\id 1JN  - Dano NT [aso] -Papua New Guinea 1989 (DBL -2014) 
\h 1 ZOHANEꞌ 
\toc1 Zohaneꞌ Gizineꞌ Luhuvo Niteꞌ Naba 1 
\toc2 1 Zohaneꞌ 
\toc3 1 Zon 
\mt1 ZOHANEꞌ GIZINEꞌ LUHUVO NITEꞌ NABA 1  
\imt1 Zohaneꞌ Gizineꞌ Luhuvo Niteꞌ Gomuꞌ Gataaꞌ Gamazi  
\ip Monoꞌ godolo gosohokuꞌ nene eveneꞌ guliveꞌine Zohaneꞌ ve li milave hamo pamoꞌ minaniꞌ nemuꞌ ne ma gataaꞌ noune. Aꞌmine ve nene ma nene monoꞌ noso holo-ngedaaꞌ ive Zohaneꞌ idoꞌ ma nene Izesuꞌ gamaziꞌve lamineꞌ gizive Malekoꞌ eze gulive ma nene Zohaneꞌ idoꞌ ma nene Zuda veloꞌ medelo mino Oꞌmoso initeꞌ lehize-daaꞌ ive naba gulive Anasiꞌ zuhoutiꞌ minive gulive Zohaneꞌ. Nemuꞌ nene neuꞌ do gopoꞌ napa ogo gelamozo. Aꞌmine ve nete Zohaneꞌ luhuvo niteꞌ nene ma gizamave.  
\ip Luhuvo niteꞌ sitohamo gizive nene eveneꞌ nete luhuvo niteꞌ Zohaneꞌ gizineꞌ ve laniꞌza aꞌmine luhuvo niteꞌ gizive nene guliveꞌve gizamineꞌ neineꞌza ganaꞌ akaꞌmilatiꞌ Zebedaioꞌ gipele Zohaneꞌ nene gizineꞌ ve laniꞌ. Aꞌmine Zohaneꞌ nene Zuda ve nGalilaia misuboukotiꞌ minineꞌ. Eze bisinisiꞌve nene alahaꞌ belo maketiloꞌ molaaꞌ ineꞌ. Idoꞌ Izesuꞌ aza izipahala zuho dokaꞌ dokaꞌ ineꞌ nene ganaꞌ apiꞌ ogo eiꞌ Zohaneꞌni nene daniꞌ. Idoꞌ Izesuꞌ hilingutiꞌ otavo Oꞌmosoꞌmo Okulumukuko eleꞌmizo do dizo vavosa Zohaneꞌ nene gamene haꞌna Zelusalemi numuno ebekuꞌ Oꞌmosoꞌmi gono do minineꞌ. Tiꞌ ogo minidotiꞌ nene ebeꞌ ma gulive Eheso nela ongo monelesa vineꞌ. Loma vete Asia misubo ve laaꞌ anguꞌ ve. Asia misubouꞌ Izesuꞌ zuho minaniꞌ neti ve nabaꞌine loloꞌ ineꞌ. Gamene ma Eheso ebekuko ongo nomonosa nene Izesuꞌ gamaziꞌve lamineꞌ Zohaneꞌ gizineꞌ ve laaꞌ nouneꞌ nesi Zohaneꞌ luhuvo niteꞌ sitohamo ve laaꞌ nouneꞌ nesi nene gizineꞌ. Idoꞌ alingeꞌ sotoꞌ ilinekumuꞌ gamazi Leveleseni ve laaꞌ nouneꞌ nesi nene gizineꞌ. Neꞌmine ogo Eheso ebeta ongo mono mino mo vani gehepeve molaniꞌ. Tiꞌ ogo hilineꞌ. Izesuꞌ izipahala zuhoutiꞌ nene eiꞌ hamoꞌ alingeꞌ hilineꞌ.  
\ip Zohaneꞌ aza luhuvo niteꞌ ganaꞌ gizineꞌ nene ne aleve ma nene nohulo-ngiduve lo lamiha eveneꞌ nete Asia misubouꞌ Izesuꞌ zuho minaniꞌ nene gizo hulo-ngidive li gilaniꞌ nene eleꞌvoleꞌ ineꞌ. Aꞌmine gameneuꞌ nene Eheso ebekuꞌ soza monoꞌ gamazi li-ngimaaꞌ ave ma minadite neꞌmine laaꞌ aniꞌ: Initeꞌ mukiꞌ do gelaaꞌ uneꞌ, no laniteꞌ gelaaꞌ uneꞌ, ninguneꞌ initeꞌ idoꞌ initeꞌ pataꞌ okoꞌinesi initeꞌ mukiꞌ nene mo initeꞌ golosovoꞌ ve lisa Oꞌmosovoꞌ hamoꞌ nene lamineꞌ gehepeve ve laniꞌ. Idoꞌ initeꞌ pataꞌ nene goloso minikevo Oꞌmosovoꞌ lamineꞌ ve li gilaniꞌ nemuꞌ nene gamazi neꞌminisasi ma laniꞌ: Eveneꞌ okode nene goloso neivo lamineꞌ minive Oꞌmoso nene eveneꞌ okoꞌno ngelo do otuhilihe. Neꞌmine mo amoloseive li laaꞌ aniꞌ. Nemuꞌ nene evenelite Oꞌmosoꞌmo eveneꞌ okoꞌno do otuho eveneꞌ gihile loloꞌ ineꞌ ve li laniꞌ nene soza ve li laaꞌ aniꞌ. Neꞌmine li eveneꞌ tiꞌ li li-ngimaaꞌ aniꞌ: Oꞌmoso neꞌmo sikalahuꞌ ma gulive Kilisitoꞌni nene Izesuꞌ lulouꞌ minevoꞌ dovoꞌ ilive lo imiselineꞌ ve li li-ngimaaꞌ aniꞌ. Idoꞌ tiꞌ li laniꞌ: Monoꞌ noso holo-ngedaaꞌ ive Zohaneꞌ neꞌmo Izesuꞌni monoꞌ noso noholo-divo aꞌmine sikalahuꞌ gulive Kilisitoꞌ nene ganaꞌ eiꞌ Izesuda aniꞌ ve li laniꞌ. Idoꞌ hulo-do vineꞌ nene Izesuꞌni lohotoꞌ zaloꞌ olihe bililisa navo hulo-do vineꞌ ve li laniꞌ. Idoꞌ leliꞌ sunoꞌ gamazi gili gililizaniꞌ nene vodinehaza nene initeꞌ pataꞌ goloso mininekisi nene bizo miningutiꞌ apasi-di di lamineꞌ i-dilisave li laniꞌ. Aꞌmine soza saza monoꞌ laaꞌ ave linge ma nete laza aꞌmine sunoꞌ gamazi mene lo geleloneꞌ neꞌmo vodehaza nene do uꞌ izeleseive. Mino molo oloneꞌ neꞌmo nadilivoba li li-ngimi ngimiꞌ igaꞌ aniꞌ ve. Asiꞌve okodeꞌve nene goloso neineꞌ nenako initeꞌ goloso nevoꞌmine ma osoꞌ neꞌmo goloso amive li laniꞌ. Aꞌmine alevete igi mili igi minaniꞌ nene gihile nomive lo Zohaneꞌ Izesuꞌ zuho minaniꞌ nene luhuvo niteꞌ ganaꞌ gizo hulo-ngidineꞌ. Aꞌmine luvoniꞌ gamazi neꞌmine lave nene gili ngimamilo lo lo-ngimineꞌ. Idoꞌ Izesuꞌ nene leliꞌ haza okode gehepeve neꞌmine aniꞌ ve lo lo-ngimineꞌ. Idoꞌ Izesuꞌni gele emesoꞌ nene eiꞌ Oꞌmoso nesi lelikuꞌ minevoꞌ dovoꞌ ogo mineleseive lo nesi lo-ngimineꞌ. Idoꞌ Izesuꞌnimuꞌ gele eleꞌvoleꞌ oloneꞌ nene Oꞌmosoꞌmi izipahala nene none. Idoꞌ izipahala noneꞌ nene eiꞌ ve lisiheꞌ minineꞌ neꞌmino lazasi aꞌmineꞌmino minelone. Goloso initeꞌ nene iheꞌ geli geli ogo do do vo minamolone. Eveneꞌ ma geli geli ogo goloso niteꞌ do do vo minelineꞌ nene Oꞌmosoꞌmi izipahala minamoloseive. Idoꞌ ma nene tiꞌ lo lineꞌ: Oꞌmosoꞌmo lulo nolimineꞌ neꞌmino aꞌmineꞌmine ogo lute ezesi emo laza lute ge neme ne geme lo minelone. Me initekumukisi idoꞌ initeꞌ mamukisi nevo losa gizo hulineꞌ.  
