\id GAL - Arabela NT + OT portions -Peru 2009 (DBL -2013) 
\h GÁLATA 
\toc1 Pablo naajionee Gálata jiyajinia quiniaa Pueyaso pueyacuara 
\toc2 Carta a los Gálatas 
\toc3 Gá 
\mt1 PABLO NAAJIONEE GÁLATA JIYAJINIA QUINIAA PUEYASO PUEYACUARA 
\c 1  
\s1 Gálata pueyacuara naajionee 
\p  
\v 1 ¿Niaate quiyajaa pueyanaa? Janiyari Pabloni, pa Que Pueyaso jiyaramiquishano. Janiyari maja nareja pueyano jiyaramiquishanoni. Mijiria quiniaa pueyari maja na jiyatenu quiquiaari janiya Pueyaso jiyaramiquishano cua quiniuria. Jesucristojuanaacuajaari cua jiyatequiaari na jiyaramiquishano cua quiniuria. Nojuacuajaari na Que samiitianishanohua macujiniji.  
\v 2 Niya cuata quiniaa parta Pueyaso pueyatani, janiyari nio naajiyani. Nio cua naajioneeri puetunu Galacia jiyajinia quiniaa Pueyaso pueya maapuerajanaa.  
\v 3 Pa Que Pueyaso, mariyata pa Jiyaniijia Jesucristoni, nojori cuaara cumaquiiria niajaniya, nioojia cajitishano nia quiniuriajuhuaj.  
\v 4 Jesucristoori tama na cuaqueyajaaja panitiaquiaari pocuara na mosaanura. Naacuajitij, nojuajaari pa jeequequiaari puetunu sesa pa miishanojinijijianaa. Nojuajaari naa miiquiaari sesa miiniuucua jiaatianu pa cartenura. Nojuajaari naa cusoquiaari pocuaratej, taa pa Que Pueyaso paniquiaaricuajani, na muerasu pa quiniuria.  
\v 5 Naaratej, pa Que Pueyaso cuaara maniniuhuaqueetasano quiiria. Cuaara naa quiiria pueyaracaanutej. 
\s1 Maja tamonu maninia rupaa quiniu socua Jesucristo rupaajiniji 
\p  
\v 6 ¿Taa nia miiquianuni pueyanaa? Quiarijiani, janiyari jiyanohua tacaya niaacuani. ¿Niaateeri ritia cartecanu Jesucristo rupaa, tamaatia niishitiojosano tojitiajaca nia quiniuria? Pueyasocuajaari Neyanutaja nia cojiritiaquiaari paniniu, Jesucristo miiniuucua maninia niaara, na panishano pueya nia quiniuria.  
\v 7 Seetanujuanaa, majaari socua tamonu rupaa quiniu Pueyaso pueyara pa jatanishaanura. Noo juhuari nia cushitiojoquiaa saajatejaj, najuhuana tamaatia nia niishitiojonuuquiaatej. Nojoriiri Jesucristo rupaa cushitiojoquiaa niaara, nojori tacarojosacari najuhuanaj, mariyateyacato nojori quiniuucua.  
\v 8 Cua tojiri pueyanaa, tamonu pueyano jaara pocuaji Tacuna rupaa niishitiojoriquia niajaniya tamaatia canaa niishitiojosanojiniji niajaniya, Pueyasoori na saniitionutaniya. Naajuhuaj, janiya jaara tamaatia pohuatare Jesucristojiniji niajaniyani, jiyocuacaanuji roseno Pueyaso serujuhuaj, Pueyasojuanaari canaa saniitionutaniya.  
\v 9 Janiyacuajaari naa sequeja niajaniyani. Quiarijia socua pacuterohuacuara sequenu nia niishishocoriquiano. Cua tojiri pueyanaa. Niaa jaara tamaatia pohuatasaariquia Jesucristojiniji, maja naate taa tari cua pohuataquiaari niajaniyacuajani, Pueyaso cuaara saniitiooranoj. 
\p  
\v 10 ¿Niaateeri jiyaniya janiya pueya timitiasano quiniu paniyani? Maja. Janiya cutaraari Pueyaso timitiasano quiniu paniyani. Janiya jaara saaja pueya timitiasano quiniu paniriquiani, janiya maara pa Jiyaniijia Jesucristo seru quiyaquirini. 
\s1 Taa Pablo jatanishaaquiaari Jesucristo jiyaramiquishano na quiniuriani 
\p  
\v 11 Cuarta Pueyaso pueyanaa, nia pohuatareera cante cua niishitiojoquiaari Jesucristo rupaani, cua pohuatasano niajaniyani. Pueyanaa, nio rupaa janiya na pohuataa niajaniyani, nioori maja mijiria quiniaa pueya niishitiojosano janiya.  
\v 12 Taa cua sequeya niajaniyacuajani, majaari nio rupaa cua niishiniu quiquiaari tamasaca pueyajiniji. Jesucristojuanaacuajaari na rupaa cua niishitiquiaari. 
\p  
\v 13 Niaa naasucuaari janiyajiniji tojiniuujiacuaja tarijia. Seetanujuanaa cuarta Judiocuaca miishano miijia cua quishacarijia, janiyari Pueyaso saquiriojosano pueya puecoonu panijia puetunujuanaani. Janiyari jiyanohua paracaajia nojorini.  
\v 14 Janiyari seetanujuanaa canaa supuetanaa niishitiojosano tojijia quijia cutarani, socua cuarta Judiocuaca mashiquiorijiniji.  
\v 15 Naajaa, jiyanohua panijia Pueyaso quiniuucua, cua supueyaquishacarijia, ¡nojuajaquiiri tari cua saquiriojoquiaari na pueyano cua quiniuria!  
