\id PHP  - Dano NT [aso] -Papua New Guinea 1989 (DBL -2014) 
\h HILIPI 
\toc1 Hilipi Numuno Ebekuꞌ Izesuꞌ Evenele Minaniꞌ Neti Luhovo Niteꞌ Pauloꞌ Gize-ngidineꞌ 
\toc2 Hilipi 
\toc3 Hip 
\mt1 HILIPI NUMUNO EBEKUꞌ IZESUꞌ EVENELE MINANIꞌ NETI LUHUVO NITEꞌ PAULOꞌ GIZE-NGIDINEꞌ  
\imt1 Izesuꞌ Evenele Hilipi Ebekuꞌ Minaniꞌ Neti Luhuvo NiteꞌPauloꞌ Gize-ngidingumuꞌ Gomuꞌ Gataaꞌ Gamazi  
\ip Mene luhuvo niteꞌ nene aposoloꞌ Pauloꞌ gizineꞌ ve. Aꞌmine Pauloꞌ monovoꞌvemuꞌ nene Aposoloꞌ bukuuꞌ nene gatelesane. Idoꞌ Izesuꞌ Kilisitoꞌ evenele zuho Loma ebekuꞌ minaniꞌ neti luhuvo niteꞌ Pauloꞌ gize-ngidingumuꞌ gomuꞌ gataaꞌ gamazi gizuningukisi nene eiꞌ Pauloꞌ monovoꞌvemuꞌ nene ma gatelesane. Idoꞌ Pauloꞌ luhuvo niteꞌ mene gizineꞌ nene Izesuꞌ evenele zuho Hilipi ebekuꞌ minaniꞌ nene gize-ngidineꞌ ve. Hilipi ebeꞌ nene Loma velite gizebo aniꞌ polovinisi Makedonia neuꞌ minineꞌ. Aꞌmine polovinisi neutiꞌ nene izi huki disitiliki setaꞌve setaꞌve liliꞌ aniꞌ. Aꞌmine disitiliki nene neꞌmino minineꞌ ve: Makedonia 1 idoꞌ Makedonia 2 idoꞌ Makedonia 3 idoꞌ Makedonia 4 lo minineꞌ ve. Aꞌmine ebeꞌ gahevela nene ngoli moni gihaaꞌ aniꞌ ve. Makedonia aleve ingine nGiliki aleve minaniꞌza Loma veti gizebo veꞌine naba neꞌmo Loma ve adoꞌ ami gonoꞌnidotiꞌ osuꞌ likeve mukiꞌ nene Hilipi ebeta vi minilizave lo ngimisele hulineꞌ ve. nGimiselo Loma ebekuꞌ minineꞌ ngamani neꞌmine gehepeve di sotoꞌ ikevo aꞌmine ebetoꞌ gizebo ilive lo gele ngimineꞌ ve. Nemuꞌ nene aꞌminguꞌ minaniꞌ aleve mukiꞌ ingine nGiliki loutokisi idoꞌ monovolokisi eꞌmetami asi Loma loutokisi monovolokisi eꞌmetilizadoꞌ o minineꞌ ve. Soza oꞌmosoloꞌ eꞌmeti minaniꞌ. Zuda aleve linge ma aꞌminguꞌ minaniꞌza monoꞌ numunoꞌine giziliza votigileloꞌ lisiheꞌ i minamaniꞌ ve. Misubo nabaꞌ nabaꞌ Zulopu ve laaꞌ nanguꞌ numuno ebeꞌ mukiꞌ minangutiꞌ Hilipi ebekuꞌ nene Pauloꞌ aza ganaꞌ apiꞌ ogo Izesuꞌ gamaziꞌve lamineꞌ nene lo sotoꞌ ineꞌ ve. Pauloꞌ aza aꞌmida vineꞌ nene vamutoꞌ Makedonia ve maliꞌmo ezemuꞌ nene Makedoniala ogo hize eleꞌ o-ledezo lo nolivo ningo nemuꞌ Asia Maino (Minor) misubouko minineꞌ ebeꞌ Toloasi neuꞌ ongo mono minineꞌ nene hulo guvo nosoloꞌ ledo vo aꞌmida vineꞌ ve. Aꞌmine Hilipi ebeta vo hetelo mino gamene ma veneꞌ linge ma ingine Oꞌmosola lolone li nosoloꞌ di nubuho igi nizavo aꞌmidoꞌ vo Izesuꞌnimuꞌ lo-ngimineꞌ. Lo-ngemavo veneꞌ ma gulive Lidiaꞌ nesi idoꞌ eze zuho numuno hamokuꞌ makaꞌ ingaaꞌ ave nesi nene luꞌine di velepeꞌ izi Izesuꞌ evenele zuho liliꞌ aniꞌ. Mine do vo alingeꞌ nene Pauloꞌ aza alungo maliꞌmi luloutiꞌ sikalahuꞌ goloso do hulineꞌ. Aꞌmine sikalahuꞌ goloso neꞌmo aꞌmine alungo nene amuzo emavo alingeꞌ sotoꞌ o-ngedelineꞌ initekumuꞌ nene eveneꞌ lo-ngemaaꞌ ineꞌ. Aꞌmine alu nene eveneꞌ maliti goboni alu minineꞌ nenako nemuꞌ nene ingine eveneꞌ ma engitoꞌ sotoꞌ o-ngedelineꞌ initekumuꞌ nene aꞌmine alu neꞌmo lo sotoꞌ ogo lo-lemelive likevo gizebo i-daaꞌ ave nete meni naba daaꞌ aniꞌ ve. Aꞌmine sikalahuꞌ goloso nene Pauloꞌ imisele hulidotiꞌ aꞌmine alu aza alingeꞌ sotoꞌ ilineꞌ initekumuꞌ lo sotoꞌ ogaꞌ ineꞌ amuzoꞌve nene osuꞌ lineꞌ nenako nemuꞌ nene gizebo i-daaꞌ ave ingine Paulongi Silasingimuꞌ ngizeboloꞌ goloso molavo nalaꞌ numunguꞌ huli-ngidaniꞌ. Huli-ngidaniꞌza Oꞌmosoꞌmo lavo mimiꞌ ogo nalaꞌ numunoliꞌmi akahe nene izo siꞌzineꞌ. Neꞌmine idiꞌmo nalaꞌ numudoꞌ gizebo ve ma lulo do velepeꞌ izo gele eleꞌvoleꞌ ogavo idoꞌ Pauloꞌ Izesuꞌnimuꞌ lo-ngemavo eze venele izipahala zuho nesi luꞌine di velepeꞌ izi Izesuꞌ evenele liliꞌ aniꞌ. Aꞌmine mene gamazi mukikumuꞌ nene Aposolo bukuuꞌ lakaꞌni 16 neuꞌ nene gatelesane. Nelotiꞌ mine do vo Pauloꞌ aza Hilipi ebekuꞌ gamene vaitile gidini vineꞌ. Izesuꞌ evenele zuho Hilipi ebekuꞌ minaniꞌ nete Pauloꞌni luꞌine imi idoꞌ gamene masi nene Oꞌmosoꞌmi gono dalingumuꞌ hize eleꞌ i-di initeꞌ imaaꞌ aniꞌ nelotiꞌ nene gamene haꞌna ogo vavo idoꞌ Pauloꞌ Izesuꞌ gamaziꞌve lamineꞌ eveneꞌ lo-ngimingumuꞌ Loma ebekuꞌ nalaꞌ numunguꞌ huli-dikevo neivo gohi initeꞌ ma huli-daniꞌ. Ve ma gulive Epahaloditoꞌ ve lo minineꞌ neꞌmo aꞌmine initeꞌ nene do vo Pauloꞌni emo hize eleꞌ o-delesa ha minineꞌ. Alingeꞌ nene aꞌmine ve aza initeꞌ gize do mo helaatoꞌ minineꞌ. Izesuꞌ evenele zuho Hilipi ebekuꞌ minaniꞌ ingine aꞌminemuꞌ gilii gaꞌine mukiꞌ gilaniꞌ. Aꞌmine Epahaloditoꞌ aza aꞌmine gaꞌine mukiꞌ gilangumuꞌ nene gelo azasi geni bilineꞌ. Neꞌmine ingumuꞌ Pauloꞌ aza Hilipila gohi imisele hulolosa gala gilineꞌ. Izesuꞌ evenele zuho Hilipi ebekuꞌ minaniꞌ nete initeꞌ huli-daniꞌ nene dosa mulunouꞌ lamineꞌ gilingumuꞌ lo-ngemelesa luhuvo niteꞌ gize-ngedo do vo ngemelive lo Epahaloditoꞌni imineꞌ.  
\ip Aꞌmine luhuvo nitekuꞌ nene Hilipi aleve initeꞌ huli-dangumuꞌ tangezoꞌ ve lo-ngedoo aꞌmidoꞌ imineꞌ molo tiꞌ lo-ngimineꞌ: Nalaꞌ numunguꞌ minuvoniꞌ neꞌmo Izesuꞌ gamaziꞌve lamineꞌ buu lo monelineꞌ akaꞌve nene hize tilamive. Asi aꞌmine nalaꞌ numunguꞌ minuvoniꞌ neꞌmo buu lo monelineꞌ akaꞌve nene do ngoloꞌ lineꞌ ve. Neꞌmine ogavo aꞌmine Izesuꞌ gamaziꞌve lamineꞌ nene ngamani nabaꞌmi numuꞌve nabaukisi dizo vineꞌ. Aꞌmine initeꞌ eitoꞌ sotoꞌ ineꞌ neꞌmo Izesuꞌ evenele zuho linge ma nesi nene apiꞌ igi Izesuꞌnimuꞌ amuzo mili li sotoꞌ aniꞌ. Aza gilivo nalaꞌ numungutiꞌ nene huli-nidikevo heta voloniꞌ ogave lo gelo lo-ngimineꞌ. Ne neineꞌza eze gilivo naba o minineꞌ initeꞌ nene Loma vete nalaꞌ numungutiꞌ huli heta i-dilizahe idoꞌ bili hililizahe ilizanguꞌ aza ogo molo ilineꞌ monovo neꞌmo Kilisitoꞌ gulive do hozi lilive. Idoꞌ nalaꞌ numungutiꞌ huli heta i-dilizahe i-damilizahe nene ha ilisaha aza Hilipi aleve ingine Izesuꞌ gamaziꞌve lamineꞌ lovo i imaaꞌ ave nene gili ngimami ha amuzo mili minilizangumuꞌ geleloniꞌ nene lamineꞌ oloseive lo gelaaꞌ ineꞌ. Nemuꞌ nene ingine muluꞌninguꞌ geni amivo Kilisitodoꞌ giꞌmizi amuzo mili minilizadoꞌ o neive lo lo-ngimineꞌ. Idoꞌ Kilisitoꞌ mineꞌmo lemo minineꞌ neꞌmini inginesi miniꞌmi limi minilizangumuꞌ lo-ngimineꞌ. Kilisitokisi Oꞌmososi lisiheꞌ i minasineꞌza Kilisitoꞌ aza aꞌmine Oꞌmososi lisiheꞌ o minineꞌ moꞌmosiꞌve nene hulo haza eveneꞌ loloꞌ ogo lihimeloꞌ ve gelo leliꞌ lihimetemuꞌ lohotoꞌ zaloꞌ hilineꞌ ve. Neꞌmine ingumuꞌ nene lingine neniꞌ lo-lengemelodoꞌ gili divoꞌ minilo lo lo-ngimineꞌ. Neꞌmine lo tiꞌ lo lo-ngidineꞌ: Naza lengikumuꞌ muluꞌneuꞌ lamineꞌ gelelove lo gele nouve. Idoꞌ neꞌmine olongumuꞌ nene lingine lisiheꞌ lamineꞌ minilo.  
\ip Nelotiꞌ nene ingine nadii nizahe nemuꞌ vo ningelive lo Timoteoꞌni imiselo idoꞌ Epahaloditoꞌni nesi nene gohi engita imisele hulolosuve lo lo-ngimineꞌ. Neꞌmine lo alingeꞌ nene luhuvo niteꞌve nene gize osuꞌ lineꞌ gilineꞌza gohi lo-ngemelineꞌ gamazi ma omo galaloꞌ ogavo imineꞌ molo tiꞌ lo lineꞌ: Izesuꞌ evenele zuho gehepeve liliꞌ ili ma nene okodine lolovo hukilo laaꞌ avemuꞌ nene eheꞌ igi minilizave lo gaꞌine daniꞌ. Izesuꞌ evenele zuho ingine nene evenelite okoꞌine losuvola aniꞌ initetoꞌ nene gili eleꞌvoleꞌ isaꞌmave. Neꞌmine lo eiꞌ monovoꞌvemuꞌ gohi lo gaꞌine ineꞌ. Adoꞌ aꞌmine okode losuvoloꞌ ogaꞌ initeꞌ vaiꞌ nevoꞌmine nene eita miningumuꞌ nene lo-ngimineꞌ. Aꞌmine initetoꞌ ha gele eleꞌvoleꞌ ilineꞌza Kilisitoꞌni do minaaꞌ neꞌmo nene aꞌneꞌmine initeꞌ mukiꞌ nene ivileꞌ goloso o neineꞌ nenako nemuꞌ aꞌmine initeꞌ mukiꞌ nene meheꞌnela molokuve lo lo-ngimineꞌ. Nemuꞌ idise gamenela nene Kilisitoꞌ gono dadotiꞌ Okulumokukotiꞌ minevoꞌ minevoꞌ ngemeni dameni dalizave lo Oꞌmosoꞌmo asi lo-ngimineꞌ nene dalosa nemukovoꞌ gelaaꞌ nouve. Neꞌmine lo tiꞌ lo lineꞌ: Neꞌmine ineꞌ neꞌmini inginesi aꞌmineꞌmine ilizave lo lineꞌ.  
\ip Nelotiꞌ nene veneꞌ ma lolize gamazi li minasineꞌ nene hulilisive lo lo-ngedo idoꞌ Hilipi aleve ingine ngolize izivoꞌ mini idoꞌ initeꞌ laminekumukovoꞌ gili minilizave lo lo-ngimineꞌ. Neꞌmine lo ingine initeꞌ huli-dangumuꞌ mulunouꞌ lamineꞌ goloso gilingumuꞌ lo-ngemo ngopoꞌni lo-ngidineꞌ. Luhuvo niteꞌve nene meseꞌ aseka lo-ngedo noꞌnohoꞌ gamazitunuꞌ gize osuꞌ lineꞌ.  
\c 1  
\s1 Hilipi Ebekuꞌ Izesuꞌ Evenele Minaniꞌ Nene Gekeꞌ Lo-ngedo Pauloꞌ Gizineꞌ Gamazi  
\p
\v 1 Pauloꞌ nazasi Timoteokisi Izesuꞌ gelekeleꞌ ve minusive netise nene makatoꞌ mino lengiꞌ Oꞌmosoꞌmi evenele Izesuꞌ Kilisitoda giꞌmizi minave Hilipi numuno ebekuꞌ nizaniꞌ mukiꞌ nesi idoꞌ monoꞌ gizebo vetinesi idoꞌ monoꞌ gonoloꞌ vetinesi lengikumuꞌ nene luhuvo niteꞌ mene nogize-lingiduze. Ningilo.  
\v 2 Oꞌmoso metehosi idoꞌ Guvetesi ve Izesuꞌ Kilisitoꞌ nesi nasahiliꞌ i-lingidikesivo neꞌmo lengiꞌ muludinguꞌ nene hongu minivo mine lamineꞌ igi minilizave lo Oꞌmosola noluve.   
\s1 Pauloꞌ Aza Luhuvo Niteꞌ Gize-ngidive Hilipi Alevemuꞌ Oꞌmosola Lineꞌ Gamazi  
\p
\v 3 Naza lengikumuꞌ giluvoniꞌ gameneloꞌ gameneloꞌ nene Oꞌmosoꞌnela isaaꞌ neve lo laaꞌ nouve.  
\v 4 Idoꞌ aꞌmine lengikumuꞌ Oꞌmosola laaꞌ nouvonguꞌ nene gamene gamene nolizesi minosavoꞌ nene laaꞌ nouve.  
