\id COL  - Dano NT [aso] -Papua New Guinea 1989 (DBL -2014) 
\h KOLOSA 
\toc1 Izesuꞌ Eveneli Zuho Kolosa Numuno Ebekuꞌ Mulise Milaaꞌ Aveti Luhovo Niteꞌ Pauloꞌ Gize-ngidineꞌ 
\toc2 Kolosa 
\toc3 Kos 
\mt1 IZESUꞌ EVENELE ZUHO KOLOSA NUMUNO EBEKUꞌ MULISE MILAAꞌ AVETI LUHUVO NITEꞌ PAULOꞌ GIZE-NGIDINEꞌ  
\imt1 Izesuꞌ Evenele Kolosa Ebekuꞌ Minaniꞌ Neti Luhuvo Niteꞌ Pauloꞌ Gize-ngidingumuꞌ Gomuꞌ Gataaꞌ Gamazi  
\ip Mene luhuvo niteꞌ nene aposoloꞌ Pauloꞌ gizineꞌ ve. Aꞌmine Pauloꞌ monovoꞌvemuꞌ nene Aposoloꞌ bukuuꞌ nene gatelesane. Idoꞌ Izesuꞌ Kilisitoꞌ evenele zuho Loma ebekuꞌ minaniꞌ neti luhuvo niteꞌ Pauloꞌ gize-ngidingumuꞌ gomuꞌ gataaꞌ gamazi gizuningukisi nene eiꞌ Pauloꞌ monovoꞌvemuꞌ nene ma gatelesane. Idoꞌ Pauloꞌ luhuvo niteꞌ mene gizineꞌ nene Izesuꞌ evenele zuho ebeꞌ ma Kolosa ve languꞌ minaniꞌ nene gize-ngidineꞌ ve. Idoꞌ aꞌmine luhuvo niteꞌ nogizo Timoteoꞌ nesi nohulo-lingidusive lo gizineꞌ ve.  
\ip Aꞌmine ebeꞌ Kolosa nene Loma vete gizebo aniꞌ polovinisi Asia ve languꞌ misubo ma Hiligia ve languꞌ minineꞌ. Aꞌmine tauni nene mo gozopoꞌ tauni gehepeve mino gomuꞌ gamenela tauni naba minineꞌ neꞌmino minamo mo ngomo ogo minineꞌ. Aꞌmida minave linge mukiꞌ nene Hiligia ve minaniꞌza nGiliki aleve mukiꞌ nesi minaniꞌ ve. Idoꞌ gozopoꞌ akaꞌmila nGiliki ve naba maliꞌmo aꞌmida minaniꞌ kanitili mukiꞌ ngivileꞌ ogo gizebo veꞌine naba loloꞌ ineꞌ neꞌmo Zuda aleve mukiꞌ Babelonia misubouko minadatiꞌ nene ngeleꞌmizo ogo aꞌmine Hiligia misubouꞌ minilizave lo hulo-ngidineꞌ nenako nemuꞌ nene Zuda ve mukikisi Kolosa ebekuꞌ minaniꞌ. Idoꞌ aꞌmine aleve mukikutiꞌ Zuda ve minamave ingine soza oꞌmosovoꞌ ngeꞌmetaaꞌ aniꞌ ve.  
\ip Eiꞌ Pauloꞌ nene Kolosa ebekuꞌ vamineꞌza eiꞌ hize eleꞌ i-daaꞌ aveutiꞌ Kolosa ve ma minineꞌ gulive Epahalaꞌ neꞌmo Izesuꞌ gamaziꞌve lamineꞌ nene Kolosa aleve lo-ngimineꞌ. Mene luhuvo niteꞌ gizineꞌ gamenela nene Pauloꞌ aza Loma ebekuꞌ nalaꞌ numunguꞌ minineꞌ. Nalaꞌ numunguꞌ mino Izesuꞌ evenele Kolosa ebekuꞌ minaniꞌ nene eveneꞌ malite soza monoꞌ apizi ningimave laniꞌ nene gelo aꞌmine soza monoꞌ li minaniꞌ nene do lisiheꞌ o-ngedelesamuꞌ luhuvo niteꞌ mene gize-ngidineꞌ. Aꞌmine luhuvo niteꞌ gizineꞌ gamenelokovoꞌ nene Izesuꞌ evenele zuho Eheso ebekuꞌ minavesi luhuvo niteꞌ gize-ngedo idoꞌ Hilemoniꞌnisi luhuvo niteꞌ ma gize-dineꞌ. Izesuꞌ evenele zuho Kolosa ebekuꞌ minave gize-ngidineꞌ luhuvo nitekuꞌ minineꞌ gamazi linge mukiꞌ nene Eheso aleveliti luhuvo niteꞌ gize-ngidinguꞌ nesi minineꞌ ve. Aꞌmine luhuvo niteꞌ setohamo nene Pauloꞌni hize eleꞌ o-daaꞌ ive ma gulive Tikikoꞌ neꞌmo do vo gize-ngidive nene ngimineꞌ. Onesimoꞌ nene Tikikokisi makaꞌ vasineꞌ. Onesimoꞌ nene Hilemoniꞌ gelekeleꞌ veꞌve mino hulo-do golise vive minineꞌ. Aza golise vo Loma ebeta vo Pauloꞌni ningo lulo do velepeꞌ izo Izesuꞌ evenele loloꞌ ogavo Pauloꞌ aza Hilemoniꞌnida tineꞌ molo vilive lo imiselineꞌ ve.  
