\id JAS  - Dano NT [aso] -Papua New Guinea 1989 (DBL -2014) 
\h ZAKOBOꞌ 
\toc1 Zakoboꞌ Gizineꞌ Luhuvo Niteꞌ 
\toc2 Zakoboꞌ 
\toc3 Zak 
\mt1 ZAKOBOꞌ GIZINEꞌ LUHUVO NITEꞌ  
\imt1 Zakoboꞌ Gizineꞌ luhuvo Niteꞌ Gomuꞌ Gataaꞌ Gamazi  
\ip Monoꞌ Godolo Gosohokuꞌ nene eveneꞌ setihami guliveꞌine hamoꞌ guliveꞌine minineꞌ minaniꞌ nene Zakoboꞌ ve lisa minaniꞌ nemuꞌ gataaꞌ noune. Ma nene Zebedaioꞌ gipele minineꞌ nene Zohaneꞌ uvoloho ve. Idoꞌ aꞌmine nene Izesuꞌ izipahala zuho tuvelutiꞌ minineꞌ ve. Aza nene eveneꞌ naba Helodeꞌ neꞌmo luvono gitilo lavo aꞌmine Zakoboꞌni nene luvono gitaniꞌ. Aꞌminemuꞌ nene Aposolo Gono Di Minaniꞌ Monovo gizaniꞌ nene lakaꞌni 12 idoꞌ goholo 1 nelotiꞌ 3 neuꞌ gatelesane. Idoꞌ Zakoboꞌ ma nene Alahaioꞌ gipele minineꞌ. Azasi nene Izesuꞌ izipahala zuhoutiꞌ minineꞌ. Idoꞌ Zakoboꞌ ma nene Izesuꞌ akunolo minineꞌ. Zakoboꞌ luhuvo niteꞌ nene Izesuꞌ akunolo neꞌmo gizineꞌ ve li Izesuꞌ zuho mukiꞌ nete gili eleꞌvoleꞌ aniꞌ. Izesuꞌ gamaziꞌve lamineꞌ Zohaneꞌ gizinguꞌ nene tiꞌ lo lineꞌ: Izesuꞌ akunolo zuho nene Izesuꞌnimuꞌ gili eleꞌvoleꞌ igi eꞌmetamavo mino helo otavosa gili eleꞌvoleꞌ igi eꞌmetaniꞌ. Tiꞌ aha Pauloꞌ Kolidi ebekuꞌ Izesuꞌ zuho minaniꞌ luhuvo niteꞌ hulo-ngidinguꞌ nene Izesuꞌ hilingutiꞌ otosa nakunolo Zakoboꞌni sotoꞌ o emo idoꞌ izipahala zuhosi nene sotoꞌ o ngimive lineꞌ. Sotoꞌ o imineꞌ gameneuꞌ nene Zakoboꞌ aza Izesuꞌnimuꞌ gele eleꞌvoleꞌ ogo eꞌmetive li eveneꞌ mukiꞌ nete gilaniꞌ. Neꞌmine ogo alingeꞌ nene Izesuꞌ zuho Zelusalemi ebekuꞌ minaveti gizebo veꞌine loloꞌ ogo minineꞌ. Minavo monoꞌ gizebo ve mukiꞌ Zelusalemi ebekuꞌ mulise mili Zuda ve minamadite Izesuꞌ zuho liliꞌ aniꞌ nene okoꞌine lolovo huki Zuda veti louꞌ gamazi mukiꞌ eꞌmetilizaniꞌ o neive lo lo-ngemelobe lo-ngemamolone li gamaziꞌine di hamoꞌ ilisa mulise milanguꞌ nene Zakoboꞌ aza gamazi lo osuꞌ lolosa gamaziꞌine do hamoꞌ ogo neꞌmine lo lo-ngemamolone lo lineꞌ.  
\ip Neꞌmine lineꞌza asiꞌve Zakoboꞌ nene Zuda ve mino Zuda veti louꞌ gamazi nene eꞌmete lamineꞌ ineꞌ. Idoꞌ Zakoboꞌ aꞌminguꞌ neivo initeꞌ mataꞌ Zelusalemi numunguꞌ sotoꞌ ineꞌ nemuꞌ luhuvo gizave mate tiꞌ li laniꞌ: Eveneꞌ mukiꞌ Izesuꞌ zuho minanikisi minamanikisi nene Zakoboꞌnimuꞌ gilavo dizavo ve lisiheꞌ gehepeve ve li li-daniꞌ. Eveneꞌ ma nete Zakoboꞌni bilaniꞌ monovo nesi gizaniꞌ. Ma nete tiꞌ li gizaniꞌ: Eveneꞌ mukiꞌ nene Izesuꞌ zuho liliꞌ i di vi minangumuꞌ nene Zuda veti evenetoꞌ medelo mino Oꞌmoso initeꞌ lehize-daaꞌ ive nabasi idoꞌ eze zuhosi ngizeboloꞌ molavo Zakoboꞌni asi li di evenetoꞌ i-diki Izesuꞌnimuꞌ aza Oꞌmosoꞌmo do luꞌ izelive lo imiselelesa live nene nomive lo eveneꞌ lo-ngemelive li amuzo mili li-imaniꞌ. Li-imaniꞌza Zakoboꞌ aza neꞌmine losaꞌmineꞌ nenako oꞌve lo gekeꞌ lo asi lo eveneꞌ tiꞌ lo lo-ngimineꞌ: Izesuꞌ nene Oꞌmosoꞌmi gipele eveneꞌ mukiꞌ izeꞌ molo-ledaaꞌ neive ve. Tiꞌ lo lineꞌ nene Zuda ve Izesuꞌ zuho minamaniꞌ nene ngizeboloꞌ goloso molavo geheni huli bili nizavo hilineꞌ. Zakoboꞌ velesi ha minineꞌ gameneuꞌ nene Loma veti guveꞌinesi ve naba neꞌmo gizebo o minineꞌ misubouꞌ Zuda ve nene ebeꞌ ato atoꞌ mukikuꞌ miniꞌmi moni minaniꞌ. Ma nene gozopoꞌ lovo vete avoꞌningine Zudaia misuboutiꞌ di vikevo aꞌmine di vaniꞌ misubola minaniꞌ. Ma nene Zudaia misubo huli geheni gonoꞌine dalisa misubo ato atota vaniꞌ. Aꞌmingutiꞌ linge ma nene Izesuꞌ zuho liliꞌ aniꞌ. Gamene ma Zakoboꞌ olihe helamo velesi ha mino Zelusalemi ebekuꞌ Izesuꞌ zuholiti gizebo veꞌine mino nene aꞌmine Zuda ve ebeꞌ ebekuꞌ hutileꞌ igi ato atoꞌ misubouꞌ vi minada nene luhuvo niteꞌ gizo hulo-ngidineꞌ. Luhuvo gize-ngidinguꞌ nene Oꞌmosoꞌmi evenele zuho nene igi mili monilizaniꞌ monovomuꞌ gizineꞌ. Eiꞌ Zakoboꞌ luhuvo niteꞌ gizinguꞌ nene initeꞌ mukikumuꞌ lineꞌ. Eveneꞌ nete Izesuꞌnimuꞌ gili eleꞌvoleꞌ angumuꞌ ve