\id GAL  - Dano NT [aso] -Papua New Guinea 1989 (DBL -2014) 
\h GALATIA 
\toc1 Izesuꞌ Zuho Galatia Misubouꞌ Minaniꞌ Neti Luhovo Niteꞌ Pauloꞌ Gize-ngidineꞌ 
\toc2 Galatia 
\toc3 Gal 
\mt1 IZESUꞌ ZUHO GALATIA MISUBOUꞌ MINANIꞌ NETI LUHUVO NITEꞌ PAULOꞌ GIZE-NGIDINEꞌ  
\imt1 Izesuꞌ Evenele Zuho Galatia Polovinisiuꞌ Minavemuꞌ Pauloꞌ Gizineꞌ Luhuvo Nitekumuꞌ Gomuꞌ Gataaꞌ Gamazi  
\ip Mene luhuvo niteꞌ nene Aposoloꞌ Pauloꞌ gizineꞌ. Eiꞌ monovoꞌvemuꞌ nene aposoloꞌ bukuuꞌ neive. Idoꞌ Izesuꞌ Kilisitoꞌ evenele zuho Loma ebekuꞌ minaniꞌ neti luhuvo niteꞌ Pauloꞌ gize-ngidingumuꞌ gomuꞌ gataaꞌ gamazi gizuningukisi nene eiꞌ Pauloꞌ monovoꞌvemuꞌ nene ma gatelesane. Pauloꞌ luhuvo niteꞌ mene gizineꞌ nene Loma vete gizebo aniꞌ polovinisi Galatia ve languꞌ Izesuꞌ evenele zuho miniꞌmi monangumuꞌ gize-ngidineꞌ ve. Galatia polovinisi nene idise gamenela Teki (Turkey) ve laaꞌ nouneꞌ neꞌmi olusota minineꞌ ve. Idoꞌ aꞌmine misubo neꞌmi gulive gohi ma nene Asia Mainoo (Asia Minor) ve. Aposolo bukuuꞌ nene Pauloꞌ aza tauni gulive Pisidia Adiokia idoꞌ Ikonio idoꞌ Lisitila idoꞌ Delebe ve laaꞌ nouninguꞌ nene gamene vaiꞌ mono ninge-ngidineꞌ. Aꞌmine tauni nene Galatia polovinisi neꞌmi ema gahevela (south) minaniꞌ. Ato atoꞌ aleve noꞌine ato atokisi Galatia misubouꞌ nene vaiꞌ goloso li minaniꞌ. nGiliki alevesi idoꞌ Loma alevesi idoꞌ Zuda vesi eveneꞌ linge ato atoꞌ mukikisi minaniꞌ. Vaita nene Zuda ve minamaniꞌ soza Oꞌmosoloꞌ monoꞌ laaꞌ ave minaniꞌ. Pauloꞌ aꞌmida vo Izesuꞌnimuꞌ lo-ngimidotiꞌ eveneꞌ linge ma nene Izesuꞌnidoꞌ gili eleꞌvoleꞌ aniꞌ. Pauloꞌ mene luhuvo niteꞌ nene me aleveloꞌ gizo hulineꞌ.  
\ip Pauloꞌ hulo-ngedo vidotiꞌ gamene haꞌna ogo vamivo Zuda ve linge gohi monoꞌ li-ngimaaꞌ aniꞌ tisaꞌ nene aꞌmine aleveliti vovoꞌninguꞌ aniꞌ. Ingine Pauloꞌni lovo i imaaꞌ ave minaniꞌ. Pauloꞌ monoꞌ apize ngemaaꞌ neineꞌ nene lisiheꞌ amive li laniꞌ. Izesuꞌnidoꞌ gele eleꞌvoleꞌ ogaꞌ neꞌmovoꞌ nene damive laniꞌ. Oꞌmosoꞌmi evenele gehepeve loloꞌ olone li ma nene aꞌmine aleve me ve nene okoꞌine lolovo huki Zuda veliti louꞌ gamazi mukitoꞌ nene eꞌmetilo li laniꞌ. Neꞌmine likevo Galatia ebekuꞌ Izesuꞌ evenele zuho ingine nene aꞌmidoꞌ gili eleꞌvoleꞌ aniꞌ.  
\ip Neꞌmine aniꞌ nene Pauloꞌ aza gelo mene luhuvo niteꞌ nene aꞌmine Izesuꞌ evenele mulise Galatia polovinisiuko miniꞌmi monaniꞌ nene gizo hulo-ngidineꞌ. Aꞌmine luhuvo niteꞌveuꞌ nene tiꞌ lo lineꞌ: Eiꞌ lo-ngimineꞌ monoꞌ gamazi neve nene monoꞌ gamazi gihile ne neivo gohi atoꞌ ma nomive lo lo-ngimineꞌ. Aꞌmine monoꞌ gamazi nene Izesuꞌ Kilisitoꞌ aꞌsiꞌve lo-dineꞌ ve. Eveneꞌ malotiꞌ damuve lo lineꞌ. Idoꞌ aꞌmine apize ngimineꞌ monokumuꞌ aposoloꞌ mala lo-ngimineꞌ nene ingine aꞌminemuꞌ muluꞌine mili hamoꞌ igi gamazi gohi atoꞌ ma lilive li li-damaniꞌ ve lo lineꞌ. Oꞌmosoꞌmi veleloꞌ lisiheꞌ gehepeve ikeve do nguꞌ izelineꞌ aka hamoꞌ nene Izesuꞌ malipo zaloꞌ neniꞌ lihimeꞌne do hulolosa helave li gili eleꞌvoleꞌ ilizadotikovoꞌ ne neive lo lineꞌ. Eveneꞌ ma louꞌ gamazi eꞌmeto minelidotiꞌ nene Oꞌmosoꞌmi veleloꞌ ve lisihetoꞌ ve loloꞌ ogavo do uꞌ izamoloseive lo lineꞌ. Idoꞌ eveneꞌ neꞌmine ma ilizaniꞌ nene Izesuꞌ aza hazamuꞌ hilineꞌ geleleseive. Louꞌ neꞌmi gonoꞌve nene eveneꞌ gizebo o-ngedo do akaloꞌ o-ngedo neivo Izesuꞌ alingumuꞌ ne neive. Abalahamuꞌnisi nene Oꞌmosoꞌmo ve lisihetoꞌ ve ve lo-dineꞌ nene eitoꞌ gele eleꞌvoleꞌ ingumuꞌ neꞌmine lo-dineꞌ ve. Louꞌ eꞌmetelonidiꞌmo nene Oꞌmosoꞌmi veleloꞌ lisiheꞌ olosune lii neꞌmine igaꞌ nave nene louliꞌmi agoveꞌve neꞌminisa ne nizave. Ne neineꞌza Izesuꞌ evenele laza nene agove nomune. Izesuꞌ aza louliꞌmi agoveꞌve minunidotiꞌ nene do kululuꞌ ize-ledave. Idoꞌ do kululuꞌ ize-lidineꞌ nene gohi monovo goloso oloningumuꞌ nomive. Asi monovo lamineꞌ oloningumuꞌ ve. Adoꞌ ge luka neme ne luka geme idoꞌ ne hize eleꞌ o-gede ge hize eleꞌ o-nede lolone. Neꞌmine oloneꞌ nene louliꞌmo neꞌmine ilo lo neidoꞌ olosune. Ne neineꞌza okode neꞌmo nene initeꞌ goloso mukiꞌ olosa gelaaꞌ neinako nemuꞌ laza hulo-mikunivo leliꞌ nene gizebo o-ledamilive. Neꞌmine amivo leliꞌ nene Oꞌmosoꞌmi Sikalahuliꞌmo lelebizelidokovoꞌ eꞌmetelone. Neꞌmine okunivo Oꞌmosoꞌmi Sikalahuꞌ neꞌmo nene lelikuꞌ gihile lamine tamineꞌ vaiꞌ izelive.  
\ip Pauloꞌ aza mene gamazi lo osuꞌ lo Galatia ve tiꞌ lo lo-ngimineꞌ. Ve ma initeꞌ goloso nodavo ningi ma alahaꞌ igi aꞌmine ve nene gohi eleꞌmize aka lisiheta ilo. Idoꞌ okoꞌine lolovo hukilizave lii li-ngidi minangumuꞌ gohi gaꞌine daniꞌ. Ve ma okoꞌno lolovo huko nolihe hukamo nolihe neuꞌ nene initeꞌ ma nomive. Eveneꞌ gosohoꞌ gehepeve loloꞌ ilineꞌ nevoꞌ nene initeꞌ naba ve. Neꞌmine ogo luhuvo niteꞌ ve nene noꞌnohoꞌ gamazitunuꞌ gize osuꞌ lineꞌ.  
\c 1  
\s1 Pauloꞌ Aza Izesuꞌ Evenele Noꞌnohoꞌ Ize-ngedo Lo-ngimineꞌ Gamazi  
\p
\v 1-2 Aposolo Pauloꞌ naza idoꞌ leze zuho Izesuꞌ aleve ingine mukikisi noneꞌ nesi nene lingine Izesuꞌ Kilisitoꞌ zuho mulise mukiꞌ Galatia misubouꞌ miniꞌmi monangumuꞌ nene luhuvo initeꞌ gize lengemelone loosa naza mene nogize lingimuze. Ningilo. Naza aposolo gono daaꞌ nouvoniꞌ nene haza evenelite neꞌmine gono nimi neleꞌmizi milaniꞌ nevoba asi Izesuꞌ Kilisitoꞌ asiꞌve nesi hilingutiꞌ do ote-dive meleho Oꞌmoso nesi neleꞌmizi milasineꞌ nenako nemuꞌ aposolo nouve noluvoniꞌ nene mo laminetoꞌ noluve.   
\p
\v 3 Idoꞌ Oꞌmoso metehosi Guvetesi ve Izesuꞌ Kilisitokisi engiꞌ nasahiliꞌ i-lidaaꞌ nasineꞌ monovoꞌine nesi idoꞌ hongu lo lamino minaaꞌ monovoꞌine nesi nene lengita minelive lo Oꞌmosola noluve.   
\p
\v 4 Meteho Oꞌmosoꞌmo lavo eiꞌ luloloꞌ eꞌmeto Guvetesi ve Izesuꞌ Kilisitoꞌ aza idise minaniꞌ alevetinguꞌ goloso ogo noningutiꞌ nene do luꞌ izelove lo eze okoꞌno hulo lihimete apaso hilineꞌ.  
\v 5 Nemuꞌ nene Oꞌmoso opoꞌni lovoꞌ lovoꞌ ogo mino mo izo huko-ledamivo minevoꞌ minevoꞌ ogo minelive lo mo aꞌminemuꞌ neꞌminovoꞌ miniliho lo noluve.   
\s1 Izesuꞌ Kilisitoꞌ Gamaziꞌve Lamineꞌ Lo-lingimuvoniꞌ Nene Eveneꞌ Malite Neꞌmino Nomive Li Ma Li-lingimilizaniꞌ Nene Mo Gilikelizave Lo Pauloꞌ Lo-ngimineꞌ  
\p
\v 6 Lingine Kilisitoꞌ nasahiliꞌ o-lengedavo neꞌmo Oꞌmosoꞌmo eiꞌ evenele ve lo lengeleꞌmize molavo minangutiꞌ liteꞌ li mehedine imi evenelite monoꞌ gamazi lamineꞌ ve li gamazi atoꞌ li-lingimaniꞌ gili ngimaaꞌ naniꞌ nemuꞌ nene naza upuhoꞌ ogo aizo lo nogiluve.  
\v 7 Ne neiha Kilisitoꞌ gamaziꞌve lamineꞌ neꞌmine nene atoꞌ ma nomineꞌza eveneꞌ ma ingine nene lengiꞌ lutinguꞌ hizi di gopoꞌ napa i-lingidi Kilisitoꞌ gamaziꞌve lamineꞌ nene di atoꞌ igi di goloso ilisa laaꞌ nave.  
\v 8 Ingine neꞌmine igi Kilisitoꞌ gamaziꞌve lamineꞌ gomuꞌ vomila lo-lingimuneꞌ nene li-lingimami ma di gopo igi atoꞌ ma li-lingimilizave ingine nene Oꞌmosoꞌmo usiꞌ ize-ngedavo mo vi tolovo ilisave lo noluve. Mo nazasi neꞌmine ma olonikisi nene mo vo tolovo olosuve lo noluve. Idoꞌ Okulumokutiꞌ Oꞌmosoꞌmi angeloꞌ neꞌmineꞌmosi neꞌmine ma ilineꞌ nene Oꞌmosoꞌmi angeloꞌ noliha aꞌminesi mo vo tolovo oloseive.  
\v 9 Gomuꞌ lo-lingimuneꞌ nene idise gohi tiꞌ lo nolo-lingimuve: Ve ma ingine laza monoꞌ gamazi lo-lingimuneꞌ gili eleꞌvoleꞌ aniꞌ gamazi neꞌmine li-lingimami atoliꞌmine ma li-lingimilizave nene Oꞌmosoꞌmo usiꞌ ize-ngedavo vi tolovo ilisave.   