\ip Soza monoꞌ apizi ngimaaꞌ ave ingine naniꞌmine monoꞌ li-ngimaaꞌ ahe nemuꞌ ma gelo osuꞌ lamuneꞌza Kolosa aleve nene neꞌmine gamazi li-ngimi nilisave lo gele none: Misubo mesi aꞌminguꞌ nizaniꞌ initeꞌ nesi adoꞌ laza ningo do gelaaꞌ nouneꞌ initeꞌ mukiꞌ nesi nene initeꞌ golosovoꞌ nizave li li-ngimaaꞌ aniꞌ noloseive. Idoꞌ Oꞌmoso aza eveneꞌ lamineꞌ gehepeve neineꞌ nenako ngelo neꞌmine initeꞌ goloso loloꞌ amoloseive. Ganaꞌ apiꞌ ogo nene eikutiꞌ eveneꞌ nehe angeloꞌ nehe eiꞌ gele vineꞌ ma do sotoꞌ molaniꞌza aza eveneꞌ lamineꞌ gehepeve neineꞌ neꞌminosa minamineꞌ ve. Nelotiꞌ nene aꞌmine angeloꞌ neꞌmo eikutiꞌ angeloꞌ gohi ma do sotoꞌ molaniꞌza eiꞌ lamineꞌ minineꞌ neꞌmine nomive. Neꞌmine ogo do sotoꞌ molavo aꞌmine angeloꞌ neꞌmosi eikutiꞌ angeloꞌ gohi ma do sotoꞌ molaniꞌza azasi do sotoꞌ o-dineꞌ angeloꞌ lamineꞌ minineꞌ neꞌmino minamineꞌ. Neꞌmine igi angelolite gidikaꞌ gidikaꞌ iꞌmi vaniꞌ nene gamene vaiꞌ ogavo nelotiꞌ alingeꞌ gehepeve angeloꞌ ma sotoꞌ ineꞌ nene goloso gidini sotoꞌ ogo initeꞌ mukiꞌ do sotoꞌ molaniꞌ. Neꞌmine li Kilisitoꞌ nene Oꞌmoso gihile minamo ha aꞌmine sotoꞌ iꞌmi vaniꞌ angelokutiꞌ minineꞌ ve laniꞌ. Idoꞌ aꞌmine angelokumuꞌ nene amuzoꞌinesi mini initetoꞌ nesi gizebo igaꞌ aniꞌ sikalahuꞌ ve li laaꞌ aniꞌ. Eveneꞌ ingine Oꞌmoso ningo gelo lukuvo nalone li ma ingine aꞌmine guveꞌinesi sikalahuꞌ nene monoꞌ li-ngimilizave laniꞌ. Idoꞌ aꞌmine Oꞌmoso ningo gelaaꞌ monovo nene sunoꞌ initeꞌ neineꞌ nenako eveneꞌ lingelitevoꞌ ningi gililizadoꞌ o neive laniꞌ. Idoꞌ neꞌmine igi lukuvo nalone li gilave ingine okoꞌine lolovo huki idoꞌ gamene naba ve li gamene ma di kegesi aꞌmine gameneuꞌ holiseꞌ mini idoꞌ nosoꞌ niteꞌ linge ma malise igi mini idoꞌ initeꞌ linge maloꞌ di gilami minilizadoꞌ o neive laniꞌ. Eveneꞌ malite gotine izikevo angeloꞌ monoꞌ li-ngimi idoꞌ gamene linge mamuꞌ gamene naba ve li holiseꞌ minilo idoꞌ neꞌmine nosoꞌ niteꞌ malise ilo idoꞌ neꞌmine initetoꞌ di gilamilo li-lingidilizadoꞌ gili dikelizaze. Kilisitoꞌni di giliꞌ li di minilo lo lo-ngimineꞌ. Neꞌmine louꞌ gamaziloꞌ gele daaꞌ neꞌmo okoꞌineꞌmi emeni dameni goloso diꞌmi limilizangumuꞌ nene hize eleꞌ o-ngedamoloseive lineꞌ. Luꞌine gaꞌine nene Kilisitodokisi idoꞌ Okulumokuko nizaniꞌ initetokisi mili giliꞌ li mini monovo goloso atoꞌ atoꞌ daaꞌ naniꞌ mukiꞌ nene huli osuꞌ lilizadoꞌ o neive. Asi monovo laminetokovoꞌ eꞌmetilizave. Adoꞌ ge luka neme ne luꞌne geme laaꞌ idoꞌ Kilisitoꞌ aza engiꞌ lihimeꞌine hulo-ngidineꞌ neꞌmini inginesi ge lihimeꞌne hulo-nede ne lihimeka hulo-gede lilizave. Nevoꞌmine monovoloꞌ eꞌmetilizave lo lineꞌ. Neꞌmine lo eleꞌninge vaꞌninge izipahaꞌinesi izeꞌninge meꞌningesi idoꞌ gonouꞌ vesi gizebo veꞌine netesi ingine minilizanguꞌ nene naniꞌmine monovo i-ngimi minilizahe neꞌmi monovo lo ngoloꞌ lo lo-ngimineꞌ. Idoꞌ Oꞌmosola livoꞌ minilizangumuꞌ gohi lo gaꞌine ogo aꞌmine Oꞌmosola lilizanguꞌ eikumukisi lilizangumuꞌ lo-ngimineꞌ. Izesuꞌ evenele minamave monovo i-ngimilizanguꞌ nene monovo golososi o-ngedalone li eheꞌ igi minilizangumuꞌ lo-ngimineꞌ. Neꞌmine lo tiꞌ lo lo-ngimineꞌ: Tikikoki Onesimoki ingine lengiꞌ nizadaa vilisa nasineꞌ nenako aꞌmine vilisinguꞌ nene mela sotoꞌ ineꞌ initeꞌ mukikumuꞌ nene li-lingimilisasive lo lo-ngimineꞌ. Nelotiꞌ nene luhuvo niteꞌve gize osuꞌ lolosa eikisi makaꞌ nizavelite meseꞌ aseka gamazi li engikisi minave linge mamuꞌ hulaniꞌ nene lo-ngemo noꞌnohoꞌ gamazidunuꞌ luhuvo niteꞌve nene gize osuꞌ lineꞌ ve.  
\c 1  
\s1 Pauloꞌ Gamazi Apiꞌ Olosa Izesuꞌ Evenele Kolosa Ebekuꞌ Minave Nene Noꞌnohoꞌ Gamazi Lo-ngidineꞌ Gamazi  
\p
\v 1 Izesuꞌ Kilisitoꞌ aposolo mineline lo Oꞌmosoꞌmo eiꞌ luloloꞌ neleꞌmize molave Pauloꞌ naza leze zuho Timoteokisi makaꞌ mino  
\v 2 leze zuho Oꞌmosoꞌmi evenele Kolosa ebekuꞌ mini Kilisitoꞌnimuꞌ gili eleꞌvoleꞌ igi eꞌmete lamineꞌ igi minave lengiꞌ nene luhuvo niteꞌ mene nogize-lengedo tiꞌ lo noluve: Meteho Oꞌmoso eitatiꞌ nasahiliꞌ idoꞌ hongu lo lamino minaaꞌ monovo nene lengikisi miniliho lo noluve.   
\s1 Pauloꞌ Aza Kolosa Aleve Nene Monoꞌ nGemeni Dameni Laminekisi Minilizave Lo Oꞌmosola Laaꞌ Ingumuꞌ Lo-ngimineꞌ Gamazi  
\p
\v 3 Laza lengikumuꞌ Guvetesi ve Izesuꞌ Kilisitoꞌ meleho Oꞌmosola laaꞌ uninguꞌ nene gamene gamene lengikumuꞌ nene Oꞌmoso isaaꞌ neve lo-daaꞌ noune.  
\v 4 Lengikumuꞌ Oꞌmosola laaꞌ nouneꞌ nene lingine Izesuꞌ Kilisitoꞌnimuꞌ gili eleꞌvoleꞌ angumukisi idoꞌ Oꞌmosoꞌmi evenele zuho mukiꞌ lutine ngimaaꞌ naaniꞌ mamukisi nene geloosa Oꞌmoso isaaꞌ neve lo-daaꞌ noune.  
\v 5 Lingine neꞌmine igi Izesuꞌ Kilisitoꞌnimuꞌ gili eleꞌvoleꞌ igi Oꞌmosoꞌmi evenele lutine ngimaaꞌ naaniꞌ nene gomuta lingine gamazi gihile Kilisitoꞌ gamazi lamineꞌ li-lingimanguꞌ nene Oꞌmosoꞌmo Okulumokuko salani molo-lingidineꞌ initekumuꞌ nene giliisa aꞌminemuꞌ gili medeli minaniꞌ neꞌmo nene neꞌmine aniꞌ ve.  
\v 6 Aꞌmine lengita aniꞌ gamazi lamineꞌ neꞌmo nene lingine ganaꞌ apiꞌ igi giliisa Oꞌmosoꞌmi nasahiliꞌveꞌmi monovo gihilemuꞌ ningi vevesaniꞌ gamenelotiꞌ lengita idiꞌmine ogo aꞌmine gamazi lamineꞌ nene gihile noizo misubouꞌ misubouꞌ hutileꞌ ogo naba oꞌmo novive.  
