\id PHP - Pele-Ata Genesis, Jonah and New Testament [ata] -Papua New Guinea 2009 (DBL -2014) \h PILIPAI \toc1 Uoli Voloxu Ane Paulo Mukaukavu Mulai Noxiꞌa Ta Pilipai \toc2 Pilipai \toc3 Pil \mt2 UOLI VOLOXU ANE PAULO MUKAUKAVU MULAI NOXIꞌA \mt1 TA PILIPAI \imt1 Vaikala lamana \ip No mine Paulo musokou xaixai noxou la anu mulai ne Pilipai tei sou muaꞌaloxu aꞌalo laixe sou Iesu Kalisito. Pilipai ne anu tuala tila ne Iuropu no xalee lia tila ne Makedonia (Aposeli 16:8-15). Paulo mukaukavu uoli voloxu ane ꞌo no mine anu muxolu no nano no taasou navunavu ne Romu. No mine anu muxolu no taasou navunavu ne, la mulomusou aꞌalosiꞌa ta Pilipai lexe ta mitema moseꞌi mineꞌe miaꞌaloiꞌa no anu aꞌalo kalakalavoi moseꞌi, la muxovulauvaulixaꞌa. Ia no mine nenge taitiiti no nano no anu uoli voloxu ꞌo, la tamaisou mimii e muꞌoxonu Paulo opo tuꞌumaxu no anu ne uasi. Mimii ne mutalume ia tamaisou lexe Paulo mumuxaxu tanu noxou Iesu pekiaꞌu manina xe ꞌosaꞌilasi muꞌanaꞌana noxou. \ip Paulo mukaukavunu uoli voloxu ane ꞌo mulai noxiꞌa ta Pilipai ne sou ulemolu laixe noxiꞌa. Xo tei no mine anu mumasaxau suꞌuli, la aneꞌi misuꞌulinu laixe. Mo anu umusaxa lexe uꞌoxonu pekiaꞌa. Xo loxo ꞌo io aneꞌi ixavutalanu no anu tuꞌumaxu noxou xe tuꞌutuꞌumaxu noxiꞌa, la ulosiꞌa tuꞌumaxu la. La sou anu muvikalaneꞌi lexe mii tatila Lataua mulosinge ane mauli. Mauli ne ngenoꞌu noxou Kalisito Iesu. La musolonu la lexe mauli e ngenoꞌu ne, ngenoꞌu no anu ꞌilixo sou ngemulimulinu lapuloto noxiꞌa ta Iutaia uasi. Anu muvikalaneꞌi lamana lexe mauli alavua e aneꞌi minoꞌu ne, xo aneꞌi mimuxaxu taneꞌi noxou Kalisito. Mo muvikalaneꞌi lexe laixe lexe aneꞌi imulinu masaxa noxiꞌa mo iꞌitineꞌi mamu, ia imulinu ꞌilixo noxou Kalisito. Anu uꞌitinu mo uxavutala lexe anu itema tila xe umulinu masaxa noxou uasi. Anu mutaloxolixu sou muꞌoxonu xaixai e Lataua mupalusou sou uꞌoxonu. Mo muvikala lexe ta mitema e mixolu noxou Kalisito ne opo seꞌisisi noxou Lataua xe ꞌosaꞌila uꞌanaꞌana no anu mauilixaꞌa utotomu. \ip No anu uoli voloxu ane ꞌo la tamaisou lexe muvikala pekiaꞌu no anu ꞌiliꞌilixo sou ꞌosaꞌila, tatulu pekiaꞌinge, tapita xe xavinenge no anu mauli ane tenoꞌu no mine temuxaxu tanenge noxou Kalisito. Xe tamaisou lexe no nano no anu uoli voloxu ꞌo, la nenge tamaisou lexe Paulo tanuxaꞌa ta temanu lalotu ne Pilipai manina. \iot Aꞌalo muai no nano aloxo ꞌo \io1 Vaikala lamana 1:1-2 \io1 Paulo mukilakasiꞌa ta Pilipai 1:3-11 \io1 Misakisakiinu Paulo la musuꞌulinu aꞌalo laixe 1:12-26 \io1 Vateteli noxou Paulo 1:27–2:18 \io1 Tito ilou Epapulotitosi 2:19-30 \io1 Ngalaxaꞌi noxiꞌa ta uluamengi 3:1–4:1 \io1 Vateteli kaluxusou mo vaikala sou sexela xe kaluxusou 4:2-23 \c 1 \p \v 1 \x + \xo 1:1 \xt Apo 16:12-40\x*Eni Paulo, nexi noxou Timoti ta mitema sou xaixai noxou Kalisito Iesu, tekaukavunu vaivaikala ane ꞌo ulai noxinge ngingi ta mitema ane Kalisito Iesu ta naꞌu mo ta tatila sou isaxilaꞌinge