\id ROM - Dano NT [aso] -Papua New Guinea 1989 (DBL -2014) \h LOMA \toc1 Ezesuꞌ Evenele Zuho Loma Ebekuꞌ Minaniꞌ Engiꞌ Lukuvo Niteꞌ Pauloꞌ Gize-ngimineꞌ \toc2 Loma \toc3 Lom \mt1 IZESUꞌ EVENELE ZUHO LOMA EBEKUꞌ MINANIꞌ ENGIꞌ LUHUVO NITEꞌ PAULOꞌ GIZE-NGIMINEꞌ \ip Izesuꞌ Evenele Loma Ebekuꞌ Minaniꞌ Neti Luhuvo Niteꞌ Pauloꞌ Gize-ngidingumuꞌ Gomuꞌ Gataaꞌ Gamazi \ip Mene luhuvo niteꞌ nene aposoloꞌ Pauloꞌ gizineꞌ. Eikumuꞌ nene monoꞌ godolo gosohokuꞌ Aposoloꞌ buku neuꞌ nene mukiꞌ goloso gatelesane. Izelehoi melehoi ne Zuda aleve minasineꞌza Zuda alevelite misuboꞌninguꞌ minamasineꞌ. Siti nabaꞌ naba Taliso ve languꞌ Kilikia polovinisi ve laniꞌ neuꞌ nene minaniꞌ. Gamene ma nene Pauloꞌ meleho aza Loma ve loloꞌ ineꞌ. Loma ngamani neꞌmo nene leliꞌ misuboteutiꞌ ve ne neive lo lineꞌ. Nemuꞌ Pauloꞌ sotoꞌ ineꞌ gameneuꞌ nene Loma ve ve li-daaꞌ idoꞌ Zuda ve ve li-daaꞌ aniꞌ. Pauloꞌ gulive Zuda velatiꞌ nene Sauloꞌ ve lo minineꞌ idoꞌ Loma velatiꞌ nene Pauloꞌ ve lo minineꞌ. Aꞌmine gulive Pauloꞌ neꞌmi monovo nene ngomo ve losa ve. Pauloꞌ aza umungiveloꞌ minineꞌ gameneuꞌ nene Talisola mino seli numuno gizaatoꞌ lainimi ineꞌ. Mine do vo naba ineꞌ nene Zelusalemila vo Zuda tisaꞌ naba gulive Gamalieleꞌ ve lo minineꞌ neꞌmo sukulu lo-ngemaaꞌ ineꞌ sukuluuꞌ vo sukulu lo minineꞌ. Halisaioꞌ ve gehepeve loloꞌ ogo Zuda velite louꞌ gamaziloꞌ eꞌmetelesa amuzo goloso molaaꞌ ineꞌ. Alingeꞌ Izesuꞌ evenele zuholite Izesuꞌnimuꞌ nene Oꞌmosoꞌmi gipele mino aza do luꞌ izelive lo Oꞌmosoꞌmo imiselelesa live ma ne neive laniꞌ gelo aꞌmine nene gosohoꞌ nilave lo gelo nemuꞌ aꞌmidoꞌ gili eleꞌvoleꞌ igi idoꞌ eveneꞌ li-ngimamilizave lo oꞌve lo-ngedelesa amuzo molaniꞌ. Neꞌmine ogo apiꞌ ogo mono Izesuꞌ evenele viseꞌ ogo do vo nalaꞌ numunguꞌ hulo-ngedelesa vineꞌ. Ebeꞌ hota atoꞌ aleveliti misuboukosi neꞌmine o-ngedelesa vineꞌ. Neꞌmine ogo nomonivo Izesuꞌ Kilisitoꞌ aza holiꞌmi labanaꞌve nesi ivileꞌ ivo atoliꞌmine labanaꞌvesi mino sotoꞌ o emavo nelotiꞌ lulo do velepeꞌ izo Izesuꞌ evenele loloꞌ ineꞌ. Zuda ve minamineꞌ heta atoꞌ ve nene monoꞌ gamazi lamineꞌ nene lo-ngemelive lo Oꞌmosoꞌmo eletineꞌ. Ebeꞌ atoꞌ atoꞌ mukita neꞌmine olosa vineꞌ. Zuda vesi idoꞌ eveneꞌ linge ma netesi oꞌve li-dilisa amuzo milaniꞌ. Gamene ma nene bilaaꞌ aniꞌ. Gamene ma nene nalaꞌ numunguꞌ eleꞌmize milaaꞌ aniꞌ. Bili hiladineꞌza Oꞌmosoꞌmo gizebo lamineꞌ oꞌdeꞌmo vo minivo gonoꞌve do osuꞌ lineꞌ. Pauloꞌ aza nadiꞌ ogo hilihe neꞌmi monovo nene ma monoꞌ godolouꞌ gizamaniꞌza gomutatiꞌ vomine eveneꞌ nete tiꞌ li laaꞌ nave. Izesuꞌnimuꞌ eveneꞌ lo-ngimingumuꞌ Loma ve nete gonitoꞌ eleꞌmize mili luvono nene bainati mitetunuꞌ giti hulaniꞌ ve laaꞌ nave. \ip Mene luhuvo niteꞌ nene Loma ebekuꞌ Izesuꞌ evenele minaniꞌ nene Pauloꞌ gize-ngidineꞌ. Loma neve nene kanitili Italia ve laaꞌ nanguꞌ nene siti naba minineꞌ ve. Vanu milioni (1 000 000) nesi ivileꞌ ivosa eveneꞌ vaiꞌ goloso minaniꞌ ve. Loma aleve nene amuzo malehe aleve goloso minaniꞌ ve. Engiꞌ amiꞌine nete kanitili mukiꞌ nene ngivileꞌ aniꞌ nenako nemuꞌ ve nabaꞌine Kaesaleꞌ aza Zuda velite ebeꞌinesi ne gizebo ogo ebeꞌ mukitoꞌ gizebo ineꞌ. Pauloꞌ monoꞌ gamazi lo-ngemelesa monineꞌ ebeꞌ mukiꞌ nene Lomaliꞌmo gizebo o minineꞌ. Loma ebekuꞌ nene monoꞌ nado apiꞌ ogo sotoꞌ ihe nemuꞌ nene ma gelamune. Ebeꞌ atota monoꞌ aleve liliꞌ aniꞌ mukiꞌ nete aꞌmida igi mini monoꞌ zuho di sotoꞌ aniꞌ noloseive. Pauloꞌ aza aꞌmine monoꞌ nene Loma vetinguꞌ ma do sotoꞌ amineꞌza eiꞌ vo Izesuꞌnimuꞌ lo-ngimineꞌ ebeꞌ linge mautiꞌ aꞌmida vaniꞌ nene gele neive. Guliveꞌine nene mene luhuvo gizo osuꞌ lo meseꞌ aseka lo-ngidida nene gatelesane. \ip Pauloꞌ aza Kolidi ebekuꞌ minineꞌ gamene nene Izesuꞌ evenele zuholite gohoꞌ gahalikumuꞌ moni di nubo aniꞌ nene do Zelusalemila volosa do nene ogo minineꞌ gamenela mene luhuvo niteꞌ nene gizineꞌ ve. Aꞌmine moni do vo ngemosa nelotiꞌ Loma vetinguꞌ Izesuꞌ evenele zuho minanikisi gamene ngomosiꞌ ma minosa nelotiꞌ nene kanitili gosohoꞌ gulive Sipeni ve languko nene vo Izesuꞌnimuꞌ monoꞌ gamazi lamineꞌ nene lo-ngemelesuve lo Loma vetinguꞌ Izesuꞌ evenele zuho minaniꞌ nene luhuvo niteꞌ gize-ngidineꞌ. \ip Mene luhuvo nitekuꞌ Pauloꞌ aza monoꞌ gamazi li-ngimangutiꞌ gilivo naba o minineꞌ nene Loma vetinguꞌ monoꞌ aleve minaniꞌ nene gize-ngidineꞌ. Oꞌmosoꞌmi veleloꞌ lisiheꞌ i minikevo Oꞌmosoꞌmo do nguꞌ izelineꞌ aka hamoꞌ nene Izesuꞌnidoꞌ gili eleꞌvoleꞌ ikevosavoꞌ ve lo monoliꞌmo lo neive lo lo-ngimineꞌ. Eveneꞌ mukiꞌ nene lihime monovo dikeve. Zuda aleve Oꞌmosoꞌmi louꞌ di minave netesi idoꞌ louꞌ gamazi damave heta atoꞌ ve netesi dikeve. Neꞌmine o neineꞌ nenako nemuꞌ eveneꞌ mukiꞌ ingine Oꞌmosoꞌmi veleloꞌ ve lisihetoꞌ ve liliꞌ ilizadoꞌ o neive. Gamene gamene Oꞌmosoꞌmi louꞌ gamazi mukitoꞌ eꞌmetatoꞌ nene eveneꞌ hamoliꞌmosi ngelo neꞌmine amilineꞌ nenako louꞌ neꞌmo ngelo Oꞌmosoꞌmi veleloꞌ do lisihetoꞌ ve loloꞌ o-ledamoloseive. Zuda vesi idoꞌ heta atoꞌ vesi Oꞌmosoꞌmi veleloꞌ lisiheꞌ o minaaꞌ aka hamoꞌ nene Izesuꞌnidoꞌ gele eleꞌvoleꞌ ogaꞌ ne neive. Idoꞌ Izesuꞌnimuꞌ gele eleꞌvoleꞌ uneꞌ neꞌmi gihileꞌve nene Oꞌmosoꞌmo lemeni dameni gosohoꞌ leme neidoꞌ do molo ogo molo minelonidoꞌ o neineꞌ monovomuꞌ nesi lo-ngimineꞌ. Idoꞌ Izesuꞌ malipo zaloꞌ helosa lihimete do hulaniꞌ nenako Oꞌmoso aza lelikumuꞌ gohi goloso gele minelidoꞌ nomive. Neꞌmine o neineꞌ nenako Oꞌmososi lezesi olusoteuꞌ nene hongu idoꞌ zogo monovosi nene neive lo lineꞌ. Oꞌmosoꞌmi Sikalahuꞌ neꞌmo Oꞌmosoꞌmi izipahala zuho nizave lo do kegese-ledo lihime dikilizave lo hize eleꞌ o-ledaaꞌ neive. Neꞌmine ogaꞌ neineꞌ nenako helaaꞌ neꞌmosi ngelo doꞌmo leme-ledamoloseive. Moseꞌ louꞌ gamazi neꞌmo naniꞌmine gono daaꞌ neihe nemuꞌ lo ngoloꞌ lineꞌ. Zuda aleve mukiꞌ adoꞌ Oꞌmosoꞌmo eiꞌ izipahala zuho gehepeve ve lo do kegesekineꞌ nete Izesuꞌni nanitekumuꞌ ningi hulahe nemukisi lineꞌ. Oꞌmosoꞌmo gelavo neꞌmino sotoꞌ ineꞌ ve. Nanitekumuꞌ. Aꞌmine neꞌmine ineꞌ neꞌmo heta atoꞌ ve netesi Izesuꞌnidoꞌ gili eleꞌvoleꞌ ilizadiꞌmo Oꞌmosoꞌmi izipahala zuho liliꞌ ilizaniꞌ aka do ngoloꞌ lineꞌ ve lo lineꞌ. Gamene ma Zuda ve ingine Izesuꞌni ningi goseleꞌ igaꞌ aniꞌ monovoꞌine nene huli Izesuꞌnimuꞌ gili eleꞌvoleꞌ ilisave. Idoꞌ neꞌmine ilizadotiꞌ gihileꞌve lamineꞌ nene eveneꞌ mukita sotoꞌ o-ngedeleseive lineꞌ. Neꞌmine losa Izesuꞌ evenele zuho ingine naniꞌmine monovoloꞌ izi mili minilizahe nemuꞌ lineꞌ. Leze hamo hamoꞌ nene Oꞌmosoꞌmo dalizave lo molo-lede neineꞌ gono nene dalone. Goseleꞌ amo gono nene amuzo molo dalone. Ge luka neme ne luꞌne geme idoꞌ ge hize eleꞌ o-nede ne hize eleꞌ o-gede lolone. Initeꞌ di goloso i-lidaaꞌ nave nesi nene lute ngemo monovo goloso do velepeꞌ izo o ngemamo monovo lamineꞌ o ngemelone. Dinate nene bekimi ogo takisi meni hizelone. nGamani nesi idoꞌ ngamani gono daaꞌ nave naba netesi gamaziꞌine gele dalone. Monovo goloso atoꞌ atotoꞌ nene mine olovoꞌ o minelone. Izesuꞌ evenele zuho linge malite initeꞌ ma adoꞌ ize nene nalobe namolobe idoꞌ gamene naba ve lo gizebo lamineꞌ olobe amolobe li gilii nevoꞌmine initekumuꞌ lezesi luꞌine mili hamoꞌ amaaꞌ nave nene lovo o ngemamo asi hamoꞌ zuho none lo bizo minelone lineꞌ. Initeꞌ olonidiꞌmo Izesuꞌ evenele linge ma luꞌninguꞌ do goloso ogalive lo monovoteloꞌ gizebo lamineꞌ ogo idoꞌ initeꞌ goloso neive lo ningo gele minelive ma aꞌmine initeꞌ goloso nene dalineꞌ initeꞌ ogalone lo gizebo lamineꞌ ogo monelone lineꞌ. Neꞌmine lo luhuvo gize osuꞌ loo eveneꞌ mukiꞌ nene meseꞌ aseka lo-ngedo Oꞌmoso gulive do hozi loo gize osuꞌ lineꞌ. \c 1 \s1 Pauloꞌ Aza Izesuꞌ Evenele Loma Ebekuꞌ Minaniꞌ Nene nGopoꞌni Lo Luhuvo Niteꞌ Gize nGimineꞌ Monovo \p \v 1-7 Pauloꞌ neniꞌ nene Izesuꞌ Kilisitoꞌ aposolo mineline lo Oꞌmosoꞌmo neleꞌmize molo eiꞌ gamaziꞌve lamineꞌ nene lo soto sotoꞌ ogo mineline lo do kegese-nedavo Izesuꞌ Kilisitoꞌ gonoꞌve daaꞌ uve loloꞌ ogo minuve naza Oꞌmosoꞌmi lulo lengemo eiꞌ evenele loloꞌ igi minilizave lo lengeleꞌmize molave Loma ebekuꞌ minave lengiꞌ nene luhuvo niteꞌ mene nogize-lingiduve. Aꞌmine Oꞌmosoꞌmi gamazi lamineꞌ nene Oꞌmosoꞌmo lo-ngemavo eze veleutiꞌ gamazi li sotoꞌ igaꞌ ave nete gomukutiꞌ monoꞌ godolouꞌ gizikavo minineꞌ ve. Aꞌmine gamazi lamineꞌ nene eiꞌ Oꞌmosoꞌmi gipele Guvetesi ve Izesuꞌ Kilisitoꞌnimuꞌ gizaniꞌ ma neive. Aꞌmine Oꞌmosoꞌmi gipele aza eveneꞌ okode neꞌminesi sotoꞌ ineꞌ nene Zuda veti guvetesi ve naba gomuꞌ minive Davidiꞌ aꞌvopilemoꞌ zuhoutiꞌ sotoꞌ ogo minineꞌ ve. Idoꞌ eiꞌ Sikalahuꞌve nene atoliꞌmine ogo lisiheꞌ lamineꞌ minidiꞌmo Oꞌmosoꞌmo amuzo molo hilingutiꞌ do ote-dineꞌ neꞌmo eiꞌ gipele gehepeve minineꞌ nene lelebizave. Idoꞌ eiꞌ Izesuꞌ Kilisitoꞌ nene Oꞌmosoloꞌ medelo mino aza nasahiliꞌ o-nedo aposolo neleꞌmize molaniꞌ nene naza eze gulive nene do ote-do eveneꞌ zuho ato atoꞌ mukiꞌ miniꞌmi monaniꞌ nene ezemuꞌ lo-ngemekuvo ezemuꞌ gili eleꞌvoleꞌ igi gamaziꞌve gili di eꞌmetilizave losa neleꞌmize molaniꞌ ve. Idoꞌ Loma ebekuꞌ Oꞌmosoꞌmo Izesuꞌ Kilisitoda lengeleꞌmize molave linginesi nene aꞌmine Oꞌmosoꞌmo eveneꞌ zuho ato atoꞌ mukita viline lo lo-nimineꞌ aleveti muliseutiꞌ nene nizave. Nemuꞌ nene luhuvo niteꞌ mene nogize-lengedo Oꞌmoso metehosi idoꞌ Guvetesi ve Izesuꞌ Kilisitoꞌ nesi nasahiliꞌ i-lingidikesivo neꞌmo lengiꞌ muludinguꞌ hongu lo minivo mine lamineꞌ igi minilizave lo Oꞌmosola noluve. \s1 Pauloꞌ Loma Ebekuꞌ Izesuꞌ Zuho Minaniꞌ Nene Vo Monoꞌ Gamazi Lo-ngemelesa Lulo Otingumuꞌ Gizineꞌ Gamazi \p \v 8 Gamazi lo haꞌna ogo loloze. Ganaꞌ nene apiꞌ ogo tiꞌ lo noluve: Lingine Izesuꞌ Kilisitoꞌ gamaziꞌve amuzo mili gili eleꞌvoleꞌ igi minaniꞌ monovotine nene misubouꞌ misubouꞌ buu lo nomonive likevo naza gelo Izesuꞌ Kilisitoꞌ velemuꞌ ogo lengiꞌ mukikumuꞌ tangezoꞌ ve lo Oꞌmosola noluve. \v 9 Idoꞌ neꞌmine noluvoniꞌ nene naza eiꞌ gipeleꞌmi gamaziꞌve lo sotoꞌ o ngemeꞌmo mono eze gono nodo luꞌne molo opoꞌni laaꞌ nouvoniꞌ Oꞌmoso neꞌmo ezela luvonguꞌ lengikumuꞌ gamene gamene laaꞌ nouvoniꞌ monovoꞌne nene gele neive. Naza nene mo laminetoꞌ noluve. \v 10 Idoꞌ naza gamene gamene aꞌmine Oꞌmosola luvo gameneloꞌ nene eiꞌ gilivo lisiheꞌ o nolineꞌ nene naza gomuꞌ lengita alove lo gamene haꞌna geleꞌmo ogo minuvoniꞌza aka ma sotoꞌ o-nidamivo amuvoniꞌ mamuꞌ nene idise aka ma vele-nidavo lengita alohe lo laaꞌ nouve. \v 11 Idoꞌ neꞌmine lo Oꞌmosola laaꞌ nouvoniꞌ nene naza lengita vo Oꞌmosoꞌmi Sikalahutatiꞌ daaꞌ nouneꞌ amuzo ma nene lehize-lengedekuvo monokuꞌ amuzo mili oti minilizave lo lengita volove lo amuzo molo gelaaꞌ uvoniꞌ nenako nemuꞌ nene laaꞌ nouve. \v 12 Idoꞌ lengiꞌ do amuzo molo-lengedelove noluvoniꞌ nene naza tiꞌ lo gelosa noluve. Naza lengiꞌ nizada vokuvo lingine Kilisitoꞌnimuꞌ gili eleꞌvoleꞌ igaꞌ naniꞌ nemukisi idoꞌ naza gele eleꞌvoleꞌ ogaꞌ nouvoniꞌ monovoꞌne nemukisi nene lo voleloꞌ meloꞌ ogo gelo lute do amuzo molalone lo gelosa noluve. \v 13 Idoꞌ neze zuhokizo, naza lengita volove lo gamene vaiꞌ gaꞌne gelo minuvoniꞌ nemuꞌ lingine gilamilizaniꞌ nene edamoloseive lo gelosa nolo-lingimuve. Aꞌmine gomuꞌ lengita vamuvoniꞌ nene voloniꞌ akaꞌne ma ngoloꞌ lamivo vamuvoniꞌza idise akaꞌne ngoloꞌ lavo volosa gelekuve. Akaꞌne ngoloꞌ lavo volosa giluvoniꞌ nene eveneꞌ linge zuho ato atota vo gono dokuvo gihile izineꞌ neꞌmino lengita aꞌmineꞌmine ogo vo gono dokuvo gihile izavo monoꞌ lengemeni damenisi minilizave lo volosa giluvoniꞌ ve. \v 14 Oꞌmosoꞌmo monoꞌ gono nene eveneꞌ ato atoꞌ mukita daline lo nimineꞌ nenako nemuꞌ nene nGiliki aleveti monovoꞌnidoꞌ ngeꞌmetaaꞌ ave nevoꞌmine maduꞌninguꞌ gamazi lamineꞌ minaaꞌ ineꞌ alevelasi idoꞌ nGiliki aleveti monovoꞌnidoꞌ ngeꞌmetamave nevoꞌmine maduꞌninguꞌ gamazi lamineꞌ minesaꞌmineꞌ alevelasi mukita nene monoꞌ gono daloniꞌ o neive. \v 15 Nemuꞌ nene Loma ve linginelasi Izesuꞌ gamaziꞌve lamineꞌ nene lo sotoꞌ ogo lo-lengemelesa gilingili ogo nouve. \s1 Izesuꞌ Kilisitoꞌnimuꞌ Gamazi Lamineꞌ Nene Amuzoꞌvesi Neive Lo Pauloꞌ Lineꞌ Gamazi \p \v 16 Naza Loma ebetasi vo Izesuꞌ gamazi lamineꞌ lo-lengemelove luvoniꞌ nene aꞌmine gamazi neꞌmo Oꞌmosoꞌmo Izesuꞌnimuꞌ gili eleꞌvoleꞌ ave do nguꞌ izelineꞌ amuzoꞌve nene do sotoꞌ ogaꞌ neivosa nemuꞌ nene naza aꞌmine gamazi lamineꞌ nene lo sotoꞌ olosa novozo helamo nolize izo laaꞌ nouvoniꞌ nenako nemuꞌ luve. Ee, aꞌmine gamazi lamineꞌ neꞌmo nene Oꞌmosoꞌmo do nguꞌ izelineꞌ amuzoꞌve nene gomuꞌ Zuda vela do sotoꞌ o-ngedosa Zuda ve minamave nGiliki ve nevoꞌmida nesi nene do sotoꞌ o do novive. \p \v 17 Idoꞌ Oꞌmosoꞌmo eveneꞌ do nguꞌ izelineꞌ amuzoꞌve nene Izesuꞌ gamazi neꞌmo do sotoꞌ ogaꞌ neive luvoniꞌ nene nemuꞌ luve: Aꞌmine gamazi laminekutiꞌ nene Oꞌmosoꞌmo eveneꞌ do luꞌ izelidoꞌ do lisiheꞌ o-ledaaꞌ neineꞌ akaꞌve nene sotoꞌ ogavo ningo gelekune. Aꞌmine aka nene neꞌmino neive: Eveneꞌ ma laza Izesuꞌnimuꞌ gele eleꞌvoleꞌ ogo mineloneꞌ neꞌmovoꞌ nene Oꞌmosoꞌmi veleloꞌ eveneꞌ lisiheꞌ lamineꞌ loloꞌ ogo minelesune. Ee, gele eleꞌvoleꞌ olonidotikovoꞌ nene Oꞌmosoꞌmo do luꞌ izelidoꞌ lisiheꞌ ogo minelesune. Neve nene monoꞌ godolouꞌ tiꞌ li gizi nizadoꞌ nene vo dave: \q1 Ingine Oꞌmoso nenikumuꞌ gili eleꞌvoleꞌ igi minilizadotiꞌ \q1 eveneꞌ lisiheꞌ lamineꞌ liliꞌ ilizave nene do nguꞌ izekuvo \q1 miniviꞌ miniviꞌ ilisave. \s1 Eveneꞌ Mukiꞌ Lelita Nene Lihimetesivoꞌ Noneꞌ Nenako Nemuꞌ Nene Oꞌmosoꞌmo Lihime Lemo Lebeleleseive Lo Pauloꞌ Lineꞌ Gamazi \p \v 18-19 Eveneꞌ laza Oꞌmoso mehede emo goloso niteꞌ mukiꞌ daaꞌ nouningumuꞌ nene Oꞌmoso izeboloꞌ molavo lihimete lemelingumuꞌ nene Okulumokutiꞌ lo sotoꞌ ogavo aꞌmine monovo nene mo gelekune. Idoꞌ gelekuneꞌ nenako nemuꞌ nene Izesuꞌnimuꞌ gele eleꞌvoleꞌ olonidotikovoꞌ do luꞌ izeleseive luvoniꞌ nene nemuꞌ luvoniꞌ ve. Eveneꞌ ingine goloso niteꞌ di minaaꞌ adiꞌmo Oꞌmosomuꞌ gamazi gihile lamineꞌ neineꞌ nene engiꞌ luꞌninguꞌ sotoꞌ ogo minelineꞌ akaꞌve hizi tilaaꞌ nave. Ee, Oꞌmosomuꞌ ingine gililizaniꞌ o neineꞌ gamazi gihile lamineꞌ nene Oꞌmosoꞌmo inginela do sotoꞌ ogavo aꞌmine gamazi nene inginela sotoꞌ ogosa sotoꞌ neive. Sotoꞌ neineꞌ nenako aꞌminemuꞌ gilisaꞌmaniꞌ nene ingine aꞌmine gamazi gihile lamineꞌ luꞌninguꞌ sotoꞌ ogo minelineꞌ akaꞌve nene angiseꞌine hizi tiladiꞌmo nene gilisaꞌmave. \v 20 Idoꞌ evenelite Oꞌmosomuꞌ gililizaniꞌ o neineꞌ gamazi nene Oꞌmosoꞌmo inginela do sotoꞌ ineꞌ ve luvoniꞌ nene Oꞌmosoꞌmi monovo linge ma nene vetedunuꞌ ningamolonidoꞌ o minineꞌza Oꞌmosoꞌmo Okulumoꞌ misubo initeꞌ mukiꞌ do sotoꞌ molavo mine do ogo neivo aꞌmine initeꞌ mukiꞌ ningaaꞌ nounidotiꞌ nene eze monovo vetedunuꞌ ningamolonidoꞌ o minineꞌ nene ha ningo gelaaꞌ nounako nemuꞌ luvoniꞌ ve. Ee, do sotoꞌ molaniꞌ initeꞌ ningaaꞌ nounidotiꞌ nene aza minevoꞌ minevoꞌ ogo minaaꞌ neineꞌ amuzoꞌvesi idoꞌ emeni dameniꞌve atoliꞌmine ogo minineꞌ laza ma ivileꞌ amolonidoꞌ o minineꞌ nesi nene ha ninge gelelonidoꞌ o neive. Idoꞌ ha ningo gelelonidoꞌ neineꞌ nenako Oꞌmoso huli minilizave ingine nene laza eze monovo danava ningo gelamosa huluneꞌ ve li gamene nabala ma lamilisave. \v 21 Ingine nene Oꞌmoso neive li eiꞌ monovolo ha gili minaniꞌza Oꞌmoso neive li eikumuꞌ gilavo dizamivo opoꞌni li di naba i-disaꞌmaniꞌ ve. Neꞌmine ami gaꞌine gilaaꞌ aniꞌ nene vo gopoꞌnapa gehepeve ogo luꞌninguꞌ gilaaꞌ aniꞌ nene gili lamineꞌ ami litiꞌmusouꞌ nizaniꞌ gilivo minaaꞌ aniꞌ ve. \v 22 Neꞌmine igi mini ingine leliꞌ nene gate gele nge lo nonive none li minaniꞌza ingine neꞌmini ma minami negi hizi mini \v 23 emeni dameni lamineꞌ atoliꞌminesi mino helamo minevoꞌ minevoꞌ ogo minaaꞌ ive Oꞌmoso nene huli ezeloꞌ medeli eveneꞌ miniviꞌ miniviꞌ ami hilaaꞌ naniꞌ neti avazaha nehe idoꞌ nama gaha ize guloti avazaha nehe gosiheliti avazaha nehe neꞌmine niteꞌ loloꞌ igi ngopoꞌni laaꞌ aniꞌ ve. \p \v 24 Neꞌmine igi mini Oꞌmoso meheꞌine imikevo nemuꞌ Oꞌmoso aza nene eleꞌninge vaꞌninge ingalizaniꞌ monovo di gopo igi luꞌine do goloso ilineꞌ monovo goloso nene di mini engiꞌ okoꞌine di gopo ilisa eveneꞌ ingine luꞌninguꞌ laniteꞌ giladoꞌ nene eꞌmetamilizanako luꞌineꞌmo laniteꞌ gilidoꞌ nene ha eꞌmetilizave lo hulo-ngidineꞌ ve. \v 25 Ingine Oꞌmoso gihile nene huli-di ezeloꞌ medeli soza oꞌmoso di sotoꞌ igisa initeꞌ mukiꞌ do sotoꞌ molave Oꞌmoso nene gubuꞌ izi imi opoꞌni li-dami Oꞌmoso asiꞌve loloꞌ ineꞌ initetoꞌ nene gubuꞌ izi ngimi ngopoꞌni li minaaꞌ aniꞌ ve. Neꞌmine aniꞌza initeꞌ mataꞌ do sotoꞌ ive Oꞌmosovoꞌ nene laza gamene gamene opoꞌni laaꞌ olonidoꞌ o neive. Nemuꞌ nene neꞌmino minivo. \v 26 Idoꞌ eveneꞌ neꞌmine igi Oꞌmoso huli-di soza oꞌmoso ngopoꞌni li minaniꞌ nemuꞌ Oꞌmoso aza ninge mate ngimikivo ingine monovo goloso adoꞌ neꞌmine igi minaniꞌ ve: Veneꞌ nete vaꞌningesivoꞌ ingalizaniꞌ monovo Oꞌmosoꞌmo ganakutiꞌ ngelebizineꞌ ma nene huli Oꞌmosoꞌmo ngelebizamineꞌ monovo goloso di sotoꞌ igi engiꞌ veneꞌ okoꞌninguꞌ initeꞌ igaꞌ aniꞌ ve. \v 27 Idoꞌ aꞌmineꞌmine igi vemohoꞌ ingine Oꞌmosoꞌmo venekisi ingaaꞌ monovo ganakutiꞌ ngelebizineꞌ nene meheꞌine imi ve malite ve mamuꞌ ma duvo lo okoꞌninguꞌ oloꞌ lavo ngovozo niteꞌ goloso di sotoꞌ igi angiseꞌine okoꞌninguꞌ initeꞌ igaꞌ aniꞌ ve. Neꞌmine adotiꞌ lihime daniꞌ votigileloꞌ do molo Oꞌmosoꞌmo lihime ngemavo okoꞌine nene goloso ogaꞌ neive. \v 28 Ee, ingine Oꞌmosomuꞌ gili minilizaniꞌ nemuꞌ nene levelenga li huli-dikevo Oꞌmoso aza nene eveneꞌ ingine goloso monovomuꞌ gohi gili minikevo aꞌmine gaꞌine giladoꞌ nene eꞌmeti evenelite amilizaniꞌ o minineꞌ monovo goloso ato atoꞌ igi mili minilizave lo ninge mate-ngidineꞌ ve. \v 29 Neꞌmino ninge mate-ngedavo eveneꞌ ingine lisiheꞌ amineꞌ monovo danava goloso vaiꞌ lihime daaꞌ monovo nene engita vaiꞌ goloso sotoꞌ ivo minaniꞌ ve. Aꞌmine monovo goloso nene neꞌmini nizave: Mumuzoꞌ igaꞌ, evenekumuꞌ lukehe igaꞌ, eveneꞌ mala initeꞌ lamineꞌ ma sotoꞌ o ngemavo ma aꞌmine vemuꞌ ngizeboloꞌ gohi molaaꞌ, eveneꞌ ngibili hilaaꞌ, lolize hizaaꞌ, eveneꞌ goꞌine izaaꞌ, \v 30 eveneꞌ dovo ledevoꞌ ogo ngemenga laaꞌ, Oꞌmosoꞌmi biluvaꞌve minaaꞌ, hokolizeꞌ igi hokolizeka li engiꞌ okoꞌine di dizaaꞌ, monovo goloso di sotoꞌ igaꞌ, izeꞌninge meꞌninge laniꞌ gamazi gili hulaaꞌ, \v 31 negi suno suno daaꞌ, gamazi angise li hukisa aꞌmidoꞌ eꞌmetamaaꞌ, luꞌine ngimamaaꞌ, idoꞌ eveneꞌ muheleꞌine ningamaaꞌ ave mukiꞌ neꞌmine nene nizave. \v 32 Neꞌmino neivo Oꞌmosoꞌmo eveneꞌ neꞌmine monovo goloso ilizadotiꞌ nene golo hizi meniꞌve helaaꞌ nene dikevosa lisiheꞌ oloseive lineꞌ nemuꞌ nene mo gili minisasi aꞌmine luvoniꞌ neꞌmine monovo goloso nene ha igi mili minaaꞌ nave. Idoꞌ neꞌmine igaꞌ naniꞌ nene goloso neineꞌza ingine aꞌmine monovo goloso aꞌnevoꞌ nene ma amave. Ingine ningavo eveneꞌ malitesi aꞌmine luvoniꞌ monovo goloso nene igi mili nizavo ma nene ingine lamineꞌ ve li siza li-ngidaaꞌ nave. Ingine aꞌneꞌmine igaꞌ naniꞌ neꞌmo nene goloso gehepeve ogaꞌ neive. \c 2 \s1 Oꞌmosoꞌmo Meni Golososi Laminekisi Eveneꞌ Monovoteloꞌ Monovoteloꞌ Izeꞌ Molo-ledo Lemelingumuꞌ Pauloꞌ Lineꞌ Gamazi \p \v 1 Idoꞌ aꞌmela luvoniꞌ neꞌmino neꞌmine monovo goloso igaꞌ nave mukiꞌ nene Oꞌmosoꞌmo lihime molo ngimikaꞌ neineꞌ nenako nemuꞌ eveneꞌ ma lingine eveneꞌ mamuꞌ lihime dikeve li-ngidaaꞌ nave mukiꞌ lingine aꞌmine lihime dikeve li-ngidaaꞌ navete igaꞌ naniꞌ initeꞌ goloso neꞌmine nene linginesi igaꞌ naniꞌ nenako Oꞌmosoꞌmo eveneꞌ lihime ngemelineꞌ gameneloꞌ nene lingine lengiꞌ isetine izelive li-imilizaniꞌ gamazi ma minamoloseive. \v 2 Idoꞌ Oꞌmosoꞌmo eveneꞌ neꞌmine igaꞌ ave goniꞌ o-ngedo lihime ngemelineꞌ nene mo monovo lisiheꞌ lamineꞌ ogo lihime ngemeleseive losa gele none. \v 3 Gele noneꞌza lingine nene langisetinesi aꞌmine monovo goloso nene ha igi mili minaaꞌ niigisa eveneꞌ ma aꞌmine monovo goloso igaꞌ navemuꞌ izeꞌ mili-ngidi lihime dikeve li-ngidaaꞌ nave lingine nene Oꞌmosoꞌmo eveneꞌ lihime ngemelingutiꞌ nene ha olovoꞌ olosune li gilaaꞌ nahe. Oꞌove. Olovoꞌ ngeli mo amilisave. \v 4 Idoꞌ ma nene tiꞌ li gilaaꞌ nahe: Oꞌmosoꞌmo isetine izo nasahiliꞌ o-lengedeꞌmo ogo minaaꞌ neineꞌ neꞌmo do akaloꞌ o-lengedavo lutine di velepeꞌ izi monovo goloso hulilizave losa nasahiliꞌ o-lengedaaꞌ neingumuꞌ nene lingine ha gililizanako gili hulisa Oꞌmosoꞌmo atoliꞌmine ogo nasahiliꞌ o-lengedo geto lihime lengemo lengebelamo isetine izeꞌmo vo minaaꞌ neineꞌ nemuꞌ nene lingine gilavo haza niteꞌ loloꞌ ogahe. \v 5 Eveneꞌ ma lingine lutine di velepeꞌ izami lutine di aꞌmanapa iꞌmi vi minaaꞌ nangumuꞌ nene Oꞌmoso aza izeboloꞌ molokaꞌ molokaꞌ oꞌmo vo minaaꞌ neineꞌ nene naba oꞌmo vo minaaꞌ neive. Idoꞌ Oꞌmosoꞌmo monovo lisiheꞌ lamineꞌ eꞌmeto eveneꞌ izeꞌ molo-ledo lihime lemelineꞌ gamene sotoꞌ ogavo ma aꞌmine izeboloꞌ molaniꞌ votigileloꞌ nene do molo lihime ngemeleseive. \v 6 Aꞌmine eveneꞌ izeꞌ molo-ledelineꞌ gameneloꞌ nene eveneꞌ ingine monovo goloso nehe lamineꞌ nehe igi mili i nilizaniꞌ votigileloꞌ do molo meni neꞌmino ngemeleseive: \v 7 Ve ma ingine nene Oꞌmosoꞌmi monovo danava lamineꞌ goloso neineꞌ nene dalizangumukisi idoꞌ ninge lamineꞌ do-ngedo do naba o-ngedelineꞌ nemukisi idoꞌ helamaaꞌ ngemeni dameni dalizangumukisi nene aka viseꞌ ogo do sotoꞌ olone li geni initeliꞌmi lulouꞌ minilizahe mulumo alumo initeliꞌmi lulouꞌ minilizahe nemuꞌ nene gilami gili huli geli geli igi monovo laminekovoꞌ igi mili minilizaniꞌ nene Oꞌmosoꞌmo minevoꞌ minevoꞌ ngemeni dameni lehize-ngedeleseive. \v 8 Idoꞌ ve ma ingine Oꞌmoso biluvaꞌ i-di Oꞌmosoꞌmi gamazi gihile nene gili huli eꞌmetami monovo golosoloꞌ eꞌmeti vi minave engikumuꞌ nene Oꞌmosoꞌmo izeboloꞌ molavo lihime atoliꞌmine ogo ngemeleseive. \v 9 Neꞌmine ogavo mulumo niteꞌ goloso ato atoꞌ nene goloso niteꞌ daaꞌ avela sotoꞌ o ngemeleseive. Ganaꞌ nene Zuda vela sotoꞌ o ngemosa nelotiꞌ nene Zuda ve minamaniꞌ atoꞌ vela sotoꞌ o ngemeleseive. \v 10-11 Neꞌmine oloseineꞌza monovo laminetoꞌ eꞌmeti minaaꞌ avela nene Oꞌmosoꞌmo do hozi lo do naba o-ngedo hongu lo minaaꞌ monovo lehize-ngedeleseive. Idoꞌ neꞌmine o-ngedelineꞌ nene Oꞌmoso aza eveneꞌ mukiꞌ nizangutiꞌ nene linge mavoꞌ do kegeso do lamineꞌ o-ngedesaꞌmineꞌ nenako nemuꞌ nene Zuda ve gomuꞌ neꞌmine o-ngedosa nelotiꞌ nene Zuda ve minamaniꞌ atoꞌ ve nesi nene neꞌmine o-ngedeleseive. \p \v 12 Idoꞌ Oꞌmosoꞌmo gopo hazamuꞌ eveneꞌ linge ma do lamineꞌ o-ngedo linge ma do goloso o-ngedesaꞌmive luvoniꞌ nene nemuꞌ noluve: Eveneꞌ ma Oꞌmosoꞌmo louꞌ gamaziꞌve lo-ngemamivo haza minave adoꞌ Zuda ve minamave nete lihime dalizaniꞌ nene Oꞌmosoꞌmo loutoꞌ do molo izeꞌ ma molo-ngedamoloseiha nesi mo ha vi tolovo ilisave. Idoꞌ Oꞌmosoꞌmo louꞌ gamaziꞌve lo-ngemavo gili minave Zuda ve nene louꞌ di minisasi lihime dalizave nene Oꞌmosoꞌmo aꞌmine loutoꞌ do molosa izeꞌ molo-ngedo lihime ngemeleseive. \v 13 Ee, Oꞌmosoꞌmo eveneꞌ mamuꞌ ve lisiheꞌ ve lo lo-ngedaaꞌ neive nene eveneꞌ ma ingine louꞌ gamazi nene ha gaꞌinedunukovoꞌ gilaaꞌ avemuꞌ nene losaꞌmive. Asi louꞌ gamaziꞌmo lidoꞌ igaꞌ avevoꞌ nene ve lisiheꞌ ve lo lo-ngedaaꞌ neive. \v 14 Idoꞌ naza luvoniꞌ ma nene me gililo: Zuda ve minamave adoꞌ Oꞌmosoꞌmo louꞌ gamaziꞌve lo-ngemavo damave ingine engiꞌ ngemeni dameniloꞌ di mili igi mili iliza initeꞌ nene louꞌ gamaziꞌmo lidoꞌ vo miliseꞌ o minelineꞌ neꞌmo nene mo Oꞌmosoꞌmi louꞌ nene engiꞌ luꞌninguꞌ neive. \v 15 Idoꞌ engiꞌ neꞌmine igi mili minaaꞌ naniꞌ neꞌmo nene louꞌ gamaziꞌmo lo neineꞌ gamazi luꞌninguꞌ neineꞌ nene do sotoꞌ ogo lelebize neive. Ingine igaꞌ naniꞌ initekumuꞌ nene engiꞌ luꞌine gaꞌine neꞌmo gamene ma nene di lamineꞌ ikeve laaꞌ idoꞌ gamene ma nene di goloso ikeve lo lo-ngemaaꞌ neineꞌ nenako nemuꞌ nene aꞌmine neꞌmine luꞌine gaꞌine engita minaaꞌ neineꞌ neꞌmo nene naza lamineꞌ luvoniꞌ nene do sotoꞌ ogave. \v 16 Idoꞌ Oꞌmosoꞌmo lavo Izesuꞌ Kilisitoꞌ nene ezeloꞌ medelo mino eveneꞌ laza sunoꞌ ogo molo ogaꞌ nouneꞌ initeꞌ izeꞌ molalineꞌ gameneloꞌ nene neniꞌ mene noluvoniꞌ neꞌmino mineleseive. Ee, naza gamazi lamineꞌ lo sotoꞌ sotoꞌ ogaꞌ nouvoniꞌ neꞌmo nene aꞌmine gamazi mene lo sotoꞌ neive. \s1 Oꞌmosoꞌmi Evenele Gihile None Laaꞌ Ave Zuda Ve Nene Oꞌmosoꞌmi Evenele Gihile Minaaliꞌmi Monovo Pauloꞌ Lo-ngimineꞌ Gamazi \p \v 17 Idoꞌ gaza Zuda ve nolinive nene gelezo. Zuda ve nouve losa Oꞌmosoꞌmi louꞌ gamazi Moseꞌ gizo limineꞌ neꞌmo nene Oꞌmosoꞌmo goniꞌ o-ledelingutiꞌ nene ha do nuꞌ izeleseive lo gelo aꞌmidoꞌ gele medele mino okonga do dizo Oꞌmosoꞌmi evenele nouve laaꞌ nane. \v 18 Oꞌmosoꞌmi louꞌ gamazi nene apize gimikevo gele naineꞌ nenako nemuꞌ nene Oꞌmosoꞌmo geiꞌ iline lo lulouꞌ gele neineꞌ nene gaza mo ningo gelosa monovo ma ivileꞌ ogo monovo lamineꞌ gehepeve nene do kegeso ningaaꞌ nane. \v 19-20 Neꞌmine anidiꞌmo nene gaza tiꞌ lo laaꞌ nane: Moseꞌ gizineꞌ louꞌ gamazi nenita neinguꞌ nene gamazi monovo vaikisi gamazi gihile lamineꞌ vaikisi neivosa nene naza luꞌineꞌmi vele likavo nizave aka ngelebizelodoꞌ mino litiꞌmusouꞌ minave neti liviꞌine neꞌmine mino idoꞌ gamazi gilamave ngeleꞌmize hehe lolodoꞌ mino monoꞌ gilami izipe ngomo neꞌmine minave initeꞌ apize ngemaaꞌ olodoꞌ mo lisiheꞌ o nouve lo amuzo molo gelaaꞌ nane. \v 21 Nemuꞌ nene gaza eveneꞌ ma apize ngemaaꞌ naineꞌ gamaziloꞌ nene geikisi gele dalinako gele dosaꞌmane. Ee, gaza gumine amozo lo eveneꞌ lo-ngemaaꞌ noogosa gaza nene gumine ogaꞌ noolosane. \v 22 Idoꞌ veneꞌ vemohoꞌ liliꞌ ikeniꞌ nete veneꞌ vemohoꞌ masi gopo ingamilo laaꞌ noogosa geiꞌ nene neꞌmine ogaꞌ noolosane. Gaza soza oꞌmosomuꞌ nene muso gaka dizavo olovoꞌ ogaꞌ noogosa soza oꞌmosoliti numungutiꞌ initeꞌ gumine ogaꞌ noolosane. \v 23 Idoꞌ gaza Oꞌmosoꞌmi louꞌ gamazi nene gele nouve lo okonga do dizaaꞌ nanive neke nene aꞌmine louꞌ nene avutoꞌ ogosa Oꞌmosoꞌmi gulive do lemaaꞌ noolosane. \v 24 Neꞌmine noluvoniꞌ nene monoꞌ godolouꞌ gamazi ma tiꞌ li gizi nizaniꞌ nene lengitoꞌ vo davosa noluve: \q1 Zuda ve lengiꞌ monovotine nene heta atoꞌ ve ingine ningisa \q1 Oꞌmoso nene divi lediviꞌ igaꞌ nave. \p \v 25 Zuda veti okodidoꞌ Oꞌmosoꞌmi noso mili-lingidaaꞌ naniꞌ neꞌmo nene lingine Oꞌmosoꞌmi louꞌ gamaziloꞌ eꞌmeti minilizaniꞌ nene mo hize eleꞌ o-lengedeleseive. Idoꞌ okodida Oꞌmosoꞌmi noso neivo mini louꞌ gamazi avutoꞌ igi minilizaniꞌ neꞌmo nene Oꞌmosoꞌmi noso lengita neineꞌ ma nene haza niteꞌ loloꞌ ogavo nomivo nizaniꞌ geleleseive. \v 26 Neꞌmine o neineꞌ nenako ve ma ingine okoꞌnida Oꞌmosoꞌmi noso nomivo nilizadite Oꞌmosoꞌmi louꞌ gamazi gili di minaaꞌ niilizaniꞌ nene Oꞌmosoꞌmo gilivo eiꞌ nosoꞌve nene mo engiꞌ okoꞌnida mineleseive. \v 27 Idoꞌ ve ma okoꞌnida Oꞌmosoꞌmi noso nomivo mini Oꞌmosoꞌmi louꞌ gamaziloꞌ eꞌmeti osuꞌ lilizadite nene lengiꞌ monoꞌ godolo di minisasi idoꞌ Oꞌmosoꞌmi noso okodida mili-lingidikevo minisasi Oꞌmosoꞌmi louꞌ gamazi avutoꞌ igaꞌ nave lengiꞌ nene losuvotine ilavo monovotine nene sotoꞌ oloseive. \v 28 Ee, Oꞌmosoꞌmi evenele gihile Zuda ve minaaꞌ neꞌmi gihile nene okode losuvolotiꞌ nene ma sotoꞌ osaꞌmive. Idoꞌ aꞌmineꞌmine ogo Oꞌmosoꞌmi noso do minaaꞌ neꞌmi gihile nene Oꞌmosoꞌmi noso ve li okode lolovo huki hulaaꞌ nadotiꞌ nene ma sotoꞌ osaꞌmive. \v 29 Asi Oꞌmosoꞌmi evenele Zuda ve minaaꞌ neꞌmi gihile nene luteuꞌ haleko minineꞌ lemeni damenilotiꞌ nene sotoꞌ ogaꞌ neive. Idoꞌ Oꞌmosoꞌmi noso gihile nene louꞌ gamazi gizi nizadoꞌ nene ha okode losuvolotiꞌ eꞌmeto okode lolovo huko hulaaꞌ neve nene nevoba asi Oꞌmosoꞌmi Sikalahuꞌ neꞌmo luteuꞌ molo-ledaaꞌ neineꞌ lemeni dameni nene neive. Neꞌmine lemeni damenisi Zuda ve gihile minelonivemuꞌ nene evenelite lopoꞌni lilizavoba asi Oꞌmosoꞌmo loloseive. \c 3 \s1 Oꞌmosoꞌmo Zuda Ve Hize Eleꞌ O-ngedo Gamaziꞌve Lehize-ngidineꞌza Aꞌmine Lidoꞌ Nene Azasi Gele Do Mino Aꞌmidoꞌ Gili Damave Nene Lihime nGemelidoꞌ Lisiheꞌ O Neive Lo Pauloꞌ Lineꞌ Gamazi \p \v 1 Idoꞌ naza nene neꞌmine luvoniꞌ nemuꞌ nene Zuda ve lingine lutinguꞌ nene gopo gatine gili longoꞌ neꞌminisa ilizaniꞌ o neive: Oꞌmosoꞌmo ningivo Zuda vesi idoꞌ heta atoꞌ vesi nene mo lisihekovoꞌ o minaaꞌ nouneꞌ nolineꞌ nene laza Zuda ve minuningumuꞌ Zuda ve minamave ngivileꞌ ogo hize eleꞌ o-ledaaꞌ neineꞌ nene nanitedunuꞌ hize eleꞌ o-ledaaꞌ neive. Idoꞌ laza Oꞌmosoꞌmi noso okodela molaaꞌ nouneꞌ nelotiꞌ nene initeꞌ lamineꞌ nene naniteꞌ sotoꞌ o-ledaaꞌ neive li longoꞌ ilisave. \v 2 Neꞌmine ilisaha initeꞌ lamineꞌ vaiꞌ goloso vauve elosa lelita neive. Initeꞌ naba ganaꞌ nene Oꞌmosoꞌmo lo huko lo-lidineꞌ gamaziꞌve nene Zuda ve leliꞌ nene di minilizave losa lehize-lidineꞌ ve. \v 3 Ne neiha Zuda ve linge ma nete nene aꞌmine Oꞌmosoꞌmo lehize-lidineꞌ gamaziloꞌ nene eꞌmetamaniꞌ ve. Nemuꞌ nene ve malite nene tiꞌ li longoꞌ ilisa gili nilisave: Ingine gamaziꞌveloꞌ eꞌmetamaniꞌ nemuꞌ Oꞌmosoꞌmo aꞌmine gamaziloꞌ eꞌmeto amilidoꞌ o neihe. \v 4 Oꞌove. Eꞌmetamilivoba asi aꞌmine gamaziꞌveloꞌ nene ha mo eꞌmeteleseive. Eveneꞌ vaiꞌ nene sozaloꞌ vevoꞌ minilisaha Oꞌmoso neve nene gamazi gihile laminekovoꞌ laaꞌ ive mineleseive. Neꞌmine neingumuꞌ nene monoꞌ godolouꞌ tiꞌ li gizi nizaniꞌ ma neive: \q1 Neꞌmino neineꞌ nene nanitekumuꞌ ve. \q1 Oꞌmosoo, gaza gamazi lisihekovoꞌ lilineꞌ o neineꞌ nene mo \q1 sotoꞌ neivo gonikuꞌ nesi nene gasika ngivileꞌ olosane lo neive. \p \v 5 Nemuꞌ nene naza mene evenelite igaꞌ naniꞌ monovoloꞌ do molo tiꞌ lo noluve: Laza monovo goloso ogo molo ogaꞌ nouneꞌ neꞌmo nene Oꞌmosoꞌmi monovo lisiheꞌ lamineꞌ nene do sotoꞌ o-daaꞌ neineꞌ nenako Oꞌmoso aza monovote golosomuꞌ lihime lemelineꞌ nemuꞌ nene monovo do goloso ogave lo ha lo-delonidoꞌ o neihe. \v 6 Oꞌve. Mo kekeꞌ neꞌmino nomive. Idoꞌ neꞌmine minidiniko Oꞌmosoꞌmo me misubouꞌ ve mukiꞌ izeꞌ molo-ledelineꞌ nenako nado izeꞌ molo-ledelidoꞌ lisiheꞌ o minidine. \v 7 Idoꞌ ve ma tiꞌ lo loloseive: Naza soza gamazi luvodiniko Oꞌmosoꞌmo nenikumuꞌ lihimeloꞌ ve minane lo lihime nimidine. Ne neiha eveneꞌ nete aꞌmine soza gamaziꞌnemuꞌ gililizadotiꞌ nene Oꞌmosoꞌmo gamazi gihile laminekovoꞌ laaꞌ neineꞌ monovoꞌve nene sotoꞌ gehepeve ogavosa ezemuꞌ nene gohi opoꞌni li di naba igi li-dilizadoꞌ idine. Idoꞌ neꞌmine idiniko naza initeꞌ lamineꞌ do sotoꞌ uvoniꞌ gilidine. Nemuꞌ neniꞌ nene lihimeloꞌ ve ve lo lihime nene nanimuꞌ nimidine. \v 8 Ee, ve malite lelikumuꞌ nene divi lediviꞌ igi tiꞌ li laaꞌ nave: Paulole laaꞌ naniꞌ nene neꞌmino neive: Monovo goloso neꞌmo monovo lamineꞌ do sotoꞌ ilineꞌ nenako nemuꞌ neꞌmine ilingumuꞌ ve lo laza nene ha monovo goloso ogo molo minelesune. Idoꞌ neꞌmine laaꞌ nene mo lamineꞌ nehe. Oꞌove. Oꞌmosoꞌmo neꞌmine laaꞌ ave nene lihime ngemelidoꞌ lisiheꞌ i nizave. \s1 Eveneꞌ Mukikutiꞌ Nene Oꞌmosoꞌmi Veleloꞌ Ve Lisiheꞌ Hamokisi Minamune Lo Pauloꞌ Lineꞌ Gamazi \p \v 9 Nelotiꞌ nene laza nadive lo gelelone. Zuda ve leliꞌ nene eveneꞌ linge mukiꞌ ngivileꞌ ogo lamineꞌ nobe. Oꞌove. Neꞌmino minamune. Mo Zuda vesi aꞌmine Zuda ve minamavesi nene mo lihime monovoliꞌmo nene adeloꞌ do minivevoꞌ none lo naza mo lo-lengemekuvoniꞌ ma ve. \v 10 Aꞌmine me luvoniꞌ gamazi neꞌmo nene monoꞌ godolouꞌ gamazi ma tiꞌ li gizi nizadoꞌ vo do neive: \q1 Me misubouꞌ nene eveneꞌ lisiheꞌ lihimeꞌvesi nomive nene \q1 mo kekeꞌ hamokisi ma nomive. \q1 \v 11 Aka laminekumuꞌ ningi gilave nene hamokisi ma nizamave. \q1 Idoꞌ Oꞌmoso ningelone li ezemuꞌ viseꞌ igaꞌ ave nene mo kekeꞌ ma nizamave. \q1 \v 12 Idoꞌ eveneꞌ mukiꞌ nene aka lamineꞌ huli zovoꞌ izi visa vi goloso nave. \q1 Ve ma monovo laminekovoꞌ i di vi minaaꞌ ave nene \q1 mo kekeꞌ hamokisi nizamave. \q1 \v 13 Luꞌningutiꞌ vomine gamazi laaꞌ naniꞌ nene \q1 gonoso galese ngoloꞌ lo miningutiꞌ unuvo goloso ogaꞌ neineꞌ neꞌminosa nene neive. \q1 Idoꞌ gamazi laaꞌ naniꞌ nene eveneꞌ goꞌine izisavoꞌ nene laaꞌ nave. \q1 Idoꞌ sataꞌ ume nete eveneꞌ ongovusoꞌ ngibilaaꞌ naniꞌ neꞌmino \q1 ingine gamazi laaꞌ naniꞌ neꞌmo nene ngebelaaꞌ neive. \q1 \v 14 Idoꞌ engita gamazi goloso ekeseꞌ lo-ngedaaꞌ monovo nene veꞌninguꞌ vaiꞌ lo neive. \q1 \v 15 Idoꞌ gizeꞌine neꞌmo nene eveneꞌ ngebelaatoꞌ liteꞌ lo ngeleꞌmizo vaaꞌ neive. \q1 \v 16 Idoꞌ zaaꞌ zaaꞌ akaloꞌ vilizahe aꞌmida nene \q1 initeꞌ mataꞌ di goloso gehepeve igaꞌ idoꞌ eveneꞌ geni ngimaaꞌ neꞌmine igaꞌ nave. \q1 \v 17 Neꞌmine igi minisa ingine hongu lo lamino minaaꞌ aka nene mo kekeꞌ ningamave. \q1 \v 18 Idoꞌ Oꞌmosomuꞌ golise gelaaꞌ monovomuꞌ nene mo ningi gilisaꞌmave. \p \v 19 Idoꞌ Oꞌmosoꞌmi louꞌ gamaziꞌmo neꞌmine lineꞌ nene aꞌmine louꞌ gamaziꞌmi gesi minguꞌ minunivemuꞌ lineꞌ nene mo gele none. Neꞌmine lineꞌ nene me misubouꞌ aleve mukiꞌ laza loloneꞌ gamazi nomivo luꞌ izo mino Oꞌmosoꞌmi veleloꞌ goniꞌ o-ledelidoꞌ lisiheꞌ ogo mineloningumuꞌ nene neꞌmine lineꞌ ve. \v 20 Nemuꞌ nene Oꞌmosoꞌmi louꞌ gamaziloꞌ eꞌmetelesa olonidotiꞌ nene eveneꞌ hamokisi Oꞌmosoꞌmi veleloꞌ nene gamazite nomineꞌ ngelo minamolosune. Nanitekumuꞌ ve. Aꞌmine louꞌ gamazi neꞌmo nene lihime daaꞌ monovo danava nene do sotoꞌ gehepeve ogosa lelebizaaꞌ neive. \s1 Oꞌmosoꞌmi Veleloꞌ Eveneꞌ Lisiheꞌ Mineloneꞌ Nene Izesuꞌ Kilisitoꞌnimuꞌ Gele Eleꞌvoleꞌ Ogosavoꞌ Minelesune Lo Neꞌmi Monovo Pauloꞌ Lo-ngimineꞌ Gamazi \p \v 21 Ne neiha Oꞌmosoꞌmi veleloꞌ eveneꞌ lisiheꞌ mineloningumuꞌ nene loutoꞌ eꞌmetaaꞌ aka neꞌmo nene vo damivo Oꞌmosoꞌmo aꞌminemuꞌ gele hulo aka atoꞌ nene idise do sotoꞌ o-lede neive. Aꞌmine akamuꞌ nene Oꞌmosoꞌmi gamazi neꞌmosi livo idoꞌ polohetelite gizaniꞌ gamazi neꞌmosi livo setatoꞌ aꞌminemuꞌ nene li sotoꞌ asineꞌ ve. \v 22-23 Aꞌmine aka nene neꞌmino neive: Oꞌmosoꞌmo eveneꞌ lisiheꞌ ve lo-ngedelineꞌ nene ingine Izesuꞌ Kilisitoꞌnimuꞌ gili eleꞌvoleꞌ i nizangumuꞌ ve lo Izesuꞌ Kilisitoꞌnimuꞌ gili eleꞌvoleꞌ ave mukikumuꞌ nene loloseive. Ee, eveneꞌ mukiꞌ nene lihime daaꞌ nouneꞌ nenako Oꞌmosoꞌmi emeni dameni lamineꞌ goloso nene do tiꞌ olonidoꞌ lisiheꞌ amune. Nemuꞌ nene Oꞌmosoꞌmo Zuda ve nene ve lisiheꞌ ve lo-ngedelineꞌ aka nene atoꞌ ma neivo Zuda ve minamave nene ve lisiheꞌ ve lo-ngedelineꞌ aka nene atoꞌ ma neivoba asi mo aka hamokovoꞌ nene neive. \v 24 Neꞌmino neineꞌ nenako Oꞌmosoꞌmo ve lisiheꞌ ve lo-ledelineꞌ nene laza neꞌmine lo-ledelidoꞌ lisiheꞌ amuba haza eiꞌ luloloꞌ do molo nasahiliꞌ o-ledo ve lisiheꞌ ve lo-ledeleseive. Neꞌmine lo-ledelineꞌ nene Izesuꞌ Kilisitoꞌ aza lihimetemuꞌ golo hizo helo kuluhize-ledaaꞌ aka do sotoꞌ ineꞌ nemukovoꞌ nene ve lisiheꞌ ve lo-ledeleseive. \v 25-26 Idoꞌ Oꞌmosoꞌmo kuluhize-ledelineꞌ aka Izesuꞌ Kilisitoꞌ do sotoꞌ ineꞌ nene aza leliꞌ lihimetemuꞌ nene eiꞌ vaniseꞌve hulo hilingumuꞌ nene gele eleꞌvoleꞌ okunivo neꞌmo nene Oꞌmosoꞌmi izeboloꞌve lelikumuꞌ nene do mate-delive losa eleꞌmize molavosa kuluhize-ledaaꞌ aka nene do sotoꞌ ineꞌ ve. Izesuꞌ neꞌmine ilive lo