\v 7 Idoꞌ aꞌmine Oꞌmosoꞌmi nasahiliꞌveꞌmi monovo gihilemuꞌ nene leliꞌ gidini ve Kilisitoꞌ gelekeleꞌ veꞌve lute eme nonive Epahalaꞌ neꞌmo apize lengemavoo gili nizaniꞌ ma neive. Eiꞌ neve nene lelitoꞌ medelo Kilisitoꞌ gonoloꞌ nene peleseveꞌ ngomosi ma izamo daaꞌ ive ne neive.  
\v 8 Idoꞌ eiꞌ neve nene lingine Oꞌmosoꞌmi Sikalahuliꞌmo do ote-lengedavoo lutine ngimaaꞌ monovotine lengita minineꞌ nemuꞌ lo-limive ne neive.   
\p
\v 9 Idoꞌ lingine neꞌmine igi minaniꞌ nemuꞌ giluneꞌ gamenelotiꞌ lengikumuꞌ nene gamene gamene Oꞌmosola laaꞌ nouninguꞌ nene Oꞌmosoꞌmo monokuꞌ otohato ve gehepeve loloꞌ o-lengedavo lingine eiꞌ Sikalahutatiꞌ gele vevesaaꞌ monovo di nizavo neꞌmo nene eiꞌ Oꞌmosoꞌmi luloloꞌ minineꞌ monovomuꞌ nene gili osuꞌ li minilizave losa laaꞌ noune.  
\v 10 Guvelesi veꞌmi evenele minilizaniꞌ votigileloꞌ mini mili mini Guvelesi veꞌmo ninge lamineꞌ dalineꞌ monovolokovoꞌ nene eꞌmeti minilizave. Neꞌmine ikevo neꞌmi gihile nene gono lamineꞌ ato atoꞌ mukiꞌ di nizavo Oꞌmosomuꞌ gili vevesaaꞌ aniꞌ monovotine nene naba oꞌmo vo minelive.  
\v 11 Idoꞌ Oꞌmosolatiꞌ atoliꞌmine ogo minineꞌ amuzoꞌve nene lengemavoo neꞌmo eleꞌvoleꞌ gehepeve igi mini lengita geni ato atoꞌ mukiꞌ sotoꞌ o-lengedelinguꞌ nene hongu li mini ha gihi di dizivoꞌ minilizadoꞌ lisiheꞌ i mini longolize izi  
\v 12 metehida nene isaaꞌ neve li tangezoꞌ ve li-dilizave losa nene Oꞌmosola laaꞌ noune. Aza nene labanaꞌvesi minineꞌ ebeꞌveuꞌ eze evenele salani molo-lidineꞌ initeꞌ linge nene dalizadoꞌ do lisiheꞌ o-lengede neive.  
\v 13 Ee, litiꞌmuso melehi amuzoloꞌ mino gelekeleꞌ o-do minuningutiꞌ nene do luꞌ izo hulo lulo eme neineꞌ gipeleꞌmi gizebouꞌ o-lede neive.  
\v 14 Aꞌmine gipele neꞌmo nene meni hizo do kuluhize-lidineꞌ nene adoꞌ lihime apase-lidineꞌ neve ne neive.   
\s1 Kilisitoꞌ Emeni Damenimukisi Gono Daaꞌ Neingumukisi Pauloꞌ Lo-ngimineꞌ Gamazi  
\p
\v 15 Idoꞌ aꞌmine Oꞌmosoꞌmi gipele nene ningamosoꞌ o minineꞌ Oꞌmoso neꞌmi avazaha neꞌmine mino Oꞌmosoꞌmo initeꞌ do sotoꞌ molaniꞌ mukiꞌ neti nabaꞌine ne neive.  
\v 16 Idoꞌ initeꞌ mukiliti nabaꞌine neive noluvoniꞌ nene initeꞌ Okulumokuꞌ minaniꞌ initekisi misubouꞌ initekisi mukiꞌ nene eitatikovoꞌ sotoꞌ aniꞌ nenako nemuꞌ nene nabaꞌine ve noluvoniꞌ nene adoꞌ ningaaꞌ nouneꞌ initekisi idoꞌ ma ningamaaꞌ nouneꞌ initekisi ato atoꞌ initetoꞌ gizebo igi minaaꞌ ave dizi minaniꞌ limi minaniꞌ guveꞌinesi ve mukikisi nene eikumukovoꞌ asiꞌve do sotoꞌ o-ngidineꞌ ve.  
\v 17 Idoꞌ eiꞌ neve nene initeꞌ mukikisi olihe sotoꞌ amavosa ha mino initeꞌ mukiꞌ hize eleꞌ o-ngedo neivosa eiꞌ amuzoloꞌ nene nizave.  
\v 18 Aza nene eze evenele mulise eiꞌ okoꞌno neꞌmino minuniveti godoteloꞌ minive ne neive. Aza nene leliꞌ minevoꞌ alevoteꞌmi izeleho mino eiꞌ nene initeꞌ mukiꞌ ngivileꞌ ogo dizo minelove losa gomuꞌ molo lemo hilingutiꞌ otineꞌ ve.  
\v 19 Idoꞌ Oꞌmosoꞌmo eiꞌ gipele ezeloꞌ lisihetokovoꞌ minelive lo gala gilidoꞌ do molo laavo aꞌmine gipelela nene eiꞌ Oꞌmosoꞌmi emeni dameniꞌve gehepeve mudise mine molo minineꞌ nenako nemuꞌ nene naza ezemuꞌ initeꞌ mukiꞌ ngivileꞌ ogo neive noluvoniꞌ nene mo laminetokovoꞌ noluve.  
\v 20 Oꞌmosoꞌmo gala gelo laavo aꞌmine gipele nene lohotoꞌ zaloꞌ helo vaniseꞌve lepineꞌ neꞌmo nene Oꞌmososi biluvaꞌ ogo minuningutiꞌ nene kuku holo-ledo eiꞌ Oꞌmososi initeꞌ mukikisi misubouꞌ initeꞌ nilizahe Okulumokuꞌ initeꞌ nilizahe nesi nene do hamoꞌ o-ledavo uva lo do bizo none.   
\p
\v 21 Ee, lingine gomuꞌ Oꞌmoso huli hotoꞌ i-di mini monovo goloso igi minadiꞌmo nene lutine gatinguꞌ Oꞌmoso biluvaꞌ i-di minaniꞌza  
\v 22 idise nene Kilisitoꞌ aza eveneꞌ okoꞌnoꞌve hulo labuluvo ogo hilineꞌ neꞌmo nene Oꞌmososi do hamoꞌ o-lingidineꞌ ve. Idoꞌ neꞌmine ineꞌ nene lingine golosoutiꞌ mine abazaꞌ igi mini lihime okodida dizamivo gamazitine nomivo minikevo Oꞌmosoꞌmi veleloꞌ nene lengeleꞌmize molalove losa nene neꞌmine ineꞌ ve.  