li ngibili ngeleꞌmize goloso navo ma nadiꞌ ilizahe nemukisi lo gizineꞌ. Idoꞌ Oꞌmosola laakumukisi ne lo gizineꞌ. Idoꞌ gohoꞌ gahalikumukisi heneni vemukisi nevo ma lo gizineꞌ. Idoꞌ Oꞌmosola gele eleꞌvoleꞌ ogakumukisi nevo lo gizineꞌ. Nemuꞌ gizinguꞌ nene Oꞌmosoꞌmi gamazi nene gato gatedunukovoꞌ gelo mo lamineꞌ ve lo gelosa aꞌminevoꞌ oloneꞌ nene Oꞌmosomuꞌ olihe gele eleꞌvoleꞌ amune lo gizineꞌ. Idoꞌ Oꞌmosoꞌmi gamaziliꞌmo lidiꞌmine lidiꞌmine amoloneꞌ nene Oꞌmosola gele eleꞌvoleꞌ o guno amune lineꞌ. Idoꞌ gohoꞌ gahaliꞌ siheleꞌni gopo monaniꞌ idoꞌ negi nene nasahiliꞌ o-ngedaakumukisi lo gizineꞌ. Mevo gamazi goloso lamineꞌ lo molo laaꞌ uneꞌ nevomukisi lo gizineꞌ. Idoꞌ alingeꞌ neꞌmine manaꞌmine olone laaꞌ nouneꞌ nene Oꞌmosoꞌmo gala gelo leliꞌ dalizave lo lo-lidineꞌ nemuꞌ nene gelamo laaꞌ noningumuꞌ nesi lo gizineꞌ. Idoꞌ eveneꞌ okoꞌninguꞌ oloꞌ lavo lovo hizi idoꞌ di goloso igaꞌ aniꞌ nemukisi gizineꞌ. Idoꞌ eveneꞌ di gopo igi aka golosouꞌ vaniꞌ nene do tiꞌno ngeleꞌmize aka lamineta ogakumuꞌ nesi lo gizineꞌ. Initeꞌ mukiꞌ memuꞌ nene lo gizosa hulo-ngidineꞌ.  
\ip Luhuvo niteꞌ Zakoboꞌ gizineꞌ ma nene gatosa ne gele guno olosane.  
\c 1  
\s1 Zakoboꞌ Gekeꞌ lo-ngedo Luhuvo Gize-ngidineꞌ  
\p
\v 1 Oꞌmoso idoꞌ Guvetesi ve Izesuꞌ Kilisitoꞌ engiꞌ gelekeleꞌ izipe Zakoboꞌ naza luhuvo niteꞌ nogizuve. Isilaeleꞌ veti avoteho Zakoboꞌ gipele zuho tuvelu engiꞌ ngaꞌvopilemoꞌ muliseꞌningutiꞌ muliseꞌningutiꞌ ma hutileꞌ igi misubouꞌ misubouꞌ miniꞌmi vangutiꞌ Izesuꞌ evenele zuho liliꞌ ave lengikumuꞌ luhuvo niteꞌ mene nogizuve. Longopoꞌni lo nogizuve.   
\s1 Lemenguꞌ Sotoꞌ O-ledaaꞌ Neineꞌ Neꞌmo Gele Eleꞌvoleꞌ Ogate Do Amuzo Molo-ledaaꞌ Neingumuꞌ Gizineꞌ Gamazi  
\p
\v 2-3 Neze zuho mate, lengemenguꞌ molaaꞌ initeꞌ nehe mulumo niteꞌ ato atoꞌ nehe neꞌmine initeꞌ lengita sotoꞌ ilineꞌ neꞌmo nene Oꞌmosomuꞌ gili eleꞌvoleꞌ igaꞌ naniꞌ nene do amuzo molo gili eleꞌvoleꞌ igi di giliꞌ li minilizaniꞌ monovo do sotoꞌ ilineꞌ nene mo gili nizave. Gili nizanako mulumo niteꞌ ato atoꞌ neꞌmine lengita sotoꞌ neivo ma muludinguꞌ goloso gilami longolize izivoꞌ minilo.  
\v 4 Mulumo initekuꞌ mini Oꞌmosomuꞌ gili eleꞌvoleꞌ igi di giliꞌ li minaniꞌ nene hulami aꞌmingukovoꞌ minilizaniꞌ neꞌmi gihile nene neꞌmino sotoꞌ oloseive: Lengita monoꞌ monovo lamineꞌ mine osuꞌ lavo nominekisi minami minilisave. Nemuꞌ nene neꞌmine ogo minelone li gili eleꞌvoleꞌ igi di giliꞌ li minilo.   
\s1 Gate Lamineꞌ Gelaaꞌ Monovomuꞌ Viseꞌ O Ma Aꞌminemuꞌ Oꞌmosola Loloningumuꞌ Gizineꞌ Gamazi  
\p
\v 5 Idoꞌ lengikutiꞌ ve maliꞌmo gala lamineꞌ gelaaꞌ monovomuꞌ nene viseꞌ ogo ma Oꞌmosola lilive. Lilineꞌ ha emeleseive. Oꞌmoso neve eveneꞌ mukiꞌ nene balu o-ledo lukehe amo initeꞌ ha lemaaꞌ neive.  
\v 6 Nemuꞌ nene aꞌmine ve Oꞌmosola lilinguꞌ initeꞌ dalohe damolohe lo gala setaꞌ gelamo gele hamoꞌ o mino Oꞌmosola lilive. Gaꞌine sitaꞌ gilaaꞌ nave nene gaꞌine gili nge lami guvo noso mine guno amivo hepeliꞌmo do mone mone ogaꞌ neineꞌ neꞌmini minaaꞌ nave.  
\v 7-8 Ve aꞌneꞌmine ve luꞌine gaꞌine taza vo vineꞌ nete zovoꞌ izi di monaaꞌ nanako Guvelesi velatiꞌ initeꞌ ngeli damilisave.   
\s1 Gohoꞌ Gahaliꞌ Vemuꞌ Idoꞌ Heneni Vemuꞌ Gizineꞌ Gamazi  
\p
\v 9 Neze zuhokizo, linginela eveneꞌ ma limi nizave ingine nene Oꞌmosoꞌmo ningivo dizi nizanako nemuꞌ ngolize izi minilizave.  
\v 10 Idoꞌ heneni ve nete heneniꞌinemuꞌ ngolize izami ingine Oꞌmosoꞌmo ningivo limi nizaniꞌ nemuꞌ ngolize izi minilizave. Guvise naviseꞌmi guvovo suludaniꞌ neꞌmine igi suludilisave.  
\v 11 Ee, hoꞌ dizo amuzo molo lavo aꞌmine guvise navise gokoꞌ loloseive. Idoꞌ gokoꞌ lavo guvovo suludoꞌmozavo emeniꞌve gonoliseꞌve lamineꞌ nene goloso ogaꞌ neive. Aꞌmineꞌmine igi heneni ve ingine gono bezeꞌninguꞌ moni minilizadotiꞌ vi tolovo ilisave.   