\p
\v 10 Idoꞌ eveneꞌ malite nenikumuꞌ nene aza laminetoꞌ lamo ha eveneꞌ laniteꞌ gililizadokovoꞌ lo-ngemaaꞌ neive laaꞌ aniꞌ nene naza neꞌmine ogaꞌ uvodoꞌ ladiniko idise eveneꞌ ma vi tolovo ilisave noluvoniꞌ nene ngelo lo-ngimuvodibe. nGelo ma lo-ngemamuvodine. Nemuꞌ nene eveneꞌ laniteꞌ gililizadokovoꞌ lo-ngemamo Oꞌmosoꞌmo ninge lamineꞌ dalidokovoꞌ lo-ngemaaꞌ nouve. Ee, Kilisitoꞌ gelekeleꞌ ve loloꞌ oo minuvoniꞌ neꞌmo evenelite neniꞌ ngeli ninge lamineꞌ damilizadoꞌ nenako evenelite neniꞌ ninge lamineꞌ dalizave losa idisesi neꞌmine ogo ha minuvodiniko Kilisitoꞌ gelekeleꞌ ve loloꞌ ogo ma minamuvodine.   
\s1 Pauloꞌ Aposolo Loloꞌ Ogo Monineꞌ Monovo Lo-ngimineꞌ  
\p
\v 11-12 Neze zuhokizo, naza Kilisitoꞌ gamaziꞌve lamineꞌ lo-lingimuvoniꞌ mamuꞌ lo-lengemeloze. Gililo. Aꞌmine gamazi nene eveneꞌ malitidatiꞌ giluvoba evenelitesi apizi nimamavo Izesuꞌ Kilisitoꞌ asiꞌve lo sotoꞌ ogo lo-nimineꞌ ve. Nemuꞌ nene evenelite di sotoꞌ milaniꞌ gamazi nomive li gililizave losa nolo-lingimuve.   
\p
\v 13 Idoꞌ Kilisitoꞌ gamaziꞌve lamineꞌ nene eveneꞌ malitesi li-nimamavo Kilisitoꞌ asiꞌve lo sotoꞌ ogo lo-nimive luvoniꞌ nene nemuꞌ luze. Gililo. Naza gomuꞌ Zuda veti monovoloꞌ eꞌmeto mino ogo molo minaaꞌ uvoniꞌ monovoꞌne nene lingine mo li-lingimikevo mo gili nizave. Naza nene neꞌmine noogo Oꞌmosoꞌmi evenele zuho do goloso palasa ogo osuꞌ lo-ngedelove lo neꞌmine olosa do goloso ogosa goboni molo-ngedaaꞌ uvoniꞌ ve.  
\v 14 Idoꞌ naza nene avotemotidatiꞌ monovo ngomoꞌ nabaꞌ nene lemo ongalive lo aꞌmine avotemotidatiꞌ gamazi nene amuzo goloso molo gele do mino neze gonoꞌnemote leliꞌ Zuda veutiꞌ minaniꞌ mukiꞌ nene ngivileꞌ ogo Zuda veti monokuꞌ nene dize veletoꞌ okaꞌ okaꞌ oꞌmo vo minuvoniꞌ nene lingine mo gili nizave.  
\v 15-16 Neꞌmino mino neꞌmine ogaꞌ uvoniꞌza izeꞌnehi mulunouꞌ olihe ha minuvonguꞌ do kegese-nedo nasahiliꞌ o-nidineꞌ neꞌmo aposolo loloꞌ iline lo neleꞌmize molave Oꞌmoso aza gala gelavo lamineꞌ ogavo eze gamaziꞌve lamineꞌ nene do vo Zuda ve minama veti zuho ato atoꞌ nene vo lo-ngemeꞌmo moneline lo eiꞌ gipeleꞌmi monovo nene lo sotoꞌ ogo nelebizavo naza neꞌmi monovo nene imineꞌ mili li-nimilizave lo aꞌmine gamazi nemuꞌ eveneꞌ hamokisi ma lo gele ha gele amo  
\v 17 idoꞌ Zelusalemi ebeta olihe aposolo loloꞌ amuvo gomuꞌ mili aposolo liliꞌ igi minave engitasi nene vamuvoniꞌza naza liteꞌ lo eveneꞌ vaiꞌ minamaniꞌ misubo Alabia nela vo mino alingeꞌ nene Damasiko numuno ebeta tineꞌ molo vo minuvoniꞌ ve. Idoꞌ neꞌmine ogo evenekisi gamazi lo gele ha gele amuvoniꞌ nemuꞌ nene naza monoꞌ gamazi lo-lengemaaꞌ nouvoniꞌ nene evenetatiꞌ nomineꞌ ve. Asi Kilisitodatiꞌ neineꞌ neive li lingine gililizave losa nolo-lingimuve.   
\p
\v 18 Idoꞌ tineꞌ molo Damasiko numuno ebeta vo hetelo mino kilisimasi seto hamo hulosa Petoloꞌni ningo gamazi lo-emo eze gamazi gelelove lo Zelusalemi ebeta dizo vo salele sitakisi gamene hamokisi nene ezesi makaꞌ minusive.  
\v 19 Neꞌmino minuvoniꞌza aposolo linge ma nene ningamo Guvelesi ve Izesuꞌ nakunolo minive Zakoboꞌnivoꞌ nene ninguve.  
\v 20 Idoꞌ naza aꞌmine me gamazi nogize-lingiduvoniꞌ nene gosohoꞌ nasahaꞌ lo-lengemamo Oꞌmosoꞌmi veleloꞌ laminetoꞌ monoꞌ gamazi lo-lengemaaꞌ nouvoniꞌ nene evenetatiꞌ gelamo Kilisitodatiꞌ giluvoniꞌ nene nolo-lingimuve.  
\v 21 Nelotiꞌ Zudaia misubouꞌ minamo gohi alingeꞌ nene Silia misuboukosi Kilikia misuboukosi vuvoniꞌ ve.  
\v 22 Vuvoniꞌza Zudaia misubouꞌ Kilisitoꞌ evenele mulise ato atoꞌ minaniꞌ ingine nene nenikumuꞌ ma ningi gilamaniꞌ ve.  
\v 23 Ee, ingine nene neniꞌ monovoꞌnemuꞌ nene veꞌinedunuꞌ ma ningami gaꞌinedunukovoꞌ nene eveneꞌ malite li-ngimikevo tiꞌ li gilaniꞌ ve: Leliꞌ monoꞌ gamazite osuꞌ lilive lo leliꞌ goboni molo-ledaaꞌ ive maꞌmo idise nene aꞌmine monoꞌ gamazi nene gamazi lamineꞌ ve lo lo-ngemeꞌmo nomonive.  
\v 24 Nemuꞌ nenikumuꞌ nene Oꞌmoso opoꞌni li minaniꞌ ve.   
\c 2  
\s1 Pauloꞌ Aposolo Gono Daaꞌ ineꞌ Nemuꞌ Aposolo Lingelite Gilavo Lamineꞌ Ingumuꞌ Lo-ngimineꞌ  
\p
\v 1 Nelotiꞌ kilisimasi fotini (14) ogo vavo Banabasikisi Zelusalemi numuno ebeta gohi dizo vusineꞌ ve. Idoꞌ dizo vusinguꞌ nene Titoꞌnisi eleꞌmizo makatoꞌ vuneꞌ ve.  
\v 2 Idoꞌ dizo vuvoniꞌ nene haza dizo vamuve. Oꞌmosoꞌmo dizo vozo lo-nemavosa dizo vuvoniꞌ ve. Idoꞌ aꞌmida dizo vosa naza gono gomuꞌ duvoniꞌ nesi idoꞌ gono idise noduvoniꞌ nesi nene gopo soza initeꞌ do minuvoniꞌ gelalive losa Izesuꞌ evenele guveꞌinesi ve minave engikovoꞌ nene mulise mili minanguꞌ nene aꞌmine gono daaꞌ uvoniꞌ monovo nene lo-ngimuvoniꞌ ve. Adoꞌ Zuda ve minamave heta atoꞌ ve nene Kilisitoꞌnimuꞌ gamazi lamineꞌ lo-ngemaaꞌ nouvoniꞌ nene neꞌmine lo lo-ngemo idoꞌ leliꞌ Zuda veti monovo di tiꞌ igi okodine lolovo huki hulilizave lo lo-ngemesaꞌmuve lo aꞌmine lo-ngemaaꞌ uvoniꞌ gamazimuꞌ nene lo sotoꞌ o-ngemekuve. Neꞌmino lo sotoꞌ o-ngemekuvo ingine gilii lamineꞌ ve laniꞌ ve.  
\v 3 Idoꞌ Zuda ve ma nete Titoꞌnimuꞌ nene aza heta atoꞌ ve nGiliki ve minineꞌ nenako Moseꞌ louꞌ gamaziloꞌ eꞌmeti okoꞌno lolovo huki huli-di Zuda ve loloꞌ i-dilizave laniꞌza Izesuꞌ evenele guveꞌinesi ve nete gili ngimami Titoꞌnimukisi okoꞌno lolovo huki-dilizave lii ma li hukamaniꞌ ve.  
\v 4 Idoꞌ aꞌmine Zuda ve nete Titoꞌni okoꞌno lolovo huki huli-di Zuda ve loloꞌ i-dilizave laniꞌ nene Moseꞌ louꞌ gamaziloꞌ gelekeleꞌ ogo aꞌmineꞌmi lulouꞌ minunidotiꞌ Izesuꞌ Kilisitoꞌ aza evenele leliꞌ do apase-lidineꞌ nenako aꞌminemuꞌ gilisa edamive li gili mo laminetoꞌ nolihe li ningi gililisa ingine haleki sunoꞌ leliꞌ vovoteuꞌ igi gote izi Izesuꞌ evenele minaniꞌ gili mini aꞌmine louꞌ gamaziloꞌ gohi di gelekeleꞌ i-lidilizaniꞌ akamuꞌ viseꞌ igi minisa laniꞌ ve.  
\v 5 Ee, ingine nete heta atoꞌ ve nene okoꞌine lolovo huki huli-ngidi Zuda ve loloꞌ i-ngidilizave li amuzo mili laniꞌza laza ingine Izesuꞌnimuꞌ gamazi lamineꞌ nene di gopo igi li-lingimikelizave lo aꞌmine gamaziloꞌ gizebo lamineꞌ okunivo gamazi gihile nene lamineꞌ ha minelive lo engiꞌ gamaziloꞌ nene mo gele ngemamune. Ee, gamene ngomosi nene mo kekeꞌ gele ngemamo Titoꞌni okoꞌno lolovo nene ma huko hulo-damune.  
\v 6 Idoꞌ monokuꞌ guveꞌinesi ve minaniꞌ gili minave ingine nene naza monoꞌ gamazi lamineꞌ lo-ngemaaꞌ uvodoꞌ nene gamazi neꞌminesi imineꞌ molo lo-ngemelesane li ma li-nimamaniꞌ ve. Idoꞌ monokuꞌ guveꞌinesi ve minaniꞌ gilivo minaniꞌ ve luve ingine nene mo guveꞌinesi ve minaniꞌ nolihe naniꞌmine ve minaniꞌ nolihe nemuꞌ nene naza giluvo haza initeꞌ loloꞌ ogave. Oꞌmoso neꞌmo eveneꞌ ninge lamineꞌ daaꞌ neineꞌ nene ingine dizi minangumuꞌ ve losa idoꞌ limi minangumuꞌ ve losa ma nomive.   
\p
\v 7-9 Ee, monokuꞌ guveꞌinesi ve minaniꞌ nete gamazi ma neꞌmino imineꞌ molo lo-ngemeline li li-nidamaniꞌ ve. Asi monokuꞌ eveneꞌ naba numuno langise neꞌmini oti minave ve li li-ngidaaꞌ ave Zakoboꞌ ve Petoloꞌ ve Zohaneꞌ ve nete lelikumuꞌ nene lingine leliꞌ daaꞌ uneꞌ gono maꞌmini daaꞌ asive nene nizasive. Nemuꞌ nene laza Zuda vetida mene gono nodunivo lingine nene heta atoꞌ vetida vi gono dalisive li Banabasingisi adeloꞌ daniꞌ ve. Idoꞌ neꞌmine li adeloꞌ daniꞌ nene tiꞌ li ningi gilaniꞌ nemuꞌ adeloꞌ daniꞌ ve: Petoloꞌ aza okoꞌine lolovo huki hulaaꞌ ave Zuda vela aposolo gono danguꞌ hize eleꞌ o-daaꞌ ive Oꞌmoso neꞌmo naza heta atoꞌ vetida gono do nouvonguꞌ nene aꞌmineꞌmine ogo hize eleꞌ o-nedaaꞌ neineꞌ nene sotoꞌ ogo minavo nelotiꞌ nene aꞌmine aposolo ingine Izesuꞌnimuꞌ gamazi lamineꞌ nene Zuda ve lo-ngemeline lo Oꞌmosoꞌmo Petoloꞌni imiselineꞌ maꞌmino neze nene Zuda ve minamaniꞌ heta atoꞌ vetida vo Izesuꞌnimuꞌ gamazi lamineꞌ nene lo-ngemeline lo Oꞌmosoꞌmo nimiselineꞌ nemukisi idoꞌ nasahiliꞌ o-nedo aposolo loloꞌ o-nidineꞌ nemukisi nene ningi gilaniꞌ nenako nemuꞌ nene heta atoꞌ vetida vi gono dalizo li adeloꞌ daniꞌ ve.  
