\id 2TI  - Pele-Ata Genesis, Jonah and New Testament [ata] -Papua New Guinea 2009 (DBL -2014) 
\h 2 TIMOTI 
\toc1 Uoli Voloxu Tameisou Ane Paulo Mukaukavu Mulai Noxou Timoti 
\toc2 2 Timoti 
\toc3 2Ti 
\mt2 UOLI VOLOXU TAMEISOU ANE PAULO MUKAUKAVU MULAI NOXOU  
\mt1 TIMOTI  
\imt1 Vaikala lamana  
\ip Timoti ne anu muxaxai iouvilesisi aloxo Paulo. La sou anu Paulo mukaukavu mulai noxou sou mupelaꞌu sou umulimulinu ꞌiliꞌilixo lailaixesi. Mo umulinu vaikala noxou Lataua laixe xe uaꞌaloxu aꞌalo laixe sou Iesu Kalisito ulai noxiꞌa ta mitema la uꞌoxo maninasou. Mo no mine ta mitema ilosou tuꞌutuꞌumaxu, la anu utulu pekiaꞌu mo uxaxaisou xaixai noxou e Lataua mulosou sou uxaxaisou ne.  
\ip Paulo mupelaꞌu Timoti lexe ulomuxaꞌa ta mitema ilavusou mii vile uasi ne mamu. Xo vaikala ane loxo ne, anu umomomo sou uxalixu mii vile laixe uasi, ia uxalixu mamulosi no anu lolomu noxiꞌa ta mitema. Xe muvikalanu Timoti lexe anu umulinu ꞌilixo noxou anu Paulo. Laixe sou umuxaxu tanu pekiaꞌu mo opo seꞌisisi uꞌanaꞌana noxou, mo umasaxaiꞌa ta mitema moseꞌi maninasou xe tuꞌutuꞌumaxu iouiou uxali noxou, la anu laixe lexe anu utavulenusi.  
\iot Aꞌalo muai no nano aloxo ꞌo  
\io1 Vaikala lamana 1:1-2  
\io1 Vaikala ꞌosaꞌila ilou peletoto noxou Paulo 1:3–2:26  
\io1 Tuꞌutuꞌumaxu uxali no anu voxo kalukaluxusou 3:1-9  
\io1 Paulo muaꞌaloxu xaixai noxou 3:10–4:18  
\io1 Vaikala kaluxusou xe vaikala sou sexela 4:19-22  
\c 1  
\p
\v 1-2 \x + \xo 1:1-2 \xt Apo 16:1; 1Ti 1:2\x*Eni Paulo, ekaukavunu vaikala ano ꞌo mulai noxine nini Timoti. Eni emasaxaine loxo nini ꞌalixeni maninasou. Lataua musakiinu vaikala noxou lexe ꞌei ane umuxaxu tanu noxou Kalisito Iesu, la unoꞌu mauli ane kaluxu uasi. La sou Lataua mupalusilo loxo itema sou xaixai noxou Kalisito Iesu sou aaꞌaloiꞌa ta mitema no anu aꞌalo laixe ane ne.  
\p Eni alinga lexe alauna mo tanutanuxu mo opo seꞌisisi noxou Lataua Maminge nengeꞌa mo Tila noxinge Kalisito Iesu, umomomosou uxolu noxine.   
\s1 Vaikala Peletoto  
\p
\v 3 \x + \xo 1:3 \xt Apo 23:1\x*Eni avikala laixe ulai noxou Lataua e eni aꞌoxoꞌoxonu xaixai noxou, la alavusou axavutalaneni utotomu no anu linga noxilo. Lataua ane eni alavusou axaxai noxou loxo ta xaixasilo iloꞌa ta ꞌiluꞌilusuleli mixaxai tei no anu oponeꞌi maninasou.  
\v 4 Eni axavutalanu tama noxine, la eni emasaxa lexe eni amaisine la. Lexe eni amaisine, la eni aꞌosa manina.  
