\id TIT  - Dano NT [aso] -Papua New Guinea 1989 (DBL -2014) 
\h TITOꞌ 
\toc1 Pauloꞌ Titoꞌni Luhuvo Niteꞌ Gizo Imineꞌ 
\toc2 Titoꞌ 
\toc3 Tit 
\mt1 PAULOꞌ TITOꞌNI LUHUVO NITEꞌ GIZO IMINEꞌ  
\ip Pauloꞌ Titoꞌni Luhuvo Niteꞌ Gize-dingumuꞌ Gomuꞌ Gataaꞌ Gamazi  
\ip Titoꞌ nene nGiliki ve minineꞌ. Pauloꞌ aza Izesuꞌnimuꞌ lo-emeꞌ emeꞌ ivo Izesuꞌ zuho loloꞌ ineꞌ. Alingeꞌ nene Pauloꞌ mone mone ogo monoꞌ lo-ngemeꞌmo moninguꞌ nene Titokisi makatoꞌ neꞌmine iꞌmi monasineꞌ.  
\ip Idoꞌ Izesuꞌ zuho ingine Kolidi ebekuꞌ minaniꞌ engita monokumuꞌ geni neꞌmine sotoꞌ o-ngedavo Pauloꞌ aza Titoꞌni imiselavo vo aꞌmine geniꞌine ne hize apase-ngidineꞌ. Geniꞌine hize apase-ngedosa ofa moni do lumo lumo ogo Izesuꞌ zuho gohoꞌ gahaliꞌ Zelusalemi ebeta nizaniꞌ nene ngemelone li gomukutiꞌ apiꞌ igi di lumo lumo aniꞌ nene imineꞌ mili di lumo lumo i pililizave lo aꞌmine gono dadoꞌ gizebo ineꞌ. Pauloꞌ luhuvo niteꞌ Kolidi ebekuꞌ Izesuꞌ zuho minaniꞌ nene gize ngemavo do ngemelesa do-ngedo nave li eveneꞌ ma nete gilaniꞌ eleꞌvoleꞌ ineꞌ. Pauloꞌ luhuvo niteꞌ gohi Kolidi aleve gize-ngidinguꞌ nene Titoꞌnimuꞌ nene hamo hamoꞌ ma lo neive.  
\ip Gamene haꞌna vavo aꞌmidotiꞌ Titoꞌ aza Paulokisi ailani naba ma minineꞌ gulive Keleta neuꞌ vasineꞌ. Keleta aleve minanguꞌ nene Zuda ve ma vi minaniꞌ. Aꞌmine Zuda ve Keleta ailaniuꞌ minangutiꞌ linge ma ne Pedekosi ve lii nosoꞌ niteꞌ apiꞌ igi naaꞌ aniꞌ holiseꞌ nene minilisa vi Zelusalemi ebeta mini Oꞌmosoꞌmo Sikalahuꞌ imiselelineꞌ gameneukisi aꞌmida minaniꞌ. Aꞌmine gameneuꞌ nene linge ma Izesuꞌ zuho liliꞌ i nilisave. Keleta aleve vaiꞌ goloso mini engiꞌ numuno ebeꞌningukisi vaiꞌ minaniꞌ. Aꞌmine aleve nene Zuda ve minamaniꞌ. nGiliki gamaziutiꞌ laaꞌ aniꞌ idoꞌ aꞌinedunuꞌ liliꞌ aniꞌ oꞌmoso nitetoꞌ nene monoꞌ li-ngimi ngopoꞌni laaꞌ aniꞌ. Keleta aleve linge ma nene sipiloꞌ lamineꞌ di monaaꞌ aniꞌ. Linge ma nene elese hulaakuꞌ nene lamineꞌ hulaaꞌ aniꞌ. Neꞌmine igaꞌ aniꞌza engiꞌ monovoꞌine nene Oꞌmosoꞌmo lo huko lineꞌ gamazi neloꞌ eꞌmetamaaꞌ aniꞌ. Ingine gamazi sozaloꞌ aleve mini veꞌine mukiꞌ nalisa gilaaꞌ aniꞌza gono dalisa gilamaaꞌ aniꞌ.  
