\id HEB - Dano NT [aso] -Papua New Guinea 1989 (DBL -2014) \h HEBILAIOꞌ \toc1 Zuda Veti Guliveꞌine Gohi Ma Hebilaioꞌ Aleve Izesuꞌ Zuho Minaniꞌ Neti Luhuvo Niteꞌine Ve \toc2 Hebilaioꞌ \toc3 Heb \mt1 ZUDA VETI GULIVEꞌINE GOHI MA HEBILAIOꞌ ALEVE IZESUꞌ ZUHO MINANIꞌ NETI LUHUVO NITEꞌINE VE \imt1 Hebilaioꞌ Ve Ma Izesuꞌ Evenele Zuho Minaniꞌ Neti Luhuvo Niteꞌinemuꞌ Gomuꞌ Gataaꞌ Gamazi \ip Mene luhuvo niteꞌ gizive aꞌmidoꞌ guliveꞌve gizamineꞌ nenako neꞌmo nene evenelite ve neꞌmo gizineꞌ noloseive li gilaniꞌ nene eveneꞌ atoꞌ atokumuꞌ gilaaꞌ aniꞌ ve. Adoꞌ malite Banabasiꞌ gizineꞌ noloseive lavo malite nene Izesuꞌ evenele zuho Loma ebekuꞌ minaveliti gizebo veꞌine ganaꞌ di oti-ngidangutiꞌ maliꞌmo gulive Kelemedoꞌ ve lo minineꞌ neꞌmo gizineꞌ noloseive lavo idoꞌ malite Lukaꞌ gizineꞌ noloseive laaꞌ aniꞌ ve. Idoꞌ eveneꞌ mukiꞌ nene aposoloꞌ Pauloꞌ gizineꞌ noloseive li gilaaꞌ aniꞌ ve. Matini Lutaꞌ aza Apoloꞌ gizineꞌ noloseive lo gilineꞌ. Nemuꞌ nene laza aꞌmine luhuvo niteꞌ nene zaho gizihe nemuꞌ gele guno amoloneꞌ o neineꞌ nene mo sotoꞌ o neive. Idoꞌ aꞌmine luhuvo niteꞌ nene zamotinemuꞌ gehepeve gizineꞌ neve nemukisi nene mo gele lamineꞌ amune. Hebilaioꞌ Veliti luhuvo niteꞌine ve lo laaꞌ noune. Idoꞌ aꞌmine gulive Hebilaioꞌ nene Zuda vemuꞌ guliveꞌine gohi ma ne neive. Aꞌmine luhuvo nitekuꞌ gize-ngidineꞌ gamazilotiꞌ nene tiꞌ lo gele none: Gizive aza gopo gizamo Zuda ve linge ebeꞌ mautiꞌ ve minave nene gize-ngidineꞌ ve lo gele none. Aꞌmine Zuda ve ingine ingi monaaꞌ aniꞌ ebeliꞌmi gulive nene gizamineꞌza nGiliki gamazi laaꞌ aniꞌ nenako nemuꞌ aꞌmine ebeꞌ nene Zuda veliti misuboꞌine heta minineꞌ noloseive. Aꞌmine aleve ingine gozopotiꞌ Izesuꞌ evenele zuho minaniꞌ ve lo mene luhuvo niteliꞌmo nolo-limive. Izesuꞌ evenele zuho minangumuꞌ di goloso palasa i-ngidaniꞌza ingine Izesuꞌni huli eze zuho nomune lamaaꞌ aniꞌ ve. Neꞌmine aniꞌza aꞌmine luhuvo niteꞌ gizineꞌ gameneuꞌ ingine geni ngebelavo Izesuꞌ evenele zuho minadotiꞌ huli gohi Zuda monokuko tineꞌ mili vilisa gaꞌine gilaniꞌ gilineꞌ. Laza giluneꞌ nene Zuda ve linge malite tiꞌ li goꞌine izangumuꞌ Izesuꞌni huli vilisa aniꞌ noloseive lo gele none: Ve naba Moseꞌ neꞌmo Oꞌmosolatiꞌ daniꞌ monoꞌ adoꞌ Oꞌmosoꞌmo ngimiselavo angelolite igi li ngoloꞌ laniꞌ monoꞌ nene huli monoꞌ adoꞌ monoꞌ numuꞌve nomineꞌ idoꞌ engitoꞌ medeli mini Oꞌmoso initeꞌ lehizi-daaꞌ aveꞌine nizamaniꞌ idoꞌ initeꞌ olokuꞌ gizi Oꞌmoso imaaꞌ monovoꞌine nomineꞌ monoꞌ nene eꞌmetaniꞌ. Idoꞌ gizebo veꞌine naba nene adoꞌ lihimeloꞌ ve goloso lohotoꞌ zaloꞌ bili hilave ne neive li li-ngidaaꞌ aniꞌ noloseive. \ip Aꞌmine luhuvo niteꞌ giziveꞌmo lo-ngimineꞌ gamazi malotiꞌ nene tiꞌ lo gele none: Eveneꞌ malite neꞌmine li goꞌine izi nilizahe izami nilizahe nesi nene ingine engiꞌ gaꞌninguꞌ neꞌmine li gilaniꞌ noloseive lo gele none. Idoꞌ neꞌmine lo gele noneꞌ nene aza tiꞌ lo lo-ngimidotiꞌ nene gele none: Laza Izesuꞌ evenele zuho nete aꞌmine Zuda velite di nizaniꞌ initeꞌ nene ivileꞌ ivosa do none. Izesuꞌ aza Oꞌmosoꞌmi gipele mino idoꞌ eiꞌ gidini gehepeve neineꞌ nene ngelebizineꞌ ve. Ha Oꞌmosoꞌmi gonouꞌ ve adoꞌ angeloꞌ nesi idoꞌ Moseꞌine nesi nene ngivileꞌ ogosa naba gehepeve neive. Idoꞌ Kilisitoꞌ aza evenetoꞌ medelo mino Oꞌmoso initeꞌ lehize-daaꞌ ivesi mino Aloniꞌ aꞌvopilemoꞌ zuholite evenetoꞌ medeli mini Oꞌmoso initeꞌ lehizi-daaꞌ aveliti zuhoutiꞌ minamineꞌza engiꞌ ngivileꞌ ogo Oꞌmoso initeꞌ lehize-daaꞌ ive lamineꞌ minineꞌ. Neꞌmine ogo aza Oꞌmoso initeꞌ lehize-dineꞌ nene engiꞌ lehizi-daaꞌ aniꞌza aꞌmine neꞌmo lihimeꞌine mudise ngelo do hulamilidoꞌ ogavo nemuꞌ nene gohi lehizi-di gohi lehizi-di igaꞌ aniꞌ ve. Neꞌmine igaꞌ aniꞌza Kilisitoꞌ aza eiꞌ okoꞌno hulo Oꞌmoso lehize-dineꞌ neꞌmo mudise lihimete vaiꞌ do hulo-ledelidoꞌ gehepeve minineꞌ nenako aꞌmine okoꞌno nene gohi hulo lehize-delidoꞌ minamineꞌ ve. Idoꞌ Oꞌmososi Zuda vesi bizi minilizaniꞌ aka nene Oꞌmosoꞌmo Moseꞌni elebizavo Moseꞌ do sotoꞌ o-ngidineꞌ nene minevoꞌ minevoꞌ ogo minamineꞌza Oꞌmososi bizo mineloneꞌ aka Kilisitoꞌ do sotoꞌ o-lidineꞌ nene minevoꞌ minevoꞌ ilineꞌ aka mino aꞌmine akamuꞌ Oꞌmosoꞌmo lo huko-lidineꞌ gamazi neꞌmo nene Moseꞌ do sotoꞌ ineꞌ akaliꞌmi gamazi nene ivileꞌ ogo lamineꞌ neive. Idoꞌ Zuda veliti monoꞌ numuno naba nene ha Oꞌmoso opoꞌni laaꞌ numuno gehepeve adoꞌ Okulumoꞌ neꞌmi avazahavoꞌ ne neive. Idoꞌ aꞌmine Zuda velite monoꞌ numunguꞌ nene haza evenelite Oꞌmosoꞌmi moꞌmosiꞌve minidaa nene dizamilizave li li hukaniꞌ ve. Ne neineꞌza Kilisitoꞌ hilidiꞌmo nene Oꞌmoso neidoꞌ gehepeve Okulumokuko voloningumuꞌ aka vele-ledave. Neꞌmino neineꞌ nenako nemuꞌ nene lingine Kilisitoꞌnidoꞌ gili eleꞌvoleꞌ igaꞌ nanitine nene hulami ezeloꞌ gili eleꞌvoleꞌ igivoꞌ minilo lo mene luhuvo niteꞌ giziveꞌmo lineꞌ. Neꞌmine lo Oꞌmosomuꞌ gele eleꞌvoleꞌ ogaliꞌmi monovo ngelebizelesa eveneꞌ atoꞌ ato mukiꞌ Oꞌmosomuꞌ gili eleꞌvoleꞌ adotiꞌ igi mili aniꞌ initeꞌ mukikumuꞌ nene lo-ngimineꞌ. Nemuꞌ Izesuꞌ ineꞌ initekumuꞌ gatine gilivoꞌ mini eze evenele zuho liliꞌ igi minangutiꞌ nene huli heta limi vamilo lineꞌ. Mulumo geni daaꞌ nouneꞌ nene Oꞌmosoꞌmo eveneꞌ lisiheꞌ lamineꞌ minilizave lo do lisiheꞌ o-ledaaꞌ neineꞌ aka ne neive. Zou lo mino aꞌmine mulumo geniuꞌ vo holalonidiꞌmo gihileꞌve nene minevoꞌ alevote vo lamineꞌ ilineꞌ ne neive. Neꞌmine lo mine lamineꞌ ilizaniꞌ akamuꞌ gamazi liꞌnibe liꞌnibe vaiꞌ lo-ngimineꞌ. Adoꞌ lengikuꞌ honguvoꞌ minivo minilo idoꞌ ge luka neme ne luꞌne geme li minilo lo nevoꞌmine gamazi vaiꞌ lo-ngimineꞌ. Izesuꞌ aza Zelusalemi ebeꞌ heta hilineꞌ nemuꞌ lo gaꞌine ogo inginesi nene Zuda velite ingi minaniꞌ ebeꞌ neꞌmi heta vi gomuꞌ Izesuꞌni ovozo monovo i-dikevo daniꞌ neꞌmini inginesi dalizave. Asiꞌvemukisi idoꞌ eikisi makaꞌ minavemukisi Oꞌmosola lilizave lo lo-ngedo Oꞌmosola lo tiꞌ lo gizineꞌ: Eiꞌ Oꞌmosoꞌmo gilidokovoꞌ ilizangisi dalizadoꞌ o minineꞌ initeꞌ mukiꞌ nene Oꞌmosoꞌmo lehize-ngedelive lo Oꞌmosola lo luhuvo nitekuꞌ gizineꞌ. Neꞌmine ogo Timoteoꞌ nalaꞌ numunguꞌ minidotiꞌ nene imisele hulaniꞌ gamazi lo-ngemo noꞌnohoꞌ gamazitunuꞌ luhuvo niteꞌve nene gize osuꞌ lineꞌ. Aꞌmine luhuvo nitekuꞌ nene Kilisitoꞌni meheꞌine imi huli-di vaaꞌ naveloꞌ sotoꞌ o-ngedelineꞌ initekumuꞌ hungoꞌ vaiꞌ ngemo Kilisitoꞌnimuꞌ gili eleꞌvoleꞌ aniꞌ nene hulikelizave lo gamene vaiꞌ lo-ngidineꞌ. \c 1 \s1 Oꞌmosoꞌmo Gipeleine Gamazi Do Vaꞌvaꞌ O-davo Gamaziꞌve Lamineꞌ Lo-limineꞌ \p \v 1 Gozopoꞌ nene Oꞌmosoꞌmo gamaziꞌve avotemotine lo-ngemelesa nene ato atoꞌ gameneuꞌ monovo do ato atoꞌ ogo polohetela molavo ingine avotemotine li-ngimi ngimiꞌ iꞌmi igaꞌ aniꞌ ve. \v 2 Ne neiha gamene alingeꞌ idise mene noneꞌ gamenela nene Oꞌmosoꞌmo gamaziꞌve nene leliꞌ lo-lemelesa eiꞌ gipele neve imiselavo ogo lo-limineꞌ ve. Aꞌmine gipele nene initeꞌ mataliti meꞌnibo minelive lo eleꞌmize molo eiꞌ gipeleloꞌ aꞌmine initeꞌ mataꞌ mukiꞌ nene do sotoꞌ ineꞌ ve. \v 3 Aꞌmine gipele neve Oꞌmosoꞌmi monovo danavaꞌve atoliꞌmine goloso ogo lamineꞌ neineꞌ neꞌmi gihileꞌve gehepeve mino Oꞌmosoꞌmi emeni dameni neꞌmidoꞌ lisiheꞌ gehepeve o minive ne neive. Nemuꞌ aꞌmine gipele neꞌmo eiꞌ amuzoꞌveloꞌ molo gele mino laaꞌ neineꞌ gamazi neꞌmo nene initeꞌ mataꞌ mukiꞌ nene hize eleꞌ ivo laminekovoꞌ minaaꞌ neive. Idoꞌ aza nene goloso initete apase-ledaaꞌ akaꞌve vele osuꞌ lo-ledo veleta ve Guvelesi ve naba eitotiꞌ lemo minive nenako ana hulaaꞌ ida minineꞌ ve. \v 4 Mino Oꞌmosoꞌmi gipele ve li li-daniꞌ guliveꞌve neꞌmo Oꞌmoso gelekeleꞌ i-di gonoꞌve di-daaꞌ ave angeloliti guliveꞌine nene ivileꞌ ogo mino aꞌmine votigileloꞌ lisiheꞌ ogo ngivileꞌ goloso ogo dizosa neive. \s1 Oꞌmosoꞌmi Gipeleꞌmo Angeloꞌ Mukiꞌ nGivileꞌ Ogo Osuꞌ Lo Neingumuꞌ Lineꞌ Gamazi \p \v 5 Ee, Oꞌmosoꞌmo gipelemuꞌ lineꞌ gamazi nene angeloꞌ hamokumukisi ma lo-ngedamineꞌ nenako neꞌmo nene aza angeloꞌ ngivileꞌ ogo dizosa neive. Oꞌmosoꞌmo ezemuꞌ tiꞌ lo lineꞌ monoꞌ godolouꞌ gizi nizaniꞌ ma neive: \q1 Idise naza geiꞌ maho loloꞌ ogo \q1 neniꞌ gipeꞌne geiꞌ nene nane lo do ote-giduvoniꞌ ve. \m Idoꞌ ma lineꞌ gizi nizaniꞌ ma neive: \q1 Naza nene eiꞌ giduve melehine minekuvo \q1 Eze nene neniꞌ gipeꞌne minelive. \m \v 6 Idoꞌ Oꞌmosoꞌmo ganaꞌ gipele nene misubouko imiselelesa gohi lineꞌ gamazi ma tiꞌ li gizi nizaniꞌ ve: \q1 Oꞌmosoꞌmi angeloꞌ mukiꞌ ingine gubiꞌ izi imi opoꞌni lilizave. \m \v 7 Idoꞌ angeloꞌve ingine gelekeleꞌ i-di minaaꞌ avemuꞌ nene Oꞌmosoꞌmo gamazi tiꞌ lo lineꞌ luhuvo gizi nizaniꞌ ma neive: \q1 Oꞌmosoꞌmo lavo \q1 eiꞌ angeloꞌve nene hepeꞌ ngemeni dameni di otuhaaꞌ nave. \q1 Idoꞌ lavo \q1 aꞌmine gelekeleꞌ i-daaꞌ ave nene \q1 oloꞌ gulumo neꞌmine ngemeni dameni di otuhaaꞌ nave. \m \v 8 Neꞌmine o neineꞌza gipelemuꞌ neve monoꞌ godolouꞌ tiꞌ lo lineꞌ: \q1 Oꞌmosoo, gaza gizebo ogaꞌ moꞌmosikauꞌ gizebo ogo minelineꞌ nene \q1 huko vamo minevoꞌ minevoꞌ ogo mineleseive. \q1 Mineleseinako Guvekasi ve loloꞌ ogo minelineꞌ neꞌmi monovo nene \q1 monovo do lisiheꞌ ogaꞌ monovo nene mineleseive. \q1 \v 9 Gaza nene monovo lisiheꞌ laminetokovoꞌ luka molo mino \q1 goloso initeꞌ daaꞌ monovomuꞌ goseleꞌ gebelavo mehenga emaaꞌ nane. \q1 Neꞌmine ogaꞌ naneꞌ nenako \q1 Oꞌmoso geiꞌ Oꞌmosoka neꞌmo eveneka ngivileꞌ ogo gaza golize izo mineline lo \q1 aꞌmine moꞌmositoꞌ nene geleꞌmize molave. \m \v 10 Idoꞌ ma nene Oꞌmosoꞌmo gipelemuꞌ Guvekasi ve lo-do tiꞌ lo lo neineꞌ ma neive: \q1 Guvekasi ve, gaza ganaꞌ nene me misubo do sotoꞌ molanivo \q1 amuzo molo ha neive. \q1 Idoꞌ Okulumoꞌ nesi geiꞌ angadunuꞌ loloꞌ aineꞌ ve. \q1 \v 11 Ne neiha aꞌmine initeꞌ nene vi osuꞌ lilisasineꞌza \q1 gaza nene minevoꞌ minevoꞌ ogo haza minaaꞌ nane. \q1 Idoꞌ okulumoꞌ misubo nene eveneliti okoꞌnidoꞌ initeꞌ hulupovo ili \q1 goloso igaꞌ naniꞌ neꞌmine ilisasive. \q1 \v 12 Idoꞌ aꞌmine okulumoꞌ misubo nene litehe initeꞌ di gangi milaniꞌ maꞌmino \q1 gango moloko gosohoꞌ ha do sotoꞌ olosaba gaza neve ha minevoꞌ minevoꞌ ogo hazavoꞌ nanivo \q1 kilisimasi nene ogo vokaꞌ vokaꞌ ogo minelineꞌ nene osuꞌ lamoloseive. \m \v 13 Idoꞌ gipelemuꞌ tiꞌ lo lineꞌ gamazi neꞌmino nene angeloꞌ hamokumukisi lo-ngemesaꞌmive: \q1 Nezelotiꞌ geiꞌ nene nange. Aꞌne hulaaꞌ uvoda nene minezo. \q1 Mine do vo nanivo biluvaka nete gelekeleꞌ i-gidi minilizave lo \q1 gizengauꞌ doꞌmo leme-ngedelesuve. \m \v 14 Neꞌmine ma lo-ngedesaꞌmineꞌ nenako angeloꞌ ingine gipele neꞌminisa dizi minami ha Okulumoꞌ ngemeni damenisi Oꞌmosoꞌmi gelekeleꞌ veꞌve minikevo Oꞌmosoꞌmo do luꞌ izelesa leleꞌmize molave leliꞌ nene hize eleꞌ i-lidilizave lo ngimiselaaꞌ neive. \c 2 \s1 Oꞌmosoꞌmo Do Luꞌ Izaaꞌ Neineꞌ Nemuꞌ Nene Initeꞌ Naba Ve Lo Gele Mineloningumuꞌ Lo-ngimineꞌ \p \v 1 Idoꞌ monoꞌ gamazi nogiluneꞌ nene angeloꞌ ngivileꞌ ogo dize minive Oꞌmosoꞌmi gipeleꞌmo lo-limineꞌ gamazi nenako nemuꞌ nene aꞌmidoꞌ eꞌmeto novube lo zovoꞌ izo mala valonge. Aꞌmine nogiluneꞌ gamazi lamineꞌ mene lute gate molo gele lamineꞌ o mino eꞌmeto volone. \v 2 Oꞌmosoꞌmidatiꞌ gamazi ha angelolite laniꞌ gamazi Moseꞌ gizineꞌ neꞌmo nene amuzoꞌvesi miningumuꞌ aꞌmine gamazi nene ma avutoꞌ igi gili hulave engiꞌ nene aꞌmine gamazi avutoꞌ aniꞌ votigileloꞌ nene di mili lihime ngimi mulumo initeꞌ di-ngidaaꞌ aniꞌ ve. \v 3 Idoꞌ aꞌmine amuzoꞌve ngomosi minineꞌ gamazi avutoꞌ ave nene mulumo niteꞌ neꞌmine di-ngidaaꞌ aniꞌ nenako aꞌmine Moseꞌ gizineꞌ gamazi ivileꞌ ogo dizo minineꞌ initeꞌ naba Oꞌmosoꞌmo lihimete hulo-ledo do luꞌ izelineꞌ akate vele-lidineꞌ neꞌmi gamazi nene gilube gelamube ogo mineloneꞌ nene Oꞌmosoꞌmo lihime lemo mulumo niteꞌ naba do-ledeleseive. Idoꞌ aꞌmine mulumo niteꞌ naba do-ledelingutiꞌ nene mo ngelo olovoꞌ amolosune. Idoꞌ aꞌmine Oꞌmosoꞌmo lihimete hulo-ledo do luꞌ izelineꞌ gamazi nene Guvelesi ve asiꞌve ganatilise lo sotoꞌ ivo eze veletiꞌ gilave nete lezela li hulaniꞌ ve. \v 4 Idoꞌ lezela nili hulavo aꞌmine gamazi nene lamineꞌ ve li ningilizave lo Oꞌmosoꞌmo eiꞌ gala gilidoꞌ do molo atoꞌ suno ogo amuzo malehe initeꞌ ato atoliꞌmine do sotoꞌ ogo idoꞌ aꞌmine gamazi li-limave nene Sikalahuꞌvelatiꞌ amuzo ato atoꞌ lehize-ngedo minineꞌ ve. Idoꞌ Oꞌmosoꞌmo neꞌmine ineꞌ nenako nemuꞌ nene aꞌmine lihimete hulo-ledo do luꞌ izelineꞌ gamazi nene laminetoꞌ mo initeꞌ naba goloso neive. Nemuꞌ nene lute gate molo gele lamineꞌ o mino eꞌmeto volone. \s1 Gomuꞌ Molo Lemo Akate Velo Do Luꞌ Izaaꞌ Ivete Aza Aꞌmine Gono Dalidoꞌ Lisiheꞌ Ogo Minelingumuꞌ Ve Lo Aza Eiꞌ Evenele Zuho Leliꞌ Okode Neꞌmine Do Otuho Mulumo Alumo Gelo Hilineꞌ Ve Lo Lo-ngimineꞌ \p \v 5 Idoꞌ idise lo-lingimuvoniꞌ nene monovo gosohoꞌ sotoꞌ ilinguꞌ vi hilalizaniꞌ alevemuꞌ nene lo-lingimuvoniꞌ ve. Idoꞌ aꞌmine monovo gosohoꞌ sotoꞌ ilinguꞌ vi hilalizaniꞌ aleve nene angeloꞌ engitoꞌ neve gelekeleꞌ i-ngidi minikevo gizebo i-ngidilizave lo Oꞌmosoꞌmo ma lo-ngedamive. \v 6 Idoꞌ monoꞌ godolouꞌ gamazi ma ve maliꞌmo Oꞌmoso lo-imineꞌ gamazi ma tiꞌ lo gize neineꞌ ma neive: \q1 Laza eveneꞌ ngomo haza niteꞌ noneꞌ lelikumuꞌ nene \q1 gaka gelo minelinidoꞌ minamaneꞌza \q1 aizo, lelikumuꞌ nene gaka gelo minaaꞌ nane. \q1 Idoꞌ eveneꞌ lemeni dameni nene lamineꞌ amivo \q1 gaza gizebo o-ledelinidoꞌ minamaneꞌza \q1 gaza nene ha gizebo o-ledaaꞌ nane. Idoꞌ neꞌmine o-ledaaꞌ naningumuꞌ nene naza aizo lo gelekuve. \q1 \v 7 Eveneꞌ nene angeloꞌ engitotiꞌ gamene liꞌnibevoꞌ lemetiꞌ igi minilizave lo \q1 gaza eveneꞌ nene angelototiꞌ do leme-ngedo molo-ngede nane. \q1 Gaza eveneꞌ nene do hozi lo-ngedo guveꞌinesi ve loloꞌ o-ngedane. \p \v 8 Idoꞌ neꞌmine o-ngedo eveneꞌ nete \q1 initeꞌ mataꞌ mukitoꞌ gizebo igi minilizave lo \q1 aꞌmine initeꞌ mataꞌ mukiꞌ nene eveneliti gizeꞌinguꞌ do leme-ngedaaꞌ nane. \m Ee, Oꞌmosoꞌmo initeꞌ mukiꞌ nene eveneliti gizeꞌninguko do leme-ngedo molave. Neꞌmine ogavo initeꞌ hamokisi evenelite gizebo amilizave lo molaniꞌ initeꞌ nene ma nizamave. Ne neiha idise gameneuko ningaaꞌ nouneꞌ nene initeꞌ mukiꞌ nete eveneꞌ nene olihe gelekeleꞌ i-ngidi osuꞌ lamavo ningaaꞌ noune. \v 9 Idoꞌ ningo gelaaꞌ nouneꞌ nene Oꞌmoso aza angelototiꞌ gamene liꞌnibevoꞌ lemetiꞌ ogo minelive lo angelototiꞌ do lemetiꞌ ogo hulo-dive Izesuꞌnimuꞌ nene ningo gelaaꞌ noune. Ee, Oꞌmosoꞌmo nasahiliꞌ o-ledo eveneꞌ mukikumuꞌ helelive lo imiselineꞌ ve. Idoꞌ aꞌmine ve Izesuꞌ nene mulumo gelo hilingumuꞌ ve lo Oꞌmosoꞌmo do hozi lo-doo Guvelesi ve loloꞌ o-dineꞌ nemuꞌ nene mo ningo gelaaꞌ noune. \p \v 10 Idoꞌ Oꞌmosoꞌmo Izesuꞌni imiselo mulumo alumo gelo helelive lineꞌ nene nanitekumuꞌ ve. Izesuꞌ nene do luꞌ izelineꞌ gono dalidoꞌ olihe lisiheꞌ gehepeve amo minineꞌ nenako nemuꞌ mulumo alumo gelo helelineꞌ neꞌmo aꞌmine leliꞌ do luꞌ izelineꞌ gono nene dalidoꞌ do lisiheꞌ gehepeve o-delingumuꞌ mulumo alumo gelo helelive lo Oꞌmosoꞌmo imiselineꞌ ve. Idoꞌ izipahala vaiꞌ leleꞌmize molo atoliꞌmine ogo do lamineꞌ o-ledelesa