\id 1TI  - Dano NT [aso] -Papua New Guinea 1989 (DBL -2014) 
\h 1 TIMOTEOꞌ 
\toc1 Pauloꞌ Timoteoꞌni Gize-Dineꞌ Luhuvo Niteꞌ Naba 1 
\toc2 1 Timoteoꞌ 
\toc3 1 Tim 
\mt1 PAULOꞌ TIMOTEOꞌNI GIZE-DINEꞌ LUHUVO NITEꞌ NABA 1  
\ip Pauloꞌ Timoteoꞌnimuꞌ Luhuvo Niteꞌ Setaꞌ Gize-dingumuꞌ Gomuꞌ Gataaꞌ Gamazi  
\ip Mene luhuvo niteꞌ setaꞌ nene aposoloꞌ Pauloꞌ gizineꞌ ve. Aꞌmine Pauloꞌ monovoꞌvemuꞌ nene Aposoloꞌ bukuuꞌ nene gatelesane. Idoꞌ Izesuꞌ Kilisitoꞌ evenele zuho Loma ebekuꞌ minaniꞌ neti luhuvo niteꞌ Pauloꞌ gize-ngidingumuꞌ gomuꞌ gataaꞌ gamazi gizuningukisi nene eiꞌ Pauloꞌ monovoꞌvemuꞌ nene ma gatelesane. Idoꞌ Pauloꞌ luhuvo niteꞌ setaꞌ mene gizineꞌ nene eiꞌ hize eleꞌ o-daaꞌ ive Timoteoꞌni nene gize-dineꞌ ve.  
\ip Timoteoꞌ nene Loma vete gizebo aniꞌ polovinisi Asia ve languꞌ Lisitila tauniutiꞌ ve minineꞌ. Timoteoꞌ meleho nene Izesuꞌ evenele minamive nGiliki veutiꞌ minineꞌza izeleho nene Zuda veneꞌ minineꞌ ve. Timoteoꞌ aza izipe ngomoloꞌ ha neivo izelehosi idoꞌ eleni izelehosi ingine monoꞌ godolo liteheꞌmo lokineꞌ gamazi mukiꞌ nene apizi imasineꞌ. Lisitila ebekuko Pauloꞌ aza ganaꞌ apiꞌ ogo vo Izesuꞌ gamaziꞌve lamineꞌ eveneꞌ lo-ngimineꞌ gameneuꞌ nene Timoteoki izelehoi ingine Izesuꞌ evenele zuho liliꞌ asineꞌ noloseive. Pauloꞌ aza Lisitila ebekuꞌ gohi vo ninge-ngedo tineꞌ molo volosa inguꞌ nene eiꞌ hize eleꞌ i-daaꞌ aveutiꞌ ve minelive lo Timoteoꞌni eleꞌmizo vineꞌ. Aꞌminemuꞌ nene Aposolo 16 neuꞌ nene gatelesane. Nelotiꞌ Timoteoꞌ aza Paulokisi makaꞌ monoꞌ Izesuꞌ gamaziꞌve lamineꞌ eveneꞌ lo-ngemaaꞌ gonoꞌveuꞌ nene hize eleꞌ o-dineꞌ. Idoꞌ Pauloꞌ aza luhuvo niteꞌ linge ma hulinguꞌ nene Timoteokisi nohulisive lo gizineꞌ. Adoꞌ Tesalonika aleveliti luhuvo niteꞌ naba vanu naba tu neukisi idoꞌ Kolidi aleveti luhuvo niteꞌ naba tu neukisi idoꞌ Hilipi aleveti luhuvo nitekukisi idoꞌ Kolosa aleveti luhuvo nitekukisi idoꞌ Hilemoniꞌni luhuvo nitekukisi nene Timoteokisi nohulusive lo gizineꞌ ve. Idoꞌ Pauloꞌ aza Izesuꞌ evenele zuho Loma ebekuꞌ minaniꞌ luhuvo gize-ngidineꞌ lumola nene Timoteoꞌ aza aꞌmine alevemuꞌ ngopoꞌni lineꞌ. Hebilaioꞌ aleve luhuvo niteꞌ gizo hulo-ngidive neꞌmo aꞌmine luhuvo niteꞌve neꞌmi lumula nene tiꞌ lo lo neive: Timoteoꞌni nene nalaꞌ numunguꞌ miningutiꞌ imisele hulikeve. Neꞌmine lineꞌ nenako nemuꞌ nene laza tiꞌ lo gele none: Timoteoꞌ aza Izesuꞌ gamaziꞌve lamineꞌ lo sotoꞌ ogaꞌ ingumuꞌ nalaꞌ numunguꞌ huli-dikevo minineꞌ ve lo gele none. Idoꞌ neꞌmine i-daniꞌ nene gamene hamoꞌ i-dave lo gele noneꞌza gohi neꞌmine i-dahe i-damahe nemuꞌ ma gelamune. Loma vete Pauloꞌni bili hilikevo nelotiꞌ alingeꞌ Timoteoꞌ aza nadiꞌ ogo minihe nemuꞌ monoꞌ godolouꞌ ma gizi li-limamave. Gizi li-limamaha gozopoꞌ akaꞌmilatiꞌ liꞌmi aniꞌ gamazi ma tiꞌ lo neineꞌ ma neive: Timoteoꞌ aza Eheso ebekuꞌ mino Izesuꞌ evenele zuho aꞌmida minaniꞌ nene gizebo o-ngedo neivo kilisimasi mukiꞌ ogo vavo alingeꞌ nene Loma veti gizebo ve naba gulive Domitianiꞌ aza Izesuꞌ evenele zuho nene do osuꞌ lo-ngedelesa goboni molo-ngedaaꞌ ineꞌ gameneuꞌ nene eiꞌ Timoteoꞌnisi bili hilaniꞌ ve laniꞌ.  
\ip Lukaꞌ aza aposoloꞌ buku gize osuꞌ lineꞌ gamenela nene Pauloꞌ aza Loma ebekuꞌ nalaꞌ numunguꞌ kilisimasi sitaꞌ mino nelotiꞌ alingeꞌ nesi ha minineꞌ. Ne neineꞌza gozopoꞌ akaꞌmilatiꞌ liꞌmi aniꞌ gamazi ma tiꞌ lo neineꞌ ma neive: Nalaꞌ numungutiꞌ huli heta i-daniꞌza gohi mono Izesuꞌ gamaziꞌve lamineꞌ nene eveneꞌ lo-ngemo mo hota gehepeve minineꞌ misubo Sipeni nelasi vo lo-ngimineꞌ ve. Nelotiꞌ gamene haꞌna minamivo Loma ve nete nalaꞌ numunguꞌ gohi di huli-daniꞌ. Neꞌmine igi goniꞌ i-di luvono giti hulaniꞌ. Neꞌmine li liꞌmi aniꞌ gamazi nene eveneꞌ mukiꞌ mo laminetoꞌ neive li gili eleꞌvoleꞌ igaꞌ nave. Monoꞌ godolouꞌ minineꞌ gamaziꞌmi monovo gilaaꞌ ave mukiꞌ nene tiꞌ li gilaaꞌ nave. Pauloꞌ aza Timoteoꞌni luhuvo niteꞌ naba vanu gize-didotiꞌ nene gamene haꞌna ogo vamivo Loma vete nalaꞌ numunguꞌ huli-dikevo gamene setaꞌ ineꞌ ve li gilaaꞌ nave. Idoꞌ tiꞌ li gilaaꞌ nave: Idoꞌ aꞌmine nalaꞌ numunguꞌ mino Timoteoꞌni luhuvo niteꞌ naba tu gize-didotiꞌ nene gamene haꞌna ogo vamivo Loma ve nete bili hilaniꞌ ve li gilaaꞌ nave.  
\ip Idoꞌ Pauloꞌ aza Timoteoꞌni luhuvo niteꞌve naba vanu gize-dineꞌ gamenela nene Timoteoꞌ aza Eheso ebekuꞌ mino Izesuꞌ evenele zuho aꞌminguꞌ minaniꞌ nene gizebo o-ngedo minineꞌ ve. Pauloꞌ aza Timoteoꞌ Eheso ebekuko neida nene mo alosuvoniꞌza geto ma amoloniꞌ nene monoꞌ muliseuꞌ igi mili minilizaniꞌ monovomuꞌ nene gele mineline lo luhuvo niteꞌ mene nogize-giduve lo Timoteoꞌni gize-dineꞌ. Aꞌmine luhuvo niteꞌ nene eveneꞌ malite soza monoꞌ laaꞌ naniꞌ nene doꞌmo lemelineꞌ monovomuꞌ nene lo-imineꞌ. Adoꞌ veneꞌ daaꞌ veloꞌ vaaꞌ nene ami mini nosoꞌ niteꞌ mamuꞌ malise ilizave li laaꞌ aniꞌ gamazi doꞌmo lemelineꞌ monovomuꞌ nene lo-imineꞌ. Idoꞌ vemohoꞌ monoꞌ muliseuꞌ Oꞌmosola lilizaniꞌ nadi lilizahe idoꞌ veneꞌ nene okoꞌnidoꞌ initeꞌ di guni izilizaniꞌ monovomuꞌ lo-emo veneꞌ ingine vemoholiti gizebo veꞌine liliꞌ amilizave lo lo-imineꞌ. Idoꞌ monoꞌ muliseloꞌ gizebo ilingumuꞌ naniꞌmine ve di oti-dilizahe nemukisi lo-dineꞌ. Idoꞌ Kilisitoꞌ gonouꞌ ve lamineꞌ minelingumuꞌ ogo molo ilineꞌ monovomukisi lo-imineꞌ. Idoꞌ aꞌmida Izesuꞌ evenele zuho nizaniꞌ nete eiꞌ Timoteoꞌ ogo molo ilidotikisi idoꞌ gamazi lilidotikisi monovo lamineꞌ ningi dalizangumuꞌ nene lo-imineꞌ. Adoꞌ lulo eveneꞌ ngemo nasahiliꞌ o-ngedovoꞌ minilive idoꞌ gele eleꞌvoleꞌve nene minivo lihime monovolotiꞌ mine olovoꞌ ilive lo lo-imineꞌ. Idoꞌ eiꞌ gizeboꞌveuꞌ minave nene monoꞌ godoloutiꞌ gamazi gato lo-ngemo monoꞌ apize ngemaaꞌ monovo nene hulamo gamene gamene o-ngedelive lo lo-imineꞌ. Idoꞌ eveneꞌ ato atoꞌ adoꞌ veneꞌ nizahe vemohoꞌ nizahe ozoho nizahe eiꞌ gidini gosoꞌve nizahe nene eiꞌ o-ngemelineꞌ monovomuꞌ lo-imineꞌ. Idoꞌ veneꞌ gevonoꞌ minangutiꞌ mala nene monoꞌ muliseꞌmo mine lamineꞌ ilizangumuꞌ nene hize eleꞌ o-ngedo idoꞌ mala nene hize eleꞌ o-ngedamilive lo izeꞌ molo-ngedaaꞌ ilineꞌ monovomuꞌ lo-imineꞌ. Monoꞌ muliseloꞌ gizebo ve meni ngimilizaniꞌ monovomuꞌ lo-dineꞌ. Gonouꞌ ve ingine gizebo veꞌine nene gono di lamineꞌ igi di-ngidilizave. Idoꞌ aꞌmine gizebo veꞌine Izesuꞌ evenele zuho nizavo ma nene gono di lamineꞌ i-ngidilizaniꞌ nene initeꞌ naba neive lineꞌ. Idoꞌ heneni ve ingine engiꞌ okoꞌine di dizami asi muluꞌninguꞌ geni amivo mini ingine di minaniꞌ initekutiꞌ nene eveneꞌ masi hize eleꞌ i-ngidilizave lo lo-ngemelive lineꞌ. Idoꞌ Oꞌmosoꞌmi monovomuꞌ gamazi sunoꞌ o neineꞌ nene laꞌlisetevoꞌ gele none li laaꞌ avete aꞌminemuꞌ amuzo mili gihileꞌve nomineꞌ getipe gamazi laaꞌ nanguꞌ nene Timoteoꞌ vo lamilive lo gohi lo gala ogo luhuvo niteꞌve noꞌnohoꞌ gamazitunuꞌ gize osuꞌ lineꞌ.  
\ip Pauloꞌ aza Timoteoꞌni luhuvo niteꞌve naba tu gize-dineꞌ nene Loma ebekuꞌ nalaꞌ numunguꞌ mino lasi goniꞌve gililizangumuꞌ gizebo ogo mino aꞌmine luhuvo niteꞌ nene gize-dineꞌ ve. Aꞌmine luhuvo nitekuꞌ nene Timoteoꞌni gala do tiꞌ lo lineꞌ: Gaza Izesuꞌ gamaziꞌve lamineꞌ do mineliningumuꞌ goboni mili-gidi minilisaha neꞌmine ilizangukisi nene hulamo ha do giliꞌ lo do minezo lo lo-dineꞌ. Idoꞌ aꞌmine apize ngimuvoniꞌ gamazi nene eveneꞌ ma apize ngemanivo inginesi eveneꞌ gohi ma vi apize ngimilizave lo lo-imineꞌ. Neꞌmine gono amuzo molo dalive lo lo-imineꞌ. Neꞌmine lo aza Izesuꞌ gamaziꞌve lamineꞌ lo-ngemaaꞌ ingutiꞌ gamazi linge ma naba miningumuꞌ nene gohi lo gala ineꞌ. Neꞌmine lo idoꞌ aꞌmine Izesuꞌ gamaziꞌve lamineꞌ nene eveneꞌ lo-ngimingumuꞌ nalaꞌ numunguꞌ huli-dikevo minineꞌ monovomukisi lo-imineꞌ. Oꞌmosoꞌmo eiꞌ ve lo do kegesekineꞌ evenele nene lukuvo nalizave losa aꞌmine mulumo geniuꞌ nene nouve lo lineꞌ. Idoꞌ aꞌmine lineꞌ initeꞌ mukikumuꞌ nene Izesuꞌ evenele zuho lo gaꞌine ilive lo Pauloꞌ Timoteoꞌni lo-emo idoꞌ mono gamaziliꞌmi monovomuꞌ lolize gamazi lamilizave lo lo-ngedelive lineꞌ. Neꞌmine lolize gamazi golosouꞌ nene Timoteokisi aza lamilive lo lo-dineꞌ. Initeꞌ goloso daatoꞌ nene mine olovoꞌ o mino monovo lisihekovoꞌ ogo gele eleꞌvolekovoꞌ ogo mino lulo eveneꞌ ngemo hongu nasahilikuꞌ minelive lo lo-dineꞌ. Idoꞌ Timoteoꞌni hungoꞌ emo tiꞌ lo lineꞌ: Geꞌnebe gamene goloso adoꞌ Izesuꞌ gamaziꞌve lamineꞌ lilizadoꞌ gili dalisa gilami monovo goloso ato atotoꞌ nene eꞌmetilizaniꞌ gamene ma aloseive lineꞌ. Asiꞌve Pauloꞌ ogaꞌ ineꞌ neꞌmine ogo Izesuꞌ gamaziꞌve lamineꞌ lo sotoꞌ ogaꞌ gonoꞌve nene amuzo molo dozo lo-dineꞌ.  
\ip Neꞌmine lo nibili hililizaniꞌ gamene nene mo avitoꞌ ogave lo lo-emo idoꞌ hize eleꞌ i-nidaaꞌ ave linge mukiꞌ nene huli-nidi ebeꞌ ato atota vikevo Lukakisivoꞌ mela nosive lo lo-emo idoꞌ gonitoꞌ otuvodokisi nene eveneꞌ hamolitesi neniꞌ gamaziꞌneloꞌ hize eleꞌ i-nidamavo minuvoniꞌ ve. Nemuꞌ gaza geto ano lo lo-dineꞌ. Neꞌmine lo Oꞌmosoꞌmo hize eleꞌ o-dingumuꞌ nene opoꞌni lo aꞌmida sotoꞌ ineꞌ initeꞌ linge mamuꞌ lo-emo Timoteoꞌnisi eveneꞌ linge mamukisi meseꞌ aseka lo-ngedo luhuvo niteꞌve nene noꞌnohoꞌ gamazitunuꞌ gize osuꞌ lineꞌ.  
\c 1  
\s1 Pauloꞌ Luhuvo Niteꞌ Apizo Gizaaꞌ Gamazi Gizosa Timoteoꞌni Noꞌnohoꞌ Gamazi Gize-dineꞌ  
\p
\v 1 Do luꞌ izaaꞌ ive Oꞌmososi idoꞌ leleꞌmize lamineꞌ ilive ne neive lo gele medele minaaꞌ unive Izesuꞌ Kilisitokisi engiꞌ nene Izesuꞌ Kilisitoꞌ aposolo loloꞌ iline li lasidoꞌ loloꞌ uve neniꞌ Pauloꞌ luhuvo niteꞌ meve nene  
\v 2 gaza monokuꞌ neniꞌ gipeꞌne gihile loloꞌ ogo minanive geiꞌ Timoteoꞌni nene nogize-giduve. Neꞌmine ogosa meteho Oꞌmosolatiꞌ idoꞌ Guvetesi ve Izesuꞌ Kilisitodatiꞌ nasahilikisi idoꞌ mulumote ningaaꞌ monovosi idoꞌ hongu lo lamino minaaꞌ monovo nesi nene lehizi-gidikesivo geitoꞌ minivoo losa noluve.   
\s1 Eveneꞌ Soza Saza Gamazi Apizi nGimaaꞌ Naniꞌ Nene Alamilizangumuꞌ Lo-ngedelive Lo Pauloꞌ Timoteoꞌni Lo-imineꞌ Gamazi  
\p
\v 3 Naza gomuꞌ Makedonia misubouko volosa noogo tiꞌ lo lo-gimuvoniꞌ maloꞌ nene eꞌmeto ozo: Adoꞌ Eheso numuno ebekuꞌ hazavoꞌ mino eveneꞌ malite monoꞌ atoliꞌmine ma apizi eveneꞌ li-ngimaaꞌ naniꞌ nene oꞌve lo-ngedosa  
\v 4 avoꞌningine di naba i-ngidi guliveꞌine likaꞌ likaꞌ igi laaꞌ naniꞌ gamazi adoꞌ ngeli li pili osuꞌ lamilizadoꞌ o minineꞌ gamazi nehe idoꞌ gihileꞌve nomineꞌ gamazi gaꞌningutiꞌ gili laniꞌ gamazi nehe neꞌmine gamazimuꞌ nene gaꞌine giliviꞌ giliviꞌ amilizaze. Lo-ngedezo. Aꞌmine giliviꞌ giliviꞌ igi minaaꞌ naaniꞌ gamaziꞌmi monovomuꞌ viseꞌ igi gohi li voleloꞌ meloꞌ ikaꞌ ikaꞌ avo neꞌmo nene maduꞌine do lihiteheꞌ o-ngedosa aꞌmine gamazi neꞌmo Oꞌmosoꞌmo lulouꞌ gele neineꞌ akaloꞌ nene ma ngeleꞌmize molosaꞌmive. Asi Oꞌmosoloꞌ gele medele minaaꞌ neꞌmovoꞌ nene aꞌmine akaloꞌ leleꞌmize molaaꞌ neive.  
