\id 1CO  - Dano NT [aso] -Papua New Guinea 1989 (DBL -2014) 
\h 1 KOLIDI 
\toc1 Kolidi Ebekuꞌ Aleve Linge Izesuꞌ Zuho Minaniꞌ Neti Luhovo Niteꞌ Pauloꞌ Gize-Ngidineꞌ Naba 1 
\toc2 1 Kolidi 
\toc3 1 Kod 
\mt1 KOLIDI EBEKUꞌ ALEVE LINGE IZESUꞌ ZUHO MINANIꞌ NETI LUHUVO NITEꞌ PAULOꞌ GIZE-NGIDINEꞌ NABA 1  
\imt1 Pauloꞌ Gizineꞌ Luhuvo Niteꞌ Meꞌmi Monovo  
\ip Pauloꞌ nene Izesuꞌ zuho loloꞌ neivo Guvelesi veꞌmo tiꞌ lo lo-imineꞌ ve: Gaza nene vo heta Zuda ve minamaniꞌ atoꞌ ve engiꞌ nene nenikumuꞌ gamazi lamineꞌ nene lo-ngemeline lo gimiselelesuve. Neꞌmine lineꞌ nene Aposolo 26:15-18 neuꞌ ningelesane. Neꞌmine lavo mino alingeꞌ nene Pauloꞌ aza Zuda ve minamaveti misubo ato atoꞌ mukikuꞌ nene mone mone ogo Kilisitoꞌnimuꞌ lo-ngeme ngemeꞌ ineꞌ ve. Neꞌmine oꞌmo novo nGiliki aleveti misuboꞌninguꞌ nene vineꞌ ve. Aꞌmine misubouꞌ numuno ebeꞌ ma minineꞌ gulive Kolidi ve laaꞌ aniꞌ nene naba goloso minineꞌ ve. Aꞌminguꞌ nene Guvelesi vemuꞌ gamazi lamineꞌ nene lo soto sotoꞌ ogo lo-ngemelesa vineꞌ ve. Eveneꞌ aꞌminguꞌ mukiꞌ gidini minaniꞌ nene nGiliki ve minaniꞌ ve. Idoꞌ Loma vesi Zuda vesi nene ma minaniꞌ ve. Idoꞌ nGiliki alevesi Loma vesi nene soza oꞌmoso ato atoꞌ mukitoꞌ nene ngopoꞌni laaꞌ aniꞌ ve. Idoꞌ heneni nganeni di igaꞌ aniꞌ sipi nene ebeꞌ ato atoꞌ mukita vilisa igaꞌ vigaꞌ adoꞌ nene aꞌmine Kolidi numuno ebekuꞌ nesi vi minisa vaaꞌ aniꞌ ve. Aꞌmine ebekuꞌ nene initeꞌ ato atoꞌ vaiꞌ goloso igi mili minaaꞌ aniꞌ ve. Aꞌminguꞌ nene eveneꞌ vaiꞌ gidini monovo golosoloꞌ eꞌmeti minaaꞌ aniꞌ ve. Pauloꞌ nene aꞌminguꞌ kilisimasi hamokisi ikeꞌni sigisi neꞌminesi ivileꞌ ivosa mino gamazi lamineꞌ apize ngeme ngemeꞌ neivo Zuda ve lingesi idoꞌ Zuda ve minamaniꞌ heta atoꞌ ve vaiꞌ gidini neꞌminesi nene aꞌmidoꞌ gili eleꞌvoleꞌ igi Izesuꞌ zuho liliꞌ aniꞌ ve. Aꞌminemuꞌ nene Aposolo 18:1-17 neuꞌ nene gato gelezo. Nelotiꞌ alingeꞌ nene Pauloꞌ aza misubo gohi mauꞌ Eheso numuno ebekuꞌ nene vo minineꞌ ve. Aꞌmine Eheso numuno ebekuꞌ minineꞌ gameneuꞌ nene eveneꞌ malite igi aꞌmine Kolidi aleveti monoꞌ muliseꞌninguꞌ nene geni ma minekaꞌ minekaꞌ ineꞌ nene igi li-imaniꞌ ve. Aꞌmine geni nene ma neꞌmino neive: Eveneꞌ nene hoꞌli ato atoꞌ nivave. Idoꞌ ve maliꞌmo melehi elenahine dave. Idoꞌ Izesuꞌ zuho linge ma nete nene Izesuꞌ zuho linge nene ngeleꞌmize gonitoꞌ milii Izesuꞌ zuho minamaniꞌ zasila ngeleꞌmizi vaaꞌ nave. Idoꞌ Kolidi ebekuꞌ Izesuꞌ zuho minaniꞌ nete Pauloꞌni luhuvo niteꞌ huli-di gili guno ilisa longoꞌ i-daniꞌ ve. Idoꞌ longoꞌ i-daniꞌ nene nevoꞌmine initekumuꞌ nene longoꞌ i-daniꞌ ve: Izesuꞌ zuho nene veneꞌ daaꞌ idoꞌ veloꞌ vaaꞌ nene ha ilizahe. Idoꞌ soza oꞌmoso niteꞌ lehizi-ngidaniꞌ initekutiꞌ nene ha nalizahe. Idoꞌ Izesuꞌ zuho Oꞌmosoꞌmi Sikalahuliꞌmo lehize-ngidineꞌ amuzo ato atoꞌ nene nadiisa igi mili ilizave.  
\ip Neꞌmine li longoꞌ ikevosa Pauloꞌ aza nene mene luhuvo niteꞌ monoꞌ godoloutiꞌ neineꞌ adoꞌ Pauloꞌ Luhuvo Niteꞌ Kolidi Alevetine Ve Lo Luhuvo Gize-ngidineꞌ Naba 1 meve nene neive. Aꞌmine luhuvo niteꞌ nene Izesuꞌ zuho Kolidi ebekuꞌ nizanguꞌ initeꞌ vo ladeni vadeni ineꞌ nemukisi idoꞌ longoꞌ i-daniꞌ mamukisi nene gize-ngidineꞌ ve.  
\c 1  
\s1 Pauloꞌ Aza Izesuꞌ Zuho Kolidi Ebekuꞌ Minaniꞌ Nene Gekeꞌ Lo-ngedo Engikumuꞌ Oꞌmosola Isaaꞌ Neve Lo Opoꞌni Laaꞌ Ingumuꞌ Lo-ngimineꞌ  
\p
\v 1 Izesuꞌ Kilisitoꞌ aposolo loloꞌ iline lo Oꞌmosoꞌmo gala gilidoꞌ neleꞌmize molave Pauloꞌ naza nene leze zuho Sositeniꞌ nesi makaꞌ mino  
\v 2 Kolidi ebeta Oꞌmosoꞌmi evenele lengita luhuvo initeꞌ mene nogize lingimuve. Lingine Izesuꞌ Kilisitoda igi giꞌmizikevo Oꞌmosoꞌmo eiꞌ evenele zuho minilizave lo do kegese-lingidineꞌ. Idoꞌ do kegese-lingidineꞌ nene ebeꞌ mukita engiꞌ Guveꞌinesi vesi leliꞌ Guvetesi vesi minive Izesuꞌ Kilisitoꞌni opoꞌni laaꞌ nave mukiꞌ nesi nene laminekovoꞌ lisiheꞌ igi minilizave lo eiꞌ evenele do kegeso lengeleꞌmize molaniꞌ ve.  
\v 3 Ee, naza nene luhuvo initeꞌ mene lengita nogize lengemo Oꞌmoso metehidasi Guvetesi ve Izesuꞌ Kilisitoꞌ eitasi nene lengiꞌ nasahiliꞌ i-lingidikesivo lengiꞌ muludinguꞌ nene hongu minelive lo engita noluve.   
\s1 Engita Monoliꞌmi Amuzo Sotoꞌ Ilingumuꞌ Pauloꞌ Aza Oꞌmoso Opoꞌni Lineꞌ  
\p
\v 4-6 Naza Kilisitoꞌ gamaziꞌve lamineꞌ nene lo-lengemekuvo aꞌmine gamazi nene gilikevo lengita lutinguꞌ amuzo molosa minineꞌ ma neive. Neꞌmo nene lingine mo Izesuꞌ Kilisitoda igi giꞌmizikevo Oꞌmosoꞌmo nasahiliꞌ o-lengedo lutinguꞌ nene monovo danava laminekovoꞌ goꞌzo vaiꞌ lo-lengedave. Neꞌmo gele guno ogaꞌ nene lengita mo vaiꞌ lavo gamazi li sotoꞌ igaꞌ naniꞌ nene laminekutikovoꞌ laaꞌ nave. Ee, neꞌmino Oꞌmosoꞌmo lengiꞌ nasahiliꞌ o-lingidineꞌ nemuꞌ nene naza Oꞌmosola isaaꞌ neve lo gamene gamene opoꞌni laaꞌ nouve.  
\v 7 Idoꞌ Oꞌmosoꞌmo neꞌmino nasahiliꞌ o-lingidineꞌ nenako nemuꞌ nene Guvetesi ve Izesuꞌ Kilisitoꞌ ogo sotoꞌ neivo ningeloneꞌ gamenemuꞌ gizebo igi minangumuꞌ nene monovo danava lamineꞌ ato atoꞌ Oꞌmosoꞌmo eze evenele lehize-ledaaꞌ neingutiꞌ nene lingine monovo danava hamokisi ma viseꞌ isaꞌmave.  
\v 8 Oꞌmoso aza hize eleꞌ o-lengedeꞌmo vo neivo gamene naba aliteleseive. Neꞌmine ogavo Guvetesi ve Izesuꞌ Kilisitoꞌ alineꞌ gameneuꞌ nene okodidoꞌ gamazi nomivo laminekovoꞌ ha minilisave.  
\v 9 Oꞌmosoꞌmi gipele leliꞌ Guvetesi ve Izesuꞌ Kilisitoꞌ eikisi lutine hamoꞌ ogavo minilizave lo lengeleꞌmize molave eiꞌ nene gote izesaꞌmineꞌ ve. Idoꞌ eze gamazi lineꞌ nene vo haza amilineꞌ nenako nemuꞌ aꞌmine luvoniꞌ gamazi nene asiꞌve Oꞌmoso neꞌmo do sotoꞌ ogo do gihile izeleseive.   
\s1 Kolidi Aleve Ingine Monokumuꞌ Ve Li Hoꞌli Vi Eza Ema Vangumuꞌ Pauloꞌ Lineꞌ  
\p
\v 10 Agae, neze zuhokizo, Guvetesi ve Izesuꞌ Kilisitoꞌ eiꞌ velemuꞌ ogo gatine doo gamazi tiꞌ lo nolo-lingimuze. Gililo. Lingine gamazi ato atoꞌ li vi eza ema vamilo. Mukitoꞌ lingine gohi di bizii igi lutine di hamoꞌ igi hamoꞌ lutidokovoꞌ minilo.  
\v 11 Neze zuhokizo, naza mene gamazi noluvoniꞌ nene Koloveꞌ zuho linge malite lingine nene lutine aka ato atotoꞌ vavosa nene lolize hizi izi huki vi eza ema vaaꞌ nave li-nimikevosa nene noluve.  
\v 12 Neꞌminemuꞌ nene noluve: Lingine vi eza ema vi hamo hamoꞌ neꞌmine laaꞌ nave: Laza Pauloꞌni eꞌmetaaꞌ noune. Idoꞌ ma nete Apoloꞌni eꞌmetaaꞌ noune. Idoꞌ ma nete nene Petoloꞌni eꞌmetaaꞌ noune laaꞌ nave. Idoꞌ ma nete nene Kilisitoꞌni eꞌmetaaꞌ none laaꞌ nave.  
\v 13 Neꞌmine nene nanitekumuꞌ nilave. Kilisitoꞌ nene hoꞌlo ato atoꞌ vaiꞌ minamive. Pauloꞌ naza nene lengiꞌ do lunguꞌ izelesa lohotoꞌ zaloꞌ ma helamuve. Lingine noso hili-lingidaniꞌ nene neniꞌ Pauloꞌ muliseuꞌ nene ma imi hilamave.  
\v 14-15 Idoꞌ eveneꞌ ma nenikuꞌ imi hilikevo naza nene neniꞌ Pauloꞌ gulivelokovoꞌ noso holo-ledave li gilikelizave lo lingine noso hili-lingidangutiꞌ ve sitakovoꞌ Kilisipoꞌni ve Gaioꞌni ve engiꞌ nevoꞌ nene neniꞌ noso holo-ngedo gohi ma holo-lengedamuvoniꞌ ma nene lamineꞌ ve lo nogiluve.  
\v 16 Idoꞌ ma nene Setehanoꞌ ve eze zuhosi noso holo-ngiduvoniꞌ nenako nelotiꞌ nene noso ma holo-ngiduhe holo-ngedamuhe gelamuve.  
\v 17 Kilisitoꞌ aza nene eveneꞌ monoꞌ noso holo-ngedeline lo nimiselamive. Eiꞌ gamaziꞌve lamineꞌ nene lo-ngeme ngemeꞌ iline lo lo-nide neineꞌ ma neive. Nemuꞌ nene naza lengikutiꞌ mukiꞌ noso holo-lengedamuvoniꞌ nene lamineꞌ ve lo nogiluve. Idoꞌ naza gamazi lo sotoꞌ sotoꞌ ogo gamazi loloniꞌ nene Kilisitoꞌ lohotoꞌ zaloꞌ hilineꞌ gamaziꞌmi amuzo nene molo hitalonako eveneꞌ gamazi monovo gili miniꞌ miniꞌ igi gepeꞌ gamazivoꞌ laaꞌ navete laaꞌ naniꞌ neꞌmino lamo haza gili ngolosi gililizadokovoꞌ lolosuve.   
\s1 Oꞌmosoꞌmi Amuzoꞌvesi Idoꞌ Gala Lamineꞌ Gelaaꞌ Neineꞌ Nesi Kilisitoda Mo Neive Lo Pauloꞌ Lo-ngimineꞌ  
\p
\v 18 Kilisitoꞌ do luꞌ izelesa hilineꞌ neꞌmi gamazi mamuꞌ aka golosouꞌ nivaniꞌ eveneꞌ nete nene negi gamazi laniꞌ ne neive laaꞌ nave. Neꞌmine laaꞌ naniꞌza Oꞌmosoꞌmo do luꞌ izo do eita eita oꞌmo novineꞌ aleve leliꞌ nete nene aꞌmine gamaziuꞌ Oꞌmosoꞌmi amuzoꞌve sotoꞌ ogo neineꞌ nene ningo gele none.  
\v 19 Ee, idoꞌ Oꞌmosoꞌmo aꞌminemuꞌ lineꞌ gamazi monoꞌ godolouꞌ ma tiꞌ li gizi nizaniꞌ ma neive:  
\q1 Naza nene gamazi monovo gilaaꞌ navete gamazi gilaaꞌ naniꞌ nene  
\q1 do goloso o-ngedelesuve.  
\q1 Idoꞌ luꞌine gaꞌninguꞌ gamazi lamineꞌ minineꞌ nene lokuvo vo haza oloseive.   
\m
\v 20 Tiꞌ lo lineꞌ nemuꞌ gamazi monovo gilaaꞌ avemukisi idoꞌ initeꞌ mukikumuꞌ sukulu li osuꞌ lavemukisi idoꞌ gamazi li voleloꞌ meloꞌ igi initeꞌ monovo viseꞌ igaꞌ ave idise gameneuꞌ nizave nemukisi nadive lo gelelone. Me misubouꞌ minunive nene aꞌneꞌmine vete laniꞌ gamazimuꞌ gamazi gihile ve lo giluneꞌ gamazi nene Oꞌmosoꞌmo lavo haza gopo negi gamazi loloꞌ oganako nemuꞌ nene aꞌneꞌmine ve ingine nene mo haza ve loloꞌ ikeve lo gelelesune.  
\v 21 Ee, misubouꞌ ve nete Oꞌmosoꞌmi monovomuꞌ gele veveselone li viseꞌ aniꞌza aza Oꞌmosoꞌmo gala lamineꞌ gilidoꞌ do molo lavo engiꞌ gili vevesaaꞌine nene eze monovo ningilizadoꞌ lisiheꞌ amivo eze monovo nene mo ningamaniꞌ ve. Idoꞌ neꞌmine igi engiꞌ gamazi laminekutiꞌ nene eze monovo ningamanako nemuꞌ Oꞌmosoꞌmo eiꞌ luloloꞌ do molo aꞌmine negi gamazi ve laaꞌ naniꞌ gamazi nene nolo-ngimunivo ve ma ingine aꞌmine gamazi gili eleꞌvoleꞌ ave nene Oꞌmosoꞌmo do nguꞌ izaaꞌ neive.  
\v 22 Gili eleꞌvoleꞌ ave nene ha do nguꞌ izaaꞌ neiha ingine Zuda ve nete nene tiꞌ li laaꞌ aniꞌ ve: Oꞌmosolatiꞌ gamazi nene mo eitatiꞌ neive lo gele eleꞌvoleꞌ oloneꞌ nene atoliꞌmine suno ma sotoꞌ ogavo ningosavoꞌ nene gele eleꞌvoleꞌ olosune. Neꞌmine lisa haza minaaꞌ nave. Idoꞌ heta atoꞌ ve nGiliki aleve ingine nene initeꞌ ato atoliti gamazi gihileꞌvemuꞌ nene viseꞌ iꞌmi vi minaaꞌ naniꞌza  
\v 23 laza nene Kilisitoꞌ do luꞌ izelesa lohotoꞌ zaloꞌ hilineꞌ neꞌmi monovoꞌvevoꞌ nene lo sotoꞌ ogo lo-ngeme ngemeꞌ ogaꞌ noune. Neꞌmino nonivo Zuda ve nete lohotoꞌ za nene initeꞌ goloso mamuꞌ nilave li olovoꞌ goloso igaꞌ nave. Idoꞌ heta atoꞌ ve nete aꞌmine gamazi nene gamazi gihile nevoba negi gamazi ve lii gili eleꞌvoleꞌ isaꞌmave.  
\v 24 Ingine nene neꞌmine igaꞌ naniꞌza laza Zuda vesi nGiliki vesi Oꞌmosoꞌmo elese molo limidoꞌ eꞌmetunive nene Oꞌmosoꞌmo gala lamineꞌ gelaaꞌ neineꞌ nesi amuzoꞌve nesi nene Kilisitoda neineꞌ nene mo gele none.  
\v 25 Ee, Oꞌmosoꞌmo ogaꞌ neineꞌ initeꞌ nene negi initeꞌ ogaꞌ neive laaꞌ naniꞌ neꞌmo nene evenelite gaꞌine lamineꞌ gili igaꞌ naniꞌ initeꞌ nene ivileꞌ ogosa initeꞌ gihile neive. Idoꞌ Oꞌmosoꞌmo ogaꞌ neineꞌ initeꞌ nene amuzoꞌvesi nomineꞌ initeꞌ ogaꞌ neive laaꞌ naniꞌ neꞌmo nene evenelite amuzo mili igaꞌ naniꞌ initeꞌ mukiꞌ nene ngivileꞌ ogo amuzoꞌvesi initeꞌ neive. Neineꞌ nenako nemuꞌ nene Oꞌmosoꞌmo gala lamineꞌ gelaaꞌ neineꞌ nesi idoꞌ amuzoꞌvesi nene Kilisitoda mo neineꞌ nene gele none. Idoꞌ me misubouꞌ alevelite gamazi lamineꞌ ve li gilaaꞌ naniꞌ gamazi nemuꞌ nene Oꞌmosoꞌmo gilivo haza niteꞌ loloꞌ ogaꞌ neineꞌ nesi nene mo gele none.   
\p
\v 26 Neze zuhokizo, lingine nene Oꞌmosoꞌmo eiꞌ ve lo elese molo lingimive ma nene nizave. Idoꞌ naniꞌmine aleve nizahe nemuꞌ gililizaniꞌ nene gamazi neuko luvoniꞌ mautiꞌ nene gamazi gihile neive li gili ngoloꞌ li gililisave. Idoꞌ lengiꞌ monovotine nene neꞌmino neingumuꞌ noluve: Me misubouko eveneꞌ mukiꞌ nete lengikumuꞌ nene gilavo lengikuꞌ nene gatinguꞌ gamazi lamineꞌ minive nene mukiꞌ ma minamave li gilaaꞌ naniꞌza lengiꞌ aꞌneꞌmine ve nene Oꞌmosoꞌmo eiꞌ ve lo elese molo-lengedo lengeleꞌmize molaniꞌ ve. Idoꞌ eveneꞌ amuzo malehe nene lengikuꞌ mukiꞌ nizamavo idoꞌ eveneꞌ ma izeꞌninge meꞌninge eveneꞌ naba nizavo sotoꞌ adiꞌmo guveꞌinesi ve gili nizaniꞌ aleve nene lengikuꞌ mukiꞌ ma nizamaniꞌza lengiꞌ neꞌmine aleve nene Oꞌmosoꞌmo eiꞌ ve lo elese molo-lengedo lengeleꞌmize molaniꞌ ve.  
\v 27 Neꞌmino leleꞌmize molaniꞌ nene eveneꞌ naba nevoꞌminevoꞌ leleꞌmize molaniꞌ nevoba Oꞌmosoꞌmo me misubouꞌ aleve malite eveneꞌ mamuꞌ negi nizave li li-ngidaaꞌ nave ma ngeleꞌmize molokuvo ingine eveneꞌ gaꞌine gili lamineꞌ igaꞌ ave di limi-ngidikevo ngovozo hili minilizave lo aꞌneꞌmine ve do kegeso ngeleꞌmize molaniꞌ ve. Idoꞌ me misubouꞌ alevelite eveneꞌ mamuꞌ gilizevo nizave li li-ngidaaꞌ nave ma ngeleꞌmize molokuvo ingine eveneꞌ amuzo malehe nizave di limi-ngidikevo ngovozo hili minilizave lo Oꞌmosoꞌmo aꞌneꞌmine ve do kegeso ngeleꞌmize molaniꞌ ve.  
\v 28 Ee, misubouꞌ aleveti veꞌnidoꞌ nene haza ve limi minii haza niteꞌ gehepeve gili minave nene Oꞌmosoꞌmo do kegeso ngeleꞌmize molavo aꞌneꞌmine ve nete eveneꞌ none laaꞌ ave nene ngivileꞌ igi minikevo haza niteꞌ loloꞌ ilisave.  
\v 29 Idoꞌ Oꞌmosoꞌmo neꞌmine ogaꞌ neineꞌ nene eveneꞌ malite eiꞌ veleloꞌ oti mini engiꞌ okoꞌine di hozi likelizave losa engiꞌ akaꞌine nene hize tile-ngedosa neꞌmine ogaꞌ neive.  
\v 30 Neꞌmine ogaꞌ neineꞌza lengiꞌ nene Oꞌmoso neꞌmo Izesuꞌ Kilisitoda do imineꞌ molo-lengedave. Neꞌmine ogo aꞌmine Kilisitoꞌni nene gateuꞌ gamazi lamineꞌ minineꞌ neꞌmi izelehine loloꞌ o-dave. Idoꞌ loloꞌ o-davo asiꞌve neꞌmo nene lelitoꞌ medelo minevoꞌ alevoꞌve hulo helo Oꞌmosoꞌmi veleloꞌ eveneꞌ lisiheꞌ laminekovoꞌ minilizave lo goloso initeꞌ apase-ledoo Oꞌmosoꞌmi evenele loloꞌ o-ledo aza golosoutiꞌ mudise leleꞌmize lamineꞌ oloseive.  
\v 31 Idoꞌ Oꞌmosoꞌmo neꞌmine neineꞌ nene monoꞌ godolouꞌ gamazi ma tiꞌ li gizaniꞌ maloꞌ nene eveneꞌ mukiꞌ eꞌmetilizave losa neꞌmine ineꞌ ve: Ve ma aza eiꞌ okoꞌnomuꞌ olize noizelineꞌ nevo alamo Guvelesi vemukovoꞌ olize izelive.   
\c 2  
\s1 Pauloꞌ Aza Kilisitoꞌni Lohotoꞌ Zaloꞌ Bilaniꞌ Monovo Lo-ngimineꞌ  
\p
\v 1 Neze zuhokizo, naza lengita ogo Oꞌmosoꞌmi gamazi sunoꞌ minineꞌ lo-lingimuvoniꞌ nene aꞌmine Oꞌmosoꞌmo okodine di dizamilo lineꞌ gamaziloꞌ eꞌmeto eveneꞌ dizi minavete laaꞌ adiꞌmino lamo gamazi monovo gilaaꞌ avetevoꞌ gililizadoꞌ nene lo-lengemamuvoniꞌ ve.  
\v 2 Idoꞌ neꞌmine uvoniꞌ nene nanitekumuꞌ ve. Naza lengita uvoniꞌ nene gamazi atokumuꞌ mo gaꞌne gelamolove lo asi Izesuꞌ Kilisitoꞌnimukisi idoꞌ lohotoꞌ zaloꞌ hilineꞌ monovomukisivoꞌ nene lo-lengemelove losa uvoniꞌ ma neive.  
\v 3 Idoꞌ naza lengikisi minuvoniꞌ gameneuꞌ nene amuzoꞌnesi nomineꞌ mino nehelele goloso izivo luvoluvo izosa minuvoniꞌ ve.  
\v 4-5 Idoꞌ monoꞌ gamazi lo-lengemelesa uvoniꞌ nene lingine gili eleꞌvoleꞌ ili ma Oꞌmosoꞌmi amuzo nene aꞌmine gamazi luvonguꞌ neive li gili eleꞌvoleꞌ ilizanako otohato gamazi laaꞌ avete laaꞌ adiꞌmino noluvo lingine mene otohato gamazi nolize. Aꞌmidoꞌ gele eleꞌvoleꞌ ukeꞌzo li likelizave lo neniꞌ gamazi lo-lengemaaꞌ uvoniꞌ nene lutine gatinguꞌ gamazi ma do gosohoꞌ o-lengedelone li gili mini otohato gamazi laaꞌ avete laaꞌ naniꞌ neꞌmino lutinguꞌ hizo monoꞌ lo-lengemamuve. Monoꞌ gamazi lo-lingimuvoniꞌ nene Oꞌmosoꞌmi Sikalahuliꞌmo hize eleꞌ o-nidivosa neꞌmi amuzo nene do sotoꞌ ogo lengelebizuvoniꞌ ve.   
\s1 Oꞌmosoꞌmi Gamazi Sunoꞌ Minineꞌ Nene Sikalahuꞌveliꞌmo Lo Sotoꞌ Ogaꞌ Neive Lo Pauloꞌ Lo-ngimineꞌ  
\p
\v 6 Lamineꞌ laza eveneꞌ ma monokuꞌ amuzo mili lodive igi nizavo monoꞌ lo-ngemeloneꞌ gameneuꞌ nene otohato gamazisi ha lo-ngemeloba me misubouꞌ alevesi guveꞌinesi vesi engiꞌ amuzoꞌine nene mo osuꞌ lolosa neineꞌ nenako nemuꞌ ingine otohato gamazi laaꞌ aniꞌ neꞌmino lamo atoliꞌmine lolosune.  
\v 7 Oꞌmosolatiꞌ otohato gamazi sunoꞌ minineꞌ nene lolosune. Aꞌmine gamazi nene Oꞌmosoꞌmo leliꞌ atoliꞌmine ogo do lamineꞌ o-ledelesa olihe okulumoꞌ misubo do sotoꞌ amo minidatiꞌ salani molo-ledavo hito minineꞌ ve.  
\v 8 Idoꞌ me misubouꞌ aleve gizebo i-ngidaaꞌ ave guveꞌinesi ve hamolitesi aꞌmine sunoꞌ gamazi nene ma gilamaniꞌ ve. Idoꞌ ma gili minadiniko Guvelesi ve atoliꞌmine ogo dizo minive nene lohotoꞌ zaloꞌ nene ma bili hilamadine.  
\v 9-10 Ee, gomuꞌ aꞌmine otohato gamazi nene sunoꞌ minineꞌza idise leliꞌ nene mo gelekune. Oꞌmosoꞌmi Sikalahuꞌ neꞌmo initeꞌ mukiꞌ nene do sotoꞌ ogaꞌ neive. Idoꞌ Oꞌmosoꞌmi monovo danava hito neineꞌ nesi nene do sotoꞌ ogo ningaaꞌ neineꞌ nenako Oꞌmosoꞌmo aꞌmine Sikalahuꞌve nene imiselavo aꞌmine neꞌmo nene Oꞌmoso lute emaaꞌ uneꞌ aleve leliꞌ do vaꞌvaꞌ o-lidineꞌ initeꞌ lamineꞌ nene idise lelebizave. Aꞌmine initeꞌ lamineꞌ do vaꞌvaꞌ o-lidingumuꞌ nene monoꞌ godolouꞌ tiꞌ li gizi nizaniꞌ ma neive:  
\q1 Eveneꞌ hamolitesi veꞌinedunuꞌ ningamaniꞌ initekisi  
\q1 idoꞌ li sotoꞌ amavo aꞌminemuꞌ ma gilamaniꞌ initekisi  
\q1 idoꞌ gaꞌine gili hehe laaꞌ anguꞌ ogo sotoꞌ amivo  
\q1 olihe gilamaniꞌ initekisi nene Oꞌmosoꞌmo leliꞌ lute emaaꞌ uneꞌ aleve nene do vaꞌvaꞌ o-lidineꞌ ma neive.  
\m Neꞌmine li gizi nizaniꞌ ma neineꞌza idise nene Sikalahuliꞌmo aꞌmine gamazi nene lelebizavosa lo sotoꞌ ogaꞌ noune.  
\v 11 Neꞌmine ogaꞌ nouneꞌza eveneꞌ lelikutiꞌ ve maliꞌmo ve maliꞌmi monovolo nene mo ningo gelamoloseive. Eveneꞌ eiꞌ Sikalahuꞌve neꞌmovoꞌ nene eveneꞌ neꞌmi lulouꞌ mino monovoloꞌve nene ningo gele mineleseive. Aꞌmineꞌmine ogo ve maliꞌmosi Oꞌmosoꞌmi monovo danava nene ningamive. Asiꞌve Oꞌmosoꞌmi Sikalahuꞌ neꞌmovoꞌ nene Oꞌmosoꞌmi monovo danavaꞌve nene ningaaꞌ neive.  
\v 12 Idoꞌ Kilisitoꞌ evenele leze Sikalahute nene me misubouꞌ sotoꞌ ineꞌ nomive. Laza Oꞌmosoꞌmo initeꞌ ato atoꞌ nolehize-lidineꞌ nene aꞌminemuꞌ ningo geleloningumuꞌ ve losa Oꞌmosolatiꞌ do ogo do tiꞌ uneꞌ ne neive.  
\v 13 Idoꞌ aposolo laza aꞌminemuꞌ lo sotoꞌ ogo noluneꞌ nene eveneꞌ angiseꞌinemuꞌ laza nene gate gele otohato ogaꞌ nounive nene none laaꞌ navete li-limaaꞌ naniꞌ gamaziloꞌ nene eꞌmetamune. Sikalahuliꞌmo lo-limidokovoꞌ nene eꞌmetosa apize lengemaaꞌ noune. Idoꞌ Oꞌmosoꞌmi Sikalahuꞌ engita minineꞌ eveneꞌ vaiꞌ nene Sikalahuliꞌmo lidoꞌ eꞌmeto gamazi nene lo ngoloꞌ lo lo-ngemaaꞌ noune.  
\v 14 Idoꞌ Oꞌmosoꞌmi Sikalahuliꞌmo lelebizaaꞌ neineꞌ gamaziꞌmi monovo nene aꞌmine Sikalahuꞌ neꞌmo lute gateꞌve do lapa nomineꞌ o-ledavo izeꞌ molo gelelonidoꞌ ogaꞌ neineꞌ nenako eveneꞌ ma Oꞌmosoꞌmi Sikalahuꞌ nomivo haza minaaꞌ nave nete aꞌmine gamaziꞌmi monovo nene gililizadoꞌ minamivo nemuꞌ nene negi gamazi ve li gili disaꞌmave.  
\v 15 Oꞌmosoꞌmi Sikalahuꞌ lelita minineꞌ aleve nene laza initeꞌ mukikumuꞌ nene leliꞌ lute gatedunuꞌ nene ha izeꞌ molo gelelesune. Neꞌmine olosuneꞌza leliꞌ lute gate nene eveneꞌ malite ngeli izeꞌ mili lamilisave.  
\v 16 Ee, monoꞌ godolo neꞌmo aꞌminemuꞌ tiꞌ lo lo neineꞌ ma neive:  
\q1 Guvelesi ve gilidiꞌmino eveneꞌ zaho gele nolive.  
\q1 Kekeꞌ hamolitesi mo gilamave.  
\q1 Gilamanako aza ma gelamineꞌ initekumuꞌ nene  
\q1 eveneꞌ zaho apize emelive.  
\m Tiꞌ lo lo neineꞌza Oꞌmosoꞌmi Sikalahuꞌ neꞌmo nene mo lelebizavo Kilisitoꞌ lulo galauꞌ gilidiꞌmino nene leliꞌ mo gele none. Idoꞌ gele noneꞌ nemuꞌ nene leliꞌ lute gate nene eveneꞌ malite ngeli izeꞌ mili lamilisave.   
\c 3  
\s1 Oꞌmososi Makaꞌ Hamoꞌ Gono Nodune Lo Pauloꞌ Lineꞌ  
\p
\v 1 Idoꞌ neze zuhokizo, naza lengita ogo minuvoniꞌ gameneuꞌ nene lingine monoꞌ gilamaniꞌ haza vete igaꞌ adiꞌmine igii igi mili minii Kilisitoꞌ monovo danavaꞌve neꞌmine nene olihe igi mili ami izipe ngomo neꞌmine minaniꞌ nenako nemuꞌ naza eveneꞌ ma Oꞌmosoꞌmi Sikalahuliꞌmo lo-ngimidoꞌ igi mili minavo neꞌmo gaꞌine lapa nomineꞌ minave engiꞌ monoꞌ lo-ngemaaꞌ uvodiꞌmine ogo lingine ma lo-lengemelodoꞌ amivo  
\v 2 amuzo malehe gamazi ma lo-lengemamuvoniꞌ ma ne neive. Haza lapa nomineꞌ izipe amine naniꞌ maꞌmino lo-lingimuvoniꞌ ma neive. Aꞌmine gameneuꞌ nene ozohote naaꞌ aniꞌ nosoꞌ nitetoꞌ nene lisiheꞌ amaniꞌ nenako idisesi nene olihe lisiheꞌ amave.  
\v 3 Lingine nene monoꞌ gilamaveti monovoꞌine neꞌmidoꞌ nene ha eꞌmetivoꞌ vi nizave. Lingine lengikuꞌ nene ge nivileꞌ ogani ne givileꞌ ogani li lukehe igi lolize hizaaꞌ naangumuꞌ nene noluve. Idoꞌ neꞌmine igaꞌ naniꞌ nene monoꞌ gilamaveti monovoꞌnidoꞌ gehepeve nieꞌmeti engiꞌ neꞌmine nizaniꞌ ma neive.  
\v 4 Ee, lolize hizi malite Pauloꞌni noeꞌmetune nilavo malite Apoloꞌni noeꞌmetune li laaꞌ naniꞌ nene monoꞌ gilamaveti monovoꞌnidoꞌ nene nieꞌmetave.  
\v 5 Lingine leliꞌ nene hizi hoꞌli-lidi Apoloꞌ nene eveneꞌ naba ve idoꞌ Pauloꞌ nene eveneꞌ naba ve li nanimuꞌ laaꞌ nave. Neꞌmine mo lamilo. Laza nene haza gonoloꞌ ve mino Guvelesi veꞌmo gonote limidoꞌ limidoꞌ nene gono nodusivo aꞌmine gonotelotiꞌ gihileꞌve nene lingine Kilisitoꞌnimuꞌ gili eleꞌvoleꞌ aniꞌ nene nizave.  
\v 6 Idoꞌ naza nene ve ma mine gosohoꞌ zuhoꞌ ive maꞌmino mino Oꞌmosoꞌmi gamazi nene ganaꞌ lo-lingimuvoniꞌ ma neive. Idoꞌ Apoloꞌ nene mine gizebo ve mino mine naba ilive lo noso ohizo lepe lepe ve neꞌmino mino neniꞌ gonoloꞌ imineꞌ molo Oꞌmosoꞌmi gamazi masi nene ogo lo-lingimineꞌ ma neive. Laza nene gono daaꞌnivoꞌ dokusivo Oꞌmoso asiꞌve neꞌmo gonote nene do gihile ize-lidineꞌ ma neive.   
\p
\v 7 Ve ma monokuꞌ mine zuhoꞌ ogaꞌ ive nesi idoꞌ mine gizebo ve neꞌmine nesi nene haza initeꞌ ve. Oꞌmoso eiꞌ hamoꞌ gihile do sotoꞌ ogaꞌ neineꞌ neevoꞌ nene initeꞌ naba goloso neive.  
\v 8 Mine zuhoꞌ okuvosa mine gizebo ogo noso ohizo lepe lepe ogaꞌ neive nesi nene hamoliꞌmine ogo lisihetoꞌ nosive. Nemuꞌ nene gono dusineꞌ votigileloꞌ votigileloꞌ laza hamo hamoꞌ menite dalosusive.  
\v 9 Laza nene Oꞌmososi makaꞌ hamoꞌ gono nodunivo lingine nene Oꞌmosoꞌmi miꞌve neꞌminisa nene nizave. Idoꞌ gepeꞌ gamazi ma atoꞌ nene Oꞌmosoꞌmo numuno do hizineꞌ neꞌminisa ne nizave.   
\p
\v 10 Oꞌmosoꞌmo aꞌmine numuno nene do hizelesa gala gilineꞌ nemuꞌ neniꞌ nene neleꞌmize lamineꞌ o-nido aꞌmine numuno gizelongumuꞌ ve lo numuno lamineꞌ gizaaꞌ ave neꞌmine loloꞌ o-nidavo nemuꞌ nene aꞌmine numuno gizaaꞌ ave nete numuno gizaakumuꞌ gaꞌine lamineꞌ gilaaꞌ naniꞌ neꞌmidoꞌ eꞌmeto simeni loloꞌ ogo numuno do hizaaꞌ ebeꞌ amuzo malehe lamineꞌ do lisiheꞌ ogo loloꞌ okuve. Neꞌmine okuvo eveneꞌ ma ingine nene aꞌmidoꞌ numuno nigizave. Nigizanako ve ma aza aꞌmine simeni loloꞌ uvodoꞌ nene numuno gizelove loo ma do goloso ogalive. Mo ninge guno ogosa gizelive.  
\v 11 Numuno do oto gizaaꞌ simeni lamineꞌ nene ngeli atoꞌ kekeꞌ mo loloꞌ amilisave. Numuno do oto gizaaꞌ simeni lamineꞌ nene mo neize. Aꞌmidokovoꞌ nene numuno di oti gizilizave. Naza nene Oꞌmosoꞌmi numuno gizo do otaaꞌ simeni nene Izesuꞌ Kilisitoꞌ eiꞌ hamoꞌ nene neive losa noluve.  
\v 12-13 Aꞌmine simeniloꞌ Oꞌmosoꞌmi numuno nigizi monoꞌ eze evenele li-ngimaaꞌ nave ingine nene gono lamineꞌ daaꞌ nahe apa niteꞌ igaꞌ nave. Neꞌmi monovo nene mo sotoꞌ oloseinako nemuꞌ monoꞌ li-ngimilizaniꞌ nene gamazi gihilevoꞌ li-ngimilizave. Ladani igi li-ngimikelizave. Numuno nene olokuꞌ lamilineꞌ initeꞌ minevoꞌ minevoꞌ initeꞌ lamineꞌ ngoli moni idoꞌ siluvaꞌ geheni idoꞌ geheni lamineꞌ nevoꞌmine initedunuꞌ gizilizahe idoꞌ olokuꞌ lilineꞌ initeꞌ minevoꞌ minevoꞌ amilineꞌ initeꞌ za neꞌmine idoꞌ meꞌnihe idoꞌ angaba nevoꞌmine initedunuꞌ gizilizahe neꞌmi monovo nene gamene nabaloꞌ Oꞌmosoꞌmo do sotoꞌ oloseinako ha sotoꞌ oloseive. Gonoloꞌ ve hamo hamoliti gonoꞌineꞌmi monovo nene do sotoꞌ olosa aꞌmine numuno di huli gizada gizada nene viteꞌ okaꞌ okaꞌ ogavo oloꞌ neꞌmo loꞌvoto neꞌmi monovo do sotoꞌ oloseive.  
\v 14 Neꞌmine ogavo numuno lingela lamilineꞌ nene aꞌmida gono di numuno gizave gizave nene gonoꞌine lamineꞌ dadoꞌ meni dalisave.  
\v 15 Idoꞌ numuno lingela lo osuꞌ lilineꞌ nene aꞌmidoꞌ gono dave dave nene meni ngemamivo hazavoꞌ minilisave. Ee, engiꞌ nene Oꞌmosoꞌmo do nguꞌ izeleseiha eveneꞌ ma nene initeꞌ mataꞌine olokuꞌ lavo initeꞌine nomineꞌ neꞌmine mini hazavoꞌ minilisave. Ee, Oꞌmosoꞌmo eiꞌ gonoꞌve dunidoꞌ dunidoꞌ nene gono lamineꞌ dahe damahe lo izeꞌ molo-ledeleseinako gono goloso do noloneꞌ nene aꞌmidoꞌ meni lamineꞌ lemamoloseive.   
\p
\v 16 Lingine mukiꞌ nene do nubuho ogo Oꞌmosoꞌmo neniꞌ kekeize numuꞌne ve lavo eiꞌ Sikalahuꞌve nene lengikuꞌ mino molo neive ma nene nizave. Lingine aꞌminemuꞌ nene gilamaniꞌ nevoba mo gili nizaniꞌ ma neive.  
\v 17 Oꞌmosoꞌmi numuno nene lengiꞌ nene nizave. Idoꞌ aꞌmine nene kekeize numuno nenako ve malite di goloso ilizaniꞌ nene Oꞌmosoꞌmo do goloso o-ngedeleseive.   
\p
\v 18-19 Idoꞌ me misubouꞌ aleve nete lengikumuꞌ gilavo otohato ve minaniꞌ nolineꞌ nene Oꞌmosoꞌmo lengikumuꞌ gilivo lingine nene otohato ve nizave lo gele noloseive li gili lutine golo izamilo. Lengitatiꞌ eveneꞌ malite laza nene me misubouꞌ gamazi otohato o minineꞌ nene gele vevesunive otohato ve none li gili nilizaniꞌ nene Oꞌmosoꞌmo gilivo me misubouꞌ alevete otohato gamazi ve li gilaaꞌ naniꞌ nene negi gamazi ve lo gelaaꞌ neineꞌ nenako nemuꞌ nene otohato ve gihile loloꞌ ili ma nene tiꞌ ogo monilize. Me misubouꞌ aleveti veꞌnidoꞌ nene negi neꞌmine loloꞌ igi minilo. Idoꞌ misubouꞌ alevete otohato gamazi ve li gilaaꞌ naniꞌ nene Oꞌmosoꞌmo gilivo negi gamazi ve lo gelaaꞌ neingumuꞌ nene monoꞌ godolouꞌ tiꞌ li gizi nizaniꞌ ma neive:  
\q1 Otohato ve gaꞌine gili nge li mini eveneꞌ goꞌine izaaꞌ nevoꞌmine navo  
\q1 aza do sotoꞌ o-ngedo otohato gaꞌine gilaniꞌ nene do gopo o-ngedaaꞌ neive.   
\m
\v 20 Idoꞌ gamazi gohi ma tiꞌ li gizi nizave:  
\q1 Guvelesi ve aza otohato gaꞌine gilaaꞌ avete gilaniꞌ gaꞌine nene  
\q1 mo gele neive.  
\q1 Neꞌmine ogo gaꞌine gilaniꞌ nene haza niteꞌ ve lo gelaaꞌ neive.   
\m
\v 21 Nemuꞌ nene lingine hoꞌli ato atoꞌ mini monoꞌ lo-lengemaaꞌ unive haza eveneꞌ noneꞌ leliꞌ hamo hamokumuꞌ nene monoꞌ lo-lemaaꞌ ive naba nene eꞌmetaaꞌ nouneꞌ nenako eveneꞌ linge lengiꞌ nene lingivileꞌ ogosa none li lingine mulise ato atoꞌ mili mini okodine di dizaaꞌ naniꞌ nene mo hulilo.  
\v 22 Initeꞌ mukiꞌ nene mo lengiꞌ initetine neineꞌ nenako eveneꞌ leliꞌ hamo hamokumuꞌ nene eveneꞌ nabate ve li okodine di dizaaꞌ naniꞌ nene nanitekumuꞌ neꞌmine igaꞌ nave. Ee, adoꞌ neniꞌ Pauloꞌ idoꞌ Apoloꞌ ve Petoloꞌ ve idoꞌ misubouꞌ initeꞌ mataꞌ mukiꞌ nizaniꞌ nesi idoꞌ vetesi minevoꞌ alevoꞌ ogaꞌ nesi idoꞌ helaaꞌ nesi idoꞌ idise sotoꞌ neineꞌ initeꞌ nesi idoꞌ alingeꞌ sotoꞌ ilineꞌ initeꞌ nesi nene mo lengiꞌ initekovoꞌ ve.  
\v 23 Ne neineꞌza lingine nene Kilisitoꞌni nene nizave. Idoꞌ Kilisitoꞌ nene Oꞌmosoꞌmine ve. Nemuꞌ nene eveneꞌ haza Oꞌmosoꞌmi gonoloꞌ aleve lelikumuꞌ nene okodine di dizamilo.   
\c 4  
\s1 Pauloꞌ Aposololite Gono Daniꞌ Neꞌmi Monovomuꞌ Lineꞌ  
\p
\v 1 Lingine lelikumuꞌ nene Kilisitoꞌ gonoloꞌ ve mini Oꞌmosoꞌmi gamazi sunoꞌ minidoꞌ gizebo igi li-ngimi ngimiꞌ igaꞌ ave ma nene nizave lisa gili minilo.  
\v 2 Idoꞌ gonoloꞌ ve ngeleꞌmize milavemuꞌ nene ngeleꞌmize milavete tiꞌ li gilaaꞌ nave: Gote izami lunidokovoꞌ eꞌmeti gono di minilizaniꞌ o neive. Neꞌmine li gilaaꞌ naniꞌ nenako nemuꞌ nene Guvelesi veꞌmo eze gonoloꞌ gizebo ve leleꞌmize molaniꞌ nenako lelikumuꞌ nene neꞌmine lo gele noloseive.  
\v 3 Neꞌmine lo gelo neniꞌ gonoꞌve daaꞌ nouvoniꞌ monovo nene lamineꞌ nehe goloso nehe lo ningeꞌmo vo minelineꞌ o neive. Neꞌmine ilineꞌ nenako lengitatipe evenetatipe goniꞌne ma sotoꞌ ogavo monovoꞌnemuꞌ izeꞌ mili goniꞌ ma i-nidilizaniꞌ nene initeꞌ naba neive lo gelamolosuve.  
\v 4 Naza nene Oꞌmosoꞌmi gono daaꞌ nouvonguꞌ nene do goloso ogaꞌ uvoniꞌ monovoꞌne nene ma nomive lo gele nouvoniꞌza neꞌmine lo gaꞌne giluvongutiꞌ nene nenikumuꞌ Oꞌmosoꞌmo giluvonguꞌ gele nolineꞌ nene laza ngelo sotoꞌ ivo ningamolosunako nemuꞌ nene gamaziꞌne nomineꞌ nouve lo lamolosuve. Idoꞌ nenikisi nehe eveneꞌ gohi masi nehe neze monovoꞌnemuꞌ izeꞌ molo losoꞌ nene vo damoloseive. Guvelesi ve eiꞌ hamoꞌ neꞌmo nene neze monovoꞌnemuꞌ izeꞌ molo lilive ne neive.  
\v 5 Nemuꞌ nene Guvelesi ve alineꞌ gamene olihe amidoꞌ lingine nene liteꞌ li eveneꞌ monovotemuꞌ izeꞌ mili gamazi laaꞌ naniꞌ nene huli Guvelesi ve alingumuꞌ nene gizebo ilo. Aza nene ogo initeꞌ liꞌnimusouꞌ minaniꞌ nene do sotoꞌ molo eveneꞌ vaiꞌ luteuꞌ nene nadive lo gelaaꞌ ube neꞌmine lemeni damenite nene do sotoꞌ ogavo ningelesune. Neꞌmine ogo luteuꞌ nene nadive lo gelo idoꞌ nani lemeni dameni molo monaaꞌ ube aꞌmidoꞌ aꞌmidoꞌ Oꞌmosoꞌmo do naba o-ledo lopoꞌni lilidoꞌ nolineꞌ nene lopoꞌni loloseive.   
\p
\v 6 Neze zuhokizo, gamazi mukiꞌ mene monoꞌ gono daaꞌ usive nenitasi Apolodasi lo molo noluvoniꞌ nene aꞌmingutiꞌ monoꞌ godolouꞌ gizi nizaniꞌ neineꞌ gamazi avutoꞌ amaaꞌ monovomuꞌ nene viseꞌ igi gili dalizangisi eveneꞌ linge ma di naba i-ngidi linge ma divi lediviꞌ i-ngidi lingine monoꞌ gono daaꞌ aveutiꞌ dizo minive nene eꞌmetaaꞌ noune li okodine di dizisa gavele ve gehesami minilizave losa monokuꞌ hize eleꞌ o-lengedelesa noluve.  
\v 7 Eveneꞌ mukiꞌ lengikumuꞌ gilavo dize nonive ne none li gilaaꞌ nahe. Oꞌove. Lingine nene dizi nizave ne minamave. Lengita Oꞌmosoꞌmo lengemamineꞌ initeꞌ nene naniteꞌ neve. Ma nomive. Oꞌmosoꞌmo initeꞌ mataꞌ nene lengeme osuꞌ lo neineꞌ nenako lingine gilavo Oꞌmosoꞌmo initeꞌ mataꞌ lengemamineꞌ gelavo leliꞌ do sotoꞌ okune li okodine nanimuꞌ di hozi laaꞌ nave.  
\v 8 Lingine gilaniꞌ lutinguꞌ lutineꞌmi nosoꞌ niteꞌ nene vaiꞌ lave lisa gili nizahe. Eꞌe, mo vaiꞌ lamive. Idoꞌ lingine gilaniꞌ monoliꞌmi heneni nene lengita mo vaiꞌ lavo none lisa gili nizahe. Eꞌe, monoliꞌmi heneni nene lengita vaiꞌ lavo ma minamave. Idoꞌ laza nene lengikisi minamunivo monokuꞌ guvetinesi ve mo liliꞌ ikeniꞌ neive. Eꞌe, guvetinesi ve ma liliꞌ amaha ma liliꞌ adiniko lengikisi lelikisi nene makaꞌ guvetesi ve naba minunidine. Ne mo ede vidineꞌ ha liliꞌ ilizanakoo.  
\v 9 Loma ve monoꞌ gilamavete souꞌ di sotoꞌ adoꞌ eveneꞌ mukiliti veꞌnidoꞌ initeꞌ ato atoꞌ mukiꞌ di sotoꞌ igisa alingeꞌ nene eveneꞌ niningavo ngibili hililizave li eveneꞌ goloso ma di sotoꞌ igaꞌ aniꞌ nee maꞌmino naza leliꞌ aposolomuꞌ nene giluvoniꞌ Oꞌmosoꞌmo lelikumuꞌ aꞌmine ngibili hililizave neꞌmine minikevo angelolesi evenekisi mukitoꞌ nene ningi minilisave lo leliꞌ do alingeꞌ molo-ledo do sotoꞌ o-lidineꞌ gelavo haza initeꞌ loloꞌ okune losa gele nouve.  
\v 10 Laza nene Kilisitoꞌni eꞌmetuningumuꞌ ve losa negi ve neꞌmino noneꞌza lengiꞌ nene Kilisitoda imi hili lengikumuꞌ nene laza monokuꞌ otohato ve none li gilaaꞌ nave. Idoꞌ laza nene amuzo molamuneꞌza lingine lengikumuꞌ nene amuzo malehe none laaꞌ nave. Lingine nene evenelite lengikumuꞌ gilavo dizaaꞌ neive li laaꞌ naha leliꞌ nene evenelite divi ledivika li-lidaaꞌ nave.  
\v 11 Idoꞌ gamene galaꞌmudatiꞌ mine do dizo idise gameneloꞌ ivo aposolo laza Kilisitoꞌ gonoloꞌ nomonuninguꞌ nene hepeꞌ nosomuꞌ luvode gaꞌnaba gizivo mino idoꞌ naaꞌ initekumuꞌ gaꞌna helo mino idoꞌ okodeloꞌ initeꞌ nomivo viseꞌ ogo minaaꞌ noune. Idoꞌ aꞌine gavoso libili goboni mili-lidavo molo gelo minesoꞌ numuno ebekisi nomivo mono none.  
\v 12 Idoꞌ laza nene okode losuvoꞌmi initeꞌ nene dalone lo gono laꞌlisete amuzo molo leliꞌ adedunuꞌ daaꞌ noune. Idoꞌ evenelite goboni mili-lidaniꞌ gameneuꞌ nene aꞌminemuꞌ goloso gelamo hongu lo minaaꞌ noune.  
\v 13 Idoꞌ gamazi goloso palasa li-lidikevo ma laza nene do hongu gamazi lo-ngemaaꞌ noune. Ee, gamene galaꞌmudatiꞌ mine do dizo idisesi nene eveneꞌ me misubouꞌ alevete lelikumuꞌ gilaniꞌ leze nene sihononi gehepeve nizave li vasa izi-ngidaaꞌ ave maꞌminosa nene none.   
\p
\v 14 Idoꞌ naza luhuvo initeꞌ mene longovozo hililizave losa gize lengemamuve. Asi lingine nene neniꞌ izipahaꞌne nizaniꞌ gelavo luꞌne lengeme nouvoniꞌ nenako nemuꞌ gatine dosa luhuvo initeꞌ mene nogize lingimuve.  
\v 15 Lingine Kilisitoꞌ monokuꞌ lengiꞌ gizebo vetine nene vaiꞌ li nilisaha neniꞌ nene ganaꞌ Kilisitoꞌnimuꞌ gamazi lamineꞌ nene lo-lengemekuvo nelotiꞌ gili eleꞌvoleꞌ ikevosa neniꞌ hamoꞌ nene metibine loloꞌ okuve. Nemuꞌ nene metinge vaiꞌ ma nizamave.  
\v 16 Nemuꞌ nene neniꞌ monovoloꞌ eꞌmeti alizave losa gatine do noluze. Gililo.  
\v 17 Lingine neꞌmine ilizave lo Timoteoꞌni imiselekuvo lengita novive. Aza nene luꞌne eme nouve Guvelesi veꞌmi monoꞌ akaloꞌ eleꞌmize molokuvo gipeꞌne loloꞌ ogo mino lulo lisiheꞌ o neivo gono lamineꞌ daaꞌ ive ve. Aza nene lengita ogo hetelo Kilisitoꞌni eꞌmeto ogo molo minaaꞌ nouvoniꞌ monovo nene dalizave lo Izesuꞌ Kilisitoꞌ evenele zuho mulise miniꞌmi monada mukiꞌ apize ngemaaꞌ nouvoniꞌ ma nene lo gatine oloseive.  
\v 18 Idoꞌ lengikutiꞌ linge malite neniꞌ nene nonida amoloseinako ngelo ogo lelemelihe li hokolizeꞌ igi gopo minaaꞌ naniꞌza  
\v 19-20 Guvelesi veꞌmo nenikumuꞌ lengita alive lo gele nolineꞌ nene eiꞌ luloloꞌ eꞌmeto naza mine haꞌna amo liteꞌ lo alosuve. Idoꞌ eveneꞌ ma ingine Oꞌmosoꞌmi gizebouꞌ vo hulunive ne none likevosa haza gamazi lilizadotikovoꞌ nene aꞌmineꞌmi gihile nene ningamo Oꞌmosoꞌmi amuzo nesi engita sotoꞌ neivosasi nene ningaaꞌ nounako naza nene ogo aꞌmine hokolizeꞌ igaꞌ aniꞌ aleve nene okoꞌine di hozi li gamazi gopo laaꞌ niilisanako aꞌminemuꞌ nene gelamo gele hulo Oꞌmosoꞌmi amuzo nene engita neihe nomihe nemukovoꞌ nene ningelove.  
\v 21 Idoꞌ lingine nadive li nigilave. Nenikumuꞌ nene lebelaaꞌ gavososi do ano li gili nizahe. Eꞌe, tiꞌ lii ma gilamilisanako nemuꞌ nene luꞌne laminekisi hongu lo mino nasahiliꞌ o-lengedelesa alosuvonako nemuꞌ monovotine nene di lamineꞌ igi minilo.   
\c 5  
\s1 Kolidi Alevetinguꞌ Veneꞌ Vemoholite Igaꞌ Aniꞌ Monovo Goloso Nene Sotoꞌ Ingumuꞌ Pauloꞌ Lineꞌ  
\p
\v 1 Eveneꞌ mukiꞌ nete lengiꞌ muliseuꞌ nene veneꞌ vemoholite igaꞌ aniꞌ monovo goloso ma sotoꞌ neive li liꞌmi nimonave. Aꞌmine initeꞌ nene monoꞌ gilamaaꞌ avetingukisi isaꞌmaniꞌ initeꞌ atoliꞌmine goloso ve. Aꞌmine initeꞌ nene eveneꞌ ma lengiꞌ muliseuꞌ neiveliꞌmo melehi elenahine dave.  