Oꞌmosoꞌmo eleꞌmize molaniꞌ nene gomukutiꞌ lihime daaꞌ aniꞌ mamuꞌ nene gelo geto lihime ngemamo hongu lo mino ninge mate-ngidineꞌ nenako nemuꞌ nene eiꞌ monovoꞌve lisiheꞌ o neineꞌ nene ningi gililizave lo lelebizelesa eleꞌmize molaniꞌ ve. Idoꞌ eleꞌmize molaniꞌ nene idise gamenela eiꞌ monovoꞌve lisiheꞌ nene adoꞌ ve lisiheꞌ minosasi idoꞌ Izesuꞌnimuꞌ gele eleꞌvoleꞌ nolonivemuꞌ nene ve lisiheꞌ ve ha lo-ledelidoꞌ lisiheꞌ o neineꞌ nene lelebizelesa eleꞌmize molaniꞌ ve. \p \v 27 Neꞌmino laza ve lisiheꞌ ve lo-ledelidoꞌ lisiheꞌ minamosa haza Izesuꞌ Kilisitoꞌnimuꞌ gele eleꞌvoleꞌ unidotikovoꞌ Oꞌmosoꞌmo ve lisiheꞌ ve lo-ledaaꞌ neineꞌ nenako laza okode do dizelonidoꞌ nene lisiheꞌ amive. Okode do dizeloneꞌ aka nene mo hize tile lamineꞌ ogave. Nene nanitekumuꞌ ve. Laꞌlisete louꞌ gamaziloꞌ eꞌmetekunivosa Oꞌmosoꞌmo ve lisiheꞌ ve lo-lididiniko aꞌmine aka nene hize tilamidineꞌza asi Kilisitoꞌnimuꞌ gele eleꞌvoleꞌ okunivosavoꞌ nene ve lisiheꞌ ve lo-ledaaꞌ neineꞌ nenako nemuꞌ nene leliꞌ okode do dizaaꞌ aka nene mo hize tile lamineꞌ ogave. \v 28 Ee, laza tiꞌ lo gele none: Oꞌmosoꞌmo evenekumuꞌ ve lisiheꞌ ve lo-ledelineꞌ nene louꞌ gamaziloꞌ eꞌmete osuꞌ lube lamube nemuꞌ gele hulo Izesuꞌ Kilisitoꞌnimuꞌ gele eleꞌvoleꞌ okunivosavoꞌ nene ve lisiheꞌ ve lo-ledeleseive. \v 29-30 Lingine gilavo Oꞌmoso nene Zuda ve minamaveti Oꞌmosoꞌine minamo Zuda veti Oꞌmosotevoꞌ neihe. Oꞌove. Oꞌmoso nene hamokovoꞌ neineꞌ nenako nemuꞌ nene aza mo Zuda ve minamave neti Oꞌmosoꞌinesi nene mino Oꞌmosoꞌmi noso okodela mulunive Zuda ve nene aꞌmine Kilisitoꞌnimuꞌ gele eleꞌvoleꞌ okunivo neꞌmo nene ve lisiheꞌ ve lo-ledaaꞌ ogo idoꞌ Oꞌmosoꞌmi noso okoꞌnida milisaꞌmave heta atoꞌ vesi nene aꞌmine Kilisitoꞌnimuꞌ gili eleꞌvoleꞌ ikevosavoꞌ nene engikisi Oꞌmosoꞌmo ve lisiheꞌ ve lo-ngedeleseive. \v 31 Nemuꞌ nene malite tiꞌ li longoꞌ ilisave: Neꞌmino neineꞌ nenako Kilisitoꞌnimuꞌ gele eleꞌvoleꞌ ogaꞌ neꞌmovoꞌ nene Oꞌmosoꞌmo ve lisiheꞌ ve lo-ledelidoꞌ lisiheꞌ o neive li likenako lingine nene louliꞌmi gono nene mo osuꞌ lave lisa nilahe. Oꞌove. Laza mo kekeꞌ neꞌmine lamune. Asi laza ne louꞌ nene hize eleꞌ noo-dune. \c 4 \s1 Gomuꞌ Abalahamuꞌni Oꞌmosoꞌmo Ve Lisiheꞌ Ve Lo-dineꞌ Monovoꞌve Maloꞌ Nene Ningo Geleloningumuꞌ Pauloꞌ Lineꞌ Gamazi \p \v 1 Nemuꞌ nene laza leliꞌ Zuda veti zuho do sotoꞌ ive avoteho Abalahamuꞌnida sotoꞌ ineꞌ initeꞌ mamuꞌ nene laza aꞌmidoꞌ do molosa lo gele ha gele ogo gelelone. \v 2 Abalahamuꞌ nene aza monovo laminekovoꞌ ogo molo minidotiꞌ Oꞌmosoꞌmo ve lisiheꞌ ve lo-didiniko aza nene eiꞌ okoꞌno do dizelidoꞌ lisiheꞌ o minidineꞌza Oꞌmosoꞌmi veleloꞌ nene aza neꞌmino ma minamidine. \v 3 Aꞌminemuꞌ nene monoꞌ godolouꞌ nene nadive li gizi nizaniꞌ neve. Mene gililo: \q1 Abalahamuꞌ aza Oꞌmosomuꞌ gele eleꞌvoleꞌ o minavo \q1 aza nene ve lisiheꞌ ve lo-dineꞌ ve. \m \v 4 Ve maliꞌmo ve maloꞌ gono davo aꞌmine ve meni emelineꞌ nene haza gidini noimuve lo gelosa emelivoba asi nenitoꞌ gono nodavo dinaꞌ neineꞌ nene golo nohizuve lo gele minosa meni nene emeleseive. \v 5 Idoꞌ aꞌmineꞌmine ogo laza ogo molo oloneꞌ neꞌmo Oꞌmosoloꞌ gono noduneꞌ gilivo mino monovo lamineꞌ gehepevelokovoꞌ eꞌmetunidiniko Oꞌmosoꞌmo aꞌmidoꞌ golo hizo meni neꞌmine lemo ve lisiheꞌ ve lo-lididineꞌza mo neꞌmino nomive. Nemuꞌ nene ve ma laza aꞌmine ogo molo oloneꞌ initetotiꞌ nene menite neꞌmine ve lisiheꞌ ve lo-ledelidoꞌ nomive lo gelosa idoꞌ Oꞌmoso aza nene lihimeꞌinesi vemukisi ve lisiheꞌ ve lo-ngedaaꞌ ive ve lo laza ogo molo oloneꞌ initetoꞌ nene gele medelamo ezemuꞌ haza gele eleꞌvoleꞌ oloneꞌ nene aza ezemuꞌ gele eleꞌvoleꞌ oloningumukovoꞌ nene ve lisiheꞌ ve lo-ledeleseive. \v 6 Idoꞌ neniꞌ luvoniꞌ neꞌmino Davidiꞌ aza Oꞌmosoꞌmo eveneꞌ igi mili minaniꞌ monovomuꞌ nene gele hulo ve lisiheꞌ ve lo-ngedelive nene ngolize izilizadoꞌ lisiheꞌ i nizave lo tiꞌ lo lineꞌ ve: \q1 \v 7 Ve ma louꞌ gamaziꞌve avutoꞌ angumuꞌ nene \q1 Oꞌmosoꞌmo gele hulo lihimeꞌine hulo-ngedelive nene \q1 ngolize izilizadoꞌ lisiheꞌ i nizave. \q1 \v 8 Ee, ve ma lihimeꞌine Oꞌmosoꞌmo do-ngede minamilive nene \q1 ngolize izilizadoꞌ lisiheꞌ i nizave. \p \v 9 Lingine gilavo aꞌmine neꞌmino lolize izelonidoꞌ lisiheꞌ ogaꞌ monovo mene Oꞌmosoꞌmi noso okodela mulunive Zuda velavoꞌ sotoꞌ ogaꞌ neineꞌ nehe idoꞌ Oꞌmosoꞌmi noso okoꞌnida milisaꞌmave Zuda ve minamavelasi sotoꞌ ogaꞌ neineꞌ neve. Nemuꞌ nene lo gele ha gele olonge. Gililo. Laza tiꞌ lo laaꞌ none: Abalahamuꞌ Oꞌmosomuꞌ gele eleꞌvoleꞌ ineꞌ neꞌmo Oꞌmoso ezemuꞌ ve lisiheꞌ ve lo-dineꞌ ve. Nemuꞌ nene aꞌmine luvoniꞌ monovo nene Oꞌmosoꞌmi noso okoꞌnida milisaꞌmavelasi sotoꞌ ogaꞌ neive lo ningo gele none. Nanitekumuꞌ ve. \v 10 Oꞌmosoꞌmo lihimeꞌvemuꞌ gele hulo Abalahamuꞌni ve lisiheꞌ ve lo-dineꞌ monovomuꞌ nene gohi gelosa gelelone. Abalahamuꞌ okoꞌnola Oꞌmosoꞌmi noso molosa neivo Oꞌmosoꞌmo ve lisiheꞌ ve lo-dineꞌ nehe olihe Oꞌmosoꞌmi noso okoꞌnola molamivosa lo-dineꞌ neve. Oꞌmosoꞌmo ve lisiheꞌ ve lo-dineꞌ nene okoꞌnola Oꞌmosoꞌmi noso neivosa nevoba asi olihe nomivosa ve lisiheꞌ ve lo-dineꞌ ve. \v 11 Neꞌmine ogo Abalahamuꞌ okoꞌnola Oꞌmosoꞌmi noso nomineꞌ mino Oꞌmosomuꞌ gele eleꞌvoleꞌ ogo minineꞌ nemuꞌ nene Oꞌmosoꞌmo ve lisiheꞌ ve lo-dineꞌ nene do sotoꞌ olosa aꞌmine noso nene eiꞌ okoꞌnoloꞌ nene molaniꞌ ve. Neꞌmine ineꞌ nenako Abalahamuꞌ aza Oꞌmosoꞌmi noso okoꞌnida nomineꞌ minisa Oꞌmosomuꞌ gili eleꞌvoleꞌ ilizadotiꞌ nene Oꞌmosoꞌmo ve lisiheꞌ ve lo-ngedeliveti meꞌnibo loloꞌ ineꞌ ve. \v 12 Neꞌmino engiꞌ meꞌnibo loloꞌ ogo minineꞌ nene laza Oꞌmosoꞌmi noso okodela mulunive linge maliti meteho nesi neive. Adoꞌ laza nene avoteho Abalahamuꞌ Oꞌmosoꞌmi noso okoꞌnola nomivo mino gele eleꞌvoleꞌ ogo minineꞌ monovoꞌveloꞌ eꞌmeto mino Oꞌmosoꞌmi nosovoꞌ nene okodela mulunivoba asi gele eleꞌvolekisi o noniveti meteho nesi nene neive. \s1 Oꞌmosoꞌmo Lemelove Lo Lo Huko Salani Molo-lidineꞌ Initeꞌ Daloneꞌ Nene Loutoꞌ Eꞌmetelonidotiꞌ Dalonivoba Asi Oꞌmosomuꞌ Gele Eleꞌvoleꞌ Olonidotikovoꞌ Nene Dalosune Lo Pauloꞌ Lineꞌ Gamazi \p \v 13 Idoꞌ naza neꞌmine noluvoniꞌ nene memuꞌ luve: Oꞌmosoꞌmo Abalahamuꞌni misubo mukiꞌ nene eiꞌ aꞌvopilemokisi salani molo-lengedekuve lo lo huko-dineꞌ nene louꞌ gamazi gomukutiꞌ ma minidoꞌ eꞌmeto miningumuꞌ nevoba asi Oꞌmosomuꞌ gele eleꞌvoleꞌ ogo miningumuꞌ nene Oꞌmosoꞌmo ve lisiheꞌ ve lo-dineꞌ nenako nemuꞌ nene aꞌmine salani gamazi lo huko-dineꞌ ve. \v 14 Ee, louꞌ gamaziloꞌ eꞌmetelonidotiꞌ nene aꞌmine salani initeꞌ nene ma dunidiniko Oꞌmosomuꞌ gele eleꞌvoleꞌ ogaꞌ monovo nesi idoꞌ aꞌmine Oꞌmosoꞌmo Abalahamuꞌni lo huko-dineꞌ gamazi nesi nene vi haza niteꞌ loloꞌ asidine. \v 15 Naniteliꞌmo ve. Louꞌ gamaziloꞌ eꞌmetaaꞌ neꞌmo nene Oꞌmosoꞌmo izeboloꞌ molavo lihime lemeli akaloꞌ leleꞌmize molaaꞌ neive. Ne neiha louꞌ gamazi ma minamilidokovoꞌ nene louꞌ gamazi avutoꞌ oloneꞌ aka ma minamoloseive. \v 16 Nemuꞌ nene aꞌmine salani initeꞌ daloneꞌ nene mo Oꞌmosomuꞌ gele eleꞌvoleꞌ olonidotikovoꞌ nene haza gidini dosoꞌ o neive. Ee, aꞌmine lo huko-lidineꞌ initeꞌ nene Oꞌmosoꞌmo haza nasahiliꞌ o-lididiꞌmovoꞌ nene Abalahamuꞌ aꞌvopilemoꞌ zuho mukiꞌ adoꞌ Moseꞌ louꞌ gamaziꞌmi gesi minguꞌ nonivesi idoꞌ aꞌminguꞌ minami Abalahamuꞌ aza Oꞌmosomuꞌ gele eleꞌvoleꞌ idiꞌmine igi gili eleꞌvoleꞌ ilizavesi nene laza mukitoꞌ dalonidoꞌ lisiheꞌ o minelive losa lehize-lidineꞌ nenako gele eleꞌvoleꞌ olonidotikovoꞌ nene haza gidini dosoꞌ o neive. Abalahamuꞌ nene aꞌmine neꞌmino dalonive mukiliti meteho nene neive. \v 17 Neꞌmino meteho minineꞌ nene aꞌminemuꞌ Oꞌmosoꞌmo lineꞌ gamazi monoꞌ godolouꞌ tiꞌ li gizi nizaniꞌ ma neive: \q1 Naza nene eveneꞌ zuho ato atoꞌ mukiliti avoꞌnibo mineline lo \q1 geleꞌmize molokuve. \p Ee, Oꞌmosoꞌmi veleloꞌ nene aꞌmine lo huko lineꞌ gamazi nene mo eleꞌvoleꞌ o neive. Idoꞌ Oꞌmoso aza nene hilavemuꞌ gohi veꞌine gizilizave lo hilangutiꞌ nene gohi do ote-ngedaaꞌ ive mino idoꞌ olihe sotoꞌ amaniꞌ initeꞌ nene mo sotoꞌ aniꞌ gilivosa aꞌminemuꞌ nene ha lo sotoꞌ ogaꞌ ive nesi neive. \v 18 Idoꞌ Abalahamuꞌ nene Oꞌmosoꞌmo lo huko-dineꞌ initeꞌ sotoꞌ o-delineꞌ aka nene nomineꞌza aza nene aꞌmine initeꞌ sotoꞌ ilineꞌ aka nene mo ninge minineꞌ gelavo mino aza nene Oꞌmosoꞌmo gaꞌvopilemoꞌ nene neꞌmini mukiꞌ sotoꞌ ilisave lo lo-nimidoꞌ nene gihile izavo eveneꞌ zuho ato atoꞌ mukiliti avoꞌnibo ha loloꞌ olosuve lo gele eleꞌvoleꞌ ogo minineꞌ ve. \v 19 Idoꞌ neꞌmino gele eleꞌvoleꞌ ogo minineꞌ nene aza kilisimasiꞌve vanu hadeti (100) neꞌminesi mino okoꞌnoꞌve nene gilisupo molangumuꞌ nesi nene ha gele mino idoꞌ Salaꞌ aza nesi nene eleni molavo izipe gedelineꞌ gamene nene osuꞌ lavo minineꞌ neemukisi nene mo ha gele minineꞌza gele eleꞌvoleꞌ ogo minineꞌ nene matamineꞌ. \v 20 Aꞌmine neꞌmino Oꞌmosoꞌmo lo-dineꞌ nemuꞌ nene gele hepeꞌ lizo gala setaꞌ gelamineꞌza gele eleꞌvoleꞌ ineꞌ neꞌmo amuzo molo minavosa Oꞌmoso nene opoꞌni laaꞌ ineꞌ ve. \v 21 Idoꞌ aꞌmine gamazi lo huko-nidive Oꞌmoso neꞌmo aꞌmine gamazi nene do gihile izelidoꞌ mo lisiheꞌ o neineꞌ nenako ha do gihile izeleseive lo gele muꞌmusiꞌ gehepeve ogo minineꞌ ve. \v 22 Neꞌmine ogo minineꞌ nenako aꞌneemuꞌ nene Oꞌmosoꞌmo ve lisiheꞌ ve lo-dineꞌ ve. \v 23 Idoꞌ Oꞌmosoꞌmo neꞌmino ve lisiheꞌ ve lo-dineꞌ monoꞌ godolouꞌ gizi nizaniꞌ nene eikumukovoꞌ neive li gililizave lisa gizi nizaniꞌ nevoba \v 24 asi Guvetesi ve Izesuꞌ Kilisitoꞌ hilingutiꞌ do ote-dive Oꞌmosomuꞌ gele eleꞌvoleꞌ ogo minunivo Oꞌmosoꞌmo ve lisiheꞌ ve lo-ledelive lelikumukisi nene gizi nizaniꞌ ma neive. \v 25 Aꞌmine Guvetesi ve Izesuꞌni nene leliꞌ lihimetemuꞌ medelo helelive lo Oꞌmosoꞌmo eveneliti aꞌninguꞌ molavo helavosa leliꞌ nene ve lisiheꞌ ve lo-ledelineꞌ aka velo hilingutiꞌ nene gohi do ote-dineꞌ ve. \c 5 \s1 Oꞌmosomuꞌ Gele Eleꞌvoleꞌ Okunivo Aza Ve Lisiheꞌ Ve Lo-ledelineꞌ Neꞌmi Gihile Lelita Minelineꞌ Monovomuꞌ Nene Pauloꞌ Lineꞌ Gamazi \p \v 1 Nemuꞌ nene ezemuꞌ gele eleꞌvoleꞌ unidotiꞌ nene Oꞌmosoꞌmo ve lisiheꞌ ve lo-ledavo mino Oꞌmosoꞌmo lelikumuꞌ izeboloꞌ molaniꞌ nene matelineꞌ aka Guvetesi ve Izesuꞌ Kilisitoꞌ velavo neꞌmo nene Oꞌmososi lezesi vovoteuꞌ nene gamazisi nomivo lamineꞌ none. \v 2 Ee, idise mela Oꞌmosoꞌmo nasahiliꞌ noo-lidivo noneꞌ aka nene aꞌmine Guvetesi ve neꞌmo vele-ledavosa aꞌminguꞌ none. Idoꞌ aꞌminguꞌ mino Oꞌmosoꞌmi emeni dameni lamineꞌ nene mudise do leliꞌ olosune lo aꞌminemuꞌ nene gilingili ogo gizebo ogo lolize izo minaaꞌ noune. \v 3 Idoꞌ nemukovoꞌ lolize izesaꞌmune. Laza geni initeliꞌmi lulouꞌ mineloneꞌ neꞌmo nene Oꞌmosomuꞌ gele eleꞌvoleꞌ ogo mino geni gehe do dizo mineloneꞌ amuzote do naba o-ledaaꞌ neive lo gele mino geni initeꞌ lelita mininguꞌ nesi nene aꞌmine genimuꞌ nene ha lolize izo minaaꞌ noune. \v 4 Idoꞌ Oꞌmosomuꞌ gele eleꞌvoleꞌ ogo mino geni gehe do dizo mineloneꞌ neꞌmo nene Oꞌmosoꞌmo ninge lamineꞌ ilineꞌ lemeni dameni nene do sotoꞌ o-ledeleseive. Idoꞌ Oꞌmosoꞌmo ninge lamineꞌ ilineꞌ lemeni damenisi mineloneꞌ neꞌmo leliꞌ nene Oꞌmosoꞌmo do eita oloseive lo laza gele muꞌmusiꞌ olonidoꞌ nene do lisiheꞌ o-ledaaꞌ neive lo nesi nene gele none. \v 5 Idoꞌ aꞌmine gele muꞌmusiꞌ uneꞌ initeꞌ nene vo haza ogavo lovozo ngelo ma helamolosune. Nene nanitekumuꞌ ve. Oꞌmosoꞌmo eiꞌ Sikalahuꞌve lehize-lidineꞌ neꞌmo nene luteuꞌ gono do Oꞌmosoꞌmo vauve elo lulo limineꞌ neꞌmi monovo nene do sotoꞌ ogo lelebizaaꞌ neineꞌ nenako nemuꞌ nene aꞌmine gele muꞌmusiꞌ uneꞌ initeꞌ nene vo haza ogavo lovozo ngelo ma helamolosune. \v 6 Idoꞌ Oꞌmosoꞌmo lulo vauve elo limive luvoniꞌ nene neemuꞌ luve: Laza nene Oꞌmoso eꞌmetelonidoꞌ minamo lute gilizevosi ha nonivo Oꞌmosoꞌmo molaniꞌ gamene nene lisiheꞌ ogavo Kilisitoꞌ nene aꞌmine Oꞌmoso eꞌmetamunivemuꞌ nene medelo hilineꞌ ve. \v 7 Eveneꞌ lisiheꞌ gehepeve nene bililisa navo ma eveneꞌ hamoliꞌmosi ezeloꞌ medelo helelove lo ngelo ma lamoloseiha ma lilineꞌ nene laza amosoꞌ initeꞌ nene olosa lave lo ha gelelesune. Idoꞌ eveneꞌ lamineꞌ gehepevelokisi nene medeli eveneꞌ mukiꞌ nete ngeli ma hilamavo hamo hamolitevoꞌ nene helaakumuꞌ golise gilaniꞌ nene gili huli amuzo mili ma hililizahe lo gele nouve. \v 8 Ne neiha Oꞌmosoꞌmo lulo atoliꞌmine ogo leme neineꞌ nene neꞌmino do sotoꞌ ogo lelebizave: Laza nene ha lihimeloꞌ ve nonivo Kilisitoꞌ aza eveneꞌ amiliza initeꞌ gehepeve ogo lelitoꞌ medelo hilineꞌ ve. \v 9 Nemuꞌ nene tiꞌ lo gelelesune: Kilisitoꞌ aza lelitoꞌ medelo lihimetemuꞌ vaniseꞌve hulo helavo nemuꞌ nene Oꞌmosoꞌmo idise ve lisiheꞌ ve lo-ledavo noneꞌ nenako nemuꞌ Oꞌmosoꞌmo evenekumuꞌ izeboloꞌ molaniꞌ nene Kilisitoꞌ do matosa lihime lemelingutiꞌ do luꞌ izelingumuꞌ nene mo gele muꞌmusiꞌ olonidoꞌ o neive. \v 10 Idoꞌ neꞌmine noluvoniꞌ nene nemuꞌ noluve: Laza Oꞌmososi biluvaꞌ ogo noninguꞌ nene eiꞌ Oꞌmosoꞌmi gipele nene lelikumuꞌ helo Oꞌmososi do hamoꞌ o-lidineꞌ nene mo amosoꞌ initeꞌ daniꞌ nenako nemuꞌ nene laza Oꞌmososi do hamoꞌ o-ledavo noninguꞌ nene aza hilingutiꞌ gohi minevoꞌ alevoꞌ o neineꞌ neꞌmo nene haza ilidoꞌ o neineꞌ initeꞌ ogo mudise do luꞌ izeleseive lo gele muꞌmusiꞌ gehepeve olosune. \v 11 Idoꞌ neevoꞌ nevoba asi Guvetesi ve Izesuꞌ Kilisitoꞌ neꞌmino idise Oꞌmososi do hamoꞌ o-ledavo noneꞌ neꞌmo nene Oꞌmosomuꞌ lolize izo minaaꞌ noune. \s1 Adamudatiꞌ Nene Helaaꞌ Monovo Sotoꞌ Ogavosa Kilisitodatiꞌ Nene Helaakutiꞌ Otosa Minevoꞌ Minevoꞌ Ogaꞌ Monovo Nene Sotoꞌ Ineꞌ Ve Lo Pauloꞌ Lineꞌ Gamazi \p \v 12 Nemuꞌ nene laza tiꞌ lo gele none: Me misubouꞌ lihime sotoꞌ ineꞌ nene ve hamoliꞌmo do sotoꞌ ogavo aꞌmine lihime neꞌmo nene helaaꞌ monovo do sotoꞌ ineꞌ ve. Neꞌmine ogavo eveneꞌ mukiꞌ nene lihime daaꞌ nouneꞌ nenako helaaꞌ nene leliꞌ mukita sotoꞌ o limineꞌ ve. \v 13 Ee, Moseꞌ louꞌ gamazi olihe sotoꞌ amivosa me misubouꞌ nene eveneꞌ lihime daaꞌ aniꞌza louꞌ nomida nene Oꞌmosoꞌmo lihime do molo-ngedamaaꞌ neineꞌ ve. \v 14 Ne neiha louꞌ nomineꞌ gameneuꞌ nene adoꞌ Adamuꞌ minidotiꞌ mine do dizo vo Moseꞌ louꞌ gamazi daniꞌ gamenela nene eveneꞌ sotoꞌ igi miniꞌmi ave mukiꞌ ingine Adamuꞌni Oꞌmosoꞌmo lo huko-dineꞌ gamazi avutoꞌ idiꞌmine igi lihime ma damaniꞌza inginesi nene helaaliꞌmi gesi mingukovoꞌ mini hilaakovoꞌ aniꞌ ma neive. Idoꞌ Adamuꞌ neve nene alingeꞌ sotoꞌ ilivemuꞌ ha avazahaꞌve neꞌminosa nene sotoꞌ ineꞌ ve. \p \v 15 Ne neiha aꞌmine eveneꞌ hamoliꞌmo apiꞌ ogo Oꞌmosoꞌmo lo huko-dineꞌ gamazi avutoꞌ ogo lihime dadotiꞌ nene eveneꞌ mukiꞌ helaaꞌ nouneꞌza aꞌmine Adamuꞌ lihime daniꞌ nene ivileꞌ goloso ivosa Oꞌmosoꞌmo nasahiliꞌ o-lidineꞌ nene eveneꞌ hamoꞌ Izesuꞌ Kilisitoꞌ neꞌmo haza gidini vauve elo aꞌmine nasahiliꞌ nene eveneꞌ mukitoꞌ do sotoꞌ o-lidineꞌ nenako nemuꞌ nene Adamuꞌni Oꞌmosoꞌmo lo huko-dineꞌ gamazi avutoꞌ ineꞌ neꞌmi gihile nene atoliꞌmine ogo neivo idoꞌ Oꞌmosoꞌmo nasahiliꞌ o-lidineꞌ neꞌmi gihile nene atoliꞌmine ogo neivo ato atoliꞌmine igi nizasive. \v 16 Ee, aꞌmine eveneꞌ hamoliꞌmo lihime daniꞌ neꞌmi gihile nene atoliꞌmine ogo neivo Oꞌmosoꞌmo haza gidini o-lidineꞌ initeliꞌmi gihile nene atoliꞌmine ogo neive noluvoniꞌ nene nemuꞌ noluve: Aꞌmine lihime hamoꞌ daniꞌ neꞌmo nene Oꞌmosoꞌmo goniꞌ o-ledo lihime lemaaꞌ neineꞌ nene do sotoꞌ ineꞌza laza gamaziꞌve avutoꞌ vaiꞌ ogaꞌ nouneꞌ neivosa Oꞌmosoꞌmo nene haza gidini o-lidineꞌ initeꞌ neꞌmo nene aza gamazite do helo ve lisiheꞌ ve lo-ledaaꞌ neineꞌ nene do sotoꞌ ineꞌ ve. \v 17 Lamineꞌ, eveneꞌ hamoliꞌmo Oꞌmosoꞌmo lo huko-dineꞌ gamazi ganaꞌ avutoꞌ idotiꞌ nene eveneꞌ laza helaaliꞌmi gesi mingukovoꞌ mino helaaꞌ nouneꞌ nenako idoꞌ ve hamoꞌ Izesuꞌ Kilisitoꞌ o-lidineꞌ initeꞌ neꞌmo helaaꞌ nene ivileꞌ goloso ogavosa Oꞌmosoꞌmo vauve elo nasahiliꞌ o-ledelidotiꞌ ve lisiheꞌ ve lo-ledelive laza nene guvetesi ve neꞌmine loloꞌ ogo minevoꞌ minevoꞌ ogovoꞌ minelesune. \v 18 Nemuꞌ nene tiꞌ lo gelelesune: Ve hamoliꞌmo Oꞌmosoꞌmi gamazi avutoꞌ idotiꞌ nene eveneꞌ mukiꞌ nene Oꞌmosoꞌmo goniꞌ o-ledo lihime lemelidoꞌ o noneꞌ neꞌmino ve hamoliꞌmo monovo lisiheꞌ gehepeve ogo molo idotiꞌ nene Oꞌmosoꞌmo gamazite do helo ve lisiheꞌ ve lo-ledavo eveneꞌ mukiꞌ minevoꞌ minevoꞌ ogo minelonidoꞌ o noneꞌ ma neive. \v 19 Ee, eveneꞌ hamoliꞌmo Oꞌmosoꞌmi gamazi gele hulidotiꞌ nene eveneꞌ mukiꞌ lihimeloꞌ vevoꞌ loloꞌ uneꞌ neꞌmino ve hamoliꞌmo Oꞌmosoꞌmi gamazi gele do osuꞌ lidotiꞌ eveneꞌ mukiꞌ nene ve lisiheꞌ loloꞌ olosune. \v 20 Neꞌmine o neiha Oꞌmosoꞌmo louꞌ gamaziꞌve do sotoꞌ ineꞌ nene louꞌ avutoꞌ ogaꞌ monovo nene naba oꞌmo vo minelive losa do sotoꞌ ineꞌza lihime daaꞌ monovo naba oꞌmo vo minida nene aꞌmine naba oꞌmo vineꞌ votigile nene ivileꞌ goloso ivosa Oꞌmosoꞌmi nasahiliꞌ nene atoliꞌmine ogo sotoꞌ ogo minineꞌ ve. \v 21 Idoꞌ neꞌmine ineꞌ nene nanitekumuꞌ ve. Lihime daaꞌ monovo neꞌmo helaaliꞌmi gesi minguꞌ hulo-ledavo aꞌminguꞌ mino helaaꞌ nouneꞌ neꞌmino Guvetesi ve Izesuꞌ Kilisitoꞌ gono daniꞌ neꞌmo nene eveneꞌ lisiheꞌ loloꞌ o-ledo Oꞌmosoꞌmi nasahililiꞌmi gesi minguꞌ hulo-ledavo aꞌminguꞌ mini minivoꞌ minivoꞌ ilizave losa neꞌmine ineꞌ ve. \c 6 \s1 Laza Nene Kilisitolesi Makaꞌ Hiluneꞌ Gelavo Lihime Daaꞌ Monovote Osuꞌ Lavo Kilisitolesi Makaꞌ Oto Gohi Minevoꞌ Alevoꞌ Ogo Noneꞌ Gelavo Monovo Lisiheꞌ Laminekovoꞌ Ogo Molo Mineloningumuꞌ Pauloꞌ Lineꞌ Gamazi \p \v 1 Idoꞌ lihime daaꞌ monovo naba oꞌmo vo minida nene aꞌmine naba oꞌmo vineꞌ votigile nene ivileꞌ goloso ivosa Oꞌmosoꞌmi nasahiliꞌ nene atoliꞌmine ogo sotoꞌ ogo minineꞌ nenako nemuꞌ nene laza nadive lolone. Oꞌmosoꞌmo nasahiliꞌ gohi vauve elo o-ledelineꞌ aka nene do sotoꞌ oloseize. Lihime nene daakovoꞌ ogo minukeꞌzo lolobe. \v 2 Mo kekeꞌ neꞌmine ma lamolosune. Laza nene hilunive gelo mino hilave nete initeꞌ hamokumukisi upuhoꞌ isaꞌmaniꞌ neꞌmino upuhoꞌ ogo lihime gohi damolonidoꞌ mine molo nonive nete nene lihime daaꞌ monovo nene gohi do oto ogo molo minelonidoꞌ nene mo kekeꞌ nomive. \v 3 Idoꞌ Kilisitoda giꞌmizo minelone lo noso hulunive laza mukiꞌ neꞌmino noso huluninguꞌ nene ezesi makaꞌ lohotoꞌ zaloꞌ hiluneꞌ gilivo noneꞌ nenako nemuꞌ nene lingine gilamahe. \v 4 Neꞌmino neineꞌ nenako nemuꞌ nene laza noso huluninguꞌ nene ezesi makaꞌ helosa ezesi makaꞌ gonoso galesela vo minuneꞌ gele neive. Idoꞌ noso huluninguꞌ neꞌmine ineꞌ nene Kilisitoꞌni nene meleho Oꞌmosoꞌmo amuzoꞌve atoliꞌmine ogo minineꞌ nene do sotoꞌ ogo hilingutiꞌ do ote-davo neineꞌ neꞌmino lazasi nene aꞌmineꞌmine ogo ezesi makaꞌ otosa minevoꞌ alevote nene gosohoꞌ loloꞌ ogavo igi mili minilizave losa neꞌmine ineꞌ ve. \p \v 5 Ee, ezela giꞌmizo mino eiꞌ hilidiꞌmine ogo lazasi makaꞌ hiluneꞌ gilineꞌ nenako nemuꞌ nene aza hilingutiꞌ otidiꞌmine ogo lazasi nene ha ote noneꞌ gilivosa minelesune. \v 6 Laza tiꞌ lo gele none: Lihime monovo goloso neꞌmo okodela gono daaꞌ ineꞌ nene osuꞌ lavo laza lihime monovoloꞌ gohi gelekeleꞌ ogo minamoloningumuꞌ nene lemeni dameni litehe nene Kilisitoꞌnisi lohotoꞌ zaloꞌ bili nizaniꞌ ma neive. \v 7 Idoꞌ neꞌmine noluvoniꞌ nene nemuꞌ noluve: Veꞌinesi mini lihime monovoloꞌ gelekeleꞌ igi mini hilanguꞌ nene aꞌmine monovosi huko vavosa hilave nene lihime monovoꞌmi gelekeleꞌ ve gohi ma minami haza minaaꞌ nave. \v 8 Laza nene Kilisitolesi makaꞌ hiluneꞌ ma nenako laza nene ezesi makaꞌ minevoꞌ alevoꞌ ogo minelesune lo mo gele muꞌmusiꞌ gehepeve o none. \v 9 Idoꞌ neꞌmine lo gele muꞌmusiꞌ o noneꞌ nene Kilisitoꞌ hilingutiꞌ otineꞌ nene aza helaaliꞌmi gesi mingutiꞌ nene mudise lemo heta oganiꞌ nenako gohi helamoloseive lo gele minosa nene laza gele muꞌmusiꞌ o none. \v 10 Idoꞌ hilineꞌ nene lihime monovoliꞌmi amuzo nene mudise do nohulosa hilineꞌ ve. Idoꞌ gohi minevoꞌ alevoꞌ neineꞌ nene Oꞌmosoꞌmine nene minevoꞌ alevoꞌ o do neive. \v 11 Idoꞌ lingine lengikumuꞌ nesi nene tiꞌ li gili minilo: Laza nene mo hiluneꞌ gilivo mino lihime nene gohi ma damolone. Idoꞌ minevoꞌ alevoꞌ ogo mineloneꞌ nene mo Izesuꞌ Kilisitoda giꞌmizo mino Oꞌmosoꞌmine nene minevoꞌ alevoꞌ o do minelesune. \p \v 12 Nemuꞌ nene okodine helelineꞌ akaloꞌ mine molo neineꞌ neꞌmo nene laniteꞌ gelo dalosa gilineꞌ goloso niteꞌ nene mo di minilizave lo lihime monovo neꞌmo nene do eita ogo do gelekeleꞌ o-lengedalize. \v 13 Lingine okodidotiꞌ gizedine adine neꞌmine nehe nanitetine nolihe initeꞌ hamokisi nene goloso niteꞌ dalive li lihime monovoliꞌmi gono daaꞌ initeꞌ neꞌmine nene loloꞌ i-damilo. Asi hiluningutiꞌ nene otosa gosohoꞌ lemeni dameniloꞌ minevoꞌ alevoꞌ ogo noneꞌ nenako nemuꞌ nene laza okodelatiꞌ gizede ade nevoꞌmine nehe idoꞌ nanitete nolihe neve nene Oꞌmosoꞌmine emekunivo eiꞌ gono daaꞌ ineꞌ initeꞌve neꞌmine loloꞌ ogavo monovo lisiheꞌ laminekovoꞌ ilive lii okodine mukiꞌ nene Oꞌmoso imilo. \v 14 Ee, lingine nene Moseꞌ louꞌ gamaziꞌmi gesi minguꞌ nene minami Oꞌmosoꞌmi nasahililiꞌmi gesi minguꞌ imi nizaniꞌ nenako nemuꞌ lengiꞌ nene lihime monovoliꞌmo eita do gelekeleꞌ o-lengedelidoꞌ minamave. \s1 Lihime Monovoliꞌmi Gelekeleꞌ Ve Minaatotikisi Idoꞌ Monovo Lisiheliꞌmi Gelekeleꞌ Ve Minaatotikisi Nene Gihileꞌve Ato Atoꞌ Soto Ogaꞌ Neive Lo Pauloꞌ Lineꞌ Gamazi \p \v 15 Neꞌmino neineꞌ nenako nadolone. Laza nene louꞌ gamaziꞌmi gesi minguꞌ minamo Oꞌmosoꞌmi nasahililiꞌmi gesi minguꞌ noneꞌ nenako louꞌ gamazi nene avutoꞌ ogo ha gopo lihime daakovoꞌ olobe. Oꞌove. Mo kekeꞌ neꞌmine amolosune. \v 16 Lingine ve maliꞌmi gelekeleꞌ ve loloꞌ ogo eiꞌ gamaziꞌve gele dalone li vi giꞌmizi eitoꞌ gelekeleꞌ i-diꞌmi vi minilizaniꞌ neꞌmo nene mo eiꞌ gelekeleꞌ ve gehepeve nene nizave. Idoꞌ lihime monovoloꞌ gelekeleꞌ igi minilizaniꞌ neꞌmi gihile nene helaaꞌ nene do sotoꞌ o-lengedeleseive. Idoꞌ Oꞌmosoloꞌ gelekeleꞌ igi minilizaniꞌ neꞌmi gihile nene Oꞌmosoꞌmo eveneꞌ lisiheꞌ ve lo-lengedeleseive. Neꞌmino neingumuꞌ nene lingine gilamaniꞌ nehe. Mo gili nilisave. \v 17 Ne neiha lingine gomuꞌ nene lihime monovoliꞌmi gelekeleꞌ ve minaniꞌza Kilisitoꞌ gonouꞌ velite apizi lingimi di gelekeleꞌ i-lingidaniꞌ gamaziꞌmi monovoloꞌ lutine milisa eꞌmetaniꞌ nenako nemuꞌ nene Oꞌmosomuꞌ tangezoꞌ ve lolone. \v 18 Ee, lingine nene lihime monovoloꞌ gelekeleꞌ igi minangutiꞌ nene Oꞌmosoꞌmo do kuluhize-lengedavo monovo lisiheꞌ lamineliꞌmi gelekeleꞌ ve liliꞌ ikeve. \v 19 Neꞌmine noluvoniꞌ nene lingine nene haza eveneꞌ leliꞌ neꞌmine mini naza gamazi gihileloꞌ eꞌmeto ma loloniꞌ nene lingine aꞌmineꞌmi monovo gililizadoꞌ lisiheꞌ amaniꞌ nenako nemuꞌ nene neꞌmine amo ha eveneliti gamaziloꞌ do molo neꞌmine noluve. Idoꞌ lingine gomuꞌ nene okodidoꞌ gizedine adine neꞌmine initetine mukiꞌ nene louꞌ avutoꞌ igi lutine do goloso ogaꞌ monovoloꞌ di gelekeleꞌ i-ngidisa louꞌ avutoꞌ igaꞌ ave gehepeve liliꞌ aniꞌ maꞌmine igi Oꞌmosoꞌmi evenele gehepeve minelonidoꞌ do lisiheꞌ okaꞌ okaꞌ okunivo lute lisiheꞌ lamineꞌ gehepeve ilive li monovo lisihetoꞌ nene aꞌmine okodine nene di gelekeleꞌ i-dilizave. \v 20 Neꞌmine ilizave luvoniꞌ nene nanitekumuꞌ ve. Lingine gomuꞌ nene lihime monovoliꞌmi gelekeleꞌ ve mini monovo lisihetoꞌ nene gelekeleꞌ isaꞌmaniꞌza \v 21 neꞌmine adotiꞌ nene gihileꞌve naniteꞌ sotoꞌ ogaꞌ ineꞌ neve. Aꞌmine lingine neꞌmine igaꞌ adotiꞌ idise longovozo hilaaꞌ naniꞌ initeꞌ neꞌmo nene mo helaaꞌ nene do sotoꞌ neive. \v 22 Neꞌmine ogaꞌ neineꞌza idise lingine lihime monovoloꞌ gelekeleꞌ ogaꞌ aka nene mudise huli Oꞌmosoloꞌ gelekeleꞌ igi minadotiꞌ nene gihileꞌve nene lutine lisiheꞌ oꞌmo vo osuꞌ lavosa neꞌmo nene mo minevoꞌ minevoꞌ minaaꞌ lengemeni dameni dalisave. \v 23 Ee, lihime monovoliꞌmo nene meniꞌve meni hizaaꞌ neineꞌ nene mudise helaaꞌ monovo ne neiha Guvetesi ve Izesuꞌ Kilisitoda vo giꞌmizekunivo Oꞌmosoꞌmo haza gidini lehize-ledaaꞌ neineꞌ initeꞌ nene minevoꞌ minevoꞌ minaaꞌ lemeni dameni ne neive. \c 7 \s1 Pauloꞌ Aza Veneꞌ Vemohoꞌ Minaaꞌ Monovoloꞌ Lo Molo Kilisitokisi Hilunidotiꞌ Nene Loutoꞌ Gelekeleꞌ Ogo Minuneꞌ Monovo Nene Mo Osuꞌ Lave Lineꞌ Gamazi \p \v 1 Neze zuhokizo, lingine louliꞌmi monovo gili minavemuꞌ nene noluvoniꞌ nenako nemuꞌ nene eveneꞌ laza loutoꞌ gelekeleꞌ oloneꞌ nene vetesi noneꞌ gameneukovoꞌ nene gelekeleꞌ olosune lisa gili nilisave. \v 2 Nemuꞌ nene naza gamazi ma tiꞌ lo lo molo noluve: Veneꞌ di minaniꞌ veneꞌ neve nene ve maloꞌ vamoloseive lo minineꞌ louꞌ gamazi neꞌmo nene vanaho velesi ha minelineꞌ gamenelokovoꞌ nene analoꞌ do minaaꞌ neineꞌza vanaho ma helelineꞌ nene vanahidokovoꞌ minelive lo minineꞌ louꞌ neꞌmo nene kuluhize-davo haza mineleseive. \v 3 Idoꞌ nemuꞌ nene vanaho velesi ha neivo ve gohi maloꞌ vilineꞌ nene veneꞌ vemohoꞌ bizivoꞌ minaakumuꞌ minineꞌ louꞌ ma nene avutoꞌ ogaꞌ ineꞌ veneꞌ ve li-dilisave. Neꞌmine li-dilisaha vanaho helavosa ve gohi maloꞌ vamilive lo minineꞌ louꞌ maꞌmo nene kuluhize-dineꞌ nenako nemuꞌ nene ve gohi maloꞌ vilineꞌ nene aꞌmine louꞌ ma avutoꞌ amoloseive. \v 4 Nemuꞌ nene neze zuhokizo, aꞌmineꞌmine igi linginesi nene Kilisitolesi hamoꞌ liliꞌ igi mini makaꞌ hilikevo gomuꞌ vadibo neꞌmine minive adoꞌ louꞌ gamazi neꞌmo nene gohi adidoꞌ do minamivo minikeve. Idoꞌ neꞌmine aniꞌ nene ve gohi maloꞌ vi giꞌmizilizangumuꞌ nene neꞌmine aniꞌ ve. Ee, Oꞌmosola gihile di sotoꞌ ilizangumuꞌ hilingutiꞌ otive Izesuꞌni eita nene vi giꞌmizilizangumuꞌ nene neꞌmine aniꞌ ve. \v 5 Laza lemeni dameni liteheloꞌ eꞌmeto minuneꞌ gamenela nene laza lihime monovomuꞌ laniteꞌ gelaaꞌ uneꞌ monovo nene louꞌ neꞌmo do ote-davo okode mukita gono davo aꞌmidoꞌ eꞌmetunidotiꞌ gihileꞌve nene helaaꞌ akaloꞌ mine molo minuneꞌ ve. \v 6 Neꞌmine uneꞌza Kilisitolesi makaꞌ hiluneꞌ neꞌmo nene louliꞌmo adeloꞌ do minineꞌ nene idise kuluhize-ledavo laza aꞌmine litehe molo vineꞌ louꞌ gamazi gizaniꞌ maloꞌ nene gelekeleꞌ amo Oꞌmosoꞌmi Sikalahuliꞌmo lemeni dameni gosohoꞌ do sotoꞌ o-lididoꞌ nene gelekeleꞌ ogo gono daaꞌ noune. \s1 Louꞌ Gamaziꞌmo Lihime Monovo Do Sotoꞌ O-ledavosa Lihime Daaꞌ Nouneꞌ Nemuꞌ Pauloꞌ Lineꞌ Gamazi \p \v 7 Nemuꞌ nene laza nadive lolone. Louꞌ gamazi nene initeꞌ goloso lihime neꞌmine neive lolobe. Mo kekeꞌ neꞌmine neive lamolosuneꞌza louꞌ nene ma minamidiniko naza lihime monovo nene mo ningamuvodine. Ee, louꞌ neꞌmo mumuzoꞌ amozo lamidiniko naza mumuzoꞌ ogaꞌ monovo nene ma ningo gelamuvodine. \v 8 Aꞌmine louꞌ gamazi neꞌmo nene aka velo do upuhoꞌ o-davo lihime monovo neꞌmo nene mumuzoꞌ ogaꞌ monovo mukiꞌ nene vauve elo luꞌneuꞌ do sotoꞌ o-nidineꞌ ve. Ee, louꞌ nene ma minamidiniko lihime monovo neꞌmo nene ogo molo monaaꞌ initekisi ma amo hilive neꞌmino haza minidinako nemuꞌ nene noluve. \v 9 Gomuꞌ louꞌ neꞌmo nenita olihe amivosa naza nene ha gopo minevoꞌ alevoꞌ ogo veꞌnesi minuvoniꞌza Oꞌmosoꞌmi louꞌ gamazi ogo hetelidotiꞌ nene lihime monovo neꞌmo nene hilineꞌ gelavo luꞌneuꞌ miningutiꞌ nene gilelo otavosa \v 10 naza ma nene mo hiluvoniꞌ gelo minekuve. Neꞌmine ogo mino naza giluvoniꞌ nene Oꞌmosoꞌmi louꞌ gamazi neꞌmo minevoꞌ minevoꞌ oloniꞌ akaloꞌ nene neleꞌmize molalosa minineꞌza asi helaaꞌ akaloꞌ neleꞌmize molaave lo giluvoniꞌ ve. \v 11 Idoꞌ neꞌmine noluvoniꞌ nene nemuꞌ noluve: Aꞌmine louꞌ gamazi neꞌmo nene aka velo lihime nene do upuhoꞌ o-davo lihime monovo neꞌmo nene goꞌne izavo louꞌ nene avutoꞌ okuvosa neꞌmo nene nebele helave. \v 12 Nemuꞌ nene Oꞌmosoꞌmi louꞌ gamazi nene mo lihimeꞌvesi nomineꞌ lamineꞌ gehepeve neivo idoꞌ gamazi hamoꞌ hamoꞌ aꞌminguꞌ nizaniꞌ nesi nene lihimeꞌvesi nomineꞌ mino mo lisiheꞌ laminekovoꞌ ne neive. \p \v 13 Nemuꞌ nene naza hiluvoniꞌ ma nene aꞌmine initeꞌ lamineꞌ gehepeve neꞌmo nene nebelavosa hiluvoniꞌ nehe. Oꞌove. Neꞌmo nomive. Lihime monovo neve nene initeꞌ goloso minineꞌ nene mo sotoꞌ ogo minelingumuꞌ nene aꞌmine lihime monovo neꞌmo gono do aꞌmine initeꞌ lamineꞌ louꞌ gamazi nedunuꞌ nene nemenguꞌ molavo neꞌmo nene lihime dosa hiluvoniꞌ gelavo nouve. Idoꞌ neꞌmino neineꞌ nene louꞌ neꞌmo nene lelebizavo lihime monovo atoliꞌmine ogo initeꞌ goloso gehepeve minineꞌ nene ningeloningumuꞌ nene neꞌmino neive. \v 14 Ee, laza tiꞌ lo gele none: Oꞌmosoꞌmi louꞌ gamazi neuꞌ nene Oꞌmosoꞌmi Sikalahuliꞌmi emeni damenisi neive. Ne neiha neniꞌ nene haza eveneliti lemeni damenisi mino lihime monovoꞌmi gelekeleꞌ ve neꞌmine ne nouve. \v 15 Idoꞌ neꞌmine noluvoniꞌ nene nemuꞌ noluve: Naza nene olosa gelamuvoniꞌ initeꞌ monovo goloso nene ogo molo ogo mino naza goseleꞌ gehepeve nebelaaꞌ neineꞌ initeꞌ nene ha ogaꞌ nouve. Neꞌmine ogaꞌ nouvoniꞌ nene nanimuꞌ nouhe nemuꞌ nene mo gelesi amuve. \v 16 Idoꞌ naza nene louꞌ avutoꞌ ogo olosa gelamuvoniꞌ initeꞌ goloso ma oloniꞌ nene ha oloha olosa gelamuvoniꞌ neꞌmo nene aꞌmine nene amaaꞌ initeꞌ ve lo giluvoniꞌ nene do sotoꞌ oloseive. Idoꞌ louꞌ neꞌmosi nene aꞌmine initeꞌ amaaꞌ initeꞌ ve lo neineꞌ nenako naza giluvoniꞌ nesi nene louꞌ neꞌmo lidoꞌ vo miliseꞌ ogavo neꞌmo naza louꞌ nene mo lamineꞌ neive lo giluvoniꞌ nene do sotoꞌ oloseive. \v 17 Neꞌmino neineꞌ nenako naza initeꞌ goloso oloniꞌ nene neniꞌ gehepeve olovoba asi neniꞌ luꞌneuꞌ minineꞌ lihime monovo neꞌmo nene oloseive. \v 18 Naza laminetoꞌ noluve. Nenikuꞌ nene adoꞌ nemeni dameni litehesi nouvonguꞌ neve nene monovo lamineꞌ ma minamive lo gele nouve. Nanitekumuꞌ ve. Naza nene monovo laminetoꞌ eꞌmetelesa ha gelelesuha eꞌmetaaꞌ nene mo ngelo ma amolosuve. \v 19 Neꞌmine noluvoniꞌ nene nemuꞌ noluve: Initeꞌ lamineꞌ olosa gelaaꞌ nouvoniꞌ ma nene mo osaꞌmuve. Asi monovo goloso olosa ma gelesaꞌmuvoniꞌ ma nene ha oꞌmo vo minaaꞌ nouve. \v 20 Idoꞌ naza nene olosa gelamuvoniꞌ initeꞌ ma oloniꞌ nene neniꞌ gehepeve olovoba asi neniꞌ luꞌneuꞌ minineꞌ lihime monovo neꞌmo nene oloseive. \p \v 21 Nemuꞌ nene monovo nenita neꞌmino ma neineꞌ nene mo ningekuve: Naza nene monovo laminekovoꞌ ogo molo minelove lo nogiluvo aꞌmidoꞌ nene goloso monovo neve nene nenita mo omo minaaꞌ neive. \v 22 Ee, neniꞌ luꞌneuꞌ gehepeve vomine Oꞌmosoꞌmi louꞌ gamazimuꞌ nene laniteꞌ gelaaꞌ nouha \v 23 okoꞌne mukita nene atoꞌ monovosi minaaꞌ neivosa nene mo ningekuve. Aꞌmine monovo neꞌmo nene luꞌne gaꞌneuꞌ minineꞌ monovo lamineꞌ nene lovo o emo mino aꞌneloꞌ nesi nene do mino aꞌmine okoꞌnela minineꞌ lihime monovoloꞌ nene do gelekeleꞌ o-nedaaꞌ neive. \v 24 Agae, minevoꞌ alevoꞌne lihiteheꞌ o vive naza helaaliꞌmi akaloꞌ mine molaniꞌ okoꞌnesi mene nouvongutiꞌ nene zaho do nuꞌ izelive. \v 25 Guvetesi ve Izesuꞌ Kilisitoꞌ asiꞌve nene mo do nuꞌ izaaꞌ neive. Nemuꞌ nene Oꞌmosomuꞌ tangezoꞌ ve lo nolo-duve. \p Idoꞌ gamazi mukiꞌ mene luvongumuꞌ nene gelo tiꞌ lo lolosuve: Neniꞌ nene gaꞌnedunuꞌ Oꞌmosoꞌmi louꞌ gamaziloꞌ nene gelekeleꞌ ogaꞌ nouvoniꞌza nemeni dameni litehe neꞌmo nene lihime monovoloꞌ do gelekeleꞌ o-nedaaꞌ neive. \c 8 \s1 Kilisitoꞌ Aza Nene Lelita Lihime Monovo Do Hulo-ledavo Sikalahuliꞌmo Lemeni Dameni Gosohoꞌ Lehize-lididoꞌ Nene Eꞌmetelonidoꞌ O None Lo Pauloꞌ Lineꞌ Gamazi \p \v 1 Nemuꞌ nene Izesuꞌ Kilisitoda giꞌmize minuniveti okodela nene lihime gohi ma nomivo Oꞌmosoꞌmo lihime lemelidoꞌ minamune. \v 2 Nene nanitekumuꞌ ve. Naza Izesuꞌ Kilisitoda giꞌmizosa minevoꞌ minevoꞌ minaaꞌ do sotoꞌ o-ledaaꞌ ive Oꞌmosoꞌmi Sikalahuliꞌmi anauꞌ ogo nouvoniꞌ neꞌmo nene helaatoꞌ leleꞌmize molaaꞌ neineꞌ monovo lihime daaliꞌmi anauꞌ minuvongutiꞌ nene mo kuluhize-nedave. \v 3 Ee, eveneꞌ leliꞌ lemeni dameni nene amuzo molamineꞌ nenako neꞌmo nene louꞌ gamaziloꞌ ngelo eꞌmetamoloneꞌ ogavo louꞌ gamazi neꞌmo lihimeꞌmi anauꞌ minuningutiꞌ nene ngelo ma kuluhize-ledamineꞌ ve. Ne neiha louꞌ gamazi neꞌmo ngelo mo loloꞌ amineꞌ initeꞌ nene Oꞌmosoꞌmo nene mo ha ineꞌ ve. Aꞌmine initeꞌ ineꞌ nene eiꞌ gipele nene leliꞌ lihime daaꞌ univeti okode neꞌminesi nene leliꞌ lihimete apase-ledelingumuꞌ ve lo imiselineꞌ ve. Neꞌmine ogavosa leliꞌ lihimete mukiꞌ nene aꞌmine okoꞌno hamotoꞌ nene dizavo Oꞌmosoꞌmo lihime imineꞌ ve. \v 4 Idoꞌ neꞌmine ineꞌ nene lemeni dameni liteheꞌmo lidoꞌ eꞌmetamosa asi Oꞌmosoꞌmi Sikalahuꞌ neꞌmo lidoꞌ eꞌmeto ogo molo ogaꞌ nounive nene louliꞌmo lidiꞌmine igi eveneꞌ lisiheꞌ lamineꞌ minilizangumuꞌ ve losa neꞌmine ineꞌ ve. \v 5 Ee, eveneꞌ ma ingine ngemeni dameni liteheloꞌ eꞌmetaaꞌ ave nene ngemeni dameni liteheliꞌmi initekumukovoꞌ gili minaaꞌ naniꞌza Sikalahuliꞌmo lidoꞌ eꞌmetaaꞌ nave ingine nene aꞌmine Sikalahuꞌ neꞌmo gilineꞌ initekumukovoꞌ nene gili minaaꞌ nave. \v 6 Lemeni dameni liteheꞌmo gilidoꞌ eꞌmetaaꞌ neꞌmo nene helo vo tolovo olonidoꞌ leleꞌmize molaaꞌ neineꞌza Sikalahuliꞌmo gilidoꞌ eꞌmetaaꞌ neꞌmo nene minevoꞌ minevoꞌ ogo mino hongu lovoꞌ minelonidoꞌ leleꞌmize molaaꞌ neive. \v 7 Aꞌmine lemeni dameni liteheliꞌmo gilidoꞌ eꞌmetaaꞌ neꞌmo nene Oꞌmosoꞌmi louꞌ gamaziꞌmo lidoꞌ nene gele damo mino gele dalineꞌ amuzoꞌvesi nomivo mo kekeꞌ ngelo gele damoloseinako neꞌmo nene Oꞌmoso biluvaꞌ o-daaꞌ do sotoꞌ ogaꞌ neive. \v 8 Ee, ngemeni dameni liteheliꞌmi gelekeleꞌ ve minave nete nene Oꞌmosoꞌmo ninge lamineꞌ dalineꞌ initeꞌ hamokisi nene mo kekeꞌ ngeli ma amilisave. \p \v 9 Ne neiha lengiꞌ lutinguꞌ Oꞌmosoꞌmi Sikalahuꞌ nene ma minevoꞌ dovoꞌ ogo nolineꞌ nene lingine lengemeni dameni liteheꞌmi gelekeleꞌ ve minami asi Sikalahuꞌ neꞌmi gelekeleꞌ ve nene nizave. Idoꞌ ve ma ingine Kilisitoꞌ Sikalahuꞌve di minamave nene Kilisitoꞌ zuho minisaꞌmave. \v 10 Ee, okodine nene lihime monovoliꞌmo mo helelidoꞌ o neineꞌza eveneꞌ lisiheꞌ liliꞌ igi minaniꞌ neꞌmo lutine nene vele gizo neive. \v 11 Izesuꞌ hilingutiꞌ do ote-diveꞌmi Sikalahuꞌ neꞌmo lutinguꞌ mo minevoꞌ dovoꞌ ogo nolineꞌ nene aꞌmine Sikalahuꞌ neꞌmo lengiꞌ lutinguꞌ minevoꞌ dovoꞌ ogo neingumuꞌ nene Kilisitoꞌ hilingutiꞌ do ote-dive aza helelidoꞌ o neineꞌ okodine nesi nene gohi ha do vele gizeleseive. \p \v 12 Nemuꞌ nene neze zuhokizo, aꞌmidoꞌ nene golo hizo initeꞌ ma olonidoꞌ o neineꞌza aꞌmine initeꞌ nene lemeni dameni litehe neve eitoꞌ golo hizelonidoꞌ nene nomive. Ee, aꞌmine lemeni dameni litehe neꞌmo gilidoꞌ nene eꞌmeto ogo molo olonidoꞌ nene nomive. \v 13 Nene nanitekumuꞌ ve. Lingine lengemeni dameni liteheꞌmo gilidoꞌ eꞌmeti minilizaniꞌ nene mo mudise helaatoꞌ mini mili nizave. Ne neiha lingine Oꞌmosoꞌmi Sikalahuliꞌmi amuzodunuꞌ nene okodineꞌmo monovo goloso ogo molo ogaꞌ ineꞌ nene ma bili hililizaniꞌ nene mudise minevoꞌ minevoꞌ ogatoꞌ mini mili nizave. \v 14 Ee, Oꞌmosoꞌmi Sikalahuliꞌmo lidoꞌ eꞌmetaaꞌ ave mukiꞌ nene Oꞌmosoꞌmi izipahala nizaniꞌ nenako nemuꞌ nene mudise miniviꞌ miniviꞌ ilisave. \v 15 Idoꞌ Oꞌmosoꞌmi izipahala nizave luvoniꞌ nene nemuꞌ luvoniꞌ ve: Lingine di tiꞌ aniꞌ Sikalahuꞌ neꞌmo nene golise gohi giliꞌmi vi minilizave lo do gelekeleꞌ ve loloꞌ o-lingidineꞌ nevoba asi Oꞌmosoꞌmi izipahala loloꞌ o-lingidineꞌ ma neive. Idoꞌ neꞌmine o-lidineꞌ neꞌmo laza Oꞌmosomuꞌ nene meteho ve lo Ahono lo vise laaꞌ noune. \v 16 Oꞌmosoꞌmi Sikalahuꞌ neꞌmo nene leliꞌ luteꞌmo lo-limineꞌ gamazi hize eleꞌ ogo lelikumuꞌ nene Oꞌmosoꞌmi izipahala nizave lo lo sotoꞌ ogo lo-lemaaꞌ neive. \v 17 Idoꞌ Oꞌmosoꞌmi izipahala noneꞌ nenako Oꞌmosoꞌmo salani molaniꞌ initeꞌ dalonive nene none. Ee, idoꞌ Kilisitoꞌni Oꞌmosoꞌmo do naba o-delinguꞌ lezesi makatoꞌ do naba o-ledelingumuꞌ nene Kilisitoꞌ mulumo alumo niteꞌ gihineꞌ neꞌmino lazasi makatoꞌ ma gehesoꞌ nene Kilisitoꞌ salani initeꞌve nene ezesi makatoꞌ dalosune. \s1 Idise Lelita Nene Geni Ha Neineꞌza Oꞌmosoꞌmi Sikalahuꞌ Neꞌmo Hize Eleꞌ O-ledavo Initeꞌ Maliꞌmo Do Goloso O-ledamivo Alingeꞌ Oꞌmosoꞌmo Moꞌmosiꞌ Lamineꞌ Do Sotoꞌ O-ledeleseive Lo Pauloꞌ Lineꞌ Gamazi \p \v 18 Naza idise mela nene geni mulumo alumo niteꞌ gehaaꞌ nouneꞌ nemuꞌ nene amuzo molo tiꞌ lo gele nouve: Alingeꞌ sotoꞌ o-ledelineꞌ initeꞌ adoꞌ Oꞌmosoꞌmo do naba o-lidivo lamineꞌ mineloneꞌ monovo neꞌmo nene initeꞌ naba goloso neineꞌ nenako aꞌmine genimuꞌ nene mo gele hulolonidoꞌ lisiheꞌ o neive. \v 19 Ne nanitekumuꞌ ve. Oꞌmosoꞌmo do sotoꞌ molaniꞌ initeꞌ mukiꞌ nete nene Oꞌmosoꞌmo izipahala zuho Okulumoꞌ lemeni damenisi do sotoꞌ o-ledelingumuꞌ nene mo sotoꞌ iliho li gizebo lekeseve igi nizave. \v 20-21 Neꞌmini aꞌmine gamenemuꞌ gizebo igi nizaniꞌ nene aꞌmine gamene alidoꞌ nene Oꞌmosoꞌmo aꞌmine do sotoꞌ molaniꞌ initeꞌ nene gihile izamilizadoꞌ ngeleꞌmize molavo minadotiꞌ nene kuluhizilizaniꞌ nenako nemuꞌ nene gizebo igi nizave. Idoꞌ Oꞌmosoꞌmo gihile izamilizadoꞌ ngeleꞌmize molaniꞌ nene ingine neꞌmine o-ledelive li gilangumuꞌ nevoba asi eiꞌ luloloꞌ do molosa gihile izamilizadoꞌ ngeleꞌmize molaniꞌ ve. Ee, aza gihile izamilizadoꞌ ngeleꞌmize molaniꞌ nene aza tiꞌ lo gele muꞌmusiꞌ ogo minosa nene neꞌmine ineꞌ ve: Alingeꞌ vo tolovo ogaꞌ neꞌmi anauꞌ minilizangutiꞌ nene kuluhizi Oꞌmoso neniꞌ izipahaꞌne zuho nene initeꞌ maliꞌmi anaukisi minami atoliꞌmine igi haza gehepeve nizaniꞌ neꞌmini haza minilisave lo gele muꞌmusiꞌ ogo minineꞌ ve. \v 22 Ee, laza tiꞌ lo gele none: Oꞌmosoꞌmo do sotoꞌ molaniꞌ initeꞌ mukiꞌ nete nene veneꞌ izipe gidilisa mulumo gilaaꞌ naniꞌ neꞌmini ganakutiꞌ mulumo gili leꞌ goloso izi mini di dizi idise gamenelasi mene ha neꞌmine igi nizave. \v 23 Idoꞌ inginevoꞌ nene neꞌmine igi nizavoba asi Oꞌmosoꞌmo lehize-ledelineꞌ initekutiꞌ ganaꞌ daloneꞌ initeꞌ Oꞌmosoꞌmi Sikalahuꞌ mo do nonive lazasi nene Oꞌmosoꞌmo izipahaꞌne ve lo do eita ogo okode nene helo vaaꞌ akaloꞌ minidotiꞌ do kuluhize-delingumuꞌ gizebo ogo nonida mene luteuꞌ leꞌ izo minaaꞌ noune. \v 24 Ee, neꞌmino hele vaaꞌ okode nene do kuluhize-delive lo aꞌminemuꞌ gele muꞌmusiꞌ ogo nonivosa nene do luꞌ izineꞌ ve. Idoꞌ initeꞌ ma sotoꞌ oloseive lo gele muꞌmusiꞌ ogo gizebo minaaꞌ nouneꞌ initeꞌ ma sotoꞌ ilineꞌ nene laza gele muꞌmusiꞌ o mineloneꞌ ma nene gohi gele muꞌmusiꞌ ve lamolosune. Idoꞌ mo ningikeniꞌ initekumuꞌ nene gili muꞌmusiꞌ igi mini gizebo aꞌminemuꞌ nene ma isaꞌmave. \v 25 Ne neiha olihe ma ningamuneꞌ initekumuꞌ gele muꞌmusiꞌ ogo mineloneꞌ nene mo aꞌminemuꞌ gizebo o do dizo minelesune. \p \v 26 Idoꞌ gele muꞌmusiꞌ ogaꞌ nouneꞌ neꞌmo hize eleꞌ o-ledaaꞌ neineꞌ neꞌmino Oꞌmosoꞌmi Sikalahuꞌ neꞌmosi nene monokuꞌ gilizevo ogo minaaꞌ nouningutiꞌ nene hize eleꞌ o-ledaaꞌ neive. Idoꞌ hize eleꞌ o-ledaaꞌ neineꞌ nene laza Oꞌmosola loloneꞌ o neineꞌ monovo nene gele guno amuneꞌ nenako nemuꞌ nene asiꞌve nene lelitoꞌ medelo laza gamazi viseꞌ ogo leꞌ izo luteuꞌ gelaaꞌ nouneꞌ monovo nene hize eleꞌ o-ledo Oꞌmosola lo-ledaaꞌ neive. \v 27 Neꞌmine ogaꞌ neineꞌ nene Sikalahuꞌ neꞌmo gala gilineꞌ nene luteuꞌ minineꞌ initeꞌ viseꞌ ogo do sotoꞌ ogaꞌ ive Oꞌmoso neꞌmo nene mo ningo gelaaꞌ neive. Nene nanitekumuꞌ ve. Aꞌmine Sikalahuꞌ neꞌmo nene Oꞌmosoꞌmi luloloꞌ do molosa Oꞌmosoꞌmi eveneleloꞌ medelo lelikumuꞌ Oꞌmosola laaꞌ neineꞌ nemuꞌ ve. \p \v 28 Idoꞌ laza tiꞌ lo gele none: Lute Oꞌmoso eme nonive adoꞌ eiꞌ gala gilidoꞌ ogo eiꞌ ve lo leleꞌmize molavo nonivemuꞌ nene aza lelita sotoꞌ iliza initeꞌ mukiꞌ nene di laminekovoꞌ i-lidilizadoꞌ nene do molaaꞌ neive. \v 29 Idoꞌ neꞌmine ineꞌ nene aza ganakutiꞌ ninge lamineꞌ daniꞌ aleve nene eiꞌ gipeleꞌmi emeni dameni neꞌminesi liliꞌ igi minikevo aꞌmine gipele nene nakunolo vaiꞌ neti uvoꞌnibo naba minelive losa engiꞌ nene do kegeso ngeleꞌmize molaniꞌ ve. \v 30 Ee, aꞌmine do kegeso ngeleꞌmize molaniꞌ aleve nene elesesi molo-ngedo do eita ineꞌ ve. Idoꞌ aꞌmine elese molo-ngedo do eita ineꞌ aleve nene ve lisiheꞌ ve losasi nene lo-ngidineꞌ ve. Idoꞌ aꞌmine ve lisiheꞌ ve lo-ngidineꞌ aleve nene eitatiꞌ monovo lamineꞌ atoliꞌmine ogo minineꞌ nesi nene lehize-ngidineꞌ ve. \s1 Oꞌmosoꞌmo Lulo Atoliꞌmine Ogo Leme Neineꞌ Nene Kilisitoꞌ Do Sotoꞌ Ogavo Ningunidotiꞌ Nene Initeꞌ Hamoliꞌmosi Mudise nGelo Ma Do Goloso O-ledamoloseive Lo Gele Nouve Lo Pauloꞌ Lineꞌ Gamazi \p \v 31 Oꞌmosoꞌmo neꞌmino do luꞌ ize neineꞌ nenako nemuꞌ nene tiꞌ lo gelelesune: Oꞌmoso nene lelita molo hize eleꞌ noo-lidineꞌ nenako initeꞌ malitesi nene ngeli livileꞌ gehepeve amilisave. \v 32 Oꞌmosoꞌmo eiꞌ gipele gehepeve nene do aꞌmanapa amo leliꞌ mukikumuꞌ nene lehize-lidineꞌ ve. Idoꞌ neꞌmine ineꞌ nenako initeꞌ mukiꞌ nene lehize-ledamilivoba mo ezesi do lehize-ledeleseive. \v 33 Idoꞌ eiꞌ ve lo do kegese-lede neivemuꞌ nene Oꞌmosoꞌmo asiꞌve ve lisiheꞌ ve lo-lede neineꞌ nenako zaho goniꞌ o-ledelive. Mo ma nizamave. \v 34 Lelikumuꞌ hilive adoꞌ gohi hilingutiꞌ otive Izesuꞌ Kilisitoꞌ Oꞌmosolatiꞌ leme mino ana zamela mino lelitoꞌ medelo gamazite hize eleꞌ o-ledo neineꞌ nenako zaho lihime lemelidoꞌ o neive. Mo ma nizamave. \v 35 Idoꞌ Kilisitoꞌ lulo leme neivo noneꞌ neꞌmi luloutiꞌ nene initeꞌ maliꞌmosi nene geleleheꞌ ogo hulo heta ma o-ledamoloseive. Adoꞌ geni initeꞌ neꞌmo nehe, lihitehe initeliꞌmi lulouꞌ mineloneꞌ neꞌmo nehe, goboni malaꞌ malaliꞌmi lulouꞌ minelonidiꞌmo nehe, gaꞌna naba helelonidiꞌmo nehe, okodeloꞌ initekumuꞌ viseꞌ olonidiꞌmo nehe, ganala daatoꞌ mine molo minelonidiꞌmo nehe, idoꞌ evenelite libililisa navo luno miteꞌ veleloꞌ ningelonidiꞌmo nehe, nene ma geleleheꞌ ogo ma hulo heta o-ledamoloseive. \v 36 Idoꞌ mene noluvoniꞌ initeꞌ nevoꞌmine nene laminetoꞌ mo sotoꞌ i-lidaaꞌ naniꞌ nene monoꞌ godolouꞌ tiꞌ li gizadoꞌ nene vo dave: \q1 Guvekasi ve, geita giꞌmizo minuningumuꞌ nene \q1 gamene gamene evenelite nene libili hili hiliꞌ igaꞌ nave. \q1 Neꞌmine naniꞌ nene lelikumuꞌ eveneꞌ ingine gilavo \q1 laza nene sipisipi ize neꞌmine nene nizave li giliisa libilaaꞌ nave. \m \v 37 Ne neiha aꞌmine mene luvoniꞌ initeꞌ nete nene mo kekeꞌ livileꞌ amavo aꞌmine lulo leme neive Kilisitoꞌ neꞌmo hize eleꞌ o-ledaaꞌ neineꞌ neꞌmo nene ngivileꞌ gehepeve okune. \v 38-39 Naza ngivileꞌ gehepeve okune luvoniꞌ nene nanitekumuꞌ ve. Naza nene tiꞌ lo gele eleꞌvoleꞌ o nouve: Oꞌmosoꞌmo lulo leme neineꞌ Guvetesi ve Izesuꞌ Kilisitoꞌ do sotoꞌ o-lidineꞌ neꞌmi lulouꞌ noningutiꞌ nene initeꞌ maliꞌmosi ngelo hulo heta o-ledamoloseive. Adoꞌ heleloneꞌ neꞌmo nehe, minevoꞌ alevoꞌ neꞌmo nehe, angelolitesi nehe, guveꞌinesi ve ato atolite nehe, idise sotoꞌ o-lede neineꞌ initeꞌ nehe, alingeꞌ sotoꞌ o-ledelineꞌ initeꞌ nehe, amuzo malehe initeꞌ ato atolite nehe, veleta nizaniꞌ initelite nehe, galaꞌmuda nizaniꞌ initelite nehe, idoꞌ Oꞌmosoꞌmo do sotoꞌ molaniꞌ initeꞌ gohi ma nilizaniꞌ netesi nehe, nene mo ngelo nomive. \c 9 \s1 Pauloꞌ Aza Eze Zuho Zuda Ve Ingine Nene Malite Gili Eleꞌvoleꞌ Ikevo Mukilite Gili Eleꞌvoleꞌ Amavo Angumuꞌ Nene Pauloꞌ Lineꞌ Gamazi \p \v 1 Kilisitoꞌ evenele nouvoniꞌ nenako nemuꞌ nene loloniꞌ gamazi mene soza lamo laminetoꞌ lolosuve. Ee, Oꞌmosoꞌmi Sikalahuꞌ neꞌmo nene neniꞌ luꞌne gaꞌneuꞌ hize eleꞌ ogo neivo aꞌmine mene loloniꞌ gamazi nene mo gamazi laminekovoꞌ neive lo gele nouve. \v 2 Naza neniꞌ zuho Isilaeleꞌ alevemuꞌ mulumo naba gelo muheleꞌine geleꞌmo geleꞌmo vo nouve. \v 3 Nemuꞌ nene naza giluvo me misubouꞌ makaꞌ noneꞌ aleve neze zuho Isilaeleꞌ aleve hize eleꞌ o-ngedaaꞌ aka nene ma minidiniko engiꞌ mukikumuꞌ nene Oꞌmosoꞌmo do nguꞌ izelive lo Kilisitoda giꞌmizo nouvongutiꞌ nene izo huko Oꞌmosoꞌmo usiꞌ ize-nedavo vo tolovo uvodine. \v 4 Aꞌmine aleve nene Isilaeleꞌ aleve nene nizave. Engiꞌ aꞌmine zuho gehepeve nene Oꞌmosoꞌmo neniꞌ izipahaꞌne zuho ve lo do tiꞌ ive nene nizave. Idoꞌ Oꞌmosoꞌmi amuzo labanaꞌve ningave nesi nene nizave. Idoꞌ Oꞌmosoꞌmo igi mili ilizangumuꞌ lo huko-ngidive nesi nene nizave. Idoꞌ eze louꞌ gamaziꞌve ngimive nesi nene nizave. Idoꞌ Oꞌmoso opoꞌni lilizaniꞌ aka gihile ngelebizo idoꞌ initeꞌ do lisiheꞌ o-ngedelesa salani gamazi lo-ngidive nesi nene nizave. \v 5 Aꞌmine Zuda ve nene gomuꞌ guveꞌine gelaaꞌ unive mukiꞌ Abalahamule Mosele engikutiꞌ nene sotoꞌ aniꞌ ve. Idoꞌ Kilisitoꞌ nene Oꞌmosolatiꞌ sotoꞌ ineꞌza helala evenetatiꞌ sotoꞌ ineꞌ nene mo aꞌmine zuhoti vaniseutiꞌ sotoꞌ ineꞌ ve. Idoꞌ Kilisitoꞌ aza initeꞌ mataꞌ mukitoꞌ Guvelesi ve minive mino mo Oꞌmoso ne neive. Eze opoꞌni loꞌmo vo minesoꞌ nene mo huko vamivo opoꞌni lo mine do volonive ne neize. Mo neꞌmino miniliho. \p \v 6 Idoꞌ naza Isilaeleꞌ aleveutiꞌ mukiꞌ nene Kilisitoꞌnimuꞌ gili eleꞌvoleꞌ amave noluvoniꞌ nene Oꞌmosoꞌmo aꞌmine Isilaeleꞌ alevemuꞌ lineꞌ gamazi nene vo haza ogave noluvoba asi Isilaeleꞌ aleveti vaniseutiꞌ sotoꞌ igaꞌ ave mukiꞌ nene Isilaeleꞌ aleve gehepeve nene ma minisaꞌmangumuꞌ nene luve. \v 7 Idoꞌ ma nene Abalahamuꞌ aꞌvopilemoꞌ zuho mukiꞌ nene izipahala zuho gihile mukiꞌ nizavoba asi Oꞌmosoꞌmo Abalahamuꞌni tiꞌ lo lo-imidoꞌ nene neive: Isakaꞌ aꞌvopilemokovoꞌ nene geiꞌ izipaha zuho gihile ve lo-ngedelone. \v 8 Neꞌmine lo-ngedeloneꞌ nene adoꞌ eveneꞌ mukiꞌ sotoꞌ igaꞌ adiꞌmine igi haza sotoꞌ igaꞌ ave nene Oꞌmosoꞌmi izipahala ve lo-ngedelonivoba asi Oꞌmosoꞌmo lo huko lineꞌ gamaziloꞌ eꞌmeti sotoꞌ ave engikovoꞌ nene Oꞌmosoꞌmi izipahala ve lo-ngedelesune. \v 9 Idoꞌ aꞌmine Oꞌmosoꞌmo lo huko lineꞌ gamazi nene tiꞌ lo neive: Idise mene minosa gamene mauꞌ nene tineꞌ molo gohi okuvo Salaꞌ aza nene gipele gedeleseive. \v 10 Idoꞌ Abalahamuꞌ aꞌvopilemokutikovoꞌ nene Oꞌmosoꞌmi zuho do kegese-ngidineꞌ nevoba Isakaꞌ aꞌvopilemoꞌ zuhoutikisi nene ma do kegese-ngidineꞌ ve. Aꞌmine avoteho Isakaꞌ aza Lepekaꞌni nene lobeꞌ izipe gede imineꞌ ve. Idoꞌ aꞌmine izipeti meꞌnibo nene hamoꞌ minineꞌza \v 11-12 ingine sotoꞌ igi monovo lamineꞌ nehe monovo goloso nehe nesi nene olihe amasivoo Oꞌmoso neꞌmo nene Lepekaꞌni tiꞌ lo lo-imineꞌ ve: \q1 Ganaꞌ ve neve nene alingeni izipeꞌmi gelekeleꞌ ve minelive. \m Idoꞌ Oꞌmosoꞌmo neꞌmine lineꞌ nene eze evenele do kegese-ngedelesa eveneꞌ igi mili ilizaniꞌ monovoloꞌ gele mino do kegese-ngedamo asi eiꞌ ngeleꞌmize molaaꞌ neiveꞌmi luloloꞌ do molo do kegese-ngedaaꞌ neineꞌ monovoꞌve nene sotoꞌ ogo minelive losa nene neꞌmine lineꞌ ve. \v 13 Idoꞌ neve nene monoꞌ godolouꞌ Oꞌmosoꞌmo tiꞌ lo lineꞌ gamaziloꞌ nene vo daave: \q1 Naza luꞌneꞌve nene Zakoboꞌni eme nouvoniꞌza \q1 Esauꞌnimuꞌ nene goseleꞌ okuve. \p \v 14 Idoꞌ Oꞌmosoꞌmo nene neꞌmine ogaꞌ neineꞌ nenako nemuꞌ nene nadive lolone. Oꞌmosoꞌmo ogaꞌ neineꞌ nene mo lisiheꞌ amive lolobe. Oꞌove. Mo kekeꞌ neꞌmine ma lamolosune. \v 15 Asiꞌve Oꞌmoso neꞌmo Moseꞌni nene tiꞌ lo lo-imineꞌ ma ve: \q1 Naza iseꞌine ize-ngedelove lo gelelove nene \q1 ha iseꞌine ize-ngedelesuve. \q1 Ee, muheleꞌine ningo hize eleꞌ o-ngedelove lo gelelove nene \q1 ha muheleꞌine ningo hize eleꞌ o-ngedelesuve. \m \v 16 Nemuꞌ nene Oꞌmosoꞌmo eveneꞌ mamuꞌ neniꞌ ve lo do kegese-ngedelineꞌ nene angiseꞌine giladotiꞌ nehe idoꞌ ingine igi mili minaaꞌ naadotiꞌ nehe nene ma do molo do kegese-ngedesaꞌmive. Asi Oꞌmosoꞌmo eveneꞌ muhelete ningosa isete izaaꞌ neineꞌ monovoꞌve neꞌmovoꞌ nene eiꞌ ve lo do kegese-ngedeleseive. \v 17 Idoꞌ mene noluvoniꞌ nene Oꞌmosoꞌmo Halaoꞌni lo-imineꞌ gamazi monoꞌ godolouꞌ tiꞌ li gizikaniꞌ gamazi maloꞌ nene vo dave: \q1 Geiꞌ eveneꞌ naba do ote-giduvoniꞌ nene \q1 adoꞌ neꞌminemuꞌ do ote-giduvoniꞌ ve: Geita nene amuzo initeꞌ ma ogo doꞌmo leme gehepeve o-gedekuvo neꞌmo nene neniꞌ amuzoꞌne do sotoꞌ ogavo misubouꞌ misubouꞌ nene neniꞌ guveꞌne gililizangumuꞌ ve losa do ote-giduvoniꞌ ve. \m \v 18 Neꞌmino neineꞌ nemuꞌ nene Oꞌmosoꞌmo iseꞌine ize-ngedelove lo gelelive nene iseꞌine ize-ngedosa aza gamaziꞌve gili hulilizangumuꞌ luꞌine do aꞌmanapa o-ngedelove lo gelelive nene ha luꞌine do aꞌmanapa o-ngedeleseive. \s1 Oꞌmosoꞌmo Eiꞌ Luloloꞌ Eveneꞌ Do Sotoꞌ Molaniꞌ Nenako Eiꞌ Luloloꞌ Do Molo Linge Ma Iseꞌine Izo Linge Ma Izeboloꞌ Molave Nene Lihime nGemelineꞌ Nene Mo Lisiheꞌ O Neive Lo Pauloꞌ Lineꞌ Gamazi \p \v 19 Neꞌmino neineꞌ nenako lingine tiꞌ li li-nimilisave: Oꞌmosoꞌmo neꞌmine ogaꞌ neineꞌ nenako eveneꞌ laza nene eiꞌ lulouꞌ gelaaꞌ neineꞌ initetoꞌ nene do peleseveꞌ izaatoꞌ lisiheꞌ amo aꞌmine gelaaꞌ neidokovoꞌ nene eꞌmeto vaaꞌ nouneꞌ nenako nemuꞌ nene nanitekumuꞌ goloso gelo lihime molo-ledaaꞌ neive. \v 20 Vekizo, lingine nene neꞌmine li li-nimilisaniꞌza lingine nene haza vetesi Oꞌmoso neve nene eꞌmenga li-imilizadoꞌ lisiheꞌ i nizahe. Idoꞌ initeꞌ ma loloꞌ ilineꞌ nene aꞌmine initeliꞌmo loloꞌ o-delivemuꞌ nene ha tiꞌ lo lo-delihe: Gaza nene neꞌmino loloꞌ o-nedamilinako nanimuꞌ neꞌmino loloꞌ o-nedane lo ha lilihe. \v 21 Idoꞌ misubo somo loloꞌ ogaꞌ ive misubo do vaꞌvaꞌ ogo molokidotiꞌ nene linge ma do somo lamineꞌ gidi naniꞌ nene ma loloꞌ ogosa aꞌmine hamoꞌ misubo mautiꞌ linge ma do haza somo meniꞌve lemo minineꞌ nesi nene loloꞌ ilineꞌ nene lisiheꞌ amilihe. Oꞌove. Eiꞌ luloloꞌ nene initeꞌ laminekisi golososi nene ha lisiheꞌ o neivo loloꞌ oloseive. \v 22 Idoꞌ Oꞌmosoꞌmo aꞌmineꞌmine ogaꞌ neive. Aza nene neniꞌ nizeboloꞌ molaniꞌ nene ngelebizekuvo eveneꞌ nete neniꞌ amuzoꞌne nene ningi gililizave lo gele mino aꞌmine somo goloso neꞌmine mini eiꞌ izeboloꞌ molaaꞌ neineꞌ aleve vi tolovo ilizadoꞌ do sotoꞌ ineꞌ aleve nene gozopotiꞌ ha ninge mate ngimikoo hongu lo minineꞌ ve. \v 23 Neꞌmino minineꞌ nene eveneꞌ somo lamineꞌ neꞌmine minikevo iseꞌine ize-ngedelive adoꞌ gomukutiꞌ eiꞌ emeni dameni lamineꞌ atoliꞌmine ogo minineꞌ nene dalizadoꞌ do vaꞌvaꞌ o-ngidive nete nene aꞌmine Oꞌmosoꞌmi emeni dameni lamineꞌ tamineꞌ vaiꞌ gikiꞌ ogo neineꞌ nene ningilizave losa neꞌmino minineꞌ ve. \v 24 Eiꞌ ve lo elese molo leleꞌmize molave lelikumuꞌ nene noluve. Aꞌmine elese molo-lidive nene Zuda ve lelikutikovoꞌ nomive. Asi heta atoꞌ veutikisi nene ma neꞌmine o-ngidineꞌ ve. \v 25 Neꞌmine ineꞌ nene eiꞌ lineꞌ gamazi polohete Hoseaꞌ tiꞌ lo gize neidoꞌ nene vo dave: \q1 Eveneꞌ neniꞌ zuho minamaniꞌ alevemuꞌ nene \q1 neniꞌ zuho ve l o ha lo-ngedelesuve. \q1 Ee, naza luꞌne ngemesaꞌmuvoniꞌ alevemuꞌ nene \q1 luꞌne ngeme nouvoniꞌ aleve ve lo-ngedelesuve. \q1 \v 26 Idoꞌ lengiꞌ nene neniꞌ eveneꞌne zuho nizamave lo lo-ngimuvoda nene \q1 minevoꞌ dovoꞌ ogaꞌ ineꞌ Oꞌmoso neniꞌ izipahaꞌne zuho ve lo-ngedelesuve. \m \v 27 Idoꞌ polohete Isaiaꞌ aza Isilaeleꞌ alevemuꞌ nene tiꞌ lo lo sotoꞌ ineꞌ ve: \q1 Isilaeleꞌ aleve nene noso gahevela gepe minaaꞌ neineꞌ neꞌminisa vaiꞌ goloso minilizaha aꞌmingutiꞌ nene ngomosikovoꞌ ma lukuvo nalisave. \v 28 Neꞌmino eveneꞌ ngomosiꞌ do nguꞌ izavo lukuvo nalizaniꞌ nene Guvelesi veꞌmo liteꞌ lo eiꞌ misuboꞌveuꞌ aleveliti goniꞌine gele osuꞌ lo lihime ngemo osuꞌ lilidiꞌmo nene ngomosikovoꞌ ma lukuvo nalisave. \m \v 29 Ee, Isaiaꞌ gamazi ma gomukutiꞌ tiꞌ lo lo sotoꞌ idoꞌ nene vo dave: \q1 Amuzoꞌvesi mino \q1 initeꞌ mulise ato atoꞌ mukitoꞌ gizebo ogaꞌ neineꞌ Guvelesi veꞌmo nene \q1 Isilaeleꞌ aleve leliꞌ nene ha mini di dizivoꞌ minilizave lo \q1 eveneꞌ ngomosiꞌ nene ma hulo-ledamidiniko \q1 laza nene Sodomi alevesi idoꞌ Gomola alevesi osuꞌ gehepeve laniꞌ neꞌmine ogo \q1 mo osuꞌ gehepeve lunidine. \s1 Heta Atoꞌ Ve Oꞌmosoꞌmo Ve Lisiheꞌ Ve Lo-ngedelineꞌ Aka Nene Mo Ninganiꞌza Isilaeleꞌ Alevemuꞌ Oꞌmosoꞌmo Ve Lisiheꞌ Ve Lo-ngedelineꞌ Akamuꞌ Nene Goseleꞌ nGebelavo Olovoꞌ Aniꞌ Ve Lo Pauloꞌ Gizineꞌ Gamazi \p \v 30 Neꞌmine ogo neineꞌ nenako nelotiꞌ nene laza tiꞌ lo gelelesune: Ve lisiheꞌ liliꞌ ilizaniꞌ akamuꞌ viseꞌ amave heta atoꞌ ve ma nete aꞌmine aka nene ningi ikeve. Aꞌmine aka nene ezemuꞌ gele eleꞌvoleꞌ okunivo Oꞌmosoꞌmo ve lisiheꞌ ve lo-ledaaꞌ neineꞌ akamuꞌ nene noluve. \v 31 Aꞌmine heta atoꞌ ve nene neꞌmine ikeha Oꞌmosoꞌmi evenele zuho Isilaeleꞌ aleve nete nene louꞌ gamaziloꞌ eꞌmetelonidotiꞌ nene ve lisiheꞌ loloꞌ olobe li neꞌmine ilizaniꞌ aka nene viseꞌ aniꞌza mo kekeꞌ ma di gihile izamaniꞌ ve. \v 32 Nanitekumuꞌ di gihile izamave. Di gihile izamaniꞌ nene Oꞌmosomuꞌ gele eleꞌvoleꞌ ogosavoꞌ nene do gihile izesoꞌ o neive lamisa asi leliꞌ gono dalonidotikovoꞌ nene do gihile izelesune li di gihile izilisa aniꞌ neꞌmo nene mo di gihile izamaniꞌ ve. Ingine monoꞌ godolouꞌ eveneꞌ zodohoꞌ izi limi ingalizaniꞌ gehenimuꞌ gizi nizadoꞌ nene zodohoꞌ izi limi inganiꞌ ve. \v 33 Aꞌminemuꞌ Oꞌmosoꞌmo lineꞌ gamazi nene tiꞌ li gizi nizave: \q1 Lingine gililo. \q1 Naza Zuda veti gotoꞌ numudida Zaioni golola nene \q1 eveneꞌ zodohoꞌ izi limi pouꞌ li ingalizaniꞌ geheni gehepeve nene \q1 ma nomuluve. \q1 Idoꞌ ve ma ingine aꞌmine geheni miniveloꞌ ma gili eleꞌvoleꞌ ilizave nene \q1 aꞌmine gili eleꞌvoleꞌ ilizadotiꞌ nene gihileꞌve