\id EPH  - Pele-Ata Genesis, Jonah and New Testament [ata] -Papua New Guinea 2009 (DBL -2014) 
\h EPESO 
\toc1 Uoli Voloxu Ane Paulo Mukaukavu Mulai Noxiꞌa Ta Epeso 
\toc2 Epeso 
\toc3 Ep 
\mt2 UOLI VOLOXU ANE PAULO MUKAUKAVU MULAI NOXIꞌA  
\mt1 TA EPESO  
\imt1 Vaikala lamana  
\ip Paulo mukaukavu uoli voloxu ane ꞌo mulai noxiꞌa ta Epeso, xo umasaxa sou ulamanalixaꞌa aloxo ꞌo. Xavutala noxou Lataua ne lexe upitanu mimii teitexi no opo loxotolo mo mimii no lialia ꞌo ne uxolu no laaxu Kalisito mo Anu uxolu kisou mimii ne ukalusi (1:10). La sou Lataua mumasaxa lexe uavutinoxu ta mitema noxou sou ipita ixolu noxou Kalisito mo ixali vilesisi.  
\ip Paulo musokou vaivaikala noxou la mulamanalixu vaikala kisou lexe Lataua musosovosiꞌa ta mitema noxou la mupitaneꞌi no anu voteꞌi a loxovaa. Anu mulamanalixu lexe no anu tanutanuxu noxou Lataua, la muꞌoxoneꞌi mixali vilesisi. No anu xaixai noxou Iesu la Lataua mululusou susu noxiꞌa, xe mulivulixaꞌa no anu sakisaki sou susu. Mo Anu mulosiꞌa Uleenu Tavuna loxo Anu sosovo noxou sou uꞌoxonu mimii lalaixe loxo Anu musakiinu vaikalasou tei (1:14). Xe tameisou la Paulo muvikala lexe ta mitema ane iloꞌa Kalisito mipita ne ipita ixali vilesisi no anu maulixaꞌa. No anu viavaikala noxou Paulo la anu muꞌoxonu vaikala tovolaꞌi moseꞌi sou ulamanalixaꞌa ta mitema noxou Lataua lexe aneꞌi mipita noxou Iesu la aneꞌi mixali vilesisi. Anu muꞌoxo lexe ta temanu lalotu ne loxo itema vasimolu ia Kalisito anu muxali kisou (4:1). Mo mutovolaꞌinu vile lexe aloxo tani, ia Iesu anu loxo atolaxu tani (2:19-22). Xe aloxo sema ilou mulu mitaulaꞌi, la Iesu aloxo sema mulue (5:22-32). No anu uoli voloxu ane ꞌo la nenge tamomomo sou tamaisou lamana mii maꞌia lailaixe Lataua muꞌoxonu mulai noxiꞌa ta mitema noxou.  
\iot Aꞌalo muai no nano aloxo ꞌo  
\io1 Vaikala lamana 1:1-2  
\io1 Kalisito anu kisou mimii mukalusi 1:3-14  
\io1 Lakilaka noxou Paulo 1:15-23  
\io1 Noxou Kalisitosi la nenge temauli 2:1–3:21  
\io1 ꞌIlixo sou lalotu maninasou 4:1–6:20  
\io1 Vaikala sou sexela xe lakilaka 6:21-24  
\c 1  
\p
\v 1 \x + \xo 1:1 \xt Apo 18:19-21; 19:1\x*Eni Paulo aposeli noxou Kalisito Iesu no anu masaxa noxou Lataua mupalusilo sou akaukavunu vaivaikala ane ꞌo ulai noxinge ngingi ta mitema noxou Lataua, mo ngingi ane ngemuxaxu tangengi noxou Kalisito Iesu ne Epeso.  
\v 2 Eni akilaka lexe alauna mo opo seꞌisisi noxou Lataua Maminge mo Tila Iesu Kalisito uxolu noxinge.   
\s1 Alualu Noxou Kalisito Muneꞌe Noxinge  
\p
\v 3 \x + \xo 1:3 \xt Ep 2:6\x*Taꞌitinu Lataua ualasou anu Tila noxinge Iesu Kalisito Momu. Noxou Kalisito la sou Anu mualusinge no anu mii lailaixe teitexi no opo loxotolo sou usuꞌuli uleenenge.  
\v 4 \x + \xo 1:4 \xt Ioa 15:16\x*Xo no mine Anu ukoinu mimii uao la, Anu musosovosinge. Mo no iou Lataua la nenge malemalenga mo ta noxou la, ta mitema ixalisou susu vile noxinge uasi.  
\v 5 \x + \xo 1:5 \xt Ioa 1:12\x*No anu tanutanuxu noxou Lataua la Anu xavutalau lexe, noxou Iesu Kalisito la Anu umoxoꞌinge lexe nenge taxali loxo anu ta ꞌolu. Anu tanu mo masaxa tatila noxou aloxo ne.  
\v 6 La sou nenge taꞌitinu Lataua ualasou no anu alauna lailaixe ane Anu mulosinge vitanisi muxolu noxou Iesu anu ane Anu tanuxu musuku.  
\v 7 \x + \xo 1:7 \xt Ep 2:7; Kol 1:14\x*Alauna tatila muꞌanaꞌana noxou Lataua la munoꞌu ꞌulusinge no anu sialuxu Iesu. La sou Anu mululusou susu noxinge no anu alauna noxou.  
\v 8 No anu alauna noxou la Anu muꞌanaꞌanalinenge no anu xavutala laixe mo lavulavu lailaixe.  
\v 9 \x + \xo 1:9 \xt Rom 16:25\x*Mo Anu mumolo tanuou mii maiꞌa ane lexe Anu uꞌoxonu no anu xaixai naxou Kalisito. Ia xavutalau ne tei la mutalume, ia vaimomo ꞌo Anu mulosiengexu xavutala noxou ne. Anu uꞌoxonu manina sou ne.  
\v 10 \x + \xo 1:10 \xt Kol 1:16, 20\x*Xavutala ne aloxo ꞌo, xavutalau ne. Mo voxo ulai ukalu la Anu mupitanu mimii latala teitexi no opo loxotolo mo no lia ꞌo mukalusi ne muxolu loxo kisiꞌa Kalisito.   
\p
\v 11 \x + \xo 1:11 \xt Rom 8:28-29\x*Mo noxou Kalisito la sou Anu xavutala mo masaxa noxou anu ane muꞌoxonu mimii latala mukalusi ne musosovosixe lexe nexi ta naꞌu maninasou.  
\v 12 Anu musosovosixe ta Iutaiasi tei, xo nexi teloopala noxou Kalisito. La sou nexi taꞌitinu Lataua no anu alauna lailaixe noxou ne.  
\v 13 Mo ngingi kalumo ngelomusou vaikala manina noxou Kalisito. La sou ngexali ngexolu noxou la anu aꞌalo lailaixe sou Lataua mupamaulingengi. Mo ngemuxaxu tangengi noxou Kalisito la sou mumomomo sou vaikala noxou Lataua e musakii tei lexe umulaxu sosovo vile noxinge. Sosovo noxou ne ane Uleenu Tavuna noxou.  