\v 23 Idoꞌ neꞌmine o-lengedelineꞌ nene lingine monoꞌ gamazi lamineꞌ gilaniꞌ gili muꞌmusiꞌ aniꞌ nene huli vamii gili eleꞌvoleꞌ i mini monokuꞌ nene eleꞌvoleꞌ igi mini mine giliꞌ li minilizanikovoꞌ nene neꞌmine o-lengedeleseive. Aꞌmine monoꞌ gamazi lamineꞌ nene li sotoꞌ igi misubouꞌ misubouꞌ numudoꞌ namadoꞌ ve nene li-ngimikeve. Idoꞌ neniꞌ Pauloꞌ nene aꞌmine monoꞌ gamaziꞌmi gonoloꞌ ve loloꞌ ogo nouve.   
\s1 Pauloꞌ Izesuꞌ Evenele Zuho Mulisemuꞌ Gono Daaꞌ Ineꞌ Monovo Lo-ngimineꞌ Gamazi  
\p
\v 24 Idoꞌ naza lengikumuꞌ ve lo mulumo alumo geni nogihuvoniꞌ nemuꞌ nene idise naza nolize noizuve. Neꞌmine nouvoniꞌ nene Kilisitoꞌ aza mulumo geni gehelineꞌ nene ma ha neivosa naza nene ezeloꞌ medelo eiꞌ okoꞌno neꞌmine liliꞌ igi minave eze evenele zuho mulisemuꞌ nene aꞌmine ha minineꞌ geni nene do pelelesa neniꞌ okoꞌnela nene ma nogeho hize eleꞌ noo-lingiduve.  
\v 25 Ee, Oꞌmosoꞌmo neniꞌ nene lengikumuꞌ gono doo aꞌmine gonoloꞌ gizebo ve mineline lo gono nimidoꞌ do molosa aꞌmine Kilisitoꞌ evenele zuho muliseꞌmi gonoloꞌ ve nene loloꞌ ogo nouve. Idoꞌ neꞌmi gonoloꞌ ve loloꞌ ogo nouvoniꞌ nene Oꞌmosoꞌmo eiꞌ gamaziꞌve nene lo-ngemo osuꞌ gehepeve liline losa lo-nedavo nemuꞌ nene gonoloꞌ ve loloꞌ o nouve.  
\v 26 Idoꞌ aꞌmine gamaziꞌve nene gozopoꞌ akaꞌmila sotoꞌ ikaꞌ ikaꞌ iꞌmi ave nene gilamavo sunoꞌ gamazi neꞌmine minineꞌza idise nene eze evenele zuho ningi gililizave lo do sotoꞌ o-ngede neive.  
\v 27 Ee, aꞌmine sunoꞌ gamazi nene ede vineꞌ initeꞌ gehepeve mino Zuda ve minamave heta atoꞌ ve engikisi do olusoꞌ o-ngedelingumuꞌ nene Oꞌmosoꞌmo eze evenele gililizave lo gelo lo-ngemelesa gele minineꞌ ve. Aꞌmine gamazi nene neꞌmino neive: Kilisitoꞌ neve nene lengikuꞌ neivosa neꞌmo nene lingine Oꞌmosolatiꞌ initeꞌ atoliꞌmine ogo minineꞌ nene vi di tiꞌ ilisaaze. Nemuꞌ nene aꞌminemuꞌ ha gili muꞌmusiꞌ i minilizadoꞌ o neive.  
\v 28 Eveneꞌ hamo hamoꞌ mukiꞌ nene Kilisitoda giꞌmizi minisa monokuꞌ lodive ikeniꞌ nizavosavoꞌ Oꞌmosoꞌmi veleloꞌ nene ngeleꞌmize molalone losa nene aꞌmine Kilisitoꞌnimuꞌ lo sotoꞌ ogo eveneꞌ hamo hamoꞌ mukiꞌ nene hungoꞌ ngemo otohato monovoloꞌ gehepeve eꞌmeto eiꞌ Kilisitoꞌnimuꞌ nene eveneꞌ hamo hamoꞌ mukiꞌ apize ngemaaꞌ noune.  
\v 29 Idoꞌ neꞌmine olongumuꞌ nene Kilisitoꞌ atoliꞌmine ogo do amuzo molo-nedaaꞌ neineꞌ votigileloꞌ gehepeve do molosa aꞌmine amuzodunuꞌ nene zegeꞌ zegeꞌ ogosa eleꞌvoleꞌ ogo gono daaꞌ nouve.   
\c 2  
\p
\v 1 Idoꞌ neꞌmine noluvoniꞌ nene naza lengikumukisi idoꞌ Laodikia ebekuꞌ minavemukisi idoꞌ neniꞌ goꞌne veꞌne gehepeveloꞌ ningamave linge mukikumukisi nene monoꞌ gono zegeꞌ zegeꞌ ogo daaꞌ nouvongumuꞌ nene gililizave losa noluve.  
\v 2 Idoꞌ neꞌmine nouvoniꞌ nene ingine luꞌine amuzo molavo luꞌine ne geme ge neme li di hamoꞌ igi bizi minilizangumuꞌ ve losa neꞌmine nouve. Neꞌmine igi monoꞌ nene mo gili vevesilizadiꞌmo nene gili eleꞌvoleꞌ gehepeve igi Oꞌmosoꞌmo sunoꞌ molaniꞌ initeꞌ Kilisitoꞌnimuꞌ nene gili ngoloꞌ li minilizave losa gele noosa noluve.  
\v 3 Idoꞌ monoꞌ gele osuꞌ lo otohato ogo minaaꞌ monovo mukiꞌ nene heneni lamineꞌ di haleki milaaꞌ naaniꞌ neꞌmine mino aꞌmine nene eiꞌ Kilisitoda mine osuꞌ lo neive.  
\v 4 Neꞌmine noluvoniꞌ nene eveneꞌ hamolitesi gamazi nosoꞌvesi li-lingimii gotine izi lengeleꞌmize gopo ikelizave losa noluve.  
\v 5 Ee, naza nene hota goloso nouha luꞌne gaꞌneꞌve nene mo lengikisi gehepeve neivo lingine Kilisitoꞌnimuꞌ gili eleꞌvoleꞌ anitine nene ma hulami di giliꞌ li mini di hamoꞌ igi mine lamineꞌ igi nizaniꞌ nene ningo gelo nolize izo nouve.   
\s1 Kilisitoda Giꞌmizi Gelekeleꞌ I-daniꞌ Neꞌmo Oꞌmosolatiꞌ Lengemeni Dameni Nene Mo Dikeniꞌ Nenaze. Evenelite Di Sotoꞌ Aniꞌ Gamaziloꞌ Nene Gelekeleꞌ Igi Minamilo Lo Pauloꞌ Lo-ngimineꞌ Gamazi  
\p
\v 6 Lingine Guvetesi ve minelive li Izesuꞌ Kilisitoꞌni nene di tiꞌ aniꞌ nenaze. Nemuꞌ lingine nene ezela eꞌmeti igi milisa minilo.  
\v 7 Luhisetine nene Izesuꞌ Kilisitodoꞌ do neivosa minevoꞌ alevotine nene eita di lehete igi li-lingimaniꞌ gamaziloꞌ nene eꞌmetisa ezemuꞌ gili eleꞌvoleꞌ naaniꞌ nene di amuzo miliꞌmi vi mini aꞌminemuꞌ Oꞌmosola nene isaaꞌ neve li opoꞌni vauve ili li minilo.  
