\id 1PE  - Dano NT [aso] -Papua New Guinea 1989 (DBL -2014) 
\h 1 PETOLOꞌ 
\toc1 Petoloꞌ Izesuꞌ Zuho Miniꞌmi Monave Gize-Ngidineꞌ Luhuvo Niteꞌ Naba 1 
\toc2 1 Petoloꞌ 
\toc3 1 Pet 
\mt1 PETOLOꞌ IZESUꞌ ZUHO MINIꞌMI MONAVE GIZE-NGIDINEꞌ LUHUVO NITEꞌ NABA 1  
\ip Petoloꞌ Izesuꞌ Evenele Zuho Naba Vanu Luhuvo Niteꞌ Gize-ngidingumuꞌ Gomuꞌ Gataaꞌ Gamazi  
\ip Mene luhuvo niteꞌ nene aposoloꞌ Petoloꞌ gizineꞌ ve. Petoloꞌ aza Betesaida ebekutiꞌ ve minineꞌ. Aꞌmine ebeꞌ Betesaida nene Zuda veliti misubo lingela nGalilaia polovinisi ve languꞌ minineꞌ. Idoꞌ Izesuꞌ aza olihe gulive gosohoꞌ Kehaꞌ ve lo molo-damivo Petoloꞌ gulive nene Simoniꞌ ve lo minineꞌ. Aꞌmine Izesuꞌ molo-dineꞌ gulive Kehaꞌ nene do velepeꞌ izo nGiliki aleveti gamaziꞌningutiꞌ loloneꞌ nene Petoloꞌ ve lo mineleseive. Aꞌmine Petoloꞌ gulive neꞌmi monovo nene neꞌmino neive: Eleꞌvoleꞌ ogo minaaꞌ neineꞌ initeꞌ geheni neꞌmine ve. Melehi gulive nene Zohaneꞌ ve. Petolokisi akunolo Adeleakisi ingine alahaꞌ daaꞌ asive minasineꞌ ve. Aꞌmine alahaꞌ dii maketi milaaꞌ gonouꞌ makaꞌ daaꞌ ave ma minasineꞌ nene uvolohoi akunoloi adoꞌ Zakoboki Zohaneki ve. Idoꞌ alahaꞌ daaꞌ aniꞌ nene nGalilaia noso ohuno nabautiꞌ disa maketi milaaꞌ aniꞌ ve. Aꞌmine ve setaꞌve setaꞌve ingine noso holo-ngedaaꞌ ive Zohaneꞌ izipahala liliꞌ igi mini nelotiꞌ alingeꞌ nene Izesuꞌ izipahala zuho liliꞌ aniꞌ ve. Alingeꞌ nene Petoloꞌ aza Izesuꞌ izipahala zuho mukiꞌ minangutiꞌ aposoloꞌ gono di hize eleꞌ i-dilizave lo ve tuveluꞌa do kegese-ngidiveutiꞌ minineꞌ ve. Idoꞌ aꞌmine Izesuꞌ aposoloꞌve tuveluꞌa minanguꞌ nene Petoloꞌ aza ve naba neꞌmine minineꞌ ve. Idoꞌ aza gamazi lo ogo molo ineꞌ initeꞌ vaikumuꞌ nene Mataioꞌ ve Malekoꞌ ve Lukaꞌ ve Zohaneꞌ ve gizaniꞌ buku setaꞌve setaꞌveukisi idoꞌ aposoloꞌ bukuukisi nene gatelesane. Pedekosi gameneuꞌ Oꞌmosoꞌmi Sikalahuꞌ neꞌmo Izesuꞌ izipahala zuhola lemo minineꞌ gameneuꞌ eveneꞌ vaiꞌ igi di geseꞌ ave monoꞌ lo-ngimive nene Petoloꞌ ve. Aꞌmine di geseꞌ aveuꞌ nene kanitili ato atoꞌ mukikutiꞌ aniꞌ Zuda ve masi vaiꞌ minaniꞌ. Aꞌmine gameneuꞌ Izesuꞌnimuꞌ gili eleꞌvoleꞌ igi eze evenele zuho liliꞌ ave tili tauseni minanguꞌ nene aꞌmine kanitili ato atokutiꞌ aniꞌ Zuda ve lingesi neꞌmine aniꞌ noloseive. Idoꞌ Zuda ve minamave nene ganaꞌ apiꞌ ogo Izesuꞌ gamaziꞌve lamineꞌ lo-ngemelive lo Oꞌmosoꞌmo Petoloꞌni eleꞌmize molaniꞌ ve. Neꞌmine gamazimuꞌ nene Aposoloꞌ tenisi idoꞌ leveniukisi ne neive. Idoꞌ gozopoꞌ akaꞌmilatiꞌ liꞌmi aniꞌ gamazi ma tiꞌ lo lo neineꞌ ma neive. Petoloꞌ aza Kolidi ebeta vo aꞌmida alevesi monoꞌ gamazi lo-ngimineꞌ. Ne neiha Zuda ve minamave nene Izesuꞌ gamaziꞌve lamineꞌ lo-ngemeꞌmo monelive lo Oꞌmosoꞌmo eleꞌmize molave nene Pauloꞌ minineꞌ ve. Petoloꞌ aza monoꞌ gono vauve elo daniꞌ nene Zuda vetinguꞌ ve. Petoloꞌ aza vani molo mino Loma ebekuko vo neivo aꞌmida Loma vete Pauloꞌni bili hilaniꞌ gamenela nene Petoloꞌnisi lohotoꞌ zaloꞌ bili hilaniꞌ ve li liꞌmi aniꞌ. Idoꞌ bili hililisa navo Petoloꞌ aza Guvelesi ve Izesuꞌni bili hiladiꞌmine gehepeve igi nenikisi nibili hililizadoꞌ lisiheꞌ amuve lo gelo amilite godoꞌne huli galaꞌmuda igi gizeꞌne di veleta igi lohotoꞌ zaloꞌ nilidunuꞌ nibililizave lo lo-ngedavo gili di neꞌmine i-daniꞌ ve laaꞌ aniꞌ. Idoꞌ luhuvo niteꞌ mene gizavo gamene haꞌna ogo vamivo bili hilaniꞌ noloseive. Luhuvo niteꞌ lumola nene Babelonia meuꞌ minineꞌ alu neꞌmo meseꞌ aseka nolo-lingidive lo gizineꞌ. Idoꞌ monoꞌ monovo gili lamineꞌ igaꞌ ave linge mukiꞌ nete tiꞌ li laaꞌ nave: Petoloꞌ aza aꞌmine alumuꞌ gizineꞌ nene eiꞌ minineꞌ ebekuꞌ Izesuꞌ evenele zuho muliseloꞌ lo molo gizineꞌ ve. Idoꞌ Babelonia ebekumuꞌ lineꞌ nene gepeꞌ gamazi Loma ebekumuꞌ lo molo lineꞌ noloseive li laaꞌ nave.  
\ip Idoꞌ aꞌmine luhuvo niteꞌ gizineꞌ nene Izesuꞌ evenele zuho Podo polovinisiukisi Galatia polovinisiukisi Kapadokia polovinisiukisi Asia polovinisiukisi idoꞌ Bitinia polovinisiukisi miniꞌmi monangumuꞌ gizineꞌ. Aꞌmine polovinisi mukiꞌ nene kanitili ma idise Teki (Turkey) ve laaꞌ nouninguꞌ minaniꞌ ve. Idoꞌ luhuvo niteꞌ gizingumuꞌ nene nemuꞌ gizuve lo gizamineꞌza aꞌminguꞌ gizineꞌ gamazilotiꞌ nene tiꞌ lo gele none: Aꞌmine luhuvo niteꞌ gize-ngidive nene eveneꞌ malite goboni nimili-ngidave nete gohi amuzo mili goboni mili-ngidilisa nave lo gele mino monokuꞌ mini giliꞌ li minilizangumuꞌ do amuzo molo-ngedelesa gizineꞌ noloseive lo gele none. Neꞌmine lo gelo laza Loma veti gizebo veꞌine naba gulive Neloꞌ aza ngamani gonoꞌ daaꞌ avesi idoꞌ ami pilisi veꞌvesi lo-ngedavo ingine apiꞌ igi Izesuꞌ evenele zuho numudoꞌ namadoꞌ miniꞌmi monaniꞌ nene goboni mili-ngidi minaniꞌ gamene nene olihe alosa neivo nehe idoꞌ mo ogavo nehe neꞌmine gameneuꞌ nene luhuvo niteꞌ mene gizineꞌ noloseive lo gele none. Idoꞌ aꞌmine luhuvo niteꞌ gizinguꞌ nene Petoloꞌ aza Izesuꞌ evenele mene tiꞌ lo lo-ngimineꞌ: Ingine mulumo geni gihi nizaniꞌza nesi nene ngolize izi minilizadoꞌ o neive. Idoꞌ neꞌmino ngolize izilizadoꞌ o neineꞌ nene Oꞌmosoꞌmo noꞌnohoꞌ ize-ledo Okulumokuko initeꞌ lamineꞌ goloso salani molo-lede neingumuꞌ nene ngolize izilizadoꞌ o neineꞌ ve. Izesuꞌ Kilisitoꞌnimuꞌ gili eleꞌvoleꞌ aniꞌ nene do ningelesamuꞌ aꞌmine mulumo geni nene gihilizave lo Oꞌmosoꞌmo gele ngimineꞌ ve. Idoꞌ gili eleꞌvoleꞌ aniꞌ nenako neꞌmo lukuvo nikevo Izesuꞌ gohi tineꞌ molo alineꞌ gameneuꞌ nene Oꞌmosoꞌmo guliveꞌine do hozi loloseive. Monovo golosoꞌmi akaloꞌ minadotiꞌ huli monovo lamineliꞌmi akaloꞌ minilizave lo Kilisitoꞌ aza helo vaniseꞌve dizo minineꞌ lekineꞌ nemuꞌ gili minilizave lo lo-ngimineꞌ. Mo Oꞌmosoꞌmi izipahala gehepeve liliꞌ ikeniꞌ nenako nemuꞌ ingine gonoꞌine nene