\v 5 \x + \xo 1:5 \xt Apo 16:1\x*Eni axavutalaneni no anu muxamuxaxu taneni manina noxou Kalisito Iesu. Xo tei, la xasine ualasie lexe Loi ilee nenine Onike, aneꞌi mimuxaxu taneꞌi noxou, la sou eni elavu lexe nini kalumo namuxamuxaxu taneni noxou loxo aneꞌi ilou ne.  
\v 6 \x + \xo 1:6 \xt 1Ti 4:14\x*Tavaꞌu aloxo ne, la sou eni avikalaneni la lexe nini naavutilixu mii laixe ane Lataua mulosine no voxo ane eni emulaxu avolo no kisine.  
\v 7 \x + \xo 1:7 \xt Rom 8:15\x*Uleenu ane Lataua mulosine ne, anu sou uꞌoxonenge taꞌume uasi. Anu sou ulosinge xavi mo, sou uꞌoxonenge tamasaxaiꞌa ta mitema xe, sou usuꞌulinenge sou tasaxilaꞌu muamuaꞌinenge.   
\p
\v 8 La sou mamu nini namaela sou naaꞌaloxu Tilasinge ualasou, mo mamu namaela noxilo e eni axoxolu no taasou navunavu, xo eni exaxai noxou Iesu. Ia eni emasaxa lexe no anu xavi noxou Lataua, la nini natavulenu tuꞌutuꞌumaxu sou aꞌalo laixe loxo eni atatavulenu ꞌo.  
\v 9 \x + \xo 1:9 \xt Ep 2:8-9; Tit 3:5\x*Lataua mupamaulinenge mo muꞌavalinge, sou lexe nenge taxolu vaꞌaxu no anu ꞌiliꞌilixo masumasua. Nenge teꞌoxonu ꞌiliꞌilixo laixe, la sou Anu upamaulinenge mo uꞌavalinge uasi, Anu muꞌoxonu aloxo ne, no anu xavutala ilou alauna noxousi. Alauna ne, Anu mumaxaꞌu noxou Kalisito Iesu tatei no mine Lataua ukoinu mimii uao.  
\v 10 \x + \xo 1:10 \xt Eva 2:14\x*Ia vaimomo ꞌo, alauna ne muxali mupalaꞌa lamana noxou Kalisito Iesu, Anu itema sou pamauli. Anu mutaloxolixu soli, ia no anu aꞌalo laixe noxou, la mulosinge mauli ane kaluxu uasi.  
\v 11 \x + \xo 1:11 \xt 1Ti 2:7\x*Lataua musosovosilo lexe eni aaꞌaloxu aꞌalo laixe xe amitema sou xaixai noxou Iesu mo amitema sou alosieixu ta mitema lavulavu.  
\v 12 Anu aloxo ne, la sou eni atavule tuꞌutuꞌumaxu ꞌo. Ia eni amaela no anu uasi. Xo eni elavusou ꞌei ane eni emulaxu taleli noxou mo elavusou manina lexe Anu usaxilaꞌu mii ane eni eꞌitalonu mulai noxou mole ulai utalo no voxo ane Anu ulivu uneꞌe la.   
\p
\v 13 Mii maꞌia ane nini nelomusou noxilo, la nelavu lexe anu vaikala noxou Lataua mo nalosieixu ta mitema no anu. Mo namuxamuxaxu taneni noxou Kalisito Iesu mo namasaxaiꞌa ta mitema loxo Kalisito Iesu mumasaxaine.  
\v 14 \x + \xo 1:14 \xt 1Ti 6:20\x*Eni emasaxa lexe nini nasaxilaꞌu mii laixe ane Lataua muꞌitalonu noxine laixe no anu xavi noxou Uleenu Tavuna e uxolu noxinge.   
\p
\v 15 Nini nelavusou aloxo ꞌo. Ta mitema noxou Lataua latala no xalee lia tila ne Asia ne, aneꞌi mixiu tumaliꞌa muneꞌe noxilo mukalu ne. Ta tamei noxiꞌa ualasiꞌa lexe Pixelo ilou Emoxenesi.   
