt 1Ta 18:24-39; Mat 24:24; Pal 19:20\x*La muꞌoxonu sosovo seꞌi toxotoxoxaꞌa no ieꞌi ta mitema. Sosovo vile toxoxaꞌa muꞌoxonu no ieꞌi ta mitema ane muꞌoxonu navu molu teitexi no loxotolo muluꞌe no lia ꞌo.  
\v 14 Xo no anu xavi anu munoꞌu ne, la muꞌoxonu sosovo toxotoxoxaꞌa no anu sou munoꞌu tanixu mii vova ane tei. La muꞌoxo loloxaꞌa ta mitema e mixoxolu no lia ꞌo. Anu muavuti la muvikalaneꞌi lexe ipuinu mii vile iouvilesisi aloxo mii vova tei ne mo itulusou. Anu mii vova ne mivau no anu laviso la xavaxavanu xe velavelamolu mo muvesa ia usoli uasi.  
\v 15 Mo anu milosou xavi sou mutaunu tauuxu mulai no anu mii e mipuinu iou loxo mii vova tei mo sou uꞌoxonu uvivikala, mo sou lexe aneꞌi ane imasaxa sou ilotu no anu mii ne uasi, la iveꞌaveꞌa isoisoli.  
\v 16 \x + \xo 13:16 \xt Pal 14:9-11; 16:2; 20:4\x*Mo anu muavuti la muvikalaneꞌi ta mitema tavuꞌalo sou imulaxu sosovo vile no avoꞌa tema xe no ꞌalaieꞌi. Aneꞌi ta mitema ane ualasiꞌa uasi mo aneꞌi ane ualasiꞌa mo aneꞌi aneiꞌa lavuluti xe aneꞌi aneiꞌa lavuluti uasi mo ta mitema ixoxolusi ia mivile usakisakineꞌi uasi xe ta mitema sou ipalupalusiꞌa tavuꞌalo ne inoꞌu ukalusi.  
\v 17 Mo sou anu ane unoꞌu sosovo sou ualasou mii vova ne xe itiiti noxou uasi la umomomo sou ulotoloto xe usovanu mimii uasi.  
\v 18 La sou lexe ꞌei ane mulavu manina la utovo uxaxaisou itiiti ne anu musosovo sou itema itiiti noxou. Anu itiiti noxou itema ne aloxo ꞌo itemaxu mavulovexa tatalu mo itemaxu tatalu xe muxatele vile (666).   
\c 14  
\s1 Ta Mitema Noxou Sipsip ꞌOlu Ilexenu Lexe Alavua  
\p
\v 1 Ioxe eni emaisou mimii ne mukalu xe emalei la, emaisou Sipsip ꞌOlu mutulu teitexi no alaele ne Sioni. Anu iloꞌa ta mitema e mikaukavunu Sipsip ꞌOlu xe Momu Lataua ualasiꞌa no ꞌalaieꞌi. Aneꞌi ta mitema ne itiitisiꞌa mumomomo loxo 144,000.  
\v 2 \x + \xo 14:2 \xt Pal 1:15; 19:6\x*Xe elomusou mii vile luluxu teitexi no loxotolo luluxu loxo lexa utaloxo no kisou matala mo loxo leleꞌe upau la luluxu. Mo eni elomusou mii ne luluxu loxo tamaxu susapu e ta mitema mipita xe mivau la mutatama.  
\v 3 \x + \xo 14:3 \xt Ais 42:10; Pal 5:9; 7:4\x*La emaisiꞌa ta mitema itiitisiꞌa loxo 144,000 mitulu talaxaꞌa mulai no anu puloulou noxou Lataua mo noxiꞌa ta mimii tamiꞌa e mimauli xe noxiꞌa ta tatila. Aneꞌi mitulu no talaxaꞌa ne la ilelexenu lexe vile alavua. Lexe ne aneꞌi ta mitema e Lataua mupamaulineꞌi e itiitisiꞌa loxo 144,000 aneꞌisisi milavusou.  
\v 4 Aneꞌi ta mitema ne misaxilaꞌu maulixaꞌa la malemalenga mo iꞌoxonu masuaneꞌi no anu ꞌilixo sou ilai noxiꞌa ta sema uasi, mo ilavu sou ꞌilixo ane ne uasisi manina. Mo aneꞌi imulimulinu Sipsip ꞌOlu utotomu mo lexe anu ulai a loxovaa la aneꞌi imulinusi. Xo aneꞌi Lataua mupamaulineꞌi no taineꞌi ta mitema mo loxo xai iou vile temanu lingamo tei la anu Lataua mo Sipsip ꞌOlu naꞌa.  
\v 5 Mo vaikala kalavoi vile ulaa no anaxaꞌa uasi, xo ixalisou susu vile no anu maulixaꞌa uasisi manina.   
\s1 Vaivaikala Noxiꞌa ta Angelo Tatalu  
\p
\v 6 Mo emalei la, la emaisou angelo vile muvava teitexi no nixi manina. Anu muneꞌe sou uaꞌaloxu aꞌalo laixe ane kaluxu uasi noxiꞌa aneꞌi ane mixolu no lia ꞌo no xalexalee tuatuala no lia ꞌo ukalusi mo matamata iouiou mo vaikalaiꞌa iouiou xe ta mitema vasimeꞌa kaukavuxu iouiou.  
\v 7 Anu muꞌava tatila aloxo ꞌo, “Ngaꞌume noxou Lataua mo ngaitinu ualasou xo voxo noxou Lataua a muxali sou utulusiꞌa ta mitema no anu vaivaikala. La sou ngalotu noxou Lataua e Anu mukoinu loxotolo ilou lia mo luaki xe pupupulu sou lexa.”   
\p
\v 8 \x + \xo 14:8 \xt Ais 21:9; Iel 51:7-8; Pal 17:2; 18:2-3\x*Ioxe angelo ta tameisou muvava mumulinu ane tei la muꞌava kalumo lexe, “Tuala tatila ne Vaviloni a mumamumamulo mukalu. Ani, anu mumamulo mukalu ne xo anu loxo sema sou voteꞌi e miꞌoxoneꞌi ta mitema no xalexaleenu tuatuala no lia ꞌo la miꞌuna no nano no anu ꞌiliꞌilixo masumasua sou voteꞌi noxie. Anu aloxo ane milosiꞌa uaini pekiaꞌu la aneꞌi miiexu.”   
\p
\v 9 \x + \xo 14:9 \xt Pal 13:12-17\x*Ioxe angelo tatalusou muvava mumulineꞌi ta angelo ta tamei tei la muꞌava ta tatila aloxo ꞌo, “Lexe ꞌenaꞌei ane mulotu noxou mii vova ne mo mulotu no anu mii e mipuinu iou loxo anu ne xe munoꞌu sosovo noxou muxolu no ꞌalaiou xe uasi la no avolu,  
\v 10 \x + \xo 14:10 \xt Tav 19:24; Lex 75:8; Ais 51:17, 22; Iel 25:15-16; Ese 38:22; Pal 16:19; 20:10\x*la anu kalumo uiexu uaini noxou Lataua. Anu uaini noxou Lataua ne anu laꞌia noxou e loxo uaini pekiaꞌu e Anu munixiꞌu no anu paku ia mii vile uꞌunalaxu uasi. Itema ane ne, ne uela no navu mo taupea no ieꞌi ta angelo noxou Lataua mo no iou Sipsip ꞌOlu.  
\v 11 \x + \xo 14:11 \xt Ais 34:10\x*La navu e iꞌelaxaꞌa no anu ne mo utoꞌitoꞌisiꞌa ne umuxu ne ulai teitexi mo kaluxu uasi. ꞌEnaꞌei ane ulotu noxou mii vova mo no anu mii e mipuinu iou loxo mii vova ne xe unoꞌu sosovo sou ualasou la unoꞌu umaꞌila no anu navu ne no aso xe no ꞌolovoxo uasi.  
\v 12 \x + \xo 14:12 \xt Pal 13:10\x*Lexe mimii ne uxali la ta mitema noxou Lataua e imulinu lapuloto noxou mo imuxaxu taneꞌi noxou Iesu itulu pekiaꞌa.”   
\p
\v 13 Ioxe angelo tatalusou ne muvivikala mukalu, la elomusou vaikala molu teitexi no loxotolo muvikala aloxo ꞌo, “Nakaukavunu vaikala ane ꞌo lexe, ‘Usoko vaimomo ꞌo, aneꞌi ane imuxaxu taneꞌi noxou Tila ia isoisoli la iꞌosa xo Lataua ualusiꞌa’ Angelo muvikala aloxo ne mukalu la Uleenu Tavuna muvikala kalumo aloxo ꞌo, ‘Ani manina aneꞌi imaꞌila no anu xaixai ane aneꞌi miꞌoxoꞌoxonu xo aneꞌi inoꞌu lakoli sou xaixai lailaixe ane aneꞌi miꞌoxoꞌoxonu.’”   
\s1 Laꞌilali no Lia ꞌo Lingamo sou Kokoli  
\p
\v 14 \x + \xo 14:14 \xt Tan 7:13\x*Ioxe eni emaisou mimii ne mukalu, xe emalei la, la emaisou itema vile loxo itema ꞌolu muxolu no anu tamuxala kea ne anu mutaanu kisivalu miꞌoxonu no anu xoulu, xe no avolu la mutetelisou laviso vile anaxu manina.  
\v 15 Xe ieli mulai la emaisou angelo vile molu no nano no vimelu sou taasou noxou Lataua mulaa muatu la muꞌava ta tatila mulai noxou itema e muxolu no anu tamuxala aloxo ꞌo, “Nanoꞌu lavisomeni mo nakokoli. Xo laꞌilali no lia ꞌo anu lingamo mukalu xe anu voxo sou kokoli anu muxali.”  
\v 16 La sou itema e muxolu no anu tamuxala ne mutangatulu muluꞌe no lia xo laꞌilali tavuꞌalo no lia ꞌo ne lingamo mukalusi la sou anu muvalitusou.   
