\id 2TI - Sari
\ide UTF-8
\h 2 Timɔti
\toc1 Kiŋwaati ki kiŋga kifɛ ki Pɔɔ tɛ̀ tsɛɛ li Timɔti-i
\toc2 2 Timɔti
\toc3 2Ti
\mt2 Kiŋwaati ki kiŋga kifɛ ki Pɔɔ tɛ̀ tsɛɛ li
\mt1 Timɔti-i
\imt1 Fiee fi nuuŋ lɛ Kiŋwaati ki Timɔti-i ki kiŋga kifɛ kini
\ip Lɛ kiŋwaati kini-i, fi ŋge fiɛɛ nuuŋ bɛntiifɛ bɛ Pɔɔ tɛ̀ nyɛɛ li Timɔti-i si wi wu be wu nindi fi-i wu. Wu teeɔ ŋge kii shéŋ yi kanɛ. Wu nyɛɛɔ ntifi li Timɔti-i le ni giiŋgi limfwe bɛ nimɛ chee chi nindi li Jiso Krai bɛ shéŋ yimumkpaŋ, bɛ le ni kɛmi nɛɛ ntiifɛ wu chɛɛŋ wu kii ntoŋ wu dzeeŋ bɛ wu nuuŋ lɛ leh wu fichi-i. Wu nyɛɛɔ ntifi tɛ le ni nindi nimɛ chee si wi wu ntiifɛ bɛ wi wu deŋgi fenjisi jɛ yi Nyɔ bujɔŋ mɔɔ ŋiŋgi bumfa niŋ le, mɔɔ bɛniiŋ tɛchini wu niŋ le.
\ip Pɔɔ bɔsɔɔ yi wu tee tɛ li Timɔti-i le ni ŋiŋgi le kiiŋ ni dza lii kimfimɛ li “bitɛchinɛ bi kibere-e bi lɔɔlɔɔ kɛ” (2:23). Li biee bini bichu-u tɛ̀ kiimi Timɔti le dzɔɔ mbosɛ li ntsɛ wu we-e.
\iot Bikoo bi biee bi lɛ Kiŋwaati kini-i
\io1 1:1-2 Mbɛɛchɛ
\io1 1:3–2:13 Pɔɔ nyɛ kiyɔɔni li Nyɔ-ɔ kii Timɔti tuu ŋkaaŋgi shéŋ yee
\io1 2:14–4:5 Pɔɔ nyɛ ntifi li Timɔti-i
\io1 4:6-18 Pɔɔ tee kii yi yee
\io1 4:19-22 Kimɛrisɛ
\c 1
\p
\v 1 Ɛ mi Pɔɔ, nnuuŋ ŋwanɛ ntoŋ wu Krai Jiso li kiŋkɔŋgisɛ ki nuuŋ ki Nyɔ-ɔ. Fini biki ŋkaachɛ wu kii ntsɛ wu kimakɛ wu nuuŋ li Krai Jiso-o.
\p
\v 2 Ntsɛkɔɔ kiŋwaati kini li wɛ-ɛ Timɔti ŋwanɛŋ. Ɔ nuuŋ shéŋ yɛŋ.
\p Nyɔ Baa bɛ Krai Jiso wu Taa wusɛŋ doonchɛ wɛ shéŋ yi dzeeŋ, kɔɔ nshiiŋ bɛ wɛ, nyɛ wɛ mbɛɛŋgii.
\s Pɔɔ nyɛ kiyɔɔni li Nyɔ-ɔ kii Timɔti tuu kaaŋgi shéŋ yee
\p
\v 3 Mbɛɛ ŋkiimi wɛ mfi kwi butuu bɛ fɛnshaaŋ li nlɛkɛ li Nyɔ-ɔ wɛŋ ntuu nyɛɛ tɛ kiyɔɔni li Nyɔ-ɔ yi nindi li yi-i fiee tɛ saa mi li shéŋ kɛ nɛɛ si bɛtaa tɛ̀ nindi. 
\v 4 Mbɛɛ fɛ ŋkiimi musu mɛ ɔ tɛ̀ shiikisi mfi wu tɛɛ wɛ tɛ tɛ̀ gatɛ, nshɔɔŋ tɛti mi le bee mi ŋɛŋ wɛ, le shéŋ yɛŋ yisɛ bɛ kinɛɛtinɛ. 