gono doꞌmo vo miningutiꞌ nene Oꞌmoso aza leliꞌ gomuꞌ molo lemo akate velo do luꞌ izelive Izesuꞌ mulumo alumo gelo helelive lo imiselineꞌ neꞌmo nene monovo do lamineꞌ goloso ineꞌ ve. Ee, initeꞌ mataꞌ mukiꞌ eiꞌ initeꞌve eikumukovoꞌ mini di dizilizave lo do sotoꞌ molave eveneꞌ naba Oꞌmoso aza Izesuꞌni nene do luꞌ izelidoꞌ do lisiheꞌ o-delesa mulumo alumo gelo helelive lo imiselineꞌ neꞌmo nene monovo do lamineꞌ goloso ineꞌ ve. \v 11 Idoꞌ eveneꞌ lute noso izo gilito do lamineꞌ o-ledo do Oꞌmosoꞌmi evenele loloꞌ o-ledaaꞌ ivesi idoꞌ lute do lamineꞌ o-lidineꞌ alevesi leliꞌ meteho nene hamoꞌ minineꞌ aleve none. Nemuꞌ aza lelikumuꞌ nene neniꞌ akuꞌne aluꞌne zuho nizave lolosa ovozo helesaꞌmive. \v 12 Idoꞌ akuꞌne aluꞌne zuho ve lineꞌ nemuꞌ monoꞌ godolouꞌ Oꞌmoso lo-imineꞌ gamazi ma tiꞌ li gizi nizaniꞌ ma neive: \q1 Naza neniꞌ akuꞌne aluꞌne zuho nene geiꞌ guliveka nene lo sotoꞌ o ngemo \q1 geiꞌ guliveka do hozi lo leliꞌ zuholiti muliseuꞌ nene nama lolosuve. \m \v 13 Idoꞌ leliꞌ eveneliti lemeni damenisi minelingumuꞌ lineꞌ gamazi gohi ma tiꞌ li gizi nizaniꞌ ma neive: \q1 Naza Oꞌmosomuꞌ gele eleꞌvoleꞌ o mino eitoꞌ lehete o minelove. \m Neꞌmine lo gohi ma tiꞌ lo lineꞌ ma neive: \q1 Idoꞌ naza nene Oꞌmosoꞌmo neze izipahaꞌne zuho nimineꞌ mesi noneꞌ ningilo. \p \v 14-15 Idoꞌ aꞌmine izipahala zuho laza nene hele vaaꞌ okodesi noneꞌ nenako aꞌmineꞌmine ogo Izesuꞌ aza helelineꞌ neꞌmo helaaꞌ amuzo do minive Satani nene do goloso o-do idoꞌ helakumuꞌ ngehelele izaaꞌ neꞌmo gesi hizo hulo lulouꞌ o-ngedavo ngehelele izaaꞌ lulouꞌ minave nesi nene aza helosa gesi kele hulo-ngedelesa hele vaaꞌ okode neꞌmine do otuho minineꞌ ve. \v 16 Idoꞌ neꞌmine ineꞌ nene angeloꞌ aleve do nguꞌ izo neꞌmine ineꞌ nevoba monoꞌ godolouꞌ Abalahamuꞌ aꞌvopilemoꞌ zuho do nguꞌ izaaꞌ neive li gizi nizadoꞌ eꞌmeto neꞌmine ineꞌ ve. \v 17 Idoꞌ nemuꞌ nene eveneliti lihimete apase-ledelesa leliꞌ hele vaaꞌ okode neꞌmine do otuho nakunolo alunolo zuho leliꞌ gehepeve neꞌmine loloꞌ ilineꞌ ogavo idoꞌ evenetoꞌ medeli mini Oꞌmoso initeꞌ lehizi-daaꞌ ave naba nete eveneliti lihime apasaakumuꞌ gono daaꞌ nanako neꞌmine ve loloꞌ ogo eveneꞌ muhelete ningo Oꞌmosoꞌmi veleloꞌ monovo lisihetotiꞌ Oꞌmosoꞌmo lidokovoꞌ gono dalosa eze akunolo alunolo zuho leliꞌ gehepeve neꞌmine loloꞌ ilineꞌ ogavo loloꞌ ineꞌ nenako aza nene leliꞌ gehepeve neꞌmine loloꞌ amidiniko aꞌmine gono nene dalidoꞌ lisiheꞌ mo amidine. Nemuꞌ nene leliꞌ gehepeve neꞌmine loloꞌ ilineꞌ ogavo loloꞌ ineꞌ ve. \v 18 Ee, idoꞌ emenguꞌ milanguꞌ mulumo gelo minineꞌ nemuꞌ nene mo ningo gele neineꞌ nenako ve ma ingine ngemenguꞌ nimilavo minilizaniꞌ aleve nene hize eleꞌ noo-ngedo alete molo-ngedelidoꞌ o neive. \c 3 \s1 Izesuꞌ Neꞌmo Moseꞌni Ivileꞌ Ogo Dizosa Miningumuꞌ Lo-ngimineꞌ \p \v 1 Nemuꞌ nene neze zuho, Oꞌmosoꞌmo eiꞌ ve lo Okulumokuꞌ voloningumuꞌ lengeleꞌmize molave lingine nene leliꞌ monokuꞌ nene Oꞌmosoꞌmo eiꞌ velemuꞌ ogo imiselavo ave aposolo mino evenetoꞌ medeli mini Oꞌmoso initeꞌ lehizi-daaꞌ ave naba neꞌmine minive naba Izesuꞌnimuꞌ nene gatine gili minilo. \v 2 Moseꞌ aza Oꞌmosoꞌmi zuhola gono danguꞌ nene Oꞌmosoꞌmo lo-didokovoꞌ eꞌmeto monovoꞌve lisihetotiꞌ gono do do vineꞌ neꞌmine ogo Izesuꞌ aza nesi aꞌmineꞌmine ogo gonoloꞌ eleꞌmize molave Oꞌmosoꞌmi gamaziꞌve nene ivileꞌ amo lo-didokovoꞌ eꞌmeto monovoꞌve lisihetotiꞌ gono do do vineꞌ ve. \v 3 Idoꞌ eveneꞌ zuho maliti meꞌnibi guvele neꞌmo aꞌmine zuholiti guveꞌine nene ivileꞌ ogo naba minaaꞌ neineꞌ neꞌmino Izesuꞌ gulive do hozi loloneꞌ nene Moseꞌ gulive do hozi laaꞌ nouneꞌ nene ivileꞌ ivosa do hozi lolonidoꞌ lisiheꞌ o neive. Idoꞌ lisiheꞌ o neineꞌ nenako nemuꞌ nene ezemuꞌ gatine gili minilo. \v 4 Idoꞌ neꞌmine lo Oꞌmosoꞌmi evenele zuholiti meꞌnibo nene Izesuꞌnimuꞌ luvoniꞌ gilineꞌ nenako nemuꞌ nene lo-lengemelove. Eveneꞌ zuho ato atoꞌ di sotoꞌ i-ngidave meꞌninge nene minamaniꞌ nevoba ha minaniꞌ ma neive. Ha minaniꞌza aꞌmine initeꞌ mataꞌ mukiꞌ do sotoꞌ molave nene Oꞌmosoꞌmovoꞌ do sotoꞌ molaniꞌ nenako eiꞌ hamoꞌ nene meꞌnibo neive. \v 5 Idoꞌ Moseꞌ nene Oꞌmosoꞌmo lo-didokovoꞌ eꞌmeto monovoꞌve lisihetotiꞌ Oꞌmosoꞌmi zuhola gono do do vineꞌ nene ha Oꞌmosoꞌmi gelekeleꞌ veꞌvevoꞌ mino Oꞌmosoꞌmi gamaziꞌve alingeꞌ sotoꞌ ilingumukovoꞌ gamazi lo ngeme ngemeꞌ ogo gono do do vineꞌza \v 6 Kilisitoꞌ aza neve Oꞌmosoꞌmo lo-didokovoꞌ eꞌmeto monovoꞌve lisihetotiꞌ gono do do vineꞌ nene mo Oꞌmosoꞌmi gipele mino eze zuholoꞌ gizebo o-ngede mino gono do do vineꞌ ve. Idoꞌ eze zuho ve luvoniꞌ nene laza Kilisitoꞌ do luꞌ izelive lo ezemuꞌ gele eleꞌvoleꞌ o mino lolize izaaꞌ nouneꞌ monovote nene ma hulamosoꞌ aꞌmine zuho nene leliꞌ minelesune. \s1 Moseꞌ nGeleꞌmizo Vive Mukiꞌ Ingine Oꞌmosomuꞌ Gili Eleꞌvoleꞌ Ami Meheꞌine Imiꞌmi Vadiꞌmo Mine Gelaaꞌ Ebeꞌ nGemelesa Inguꞌ Nene Vi Hilamaniꞌ Nenako Nemuꞌ Leliꞌ Nene Eheꞌ Ogo Mineloningumuꞌ Lo-ngimineꞌ \p \v 7-8 Nemuꞌ nene laza Oꞌmosoꞌmi Sikalahuliꞌmo gamazi ma tiꞌ lo lineꞌ mamuꞌ nene gele dalone: \q1 Moseꞌ aza ebeꞌ hadivela ngeleꞌmizo novivo \q1 Oꞌmoso golo izaniꞌ gameneuꞌ eveneꞌ ingine \q1 Oꞌmosoꞌmi gamaziꞌve gili huli gili dalisa gilami \q1 aꞌmanapa igi minaniꞌ neꞌmine igi minami \q1 lingine eiꞌ noloꞌve idise aꞌmene ma nigili ma \q1 lutine di aꞌmanapa igi gili hulamilo. \q1 \v 9 Idoꞌ aꞌmine ebeꞌ hadivela nene avotinge ingine \q1 initeꞌ mataꞌ mukiꞌ engita ogo molo uvoniꞌ nene \q1 kilisimasi foti (40) neꞌmine nene mini ningi minaniꞌza \q1 ningi huli-nidi goꞌne iziꞌmi igi minaniꞌ ve. \q1 \v 10 Nemuꞌ nene naza aꞌmine alevemuꞌ nene muluꞌneuꞌ goloso gehepeve gelo \q1 engikumuꞌ tiꞌ lo luvoniꞌ ve: \q1 Engiꞌ luꞌine neꞌmo gamene gamene gopo akaloꞌ vaaꞌ ivo \q1 neze akaꞌne nene ningi hulaniꞌ ve. \q1 \v 11 Nemuꞌ nene nizeboloꞌ molaniꞌ nenako naza laminetoꞌ nolo hukuve lo \q1 tiꞌ lo luvoniꞌ ve: \q1 Ingine nene neniꞌ mine gelaaꞌ ebeꞌneuꞌ nene igi mini gilamilisave lo \q1 noluve. \p \v 12 Nemuꞌ nene neze zuhokizo, lengikutiꞌ eveneꞌ ma nene lutine golososi mini Oꞌmosomuꞌ gili eleꞌvoleꞌ ami minevoꞌ minevoꞌ ogo gono daaꞌ ive Oꞌmoso nene mehedine imikelizaze. Eheꞌ igi minilo. \v 13 Idoꞌ lengikutiꞌ eveneꞌ ma lingine lutine Oꞌmosola molakumuꞌ lutine aꞌmanapa ogavo lihime daaꞌ monovo goloso neꞌmo lingimimiseꞌ ogavo goloso ikelizaze. Monoꞌ godolouꞌ idise gamene ve laniꞌ nene ha neidokovoꞌ monokuꞌ nene ne luꞌne do ngi lo-nede ge luka do ngi lo-gede livoꞌ minilo. \v 14 Laza ganaꞌ apiꞌ ogo Kilisitoꞌnimuꞌ gele eleꞌvoleꞌ uneꞌ nene hulamo do giliꞌ lo nonivo idise mene noneꞌ gamene osuꞌ lilineꞌ nene aꞌneꞌmovoꞌ Kilisitoꞌ evenele loloꞌ uneꞌ nene gihile mineleseive. \p \v 15 Nemuꞌ nene monoꞌ godolouꞌ tiꞌ li gizi nizaniꞌ gamazi maloꞌ eꞌmeti minilo: \q1 Eveneꞌ ingine Oꞌmosoꞌmi gamaziꞌve gili huli \q1 gili dalisa gilami aꞌmanapa igi minaniꞌ neꞌmine igi minami \q1 lingine eiꞌ noloꞌve idise aꞌmene nigili ma \q1 lutine di aꞌmanapa igi gili hulamilo. \p \v 16 Idoꞌ monoꞌ godolouꞌ gamazi idise lo sotoꞌ uvoniꞌ neꞌmo nene laminetoꞌ tiꞌ lo nolo-limive: Laza Oꞌmosoꞌmi gamazi gele damo mehede emo mineloneꞌ nene Oꞌmosoꞌmo mine gelaaꞌ lemelesa neinguꞌ nene ngelo vo holamolosune. Ee, Oꞌmosoꞌmo gamazi nolo-ngimivo gili minisasi aꞌmine gamaziloꞌ eꞌmetami meheꞌine imave li monoꞌ godolouꞌ gizaniꞌ ma nene zamotinemuꞌ luhuvo gizaniꞌ neve. Moseꞌ Aigita misuboutiꞌ ngeleꞌmizo aniꞌ aleve mukiꞌ engikumuꞌ nene luhuvo gizaniꞌ ve. \v 17 Idoꞌ kilisimasi foti (40) neꞌmi lulouꞌ ma nene Oꞌmosoꞌmo zamotinemuꞌ mulunouꞌ goloso gehepeve gilineꞌ neve. Aꞌmine hamoꞌ aleve ingine kilisimasi foti (40) neꞌmi lulouꞌ lihime di ebeꞌ hadivela hili geseꞌ aniꞌ aleve engiꞌ nemuꞌ nene mulunouꞌ goloso gehepeve gilineꞌ ma neive. \v 18 Idoꞌ Oꞌmoso aza eveneꞌ mine gelaaꞌ ebeꞌ ngemelesa nouvonguꞌ nene ingine mini gilamilisave lo eveneꞌ zamotinemuꞌ lo huko lineꞌ ma neve. Aꞌmine hamoꞌ aleve ingine Oꞌmosoꞌmi gamazi gili huli meheꞌine imave engikumuꞌ nene mine gelaaꞌ ebeꞌ ngemelesa nouvonguꞌ nene igi mini gilamilisave lo lo hukineꞌ ve. \v 19 Nemuꞌ nene ingine Oꞌmosomuꞌ gili eleꞌvoleꞌ ami meheꞌine imaaꞌ aniꞌ monovoꞌine neꞌmo nene mine gelaaꞌ ebeꞌ ngemelesa inguꞌ nene vamaniꞌ ve lo mo ningo gele none. \c 4 \p \v 1 Idoꞌ nemuꞌ nene Oꞌmosoꞌmo eveneꞌ ma ingine mine gelaaꞌ ebeꞌneuꞌ nene vi hilalisave lo lo hukineꞌ gamazi nene olihe ogo gihile izamivo aꞌmineꞌmi akaꞌvesi olihe tilamidoꞌ nene Oꞌmosoꞌmo lengikumuꞌ gala gelosa lengikutiꞌ eveneꞌ mamuꞌ mo aka ivileꞌ ikenako aꞌminguꞌ mo kekeꞌ vi hilamilisave lo gelalize. Laza eheꞌ ogo golise gelo minelone. \v 2 Idoꞌ laza eheꞌ ogo golise geleloneꞌ nene nanitekumuꞌ ve. Moseꞌ mininguꞌ minaniꞌ aleve monoꞌ gamazi lamineꞌ li-ngimaniꞌ neꞌmine igi lezesi li-limikevo none. Idoꞌ aꞌmine monoꞌ gamazi lamineꞌ nene li-ngimi ngimiꞌ avo gilaniꞌza ingine aꞌminemuꞌ gili eleꞌvoleꞌ igi eꞌmetisaꞌmadiꞌmo engita vo gihile izamo hize eleꞌ o-ngedamaaꞌ ineꞌ ve. Nemuꞌ nene laza engiꞌ aniꞌ monovo nemuꞌ gelo golise gelo eheꞌ ogo minelone. \v 3 Idoꞌ Oꞌmosoꞌmo ezemuꞌ gili eleꞌvoleꞌ ami meheꞌine imaaꞌ avemuꞌ ingine mine gelaaꞌ ebeꞌneuꞌ igi mini gilamilisave lo lo hukokuve lineꞌ nenako nemuꞌ nene aꞌneꞌmine ve ingine mine gelaaꞌ ebeꞌveuꞌ nene vi hilamilizadoꞌ mini mili minikevo aꞌmine mine gelaaꞌ ebeꞌveuꞌ vo holalonive nene ezemuꞌ gele eleꞌvoleꞌ ogo nonive leliꞌ nene none. Idoꞌ ingine Oꞌmosoꞌmi mine gelaaꞌ ebeꞌveuꞌ vi hilamaniꞌ nene mine gelaaꞌ ebeꞌve nomivosa nevoba asi aza okulumoꞌ misubo do sotoꞌ ogo gono do osuꞌ lidotiꞌ nene mine gelo neineꞌ nenako mine gelaaꞌ ebeꞌve nene mo neive. \v 4 Idoꞌ Oꞌmoso aza mine gelo neive luvoniꞌ nene Oꞌmosoꞌmo gamene sigisi (6) neꞌmi lulouꞌ gono davo gamene seveni (7) ineꞌ nemuꞌ nene monoꞌ godolouꞌ gamazi tiꞌ li gizi nizaniꞌ ma neive: \q1 Gamene seveni (7) ogavo gonoꞌve osuꞌ lineꞌ nenako \q1 neuꞌ nene apiꞌ ogo mine gilineꞌ. \m \v 5 Idoꞌ mine gelo neive li luhuvo gohi gizaniꞌ ma tiꞌ lo lineꞌ neuko mo lo-lengemekuve: \q1 Ingine nene mine gelaaꞌ ebeꞌneuꞌ nene igi mini gilamilisave. \m \v 6 Idoꞌ naza gomuꞌ lo-lingimuvoniꞌ gamazi malotiꞌ nene eveneꞌ ma ingine Oꞌmosoꞌmi mine gelaaꞌ ebeꞌveuꞌ vi hilalizaniꞌ aka nene ha ngolokovoꞌ lo minivo minineꞌ nenako idoꞌ gomuꞌ minanguꞌ nene monoꞌ gamazi lamineꞌ li-ngimikevo gilave engiꞌ nene aꞌmine gamazi gili eleꞌvoleꞌ igi eꞌmetisaꞌmadiꞌmo Oꞌmosoꞌmi mine gelaaꞌ ebekuꞌ nene ma vamaniꞌ nenako \v 7 aꞌminguꞌ vo holaloneꞌ gamene atoꞌ gohi ma do kegeso molo-lidineꞌ ve. Idoꞌ aꞌmine gamene nene idise mine do nodizuneꞌ gamene ne neive. Ee, Moseꞌ eveneꞌ ngeleꞌmizo vineꞌ gamenelotiꞌ kilisimasi vaiꞌ goloso ogo vavo aꞌmine gamenemuꞌ nene idise mine do nouneꞌ gamene ve lo Oꞌmosoꞌmo Davidiꞌ veleuꞌ molavo aꞌmine lo-lingimuvoniꞌ gamazi ma nene Davidiꞌ tiꞌ lo lineꞌ ve: \q1 Lingine eiꞌ noloꞌve idise aꞌmene ma nigili ma \q1 lutine di aꞌmanapa igi gili hulamilo. \p \v 8 Idoꞌ Moseꞌ helavo Zosuvaꞌ ezeloꞌ medelo Kanaha misubouꞌ ngeleꞌmizo vineꞌ mauꞌ nene ingine mine gelaaꞌ ebeꞌ nene dadiniko Oꞌmosoꞌmo mine gelaaꞌ ebekuꞌ vo holaaꞌ gamene atoꞌ gohi mamuꞌ alingeꞌ ma lamidine. \v 9 Nemuꞌ nene Oꞌmosoꞌmo gonoꞌve do osuꞌ losa mine gilineꞌ neꞌmine ogo eze evenele zuho mine geleloneꞌ gamene nene lelikumuꞌ ha gizebo ogo neive. \v 10 Ee, Oꞌmosoꞌmi mine gelaaꞌ ebekuꞌ vo holalonive laza nene Oꞌmosoꞌmo initeꞌ mataꞌ loloꞌ ogo osuꞌ lo gonoꞌve hulo mine gilineꞌ neꞌmino lazasi gonotesi hulo aꞌmida mudise aka vo mine gelelesunako nemuꞌ nene Oꞌmosoꞌmi evenele zuho mine geleloneꞌ gamene nene lelikumuꞌ gizebo ogo neive. \v 11 Nemuꞌ nene laza Moseꞌ mininguꞌ minaniꞌ aleve Oꞌmosoꞌmi gamazi gili huli eꞌmetami aꞌmine mine gelaaꞌ ebekuꞌ vi hilamaniꞌ neꞌmine ogo engiꞌ aniꞌ neꞌmine oloneꞌ neꞌmo aꞌmine mine gelaaꞌ ebekuꞌ nene vo holamo zovoꞌ izo mauꞌ vogalonge. Mine gelaaꞌ ebekuꞌ voloningumuꞌ nene Oꞌmosomuꞌ gele eleꞌvoleꞌ ogo eze gamaziꞌve nene amuzo molo gele do vo minelone. \p \v 12 Ee, Oꞌmosoꞌmi gamazi neꞌmo nene gilizevo ogo haza minamo amuzoꞌvesi goloso mino gono dovo dovoꞌ ogo mino bainati miteꞌ velela geꞌno mehenela geꞌno gohe goloso minaaꞌ neineꞌ nene ivileꞌ ogo gohe goloso neive. Idoꞌ bainati miteꞌ nene eveneꞌ hize sato sokuluꞌ lo lulouꞌ gehepeve vaaꞌ neineꞌ nene ivileꞌ ogo aꞌmine Oꞌmosoꞌmi gamazi neꞌmo luteuꞌ vodeuꞌ nene hize sokuluꞌ lo vo holosa laza lute gateuꞌ olosa giluneꞌ initekumuꞌ nene izeꞌ molaaꞌ neive. \v 13 Oꞌmosoꞌmo do sotoꞌ molaniꞌ initeꞌ mukiꞌ nene haleki minilizadoꞌ ma minamavo aza ningesaꞌmineꞌ initeꞌ nene hamokisi mo kekeꞌ nizamave. Ee, leze monovote izeꞌ molo-ledelive eiꞌ veleloꞌ nene initeꞌ mukiꞌ hiti minami sotokovoꞌ minaaꞌ naniꞌ nenako nemuꞌ aꞌmine Oꞌmosoꞌmi gamazi nene amuzo molo gele do minelone. \s1 Leliꞌ Hize Eleꞌ O-ledelive Evenetoꞌ Medelo Mino Oꞌmoso Initeꞌ Lehize-daaꞌ Ive Nabate Dizo Minive Izesungumuꞌ Lo-ngimineꞌ \p \v 14 Idoꞌ evenetoꞌ medeli mini Oꞌmoso initeꞌ lehizi-daaꞌ ave nabalitevoꞌ monoꞌ numuno nabauꞌ lavolavo izi hukikaniꞌ nene di vesemeꞌ ili Oꞌmosoꞌmi moꞌmosiꞌvevoꞌ ve languꞌ dizaaꞌ aniꞌ neꞌmine ogo Oꞌmosoꞌmi gipele Izesuꞌ aza evenetoꞌ medelo mino Oꞌmoso initeꞌ lehize-daaꞌ ive nabate dizo minive loloꞌ ogo okulumoꞌ ivileꞌ ogosa hozila Oꞌmosoꞌmi moꞌmosiꞌve gehepeve neida Okulumokuko dizo minineꞌ nenako nemuꞌ monote gele eleꞌvoleꞌ uneꞌ nene do amuzo molo do ngi lo do minelone. \v 15 Idoꞌ monote nene do amuzo molo do ngi lo do mineloneꞌ nene evenetoꞌ medelo mino Oꞌmoso initeꞌ lehize-daaꞌ ivete naba nene lemenguꞌ neꞌmi lulouꞌ mino amuzote nomivo gilizevo ogo nonivo aza nene mulumote ningamo ninge mate-ledaaꞌ ive minineꞌ nevoba lelita lemenguꞌ ato atoꞌ mukiꞌ sotoꞌ ogaꞌ neineꞌ neꞌmino ezelasi nene emenguꞌ ato atoliꞌmine sotoꞌ o-dineꞌ nenako nemuꞌ nene leliꞌ mulumote ningelidoꞌ lisiheꞌ o neive. Ee, lelita lemenguꞌ sotoꞌ ogaꞌ neineꞌ neꞌmino ezelasi sotoꞌ ineꞌza aza neve lihime hamokisi ma damive. Idoꞌ leliꞌ mulumote ningelidoꞌ lisiheꞌ o neineꞌ nenako nemuꞌ nene monote nene do amuzo molo do ngi lo do minelone. \v 16 Idoꞌ evenetoꞌ medelo mino Oꞌmoso initeꞌ lehize-daaꞌ ive nabate neꞌmo leliꞌ mulumote ningelidoꞌ lisiheꞌ o minive aza nene Oꞌmoso neida leliꞌ gamazite hize eleꞌ olosa vo neineꞌ nenako nemuꞌ laza geni lebeleli gameneuꞌ nene Oꞌmosoꞌmo isete izo idoꞌ nasahiliꞌ o-ledo ha hize eleꞌ o-ledeleseive lo aꞌmine geni lebelelineꞌ initeꞌ nemuꞌ nene lovoꞌ kiselevoꞌ ogo lo-emesoꞌ nene Oꞌmoso aza moꞌmosiꞌveloꞌ mino gizebo o-ledo nasahiliꞌ o-ledo minaaꞌ neingumuꞌ nene ha lo-emelone. \c 5 \p \v 1 Idoꞌ neꞌmino geni lebeleli initekumuꞌ Oꞌmoso lo-emeloneꞌ nene evenetoꞌ medelo mino Oꞌmoso initeꞌ lehize-daaꞌ ive nabaꞌmi monovo tiꞌ lo neingumuꞌ nene gelo ma neꞌmine ha olosune. Neꞌmino neive: Evenetoꞌ medeli mini Oꞌmoso initeꞌ lehizi-daaꞌ ave mukiꞌ ngeleꞌmizi milikaꞌ milikaꞌ igaꞌ naniꞌ nene sipisipi nevoꞌmine initeꞌ lihimete apase-ledelive li Oꞌmoso imilisa di aniꞌ nene ngibili Oꞌmoso imaniꞌ initeꞌ ato atoꞌ mukiꞌ nesi olokuꞌ gizikaꞌ gizikaꞌ igi minilisa eveneꞌ lelikumuꞌ ve li Oꞌmosola gono di hizi eleꞌ i-lidilizave minilizave lo Oꞌmosoꞌmo lidoꞌ igi eveneꞌ engikutiꞌ nene ma ngeleꞌmizi milaaꞌ nave. \v 2 Idoꞌ aꞌmine evenetoꞌ medeli mini Oꞌmoso initeꞌ lehizi-daaꞌ ave naba nene haza eveneꞌ mini inginesi nene eveneꞌ mukiꞌ amuzote nomineꞌ mino aka laminetotiꞌ zovoꞌ izo vaaꞌ nouneꞌ neꞌmine nene ha ilizadoꞌ o neineꞌ nenako nemuꞌ nene monoꞌ gili lamineꞌ ami zovoꞌ izi vaaꞌ naniꞌ neꞌmino lazasi zovoꞌ izo vunidine li neꞌmine aniꞌ aleve nene mulumoꞌine gili hongu monovo ngelebizilizadoꞌ o neive. \v 3 Idoꞌ aꞌmine evenetoꞌ medeli mini Oꞌmoso initeꞌ lehizi-daaꞌ ave nabasi nene amuzoꞌine nomineꞌ mini zovoꞌ ha izi vilizadoꞌ i nizaniꞌ nenako nemuꞌ evenekumuꞌ nene lihimeꞌine apase-ngedelive li sipisipi nevoꞌmine initeꞌ ngibili olokuꞌ gizi Oꞌmoso imilizaniꞌ neꞌmine igi angiseꞌinemukisi ma imilizaniꞌ o neive. \v 4 Aꞌmine evenetoꞌ medelo mino Oꞌmoso initeꞌ lehize-daaꞌ ive nabaꞌmi gono nene dizosa neive. Idoꞌ aꞌmine gono dalisa nene ve malite engiꞌ luꞌnidoꞌ di mili ma disaꞌmave. Oꞌmoso asiꞌve nene Moseꞌ uvoloho Aloniꞌni nene do ote-davo neꞌmine gono daniꞌ maꞌmine ogo eveneꞌ ma do ote-ngedavo aꞌmine gono nene daaꞌ nave. \v 5 Idoꞌ Kilisitoꞌ nene aꞌmineꞌmine ogo eiꞌ gala gilidoꞌ do molo eiꞌ okoꞌno do hozi lo evenetoꞌ medelo mino Oꞌmoso initeꞌ lehize-daaꞌ ive naba loloꞌ amineꞌ. Asi Oꞌmoso neꞌmo eleꞌmize nomolo tiꞌ lo lo-dineꞌ ve: \q1 Idise naza geiꞌ maho loloꞌ ogo neniꞌ gipeꞌne geiꞌ nene nane lo \q1 do ote-giduvoniꞌ ve. \m \v 6 Idoꞌ monoꞌ gamazi gohi mautiꞌ Kilisitoꞌ nene Abalahamuꞌni noꞌnohoꞌ ize-dive Melekisedekiꞌ gono daaꞌ ineꞌ neꞌmino aꞌmidoꞌ medelo do mino evenetoꞌ medelo mino Oꞌmoso initeꞌ lehize-daaꞌ ive minelive lo Kilisitoꞌnimuꞌ tiꞌ lo lineꞌ: \q1 Oꞌmoso neniꞌ nimaniꞌ initeꞌ nene Melekisedekiꞌ gono daaꞌ ineꞌ monovoloꞌ ogo \q1 evenetoꞌ medelo mino initeꞌ lehize-nedaaꞌ anive \q1 minevoꞌ minevoꞌ ogo minelesane. \p \v 7 Izesuꞌ aza misubouko ve loloꞌ ogo minineꞌ gameneuꞌ nene aza helaaꞌ akaloꞌ novingutiꞌ do tiꞌne-do do uꞌ izeli amuzoꞌvesi minive Oꞌmosola nene vise nabaꞌ naba lo idoꞌ Oꞌmosola loo veletiꞌ ive novozo limineꞌ. Neꞌmine ogavo aza okoꞌno doꞌmo lemo gelekeleꞌ o-nedaaꞌ ingumuꞌ ve lo Oꞌmosoꞌmo gele imineꞌ. \v 8 Aza nene Oꞌmosoꞌmi gipele minineꞌza mulumo alumo gilineꞌ neꞌmo nene Oꞌmoso gelekeleꞌ o-daaꞌ monovomuꞌ nene gele ngoloꞌ lo gilineꞌ. \v 9 Idoꞌ neꞌmino gele ngoloꞌ lo gilidiꞌmo eze nene gono dalidoꞌ lisiheꞌ gehepeve ogo mino gelekeleꞌ o-daaꞌ unive mukikumuꞌ nene minevoꞌ minevoꞌ oloningumuꞌ ve lo mudise do luꞌ izaaꞌ neꞌmi meleho nene aza loloꞌ ogavosa \v 10 Oꞌmosoꞌmo gaza neniꞌ nimaniꞌ initeꞌ nene Melekisedekiꞌ gono daaꞌ ineꞌ monovoloꞌ ogo evenetoꞌ medelo mino initeꞌ lehize-nedaaꞌ anive naba minelesane lo eleꞌmize molaniꞌ ve. \s1 Monoꞌ Hulikelizave Lo Gaꞌine Do Gizineꞌ Gamazi \p \v 11 Idoꞌ aꞌminemuꞌ gamazi lo-lengemeloniꞌ nene vaiꞌ goloso neineꞌza gatine gohi duu lo vivo nizaniꞌ neꞌmo nene lo ngoloꞌ lo lo-lengemelesa geꞌnebe olosuve. \v 12 Idoꞌ geꞌnebe oloniꞌ nene lingine Kilisitoꞌ evenele liliꞌ igi gamene haꞌna minaniꞌ nenako idise mene eveneꞌ ma monoꞌ monovo apizi ngimilizadoꞌ i minilizanako neꞌmine ami ve malite Oꞌmosoꞌmi gamazi nili-lingimavo gohi apiꞌ igi bina giliꞌmi giliꞌmi dizi alizadoꞌ mini mili mini monoꞌ gamazi amuzo malehe ma gilami izipe amine naaꞌ naniꞌ neꞌmine lapa nomineꞌ gamazi neevoꞌ nene gililizadoꞌ i nizaniꞌ neꞌmo nene geꞌnebe olosuve. \v 13 Ee, ingine amine naaꞌ nave mukiꞌ nene ha izipe ngomo neꞌmine nene nizanako neꞌmo nene monovo lisiheliꞌmi gamaziꞌve nene ningi di kegesami ladenivoꞌ igi minaaꞌ nave. \v 14 Ne neiha luteꞌmi amuzo malehe nosoꞌ niteꞌve nalizaniꞌ nene lute gate do lamineꞌ olone li di ningiꞌ ningiꞌ igi monovo lisihekisi golososi ningi di kegesisa monokuꞌ lodive igi nizave engikovoꞌ nene amuzo malehe nosoꞌ niteꞌ neꞌmine nene ha nalisave. \c 6 \p \v 1-2 Nemuꞌ nene luꞌine do ngi lo-ngedelingumuꞌ ve li Kilisitoꞌ evenele idiꞌne aꞌmene liliꞌ ave ganaꞌ apizi ngimaaꞌ aniꞌ gamazi adoꞌ luꞌine di velepeꞌ izi labuluvo ogaꞌ akauꞌ ngeleꞌmize molaaꞌ neineꞌ monovo nene hulaakumuꞌ gamazi nesi idoꞌ Oꞌmosomuꞌ gele eleꞌvoleꞌ ogaliꞌmi gamazi nesi monoꞌ noso holaaꞌ monovo ato atokumuꞌ apizi ngimaaꞌ naniꞌ gamazi nesi idoꞌ aꞌine eveneꞌ godoꞌnidoꞌ hitaaꞌ naniꞌ monovo neꞌmi gamazi nesi idoꞌ hele noloningutiꞌ otaaꞌ neꞌmi gamazi nesi idoꞌ Oꞌmosoꞌmo goniꞌ o-ngedo lihime ngemelive mulumo alumo gili miniviꞌ miniviꞌ ilizaniꞌ gamazi nene gohi gelo gohi gelo minuneꞌ nene hulo gamazi monokuꞌ do lodive o-ledelineꞌ gamazi ma atokumukisi imineꞌ molo gelo minelone. \v 3 Idoꞌ gamazi gohi ma monokuꞌ do lodive o-ledelineꞌ gamazi mamuꞌ imineꞌ molo gelo gelo mineloningumuꞌ nene mo Oꞌmosoꞌmo gele lemavo ma mo neꞌmino imineꞌ molo gelo minelone. \v 4-6 Monoꞌ neꞌmo ve ma ingine luꞌine hize labanaꞌ ele-ngedavo Oꞌmosoꞌmo eze evenele lehize-ngedaaꞌ initeꞌ nene lehize-ngedavo neꞌmi laniteꞌve gilaaꞌ idoꞌ Oꞌmosoꞌmi Sikalahuꞌ engita ogavo minaaꞌ idoꞌ Oꞌmosoꞌmi gamazi nene lamineꞌ neive li neꞌmi laniteꞌve gilaaꞌ idoꞌ alingeꞌ gamene naba sotoꞌ ilineꞌ neꞌmi amuzo engita sotoꞌ ivo laniteꞌve gilaaꞌ ave ingine neꞌmine ve monoꞌ meheꞌine imi hulilizaniꞌ neꞌmo ingine Oꞌmosoꞌmi gipele nene lohotoꞌ zaloꞌ gohi bilaniꞌ gelavo eveneꞌ mukiꞌ eze di uꞌmusupo lizi-dilizaniꞌ monovo di sotoꞌ ilizaniꞌ nenako neꞌmine igi nizadotiꞌ laza engiꞌ nene luꞌine di velepeꞌ izilizaniꞌ akauꞌ ngelo ngeleꞌmize tineꞌ molamolosunako nemuꞌ nene lutine di velepeꞌ izilisave li ganaꞌ apiꞌ igi li-lingimaaꞌ aniꞌ gamazi bina nene hazamuꞌ gohi lo gohi lo amo gamazi gohi mamuꞌ imineꞌ molo lo gelo minelone. \v 7 Ee, goline nene misubouꞌ izekaꞌ izekaꞌ ivo misubo neꞌmo geꞌno nosa aꞌmine misubouꞌ gono daaꞌ ave nene do lamineꞌ o-ngedeli nosoꞌ niteꞌ nene do sotoꞌ ogaꞌ neineꞌ misubo nene Oꞌmosoꞌmo noꞌnohoꞌ izo do lamineꞌ ogaꞌ neineꞌ neꞌmino aza eveneꞌ ma engita eze gamazi limineꞌ nene gili neꞌmi gihileꞌve monovo lamineꞌ di sotoꞌ ilizave nene noꞌnohoꞌ ize-ngedaaꞌ neive. \v 8 Idoꞌ aꞌmine misubo neꞌmo goline nene geꞌno noosa aꞌminguꞌ nene gasavasi lilihe golosovoꞌ do sotoꞌ ilineꞌ nene Oꞌmosoꞌmo aꞌmine misubo nene gohi ma do guno amosoꞌ ogave lo usiꞌ ize-delidoꞌ o neinako aꞌmine misubouꞌ nene oloꞌ enge viteꞌ oloseinako nemuꞌ nene Oꞌmosoꞌmidatiꞌ gamazi nene engita lemavo mo gilisa monovo lamineꞌ di sotoꞌ ami mudise meheꞌine imilizave nene mo olokuꞌ vilisave. \p \v 9 Neꞌmine ve nene olokuꞌ vilisave luvoniꞌza luꞌne lengeme nouvoniꞌ aleve lingine nene olokuꞌ vaaꞌ akaloꞌ vilizave lo gele minosa noluvoba lengiꞌ do lunguꞌ izineꞌ neꞌmi gihile monovo lamineꞌ nene lengita sotoꞌ o do vo minelive lo gele minosa nene noluve. \v 10 Lingine Oꞌmosola lutine mili minadiꞌmo lingine eiꞌ evenele nasahiliꞌ i-ngidaaꞌ naniꞌ monovotine nene lengita neivo neꞌmine i di vi minaaꞌ naniꞌ ma neive. Idoꞌ lingine neꞌmine igi minaaꞌ nangumuꞌ nene Oꞌmoso aza gala molavo lengeleꞌmize lamineꞌ amidiniko eze nene monovo goloso ogaꞌ ive neꞌmine minidine. Neꞌmine idineꞌza monovo goloso ogaꞌ ive minesaꞌmineꞌ nenako lingine neꞌmine igi minaaꞌ nangumuꞌ nene gala molavo lengiꞌ nene lengeleꞌmize lamineꞌ amilivoba ha lengeleꞌmize lamineꞌ oloseive. \v 11 Oꞌmosoꞌmo gamene nabala initeꞌ lamineꞌ lehize-ledeleseive li aꞌminemuꞌ gapepeꞌ igi minaaꞌ naniꞌ initeꞌ nene dalizangisi lingine hamo hamoꞌ aꞌmine igi mili minaniꞌ monovotine neꞌminevoꞌ nene igi mili mini amuzo mili minilizave lo gelo noluve. \v 12 Idoꞌ eveneꞌ malite goseleꞌ ngebelamivo Oꞌmosomuꞌ gili eleꞌvoleꞌ igi mini igi mili minaaꞌ naniꞌ aleve nene Oꞌmosoꞌmo eze evenele lemelove lo lo huko salani molo-lidineꞌ initeꞌ nene daaꞌ nave. Lingine aꞌmineꞌmine igi monokumuꞌ goseleꞌ lengebelaaꞌ ive liliꞌ igi minami aꞌmine aleveti monovoꞌnidoꞌ nene ngeꞌmeti nivi igi mili minilizangumuꞌ ve losa lingine Oꞌmosoꞌmi evenele nasahiliꞌ i-ngidi minaniꞌ monovotine neꞌminevoꞌ nene igi mili mini amuzo mili minilizave lo gelo noluve. \s1 Oꞌmosoꞌmo Lemelove Lo Salani Molo Lo Hukineꞌ Gamazi Nene nGelo Vo Haza Amoloseive Lo Gele Mineloningumuꞌ Lo-ngimineꞌ \p \v 13 Oꞌmosoꞌmo salani molo-ngidineꞌ initeꞌ daaꞌ nave luvoniꞌ nene Abalahamuꞌni salani gamazi lo molo-dineꞌ nene gihile izingumuꞌ luvoniꞌ ve. Eveneꞌ eze Oꞌmoso ivileꞌ ogo minive ma neivosa aꞌmine veꞌmi guliveloꞌ salani gamazi lo huko lilive ma minamivo Oꞌmoso eiꞌ guliveloꞌ salani gamazi tiꞌ lo lo hukineꞌ: \q1 \v 14 Neniꞌ nene noꞌnohoꞌ ize-gedekuvo \q1 gaꞌvopilemoꞌ vaiꞌ goloso sotoꞌ igi mini di vilisave losa \q1 neniꞌ noluve. \m \v 15 Tiꞌ lo lo huko-dineꞌ nenako aꞌmine nene geto gihile izamingumuꞌ nene goseleꞌ belamivo ha gele eleꞌvoleꞌ ogo gizebo ogo hazavoꞌ neivo aꞌmine Oꞌmosoꞌmo lo huko-dineꞌ gamazi nene Isakaꞌni gedavosa apiꞌ ogo gihile izineꞌ. \v 16 Eveneꞌ ingine nene gamazi lamineꞌ nolune li engiꞌ ngivileꞌ ogo minive eiꞌ guliveloꞌ likevo neꞌmo eveneꞌ ingine laniꞌ gamaziloꞌ nene ve malitesi eꞌmenga aꞌmanga lisaꞌmave. Nemuꞌ nene Oꞌmosoꞌmo gamazi lo hukineꞌ nene eiꞌ guliveꞌveloꞌ lo huko lineꞌ ve. \v 17 Ee, Oꞌmoso eiꞌ nene izipahala zuho leliꞌ do lemelove lo lo hukineꞌ initekumuꞌ nene lulo do velepeꞌ izo lemamilihe li gilikelizave losa aꞌmine lineꞌ gamazi nene mo lamineꞌ lave li gililizangumuꞌ nene amuzo molo gele mino eiꞌ guliveꞌveloꞌ lo huko lineꞌ ve. \v 18 Idoꞌ initeꞌ sitaꞌ aꞌmine gamazi lo huko lineꞌ nemukisi idoꞌ aꞌmine gamazi lo huko linguꞌ nene eiꞌ guliveꞌvelokisi lineꞌ nemukisi nene aza lulo do velepeꞌ izo mo amolosuve lo soza ngelo lamoloseive lo geleloneꞌ neꞌmo lute do amuzo goloso molo-ledavo laza alete molo-ledelive lo eze gizebo inguꞌ vo hulunive laza aꞌmine lo huko-lidineꞌ initeꞌ nene alingeꞌ mo do sotoꞌ o-ledeleseive lo gapepeꞌ ogo gizebo minaaꞌ nouneꞌ nene hulamo do giliꞌ lo do minelone losa aꞌmine gamazi nene eiꞌ guliveꞌveloꞌ lo huko-lidineꞌ ve. \v 19 Idoꞌ aꞌmine initekumuꞌ gapepeꞌ ogo gizebo minaaꞌ nouneꞌ neꞌmo nene lute do giliꞌ lo-lede mino mo apasamilineꞌ initeꞌ sipi vo mala valive li di giliꞌ li-daaꞌ aniꞌ initeꞌ neꞌminosa mo apasamilineꞌ initeꞌ nenako lute nene ngelo vo mala vamoloseive. Ee, monoꞌ numuno nabauꞌ nene Oꞌmosoꞌmi moꞌmosiꞌveuko dizikelizave li eveneꞌ akaꞌine hizi tili-ngidi lavolavo izi hukikaniꞌ nene di vesemeꞌ ili evenetoꞌ medeli mini Oꞌmoso initeꞌ lehizi-daaꞌ ave naba ingine aꞌmine Oꞌmosoꞌmi moꞌmosiꞌve ve languꞌ dizaaꞌ naniꞌ neꞌmine ogo aꞌmine Oꞌmosoꞌmo lo huko-lidineꞌ initekumuꞌ gapepeꞌ ogo gizebo minaaꞌ nouneꞌ lute gate neꞌmo nene vo Oꞌmosoꞌmi moꞌmosiꞌve gihile neida nene nalava ize neineꞌ gelavo none. \v 20 Idoꞌ aꞌmine Oꞌmosoꞌmi moꞌmosiꞌve gihile neida nene Izesuꞌ nesi nene Melekisedekiꞌ gono daaꞌ ineꞌ monovoloꞌ ogo evenetoꞌ medelo mino Oꞌmoso initeꞌ lehize-daaꞌ ive naba loloꞌ ogosa leliꞌ gamazite hize eleꞌ olosa leliꞌ nene gomuꞌ molo lemo vo neive. \c 7 \s1 Melekisedekiꞌ Aza Nene Evenetoꞌ Medelo Mino Oꞌmoso Initeꞌ Lehize-daaꞌ Ive Mino Abalahamuꞌnisi Idoꞌ Aꞌvopilemoꞌ Zuho Nesi nGivileꞌ Ogo Dizo Minineꞌ Nenako Izesuꞌ Aza Nene Eze Monovoloꞌ Eꞌmeto Evenetoꞌ Medelo Mino Oꞌmoso Initeꞌ Lehize-daaꞌ Ive Mino Abalahamuꞌ Zuhoutiꞌ Evenetoꞌ Medeli Mini Oꞌmoso Initeꞌ Lehizi-daaꞌ Ave Engiꞌ Nene nGivileꞌ Ogo Dizo Miningumuꞌ Gamazi Lo-ngimineꞌ \p \v 1 Aꞌmine Melekisedekiꞌ nene Salemi ebekuꞌ guvelesi ve mino idoꞌ evenetoꞌ medelo mino veleta Oꞌmoso atoliꞌmine minive nene initeꞌ lehize-daaꞌ ive nesi loloꞌ ogo minineꞌ ve. Idoꞌ Abalahamuꞌ aza guveꞌinesi ve ma minaniꞌ nene ngebele osuꞌ lo tineꞌ molo navo Melekisedekiꞌ aza vavo akaloꞌ di goꞌine hizi Abalahamuꞌni nene noꞌnohoꞌ ize-dineꞌ ve. \v 2 Neꞌmino Abalahamuꞌni noꞌnohoꞌ ize-davo aza initeꞌ mataꞌve teni teni (10 10) neꞌmine miningutiꞌ Melekisedekiꞌni hamo hamoꞌ ma imineꞌ. Idoꞌ eiꞌ gulive Melekisedekiꞌ neꞌmi monovo nene monovoꞌve lisihekovoꞌ ogo minineꞌ guvelesi ve ve. Idoꞌ ebeꞌve gulive Salemi neꞌmi monovo nene hongu monovo ve losa neineꞌ nenako aza nene hongu monovoꞌvesi minaaꞌ ineꞌ guvelesi ve nene neive. \v 3 Idoꞌ Aloniꞌ monovoꞌveloꞌ imineꞌ mili evenetoꞌ medeli mini Oꞌmoso initeꞌ lehizi-daaꞌ ave nene lamineꞌ Zakoboꞌ gipele Leviꞌ aꞌvopilemoꞌ minaniꞌ nene ngelebizi avoꞌninge idoꞌ izeꞌninge meꞌningeliti guliveꞌine li sotoꞌ ikevosavoꞌ nene aꞌmine gonoloꞌ ngeleꞌmizi milaaꞌ aniꞌza Melekisedekiꞌ aza nene neꞌminosa minamineꞌ ve. Aza nene evenetoꞌ medelo mino Oꞌmoso initeꞌ lehize-daaꞌ ive minineꞌza monoꞌ godolouꞌ nene avolomote idoꞌ izele mele neti guliveꞌine nene gizavo ma gelamune. Idoꞌ sotoꞌ ogo mine do ogo hilineꞌ neꞌmi monovo nesi gizavo gelamuneꞌ neꞌmo Melekisedekiꞌ nene minevoꞌ minevoꞌ ogovoꞌ minineꞌ gelavo Oꞌmosoꞌmi gipele eiꞌ neꞌmine mino evenetoꞌ medelo mino Oꞌmoso initeꞌ lehize-daaꞌ ive mine do vovoꞌ vovoꞌ ogo minaaꞌ ive minineꞌ ve. \p \v 4 Idoꞌ Melekisedekiꞌ aza nene eveneꞌ naba goloso minaniꞌ neineꞌ nemuꞌ mene giliꞌnalo: Avoteho naba minive Abalahamuꞌ aza nene lovouꞌ ngivileꞌ ineꞌ alevetidatiꞌ initeꞌ teni teni (10 10) do angutiꞌ Melekisedekiꞌni nene hamo hamoꞌ imineꞌ ve. \v 5 Isilaeleꞌ aleve ma haza alevesi idoꞌ Leviꞌ aꞌvopilemoꞌ linge ma evenetoꞌ medeli mini Oꞌmoso initeꞌ lehizi-daaꞌ ave liliꞌ ave nesi mukitoꞌ nene Abalahamuꞌ aꞌvopilemoꞌ mini hamoꞌ zuho minaniꞌza aꞌmine evenetoꞌ medeli mini Oꞌmoso initeꞌ lehizi-daaꞌ ave ingine Oꞌmosoꞌmo louꞌ gamazi lidoꞌ nene eꞌmeti engiꞌ Isilaeleꞌ aleve linge ma initeꞌ teni teni (10 10) di sotoꞌ igaꞌ angutiꞌ hamo hamoꞌ nene daaꞌ aniꞌ ve. Ee, initeꞌ ngimaaꞌ ave idoꞌ initeꞌ daaꞌ ave mukiꞌ nene mo Abalahamuꞌ aꞌvopilemokovoꞌ minaniꞌza mo engitatikisi ha daaꞌ aniꞌ ve. \v 6 Ne neiha Melekisedekiꞌ aza Leviꞌ aꞌvopilemokutiꞌ sotoꞌ amineꞌ minineꞌza Abalahamuꞌnidatiꞌ initeꞌ nene ha daniꞌ ve. Idoꞌ Oꞌmosoꞌmo salani gamazi lamineꞌ Abalahamuꞌni lo huko-daaꞌ idiꞌmo nene eveneꞌ naba minineꞌza Melekisedekiꞌ neꞌmo nene noꞌnohoꞌ ize-dineꞌ ve. \v 7 Idoꞌ Oꞌmosoꞌmo salani gamazi lamineꞌ nene Abalahamuꞌni lo huko-daaꞌ idiꞌmo nene Abalahamuꞌ aza eveneꞌ naba goloso minineꞌ nene gele none. Ne neiha Abalahamuꞌ aza Melekisedekiꞌni ivileꞌ ogo naba minidiniko Melekisedekiꞌ aza Abalahamuꞌni nene noꞌnohoꞌ ize-delidoꞌ o minamidine. Noꞌnohoꞌ ize-delidoꞌ o minamidineꞌza aza mo Abalahamuꞌni noꞌnohoꞌ ize-dineꞌ nenako Melekisedekiꞌ aza nene Abalahamuꞌni ivileꞌ ogo minineꞌ ve. Ee, ve maliꞌmo ve ma noꞌnohoꞌ ize-delineꞌ nene noꞌnohoꞌ ize-dive nene dizo minavo noꞌnohoꞌ dave nene lemo mineleseive lo gele noneꞌ nene lamineꞌ nenako malite soza gamazi ve li mo lamilisave. Nemuꞌ nene Melekisedekiꞌ aza Abalahamuꞌni ivileꞌ ogo minive minaaniꞌ neive lo gelelesune. \v 8 Idoꞌ ma nene Leviꞌ aꞌvopilemoꞌ zuhoutiꞌ evenetoꞌ medeli mini Oꞌmoso initeꞌ lehizi-daaꞌ ave nete eveneꞌineti initeꞌ teni teni (10 10) miningutiꞌ hamo hamoꞌ daaꞌ ave engiꞌ nene hili vaaꞌ aniꞌ zuho nizave lo gele minelesune. Ne neiha aꞌmineꞌmine ogo evenetatiꞌ initeꞌ daaꞌ ive Melekisedekiꞌ eiꞌ nene hilineꞌ ve li monoꞌ godolouꞌ gizamavo neꞌmo Melekisedekiꞌ nene helamo velesi hazavoꞌ neineꞌ gilineꞌ nemuꞌ nene gelelone. \v 9-10 Naza giluvoniꞌ mo neꞌmine luvodine: Abalahamuꞌ lovoutiꞌ initeꞌ teni teni (10 10) do angutiꞌ hamo hamoꞌ Melekisedekiꞌni imineꞌ gameneuꞌ nene Abalahamuꞌ aꞌvopilemoꞌ initeꞌ teni teni (10 10) evenelite di minangutiꞌ hamo hamoꞌ daaꞌ aveti avoꞌnibo Leviꞌ nene olihe Abalahamudatiꞌ sotoꞌ amivo nenako azasi Abalahamukisi makaꞌ mini aꞌmine initeꞌ nene imasineꞌ gelave. Nemuꞌ nene evenetoꞌ medeli mini Oꞌmoso initeꞌ lehizi-daaꞌ ave Leviꞌ aꞌvopilemoꞌ zuho nene Melekisedekiꞌ evenetoꞌ medelo mino Oꞌmoso initeꞌ lehize-daaꞌ gono daaꞌ ineꞌ neꞌmo ngivileꞌ ogo minineꞌ ve. \p \v 11 Idoꞌ Oꞌmosoꞌmo Moseꞌni louꞌ gamaziꞌve iminguꞌ nene gamazi ma tiꞌ lo lo-imineꞌ ma lingine mo gili nizaniꞌ ma neive: Leviꞌ aꞌvopilemokutiꞌ Oꞌmoso neniꞌ nimaniꞌ initeꞌ evenetoꞌ medeli mini lehizi-nidilizave liliꞌ igi minilizave ingine nene aꞌmine louꞌ gamaziloꞌ nene gizebo igi eveneꞌ ngeleꞌmize akaloꞌ ilizave. Neꞌmine lo lo-imineꞌ nenako nemuꞌ nene aꞌmine evenetoꞌ medeli mini Oꞌmoso initeꞌ lehizi-daaꞌ ave nete eveneꞌ nene mudise ngeleꞌmize akaloꞌ ilizadoꞌ lisiheꞌ gehepeve i minadiniko Leviꞌ aꞌvopilemoꞌ evenetoꞌ medelo mino Oꞌmoso initeꞌ lehize-daaꞌ ive aza Aloniꞌ gono daaꞌ ineꞌ neꞌmino damo Melekisedekiꞌ evenetoꞌ medelo mino Oꞌmoso initeꞌ lehize-daaꞌ gono daaꞌ ineꞌ neꞌmino daaꞌ ive atoliꞌmine ogo minive Izesuꞌni nene ma nanimuꞌ do ote-didine. Leviꞌ aꞌvopilemoꞌ zuho ingine gono nene di pili di osuꞌ ladiniko aꞌmine initeꞌ lehize-daaꞌ gono dalive gosohoꞌ do ote-dive neꞌmi gonoꞌve nene ma minamivo ma do ote-damidine. \v 12 Idoꞌ evenetoꞌ medeli mini Oꞌmoso initeꞌ lehizi-daaꞌ gono daaꞌ ave gomuꞌ minadoꞌ nene medelo atoliꞌmine gosohoꞌ sotoꞌ ogavo ma nene louꞌ gamazi nesi gosohokovoꞌ sotoꞌ oloseinako nemuꞌ nene gomuꞌ louꞌ gamazi neꞌmi gonoꞌve nene mo osuꞌ laniꞌ ve. \v 13 Idoꞌ evenetoꞌ medelo mino Oꞌmoso initeꞌ lehize-daaꞌ ive do ote-dingumuꞌ atoliꞌmine ve ve luvoniꞌ nene Oꞌmoso neniꞌ nimaniꞌ initeꞌ nene Melekisedekiꞌ gono daaꞌ ineꞌ monovoloꞌ eꞌmeto lehize-nedaaꞌ anive minevoꞌ minevoꞌ ogo minelesane lo Oꞌmosoꞌmo lo-dive nene Leviꞌ aꞌvopilemoꞌ zuhoutiꞌ sotoꞌ amo Oꞌmosoꞌmi holomoloꞌ mili-daniꞌ initeꞌ lehize-daaꞌ gono nene ma damaaꞌ ave atoꞌ zuhoutiꞌ sotoꞌ ogo minineꞌ nenako nemuꞌ nene luvoniꞌ ve. \v 14 Idoꞌ atoꞌ zuhoutiꞌ sotoꞌ ive luvoniꞌ nene Guvetesi ve aza Zudaꞌ aꞌvopilemoꞌ zuhoutiꞌ sotoꞌ ineꞌ nene mukitoꞌ mo gele osuꞌ lo noneꞌ nenako nemuꞌ nene luvoniꞌ ve. Idoꞌ Moseꞌ neꞌmo louꞌ gamazi gizinguꞌ nene Leviꞌ aꞌvopilemoꞌ zuhoutikovoꞌ nene evenetoꞌ medeli mini Oꞌmoso initeꞌ lehizi-daaꞌ ave liliꞌ ilizave lo lo-ngidineꞌza Zudaꞌ aꞌvopilemoꞌ zuhoutikisi nene evenetoꞌ medeli mini Oꞌmoso initeꞌ lehizi-daaꞌ ave liliꞌ ilizave lo ma lo-ngedamineꞌ ma neive. \p \v 15-16 Idoꞌ evenetoꞌ medelo mino Oꞌmoso initeꞌ lehize-daaꞌ ive atoliꞌmine sotoꞌ ineꞌ nene louꞌ gamazi ma evenetoꞌ medeli mini Oꞌmoso initeꞌ lehizi-dilizave nene Leviꞌ aꞌvopilemoꞌ zuhoutikovoꞌ mini okoꞌine laminekisivoꞌ minilizavetevoꞌ nene Oꞌmoso initeꞌ lehizi-daaꞌ ave liliꞌ ilizave li louꞌ miladoꞌ nene lisiheꞌ o nouve losa Leviꞌ zuholiti gonoloꞌ medelo sotoꞌ ineꞌ nevoba asi minevoꞌ minevoꞌ ogo mino vo osuꞌ lamaaꞌ amuzo ezela miningumuꞌ ve losa evenetoꞌ medelo mino Oꞌmoso initeꞌ lehize-daaꞌ ive Melekisedekiꞌ gonoloꞌ medelo sotoꞌ ineꞌ nenako gomuꞌ minineꞌ louꞌ gamazi nene Oꞌmosoꞌmo do atoꞌ ingumuꞌ luvoniꞌ gamazi nene neꞌmo sotoꞌ ogavo mo laminetoꞌ ningekune. \v 17 Idoꞌ Oꞌmoso aza aꞌmine vemuꞌ evenetoꞌ medelo mino Oꞌmoso initeꞌ lehize-nedaaꞌ anive loloꞌ ogo minevoꞌ minevoꞌ ogo minelesane lo lo-dineꞌ gamazi neꞌmo aꞌmine luvoniꞌ gamaziloꞌ nene vo daanako mo laminetoꞌ lokuve. \v 18-19 Idoꞌ Oꞌmosoꞌmo louꞌ gamazi gomuꞌ minineꞌ do atoꞌ ineꞌ neꞌmi monovo nene neꞌmino neive: Aꞌmine louꞌ gamazi nene eveneꞌ hamokisi mudise leleꞌmize akaloꞌ amivo eveneꞌ lisiheꞌ lamineꞌ minesaꞌmuneꞌ neꞌmo amuzoꞌve nomineꞌ mino eveneꞌ hize eleꞌ o-ledamivo Oꞌmosoꞌmo lavo aꞌmine louꞌ gamazi nene gohi minamineꞌ. Idoꞌ neꞌmine ogo Oꞌmosoꞌmo aꞌmine evenetoꞌ medelo mino Oꞌmoso initeꞌ lehize-daaꞌ ive atoliꞌmine nene do sotoꞌ o-ledavo aza nene gomuꞌ louꞌ nesi evenetoꞌ medeli mini Oꞌmoso initeꞌ lehizi-daaꞌ ave nesi nene ngivileꞌ ogo leleꞌmize akaloꞌ ogavo neꞌmo lisiheꞌ lamineꞌ ogo Oꞌmososi makaꞌ minelonidoꞌ lisiheꞌ ogavo ezela nene lehete ogo minaaꞌ noune. \p \v 20 Idoꞌ evenetoꞌ medelo mino Oꞌmoso initeꞌ lehize-daaꞌ ive gosohoꞌ atoliꞌmine nene Oꞌmosoꞌmo eleꞌmize nomolo aꞌmine gono do minevoꞌ minevoꞌ ogo minelesane lo eiꞌ guliveloꞌ lo huko-damo haza do ote-dineꞌ nevoba aza eiꞌ guliveꞌveloꞌ lo huko-do do ote-dineꞌ ve. Ingine Leviꞌ aꞌvopilemoꞌ zuhoutiꞌ evenetoꞌ medeli mini Oꞌmoso initeꞌ lehizi-daaꞌ ave liliꞌ aniꞌ nene Oꞌmosoꞌmo ngeleꞌmize nomolo lingine aꞌmine gono di miniviꞌ miniviꞌ ilisave lo eiꞌ guliveloꞌ lo huko-ngedamivo haza di oti-ngidaaꞌ aniꞌza \v 21 aꞌmine ve gosohokumuꞌ nene monoꞌ godolouꞌ tiꞌ lo minineꞌ gamazi nene Oꞌmoso eiꞌ guliveloꞌ lo lo huko-dineꞌ ve: \q1 Gaza nene evenetoꞌ medelo mino Oꞌmoso neniꞌ initeꞌ lehize-nedaaꞌ anive loloꞌ ogo \q1 minevoꞌ minevoꞌ ogo minelesane lo Guvelesi ve Oꞌmoso aza eiꞌ guliveloꞌ lo huko-dineꞌ neꞌmo \q1 lulo ngelo do velepeꞌ izo soza lamoloseive. \m \v 22 Idoꞌ Izesuꞌ aza minevoꞌ minevoꞌ ogo gono dalive lo Oꞌmosoꞌmo neꞌmine ogo eiꞌ guliveloꞌ lo huko do ote-dineꞌ neꞌmo leliꞌ gele daloneꞌ gamazi ve lo Oꞌmosoꞌmo minevoꞌ minevoꞌ gamazi lo huko-lidineꞌ nene gihile izelingumuꞌ hize eleꞌ ilive izeleho nene Izesuꞌ minavo idoꞌ neꞌmo nene aꞌmine idise lo huko-lidineꞌ gamazi neꞌmo gomuꞌ aleve lo huko-ngidineꞌ gamazi nene ivileꞌ ogosa gamazi lamineꞌ neive. \v 23 Idoꞌ gomuꞌ nene evenetoꞌ medeli mini Oꞌmoso initeꞌ lehizi-daaꞌ ave minaniꞌ nene hilikaꞌ hilikaꞌ iꞌmi vaaꞌ aniꞌ neꞌmo miniviꞌ miniviꞌ igi gono dalizadoꞌ minamavo eveneꞌ ato atoꞌ mukiꞌ vaiꞌ nete nene evenetoꞌ medeli mini Oꞌmoso initeꞌ lehizi-daaꞌ ave liliꞌ ikaꞌ ikaꞌ iꞌmi vaaꞌ aniꞌ ve. \v 24 Neꞌmine aniꞌza Izesuꞌ aza helamo minevoꞌ minevoꞌ ogovoꞌ minelineꞌ nenako ezeloꞌ medeli ma minamavo evenetoꞌ medelo mino Oꞌmoso initeꞌ lehize-daaꞌ gono nene mo mudise dovo dovoꞌ ogo mineleseive. \v 25 Nemuꞌ nene Izesuꞌ aza lelikumuꞌ nene isete izelive lo Oꞌmosola lo minevoꞌ minevoꞌ ogo minaaꞌ neineꞌ nenako Izesuꞌnimuꞌ gele eleꞌvoleꞌ ogo Oꞌmosola vo hulunive leliꞌ nene Izesuꞌ do luꞌ izo mudise leleꞌmize lamineꞌ ilidoꞌ neive. \p \v 26 Idoꞌ aza neꞌmine veꞌmo evenetoꞌ medelo mino Oꞌmoso initeꞌ lehize-daaꞌ ivete naba mino goloso ogo minunidotiꞌ leleꞌmize lamineꞌ ilidoꞌ lisiheꞌ o neineꞌ nenako ha do luꞌ izo leleꞌmize lamineꞌ oloseive. Aꞌmine ve nene aza ve lamineꞌ atoliꞌmine ogo mino lulo do gopo o-delineꞌ initeꞌ hamokisi eita ma nomineꞌ mino lihime daaꞌ naniꞌ aleve neꞌmino minamo atoliꞌmine gehepeve ogo mino okulumoꞌ nesi ivileꞌ ogo osuꞌ lo dizosa neive. \v 27 Evenetoꞌ medeli mini Oꞌmoso initeꞌ lehizi-daaꞌ ave naba ingine gamene gamene eveneliti lihimeꞌine apase-ngedelive li sipisipi nevoꞌmine initeꞌ ngibili olokuꞌ gizi Oꞌmoso lehizi-dilisa gomuꞌ nene engiꞌ lihimeꞌine apase-ngedelive li sipisipi ma ngibili Oꞌmoso imaaꞌ nave. Izesuꞌ aza dizosa mino engiꞌ ngivileꞌ ogo lihimeꞌvesi nomineꞌ lamineꞌ minaaꞌ neineꞌ nenako ingine igaꞌ adiꞌmine osaꞌmineꞌ ve. Eiꞌ nene gele ngemavo evenelite bili hilanguꞌ asiꞌve lulo okoꞌnoꞌve nene Oꞌmoso emavo leliꞌ mukiꞌ lihimete nene mudise apase-ledelidoꞌ lisiheꞌ ogavo eiꞌ okoꞌnoꞌve nene gamene hamokovoꞌ emavo osuꞌ lineꞌ ma neive. \v 28 Idoꞌ lelitoꞌ medelo mino Oꞌmoso initeꞌ lehize-daaꞌ ivete naba neꞌmo gomuꞌ evenetoꞌ medeli mini Oꞌmoso initeꞌ lehizi-daaꞌ ave naba minaniꞌ nene ngivileꞌ ogo lamineꞌ minive ve luvoniꞌ nene neꞌmino neingumuꞌ luvoniꞌ ve: Gomuꞌ minineꞌ louꞌ gamaziloꞌ eꞌmeti evenetoꞌ medeli mini Oꞌmoso initeꞌ lehizi-daaꞌ ave naba minilizave di oti-ngidaaꞌ aniꞌ nene ha eveneꞌ mukiꞌ amuzote nomivo minaaꞌ nouneꞌ ngemeni damenisi minave nene di oti-ngidaaꞌ aniꞌ ve. Ee, neꞌmine vevoꞌ di oti-ngidaaꞌ aniꞌza Oꞌmosoꞌmo gomuꞌ louꞌ gamaziloꞌ medelo alingeꞌ evenetoꞌ medelo mino Oꞌmoso initeꞌ lehize-daaꞌ ive mineline lo eiꞌ guliveꞌveloꞌ lo huko-dive eiꞌ gipele nene do ote-dineꞌ ve. Idoꞌ aꞌmine gipele neve gopo haza neivosa do ote-dineꞌ nevoba asi aꞌmine gono dalidoꞌ nene mudise do lisiheꞌ o-davo neivosa nene do ote-dineꞌ ve. \c 8 \s1 Lelitoꞌ Medelo Mino Oꞌmoso Initeꞌ Lehize-daaꞌ Ivete Naba Izesuꞌ Aza Nene Oꞌmosoꞌmo Lo huko-lidineꞌ Gamazi Gosohoꞌ Nene Do Sotoꞌ O-ledave. Idoꞌ Aꞌmine Gamazi Neꞌmo Gomuꞌ Lo huko Lineꞌ Gamazi Nene Ivileꞌ Ogosa Gamazi Lamineꞌ Neingumuꞌ Lineꞌ Gamazi \p \v 1 Gamazi noluvoniꞌ neꞌmi monovo neꞌmino neingumuꞌ nene gelelesune: Evenetoꞌ medelo mino Oꞌmoso initeꞌ lehize-daaꞌ ivete naba eiꞌ monovoꞌve nene neꞌmino neive lo lo-lingimuvoniꞌ maꞌmine monovo laminekisi minive nene lelikumuꞌ sotoꞌ ogo neive. Aza nene Oꞌmosolotiꞌ lemo minive nenako Okulumokuko Guvelesi ve naba minive Oꞌmosoꞌmo gizebo ogo minaaꞌ neineꞌ moꞌmosiꞌveuko nene ana hulaaꞌ ida neive. \v 2 Idoꞌ aꞌmida nene evenelite gizamaniꞌ numuno Guvelesi veꞌmo do sotoꞌ molaniꞌ monoꞌ numuno neꞌmi avazahaloꞌ seli numuno gele vineꞌ monoꞌ numuno avotemote gizi di monaniꞌ neꞌmine monoꞌ numuno lulouꞌ gehepeve Oꞌmosoꞌmi moꞌmosiꞌve neinguꞌ nene mino initeꞌ Oꞌmoso lehize-daaꞌ gonoꞌve nene do neive. \v 3 Idoꞌ neꞌmine gono do minaaꞌ neineꞌ nene evenetoꞌ medeli mini Oꞌmoso initeꞌ lehizi-daaꞌ ave naba mukiꞌ di oti-ngidaaꞌ naniꞌ nene eveneꞌ Oꞌmoso imilisa di igaꞌ naniꞌ initekisi idoꞌ lihimemuꞌ sipisipi nevoꞌmine initeꞌ ngibili olokuꞌ gizi imilizave li di igaꞌ naniꞌ initekisi nene Oꞌmoso lehizi-dilizave li eveneꞌ di oti-ngidaaꞌ naniꞌ nenako nemuꞌ nene azasi neꞌmine gono do minaaꞌ neive. Idoꞌ neꞌmine gono do neineꞌ nenako nemuꞌ nene azasi nene initeꞌ Oꞌmoso ma lehize-delidoꞌ o minineꞌ nenako mo nene lehize-daniꞌ ve. \v 4 Idoꞌ aza nene misubouko mene minidini Moseꞌ gizineꞌ louꞌ gamaziloꞌ eꞌmeti evenetoꞌ medeli mini Oꞌmoso initeꞌ lehizi-daaꞌ ave nene mo minaniꞌ nenako aza nene evenetoꞌ medelo mino Oꞌmoso initeꞌ lehize-daaꞌ ive loloꞌ ilidoꞌ lisiheꞌ amivo loloꞌ amidine. \v 5 Ingine misubouko evenetoꞌ medeli mini Oꞌmoso initeꞌ lehizi-daaꞌ aveti monoꞌ numunoꞌine idoꞌ gono daaꞌ naniꞌ nene Okulumokuko minaniꞌ initeliti avazaha idoꞌ mumunoꞌinevoꞌ nene minaaꞌ nave. Aꞌmine nene monoꞌ numuno seli numuno gele vineꞌ nene Moseꞌ gizelesa neivo Oꞌmosoꞌmo Moseꞌni tiꞌ lo lo-imineꞌ maꞌmino nene neive: Gaza nene gololoꞌ minusidoꞌ seli numuno gele vineꞌ monoꞌ numuno idoꞌ aꞌminguꞌ miniliza initeꞌ mukiꞌ neti avazaha gelebizuvoniꞌ maloꞌ nene eꞌmeto eheꞌ ogo minosa do lamino loloꞌ ogo gizezo. \v 6 Idoꞌ evenetoꞌ medeli mini Oꞌmoso initeꞌ lehizi-daaꞌ ave ingine gomuꞌ gono daaꞌ aniꞌ nene Okulumokuko gono gihile minineꞌ neꞌmi avazahaloꞌ nene daaꞌ aniꞌza Izesuꞌ nene aꞌmine gono gihile nene nodavo neꞌmo gomuꞌ daaꞌ aniꞌ gono nene ngivileꞌ ogo hozila neive. Idoꞌ gomuꞌ aleve lo huko-ngidineꞌ gamazi neuꞌ nene Oꞌmosoꞌmo initeꞌ lamineꞌ o-ledelesa lo huko-lidineꞌza leliꞌ lo huko-lidineꞌ gamazi gosohokuꞌ nene ivileꞌ ogosa initeꞌ lamineꞌ goloso o-ledelesa lo huko-lidineꞌ nenako Izesuꞌ aza lelikisi Oꞌmososi kuku holo-ledo gamazi hulo eza ema ogo leliꞌ gele daloneꞌ gamazi ve lo Oꞌmosoꞌmo lo huko-lidineꞌ gamazi lo do ogo limineꞌ neꞌmo Oꞌmosoꞌmo gomuꞌ aleve lo huko-ngidineꞌ gamazi nene ivileꞌ ogo neineꞌ nene gele none. Idoꞌ aꞌmine votigileloꞌ aꞌmineꞌmine ogo Izesuꞌ gono do neineꞌ neꞌmo misubouko evenetoꞌ medeli mini Oꞌmoso initeꞌ lehizi-daaꞌ avete gono di minaaꞌ aniꞌ nene ivileꞌ ogosa lamineꞌ neive. \p \v 7 Avotemote gili dalizaniꞌ gamazi ve lo lo huko-ngidineꞌ gamazi neꞌmo gono davo vo gihile ma izidiniko aꞌmidotiꞌ nene leliꞌ gili dalizaniꞌ gamazi ve lo gosohoꞌ ma do sotoꞌ ogo lo huko-ledamidine. \v 8 Neꞌmine amidineꞌza avotemote igi mili igaꞌ aniꞌ monovoꞌine goloso nene do sotoꞌ o-ngedosa Guvelesi veꞌmo lineꞌ gamazi ma monoꞌ godolouꞌ tiꞌ li gizi nizaniꞌ ma neive: \q1 Guvelesi veꞌmo tiꞌ lo lave: \q1 Gililo. Isilaeleꞌ zuhoti muliseukisi Zudaꞌ zuhoti muliseukisi nene \q1 gili dalizaniꞌ gamazi gosohoꞌ ma lo huko-ngedo do sotoꞌ oloniꞌ gamene nene \q1 alingeꞌ ma sotoꞌ oloseive. \q1 \v 9 Aꞌmine gili dalizaniꞌ gamazi gosohoꞌ ma lo huko-ngedeloniꞌ nene \q1 avoꞌningine Aigita misuboutiꞌ ngeleꞌmizo novosa gili dalizave lo \q1 lo huko-ngiduvoniꞌ gamaziloꞌ nene eꞌmetamadiꞌmo ingine nene \q1 ninge mate-ngedo minuvoniꞌ nenako neꞌmo nene gomuꞌ \q1 lo huko-ngiduvoniꞌ gamazi maꞌminosa lo huko-ngedamo \q1 atoliꞌmine ogo lo huko-ngedelesuve lo \q1 \v 10 Guvelesi veꞌmo gohi tiꞌ lo lineꞌ: \q1 Alingeꞌ aꞌmine noluvoniꞌ gamene nene ogavo nelotiꞌ \q1 alingeꞌ nene Isilaeleꞌ aꞌvopilemoꞌ zuho mukilite gili dalizaniꞌ gamazi \q1 atoꞌ gohi ma lo huko do sotoꞌ o-ngedelesuve. \q1 Aꞌmine lo huko-ngedeloniꞌ gamazi nene neꞌmino neive: \q1 Neniꞌ lo huko loloniꞌ gamazi mukiꞌ nene engiꞌ gaꞌninguꞌ molo-ngedo \q1 luꞌninguꞌ nene luhuvo gizekelesuve. Neꞌmine ogo engiꞌ Oꞌmosoꞌine loloꞌ ogo nouvo ingine nene \q1 neniꞌ eveneꞌne zuho liliꞌ igi minilisave. \q1 \v 11 Neꞌmine igi eveneꞌ dizi minaniꞌ limi minaniꞌ mukiꞌ nene \q1 nenikumuꞌ gili osuꞌ li gili nilizaniꞌ nenako ve malite ingine zuho gaꞌine di \q1 Guvelesi vemuꞌ gili minilo li ma li-ngidamilisave. \q1 \v 12 Idoꞌ neꞌmino lo huko-ngedeloniꞌ nene goloso initeꞌ dangumuꞌ nene \q1 iseꞌine ize-ngedosa aꞌmine lihimeꞌinemuꞌ nene \q1 gohi gaꞌne gelamolosuvonako nemuꞌ Isilaeleꞌ aleve nene \q1 aꞌmine luvoniꞌ gamazi nene lo huko-ngedelesuve lo Guvelesi veꞌmo lineꞌ. \p \v 13 Idoꞌ gili dalizaniꞌ gamazi nene gosohoꞌ lo huko-ngedelesuve lineꞌ nenako neꞌmo gomuꞌ lo huko-ngidineꞌ gamazi nene mo litehe ilineꞌ neꞌmo nene mo geto vo haleke gehepeve ilidoꞌ ogave. \c 9 \s1 Me Misubouko Monoꞌ Numuno Adoꞌ Seli Numuno Gele Vineꞌ Gizaniꞌ Nesi Idoꞌ Aꞌminguꞌ Gono Daaꞌ Aniꞌ Nesi Nene Okulumokuꞌ Avazahaloꞌ Igaꞌ Aniꞌ Nemuꞌ Lineꞌ \p \v 1 Idoꞌ aꞌmine gamazi gomuꞌ lo huko-ngidineꞌ nene Oꞌmoso gubiꞌ izi imi opoꞌni laaꞌ idoꞌ initeꞌ olokuꞌ gizi imaaꞌ nemuꞌ nene louꞌ gamaziꞌvesi minivo minineꞌ ve. Idoꞌ aꞌmine lo huko-ngidineꞌ gamazi nemuꞌ nene misubouko mene monoꞌ numuno ma minineꞌ ve. \v 2 Ee, seli numuno gele vineꞌ monoꞌ numuno nene