\id 2TH  - Pele-Ata Genesis, Jonah and New Testament [ata] -Papua New Guinea 2009 (DBL -2014) 
\h 2 TESALONIKA 
\toc1 Uoli Voloxu Tameisou Ane Paulo Mukaukavu Mulai Noxiꞌa Ta Tesalonika 
\toc2 2 Tesalonika 
\toc3 2Te 
\mt2 UOLI VOLOXU TAMEISOU ANE PAULO MUKAUKAVU MULAI NOXIꞌA  
\mt1 TA TESALONIKA  
\imt1 Vaikala lamana  
\ip Ta mitema no tuala tila ne Tesalonika ne, no mine Paulo ilou Timoti mikaukavu mulai noxiꞌa tei sou lailivuxu Kalisito ne, la aneꞌi xavutalaiꞌa uai laixe uasi. Xo leviani miꞌoxo lexe voxo sou Kalisito ulivu uneꞌe ne, anu muxali. La sou Paulo ilou Timoti mikaukavunu uoli voloxu ta tameisou ꞌo la, sou imomosou xavutalaiꞌa la.  
\ip Paulo mulamanalixaꞌa lexe voxo ne uxali uao. Anu muvikala lexe tei sou Kalisito ulivu uneꞌe, la ꞌilixo sou lolomu lailaixe ne usuꞌa, xe ꞌiliꞌilixo masumasua ne utila manina. Mo ta mitema ixolu no laaxu itema vile ualasou lexe “ꞌilixo nuniꞌu manina” sou uulaxuneꞌi. Mo itema ne uvikala masumasua noxou Kalisito.  
\ip Paulo muvikalaneꞌi lexe itulu pekiaꞌa no anu muxamuxaxu taneꞌi noxiꞌa mo itavulenu tuꞌutuꞌumaxu. Anu muvikalaneꞌi lexe ixaxai xavineꞌi mo isaxilaꞌa ngatongatoꞌo laixe loxo anu Paulo iloꞌa tavaitamiou iꞌoxoꞌoxonu.  
\iot Aꞌalo muai no nano aloxo ꞌo  
\io1 Vaikala lamana 1  
\io1 Pateteli noxou Paulo 2  
\io1 Taliꞌi sou suꞌuli no anu lakilaka 3  
\c 1  
\p
\v 1 Eni Paulo, nexi noxiꞌa Sailasi ilou Timoti tekaukavu vaikala ane ꞌo mulai noxinge ngingi ta mitemau Lataua ne Tesalonika e ngingi ngongiꞌa Lataua Maminge mo Tila Iesu Kalisito ngepita vilesisi.   
\p
\v 2 \x + \xo 1:2 \xt Rom 1:7\x*Nexi talinga lexe alauna mo opo seꞌisisi noxou Lataua Maminge ilou Tila Iesu Kalisito umomomo sou uxolu noxinge.   
\s1 Vaikala Laixe Musuku Ilou Linga Noxiꞌa Paulo Ena Mulai Noxou Lataua  
\p
\v 3 Ta vivixe, utotomu ne nexi talavusou talemolu laixe musukusi singe ulai noxou Lataua mo anu laixe sou nexi taꞌoxonu aloxo ne. Xo muxamuxaxu tangengi ne, anu muxali pekiaꞌu maninasou mo ꞌilixo sou ngingi vilevilesi tanengingenge ngatongatoꞌo ne, anu muxali laixe.  
\v 4 \x + \xo 1:4 \xt 2Ko 7:4; 1Te 2:19\x*Anu aloxo ne, la sou ane nexi taꞌitinu ualasinge no taiineꞌi ta mitema sou lalolalotu noxou Lataua. Xo ngingi ngetulu pekiaꞌinge mo ngemuxamuxaxu tangengi noxou Lataua, la no anu tuꞌutuꞌumaxu tavuꞌalo xe tovotovo iouiou muxali noxinge ne, ngingi ngetavulenusi.   