\ip Zohaneꞌ luhuvo niteꞌ naba 2 gizinguꞌ nene eiꞌ asiꞌve guliveꞌve nene monoꞌ gizebo ve ve lo gizo Oꞌmosoꞌmo veneꞌ ma do kegeso molo-dineꞌ nene hulo-dineꞌ. Aꞌmine veneꞌ nene zahinemuꞌ lihe neꞌmi monovo nene gelamune. Eveneꞌ mukilite gilaniꞌ nene gepeꞌ gamazi ve li gilaniꞌ. Tiꞌ igi gilisa nene Izesuꞌ zuho Asia misubouꞌ ma minaniꞌ mulise hamoꞌ nemuꞌ lineꞌ ve laniꞌ. Aꞌmine luhuvo nitekuꞌ nene gomuꞌ ma gizinguꞌ gamazi gosohoꞌ nasahaꞌ laaꞌ avemuꞌ gizineꞌ maꞌmino gohi gizinguꞌ nene gohi lineꞌ. Tiꞌ ogo aꞌmine ve soza gamazi li-ngimaaꞌ ave nene Izesuꞌ zuholite numuꞌnida ngeleꞌmizi di vi meseꞌ aseka li-ngidamilizave lo lo-ngimineꞌ.  
\ip Zohaneꞌ luhuvo niteꞌ naba 3 nene eveneꞌ ma gulive Gaioꞌni gizo hulo-dineꞌ. Aꞌmine Gaioꞌnimuꞌ nene ma gelamuneꞌ ve. Zohaneꞌ nene Gaioꞌni tiꞌ lo lo-imineꞌ: Izesuꞌ zuho Gaioꞌ minineꞌ muliseutiꞌ nete eveneꞌ mone mone igi Oꞌmosoꞌmi gono nidaniꞌ aleve nene di lamineꞌ i-ngidilizave lo lo-imineꞌ. Idoꞌ monoꞌ gizebo ve ma gulive Dioteleheꞌnimuꞌ nesi tiꞌ lo lineꞌ. Aza nene Oꞌmosoꞌmi gono daniꞌ aleve nene do oꞌve lo-ngedelesa ogaꞌ ingumukisi idoꞌ ve ma Demetelioꞌnimukisi lineꞌ. Aza eveneꞌ lamineꞌ minineꞌ. Demetelioꞌ nene mone mone ogo Oꞌmosoꞌmi gono daniꞌ ve lo gele eleꞌvoleꞌ o none. Aza Zohaneꞌ nene Gaioꞌ zuholite Izesuꞌ zuho minaniꞌ nete Demetelioꞌni meseꞌ aseka lii di lamineꞌ i-dilizave lo gizineꞌ ve. Dioteleheki Demetelioki nene Asia misuboukotiꞌ ve nizasive lo gele noba ingine nene neꞌmine manaꞌmine asive lavo ma gelamune.  
\ip Zohaneꞌ luhuvo niteꞌ nene gatosa gele guno olosane.  
\c 1  
\s1 Minevoꞌ Minevoꞌ Minaaꞌ Do Sotoꞌ Iveꞌmi Gamazi  
\p
\v 1 Oꞌmosoꞌmo olihe apiꞌ ogo initeꞌ mataꞌ do sotoꞌ amivosa aꞌmine gameneloꞌ akaꞌmine ha minivemuꞌ nene luhuvo niteꞌ mene gizo nolo-lingimuze. Ningilo. Ee, aꞌmine giluneꞌ idoꞌ vetedunuꞌ ningo ningeꞌmo vo minuneꞌ idoꞌ adedunuꞌ do giluneꞌ nemuꞌ nolo-lingimuve. Adoꞌ minevoꞌ minevoꞌ minaaliꞌmi meleho neꞌmi monovoꞌve laaꞌ ivemuꞌ nene nolo-lingimuve.  
\v 2 Aꞌmine ve nene minevoꞌ minevoꞌ ogo minaaꞌ do sotoꞌ ineꞌ nene ninguneꞌ ve. Ninguneꞌ nenako aꞌminemuꞌ lo-lengemaaꞌ noune. Aꞌmine minevoꞌ minevoꞌ ogo minaaꞌ nene metehida minidotiꞌ sotoꞌ o-ledavo ninguneꞌ nemuꞌ lo sotoꞌ o-lengemaaꞌ noune.  
\v 3 Ee, linginesi lazasi aꞌmidoꞌ lute do hamoꞌ ogo bizo minelone lo initeꞌ ninguneꞌ idoꞌ giluneꞌ nene lengikisi lo-lengemaaꞌ noune. Idoꞌ laza nene lute do hamoꞌ ogo bizo minaaꞌ nouneꞌ nene Meteho Oꞌmososi idoꞌ gipele Izesuꞌ Kilisitokisi bizo minaaꞌ noune.  
\v 4 Idoꞌ linginesi neꞌmine ogo lute do hamoꞌ ogo bizo mino lolize izo minelone lo nene gamazi nogize-lingimuve.   
\s1 Oꞌmosoꞌmi Labanakuꞌ Minevoꞌ Dovoꞌ Ogo Minaakumuꞌ Gizineꞌ Gamazi  
\p
\v 5 Idoꞌ ezelatiꞌ giluneꞌ gamazi nene neꞌmino neive: Eita initeꞌ goloso litiꞌmusouꞌ initeꞌ hamokisi mo kekeꞌ nomive. Nomivo Oꞌmoso ezela neve initeꞌ lamineꞌ labanakovoꞌ neive.  
\v 6 Nemuꞌ nene litiꞌmuso monovo golosouꞌ nomonosasi laza ezesi do hamoꞌ ogo bizo none lo loloneꞌ nene sozasi lokunivo ogo molo oloneꞌ nene initeꞌ gihile nomoloseive.  