\v 5 Idoꞌ gaza neꞌmine lo-ngedeline noluvoniꞌ nene ingine aꞌmidoꞌ eꞌmetisa luꞌninguꞌ goloso monovosi nomivo mini gaꞌninguꞌ engiꞌ monovoꞌinemuꞌ izeꞌ mili gilikevo laminekovoꞌ minaaꞌ ive mini apa niteꞌ ami Oꞌmosomuꞌ gili eleꞌvoleꞌ gehepeve igi minilizadiꞌmovoꞌ luꞌine ngemaaꞌ monovo nene engita sotoꞌ ogo minelive losa luvoniꞌ ve.  
\v 6 Neꞌmine ilizangumuꞌ nene noluvoniꞌza eveneꞌ linge ma nene mo aꞌmine aka lamineꞌ nene huli zovoꞌ izisa gihileꞌve nomineꞌ gamazivoꞌ li voleloꞌ meloꞌ igaꞌ nave.  
\v 7 Ingine nene Oꞌmosoꞌmi louꞌ gamazi apizi ngimaaꞌ ave liliꞌ ilisa gilaniꞌza ingine aꞌminemuꞌ laaꞌ naaniꞌ gamaziꞌmi monovo nesi idoꞌ aꞌmine liviꞌ kiseliviꞌ igi laniꞌ initeliti monovo nesi nene mo ma gili hehe lisaꞌmave.   
\p
\v 8 Oꞌmosoꞌmi louꞌ gamazi nene laza ladeni amo gonoꞌveloꞌ gehepeve do molo oloneꞌ nene mo initeꞌ lamineꞌ gehepeve mineleseive.  
\v 9 Ee, aꞌmine louꞌ gamazi neve nene eveneꞌ lisiheꞌ i minavemuꞌ nomive. Asi eveneꞌ ma louꞌ gamaziloꞌ eꞌmetamaaꞌ ave gizengizeloꞌ ve nizahe idoꞌ Oꞌmosomuꞌ ngehelele izamaaꞌ ive lihimeloꞌ ve nizahe nemukisi idoꞌ monovo lisiheꞌ laminetoꞌ eꞌmetami monoꞌine nomineꞌ minave nizahe idoꞌ meꞌningine izeꞌningine ngibili hilaaꞌ idoꞌ eveneꞌ ngibili hulaaꞌ ave nizahe nemukisi idoꞌ  
\v 10 veneꞌ vemohoꞌ gipe alu gopo ingiꞌmi monaaꞌ ave nizahe veneꞌ vemohoꞌ ingaaꞌ aniꞌ avazahaloꞌ eꞌmeti ingami veneꞌ angiseꞌine ingaaꞌ avo vemohoꞌ angiseꞌine ingavo igaꞌ ave nizahe nemukisi idoꞌ eveneꞌ gumine di halekiki moni daaꞌ ave nizahe idoꞌ sozaloꞌ ve nizahe idoꞌ soza gamazimuꞌ lamineꞌ nolune li aꞌine dizaaꞌ ave nizahe nemukisi idoꞌ monovo gohi eveneꞌ ngeleꞌmize lamineꞌ ilineꞌ monotoꞌ vo damaaꞌ ineꞌ maloꞌ eꞌmetaaꞌ ave nizahe neꞌmine alevemuꞌ nene louꞌ gamazi ne neive lo gele minosa Oꞌmosoꞌmi louꞌ gamazi nene gonoꞌveloꞌ gehepeve do molo oloneꞌ nene aꞌmine louꞌ nene initeꞌ lamineꞌ gehepeve mineleseive.  
\v 11 Aꞌmine neꞌmine noluvoniꞌ gamazi mene laminekuꞌ minive Oꞌmosolatiꞌ guvelesi gamazi laminetoꞌ nene vo miliseꞌ o neive. Aꞌmine nene Oꞌmosoꞌmo lo soto sotoꞌ ogo lo-ngemeline lo lehize-nede neineꞌ gamazi lamineꞌ mamuꞌ nene noluve.   
\s1 Izesuꞌ Kilisitoꞌ Aza Pauloꞌ Ve Goloso Miningutiꞌ Eleꞌmize Lamineꞌ Ogo Eiꞌ Gonoloꞌ Ve Loloꞌ O-dingumuꞌ Opoꞌni Lineꞌ Gamazi  
\p
\v 12-13 Aꞌmine gono dalongumuꞌ amuzo nimive Guvetesi ve Izesuꞌ Kilisitoꞌnimuꞌ nene isaaꞌ neve lo opoꞌni noluve. Ee, naza gomuꞌ eze nene dovo ledevoꞌ ogo mino evenele goboni molo-ngedo do goloso o-ngedaaꞌ uvoniꞌza naza eze monovo gele guno amuvodiꞌmo ezemuꞌ gele eleꞌvoleꞌ amo neꞌmine ogaꞌ uvonako nemuꞌ nene iseꞌne izosa nenikumuꞌ aꞌmine gonoꞌve nene ha dalidoꞌ o neive lo gele medele mino aꞌmine gonoloꞌ nene neleꞌmize molaave.  
\v 14 Neꞌmine o-nedoo Guvetesi ve aza vauve goloso elo nasahiliꞌ o-nedosa naza eiꞌ Izesuꞌ Kilisitoꞌnimuꞌ gele eleꞌvoleꞌ o mino luꞌne emelodoꞌ neleꞌmize molangumuꞌ nene opoꞌni lo isaaꞌ neve noluve.  
\v 15 Ee, Izesuꞌ Kilisitoꞌ aza lihimeloꞌ ve do nguꞌ izelove lo me misubouꞌ limive gamazi nene mo gihile lamineꞌ neive. Eveneꞌ mukiꞌ aꞌminemuꞌ gele muꞌmusiꞌ o minelonidoꞌ nene lisiheꞌ o neive. Idoꞌ lihimeloꞌ ve engikutiꞌ neniꞌ neve nene lihimeloꞌ ve naba minuve ne nouve.  
\v 16 Nouvoniꞌza Izesuꞌ Kilisitoꞌ iseꞌne izineꞌ nene aza mo mulumote gelo geto lihime lemamo isete izeꞌmo ogo minaaꞌ neineꞌ monovoꞌve nene nenitoꞌ ganaꞌ do sotoꞌ ogo ngelebizavo alingeꞌ ezemuꞌ gili eleꞌvoleꞌ igisa minevoꞌ minevoꞌ ngemeni dameni dalizave ningilizangumuꞌ nene aꞌmine monovoꞌveꞌmi avazaha pikisa neꞌmine neniꞌ nene minelongumuꞌ ve losa iseꞌne izineꞌ ma neive.  
\v 17 Ogo vokaꞌ vokaꞌ ilineꞌ gamene mukitoꞌ Guvelesi ve naba minive helamaaꞌ ive adoꞌ evenelite ha ningelonidoꞌ amive Oꞌmoso hamoꞌ minive nene do hozi lo opoꞌni lo minevoꞌ minevoꞌ ogo mineloneꞌ nene okuꞌ lamilihoo. Neꞌmine ilihoo.   
\s1 Timoteoꞌ Monoꞌ Gono Dalinguꞌ Ogo Molo Ilineꞌ Monovomuꞌ Pauloꞌ Gala Daniꞌ Gamazi  
\p
\v 18 Gipeꞌne Timoteoo, aꞌmine gono gamazi mene nolo-giduvoniꞌ nene geiꞌ monovoka do sotoꞌ ogo Oꞌmosoꞌmi veletiꞌ gamazi ma gozopoꞌ sotoꞌ ineꞌ mamuꞌ nene gele mino nolo-giduve. Idoꞌ gaza aꞌmine gamaziloꞌ mene noeꞌmeto monoliꞌmi lovo laminekuꞌ nene lovo hizeline losa nolo-giduze.  
\v 19 Neꞌmine ogo monoꞌ gihilemuꞌ nene gele eleꞌvoleꞌ o mino madungauꞌ nene monovo lisiheꞌ lamineꞌ neive lo gele nanidoꞌ gehepeve eꞌmeto mineline losa nene nolo-giduve. Monoꞌ aleve linge ma nete monovo goloso neive li gilaaꞌ naniꞌ maduꞌine nene gili hulii monoꞌ engitoꞌ minineꞌ nene di gopo igisa mo goloso akaloꞌ nivave.  
\v 20 Aꞌmine aleve engikutiꞌ nene Himenaioꞌ ve Alekisadeloꞌ ve engiꞌ nene nizasive. Aꞌmine ve sitaꞌ nene naza Oꞌmoso divi lediviꞌ igaꞌ asineꞌ nene ningi gilisa gohi neꞌmine amilisingumuꞌ nene ningi gililisive losa do hulo heta o-ngedo Sataniꞌmi anauꞌ molo-ngedekuve.   
\c 2  
\s1 Monoꞌ Muliseuꞌ Oꞌmosola Laaꞌ Ilizangumuꞌ Pauloꞌ Timoteoꞌni Lo-dineꞌ Gamazi  
\p
\v 1 Idoꞌ naza gamazi gaka do lolonguꞌ mene ganaꞌ neve nene tiꞌ lo nolo-gimuve: Lingine nene Oꞌmosolavoꞌ laaꞌ ilo. Idoꞌ lengita initeꞌ ma viseꞌ igi ma nemukisi nene Oꞌmosola laaꞌ ilo. Idoꞌ eveneꞌ ato atoꞌ mukiꞌ nene hize eleꞌ o-ngedelive li Oꞌmosola laaꞌ ilo. Neꞌmine ilizanguꞌ nene isaaꞌ neve li-di opoꞌni laaꞌ ilo.  
\v 2 Ee, laza monokuꞌ minineꞌ monovoloꞌ eꞌmete osuꞌ lo Oꞌmososi evenekisi monovo lisihekovoꞌ o-ngedo mino goboni mili-lidamavo hongu lo laminovoꞌ mineloningumuꞌ nene guveꞌinesi ve nabamukisi idoꞌ gizebo i-lidaaꞌ gono daaꞌ ave mukikumukisi nene Oꞌmosoꞌmo hize eleꞌ o-ngedelive lo ezela laaꞌ olone.  