\v 10 Ingine gamazi gohi li-limami gamazi hamoꞌ nene tiꞌ li li-limaniꞌ ve: Lingine heta atoꞌ vetida Izesuꞌ aleve monoꞌ li-ngimilisinguꞌ nene ingine Zudaia misubouko gohoꞌ gahaliꞌ minave nene hize eleꞌ i-ngidilizave li li-ngimilisingumuꞌ nene gatine molamivoo. Neꞌmine laniꞌ nene naza mo neꞌmine olosa amuzo molo minuvodoꞌ laniꞌ ve.   
\s1 Adiokia Numuno Ebeta Minasinguꞌ Pauloꞌ Aza Petoloꞌni Elemingumuꞌ Lineꞌ  
\p
\v 11 Idoꞌ alingeꞌ Petoloꞌ aza neniꞌ minuvoniꞌ numuno ebeꞌ Adiokiala ogosa aꞌmida initeꞌ ma ogo molo minineꞌ lisiheꞌ amineꞌ nene sotoꞌ ogavo nemuꞌ nene naza neida vo lo sotoꞌ ogo elemuvoniꞌ ve.  
\v 12 Idoꞌ elemuvoniꞌ nene neꞌmine ogo molo miningumuꞌ nene elemuvoniꞌ ve: Aza nene aꞌmine Adiokiala ogo hetelo mininguꞌ nene Izesuꞌ evenele zuho mukiliti guvetesi ve Zakoboꞌ aza Izesuꞌ evenele Zuda ve linge ma ngimiselavo Adiokiala olihe igi hetelamavo Peteloꞌ aza nene monovo lamineꞌ apizo Izesuꞌ evenele Zuda ve minamavesi nene gopo makatoꞌ nosoꞌ niteꞌ naaꞌ aniꞌ ve. Aza monovo lamineꞌ apizo neꞌmine ogaꞌ ineꞌza Zelusalemi ebetatiꞌ Zakoboꞌ ngimiselive ingine igi hetelikevo Petoloꞌ aza nene tiꞌ lo gelo golise gilineꞌ: Zuda ve linge mukiꞌ nene engiꞌ louꞌ gamaziloꞌ amuzo mili gili mini ingine heta atoꞌ ve gomuꞌ okoꞌine lolovo huki huli Zuda ve liliꞌ igisavoꞌ nene Izesuꞌ evenele liliꞌ ilisave laaꞌ nave. Nemuꞌ nene aꞌmine Zuda ve ingine nenikumuꞌ nene gaza heta atoꞌ vesi nosoꞌ niteꞌ makatoꞌ naniꞌ neꞌmo nene Zuda ve leliꞌ louꞌ gamazite nene avutoꞌ ogane li nelemilizahe lo gelo golise gilineꞌ. Nemuꞌ nene heta atoꞌ vesi nosoꞌ niteꞌ makatoꞌ naaꞌ adotiꞌ nene vo nokaꞌ minekaꞌ ogo mino gohi vo namo hulo lamineꞌ ineꞌ ve.  
\v 13 Idoꞌ aꞌmida Izesuꞌ zuho Zuda ve linge ma nesi Zuda vemuꞌ golise gilangumuꞌ nene aꞌmineꞌmine igi monovo di goloso igi ingine luꞌninguꞌ nene laza heta atoꞌvesi nosoꞌ niteꞌ makatoꞌ naaꞌ nouneꞌ nene lisiheꞌ o neive li ha gili minaniꞌ nene di haleki heta atoꞌ vesi makatoꞌ naaꞌ aniꞌ nene hulikevo neꞌmo Banabasiꞌ nesi engikuꞌ vo giꞌmizo aꞌmine monovoloꞌ eꞌmeto aꞌmineꞌmine ineꞌ ve.  
\v 14 Ingine Izesuꞌ zuho heta atoꞌ ve minanikisi makatoꞌ nosoꞌ niteꞌ naaꞌ adotiꞌ huli alamaniꞌ neꞌmo Kilisitoꞌ gamazi lamineliꞌmi akauꞌ lisiheꞌ igi vamavo naza ningo Izesuꞌ evenele linge mukiliti veꞌnidoꞌ nene Petoloꞌni tiꞌ lo lo-imuve: Gaza nene Zuda veutiꞌ sotoꞌ aineꞌ mino Zuda veti monovo hulo heta atoꞌ vela bizaaꞌ anive neke nene heta atoꞌ vela bizo nosoꞌ niteꞌ makatoꞌ naaꞌ adotiꞌ hulo alamo minaineꞌ neꞌmo nene heta atoꞌ ve ingine gilavo gomuꞌ Zuda ve loloꞌ ikevosavoꞌ nene laza Izesuꞌ evenele Zuda ve minunekisi nene bizo minelesune laineꞌ gelave. Nemuꞌ nene heta atoꞌ ve nene Zuda veti monovoloꞌ ngeleꞌmize molalosa ilineꞌ nene ngelo lisiheꞌ ilihe lo lo-imuve.   
\s1 Oꞌmosoꞌmo Zuda ve Do nGuꞌ Izaaꞌ Neineꞌ Monovo Nene Atoꞌ Nevoba Heta Atoꞌ ve Kilisitoꞌnimuꞌ Gili Eleꞌvoleꞌ Aniꞌ Neꞌmovoꞌ Do nGuꞌ Izaaꞌ Neidiꞌmine Ogovoꞌ Do nGuꞌ Izaaꞌ Neive Lo Pauloꞌ Lineꞌ  
\p
\v 15 Mo laminetoꞌ laza nene Zuda ve minamaniꞌ heta atoꞌ zuho Moseꞌ louꞌ gamazi gilami gopoꞌnapa minaaꞌ aveutiꞌ sotoꞌ uneꞌ nevoba Moseꞌ louꞌ gamazi di minave Zuda veutiꞌ sotoꞌ uneꞌ noneꞌza  
\v 16 laza tiꞌ lo gele none: Moseꞌ louꞌ gamaziloꞌ nene ngelo eꞌmeto osuꞌ lamoloneꞌ nenako aꞌmine louꞌ gamaziloꞌ eꞌmeto mineloneꞌ neꞌmo do gamazite nomineꞌ loloꞌ o-ledamo eveneꞌ hamokisi Oꞌmosoꞌmo do luꞌ izelidoꞌ do lisiheꞌ gehepeve o-ledamoloseinako nemuꞌ nene Oꞌmosoꞌmo eveneꞌ do luꞌ izelidoꞌ do lisiheꞌ o-ledelineꞌ nene louꞌ gamaziloꞌ eꞌmeti minangumuꞌ ve losa nevoba ingine Izesuꞌ Kilisitoꞌnimuꞌ gili eleꞌvoleꞌ angumuꞌ ve losa do luꞌ izelidoꞌ do lisiheꞌ o-ledeleseive. Nemuꞌ nene laza louꞌ gamaziloꞌ eꞌmeto minuneꞌ neꞌmo do luꞌ izelidoꞌ do lisiheꞌ o-ledamivo Kilisitoꞌnimuꞌ gele eleꞌvoleꞌ oloneꞌ neꞌmovoꞌ nene do luꞌ izelidoꞌ do lisiheꞌ o-ledeleseive lo laza Zuda ve lingela nene Izesuꞌ Kilisitoꞌnimuꞌ gele eleꞌvoleꞌ uneꞌ ve.  
\v 17 Idoꞌ Kilisitoꞌnimuꞌ gele eleꞌvoleꞌ okunivo neꞌmovoꞌ nene Oꞌmosoꞌmo do luꞌ izelidoꞌ do lisiheꞌ o-ledeleseive lo gelo louꞌ gamaziloꞌ eꞌmetaaꞌ akaloꞌ vamuneꞌ neꞌmo lazasi heta atoꞌ ve neꞌmine louꞌ avutoꞌ ogaꞌ unive minuneꞌ gelavo nemuꞌ Kilisitoꞌ aza nene eveneꞌ lihime daaꞌ akaloꞌ leleꞌmize molaaꞌ ive neive lisa gililizaha oꞌve mo kekeꞌ ne nomive.  
\v 18 Idoꞌ lingine mo gili nizave. Petoloꞌ aza heta atoꞌ vesi nosoꞌ niteꞌ ni minaaꞌ adiꞌmo Zuda veti louꞌ gamazi nene mo hulo alamineꞌ ve. Idoꞌ alingeꞌ heta atoꞌ vesi nosoꞌ niteꞌ makaꞌ naaꞌ aniꞌ nene hulo haza minidiꞌmo aꞌmine gomuꞌ hulokineꞌ louꞌ gamazi nene gohi amuzo molalive lo gohi do oto eꞌmetineꞌ gilineꞌ ve. Idoꞌ laza aꞌmineꞌmine ogo louꞌ gamaziꞌmi lulouꞌ minaaꞌ monovo mudise hulokuneꞌ nene gohi ma do oto eꞌmetunidiniko laza lamineꞌ mo louꞌ gamazi avutoꞌ ogo lihime daaꞌ unive minuneꞌ nene do sotoꞌ unidine.  
\v 19 Idoꞌ neꞌmine luvoniꞌ nene nemuꞌ luvoniꞌ ve: Louꞌ gamazi nene ngenga lo gele damuvo aꞌmine neꞌmo nebele hilineꞌ gelavo neꞌmo louꞌ gamaziꞌmi gesi minguꞌ minuvoniꞌ nene osuꞌ lineꞌ. Idoꞌ osuꞌ lineꞌ nene naza Oꞌmosoꞌmo luꞌne do ote-nedeꞌmo vo minivo eiꞌ lilidokovoꞌ ezemuꞌ gelo ogo molo minelove lo nemuꞌ louꞌ gamaziꞌmi gesi minguꞌ nene gohi ma minamuvoniꞌ ve. Kilisitoꞌni nene neniꞌ lihimeꞌnemuꞌ lohotoꞌ zaloꞌ bilanguꞌ nene nenikisi makaꞌ nibili hilaniꞌ gelavo nouve.  
\v 20 Neꞌmine ogo naza nene veꞌnesi ha minevoꞌ alevoꞌ nouha Kilisitoꞌ neꞌmo luꞌneuꞌ minevoꞌ dovoꞌ ogo minidiꞌmo nene nouve. Idoꞌ idise me misubouꞌ minevoꞌ alevoꞌ ogo nouvoniꞌ nene Oꞌmosoꞌmi gipele aza lulo nemo nenikumuꞌ lohotoꞌ zaloꞌ hilive eikumuꞌ gele eleꞌvoleꞌ ogo nouve.  
\v 21 Idoꞌ Oꞌmosoꞌmi louꞌ gamazi nene gele dokunivo lihimete nomineꞌ minelonidoꞌ minidiniko Kilisitoꞌ nene hazamuꞌ hilidine. Neꞌmine idinako Oꞌmosoꞌmo nasahiliꞌ o-ledo Kilisitoꞌni imiselavo ogo lihimetemuꞌ hilineꞌ nemuꞌ nene gele hulo naza Moseꞌ louꞌ gamaziloꞌ nene gele dosavoꞌ lihimeꞌne nomineꞌ minelesuve lamolosuve. Neꞌmine ma oloniꞌ nene Oꞌmosoꞌmo nasahiliꞌ o-ledo Kilisitoꞌni imiselavo lihimete nomivo mineloneꞌ akate vele-lidineꞌ nene hazamuꞌ vele-ledave lo meheꞌne imuvoniꞌ geleleseinako nemuꞌ nene mo kekeꞌ meheꞌne emamolosuve.   
\c 3  
\s1 Lihimete Nomineꞌ Minaaꞌ Nouneꞌ Nene Oꞌmosoꞌmi Louꞌ Gamazi Gele Daaꞌ Nouneꞌ Neꞌmo Nomive. Izesuꞌnimuꞌ Gele Eleꞌvoleꞌ Ogaꞌ Nouneꞌ Neꞌmo Ve Lo Pauloꞌ Lo-ngimineꞌ  
\p
\v 1 Agae, Galatia aleve lingine nene Izesuꞌ Kilisitoꞌ lohotoꞌ zaloꞌ hilineꞌ monovomuꞌ nene do lanosa lo sotoꞌ ogo lo-lengemekunivo lingine gilaniꞌ nene mo vetinedunuꞌ ninganiꞌ gilineꞌ nenako lingine negi neꞌmine hizi Moseꞌ louꞌ gamaziꞌmi gesi minguꞌ vilisa naniꞌ nene zaho gatine hizo lengeleꞌmize gopo ogavosa neꞌmine nave.  
\v 2 Neꞌmine naniꞌ nemuꞌ nene lingine mene ma longoꞌ o-lengedelouze. Gililo. Lingine Oꞌmosoꞌmi Sikalahuꞌ di tiꞌ aniꞌ ma nene Moseꞌ louꞌ gamaziloꞌ eꞌmeti minisa daniꞌ nehe. Ne nomive. Lingine Izesuꞌ Kilisitoꞌnimuꞌ gilisa ezemuꞌ gili eleꞌvoleꞌ igi minaniꞌ neꞌmo Oꞌmosoꞌmi Sikalahuꞌ nene di tiꞌ aniꞌ ma neive.  
\v 3 Lingine ganaꞌ nene Oꞌmosoꞌmi Sikalahuꞌ nene di tiꞌ igi eiꞌ amuzololoꞌ minaniꞌ nene mo hulisa lingine louꞌ gamaziꞌmi gesi minguꞌ vo leliꞌ amuzotelokovoꞌ mino monovote mudise do lamineꞌ olone li gilaniꞌ nolineꞌ nene mo negi gatine gehepeve gilaniꞌ ve.  