\v 14 \x + \xo 1:14 \xt 2Ko 1:22\x*Nenge tenoꞌu Uleenu Tavuna la sou nenge tamomomo sou tanoꞌu mimii lailaixe teitexi no opo loxotolo ane Lataua mulalaxiinu sou ulosiꞌa tamitema noxou. La sou nenge taꞌitinu ualasou no anu alauna noxou singe.   
\s1 Lakilaka Noxou Paulo  
\p
\v 15 Aloxo ne la sou no mine eni elomusinge lexe ngingi ngemuxaxu tangengi noxou Tila Iesu mo ngingi tangengixaꞌa ta mitema noxou Lataua.  
\v 16 La sou eni axavutalangengi no anu lakilaka noxilo mo alemolu laixe noxou Lataua utotomu.  
\v 17 \x + \xo 1:17 \xt Kol 1:9\x*Mo utotomu ne eni akilaka ulai noxou Lataua e Tila noxinge Iesu Kalisito. Anu Maminge xavi musuku lexe ulosinge Uleenu sou ulosinge xavutala lailaixe, mo ngalavusou Lataua laixe, xe upalapalaꞌalixu laaxu vaivaikala noxou ane mutalume.  
\v 18 Mo eni akilaka kalumo lexe ukisiinu xavutalamengi mo sou xavutalamengi ulamana no anu mii maꞌia ane anu muꞌavalinge la ngingi ngeloopala no anu, mo ngalavusou laixe lexe lavuluti lailaixe ne Lataua ulosiꞌa ta mitema noxou.  
\v 19 \x + \xo 1:19 \xt Kol 1:11\x*Mo eni akilaka lexe nenge ta mitema ane tamuxaxu tanenge noxou ne, talavusou xavi noxou Lataua a uxolu noxinge. Xavi noxou Lataua e uxaxai noxinge ne anu uxaxai la xavi musuku umomomo sou tatilovo sou uasi.  
\v 20 \x + \xo 1:20 \xt Lex 110:1; 2Ko 13:4; Kol 2:12\x*Xe no mine musoli la no anu xavi noxou Latauasi la mutulusou. No anu xavi ano ꞌo la Lataua mulaixu sou muxolu no avolu tema teitexi no opo loxotolo.  
\v 21 \x + \xo 1:21 \xt Kol 1:16; 2:10\x*La Anu muxolu kisiꞌa ta uleenu ane mixolu teitexi no opo loxotolo, mo muxolu kisiꞌa ta mitema e iulaxuneꞌi ta mitema no lia ꞌo mo ta tatila no lia ukalusi ꞌo xe ta uleenu ane xavineꞌi musuku kalumo. Anu munoꞌu uala tila manina. Uala tila ne sou vaimomo ꞌosi uasi, sou ꞌiliꞌi kalumo.  
\v 22 \x + \xo 1:22 \xt Lex 8:6\x*Mo Lataua mumuxaxu mimii latala muxolu no laaxu mo musosovo sou lexe Anu uxolu kisou mimii latala ukalusi, mo uxolu kisou noxiꞌa ta mitema ilotu noxou Iesu.  
\v 23 \x + \xo 1:23 \xt Rom 12:5; Ep 4:10, 15; Kol 1:18\x*Lalotu ne anu Kalisito vasimolu. Anu muxolu mo muꞌanaꞌana no anu mimii latala mukalusi mo muꞌanaꞌana no anu lalotu noxou.   
\c 2  
\s1 Nenge Tesoisoli Ia Kalisito Mutulusinge  
\p
\v 1 \x + \xo 2:1 \xt Kol 1:21; 2:13\x*Ngingi tei la ngeꞌoxoꞌoxonu ꞌiliꞌilixo masumasua mo susu la muvau ulengengi musoisoli.  
\v 2 \x + \xo 2:2 \xt Kol 3:7; Tit 3:3\x*No mine ngingi ngemulimulinu xoluxolu mo muamuaꞌi masumasua sou lialia ꞌo, mo ngemulinu ꞌilixo noxou kisiꞌa ta uleenu ta masumasua e musaxilaꞌu la vaꞌa vitanisi teitexi no loxotolo. Anu uleenu ne ane uxolu uxaxai no nano no anu maulixaꞌa ta mitema ane moseꞌi ilolomu uasi vaimomo ꞌo.  
\v 3 \x + \xo 2:3 \xt Kol 3:6\x*Nenge nengeꞌa tei la texolu no taineꞌi mo xavutalamenge muavuti la temulimulinu masaxa masua sou vasimenge sou umomomo sou masaxa no anu vasimenge. Nenge teꞌoxonu aloxo ne, la nenge kalumo texo no nano no anu laꞌia noxou Lataua ane Anu mulalaxiinu sou ulosiꞌa ta mitema ukalusi ane moseꞌi imulimulinu ꞌiliꞌilixo ane ne.  
\v 4-5 \x + \xo 2:4-5 \xt Rom 6:11-13\x*Manina susu noxinge teꞌoxoꞌoxonu la muvau uleenenge musoisoli, ia xo no anu alauna mo tanu tanuxu lailaixe noxou Lataua muꞌanaꞌana no anu alauna misevile la sou mutulusinge temauli noxou Kalisito. Ani no anu alauna tatila noxou Latauasi la sou Anu mupamaulingengi.  
\v 6 \x + \xo 2:6 \xt Kol 2:12\x*Mo Anu mutulusinge nengeꞌa Kalisito la mupalupexasinge no paꞌumolu teitexi no opo loxotolo mo nengeꞌa Iesu Kalisito texolu tepita.  
\v 7 Anu muꞌoxonu aloxo ne noxinge mo uꞌoxonu kalumo noxiꞌa aneꞌi ane iliꞌi. Anu muꞌoxonu aloxo ne sou umaxaꞌu alauna tatila noxou singe noxou Kalisito Iesu. Alauna tatila noxou ne umomomo sou tatilovo sou uasisi manina.  
\v 8-9 \x + \xo 2:8-9 \xt 1Ko 1:29-31; 2Ti 1:9\x*La sou no anu alauna noxou la, Anu mupamaulingengi xo ngingi ngemuxaxu tangengi noxou. Mii ane ꞌo, ngaꞌitinu ualasinge lexe ngingi ngeꞌoxonu muxali no anu xaixai noxinge, mo lakolisou xaixai noxinge uasi. Anu Lataua molusi mulosinge vitanisi.  
\v 10 \x + \xo 2:10 \xt Tit 2:14\x*Lataua anu mukoinenge, la sou Anu mupuinenge. Sou nenge tamuamuaꞌi no anu voteꞌi sou ꞌilixo laixe ane Anu mulalaxiinu tei lexe nenge tamulinu.   