\v 3 Neꞌmine ogaꞌ oloneꞌ nene do luꞌ izaaꞌ ive Oꞌmosoꞌmo ningivo lamineꞌ ogavo mulunouꞌ lamineꞌ oloseive.  
\v 4 Aza nene eveneꞌ mukiꞌ lukuvo nalizaho idoꞌ monoꞌ gamazi gihile nene goꞌzi vaiꞌ lilizaho losavoꞌ gele minaaꞌ neive.  
\v 5 Naza Oꞌmosoꞌmo eveneꞌ mukikumuꞌ lukuvo nalizaho lo gala gele minaaꞌ neingumuꞌ Oꞌmosola aꞌmine alevemuꞌ laaꞌ ilizave noluvoniꞌ nene Oꞌmoso ne mo hamokovoꞌ neivosa idoꞌ Oꞌmososi evenekisi goholusoꞌ mino kuku holo-ledo do hamoꞌ o-ledaaꞌ ive nesi nene hamokovoꞌ neivosa noluve. Aꞌmine kuku holo-ledaaꞌ ive nene eveneꞌ minive Izesuꞌ Kilisitoꞌ  
\v 6 adoꞌ eveneꞌ mukiꞌ kuluhize-ledelingumuꞌ meniꞌve eiꞌ okoꞌno hulo hilive nemuꞌ nene noluve. Neꞌmine ineꞌ nene Oꞌmosoꞌmo eveneꞌ mukiꞌ lukuvo nalizahoo lo gala gele minineꞌ nene gameneꞌveloꞌ lisiheꞌ ogo lelebizavo mo ningo gele none.  
\v 7 Aꞌmine gamazi nene lo soto sotoꞌ ilinive aposolo loloꞌ iline lo Oꞌmosoꞌmo neleꞌmize molaniꞌ ve. Naza neꞌmine noluvoniꞌ nene mo sozasi lamuvoniꞌza mo laminetoꞌ gehepeve noluve. Aza nene eveneꞌ heta atoꞌ ve gamazi gihile lamineꞌ apize ngeme ngemeꞌ ogaꞌ anive loloꞌ ogo nanivo ingine gili eleꞌvoleꞌ ilizave losa neleꞌmize molaniꞌ ve.   
\s1 Monoꞌ Mulise Milalizanguꞌ Vemohokisi Venekisi Eꞌmetilizaniꞌ Monovomuꞌ Timoteoꞌni Lo-dineꞌ Gamazi  
\p
\v 8 Nemuꞌ nene monoꞌ mulise numudoꞌ namadoꞌ miniꞌmi monanguꞌ vemohoꞌ ingine Oꞌmosola nene laaꞌ ilizave losa noluve. Aꞌmine Oꞌmosola lilisa aꞌine di hozi lilizaniꞌ nene lihimeꞌine nomineꞌ mini ngizeboloꞌ nomivo engikuꞌ lovo lolize neꞌminesi nomivo minisa nene Oꞌmosola lilisave.  
\v 9 Idoꞌ aꞌmineꞌmine ogo venelite eꞌmetilizaniꞌ monovomuꞌ lo-gemelove: Veneꞌ neve nene evenelite ma ningilizahe ningamilizahe li maduꞌine zopovo nalava izi di maꞌmine maꞌmine igi okoꞌnidoꞌ niteꞌ meniꞌve dizo minineꞌ initeꞌ ngilisa gonolise initeꞌ ato atoꞌ meniꞌve dizo minineꞌ ngaluluꞌ nehe ngolidunuꞌ liliꞌ aniꞌ initeꞌ nehe nevoꞌmine initeꞌ ngilami ha eveneꞌ do upuhoꞌ o-ngedamilineꞌ initeꞌ laminekovoꞌ ngilaaꞌ ilizaniꞌ nene lamineꞌ ve.  
\v 10 Adoꞌ Oꞌmoso opoꞌni laaꞌ noune laaꞌ aniꞌ venelite igi mili ilizadoꞌ lisiheꞌ o minineꞌ monovo laminetoꞌ eꞌmeti igi mili minilizaniꞌ neꞌmo neve nene engiꞌ okoꞌnidoꞌ gonolise neꞌmine nene mineleseive.  
\v 11 Veneꞌ neve nene gelekeleꞌ gehepeve igi mini eleseꞌ iki mini gamazi nene di maduꞌninguꞌ milikaꞌ milikaꞌ igivoꞌ minaaꞌ ilizave.  
\v 12 Veneꞌ neve nene vemohoꞌ gamazi apize ngemaaꞌ nehe vemohoꞌ ngivileꞌ o mino gizebo o-ngedaaꞌ nehe neꞌmine ilizangumuꞌ nene gele ngemamo oꞌove noluze. Veneꞌ ingine eleseꞌ ikiivoꞌ minilizave.  
\v 13 Nene Nanitekumuꞌ ve. Oꞌmosoꞌmo ganaꞌ nene Evaꞌni loloꞌ amo Adamuꞌni nene gomuꞌ loloꞌ ineꞌ ve.  
\v 14 Idoꞌ Sataniꞌmo za gihilemuꞌ golo izavo gele ladeni ive nene Adamuꞌ nevoba asi Evaꞌ gele ladeni ogosa Sataniꞌmi gamaziloꞌ gele do Oꞌmosoꞌmo lineꞌ gamazi avutoꞌ ineꞌ ve. Nemuꞌ veneꞌ neve nene vemohoꞌ ngivileꞌ ami eleseꞌ igivoꞌ minilizave losa noluve.  
\v 15 Ne neiha veneꞌ ingine Guvelesi vemuꞌ gele muꞌmusiꞌ i mini luꞌine ngemaaꞌ monovoloꞌ eꞌmeti mini idoꞌ lihime monovomuꞌ olovoꞌ i mini veneꞌ lamineꞌ gehepeve gili mini nizavo izipe gidaaꞌ ilizanguꞌ nene lukuvo ngemeleseive.   
\c 3  
\s1 Monoꞌ Gizebo Ve Liliꞌ Ilizadoꞌ Lisiheꞌ I Minilizaveti Monovomuꞌ Timoteoꞌni Lo-dineꞌ Gamazi  
\p
\v 1 Ve ma aza gizebo ve loloꞌ olosa ive nene mo gono gihile lamineꞌ maloꞌ nene lulo nomolave li evenelite laaꞌ naniꞌ nene mo lamineꞌ laaꞌ nave.  
\v 2 Aꞌmine gono nene gono lamineꞌ nenako aꞌmine gizebo ve loloꞌ ilive nene eveneliti veꞌnidoꞌ nene monovo golosoꞌvesi minamaaꞌ ilive minoo veneꞌ hamoꞌ do minive mino getipe ve minamo monovo goloso ogalove lo monovoꞌveloꞌ gizebo ogo initeꞌ ogo molo ilineꞌ nene mo lisihekovoꞌ ilive mino venenga ve ngeleꞌmize lamineꞌ ogaꞌ ive mino eveneꞌ gamazi apize ngemaaꞌ ilidoꞌ o minelive mineleseive.  
\v 3 Noso geli geli ogo naaꞌ ive minamilive. Idoꞌ evenekumuꞌ izeboloꞌ malaꞌ malaꞌ ogaꞌ ive minamo asi hongu lo-ngemo lamineꞌ minaaꞌ ive lovo lolize amaaꞌ ilive minelive. Idoꞌ aꞌmine monoꞌ muliseloꞌ gizebo o-ngedaaꞌ ilive nene monimuꞌ lulo molaaꞌ ilive minamilive.  
\v 4 Aꞌmine ve nene eiꞌ veneꞌ izipahala zuholoꞌ gizebo lamineꞌ ogo ngeleꞌmize akaloꞌ ogaꞌ neivo aꞌmine izipahala ingine meꞌnibinemuꞌ gilavo dizavosa peleseveꞌ izami gamaziꞌveloꞌ gili daaꞌ ave minelive.  
\v 5 Neꞌmine noluvoniꞌ nene eze zuho gizebo ogo ngeleꞌmize akaloꞌ o-ngedaaꞌ monovo gele vevesamilineꞌ nene Oꞌmosoꞌmi muliseloꞌ gizebo ogaꞌ gono dalidoꞌ nene ngelo lisiheꞌ o minelihe. Mo kekeꞌ lisiheꞌ o minamoloseinako nemuꞌ nene noluve.  
\v 6 Aꞌmine monoꞌ muliseloꞌ gizebo ve nene monokuꞌ olihe lodive amive eveneꞌ gosohoꞌ neꞌmine eleꞌmizi milalizaniꞌ nene neꞌmine i-nidikeve loo okoꞌno do dizavo Oꞌmosoꞌmo Satani lihime molo-do mulumo gono emelesa neineꞌ neꞌmine ogo lihime molo-do mulumo gono emaalinako olihe monokuꞌ lodive amive eveneꞌ gosohoꞌ nene monoꞌ gizebo ve liliꞌ i-damilizave.  
\v 7 Idoꞌ Izesuꞌ evenele minamave nete ezemuꞌ gamangi mili-daaꞌ avevoꞌ nene monoꞌ gizebo ve liliꞌ i-dilizave. Monoꞌ gizebo ve nene neꞌmine ve minamilineꞌ nene eveneꞌ malite monovo goloso ogave li elemikevo Sataniꞌmo emenguꞌ molo ivileꞌ ogavo lihime daalive losa noluve.   