\v 2 Idoꞌ lingine initeꞌ neꞌmine sotoꞌ ineꞌ nemuꞌ nene okodidoꞌ gili longovozo hilami monokuꞌ dize nonive ne none li nanimuꞌ okodine di hozi li nizave. Lingine agae li longovozo hili lengiꞌ muliseutiꞌ aꞌmine monovo goloso dave nene imiseli hulilizanako imiseli hulamave.  
\v 3 Naza nene okoꞌneꞌvesi hota minuvoniꞌza voꞌne nene lengita lengikisi makaꞌ minineꞌ gelave. Idoꞌ makaꞌ lengikisi minuneꞌ gelavo aꞌmine initeꞌ goloso iveꞌmi gamaziꞌve nene gelo tiꞌ lo lo huko luve:  
\v 4-5 Lingine mulise milikevo neniꞌ voꞌnedunuꞌ lengikisi minuneꞌ gelavo Guvetesi ve Izesuꞌ aza do amuzo molo-lengedavo eze velemuꞌ igi monovo goloso daaꞌ ive nene goniꞌ i-di imiselikevo aza nene lengiꞌ muliseutiꞌ lemo Sataniꞌmi anauꞌ vavo neꞌmo monovo goloso daaꞌ ineꞌ okoꞌnoꞌve nene vo goloso ogavo alingeꞌ Guvelesi ve tiꞌno alineꞌ gameneuꞌ nene aꞌmine veꞌmi sikalahuꞌ do uꞌ izelingumuꞌ ve li lihime imi imiseli hulilizave.   
\p
\v 6 Monovo goloso neꞌmine daaꞌ ive aza lengiꞌ muliseuꞌ neivo lingine monoꞌ gele guno o none li lingine okodine di hozi li nizaniꞌ nene lamineꞌ amive. Beleti do lulu izaaꞌ ineꞌ initeꞌ zisiti nene ngomo lasolo ma doo beleti loloꞌ oloneꞌ palauvaꞌ vaikuꞌ nene nososi do gopo okunivo aꞌmine zisiti neꞌmo palauvakuꞌ mono osuꞌ laaꞌ neineꞌ nene gilamaniꞌ nehe. Idoꞌ aꞌmineꞌmine ogo lihime goloso daaꞌ ive hamokovoꞌ nene lengikuꞌ minavosa neꞌmi lihime nene lengiꞌ mukita dizavosa mulisetine nene goloso ogaꞌ neive.  
\v 7 Nemuꞌ nene Oꞌmosoꞌmo Zuda veti avotemote Aigita misubouꞌ minaniꞌ iseꞌine izingumuꞌ gili holiseꞌ minilisa numudeuꞌ zisiti minamilive li numuꞌningutiꞌ zisiti viseꞌ igi di hulaaꞌ naniꞌ neꞌmine igi lingine lihimete nomineꞌ minelone li goloso initeꞌ lengita nolineꞌ nene viseꞌ igi di hulilo. Idoꞌ Zuda vete aꞌmine iseꞌine izineꞌ holisekumuꞌ nene sipisipi angale ma bilaaꞌ naniꞌ neꞌmino leliꞌ sipisipi angale Kilisitoꞌnisi bilikevo leliꞌ lihimetemuꞌ hilineꞌ nenako lingine lamineꞌ lihimetine nomineꞌ nizaniꞌ gele neive.  
\v 8 Nemuꞌ nene Zuda vete aꞌmine holiseꞌ minaaꞌ naniꞌ gameneuꞌ gameneuꞌ nene zisiti hulamavo lulu izamineꞌ beleti ni minaaꞌ naniꞌ neꞌmino laza nene litehe initeꞌ zisiti neꞌmino lute golososi monovo golososi lelita minamineꞌ mino lute lisiheꞌ laminekisi mino initeꞌ lamineꞌ gihilevoꞌ ogo molo minelone.   
\p
\v 9 Luhuvo initeꞌ gomuꞌ ma tiꞌ lo gize lingimuvoniꞌ ma neive: Lingine nene veneꞌ vemohoꞌ monovo goloso gopoꞌ napa igaꞌ avesi bizi moni zogo mili namilo lo lo-lengede nouvoniꞌ ma neive.  
\v 10 Nene luvoniꞌ nene me misubouꞌ aleve Oꞌmosomuꞌ gilamaniꞌ heta atoꞌ aleve ma gopoꞌnapa monanikisi idoꞌ mumuzoꞌ igaꞌ avesi gumine gizengize vesi idoꞌ soza oꞌmosomuꞌ ngopoꞌni laaꞌ avesi mudise huli-ngidi mini kegesi minilo luvodini neꞌmine ve misubo vaitoꞌ miniꞌmi monaaꞌ naniꞌ nenako huli-ngidi mini kegesilisa huli-ngidi zaaꞌ misubola vadine. Lingine misubo mukiꞌ huli mala ngeli vamilisanako ma mini kegesilizave luvodini ngeli neꞌmine amilizadoꞌ luvodine.  
\v 11 Nemuꞌ nene luhuvo gize lingimuvoniꞌ gamaziꞌmi monovo ma nene neꞌmino neive: Eveneꞌ ma Izesuꞌ evenele leliꞌ muliseutiꞌ none laaꞌ nave veneꞌ vemohoꞌ engiꞌ nete monovo goloso igaꞌ ilizaniꞌ nehe mumuzoꞌ igaꞌ ilizahe soza oꞌmosomuꞌ ngopoꞌni laaꞌ ilizahe noso ni sipaki igaꞌ ilizahe idoꞌ gumine gize ngize ve minilizahe neꞌmine ve nesi nene bizi moni zogo milamilizave. Ee, nosoꞌ niteꞌ engikisi makaꞌ mo kekeꞌ namilizave.  
\v 12-13 Naza nene monoꞌ gilamaniꞌ aleve engiꞌ monovomuꞌ izeꞌ molo lo huko-ngedaaꞌ gono nene neniꞌ gono nomineꞌ nenako engikumuꞌ nene lamuve. Heta monoꞌ gilamave engiꞌ monovoꞌinemuꞌ izeꞌ molo laaꞌ nene Oꞌmosoꞌmi gono neive. Idoꞌ lengiꞌ muluseuꞌ monoꞌ nigilaniꞌ aleveti gamaziꞌinemuꞌ laaꞌ nene lengiꞌ gonotine ma nenako damilizahe. Nemuꞌ nene monoꞌ godolouꞌ tiꞌ lo minineꞌ nene gili dalo: Ve ma ingine monovo goloso daaꞌ niilizave nene lengiꞌ mulisetinguꞌ minamilizaze. nGimiseli hulilo.   
\c 6  
\s1 Lengiꞌ Zuho Izesuꞌ Evenele Ma Oꞌmosomuꞌ Gilamavetida Di Vi Goniꞌ I-ngidamilo Lo Pauloꞌ Lineꞌ  
\p
\v 1 Idoꞌ lengitatiꞌ maliꞌmo eze zuho ma lihime molo-davo aza goniꞌ o-delineꞌ nene monoꞌ aleve nizada do vo goniꞌ o-delineꞌ o neineꞌ nenako neꞌmine amo Oꞌmosomuꞌ gilamavetida do vo goniꞌ o-daaꞌ neive. Naza giluvoniꞌ lingine neꞌmine ilisa longovozo hililizahe lo giluvoniꞌza longovozo hilami neꞌmine igaꞌ nave.  
\v 2 Laza Oꞌmosoꞌmi evenele nete misubouꞌ aleve Oꞌmosomuꞌ gilama aleveti gamaziꞌine nene gelekaꞌ gelekaꞌ ogo mineloneꞌ nenako gilamaniꞌ nehe. Ee, gamaziꞌine nene gelekaꞌ gelekaꞌ ogo minelesunako lingine gamazi ngomo nesi nene gililizadoꞌ lisiheꞌ amahe.  
\v 3 Laza nene angeloliti gamaziꞌine nesi gele-ngedeloneꞌ nenako nemuꞌ gilamaniꞌ nehe. Nemuꞌ nene me misubouꞌ initeliti gamaziꞌine nene gele-ngedatoꞌ lisiheꞌ gehepeve o none.  
\v 4 Nemuꞌ nene me misubouꞌ initeliti gamazi lengita ma sotoꞌ ogavo ma aꞌmine gamazitine nene gili-lidilizave li engita di vaaꞌ naniꞌ alevemuꞌ nene Oꞌmosoꞌmi evenele zuho laza engikumuꞌ gilunivo monoꞌine nomineꞌ mo haza initeꞌ nizaniꞌ nenako engita nanimuꞌ di vaaꞌ nave.  
\v 5 Aꞌmine noluvoniꞌ nene longovozo hililizave losa noluve. Idoꞌ monoꞌ gilave Izesuꞌ zuho lengiꞌ muliseuꞌ gamazi ma sotoꞌ ilineꞌ nene galauꞌ otohato o minivo do lisiheꞌ o-lengedelive nene hamokisi ma minamihe.  
\v 6 Ma noloseiha gamazitine nene ha do lisiheꞌ o-lengedelinako ezela di vamavo linginelatiꞌ malite lengiꞌ zuho ma nene zasila ngeleꞌmizi di vi goniꞌ i-ngidaaꞌ naniꞌ nene goloso ve. Idoꞌ neevoꞌ nomive. Aꞌmine zasi nesi nene Izesungumuꞌ gili eleꞌvoleꞌ isaꞌmanako engita ngeleꞌmizi di vi goniꞌ i-ngidaaꞌ naniꞌ nene mo goloso gehepeve ve.  
\v 7 Lingine zuho monokuꞌ minangutiꞌ di gonitoꞌ mili-ngidaaꞌ nadiꞌmo nene monokutiꞌ mo limi ingikeve. Linginela lihime ma mili-lingidikevo ma nene goniꞌ i-ngidami huli ngimikilizaniꞌ nene lamineꞌ o neinako nanimuꞌ goniꞌ i-ngidaaꞌ nave. Idoꞌ lengiꞌ initetine gumine dikevo ma goniꞌ nene i-ngidami huli ngimikilizaniꞌ nene lamineꞌ o neinako nanimuꞌ goniꞌ i-ngidaaꞌ nave.  
\v 8 Neꞌmine amilizanako lingine nene langisetinesi lihime mili-ngidi monovo lisiheꞌ aniꞌ gilivo mini goꞌine izi gumine damine igaꞌ nave. Neꞌmine igaꞌ niigisa monokuꞌ minave lengiꞌ zuho nesi nene neꞌmine i-ngidaaꞌ nave.  
\v 9-10 Initeꞌ goloso daaꞌ nave nete nene Oꞌmosoꞌmi gizebouꞌ ngeli vi hilamilizaniꞌ nenako nemuꞌ gilamaniꞌ nehe. Eveneꞌ ma veneꞌ vemohoꞌ monovo goloso gopoꞌ napa igaꞌ navesi soza oꞌmosomuꞌ ngopoꞌni laaꞌ navesi eveneꞌ ma ve maliti eleꞌningine gopo daaꞌ navesi idoꞌ ve ma veneꞌ vemohoꞌ initeꞌ igaꞌ adiꞌmine igi vemohoꞌ engiꞌ okoꞌninguꞌ initeꞌ igaꞌ nave nesi idoꞌ veneꞌ engiꞌ okoꞌninguꞌ initeꞌ igaꞌ naniꞌ venekisi idoꞌ gumineloꞌ vesi idoꞌ ve maliti initetoꞌ mumuzoꞌ igaꞌ navesi idoꞌ noso ni sipaki igaꞌ navesi eveneꞌ divi ledivika li gamazi goloso laaꞌ navesi gumine gize ngize ve nesi nene Oꞌmosoꞌmi gizebouꞌ nene ngeli vi hilamilisaze. Lingine laza gopo minelonidotiꞌ nene aꞌminguꞌ ha vo holalobe li gopo gatine gilamilo.  
\v 11 Idoꞌ gomuta nene lengikutiꞌ eveneꞌ linge ma nete neꞌmini goloso initeꞌ daaꞌ ave ma minaniꞌza lingine igi Guvelesi ve Izesuꞌ Kilisitoda giꞌmizi eze gulive nene di lengita adiꞌmo Oꞌmosoꞌmi Sikalahuꞌ nene lengita ogo gono do aꞌmine monovo golosotine nene gilite-lengedo Oꞌmosoꞌmi evenele lamineꞌ loloꞌ o-lengedavo Oꞌmosoꞌmo lihimetinesi nomineꞌ ve lo-lingidineꞌ ve.   
\s1 Leliꞌ Okodedunuꞌ Nene Oꞌmosoꞌmi Monovo Lamineꞌ Nene Do Sotoꞌ Ogo Eze Gulive Do Naba Ilineꞌ Initekovoꞌ Ogo Molo Minelesune Lo Pauloꞌ Lo-ngimineꞌ  
\p
\v 12 Lingine initeꞌ mukiꞌ nene ha gopo gamaziꞌvesi nomineꞌ ogo molo olosune laaꞌ naniꞌza aꞌmine initeꞌ linge ma nete leleꞌmize lamineꞌ amilisave. Ee, lingine initeꞌ mukiꞌ nene ha gopo gamaziꞌvesi nomivo ogo molo olosune laaꞌ naniꞌza initeꞌ ma ogo molo ogaꞌ nounivo aꞌmine initeliꞌmo guvetesi ve neꞌmine loloꞌ o lemavo agae neꞌmine amolone lo mineloneꞌ nesi geli geli ogo ogo molo minelesunako nemuꞌ nene naza initeꞌ maliꞌmo guveꞌnesi ve loloꞌ ogalive lo initeꞌ ato atoꞌ nene gopo osaꞌmuve.  
\v 13 Laminetoꞌ likeniꞌ neive. Oꞌmosoꞌmo nosoꞌ niteꞌ do sotoꞌ ineꞌ nene gatudemuꞌ ve losa do sotoꞌ ineꞌ ve. Idoꞌ gatude do sotoꞌ ineꞌ nene nosoꞌ nitekumuꞌ ve losa do sotoꞌ ineꞌ ve. Ne neiha eiꞌ Oꞌmosoꞌmo lavo nosoꞌ nitekisi gatudesi mudise osuꞌ ha lilisasive. Ee, Oꞌmosoꞌmo nosoꞌ nitekisi gatudesi nene neꞌminemuꞌ do sotoꞌ ineꞌza okode do sotoꞌ ineꞌ nene veneꞌ vemohoꞌ gopoꞌ napa ingalizave losa do sotoꞌ amo Guvelesi vela gelekeleꞌ igi nizavo Guvelesi veꞌmo okodeloꞌ gizebo o minelive losa okode nene do sotoꞌ ineꞌ ve.  
\v 14 Nemuꞌ nene Oꞌmosoꞌmo Guvelesi ve hele neingutiꞌ do ote-dineꞌ ve. Idoꞌ aꞌmineꞌmine ogo amuzoꞌvedunuꞌ lelikisi hele noloningutiꞌ do ote-ledeleseive.  
\v 15 Lingine nene Kilisitoꞌ okoꞌnoloꞌ gizene ana neꞌminisa nene miniꞌmi moni nizave. Nemuꞌ nene gilamaniꞌ nehe. Nemuꞌ nene laza Kilisitoꞌ okoꞌno hamoꞌ neꞌmine minuneꞌ gilivo minuningutiꞌ linge ma nene Kilisitoꞌ okoꞌnoloꞌ gizene ana neꞌmine minaniꞌ matesi vi pasidiaꞌ alusi ingalizaniꞌ neꞌmo Kilisitoꞌ okoꞌno ma nene di vi pasidiaꞌ veneꞌ alusi di gopo igi di hamoꞌ ilisanako nemuꞌ nene neꞌmine mo kekeꞌ amolone.  
\v 16 Ee, monoꞌ godolouꞌ gamazi ma veneꞌ vemohoꞌ bizi ingalisineꞌ nene hamoꞌ liliꞌ ilisasive lo neineꞌ nenako pasidiaꞌ venekisi ongalive nene aꞌmine venekisi hamoꞌ liliꞌ ilisasive. Nemuꞌ nene lingine gilamaniꞌ nehe.  
\v 17 Ne neiha eveneꞌ ma aza Kilisitoda vo giꞌmizelive nene Kilisitokisi luꞌine hamoꞌ loloꞌ ogavo minilisive.  
\v 18 Lingine veneꞌ alusi gopoꞌ napa ingiꞌmi monaaꞌ monovomuꞌ nene golise igi mehedine imilo. Initeꞌ goloso ato atoꞌ vaiꞌ nevo dalineꞌ nene okonga losuvolotikovoꞌ dalineꞌza veneꞌ alusi gopoꞌ napa ongalineꞌ nene geiꞌ okonga gihile nene lihime molo-do do goloso o-delesane.  
\v 19 Oꞌmosoꞌmi Sikalahuꞌ nene Oꞌmosoꞌmo lehize-lengedavo lutinguꞌ minevo dovoꞌ ogo minive eiꞌ kekeize numuꞌve nene lengiꞌ okodine nene neive. Lengiꞌ initetine nomive. Nemuꞌ nene gilamaniꞌ nehe.  
\v 20 Ee, Oꞌmosoꞌmo lengiꞌ nene meni hizo do eita o neineꞌ nenako okodine nene lengiꞌ initetine nomive. Nemuꞌ nene aꞌmine okodinedunuꞌ nene eze gulive do naba ilineꞌ initekovoꞌ nene igi mili minilo.   
\c 7  
\s1 Pauloꞌ Aza Veneꞌ Daakumukisi Veloꞌ Vaakumukisi Nene Lo-ngimineꞌ  
\p
\v 1 Idoꞌ lingine luhuvo initeꞌ gizi huli-nidi longoꞌ i-nidaniꞌ initeꞌ mamuꞌ nene lo sotoꞌ ogo lo-lengemeloze. Gililo. Ve maliꞌmo veneꞌ damo hazavoꞌ minelineꞌ nene nesi ha lamineꞌ o neive.  
\v 2 Neꞌmine o neineꞌza eveneꞌ mukiꞌ igaꞌ adiꞌmine igi lingine veneꞌ alusi gopo ingikelizanako nemuꞌ nene vemohoꞌ mukiꞌ hamo hamolite veneꞌ di minilizaniꞌ nesi nene lamineꞌ oloseive. Idoꞌ veneꞌ mukiꞌ hamo hamoꞌ ingine veloꞌ vanikovoꞌ minilizaniꞌ nene lamineꞌ oloseive.  
\v 3 Ve gaza elengahosi bizi ingalisidoꞌ o neize. Initeꞌ ogakumuꞌ aꞌmanapa o damozo. Idoꞌ veneꞌ gaza vangahosi bizi ingalisidoꞌ o neize. Gazasi initeꞌ ogakumuꞌ nene aꞌmanapa o damozo.  
\v 4 Veneꞌ lingine okodineꞌmi initetoꞌ nene gizebo amave. Asi vadinge nete gizebo i nizave. Aꞌmineꞌmine ogo vemohoꞌ lengiꞌ okodineꞌmi initetoꞌ nene gizebo amave. Asi mo eledinge netesi nene gizebo i-lingidi nizave.  
\v 5 Nemuꞌ nene elenahoi vanahoi lingine initeꞌ ili ma aꞌmanapa aꞌmanapa amilizo. Oꞌmosola lolosive lilisineꞌ gameneukovoꞌ nene Oꞌmosola gamene nanikeꞌ lolosive lilisihe li hukiki initeꞌ ami mini Oꞌmosola lilisineꞌ nene lamineꞌ o neive. Neꞌmine o neineꞌza Satani neꞌmo lengemenguꞌ molavo initeꞌ goloso ogatoꞌ lutine otavo moni veneꞌ vemohoꞌ atokisi gopoꞌ napa ingikelisive. Nemuꞌ aꞌmine gamene milasineꞌ nene osuꞌ lavo ma initeꞌ nene iheꞌ ha ilisasive lo noluve.  
\v 6 Idoꞌ neꞌmine lo nolo-lingimuvoniꞌ nene neꞌmine manaꞌmine ilizave idoꞌ amilizave lo lo huko lamuve. Langisetine nene neꞌmine ilisa gili nilisave lo gele noosa nogele lingimuve.  
\v 7 Naza giluvoniꞌ eveneꞌ mukiꞌ nene neniꞌ uvodiꞌmine igi veneꞌ dami hazavoꞌ minilisave lo gele nouvoniꞌza Oꞌmoso neꞌmo mino ogo molo oloneꞌ amuzote nene ato atoꞌ lehize-lidineꞌ nenako neꞌmo ma nete nene na minuvodiꞌmine igi ngeli minamilisave.   
\p
\v 8 Idoꞌ nemuꞌ veloꞌ vamaniꞌ venekumukisi idoꞌ veneꞌ damavemukisi veneꞌ gevonokumukisi nene naza neꞌmine lo noluve: Ingine nene neniꞌ uvodiꞌmine igi veneꞌ dami veloꞌ vami hazavoꞌ minilizaniꞌ nene lamineꞌ oloseiha  
\v 9 veneꞌ vemohoꞌ malite veloꞌ vaaꞌ veneꞌ daaꞌ amo haza minelone lisa nizavo initeꞌ ogakumuꞌ okoꞌninguꞌ oloꞌ loꞌmo novivo hongu li minilizadoꞌ lisiheꞌ amaniꞌ aleve ingine nene ha veloꞌ vaaꞌ veneꞌ daaꞌ ilizave. Initeꞌ ogakumuꞌ okodinguꞌ oloꞌ laaꞌ neꞌmo goloso initeꞌ daaꞌ akauꞌ lengeleꞌmize molaloseinako veloꞌ vaaꞌ idoꞌ veneꞌ daaꞌ nene lamineꞌ o neive.  
\v 10 Idoꞌ veneꞌ vemohoꞌ liliꞌ igi nizaniꞌ aleve nene lengikumuꞌ tiꞌ lo lo huko nolo-lingimuha aꞌmine nene neniꞌ luvoniꞌ gamazivoꞌ nomive. Guvelesi veꞌmo lo huko-lingidineꞌ gamazi ve. Aꞌmine gamazi nene tiꞌ lo neive: Veneꞌ ingine vaꞌningine huli-ngidi vamilizave.  
\v 11 Neꞌmine o neineꞌza vaꞌningine ma huli-ngidilizaniꞌ nene eleꞌninge ingine ve gohi maloꞌ vami haza minilizave. Idoꞌ haza minesoꞌ ngisamilineꞌ nene tineꞌ mili gohi vaꞌningida alizave. Idoꞌ vaꞌninge nete eleꞌningine nene huli-ngidamilizave.   
\p
\v 12-14 Idoꞌ naza eveneꞌ linge mamuꞌ Guvelesi veꞌmi gamazi nomineꞌ naꞌnise tiꞌ lo noluve: Izesuꞌ evenele zuho maliꞌmo Kilisitoꞌnimuꞌ gele eleꞌvoleꞌ ami veneꞌ ma do neivo vanahosi bizi mini di vilisida aꞌmine veneꞌ nene Oꞌmosoꞌmo do lamineꞌ o-davosa elenaho Kilisitoꞌnimuꞌ gele eleꞌvoleꞌ amineꞌ neꞌmo vanaho gele eleꞌvoleꞌ o neineꞌve nene ngelo do goloso o-damilidoꞌ mineleseinako nemuꞌ elenaho aza aꞌmine veloꞌ nene ha minelove nolivo ma aꞌmine veneꞌ nene do hulo-damo ha do minelive. Idoꞌ Izesuꞌ evenele zuhoutiꞌ veneꞌ maliꞌmo Kilisitoꞌnimuꞌ gele eleꞌvoleꞌ ami veloꞌ vo neivo elenahosi bizi mini di vilisida aꞌmine ve nene Oꞌmosoꞌmo do lamineꞌ o-davosa vanaho Kilisitoꞌnimuꞌ gele eleꞌvoleꞌ amineꞌ neꞌmo elenaho gele eleꞌvoleꞌ o neineꞌve nene ngelo ma do goloso o-damilidoꞌ mineleseinako nemuꞌ nene vanaho aza aꞌmine veneꞌ nene ha do minelesuve nolivo ma elenaho aza hulo-do vamilive. Aꞌmine Izesungumuꞌ gili eleꞌvoleꞌ ama vadingesi idoꞌ eledingesi nene Oꞌmosoꞌmo do lamineꞌ o-ngedamaaꞌ neineꞌ neidiniko izipe gidilizaniꞌ nene Oꞌmosoꞌmi evenele zuho minami heta atoꞌ ve minadine. Neꞌmine o neiha do lamineꞌ o-ngedaaꞌ neineꞌ aleve nizaniꞌ gilineꞌ neꞌmo izipahatine nene Oꞌmosoꞌmi evenele zuhoutiꞌ nizave.  
\v 15 Izesuꞌ zuho minamineꞌ veneliꞌmo he idoꞌ vemoholiꞌmo he vanahine nolihe elenahine nolihe hulo-delove nolivo ma Oꞌmosoꞌmo ezesi bizi minilisive lo hukamineꞌ mo asi hongu li laminivoꞌ minilizave lo neineꞌ nenako ma volone nilavo ma nene aꞌminemuꞌ oꞌve li-ngidamilo.  
\v 16 Ne neiha Izesuꞌ zuho minamineꞌ elengaho nolihe vangaho nolihe aꞌmingutiꞌ maliꞌmo minelesive lilineꞌ nene Oꞌmosoꞌmo do uꞌ izeli akaloꞌ eleꞌmize molalibe nemuꞌ gelamange. Mo hulo-damozo.   
\s1 Laza Nene Guvelesi Veꞌmo Igi Mili Minilizave Lo-lidineꞌ Neukovoꞌ Minelone Lo Pauloꞌ Lo-ngimineꞌ  
\p
\v 17 Idoꞌ Izesungumuꞌ gele eleꞌvoleꞌ amineꞌ vangaho nolihe elengaho nolihe nesi bizi minilisive lo Oꞌmosoꞌmo lo huko lamive lo lo-lingimuvoniꞌ ma neineꞌza Guvelesi veꞌmo lengiꞌ hamo hamoꞌ minevoꞌ alevotine nene neꞌmine manaꞌminesi minilizave lo lengeleꞌmize molavo aꞌmine minevoꞌ alevotinesi minikevo Oꞌmosoꞌmo elese molo-lengedo eiꞌ ve lo lengeleꞌmize molaniꞌ gameneuꞌ minaniꞌ minevoꞌ alevotine minineꞌ maꞌmino ha minivosa minilo. Idoꞌ Izesuꞌ evenele mulise ato atoꞌ miniꞌmi monada nene neꞌmine lo lo huko-ngedaaꞌ nouve.  
\v 18 Ve ma Zuda veti noso mili-di okoꞌno lolovo huki-dikedoꞌ Oꞌmosoꞌmo Izesuꞌ zuho minelive lo eleꞌmize molavo ma aꞌmine Zuda veti noso mili-daniꞌ nene do hulamoloseive. Idoꞌ ve ma okoꞌno lolovo huki-damaniꞌ heta atoꞌ ve minidoꞌ Oꞌmosoꞌmo Izesuꞌ zuho minelive lo eleꞌmize molavo ma Zuda veti noso mili-nidi okoꞌne lolovo huki-nidilizave lo lamilive.  
\v 19 Ne nanitekumuꞌ ve. Okode lolovo huki-lidikevo minaaꞌ nene haza initeꞌ ve. Idoꞌ okode lolovo hukamuneꞌ minaaꞌ nesi nene haza initeꞌ ve. Haza initeꞌ neiha initeꞌ gihile nene Oꞌmosoꞌmo lo huko-lidineꞌ gamaziꞌve gele daaꞌ ne neive.  
\v 20 Oꞌmosoꞌmo elese molo-lengedo eiꞌ ve lo lengeleꞌmize molaniꞌ gameneuꞌ lingine hamo hamolite minevoꞌ alevotine gomuꞌ minivo minaniꞌ maꞌmino ha minivosa minilo.  
\v 21 Idoꞌ eveneꞌ malite geiꞌ okonga nene meni hizikevo engiꞌ initeꞌ neꞌmine loloꞌ ogo goboni gono do-ngedeꞌmo vo nanivo Oꞌmosoꞌmo eiꞌ ve lo geleꞌmize molavo ma goboni ve naningumuꞌ nene gopo gaka gelamo aꞌminguꞌ nene ha minezo. Ne neiha aꞌmine goboni gonoutiꞌ apaso vilineꞌ aka ma sotoꞌ o-gedavo ma aꞌmidoꞌ eꞌmetelineꞌ nene lamineꞌ oloseive.  
