\id 2TI  - Dano NT [aso] -Papua New Guinea 1989 (DBL -2014) 
\h 2 TIMOTEOꞌ 
\toc1 Pauloꞌ Timoteoꞌni Gize-Dineꞌ Luhuvo Niteꞌ Naba 2 
\toc2 2 Timoteoꞌ 
\toc3 2 Tim 
\mt1 PAULOꞌ TIMOTEOꞌNI GIZE-DINEꞌ LUHUVO NITEꞌ NABA 2  
\c 1  
\s1 Pauloꞌ Luhuvo Niteꞌ Apizo Gizaaꞌ Gamazi Gizosa Timoteoꞌni Noꞌnohoꞌ Gamazi Gize-dineꞌ  
\p
\v 1 Oꞌmosoꞌmo eveneꞌ ma ingine Izesuꞌ Kilisitoda giꞌmizilizadotiꞌ nene minevoꞌ minevoꞌ ngemeni dameni dalisave lo lo huko lingumuꞌ neniꞌ nene Izesuꞌ Kilisitoꞌ aposolo mineline lo gilidoꞌ aposolo loloꞌ uve Pauloꞌ naza  
\v 2 luhuvo niteꞌ mene geiꞌ voꞌneloꞌ gipeꞌne minanive Timoteoꞌni nogize-giduve. Neꞌmine ogosa meteho Oꞌmosolatiꞌ idoꞌ Guvetesi ve Izesuꞌ Kilisitodatiꞌ nasahilikisi idoꞌ mulumote ningaaꞌ monovosi idoꞌ hongu lo lamino minaaꞌ monovo nesi nene lehizi-gidikesivo geitoꞌ minivoo losa noluve.   
\s1 Pauloꞌ Timoteoꞌnimuꞌ Gelo Oꞌmoso Opoꞌni Losa Oꞌmosoꞌmo Gonouꞌ Amuzo Lehize-dineꞌ Nene Amuzo Molo Do Otelive Lo Gala Daniꞌ Gamazi  
\p
\v 3 Gamene gamene holukaꞌ neiha holiseꞌ neiha Oꞌmosola laaꞌ nouvonguꞌ geikumuꞌ gaꞌne molosaꞌmivo mino Oꞌmoso isaaꞌ neve laaꞌ nouve. Aꞌmine Oꞌmoso nene avoꞌnemote gelekeleꞌ i-di opoꞌni laaꞌ adiꞌmine ogo luꞌneuꞌ monovo lisihekovoꞌ neivo minosa nene gelekeleꞌ o-do opoꞌni laaꞌ nouve.  
\v 4 Idoꞌ naza hulo-gedo mala volosa nouvo veka novozo doꞌmozineꞌ mamuꞌ nene naza ha gele mino okongaloꞌ ma ningekuvo nenita nolize naba sotoꞌ iliho losa gelaaꞌ nouve.  
\v 5 Gaza Oꞌmosomuꞌ gele eleꞌvoleꞌ ogaꞌ naineꞌ nene mo apa niteꞌ amo laminetoꞌ gele eleꞌvoleꞌ gehepeve nane lo gele minaaꞌ nouve. Ee, ganaꞌ nene eleni izaho Loisiꞌ aꞌmineꞌmine ogo Oꞌmosomuꞌ gele eleꞌvoleꞌ ogo neivosa izaho Eunikeꞌ nesi aꞌmineꞌmine ineꞌ nenako naza geiꞌ nene aꞌmineꞌmine ogo gele eleꞌvoleꞌ o nolosane losa gele muꞌmusiꞌ o nouve.  
\v 6 Nemuꞌ nene naza aꞌne hite-giduvonguꞌ Oꞌmosoꞌmo gonouꞌ amuzo lehize-gedavo geita neineꞌ nene gaza amuzo molo do otezo lo gaka noduve.  
\v 7 Idoꞌ naza Oꞌmosoꞌmo gonouꞌ amuzo gimineꞌ nene amuzo molo do otezo noluvoniꞌ nene aꞌmine Oꞌmosoꞌmo leme neineꞌ lemeni dameni neve nene laza evenekumuꞌ lovozo helo golise gelaaꞌ lemeni dameni leme neivoba asi eveneꞌ veꞌnidoꞌ eleꞌvoleꞌ ogo ogo molo ogaꞌ amuzo do minaaꞌ lemeni damenisi idoꞌ eveneꞌ lute ngemaaꞌ lemenisi idoꞌ lute okodeloꞌ gizebo eleꞌvoleꞌ ogaꞌ amuzosi nene lehize-lede neize.  
\v 8 Nemuꞌ nene gaza govozo helamo mino Guvetesi vemuꞌ gamaziꞌve nene lo soto sotokovoꞌ ozo. Idoꞌ aꞌmine Guvetesi vemuꞌ nalatoꞌ ve loloꞌ ogo nouve nenikumukisi nene govozo helamozo. Asi Kilisitoꞌ gamazi laminekumuꞌ lelitokisi sotoꞌ o-ledaaꞌ neineꞌ mulumo geni initeꞌ neꞌmine sotoꞌ o gemelineꞌ nene gazasi Oꞌmosoꞌmo amuzo geme neineꞌ neꞌmi votigileloꞌ do molo ha geheꞌmo vo minezo.  