mo gizi di otaniꞌ ve. Aꞌmine monoꞌ numunguꞌ ganaꞌ lumu izi hukikanguꞌ nene lamu liviꞌ di badaaꞌ aniꞌ zavasi idoꞌ Oꞌmoso lehizi-di veleloꞌ mili-daniꞌ beleti nesi idoꞌ tevoliꞌvesi nene minaaꞌ ineꞌ ve. Aꞌmine izi hukikaniꞌ lumu nene kekeize lo minineꞌ numuno lulo ve laaꞌ aniꞌ ve. \v 3 Idoꞌ oduvo numuno lulo gohi ma izi hukiki lavolavodunuꞌ izi tilikaniꞌ nemuꞌ nene mo kekeize atoliꞌmine lo minineꞌ numuno lulo ve likevo minaaꞌ ineꞌ ve. \v 4 Aꞌmine numuno lulouꞌ nene unuvo lamineꞌ ogaꞌ ineꞌ initeꞌ Oꞌmoso gizi imaaꞌ aniꞌ holomo ngolidunuꞌ liliꞌ aniꞌ nesi idoꞌ eveneꞌ gili dalizave lo lo huko-ngidineꞌ gamazi milikaniꞌ bokisi ngolidunuꞌ asabuꞌ izi liliꞌ aniꞌ nesi idoꞌ aꞌminguꞌ goꞌzikaniꞌ initeꞌ nene Okulumokutiꞌ ngimineꞌ nosoꞌ niteꞌ gulive mana minineꞌ somo ngolidunuꞌ liliꞌ aniꞌ nesi idoꞌ Aloniꞌ hatuso sisive hoꞌlineꞌ hatusoꞌve nesi idoꞌ Oꞌmosoꞌmo lo huko-ngidineꞌ gamazi luhuvo gizineꞌ geheni nesi nene minaaꞌ aniꞌ ve. \v 5 Idoꞌ aꞌmine bokisi veletoꞌ nene initeꞌ sitaꞌ ma eveneꞌ godoꞌine neꞌmino mino holokeꞌneꞌinesi minasineꞌ initeꞌ gulive kelubu avazahaloꞌ liliꞌ aniꞌ initeꞌ nene minaaꞌ asineꞌ. Kelubu ingine hela hela mini holokeꞌneꞌine di pateli di hozi li hiti nizasivo olusoꞌ nene Oꞌmosoꞌmo eveneꞌ lihimeꞌine apase-ngedaaꞌ ineꞌ moꞌmosiꞌve nene minineꞌ. Idoꞌ minineꞌ nenako aꞌmine kelubu minasidoꞌ nene Oꞌmosoꞌmi labanala nene sotoꞌ ogo minaaꞌ ineꞌ ve. Idoꞌ aꞌmine initeꞌ neti monovo nene ato atoꞌ vaiꞌ neineꞌ nenako aꞌminemuꞌ imineꞌ molo gohi ma lo-lengemelodoꞌ nomive. \p \v 6 Idoꞌ aꞌmine initeꞌ nene di vaꞌvaꞌ igi osuꞌ likevo evenetoꞌ medeli mini Oꞌmoso initeꞌ lehizi-daaꞌ ave ingine monoꞌ gonoꞌine nene nidi aꞌmine monoꞌ numunguꞌ ganaꞌ izi hukikaniꞌ numuno lulouꞌ nene gamene gamene dizaaꞌ naha \v 7 aꞌmidotiꞌ numuno lulo gohi ma izi hukikanguꞌ nene evenetoꞌ medelo mino Oꞌmoso initeꞌ lehize-daaꞌ ive naba neꞌmovoꞌ nene kilisimasiloꞌ kilisimasiloꞌ gamene hamokovoꞌ dizaaꞌ neive. Idoꞌ dizeli gamene nene eiꞌ lihimeꞌvesi eveneliti lihimeꞌinesi nene Oꞌmosoꞌmo apase-ledelingumuꞌ ve lo ato atoꞌ izeliti vanisesi nene damo dizo vaaꞌ ineꞌ nevoba ha do-dosavoꞌ nene aꞌminguꞌ dizo vaaꞌ ineꞌ ve. \v 8 Neꞌmine ogaꞌ ineꞌ nenako nelotiꞌ nene tiꞌ lo gelelesune: Ganaꞌ izi hukaniꞌ numuno lulo nene vo goloso amo hazavoꞌ neivo ma numuno lulo gohi ma Oꞌmosoꞌmi kekeize atoliꞌmine lo minineꞌ numuno lulo ve li izi hukikavo akaloꞌ tile minineꞌ lavolavo nesi nene ha minelineꞌ nenako Oꞌmoso neida voloneꞌ akate nene olihe do sotoꞌ o-ledamive lo Oꞌmosoꞌmi Sikalahuꞌ neꞌmo lelebizavo gelelesune. \v 9 Idoꞌ monoꞌ numuno adoꞌ seli numuno gele vineꞌ nesi idoꞌ aꞌminguꞌ igi mili di sotoꞌ aniꞌ initeꞌ nene idise gameneuꞌ igi mili igaꞌ naniꞌ initeꞌ neti avazahaꞌine do sotoꞌ ogavo neꞌmi monovo tiꞌ lo noningune: Aꞌminguꞌ nene initeꞌ ma Oꞌmoso imi idoꞌ sipisipi nevoꞌmine initeꞌ ngibili lihimete apase-ledelive li olokuꞌ gizi Oꞌmoso imi minaaꞌ naniꞌza neꞌmo neꞌmine igaꞌ aveti luꞌine nene ma do lisiheꞌ lamineꞌ o-ngedesaꞌmive. \v 10 Idoꞌ luꞌine do lamineꞌ o-ngedesaꞌmineꞌ nene okoꞌinevoꞌ do lamineꞌ o-ngedelineꞌ louꞌ gamazilokovoꞌ nene eꞌmeti minaaꞌ aniꞌ nenako neꞌmo luꞌine nene do lisiheꞌ lamineꞌ o-ngedesaꞌmive. Ee, aꞌmine louꞌ gamazi nene nosoꞌ niteꞌ idoꞌ noso avoso nalizangumuꞌ idoꞌ ato atoꞌ monovomuꞌ nosouꞌ ingi okoꞌine noso izi hulilizangumuꞌ idoꞌ nevoꞌmine initekumukovoꞌ nene gamazi li gizi Kilisitoꞌ monovo gosohoꞌ do sotoꞌ ogo initeꞌ mukiꞌ do lamineꞌ ilidokovoꞌ nene mino osuꞌ loloseive li gizi nizaniꞌ ve. \p \v 11 Idoꞌ Kilisitoꞌ nene evenetoꞌ medelo mino Oꞌmoso initeꞌ lehize-daaꞌ ive naba monoꞌ initeꞌ lamineꞌ idiꞌne Oꞌmosolatiꞌ sotoꞌ oꞌmo novineꞌ nene do sotoꞌ ive loloꞌ ogo mo ogave. Aza nene monoꞌ numuno adoꞌ seli numuno gele vineꞌ nene ivileꞌ ogo lamineꞌ goloso mino idoꞌ eiꞌ gono dalidoꞌ lisiheꞌ gehepeve o minineꞌ monoꞌ numuno nene evenelitesi liliꞌ amaniꞌ asi mo mene misuboukosi ma minamineꞌ monoꞌ numunomuꞌ noluve. Aza aꞌminguꞌ nene dizo gono do \v 12 memeꞌ ize idoꞌ bulumakaꞌ angale neti vanise nene aꞌmida do vamo eiꞌ vaniseꞌve nene gamene hamokovoꞌ mudise Oꞌmosoꞌmi moꞌmosiꞌve kekeize lo minida do vo minineꞌ ve. Idoꞌ neꞌmine ineꞌ neꞌmo goloso ogo minunidotiꞌ nene mudise do luꞌ izo Oꞌmosola tineꞌ molo vo mineloneꞌ akate vele-lidineꞌ ve. \v 13 Idoꞌ memeꞌ ize idoꞌ bulumakaꞌ neti vanisemuꞌ luvoniꞌ nene monokumuꞌ kekeize laniꞌ initeꞌ dikevosa monokuꞌ dizilizaniꞌ akatine nene hize tile-lengedo okodida sihononi neꞌmine initeꞌ hitelineꞌ nene gilite-lengedelive li memeꞌ izeliti vanisesi idoꞌ vemohoꞌ bulumakaliti vanisesi idoꞌ alungo bulumakaꞌ giziꞌvotaniꞌ neꞌmi leneheꞌve nesi nene Oꞌmoso imikevosa neꞌmo okodida sihononi neꞌmine hitelineꞌ nene do hulavo lamineꞌ ogaꞌ neineꞌ nenako nemuꞌ nene luvoniꞌ ve. \v 14 Idoꞌ neve nene initeꞌ ngomoliꞌmo okodida sihononi neꞌmine hitineꞌ nene do lamineꞌ ogaꞌ neineꞌ nenako initeꞌ naba Kilisitoꞌ vaniseꞌve neꞌmo monovotine goloso labuluvo ogaꞌ akauꞌ lengeleꞌmize molaaꞌ neineꞌ neti lihime lutine gatinguꞌ nene gilite hulo-lengedo minevoꞌ minevoꞌ Oꞌmoso gelekeleꞌ i-di gubiꞌ izi imi minilizadoꞌ nene do lisiheꞌ o-lengedelidoꞌ nene mo lisiheꞌ gehepeve o neive. Ee, Oꞌmosoꞌmi minevoꞌ minevoꞌ Sikalahuꞌve neꞌmo Kilisitoꞌni hize eleꞌ o-davo aza okoꞌnoloꞌ lihime hamokisi minamineꞌ mino okoꞌnoꞌve hulo Oꞌmoso imineꞌ nenako neꞌmo nene leliꞌ lute do lamineꞌ o-ledelidoꞌ lisiheꞌ o neive. \p \v 15 Idoꞌ Kilisitoꞌ vaniseꞌve neꞌmo lihimete mukiꞌ gilite hulo-ledaaꞌ neineꞌ nenako Izesuꞌ aza nene evenekisi Oꞌmososi kuku holo-ledo gamazi hulo eza ema ogo leliꞌ gele emeloneꞌ gamazi ve lo gosohoꞌ gamazi Oꞌmosoꞌmo lo huko-lidineꞌ nene do ogo limive loloꞌ ogo neive. Idoꞌ neꞌmine ineꞌ nene Oꞌmosoꞌmo izipahala zuho minilizave lo elese molo-ledo leleꞌmize molave leliꞌ nene minevoꞌ minevoꞌ initeꞌ lemelove lo lo huko-ledo salani molo-lidineꞌ initeꞌ daloningumuꞌ ve losa neꞌmine ineꞌ ve. Ee, Oꞌmosoꞌmo gomuꞌ lo huko-lidineꞌ gamazi nene avutoꞌ ogo lihime duningumuꞌ aꞌmidoꞌ golo hizo Izesuꞌ hilineꞌ neꞌmo nene aꞌmine lihime nene apase-lidineꞌ nenako neꞌmo nene aꞌmine salani molo-lidineꞌ initeꞌ daloneꞌ aka nene ngoloꞌ lo neinako ha dalosune. \v 16-17 Ee, Izesuꞌ nene ma helamidiniko Oꞌmosoꞌmo salani molo-lidineꞌ initekisi idoꞌ leliꞌ dalizave lo lo huko-lidineꞌ gamazisi nene gihile izelidoꞌ minamidine. Lingine mo gili nizave. Eveneꞌ malite alingeꞌ hililizangumuꞌ leliꞌ monovoloꞌ eꞌmeti luhuvo tiꞌ li gizi milaaꞌ nave: Laza helekunivo ma mene alevete leliꞌ initete nene dalizave li aꞌmine initeꞌ dalizangumuꞌ li huki-ngidaniꞌ gamazi nene luhuvouꞌ gizi milaaꞌ nave. Idoꞌ aꞌmine initeꞌine dalizangumuꞌ luhuvo gizaniꞌ nene gizave hilikevo neꞌmovoꞌ nene aꞌmine li huki-ngidaniꞌ gamazi nene gihile izelidoꞌ vo lisiheꞌ ilineꞌ nenako nemuꞌ nene luhuvo gizave hilami veꞌinesi ha nizavo ma nene aꞌmine gamazi nene olihe gihile izamo ha minaaꞌ neive. Nemuꞌ nene ve maliꞌmo neꞌmine luhuvo gize molosa mino helavo ma initeꞌve dalizave ingine aꞌmine luhuvo gizive nene mo helanako luhuvo gizidoꞌ eꞌmeto initeꞌve ma nene ha dalosune lilisave. Lilisaha helave lilizaniꞌ gamazi nene mo laminetoꞌ lahe idoꞌ soza lahe nemuꞌ nene gomuꞌ ningi gilikevosavoꞌ nene aꞌmine dalizave lineꞌ initeꞌ nene ha dalisave. Helaaꞌ neꞌmo li hukaaꞌ naniꞌ gamazi nene do amuzo molaaꞌ neive. Nemuꞌ nene Izesuꞌ aza helamidini Oꞌmosoꞌmo salani molo-lidineꞌ initekisiꞌ idoꞌ leliꞌ dalizave lo lo huko-lidineꞌ gamazisi nene gihile izelidoꞌ minamidine. \v 18 Idoꞌ helaaꞌ neꞌmo li hukaaꞌ naniꞌ gamazi nene do amuzo molaaꞌ neineꞌ nenako nemuꞌ aꞌmineꞌmine ogo Oꞌmosoꞌmo gomuꞌ lo huko-ngidineꞌ gamazi nene haza do amuzo molaniꞌ nevoba helaaꞌ neꞌmovoꞌ nene do amuzo molaniꞌ ve. Do amuzo molaniꞌ nene bulumakaꞌ ngibili hilikevo neti vaniseꞌine neꞌmo aꞌmine gomuꞌ lo huko-ngidineꞌ gamazi nene do amuzo molaniꞌ ve. \v 19 Ee, aꞌmine louꞌ gamazi miningutiꞌ gamazi godolo godolola nene Moseꞌ lo sotoꞌ ogo eveneꞌ lo-ngemavosa ingine nene bulumakaꞌ ma ngibilikevo Moseꞌ aza vaniseꞌine do nososi do gopo ogo unuvo ogaꞌ ineꞌ za ngomo ma gulive hisopu ve lo minineꞌ neꞌmi aꞌnava ma do aꞌmidoꞌ nene sipisipi zopovo gulehedunuꞌ nene likosa vaniseuꞌ nene lupizoo aꞌmine louꞌ gamaziꞌmi luhuvolokisi idoꞌ aꞌmida eveneꞌ mukitokisi nene hibiꞌ izo nohulo-ngedo \v 20 gamazi tiꞌ lo lineꞌ: Vanise mene Oꞌmosoꞌmo louꞌ gamazi gili dalizave lo lo huko-lingidineꞌ nene do amuzo molaaꞌ neineꞌ vanise ma neive. Idoꞌ Moseꞌ neꞌmine ineꞌ nenako nemuꞌ Oꞌmosoꞌmo gomuꞌ lo huko-ngidineꞌ gamazi nene vanisedunuꞌ di amuzo mili-daniꞌ ve luvoniꞌ nene mo laminetoꞌ luvoniꞌ ve. \v 21 Idoꞌ Moseꞌ aza luhuvosi evenekisi vanise hibiꞌ izo hulo-ngidineꞌ neꞌmino monoꞌ numuno adoꞌ seli numuno gele vineꞌ nesi idoꞌ Oꞌmoso opoꞌni li gubiꞌ izi imaaꞌ anguꞌ nene lapese gomise miteꞌ initeꞌ mukiꞌ aꞌminguꞌ milikevo minidoꞌ nesi vanise hibiꞌ izo hulineꞌ ve. \v 22 Idoꞌ gomuꞌ lo huko lineꞌ louꞌ gamazi neuꞌ nene naza luvoniꞌ evenekisi idoꞌ luvoniꞌ initekisivoꞌ nevoba initeꞌ mukiꞌ gidini neꞌmine ma goloso ilizahe lihime dalizahe ilizaniꞌ nene initeliti vanisedunuꞌ nene do lamineꞌ olosane lo lo hukineꞌ ma neive. Idoꞌ aꞌmine gomuꞌ lo huko lineꞌ gamazi neuꞌ nene ize nevoꞌmine ganaꞌ ma bili vaniseꞌinedunuꞌ nene hibiꞌ izi Oꞌmosoꞌmi holomoꞌveloꞌ hulamaniꞌ nene lihime nene mo kekeꞌ apase-ngedesaꞌmineꞌ ve. \s1 Kilisitoꞌ Nene Okoꞌno Hulo Vaniseꞌve Lepo Oꞌmoso Noemo Hilineꞌ Neꞌmo Lihimete Apase-lidineꞌ Nemuꞌ Lineꞌ \p \v 23 Ee, gomuꞌ louꞌ gamazi neꞌmo neꞌmine ilizave lo lo neineꞌ nenako nemuꞌ aꞌmine seli monoꞌ numuno nesi aꞌminguꞌ initeꞌ mukiꞌ nesi nene Okulumokuꞌ minineꞌ avazahaloꞌ liliꞌ aniꞌ initeꞌ nene luvodiꞌmine igi bulumakaꞌ ngibili Oꞌmoso imi vanisedunuꞌ nene hibiꞌ izi-ngidi di kekeize lilisave. Neꞌmine ilisaaha misubouko mene avazaha initeꞌ do lamineꞌ o-ngedelive li bulumakaꞌ ngibili vaniseꞌine hibiꞌ izi hulaaꞌ naniꞌ nene Okulumokuꞌ initeꞌ do lamineꞌ o-ngedelidoꞌ lisiheꞌ o minelineꞌ initeꞌ neꞌmo ngivileꞌ ogo lamineꞌ goloso mineleseive. \v 24 Idoꞌ nene nanitekumuꞌ luvoniꞌ neve. Kilisitoꞌ aza monoꞌ numunguꞌ dizineꞌ nene evenelite liliꞌ igi di kekeize laniꞌ monoꞌ numuno adoꞌ Okulumokuko minineꞌ neꞌmi avazahaloꞌ minineꞌ monoꞌ numunguꞌ nene dizineꞌ nevoba asi mo Okulumokuꞌ gehepeve nene dizo leliꞌ hize eleꞌ o-ledelesa Oꞌmosoꞌmi veleloꞌ vo neive. \v 25-26 Idoꞌ dizineꞌ nene Zuda veti evenetoꞌ medelo mino Oꞌmoso initeꞌ lehize-daaꞌ ive naba aza eiꞌ vaniseꞌve do dizamo ize ato atoliti vaniseꞌine nene Oꞌmosoꞌmi kekeize atoliꞌmine lo minineꞌ numuno luloꞌveuꞌ nene kilisimasiloꞌ kilisimasiloꞌ do dizo Oꞌmoso lehize-dekaꞌ lehize-dekaꞌ ogaꞌ ineꞌ neꞌmine nene eiꞌ Kilisitoꞌ ilidoꞌ o minidiniko Oꞌmosoꞌmo misubo do sotoꞌ idotiꞌ apiꞌ ogo gamene mukiꞌ okoꞌno huloꞌmo ogo mulumo gelekaꞌ gelekaꞌ ogovoꞌ minidineꞌza aꞌmine Zuda veti evenetoꞌ medelo mino Oꞌmoso initeꞌ lehize-daaꞌ ive nabaꞌmo ogaꞌ ineꞌ neꞌmine ilidoꞌ minamineꞌ nenako nemuꞌ aza gamene mukiꞌ eze okoꞌno hulo vaniseꞌve lepo Oꞌmoso lehize-dekaꞌ lehize-dekaꞌ ogo minelesa dizineꞌ nevoba asi Oꞌmosoꞌmo molaniꞌ gamene nene osuꞌ lolosa neivo Kilisitoꞌ aza gamene hamokovoꞌ eiꞌ okoꞌno nene hulo vaniseꞌve lepo Oꞌmoso lehize-do lihimete nene mudise hulo-ledelesa sotoꞌ ineꞌ ve. \v 27 Idoꞌ Oꞌmosoꞌmo lidoꞌ ogo eveneꞌ laza gamene hamokovoꞌ helosa Oꞌmosoꞌmo goniꞌ o-ledelidoꞌ volosunako \v 28 Kilisitoꞌ aza aꞌmineꞌmine ogo eveneꞌ mukiliti lihime geho okoꞌnoꞌve hulo hilineꞌ nenako alingeꞌ gohi alineꞌ nene lihimetemuꞌ amo eikumuꞌ gizebo nonive nene mudise do luꞌ izo leleꞌmize lamineꞌ olosa aloseive. \c 10 \p \v 1 Idoꞌ gomuꞌ louꞌ gamaziloꞌ eꞌmeti ize ato atoꞌ ngibili Oꞌmoso lehizi-dikevo neꞌmi gihileꞌve initeꞌ lamineꞌ sotoꞌ o ngemaaꞌ neineꞌ nene alingeꞌ initeꞌ lamineꞌ lelita sotoꞌ o lemelineꞌ nene initeꞌ gihile neꞌmine engita nene ma sotoꞌ o ngemesaꞌmineꞌ ve. Asi mo alingeꞌ sotoꞌ o-ledelineꞌ initeꞌ neti avazaha neꞌminevoꞌ nene sotoꞌ o ngemaaꞌ neineꞌ nenako ingine nene kilisimasiloꞌ kilisimasiloꞌ lihimete apase-ledavo lisiheꞌ lamineꞌ mineloningumuꞌ ve li ize ato atoꞌ di igi ngibili Oꞌmoso lehizi-dikaꞌ lehizi-dikaꞌ igi minaaꞌ naniꞌ neꞌmo ngelo do lisiheꞌ lamineꞌ gehepeve o-ngedesaꞌmineꞌ nenako nemuꞌ nene aꞌmine initeꞌ nene Oꞌmoso lehizi-dikaꞌ lehizi-dikaꞌ igivoꞌ minaaꞌ nave. \v 2 Ee, neꞌmine igaꞌ naniꞌ neꞌmo lihimeꞌine apase-ngedo mudise do lisiheꞌ gehepeve o-ngididiniko aꞌmine initeꞌ Oꞌmoso imi gubiꞌ izi imaaꞌ nave ingine nene lihimete nomineꞌ minelesune li ize ngibili Oꞌmoso lehizi-dikaꞌ lehizi-dikaꞌ naniꞌ nene huli alamadine. \v 3-4 Ne neiha vemohoꞌ bulumakaꞌ neti vanisesi memeꞌ ize neti vanisesi neꞌmo nene eveneliti lihimeꞌine nene apase osuꞌ lo-ngedamilidoꞌ nenako kilisimasiloꞌ kilisimasiloꞌ ingine neꞌmine initeꞌ ngibili vaniseꞌine nene Oꞌmoso lehizi-daaꞌ naniꞌ neꞌmo lihime daniꞌ mamuꞌ nene gohi gili okoꞌnidoꞌ gilaaꞌ nave. \p \v 5 Nemuꞌ nene Kilisitoꞌ misubouko mene lemelesa noogo monoꞌ godolouꞌ melehine lo imineꞌ gamazi ma tiꞌ li gizi nizaniꞌ ma neive: \q1 Gaza eveneꞌ isaaꞌ neve li ize ato atoꞌ bili gimi idoꞌ \q1 initeꞌ gohi ato atoꞌ nene gimikaꞌ gimikaꞌ igi minilizave lo gelamo \q1 neniꞌ nene gelekeleꞌ o-gedelongumuꞌ ve lo \q1 okoꞌne nene do vaꞌvaꞌ ogo molo-nedane. \q1 \v 6 Ee, ize ma bili olokuꞌ giziꞌ voti gimi idoꞌ \q1 lihime apase-ngedelive li ize ngibili \q1 vaniseꞌine gimaaꞌ naniꞌ nemuꞌ nene laniteꞌ gelesaꞌmanivosamuꞌ \q1 \v 7 tiꞌ lo lo-gimuvoniꞌ ve: Oꞌmosoo, gelezo. \q1 Naza monoꞌ godolouꞌ nenikumuꞌ louꞌ gamazi gizi nizaniꞌ maloꞌ \q1 nene eꞌmeto geiꞌ lukaloꞌ do molo gelekeleꞌ o-gedelesa uvoniꞌ ve. \m \v 8 Idoꞌ Moseꞌ louꞌ gamaziꞌmo lidoꞌ eꞌmeti igaꞌ naniꞌ initekumuꞌ Kilisitoꞌ aza Oꞌmosomuꞌ lineꞌ nene ize ato atoꞌ bili gimi idoꞌ ato atoꞌ initeꞌ nesi isaaꞌ neve li gimi idoꞌ lihime apase-ngedelive li ize bili giziꞌ voti gimaaꞌ naniꞌ nene laniteꞌ gelamosa nimikaꞌ nimikaꞌ igi minilizave lo gelesaꞌmane loosa \v 9 nelotiꞌ nene geiꞌ lukaloꞌ do molo gelekeleꞌ o-gedelesa uvoniꞌ ve lo Izesuꞌ lidiꞌmo lihimetemuꞌ ize belo Oꞌmoso emaaꞌ monovomuꞌ nene ganaꞌ lineꞌ gamazi nene do hulo Oꞌmosoꞌmi luloloꞌ do molo gelekeleꞌ o-daaꞌ monovomuꞌ alingeꞌ lineꞌ gamazi nene do otineꞌ ve. \v 10 Idoꞌ Kilisitoꞌ aza Oꞌmosoꞌmi luloloꞌ eꞌmeto leliꞌ mukikumuꞌ nene gamene hamokovoꞌ okoꞌno hulo helo Oꞌmoso imineꞌ neꞌmo lute do lisiheꞌ o-ledo Oꞌmoso gelekeleꞌ o-do mineloneꞌ evenele loloꞌ o-ledave. \p \v 11 Idoꞌ evenetoꞌ medeli mini Oꞌmoso initeꞌ lehizi-daaꞌ ave mukiꞌ ingine nene goꞌ laneme goꞌ laneme monoꞌ gonoꞌine nene di mini ize ato atoꞌ ngibili gamene gamene hamoꞌ initekovoꞌ igi Oꞌmoso imiꞌmi vi minaaꞌ naniꞌza eveneliti lihimete nene apase-ledelidoꞌ lisiheꞌ amineꞌ initekovoꞌ imaaꞌ nave. \v 12 Ingine neꞌmine igaꞌ naniꞌza Kilisitoꞌ aza gamene hamokovoꞌ okoꞌno hulo helo Oꞌmoso imineꞌ neꞌmo eveneliti lihimete nene mudise apase-ledelidoꞌ vo daavosa Oꞌmosolatiꞌ lemo minive eiꞌ moꞌmosiꞌve Oꞌmosoꞌmo ana hulaaꞌ ida neidoꞌ aꞌmida vo neive. \v 13-14 Ee, eze okoꞌno hulo helo mo gamene hamokovoꞌ Oꞌmoso imineꞌ neꞌmo Oꞌmoso gelekeleꞌ o-do mineloneꞌ evenele nene mo mudise do lisiheꞌ lamineꞌ gehepeve o-lidineꞌ nenako nemuꞌ nene okoꞌnoꞌve gohi gohi hulo helo Oꞌmoso emamo vo Oꞌmosoꞌmo ana hulaaꞌ ida eiꞌ moꞌmosiꞌveloꞌ mino nelotiꞌ nene eiꞌ Kilisitoꞌni biluvaꞌ i-daaꞌ ave nene gelekeleꞌ i-dilizave lo Oꞌmosoꞌmo gizeneuko doꞌmo leme-ngedelingumuꞌ nene gizebo o neive. \p \v 15 Idoꞌ aꞌmine luvoniꞌ gamazi nene Oꞌmosoꞌmi Sikalahuꞌ neꞌmosi hize eleꞌ ogave. Aꞌmine Sikalahuliꞌmo eiꞌ gamaziꞌve lo-limineꞌ monoꞌ godolouꞌ tiꞌ li gizi nizaniꞌ ma neive: \p \v 16 Guvelesi veꞌmo tiꞌ lo lineꞌ: \q1 Gamene muluvoniꞌ nene ogavo alingeꞌ eveneꞌ mukilite gili dalizaniꞌ \q1 gamazi gosohoꞌ gohi ma lo huko do sotoꞌ o-ngedeloniꞌ gamazi nene \q1 neꞌmino neive: Naza lo huko do sotoꞌ o-ngedeloniꞌ gamazi nene \q1 luꞌninguꞌ molo-ngedo idoꞌ gaꞌninguꞌ nene luhuvo neꞌmine gize-ngedekuvo \q1 mineleseive. \p \v 17 Idoꞌ neꞌmine lo nelotiꞌ alingeꞌ gamazi gohi ma tiꞌ lo lineꞌ: \q1 Idoꞌ eveneꞌ engita lihime minineꞌ mamuꞌ nesi idoꞌ \q1 louꞌ gamazi avutoꞌ igaꞌ naniꞌ mamukisi nene \q1 gohi gaꞌne gelamolosuve. \m \v 18 Idoꞌ Oꞌmosoꞌmo lihimete mukiꞌ nene apaso osuꞌ lo-ledavo ma nene lihimete apase-ledelive lo lihimetemuꞌ ize ato atoliꞌmine belo olokuꞌ gize emaaꞌ uneꞌ ma nene gohi ma amolosune. \s1 Laza Oꞌmosoꞌmo Lihime Lemelihe Lebelelihe Lo Golise Gelamo Ezela Vo Giꞌmizelone Lo Lo-ngimineꞌ \p \v 19 Nemuꞌ nene neze zuho lingine Izesuꞌ vanise lepo helo Oꞌmoso imineꞌ neꞌmo lihimete nene mudise apase-lidineꞌ nenako nemuꞌ nene golise gelamo Oꞌmosoꞌmi kekeize atoliꞌmine lo minineꞌ numuno lulouꞌ nene ha vo dizelonidoꞌ o neive. \v 20 Ee, Izesuꞌ eze okoꞌno hulo hilineꞌ neꞌmo Oꞌmosoꞌmi kekeize atoliꞌmine lo minineꞌ numuno lulouꞌ nene eveneꞌ dizikelizave li monoꞌ numuno nabauꞌ lavolavodunuꞌ akate hizi tili-limikaniꞌ nene mudise bele ngoloꞌ lo-ledo Oꞌmososi bizo mineloneꞌ aka gosohoꞌ eleꞌvoleꞌ ogo minevoꞌ minevoꞌ ilineꞌ nene vele-ledave. \v 21 Idoꞌ lelitoꞌ medelo mino Oꞌmoso initeꞌ lehize-daaꞌ ivete nene aza eveneꞌ naba mino Oꞌmosoꞌmi evenele zuho leliꞌ nene gizebo o-lede neive. \v 22 Nemuꞌ nene evenetoꞌ medeli mini Oꞌmoso initeꞌ lehizi-daaꞌ ave ngeleꞌmize milalizangumuꞌ aꞌmine ve nene di lamineꞌ i-ngidi okoꞌnidoꞌ nene vanisedunuꞌ hibiꞌ izi huli-ngidi idoꞌ nosoꞌ izi-ngidaaꞌ aniꞌ neꞌmino aza leliꞌ lute nene eiꞌ vaniseꞌvedunuꞌ hibiꞌ izo hulo-ledo aꞌminguꞌ monovo goloso minineꞌ nene do hulo-ledo idoꞌ okode nene noso laminedunuꞌ noso ize-lidineꞌ gelavo mino lute lisiheꞌ lamineꞌ minidiꞌmo Oꞌmoso golo izamo idoꞌ gate setaꞌ gelamo ezemuꞌ gele eleꞌvoleꞌ goloso ogo Oꞌmosola ogo ezesi bizo minukeꞌzo. \v 23 Idoꞌ Oꞌmosoꞌmo initeꞌ mukiꞌ ha olosuve lineꞌ initeꞌ nene mo laminetoꞌ oloseive lo mo gele noneꞌ ma nenako laza gele eleꞌvoleꞌ ogo Oꞌmosoꞌmo lemelove lo lo neineꞌ initekumuꞌ gizebo ogo minaaꞌ noningumuꞌ lo sotoꞌ ogaꞌ nouneꞌ nemuꞌ nene golise gelo hulamo do giliꞌ lo do minelone. \v 24 Neꞌmine ogo lute ngemo nasahiliꞌ o-ngedaaꞌ monovo idoꞌ nevoꞌmine gono lamineꞌ ato atoꞌ daaꞌ monovo lamineꞌ nene lelita amuzo molo minelive lo ge luka do ote-gede ne luꞌne do ote-nede loloneꞌ akamuꞌ nene viseꞌ ogo ningo ogo molo minelone. \v 25 Idoꞌ eveneꞌ malite monokumuꞌ do geseꞌ ogaꞌ monovo hulaaꞌ naniꞌ neꞌmine igi lingine hulami monokumuꞌ di geseꞌ iꞌmi vi mini monokuꞌ ge hize eleꞌ o-nede ne hize eleꞌ o-gede li minilo. Gamene naba mo avitoꞌ navo lingine mo ningi gili nizaniꞌ nenaze. Nemuꞌ nene lingine mo ge hize eleꞌ o-nede ne hize eleꞌ o-gede liviꞌ liviꞌ igivoꞌ minilo. \p \v 26 Idoꞌ laza Kilisitoꞌ gamaziꞌve gihile laminekumuꞌ nene mo gelo eꞌmeto minaaꞌ noolonivete lihime daaꞌ initekumuꞌ nene mo amoloneꞌ initeꞌ neive lamo lihime dosoꞌ neꞌmo Kilisitoꞌ vaniseꞌve lepo helo lihimete apase-ledelineꞌ aka vele-lidingumuꞌ nene oꞌve luneꞌ geleleseive. Idoꞌ laza lihime daaꞌ akaloꞌ gohi voloneꞌ neꞌmo Oꞌmosoꞌmo lihimete apase-ledelineꞌ aka nene Kilisitoꞌ vele-lidingumuꞌ nene oꞌve luneꞌ gelavo aꞌmine lihimetemuꞌ golo hizo Oꞌmoso lehize-deloneꞌ initeꞌ gohi ma minamoloseinako aꞌmine lihimete nene Oꞌmosoꞌmo ha do mineleseive. \v 27 Idoꞌ aꞌmine lihimeꞌine do minelive nene Oꞌmoso biluvaꞌ i-daaꞌ nanako aza oloꞌ goloso lo neineꞌ olokuꞌ ngimiselavo aꞌminguꞌ vi tolovo ilizaniꞌ nenako laza golise voloneꞌ akate atoꞌ ma nominako nemuꞌ laza lihime daaꞌ akaloꞌ gohi ma voloneꞌ nene lehelele izivo golise goloso gelo Oꞌmosoꞌmo lihime lemo olokuꞌ hulo-ledo neꞌmine o-ledelineꞌ gamenemukovoꞌ nene gizebo ogo minelesune. \v 28 Idoꞌ Moseꞌ louꞌ gamazi avutoꞌ ave nene mo iseꞌine izisaꞌmaniꞌ ve. Ve malite aꞌmine louꞌ gamazi avutoꞌ aniꞌ nene eveneꞌ sitape sitohamolite he ningi gonikuꞌ li sotoꞌ i-ngidikevo aꞌmine louꞌ gamazi avutoꞌ ave nene lihime ngimi ngibili hilaaꞌ nave. \v 29 Ee, Moseꞌ louꞌ gamaziꞌve nene mo gili eꞌmeti minaaꞌ niigisa aꞌmine louꞌ nene ma avutoꞌ aniꞌ nene ngibili hilaaꞌ aniꞌ nenako Moseꞌni ivileꞌ ogo minive Oꞌmosoꞌmi gipele aza Oꞌmosoꞌmo lo huko-lidineꞌ gamazi gosohoꞌ nene do amuzo molo idoꞌ engiꞌ luꞌine do lamineꞌ o-ngedo Oꞌmosoꞌmi evenele loloꞌ o-ngedo vaniseꞌve lepo hilingumuꞌ gilikevo haza initeꞌ ogavo eze nene lisi hupiꞌ izi-dii idoꞌ leliꞌ nasahiliꞌ o-ledaaꞌ ive Oꞌmosoꞌmi Sikalahuꞌ nene di uꞌmusupo lizi-dilizave nene Moseꞌ louꞌ gamazi avutoꞌ ikevo lihimeꞌinemuꞌ ngibili hilaaꞌ naniꞌ nene ivileꞌ ivosa lihime nabaloꞌ goloso ngemeleseive. \v 30 Monoꞌ godolouꞌ gizaniꞌ gamazi ma tiꞌ lo livemuꞌ mo gele none: \q1 Lihime ngemaaꞌ gono nene neniꞌ gono nenako \q1 lihime nene neniꞌ ngemelesuve. \m Idoꞌ ma nene: \q1 Guvelesi veꞌmo zasi gono do eze evenele izeꞌ molo-ngedeleseive. \m Idoꞌ aꞌmine gamazi live nene Oꞌmosoꞌmo lineꞌ nenako nemuꞌ nene Izesuꞌ monovo danavamuꞌ mo gili minisasi avutoꞌ igaꞌ nave nene lihime ngemo mo ngebeleleseive losa mo gele none. \v 31 Nemuꞌ nene laza neꞌmino lihime do minelonidotiꞌ lebelaaꞌ amuzoꞌvesi minive minevoꞌ minevoꞌ Oꞌmosoꞌmi anauꞌ aloneꞌ nene lihime atoliꞌmine ogo lemeleseinako agae mo nehelele goloso izo live. Nemuꞌ nene lihime akauꞌ vaalone lo ge hize eleꞌ o-nede ne hize eleꞌ o-gede lovoꞌ lovoꞌ ogovoꞌ minelone. \p \v 32 Gomuꞌ gameneuꞌ lingine minaniꞌ monovomuꞌ gatine molalize. Aꞌminemuꞌ gohi gili minilo. Aꞌmine gameneuꞌ nene Izesuꞌnimuꞌ gilikevo neꞌmo lutinguꞌ hize labanaꞌ elavo minaniꞌ neꞌmo goboni malaꞌ malaꞌ i-lingidi nizavo mulumo alumo giliꞌmi vi minisasi Izesuꞌ monoꞌve nene hulami amuzo mili di minaniꞌ. \v 33 Ee, gamene ma nene eveneꞌ mukiliti veꞌnidoꞌ di oti-lingidi gamazi goloso li-lingidi di goloso i-lingidaaꞌ aniꞌ ve. Idoꞌ gamene ma nene lingine zuhola aꞌmine suno nene sotoꞌ noo-ngidivo linginesi aꞌminguꞌ vi makatoꞌ aꞌmine geni nene gihaaꞌ aniꞌ ve. \v 34 Neꞌmine noluvoniꞌ nene Izesuꞌni biluvaꞌ i-daaꞌ avelite henenitine initeꞌ matatine ipeꞌ igi di vikevo lingine nene laza aꞌmine heneni nene ivileꞌ ogo minineꞌ luteꞌmi minevoꞌ minevoꞌ ilineꞌ heneni nene ha molo none li gili longolize izi ningi mati-ngimikavo dii vaaꞌ aniꞌ ve. Idoꞌ lingine zuho Izesuꞌ evenele linge nalaꞌ numunguꞌ minaniꞌ nene mulumoꞌine gili nasahiliꞌ i-ngidaaꞌ aniꞌ nemuꞌ nene noluve. \v 35-36 Ee, lingine gomuꞌ nene lengita geni initeꞌ ato atoꞌ mukiꞌ sotoꞌ ivo aꞌminguꞌ amuzo mili gili eleꞌvoleꞌ igi minaniꞌ nenako neꞌmi gihileꞌve dalizangisi idise lengehelele izavo aꞌmine gili eleꞌvoleꞌ aniꞌ nene hulikelizaze. Ha gili eleꞌvoleꞌ igi di minilo. Oꞌmosoꞌmo lemelove lo salani molo-lidineꞌ initeꞌ nene dalone li ma aꞌmine geni initeꞌ sotoꞌ o-lengemelingutiꞌ nene olovoꞌ igi limi ingami amuzo mili gili eleꞌvoleꞌ igivoꞌ minilizaniꞌ nenako nemuꞌ nene aꞌmine gili eleꞌvoleꞌ ilizaniꞌ monovotine nene hulami di giliꞌ li di minilo. Amuzo mili gili eleꞌvoleꞌ igi minilizaniꞌ nene Oꞌmosoꞌmo menitine naba lengemeleseive. \p \v 37 Idoꞌ geni lengebelelinguꞌ nene olovoꞌ ami ha amuzovoꞌ mili gili eleꞌvoleꞌ igi minilizaniꞌ nene monoꞌ godolouꞌ Izesuꞌ geto alingumuꞌ tiꞌ li gizi nizaniꞌ nenako nemuꞌ neꞌmine ilizave: \q1 Aꞌmine aloseive lave nene gamene haꞌna neꞌmine minosa alivoba \q1 alineꞌ gameneꞌve nene mo liꞌnibe o neive. \m \v 38 Idoꞌ Oꞌmosoꞌmo tiꞌ lo lineꞌ: \q1 Neꞌmine o neiha neze eveneꞌne zuho luꞌine lisihekisi minaniꞌ nete \q1 nenikumuꞌ gili eleꞌvoleꞌ igivoꞌ minilizaniꞌ neꞌmo \q1 hazavoꞌ eleꞌvoleꞌ igi veꞌinesi mini-di vii minilisaniꞌza \q1 gili eleꞌvoleꞌ igi mini-di vilizangutiꞌ \q1 ve ma ingine olovoꞌ igi velepeꞌ izi vilizaniꞌ nene \q1 naza mo luꞌneuꞌ goloso gehepeve gelelesuve. \m \v 39 Neꞌmine lo lineꞌza laza nene eveneꞌ ma ingine gili eleꞌvoleꞌ igi mini di vangutiꞌ olovoꞌ igi velepeꞌ izi vii vi tolovo igaꞌ nave neꞌmine eveneꞌ minamo laza nene gele eleꞌvoleꞌ ogo mino mine do dizo minaaꞌ lemeni dameni do minelonive nene none. \c 11 \s1 Gele Eleꞌvoleꞌ Ogaliꞌmi Monovo Lo-ngimineꞌ \p \v 1 Gele eleꞌvoleꞌ ogaꞌ monovo nene neꞌmino neive: Laza Oꞌmosomuꞌ gele eleꞌvoleꞌ o noo ma aza lemelove lo salani molo-lidineꞌ initekumuꞌ gizebo o noneꞌ nene olihe damo idoꞌ aꞌminesi nene ma ningamuneꞌ nenako nomihe idoꞌ lemamilihe lo gate sitaꞌ gelamo aꞌmine initeꞌ nene mo ha noloseinako lemavo dalosune lo aꞌminemuꞌ nene gele eleꞌvoleꞌ ogovoꞌ minelesune. \p \v 2 Idoꞌ Oꞌmosoꞌmi evenele gomuꞌ minaniꞌ nete aꞌmineꞌmine igi gili eleꞌvoleꞌ igi minaaꞌ aniꞌ nemuꞌ nene Oꞌmosoꞌmo inginemuꞌ ninge lamineꞌ daaꞌ ineꞌ ve. \v 3 Idoꞌ Oꞌmosomuꞌ gele eleꞌvoleꞌ o noneꞌ neꞌmo okulumokuꞌ idoꞌ misubouko initeꞌ mataꞌ mukiꞌ sotoꞌ ogo neineꞌ nene Oꞌmosoꞌmo lavosavoꞌ sotoꞌ ogo neineꞌ nene mo gele none. Idoꞌ ningaaꞌ nouneꞌ initeꞌ mataꞌ mukiꞌ nene ningesaꞌmuneꞌ initedunuꞌ do sotoꞌ molaniꞌ nenako nesi nene mo gele none. \p \v 4 Idoꞌ Adamuꞌ gipele Kainiki Abeliki ingine initeꞌ olokuꞌ gizi Oꞌmoso imasingutiꞌ Abeliꞌ aza nene Oꞌmosomuꞌ gele eleꞌvoleꞌ ogo minineꞌ neꞌmo uvoloho Kainiꞌni nene ivileꞌ ogosa monovolo laminekisi minidotiꞌ initeꞌ lamineꞌ olokuꞌ gize imineꞌ ve. Neꞌmine ogavo Oꞌmoso aza mo lamineꞌ ve lo daniꞌ nenako neꞌmo Abeliꞌ aza ve lisiheꞌ minineꞌ nene mo lelebizavo ningo nogilune. Idoꞌ Abeliꞌ aza nene mo helaniꞌ ma neineꞌza Oꞌmosomuꞌ neꞌmino gele eleꞌvoleꞌ ogo minineꞌ neꞌmo gamaziꞌve nene ha minivo gelaaꞌ noune. \p \v 5 Idoꞌ gozopoꞌ akaꞌmila Enokuꞌ Oꞌmosomuꞌ gele eleꞌvoleꞌ ogo minineꞌ neꞌmo olihe helamivo Oꞌmosoꞌmo eleꞌmize do vineꞌ ve. Idoꞌ eleꞌmize do vineꞌ nenako ezemuꞌ nene eveneꞌ ingine viseꞌ igi ma ningamaniꞌ ve. Nemuꞌ nene eiꞌ monovomuꞌ monoꞌ godolouꞌ tiꞌ li gizi nizaniꞌ ma neive: Oꞌmosoꞌmo olihe eleꞌmize do vamineꞌ gamenelasi nene Oꞌmosoꞌmo ninge lamineꞌ do-daaꞌ ineꞌ ve. \v 6 Ne neiha Oꞌmosola vo giꞌmizelone li minilizave ingine ezemuꞌ nene tiꞌ li gili gili eleꞌvoleꞌ igi minilizadoꞌ o neive: Oꞌmoso nene nomineꞌ nevoba mo neive. Idoꞌ eze viseꞌ igi ezela vi giꞌmizave nene meni lamineꞌ ngemaaꞌ ive ma ne neive. Idoꞌ neꞌmine li gili gili eleꞌvoleꞌ igi minilizadoꞌ o neineꞌ nenako ma gili eleꞌvoleꞌ amilizaniꞌ nene Oꞌmosoꞌmo engiꞌ ninge lamineꞌ dalineꞌ aka nene ma minamoloseive. \p \v 7 Idoꞌ Oꞌmosomuꞌ gele eleꞌvoleꞌ ogaꞌ ive gohi ma Noaꞌni nene Oꞌmosoꞌmo eveneꞌ ngebeleleseive lineꞌ noso nene olihe sotoꞌ amivo aꞌmine noso sotoꞌ ilingumuꞌ nene lo sotoꞌ ogo lo-emavo Noaꞌ aza Oꞌmosomuꞌ gele eleꞌvoleꞌ ogo minineꞌ neꞌmo aza veneꞌ izipesi goloso ogalone lo Oꞌmosoꞌmo lidoꞌ gele lamineꞌ o mino sipi ma loloꞌ ogo noso velo anguꞌ nene gipele zuhosi veneꞌ izipesi nene do nguꞌ izineꞌ. Idoꞌ neꞌmine ogo Oꞌmosomuꞌ gele eleꞌvoleꞌ ogo minineꞌ neꞌmo misubouko aleve linge engita monovo goloso minineꞌ nene ngelebizineꞌ. Idoꞌ Oꞌmosoꞌmo ezemuꞌ gili eleꞌvoleꞌ igi minaaꞌ ave mukiliti luꞌine nene do lisiheꞌ o-ngedaaꞌ neineꞌ nenako Noaꞌ aza neꞌmine ogo Oꞌmosomuꞌ gele eleꞌvoleꞌ ogo minineꞌ neꞌmo nene eiꞌ Noaꞌ lulosi do lisiheꞌ o-dineꞌ ve. \p \v 8 Idoꞌ Abalahamuꞌ aza Oꞌmosomuꞌ gele eleꞌvoleꞌ ogo minineꞌ nenako nemuꞌ nene Oꞌmosoꞌmo naza gelebizeloniꞌ misubola gaꞌ lo vozo lo lo-davo aza aꞌmidoꞌ gele do vineꞌ ve. Ee, aza vo hetelelineꞌ misubo nemukisi nene ningo gelamo gopo eze misuboꞌve hulo Oꞌmosoꞌmo aꞌvopilemoꞌ zuholiti misubo minelive lo alingeꞌ imineꞌ misubola nene gaꞌ lo vo minineꞌ. \v 9 Idoꞌ Oꞌmosomuꞌ gele eleꞌvoleꞌ ogaꞌ ive minineꞌ neꞌmo aꞌmine vozo lo-dineꞌ misuboloꞌ nene vo hetelo aꞌmida nene gopo venenga ve neꞌmine gelo mino Oꞌmosoꞌmo aꞌmine misubo salani molo-lengedekuve lo lo huko-ngidive sitaꞌ eiꞌ gipele Isakaki idoꞌ Isakaꞌ gipele Zakoboki nesi nene aꞌmida seli numungukovoꞌ ingi monaniꞌ ve. \v 10 Idoꞌ seli numungukovoꞌ ongo minineꞌ nene Oꞌmosoꞌmo gala gelo luhuvo izo do sotoꞌ ineꞌ numuno ebeꞌ minevoꞌ minevoꞌ inguꞌ nene alingeꞌ vo holalove lo gala gelo aꞌminemuꞌ gizebo ogo mino seli numungukovoꞌ ongo minaaꞌ ineꞌ ve. \p \v 11 Idoꞌ Abalahamuꞌ aza Oꞌmosomuꞌ gele eleꞌvoleꞌ ogaꞌ ive minineꞌ neꞌmo nene Oꞌmosoꞌmo gipa ma gedelesane lo lo huko-dineꞌ nenako nemuꞌ aza goꞌne ngelo izamoloseinako mo gedelesuve lo gelo gele eleꞌvoleꞌ ogo minineꞌ neꞌmo elenaho Salaꞌ aza gohuno veneꞌ neivo idoꞌ Abalahamuꞌ aza ozoho molo izipe gedeli gamene osuꞌ lavo neꞌmini minasidoꞌ nene Oꞌmosoꞌmo Salaꞌni izipe molo emelineꞌ amuzo emavo Isakaꞌni gidineꞌ. \v 12 Neꞌmo Abalahamuꞌ eze nene mo ozoho molo vani goloso molo minidotiꞌ nene aꞌvopilemoꞌ mukiliti avoꞌnibo loloꞌ ineꞌ. Eiꞌ hamokutiꞌ nene aꞌvopilemoꞌ vaiꞌ goloso sotoꞌ igi okulumotoꞌ sonohiꞌ neꞌmine idoꞌ noso gahevela gepe neꞌminisa sotoꞌ igi evenelitesi gati nanikeꞌ nilizahe li ningamilizadoꞌ neꞌmine minaniꞌ ve. \p \v 13 Idoꞌ aꞌmine mene lo-lingimuve mukiꞌ ingine nene Oꞌmosoꞌmo ngemelove lo salani molo-ngidineꞌ initeꞌ nene olihe engita sotoꞌ amivo hili vaniꞌza aꞌmine initeꞌ sotoꞌ ilineꞌ gamene nene olihe hotoꞌ ha neivo mo sotoꞌ oloseive li ningi gili laniteꞌ gili gili eleꞌvoleꞌ igivoꞌ mini hilaniꞌ. Idoꞌ neꞌmine igi mini hilaniꞌ neꞌmo ingine nene me misubouꞌ mine giliꞌ lo minelonive minamo ha venenga ve neꞌminevoꞌ gelo minelonive nene none li li sotoꞌ igi minaniꞌ ve. \v 14 Idoꞌ eveneꞌ ma ingine gamazi neꞌminevoꞌ nilavo ma nene neꞌmo ingine mo mini giliꞌ lilizaniꞌ ebeꞌine atokumuꞌ viseꞌ igi gizebo igi nizave lo gelelesune. \v 15 Idoꞌ ingine gomuꞌ mini mili minaaꞌ aniꞌ misuboꞌninguko tineꞌ mili gohi ma vilisa giladiniko tineꞌ mili viliza akaꞌine nene ha ngoloꞌ lo minivo mo tineꞌ mili vikedine. \v 16 Vikedineꞌza ingine minaniꞌ misubo ivileꞌ ogo minineꞌ ebeꞌ Okulumokuꞌ neineꞌ nela luꞌine nene vavo aꞌmine misubouꞌ nene ha gopo minaniꞌ ve. Idoꞌ ingine neꞌmine igi minaaꞌ aniꞌ nemuꞌ Oꞌmoso aza engiꞌ Oꞌmosoꞌine minineꞌ nemuꞌ nene Oꞌmosoꞌine nouve loo lo sotoꞌ olosa ovozo helaaꞌ ineꞌ nevoba olize izo lo sotoꞌ ogaꞌ ineꞌ ve. Idoꞌ aza nene engiꞌ alingeꞌ miniliza numuno ebeꞌine do sotoꞌ ogo molo-ngidineꞌ nenako neꞌmo nene engiꞌ Oꞌmosoꞌine minineꞌ nemuꞌ ovozo helamaaꞌ ineꞌ nene mo gele none. \p \v 17-19 Idoꞌ Oꞌmosoꞌmo Abalahamuꞌni nene nenikumuꞌ gele eleꞌvoleꞌ ihe amihe lo emenguꞌ molo gipele Isakaꞌni nene belo olokuꞌ gize nemezo lavo Abalahamuꞌ aza Oꞌmosomuꞌ gele eleꞌvoleꞌ ineꞌ neꞌmo gipele Isakaꞌni nene belo olokuꞌ gize emelesa ineꞌ. Ee, gomuꞌ nene aꞌmine Isakaꞌnimuꞌ nene Abalahamuda Oꞌmosoꞌmo gamazi atoꞌ atoꞌ lo lo huko-do tiꞌ lo lineꞌ: Geiꞌ guliveka di mini sotoꞌ igi mini-di dizilizaniꞌ gaꞌvopilemoꞌ zuho nene aꞌmine Isakadatikovoꞌ sotoꞌ ilisave lo lo-emavo Abalahamuꞌ aza gele lamineꞌ ogo aꞌminemuꞌ nene gele eleꞌvoleꞌ ineꞌza Isakaꞌ aza helaavo ma Oꞌmosoꞌmo gohi do ote-do lo huko lo nimineꞌ gamazi nene ha do gihile izelidoꞌ o neive lo gala gilineꞌ nenako Oꞌmosoꞌmo lavo aza nene aꞌmine gipele hamoꞌ Isakaꞌni nene belo olokuꞌ gizo Oꞌmoso lehize-delesa ineꞌ ve. Idoꞌ Abalahamuꞌ Isakaꞌni belelesa gamunoꞌ neivo Oꞌmosoꞌmo geto oꞌve lo-damidini Abalahamuꞌ aza belavo mo heladinako nemuꞌ nene hilingutiꞌ Oꞌmosoꞌmo do tineꞌ molo-davo eleꞌmizo aniꞌ gelave. \p \v 20 Idoꞌ Isakaꞌ aza Oꞌmosomuꞌ gele eleꞌvoleꞌ ogo minineꞌ neꞌmo gipele Zakobongi Esaungi engita alingeꞌ sotoꞌ o-ngemelineꞌ initeꞌ nemuꞌ nene lo-ngemo noꞌnohoꞌ ize-ngidineꞌ. \p \v 21 Idoꞌ Zakoboꞌ aza Oꞌmosomuꞌ gele eleꞌvoleꞌ ogo minineꞌ neꞌmo helelesa miningutiꞌ nene Zoseheꞌ gipele sitaꞌ nene hamo hamoꞌ Zakoboꞌ noꞌnohoꞌ ize-ngidineꞌ. Neꞌmine ogo zaloꞌ do oto gubiꞌ izo Oꞌmoso opoꞌni lineꞌ. \p \v 22 Idoꞌ Zoseheꞌ aza Oꞌmosomuꞌ gele eleꞌvoleꞌ ogo minineꞌ neꞌmo vani molo helelesa minineꞌ gameneuꞌ nene Kanaha misubo nene Oꞌmosoꞌmo ngemelove lo salani molo-ngidineꞌ nenako neze zuho Isilaeleꞌ aleve ingine Aigita misubo nene huli Kanaha misubola tineꞌ mili vilisave lo gala gelo gele eleꞌvoleꞌ ogo aꞌminemuꞌ lo-ngemo idoꞌ neniꞌ amuzoꞌne nesi nene di vii aꞌmine Kanaha misubola galese izilizave lo lo-ngimineꞌ. \p \v 23 Idoꞌ Moseꞌ sotoꞌ ogavo izelehoi melehoi ningasineꞌ nene izipe lamineꞌ goloso sotoꞌ ogavo ingine Oꞌmosomuꞌ gili eleꞌvoleꞌ igi minasineꞌ neꞌmo Aigita aleveti guveꞌinesi ve Halaoꞌ aza Isilaeleꞌ alevelatiꞌ gipeꞌine ma sotoꞌ ikevo ma mo ngibili hiliꞌmi vivoꞌ minilisave lo lo huko-ngidingumuꞌ nene golise gilami gili huli aꞌmine gipeꞌine nene di haleki di minasivo ikeꞌni sito hamo vineꞌ. \p \v 24-26 Idoꞌ Halaoꞌ aluvoꞌmo Moseꞌni nene do mongizavo minineꞌ nenako aza nene eiꞌ gipele gelo mino Aigita vetinguꞌ eveneꞌ naba mino neꞌmi laniteꞌve ato atoꞌ gelo minidineꞌza aza lodive ogosa Oꞌmosomuꞌ gele eleꞌvoleꞌ ogo minineꞌ neꞌmo Oꞌmosoꞌmo eiꞌ evenele meni ngemelinguꞌ nene nezesi nemelive lo nemuꞌ lulo molo minineꞌ nenako nemuꞌ nene Aigita ve nete Isilaeleꞌ aleve ingine Kilisitoꞌ zuho neꞌmine liliꞌ igi minadiꞌmo di uꞌmusupo lizi-ngidavo minanguꞌ nene nazasi vo holo engikisi mulumo gelo mineloniꞌ nemuꞌ Oꞌmosoꞌmo meniꞌne nemelineꞌ neꞌmo Aigita misubouꞌ heneni nganeni minineꞌ nene ivileꞌ o neive lo gelo idoꞌ naza nene Aigita aleveti monovo golosoloꞌ nene eꞌmeto neꞌmi laniteꞌve nene nazasi ha gelo mineloniꞌza aꞌmine laniteꞌve nene geto osuꞌ lilineꞌ nenako nemuꞌ nene neꞌmine amo naza nene Oꞌmosoꞌmi evenele Isilaeleꞌ aleveuꞌ nene vo holo engiꞌ goboni mili-ngidanguꞌ nene makatoꞌ mino mulumo alumo gelo minelone lo Oꞌmosomuꞌ gele eleꞌvoleꞌ ogo minineꞌ neꞌmo Halaoꞌ aluvoꞌmi gipele ve li-nidamilizave lo oꞌve lo golise vineꞌ. \v 27 Idoꞌ Oꞌmosomuꞌ gele eleꞌvoleꞌ ogo minineꞌ neꞌmo guvelesi ve Halaoꞌ neꞌmi goliseꞌve gelamo Aigita misubo hulo vineꞌ. Ee, Oꞌmoso nene vetedunuꞌ ngelo ningamolonidoꞌ o minineꞌza Moseꞌ aza Oꞌmosomuꞌ gele eleꞌvoleꞌ ogo minineꞌ neꞌmo aza nene Oꞌmoso ninge neineꞌ gele minivo minineꞌ neꞌmo nene Aigita misubo hulo Oꞌmosoꞌmo imineꞌ gono nene hulamo geni bilingukisi ha amuzo molo doꞌmo vo minineꞌ. \v 28 Idoꞌ Moseꞌ aza Oꞌmosomuꞌ gele eleꞌvoleꞌ ogo minive minineꞌ nenako neꞌmo nene aza neꞌmine ineꞌ ve. Oꞌmosoꞌmo angeloꞌ ma imiselavo ogo Aigita aleveti ganaꞌ gipeꞌine ngebelelinguꞌ nene Isilaeleꞌ aleve leze gipetesi ngebelalive lo Moseꞌ aza angeloliꞌmo iseꞌine izelineꞌ akaloꞌ ngeleꞌmize molo Oꞌmosoꞌmo lidoꞌ eꞌmeto eveneꞌ lo-ngedavo Isilaeleꞌ aleve ingine sipisipi angale nene ngibili vaniseꞌine nene numuꞌine gatedoꞌ gatedoꞌ nene noso mili hibiꞌ izi hilikaꞌ hilikaꞌ aniꞌ ve. \p \v 29 Idoꞌ Isilaeleꞌ aleve ingine Oꞌmosomuꞌ gili eleꞌvoleꞌ aniꞌ neꞌmo guvo noso ma gulive Guleheꞌ Noso nene izo huko eza ema ogo gokoꞌ misubo neꞌmino minineꞌ gele minivo aꞌminguꞌ liki vaniꞌ. Idoꞌ Aigita aleve inginesi aꞌmineꞌmine ogo volone li nivavo guvo noso neꞌmo iheꞌ ogo do suꞌmize-ngedavo noso nii hilaniꞌ. \p \v 30 Idoꞌ Isilaeleꞌ aleve ingine Oꞌmosomuꞌ gili eleꞌvoleꞌ igi minaniꞌ neꞌmo Oꞌmosoꞌmo lidoꞌ eꞌmeti Zeliko numuno ebeliꞌmi gesi gehenidunuꞌ gizaniꞌ gesi haꞌna nene goꞌ laneme goꞌ laneme nene gamene hamo hamoꞌ di vodo vodo i-dikaꞌ i-dikaꞌ igi nizavo gamene seveni (7) ogavo aꞌmine gamene seveni (7) neꞌmi lulouꞌ nene gohi gamene seveni (7) neꞌmine di vodo vodo i-dikevo aꞌmine gehenidunuꞌ gizaniꞌ gesi nene ngululubizo lemo ongavo Isilaeleꞌ aleve aꞌminguꞌ dizi Zeliko aleve ngibili geseꞌ aniꞌ. \v 31 Idoꞌ Isilaeleꞌ aleve lovo di Zeliko ebekuꞌ olihe alisa navo aꞌmine ebekuꞌ minineꞌ pasidiaꞌ alu Lahabaꞌ aza apiꞌ ogo Oꞌmosomuꞌ gele eleꞌvoleꞌ ogo minineꞌ neꞌmo Isilaeleꞌ ve sitaꞌ aꞌmine numuno ebeꞌ Zeliko nene amamakaꞌ mili ningi alisa vasive nene do lamineꞌ o-ngedo numuꞌveuꞌ ngeleꞌmize molavo nemuꞌ nene alingeꞌ Isilaeleꞌ aleve nete igi Zeliko aleve Oꞌmosoꞌmi gamazi gili hulaniꞌ ngibili geseꞌ anguꞌ nene Lahabaꞌni nene bilami iseve izi-daniꞌ ve. \p \v 32 Idoꞌ aꞌmine luvoniꞌ eveneꞌ ingine Oꞌmosomuꞌ gili eleꞌvoleꞌ igi minaniꞌ neꞌmine igi eveneꞌ linge mukiꞌ ingine aꞌmineꞌmine igi Oꞌmosomuꞌ gili eleꞌvoleꞌ aniꞌza naza nGideoniꞌ ve Balakaꞌ ve Samusoniꞌ ve Zehitaꞌ ve Davidiꞌ ve Samueliꞌ ve idoꞌ Oꞌmosoꞌmi veletiꞌ gamazi li sotoꞌ igaꞌ ave polohete linge mukiꞌ engiꞌ neti gamazi lo osuꞌ lo lolosa luvodiniko lo do vo nouvo haꞌna idine. Nemuꞌ nene gamazi linge nene ngelo ma lo osuꞌ lamolosuve. \v 33 Aꞌmine ve ingine Oꞌmosomuꞌ gili eleꞌvoleꞌ igi minadiꞌmo Oꞌmosoꞌmo hize eleꞌ o-ngedo neivo engikutiꞌ linge ma nete amuzo mili misubo mala mala vi Oꞌmosomuꞌ gilamave nene lovo i ngimi ngivileꞌ igi engita di gelekeleꞌ i-ngidaniꞌ. Idoꞌ engikutiꞌ linge ma nete engiꞌ misuboꞌninguꞌ nene monovo lisiheꞌ laminekovoꞌ minelive li eveneꞌ di lisiheꞌ i-ngidaaꞌ aniꞌ ve. Idoꞌ Oꞌmosoꞌmo neꞌmine manaꞌmine initeꞌ do sotoꞌ o-ngedelove lo lo huko-ngidineꞌ gamazi nesi nene engita gihile izaaꞌ ineꞌ ve. Idoꞌ engikutiꞌ eveneꞌ linge ma nete loposo gulo laioni nete ngibililisa ikevo ma aꞌmine laizoni nete libilikelizave li eveneꞌ nete akaꞌine nene hizi tili-ngidaaꞌ aniꞌ ve. \v 34 Idoꞌ engikutiꞌ linge ma nete ololiꞌmo loꞌvote-ngedelesa ineꞌ amuzoꞌve nene di hongu li-daaꞌ aniꞌ ve. Idoꞌ linge ma nene lovo ve nete bainati miteꞌ nedunuꞌ ngibilaaꞌ aniꞌza ingine olovoꞌ lamineꞌ ikevo bainati miteꞌ neꞌmo ngebelamaaꞌ ineꞌ ve. Idoꞌ linge ma ingine gilizevo minangutiꞌ nene amuzo ve liliꞌ igi minaaꞌ aniꞌ. Idoꞌ misubo mautiꞌ ve igi lovo i ngimaaꞌ anguꞌ nene linge ma nete amuzo mili mini ngimiseli di vaaꞌ aniꞌ ve. \v 35 Idoꞌ veneꞌ linge ma nene izipahaꞌine hilikengutiꞌ nene Oꞌmosoꞌmo do ote-ngedavo gohi izeꞌningida igi giꞌmizaaꞌ aniꞌ ve. Idoꞌ linge ma ingine Oꞌmosomuꞌ gili eleꞌvoleꞌ igi minaniꞌ neꞌmo ve malite gavoso ngibili goboni mili-ngidi tiꞌ li li-ngidaaꞌ aniꞌ ve: Isetine izo gavoso lengebelamoloniko lingine Oꞌmoso mehedine imi monoꞌ nene hulilizave li neꞌmine li-ngidaaꞌ aniꞌza alingeta hele noloningutiꞌ gohi oto minevoꞌ minevoꞌ lemeni dameni lamineꞌ dosoꞌ ma nenave li gili huli nizavo ngibilikevo hilaaꞌ aniꞌ ve. \v 36 Idoꞌ linge ma nene evenelite gamazi goloso palasa li-ngidi gize zohiꞌ i-ngidi amuzo malehe nalaꞌ izi lobe tobeꞌ aniꞌ nedunuꞌ nene ngibilaaꞌ aniꞌ ve. Idoꞌ linge ma nene gizeꞌnidoꞌ aꞌnidoꞌ seni nalaꞌ izi-ngidi huli nalaꞌ numunguꞌ i-ngidaaꞌ aniꞌ ve. \v 37 Idoꞌ linge ma nene gehenidunuꞌ huli huliꞌ igi ngibilaaꞌ avo hilaaꞌ aniꞌ ve. Idoꞌ linge ma nene ngibili giti setaꞌ igaꞌ aniꞌ ve. Idoꞌ linge ma nene bainati miteꞌ nedunuꞌ ngibili hilaaꞌ aniꞌ ve. Idoꞌ linge ma Oꞌmosomuꞌ gili eleꞌvoleꞌ aniꞌ nemuꞌ ngimiseli hulikevo okoꞌnidoꞌ initeꞌine nomivo sipisipi losuvo idoꞌ memeꞌ losuvo nedunukovoꞌ okoꞌnidoꞌ ngili moni okoꞌine losuvoꞌmi initeꞌ nosoꞌ initekisi idoꞌ geneganaꞌinesi mukiꞌ nene nomivo nimonavo goboni mili-ngidi di goloso i-ngidaaꞌ aniꞌ ve. \v 38 Ingine Oꞌmosomuꞌ gili eleꞌvoleꞌ igi eveneꞌ lisiheꞌ lamineꞌ minadiꞌmo eveneꞌ linge mukiꞌ nene engitoꞌ lisiheꞌ igi minamaniꞌza aꞌmine aleve nene evenelite vasa izi-ngidikevo guhali hali igi vi eveneꞌ nizamada ebeꞌ hadivela idoꞌ golola geheni mulikuꞌ idoꞌ misubo luloukisi gopo ingaaꞌ aniꞌ ve. \v 39 Aꞌmine mene aleve mukiꞌ ingine ezemuꞌ gili eleꞌvoleꞌ aniꞌ nemuꞌ Oꞌmosoꞌmo ningivo lamineꞌ ineꞌza lehize-ngedelove lo evenele zuho lo molo-ngidineꞌ initeꞌ nene olihe dami hilaniꞌ ve. \v 40 Idoꞌ aꞌmine Oꞌmosoꞌmo ngemelove lo lo molo-ngidineꞌ initeꞌ nene olihe dami hilaniꞌ nene nanitekumuꞌ ve. Oꞌmosoꞌmo leliꞌ olihe sotoꞌ amunivo engiꞌ lehize-ngedeloniꞌ initeꞌ nene gomuꞌ mili mudise dalizadoꞌ lisiheꞌ i nizaha gizebo igi nizavo lelikisi makatoꞌ daloneꞌ nene lamineꞌ oloseive lo gomuꞌ gele minineꞌ nenako nemuꞌ nene ingine olihe dami hilaniꞌ ve. \c 12 \s1 Izesungumuꞌ Gele Eleꞌvoleꞌ Ogo Monoliꞌmi Lesisiꞌveuꞌ Lotiꞌ Izo Mino Geni Lebelelingukisi Amuzo Molo Mineloninguꞌ Nene Laza Nadiꞌ Olobe Nemuꞌ Lo-ngimineꞌ \p \v 1 Aꞌmine Oꞌmosomuꞌ gele eleꞌvoleꞌ ogaliꞌmi monovo di sotoꞌ mili lelebizave mukiꞌ ingine nene limuso neꞌmini vaiꞌ goloso mini hizi vodo vodo i-lidi vonuꞌ libili nizaniꞌ gilineꞌ nemuꞌ nene laza okodela lihiteheꞌ initeꞌ vaiꞌ nene do hulo idoꞌ lihime initeliꞌmo gizedeloꞌ izo do mineꞌ mineꞌ ilineꞌ initeꞌ nesi nene do hulo hazala ogo Oꞌmosoꞌmo aka lelebizidokovoꞌ nene initeꞌ maliꞌmo aꞌmine aka hize tile-ledamivo idoꞌ ahukisi mo lamo lotikovoꞌ izo vo minelone. \p \v 2 Idoꞌ neꞌmino lotiꞌ izo novo Oꞌmosomuꞌ gele eleꞌvoleꞌ ogaꞌ monovoloꞌ nene gomuꞌ molo lemo aꞌmine monovoloꞌ eꞌmete osuꞌ losa aka lelebizive Izesuꞌnivoꞌ nene eꞌmeto volone lo eitokovoꞌ nene vete hulo-do volone. Aza nene alingeꞌ nolize izo minelongumuꞌ ve lo gelo evenelite ve goloso ve li gili lohotoꞌ zaloꞌ bililizangumuꞌ ovozo helo minelingumuꞌ nene haza initeꞌ ve lo gele hulo golise vamo aꞌmine lohotoꞌ zaloꞌ bilangukisi nene amuzo molo minineꞌ ve. Neꞌmine ogo Oꞌmosolatiꞌ lemo minelineꞌ moꞌmosiꞌveloꞌ Oꞌmosoꞌmo ana hulaaꞌ ida vo neive. \v 3 Idoꞌ Izesuꞌ monovomuꞌ gililizaniꞌ nene aza mo hize eleꞌ o-ledelineꞌ nenako nemuꞌ nene lingine monokuꞌ amuzo molaakumuꞌ goseleꞌ lengebelavo lutine nene vo gilizevo ogalive li lihime daaꞌ ave nete Izesuꞌni biluvaꞌ i-daaꞌ anguꞌ amuzo molo minineꞌ mamuꞌ nene gili minilo. \s1 Vete Zopovo Siꞌzo Monovo Lisihetokovoꞌ Moneloningumuꞌ Ve Lo Oꞌmosoꞌmo Geni Initeliꞌmi Lulouꞌ Hulo-ledaaꞌ Neingumuꞌ Lo-ngimineꞌ \p \v 4 Lingine goloso initeꞌ neꞌmo do ongo-lengedelesa neivo amuzo mili lovo i imi aꞌmineꞌmi luloutiꞌ nene lingine olihe vanise lepi hilamave. \v 5-6 Idoꞌ lingine Oꞌmosoꞌmo muludinguꞌ do lamineꞌ ogo gipeꞌne ve lo gamazi ma monoꞌ godolouꞌ tiꞌ lo lo-lingidineꞌ mamuꞌ nene gatine molahe. Olo: \q1 Gipeꞌnee, Guvelesi veꞌmo eveneꞌ ma lulo ngemo minelive nene \q1 veꞌine zopovo siꞌzi monovo lisihetokovoꞌ monilizangumuꞌ ve lo \q1 geni initeliꞌmi lulouꞌ ngeleꞌmize molaloseive. \q1 Ee, gipeꞌne ve lo ningaaꞌ ive mukiꞌ nene \q1 veꞌine zopovo siꞌzilizave lo ngebeleleseive. \q1 Idoꞌ neꞌmine oloseinako nemuꞌ nene gaza Guvelesi veꞌmo \q1 veka zopovo siꞌzo monovo lisihetokovoꞌ moneline lo \q1 do lisiheꞌ o-gedo geni initeliꞌmi lulouꞌ geleꞌmize nomolavo ma \q1 gaza nemuꞌ gelanivo haza initeꞌ loloꞌ amivo. \q1 Idoꞌ lihimeka nogimivo ma nemuꞌ goseleꞌ gebelamilive. \m \v 7 Geni initeliꞌmi lulouꞌ mini ma nene Guvelesi veꞌmo leleꞌmize akaloꞌ neive li aꞌmine initeꞌ nene goseleꞌ lengebelamivo ha gihi minilo. Meꞌninge nete gipeꞌine ma veꞌine zopovo siꞌzilizave li ngibili di hehe li-ngidami huli-ngimikavo minaniꞌ nene ma minamavo mukitoꞌ nene ngibili di hehe li-ngidaaꞌ naniꞌ nemuꞌ nene Oꞌmosoꞌmo linginesi gipeꞌne nizave lo neꞌmine o-lengedo noloseive. \v 8 Ee, meꞌninge mukiꞌ nete gipeꞌine veꞌine zopovo siꞌziliza initeꞌ di-ngidi di hehe li-ngidaaꞌ naanako lengikisi Oꞌmosoꞌmo neꞌmine o-lengedo minamineꞌ neidiniko eiꞌ izipahala zuho minami akaloꞌ izipe neꞌmine minadine. \v 9 Idoꞌ aꞌmine gamaziloꞌ imineꞌ molo ma lolove. Ha okode losuvosi noneꞌ mene gidave metemote nete leliꞌ vete zopovo siꞌzilizave li di hehe li-lidavo gelekeleꞌ o-ngedo mino lamineꞌ giluneꞌ nenako nemuꞌ nene neꞌmine o-ngedaaꞌ nouneꞌ nene ivileꞌ ogo vode lute lemeni dameni do sotoꞌ o-ledaaꞌ ive metehine nene nabosa gelekeleꞌ o-dukeꞌvo. Olo. Ee, laza neꞌmine ogo ezelatiꞌ minevoꞌ minevoꞌ lemeni do minevoꞌ minevoꞌ olosunako nemuꞌ nene gelekeleꞌ nabo o-do minelone. \v 10 Ee, me misubouꞌ metemote di hehe li-lidavo gelekeleꞌ o-ngiduneꞌ nene ingine engiꞌ luꞌnidoꞌ lamineꞌ oloseive li giladoꞌ gamene liꞌnibevoꞌ di hehe li-lidaaꞌ aniꞌza Oꞌmoso eiꞌ neꞌmino lihimete goloso daaꞌ monovote nene nomivo monovote lisihekisivoꞌ minelone lo leleꞌmize lamineꞌ ilineꞌ initeꞌ do sotoꞌ o-ledo do hehe lo-ledaaꞌ neineꞌ nenako nemuꞌ nene gelekeleꞌ nabo o-do minelone. \v 11 Vete zopovo siꞌzeloningumuꞌ ve li di hehe li-lidi geni initeliꞌmi lulouꞌ leleꞌmizi milikevo aꞌminguꞌ mineloneꞌ gameneuꞌ nene lolize izo laniteꞌ gelo minelonivoba ha mulumo alumo gelo minelesuneꞌza neꞌmine oloneꞌ neꞌmo leleꞌmize akaloꞌ ogavo ma alingeꞌ neꞌmi gihileꞌve nene monovo lisiheꞌ laminekovoꞌ ogo molo nonivo lute nene zou lo minaaꞌ neive. \p \v 12 Oꞌmosoꞌmo vetine zopovo siꞌzilizave lo geni initeliꞌmi lulouꞌ lengeleꞌmize molaaꞌ neineꞌ neꞌmo nene lengeleꞌmize lamineꞌ oloseinako nemuꞌ nene lingine lutine gopo o vivo lutineꞌmi gizene anaꞌve nene guluꞌ gelo izo bele vivo lutine gilizevo ogo minaaꞌ neineꞌ nene gohi di oti-di gonouꞌ eleꞌmizi milalo. \v 13 Neꞌmine igi lutine neꞌmo monoꞌ akaloꞌ volosa neivo ma lengikuꞌ ve ma lingine lutineꞌmi gizeneꞌve goloso o vivo minave lingine nene gopo aka mili vami aꞌmidoꞌ lamini nivi lamineꞌ ilizangumuꞌ nene aka lamineꞌ di hehe li vi minilo. \s1 Ingine Monovo Lisiheꞌ Igi Mili Ami