\v 5 Nti mbɛɛ ŋkiimi tɛ kimbeenchɛ ko ki chɛɛŋ ki ɔ kɛmi. Kimbeenchɛ kini tɛ saa ki nuuŋ ki ŋkoko wa wu Loys bɛ na wu Yuni tɛ kɛmi, nse ŋkiiɔ mɛŋinɛ nsiŋ le ɛ ki ki ɔ kɛmɔɔ dɛɛni. 
\v 6 Fiɛɛ fiee fi ŋ'wɛkɔɔ le ŋkimi wɛ le ɔ kaari ɔ kaaŋgi li nya yi Nyɔ yi nuuŋ li wɛ-ɛ, ɔ fokɛ yi, yi ni yi duti li wɛ-ɛ si wi. Nya yini nuuŋ yi ɔ tɛ̀ kɛmɛ mfi wu ntɛ̀ ŋgɛɛ tsaŋ yɛŋ li wɛ-ɛ. 
\v 7 Ɔ kɛɛ le Nyɔ ti mɛɛŋ ki nyɛ kɛ fiana li tɛɛbeŋ le yi fɛ bee tɛ ni tɛ kɛmi chɛnɛ kɛ. Yi tɛ̀ nyɛ nuuŋ fiana yi buŋga bɛ yi kiŋkɔŋgisɛ mɔɔ yi nuuŋ yi fɛ bee tɛ ni tɛ ni bichi lɛ yi yisɛ-ɛŋ.
\p
\v 8 Bɛdɛɛni, kiiŋ ɔ ni ɔ nuuŋ bɛ buya li ntefu li bɛniiŋ bamu kii Taa wusɛŋ wu nnindi ncha kii wu kɛ. Se nuuŋ le ɔ dzeti tɛ wa ŋgɛ li ntoŋ wu dzeeŋ wuni bɛ buŋga bu Nyɔ nyɛ li wɛ-ɛ. 
\v 9 Ɛ Nyɔ yi tɛ soo bee, yi teeŋ bee le tɛ ni tɛ tsiiŋ ntsɛ wu nuuŋ wu bɛniiŋ bee. Yi tɛ̀ mɛɛŋ ki fɛ kɛ fini kii nimɛ chimu chi tɛ tɛ̀ fɛ kɛ. Tɛ gii nuuŋ kii nachɛ wu yi li bee li, mɔɔ shéŋ yee yi dzeeŋ yi tɛ̀ kɛmi li bee li kɛti li Krai Jiso-o nshɛ mɛɛŋ yi se naa yi bɛchi. 
\v 10 Dɛɛni, Nyɔ doonchɛ yɛ shéŋ yee yi dzeeŋ yilu li bee li si Kinsofu kisɛŋ ki Krai Jiso bɛ kɛɛ lɛ. Wu lɛɛshɔɔ buŋga bu kwe-e, yi se doonchɛ ntsɛ gbanaa, le wi mɛɛŋ yɛ tuu kwi kɛ. Yi fɛ yɛ fi yenɛ gbanaa nuuŋ bɛ ntoŋ wu dzeeŋ. 
\v 11 Ɛ ntoŋ wu dzeeŋ wulu wuni wu Nyɔ buu yɛ mi le ni nuuŋ wi wu mfenjisɛ bɛ ŋwanɛ ntoŋ wu Krai mɔɔ Wi wu Ntiifɛ. 
\v 12 Ɛ kii fini fi ŋiŋgi ŋgɛ wu ŋiŋgi wuni ni. Se nuuŋ le ŋkɛmi yɛ buya kɛ, kifɛ ŋkiiɔ wi wu mi ŋgɛɛ shéŋ li mwɛ-ɛ. Ŋkiiɔ mɛŋinɛ nsiŋ le nuuŋ nɛɛ ni bichi lɛ fiee fi mi nyɛ li tsáŋ yee li fini,\f + \fr 1:12 \fr*\ft Dɛɛŋ le, “Nuuŋ nɛɛ ni bichi nɛɛ lɛ fiee fi wu nyɛ li tsáŋ yɛ-ɛŋ fini”,\ft*\f* gɛɛŋ bo bu jobɛ chi kimɛrisɛ-ɛ 
\v 13 Ɔ biki nɛɛ nuuŋ dze yi ntiifɛ yi chɛɛŋ yi ntɛ̀ ntifi wɛ lu. Si ɔ biki lɛ gɛɛ nɛɛ shéŋ nuuŋ li Krai, ɔ kɛmi tɛ kiŋkɔŋgisɛ li bɛniiŋ li, fichu ni fi nuuŋ lɛ dze yi bɛniiŋ bɛ Krai Jiso-o. 