\v 22 Ve ma eveneꞌ maliꞌmi goboni ve neivo Guvelesi veꞌmo eiꞌ ve lo eleꞌmize molalineꞌ nene Satani neꞌmi goboni ve miningutiꞌ apase-dineꞌ nenako neꞌmo nene Guvelesi veꞌmi evenele loloꞌ ogosa goboni ve minamineꞌ gelave. Nemuꞌ nene goboni ve miningumuꞌ ve lo gopo gala gelamilive. Idoꞌ aꞌmineꞌmine ogo ve ma goboni ve minamo neivo Guvelesi veꞌmo eiꞌ ve lo elese molo-do eleꞌmize molalineꞌ aꞌmine ve nene Kilisitoꞌ goboni ve loloꞌ ogo mineleseive.  
\v 23 Ee, Izesuꞌ aza minevoꞌ alevoꞌve hulo lengikumuꞌ helo lengiꞌ meni hizavo eiꞌ initeꞌve liliꞌ ikeniꞌ nizanaze. Nemuꞌ nene misubouꞌ alevete meni hizi-lingidikevo engiꞌ goboni gono di-ngidi minamilo.  
\v 24 Idoꞌ nemuꞌ nene neze zuhokizo, Oꞌmosoꞌmo elese molo-lengedo lengeleꞌmize molavo ma nene lingine hamo hamoꞌ gomuꞌ mini mili minaniꞌ minevoꞌ alevotine maloꞌ aꞌmidoꞌ nene Oꞌmososi makaꞌ makaꞌ minilo.   
\s1 Pauloꞌ Aza Veloꞌ Vamaniꞌ Idoꞌ Veneꞌ Damaniꞌ Alevemukisi Gevonoꞌ Minaniꞌ Nemukisi Lo-ngimineꞌ  
\p
\v 25 Veloꞌ vamaniꞌ idoꞌ veneꞌ damaniꞌ alevemuꞌ nene Guvelesi veꞌmo gamazi lo huko lamivo naꞌniseꞌne gaꞌne giluvoniꞌ gamazivoꞌ ma lo-lengemelesuve. Idoꞌ Guvelesi ve aza mulumoꞌne ningo do nuꞌ izo eiꞌ gonoloꞌ neleꞌmize molaniꞌ nenako gamazi lamineꞌ lengiꞌ lo-lengemelodoꞌ gili nimilizadokovoꞌ lisiheꞌ o nouve losa gele nouve.  
\v 26 Nemuꞌ nene tiꞌ lo gele nouve. Idise aꞌmene apiꞌ ogo sotoꞌ o-lengedeꞌmo novineꞌ geni initeꞌ neꞌmi lulouꞌ nizaniꞌ nenako nemuꞌ veloꞌ vami idoꞌ veneꞌ dami haza minaniꞌ aleve ingine minaniꞌ neꞌmini hazavoꞌ minilizaniꞌ nene lamineꞌ oloseive losa gele nouve.  
\v 27 Idoꞌ gaza veneka neivo ma nene naza veneꞌ alamo mo hulo-delove lo gelamozo. Idoꞌ veneka ma nomivo ma naza veneꞌ viseꞌ olove lo gelamozo.  
\v 28 Idoꞌ veneꞌ dalineꞌ nene goloso amoloseive. Idoꞌ veneꞌ alu maliꞌmo veloꞌ vilineꞌ nesi goloso amoloseive. Ne neiha veneꞌ vemohoꞌ liliꞌ ikeniꞌ nete nene okoꞌine losuvoꞌmi initekumuꞌ geni engita sotoꞌ ilingumuꞌ nene gilavo geni geni ivo minilisanako neꞌmine geni nene lengita sotoꞌ ogalive lo gelo veloꞌ vami veneꞌ dami haza minilizaniꞌ alevevoꞌ minilizaniꞌ nene lamineꞌ ve lo noluve.   
\p
\v 29 Neze zuhokizo, gamazi lo-lengemeloniꞌ mene gililo. Oꞌmosoꞌmo molaniꞌ gamene naba nene mo alitave. Mo alitaze. Aꞌminemuꞌ nene di vaꞌvaꞌ igi minilizaniꞌ o neinako lingine initeꞌ gohi mamuꞌ gili minavo aꞌmine gamene naba nemuꞌ gatine molavo veneꞌ vemohoꞌ lingine vadinginemuꞌ gilavo dizaaꞌ neineꞌ idoꞌ eledinginemuꞌ gilavo dizaaꞌ neꞌmo Guvelesi vemuꞌ gilaaꞌ naniꞌ nene do leme-dalize. Veneꞌ vemohoꞌ liliꞌ igi nizaniꞌ aleve lingine nene veneꞌ vemohoꞌ liliꞌ igi minamaniꞌ eveneꞌ hamokovoꞌ neineꞌ gilivosa minilo.  
\v 30 Idoꞌ eveneꞌ ma linginela mulumo alumo gelaaꞌ initeꞌ ma minavo ive nama igaꞌ nave lingine nene ive nama amaniꞌ gilivosa minilo. Idoꞌ ve ma lingine initeꞌ mamuꞌ longolize ize minaaꞌ naniꞌ aleve lingine nene neꞌmine amaniꞌ gilivosa minilo. Idoꞌ initeꞌ maketi milaaꞌ meni hizaaꞌ igaꞌ nave lingine nene henenitine nomineꞌ nizaniꞌ gili minilo.  
\v 31 Idoꞌ eveneꞌ ma me misubouꞌ initetoꞌ gono daaꞌ nave ingine nene aꞌmidoꞌ luꞌine mili mini gono daniꞌ gelamivosa minilizave. Me misubosi idoꞌ aꞌmine misubouꞌ initeꞌ igi mili igaꞌ naniꞌ nesi nene osuꞌ loloseinako nemuꞌ gamazi mene noluve.   
\p
\v 32 Gopo gatine gililiza initeꞌ nene lengita minamineꞌ minilizave losa gele nouve. Gohuno ve nete nene naniteꞌ naniteꞌ okunivo Guvelesi veꞌmo mulunouꞌ lamineꞌ gelelihe li Guvelesi veꞌmi initekumuꞌ luꞌine mili gili minaaꞌ naha  
\v 33 veneꞌ di nizave nene gopo gaꞌine gili naniteꞌ naniteꞌ okunivo venete lamineꞌ gililizahe li me misubouꞌ initekumuꞌ luꞌine mili gili minaaꞌ nave.  
\v 34 Neꞌmine igaꞌ naniꞌ neꞌmo nene luꞌine gaꞌine seꞌze lo minaaꞌ neive. Idoꞌ veloꞌ olihe vamaniꞌ alu nete nene okodesi lutesi Guvelesi veꞌmi initekovoꞌ mino kekeize lo minelive li Guvelesi veꞌmi initekumuꞌ luꞌine mili gili minaaꞌ naha veloꞌ vi nizaniꞌ veneꞌ nene gopo gaꞌine gili naniteꞌ naniteꞌ okunivo vademote lamineꞌ gililizahe li me misubouꞌ initekumuꞌ luꞌine mili gili minaaꞌ nave.  
\v 35 Lengiꞌ nene lengeleꞌmize lamineꞌ olove losa gamazi mene nolo-lingimuve. Lengiꞌ veneꞌ daaꞌ idoꞌ veloꞌ vaaꞌ akatine nene hize tile-lengedosa lamuve. Lingine gamene gamene lamineꞌ vevesi mini lutine initeꞌ maloꞌ maloꞌ milami lutine Guvelesi velokovoꞌ mili gelekeleꞌ i-di minilizave losa noluve.   
\p
\v 36 Idoꞌ ve ma aza alungo ma izeni i-dikevo mino alingeꞌ nene veneꞌ damo haza minelove lo lo huko nolinguꞌ aꞌmine izeni elenahine nene ma duvo lo lulo amuzo molo otelineꞌ neꞌmo aꞌmine alumuꞌ lihime daniꞌ geleleseinako eikumuꞌ lulouꞌ gilidoꞌ do molo aꞌmine alu nene daloseive. Dalineꞌ neꞌmo goloso amoloseive.  
\v 37 Ne neiha ve maliꞌmo veneꞌ mo damolove lo lo huko eze lulo amuzo molo gizebo ogavo veneꞌ daakumuꞌ lulo otamivo hazavoꞌ minelidoꞌ lisiheꞌ o neivo ma izeni elenahine nene haza gizebo o-do mino damilineꞌ nene lamineꞌ oloseive.  
\v 38 Nemuꞌ nene ve ma aza izeni elenahine ma dalineꞌ nene lamineꞌ oloseiha ve ma izeni elenahine ma damo minelidiꞌmo nene ivileꞌ ogosa lamineꞌ oloseive.   
\p
\v 39 Veneꞌ ingine vaꞌninge hilami veꞌinesi minilizaniꞌ gameneuꞌ nene vaꞌningine huli-ngidamilizaniꞌ o neineꞌ nenako bizivoꞌ minilisave. Idoꞌ vaꞌninge hilikevo ve maloꞌ volone lilizaniꞌ nene ha vilisaha aꞌmine vilizave nene Izesuꞌ zuho minilizavelokovoꞌ vilizave.  
\v 40 Neꞌmine ilizaniꞌza naza giluvoniꞌ veloꞌ vami hazavoꞌ minilizaniꞌ nene lamineꞌ minilisave losa gele nouve. Meve nene neniꞌ gamazi neineꞌza naza giluvoniꞌ Oꞌmosoꞌmi Sikalahuꞌ nene nenita neivosa eiꞌ gilidoꞌ hize eleꞌ ogo noluhe losa noluve.   
\c 8  
\s1 Pauloꞌ Aza Soza Oꞌmoso Nosoꞌ Niteꞌ nGimangutiꞌ Izesuꞌ Zuho Lingine Nene Ha Nalizadoꞌ O Neihe Lo Lo-ngimineꞌ  
\p
\v 1 Idoꞌ longoꞌ ma i-nidaniꞌ maloꞌ nene soza oꞌmoso ngimaniꞌ initeꞌ naaꞌ nemuꞌ lo-lengemelosuve. Lingine mukitoꞌ nevoꞌmine initeꞌ monovo danava gelaaꞌ noune laniꞌ nene mo laminetoꞌ laniꞌza ve ma ingine laꞌlisete initeꞌ monovo danava gelaaꞌ unive ne none laaꞌ nave nene engiꞌ okoꞌine di hozi li hokolizeꞌ igi minaaꞌ nave. Ingine nene neꞌmine igi minaaꞌ naha ve ma ingine luꞌine eveneꞌ ngimaaꞌ nave minaniꞌ nete nene hize eleꞌ i-ngidi minaaꞌ nave.  
\v 2 Idoꞌ ve ma ingine initeꞌ monovo danava gele osuꞌ lo none li gilaaꞌ nave ingine nene initeꞌ gele vevesaaꞌ monovo nene olihe gilamave.  
\v 3 Ne neineꞌza ve ma ingine Oꞌmoso luꞌine imaaꞌ nave nene Oꞌmosoꞌmo engikumuꞌ nene eiꞌ ve lo ningo gele neive.   
\p
\v 4 Idoꞌ nelotiꞌ nene soza oꞌmoso initeꞌ ngimaniꞌ initekutiꞌ naaꞌ nemuꞌ naza tiꞌ lo noluve: Aꞌmine soza oꞌmoso nene initeꞌ gihile minamaniꞌ nenako aꞌminete me misubouꞌ initeꞌ ma amilisave. Oꞌmoso eiꞌ hamokovoꞌ minineꞌ nene neive li lingine laniꞌ nene lamineꞌ ve lo gele nouve.  
\v 5 Ee, eveneꞌ ma ingine Oꞌmosote ve idoꞌ Guvetesi ve ve laniꞌ initeꞌ okulumokukisi misuboukisi nene minaniꞌ neiha idoꞌ aꞌmine soza oꞌmoso idoꞌ guveꞌinesi ve liliꞌ igi minaniꞌ initeꞌ nene lamineꞌ mo vaiꞌ li minaniꞌ ve.  
\v 6 Neꞌmini minaniꞌ neiha Kilisitoꞌ evenele zuho laza nene tiꞌ lo gele none: Oꞌmoso eiꞌ hamoꞌ nene neive. Aza nene Meteho initeꞌ mataꞌ mukiꞌ do sotoꞌ ive ne neive. Idoꞌ laza nene eze luloloꞌ ogo molo olone lo eitoꞌ lehete ogo minaaꞌ unive ne neive. Idoꞌ Guvelesi ve nene hamoꞌ neive. Aꞌmine ve Izesuꞌ Kilisitoꞌ nene Oꞌmosoꞌmo eitoꞌ gele medele mino initeꞌ mataꞌ mukiꞌ nesi idoꞌ leliꞌ nesi do sotoꞌ ive ne neive.   
\p
\v 7 Neꞌmine ve neingumuꞌ nene leliꞌ ha gele noneꞌ nenako soza oꞌmoso nene initeꞌ gihile nizamaze. Nemuꞌ nene eveneꞌ linge ma lingine soza oꞌmoso ngimaniꞌ nosoꞌ nitekutiꞌ naloneꞌ nene goloso amoloseive laaꞌ naniꞌza lengita Izesuꞌ evenele ma nete nemuꞌ olihe gili lamineꞌ amave. Ingine nene gamene galaꞌmudatiꞌ vomine soza oꞌmoso nene initeꞌ gihile ve li ngopoꞌni li minaaꞌ aniꞌ nenako nemuꞌ nene ingine idisesi soza oꞌmoso ngimaniꞌ nosoꞌ nitekutiꞌ nalizaniꞌ nene aꞌmine oꞌmoso ngopoꞌni nolune li gilisa nalisave. Idoꞌ neꞌmine ilizaniꞌ nene luꞌine gilizevo o vineꞌ mininguꞌ nene gili vevesamanako nemuꞌ nene ingine aꞌmingutiꞌ ma nalisa gili laza naloneꞌ nene soza oꞌmoso opoꞌni luneꞌ gelavo mo lihime dalosuneꞌza nevo ha nalosune li gili nalizaniꞌ neꞌmo nene ingine lihime daniꞌ gelavo lengiꞌ zuho nene ngeleꞌmize goloso ilisave.  
\v 8 Ne neineꞌza nosoꞌ niteꞌ naaꞌ idoꞌ namaaꞌ monovote neꞌmo Oꞌmosoꞌmo lelikumuꞌ gala gilineꞌ nene ma do atoꞌ amoloseive. Oꞌmosoꞌmi veleloꞌ nosoꞌ niteꞌ ma naloneꞌ neꞌmo do lamineꞌ o-ledamo idoꞌ malise ogo namoloneꞌ neꞌmo nene ma do goloso o-ledamoloseive.  
\v 9 Ne neiha soza oꞌmoso ngimaniꞌ nosoꞌ nitekutiꞌ nene ha nalonidoꞌ o neihe li nemuꞌ gili lingine nalizaniꞌ neꞌmo eveneꞌ ma ingine monokuꞌ gilizevo neꞌmine gili minaniꞌ nene monokutiꞌ limi ingikelizaze. Monovotidoꞌ nene gizebo lamineꞌ ilo.  
\v 10 Neꞌmine noluvoniꞌ nene nemuꞌ noluve. Gaza Izesuꞌ evenele malike, soza oꞌmoso nene initeꞌ gihile nizamaniꞌ nenako nemuꞌ nene soza oꞌmoso ngimaniꞌ initeꞌ nene ha nalosune lo gele nanivelike, soza oꞌmosoꞌmi monoꞌ numuꞌveuꞌ mino nosoꞌ niteꞌ no nanivo ve ma lulouko monoꞌ gele guno amive aza soza oꞌmoso ngimaniꞌ initeꞌ naaꞌ nene goloso ve lo gelaaꞌ noilive maliꞌmo ningo ehelele izaaꞌ ineꞌ ma nene ehelele izamivo ha vo naloseive.  
\v 11 Idoꞌ neꞌmine ilineꞌ nene goloso initeꞌ dalosuve lo gelo vo no lulo do goloso oloseinako neꞌmo monoꞌ gele guno amive geze zuho eikumukisi Kilisitoꞌ aza nene hilineꞌ nenako aꞌmine geze zuho ma nene do goloso o-do gaza soza oꞌmoso ngimangutiꞌ nene ha nalosune lo gelaaꞌ anidiꞌmo mo aka golosoloꞌ eleꞌmize molane.  
\v 12 Lingine neꞌmine igaꞌ naniꞌ neꞌmo lingine zuho ma monokuꞌ luꞌine gilizevo o vineꞌ nene di goloso i-ngidi lihime mili-ngidaaꞌ naniꞌ nene Kilisitoꞌnisi lihime mili-daaꞌ nave.  
\v 13 Nemuꞌ nene lingine olodiꞌmine igi minilizangisi naza soza oꞌmoso ngimaniꞌ nosoꞌ niteꞌ ma naloniꞌ nene neze zuho ma lihime akauꞌ vikelizave lo aꞌmine ize nevoꞌmingutiꞌ nene namo mino helelosuve.   
\c 9  
\s1 Pauloꞌ Aposolo Gono Daaꞌ Monovomuꞌ Lo-ngimineꞌ  
\p
\v 1 Idoꞌ eveneꞌ ma nehe initeꞌ ma nehe neꞌmineti goboni veꞌine minamuvonako naza nene initeꞌ naniteꞌ olosa gelelohe nene ha olosuve. Naza nene Guvelesi veꞌmi velemuꞌ ogo gono daaꞌ uve aposolo nouve. Guvetesi ve Izesuꞌni nene neniꞌ veꞌnedunuꞌ mo ningekuvoniꞌ ve. Idoꞌ Guvelesi veꞌmi velemuꞌ ogo gono duvoniꞌ neꞌmi gihile lengiꞌ nene nizave.  
\v 2 Ee, lengita gono dokuvo Guvelesi veꞌmo eze evenele loloꞌ o-lingididiꞌmo naza nene aposolo gihile nouvoniꞌ nene mo sotoꞌ o neineꞌ nenako nemuꞌ eveneꞌ malite nenikumuꞌ aposolo nomive li gili nilizaniꞌ nene tiꞌ ogo monilize. Asi neniꞌ lengiꞌ aposolo nouvoniꞌ nene langise mo gili nizave.   
\p
\v 3 Idoꞌ eveneꞌ malite neniꞌ monovoꞌnemuꞌ izeꞌ mili laaꞌ nahe nemuꞌ nene naza aꞌmidoꞌ mene tiꞌ lo ma nolo-lingimuve:  
\v 4 Nazasi makatoꞌ gono dunivesi volonida nene eveneꞌ ma ingine nosoꞌ niteꞌ haza limikevo nalonidoꞌ amihe. Eꞌe, mo ha nalonidoꞌ o neive.  
\v 5 Idoꞌ Petololesi Guvelesi veꞌmi akunolo zuhosi aposolo linge masi ingine monoꞌ gonoloꞌ monada monada nene veneꞌinesi makaꞌ monaaꞌ nave. Idoꞌ lingine mo gili nilisave. Leliꞌ nene neꞌmine olonidoꞌ mo lisiheꞌ o noloseive. Olo.  
\v 6 Idoꞌ aposolo linge nene nosoꞌ niteꞌ haza ngimikevo naaꞌ naha leliꞌ Banabasikisi nenikisi nene monoꞌ gono helala do idoꞌ helala okode losuvoꞌmi initekumuꞌ nene leliꞌ adedunuꞌ gono do do sotoꞌ ogaꞌ nosive. Ne neiha aposolo linge ma ingine nene nosoꞌ nitekumuꞌ gono dami haza naaꞌ naniꞌ nene ha neiha lelikovoꞌ nene gono dami haza nalisidoꞌ minamasive li lingine gilaaꞌ nahe. Ne nomive.  
\v 7 Idoꞌ ve ma ami pilisi ve nene gonoꞌveloꞌ meni imamavo asiꞌvevoꞌ nene okoꞌno losuvoꞌmi initeꞌ nene do sotoꞌ oꞌmo vo minelihe. Idoꞌ ve ma aza gono doo mine zuhoꞌ ogavo o molavo aꞌmingutiꞌ dolizo namilihe. Idoꞌ ve ma zaho bulumakaꞌ gizebo ogo minelingutiꞌ aꞌmine bulumakaliꞌmi amine novozo nene asiꞌve namilive. Neꞌmine igi haza gono mo kekeꞌ mo damilisave.  
\v 8-10 Idoꞌ neniꞌ nene eveneliti gamaziloꞌ eꞌmeto aꞌmine luvoniꞌ gamazi mene nolive lisa nilahe. Eꞌe, Oꞌmosoꞌmi louꞌ gamazi Moseꞌ ma tiꞌ lo gizineꞌ neineꞌ masi ne neive:  
\q1 Bulumakatinelite lengiꞌ viti gihiletine nene lisi  
\q1 di lediꞌ lediꞌ nii-lingidavo ma nene  
\q1 aꞌmingutiꞌ ha nalizadoꞌ o neize.  
\q1 Aꞌmingutiꞌ ma nikelizave li veꞌnidoꞌ nene initeꞌ ma di tili-ngidamilo.  
\m Idoꞌ lingine aꞌmine lineꞌ gamaziuꞌ nene Oꞌmosoꞌmo leliꞌ evenekumuꞌ lamo bulumakakumukovoꞌ lave li gili nizahe. Oꞌove. Leliꞌ evenekumukisi lo neineꞌ ma neive. Ee, ganaꞌ gono davesi idoꞌ neꞌmi gihileꞌve do sotoꞌ olosa alingeꞌ gono davesi ingine gonotelotiꞌ gihileꞌve sotoꞌ ogavo ma nelotiꞌ ha nalosune li gono dalizadoꞌ o neineꞌ nenako nemuꞌ aꞌmine gamazi nene lelikumukisi lineꞌ ma neive. Idoꞌ tiꞌ lo gize neineꞌ nenako Oꞌmosoꞌmi louꞌ gamazi nesi nene neniꞌ luvodiꞌmine ogo gonouꞌ ve nene gono haza damilisave lo neineꞌ ma neive.  
\v 11 Idoꞌ nelotiꞌ nene lengiꞌ lutinguꞌ monoꞌ nene zuhoꞌ ogosa neꞌmi gihileꞌve okode losuvoꞌmi initeꞌ lengitatiꞌ ma daloneꞌ nene mo initeꞌ nabasi nomive.  
\v 12 Eveneꞌ ma ingine nene lengitatiꞌ okoꞌine losuvoꞌmi initeꞌ dalizadoꞌ lisiheꞌ i nizahe idoꞌ leliꞌ nene engiꞌ ngivileꞌ ogosa okode losuvoꞌmi initeꞌ lengitatiꞌ dalonidoꞌ lisiheꞌ o none.  
\p Okode losuvoꞌmi initeꞌ lengitatiꞌ nene ha dalonidoꞌ lisiheꞌ o neiha ma damo okode losuvoꞌmi initekumuꞌ loloneꞌ nene eveneꞌ olovoꞌ ikevosa Kilisitoꞌ gamaziꞌve lamineꞌ nene gili dalizaniꞌ akaꞌve hize tilalone lo aꞌmine initeꞌ mukikumuꞌ nene laꞌlisete geni gono gehaaꞌ noune.  
\v 13 Idoꞌ monoꞌ numuno nabauꞌ gono dave ingine nosoꞌ niteꞌine nene monoꞌ numuno nabautiꞌ di naaꞌ nave. Ee, monoꞌ numuno nabauꞌ evenetoꞌ medeli mini Oꞌmoso initeꞌ lehizi-daaꞌ gono dave ingine nene Oꞌmoso lehizi-daniꞌ nosoꞌ nitekutiꞌ nene di naaꞌ nave. Lingine aꞌmine nee mamuꞌ gilamaniꞌ nehe.  
\v 14 Idoꞌ aꞌmineꞌmine ogo Guvelesi veꞌmi gamaziꞌve lamineꞌ nene di vi li sotoꞌ i ngimaaꞌ ilizave ingine nene li sotoꞌ i ngimilizavelatiꞌ nosoꞌ niteꞌine di nalisave lo asiꞌve Guvelesi veꞌmo lo hukineꞌ ma neive.  
\v 15 Ne neineꞌza naza Kilisitoꞌ gamaziꞌve lamineꞌ nene lo sotoꞌ ogo lo-ngemeꞌmo vaaꞌ nouvodoꞌ nene lo sotoꞌ o ngemaaꞌ uvelatiꞌ nene nosoꞌ niteꞌ nevoꞌminesi ma damo haza gidini lo-ngemaaꞌ nouve. Idoꞌ naza luhuvo neꞌmine lo nogizuvoniꞌ nene evenelite gili nosoꞌ niteꞌ nevoꞌmine ma nimilizave losa gelo luhuvo gizamuve. Naza giluvo monoꞌ gamazi haza gidini lo-ngemaaꞌ nouvoniꞌ monovoꞌne nene ede vive lo nolize izaaꞌ nouve. Nemuꞌ aꞌmine nolize izaaꞌ akaꞌne nene hizi tili-nidisa aꞌmine gono daaꞌ nouvongumuꞌ nosoꞌ niteꞌ haza gidini nimamavo hazavoꞌ mine do vo heleloniꞌ nene mo lamineꞌ ve lo gele nouve.  
\v 16 Nene nanitekumuꞌ ve. Guvelesi ve aza gamaziꞌne lamineꞌ nene lo sotoꞌ ogo lo-ngemeꞌmo viline lo lo huko-nidineꞌ nenako lo-ngemamoloniꞌ nene lihime nemavo agae agae lo minalove lo aꞌmine gamaziꞌve lamineꞌ nene lo-ngemamo haza mineloniꞌ akaꞌne nomivo mino Kilisitoꞌ gamazi lamineꞌ nene lo sotoꞌ ogo lo-ngemaaꞌ nouvoniꞌ nemuꞌ nene neniꞌ okoꞌne do dizo nolize izamolosuve.  
\v 17 Aꞌmine gono dalove lo neiꞌ luꞌne otavosa duvodiniko nelotiꞌ nene meniꞌnesi ha duvodiba neꞌmino nomive. Neniꞌ luꞌne olihe otamivosa Guvelesi veꞌmo aꞌmine gono nene nogimuze. Dozo lavo noduve.  
\v 18 Nemuꞌ nene meniꞌne naniteꞌ daaꞌ nouve. Neꞌmino neive. Monoꞌ gono daaꞌ nouvodotiꞌ nene okoꞌne losuvoꞌmi initeꞌ haza gidini dalodoꞌ o neineꞌ nene gele hulo meni dalongumuꞌ lamo Kilisitoꞌ gamaziꞌve lamineꞌ nene lo sotoꞌ ogo lo-ngemelodoꞌ meniꞌve nomivo haza gidini lo-ngemaaꞌ nouvongumuꞌ nene nolize izaaꞌ nouve. Nemuꞌ nene naza Kilisitoꞌ gamazi lo-ngemaaꞌ nouvodotiꞌ meniꞌne daaꞌ nouvoniꞌ nene aꞌmine nolize izaaꞌ nouvoniꞌ nene neive.   
\s1 Pauloꞌ Aza Eveneꞌ Ato Atoꞌ Mukiꞌ Nene Izesuda nGeleꞌmize Molalongumuꞌ Ve Lo Monokuꞌ Gelekeleꞌ Ve Loloꞌ Ogo Mino Engiꞌ Aleve Gelo Minineꞌ Monovoꞌvemuꞌ Lineꞌ  
\p
\v 19 Neꞌmino neive: Naza nene meni nemaaꞌ ilive lo eveneꞌ hamoꞌ maliꞌmi gelekeleꞌ ve neꞌmine minamuvoniꞌza eveneꞌ vaiꞌ goloso ngeleꞌmize Izesuda molalove losa naꞌniseꞌne nene eveneꞌ mukitoꞌ gelekeleꞌ o-ngedaaꞌ nouve.  
\v 20 Naꞌniseꞌne nene Zuda veti louꞌ gamazi Moseꞌ gize ngimidokovoꞌ eꞌmetaaꞌ aveti muliseutiꞌ minamuvoniꞌza Zuda vesi idoꞌ Zuda veti louꞌ gamaziloꞌ eꞌmetaaꞌ ave mukiꞌ nesi nene ngeleꞌmize Izesuda olove lo aꞌmine Zuda vesi idoꞌ engiꞌ louꞌ gamaziloꞌ eꞌmetaaꞌ ave engiꞌ veꞌnida nazasi nene Zuda ve aꞌmine louꞌ gamaziloꞌ eꞌmetaaꞌ uve gelo gono do minelesuve.  
\v 21 Idoꞌ naꞌniseꞌne nene Oꞌmosoꞌmi louꞌ gamaziloꞌ eꞌmetesaꞌmuve minamuvoba Kilisitoꞌ louꞌ gamaziloꞌ gelekeleꞌ ogaꞌ uve nouvoniꞌza Oꞌmosoꞌmi louꞌ gamazi di minamave heta atoꞌ vesi nene ngeleꞌmize Izesuda olove lo aꞌmine Oꞌmosoꞌmi louꞌ gamazi di minamaveti veꞌnida nene nazasi engiꞌ aleve minuvoniꞌ gelo gono do minaaꞌ nouve.  