\p
\v 5 La mimii latala ane muxali noxinge ne, anu sosovo sou lexe Lataua uiloinge no anu xavutala noxou ane mulapu. Xo tuꞌutuꞌumaxu ilou tovotovo ane ngingi ngetatavule ne, anu muꞌoxongengi sou ngingi ngaxolu no nano no anu saxisaxilaꞌu noxou Lataua.  
\v 6 \x + \xo 1:6 \xt Rom 12:19\x*Lataua anu mulapu, la sou Anu molu ukolinu tuꞌutuꞌumaxu noxiꞌa aneꞌi ane milosinge,  
\v 7 \x + \xo 1:7 \xt 1Te 3:13\x*mo Anu umasaxa lexe uxexeenu tuꞌutuꞌumaxu ane ngingi ngetavule ne, la ulosinge nengeꞌa maꞌila. Anu uꞌoxonu mii ane ne uxali no voxo ane Tila Iesu iloꞌa ta angelo noxou xavineꞌi iꞌumesou opo loxotolo, ia iluꞌe ixali lamana no anu navu lamixu.  
\v 8 \x + \xo 1:8 \xt Ais 66:15\x*No voxo ane ne, la sou aneꞌi ane ilavusou Lataua mo ilomuxu aꞌalo laixe noxou Tila noxinge Iesu uasi ne, Anu ulosiꞌa navunavu.  
\v 9 \x + \xo 1:9 \xt Ais 2:10\x*Ta mitema ane ne, Lataua ulosiꞌa navunavu sou ꞌiliꞌilixo noxiꞌa mo usuꞌaneꞌi avilesi ilai ixolu vaꞌaxu manina noxou Tila mo imaisou xavi laixe noxou la uasi.  
\v 10 \x + \xo 1:10 \xt Kol 3:4\x*No mine Tila Iesu ulivu uneꞌe, la ta mitema noxou Lataua iꞌitinu ualasou mo ta mitema aneꞌi ane mimuxaxu taneꞌi noxou iꞌosasou misevile. Mo ngingi kalumo ngaꞌoxonu aloxo ne, xo ngingi ngemuxaxu tangengi no anu aꞌalo laixe noxou Iesu e nexi teaꞌaloxu noxinge.   
\p
\v 11 \x + \xo 1:11 \xt Kol 1:9; 1Te 1:2-3\x*Xe nexi texavutalanu mii ane ne mo ꞌava noxou Lataua noxinge la sou utotomu ne nexi talinga lexe Lataua noxinge usuꞌulingengi sou ngingi namulinu ꞌiliꞌilixo ane umomomo no iou. Mo nexi talinga lexe no anu xavi noxou ne, la Anu usuꞌulingengi no anu voteꞌi mulapu mo ngaꞌoxonu ꞌiliꞌilixo laixe mo xaixai tavuꞌalo e ngingi ngemuxaxu tangengi noxou Iesu sou lexe ngaꞌoxonu.  
\v 12 La sou no mine ngingi ngaꞌoxonu aloxo ne, la nexi talinga sou lexe ngingisi ane ngaꞌitinu ualasou Tila noxinge Iesu xe Anu uꞌitinu ualasinge kalumo no anu alauna noxou Lataua noxinge xe Tila Iesu Kalisito.   
\c 2  
\s1 Sosovo Seꞌi Uxali Tei, Ka sou Kalisito Uneꞌe  
\p
\v 1 Ioxe, ta vivixe, nexi talingainge aloxo ꞌo. No anu lailivuxu Tilasinge Iesu Kalisito ane uneꞌe la utokinenge no anu sou nenge nengeꞌa Iesu taxolu tapita, la nexi talinga lexe ngalomusou vaikala ane ꞌo laixe.  