\v 14 Ɔ kɛmi li ntiifɛ wu chɛɛŋ li wu bɛ tɛ̀ nyɛ li tsáŋ ya-a. Ɔ bichi bɛ buŋga bu Fiana yi Waaŋ yi nuuŋ li yi yisɛ-ɛŋ.
\p
\v 15 Ɔ kiiɔ le bɛniiŋ bɛchu bɛ lɛ kimbɛ ki Eesha tɛ too mi. Li kintutu kibee tɛ̀ nuuŋ, Figelu bɛ Hɛmogenes. 
\v 16 Nlɛkɔɔ li Nyɔ-ɔ le Taa kɔɔ nshiiŋ bɛ yih yi Onesifolu. Ti shiiŋ feti nɛɛ li kiŋga-a li kiŋga-a shéŋ yɛŋ se dendi. Buya tɛ keeti yɛ wu kii ncha wu ntɛ̀ nnuuŋ lu kɛ. 
\v 17 Tɛ̀ nuuŋ mfi wu tɛ fɛsi Lom fɛni, tɛ bɔsɛyi gɔɔŋ mi siiŋ gɛɛŋ bo si tɛ̀ ŋɛŋ mi. 
\v 18 Nlɛkɔɔ li Nyɔ-ɔ le Taa fɛ le ke bu jobɛ chi kimɛrisɛ-ɛ, Taa se kɔɔ nshiiŋ bɛ wu. Ɔ gbɛŋgɔɔ ɔ kii nimɛ chichu chi tɛ̀ nindi li mi-i li kitoŋ ki Ɛfɛso.
\c 2
\s Si nuuŋ Timɔti ni gwii li fiee fi Nyɔ-ɔ
\p
\v 1 Timɔti ŋwanɛŋ, li wɛ-ɛ, ɔ lemi mkpaaŋ ɔ tɛɛmi biki shéŋ yi dzeeŋ yi Krai doonchɛ li wɛ-ɛ. 
\v 2 Ɔ dzeti fiee fi ɔ ti shiiŋ ɔ wuki ntiiti li bɛniiŋ li ŋge limfwe fiɛɛ ɔ giki li tsáŋ yi bɛniiŋ bɛ nuuŋ tsaaŋ bɛ nuuŋ be kɔchɛ le bɛ nuuŋ be ni be fenjisi bɛniiŋ bamu lu tɛ. 
\v 3 Ɔ dzeti tɛ wa ŋgɛ si wi wu nchi wu chɛɛŋ wu Krai Jiso. 
\v 4 Wi wu nchi ti bɛɛ ɛ nuuŋ li nimɛ chee li tɛ tuu le lii yi yee li biee bi bɛniiŋ bɛ yee lɛ kɛ, kifɛ fiee fi bichi li fi-i nuuŋ le fɛ fiee fi te kikoo we Kɔŋgisi. 
\v 5 Ɛ nɛɛ lɛ si wi wu letini ŋgwɛti nuuŋ tɛ naa letɛ le sɔ, fuki fɛ letini biki bɛnchi bɛ ŋgwɛti-i nsiŋ kɛ. 
\v 6 Wi wu nindi wɛ bujɔŋ, ɛ wu wu kɛmi le saa mɔŋ fiee lɛ biee bi tɛ tɔyɛ-ɛ linti. 
\v 7 Beechɛ kii biee bi ntiiti bini Taa se fɛ ɔ kɛɛ bi bichu.
\p
\v 8 Ɔ kiimi Jiso Krai. Tɛ̀ bo li kwe-e. Tɛ̀ gii nuuŋ wi wu li kini ki Mfɔŋ Daafi-i. Ɛ fi fi mfenjisi li ntoŋ wɛŋ wu dzeeŋ li. 