eiꞌ gulive di oti eveneꞌ li-ngimilizave. Izesuꞌ evenele minamave nete Izesuꞌ evenele zuho nene eveneꞌ goloso nizave laaꞌ naha Izesuꞌ evenele zuho ingine igi mili minilizaniꞌ monovo nene aꞌmine Izesuꞌ evenele minamaniꞌ aleve nete engikumuꞌ nene monovo laminekovoꞌ daaꞌ nave lilizadoꞌ di mili igi mili minilizave. Nemuꞌ ingine gizebo veꞌinelite gamaziꞌine nene gili dalizave. Gizebo veꞌinelite gonouꞌ ve monovo lamineꞌ i ngimamaaꞌ nave nemukisi noluve. Monovo lamineꞌ ilizanguꞌ mulumo geniuꞌ vilizaniꞌ nene Oꞌmosoꞌmo noꞌnohoꞌ ize-ngedeleseive. Nemuꞌ nene Kilisitoꞌ gomuꞌ molo ngemo okineꞌ monovoloꞌ nene eꞌmeti ilizave lineꞌ. Di goloso gehepeve i-danguꞌ nesi Izesuꞌ aza aꞌmida do velepeꞌ izo gamazi lo idoꞌ do goloso o-ngedamaaꞌ ineꞌ. Neꞌmine lo Izesuꞌ evenele zuho nene eleꞌninge vaꞌninge minaniꞌ nete engiꞌ minevoꞌ alevoꞌninguꞌ monovo igi mili minilizangumuꞌ lo-ngimineꞌ. Gohi tiꞌ lo lo gaꞌine ineꞌ: Lingine luꞌine mili hamoꞌ igi ge luka neme ne luꞌne geme idoꞌ ge hongu monovo o neme ne hongu monovo o geme li minilizave. Monovo goloso i-ngidaaꞌ nave nene luꞌine ngimilizave. Monovo lamineꞌ ilizangumuꞌ eveneꞌ nete ma di goloso i-lingidamilizaniꞌza ma neꞌmine ilizaniꞌ nene Oꞌmosoꞌmi noꞌnohoꞌ dalizaze. Nemuꞌ lingine lengehelele izamivo minilo. Lingine gili eleꞌvoleꞌ igi minaaꞌ naniꞌ niteꞌ nene nanitekumuꞌ gili eleꞌvoleꞌ igaꞌ nave li longoꞌ i-lingidilizave nene lutine laminetotiꞌ lingimilizangumuꞌ di vaꞌvaꞌ igivoꞌ minilo lineꞌ. Idoꞌ gohi amuzo molo tiꞌ lo lo-ngimineꞌ: Evenelite mulumo geni lingimilizaniꞌ nene monovo goloso angumuꞌ minamilive. Kilisitoꞌ mulumo geni nogeho gala gelaaꞌ ineꞌ neꞌmini gililizave. Neꞌmine ikevo mulumo geni gihilizaniꞌ neꞌmo lihime monovolotiꞌ do olovoꞌ o-ngede minelive lineꞌ. Idoꞌ gohi tiꞌ lo gaꞌine daniꞌ: Initeꞌ mukiꞌ osuꞌ lilineꞌ gamene nene mo avitoꞌ ogaze. Nemuꞌ Oꞌmosola lii ge hize eleꞌ o-nede ne hize eleꞌ o gede lii idoꞌ Oꞌmosoꞌmo dalizave lo amuzo lengeme neineꞌ gono nene dalo lineꞌ. Asiꞌve nene monoꞌ muliseloꞌ gizebo ve minineꞌ nenako nemuꞌ monoꞌ muliseloꞌ gizebo ve ingine gonoꞌine nene di guni dalizave lo lo-ngidineꞌ. Ingine mukitoꞌ okoꞌine diꞌmi limi minilizave lo lo-ngimineꞌ. Miniꞌmi limi ve maliꞌmi gonouꞌ ve neꞌmini minaatoꞌ mini mili minilizave. Miniꞌmi limi minikevo Oꞌmosoꞌmo geniꞌine hize eleꞌ o-ngedelidoꞌ mini mili minilizave. Oꞌmoso aza engikumuꞌ gelaaꞌ neineꞌ nenako nemuꞌ hize eleꞌ o-ngedeleseive.  
\ip Nelotiꞌ gohi ma tiꞌ lo lo-ngimineꞌ: Satani aza doꞌmo leme-lengedelesa nomonize. Nemuꞌ gizebo igi minilo lo gaꞌine daniꞌ. Idoꞌ Izesuꞌ evenele zuho numudoꞌ namadoꞌ minaniꞌ nesi ingine aꞌmine hamoꞌ geni nidaniꞌza gamene haꞌna minamunivo Oꞌmoso aza initeꞌ do lisiheꞌ o-lengedelesa aloseive lineꞌ.  
\ip Siluvanoꞌ adoꞌ Aposoloꞌ bukuuꞌ Silasiꞌ ve laaꞌ ave aza aꞌmine luhuvo niteꞌ gizuvonguꞌ nene hize eleꞌ o-nidive lo lo-ngemo idoꞌ Oꞌmosoꞌmo do kegese-mikineꞌ alu Babelonia ebekuꞌ minineꞌ neꞌmo meseꞌ aseka lo-ngidineꞌ nene lo-ngemo idoꞌ Malekoꞌ meseꞌ aseka lo-ngidineꞌ nesi lo-ngimineꞌ. (Monoꞌ monovo gilaaꞌ ave nete gilaniꞌ nene aꞌmine Babelonia ebekuꞌ minineꞌ alu ve lineꞌ nene Izesuꞌ evenele zuho mulise Loma ebekuꞌ minaniꞌ nemuꞌ lo noloseive li gilaniꞌ ve.) Neꞌmine lo luhuvo niteꞌve nene noꞌnohoꞌ gamazitunuꞌ gize osuꞌ lineꞌ.  
\c 1  
\s1 Petoloꞌ Luhuvo Niteꞌ Gizelesa Apiꞌ Ogo Gizaaꞌ Gamazi Gizinguꞌ Noꞌnohoꞌ Gamazi Gize-ngidineꞌ Gamazi  
\p
\v 1-2 Izesuꞌ Kilisitoꞌ aposolo minuve Petoloꞌ naza lingine Izesuꞌ Kilisitoꞌ gamaziꞌve gili diivoꞌ minilizangumuꞌ ve losa idoꞌ vaniseꞌve neꞌmo noso ize-lengedo Kilisitoꞌ gelekeleꞌ ve lengeleꞌmize molalingumuꞌ ve losa eiꞌ Oꞌmosoꞌmi Sikalahuꞌve neꞌmo nene do kekeize lo-lengedelive lo Oꞌmosoꞌmo gomukutiꞌ vomine gele minidoꞌ eꞌmeto do kegese-lengede neineꞌ aleve lingine venenga ve neꞌmine gili mini gamene liꞌnibemukovoꞌ Podo misuboukisi Galatia misuboukisi Kapadokia misuboukisi Asia misuboukisi idoꞌ Bitinia misuboukisi miniꞌmi monave lengiꞌ nene luhuvo niteꞌ mene nogize-lingiduve. Oꞌmosolatiꞌ nasahiliꞌ nesi idoꞌ hongu lo lamino minaaꞌ monovo nesi nene lengita mine vaiꞌ loꞌmo vo miniliho.   
\s1 Oꞌmosoꞌmo Leliꞌ Mulumote Gelo Do Luꞌ Izo Minevoꞌ Alevoꞌ Lamineꞌ Nene Okulumokuko Salani Molo-lede Neineꞌ Nenako Nemuꞌ Nene Lingine Idise Mulumo Geni Ato Atoliꞌmine Gihi Nizangukisi Longolize Naba Izi Minilizave Lo Petoloꞌ Lo-ngimineꞌ Gamazi  
\p
\v 3 Idoꞌ Guvetesi ve Izesu Kilisitoꞌ eiꞌ Oꞌmosoꞌve mino eiꞌ meleho minive nene opoꞌni lolone. Opoꞌni loloneꞌ nene adoꞌ Oꞌmosoꞌmo mulumote naba gelosa lemeni dameni nene do gosohoꞌ o-ledo gohi do sotoꞌ o-ledave. Idoꞌ neꞌmine o-lidineꞌ nene laza minevoꞌ alevoꞌ lamineꞌ daloningumuꞌ upuhoꞌ ogo gilingili ogo mino aꞌminemuꞌ gele muꞌmusiꞌ ogo noneꞌ akaloꞌ nene leleꞌmize nomolosa lemeni dameni nene do gosohoꞌ o-ledo gohi do sotoꞌ o-lidineꞌ ve. Idoꞌ neꞌmine o-lidineꞌ nene Izesu Kilisitoꞌ hilingutiꞌ do ote-didiꞌmo nene neꞌmine o-lidineꞌ ve.  
\v 4 Ee, idoꞌ neꞌmine ineꞌ nene aza Okulumokuko salani molo-lengede neineꞌ initeꞌ adoꞌ geleso osuꞌ lamaaꞌ idoꞌ golosoꞌvesi minamaaꞌ idoꞌ emeni dameniꞌve gopo amo gosohoꞌ laminekovoꞌ minaaꞌ initeꞌ nene dalizangumuꞌ ve losa lengemeni dameni do gosohoꞌ o-lengedo gohi do sotoꞌ o-lengedave.  
\v 5 Idoꞌ lingine aꞌmine salani molo neineꞌ initeꞌ dalizave noluvoniꞌ nene lingine ezemuꞌ gili eleꞌvoleꞌ igi minaaꞌ naniꞌ nemuꞌ nene Oꞌmosoꞌmo do lunguꞌ izelingumuꞌ ve losa eiꞌ amuzoꞌve neꞌmo alete molo-lengede minaaꞌ neingumuꞌ nene noluve. Aza do lunguꞌ izelesa do nene ogo neineꞌ nene gamene nabala do sotoꞌ ogo mudise do lunguꞌ izeleseive.  
