\id 2PE  - Dano NT [aso] -Papua New Guinea 1989 (DBL -2014) 
\h 2 PETOLOꞌ 
\toc1 Petoloꞌ Izesuꞌ Zuho Miniꞌmi Monave Gize-Ngidineꞌ Luhuvo Niteꞌ Naba 2 
\toc2 2 Petoloꞌ 
\toc3 2 Pet 
\mt1 PETOLOꞌ IZESUꞌ ZUHO MINIꞌMI MONAVE GIZE-NGIDINEꞌ LUHUVO NITEꞌ NABA 2  
\imt1 Petoloꞌ Izesuꞌ Evenele Zuho Naba Tu Luhuvo Niteꞌ Gize-ngidingumuꞌ Gomuꞌ Gataaꞌ Gamazi  
\ip Mene luhuvo niteꞌ nene aposoloꞌ Petoloꞌ gizineꞌ ve. Eiꞌ monovoꞌvemuꞌ nene Mataioꞌ ve Malekoꞌ ve Lukaꞌ ve Zohaneꞌ ve gizaniꞌ buku setaꞌve setaꞌveukisi idoꞌ aposoloꞌ bukuukisi nene gatelesane. Gohi eikumuꞌ nene naba vanu luhuvo nitekumuꞌ gomuꞌ gataaꞌ gamazi gizuningukisi nene gatelesane. Laza gele noneꞌ nene Petoloꞌ aza nene luhuvo niteꞌ gizidotiꞌ gamene haꞌna minamivo Loma velite bili hilaniꞌ ve lo gele none. Aꞌmine luhuvo niteꞌve nene eikisi idoꞌ eikisi makaꞌ minavesi gili eleꞌvoleꞌ aniꞌ neꞌmini gili eleꞌvoleꞌ i minave nene gizo ngimineꞌ. Izesuꞌ evenele zuho gehepeve minaniꞌ mukikumuꞌ nolineꞌza alingeꞌ luhuvo niteꞌveuꞌ nene tiꞌ lo lineꞌ: Mene naba tu luhuvo niteꞌ nene aꞌmine alevemuꞌ gize-lingiduve lo lineꞌ nenako nemuꞌ aꞌmine mene luhuvo niteꞌve nesi nene aꞌmine gomuꞌ gize-ngidive gehepevevoꞌ gize-ngidineꞌ gelave. Gaꞌine laminekovoꞌ gililizave lo gala gelo tiꞌ lo lineꞌ: Aꞌmine luhuvo niteꞌve gizineꞌ monovo initeꞌ linge mamuꞌ lo gaꞌine olosa gizuve lineꞌ.  
\ip Minevoꞌ alevoꞌine lamineꞌ minelive lo Oꞌmosoꞌmo viseꞌ aniꞌ initeꞌ nene ngeme neive lo lo gaꞌine ogo ne gamazitunuꞌ apiꞌ ogo gizineꞌ. Idoꞌ Oꞌmosoꞌmo neꞌmine ineꞌ nemuꞌ nene ingine Izesuꞌnimuꞌ gili eleꞌvoleꞌ igaꞌ aniꞌ monovoꞌnidoꞌ imineꞌ mili neꞌmine monovosi di minilizave. Adoꞌ lisiheꞌ gehepeve minaaꞌ idoꞌ monokumuꞌ gaꞌine gili vevesaaꞌ idoꞌ Oꞌmosomuꞌ gilii okoꞌine luꞌnidoꞌ gizebo igaꞌ idoꞌ monokuꞌ amuzo mili geni gihi di vi minaaꞌ idoꞌ engiꞌ zuho Izesuꞌ evenele luꞌine ngemaaꞌ idoꞌ eveneꞌ ato atoꞌ vaiꞌ luꞌine ngemaaꞌ monovo nesi nene di minilizave lineꞌ. Neꞌmine monovo di minilizaniꞌ neꞌmo ingine Guvelesi vemuꞌ gilaniꞌ nene gihile izeleseive. Idoꞌ neꞌmine monovoloꞌ eꞌmetilizaniꞌ nelotiꞌ nene Guvelesi ve Izesuꞌ Kilisitoꞌ gizebo o neinguꞌ moꞌmosiꞌine nene minamilivoba asi mo mineleseive.  
\ip Neꞌmine lo tiꞌ lo lineꞌ: Heleloniꞌ gamene nene mo avitoꞌ oganako nemuꞌ helekuvo aꞌmine lo-ngimuvoniꞌ initekumuꞌ nene gaꞌine molalinako mo lo gaꞌinevoꞌ ogo minelesuve lineꞌ.  
\ip Asiꞌvesi idoꞌ eveneꞌ linge masi Kilisitoꞌnimuꞌ li-ngimaniꞌ nene mo laminetoꞌ ve lo lo-ngimineꞌ. Oꞌmosoꞌmo lavo Kilisitoꞌnidoꞌ atoliꞌmine initeꞌ sotoꞌ ineꞌ nene ingine Kilisitolesi makaꞌ mini mo ninganiꞌ. Aꞌmine neꞌmine initeꞌ sotoꞌ idiꞌmo ingine polohetelite gizaniꞌ initekumuꞌ nene gili eleꞌvoleꞌ i minadoꞌ nene gohi gili eleꞌvoleꞌ gehepeve aniꞌ. Monoꞌ Godolouꞌ gizaniꞌ gamazi nene evenelite gaꞌningutiꞌ gili gizaniꞌ nevoba asi Oꞌmosoꞌmi Sikalahuliꞌmo luꞌninguꞌ gono davo gizaniꞌ ve.  