\v 9 Aꞌmine amuzo gimive Oꞌmoso neꞌmo leliꞌ elese molo-ledo do luꞌ izo do eita o-lidineꞌ nene eveneꞌ monovo lamineꞌ uningumuꞌ nene neꞌmine ineꞌ nevoba asi olihe initeꞌ mataꞌ do sotoꞌ amo asiꞌvevoꞌ minida vomine aza nasahiliꞌ Izesuꞌ Kilisitonguꞌ lehize-ledelesuve lo eiꞌ luloloꞌ do lisiheꞌ okidoꞌ eꞌmeto ineꞌ ve.  
\v 10 Aꞌmine eikovoꞌ minineꞌ gamene gozopoꞌ vomila plenim ineꞌ initeꞌ nene idiꞌnise aꞌnene Guvetesi ve Izesuꞌ Kilisitoꞌ sotoꞌ idotiꞌ nene mo sotoꞌ ogavo ningekune. Aza nene sotoꞌ ogosa helaaꞌ neꞌmi amuzoꞌve nene bele helosa helo gelesamo minevoꞌ minevoꞌ minaaꞌ nene monoꞌ gamazi laminekutiꞌ nene do sotoꞌ ogo lelebizave.  
\v 11 Aꞌmine gamazi lamineꞌ nene lo soto sotoꞌ ogaꞌ ilinive mineline idoꞌ aꞌmineꞌmi aposolo mineline idoꞌ aꞌmine gamazi nene apize ngemaaꞌ anive mineline lo Oꞌmosoꞌmo neniꞌ neve nene neleꞌmize molave.  
\v 12 Neꞌmine o-nidineꞌ neꞌmo naza idise mela mulumo alumo niteꞌ mene geheꞌmo nouvoniꞌza naza gele muꞌmusiꞌ o-daaꞌ nouve Kilisitoꞌ monovoꞌve nene naza ningo gele minuvodiꞌmo aza gono nimineꞌ nene do nouvo aza aꞌmidoꞌ gizebo lamineꞌ ilineꞌ amuzoꞌvesi mino gizebo lamineꞌ ogo neivo gamene naba aloseive lo gele eleꞌvoleꞌ o nouvoniꞌ nenako nemuꞌ novozo helamo mino aꞌmine gono nene daaꞌ nouve.  
\v 13 Nemuꞌ nene gaza nenitatiꞌ gelaineꞌ gamazi nene gamazi gihile neineꞌ nenaze. Aꞌmine gelaineꞌ gamazi nene gaza aꞌmineꞌmine ogo lo-ngemeliningumuꞌ nene avazahaꞌve neꞌmine do mino Izesuꞌ Kilisitoda minineꞌ monovo ezemuꞌ gele eleꞌvoleꞌ ogatokisi idoꞌ lute ngemaatokisi nene eꞌmeto mino gonoꞌve do mino  
\v 14 lelikuꞌ omo minive Oꞌmosoꞌmi Sikalahutoꞌ nene lehete o mino Oꞌmosoꞌmo gono lamineꞌ gimidoꞌ nene gizebo lekeseve o minosa do minezo.   
\s1 Pauloꞌ Eveneꞌ Linge Meheꞌine Imangumukisi Idoꞌ Onesiholoꞌ Pauloꞌ Lulo Do Gehe Gehe Ize-dingumukisi Gizineꞌ Gamazi  
\p
\v 15 Gaza mo gele nane. Asia aleve mukikisi idoꞌ Higeloki Helemogeneki nesi nene mo meheꞌine nimi mine velepeꞌ izikeve.  
\v 16 Ne neiha engiꞌ zuho Onesiholoꞌ aza nene gamene mukiꞌ luꞌneuꞌ do gehe gehe ize-nedo mino nalatoꞌ minuvongumuꞌ nene ovozo ogavo golise gelamaaꞌ ineꞌ nenako nemuꞌ nene Guvelesi veꞌmo eiꞌ Onesiholoꞌ zuhola nene mulumoꞌine ningivo lo noluve.  
\v 17 Ee, golise gelamo Loma ebekuꞌ ogo hetelo mino nenikumuꞌ nene amuzo molo viseꞌ ogo ogosa ningineꞌ ma neive.  
\v 18 Nemuꞌ nene gamene nabala Guvelesi veꞌmo gele emo mulumolo ningiliho lo noluve. Idoꞌ Eheso numuno ebekuꞌ nouvo aza vauve goloso elosa neniꞌ nene hize eleꞌ o-nedo minineꞌ gasika mo ningo gele lamineꞌ o naneꞌ ma neive.   