\v 9 Ɛ kii ntoŋ wu dzeeŋ wuni wu ŋiŋgi ŋgɛ, nnuuŋ li bɛmfaŋgɛ-ɛ si wi wu bondɛ nchi. Se nuuŋ le, mɔɔ nuuŋ si mi ŋ'wɛ li bɛmfaŋgɛ-ɛ lɛ, jɛ yi Nyɔ nuuŋ yɛ li bɛmfaŋgɛ-ɛ kɛ. 
\v 10 Si fi nuuŋ lɛ, nse ŋkɛndi nɛɛ shéŋ li fiee fichu-u kii bɛniiŋ bɛ Nyɔ tɛ tsaa, ke be se kɛmɛ tɛ kinsofu li Krai Jiso bɛ bunɔŋa bu kimakɛ. 
\v 11 Tefɛ chini nuuŋ nɛɛ chɛɛŋ, chi nuuŋ le:
\q1 Ɛ tɛ taashɛ tɛ kwi bɛ wu,
\q1 tɛ naa tɛ ni tɛ tsiiŋ bɛ wu.
\q1
\v 12 Ɛ tɛ kaŋ shéŋ,
\q1 tɛ naa tɛ ni tɛ sɛki bumfɔŋ bɛ wu.
\q1 Ɛ tɛ faaŋ wu,
\q1 naa faaŋ tɛ bee.
\q1
\v 13 Ɛ tɛ lemi yɛ mkpaaŋ kɛ,
\q1 ba nɛɛ ni lemi mkpaaŋ,
\q1 kifɛ nuuŋ tɛ faaŋ yi yee kɛ.
\s Wi wu nimɛ wu Nyɔ beŋ
\p
\v 14 Kimi be biee bini, ɔ tuuɔ tee li bee li Nyɔ-ɔ limfwe le be chikɛ bɛ bitɛchinɛ kii jɛ́. Bi fi-i yɛ wi kɛ. Bi bifisi bɛniiŋ be yiki bi. 
\v 15 Ɔ gwenini ŋge le ɔ ni ɔ doonchi yi ya lɛ Nyɔ lii si wi wu Nyɔ ŋiŋgi le nuuŋ tsaaŋ. Ɔ nuuŋ wi wu nimɛ wu kɛmi yɛ fiee fi buya keeti wu lu kɛ, mɔɔ wu kɛmi chɛɛŋ wu jɛ yi Nyɔ lɛ dze yi tsaaŋ li. 
\v 16 Ɔ wɛti yi li tefɛ chi kɛmi yɛ fiee fi fɛrɛ bɛ Nyɔ kɛ, kifɛ tefɛ chilu gii chi fɛ bɛniiŋ ni be tsiiŋ ntsɛ wu nuuŋ yɛ wu Nyɔ wɛki kɛ be giiŋgi bɛ wu bulimfwee. 
\v 17 Bɛntiifɛ bɛ bee bɛlu dzɛti be nuuŋ si kikɔti ki jii wi ki yɛɛdi ki kuu. Kintutu ki bɛniiŋ bɛ tiifi ntiifɛ wuni nuuŋ Imenayus bɛ Filitus. 
\v 18 Be chinɛ baa dze yi chɛɛŋ si be lemi le Mbochu wu li kwe-e dzɔ wɛ kintsii kituŋ. Si be fɛ lɛ, be biifi baa kimbeenchɛ ki bɛniiŋ bamu. 
\v 19 Se nuuŋ le, kimfoo ki nuuŋ ŋgɛwu wu Nyɔ, nuuŋ ki tɛɛmi, ki lemi nɛɛ fe. Kimfoo kini nuuŋ ɛ Nyɔ tsɛɛ ŋkiki we li ki-i wu nuuŋ le, “Taa kii bɛniiŋ bɛ nuuŋ bee,” mɔɔ le, “Wi kwikwi wu teenyi bukooŋ bu Taa lɛ, kɛmi le chinɛ mferu biee bibifi.”