\v 2 Nexi texavutala lexe ta mitema seꞌi mivikalangengi lexe voxo noxou Tila a muxali mukalu ne. Male, vile noxiꞌa mukalavoingengi no anu vaikala e ulee vile sou kalavoi mulosou. Xe vile noxiꞌa muaꞌalomengixu mo vile noxiꞌa mukalavoingengi lexe nexi tekaukavu aloxo ne. Ia ngingi ngelomusiꞌa mivikala aloxo ne, la mamu sou ngakuluke mo ngaꞌoloꞌolo.  
\v 3 \x + \xo 2:3 \xt 1Ti 4:1; 1Ioa 2:18; 4:3\x*Mo mamu sou ngalomuxu itema vile vaꞌaxu ukalavoingengi no anu voteꞌi iouiou mo vaivaikala noxou vitanisi. Xo voxo noxou Tila uxali uao, la ta mitema tavuꞌalo ixiu tumaliꞌau Lataua xe itema e umasaxa umulinu lapuloto noxou Lataua uasi uxali upalaꞌa tei. Ia iliꞌi, la itema ane ne, Lataua ukalusou no tualasiꞌa ta mitema misoisoli.  
\v 4 \x + \xo 2:4 \xt Ese 28:2; Tan 11:36\x*Anu uxiu tumalou Lataua mo uxiu tumalouiꞌa ta mimii ane ta mitema ilavusou ilotu noxiꞌa. Ia anu molu uꞌitinu ualasou sou uxali tila noxiꞌa mo uxolu teitexi no tani tila noxou Lataua sou uvikala lamana lexe, “Enisi eni Lataua.”   
\p
\v 5 Nenge nengeꞌa texoxolu, la ngaxavu-talanu mimii ane evikalangengixu ꞌole uasi?  
\v 6 Mo ngingi ngelauvusou maꞌia ane mutaluxu voteꞌisou itema ne, la sou anu uxali upalaꞌa lamana vaimomo uasi, ia anu uxali upalaꞌa lamana no voxo ane Lataua ulemolu lexe anu uxali.  
\v 7 Xo anu ane mutaluxu voteꞌisou mo utetelisou ne, ulai utalo no anu voxo ane sou anu uꞌitalonu ulai. Ia vaimomo ꞌo, la uxaxai xaviinu, la Lataua unoꞌu mo sou ulailixu vaꞌaxu.  
\v 8 \x + \xo 2:8 \xt Ais 11:4; Pal 19:15\x*La no voxo ane itema e umasaxa umulinu lapuloto noxou Lataua uasi ne uxali upalaꞌa lamana, xe Tila Iesu uvau usoli no anu anaxu tauuxu ilou lamanaxu no mine anu ulivu uneꞌe.  
\v 9 \x + \xo 2:9 \xt Pal 13:11-13\x*Ia itema ane umasaxa umulinu lapuloto noxou Lataua uasi ne, uxali la uꞌoxonu xaixai noxou Satani. Anu uꞌoxonu xaixai sou kalakalavoi ane ta mitema imaisou la taneꞌi liliiou xe uꞌoxonu sosovo iouiou kalumo.  
\v 10 Mo anu uꞌoxonu ꞌiliꞌilixo masumasua iouiou sou ukalavoineꞌi aneꞌi ane imuamuaꞌi no voteꞌi ane ne sou ilai iulua. Xo Lataua mulosiꞌa vaikala manina sou lexe upamaulineꞌi no anu, ia aneꞌi mixiu tumaliꞌau mo imasaxau sou inoꞌu uasi.  
\v 11 Tavaꞌu aloxo ne, la sou Lataua musovanu xavi sou xovulaulau mulai noxiꞌa, mo sou aneꞌi imuxaxu taneꞌi no anu mimii sou kalakalavoi.  
\v 12 Tavaꞌu sou ta mitema tavuꞌalo ane imuxaxu taneꞌi no anu vaikala manina uasi, ia iꞌosasou ꞌiliꞌilixo masumasua sou iꞌoxonu ne, Lataua utulusiꞌa no anu vaivaikala.   