\v 5 Neꞌmino laaꞌ nouvoniꞌ nene nanitekumuꞌ ve. Lingine ganaꞌ apiꞌ igi gamazi lamineꞌ giladotiꞌ mineꞌmo dizo idise nonida neve aꞌmine gamazi lamineliꞌmi gono noduvonguꞌ nene hize eleꞌ i-nidaaꞌ aniꞌ nemuꞌ nene neꞌmino Oꞌmosola nolize izo laaꞌ nouve.  
\v 6 Naza lengikumuꞌ nene tiꞌ lo gele muꞌmusiꞌ o nouve: Lengikuꞌ apiꞌ ogo gono lamineꞌ nodave Oꞌmoso neꞌmo nene gono do do vo neivo Izesuꞌ Kilisitoꞌ alineꞌ gamenela aꞌmine gono nene vo pele gehepeve oloseive.  
\v 7 Idoꞌ lengiꞌ nene luꞌneuꞌ homi do molo nouvoniꞌ ma nene nizanako naza lengikumuꞌ neꞌmine lo gele muꞌmusiꞌ o nouvoniꞌ nene mo lisiheꞌ lamineꞌ o neive. Ee, Oꞌmosoꞌmo nasahiliꞌ o-nedo gono nimineꞌ noduvonguꞌ nene lingine mukitoꞌ hize eleꞌ i-nidaaꞌ aniꞌ adoꞌ nalaꞌ numunguꞌ nouvonguꞌ mesi idoꞌ gamazi lamineꞌ diꞌmi limaaꞌ aveti gamaziꞌine doꞌmo lemoo gamazi lamineꞌ nene doꞌmo dizosa aꞌmine gamaziꞌmi amuzoꞌve do sotoꞌ uvonguꞌ nesi nene hize eleꞌ i-nidaaꞌ aniꞌ nenako nemuꞌ lengiꞌ nene luꞌneuꞌ homi do molo nouve.  
\v 8 Ee, Izesuꞌ Kilisitoꞌ lulo limineꞌ neꞌmo do ote-nedavo aza ogaꞌ neineꞌ neꞌmino muluꞌneuꞌ homine lengikumuꞌ nene huhu lo gele nouve. Neve nene mo laminetoꞌ noluvoniꞌ nene Oꞌmosoꞌmo gele neive.  
\v 9 Idoꞌ lengikumuꞌ Oꞌmosola luvonguꞌ nene tiꞌ lo laaꞌ nouve: Lingine lutine ngemaaꞌ monovotine nene naba oꞌmo vo neivo gatine gili nge li initeꞌ ningi hehe laaꞌ monovo di minilizave.  
\v 10 Adoꞌ monovo ato atoꞌ mukiꞌ izeꞌ mili monovo ma ngivileꞌ igi lamineꞌ gehepeve minaniꞌ monovo nene di kegesi ningi dalizadoꞌ lisiheꞌ i minilizangumuꞌ nene lingine gatine gili nge li initeꞌ ningi hehe laaꞌ monovo di minilizave lo laaꞌ nouve. Idoꞌ lingine neꞌmine ilizadotiꞌ nene Izesuꞌ Kilisitoꞌ alineꞌ gamenela nene lingine lutinguꞌ goloso monovo nomivo okodida gamazitinesi nomivo minikevo  
\v 11 monovo lisiheliꞌmi gihileꞌve Izesuꞌ Kilisitoꞌ do sotoꞌ o-ledaaꞌ neineꞌ nene lengita vaiꞌ laavo aꞌminemuꞌ nene evenelite Oꞌmoso di hozi li opoꞌni lilizadoꞌ lisiheꞌ o mineleseive lo laaꞌ nouve.   
\s1 Izesuꞌ Kilisitoꞌ Gamaziꞌve Lamineꞌ Nene Pauloꞌ Naza Galapuso Numunguꞌ Minuvongukisi Geli Geli Ogo Hize Eleꞌ Ogo Minaaꞌ Nouvoniꞌ Neꞌmini Hilipi Aleve Nene Aꞌmineꞌmine Igi Minilizave Lo Pauloꞌ Lineꞌ Gamazi  
\p
\v 12 Neze zuhokizo, nenita sotoꞌ ineꞌ initeꞌ mene gamazi lamineliꞌmi akaꞌve nene hize tilivoba asi gamazi lamineꞌ hize eleꞌ ineꞌ nenako nemuꞌ nene lingine gililizave lo gelosa nolo-lingimuve.  
\v 13 Ee, naza nalatoꞌ nouvoniꞌ nene Kilisitoꞌnimuꞌ nouvoniꞌ nenako nene mo sotoꞌ o neivo mela Kaesaleꞌ numuꞌveloꞌ gizebo igaꞌ aniꞌ ami pilisi ve mukilitesi idoꞌ eveneꞌ linge mukikisi nene mo ningi gili osuꞌ li nizave.  
\v 14 Idoꞌ nalatoꞌ nouvoniꞌ neꞌmo nene leze zuho linge mukiꞌ nete nene Guvelesi vemuꞌ gili muꞌmusiꞌ i minaniꞌ nene naba goloso ogavo ingine ngehelele izamivo amuzo mili Kilisitoꞌ gamazi nene li sotoꞌ igaꞌ nave.   
\p
\v 15 Idoꞌ eveneꞌ linge malite Kilisitoꞌ gamaziꞌve li sotoꞌ igaꞌ naaniꞌ nene nenikumuꞌ muluꞌninguꞌ goloso o minivo neniꞌ nivileꞌ ilisa nene laaꞌ naaniꞌza linge ma nete Kilisitoꞌ gamaziꞌve li sotoꞌ igaꞌ naaniꞌ nene luꞌine laminetotiꞌ gehepeve li sotoꞌ igaꞌ naave.  
\v 16 Ee, ingine Kilisitoꞌ gamaziꞌve li sotoꞌ naaniꞌ nene naza nalaꞌ numunguꞌ nouvoniꞌ meꞌmo gamazi lamineꞌ nene alete molo-delive losa Oꞌmosoꞌmo neleꞌmize molavo nouvongumuꞌ nene gili mini luꞌine nimisa li sotoꞌ naaha  
\v 17 linge ma meuko luve nete nene gamazi lamineꞌ li sotoꞌ naaniꞌ nene luꞌine laminetotikovoꞌ naavoba asi ingine nene Pauloꞌ nalaꞌ numunguꞌ neinguꞌ nene geni gohi masi do imineꞌ molo-delone liisa engiꞌ okoꞌine di dizilisavoꞌ gamazi lamineꞌ nene li sotoꞌ igaꞌ naave.  
\v 18 Toꞌ o monilize. Gamazi lamineꞌ luꞌine avilelotiꞌ abeleni igi li sotoꞌ ahe idoꞌ luꞌine lamineꞌ gehepevelotiꞌ nene li sotoꞌ ahe neꞌmine manaꞌmine adotikisi nene mo Kilisitoꞌnimuꞌ li sotoꞌ naave loosa nemuꞌ nene nolize izaaꞌ nouve. Ee, aꞌminemuꞌ nene nolizevoꞌ izeꞌmo vo minelesuve.  
\v 19 Idoꞌ naza nene nolize izeꞌmo voovoꞌ minelesuve noluvoniꞌ nene nanitekumuꞌ ve. Lingine nenikumuꞌ ve li Oꞌmosola laaꞌ naavo idoꞌ Oꞌmosoꞌmi Sikalahuliꞌmo hize eleꞌ o-nedaaꞌ neivo neineꞌ neꞌmo nene idise initeꞌ sotoꞌ o-nede neivo nouvongutiꞌ nene ha do nuꞌ izeleseive lo gele nouvongumuꞌ nene nolize izeꞌmo voovoꞌ minelesuve.  
\v 20 Ee, naza novozo ngomosi helamo mino gamene gamene ogaꞌ uvodiꞌmine ogo idisesi nene ha aꞌmineꞌminevoꞌ ogo gamazi nene lovoꞌ kiselevoꞌ ogo lo nouvo neniꞌ okoꞌnedunuꞌ initeꞌ ogo molo oloniꞌ mukiꞌ neꞌmo Kilisitoꞌni nene do naba o-deleseive. Aꞌmine nene adoꞌ minevoꞌ alevoꞌ ogo ha minelohe idoꞌ nibili hilikevo helelohe olonikisi Kilisitoꞌni nene ha do naba o-daakovoꞌ olosuve lo gele muꞌmusiꞌ o nouve.  