iloꞌa ta mitema sou xaixai no ꞌa lalotu ne Pilipai. \p \v 2 Nexi noxou takilaka lexe alauna mo opo seꞌisisi noxou Lataua Maminge mo Tila Iesu Kalisito uxolu noxinge. \s1 Lakilaka Noxou Paulo \p \v 3 Eni alemo laixe musuku ulai noxou Lataua utotomu, no mine eni axavutalangengi. \v 4 No mine eni akilakasinge ngingi latala, la no voxovoxo ne eni aꞌosa manina. \v 5 Xo musoko no mine nenge nengeꞌa teaꞌaloxu aꞌalo laixe sou Iesu mo muneꞌe muxali vaimomo ꞌo la nenge nengeꞌa texaxai tepita. \v 6 \x + \xo 1:6 \xt 1Ko 1:8\x*Xo eni elavusou manina aloxo ꞌo. Lataua musokou xaixai laixe noxinge mo Anu a usosolonu sio xe ukalusou manina no voxo ane Kalisito Iesu ulivu uneꞌe la. \p \v 7 La sou anu laixe manina lexe eni axamulinu aloxo ne singe ukalusi lexe Lataua usolonu xaixai noxou. Xo ngingi latala ne, nenge nengeꞌa texaxai tepita no anu xaixai laixe ane Lataua mualaunasilo la mulosinge. Mo eni aꞌosa sou axavutalangengi utotomu no mine aneꞌi misakisakileli, xe no mine utotomu eni aꞌoxo latolosou xe aꞌoxo pekiaꞌusou aꞌalo laixe noxou Iesu. \v 8 Lataua mulavusou manina lexe no nano no anu masaxa noxou Kalisito Iesu la eni emasaxainge ngingi latala no nano no taleli manina sou amaisinge. \p \v 9 La sou eni akilakasinge aloxo ꞌo. Ngingi ngalavusou vaikala maninasou musuku mo ngalavusou mii maꞌia ane laixe xe masua, la sou ꞌilixo sou tangengingenge ngatongatoꞌo uxali pekiaꞌu musuku. \v 10 \x + \xo 1:10 \xt 1Te 5:23\x*Mo eni akilakasinge la aloxo ꞌo. Ngingi umomomo sou ngatongonu mii maꞌia ane maninasou mo ngaxolu vaꞌaxu no anu ꞌiliꞌilixo masumasua xe ixalisou susu vile noxinge uasi ulai uxali no voxo ane Kalisito ulivu uneꞌe. \v 11 Mo maulingenge uꞌanaꞌana no anu ꞌiliꞌilixo ane mulapu molu noxou Iesu Kalisito sou ngingi ngalosou uala tila mo ngaꞌitinu ualasou Lataua. \s1 Misakii Paulo La Anu Musuꞌulinu Aꞌalo Laixe sou Iesu \p \v 12 Ioxe, ta vivilo noxou Iesu. Eni emasaxa lexe ngingi ngalavusou lexe mii maꞌia ane muxali noxilo ꞌo ne, musuꞌulinu aꞌalo laixe sou musuku mulai no tuatuala. \v 13 \x + \xo 1:13 \xt Apo 28:30\x*Anu aloxo ne, la sou ta mitema sou ꞌotoꞌoto isaxilaꞌa ta tatila sie Romu mukalusi iloꞌa ta mitema latala moseꞌi milavusou lexe eni exolu no anu sakisaki xo eni amitema sou xaixai noxou Kalisito. \v 14 Tavaꞌu xo eni exolu no anu sakisaki, la sou mii ane ne muꞌoxonu pekiaꞌa ta vivilo latala noxou Tila sou miaꞌaloxu vaikala noxou Lataua. Aneꞌi miaꞌalo la iꞌume uasi, ia mitulu pekiaꞌa. \p \v 15 Ia anu manina xo seꞌi iaꞌaloxu Kalisito ualasou ia aneꞌi oponeꞌi masuailo, mo iꞌoxonu sou lexe iuaulixo no anu, xe seꞌi iaꞌalo no anu xavutala laixe. \v 16 Aneꞌi ane iaꞌalo no anu xavutala laixe iꞌoxo aloxo ne xo aneꞌi taneꞌixo mo milavusou lexe Lataua mumulaxo lexe sou aꞌoxonu latolosou aꞌalo laixe noxou Iesu. \v 17 Ia aneꞌi ane iaꞌaloxu Kalisito ualasou no anu opo masua ne, iꞌoxo aloxo xo aneꞌi mimasaxa lexe ualasiꞌa uxali tila noxilo