\s1 Lemenguꞌ Molaakumukisi Idoꞌ Lihime Daakumukisi Gizineꞌ gamazi  
\p
\v 12 nGemenguꞌ molaaꞌ initekuꞌ nehe mulumo initekuꞌ nehe mulumo initeꞌ ato atokuꞌ nehe ne gilizevo ami amuzo mili minilizave ingine ngolize izi minilisave. Amuzo mili mini aꞌmine initeꞌ ivileꞌ ikevo neꞌmi meniꞌve nene Oꞌmosoꞌmo minevoꞌ minevoꞌ ngemeni dameni nene lehize-ngedeleseive. Ee, luꞌine Oꞌmoso imi nizave engiꞌ ngemelove lo salani molo-ngidineꞌ initeꞌ minevoꞌ minevoꞌ ngemeni dameni nene lehize-ngedeleseive. Idoꞌ lehize-ngedelingumuꞌ ve li ngolize izi minilisave.  
\v 13 Initeꞌ maliꞌmo emenguꞌ molalosa lulo hizo eze geleleheꞌ ogo do vavo ma aꞌmine ve aza lihime dosa Oꞌmosoꞌmo nemenguꞌ molave lamilive. Lihime daakumuꞌ nene Oꞌmoso aza lulo otesaꞌmive. Idoꞌ lihime dalizave lo Oꞌmosoꞌmo nene lemenguꞌ molosaꞌmive. Nemuꞌ nene nemenguꞌ molave lamilive.  
\v 14 Leliꞌ goloso niteꞌ ogo molo ogakumuꞌ lumo helaaꞌ neineꞌ neꞌmo gate hizo limimiseꞌ ogaꞌ neive.  
\v 15 Lumo helaaꞌ neineꞌ neꞌmo izipahala mino gedelineꞌ neꞌmi gulive nene lihime ve. Lihime neꞌmo naba ogo izipahala mino gedelineꞌ neꞌmi gulive nene helaaꞌ ve.   
\p
\v 16 Neze zuho luꞌne lengeme nouvoniꞌ mate, ladani gatine gilamilo.  
\v 17 Initeꞌ mataꞌ lamineꞌ idoꞌ leleꞌmize lamineꞌ ogaꞌ initeꞌ lamineꞌ nene Oꞌmosolatiꞌ neive. Meteho Oꞌmoso Okulumokuꞌ labanaꞌ elaaꞌ neineꞌ initeꞌ do sotoꞌ molave aza aꞌmine molaniꞌ initeꞌ nene neꞌmino do velepeꞌ alepeꞌ izesaꞌmive. Gamene gamene do lamineꞌ o-ledovoꞌ neive.  
\v 18 Laza nene eiꞌ do sotoꞌ ineꞌ initeꞌ mukiꞌ ngivileꞌ igi mini evenele zuho gosohoꞌ ganaꞌ apiꞌ igi liliꞌ ilizave lo Oꞌmosoꞌmo asiꞌve gala gelo gamaziꞌve gihiledunuꞌ do sotoꞌ o-ledo lemeni dameni gosohoꞌ lemave.   
\s1 Oꞌmosoꞌmi Gamazi Gelo Gele Do Eꞌmetaakumuꞌ Gizineꞌ Gamazi  
\p
\v 19 Neze zuho luꞌne lengeme nouvoniꞌ mate, gamazi mene gililo. Lingine mukiꞌ nene gamazi gelaakumuꞌ liteꞌ li di nene igi minilo. Ne neiha gamazi laakumuꞌ nene zou li gili minisa lilo. Idoꞌ linginela liteꞌ lo lingizeboloꞌ molamivo.  
\v 20 Eveneꞌ lizeboloꞌ neꞌmo Oꞌmosoꞌmi monovo lisiheꞌ nene ngelo do sotoꞌ amoloseive.  
\v 21 Nemuꞌ nene lutine do goloso ogaꞌ initeꞌ mukiꞌ idoꞌ goloso niteꞌ pataꞌ buu lo minineꞌ nene huli hokolizeꞌ ami okodine diꞌmi limi mini Oꞌmosoꞌmi gamazi lutinguꞌ molaniꞌ nene di giliꞌ li dalo. Oꞌmosoꞌmi gamazi neꞌmo nene do lunguꞌ izo do lamineꞌ oloseize. Di giliꞌ li dalo.   
\p
\v 22 Idoꞌ neꞌmine igi Oꞌmosoꞌmi gamazi nene haza gatinedunukovoꞌ gili minami gili di eꞌmetilo. Haza gatinedunukovoꞌ gililizaniꞌ nene langisetine lutine golo izilisave.  
\v 23 Eveneꞌ malite Oꞌmosoꞌmi gamazi gili gili damilizaniꞌ nene ve ma gapogapokuꞌ ningi engiꞌ goꞌine veꞌine ningaaꞌ naniꞌ neꞌmino neive.  
\v 24 Goꞌine veꞌine ningi vikevo aꞌmidoꞌ liteꞌ lo gaꞌine molaaꞌ neive.  
\v 25 Nene neiha Oꞌmosoꞌmi gamazi lo huko-lidineꞌ nene gamazi gihile lamineꞌ mino goloso niteliꞌmi gelekeleꞌ ve minuningutiꞌ apase-ledaaꞌ neive. Neꞌmine ogaꞌ neineꞌ nenako aꞌmine gamazi neutiꞌ nene Oꞌmosoꞌmi monovomuꞌ viseꞌ ogo gate molamivo gele dovoꞌ mineloneꞌ nene Oꞌmosoꞌmo aꞌminguꞌ hize eleꞌ o-ledavo initeꞌ mukiꞌ oloneꞌ nene lamineꞌ ogavo muludeuꞌ lamineꞌ gelelesune.   
\p
\v 26 Eveneꞌ malite Oꞌmosomuꞌ gele eleꞌvoleꞌ ogo monoꞌ ve none li lilizaniꞌ nete gamazi laaꞌ adoꞌ gizebo isaꞌmaniꞌ nene eveneꞌ aꞌneꞌmine ve monoꞌ ve nobe li engiꞌ luꞌine golo izi soza lilisave.  
\v 27 Lodomuloꞌ izipe idoꞌ veneꞌ getoꞌ muheleꞌ igi minaniꞌ nene ngeleꞌmize lamineꞌ oloneꞌ idoꞌ me misubouꞌ eveneꞌ Oꞌmosomuꞌ gilamaveti monovoꞌine dokunivo lute do goloso ogalive lo gizebo ogo mineloneꞌ nene Oꞌmosomuꞌ gele eleꞌvoleꞌ ogo monoꞌ ve gihile minelonidiꞌmo Meteho Oꞌmosoꞌmi veleloꞌ hehe lamineꞌ lo mineleseive.   
\c 2  
\s1 Eveneꞌ Do Kegeso Ninge Lamineꞌ Ogo Ninge Goloso Amaakumuꞌ Gizineꞌ Gamazi  
\p
\v 1 Neze zuho mate, lingine labanaꞌvesi minive Guvetesi ve Izesuꞌ Kilisitoꞌnimuꞌ gili eleꞌvoleꞌ i nizanako eveneꞌ di kegesi eveneꞌ mamuꞌ siza li-ngidi eveneꞌ mamuꞌ ningi hulaaꞌ naniꞌ nene nanitekumuꞌ ve.  