\s1 Noxou Kalisito La Nenge Taxali Vilesisi  
\p
\v 11 Aloxo ne la sou ngingi ane ngaxali no anu mata noxiꞌa ta Iutaia uasi ngaxavutala ulivu. Ta Iutaia ilemenge lexe ngingi xooxoo ungasinge uasi, ia aneꞌisisi xooxoo mungasiꞌa. ꞌIlixo ane ne iꞌoxo noxiꞌa ta mulusi vasimeꞌa mo ixaxaisou no ꞌa avoꞌa.  
\v 12 \x + \xo 2:12 \xt Rom 9:4; Kol 1:21\x*Mo ngaxavutala ulivu, tei no mine ngingi ngamuxaxu tangengi noxou Kalisito uao, la ngingi ngexolu vaꞌaxu noxou. Mo ngaxavutalanu laixe, tei la ngingi ngexolu loxo ta asila mo ngexali no anu mata noxiꞌa ta Isilaeli uasi. Lataua musakiinu vaikala mo mulosiꞌa ta Isilaeli lapuloto, la ngingi ngexolu vaꞌaxu noxiꞌa. Mo no mine ngingi ngexoxolu no lia ꞌo la ngaloopala sou nganoꞌu mii vile laixe iliꞌi uasi mo ngalavusou Lataua uasi.  
\v 13 \x + \xo 2:13 \xt Kol 1:20\x*Mo tei la ngingi ngexolu no paxa manina. Ia vaimomo ꞌo, no anu sialuxu Kalisito la munoꞌinge ngelivu muneꞌe ꞌalai noxou mo ngexolu ngepita noxou Kalisito Iesu.   
\p
\v 14 \x + \xo 2:14 \xt 1Ko 12:13\x*Xo noxou Kalisitosi la mulosinge opo seꞌisisi mo muꞌoxonu xoluxolungenge muxali laixe. Tei la ta Iutaia mimolosilangengi mo mikalipalangengi. Ia noxou Kalisito la mumamulonu vimelu e muxolu no taingengi la ngingi ngexali vilesisi.  
\v 15 \x + \xo 2:15 \xt Kol 2:14\x*Mo anu soli noxou la Anu mumamulonu lapuloto noxou Mosesi mo vaivaikala maumautunu ilou lapuloto sou. Anu muꞌoxonu aloxo ne sou mupitaneꞌi ta mitema laꞌoluxaꞌa ta tamei ne, mixali alavua mo vilesisi. No anu ꞌilixo ane ne la sou Anu muxalilixu opo seꞌisisi no tainenge.  
\v 16 \x + \xo 2:16 \xt Sek 9:10; Kol 1:20, 22\x*Mo no anu soli noxou no ovu valautu la Anu mupitaneꞌi ta mitema laꞌoluxaꞌa ta tamei ne mixali vilesisi muneꞌe noxou Lataua. No anu ovu valautu ne la Anu mukalusou ꞌilixo sou imolomolosilangengi ne.  
\v 17 \x + \xo 2:17 \xt Ais 57:19\x*Mo Anu muneꞌe la muaꞌaloxu aꞌalo laixe sou opo seꞌisisi. Anu muaꞌaloxu noxiꞌa aneꞌi ane mixolu ꞌalai xe noxiꞌa aneꞌi ane mixolu no paxa kalumo.  
\v 18 La sou no anu mii maꞌia ane Kalisito muꞌoxonu ne mukisiinu voteꞌisinge ta Iutaia xe aneꞌi ane ta Iutaia uasi. Mo no anu Uleenu vilesisi muxolu noxinge la sou nenge tamomomo sou talai noxou Maminge.   
\p
\v 19 \x + \xo 2:19 \xt Ep 3:6\x*Ngingi ngeꞌoxonu aloxo ne la sou ngingi ngexolu loxo ta asila la ua, ngingi ngexali loxo aneꞌi mo ngexali ta mitema noxou Lataua xe ngexali Lataua ta ꞌolu.  
\v 20 \x + \xo 2:20 \xt 1Ko 3:11\x*Mo ngingi ngexali loxo tani Lataua mutulusou. Nexi ta mitema ane Iesu mupalusixe, mo ta mitema sou palomatana, nexi aloxo lavoꞌo sou tani tavaꞌu. Ia Kalisito Iesu Anu loxo lavoꞌo mutila manina sou tani tavaꞌu ne.  
\v 21 \x + \xo 2:21 \xt 1Ko 3:16\x*Noxousi, xe nenge nengeꞌa tapita la tani lololinu ne utulu. Anu utulu la uxali taasou lalotu tatila noxou Tila sou talotu ulai noxou Lataua no anu.  
\v 22 \x + \xo 2:22 \xt 1Pi 2:5\x*Mo noxousi la Anu mutulusinge kalumo la ngexali taasou Uleenu Lataua sou uxoxolu no anu.   
\c 3  
\s1 Paulo Muaꞌaloxu Aꞌalo Laixe sou Iesu Mulai Noxiꞌa Aneꞌi Ane ta Iutaia Uasi  
\p
\v 1 \x + \xo 3:1 \xt Pil 1:7, 13\x*Tavaꞌu xo eni Paulo itema sou xaixai noxou Kalisito Iesu esuꞌulingengi ta mitema aneꞌi ane ta Iutaia uasi, la sou exolu no nano no taasou navunavu.  
\v 2 \x + \xo 3:2 \xt Kol 1:25\x*Eni elavu sou lexe ngingi ngelomu sou lexe no anu alauna noxou Latauamenge, la Anu musosovosilo sou aꞌoxonu xaixaisinge noxou.  
\v 3 \x + \xo 3:3 \xt Ep 1:9-10; Kol 1:26\x*Mo mii maꞌia ane mutalume tei ne mupalaꞌa noxilo la sou eni ekaukavu sevile no anu tei ne.  
\v 4 No mine ngingi ngaitisou la sou ngingi ngamomomosou, ngalavusou lexe eni elavu manina no anu mii maꞌia mutalume noxou Kalisito.  
\v 5 Mii maꞌia ane mutalume noxiꞌa ta mitema ane tatei, vaimomo ꞌo Uleenu mupalaꞌalixu noxixe ta mitema sou ane Iesu mupalusiꞌa mo ta mitema sou palomatana noxou.  
\v 6 \x + \xo 3:6 \xt Ep 2:13, 16-19\x*Mii maꞌia ane mutalume ne aloxo ꞌo, no anu aꞌalo laixe sou Iesu Kalisito la muꞌoxongengi ta mitema aneꞌi ane ta Iutaia uasi nengeꞌa taxali vilesisi. Mo ngingi ta mitema aneꞌi ane ta Iutaia uasi nganoꞌu mii maꞌia ane Lataua musakiinu vaikala sou tei noxou Iesu lexe ta Isilaeli inoꞌu ne. No anu xaixai noxou Kalisito Iesusi la ngingi nganoꞌu kalumo.   
\p
\v 7 \x + \xo 3:7 \xt Kol 1:25\x*Lataua muꞌoxoleli exali amitema sou xaixai noxou. Mo no anu alauna noxou la Anu mulosilo xavi noxou la sou eni exali itema sou xaixai noxou. Sou aꞌaloxu aꞌalo laixe sou Iesu.  