\p
\v 17 Mo ieli mulai la emaisou angelo vile la mulaa muatu no opo loxotolo. Anu muatu la mutetelisou laviso vile anaxu manina kalumo no avolu.  
\v 18 \x + \xo 14:18 \xt Ioe 3:13\x*Xe emaisou angelo vile e musaxilaꞌu valovalo sou navu no taasou Lataua muatu la muꞌava tatila mulai noxou angelo e mutetelisou laviso anaxu ne aloxo ꞌo, “Nanoꞌu lavisomeni anaxu misevile ne mo navalitusou uaini kolekolesou no lia mo napitanu xo anu momoxo mukalu.”  
\v 19 Angelo ne mulomusou vaivaikala ne mukalu la mutangatulu muluꞌe no lia ꞌo sou muvalitusou uaini kolekolesou no lia mupitanu, mukalu la mulea mulai. Anu lavoꞌo alela sou umutanu uaini kolekolesou ne anu sosovo sou laꞌia noxou Lataua manina ane.  
\v 20 \x + \xo 14:20 \xt Ais 63:3; Pal 19:15\x*Anu mutaꞌolunu uaini kolekolesou ne no lavoꞌo alela mukalu la ta mitema mimalamalaxoꞌu no tavaꞌa sou lexaxu ulai uxali uaini. Aneꞌi miꞌoxonu aloxo ne no ale no tuala tatila, la sialu munixi muatu no anu lavoꞌo alela ne la musiali mulai muxali loxo kilomita itemaxu mavulovexa mo itemaxu taꞌuve (300 kilomita) xe kupaxu mutelo muxali no anu samalisou sou oosi anaxu. (Mita vile mo paꞌusou).   
\c 15  
\s1 Ta Angelo Muxatele Tamei Mo Tuꞌutuꞌumaxu Muxatele Tamei  
\p
\v 1 Eni emaisou mimii ne mukalu xe ieli mulai teitexi no loxotolo la, la emaisou sosovo vile tatila manina mo iouvilemo. Eni emaisiꞌa ta angelo muxatele tamei xe tuꞌutuꞌumaxu kaluxusou muxatele tamei. Xo anu laꞌia masua manina noxou Lataua kaluxusou ane la ukalu.  
\v 2 Mo ieli mulai la emaisou mii vile loxo laxalasi toxoxaꞌa loxo luaki ilou navu kalumo. Mo emaisiꞌa aneꞌi ane miuaulixu mii vova ne mo no anu mii e mupuinu iou loxo anu ne xe no anu itiiti sou ualasou ne itutulu no anu luaki ne paꞌumolu. Aneꞌi minoꞌu susapu noxou Lataua anu mulosiꞌa.  
\v 3 \x + \xo 15:3 \xt Mul 15:1; Lex 139:14; 145:17\x*La aneꞌi milexenu lexe vile noxou Mosesi anu itema sou xaixai noxou Lataua mo lexe noxou Sipsip ꞌOlu. Lexe ne aloxo ꞌo,  
\q1 “Lataua Tila xaviinu musuku misevile.  
\q2 Nini nalavusou naꞌoxonu mimii ta tatila xe lailaixe manina.  
\q2 Nini itema mulapu mo navikala maninasi.  
\q2 Nini tatanaanu tuala noxiꞌa ta mitema no lia ꞌo ukalusi.   
\q1
\v 4 \x + \xo 15:4 \xt Lex 86:9; Iel 10:6-7\x*Ninisisi nexolu vaꞌaxu no anu ꞌiliꞌilixo masumasua.  
\q2 La sou ꞌenaꞌei umomomo sou uꞌumene Tila mo uꞌitinu ualasine uasi?  
\q2 Tuatuala no xalexalee lia ukalusi ne ineꞌe ipita la ilotu noxinesi.  
\q2 Xo ꞌiliꞌilixo mulapu noxine ne muxali manina.”   
\p
\v 5 \x + \xo 15:5 \xt Mul 38:21\x*Mo eni emaisiꞌa milexe mukalu xe ieli mulai teitexi no loxotolo la, la emaisou taasou lalotu anu tani alelaxu noxou Lataua sou aꞌalo manina mukisi.  
\v 6 Mo ieli mulai la emaisiꞌa ta angelo muxatele ta tamei ne mitokolomo no anu lavalava kea. Lavalavaiꞌa ne maenaxu misevile mo misakiinu utupoko vile miꞌoxonu no anu xoulu la ulamilami miutupokoxu no lutuneꞌi. Aneꞌi miuatu la miuatu ilou tuꞌutuꞌumaxu muxatele tamei ne.  
\v 7 Aneꞌi miuatu mukalu la vile noxiꞌa ta mii tamiꞌa e mimauli ne munoꞌu latotope xoulu muxatele tamei la mulosiꞌa. Latotope muxatele tamei ne muꞌanaꞌana no anu laꞌia masua manina noxou Lataua. Anu Lataua e umauli utotomu mo kaluxu uasi.  
\v 8 \x + \xo 15:8 \xt 1Ta 8:10-11; 2Aꞌa 5:13-14; Ais 6:4\x*Xe ieli mulai la navu umuxu ilou lamanaxu Lataua mo xavi noxou mutaasou taasou lalotu noxou ne la umomomo sou evile uꞌunalai no anu taasou lalotu noxou ne uasi. Mulai muxali no mine ta angelo muxatele tamei minoꞌu latotope sou tuꞌutuꞌumaxu muxatele tamei noxou Lataua mukalu.   
\c 16  
\s1 Tavulu sou Laꞌia Masua Manina Noxou Lataua Muxatele Tamei  
\p
\v 1 Eni emaisou aloxo ne mukalu, la elomusou ꞌava vile tatila molu no taasou lalotu noxou Lataua muꞌava muatu noxiꞌa ta angelo muxatele tamei ne aloxo ꞌo, “Ngalai mo nganixiꞌu tavulu muxatele tamei sou laꞌia masua manina noxou Lataua ne uluꞌe lai no lia.”  
\v 2 \x + \xo 16:2 \xt Mul 9:10; Pal 13:12-17\x*Aneꞌi ta angelo ne milomu aloxo ne mukalu, la angelo ane muuli mulai munixiꞌu tavulu noxou no anu latotope ne mulai no lia. Anu munixiꞌu tavulu ne muluꞌe la xalevi toxotoxoxaꞌa ilou navunavu sou toxotoxoxaꞌa muxali no vasimeꞌa ta mitema e minoꞌu sosovo noxou mii vova ne xe milotu no anu mii e mipuinu iou loxo mii vova ne.  
\v 3 \x + \xo 16:3 \xt Mul 7:17-21\x*Ioxe angelo ta tameisou muavuti la mulai munixiꞌu tavulu noxou ne no luaki. La luaki muxiu muxali sialu. Sialu ne loxo ivau itema usoli la sialuxu, la muꞌoxoneꞌi ta mimii iouiou e mixolu no luaki tanu ne misoisoli mukalusi.  
\v 4 Xe angelo tatalusou ne munixiꞌu tavulu noxou muluꞌe no lexa xe no pupupulu sou lexa ne la muxiu muxali sialu mukalusi.  
\v 5 Xe eni elomusou angelo e musaxilaꞌu lexalexa ne muvikala aloxo ꞌo,  
\q1 “Lataua nini nexolu vaimomo ꞌo mo nexolu tei.  
\q2 Nini nexolu vaꞌaxu no anu ꞌiliꞌilixo masumasua  
\q2 mo natulusiꞌa ta mitema no anu vaivaikala la nini naꞌoxonu ꞌilixo ulapu.  
\q2 Xo nini nevikala la aneꞌi itulu no anu vaivaikala loxo nini nelemolu ne.   
\q1
\v 6 Xo aneꞌi miveꞌaveꞌa ta mitema iloꞌa ta mitema sou palomatana noxine misoisoli.  
\q2 La sou nini nelosiꞌa sialu sou iiexu mumomomo sou ꞌilixo maꞌia aneꞌi miꞌoxonu.”   
\p
\v 7 \x + \xo 16:7 \xt Lex 19:9; Pal 15:3\x*Mo elomu la, la elomusou ꞌava molu no anu valovalo muatu kalumo aloxo ꞌo,  
\q1 “Manina, Tila Lataua anu xaviinu musuku misevile,  
\q2 nini nevikala lexe natulusiꞌa ta mitema no anu vaivaikala  
\q2 la nini naꞌoxonu manina sou vaikalameni la naꞌoxo ꞌilixo ulapu  
\q2 la natulusiꞌa no anu vaivaikala.”   
\p
\v 8 Xe angelo tamiꞌasou mulai munixiꞌu tavulu noxou no aso iou, sou uꞌoxonu aso uiei xaviinu la uieisiꞌa ta mitema loxo navu.  
\v 9 \x + \xo 16:9 \xt Pal 9:20-21\x*Xo no anu aso ialuxu e utoꞌitoꞌisiꞌa ta mitema ne la aneꞌi ivivikala masumasua no ualasou Lataua. Anu Lataua ne Anusisi xavi sou usaxilaꞌu tuꞌutuꞌumaxu ne, la aneꞌi ixiunu oponeꞌi mo iꞌitinu ualasou uasi.   
\p
\v 10 \x + \xo 16:10 \xt Mul 10:22; Ais 8:21-22\x*Xe angelo taꞌuvesou mulai la munixiꞌu tavulu noxou no anu puloulou noxou mii vova e muxali muatu no luaki ne la tuala e anu musaxilaꞌu ne isivoxo mutomu. Xe muꞌoxoneꞌi ta mitema mixolu ne mixamulinu navunavu toxoxaꞌa la mingangasou levexaꞌa.  
\v 11 Mo minoꞌu navunavu ilou xalevi toxotoxoxaꞌa la imasaxa ixiunu oponeꞌi no anu ꞌiliꞌilixo masumasua noxiꞌa e miꞌoxonu ne uasi. Ia ivikala masumasua noxou Lataua sou teitexi.   