\v 6 Nemuꞌ nene lingine longolize izilizadoꞌ o neive. Ee, Oꞌmosoꞌmo gelavo idise nene gamene liꞌnibemuꞌ mulumo geni ato atoꞌ ma gihi nilizangukisi nene longolizevoꞌ izi minilizadoꞌ o neive.  
\v 7 Idoꞌ aꞌmine mulumo geni gihaaꞌ ilizaniꞌ nene nanitekumuꞌ ve. Lingine Oꞌmosomuꞌ gili eleꞌvoleꞌ igi minaaꞌ naniꞌ nene aza mo gihile lamineꞌ nehe lo neꞌmi monovo do sotoꞌ o-lengedelesa nene lengemenguꞌ nomolave. Idoꞌ evenelite gilavo ngoli neꞌmo initeꞌ mataꞌ mukiꞌ ngivileꞌ ogo initeꞌ lamineꞌ neiha ngoli nene ngoli lamineꞌ nolihe li ningilisa olokuꞌ gizikevo loꞌvotamo ha minaaꞌ neiha alingeꞌ ngoli nesi nene vo osuꞌ loloseive. Lingine Oꞌmosomuꞌ gili eleꞌvoleꞌ igi minaaꞌ nanitine nene gihile lamineꞌ nolineꞌ nene mo ngoli nene ivileꞌ goloso ivosa initeꞌ naba neive. Nemuꞌ nene neꞌmino Oꞌmosoꞌmo lengemenguꞌ molaaꞌ ilidotiꞌ gele eleꞌvoleꞌ ogatine gihile lamineꞌ neineꞌ nene sotoꞌ ogavo Izesu Kilisitoꞌ gohi sotoꞌ o lemelineꞌ gamenela nene aza longopoꞌni lo gulivetine do hozi lo do naba o-lengedelingumuꞌ nene aꞌmine mulumo geni ato atoꞌ nene gihaaꞌ ilisave.  
\v 8 Izesu Kilisitoꞌni nene lingine mo ma ningamaniꞌza lutine imi minikeve. Idoꞌ idisesi mene okoꞌnoloꞌ ma ningami nizangukisi nene ezemuꞌ gili eleꞌvoleꞌ i mini lutinguꞌ gulumo avile lisivo longolize izi minaniꞌ nene laza evenelitesi ngelo monovo ma lamolonidoꞌ o minineꞌ longolize adoꞌ Okulumokutiꞌ atoliꞌmine ogo minineꞌ ma ne neive.  
\v 9 Idoꞌ neꞌmine igi longolize izi nizaniꞌ nene Kilisitoꞌnimuꞌ gili eleꞌvoleꞌ igi minaniꞌ neꞌmi gihileꞌve nene Oꞌmosoꞌmo lutine lukuvo emelidoꞌ mini mili nizaniꞌ nemuꞌ nene lutinguꞌ gulumo avile lisivosa longolize izi nizave.   
\p
\v 10 Oꞌmosoꞌmo leliꞌ lehize-ledelesa gele minineꞌ nasahilikumuꞌ li sotoꞌ ikaꞌ ikaꞌ igaꞌ ave gozopoꞌ minaniꞌ polohete nete nene aꞌmine aꞌme luvoniꞌ gamazi adoꞌ Oꞌmosoꞌmo lukuvo lemelineꞌ nene nado lemelive li neꞌmi monovomuꞌ nene gelelone li viseꞌ ikaꞌ ikaꞌ iꞌmi vi minaniꞌ ve.  
\v 11 Ee, Kilisitoꞌ Sikalahuꞌve neꞌmo aꞌmine polohete engikuꞌ omo mino Kilisitoꞌ mulumo geni ato atoꞌ gehelingumukisi lo sotoꞌ ogo idoꞌ neꞌmine ilidotiꞌ Guvelesi ve naba gehepeve loloꞌ ogo minelineꞌ makiloꞌ mine do dizelingumukisi lo sotoꞌ ineꞌ nene aꞌmine polohete nete aꞌmine mulumo geni gehelive zaho nolive li idoꞌ aꞌmine Sikalahuliꞌmo lo sotoꞌ ogo lo-limineꞌ initeꞌ nene nani gameneloꞌ sotoꞌ ilizave li neꞌmi monovo nene viseꞌ ikaꞌ ikaꞌ igaꞌ aniꞌ ve.  
\v 12 Viseꞌ ikevo Oꞌmosoꞌmo tiꞌ lo ngelebizineꞌ ve: Ingine Kilisitoꞌ gehelineꞌ initekumuꞌ li sotoꞌ igi gono daniꞌ nene angiseꞌinemuꞌ dami asi lengikumuꞌ daniꞌ nene Oꞌmosoꞌmo ngelebizavo gilaniꞌ ve. Idoꞌ aꞌmine Kilisitoꞌnimuꞌ laniꞌ gamazi nene idise lingine mo gilikeve. Oꞌmosoꞌmo Sikalahuꞌ Okulumokutiꞌ lelita imiselineꞌ neꞌmo do ote-ngedavo Kilisitoꞌnimuꞌ gamazi lamineꞌ li sotoꞌ igi li-lingimave nete nene mo li sotoꞌ igi li-lingimikevo gilikeve. Idoꞌ aꞌmine li-lingimaniꞌ gamazi laminekumuꞌ nene angeloꞌ netesi nene ma ningo geleloinakoo li gili minaaꞌ nave.   
\s1 Monovo Golosoloꞌ Minevoꞌ Alevoꞌ Igi Minangutiꞌ Nene Kilisitoꞌ Vaniseliꞌmo Do Kuluhize-lingidingumuꞌ Gili Mini Oꞌmoso Monovo Laminekovoꞌ Ogo Minaaꞌ Neineꞌ Neꞌmine Igi Lingine Monovo Laminekovoꞌ Igi Minilo Lo Petoloꞌ Gaꞌine Daniꞌ Gamazi  
\p
\v 13 Neꞌmine o neineꞌ nenako nemuꞌ nene lutine gatine nene gono dalidoꞌ di nene i-di mini lingine negi hizami monovotidoꞌ ha gizebo lamineꞌ igi mini Izesu Kilisitoꞌ sotoꞌ o lemelidoꞌ nasahiliꞌ gohi o-ledelingumuꞌ nene mudise gili muꞌmusiꞌ i minisa minilo.  
\v 14 Lingine Oꞌmosoꞌmi izipahala mini eiꞌ gamaziꞌve gili dalizadoꞌ o neineꞌ nenaze. Nemuꞌ nene lingine gomuꞌ ezemuꞌ gilami haza minaniꞌ gamenela vomine laniteꞌ gilaaꞌ aniꞌ initeꞌ maloꞌ nene gohi mini milamilo.  
\v 15-16 Asi monoꞌ godolouꞌ nene Oꞌmosoꞌmo lineꞌ gamazi tiꞌ li gizi nizaniꞌ ve:  
\q1 Naza nene monovoꞌne golososi nomineꞌ nouvoniꞌ nenako nemuꞌ nene linginesi monovotine golososi nomineꞌ minilo.  
\m Idoꞌ neꞌmine lineꞌ gizi nizaniꞌ nenako nemuꞌ nene elese molo-lengedo do eita ive Oꞌmoso aza monovo golosoꞌvesi nomivo neineꞌ neꞌmine igi linginesi nene initeꞌ mataꞌ mukiꞌ igi mili ilizanguꞌ nene monovotine golososi nomineꞌ minilo.   
\p
\v 17 Idoꞌ lingine meteho ve li Oꞌmosola laaꞌ naniꞌza eveneꞌ mukiꞌ izeꞌ molo-ledaaꞌ ilineꞌ nene gopo eveneꞌ mala ninge lamineꞌ o-ledoo mala ninge goloso o-lede minosa nene izeꞌ molo-ledelineꞌ nevoba asi leliꞌ hamo hamoꞌ nene ogo molo olonidoꞌ olonidoꞌ do molo meni lamineꞌ lemelihe goloso lemelihe ilineꞌ nene mo aꞌmine o noloneꞌ initeꞌ lisiheꞌ o nolidokovoꞌ nene lisiheꞌ ogo golo hizo lemeleseive. Neꞌmine ilineꞌ nenako lingine olihe gotoꞌ numudine Okulumokuko vi minami venenga ve gili me misubouko minilizaniꞌ gameneuꞌ nene ezemuꞌ lengehelele izivosa mini monovo lisiheꞌ laminekovoꞌ igi mili minilo.  
\v 18 Idoꞌ neꞌmine igi minilizaniꞌ nene lingine tiꞌ li gili nizaniꞌ nemuꞌ nene neꞌmine igi minilisave. Lingine lengiꞌ avotingidatiꞌ di minaniꞌ dingani monovo igi mili minangutiꞌ nene do eita ogo meni hize-lingidineꞌ nene me misubouꞌ initeꞌ hulupo elelineꞌ siluvaꞌ nehe ngolimoni nehe nevoꞌmine initeꞌ nedunuꞌ nene meni hizineꞌ nevoba  
\v 19 asi mo Kilisitoꞌ vaniseꞌve lamineꞌ nedunuꞌ meni hizineꞌ ve. Ee, Kilisitoꞌ aza lihimetemuꞌ belaaꞌ nouneꞌ sipisipi angale okoꞌnoloꞌ initeꞌ goloso hamokisi nomineꞌ neꞌmine loloꞌ ogo neivo biladotiꞌ vaniseꞌve lamineꞌ nedunuꞌ nene meni hizineꞌ ma neive.  
\v 20 Ee, Oꞌmosoꞌmo me misubo nene olihe do sotoꞌ amosa gozopoꞌ vomilotiꞌ nene neꞌmine ilingumuꞌ ha mo ningo gele minineꞌza ha minosa alingeꞌ gameneuꞌ mene lengikumuꞌ ve losa do sotoꞌ o-dineꞌ ve.  
\v 21 Neꞌmine o-davo aꞌmine Kilisitoꞌ gono dadotiꞌ nene lingine Kilisitoꞌ hilingutiꞌ do ote-do do naba o-dive Oꞌmosomuꞌ nene gili eleꞌvoleꞌ aniꞌ nene Oꞌmosomuꞌ neve nene gili eleꞌvoleꞌ igi ezemuꞌ gili muꞌmusiꞌ igi minaaꞌ nave.   