\p
\v 16 Ia eni alinga lexe Tila tanuxu Onesipolo iloꞌa ta tema tani noxou. Xo anu muꞌoxonu opoleli muꞌosa alaxu tavuꞌalo misevile mo umaela noxilo sou aneꞌi misakileli ꞌo uasi,  
\v 17 ia anu molu muneꞌe no tuala tila ne Romu, la anu ukakamulileli misevile xoo mole muxalisilo.  
\v 18 Eni alinga lexe Tila tanuxu no voxo ane Iesu ulivu uneꞌe la. Xo nelavu laixe lexe no tuala tila ne Epeso ne, la anu musuꞌulileli laixe no anu mimii tavuꞌalo misevile.   
\c 2  
\p
\v 1 Ioxe, nini Timoti loxo ꞌalixeni, nini natulu pekiaꞌine no anu alauna noxou Kalisito Iesu.  
\v 2 Vaivaikala e nini nelomusou noxilo no ieꞌi ta mitema tavuꞌalo ne, nini naꞌitalonu vaikala ane ne ulai noxiꞌa ta mitema e nini nemaisiꞌa lexe aneꞌi imomomo sou ilosieixu ta mitema no anu kalumo.  
\v 3 \x + \xo 2:3 \xt 2Ti 1:8\x*Nini natavule tuꞌutuꞌumaxu loxo itema sou ꞌotoꞌoto laixe noxou Kalisito Iesu aloxo eni atatavulenu ꞌo.  
\v 4 Lexe itema vile uxali loxo itema sou ꞌotoꞌoto, la anu uꞌoxonu xaixai sou ꞌotoꞌoto nesi, mo sou tila noxou uꞌosasou. Ia umomomo sou uꞌoxonu xaixai seꞌi e anu ulavusou uꞌoxonu no tualasou uasi.  
\v 5 \x + \xo 2:5 \xt 2Ti 4:8\x*Xe itema vile sou uiave no anu iaveiave sou uuaulixaꞌa ta menexu, la anu umulinu lapuloto sou uauli, xe uasi la anu umomomo sou uuaulixaꞌa mo unoꞌu kisivalu sou uuli no anu iaveiave noxou uasi.  
\v 6 \x + \xo 2:6 \xt 1Ko 9:7\x*Xe itema vile uxaxai no xai xaviinu misevile, la anu itema sou unoꞌu temanu tei.  
\v 7 Naxavutala laixe no anu vaivaikala eni elosine ne. Nini naxavutala laixe, la Tila ulosine xavutala lamana sou nalavu no anu mimii latala.   
\p
\v 8 \x + \xo 2:8 \xt Rom 1:3; 1Ko 15:4\x*Mo naxavutalanu Iesu Kalisito. Anu ꞌilusunu ane Deviti e tatananu tuala ne Isilaeli, mo Lataua mutulusou no anu soli. Anu aꞌalo laixe eni aaꞌaloxu noxiꞌa ta mitema ane.  
\v 9 \x + \xo 2:9 \xt Ep 3:1, 13; Pil 1:12-14\x*Eni aaꞌaloxu aꞌalo laixe noxou Iesu, la sou eni atatavule tuꞌutuꞌumaxu mo aneꞌi misakileli loxo itema ane sou muꞌoxonu susu. Ia vaikala noxou Lataua ne, umomomo sou aneꞌi isakiinu uasi.  
\v 10 Anu aloxo ne, la sou eni aꞌosasou tuꞌutuꞌumaxu e muxalisilo sou asuꞌulineꞌi ta mitema ane Lataua musosovosiꞌa sou aneꞌi inoꞌu mauli noxou Kalisito Iesu mo ixolu noxou utotomu no tuala ane lamanaxusi.   
\q1
\v 11-13 \x + \xo 2:11-13 \xt Mat 10:33; Rom 3:3-4; 2Ko 4:11; Tit 1:2\x*“Lexe nenge tasoli loxo Anu musoli,  
\q2 la nenge tamauli loxo Anu mumauli.  
\q2 Xe lexe nenge taꞌosasou tuꞌutuꞌumaxu e uxalisinge no lia ꞌo,  
\q2 la nenge nengeꞌa taxolu sou tasaxilaꞌu tuala teitexi.  
\q2 Xe lexe nenge tasingisou,  
\q2 la Anu usingisinge kalumo.  