\p
\v 12 \x + \xo 16:12 \xt Ais 11:15\x*Xe angelo muxatele vilesou munixiꞌu tavulu noxou no lexa tila ne Iupulatesi. Anu munixiꞌu la muꞌoxonu lexa tatila ne musii sou ulalaxiinu voteꞌisiꞌa ta tatanaanu tuala no aso uxali sou ineꞌe.  
\v 13 Mo eni emalei la emaisiꞌa ta uleenu ta masumasua tatalu ieꞌi loxo ta vaꞌe milaa muatu. Vile mulaa muatu no anaxu iaulu toxoxaꞌa ne mo vile mulaa no anaxu mii vova ne xe vile mulaa muatu no anaxu itema sou palomatana kalakalavoi ne.  
\v 14 \x + \xo 16:14 \xt Pal 19:19\x*Aneꞌi ta uleenu masumasua manina ne ilavusou iꞌoxonu sosovo seꞌi uxali. La sou ilai itaxusiꞌa ta tatanaanu tuatuala no xalexalee lia ukalusi mo ineꞌe ipita sou iꞌoto no anu voxo tatila noxou Lataua e xavi musuku.  
\v 15 \x + \xo 16:15 \xt Mat 24:43-44; Pal 3:3\x*“La sou ngalomu laixe, eni aneꞌe loxo itema sou pakali. Anu ane uxolu ulalaxii mo ulosou tokolomou laixe la anu uꞌosa xo Lataua ualusou. Xo umomomo sou anu umuamuaꞌi pangapangaꞌu mo umaela no ieꞌi ta mitema uasi.”  
\v 16 \x + \xo 16:16 \xt Sek 12:11\x*La sou aneꞌi ta uleenu ta masumasua ne milai mipitaneꞌi ta tatanaanu tuatuala ne no xaleenu lia vile ilemolu no anu vaikala noxiꞌa ta Evalaio lexe Aamaxetoni.\f + \fr 16:16 \ft Aamaxetoni ne ilemolu no anu vaikala ngiala la lexe Armagedon.\f*   
\p
\v 17 Xe angelo muxatele tameisou muavuti la mulai munixiꞌu tavulu noxou mutelo teitexi no vaꞌa vitanisi. Xe no nano no taasou lalotu noxou Lataua, la vaikala vile muꞌava ta tatila muatu no puloulou noxou Lataua aloxo. “Anu a mukalu.”  
\v 18 \x + \xo 16:18 \xt Pal 4:5; 8:5\x*La leleꞌe lamixu mukelekelele mo luluxu muvalivalixumu xe laliua mukunikuni toxoxaꞌa manina. Laliua ne toxoxaꞌa manina xo no mine ta mitema mixolu no lia ꞌo la laliua vile toxoxaꞌa aloxo ne uxali uasi ia ane ꞌo ne tatila e tatila manina.  
\v 19 \x + \xo 16:19 \xt Pal 14:10\x*Laliua toxoxaꞌa ne mukuni la tuala tatila ne Vaviloni museꞌiseꞌi muxali alelaxu tatalu. Mo tuala tatila no xalexalee tuatuala no lia ꞌo mumamumamulo mukalusi. Lataua muxavutalaneꞌi tuala tatila ne Vaviloni no ꞌiliꞌilixo noxiꞌa la muꞌoxoneꞌi miiexu paku sou uaini noxou. Paku sou uaini e ane miiexu ne muꞌanaꞌana no anu laꞌia masua manina noxou Lataua.  
\v 20 \x + \xo 16:20 \xt Pal 6:14\x*Laliua ne mukuni la muꞌoxonu laꞌolaꞌolu no luaki ne tasiauxu mo laxalaxaꞌilu ne tasiauxu ia uxolu la uasi.  
\v 21 \x + \xo 16:21 \xt Mul 9:23-24; Pal 11:19\x*Xe muꞌoxonu laꞌiua tavaꞌu toxotoxoxaꞌa loxo aesi lavoꞌo molu teitexi no loxotolo muluꞌe noxiꞌa ta mitema. Laꞌiua e tavaꞌu toxotoxoxaꞌa loxo lavoꞌo ne tuꞌumaxu mumomomo loxo kiloxelemu itemaxu ta tamei mo taꞌuve (45kg). Xo anu muꞌoxonu laꞌiua tavaꞌu loxo lavoꞌo ne muluꞌe muꞌoxo masuaneꞌi manina la sou aneꞌi mivivikala sou Lataua masumasua.   
\c 17  
\s1 Sema sou Voteꞌi Ilou Mii Vova  
\p
\v 1 \x + \xo 17:1 \xt Iel 51:12-13\x*Ioxe eni emaisou tuꞌutuꞌumaxu e muxali noxiꞌa ta mitema ne mukalu la, emaisou angelo vile noxiꞌa ta angelo muxatele tamei e munoꞌu tavulu no anu latotope muxatele tamei ne muneꞌe la muvikalaleli aloxo ꞌo, “Naneꞌe mo alosienixu tuꞌutuꞌumaxu e sema sou voteꞌi inoꞌu. Ane mixolu no lexa tavuꞌalo paꞌumolu.  
\v 2 \x + \xo 17:2 \xt Ais 23:17; Iel 51:7; Pal 14:8\x*Ta tatanaanu tuatuala no lia ꞌo miꞌoxonu ꞌilixo sou voteꞌi noxie mo ta mitema e mixolu no lia ꞌo milai miꞌoxonu ꞌilixo sou voteꞌi noxie kalumo. Aneꞌi miꞌuna no anu ꞌilixo masua sou voteꞌi noxie ne la muꞌoxoneꞌi mixovulaulau loxo miiexu uaini.”  
\v 3 \x + \xo 17:3 \xt Pal 13:1\x*Mo Uleenu Tavuna muꞌanaꞌana noxilo manina la elai no anu Uleenu, la angelo vile munoꞌilo noxou telai no xalee lia vitanisi. Xe nexi noxou telai texali la emaisie sema vile ixoxolu no latanu mii vova vile. Mii vova ne lauolauoinu ia kisou muxatele tamei mo sikilinu mavulovexa xe kaukavu ne mikaukavunu vaivaikala masumasua sou Lataua.  
\v 4 \x + \xo 17:4 \xt Iel 51:7; Pal 18:16\x*Mo emaisie sema ne mitokolomo no anu tokolomo kaukavuxu malivololoonu xe lauo-lauoinu mo xoulu ulamilami mo lasala manina xe xapo iouiou miꞌainu no xolane. Mo no avole la mitetelisou paku vile miꞌoxonu no anu xoulu, ia no nano no anu paku ne la ꞌiliꞌilixo muꞌui e tumaꞌu masumasua mo ꞌiliꞌilixo sou voteꞌi nuninuniꞌu no iou Lataua muꞌanaꞌana no anu.  
\v 5 Xe ualasie mikaukavunu muxolu no ꞌalaiei ne laaxu mutalume. Ualasie ne laaxu aloxo ꞌo, “Tuala tatila ne Vaviloni ane neniꞌa ta sema sou voteꞌi mo ꞌiliꞌilixo iouiou e tumaꞌu masumasua no lia ꞌo.”  
\v 6 \x + \xo 17:6 \xt Pal 18:24; 19:2\x*Eni emaisie sema ne la ekuluke manina, xo ane miveꞌaveꞌa ta mitema noxou Lataua iloꞌa aneꞌi ane miaꞌaloxu aꞌalo laixe noxou Iesu misoisoli la miiexu sialuxaꞌa. Ane miiexu sialuxaꞌa la muꞌoxone mixovulaulau loxo miiexu uaini.   
\p
\v 7 \x + \xo 17:7 \xt Pal 13:1\x*La angelo muvikalaleli aloxo ꞌo, “Nini nemaisou mimii ne la nekuluke? Nini naxolu mo eni avikalanenixe sema ne xe mii vova e ane mixolu no latanu e kisou muxatele tamei xe sikiliu mavulovexa ne laaxu. Xo laaxu ne mutalume ia vaimomo ꞌo la eni avikalanenixu.  
\v 8 \x + \xo 17:8 \xt Tan 12:1; Pal 11:7; 13:7\x*Mii vova e nemaisou ne tei la anu muxolu ia vaimomo ꞌo la anu uxolu uasi. Xe iliꞌi la anu uxali utelo no anu taxa e mulai no lia manina ne la ulai uulua a vile. La sou ta mitema e ixoxolu no lia ꞌo e ualasiꞌa uai no nano no anu lavuku sou mauli uasi no mine Lataua usokou ukoinu mimii uao imaisou mii vova ne la ikuluke manina. Xo tei la anu muxolu ia vaimomo ꞌo la anu uxolu uasi xe iliꞌi la anu uxali.  
\v 9 La sou itema e mulavu manina la anu ulavusou laaxu. Anu laaxu aloxo ꞌo, mii vova kisou muxatele tamei ne musosovo sou laxaꞌilu muxatele tamei e sema mixolu no anu mo musosovosiꞌa ta tatanaanu tuatuala muxatele tamei.  
\v 10 Ta tatanaanu tuala taꞌuve a mikalukalu ia muxatele vilesiꞌa uxoxolu vaimomo ꞌo xe iliꞌi la muxatele tameisiꞌa uxali, ia anu uxali la uxolu maxuveeni uasi.  
\v 11 Xe mii vova e tei la anu muxolu xe vaimomo ꞌo la anu uxolu uasi, ia iliꞌi la anu uxali tatanaanu tuala muxatele tatalusiꞌa. Anu vile noxiꞌa aneꞌi ta tatanaanu tuatuala muxatele tamei ne ane e ulai la uulua avile.  
\v 12 \x + \xo 17:12 \xt Tan 7:7, 24\x*Mo mii vova sikilinu mavulovexa e nini nemaisou no kisou ne musosovosiꞌa ta tatanaanu tuatuala mavulovexa, ia aneꞌi ixali uao. Lexe ixali, la aneꞌi inoꞌu xavi sou iloꞌa mii vova ne ixaxai aso iou maxuvee uasi.  