\p
\v 22 Lingine gamazi gihile di minadiꞌmo lutinguꞌ monovo goloso minineꞌ nene di huli lutine di guluviꞌ lisa lingine lengiꞌ zuho Kilisitoꞌ evenele lutine ngimilizaniꞌ nene abeleni ami asi lutine ngimi giliꞌ lilizadoꞌ nene lisiheꞌ i nizaze. Mo lutine laminetotiꞌ nene amuzo mili lutine ge neme ne geme li minilo.  
\v 23 Lingine nene lengemeni dameni gosohoꞌ ogavo gohi sotoꞌ aniꞌ ve. Idoꞌ gohi sotoꞌ aniꞌ nene helosa osuꞌ liliveꞌmo zuho molavosa nevoba asi helosa osuꞌ lamaaꞌ neiveꞌmo zuho molavosa gohi sotoꞌ aniꞌ ma neive. Ee, minevoꞌ minevoꞌ ogo mino minevoꞌ minevoꞌ ogaliꞌmi monovo do sotoꞌ o-ledaaꞌ neineꞌ initeꞌ Oꞌmosoꞌmi gamazi neꞌmo lengiꞌ lutinguꞌ gono dadotiꞌ nene lengemeni dameni do gosohoꞌ ogavo gohi sotoꞌ aniꞌ ma neive.  
\v 24 Idoꞌ mene noluvoniꞌ gamazi nene monoꞌ godolouꞌ tiꞌ li gizi nizaniꞌ gamaziloꞌ vo miliseꞌ o neivosa nene noluve:  
\q1 Eveneꞌ mukiꞌ leliꞌ nene guvise navise neꞌmine nene none.  
\q1 Idoꞌ leliꞌ do sotoꞌ ogaꞌ nouneꞌ initeꞌ lamineꞌ tamineꞌ ato atoꞌ mukiꞌ nene  
\q1 ha aꞌmine guvise naviseliꞌmi guvovo neꞌmine nene neive.  
\q1 Guvise nene gaꞌnuvo elo osuꞌ lavosa  
\q1 guvovoꞌve nene suludoꞌmozaaꞌ neive.   
\q1
\v 25 Neꞌmine ogaꞌ neiha Guvelesi veꞌmi gamazi nene mo eleꞌvoleꞌ ogo  
\q1 minevoꞌ minevoꞌ ogovoꞌ mineleseive.  
\m Idoꞌ aꞌmine Guvelesi veꞌmi gamazi nene adoꞌ aꞌmine li soto sotoꞌ igi li-lingimaniꞌ gamazi lamineꞌ nene neive.   
\c 2  
\s1 Lingine Monovo Goloso Hulisa Oꞌmosoꞌmi Gamaziꞌmo Amine Lingimivo Idoꞌ Guvelesi Ve Nene Oꞌmosoꞌmi Numuno Do Amuzo Molo Minaaꞌ Neineꞌ Geheni Neꞌmine Neivo Idoꞌ Lengiꞌ Nene Aꞌmine Numunoꞌmi Geheni Lingela Neꞌmine Mini Eiꞌ Evenele Gihile Gehepeve Minilo Lo Petoloꞌ Lo-ngimineꞌ Gamazi  
\p
\v 1 Nemuꞌ nene lingine goloso monovo ato atoꞌ mukiꞌ adoꞌ eveneꞌ goꞌine izaaꞌ idoꞌ lutinguꞌ monovo goloso haleko neivosa eveneꞌ lamineꞌ gili monaaꞌ idoꞌ eveneꞌ maliti initekumuꞌ lavodine lemavo muludinguꞌ goloso gilaaꞌ idoꞌ gamazi di goloso igi laaꞌ monovo ato atoꞌ mukiꞌ nesi nene ogalone li mudise huli osuꞌ lisa mini  
\v 2 Oꞌmosoꞌmi gamazi neꞌmo lute do naba ogavo lukuvo naloningumuꞌ ve li izipe namunolite aminemuꞌ ngisavo igaꞌ naniꞌ neꞌmine igi lingine aꞌmine lutineꞌmi nosoꞌ niteꞌ aminemuꞌ nene lingisivosavoꞌ minilo.  
\v 3 Neꞌmine igi minilizave lo noluvoniꞌ nene lingine Guvelesi veꞌmo mulumote ningo do lamineꞌ o-ledaaꞌ neineꞌ monovoꞌveꞌmi laniteꞌve ningi nigilaniꞌ nemuꞌ nene noluve.  
\v 4 Aꞌmine Guvelesi ve nene numuno gizaaꞌ geheni sikalahuꞌvesi minineꞌ neꞌmine ne neive. Eveneꞌ nete eiꞌ nene di ningisa goloso neive li di hulaniꞌza Oꞌmosoꞌmo eikumuꞌ gilivo dizo neivosa do kegese-dineꞌ nenaze. Eita nene igi giꞌmizi minilo.  
\v 5 Neꞌmine igisa lingine nene numuno gizaaꞌ geheni sikalahuꞌvesi minineꞌ neꞌmine liliꞌ igi minikevo Oꞌmosoꞌmo eiꞌ Sikalahuꞌveꞌmi numuꞌve loloꞌ o-lengedelize. Guvelesi vela igi giꞌmizilo. Idoꞌ neꞌmine igisa lingine Oꞌmosoꞌmi numunguꞌ gono di-dilisa kekeize li minaniꞌ zuho liliꞌ igi monoꞌ numuno nabauꞌ Oꞌmoso initeꞌ lehizi-daaꞌ aniꞌ neꞌmine igi Oꞌmosoꞌmo Izesu Kilisitoꞌ gono dangumuꞌ gelosa ninge lamineꞌ dalineꞌ initeꞌ nene lengiꞌ lutingutiꞌ nene di sotoꞌ igi lehizi-dilizave.  
\v 6 Mene noluvoniꞌ nene mo laminetoꞌ monoꞌ godolouꞌ Oꞌmosoꞌmo lineꞌ gamazi tiꞌ li gizi nizadoꞌ nene eꞌmeto noluve:  
\q1 Lingine giliꞌnalo.  
\q1 Naza numuno gizaaꞌ geheni mamuꞌ nene giluvo dize neivosa  
\q1 aꞌmine geheni nene numuno do amuzo molaaꞌ geheni minelive losa  
\q1 do kegeso neniꞌ eveneꞌne zuhoti ebeꞌnine Zaioni golo neuꞌ  
\q1 adoꞌ engiꞌ vovoꞌninguꞌ gehepeve nene nohulo-duve.  
\q1 Idoꞌ ezemuꞌ gili eleꞌvoleꞌ ilizave mukiꞌ nene  
\q1 gili eleꞌvoleꞌ ilizaniꞌ neꞌmi gihile nene sotoꞌ amivo  
\q1 ngovozo ma hilamilisave.   
\m
\v 7 Idoꞌ aꞌmine geheni nene mo dizo neive noluvoniꞌ nene lingine ezemuꞌ gili eleꞌvoleꞌ i nizave nene ezemuꞌ gilavo dize neivosa nene noluha eveneꞌ ma ezemuꞌ gili eleꞌvoleꞌ amavela nene monoꞌ godolouꞌ tiꞌ li gizi nizaniꞌ gamazi maloꞌ nene mo gihile izave:  
\q1 Numuno gizilizaniꞌ geheni mukikutiꞌ nene geheni ma  
\q1 numuno gizaaꞌ avelite ningisa goloso o vive li di hulaniꞌ geheni neꞌmo  
\q1 geheni mukiꞌ ngivileꞌ ogo numuno do amuzo molaaꞌ geheni loloꞌ ogave.   
\m
\v 8 Idoꞌ ma nene:  
\q1 Aꞌmine geheni nene eveneꞌ lodohoꞌ izi limi pouꞌ li  
\q1 ingalizaniꞌ geheni gehepeve ne neive.  
\m Ingine lodohoꞌ izi limi ingaaꞌ naniꞌ nene Oꞌmosoꞌmi gamazi gili damadiꞌmo nene limi ingaaꞌ nave. Oꞌmosoꞌmo ingine mo neꞌmine ilizave lo gele neidoꞌ nene neꞌmine igaꞌ nave.   
\p
\v 9 Ne neiha lingine neve nene mo Oꞌmosoꞌmo eiꞌ ve lo do kegesineꞌ zuho mini Guvelesi ve nabaꞌmi monoꞌ gono di-di initeꞌ lehizi-daaꞌ aveliti muliseutiꞌ mini Oꞌmosoꞌmo eiꞌ ve lo do kekeize lo-lengede neineꞌ zuho nene nizave. Idoꞌ neꞌmine nizaniꞌ nene vode vavo lehelele izelineꞌ labanaꞌveuꞌ nene litiꞌmusoutiꞌ elese molo-lengedo lengeleꞌmize molavemuꞌ nene opoꞌni li guvele li soto sotoꞌ ilizangumuꞌ nene neꞌmine aleve nene nizave.  
\v 10 Gomuꞌ lingine eveneꞌ numuno gulivetine minamivo gopo minaniꞌza idise nene numuno gulivetine Oꞌmosoꞌmi evenele zuho ve lisa nene nizave. Gomuꞌ nene Oꞌmosoꞌmo isete izo nasahiliꞌ o-ledaaꞌ ineꞌ monovoꞌve nene lengita hetelamivo minaniꞌza idise nene mo lengita ogo hetelavo aꞌmineꞌmi lulouꞌ nene nizave.   
\s1 Lingine Nene Oꞌmosoꞌmi Gelekeleꞌ Veꞌve Minii Monovo Lisiheꞌ Laminekovoꞌ Igi Mili Minikevo Oꞌmosomuꞌ Gilamave Nete Aꞌmine Monovotine Lamineꞌ Nene Ningisa Oꞌmoso Opoꞌni Lilizadoꞌ Mini Mili Minilo Lo Lo-ngimineꞌ Gamazi  
\p
\v 11 Lingine luꞌne lengeme nouvoniꞌ alevekizo, me misubouꞌ aleve minami gamene liꞌnibemukovoꞌ aꞌmida mene minilizaniꞌ nenako okodineꞌmo me misubouꞌ initekumuꞌ laniteꞌ gilineꞌ nene gili hulilo. Okodineꞌmo neꞌminemuꞌ gilineꞌ neꞌmo lutine nene ivileꞌ olosa lovo o emaaꞌ neinaze. Lingine gili hulilo lo nolo-lingiduve.  