\c 2  
\s1 Gaza Oꞌmosoꞌmi Amuzoloꞌ Lehete O Mino Neniꞌ Laaꞌ Nouvoniꞌ Monoꞌ Nene Eveneꞌ Masi Apizi nGimilizangumuꞌ Ve Lo Eveneꞌ Ma Nene Apize nGemaaꞌ Iline Idoꞌ Monokumuꞌ Mulumo Geni Gehaaꞌ Nouneꞌ Nene Gazasi Gehaaꞌ Iline Lo Pauloꞌ Timoteoꞌni Lo-dineꞌ Gamazi  
\p
\v 1 Nemuꞌ nene gaza gipeꞌne make, laza Izesuꞌ Kilisitoda vo giꞌmizekunivo Oꞌmosoꞌmo nasahiliꞌve lehize-ledaaꞌ neingutiꞌ nene amuzo do minosa nene amuzo molo minezo.  
\v 2 Neꞌmine ogo minosa naza eveneꞌ mukiliti veꞌnidoꞌ lo sotoꞌ nouvo nenitatiꞌ gelaineꞌ monoꞌ nene eveneꞌ masi apizi ngimilizangisi nene monotoꞌ eꞌmete lamineꞌ igi mini apizi ngimilizadoꞌ lisiheꞌ i minaniꞌ eveneta nene ngeme molozo.  
\v 3 Gaza nene Izesuꞌ Kilisitoꞌ amiꞌve loloꞌ ogange. Ami laminelite mulumo gono ha gihaaꞌ naniꞌ neꞌmino laza Kilisitoꞌnimuꞌ mulumo geni neꞌmine gehaaꞌ nouneꞌ neꞌmino gazasi nene ha gehaaꞌ ozo.  
\v 4 Ami hamolitesi nene atoꞌ gono neꞌmo adeloꞌ do minaalive li haza gonouꞌ ma vi hilalizavoba asi amiuꞌ leleꞌmize molave neꞌmo lelikumuꞌ lamineꞌ gelelingumuꞌ ve li olovoꞌ igi minaaꞌ nave.  
\v 5 Idoꞌ zohiꞌ igaꞌ nave nene zohiꞌ iꞌmi vilizanguꞌ zohiliꞌmi louꞌ gamaziꞌve ma avutoꞌ ilizaniꞌ nene zohikuꞌ vuni ikeve li palaisi ngimisaꞌmave.  
\v 6 Idoꞌ ma neve nene ve ma mine zuhoꞌ ogo gono amuzo molo dalive neꞌmo nene gomuꞌ apiꞌ ogo nosoꞌ niteꞌ o molaaꞌ neineꞌ nene do naaꞌ neive.  
\v 7 Nemuꞌ nene mene noluvoniꞌ initeꞌ mukikumuꞌ nene Guvelesi veꞌmo luka gaka do ngoloꞌ lo-gedavo gele nge lo gelelesange. Nemuꞌ nene izeꞌ molo gelo minezo.   
\p
\v 8 Idoꞌ gaza Izesuꞌ Kilisitoꞌnimuꞌ nene gele nge lo minezo. Aza neve nene guvelesi ve Davidiꞌ aꞌvopilemoꞌ zuhoutiꞌ mino hilingutiꞌ oto neingumuꞌ monoꞌ gamazi lamineꞌ lo-ngemaaꞌ nouvoniꞌ nene gele minezo.  
\v 9 Naza aꞌmine gamazi lamineꞌ laaꞌ nouvongumuꞌ nene mulumo geni niteꞌ nogihuve. Ee, naza nene gizengize ve nouvoniꞌ gelavo nalaꞌ numunguꞌ nesi nene huli-nidikevo nouve. Neꞌmine ikevo nouha Oꞌmosoꞌmi gamazi nesi nene nalatoꞌ ma minamive.  
\v 10 Nemuꞌ naza Oꞌmosoꞌmo eiꞌ ve lo do kegese-ngede neineꞌ alevemuꞌ nene mulumo geni initeꞌ mukiꞌ nene ha geheꞌmo vo minaaꞌ nouve. Ee, aꞌmine aleve Izesuꞌ Kilisitoda igi giꞌmizilizadotiꞌ lukuvo ni labanaꞌve di tiꞌ igi ezesi miniviꞌ miniviꞌ ilizangumuꞌ ve lo nenita sotoꞌ ogaꞌ neineꞌ mulumo niteꞌ mukiꞌ nene ha geheꞌmo vo mino monoꞌ gamazi lo-ngemaaꞌ nouvoniꞌ nene hulosaꞌmuve.  
\v 11 Gamazi meve nene mo gihile lamineꞌ neive. Adoꞌ:  
\q1 Laza nene mo laminetoꞌ Kilisitolesi makaꞌ helekuneꞌ nolineꞌ nene  
\q1 ezesi makaꞌ minevoꞌ alevoꞌ ogo minelesune.   
\q1
\v 12 Idoꞌ laza geni mukiꞌ sotoꞌ ilinguꞌ amuzo molo minesoꞌ nene  
\q1 Guvelesi ve naba loloꞌ ogo minelinguꞌ nene  
\q1 lazasi makaꞌ gonoꞌveloꞌ gizebo o minelesune.  
\q1 Laza eze aleve nomune lo ataize lo-deloneꞌ nene  
\q1 azasi aꞌmineꞌmine ogo neze aleve nizamave lo lo-ledeleseive.   