\v 16 Naacuajitij, tama na panishacarijiaaja, nojuajanaari Neyanu cua niishitiquiaari, Neyanujiniji cua pohuatanura taucuaca. Neyanu na niishitiniu nuhuaji janiya, majaari quenaaja tamasaca nequesotanuucua cua quianu quiquiaari, cua niishiniuria seetanutejanaa na niishitishano janiya. Pueyasocuajaari maninia cua niishitiquiaari puetunujuanaa Neyanujiniji.  
\v 17 Naajuhuaj, majaari cua quianu quiquiaari Jerusalén tiacajinia, tii cua niquiniuria cuarta Jesu jiyaramiquishano pueya. Nojoriiri coteenujuanaa Jesu jiyaramiquishano pueya quijia. Jiyacaritij, majaari quenaaja cua tarishiniu quiquiaari Damasco tiacajinia. Janiyari ritia quiaquiaari pueya quiyaquishaqui Arabia jiyajiniani. Na nuhuaji, janiyari tacatequiaariuhua Damasco tiacajiniohuani. 
\p  
\v 18 Jiuujianaraca marijia cua shocotejonu nuhuaji Damasco tiacajinia, janiyari shusha jiyacari quiaquiaari Jerusalén tiacajiniani, Pedro cua niishiniuria shushajanaa. Nata cua quishacari, quince juucaari cua shocojoquiaari tiini.  
\v 19 Jiyacaritij, majaari socua Jesu saquiriojosano pueya cua niquiniu quiquiaari. Janiyari saaja Santiago niquiquiaari cutarani. Nojuacuajaari pa Jiyaniijia Jesu tarajanu.  
\v 20 Pueyanaa, Pueyasocuajaari niishiya, janiyari nio cua naajiojinia seetanujuanaa nia pohuataani. 
\p  
\v 21 Na nuhuaji, janiyari quiaquiaari Siria jiyajiniani, Cilicia jiyajinianio.  
\v 22 Saniniuujia, Judea jiyajinia Jesu tojitiajaca maapueeri juhuanojuaja maja na niishitiuniu quijia janiya.  
\v 23 Nojoriiri saaja naa poojotasaaquiaari janiyajinijitij: “Noo pueyano tarijia pa miitiaja naquiya Jesujiniji pa pohuatasacaritij, nojuajanaari quiarijia pa Jiyaniijiajiniji pohuataa pueya niquiarajuhuaj”.  
\v 24 Naa nojori tojiniuushacari janiyajinijitij, nojoriiri Pueyaso maniniuhuaqueetaquiaari nojori paraca na jataniniuucua Jesu rupaa pohuatana na quiniuria. 
\c 2  
\s1 Jesu jiyaramiquishano pueya niishishacari, Pablo seetanujuanaa Jesu jiyaramiquishano pueyanojuhuaj 
\p  
\v 1 Catorce marijia jaara shocojoquiaari, janiyari Bernabeeta Jerusalén tiacajinia pacutequiaariuhua quianuni. Janiyari jiyacari Tito rupoquiaari cucuajuhuaj.  
\v 2 Pueyasocuajaari cua toquiaari cua quianura Jerusalén tiacajinia. Janiyari cunora quiaquiaarini. Tii cua quishacari, janiyari Jesu tojitiajaca jiitianaa pueyata rerejoquiaarini. Maja seetanu puetunu nojoritiajanaa, saaja nio pojoritia: Santiago, Pedro, Juannio. Janiyari saaja cuno pojori niquiara pohuataquiaarini taa cua pohuataquiaa Jesujiniji puetunu taucuacajanaacuajani. Na nuhuaji, janiyari nojori nequesotareeni: “¿Taa nia sequeyani pueyanaa? ¿Janiyate najuhuana sesa niishitiojiya taucuacani?” Cua sequetureeri: “Maja. Quiaacuaja seetanu rupaajanaa niishitiojiya taucuaca, naa Jesucristojiniji quia pohuatasacari nojori”.  
\v 3 Naajuhuaj, parta Pueyaso pueyano Titoni, cuata quiquiaari tiini, nojuajaari Grecia jiyajinijinio tahue. Naajaa, majaari na sequesaanu quiquiaari na cararaatiuuquia co miatesaanura, seetanujuanaa Pueyaso pueyano na quiniuria. Nojuajaari maja naa na sequesaanu quiquiaari. Canaa rerejosacari Pueyaso pueya jiitianaata, nojoriiri Tito niquiquiaari nareja, nojori na rupuenurajuhuaj. Nojoriiri niishiquiaari nojuajaari seetanujuanaa Pueyaso pueyanojuhuaj, saaja Jesucristoocua na tiuuniuucua.  
\v 4 Saniniuujia, noojiaqueya canaa Judiocuacajinijinioori tama nojori cuaqueyajaaja jiyatequiaari juhua Jesu tojijiaca pueyara, nojori cojiniuria canaa. Nojoriiri naa canaa rupuequiaari na sapojonuta. Canaata nojori quishacari, nojoriiri canaa shanacutaja nojori niishiniuria canaate seetanujuanaa Pueyaso muerasuni, saaja Jesuucua canaa tiuushacari. Nojoriiri juucua canaa jiyatenu paniquiaari tariucuacaanu Moisés Rootasano tojijiaca canaa quiniuhuara.  
\v 5 Canaari nojori niishitiojosano pataquiaari saajani. Majaari quenaaja shiitianiyojua nojori rootasano canaa tojiniu quiquiaari. Canaari naa miiquiaarini seetanu Jesucristo rupaajanaa canaa cojuanura niaara, seetanujuanaa Pueyaso muerasu nia quiniuria saaja Jesucristoocua nia tiuuniuucua. Majaari canaa cojitiniu paniniu quiquiaari Jesucristo rupaa, tariucuacaanu niishitiojosanota. 