\ip Ne neineꞌza Petoloꞌ tiꞌ lo lineꞌ: Gozopoꞌ nene soza polohete minaniꞌ nenako luhuvo niteꞌve gatilizaveliti vovoꞌninguꞌ nesi minilisave lineꞌ. Aꞌmine soza poloheteliti monovo lo sotoꞌ ogo tiꞌ lo lineꞌ: Ingine initeꞌ vaiꞌ dalisa gili monovo goloso di mini eveneꞌ mukiꞌ nene engiꞌ monovoꞌnidoꞌ ngeꞌmetilizave li goꞌine izi ngeleꞌmize gopo igaꞌ nave. Neꞌmine ilizaniꞌza Oꞌmosoꞌmo lihime daniꞌ angelokisi idoꞌ Noaꞌ minineꞌ gameneuꞌ minaniꞌ alevesi idoꞌ Sodomi idoꞌ nGomola ebekuꞌ minaniꞌ alevesi lihime ngimineꞌ neꞌmine ogo aꞌmine soza polohetesi lihime ngemeleseive. Aꞌmine soza monoꞌ apizi ngimaaꞌ ave nete engiꞌ gamaziloꞌ eꞌmetilizaveliti luꞌninguꞌ nene tiꞌ li hizaaꞌ nave: Initeꞌ maliꞌmo adidoꞌ do akaꞌine hize tile-lengedamivo lengiꞌ lutidoꞌ gehepeve ha igi mili minilisave. Neꞌmine laaꞌ naha angiseꞌine initeꞌ maliꞌmo aꞌnidoꞌ damivo lamineꞌ haza minisaꞌmave. Adoꞌ monovo goloso ato atoꞌ nete engiꞌ aꞌnidoꞌ di giliꞌ gehepeve li nizavo aꞌmine monovoliti gelekeleꞌ ve liliꞌ igi nizave. Aꞌmine monovo goloso nete di goloso i-ngidikevo simeꞌ nalisave lineꞌ. Neꞌmine lo tiꞌ lo hungoꞌ ngimineꞌ: Izesuꞌ evenele zuhoutiꞌ eveneꞌ aꞌmine soza polohetelite ngeleꞌmize gopo ilizave nene Kilisitoꞌnimuꞌ olihe gilamaniꞌ gameneuꞌ goloso igi minaniꞌ nesi ivileꞌ ivosa goloso gehepeve ilizadoꞌ minilisave lineꞌ.  
\ip Nelotiꞌ nene ingine eveneꞌ ma Guvelesi ve mo ngelo tineꞌ molo amoloseive li laaꞌ avemuꞌ nene eheꞌ igi minilizave lo lo-ngimineꞌ. Aꞌmine ve ingine tiꞌ li lilisave: Oꞌmosoꞌmo Okulumoꞌ misubo do sotoꞌ moladotiꞌ nene initeꞌ hamolitesi senisi amaniꞌ nenako alingetasi ngeli ma senisi amilisave. Neꞌmine lilisaniꞌza Petoloꞌ aza ingine goline izevoꞌ izevoꞌ neivo nosoliꞌmo misubo mukiꞌ hite osuꞌ lingumuꞌ nene gaꞌine molaniꞌ neive lineꞌ. Oꞌmosoꞌmo aꞌmine gameneuꞌ minineꞌ misubo do goloso ineꞌ nenako mo laminetoꞌ initeꞌ ma do senisi ineꞌ ve. Idoꞌ alingeꞌ eveneꞌ goloso ezemuꞌ gilamave goniꞌ o-ngedo do goloso o-ngedo me misubo olokuꞌ gize osuꞌ lilineꞌ gamenelasi initeꞌ mataꞌ do senisi oloseive.  
\ip Neꞌmine lo imineꞌ molo tiꞌ lo lineꞌ: Oꞌmosoꞌmo Guvelesi ve alineꞌ gamene do haꞌna neineꞌ nene eveneꞌ ingine luꞌine di velepeꞌ izi lukuvo nalizangumuꞌ nene gamene ngemelesamukovoꞌ nene do haꞌna neive lineꞌ. Ne neiha Guvelesi ve mo aloseive. Eveneꞌ ingine aloseive li gilamaniꞌ gameneloꞌ ogo heteleleseive. Aꞌmine gameneloꞌ nene initeꞌ mataꞌ nene olokuꞌ lo osuꞌ lavo gohi minamoloseive lineꞌ. Idoꞌ neꞌmine oloseiha Oꞌmosoꞌmo okulumoꞌ gosohokisi misubo gosohokisi lemelove lo lo huko-lede neive. Aꞌminguꞌ nene monovo lisiheꞌ laminekovoꞌ mineleseive lineꞌ.  
\ip Nemuꞌ nene ingine Oꞌmosoꞌmi veleloꞌ monovo lisiheꞌ lamineꞌ igi mili minilisa amuzo mili minilizave lo Petoloꞌ lo-ngimineꞌ. Ingine Guvelesi ve alingumuꞌ gizebo i nizaniꞌ gamenemuꞌ nene tiꞌ li gililizave lineꞌ: Leliꞌ lukuvo naloningumuꞌ leme neive. Idoꞌ Pauloꞌ aza eiꞌ luhuvo niteꞌve gizinguꞌ nene hamoliꞌmine gamazi gize neineꞌ ve lo lo gaꞌine ineꞌ. Idoꞌ Pauloꞌ gizineꞌ gamaziutiꞌ gamazi linge maliꞌmi monovo nene sotoꞌ lamineꞌ amivo geꞌnebe ogovoꞌ gelaaꞌ noune. Neꞌmino neineꞌ nenako eveneꞌ malite aꞌmine gamaziꞌmi monovo di atoꞌ igi li sotoꞌ igaꞌ nave. Neꞌmine igaꞌ ave nene Oꞌmosoꞌmo lihime ngemeleseive lineꞌ. Neꞌmine lo hungoꞌ ngemo aꞌmine eveneꞌ goloso nete ngeleꞌmize gopo ikelizanako nemuꞌ nene gili ngimami asi Kilisitodatiꞌ minineꞌ ngemeni dameni di amuzo mili eiꞌ Guvelesi ve Izesuꞌ Kilisitoꞌ monovoꞌvemuꞌ gilaaꞌ nene di naba ilizave lo idoꞌ Kilisitoꞌ aza dizovoꞌ minelive lo Oꞌmosola lo luhuvo niteꞌve nene gize osuꞌ lineꞌ ve.  