\s1 Monoꞌ Muliseloꞌ Medeli Mini Ato Atoꞌ Gonoloꞌ Gizebo Ve Liliꞌ Ilizadoꞌ I Minilizaveti Monovomuꞌ Timoteoꞌni Lo-dineꞌ Gamazi  
\p
\v 8 Idoꞌ monoꞌ muliseloꞌ medeli mini ato atoꞌ gono adoꞌ gohoꞌ gahaliꞌ nasahiliꞌ i-ngidaaꞌ gono nevoꞌmidoꞌ gizebo ve nete nene aꞌmineꞌmine igi monoꞌ muliseloꞌ gizebo ve neꞌminisa mini evenelite gamangi mili-ngidilizadoꞌ i minave mini eveneꞌ goꞌine izaaꞌ ave minami noso geli geli igi naaꞌ ave minami monovo goloso igi moni heneni vaiꞌ dalisa gilaaꞌ ave minami  
\v 9 monoliꞌmi sunoꞌ gamazi Oꞌmosoꞌmo do sotoꞌ o-lede neineꞌ nene di mini monoꞌ gili nizadoꞌ nene ha eꞌmetivoꞌ minisa engiꞌ luꞌninguꞌ monovo goloso minivo ningisaꞌmave minilizave.  
\v 10 Idoꞌ aꞌmine ato atoꞌ gonoloꞌ gizebo ve liliꞌ i-ngidilizave nene gomuꞌ engiꞌ monovomuꞌ izeꞌ mili-ngidi ningavo engita aꞌmine eꞌmetamilizave luvoniꞌ initekutiꞌ nene ma nomivo minilizanikovoꞌ nene aꞌmine gonoloꞌ dalizangumuꞌ di oti-ngidilizave.  
\v 11 Idoꞌ engikisi bizi minaniꞌ veneꞌ neve nene evenelite gamangi mili-ngidilizadoꞌ lisiheꞌ i minaniꞌ veneꞌ minii divi lediviꞌ gamazi li-ngidisaꞌmaniꞌ veneꞌ mini negi hizami monovoꞌnidoꞌ gizebo lamineꞌ igi mini neꞌmine manaꞌmine gono dalizaniꞌ nene monovo lisihetokovoꞌ eꞌmetisa di minilizaniꞌ veneꞌ minilizave.  
\v 12 Idoꞌ aꞌmine ato atoꞌ gonoloꞌ gizebo ve liliꞌ i-ngidilizave nene veneꞌ hamoꞌ di minisa engiꞌ izipahaꞌnidokisi engiꞌ numuꞌninguꞌ ingaaꞌ avelokisi nene gizebo lamineꞌ i-ngidi ngeleꞌmize akaloꞌ igaꞌ ave minilizave.  
\v 13 Neꞌmine noluvoniꞌ nene nanitekumuꞌ ve. Aꞌmine gonoꞌine nene laminisa ma di minilizaniꞌ nene eveneꞌ gilavo dizi minisa Izesuꞌ Kilisitodoꞌ giꞌmizo mino gelaaꞌ nouneꞌ monokumuꞌ nene ngehelele izamivo livi kiseliviꞌ ilisanako nemuꞌ nene noluve.   
\s1 Gamazi Mene Gizuvoniꞌ Nene Naza Geto Ma Naamolongumuꞌ Oꞌmosoꞌmi Evenele Zuho Igi Mili Ilizaniꞌ Monovomuꞌ Gele Mineline Losa Gamazi Mene Nogizuve Lo Lo-imineꞌ Gamazi  
\p
\v 14-15 Naza geiꞌ nanida nene liteꞌ lo alohe lo gele nouha liteꞌ lo amuvo ma nene gaza ladani amo Oꞌmosoꞌmi evenele zuhoutiꞌ alevelite igi mili ilizaniꞌ monovomuꞌ nene gaza gele mineline losa gamazi mene nogize-giduve. Aꞌmine Oꞌmosoꞌmi evenele zuhomuꞌ luvoniꞌ nene minevoꞌ minevoꞌ ogaꞌ neineꞌ Oꞌmosola giꞌmizunive leliꞌ mulisemuꞌ nene luve. Langise neꞌmo numuno hize eleꞌ ogo do minaaꞌ neineꞌ neꞌmino gamazi gihile hize eleꞌ ogo do minaaꞌ neineꞌ nene leliꞌ Oꞌmosoꞌmi evenele mulise neve nene none.  
\v 16 Idoꞌ sunoꞌ gamazi leliꞌ monoteuꞌ sotoꞌ ogo minineꞌ nene gamazi naba neive lo lo sotoꞌ ogaꞌ nouneꞌ nene adoꞌ  
\q1 Kilisitoꞌ eiꞌ nene leliꞌ okode neꞌmine do otuho sotoꞌ ogo minavoo  
\q1 eiꞌ monovoꞌve nene mo lisiheꞌ o neive lo  
\q1 Sikalahuliꞌmo do sotoꞌ ogo lelebizavosa  
\q1 angeloꞌ ma netesi nene ningikevo  
\q1 eveneꞌ zuho ato atotidasi gamaziꞌve nene li sotoꞌ igi li-ngimikevo  
\q1 me misubouko aleve linge netesi nene ezemuꞌ gili eleꞌvoleꞌ aniꞌ ve.  
\q1 Idoꞌ eze nene Oꞌmosoꞌmo Okulumoꞌ ebeꞌ laminekuko eleꞌmizo dizineꞌ ve.   
\c 4  
\s1 Eveneꞌ Monoꞌ Gihile Hulisa Sikalahuꞌ Golosolatiꞌ Monoꞌ Gamazi Gilii Gosohoꞌ Nasahaꞌ Gamazi Apizi nGimilizangumuꞌ Timoteoꞌni Pauloꞌ Hungoꞌ Molo Lo-imineꞌ Gamazi  
\p
\v 1 Ne neiha Oꞌmosoꞌmi Sikalahuꞌ neꞌmo tiꞌ lo lo sotoꞌ ogo lo-leme neineꞌ ma neive: Alingeꞌ nela nene eveneꞌ ma ingine monoꞌ gihile di mini minilizangutiꞌ nene hulisa goꞌine izaaꞌ naniꞌ sikalahuta nene vi giꞌmizi sikalahuꞌ golosolatiꞌ minineꞌ monoꞌ gamazi apizi ngimaaꞌ naadoꞌ nene eꞌmetilisave.  
\v 2 Neꞌmine monoꞌ goloso di sotoꞌ nave nete okoꞌine losuvolotiꞌ nene eveneꞌ lamineꞌ gili minii sozaloꞌ ve monovo goloso lamineꞌ izeꞌ mili ningi di kegesaaꞌ aniꞌ maduꞌine di goloso ikeniꞌ mini  
\v 3 veneꞌ daaꞌ veloꞌ vaaꞌ nene amilizave li idoꞌ Oꞌmoso ezemuꞌ gili eleꞌvoleꞌ igi gamazi gihile gili minave Oꞌmosoꞌmo eiꞌ isaaꞌ neve li-di di nalizave lo nosoꞌ niteꞌ do sotoꞌ ineꞌ linge ma nene malise ilizave li-ngidaaꞌ nave.  
\v 4 Idoꞌ naza Oꞌmoso isaaꞌ neve li-di dalizave noluvoniꞌ nene Oꞌmosoꞌmo do sotoꞌ ineꞌ initeꞌ mataꞌ nene laminekovoꞌ neineꞌ nenako aꞌmine mukikumuꞌ nene Oꞌmoso isaaꞌ neve lo-dosa hamokumukisi nene oꞌove lamo mo daakovoꞌ oloneꞌ o neineꞌ nenako nemuꞌ nene luve.  
\v 5 Idoꞌ naza di naakovoꞌ ilisave noluvoniꞌ nene nanitekumuꞌ ve. Oꞌmosoꞌmo lineꞌ gamazi neꞌmosi idoꞌ laza isaaꞌ neve lo Oꞌmosola luneꞌ neꞌmosi aꞌmine nosoꞌ niteꞌ nene do lamineꞌ ogaꞌ neinako nemuꞌ nene luve.   
\s1 Izesuꞌ Kilisitoꞌ Gonoloꞌ Ve Lamineꞌ Minelineꞌ Monovomuꞌ Pauloꞌ Timoteoꞌni Gala Do Lo-dineꞌ Gamazi  
\p
\v 6 Gaza lo-giduvoniꞌ gamazi mene leze zuho Izesuꞌ evenele lo-ngedelineꞌ nene monoꞌ gamazi lamineꞌ apize gimunidoꞌ eꞌmeto minaineꞌ neꞌmo nene lukaꞌmi nosoꞌ niteꞌ loloꞌ ogo hize eleꞌ o-gidivo mino mo Izesuꞌ Kilisitoꞌ gonoloꞌ ve gihile lamineꞌ nene minelesane.  
\v 7 Monokuꞌ vo damineꞌ gamazi heluno neꞌmine gihileꞌve nomineꞌ getipe gamazi laaꞌ naniꞌ nene mehenga emaaꞌ ozo. Neꞌmine ogaꞌ noogosa monotoꞌ monovo do hehe lovoꞌ ogo molo iliningumuꞌ nene eleꞌvoleꞌ ogo aꞌmineꞌmi gonoꞌve do ningeꞌ ningeꞌ ogo dokaꞌ dokaꞌ oꞌmo vo minezo.  
\v 8 Neꞌmine noluvoniꞌ nene nemuꞌ noluve. Laza okode amuzo molo eleꞌvoleꞌ ogo minelive lo neꞌmi gonoꞌve dokaꞌ dokaꞌ oꞌmo vo eksesais ogo minaaꞌ nouneꞌ neꞌmo nene ngomo hize eleꞌ o-ledaaꞌ neive. Neꞌmine ogaꞌ neiha monotoꞌ monovo do hehe lovoꞌ ogo amuzo molo ogo molo ogaꞌ neꞌmo nene idise minevoꞌ alevoꞌ ogo nounidaa mene hize eleꞌ o-ledelidoꞌ o neivosa idoꞌ alingeꞌ Okulumokuko minevoꞌ minevoꞌ ogo minelonidaasi nene hize eleꞌ o-ledelidoꞌ o neive. Nemuꞌ nene okode losuvomuꞌ oloneꞌ initeꞌ nene ivileꞌ ivosa aꞌmine monotoꞌ monovo do hehe lovoꞌ ogaꞌ neꞌmo nene mudise hize eleꞌ gehepeve o-ledaaꞌ neineꞌ nenako nemuꞌ nene noluve.  