\ip Pauloki Titoki gono di hamoꞌ mili Keleta aleve Izesuꞌnimuꞌ li-ngimasineꞌ gamaziloꞌ nene ma nete gili di Izesuꞌ zuho liliꞌ aniꞌ. Pauloꞌ aza misubo mala volosa Titoꞌni Keleta ailaniuꞌ Izesuꞌ gamaziꞌve lo-ngemeꞌ ngemeꞌ ogo geni engita sotoꞌ ilineꞌ hize apaseꞌ apaseꞌ o-ngedo minelive lo hulo-do vineꞌ. Tiꞌ ogo alingeꞌ nene Titoꞌni luhuvo niteꞌ hulo-dineꞌ. Idoꞌ aꞌmine luhuvo nitekuꞌ nene gomuꞌ gono dalive lo lo-dineꞌ mamuꞌ nene lo gala ineꞌ. Monoꞌ gizebo ve ve lo naniꞌmine ve do ote-ngedelihe neꞌminemuꞌ Titoꞌni lo-imineꞌ. Ve linge ma eveneꞌ moni limilizahe li monoꞌ soza saza li li-ngimaaꞌ aniꞌ nene oꞌve lo-ngedezo lo Pauloꞌ Titoꞌni gohi lo-imineꞌ. Idoꞌ Izesuꞌ zuholite igi mili moniliza monovomuꞌ nene gohi Titoꞌni lo gala ineꞌ. Aꞌminemuꞌ nene imineꞌ molo Keleta aleve lo-ngemeꞌ ngemeꞌ ilive losa lo gala ineꞌ. Pauloꞌ aza eveneꞌ ma imiselelesuve lo Titoꞌni lo-imineꞌ. Idoꞌ aꞌmine ve Titoꞌ neida vilineꞌ nene Titoꞌ aza Keleta ailani hulo eiꞌ Pauloꞌ neida numuno ebeꞌ ma gulive Nikopoli Akaia misubouꞌ vilive lo neꞌmine lo gizo Titoꞌni hulo-dineꞌ.  
\ip Alingeꞌ Pauloꞌ gohi nalatoꞌ mino Timoteoꞌni luhuvo niteꞌ hulo-dinguꞌ nene Titoꞌ aza hulo-nedo misubo ma gulive Dalamatia nela vave lo gizineꞌ. Monoꞌ Godolo Gosohokuꞌ Titoꞌnimuꞌ nene mo aꞌnevoꞌ gataaꞌ noune.  
\ip Pauloꞌ Titoꞌni luhuvo niteꞌ gize-dinguꞌ nene gatosa gele guno olosane.  
\c 1  
\s1 Pauloꞌ Titoꞌni Gekeꞌ Lo-do Luhuvo Niteꞌ Gize-dineꞌ  
\p
\v 1-4 Titoo, naza monoꞌ akaloꞌ geleꞌmize molokuvo nazasi gazasi hamoꞌ monoꞌ gele eleꞌvoleꞌ o nosinako gaza neniꞌ gipeꞌne gihile gelo minaneꞌ make, luhuvo mene nogize-giduve. Pauloꞌ naza Oꞌmosoꞌmi gelekeleꞌ izipe Izesu Kilisitoꞌ aposoloꞌve neniꞌ nogize-giduze. Ningezo.  
\p Oꞌmosoꞌmo aꞌmine gono nimineꞌ nene eze do kegeso ningekineꞌ eveneꞌ ingine monokuꞌ eleꞌvoleꞌ ilizave lo idoꞌ gamazi gihile lamineꞌ monokuꞌ ma neineꞌ nene gili vevesi minilizave lo aꞌmine gono nimineꞌ ma neive. Aꞌmine gamazi gihile neꞌmi monovo neꞌmino neive: Oꞌmoso soza losaꞌmive neꞌmo gozopoꞌ gamene galaꞌmuda vomine olihe Okulumoꞌ misubo do sotoꞌ molamineꞌ gamene neuꞌ salani gamazi lo minevoꞌ minevoꞌ lemeni dameni nene lehize-ledelove lo lo huko lo molo-ledo lingumuꞌ vode otavo gilingili ogo minaaꞌ noune. Aꞌmine lo huko molaniꞌ gamene ogavo aꞌmine gamaziꞌve do sotoꞌ o-lidineꞌ. Ee, do sotoꞌ o-ledo do luꞌ izaaꞌ ive Oꞌmosoꞌmo nenikumuꞌ gaza aꞌmine gamazi nene lo sotoꞌ ogo eveneꞌ lo-ngemeꞌmo vo mineline lo gono nemavo nemuꞌ nene gono daaꞌ nouve.  