\v 12 Oꞌmosoꞌmi evenele minamaveti zuhoti vovoꞌninguꞌ minilizanguꞌ lingine igi mili ilizaniꞌ nene mo monovo lisiheꞌ laminekovoꞌ nene igi mili minilo. Ee, ingine lengikumuꞌ eveneꞌ goloso ve li divi lediviꞌ i-lingidi laaꞌ naha neꞌmine i-lingidi minilizangukisi monovo lamineꞌ igi mili igaꞌ ilizaniꞌ nene ningi miniꞌ miniꞌ ilizadiꞌmo Oꞌmosoꞌmo monovoꞌnidoꞌ ogo do ningelineꞌ gameneloꞌ ingine nene aꞌmine monovote laminekumuꞌ Oꞌmoso opoꞌni lilizangumuꞌ ve li monovo lisiheꞌ laminekovoꞌ igi mili minilo.   
\p
\v 13 Guvelesi veꞌmo ningivo lamineꞌ ilingumuꞌ ve li lingine evenelite amuzo ato atoꞌ ngimaniꞌ aleve mukiꞌ nene gelekeleꞌ i-ngidivoꞌ minilo. Adoꞌ eveneꞌ linge mukiꞌ ngivileꞌ ogo minive guvelesi ve naba gehepeve nolihe  
\v 14 idoꞌ aꞌmine guvelesi ve naba neꞌmo ingine eveneꞌ monovo goloso ilizave lihime ngemaaꞌ gonosi idoꞌ monovo lamineꞌ ilizave ngopoꞌni laaꞌ gono nesi nene dalizave lo ngeleꞌmize molave ngamani naba nilizahe mukiꞌ nene gelekeleꞌ i-ngidivoꞌ minilo.  
\v 15 Idoꞌ lingine gelekeleꞌ i-ngidivoꞌ minilizave noluvoniꞌ nene Oꞌmosoꞌmo tiꞌ lo gele neingumuꞌ nene noluve: Adoꞌ lingine monovo lisiheꞌ laminetoꞌ eꞌmeti minilizadiꞌmo eveneꞌ negi adoꞌ gamazi monovo gilamavete divi lediviꞌ i-lingidaaꞌ nave neti veꞌnidoꞌ nene humo izi-ngidikevo gohi lamilisave lo gele neive.  
\v 16 Lingine Moseꞌ louliꞌmi gesi minguꞌ mini nalatoꞌ ve gili minangutiꞌ kuluhizi nizaniꞌza aꞌmine louliꞌmo adeloꞌ damivo fili o noneꞌ nenako nemuꞌ nene monovo ato atoꞌ mukiꞌ nene lihimeꞌve nomivo gopo ha olosune lisa monovo goloso dikelizave. Neꞌmine amilo. Asi Oꞌmosoꞌmi gelekeleꞌ ve mini eiꞌ lulolokovoꞌ igi mili minilo.  
\v 17 Adoꞌ eveneꞌ mukikumuꞌ gilavo dizivo mini Kilisitoꞌ evenele leliꞌ zuho mukiꞌ nene lutine ngimi mini Oꞌmosomuꞌ golise gili mini aꞌmine me misubouꞌ guvetinesi ve naba minive nene di naba i-di gili imi minilo.   
\s1 Gonouꞌ Aleve Nene Gelekeleꞌ Igi Gono Lamineꞌ Di Minilizanguꞌ Hazaloꞌ Mulumo Gono Ma nGimilizaniꞌ Nene Kilisitoꞌ Engikumuꞌ Mulumo Gono Ha Gihineꞌ Monovoꞌveloꞌ Nene Eꞌmeti Aꞌmine Mulumo Gono Nene Ha Gihilizangumuꞌ Lo-ngimineꞌ Gamazi  
\p
\v 18 Gonoloꞌ gipe alu lingine lengehelele gehepeve izivo mini metinge gizebo vetine nene gelekeleꞌ i-ngidivoꞌ minilo. Adoꞌ gizebo vetine ve lamineꞌ hongu ve neꞌmine minilizanikovoꞌ gelekeleꞌ i-ngidi minilizavoba asi metinge gasava ve minilizaniꞌ nesi nene ha gelekeleꞌ i-ngidivoꞌ minilo.  
\v 19 Ee, eveneꞌ ma initeꞌ ma do goloso amilidoꞌ hazamuꞌ mulumo gono imikevosa aza hongu lo mino aꞌmine mulumo nene Oꞌmosomuꞌ gele mino ha gehelineꞌ nene Oꞌmosoꞌmo ezemuꞌ gelavo lamineꞌ oloseive.  
\v 20 Ne neiha lingine initeꞌ ma di goloso ikevo aꞌminemuꞌ lihime lingimi gavoso nilingibilavo lingine hongu li mini ha gihilizaniꞌ nemuꞌ nene longopoꞌni lilizadoꞌ minilizahe. Oꞌove. Longopoꞌni lamilisaniꞌza lingine initeꞌ lisiheꞌ lamineꞌ ma ikevo gavoso nilingibilavo lingine hongu li ha gihilizaniꞌ nene Oꞌmosoꞌmo ningivo lamineꞌ oloseive.  
\v 21 Idoꞌ neꞌmine ilizave lo noluvoniꞌ nene Oꞌmosoꞌmo neꞌmine ilizave lo elese molo lengeleꞌmize molaniꞌ nenako nemuꞌ noluve. Idoꞌ Oꞌmosoꞌmo neꞌmine ineꞌ nene Kilisitoꞌ azasi lingine neniꞌ ogo molo uvodoꞌ apiꞌ napiꞌ igi igi mili minilizave lo avazaha pikisa neꞌmine bele molo lengitoꞌ medelo mulumo gono gihineꞌ nenako nemuꞌ nene Oꞌmosoꞌmo linginesi neꞌmine ilizave losa elese molo-lengedave.  
\v 22 Aꞌmine ogo molo minidoꞌ apiꞌ napiꞌ igi eꞌmetilizave Kilisitoꞌ  
\q1 aza nene lihime ma damineꞌ ma neive.  
\q1 Idoꞌ goꞌine izo soza gamazi veleutiꞌ livo eveneꞌ hamoliꞌmosi ma gelamineꞌ ve.   
\m
\v 23 Evenelite divi lediviꞌ igi elemadoꞌ nene do velepeꞌ izo aza aꞌmidoꞌ do goloso o-ngedo ngelemesaꞌmineꞌ ve. Idoꞌ mulumo niteꞌ i-dadoꞌ nene golo hizo golise gililiza gamazi lo-ngedamo asi goniꞌ do lisiheꞌ ogovoꞌ gelaaꞌ ive Oꞌmosoꞌmi anaukovoꞌ molosa ezeloꞌ lehete o minaaꞌ ineꞌ ve.  
\v 24 Idoꞌ leliꞌ nene lihime mudise hulisa monovo lisiheꞌ laminekovoꞌ igi mili miniviꞌ aliviꞌ ilizangumuꞌ ve losa asiꞌve nene leliꞌ lihimete eiꞌ okoꞌnoloꞌ geho aꞌminemuꞌ nene lohotoꞌ zaloꞌ hilineꞌ ve. Eiꞌ biladiꞌmo lingine nene mo lamineꞌ ikeve.  
\v 25 Idoꞌ naza neꞌmine noluvoniꞌ nene lingine sipisipi ize neꞌmine mini vi gopo igi minaniꞌza idise mini velepeꞌ izi lengiꞌ lutineꞌmi noso niteꞌ emeꞌmo vo aꞌmidoꞌ gizebo o-lengedelivela igi giꞌmizikeniꞌ nizaniꞌ nenako nemuꞌ nene noluve.   
\c 3  
\s1 Eleꞌninge Vaꞌninge Lamini Minilizaniꞌ Monovomuꞌ Petoloꞌ Lo-ngimineꞌ Gamazi  
\p
\v 1-2 Idoꞌ gomuꞌ noluvoniꞌ neꞌmine igi veneꞌ nete vadingine gelekeleꞌ i-ngidivoꞌ minilo. Ee, neꞌmine ikevo vadinge engikutiꞌ linge ma Kilisitoꞌ gamaziloꞌ gili dami nilizaniꞌ nene veneꞌine lingine ha lengehelele izivo mini monovo goloso lengita nomivo monovo laminekovoꞌ igi mili nizavo ingine aꞌmidoꞌ ningi miniꞌ miniꞌ ilizaniꞌ neꞌmo nene lingine gamazi li-ngimamavosi Kilisitoꞌnimuꞌ gili eleꞌvoleꞌ igi eze zuhouko ha di imineꞌ mili minilizahe. Nemuꞌ lengiꞌ nene ha gelekeleꞌ i-ngidivoꞌ minilo.  
\v 3 Idoꞌ gonolisetine nene okodine losuvoloꞌ minelineꞌ initeꞌ adoꞌ madudine zopovo nalava izi di maꞌmine maꞌmine igaꞌ nehe, ngolidunuꞌ liliꞌ aniꞌ initeꞌ nehe, okodidoꞌ initeꞌ lamineꞌ tamineꞌ nehe, nevoꞌmine initeꞌ neve nene minelivoba  
\v 4 asi lengemeni dameni lutinguko haleko minaaꞌ neineꞌ adoꞌ hongu lo alahaꞌ ogo minaaꞌ lengemeni dameni neꞌmo nene litehe elo osuꞌ lamo gonolisetine gihile mineleseive.  