\v 21 Nenikumuꞌ neꞌmine noluvoniꞌ nene neemuꞌ noluve: Naza minevoꞌ alevoꞌ ogo mine do voloniꞌ nene Kilisitoꞌ nenita mine molo neivosa eikumukovoꞌ nene minevoꞌ alevoꞌ olosuve. Idoꞌ helo voloniꞌ neꞌmo nene minevoꞌ alevoꞌ ogo mineloniꞌ nesi ivileꞌ ivosa lamineꞌ golosouꞌ vo minelesuve.  
\v 22 Ne neiha okoꞌneꞌvesi ha minevoꞌ alevoꞌ ogo mine do voloniꞌ nene gihile vaiꞌ izelineꞌ gono nene dalosuvonako nemuꞌ nene heleloniꞌ akaloꞌ eꞌmetelove loloniꞌ nene lamineꞌ ilihe idoꞌ minevoꞌ alevoꞌ o do vaaꞌ akaloꞌ eꞌmetelove loloniꞌ nene lamineꞌ ilihe nemuꞌ nene ma gelamuve.  
\v 23 Aꞌmine aka sitaꞌ memuꞌ nene veꞌneheꞌ kaꞌneheꞌ lo nouve. Naza vo Kilisitokisi minaaꞌ nene ivileꞌ o neineꞌ nenako neꞌmine olongumuꞌ laniteꞌ nene ha gele nouha  
\v 24 helo voloniꞌ nene lingine siheleꞌni neꞌmine gopo minilizaniꞌ nenako naza me misubouꞌ okoꞌnesi ha mineloniꞌ neꞌmo nene ivileꞌ ogo lamineꞌ oloseive.  
\v 25 Nemuꞌ nene tiꞌ lo gele eleꞌvoleꞌ gehepeve ogo gele nouve: Naza nibili hilamavo lingine monokumuꞌ lutinguꞌ gulumo avile lisivo minaniꞌ nesi nene do naba oꞌmo vo minelongumuꞌ nene lengiꞌ mukikisi ha mine do vo minelesuuve losa gele nouve.  
\v 26 Idoꞌ neꞌmino lengita gohi ogo mineloniꞌ neꞌmo nene lingine nenikumuꞌ ve li Izesuꞌ Kilisitoꞌni nene vauve ilisa di naba i-dilizadoꞌ minilisave.   
\p
\v 27-28 Neꞌmine manaꞌmine initeꞌ naniteꞌ naniteꞌ neꞌmine sotoꞌ ilihe. Aꞌmingukisi lingine nene Kilisitoꞌ gamazi lamineꞌ gilavete igi mili minilizadoꞌ lisiheꞌ o minineꞌ monovolokovoꞌ nene eꞌmeti igi mili minilo. Neꞌmine igi nizavo naza ogo ninge-lengedelohe idoꞌ hota mino lengikumuꞌ gamazi gelelohe oloniꞌ nene lingine ongovango lamii ha lutine di hamoꞌ i mini monokuꞌ oti pehe li mini monoliꞌmi lovouꞌ nene makaꞌ makatoꞌ lutine gatine hamoꞌ minivo biluvaꞌ i-lingidaaꞌ avete neꞌmine manaꞌmine initeꞌ i-lingidilizangumuꞌ nene lengehelele izamivo gili eleꞌvoleꞌ i nizaniꞌ gamazi lamineꞌ di otilisa nene makatoꞌ amuzo mili nizavoo ningo gelelove. Neꞌmine igi minilizaniꞌ neꞌmo aꞌmine biluvaꞌ i-lingidaaꞌ ave vi tolovo ilizangumuꞌ nene ngelebizosa lingine lukuvo nalizangumuꞌ nene lengelebizeleseive. Neꞌmino sotoꞌ ilineꞌ nene Oꞌmosoꞌmo laavosa eitatiꞌ nene sotoꞌ oloseive.  
\v 29 Idoꞌ neꞌmine noluvoniꞌ nene neemuꞌ noluve: Oꞌmosoꞌmo nasahiliꞌ o-lengedo lingine igi mili ilizaniꞌ aka lehize-lingidineꞌ nene lingine Kilisitoꞌnimuꞌ gili eleꞌvoleꞌ i minilizave losavoꞌ lehize-lingidineꞌ nevoba asi eiꞌ Kilisitoꞌnimuꞌ nene mulumo alumo initeꞌ nesi nene gihilizave losa aꞌmine neꞌmine aka nesi nene lehize-lingidineꞌ ve.  
\v 30 Ee, linginesi nene aꞌmine monoliꞌmi lovouꞌ mene zegeꞌ zegeꞌ igi nizave. Aꞌmine lovouꞌ nene gomuꞌ naza zegeꞌ zegeꞌ ogo nouvo ninganiꞌ idoꞌ idisesi ha zegeꞌ zegeꞌ ogo nouvo gilaniꞌ lovo ma nene neive.   
\c 2  
\s1 Izesuꞌ Kilisitoꞌ Eiꞌ Okoꞌno Doꞌmo Lemo Zou Lo Minidiꞌmine Igi Lengiꞌ Okodine Diꞌmi Limi Zou Li Mini Lengiꞌ Zuhomuꞌ Gilavo Lingivileꞌ Igi Dizi Minilizave Lo Pauloꞌ Lineꞌ Gamazi  
\p
\v 1 Neꞌmino neineꞌ nenako nemuꞌ nene naza agae lo tiꞌ lo nolo-lingiduve: Lingine Kilisitoda giꞌmizi nizaniꞌ neꞌmo hize eleꞌ o-lengedavo idoꞌ Kilisitoꞌ lulo limineꞌ neꞌmo nene lutine do upuhoꞌ o-lengedavo idoꞌ Oꞌmosoꞌmi Sikalahuꞌ neꞌmo lengikisi bizo neivo muludine hukavo mulumoꞌine ningaaꞌ monovo nene lingine di nilizaniꞌ nenako nemuꞌ nene  
\v 2 naza nene nolize gehepeve izeloniꞌ aka nene ma di sotoꞌ i-nidisa neꞌmine igi minilo: Aꞌmine nene adoꞌ lingine lutine gatine di hamoꞌ igivoꞌ mini lutine ngemaaꞌ monovo hamotoꞌ eꞌmeti ge luka neme ne luꞌne geme li mini lutine vo hamoꞌ ogavo hamoꞌ gatinevoꞌ gili minilo.  
\v 3 Lengikuꞌ nene lengikutiꞌ ma ngivileꞌ ogo minelone li okodine hazamuꞌ di dizaaꞌ monovoloꞌ nene eꞌmetilizavoba asi lengiꞌ okodine diꞌmi limi mini lengiꞌ okodinemuꞌ gilaaꞌ naniꞌ nene ivileꞌ ivosa eveneꞌ mamuꞌ gilavo dizo mineleseive.  
\v 4 Lingine hamo hamoꞌ lengiꞌ initetinemukovoꞌ viseꞌ igi minami lingine hamo hamoꞌ eveneꞌ linge ma neti initeꞌinemukisi nene viseꞌ igi hize eleꞌ i-ngidi minilo.  
\v 5 Lengiꞌ lengemeni damenitine nene mo Kilisitoꞌ emeni dameniꞌve gehepeve meꞌminesi nene di minilo:  
\v 6 Adoꞌ aza neve nene mo ganakutiꞌ Oꞌmosoꞌmi emeni dameni gehepevesi minineꞌza aza nene Oꞌmososi lisihetoꞌ minineꞌ moꞌmosiꞌve nene do giliꞌ lo do minelove lo gelamo  
\v 7 aꞌmine amuzoꞌve nene do hulo gelekeleꞌ ve neꞌmineti ngemeni dameni gehepeve do otuho eveneꞌ okode neꞌminesi loloꞌ ineꞌ ve. Eveneꞌ okode neꞌminesi sotoꞌ ogo mino  
\v 8 eiꞌ okoꞌno nene do leme gehepeve noogo Oꞌmosoloꞌ gelekeleꞌ ogo minineꞌ nene Oꞌmosoꞌmo vo heleline lineꞌ gamazilokisi nene gele doosa hilineꞌ ve. Ee, lohotoꞌ zaloꞌ bililizangutiꞌ nene ovozo helo olovoꞌ amo Oꞌmoso gelekeleꞌ o-do eveneꞌ mukiliti veꞌnidoꞌ ve goloso gehepeve neꞌmine loloꞌ ogo lohotoꞌ zalokisi nene hilineꞌ ve.  