\s1 Ngatulu Pekiaꞌinge  
\p
\v 13 \x + \xo 2:13 \xt Ep 1:4; 2Te 1:3\x*Ia, ta vivixe e Tila ulavusou umasaxainge misevile. Utotomu ne, nexi talavusou talemolu laixe musuku ulai noxou Latauasinge. Xo tatei no mine Lataua ukoinu mimii uao, la Anu musosovosinge sou lexe upamaulingengi. Uleenu Tavuana uxaxai noxinge mo uꞌoxongengi ngaxali ta mitema noxou Latauasi xe ngamuxaxu tangengi no anu vaikala manina noxou.  
\v 14 La Anu muꞌavalinge no anu aꞌalo laixe noxou Tila Iesu Kalisito noxinge e nexi teaꞌaloxu sou lexe ngingi nganoꞌu mimii lailaixe ane Anu ulosinge.  
\v 15 La sou ta vivixe, ngatulu pekiaꞌinge mo ngatetelisou vaivaikala e nexi telosiengixu xe tekaukavu mo telelemolu no ananexe la tesova mulai noxinge.   
\p
\v 16 Tila noxinge Iesu Kalisito anusi ilou Lataua Maminge mimasaxainge, la sou miꞌoxonu alaunasinge mo utotomu ne mipeletotosinge sou tatulu pekiaꞌinge mo miꞌxonenge tamolo tanenge sou taloopala Iesu ulivu uneꞌe.  
\v 17 La nexi talinga lexe aneꞌi ilou iavutilixu opongengi mo iꞌoxongengi pakiaꞌinge sou ngamulinu ꞌiliꞌilixo lailaixe ukalusi mo ngavikala la ngavikala laixesi.   
\c 3  
\s1 Ngalinga Noxou Lataua sou Usuꞌulinexi  
\p
\v 1 Ioxe, ta vivixe. Vaikala kaluxusou aloxo ꞌo. Nexi tataliꞌisinge lexe ngingi ngalinga noxou Lataua sou usuꞌulinexi, mo sou nexi taaꞌaloxu vaikala noxou Tila la ulai upalea noxiꞌa ta mitema no tuatuala ukalusi mo itoxonusi loxo mulai noxinge la ngingi ngetoxonu.  
\v 2 Mo ngalinga noxou Latauasi lexe Anu uxexenexi no avoꞌa ta mitema ta masua ilou ꞌilixoiꞌa masua, xo ngingi ngelavusou lexe ta mitema tavuꞌalo ne imuxaxu taneꞌi noxou Kalisito uasi.  
\v 3 Ia Tila ne, Anu itema sou uvikala lexe uꞌoxonu mii vile, la Anu uꞌoxonusi. La sou Anu uꞌoxongengi pakiaꞌinge mo uvimelusinge noxou itema masua.  
\v 4 \x + \xo 3:4 \xt 2Ko 7:16; Xal 5:10\x*Nexi noxiꞌa Tila telavu manina lexe ngingi a ngaꞌoxoꞌoxonu mo ngamulimulinu ꞌiliꞌilixo ane nexi tevikalangengixu lexe ngingi ngaꞌoxonusi utotomu.  
\v 5 Xe nexi talinga lexe Tila uulaxungengi, mo sou ngingi ngamulinu manina ꞌilixo noxou Lataua sou umasaxaiꞌa ta mitema mo ꞌilixo noxou Kalisito sou mutulu pekiaꞌu no anu tuꞌutuꞌumaxu.   
\s1 Vaikala Peletotosiꞌa Aneꞌi Ane Ixaxai Uasi  
\p
\v 6 \x + \xo 3:6 \xt Rom 16:17\x*Ioxe, ta vivixe. Nexi tavikalangengi pekiaꞌu no anu ualasou Tila Iesu Kalisito uvikalangengi lexe ngingi ngaxolu vaꞌaxu noxiꞌa ta vivinge latala e ixolu vitanisi mo ixaxai uasi xe imulinu vaivaikala e nexi telosiengixu ne uasi.  