\p
\v 20 Li yih yi wi wu nyɔŋa-a, bɛtasa bɛ bɛke kɛ muka mu ti nuuŋ lu ti nuuŋ yɛ ɛ bɛ nachɛ bɛ bikwa bi gaa kɛ bi ncherere kwaa kɛ. Yimi ti nuuŋ ɛ bɛ nachɛ bɛ biti mɔɔ ɛ bɛ nachɛ bɛ chimɛ. Shó yini nuuŋ yimi kɛmi nimɛ chi shaaŋ, yimi se kɛmi nimɛ chi lɔɔlɔɔ.\fig Shó|alt="Vessels" src="hk00143c.tif" size="col" copy="Horace Knowles" ref="2:20"\fig* 
\v 21 Nɛɛ lɛ, ɛ wi wu buu tsáŋ yee fɛ biee bi kɛmi nimɛ chi lɔɔlɔɔ, kɛ gii ni nuuŋ si sho yi nuuŋ bɛ ni bɛ dzeti bɛ nindi nimɛ chi shaaŋ lɛ lu. Wɛ wi wu Nyɔ fɛ le ni nuuŋ wi we kituŋ. Wɛ wi wu tɛŋgi te kikoo we le ni dzeti wu nindi nimɛ chee chi dzeeŋ chichu lu. 
\v 22 Nɛɛ lɛ, ɔ kiifi fio biee bi yi nyiŋini bɛsɔɔŋ li bi-i. Ɔ gwenini le ɔ ni ɔ bichi fio nuuŋ lɛ ntsɛ wu tsaaŋ li bɛ le ɔ ni ɔ kɛmi kimbeenchɛ mɔɔ kiŋkɔŋgisɛ bɛ ntsɛ wu mbɛɛŋgii. Ɔ feti lɛ nɛɛ si bɛniiŋ bɛ teenyi tɛ bukooŋ bu Taa lɛ bɛ shéŋ yibe yi wuuti feti. 
\v 23 Kiiŋ ɔ ni ɔ kɛmi fiee fi fɛrɛ bɛ bitɛchinɛ bi kibere bɛ bi lɔɔlɔɔ kɛ, kifɛ bi ti bɛɛ nɛɛ nuuŋ bɛ ntsooŋ. 
\v 24 Wi wu nimɛ wu Taa se kɛmi yɛ le ni tsuki ntsooŋ bɛ bɛniiŋ kɛ. Kɛmi le ni nuuŋ bɛ shéŋ yi dzeeŋ li wi kwikwi, nuuŋ wi wu kii ntiifɛ bɛniiŋ, kii tɛ ŋkanu shéŋ bɛ bɛniiŋ. 
\v 25 Kii si nachi fiee bɛ mbɛɛŋgii li bɛniiŋ bɛ tɛchini wu-u. Ti bɛɛ nachi lɛ, bɛ mbeechɛ le nuuŋ Nyɔ fi be, be se fiiki shéŋ yibe be kɛɛ fiee fi chɛɛŋ, 
\v 26 be tuu be teeŋ bufii bu bee lijiŋ, be kifi be bo li kintasi ki kiŋkundi-i ki kɔɔ be ki feti le be ni be feti nuuŋ fiee fi ki Kɔŋgisi.
\c 3
\s Biee bi koofi yi gii bi ni bi kɛti bu jobɛ chi kimɛrisɛ-ɛ
\p
\v 1 Ɔ kɛɛ le, naa nuuŋ li jo yi lɛji-iŋ, biee bi tɛɛmi gii naa bi ni bi kɛti ŋge. 
\v 2 Bɛniiŋ gii naa be dza be ni be kɔŋgisi nuuŋ yí yibe, be ni be kɔŋgisi kwa, be tsakisi yi, be doonchi yi, be yeti jɛ́ yi bifi kii bɛniiŋ bamu. Be se tɛ tuu le be ni be wuki bɛni bɛ bee bɛ bɛ tee bɛ bee kɛ, be tɛ nyɛ kiyɔɔni li fiee li kɛ, be tɛ kɛmɛ kiŋge ki wuuti tɛ kɛ. 
\v 3 Be nuuŋ tɛ kɛmɛ nshiiŋ li bɛniiŋ li kɛ, be tɛ feeki bidzɔ bi bɛniiŋ lɛ kɛ. Be gii be ni be bifisi mɛŋkooŋ mɛ bɛniiŋ lɛ, be tɛ nuuŋ le nuuŋ be kɛmɛ yí yibe kɛ. Be gii naa be ni be kɛmi biŋge bi bɛndi yi, be tɛ kɔɔŋgi fiee fi dzeeŋ kɛ. 
\v 4 Be gii naa be ni be lii ntsuuŋ kii bɛniiŋ, be tsiiŋ ntsɛ wu waniti-i, nuuŋ ɛ be yisɛ bɛ yi yi tsakisɛ. Be gii naa be ni be kɔŋgisi nuuŋ kikuuŋ ki jɛ yɛki fɛ nuuŋ be ni be kɔŋgisi nuuŋ Nyɔ. 