\p  
\v 6 Cuno pojori Pueyaso pueya maapue jiitianaa Jerusalén tiacajiniani, nojoriiri jiyanohua tojishano pueya quijia. Janiyara naajaa. Pueyasocuajaari najuhuana quijiaca jiyanooquiaajuhuaj, taa na jiyanooquiaa tojishano pueyacuaani. Naajaa, cuno tojishano pueya jaara tojiquiaari taa cua pohuataquiaa Jesucristo rupaani, majaari quenaaja niquiriyatu rupaa nojori sequenu quiquiaari, nojori niishitiojonura janiya socua.  
\v 7 Nojori cutaraari niishiquiaari Pueyasocuajaari seetanujuanaa cua jiyatequiaari na rupaa pohuatana cua quiniuria taucuacara, taa Pedro na jiyatequiaari Judiocuaca niquiara pohuatana na quiniuriacuaani.  
\v 8 Pedro Jiyatena Judiocuaca niquiara Jesucristojiniji pohuatariquianoni, cuno Pueyasojuanaacuajaari cua jiyatequiaarijiuhua taucuaca niquiara pohuatana cua quiniuria. Naacuajitij, canaari mariyata Pueyaso jiyaramiquishano pueyani. 
\p  
\v 9 Santiago, Pedro, Juannio, nojoriiri socua tojishano quijia puetunu Jesuucua tiuuniaa cuarta Judiocuacajinijiniojuanaa. Nojoriiri seetanujuanaa puetunu Pueyaso muerasu jiyaniijianucuajanaa quijia. Naajaa, nojoriiri seetanujuanaa niishiquiaari Pueyasoori maninia cua jiyanooquiaari, na jiyatenura janiya Neyanujiniji pohuatana cua quiniuria taucuaca niquiara. Naaratej, nojoriiri na juaashiquia niquitiojoquiaari canaani, janiya, Bernabeenio. Nojoriiri cunota juhua canaa sequeturiquiaa canaari seetanujuanaa nojori cojiniaani. Naa canaa sequetuquiaarijiaariuhuaj: “Maniniacuaja. Nia quiojiyare taucuacaacua tii nia pohuatanura Jesujiniji nojorijiuhuaj. Canaari saniniuujia parta Judiocuaca tajinia poonijionutaniyanijia, nojori niquiara canaa pohuatanura Jesujinijijiuhuaj”.  
\v 10 Nojoriiri canaa sequequiaarijiuhuaj: “Canaa panishano pueyanaa, majaari nia niyajetanu casamiijiuniucua pueya naacunu”. Naaratej cuarta Pueyaso pueyanaa, puetunu tiquiyocuajanaa cua rucuanesacari, janiyari naa miiquiaa seetanujuanaani. 
\s1 Antioquiya tiacajinia Pedro nacasusaanujiniji pohuatasano 
\p  
\v 11 Tamacari, canaa quishacari Antioquiya tiacajinia, Pedroori canaacua niquiaarijiuhuaj, canaata na quiniuria tii. Tii na quishacari canaata, Pedroori sesa miiquiaari cua niquiara. Cunora, janiyari jiyanohua na nacasuquiaarini. Cuno na miishanoni, cunoori seetanujuanaa sesa quiquiaari Pueyasora. Naa na miishacaritij, tamajaaja miiriquiaa cocuaatiaari.  
\v 12 Pedroori naa miiquiaaritij. Coteenu canaa cojiquiaari maniniaari tariucua Jesuucua tiuujiaca taucuacata, canaata na miaquejonura jatiqui. Jiyacaritij, canaacua tiuquiijioquiaariiri socua cuarta Judiocuaca Jerusalén tiacajiniji. Nojoriiri Santiago jiyarosano pueya quiquiaari. Cuno Judiocuaca quishacari tii canaata, Pedroori canaacuaji rupatequiaari. Majaari tari na miaquenu paniniu quijia canaata, tariucua Jesuucua tiuujiaca taucuacata. Narta Judiocuaca puerequiaariiri maja na sequesaanura: “Cunoqui sacuaraatia miaquejojua taucuacata”.  
\v 13 Tii quiniaa Jesuucua tiuujiaca Judiocuaca jaara niquiquiaari naa Pedro miishanocuaatej, nojoriiri jaarajaaja canaacuaji rupatequiaarijiuhuaj, Pedro na cojitiuniuria. Naajuhuaj, ¡Bernabeeri jaarajaaja canaacuaji rupatequiaarijiuhuaj cuno mosanucua na cojiniuria!  
\v 14 Naaratej, janiya jaara naa nojori niquiquiaari tariucua Jesuucua tiuunio taucuaca tamacatiuyanoni, janiyari niishiquiini, cuno pojoriiri maja maninia na miitiuniu quiriquiaa. Cunoori maja na quiniu quiriquiaa taa nojori rootasaaquiaari Pueyaso rupaacuajani. Cunora, janiyari puetunu Pueyaso pueya maanu niquiarajanaa naa sequequiaari Pedroni: “Quiaari Judio pueyano. Naajaa, majaari seetanujuanaa juhua Judio pueyano quia quiniu quiquiaa. Quiarijia saniniuujia, quiaari Jesuucua tiuunio taucuaca shiniujiya nojori quiniuria seetanujuanaa juhua Judiocuaca, nojori rupuenura pajaniya. ¿Casaara naa quia shiniujiya nojoriirini?  
\v 15 Paacuajaari Moisés Rootasano tojijiaca cutarani, Judiocuaca pa quiniuucua. Paari maja tahuani, Pueyaso tojiyashijiaca.  