\v 9 Idoꞌ gamazi meve nene gihile lamineꞌ neineꞌ nenako mo mudise gele dalonidoꞌ nene lisiheꞌ o neive.  
\v 10 Nemuꞌ nene minevoꞌ minevoꞌ ogaꞌ neineꞌ Oꞌmoso aza eveneꞌ mukiꞌ do nguꞌ izaatoꞌ minidotiꞌ nene adoꞌ leliꞌ Kilisitoꞌnimuꞌ gele eleꞌvoleꞌ ogaꞌ nounive nene do luꞌ izaaꞌ ive gehepeve ne neive losa ezemuꞌ gele muꞌmusiꞌ ogo noneꞌ nenako aꞌnemuꞌ nene zegeꞌ zegeꞌ goloso ogosa mulumo gono neꞌmine do do dizo minaaꞌ noune.   
\p
\v 11 Aꞌmine lo-giduvoniꞌ gamazi mukiꞌ mene lo sotoꞌ ogo apize ngemezo.  
\v 12 Idoꞌ gaza ve gosoꞌve ve li geikumuꞌ gilikevo lemo minaaline. Nemuꞌ nene Kilisitoꞌnimuꞌ gili eleꞌvoleꞌ igi minave nene geiꞌ monovokaloꞌ eꞌmetilizadoꞌ lisiheꞌ ilidoꞌ ogo molo ozo. Gaza gamazi lilininguꞌ nolihe neꞌmine manaꞌmine initeꞌ ilininguꞌ nolihe eveneꞌ lute ngemaaꞌ monovolokisi idoꞌ Guvelesi vemuꞌ gele eleꞌvoleꞌ ogaꞌ monovolokisi idoꞌ monovo goloso hamokisi ogo molo amo minaaꞌ monovolokisi nene gaza lamino eꞌmeto nanivo neꞌmo nene ingine aꞌmidoꞌ eꞌmeti igi mili ilizaniꞌ akaꞌine nene ngelebizelive.  
\v 13 Naza geiꞌ nanida olihe amuvo nanidoꞌ nene monoꞌ godolouꞌ gamazi nene gate ngemaaꞌ idoꞌ luꞌine do oto gaꞌine daaꞌ gamazi lo-ngemaaꞌ idoꞌ monoꞌ monovo apize ngemaaꞌ gono neꞌmidoꞌ nene luka amuzo molo molo minoosa do do vo minezo.  
\v 14 Idoꞌ Oꞌmosoꞌmi veletiꞌ gamazi geikumuꞌ lineꞌ nene nilavo idoꞌ monoꞌ gizebo ve nene gonouꞌ geleꞌmizi mili aꞌnine godokaloꞌ nimilavo gonouꞌ amuzo Oꞌmosoꞌmo lehize-gidineꞌ nesi nene damanivo haza minaalive.  
\v 15 Monoꞌ gonoka do lamineꞌ oꞌmo novaineꞌ nene eveneꞌ mukiꞌ ningilizangumuꞌ ve lo aꞌmine lo-giduvoniꞌ initetoꞌ mene luka molo mino aꞌmine neꞌmine monovo ogatokovoꞌ nene minezo.  
\v 16 Geiꞌ monovokalokisi idoꞌ eveneꞌ apize ngeme ngemeꞌ ilineꞌ gamazilokisi nene ninge lamineꞌ gehepeve o minezo. Gaza aꞌmine gamaziloꞌ nene mo giꞌmize giliꞌ lo minelineꞌ neꞌmo nene gasika lukuvo nalinidoꞌ geleꞌmize molosa geiꞌ gamazika gililizavesi nene lukuvo nalizadoꞌ ngeleꞌmize molalosainaze. Aꞌmine gamaziloꞌ nene giꞌmize giliꞌ lo minezo.   
\c 5  
\s1 Monoꞌ Aleve Mukiꞌ Ogo Molo O-ngedaaꞌ Ilineꞌ Monovomuꞌ Pauloꞌ Lo-imineꞌ Gamazi  
\p
\v 1 Gaza vemohoꞌ ozoho neꞌmine nene gamazi amuzonga lo-emamo geiꞌ maho gehepeve gele neivosa gala do gamazi lo-emezo. Idoꞌ izipe gosoꞌve nene nakuna gehepeve neꞌmine gili minavosa gaꞌine do gamazi lo-ngemezo.  
\v 2 Idoꞌ veneꞌ ozoho neve nene geiꞌ izamote gehepeve gili nizavo idoꞌ veneꞌ alu neꞌmine nene gaka do zovoꞌ zavaꞌ izalize. Aluna gehepeve gili nizavosa nene gaꞌine do gamazi lo-ngemezo.   
\s1 Monoꞌ Mulise Nete Nosoꞌ Niteꞌ nGimi Hize Eleꞌ I-ngidilizadoꞌ Lisiheꞌ I Minilizaniꞌ Veneꞌ Gevonoliti Monovomuꞌ Timoteoꞌni Lo-dineꞌ  
\p
\v 3 Veneꞌ gevonoꞌ mamuꞌ ninganivo monoꞌ mulise nete hize eleꞌ i-ngidilizadoꞌ minikeve lo ningelineꞌ nene mo guhalihali gehepeve i minaniꞌ venekumukovoꞌ nene ningelesane.  
\v 4 Ne neiha veneꞌ gevonoꞌ maliti izipahaꞌine nehe ngaꞌvopilemoꞌ nehe ma minilizaniꞌ aꞌmine aleve nene initeꞌ atoꞌ ma amisa gomuꞌ ilizaniꞌ initeꞌ naba adoꞌ monoꞌ neꞌmo izeꞌningine meꞌninginemuꞌ neꞌmine monovo ilizave lo neineꞌ nene ningi gili aꞌmidoꞌ eꞌmetiꞌmi vi engiꞌ zuho gehepeve engiꞌ izeꞌningine meꞌningine golo hizi-ngidi nosoꞌ niteꞌ nevoꞌmine ngimi hize eleꞌ i-ngidilizave. Ee, neꞌmine ogakumuꞌ nene Oꞌmosoꞌmo lamineꞌ gelaaꞌ neineꞌ nenako nemuꞌ nene izipahaꞌine ingine aꞌmine izeꞌningine gizebo i-ngidilizave.  
\v 5 Veneꞌ gevonoꞌ guhalihali gehepeve ogo minaaꞌ neineꞌ neꞌmo nene Oꞌmosoloꞌ gele muꞌmusiꞌ o mino holukaꞌ nehe holiseꞌ nehe gamene gamene hize eleꞌ o-delingumuꞌ nene Oꞌmosola lo minaaꞌ neive.  
\v 6 Neꞌmine ogo minaaꞌ neiha veneꞌ gevonoꞌ ma okoꞌno losuvoꞌmo laniteꞌ gilineꞌ initekumukovoꞌ gelo monaaꞌ ineꞌ veneꞌ nene mo velesi ha noliha luloꞌve nene mo hele osuꞌ lo vineꞌ ne neive.  
\v 7 Mene nolo-giduvoniꞌ gamazi nene ma avutoꞌ ikevo evenelite ngelemikelizaze. Aꞌmine lo-giduvoniꞌ gamazi meve nene lo-ngemezo.  
\v 8 Ve ma ingine engiꞌ zuho di guni gizebo i-ngidami minilizave mukiꞌ nene monovo goloso igi monoꞌ huli osuꞌ lisa Kilisitoꞌnimuꞌ gili eleꞌvoleꞌ amave nene ngivileꞌ igi lihime daaꞌ ave minilisave. Ne neiha ve ma engiꞌ numuꞌninguꞌ ingaaꞌ ave engiꞌ zuho gehepeve di guni i-ngidami minilizave engiꞌ neve nene engiꞌ zuho gizebo i-ngidamaaꞌ ave linge masi nene ngivileꞌ igi lihime nene naba goloso gehepeve daaꞌ ilisave.   
\p
\v 9 Idoꞌ monoꞌ muliselite hize eleꞌ i-ngidilizadoꞌ lisiheꞌ i minaniꞌ veneꞌ gonoliti guliveꞌine gizelo ma nene kilisimasi fifti naeni (59) ivileꞌ o nolineꞌ veneꞌ vanahine hamotoꞌ bizo minineꞌ veneꞌ  
\v 10 adoꞌ eveneꞌ hize eleꞌ o-ngedaaꞌ gono lamineꞌ adoꞌ izipe do naba o-ngedaaꞌ ineꞌ nolihe idoꞌ venenga ve aniꞌ nasahiliꞌ o-ngedaaꞌ ineꞌ nolihe idoꞌ eze okoꞌno do lemo mino gelekeleꞌ veneꞌ neꞌmine gelo Oꞌmosoꞌmi evenele hize eleꞌ o-ngedaaꞌ gono daaꞌ ineꞌ nolihe idoꞌ geni initeliꞌmi lulouꞌ minave hize eleꞌ o-ngedaaꞌ ineꞌ nolihe neꞌmine manaꞌmine gono laminetoꞌ eꞌmeto daaꞌ ineꞌ veneꞌ lamineꞌ nolineꞌ neevoꞌ nene guliveꞌine gizezo.  