\q1
\v 13 Eiꞌ gamazi lo nolidoꞌ nene gele hulosa ataize ngelo lamilineꞌ nenako  
\q1 nemuꞌ nene laza ezemuꞌ gele eleꞌvoleꞌ ogo mino  
\q1 eꞌmetelone loloneꞌ gamaziloꞌ ma gele damoloneꞌ nene  
\q1 aza neve olove lilineꞌ gamaziloꞌ nene mo gele do ogakovoꞌ oloseive.   
\s1 Lo-gimuvoniꞌ Initekumuꞌ Lo-ngemo Monokumuꞌ Lovo Lolize Amilizave Lo-ngedo Gasika Gono Do Hehe Lo Do Oꞌmosoꞌmo Ninge Lamineꞌ Ilidoꞌ Lisiheꞌ O Minezo Lo Pauloꞌ Timoteoꞌni Lo-imineꞌ Gamazi  
\p
\v 14 Aꞌmine noluvoniꞌ gamazi mene lo gaꞌine ogo lo-ngemo monoꞌ gamazimuꞌ nene lovo lolize amilizave lo Oꞌmosoꞌmi veleloꞌ nene gaꞌine do lo-ngedezo. Neꞌmino lovo lolize ogaꞌ neꞌmo nene initeꞌ gihile ma do sotoꞌ amosa asi aꞌmine lolize gamazi gililizave nene ngeleꞌmize goloso oloseive.  
\v 15 Gaza geiꞌ nene Oꞌmosoꞌmo ningivoo gonouꞌ ve lisiheꞌ mino gono daaꞌ monovoꞌnemuꞌ novozo helamolodoꞌ minelove lo gono amuzo molo do mino gamazi gihile nene do hehe lo izeꞌ molo lo-ngemezo.  
\v 16 Eveneꞌ malite haza monoꞌ gihile nomineꞌ gamazi laaꞌ naniꞌ nene gele hulo mehenga emezo. Neꞌmine gamazi liꞌmi vaaꞌ naadiꞌmo nene monoꞌ hulilizadoꞌ mini milikevo  
\v 17 aꞌmine laaꞌ naniꞌ gamazi neꞌmo nene huso goloso okodeloꞌ naba oꞌmo vo pelaaꞌ neineꞌ huso neꞌmino eveneꞌ linge mukita vosa mo ngeleꞌmize goloso oloseive. Adoꞌ neꞌmine gamazi laaꞌ aveutiꞌ nene Himenaeoki Hiletoki nene nizasive.  
\v 18 Aꞌmine ve sitaꞌ netise nene hele noloningutiꞌ otaaꞌ nene luteliꞌmo mo otaniꞌ nenako nemuꞌ nene gohi ma otamolosune lisa monoꞌ gamazi gihilelotiꞌ nene zovoꞌ izi visa eveneꞌ lingeliti monoꞌine nene di gopo i-ngidikesive.  
\v 19 Neꞌmine ikesiha Oꞌmosoꞌmo gamazi gihileloꞌ do lehete o-ngedo do ote-ngidiveti mulise nene eleꞌvoleꞌ ogo neivo initeꞌ maliꞌmosi do gabeꞌ osaꞌmive. Idoꞌ aꞌmidoꞌ nene monovoꞌve tiꞌ lo gize neive:  
\q1 Guvelesi ve aza eiꞌ evenele nene mo ningo gele neive.  
\m Idoꞌ ma nene:  
\q1 Guvelesi veꞌmi gulive igi eiꞌ evenele none laaꞌ nave mukiꞌ nene  
\q1 monovo golosomuꞌ olovoꞌ ilisave.   
\p
\v 20 Guvelesi ve maliꞌmi numuꞌve nabauꞌ somo lapese nevoꞌmine initeꞌ nene initeꞌ lamineꞌ ngolidunukisi siluvadunukisi liliꞌ aniꞌ initekovoꞌ minaaꞌ neivoba asi haza niteꞌ zadunuꞌ nehe misubodunuꞌ nehe liliꞌ aniꞌ initekisi nene ha minaaꞌ neive. Linge ma meniꞌve dize minineꞌ initetunuꞌ liliꞌ aniꞌ initeꞌ nene gono initeꞌ laminekumuꞌ neive. Idoꞌ haza nitetunuꞌ liliꞌ aniꞌ initeꞌ nene haza gonolokumuꞌ nene gopo minaaꞌ neive.  
\v 21 Neꞌmine ogaꞌ neinako eveneꞌ malite lo-gimuvoniꞌ goloso niteꞌ nene haza lapese gili minangutiꞌ golovoꞌ izi ma di hulilizaniꞌ nene ingine aꞌmine meniꞌve dizo minineꞌ lapese neꞌmine liliꞌ igi Guvelesi veꞌmo ato atoꞌ gono laminetoꞌ ngeleꞌmize molalidoꞌ di lisiheꞌ igi mini eiꞌ kekeize initeꞌve gono daaꞌ ilineꞌ initeꞌve neꞌmine mini mili minilisave.  