\v 16 Naajaa, paacuajaari niishiyani, majaari Pueyaso jiyanooniu pajaniya Moisés Rootasano tojijiaca pa quiniuucua. Maja. Pueyaso cutaraari pa jiyanoojia, Neyanu Jesucristoocua pa tiuushacari. Paari cunora Jesucristoocua tiuuquiaani, nojuaja jiyanooniuria pajaniya puetunu sesa pa miishanojinijijianaa. Sesa pa miishanoori maja na jiyanooshaanu quiquiaa Moisés Rootasano pa tojishacari. Maja. Naajuhuaj, majaari quenaaja niquiriyatu pueyano jiyanooshaanu quiniutianiya Moisés Rootasano tojijia na quiniuucua. Maja. 
\p  
\v 17 ’Paacuajaari Jesucristoocua tiuuquiaarini, jiyanooshano pa quiniuria, maja socua Moisés Rootasano tojijiaca pa quiniuria. Na nuhuaji, paa jaara jiyaniyani paa sesa miijiaca quiriohuani Moisés Rootasano pa tojiyaquishacari tarini, saaja Jesucristoocua pa tiuushacari, paari jiyanohua jiyajeneyani. Naa pa jiyanishacaritij, paari juhua sequeyani Cristoori pa jiyaterohua sesa miijiaca pa quiniuhuara nocua pa tiuuniuucua. ¿Quiaateeri naa sequenu paniya Pedronaa? ¡Maja!  
\v 18 Paacuajaari maninia miiquiaarini pa tarinitiasacari tojiniu Moisés Rootasano, jiyanooshano pa quiniuria saaja Jesucristo rupaacua pa tiuushacari. ¿Paateeri socua maninia miijiaca quiniutianiya Pueyaso niquiarani, paa jaara Moisés Rootasano tojijiaca quiriohuani? ¡Maja! Paa jaara naa niishiriojiyani, paari jiyanohua jiyajeneyani. Paacuajaari seetanujuanaa pohuatanuuquiaa puetunu pueya niquiarajanaani, nojoriiri jiyanooshaanutaniya saaja Jesuucua nojori tiuushacari. Naa pa pohuatanuusano jaara sapojosano quiriquia, paa maara jiyanohua sesa miijiaca quiriquiani. Saniniuujia, Pueyaso cutaraari seetanujuanaa pa jiyanooquiaa saaja Neyanuucua pa tiuushacari”. 
\p Janiyari naa nacasuquiaari Pedroni puetunu tii quiniaa Pueyaso pueya niquiarajanaa.  
\v 19 Pueyanaa, cua niishishacari maja cua naata Moisés Rootasano tojiniu maninia puetunujuanaa, janiyari niishiquiaarini Pueyasoori cua shaajanutaniya na shuriucuaji. Naaratej, janiyari tama cua cuaqueyajaaja jiyatequiaari juhua tariucua macuni, maja Moisés Rootasano tojijia cua quiniuria socua. Naacuajitij, janiyari quiarijia saaja Pueyasora quiya cutarani. Janiyara, janiyari tari cojiritiasaaquiaari monu Cristota niyacutesanojiniani.  
\v 20 Naacuajitij, quiarijiani, majaari nio janiya quiyani. Jesucristocuajaari nio, coojiajinia quiyani. Majaari tamajaaja saminio cua quiniu. Jesucristo cua rupuesacari, naacuajiti janiyari saminio quiyani. Naa saminio cua quishacari puetunu cua cuaqueyatajanaatej, janiyari rishiyani Pueyaso Niyanuucua tiuujia cua quishacari. Nojuajaari cua paniquiaari. Naaratej, tama na cuaqueyajaaja tarinitiaquiaariiri cucuara na mosaanura.  
\v 21 Majaari cua ruuretanu Pueyaso jiyanooniu panishacari janiya. Jaara pa naata quiriquia tama pa cuaqueyajaaja jiyanootiniu Pueyaso, Moisés Rootasano tojijiaca pa quiniuucua, Jesucristo maara najuhuana cusoquiaari pocuara. 
\c 3  
\s1 ¿Teyano tojijia pa quishacari pa jiyanooshaaquiaani, Moisés Rootasano, Jesucristoocua tiuuniu soj? 
\p  
\v 1 Mosanucua Gálata pueyanaa, ¿cante nia shimiojocanuni, naa pa Jiyaniijia Jesuucua tiuuniu nia tarinitianuratej? Canaa jaara shushajanaa nia niquiara pohuataquiaari Jesucristojinijitij, canaacuajaari maatia nia niishitiquiaarini, nojuajaari pocuara mosaaquiaari pa jiyanooshaanura. ¿Quiarijiaariuhuaj, cante tari nia sapojocanuni, Jesucristoocua tiuuniujiniji nia pishiniuriani? Naa nia miishacaritij, ¿niaateeri jiyaniya niaa tama nia cuaqueyajaaja jiyanootiniutianiya Pueyaso? Maja nia naata pueyanaa.  
\v 2 Quiarijiani pueyanaa, janiya saaja nio nia nequesotanu paniyani. Cua riucuature. ¿Niaateeri Pueyaso Sohuanu tiuquiniquiaari nioojiajinia Moisés Rootasano nia tojiniuucua, Jesucristo rupaacua nia tiuuniuucua soj? ¿Taa nia sequeyani? Niaacuajaari niishiya, niaari Pueyaso Sohuanu tiuquiniquiaari nioojiajinia Jesucristoocua nia tiuushacari, niaa jaara na rupaa tojiquiaari.  