\v 7 Ne neiha aza nene labanakuꞌ neineꞌ neꞌmino lazasi aꞌmineꞌmine ogo labanakuꞌ minevo alevoꞌ oloneꞌ nene lute do hamoꞌ ogo lamineꞌ bizo minelesune. Idoꞌ neꞌmine okunivo gipele Izesuꞌ vanise neꞌmo nene goloso nitete mudise gilite ledeꞌmo vo neivo laminovoꞌ minelesune.  
\v 8 Idoꞌ lihime lelita nomive loloneꞌ nene soza lo leliꞌ lute nene golo izelesune. Neꞌmine okunivo gamazi gihile nene lelita minamoloseive.  
\v 9 Ne neiha laza lihimete lo sotoꞌ oloneꞌ nene aza aꞌmine lihimete nene hulo-ledo goloso niteꞌ lelita neineꞌ vaiꞌ nene gilite-ledeleseive. Ee, aza nene ve lisiheꞌ mino gote izesaꞌmineꞌ nenako nemuꞌ lihimete lo sotoꞌ okunivo lihimete hulo-ledeleseive.  
\v 10 Ne neiha goloso niteꞌ daaꞌ nave lo lo-lemaaꞌ neineꞌ nenako laza goloso niteꞌ ma damaaꞌ noune lo loloneꞌ nene Oꞌmosomuꞌ sozaloꞌ ve ve lo lo-duneꞌ geleleseive. Idoꞌ neꞌmine oloneꞌ nene eze gamazi leze luteuꞌ minamoloseive.   
\c 2  
\s1 Oꞌmosoꞌmo Lihime Lemelesa Neivo Hize Eleꞌ O-ledaaꞌ Ive Izesuꞌ Neive Lo Gizineꞌ Gamazi  
\p
\v 1 Izipahaꞌne zuho mate, goloso niteꞌ ma dikelizave losa luhuvo niteꞌ mene nogize lingimuve. Idoꞌ maliꞌmo lihime niteꞌ ma dalineꞌ nene Metehida aꞌmine lihimeꞌvemuꞌ goniꞌ ogavo leze hize eleꞌ o-ledelive ve lisiheꞌ Izesuꞌ Kilisitoꞌ nene aꞌmida neive. Aza nene aꞌmine lihime ma dalive nene hize eleꞌ o-deleseive.  
\v 2 Asiꞌve Izesuꞌ gono do lihimete apase-lidineꞌ ma ve. Idoꞌ leliꞌ lihimetevoꞌ nomive. Eveneꞌ mukiꞌ misubouꞌ misubouꞌ miniꞌmi monaveti lihimeꞌine nesi apase-ngidineꞌ ve.  
\v 3 Idoꞌ eze nene ningo gele none lo gelaaꞌ nouneꞌ nene lamineꞌ nehe. Nado gelelone. Leliꞌ monovote do ningosa gelelesune. Eze gamazi lo huko-lidineꞌ nene gele do minaaꞌ nooloneꞌ nene eze ningo gele none lo gelaaꞌ nouneꞌ nene lamineꞌ gelaaꞌ noune lo gelelesune.  
\v 4 Idoꞌ eveneꞌ lingelite eze ningo gele none li gamaziꞌve gili disaꞌmaniꞌ nene ingine sozaloꞌ ve minikevo gamazi gihile engita nomive.  
\v 5-6 Idoꞌ eveneꞌ linge ma Oꞌmosoꞌmi gamazi gili di minaniꞌ nete ingine luꞌine imaniꞌ nene apa niteꞌ nomive. Laminetokovoꞌ imi giliꞌ li imaaꞌ nave. Idoꞌ ingine Oꞌmosola giꞌmize none laaꞌ ave nene Izesuꞌ ogo molo minidiꞌmine igi inginesi aꞌmineꞌmine igi mili minilizaniꞌ o neive. Laza neꞌmino ogo molo ogo mino ma neꞌmo ezela giꞌmize none luneꞌ nene gamazi gihile ve lo gelelesune.   
\s1 Louꞌ Gamazi Liteheliꞌmo Gosohoꞌ Gidini Gilingumuꞌ Gizineꞌ Gamazi  
\p
\v 7 Luꞌne lengeme nouvoniꞌ mate, louꞌ gamazi gosohoꞌ ma lo sotoꞌ ogo gize lengemamuve. Litehe louꞌ adoꞌ gamene gozopoꞌ akaꞌmilatiꞌ gili minaniꞌ mamuꞌ nogize-lingimuve. Aꞌmine louꞌ gamazi litehe nene nado neve. Nene monoꞌ gamazi li-lingimikevo gilaaꞌ naniꞌ nene neive.  
\v 8 Ne neiha mene luhuvo nitekuꞌ nogizuvo aꞌmine louꞌ nene gosohoꞌ neineꞌ gelave. Ee, mo laminetoꞌ gosohoꞌ neive. Izesuꞌ aza aꞌmine louꞌ nene do gosohoꞌ ogavo linginela gono gosohoꞌ nodavo litiꞌmuso izo minineꞌ nene vovoꞌ vovoꞌ neivo labanaꞌ gihile nene mo apiꞌ ogo noilive.  
\v 9 Ne neiha eveneꞌ linge ma eveneꞌ mamuꞌ muluꞌninguꞌ goloso ogavo lukehe ngibili minisa laza labanakuꞌ none li laaꞌ nave nene ingine olihe labanakuꞌ ami litiꞌmusouꞌ ha nizave.  
\v 10 Nizaniꞌza eveneꞌ linge ma ingine eveneꞌ mukiꞌ luꞌine ngimi nasahiliꞌ i-ngidaaꞌ ave nene lamineꞌ labanakuꞌ nizave. Ingine eveneꞌ ma ngeleꞌmizi gopo amilisave.  
\v 11 Idoꞌ ingine eveneꞌ mamuꞌ muluꞌninguꞌ goloso ogavo lukehe ngibilaaꞌ nave nene litiꞌmusouꞌ ha nizave. Aꞌmine ve nete litiꞌmusoukovoꞌ moni litiꞌmusoliꞌmo veꞌine likavo vilizaniꞌ aka nene ningi gilamave.   
\q1
\v 12 Izipahaꞌne zuho mate, Izesuꞌnimuꞌ ve lo Oꞌmosoꞌmo lihimetine hulo-lengede neive.  
\q1 Nemuꞌ luhuvo niteꞌ mene nogize-lingiduve.   
\q1
\v 13 Idoꞌ meꞌninge lingine Oꞌmosoꞌmo olihe apiꞌ ogo initeꞌ mataꞌ do sotoꞌ amivosa  
\q1 aꞌmine gameneloꞌ akaꞌmila ha minive nene ningi gili nizave.  
\q1 Nemuꞌ luhuvo niteꞌ mene nogize-lingiduve.  
\q1 Idoꞌ ve gosoꞌve lingine goloso meleho Satani mo ivileꞌ igi nizave.  
\q1 Nemuꞌ luhuvo niteꞌ mene nogize-lingiduve.   
\q1
\v 14 Izipekizo, lingine Metehine ningi gili nizave.  
\q1 Nemuꞌ luhuvo niteꞌ mene gize-lingiduvoniꞌ ve.  