\v 5 Ee, idoꞌ gomuꞌ vomila Oꞌmosola giꞌmizi mini ezeloꞌ gili muꞌmusiꞌ igi minaaꞌ aniꞌ veneꞌ nete nene luteꞌmi gonoliseꞌve minelive li aꞌmine neꞌmine monovoloꞌ eꞌmetisa vaꞌningida gelekeleꞌ i-ngidi minaniꞌ nenako lengitasi neꞌmine monovotine minelineꞌ nene lamineꞌ oloseive.  
\v 6 Mene noluvoniꞌ nene adoꞌ Salaꞌ aza Abalahamuꞌnimuꞌ nenitoꞌ gizebo ve ve lo gamaziꞌve gele doꞌmo vo minaaꞌ ineꞌ maꞌminemuꞌ nene noluve. Idoꞌ lingine monovo laminetokovoꞌ eꞌmeti mini neꞌmine manaꞌmine initekumuꞌ golise gilami minilizaniꞌ nene eiꞌ aluvo gidini mini eiꞌ gili vaniꞌ minilisave.   
\p
\v 7 Idoꞌ vaꞌninge lingine eledinginemuꞌ luvodiꞌmine ogo tiꞌ lo nolo-lingimuve: Lingine nene Oꞌmosola laaꞌ oloneꞌ akate nene goloso ogalive li eledinginemuꞌ nene ingine amuzo damaniꞌ mini lelitotiꞌ nene limisa nizave li ngeleꞌmize lamineꞌ igi mini Oꞌmosoꞌmo lehize-ledavo minevoꞌ alevoꞌ ogaꞌ lemeni dameni nene engikisi lelikisi makatoꞌ dalonive ne nizave li eleꞌvoleꞌ i-ngidami asi gili nge li mini zou li makatoꞌ lamini bizi minilo.   
\s1 Monovo Lisiheꞌ Laminetoꞌ Eꞌmetilizadiꞌmo Mulumo Geni Gihilizaniꞌ Nene Oꞌmosoꞌmo Ninge Lamineꞌ O-lengedeleseinaze. Lingine Monovo Laminekovoꞌ Igi Mili Minilo Lo Petoloꞌ Lo-ngimineꞌ Gamazi  
\p
\v 8 Naza gamazi lo osuꞌ lo do vo noꞌnovo molalosa tiꞌ lo nolo-lingimuve: Lingine lutine gatine nene hamoliꞌminevoꞌ minivosa minilo. Idoꞌ ge mulumoꞌne ninge-nede ne mulumoka ninge-gede lisavoꞌ minilo. Idoꞌ lengiꞌ nene hamoꞌ zuho nizanaze. Ge luka neme ne luꞌne geme lisavoꞌ minilo. Idoꞌ ezemuꞌ mulunga hukivo hukivo gezemuꞌ muluno hukivo hukivo lisavoꞌ minilo. Idoꞌ hokolizeꞌ ami okodine diꞌmi limivoꞌ minilo.  
\v 9 Idoꞌ lengiꞌ di goloso nii-lingidavo ma aꞌmidoꞌ golo hizi di goloso i-ngidamilo. Idoꞌ aꞌmineꞌmine igi lengiꞌ nene gamazidunuꞌ giziꞌvoti gamazi ma nili-lingidavo ma nene aꞌmidoꞌ golo hizi lingine giziꞌvoti li-ngidamilo. Asi Oꞌmosoꞌmo lengiꞌ vise lo do eita ineꞌ nene eitatiꞌ nene noꞌnohoꞌ dalizave losa neꞌmine ineꞌ nenako nemuꞌ nene neꞌmine nii-lingidavo ma aꞌmidoꞌ nene Oꞌmosoꞌmo noꞌnohoꞌ ize-lingidivo lisavoꞌ nene li-ngimilo.  
\v 10 Mene nolo-lingimuvoniꞌ gamazi neve nene monoꞌ godolouꞌ gamazi tiꞌ li gizi nizaniꞌ maloꞌ nene vo nodave:  
\q1 Ve ma aza minevoꞌ alevoꞌve lamineꞌ minivo  
\q1 laminekovoꞌ mine do dizelesa gelelive nene  
\q1 veleꞌmo gamazi gosohoꞌ nasahaꞌ lo gamazi goloso lalive lo  
\q1 veleloꞌ nene gizebo lamineꞌ ilive.   
\q1
\v 11 Idoꞌ monovo golosomuꞌ nene olovoꞌ o mino monovo laminekovoꞌ ilive.  
\q1 Idoꞌ hongu lo lamino minaaꞌ monovomuꞌ nene viseꞌ ogo  
\q1 imisele do vo dalive.   
\q1
\v 12 Ee, Guvelesi veꞌmi vele nene eveneꞌ lisihetokovoꞌ hulo mino  
\q1 gizebo o-ngedo mino  
\q1 ezemuꞌ lilizaniꞌ gamazi nene gelelesa gapepeꞌ o minaaꞌ neiha  
\q1 eveneꞌ monovo goloso daaꞌ avela nene gololoꞌ ninge-ngedo minaaꞌ neineꞌ nenako  
\q1 nemuꞌ nene aꞌmine minevoꞌ alevoꞌ laminekuꞌ minelesa gelelive nene  
\q1 aꞌmine meuko luvoniꞌ neꞌmine nene ilidoꞌ o neive.   
\p
\v 13 Idoꞌ lingine monovo laminekovoꞌ igi mili ilisa amuzo mili minilizaniꞌ nene evenelite ma di goloso i-lingidilizadoꞌ o neihe. Mo oꞌove.  
\v 14 Ne neiha monovo lamineꞌ igi mili ilizangumukisi mulumo gono ma gihi-lingidilizaniꞌ nene Oꞌmosoꞌmo ninge lamineꞌ o-lengedeleseinako lamineꞌ oloseive. Lingine evenelite lengehelele izelineꞌ initeꞌ i-lingidilizaniꞌ nene muludine badavo golise gilamilo.  
\v 15 Kilisitoꞌ nene lengiꞌ lutineꞌmi Guvelesi ve minelive li eleꞌmizi milalo. Idoꞌ lingine Kilisitoꞌnimuꞌ gili muꞌmusiꞌ i nizangumuꞌ evenelite longoꞌ i-lingidikaꞌ i-lingidikaꞌ ilizadoꞌ nene aꞌmine gili muꞌmusiꞌ i nizaniꞌ neꞌmi monovo nene li ngoloꞌ li li-ngimilizadoꞌ di vaꞌvaꞌ ikisavoꞌ minilo.  
\v 16 Idoꞌ neꞌmine igi li-ngimili ma nene humedame ami hongu gamazi laminekovoꞌ li-ngimilo. Idoꞌ lingine Kilisitoꞌ evenelelite ilizadoꞌ o neineꞌ monovo lamineꞌ igi mili minaaꞌ naangumuꞌ divi lediviꞌ igi laaꞌ nave nene aꞌmine lengemenga langumuꞌ nene ngovozo hililizangumuꞌ ve li monovo lisiheꞌ lamineꞌ gehepeve neive li lutinguꞌ gili nizadokovoꞌ nene eꞌmeti minilo.  
\v 17 Idoꞌ Oꞌmosoꞌmo gelavo lingine mulumo geni gihilizadoꞌ o nolineꞌ nene lingine monovo laminekovoꞌ eꞌmetilizadotiꞌ aꞌmine mulumo geni gihilizaniꞌ nene lamineꞌ oloseiha lingine mulumo geni gihilizaniꞌ nene mo monovo goloso dalizadotiꞌ gihilizaniꞌ neve nene mo goloso oloseive.   
\s1 Kilisitoꞌ Aza Ve Lisiheꞌ Mino Monovo Goloso Ogo Molo Amineꞌza Leliꞌ Lihimetemuꞌ Mulumo Geni Geho Helosa Gohi Oto Okulumokuko Dizo Neive Lo Lo-ngimineꞌ Gamazi  
\p
\v 18 Ee, Kilisitoꞌ azasi nene mulumo alumo gelo hilineꞌ ve. Aza nene ve lisiheꞌ minineꞌza Oꞌmosola do bize-ledelesa eveneꞌ goloso leliꞌ lihimetemuꞌ lelitoꞌ medelo hilineꞌ ve. Idoꞌ aꞌmine gamene hamokovoꞌ hilineꞌ aꞌneꞌmo nene leliꞌ mukiliti lihimete nene mo osuꞌ lilidoꞌ vo daniꞌ ve. Aza neve nene eveneꞌ leliꞌ okode neꞌminesi neivosa nene bili hilaniꞌza sikalahuꞌve nene Oꞌmosoꞌmo do upuhoꞌ o-davo vele gizosa  
\v 19 aꞌmine sikalahuꞌve nesi mino nene vo nalaꞌ numunguꞌ minaniꞌ sikalahuꞌ nene monoꞌ lo-ngimineꞌ ve.  
\v 20 Aꞌmine monoꞌ lo-ngimineꞌ sikalahuꞌ nene gomuꞌ Noaꞌ minineꞌ gameneuꞌ Noaꞌ aza sipi loloꞌ neivo Oꞌmosoꞌmo eveneꞌ engikumuꞌ izeboloꞌ molavo geto ngebelamo ha gizebo o minineꞌ gameneuꞌ eze gamazi gili hulave engiꞌ nene monoꞌ lo-ngimineꞌ ve. Aꞌmine sipiuꞌ nene eveneꞌ ngomosiꞌ eiti aꞌneꞌminevoꞌ dizikevo Oꞌmosoꞌmo nosodunuꞌ do nguꞌ izineꞌ ve.  
\v 21 Idoꞌ aꞌmine noso velo aniꞌ nene noso holaaliꞌmi avazaha neꞌmine nene sotoꞌ ineꞌ ve. Ee, noso hilaaꞌ naadotiꞌ nene Oꞌmosoꞌmo do lunguꞌ izaaꞌ neive. Idoꞌ noso holaaꞌ nouneꞌ nene okodeloꞌ goloduvo gilite-ledelive losa nevoba asi Oꞌmosoꞌmo lute do guluviꞌ lo-ledavo guluvikovoꞌ lo minaaꞌ ilive losa ezela lo noso holaaꞌ noune. Idoꞌ aꞌmine Oꞌmosoꞌmo do lunguꞌ izaaꞌ neineꞌ nene Izesuꞌ Kilisitoꞌ hilingutiꞌ otidiꞌmo ve losa do lunguꞌ izaaꞌ neive.  