\v 4 Idoꞌ lingine gomuꞌ Oꞌmosoꞌmi Sikalahuꞌ di tiꞌ igi nizavo lengita ato atoꞌ monovo vaiꞌ goloso sotoꞌ o lingimineꞌ ma nene hazamuꞌ nehe. Eꞌe, hazamuꞌ sotoꞌ o lingimineꞌ nomive losa gele nouve.  
\v 5 Idoꞌ lingine Oꞌmosoꞌmo Sikalahuꞌ lehize-lengedo eleꞌvoleꞌ suno lengikuꞌ do sotoꞌ ogaꞌ ineꞌ ma nene louꞌ gamaziloꞌ gili di gono di minangumuꞌ neꞌmine ineꞌ nehe idoꞌ Izesuꞌ gamazi gili gili eleꞌvoleꞌ angumuꞌ neꞌmine ineꞌ neve.  
\v 6 Monoꞌ godolouꞌ tiꞌ li gizi nizaniꞌ ma neive:  
\q1 Abalahamuꞌ Oꞌmosomuꞌ gele eleꞌvoleꞌ ogavo nemuꞌ Oꞌmosoꞌmo gelavo ve lisiheꞌ lihimeꞌve nomineꞌ loloꞌ ineꞌ.  
\m Idoꞌ Oꞌmosoꞌmo Abalahamuꞌni initeꞌ o-dineꞌ nesi idoꞌ lengikuꞌ eleꞌvoleꞌ suno do sotoꞌ ogaꞌ ineꞌ nesi nene hamoꞌ monovo angumuꞌ do sotoꞌ o-lingidineꞌ nenako Abalahamuꞌ Oꞌmosomuꞌ gele eleꞌvoleꞌ ineꞌ neꞌmine igi lingine Izesuꞌnimuꞌ gili eleꞌvoleꞌ igi minangumuꞌ ve losa eleꞌvoleꞌ suno lengikuꞌ nene do sotoꞌ ogaꞌ ineꞌ ve.   
\p
\v 7 Idoꞌ Abalahamuꞌ Oꞌmosomuꞌ gele eleꞌvoleꞌ ineꞌ nemuꞌ nene Oꞌmosoꞌmo ve lisiheꞌ ve lo-dineꞌza lengiꞌ gatine hizave nene tiꞌ li li-lingimi nilisave: Oꞌmosoꞌmi evenele zuho nene Abalahamuꞌ aꞌvopilemoꞌ okoꞌine lolovo huki huli Moseꞌ louꞌ gamaziꞌmi gesi minguꞌ minavevoꞌ nene Oꞌmosoꞌmi zuho nizave. Neꞌmine li li-lingimi nilisaha aꞌmine monoꞌ godolouꞌ neineꞌ gamazi Abalahamuꞌ monovomuꞌ luvoniꞌ malotiꞌ nene lingine neꞌmine li ningi gililisave: Abalahamuꞌ zuho gihile nene eze aꞌvopilemoꞌ minave nene nizavoba asi eveneꞌ ma ingine eze emeni dameniꞌve di tiꞌ igi eze ogaꞌ idiꞌmine igi Oꞌmosomuꞌ gili eleꞌvoleꞌ igaꞌ ave nene Abalahamuꞌ zuho gihile nene nizave.  
\v 8 Idoꞌ Abalahamuꞌ aꞌvopilemoꞌ minamaniꞌ eveneꞌ heta atoꞌ ve inginesi Oꞌmosomuꞌ alingeꞌ gili eleꞌvoleꞌ ikevo nemuꞌ nene Oꞌmosoꞌmo lihimeꞌine hulo-ngedo do lisiheꞌ o-ngedelineꞌ nene mo gele mino aza Oꞌmosoꞌmo aꞌminemuꞌ nene Abalahamuꞌni gamazi lamineꞌ tiꞌ lo lo-imineꞌ monoꞌ godolouꞌ tiꞌ li gizi nizaniꞌ ma neive:  
\q1 Geitatiꞌ noꞌnohoka nene eveneꞌ zuho ato atoꞌ mukita do sotoꞌ o-ngedelesuve.   
\m
\v 9 Nemuꞌ nene Abalahamuꞌ aza gele eleꞌvoleꞌ ogaꞌ ive mine do vo minineꞌ neꞌmine igi gili eleꞌvoleꞌ igaꞌ nave ingine nene Oꞌmosoꞌmo Abalahamuꞌni noꞌnohoꞌ ize-do aꞌmineꞌmine ogo engikisi noꞌnohoꞌ ize-ngedaaꞌ neive.  
\v 10 Idoꞌ monoꞌ godolouꞌ tiꞌ li gizi nizaniꞌ ma neive:  
\q1 Ve ma ingine aꞌmine louꞌ gamazi gizi nizaniꞌ mukiꞌ nene gili dii osuꞌ liꞌmi vi minami  
\q1 aꞌmingutiꞌ ma hitilizaniꞌ nene Oꞌmosoꞌmo mudise vi tolovo ilisave lo engikumuꞌ usiꞌ ize-ngedo lo huko lo-ngede neive.  
\m Idoꞌ tiꞌ li gizi nizaniꞌ nenako ve ma ingine aꞌmine Moseꞌ lo huko lineꞌ louꞌ gamaziloꞌ nene gele dokunivo aꞌmineꞌmo do luꞌ izelihe li aꞌmidoꞌ eꞌmetaaꞌ ave nene Oꞌmosoꞌmo mudise vi tolovo ilisave lo usiꞌ ize-ngedo lo huko lineꞌ gamaziꞌmi lulouꞌ nene vi hilaaꞌ nave. Nemuꞌ nene louꞌ gamaziꞌmi gesi minguꞌ vaaꞌ nave nene Oꞌmosoꞌmo noꞌnohoꞌ ize-ngedaaꞌ neive li li-lingimaniꞌ nene mo laminetoꞌ li-lingimamave.  
\v 11 Ee, ve ma gili eleꞌvoleꞌ igi minilizadiꞌmo Oꞌmosoꞌmi veleloꞌ lihimeꞌine nomineꞌ minilizave ingine hazavoꞌ eleꞌvoleꞌ igi mini di vi minilizave li monoꞌ godolouꞌ gizi nizaniꞌ nenako nemuꞌ nene Moseꞌ louꞌ gamaziloꞌ eꞌmeto minelonidotiꞌ Oꞌmosoꞌmi veleloꞌ lihimete nomineꞌ minelonidoꞌ nomineꞌ nene mo sotoꞌ o neive.  
\v 12 Ne neiha louꞌ gamazi dokunivo neꞌmo do luꞌ izeleseive laaꞌ nave ingine nene Oꞌmosomuꞌ gele eleꞌvoleꞌ ogaꞌ monovoloꞌ mini mili minisaꞌmaniꞌza ingine monoꞌ godolouꞌ tiꞌ li gizi nizaniꞌ gamaziꞌmi lulouꞌ nene vi hilaniꞌ ve:  
\q1 Louꞌ gamazi gili dalizave ingine louꞌ gamazi ngomoꞌ nabaꞌ mukiꞌ nene gili di osuꞌ lilizaniꞌ neꞌmo nene  
\q1 hazavoꞌ eleꞌvoleꞌ igi mini di vi minilisave.   
\m
\v 13 Ne neiha louꞌ gamaziloꞌ nene ngelo gele do osuꞌ lamoloneꞌ o neineꞌ nenako neꞌmo Oꞌmosoꞌmo mudise vi tolovo ilisave lo usiꞌ izo lo huko lo-lidineꞌ gamaziꞌmi lulouꞌ nene vo huluneꞌ ve. Idoꞌ laza aꞌminguꞌ vo hulunidotiꞌ Kilisitoꞌ aza eze okoꞌno nene hulo meni hizo do tineꞌ molo-lidineꞌ ma neive. Idoꞌ do tineꞌ molo-lidineꞌ aka nene neꞌmino neive. Monoꞌ godolouꞌ gamazi ma tiꞌ li gizi nizaniꞌ ma neive:  
\q1 Eveneꞌ zaloꞌ ngibili badave nene Oꞌmosoꞌmo usiꞌ ize-ngidive nizave.  
\m Kilisitoꞌ nene leliꞌ lihimetemuꞌ lohotoꞌ zaloꞌ bili badikevo lelitoꞌ medelo Oꞌmosoꞌmo usiꞌ ize-dive loloꞌ ogave.  
\v 14 Idoꞌ Kilisitoꞌ neꞌmine ineꞌ nene eiꞌ Izesuꞌ Kilisitoda vo giꞌmizekunivo Abalahamudatiꞌ noꞌnohoꞌ nene numudoꞌ namadoꞌ ve lelita vo osuꞌ lavo ezemuꞌ gele eleꞌvoleꞌ ogo minekunivo neꞌmo Oꞌmosoꞌmo Sikalahuꞌve lemelove lo lo huko-lidineꞌ nene mo eleꞌvoleꞌ ogavo daloningumuꞌ ve losa neꞌmine ineꞌ ve.   
\s1 Moseꞌ Louꞌ Gamaziꞌve Neꞌmo Oꞌmosoꞌmo Abalahamuꞌni Lo huko Lo-dineꞌ Gamazi Nene Ivileꞌ Amivo Idisesi Ha Eleꞌvoleꞌ Ogo Neive Lo Pauloꞌ Aza Louꞌ Gamaziꞌmi Monovomuꞌ Lo-ngimineꞌ  
\p
\v 15 Neze zuhokizo, eveneꞌ laza ogo molo ogaꞌ nouningutiꞌ naza haza avazaha gamazi ma loloze. Gililo. Ve ma aza eveneꞌ mamuꞌ gamazi ma lo huko-do aꞌmine gamazi nene amuzo molo minelive lo luhuvo gize molavo aꞌmine gamazi nene haza eveneliti gamazi neiha eveneꞌ malitesi mo kekeꞌ aꞌmine gamazi lo huko luhuvo gize molaniꞌ nene di hulisa atoꞌ gamazi gohi ma imineꞌ mili ma lamilisave.  
\v 16 Nemuꞌ nene Oꞌmoso neve Abalahamuꞌni initeꞌ lamineꞌ ma do sotoꞌ o-delesa gamazi lo huko lo-dineꞌ nenako aꞌmine gamazi di hulisa atoꞌ gamazi gohi ma imineꞌ mili ma lamilisave. Aꞌmine lo huko lineꞌ gamazi nene Abalahamuꞌnimukisi idoꞌ aꞌvopilemokumukisi nene lo-ngidineꞌ ve. Idoꞌ aꞌmine lo-ngidinguꞌ nene gaꞌvopilemoꞌ mukikumuꞌ noluve lamo gaꞌvopilemokumuꞌ noluve lineꞌ nenako nemuꞌ nene aza eveneꞌ mukikumuꞌ lamo eveneꞌ hamokumukovoꞌ lineꞌ gelave. Idoꞌ aꞌmine aꞌvopilemoꞌ hamoꞌ nene Kilisitoꞌnimuꞌ lineꞌ ve.  
\v 17 Idoꞌ Oꞌmosoꞌmo Abalahamuꞌnimuꞌ lo huko lo-dineꞌ gamazi nene di hulisa atoꞌ gamazi gohi ma imineꞌ mili ma lamilisave luvoniꞌ nene nemuꞌ noluve: Oꞌmosoꞌmo gozopoꞌ nene aꞌmine lehize-ledelineꞌ initekumuꞌ nene Abalahamuꞌni lo huko-davo nelotiꞌ alingeꞌ kilisimasi fo hadeti teoti (430) ogo vavo Moseꞌ gizineꞌ louꞌ gamazi nene sotoꞌ ogo minineꞌ ve. Idoꞌ aꞌmine louꞌ gamazi nene alingeꞌ sotoꞌ ineꞌ nenako Oꞌmosoꞌmo gomuꞌ Abalahamuꞌnimuꞌ lo huko lineꞌ gamazi nene ivileꞌ ogavo haza gamazi ma loloꞌ amoloseive.  
\v 18 Ee, lingine mo gili nizave. Laza nene tiꞌ lo laaꞌ noune: Oꞌmosoꞌmo salani molo-lidineꞌ initeꞌ lemelineꞌ nene initeꞌ ma okunivo lemelivoba Oꞌmoso aza ha lemelove lo lo huko-lidineꞌ gamaziꞌve nene do gihile izelove losa haza gidini lemeleseive laaꞌ noune. Idoꞌ lengiꞌ gatine hizave nete tiꞌ li laaꞌ nave: Oꞌmosoꞌmo salani molo-lidineꞌ initeꞌ lemelineꞌ nene haza gidini lemamoloseive. Asi laza Moseꞌ louꞌ gamaziloꞌ eꞌmeto minekunivosavoꞌ nene menite gidini neꞌmine nene lemeleseive laaꞌ nave. Idoꞌ ingine neꞌmine laaꞌ naniꞌ gamazi nene laminetoꞌ likeve losa Moseꞌ louꞌ gamaziloꞌ eꞌmeto minekunivosavoꞌ nene Oꞌmosoꞌmo salani molo-lidineꞌ initeꞌ nene menite neꞌmine lemaaꞌ idiniko leliꞌ laaꞌ nouneꞌ gamazi nene gosohoꞌ luneꞌ gelavo Oꞌmosoꞌmo ha lemelove lo lo huko-lidineꞌ gamaziꞌve nene do gihile izelove lo lemelesa lineꞌ initeꞌ nene haza gidini lemamidine. Idoꞌ haza nene lemamidineꞌza Oꞌmosoꞌmo Abalahamuꞌni emelove lo lo huko-dineꞌ initeꞌ imineꞌ nene initeꞌ mamuꞌ emamo ha gemelove lo lo huko-dineꞌ gamaziꞌve nene do gihile izelove losa haza gidini imineꞌ nenako nemuꞌ nene Oꞌmoso aza lemelove lo lo huko salani molo-lidineꞌ initeꞌ lemelineꞌ nene louꞌ gamaziloꞌ eꞌmeto minuningumuꞌ lemelivoba asi lo huko-lidineꞌ gamaziꞌve nene do gihile izelove losavoꞌ nene lemeleseive lo mo laminetoꞌ gele none. Idoꞌ nemuꞌ nene moseꞌ louꞌ gamazi neꞌmo Oꞌmosoꞌmo gomuꞌ lo huko lineꞌ gamazi nene ivileꞌ amoloseive.  