\c 1  
\s1 Petoloꞌ Luhuvo Niteꞌ Mene Gizelesa Apiꞌ Ogo Noꞌnohoꞌ Gamazi Gize-ngidineꞌ Gamazi  
\p
\v 1 Adoꞌ Izesu Kilisitoꞌ gonouꞌ ve idoꞌ aposoloꞌve minuve Simeoniꞌ guliveꞌne gohi ma Petoloꞌ naza lengiꞌ luhuvo niteꞌ mene nogize-lingiduve. Adoꞌ Oꞌmosotesi idoꞌ do luꞌ izaaꞌ ivesi minive Izesu Kilisitoꞌ aza ve lisiheꞌ minidiꞌmo nene lelikisi lengikisi do miliseꞌ ogo do lisiheꞌ o-ledosa hamoliꞌmine monovo adoꞌ ezemuꞌ gele eleꞌvoleꞌ ogaꞌ monovo lamineꞌ nene leliꞌ limineꞌ neꞌmino lengikisi lehize-lengedavo di nizave lengiꞌ nene nogize-lingiduve.  
\v 2 Idoꞌ lingine Oꞌmosomukisi Guvelesi ve Izesuꞌnimukisi gili lamineꞌ igi gili minaaꞌ ilizadotiꞌ nene Oꞌmosoꞌmi nasahiliꞌ monovo nesi idoꞌ hongu lo lamino minaaꞌ monovo nesi nene lengita mine vaiꞌ loꞌmo vo miniliho.   
\s1 Gele Eleꞌvoleꞌ Ogaꞌ Monovoloꞌ Nene Monovo Lamineꞌ Linge Ma Neꞌminesi Nene Imineꞌ Mili Igi Mili Ilizaniꞌ Neꞌmo Nene Monoliꞌmi Gihile Gehepeve Di Sotoꞌ Ikevo Guvetesi Ve Izesuꞌ Gizebo O Neinguꞌ Vi Hilalizaniꞌ Amuzo Nene Vauve Elo Lehize-lengedeleseive Lo Lo-ngimineꞌ Gamazi  
\p
\v 3 Oꞌmosoꞌmo leliꞌ nene monotoꞌ eꞌmetovoꞌ mino minevoꞌ alevoꞌ ogo minelonidoꞌ do lisiheꞌ o-ledelineꞌ monovo mukiꞌ nene lehize-lede neive. Idoꞌ aꞌmine lehize-lede neineꞌ monovo daloneꞌ nene aza leliꞌ vise lo-ledo do eita ive eikumuꞌ nene laza ningo gele lamineꞌ ogo gele minaaꞌ olonidotiꞌ nene dalosunako nemuꞌ nene lehize-lede neive. Idoꞌ aꞌmine vise lo-ledo do eita iveꞌmo neꞌmine o-lidineꞌ nene eiꞌ labanaꞌvesi idoꞌ eiꞌ monovoꞌve lamineꞌ atoliꞌmine ogo neineꞌ nesi nene di tiꞌ ilizave losa vise lo-ledo do eita ineꞌ ve.  
\v 4 Neꞌmine ogosa aza lo huko-ledekineꞌ gamazi ma nene do gihile noizo monovo lamineꞌ goloso dizo minineꞌ nene lehize-lede neive. Idoꞌ neꞌmine ineꞌ nene me misubouꞌ aleveti luꞌine otavosa laniteꞌ gilaaꞌ naaniꞌ monovo igaꞌ nadiꞌmo luꞌine do goloso ogaꞌ neineꞌ initekutiꞌ lingine olovoꞌ ilizadotiꞌ nene Oꞌmosoꞌmo eiꞌ emeni dameni neꞌmine nene izeꞌ molo lengemavo di minilizangumuꞌ nene neꞌmine ineꞌ ve.  
\v 5 Idoꞌ neꞌmine ineꞌ nenako nemuꞌ nene lingine ezemuꞌ gili eleꞌvoleꞌ igaꞌ naaniꞌ monovotidoꞌ nene imineꞌ mili mo lamineꞌ goloso gehepeve minaaꞌ monovoloꞌ nene monokumuꞌ gatineꞌ gili vevesaaꞌ monovo nesi igi mili minilisa nene amuzo goloso milalo.  
\v 6 Idoꞌ aꞌmine gatine gili vevesaaꞌ monovoloꞌ nene okodine lutidoꞌ gizebo igaꞌ monovo nesi igi mili minilisa nene amuzo goloso milalo. Idoꞌ aꞌmine okodine lutidoꞌ gizebo igaꞌ monovoloꞌ nene monokuꞌ amuzo mili geni gihi di dizi minaaꞌ monovo nesi igi mili minilisa nene amuzo goloso milalo. Idoꞌ aꞌmine monokuꞌ amuzo mili geni gihi di dizi minaaꞌ monovoloꞌ nene monoꞌ avazahasivoꞌ igi mili igaꞌ monovo nesi igi mili minilisa nene amuzo goloso milalo.  
\v 7 Idoꞌ aꞌmine monoꞌ avazahasivoꞌ igi mili igaꞌ monovoloꞌ nene lengiꞌ zuho Izesuꞌ evenele lutine ngimaaꞌ monovo nesi igi mili minilisa nene amuzo goloso milalo. Idoꞌ aꞌmine lengiꞌ zuho Izesuꞌ evenele lutine ngimaaꞌ monovoloꞌ nene eveneꞌ atoꞌ atoꞌ vaiꞌ lutine ngimaaꞌ monovo nesi igi mili minilisa nene amuzo goloso milalo.  
\v 8 Neꞌmine monovoloꞌ amuzo goloso mili igi mili ilizave noluvoniꞌ nene aꞌmine neꞌmine monovo lengita mine hutileꞌ ogo minelineꞌ neꞌmo nene lingine Guvetesi ve Izesuꞌ Kilisitoꞌnimuꞌ ningi gili minaaꞌ naaniꞌ nene hazamuꞌ neivo neꞌmi gihile lengita izamilivoba asi mo ize lamineꞌ oloseinako nemuꞌ nene noluve.  
\v 9 Eveneꞌ ma ingine meuko luvoniꞌ monovoloꞌ igi mili minamilizave neti luꞌineꞌmi vele nene mo ngenge ogosa like minaaꞌ neive. Neꞌmine ogavosa Oꞌmosoꞌmo gomuꞌ lihimeꞌine daniꞌ gilite-ngidineꞌ mamuꞌ nene mo gaꞌine molaniꞌ gele vivo gopo nizave.  