\v 2 Lingine monoꞌ gililisa di geseꞌ igi nizavo ve maliꞌmo initeꞌ lamineꞌ ngolo analoꞌ ngolidunuꞌ liliꞌ aniꞌ lini lamineꞌ izo nodizivo ve gohoꞌ gahaliꞌ ma geneganaꞌve litehevoꞌ izo dizelineꞌ nesi nene  
\v 3 lingine initeꞌ lamineꞌ ngolo nodizive ma ne ningi siza li-di gaza holomo lamineta me ogo minezo li-di ve gohoꞌ gahaliꞌ nene gaza akaꞌ volela vo ote minezo idoꞌ meheꞌneko ogo minezo li li-imilizaniꞌ nene  
\v 4 lingine eveneꞌ di kegesi-ngidi gatine goloso gili eveneꞌ gizekaꞌ igaꞌ nave.   
\p
\v 5 Neze zuho luꞌne lengeme nouvoniꞌ mate, gililo. Eveneꞌ me misubouꞌ minangutiꞌ linge mamuꞌ ve gohiꞌ gahaliꞌ nizave li laaꞌ nahe. Aꞌmine ve nene Oꞌmosoꞌmo neze zuho liliꞌ ilisave lo do kegese-ngidineꞌ ma ve. Ee, ezemuꞌ gili eleꞌvoleꞌ ikevo nemuꞌ Oꞌmosoꞌmo gelavo gili eleꞌvoleꞌ aniꞌ neꞌmo heneniꞌine loloꞌ ogavo heneni ve gililisave. Idoꞌ luꞌine imilizavemuꞌ Oꞌmosoꞌmo initeꞌ ma ngemelesa salani molo-ngidineꞌ neive. Aꞌmine initeꞌ nene aꞌmine gohoꞌ gahaliꞌ engiꞌ ngemelove lo do kegese-ngidineꞌ ma ve. Idoꞌ ngemelineꞌ initeꞌ nene neꞌmino neive: Ingine Oꞌmosoꞌmo gizebo o neinguꞌ vi hilalisave.  
\v 6 Ne neiha lingine neve ningikevo gohoꞌ gahaliꞌ nene haza niteꞌ minaniꞌ ve. Heneni ve neve ingine goboni mili-lingidi gonitoꞌ lengeleꞌmizi di moniꞌ moniꞌ i-lingidaaꞌ nave.  
\v 7 Idoꞌ Izesuꞌ gulive lamineꞌ lingine di nizaniꞌ nene inginesi di hozi laaꞌ ilizanako aꞌmine heneni ve nete diviꞌ lediviꞌ igaꞌ nave.   
\p
\v 8 Monoꞌ godolouꞌ Guvetesi ve nabaꞌmo lo huko lineꞌ gamazi ma neꞌmino neive:  
\q1 Geikumuꞌ gelaaꞌ naineꞌ neꞌmino geiꞌ nanida nizavemuꞌ gelo luka ngemezo lo lo neive.  
\m Lingine aꞌmine eleꞌvoleꞌ gamazi gili dalizaniꞌ nene initeꞌ gihile dalisaniꞌza  
\v 9 eveneꞌ ma siza li-ngidi eveneꞌ ma ningi goseleꞌ ilizaniꞌ nene lihime dalizaniꞌ o neive. Idoꞌ neꞌmine ilizaniꞌ nene Oꞌmosoꞌmo lo huko lineꞌ gamazi avutoꞌ igaꞌ ave minikeve loloseive.  
\v 10 Ve maliꞌmo Oꞌmosoꞌmo lo huko lineꞌ gamazi mukiꞌ gele do mino hamokovoꞌ ma gele hulilineꞌ nene mukiꞌ avutoꞌ ineꞌ geleleseive.  
\v 11 Oꞌmosoꞌmo veneꞌ longoꞌ amilo idoꞌ eveneꞌ ngibili hilamilo nesi lineꞌ ma neive. Nemuꞌ nene gaza veneꞌ longoꞌ amaba eveneꞌ ma bele helelineꞌ neꞌmo mo louꞌ gamazi avutoꞌ ogaꞌ anive loloꞌ olosane.  
\v 12 Idoꞌ Oꞌmosoꞌmo eveneꞌ mukiꞌ izeꞌ molo-ledelesa nene lihime monovoloꞌ gelekeleꞌ ogo minuningutiꞌ apase-ledaaꞌ ineꞌ louꞌ gamaziꞌve nene gili di minahe gili hulahe lo izeꞌ molo-ledeleseive. Neꞌmine ilingumuꞌ nene gilii lingine gamazi lilizadokisi initeꞌ igi mili ilizadokisi gizebo igi minilo.  
\v 13 Idoꞌ ve maliꞌmo eveneꞌ iseꞌine izesaꞌmivo ma Oꞌmosoꞌmo goniꞌ o-do eze iseve ize-damoloseive. Idoꞌ eveneꞌ ma nete eveneꞌ iseꞌine izaaꞌ nave nene aꞌmineꞌmine ogo Oꞌmosoꞌmo engiꞌ iseꞌine ize-ngedeleseive. Iseꞌine izaaꞌ neꞌmo goniꞌ ogaꞌ nene ivileꞌ oloseive.   
\s1 Oꞌmosola Gele Eleꞌvoleꞌ Ogaꞌ Monovomuꞌ Gizineꞌ Gamazi  
\p
\v 14 Neze zuho mate, ve maliꞌmo monovo lamineꞌ ogo molo minamo naza Izesuꞌnimuꞌ giluvoniꞌ nene gele eleꞌvoleꞌ okuve lo lilineꞌ nene haza niteꞌ loloꞌ oloseive. Neꞌmine ogovoꞌ gele eleꞌvoleꞌ o do vilidotiꞌ nene Oꞌmosoꞌmo do uꞌ izamoloseive.  
\v 15 Ve ma he veneꞌ ma he okoꞌnoloꞌ initeꞌ nomivo nosoꞌ nitekisi viseꞌ ogo neivo  
\v 16 lengikutiꞌ maliꞌmo aꞌmine viseꞌ ineꞌ initeꞌ ma emamo geita hongu minivo vozo. Muꞌmu lo-gidivo mino no gatunga ogo minezo lo lo-emelineꞌ nene lamineꞌ ilihe. Aꞌmine haza gamazi lineꞌ neꞌmo eveneꞌ ha do lamineꞌ o-delihe. Haza ngelo do lamineꞌ o-damoloseive.  
\v 17 Idoꞌ aꞌmineꞌmine ogo aꞌmine gamazi lineꞌ nene haza nitekovoꞌ minineꞌ neꞌmino monovo lamineꞌ ogo molo minamo haza Oꞌmosomuꞌ gele eleꞌvoleꞌ ogaꞌ nesi haza niteꞌ neive. Eveneꞌ ma ingine gili eleꞌvoleꞌ igisa monovo lamineꞌ nesi igi mili minamilizaniꞌ nene Oꞌmosomuꞌ gili eleꞌvoleꞌ aniꞌ nene hele osuꞌ lo haza niteꞌ loloꞌ ogave.   
