\id 1JN - Sari
\ide UTF-8
\h 1 Jɔɔŋ
\toc1 Kiŋwaati ki ŋkosi ki Jɔɔŋ lɛ
\toc2 1 Jɔɔŋ
\toc3 1Jŋ
\mt2 Kiŋwaati ki ŋkosi ki
\mt1 Jɔɔŋ lɛ
\imt1 Fiee fi nuuŋ lɛ kiŋwaati ki Jɔɔŋ lɛ ki ŋkosi kini
\ip Kiŋwaati ki Jɔɔŋ lɛ ŋkosi ki tɛ̀ tsɛɛ li bintaashɛ bi bɛniiŋ bɛ kimbeenchɛ-ɛ kini, kɛmi bikoo bi biee lɛ bifɛ. Bi biɛɛ li ŋkaŋgisɛ shéŋ yi bɛniiŋ bɛ tɛ̀ tsɛɛ li be-e, le be ni be tsiiŋ li kintaashɛ bɛ Nyɔ mɔɔ Ŋwani wu Jiso Krai bɛ li ntiifɛ le be ni be ŋiŋgi kii be biki nlaanchɛ wu binsɛɛ. Wi wu tsɛɛ kiŋwaati kini tɛ̀ bɔsɛyi wu chiinsɛ le, ɛ wi tsiiŋ lɛ kiŋ'wofu-u lɛnti, tɛ tuu le ni feti biee bi kijibɛ-ɛ kɛ. Tɛ tuu tsɛɛ tɛ le Jiso Krai tɛ nuuŋ nɛɛ wiwoŋ, wi kwikwi wu gɛɛ shéŋ li wu-u tuu kɔŋgisi Nyɔ, kɛmi tɛ le ni kɔŋgisi ŋwaani.
\iot Bikoo bi biee bi lɛ Kiŋwaati kini-i
\io1 1:1-4 Mbɛɛchɛ
\io1 1:5–2:29 Ntoŋ wu kii kiŋ'wofu bɛ kijibɛ
\io1 3:1-24 Bɔɔŋ bɛ nuuŋ bɛ Nyɔ-ɔ bɛ bɛ nuuŋ bɛ kiŋkundi-i
\io1 4:1-6 Fiee fi nuuŋ fi chɛɛŋ bɛ fi nuuŋ fi binsɛɛ lɛ
\io1 4:7-21 Kii kiŋkɔŋgisɛ
\io1 5:1-21 Shéŋ yi wi gɛɛ li Krai li seti fiee fichu bu sɔlu
\c 1
\s Jɛ yi nyɛɛ ntsɛ
\p
\v 1 Fiee fi tɛ̀ tsɛki fini nuuŋ kii Jɛ yi nyɛɛ ntsɛ yi tɛ̀ nuuŋ fɛmbɛɛchɛ-ɛ. Jɛ yini nuuŋ yi tɛ tɛ̀ woo biee bi yi tɛ̀ tiiti, tɛ̀ ŋɛŋ yi bɛ lii yisɛŋ, tɛ̀ bichɛ si yi nuuŋ, tɛ̀ koŋ li yi-i bɛ tsáŋ yisɛŋ. 
\v 2 Ntsɛ wuni tɛ̀ yenɛ tɛ ŋɛŋ wu, tɛ se tuu tɛ tiiti kii wu, tɛ fenjisi baa li be-eŋ kii ntsɛ wu kimakɛ wuni wu tɛ̀ nuuŋ bɛ Baa we, wu se yenɛ li bee li. 
\v 3 Fiee fi tɛ tɛ̀ ŋɛŋ tɛ tuu tɛ woo fiɛɛ, ɛ fi fi tɛ fenjisi baa tɛ li be-eŋ le nɛ ni nɛ nuuŋ li kintaashɛ-ɛ bɛ bee. Kintaashɛ kisɛŋ nuuŋ bee bɛ Baa wusɛŋ bɛ Ŋwani wu Jiso Krai. 
\v 4 Tɛ se tsɛki baa fini ke kinɛɛtinɛ kisɛŋ se ni ki nuuŋ ɛ ki yisɛ bujɔŋ.
\s Ntsɛ li kiŋ'wofu-u linti
\p
\v 5 Wuni nuuŋ ntoŋ wu tɛ tɛ̀ woo li wuu, tɛ se laŋini li be-eŋ le, Nyɔ nuuŋ kiŋ'wofu, kijibɛ nuuŋ yɛ li yi-i kɛ dududu. 
\v 6 Bɛdɛɛni, ɛ tɛ kweŋgi le tɛ baa li kintaashɛ-ɛ bɛ yi, tɛ se tuu tɛ deŋgi nuuŋ li kijibɛ-ɛ, kɛ tɛ sɛɛyi baa binsɛɛ, tɛ tsiiŋ yɛ tɛ biki chɛɛŋ kɛ. 
\v 7 Se nuuŋ le, ɛ tɛ deŋgi li kiŋ'wofu linti si nuuŋ tɛ li kiŋ'wofu linti lɛ, kɛ tɛ gii tɛ ni tɛ nuuŋ li kintaashɛ wi bee wi, ŋgɔŋ mɛ Jiso wu Ŋwanɛwi tsootsi tɛɛbeŋ tɛ wuuti li bibifi bisɛ-ɛŋ bichu. 