\v 5 Be gii be ni be doonchi le be lemi li fiee fi Nyɔ-ɔ, se nuuŋ le be fɛŋgi buŋga bu fiee fi Nyɔ-ɔ filu. Ɔ wɛti yi li ŋwaani beeyɛ bɛniiŋ li. 
\v 6 Bɛniiŋ bani bamu deŋgi baa be lii li yih yi bɛniiŋ li be kɛti bukɛɛŋ bɛ nuuŋ wɛɛ bɛ bibifi bi bee yikɛ be, be njiindi be giki ŋgeeŋ lɛ biee chichi chichi-i. 
\v 7 Bani bukɛɛŋ nuuŋ bɛ ti shiiŋ be yiki ntiifɛ mfi kwi, se nuuŋ le be nuuŋ tɛ naa kɛɛ fiee fi nuuŋ fi chɛɛŋ kɛ. 
\v 8 Si Janis bee Jambrɛs tɛ̀ fɛŋgi Mɔɔsɛ, ɛ nɛɛ lɛ si bɛniiŋ bani tɛ̀ fɛŋgi chɛɛŋ wu Nyɔ. Nuuŋ bɛniiŋ bɛ bufii bubee bu lakɛ, shéŋ yi be kweŋgi le be gɛɛ baa li Krai se nuuŋ binsɛɛ. 
\v 9 Se nuuŋ le be nuuŋ tɛ fɛ lɛ le be gɛɛŋ mfiiŋ kɛ, kifɛ kibere kibee gii ki yenɛ gbanaa li bɛniiŋ bɛchu si ki Janis bee Jambrɛs tɛ̀ yenɛ.
\s Pɔɔ tifi Timɔti le ni lemi li fiee fi be tɛ tiifi wu lu
\p
\v 10 Timɔti, ɔ wɛ fio, ɔ kiiɔ kii ntiifɛ wɛŋ kituŋ bɛ ntsɛwu wɛŋ mɔɔ fiee fi nti nlekisi bufii li fi-i. Ɔ kiiɔ tɛ kii shéŋ yi mi ŋgɛɛ li Nyɔ-ɔ bɛ shéŋ yi nti ŋkɛndi, mɔɔ kiŋkɔŋgisɛ ki ŋkɛmi li bɛniiŋ li, bɛ si nshiiŋ ŋgwɛnini li fiee fichu ŋgiiŋgi limfwe. 
\v 11 Ɔ kiiɔ tɛ bikaa bi bɛniiŋ tɛ biindi lɛ mi-i jiŋ mɔɔ bɛŋgɛ beŋ. Ɔ kiiɔ biee bi tɛ̀ kɛti bɛ mi Antiɔk bɛ Ikonyɔŋ mɔɔ Listra. Ɔ kiiɔ ŋwaani bikaa bi bɛniiŋ tɛ biindi lɛ mi-i jiŋ. Se nuuŋ le, li bɛŋgɛ bani bɛchu-u Taa tɛ̀ suuti nɛɛ mi li bee. 
\v 12 Fi nuuŋ chɛɛŋ le wi kwikwi wu wɛki le ni tsiiŋ ntsɛ wu Nyɔ wɛki si wi wu taashɛ bɛ Krai Jiso bɛ gii bɛ ni bɛ biindi nɛɛ bikaa lɛ wu-u jiŋ. 
\v 13 Bɛniiŋ bɛ cheti biee bɛ bɛniiŋ bɛ nimi-i, kiŋge kibee gii naa ki fɔ ki ni ki giiŋgi tɛ si be yɛŋgi bɛ bɛniiŋ bamu be yɛŋgi tɛ bɛ yi yibe. 
\v 14 Se nuuŋ le, li wɛ-ɛ, ɔ lemi nɛɛ nuuŋ li fiee fi bɛ tɛ̀ tifi wɛ lu-u, ɔ beŋ fi bɛ shéŋ ya chi. Ɔ lemi li fi-i kifɛ ɔ kiiɔ bɛniiŋ bɛ tifi wɛ fi. 