\p Neꞌmine ogo luhuvo niteꞌ mene gize-gedo meteho Oꞌmoso idoꞌ do luꞌ izaaꞌ ive Izesuꞌ Kilisitoꞌ engitatiꞌ nasahilikisi hongu lo lamino minaaꞌ monovo nesi geikisi miniliho lo Oꞌmosola noluve.   
\s1 Keleta Aleveti Monoꞌ Gizebo Ve Nene Naniꞌmine Ve Do Ote-ngedelihe Nemuꞌ Titoꞌni Lo-imineꞌ Gamazi  
\p
\v 5 Gono lumo ma ha minineꞌ nene do veveso do apaseline lo Keleta ailaniuꞌ hulo-gedo vuvonguꞌ gono gamazi neꞌmine lo-giduvoniꞌ ma neive: Gaza numudoꞌ namadoꞌ mono monoꞌ ve linge ma do gizebo ve minilizave lo ngeleꞌmize molalosane.  
\v 6 Gizebo ve ngeleꞌmize molalo ma ve neꞌminevoꞌ ngeleꞌmize molalosane: Eveneꞌ mukiꞌ gilavo lihimeꞌve nomivo veneꞌ hamoꞌ do ezesi bizovoꞌ minavo izipahala zuho nete Oꞌmosola giꞌmizi minikevo eveneꞌ nete engiꞌ monovo ningi gili zogo zogo izi mini gamazi gilamaaꞌ ave nizave li lamilizadoꞌ minikevo ma ve neꞌminevoꞌ ngeleꞌmize molalosane.  
\v 7 Ee, Oꞌmosoꞌmi gonoloꞌ gizebo ogaꞌ ilineꞌ nemuꞌ monoꞌ gizebo ve minelive nene eveneꞌ ezemuꞌ gilavo lihimeꞌve nomivo minelineꞌ o neive. Neꞌmine ogo mino eveneꞌ ngivileꞌ ogo gamazi belaaꞌ ive minamo izeboloꞌ geto molosaꞌmive mino noso no sipaki amaaꞌ ive mino lovo amaaꞌ ive mino moni heneni mamuꞌ mumuzoꞌ amaaꞌ ive neꞌmine ve minelineꞌ o neive.  
\v 8 Neꞌmine ogo venenga ve ikevo ma nasahiliꞌ o-ngedo ngeleꞌmize molaaꞌ ilive mino initeꞌ lamineꞌ ogo molo ogakumuꞌ umo helelive mineleseive. Idoꞌ gala gele vevesaaꞌ ive ma mino eze monovoꞌve lisihekovoꞌ o minelineꞌ mino eze okoꞌno lulo do hamoꞌ ogo gizebo ogaꞌ ive mineleseive.  
\v 9 Neꞌmine ogo lo-ngeme ngemeꞌ nouneꞌ gamazi gihile nene do giliꞌ lo do minelive. Nene gamaziꞌmo eze hize eleꞌ o-divo monoꞌ gihile lamineꞌ nene lo-ngemo gaꞌine do hize eleꞌ o-ngedelive. Neꞌmine ogo leze monoꞌ gamazi bilaaꞌ aveti gamazi nene do peleseveꞌ izo do galaꞌmuda ilive.   
\s1 Keleta Ailaniuꞌ Sozaloꞌ Ve Vaiꞌ Li Minangumuꞌ Gizineꞌ Gamazi  
\p
\v 10 Nanitekumuꞌ ve. Eveneꞌ aꞌmanapa igi gamazi bilaaꞌ ave mukiꞌ nizanako nemuꞌ ve. Ingine godoꞌninguꞌ gamazi nomivo gopo gamazi li eveneꞌ di gopo i-ngidi goꞌine izaaꞌ nave. Engikutiꞌ Zuda ve ma Izesuda vi giꞌmizi alingeꞌ di gopo igi Izesuꞌ monokovoꞌ nomive li avotemoti louꞌ gamazi nesi gele dunivo Oꞌmosoꞌmo do luꞌ izelive li vauve ili neꞌmine igaꞌ nave.  