\v 22 Nemuꞌ nene gaza umungive gosoꞌve lavoꞌine lemaaꞌ neineꞌ initekumuꞌ nene lavonga lemamivo golise ogo mehenga emosa gaza luꞌninguꞌ goloso monovo nomivo mini Guvelesi vela likaꞌ likaꞌ igi ezeloꞌ lehete i minave mukikisi nene makaꞌ bizo mino lisiheꞌ lamineꞌ minaaꞌ monovosi idoꞌ Guvelesi vemuꞌ gele eleꞌvoleꞌ ogaꞌ monovosi idoꞌ lute ngemaaꞌ monovosi idoꞌ hongu lo lamino minaaꞌ monovosi nene imiselo dalosa amuzo molozo.  
\v 23 Idoꞌ gihileꞌve nomineꞌ getipe gamazi adoꞌ gamazi monovo gilamavete laaꞌ naniꞌ gamazi neꞌmine li monoꞌ monovomuꞌ gamazidunuꞌ ge hulo ne hulo laaꞌ neꞌmo nene lovo lolize do sotoꞌ ogaꞌ neineꞌ nene mo gele naneꞌ ma neive. Nemuꞌ nene gaza aꞌminguꞌ vo holamo mehenga emezo.  
\v 24 Guvelesi veꞌmi gelekeleꞌ ve nene lovo lolize amilizadoꞌ i mini asi eveneꞌ mukita alahaꞌ igi hongu gamazi li-ngimi mini apizi ngimiliza monovoꞌine nene laminekisi mini gehe gehe izi ngimi mini  
\v 25 engiꞌ gamaziꞌine bililisa igaꞌ ave nene hongu monovo di sotoꞌ i-ngidi minisa di hehe li-ngidilizaniꞌ o neive. Neꞌmine ikevo luꞌine di velepeꞌ izi gamazi gihile nene gili lamineꞌ ilizadoꞌ Oꞌmosoꞌmo ngeleꞌmize molalihe losa noluve.  
\v 26 Neꞌmine ogavosa Satani aza eiꞌ gelekeleꞌ i-dilizave lo do eita o minavo gelevusoꞌveliꞌmo do miningutiꞌ nene apasisa lukuvo nalisave.   
\c 3  
\s1 Alingeꞌ Gameneuꞌ Monovo Goloso Ato Atoꞌ Sotoꞌ Ogo Naba Ogo Buu Lilingumuꞌ Pauloꞌ Timoteoꞌni Lo-imineꞌ Gamazi  
\p
\v 1 Ne neiha naza ma lo-gemeloze. Gele minezo. Alingeꞌ gamenela nene lihiteheꞌ initeꞌ sotoꞌ o-ledelineꞌ gamene gehepeve sotoꞌ oloseive.  
\v 2 Aꞌmine noluvoniꞌ nene adoꞌ eveneꞌ engikumukovoꞌ gilaaꞌ idoꞌ monimukovoꞌ gilaaꞌ idoꞌ engiꞌ igi mili iliza nitekumuꞌ okoꞌine di naba igi laaꞌ idoꞌ engikumuꞌ gilavo dizaaꞌ, eveneꞌ dovo ledevoꞌ o-ngedaaꞌ, izeꞌningi meꞌningi gamazi gili hulaaꞌ, initeꞌ lamineꞌ i-ngidavemuꞌ gilavo haza niteꞌ loloꞌ ogaꞌ, monoꞌ luꞌninguꞌ nomineꞌ minaaꞌ,  
\v 3 idoꞌ engiꞌ zuhomukisi ngumo helesaꞌmivo minaaꞌ, eveneꞌ mamuꞌ lihime di minaaꞌ, ngemenga laaꞌ, okoꞌnine luꞌnidoꞌ gizebo ami gopo minaaꞌ, ize gulo suno di eveneꞌ di goloso i-ngidaaꞌ, monovo laminekumuꞌ ngumo helamivo minaaꞌ,  
\v 4 engiꞌ zuho biluvaliti aꞌninguꞌ ngeleꞌmizi milaaꞌ, initeꞌ bubu izi di goloso igaꞌ, engikumuꞌ gilavo dizaaꞌ, idoꞌ Oꞌmosoloꞌ luꞌine milaaꞌ naniꞌ nene ivileꞌ ivosa okoꞌineꞌmo laniteꞌ gelaaꞌ neineꞌ initetoꞌ luꞌine milaaꞌ,  
\v 5 nevoꞌmine manaꞌmine monovo nene mo ha di sotoꞌ ilisave. Idoꞌ monoꞌ nene vi gilaaꞌ ilizaha okoꞌine losuvolotikovoꞌ gili mini monoꞌ nene luꞌninguꞌ amuzo molo gihileꞌve do sotoꞌ ilingumuꞌ nene oꞌve li monoliꞌmi amuzo nene vasa izilisave. Nemuꞌ nene gaza aꞌmine neꞌmine manaꞌmine vesi nene bizami olovoꞌ ogo minezo.  
\v 6 Neꞌmine luvoniꞌ nene nemuꞌ luve: Engikutiꞌ nene ve malite eveneꞌ goꞌine izi numuꞌninguꞌ dizi aꞌminguꞌ veneꞌ monokuꞌ luꞌine gilizevo o vivo mini okoꞌnidoꞌ lihime monovo vaiꞌ dizivo okoꞌineꞌmo laniteꞌ gilineꞌ initeꞌ ato atoꞌ neꞌmo ngimimiseꞌ ogo do novivo minaaꞌ aniꞌ veneꞌ nene luꞌninguꞌ hizi di giꞌmizaaꞌ nave.  