\v 15 Ɔ tɛ̀ bɛchi ɔ kii biee bi bɛ tsɛɛ lɛ Kiŋwaati ki Nyɔ-ɔ ɔ mɛɛŋ ŋwaŋ wu bwi. Biee bini nuuŋ bi nuuŋ bi tifi wɛ ɔ kɛmɛ kinsofu kɛti li shéŋ yi ɔ gɛɛ li Krai Jiso-o. 
\v 16 Fiee fichu fi bɛ tsɛɛ lɛ Kiŋwaati ki Nyɔ-ɔ nuuŋ ɛ bufii bulu dza fɛ Nyɔ-ɔ. Fi fi-i li ntiifɛ bɛniiŋ lu-u, fi doonchi chɔ yi wi, fi naanyi biee bɛ bɛniiŋ lɛ, fi tiifi bɛniiŋ ntsɛ wu tsaaŋ, 
\v 17 le ke wi wu nuuŋ wi wu Nyɔ ni nuuŋ ɛ wu kɔchɛ, kɛmi fiee fichu fi fɛrɛ nimɛ chi dzeeŋ chichu lu.
\c 4
\s Pɔɔ tee Timɔti le ni nindi nimɛ chee bujɔŋ
\p
\v 1 Ntiiti fini li wɛ-ɛ Nyɔ limfwe bɛ Krai Jiso wu gii naa saa bɛniiŋ bɛ mɛɛŋ lu mɔɔ bɛ tɛ̀ kwiyɛ. Ntiiti kii mbundinɛ wu gii naa mbundɛ mɔɔ kii bumfɔŋ bwee ntiiti le, 
\v 2 ɔ fenjisi jɛ yi Nyɔ. Ɔ fenjisi nɛɛ ɔ giiŋgi bɛ yi, mɔɔ nuuŋ mfi wu tsaaŋ mɔɔ nuuŋ yɛ mfi wu tsaaŋ kɛ. Ɔ tɔchi bubiɛɛ bu bɛniiŋ lɛ, ɔ lekisi be, ɔ kaŋgisi shéŋ yibe bɛ mbɛɛŋgii mɔɔ ntiifɛ wa. 
\v 3 Ɔ kɛɛ le mfi bɛɛɔ wu bɛniiŋ nuuŋ tɛ leŋ li mfenjisɛ wu tsaaŋ li kɛ. Bintooŋ bi bee gii bi ni bi fuu le bi woo nuuŋ fiee fimu fi chichi. Be gii be ni be geendi nuuŋ bɛniiŋ bɛ ntiifɛ-ɛ, bɛ gii be ni be tiifi be nuuŋ fiee fi be kɔŋgisi le be woo. 
\v 4 Be gii be chinɛ ŋ'wowu fiee fi chɛɛŋ, be ni be njiindi be giiŋgi nuuŋ lɛ muloŋ mu nuuŋ yɛ chɛɛŋ kɛ. 
\v 5 Se nuuŋ le, li wɛ-ɛ, ɔ giki yi ya tsaaŋ mfi kwi, ɔ kɛndi shéŋ li bɛŋgɛ-ɛ, ɔ nindi nimɛ chi wi wu deŋgi fenjisi jɛ yi Nyɔ. Ɔ nindi nimɛ cho chi bɛ nyɛ li wɛ-ɛ chichu.
\p
\v 6 Li mi-i, miɔ dɛɛni si mbiiŋ, mfi kɔchɔɔ kituŋ wu bɛ gii bɛ dzɔɔ mi bɛ foŋ si bɛ ti fundi mbiiŋ lɛ. Mfi wu ŋgii ŋkoo kɔchɔɔ kituŋ. 
\v 7 Mi ŋgwɛɔ bugwe bu dzeeŋ li fiee fi Nyɔ-ɔ, mi nletɔɔ ŋgwɛti mi mɛɛshi, mi ŋkɛmɔɔ kimbeenchɛ keŋ mi mba li ki-i. 
\v 8 Mbɛɛchɛ li dɛɛni, bɛ gɛɛ baa kifɔ keŋ ki bumfɔ-ɔŋ ki nuuŋ ki ntsɛ wu tsaaŋ lɛ. Kifɔ kini kɛɛ ki Taa wu nuuŋ wi wu sɛki bɛnsa tsaaŋ gii naa beeŋ li mi-i fa bu jobɛ chi kimɛrisɛ. Se nuuŋ tɛ beeŋ nuuŋ keŋ kwaa kɛ. Gii beeŋ tɛ ki bɛniiŋ bɛchu bɛ tɛŋgi le kaari bɛ.