\q1 Idoꞌ meꞌninge lingine Oꞌmosoꞌmo olihe apiꞌ ogo initeꞌ mataꞌ do sotoꞌ amivosa  
\q1 aꞌmine gameneloꞌ akaꞌmine ha minive nene ningi gili nizave.  
\q1 Nemuꞌ luhuvo niteꞌ mene gize-lingiduvoniꞌ ve.  
\q1 Idoꞌ ve gosoꞌve lingine amuzo mili minavo Oꞌmosoꞌmi gamazi nene lutinguꞌ neivo  
\q1 goloso meleho Satani mo ivileꞌ igi nizave.  
\q1 Nemuꞌ luhuvo niteꞌ mene gize-lingiduvoniꞌ ve.   
\s1 Laza Misubouko Nitetoꞌ Lute Molamoloningumuꞌ Gizineꞌ Gamazi  
\p
\v 15 Oꞌmoso gelekeleꞌ o-damo misubouko minevoꞌ dovoꞌ ogaꞌ sunoloꞌ nehe idoꞌ me misubouꞌ minineꞌ initeꞌ golosoloꞌ nehe nene lutine milamilo. Eveneꞌ ma ingine luꞌine aꞌmidoꞌ milaniꞌ nete luꞌine nene Meteho Oꞌmoso imisaꞌmave.  
\v 16 Misubouꞌ veti monovo danava mukiꞌ nene goloso nitekumuꞌ lumo helaaꞌ idoꞌ initeꞌ mataꞌ ninge lamineꞌ tamineꞌ ogo mumuzoꞌ ogaꞌ nehe idoꞌ eveneꞌ veꞌnidoꞌ heneni nganeni do sotoꞌ sotoꞌ ogo gonolise gonolise ogo okode lute do dize dizeꞌ ogaꞌ nehe neꞌmine monovo nesi nene Metehidatiꞌ nomive. Misuboukotikovoꞌ neive.  
\v 17 Idoꞌ misubouꞌ neve aꞌminguꞌ lumo helaaꞌ ineꞌ initeꞌ mataꞌ nesi nene osuꞌ loꞌmo novive. Noviha ingine Oꞌmosoꞌmi gamazi gili di minaaꞌ nave nene vi osuꞌ lami miniviꞌ miniviꞌ igivoꞌ minilisave.   
\s1 Kilisitoꞌni Lovo O Emaaꞌ Ive Neineꞌ Mamuꞌ Gizineꞌ Gamazi  
\p
\v 18 Izipahaꞌne zuho mate, gamene nene mo liꞌnibe ogave. Nemuꞌ Kilisitoꞌni lovo o emaaꞌ ive mo sotoꞌ oloseive li li nizaniꞌ nene mo gilikeve. Idoꞌ giladoꞌ nene lovo i imaaꞌ ave mukiꞌ nene mo sotoꞌ ikeve. Nemuꞌ nene gamene mo liꞌnibe ogave lo gele none.  
\v 19 Aꞌmine ve nene lezesi makaꞌ minuningutiꞌ leze huli-lidi vaniꞌza leze aleve gihile liliꞌ igi minamave. Leze aleve gihile liliꞌ igi minadini leze huli-lidi vamavo makaꞌ minunidine. Idoꞌ ingine huli-lidi vaniꞌ nemuꞌ ingine mukiꞌ leliꞌ zuho minamaniꞌ nene sotoꞌ ogavo gele none.  
\v 20 Emeni dameniꞌve lamineꞌ atoliꞌminesi minive neꞌmo Sikalahuꞌve lehize-lingidivo mini lingine mukiꞌ gamazi gihile nene mo gili nizave.  
\v 21 Luhuvo niteꞌ mene gizuvoniꞌ nene lingine gamazi gihile lamineꞌ nene gilamave lo gizamuve. Gamazi gihile lamineꞌ nene mo gili mini aꞌmine gamazi gihile laminekutiꞌ nene soza gamazi ma sotoꞌ osaꞌmineꞌ nesi nene gili nizave lo gizuvoniꞌ ve.  
\v 22 Idoꞌ sozaloꞌ ve ve lo ne zamotinemuꞌ lolone. Ingine Izesuꞌnimuꞌ ataize li aza Oꞌmosoꞌmo do luꞌ izelive lo imiselelesa live minamive li laaꞌ nave nene ingine sozaloꞌ ve ve lolone. Me ve nete Melehingi gipelengi ataize li-ngidisa Kilisitoꞌni lovo i imaaꞌ ave nizave.  
\v 23 Ingine gipelemuꞌ ataize li-daaꞌ nave nete Melehosi makaꞌ bizi minamaaꞌ nave. Idoꞌ ingine gipele gili imaaꞌ nave nete Melehosi makaꞌ bizi minaaꞌ nave.  
\v 24 Lingine gozopoꞌ gamene akaꞌmila ganaꞌ gilaniꞌ gamazi nene gili di minilo. Aꞌmine ganaꞌ gilaniꞌ gamazi nene gili di minilizaniꞌ nene Melehingi Gipelengi inginela giꞌmize lamineꞌ ilisave.  
\v 25 Idoꞌ Izesuꞌ aza initeꞌ ma lehize-ledelove lo lo huko lineꞌ nene minevoꞌ minevoꞌ ogo minaaꞌ lemeni dameni nene lehize-ledelove lo molo-lede neive.   
\p
\v 26 Me gamaziuꞌ nene lengiꞌ lengeleꞌmize gopo ilisa gili minaveti monovo lo sotoꞌ ogo gize lingimuvoniꞌza  
\v 27 lingine neve Kilisitoꞌ lehize-lingidineꞌ Sikalahuꞌve nene ha di miniꞌmi vi nizave. Di miniꞌmi vi nizanako eveneꞌ laza initeꞌ matakumuꞌ apize lengemelonidoꞌ nomive. Aꞌmine Sikalahuꞌve lehize-lingidineꞌ neꞌmo initeꞌ matakumuꞌ apize lengemaaꞌ neive. Idoꞌ gamazi lo-lengemaaꞌ neineꞌ nene sozasi nomive. Laminetokovoꞌ lo-lengemaaꞌ neineꞌ nenako lidoꞌ nene gili di Kilisitoda giꞌmizi minilo.  
\v 28 Ee, izipahaꞌne zuho mate, Kilisitoꞌ ogo hetelelineꞌ gamene sotoꞌ ilinguꞌ nene laza eze veleloꞌ mino lovozo helepeleꞌ ogo lehelele izamivo minelone li ezela giꞌmizi minilo.  
\v 29 Oꞌmoso aza nene ve lisiheꞌ lamineꞌ neive li lingine gili nizave. Gili nizanako eveneꞌ ingine monovo lisiheꞌ lamineꞌ igi mili minaaꞌ navemuꞌ nene Oꞌmosolatiꞌ sotoꞌ aniꞌ ve li gililisave.   
\c 3  
\s1 Idise Oꞌmosoꞌmi Izipahala None Lo Gizineꞌ Gamazi  
\p
\v 1 Vekizo, Meteho lulo atoliꞌmine ogo leme neineꞌ nene gili nizahe. Ee, lulo atoliꞌmine ogo limidotiꞌ nene izipahaꞌne zuho ve lo lo-ledaaꞌ neive. Idoꞌ lamineꞌ izipahala zuho none. Noneꞌza me misubouꞌ ve Oꞌmoso gelekeleꞌ i-damaniꞌ ingine nene Oꞌmoso ningi gilamaniꞌ nenako lezesi aꞌmineꞌmine igi ningi gilamaaꞌ nave.  