\v 11 Neꞌmine igaꞌ ave nete eveneꞌ linge ma veneꞌ izipahaꞌinesi mukiꞌ nene ngeleꞌmizi gopo igaꞌ nave. Ee, ingine goꞌine izekunivo moni limilizahe li gili lamilizadoꞌ o minineꞌ gamazi nene li ladanga monoꞌ apizi ngimi ngeleꞌmizi gopo igaꞌ nave. Idoꞌ neꞌmine igaꞌ nanako nemuꞌ nene engiꞌ gamazi doꞌmo lemoo oꞌve lo-ngedelone.  
\v 12 Keleta ailaniuꞌ aleveti monovoꞌine goloso minineꞌ nene sotoꞌ o minineꞌ ve. Idoꞌ engikutiꞌ ve ma gamazi monovo gelaaꞌ iveꞌmo engiꞌ monovo lo sotoꞌ ogo tiꞌ lo lineꞌ: Keleta aleve nene sozaloꞌ ve mini idoꞌ ize loposo neꞌmine mini nosoꞌ niteꞌ nalisavoꞌ lamineꞌ gili mini gono dalisa goseleꞌ goloso ngebelaaꞌ neive. Ee, gamene galaꞌmudatiꞌ neꞌmine monovoꞌine mine do dizo idisesi ha neive lineꞌ.  
\v 13-14 Engikumuꞌ aꞌmine gamazi lineꞌ nene laminetoꞌ lineꞌ ve. Nemuꞌ nene Zuda veti heluno haza gamazi nene gohi gili dami haza eveneꞌ gamazi gihile nene meheꞌine imaaꞌ avete li huki nizaniꞌ gamazi nesi gili dami monoꞌ gili vevesi mini gili eleꞌvoleꞌ ilizave lo gaza amuzo molo ngelemo gaꞌine dozo.  
\v 15 Ingine initeꞌ mamuꞌ nene di gililizanipe di nalizanipe neꞌmo lutine goloduvo eleleseive li laaꞌ nahe. Naza lo-gemelove: Eveneꞌ luꞌine lamineꞌ o nolineꞌ nene initeꞌ mataꞌ do lamineꞌ o-ngedeleseiha eveneꞌ monoꞌ gili huli mini luꞌine goloso o nolineꞌ nene luꞌine gaꞌine ngemeni dameni goloso ineꞌ nenako nemuꞌ nene initeꞌ mataꞌ do lamineꞌ o-ngedamo gohi do goloso o-ngedeleseive.  
\v 16 Ingine Oꞌmosoꞌmi monovo gele none li veꞌinedunuꞌ laaꞌ naniꞌza igi mili igaꞌ aniꞌ neꞌmo lo sotoꞌ neivo gihile nomive. Ingine eveneꞌ goloso gamazi gili hulaaꞌ ave gono lamineꞌ hamokisi ngeli ma dalizadoꞌ nomive.   
\c 2  
\s1 Monoꞌ Gihile Lamineliꞌmi lulouꞌ Minaaꞌ Gamazi Ozohoti Gamazi  
\p
\v 1 Ingine aniꞌ neꞌmine amo gaza neve gamazi lo-ngemelineꞌ nene monoꞌ gihile lamineꞌ apize gimunidoꞌ vo miliseꞌ o minelineꞌ gamazivoꞌ lo-ngemelesane.  
\v 2 Tiꞌ lo lo-ngemezo: Ve ozoho ingine gaꞌine gopo amivo mini ngemeni dameni vevese minivo mini gaꞌine gili hehe li luꞌine gaꞌine gizebo igi mini monokuꞌ minaaꞌ monovoꞌine di lamineꞌ igi eveneꞌ luꞌine ngimi nasahiliꞌ i-ngidaaꞌ monovoꞌine di lamineꞌ igi geni initeliꞌmi lulouꞌ mini ma eleꞌvoleꞌ igi hongu li minaaꞌ monovoꞌine nene di lamineꞌ igi minilizave.  