\q2 Xe voxo seꞌi, la nenge taxiu tumalingeu Iesu,  
\q2 ia Anu ulavusou uxiunu tumalouinge uasi.  
\q2 Xo Anu molu usingisou uasi.”  
\p Vaikala ane ne, anu umomomo sou nenge tamuxaxu tanenge no anu.   
\s1 Itema sou Xaixai Noxou Lataua E Anu Musosovosou  
\p
\v 14 \x + \xo 2:14 \xt 1Ti 6:4; Tit 3:9\x*Eni emasaxa lexe nini naavutilixu xavutalaiꞌa ta mitema no anu vaivaikala e eni alosine ne. Mo navikalaneꞌi pekiaꞌu no iou Lataua aloxo ꞌo. Mamu sou iꞌotoꞌotosou anaxaꞌa no anu vaivaikala. Xo iꞌotoꞌotosou anaxaꞌa, la usuꞌulineꞌi ta menexiꞌa uasi. Ia uꞌoxo masuaneꞌi aneꞌi ane ilomusiꞌa.  
\v 15 \x + \xo 2:15 \xt 1Ti 4:6\x*Nini pekiaꞌine sou nalailixu maulixene ulai noxou Lataua loxo Anu musosovosine loxo nini itema sou xaixai noxou. Nini namaela mamu, ia nalosieixu ta mitema laixe no anu vaikala manina.  
\v 16 \x + \xo 2:16 \xt 1Ti 4:7\x*Naxiu tumalineu vaivaikala vitavitanisi sou lia ꞌo. Xo aneꞌi ane ivikala no anu vaikala vitavitanisi ne, aneꞌi ixolu vaꞌaxu noxou Lataua,  
\v 17 \x + \xo 2:17 \xt 1Ti 1:20\x*mo vaivaikala noxiꞌa ne, uveꞌa ta menexiꞌa loxo vovolea vila masua manina. Tamei noxiꞌa ualasiꞌa lexe Amenaio ilou Piletusi.  
\v 18 Aneꞌi ilou mipolo vilenu vaikala manina. La aneꞌi ivikala lexe Lataua mutulusiꞌa ta mitema misoisoli mukalu ne. La sou aneꞌi mixovulaulaulixaꞌa ta mitema seꞌi no anu muxamuxaxu taneꞌi noxiꞌa.  
\v 19 \x + \xo 2:19 \xt Iti 16:5; Ais 52:11; Ioa 10:14; 1Ko 8:3\x*Ta mitema seꞌi miꞌoxonu aloxo ne, ia Lataua mutulusou mii vile pekiaꞌu manina loxo vuluvulu sou tani. Kaukavu muxolu no anu aloxo ꞌo. Vile lexe, “Tila mulavusiꞌa ta mitema ane aneꞌi ta naꞌu manina.” Xe vile aloxo ꞌo, “Ta ꞌei ane ipalaꞌalixu lexe Iesu anu Tila, la aneꞌi ixiu tumaliꞌau ꞌiliꞌilixo masumasua.”   
\p
\v 20 No nano no tani tatila, la mimii seꞌi sou taꞌani no anu loxo paku ilou latotope mo lakupapa a uai. Ioxe, seꞌi ne, miꞌoxonu no anu xoulu ilou siliva sou voxo tilasi xe seꞌi, la miꞌoxonu no anu ovu ilou lialia, anu sou voxovoxo vitanisi. \fig |alt="vessels and clay pots" src="HK00143B.TIF" size="col" loc="2Ti 2:20-21" copy="Horace Knowles © The British & Foreign Bible Society, 1954, 1967, 1972." ref="2 Timoti 2:20" \fig*  
\v 21 La sou lexe itema vile uxolu vaꞌaxu no anu ꞌiliꞌilixo masumasua, la anu uxali itema sou xaixai noxou Tila, loxo paku ilou latotope ane sou voxo tilasi. Anu uxolu vaꞌaxusi sou uꞌoxonu xaixai noxou tatananu tani tila ne xe uloosi sou xaixai laixe ukalusi.   