\v 2 Idoꞌ luꞌne lengeme nouvoniꞌ aleve mate, laza idiꞌnise nene Oꞌmosoꞌmi izipahala zuho ne none. Idoꞌ mino nani lemeni dameniloꞌ sotoꞌ oloneꞌ nehe neꞌmi monovo nene olihe ma sotoꞌ o lamineꞌ amineꞌza laza mo tiꞌ lo gele none: Guvetesi ve sotoꞌ ilineꞌ gameneloꞌ nene eiꞌ emeni dameniꞌve ningo lazasi eiꞌ emeni dameni neꞌmine gidinisi minelesune losa gele none.  
\v 3 Idoꞌ ogavo eze ningo emeni dameni neꞌmine gidinisi minelone li ezemuꞌ gili eleꞌvoleꞌ igi minaaꞌ nave mukiꞌ ingine nene eiꞌ lulo lamineꞌ minineꞌ neꞌmino leze lute nesi lamineꞌ minelive li engiꞌ luꞌine di lamineꞌ igi minaaꞌ nave.  
\v 4 Goloso niteꞌ daaꞌ neꞌmo Oꞌmosoꞌmo louꞌ gamazi lineꞌ nene avutoꞌ ogaꞌ neineꞌ nenako ingine goloso niteꞌ daaꞌ niilizaniꞌ nene Oꞌmosoꞌmo louꞌ gamazi lineꞌ nene avutoꞌ ikeve.  
\v 5 Avutoꞌ ikeniꞌza Izesuꞌ aza goloso niteꞌ do hulolosa sotoꞌ ineꞌ nesi idoꞌ ezela goloso niteꞌ ma minamineꞌ nesi nene lingine gili nizave.  
\v 6 Nemuꞌ nene ezela giꞌmizi minaaꞌ nave ingine goloso niteꞌ di minisaꞌmave. Goloso niteꞌ daaꞌ nave nete nene eze ningi gilisaꞌmave.  
\v 7 Izipahaꞌne zuho mate, ingine monovo lisiheꞌ lamineꞌ igi mili i minaaꞌ nave nene Izesuꞌ aza ve lisiheꞌ lamineꞌ minineꞌ neꞌmini eveneꞌ lisiheꞌ lamineꞌ nizave. Nemuꞌ malite atoꞌ gamazi li lengeleꞌmize gopo ikelizave.  
\v 8 Idoꞌ malite goloso niteꞌ di minilizaniꞌ nene ingine Sataniꞌmi zuho minilisave. Satani aza goloso niteꞌ gozopoꞌ akaꞌmilatiꞌ doꞌmo ogo minaaꞌ neive. Idoꞌ goloso niteꞌ doꞌmo ogo minineꞌ nenako Oꞌmosoꞌmi gipele aza Sataniꞌmi gono nene bele helo ize huko-delesa sotoꞌ ineꞌ ma neive.  
\v 9 Oꞌmosolatiꞌ sotoꞌ igi izipahala liliꞌ igi nizave ingine goloso niteꞌ mo di minisaꞌmave. Ee, Oꞌmosolatiꞌ emeni dameniꞌve engita mine molo neivo ingine ezelatiꞌ sotoꞌ igi eiꞌ izipahala liliꞌ i nizanako goloso niteꞌ ngeli di minamilisave.  
\v 10 Oꞌmosoꞌmi izipahala zuho idoꞌ Sataniꞌmi izipahala zuho engiꞌ monovo danava tiꞌ lo do kegeso ningelesune: Eveneꞌ ma ingine hehe li lamineꞌ minamilizaniꞌ nene ingine Oꞌmosolatiꞌ sotoꞌ igi minamave lo ningelesune. Idoꞌ aꞌmineꞌmine ogo eveneꞌ ma ingine eveneꞌ mukiꞌ luꞌine ngimi nasahiliꞌ i-ngidamilizaniꞌ nene ingine Oꞌmosolatiꞌ sotoꞌ igi minamave lo ningelesune.   
\s1 Lute Ne Geme Ge Neme Lo Minelone Lo Gizineꞌ Gamazi  
\p
\v 11 Nemuꞌ nene monoꞌ gamazi apiꞌ ogo gilunidotiꞌ gamazi tiꞌ lo geleꞌmo geleꞌmo ogo minune: Laza lute ne geme ge neme lo bizo minelone.  
\v 12 Gozopoꞌ vomila minive Kainiꞌ aza ineꞌ neꞌmine amolone. Aza nene ve goloso Sataniꞌmi gipele loloꞌ ogo akunoloine bele hilineꞌ. Idoꞌ bele hilineꞌ monovo nene nanitekumuꞌ bele hilive. Eiꞌ Kainiꞌ ogo molo minineꞌ monovoꞌve nene goloso o vivo idoꞌ nakunoloꞌmo ogo molo minineꞌ monovoꞌve nene lisiheꞌ lamineꞌ minineꞌ nenako nemuꞌ bele hilineꞌ ve.  
\v 13 Leze zuho mate, me misubouꞌ ve adoꞌ Oꞌmoso gelekeleꞌ i-damaaꞌ ave nete lengikumuꞌ muluꞌninguꞌ goloso ogavo lukehe lingibilaaꞌ nangumuꞌ nene lingine gosohoꞌ suno ma ve li gilii upuhoꞌ igi gatine mukiꞌ gilamilo.  
\v 14 Laza lute eveneꞌ mukiꞌ ngemaaꞌ nouneꞌ nenako lelikumuꞌ tiꞌ lo gelaaꞌ noune: Hele noningutiꞌ tineꞌ molo ogo eleꞌvoleꞌ ogo minevoꞌ minevoꞌ ogo mineloninguꞌ vo holokuneꞌ ma neive. Eveneꞌ malite eveneꞌ ma luꞌine ngimami minaaꞌ ave ingine nene luꞌine hele vineꞌ nizave.  
\v 15 Malite eveneꞌ mamuꞌ muluꞌninguꞌ goloso ogavo lukehe ngibili minaaꞌ nave ingine nene eveneꞌ ngibili hilaaꞌ ave nizaniꞌ gelaaꞌ neive. Idoꞌ eveneꞌ ngibili hilaaꞌ avemuꞌ lingine mo gili nizave. Ingine minevoꞌ minevoꞌ ngemeni damenisi minamave.  
\v 16 Izesuꞌ aza lelikumuꞌ ve lo minevoꞌ alevoꞌve hulo lute ngemaliꞌmi monovo lelebizavo ningo gele none. Nemuꞌ laza aꞌmineꞌmine ogo evenekumuꞌ nene minevoꞌ alevote hulolonidoꞌ o neive.  
\v 17 Ne neiha eveneꞌ ma me misuboꞌmi heneni di minave ingine eveneꞌ ma initeꞌine nomineꞌ minave ma ningi mulumoꞌine gili initeꞌ ma ngimami minilizaniꞌ nene ingine mo kekeꞌ luꞌine Oꞌmoso imisaꞌmave.  