\v 3 Idoꞌ veneꞌ eleni nizaniꞌ nene lo-ngemanivo ingine aꞌmineꞌmine igi monoꞌ veneꞌ liliꞌ igi mini eveneꞌ ngemenga lami vaini noso geli geli igi namilizave. Neꞌmine igi mini monovo lamineꞌ apizi ngimi minilizave.  
\v 4 Adoꞌ ingine veneꞌ gosohoꞌ nesi vaꞌningine izipahaꞌine luꞌine ngimi gizebo i-ngidilizaniꞌ aka ngelebizilizave.  
\v 5 Idoꞌ ingine veneꞌ gosohoꞌ gili vevesi okoꞌine luꞌine gizebo igi luꞌine hamoꞌ ivo mini numuꞌine ebeꞌine gizebo lamineꞌ igii numuꞌninguꞌ minaaꞌ ave nesi nasahiliꞌ i-ngidi mini vaꞌningine gelekeleꞌ i-ngidi minilizave. Eveneꞌ Oꞌmosoꞌmi gamazi divi lediviꞌ ikelizave li neꞌmine igi minilizave.   
\s1 Gosoꞌveti Gamazi  
\p
\v 6 Idoꞌ aꞌmineꞌmino gosoꞌvesi gaꞌine do lo-ngemanivo inginesi okoꞌine luꞌine gizebo lamineꞌ ilizave.  
\v 7 Idoꞌ gaza neve monovoka do lamineꞌ ogo mino eveneꞌ ingine initeꞌ mukiꞌ ilineꞌ ningi geiꞌ monovokaloꞌ geꞌmetilizangumuꞌ ve lo initeꞌ lisiheꞌ ogo molo mino aka tiꞌ ogo ngelebizezo: Monoꞌ apize ngemelo ma abeleni amo do veveso apize ngemezo.  
\v 8 Soza lo ladani ogane li lamilizaniꞌ gamazi laminekovoꞌ lo-ngemezo. Neꞌmine anivo lovo i limaaꞌ ave ingine lelikumuꞌ gamazi goloso lilisa viseꞌ igi ngovozo hili hulilisave.   
\s1 Gonoꞌ Daaꞌ Aveti Gamazi  
\p
\v 9 Idoꞌ gelekeleꞌ gipe alu nene lo-ngemanivo ingine meꞌningine muluꞌine di lamineꞌ i-ngidi gamazi di tibizi li-ngimami initeꞌ mataꞌ mukitoꞌ nene gelekeleꞌ i-ngidi gamzaiꞌine diivoꞌ minilizave.  
\v 10 Neꞌmine igi meꞌningi initeꞌ mataꞌ gumine dami initeꞌ matatoꞌ gizebo lamineꞌ igi gono di igi mili ilizaniꞌ neꞌmo veveseleseive. Neꞌmine ilizaniꞌ nene Oꞌmoso do luꞌ izaaꞌ iveꞌmi monoꞌ nene neꞌmine manaꞌmine ogo do otelesune li tiꞌ ilisave.   
\s1 Vaitoꞌ Lute Lisihekovoꞌ Ivo Mino Gamene Nabamuꞌ Gizebo Olone  
\p
\v 11 Oꞌmosoꞌmo eveneꞌ mukiꞌ do lamineꞌ o-ledelesa nasahiliꞌ o-lidineꞌ nene sotoꞌ ogavo ningekune.  
\v 12 Idoꞌ nasahiliꞌ o-lidineꞌ neꞌmo leleꞌmize vevesavo Oꞌmoso mehede emo zogo zogo izaaꞌ monovo nene hulo Oꞌmosomuꞌ gilamavete mene misubouꞌ initekumuꞌ ngumo helepeleꞌ igaꞌ naniꞌ nesi hulo idise gamene okode lute gizebo lamineꞌ ogo initeꞌ lisihekevoꞌ ogo molo monoꞌ lemeni dameni ogavo minelone.  