\v 3 ¡Niaaquiiri tojetaarucuajanaa mosanucuajuhuanajaj! Nia niquishuriiriaj, niaacuajaari Pueyaso muerasura quiquiaari Pueyaso Sohuanu nia shanacunuucua nioojiajinia na tiuquiniuria, Jesucristoocua nia tiuushacari. Quiarijia saniniuujia, ¿niaateeri jiyaniya nia naata Pueyaso jiyanootiniu tama nia cuaqueyajaaja Moisés Rootasano nia tojishacariuhua juucua, tama nia cumaacatajaaja? ¡Maja!  
\v 4 Pueyasocuajaari jiyanohua maninia miiriquiaa niajaniya, saaja Neyanuucua nia tiuushacari. Naa Pueyaso miishano niaarani, ¿cunoteeri najuhuana quiquiaarijiuhuaj?  
\v 5 Pueyanaa, Pueyaso jaara na Sohuanu niquitioquiaa niajaniya, na nuhuaji na cumaacata miiquiaa nia niishishoo casaari, nia sequeretoj, ¿casaara naa na miiquiaarini? ¿Pueyasoteeri naa maninia miiquiaa niajaniyatej, Moisés Rootasano tojijiaca nia quiniuucua? Maja. Nojuajaari naa maninia miiquiaa niajaniyatej, saaja na rupaacua tiuujiaca nia quiniuucua, canaa pohuatasano niajaniyani. 
\p  
\v 6 ¿Niaate niishiya, casaara Pueyaso jiyanooquiaari canaa supuetana Abrahamni? Abrahamcuajaari Pueyaso sequesanoocua tiuuquiaari. Naaratej, Pueyasoori na jiyatequiaari juhua tojetaarucuajanaa sesa miyashijia pueyanora. Naa na jiyatequiaariiri saaja nocua na tiuuniuucua.  
\v 7 Naacuajitij pueyanaa, quiarijia nia niishiri cutara, cante Pueyasoocua tiuujiani taa supuetana Abraham tiuuquiaaricuaani, nojoriiri seetanujuanaa canaa supuetana Abraham niquiohuajanaa cutara.  
\v 8 Pueyaso jaara na sequenu panishano naajiotaniquiaari tariucuacaanu, nojuajaari tari niishiquiaari taa taucuaca na jiyanooniutianiyajaaniuhuaj, nojori jaara nocua tiuuri. Naaratej, nojuajaari naa sequequiaari supuetana Abrahamtej: “Quiaacuajaari cua sequesanoocua tiuurii, Abrahamnaa. Naaratej, quia jinianuucuajinio supueno pueyanoori jiyanohua maninia miiniutianiya puetunu pueyapuerajanaa. Noo pojori shuquiritiniutianiyari, puetunu jiyacajinijiniojuanaa nocua tiuuriquiano pueyatej”.  
\v 9 Naaratej, cante Jesucristoocua tiuujiani, Pueyasoori na jiyanooniutianiyajuhuaj, taa supuetana Abraham na jiyanooquiaaricuaani, na sequesanoocua Abraham tiuushacari. Cunora, Pueyasoori maninia miiquiaa Jesucristoocua tiuujiaca, taa na miiquiaari Abrahamcuaani. 
\p  
\v 10 Saniniuujia, cante jiyaniyani Pueyasoori na jiyanooniutianiya Moisés Rootasano tojijia na quiniuucua, nojuajaari pueyaracaanu saniitiosaanutaniya. Naa naajiotasano quiyacuajaari tariucuacaanu Pueyaso Rupaajinia: 
\q1 “Moisés Rootasano tojijia cuaara tojiiria puetunu Pueyaso naajiotanishanojuanaa. Cante niquiriyatu na sequesano tojiyaquijiani, nojuajaari pueyaracaanu saniitiosocoriquiano”. 
\m  
\v 11 Naacuajitij, niaari niishiyacuaja, majaari quenaaja niquiriyatu pueyano jiyanooshaanu quiniutianiya, Moisés Rootasano na tojiniuucua. Saniniuujia, naa naajiotasano quiyacuajaari Pueyaso Rupaajinia: 
\q1 “Pueyaso jiyanooshano pueyanoori pueyaracaanu rishiriquiano cutara, Pueyasoocua na tiuuniuucua”. 
\m  
\v 12 Saniniuujia, Moisés Rootasanoni, cunoori maja na niishitiojonu Pueyasoocua pa tiuuniuria, jiyanooshano pa quiniuria. Maja. Saaja naa sequeyari: 
\q1 “Cante puetunu nio naajioneejinia rootasanojuanaa tojijiani, nojuajaari cuno na tojiniuucua rishiniutianiya”. 
\p  
\v 13 Maja maninia pa tojiyaquiniuucua Moisés Rootasano, paari Pueyaso puecoosocoriquiano quiquiaarini. Naajaa, Pueyasoori pa Jiyaniijia Jesucristo jiyatequiaari na sesacasano pueyanora pa niti, pocuara na cusonura. Naa sequeyajaariuhua tariucuacaanu Pueyaso Rupaa: 
\q1 “Pueyaso sesacasanoori cuno, niyacutesanojinia teetesanoni”. 
\m  
\v 14 Naa Jesucristo cusonuucua pocuaratej, saaja nocua nia tiuushacari, Pueyasoori na naata shuquiritiniu niajaniya taucuacajuhuaj, puetunu na sequesanotajanaa canaa supuetana Abraham. Naajuhuaj, saaja pa tiuuniuucua Jesuucua, puetunu pajaniyajanaari Pueyaso Sohuanu masequiaani, taa seetanujuanaa Pueyaso sequequiaari tariucuacaanucuajani. 