\v 7 Aꞌneꞌmine veneꞌ nene gamazi lamineliꞌmi monovo nene gelelone li gamene gamene amuzo milaaꞌ naniꞌza gamazi gihile nene ngeli ma ningi gililizadoꞌ minisaꞌmave.  
\v 8 Idoꞌ Halaoꞌ luso veꞌve setaꞌ Zaneki Zabeleki ingine Moseꞌ gamaziꞌve diꞌmi limilisa asidiꞌmine igi noluve ingine mene gamazi gihile diꞌmi limilisa igaꞌ nave. Ingine nene luꞌine gaꞌine unuvo ogo goloso o vineꞌ neivo mini ingine Oꞌmosoꞌmo gilivo lisiheꞌ amineꞌ monokumukovoꞌ gili eleꞌvoleꞌ igaꞌ nave.  
\v 9 Neꞌmine igaꞌ naha Zaneki Zabeleki monovoꞌine sotoꞌ ineꞌ neꞌmino aꞌmine luve nesi negi hizaniꞌ monovoꞌine nene sotoꞌ ogavo eveneꞌ mukiꞌ nene ningi gililisanako aꞌmine eveneꞌ goꞌine izaaꞌ aniꞌ nene gohi goꞌine iziꞌmi vilizadoꞌ minamilisave.   
\s1 Timoteoꞌ Nene Monoꞌ Monovo Apize Imunidoꞌ Eꞌmete Lamineꞌ Ilive Losa Pauloꞌ Gala Daniꞌ Gamazi  
\p
\v 10 Ne neiha geiꞌ neve nene neniꞌ monoꞌ apize ngemaaꞌ ogo ogo molo ogaꞌ uvoniꞌ monovoꞌnesi idoꞌ gono do gihile do sotoꞌ olosa giluvongumuꞌ nesi nene mo ningo geleꞌmo geleꞌmo nane. Idoꞌ Kilisitoꞌnimuꞌ gele eleꞌvoleꞌ o mino hongu lo mino luꞌne ngemaaꞌ ogo mino mulumo geni ha geheꞌmo vo minaaꞌ nouvongumuꞌ nesi nene mo ningo geleꞌmo geleꞌmo ogo nane.  
\v 11 Idoꞌ eveneꞌ goboni malaꞌ malaꞌ i-nidi nizavo neꞌmi mulumo geni naba Adiokia numuno ebekukisi Ikonio numuno ebekukisi Lisitila numuno ebekukisi geheꞌmo vuvoniꞌ monovo nene gasika mo gele nane. Ee, idoꞌ aꞌmine geni initeꞌ mukiliti lulouꞌ minuvodotiꞌ nene Guvelesi veꞌmo alete molo-nedavo lukuvo nosa nouve.  
\v 12 Idoꞌ eveneꞌ laza Izesu Kilisitoda giꞌmizo mino monoꞌ monovoloꞌ eꞌmetovoꞌ minelone losa neꞌmine ogo minelonive mukiꞌ nene goboni mili-lidavo aꞌmine neꞌmine geni mulumo initeꞌ nene gehamolonivoba mo geheloneꞌ o neive.  
\v 13 Ne neiha eveneꞌ goloso soza monoꞌ li eveneꞌ goꞌine izaaꞌ ave nene Sataniꞌmo goꞌine izavosa ingine aꞌmineꞌmine igi eveneꞌ goꞌine iziꞌmi vi mini goloso naba iꞌmi iꞌmi vi minilisave.  
\v 14 Neꞌmine igi minilisaha geiꞌ neve nene aꞌmine gele naneꞌ monoꞌ apize gimunive leiꞌ monovote nene mo ningo gele naneꞌ nenako nemuꞌ aꞌmine geiꞌ gele mino gele muꞌmusiꞌ o naneꞌ monoꞌ maloꞌ nene do ngi lo do minezo.  
\v 15 Idoꞌ ma mesi nene gele naneꞌ ma neive. Adoꞌ gomuꞌ izipe ngomolotiꞌ monoꞌ godoloutiꞌ gamazi geleꞌmo geleꞌmo ogosa do madungauꞌ molo osuꞌ lo nane. Idoꞌ aꞌmine monoꞌ godoloutiꞌ gamazi neꞌmo nene lukuvo nalinidoꞌ geleꞌmize molalidoꞌ o neive. Ee, aꞌmine gamazi do madungauꞌ molanidiꞌmo gaza gamazi monovo gele vevesosa Izesu Kilisitoꞌnimuꞌ gele eleꞌvoleꞌ ilinidoꞌ o neineꞌ nenako neꞌmo nene Oꞌmosoꞌmo do guꞌ izelidoꞌ geleꞌmize molaloseive.  