\v 9 Neꞌmine ingumuꞌ nene Oꞌmosoꞌmo doꞌmo dizo dizo mo moꞌmosiꞌ nabaloꞌ goloso hozine hulo-doo eiꞌ gulive do hozi lo-dineꞌ neꞌmo nene gulive ato atoꞌ mukiꞌ nene ngivileꞌ ogosa minineꞌ ve.  
\v 10 Idoꞌ neꞌmine ineꞌ nene Okulumokuꞌ nizaniꞌ initekisi misuboloꞌ nizanikisi misubo lulouꞌ nizanikisi mukitoꞌ Izesuꞌ gulive lilizadoꞌ nene obuvoꞌine hizi imi  
\v 11 mukitoꞌ Izesuꞌ Kilisitoꞌ neve nene Guvelesi ve naba neive li li sotoꞌ ilizave losa neꞌmine ineꞌ ve. Idoꞌ Izesuꞌni neꞌmine i-dikevo neꞌmo nene meleho Oꞌmoso neꞌmi guvele nene voloseive.   
\s1 Nenitoꞌ Gelekeleꞌ I-nidi Mini Oꞌmosoꞌmo Do Lunguꞌ Izelineꞌ Neꞌmi Gihile Di Sotoꞌ Iꞌmi Vi Minilizanguꞌ Nene Sonohiꞌ Neꞌminisa Veꞌne Veꞌne Ili Minilizave Lo Pauloꞌ Lineꞌ Gamazi  
\p
\v 12 Luꞌne lengeme nouvoniꞌ alevekizo, Izesuꞌ aza nene Oꞌmoso neꞌmino gelekeleꞌ o-do minineꞌ nenako nemuꞌ nene lingine aꞌmineꞌmine igi gelekeleꞌ igi minilo. Gomuꞌ naza lengikisi minuvonguꞌ gamene gamene gelekeleꞌ i-nidaaꞌ aniꞌ maꞌmine igi mini idise naza lengikisi minamuvodoꞌ nene aꞌmine gomuꞌ monovotine nene ivileꞌ igisa gelekeleꞌ gehepeve i-nidilo. Naza tiꞌ lo nolo-lingimuve: Oꞌmosoꞌmo do lunguꞌ izelineꞌ nenaze. Neꞌmi gihile di sotoꞌ ilizangisi lengiꞌ nene ladise ogalone li golise gili luvo luvo izi minisa nene amuzo mili gono dalo.  
\v 13 Neꞌmine noluvoniꞌ nene nanitekumuꞌ ve. Oꞌmosoꞌmo gilivo lamineꞌ ilineꞌ initeꞌ olone li gilisa lingine aꞌmine initeꞌ ilizadoꞌ nene do upuhoꞌ noo-lengedo asiꞌve Oꞌmoso neve nene lengikuꞌ omo mino gono nodave.  
\v 14 Nemuꞌ nene lingine neꞌmine manaꞌmine initeꞌ igi mili minilizanguꞌ nene nulu nulunga li lihiteheka li lovo lolize amisavoꞌ nene igi mili minilo.  
\v 15 Idoꞌ neꞌmine igi minilizave lo noluvoniꞌ nene nanitekumuꞌ noluve: Lingine nene okodidoꞌ gamazi nomivo mini lutingukisi goloso monovo nomivo mini me misubouꞌ aleve aka lisihetoꞌ vami zovoꞌ zavaꞌ izi vaaꞌ aveti vovoꞌninguꞌ nene Oꞌmosoꞌmi izipahala zuho lengita goloso niteꞌ ma giꞌmizamineꞌ minilizangumuꞌ nene neꞌmine ilizave losa noluve. Neꞌmine igi mini aꞌmine me misubouꞌ aleveti vovoꞌninguꞌ mene sonohiꞌ neꞌminisa veꞌne veꞌne ili mini  
\v 16 minevoꞌ minevoꞌ minaaliꞌmi gamazi nene di hozi li minikevo naza lotiꞌ hazamuꞌ izo minuvoniꞌ nomive lo idoꞌ amuzo molo gono hazamuꞌ do minuvoniꞌ nomive losa Kilisitoꞌ alineꞌ gameneloꞌ nene lengikumuꞌ lo sotoꞌ ogo nolize izelodoꞌ minelesuve.  
\v 17 Neze nene nibili hililizahe gelamuha neꞌmine ma ikevo vanise lepeloniꞌ nene lingine Kilisitoꞌnimuꞌ gili eleꞌvoleꞌ igaꞌ naaniꞌ nene sipisipi Oꞌmoso imilisa bilaaꞌ naaniꞌ neꞌmino neivo aꞌmine nene lingine mo Oꞌmoso lehizi-di nizadoꞌ neniꞌ vaniseꞌne lepeloniꞌ nene aꞌmidoꞌ imineꞌ molo mineleseive losa nolize noizuve. Idoꞌ aꞌminemuꞌ nolize izeloniꞌ nene lengiꞌ mukikisi makaꞌ lolize izelesune.  
\v 18 Idoꞌ neꞌmine oloniꞌ nene lingine aꞌmineꞌmine igi longolize iziisa nenikisi makatoꞌ lolize izelonidoꞌ o neive.   
\s1 Timoteongi Epahaloditongi Nene Engita nGimiselelove Loosa Engiꞌ Monovo Danavaꞌine Pauloꞌ Lo-ngimineꞌ Gamazi  
\p
\v 19 Naza lengiꞌ nene nadii nizahe lo aꞌminemuꞌ gelosa muluꞌneuꞌ lamineꞌ gelelove loo Guvelesi ve Izesuꞌ luloloꞌ nolineꞌ nene Timoteoꞌni lengita nene liteꞌ losa imiselelove losa gele nouve.  
\v 20 Idoꞌ Timoteoꞌni neꞌmine nene nenikisi mela ma minamave. Asi eiꞌ hamoꞌ nene neniꞌ gelaaꞌ nouvodiꞌmine ogo gilivo bizo minusive mino lengikumuꞌ gehepeve ogo minelive ne neive.  
\v 21 Idoꞌ linge ma mukiꞌ nete nene engiꞌ initeꞌinemukovoꞌ gili minisa Izesuꞌ Kilisitoꞌ gonoꞌvemuꞌ nene ma gilisaꞌmave.  
\v 22 Idoꞌ Timoteoꞌ monovoꞌve lamineꞌ mamuꞌ nene lingine mo gili nizaniꞌ ma neive. Aza nene nenikisi melehoi gipelei neꞌmine loloꞌ ogo monoꞌ gamazi laminetoꞌ nene gelekeleꞌ ogo do hutileꞌ ogo minaaꞌ nousive.  
\v 23 Neꞌmino minaaꞌ nousingumuꞌ lengita imiselelove nene eiꞌ ve losa gelo neniꞌ okoꞌnela initeꞌ sotoꞌ ilineꞌ ma nene vo nadiꞌ nadiꞌ ilihe ninge minosa liteꞌ lo lengita imiselelove lo giluve.  
\v 24 Idoꞌ Guvelesi vemuꞌ gele eleꞌvoleꞌ o nouvoniꞌ nenako nemuꞌ nene neniꞌ nesi mo liteꞌ lo lengita alosuve losa gele muꞌmusiꞌ o nouve.   
\p
\v 25 Idoꞌ nenikisi gono doo monoliꞌmi lovouꞌ makatoꞌ zegeꞌ zegeꞌ ogo minusive leze zuho lengiꞌ imiselikevo ogo nasahiliꞌ o-nedo minaaꞌ ive Epahaloditoꞌ nene naza lengita tineꞌ molo vilidoꞌ o neive lo gelosa gohi lengita imiselelesa nouve.  
\v 26 Nene nanitekumuꞌ ve. Aza lengiꞌ mukikumuꞌ nene gohi ningelove lo lulouꞌ huhu lo gelo mininguꞌ nene aza initeꞌ gize do miningumuꞌ lingine gilangumuꞌ nene gelosa gala mukiꞌ goloso nogilive.  