\v 22 Idoꞌ Kilisitoꞌ eiꞌ neve nene idise Okulumokuko dizo Oꞌmosolotiꞌ lemo mino ana hulaaꞌ idaa neivo angeloꞌ nesi idoꞌ ato atoꞌ amuzoꞌinesi miniꞌmi monaniꞌ nesi nene gizeneuko limi gelekeleꞌ i-di nizavosa gizebo o-ngede neive.   
\c 4  
\s1 Kilisitoꞌ Okoꞌnoloꞌ Mulumo Geni Gihidiꞌmino Lazasi Gehelone Liisa Lihime Daaꞌ Monovo Ato Atoꞌ Nene Hulii Oꞌmosoꞌmi Lulolokovoꞌ Igi Mili Nizavo Hililizaniꞌ Gamene Ilive Lo Petoloꞌ Lo-ngimineꞌ Gamazi  
\p
\v 1 Nemuꞌ nene Kilisitoꞌ okoꞌnoloꞌ mulumo geni gihidiꞌmine igi linginesi mulumo geni gihilizangumuꞌ nene lutine gatine di amuzo mili di vaꞌvaꞌ igisa minilo. Nene nanitekumuꞌ ve. Ve ma okoꞌnoloꞌ mulumo geni gehe nolive aza lihime daaꞌ monovo nene mo hulosa noloseinako nemuꞌ nene noluve.  
\v 2 Idoꞌ neꞌmine ma ilizaniꞌ nene idise melotiꞌ nene haza okodesi minevoꞌ alevoꞌ oꞌmo dizeloneꞌ gameneuꞌ nene haza alevete laniteꞌ gilaaꞌ naaniꞌ monovo nene laza gohi amo asi Oꞌmosoꞌmi lulolokovoꞌ ogo molo minelone lisa neꞌmine ilizaniꞌ o neive.  
\v 3 Ee, gomuꞌ lingine Oꞌmosoꞌmi evenele minamave heta atoꞌ velite ngumo helaaꞌ ineꞌ monovo goloso igi miliꞌmi dizaniꞌ nene mo moda ve lo noluze. Gohi amilo. Aꞌmine goloso monovo nene adoꞌ neꞌmine manaꞌmine monovo goloso longovozo hilami gopo igaꞌ, initeꞌ goloso mamuꞌ lutine otaaꞌ, nosoloꞌ moni sipaki goloso igaꞌ, nosoꞌ niteꞌ naba ni zohiꞌ igi noso ni sipaki igaꞌ idoꞌ noso naaꞌ pati di sotoꞌ igaꞌ idoꞌ soza oꞌmoso ngeꞌmetaaꞌ monovo goloso igaꞌ aniꞌ mamuꞌ nene noluze. Mo hulilo.  
\v 4 Lingine aꞌmine heta atoꞌ vesi nene aꞌmine monovo golosouꞌ nene vili viviꞌ viviꞌ igi minaniꞌ maꞌmine nene gohi amavo ingine ningi upuhoꞌ igi lengiꞌ nene divi lediviꞌ igi lengemenga laaꞌ nave.  
\v 5 Ne neiha aꞌmine engiꞌ nene vetesi ha nonivesi hilavesi monovotemuꞌ goniꞌ o-ledo izeꞌ molo-ledelesa do vaꞌvaꞌ o neive neꞌmo nene neꞌmine angumuꞌ nene lingine nanitekumuꞌ ave lo goniꞌ o-ngedo lihime ngemeleseive.  
\v 6 Nemuꞌ nene monoꞌ gamazi lamineꞌ nene hilavetidasi vo hetelineꞌ ve. Ingine haza okoꞌinesi minaniꞌ gameneuꞌ nene Oꞌmosoꞌmo eveneꞌ mukiꞌ o-ledaaꞌ neineꞌ neꞌmino engikisi goniꞌ o-ngedo lihime ngemavo hilaniꞌza ingine sikalahuꞌinesi mini Oꞌmosoꞌmo minevoꞌ minevoꞌ ogaꞌ neidiꞌmine igi miniviꞌ miniviꞌ ilizangumuꞌ ve losa aꞌmine monoꞌ gamazi lamineꞌ nene engitasi hulavo vo hetelineꞌ ve.   
\s1 Oꞌmosoꞌmo Nasahiliꞌ O-ledo Lehize-lede Neineꞌ Amuzo Nene Gele nGe Lo Mino Ogo Molo Oloningumuꞌ Petoloꞌ Lineꞌ Gamazi  
\p
\v 7 Idoꞌ initeꞌ mataꞌ mukiꞌ osuꞌ lilineꞌ gamene nene mo avitoꞌ ogaze. Lingine nene Oꞌmosola lilizadoꞌ lisiheꞌ i minilizangumuꞌ nene lutine gatine gopo amivo di vevesi minilo.  
\v 8 Lute ngemaaꞌ monovoloꞌ eꞌmetilizave nete nene evenelite di goloso i-ngidilizaniꞌ lihime mukiꞌ nene di halekisavoꞌ apasi-ngidilizaniꞌ nenako nemuꞌ nene lingine igi mili ilizaniꞌ initeꞌ mukikutiꞌ ma dizo neineꞌ nene lingine lutine ge neme ne geme li minilisa nene amuzo mili igi mili minilo.  
\v 9 Idoꞌ eveneꞌ numudinguꞌ alizangumuꞌ nene lingine nulu nulunga li lihiteheka lami numudinguꞌ numudinguꞌ nene ne do lamineꞌ o-gede ge do lamineꞌ o-nede lisavoꞌ minilo.  
\v 10 Oꞌmosoꞌmo lengiꞌ nene nasahiliꞌ o-lengedo gono daaꞌ amuzo ato atoꞌ vaiꞌ nene lehize-lengede neize. Aꞌmine lehize-lingidineꞌ amuzoloꞌ nene gizebo lamineꞌ igi minilizangisi lingine hamo hamoꞌ aꞌmine di nizaniꞌ amuzodunuꞌ nene ge hize eleꞌ o-nede ne hize eleꞌ o-gede li minilo.  
\v 11 Adoꞌ monoꞌ lo-lengemelive neve nene Oꞌmosoloꞌ medelo mino eiꞌ Oꞌmosoꞌmi gamaziꞌvevoꞌ nene lo-lengemelive. Idoꞌ nasahiliꞌ ogo hize eleꞌ gono do-lengedelive neve nene Oꞌmosoꞌmo amuzo emaaꞌ neineꞌ votigileloꞌ nene do molo aꞌmine gono nene do-lengedelive. Idoꞌ neꞌmine ilizaniꞌ nene lingine Izesuꞌ Kilisitoꞌ hize eleꞌ o-lidivo laza oloneꞌ initeꞌ mataꞌ mukitotiꞌ nene Oꞌmosoꞌmi gulive nene do naba o-delone lisa nene neꞌmine ilizave. Ezela nene guvelesi idoꞌ amuzo nesi nene mo minevoꞌ minevoꞌ ogovoꞌ minelive. Mo neꞌmino minilihoo.   
\s1 Izesu Kilisitodoꞌ Giꞌmizi Nizavo Mulumo Geni Gihi-lingidilizangumuꞌ Nene Upuhoꞌ Igi Olovoꞌ Ami Longolize Izi Mini Monovo Lamineꞌ Iꞌmi Vi Mini Oꞌmosoloꞌ Leheteꞌ I Minilizave Lo Petoloꞌ Lo-ngimineꞌ Gamazi  
\p
\v 12 Luꞌne lengeme nouvoniꞌ alevekizo, lutine do ningelesa lengemenguꞌ molo ololiꞌmo longolaaꞌ neineꞌ neꞌmino mulumo geni gihi-lingidilisa naavo lengiꞌ sotoꞌ o-lengedelesa neingumuꞌ nene lingine leliꞌ sotoꞌ o-ledamilidoꞌ o neineꞌ initeꞌ atoliꞌmine ma sotoꞌ o-ledelesa neihe li upuhoꞌ amilo.  
\v 13 Asi Kilisitoꞌ mulumo geni gihineꞌ neꞌmine nene linginesi gihi nilizaniꞌ nenako nemuꞌ nene lingine Kilisitoꞌ labanaꞌvesi gohi sotoꞌ ilineꞌ gameneuꞌ nene luteuꞌ gulumo avile lisivo mino lolize naba izeloningumuꞌ ve li longolize izi minilo.  
\v 14 Idoꞌ lingine Kilisitoꞌ evenele liliꞌ igi eze gulive di minangumuꞌ lingilimaaꞌ navo ma nene guvelesi neineꞌ Oꞌmosoꞌmi Sikalahuꞌ neve nene lengitoꞌ omo mino mine do vilineꞌ nenako nemuꞌ nene lingine longolize izi minilizadoꞌ o neive.  
\v 15 Idoꞌ lengikutiꞌ linge ma mulumo gono gihi-lingidilizaniꞌ nene lingine eveneꞌ ma ngibili hililizahe idoꞌ gumine damine ilizahe idoꞌ monovo goloso atoliꞌmine ilizahe idoꞌ eveneꞌ maliti initekuꞌ gavakavatoꞌ monaaꞌ ilizahe ilizadotiꞌ mulumo gono lingimilizaniꞌ nene mo edamoloseize. Aꞌneꞌmine monovo nene mo amilo.  
\v 16 Ne neiha eveneꞌ ma aza Kilisiteni loloꞌ ogo minelingumuꞌ mulumo geni initeꞌ gihi-dilizaniꞌ nemuꞌ nene ovozo helamo asi Kilisiteni guliveꞌve miningumuꞌ nene Oꞌmoso do naba o-do minelive.  