\p
\v 18 Ne neiha lengikutiꞌ ve maliꞌmo tiꞌ lo lilihe lo gele nouve: Eveneꞌ malite Oꞌmosomuꞌ gili eleꞌvoleꞌ igaꞌ navo idoꞌ eveneꞌ ma nete monovo lamineꞌ igi mili minaaꞌ nave. Idoꞌ ve ma neꞌmine lo lilineꞌ naza tiꞌ lo lo-emelesuve: Monovo lamineꞌ ogo molo amosa Oꞌmosomuꞌ gele eleꞌvoleꞌ o naineꞌ nene nado do sotoꞌ anivo ningelove. Ne neiha naza monovo lamineꞌ ogo molo nouvoniꞌ neꞌmo Oꞌmosomuꞌ gele eleꞌvoleꞌ o nouvonikisi nene do sotoꞌ ogavo nelotiꞌ ha ningelesane lo lo-emelesuve.  
\v 19 Lingine Oꞌmoso hamokovoꞌ neive li gili eleꞌvoleꞌ igaꞌ nahe. Neꞌmini gilaaꞌ naniꞌ nene mo lamineꞌ neiha Sataniꞌmi zuho sikalahuꞌ goloso ingine nesi aꞌmineꞌmine igi Oꞌmoso neive li gilii gili eleꞌvoleꞌ igaꞌ nave. Ee, ingine gili eleꞌvoleꞌ igaꞌ nanako nemuꞌ nene lihime lemeleseive li golise gilivoꞌ minaaꞌ nave.  
\v 20 Monovo lamineꞌ ogo molo minamo Oꞌmosomuꞌ gele eleꞌvolekovoꞌ ogaꞌ oloneꞌ nene haza niteꞌ neineꞌ nenako gaza gelamabe. Ve negi mene naza gelebizelove.  
\v 21 Avoteho Abalahamuꞌ aza gipele Isakaꞌni Oꞌmoso gize emelesa ogo monovo lamineꞌ ineꞌ nemuꞌ Oꞌmosoꞌmi veleloꞌ ve lisiheꞌ gehepeve lihimeꞌvesi nomineꞌ minineꞌ gilineꞌ nene lingine mo gili nizave. Olo.  
\v 22 Nemuꞌ nene aza Oꞌmosomuꞌ gele eleꞌvoleꞌ ogo mino monovo lamineꞌ nesi ogo molaaꞌ idotiꞌ nene monovo lamineꞌ ogaꞌ monovoꞌve neꞌmo Oꞌmosomuꞌ gele eleꞌvoleꞌ ogaꞌ monovoꞌve nene hize eleꞌ ogo do gihile izo do sotoꞌ ineꞌ nene ningi gilamahe.  
\v 23 Neꞌmine ogavo monoꞌ godolouꞌ minineꞌ gamazi ma nene gihile izineꞌ ve. Aꞌmine gamazi nene neꞌmino neive:  
\q1 Abalahamuꞌ aza Oꞌmosomuꞌ gele eleꞌvoleꞌ ineꞌ nemuꞌ Oꞌmosoꞌmo gelo  
\q1 Abalahamuꞌ nene lihimeꞌve nomive ve lisiheꞌ ve lineꞌ  
\m Idoꞌ eveneꞌ ingine ezemuꞌ Oꞌmosoꞌmi zogo ve neive li laniꞌ.  
\v 24 Nemuꞌ nene Oꞌmosoꞌmo ningivo lihimete nomivo ve lisiheꞌ minaaꞌ nouneꞌ neꞌmi monovo mo ningi osuꞌ li nilisave. Neꞌmi monovo neꞌmino neive: Eveneꞌ haza gili eleꞌvoleꞌ igaꞌ nanikovoꞌ nene Oꞌmosoꞌmo ningivo lisiheꞌ osaꞌmive. Idoꞌ eveneꞌ ezemuꞌ gili eleꞌvoleꞌ igi monovo lamineꞌ nesi igi mili igaꞌ naniꞌ nene ningivo eveneꞌ lisiheꞌ lihimeꞌine nomineꞌ minaaꞌ nave.  
\v 25 Idoꞌ aꞌmineꞌmine ogo pasidiaꞌ veneꞌ Lahabaꞌ aza monovo lamineꞌ ogavo Oꞌmosoꞌmo ezemuꞌ gilivo lisiheꞌ ineꞌ ve. Isilaeleꞌ aleve Kanaha misubo dizi dalisa nizavo guveꞌinesi ve Zosuvaꞌ aza eveneꞌ ma misubo amamakaꞌ mili ningilizave lo ngimiselavo vi aꞌmine Kanaha veneꞌ Lahabaꞌ neida vikevo aza ngeleꞌmize numuꞌveuꞌ molo Kanaha eveneꞌ nete ningi ngibilikelizave lo aka atota ngimiselavo vaniꞌ.  
\v 26 Ve ma sikalahuꞌve nomivo okoꞌno losuvovoꞌ minelineꞌ nene mo hele neive lolosune. Aꞌmineꞌmine ogo ve ma aza haza gele eleꞌvoleꞌ ogo minelineꞌza monovo lamineꞌ ogo molo minamivo ma eze gele eleꞌvoleꞌ ogaꞌ neineꞌve nene ezela mo helave lo lolosune.   
\c 3  
\s1 Vete Nahuno Neꞌmo Gamazi Goloso Lalize Lo Gizebo Lamineꞌ O-delone Lo Gizineꞌ Gamazi  
\p
\v 1 Neze zuho mate, laza tisaꞌ loloꞌ ogo nonivete ladanga gamazi loloneꞌ nene Oꞌmosoꞌmo aꞌminemuꞌ goniꞌ o-ledo haza eveneꞌ goniꞌ o-ngedelineꞌ nene ivileꞌ ivosa leliꞌ nene goniꞌ nabaloꞌ o-ledelineꞌ nene gili nizave. Gili nizanako nemuꞌ nene lengikutiꞌ eveneꞌ mukiꞌ tisaꞌ liliꞌ amilo.  
\v 2 Eveneꞌ mukiꞌ laza ladani vaiꞌ ogaꞌ noune. Eveneꞌ hamoꞌ hamolite gamazi ladanga lamilizaniꞌ nene ingine ve lisiheꞌ gehepeve minilisave. Veꞌnidoꞌ gizebo lamineꞌ igi gopo gamazi lisaꞌmanako okoꞌnine mukitoꞌ ha gizebo lamineꞌ ilizadoꞌ i nizave.  
\v 3 Hosi ize ingine initeꞌ naba nizaniꞌza okoꞌine di zovoꞌ izi vilizangumuꞌ ve li sitiaꞌ initeꞌ ainidunuꞌ liliꞌ aniꞌ ngomo lasolo nene veꞌninguꞌ di ingihi-ngidikevo neꞌmo gamazi gilaaꞌ nave.  