\v 22 Idoꞌ eveneꞌ monokuꞌ amuzo milamave engiꞌ nene ngeleꞌmize Izesuda ogo do amuzo molo-ngedelove lo nazasi nene engiꞌ gidini loloꞌ ogo mino gono daaꞌ nouve. Idoꞌ aꞌmine aleve mukikutiꞌ nene linge ma Oꞌmosoꞌmo do nguꞌ izelineꞌ akaloꞌ ngeleꞌmize molalohe lo ato atoꞌ aleveti monovoꞌnidoꞌ eꞌmeto amuzo molo gono daaꞌ nouve.  
\v 23 Idoꞌ initeꞌ mukiꞌ neꞌmine ogaꞌ nouvoniꞌ nene eveneꞌ mukiꞌ nene Kilisitoꞌ gamaziꞌve laminetoꞌ nene gelekeleꞌ ikevosa Oꞌmosoꞌmo engikisi nezesi makatoꞌ do lamineꞌ o-ledelive lo aꞌmine gamazi lamineꞌ nene hize eleꞌ olosa neꞌmine ogaꞌ nouve.   
\s1 Meni Dalone Lo Ma Monokuꞌ Amuzo Molalone Lo Lo-ngimineꞌ  
\p
\v 24 Lingine gili nizave. Eveneꞌ lotiꞌ izi ge hulo ne hulo lilizanguꞌ nene mukilite meni dalobe li amuzo mili lotiꞌ izilisaha eveneꞌ hamoliꞌmo ngivileꞌ ogosa meni daloseive. Idoꞌ aꞌmineꞌmine igi lingine meni daloningumuꞌ ve li monokuꞌ amuzo milalo.  
\v 25 Idoꞌ neꞌmine zohikuꞌ ge hulo ne hulo lilizave ingine eveneꞌ ma ngivileꞌ ogo meni daloningumuꞌ ve li engiꞌ okoꞌine do gilizevo ilineꞌ monovomuꞌ nene oꞌve li okoꞌine do amuzo molalineꞌ monovovoꞌ igi mili mini monovoꞌnidoꞌ gizebo lekeseve ilizave. Idoꞌ ingine neꞌmine ilizaniꞌ nene naniꞌmine meni dalisa neꞌmine ilizave. Haza minevoꞌ minevoꞌ amilineꞌ meni ma dalisa neꞌmine ilisave. Ne neiha leliꞌ nene monokuꞌ amuzo molokunivo Oꞌmosoꞌmo minevoꞌ minevoꞌ meni lamineꞌ lemelingumuꞌ nene monovoteloꞌ gizebo lekeseve olone.  
\v 26 Idoꞌ nemuꞌ gelo naza monokuꞌ amuzo molo lotiꞌ noizuvongukisi idoꞌ Satani lovo o emaaꞌ nouvonguꞌ nesi nene abeleni ogo zohiꞌ neꞌmine amo mino  
\v 27 eveneꞌ monoꞌ lo-ngemeꞌmo vo minaaꞌ uve minelonikisi naꞌniseꞌne nene vo tolovo ogalove lo neniꞌ okoꞌne nene goloso initekumuꞌ laniteꞌ gelelingumuꞌ nene amuzo molo doꞌmo leme-de mino aꞌmidoꞌ gizebo lekeseve ogaꞌ nouve.   
\c 10  
\s1 Oꞌmosoꞌmi Evenele Gozopoꞌ Minaniꞌ Nene Monovo Goloso Di Sotoꞌ Ikevo nGibilineꞌ Nenako Ehee Lengikisi Neꞌmine O-lengedalive Losa Pauloꞌ Hungoꞌ Molo Lineꞌ  
\p
\v 1 Idoꞌ neze zuhokizo, Oꞌmosoꞌmo do nguꞌ izineꞌ aleve nene initeꞌ neꞌmine manaꞌmine igi mili ilizaha nesi mo ngeli vi tolovo amilisave li lingine gili nilisaha nemuꞌ aka lengelebizo lo-lengemeloze. Gililo. Lingine gili nizave. Moseꞌ aza leliꞌ Zuda veti avotemotine Aigita misuboukotiꞌ ngeleꞌmizo Kanaha misubouꞌ novivo vilizaniꞌ aka ngelebizelive lo Oꞌmosoꞌmo do sotoꞌ o-ngidineꞌ limusoꞌmi mumunouꞌ nene mukiꞌ ingine vaniꞌ. Idoꞌ noso naba nene izo huko eza ema o-ngedo aka loloꞌ o-ngedavo mukiꞌ ingine aꞌminguꞌ vaniꞌ.  
\v 2 Neꞌmine igi aꞌmine limusolokovoꞌ nene eꞌmeti guvo nosouꞌ vi vi helala vaniꞌ neꞌmo mukitoꞌ ingine Moseꞌ zuho liliꞌ igi noso hilaniꞌ gilineꞌ.  
\v 3 Idoꞌ ebeꞌ hadiveloꞌ nene naaꞌ initeꞌine nomivo Oꞌmosoꞌmo nosoꞌ niteꞌ Okulumokutiꞌ hulo-ngedavo mukitoꞌ naniꞌ.  
\v 4 Idoꞌ Oꞌmosoꞌmo geheni nabaꞌmi luloutiꞌ do sotoꞌ ogo ngimineꞌ nosoutiꞌ nene mukitoꞌ naniꞌ. Idoꞌ aꞌmine gameneloꞌ nene Kilisitoꞌ aza nene engikisi makaꞌ monineꞌ gelavo aꞌmine noso nene ezelotiꞌ sotoꞌ o ngimineꞌ ve.  
\v 5 Ee, Oꞌmosoꞌmo neꞌmino do nguꞌ izineꞌza aꞌmine do nguꞌ iziveutiꞌ lingela mukiꞌ nene goloso initeꞌ diꞌmi ikevo Oꞌmoso aza gele goloso ogo ngebelekaꞌ ngebelekaꞌ ivo ebeꞌ hadiveloꞌ nene hili geseꞌ aniꞌ ve.   
\p
\v 6 Idoꞌ Zuda ve ingine goloso initekumuꞌ laniteꞌ gili di sotoꞌ iꞌmi vikevo Oꞌmosoꞌmo do sotoꞌ ogo lihime ngimineꞌ initeꞌ luvoniꞌ nemuꞌ lingine gili ingine adiꞌmine igi goloso initekumuꞌ laniteꞌ gili aꞌmineꞌmine ikelizave losa Oꞌmosoꞌmo alingeꞌ sotoꞌ olonivemuꞌ aka lelebizo neꞌmine ineꞌ ve.  
\v 7 Nemuꞌ nene ingine linge malite aniꞌ neꞌmine igi lingine soza oꞌmosomuꞌ gelekeleꞌ i-ngidi ngopoꞌni li minamilo. Ingine neꞌmine angumuꞌ monoꞌ godolouꞌ tiꞌ li gizi nizaniꞌ ma neive:  
\q1 Eveneꞌ ingine Oꞌmosote minelive li bulumakaꞌ avazaha neꞌmine liliꞌ igi  
\q1 opoꞌni li mini mitoꞌ mini nosoꞌ niteꞌ ni noso ni mini  
\q1 oti melengeni igi di goloso igi zohiꞌ igi minaniꞌ.   
\m
\v 8 Idoꞌ ma nene engikutiꞌ veneꞌ vemohoꞌ gopoꞌ napa ingiꞌmi monikevo Oꞌmosoꞌmo gamene hamokukovoꞌ eveneꞌ 23 tauseni ngebele hilineꞌ nenaze. Laza nene ingine adiꞌmine ogo veneꞌ vemohoꞌ gopoꞌ napa ongamolone.  
\v 9 Idoꞌ Guvelesi vesi golo izikevo satalite ngibilikevo hilaniꞌ nenaze. Laza ingine adiꞌmine ogo Guvelesi ve golo izamolone.  
\v 10 Idoꞌ eveneꞌ linge malite Oꞌmosola nene initeꞌ ato atokumuꞌ emenga laaꞌ idoꞌ uvonga avanga li-daaꞌ ikevo Oꞌmosoꞌmo angeloꞌ ma imiselavo ogo lihime ngemo ngibilineꞌ nenaze. Laza nene ingine laniꞌ neꞌmino Oꞌmoso uvonga avanga lo-damolone.  
\v 11 Idoꞌ aꞌmine initeꞌ mukiꞌ mene sotoꞌ o ngimineꞌ nene eveneꞌ laza nelotiꞌ aka ningeloningumuꞌ ve losa sotoꞌ ineꞌ nene gamene osuꞌ lolosa neida mene noneꞌ aleve leliꞌ nene ningi neꞌmine amilizave li lelikumuꞌ nene monoꞌ godolouꞌ luhuvo gizaniꞌ ve.  
\v 12 Nemuꞌ nene ve ma gaza vo tolovo ogaꞌ akaloꞌ minamo ha mine giliꞌ lo nouve lo minelinive gaza ehee gemenguꞌ sotoꞌ o gemavo lihime daaꞌ akauꞌ vo holo lemo ongalinge. Ningosa minezo.  
\v 13 Lengita lengemenguꞌ sotoꞌ o lengemaaꞌ neineꞌ nene atoliꞌmine sotoꞌ o lengemamive. Eveneꞌ mukita sotoꞌ ogaꞌ neineꞌ maꞌmino nene sotoꞌ noo lingimive. Idoꞌ Oꞌmosoꞌmo leze nene hulo-ledamoloseinako lingine ezemuꞌ gili eleꞌvoleꞌ gehepeve i mini ezela lehete igi minilo. Aza nene lingivizelineꞌ lengemenguꞌ ma sotoꞌ o lengemelineꞌ nene ma ninge mate lingimikamoloseive. Lengemenguꞌ ma sotoꞌ o lengemelineꞌ nene lingivizamivo amuzo mili ha mine giliꞌ li minilizave lo aza nene olovoꞌ ilizaniꞌ aka vele-lengedeleseive.   
\p
\v 14 Idoꞌ Moseꞌ mininguꞌ minave nene Oꞌmosoꞌmo lihime ngemo ngibilineꞌ maꞌmino lengebelalize. Nemuꞌ nene neze zuho luꞌne lengeme nouvoniꞌ mate, soza oꞌmoso nene gelekeleꞌ i-ngidami idoꞌ nosoꞌ niteꞌ ngimilizangutiꞌ nesi nami ngopoꞌni laaꞌ monovomuꞌ nene olovoꞌ igi mehedine ngimilo.  
\v 15 Lingine nene lutine gatine neive ma nene nizave losa gamazi mene lo-lengemelouze. Nemuꞌ nene gamazi loloniꞌ nene gihile nolihe langisetine ningi gili hehe lilo.  
\v 16 Lebeni initeꞌ naaꞌ nouninguꞌ Oꞌmosola isaaꞌ neve lo vaini gomise Guvelesi veꞌmo noꞌnohoꞌ izingutiꞌ nuneꞌ neꞌmo do hamoꞌ o-ledavo naaꞌ nouneꞌ aleve mukiꞌ nene Kilisitoꞌ vanise lepineꞌ neꞌmi gihileꞌve ma nene dalosune. Olo. Idoꞌ lebeni initeꞌ beleti apilo aꞌmingutiꞌ nuneꞌ neꞌmo do hamoꞌ o-ledavo naaꞌ nouneꞌ aleve mukiꞌ nene Kilisitoꞌ okoꞌno hulo hilineꞌ neꞌmi gihileꞌve ma nene dalosune. Olo.  
\v 17 Ee, lebeni initeꞌ naaꞌ nouninguꞌ nene beleti hamokovoꞌ minavosa laza mukitoꞌ aꞌmine beleti hamoꞌ mautiꞌ naaꞌ nounako nemuꞌ nene laza mukitoꞌ hamoꞌ zuho nene none.  
\v 18 Idoꞌ Isilaele aleveti monovomuꞌ mene gililo. Ingine Oꞌmoso imaniꞌ initekutiꞌ naaꞌ ave engiꞌ nene Oꞌmosola vi giꞌmizaaꞌ nave.  
\v 19 Neve nene naza nadive lo lo-lengemelesa noluve. Soza oꞌmoso ngimaniꞌ initeꞌ nene initeꞌ gihile ve lo lamuve. Idoꞌ soza oꞌmoso initeꞌ asiꞌve nesi nene initeꞌ gihile neive lo lamuve.  
\v 20 Oꞌove. Ne neineꞌza Oꞌmosomuꞌ gilamavete soza oꞌmoso ngimaniꞌ initeꞌ nene Oꞌmoso imaaꞌ naavoba sikalahuꞌ goloso ngimaaꞌ naanako nemuꞌ nene sikalahuꞌ goloso ngimaniꞌ initekutiꞌ nisa lingine makaꞌ giꞌmizi minilizave losa gelamuve.  
\v 21 Idoꞌ Guvelesi vela giꞌmizi mini lebeni nosoꞌve naaꞌ niigisa sikalahuꞌ golososi vi giꞌmizi mini sikalahuꞌ goloso ngimaniꞌ nosoutiꞌ nene nalizadoꞌ nomive. Guvelesi vela giꞌmizi mini holomoꞌvelotiꞌ nosoꞌ niteꞌ naaꞌ niigisa sikalahuꞌ golosola vi giꞌmizi engiꞌ holomoloꞌ nosoꞌ nitekutiꞌ nalizadoꞌ nomive.  
\v 22 Idoꞌ neꞌmine oloneꞌ nene Guvelesi ve aza nenitokovoꞌ giꞌmizilizanako lo izeboloꞌ molaloseive. Neꞌmine oloseinako leliꞌ amuzo neꞌmo Oꞌmosoꞌmi amuzo nene ma ivileꞌ aminako lebelamilihe. Olo.   
\s1 Oꞌmosoꞌmi Gulive Do Naba Ilineꞌ Initekovoꞌ Ogo Molo Minelone Lo Pauloꞌ Lo-ngimineꞌ  
\p
\v 23 Ee, lingine initeꞌ mukiꞌ nene ha gopo gamaziꞌvesi nomivo ogo molo olosune laaꞌ naniꞌza aꞌmine initeꞌ ma nete leleꞌmize lamineꞌ ma amilisave. Initeꞌ mukiꞌ nene ha gopo gamaziꞌvesi nomivo ogo molo olosune laaꞌ naniꞌza aꞌmine initeꞌ ma nete monokuꞌ ma hize eleꞌ i-lidamilisave.  
\v 24 Eveneꞌ hamo hamoꞌ lingine nene lengiꞌ okodinemukovoꞌ gilamisa lengiꞌ zuho neemukisi gili mini eveneꞌ ngeleꞌmize lamineꞌ ilizangumuꞌ amuzo mili minilo.  
\v 25-26 Idoꞌ gamazi ma monoꞌ godolouꞌ tiꞌ li gizi nizaniꞌ ma neive:  
\q1 Misubo nesi idoꞌ initeꞌ mataꞌ mukiꞌ aꞌminguꞌ neineꞌ nesi nene  
\q1 Guvelesi veꞌmi initeꞌ ve li gizi nizaniꞌ ve.  
\m Idoꞌ Guvelesi veꞌmine mino eiꞌ evenele leliꞌ di gunoꞌ ilizave losa neineꞌ nenaze. Ize neꞌmine situvakuꞌ nehe maketiloꞌ nehe milangutiꞌ ma meni hizi nali ma nene ha meni hizi nalisaze. Nemuꞌ nene leliꞌ lute do goloso ilineꞌ initeꞌ soza oꞌmoso ngimaniꞌ initekutiꞌ nehe idoꞌ nadiꞌ angutiꞌ ize neve li longoꞌ tongoꞌ amilo.  
\v 27 Idoꞌ eveneꞌ Izesungumuꞌ gili eleꞌvoleꞌ amaveutiꞌ maliꞌmo elese molo-lengedo nosoꞌ niteꞌ nalonge. Alo lo nolivo ma vi ha mili-lingidiliza initeꞌ nene leliꞌ lute do goloso ilineꞌ initeꞌ soza oꞌmoso ngimaniꞌ initekutiꞌ nehe li aꞌminemuꞌ longo tongoꞌ ami ha nalisave.  
\v 28 Ne neineꞌza nosoꞌ niteꞌ nalisa nizavo ve maliꞌmo nosoꞌ niteꞌ mene soza oꞌmoso ngimangutiꞌ ve lavo ma aꞌmine veꞌmi lulomuꞌ nene gilisa namilo.  
\v 29 Lengiꞌ lutine goloso ilingumuꞌ nomive. Aꞌmine lo-lingimive nene aza Guvelesi ve Izesuꞌ evenele aꞌmingutiꞌ nalizaniꞌ nene lihime dalisanako nemuꞌ namilizadoꞌ o neive lo lulouko gelo soza oꞌmoso ngimangutiꞌ ve lo lo-lingimineꞌ noloseinako lingine nikevo eze luloꞌve nene goloso ogalive losa noluve.  
\p Idoꞌ lengitatiꞌ linge malite tiꞌ li lilisave: Laza nosoꞌ niteꞌ mukiꞌ malise amo nalosa gelesoꞌ nene mo naakovoꞌ olosune. Eveneꞌ malite nosoꞌ niteꞌ mamuꞌ nene naloneꞌ lihime daalone li malise ilizangumuꞌ nene engiꞌ luꞌnidoꞌ do molo lazasi malise olone lamolosune.  
\v 30 Laza Oꞌmosola nosoꞌ nitekumuꞌ opoꞌni losa nonaloneꞌ nene eveneꞌ malite aꞌmine Oꞌmosola losa nonaloneꞌ initekumuꞌ nene ve mene malise igi namilizaniꞌ nosoꞌ niteꞌ ninave li lelikumuꞌ gamazi goloso lamilizadoꞌ o neineꞌ nenako nemuꞌ nene ma lamilisave.  
\v 31 Tiꞌ li lilizaha nosoꞌ niteꞌ ma nene ha nalizahe idoꞌ malise ilizahe neꞌmine ilizangukisi idoꞌ initeꞌ ato atoꞌ ilizangukisi nene Oꞌmosoꞌmi gulive do naba ilineꞌ initekovoꞌ igi mili minilo.  
\v 32 Zuda ve he heta atoꞌ ve nGiliki ve he idoꞌ Oꞌmosoꞌmi zuho Kilisitoꞌ evenele he engiꞌ neti veꞌnidoꞌ nene goloso initeꞌ dikeve li olovoꞌ ilizaniꞌ initeꞌ nene di sotoꞌ amilo.  
\v 33 Neniꞌ Pauloꞌ initeꞌ ma oloniꞌ nene neniꞌ neleꞌmize lamineꞌ oloseive losa amolosuve. Naza eveneꞌ mukikumuꞌ gelo Oꞌmosoꞌmo do nguꞌ izelineꞌ akaloꞌ ngeleꞌmize molalohe losa eveneꞌ ato atoꞌ mukiliti luꞌninguꞌ nene lamineꞌ gililiza initekovoꞌ olosuve.   
\c 11  
\p
\v 1 Idoꞌ naza Kilisitoꞌ monovoloꞌ eꞌmeto ogo molo nouvoniꞌ neꞌmine igi linginesi neniꞌ monovoloꞌ ningi neꞌmeti igi mili minilo.   
\s1 Veneꞌ Ingine Nene Engitoꞌ Gizebo I Minave Nizaniꞌ Nenako Oꞌmosola Lili Ma Godoꞌnidoꞌ Initeꞌ Gihi Mini Lilizave Lo Pauloꞌ Lo-ngimineꞌ  
\p
\v 2 Lingine nene naza apize lengemo lo-lingimuvoniꞌ initekumuꞌ nene eꞌmeti gili minaaꞌ naniꞌ nemuꞌ longopoꞌni lo do naba noo-lingiduve.  
\v 3 Idoꞌ naza gamazi mene gili guni i minilizave losa nolo-lingimuve. Veneliti gizebo veꞌine nene vemohoꞌ nene nizave. Idoꞌ vemoholiti nabaꞌine nene Kilisitoꞌ ne neive. Idoꞌ Kilisitoꞌ nabaꞌve nene Oꞌmoso ne neive.  
\v 4-7 Lingine mo gili nizave. Leze monovola nene godotela initeꞌ ma do gehesoꞌ nene monovo neꞌmino neive: Eveneꞌ leze gizebo vete ma neive losa godoteloꞌ nene initeꞌ ma gehaaꞌ noune. Ne neineꞌza Oꞌmoso neꞌmo vemohoꞌ nene eiꞌ avazaha eiꞌ neꞌminosa loloꞌ ogavosa neꞌmo nene vemohoꞌ ivileꞌ igi miniliza initeꞌ nene ma minamaniꞌ ve. Nemuꞌ nene ve maliꞌmo Oꞌmosola lilihe Oꞌmosoꞌmi veletiꞌ gamazi lo sotoꞌ ilihe neꞌmine noilinguꞌ godololoꞌ initeꞌ ma gehe mino lilineꞌ nene eiꞌ godolo nene do uꞌmusupo lizineꞌ geleleseinako nemuꞌ nene initeꞌ ma gehamosa lilive. Ne neineꞌza Oꞌmosoꞌmo veneꞌ nene vemohoꞌ avazaha neꞌmine loloꞌ ogo hize eleꞌ ilingumuꞌ ve lo do sotoꞌ o-dineꞌ ve. Nemuꞌ nene veneꞌ ma aza Oꞌmosola lilihe Oꞌmosoꞌmi veletiꞌ gamazi ma lo sotoꞌ ilihe neꞌmine noilinguꞌ godololoꞌ initeꞌ ma gehamo lilineꞌ nene eiꞌ godoloꞌve ma nene do uꞌmusupo lize-deleseinako godololoꞌ initeꞌ gehosavoꞌ lilive. Idoꞌ veneꞌ ma aza godololoꞌ initeꞌ ma gehamilineꞌ nene monovo golosolokovoꞌ monaaꞌ aniꞌ alu nene godoꞌnidoꞌ initeꞌ gihamaaꞌ naanako aza nene engiꞌ neꞌmine mineleseinako godolo zopovo nene monovo golosoloꞌ monaaꞌ aniꞌ alu huki-ngidaaꞌ aniꞌ neꞌmini huki-dilisave. Idoꞌ veneꞌ aza godoꞌne zopovo huki-nidikevo novozo helo minalove lo gelo ma godololoꞌ nene initeꞌ ma gehelive.  
\v 8 Ee, veneꞌ ingine vemoholiti avazaha mini hizi eleꞌ i-ngidilizadoꞌ minaniꞌ ve. Oꞌmoso aza vemohoꞌ nene ganaꞌ venetatiꞌ do sotoꞌ o-davo sotoꞌ ineꞌ nomive. Veneꞌ nene ganaꞌ vemohotatiꞌ do sotoꞌ o-davo sotoꞌ ineꞌ ve.  
\v 9 Idoꞌ vemohoꞌ nene veneꞌ nemuꞌ ve losa do sotoꞌ o-damive. Asi vemohokumuꞌ ve losa veneꞌ nene do sotoꞌ molo-dineꞌ ve.  
\v 10 Nemuꞌ nene angeloꞌ ingine ningi vaꞌninginemuꞌ gili nizave li ngolize izilizangisi veneꞌ ingine godoꞌnidoꞌ nene vaꞌningi amuzoloꞌ none lisa initeꞌ ma gihisa minilizave.  
\v 11-12 Ee, veneꞌ ingine vaꞌningi amuzoloꞌ minilisaha Oꞌmoso aza veneꞌ nene ganaꞌ vemohotatiꞌ do sotoꞌ o-davo nelotiꞌ vemohoꞌ nene venetatiꞌ sotoꞌ igaꞌ naanako vemohoꞌ minamadiniko venekisi minamadine. Idoꞌ aꞌmineꞌmine ogo veneꞌ minamadiniko vemohokisi minamadine. Idoꞌ initeꞌ mukiꞌ Oꞌmosolatiꞌ sotoꞌ aniꞌ nemuꞌ nene Guvelesi veꞌmi evenele laza giluneꞌ nene vemohoꞌ dizi minikevo veneꞌ limi minikevo minamo lisiheꞌ ogovoꞌ none.  
\v 13 Langisetine ningi gili hehe lilo. Veneꞌ maliꞌmo godololoꞌ initeꞌ gehamo eveneꞌ veꞌnidoꞌ Oꞌmosola lilineꞌ nene edelihe. Ne mo edamoloseive.  
\v 14 Eveneꞌ ingine gozopoꞌ vomilatiꞌ igi mili minaniꞌ monovo danavamuꞌ gililizaniꞌ nene tiꞌ li gililisave: Vemohoꞌ ingine godoꞌine zopovo nene hukami hulikilizaniꞌ nene edamoloseiha  
\v 15 venelite godoꞌine zopovo haꞌna hulikilizaniꞌ nene Oꞌmoso neꞌmo godoꞌnidoꞌ gehaaꞌ angiliꞌ neꞌmine nene okoꞌnineꞌmi gonolise neꞌminosa ngeme neive.  
\v 16 Ne neineꞌza ve maliꞌmo aꞌmine noluvongumuꞌ nene lolize gani ma lilineꞌ nene nazasi idoꞌ neze gonoꞌneuꞌ minavesi laza veneꞌ haza initeꞌ godoꞌnidoꞌ gihami mini Oꞌmosola lilizave lo gele ngemesaꞌmune. Idoꞌ Oꞌmosoꞌmi zuho Izesuꞌ evenele gohi masi idoꞌ muliseꞌine miniꞌmi monanguꞌ nesi nene aꞌmine monovomuꞌ gili ngimisaꞌmave.   
\s1 Kolidi Aleve Lebeni Initeꞌ Nalisa Di Nubuho Igi Minanguꞌ Monovo Di Goloso Igi Minaaꞌ Aniꞌ Monovomuꞌ Nene Pauloꞌ Lineꞌ  
\p
\v 17 Idoꞌ naza initeꞌ monovo ma di goloso igaꞌ naniꞌ ma giluvoniꞌ nemuꞌ nene siza lo do naba o-lengedamo gatine do loloze. Gililo. Lingine nosoꞌ nitekisi lebeni initekisi nalisa di nubo igaꞌ naniꞌ neꞌmo nene monokuꞌ hize eleꞌ o-lengedeleseineꞌza lingine igi di nubo anguꞌ nene monovo lamineꞌ eꞌmetisaꞌmaniꞌ neꞌmo nene do goloso o-lengedaaꞌ neive.  
\v 18-19 Nene eveneꞌ malite tiꞌ li li-nimangumuꞌ noluve: Lingine nosoꞌ nitekisi lebeni initekisi nalisa di nubo anguꞌ nene mine hamoꞌ igi lebeni initeꞌ namisa hizi hoꞌli minaaꞌ nave. Idoꞌ lengiꞌ mulisetine nene hoꞌli izeꞌ mili vi ato atoꞌ ma ilizaniꞌ nene lengiꞌ mulisetinguꞌ eveneꞌ lisiheꞌ monovo laminekovoꞌ igi mili minaaꞌ ave ma nene sotoꞌ pizi minilizangumuꞌ nene neꞌmine ilisanako nemuꞌ nene aꞌmine gamazi li-nimangutiꞌ linge ma nene mo laminetoꞌ noloseive losa gele nouve.  
\v 20-21 Neze nene tiꞌ li li-nimave: Nosoꞌ niteꞌ igi nalisa adoꞌ nene gomuꞌ ma ave ingine alingeꞌ ma alizavemuꞌ nene gizebo ami nosoꞌ niteꞌ nene ni gatuꞌine igaꞌ idoꞌ noso ni negi hizaaꞌ ikevosa alingeꞌ ave nene nami gaꞌna hili di vaaꞌ nave. Nemuꞌ nene lingine lebeni initeꞌ nalone li igi di nubo igi ni minaaꞌ naniꞌ nene Guvelesi veꞌmi lebeni initeꞌ nonube li haza initeꞌ nene ni minaaꞌ nave.  
\v 22 Nadive. Lingine nosoꞌ niteꞌ ni miniliza numudine nene nomihe. Idoꞌ lingine Oꞌmosoꞌmi zuho mulise nemuꞌ gilavo haza initeꞌ loloꞌ ogavo leze zuho linge ma initeꞌine nomineꞌ mini nosoꞌ niteꞌ di amilizave nene ngovozo hililizave lisa igaꞌ nahe. Nemuꞌ naza nadive lo-lengedelove. Longopoꞌni lo do naba o-lengedelohe. Eꞌe, mo oꞌove. Neꞌmine mo amolosuve.   