\v 8 Ɛ tɛɛbeŋ kweŋgi le tɛ kɛmi yɛ bibifi kɛ, kɛ tɛ yɛŋgi baa bɛ yí yisɛŋ, kɛ chɛɛŋ nuuŋ yɛ li tɛɛbeŋ kɛ. 
\v 9 Se nuuŋ le, ɛ tɛ jiishi bibifi bisɛŋ li wu-u, si nuuŋ wi wu ti lemi li jɛ ye-e feti biee tsaaŋ lɛ, kɛ gii feeki bibifi bisɛŋ, tsootsɛ bee, tɛɛbeŋ tɛ ni tɛ wuuti li biŋge bisɛŋ bichu bi ti nuuŋ yɛ tsaaŋ kɛ. 
\v 10 Ɛ tɛɛbeŋ kweŋgi le tɛ mɛɛŋ baa ki fɛ kɛ bibifi kɛ, kɛ tɛ dzɔ baa yi le yi yɛɛ wi wu binsɛɛ, jɛ ye kɛmi yɛ kintsii li yí yi sɛ-ɛŋ kɛ.
\c 2
\s Jiso nuuŋ kimaŋ ki fekisi bibifi bisɛŋ
\p
\v 1 Bɔɔŋ beŋ, ntsɛkɔɔ biee bini li be-eŋ kii nɛ ni dza nɛ ni nɛ feti biee bibifi. Se nuuŋ le, ɛ wi fɛ biee bibifi, tɛ kɛmi baa, wi wu suŋgi bɔ li Baa wusɛŋ kii tɛɛbeŋ. Wi wuni nuuŋ Jiso Krai wu nuuŋ wi wu tsaaŋ. 
\v 2 Ɛ wu wu nuuŋ kimaŋ ki fekisi bibifi bisɛŋ. Kimaŋ kini nuuŋ yɛ li bibifi bisɛ-ɛŋ kwaa kɛ, ki kɛɛ tɛ li bi bɛniiŋ bɛchu bɛ li nshɛ yini-i.
\p
\v 3 Ɛ tɛɛbeŋ giki bɛnchi bɛ Nyɔ-ɔ, fini se nuuŋ mɛŋinɛ nsiŋ le tɛɛbeŋ kii baa yi. 
\v 4 Wi wu kweŋgi le kii Nyɔ, ntuu ŋkichɛ bɛnchi bee nsiŋ, wɛ wi wu binsɛɛ, chɛɛŋ nuuŋ yɛ li wuu bwiŋ kɛ. 
\v 5 Se nuuŋ le, wi wu giki n'yɔru we, nuuŋ wi wu kɔɔŋgi Nyɔ chɛɛŋ, wu gɛɛŋ wu mɛɛshi. Fiee fi nuuŋ fi doonchɛ mɛŋinɛ nsiŋ le tɛɛbeŋ taashɛ baa bɛ Nyɔ nuuŋ fini fi le: 
\v 6 Ɛ wi kweŋgi le wɛ mfikwi bɛ Nyɔ kɛ kɛmi le ni tsiiŋ nɛɛ yɛɛŋ si Krai tɛ̀ tsiiŋ lɛ.
\s Nchi wu fwɛŋ
\p
\v 7 Nsáŋ yɛɛŋ yi shéŋ, nchi wu ntsɛki li be-eŋ wuni nuuŋ yɛ nchi wu fwɛŋ kɛ. Ɛ nchi wu fichi wu nɛ tɛ̀ kɛmɛ mɛɛŋ fɛmbɛɛchɛ-ɛ. Nchi wu fichi wuni ɛ ntoŋ wu nɛ woo baa kituŋ. 
\v 8 Se nuuŋ le, nchi wu ntsɛki li be-eŋ wuni wɛ nɛɛ nchi wu fwɛŋ. Chɛɛŋ wu nchi wuni yeŋgi li Krai mɔɔ li be-eŋ, wu se yenɛ tɛ li yih yinɛ-ɛ. Nchi wulu yeŋgi fwɛŋ kifɛ kijibɛ ma kɛɛ kituŋ ki gɛɛŋ, kiŋ'wofu ki chɛɛŋ bɛchi ki wuuti. 
\v 9 Ɛ wi kweŋgi le wɛ li kiŋ'wofu linti tuu baanini ŋwaani, kɛ mɛɛŋɔ nɛɛ li kijibɛ-ɛ linti. 
\v 10 Wi wu kɔŋgisi ŋwaani nuuŋ mfi kwi li kiŋ'wofu-u linti fiee nuuŋ yɛ li yi yee li fi nuuŋ fi fɛ wu ni deŋgi kɔtini kɛ. 
\v 11 Se nuuŋ le, wi wu baanini ŋwaani wɛ wi wu nuuŋ li kijibɛ-ɛ deŋgi tɛ kɛɛ fɛ giiŋgi kɛ, kifɛ kijibɛ kilu fɛ kɛɛ wu wu nyɛɛ.
\p
\v 12 Bɔɔŋ beŋ, ntsɛkɔɔ li be-eŋ kifɛ bɛ feeki baa bibifi binɛ kii Krai. 