\v 13 Aneꞌi ta tatanaanu tuatuala mavulovexa ne xavutalaiꞌa vilesisi manina sou ilosou mii vova ne xavi mo xaixai noxiꞌa sou anu uxaxaisou.  
\v 14 Mo aneꞌi ipita la iloꞌa Sipsip ꞌOlu iꞌoto, la anu Sipsip ꞌOlu iloꞌa aneꞌi ta mitema noxou e anu muꞌavaliꞌa mo musosovosiꞌa lexe anu ta naꞌu xe aneꞌi ane mimulimulinu vaikala noxou iuaꞌulixaꞌa no anu ꞌotoꞌoto ne. Xo anu Sipsip ꞌOlu ne anu Tila noxiꞌa ta tatila xe tatanaanu tuala noxiꞌa ta tatanaanu tuatuala.”  
\v 15 Mo angelo muvikalaleli la aloxo ꞌo, “Lexa tavuꞌalo e nini nemaisie sema sou voteꞌi mixolu no anu ne anu musosovosiꞌa ta mitema vasimeꞌa kaukavuxu iouiou mo tuatuala ta tatila no xalexalee lia ꞌo mukalusi xe vaivaikalaiꞌa iouiou no lia ꞌo ukalusi.  
\v 16 \x + \xo 17:16 \xt Pal 18:8\x*Mo mii vova xe sikilinu mavulovexa e nini nemaisou ne ulai la iꞌoxo masuane sema sou voteꞌi ne. Aneꞌi iavuti la iꞌoxonu masuane manina mo ikalanu tokolomoxe la ixolu pangapangaꞌesi mo iiꞌeu xiaxiasine xe iꞌelaxe no navu ukalusi.  
\v 17 Xo Lataua mulosiꞌa neꞌi ta tatanaanu tuatuala xavutala sou iꞌoxonu mimii ne uxali manina sou umomomosou mii maꞌia Anu mulemolu tei. Aneꞌi xavutalaiꞌa vilesisi sou milosou mii vova ne xavi sou Anu usaxilaꞌa ulai uxali no mine Lataua uꞌoxonu maninasou vaikala noxou.  
\v 18 Xe sema e nini nemaisie ne misosovo sou tuala ta tila manina e musaxilaꞌa ta tatanaanu tuatuala no lia ꞌo.”   
\c 18  
\s1 Tuala Tatila ne Vaviloni Mimamulo  
\p
\v 1 Ioxe eni emaisou mimii ne mukalu xe iliꞌi no anu la angelo vile molu teitexi no loxotolo muluꞌe. Anu xaviinu manina xe muluꞌe la lamanaxu muieisou lia ꞌo mukalusi.  
\v 2 \x + \xo 18:2 \xt Ais 13:21; 34:11-14; Iel 50:39; Pal 14:8\x*Anu muꞌava tatila aloxo,  
\q1 “Tuala tatila ne Vaviloni a mimamulo mukalu.  
\q2 Mo ane ixali tualasiꞌa ta uleenu ta masumasua.  
\q2 Aneꞌi ta molosila mo ta ngiala ta masumasua  
\q1 iloꞌa ta ngiala ta laꞌilaꞌia manina ixolu no anu.   
\q1
\v 3 Xo ta mitema tavuꞌalo milai noxie la iloꞌa miꞌoxonu ꞌiliꞌilixo masumasua sou voteꞌi,  
\q2 la miꞌoxoneꞌi mixovulaulau loxo milosiꞌa uaini noxie la miiexu.  
\q2 Mo ta tatanaanu no lia ꞌo miꞌoxonu ꞌilixo sou voteꞌi ne kalumo noxie.  
\q2 Mo ta mitema sou isovanu mimii iouiou  
\q2 la ta mitema ilotonu no lia ꞌo minoꞌu lamoli toxotoxoxaꞌa manina  
\q2 no anu ꞌiliꞌilixo masumasua noxie ne.”   
\p
\v 4 \x + \xo 18:4 \xt Ais 48:20; Iel 50:8; 51:6, 45; 2Ko 6:17\x*Mo eni elomu la, la elomusou ꞌava vile la molu teitexi no loxotolo muluꞌe aloxo ꞌo,  
\q1 “Ta mitema noxilo ngongiꞌa ngavaitami malaxo no anu susu noxie mamu,  
\q2 ngaꞌume mo ngaxexesie mo sou umomomo sou  
\q2 ngaꞌuna no anu tuꞌutuꞌumaxu e sou uxali noxie uasi.   
\q1
\v 5 \x + \xo 18:5 \xt Tav 18:20-21; Iel 51:9\x*Xo Lataua uxavutalanu ꞌiliꞌilixo masumasua e ane miꞌoxoꞌoxonu ne  
\q2 misuꞌanu laꞌoluxu xo mole mutelo muxali teitexi no loxotolo.   
\q1
\v 6 \x + \xo 18:6 \xt Lex 137:8; Iel 50:15, 29; 2Te 1:6\x*La sou ꞌiliꞌilixo maꞌia ane miꞌoxonu muneꞌe noxinge  
\q2 la ngakolinu ulivu noxie aloxo ne alaxu ta tamei.  
\q2 Mo milosinge uaini ngeiexu la ngakolinu ulivu ulai noxie,  
\q2 aloxo ne alaxu ta tamei xe ukalu la ngalosie iiexu.   
\q1
\v 7 \x + \xo 18:7 \xt Ais 47:7-9\x*Mo ngalosie navunavu manina mo itama,  
\q2 xo ane iꞌitinu ualasie la mivikala lexe ane mixolu laixe manina.  
\q2 Mo tane uvikala lexe ane mixolu loxo sema tatila la iꞌitinu ualasie mo ivikala lexe,  
\q2 ‘Eni loxo sema valu uasi xe umomomo sou mii vile uꞌoxoleli atama uasi.’   
\q1
\v 8 \x + \xo 18:8 \xt Pal 17:16\x*Aloxo ne la sou tuꞌutuꞌumaxu masumasua uxali noxie no voxo vilesisi.  
\q2 Tuꞌutuꞌumaxu ne soli mo tama xe kaetoto toxoxaꞌa  
\q2 mo ane iꞌela no navu xo Tila anu Lataua xaviinu musuku  
\q2 mulavusou ꞌiliꞌilixo maꞌia ane miꞌoxonu la muvikala lexe anu ukalusie.   
\p
\v 9 \x + \xo 18:9 \xt Ese 26:17; 27:30-35\x*Mo ta tatanaanu tuatuala e mineꞌe iloꞌa miꞌoxoꞌoxonu ꞌiliꞌilixo iouiou sou voteꞌi la iloꞌa mixolu laixe manina imaisou navu umuxu sou iꞌela la itama mo ielielisie.  
\v 10 Mo imaisou navunavu e muxali noxie ne la iꞌume xe itulu vaꞌaxu ꞌolesi ia itama. Aneꞌi itama la ivikala lexe,  
\q1 ‘Maulamenge Vaviloni,  
\q2 nini tuala manina mo xavineni musuku,  
\q2 ia alaxu vilesisi la nini nakalu avile.’   
\p
\v 11 \x + \xo 18:11 \xt Ese 27:36\x*Mo ta mitema sou isovanu mimii no lia ꞌo ukalusi kalumo itama mo ielielisie xo evile umomomo sou ulotonu miꞌamiꞌa ilou mixamixaꞌa la uasi.  
\v 12 \x + \xo 18:12 \xt Ese 27:12-13, 22\x*Miꞌamiꞌa ilou mixamixaꞌa loxo xoulu mo siliva mo xapoxapo mo lasala mo lavalava keakea mo malivololoonu mo xalexalexu xe lauolauoinu, mo ovuovu tumaꞌu lailaixe mo mimii iouiou miꞌoxonu no anu elepani anaxu mo ovuovu iouiou ilotonu la lamoli sou toxoxaꞌa mo balasi mo aeni mo kulu lailaixe toxoxaꞌa.  
\v 13 Mo mimii tumaꞌu lailaixe loxo maiau sosou mo misou ielaxu la tumaꞌu lailaixe mo ueli mo mii tumaꞌu lailaixe mo uaini ilou olivu lexaxu mo palaua mo uiti mo kau mo sipsip mo oosi mo mii e oosi ulapulapunu sou utavuleneꞌi ta mitema no anu mo isovaneꞌi ta mitema sou ta mitema ilotoneꞌi xe ta mitema imaumauli ne evile ulotonu la uasi.   
\p
\v 14 Ta mitema lavuluti la ivikala lexe, mimii e ngiangiaxu nini nemasaxau sou naꞌou mo lavuluti iouiou mo tokolomo e lailaixe lamoli sou toxotoxoxaꞌa ne ukalu avile. La umomomo sou naxalisou la uasi.  
\v 15 \x + \xo 18:15 \xt Ese 27:31, 36\x*La ta mitema sou isovanu mimii ne misovanu mimii no nano noxie la minoꞌu lamoli toxoxaꞌa ne mimaisou navunavu noxie ne la miꞌume manina la umomomo sou ilai ꞌalai uasi. Mitulu vaꞌaxusi. Aneꞌi mitama mo mielieli manina,  
\v 16 \x + \xo 18:16 \xt Pal 17:4\x*mo mitama miꞌavaꞌava aloxo ꞌo,  
\q1 ‘Maulamenge tuala tatila manina,  
\q2 tatei la tokolomoxe ne lavulavu keakea mo lailaixe manina  
\q2 mo kaukavuxu iouiou manina.  
\q2 Anu kaukavuxu malivololoonu mo lauolauoinu mo lasala  
\q2 mo xoulu xe xapo iouiou ulamilami no anu vasimele.   
\q1
\v 17 \x + \xo 18:17 \xt Ais 23:14; Ese 27:27-29\x*Xo alaxu vilesisi la tokolomoie ilou lamolie ne tasiauxu.’  