\p
\v 22 \x + \xo 2:22 \xt 1Ti 6:11\x*La sou nini naxiu tumalineu ꞌilixo sou voteꞌi ane ta maulu ilavusou iꞌoxoꞌoxonu. Ia ngingi ngongiꞌa aneꞌi ane ilinga noxou Tila no anu oponeꞌi maninasou, ngamulinu ꞌiliꞌilixo ane laixe mo ngamuxamuxaxu tangengi noxou Kalisito mo ngamasaxaiꞌa ta mitema la opongengi uai seꞌisisi.  
\v 23 \x + \xo 2:23 \xt 1Ti 4:7\x*Namuxaxu xaleeneniu vaivaikala vulaulau. Xo nini nelavu lexe mii ane ne, uxalixu ꞌotoꞌoto sou anaxaꞌa.  
\v 24 Mamu sou itema sou xaixai noxou Tila iloꞌa ta menexu iꞌotoꞌotosou anaxaꞌa. Ia anu uꞌoxo laixe noxiꞌa ta mitema ukalusi, mo anu ulosieixu ta mitema no anu vaikala noxou Lataua laixe xe anu itema sou laꞌiaxuiꞌa ta mitema palea uasi.  
\v 25 Mo anu itema sou upelaꞌa ta mitema seꞌisisi ane aneꞌi imasaxau uasi. Anu upelaꞌa ta mitema, la male Lataua upelemasaxaneꞌi lexe ixiunu xavutalaiꞌa mo ilavusou vaikala manina.  
\v 26 Mo aneꞌi xavutalaiꞌa lamana, la iꞌume no anu uoi noxou Satani e mutetelisiꞌa sou iꞌoxonu xaixai noxou.   
\c 3  
\s1 Voxo Kaluxu  
\p
\v 1 \x + \xo 3:1 \xt 1Ti 4:1\x*Ia eni emasaxa lexe nini nalavu aloxo ꞌo. No voxo ane voxo kaluxusou uxali, la tuꞌutuꞌumaxu tavuꞌalo uxali.  
\v 2 Tuꞌutuꞌumaxu uxali, la ta mitema ne, taneixaꞌasi mo imasaxau lamolisi. Mo aneꞌi imasaxa ixali tila mo iꞌitinu ualasiꞌa. Ilea vaikala masumasua mo ilomuxaꞌa ta neniꞌa iloꞌa ta mamiꞌa uasi mo ivikala laixe ulai noxiꞌa kalumo uasi. Aneꞌi imulinu ꞌiliꞌilixo ane Lataua umasaxau uasi.  
\v 3 Mo aneꞌi taneixaꞌa ta mitema uasi, mo ixiunu tumaliꞌau ꞌiliꞌilixo masumasua uneꞌe noxiꞌa uasi. Mo ikalavoisiꞌa ta mitema. Mo aneꞌi ilavusou isaxilaꞌu muamuaꞌixaꞌa laixe uasi. Mo aneꞌi iꞌoto, la ivea ta mitema. Mo aneꞌi imasaxau ꞌiliꞌilixo ane laixe uasi.  
\v 4 Aneꞌi ixiu tumaliꞌaiꞌa ta menexiꞌa mo aneꞌi iavuti palea sou imulinu xavutala masua noxiꞌa. Xe aneꞌi ixavutala lexe aneꞌisi ta laixe manina. Aneꞌi imasaxau Lataua uasi, ia aneꞌi imasaxau mimii no anu vasimeꞌa sou ꞌosaꞌosasi.  
\v 5 \x + \xo 3:5 \xt Mat 7:15, 21; Tit 1:16\x*Naxolu vaꞌaxu noxiꞌa ta mitema ane ne. Xo aneꞌi ikalavoi lexe mimulinu ꞌiliꞌilixo ane Lataua mumasaxau. Ia uasi, no anu vasimeꞌasi. Aneꞌi mixolu vaꞌaxu no anu xavi sou ꞌiliꞌilixo ane Lataua mumasaxau.   
\p
\v 6 Seꞌi noxiꞌa ne, iꞌunalai no tanitani sou ivikala seꞌisisi ulai noxiꞌa ta sema ane xavutalaiꞌa mamalaxu sou ta sema imulinu vaikalaiꞌa. Aneꞌi ta sema ne, milavu lexe misusu tavuꞌalo, ia oponeꞌi uavuti sou iꞌoxonu ꞌiliꞌilixo masumasua tavuꞌalo la.  
\v 7 Aneꞌi ta sema imasaxa lexe inoꞌu lavulavu no anu vaikala noxou Lataua utotomu, ia imomomo sou ilavu no anu vaikala manina ne uasi.  
\v 8 \x + \xo 3:8 \xt Mul 7:11\x*Ta mitema ane ne, aneꞌi mitelo anaxaꞌau vaikala manina noxou Lataua, loxo Ianesi ilou Iamulesi mixiu tumaliꞌau Mosesi. Aneꞌi ixavutala no anu mii masumasuasi, la sou milapalapau no anu muxamuxaxu taneꞌi noxou Lataua.  
\v 9 Ia aneꞌi isolonu iꞌoxonu ꞌiliꞌilixo ane ne uasi, xo ta mitema latala imaisou mo ilavu lexe ꞌilixoiꞌa ne masumasua mukalu loxo ta mitema tamei, Ianesi ilou Iamulesi.   
\s1 Vaikala Peletoto Ulai Noxou Timoti  
\p
\v 10 Ia nini nelavu manina no anu vaivaikala eni elosine, mo muamuaꞌixo mo mii ane eni exavutala sou aꞌoxonu, mo muxamuxaxu taleli noxou Lataua mo laꞌiaxo palepalea uasi, mo talelixaꞌa ta mitema xe etavule tuꞌutuꞌumaxu ia eꞌoxonu xaixai noxou Lataua.  
\v 11 \x + \xo 3:11 \xt Apo 13:14-52; 14:5, 8-20\x*Mo nini nelavu manina lexe ta mitema ne Antioki mo Ikonia mo Lisita ne, aneꞌi milosilo tuꞌutuꞌumaxu mo mivelo masualeli loxo ꞌo. Eni exalisou tuꞌutuꞌumaxu tavuꞌalo, ia eꞌoxonu xaixai noxou Latauasi. Voxovoxo ne, eni exalisou tuꞌutuꞌumaxu ne, ia Tila muꞌumeleli no anu.  
\v 12 \x + \xo 3:12 \xt Mat 16:24; Ioa 15:20; Apo 14:22\x*Anu manina musuku lexe itema vile umuxaxu tanu noxou Kalisito Iesu mo umasaxa lexe umulinu ꞌiliꞌilixo ane Lataua mumasaxau, la anu uxalisou tuꞌutuꞌumaxu.  
\v 13 Ia ta mitema ta masua iloꞌa ta mitema ane sou ikalakalavoineꞌi ta mitema lexe aneꞌi ta mitema sou ilosieixu vaikala noxou Lataua, la aneꞌi iloꞌa ikalavoineꞌi ngatongatoꞌo. La sou aneꞌi iloꞌa ixali masua avile.  
\v 14 Ia nini natetelisou vaikala e nelomusou noxilo mo nelavusou. Xo nini nelavusou lexe ꞌei ane mulosine lavulavu,  
\v 15 mo nelavusou Lavuku Tavuna no mine nini molomoloxene. Lavuku Tavuna ne, ulosine lavulavu, mo sou nini namuxaxu taneni ulai noxou Kalisito Iesu, la Lataua upamaulineni.  
\v 16 \x + \xo 3:16 \xt Rom 15:4\x*Vaivaikala latala e muxolu no nano no Lavuku Tavuna ꞌo ne, Lataua mutausou. Anu usuꞌulinenge sou talavu no anu vaikala manina noxou Lataua xe upelaꞌingexu susu maꞌia nenge teꞌoxonu sou umomosinge mo ulosiengexu ꞌiliꞌilixo ane mulapu.  
\v 17 Mo sou itema sou xaixai noxou Lataua ne, ulaxalaxaꞌi no anu laixe manina sou umomomo sou uꞌoxonu xaixai laixe ukalusi.   