\v 13 Bɛtaa, ntsɛkɔɔ li be-eŋ kifɛ nɛ kɛɛ baa wi wulu wɛ wu tɛ̀ nuuŋ fɛmbɛɛchɛ-ɛ. Bɛsɔɔŋ, ntsɛkɔɔ li be-eŋ kifɛ nɛ sɔ baa wi wu bibifi wɛ kituŋ. Bɔɔŋ beŋ, ntsɛkɔɔ li be-eŋ kifɛ nɛ kɛɛ baa Nyɔ Baa wusɛŋ. 
\v 14 Bɛtaa, ntsɛkɔɔ li be-eŋ kifɛ nɛ kɛɛ baa wi wulu wu tɛ̀ nuuŋ fɛmbɛɛchɛ-ɛ kituŋ. Bɛsɔɔŋ, ntsɛkɔɔ li be-eŋ kifɛ nɛ tɛɛmi baa jɛ yi Nyɔ se nuuŋ li yí yinɛ mfi kwi, nɛ sɔ baa wi wu bifi wɛ.
\p
\v 15 Nse ntuuɔ nyɛɛ beŋ ntifi le, kiiŋ nɛ ni nɛ kɔŋgisi nshɛ yini kɛ biee bi li yi-i kɛ. Ɛ wi kɔŋgisi nshɛ yini, kɛ kɔŋgisi yɛ Baa wusɛŋ kɛ. 
\v 16 Nɛ kɛɛ le biee bichu bi li nshɛ yini-i bi nyaŋ yi bwiŋ kɔŋgisi bɛ biee bi tɛ biindi lii li bi-i, mɔɔ bi bɛniiŋ tsakisi yi li bi-i li ntsɛ wuni-i, nuuŋ yɛ bi dzɛti fɛ Nyɔ Baa wusɛŋ kɛ. Ɛ bi li nshɛ yini-i. 
\v 17 Nshɛ yini gii yi ma, biee bi li nshɛ yini bi bɛniiŋ biindi lii li bi-i gii bi se ma tɛ. Se nuuŋ le, wi wu feti nuuŋ fiee fi Nyɔ kɔŋgisi gii booshɛ.
\s Bɛniiŋ bɛ mbani-i bɛ Krai lɛ
\p
\v 18 Bɔɔŋ beŋ, mfi wuni wɛ wu kimɛrisɛ kituŋ. Si nɛ tɛ̀ woo le wi wu mbani wu Krai gii naa bɛ, dɛɛni yani bɛniiŋ bɛ mbani-i bɛ Krai bɛ baa weseeŋ kituŋ. Fiɛɛ fiee fi fɛ tɛ̀ se kɛɛ le wuni nuuŋ mfi wu kimɛrisɛ. 
\v 19 Bɛniiŋ bani tɛ̀ bo li tɛɛbeŋ linti, fi se fiɛɛ le be tɛ̀ nuuŋ yɛ bɛniiŋ bɛsɛŋ kɛ. Gii nuuŋ le be ni be nuuŋ bɛniiŋ bɛsɛŋ, gii nuuŋ be ba be nuuŋ bɛ bee. Nɛɛ lɛ, be se tɛ̀ bo le fi doonchɛ gbanaa le wu be wumu tɛ̀ nuuŋ yɛ wusɛŋ kɛ. 
\v 20 Nɛ baa finɛ ɛ wu wu nuuŋ wi wu Wuuti fwaɔ\f + \fr 2:20 \fr*\ft Mfwaru wuni nuuŋ Fiana yi Waaŋ yi bɛ nyɛ li bee.\ft*\f* beŋ kituŋ, beŋ bɛchu se kii baa biee bi chɛɛŋ. 
\v 21 Ntsɛki yɛ li be-eŋ nuuŋ le kifɛ nɛ mɛŋɛ baa chɛɛŋ kɛ. Ntsɛkɔɔ kifɛ nɛ kii baa chɛɛŋ, nɛ kii tɛ le binsɛɛ ti buti yɛ li chɛɛŋ li kɛ. 
\v 22 Wi wu binsɛɛ nuuŋ wu la? Ɛ nɛɛ wi wu fɛŋgi le Jiso nuuŋ yɛ Kinsofu ki Nyɔ tɛ̀ kaachɛ kɛ ni? Wi wu fɛŋgi Baa wusɛŋ bɛ Ŋwani ɛ wu wu nuuŋ wi wu mbani wu Krai. 
\v 23 Wi wu fɛŋgi Ŋwaŋ kɛmi yɛ kintaashɛ bɛ Baa wu ŋwaŋ kɛ. Wi wu yɔ bɛ kimfimɛ kee le wu beŋɔ Ŋwaŋ, kɛ mwɛ kɛmɔɔ kintaashɛ bɛ Baa wu ŋwaŋ tɛ. 
\v 24 Nɛ gɛɛ fiee fi nɛ tɛ̀ woo fɛ mbɛɛchɛ fi ni fi nuuŋ mfi kwi li yí yinɛ. Ɛ nɛ gɛɛ fiee fi nɛ tɛ̀ woo fɛ mbɛɛchɛ fi nuuŋ mfi kwi li yí yinɛ, nɛ se ni nɛ nuuŋ mfi kwi li Ŋwaŋ bɛ Baa we-e. 