\v 13 Idise gameneuꞌ neꞌmine ogo mine do dizo gilingili ogo minaaꞌ nouneꞌ initeꞌ laminekumuꞌ nene gizebo ogo minelesune. Aꞌmine initeꞌ lamineꞌ neꞌmino neive: Leze Oꞌmosote naba do luꞌ izaaꞌ ive Izesuꞌ Kilisitoꞌ aloseive. Ogavo eze labanaꞌve ningelesune.  
\v 14 Aza neve goloso niteꞌ gozopoꞌ doꞌmo vuneꞌ akalotiꞌ do tineꞌ molo leleꞌmizo ogo do luꞌ izelesa lelikumuꞌ ogo hilineꞌ. Ee, lihimeꞌine apaso do lamineꞌ o-ngedekuvo neze zuho liliꞌ igi mini luꞌine aꞌmida mili initeꞌ lisiheꞌ laminekumuꞌ amuzo mili gili igi mili ilizave lo lelikumuꞌ ogo hilineꞌ ve   
\p
\v 15 Haza ve nabe li gilikelizaze. Neꞌmine gamazi lo-ngemo gaꞌine do ngeleꞌmize veveso amuzo molo lo-ngemezo.   
\c 3  
\s1 Monovo Laminekovoꞌ Ogo Molo Mineloningumuꞌ Gizineꞌ Gamazi  
\p
\v 1 Geiꞌ gizebouꞌ minaniꞌ eveneꞌ nene gamazi do gosohoꞌ ogo tiꞌ lo lo-ngeme ngemeꞌ ogo minezo: Ingine ngamanisi idoꞌ ngamani gono di lelitoꞌ gizebo igi minaaꞌ avesi gelekeleꞌ i-ngidi gamaziꞌine gili dalizave. Alingeꞌ gono lamineꞌ atoliꞌmine atoliꞌmine nasahiliꞌ ogaꞌ gono neꞌmine sotoꞌ ilineꞌ nene ha dalone li amuzo mili gili minilizave.  
\v 2 Eveneꞌ mamuꞌ ngemenga lami lovo lolize hizami hongu ve mini eveneꞌ mukiꞌ nene nasahiliꞌ i-ngidi minilizave.  
\v 3 Lazasi gozopoꞌ nene aꞌmineꞌmine ogo negi hizo ladani ogo gamazi gele hulo gopo minuneꞌ ve. Neꞌmine ogo initeꞌ goloso ato atoꞌ lumo helaaꞌ ineꞌ idoꞌ laniteꞌ gelaaꞌ uneꞌ initeꞌ nemuꞌ gelekeleꞌ o-do mino eveneꞌ igi mili igaꞌ naniꞌ neꞌmine ogo molo mineloninako lo gituhoꞌ no mikileꞌ ogaꞌ uneꞌ ve. Neꞌmine ogo nonivo eveneꞌ mukiꞌ biluvaꞌ i-lidi minikevo lazasi biluvaꞌ o-ngedo minaaꞌ uneꞌ ve.  
\v 4 Neꞌmino nonivo alingeꞌ leleꞌmize lamineꞌ ogaꞌ ive Oꞌmosoꞌmo eze nasahiliꞌve nesi idoꞌ lulo limineꞌ nesi do sotoꞌ ogo lelebizo do luꞌ izineꞌ.  
\v 5 Do luꞌ izineꞌ nene laza initeꞌ lisiheꞌ ogo molo ogaꞌ nouneꞌ nemuꞌ ve lo gilivoba asiꞌve lelikumuꞌ mulumo gilineꞌ nemuꞌ do luꞌ izineꞌ ve. Noso izo do izipe gosohoꞌ sotoꞌ aniꞌ neꞌmine o-ledo eze Sikalahuꞌve neꞌmo lemeni dameni gosohoꞌ limineꞌ neꞌmine ogo do luꞌ izineꞌ.  
\v 6 Ee, do luꞌ izaaꞌ ive Izesuꞌ Kilisitoꞌ gono davo neꞌmo Oꞌmosoꞌmo eze Sikalahuꞌve vauve elo lehize-lidineꞌ.  