\v 18 Izipahaꞌne zuho mate, laza lute eveneꞌ ngemaaꞌ noune lo ma haza gamaziꞌve vetedunukovoꞌ lalone. Lute ngemaaꞌ noune lo ma neꞌmi gihileꞌve do sotoꞌ ilineꞌ gono nene dalone.   
\s1 Oꞌmosoꞌmi Veleloꞌ Gele Oloboꞌ Ogosa Mineloningumuꞌ Gizineꞌ Gamazi  
\p
\v 19 Neꞌmine ogo minaaꞌ olonidotiꞌ nene laza gamazi gihile lamineliꞌmi zuhoutiꞌ noneꞌ nene ningo gelelesune. Neꞌmine ogo Oꞌmosoꞌmi veleloꞌ lute do hongu lo minelesune.  
\v 20 Idoꞌ goloso niteꞌ daaꞌ unive ve lo lutedunuꞌ gelo lovozo helo ma tiꞌ lo gelelesune: Oꞌmoso nene lute ivileꞌ ogo mino initeꞌ mataꞌ mukiꞌ nene gele ngoloꞌ lo gelaaꞌ neive.  
\v 21 Luꞌne lengeme nouvoniꞌ mate, goloso niteꞌ daaꞌ unive ve lo lutedunuꞌ gelo lovozo helamo ma Oꞌmosoꞌmi veleloꞌ nene gele oloboꞌ ogo minelesune.  
\v 22 Neꞌmine ogo laza nene lo huko lineꞌ gamazi nene gele do mino nemuꞌ eze mulunouꞌ lamineꞌ gelaaꞌ neineꞌ initeꞌ ogo molo minaaꞌ nounako ezela initeꞌ nanitekumuꞌ lube nene haza lemavo daaꞌ noune.  
\v 23 Idoꞌ aꞌmine lo huko lineꞌ gamazi nene tiꞌ lo neive: Izesuꞌnimuꞌ nene aza Oꞌmosoꞌmi gipele mino Oꞌmosoꞌmo do luꞌ izelive lo imiselelesa live nene neive lo laza gele eleꞌvoleꞌ ogo lute ge neme ne geme lo mineloningumuꞌ lo-limidoꞌ eꞌmeto olosune.  
\v 24 Idoꞌ lo-huko lineꞌ gamazi nene gele do noolonive laza Oꞌmososi bizo lamineꞌ makaꞌ minekunivo Oꞌmoso aza luteuꞌ minevo dovoꞌ ogo minaaꞌ neive. Idoꞌ eze Sikalahuꞌ lehize-lidineꞌ neꞌmo lo-lemavo Oꞌmoso aza luteuꞌ minevoꞌ dovoꞌ neive lo gelaaꞌ noune.   
\c 4  
\s1 Oꞌmosolatiꞌ Gamazi Nehe Atokutiꞌ Gamazi Nehe Lo Izeka Hizo Geleloningumuꞌ Gizineꞌ Gamazi  
\p
\v 1 Luꞌne lengeme nouvoniꞌ mate, Oꞌmosoꞌmi gamazi lo sotoꞌ ogaꞌ unive polohete none li sozasi laaꞌ ave mukiꞌ sotoꞌ igi misubouꞌ misubouꞌ nimonanako nemuꞌ engikutiꞌ ve ma lengita igi soza gamazi li-lingimikevo gili ngimikelizave. Nemuꞌ nene linginela igi Sikalahuliꞌmo leleꞌmize akaloꞌ o-lede neive li monoꞌ li-lingimaaꞌ ave mukiꞌ gopo gili-ngimaaꞌ naniꞌ monovotine nene hulilo. Gopo gili ngimami gamazi mukiꞌ nene Oꞌmosolatiꞌ nehe atokutiꞌ nehe li gili ningilo.  
\v 2 Oꞌmosoꞌmi Sikalahuꞌ neꞌmo ngeleꞌmize akaloꞌ o-ngedaaꞌ ivemuꞌ nene tiꞌ li ningilisave: Ve ma ingine Izesuꞌ Kilisitoꞌ aza eveneꞌ okode neꞌmine loloꞌ ogo sotoꞌ ineꞌ ve li li sotoꞌ milalizave nene ingine Oꞌmosolatiꞌ nizave li ningi gililisave.  
\v 3 Idoꞌ ve ma Izesuꞌnimuꞌ aza eveneꞌ okode neꞌmine do otuho sotoꞌ ineꞌ neive li lamilizaniꞌ nene Oꞌmosolatiꞌ nizamave. Ingine Kilisitoꞌni lovo o emaaꞌ iveꞌmi gamazi laaꞌ ave nizave. Aꞌmine Kilisitoꞌni lovo o emaaꞌ ive misubouko sotoꞌ oloseive li likevo gili nizave. Idoꞌ idiꞌnise mo sotoꞌ ogo omo neive.  
\v 4 Izipahaꞌne zuho mate, lingine Oꞌmosolatiꞌ sotoꞌ igi Oꞌmosoꞌmi gamazi lo sotoꞌ ogaꞌ unive polohete none li sozasi laaꞌ ave nene ngivileꞌ igi nizaniꞌ ma neive. Lengiꞌ lutinguꞌ minaaꞌ neive neꞌmo me misubouꞌ ve adoꞌ Oꞌmoso gelekeleꞌ i-damaveti luꞌninguꞌ minive nene ivileꞌ o neive. Nemuꞌ lingine aꞌmine Kilisitoꞌni lovo i imaaꞌ ave nene ngivileꞌ i nizave.  
\v 5 Ingine misubouꞌ ve Oꞌmoso gelekeleꞌ i-damaveti ngemeni damenisi minaaꞌ nanako aꞌmine ngemeni dameniloꞌ vo miliseꞌ ilineꞌ gamazivoꞌ laaꞌ nave. Likevo misubouꞌ ve ingine laniꞌ gamazi gili laniteꞌ gilaaꞌ nave.  
\v 6 Laza nene Oꞌmosolatiꞌ sotoꞌ uneꞌ nenako ingine Oꞌmoso ningi gilaaꞌ ave nene leze gamazite gili daaꞌ nave. Idoꞌ Oꞌmosolatiꞌ sotoꞌ amave nete leze gamazite gili hulaaꞌ nave. Neꞌmine igaꞌ nanako nemuꞌ Oꞌmosoꞌmi Sikalahuꞌ neꞌmo do sotoꞌ ineꞌ gamazi gihile lamineꞌ nesi idoꞌ gopo gamazi adoꞌ Oꞌmosoꞌmi Sikalahuliꞌmo do sotoꞌ amineꞌ gamazi nesi nene do kegeso ningo gelaaꞌ noune.   
\s1 Oꞌmosoꞌmi Monovo Nene Lulo Lemaaꞌ Neive Lo Gizineꞌ Gamazi  
\p
\v 7 Luꞌne lengeme nouvoniꞌ mate, lute ngemaaꞌ nene Oꞌmosolatiꞌ neineꞌ nenako nemuꞌ laza lute ne geme ge neme lo minukeꞌzo. Ingine eveneꞌ luꞌine ngimi nasahiliꞌ i-ngidi minilizave nene Oꞌmosolatiꞌ sotoꞌ adite ilisave. Ingine Oꞌmosomuꞌ mo ningi gili nizave ve.  