\v 25 Fiee fi Krai kaachɛ tɛɛbeŋ bɛ fi nuuŋ ntsɛ wu kimakɛ.
\p
\v 26 Ntsɛkɔɔ biee bini li be-eŋ nuuŋ kii bɛniiŋ bɛ wɛki le be ni be yɛŋgi bɛ beŋ. 
\v 27 Se nuuŋ le, ntsiru wu nɛ tɛ̀ kɛmɛ li Krai wɛ mfi kwi li yih yinɛ, nɛ mɛɛŋ yɛ nɛ tuu nɛ wɛki wi wumu le tuu tifi beŋ kɛ. Si ntsiru we wuni tifɔɔ beŋ kituŋ kii biee bichu, ntsiru wulu se wɛ wu chɛɛŋ, nuuŋ yɛ wu binsɛɛ kɛ, nɛ nuuŋ yɛɛŋ tɛ mfi kwi li Krai li nɛɛ si ntsiru wuni tifi beŋ lɛ.
\p
\v 28 Dɛɛni yani bɔɔŋ beŋ, ba yɛɛŋ nɛ ni nɛ nuuŋ mfi kwi li yí yee li, ke mfi wu wu busɛ, tɛɛbeŋ kɛmɛ shéŋ yi ŋɛŋgɛ wu, yuti fɛ nuuŋ tɛ ni tɛ nyimi bɛ buya li mbɛ we-e. 
\v 29 Ɛ nɛ kii tɛ le ti nuuŋ wi wu feti biee tsaaŋ, kɛ nɛ kɛmi tɛ le nɛ ni nɛ kii le wi kwikwi wu feti fiee fi tsaaŋ nuuŋ nuuŋ mbiɛ we.
\c 3
\s Tɛ nuuŋ bɔɔŋ bɛ Nyɔ-ɔ
\p
\v 1 Bichɛ yɛɛŋ nɛ ŋɛŋ ŋwaani kiŋkɔŋgisɛ kinɔŋa ki Baa wusɛŋ doonchɛ li bee li, yi se fɛ le bɛ ni bɛ teenyi bee le bɔɔŋ bɛ Nyɔ-ɔ! Tɛ se baa bɔɔŋ bɛ Nyɔ-ɔ chɛɛŋ. Fiee fi bɛniiŋ bɛ nuuŋ bɛ li nshɛ yini kii yɛ tɛɛbeŋ kɛ nuuŋ kifɛ be ti mɛɛŋ ki kɛɛ kɛ yi. 
\v 2 Nsáŋ yɛŋ yi shéŋ, dɛɛni tɛɛbeŋ baa nuuŋ bɔɔŋ bɛ Nyɔ-ɔ kituŋ, se nuuŋ le tɛ mɛɛŋ baa ki kɛɛ kɛ si tɛ gii tɛ ni tɛ nuuŋ kɛ. Fi tɛ kii nuuŋ nɛɛ le gii naa ni nuuŋ mfi wu Krai busɛ, tɛ gii tɛ ni tɛ nuuŋ si wu, kifɛ tɛ gii tɛ ŋɛŋ wu si nuuŋ. 
\v 3 Fi se tuu fi nuuŋ le, wi kwikwi wu bichi limfwe li wuu kɛmi le ni tsootsi yi yee mfi kwi wuuti si ti wuuti.
\p
\v 4 Wi kwi wu feti biee bibifi nuuŋ wu ti bondini nchi wu Nyɔ, kifɛ biee bibifi nuuŋ nchi wu wi bondɛ. 
\v 5 Nɛ kɛɛ le Krai tɛ̀ bɛ le tsaaki biee bibifi bi bɛniiŋ lɛ. Wu wu Krai kɛmi yɛ biee bibifi kɛ. 
\v 6 Wi wu nuuŋ li Krai li nuuŋ tɛ ba le ni feti biee bibifi kɛ. Wi wu ba feti biee bibifi mɛɛŋɔ saa ki ŋɛŋ kɛ wu kɛ, kɛ le kɛɛ wu kɛ. 
\v 7 Bɔɔŋ beŋ, kiiŋ wi ni yɛɛŋ bɛ beŋ kɛ. Wi wu feti fiee fi tsaaŋ wɛ nɛɛ wi wu tsaaŋ si Krai nuuŋ wi wu tsaaŋ lɛ. 
\v 8 Wi wu ba feti bibifi nuuŋ wi wu kiŋkundi, kifɛ kiŋkundi kini tɛ̀ feti biee bibifi fɛmbɛɛchɛ-ɛ. Fiee fi Ŋwanɛ Nyɔ tɛ̀ bɛ tɛ nuuŋ le lɛɛshɛ niŋ yi kiŋkundi yini. 
\v 9 Wi wu nuuŋ mbiɛ wu Nyɔ nuuŋ tɛ ba le ni feti biee bibifi kɛ, kifɛ fiee fi nuuŋ fi Nyɔ-ɔ fichu nuuŋ li wuu mfi kwi, nuuŋ tɛ ba le ni feti bibifi kɛ, kifɛ nuuŋ mbiɛ wu Nyɔ. 