\s1 Lebeni Initeꞌ Naaꞌ Monovo Nene Di Gopo Igi Mini Nalizaniꞌ Nene Oꞌmosoꞌmo Lihime nGemalive Li Monovoꞌine Di Lisiheꞌ I Mini Nalizangumu Lo-ngimineꞌ  
\p
\v 23 Naza lebeni initeꞌ naakumuꞌ lo-lingimuvoniꞌ gamazi nene Guvelesi velatiꞌ giluvoniꞌ nenako lingine aꞌmidokovoꞌ eꞌmeti minilizanako eꞌmetamave. Naza tiꞌ lo lo-lingimuvoniꞌ ma neive: Zudaꞌ aza Izesuꞌni lovo ve ngelebizineꞌ gameneuꞌ nene olihe lovo ve ngelebizamivo holukaꞌ izipahala zuhosi minanguꞌ Guvelesi ve Izesuꞌ aza beleti do  
\v 24 Oꞌmosola opoꞌni lo apilo izipahala zuho nongemo tiꞌ lo lineꞌ: Mene neniꞌ meꞌmeleꞌne lengikumuꞌ ve losa nolingimuze. Nenikumuꞌ gili minilizangumuꞌ di niꞌmi vi minilo.  
\v 25 Idoꞌ aꞌmineꞌmine ogo veꞌnine ni osuꞌ likevo vaini nososi minineꞌ gomise ma do oto tiꞌ lo lineꞌ: Gomiseuꞌ mene neniꞌ vaniseꞌne Oꞌmosoꞌmo lo huko-lingidineꞌ gamazi gosohoꞌ ma nene do amuzo molalingumuꞌ vaniseꞌne mene di nalo. Idoꞌ di niꞌmi vi mini naliza gamene mukikuꞌ nene nenikumuꞌ gili mini naaꞌ ilizaniꞌ ve.  
\v 26 Neꞌmine lineꞌ nenako lingine lebeni initeꞌ vaini nososi beleti nesi naliza gameneloꞌ gameneloꞌ nene Guvelesi ve hilineꞌ gamazi nene li soto sotoꞌ iꞌmi vi minilisave. Idoꞌ neꞌmine iꞌmi vi nizavo Guvelesi ve tineꞌ molo alineꞌ gamene aliteleseive.   
\p
\v 27 Nemuꞌ nene ve ma ingine Guvelesi veꞌmi lebeni initeꞌ vaini nososi beletisi nene monovoꞌine di lisiheꞌ ami gopo haza nalizaniꞌ nene Guvelesi veꞌmi meꞌmelesi vanisesi nene di gopo ikevosa lihime dalisave.  
\v 28-29 Ve ma ingine Guvelesi veꞌmi meꞌmele vanise nene kekeize initeꞌ neive li gilami gopo ma nalizaniꞌ nene Oꞌmosoꞌmo lihime ngemelidoꞌ o neineꞌ nenako nemuꞌ nene Guvelesi veꞌmi meꞌmele vanise nali ma gomuꞌ nene lutinguꞌ monovo goloso nolingumuꞌ nene viseꞌ igi di hulisavoꞌ nene nalo.  
\v 30 Ee, lebeni initeꞌ gopoꞌ napa naaꞌ ave nene Oꞌmosoꞌmo lihime ngemelineꞌ o neineꞌ nenako lengikutiꞌ linge mukiꞌ ingine neꞌmine igi gopoꞌ napa nadiꞌmo gilizevo igi initeꞌ gizi davo linge ma nene hili osuꞌ laniꞌ ve.  
\v 31 Laza neꞌmine manaꞌmine olo ma leliꞌ monovotemuꞌ gomuꞌ gelo do lisiheꞌ ogosa neꞌmine ogaꞌ unidiniko Guvelesi ve neꞌmo lihime lemo do goloso o-ledamidine.  
\v 32 Idoꞌ idise mene gameneuꞌ Guvelesi veꞌmo lihime lemeꞌmo novineꞌ nene aza eveneꞌ linge ma Oꞌmosomuꞌ gilamave lihime ngemo do goloso o-ngedelinguꞌ nene lezesi neꞌmine o-ledalove losa monovote goloso nene do sotoꞌ o-ledo vete zopovo siꞌzeloningumuꞌ nene neꞌmine nooloseive.  
\v 33 Nemuꞌ nene neze zuho mate, nosoꞌ nitekisi lebeni initekisi nalisa igi di nubo niigi ma nene lingine zuho amaniꞌ nene ikevo makaꞌ nalone li gizebo mini ikevosavoꞌ nene nalo.  
\v 34 Lingine igi di nubo ilizanguꞌ nene ve linge ma gomuꞌ igi heteli nizavo gaꞌna ngolavo alingeꞌ alizavemuꞌ gilami gomuꞌ imi mini nosoꞌ niteꞌ nalizaniꞌ neꞌmo Guvelesi veꞌmo lihime lengemelineꞌ akauꞌ mini milikelizanako nemuꞌ nene nosoꞌ niteꞌ ngomo numuꞌnidatiꞌ gomuꞌ nikisavoꞌ nene alizave. Idoꞌ nemuꞌ gamazi gohi ma lo-lengemeloniꞌ neineꞌ nene naza lingine nizada alonguꞌ nene lo-lengemelesuve.   
\c 12  
\s1 Sikalahuliꞌmo Monoliꞌmi Amuzo Ato Atoꞌ Lehize-ledaaꞌ Neingumuꞌ Nene Pauloꞌ Lo-ngimineꞌ  
\p
\v 1 Idoꞌ neze zuho mate, Oꞌmosoꞌmi Sikalahuliꞌmo monoliꞌmi amuzo ato atoꞌ lehize-ledaaꞌ neineꞌ monovomuꞌ nene gilami minikelizaze. Lo-lengemeloze. Gililo.  
\v 2 Lingine gomuꞌ Oꞌmosomuꞌ gilami nizavo gatine hizi gopo lengeleꞌmizi vadaa vada nene naniteꞌ ngeꞌmeti vaaꞌ aniꞌ neve. Lingine soza oꞌmoso gamazi lisaꞌmaniꞌ initekovoꞌ ngeꞌmeti vaaꞌ aniꞌ nene mo gili nizave.  
\v 3 Idoꞌ lingine aꞌmine soza oꞌmosovoꞌ ngeꞌmetaaꞌ ave nizanako neꞌmo nene Oꞌmosoꞌmi Sikalahuliꞌmi monovomuꞌ gilami nilisanako nemuꞌ ma lo-lengemelove. Ve maliꞌmi lulouꞌ Oꞌmosoꞌmi Sikalahuliꞌmo gono nodavo Izesungumuꞌ nene dovo ledevoka ma lamoloseive. Idoꞌ Sikalahuliꞌmo lulouꞌ gono damivo minelive neꞌmo nene Izesungumuꞌ nene Guvelesi ve initeꞌ mukitoꞌ gizebo o minive neive lo ma lamoloseive. Nemuꞌ eveneꞌ ma ingine soza li Oꞌmosoꞌmi Sikalahuꞌ aza luteuꞌ gono nodavosa gamazi nolo-lingimune li nilavo ma nene soza nilahe lamineꞌ nilahe nemuꞌ gamaziꞌningutiꞌ nene ningi gili di sotoꞌ ilisave.   
\p
\v 4 Monoliꞌmi amuzo nene ato atoꞌ mukiꞌ neineꞌza aꞌmine amuzo lehize-ledaaꞌ ive nene Oꞌmosoꞌmi Sikalahuꞌ hamoꞌ neꞌmovoꞌ nene mukiꞌ lehize-ledaaꞌ neive.  
\v 5 Idoꞌ monoꞌ gonoloꞌ ve nene gono ato atoꞌ mukiꞌ nene ha dalisaniꞌza Guvelesi ve hamokumukovoꞌ nene gono dalisave.  
\v 6 Idoꞌ gono daaꞌ amuzo nene ato atoꞌ vaiꞌ goloso neineꞌza aꞌmine amuzo mukiꞌ do sotoꞌ ive Oꞌmoso hamoꞌ neꞌmo evenele mukitoꞌ nene do sotoꞌ o-ledavo gonoꞌve nene daaꞌ noune.  
\v 7 Oꞌmosoꞌmi Sikalahuꞌ neꞌmo leliꞌ mukiꞌ nene leleꞌmize lamineꞌ ilingumuꞌ monoliꞌmi amuzo ato atokutiꞌ nene izeꞌ molo Oꞌmosoꞌmi evenele nene hamo hamoꞌ lehize-ledaaꞌ neive.  
\v 8 Luvoniꞌ neꞌmino neineꞌ nene nelotiꞌ ningo gelelesune. Ve ma nene Sikalahuliꞌmo hize eleꞌ o-divo monoꞌ gamazi nene otohato gamazi laaꞌ neive. Idoꞌ ve gohi ma nene aꞌmine Sikalahuꞌ neꞌmo monoꞌ monovo gelaaꞌ amuzo nene lehize-davo laaꞌ neive.  
\v 9 Idoꞌ ve gohi ma nene vauve elo gele eleꞌvoleꞌ ogaꞌ amuzo nene aꞌmine Sikalahuꞌ malotiꞌ daaꞌ neive. Idoꞌ hamoꞌ Sikalahuꞌ maꞌmo nene eveneꞌ goloso galasa do guno o-ngedaaꞌ amuzo nene eveneꞌ atoꞌ gohi ma nene ha emeleseive.  
\v 10 Idoꞌ ve gohi ma nene amuzo malehe initeꞌ do sotoꞌ ogaꞌ amuzo nene emo ma nene Oꞌmosoꞌmi veletiꞌ gamazi lo sotoꞌ ogaꞌ amuzo nene emo ve gohi ma nene gamazi ato atoꞌ izeꞌ molo Oꞌmosoꞌmi Sikalahutatiꞌ sotoꞌ ineꞌ nene do kegeso idoꞌ atokutiꞌ sotoꞌ ineꞌ nene ningo do kegeso lo sotoꞌ ogaꞌ amuzo nene emo idoꞌ ve gohi ma nene noꞌine ato atokutiꞌ laaꞌ amuzo nene emo ve gohi ma nene aꞌmine noꞌine ato atoꞌ do velepeꞌ izo laaꞌ amuzo nene emaaꞌ neive.  
\v 11 Aꞌmine neꞌmine amuzo ato atoꞌ mukiꞌ nene aꞌmine Sikalahuꞌ hamoꞌ neꞌmovoꞌ nene do sotoꞌ ogo eiꞌ lulolokovoꞌ aꞌmine lemelesa gala gilineꞌ amuzo nene naniꞌmine amuzo lemelesa gilihe nene leliꞌ eveneꞌ hamo hamoꞌ nene izeꞌ molo lemaaꞌ neive.   
\p
\v 12 Idoꞌ neꞌmino neive: Leliꞌ okode nene initeꞌ hamokovoꞌ neineꞌza aꞌmine okodeloꞌ minaaꞌ naniꞌ initeꞌ gizede ade nevoꞌmine nene guliveꞌine ato atokisi vaiꞌ mukiꞌ nizave. Idoꞌ aꞌmineꞌmine ogo laza nene eveneꞌ mukiꞌ noneꞌza laza Kilisitoꞌ evenele zuho nene Kilisitoda giꞌmizo mino eiꞌ okoꞌnoloꞌ gizene ana initeꞌ ato atoꞌ nevoꞌmine nene loloꞌ ogo mino okoꞌno neꞌminosa hamoꞌ nene none.  
\v 13 Oꞌmosoꞌmi Sikalahuꞌ hamoꞌ neꞌmo leliꞌ mukita omo holavo laza mukiꞌ nene noso holokunivo aꞌmine Sikalahuꞌ hamoꞌ nene mo lute mukikuꞌ nene gono do minavo hamoꞌ zuho loloꞌ okune. Ee, lelikutiꞌ linge ma nene Zuda ve nonivo ma nene heta atoꞌ ve nGiliki ve nizavo idoꞌ ma nene eveneꞌ maloꞌ goboni ve nizavo ma nene neꞌmine ami haza minikevo noneꞌza laza eveneꞌ ato atoliꞌmine minunekisi nene hamoꞌ zuho loloꞌ ogo none. Neꞌmino nounako nemuꞌ laza nene eiꞌ Kilisitoꞌ okoꞌno hamoꞌ neꞌminosa nene none.  
\v 14 Idoꞌ okode nene gizede ade gote vete initeꞌ mukiꞌ nene neive. Okode nene lingelatikovoꞌ nomive.  
\v 15 Nemuꞌ nene gizede neꞌmo naza nene ade neꞌmine nomuvonako nemuꞌ nene okode lingelatiꞌ nomuve lo gelo gizedeꞌmo lilineꞌ nene gosohoꞌ loloseinako gizede nene mo okodeꞌmi lingelatiꞌ ne neive.  
\v 16 Idoꞌ gate neꞌmo naza nene vete neꞌmine nomuvonako nemuꞌ nene okode lingelatiꞌ nomuve lo gelo gate neꞌmo lilineꞌ nene gosohoꞌ loloseinako gate nene mo okode lingelatiꞌ ne neive. Idoꞌ aꞌmineꞌmine ogo Izesuꞌ evenele zuho ma nete linge ma gono daaꞌ amuzo di minaniꞌ neꞌmino ma damunako Izesuꞌ evenele zuhoutiꞌ minamo nolosune lo ma lamolosune. Lazasi nene mo Izesuꞌ evenelevoꞌ nene none.  
\v 17 Idoꞌ okode mukiꞌ nene vetevoꞌ minidiniko initeꞌ nene zalatiꞌ gilunidine. Idoꞌ okode mukiꞌ nene gatevoꞌ minidiniko initeꞌ unuvo zalatiꞌ gilunidine. Idoꞌ aꞌmineꞌmine ogo Izesuꞌ evenele mukiꞌ laza monokuꞌ hamoꞌ amuzo do hamoꞌ gono dunidiniko ma gono nene zamote dadine.  
\v 18 Neꞌmine o neineꞌza neꞌmino nomive. Oꞌmoso neꞌmovoꞌ nene gizede ade gote vete initeꞌ mataꞌ mukiꞌ okodeloꞌ neineꞌ nene gono ato atotoꞌ hulo-ngedelesa gilidoꞌ hulo-ngedeꞌmo vo neive. Hulo-ngedeꞌmo vo neinako Izesuꞌ evenele lelikisi nene aꞌmineꞌmine ogo gono ato atotoꞌ hulo-ledeꞌmo vo neive.  
\v 19 Neꞌmine o neineꞌza okoꞌdeꞌmi initeꞌ ato atoꞌ gizede ade gote vete nene hamoꞌ initekovoꞌ minidiniko okode nene ma minamidine.  
\v 20 Minamidiba neꞌmino nomive. Asi okodeloꞌ gizede ade gote vete initeꞌ mukiꞌ nene neivosa okodeꞌve nene hamoꞌ loloꞌ ogo neive.  
\v 21 Idoꞌ ade nene nomidiniko vete nene lamineꞌ ha minamidiinako nemuꞌ nene vete neꞌmo ademuꞌ geze nene minamilineꞌ naza nene lamineꞌ ha minelesuve lo ma lamoloseive. Idoꞌ godote neꞌmo gizedemuꞌ gaza minamilineꞌ naza nene lamineꞌ ha minelesuve lo ma lamoloseive. Nemuꞌ nene laza aꞌmineꞌmine ogo Izesuꞌ evenele linge mamuꞌ lingine gono daniꞌ neꞌmo leliꞌ nene hize eleꞌ o-ledesaꞌmineꞌ nenako lingine minamilizaniꞌ nesi ha lamineꞌ minelesune lo ma lamolosune.  
\v 22 Mo oꞌove. Neꞌmine losoꞌ nene nomive. Okode linge mamuꞌ ninge gehe-do nge lamida neive laaꞌ nounida nene ma minamidiniko okode nene ma mine lamineꞌ ogo minamidine.  
\v 23 Idoꞌ okodeꞌmi initeꞌ mamuꞌ nene initeꞌ lamineꞌ nomive lo gelo ma nene aꞌmida nene okodeloꞌ initeꞌ ma do hito do lamineꞌ ogaꞌ noune. Idoꞌ okodeꞌmo ovozo hilineꞌ initeꞌ nene do hito gonolise ogaꞌ nouneꞌza  
\v 24-25 lovozo amineꞌ initeta nene ha sotoꞌ igi minaaꞌ nave. Ne neiha okodeloꞌ gizede ade gote vete neꞌmine initeꞌ mataꞌ mukiꞌ ingine nene ge dovo ledevoꞌ o-nede ne dovo ledevoꞌ o-gede li izeꞌ milami mukiꞌ nete ge nasahiliꞌ o-nede ne nasahiliꞌ o-gede livoꞌ minilizave lo Oꞌmoso aza okode lingela ma lamineꞌ o guno amineꞌ gelo minida nene lamineꞌ i minada nene ngivileꞌ ivosa di lamineꞌ i-ngidilizave lo okode nene do hamoꞌ ogo do sotoꞌ ineꞌ ve.  
\v 26 Nemuꞌ nene okode lingela mulumo alumo initeꞌ ma sotoꞌ ineꞌ nene okode mukiꞌ nene mulumo makatoꞌ gilaaꞌ nave. Idoꞌ okode lingela ma di naba i-di neꞌmine aniꞌ nene okode linge malasi nene di hamoꞌ igi ngolize izaaꞌ nave. Idoꞌ leliꞌ okodela sotoꞌ ogaꞌ neineꞌ monovo neꞌmino Izesuꞌ evenele zuho lelikutiꞌ eveneꞌ ma ingine mulumo initeliꞌmi lulouꞌ nizavo ma eveneꞌ lingela lazasi nene mulumoꞌine gelo hize eleꞌ o-ngedelone. Idoꞌ aꞌmineꞌmine ogo lelikutiꞌ eveneꞌ mamuꞌ di naba i-dikevo ma nene eveneꞌ lingela lazasi nene aꞌminemuꞌ lolize izo minelone losa noluve.   
\p
\v 27 Nemuꞌ nene Izesuꞌ zuho lingine nene Kilisitoꞌ okoꞌno hamoꞌ neꞌmine mini okoꞌnoloꞌ gizene ana golo vele nevoꞌmine initeꞌve liliꞌ igi ato atoꞌ miniꞌmi vi mini ezemuꞌ gono di lingine hamo hamoꞌ ezela giꞌmizi nizave.  
\v 28 Ee, neꞌmine igi nizavo Oꞌmosoꞌmi zuhoti muliseuꞌ ganaꞌ dizi minave nene aposolo minilizave lo Oꞌmosoꞌmo linge ma nene do ote-lede neive. Idoꞌ aꞌmidotiꞌ nene eze veletiꞌ gamazi li sotoꞌ igaꞌ ave polohete nene minilizave lo linge ma nene do ote-ngede neive. Idoꞌ aꞌmidotiꞌ nene Izesuꞌ monoꞌ apizi ngimaaꞌ ave minilizave lo linge ma nene do ote-ngidineꞌ ve. Idoꞌ nelotiꞌ nene amuzo malehe suno di sotoꞌ igaꞌ ave nene do ote-ngedo eveneꞌ goloso galasa di lamineꞌ i-ngidaaꞌ amuzo di minavesi do ote-ngedo idoꞌ gonoloꞌ gizebo lamineꞌ ilizave nesi do ote-ngedo idoꞌ eveneꞌ ma nene noꞌine atokutiꞌ gili lamaaꞌ angutiꞌ laaꞌ ilizave nesi nene do ote-ngidineꞌ ve.  
\v 29 Neꞌmine ineꞌza lingine aposolo nene mukitoꞌ minaniꞌ nehe. Oꞌmosoꞌmi veletiꞌ gamazi li sotoꞌ igaꞌ ave nene mukitoꞌ minaniꞌ nehe. Idoꞌ monoꞌ apizi ngimaaꞌ ave nene mukitoꞌ minaniꞌ nehe. Idoꞌ amuzo malehe suno di sotoꞌ igaꞌ gono nene mukitoꞌ daniꞌ nehe.  
\v 30 Idoꞌ eveneꞌ goloso galasa do lamineꞌ o-ngedaaꞌ amuzo nene mukitoꞌ di minaniꞌ nehe. Idoꞌ noꞌine atokutiꞌ gili lamaaꞌ angutiꞌ nene mukitoꞌ laaꞌ naniꞌ nehe. Idoꞌ aꞌmine gili lamaaꞌ aniꞌ noꞌningutiꞌ nene ma likevo mukitoꞌ di velepeꞌ izi laaꞌ naniꞌ nehe. Oꞌove. Mo neꞌmino nomive. Neꞌmine manaꞌmine amuzo nene eveneꞌ mukitoꞌ di minamilisave. Linge nete atoꞌ ma di minikevo idoꞌ lingela nete nene atoꞌ ma di minilisave.  
\v 31 Ne neiha lingine nene polohete loloꞌ ogaꞌ amuzo nehe monoꞌ laaꞌ amuzo nehe eveneꞌ do lamineꞌ o-ngedaaꞌ amuzo nehe neꞌmine amuzo ato atoꞌ mukiꞌ miniꞌmi vangutiꞌ dizo nolineꞌ amuzo nene do minelone li amuzo milalo.   
\c 13  
\s1 Lute nGemaaꞌ Nene Initeꞌ Naba Neive Lo Neꞌmi Monovo Lo-ngimineꞌ  
\p Idoꞌ naza nene igi mili minilizaniꞌ aka lamineꞌ ma atoliꞌmine ogo neineꞌ neꞌmi monovo nene lengelebizo lo-lengemelove. 
\v 1 Oꞌmosoꞌmi Sikalahuꞌ aza note atokutiꞌ laaꞌ amuzo nene vauve elo lemavosa eveneliti noꞌningutiꞌ nene ha laaꞌ nooloneꞌ idoꞌ angeloliti noꞌningutikisi nene ha laaꞌ nooloba laza lute nene eveneꞌ aꞌnene ma ngemamosoꞌ neꞌmo laza nene ngeu ngeu lo gamazi lamaaꞌ neineꞌ initeꞌ peloꞌ nevoꞌmine mino haza initeꞌ loloꞌ olosune.  
\v 2 Idoꞌ Oꞌmosoꞌmi Sikalahuꞌ neꞌmo hize eleꞌ o-ledavosa Oꞌmosoꞌmi veletiꞌ gamazi lo sotoꞌ ogaꞌ amuzo dizo minineꞌ do mino Oꞌmosoꞌmi gamazi sunoꞌ minineꞌ mukiꞌ nene gelo monovoꞌvesi gele okuꞌ lo mino Oꞌmosomuꞌ gele eleꞌvoleꞌ ogaꞌ nouneꞌ lelita nene naba minavo neꞌmo golo mamuꞌ akatelotiꞌ olovoꞌ ozo lokunivo olovoꞌ ilidoꞌ o neivosa noloneꞌza eveneꞌ lute ngemesaꞌmo mineloneꞌ neꞌmo nene mo haza initeꞌ loloꞌ ogo minelesune.  
\v 3 Idoꞌ laza initeꞌ matate nene eveneꞌ gohoꞌ gahaliꞌ ngemeꞌmo vo mino idoꞌ Kilisitoda giꞌmize lamineꞌ ogo minuneꞌ nemuꞌ eiꞌ biluvaꞌve nete leliꞌ okode nene giziꞌ voti libili hililisa ikevo nemuꞌ nene laza neꞌmine i-lidikelizave lo Izesuꞌnimuꞌ gelamune lo golise gelo olovoꞌ amoloneꞌ nene monokuꞌ mo amuzo molokune lo gelo okode nene ha do dizelonidoꞌ o noloseive lo golise gelamo gele ngemaaꞌ nooloba laza eveneꞌ lute ngemamosoꞌ neꞌmo Kilisitongumuꞌ okode hulo helelonidotiꞌ nene Oꞌmosoꞌmo do naba ma o-ledamoloseive.   
\p
\v 4 Idoꞌ lute nene eveneꞌ ma ngemaaꞌ noogo ma ingine lizeboloꞌ molalineꞌ initeꞌ ikevo ma nene laza lizeboloꞌ molamivo mino hongu lo minelesune. Idoꞌ lute ngemaaꞌ nounive nene do laminekovoꞌ o-ngedo mino initeꞌ lamineꞌ engita ma sotoꞌ ogavo ma laza lelita sotoꞌ ilinako lo engikumuꞌ muludeuꞌ goloso gelamolosune. Idoꞌ eveneꞌ lute ngemaaꞌ noogo ma leliꞌ okode nene do hozi lo gavele ve gehesamolosune.  
\v 5 Idoꞌ eveneꞌ lute ngemaaꞌ noogo ma hokolizeꞌ o-ngedamo mino ledenihe minamo lizeboloꞌ molamivo mino lihime mili lidikevo ma aꞌminemuꞌ gelamo minelesune.  
\v 6 Idoꞌ eveneꞌ lute ngemaaꞌ noogo ma ingine goloso initeꞌ di aka golosoloꞌ nivavo ma laza gizeꞌ o-ngedo lolize izamo ingine monoꞌ aka gihileloꞌ nivavo ma aꞌminemuꞌ nene lolize izelone.  
\v 7 Idoꞌ eveneꞌ lute ngemaaꞌ noogo ma nadiꞌ nadiꞌ i-lidilizahe nemuꞌ lamo ha geho mino engikumuꞌ nene eveneꞌ lamineꞌ nizave lo gele eleꞌvoleꞌ o-ngede mino engita initeꞌ lamineꞌ mukiꞌ nene mo sotoꞌ o ngemeleseive lo gelo minelone. Idoꞌ lute ngemaaꞌ nouneꞌ nemuꞌ nene ingine naniteꞌ naniteꞌ di gopo i-lidilizahe nene ha ningeꞌmo voovoꞌ minelesune.   
\p
\v 8 Lute ngemaaꞌ monovo nene mo osuꞌ lamoloseiha Oꞌmosoꞌmi Sikalahuꞌ neꞌmo amuzo ngemavo eveneꞌ ma Oꞌmosoꞌmi veleutiꞌ gamazi li sotoꞌ igaꞌ niilizahe idoꞌ Oꞌmosoꞌmi Sikalahuliꞌmo gono davo noꞌine atokutiꞌ laaꞌ niilizahe idoꞌ monoꞌ monovo gili lamineꞌ igi laaꞌ niilizahe aꞌmine laaꞌ niiliza initeꞌ nene Oꞌmosoꞌmo lavo osuꞌ loloseive.  
\v 9 Ee, idise geleꞌmo nouneꞌ initeꞌ nene ngelo gele osuꞌ lo gelamolosune. Idoꞌ Oꞌmosoꞌmi veletiꞌ gamazi lo sotoꞌ oloneꞌ nene ngelo lo sotoꞌ ogo osuꞌ lamolosune.  
\v 10 Ne neiha alingeꞌ nene initeꞌ matakumuꞌ gele osuꞌ lo gelesoꞌ gamene alitelinguꞌ nene initeꞌ matakumuꞌ idise olihe gele osuꞌ lamo noneꞌ neꞌmino minamo gele osuꞌ lo gelelesunako nemuꞌ ingine initeꞌ mamuꞌ li-limilizadoꞌ amivo gonoꞌine osuꞌ lavo Oꞌmosoꞌmi veletiꞌ gamazi li sotoꞌ igaꞌ avesi Sikalahuliꞌmo luꞌninguꞌ gono davo noꞌine atokutiꞌ laaꞌ avesi idoꞌ monoꞌ monovo gili guni i mini aꞌminemuꞌ li-limaaꞌ avesi nene gohi li-limamilisave.   
\p
\v 11 Nene neꞌmino neive. Laza gomuꞌ izipe namuno neꞌmino minuneꞌ gamene mauꞌ nene izipe namunote igi mili minaaꞌ aniꞌ monovoloꞌ do molo gamazi nene lo minuneꞌ ve. Idoꞌ lute gateuꞌ giluneꞌ nene gele nge lamo izipe namunote gilaaꞌ aniꞌ gaꞌine neꞌminosa nene gele minune. Laza gomuꞌ nene izipelite initeꞌ monovo gizekaꞌna hizi ningaaꞌ adiꞌmino gizekaꞌna hizo ningaaꞌ uneꞌ ve. Neꞌmine ogaꞌ uneꞌza alingeꞌ laza lodive ogosa izipeliti monovoloꞌ neꞌminosa ogo molo ogaꞌ uneꞌ ma nene hulo mehedela okune. Idoꞌ aꞌmineꞌmine ogo idise Oꞌmosomuꞌ geleꞌmo nouneꞌ nene izipe namuno gaꞌine gilaaꞌ naniꞌ neꞌmino gelo mino laza gele guno ogo gele osuꞌ losaꞌmuneꞌza alingeꞌ eveneꞌ lodive gilaaꞌ naniꞌ neꞌmino gelo laza ezemuꞌ gele guno ogo gele osuꞌ lolosune.  