\v 10 Nemuꞌ nene neze zuhokizo, Oꞌmosoꞌmo lengiꞌ do kegese-lengedo vise lo-lengedo do eita ineꞌ nene di eleꞌvoleꞌ gehepeve ilisa lingine amuzo gohi gohi miliꞌmi dizivoꞌ minilo. Neꞌmine ilizave lo noluvoniꞌ nene nanitekumuꞌ ve. Lingine nene adoꞌ meuko luvoniꞌ initeꞌ igi mili minilizaniꞌ neve nene mo monokutiꞌ mo kekeꞌ ngeli limi ingamilisave.  
\v 11 Ee, neꞌmine ilizaniꞌ neve nene Guvetesi vesi idoꞌ do luꞌ izaaꞌ ivesi minive Izesuꞌ Kilisitoꞌ gizebo o-ledo minevoꞌ minevoꞌ ilinguꞌ nene vi hilalizaniꞌ amuzo vauve elo lehize-lengedeleseive.   
\p
\v 12 Neꞌmine o neineꞌ nenako nemuꞌ nene naza meuko nolo-lingimuvoniꞌ initekumuꞌ nene gohi lo gatine okaꞌ okaꞌ olosa gele nouve. Ee, aꞌmine initekumuꞌ nene mo gili mini adoꞌ lengita omo neineꞌ gamazi gihileloꞌ nene mo giꞌmizi giliꞌ li nizaniꞌza aꞌmine initekumuꞌ nene ha mo lo gatine okaꞌ okaꞌ olosa gele nosa nene noluve.  
\v 13 Ee, naza gamene liꞌnibemukovoꞌ me misubouꞌ okoꞌnesi nouvoniꞌ gamenela mene aꞌmine meuko luvoniꞌ initekumuꞌ nene gohi lo gatine ogo lutine do ote-lengedeloniꞌ neꞌmo nene lisiheꞌ oloseive lo gele nosa neꞌmine nouve.  
\v 14 Ne nanitekumuꞌ ve. Guvetesi ve Izesuꞌ Kilisitoꞌ aza heleloniꞌ monovomuꞌ lo sotoꞌ ogo lo-nimineꞌ maloꞌ nene do gihile izo aꞌmine me misubouꞌ okoꞌne do huloloniꞌ gamene nene mo avitoꞌ ogave lo gele nouvoniꞌ nemuꞌ nene noluve.  
\v 15 Naza osuꞌ lokuvo lingine aꞌmine luvoniꞌ initeꞌ mene gamene gamene omo gatidoꞌ gatidoꞌ ivo ha gili minaaꞌ ilizangumuꞌ ve loo aka vele-lengedelesa nene amuzo molalosuve.   
\s1 Oꞌmosoꞌmi Labanaꞌve Izesuꞌ Kilisitoda Sotoꞌ Ogavo Vete Gihiledunuꞌ Ninguneꞌ Neꞌmo Polohetelite Laniꞌ Gamazi Nene Gamazi Gihile Neive lo Gele Nonge. Linginesi Aꞌmine Gamazi Nene Gili Dalizadoꞌ O Neive Lo Lo-ngimineꞌ Gamazi  
\p
\v 16 Laza Izesuꞌ Kilisitoꞌ amuzoꞌvemukisi idoꞌ alingumukisi lo-lingimuneꞌ nene heluno gamazi ma gili nge li mini ladoꞌ nene eꞌmetosa lo-lengemamune. Asi aꞌmine amuzoꞌve atoliꞌmine minineꞌ monovoꞌve nene leliꞌ vete gulo neꞌmo ningavosa nene lo-lingimuneꞌ ma neive.  
\v 17 Adoꞌ labanaꞌve nabaꞌ nabasi minivelatiꞌ gamazi tiꞌ lo ezela limineꞌ gamenela nene laza aꞌmida mino ningo gele minuneꞌ ve: Neniꞌ voꞌneloꞌ gipeꞌne hamo me ve nene neive. Eikumuꞌ nene naza laniteꞌ lamineꞌ nogiluve lo meleho Oꞌmosoꞌmo do naba o-do opoꞌni lineꞌ ve.  
\v 18 Idoꞌ aꞌmine Oꞌmosoꞌmi labanaꞌve sotoꞌ ineꞌ gololoꞌ nene Izesukisi minunidoꞌ aꞌmine Okulumokutiꞌ limineꞌ gamazi nene leliꞌ gehepeve aposoloꞌ lingesi giluneꞌ ve.  
\v 19 Idoꞌ neꞌmino gilunidotiꞌ polohetelite laniꞌ gamaziloꞌ gele muꞌmusiꞌ ogaꞌ uneꞌ maloꞌ nene gohi nabosa gele muꞌmusiꞌ gehepeve uneꞌ ve. Neꞌmine uneꞌ nenako linginesi nene aꞌmineꞌmine igi polohetelite laniꞌ gamaziloꞌ ma gili dalizaniꞌ nene mo lamineꞌ oloseive. Aꞌmine gamazi nene litiꞌmuso ebekuꞌ lamuliꞌmo labanaꞌ ele neineꞌ neꞌminosa ne neive. Neꞌmino labanaꞌ elo neivo goꞌ lolosa goꞌ nuvonuvo neivo sonohiꞌ ganangomeꞌ dizaaꞌ neineꞌ neꞌmino Izesuꞌ nene gohi sotoꞌ ogo lutinguꞌ hize labanaꞌ gehepeve eleleseive.  
\v 20 Idoꞌ lingine polohetelite laniꞌ gamazi gili dalizaniꞌ o neineꞌ nenako naza tiꞌ lo lo-lengemeloniꞌ gamazi nene initeꞌ naba neize. Aꞌmine gamazimuꞌ nene gili minisavoꞌ polohetelite laniꞌ gamazi nene gili dalisave: \f + \fr 1:20 \ft Monoꞌ godolouꞌ gamaziꞌmi monovo li sotoꞌ igaꞌ ave linge malite nene aꞌmine Petoloꞌ gizineꞌ gamaziꞌmi monovo nene atoꞌ gohi ma neꞌmino neive li laaꞌ nave: Aꞌmine polohetelite laniꞌ gamazi monoꞌ godolouꞌ neineꞌ mukiꞌ nene eveneꞌ hamolitesi neꞌmi monovoꞌve angiseꞌine engiꞌ gaꞌningutikovoꞌ li sotoꞌ ilizadoꞌ minamave. Aꞌmine monoꞌ gilave neꞌmine laniꞌ neve nene Petoloꞌ aza Oꞌmosoꞌmi Sikalahuliꞌmo ngelebizavosa eitatikovoꞌ gilisa aꞌmine polohetelite laniꞌ gamaziꞌmi monovo nene li sotoꞌ ilizaniꞌ o neive lo lineꞌ ve li laniꞌ ve.\f* Aꞌmine polohetelite laniꞌ gamazi monoꞌ godolouꞌ neineꞌ mukiꞌ nene polohete hamolitesi angiseꞌine gaꞌningutiꞌ gamazi ma li sotoꞌ aniꞌ nene nomive.  