\v 7 Nasahiliꞌ o-lidineꞌ nemuꞌ leleꞌmize lisiheꞌ ogo eleꞌvoleꞌ ngemeni dameni disa miniviꞌ miniviꞌ ilizave lo eze Sikalahuꞌve lehize-lidineꞌ ve. Neꞌmine ogo laza ezesi mino minevoꞌ minevoꞌ oloninako lo gilingili ogo dalosa giluneꞌ initeꞌ nene molo-lidineꞌ.  
\v 8 Gamazi mene gihile lamineꞌ lineꞌ ne neive.  
\p Oꞌmosomuꞌ gili eleꞌvoleꞌ igi nizave ingine gaꞌine hamoꞌ gili initeꞌ lamineꞌ ato atoꞌ eveneꞌ hize eleꞌ i-ngidaaꞌ neꞌmine nene amuzo mili igi mili minilizave loo luvoniꞌ gamazi mene amuzo molo lo-ngemeline lo nogiluve. Gamazi mene lamineꞌ neinako eveneꞌ mukiꞌ hize eleꞌ o-ngedelidoꞌ o neive.  
\v 9 Abelenga gamazi idoꞌ haza gamazimuꞌ viseꞌ igi li voleloꞌ meloꞌ igi minaaꞌ naniꞌ nesi gele hulo mehenga emo idoꞌ avoꞌningi guliveꞌinemuꞌ li naza eveneꞌ nabaliti ngaꞌvopilemoꞌ nouve li engiꞌ okoꞌine di dizi di naba igi di hutileꞌ igi laaꞌ naniꞌ nesi gele hulo mehenga emo idoꞌ Moseꞌ Zuda vemuꞌ louꞌ gamazi lo huko lineꞌ nemuꞌ ato atoꞌ gamazi li lovo lolize hizi minaaꞌ naniꞌ nesi haza gamazi gopo gamazi gihile nomineꞌ nenako gele hulo mehenga emezo.  
\v 10 Eveneꞌ malite gamazi di gopo igi li monoꞌ mulise hizi hoꞌli nizavo ma do vevese-ngedelesa gaꞌine do gamene hamope setape lo-ngemanivo gilamavo ma izeꞌ molo do hulo-ngedezo.  
\v 11 Gele nabe. Ve neꞌmine ve nene peleseveꞌ izaaꞌ ave luꞌine gopo o vineꞌ mini ingine igi mili igaꞌ aniꞌ neꞌmo engiꞌ monovoꞌine do sotoꞌ ogave.   
\s1 Pauloꞌ Titoꞌni Gonomuꞌ Lo-emo Eveneꞌ Gekeꞌ Lo-ngidineꞌ Gamazi  
\p
\v 12 Naza Nikopoli ebekuꞌ vo mino hepeꞌ naba elelineꞌ gamenelokisi nene aꞌmida minelove lo lo hukokuze. Atemaꞌni he Tikikoꞌni he geiꞌ nanida imiselekuvo vo hetelavo ma gaza nene aꞌmine mineloniꞌ ebeta alove lo amuzo molozo.  
\v 13 Idoꞌ ve setaꞌ adoꞌ Apoloki idoꞌ louꞌ gamazi li hukaniꞌ gelaaꞌ ive Zenaki monoꞌ gono di vilisidoꞌ initeꞌ mataꞌ viseꞌ ikelisize. Nemuꞌ akaloꞌ initeꞌ mataꞌ amuzo molo viseꞌ ogo do sotoꞌ o ngemezo.  
\v 14 Initeꞌ lamineꞌ ogo molo ogaliꞌmi monovo ningi gili lamineꞌ ilizangumuꞌ nene leze evenete zuho Izesuꞌ evenele mukiꞌ ingine gono lamineꞌ diꞌmi vilizadoꞌ nene luꞌine milalizave. Neꞌmine igi eveneꞌ ma initekumuꞌ viseꞌ igi geni ngebelavo ma hizi eleꞌ i-ngidilizave. Leze zuho engita monoliꞌmi gihile nomineꞌ minikelizaze.   
\p
\v 15 Nezesi makaꞌ noneꞌ aleve ingine gopoꞌni nilave. Monokumuꞌ ve li luꞌine limaaꞌ nave ngopoꞌni nolo-ngiduze. Gaza lo-ngemezo. Nasahiliꞌ o-lengedelive lo Oꞌmosola noluve. Moda ve.