\v 10 Fiee fi nuuŋ fi fɛ tɛ ŋɛŋ bɛniiŋ bɛ nuuŋ bɔɔŋ bɛ Nyɔ-ɔ bɛ bɛ kiŋkundi nuuŋ fini: Wi kwikwi wu feti yɛ biee tsaaŋ kɛ mɔɔ ŋkɔŋgisɛ ŋwaani nsiŋ, kɛ nuuŋ yɛ ŋwanɛ Nyɔ kɛ.
\s Tɛ ni tɛ kɔŋgisi
\p
\v 11 Ntoŋ wu nɛ tɛ̀ woo fɛ mbɛɛchɛ nuuŋ nɛɛ wuni le, tɛ ni tɛ kɔŋgisi wi bee wi. 
\v 12 Kiiŋ tɛ ni tɛ nuuŋ si Keeŋ kɛ. Tɛ̀ nuuŋ ŋwanɛ wi wu bifi wɛ, tɛ dza wo ŋwaani. Tɛ̀ wo wu kii la? Tɛ̀ wo wu kifɛ kiŋge kee tɛ̀ nuuŋ ki bifi, ki ŋwaani se nuuŋ ki tsaaŋ. 
\v 13 Bɛŋwaanɛŋ, kiiŋ nɛ ni ta maa le bɛniiŋ bɛ nuuŋ bɛ li nshɛ yini baanini baa beŋ kɛ. 
\v 14 Tɛ kii baa le tɛ bo baa li tsaŋ yi kwe-e, tɛ lɛ li ntsɛ-ɛ kifɛ tɛ kɔŋgisi baa bɛŋwaanɛŋ bɛsɛŋ. Wi wu nuuŋ ŋkɔŋgisɛ ŋwaani nsiŋ kɛ mɛɛŋɔ nɛɛ nuuŋ li tsaŋ yi kwe-e. 
\v 15 Mɔɔ nuuŋ noo wu baanini ŋwaani le, kɛ mwɛ wɛ nuuŋ wi wu woyi bɛniiŋ. Nɛ kii baa le wi wu woyi bɛniiŋ kɛmi yɛ ntsɛ wu kimakɛ li wuu bwiŋ kɛ. 
\v 16 Fiee fi doonchi si kiŋkɔŋgisɛ nuuŋ fini le: Krai tɛ̀ nyɛ ntsɛ we li kwe-e kii bee. Tɛ kɛmi le tɛ nyɛ tɛ ntsɛ wusɛŋ kii bɛŋwaanɛŋ bɛsɛŋ. 
\v 17 Ɛ wi kɛmi biee bi li nshɛ yini-i, ŋiŋgi ŋwaani fuki, wu ba ŋgwiyɛ tsaŋ yee li wuu nsiŋ, kiŋkɔŋgisɛ ki Nyɔ-ɔ geeŋ ki se nuuŋ li wɛɛ wi-i? 
\v 18 Bɔɔŋ beŋ, kiiŋ tɛ ni tɛ kɔŋgisi nuuŋ lɛwa lɛwa kɛ, mɔɔ nuuŋ li n'yɔru kɛ. Tɛ ni tɛ kɔŋgisi bɛ chɛɛŋ, tɛ ni tɛ doonchi li kiŋge kisɛ-ɛŋ.
\p
\v 19 Ɛ fini fi gii fi fɛ tɛ se kɛɛ le tɛ baa bɛniiŋ bɛ chɛɛŋ, fi tuu fi fɛ tɛ deeni shéŋ yisɛŋ li Nyɔ-ɔ limfwe, 
\v 20 mɔɔ nuuŋ mfi wu la le, shéŋ yisɛŋ sɛki bee. Tɛ kii le Nyɔ ko yi yaa shéŋ yisɛŋ, yi kii fiee fichu. 
\v 21 Nsáŋ yɛɛŋ yi shéŋ, ɛ shéŋ yisɛŋ sɛki yɛ bee kɛ, kɛ tɛ kɛmi yɛ chɛnɛ chimu li Nyɔ-ɔ limfwe kɛ. 
\v 22 Ɛ tɛ lɛkɛ mɔɔ nuuŋ la le li yi-i, nyɛ bee, kifɛ tɛ giki baa bɛnchi bɛ yi-i tɛ feti fiee fi dzeeŋ li yi-i. 
\v 23 Nchi we nuuŋ wuni le, tɛ gɛɛ shéŋ li Ŋwani wu Jiso Krai, tɛ ni tɛ kɔŋgisi wi bee wi nɛɛ si Krai tɛ̀ tee li bee li. 
\v 24 Bɛniiŋ bɛchu bɛ kichi bɛnchi bɛ Nyɔ-ɔ nuuŋ li wuu mfi kwi nuuŋ tɛ li bee mfi kwi. Fiee fi feti tɛ se kii le nuuŋ li bee li mfi kwi nuuŋ Fiana yee yi nyɛɛ li bee li.
\c 4
\s Wi wu kɛmi Fiana yi Nyɔ bɛ wu kɛmi yɛ kɛ
\p
\v 1 Nsáŋ yɛɛŋ yi shéŋ, ɛ wi kweŋgi le fiee fi tiiti dzɛti fɛ Fiana yi Nyɔ-ɔ, kiiŋ nɛ ni beŋ kɛ. Mɔnɛ yɛɛŋ fiana yilu nɛ ŋɛŋ laa yi buti fɛ Nyɔ-ɔ le. Ntiiti ni kifɛ bɛniiŋ bɛ yɛŋgi le be baa bɛntomfɔŋ bɛ Nyɔ-ɔ bo baa be gɛɛŋ li nshɛ yini ŋge. 