\v 17 Neꞌmine manaꞌmine monovoloꞌ eꞌmeti minilizave lo meuko noluvoniꞌ nene Oꞌmosoꞌmo eze evenele zuho gonitoꞌ leleꞌmize molo-ledelineꞌ gamene mo alitingumuꞌ nene noluve. Idoꞌ eiꞌ evenele lelitotiꞌ apiꞌ ogo eveneꞌ lihime lengemeꞌmo vilineꞌ nene aizo, alingeꞌ nela eze gamaziꞌve laminekumuꞌ gili eleꞌvoleꞌ amave goniꞌ o-ngedo lihime ngemo do nadiꞌ o-ngedelidoꞌ o minelivoo. Mo mulumo gono goloso gehepeve ngemelineꞌ o noloseive.  
\v 18 Aꞌmine neve nene monoꞌ godolouꞌ tiꞌ li gizi nizadoꞌ nene vo do neive:  
\q1 Oꞌmosoꞌmo eveneꞌ lisiheꞌ lamineꞌ do luꞌ izelesa nene  
\q1 geꞌnebe ogosa do luꞌ izaaꞌ neineꞌ nenako  
\q1 Oꞌmoso meheꞌine imi lihimeloꞌ monaaꞌ ave nene  
\q1 lukuvo nalizadoꞌ o neihe.  
\q1 Mo kekeꞌ ngeli lukuvosi ma namilisave.   
\m
\v 19 Nemuꞌ nene Oꞌmosoꞌmi luloloꞌ eveneꞌ ma mulumo geni gihi nilizave engiꞌ minevoꞌ alevoꞌine nene engiꞌ do sotoꞌ o-ngidive adoꞌ gamaziꞌve lavo haza ma osaꞌmive eiꞌ anauꞌ miliki eitoꞌ leheteꞌ i mini monovo laminetoꞌ nene eꞌmeti minilizadoꞌ o neive.   
\c 5  
\s1 Petoloꞌ Gaꞌine Daniꞌ Gamazi Gizinguꞌ Mene Monoꞌ Gizebo Ve Ingine Eveneꞌnidoꞌ Gizebo Lamineꞌ I-ngidilizaniꞌ Monovomuꞌ Lo-ngimineꞌ Gamazi  
\p
\v 1 Idoꞌ lengikutiꞌ monoꞌ gizebo vetine minavemuꞌ nene gamazi lolouze. Gililo. Lengiꞌ neꞌmine gizebo ve minuve adoꞌ Kilisitoꞌ mulumo geni geheꞌmo navo ningaaꞌ idoꞌ alingeꞌ sotoꞌ o-ledelesa neineꞌ initeꞌ lamineꞌ labanaꞌvesi neineꞌ nene makatoꞌ dalonivesi minuve naza gatine do tiꞌ lo nolo-lingimuve:  
\v 2 Lengita Oꞌmosoꞌmi zuho mulise nizaniꞌ neve nene luꞌineꞌmi nosoꞌ niteꞌ ngimika ngimikaꞌ igi gizebo lamineꞌ i-ngidi minilo. Neꞌmine i-ngidi minilizaniꞌ nene evenelite lutinguꞌ hizavosa nevoba asi lutineꞌmo neꞌmine olosa gele nolidokovoꞌ nene eꞌmeti ilo. Idoꞌ ma nene moni heneni initeꞌ ma dalone li gili minisa gizebo i-ngidilizaniꞌ neꞌmo nene lovozo helaaꞌ initeꞌ goloso ilisaze. Mo neꞌmine ami asi Oꞌmosoꞌmo lingine aꞌmine gonomuꞌ lutine mili minisa gono dalizave lo gele neidoꞌ nene eꞌmeti gono dalo.  
\v 3 Idoꞌ gohi ma nene tiꞌ lo nolo-lingimuve: Aꞌmine gizebo i-ngidi nilizaniꞌ aleve nene amuzo malaꞌ malaꞌ igi gizebo i-ngidami asi Oꞌmosoꞌmi zuho engiꞌ igi mili minilizaniꞌ initeꞌ nene lingine avazaha pikisa neꞌmine mini aka ngelebizi igi mili minilo.  
\v 4 Neꞌmine ikevo gizebo ve naba aza sotoꞌ ogo hetelelineꞌ gameneuꞌ nene lingine meni dalisave. Adoꞌ geleso osuꞌ lamilineꞌ palaisi labanaꞌvesi neineꞌ nene dalisave.   
\s1 Gosoꞌve Nene Gizebo Ve Gili nGimi Nizavo Eveneꞌ Mukiꞌ Okoꞌine Diꞌmi Limisavoꞌ Mini Kilisitoꞌnimuꞌ Gili Eleꞌvoleꞌ Aniꞌ Nene Di Giliꞌ Li Mini Satani Lovo I Imi Minilizangumuꞌ Lo-ngimineꞌ Gamazi  
\p
\v 5 Idoꞌ monoꞌ gizebo ve gonoꞌine neivo ha igaꞌ naaniꞌ neꞌmine igi gosoꞌvelite ilizaniꞌ o neineꞌ initeꞌ nesi nene mo neꞌmino neive: Lingine nene gizebo vetinelite lilizaniꞌ gamaziloꞌ nene ha gili ngimisa minilo. Idoꞌ monoꞌ godolouꞌ Oꞌmosoꞌmi monovo ma tiꞌ li gizi nizaniꞌ ma neive:  
\q1 Eveneꞌ ma okoꞌine di dizi minaaꞌ nave nene  
\q1 Oꞌmosoꞌmo biluvaꞌ o-ngedaaꞌ neiha  
\q1 eveneꞌ ma engiꞌ okoꞌine diꞌmi limi minaaꞌ nave engiꞌ nene  
\q1 ninge lamineꞌ o-ngedo nasahiliꞌ o-ngedaaꞌ neive.  
\m Aza neꞌmine ogaꞌ neineꞌ nenako nemuꞌ nene eveneꞌ mukiꞌ lingine okodine diꞌmi limi mini ge gelekeleꞌ o-nede ne gelekeleꞌ o-gede li minilo.  
\v 6 Idoꞌ Oꞌmoso neve nene neꞌmine ogaꞌ neineꞌ nenako nemuꞌ nene lingine eiꞌ molaniꞌ gamene sotoꞌ ilinguꞌ nene do ote-ledelingumuꞌ ve li lengiꞌ okodine nene diꞌmi limisa Oꞌmosoꞌmi anauꞌ vi mini eiꞌ amuzoꞌve nabalokovoꞌ nene lehete i minisa  
\v 7 Oꞌmosoꞌmo lengikumuꞌ mulumotine gele minaaꞌ neineꞌ nenako nemuꞌ nene lingine gopo gatine gilaaꞌ naniꞌ initetine geni neꞌmine vaiꞌ nene eiꞌ anauꞌ huli milalo.   
\p
\v 8 Lingine nene lutine gatine vo gopoꞌnapa amivo gatine gili nge li mini eheꞌ igi ningisa minilo. Adoꞌ biluvatine Satani aza loposo gulo naba laioni neꞌmo gaꞌna helo ngebelo nalineꞌ initekumuꞌ visetoꞌ monaaꞌ neineꞌ neꞌmino lengebelelesa nomonize. Ningisa minilo.  
\v 9 Mulumo geni lengiꞌ nigihi-lingidaniꞌ neꞌmino nene lengiꞌ zuho Kilisitoꞌ evenele misubo vaikuꞌ miniꞌmi monave engikisi nene aꞌmineꞌmine igi nigihi-ngidaniꞌ nenako lingine nemuꞌ gili mini Kilisitoꞌnimuꞌ gele eleꞌvoleꞌ igaꞌ naniꞌ nene di giliꞌ li minisa aꞌmine biluvatine nene lovo i imivoꞌ minilo.  
\v 10 Neꞌmine igi aꞌmine mulumo geni nene gihiꞌmi vi nizavosa gamene haꞌna amivo aꞌmine ato atoꞌ initekuꞌ mulumote ningo nasahiliꞌ o-ledaaꞌ ive Oꞌmoso adoꞌ Kilisitoda vi giꞌmizisa labanaꞌvesi minevoꞌ minevoꞌ ogaꞌ neineꞌ moꞌmosikuꞌ nene imi hilalizave lo lengiꞌ vise lo do eita ive neꞌmo nene gohi do lamineꞌ o-lengedo do ngi lo-lengedo idoꞌ amuzo lengemo eleꞌvoleꞌ igi oti pehe li minilizadoꞌ lengeleꞌmize molaloseive.  
\v 11 Amuzo mukiꞌ nene gamene gamene eitavoꞌ minivo. Mo neꞌmino minilihoo.   
\s1 Petoloꞌ Luhuvo Niteꞌ Gize Osuꞌ Nolo nGopoꞌni Lo Gizineꞌ Gamazi  
\p
\v 12 Naza gamazi noluvo ezeloꞌ gele medele minelodoꞌ o neive lo giluve adoꞌ leze zuho Siluvanoꞌ neꞌmo hize eleꞌ o-nedo luhuvo mene nogizivo naza aꞌmine gamazi noluvoniꞌ meve nene Oꞌmosoꞌmo nasahiliꞌ o-ledaaꞌ neineꞌ monovo gihileꞌmi gamazi ve lo lo-lengemelesa naza hize eleꞌ ogosa lengiꞌ lutine nene do ngi lo-lengedo luhuvo niteꞌ liꞌnibe mene nogize-lingiduze. Aꞌmine Oꞌmosoꞌmi nasahilikuꞌ nene mini giliꞌ li minilo.   
\p
\v 13 Idoꞌ lengiꞌ neꞌmine aleve Oꞌmosoꞌmo makaꞌ do kegese-lingidive Kilisitoꞌ evenele Babelonia numuno ebekuꞌ mela mulise milaaꞌ nave ingine longopoꞌni nilavoo neze gipeꞌne Malekoꞌ azasi nene longopoꞌni nolize.  
\v 14 Lingine nene isetine ve li lute ngemaaꞌ monovo di sotoꞌ igi ge nabutiꞌ ize ne gabutiꞌ ize li adidoꞌ disa minaaꞌ ilo.  
\p Hongu lo lamino minaaꞌ monovo neve nene Kilisitoꞌ evenele minave lengiꞌ mukita minivo.  
\p Moda aꞌnesiꞌ ve.