\s1 Moisés Rootasanoori maja na naata Pueyaso sequesano Abraham jataniniu 
\p  
\v 15 Cuarta Pueyaso pueyanaa, maatia nia pohuatareera maninia nia niishiniuria cua pohuatasano. Cua tojiri. Pueyano jaara maninia miiniu paniri narta pueyanora, naa miijiaari: na sesa naajiotajaari naajioneejinia, tee cuniqui na miishocoriquiano naajiotasano quiyacuajani. Jaara naa miiritij, majaari quenaaja tamonu na naata cuno naajioneejinia naajiotasano jataniniu, socua na maatenunio.  
\v 16 Tariucuacaanu, Pueyasoori naa sequequiaari Abrahamtej: 
\q1 “Janiyari seetanujuanaa maninia quia miiniutianiyani, quia jinianuucuajinio supueriquiano pueyanonio”. 
\m Nia niishiri pueyanaa, tariucuacaanu Pueyaso Rupaajinia naajiotasanoori maja na sequenu: “Abraham jinianuucuajinio supueno pueyara”. Maatia sequeyacuajaari: “Abraham jinianuucuajinio supueno pueyanora”. Niquiriyatu pueyano sequeyari, maja queraatia. Nojuajaari pa Jiyaniijia Cristocuaja.  
\v 17 Cunora pueyanaa, janiyari seetanujuanaa nia sequeyacuajani, Pueyasoori seetanujuanaa sequequiaari Abraham taa nera na miiniutianiyani. Seetanujuanaa Pueyaso sequesanoori maja na naata jatanishaanu. Naacuajitij, Moisés Rootasanoori maja na naata Pueyaso sequesano Abraham jataniniujiuhuaj. Seetanujuanaa Pueyaso sequenu nuhuaji Abraham, taa nera na miiniutianiyani, cuno nuhuaji, shocojoquiaarijiaaraari cuatrociento treinta marijia. Cuatrociento treinta marijia shocojonu nuhuaji, Pueyasoori jiyacari shusha Moisés niquitioquiaari na rootasano, saajianeecaacua na quejasano. Moisésri saniniuujia pueya na niishitiojoquiaari. Naacuajitij, Moisés Rootasanoori maja na naata Pueyaso sequesano Abraham jataniniu, najuhuana na quiniuria pajaniyara.  
\v 18 Pueyaso niquitionu panishano pajaniya jaara pa niquitiosaariquia saaja pa tojiniuucua Moisés Rootasano, na niquitiosocoriquiano pajaniya maara nareja niquitiosoo quiri. Saniniuujia, Pueyasocuajaari seetanujuanaa naa Abraham sequequiaari: 
\q1 “Janiyari nareja quia niquitionutaniya cua sequesanoni”. 
\p  
\v 19 Niaa naasucuaari sequeya: “Jaara naa quiritij, ¿casaarano socuateeri Moisés Rootasanoni?” Nia sequereera pueyanaa. Jiyanohua Abraham nuhuaji, Pueyasoori Moisés caminiujiutiquiaari na rootasano, pueya niishiniuria nojoriiri seetanujuanaa Pueyaso tojiyashijiaca. Cunora quiquiaariiri Moisés Rootasano. Cuno Rootasanoori quiquiaari Abraham jinianuucuajinio supueno pueyano cuaara tiuquiquiaarijiaatijia, taa Pueyaso sequequiaari Abrahamcuajani. Nojuajaari pa Jiyaniijia Jesucristocuaja. Naacuajitij, Jesucristocuajaari Pueyaso jiyaniquishano quiquiaari, na sequesacari Abraham, “quia jinianuucuajinio supueriquiano pueyano”. Cristocuajaari puetunu Pueyaso sequesano Abrahamjanaa masequiaari pajaniyarajuhuaj, taa Pueyasojuanaa sequequiaari Abrahamcuajani. Saniniuujia, Moisésri saaja pueya niishitiojoquiaari Pueyaso seya caminiujiushano nojuaja.  
\v 20 Abrahamra saniniuujia, majaari quenaaja tamonu pueyano quiniu quiquiaari nera na caminiujiuriquiano. Pueyasojuanaacuajaari nocua muetaquiaari, na sequenura seetanujuanaa taa Neyanuucua tiuujiaca na miiniutianiya maniniani. Cunora, Pueyaso rupaa Jesucristojiniji pa tojishanoni, cuno cutaraari socua pa tojishocoriquiano Moisés Rootasanojiniji. 
\s1 Casaaranote Moisés Rootasanoni 
\p  
\v 21 Naa cua sequesacaritij, ¿niaateeri jiyaniya, Moisés Rootasano naasucuaari pajaniyarano Pueyaso sequesano paraca? Majaari naa cua sequenutej. Janiyari saaja sequeyani, Moisés Rootasano jaara na naata quiriquia Pueyaso jiyanootiniu pajaniya, paa maara Moisés Rootasano tojitiajaca quiriquiani, Pueyaso jiyanooniuria pajaniya.  
\v 22 Saniniuujia, tariucuacaanu Pueyaso Rupaajinijini, paari niishiyani puetunu pueyapuejanaari Sesaaca pueya. Naaratej, majaari pa naata tarinitianu quiquiaari sesa miiniu. Naacuajitij, paari maatia niishiyani, puetunu pueyajanaa cuaara tiuuria Jesucristoocua, Pueyaso sequesano Abraham nojori masenura. 
\p  
\v 23 Pa niishiyaquishacarijia Jesucristoocua pa tiuuniuria, paari juhua Moisés Rootasano jiitiasano pueya quijiani. Paari naa quijia taraatia pueyacuaani, paa jaara tojiquiaari Jesucristojinijijiaatijia, nocua pa tiuuniuria.  