\v 2 Fiee fi nuuŋ fi fɛ nɛ se kɛɛ Fiana yi nuuŋ yi Nyɔ li wi-i nuuŋ fini: Wi kwikwi wu tiiti bɛ kimfimɛ kee le Jiso Krai tɛ̀ bɛ laaŋkwiiŋ si wiwoŋ, wɛɛ wi wu kɛmi Fiana yi Nyɔ. 
\v 3 Wi kwikwi wu mɛɛŋ ki tee kɛ ni kii Jiso kɛ, wɛɛ wi kɛmi yɛ fiana yi nuuŋ yi Nyɔ kɛ. Yini fiana nuuŋ yi wi wu mbani wu Krai wu nɛ tɛ̀ woo le gii naa bɛ wɛ, dɛɛni wu se bɛɛɔ li nshɛ yini kituŋ. 
\v 4 Bɔɔŋ beŋ, nɛ nuuŋ bɛniiŋ bɛ Nyɔ-ɔ, nɛ yaa baa bɛniiŋ bɛchu. Nɛ yaa baa be kifɛ Fiana yi nuuŋ li yi yinɛ yɛki yi nuuŋ li nshɛ yini-i. 
\v 5 Beeyɛ bɛniiŋ nuuŋ bɛ li nshɛ yini-i. Mɔɔ biee bi be tiiti nuuŋ bi li nshɛ yini-i, bɛniiŋ bɛ nuuŋ bɛ li nshɛ yini-i se wuki li bee. 
\v 6 Tɛ nuuŋ fisɛŋ nuuŋ bɛniiŋ bɛ Nyɔ-ɔ. Wi kwikwi wu kii Nyɔ wuki li bee li, wi wu nuuŋ yɛ wi wu Nyɔ kɛ wuki yɛ fiee li bee li kɛ. Fini nuuŋ fiee fi feti tɛ se kii fiana yi nuuŋ yi chɛɛŋ bɛ yi binsɛɛ.
\s Nyɔ nuuŋ Nyɔ yi kiŋkɔŋgisɛ
\p
\v 7 Nsáŋ yɛŋ yi shéŋ, tɛ ni tɛ kɔŋgisi yi yisɛŋ, kifɛ kiŋkɔŋgisɛ nuuŋ fiee fi Nyɔ-ɔ. Wi wu kɔŋgisi wi wumu, nuuŋ li mbiɛ wu Nyɔ, se kii Nyɔ. 
\v 8 Wi wu nuuŋ ŋkɔŋgisɛ wi nsiŋ kii yɛ Nyɔ kɛ. Fi nuuŋ lɛ kifɛ Nyɔ nuuŋ Nyɔ yi kiŋkɔŋgisɛ. 
\v 9 Yiiŋ dze yi Nyɔ tɛ̀ doonchɛ kiŋkɔŋgisɛ kee li bee li le: Tɛ̀ toŋ Ŋwani wu mumkpaŋ li nshɛ yini le tɛ nuuŋ tɛ kɛmɛ ntsɛ kɛti li wu-u. 
\v 10 Kiŋkɔŋgisɛ ki kiŋkɔŋgisɛ nuuŋ kini le ɛ bee tɛ tɛ̀ kɔɔŋgi Nyɔ kɛ. Ɛ Nyɔ yi tɛ̀ kɔɔŋgi bee, yi toŋ Ŋwani le bɛ feeki bibifi bisɛŋ.
\p
\v 11 Nsáŋ yɛŋ yi shéŋ, si Nyɔ tɛ̀ kɔɔŋgi bee lɛ yini dze-e ni, tɛ kɛmi le tɛ ni tɛ kɔŋgisi yi yisɛŋ. 
\v 12 Wi nuuŋ yɛ lu wu tɛ̀ saa wu ŋɛŋ Nyɔ kɛ. Ɛ tɛ kɔŋgisi lɔ, Nyɔ ni yi nuuŋ mfi kwi li yi yisɛŋ, kiŋkɔŋgisɛ kee ni ki nuuŋ li bee li mfi kwi ki gɛɛŋ ki mɛɛshi.
\p
\v 13 Tɛ se kɛɛ le tɛ baa li yi bwiŋ mfi kwi yi nuuŋ tɛ li yi yisɛŋ, kifɛ yi nyɛɛ bee Fiana yi nuuŋ yee. 
\v 14 Tɛ tɛ̀ ŋɛŋ se tɛ̀ tiiti tɛ li bɛniiŋ li le Baa we tɛ̀ toŋ Ŋwani le bɛ nuuŋ Kinsofu li nshɛ yini-i. 
\v 15 Le mɔɔ nuuŋ noo le wu tee bɛ kimfimɛ kee le Jiso nuuŋ Ŋwanɛ Nyɔ, kɛ Nyɔ yɛ li mwɛ se nuuŋ tɛ li Nyɔ-ɔ. 