\v 8 \x + \xo 3:8 \xt 1Ko 15:9-10\x*Mo ta mitema noxou Lataua ne miuaꞌulixo, ia eni ne uasisi manina mo amii vitanisi. Ia Anu mualaunasilo laixe la mulosilo xaixai sou aaꞌaloxu aꞌalo sou mimii laixe sou Kalisito e tatilovo sou uasi ulai noxiꞌa ta mitema aneꞌi ane ta Iutaia uasi.  
\v 9 La sou vaimomo ꞌo eni aꞌoxonu ulamana noxinge aloxo ꞌo. Lataua mukoinu mimii latala mukalusi la mimii latala anu mutalume iou noxiꞌa aneꞌi tatei. Ia vaimomo ꞌo Anu mulosilo xaixai sou a aꞌaloxu mimii maꞌia ane mutalume ne. Anu uꞌoxonu uxali maninasou.  
\v 10 Tei la Anu mutalume iou ia vaimomo ꞌo la Anu muꞌoxonu lalotu noxou muxali. Mo anu mumasaxa lexe no anu lalotu noxou la aneꞌi ane mixolu teitexi no loxotolo mo ta tatila noxiꞌa ta uleenu e misaxilaꞌu loxotolo ilavusou mo imaisou xavutala lailaixe iouiou noxou ne uxali lamana noxiꞌa.  
\v 11 Tatei manina la Lataua muxavutala lexe uꞌoxonu mii ane kaluxu uasi ne uxali, ia vaimomo ꞌo no anu xaixai noxou Kalisito Iesu Tila noxinge, la sou Anu muꞌoxonu mimii ne muxali manina.  
\v 12 \x + \xo 3:12 \xt Ioa 14:6; Rom 5:2\x*Xo nenge noxou Kalisito, mo nenge temuxaxu tanenge noxou Kalisito la sou nenge tamamaꞌu sou talai noxou Lataua uasi.   
\p
\v 13 La sou eni avikalangengi aloxo, ngaxavutala malaxo no anu tuꞌumaxu ane noxilo singe ꞌo uasi xo eni aꞌitingengi.   
\s1 Lakilaka Noxou Paulo Siꞌa ta Epeso  
\p
\v 14 Tavaꞌu aloxo ꞌo, la sou eni axolau tavaꞌilo voꞌuxu uluꞌelai no talaxu la akilaka ulai noxou Maminge.  
\v 15 Aneꞌi ane mixolu teitexi no opo loxotolo xe aneꞌi ane ixoxolu no lia ꞌa. Mo Anu molu mumoxoꞌu ualaualasiꞌa, mo aneꞌi loxo ta mata noxou.  
\v 16 Eni akilaka ulai noxou Maminge lexe, no anu mimii tavuꞌalo lailaixe iouiou noxou, la Anu uꞌanaꞌanalingenge no anu xavi Uleenu noxou mo uxolu no nano noxinge, la uꞌoxonu pekiaꞌinge.  
\v 17 \x + \xo 3:17 \xt Ioa 14:23; Kol 1:23; 2:7\x*La sou Kalisito umomomo sou uxolu noxinge xo ngingi ngemuxaxu tangengi. Mo eni akilaka lexe ꞌilixo sou tangengi noxou Lataua tanengingenge ngatongatoꞌo uxali utila no anu maulingenge. Mo usiatoto loxo ovu uliꞌu uluꞌelai no lia.  
\v 18 Mo ngingi ngongiꞌa ta mitema noxou Lataua nganoꞌu xavi, mo ngalavu sou manina ꞌilixo noxou Kalisito sou tanuxaꞌa ta mitema. Masaxa noxou ne mutila manina mo veveeni manina mo mulai teitexi manina xe muluꞌelai no lia manina.  
\v 19 La sou ngingi ngelavusou ꞌilixo noxou Kalisito sou tanungenge ne anu mutila manina mo muaulixu lavulavu. Ia ngingi ngelavusou, la sou mimii ane noxou Lataua ne anu uꞌanaꞌanalingenge no anu.   
\p
\v 20 Ia noxou la Anu umomomo sou uꞌoxonu mimii tavuꞌalo. Mimii ane ne muaꞌulixu mimii ane nenge texavutalanu mo tekilaka. Ia no anu xavi noxou ane uxolu uxaxai noxinge ne, muaꞌulixu mimii ane ne.  
\v 21 La sou no voxovoxo utotomu ta mitema ukalusi e ilotu noxou Iesu taꞌitinu ualasou Lataua no ualasou Kalisito Iesu utotomu mo kaluxu uasi. Manina.   
\c 4  
\s1 Nenge Texali Vilesisi Noxou Kalisito  
\p
\v 1 \x + \xo 4:1 \xt Kol 1:10\x*Eni Paulo exolu no nano no taasou navunavu xo eni eꞌoxonu xaixai noxou Tila aloxo ne la sou, eni avikalangengi pekiaꞌu aloxo ꞌo. Lataua muꞌavalinge sou ngataxanu ꞌava noxou mo ngamulinu manina. Mo ngamulinu ꞌiliꞌilixo mulapu noxou.  
\v 2 \x + \xo 4:2 \xt Kol 3:12-13\x*Mo ngataloxolingenge manina noxiꞌa ta menexinge mo opongengi uai seꞌisisi noxiꞌa. Mo laꞌiangengeiꞌa paleaiꞌa uasi. Ngingi ngamulinu ꞌiliꞌilixo mulapusi. Mo tanengingenge ngatongatoꞌo.  
\v 3 \x + \xo 4:3 \xt Kol 3:14-15\x*Mo xavingengiu ꞌilixo sou ngaxolu ngapita. No anu xavi Uleenu la Anu ulosinge opo seꞌisisi, la sou usakingengi la ngaxolu ngapita mo ngaxali vilesisi.  
\v 4 Nenge texali vasimenge vilesisi mo Uleenu Tavuna vilesisi uxoo noxinge. Aloxo Lataua muꞌavalinge la sou ngingi ngaloopala no anu mii vilesisi. Mii vilesisi ne lexe Lataua umomomosou vaikala noxou la ulosinge mimii lailaixe ane Anu muꞌavalingexu ne.  
\v 5 Tila anu vilesisi mo muxamuxaxu tanenge ne vilesisi xe ꞌilixo sou taꞌulo ne anu vilesisi.  
\v 6 \x + \xo 4:6 \xt 1Ko 12:6\x*Mo Lataua vilesisi anu Maminge nenge latala mukalusi. Anu usaxilaꞌa ta mitema mukalusi mo Anu uxaxai noxiꞌa ta mitema mukalusi xe Anu uxolu no nano noxiꞌa ta mitema mukalusi.   
\p
\v 7 \x + \xo 4:7 \xt Rom 12:3, 6\x*Ia noxinge vilevilesi la Anu mualaunasinge laixe la sou Kalisito mumilaꞌanu mimii lailaixe noxou ne sou mulosinge.  
\v 8 \x + \xo 4:8 \xt Lex 68:18\x*Tavaꞌu aloxo ne la sou vaikala mikaukavunu muai no nano no anu Lavuku Tavuna teinu muvikala aloxo ꞌo.  
\q1 “No voxo ane Anu mutelai teitexi  
\q2 la munoꞌa ta mitema tavuꞌalo mitilitiliꞌusiꞌa milai kalumo  
\q2 la mumilaꞌanu mimii lailaixe noxiꞌa ta mitema.”   
\p
\v 9 \x + \xo 4:9 \xt Ioa 3:13\x*Ia Anu mutelai teitexi laaxu a loxovaa? Anu laaxu lexe Anu muluꞌe no lia ꞌo mo muluꞌelai no lia manina.  
\v 10 Anu ane muluꞌe no lia ꞌosi ane mutelai teitexi no loxotolo mo muaꞌulixu loxotolo ne ia mulai teitexi manina. Anu muꞌoxonu aloxo ne mo sou Anu uxolu no anu mimii latala no lia ꞌo mo opo loxotolo ukalusi la sou Kalisito uxali usaxilaꞌu mii mukalusi.  
\v 11 \x + \xo 4:11 \xt 1Ko 12:28\x*Anusisi ane mulosiꞌa ta mitema xaixai sou ixaxaisou. Seꞌi mulosiꞌa xaixai sou mixali ta mitema ane Iesu mupalusiꞌa. Moseꞌi mulosiꞌa xaixai sou mixali ta mitema sou palomatana, moseꞌi mixali ta mitema sou iaꞌaloxu aꞌalo laixe sou Iesu ulai noxiꞌa ta mitema moseꞌi mixali ta mitema sou isaxilaꞌa ta mitema mo ilosiꞌa ta mitema lavulavu sou imulinu ꞌiliꞌilixo maꞌia Lataua umasaxau.  
\v 12 Kalisito mulosiꞌa ta mitema xaixai ane ne sou mulalaxineꞌi ta mitema noxou Lataua sou iꞌoxonu xaixai laixe noxou. Aloxo ne la sou lalotu noxou Kalisito uleme xe utulu pekiaꞌu.  
\v 13 \x + \xo 4:13 \xt Kol 1:28\x*Anu usolonu ulai uxali no mine nenge taxali vilesisi no anu muxamuxaxu tanenge, mo no anu lavulavu noxinge noxou Lataua ꞌOlu. Mo lalotumenge uleme uxali utila ulai uxali no mine nenge maulinenge umomomo loxo Kalisito noxou.   
\p
\v 14 La sou nenge tamomomo sou taxolu loxo ta molomolo la uasi. Mo mamu sou ngalomuxu vaivaikala noxiꞌa ta mitema sou isuisu mo kalakalavoi. Xo anu uꞌoxongenge la xavutalamenge ulai uneꞌe loxo lasipi xasi mo atume utavutavulenu.  
\v 15 \x + \xo 4:15 \xt Kol 1:18; 2:19\x*Ia tanengexaꞌa ta menexinge mo tavikala maninasi noxiꞌa. La sou Anu uꞌoxonenge taleme noxou Kalisito e Anu kisinge.  
\v 16 No anu saxisaxilaꞌu noxou la Anu muꞌoxonu mineminenge iouiou no vasimenge ne mupitanu mo mutoxotoxo vaxa la sou muxali itema vasimolu. La sou no anu mineminenge iouiou no vasimenge ne uxaxaisou xaixai naꞌu vilevilesi la uxali tatila mo uleme loxo Kalisito tanunenge.   
\s1 Ngaxolu loxo Lamana ta ꞌOlu  
\p
\v 17 \x + \xo 4:17 \xt Rom 1:21; 1Pi 1:14\x*La sou eni avikalangengixu mimii ꞌo mo apeletotosinge no ualasou Tila lexe, mamu sou ngaxolu loxo ta mitema aneꞌi ane ta Iutaia uasi. Aneꞌi xavutalaiꞌa ne uxovulaulau vitanisi.  
\v 18 Mo xavutalaiꞌa ne lamana uasi mo ieꞌi isivoxo xe mitatusou oponeꞌi pekiaꞌu la sou muꞌoxoneꞌi mixolu vaꞌaxu no anu mauli ane noxou Lataua.  
\v 19 Mo xavutala laixe ne musuꞌa la sou muꞌoxoneꞌi la imaela no anu ꞌiliꞌilixo masumasua ane iꞌoxoꞌoxonu ne uasi manina. Mo miꞌunalai manina no anu ꞌiliꞌilixo masumasua utotomu misevile.   
\p
\v 20 Ia ngingi ngeneꞌe sou ngalavusou Kalisito no anu voteꞌi aloxo ne uasi.  
\v 21 Mo eni elavusou lexe ngingi ngelomusou aꞌalosou, mo Anu mulosiengi mukalu. Sou ngamulinu vaikala manina ane muxolu noxou Iesu.  
\v 22 \x + \xo 4:22 \xt Rom 8:13; Kol 3:9\x*Mo mulosiengi sou ngamulinu mauli ane ngemulimulinu tei ne uasi. Mo ngaxexeenu itema ane teinu e uxolu noxinge la uꞌoxonu masuangengi la sou uavutilixu xavutala masumasua la sou uꞌoxongengi ngaulua ne usuꞌa.  
\v 23 \x + \xo 4:23 \xt Rom 12:2\x*Mo xavutalamengi ne uxiu mo uxali alavua manina.  
\v 24 \x + \xo 4:24 \xt Tav 1:26; Kol 3:10\x*Mo ngingi ngemulinu mauli alavua la ngexali itema ane alavua, loxo ta mitema Lataua mukoineꞌi sou ixali loxo Anu, sou ngemulinu ꞌiliꞌilixo mulapu mo malemalenga manina mo ngexolu vaꞌaxu no anu ꞌiliꞌilixo masumasua manina.   
\p
\v 25 \x + \xo 4:25 \xt Sek 8:16; Kol 3:8-9\x*Aloxo ne la sou ngasuꞌanu ꞌilixo sou ngakalakalovoineꞌi ta mingemingengi ia ngavikalaneꞌi maninasi. Xo nenge vilevilesi ꞌo tapita no anu Kalisito vasimolu.  
\v 26 \x + \xo 4:26 \xt Lex 4:4; Iak 1:19-20\x*Lexe ngingi laꞌiangenge la mamu sou uꞌoxongengi ngasusu. Mo mamu sou laꞌiangenge uxoxolu ulai uxali no aso uluꞌelai.  
\v 27 Mo mamu sou ngalosou Satani taiinu vile.  
\v 28 La sou ꞌei ane upakapakali ne mamu sou upakapakali. Ia laixe lexe anu uxaxai mo ususunu avolu uluꞌelai no lia mo sou umolo mimii la usuꞌulineꞌi aneꞌi ane xaꞌa mimii uasi.   
\p
\v 29 \x + \xo 4:29 \xt Kol 4:6\x*Mo ngavivikala la mamu sou vaikala masumasua ulaa no anangenge. Ia ngaleanu vaivaikala lailaixesi sou uꞌoxonu pekiaꞌa aneꞌi ane imasaxau suꞌuli xe usuꞌulineꞌi no anu alauna aneꞌi ane ilolomu kalumo.  