\v 24 Naacuajitij, Moisés Rootasanoori juhua pa jiitiana quiquiaari. Juhua naatujooriniyojua pa pueratejojua Jesuucuaari. Naa na miishacari pajaniyatej, juhuacarijia Jesujiniji pa niishitiojojuaari. Naacuajitij, paa jaara Jesuucua tiuuquiaarini, paari puetunu sesa pa miishanojinijijianaa jiyanooshaaquiaarini.  
\v 25 Naa Jesuucua tiuujiaca pueya pa quishacari quiarijiatej, majaari socua pa tojiniu tariucuacaanu pa canashitijiona. Moisés Rootasanoori juhua pataaco seru quiquiaari, Pueyasora na canashitijionura pajaniya, juhua naatujoori pa quishacarijia.  
\v 26 Quiarijia cutara, puetunu niajaniyajanaari Pueyaso pueya, Jesuucua nia tiuuniuucua.  
\v 27 Naacuajiti pueyanaa, niaa jaara moojinia tiuquinishaacanu, seetanujuanaa nioojiata nia tiuushacari Jesuucua, niaari na coquetesaaquiaa. Naa nia quishacari natatej, na Que niquiara, niaari juhua nojuaja niquishano, na panishano muerasuniyojua nia quiniuucuajuhuaj.  
\v 28 Naa Pueyaso muerasu pa quiniuucuatej, majaari Pueyaso niquiniu rimiajata pajaniya. Tamonu jaara Judio pueyano quiri, naajaa. Tamonu jaara tahue quirijiuhuaj, naajaa. Poonijiotesano pueyano maaraja, camarnuuju pueyanonio, cunoori maja rimiajata Pueyasora. Naajuhuaj, caya, maaji, cunoori maja rimiajata Pueyasora. Jesucristoocua tiuujiaca pa quishacari, Pueyasora, puetunu pajaniyajanaari juhua niquiriyatu pueyanoni.  
\v 29 Naajuhuaj, niaa jaara seetanujuanaa Jesucristo pueya quiri, niaari seetanujuanaa canaa supuetana Abraham jiuhuacuajinio supueno pueya cutara. Naacuajitij, niaari Pueyaso sequesano Abrahamrano maseriquianojuhuaj. 
\c 4  
\p  
\v 1 Nia sequenu paniya socuanijia pueyanaa. Cua tojiri. Mijiria, pueyano jaara jiyaniijia quiri, na shaajesacari, neyanuuri camarnura jiyatesano na que niti. Shaajeno pueyano niyanu jaara naatujua quirijia, neyanuuri juhuanojuaja maja na naata na que casami jiitianu. Nojuajaari saaja juhua pataaco seru, naatujua na quishacarijia.  
\v 2 Naacuajitij, tamasacaari cuno mueya canashitijia, cuaara mashajara quirijiaatijia, jiyaniijiara jiyatesocoriquiano, taa na shipininio sequequiaaricuajani. Juhuacarijia niishitiojoshiyajaariuhuaj, maninia na jiitianura nerano na que riuriotaca.  
\v 3 Paari naajuhuaj. Pueyaso pueya pa quiyaquishacarijia, paari juhua naatujoori quiquiaarini. Paari mijiria niishishano tojitishaaquiaarini, pa supuetanaa niishishanonio. Paari naa taraatia jiitiasaaquiaarini.  
\v 4 Na nuhuaji, Pueyaso jaara tari na sequesano tohuateenu paniquiaari, nojuajaari Neyanu jiyaroquiaari pocua, mijiria na rasaanura maninia maajijinijijianaa, pueyano na quiniuria. Mijiria na quishacari, nojuajaari puetunu Moisés Rootasanojuanaa tojiquiaari pa niti.  
\v 5 Naacuajitij, nojuajaari na naata Moisés Rootasano tojijiaca jiyanooniu, maja socua pa tojitishaanura Moisés Rootasano. Naaratej, Pueyasoori na naata pa jiyatenu na muerasu pa quiniuria cutara.  
\v 6 Seetanujuanaa na niishitiniuria pajaniya paari necohuani, nojuajaari Neyanu Sohuanu jiyaroquiaari pocua, poojiajinia na quiniuria. Naa poojiajinia na quishacaritij, nojuajaari Pueyaso pa sequetequiaa, “cua Quenaa”.  
\v 7 Naacuajitij pueyanaa, majaari tari nia quiniu Moisés Rootasano tojijiaca, juhua pataaco seru. Niaacuajaari seetanujuanaa Pueyaso niquiohua cutara. Naa na muerasu nia quishacaritij, niaari tariucuacaanu Pueyaso sequesano Abrahamrano maseriquianojuhuaj, taa na muerasurano niquitionu na sequequiaaricuajani. 
\s1 Pablo tacaashacari Galacia jiyajinia quiniaa Pueyaso pueyacua 
\p  
\v 8 Pueyaso nia niishiyaquishacarijia pueyanaa, niaari juaashiquiata shipinijiosano nia pueyasohua tojijiaca quiquiaari taraatia. Cuno casaari maja seetanujuanaa Pueyaso.  
\v 9 Quiarijia saniniuujia, niaari Pueyasojuanaa niishiya. Pueyasojuanaa cutaraari saniya nia niishiya. Naa Pueyaso panishano muerasu nia quishacaritij, ¿casaara najuhuana supuetanaa pueya niishishano miiniuria nia paniuhua socuani? Cuno, canaa supuetanaa Judiocuaca rootasanoni, cunoori maja na naata cumaquiniu niajaniya. Niaari najuhuana na tojijiaca quiniutianiya.  