\v 4 Aꞌmineꞌmine ogo sipi nene initeꞌ nabaꞌ naba neivo idoꞌ hepeꞌ naba neꞌmo do vaaꞌ neineꞌza sipiloꞌ daaꞌ ive aza sipiꞌmi sitiaꞌve ngomoloꞌ geleleheꞌ ogavo initeꞌ nabaliꞌmo aꞌmidoꞌ gele do zovoꞌ izo vaaꞌ neive.  
\v 5 Aꞌmineꞌmine ogo vete nahuno nene initeꞌ ngomo lasolo neineꞌza aꞌminetunuꞌ gamazi lokunivo neꞌmo initeꞌ naba ma sotoꞌ oloseive. Oloꞌ vele ngomo neꞌmo gulumo ogo za zuho initeꞌ mataꞌ mukiꞌ lovotaaꞌ neive.  
\v 6 Idoꞌ vete nahuno nene oloꞌ neꞌmino neive. Okodela initeꞌ vaikutiꞌ vete nahuno nene misuboko monovo goloso mukiliti izeꞌnibo nene neive. Vete nahuno neꞌmo okode lute do gopoꞌ napaꞌ ogaꞌ neive. Oloꞌ vele nene gulumo ogo za zuho initeꞌ mataꞌ mukiꞌ lovotaaꞌ neineꞌ neꞌmine ogo misubouꞌ eveneꞌ mukiliti vete nahuno nene oloꞌ ebekutiꞌ ve Satani neꞌmo do velepeꞌ alepeꞌ ize-ledavo gamazi goloso losa aꞌmidotiꞌ ogo molo ogaꞌ nouneꞌ initeꞌ nene golosovoꞌ o do vaaꞌ neive.  
\v 7 Ize gulo gaha nama, gosiheꞌ, nosouꞌ nama gaha ato atoliꞌmine mukiꞌ nene ha di gaꞌine lilizadoꞌ o neive. Idoꞌ di gaꞌine laaꞌ naniꞌza  
\v 8 vete nahuno nene ve maliꞌmo ngelo do gala lamoloseive. Vete nahuno nene initeꞌ goloso do velepeꞌ alepeꞌ izo mino hazasi minesaꞌmive. Vete nahuno nene zahemede goloso helaaꞌ initeꞌ neꞌmine neive.  
\v 9 Vete nahunodunuꞌ Guvetesi ve Metehine opoꞌni laaꞌ noune. Idoꞌ Oꞌmoso eze gidini do sotoꞌ ineꞌ eveneꞌ nene aꞌmine vete nahunodunuꞌ gamazi goloso lo-ngedaaꞌ noune.  
\v 10 Vete hamokutiꞌ opoꞌni laaꞌ noune. Idoꞌ do velepeꞌ izo gamazi goloso nesi laaꞌ noune. Neze zuhokizo, nene edamineꞌ suno neive.  
\v 11 Noso hinipiniꞌ hamokutiꞌ lingela nene naaꞌ limivo idoꞌ lingela nene ekeseꞌ limivo ilihe.  
\v 12 Za atoꞌ za dize nolinguꞌ za maliꞌmi gihileꞌve ngelo izamoloseive. Vaini nalaꞌ maloꞌ gohuno gihile ngelo izelihe. Idoꞌ guvo nosotiꞌ naaꞌ noso ohizelibe. nGelo ma ohizamolosane. Nemuꞌ nene veka hamokutiꞌ gamazi laminekovoꞌ lemelive.   
\s1 Gele Vevesaaꞌ Nene Oꞌmosolatiꞌ Aniꞌ Ve Lo Gizineꞌ Gamazi  
\p
\v 13 Lengikutiꞌ ve ma gamazi monovo gelaaꞌ ive mino gala gele veveso ogaꞌ ive nolineꞌ nene hokolizeꞌ amo gele vevesaaꞌ monovo neꞌmo do sotoꞌ ogaꞌ neineꞌ monovo adoꞌ okode doꞌmo lemo minaaꞌ monovo ogo molo minelidotiꞌ nene aꞌmine gamazi monovo gelo gele vevesaaꞌ monovoꞌve nene do sotoꞌ ilidoꞌ o neive.  
\v 14 Ne neiha lingine lutinguꞌ lukehe ekeseꞌ ngibili mini ge hulo ne hulo li mini okodine di dizi laza gate gele veveso ogaꞌ nonive ne none li lilizaniꞌ nene mo gamazi lamineꞌ lami sozasi lilisanako nemuꞌ neꞌmine lamilo.  
\v 15 Neꞌmine ilizaniꞌ nene Oꞌmosolatiꞌ neineꞌ gele vevesaliꞌmi monovo nene dalisave. Oꞌmosomuꞌ gili hulaaꞌ ave me misubouꞌ ve ingine igaꞌ naniꞌ neꞌmine Satanilatiꞌ neineꞌ monovo nene dalisave.  
\v 16 Luꞌninguꞌ lukehe neivo ge hulo ne hulo li minilizada eveneꞌ luꞌine bizamivo gopoꞌ napaꞌ mini monovo goloso ato atoliꞌmine mukiꞌ di minilisave.  
\v 17 Oꞌmosolatiꞌ gele vevesaaꞌ monovo di minave engiꞌ monovoꞌine nene neꞌmino neive: Initeꞌ naba nene luꞌninguꞌ goloso initekisi nomivo luꞌine laminekovoꞌ minaaꞌ neive. Idoꞌ aꞌmidotiꞌ nene ve hongu vevoꞌ mini gelekeleꞌ igi eveneꞌ muheleꞌine ningi di lamineꞌ tamineꞌ i-ngidi idoꞌ evenekumuꞌ gili mamuꞌ ngumo hilivo mamuꞌ goseleꞌ ngibilivo ami di kegesi-ngidami mini veꞌine avilelotiꞌ soza lamilisave.  
\v 18 Idoꞌ hongu ve eveneꞌ kuku hili-ngidi hongu li minaaꞌ naniꞌ neꞌmi gihile nene lisiheꞌ lamineꞌ minaaꞌ nene sotoꞌ ogavo dalisave.   
\c 4  
\s1 Me Misubouꞌ Minaveti Monovomuꞌ Lumo Helalive Lo Gizineꞌ Gamazi  
\p
\v 1 Idoꞌ gamazi gohi ma lo-lengemeloze: Linginela lingizeboloꞌ molavo lovo hizi minaaꞌ naniꞌ nene naniteliꞌmo ve. Lingine laniteꞌ gili ahuꞌ laniꞌ initeꞌ nete lutinguꞌ lovo di sotoꞌ ikevo neꞌmo lovo hizaaꞌ nave.  
\v 2 Initeꞌ mamuꞌ lungumo hilineꞌ nene dami eveneꞌ ngibililisa gilaaꞌ nave. Idoꞌ aꞌmine initekumuꞌ mumuzoꞌ igi ngeli ma damilizaniꞌ ogavo ma gililinga li lovo hizaaꞌ nave. Initeꞌ ma damaniꞌ nene Oꞌmosola vokuꞌ lisaꞌmadiꞌmo nene disaꞌmave.  
\v 3 Idoꞌ initeꞌ mamuꞌ Oꞌmosola vokuꞌ laniꞌza gatine goloso gili langisetine aꞌmine initeliꞌmi laniteꞌ gililizangumukovoꞌ vokuꞌ likevosa nene Oꞌmosoꞌmo lengemesaꞌmive.  