\v 27 Ee, laminetoꞌ eiꞌ nene mo initeꞌ gize do helaatoꞌ mine molaniꞌza Oꞌmosoꞌmo do uꞌ izineꞌ ve. Idoꞌ neꞌmine ineꞌ nene eikovoꞌ neꞌmine o-damive. Nenikisi nene geni geho mino aꞌminemuꞌ mulumo gelo nouvonguꞌ mene gohi mulolo kaloloꞌ ogo mulumo gele-daline losa Oꞌmosoꞌmo nenikisi nene do nuꞌ izive.  
\v 28 Idoꞌ aza lengikumuꞌ mulunouꞌ huhu lo gelo mino lengikumuꞌ gala mukiꞌ gelo minineꞌ nenako nemuꞌ nene lingine eze ningisa muludinguꞌ lamineꞌ gohi nigilavosa nezela mulumo minineꞌ nene ngomo ilive lo gelo lengita imiselelongumuꞌ luꞌne nene amuzo molo otavo imiselelesa nouve.  
\v 29 Neꞌmine olosuze. Lengiꞌ nene Izesuꞌ Kilisitoꞌ zuholiti sunoloꞌ eꞌmeti longolize naba izi minisa eleꞌmize lamineꞌ ilo. Lingine nene neꞌmine vemuꞌ gilavoo dizosa minelidoꞌ o neive.  
\v 30 Idoꞌ ezemuꞌ nene lingine gilavoo dizosa minelidoꞌ o neive noluvoniꞌ nene nemuꞌ noluve. Aza nene lengitoꞌ medelo mino neniꞌ nene nasahiliꞌ o-nedelove loosa eiꞌ minevoꞌ alevoꞌve hulo labuluvo ogo Kilisitoꞌ gonoꞌve hize eleꞌ ogo mininguꞌ nene hilingutiꞌ hakaave.   
\c 3  
\s1 Okode Losuvoꞌmi Initetoꞌ Gele Medelamo Mino Oꞌmosoꞌmi Sikalahuliꞌmo Hize Eleꞌ O-lididiꞌmo Oꞌmoso Gubiꞌ Ize Emo Izesuꞌ Kilisitoꞌni Do Hozi Lo-daaꞌ Nounive Netevoꞌ Nene Oꞌmosoꞌmi Noso Do Noneꞌ Nenako Oꞌmosoꞌmi Noso Molaakumuꞌ Okodine Lolovo Hukilizave Laaꞌ Avemuꞌ Eheꞌ Igi Minilo Loo Pauloꞌ Eiꞌ Monovomuꞌ Lo-ngimineꞌ Gamazi  
\p
\v 1 Neze zuhokizo, gamazi nene mo gize lengemekuvoniꞌza ma neineꞌ nene lo-lengemeloze. Gililo. Guvelesi vemuꞌ nene longolize iziisa nene minilo. Gomuꞌ lo-lingimuvoniꞌ gamazi gohi gize lengemaakumuꞌ nene naza giluvo goseleꞌ nebelamive. Idoꞌ gohi gize lengemeloniꞌ meve nene lengiꞌ gopo aka vilizadotiꞌ nene alete molo-lengedelineꞌ nenako nemuꞌ nene tiꞌ lo nolo-lingimuve:  
\v 2 Goloso gono daaꞌ ave gulo neꞌmine minavemuꞌ nene eheꞌ igi minilo. Ee, Zuda veti monovoloꞌ eꞌmetisa Oꞌmosoꞌmi noso nomulube li Izesuꞌ evenele lengiꞌ okodine di goloso igi huki-lingidilisa laaꞌ avemuꞌ nene eheꞌ igi ningisa minilo.  
\v 3 Neꞌmine noluvoniꞌ nene neemuꞌ noluve. Oꞌmosoꞌmi noso gihile neve nene leliꞌ okode losuvoꞌmi initetoꞌ nene gele medelamuba asi Oꞌmosoꞌmi Sikalahuꞌ neꞌmo hize eleꞌ o-lididiꞌmo Oꞌmoso gubiꞌ ize emo Izesuꞌ Kilisitoꞌnimuꞌ lolize izo mino ezeloꞌ gele medele minaaꞌ nounive netevoꞌ nene do none.  
\v 4 Okode losuvoꞌmi initetoꞌ gele medelamuba neniꞌ nene okoꞌne losuvoꞌmi initetoꞌ ma gele medelelove lo giluvodini aꞌmine gele medelelodoꞌ o minineꞌ initeꞌ nene nenita ha neive. Ee, eveneꞌ malite gele medelelonidoꞌ o neineꞌ initeꞌ nene leliꞌ okodela ma do none li gili nilizaniꞌ nene neniꞌ ngivileꞌ ogo neꞌmine laniꞌ initeꞌ nene vaiꞌ do nouve.  
\v 5 Adoꞌ nemuꞌ noluve: Naza nene sotoꞌ uvodotiꞌ gamene seveni ogo vavo eitiloꞌ nene Oꞌmosoꞌmi noso mili-nidi okoꞌne lolovo huki hulaniꞌ ve. Idoꞌ naza Isilaeleꞌ aleveutiꞌ Benizaminiꞌ aꞌvopilemoꞌ zuhoutiꞌ sotoꞌ uvoniꞌ ve. Ee, izeꞌne meꞌne neniꞌ gidasive nene Hebilaioꞌ aleve minasineꞌ nenako naza nene Hebilaioꞌ ve gihile ne nouve. Idoꞌ Moseꞌ louꞌ gamaziꞌveloꞌ eꞌmete gehepeve igi minaaꞌ ave Halisaioꞌ veti muliseuꞌ vo giꞌmizuve mino  
\v 6 aꞌmine Halisaioꞌ monokumuꞌ gilingili ogo minuvodiꞌmo nene Izesuꞌ evenele zuho goboni malaꞌ malaꞌ o-ngedaaꞌ uvoniꞌ ve. Moseꞌ louꞌ gamaziꞌve neꞌmo ve lisiheꞌ minilizave nete nene neꞌmine neꞌmine ilisaave lidoꞌ nene eꞌmete osuꞌ lo naza nene aꞌmine louꞌ avutoꞌ amo gamaziꞌne nomineꞌ minuvoniꞌ ve.  
\v 7 Neꞌmine ve minuvoniꞌza aꞌmine neꞌmine monovo nete nene di naba i-nidilizadoꞌ o neive lo giluvoniꞌ initekumuꞌ nene naza alingeꞌ Kilisitoꞌ evenele loloꞌ ogosa gaꞌne giluvoniꞌ nene mo haza niteꞌ gehepeve liliꞌ ikeve.  
\v 8 Idoꞌ neevoꞌ nomive. Naza Guveꞌnesi ve Izesuꞌ Kilisitoꞌnimuꞌ ningo gelaaꞌ neꞌmo initeꞌ mukiꞌ nene ngivileꞌ gehepeve ogo initeꞌ naba ve lo gelo initeꞌ mataꞌ mukikumuꞌ nene giluvoo mukiꞌ nene haza niteꞌ gehepeve liliꞌ ikeve. Ee, initeꞌ mataꞌ mukikumuꞌ nene giluvoo pipiza initeꞌ gehepeve liliꞌ ikevoo Kilisitoꞌni nene do tiꞌ olongumuꞌ ve loo initeꞌ mataꞌ mukiꞌ nene huluve.  
\v 9 Ee, initeꞌ mataꞌ mukiꞌ huluvoniꞌ nene Kilisitoꞌni do tiꞌ ogo ezela mine molo minosa ve lisiheꞌ loloꞌ oloniꞌ nene louꞌ gamaziloꞌ eꞌmetosa nenitatiꞌ do sotoꞌ ogo loloꞌ olovoba asi Kilisitoꞌnimuꞌ gili eleꞌvoleꞌ igaꞌ ave nene gili eleꞌvoleꞌ ikevosavoꞌ nene Oꞌmosoꞌmo ve lisiheꞌ loloꞌ o-ngedaaꞌ neineꞌ neꞌmine ogo naza ezemuꞌ gele eleꞌvoleꞌ okuvoo ve lisiheꞌ loloꞌ o-nidivoo minelongumuꞌ ve loo  
\v 10 idoꞌ ezemuꞌ ningo gelo hilingutiꞌ otineꞌ amuzo do neineꞌ neꞌmo nene nenitasi mine molo neivo mino aza gomuꞌ mulumo alumo geni gehaaꞌ ineꞌ maꞌmino nazasi nene makatoꞌ geho mino idoꞌ eze hilineꞌ monovo danava nene nenita minivo mino  
\v 11 nazasi helelongutiꞌ ma otelodoꞌ o minelongumuꞌ ve losa initeꞌ mataꞌ mukiꞌ nene huluve.   