\v 21 Ee, polohetelite laaꞌ aniꞌ gamazi neꞌmine nene haza eveneliti luteloꞌ nene eꞌmeto mo kekeꞌ sotoꞌ osaꞌmive. Asi eveneꞌ Oꞌmosoꞌmi gamazi laaꞌ aniꞌ nene Oꞌmosoꞌmi Sikalahuꞌ neꞌmo zatuhoꞌ o-ngedavosavoꞌ nene Oꞌmosoꞌmi veleutiꞌ gamazi laaꞌ aniꞌ ve.   
\c 2  
\s1 Soza Polohete Gomuꞌ Minaniꞌ Neꞌmine Soza Monoꞌ Apizi nGimaaꞌ Ave Alingeꞌ Sotoꞌ Ilizaditi Monovo Lo-ngemo Aꞌmine Ve Nene Oꞌmosoꞌmo Do Goloso O-ngedo Lihime nGemelingumuꞌ Petoloꞌ Lo-ngimineꞌ Gamazi  
\p
\v 1 Ne neiha gomuꞌ nene Oꞌmosoꞌmi eveneleliti vovoꞌninguꞌ nene soza polohetesi sotoꞌ igi minaaꞌ aniꞌ ve. Neꞌmine igaꞌ aniꞌ neꞌmine igi lengiꞌ vovotingukisi nene soza monoꞌ apizi lingimilizave sotoꞌ igi minilisave. Engiꞌ nene monovoꞌine di haleki mini lengeleꞌmize goloso ilidoꞌ o minelineꞌ soza monoꞌ nene li sotoꞌ igisa engiꞌ meni hize-ngidive Guvelesi ve nesi nene meheꞌine imilisave. Idoꞌ neꞌmine ilizadotiꞌ nene Oꞌmosoꞌmo upuhoꞌ niteꞌ ngiso do goloso o-ngedeleseive.  
\v 2 Idoꞌ ingine neꞌmine manaꞌmine monovo goloso gopo igaꞌ ilizaniꞌ monovoꞌnidoꞌ nene eveneꞌ mukiꞌ ngeꞌmetilisave. Nemuꞌ nene evenelite monoꞌ aka gihile nene diviꞌ lediviꞌ ilisave.  
\v 3 Aꞌmine soza monoꞌ apizi lingimilizave nene initeꞌ gohi gohi dalone lii soza gamazi li-lingimilizadotiꞌ nene lengitatiꞌ moni geleleheꞌ ilisave. Oꞌmosoꞌmo gozopoꞌ akaꞌmila aꞌmine ve lihime ngemelesa lineꞌ nene hazamuꞌ ma lamive. Aꞌmine gamazi lokivo neineꞌ nene okise ongamo ha neivo mo do goloso gehepeve o-ngedeleseive.   
\p
\v 4 Oꞌmosomuꞌ nene tiꞌ lo gele none: Angeloꞌ linge ma lihime daniꞌ nene iseꞌine izivoba asi seni nalaꞌ ize-ngedosa lihime ngemeloniꞌ gamenemuꞌ gizebo igi litiꞌmusoukovoꞌ minilizave lo galese naba mo homiuꞌ gehepeve ngimisele neive.  
\v 5 Idoꞌ ma nene tiꞌ lo gele none: Gamene akaꞌmila minaniꞌ alevesi iseꞌine izamo eveneꞌ goloso misubo vaikuꞌ miniꞌmi monaniꞌ mukiꞌ nene nosodunuꞌ molo hite-ngedo ngebele geseꞌ ineꞌ ve. Neꞌmine ineꞌza aꞌmine gameneuꞌ nene eveneꞌ eiti (8) adoꞌ monovo lisihekumuꞌ lo soto sotoꞌ ogaꞌ ive Noakisi idoꞌ eveneꞌ gohi sevenisi nene alete molo do nguꞌ izineꞌ ve.  
\v 6 Idoꞌ ma nene tiꞌ lo gele none: Sodomi alevesi nGomola alevesi idoꞌ numuno ebeꞌine nesi nene Oꞌmosoꞌmo lihime ngemo do velepeꞌ izo lenehevoꞌ miniliza akaloꞌ ngeleꞌmize molavo neꞌmine aniꞌ ve. Neꞌmine ineꞌ nene ezemuꞌ gilamave sotoꞌ o-ngedeli initeliꞌmi avazaha neꞌmine do sotoꞌ ineꞌ ve.  
\v 7 Neꞌmine ogo aza ve lisiheꞌ Lotiꞌni nene aꞌmine ve goloso ingine monovo goloso iꞌmi angumuꞌ nene muluno hukidiꞌmo lulo zovoꞌ izo miningutiꞌ nene do uꞌ izineꞌ ve.  
\v 8 Ee, aꞌmine ve lisiheꞌ engiꞌ vovoꞌninguꞌ mino ingine monovo lamineꞌ avutokovoꞌ iꞌmi iꞌmi vi nizangumuꞌ nene ningo geleꞌmo vineꞌ neꞌmo eze lulo lisihekuꞌ nene gamene gamene mulumo geni naba beleꞌmo beleꞌmo vo minineꞌ ve.  
\v 9 Idoꞌ Oꞌmosomuꞌ neꞌmine lo gele noneꞌ nenako nemuꞌ nene laza tiꞌ lo gelelesune: Guvelesi ve aza eveneꞌ lisiheꞌ ngemenguꞌ sotoꞌ o ngemelingutiꞌ do nguꞌ izaaꞌ monovomuꞌ nene gele mino eveneꞌ goloso nene lihimeꞌine abeleni ogo ngemeꞌmo vo mino mukitoꞌ goniꞌ o-ledelineꞌ gamenemuꞌ gizebo ogo lihimeꞌine do minaaꞌ monovo nesi nene mo gele neive.  