\p La ta mitema e itatavulenu lasipi tavuꞌalo mo aneꞌi e iaveiave no lasipi ilai no tuala xalexalee moseꞌi ne mo aneꞌi ane ixaxai no nano no lasipi mo aneꞌi ane maulixaꞌa muxolu no luaki ne itulu vaꞌaxusi la ieꞌi ukaasi.  
\v 18 \x + \xo 18:18 \xt Ese 27:32\x*Aneꞌi itulu ia ieꞌi ulai no navu umuxu e uꞌie ukalu la iꞌava ulai lexe, ‘Tuala tatila vile umomomo aloxo tuala tatila ane ꞌo uasi manina.’  
\v 19 La sou aneꞌi miꞌuloxu lomulo no kisiꞌa xe mitama mo mielieli manina la miꞌava aloxo ꞌo,  
\q1 ‘Maulamenge tuala tatila manina,  
\q2 no mine nexolu la ta mousou lasipi no luaki mixali  
\q2 ta mitema sou lavuluti no anu lamoli noxiesi.  
\q2 Ia alaxu vilesisi la ane tasiauxe avile.’   
\q1
\v 20 \x + \xo 18:20 \xt Lap 32:43; Ais 44:23; Iel 51:48\x*Aloxo ne la sou nini loxotolo mo ta mitema noxou Lataua  
\q2 mo ta mitema sou xaixai noxou xe ta mitema sou palomatana.  
\q2 Ngaꞌosa manina xo Lataua mukolinu  
\q2 la mulosie navunavu iouvilesisi aloxo ane miꞌoxonu muneꞌe nixinge.”   
\p
\v 21 \x + \xo 18:21 \xt Iel 51:63-64; Ese 26:21\x*Xe vaivaikala ne mukalu la emaisou angelo vile xaviinu musuku muꞌitinu lavoꞌo kulu vile toxoxaꞌa la muleanu mulai no luaki. La muꞌava aloxo ꞌo,  
\q1 “Tuala tatila ne Vaviloni ne ileanu ulai no luaki aloxo ne  
\q2 mo umomomo sou ixalisou la uasi.   
\q1
\v 22 \x + \xo 18:22 \xt Ais 24:8; Ese 26:13\x*Mo umomomo sou ilomusou susapu mo vei  
\q2 xe xoolau ta mitema iꞌoxonu utama no nano ne la uasi,  
\q2 mo ta mitema sou xaixai iouiou umomomo sou ixaxai no nano ne la uasi,  
\q2 xe umomomo sou ilomusou lavoꞌo sou uxiunu uiti luuxu la uasi.   
\q1
\v 23 \x + \xo 18:23 \xt Iel 7:34; 16:9; 25:10\x*Mo telu ukakaa no nano ne la uasi,  
\q2 mo umomomo sou vaivaikala sou taulaꞌi ilomusou no nano ne la uasi.  
\q2 Ta mitema sou isovanu mimii mixali ta mitema sou lavuluti  
\q2 mo xavineꞌi no ieꞌi ta mitema no lia ꞌo mukalusi.  
\q2 Xo no anu saa kalakalavoi noxine la neꞌoxoneꞌi ta mitema  
\q2 no xalexalee tuatuala no lia ꞌo milai vaꞌaxu mukalusi.   
\q1
\v 24 \x + \xo 18:24 \xt Iel 51:49; Pal 17:6\x*Xe no nano la ta mitema sou palomatana iloꞌa ta mitema noxou Lataua  
\q2 xe aneꞌi ane miveꞌa misoisoli sialuxaꞌa munixi,  
\q2 la sou Lataua mumaisou aloxo ne la mukalusie tuala tatila ne avile.”   
\c 19  
\s1 Ta Mitema Noxou Lataua Miꞌosa Xo Vaviloni Mimamulo  
\p
\v 1 Ioxe mimii ne mukalu la eni elomusou mivile luluxu toxoxaꞌa loxo ta mitema xulumu toxoxaꞌa ipita teitexi no loxotolo la miꞌavaꞌava aloxo ꞌo,  
\q1 “Taꞌitinu IAUE ualasou.  
\q2 Anusisi mulivulinenge mo Anu xaviinu musuku  
\q2 la taitinu ualasou Lataua, noxinge.   
\q1
\v 2 \x + \xo 19:2 \xt Lap 32:43; Pal 6:10\x*Xo vaikala noxou manina mo mulapu  
\q2 mo Anu utulusiꞌa ta mitema no anu vaivaikala noxou  
\q2 la Anu utilovosou ꞌiliꞌilixo noxie sema sou voteꞌi  
\q2 la mulosie tuꞌutuꞌumaxu sou lakolisou ꞌiliꞌilixo masumasua noxie sou voteꞌi e  
\q2 miꞌoxonu masuaneꞌi ta mitema no anu mo sialuxaꞌa ta mitema sou xaixai noxou e  
\q2 ane miveꞌaveꞌa misoisoli.”   
\p
\v 3 Mo aneꞌi miꞌava la aloxo ꞌo,  
\q1 “Taꞌitinu IAUE ualasou.  
\q2 Mo navusie mielaxe no ano ne umuxu muavuti  
\q2 la mulai teitexi e teitexi avile.”   
\p
\v 4 La ta tatila itemaxu vile mo tamiꞌa iloꞌa ta mii tamiꞌa e imaumauli milapau miluꞌe mo mixolaꞌu tavaꞌu voꞌuxu sou milotu mulai noxou Lataua e muxolu no puloulou noxou ꞌole. La miꞌava aloxo ꞌo,  
\q1 “Manina. Taꞌitinu ualasou IAUE.”   
\p
\v 5 Mo ꞌava vile molu no puloulou noxou Lataua muatu aloxo ꞌo,  
\q1 “Ngingi ta mitema sou xaixai noxou Lataua  
\q2 mo ngingi ane ngaꞌume noxiꞌa  
\q2 ta mitema ualasiꞌa uasi xe ta tatila ngaꞌitinu Lataua noxinge ualasou.”   
\p
\v 6 \x + \xo 19:6 \xt Pal 14:2\x*Xe elomu la elomusou mii vile luluxu loxo ta mitema xulumu toxoxaꞌa xoluneꞌi mo aloxo lexa luluxu xe aloxo leleꞌe upaupau la luluxu toxoxaꞌa mo uvalivalixumu miꞌava aloxo ꞌo,  
\q1 “Taꞌitinu IAUE ualasou xo anu Lataua Tila noxinge xaviinu musuku.  
\q2 Anu usaxilaꞌu mimii ukalusi.   
\q1
\v 7 \x + \xo 19:7 \xt Ais 61:10; Pal 21:2\x*Mo nengeꞌa taꞌosa manina mo taꞌitinu Lataua ualasou.  
\q2 Xo voxo sou Sipsip ꞌOlu utaulaꞌi a muxali vaimomo ꞌo.  
\q2 Mo semau a mixolu sou ixoxomaiou.   
\q1
\v 8 Lataua mulosie tokolomo ne mukea manina mo ulamilami  
\q2 la ane mitokolomo no anu.”  
\p [Tokolomo kea manina ne musosovo sou ꞌiliꞌilixo mulapu noxiꞌa ta mitema noxou Lataua.]   
\p
\v 9 \x + \xo 19:9 \xt Mat 22:2\x*Mo angelo muvikalaleli la aloxo ꞌo, “Nakaukavunu vaivaikala ane ꞌo aloxo ꞌo, aneꞌi ane Lataua muꞌavaliꞌa mineꞌe no anu laꞌilali sou taulaꞌi noxou Sipsip ꞌOlu la aneꞌi iꞌosa xo Lataua ualusiꞌa.” Mo anu musolonu vaivaikala noxou manina la aloxo ꞌo, “Vaivaikala ane ꞌo ne anu vaivaikala manina noxou Lataua.”  
\v 10 \x + \xo 19:10 \xt Apo 10:25-26; Pal 22:8-9\x*Eni emaisou aloxo ne la elapau muluꞌe no tavaꞌu sou lexe alotu noxou, ia anu muavuti la muvikalaleli aloxo ꞌo. “Mamu nalotu noxilo uasi xo eni amitema sou xaixai noxou Lataua aloxo nini ne mo ta vivine e mimuxaxu taneꞌi no anu vaivaikala manina noxou Iesu. La sou nalotu noxou Lataua anusisi xo aꞌalo manina noxou Iesu ne anu Uleenu Tavuna muxalilixu noxiꞌa ta mitema sou palomatana la aneꞌi milemolu.”   
\s1 Itema Muxolu no Latanu Oosi Vile Kea  
\p
\v 11 \x + \xo 19:11 \xt Lex 96:13; Ais 11:4; Pal 1:5; 6:2\x*Mo eni emalei la emaisou loxotolo mukisi mo emaisou oosi kea vile, xe itema e muxolu no latanu ne ualasou lexe, itema sou umulimulinu vaikala noxou Lataua laixe xe itema mulapu manina. Mo utulusiꞌa ta mitema no anu vaivaikala mo uꞌoto la umulinu ꞌilixo laixe.  
\v 12 \x + \xo 19:12 \xt Tan 10:6; Pal 1:14; 2:17\x*Anu iou loxo navu lamixu mo kisivalu tavuꞌalo muxolu no kisou xe mikaukavunu uala vile noxou. Ualasou ne Anusisi mulavusou ia evile la uasisi manina.  
\v 13 \x + \xo 19:13 \xt Ais 63:1-3; Ioa 1:1, 14\x*Mo tokolomoxu veveeni e mutaanu ne sialu mutomu no anu. Mo ualasou ilemo lexe Vaikala noxou Lataua.  
\v 14 Mo ta mitema sou ꞌotoꞌoto teitexi no loxotolo kalumo ne mixolu no lataneꞌi ta oosi ta kea la miiave mimulinu. Aneꞌi mitokolomoxu tokolomo ne malemalenga mo mukea manina.  