\v 12 Ee, idise gamenela Oꞌmosomuꞌ ningo gelaaꞌ nouneꞌ nene neꞌminosa ningo gelaaꞌ noune: Oꞌmoso mehedela neivo gapo gapoꞌ golosouꞌ velelatiꞌ noningunivo sotoꞌ o guno amivo ninge guno amaaꞌ nouneꞌ neꞌminosa ne neive. Idise nene ezemuꞌ ningo gele guno osaꞌmuneꞌza alingeꞌ nene vetela ogavo aza leliꞌ vodeuꞌ mukiꞌ ninge osuꞌ lo minaaꞌ neineꞌ neꞌmino ezesi ninge guno ogo ezemuꞌ gele osuꞌ lolosune. Neꞌmine olosunako aꞌmine luvoniꞌ monoꞌ gono daaꞌ aniꞌ aleve ingine Oꞌmosomuꞌ li-limaaꞌ aniꞌ gonoꞌine nene osuꞌ loloseive.  
\v 13 Nene osuꞌ loloseiha monovo sito hamo adoꞌ Oꞌmosomuꞌ gele eleꞌvoleꞌ ogaꞌ idoꞌ Oꞌmosoꞌmo initeꞌ lamineꞌ oꞌmo vilingumuꞌ gelo gilingili ogo gizebo ogo minaaꞌ idoꞌ eveneꞌ lute ngemaaꞌ monovo nene osuꞌ lami miniviꞌ miniviꞌ igi ha minilisave. Idoꞌ aꞌmine monovo sito hamo neutiꞌ initeꞌ hamoꞌ lute ngemaaꞌ monovo neꞌmo nene ngivileꞌ ogo initeꞌ naba neive.   
\c 14  
\s1 Monoꞌ Gono Sikalahuliꞌmo Lehize-lidingutiꞌ Dizo Minineꞌ Nene Oꞌmosoꞌmi Veletiꞌ Gamazi Li Sotoꞌ Igaꞌ Gono Nene Dizo Neive Lo Pauloꞌ Lo-ngimineꞌ  
\p
\v 1 Nemuꞌ nene lingine eveneꞌ lutine ngimaaꞌ monovoloꞌ nene amuzo mili eꞌmetilo. Idoꞌ nelotiꞌ nene monoliꞌmi amuzo lingela nene ma dalone lisa amuzo milalo. Neꞌmine niigi Oꞌmosoꞌmi veletiꞌ gamazi li sotoꞌ igakumuꞌ nene gilavo dizelive.  
\v 2 Oꞌmosoꞌmi Sikalahuꞌ neꞌmo vetine do lapa nomineꞌ o-lengedavo gamazi notine atokutiꞌ laaꞌ nene lingine gilavo dizosa neineꞌza neꞌmo eveneꞌ mukiꞌ nene ma hize eleꞌ o-ngedamoloseinako aꞌmine gamazi notine atokutiꞌ laaꞌ nene dizo minamive. Lingine mulise milalizanguꞌ nene eveneꞌ maliꞌmo gamazi nolo atokutiꞌ lilineꞌ nene eveneꞌ gilamilizaniꞌ gamazi loloseinako aꞌmine lilineꞌ gamazi nene eveneꞌ lo-ngemamo Oꞌmosovoꞌ lo-imineꞌ geleleseive. Ee, Oꞌmosoꞌmi Sikalahuꞌ neꞌmo hize eleꞌ o-divosa eveneꞌ gilamilizaniꞌ gamazivoꞌ loloseive.  
\v 3 Ne neiha eveneꞌ maliꞌmo eveneꞌ mukiꞌ gililizaniꞌ gamaziutiꞌ nene Oꞌmosoꞌmi veletiꞌ gamazi lo sotoꞌ ogo aꞌmine gamazi eveneꞌ nevo ne lo-ngemelineꞌ neꞌmo monokuꞌ hize eleꞌ o-ngedo luꞌine do ngi lo-ngedo do nguꞌ izelineꞌ gamazi lo-ngemeleseive.  
\v 4 Izesuꞌ eveneleti muliseuꞌ nene eveneꞌ maliꞌmo gamazi eveneꞌ gilamaniꞌ nolo atokutiꞌ monoꞌ lilineꞌ nene eiꞌ lulovoꞌ hize eleꞌ o-deleseiha eveneꞌ ma Oꞌmosoꞌmi veletiꞌ gamazi evenelite gililiza noꞌningutiꞌ lo sotoꞌ ogo lilineꞌ neꞌmo aꞌmida Izesuꞌ evenele mulise minaveti luꞌine nene hize eleꞌ o-ngedeleseive.  
\v 5 Naza giluvoniꞌ lingine mukitoꞌ gamazi notine atokutiꞌ monoꞌ laaꞌ ilizaniꞌ nene lamineꞌ o neiha lingine Oꞌmosoꞌmi veletiꞌ gamazi eveneꞌ mukiꞌ gililiza noꞌningutiꞌ li sotoꞌ igaꞌ ilizaniꞌ neꞌmo nene ivileꞌ ogosa lamineꞌ oloseive losa gele nouve. Izesuꞌ zuhoti muliseuꞌ nene ve maliꞌmo gamazi nolo atokutiꞌ monoꞌ gamazi lilineꞌ nene Izesuꞌ evenele nene monokuꞌ hize eleꞌ o-ngedelingumuꞌ ve losa gamazi nolo atokutiꞌ monoꞌ lilineꞌ nene do velepeꞌ izidiniko neꞌmo nene gamazi nolo atokutiꞌ laaꞌ ivesi idoꞌ Oꞌmosoꞌmi veletiꞌ gamazi lo sotoꞌ ogaꞌ ivesi nene lisiheꞌ igi minasidineꞌza nolo atokutiꞌ monoꞌ lilineꞌ gamazi nene do velepeꞌ izo Izesuꞌ zuho mulise nene lo-ngemamilineꞌ neꞌmo nene gamazi nolo atokutiꞌ laaꞌ ive nene Oꞌmosoꞌmi veletiꞌ gamazi lo sotoꞌ ogaꞌ ive neꞌmo ivileꞌ ogo mineleseive.   
\p
\v 6 Neze zuhokizo, naza lengita ogo Oꞌmosoꞌmi sunoꞌ gamaziutiꞌ ma lo-lengemamo idoꞌ monokumuꞌ gatine do ngoloꞌ lo-lengedamo idoꞌ Oꞌmosoꞌmi veletiꞌ gamazi lo sotoꞌ o lengemamo idoꞌ monoꞌ monovo ma apize lengemamo haza gilamilizaniꞌ gamazi noꞌne atokutiꞌ aꞌmine aꞌmine gamazi lo-lengemeloniꞌ nene monokuꞌ nene ngelo hize eleꞌ o-lengedamolosuve.  
\v 7 Idoꞌ aꞌmineꞌmine ogo veꞌinesi minamaniꞌ initeꞌ polepeꞌ idoꞌ ngita nevoꞌmine initedunuꞌ nama li ma bili guni amilizaniꞌ nene aꞌmine nama nene ma gilavete neꞌmine nama ma nene nolive li ngeli gilamilisave.  
\v 8 Idoꞌ biluvalite lovo di navo lovo di nave li ngimiseli di vilizangumuꞌ di nene igi minilizave lo pikuli izelineꞌ nene ize guno amivo eveneꞌ nete izelineꞌ monovo nene gili guno ami hazamuꞌ noizeleseive li gili ngeli di nene igi minamilisave.  
\v 9 Idoꞌ aꞌmineꞌmine ogo lingine notine atoꞌ eveneꞌ gilamilizangutiꞌ lilizaniꞌ nene gamazi lilizaniꞌ monovo nene eveneꞌ ingine gilamavo hazamuꞌ meheꞌnida li huli huliꞌ ilisave.  
\v 10 Misubo ato atoꞌ mukikuꞌ nene eveneꞌ laaꞌ naniꞌ noꞌine nene nanikeꞌ neve. Naza gelamuha mukiꞌ goloso neive. Idoꞌ aꞌmine gamaziꞌine mukikutiꞌ nene monovoꞌve nomineꞌ gamazi hamokisi ma minamo noloseive.  
\v 11 Minamoloseineꞌza ve maliꞌmo gamazi atoꞌ noloutiꞌ ma nolivo naza ma gelamoloniꞌ eze nene golo mala ve loloꞌ ogo do aka o-nidamivo nazasi nene aꞌmineꞌmine ogo golo gohila ve loloꞌ ogo do aka o-damuvo minelesusive.  
\v 12 Idoꞌ lingine notine atokutiꞌ monoꞌ lilizaniꞌ nene eveneꞌ monokuꞌ di aka i-ngidamilisanako lengitasi nene monovo aꞌmineꞌmine ogo neive. Nemuꞌ nene lingine monoliꞌmi amuzo ma dalisa amuzo mili nilizaniꞌ Izesuꞌ evenele zuho nene monokuꞌ hize eleꞌ o-ngedeloneꞌ amuzo dalone li hize eleꞌ i-ngidilisa amuzo milalo.  
\v 13 Nemuꞌ nene ve ma nolo atokutiꞌ monoꞌ gamazi lo sotoꞌ ogaꞌ olo ma nene alingeꞌ do velepeꞌ izo eveneꞌ gililizadoꞌ lo-ngemelingumuꞌ nene do velepeꞌ izo lo-ngemaaꞌ amuzomuꞌ nene Oꞌmosola lilive.  
\v 14 Idoꞌ nene nanitekumuꞌ ve. Lingine giliꞌnalo. Laza note atokutiꞌ Oꞌmosola ma lo minesoꞌ nene Oꞌmosola nadive nolube monovoꞌve gelamo gopo nolunivo leliꞌ Sikalahute neꞌmovoꞌ nene loloseive.  
\v 15 Nemuꞌ nene nadiꞌ olone. Sikalahuteꞌmo Oꞌmosola nolivosa gate neꞌmosi gele hehe nolivo vetedunuꞌ loloneꞌ nene lamineꞌ oloseive. Idoꞌ Sikalahuteꞌmo monoꞌ nama nolivosa gate neꞌmosi gele hehe nolivo vete nedunuꞌ losoꞌ nene lamineꞌ oloseive.  
\v 16-17 Idoꞌ neꞌmine amoloneꞌ nene lengikutiꞌ ve malike Sikalahuka nedunukovoꞌ gamazi noka atokutiꞌ Oꞌmosola lo opoꞌni noliliba aꞌmine noka nene gilamilizave ingine lilineꞌ gamazi gilamilizaniꞌ neꞌmo monokuꞌ hize eleꞌ o-ngedamolosainako nemuꞌ nene gamazi lo osuꞌ laanivo ingine neꞌmino minivo li ngeli lamilisave.  
\v 18 Idoꞌ Oꞌmosoꞌmi Sikalahuliꞌmo gamazi noꞌne atokutiꞌ laaꞌ amuzo nene vauve elo lehize-nidivo lengiꞌ mukitoꞌ nene lingivileꞌ ogosa laaꞌ nouvoniꞌ nemuꞌ nene Oꞌmoso opoꞌni laaꞌ nouve.  
\v 19 Ne neiha Izesuꞌ eveneleti muliseuꞌ gamazi nene atoꞌ noꞌneutiꞌ gamazi haꞌna haꞌna golososi lo-ngemeloniꞌ nene monokuꞌ ngelo hize eleꞌ o-ngedamolosuha noꞌne atokutiꞌ lamo gaꞌne gele hehe lo monoꞌ lo-ngemeloniꞌ nene gaꞌine do ngoloꞌ lo-ngedelesuve. Ee, gamazi liꞌnibesi nevo ma lo-ngemeloniꞌ nene gaꞌine ha do ngoloꞌ lo-ngedelesuvonako nemuꞌ nene gamazi noꞌne atokutiꞌ lo-ngemamo gaꞌne gele hehe lo mino gililizaniꞌ gamaziutikovoꞌ lo-ngemelesuve lo gele nouve.   
\p
\v 20 Neze zuhokizo, lingine gatine gili guni ami izipe namuno liliꞌ igi minaniꞌ nene hulilo. Ne neiha goloso initeꞌ nene izipe namuno ngomolite nene ngeli damilisanako linginesi goloso initeꞌ nene dami izipe namuno neꞌmini minilisaniꞌza nemuꞌ lamuve. Lingine gatine gililizaniꞌ nene izipe namuno gatine gilami eveneꞌ lodivete gili vevesaaꞌ naniꞌ neꞌminisa lingine gatine gili vevesi minilo.  
\v 21 Monoꞌ godolouꞌ nene Oꞌmosoꞌmo ezemuꞌ gili eleꞌvoleꞌ amave Zuda vemuꞌ lineꞌ gamazi ma tiꞌ li gizi nizaniꞌ ma neive:  
\q1 Naza lokuvo golo malatiꞌ aleve ingine igi  
\q1 engiꞌ atoꞌ noꞌningutiꞌ mela aleve gamazi li-ngimilizaha nesi nene  
\q1 mela aleve neze gamazi gili damilisave.   
\m
\v 22 Idoꞌ lingine gilaniꞌ nene Oꞌmosoꞌmo lengikumuꞌ nene lamineꞌ gelosa gamazi note atokutiꞌ laaꞌ monovo nene do sotoꞌ o-ledave li gilaaꞌ nahe. Oꞌove. Oꞌmosoꞌmo ezemuꞌ gili eleꞌvoleꞌ amavemuꞌ mulunouꞌ goloso gilineꞌ neꞌmi monovo nene ngelebizelesa gamazi noꞌine atokutiꞌ laaꞌ monovo nene engitasi do sotoꞌ ineꞌ nene aꞌmine monoꞌ godolouꞌ minineꞌ gamazi mautiꞌ nene ningo gelelesune. Ne neiha Oꞌmosoꞌmi veletiꞌ gamazi laaꞌ monovo nene ezemuꞌ gili eleꞌvoleꞌ amavemuꞌ nevoba ezemuꞌ gili eleꞌvoleꞌ avemuꞌ nene eze monovo ngelebizelesa do sotoꞌ o-ngedaaꞌ neive.  
\v 23 Idoꞌ nemuꞌ nene Izesuꞌ evenele lingine di nubo igi ato atoꞌ notingutiꞌ mukitoꞌ nilavo eveneꞌ ma monoꞌ monovo olihe gilamave nizahe idoꞌ Oꞌmosomuꞌ gili eleꞌvoleꞌ amave heta atoꞌ ve nizahe ingine nene aꞌminguꞌ dizi nizavo lingine ato atoꞌ notingutiꞌ li nizavo ingine gili nemuꞌ nene lingine negi hizi nizave li lilisave.  
\v 24 Idoꞌ ato atoꞌ notingutiꞌ lami mukitoꞌ Oꞌmosoꞌmi veletiꞌ gamazi li sotoꞌ sotoꞌ igi nizavo monoꞌ monovo olihe gilamave nizahe idoꞌ Oꞌmosomuꞌ gili eleꞌvoleꞌ amave heta atoꞌ ve nizahe engikutiꞌ ve ma aza lengiꞌ muliseuꞌ dizo monoꞌ gelelineꞌ nene monoꞌ lilizanguꞌ monovo goloso ogaꞌ noilidoꞌ neꞌmine ogaꞌ monovo nene goloso ve li li sotoꞌ sotoꞌ ikevo lulouꞌ hizo do ote-davo monovoꞌve goloso ogaꞌ ineꞌ nemuꞌ gelelineꞌ neꞌmo lihimeꞌvemuꞌ li sotoꞌ i-di goniꞌ i-daniꞌ geleleseinako  
\v 25 aꞌmine veꞌmi lulouꞌ monovo goloso lamineꞌ haleko minineꞌ ma nene sotoꞌ oloseive. Neꞌmine ogavo aza nene Oꞌmoso gubuꞌ ize emo golo hizo ongo Oꞌmoso nene lengiꞌ vovotinguꞌ neive lo loloseive.   
\p
\v 26 Idoꞌ neze zuhokizo, neꞌmino neineꞌ nenako nelotiꞌ nene nadiꞌ olone. Lingine monokuꞌ igi di nubo ilizanguꞌ nene maliꞌmo monoꞌ nama lavo ma neꞌmo monoꞌ monovo ma lo ngoloꞌ lo lo-lengemavo ma neꞌmo Oꞌmosoꞌmi sunoꞌ gamazi ma lo sotoꞌ ogo lo-lengemavo maliꞌmo nene gamazi nolo atokutiꞌ lavo maliꞌmo aꞌmine lineꞌ gamazi nene do velepeꞌ izivo neꞌmine igi minilizaniꞌ neꞌmo nene eveneꞌ monokuꞌ do amuzo molo-ngedelineꞌ initeꞌ ilisanaze. Neꞌminevoꞌ ilo.  
\v 27 Idoꞌ ve ma ingine atoꞌ noꞌningutiꞌ monoꞌ lili ma nene sitalitise he sito hamolite he aꞌneꞌminetevoꞌ lilisave. Mukitoꞌ hamokuꞌ molo hite hiteꞌ igi lamilisave. Ga loke na loke li nilasivo maliꞌmo aꞌmine gamazi lilisineꞌ nene monovo do velepeꞌ izo lo-lengemelive.  
\v 28 Idoꞌ ve maliꞌmo nolo atokutiꞌ monoꞌ lo-lengemelesa neivo aꞌmine lo-lengemelineꞌ gamazi nene do velepeꞌ izo lo-lengemelive ma minamivo ma aꞌmine atoꞌ noloutiꞌ monoꞌ lolosa ive nene Izesuꞌ zuholiti muliseloꞌ nene gamazi lamo haza mino eiꞌ luloukovoꞌ Oꞌmoso lo-emo minelive.  
\v 29 Idoꞌ Oꞌmosoꞌmi veletiꞌ gamazi nene sitape sito hamohe neꞌminetevoꞌ ga loke na loke li nilavo eveneꞌ linge ma ingine nene lamineꞌ lilizahe di zovoꞌ izi lilizahe li gapepeꞌ igi gili minilisave.  
\v 30 Idoꞌ ve maliꞌmo Oꞌmosoꞌmi veletiꞌ gamazi lo sotoꞌ ogo nolo-lingimivo gapepeꞌ igi mulise mili minilizaveutiꞌ maliꞌmi lulouꞌ Oꞌmosoꞌmi Sikalahuꞌ neꞌmo monoꞌ gamazi gosohoꞌ ma molo-davo ma nene gomuꞌ gamazi lo-lengemo minive ma nene liteꞌ lo lo-lengemo osuꞌ lo haza neivo monoꞌ gamazi gosohoꞌ lulouꞌ limive neꞌmo lilive.  
\v 31 Lingine mukitoꞌ hamo hamoꞌ li-limiꞌ limiꞌ avo mukitoꞌ Oꞌmosomuꞌ gele veveso monokuꞌ amuzo molaloningumuꞌ ve li Oꞌmosoꞌmi veletiꞌ gamazi nene ga loke na loke li hamo hamoꞌ ha lo sotoꞌ ilisanako nemuꞌ nene gamazi lami gopo gatine gilami haza nizavo maliꞌmo nene ha lilive.  
\v 32 Idoꞌ Oꞌmosoꞌmi Sikalahuꞌ neꞌmo lute do ote-ledaaꞌ neineꞌ nenako gamazi nololoneꞌ nene geto lo osuꞌ lamolosune li lingine lamilo. Oꞌmosoꞌmi veletiꞌ gamazi li sotoꞌ igaꞌ ave engiꞌ luꞌnidoꞌ nene angisevoꞌ gizebo i nizanako nemuꞌ ve ma aza gamazi lo minelingutiꞌ nene hulo ha neivo monoꞌ gamazi gosohoꞌ lulouꞌ lemavo lolosa ive maꞌmo nene lilive.  
\v 33-34 Idoꞌ ne nanitekumuꞌ ve. Oꞌmoso nene initeꞌ do gopoꞌ napa ogaliꞌmi meleho minamo aza nene lute do hamoꞌ ogo hongu lo minaliꞌmi meleho ne neive.  
\p Nemuꞌ nene lingine monoꞌ gililisa mulise milalizanguꞌ nene lingine monokuꞌ igi mili iliza monovo nene di gopoꞌnapa ami mini monoꞌ lilizangumuꞌ nene kulu keleka lami ha ge loke ne loke li lilizave. Idoꞌ veneꞌ nene gamazi lamilizave lo oꞌove lo noneꞌ nenako nemuꞌ veneꞌ ingine Izesuꞌ eveneleti muliseꞌine miniꞌmi monaniꞌ mukikuꞌ nene gamazi lami haza minaaꞌ adiꞌmine igi lengitasi veneꞌ nene gamazi lami hazavoꞌ minilizave. Oꞌmosoꞌmi louꞌ gamaziꞌmo lidoꞌ igi veneꞌ ingine gelekelekovoꞌ igi minilizave.  
\v 35 Idoꞌ Izesuꞌ zuho mulise neti veꞌnidoꞌ venelite gamazi lilizaniꞌ nene lovozo oloseinako nemuꞌ nene veneꞌ ingine initeꞌ mamuꞌ longoꞌ ilisa gili ma nene numuꞌnida vi mini vanahosi angisevoꞌ minilisinguꞌ nene longoꞌ o-davo li gili ha gele igi gililisive.  
\v 36 Idoꞌ lingine veneꞌ gamazi lamilizave lo luvoniꞌ nemuꞌ eꞌmetamilizaniꞌ nene naza neꞌmine lo noluve: Oꞌmosoꞌmi gamazi nene lengikutiꞌ sotoꞌ ogo minineꞌ nehe. Idoꞌ lengikovoꞌ apiꞌ igi gilaniꞌ neve. Oꞌove. Nemuꞌ nene leliꞌ gomuꞌ Izesuꞌ zuho loloꞌ uneꞌ nene livileꞌ igi monovo gosohoꞌ di sotoꞌ amilo. Lengiꞌ nene leliꞌ gomuꞌ Izesuꞌ zuho loloꞌ uneꞌ nenaze. Leꞌmetilo.   
\p
\v 37 Idoꞌ lengikutiꞌ ve malite engiꞌ nene Oꞌmosoꞌmi veletiꞌ gamazi lo sotoꞌ ogaꞌ unive none idoꞌ Sikalahutatiꞌ amuzo do minunive none lilizave nene neniꞌ gamazi mene gizo nolingimuvoniꞌ nemuꞌ nene Guvelesi veꞌmo lo huko-lidineꞌ gamazi ve li gili minilizave.  
\v 38 Idoꞌ Guvetesi veꞌmi gamazi ve lo nogize-lingimuvoniꞌ gamazi mene ve maliꞌmo gele hulavo ma nene ezemukisi gele hulo aza nene Oꞌmosoꞌmi veletiꞌ gamazi lo sotoꞌ ogaꞌ amuzo damive lolone.   
\p
\v 39 Neze zuhokizo, gamazi meuko luvoniꞌ nemuꞌ nene Oꞌmosoꞌmi veletiꞌ gamazi li sotoꞌ ilizangumuꞌ amuzo milalo. Idoꞌ eveneꞌ ma noꞌine atokutiꞌ lilizangumuꞌ nene mo mudise oꞌve li-ngidilizave lo lamuvoniꞌza  
\v 40 lengiꞌ mulise milalizanguꞌ initeꞌ igi mili minilizaniꞌ mukiꞌ nene vo gopoꞌ napa amo laminekovoꞌ o-do vo miniliho losa noluve.   
\c 15  
\s1 Izesuꞌ Hilingutiꞌ Otineꞌ Mamuꞌ Nene Mo Gili Nizave. Nemuꞌ Nene Lazasi Hele Noloningutiꞌ Otelesune Lo Gele Mineloningumuꞌ Nene Pauloꞌ Lo-ngimineꞌ  
\p
\v 1 Neze zuhokizo, gomuꞌ lo-lingimuvoniꞌ monoꞌ gamazi lamineliꞌmi monovomuꞌ nene gohi lo-lengemelove. Aꞌmine gamazi neve lo-lengemekuvo lingine gili daniꞌ ve. Idoꞌ aꞌmine gamazi neve nene idisesi ha di giliꞌ li nizaniꞌ ve.  
\v 2 Idoꞌ aꞌmine gamazi di minaniꞌ neꞌmo Oꞌmosoꞌmo do lunguꞌ izelidoꞌ nene mini milisa nene nizave. Ee, idoꞌ lingine gamazi lo-lingimuvodoꞌ gili eleꞌvoleꞌ igi gili daniꞌ nene vo haza amivo aꞌmine gamazi gehepeve nene di giliꞌ li minilizaniꞌ nene Oꞌmosoꞌmo do lunguꞌ izeleseive.   
\p
\v 3 Idoꞌ gomuꞌ lo-lingimuvoniꞌ monoꞌ gamazi lamineliꞌmi monovomuꞌ gohi lo-lengemelove luvoniꞌ nene nemuꞌ luve: Monoꞌ gamazi lamineꞌ ganaꞌ apiꞌ ogo gelo do goꞌzekuvonikovoꞌ nene lo-lengemo neutiꞌ nene dizo minineꞌ gamazi neꞌmino ve lo tiꞌ lo lo-lingimuvoniꞌ ve: Monoꞌ godolouꞌ Kilisitoꞌnimuꞌ gizadoꞌ eꞌmeto leliꞌ lihimetemuꞌ hilineꞌ ve.  
\v 4 Idoꞌ aꞌmineꞌmine ogo helavo galese izi-dikevo gamene sito hamo mino galeseutiꞌ oteleseive li monoꞌ godolouꞌ polohetelite gizadoꞌ eꞌmeto neꞌmine ineꞌ ve.  
\v 5 Idoꞌ galesetiꞌ otosa nomono Petoloꞌni sotoꞌ o emavo ningineꞌ. Idoꞌ aꞌmidotiꞌ nene izipahala zuho tuvelu nene sotoꞌ o ngimivo ninganiꞌ ve.  
\v 6 Nelotiꞌ alingeꞌ nene eze evenele zuho faef hadeti (500) neꞌmine di geseꞌ igi minadokisi eze okoꞌnoloꞌ ninganiꞌ ve. Idoꞌ aꞌmine Izesuꞌ okoꞌnoloꞌ ningave linge ma nene osuꞌ liꞌmi vaniꞌza vaiꞌ goloso nene veꞌinesi haza nizave.  
\v 7 Idoꞌ nelotiꞌ nene akunolo Zakoboꞌni sotoꞌ o emosa alingeꞌ nene aposolo mukita sotoꞌ o ngimineꞌ ve.  
\v 8 Idoꞌ nelotiꞌ naza nene ve goloso mino eze evenele loloꞌ ogo mineloniꞌ gamene nene ivileꞌ goloso ogo nouvo alingeꞌ gehepeve nene aposolo geleꞌmize molalove lo sotoꞌ o nemavo naza aꞌneꞌmine veꞌminesi ninguvoniꞌ ve. Neꞌmino ninguneꞌ nemuꞌ nene hilingutiꞌ mo otaniꞌ neive lo gele eleꞌvoleꞌ o minelone.  
\v 9 Idoꞌ naza ve goloso loloꞌ ogo nouvodoꞌ aposolo neleꞌmize molangumuꞌ luvoniꞌ nene naza Oꞌmosoꞌmi evenele zuho do goloso o-ngedaaꞌ uve mino aposolo loloꞌ ogo minelodoꞌ lisiheꞌ amo aposolo minanguꞌ lemo mino gizeꞌninguꞌ nouvoniꞌ nemuꞌ nene luvoniꞌ ve.  
\v 10 Nemuꞌ luvoniꞌza idise mene aposolo loloꞌ ogo monovoꞌne do atoꞌ ogaꞌ nouvoniꞌ nene Oꞌmosoꞌmo lulo lamineꞌ nene lehize-nedo do lamineꞌ o-nididiꞌmo nene nouve. Idoꞌ aꞌmine do lamineꞌ o-nidineꞌ nene vo haza amive. Naza nene gono amuzo molo do aposolo linge mukiꞌ nene ngivileꞌ ogo gono daaꞌ uvoniꞌ ve. Idoꞌ neꞌmine ogaꞌ nouvoniꞌ nene neniꞌ amuzoꞌnedunuꞌ nomive. Oꞌmosoꞌmo neꞌmino do lamineꞌ o-nedaaꞌ neineꞌ neꞌmo aposolo lingela nene ngivileꞌ ogosa gono daaꞌ nouve.  
\v 11 Ne neiha naza gono do monoꞌ gamazi lamineꞌ nene lo sotoꞌ olonipe aposolo lingelite li sotoꞌ ilizanipe mukitoꞌ laza Izesuꞌ hilingutiꞌ otive lo gomuꞌ lo-lingimuvoniꞌ neꞌmino hamoꞌ gamazivoꞌ lo-lengemelesune. Idoꞌ lingine ganaꞌ apiꞌ igi monoꞌ gamazi gili eleꞌvoleꞌ aniꞌ ma nene gamazi atoꞌ ma gili eleꞌvoleꞌ aniꞌ nomive. Mo aꞌmine gamazi gehepeve nene gili eleꞌvoleꞌ aniꞌ ma neive.   
\p
\v 12 Neꞌmine aniꞌ ma neineꞌza laza Kilisitoꞌ hilingutiꞌ kululuꞌ izo otineꞌ ve lo lo-lengemaaꞌ nounivo lengikutiꞌ linge malite lingine helakutiꞌ gohi otaaꞌ nene nomive li laaꞌ naniꞌ nene nanimuꞌ laaꞌ nave.  