la iꞌoxonu xaixai laixe uasi. Mo mimasaxa lexe aneꞌi iꞌoxonu tuꞌutuꞌumaxu uneꞌe noxilo no mine eni axoxolu no anu sakisaki ꞌo. \v 18 Ta mitema iaꞌaloxu Kalisito ualasou no anu xavutala iouiou. Seꞌi iaꞌalo no anu xavutala masua xe seꞌi no anu xavutala laixe. Ia anu mii vile uasi! Ia mii tila noxilo ne aloxo ꞌo. Eni emasaxa lexe ta mitema ilomusou aꞌalosou Kalisito ꞌosi. Tavaꞌu aloxo ne, la eni aꞌosa. Ani, eni aꞌosaꞌosa utotomu aloxo ne. \p \v 19 \x + \xo 1:19 \xt 2Ko 1:11\x*Xo eni elavu lexe no anu lakilaka noxinge mo suꞌuli noxou Uleenu Tavuna noxou Iesu Kalisito, la anu usuꞌuli sou upamaulileli. \v 20 La sou eni emasaxa manina mo eloopala lexe eni umomomo sou amaela no anu mii vile uasi. Ia axolu pekiaꞌilo mo sou eni aꞌitinu Kalisito ualasou vaimomo ꞌo mo utotomu no anu mii maꞌia ane eni aꞌoxonu mo alemolu. Mo eni aꞌitinu ualasou no mine eni amauli xe no mine eni asoli. \v 21 \x + \xo 1:21 \xt Xal 2:20\x*Xo eni maulixo ne, noxou Kalisito ꞌosi xe eni asoli la anu mii laixe manina. \v 22 Ia lexe eni amauli no lia ꞌo, la eni amomomo sou asolonu xaixai noxilo mo asuꞌulineꞌi ta mitema tavuꞌalo inoꞌu Kalisito no anu maulixaꞌa. Ia eni asosovosou voteꞌi anevaa? Eni alavusou uasi! \v 23 \x + \xo 1:23 \xt 2Ko 5:8\x*La sou mii ta tamei ne muatasilo manina. Ia masaxa tila noxilo ne lexe eni alaisi mo axolu noxou Kalisito. La mii ane ne, anu laixe manina musuku. \v 24 Ia, xo noxingesi la anu mii tatila lexe eni amauli no lia ꞌo. \v 25 Eni elavu manina aloxo ne, la sou eni elavusou lexe eni axolu mo nenge nengeꞌa taxolu mo tasolonu xaixai mo sou ngingi ngamulaxu tangengi pekiaꞌu musuku noxou Iesu mo ngaꞌosa manina. \v 26 No mine eni aneꞌe noxinge la, la ngingi ngatoxoleli manina noxou Kalisito Iesu. \p \v 27 \x + \xo 1:27 \xt Ep 4:1; 1Te 2:12\x*Ioxe, eni avikalangengixu mii vile tatila aloxo ꞌo. Ngamomosou muamuaꞌingenge mo maulingenge umomomo no anu aꞌalo laixe noxou Kalisito. Xe no mine eni aneꞌe mo amaisinge, mo no mine eni axolu vaꞌaxu ia alomusou aꞌalosinge, la eni alavusou lexe ngingi opongengi vilesisi. Mo ngetulu pekiaꞌinge xe xavutalamengi vilesisi mo ngetulu ngepita sou ngexaxaisou aꞌalo laixe sou Iesu sou ta mitema imulaxu taneꞌi no anu. \v 28 Mo eni elavusou lexe ngingi ngaꞌumeꞌa aneꞌi ane ilea anaxaꞌa uneꞌe noxinge uasi. Ngingi ngamaisou aloxo ne, la anu sosovo lexe Lataua ukalusiꞌa, ia Anu upamaulingengi. Mii ane ne anu molu noxousi. \v 29 \x + \xo 1:29 \xt Apo 16:19-40\x*Xo Anu mualaunasinge mo mupelemasaxangengi lexe ngingi ngamuxaxu tangengi noxou Kalisito la nganoꞌu navunavusou kalumo. \v 30 La sou vaimomo ꞌo, ngingi ngexalisou tuꞌutuꞌumaxu iouvilesisi aloxo ngingi ngemaisou muxali noxilo tei mo ngelomusilo lexe mii ane ne ꞌa uxoxolu noxilo sio. \c 2 \s1 Iesu Mutaloxolixu La sou Laixe Lexe Nenge Kalumo Tataloxolinenge \p \v 1 Aloxo ne, la sou eni ataliꞌisinge aloxo ꞌo. Maulingenge noxou Kalisito ne, muꞌoxonu