\v 16 Si fi nuuŋ ni, tɛ kɛɛ baa, tɛ beŋ kiŋkɔŋgisɛ ki Nyɔ kɛmi li bee li.
\p Nyɔ nuuŋ Nyɔ yi kiŋkɔŋgisɛ, wi wu tsiiŋ li kiŋkɔŋgisɛ, tsiiŋ nuuŋ li Nyɔ-ɔ, Nyɔ tsiiŋ tɛ li wu-u. 
\v 17 Fiee fi doonchi le kiŋkɔŋgisɛ kɛɛ li bee li, ɛ ki yisɛ ki gɛɛŋ ki mɛɛshi nuuŋ fini le, tɛ kɛmi yɛ chɛnɛ kii jobɛ chi nsa wu kimakɛ kɛ. Tɛ se kɛmi yɛ chɛnɛ kɛ kifɛ tɛ tsiiŋ baa li nshɛ yini si Krai. 
\v 18 Chɛnɛ ti nuuŋ yɛ li kiŋkɔŋgisɛ linti kɛ. Kiŋkɔŋgisɛ ki lɛ ki gɛɛŋ ki mɛɛshi ti kuŋgi bɛ chɛnɛ bukoŋu, kifɛ chɛnɛ kɛmi fiee fi fɛrɛ nuuŋ bɛ ŋgɛ wu nuuŋ bɛ nyɛ li wi-i. Wi wu kɛmi chɛnɛ mɛɛŋ yɛ gɛɛŋ lɛ li kiŋkɔŋgisɛ le mɛɛshi kɛ. 
\v 19 Tɛ ni tɛ kɔŋgisi kifɛ Nyɔ tɛ̀ saa yi kɔɔŋgi bee. 
\v 20 Ɛ wi kweŋgi le kɔŋgisi Nyɔ, tuu baanini ŋwaani, kɛ ɛ wi wu binsɛɛ, kifɛ ɛ wi kɔŋgisi yɛ ŋwaani wu ŋiŋgi wu kɛ, tɛ tuu le kɔɔŋgi Nyɔ yi ŋiŋgi yɛ yi kɛ. 
\v 21 Nchi wu tɛ tɛ̀ kɛmɛ li yi-i nuuŋ wuni le, wi wu kɔŋgisi Nyɔ kɛmi le ni kɔŋgisi ŋwaani tɛ.
\c 5
\s Wi wu yaa nshɛ yini nuuŋ wi wu beŋ li Jiso-o
\p
\v 1 Wi kwikwi wu beŋ le Jiso nuuŋ Kinsofu ki Nyɔ tɛ̀ kaachɛ wɛ nuuŋ mbiɛ wu Nyɔ, wi kwikwi wu kɔŋgisi wi, kɛ kɔŋgisɔɔ mbiɛ wu mwɛ tɛ. 
\v 2 Fiee fi feti tɛ se kii le tɛ kɔŋgisi bɔɔŋ bɛ Nyɔ-ɔ nuuŋ mfi wu tɛ kɔŋgisi Nyɔ tɛ kichi bɛnchi bee. 
\v 3 Nɛ ni nɛ kii le kiŋkɔŋgisɛ ki Nyɔ nuuŋ ŋkichɛ bɛnchi bee, bɛnchi bee ti luuti yɛ kɛ, 
\v 4 kifɛ wi kwikwi wu ti nuuŋ mbiɛ wu Nyɔ yaaɔ nshɛ yini. Tɛ yɛki baa nshɛ yini nuuŋ bɛ kimbeenchɛ kisɛŋ. 
\v 5 Wi wu yaa nshɛ yini nuuŋ wu la? Ɛ nɛɛ wɛɛ wu beŋ le Jiso nuuŋ Ŋwanɛ Nyɔ ni?
\s Biee bi lemi lɛ nsa wu Jiso-o lɛjiŋ
\p
\v 6 Jiso Krai tɛ̀ bɛ li nshɛ yini-i, ka li dzɔɔ li bɛ li ŋgɔ-ɔŋ. Ti mɛɛŋ ki ka kɛ nuuŋ li dzɔɔ li kwaa kɛ. Tɛ̀ ka li dzɔɔ li bɛ li ŋgɔ-ɔŋ. Fiana yi Waaŋ lemi lɛ nsa wu fiee fini lɛjiŋ kifɛ fiana tiiti chɛɛŋ. 
\v 7 Biee biɛɛ lu bitɛɛtu bi lemi lɛ nsa wulu lɛjiŋ. 