\c 4  
\p
\v 1 No iou Lataua ilou Kalisito Iesu e Anu utulusiꞌa ta mitema aneꞌi ane imamauli xe aneꞌi ane misoisoli no anu vaivaikala mo Anu ulivu uneꞌe no lia ꞌo sou usaxilaꞌinge, eni avikalaneni pekiaꞌu manina aloxo ꞌo.  
\v 2 Nini xavineni sou naaꞌaloxu vaikala noxou Iesu Kalisito ulai noxiꞌa ta mitema. Voxo seꞌi, la aneꞌi ilomuxene xe voxo seꞌi, la aneꞌi imasaxa lexe ilomuxene uasi, ia nini naxaxaisi sou naaꞌaloiꞌaxu utotomu. Napelaꞌa ta mitema sou susu noxiꞌa mo nakaitoloneꞌixu, ia naavutilixaꞌa lexe sou imulinu ꞌiliꞌilixo noxou Lataua. Nini nalosiꞌa ta mitema lavulavu aloxo ne, la nini naꞌoxo seꞌisisi noxiꞌa mo laꞌiaxene palea uasi.  
\v 3 \x + \xo 4:3 \xt 1Ti 4:1\x*Xo iliꞌi, la ta mitema ilomuxu vaikala noxou Lataua uasi. Ia sangaliꞌa uavuavuti sou ilomusou vaikala ane aneꞌi imasaxau, la sou aneꞌi iꞌavaliꞌa ta mitema tavuꞌalo sou ilosieixu ta mitema lavulavu, sou ineꞌe ilosieixu vaikala ane aneꞌi imasaxa lexe ilomusou.  
\v 4 Aneꞌi ixiunu tumaliꞌau vaikala manina noxou Lataua, ia imulinu aꞌalo vitavitanisi.  
\v 5 Ia eni avikalaneni pekiaꞌu aloxo ꞌo la. Nini naxavutala laixe utotomu mo natulu pekiaꞌine mo natavule tuꞌutuꞌumaxu ane uxali noxine xe naxaxai sou naaꞌaloiꞌaxu ta mitema aꞌalo laixe noxou Kalisito Iesu. Nini naꞌoxonu xaixai noxou Tila noxine, la naꞌoxonu maninasousi.   
\p
\v 6 \x + \xo 4:6 \xt Pil 2:17\x*Xo eni ne, voxo sou soli noxilo ne a muneꞌe ꞌalai mukalu. Lexe eni asoli, la sialuxo unixi loxo uaini ulai noxou Lataua.  
\v 7 \x + \xo 4:7 \xt 1Ti 6:12\x*Eni eꞌotoꞌoto laixe no anu ꞌotoꞌoto loxo amitema sou ꞌotoꞌoto vile laixe. Mo eni eiave no anu iaveiave noxilo mukalu, loxo amitema sou aiave no anu saisale. Xe eni etetelisou muxamuxaxu taleli noxou Iesu laixe mo muneꞌe mutalo vaimomo ꞌo.  
\v 8 \x + \xo 4:8 \xt 1Ko 9:24-25\x*La sou Lataua mulalaxiinu kisivalu vile noxilo. Kisivalu ne, eni anoꞌu sou euli no anu saisale no voxo ane Tila ulosilo. Anu ulosilosi uasi, ulosiꞌa aneꞌi ane Lataua mumoxoꞌa lexe aneꞌi ta mitema mulapu no voxo ane Anu utulusiꞌa ta mitema no anu vaivaikala. No voxo ane ne, la anu ulosiꞌa ta mitema latala e ixomaiou Iesu manina sou ulivu uneꞌe kalumo.   
\s1 Paulo Mumasaxa Lexe Timoti Upalea Ulai Noxou  
\p
\v 9 Eni alingaiꞌine lexe nini napulili sou napalea uneꞌe noxilo.  
\v 10 \x + \xo 4:10 \xt Apo 15:37-39; 2Ko 8:23; Kol 4:14\x*Xo Temasi muxolu noxilo tei, ia anu mumasaxau ꞌiliꞌilixo sou lialia ꞌo misevile, la sou anu muꞌumesilo mo mulai ne Tesalonika. Xe Kulesikesi kalumo mulai no xalee lia tila ne Xalatia. Mo Tito kalumo mulai no xalee lia tila ne Talematia.  