\v 15 \x + \xo 19:15 \xt Lex 2:9; Pal 1:16; 14:20\x*Mo no anaxu itema e mulaxuneꞌi ne la Anu mualavevenu laviso vile anaxu manina e sou ukalusiꞌa ta mitema no xalexalee tuatuala ukalusi no anu mo usaxilaꞌa no anu vilaxoxu aeni. Mo Anu umalamalaxoꞌu uaini no nano no lavoꞌo taxaanu sou imalamalaxoꞌu uaini no anu ne musosovo sou laꞌia masua manina noxou Lataua e Anu xaviinu musuku.  
\v 16 \x + \xo 19:16 \xt Pal 17:14\x*Xe no anu tokolomoxu veveeni ne mo no poxoꞌu la mikaukavunu uala aloxo ꞌo, Tatanaanu tuala noxiꞌa ta tatanaanu tuatuala mo tila noxiꞌa ta tatila.   
\p
\v 17 \x + \xo 19:17 \xt Ese 39:17-20\x*Mo ieli mulai la emaisou angelo vile mutulu no nano no aso iou la muꞌava toxoxaꞌa mulai noxiꞌa ta ngiangiala iouiou mukalusi ivavava teitexi no vaꞌa vitanisi aloxo ꞌo, “Nganeꞌe ngapita mo ngaxomaiou laꞌilali toxoxaꞌa noxou Lataua,  
\v 18 mo sou ngingi ngaꞌou xiasineꞌi ta tatanaanu tuatuala mo ta mitema e iulaxuneꞌi ta mitema sou ꞌotoꞌoto mo ta mitema e xavineꞌi musuku mo ta oosi iloꞌa ta mitema e ixolu no lataneꞌi ta oosi ne xe ngaꞌou xiasineꞌi ta mitema no lia ꞌo ukalusi. Aneꞌi ane mixolu laixe mo mii vile usakisakineꞌi uasi mo aneꞌi ane ipalupalusiꞌa mo aneꞌi ane ualasiꞌa uasi xe aneꞌi ta mitema ta tatila.”   
\p
\v 19 Xe emalei la, la mii vova iloꞌa ta tatanaanu tuatuala mo ta mitema sou ꞌotoꞌoto no lia ꞌo mukalusi mipita la itema uxolu no latanu oosi iloꞌa ta mitema noxou sou ꞌotoꞌoto iꞌoto.  
\v 20 \x + \xo 19:20 \xt Pal 13:12-17; 20:10\x*Ia no anu ꞌotoꞌoto ne la aneꞌi mitetelisiꞌa mii vova ne ilou itema sou palomatana sosovo iouiou noxou ne la aneꞌi imauli la mileaneꞌi ilou miluꞌe no anu kupaxu navu mo taupea. Xo anu muꞌoxonu sosovo iouiou la muꞌoxonu loloxaꞌa ta mitema sou minoꞌu sosovo noxou mii vova ne mo milotu no anu mii e mipuinu iou loxo mii vova ne.  
\v 21 Ia aneꞌi latala ne miveꞌaveꞌa misoisoli mukalusi no anu laviso e itema muiave no anu oosi kea mualavevenu ꞌole. La ta ngiala iouiou mukalusi mineꞌe miꞌou xiasineꞌi xo mole miꞌanaꞌana manina.   
\c 20  
\s1 Misakisakii Satani Muxolu Tauu Ie Itemaxu Mavolovexa Taꞌuve (1,000)  
\p
\v 1 \x + \xo 20:1 \xt Pal 9:1\x*Ioxe eni emaisou mimii ne mukalu xe emalei la, la emaisou angelo vile molu teitexi no loxotolo muluꞌe. Anu muluꞌe la mutetelisou siliko sou aitenga sou taxa veveeni xe lamota aeni toxoxaꞌa.  
\v 2 \x + \xo 20:2 \xt Tav 3:1; Pal 12:9\x*Anu muavuti la mutetelisou iaulu toxoxaꞌa ne xe mukalu la musakisakiinu muxolu tauu ie itemaxu mavulovexa taꞌuve (1,000). Anu iaulu toxoxaꞌa ne anu iaulu sou tatei mo ulee masua xe Satani.  
\v 3 Angelo ne muavuti la muleanu muluꞌe no anu taxa e mulai no lia manina xe mukalu la musilikonu aitenga xe musakisakiinu mo sou umomomo sou ukisiinu la utelo sou uꞌoxonu loloxaꞌa ta mitema no tuatuala no xalexalee lia ꞌo la uasi. Anu uxolu ne ulai uxali no mine tauu ie itemaxu mavulovexa taꞌuve ukalu la ilulusou ia umomomo sou uxolu maxuveeni uasi.   
\p
\v 4 \x + \xo 20:4 \xt Tan 7:9, 22, 27; 1Ko 6:2; Pal 13:17\x*Mo eni emaisou puloulousiꞌa ta tatanaanu tuatuala tavuꞌalo mutaꞌolu mo aneꞌi ane mixolu no puloulou ne minoꞌu xavi sou ixaxai sou itulusiꞌa ta mitema no anu vaivaikala. Mo eni emaisou uleeneꞌi ta mitema e mixotosou xolaneꞌi la misoisoli xo miaꞌaloxu vaikala manina noxou Iesu mo noxou Lataua. Aneꞌi ane no ilotu noxou mii vova mo no anu mii e mipuinu iou loxo anu ne uasi. Xe inoꞌu sosovo noxou mii vova no ꞌalaꞌalaieꞌi mo avoꞌa uasi. Eni emaisiꞌa ta mitema ne mixolu mimauli la mo iloꞌa Kalisito mixaxai loxo ta tatanaanu tuatuala mumomomo loxo tauu ie itemaxu mavulovexa taꞌuve (1,000).  
\v 5 Anu voxo sou ta mitema misoisoli itulu vile ane. Ia ta mitema latala e misoisoli ne itulu uasi miainesi xo mole tauu ie itemaxu mavulovexa taꞌuve ne mukalu.  
\v 6 \x + \xo 20:6 \xt Pal 1:6\x*La sou aneꞌi ane misoisoli ia mitulu no anu voxo sou itulu ne la, aneꞌi iꞌosa xo Lataua musosovosiꞌa lexe anu ta naꞌu mo ualusiꞌa la soli ta tameisou umomomo sou utaloxolixaꞌa la uasi. La aneꞌi ixali ta ailiꞌi noxou Lataua mo Kalisito mo iloꞌa Kalisito ixaxai ipita loxo ta tatanaanu tuatuala ulai uxali tauu ie itemaxu mavulovexa taꞌuve ukalu.   
\s1 Mikalusou Satani a Vile  
\p
\v 7 Ioxe no anu tauu ie itemaxu mavulovexa taꞌuve ukalu la ilulusou Satani no anu taasou navunavu ne.  
\v 8 \x + \xo 20:8 \xt Ese 38:2, 9, 15-16\x*La ulai uꞌoxonu loloxaꞌa ta mitema no xalexalee tuatuala no anu atume iou tamiꞌa no lia ꞌo ukalusi. Aneꞌi ta mitema ne Xoxu ilou Maxoxu mipitaneꞌi sou lexe iꞌoto la itiitisiꞌa mumomomo loxo ioꞌi no luaki paꞌumolu.  
\v 9 \x + \xo 20:9 \xt 2Ta 1:10\x*Aneꞌi miavuti la milutu no xalexalee no lia la mineꞌe mipita sou milutu milai mixoxosou tuala tatila noxou Lataua e anu mumasaxau misevile iloꞌa ta mitema noxou. Ia navu molu teitexi no loxotolo muluꞌe la muꞌelaxaꞌa mukalusi.  
\v 10 \x + \xo 20:10 \xt Lex 11:6; Pal 19:20; 21:8\x*Ia anu ulee masua e muꞌoxonu loloxaꞌa ta mitema ne mileanu mulai no anu kupaxu navu mo taupea e mileaneꞌi mii vova ilou itema sou palomatana kalakalavoi miluꞌe no anu tei. La aneꞌi tatalu ne ixolu mo inoꞌu navunavu no aso mo no ꞌolovoxo xe utotomu mo kaluxu uasi.   
\s1 Voxo sou ta Mitema Itulu no Anu Vaivaikala  
\p
\v 11 Xe eni emalei la, la emaisou puloulou kea vile toxoxaꞌa muxolu, mo emaisou itema e muxolu no anu ne. Anu muxolu la lia ilou loxotolo muꞌume mulai tasiauxu avile.  
\v 12 \x + \xo 20:12 \xt Tan 7:9-10; Mat 25:31-46; Apo 17:31; 2Ko 5:10; Pal 13:8\x*Mo eni emaisiꞌa ta mitema ta tatila iloꞌa ta mitema e ualasiꞌa uasi misoisoli mineꞌe mipita no talaxu itema e muxolu no puloulou ne. La emaisou mixavulalanu lavuku seꞌi vile sou mauli xe seꞌi sou mikaukavunu ꞌiliꞌilixo noxiꞌa ta mitema no anu. La sou itema e muxolu no puloulou ne umaisou ꞌilixo maꞌia muai no nano no lavuku ne la sou anu utulusiꞌa no anu vaivaikala la inoꞌu ꞌulusou.  
\v 13 \x + \xo 20:13 \xt Rom 2:6; 1Pi 1:17; Pal 2:23; 22:12\x*Luaki mulivulixaꞌa aneꞌi ane misoisoli mo mixolu no anu milai xe soli ilou tuala sou soli mulivulixaꞌa aneꞌi ane misoisoli la mixolu noxiꞌa mulai sou aneꞌi vilevilesi itulu no anu vaivaikala la inoꞌu lakolisou mii maꞌia anu muꞌoxonu.  
\v 14 Xe mukalu la emaisiꞌa soli ilou tuala sou soli ne mileaneꞌi ilou miluꞌe no anu navu kupaxu. Anu navu kupaxu ne anu soli ta tameisou ane.  
\v 15 La sou lexe anu ane imaisou ualasou ikaukavunu uai no nano no anu lavuku sou mauli uasi la ileanu ulai no navu kupaxu ne.   