\v 19 Neꞌmino neivo ma Moseꞌ louꞌ gamazi nene nanitekumuꞌ do sotoꞌ o-lidineꞌ neve li longoꞌ ilisave. Oꞌmosoꞌmo aꞌmine louꞌ gamazi do sotoꞌ o-lidineꞌ nene nemuꞌ do sotoꞌ o-lidineꞌ ve. Adoꞌ louꞌ gamaziꞌve avutoꞌ ogaꞌ nouneꞌ monovote nene aꞌmine louꞌ gamazi neꞌmo do sotoꞌ ogo lelebizelive losa do sotoꞌ o-lidineꞌ ve. Idoꞌ neꞌminemuꞌ do sotoꞌ o-ledosa aꞌmine louꞌ gamazi nene mudise minelive losa do sotoꞌ o-ledamo asi aꞌmine louꞌ gamazi minelineꞌ nene aza gamazi lo huko-dive adoꞌ Abalahamuꞌ aꞌvopilemoꞌ olihe amineꞌ gameneukovoꞌ minelive losa do sotoꞌ o-lidineꞌ ve. Idoꞌ asiꞌve Oꞌmoso neꞌmo aꞌmine louꞌ gamazi nene eveneꞌ leliꞌ adeuꞌ gehepeve lemamive. Eveneꞌ di ngimilo lo angeloꞌ nene ngemavo di igi leliꞌ goholusoꞌ vete Moseꞌni imikevo do limineꞌ ve.  
\v 20 Neꞌmine o neineꞌza ve maliꞌmo goholusoꞌ ve loloꞌ ogo minelineꞌ nene eveneꞌ hamokumukovoꞌ minamoloseive. Eveneꞌ sitalitisi gamaziꞌine do hamoꞌ olosa mineleseive. Idoꞌ aꞌmine eveneꞌ sitaꞌ ingine gamaziꞌine di hamoꞌ nasivo engikutiꞌ maliꞌmo aꞌmine lasineꞌ gamaziꞌnidoꞌ ma gele damilineꞌ nene aꞌmine gamaziꞌine li di hamoꞌ asineꞌ nene doꞌmozeleseive. Aꞌmineꞌmine ogo Oꞌmosoꞌmo louꞌ gamazi do sotoꞌ o-ngidinguꞌ ezesi gamazi li di hamoꞌ aniꞌ nene eveneꞌ nete gili damavo aꞌmine louꞌ gamazi nene doꞌmozave. Ne neiha Abalahamuꞌni gamazi lo huko-dive Oꞌmoso aza nene eveneꞌ hamoꞌ mino lo huko-lidineꞌ nenako asiꞌve neꞌmo gamaziꞌve nene do amuzo molavo ngelo ma doꞌmozamoloseive.   
\s1 Louꞌ Gamaziꞌmi Monovomuꞌ Pauloꞌ Imineꞌ Molo Lo-ngimineꞌ  
\p
\v 21 Idoꞌ neꞌmino neivo ma Moseꞌ louꞌ gamazi neꞌmo nene Oꞌmosoꞌmo gomuꞌ lo huko-lidineꞌ gamazi nene molo hite-do minevoꞌ minevoꞌ lemeni dameni daloneꞌ aka atoꞌ gohi do sotoꞌ o-lede neihe. Oꞌove. Mo kekeꞌ neꞌmine ma amive. Leliꞌ nene eveneꞌ lisiheꞌ gehepeve loloꞌ o-ledo minevoꞌ minevoꞌ lemeni dameni do sotoꞌ o-ledelidoꞌ lisiheꞌ o minineꞌ louꞌ gamazi nene ma limidiniko aꞌmine louꞌ gamazi gele dunidotiꞌ eveneꞌ lisiheꞌ gehepeve loloꞌ unidineꞌza aꞌmine neꞌmine olonidoꞌ do lisiheꞌ o-ledelineꞌ louꞌ gamazi ma nomive. Idoꞌ nomineꞌ nenako nemuꞌ nene Moseꞌ louꞌ gamazi neꞌmo Oꞌmosoꞌmo minevoꞌ minevoꞌ lemeni dameni haza gidini lemelove lo gomuꞌ lo huko-lidineꞌ gamazi molo hite-do minevoꞌ minevoꞌ lemeni dameni daloneꞌ aka atoꞌ gohi ma do sotoꞌ o-ledamive lo noluvoniꞌ ve.  
\v 22 Ee, aꞌmine louꞌ gamazi gele dunidotiꞌ eveneꞌ lisiheꞌ gehepeve loloꞌ unidineꞌza monoꞌ godolouꞌ nene eveneꞌ mukiꞌ louꞌ gamazi linge ma avutoꞌ igi minisa lihime daaꞌ monovoꞌmi galapuso ve nizave li gizi nizavo louꞌ gamazi neutiꞌ lihimete nomineꞌ mino minevoꞌ minevoꞌ lemeni dameni daaꞌ akaꞌve nene ma sotoꞌ amive. Idoꞌ louꞌ gamaziutiꞌ sotoꞌ amineꞌ nene Oꞌmosoꞌmo Izesuꞌ Kilisitoꞌnimuꞌ gili eleꞌvoleꞌ igi minilizangumuꞌ ve lo aꞌmine haza lemelove lo lo huko lineꞌ initeꞌ nene ezemuꞌ gili eleꞌvoleꞌ ave ngemeleseive losa nene louꞌ gamaziutiꞌ sotoꞌ amineꞌ ve. Nemuꞌ nene Moseꞌ louꞌ gamaziꞌve neꞌmo nene Oꞌmosoꞌmo haza lemelove lo lo huko-lidineꞌ gamaziꞌveloꞌ nene ataize neꞌmine lo-do molo hitelidoꞌ o neive lo lamolosune.   
\p
\v 23 Idoꞌ laza gele eleꞌvoleꞌ oloneꞌ akate do sotoꞌ o-ledelive Kilisitoꞌ nene olihe sotoꞌ amivosa laza nene louꞌ gamazi neꞌmo galapuso gono lemo do minivo mino Kilisitoꞌnimuꞌ gele eleꞌvoleꞌ oloneꞌ akate sotoꞌ ilineꞌ nene sotoꞌ ilingumuꞌ gizebo ogo minune.  
\v 24 Nemuꞌ nene Kilisitoꞌnimuꞌ gele eleꞌvoleꞌ okunivo neꞌmovoꞌ lihimete nomineꞌ minelone losa louꞌ gamazi neꞌmo Kilisitoꞌ alingumuꞌ nene gizebo o-ledo leleꞌmize akaloꞌ ogo minineꞌ ve.  
\v 25 Idoꞌ aꞌmine Kilisitoꞌ mo ogavo ezemuꞌ mo gele eleꞌvoleꞌ ogosa laza nene louꞌ gamaziꞌmi gizebouꞌ nene gohi ma minamune.   
\p
\v 26 Idoꞌ neꞌmine luvoniꞌ nene lingine mo Kilisitoda igi giꞌmizi ezemuꞌ gili eleꞌvoleꞌ igi minikevo neꞌmo nene mukitoꞌ Oꞌmosoꞌmi izipahala zuho liliꞌ igi nizaniꞌ nenako mo aꞌneemuꞌ luvoniꞌ ve.  
\v 27 Ee, laza monoꞌ noso holo Kilisitoda giꞌmizunive mukiꞌ nene Kilisitoꞌ emeni dameniꞌve do otuhuneꞌ nenako neꞌmo nene Oꞌmosoꞌmi izipahala zuho loloꞌ okune.  
\v 28 Lingine nene mo Kilisitoꞌ evenele hamoꞌ zuho neꞌmine liliꞌ igi nizanako nemuꞌ nene gomuꞌ Zuda ve minaniꞌ nehe heta atoꞌ ve nGiliki ve nevoꞌmine minaniꞌ nehe idoꞌ eveneꞌ maliti goboni ve liliꞌ igi minaniꞌ nehe idoꞌ neꞌmine ami haza minaniꞌ nolihe idoꞌ vemohoꞌ minaniꞌ nehe veneꞌ minaniꞌ nolihe eveneꞌ atoliꞌmine atoliꞌmine minaniꞌ monovotine nene idiꞌne mo osuꞌ lave.  
\v 29 Idoꞌ Kilisitoꞌ evenele zuho nilizaniꞌ nene Abalahamuꞌ zuho gihile mini Oꞌmosoꞌmo eze zuho lemelove lo lo huko salani molaniꞌ initeꞌ nene dalisave.   
\c 4  
\p
\v 1 Idoꞌ luvoniꞌ initeliꞌmi monovo nene do guno ogo gohi ma lolosuze. Gililo. Monovo neꞌmino ma neive: Eveneꞌ nabaꞌmi gipele ma naba oꞌmo vo lodive ogo melehidatiꞌ initeꞌ ma do aꞌmine initeꞌ mukitoꞌ nene ha gizebo ogo mineleseiha olihe naba ogo lodive amineꞌ gameneuꞌ nene neꞌmine amo haza goboni ve minave nene ngivileꞌ amo  
\v 2 ha meleho molo-dineꞌ gamenemuꞌ nene gizebo ogo mino meleho neꞌmo ezelokisi idoꞌ heneniꞌvelokisi gizebo ilizave lo eveneꞌ ngeleꞌmize moladoꞌ nene gelekeleꞌ ogovoꞌ mineleseive.  
\v 3 Idoꞌ eveneꞌ laza aꞌmineꞌmine ogo gelekeleꞌ ogo minuneꞌ ve. Gomuꞌ nene olihe monokuꞌ lodive amunivo aꞌmine gamenela nene me misubouꞌ veti monoꞌ ato atoꞌ gihileꞌve nomineꞌ monotoꞌ gelekeleꞌ ogo minuneꞌ ve.  
\v 4-5 Neꞌmino nonivo gamene lamineꞌ nene sotoꞌ ogavo Oꞌmosoꞌmo leliꞌ nene do tiꞌ ogavo izipahala zuho mineloningumuꞌ ve lo eiꞌ gipele nene Moseꞌ louꞌ gamaziloꞌ gelekeleꞌ ogo minunive nene aꞌmine Moseꞌ louꞌ gamaziꞌmi gesi mingutiꞌ do heta o-ledelive lo Oꞌmosoꞌmo imiselavo venetatiꞌ sotoꞌ ogo Moseꞌ louꞌ gamaziloꞌ gelekeleꞌ ogo minosa eiꞌ okoꞌno hulo meni hizo do luꞌ izidotiꞌ nene amuzo do Oꞌmosoꞌmi izipahala gihile none.  
\v 6 Idoꞌ izipahala minuningumuꞌ ve lo Oꞌmoso eiꞌ gipeleꞌmi Sikalahuꞌve nene imiselavo lelita ogo mino lute do otavo Oꞌmosomuꞌ nene ahono idoꞌ meteho ve laaꞌ noune.  
\v 7 Nemuꞌ nene gaza goboni ve idoꞌ gelekeleꞌ ve neꞌmine gohi ma minamo asi Oꞌmosoꞌmi izipahala ne nane. Idoꞌ mo izipahala loloꞌ ogo naneꞌ nenako Oꞌmosoꞌmo nasahiliꞌ o-gedavo gazasi nene eze zuhomuꞌ salani molo-ngidineꞌ initekutiꞌ dalinive loloꞌ ogane.   
\p
\v 8 Mo laminetoꞌ gomuꞌ lingine heta atoꞌ ve mini Oꞌmosomuꞌ gilamaniꞌ gameneuꞌ nene soza initeꞌ Oꞌmoso gihile lamineꞌ minamadoꞌ nene gelekeleꞌ igi minaaꞌ aniꞌza  
\v 9 idiꞌne nene Oꞌmosomuꞌ mo ningi gilikeve. Ne neiha naza nene Oꞌmosoꞌmo lengiꞌ nene ningo gele neive nizave lo loloniꞌ nene mo lamineꞌ akautiꞌ lolosuve. Ee, Oꞌmosomuꞌ lingine mo ningi gili nizaniꞌ nenako lingine gohi velepeꞌ izi vi amuzoꞌve nomineꞌ monoꞌ mino idoꞌ lengeleꞌmize lamineꞌ ilidoꞌ minamo gihileꞌvesi nomineꞌ monoꞌ atokuꞌ vi hili aꞌmidoꞌ gohi gelekeleꞌ olone li nanimuꞌ nigilave.  
\v 10 Neꞌmine niigi lingine neꞌmine olonidiꞌmo Oꞌmosoꞌmo do luꞌ izelihe li ladani gatine gili gamene ato atotoꞌ holiseꞌ gameneloꞌ nehe ikeꞌni gosohoꞌ lomineꞌ gameneloꞌ nehe kilisimasi gosohoꞌ ma sotoꞌ ilidope aꞌmine monokumuꞌ nene gilisa holiseꞌ minaaꞌ nave.  
\v 11 Naza lengita monoꞌ gono duvoniꞌ nene vo haza ilihe lo lengikumuꞌ geni nebelavo nehelele izaaꞌ neive.   
\p
\v 12 Neze zuhokizo, lingine gomuꞌ Moseꞌ louꞌ gamaziꞌmi gesi minguꞌ minami heta minaniꞌ maꞌmino nazasi minelesa aꞌmine louꞌ gamaziꞌmi gesi minguꞌ minuvongutiꞌ nene leme heta ogo nouve. Nemuꞌ nene lingine naza leme heta ogo nouvoniꞌ neꞌmine igi minilizangisi lingine Moseꞌ louꞌ gamaziꞌmi gesi minguꞌ vilisa minangutiꞌ nene tineꞌ mili heta limi alizave lo agae losa nolo-lingiduve. Lengita vo nouvo lingine di goloso ma i-nidamaniꞌ ma neive.  
\v 13 Ganaꞌ Kilisitoꞌnimuꞌ gamazi lamineꞌ lo sotoꞌ ogo lo-lingimuvoniꞌ nene naza initeꞌ gize doo gilizevo ogo mino ebeꞌ mala vamoloniꞌ ogavosa nemuꞌ lengita ogo mino Kilisitoꞌnimuꞌ lo-lingimuvoniꞌ nene lingine mo gili nizave.  
\v 14 Idoꞌ naza lengita initeꞌ gize do gilizevo ogo minuvongumuꞌ nene lingine geꞌnebe goloso igi naꞌnaꞌ i-nidi minaniꞌza nenikumuꞌ goseleꞌ lengebelamivo vasa izi-nidami Oꞌmosoꞌmi angelope Izesuꞌ Kilisitope neꞌmine ve ngeleꞌmize lamineꞌ goloso ilizaniꞌ maꞌminisa neniꞌ neleꞌmize lamineꞌ goloso aniꞌ ve.  
\v 15 Neꞌmine i-nidaniꞌ nenako nenikumuꞌ longolize izi minaniꞌ nene idise osuꞌ lahe. Ee, aꞌmine gameneuꞌ nene lingine neniꞌ veꞌne di lamineꞌ i-nidilisa lengiꞌ vetine nene ha kuluhizilizadoꞌ o minidiniko lingine aꞌmine vetine nene ha kuluhizi nimadine. Idoꞌ nimadiniko naꞌniseꞌne gele lamineꞌ ogo ha lo sotoꞌ olonako lingine lamineꞌ nenikumuꞌ longolize izi minaniꞌ nene mo gele lamineꞌ o nouve.  
\v 16 Idoꞌ gotine izamo gamazi nene laminetokovoꞌ lo-lengemaaꞌ nouvodiꞌmo nenikumuꞌ nene lovo o lemaaꞌ ive loloꞌ ogave li gilaniꞌ gelave.  
\v 17 Moseꞌ louꞌ gamaziꞌmi gesi minguꞌ lengeleꞌmizi nimilave ingine nene lengiꞌ di naba i-lingidaaꞌ naniꞌza nene lengiꞌ lengeleꞌmize lamineꞌ ilidoꞌ nomive. Ingine lengiꞌ di naba i-lingidaaꞌ naniꞌ nene nenitoꞌ idoꞌ neniꞌ gamaziꞌnelokisi giꞌmizi minilizaniꞌ akatine nene hizi tili-lingidikevo lingine nene engiꞌ di naba i-ngidi minilizave li lengiꞌ di naba i-lingidi gotine izaaꞌ nave.  
\v 18 Idoꞌ eveneꞌ do naba o-ngedaaꞌ nene goꞌine izami laminetokovoꞌ di naba i-ngidilizaniꞌ nene monovo lamineꞌ ve. Idoꞌ neniꞌ di naba i-nidili ma naza lengita nouvosavoꞌ nene di naba i-nidami mo gamene gamene neꞌmine ilizaniꞌ nene mo lamineꞌ o neive.  
\v 19 Izipahaꞌne mate, olihe Kilisitoꞌnimuꞌ gili eleꞌvoleꞌ amavo lengikumuꞌ mulumo naba gelo minuvoniꞌ maꞌmino naza gohi nogiluve. Veneꞌ izipahaꞌine sotoꞌ olosa neivo mulumo naba gilaaꞌ naniꞌ neꞌmino lengikumuꞌ nene Kilisitoꞌ emeni damenisi sotoꞌ ilizanako lo gelo mulumo naba nogiluve.  
\v 20 Lengikumuꞌ nene naza nadiꞌ ilizave lo gopo gaꞌne gelo lengita liteꞌ lo vo hetelo gamazi lo-lengemaaꞌ uvoniꞌ monovoꞌne nene ma do atoꞌ ogo neniꞌ veꞌneutiꞌ gehepeve lo-lengemeloho lo gelaaꞌ nouve.   
\s1 Moseꞌ Louꞌ Gamaziꞌmi Gesi Minguꞌ Vi Hilave Nene Goboni Aleve Neꞌmine Nizave Idoꞌ Kilisitoꞌ Evenele Laza Nene Goboni Aleve Neꞌmine Minamune Lo Pauloꞌ Aza Aneza Gamazi Salaꞌnidokisi Hagalaꞌnidokisi Lo Molo Lo-ngimineꞌ  
\p
\v 21 Lingine Moseꞌ louꞌ gamaziꞌmi gesi minguꞌ mino aꞌmidoꞌ gelekeleꞌ ogo minelone li laaꞌ nave lingine aꞌmine louꞌ gamazi gizikaniꞌ buku mauꞌ gizi nizaniꞌ gamazi ma nene lingine mo gilaaꞌ naniꞌ nehe. Olo.  
\v 22 Aꞌmine bukuuꞌ nene Abalahamuꞌ gipele gidingumuꞌ gizi nizaniꞌ gamazi mamuꞌ noluve. Abalahamuꞌ aza gipele setaꞌ gidineꞌ ve li gizi nizaniꞌ ve. Aꞌmine gipele setakutiꞌ ma nene elenaho Salaꞌ neꞌmi goboni aluꞌve Hagalanguꞌ gedo ma nene goboni alu minamineꞌ eiꞌ elenaho Salanguꞌ gidineꞌ ve.  
\v 23 Goboni aluuꞌ gidive Isimaeleꞌ aza nene eveneꞌ mukiꞌ leliꞌ sotoꞌ ogaꞌ nouneꞌ monovoloꞌ ogo haza sotoꞌ ineꞌza goboni alu minamineꞌ veneꞌ Salanguꞌ gidive Isakaꞌ aza nene Oꞌmosoꞌmo Abalahamuꞌni lo huko-dineꞌ gamazi nene do gihile izelingumuꞌ sotoꞌ ineꞌ ve.  
\v 24 Aꞌmine gamaziloꞌ nene aneza gamazi ma lo-lengemelove: Aꞌmine veneꞌ sitaꞌ nene Oꞌmosoꞌmo gamazi sitaꞌ ato atoꞌ lo huko lidoꞌ nene lo molo noluve. Ma nene Sinae gololotiꞌ louꞌ gamaziloꞌ gelekeleꞌ igi mini goboni aleve minilizave lo lo huko-ngidineꞌ ve. Aꞌmine lo huko-ngidineꞌ gamazi nene goboni alu Hagalaꞌnidoꞌ lo molo noluve.  
\v 25 Idoꞌ Moseꞌ aza Sinae gololoꞌ vo Oꞌmosoꞌmo louꞌ gamazi lo huko lineꞌ nene do sotoꞌ ineꞌ nenako aꞌmine Sinae golo Hagalaꞌ aꞌvopilemoꞌ zuholite di minaniꞌ misubo Alabiauꞌ minineꞌ nene Moseꞌ louꞌ gamaziloꞌ gelekeleꞌ igi aꞌmineꞌmi goboni ve minaniꞌ aleve neti izeꞌnibo neꞌmino mino goboni alu Hagalaꞌ neꞌmine minineꞌ ve. Ne neiha idisesi neineꞌ Zelusalemi numuno ebeꞌ nene aꞌmine Moseꞌ louꞌ gamaziloꞌ eꞌmeti di minaniꞌ aleve neti gotoꞌ ebeꞌine mino izeꞌnibo neꞌminosa minineꞌ nenako nemuꞌ nene Sinae gololoꞌ medelo Hagalaꞌ neꞌmine minineꞌ gelave. Idoꞌ nene nanitekumuꞌ ve. Aꞌmine Zelusalemi ebekutiꞌ aleve nesi idoꞌ aꞌminguꞌ minineꞌ monovoloꞌ igi mili miniꞌmi vi minave mukiꞌ ingine nesi nene Moseꞌ louꞌ gamaziloꞌ gelekeleꞌ igi aꞌmineꞌmi goboni ve minaniꞌ nenako ingine nene aꞌmine goboni alu Hagalaꞌ neꞌmine mini goboni vevoꞌ nizave losa noluve.  
\v 26 Ne neiha Okulumokuꞌ hozi minineꞌ Zelusalemi numuno ebeꞌ gosohoꞌ nene goboni alu minamineꞌ veneꞌ Salaꞌnidoꞌ nene lo molo noluve. Aza nene Moseꞌ louꞌ gamaziꞌmi goboni ve minamunive leliꞌ gotoꞌ ebete mino izeteho neꞌmine nene neive.  
\v 27 Idoꞌ Okulumokuꞌ minineꞌ Zelusalemi numuno ebeꞌ gosohoꞌ nene Izesuꞌ zuho leliꞌ gotoꞌ ebete mino izeteho neꞌmino neive luvoniꞌ nemuꞌ nene aꞌmine luvodoꞌ vo dalineꞌ gamazi nene izipahala leliꞌ sotoꞌ oloningumuꞌ monoꞌ godolouꞌ tiꞌ li gizi nizaniꞌ nenako nemuꞌ nene mo laminetoꞌ lokuvoniꞌ neive lo gelelesune:  
\q1 Zelusalemi numuno ebeꞌ gaza mulumo gelo izipe gedamanivo izipaha nizamavo  
\q1 gohuno veneꞌ neꞌmino minaineꞌza nemuꞌ gelamo golize izo minezo.  
\q1 Ee, gaza vangaho Oꞌmoso aza hulo-gedavo izipe gedamo minaineꞌ gilineꞌza  
\q1 alingeꞌ nene gomuꞌ minineꞌ Zelusalemi litehe nene vanahosi mino  
\q1 izipahala vaikisi minineꞌ nene ivileꞌ ogo izipaha vaiꞌ goloso gedelesane.  
\q1 Nemuꞌ nene gaza ouꞌ ouꞌ lo gekeꞌ gekeꞌ lo golize izo minezo li gizi nizaniꞌ ma neive.   
\m
\v 28 Idoꞌ neze zuhokizo, lingine nene Oꞌmosoꞌmo Abalahamuꞌni lo huko-dineꞌ gamazi do gihile izelingumuꞌ Isakaꞌ sotoꞌ ineꞌ neꞌmine igi linginesi Oꞌmosoꞌmo gozopoꞌ lo huko lineꞌ gamazi ma nene di gihile izi eiꞌ izipahala zuho liliꞌ igi nizave.  
\v 29 Ne neiha Isimaeleki Isakaki sotoꞌ igi minasineꞌ gameneuꞌ nene leliꞌ haza ve sotoꞌ ogaꞌ uneꞌ monovoloꞌ sotoꞌ ive neꞌmo Sikalahutatiꞌ sotoꞌ ive nene goboni malaꞌ malaꞌ o-daaꞌ ineꞌ neꞌmine igi idise gameneukisi Moseꞌ louꞌ gamaziꞌmi goboni ve Zuda ve ingine Sikalahutatiꞌ sotoꞌ unive Izesuꞌ evenele leliꞌ nene goboni mili-lidaaꞌ nave.  
\v 30 Neꞌmine o neineꞌza aꞌmine louꞌ gamaziꞌmi goboni aleveloꞌ vo do neineꞌ gamazi ma monoꞌ godolouꞌ gizi nizaniꞌ nene lo-lengemelove. Tiꞌ li gizi nizave:  
\q1 Goboni aluꞌmi gipele aza goboni alu minamineꞌ veneliꞌmi gipele nene  
\q1 meleho salani molo-dineꞌ initeꞌ dalingutiꞌ nene  
\q1 linge ma mo kekeꞌ damoloseinako  
\q1 nemuꞌ nene aꞌmine goboni alu nesi aꞌmine gipele nesi nene  
\q1 ngimiselo hulozo.   
\m
\v 31 Nemuꞌ nene neze zuhokizo, laza nene goboni alu eiꞌ zuhoutiꞌ sotoꞌ amo asi goboni alu minamineꞌ Salaꞌ zuhoutiꞌ sotoꞌ uneꞌ nene none.   