xavutalamengi pekiaꞌu? Mo tanutanuxu noxou muxolixolingengi? Mo ngingi ngongiꞌa Uleenu Tavuna ngexolu ngepita? Xe ngingi ngamasaxaiꞌa mo tangengixaꞌa ta menexinge? \v 2 Lexe ngingi ngakolileli laixe, la eni avikalangengi aloxo ꞌo. Ngingi xavutalamengi vilesisi mo ngingi tangengixaꞌa ta menexinge no ꞌa opo ilou xavutala vilesisi. Ngingi ngaꞌoxonu aloxo ne, la eni aꞌosa manina. \v 3 \x + \xo 2:3 \xt Xal 5:26\x*Mo eni avikalangengi la aloxo ꞌo. Lexe ngingi ngaꞌoxonu mii maꞌia, la mamu sou ngaxavutalangengisi mo ngaꞌoxonu sou aneꞌi iꞌitinu ualasingesi, ia ngataloxolingenge mo ngamaisiꞌa ta menexinge loxo aneꞌi teitexi noxinge. \v 4 \x + \xo 2:4 \xt 1Ko 10:24\x*Mamu sou ngingi ngaxavutalanu mimemimengisi mo maulignengesi. Ia ngaxavutalanu ta menexinge miꞌamiꞌa mo maulixaꞌa kalumo. \p \v 5 La sou ngingi nganoꞌu xavutala laixe aloxo noxou Kalisito Iesu. \p \v 6 \x + \xo 2:6 \xt Ioa 1:1-2; 17:5\x*Anu Lataua manina, ia uxavutala lexe Anu Lataua mo utetelisou xavi noxou Lataua uasi. \p \v 7 \x + \xo 2:7 \xt Ioa 1:14; 2Ko 8:9\x*Ia Anu muxolu vitanisi loxo itema sou xaixaisi noxou Lataua mo muxali loxo nenge ta mitema ꞌosi. \p \v 8 \x + \xo 2:8 \xt Eva 5:8; 12:2\x*Mo ta mitema mimaisou loxo itema. Ia Anu mutaloxolixu mo mumulinu masaxa nouxou Momu mulai mutalo no anu soli noxou no mine mililixu teitexi no ovu valautu. \p \v 9 \x + \xo 2:9 \xt Apo 2:33; Ep 1:20-21; Eva 1:3-4\x*Xo Anu muꞌoxonu aloxo ne la sou Lataua mutelailixu muxolu teitexi manina, mo mulosou uala ane mutila no anu uala tavuꞌalo mukalusi, \m \v 10 \x + \xo 2:10 \xt Rom 14:11\x*mo sou no anu uala noxou Iesu ne, la ta mitema xe ta mimii latala ukalusi teitexi no opo loxotolo, mo no lia ꞌo, mo no tuala noxiꞌa aneꞌi ane misoisoli ixolaꞌu tavaꞌa sou ilotu noxou. \p \v 11 \x + \xo 2:11 \xt Rom 10:9\x*Mo ta mitema latala ukalusi ipalaꞌalixu Iesu Kalisito lamana no ꞌa anaxaꞌa lexe, “Anu Tila.” La sou aneꞌi iꞌitinu Lataua Maminge ualasou. \s1 Ngakaakaa loxo ta Oto \p \v 12 La sou ta menexilo e eni emasaxainge misevile. Aloxo ngelomuxo utotomu no mine nenge nengeꞌa texolu mo ngalomuxo lailaixe no mine eni eꞌumesinge ꞌo, ngasolonu ngaxaxaisou mauli ane kaluxu uasi e ngenoꞌu mukalu. Ngaxaxaisou mauli ane ne, la ngaꞌume mo ngamamaꞌu. \v 13 Xo Lataua anu muxolu noxinge mo uxaxaisinge sou ngaꞌosasou ngamulinu masaxa noxou mo ngaꞌoxonu xaixai ane anu mumasaxa lexe ngingi ngaꞌoxonu. \p \v 14 Mo ngaꞌoxonu xaixai mii maꞌia, la mamu sou ngakalakalapu piena mo ngaꞌotosou anangengesou. \v 15 \x + \xo 2:15 \xt Tan 12:3; Pil 1:10; 1Te 2:19\x*Mo sou ngingi ngaxali ta mitema ane imaisou susu vile noxinge la ivikala piena no anu uasi. Mo ngaxali Lataua ta ꞌolu ane susu vile uxolu noxinge uasi no taiineꞌi ta mitema ane ta masumasua mo xavutalaneꞌi masumasua. Ngaxolu no taiineꞌi, la ngakaakaa loxo ta oto. \v 16 Mo ngatetelisou vaikala sou mauli pekiaꞌu. Ngaꞌoxo aloxo ne, la eni aꞌitinu ualasinge no