\s1 Hozi Okulumokuꞌ Minevoꞌ Minevoꞌ Ogaꞌ Nene Dalohe Loo Dalongumuꞌ Nene Amuzo Molo Lotiꞌ Izo Novuze. Neniꞌ Ogo Molo Uvodoꞌ Nene Neꞌmetilizave Lo Pauloꞌ Lo-ngimineꞌ Gamazi  
\p
\v 12 Neꞌmine monovo nenita minelive lo noluvoniꞌ nene nenita mudise minavo Oꞌmosoꞌmo mudise do lisiheꞌ gehepeve o-nedavosa noluvoba asi Izesuꞌ Kilisitoꞌ aza neniꞌ do tiꞌ ineꞌ nene neꞌmine monovo do mineline losa do tiꞌ o-nidineꞌ nenako nemuꞌ nene aꞌmine luvoniꞌ monovo nene naza do tiꞌ olosa aꞌminemuꞌ amuzo molo do novuve.  
\v 13 Neze zuhokizo, aꞌmine initeꞌ nene mo dokuve losa gele nouvoba asi initeꞌ hamoꞌ meve nene ogaꞌ nouve: Gomuꞌ initeꞌ mukikumuꞌ nene mo hulo meheꞌnela ogosa alingeꞌ initeꞌ veꞌnela neineꞌ initeꞌ nene dalohe lo ahanga o do aꞌmida nene novo  
\v 14 Oꞌmosoꞌmo Izesuꞌ Kilisitoda mine molo mino Okulumokuꞌ hozi minevoꞌ minevoꞌ ogaꞌ iline lo elese molo-nidineꞌ nene do gihile izo meniꞌne neꞌmine aꞌmine Okulumokuꞌ minevoꞌ minevoꞌ ogaꞌ nene dalove losa daloniꞌ makila nene amuzo molo lotiꞌ izo vo nouve.  
\v 15 Nemuꞌ nene laza monokuꞌ lodive ogo nonive nete nene idise luvoniꞌ gamazi menemuꞌ nene hamoꞌ gatevoꞌ gelelone. Idoꞌ lengikutiꞌ malite gatine atoliꞌmine ma gililizaniꞌ nene aꞌminemukisi nene Oꞌmosoꞌmo do lisiheꞌ ogo lengelebizeleseive.  
\v 16 Neꞌmine oloseineꞌza laza monokuꞌ mo gele noneꞌ gamazi nene do giliꞌ lo mino aꞌmine gamazi gehepevelokovoꞌ nene eꞌmeto ogo molo mine do dizelonidoꞌ o neive.   
\p
\v 17 Neze zuhokizo, naza ogo molo ogaꞌ nouvodoꞌ nene apiꞌnapiꞌ igi mini leliꞌ lengelebizuuneꞌ monovo neꞌmidoꞌ eꞌmeti igi mili minaaꞌ aveloꞌ nene ngamamaka mili ningi minisa nene aꞌmineꞌmine ilo.  
\v 18 Neꞌmine ve nene ningi minisa ngeꞌmetilo noluvoniꞌ nene neemuꞌ noluve: Eveneꞌ mukiꞌ minaniꞌ neti monovoꞌinemuꞌ nene mo gomuꞌ gamene mukiꞌ lo-lingimuvoniꞌ ve. Idoꞌ idise nene mulumoꞌine gelosa veꞌne novozo doꞌmozeꞌ mozeꞌ neivosa engiꞌ monovomuꞌ nene gohi tiꞌ lo nolo-lingimuve: Ingine igi mili minaaꞌ naaniꞌ monovo neꞌmo nene Kilisitoꞌ lohotoꞌ zaloꞌ hilineꞌ monoꞌ mamuꞌ nene biluvaꞌ liliꞌ i-daaꞌ naaniꞌ gele neive.  
\v 19 Neꞌmine igi mili minadotiꞌ gihileꞌve sotoꞌ ilineꞌ nene vo tolovo ogaꞌ ne neive. Engiꞌ Oꞌmosoꞌine neve nene okoꞌineꞌmo laniteꞌ gelaaꞌ neineꞌ initeꞌ mataꞌ mukiꞌ nete nene liliꞌ ikeve. Ingine ngovozo hililizadoꞌ o neineꞌ initekumuꞌ nene okoꞌine di dizi mini luꞌine nene me misubouꞌ initetokovoꞌ mili minaaꞌ nave.  
\v 20 Idoꞌ Izesuꞌ evenele leliꞌ gotoꞌ numude nene Okulumokuꞌ nenako ingine neꞌmine igi minaaꞌ naaniꞌ nene mo edamive. Ee, do luꞌ izelive Guvelesi ve Izesuꞌ Kilisitoꞌ aza Okulumokutiꞌ alingumuꞌ nene gilingili ogo gizebo ogo none.  
\v 21 Idoꞌ alineꞌ nene initeꞌ mataꞌ mukiꞌ ezeloꞌ do gelekeleꞌ o-ngedelidoꞌ o minineꞌ amuzoꞌve nedunuꞌ nene idise mene nge lamineꞌ misubouꞌ okode nene do velepeꞌ izo eiꞌ okoꞌno atoliꞌmine ogo minineꞌ neꞌmine do otuho-ledeleseive.   
\c 4  
\p
\v 1 Neꞌmine ilineꞌ nenako nemuꞌ nene neze zuho luꞌne lengeme mino lengikumuꞌ ogaꞌ uvo aleve adoꞌ muluꞌneuꞌ gulumo avile lisivo minaaꞌ nouvo aleve adoꞌ gonoꞌnelotiꞌ gihileꞌve gonolise niteꞌ neꞌmine do mineloniꞌ alevekizo, ongovango lamii Guvelesi vela eleꞌvoleꞌ igi giꞌmizi giliꞌ li minilo.   
\s1 Ogo Molo Minaaꞌ Monovomuꞌ Lo nGoloꞌ Lo Pauloꞌ Lo-ngimineꞌ Gamazi  
\p
\v 2 Gaza Zuvodiaꞌ nesi idoꞌ Sidikeꞌ geiꞌ nesi lingine sitatoꞌ nene Guvelesi veꞌmi evenele nizasineꞌ nenaze. Lutine gatine di hamoꞌ igi minilisive lo gatine do agae lo nolo-lingimuve.  
\v 3 Ee, idoꞌ gono makaꞌ daaꞌ usive gihile geita nene tiꞌ lo noluve: Alungo netise Izesuꞌ gamazi lamineꞌ nene di otilisa monoliꞌmi lovouꞌ nene zegeꞌ zegeꞌ igi minasineꞌ nenako nemuꞌ nene gaza uva li di bizilisize. Hize eleꞌ o-ngedelesane. Ee, inginesi nenikisi Kelemedokisi idoꞌ gono makaꞌ daaꞌ unive lingesi nene makatoꞌ monoꞌ gonouꞌ nene zegeꞌ zegeꞌ uneꞌ ve. Aꞌmine aleveti guliveꞌine nene Oꞌmosoꞌmo minevoꞌ minevoꞌ ngemeni dameni ngemeliveti guliveꞌine gize molaaꞌ neineꞌ bukuꞌveuꞌ nene gize neive.  
\v 4 Idoꞌ lingine gamene gamene Guvelesi vemuꞌ longolize izivoꞌ minilo. Idoꞌ gohi tiꞌ lo noluve: Longolize izivoꞌ minilo.  
\v 5 Hongu livoꞌ minaaꞌ naniꞌ monovotine nene ningilizaze. Eveneꞌ mukita di sotoꞌ igi ngelebizilo. Guvelesi ve nene mo avitoꞌ oganaze.  