\v 11 Aneꞌi miꞌumesilo mukalu, ia nexi noxou Lukasi a taxoxolu ꞌo. Lexe nini naneꞌe noxilo, la ngingi ngongou Maluko nganeꞌe. Xo anu usuꞌulileli no anu xaixai noxilo.  
\v 12 Eni epalusou Tukiko sou mulai no tuala ne Epeso.  
\v 13 \x + \xo 4:13 \xt Apo 20:6\x*Nini naneꞌe noxilo, la nanoꞌu tokolomoxeni veveeni a muai no taasou Kalipo no tuala ne Toloasi. Xe nanoꞌu lavukuxeni. Ia taneni vulusi uasi, nanoꞌu lavuku seꞌi ane miꞌoxonu no anu sipsip sosou kalumo.   
\p
\v 14 \x + \xo 4:14 \xt Ais 59:18; Rom 2:6\x*Ia itema sou uꞌoxonu mimii no anu kopa, ualasou lexe Alekisanda ne, anu mulosilo tuꞌutuꞌumaxu tavuꞌalo misevile. Eni alingau Tila noxilo lexe anu ukolinu ꞌiliꞌilixo ane anu muꞌoxonu muneꞌe noxilo ꞌo.  
\v 15 Anu aloxo ne, la sou nini kalumo nasaxilaꞌine noxou. Xo anu ne, anu mutautalo ananexe no voxo ane nexi teaꞌaloxu aꞌalo laixe noxou Kalisito Iesu.   
\p
\v 16 Xe no voxo ane aneꞌi mitulusilo no anu vaivaikala tei, la eni eꞌoxo laixesousi. Ia itema vile utulu no paꞌumelo sou usuꞌulileli uasi, ta menexilo miꞌumesilo sou milailai mukalu. Ia eni alinga ulai noxou Lataua lexe Anu ukolinu ꞌilixo e aneꞌi miꞌoxonu muneꞌe noxilo ne uasi.  
\v 17 Aneꞌi miꞌumesilo, ia Tila noxilo ne uꞌumesilo uasi. Anu mutulu no paꞌumelo sou mulosilo xavi sou eni eaꞌaloxu aꞌalo laixe ukalusi ulai noxiꞌa ta mitema, mo sou ta mitema no xalexalee tuatuala ukalusi ne ilomusou. Anu Tila noxilo ne, muꞌumeleli mulivunoxilo no anu tuꞌutuꞌumaxu ane ne, loxo anu muꞌumeleli no anaxu mii vile ilemolu lexe laeoni.  
\v 18 La sou eni elavu manina lexe iliꞌi, la Tila noxilo uꞌumeleli no anu ꞌiliꞌilixo masumasua e ta mitema iꞌoxo uneꞌe noxilo mo ulailixo laixesi no tuala noxou teitexi no opo loxotolo. Eni alinga lexe nenge taꞌitinu Tila noxinge ualasou utotomu mo ukalu uasi. Manina.   
\s1 Vaikala Kaluxu  
\p
\v 19 \x + \xo 4:19 \xt Apo 18:2; 2Ti 1:16-17\x*Nasova aso laixe noxilo ulai noxie Pilisila ilou mulue Akuila mo Onesipolo ilee semau iloꞌa ta ꞌolu.  
\v 20 \x + \xo 4:20 \xt Apo 19:22; 20:4; Rom 16:23\x*Elasito muxolu no tuala ne Kolinito, ia Tolopimosi ne, eni eꞌumesou no tuala ne Mileto, xo pipiena muꞌoxonu ne.  
\v 21 Eni emasaxa lexe voxo sou laꞌiua usoko uao, ia nini napulili sou naneꞌe noxilo. Uvuloi mo Puteni mo Lino iloꞌa Kalautia xe ta mitema noxou Lataua tavuꞌalo misova aso laixe mulai noxine.   
\p
\v 22 Eni alinga lexe Tila uxolu noxine mo alauna noxou uxolu noxinge kalumo.