voxo ane Kalisito ulivu uneꞌe. Xo anu umaxaꞌu lexe xavileli mo xaixai noxilo ne, mii vitanisi uasi. \v 17 Ngingi ngemulaxu tangengi noxou Iesu, la sou ngaꞌoxoꞌoxonu xaixai ulai noxou Lataua. Ia lexe eni asoli mo sialuxo unixi no anu xaixai ne la loxo aneꞌi inixiꞌu uaini loxo iaiama noxilo ulai noxou Lataua, la eni aꞌosa mo nenge nengeꞌa taꞌosasi. \v 18 \x + \xo 2:18 \xt Pil 3:1; 4:4\x*La sou laixe lexe ngingi kalumo ne, nenge nengeꞌa taꞌosa. \s1 Timoti Ilou Epapulotitosi \p \v 19 Ia eni emasaxa manina lexe eni ꞌalaꞌalai sou apalusou Timoti ulai noxinge lexe Tila Iesu uvikalaleli, la sou eni kalumo aꞌosa no mine alomusou aꞌalosinge noxou. \v 20 Xo eni axalisou itema vile ane mulavusou masaxa noxilo loxo anu Timoti ꞌo uasi. Anu uxavutalangengi loxo eni axavutalangengi. \v 21 \x + \xo 2:21 \xt 2Ti 4:10\x*Xo ta mitema ukalusi ne ixavutalanu mii noxiꞌasi ia ixavutalanu mii noxou Iesu Kalisito uasi. \v 22 Ia ngingi ngelavusou lexe Timoti muꞌoxonu xaixai laixe noxou. Mo nexi noxou tapita taxaxaisou aꞌalo laixe noxou Iesu loxo itema vile ilou ꞌolu. \v 23 La sou eni emasaxa manina lexe eni apasipaa apalusou no voxo ane eni elavusou lexe mii maꞌia uxali noxilo. \v 24 Mo elavusou manina lexe eni kalumo ꞌalaꞌalai sou aneꞌe noxinge lexe Tila uvikalaleli. \p \v 25 \x + \xo 2:25 \xt Pil 4:18\x*Ia eni exavutala lexe eni apalusou Epapulotitosi ulivu ulai noxinge. Anu vivilo noxou Iesu, mo noxou texaxai tepita, xe anu mutulu no paꞌumelo loxo itema sou ꞌotoꞌoto. Mo anu kalumo itema sou unoꞌu vaikala ulai noxinge ane ngepalusou muneꞌe sou usuꞌulileli no anu mii maꞌia ane eni emasaxau. \v 26 Eni apalusou ulivu, xo anu tanu uꞌoxongenge ngingi latala mo umasaxa umaisinge la, la opo tuꞌumaxu. Xo ngingi ngelomusou lexe anu pipiena muꞌoxonu. \v 27 Anu mupipiena ne, manina mo sexasisi sou usoli, ia uasi. Xo Lataua mualaunasou. Ia Anu ualaunasousi uasi, Anu mualaunasilo kalumo sou musuꞌulileli la eni axamulinu tuꞌutuꞌumaxu malaxo loxo tei uasi. \v 28 Aloxo ne, la sou eni apasipaa mo apalusou ulai noxinge. Mo sou ngingi ngamaisou la, la ngaꞌosa. Xe eni kalumo opoleli uai seꞌisisi sevile. \v 29 Anu ulai uxali noxinge, la ngingi ngasexelaxu mo ngaꞌosasou manina loxo ta mitema noxou Tila iꞌosasiꞌa mo ngataxaneꞌi ta mitema aloxo anu ne. \v 30 Xo ꞌalaꞌalaisi, la anu usoli no anu xaixai noxou Kalisito ia uxavutalanu maulixu uasi. Ia anu muꞌoxonu aloxo ne noxilo sou munoꞌu taningenge. Xo ngingi ngaꞌoxonu noxilo uasi. \c 3 \s1 ꞌIlixo Mulapu Maninasou \p \v 1 Ioxe, ta vivilo noxou Iesu. Eni avikalangengi aloxo ꞌo. Ngaꞌosa noxou Tila! Vaivaikala ano ꞌo, ngingi ngelomusou ia eni atotosa sou akaukavunu la uasi, xo anu sou usuꞌulingengi. \p \v 2 Ngingi ngasaxilaꞌinge laixe noxiꞌa ta mitema loxo ta aꞌaa mo ngasaxilaꞌinge noxiꞌa aneꞌi ane iꞌoxoꞌoxonu ꞌiliꞌilixo masumasua iloꞌa aneꞌi ane ikalavoi sou ixotoxotosou vasimeꞌasi. \v 3 \x + \xo 3:3 \xt Rom 2:29\x*Ia nengesi