\v 8 Oꞌmoso aza lute ngemaaꞌ monovoꞌmi meleho neineꞌ nenako nemuꞌ eveneꞌ ma ingine luꞌine eveneꞌ ngimami minaaꞌ nave nete Oꞌmosomuꞌ ningi gilisaꞌmave.  
\v 9 Oꞌmosoꞌmo gipele hamoꞌ leliꞌ do luꞌ izo minevoꞌ minevoꞌ lemeni dameni do sotoꞌ o-ledelive me misubouko imiselavo lemo aniꞌ. Nemuꞌ nene Oꞌmosoꞌmo lulo limineꞌ nene sotoꞌ ogavo ningekune.  
\v 10 Lute ngemaliꞌmi monovo tiꞌ ogo neive: Laza lute Oꞌmoso emamunivosa asiꞌve gomuꞌ lulo lemo lelitoꞌ medelo mino okoꞌno hulo helo lihimete apase-ledelive lo gipeleine imiselineꞌ ve.  
\v 11 Luꞌne lengeme nouvoniꞌ mate, Oꞌmosoꞌmo lulo atoliꞌmine ogo lemaze. Nemuꞌ laza aꞌmineꞌmine ogo lute ne geme ge neme lo minelonidoꞌ o neive.  
\v 12 Eveneꞌ hamolitesi Oꞌmoso mo ningamune. Lute ne geme ge neme lo mineloneꞌ nene Oꞌmosoꞌmo lezesi bizo luteuꞌ neivo lute imuneꞌ nene apa niteꞌ amivo laminetokovoꞌ lute eme giliꞌ lo minelesune.  
\v 13 Idoꞌ Oꞌmosola bizo noneꞌ idoꞌ Oꞌmosoꞌmo luteuꞌ minevoꞌ dovoꞌ ogo neineꞌ nene ningo gele none. Idoꞌ naniteliꞌmo ningo gele none. Eze Sikalahuꞌve leliꞌ limidiꞌmo nene ningo gele none.  
\v 14 Meteho aza numudoꞌ namadoꞌ ve do luꞌ izelive lo gipeleine imiselavo lemo aniꞌ nene laꞌlisete vetedunuꞌ ninguneꞌ nenako neꞌmi gamazi lo sotoꞌ ogaꞌ noune.  
\v 15 Idoꞌ eveneꞌ malite Izesuꞌ aza lamineꞌ mo Oꞌmosoꞌmi gipele neive li li sotoꞌ ave nene Oꞌmosoꞌmo engiꞌ luꞌninguꞌ minevoꞌ dovoꞌ ogo neivo ingine Oꞌmososi bizi nizave.  
\v 16 Idoꞌ Oꞌmosoꞌmo lulo lemaaꞌ neineꞌ nene ningo gele eleꞌvoleꞌ o none.  
\p Lulo lemo nasahiliꞌ ogaꞌ monovo nene Oꞌmosoꞌmi emeni dameni gihile neineꞌ nenako ve ma ingine luꞌine ve ma ngimiꞌmi vi miniviꞌ diviꞌ iꞌmi vilizaniꞌ nene ingine Oꞌmosola bizi nizavo Oꞌmoso nesi engiꞌ luꞌninguꞌ minevoꞌ dovoꞌ ogo mineleseive.  
\v 17 Idoꞌ Izesuꞌ mene misubouko minevoꞌ dovoꞌ idiꞌmine ogo lazasi aꞌmineꞌmine ogo minevoꞌ dovoꞌ ogo nounako nemuꞌ gamene nabauꞌ Oꞌmosoꞌmo lihime ngemelineꞌ gamenela nene lamineꞌ minelone lo gele oloboꞌ ogo noneꞌ neꞌmo nene lute imuneꞌ nene apa niteꞌ amo laminetokovoꞌ eme giliꞌ lolosune.  
\v 18 Lute ve ma emo ma aꞌmine vemuꞌ golise gelamolosune. Lute emo giliꞌ luneꞌ neꞌmo golise nene ehusoꞌ ogaꞌ neive. Nemuꞌ nene eveneꞌ Oꞌmosomuꞌ golise gilave ingine lihimete lemelihe li ezemuꞌ golise gilaniꞌ neꞌmo luꞌine imaniꞌ nene imi giliꞌ lisaꞌmave.  
\v 19 Laza nene Oꞌmosoꞌmo ganaꞌ lulo limineꞌ nenako nemuꞌ Oꞌmososi evenekisi lute ngemaaꞌ noune.  
\v 20 Ve malite ve mamuꞌ muluꞌninguꞌ goloso ogavo lukehe ngibili minaaꞌ niigi lute nene Oꞌmoso emaaꞌ noune lilizaniꞌ soza lilisave. Ve ma ingine ningi nizave ma luꞌine ngimamilizaniꞌ nene ningamave Oꞌmoso nesi mo luꞌine imamilisave. Nemuꞌ lute Oꞌmoso emaaꞌ noune lilizaniꞌ nene soza lilisave.  
\v 21 Idoꞌ Izesuꞌ lo huko lo-lidineꞌ gamazi ma tiꞌ lo gelaaꞌ noune: Lute nene Oꞌmoso emo ma evenekisi ngemeloneꞌ o neive.   
\c 5  
\s1 Oꞌmosomuꞌ Gilive Nene Misubouꞌ Monovo Mehene nGemaaꞌ Neive Lo Gizineꞌ Gamazi  
\p
\v 1 Ve malite Izesuꞌnimuꞌ nene aza do luꞌ izelive lo Oꞌmosoꞌmo imiselelesa live neive li gili eleꞌvoleꞌ ilizaniꞌ nene Oꞌmosolatiꞌ sotoꞌ igi izipahala zuho liliꞌ igi nizave. Idoꞌ ve ma ingine luꞌine meꞌnibine imi ma izipahala zuhosi ngimilisave.  
\v 2 Idoꞌ lute Oꞌmosoꞌmi izipahala zuho ngemaaꞌ noube ngemamaaꞌ noube. Lute Oꞌmoso emo lo huko lineꞌ gamazi gele do mino ma nene mo laminetoꞌ lute ngemaaꞌ noune lo ningo gelelesune.  
\v 3 Lute Oꞌmoso emaliꞌmi monovo tiꞌ ogo neive: Lo huko lineꞌ gamazi gele daloneꞌ nene mo laminetoꞌ lute emaaꞌ olosune. Idoꞌ Oꞌmosoꞌmo lo huko lineꞌ gamazi nene geniꞌvesi nominako ngelo livizamoloseive.  
\v 4 Oꞌmosolatiꞌ sotoꞌ unive laza nene Oꞌmoso gelekeleꞌ i-damaniꞌ misubouꞌ aleveti monovo nene damo aꞌmine monovo nene amuzo molo do lemeꞌmo ogo minunako Oꞌmosoꞌmo lo huko lineꞌ gamazi nene livizesaꞌmive. Idoꞌ aꞌmine misubouꞌ minineꞌ monovo nene gele damo amuzo moloꞌmo ogo minaaꞌ nouneꞌ nene naniteliꞌmo ve. Izesuꞌnimuꞌ gele eleꞌvoleꞌ ogo noneꞌ neꞌmo ve.  