\v 8 Eveneꞌ hamolitesi gotine izi gihileꞌve nomineꞌ gamazimuꞌ nene otohato gamazi lamineꞌ ve li lengeleꞌmize gopo igi aꞌmidoꞌ di gelekeleꞌ i-lingidikelizaze. Eheꞌ igi ningisa minilo. Aꞌneꞌmine gamazi li-lingimilizaniꞌ nene Kilisitoꞌ gamaziloꞌ vo dalineꞌ gamazi li-lingimilizavoba asi haza evenelite neꞌmine manaꞌmine initeliti monovomuꞌ nene avotemotidatiꞌ li di dizaniꞌ gamazivoꞌ nene li-lingimilisave.  
\v 9 Idoꞌ neꞌmine noluvoniꞌ nene eiꞌ Kilisitoda eiꞌ okoꞌnola gehepeve nene Oꞌmosoꞌmi emeni dameni vaiꞌ nene mo mine molo osuꞌ lo neineꞌ nenako nemuꞌ nene noluve.  
\v 10 Idoꞌ Oꞌmosoꞌmi emeni dameni vaiꞌ Kilisitoda neineꞌ neꞌmo nene lingine ezeloꞌ giꞌmizi nizaniꞌ nenako eitatiꞌ neve nene lutineꞌmo minevoꞌ alevoꞌ ilineꞌ initeꞌ vaiꞌ nene lingine di osuꞌ li nizanako nemuꞌ nene ngomosi ma viseꞌ amilisave. Aꞌmine Kilisitoꞌ nene guveꞌinesi ve gizebo igaꞌ amuzo di nizave mukiliti godoꞌnidoꞌ minive ne neive.  
\v 11 Ezeloꞌ vi giꞌmizikevosa Oꞌmosoꞌmi noso neve nene mo lengita molo-lengede neive. Aꞌmine Oꞌmosoꞌmi noso nene evenelite Zuda veti monovoloꞌ eꞌmeti okodine lolovo huki huli-lingidiisa milaniꞌ nevoba asi lengemeni dameni litehe nene di hulikevo Kilisitoꞌ asiꞌve nene aꞌmine Oꞌmosoꞌmi noso nene molo-lingidineꞌ ve.  
\v 12 Ee, lingine noso hilanguꞌ nene Kilisitoꞌ galeseuꞌ liminguꞌ nene linginesi makaꞌ ezesi limaniꞌ gele neive. Idoꞌ ezeloꞌ giꞌmizi mini eze galeseutiꞌ do ote-dive Oꞌmosoꞌmi amuzo neꞌmo lelikisi do ote-ledelidoꞌ lisiheꞌ o neive li gili eleꞌvoleꞌ aniꞌ neꞌmo nene ezesi galeseutiꞌ do ote-dinguꞌ nene lengikisi makatoꞌ do ote-lingidineꞌ gele neive.  
\v 13 Ee, lingine Oꞌmosoꞌmi noso lengita nomineꞌ mini lengemeni dameni litehe nene hulamii goloso niteꞌ di minadiꞌmo lutine hele vineꞌ minangutiꞌ nene Kilisitoꞌnisi makaꞌ lengiꞌ lutinesi nene Oꞌmosoꞌmo do vele gizineꞌ ve. Neꞌmino Kilisitoꞌnisi makatoꞌ do ote-lidineꞌ gilineꞌ nene aza goloso nitete mukiꞌ do hulo-ledosa nene neꞌmine ineꞌ ve.  
\v 14 Leliꞌ lihimetemuꞌ lo sotoꞌ ogo goniꞌ o-ledelesa minineꞌ luhuvo niteꞌ Moseꞌ gizineꞌ louꞌ gamazi nene lohotoꞌ zaloꞌ belo bado aꞌmine gamazi neꞌmo leliꞌ goniꞌ o-ledelineꞌ amuzoꞌve nene do hulavo osuꞌ gehepeve lineꞌ ve.  
\v 15 Neꞌmino Kilisitoꞌ lohotoꞌ zaloꞌ hilidiꞌmo nene aza guveꞌinesi sikalahuꞌ goloso gizebo igaꞌ amuzoꞌinesi minave nene ngivileꞌ ogosa amuzoꞌine nene do hulo-ngedosa aꞌmine lohotoꞌ zadunuꞌ ngivileꞌ ogosa neineꞌ monovo nene eveneꞌ mukiliti veꞌnidoꞌ do sotoꞌ ogo osuꞌ laave.   
\p
\v 16 Neꞌmine ineꞌ nenako nemuꞌ nene lingine nosoꞌ niteꞌ ma naakumuꞌ nehe malise ogakumuꞌ nehe eveneꞌ malite neꞌmine neꞌmine ilizave lii monovotinemuꞌ izeꞌ mili lii lengemenga lilizaniꞌ nene gili ngimamilo. Idoꞌ aꞌmineꞌmine igi evenelite holiseꞌ minaaꞌ aniꞌ gamene adoꞌ kilisimasiloꞌ kilisimasiloꞌ nosoꞌ niteꞌ naba naaꞌ aniꞌ gamenelokisi ikeꞌni gosohoꞌ sotoꞌ ineꞌ gameneloꞌ gamenelokisi idoꞌ saleleuꞌ saleleukisi nene lingine holiseꞌ minaaꞌ naahe minamaaꞌ naahe neꞌmine naavo eveneꞌ malite aꞌmine monovotinemuꞌ izeꞌ mili lii lengemenga nilavo ma nene gili ngimamilo.  
\v 17 Aꞌmine nosoꞌ niteꞌ nehe holiseꞌ gamene nehe neꞌmine initeꞌ nene alingeꞌ sotoꞌ ilizaniꞌ initeliti avazahaꞌine mumunoꞌine neꞌmine minaniꞌza aꞌmine initeliti initeꞌ gihileꞌine nene Kilisitoꞌ ne neive.  
\v 18 Eveneꞌ malite ha me misubouꞌ alevete gaꞌine gilaaꞌ adiꞌmine igi gilii ingine laza veteloꞌ initeꞌ o molavo ninguuneꞌ nenako nemuꞌ nene laza monoꞌ monovo gehepeve gele none liisa engiꞌ okoꞌine nene hazamuꞌ di dizi minii lengikumuꞌ nene lingine amuzo mili okodine di limisa angeloꞌ gubiꞌ izi ngimaaꞌ amilizaniꞌ nene lukuvo nalizadoꞌ lisiheꞌ igi minamilisave lii lutinguꞌ hizilizaniꞌ nene gili ngimamilo.  
\v 19 Aꞌmine neꞌmine aleve nene leliꞌ godote neꞌmino neive Kilisitodoꞌ nene eze aleve mukitoꞌ giꞌmizo noneꞌ neꞌmine igi ingine nene giꞌmizamave. Idoꞌ laza eitoꞌ giꞌmizo noneꞌ nene ezelatiꞌ guꞌnuhuvolo neꞌmo eze okoꞌno linge ato atoꞌ neꞌmine nonive mukiꞌ nene do giliꞌ lo-lidivo mino Oꞌmosoꞌmo hize eleꞌ o-lede neivo neꞌmo nene naba oꞌmo vo minaaꞌ noune.   