dami ngovozo hililizavoba \q1 asi mo hilamilisave. \c 10 \p \v 1 Neze zuhokizo, naza Zuda vemuꞌ nene luꞌneuꞌ amuzo molo gelaaꞌ nouvoniꞌ nene adoꞌ tiꞌ lo gelo Oꞌmosola aꞌminemuꞌ laaꞌ nouve: Oꞌmosoꞌmo do nguꞌ izeliho lo aꞌminemukovoꞌ laaꞌ nouve. \v 2 Nene nanitekumuꞌ ve. Engiꞌ monovo nene mo ninge lamineꞌ o nouve. Ingine nene gilingili igi Oꞌmosomuꞌ gilaaꞌ naniꞌza eze eꞌmetilizaniꞌ aka nene ninge nobe li ningi gili guni amave. \v 3 Idoꞌ neꞌmine noluvoniꞌ nene nemuꞌ noluve: Ingine Oꞌmosoꞌmo evenekumuꞌ eveneꞌ lisiheꞌ ve lo-ngedaaꞌ neineꞌ monovomuꞌ nene gili imami mini angiseꞌine di sotoꞌ aniꞌ monovoloꞌ di mili eveneꞌ lisiheꞌ ilisa igi mili minaaꞌ naniꞌza Oꞌmosoꞌmo eveneꞌ lisiheꞌ ve lo-ngedelineꞌ monovoloꞌ nene gelekeleꞌ amave. \v 4 Neꞌmine igaꞌ naniꞌza ezemuꞌ gili eleꞌvoleꞌ igi minave nene ve lisiheꞌ ve lo-ngedosa Kilisitoꞌ aza louꞌ gamaziloꞌ eꞌmetaatotiꞌ eveneꞌ lisiheꞌ loloꞌ ogaꞌ aka nene mo mudise hize tilineꞌ nenako nemuꞌ ingine nene mo ladani nave. \s1 Guvelesi Vela Vise Liliza Aleve Mukiꞌ Nene Do nGuꞌ Izeleseive Lo Pauloꞌ Lineꞌ Gamazi \p \v 5 Naza mo laminetoꞌ noluve. Ingine ngelo amosoꞌ initeꞌ ilisa naniꞌ neineꞌ nene Moseꞌ aza louꞌ eꞌmetaatotiꞌ eveneꞌ lisiheꞌ loloꞌ ogakumuꞌ tiꞌ lo gizidotiꞌ nene ha gelelesune: \q1 Ve ma ingine aꞌmine louꞌ gamazi vaitoꞌ eꞌmeti lamineꞌ ma ilizaniꞌ nene aꞌmine neꞌmine ilizadotiꞌ nene mine lamineꞌ igi ha miniviꞌ miniviꞌ igi minilisave. \m \v 6-7 Ne neiha Oꞌmosomuꞌ gele eleꞌvoleꞌ ogatotikovoꞌ nene eveneꞌ lisiheꞌ loloꞌ ogaꞌ neve nene lapa nomivo ha loloꞌ olonidoꞌ neineꞌ nene gamazi ma tiꞌ lo neidotiꞌ nene gelelesune: \q1 Lingine aꞌmine nene mo amosoꞌ niteꞌ neive lisa lutinguꞌ tiꞌ li gilamilo: Okulumokuko zaho dizelive. Mo ma dizamilisave. Idoꞌ home galese golosouꞌ zaho lemelive. Mo ma limamilisave. \m Neꞌmine lilizaniꞌ nene Kilisitoꞌni Okulumokukotiꞌ eleꞌmizi limilizangumukisi idoꞌ hilingutiꞌ di oti-di eleꞌmizi dizilizangumukisi lilizaniꞌ nenako idoꞌ Kilisitoꞌ aza mo Okulumokutiꞌ lemosa hilingutiꞌ nene mo otosa neineꞌ nenako nemuꞌ nene amosoꞌ initeꞌ ma nomineꞌ nenako neꞌmine li gililizadoꞌ ma nomive lo neineꞌ ma neive. \v 8 Ne neiha aꞌminemuꞌ nene gamazi ma tiꞌ lo neive: \q1 Aꞌmine monoꞌ gamazi nene hota neꞌmine ma minamive. \q1 Asi avitoꞌ mino \q1 lingine ha vetinedunuꞌ lilizadoꞌ mino lutinguꞌ gililizadoꞌ neive. \m Aꞌmine monoꞌ gamazi nene Oꞌmosomuꞌ gele eleꞌvoleꞌ ogaliꞌmi gamazi leliꞌ lo sotoꞌ o ngemaaꞌ nouneꞌ gamazi nene neive. \v 9 Adoꞌ lingine vetinedunuꞌ nene Izesuꞌ aza Guvetesi ve naba ve li li sotoꞌ igi idoꞌ lutinguꞌ nene Oꞌmosoꞌmo hilingutiꞌ do ote-dineꞌ ve li gili eleꞌvoleꞌ ilizaniꞌ nene Oꞌmosoꞌmo do lunguꞌ izeleseive. \v 10 Ee, lutedunuꞌ aꞌmine gamazi gele eleꞌvoleꞌ osoꞌ nene Oꞌmosoꞌmo eveneꞌ lisiheꞌ ve lo-ledelive. Idoꞌ vetedunuꞌ aꞌminemuꞌ lo soto sotoꞌ osoꞌ nene Oꞌmosoꞌmo do luꞌ izeleseive. \v 11 Idoꞌ mene noluvoniꞌ nene monoꞌ godolouꞌ tiꞌ li gizi nizadoꞌ nene vo miliseꞌ ogave: \q1 Aꞌmine vemuꞌ gili eleꞌvoleꞌ ilizave mukiꞌ nene \q1 aꞌmine gili eleꞌvoleꞌ ilizadotiꞌ nene gihileꞌve dami ngovozo hililizavoba \q1 asi hilamilisave. \m \v 12 Idoꞌ ingine mukiꞌ ngovozo hilamilisave noluvoniꞌ nene Zuda vesi heta atoꞌ vesi nene ato atoliꞌmine minamavo engiꞌ sitatoꞌ gizebo ogaꞌ ive nene Guvelesi ve eiꞌ hamokovoꞌ mino hize eleꞌ o-ledelive li ezela laaꞌ nave ato atoꞌ mukiꞌ nene atoliꞌmine ogo nasahiliꞌ o-ngedaaꞌ neineꞌ nenako nemuꞌ nene noluve. \v 13 Ee, eveneꞌ mukiꞌ ingine Guvelesi veꞌmi gulive igi ezela lilizave ato atoꞌ mukiꞌ nene do nguꞌ izeleseive li monoꞌ godolouꞌ gizi nizaniꞌ ve. \p \v 14 Neꞌmino neineꞌza ingine Kilisitoꞌnimuꞌ gili eleꞌvoleꞌ amaniꞌ nenako nadiisa eiꞌ gulive igi ezela lilizave. Mo neꞌmine ma amilisave. Idoꞌ ezemuꞌ li-ngimavo ma gilamaniꞌ nenako haza nene nadiisa gili eleꞌvoleꞌ ilizave. Mo ngeli neꞌmine ma amilisave. \v 15 Idoꞌ Oꞌmosoꞌmo eze gamazi li sotoꞌ igi li-ngimilizave ma ngimiselamilineꞌ nene nadiisa vi li sotoꞌ igi li-ngimilizave. Mo neꞌmine ma amilisave. Gamazi lamineꞌ li-ngimilizave ngimiselingumuꞌ nene monoꞌ godolouꞌ tiꞌ li gizi nizave: \q1 Gamazi lamineꞌ li sotoꞌ igi li-limilizave aniꞌ nene mo ede vineꞌ initeꞌ ikeve lo lolize izekune. \m Gamazi lamineꞌ li sotoꞌ ilizave nene mo neꞌmino ngimiselavo igi li soto sotoꞌ aniꞌza \v 16 Isilaeleꞌ aleve mukiꞌ gidini nete aꞌmine gamazi laminetoꞌ nene gili damaniꞌ ve. Neꞌmine aniꞌ nene monoꞌ godolouꞌ polohete Isaiaꞌ gamazi ma tiꞌ lo lidoꞌ nene vo daniꞌ ve: \q1 Guvekasi ve, laza lo-ngimuneꞌ gamaziloꞌ nene \q1 mo ma gili eleꞌvoleꞌ amave. \m \v 17 Nemuꞌ nene laza tiꞌ lo gele none: Kilisitoꞌnimuꞌ gele eleꞌvoleꞌ oloneꞌ nene gamazi lamineꞌ gelosavoꞌ nene gele eleꞌvoleꞌ olosune. Idoꞌ gamazi lamineꞌ geleloneꞌ nene Kilisitoꞌ gamaziꞌve nelotikovoꞌ nene gamazi lamineꞌ gelelesune. \v 18 Neꞌmino neineꞌza naza tiꞌ lo noluve: Ingine nene aꞌmine gamazi mene gilamavoba asi mo gili nizave. Monoꞌ godolouꞌ tiꞌ li gizi nizaniꞌ maloꞌ vo dave: \q1 Veꞌningutiꞌ gamazi neꞌmo nene mo misubouꞌ misubouꞌ vo osuꞌ lave. \q1 Ee, gamaziꞌine nene eveneꞌ minaniꞌ misubo neꞌmo vo sididasi nene \q1 buu lo vineꞌ ma neive. \m \v 19 Idoꞌ naza gohi tiꞌ lo noluve: Isilaeleꞌ aleve ingine gili vevesamilizadoꞌ minavoba asi gili vevesilizadoꞌ minaniꞌ ve. Aꞌmine nemuꞌ nene ganaꞌ Moseꞌ Oꞌmosoꞌmo lineꞌ gamazi tiꞌ lo gizineꞌ ve: \q1 Eveneꞌ ma neniꞌ zuho nizave li gilamave haza ve engikutiꞌ nene \q1 ma do nenita okuvo \q1 lingine Isilaeleꞌ aleve aꞌminemuꞌ nene lavodine nalisave. \q1 Ee, gaꞌine gili vevesamave nene ma do nenita okuvo \q1 nemuꞌ nene mo lingizeboloꞌ molaloseive. \m \v 20 Idoꞌ Isaiaꞌ aza Oꞌmosoꞌmo lineꞌ gamazi gohi ma lovoꞌ kiselevoꞌ ogo tiꞌ lo gizineꞌ ve: \q1 Nenikumuꞌ viseꞌ isaꞌmave nete nene nenikumuꞌ mo ningi gilikeve. \q1 Ee, neniꞌ monovoꞌnemuꞌ gililisa longoꞌ isaꞌmavela nene \q1 neniꞌ monovoꞌne do sotoꞌ ogo ngelebizekuvo \q1 mo ningikeve. \m \v 21 Ne neiha Isilaeleꞌ alevemuꞌ aza tiꞌ lo lineꞌ ve: \q1 Naza nene haza minamo \q1 gamene gamene aꞌne do patelo nenita alo alo lo-ngedeꞌmo vovoꞌ minaaꞌ nouvoniꞌza \q1 ingine nene gamaziꞌne gili huli eꞌmenga laaꞌ ave mini \q1 mo gilisaꞌmave. \c 11 \s1 Isilaeleꞌ Aleve Engikutiꞌ Mukiꞌ Gidini Nene Kilisitoꞌnimuꞌ Gili Eleꞌvoleꞌ Amaniꞌza Oꞌmosoꞌmo Aꞌmine Isilaeleꞌ Aleve Mukiꞌ Mudise Vasa Ize-ngedamo Engikutiꞌ Linge nGomo Nene Do Kegese-ngidineꞌ Ve Lo Pauloꞌ Lineꞌ Gamazi \p \v 1 Isilaeleꞌ aleve ingine neꞌmine igi minaniꞌ nenako naza tiꞌ lo gelo longoꞌ nouve: Oꞌmosoꞌmo aꞌmine evenele zuho mo mudise vasa ize-ngede neineꞌ nolihe. Oꞌove. Mo kekeꞌ neꞌmine amilihe losa gele nouve. Naza mudise vasa ize-ngedamive noluvoniꞌ nene nenikisi aꞌmine Isilaeleꞌ aleveutiꞌ nouvoniꞌ nenako nemuꞌ noluve. Ee, naza Abalahamuꞌ aꞌvo mino Zakoboꞌ gipele Benizaminiꞌ aꞌvopilemoꞌ zuhoutiꞌ gehepeve ne nouve. \v 2 Oꞌmosoꞌmo gomukutiꞌ ninge lamineꞌ do eze zuho loloꞌ o-ngede neineꞌ aleveꞌve nene mo kekeꞌ mudise vasa ize-ngedamive. Oꞌove. Idoꞌ nemuꞌ nene lingine Eliaꞌ gamaziꞌve monoꞌ godolouꞌ neineꞌ ma nene gilamaniꞌ nehe. Isilaeleꞌ alevemuꞌ nene tiꞌ lo Oꞌmosola lipoti molaniꞌ ve: \v 3 Guvekasi ve, geiꞌ vekautiꞌ gamazi laaꞌ ave polohete vaiꞌ nene ngibili geseꞌ igi gopoꞌni lo initeꞌ molo-gedaaꞌ uneꞌ holomo mukiꞌ nesi neve nene izi nguꞌvosi hulikevo geita mili geꞌmetaaꞌ ave nene gohi masi nizamavo nenikovoꞌ nene lumo nouvo nenikisi nibililisamuꞌ nene viseꞌ iꞌmi nimonave. \v 4 Neꞌmine lineꞌza aꞌmidoꞌ Oꞌmosoꞌmo lo-imineꞌ gamazi mene gililo: \q1 Oꞌove. Gaza nene geikovoꞌ gehepeve nene lumo minamane. Vemohoꞌ seveni tauseni (7,000) neꞌmine nene soza oꞌmoso initeꞌ Baaliꞌni nene gubiꞌ izi imi opoꞌni lisaꞌmave neniꞌ eveneꞌne gehepeve nene nenikumuꞌ ve lo lumo ha hulo-ngede nouve. \m \v 5 Neꞌmine lineꞌ nenako aꞌmineꞌmine ogo idisesi nene eveneꞌ ngomosiꞌ nene haza gidini inele ogosa eiꞌ ve lo do kegese-ngedavo nizave. \v 6 Eiꞌ ve lo do kegese-ngidineꞌ nene inele ogaꞌ neꞌmine ogo haza gidini do kegese-ngidineꞌ nenako neꞌmine o-ngidineꞌ nene gono ma dikevosa neꞌmine o-ngidineꞌ nene nomive. Asi gono ma dikevosa neꞌmine o-ngidineꞌ neidiniko inele haza gidini ogo do eita o-ngidineꞌ ma nene inele neꞌmine ineꞌ gelamidine. \v 7 Nemuꞌ nene laza nadive lolone. Tiꞌ lo lolosune: Isilaeleꞌ aleve Oꞌmosolatiꞌ viseꞌ aniꞌ initeꞌ nene adoꞌ ve lisiheꞌ ve lo-ngedelineꞌ mukilite ma damavo Oꞌmosoꞌmo do kegese-ngidive netevoꞌ nene dikevosa linge ma nene aꞌmanapa igisa damaniꞌ ve. \v 8 Neꞌmino sotoꞌ ineꞌ initeꞌ nene monoꞌ godolouꞌ tiꞌ li gizadoꞌ nene sotoꞌ neive: \q1 Oꞌmosoꞌmo luꞌine nene do negi hize-ngedavo \q1 veꞌinedunuꞌ nene initeꞌ ma ningami \q1 gaꞌinedunuꞌ nene gamazi ma gilami mini \q1 idisesi neꞌminivoꞌ igi nizave. \m \v 9 Idoꞌ Davidiꞌ nene tiꞌ lo lineꞌ ve: \q1 Idoꞌ laniteꞌ gilaniꞌ initeꞌ neꞌmo nene \q1 gelevuso neꞌmine gehepeve loloꞌ ogo ngebelavosa \q1 lihime dalizaho. \q1 \v 10 Ee, veꞌine nene do gopo o-ngedavo initekisi ma ningamilizaho. \q1 Idoꞌ geni initeliꞌmo gamene gamene meheꞌine nene \q1 do hilingize-ngede miniliho. \s1 Isilaeleꞌ Aleve Ingine Aka Laminetotiꞌ Zovoꞌ Izi Vaniꞌ Neꞌmo Nene Oꞌmosoꞌmo Heta Atoꞌ Ve Do nGuꞌ Izelineꞌ Aka Nene Velave Lo Pauloꞌ Lineꞌ Gamazi \p \v 11 Nemuꞌ nene naza tiꞌ lo gohi longoꞌ nouve: Isilaeleꞌ aleve ingine ladani igisa mo mudise limi pouꞌ li inganiꞌ nehe. Oꞌove. Mo kekeꞌ neꞌmine amaniꞌza asi ingine aka laminetotiꞌ nene zovoꞌ izi vaniꞌ neꞌmo nene Oꞌmosoꞌmo heta atoꞌ ve do nguꞌ izelineꞌ aka nene velave. Idoꞌ neꞌmine aka vele-ngidineꞌ nene aꞌmine Zuda ve ningi lezesi neꞌmine o-ledeliho lilizave losa vele-ngidineꞌ ve. \v 12 Idoꞌ ingine aka laminetotiꞌ nene zovoꞌ izi vi gopo aniꞌ neꞌmo nene Oꞌmosoꞌmo heta atoꞌ ve vaiꞌ nene do lamineꞌ o-ngedelidoꞌ ngeleꞌmize molo initeꞌ lamineꞌ gehepeve do sotoꞌ ineꞌ nenako Zuda ve ingine nene alingeꞌ mudise aka laminetoꞌ tineꞌ mili alizaniꞌ neꞌmo nene mo ivileꞌ ivosa initeꞌ lamineꞌ goloso do sotoꞌ oloseive. \p \v 13 Idoꞌ heta atoꞌ ve lengikumuꞌ nene tiꞌ lo noluve: Naza nene heta atoꞌ ve lengiꞌ aposolo nouvoniꞌ nenako nemuꞌ nene naza heta atoꞌ ve lengita gono daaꞌ nouvongumuꞌ nene do naba ogaꞌ nouve. \v 14 Idoꞌ lengita neꞌmino aposolo gono daaꞌ nouvongumuꞌ do naba nouvoniꞌ nene neze zuho Isilaeleꞌ aleve nene ningi ingine heta atoꞌ ve neꞌmine gono do-ngidineꞌ nene leliꞌ do-ledelinako li minikevo engikutiꞌ linge ma nene Oꞌmosoꞌmo do nguꞌ izelineꞌ akaloꞌ ngeleꞌmize molaloho lo aꞌmine gonoꞌnemuꞌ nene do naba ogaꞌ nouve. \v 15 Idoꞌ engiꞌ nene Oꞌmosoꞌmo do nguꞌ izelineꞌ akaloꞌ ngeleꞌmize molaloho lo noluvoniꞌ nene tiꞌ lo gelosa noluve: Oꞌmosoꞌmo vasa ize-ngidineꞌ neꞌmo nene misubouꞌ aleve linge lovo i imi minangutiꞌ nene gohi eiꞌ Oꞌmososi do hamoꞌ o-ngidineꞌ nenako nemuꞌ nene aꞌmine Isilaeleꞌ aleve nene gohi do gatulo o-ngedelineꞌ neꞌmo nene atoliꞌmine ogo initeꞌ lamineꞌ goloso do sotoꞌ o-ledavo mo helaaꞌ neꞌmine ogo noningutiꞌ nene gohi oto minevoꞌ dovoꞌ ogo noneꞌ geleleseive. \v 16 Idoꞌ Isilaeleꞌ alevemuꞌ nene aneza gamazi tiꞌ lo lo-lengemelesuve: Beleti loloꞌ ogosa gomuꞌ nene aꞌmidotiꞌ linge ngomo ma do Oꞌmoso emekunivo Oꞌmosoꞌmi initeꞌ loloꞌ ilineꞌ nene aꞌmine beleti linge naba nesi nene Oꞌmosoꞌmi initeꞌ loloꞌ oloseive. Idoꞌ zaliꞌmi luhive neꞌmo Oꞌmosoꞌmi initeꞌ ma minelineꞌ nene aꞌmine zaliꞌmi aꞌnava nesi nene Oꞌmosoꞌmi initeꞌ mineleseive. \p \v 17 Idoꞌ Isilaeleꞌ aleve ingine Oꞌmosoꞌmi oliva za neꞌmine minaniꞌ nene Oꞌmosoꞌmo aꞌmine zaꞌmi aꞌnava linge nene huko hulosa oliva za hadenelotiꞌ aꞌnava ma nene do eiꞌ oliva zaꞌveloꞌ nene do giꞌmizineꞌ nenako Isilaeleꞌ aleveti avoꞌningidatiꞌ sotoꞌ ineꞌ monoꞌ lamineꞌ nene lingine heta atoꞌ vesi nene makatoꞌ di nizaze. \v 18 Lingine nene Oꞌmosoꞌmo oliva zaꞌvelotiꞌ aꞌnavaꞌve linge ma huko hulineꞌ mamuꞌ nene ningedoꞌ hangedoka li-ngidi lengiꞌ okodine di dizamilo. Lingine nete nene aꞌmine zaliꞌmi luhiveꞌve nene di ngi li-ngidisaꞌmave. Asi eiꞌ aꞌmine za neꞌmi luhive nete lengiꞌ nene di ngi li-lingidaaꞌ naaniꞌ nenaze. Okodine nene di dizamilo. \v 19 Idoꞌ aꞌminemuꞌ nene lingine tiꞌ li lilisave: Idoꞌ nadiive. Leliꞌ nene Oꞌmosoꞌmi oliva zaꞌveloꞌ nene do giꞌmize-ledelesa eiꞌ aꞌnavaꞌve nene huko hulo do giꞌmize-ledave. \v 20-21 Ehe, mo laminetoꞌ nilaniꞌza engiꞌ huko hulo-ngidineꞌ nene ingine ezemuꞌ gili eleꞌvoleꞌ amavosa huko hulo-ngidineꞌ ve. Idoꞌ lingine eiꞌ zaꞌveloꞌ do giꞌmize-lengedavo nizaniꞌ nene lengiꞌ gili eleꞌvoleꞌ i minangumuꞌ nene eiꞌ zaꞌveloꞌ nene do giꞌmize-lengedavosa nizave. Nemuꞌ nene lengikumuꞌ gilavo dizalize. Oꞌmosoꞌmo aꞌmine zaꞌveꞌmi aꞌnavaꞌve gehepeve nene iseꞌine izamineꞌ nenako lengikisi nene isetine izamoloseize. Golisesi nene ha gili minilizaniꞌ o neive. \v 22 Idoꞌ Oꞌmosoꞌmo neꞌmine ogaꞌ neidotiꞌ nene helala nasahiliꞌ lamineꞌ ogaꞌ neineꞌ nene ningo idoꞌ helala amuzo molo lihime ngemaaꞌ neineꞌ nene ningo gelelesune. Ee, monokutiꞌ limi ingave nene amuzo molo lihime ngemosa lengiꞌ nene nasahiliꞌ o-lengedo neive. Idoꞌ aza nasahiliꞌ o-lengedelidoꞌ lisiheꞌ i minilizangumuꞌ nene mo nasahiliꞌ o-lengedeleseiha neꞌmine ma ami minilizaniꞌ nene linginesi zaꞌvelotiꞌ nene huko hulalize. Ningiisa minilo. \v 23 Idoꞌ aꞌmine zaꞌvelotiꞌ aꞌnava huko hulineꞌ neꞌminisa minaniꞌ Isilaeleꞌ aleve ingine gili eleꞌvoleꞌ ami minadotiꞌ nene huli gili eleꞌvoleꞌ ma ilizaniꞌ nene Oꞌmosoꞌmo gohi zaꞌvela do giꞌmize-ngedaaꞌ amuzo nene ha do neinako gohi ha do giꞌmize-ngedeleseive. \v 24 Idoꞌ neꞌmino gohi do giꞌmize-ngedelineꞌ amuzo do neineꞌ nene nadosa ningo gelelone. Aza nene amosoꞌ initeꞌ gehepeve ogo heta atoꞌ ve lingine nene oliva za hadenelotiꞌ aꞌnava neꞌmine minave nene eiꞌ oliva zaꞌve laminekuꞌ nene do giꞌmize-lingidineꞌ nenako nemuꞌ nene eiꞌ zaꞌvelotiꞌ gehepeve minaniꞌ aleve Zuda ve nene ha lapa nomineꞌ initeꞌ ogo gohi aꞌmine zaꞌveloꞌ nene ha do giꞌmize-ngedeleseive lo ningo gelelesune. \s1 Oꞌmosoꞌmo Isilaeleꞌ Aleve Aꞌmanapa Igi Minangutiꞌ Gohi Do Eita Ogo Do nGuꞌ Izelineꞌ Nenako Neꞌminosa Eveneꞌ Ato Atoꞌ Mukiꞌ Nene Isete Ize-ledeleseive Lo Pauloꞌ Lineꞌ Gamazi \p \v 25 Neze zuhokizo, mene loloniꞌ gamazi nene gilami minilizaniꞌ neꞌmo lingine laza otohato ve nene none lisa okodine di dizi minikelizave losa sunoꞌ gamazi mene lo-lengemelouze. Gililo: Isilaeleꞌ aleve linge nene aꞌmanapa igi Kilisitoꞌnimuꞌ gili eleꞌvoleꞌ amaniꞌza neve nene mudise nomive. Asi heta atoꞌ ve ingine Oꞌmosoꞌmo gele neineꞌ votigileloꞌ Oꞌmosola imi hilalizaniꞌ \v 26 nelotiꞌ nene monoꞌ godolouꞌ tiꞌ li gizi nizadoꞌ nene eꞌmeto Isilaeleꞌ aleve mukiꞌ nene do nguꞌ izeleseive: \q1 Isilaeleꞌ aleveti gotoꞌ numuꞌine Zaioni gololotiꞌ nene \q1 do nguꞌ izelive ma sotoꞌ oloseive. \q1 Sotoꞌ ogosa aza monoꞌ gelamaaꞌ monovo \q1 Zakoboꞌ aꞌvopilemoꞌ zuho Isilaeleꞌ alevetinguꞌ minineꞌ nene \q1 do huloloseive. \q1 \v 27 Naza gamazi meve nene ma nolo huko-ngiduve. \q1 Engiꞌ lihime do hulo-ngedeloniꞌ gamene nene ma gihile izo sotoꞌ oloseive. \p \v 28 Izesuꞌnimuꞌ gamazi lamineꞌ nene gili hulisa Isilaeleꞌ aleve nene Oꞌmosoꞌmi biluvaꞌve liliꞌ aniꞌ ve. Neꞌmo nene heta atoꞌ ve lingine Oꞌmosoꞌmo do lunguꞌ izelineꞌ akaloꞌ lengeleꞌmize molave. Ne neiha ganakutiꞌ nene Oꞌmosoꞌmo eiꞌ ve lo do kegese-ngidineꞌ nenako nemuꞌ nene engiꞌ avoꞌninginemuꞌ gele minosasi nene lulo ha ngeme neive. \v 29 Idoꞌ lulo ha ngeme neive noluvoniꞌ nene adoꞌ Oꞌmosoꞌmo eveneꞌ ma elese molo-ngedo do eita ogo initeꞌ ma ngeme nolineꞌ nene aꞌminemuꞌ gamazi gohi senisi ogo oꞌve aꞌva losaꞌmineꞌ nenako nemuꞌ nene luve. \v 30 Ee, gomuꞌ nene heta atoꞌ ve lingine Oꞌmosoloꞌ gelekeleꞌ ami minaniꞌza Isilaeleꞌ aleve ingine nene idise Oꞌmosoloꞌ gelekeleꞌ amavo neꞌmo nene Oꞌmosoꞌmo lengiꞌ heta atoꞌ ve nene isetine izo do eita ogave. \v 31 Aꞌmineꞌmine ogo Oꞌmosoꞌmo lengiꞌ isetine izo do eita ineꞌ neꞌmo nene Isilaeleꞌ aleve idise Oꞌmosoloꞌ gelekeleꞌ amave. Idoꞌ neꞌmine monovo sotoꞌ ineꞌ nene Oꞌmosoꞌmo engiꞌ Isilaeleꞌ aleve nene iseꞌine izelingumukisi ve losa neꞌmino sotoꞌ ineꞌ ve. \v 32 Ee, Oꞌmosoꞌmo eveneꞌ ato atoꞌ mukiꞌ nene iseꞌine izelidoꞌ lisiheꞌ i minilizangumuꞌ ve lo eveneꞌ mukiꞌ nene ezeloꞌ gelekeleꞌ amaaꞌ monovoꞌmi gesi minguꞌ nene hulo-ngidineꞌ ve. \s1 Oꞌmoso Nene Atoliꞌmine Ogo Miningumuꞌ Pauloꞌ Do Naba O-do Opoꞌni Lineꞌ Gamazi \p \v 33 Aizoo, Oꞌmosote nene atoliꞌmine ogo minive neive. Adoꞌ gamazi gele neineꞌ nene atoliꞌmine ogo gele mino otohato ogaꞌ neineꞌ nesi nene vosoꞌ vamosoꞌ vaaꞌ neive. Idoꞌ lo hukaaꞌ neineꞌ gamaziꞌmi monovo nene eveneꞌ malitesi ngelo lo ngoloꞌ lo osuꞌ lamolosune. Idoꞌ eze gono dalosa gala gelaaꞌ neineꞌ nemuꞌ nene ve malitesi ngelo gelamolosune. \v 34 Monoꞌ godolouꞌ tiꞌ li gizi nizaniꞌ nenako mo laminetoꞌ noluve: \q1 Oꞌmosoꞌmo gelaaꞌ neineꞌ maduno nene \q1 eveneꞌ hamolitesi ngelo ma gelamolosune. \q1 Idoꞌ eveneꞌ hamolitesi nene \q1 ogo molo ilineꞌ monovomuꞌ ngelo ma apize emamolosune. \q1 \v 35 Idoꞌ eveneꞌ hamolitesi nene \q1 Oꞌmosoꞌmo alingeꞌ do tibizo lemelive lo \q1 dinaꞌ ogo initeꞌ nene ngelo ma emamolosune. \m \v 36 Nanitekumuꞌ ve. Initeꞌ mukiꞌ nene eitokovoꞌ gelekeleꞌ i-dilizave losa asiꞌvevoꞌ initeꞌ mukiꞌ do sotoꞌ ogavo mo eitokovoꞌ lehete i minaaꞌ nave. Nemuꞌ nene Oꞌmoso opoꞌni lo mineloneꞌ nene huko vamivo ha miniliho. \c 12 \s1 Laza Nene Okode Lute Oꞌmoso Lehize-do Gonoꞌve Daloningumuꞌ Nene Oꞌmosoꞌmo Limineꞌ Amuzo Ato Atodunuꞌ Nene Hamoꞌ Hamoꞌ Amuzo Molo Ogo Molo Olosune Lo Pauloꞌ Lineꞌ Gamazi \p \v 1 Nemuꞌ nene neze zuhokizo, Oꞌmosoꞌmo neꞌmino muhelete ningo isete izaaꞌ neineꞌ nenako nemuꞌ nene naza agae lo do upuhoꞌ o-lengedo gatine do tiꞌ lo nolo-lingimuve: Ize ato atoꞌ ngibili Oꞌmoso lehizi-daaꞌ aniꞌ neꞌmine igi lingine okodine nene di kekeize li Oꞌmosoꞌmi monovolokovoꞌ di milikevosa Oꞌmosoꞌmo laniteꞌ gelelidoꞌ lisiheꞌ o minivo aꞌmine okodine nene lehizi-dilo. Idoꞌ lehizi-dilizaniꞌ okodine nene hele neivosa nevoba asi velesi ha minevoꞌ dovoꞌ neidoꞌ nesi nene lehizi-dilo. Neꞌmine ilizaniꞌ neve nene mo maduꞌninguꞌ gamazi neivete igaꞌ ilizaniꞌ o neineꞌ initeꞌ nenako aꞌmidoꞌ nene ha ilisave. \v 2 Me misubouꞌ minineꞌ monovo danava goloso nene di otuhi minamilo. Asi Oꞌmosoꞌmo lutine gatine do gosohoꞌ o-lengedavo neꞌmo nene aꞌmine gomuꞌ lengemeni dameni do hulosa nene do atoꞌ o-lengedavo minilo. Neꞌmine ilizaniꞌ nene Oꞌmosoꞌmo igi mili minilizave lo gele neineꞌ monovo adoꞌ monovo lamineꞌ eiꞌ gilidoꞌ gehepeve vo daaꞌ neineꞌ monovo adoꞌ aza aꞌminemuꞌ laniteꞌ gelelidoꞌ lisiheꞌ o neineꞌ monovo nene igi mili minilizaniꞌ nenako nelotiꞌ nene eiꞌ gelaaꞌ neineꞌ monovo nene ningi gililisave. \p \v 3 Idoꞌ Oꞌmosoꞌmo nasahiliꞌ o-nedo neniꞌ moꞌmosiꞌne mene lehize-nidineꞌ nenako nemuꞌ nene naza lingine luvoniꞌ neꞌmine ilizangumuꞌ ve losa nene lengiꞌ hamo hamoꞌ nene tiꞌ lo nolo-lingimuve: Lingine Oꞌmosomuꞌ gili eleꞌvoleꞌ ikevo amuzo lingimineꞌ nene hamo hamoꞌ nani amuzo lingimihe neꞌmi votigile gehepeveloꞌ di milisa lengikumuꞌ gilavo aꞌmine votigile ivileꞌ ogo dizalinaze. Lengikumuꞌ nene gili vevesisa minilo. \v 4 Lingine neꞌmine ilizave lo noluvoniꞌ nene nemuꞌ noluve: Eveneꞌ okodeloꞌ nene gizede ade neꞌmine initeꞌ nene ato atoꞌ vaiꞌ goloso neivo ingine mini gonoꞌine daaꞌ naniꞌ nene ato atoꞌ gono daaꞌ nave. \v 5 Aꞌmineꞌmine ogo Kilisitoda nene eveneꞌ mukiꞌ laza okoꞌno hamoꞌ neꞌmine loloꞌ ogo ato atoꞌ minamo ne hize eleꞌ o-gede ge hize eleꞌ o-nede lo minelonive nene none. \v 6 Idoꞌ Oꞌmosoꞌmo nasahiliꞌ o-ledo amuzo lehize-ledineꞌ nene hamoliꞌminevoꞌ lehize-ledamo ato atoliꞌmine lehize-lidineꞌ ve. Nemuꞌ nene Oꞌmosoꞌmo ve ma lehize-lede nolineꞌ amuzo nene Oꞌmosoꞌmi veletiꞌ gamazi lo soto sotoꞌ ogaꞌ amuzo nolineꞌ nene laza mo laꞌlisete gele eleꞌvoleꞌ o noloneꞌ votigileloꞌ nene do molosa Oꞌmosoꞌmi veletiꞌ gamazi nene lo soto sotoꞌ ogo lolosune. \v 7 Idoꞌ ve malite eveneꞌ ma hize eleꞌ o-ngedaaꞌ amuzo lehize-lede nolineꞌ nene mo ha eveneꞌ hize eleꞌ o-ngedo minelesune. Idoꞌ eveneꞌ initeꞌ ma apize ngemaaꞌ amuzo lehize-lede neineꞌ neivo ma nene mo ha apize ngemo minelesune. \v 8 Idoꞌ eveneꞌ gaꞌine do gamazi lo-ngemaaꞌ amuzo ma lehize-lede neineꞌ neivo ma nene ha mo gaꞌnine do gamazi lo-ngemaaꞌ olosune. Idoꞌ ve ma nene initeꞌ izeꞌ molo ngemaaꞌ amuzo lehize-de nolive neꞌmo nene mo inele ogo ngemeleseive. Idoꞌ ve maliꞌmo nene gomuꞌ molo-ngemaaꞌ amuzo do nolineꞌ nene aꞌmine gonoꞌve nene amuzo molo do mineleseive. Idoꞌ ve ma aza nasahiliꞌ o-ngedaaꞌ amuzo do nolive neꞌmo nene nasahiliꞌ o-ngedaakuꞌ nene olize izo minosa neꞌmine ilive. \s1 Monoꞌ Alevete Igi Mili Ilizaniꞌ Monovo Gihile Nene Do Mineloningumuꞌ Pauloꞌ Lineꞌ Gamazi \p \v 9 Lingine eveneꞌ lutine ngimaaꞌ naaniꞌ monovo nene abeleni neꞌmine nomivo mo lutine ngimi gehepeve igi minilo. Monovo golosomuꞌ nene goseleꞌ lengebelavo mehedine imivoꞌ mini monovo laminetoꞌ nene giꞌmizi giliꞌ li minilo. \v 10 Hamoꞌ zuho liliꞌ igi nizanako nemuꞌ nene hamoꞌ zuholite luꞌine ne geme ge neme li minilizaniꞌ votigileloꞌ di mili lutine amuzo mili ge neme ne geme li minilo. Idoꞌ eveneꞌ di naba i-ngidaaꞌ monovomuꞌ nene aka ge nelebize ne gelebize li minilo. \v 11 Monokuꞌ mini gonotine di di vi minaaꞌ naaniꞌ nene goseleꞌ lengebelamivo mini Guvelesi ve nene lutine gilingili ivo gelekeleꞌ i-di minilo. \v 12 Lingine Kilisitoꞌ do lamineꞌ o-ledelesa neive li gili muꞌmusiꞌ igi gizebo nizaniꞌ nenako nemuꞌ aꞌminguꞌ nene longolizesi izisa minilo. Idoꞌ geni initeꞌ lengita sotoꞌ ilingumuꞌ nene monotine hulami aꞌmine geni nene hongu li mini gihi minilo. Idoꞌ Oꞌmosola li minilizaniꞌ nene hulami laakovoꞌ igi minilo. \v 13 Oꞌmosoꞌmi evenele linge malite initeꞌ mamuꞌ viseꞌ naavo ma nene hize eleꞌ i-ngidi ma ngimilo. Idoꞌ venenga ve neꞌmine ma nimonavo ma nene ngeleꞌmize lamineꞌ i-ngidi nasahiliꞌ i-ngidilo. \p \v 14 Lengiꞌ goboni mili-lingidilizavemuꞌ nene Oꞌmosoꞌmo noꞌnohoꞌ ize-ngedelive li ezela lilo. Ee, usiꞌ ize-ngedelive lamisa asi noꞌnohoꞌ ize-ngedelingumuꞌ nene eita lilo. \v 15 Idoꞌ ve ma ingine initeꞌ mamuꞌ ngolize izi nizavo ma nene linginesi aꞌminguꞌ mini makatoꞌ longolize izi minilo. Idoꞌ ve ma ingine initeꞌ mamuꞌ mulumo alumo gili nizavo ma nene linginesi aꞌminguꞌ mini mili makatoꞌ mulumo alumo gili minilo. \v 16 Lingine lengiꞌ hamo hamokumuꞌ nene di dizi limi gilami asi hamoꞌ monovoloꞌ nene di milisa minilo. Ee, lengiꞌ okodine nene di dizami asi eveneꞌ limi minavesi nene bizi monilo. Idoꞌ laꞌmo nene otohato ve none li okodine di dizamilo. \p \v 17 Eveneꞌ malite di goloso i-lingidikevo ma nene aꞌmidoꞌ di tineꞌ mili di goloso i-ngidamilo. Asi eveneꞌ mukiliti veꞌnidoꞌ nene monovo lamineꞌ ogave li ningilizaniꞌ monovovoꞌ nene igi mili minilo. \v 18 Lingine eveneꞌ ato atoꞌ mukikisi lovo lolize ami hongu li laminivoꞌ minilizaniꞌ aka ma neivo ma nene aꞌmine akalokovoꞌ nene eꞌmeti minilo. Lengitatiꞌ neve nene lovo lolize di sotoꞌ amilo. \v 19 Luꞌne lengeme nouvoniꞌ alevekizo, eveneꞌ malite lutine di goloso igi lihime nimili-lingidavo ma aꞌmidoꞌ golo hizi aꞌmineꞌmine i-ngidamilo. Asi Oꞌmosoꞌmo izeboloꞌ molavo lihime ngemelize. Ningi mati ngimikilo. Aꞌmine nemuꞌ monoꞌ godolouꞌ tiꞌ li gizi nizaniꞌ ma neive: \q1 Guvelesi veꞌmo tiꞌ lo lineꞌ ve: \q1 Lihime ngemaaꞌ gono nene neniꞌ gono nenako \q1 lihime nene neniꞌ ngemelesuve. \m \v 20 Mo neꞌmine igi langisetine nene lihime ngimamilisaha monoꞌ godolouꞌ tiꞌ li gizi nizadoꞌ nene eꞌmetilisave: \q1 Lengiꞌ biluvaꞌ i-lingidaaꞌ nave ingine gaꞌna hili nizavo ma nene \q1 di veꞌine milalo. \q1 Idoꞌ nosomuꞌ gaꞌna hili nizavo ma nene noso ngimilo. \q1 Lingine neꞌmine i-ngidilizaniꞌ neꞌmo nene \q1 ngovozo naba goloso nene engita dizavo \q1 oloꞌ vele nene godoꞌnidoꞌ mili-ngidaniꞌ geleleseive. \m \v 21 Idoꞌ goloso monovo neꞌmo nene lingivileꞌ ogalize. Asi monovo lamineꞌ igi mili minilizaniꞌ neꞌmo nene monovo goloso nene ivileꞌ igi di limi-di minilo. \c 13 \s1 nGamani Alevete Li Hukilizaniꞌ Gamaziloꞌ Nesi Nene Ha Gelekeleꞌ Oloneꞌ O Neive Lo Pauloꞌ Lineꞌ Gamazi \p \v 1 Idoꞌ eveneꞌ ma ngamani gono veleloꞌ nizaniꞌ nene Oꞌmosoꞌmo lamivosa nene hamokisi ma nizavoba asi eiꞌ Oꞌmosoꞌmo ngeleꞌmize molavosavoꞌ nene nizanako nemuꞌ nene eveneꞌ mukiꞌ lingine ngamani alevete ladoꞌ nene eꞌmeti gelekeleꞌ i-ngidilo. \v 2 Idoꞌ Oꞌmosoꞌmo ngeleꞌmize molaniꞌ nenako nemuꞌ nene engiꞌ gamaziloꞌ ma peleseveꞌ izilizaniꞌ nene Oꞌmosoꞌmo lidoꞌ sotoꞌ aveti gamaziloꞌ nene peleseveꞌ izilizaniꞌ nenako mo angiseꞌine neꞌmine ilizadiꞌmo nene lihime dalisave. \v 3 Ee, ngamani nete eveneꞌ ma golise gililiza initeꞌ ngisilizaniꞌ nene monovo laminekovoꞌ igi mili minilizave nene golise gililiza initeꞌ ngisilizavoba asi monovo goloso igi mili minilizavevoꞌ nene neꞌmine i-ngidilisave. Lingine ngamanimuꞌ golise gelamo mineloneꞌ akaꞌve nene do sotoꞌ olone li gilisa viseꞌ nahe. Monovo laminekovoꞌ igi mili minilo. Neꞌmine ikevo ngamani nete siza li-lingidilisave. \v 4 Idoꞌ siza li-lingidilizaniꞌ nene Oꞌmosoꞌmo ngeleꞌmize molavo eiꞌ gelekeleꞌ ve miniisa lengiꞌ lengeleꞌmize lamineꞌ ilisa gono nene daaꞌ naniꞌ nenako nemuꞌ nene lingine monovo lamineꞌ igi mili minilizangumuꞌ nene siza li-lingidilisave. Ne neiha monovo goloso ilizaniꞌ nene ngamanite lihime lingimilizaniꞌ amuzo nene hazamuꞌ di minamaniꞌ nenako nemuꞌ nene golise gili minilo. Nene nanitekumuꞌ ve. nGamani nete nene monovo goloso igi mili minilizaveti monovoloꞌ golo hizi lihime ngimilizangumuꞌ nene Oꞌmosoꞌmi gonoloꞌ izipeꞌve nizaniꞌ nemuꞌ ve. \v 5 Nemuꞌ nene laza ngamani alevete lilizadoꞌ eꞌmeto gelekeleꞌ o-ngedeloneꞌ o neive. Idoꞌ Oꞌmosoloꞌ medeli lihime lingimilizangumukovoꞌ nomive. Asi luteliꞌmo ngamani gamaziloꞌ peleseveꞌ izaaꞌ neꞌmo nene goloso ve lo lo-lemaaꞌ neinako nemukisi nene ngamaniloꞌ gelekeleꞌ o-ngedeloneꞌ o neive. \v 6 Idoꞌ nemukisi nene ngamanila takisi moni huli-ngidilizaniꞌ o neive. Ingine Oꞌmosoꞌmi gonouꞌ izipeꞌve mini aꞌmine noluvoniꞌ gono nene daaꞌ nave. Nemuꞌ nene gelekeleꞌ i-ngidilo. \v 7 Eveneꞌ mukiꞌ hamo hamoꞌ ngimikaꞌ ngimikaꞌ ilizadoꞌ lisiheꞌ o neineꞌ initeꞌ nene mo ha ngimilo. Takisi moni ato atoliꞌmine eveneꞌ ngimilizadoꞌ o nolineꞌ nene ma ngimilo. Idoꞌ eveneꞌ ma dizi minave minikevo ma nemuꞌ nene lengehelele izivo mini di hozi li-ngidilizadoꞌ o neivo ma aꞌmine alevemuꞌ nene lengehelele izivo mini di hozi li-ngidilo. \s1 Monovo Lamineꞌ Ge O-nede Ne O-gede Lo Minelonidoꞌ O Neineꞌ Monovomuꞌ Nene Pauloꞌ Lineꞌ Gamazi \p \v 8 Idoꞌ linginela golo hizamaniꞌ dinaꞌ ma neivo ma nene geti golo hizi ngimilo. Eveneꞌ hamotasi dinaꞌ igisa haza huliki minamilo. Idoꞌ lingine dinaꞌ nene di minami golo hizi osukovoꞌ lilizave lo noluvoniꞌza linginela dinaꞌ neꞌmine ma minaaꞌ neineꞌ adoꞌ ngeli bekimi amilizaniꞌ o minaaꞌ neineꞌ nene ma neive. Aꞌmine dinaꞌ nene lingine lutine ge neme ne geme li minilizadoꞌ o neineꞌ initeꞌ nemuꞌ nene noluve. Idoꞌ neꞌmine noluvoniꞌ nene eveneꞌ malite eveneꞌ ma luꞌine ngimilizave ingine neꞌmine ilizangumuꞌ nene Oꞌmosoꞌmi louꞌ gamaziꞌveloꞌ mo eꞌmeti osuꞌ lilizaniꞌ nenako nemuꞌ nene noluve. \v 9 Ee, Oꞌmosoꞌmo lo huko lineꞌ gamazi adoꞌ veneꞌ vemohoꞌ liliꞌ ikeniꞌ nete veneꞌ vemohoꞌ masi gopo ingamilo, idoꞌ eveneꞌ ma ngibili hilamilo, idoꞌ gumine amilo, idoꞌ eveneꞌ maliti initeꞌnidoꞌ mumuzoꞌ amilo lineꞌ gamazisi idoꞌ Oꞌmosoꞌmo lo huko lineꞌ gamazi ato atoꞌ mukiꞌ nesi nene adoꞌ gamazi tiꞌ lo ma neineꞌ neꞌmo nene asabuꞌ izo osuꞌ lo neive. Adoꞌ lingine lengiꞌ okodinemuꞌ gilaaꞌ naniꞌ neꞌmini lengiꞌ nizada minilizavemuꞌ nene gili lutine ngimilo. \v 10 Lute ngemaaꞌ nooloneꞌ nene leliꞌ nonida minilizave nene ngelo do goloso o-ngedamolosunako nemuꞌ laza lute eveneꞌ ngemaaꞌ oloneꞌ neꞌmo nene Oꞌmosoꞌmi louꞌ gamazi mukiꞌ nene mo eꞌmeto osuꞌ gehepeve lolosune. \s1 Gamene Naba Nene Avitoꞌ Okaꞌ Okaꞌ Neineꞌ Nenako Nemuꞌ Nene Laza Monovo Lisiheꞌ Laminekovoꞌ Ogo Molo Minelone Lo Pauloꞌ Lineꞌ Gamazi \p \v 11 Neꞌmine igisa idise gameneꞌmi monovomuꞌ nene gili minilisave. Adoꞌ apiꞌ ogo Kilisitoꞌnimuꞌ gele eleꞌvoleꞌ unidotiꞌ nene Oꞌmosoꞌmo mudise do luꞌ izelineꞌ gamene nene avitoꞌ oꞌmo ogo mino idise mo avitoꞌ oganako nemuꞌ nene lingine lutine okise ongo helo miningutiꞌ upuhoꞌ igi di oti-dilizaniꞌ o neineꞌ gamene nene mo ogave. \v 12 Monovo goloso dizo minineꞌ gamene adoꞌ litiꞌmuso ize minineꞌ gamene nene voꞌmo voꞌmo vo osuꞌ lolosa neivo goꞌ lo labanaꞌ elelineꞌ gamene nene mo avitoꞌ ogaze. Nemuꞌ nene litiꞌmusouꞌ minave monovo goloso igi mili minaaꞌ naniꞌ nene lingine vasa izi huli hotoꞌ igi monovo goloso lovo i imilisa lovouꞌ initeꞌ neꞌmine Oꞌmosoꞌmi labanakuꞌ minavete igi mili ilizadoꞌ lisiheꞌ o neineꞌ monovo lamineꞌ nene di otuhi minilo. \v 13 Ee, eveneꞌ labanakuꞌ sotoꞌ igi monave nete monovo lisiheꞌ laminekovoꞌ igi mili minaaꞌ adiꞌmine ogo laza nene monovo laminekovoꞌ ogo molo mineloneꞌ o neize. Noso ni sipaki igi longolize izamilo. Ee, mo noso ni sipaki amilo. Idoꞌ veneꞌ vemohoꞌ alu gipe lingine gopo ingamilo. Idoꞌ longovozo hilami monovo goloso galasa gopo igaꞌ monovo nene mo amilo. Initeꞌ mamuꞌ lavodine lemavo eveneꞌ mamuꞌ nene gili goloso amilo. \v 14 Neꞌmine monovo goloso nene ogalone li lepesetine neꞌmine Guvelesi ve Izesuꞌ Kilisitoꞌni nene di kisi mini lengemeni dameni liteheliꞌmo laniteꞌ gelaaꞌ neineꞌ monovo goloso dalizangumuꞌ aka viseꞌ igaꞌ naniꞌ nene mudise hulilo. \c 14 \s1 Lengiꞌ Zuho Malite Monokumuꞌ Gaꞌine Atoꞌ Gilangumuꞌ Nene Engiꞌ Monovoꞌnidoꞌ Izeꞌ Mili Lisa Gili Goloso Amilo Lo Pauloꞌ Lineꞌ Gamazi \p \v 1 Idoꞌ monokuꞌ gilizevo igi minave ma lengita ikevo ma nene ha ngeleꞌmizi milalo. Idoꞌ ngeleꞌmizi milalizaniꞌ nene ingine lingine gatine giladoꞌ vo lisiheꞌ amilineꞌ gaꞌine gili nilizangumuꞌ nene lesisi igi gamazidunuꞌ ge hulo ne hulo lilisamuꞌ nene ngeleꞌmizi milamilo. \v 2 Nene adoꞌ neꞌminemuꞌ noluve. Eveneꞌ malite gilavo initeꞌ ato atoꞌ mukiꞌ naaꞌ nene ha neive. Ne neiha eveneꞌ linge ma monokuꞌ gilizevo igi mini ize malise igi minguꞌ initekovoꞌ naaꞌ nave. \v 3 Nosoꞌ niteꞌ ato atoꞌ mukiꞌ naaꞌ nave nete nosoꞌ niteꞌ ma malise igaꞌ navemuꞌ nene gilavo haza niteꞌ ve li gilikelizave. Idoꞌ Oꞌmoso neꞌmo nene nosoꞌ niteꞌ mukiꞌ gopo naaꞌ avesi nene mo eiꞌ ve lo ngeleꞌmize molaniꞌ nenako nemuꞌ nene nosoꞌ niteꞌ malise igaꞌ ave nete nosoꞌ niteꞌ mukiꞌ gopo naaꞌ aveti monovomuꞌ nene izeꞌ mili lamilizadoꞌ o neive. \v 4 Lingine gilavo eveneꞌ atoꞌ neꞌmi gelekeleꞌ izipeꞌveti monovomuꞌ izeꞌ molo laaꞌ nene lisiheꞌ o neivosa nahe. Oꞌove. Neꞌmino nomive. Engiꞌ monovoꞌinemuꞌ lilive nene engiꞌ meꞌniboꞌmovoꞌ nene izeꞌ molo loloseive. Idoꞌ meꞌnibo Oꞌmosoꞌmo gelavo monovoꞌine lamineꞌ neinako ha oti minilisave lilihe idoꞌ monovoꞌine goloso neinako diꞌmozilisave lilihe nene mo eitokovoꞌ neive. Idoꞌ eiꞌ Oꞌmosoꞌmo do ote-ngedelidoꞌ lisiheꞌ o neinako ingine mo oti minilisave. \p \v 5 Idoꞌ gamene hamo hamokumuꞌ giluneꞌ nene eveneꞌ linge ma nete gilavo gamene nene dizi limi minaaꞌ naha eveneꞌ linge ma nete gilavo gamene mukiꞌ nene dizi limi minami mo hamoliꞌminevoꞌ minaaꞌ nave. Lingine eveneꞌ malite gilangumuꞌ izeꞌ mili lami hamo hamoꞌ aꞌmine gamenemuꞌ gilavo lisiheꞌ ilineꞌ akamuꞌ nene gili eleꞌvoleꞌ igi aꞌmidoꞌ eꞌmeti minilo. \v 6 Eveneꞌ ma ingine gamene mamuꞌ nene gamene naba ve li gilaaꞌ naniꞌ nene Guvelesi vemuꞌ gili neꞌmine igaꞌ nave. Idoꞌ eveneꞌ ma nosoꞌ niteꞌ ato atoꞌ mukiꞌ naaꞌ naniꞌ nene aꞌmine nosoꞌ nitekumuꞌ nene Oꞌmoso tangezoꞌ ve li opoꞌni li-daaꞌ naniꞌ nenako neve nene mo Guvelesi vemuꞌ gili minisa naaꞌ nave. Idoꞌ eveneꞌ ma ingine nosoꞌ niteꞌ ma malise igaꞌ nave ingine Guvelesi vemuꞌ gili malise igi inginesi Oꞌmoso tangezoꞌ ve li opoꞌni li-daaꞌ nave. \v 7-8 Idoꞌ neꞌmine noluvoniꞌ nene nemuꞌ noluve: Laza minevoꞌ alevoꞌ oloneꞌ nene Guvelesi vemuꞌ minevoꞌ alevoꞌ olosune. Idoꞌ heleloneꞌ nesi nene Guvelesi vemuꞌ helelesune. Nemuꞌ nene laza minevoꞌ alevoꞌ oloneꞌ nene eveneꞌ hamolitesi lelikumukovoꞌ nene ma minevoꞌ alevoꞌ osaꞌmune. Idoꞌ heleloneꞌ nene hamolitesi lelikumukovoꞌ nene ma helesaꞌmune. Nemuꞌ nene minevoꞌ alevoꞌ ogo minelobe idoꞌ helelobe nene Guvelesi veꞌmi evenelevoꞌ nene minelesune. \v 9 Nemuꞌ nene Kilisitoꞌ aza eveneꞌ veꞌinesi ha nizaveti Guveꞌinesi ve mino hili nizaveti Guveꞌinesi ve nesi nene minelongumuꞌ ve losa hilineꞌ ve. Idoꞌ nemukisi nene oto minevoꞌ minevoꞌ ogo neive. \v 10 Idoꞌ laza mukitoꞌ Oꞌmosoꞌmo goniꞌ o-ledelidoꞌ eze veleloꞌ vo otekunivo mukitoꞌ nene eiꞌ izeꞌ molo-ledelineꞌ o neinako lingine linge ma lengiꞌ zuholiti monovoꞌinemuꞌ izeꞌ mili laaꞌ naniꞌ nene nanimuꞌ nave. Idoꞌ linge ma nete lengiꞌ zuho mamuꞌ gilavo lemo haza niteꞌ loloꞌ ogaꞌ neineꞌ nene nanimuꞌ nave. \v 11 Idoꞌ Oꞌmosoꞌmo goniꞌ o-ledelidoꞌ nene ha volosune noluvoniꞌ nene monoꞌ godolouꞌ gamazi ma tiꞌ li gizi nizaniꞌ neineꞌ nenako nemuꞌ nene noluve: \q1 Guvelesi veꞌmo tiꞌ lo nolive: \q1 Naza nouvoniꞌ nene soza nomive. Mo gamazi gihile laminetoꞌ neive. \q1 Idoꞌ aꞌmineꞌmine ogo \q1 naza eveneꞌ hamo hamoꞌ mukiꞌ lingine obuvotine hizi neniꞌ gubiꞌ izi nimi \q1 Gaza Oꞌmoso gihile nane li li sotoꞌ ilisave lo noluvoniꞌ nene \q1 gamazi gihile laminekovoꞌ noluve. \m \v 12 Nemuꞌ nene laza eveneꞌ hamo hamoꞌ mukiꞌ leliꞌ ogo molo minuneꞌ monovote nene lo sotoꞌ ogo lo-emelesune. \s1 Leliꞌ Ogo Molo Noneꞌ Initetoꞌ Eꞌmeti Leze Zuho Malite Goloso Ve Li Gilaniꞌ Initeꞌ Disa Lihime Dikelizave. Leliꞌ Monovoteloꞌ Gizebo Lamineꞌ Olosune Lo Pauloꞌ Lineꞌ Gamazi \p \v 13 Nemuꞌ nene laza ge izeꞌ molo-nede ne izeꞌ molo-gede lo minaaꞌ monovo nene hulo gohi amolone. Asi lingine tiꞌ li gili minilo. Leze zuho ma nene limi ingikelizaze. Laza ngeleꞌmize goloso ogaꞌ monovo nene amolone. \v 14 Naza Guvetesi ve Izesuda giꞌmize nouvonako neꞌmo nene tiꞌ lo gele eleꞌvoleꞌ gehepeve o nouve: Nosoꞌ niteꞌ leliꞌ lute do goloso o-ledaaꞌ emeni damenisi minineꞌ nosoꞌ niteꞌ ma nomive. Ne neiha eveneꞌ malite initeꞌ mamuꞌ nene lute do goloso ogaꞌ initeꞌ ve li gililizaniꞌ nene aꞌmine initeꞌ neve nene engiꞌ luꞌine do goloso ogaꞌ initeꞌ loloꞌ oloseive. \v 15 Ne neiha lingine lengiꞌ zuho malite nosoꞌ niteꞌ mamuꞌ nene lute do goloso ogaꞌ initeꞌ ve li gili nizaniꞌ nosoꞌ niteꞌ ma gopo naaꞌ ilizadiꞌmo nene aꞌmine lingine zuho di goloso i-ngidilizaniꞌ nene mo lutine ngemaaꞌ monovoloꞌ eꞌmetami minilisanako nemuꞌ nene lingine neꞌmine ogo leze zuho ngeleꞌmize goloso ogaꞌ monovo ma