\v 11 Ne neiha veneꞌ gevonoꞌ olihe ozoho milami gosohoꞌ gidini nizaniꞌ neti guliveꞌine nene gizamozo. Nene nanitekumuꞌ ve. Alingeꞌ nene luꞌine Kilisitodokovoꞌ mili minaniꞌ ma nene okoꞌine losuvoꞌmo laniteꞌ gilineꞌ initekumuꞌ otavosa veloꞌ gohi volone li amuzo mili gililizaniꞌ nenako nemuꞌ nene guliveꞌine gizamolosane.  
\v 12 Ingine gohi veloꞌ ma vilizaniꞌ nene ganaꞌ luꞌine Kilisitodokovoꞌ molo minelone laniꞌ ma nene avutoꞌ igisa lihime dalisave.  
\v 13 Idoꞌ ma nene gono dami haza gopo minaaꞌ monovo ningi ditiꞌ igi mini numuno mukikuꞌ dizaaꞌ limaaꞌ igi moniivoꞌ minaaꞌ nave. Neꞌmine niigisa gamazi lodonga hize eza ema igi gamazi di lulu izi eveneꞌ initekumuꞌ dedeꞌ izi lamilizaniꞌ gamazisi nene liꞌmi monaaꞌ nave.  
\v 14 Nemuꞌ nene monoteliꞌmi biluvaꞌ ve nete ngemenga likelizave lo naza veneꞌ gosohoꞌ gevonoꞌ minaniꞌ nene veloꞌ gohi vi izipe gidi mili numuꞌine ebeꞌnidoꞌ nene gizebo igi minilizave losa noluve.  
\v 15 Neꞌmine noluvoniꞌ nene nanitekumuꞌ ve. Veneꞌ gevonoꞌ linge nene mo monokutiꞌ limi vi Satani eꞌmeti nivaniꞌ nenako nemuꞌ nene noluve.  
\v 16 Idoꞌ Kilisitoꞌ evenele maliꞌmi zuhouꞌ nene veneꞌ gevonoꞌ ma nizavo ma engiꞌ hize eleꞌ o-ngedaaꞌ gono nene monoꞌ mulise gehe-ngedamo asiꞌve nene hize eleꞌ o-ngedo viseꞌ aniꞌ initeꞌ ngemo minelive. Ne nanitekumuꞌ ve. Monoꞌ mulise neꞌmo nene guhalihali igi minaaꞌ naaniꞌ veneꞌ gevonoꞌ nene hize eleꞌ o-ngedaaꞌ neineꞌ nenako hize eleꞌ i-ngidilizaniꞌ initeꞌ viseꞌ ikelizave losa nemuꞌ nene aꞌmine engiꞌ zuho asiꞌve hize eleꞌ o-ngedelive lo noluve.   
\s1 Monoꞌ Gizebo Ve Meni nGemaaꞌ Idoꞌ Goniꞌ O-ngedaaꞌ Idoꞌ Monoꞌ Gonoloꞌ nGeleꞌmize Molaakumuꞌ Timoteoꞌni Lo-dineꞌ Gamazi  
\p
\v 17 Idoꞌ monoꞌ gizebo ve linge gono lamineꞌ di minaaꞌ nave nene meniꞌnidoꞌ masi imineꞌ mili ngimilizadoꞌ lisiheꞌ o neize. Neꞌmine igi ngimilo. Neꞌmine noluvoniꞌ nene monoꞌ gono lamineꞌ daaꞌ ave mukitoꞌ nene vo do neiha monoꞌ gamazi li sotoꞌ igaꞌ naavelokisi idoꞌ monoꞌ monovo apizi ngimaaꞌ naavelokisi nene vo do gehepeve o neive.  
\v 18 Aꞌmine noluvoniꞌ gamazi meemuꞌ neve nene monoꞌ godolouꞌ tiꞌ lo lo neineꞌ ma mo gele noneꞌ ma neive:  
\q1 Bulumakatinelite lengiꞌ viti gihiletine nene  
\q1 lisi di lediꞌ lediꞌ nii-lingidavo ma nene  
\q1 aꞌmingutiꞌ nevo ha nalizadoꞌ o neize.  
\q1 Ma nikelizave li veꞌnidoꞌ nene initeꞌ ma di tili-ngidamilo.  
\m Idoꞌ ma neve nene:  
\q1 Gonouꞌ ve ingine gonoꞌnidotiꞌ meniꞌine dalizadoꞌ lisiheꞌ o neineꞌ nenako  
\q1 mo meniꞌine dalisave.   
\m
\v 19 Idoꞌ eveneꞌ maliꞌmo monoꞌ gizebo ve mamuꞌ monovo goloso dave lo goniꞌ o-delesa ma nolivo ma nene aꞌmine monovo goloso do nolineꞌ nemuꞌ nene eveneꞌ sitape setohamo he neꞌminete mo neꞌmine ogave li hamoꞌ gamazivoꞌ gehepeve lamavo ma nene alamo goniꞌ o-damolosane.  
\v 20 Idoꞌ lihime diꞌmi nave nene eveneꞌ mukiliti veꞌnidoꞌ nene ngelemezo. Ee, eveneꞌ linge nesi nene nemuꞌ golise gili lihime dami hazavoꞌ minilizangisi eveneꞌ mukiliti veꞌnidoꞌ nene ngelemezo.  
\v 21 Gaza lo-giduvoniꞌ gamazi mene eꞌmete gehepeve iline losa naza Oꞌmosoꞌmi velelokisi Izesuꞌ Kilisitoꞌ velelokisi idoꞌ Oꞌmosoꞌmo do kegese-ngidineꞌ angeloꞌveti veꞌnidokisi nene nolo-giduze. Goniꞌ gamaziꞌine olihe gele-ngedamo bubu izo mo laminetoꞌ lihime dikeve idoꞌ damave lo mo lamo idoꞌ gonikuꞌ sisitemi nesi nene mo amo goniꞌ neve nene mo monovo lisihetokovoꞌ do molo gele-ngedelesane.  
\v 22 Idoꞌ gaza eveneꞌ ma do kegeso monoꞌ gizebo ve loloꞌ o-ngedelo ma nene bubu izo anga godoꞌnidoꞌ hito do kegese-ngedamozo. Gaza bubu izo ingine monovoꞌine golososi ma nolingumuꞌ neꞌmine oganivo engiꞌ lihime nene geita dizalize. Lihimeka nomineꞌ mineliningisi geiꞌ monovokaloꞌ nene gizebo lamineꞌ ogosa minezo.  
\v 23 Neꞌmine ogo minelesaineꞌza gaza haza nosovoꞌ nonaineꞌ nene hulo haza nosovoꞌ namo gatungauꞌ initeꞌ geteꞌ geto gize doꞌ gize doꞌ ogaꞌ naineꞌ nene do lamineꞌ o-gedelingisi vaini noso ngomo ha niteꞌ nesi malasini neꞌmino nokaꞌ nokaꞌ olosane.  
\v 24 Idoꞌ gaza bubu izamozo noluvoniꞌ nene nanitekumuꞌ luvoba asi eveneꞌ malite monovo goloso di lihime daaꞌ naaniꞌ neꞌmi guvele nene geto buu lo vavosa alingeꞌ gonitoꞌ ngeleꞌmizi milii lihime ngimaaꞌ naaniꞌza ve ma neve nene monovo goloso di lihime daaꞌ naniꞌ neꞌmi lihime geto sotoꞌ amivo mino alingeꞌ sotoꞌ ogaꞌ neive.  
\v 25 Idoꞌ aꞌmineꞌmine ogo eveneꞌ malite monovo lamineꞌ igi mili igaꞌ naniꞌ nene mo sotokovoꞌ minaaꞌ neive. Idoꞌ malite monovo lamineꞌ igi mili igaꞌ naniꞌ nene idise sotoꞌ amo nolineꞌ nesi nene ngelo mudise halekamoloseinako nemuꞌ nene bubu izamaaꞌ iline losa nolo-giduve.   
\c 6  
\s1 Gelekeleꞌ Gono Daaꞌ Ave Ingine Gizebo Veꞌine Igi Mili I-ngidilizaniꞌ Monovomuꞌ Pauloꞌ Timoteoꞌni Lo-dineꞌ Gamazi  
\p
\v 1 Eveneꞌ malitesi nene Oꞌmosoꞌmi gulive diꞌmi limi apize lengemaaꞌ nouneꞌ monote nesi nene divi lediviꞌ ikelizaze. Eveneꞌ malite gelekeleꞌ gono gihi-ngidikevo engiꞌ gonouꞌ initeꞌine neꞌmine liliꞌ i minave mukiꞌ ingine aꞌmine gelekeleꞌ gono gihi-ngidaaꞌ avemuꞌ nene gilunivo diziivoꞌ minilizadoꞌ o neive li gili gelekeleꞌ lamineꞌ i-ngidivoꞌ minilisave.  
\v 2 Idoꞌ ve ma gono gihi-ngidaaꞌ ave gizebo veꞌine nene gili eleꞌvoleꞌ ave nilizaniꞌ nene engitoꞌ gono daaꞌ ave nete nene aꞌmine gizebo vete nene Izesuꞌ evenele leze zuho neive li gilisa engikumuꞌ gilavo lemavosa gonouꞌ nene alahaꞌ alahaꞌ igi dikelizave. Asi leliꞌ gono dunidiꞌmo hize eleꞌ o-ngidive nene Izesuꞌ evenele leliꞌ zuho lute ngimunive nene nizave lisa gono engitoꞌ dalizaniꞌ nene gohi ma amuzo milisa di mini gelekeleꞌ lamineꞌ gehepeve i-ngidilizave.  
\s1 Atoꞌ Monoꞌ Apizi nGimaaꞌ Aveti Monovomukisi Idoꞌ Monototiꞌ Heneni Ve Liliꞌ Ilisa Gilaveti Monovomukisi Timoteoꞌni Lo-imineꞌ Gamazi  
\p Mene noluvoniꞌ gamazi nene eꞌmetilizave lo gaꞌine do apize ngemezo.  