\s Pɔɔ tee si biee biɛɛ lɛ kimbɛ kee li
\p
\v 9 Timɔti, gwenɛ nɛɛ bujɔŋ le ɔ bakɛ ɔ bɛ tsɛkɛ lɛ mi-i. 
\v 10 Ɔ kiiɔ le Dɛma kɔɔŋgɔɔ biee bi li nshɛ bi dɛɛni bini, wu chinɔɔ mi wu gɛɛŋ Tɛsalonika. Kresɛns gɛɛŋɔ Galashaŋ, Taato se gɛɛŋ Dalmatia. 
\v 11 Shɛɔ nɛɛ Luk wuu mbiiŋ wu wɛ tɛɛ wu. Mfi wuɔ bɛɛ, ɔ dzɔ Mak nɛɛ wu se bɛ. Nuuŋ ni fii mi li nimɛ-ɛ. 
\v 12 Mi ntoŋɔ Tichiku Ɛfɛso. 
\v 13 Mfi wu ɔ bɛɛ, ɔ dzɔ kiŋkoŋ keŋ ki nɔŋa ki ntɛ̀ ŋkiri li yih yi Kapu li kitoŋ ki Towa-a. Ɔ bɛɛ tɛ bɛ biŋwaati bieŋ, teege bi bɛ tɛ̀ nachɛ bɛ dzí yi nyáŋ biɛɛ.\fig Biŋwaati|alt="Scrolls" src="hk00150c.tif" size="col" copy="Horace Knowles" ref="4:13"\fig*
\p
\v 14 Alɛkɛsanda wu tendi gwɛ fɛɔ ŋgɛ bɛ lɛ mi-i nuuŋ yɛ wu didi kɛ. Taa gii naa sooŋ wu li kiŋge kee li. 
\v 15 Ɔ dzeti tɛ mfi bɛ wu. Fɛŋgɔɔ ntoŋ wu tɛ fenjisi wuni ŋge.
\p
\v 16 Li nsa wu wɛ-ɛŋ, tɛ̀ nuuŋ jobɛ chi ŋkosi chi ntɛ̀ nleŋ lɛ ŋko wu nsa-a, wi tɛ mɛɛŋ mi lɛjiŋ ki leŋ kɛ. Bɛniiŋ bɛchu tɛ̀ tuu be kifi mi. Kiiŋ Nyɔ ni saa be li fiee yɛ kɛ. 
\v 17 Se nuuŋ le, Taa tɛ̀ tuu leŋ lɛ mi-i jiŋ, nyɛ mi buŋga bu fenjisɛ ntoŋ wu dzeeŋ lu ŋge le bɛniiŋ bɛchu bɛ tɛ̀ nuuŋ yɛ Bɛjuu kɛ woo ntoŋ wulu. Nɛɛlɛ, tɛ̀ soo mi lɛ kimfimɛ ki buri-i. 
\v 18 Taa gii ni suuti nɛɛ mi li tsaŋ yi fiee fi bifi-i fichu, nsiiŋ gɛɛŋ bo bɛ mi li bumfɔŋ bwee bu liboo li nyɛɛkii. Tɛ ni tɛ yɔɔnchi yi mfi kwi ma nsiŋ. Gɛɛ fi nuuŋ lɛ.
\s Bɛn'yɛɛshɛ
\p
\v 19 Yɛsi Prisilia bɛ Akwila mɔɔ li yih yi Onesifolu. 
\v 20 Ɛrastu tɛ̀ shɛ Kɔrɛŋ, ntɛ̀ nshɛ Tufimu Miletus gendi. 
\v 21 Gwenɛ nɛɛ ŋge le ɔ bɛ mfiee yi tɛɛmi se bɛchi. Yubulus tuumɔɔ n'yɛɛshɛ li wɛ-ɛ. Budeŋ bee Lanɔs mɔɔ Klawda bɛ bɛŋwaanɛŋ bɛsɛŋ bɛchu li Krai tuumi baa tɛ n'yɛɛshɛ. 
\v 22 Nlɛkɔɔ le Taa ni bichi lɛ fiana ya-a. Nyɔ doonchɛ yɛ shéŋ yee yi dzeeŋ li bɛniiŋ li.