amolone li gili minisa nosoꞌ niteꞌ nalizadotiꞌ nene Kilisitoꞌ engitoꞌ hilive nene vi tolovo ilizaniꞌ akaloꞌ ngeleꞌmizi milamilo. \v 16-17 Nosoꞌ niteꞌ ma nalobe idoꞌ malise ogo minelobe neꞌmo nene Oꞌmosoꞌmo gizebo o neineꞌ akauꞌ nene initeꞌ naba nomive. Asi Oꞌmosoꞌmi Sikalahuꞌ neꞌmo nene do sotoꞌ o-ledaaꞌ monovo adoꞌ monovo lisiheꞌ laminekovoꞌ ogo molo minaaꞌ nesi idoꞌ muludeuꞌ hongu lo lamino minaaꞌ nesi idoꞌ luteuꞌ gulumo avile lisivo minaaꞌ monovo nesi nene initeꞌ naba neineꞌ nenako nemuꞌ nene lingine monovo lamineꞌ nehe li nosoꞌ niteꞌ ha gopo nikevo lengemenga likelizaze. Alamilo. \v 18 Neꞌmine igi Kilisitoda gelekeleꞌ i-di minilizave ingine nene Oꞌmosoꞌmo mulunouꞌ lamineꞌ gelelineꞌ initeꞌ igi mili mini eveneꞌ nesi ningavo lisiheꞌ ilineꞌ monovoloꞌ nene eꞌmeti minilisave. \p \v 19 Nemuꞌ nene lingine lengikuꞌ hongu li bizi lamini miniliza monovolokisi idoꞌ monokuꞌ ne hize eleꞌ o-gede ge hize eleꞌ o-nede li minilizadoꞌ lisiheꞌ o neineꞌ monovo ato atokisi nene amuzo mili eꞌmeti minilo. \v 20 Nosoꞌ niteꞌ ha gopo nalizaniꞌ neꞌmo nene lingine Oꞌmosoꞌmi gono di goloso amilo. Nosoꞌ niteꞌ ato atoꞌ mukiꞌ nene lute do goloso amaaꞌ neiha ha gopo nokunivo neꞌmo nene eveneꞌ linge ma monokutiꞌ limi ingalizaniꞌ nene monovo goloso olosune. \v 21 Nemuꞌ nene ize meꞌmele nehe vaini noso nehe initeꞌ ma nehe nene lingine nalizadiꞌmo lengiꞌ zuho linge ma monoꞌ akalotiꞌ nene vi zovoꞌ izilizaniꞌ nene lingine aꞌneꞌmine initeꞌ malise ilizaniꞌ nene lamineꞌ o neive. \v 22 Idoꞌ aꞌneꞌmine initekumuꞌ nene lingine hamo hamoꞌ gilaniꞌ nene lengikisi Oꞌmosolokisivoꞌ neivo lengiꞌ hamo hamokovoꞌ gili minilo. Eveneꞌ ma nete monovo mamuꞌ nene neꞌmine ogaꞌ ha neive li gilangumuꞌ nene engiꞌ luꞌineꞌmo goloso ve lo goniꞌ o-ngedamilineꞌ nene engiꞌ minevoꞌ alevoꞌine lamineꞌ neivo ngolize izilizadoꞌ lisiheꞌ o neive. \v 23 Eveneꞌ ma initeꞌ mamuꞌ nene naloneꞌ lute do goloso ilihe li gaꞌine setaꞌ gili minisasi aꞌmine initeꞌ gopo nalizaniꞌ nene mo Oꞌmosoꞌmo lihime molo-ngedeleseive. Nene nanitekumuꞌ ve. Laza initeꞌ mamuꞌ nene monovo lisiheꞌ ve lo gele eleꞌvoleꞌ amosasi ha gopo oloneꞌ nene monovo goloso uneꞌ gelavo lihime daloneꞌ nenako idoꞌ ingine aꞌmine initeꞌ naaꞌ nene lisiheꞌ o neive li gili eleꞌvoleꞌ amisa nalizaniꞌ o neinako nemuꞌ nene Oꞌmosoꞌmo lihime molo-ngedeleseive. \c 15 \s1 Laza Leliꞌ Lutelokovoꞌ Ogo Molo Minamo Kilisitoꞌ Ogo Molo Minidiꞌmine Ogo Leze Zuho Monokuꞌ Gilizevo I Minaniꞌ Nene Hize Eleꞌ O-ngedelone Lo Pauloꞌ Lineꞌ Gamazi \p \v 1 Laza monokuꞌ amuzo molo nonive nene leliꞌ lutelokovoꞌ ogo molo minamo monokuꞌ gilizevo i nizave hize eleꞌ o-ngedo engiꞌ geni ngibilineꞌ initeꞌ nene lazasi gehe-ngedelonidoꞌ o neive. \v 2 Laza hamo hamoꞌ mukiꞌ nene leze zuho monokuꞌ do amuzo molo-ngedelingumuꞌ ve lo do lamineꞌ o-ngedelesa nene ingine gilavo lamineꞌ ilineꞌ initekovoꞌ ogo molo minukeꞌzo. \v 3 Nene nanitekumuꞌ ve. Laza nene Kilisitoꞌ idiꞌmine ogo ogo molo mineloneꞌ o neinako nemuꞌ ve. Kilisitoꞌ aza nesi eiꞌ lulolokovoꞌ ogo molo amineꞌza monoꞌ godolouꞌ tiꞌ li gizi nizaniꞌ nene eitoꞌ gihile izineꞌ ve: \q1 Oꞌmosoo, geiꞌ divi lediviꞌ i-gidaaꞌ avete \q1 divi lediviꞌ i-gidi laniꞌ neꞌmi geniꞌve nene neniꞌ nogihuve. \m \v 4 Idoꞌ naza monoꞌ godolouꞌ gizi nizaniꞌ gamazimuꞌ noluvoniꞌ nene nemuꞌ noluve: Gozopoꞌ gizi nizaniꞌ gamazi mukiꞌ nene Oꞌmosoꞌmo aꞌmine gamazi leliꞌ nene monoꞌ apize lemelive lo gelo lavo gizi nizaniꞌ ve. Ee, monokuꞌ amuzo mili mini geni ha gihi di dizi minilizadoꞌ nene aꞌmine gamazi neꞌmo luꞌine do ngi lo-ngedavo gaꞌine sitaꞌ gilami lukuvo nalizangumuꞌ nene gilingili igi gizebo igi minilizave lo gelo Oꞌmosoꞌmo lavosa aꞌmine gamazi nene gizi nizaniꞌ ve. \v 5-6 Idoꞌ lingine lutine gatinesi idoꞌ gamazitinesi nene di hamoꞌ igisa Guvetesi ve Izesuꞌ Kilisitoꞌ melehine Oꞌmoso nene opoꞌni li di naba i-dilizave lo monokuꞌ amuzo molo geni gehe do dizo minaaꞌ monovo idoꞌ lute do ngi laaꞌ monovo do sotoꞌ ive Oꞌmoso neꞌmo nene lingine Izesuꞌ Kilisitoꞌni eꞌmeti nizavo gatine gilaaꞌ naniꞌ nene do hamoliꞌmine o-lengedeliho. \s1 Kilisitoꞌ Aza Zuda Vesi Idoꞌ Heta Atoꞌ Vesi Leleꞌmize Lamineꞌ Ineꞌ Nenako Laza Aꞌmineꞌmine Ogo Ge Neleꞌmize Lamineꞌ O-nede Ne Geleꞌmize Lamineꞌ O-gede Lo Minelone Lo Pauloꞌ Lineꞌ Gamazi \p \v 7 Nemuꞌ nene Oꞌmoso opoꞌni li di naba i-dilizangisi Kilisitoꞌ aza lengikisi lengeleꞌmize lamineꞌ idiꞌmine igi lingine ge neleꞌmize lamineꞌ o-nede ne geleꞌmize lamineꞌ o-gede li minilo. \v 8 Idoꞌ Kilisitoꞌ lengiꞌ eveneꞌ ato atoꞌ lengeleꞌmize lamineꞌ ineꞌ gamazi noluvoniꞌ nene nemuꞌ noluve: Kilisitoꞌ aza Oꞌmosoꞌmo gamazi laminetokovoꞌ laaꞌ neineꞌ nene do sotoꞌ ogo Oꞌmosoꞌmo Zuda veti avotemotinemuꞌ lo huko lo-ngidineꞌ gamazi nene do gihile izelesa gelekeleꞌ ve loloꞌ ogo Oꞌmosoꞌmi noso okodela mulunive Zuda ve lelita nene gono daniꞌ ve. \v 9 Idoꞌ Zuda ve lelikumukovoꞌ aniꞌ nevoba asi Oꞌmosoꞌmo heta atoꞌ vesi iseꞌine izavo inginesi aꞌminemuꞌ opoꞌni li di naba i-dilizangumuꞌ ve losa nene engikumukisi aniꞌ ve. Idoꞌ neꞌmine ineꞌ nene monoꞌ godolouꞌ tiꞌ li gizi nizadoꞌ nene eꞌmetosa neꞌmine ineꞌ ve: \q1 Nemuꞌ nene Oꞌmosoo, heta atoꞌ veti vovoꞌninguꞌ mino gopoꞌni lolosuve. \q1 Ee, geiꞌ guliveka do hozi lo nama lolosuve. \m \v 10 Idoꞌ ma nene tiꞌ li gizi nizaniꞌ ve: \q1 Heta atoꞌ ve lingine Oꞌmosoꞌmi evenelesi makatoꞌ longolize izi minilo. \m \v 11 Idoꞌ gohi ma tiꞌ lo neive: \q1 Heta atoꞌ ve lingine mukiꞌ nene Oꞌmoso opoꞌni li minilo. \q1 Ee, eveneꞌ zuho ato atoꞌ mukiꞌ ingine nene \q1 Oꞌmoso opoꞌni li minilizaniꞌ o neive. \m \v 12 Idoꞌ polohete Isaiaꞌ nesi nene tiꞌ lo ma lineꞌ ve: \q1 Guvelesi ve Davidiꞌ meleho Zesaiꞌ aꞌvopilemoꞌ zuhoutiꞌ nene \q1 ve ma sotoꞌ oloseive. \q1 Aza nene heta atoꞌ veti guveꞌinesi ve loloꞌ ogo gizebo o-ngedo neivo \q1 heta atoꞌ ve ingine gilingili igi ezemuꞌ gili eleꞌvoleꞌ ilisave. \m \v 13 Idoꞌ lukuvo naloningumuꞌ nene gele muꞌmusiꞌ ogaꞌ monovo do sotoꞌ ive Oꞌmosomuꞌ nene gili eleꞌvoleꞌ igi nizavo aza lavo muludinguꞌ nene gulumo avile atoliꞌmine ogo lisivo hongu gehepeve lo neivo Oꞌmosoꞌmi Sikalahuꞌ neꞌmo lukuvo nalizangumuꞌ nene gili muꞌmusiꞌ ilizaniꞌ amuzo nene lengemavo neꞌmo vauve ilisa gili muꞌmusiꞌ igi minavoo. \s1 Luhuvo Niteꞌ Mene Nogize-lingimuvoniꞌ Nene Oꞌmosoꞌmo Nimineꞌ Gono Nodosa Nogize-lingimuve Lo Pauloꞌ Eiꞌ Gono Daniꞌ Monovo Lineꞌ \p \v 14 Neze zuhokizo, neniꞌ lengikumuꞌ giluvoniꞌ nene mo neꞌmine losa gele eleꞌvoleꞌ ogo gele nouve: Adoꞌ lengita nene monovo lamineꞌ vaiꞌ lo neivo gamazi monovo ato atoꞌ mukiꞌ nene mo gili minisa lingine ne gaka doo do akaloꞌ o-gede ge gaꞌne doo do akaloꞌ o-nede li minilizadoꞌ lisiheꞌ i nizave losa gele nouve. \v 15 Neꞌmine lo gele nouha eze Oꞌmosoꞌmo neniꞌ ninge lamineꞌ do heta atoꞌ ve lengita gono nimineꞌ nenako nemuꞌ nene monoꞌ linge ma gohi do gatidoꞌ molalove lo luhuvo niteꞌ mene nogizuve. Idoꞌ gamazi linge ma nogizuvoniꞌ nene amuzo malehe gamazi nogizuvoniꞌza neemukisi nehelele izamivo ha nogizuve. \v 16 Ee, Oꞌmosoꞌmo Izesuꞌ Kilisitoꞌni gelekeleꞌ veꞌve loloꞌ ogo heta atoꞌ vemuꞌ nene gono daline lo neleꞌmize molavo naza evenetoꞌ medelo mino Oꞌmoso initeꞌ lehize-daaꞌ uve gelo Oꞌmosoꞌmi Sikalahuliꞌmo do kekeize lo-ngedavo Oꞌmosoꞌmo ninge lamineꞌ ilidoꞌ i nizavo naza heta atoꞌ ve nene Oꞌmosoꞌmine lehize-delove lo Oꞌmosoꞌmi gamazi lamineꞌ nene heta atoꞌ vesi lo soto sotoꞌ ogo lo-lengemaaꞌ nouve. \v 17 Nemuꞌ nene naza giluvo Izesuꞌ Kilisitoda giꞌmize mino Oꞌmosomuꞌ gono daaꞌ nouvoniꞌ nene dizo minavo naza aꞌminemuꞌ nolize izo mino laaꞌ nouve. \v 18-19 Idoꞌ initeꞌ mamuꞌ lolovoba asi Oꞌmosoꞌmi Sikalahuliꞌmo amuzo nemavo naꞌniseꞌne gamazi noluvosi idoꞌ ngehelele izelineꞌ initeꞌ osoꞌ amosoꞌ suno ato atoꞌ ngelebizo ogo molo nouvosi Kilisitoꞌ aza heta atoꞌ ve do eitoꞌ gelekeleꞌ o-ngedelesa ineꞌ initekumukovoꞌ nene lovoꞌ kiselevoꞌ ogo lolosuve. Idoꞌ noluvoniꞌ neꞌmine ogo Zelusalemi numuno ebetotiꞌ apiꞌ ogo Kilisitoꞌ gamaziꞌve lamineꞌ nene lo soto sotoꞌ oꞌmo vo mo Ililikumi misubola vo pelekuve. \v 20 Idoꞌ neꞌmine noogo naza eveneꞌ maliꞌmo gono dadoꞌ imineꞌ molo damo Kilisitoꞌ guliveꞌve olihe gilamadaavoꞌ nene ezemuꞌ gamazi lamineꞌ lo sotoꞌ ogo lo-ngemelove losa neniꞌ luꞌneꞌmo gilidoꞌ nene eꞌmetuvoniꞌ ve. \v 21 Neꞌmine nouvo monoꞌ godolouꞌ tiꞌ li gizikaniꞌ gamazi nene vo gihile izineꞌ ve: \q1 Ezemuꞌ gamazi gilamave ingine nene ningilisave. \q1 Ee, eze gamazi gilamave aꞌminemuꞌ gili guno ilisave. \s1 Loma Ebekuꞌ Vo Ninge-ngedelesa Gilingumuꞌ Pauloꞌ Lo-ngemo Lineꞌ Gamazi \p \v 22 Neꞌmine ogo gono do mineloniꞌ neidiꞌmo naza lengita alosa giluvoniꞌ akaꞌne nene hize tile-nidineꞌ ve. \v 23 Ne neiha idise mene noluvoniꞌ misubola nene gono daloniꞌ ebeꞌ gohi ma nomivo naza kilisimasi mukikuꞌ lengita volove lo amuzo molo giluvodoꞌ eꞌmeto lengita alosuve. \v 24 Idoꞌ alosuve noluvoniꞌ nene Sipeni misubouꞌ volosa aka novosa lingine ninge-lengedelesa lengita vo hetelo lengikisi nene gamene linge ma minekuvo aꞌmida voloniꞌ akaꞌne nene vili-nidi hize eleꞌ i-nidikevo volosuve lo gele nouvoniꞌ nemuꞌ noluve. \v 25 Ne neiha idise naza Oꞌmosoꞌmi evenele zuho Zelusalemi ebekuꞌ nizaniꞌ nene hize eleꞌ o-ngedelesa aꞌmida novuve. \v 26 Idoꞌ novuvoniꞌ nene Izesuꞌ evenele Makedonia misuboukisi Akaia misuboukisi Izesuꞌ evenele Zelusalemi ebekuꞌ minangutiꞌ gohoꞌ gahaliꞌ alevemuꞌ nene moni do nubuho ogo ngemelone lisa di nubuho aniꞌ nemuꞌ nene novuve. \v 27 Ee, angiseꞌnidatiꞌ neꞌmine olone li aniꞌza lute do lamineꞌ ogaꞌ initeꞌ Zuda velatiꞌ sotoꞌ ineꞌ nene heta atoꞌ ve lengita ma inele aniꞌ nenako nemuꞌ nene aꞌmidoꞌ golo hizi okode do lamineꞌ ogaꞌ initeꞌ lengita neineꞌ nene Zuda vela inele ma ilizaniꞌ o neidoꞌ nizanako aꞌmine aniꞌ initeꞌ nene engita dinaꞌ neꞌmine minineꞌ nene apaselidoꞌ o minineꞌ ve. \v 28 Idoꞌ aꞌmine gono do okuꞌ lo ingine monoꞌ gihile di sotoꞌ igi moni di nubuho aniꞌ mene dalizaveti aꞌninguꞌ gehepeve molosa Zelusalemi numuno ebeꞌ hulo lengita ogosa Sipeni misubola volosuve. \v 29 Idoꞌ naza lengita voloniꞌ nene Kilisitodatiꞌ noꞌnohoꞌ vauve elo do-lengedo alosuve lo gele nouve. \p \v 30 Neze zuhokizo, naza amuzo molo tiꞌ lo longoꞌ noo-lingiduve: Lingine Guvetesi ve Izesuꞌ Kilisitoꞌnimuꞌ ve li idoꞌ Oꞌmosoꞌmi Sikalahuliꞌmo lute ne geme ge neme lo minaaꞌ monovo do sotoꞌ o-ledaaꞌ neingumuꞌ ve li naza amuzo molo Oꞌmosola laaꞌ nouvodiꞌmine igi linginesi imineꞌ mili nenikumuꞌ nene amuzo mili Oꞌmosola liꞌmi vi minilo. \v 31 Idoꞌ Oꞌmosola lilizaniꞌ nene naza Zudaia misubouko volonguꞌ nene aꞌmida Kilisitoꞌnimuꞌ gili eleꞌvoleꞌ amavelite nibililisa gili nilizangutiꞌ nene lukuvo nalongumuꞌ ve li idoꞌ Izesuꞌ evenele zuho Zelusalemi numunguꞌ nizaniꞌ ingine do vo ngemeloniꞌ initekumuꞌ oꞌove lami luꞌine laminetotiꞌ dalizave li Oꞌmosola lilo. \v 32 Idoꞌ neꞌmine likevo Oꞌmosoꞌmo gele lengemavo neꞌmo nene naza luꞌneuꞌ gulumo avile lisivo Oꞌmosoꞌmi luloloꞌ nolineꞌ nene lengita ogo hetelo lengikisi mino hepeꞌ doo lamineꞌ gelelongumuꞌ nene Oꞌmosola lilo. \p \v 33 Hongu lo lamino minaaꞌ monovo lemaaꞌ ive Oꞌmoso nene lengiꞌ mukita minivoo. Mo neꞌmino miniliho. \c 16 \s1 Pauloꞌ Eveneꞌ Mukiꞌ nGopoꞌni Lineꞌ Gamazi \p \v 1 Alungo ma gulive Hoibeꞌ lengita naaniꞌ nene nasahiliꞌ i-dilizave lo eze monovoꞌve tiꞌ lo nolo-lingimuve: Aza nene Izesuꞌ evenele Kenekelea ebekuꞌ mulise milaaꞌ nada monoꞌ gono daaꞌ ineꞌ alu nene neive. \v 2 Nemuꞌ nene Izesuꞌ evenele zuho ilizadoꞌ lisiheꞌ o neineꞌ monovoloꞌ nene eꞌmeti Guvelesi vemuꞌ ve li eleꞌmize lamineꞌ ilizave lo noluve. Idoꞌ aza nene eveneꞌ vaikisi nenikisi hize eleꞌ o-ledaaꞌ ineꞌ nenako nemuꞌ nene initeꞌ neꞌmine manaꞌminemuꞌ viseꞌ ilineꞌ nene lingine hize eleꞌ i-dilo. \p \v 3 Idoꞌ nezesi makatoꞌ Izesuꞌ Kilisitoꞌ gono daaꞌ uneꞌ aleve Pilisikangi idoꞌ vanaho Akuilangi nene ngopoꞌni noluze. Li-ngimilo. \v 4 Ingine nene ngibili hilaaꞌ akaloꞌ vi neniꞌ lukuvo nimasineꞌ ve. Nemuꞌ nene naza engikumuꞌ isetine ve lo muluꞌneuꞌ lamineꞌ gelaaꞌ nouve. Idoꞌ nenikovoꞌ nevoba asi Izesuꞌ evenele zuholiti mulise mukiꞌ heta atoꞌ vetinguꞌ miniꞌmi monaniꞌ inginesi nene aꞌminemuꞌ muluꞌninguꞌ lamineꞌ gilaaꞌ nave. \v 5 Idoꞌ engiꞌ numuꞌninguꞌ mulise milaaꞌ navesi nene ngopoꞌni noluze. Li-ngimilo. Idoꞌ Asia misubouꞌ aleveutiꞌ ganaꞌ Kilisitoda vo giꞌmizive luꞌne eme nouve Epainetoꞌni nesi nene opoꞌni noluze. Li-imilo. \v 6 Idoꞌ lengitoꞌ gono amuzo molo daaꞌ ineꞌ alu Maliaꞌni nesi nene opoꞌni noluze. Li-imilo. \v 7 Idoꞌ neniꞌ neꞌmini Zuda ve minasive nenikisi makatoꞌ galapusoloꞌ minunive Adilonikongi Zuniangi nene ngopoꞌni noluze. Li-ngimilo. Aposololiti muliseuꞌ nene engiꞌ guliveꞌine dize minineꞌ ve. Idoꞌ ingine nene gomuꞌ mili nimi Kilisitoda vi giꞌmizi minasineꞌ ve. \v 8 Idoꞌ Guvelesi vela giꞌmizusive luꞌne eme nouve Abiliatoꞌnisi nene opoꞌni noluze. Li-imilo. \v 9 Idoꞌ makaꞌ Kilisitoda gono daaꞌ unive Ulubanoꞌnisi idoꞌ luꞌne eme nouve Sitakiꞌni nesi nene ngopoꞌni noluze. Li-ngimilo. \v 10 Idoꞌ Kilisitoꞌnimuꞌ gele eleꞌvoleꞌ ogaꞌ ive gehepeve Apeleꞌni nesi opoꞌni noluze. Li-imilo. Idoꞌ Alisitobuloꞌ zuho nesi nene ngopoꞌni noluze. Li-ngimilo. \v 11 Idoꞌ neniꞌ neꞌmine Zuda ve minive Helodiaꞌnisi nene opoꞌni noluze. Li-imilo. Idoꞌ Nalakisoꞌ zuho nesi nene Guvetesi veꞌmi zuho nizanako engikisi nene ngopoꞌni noluze. Li-ngimilo. \v 12 Idoꞌ Guvelesi veꞌmi gono amuzo mili daaꞌ asive Tilihainangi Tilihosangi nesi nene ngopoꞌni noluze. Li-ngimilo. Idoꞌ Guvelesi veꞌmi gono vaiꞌ amuzo molo daaꞌ ineꞌ alu Pelesiꞌni nesi nene opoꞌni noluze. Li-imilo. \v 13 Idoꞌ Guvelesi veꞌmi evenele lamineꞌ gehepeve minive Luhuꞌni nesi opoꞌni lo eiꞌ izeleho neniꞌ izeꞌneho gelo minineꞌ nesi nene opoꞌni noluze. Li-ngimilo. \v 14 Idoꞌ Asungilitoꞌ ve Helegoniꞌ ve Helemesiꞌ ve Patalobasiꞌ ve Helemasiꞌ ve idoꞌ leze zuho engikisi makatoꞌ minave nene ngopoꞌni noluze. Li-ngimilo. \v 15 Idoꞌ Hilologoꞌ ve Zuliaꞌ ve idoꞌ Neleakisi alunolosi idoꞌ Olibaꞌ ve idoꞌ Kilisitoꞌ evenele linge ma engikisi nizaniꞌ nesi nene ngopoꞌni noluze. Li-ngimilo. \p \v 16 Lingine nene Oꞌmosoꞌmi evenelelite ilizadoꞌ o minineꞌ monovoloꞌ nene igi adinguꞌ di ge nabutiꞌ ize ne gabutiꞌ ize li minaaꞌ ilo. Idoꞌ Kilisitoꞌ eveneleliti mulise mevola miniꞌmi monadite nene mukiꞌ longopoꞌni nilave. \s1 Eveneꞌ Ma Monoꞌ Di Gopo Igi Li Izesuꞌ Evenele Hizi Hoꞌli-ngidilizavemuꞌ Gizebo Lamineꞌ Igi Engikumuꞌ Olovoꞌ Igi Minilo Lo Pauloꞌ Lineꞌ Gamazi \p \v 17 Neze zuhokizo, gatine do naza amuzo molo tiꞌ lo nolo-lingimuve: Ehetineꞌ neve. Lingine monoꞌ ganakutiꞌ giladoꞌ vo damineꞌ gamazi li-lingimi monokutiꞌ limi ingaliza initekisi idoꞌ hizi hoꞌlilizaniꞌ gamazisi lilizavemuꞌ nene gizebo igi olovoꞌ igi minilo. \v 18 Nene nanitekumuꞌ ve. Aꞌneꞌmine ve ingine nene Guvetesi ve Kilisitoꞌnimuꞌ gelekeleꞌ igaꞌ navoba asi engiꞌ okoꞌnine neꞌmo laniteꞌ gilineꞌ initetokovoꞌ nene gelekeleꞌ igaꞌ nave. Gamazi laniteꞌ ineꞌ gamazi soza saza gamazi lisa ingine golosomuꞌ gilamaveti luꞌine nene golo izi ngeleꞌmize gopo igaꞌ nave. \v 19 Ee, lingine gamazi laminetoꞌ gelekeleꞌ igaꞌ nangumuꞌ guvetine nene mo misubouꞌ misubouꞌ buu lo monineꞌ nenako nemuꞌ nene naza lengikumuꞌ nolize izaaꞌ nouve. Ne neiha lingine monovo laminekumuꞌ nene gili nge li minikevo monovo goloso nene lengitoꞌ vo giꞌmize minamilive lo gele nouve. \p \v 20 Neꞌmine ikevo hongu lo lamino minaaꞌ monovo do sotoꞌ ogaꞌ ive Oꞌmoso neꞌmo nene mine haꞌna amo hize eleꞌ o-lengedo neivo Satanisi eiꞌ zuhosi ngivileꞌ gehepeve igi lingine lisi hupiꞌ izi-ngidaniꞌ geleleseive. \p Guvetesi ve Izesuꞌ nasahiliꞌve nene lengita minivoo. \p \v 21 Nezesi makaꞌ gono daaꞌ usive Timoteoꞌ nene longopoꞌni nolive. Idoꞌ neniꞌ neꞌmini Zuda ve minave Lukiole Zasonile Sosipatelole ingine nesi nene longopoꞌni nilave. \p \v 22 Idoꞌ Pauloꞌ gamazi nolivo luhuvo niteꞌ mene gizuve Teletioꞌ nazasi nene Guvelesi veꞌmi evenele nouvonako longopoꞌni noluve. \p \v 23-24 Idoꞌ Pauloꞌ naza numuꞌveuꞌ ongaaꞌ uve Gaioꞌ eiꞌ nesi nene longopoꞌni nolive. Eze numuꞌveuꞌ nene Kilisitoꞌ evenele mukiꞌ nesi nene mulise milaaꞌ nave. \p Idoꞌ mene numuno ebekuꞌ ngamani moniloꞌ gizebo ogaꞌ ive Elasitoꞌ ve idoꞌ leze zuho Kualatoꞌ ve engiꞌ nesi nene longopoꞌni nilasive. \s1 Pauloꞌ Gamaziꞌve Lo Osuꞌ Lo Oꞌmoso Opoꞌni Lo Lineꞌ Gamazi \p \v 25-26 Naza monoꞌ gamazi lamineꞌ lo soto sotoꞌ nouvoniꞌ neꞌmo nene Oꞌmosoꞌmo monokuꞌ do ngi lo-lengedelidoꞌ o neive lo neineꞌ ve. Aꞌmine gamazi nene Izesuꞌ Kilisitoꞌnimuꞌ gamazi lamineꞌ nene neive. Gamene galaꞌmudatiꞌ vomine aꞌmine sunoꞌ gamazi haleke minineꞌ nene voꞌmo voꞌmo ogo idise mene sotoꞌ nopizive. Ee, heta atoꞌ ve mukiꞌ aꞌmine gamazimuꞌ nene gili gili eleꞌvoleꞌ igi aꞌmidoꞌ gelekeleꞌ igi eꞌmetilizave lo idise nene minevoꞌ minevoꞌ Oꞌmoso neꞌmo lavo polohetelite gizikaniꞌ gamazi nene lo-ngemo aꞌmine gamazi nene heta atoꞌ ve mukita nene lo sotoꞌ nounivo aꞌmine gamazi nene sotoꞌ nopizive. \v 27 Oꞌmoso eiꞌ hamoꞌ nene otohato ve ne neive. Neꞌmine o neize. Laza nene do hozi lo-do Izesuꞌ Kilisitoꞌnimuꞌ ve lo opoꞌni lo minevoꞌ minevoꞌ ogo mineloneꞌ nene okuꞌ lamivoo. Neꞌmine ogo miniliho.