\v 3 Eveneꞌ malite monoꞌ gihile lamineꞌ Guvetesi ve Izesuꞌ Kilisitoꞌ gamazi monoꞌ monovo lisihetoꞌ leleꞌmize molaaꞌ neidoꞌ nene luꞌine milami gamazi atoꞌ apizi ngimilizaniꞌ nene  
\v 4 engiꞌ okoꞌine di dizi otohato ve none li gilaaꞌ naha initeꞌ hamokumukisi ma gili lamineꞌ amavete nene laaꞌ nave. Monoꞌ monovomuꞌ nene gamazidunuꞌ ge hulo ne hulo laakumuꞌ nene naba goloso ngisaaꞌ neineꞌza neꞌmine ogaꞌ neꞌmo nene initeꞌ neꞌmino do sotoꞌ ogaꞌ neive: Mumuzoꞌ ogo goloso gelaaꞌ lovo lolize ogaꞌ idoꞌ dovo ledevoꞌ gamazi laaꞌ hazamuꞌ ngemenga laaꞌ gaꞌine gilaaꞌ  
\v 5 eze elemivo eze elemivo laaꞌ neꞌmine monovo nene do sotoꞌ neive. Aꞌmine neꞌmine monovo neꞌmini di sotoꞌ igaꞌ ave neti maduꞌine nene goloso ogavo mini gamazi gihile nene damavo engita nomivo mini initeꞌ gohi gohi daloneꞌ aka nene monoꞌ monovoloꞌ eꞌmetaaꞌ nehe li gilaaꞌ nave.  
\v 6 Idoꞌ lamineꞌ initeꞌ gohi gohi daloneꞌ aka nene neineꞌza ingine giladiꞌmine ogo me misubouꞌ initeꞌ nevoba asi laza do noneꞌ initeꞌ nene leliꞌ votigileloꞌ mo vo do neive lo hongu lo lamino minosa monoꞌ monovoloꞌ eꞌmetaaꞌ nouneꞌ neꞌmo luteliꞌmi heneni nene vaiꞌ goloso do sotoꞌ o-ledaaꞌ neive.  
\v 7 Neꞌmine noluvoniꞌ nene nanitekumuꞌ ve. Laza izetehi mulunoutiꞌ sotoꞌ uninguꞌ nene initeꞌ hamokisi do amosa me misubo hulo volonidaa nene initeꞌ hamokisi ma do vamolosune.  
\v 8 Nemuꞌ nene nosoꞌ nitekisi okodeloꞌ nitekisi do mineloneꞌ nene leliꞌ votigileloꞌ mo vo do neive lo hongu lo lamino minelone.  
\v 9 Ne neiha ingine heneni ve loloꞌ olone li gilaaꞌ ave nene Sataniꞌmo ngemenguꞌ molo ngimimiseꞌ ogavo negi hizi do goloso o-ngedaaꞌ neineꞌ initeꞌ mukikumuꞌ nene ma dunivo li gilaaꞌ naniꞌ neꞌmo nene vi Sataniꞌmi gelevusouꞌ bilaaꞌ nave. Ee, eveneꞌ di goloso i-ngidi ngeleꞌmize tolovo igaꞌ naniꞌ initekumuꞌ nene ngumo helavo monokutiꞌ limi ingi goloso igaꞌ nave.  
\v 10 Neꞌmine noluvoniꞌ nene lute moniloꞌ molaaꞌ neꞌmo nene neꞌmine manaꞌmine monovo goloso nene do sotoꞌ ogaꞌ neive. Eveneꞌ ma nene moni heneni dalisa gili monoꞌ akalotiꞌ vi gopo igi engiꞌ okoꞌnidoꞌ nene mulumo geni initeꞌ vaiꞌ angiseꞌine di gihaaꞌ nanako nemuꞌ nene noluve.   
\s1 Timoteoꞌni Oꞌmosoꞌmo Imineꞌ Gono Nene Amuzo Molo Do Minelineꞌ Monovomukisi Idoꞌ Heneni Vete Igi Mili Ilizaniꞌ Monovomukisi Pauloꞌ Gala Do Lo-imineꞌ Gamazi  
\p
\v 11 Neꞌmine igaꞌ naniꞌza Oꞌmosoꞌmi gonoloꞌ ve gaza me luvoniꞌ monovo golosolotiꞌ nene golise ogo mehenga emo mene lo-gemeloniꞌ monovo nene imiselo dalosa amuzo molozo. Adoꞌ monovo lisihekovoꞌ ogakisi monoꞌ monovoloꞌ eꞌmetaakisi Guvelesi vemuꞌ gele eleꞌvoleꞌ ogakisi lute ngemaaꞌ monovo nesi idoꞌ geni initeꞌ sotoꞌ ilinguꞌ zegeꞌ zegeꞌ ogakisi hongu monovo eveneꞌ ngelebizo minaakisi nene dalinge. Imiselezo.  
\v 12 Eveneꞌ malite meni dalisa ge hulo ne hulo li lotiꞌ izi vaaꞌ naniꞌ neꞌmino gaza monoꞌ lesisi laminekuꞌ nene zegeꞌ zegeꞌ ogo lotiꞌ izo minevoꞌ minevoꞌ gemeni dameni nene do tiꞌ ozo. Adoꞌ neꞌmine iline lo Oꞌmosoꞌmo elese molo-gedavo ogo eveneꞌ mukiliti veꞌnidoꞌ do lamineꞌ ogo Kilisitoꞌnimuꞌ gele eleꞌvoleꞌ ogaꞌ naningumuꞌ nene lo sotoꞌ aineꞌ ma neive.  
\v 13 Idoꞌ Oꞌmoso initeꞌ mukiꞌ vetesi minaaꞌ amuzo limiveꞌmi velelokisi idoꞌ ngamani naba Podioꞌ Pilatoꞌ minidaa gamazi gihile lamineꞌ lo sotoꞌ ive Izesuꞌ Kilisitoꞌ velelokisi nene tiꞌ lo nolo-giduze:  
\v 14 Gaza monoꞌ gamazi lo-giduvoniꞌ nene eꞌmete gehepeve ozo. Neꞌmino gaza aꞌmine gamazi nene do gopo amanivo eveneꞌ nene ningi aꞌmine gamazimuꞌ nene ningedoꞌ hangedoka lamavo Guvetesi ve Izesuꞌ Kilisitoꞌ sotoꞌ ilidoꞌ nene lihimeka nomineꞌ minelesane lo nolo-giduve.  
\v 15 Idoꞌ aꞌmine Guvetesi ve nene Oꞌmoso asiꞌve molaniꞌ gameneloꞌ gehepeve nene do sotoꞌ o-deleseive. Aꞌmine Oꞌmoso nene laminekukovoꞌ minive dizo minineꞌ gizebo ve hamoꞌ minive guveꞌinesi naba mukiliti Guveꞌinesi ve naba minive  
\v 16 eiꞌ hamokovoꞌ nene helamaaꞌ ive adoꞌ eveneꞌ hamolitesi ngelo avitasi vamoloneꞌ o minineꞌ labanaliꞌmi lulouꞌ minive eveneꞌ hamolitesi ningamaniꞌ mino mo ngeli ningamilizaniꞌ Oꞌmoso eikumuꞌ nene gilunivo dizo minavo gizebo o-ledelineꞌ amuzoꞌve nene eleꞌvoleꞌ ogo minevoꞌ minevoꞌ ilive. Mo neꞌmino minilihoo.   
\p
\v 17 Idoꞌ gaza idise mene gameneloꞌ moni heneni ve nizave nene gaꞌine do lo-ngedezo. Angiseꞌinemuꞌ gilavoo dizi minisa aꞌmine do ngululubize-ledaaꞌ neineꞌ initeꞌ moni heneniloꞌ nene gili muꞌmusiꞌ igi gili medeli minami asi laniteꞌ gili minilizave lo initeꞌ mataꞌ mukiꞌ vauve elo lehize-ledaaꞌ ive Oꞌmoso eikumuꞌ neve nene gili muꞌmusiꞌ igi gili medeli mini  
\v 18 gono lamineꞌ di nizavo heneniꞌine nene aꞌmine gono lamineꞌ neꞌmo nene loloꞌ ogavosa aꞌmine nene vauve ili dii mini engita minineꞌ initeꞌ nene inele panala igi eveneꞌ masi nasahiliꞌ i-ngidi minilo lo lo-ngedezo.  
\v 19 Neꞌmine ilizaniꞌ nene alingeꞌ gameneuꞌ mine lamineꞌ ilizangumuꞌ hize eleꞌ o-ngedelineꞌ heneniꞌine nene di milisa aꞌmine gameneuꞌ initeꞌ gihile minevoꞌ minevoꞌ ngemeni dameni nene dalizadoꞌ minilisave.   
\s1 Timoteoꞌni Gala Do Pauloꞌ Luhuvo Niteꞌ Gize Osuꞌ Lo Gizineꞌ Gamazi  
\p
\v 20 Timoteoo, gaza Oꞌmosoꞌmo do-nedeline lo gono gimineꞌ maloꞌ nene gizebo lekeseve ozo. Idoꞌ haza monoꞌ gihile nomineꞌ gamazi eveneꞌ malite laaꞌ naniꞌ nesi idoꞌ soza li gele vevesaaꞌ monovoloꞌ noeꞌmetune li monoꞌ gamazite bili laaꞌ naniꞌ gamazi nesi nene gelamo mehenga emaaꞌ ozo.  
\v 21 Neꞌmine ogaꞌ ozo noluvoniꞌ nene eveneꞌ ma nene aꞌmine neꞌmine gamaziloꞌ vi giꞌmizaniꞌ neꞌmo monoꞌ gihilelotiꞌ nene mo zovoꞌ izi vikeve.  
\p Oꞌmosoꞌmi nasahiliꞌ nene lengikisi miniliho.