\v 30 \x + \xo 4:30 \xt Ais 63:10; Ep 1:13-14; 1Te 5:19\x*Xo voxo a uneꞌe la sou Lataua mululusinge mo musosovosinge no anu Uleenu Tavuna noxou sou ulotongengi ngalivu. La sou mamu sou ngalosou Uleenu Tavuna noxou Lataua tuꞌumaxu.  
\v 31 \x + \xo 4:31 \xt Kol 3:8\x*La sou laixe lexe ngaxexeenu ꞌilixo sou opo masumasua mo ꞌilixo sou laꞌiangenge mo ꞌilixo sou ngakaikaitolo la ngaleanu vaikala masumasua noxiꞌa ta mitema.  
\v 32 \x + \xo 4:32 \xt Mat 6:14; 18:22-35; Kol 3:12-13\x*Ia tangengixaꞌa mo ngaꞌoxonu ꞌilixo sou opo seꞌisisi noxiꞌa ta menexinge ngatongatoꞌo. Mo ngaxiunu tumalingeu ꞌilixo maꞌia aneꞌi miꞌoxonu muneꞌe noxinge. Aloxo noxou Kalisito la Lataua muxiunu tumalouu ꞌiliꞌilixo masumasua noxinge.   
\c 5  
\p
\v 1 \x + \xo 5:1 \xt Mat 5:48\x*Lataua tanungenge misevile loxo anu ta ꞌolu, la sou laixe lexe ngingi ngamulimulinu ꞌiliꞌilixo loxo Anu uꞌoxoꞌoxonu.  
\v 2 \x + \xo 5:2 \xt Mul 29:18; Eva 10:10\x*Mo no anu xoluxolungenge la ngamasaxainge ngatongatoꞌo. Aloxo Kalisito mumasaxainge la mulosou maulixusinge loxo mii tumaꞌu lailaixe mo iaiama lailaixe manina uela ulai noxou Lataua.   
\p
\v 3 La sou mamu sou ngaꞌoxonu ꞌiliꞌilixo sou voteꞌi mo ꞌiliꞌilixo masumasua iouiou xe ngaisuisuxu ta menexinge miꞌamiꞌa la ngavivikala sou. Xo ngingi ngexali ta mitema noxou Lataua la ꞌiliꞌilixo ane ne ngaꞌoxonu uasi.  
\v 4 Mo aꞌalo masumasua mo aꞌalo ane laixe uasi xe suku masumasua ngaꞌoxonu uasi, ngasuꞌanu mo usuꞌa. Vaivaikala aloxo ne anu laixe sou ngingi ngaꞌoxoꞌoxonu uasi, ia laixe lexe ngingi ngavikala laixe noxou Latauasi.  
\v 5 \x + \xo 5:5 \xt 1Ko 6:9-10; Kol 3:5\x*Xo ngingi ngelavusou laixe lexe ta mitema ane iꞌoxoꞌoxonu ꞌilixo sou voteꞌi mo ꞌiliꞌilixo masumasua iouiou mo isuisu ne aneꞌi umomomo sou iꞌunalai no anu saxisaxilaꞌu noxou Kalisito mo Lataua e no anu opo loxotolo uasi. Ta mitema ane aloxo ne, ꞌiliꞌilixo ane ne muxali loxo lataua noxiꞌa.   
\s1 Tamuamuaꞌi no Anu Lamana  
\p
\v 6 \x + \xo 5:6 \xt Rom 1:18; Kol 2:4, 8\x*La sou mamu sou itema vile uꞌoxonu lolongenge no anu vaivaikala ane tematemanu uasi la ngamulinu. Xo laꞌia noxou Lataua uxolu noxiꞌa aneꞌi ane imulinu ꞌiliꞌilixo ane ne xe ilolomu uasi.  
\v 7 Aloxo ne la sou mamu sou ngingi ngongiꞌa ngaxolu ngapita.   
\p
\v 8 \x + \xo 5:8 \xt Ioa 12:36; Ep 2:13; Kol 1:13; 1Pi 2:9\x*Xo tei la ngingi ngexolu no isivoxo, ia vaimomo ꞌo Tila muꞌoxongengi la ngingi ngexolu no lamana. La sou ngamuamuaꞌi loxo lamana ta ꞌolu.  
\v 9 Xo ngingi lamana ta ꞌolu la sou ꞌiliꞌilixo lailaixe mo ꞌiliꞌilixo mulapu xe ꞌilixo sou vaikala manina uxolu noxinge, la anu umaxaꞌu neneꞌaxu lamana anesi.  
\v 10 Mo ngingi ngatovo ngatilovosou ꞌiliꞌilixo maꞌia manina ane ngingi ngaꞌoxonu la Tila uꞌosa no anu.  
\v 11 Ngaxolu vaꞌaxu no anu ꞌiliꞌilixo masumasua sou isivoxo ne xo anu uxalilixu neneꞌaxu vile laixe uasi. Ia nganoꞌu ꞌiliꞌilixo masumasua ne uatu mo ngamulaxu lamana.  
\v 12 Xo tamaela sou talemolu ꞌiliꞌilixo maꞌia ane miꞌoxoꞌoxonu mutalume ne.  
\v 13 \x + \xo 5:13 \xt Ioa 3:20-21\x*Ia lamana uxalilixu mii maꞌia ane mutalume ne uxali lamana.  
\v 14 \x + \xo 5:14 \xt Ais 26:19; Rom 13:11\x*Xo no anu lamanasi la sou mimii latala e mutalume ne muxali lamana. La sou umomomo sou vaikala aloxo ꞌo.  
\q1 “Nini ꞌenaꞌei neai, ne natulu.  
\q2 Natulu no anu soli.  
\q2 Mo Kalisito lamanaxu uieisine.”   
\p
\v 15 \x + \xo 5:15 \xt Kol 4:5\x*Mo ngasaxilaꞌu muamuaꞌingenge laixe ia mamu sou ngamuamuaꞌi loxo itema xavutalau laixe uasi, uasi. Ngamuamuaꞌi loxo itema xavutalau laixe.  
\v 16 Mo vaimomo ꞌo anu voxo ngaꞌangingi sou ngaꞌoxonu ꞌiliꞌilixo lailaixe xo vaimomo ꞌo anu voxo masumasua. Xo itema sou isivoxo uꞌoxonu lolongenge.  
\v 17 Aloxo ne la sou ngaxolu ngaxovulaulau uasi, ia ngalavu sou masaxa noxou Tila a loxovaa.  
\v 18 \x + \xo 5:18 \xt Luk 21:34\x*Mo ngaiexu lexa pekiaꞌu mamu xo anu sou uxovulaulaulingenge la ngasuꞌa avile. Ia laixe lexe ngaꞌanaꞌana no anu Uleenu Tavuna.  