\v 4 Lingine nene veneꞌ ma vaꞌningine huli ve gohi maloꞌ vaaꞌ ave neꞌmine mini Oꞌmosomuꞌ lungumo hilineꞌ nene huli me misubouꞌ ve Oꞌmosomuꞌ gili hulaniꞌ alevemukisi idoꞌ engiꞌ initeꞌinemukisi lungumo helelineꞌ neꞌmo Oꞌmoso mehedine imaaꞌ idoꞌ lovo i imaaꞌ o neineꞌ ne gilamahe.  
\v 5 Idoꞌ monoꞌ godolouꞌ gamazi ma neꞌmino neive:  
\q1 Oꞌmosoꞌmo leze luteuꞌ molaniꞌ sikalahute neꞌmo initeꞌ atoꞌ atokumuꞌ umo helavo  
\q1 aꞌmine nene dalongisi lo ahuꞌ laaꞌ neive.  
\m Aꞌmine gamazi nene hazamuꞌ neive li gilahe. Oꞌove. Hazamuꞌ nomive.  
\v 6 Ne neiha lumo helaaꞌ initeꞌ goloso nene gele emamoloningumuꞌ ve lo Oꞌmosoꞌmo vauve elo hize eleꞌ o-ledaaꞌ neive. Nemuꞌ nene monoꞌ godolouꞌ gamazi ma tiꞌ lo neive:  
\q1 Oꞌmosoꞌmo hokolizeꞌ igaꞌ ave lovo o ngemo limi minave hize eleꞌ o-ngedaaꞌ neive.   
\m
\v 7 Nemuꞌ nene Oꞌmoso gelekeleꞌ i-di Satani nene oꞌve li-di gili huli-dilo. Neꞌmine ikevo hulo-lengedo golise vohaha oloseive.  
\v 8 Lingine Oꞌmosola vi giꞌmizilizaniꞌ nene aza linginela aꞌmineꞌmine ogo giꞌmizeleseive. Lingine goloso initeꞌ daaꞌ nave aꞌmine initeꞌ aloꞌ hulilo. Idoꞌ Oꞌmosola volohe goloso initeta volohe li veꞌneheꞌ kaꞌneheꞌ nilaniꞌ nene huli lutine noso izi di lamineꞌ ilo.  
\v 9 Lingine monovotida gili eveneꞌ goloso none li agae agae li longovozo hili mulumo gili ive ilo. Ee, gize zohiꞌ igi longolize izaaꞌ naniꞌ nene huli mulumo gili muheleꞌ igi ivevoꞌ igi agae agae li minilo.  
\v 10 Neꞌmine igi Guvelesi veꞌmi veleloꞌ langisetine lutine diꞌmi limilo. Neꞌmine ikevo Guvelesi ve aza doꞌmo dize-lengedeleseive.   
\s1 Eveneꞌ Ge Dovo Ledevoꞌ O-nede Ne Dovo Ledevoꞌ O-gede Lamaakumuꞌ Gizineꞌ Gamazi  
\p
\v 11 Neze zuho mate, lengikuꞌ ge dovo ledevoꞌ o-nede ne dovo ledevoꞌ o-gede lamilo. Ve maliꞌmo gonolohi monovo izeꞌ molo dovo ledevoꞌ ogo lihime molo-delineꞌ nene ezevoꞌ neꞌmine o-damoloseive. Louꞌ gamazi nesi neꞌmine o-do dovo ledevoꞌ ogo ivileꞌ ogo izeꞌ molalineꞌ nene louꞌ gamazi gele daaꞌ anive minamo louꞌ gamaziloꞌ gizebo ogo izeꞌ molaaꞌ anive loloꞌ ogane.  
\v 12 Idoꞌ Oꞌmosoꞌmo asiꞌve hamoꞌ louꞌ gamazi do sotoꞌ ogo izeꞌ molaaꞌ ive neive. Asiꞌvevoꞌ do luꞌ izaakumuꞌ idoꞌ leleꞌmize tolovo ogakumuꞌ laaꞌ ive neive. Neineꞌ nenako gasika Oꞌmoso noosa gonahi monovo izeꞌ molo lihime molo-delibe.   
\s1 Igi Mili Ilizangumuꞌ Okodine Di Dizamilo Lo Gizineꞌ Gamazi  
\p
\v 13 Lingine nene Oꞌmoso ivileꞌ igi idise nehe aizeꞌ nehe ebeꞌ mala vo kilisimasi hamoꞌ mino bisinisi gono do moni heneni do sotoꞌ olone li laaꞌ naniꞌ aleve nene gamazi ma lo-lengemeloze.  
\v 14 Aizeꞌ initeꞌ neꞌminesi neꞌminesi ogo molo ogo minelone laaꞌ naniꞌ nene lingine aizeꞌ sotoꞌ ilineꞌ initeꞌ nene gili niisa laaꞌ nahe. Lingine mo gilamave. Oꞌmosovoꞌ gele neive. Lengiꞌ miniviꞌ diviꞌ igi nizaniꞌ nene oloꞌ sokile neꞌmino neive. Oloꞌ sokile nodizivo nodizivo eveneꞌ gamene ngomo ningi nizavo gete geto osuꞌ laaꞌ neive.  
\v 15 Nemuꞌ nene neꞌmine li lilo: Guvetesi veꞌmo gelavo lamineꞌ o neivo ma mine do dizo initeꞌ neꞌminesi neꞌminesi ogo molo minelone li lilo.  
\v 16 Idise lingine monovo goloso di lihime nidave. Hokolizeꞌ igi Oꞌmoso ivileꞌ igi initeꞌ neꞌminesi neꞌminesi ogo molo minelone li okodine di dizaaꞌ nave.  
\v 17 Idoꞌ initeꞌ veveso lisiheꞌ ogaliꞌmi monovo ningi gili minisasi aꞌmine monovo lisiheꞌ amilizaniꞌ nene lihime dalisave. Nemuꞌ Oꞌmoso ivileꞌ ami Oꞌmosoꞌmo gelo gele lemavo ma initeꞌ neꞌminesi neꞌminesi ogo molo minelone li lilo.   
\c 5  
\s1 Heneni Vemuꞌ Gizineꞌ Gamazi  
\p
\v 1 Heneni nganeni ve lingine gililo. Mulumo niteꞌ naba linginela sotoꞌ ilingumuꞌ gekeꞌ gekeꞌ li ive nama igi minilo.  
\v 2 Henenitine di nubo nubo aniꞌ nene mo hulupo elavo geneganatine lamineꞌ nene giꞌningoni nete mo huki nikeve.  
\v 3 Idoꞌ monitine nene gaba hitineꞌ neꞌmo moni di giliꞌ li minaniꞌ monovotine nene do sotoꞌ ogavo neꞌmo mulumo gono dikevo okodine ololiꞌmo lovotineꞌ geleleseive. Heneni di nubo nubo igi milaniꞌza misubouꞌ initeꞌ osuꞌ lilineꞌ gamene mo alitave.  