\v 10 Idoꞌ aꞌmine lihime ngemelive engikutiꞌ nene okoꞌineꞌmo laniteꞌ gilineꞌ monovo goloso gehepeveloꞌ eꞌmeti mini eveneꞌ nabaꞌmi gizeboloꞌ mini gamaziꞌve gili di minaaꞌ monovomuꞌ goseleꞌ igaꞌ ave nene lihime naba ngemeleseive.  
\p Aꞌneꞌmine ve adoꞌ aꞌmine soza monoꞌ laaꞌ ave engiꞌ nene gamazi gilami hokolizeꞌ igi engiꞌ luꞌnidokovoꞌ igaꞌ ave mini hozila dizi minave nabamuꞌ nesi nene ngehelele izamivo mini engiꞌ nesi nene diviꞌ lediviꞌ i-ngidaaꞌ nave.  
\v 11 Neꞌmine igaꞌ naha Oꞌmosoꞌmi angeloꞌ nete aꞌmine nene ngivileꞌ igi mini eveneꞌ naba amuzoꞌinesi nizaniꞌza ingine neve nene diviꞌ lediviꞌ i-ngidi Guvelesi vela goniꞌ i-ngidisaꞌmave.  
\v 12 Ne neiha aꞌmine ve nene ize gulo idoꞌ nama gaha gaꞌine nomivo minaniꞌ adoꞌ evenelite ngimiselo ngebelaaꞌ idoꞌ ngebelaaꞌ olonidoꞌ sotoꞌ igi minaaꞌ naaniꞌ neꞌmini mini ingine gilamaniꞌ initekumuꞌ nene diviꞌ lediviꞌ igi laaꞌ nave. Nemuꞌ nene ize gulo nama gaha ngebelaaꞌ nouneꞌ neꞌmine ogo Oꞌmosoꞌmo aꞌmine ve nene do goloso gehepeve o-ngedeleseive.  
\v 13 Ee, eveneꞌ di goloso ilizadoꞌ nene Oꞌmosoꞌmo golo hizo do goloso o-ngedeleseive. Aꞌmine soza monoꞌ laaꞌ avete gilavo labanaꞌ ele minineꞌ gameneloꞌ nosoꞌ niteꞌ naba nii noso niꞌmi vi minaakumuꞌ nene laniteꞌ goloso ve li gilaaꞌ nave. Ingine lengikisi makaꞌ nosoꞌ niteꞌ ni mini di gopoꞌnapa i-lingidi gotine izaaꞌ naangumuꞌ nene ngolize izi mini lengiꞌ muliseuꞌ nene longovozo hililiza niteꞌ goloso liliꞌ ikeve.  
\v 14 Ingine veneꞌ ma ninganiꞌ nene ma duvo lii gumine dikaꞌ dikaꞌ igi lihime daaꞌ monovo nene engitatiꞌ osuꞌ losaꞌmivo monokuꞌ amuzoꞌine nomive nene lihime monovouꞌ ngimimiseꞌ igi di vaaꞌ igi mini mumuzoꞌ ogaꞌ monovomuꞌ apiꞌnapiꞌ igi save naba di minaniꞌ nenako nemuꞌ nene Oꞌmosoꞌmo usiꞌ ize-ngedelidoꞌ i nizave.  
\v 15 Ingine aka lisiheꞌ nene huli vi gopo igi nimonaniꞌ nene Bosoleꞌ gipele Balaamuꞌ vineꞌ akaloꞌ nene eꞌmetikeve. Adoꞌ monovo golosolotiꞌ meni dalingumuꞌ umo hilive maꞌmi monovoloꞌ eꞌmetikevosa nene noluve.  
\v 16 Aꞌmine Balaamuꞌ neꞌmo nene monovo lamineꞌ avutoꞌ ingumuꞌ Oꞌmosoꞌmo elemineꞌ ve. Aꞌmine elemineꞌ nene gamazi lamaaꞌ ineꞌ initeꞌ dongi ize neꞌmo nene eveneꞌ laaꞌ nouneꞌ noloutiꞌ gamazi lo-emo aꞌmine poloheteliꞌmo negi initeꞌ olosa ingutiꞌ nene do oꞌove lo-dineꞌ ve.   
\p
\v 17 Aꞌmine soza monoꞌ laaꞌ ave nene noso hinipinikuꞌ gokoꞌ lavo haza galesevoꞌ minaaꞌ neineꞌ neꞌminesi idoꞌ hepeliꞌmo limuso hubu lo do vavo goline izamaaꞌ neineꞌ neꞌminesi nene nizaniꞌ nenako neꞌmo nene monokuꞌ ma hize eleꞌ i-lidisaꞌmave. Nemuꞌ nene Oꞌmosoꞌmo litiꞌmuso atoliꞌmine ogo ize minineꞌ ebekuꞌ vi hilalisave lo aꞌmine litiꞌmuso ebeꞌ nene salani molo-ngede neive.  
\v 18 Neꞌmine noluvoniꞌ nene nemuꞌ noluve: Ingine gamazi naba gele vineꞌ gihileꞌve nomineꞌ gamazi li eveneꞌ ma ladeni igi igi mili minaaꞌ nave engikutiꞌ idise aꞌmene olovoꞌ nave nene okodeꞌmo laniteꞌ gelaaꞌ neidoꞌ gopo geligeli igi eꞌmeti minaaꞌ monovo nedunuꞌ nene gohi ngimimiseꞌ igaꞌ nave.  
\v 19 Aꞌmine ve ingine aꞌmine ngimimiseꞌ aniꞌ aleve nene tiꞌ li li-ngimaaꞌ nave: Leliꞌ leꞌmetilizaniꞌ nene lingine initeꞌ maliꞌmosi nene igi mili ilizaniꞌ akatine nene hize tile-lengedamivo goboni ve neꞌmine ma minamilisave. Neꞌmine li li huki-ngidaaꞌ naaniꞌza engiꞌ neve nene leleꞌmize tolovo ogaꞌ initeꞌ monovo goloso neꞌmo nene aꞌnidoꞌ davo neꞌmi goboni ve mini milikeve. Idoꞌ goboni ve minikeve noluvoniꞌ nene initeꞌ maliꞌmo zatuhoꞌ o-ngidivo aꞌmine initeꞌ igi mili igaꞌ ilizave neve nene mo aꞌmine initeliꞌmi goboni ve liliꞌ i nizaniꞌ nenako nemuꞌ nene noluve.  