\v 16 Monoꞌ godoloutiꞌ gamazi mukiꞌ nene Oꞌmosoꞌmo eveneꞌ maduꞌninguꞌ molo zatuhoꞌ o-ngedavo gizaniꞌ neineꞌ nenako nemuꞌ aꞌmine gamazi neve nene monoꞌ monovo apize ngemelonidokisi idoꞌ gopo ladani igaꞌ avesi lihime davesi monovoꞌine ngelebizo do lisiheꞌ o-ngedo ngeleꞌmize akaloꞌ olonidokisi idoꞌ monovo lisihekovoꞌ igi mili ilizaniꞌ monovo apiꞌ napiꞌ o-ngemelonidoꞌ nesi nene lisiheꞌ lamineꞌ o neive.  
\v 17 Neꞌmine olonidoꞌ lisiheꞌ o neineꞌ nene Oꞌmosoꞌmi gelekeleꞌ ve laza nene do lisiheꞌ gehepeve oko mino gono lamineꞌ ato atoꞌ mukiꞌ nene dalonidoꞌ mo lisihekovoꞌ o mineloningumuꞌ ve losa neꞌminosa neineꞌ neive.   
\c 4  
\s1 Pauloꞌ Timoteoꞌ Gono Dalingumuꞌ Nene Gohi Amuzo Molo Gala Dosa Naza Heleloniꞌ Gamene Nene Mo Avitoꞌ Ogave Lo Lo-imineꞌ Gamazi  
\p
\v 1 Izesu Kilisitoꞌ nene tineꞌ molo ogo Guvelesi ve naba loloꞌ ogo gizebo o-ledelingumuꞌ nene naza gaꞌne gele mino gaka dalove. Oꞌmosoꞌmi velelokisi idoꞌ hilaniꞌ alevesi idoꞌ ha minilizaniꞌ alevesi gonitoꞌ leleꞌmize molo izeꞌ molo-ledelive aꞌmine Izesu Kilisitoꞌ eiꞌ velelokisi nene gaka do tiꞌ lo nolo-giduve:  
\v 2 Gaza gamazi lamineꞌ nene lo sotoꞌ ogo lo-ngemezo. Ee, gili gimilizaniꞌ gameneloꞌ nolihe gili gimamilizaniꞌ gameneloꞌ nolihe ha lo-ngemovoꞌ mino goseleꞌ gebelamivo apize ngemeꞌmo vo mino gaꞌine do monoꞌ nene gihile neive lo ngelebizo lihimeꞌinemuꞌ nene ngelemo luꞌine do ngii lo-ngedezo.  
\v 3 Idoꞌ gamazi neꞌmino lo-ngemezo noluvoniꞌ nene ingine monoꞌ gamazi gihilemuꞌ goseleꞌ ngebelavo gelesoꞌ ngisamivo angiseꞌine laniteꞌ gili gililizaniꞌ gamazimuꞌ nene gaꞌninguꞌ huhu lavo aꞌmine laniteꞌ gili gililiza gamazi nene apizi ngimilizave vaiꞌ ngeleꞌmizi di igi hitilizaniꞌ gamene ma aloseinako nemuꞌ nene luve.  
\v 4 Neꞌmine igi gamazi gihile nene meheꞌine imi zovoꞌ izi vi gihileꞌve nomineꞌ gamazi heluno neꞌmine maloꞌ nene giꞌmizilisave.  
\v 5 Neꞌmine ilisaanaze. Geiꞌ neve nene negi hizo ladani amo gaka gele ngevoꞌ lo mino monoliꞌmi geni mulumo sotoꞌ ilineꞌ nesi nene ha geho mino monoꞌ gamazi lamineꞌ lo sotoꞌ ogo lo-ngemaaꞌ gono nene ha do mino gono geitoꞌ hulo neineꞌ gono nene mo vaiꞌ doovoꞌ minezo.   
\p
\v 6 Naza neꞌmine gamazi mene nolo-gimuvoniꞌ nene neniꞌ vaniseꞌne nene mo apiꞌ igi lepilisa navo neniꞌ osuꞌ lo voloniꞌ gameneꞌne nene mo alite neivosa noluve. Idoꞌ vaniseꞌne neꞌmino lepeloniꞌ nene Oꞌmosomuꞌ ve li vaini noso lepi hulaaꞌ naniꞌ neꞌmino lepe hulolosuve.  
\v 7 Naza monoꞌ lesisi laminekuꞌ nene amuzo molo lotiꞌ izo vo makiloꞌ mo hetelekuve. Monoꞌ gihilelotiꞌ nene zovokisi izamo mo eꞌmete osuꞌ lokuve.  
\v 8 Idise melotiꞌ alingeꞌ neve nene monovo lisihetoꞌ eꞌmetaaꞌ avete daaꞌ naniꞌ meni nene nenikumuꞌ gizebo ogo neive. Aꞌmine meni initeꞌ nene monovo lisihetoꞌ izeꞌ molo-ledaaꞌ neineꞌ zasi Guvelesi ve neꞌmo nene gamene nabala nemeleseive. Idoꞌ nemelineꞌ nene nenikovoꞌ nemelivoba asi eiꞌ alingumuꞌ luꞌine mili minave mukikisi nene ngemavo dalisave.   