\c 5  
\p
\v 1 Idoꞌ Kilisitoꞌ aza nene goboni ve gohi ma minamilisave lo laza Moseꞌ louꞌ gamaziꞌmi gesi minguꞌ mino aꞌmineꞌmi goboni ve mino geni gono do minunidotiꞌ nene do heta o-ledave. Nemuꞌ nene gohi louꞌ gamazi neꞌmi gesi minguꞌ lengeleꞌmizi mili goboni ve liliꞌ i-lingidikelizaze. Gamaziꞌine nene gili huli hetavoꞌ moni minilo.   
\s1 Moseꞌ Louꞌ Gamaziꞌmi Gesi Minguꞌ Vo Holaloneꞌ Nene Kilisitoda Vo Giꞌmizuneꞌ Nene Vo Haza Ogavo Do Lamineꞌ O-ledamoloseinako Nemuꞌ Aꞌminguꞌ Vi Hilikelizave Lo Pauloꞌ Lo-ngimineꞌ  
\p
\v 2 Idoꞌ naꞌnise Pauloꞌ nene tiꞌ lo nolo-lingimuze. Gililo. Lingine gatine hizaaꞌ nave nete ladoꞌ gili ngimi Moseꞌ louꞌ gamaziꞌmi gesi minguꞌ vi hilalisa okodine lolovo huki hulilizaniꞌ nene lingine Kilisitoda vi giꞌmizaniꞌ nene vo haza ogavo do lamineꞌ o-lengedamoloseive.  
\v 3 Idoꞌ okodine lolovo huki hulilizave mukiꞌ nene gohi do lamino lo-lengemeloze. Gililo. Zuda ve neꞌmine loloꞌ okunivo nemuꞌ Oꞌmosoꞌmo do luꞌ izelihe li lingine okodine lolovo huki hulilizaniꞌ neꞌmo nene Moseꞌ louꞌ gamazi ngomoꞌ nabaꞌ vaitoꞌ nene gili di osuꞌ lilizadoꞌ o mineleseive.  
\v 4 Idoꞌ lingine Oꞌmosoꞌmo eveneꞌ lisiheꞌ lamineꞌ gehepeve ve lo-ledelive li Moseꞌ louꞌ gamaziloꞌ eꞌmeti osuꞌ lilisa ilizaniꞌ nene lingine Kilisitoꞌni nene mo huli-di mehedine imikeve. Neꞌmine igisa Oꞌmosoꞌmi nasahiliꞌ nesi nene mo hulikeve.   
\p
\v 5-6 Idoꞌ neꞌmine noluvoniꞌ nene nemuꞌ noluve: Laza Kilisitoda vo giꞌmizunive nene okode lolovo huko hulo nolobe huko hulamo nolobe nemuꞌ Oꞌmosoꞌmo leliꞌ do luꞌ izelesa gala gilineꞌ nene do atoliꞌmine ma amoloseive. Neꞌmine amoloseiha asi Kilisitoꞌnimuꞌ gele eleꞌvoleꞌ o noneꞌ neꞌmo lute ngemaaꞌ monovo nene ogo molo mineloneꞌ neevoꞌ nene initeꞌ gihile neive. Neꞌmino neineꞌ nenako nemuꞌ Oꞌmosoꞌmo leliꞌ nene ve lisiheꞌ lamineꞌ gehepeve ve lo-ledelive lo gelo laza neꞌmine ilingumuꞌ gizebo ogo noneꞌ nene Oꞌmosoꞌmi Sikalahuꞌ neꞌmo hize eleꞌ o-ledavo Kilisitoꞌnimuꞌ gele eleꞌvoleꞌ ogo minuningumukovoꞌ nene eveneꞌ lisiheꞌ ve lo-ledelineꞌ nenako nemuꞌ nene luvoniꞌ ve.   
\p
\v 7 Gomuꞌ nene lingine monoꞌ akaloꞌ lamini viviꞌ viviꞌ igi minaniꞌ malotiꞌ idise nene monoꞌ gamazi gihile maloꞌ eꞌmetami apiꞌ igi mehedine imilisa naniꞌ nene zaho gatine hizo monoꞌ akatine hize tilavosa neꞌmine nave.  
\v 8 Aꞌmine monoꞌ akatine hize tilo gatine hizive nene lengiꞌ vise lo-lengemo do eita ive neꞌmo nene gatine hizavo neꞌmine ma isaꞌmave.  
\v 9 Beleti do lulu izaaꞌ ineꞌ initeꞌ zisiti nene ngomo lasolo ma do beleti loloꞌ oloneꞌ palauvaꞌ vaikuꞌ nene nososi do gopo okunivo aꞌmine zisiti neꞌmo palauvakuꞌ mone okuꞌ laaꞌ neineꞌ neꞌmino eveneꞌ hamo hamoꞌ ingine lengiꞌ vovotinguꞌ mini monovo goloso ma apizi lingimilizaniꞌ nene aꞌmine monovo nene lengita buu lo mone osuꞌ lavo mukitoꞌ goloso ikelizave.  
\v 10 Ne neiha naza lengikumuꞌ gelo tiꞌ lo gele eleꞌvoleꞌ o nouve: Lingine Guvelesi vela vi giꞌmizi nizaniꞌ nenako lingine nene neniꞌ gele mino laaꞌ nouvoniꞌ monoꞌ nene di atoꞌ ami linginesi aꞌmidokovoꞌ gilaaꞌ ilisave. Ne neiha lengiꞌ lengeleꞌmize gopo ogaꞌ neive nene zaho nolive. Aꞌmine ve nene Oꞌmosoꞌmo lihimeꞌve emavo mulumo gono daloseive.  
\v 11 Idoꞌ naza Kilisitoꞌnimuꞌ olihe gele eleꞌvoleꞌ amosa ma eveneꞌ mukiꞌ okoꞌine lolovo huki hulilizaniꞌ neꞌmo nene Oꞌmosoꞌmo do nguꞌ izeleseive lo gomuꞌ laaꞌ uvoniꞌ ma nene idisesi ha lo-ngemaaꞌ nooloseive li lingine gilaaꞌ nahe. Eꞌe, naza neꞌmine lo apize ngemaaꞌ uvodiniko Kilisitoꞌ leliꞌ lihimetemuꞌ lohotoꞌ zaloꞌ hilingumuꞌ nene gele eleꞌvoleꞌ okunivo Oꞌmosoꞌmo do luꞌ izeleseive lo naza laaꞌ nouvoniꞌ nemuꞌ goloso gilaaꞌ naniꞌ nene gohi gilamavo osuꞌ lavo Moseꞌ louꞌ gamaziꞌmi gesi minguꞌ vi hili nizave engiꞌ nete neniꞌ goboni malaꞌ malaꞌ i-nidaaꞌ amadine.  
\v 12-13 Ne neiha Oꞌmosoꞌmo lengiꞌ nene elese molo-lengedo do eita o-lingidineꞌ nene lingine Moseꞌ louꞌ gamaziloꞌ gelekeleꞌ igi aꞌmineꞌmi goboni ve galapuso aleve neꞌmini minami haza aleve minilizave losa elese molo-lengedo do eita o-lingidineꞌ nenako nemuꞌ nene ve ma ingine aꞌmine Moseꞌ louꞌ gamaziꞌmi gesi minguꞌ nene vi minilizave li lengeleꞌmizi gopo igi okodine lolovo huki huli-lingidilisa gilaaꞌ nave ingine lengiꞌ okodine lolovo nene huki hulilizadoꞌ nomineꞌ nenako initeꞌ atoꞌ gohi ma huki hulilisa gili ma engiꞌ initeꞌinesi vaiꞌ nene nanimuꞌ huki hulamave.  
\p Ee, neze zuho mate, Oꞌmosoꞌmo goboni ve minami haza aleve minilizave lo elese molo-lengedo do eita o-lengedaniꞌza lingine laza nene louꞌ gamaziꞌmi goboni ve minamuneꞌ nenako olosa giluneꞌ initeꞌ mukiꞌ nene ha olosune li okodineꞌmo goloso initekumuꞌ laniteꞌ gelaaꞌ neineꞌ neꞌmo lengeleꞌmize gopo ilineꞌ akaꞌve vilikelizave. Neꞌmine ami eveneꞌ lute ngemaaꞌ monovoloꞌ gelekeleꞌ igi ge nasahiliꞌ o-nede ne nasahiliꞌ o-gede li minilo.  
\v 14 Idoꞌ lute ngemaaꞌ monovoloꞌ gelekeleꞌ igi minilizave luvoniꞌ nene monokuꞌ gamazi hamoꞌ ma neineꞌ nene gele do osuꞌ loloneꞌ neꞌmo nene Oꞌmosoꞌmi louꞌ gamazi vaiꞌ gele duneꞌ geleleseinako nemuꞌ luvoniꞌ ve. Aꞌmine gamazi nene tiꞌ lo neive:  
\q1 Geiꞌ okongamuꞌ gelaaꞌ naineꞌ neꞌmino eveneꞌ ato atoꞌ mamuꞌ nesi gelo luka ngemezo.   
\m
\v 15 Ne neineꞌza neꞌmine ami lengiꞌ okodinguꞌ lovo lolize di sotoꞌ igi ge do leme-nede ne do leme-gede li minilizaniꞌ nene lingine vi tolovo ikelizaze. Eheꞌ igi ningisa minilo.   
\s1 Oꞌmosoꞌmi Sikalahuliꞌmo Aka Lelebizidokovoꞌ Eꞌmeteloneꞌ Nene Initeꞌ Maliꞌmi Goboni Veꞌve Minamolosune Lo Pauloꞌ Lo-ngimineꞌ  
\p
\v 16 Idoꞌ nemuꞌ naza ma tiꞌ lo noluve: Lingine nene Oꞌmosoꞌmi Sikalahuꞌ neꞌmo lilidoꞌ lilidokovoꞌ nene eꞌmeti igi mili minilo. Neꞌmine igi minilizaniꞌ neꞌmo lengemeni dameni goloso gomuꞌ igi mili monaaꞌ aniꞌ monovo ma nene gohi damilisave.  
\v 17 Neꞌmine luvoniꞌ nene nemuꞌ noluve: Gomuꞌ lengemeni dameni goloso neꞌmo atoꞌ initekumuꞌ laniteꞌ gilivo idoꞌ Oꞌmosoꞌmi Sikalahuꞌ neꞌmo atoꞌ initekumuꞌ gilivo neꞌmine igi eze ivileꞌ olosa ivo idoꞌ eze ivileꞌ olosa ivo igi mini lutinguꞌ lovo hizi minaaꞌ nasineꞌ neꞌmo lingine ilisa gilaniꞌ initeꞌ nene amilizadoꞌ ogaꞌ neive.  
\v 18 Ne neiha lingine Oꞌmosoꞌmi Sikalahuꞌ neꞌmo aka lengelebizidoꞌ eꞌmetilizaniꞌ nene Moseꞌ louꞌ gamaziloꞌ gelekeleꞌ igi neꞌmi goboni veꞌve minamilisave.  
\v 19 Idoꞌ gomuꞌ lemeni dameni goloso neꞌmi monovo nene ha sotoꞌ ogo neineꞌ nenako neꞌmino neineꞌ ma nene lingine mo gili ninganiꞌ ma neive: Veneꞌ vemohoꞌ alu gipe gopoꞌ napa ongoꞌmo monaaꞌ monovo idoꞌ neꞌmine monovo lute do goloso ilineꞌ monovo ato atoꞌ idoꞌ lovozo helamo aꞌmine monovo ato atoꞌ nene eveneꞌ veꞌnidoꞌ do sotoꞌ ogaꞌ  
\v 20 idoꞌ soza oꞌmosoloꞌ ngopoꞌni laaꞌ idoꞌ poisini inite pataꞌ do minaaꞌ monovo nesi idoꞌ eveneꞌ lovo o-ngemaaꞌ idoꞌ lolize lovo ogaꞌ idoꞌ ngizeboloꞌ molavo muluꞌninguꞌ goloso gelaaꞌ idoꞌ ngizeboloꞌ molaaꞌ idoꞌ guvetesi ve loloꞌ olone li engiꞌ okoꞌinemuꞌ gilavo dizavo amuzo milaaꞌ idoꞌ luꞌine di hamoꞌ ami izi hoꞌli vi eza ema vaaꞌ idoꞌ gaꞌine ato atoꞌ gilii izi hoꞌli mulise ato atoꞌ liliꞌ igaꞌ  
\v 21 idoꞌ eveneꞌ maliti initetoꞌ mumuzoꞌ ogo lukehe lakehe ogaꞌ idoꞌ noso no sipaki ogo minaaꞌ idoꞌ noso ni sipaki goloso igi minaaꞌ pati do sotoꞌ ogaꞌ idoꞌ nevoꞌmine inite pataꞌ mukiꞌ nene gomuꞌ lemeni dameniꞌmi monovo nenako nemuꞌ mo gili nizaniꞌ ma neive. Gomuꞌ lo-lingimuvoniꞌ maꞌmino idise gatine do tiꞌ lo noluve: Eveneꞌ ma ingine me noluvoniꞌ monovo danava ma di minilizave nene Oꞌmosoꞌmo gizebo o neinguꞌ ma vi hilamilisaze. Eheꞌ igi ningisa minilo.   