\p
\v 20-21 Lingine nene Kilisitolesi makaꞌ hiliisa me misubouꞌ alevete neꞌmine manaꞌmine initekumuꞌ gili laaꞌ aniꞌ gamaziloꞌ gelekeleꞌ igi minangutiꞌ nene kuluhizisa nizaniꞌ nenako nemuꞌ nene lingine aꞌmine Kilisitoꞌnimuꞌ gilamave me misubouꞌ aleveti muliseutiꞌ ha nizaniꞌ gilivo evenelite neꞌmine manaꞌmine initekumuꞌ nene di gilamilo idoꞌ ni gilamilo idoꞌ diisa igi mili amilo li li-lingidaaꞌ aniꞌ gamaziloꞌ gelekeleꞌ igivoꞌ minaaꞌ naaniꞌ nene nanimuꞌ naave.  
\v 22 Ingine neꞌmine li-lingidaaꞌ aniꞌ initeꞌ nene ha igi mili naavo osuꞌ loosa vo haza ogaꞌ neineꞌ initekumukovoꞌ nene li-lingidaaꞌ aniꞌ ve. Idoꞌ ingine neꞌmine igaꞌ aniꞌ nene haza evenelitevoꞌ apizi ngimi li huki li-ngidaaꞌ aniꞌ gamaziloꞌ eꞌmetiisa igaꞌ aniꞌ ve.  
\v 23 Aꞌmine laaꞌ aniꞌ gamazi neꞌmo nene okodelotiꞌ monokumuꞌ laniteꞌ gelo amuzo molo eꞌmetaakumukisi idoꞌ leliꞌ okode nene laniteꞌ gelamilineꞌ initeꞌ o-do do limuneꞌ gelo minaakumukisi nene laaꞌ neineꞌ nenako aꞌmine neve nene otohato gamazi gele neineꞌza aꞌmine lemeni dameni litehe neꞌmo laniteꞌ gilineꞌ monovo nene do leme-doo eꞌmetamo mineloningumuꞌ nene mo kekeꞌ hize eleꞌ o-ledesaꞌmive.   
\c 3  
\s1 Lingine Nene Kilisitolesi Hiliisa Lutine Hele Neingutiꞌ Nene Kilisitolesi Gohi Oti Minevoꞌ Alevoꞌ Igi Nizaniꞌ Nenako Lengemeni Dameni Liteheloꞌ Eꞌmetami Lengemeni Dameni Gosohotoꞌ Nene Eꞌmeti Igi Mili Minilizave Lo Pauloꞌ Lo-ngimineꞌ Gamazi  
\p
\v 1 Nemuꞌ nene Kilisitoꞌ hilingutiꞌ Oꞌmosoꞌmo do ote-dinguꞌ nene lengikisi lutine helavo minangutiꞌ nene makaꞌ do ote-lengedavo nizaniꞌ nenako nemuꞌ nene lingine Kilisitoꞌ Oꞌmosolotiꞌ lemo mino ana hulaaꞌ ida neida Okulumokuꞌ minineꞌ monovo danavavoꞌ nene dalone li gili mini gono di minilo.  
\v 2 Me misubouꞌ minineꞌ initetoꞌ nene lutine milami asi Okulumokuko neineꞌ monovo danavalokovoꞌ nene lutine mili gili minilo.  
\v 3 Neꞌmine noluvoniꞌ nene neemuꞌ noluve: Lingine hili nizaniꞌ gelavosa minevoꞌ alevotine gihile nene Kilisitonguꞌ haleke neineꞌ nene mo Oꞌmosola neive.  
\v 4 Ne neiha minevoꞌ alevotineꞌmi izeleho Kilisitoꞌ ogo sotoꞌ pizelineꞌ nene linginesi aꞌmineꞌmine igi lengemeni dameni okodine atoliꞌminesi makaꞌ sotoꞌ ilisave.   
\p
\v 5 Nemuꞌ nene lingine me misubouꞌ monovo danava goloso lutinguꞌ neineꞌ adoꞌ veneꞌ vemohoꞌ gipe alu gopo ingaaꞌ monovosi idoꞌ lute do goloso ilineꞌ monovo ato atoꞌ nesi idoꞌ initeꞌ goloso mamuꞌ lutine otavo ninge lamineꞌ ogaꞌ nesi idoꞌ initeꞌ gohi masi masi dunivoo lii mumuzoꞌ ogaꞌ monovo nene soza oꞌmosoloꞌ gelekeleꞌ ogaꞌ monovo neꞌmine nenaze aꞌmine nesi nene mo ngibili hilaniꞌ gelavo mudise hulisa minilo.  
\v 6 Oꞌmosoꞌmi gamazi gili huli neꞌmine monovo igi mili igaꞌ avemuꞌ nene Oꞌmoso izeboloꞌ molavo lihime ngemeleseive.  
\v 7 Idoꞌ linginesi gomuꞌ aꞌmine neꞌmine monovo nene lengiꞌ lutineꞌmine loloꞌ ogavo minanguꞌ nene aꞌmidoꞌ eꞌmeti igi mili minaaꞌ aniꞌ ma neive.  
\v 8 Neꞌmine igi minaniꞌza idise aꞌmine nene hulisa ma meꞌmine monovo nesi nene hulilo: Adoꞌ lingizeboloꞌ malaꞌ malaꞌ nesi idoꞌ eveneꞌ singeheꞌ goloso minaaꞌ nesi idoꞌ lukehe lakehe ogaꞌ monovo nesi idoꞌ dovo ledevoka laaꞌ monovo nesi idoꞌ gamazi goloso laaꞌ nesi nene mo mudise hulilo.  
\v 9 Lengikuꞌ gamazi lilizanguꞌ nene sozasi lamilo. Lingine gomuꞌ lengemeni damenisi idoꞌ aꞌmineꞌmo ogo molo ogaꞌ ineꞌ monovoꞌve golososi nene di hulisa  
\v 10 lengemeni dameni gosohoꞌ di otuhaniꞌ ma neive. Aꞌmine lengemeni dameni nene Oꞌmosoꞌmo lingine eikumuꞌ gili vevesi osuꞌ li minilizangumuꞌ ve lo eiꞌ aꞌmine lengemeni dameni do sotoꞌ iveꞌmi avazahaloꞌ gehepeve nene gohi do gosohoꞌ oꞌmo voovoꞌ neive.  
\v 11 Idoꞌ neꞌmino do gosohoꞌ o-lidinguꞌ mene gomuꞌ hoꞌlo ato atoꞌ minuneꞌ monovo ma nene mo mudise osuꞌ laave. Adoꞌ eveneꞌ linge ma nene heta atoꞌ aleve nGiliki aleve nevoꞌmine minavo linge ma Zuda aleve minunivo neꞌmo hoꞌlo minuneꞌ nolihe idoꞌ linge ma okodela Oꞌmosoꞌmi noso neivo linge ma nomivo haza nizavoo minuneꞌ nolihe idoꞌ linge ma nene save dunive neꞌmine nonivo linge ma nene save damave eveneꞌ loposo neꞌmine minavo minuneꞌ nolihe idoꞌ linge ma goboni ve minavo linge ma nene eveneꞌ maliti goboni ve minamo haza nonivo minuneꞌ nolihe laza neꞌmino minaaꞌ uneꞌ ma nene idise Kilisitoꞌ aza leliꞌ mukiliti nabate loloꞌ ogo leliꞌ nene mukikuꞌ mine molo neineꞌ nenako nemuꞌ nene neꞌmino hoꞌlo minaaꞌ uneꞌ monovo ma nene mo osuꞌ lave.   
\p
\v 12 Neꞌmino neineꞌ nenako nemuꞌ nene lingine Oꞌmosoꞌmo lengiꞌ nene do kegeso do eita ogosa lulo lengeme neive eiꞌ evenele nizaniꞌ nenaze. Lingine meꞌmine monovo nene di otuhi igi mili minilo. Adoꞌ muludine hukavo eveneꞌ mulumoꞌine ningaaꞌ monovosi idoꞌ nasahiliꞌ o-ngedaaꞌ monovosi idoꞌ okode do lemo minaaꞌ monovo nesi idoꞌ muludine laminekisi hongu lo minaaꞌ monovo nesi idoꞌ lingizeboloꞌ molaniꞌ initeꞌ ikevo ma goloso gelamo zou lo minaaꞌ monovo nesi nene di otuhi  
\v 13 lengikuꞌ eveneꞌ malite lingizeboloꞌ molali initeꞌ i-lingidikaꞌ i-lingidikaꞌ navo ma nemuꞌ nene goseleꞌ lengebelamivo gili huli aꞌmine lihimeꞌine nene huli-ngidilo. Ee, Guvelesi veꞌmo lengiꞌ lihimetine nene hulo-lingidineꞌ nenaze. Aꞌmineꞌmine igi lingine nene ge lihimeka hulo-gede ne lihimeꞌne hulo-nede livoꞌ minilo.  
\v 14 Idoꞌ lingine neꞌmine manaꞌmine initeꞌ igi mili minaaꞌ naaniꞌ nene ngivileꞌ ivosa initeꞌ naba nene lutine ngemaaꞌ monovo nene di otuhi igi mili minilizave. Aꞌmine lute ngemaaꞌ monovo neꞌmo nene monovo lamineꞌ mukiꞌ nene asabuꞌ ize neivosa laminovoꞌ minelonidoꞌ do hamoꞌ o-ledaaꞌ neive.  
\v 15 Kilisitoꞌ elese molo-lengedo lengeleꞌmize eita ineꞌ nene lingine lutine hamoꞌ ogavo hongu li laminivoꞌ minilizave losa neꞌmine ineꞌ nenaze. Lingine neꞌmine manaꞌmine initeꞌ ilisa gilii ma nene gomuꞌ aꞌmine initekumuꞌ izeꞌ mili di ningi Kilisitodatiꞌ hongu lo lamino minaaꞌ monovoloꞌ nene eꞌmetilizaniꞌ aka vele-lengedelineꞌ initekovoꞌ ilo. Neꞌmine igi mini Oꞌmoso isaaꞌ neve li opoꞌni li minilo.  
\v 16 Kilisitoꞌ gamaziꞌve nene lutinguꞌ vauve goloso elosa mine molo minivo minilo. Neꞌmine igi otohato gamazi gehepeve li ge apize neme ne apize geme idoꞌ ge hungoꞌ molo neme ne hungoꞌ molo geme lisa monoꞌ nama ato atoꞌ monoꞌ godoloutiꞌ monoꞌ nama nehe idise aꞌmene laaꞌ naaniꞌ monoꞌ nama nehe idoꞌ Oꞌmosoꞌmi Sikalahuꞌ neꞌmo lo sotoꞌ ogo lo-lengemelineꞌ monoꞌ nama nehe neeve nene li Oꞌmoso nene isaaꞌ neve li aꞌmine nama nene lutingutiꞌ gehepeve li-imaaꞌ igisa minilo.  
\v 17 Lingine gono dalizanguꞌ nehe gamazi lilizanguꞌ nehe nadiꞌ nadiꞌ ilizahe aꞌminguꞌ nene Izesuꞌ aza lengiꞌ Guvetinesi ve miningumuꞌ nene sotoꞌ ogo minelidoꞌ di milisa igi mili eiꞌ Izesuꞌnimuꞌ nene melehine Oꞌmoso isaaꞌ neve li-di minilo.   
\s1 Veneꞌ Vemohoꞌ Engikisi Izipahaꞌinesi Izeꞌninge Meꞌningesi Idoꞌ Gonouꞌ Vesi Gizebo Veꞌinesi Ingine Igi Mili Iliza Monovomuꞌ Pauloꞌ Lo-ngimineꞌ Gamazi  
\p
\v 18 Lingine Guvelesi veꞌmi evenele nizanako nemuꞌ nene veneꞌ lengiꞌ nene vadinge lilizaniꞌ gamaziloꞌ nene gelekeleꞌ igi gili daakovoꞌ igi minilizadoꞌ o neineꞌ nenaze. Gelekeleꞌ i-ngidi minilo.  
\v 19 Idoꞌ vemohoꞌ lengiꞌ nene eledingine lutine ngimi mini goseleꞌ ngebelelineꞌ initeꞌ i-ngidamilo.  
\v 20 Idoꞌ izipe lengiꞌ nene izetingine metingine gelekeleꞌ i-ngidi minilizaniꞌ nene Guvelesi veꞌmo gilivo mulunouꞌ lamineꞌ oloseize. Gamene gamene gelekeleꞌ i-ngidivoꞌ minilo.  
\v 21 Idoꞌ izeꞌninge meꞌninge lingine izipahatine goseleꞌ ngibilivoovoꞌ minikelizaze. nGizeboloꞌ molali initeꞌ initeꞌ i-ngidi minamilo.  
\v 22 Idoꞌ gonouꞌ ve lingine nene me misubouko gizebo i-lingidaaꞌ naavetine nene gamene gamene gelekeleꞌ i-ngidivoꞌ minaaꞌ ilo. Idoꞌ neꞌmini gelekeleꞌ i-ngidilizaniꞌ nene lengiꞌ gizebo vetinelite lengikumuꞌ ningi lamineꞌ gililizave li engiꞌ veꞌnidoꞌ nene gono amuzo mili daaꞌ naave gili gono di miniisa alingeꞌ ingine ningamavo gono gilizevo igi di minaaꞌ neꞌmine nene amii asi Guvelesi vemuꞌ golise gili mini lutine gonotidokovoꞌ mili mini gono di minilo.  
\v 23 Neꞌmine manaꞌmine gono dalizanguꞌ nene eveneliti gono di-ngidamii asi Guvelesi veꞌmi gono nidi-daniꞌ gilivosa lutine laminetotiꞌ gehepeve nene di minilo.  
\v 24 Idoꞌ neꞌmine ilizaniꞌ nene Guvelesi veꞌmo aꞌmine gonotidoꞌ golo hizo salani molo-lidineꞌ initeꞌ nene menitine neꞌmine lehize-lengedelineꞌ mamuꞌ nene gili nizaniꞌ nenako nemuꞌ nene neꞌmine ilisaave. Lingine gelekeleꞌ i-di nizave nene Guvelesi ve Kilisitoꞌni gelekeleꞌ i-di nizaniꞌ ve.  
\v 25 Idoꞌ neꞌmine noluvoniꞌ nene ingine gamaziꞌve avutoꞌ igi monovo goloso ilizave nene hamokisi voꞌneloꞌ ve ve lo ma ninge mate-ngedamo mukiꞌ nene monovo goloso ilizadoꞌ golo hizo lihime ngeme osuꞌ loloseive.   