\v 20 Ee, eveneꞌ malite Guvetesi ve do luꞌ izaaꞌ ive Izesuꞌ Kilisitoꞌnimuꞌ giladotiꞌ nene me misubouꞌ minineꞌ monovo goloso eveneꞌ lute do goloso o-ledaaꞌ neidotiꞌ nene olovoꞌ igisa gohi aꞌmine monovouꞌ vi hili mutuho ngatuho igi minilizaniꞌ nene gomuꞌ goloso igi minilizadoꞌ mini milaniꞌ ma nene ivileꞌ ivosa alingeꞌ nela nene di goloso gehepeve igi minilizadoꞌ mini mili minilisave.  
\v 21 Ee, Oꞌmosoꞌmo lo-lidineꞌ gamazi ma li-ngimikevo gilisa aꞌmine gamazi gili huli meheꞌine ma imadoꞌ nene golo hizo lihime atoliꞌmine ogo ngemelidoꞌ o neineꞌ nenako ingine nene aꞌmine aka lisihekumuꞌ nene ma gilami minadiniko aꞌmine lihime do dizo ngemelineꞌ votigilelotiꞌ nene lemosa lihime ngemelidoꞌ minadinako neꞌmo nene mo lamineꞌ ngomo ma idine.  
\v 22 Aꞌmine neꞌmine ve nene monoꞌ godolouꞌ tiꞌ li gizikaniꞌ maloꞌ nene vo miliseꞌ ogave:  
\q1 Gulo neꞌmo muso velo do hulineꞌ initeꞌ nene gohi vo naaꞌ neive.  
\m Idoꞌ ma nene:  
\q1 Ize nene nosouꞌ ongo-dekunivo gohi vo gohikuꞌ gomo gomo izo ongaaꞌ neive.   
\c 3  
\s1 Eveneꞌ Malite Guvelesi Ve Nene nGelo Alihe Li Ha Lilizaha Eiꞌ Gamaziꞌve Do Gihile Izo Mo Aloseize. Lingine Aꞌmine Alingumuꞌ Gizebo Igi Nizanguꞌ Nene Lengiꞌ Monovotidoꞌ Gizebo Lekeseve Igi Mini Monovo Lisiheꞌ Laminekovoꞌ Igi Mili Minilo Lo Petoloꞌ Lo-ngimineꞌ Gamazi  
\p
\v 1 Luꞌne lengeme nouvoniꞌ alevekizo, luhuvo meve nene gohi naba tuu luhuvo nene nogize-lingiduve. Aꞌmine luhuvo sitakuꞌ mene lingine lutinguꞌ gatinguꞌ gilaaꞌ naaniꞌ nene mo lisiheꞌ laminekovoꞌ gililizangumuꞌ nene gamazi ma lutine do ote-lengedo lo gatine nouve.  
\v 2 Aꞌmine gamazi nene Oꞌmosoꞌmi polohetelite alingeꞌ sotoꞌ ilineꞌ initekumuꞌ li sotoꞌ aniꞌ gamazi nesi idoꞌ Guvetesi ve mino do luꞌ izaaꞌ ive minive Izesu Kilisitoꞌ lo-lidineꞌ gamazi lengiꞌ aposolotinete li-lingimaniꞌ nesi nene gililizave lo lo gatine nouve.  
\v 3 Initeꞌ naba nene adoꞌ tiꞌ li gililizangumuꞌ noluve: Gamene alingeꞌ nela nene eveneꞌ engiꞌ luꞌnidokovoꞌ eꞌmeti mini monokumuꞌ gize abelenga laaꞌ ave ma igi tiꞌ li  
\v 4 lilisave: Aza tineꞌ molo alosuve lo lo huko lineꞌ neꞌmi gihileꞌve ma nene zaaꞌ sotoꞌ ive. Adoꞌ metemote nesi nene gizebo igi mini hilikeniꞌza initeꞌ mukiꞌ nene ma do atoliꞌmine amivo Okulumoꞌ misubo ganaꞌ sotoꞌ idotiꞌ nene hamoliꞌminevoꞌ ogo mine do novineꞌ nenako ngelo alihe.  
\v 5 Neꞌmine laaꞌ naaniꞌza adoꞌ mene lo-lengemeloniꞌ gamazimuꞌ nene gelalone li gaꞌine hizi ngi likeve: Adoꞌ Oꞌmosoꞌmo lavo Okulumoꞌ nene gozopoꞌ akaꞌmila sotoꞌ ivo misubo nesi nene nosoutiꞌ sotoꞌ ogo noso veleta galaꞌmuda minavo olusoꞌ minineꞌ ve.  
\v 6 Idoꞌ aꞌmine noso neꞌmo nene aꞌmine gameneloꞌ minineꞌ misubo nene molo hito do goloso ineꞌ mamuꞌ nene gaꞌine molavo initeꞌ mukiꞌ nene ma senisi amave laaꞌ nave.  
\v 7 Idoꞌ aꞌmine Oꞌmosoꞌmo lo neineꞌ gamazi neꞌmo nene aꞌmine idise nizasineꞌ Okulumokisi misubosi nene ololiꞌmi minani neꞌmine mini monoꞌ gilamave lihime ngemelineꞌ gamene nabamuꞌ nene gizebo ha nizasive lo neineꞌ ve.   
\p
\v 8 Luꞌne lengeme nouvoniꞌ alevekizo, initeꞌ hamoꞌ aꞌmene lo-lengemeloniꞌ gamazi nemuꞌ nene gilami minikelizave: Adoꞌ Guvelesi veꞌmo gamenemuꞌ gelaaꞌ neineꞌ nene do atoꞌ ogo gelaaꞌ neive. Aza neve nene gamene liꞌnibe gamene hamoꞌ neꞌminemuꞌ nene gelavo gamene haꞌna goloso kilisimasi vanu tauseni (1,000) neꞌmine minineꞌ gelaaꞌ neive. Idoꞌ gamene haꞌna kilisimasi vanu tauseni neꞌminemuꞌ nene gelavo gamene liꞌnibe gehepeve gamene hamoꞌ neꞌmine minineꞌ gelaaꞌ neive.  