\c 21  
\s1 Loxotolo Ilou Lia Alavua  
\p
\v 1 \x + \xo 21:1 \xt Ais 65:17; 2Pi 3:13\x*Ioxe eni emaisou mimii ne mukalu la emaisou loxotolo ilou lia alavua. Loxotolo ilou lia tei ne tasiauxu avile mo luaki kalumo uxolu la uasi.  
\v 2 \x + \xo 21:2 \xt Ais 52:1; 61:10; Eva 11:16; 12:22; Pal 3:12\x*Mo emaisou tuala Tavuna tatila noxou Lataua anu Ielusalemu alavua molu noxou Lataua teitexi no loxotolo ululuꞌe. Anu tokolomoxu ne lailaixe manina loxo sema itokolomo no anu tokolomo lailaixe sou taulaꞌi mo ixolu ilooxu mulue sou uneꞌe.  
\v 3 \x + \xo 21:3 \xt Liv 26:11-12; Ese 37:27; Sek 2:10; 2Ko 6:16\x*Mo elomusou ꞌava vile tatila molu no anu puloulou noxou Lataua muꞌava aloxo ꞌo, “Namaisou, tani alelaxu noxou Lataua a muneꞌe muxolu no taineꞌi ta mitema no lia ꞌo mo iloꞌa ixolu. Mo aneꞌi ixali ta mitema noxou xe Anu uxali Lataua noxiꞌa.  
\v 4 \x + \xo 21:4 \xt Ais 35:10; 65:19; Pal 7:17\x*Anu uiasou ieꞌi lexaxu mo soli ilou opo tuꞌutuꞌumaxu mo tama xe navunavu la uasi, xo anu mimii sou tei ne anu mukalu avile.”   
\p
\v 5 \x + \xo 21:5 \xt 2Ko 5:17\x*Mo itema e muxolu no puloulou ne muvikala aloxo ꞌo, “Namaisou, eni aꞌoxonu mimii alavua mukalusi.” Xe mukalu la muvikalaleli la lexe, “Nakaukavunu vaivaikala ane ꞌo xo vaivaikala ane ꞌo ne maninasou mo umomomo sou itema umuxaxu tanu no anu.”  
\v 6 \x + \xo 21:6 \xt Ais 55:1; Iel 2:13; Ioa 7:37; Pal 1:8, 17; 22:17\x*Mo Anu muvikalaleli la aloxo ꞌo “Eni ekalusou xaixai noxilo, xo eni tei mo kaluxusou. Mo eni sokoꞌu mimii xe eni kaluxusou mimii. La sou anu ane usoliu lexa sou uiexu la eni alosou lexa no anu pupulu sou mauli la anu uiexu la ulotonu uasi.  
\v 7 \x + \xo 21:7 \xt 2Sa 7:14; 1Aꞌa 17:13; Lex 89:26-27\x*La sou lexe anu ane uaꞌulixu ꞌotoꞌoto la anu unoꞌu mimii ane ꞌo mo eni axali Lataua noxou xe anu uxali ꞌalixeni.  
\v 8 \x + \xo 21:8 \xt Mat 25:41; Pal 20:15; 22:15\x*Ia aneꞌi ane iꞌumekea iloꞌa aneꞌi ane imuxaxu taneꞌi uasi mo aneꞌi ane iꞌoxonu ꞌiliꞌilixo e masumasua manina mo aneꞌi ane iveꞌa ta mitema isoli ilou iꞌoxonu ꞌiliꞌilixo masumasua sou voteꞌi mo aneꞌi ane iꞌoxoꞌoxonu saa masumasua iouiou mo aneꞌi ilotu noxiꞌa ta mimii vulaulau mo aneꞌi ane ivikala la ikalakalavoi ne tualasiꞌa ane navu kupaxu e navu uꞌaniꞌani mo taupea. Anu soli ta tameisou ane.”   
\s1 Ielusalemu Alavua  
\p
\v 9 Ioxe vile noxiꞌa ta angelo muxatele tamei e minoꞌu tavulu sou tuꞌutuꞌumaxu noxou Lataua kaluxusou muxatele tamei ne muneꞌe la muvikalaleli aloxo ꞌo, “Naneꞌe mo alosienixe Sipsip ꞌOlu semau sou uꞌuluxe.”  
\v 10 \x + \xo 21:10 \xt Ese 40:2\x*Eni eꞌanaꞌana no anu xaviinu Uleenu Tavuna la elai no anu Uleenu la angelo ne mukasi noxilo la noxou telai no laxaꞌilu tatila vile kisou teitexi. La mulosielixu Ielusalemu Tuala Tavuna tatila molu noxou Lataua teitexi no loxotolo ululuꞌe.  
\v 11 \x + \xo 21:11 \xt Ais 60:1-2, 19\x*La lamanaxu Lataua mukakaa no tuala tatila ne la lamanaxu e uieiei ne iouvilemo manina loxo lavoꞌo vile lailaixe manina mo ilotonu la lamolisou toxoxaꞌa mo loxo lavoꞌo vile lailaixe ilemo lexe iasupa malemalenga xe ulamilami loxo ꞌo latitilo.  
\v 12 \x + \xo 21:12 \xt Ese 48:30-35\x*Mo vimelu toxoxaꞌa mo veveeni mulai teitexi muxoxosou tuala tatila ne mo aitengaxu mavulovexa mo muluꞌe no lia tamei xe ta angelo vilevilesi mitulu mimomoxu aiaitenga ne. Mo mikaukavunu ualasiꞌa ta matamata mavulovexa mo muluꞌe no lia tamei noxiꞌa ta Isilaeli no anu aitenga ne.  
\v 13 No xalee vimelu telo ꞌole la aitengaxu tatalu mo luꞌe ꞌole aitengaxu tatalu mo no xaleenu toꞌo ꞌole la aitengaxu tatalu xe no xaleenu vaxa ꞌole la aitengaxu tatalu kalumo.  
\v 14 Mo mimuxaxu lavoꞌo kulu sou vimelu tavaꞌu mavulovexa mo muluꞌe no lia tamei sou vimelu sou tuala tatila ne uai utelo la usiatoto no anu. Lavoꞌo kulu mavulovexa mo muluꞌe no lia tamei ne ualaualasiꞌa ta mitema sou xaixai noxou Sipsip ꞌOlu mavulovexa mo muluꞌe no lia tamei muxolu no anu.  
\v 15 \x + \xo 21:15 \xt Ese 40:3; Pal 11:1\x*Mo angelo e uvivikalaleli ne munoꞌu tilovo vile miꞌoxonu no anu xoulu sou utilovosou tuala tatila ne no anu ilou aiaitengaxu mo vimelusou.  
\v 16 Mo no anu tuala tatila ne la no xalee tamiꞌa mo ne mitilovosou la lovaxu iouvilesisi. Veveeninu mo toxoxaꞌa no anu ne mo veveeni utelai teitexi ne anu mulovaxu la itiitisou lova ne iouvilesisi mumomomo loxo lova 2,220 (kilomita).  
\v 17 Mo mulovaxu komuko no anu vimelu ne la lovaxu mumomomo loxo mita itemaxu tatalu mo taꞌuve (65 mita). Angelo munoꞌu lova ne loxo noxiꞌa ta mitema inonoꞌu sou ilovaxu mimii no anu.  
\v 18 \x + \xo 21:18 \xt Ais 54:11-12\x*Vimelu ne miꞌoxonu no anu lavoꞌo vile lailaixe ilemolu lexe iasupa xe tuala tatila ne miꞌoxonu no anu xoulu la ulamilami loxo latitilo.  
\v 19 Mo no tavaꞌu vimelu ne la mitokolomonu no anu lavoꞌo seꞌi lailaixe manina. Lavoꞌo ane mimuxaxu tei manina ane ilemolu lexe iasupa mo ta tameisou ne lavoꞌo vile ꞌelaꞌela ilemolu lexe sapaia mo lavoꞌo tatalusou ilemolu lexe xalukedoni mo lavoꞌo tamiꞌasou ne kaukavuxu vevesinu ilemolu lexe emeralu.  
\v 20 Mo lavoꞌo taꞌuvesou ne lavoꞌo kaukavuxu lauolauoinu xe kea muꞌumuꞌunalaxu ilemolu lexe saludoni mo muxatele vilesou anu lavoꞌo lauolauoinu ilemolu lexe koniliani mo muxatele tameisou ne lavoꞌo vile poonu ilemolu lexe kulisolite mo muxatele tatalusou ne anu lavoꞌo vile la kaukavuxu vevesinu ilemolu lexe velili mo muxatele tamiꞌasou ne anu lavoꞌo vile poonu la ilemolu lexe topasi mo mavulovexasou ne anu lavoꞌo vevesinu ne ilemolu lexe kulisopulasi mo mavulovexa mo muluꞌe no lia vile ne lavoꞌo ꞌelaꞌela ilemolu lexe aiasine xe mavulovexa mo muluꞌe no lia ta tameisou ne anu lavoꞌo malivololoonu ilemolu lexe ametisi.  
\v 21 Mo aitenga mavulovexa mo muluꞌe no lia tamei ne miꞌoxo no anu lasala mukalusi mo voteꞌi sou tuala tatila ne miꞌoxonu no anu xoulu e mivile uꞌunalaxu uasi la ulamilami mo tamalei ulai xalee vile loxo atitilo.  
\v 22 Xe eni amaisou taasou lalotu vile uxolu no nano no tuala tatila ne uasi xo taasou lalotu ane anu Tila Lataua xaviinu musuku ilou Sipsip ꞌOlu nesi.  
\v 23 \x + \xo 21:23 \xt Ais 60:19-20; Pal 22:5\x*Mo no nano no tuala tatila ne la umomomo sou aso ilou soꞌio ukaa la uasi xo lamanaxu Lataua ukakaa no anu mo Sipsip ꞌOlu anu telusou.  
\v 24 \x + \xo 21:24 \xt Ais 60:3, 5\x*Ta mitema tavuꞌalo no xalexalee tuatuala ukalusi ꞌo imuamuaꞌi no anu lamanaxu ne mo ta tatanaanu tuatuala no lia ꞌo inoꞌu mimii lailaixe noxiꞌa la inoꞌu ineꞌenu.  