xooxoo mungaasinge manina. Xo nenge talotu noxou Lataua no anu Uleenu, mo nenge taꞌitinu Kalisito Iesu ualasou xe nenge tamulaxu tanenge no anu mii maꞌia ane nenge taꞌoxonu uasi. \v 4 \x + \xo 3:4 \xt Apo 22:3\x*Ia eni amulaxu taleli no anu mii maꞌia ane eni aꞌoxonu. Ia mimii tavuꞌalo no lia ꞌo a uxolu sou amulaxu taleli no anu. \p Ia lexe evile uxavutala lexe mimii seꞌi a uxolu sou anu umulaxu tanu no anu, la anu umomomo noxilo uasi. Xo noxilo ne, tavuꞌalo manina. \v 5 \x + \xo 3:5 \xt Luk 1:59; Apo 23:6; 2Ko 11:22\x*Vile aloxo ꞌo. Nenilo mivoꞌoleli xe voxo muxatele tatalusou, la xooxoo mungaasilo. Mo tameisou aloxo ꞌo. Eni itema Isilaeli no anu mata Beniamini xe eni Evalaio maninasou. Eni Palisaio vile mo emulimulinu lapuloto noxou Mosesi mukalusi. \v 6 \x + \xo 3:6 \xt Apo 8:3\x*Xe eni emasaxau Lataua misevile la exaxai pekiaꞌu, sou eꞌoxo masuaneꞌi ta mitema ilalotu noxou Iesu mo evile uxalisou susu vile noxilo no anu lapuloto noxou Mosesi uasisi. \p \v 7 \x + \xo 3:7 \xt Mat 13:44-46\x*Ia eni ekalavoi lexe mimii ane ne toxoxaꞌa musuku noxilo, ia uasi. Vaimomo ꞌo eni elavu lexe mimii ne anu mii vitanisi noxou Kalisito. \v 8 Mimii ane nesi uasi ia mimii latala mukalusi ne, eni elavusou lexe anu kalumo mii vitanisi. Xo eni elavusou mii maꞌia ane toxoxaꞌa musuku no mine eni elavusou lexe Kalisito Iesu anu Tila noxilo. Noxousi, la eni esuꞌanu mimii ane ne mukalu. Xo eni elavusou lexe mimii ane ne mii vitanisi loxo mosomoso. La sou eni esuꞌanu, mo sou anoꞌu Kalisito, \v 9 \x + \xo 3:9 \xt Rom 3:21-22\x*mo sou nexi noxou taxolu tapita. La Lataua umoxoꞌilo lexe eni itema mulapu, xo xavileli sou emulimulinu lapuloto noxou Mosesi uasi, ia eni emulaxu taleli noxou Kalisito la sou Lataua mumoxoꞌilo lexe eni itema mulapu. \v 10 \x + \xo 3:10 \xt Rom 6:3-5; 8:17\x*Mo eni emasaxa lexe alavusou Kalisito mo xavi no anu tulu noxou no anu soli xe nexi noxou tapita tanoꞌu tuꞌutuꞌumaxu vilesisi mo eni asoli loxo Anu musoli. \v 11 Mo eni eloopala manina lexe eni kalumo atulu no anu soli. \s1 Paulo Xaviinu sou Ukalusou Saisale Noxou \p \v 12 \x + \xo 3:12 \xt 1Ti 6:12, 19\x*Ia eni avikala lexe anoꞌu mii ane ne uao. Mo eni axali itema laixe manina uao. Ia eni xavileli sou anoꞌu mii ane ne ane Kalisito Iesu musosovosilo lexe eni anoꞌu. \v 13 La sou ta vivilo noxou Iesu. Eni ne, melo axavutala lexe anoꞌu ukalusi uasi, ia mii vilesisi eni aꞌoxonu. Eni talelivulusiou mii maꞌia ane iliꞌi no tumalilo ia ieli uuli mo aꞌatusilo sou anoꞌu mii maꞌia ane uai no talaxosi. \v 14 \x + \xo 3:14 \xt 1Ko 9:24\x*Mo eni xavileli sou alai axali no anu sou anoꞌu lakolisou iave. Lakolisou iave ne, Lataua musosovosilo sou nexi noxou taxolu teitexi loxo Kalisito Iesu muxolu noxilo. \p \v 15 \x + \xo 3:15 \xt 1Ko 2:6\x*La sou nenge latala ane xavutalamenge muxali pekiaꞌu manina, la taxavutala loxo eni elemolu ne. Mo lexe seꞌi xavutalaiꞌa vilemo la Lataua ulamanalixu