Oꞌmoso Meheꞌine Imikevo Lihime nGemalive Lo Gaꞌine Daniꞌ Gamazi \p \v 14 Idoꞌ lengikuꞌ lovo lolize nene sotoꞌ ogalive li eveneꞌ mukita hongu monovo nene igi mili ngelebizi minilizangumuꞌ nene amuzo milalo. Idoꞌ ve ma ingine Oꞌmosoꞌmi evenelelite di minilizaniꞌ monovo lisiheꞌ lamineꞌ nene engita nomivo minaaꞌ nave nene Guvelesi ve mo ningamilizaniꞌ nenako lingine hongu monovo igi mili ilizadotiꞌ nene Oꞌmosoꞌmi evenele nounako li monovo lisiheꞌ laminetokovoꞌ eꞌmeto volone li amuzo mili minilo. \v 15 Oꞌmosolatiꞌ nasahiliꞌ lamineꞌ nene lengiꞌ zuho malite ningi huli aka maloꞌ vikelizave li ge gizebo o-nede ne gizebo o-gede li minilo. Idoꞌ lengiꞌ zuho maliꞌmo lengiꞌ vovotinguꞌ mino za maliꞌmo gihile ekeseꞌ ineꞌ izaaꞌ neineꞌ neꞌmino mino monovo goloso ato atoꞌ do sotoꞌ ogo lengita geni do sotoꞌ o-lengedo neivo lengikutiꞌ eveneꞌ lingela mukiꞌ nene aꞌmineꞌmine igi monovo goloso dikevo lutine do gopo ogalive li gizebo lekeseve igi minilo. \v 16 Idoꞌ lengikutiꞌ veneꞌ vemohoꞌ gopoꞌnapa ingi monikelizave. Idoꞌ lengikutiꞌ eveneꞌ ma Esauꞌ neꞌmine mini Oꞌmosomuꞌ gaꞌine molavo me misubouꞌ initekumukovoꞌ gili minikelizave li ge gizebo o-nede ne gizebo o-gede li minilo. Esauꞌ aza nene Isakaꞌ ganaꞌ gipele mino melehidoꞌ medelo mino melehi initeꞌvelokisi nene medelo minelidoꞌ minineꞌza gamene ma aꞌmine uvoloho Esauꞌ aza gaꞌna helo nakunolo Zakoboꞌ nosoꞌ niteꞌ gize vataꞌ ogo minineꞌ nenako aꞌmingutiꞌ nene linge ma nemavo nalongisi ve lo haza misubouꞌ initeꞌ nosoꞌ nitetoꞌ nene melehidoꞌ medelo minelineꞌ moꞌmosiꞌve nene nakunolo Zakoboꞌni eme molaniꞌ ve. Ee, Esauꞌ aza Oꞌmosomuꞌ gala molavo me misubouꞌ initekumukovoꞌ gele minive mino haza nosoꞌ niteꞌ nene gamene hamokovoꞌ nalosa idoꞌ nene initeꞌ naba melehidoꞌ medelo minelineꞌ moꞌmosiꞌve nene Zakoboꞌni imineꞌ ve. \v 17 Emavo Zakoboꞌ ezeloꞌ medelo minavo alingeꞌ meleho aza ganaꞌve noꞌnohoꞌ ize-delineꞌ noꞌnohoꞌ nene Zakoboꞌni ize-davo Esauꞌ aza meꞌneho noꞌnohoꞌ nene do tineꞌ molo neniꞌ noꞌnohoꞌ ize-nedelive lo ive ogo lulo do velepeꞌ izelineꞌ aka viseꞌ ogo minineꞌza ma ningamivo meleho aza Esauꞌ gamaziꞌve gele hulineꞌ nene lingine mo gili nizaniꞌ ma neize. Nemuꞌ nene lingine eze ineꞌ neꞌmine amilo. \p \v 18 Lingine Oꞌmosola igi giꞌmizaniꞌ nene Isilaeleꞌ aleve leliꞌ avotemote Sinae golola louꞌ gamazi lo huko-ngidineꞌ dalisa vanguꞌ sotoꞌ ogo minineꞌ initeꞌ neꞌmidoꞌ nene lingine ma amave. Ingine ha veꞌinedunukovoꞌ ningi idoꞌ gaꞌinedunukovoꞌ gililizaniꞌ initeꞌ nevoꞌminevoꞌ neidoꞌ aniꞌ ma neive. Ee, ingine Sinae golola vadoꞌ nene oloꞌ gulumo ogo minivo idoꞌ litiꞌmuso goloso izo minivo idoꞌ hepeꞌ naba mumu gehe gehe ogo elo minivo \v 19 idoꞌ pikuli neꞌmo nolo naba molo minivo idoꞌ Oꞌmosoꞌmo gamazi livo gilave nete nolo nene gilangumuꞌ golise gili gamazi gohi ma lelitoꞌ lisiheꞌ ogo lo lemamilive li amuzo mili Moseꞌni li-imaniꞌ. \v 20 Idoꞌ Oꞌmosoꞌmo tiꞌ lo lo huko-ngidineꞌ nemuꞌ ngemengingi goloso izineꞌ: Aꞌmine Sinae golola vi lisi gililiza initepe evenepe nene mo geheni huli huliꞌ igi ngibili hililizave. Idoꞌ evenekovoꞌ nevoba ize gulo nesi aꞌmida vi lisi gililizaniꞌ nene mo ngibili hililizave lo lineꞌ. \v 21 Ee, ingine ninganiꞌ initeꞌ nene ngemengingi izaaꞌ initeꞌ atoliꞌmine goloso minavo Moseꞌ aza nehelele goloso izavo luvoluvo zaloꞌ do nouve lo lo-ngimineꞌ. \p \v 22 Ee, lingine nene avotemotida Sinae golola ngemengingi initeꞌ sotoꞌ o ngimineꞌ neꞌmidoꞌ nene ma vamave. Asi aꞌmine ngemengingi initeꞌ ivileꞌ ogo lamineꞌ goloso minineꞌ initetoꞌ ikeniꞌ neive. Idoꞌ Zelusalemi numuno ebekuꞌ minineꞌ golo Zaioni neꞌmine minevoꞌ minevoꞌ Oꞌmosoꞌmi numuno ebeꞌ Zelusalemi neꞌmino Okulumokuko minineꞌ numuno ebekuꞌ Zaioni golo mala nene lingine mo imi hilikeve. Idoꞌ angeloꞌ tauseni tauseni neꞌminete zegeꞌ zegeꞌ igi ngolize izi minadasi \v 23 idoꞌ Oꞌmosoꞌmo noꞌnohoꞌ ize-ngedelineꞌ izipahala Okulumoꞌ ebeꞌ ngemelingumuꞌ guliveꞌine Okulumokuꞌ gize molave engiꞌ muliseukisi nene mo imi hilikeve. Idoꞌ eveneꞌ mukiliti Oꞌmoso leliꞌ zaasi naba minidasi idoꞌ ve lisiheꞌ neꞌmine mo hilikevo sikalahuꞌine Oꞌmosoꞌmo mudise ngeleꞌmize lamineꞌ ogavo nizada nesi nene mo imi hilikeve. \v 24 Idoꞌ lelikisi Oꞌmososi kuku holo-ledo gamazi hulo voleloꞌ meloꞌ o-ledo Oꞌmosoꞌmo gamazi lamineꞌ gosohoꞌ lo huko-lidineꞌ lo-do ogo limive Izesuda nesi imi hilikevo vaniseꞌve lutidoꞌ hibiꞌ izo hulineꞌ gelavo minikeve. Kainiꞌ aza Abeliꞌni bele hilineꞌ vaniseꞌve nene misubouꞌ doꞌmozavo Oꞌmosoꞌmo ningo Kainiꞌni nene lihime imineꞌza Izesuꞌni bili hilaniꞌ vaniseꞌve nene ningo lihime lemamo isete izineꞌ nenako aꞌmine vaniseꞌve neꞌmo gono daniꞌ nene Abeliꞌ vaniseꞌmo gono daniꞌ nene ivileꞌ ogosa gono lamineꞌ daniꞌ ve. Neꞌmo lingine nene mo aꞌminguꞌ imi hilikeve. Idoꞌ lingine aꞌminguꞌ nene mo imi hilikenako nemuꞌ nene Oꞌmosoꞌmo nasahiliꞌ o-ledo hize eleꞌ o-ledaaꞌ neineꞌ nene lengikutiꞌ ve malite ningi huli monovo goloso lengiꞌ vovotinguꞌ di sotoꞌ ikelizave li gizebo lamineꞌ igi minilo. \p \v 25 Ee, Oꞌmosoꞌmi gamazi Izesuꞌ lo-lingimineꞌ nene hulikelizaze. Gizebo lamineꞌ igi minilo. Ingine Oꞌmosoꞌmi gamazi misubouꞌ mene Moseꞌ lo-ngimineꞌ gili hulave nene Oꞌmosoꞌmo ngebelelingutiꞌ olovoꞌ igi golise viliza akaꞌine ma minamivo aza lihime ngemaaꞌ neineꞌ nenako nemuꞌ Oꞌmosoꞌmi gamazi nene Okulumokutiꞌ lo-limineꞌ nenako gele huloloneꞌ nene laza Oꞌmosoꞌmo lihime lemelingutiꞌ nene mo kekeꞌ ngelo olovoꞌ amolosunako nemuꞌ nene aꞌmine gamazi nene gili hulikelizaze. Gizebo lamineꞌ igi minilo. \v 26 Moseꞌ Sinai gololoꞌ dizo minineꞌ gameneuꞌ nene Oꞌmosoꞌmo gamazi nolo-imivo nolo neꞌmo misubo nene do moꞌmongoꞌ ineꞌ ve. Idoꞌ Oꞌmosoꞌmo idise tiꞌ lo lo huko neineꞌ ma neive: Iheꞌ initeꞌ mukiꞌ nene gamene hamokovoꞌ ma do moꞌmongoꞌ olosuve. Idoꞌ misubovoꞌ nevoba okulumoꞌ nesi do moꞌmongoꞌ olosuve lo lineꞌ ve. \v 27 Idoꞌ initeꞌ mataꞌ nene gohi do moꞌmongoꞌ olosuve lo lineꞌ nene aza initeꞌ mataꞌ mukiꞌ do sotoꞌ muluvoniꞌ nene do moꞌmongoꞌ ogo do hulokuvo moꞌmongoꞌ ami minilizaniꞌ initekovoꞌ nene ha miniviꞌ miniviꞌ ilisave lo gele mino do moꞌmongoꞌ ilingumuꞌ lineꞌ ve. \v 28-29 Idoꞌ laza Oꞌmosoꞌmo gizebo inguꞌ moꞌmongoꞌ amilineꞌ ebeꞌ minevoꞌ minevoꞌ ilinguꞌ nene vo holokuneꞌ nenako nemuꞌ nene Oꞌmoso isaaꞌ neve lo-do opoꞌni lo-deloneꞌ nene mulunouꞌ lamineꞌ gelelidokovoꞌ o-delone. Idoꞌ ololiꞌmo initeꞌ loꞌvoto osuꞌ lilineꞌ neꞌmino Oꞌmosote neꞌmo eveneꞌ goloso ngebele osuꞌ loloseinako eze opoꞌni loloneꞌ nene ezemuꞌ lehelele izivo goliseꞌve gele mino neꞌmine ogo minelone. \c 13 \s1 Ogo Molo Nonivo Oꞌmosoꞌmo Ninge Lamineꞌ Ilineꞌ Neꞌmi Gamazi Lo-ngimineꞌ \p \v 1 Lingine monokuꞌ nene hamoꞌ zuho liliꞌ igi mini lutine nene ne geme ge neme li minaaꞌ naniꞌ nene lengitatiꞌ huko vamivo mini di vi minilo. \v 2 Idoꞌ eveneꞌ malite venenga ve ma engiꞌ minada ikevo ngeleꞌmize lamineꞌ igi haza eveneꞌ nene neꞌmine noo-ngidube li gili angeloꞌ nene ngeleꞌmize lamineꞌ aniꞌ nenako nemuꞌ lingine venenga ve ngeleꞌmize lamineꞌ ogakumuꞌ nene gili hulikevo gatine molalive. \v 3 Idoꞌ Izesuꞌ evenele ma nalaꞌ numunguꞌ huli-ngidikevo minanguꞌ nene lingine engikisi makatoꞌ nalaꞌ numunguꞌ mini mulumo alumo gili nizaniꞌ gilivosa engikumuꞌ gili mini hize eleꞌ i-ngidi minilo. Idoꞌ lingine ha vetinesi mini olihe ma hili vamanako lengikisi nene aꞌmineꞌmine igi goboni mili-lingidilizaniꞌ nene agae ma hize eleꞌ i-lidavoo li minilisanako nemuꞌ nene goboni mili-ngidavo minaaꞌ navemukisi nene gili mini hize eleꞌ i-ngidi minilo. \v 4 Idoꞌ veneꞌ vemohoꞌ gopoꞌ napa ingalizaniꞌ nene Oꞌmosoꞌmo lihime ngemeleseinako eveneꞌ mukiꞌ nene veneꞌ vemohoꞌ liliꞌ igaꞌ monovomuꞌ nene gili lamineꞌ i mini di gopo ami lisiheꞌ lamineꞌ igi mini eledingesivoꞌ idoꞌ vadingesivoꞌ ingalizave. \v 5 Idoꞌ Guvelesi ve aza lengiꞌ mo kekeꞌ hulo-lengedo vo haha amolosuve lo lineꞌ nenako nemuꞌ lingine lutine nene moni heneniloꞌ vaalive. Initeꞌ gohi ma daloinako li mumuzoꞌ ami lingine di minaniꞌ initeꞌ nene leliꞌ votigileloꞌ lisiheꞌ o neive li gili hongu li lamini minilo. Ee, Guvelesi ve aza lengiꞌ hulo-lengedamolosuve lineꞌ nenako \v 6 nemuꞌ nene laza gopo gate gelamo ezemuꞌ gele eleꞌvoleꞌ ogo monoꞌ godolouꞌ tiꞌ li gizi nizaniꞌ gamazi ma nene ha tiꞌ lo lolosune: \q1 Guvelesi ve aza hize eleꞌ o-ledaaꞌ neinako \q1 laza initeꞌ mamuꞌ lehelele izelidoꞌ nomivo \q1 idoꞌ eveneꞌ nete ma di goloso i-lidilizadoꞌ minamune. \p \v 7 Idoꞌ Oꞌmosoꞌmi gamazi li-lingimave gizebo vetine ingine monoꞌ akaloꞌ nivi hilaniꞌ engita nene gili mini gizekaꞌnidoꞌ nene ningi hehe li mini ngeꞌmeti nivi ingine Oꞌmosomuꞌ gili eleꞌvoleꞌ igi minaaꞌ aniꞌ monovoꞌine neꞌmidoꞌ nene lingine apiꞌnapiꞌ igi di minilo. \v 8 Izesuꞌ Kilisitoꞌ aza nene gomuꞌ minineꞌ monovoꞌvesi hazavoꞌ mino monovoꞌve nene do atoꞌ amo idisesi nene mo aꞌmineꞌmine ogovoꞌ mino mine do voo mineleseinako \v 9 nemuꞌ nene eveneꞌ ma monoꞌ gamazi ve li soza gamazi ato atoꞌ li-lingimilizaniꞌ neꞌmo gatine hizalize. Lute hize eleꞌ oloseive li nosoꞌ niteꞌ naakumukisi li-lingimilizaniꞌza lute hize eleꞌ o-ledaaꞌ neineꞌ initeꞌ nene nosoꞌ niteꞌ nevoba asi Oꞌmosoꞌmo nasahiliꞌ o-ledaaꞌ neineꞌ neꞌmo lute amuzo molavo neꞌmo nene lamineꞌ ilineꞌ nenako aꞌmine nosoꞌ nitekumuꞌ li-lingimilizaniꞌ gamazi gili daaꞌ nave nene aꞌmine initeliꞌmo ngeleꞌmize lamineꞌ amaaꞌ neineꞌ nenako neꞌmo gatine hizalive. \v 10 Ee, Oꞌmoso imaniꞌ nosoꞌ initekutiꞌ nene ha nalisave li li-lingimilisaniꞌza nemuꞌ lo-lengemeloze. Gililo. Sipisipi ize nevoꞌmine bili Oꞌmosoꞌmi holomoloꞌ mili gizi imisa naaꞌ naniꞌ neꞌmine initeꞌ gelo minivete Kilisitoꞌ nene leliꞌ sipisipi nevoꞌmine initete loloꞌ ogo lelita mine molo neive. Aꞌmine Kilisitoꞌ nene Oꞌmoso belo gize emaaꞌ sipisipi ize neꞌmine loloꞌ ogo neivosa laza nene eiꞌ Izesuꞌnimuꞌ gele eleꞌvoleꞌ ogo minaaꞌ nouneꞌ neꞌmo eiꞌ Izesuꞌ okoꞌno naaꞌ nouneꞌ gelave. Neꞌmine ogaꞌ nouneꞌza Zuda veti monoꞌ numuno adoꞌ seli numuno avazahaloꞌ gizaniꞌ mininguꞌ nene vi hili mini sipisipi nevoꞌmine bili Oꞌmoso imangutiꞌ naaꞌ nave ingine nene leliꞌ sipisipi izete neꞌmine loloꞌ ogo neivo laza eze okoꞌno nene naaꞌ nouneꞌ gilivo minaaꞌ nouneꞌ neꞌmine igi ingine gohi Izesuꞌ okoꞌnosi nene nalizave lo Oꞌmosoꞌmo gele ngemamineꞌ ve. \v 11 Idoꞌ gele ngemamineꞌ nene Kilisitoꞌ avazahaloꞌ ingine nene ize ma bilikevosa evenetoꞌ medelo mino Oꞌmoso initeꞌ lehize-daaꞌ ive naba aza aꞌmine izeliti vaniseꞌne nene eveneliti lihimeꞌine apaselingumuꞌ ve lo Oꞌmosoꞌmi kekeize atoliꞌmine lo minineꞌ numuno lulouko nene do dizo hibiꞌ izo Oꞌmoso emavo sikizapovo nene mo kekeꞌ nami di vi numuno ebeꞌ heta giziꞌvotaaꞌ aniꞌ nenako nemuꞌ aꞌmineꞌmine igi ize neꞌmi avazahaloꞌ minive bilangutikisi nene ingine mo naniꞌ gilivo minilizave lo ma gele ngemamineꞌ ve. \v 12 Idoꞌ aꞌmine ize neꞌmi vaniseꞌve nene Oꞌmoso imi sikizapovola nene di vi numuno ebeꞌ heta giziꞌvotaaꞌ aniꞌ nenako neꞌmo Izesuꞌ aza eiꞌ vaniseꞌvedunuꞌ eveneliti lihimete apase-ledo Oꞌmosoꞌmi evenele loloꞌ ogo minelonidoꞌ do lisiheꞌ o-ledelesa Zelusalemi numuno ebeliꞌmi gesi gatedotiꞌ lemo heta ogo mulumo gelo hilineꞌ. \v 13 Nemuꞌ nene Zuda veti gesi mingutiꞌ lemo vida nene lazasi lemo vo heta ogo ezela giꞌmizo mino eze ovozo hilineꞌ initeꞌ i-di minaaꞌ aniꞌ maꞌmine igi leliꞌ lovozo heleloneꞌ initeꞌ i-lidi minilizaniꞌ nene gopo gehe do vukeꞌzo. \v 14 Idoꞌ ezemuꞌ lovozo heleloneꞌ initeꞌ geho Zuda veti gesi mingutiꞌ lemo vo heta oloneꞌ nene minevoꞌ minevoꞌ ilineꞌ numuno ebete me misubouꞌ nene ma minamivo minevoꞌ minevoꞌ numuno ebete nene alingeꞌ sotoꞌ o-ledelingumuꞌ gelo aꞌminemuꞌ gizebo ogo neꞌmine olone. \v 15 Nemuꞌ nene eze evenele nene none lo leliꞌ vetetiꞌ eze gulive ogaꞌ noolonivete aꞌmine gulive nene do oto minelonidoꞌ o neineꞌ nenako nemuꞌ nene Izesuꞌ akate vele-lididoꞌ nene eꞌmeto Oꞌmoso ize bili imaaꞌ aniꞌ neꞌmino laza nene gamene gamene veteutiꞌ Oꞌmoso opoꞌni lo-emo minelone. \v 16 Idoꞌ eveneꞌ nasahiliꞌ i-ngidi initeꞌine nomivo nizaniꞌ aleve nene inele i-ngidi minilizaniꞌ neꞌmo ize ato atoꞌ bili Oꞌmoso gizi imaaꞌ aniꞌ initeꞌ neꞌmine lamineꞌ ma imaniꞌ gelavo mulunouꞌ lamineꞌ geleleseinako nemuꞌ nene neꞌmine ogakumuꞌ gatine molalive. \p \v 17 Lengiꞌ monokuꞌ gizebo i-lingidaaꞌ nave nete di minaaꞌ naniꞌ gonoꞌine neꞌmi monovomuꞌ nene alingeꞌ gamene nabaloꞌ Oꞌmosoꞌmi veleloꞌ li sotoꞌ ilisanako nemuꞌ gili mini ingine nene lengiꞌ monovotidoꞌ gizebo lamineꞌ igi di lisiheꞌ i-lingidivoꞌ minaaꞌ nave. Nemuꞌ nene lengikumuꞌ geni ngebelamivo gonoꞌine nene ngolize izi luꞌine laminetotikovoꞌ daaꞌ ilizave li lingine engiꞌ gamazi lilizadoꞌ gili di mini gelekelekovoꞌ i-ngidi minilo. Ee, ingine lengikumuꞌ goseleꞌ ve li geni ngibilivo gono dalizaniꞌ neꞌmo lengiꞌ lengeleꞌmize lamineꞌ amilizadoꞌ o neineꞌ nenako nemuꞌ liliza gamaziloꞌ nene gelekelekovoꞌ i-ngidi minilo. \p \v 18 Laza gamene gamene monovo lisihekutikovoꞌ ogo molo minelone lo gelo minaaꞌ nouneꞌ nenako laza giluneꞌ leliꞌ lute nene Oꞌmosoꞌmi veleloꞌ lisiheꞌ goloso o neive losa gele none. Nemuꞌ nene lingine Oꞌmosola lelikumuꞌ ve li li minilo. \v 19 Idoꞌ Oꞌmosola nenikumuꞌ li-nidikevo neꞌmo neleꞌmize lamineꞌ ivo lengita liteꞌ losa tineꞌ molo alove lo amuzonga noluve. \s1 Gamazi Lo Osuꞌ Lolosa Oꞌmosola Laaꞌ Neꞌmino Lineꞌ \p \v 20 Idoꞌ Oꞌmoso nene zou lo minaaꞌ monovo do sotoꞌ o-ledaaꞌ ive mino aza nene eiꞌ evenele sipisipi ize neꞌmine gelo minunive leliꞌ gizebo vete naba Izesuꞌ Kilisitoꞌ aza vaniseꞌve lepo leliꞌ gele daloningumuꞌ ve lo Oꞌmosoꞌmo lo huko-lidineꞌ minevoꞌ minevoꞌ ilineꞌ gamazi do amuzo molavo gohi hilingutiꞌ do ote-dineꞌ neꞌmo \v 21 Oꞌmoso aza nene lingine eiꞌ luloloꞌ eꞌmeti gili dalizangumuꞌ ve lo neꞌmine ilizadoꞌ do lisiheꞌ o-lengedo monovo lamine tamineꞌ mukiꞌ nene lehize-lengedo Izesuꞌ Kilisitoꞌ amuzo neꞌmo lutinguꞌ gono do eze ninge lamineꞌ ilineꞌ monovo nene do sotoꞌ o-lengedelive lo idoꞌ eze opoꞌni liviꞌ liviꞌ igi mini izi hukamavo minevoꞌ minevoꞌ ilive lo mo neꞌmino miniliho lo noluve. \p \v 22 Neze zuhokizo, lutine do ngi lo-lengedo luhuvo initeꞌ mene do liꞌnibe ogosa gizuvoniꞌ nenako nemuꞌ nene goseleꞌ lengebelamivo gati gili minilizave losa lengita amuzo molo noluve. \p \v 23 Idoꞌ tiꞌ lo nolo-lingimuze. Gililo. Leze zuho Timoteoꞌni ma nene nalatoꞌ minidotiꞌ mo imiselikeve. Idoꞌ mo imiselikenako aza liteꞌ lo nouvoda ogo hetelelineꞌ nene ninge-lengedelesa lengiꞌ nizada nene makatoꞌ ogo hetelelesusive. \p \v 24 Idoꞌ lengiꞌ gizebo vetine nesi Oꞌmosoꞌmi evenele mukiꞌ nesi nene longopoꞌni noluze. Gati li-ngimilo. Idoꞌ Oꞌmosoꞌmi zuho Italia misuboukotiꞌ minaniꞌ ingine netesi longopoꞌni nilave. \p \v 25 Oꞌmosoꞌmi nasahiliꞌ neꞌmo nene lengita mine do vo miniliho lo noluve. \p Moda aꞌnesiꞌ ve.