\v 9 Eveneꞌ malite Guvelesi ve alosa lo huko lineꞌ gamazi do gihile izelingumuꞌ nene zou zou gohi lave li gilaaꞌ naniꞌ nene ladani igi gilikeve. Aza nene zou zou lamive. Asi eveneꞌ hamokisi vi tolovo ilizave lo gelamo mukitoꞌ nene luꞌine di velepeꞌ izilizahoo lo lengikumuꞌ nene goseleka lamo ha gizebo o neive.  
\v 10 Neꞌmine ogo neiha gumineloꞌ ve alisave lo gelamuneꞌ gameneloꞌ igi hetelaaꞌ naniꞌ neꞌmino aꞌmine Guvelesi ve alineꞌ gameneꞌve nene sotoꞌ oloseive. Aꞌmine gameneuꞌ Okulumoꞌ neve nene gugu lo vo haha oloseive. Idoꞌ aꞌminguꞌ initeꞌ mataꞌ mukiꞌ nene ololiꞌmovoꞌ lovoꞌ lovotevoꞌ o-ngidivo haza niteꞌ gidilisave. Idoꞌ misubo nesi idoꞌ aꞌminguꞌ di sotoꞌ naaniꞌ initeꞌ mukiꞌ nesi nene ololiꞌmo ningeleseive.  
\v 11-12 Neꞌmino ololiꞌmo initeꞌ mataꞌ mukiꞌ nene ninge osuꞌ lavo apile osuꞌ lilidoꞌ o neineꞌ nenaze. Aꞌmine Oꞌmosoꞌmi gamene nabamuꞌ gizebo igi minilizanguꞌ nene aꞌmine gamene nene geto ogo hetelelingumuꞌ ve li Oꞌmosoꞌmi evenele gehepeve mini monokuꞌ monovo laminetokovoꞌ eꞌmeti minilizadoꞌ o neive. Adoꞌ aꞌmine Okulumoꞌ nene ololiꞌmo lovo apilevoꞌ neivo aꞌminguꞌ miniꞌmi monaniꞌ initeꞌ mataꞌ nene lala lilizaniꞌ gamenemuꞌ nene noluve.  
\v 13 Idoꞌ neꞌmino lo osuꞌ loloseineꞌza aza lo huko lo-lidineꞌ gamazi do gihile izo monovo lisiheꞌ laminekovoꞌ minelineꞌ Okulumoꞌ atoliꞌmine gosohokisi misubo atoliꞌmine gosohokisi do sotoꞌ o-ledeleseive lo aꞌminemuꞌ gilingili ogo gizebo ogo none.   
\p
\v 14 Nemuꞌ nene luꞌne lengeme nouvoniꞌ alevekizo, aꞌmine initekumuꞌ gilingili igi gizebo igi minilizanguꞌ nene Guvelesi ve ogo ningelineꞌ nene laza luteuꞌ goloso monovo nomivo idoꞌ okodeloꞌ gamazi nomivo mino hongu lo nonivo ningelive li aꞌmidokovoꞌ amuzo mili minilo.  
\v 15 Idoꞌ Guvelesi ve aza geto amo gizebo ha ogo neingumuꞌ gililizaniꞌ nene aza eveneꞌ gohi ma do luꞌ izelingumuꞌ nene neꞌmine ogo neive lisa nene gili minilo. Leze zuho lute eme nonive Pauloꞌni Oꞌmosoꞌmo gele nge lo minaaꞌ monovo lehize-didoꞌ do molo azasi nene aꞌmine mene luvoniꞌ gamazi neꞌminesi nene mo luhuvo gize-lingidineꞌ ma neive.  
\v 16 Idoꞌ luhuvo niteꞌ mukiꞌ eiꞌ gizinguꞌ nene aꞌmine neꞌmine initekumuꞌ gizidaa gizida nene aꞌmine hamoliꞌmine gamazi memuꞌ nene mo azasi hamoꞌ gamazivoꞌ gizeꞌmo vo neive. Idoꞌ aꞌmine luhuvo niteꞌ gizeꞌmo vinguꞌ nene gamazi linge ma monovoꞌve geto gele lamineꞌ amolonidoꞌ o minineꞌ gamazi nesi nene gize neive. Neꞌmino neineꞌ nenako monoꞌ monovo gili vevesami luꞌine amuzo molamive ingine monoꞌ godolouꞌ gamazi lingeꞌmi monovo nesi nene di zovoꞌ zavaꞌ izaaꞌ naadiꞌmine igi aꞌmine Pauloꞌ gamaziꞌve nesi nene aꞌmineꞌmine igi di zovoꞌ zavaꞌ izaaꞌ nave. Neꞌmine igaꞌ naadotiꞌ nene angiseꞌine meniꞌine goloso nene di sotoꞌ igaꞌ nave.  
\v 17 Nemuꞌ nene luꞌne lengeme nouvoniꞌ zuhokizo, lingine aꞌmine neꞌmine ilizangumuꞌ nene mo gili nizaniꞌ ma neize. Lingine monokuꞌ lamineꞌ mine ngi li nizangutiꞌ nene monoꞌine nomivete di zovoꞌ zavaꞌ izaaꞌ naaniꞌ monovoꞌine neꞌmo nene geleleheꞌ o-lengedavo limi ingikelizaze. Eheꞌ igi ningisa minilo.  
\v 18 Neꞌmine igi mini Guvetesi ve do luꞌ izaaꞌ ive Izesuꞌ Kilisitoꞌ ninge lamineꞌ ogaꞌ neineꞌ monovoloꞌ eꞌmetaaꞌ naaniꞌ nene gohi di naba iꞌmi vi mini eze monovo danavaꞌve nesi nene gili ngoloꞌ liꞌmi vi minilo. Eita guvele sotoꞌ ogaꞌ neineꞌ monovoꞌve nene minevo minevoꞌ ogo idisesi alingetasi mine do vo minilihoo. Mo neꞌmino minelive.  
\p Moda aꞌnesiꞌ ve.