no anu xavutalaiꞌa. \v 16 Ia mii tila manina ne aloxo ꞌo. No anu xoluxolu ilou muamuaꞌinenge, la tamuli xoluxolu aloxo nenge tenoꞌu tei ne. \p \v 17 \x + \xo 3:17 \xt 1Ko 4:16\x*Ta vivilo noxou Iesu, ngingi ngapita mo ngamulileli no anu mii maꞌia ane eni aꞌoxoꞌoxonu. Mo ngamalei laixe noxiꞌa aneꞌi ane imulimulinexi. \v 18 Xo ta mitema tavuꞌalo iulua no anu soli noxou Kalisito no ovu valautu loxo eni evikalangengixu lalalaxu tei. Mo vaimomo ꞌo kalumo atamasiꞌa, la avikalangengixu la. \v 19 \x + \xo 3:19 \xt Rom 16:18\x*Aneꞌi ta mitema ane loxo ne, iliꞌi la iulua no ꞌa navu. Mo masaxa sou vasimeꞌa ne muxali tila noxiꞌa. Mo aneꞌi iꞌitinu ualasiꞌa no anu mii maꞌia ane aneꞌi iꞌoxoꞌoxonu. Ia iliꞌi la imaela. Xo xavutalaiꞌa ne, muꞌanaꞌana no anu mimii sou no lia ꞌosi. \v 20 \x + \xo 3:20 \xt Ep 2:6, 19\x*Ia nenge ne tualasinge no lia ꞌo uasi, tualasinge manina ꞌa uxolu teitexi no opo loxotolo. Nenge taxolu taxomaiou itema sou pamauli teitexi molu no opo loxotolo uneꞌe, Anu Tila Iesu Kalisito. \v 21 \x + \xo 3:21 \xt 1Ko 15:28, 42-53\x*Anu ne, xaviinu musuku la umomomo sou usaxilaꞌu mimii latala ukalusi. La sou no anu xavi ane ne, Anu uxiunu vasimenge ane usoli xe uꞌui la uxali lailaixe manina loxo anu noxou. \c 4 \p \v 1 \x + \xo 4:1 \xt 1Te 2:19-20\x*La sou ta vivilo noxou Iesu e emasaxainge musuku. Ngingi ngatulu pekiaꞌinge noxou Tila aloxo eni evikalangengixu. Eni talelingenge mo amasaxainge lexe amaisinge la. Xo ngingi ngeꞌoxoleli eꞌosa. Ngingi ta menexilo ane amasaxainge misevile! Noxingesi la anu loxo kisivalu noxilo. \s1 Peletoto Noxou Paulo \p \v 2 Ioxe, eni avikala pekiaꞌu ulai noxiꞌa Euotia ilee Suntoke lexe oponeꞌi uxali vilesisi noxou Tila. \v 3 \x + \xo 4:3 \xt Luk 10:20\x*Ani, eni alingaine nini menexilo manina e nengei texaxai tepita lexe nini nasuꞌulineꞌi ta sema ta tamei ne. Xo aneꞌi ilou iloꞌa Kulemeni mo ta menexilo mukalusi mitulu no paꞌumelo sou noxiꞌa teaꞌaloxu aꞌalo laixe noxou Iesu. Aneꞌi ualasiꞌa ne, mikaukavunu mo muai no lavuku sou mauli. \p \v 4 Ngingi ngaꞌosa noxou Tila no voxovoxo utotomu. Mo eni avika-langengi la lexe ngaꞌosa. \p \v 5 \x + \xo 4:5 \xt Eva 10:25; Iak 5:8-9\x*Ngaxolu seꞌisisi mo ta mitema imaisou ꞌilixo ane laixe noxiꞌa. Xo anu ꞌalaꞌalai sou Tila ulivu uneꞌe. \v 6 \x + \xo 4:6 \xt Mat 6:25-34; Kol 4:2\x*Xavutalamengi utulu no anu mimii tavuꞌalo mamu. Ia ngaxolu seꞌisisi mo ngakilaka xe ngalingau mimii latala e ngingi ngemasaxau noxou Lataua. Mo utotomu ne ngalemo laixe noxou. \v 7 \x + \xo 4:7 \xt Ais 26:3; Ioa 14:27; Kol 3:15\x*Xo opo seꞌisisi noxou Lataua anu tatila musuku. Nenge umomomo sou talamana no anu uasi. Xo tamulaxu tanenge ilou xavutalamenge ulai noxou Kalisito Iesusi. \p \v 8 Ta vivilo noxou Iesu, vaikala kaluxusou noxilo aloxo ꞌo. Ngaxavutalanu mimii ane maninasou. Mo ꞌiliꞌilixo ane laixesi noxou Lataua. Mo ngaxavutalanu mimii ane mulapu, mo ane malemalenga, mo