\v 13 Helakutiꞌ otaaꞌ nene nomidiniko Kilisitoꞌ hilingutiꞌ otive gamazi nene gihile minamidine.  
\v 14 Kilisitoꞌ nene hilingutiꞌ ma otamidiniko monoꞌ gamazi laaꞌ nouneꞌ nene gihile nomineꞌ minavo hazamuꞌ lokunivo aꞌmine gamazi nene lingine gili eleꞌvoleꞌ aniꞌ nenako mo hazamuꞌ gili eleꞌvoleꞌ adine.  
\v 15-16 Idoꞌ neevoꞌ nene nomive. Oꞌmosoꞌmo hilave nene do ote-ngedesaꞌmidiniko Kilisitokisi nene otelidoꞌ amivo otamidine. Nemuꞌ nene Oꞌmosoꞌmo hilingutiꞌ do ote-dineꞌ ve laaꞌ nounako Kilisitoꞌ hilingutiꞌ Oꞌmosoꞌmo do ote-dive laaꞌ nouneꞌ nene sozavoꞌ minidine. Idoꞌ nemuꞌ nene laza Oꞌmosoꞌmi monovomuꞌ soza luneꞌ nene ha ningi giladine.  
\v 17 Ee, Oꞌmosoꞌmo hilave nene ma do ote-ngedesaꞌmidiniko Kilisitoꞌnisi nene ma do ote-damidine. Idoꞌ Kilisitoꞌ hilingutiꞌ nene otamo hele osuꞌ lidiniko lingine Kilisitoꞌ lihimete hulo-lidineꞌ ve li gili eleꞌvoleꞌ aniꞌ nene gihile amivo hazamuꞌ gilikevo lihimetine nene ha minivo minadine.  
\v 18 Idoꞌ Kilisitoꞌnimuꞌ gili eleꞌvoleꞌ i mini hilave nesi nene mudise vi tolovo adine.  
\v 19 Idoꞌ laza nene vetesi me misubouꞌ mineloninguꞌ Kilisitoꞌni nene eꞌmeto vo minekunivo aza do lamineꞌ o-ledavo hele noloningutiꞌ gohi otosa minevoꞌ minevoꞌ olosune lo gelo laza gizebo ogo minaaꞌ nouneꞌza me misuboukovoꞌ minevoꞌ alevote osuꞌ lavo mudise hele osuꞌ lokunivo minevoꞌ minevoꞌ ogaꞌ nene minamaaꞌ idiniko eveneꞌ nete lelikumuꞌ nene ingine initeꞌ lamineꞌ goloso sotoꞌ o-ledeleseive li gilaniꞌza mo sotoꞌ o-ngedamoloseive li eveneꞌ linge mukiꞌ muheleꞌine ningaaꞌ aniꞌ ma nene ivileꞌ ivosa leiꞌ nene muhelete naba ningilizadoꞌ lisiheꞌ ivosa minunidine.   
\p
\v 20 Neꞌmine unidineꞌza neꞌmino nomive. Oꞌmosomuꞌ gili eleꞌvoleꞌ igi mini hilave mukiꞌ nene Kilisitoꞌ aza gomuꞌ molo ngemo mo laminetoꞌ hilingutiꞌ otineꞌ ve.  
\v 21 Ee, helaaꞌ nene misubouko leliꞌ haza velatiꞌ sotoꞌ ineꞌ nenako helakutiꞌ otaaꞌ nesi aꞌmineꞌmine ogo evenetatiꞌ sotoꞌ ineꞌ ve.  
\v 22 Neꞌminemuꞌ noluve: Adamuꞌ aza gomuꞌ molo lemo helaaꞌ monovo do sotoꞌ ivo aꞌvopilemoꞌ mukiꞌ laza helaaꞌ nouneꞌ neꞌmino Kilisitoꞌni nene helelingutiꞌ gomuꞌ molo lemo galeseutiꞌ otelive lo Oꞌmosoꞌmo do ote-dineꞌ nenako Kilisitoda vo giꞌmizunive laza nene hele noloningutiꞌ do ote-ledavo gohi vete gizo oto minelesune.  
\v 23 Ne neiha Kilisitokisi eze evenele zuhosi nene helakutiꞌ nene gopo gomuꞌ otaaꞌ alingeꞌ otaaꞌ amolosune. Kilisitoꞌ nene mo gomuꞌ molo lemo otineꞌ nenako alingeꞌ eze alineꞌ gameneloꞌ nene evenele zuho laza nene vete gizo otelesune.  
\v 24 Nelotiꞌ nene gonoꞌve do pelelineꞌ gamene naba sotoꞌ oloseive. Neꞌmine ogavo Kilisitoꞌ aza eze biluvaꞌ i-daaꞌ ave eveneꞌ golosoliti guveꞌinesi vesi idoꞌ ato atoꞌ amuzoloꞌ gizebo igi amuzoꞌinesi minavesi nene mukiꞌ ngivileꞌ ogo do gulupese loloꞌ o-ngedo osuꞌ lo eze evenele zuho nene Oꞌmoso melehi anauꞌ molo-ledavo gizebo o-ledeleseive.  
\v 25 Ee, Guvelesi ve mino gizebo ilineꞌ amuzo eita minamilineꞌ nene aza lovo veꞌve nene ngivileꞌ amilidoꞌ mineleseinako nemuꞌ nene ngivileꞌ ogo do gizeneuko o-ngedosavoꞌ alingeꞌ nene aꞌmine gizebo ilineꞌ amuzo nene melehi anauꞌ hulavo gizebo o-ledeleseive.  
\v 26 Idoꞌ Kilisitoꞌ aza biluvaꞌve mukiꞌ nene do gulupese loloꞌ o-ngedosa alingeꞌ gehepeve nene lovo o lemaaꞌ initeꞌ ma gulive helaaꞌ neꞌmi amuzo nene do hulo akaꞌve hize tileleseive.  
\v 27 Idoꞌ initeꞌ mukiꞌ neineꞌ initeꞌ nemuꞌ nene eze gizeneukovoꞌ molavo gelekeleꞌ i-di minilisave li monoꞌ godolouꞌ gizi nizaniꞌ nenako aꞌmine initeꞌ mukiꞌ nene gelekeleꞌ i-di minilisave li gizanguꞌ nene aꞌmine initeꞌ mukiꞌ gipelela do gelekeleꞌ o-ngidive Oꞌmoso nesi nene Kilisitoꞌni gelekeleꞌ o-deleseive li ma gizamaniꞌ nene mo gele none.  
\v 28 Initeꞌ mukiꞌ nene gipele gelekeleꞌ i-di minikevo aꞌmine initeꞌ mukiꞌ do gelekeleꞌ o-ngidive Oꞌmosoꞌmo initeꞌ mataꞌ mukitokisi idoꞌ nenitokisi nene gizebo ilive lo gipele azasi nene gelekeleꞌ o-deleseive.   
\s1 Monoꞌ Gono Noduninguꞌ Nene Helaaꞌ Akaloꞌ Mine Molosa Novunako Helakutiꞌ Otaaꞌ Nene Nomidiniko Monoꞌ Gono Nene Ma Damunidine Lo Pauloꞌ Lo-ngimineꞌ  
\p
\v 29 Idoꞌ helakutiꞌ otaaꞌ nene ma nomidiniko hilavemuꞌ ve li eveneꞌ malite noso hilaaꞌ naniꞌ nene nanimuꞌ hiladine. Helakutiꞌ otaaꞌ nene ma nomidiniko ingine hazamuꞌ holalosune li gili ma hilamadine.  
\v 30 Idoꞌ laza nene gamene gamene goboni malaꞌ malaliꞌmi lulouꞌ mino helaaꞌ akaloꞌ mine molo gono dodo novuneꞌ nene helakutiꞌ otaaꞌ nene nomidiniko geli geli ogo gono dodo ma vamunidine.  
\v 31 Guvetesi ve Izesuꞌ Kilisitoꞌnimuꞌ gono duvoniꞌ neꞌmi gihileꞌve lengikumuꞌ nene nolize izaaꞌ nouve lo laminetoꞌ loloniꞌ nene lingine mo gili nizave. Idoꞌ idise mene loloniꞌ gamazi nene aꞌmineꞌmine ogo Oꞌmosoꞌmi veleloꞌ laminetokovoꞌ lolosuve. Naza nene gamene gamene mo helo galese veleloꞌ vokuvongutikovoꞌ nene tineꞌ molo ogaꞌ nouve.  
\v 32 Idoꞌ eveneꞌ haza ve nete helakutiꞌ otaaꞌ nene nomive li giladoꞌ nene nazasi aꞌmineꞌmine ogo giluvodiniko Eheso numuda mene Kilisitoꞌ gonoꞌve do nouvo eveneꞌ ize gulo loposo gili minave nete nene biluvaꞌ i-nidi nizavo amuzo molo minuvodotiꞌ nene initeꞌ lamineꞌ ma ngelo dalohe. Mo damolosuko lo gelo alamuvodine. Idoꞌ lamineꞌ helakutiꞌ otaaꞌ nene ma nomidiniko geni gono neꞌmine nene gehamo  
\q1 aizeꞌ mo nohelesoꞌ nene mo mudise osuꞌ lolosunako  
\q1 nemuꞌ nosoꞌ niteꞌ luvoloni no mino lolize izovoꞌ minukeꞌzo li laaꞌ adokovoꞌ nene gele do minunidine.   
\p
\v 33 Idoꞌ neꞌmine laaꞌ avela vi giꞌmizikevo gotine izikelizave. Eveneꞌ golosoloꞌ vi giꞌmizilizadotiꞌ nene lutine lengemeni dameni vo goloso oloseive li gizikaniꞌ ma nene lamineꞌ gizi nizaniꞌ neive.  
\v 34 Nemuꞌ nene lingine gopoꞌ napa negi gatine nene gilami gatine gili lamineꞌ igi mini goloso initeꞌ nene mehedine imi lihime daaꞌ monovo nene hulilo. Lingine gililo. Lengikutiꞌ linge ma nene olihe Oꞌmosomuꞌ ngomosi ma gilamave. Neꞌmine i nizangumuꞌ nene longovozo hililizadoꞌ o neive losa noluve.   
\s1 Hele Noloningutiꞌ Atoliꞌmine Okodesi Oteloningumuꞌ Pauloꞌ Lo-ngimineꞌ  
\p
\v 35 Idoꞌ eveneꞌ ma nete tiꞌ li longoꞌ ilisave: Hilave engiꞌ nene nadiꞌ igisa otilizave. Okoꞌnine gelese noloseinako naniꞌmine okoꞌinesi otilizave.  
\v 36 Neꞌmine lilinive nene negike lolosane. Initeꞌ zuhoꞌ aineꞌ nene helosavoꞌ nene gohi golo dizaaꞌ neive.  
\v 37 Aꞌmine viti zuho nehe initeꞌ maliti zuho nehe zuhoꞌ naniꞌ nene alingeꞌ golo dizelineꞌ okoꞌno neꞌmine nene zuhoꞌ amave. Haza mo zuho initeꞌ nene zuhoꞌ igaꞌ naniꞌ ma neive. Idoꞌ gililo. Aꞌmineꞌmine ogo lazasi nene helo gonoso galeseuꞌ voloneꞌ okodesi nene otamo atoliꞌmine okodesi otelesune.  
\v 38 Idoꞌ aꞌmine zuho initeꞌ ato atoꞌ nene Oꞌmosoꞌmo okoꞌine ato atokisivoꞌ neꞌminisa minilisaze lo gilidoꞌ nene do molo do sotoꞌ o-ngedaaꞌ neive.  
\v 39 Idoꞌ zuho initeꞌ ato atoliꞌmine minaniꞌ neꞌmino eveneliti okoꞌine nene atoliꞌmine neivo ize guloliti okoꞌine nene atoliꞌmine neivo namaliti okoꞌine nene atoliꞌmine neivo alahaliti okoꞌine nesi atoliꞌmine neivo aꞌmine initeꞌ mukiꞌ nene hamoꞌ okoꞌinesivoꞌ ma minamave.  
\v 40 Idoꞌ okulumokuꞌ nene initeꞌ ma minikevo idoꞌ misuboukisi nene initeꞌ ma minikevo neꞌmini nizaniꞌ nene okoꞌine ato atoliꞌminesi nene nizave. Ee, okulumokuꞌ minaaꞌ naniꞌ initeliti okoꞌineꞌmi gonolise nene atoliꞌmine neivo misubouꞌ minaaꞌ naniꞌ initeliti okoꞌineꞌmi gonolise nene atoliꞌmine neive.  
\v 41 Idoꞌ holiꞌmi labanaꞌve nene atoliꞌmine neivo ikeꞌniꞌmi labanaꞌve nene atoliꞌimine neivo sonohiꞌ neti labanaꞌine nene atoliꞌmine neive. Idoꞌ sonohiꞌ neti labanaꞌine nesi nene hamoliꞌmine nomive. Labanaꞌine nene mo ato atoꞌ neive.   
\p
\v 42 Nemuꞌ nene helo otaaꞌ monovo nesi nene hamoliꞌmine ogo neive. Hilaniꞌ okoꞌine galese izaaꞌ nouneꞌ nene vo goloso ogo osuꞌ laaꞌ neive. Idoꞌ hilakutiꞌ otaaꞌ okoꞌine nene vo goloso amoloseive.  
\v 43 Ee, hilaniꞌ okoꞌine nene haza initeꞌ ve lo galese izaaꞌ nouneꞌza hilangutiꞌ otilizaniꞌ nene okoꞌine gonolise laminekisi otilisave. Idoꞌ okoꞌine amuzolo nomineꞌ nene galese izekunivo otilizaniꞌ nene amuzo malehe okoꞌinesi otilisave.  
\v 44 Idoꞌ helo galese izaaꞌ okode nene misubo okode ne neive. Idoꞌ galeseutiꞌ otaaꞌ okode nene Okulumoꞌ okodesi otelesune. Idoꞌ misubo okode neineꞌ neꞌmino Okulumoꞌ okodesi neive.  
\v 45 Idoꞌ monoꞌ godolouꞌ luhuvo tiꞌ li gizi nizaniꞌ ma neive:  
\q1 Ganaꞌ apiꞌ ogo sotoꞌ ive Adamuꞌ aza nene  
\q1 veꞌinesi mini mili igaꞌ monovo nene Oꞌmosolatiꞌ dosa minineꞌ ve.  
\m Idoꞌ Adamuꞌnimuꞌ nene neꞌmine li gizaniꞌza Adamudoꞌ medelo Okulumokutiꞌ alingeꞌ sotoꞌ ive nene minevoꞌ minevoꞌ lemeni dameni lemaaꞌ ive loloꞌ ogo minineꞌ ve.  
\v 46 Minevoꞌ minevoꞌ lemeni daaꞌ monovo nene gomuꞌ sotoꞌ amivo vetesi misubouko mino molo ogaꞌ monovo nene gomuꞌ sotoꞌ ogavosa nelotiꞌ alingeꞌ nene minevoꞌ minevoꞌ lemeni dameni daatoꞌ nene mine molo none.  
\v 47 Ganaꞌ sotoꞌ ive nene misubodunuꞌ loloꞌ o-dineꞌ neꞌmo nene misubouꞌ ve minineꞌ ve. Idoꞌ ezeloꞌ medelo alingeꞌ sotoꞌ ive nene misuboutiꞌ sotoꞌ amo Okulumokutiꞌ sotoꞌ ive minineꞌ ve.  
\v 48 Misubouꞌ ve leliꞌ okode nene ganaꞌ avoteho misubouꞌ sotoꞌ ive Adamuꞌ eiꞌ okoꞌno neꞌminosavoꞌ nene noneꞌza Okulumokutiꞌ ve Kilisitoꞌ evenele zuho loloꞌ unive laza nene eiꞌ Okulumokuꞌ okoꞌno neꞌmine do minelesune.  
\v 49 Idoꞌ laza hamo hamoꞌ misubouꞌ ganaꞌ sotoꞌ ogo minineꞌ neꞌmine emeni damenisi noneꞌ neꞌmino gamene ma alingeꞌ lazasi Okulumokutiꞌ limive neꞌmi emeni dameniꞌve neꞌmine do minelesune.   
\p
\v 50 Neze zuhokizo naza laminetoꞌ noluze. Gililo. Misubouꞌ okodesi minuneꞌ nedunuꞌ nene Oꞌmosoꞌmo gizebo inguꞌ ngelo vo holamolosune. Misubouꞌ okode vo tolovo ilineꞌ neꞌmo vo tolovo ami initeꞌ Okulumokuꞌ initeꞌ nene ngelo mo damoloseive.  
\v 51-53 Ne neineꞌza gamazi lamineꞌ ma gomuꞌ sunoꞌ minineꞌ idise sotoꞌ ogo neineꞌ nene ma lo-lengemeloze. Gililo: Leze mukitoꞌ nene linge ma hilikevo linge ma nene helamolosuneꞌza hele nolonivesi helamolonivesi mukita nene pikuli nolo molo osuꞌ nolivo liteꞌ lo vete gitibuluꞌ hamoꞌ izaaꞌ nouneꞌ neꞌmino okode nene atoliꞌmine sotoꞌ o osuꞌ loloseive. Ee, vo tolovo ogo hele vaaꞌ okode idise mene nonivo neineꞌ okode nesi mino Oꞌmosoꞌmo gizebo inguꞌ nene ngelo vo holamolosunako vo tolovo amaaꞌ idoꞌ hele vamaaꞌ emeni dameni nene do okodeloꞌ otuho-ledelineꞌ o neinako pikuli izelineꞌ leliꞌ okodeꞌve nene atoliꞌmine sotoꞌ o osuꞌ loloseive.  
\v 54 Idoꞌ vo tolovo ogo hele vaaꞌ okode neꞌmo minevoꞌ minevoꞌ ogo minaaꞌ emeni dameni dalineꞌ gameneuꞌ nene monoꞌ godolouꞌ gamazi tiꞌ li gizaniꞌ ma nene vo gihile izeleseive:  
\q1 Minevoꞌ minevoꞌ ogo minaaꞌ neꞌmo helaaꞌ nene ivileꞌ o neive.   
\q1
\v 55 Idoꞌ gaza helaaꞌ neke livileꞌ ilineꞌ amuzoka nene ma nomive.  
\q1 Idoꞌ gaza helaaꞌ neke lebelaaꞌ gavosoka nene ma nomive.  
\q1 Mo mudise osuꞌ gehepeve logane.   
\m
\v 56 Idoꞌ aꞌmine helaaꞌ neꞌmi gavoso nene lihime daaꞌ monovo ne neive. Idoꞌ Oꞌmosoꞌmi louꞌ gamaziꞌve neꞌmo lihime damaaꞌ ve lo lo neivosa lute neꞌmo lihime daakumuꞌ nene otaaꞌ neive. Idoꞌ nelotiꞌ lihime daaꞌ monovo nene lelita amuzo molo sotoꞌ ogaꞌ neive.  
\v 57 Ne neiha Oꞌmosoꞌmo lavo Guvetesi ve Izesuꞌ Kilisitoꞌ aza hize eleꞌ o-lidivo lihime daaꞌ monovo nene ivileꞌ ogo lihime damo minaaꞌ nouneꞌ nemuꞌ Oꞌmoso opoꞌni lolone.   
\p
\v 58 Idoꞌ nemuꞌ nene neze zuho luꞌne lengeme nouvoniꞌ mate, initeꞌ goloso maliꞌmo lengehusoꞌ ogalize. Lingine monokuꞌ nene amuzo mili eleꞌvoleꞌ igi oti pehe li minilo. Helakutiꞌ otaaꞌ nene nomidiniko Guvelesi veꞌmi gonoꞌve di-daaꞌ naniꞌ nene hazamuꞌ di-dadineꞌza helakutiꞌ otaaꞌ nene neineꞌ nenako hazamuꞌ ma di-damilisave. Nemuꞌ lingine nene hazamuꞌ do-dekunivo labuluvo amoloseive li gili nizaniꞌ nenaze. Guvelesi veꞌmi gono nene gamene gamene vauve ili di minilo.   
\c 16  
\s1 Oꞌmosoꞌmi Gonoꞌve Hize Eleꞌ Ogakumuꞌ Izesuꞌ Evenele Zuho Moni Di Nubuho Ilizangumuꞌ Nene Pauloꞌ Lo-ngimineꞌ  
\p
\v 1 Idise mene Zudaia misubouko Izesuꞌ zuho initeꞌine nomivo viseꞌ igaꞌ aniꞌ aleve nene hize eleꞌ i-ngidi lingine moni di nubuho ilizangumuꞌ gamazi ma loloze. Gililo: Galatia misubouꞌ Izesuꞌ zuho tiꞌ lo lo-ngiduvodoꞌ nene linginesi aꞌmineꞌmine ilo.  
\v 2 Lingine salele hamoliꞌmi lulouꞌ nene moni initeꞌ nanikeꞌ daaꞌ nahe aꞌmingutiꞌ nene daniꞌ votigileloꞌ gili mini Sadeuꞌ Sadeuꞌ nene izeꞌ mili lingela mili atoꞌ ikaꞌ ikaꞌ igi minilo. Neꞌmine ami gopo nizavo naza vo hetelekuvo lingine gohi lihiteheꞌ igi di lumo lumo ikelizaze. Neꞌmine igi minilo.  
\v 3 Neꞌmine igi nizavo naza linginela okuvo aꞌmine di nubuho igi milaniꞌ moni nene di vilizave ma di oti-ngidikevo engiꞌ monovomukisi idoꞌ viliza monovomukisi luhuvo gizo ngemekuvo di Zelusalemi numuda vilizave.  
\v 4 Idoꞌ nenikisi nene ha volodoꞌ o minelineꞌ nene nazasi makatoꞌ ha volosune.   
\s1 Pauloꞌ Aza Kolidi Alevetida Volosa Lineꞌ Gamazi  
\p
\v 5 Naza nene Makedonia misubouko voloniꞌ o neinako aꞌmida volodotiꞌ nene apase lengita alosuve.  
\v 6-7 Idoꞌ lengita aloniꞌ nene vo ninge-lengedo volosuve lo gelo lamuve. Lengikisi gamene haꞌna gidini makatoꞌ minelesune lo gelo nouvoniꞌ nene Guvelesi veꞌmo gilidoꞌ nolineꞌ nene ha minelesune. Neꞌmine lo giluvoniꞌ nenako lengita ogo hetelekuvo makatoꞌ nonivo hepeꞌ naba elaaꞌ ineꞌ gamene nesi ivileꞌ o vilihe losa nogiluve. Idoꞌ lengita aloniꞌ nene ogo minosa ebeꞌ mala volosa oloda nene lingine hize eleꞌ i-nidi aꞌmine voloda nene akaꞌne vili-nidilisave losa gele minosa alosuve.  
\v 8-9 Neꞌmine lo nogiluvoniꞌza Eheso ebeta mene Guvelesi veꞌmi gonoꞌveꞌmi gihile sotoꞌ ilineꞌ aka nene naba goloso ngoloꞌ lo-nedavo aꞌmine gono nene noduvo monokumuꞌ meheꞌine imi lovo i limaaꞌ ave nene vaiꞌ goloso nizave. Nemuꞌ nene aꞌmine gono naba nene do minelove lo idoꞌ lovo i limaaꞌ avete Izesuꞌ evenele di gopo i-ngidikelizave lo lengiꞌ nizada liteꞌ lo vamo Eheso ebeta mene ha nouvo Zuda veti holiseꞌ gamene ma gulive Pedekosi nene aliteleseive.   
\p
\v 10 Idoꞌ Timoteoꞌ nene naza Guvelesi veꞌmi gonoꞌve gehaaꞌ nouvoniꞌ neꞌmino nogihinaze. Kolidi aleve lengiꞌ nizada novivo ma nene okoꞌnoloꞌ gelalize. Gehe gehe izi imi gamazi laminekovoꞌ li-imi minilo.  
\v 11 Idoꞌ ezemuꞌ nene haza ve ve li lingine ningi huli-damilo. Lengita navo ma hongu gamazivoꞌ li-imi mini neniꞌ nouvoda alingumuꞌ ve li akaꞌve vili-di imiselilo. Leze zuhosi mela eze alingumuꞌ nene gizebo o none.   
\p
\v 12 Idoꞌ idise neve nene leze zuho Apoloꞌni mamuꞌ nene lolouve: Apoloꞌni nene leze zuho lingesi lengita vilive lo geli gelinga lo-duvoniꞌza aza nene lulo aꞌmida vamivo amuzo molo vamolove lo lingine nizada nene vamive. Vaminako alingeꞌ vilineꞌ aka lamineꞌ ma sotoꞌ o-davo ma nene lengita vilive.   
\s1 Pauloꞌ Kolidi Aleve Gekeꞌ Lo-ngedo Luhuvo Gize Osuꞌ Lineꞌ Gamazi  
\p
\v 13 Initeꞌ maliꞌmo lutine nene do goloso ogalize. Eheꞌ igi mini monoꞌ nemuꞌ gatine sita sataꞌ gilami amuzo mili gili eleꞌvoleꞌ igivoꞌ minilo. Idoꞌ eleꞌvoleꞌ igi vemohoꞌ liliꞌ igi oti pehe li minilo.  
\v 14 Initeꞌ igi mili ilizaniꞌ mukiꞌ nene haza igi mili ami nasahiliꞌ idoꞌ mangi idoꞌ lutine ngemaaꞌ monovotidotikovoꞌ nene igi mili minilo.   
\p
\v 15 Neze zuhokizo lingine Setehanoꞌ zuho mamuꞌ gili nizave. Ingine nene aꞌmine lengiꞌ Akaia misubotinguꞌ nene eveneꞌ mukiꞌ minangutiꞌ engiꞌ nene gomuꞌ mili Izesuda vi giꞌmizi eze evenele liliꞌ igi Izesuꞌ zuho linge ma hize eleꞌ o-ngedaaꞌ gono dalone li aꞌmine gonomuꞌ luꞌine otavo di nizave.  
\v 16 Lingine aꞌmineꞌmine igi aꞌmine neꞌmine vesi idoꞌ engiꞌ makatoꞌ gono amuzo mili daaꞌ navesi gelekeleꞌ i-ngidi minilizave lo naza amuzo molo nolo-lingimuve.   
\p
\v 17 Idoꞌ vekise Setehanoꞌ ve Hotunatoꞌ ve idoꞌ Akaikoꞌ ve nene neniꞌ nouvoda lingine mo amavo mulumo gele-lengedo nouvodoꞌ ingine nenita igi hetelikevo muluꞌneuꞌ lamineꞌ gelo nouve.  
\v 18 Neꞌmini igi hetelaniꞌ neꞌmo nene neniꞌ muluꞌneuꞌ lamineꞌ giluvo niteꞌ dikevo lamineꞌ goloso gelekuve. Idoꞌ aꞌmineꞌmine ogo lengiꞌ lutinesi nene di lamineꞌ i-lingidi nizave. Nemuꞌ neꞌmine ve nene di naba i-ngidi di lamineꞌ i-ngidilizave.   
\p
\v 19 Idoꞌ Asia misubouko mene Izesuꞌ zuho mulise ato atoꞌ nete nene lengikumuꞌ gekeꞌ li-lingidi nizave. Idoꞌ Akuilaꞌ ve elenaho Pilisikilaꞌ ve engiꞌ numunguꞌ di geseꞌ igi monoꞌ gilaaꞌ ave ingine nene lengiꞌ longopoꞌni goloso nilavo noluve.  
\v 20 Idoꞌ Eheso ebeta mene leze zuho nizaniꞌ netesi longopoꞌni nilave. Idoꞌ monokuꞌ igi di nubo ilizaniꞌ nene Oꞌmosoꞌmi evenelelite ilizadoꞌ o minineꞌ monovoloꞌ igi ge meseꞌ aseka lo-nede ne meseꞌ aseka lo-gede li minilo.   
\p
\v 21 Luhuvo mene gamazi noluvo ve maliꞌmo gize-nidineꞌza idoꞌ longopoꞌni lo luhuvo mene neniꞌ Pauloꞌ nene aꞌnedunuꞌ nogizuve.   
\p
\v 22 Idoꞌ ve ma ingine hamo hamoꞌ Guvelesi ve luꞌine imamilizave nene Guvelesi veꞌmo usiꞌ ize-ngidivoo lo noluve.  
\p Idoꞌ Guvekasi ve ano lo noluve.   
\p
\v 23 Idoꞌ Guvelesi ve Izesuꞌ nasahiliꞌve nene lengita mine molo minivoo lo noluve.   
\p
\v 24 Lengikisi nenikisi nene Izesuꞌ Kilisitoꞌ evenele nounako nemuꞌ ve lo luꞌneꞌve nene lengiꞌ lengeme nouve losa longopoꞌni noluve. Luvoniꞌ neꞌmino miniliho. Moda aꞌnesiꞌ ve.