\v 5 Idoꞌ zamote aꞌmine misubouko minineꞌ monovo di limiꞌmi igi amuzo mili minilizave. Ingine Izesuꞌnimuꞌ aza lamineꞌ Oꞌmosoꞌmi gipele neive li gili eleꞌvoleꞌ i nizavetevoꞌ neꞌmine ilisave.   
\s1 Oꞌmoso Aza Gipeleꞌmi Gamazi Hize Eleꞌ O-dineꞌ Gamazi  
\p
\v 6 Aꞌmine ve Izesuꞌ Kilisitoꞌ aza nene nososi vanisesi sotoꞌ ineꞌ ve. Nosovoꞌ nomive. Sotoꞌ ineꞌ nene monoꞌ noso holanikisi vanise lepo hilinekisi ne neive. Idoꞌ Sikalahuꞌ neꞌmo aza aꞌmine gamazi nene hize eleꞌ o-daaꞌ neive. Sikalahuꞌ aza gamazi gihileꞌmi meleho neinako aꞌmine gamazi laaꞌ neivo gihile izaaꞌ neive.  
\v 7-8 Nemuꞌ nene Sikalahuꞌ neꞌmo idoꞌ monoꞌ noso holaniꞌ neꞌmo idoꞌ vanise lepo hilineꞌ neꞌmo Izesuꞌ monovo hize eleꞌ i-di gono daaꞌ nave. Sikalahuꞌ idoꞌ noso holaniꞌ idoꞌ vaniseꞌve ingine setohamo nete gamazi laniꞌ nene hamoꞌ gamazi neive.  
\v 9 Haza eveneꞌ nete gamazi ma hizi eleꞌ ikevo ma nene laza aꞌmine gamazi mo laminetoꞌ neive lo gelaaꞌ noune. Ne neiha Oꞌmosoꞌmo gamazi lilineꞌ nene haza eveneliti gamazi ivileꞌ ogo gihile lamineꞌ izeleseive. Nemuꞌ nene Oꞌmosoꞌmo gipele hize eleꞌ o-do lineꞌ gamazi neineꞌ nene gele eleꞌvoleꞌ olosune.  
\v 10 Ingine Oꞌmosoꞌmi gipelemuꞌ gili eleꞌvoleꞌ igaꞌ nave nene luꞌinedunuꞌ gilikevo eleꞌvoleꞌ ogaꞌ neive. Idoꞌ ingine Oꞌmosoꞌmo lineꞌ gamazi gili eleꞌvoleꞌ ami nizave nete Oꞌmosoꞌmo gipele hize eleꞌ o-do lineꞌ gamazi nene gilikevo gihile izesaꞌminako nemuꞌ Oꞌmosomuꞌ sozaloꞌ ve ve laniꞌ gelaaꞌ neive.  
\v 11 Idoꞌ gipele hize eleꞌ o-do lineꞌ gamazi nene tiꞌ lo neive: Oꞌmosoꞌmo minevoꞌ minevoꞌ ogaꞌ lemeni dameni nene mo leme neive. Idoꞌ aꞌmine minevoꞌ minevoꞌ minaaliꞌmi meleho nene eiꞌ gipele ne neive.  
\v 12 Nemuꞌ nene ingine Oꞌmosoꞌmi gipele di giliꞌ li nizaniꞌ nete nene minevoꞌ minevoꞌ ogaꞌ ngemeni dameni nesi di nizave. Idoꞌ ingine Oꞌmosoꞌmi gipele di giliꞌ li di minamave nete minevoꞌ minevoꞌ ogaꞌ ngemeni dameni nesi mo damave.   
\s1 Minevoꞌ Minevoꞌ Lemeni Damenisi Minaakumuꞌ Gizineꞌ Gamazi  
\p
\v 13 Oꞌmosoꞌmi gipelemuꞌ gili eleꞌvoleꞌ i nizave lingine minevoꞌ minevoꞌ lengemeni dameni nene mo do none li gili eleꞌvoleꞌ igi gililizave lo mene gamazi nene nogize-lingimuve.  
\v 14 Laza tiꞌ lo Oꞌmosoꞌmi veleloꞌ gele oloboꞌ o none: Oꞌmosola initeꞌ mamuꞌ vokuꞌ lunivo eiꞌ gele neidoꞌ vo dalineꞌ nene gele lemeleseive.  
\v 15 Idoꞌ neꞌmine manaꞌmine initekumuꞌ vokuꞌ lunivo gele lemeleseive lo gele eleꞌvoleꞌ o noneꞌ nenako initeꞌ mamuꞌ vokuꞌ lo-deloneꞌ nene lemavo liteꞌ lo daaꞌ noune lo gele none.   
\p
\v 16 Ve maliꞌmo eze zuho ma goloso niteꞌ nodavo ningivo aꞌmine neꞌmo mudise helaaꞌ akauꞌ vilidoꞌ nomivo ma nene aꞌmine vemuꞌ Oꞌmosola lilive. Lavo Oꞌmosoꞌmo minevoꞌ minevoꞌ emeni damenisi mine do dizo minelineꞌ akaloꞌ eleꞌmize molaloseive. Mudise hilaaꞌ akauꞌ vilizadoꞌ nomineꞌ goloso niteꞌ davemukovoꞌ noluve. Goloso niteꞌ ma neineꞌ nene aꞌmine dalizaniꞌ nene mudise hilaaꞌ akauꞌ vilizadoꞌ o neive. Neꞌmine initeꞌ davemuꞌ Oꞌmosola lilizave lo lamuve.  
\v 17 Goloso niteꞌ mukiꞌ nene lihime daaꞌ nitekovoꞌ neive. Neineꞌza goloso niteꞌ ma daloneꞌ nene vo mudise helaaꞌ akauꞌ volonidoꞌ nomive.  
\v 18 Laza tiꞌ lo gelaaꞌ noune: Oꞌmosolatiꞌ sotoꞌ unidite nene goloso niteꞌ do minamolosune. Oꞌmosoꞌmi gipele neꞌmo gizebo o-ledavo golosoꞌmi meleho aza geleleheꞌ o-ledo do goloso o-ledamoloseive.  
\v 19 Laza nene Oꞌmosolatiꞌ sotoꞌ ogo none lo gele none. Idoꞌ me misubouꞌ ve Oꞌmoso gelekeleꞌ i-damaniꞌ mukiꞌ nete goloso melehida vi giꞌmizi gelekeleꞌ i-di nizaniꞌ nesi gele none.  
\v 20 Idoꞌ tiꞌ lo gele none: Oꞌmosoꞌmi gipele aza misubouko lemo ogave. Ogo gate do ngoloꞌ lo-lidineꞌ nenako Oꞌmoso gihile nene ningo gelaaꞌ nouneꞌ. Ee, Oꞌmoso gihile nesi bizo none. Gipele Izesuꞌ Kilisitokisi bizo none. Me ve nene Oꞌmoso gihile idoꞌ minevoꞌ minevoꞌ ogo minaaliꞌmi meleho neive.  
\v 21 Izipahaꞌne zuho mate, lingine avazaha oꞌmoso niteꞌ Oꞌmoso gihile minamaniꞌ nene gelekeleꞌ i-ngidikelizaze. Monovotidoꞌ gizebo lamineꞌ igi minilo.  
\p Moda ve.