mimii ane iꞌosasingexu, xe ane itaxangengi no anu mo iꞌitingengi no anu mo mii aneꞌi imasaxau musuku. \v 9 \x + \xo 4:9 \xt Rom 16:20\x*Ngaꞌoxonu mii maꞌia ane ngenoꞌu lavulavu no anu mo ngenoꞌu noxilo mo maꞌia ngelomusou eni evikalangengixu, xe maꞌia ane ngemaisilo eꞌoxonu. La ngaꞌoxonu ꞌilixo ane ne maninasou. Mo sou Lataua e mulosinge opo seꞌisisi ne uxolu noxinge. \s1 Paulo Mulemolu Laixe no Anu Suꞌuli \p \v 10 Eni aꞌosa misevile noxou Tila xo ngingi ngemaxaꞌu tanengi muneꞌe noxilo. Mo ngingi ngesolonu sou ngesaxilailo. Ia voteꞌi vile sou ngamaxaꞌu uasi tei. \v 11 Eni avikalangengixu mii maꞌia ne xo anu loxo eni no nano no ꞌa ane ne uasi. Eni enoꞌu lavulavu sou no anu mimii ane noxilo mo mimii tavuꞌalo ane muxali. \v 12 Eni elavusou lexe axolu a loxovaa no voxo ane eni xeni mimii uasi. Mo elavusou lexe axolu a loxovaa no mine xeni mimii tavuꞌalo. Mo elavusou lexe axolu a loxovaa no mine xenixo ꞌani tavuꞌalo xe no mine asolixo. Xe elavusou lexe axolu a loxovaa no voxo sou eni xeni mimii muꞌoki xe eni xeni mimii uasisi manina. La eni enoꞌu lavulavu no anu mii ane uxali no anu maulixo ne. \v 13 \x + \xo 4:13 \xt 2Ko 12:10\x*Xo eni amomomo sou aꞌoxonu mimii latala no anu xavi noxou Kalisito ane Anu mulosilo. \p \v 14 Ia anu laixe lexe ngingi ngasuꞌulileli no anu tuꞌutuꞌumaxu noxilo. \v 15 \x + \xo 4:15 \xt 2Ko 11:9\x*Ngingi ta Pilipai, ngaxavutalanu voxo ane eni esokou sou eaꞌaloxu aꞌalo laixe noxou Iesu. No voxo ane eni eꞌumesie Makedonia la ngingisi ta mitema ilotu noxou Iesu ne, ane ngesuꞌulileli mo ngekolileli. Ia lalotu ukalusi isuꞌulileli sou ukolileli uasi. \v 16 No voxo ane eni exolu ne Tesalonika, la ngingi ngesovanu mimii ane eni emasaxau muneꞌe noxilo alaxu moseꞌi mo. \v 17 Anu manina, ia eni amasaxa sou anoꞌu mimii ane lexe ngalosilo ne uasi. Ia amasaxainge lexe ngaꞌoxonu lakolisou noxou Lataua utelo no latanu ꞌiliꞌilixo laixe. \v 18 La sou vaimomo ꞌo eni enoꞌu mimii latala moseꞌi la. Ia vaimomo ꞌo eni enoꞌu mimii latala ane eni emasaxau. Xo Epapulotitosi musaxanu mii maꞌia lexe ngalosilo ne anu munoꞌu muneꞌe noxilo. Anu aloxo iaiama ane tumaꞌu lailaixe mielaxu mulai noxou Lataua. Anu mumasaxau mo opoo muꞌosasou. \v 19 Lataua noxilo uxaxai no anu lavuluti lailaixe noxou Kalisito Iesu sou ulosinge ta mitema noxou mimii latala umomosinge ane ngingi ngamasaxau. \v 20 Taꞌitinu Lataua Maminge ualasou utotomu mo kaluxu uasi. Manina. \s1 Vaikala sou Sexela Noxou Paulo Kaluxusou \p \v 21 Ngasexelaxaꞌa ta mitema latala noxou Lataua no ualasou Kalisito Iesu. Ia aneꞌi ta vivinge noxou Iesu ane nexi noxiꞌa texolu ꞌo misovanu sexela noxiꞌa ulai noxinge kalumo. \v 22 Mo ta mitema latala noxou Lataua mo aneꞌi ane mixolu no nano no tani tila noxou Kaisari\f + \fr 4:22 \ft Namaisou ualauala laalaaxu.\f* lai ꞌo misova sexela muꞌoki noxiꞌa ulai noxinge. \v 23 Alauna mo saxisaxilaꞌu noxou Tila Iesu Kalisito uxolu noxinge. Manina.