\s1 Pauloꞌ Ezesi Makaꞌ Gono Dave Huli-di Vangumukisi Idoꞌ Goniꞌ I-dangumukisi Timoteoꞌni Nolo-emo Ano Lo-dineꞌ Gamazi  
\p
\v 9 Gaza nenita liteꞌ lo alineꞌ aka nene amuzo molo ma do sotoꞌ ogo ano.  
\v 10 Demaꞌ neve nene me misubouꞌ minineꞌ initetoꞌ lulo molosa neniꞌ nene hulo-nedo Tesalonika numuno ebeta vavo idoꞌ Kelesekeꞌ nene Galatia misubouko vavo idoꞌ Titoꞌ nene mo Dalamatia misubouko vavosa nene noluve.  
\v 11 Lukaꞌ nevoꞌ nene nenikisi makaꞌ nosive. Idoꞌ Malekoꞌ neve nene gelekeleꞌ ogo hize eleꞌ lamineꞌ o-nedaaꞌ neineꞌ nenaze. Alininguꞌ nene eleꞌmizo makaꞌ alizo.  
\v 12 Idoꞌ Tikikoꞌni nene mo Eheso numuno ebeta imisele hulokuvo vogave.  
\v 13 Idoꞌ gaza alininguꞌ nene naza Toloasi numuno ebekuꞌ Kalipoꞌ neida ponisa hulo uvoniꞌ masi nene do-nedo ano. Idoꞌ bukuꞌne masi nene do ano. Adoꞌ aꞌmine bukuꞌneutiꞌ nene ize losuvoloꞌ luhuvo gizaniꞌ pepa ma nene initeꞌ naba nenaze. Aꞌmine nene gaka molavo hulo ogaline.   
\p
\v 14 Vapadunuꞌ initeꞌ ato atoꞌ loloꞌ ogaꞌ ive Alekisadeloꞌ neꞌmo monovo goloso nene vaiꞌ goloso o-nidive. Aza ogo molo idoꞌ nene Guvelesi veꞌmo golo hizo lihime emeleseive.  
\v 15 Idoꞌ aza leliꞌ laaꞌ nouneꞌ gamazite nene amuzo molo molovoꞌ hitevoꞌ ogo minineꞌ nenaze. Geikisi nene gamazika molovo hitevoꞌ ogalize. Eikumuꞌ nene eheꞌ ogo gizebo lamineꞌ ozo.   
\p
\v 16 Ganaꞌ apiꞌ igi gonitoꞌ neleꞌmizi milaniꞌ gameneuꞌ nene eveneꞌ hamolitesi neniꞌ gamaziꞌneloꞌ hize eleꞌ ma i-nidamave. Mukitoꞌ mo huli-nidi vikeve. Nemuꞌ neꞌmi lihime nene Oꞌmosoꞌmo do-ngede minamiliho losa noluve.  
\v 17 Neꞌmine aniꞌza Guvelesi ve nene nenikisi mino amuzo nemo hize eleꞌ o-nidineꞌ neꞌmo laza lo sotoꞌ ogaꞌ nouneꞌ gamazi nene naza lo sotoꞌ ogo lo-ngeme osuꞌ lokuvo heta atoꞌ ve mukiꞌ nesi nene gilaniꞌ ve. Idoꞌ neꞌmine ogo Guvelesi ve neꞌmo Loma vete nibili hililisa angutiꞌ nene alete molo do hulo-nedavo lukuvo nuve.  
\v 18 Idoꞌ di goloso i-nidilisa ilizaniꞌ initeꞌ mukikutiꞌ nene Guvelesi veꞌmo alete molo-nedo lukuvo nemo Okulumokuko eiꞌ gizebo o neinguꞌ nene neleꞌmize do voloseive. Nemuꞌ nene eze opoꞌni lo mineloneꞌ nene huko vamivo ha minevo minevoꞌ ogo minelineꞌ nene mo neꞌmino miniliho.   
\s1 Pauloꞌ Eveneꞌ Ma nGopoꞌni Lo Luhuvo Niteꞌ Gize Osuꞌ Lineꞌ Gamazi  
\p
\v 19 Neniꞌ nene Pilisikilaꞌnisi Akuilaꞌnisi idoꞌ Onesiholoꞌ numuꞌveuꞌ ingaaꞌ aniꞌ aleve nesi nene ngopoꞌni noluze. Lo-ngemezo.  
\v 20 Elasitoꞌ nene Kolidi numuno ebeta nene ha minive. Idoꞌ Tolohimoꞌ nene initeꞌ gize do neivosa Mileto numuno ebekuꞌ nene hulo-dosa uvoniꞌ ve.  
\v 21 Hepeꞌ gamene olihe amidoꞌ nene gaza alineꞌ aka amuzo molo viseꞌ ogo do sotoꞌ ogosa ano. Idoꞌ Eubouloꞌ nesi Poudeꞌ nesi Linoꞌ nesi Kalaudiaꞌ nesi idoꞌ leze zuho mukiꞌ nesi nene gopoꞌni nilave.   
\p
\v 22 Idoꞌ Guvelesi ve nene geiꞌ sikalahukasi minivo. Idoꞌ Oꞌmosolatiꞌ nasahiliꞌ nene lengita minivo. Moda aꞌnesiꞌ ve.