\v 7 \x + \xo 3:7 \xt Pil 3:17\x*Xo ngingi menge ngelavusou lexe ngingi ngamulinu ꞌiliꞌilixomexi a loxovaa? Nenge nengeꞌa texoxolu, la nexi taxolu vitanisi uasi,  
\v 8 \x + \xo 3:8 \xt 1Te 2:9\x*mo nexi tanoꞌu laꞌilalixaꞌa ta mitema vitanisi uasi. Ia nexi texaxai xavinexi no aso xe no ꞌolovoxo, mo sou nexi talosinge tuꞌutuꞌumaxu no anu xoluxolungenge uasi.  
\v 9 \x + \xo 3:9 \xt 1Ko 9:4; 1Te 1:6\x*Nexi umomomo sou tavika-langengi lexe ngalosixe mii loxo laꞌilali, ia nexi taꞌoxo aloxo ne uasi. Xo nexi temasaxa lexe tamaxaꞌu ꞌiliꞌilixo ane laixe ulai noxinge sou ngamuli ꞌilixonexi.  
\v 10 Xo nenge nengeꞌa texoxolu, la nexi telosinge lapuloto vile aloxo ꞌo, “ꞌEi ane uxaxai uasi, la umomomo sou unoꞌu laꞌilali vitanisi uasi.”   
\p
\v 11 \x + \xo 3:11 \xt 1Ti 5:13\x*Ia nexi telomusiꞌa xo moseꞌi no taiingengi ne lexe ixolu vitanisi mo ixaxai uasi ia iꞌauꞌausou ivivikalasou xaixai noxiꞌa ta mitemasi.  
\v 12 \x + \xo 3:12 \xt 1Te 4:11\x*Nexi noxiꞌa Tila Iesu Kalisito tavikalaneꞌi ta mitema ane ne pekiaꞌu lexe aneꞌi ixolu laixe mo iꞌoxonu xaixai sou usuꞌulineꞌi no anu laꞌilalixaꞌa.  
\v 13 \x + \xo 3:13 \xt Xal 6:9\x*Ia ta vivixe. Ngingi ne, mamu sou ngatotosa sou ngamulinu ꞌiliꞌilixo ane laixe.   
\p
\v 14 Ia lexe itema vile noxinge ne umulinu vaivaikala e nexi tekau-kavu xe telosiengixu uasi, la ngingi ngasaxilaꞌinge noxou itema ne mo ngaxolu vaꞌaxu noxou. La sou anu umaela no anu ꞌiliꞌilixo anu muꞌoxonu ne.  
\v 15 \x + \xo 3:15 \xt 1Te 5:14\x*Ia ngingi ngamaisou itema ane ne loxo anu uluamenge ne uasi, ia ngapeletotosou pekiaꞌu sou ngapaipounu xavutalau loxo anu vivinge manina noxou Iesu.   
\s1 Vaikala Kaluxusou  
\p
\v 16 Ioxe, nexi talinga lexe Tila anu itema sou tavaꞌu opo seꞌisisi molu uꞌoxongengi ngaxolu no anu opo seꞌisisi no voxovoxo utotomu e no voxo laixe xe no voxo ane tuꞌutuꞌumaxu uxalisinge kalumo. Tila umomomo sou uxolu noxinge ngingi latala ne ukalusi.   
\p
\v 17 Eni Paulo, ia eni ekaukavunu vaivaikala no avolo sou esova aso laixe mulai noxinge ne. Ia no mine eni akaukavunu vaivaikala noxilo sou asova ulai noxiꞌa ta mitema, la eni alavusou akaukavunu no anu avolosi, mo sou aneꞌi ilavusou lexe sosovo noxilo ane.   
\p
\v 18 Eni alinga lexe alauna noxou Tila noxinge Iesu Kalisito umomomo sou uxolu noxinge ngingi latala ukalusi.