\v 25 \x + \xo 21:25 \xt Ais 60:11\x*Mo aitengaxu tuala tatila ne voxo vile utatu uasi ukisi uxoxolu aloxo ne xo ꞌolovoxo la uasi aso uulualesi.  
\v 26 Mo tokolomo iouiou ilou lamoli noxiꞌa ta mitema no xalexalee tuatuala no lia ꞌo ukalusi ne inoꞌu uꞌunalai no anu.  
\v 27 \x + \xo 21:27 \xt Ais 52:1; Ese 44:9; 1Ko 6:9-10\x*Mo susu vile uxolu no nano ne uasi iloꞌa ta mitema e iꞌoxoꞌoxonu ꞌilixo sou maela loxo pakali mo ꞌilixo sou voteꞌi mo to seꞌi la xe aneꞌi ane iꞌoxoꞌoxonu vaikala kalakalavoi ne umomomo sou iꞌunalai uasisi manina. Ia aneꞌi ane ualasiꞌa uai no nano no anu lavuku sou mauli noxou Sipsip ꞌOlu aneꞌisisi iꞌunalai.   
\c 22  
\s1 Lexa sou Mauli  
\p
\v 1 \x + \xo 22:1 \xt Ese 47:1\x*Ioxe angelo ne muavuti la mulosielixu lexa sou mauli ia anu ulamilami loxo latitilo mo luuxu no laaxu puloulou noxiꞌa Lataua ilou Sipsip ꞌOlu la musiali muuatu.  
\v 2 \x + \xo 22:2 \xt Tav 2:9; Ese 47:12; Ioe 3:18; Sek 14:8\x*La muiave mulai nonixi no voteꞌi toxoxaꞌa sou tuala tatila ne, xe no paꞌumolu xalee vile xe xalee vile la ovu sou mauli mutulutulu. Ovu ne ulavusou uneneꞌa alaxu mavulovexa mo muluꞌe no lia tamei no anu tauu ie vile momoxu soꞌisoꞌio xe voloxu ne sou uꞌoxoneꞌi ta mitema no xalexaleenu lia ukalusi ꞌo inoꞌu mauli no anu.  
\v 3 Mo mimii e Lataua umasaxau uasi manina mo ulevetesou lexe uxexee umomomo sou uxolu no nano ne la uasi. Mo puloulou noxou Lataua mo Sipsip ꞌOlu uxolu no nano no tuala tatila ne la ta mitema sou xaixai noxou ixaxai noxou.  
\v 4 \x + \xo 22:4 \xt Mat 5:8; Pal 3:12\x*La aneꞌi imaisou iou xe ikaukavunu ualasou no ꞌalaieꞌi.  
\v 5 \x + \xo 22:5 \xt Tan 7:18, 27; Pal 5:10; 20:6; 21:23, 25\x*La ꞌolovoxo uasi. Xo anu tila Lataua ulosiꞌa lamana, la sou aneꞌi imomomo sou ixolu no anu lamanaxu telu mo lamanaxu aso uasi. Aneꞌi ixali ta tatanaanu tuala no voxovoxo mo kaluxu uasi.  
\v 6 \x + \xo 22:6 \xt Pal 1:1\x*Mo angelo ne muvikalaleli aloxo ꞌo, “Vaivaikala ane ꞌo ne manina misevile umomomo sou ta mitema imuxaxu taneꞌi no anu. Tila anu Lataua no anu Uleenu la muavutilixaꞌa ta mitema sou palomatana la miaꞌalo no anu vaivaikala noxou. Anu mupalusiꞌa ta angelo noxou sou ineꞌe ilosieꞌi ta mitema sou xaixai noxou no anu mimii e ꞌalaꞌalai sou uxali.”   
\s1 Lailivuxu Iesu  
\p
\v 7 \x + \xo 22:7 \xt Pal 1:3\x*Mo angelo ne musolonu vaivaikala noxou la aloxo ꞌo, “Ngalomu, eni ꞌalaꞌalai sou alivu aneꞌe. La sou ꞌenaꞌei aneꞌi umulinu vaivaikala palopalomatana uai no nano no anu uoli voloxu e misakii ꞌo, anu uꞌosa xo Lataua ualusou.”  
\v 8 \x + \xo 22:8 \xt Pal 19:10\x*Eni Ioanesi, enisisi ane emaisou mimii ne xe elomusou vaivaikala ne. Ia no mine eni elomusou xe elomusou mukalu la elapau muluꞌe no tavaꞌu angelo e ulolosielixu mimii ne sou lexe alotu noxou.  
\v 9 Ia anu muavuti la muvikalaleli aloxo ꞌo, “Mamu, nalotu noxilo uasi, nalotu noxou Lataua anusisi. Xo eni amitema sou xaixai noxou Lataua aloxo nininesi mo ta vivine ta mitema sou palomatana xe aneꞌi ane imulinu vaivaikala no anu uoli voloxu e misakii ꞌo. Nalotu Lataua!”  
\v 10 Mo muavuti la muvikalaleli la aloxo ꞌo, “Mamu sou natatusou vaivaikala palopalomatana muai no nano no anu uoli voloxu e misakii ꞌo xo voxo a ꞌalaꞌalai ukalu.  
\v 11 \x + \xo 22:11 \xt Tan 12:10\x*La sou ꞌenaꞌei uꞌoxoꞌoxonu susu la anu laixe lexe anu ulai mo usolonu uꞌoxoꞌoxonu susu mo ꞌenaꞌei ane uꞌoxoꞌoxonu ꞌiliꞌilixo e iou maemaela no anu la anu laixe lexe ulai mo usolonu uꞌoxoꞌoxonu ꞌiliꞌilixo ane ne. Mo ꞌenaꞌei ane umulimulinu ꞌiliꞌilixo mulapu la laixe lexe anu usolonu uꞌoxonu ꞌilixo mulapu xe ꞌenaꞌei ane umasaxa lexe uxolu vaꞌaxu no anu ꞌiliꞌilixo masumasua la anu laixe lexe anu usolonu sou uxolu vaꞌaxu no anu ꞌiliꞌilixo masumasua ne.”  
\v 12 \x + \xo 22:12 \xt Ais 40:10; Iel 17:10; Pal 2:23\x* “Ngalomu, eni ꞌalaꞌalai sou alivu aneꞌe la alosiꞌa ta mitema latala lakolisou ꞌiliꞌilixo maꞌia aneꞌi vilevilesi miꞌoxonu.  
\v 13 \x + \xo 22:13 \xt Ais 44:6; Pal 1:8, 17; 21:6\x*Eni tei xe eni kaluxu mo eni sokoꞌu mimii xe eni kaluxusou mimii.”  
\v 14 \x + \xo 22:14 \xt Tav 2:9; 3:22\x*Aneꞌi ane miꞌuinu tokolomoiꞌa la iꞌosa xo Lataua ualusiꞌa la aneꞌi umomomo sou iꞌani no anu ovu sou mauli mo uꞌunalai no aitenga no tuala tatila ne.  
\v 15 Ia aneꞌi ane umomomo sou iꞌuna no tuala tatila ne uasi ane ta aꞌaa mo aneꞌi ane iꞌoxoꞌoxonu sasaa kalakalavoi mo ꞌiliꞌilixo sou voteꞌi mo aneꞌi miveꞌa ta mitema misoisoli mo ilotu no anu mimii vulaulau xe aneꞌi latala e imasaxa iꞌoxoꞌoxonu vaikala kalakalavoisi. Aneꞌi ta mitema ne ixolu no ale no tuala tatila noxou Lataua ne.  
\v 16 \x + \xo 22:16 \xt Iti 24:17; Ais 11:1, 10; Rom 1:3; Pal 2:28; 5:5\x* “Eni Iesu epalusou angelo noxilo sou muluꞌe muaꞌaloxu vaivaikala manina noxilo mulai nixiꞌa ta mitema sou lalotu. Xo eni ꞌilusuleli ane Deviti mo eni Deviti uliꞌu vile ane mo eni loxo xuae sou lamana ukea.”  
\v 17 \x + \xo 22:17 \xt Ais 55:1; Pal 21:6\x*Uleenu Tavuna ilee Sipsip ꞌOlu semau ivikala lexe, “Naneꞌe.” Mo anu ane ulomusou la anu uvikala lexe, “Naneꞌe.” ꞌEnaꞌei ane usoliu lexa la anu uneꞌe mo ꞌenaꞌei ane umasaxa manina lexe uie no anu lexa sou mauli ne la anu laixe lexe anu uneꞌe mo uie vitanisi ia ulotonu uasi.   
\s1 Vaikala Peletoto Pekiaꞌu Noxou Ioanesi  
\p
\v 18 \x + \xo 22:18 \xt Lap 4:2; 12:32\x*La sou eni apeletoto aloxo ꞌo lexe ꞌenaꞌei ane mulomusou vaikala palomatana muai no nano no lavuku ꞌo ia umuxaxu vaikala seꞌi utelo no latanu la, la Lataua umuxaxu tuꞌutuꞌumaxu utelo no lataanu noxou.  
\v 19 Xe anu ane uxexeenu vaivaikala palomatana e muai no nano no lavuku ꞌo, la anu umomomo sou uꞌani no anu ovu sou mauli uasi, mo umomomo sou uꞌunalai no anu Tuala Tavuna Tatila noxou Lataua e mulemolu no anu lavuku noxou uasi. Lataua uxexeenu mimii ane ne noxou.  
\v 20 \x + \xo 22:20 \xt Mat 24:30-31; 1Ko 16:22\x*Mo itema e muaꞌalo lamana no anu mimii ane ne uvikala lexe, “Ani, Eni ꞌalaꞌalai sou alivu aneꞌe.” Manina. Tila Iesu, naneꞌe.  
\v 21 Eni alinga lexe alauna noxou Tila Iesu uxolu noxiꞌa ta mitema noxou Lataua. Manina.