\p
\v 22 Ne neiha Oꞌmosoꞌmi Sikalahuꞌ neꞌmo luteuꞌ gono do neivo neꞌmi gihile nene neꞌmine monovo ogo molo minelesune: Lute ngemo nasahiliꞌ o-ngedaaꞌ idoꞌ muludeuꞌ lamineꞌ gelaaꞌ idoꞌ gopo gate gelamo lamino minaaꞌ idoꞌ lizeboloꞌ molaniꞌ initeꞌ ikevo ma goloso gelamo zou lo minaaꞌ idoꞌ mangi gatulo ogo minaaꞌ idoꞌ initeꞌ ogo molo olo ma nene eveneꞌ goꞌine izamo monovote lisihetotikovoꞌ ogo molo ogaꞌ  
\v 23 idoꞌ lemo zou lo minaaꞌ idoꞌ gomuꞌ lemeni dameni goloso nene gohi ogalone lo ningosa minelone. Aꞌmine neꞌmine monovo lamineꞌ nene ogo molo ogakumuꞌ louꞌ gamazi ma neꞌmine amaaꞌ ve lo minineꞌ ma nomive.  
\v 24 Idoꞌ Kilisitoꞌ evenele zuho laza gomuꞌ lemeni dameni golososi idoꞌ aꞌmineꞌmo goloso initekumuꞌ umo helo laniteꞌ gelaaꞌ ineꞌ monovoꞌvesi nene mo lohotoꞌ zaloꞌ bele hiluneꞌ gelavo aꞌmine monovo danava goloso nene ogo molo amo minaaꞌ noune.  
\v 25 Oꞌmosoꞌmi Sikalahuꞌ neꞌmo lemeni dameni gosohoꞌ do sotoꞌ o-ledavo minevo dovoꞌ ogo nounako nemuꞌ nene aꞌmine Sikalahuliꞌmo aka lelebizidokovoꞌ nene eꞌmeto vo minelone.   
\p
\v 26 Laza leliꞌ okode do dize dizeꞌ ogo ne givileꞌ o-gede ge nivileꞌ o-nede lo mino ge muluꞌneuꞌ hizo do goloso o-nede ne mulungauꞌ hizo do goloso o-gede lamo lamino mino aꞌmingutiꞌ ma livileꞌ igi minilizangumuꞌ nene lukehe ngebelamo minelesune.   
\c 6  
\s1 Aka Golosouꞌ Vikelizave Lo Ge Hize Eleꞌ O-nede Ne Hize Eleꞌ O-gede Li Minilizangumuꞌ Pauloꞌ Lo-ngimineꞌ Gamazi  
\p
\v 1 Neze zuhokizo, lingine ve malite lihime nidavo ningi ma nene Oꞌmosoꞌmi Sikalahuꞌ neꞌmo aka lengelebizidoꞌ lisiheꞌ gehepeve igi eꞌmeti vaaꞌ nave nete lingine nene amuzonga li-ngimami zou li lamini mini di hehe li-ngidi gohi ngeleꞌmize akaloꞌ ilo. Neꞌmine igi mini lengita lengemenguꞌ sotoꞌ o lengemelinguꞌ nene linginesi aꞌmineꞌmine igi lihime diisa limi ingikelizaze. Gizebo lamineꞌ igi minilo.  
\v 2 Idoꞌ geni initeliꞌmi lulouꞌ minii ma nene ge hize eleꞌ o-nede ne hize eleꞌ o-gede li minilo. Neꞌmine igi minilizaniꞌ nene Kilisitoꞌ lo huko lineꞌ louꞌ gamazi maloꞌ nene mo eꞌmeti osuꞌ lilisave.  
\v 3 Idoꞌ lengiꞌ okodidoꞌ gizebo lamineꞌ igi mini ge hize eleꞌ o-nede ne hize eleꞌ o-gede li minilo luvoniꞌ nene ve maliꞌmo eveneꞌ mukiꞌ minaniꞌ neꞌmino haza minelidotiꞌ nene aza eikumuꞌ gelavo eveneꞌ linge ngivileꞌ ogo dizo minelineꞌ nene eiꞌ luloꞌve golo izosa mo lemo ongalidoꞌ mineleseinako nemuꞌ nene luvoniꞌ ve.  
\v 4-5 Nemuꞌ nene Oꞌmosoꞌmo leliꞌ hamo hamoꞌ gonote limineꞌ nene daloningutiꞌ olovoꞌ amo hamo hamoꞌ mukitoꞌ leliꞌ gonote geheloneꞌ nenaze. Nemuꞌ nene lingine hamo hamoꞌ langisetine igi mili minaaꞌ naniꞌ monovotine nene lamineꞌ nolihe goloso nolihe izeꞌ mili ningiꞌ nalo. Idoꞌ ve ma gaza eveneꞌ maliti monovomuꞌ nene izeꞌ molo gele guno o-ngedamo asi geiꞌ monovokamukovoꞌ nene ningo gelanivo lamineꞌ o neivo ma nene aꞌminemuꞌ golize izo minelinidoꞌ o neive.   
\p
\v 6 Idoꞌ monoꞌ gilaaꞌ naniꞌ aleve lingine aꞌmine monoꞌ apizi lingimaaꞌ nave nene lengitatiꞌ initeꞌ matatine lamineꞌ nevo ma nolingutiꞌ nene izeꞌ mili lingela ngimilo.   
\p
\v 7 Lingine mo gili nizave. Minguꞌ initeꞌ zuhoꞌ ikevo neꞌmi gihileꞌve nene mo initeꞌ zuhoꞌ aniꞌ initeꞌ neꞌmine gehepeve izaaꞌ neineꞌ neꞌminisa lingine igi mili ilizaniꞌ monovo nene monovo lamineꞌ nolihe goloso nolihe alingeꞌ aꞌmineꞌmi gihileꞌve gehepeve nene lengita izeleseinako lingine initeꞌ amaaꞌ iliza initekumuꞌ nene leliꞌ luteloꞌ nene ha ogo molo Oꞌmoso golo izelone li gililizadiꞌmo lengiꞌ lutine nene golo izikelizave. Oꞌmoso nene golo ngeli izamilisave.  
\v 8 Ve ma ingine gomuꞌ ngemeni dameni golosoꞌmi monovoloꞌ igi mili ilizaniꞌ nene aꞌmine gomuꞌ ngemeni dameni golosoꞌmi gihileꞌve nene mudise vo ladise ogaꞌ nene dalisave. Neꞌmine ilisaha Oꞌmosoꞌmi Sikalahuꞌ neꞌmi emeni dameniloꞌ eꞌmeti igi mili minilizaniꞌ neꞌmi gihileꞌve nene aꞌmine Oꞌmosoꞌmi Sikalahutatiꞌ nene minevoꞌ minevoꞌ ogaꞌ ngemeni dameni nene dalisave.  
\v 9 Ee, laza monovo danava lamineꞌ ogo molo minakumuꞌ nene goseleꞌ lebelamivo aꞌmine monovo nene hulamo hazavoꞌ ogo molo mineloneꞌ nene Oꞌmosoꞌmo molaniꞌ gameneloꞌ aꞌmineꞌmi gihileꞌve nene do sotoꞌ molosoꞌ nenako nemuꞌ laza initeꞌ mataꞌ lamineꞌ nene ogo molo minelo ma goseleꞌ aseleꞌ amo amuzo molo ogo molo minelone.  
\v 10 Nemuꞌ nene neꞌmine ogo laza nene eveneꞌ do lamineꞌ o-ngedo nasahiliꞌ o-ngedelonidoꞌ o neivo ma nene laza eveneꞌ mukiꞌ nene neꞌmine o-ngedelone. Idoꞌ eveneꞌ neꞌmino do lamineꞌ o-ngedeloningutiꞌ linge nene Izesuꞌ evenele minikevo ma ingine nene leliꞌ zuho nizanako gomuꞌ nene engiꞌ do lamineꞌ o-ngedeloneꞌ aka do sotoꞌ ogo do lamineꞌ o-ngedelone.   
\s1 Pauloꞌ Gamazi Lo Osuꞌ Lolosa Gaꞌine Do Gekeꞌ Lo-ngedo Gizineꞌ Gamazi  
\p
\v 11 Gamazi mene imineꞌ molo nogize-lingiduvoniꞌ mene naꞌniseꞌne neniꞌ aꞌnedunuꞌ nogize-lingiduze. Nabaꞌmine luhuvo nogizuvoniꞌ mene ningilo.  
\v 12 Aꞌmine gatine hizaaꞌ nave ingine okoꞌine losuvolotikovoꞌ igi mili igaꞌ naniꞌ initeꞌ nene di sotoꞌ ikevo neꞌmo Izesungumuꞌ gili eleꞌvoleꞌ amaniꞌ Zuda vete engikumuꞌ gilikevo lamineꞌ ilive li gili lengikumuꞌ nene okodine lolovo huki hulilizave li gatine hizaaꞌ naniꞌ nene aꞌmine gatine hizaaꞌ nave nene Zuda vete goboni mili-lidikelizave li giladiꞌmo nene neꞌmine igaꞌ nave. Ee, Kilisitoꞌ aza leliꞌ lihimetemuꞌ hilineꞌ nenako nemuꞌ laza okode lolovo huko hulakumuꞌ nene gele hulo eikumuꞌ gele eleꞌvoleꞌ okunivo neꞌmo Oꞌmosoꞌmo do luꞌ izeleseive lo Kilisitoꞌ evenele laza neꞌmine laaꞌ nouneꞌ nemuꞌ Zuda vete goboni malaꞌ malaꞌ i-lidaaꞌ naniꞌ nenako nemuꞌ gili neꞌmine i-lidikelizave li ingine gatine hizi okodine lolovo huki hulilizave li li-lingidaaꞌ nave.  
\v 13 Idoꞌ okoꞌine lolovo hukave ingine nesi nene Moseꞌ louꞌ gamazi linge maloꞌ nene gili di osuꞌ lamaniꞌza aꞌmine ve ingine nene linginesi okodine lolovo huki huli lelita igi giꞌmizi minikevo neꞌmo nene leliꞌ guvete vilive lisa engiꞌ okoꞌine di dizilisa nene lengiꞌ gatine hizi okodine lolovo huki hulilizave li li-lingidaaꞌ nave.  
\v 14 Ingine neꞌmine igaꞌ naha neniꞌ nene initeꞌ mamukisi okoꞌne ma do dizesaꞌmuve. Asi Guvetesi ve Izesuꞌ Kilisitoꞌ do luꞌ izelesa lohotoꞌ zaloꞌ hilineꞌ nemukovoꞌ nene do naba ogo minaaꞌ nouve. Kilisitoꞌ lohotoꞌ zaloꞌ hilineꞌ neꞌmo naza me misubouꞌ monovote goloso okode losuvolotiꞌ nene eveneꞌ lamineꞌ none lo okode do dizaaꞌ monovo goloso nevoꞌmine nene mudise hulosa aꞌmine monovomuꞌ giluvo mo hele osuꞌ laniꞌ nenako neniꞌ luꞌneuꞌ nene gohi ma minevoꞌ dovoꞌ amilidoꞌ neive. Idoꞌ Kilisitoꞌ lohotoꞌ zaloꞌ hilinguꞌ nene nazasi hiluvoniꞌ gelavo aꞌmine me misubouꞌ monovo goloso neꞌmo neniꞌ luꞌne nene gohi ma do ote-nedamilidoꞌ o neive.  
\v 15 Laza nene okode lolovo huko hulosa noneꞌ nolihe huko hulamo noneꞌ nolihe neꞌmo initeꞌ gihile aꞌminguꞌ ma nomive. Asi gosohoꞌ lemeni dameni lamineꞌ do otuho minaaꞌ neꞌmo nene initeꞌ gihile neive. Nemuꞌ nene naza okoꞌne losuvolotiꞌ nene eveneꞌ lamineꞌ nouve lo okoꞌne do dizamo Kilisitoꞌ lohotoꞌ zaloꞌ hilineꞌ nemukovoꞌ nene do naba ogo minaaꞌ nouve.  
\v 16 Idoꞌ nemuꞌ nene aꞌmine noluvoniꞌ gamaziloꞌ nene eꞌmeti igi mili minilizave nene lengita Oꞌmosolatiꞌ hongu nesi idoꞌ mangi gatulo nesi nene mino Isilaeleꞌ zuho gihile Oꞌmosoꞌmi evenele mukitasi nene mine do vo miniliho lo noluve.   
\p
\v 17 Gamazi nene mo osuꞌ nolivo naza tiꞌ lo noluve: Izesuꞌnimuꞌ gele eleꞌvoleꞌ uvoniꞌ nemuꞌ goboni mili-nidi neniꞌ okoꞌneloꞌ nibilaniꞌ huꞌne nene Izesuꞌ eiꞌ nosoꞌve neꞌmino asiꞌve molo-nedavo nouvoniꞌ nenako nemuꞌ nene gohi lihiteheꞌ initeꞌ igi geni nebeleli akaloꞌ neleꞌmize milalizave lo gelamuve.  
\v 18 Idoꞌ neze zuhokizo, leliꞌ Guvetesi ve Izesuꞌ Kilisitoꞌ do lamineꞌ o-ledaaꞌ neineꞌ monovoꞌve lamineꞌ neꞌmo lutinguꞌ mine do vo minivo. Neꞌmino miniliho. Moda ve.