\c 4  
\p
\v 1 Idoꞌ gonoloꞌ veti gizebo veꞌine lingine Okulumokuꞌ nene lengitoꞌ gizebo vetine ma neineꞌ nenaze. Aꞌminemuꞌ nene gili mini lengiꞌ gonouꞌ vetine nene monovo hehe lo minelineꞌ lisihekovoꞌ nene i-ngidisa minilo.   
\s1 Igi Mili Minilizaniꞌ Monovo Gohi Mamuꞌ Pauloꞌ Gaꞌine Do Lineꞌ Gamazi  
\p
\v 2 Idoꞌ Oꞌmosola li minilizaniꞌ nene hulami laakovoꞌ igi minilo. Idoꞌ neꞌmini Oꞌmosola li minilizanguꞌ nene lutine okise ongamivoo gilingili igi Oꞌmoso nene isaaꞌ neve li-di minilo.  
\v 3-4 Idoꞌ Kilisitoꞌ gamaziꞌve gomuꞌ sunoꞌ minineꞌ lo sotoꞌ ogo lo-ngemeloningumuꞌ nene Oꞌmosoꞌmo akahe siꞌze-ledaavo naza lolodoꞌ o neidoꞌ do molo lolongumuꞌ neniꞌ nene aꞌmine gamazi lovo ngoloꞌ lovoꞌ ogo lo-ngemelive lii lingine aꞌmine Oꞌmosola li minilizanguꞌ nene lelikumukisi lilo. Naza nalatoꞌ ve nouvoniꞌ nene aꞌmine Kilisitoꞌ gamaziꞌve lo sotoꞌ ogaꞌ uvongumuꞌ nene nouve.  
\v 5 Idoꞌ lingine nene gopo moni minamii eveneꞌ adoꞌ Izesuꞌ evenele liliꞌ ami heta minave nene naniteꞌ di-ngidilizahe aꞌminemuꞌ nene gatine gili nge li mini monovo laminekovoꞌ i-ngidi eveneꞌ hize eleꞌ i-ngidiliza gonotine lamineꞌ sotoꞌ ilineꞌ nene mo diivoꞌ minilo.  
\v 6 Idoꞌ gamazitine lilizaniꞌ nene gamazi unuvo huhu lo mino meleleꞌ o minelineꞌ gamazivoꞌ lilo. Neꞌmine igi minilizaaniꞌ nene monokumuꞌ ma longoꞌ i-lingidilizave hamo hamoꞌ nene di velepeꞌ izi li-ngimiliza gamazimuꞌ nene gili hehe li minisa minilizave.   
\s1 Pauloꞌ Gamazi Lo Osuꞌ Nolo Gekeꞌ Lo-ngidineꞌ Gamazi  
\p
\v 7 Idoꞌ nenita sotoꞌ oꞌmo novineꞌ initekumuꞌ gamaziꞌve mukiꞌ nene Tikikoꞌ lo-lengemeleseive. Aza nene Kilisitoꞌ evenele leliꞌ zuho Guvetesi veꞌmi gelekeleꞌ izipeꞌve lisiheꞌ lamineꞌ lelikisi makaꞌ gono daaꞌ ive neivo luꞌne emaaꞌ nouve minive  
\v 8 neꞌmo leliꞌ gamazi nene lo-lengemo muludinguꞌ do lamineꞌ ilive lo imiselekuvo lengita nesene novive.  
\v 9 Idoꞌ lengikutiꞌ ve Onesimoꞌ nene leze zuho peleseveꞌ izamaaꞌ ive lute eme nonive minive aza nene ezesi makaꞌ nivasive. Ingine nene mela minineꞌ gamazi mukiꞌ nene li-lingimilisasive.   
\p
\v 10 Nenikisi makaꞌ nalatoꞌ nosive Alisitakoꞌ neꞌmo nene longopoꞌni nolive. Idoꞌ Banabasiꞌ oholoho Malekoꞌ nesi nene longopoꞌni nolive. Ezemuꞌ i-dilizaniꞌ gamazi nene mo lengita hulo nouvo mo gili nizaniꞌ ma neive. Lengita naavo ma nene eleꞌmize lamineꞌ ilo.  
\v 11 Idoꞌ ve ma gulive Izesuꞌ ve lo minineꞌ adoꞌ guliveꞌve gohi ma Zusitoꞌ ve li li-daaꞌ ave neesi nene longopoꞌni nolive. Zuda ve minangutiꞌ nene aꞌmine luve metevoꞌ nene nenikisi makaꞌ Oꞌmosoꞌmo gizebo o-ledelingumuꞌ gono daaꞌ unive minii aꞌmine nete nene hize eleꞌ gehepeve i-nidave.  
\v 12 Idoꞌ lengikutiꞌ minive mino Izesuꞌ Kilisitoꞌ gonoloꞌ ve minive Epahalaꞌ nesi nene longopoꞌni nolive. Aza lengikumuꞌ nene gamene gamene Oꞌmosola zegeꞌ zegeꞌ ogo laaꞌ neive. Ee, lingine monokuꞌ lodive igi Oꞌmosoꞌmo lulouꞌ gilineꞌ gamazi mukiꞌ nene gili hehe li aꞌmidoꞌ eꞌmeti osuꞌ lilizave losa nene Oꞌmosola laaꞌ neive.  
\v 13 Ee, naza eze monovo nene mo gele noosa aꞌminemuꞌ nene tiꞌ lo noluve: Aza neve nene lengikumukisi idoꞌ Izesuꞌ evenele Laodikia ebekuꞌ minavemukisi idoꞌ Hielapoli ebekuꞌ minavemukisi nene geꞌnebe gono goloso amuzo molosa do minaaꞌ neive.  
\v 14 Idoꞌ longopoꞌni gohi ma nilasineꞌ nene lute eme nonive tota ve Lukaꞌ nesi idoꞌ ve ma Demaꞌ nesi nene nilasive.  
\v 15 Idoꞌ laza leze zuho Laodikia ebekuꞌ mulise milaaꞌ naavesi idoꞌ Nimihaꞌnisi idoꞌ monoꞌ aleve eze numuꞌveuꞌ mulise milaaꞌ naavesi nene ngopoꞌni noluze. Li-ngimilo.  
\v 16 Idoꞌ luhuvo niteꞌ meve nene gati li-lingimikevo ma nene Laodikia ebekuꞌ mulise milaaꞌ naanguꞌ nesi nene gatilizangisi huli-ngidilizave. Idoꞌ Laodikia ebekuꞌ di nizaniꞌ luhuvo niteꞌ nene lingine di igi aꞌminesi nene gatilo.  
\v 17 Idoꞌ Alakipoꞌni nene tiꞌ li li-imilo: Gaza Guvelesi veꞌmo gimineꞌ gono nene hulamo mo do pelelove lo gele minosa dalosane.   
\p
\v 18 Luhuvo niteꞌ gizi-nidaveti aꞌningutiꞌ luhuvo gizaaꞌ initeꞌ nene doosa neniꞌ Pauloꞌ nene longopoꞌni lo neniꞌ aꞌnedunuꞌ nogizuve. Nemuꞌ nene lingine nalatoꞌ nouvongumuꞌ nene gatine molalize. Aꞌminemuꞌ nene gili minilo. Oꞌmosoꞌmi nasahiliꞌve neꞌmo nene lengita mine molo minivoo.