\v 19 \x + \xo 5:19 \xt Kol 3:16\x*Mo lexe ngavivikalangengi ngatongatoꞌo la laixe lexe ngavivikala no anu lexe e muai no nano no anu Lavuku sou lexe, mo ngalexe la ngalexe lexe sou lalotu. Xe lexe maꞌia Uleenu uxalilixu no tangengi sou ngalexenu. Mo ngalexe no anangenge mo ngalexe no nano no tangengi ulai noxou Tila.  
\v 20 \x + \xo 5:20 \xt Kol 3:17\x*Mo utotomu la ngavikala laixe ulai noxou Lataua anu Maminge no anu mimii tavuꞌalo ukalusi no ualasou Tila noxinge Iesu Kalisito.   
\s1 Vaikala Ulai Noxiꞌa ta Mulu Iloꞌa ta Semasemaiꞌa  
\p
\v 21 \x + \xo 5:21 \xt 1Pi 5:5\x*Ngingi ngaxolu no laangenge ngatongatoꞌo xo ngingi ngaꞌume mo ngatoxonu Kalisito.  
\v 22 \x + \xo 5:22 \xt Kol 3:18; 1Pi 3:1\x*Ta sema ngaxolu no laaxaꞌa ta mulumulumengi mo ngalomuxaꞌa loxo ngingi ngexolu no laaxu Kalisito mo ngelomuxu.  
\v 23 \x + \xo 5:23 \xt 1Ko 11:3; Ep 1:22\x*Xo mulu anu muxolu kisie semau loxo Kalisito anu muxolu kisou lalotu. Xo lalotu anu Kalisito vasimolu mo Anu mupamaulinu.  
\v 24 Ia aloxo lalotu uxolu no laaxu Kalisito la ngingi ta sema kalumo ngaxolu no laaxaꞌa ta mulumulumengi no anu mimii latala ukalusi.  
\v 25 \x + \xo 5:25 \xt Kol 3:19; 1Pi 3:7\x*Mo ngingi ta mulu kalumo ngamasaxiꞌa ta semasemamengi misevile. Aloxo Kalisito mumasaxau lalotu misevile la mulosou maulixu sou.  
\v 26 \x + \xo 5:26 \xt Tit 3:5\x*Mo muꞌulosou lalotu mo muxali malemalenga manina mo muxali ta naꞌu no anu lexa xe no anu vaikala noxou.  
\v 27 \x + \xo 5:27 \xt 2Ko 11:2; Kol 1:22\x*Mo umasaxa lexe ulalaxiinu lalotu noxou ne uxali laixe mo uleleme manina no iou. Mo nuni vile mo xoxoa mo mimii iouiou uxolu no anu lalotu noxou ne uasi. Anu umasaxa lexe lalotu noxou ne uxolu vaꞌaxu no anu ꞌiliꞌilixo masumasua mo ixalisou susu vile no anu uasi.  
\v 28 Anu iouvilesisi aloxo ta mulu ngamasaxaiꞌa ta semasemamengi manina aloxo ngamasaxainge manina. ꞌEnaꞌei ane umasaxaie semau la anu mumasaxau kalumo.  
\v 29 Xo itema vile ulavusou uꞌoxonu masuanu vasimolu uasi, ia anu uaꞌanu xe usaxilaꞌu laixesi. Anu iouvilesisi aloxo Kalisito uꞌoxonu no anu lalotu.  
\v 30 Xo nenge vilevilesi tepita la sou texalilixu lalotu ne vasimolu muxali.  
\v 31 \x + \xo 5:31 \xt Tav 2:24; Mat 19:5\x*La sou vaikala muai no nano no anu Lavuku Tavuna teinu muvikala aloxo ꞌo,  
\q1 “Tavaꞌu aloxo ne la sou mulu uꞌumesiꞌa momu ilee nenu la ulai ilee semau ixolu ipita sou ixali vilesisi.”   
\p
\v 32 \x + \xo 5:32 \xt Pal 19:7\x*Vaikala ane ꞌo ne laaxu tatila manina mo mutalume ia eni elavusou lexe anu mulemo Kalisito ilou lalotu noxou.  
\v 33 Ia anu aloxo ne ulai noxinge ngingi ngamulu vilevilesi lexe ngamasaxaie semameni manina aloxo ngingi ngamasaxainge manina ne. Xe ngingi ngasema kalumo ngatoxonu mulumengi.   
\c 6  
\s1 Vaikala Ulai Noxiꞌa ta Molomolo Mo ta Mamiꞌa Iloꞌa ta Neniꞌa  
\p
\v 1 \x + \xo 6:1 \xt Kol 3:20\x*Ta molomolo, ngatoxoneꞌi ta maminge iloꞌa ta neninge. Xo ngingi noxou Tila. Xo anu ꞌilixo laixe sou ngamulinu ane.  
\v 2 \x + \xo 6:2 \xt Lap 5:16\x*Vaikala muai no nano no anu Lavuku Tavuna teinu noxou Lataua mikaukavunu aloxo ꞌo, “Ngatoxoneꞌi ta maminge iloꞌa ta neninge.”  
\p Xo anu lapuloto muai tei aloxo ne mo misakiinu vaikalasou aloxo ꞌo,  
\v 3 “Lexe ngingi ngaꞌoxonu aloxo ne la sou mimii maꞌia ane ngingi naꞌoxonu ne uxali laixesi la ngaꞌosa mo ngaxolu maxuveeni no lia ꞌo.”   
\p
\v 4 \x + \xo 6:4 \xt Lex 78:4; Xav 22:6; Kol 3:21\x*Mo vaikala ulai noxiꞌa ta molomolo ta mamiꞌa aloxo ꞌo. Mamu sou ngaꞌoxoneꞌi ta ꞌilinge laꞌiaxaꞌa. Ia ngingi ngaꞌoxonu ꞌilixo laixe mo ngamomosiꞌa xe ngapotoneꞌi no anu vaikala noxou Tila.   
\s1 Vaikala Ulai Noxiꞌa ta Mitema sou Ixaxai Vitanisi Iloꞌa ta Tatilasiꞌa  
\p
\v 5 \x + \xo 6:5 \xt Kol 3:22-23; Tit 2:9-10; 1Pi 2:18\x*Mo ngingi ta mitema sou ixaxai vitanisi ngalomuxaꞌa ta tatilasinge no lia ꞌo mo ngatoxoneꞌi. Mo ngaꞌume noxiꞌa la ngaꞌoxonu xaixai laixe manina no ieꞌi. Aloxo ngingi ngaꞌoxonu ulai noxou Kalisito.  
\v 6 Loxo ꞌo io ngingi ngaꞌoxo lexe ngaꞌoxonu xaixai laixesi no mine aneꞌi ixoxolu imamaisingesi la iꞌosasingexu. Ia aloxo ne uasi, ngingi ngaꞌoxonu xaixai loxo ngingi ta mitema sou xaixai vitanisi noxou Kalisito mo opongengi uꞌosa sou ngamulinu masaxa noxou Lataua.  