\v 6 Initeꞌ mukikumuꞌ muludine otavo gituhoꞌ namii mini asi aꞌmine initeꞌ mukikumuꞌ nene Oꞌmosola li vokuꞌ laaꞌ igi idoꞌ isaaꞌ neve laaꞌ igi mini initeꞌ mamuꞌ longoꞌ ilisa gilaniꞌ initekumuꞌ nene Oꞌmoso li-imaaꞌ igi minilo.  
\v 7 Neꞌmine ikevo Izesuꞌ Kilisitoda giꞌmizi nizaniꞌ neꞌmo Oꞌmosolatiꞌ hongu monovoꞌve adoꞌ leliꞌ evenelitesi gelaaꞌ nouneꞌ nene ivileꞌ goloso ivosa atoliꞌmine neineꞌ neꞌmo nene lutidoꞌ gatidoꞌ nene alete molo-lengedo gizebo oloseive.   
\p
\v 8 Neze zuhokizo, gamazi adoꞌ meve nene ma lo-lengemelouze. Gililo. Lingine minilizanguꞌ nene monovo lamineꞌ goloso adoꞌ evenelite di hozi lilizadoꞌ lisiheꞌ o nolineꞌ monovo nevoꞌminemukovoꞌ nene gatine gilisa minilo. Aꞌmingutiꞌ linge neve nene adoꞌ initeꞌ gihile laminekumupe initeꞌ lisiheꞌ gehepevemupe golososi minamineꞌ initekumupe ninge lamineꞌ daaꞌ initekumupe initeꞌ guvele laminekisi neineꞌ initekumupe nevoꞌmine initekumukovoꞌ nene gilisa minilo.  
\v 9 Idoꞌ neniꞌ apize lingimuvo nenitatiꞌ daniꞌ monovosi idoꞌ neniꞌ noluvoo gilaniꞌ monovosi idoꞌ ningi nizavo ogo molo uvoniꞌ monovosi nene lingine di gono veleuꞌ mili igi mili minilo. Neꞌmine ikevo hongu lo lamino minaaꞌ monovo do sotoꞌ o-ledaaꞌ neineꞌ Oꞌmoso neꞌmo nene lengikisi mine molo minelive.   
\s1 Pauloꞌ Ebeꞌ Mauꞌ Galapusoloꞌ Vo Neivo Hilipi Alevete Nosoꞌ Nitekisi Idoꞌ Initekisi Nevoꞌmine Imangumuꞌ Isetine Ve Lo nGopoꞌni Lineꞌ Gamazi  
\p
\v 10 Lingine gamene haꞌna ha minisa nenikumuꞌ gili nizaniꞌ monovotine nene gohi di sotoꞌ aniꞌ nemuꞌ nene Guvelesi vela nolize naba noizuve. Lingine gomuꞌ nene nenikumuꞌ gili minaniꞌza aꞌmine nenikumuꞌ ha gili minaniꞌ di sotoꞌ ilizaniꞌ aka nene ma sotoꞌ o-lengedamive.  
\v 11 Naza neꞌmine manaꞌmine initeꞌ sotoꞌ o-nidivoo mineloha aꞌmine neꞌmingukisi nene lamineꞌ minaaꞌ monovo nene mo ningo otohato o nouvoniꞌ nenako nemuꞌ nene naza nolize noizuve noluvoniꞌ nene naza initekumuꞌ ma viseꞌ ogosa initeꞌ ma hize eleꞌ i-nidilizave losa lamuve.  
\v 12 Gamene ma initeꞌne nomivo viseꞌ ogaꞌ uvoniꞌ ve. Idoꞌ gamene ma nene initeꞌ mataꞌ vaiꞌ ha neivo minaaꞌ uvoniꞌ ve. Nemuꞌ nene neꞌmine manaꞌmine ogo minaaꞌ monovomuꞌ nene mo otohato ogo mino mo hizo gele nouve. Adoꞌ naza initeꞌne vaiꞌ logavo gatuꞌne ivosavoꞌ minelohe idoꞌ initeꞌne nomivo viseꞌ ogo gaꞌna helo minelohe olongukisi lamino minaaꞌ monovo nene mo otohato ogo gele nouve.  
\v 13 Ee, naniteꞌ naniteꞌ sotoꞌ o-nedelihe aꞌmine mukikuꞌ nene do amuzo molo-nedaaꞌ ive Kilisitoda nene lehete o mino eleꞌvoleꞌ ogo ha ogo molo minelodoꞌ o nouve.  
\v 14 Ne neiha lingine initedunuꞌ hize eleꞌ i-nidadiꞌmo neniꞌ geniꞌne gihuvonguꞌ nene makatoꞌ lengikisi gihuneꞌ gilineꞌ nenako lingine monovo laminetoꞌ eꞌmeti neꞌmine aniꞌ nene mo lamineꞌ ve.   
\p
\v 15 Idoꞌ Hilipi alevekizo, langisetine nene mo gili nizaniꞌ ma neive. Naza ganaꞌ ogo Kilisitoꞌ gamazi lamineꞌ lo-lengemo minuvodotiꞌ aꞌmine Makedonia misubotine hulo vuvonguꞌ nene monoꞌ mulise malitesi monoꞌ gonoꞌne dalongumuꞌ hize eleꞌ i-nidi moni ma nimavo duvoniꞌ nevoba asi lengikovoꞌ nene neꞌmine igi initeꞌ nimavo nenikisi gono makaꞌ gihuuneꞌ ve.  
\v 16 Ee, olihe misubo mala vamo ha Tesalonika numuno ebeta minuvongukisi viseꞌ uvo initeꞌ nene lengiꞌ ma huli-nidi hize eleꞌ i-nidaniꞌ nene gamene hamokovoꞌ nevoba asi gohi gohi neꞌmine aniꞌ ma neive.  
\v 17 Lingine initeꞌ ma nimilizave lo gele noosa noluvoba asi initeꞌ ma nimikevo neꞌmi gihileꞌve nene vo naba ogosa aꞌmine gihile nene lengikumuꞌ ha ize-lengede minelive lo gele minosa noluve.  
\v 18 Ne neiha initeꞌ mukiꞌ naza viseꞌ uvoniꞌ votigile nene ivileꞌ ivosi mo do osuꞌ lokuve. Lingine huli-nidaniꞌ initeꞌ nene Epahaloditoꞌ do nemavosa neniꞌ votigileloꞌ nene vo dosa vaiꞌ lave. Aꞌmine huli-nidaniꞌ initeꞌ nene unuvo laminekisi initeꞌ Oꞌmosoꞌmo ninge lamineꞌ do mulunouꞌ lamineꞌ gelelidoꞌ o minineꞌ initeꞌ neꞌmine nene lehizi-dave.  
\v 19 Idoꞌ lingine Izesuꞌ Kilisitoda giꞌmizi minangumuꞌ nene Oꞌmosoꞌne neꞌmo nene initeꞌve atoliꞌmine ogo vaiꞌ goloso lo miningutiꞌ nene lingine viseꞌ iliza initetoꞌ nene vauve elo golo hizo lengemo mineleseive.  
\v 20 Idoꞌ meteho Oꞌmoso eiꞌ opoꞌni loꞌmo vo mineloneꞌ nene osuꞌ lamo mine do voovoꞌ minelive. Mo neꞌmino minilihoo.   
\s1 Gamazi Gize Osuꞌ Losa Paulolesi Makaꞌ Minavete nGopoꞌni Laniꞌ Gamazi Gizineꞌ  
\p
\v 21 Naza Izesuꞌ Kilisitoda vi giꞌmizi Oꞌmosoꞌmi evenele liliꞌ ave nene ngopoꞌni noluze. Li-ngimilo. Leze zuho mela nenikisi makaꞌ nonive nete longopoꞌni nilaze. Li-ngimilo.  
\v 22 Idoꞌ Izesuꞌ evenele mukiꞌ nete longopoꞌni nilaha engikutiꞌ guvelesi ve naba Kaesaleꞌ numunguꞌ minaaꞌ ave nete nene longopoꞌni naba goloso nilave.   
\p
\v 23 Guvelesi ve Izesuꞌ Kilisitoꞌ nasahiliꞌve nene lengiꞌ lutinguꞌ mine molo minivoo.