\v 8 Biee bini se nuuŋ, Fiana yi Waaŋ, mɔɔ dzɔɔ bɛ ŋgɔŋ. Biee bi bitɛɛtu bini bichu se nuuŋ li fiee li fimumkpaŋ.\f + \fr 5:8 \fr*\ft Biŋwaati bi fichi bimu kɛmi fi bi-i bintsii bini le, “Bɛniiŋ nuuŋ bɛtɛɛtu bɛ lemi lɛjiŋ lɛ nsa wulu liboo. Se bɛniiŋ bani nuuŋ Nyɔ Ta bɛ Jɛ mɔɔ Fiana yi Waaŋ. Bɛniiŋ bɛ bɛtɛɛtu bani nuuŋ li fiee fimumkpaŋ. 8 Se biee nuuŋ lu bitɛɛtu bi lemi lɛjiŋ lɛ nsa wulu li nshɛ. Biee bini nuuŋ Fiana yi Waaŋ, dzɔɔ mɔɔ ŋgɔŋ. Se biee bi bitɛɛtu bini nuuŋ li fiee fimumkpa-aŋ.”\ft*\f* 
\v 9 Tɛ tɛ̀ shiiŋ tɛ̀ beenchi fiee fi wiwoŋ tiiti li bee li. Se nuuŋ le, fiee fi nuuŋ ntefu wu Nyɔ fi luuti fi yɛki fi wiwoŋ. Nɛ ni nɛ kii le fini nuuŋ fiee fi Nyɔ tɛ̀ tiiti li bee li, yi lemi lɛ nsa wu Ŋwani lɛjiŋ. 
\v 10 Wi wu beŋ li ŋwanɛ Nyɔ-ɔ nuuŋ wi wu kɛmi fiee fi Nyɔ tee fini li wuu. Wi wu mɛɛŋ ki be-eŋ li Nyɔ-ɔ kɛ nuuŋ wi wu feti Nyɔ nuuŋ wi wu binsɛɛ, kifɛ mɛɛŋɔ ki beŋ kɛ fiee fi Nyɔ tiiti li bee li kii Ŋwani kɛ. 
\v 11 Tefɛ chi Nyɔ-ɔ chini nuuŋ le Nyɔ nyɛ yɛ bee ntsɛ wu kimakɛ, ntsɛ wuni dzɛti li Ŋwani-i. 
\v 12 Wi wu kɛmi ŋwanɛ Nyɔ li yi yee li kɛmi ntsɛ wulu, wi wu mɛɛŋ ki kɛmɛ kɛ ŋwanɛ Nyɔ li yi yee li kɛ se kɛmi yɛ ntsɛ wulu kɛ.
\s Bɛniiŋ bɛ kɛmi ntsɛ wu kimakɛ kituŋ
\p
\v 13 Ntsɛki biee bini li be-eŋ nɛ beŋ li Ŋwanɛ Nyɔ-ɔ, le nɛ kɛɛ le nɛ baa nuuŋ ɛ nɛ kɛmɛ ntsɛ wu kimakɛ kituŋ. 
\v 14 Tɛ kɛmi yɛ chɛnɛ le tɛ kiiŋgi tɛ gɛɛŋ li Nyɔ-ɔ limfwe le tɛ lɛkɛ fiee li yi-i kɛ, kifɛ ɛ tɛ lɛki fiee li yi-i tɛ biki si yi kɔŋgisi, woo fiee fi tɛ tiiti. 
\v 15 Ɛ tɛ kii le ti wuki fiee fi tɛ tiiti mfi wu tɛ lɛki mɔɔ nuuŋ la le li yi-i, tɛ se kɛɛ chɛɛŋ le tɛ kɛmɛ baa fiee fi tɛ lɛki li yi-i.
\p
\v 16 Ɛ wi ŋɛŋ ŋwaani feti bubiɛɛ bu nuuŋ tɛ fɛ le kwi bu kwɛ kɛ, mwɛ lɛkɛ li Nyɔ-ɔ nuuŋ le nyɛ wu ntsɛ. Fini fiɛɛ li wi wu bubiɛɛ bwee nuuŋ tɛ fɛ le kwi bu kwɛ kɛ. Bubiɛɛ bumu bwɛɛ lu bu nuuŋ bu fɛ le wi kwi bu kwɛ. Ntiiti yɛ le wi ni lɛki li Nyɔ-ɔ li bwɛɛ li kɛ. 
\v 17 Kiŋge ki bifi kichu nuuŋ bubiɛɛ, se nuuŋ le bubiɛɛ bumu bwɛɛ lu bu nuuŋ bu fɛ wi kwi bu kwɛ.
\p
\v 18 Tɛ kii le wi wu nuuŋ mbiɛ wu Nyɔ nuuŋ tɛ ba le ni feti bubiɛɛ kɛ, kifɛ wu wu nuuŋ Mbiɛ wu Nyɔ wɛ, Nyɔ kiichi yɛ wu, wi wu bifi wɛ tɛ tuu le koŋ li wuu kɛ. 
\v 19 Tɛ kii le tɛ baa bɛniiŋ bɛ Nyɔ-ɔ, mɔɔ nuuŋ le bɛniiŋ bɛ nuuŋ bɛ li nshɛ yini bɛchu baa li tsaŋ yi wi wu bifi wɛ.
\p
\v 20 Tɛ kii le Ŋwanɛ Nyɔ bɛɛɔ kituŋ le gwiyɛ bufii busɛŋ le tɛ kɛɛ le yi yi Nyɔ nuuŋ yi chɛɛŋ. Tɛ se nuuŋ li yi-i, yi nuuŋ chɛɛŋ si tɛ nuuŋ li Ŋwani wu Jiso Krai. Ɛ yi yi Nyɔ yi nuuŋ chɛɛŋ yi tuu yi nuuŋ ntsɛ wu kimakɛ.
\p
\v 21 Bɔɔŋ beŋ, dzɔɔ yɛɛŋ mfi bɛ munyɔ mu yee.