\v 7 La sou ngaxaxai no opongengi maninasou. Xo xaixai e ngingi ngaꞌoxonu ne ngaꞌoxonu ulai noxiꞌa ta mitema uasi. Ngingi ngaꞌoxonu loxo ngaꞌoxonu ulai noxou Tila.  
\v 8 \x + \xo 6:8 \xt 2Ko 5:10; Kol 3:24-25\x*Xo ngingi ngelavusou lexe ta mitema sou ixaxai vitanisi mo aneꞌi ane ixaxai vitanisi uasi ne Tila ulosiꞌa ꞌulu sou xaixai laixe noxiꞌa ukalusi.   
\p
\v 9 \x + \xo 6:9 \xt Rom 2:11; Kol 4:1\x*Mo ngingi ta tatilasiꞌa ta mitema sou ixaxai vitanisi kalumo ngaꞌoxonu ꞌilixo laixe noxiꞌa mo ngaꞌoxoneꞌi iꞌumenge mamu. Xo ngingi ngelavusou lexe ngingi ngongiꞌa ne Tila noxinge a uxolu teitexi no opo loxotolo mo iliꞌi la uꞌoxonu tulatula noxou evile uasi.   
\s1 Ngatelonu Tokolomo sou ꞌOtoꞌoto Noxou Lataua  
\p
\v 10 Ioxe, vaimomo ꞌo eni amasaxa akalusou vaivaikala noxilo ulai noxinge aloxo ꞌo. Ngingi ngongiꞌa Tila ngepita, mo no anu xavi musuku noxou la uꞌoxongengi ngatulu pekiaꞌinge.  
\v 11 \x + \xo 6:11 \xt Rom 13:12; 2Ko 10:4\x*La sou ngatelonu tokolomo sou ꞌotoꞌoto noxou Lataua utelo no vasimenge. Mo sou utalungenge xe uꞌoxongengi ngatulu pekiaꞌinge sou ngalooxu xavutala kalakalavoi noxou Satani e lexe uꞌoxonu noxinge. \fig |alt="soldier" src="HK00194B.TIF" size="col" loc="Eph 6:11" copy="Horace Knowles © The British & Foreign Bible Society, 1954, 1967, 1972." ref="Epeso 6:11" \fig*  
\v 12 \x + \xo 6:12 \xt 1Pi 5:8-9\x*Xo ꞌotoꞌoto ane ꞌo ne sou nenge taꞌoto noxiꞌa ta mitema e vasimeꞌa loxo nenge ꞌo uasi. Nenge taꞌoto noxiꞌa ta uleenu ane mixolu teitexi mo taꞌoto noxiꞌa ta uleenu ane iulaxuneꞌi ta uleenu, mo noxiꞌa ta mimii ane xavineꞌi musuku e misaxilaꞌu isivoxo no lialia ꞌo. Xe taꞌoto noxiꞌa ta uleenu ta masumasua e muxolu teitexi no loxotolo.  
\v 13 Aloxo ne la sou ngatelonu tokolomo sou ꞌotoꞌoto noxou Lataua ne ukalusi mo uxoo no vasimenge. Mo sou no anu voxo masua la ngingi ngaꞌoto ulivu pekiaꞌinge. Xe iliꞌi no anu ꞌotoꞌoto ne ukalu la ngingi ngatulu pekiꞌainge mo ngalapau uasi.  
\v 14 \x + \xo 6:14 \xt Ais 11:5; 59:17; 1Te 5:8\x*Lexe ngingi ngamasaxa ngatulu pekiaꞌinge la ngasakiinu vaikala manina loxo sini sou ngautupokolixu no vaimenge, mo ꞌiliꞌilixo mulapu loxo siovexu lutungengi.  
\v 15 \x + \xo 6:15 \xt Rom 10:15\x*Mo ngalalaxii sou ngalai ngaꞌaloxu aꞌalo laixe sou opo seꞌisisi noxou Lataua loxo siove sou tavaꞌinge ngataanu no tavaꞌinge.  
\v 16 Mo mii vile mutila no anu tokolomo sou ꞌotoꞌoto ne sou nganoꞌu utotomu ane muxamuxaxu tangengi loxo xaliau. Xo no anu xaliau ne la ngingi ngamomomo sou ngataluxu lalumiso axexexaxu noxou itema masua e lexe utoꞌomenge no anu.  
\v 17 \x + \xo 6:17 \xt Eva 4:12\x*Mo ngaxavutalanu ꞌilixo sou Lataua mupamaulingengi uxolu no kisinge ngataanu loxo siove sou utaluxu kisinge. Xe nganoꞌu vaikala noxou Lataua ngatetelisou loxo lavisou Uleenu Tavuna.  
\v 18 \x + \xo 6:18 \xt Luk 18:1; Kol 4:2; 1Te 5:17\x*Mo utotomu la ngaꞌoxonu lakilaka iouiou ulai noxou Lataua no anu xavi no anu Uleenu Tavuna, sou usuꞌulingengi no anu taitaiinu a loxovaa. Mo ngatetelisou ꞌilixo ane ne uxolu no anu xavutalamengi pekiaꞌu. Mo ngaloo xe ngakilakasiꞌa ta mitema noxou Lataua utotomu.   
\p
\v 19 \x + \xo 6:19 \xt Kol 4:3-4; 2Te 3:1\x*Mo ngakilakasilo kalumo lexe no mine eni avivikala la Lataua ulosilo vaivaikala sou alemolu, mo sou eni aꞌume uasi la aꞌaloxu aꞌalo laixe noxou Iesu maꞌia mutalume ne.  
\v 20 \x + \xo 6:20 \xt 2Ko 5:20; Plm 1:9\x*Xo eni itema sou aꞌaloxu aꞌalo laixe noxou Iesu e Lataua mupalusilo la sou eni misakileli no nano no taasou navunavu ꞌo. La sou ngakilakasilo mo sou eni aꞌalo la aꞌume uasi mo aꞌalo no anu mii maꞌia ane lexe aꞌaloxu.   
\s1 Vaikala Kaluxusou  
\p
\v 21 \x + \xo 6:21 \xt Apo 20:4; Kol 4:7-8; 2Ti 4:12\x*Ia eni amasaxa lexe ngalavu laixe no anu xoluxoluxo mo mimii maꞌia ane eni aꞌoxoꞌoxonu ꞌo la sou Tukikosi anu vivilo e eni emasaxau musuku xe itema sou xaixai manina noxou Tila molu uaꞌalomengi no anu mimii ukalusi.  
\v 22 Anu tavaꞌu aloxo ne la sou eni epalusou mulai noxinge mo sou ngingi ngalavusou lexe nexi texolu a loxovaa xe umamaatolasinge.   
\p
\v 23 Mo eni akilaka lexe opo seꞌisisi noxou Lataua Maminge mo Tila Iesu Kalisito uxoo noxinge ta vivilo ngamasaxainge misevile ngatongatoꞌo mo ngamuxaxu tangengi.  
\v 24 Xe akilaka lexe alauna uxolu noxinge ukalusi e tangengi noxou Tila noxinge Iesu Kalisito utotomu mo kaluxu uasi. Manina.