\v 4 Lengiꞌ midinguꞌ gono dave ingine gohise hili minamuno dolizi-lingidikevo lingine meniꞌine lingela di haleki ngimamavo nemuꞌ gono daaꞌ ave ive nama ikevo initeꞌ mukitoꞌ gizebo ogaꞌ ive amuzoꞌvesi minive Oꞌmoso aza gelave.  
\v 5 Lingine me misubouꞌ mini nosoꞌ nitetine vaiꞌ ivo niviꞌ niviꞌ igi mini laniteꞌ ato atoliꞌmine gili ize neꞌmine gehesaniꞌ. Neꞌmine igi gehesi minikeniꞌza Oꞌmosoꞌmo lengebelelineꞌ gamene nene mo noalitive.  
\v 6 Lingine nete eveneꞌ vevesi lisiheꞌ i minaniꞌ goniꞌ i-ngidi ngibilaniꞌ. Idoꞌ lingine ningibilavo ingine di tibizi lingibilami haza hongu li minaaꞌ nave.   
\s1 Goseleꞌ Aseleꞌ Amo Gamene Nabamuꞌ Gizebo Ogakumuꞌ Gizineꞌ Gamazi  
\p
\v 7 Neze zuho mate, goseleꞌ aseleꞌ ami Guvetesi ve alingumuꞌ gizebo igi minilo. Lingine gili nizave. Mine zuhoꞌ igaꞌ avete mine zuhoꞌ aniꞌ nene gomuꞌ golinesi alingeꞌ golinesi izavo minamuno o molavo mine lamineꞌ nalone li goseleꞌ aseleꞌ ami gizebo igi minaaꞌ nave.  
\v 8 Aꞌmineꞌmine igi lingine goseleꞌ aseleꞌ ami lutine mili eleꞌvoleꞌ igi minilo. Guvetesi ve alineꞌ gamene nene mo alitelesa neize.   
\p
\v 9 Neze zuho mate, goniꞌ o-ledelive mo avitoꞌ ogave. Goniꞌ ikelizaze. Lingine ge nemenga laani ne gemenga loku lami lamini ha minilo.  
\v 10 Idoꞌ Oꞌmosoꞌmi velemuꞌ igi eze gamazi li sotoꞌ igaꞌ ave polohete ingine evenelite goboni nimili-ngidavo nemuꞌ nene goseleꞌ aseleꞌ ami eleꞌvoleꞌ igi minaniꞌ nene gili nizave. Ingine mulumo initekuꞌ mini goseleꞌ aseleꞌ amo eleꞌvoleꞌ ogo minaliꞌmi monovo nene lelebizikenaze. Ingine adiꞌmine ilo.  
\v 11 Gili nizahe. Ingine mulumo initekuꞌ mini hongu li eleꞌvoleꞌ igi minave engikumuꞌ nene Oꞌmosoꞌmo mulunouꞌ lamineꞌ gelo do lamineꞌ o-ngedaaꞌ neinako nemuꞌ laminekuꞌ minave ve lo laaꞌ noune. Sataniꞌmo goboni molo-davo Hizobeꞌ aza mulumo alumo gilingukisi hongu lo eleꞌvoleꞌ ogo minineꞌ ma gili nizave. Idoꞌ alingeꞌ Guvetesi ve initeꞌ mataꞌ lamineꞌ lehize-dineꞌ nesi mo gili nizave. Nemuꞌ nene Guvetesi veꞌmo muhelete ningo muluno hukavo hize eleꞌ o-ledaaꞌ neive lo gelelone.   
\s1 Laminetoꞌ Nolune Lo Okulumoꞌ Misubouꞌ Lo Molo Lamoloningumuꞌ Gizineꞌ Gamazi  
\p
\v 12 Neze zuho mate, amuzo gamazi ma lo-lengemeloze. Gililo. Lingine gamazi ma lilizaniꞌ nene lamineꞌ nolune li lilisa Okulumotoꞌ li mili adine dizi li hukamilo. Idoꞌ misuboloꞌ idoꞌ initeꞌ maloꞌ maloꞌ li mili li hukamilo. Oꞌmosola goniꞌ ikelizaze. Lingine initeꞌ mamuꞌ oo. Mo laminetoꞌ nolune lili ma nene laminetokovoꞌ lilo. Idoꞌ oꞌve. Neꞌmine amolone lili ma nene laminetokovoꞌ lilo.   
\s1 Oꞌmosola Laakumuꞌ Gizineꞌ Gamazi  
\p
\v 13 Lengikutiꞌ ve ma mulumo geni initekuꞌ mino ma Oꞌmosola lilive. Idoꞌ maliꞌmo mulunouꞌ lamineꞌ goloso gelo mino ma Oꞌmoso opoꞌni nolo nama lilive.  
\v 14 Idoꞌ lengikutiꞌ ve ma initeꞌ gize do ongo mino ma monoꞌ gizebo ve mamuꞌ elese molavo igi heteli Oꞌmosola li Guvelesi veꞌmi velemuꞌ igi uveli noso hili-dilisave.  
\v 15 Oꞌmosomuꞌ gili eleꞌvoleꞌ i mini Oꞌmosola lilizaniꞌ nene Guvelesi veꞌmo do lamineꞌ o-davo initeꞌ gize dave aza lamineꞌ geleleseive. Lamineꞌ gelavo lihimeꞌve ma minelineꞌ nene Oꞌmosoꞌmo aꞌmine lihimeꞌve hulo-deleseive.  
\v 16 Oꞌmosoꞌmo do lamineꞌ o-lengedelingumuꞌ ve li lihime di miniꞌ miniꞌ aniꞌ nene ingine li sotoꞌ avo lingine li sotoꞌ avo di bizi Oꞌmosola li ge numuna lo-nede ne numuna lo-gede laaꞌ ilo. Ve lisiheꞌ vevesi minavete Oꞌmosola lilizaniꞌ nene amuzo malehe initeꞌ neive. Neꞌmo Oꞌmosoꞌmo gelavo initeꞌ gihilevoꞌ sotoꞌ oloseive.  
\v 17 Eliaꞌ nene leliꞌ gidini veꞌmo asiꞌve nene goline izamilive lo amuzo molo Oꞌmosola lavo kilisimasi setohamosi ikeꞌni lumo sigisi vivo misuboloꞌ goline izamineꞌ.  
\v 18 Alingeꞌ nene gohi goline izelive lo Oꞌmosola lavo Okulumokutiꞌ goline izavo misubouꞌ initeꞌ mataꞌ mukiꞌ nene gala hoꞌli dizaniꞌ.   
\p
\v 19 Neze zuho mate, lengikutiꞌ maliꞌmo monoꞌ gamazi gihile hulo aka zovoꞌ izo gopo novivo ma maliꞌmo eleꞌmize tineꞌ molalineꞌ nene  
\v 20 aza gamazi tiꞌ lo geleleseive: Ve maliꞌmo lihimeꞌvesi ve ma aka golosoloꞌ novidotiꞌ do tineꞌ molo-delineꞌ nene aꞌmine lihimeꞌvesi veꞌmo emeniꞌve nene mudise do uꞌ izo lihimeꞌve mukiꞌ do hulo-dineꞌ geleleseive. Modave.