\v 10 Niaanaari puetunu juucajanaa niishijiaca quiya, juhua canaa supuetanaa Judiocuaca. Niaanaari sequetuquiaa: “Cuno juuca, majaari pa miaquenu quiniutianiya. Cunoori pueresano juuca, Pueyaso jiyanooniuria pajaniya”. Niaanaari naa miiquiaa puetunu shuniyarajanaa, puetunu marijiarajanaanio. ¿Casaara naa miijiacara nia quiriohuacuaarini cuarta Pueyaso pueyanaa?  
\v 11 Naa nia miiniuucuatej, janiyari jiyanohua tacaya quiarijia niaacuani. Janiyari tama sequequiaajaacujua: “Cuno pueya tajinia Pueyaso rupaa cua pohuatasanoquiiri najuhuana quiquiaari”. 
\p  
\v 12 Cuarta Pueyaso pueyanaa, janiyari seetanujuanaa nia sequenu paniyani. Nia miiriohuarohua taa cua miiquiaaricuaani, shusha cua tiuquishacari niaacua. Moisés Rootasano niishiyashijiaca nia quishacari, janiyari na tarinitiaquiaari tojiniuni, juhua niajaniya cua quiniuriajuhuaj. Saaja Jesucristo rupaa nia tojiriohua cutara taa cua miiquiaaricuaani. Cua panishano pueyanaa, niaari maninia cua jiitiaquiaari niaata cua quishacari.  
\v 13 Niaacuajaari niishiya, cusosu cua quiniuucua, janiyari shushajanaa Jesucristojiniji pohuataquiaari nia niquiarani.  
\v 14 Naa cusosu cua quishacari niaatatej, naajaa, majaari nia ruuretanu quiquiaari janiya, naa sacuaraatia cusosu cua quishacaritij. Majaari quenaaja nia soonu quiquiaari janiya. Saniniuujia, niaari cua tojitiaquiaari juhua Pueyaso serujuanaa, nia niquiara cua pohuatasacari Jesucristojiniji. Niaa cutaraari seetanujuanaa cua tojiquiaari juhua Jesucristojuanaa. Niaari naa timitiaquiaari janiyatej, Jesujiniji cua pohuatanuucua niajaniya.  
\v 15 Quiarijiaariuhua pueyanaa, ¿casaa nia tojetacanuni? ¿Casaara nia tarinitiarohuacuaa shuquiriaatia nia quiniuurini, taa nia quiquiaari coteenucuajani? Janiyacuajaari niishiquiaarini, jiyanohua nia paniniuucua janiya, jaara nia naata quiquiaari, niaa maara nia namijia samiriootaquiaari nia niquitiosocoriquiano janiya, cucua nia taraajesacari.  
\v 16 Quiarijia naa cua sequesacari seetanujuanaa niajaniyatej, ¿niaateeri cunora cua niquiniutianiya juhua nia paraca?  
\v 17 Cuno pueya, najuhuana tamaatia nia niishitiojoquiaa Pueyaso rupaani, quiarijia nojoriiri maninia miiquiaa niajaniya na sapojonuta. Nojoriiri nia shuquiritiya, nojoriicua nia tiuuniuria. Nojoriiri naa miya, canaa nia cartenura, saniniuujia nojori tojijiaca nia quiniuria. Naacuajitij, majaari tari cua rootasano tojitiajaca nia quiniu quiniutianiya. Niaari cua cartenutaniyajuhuaj.  
\v 18 Quiarijiani, cuno pojoriiri nia shuquiritiyacuaja. Majaari nia jiyaniniu janiya nia sequeyani, maja maninia parta pueya pa shuquiritiniuria. Taaquiriirinij, maniniacuajaari parta pueya pa shuquiritiniuria, seetanujuanaa pa naacunura nojori. Niaacuajaari niishiya pueyanaa, janiyari jiyanohua nia tojishano pueyano quiquiaarini, Jesucristojiniji cua pohuatanuucua nia niquiara. ¡Naa seetanujuanaa pueyaracaanu cua panijiacara nia jiyateriquiani, maja saaja nia shuriucua cua quishacari!  
\v 19 Quiquiohuaniyojuanaa, jiyanohua cua tacaashacari niaacua, coojiaari jiyanohua noonu pacuterohuacuhuaj, naatej, taa maaji nooquiaacuaa na manajani, quera na ranu panishacari. Naajuhuaj, janiyari naa pueyaracaanu miijionutaniya naquiya niaacuani, niaa cuaara jatanishaarejaatijia, quiarinio pueya nia quiniuria. Niaari naa quiniutianiyaquij, seetanujuanaa Jesucristo quishacari nioojiacajinia, juhua nojuaja nia quiniuria.  
\v 20 ¡Seetanujuanaa nia shuriucua cua jatariquiani, maninia cua niishitiojonura niajaniya! Naa cua quishacari tucuacaanu niajaniyajinijitij, majaari cua niishiniu taa nia quiya seetanujuanaani. Niaanaari Moisés Rootasano tojijiacara quiriohuacuaa. ¿Niaateeri seetanujuanaa Jesucristo rupaa cartecanu, maja soj? 
\s1 Miriqui pohuatasano Agarjiniji, Saarajinijinio 
\p  
\v 21 Moisés Rootasano tojitiajacanaa, cua tojiri. ¿Majateeri tariucuacaanu Pueyaso Rupaajinia nia serojonu quiquiaacuaja, taa Abrahamjiniji na pohuataani?  
\v 22 Moisés Rootasanocuajaari Abrahamjiniji sequeya, nojuajaari caapiqui niyanuraca quiquiaari, caapiqui nucuaacuajiniojuhuaj. Abrahamri neco seru muetutequiaari. Na sesojoquiaariiri Ismael. Na nuhuaji, saniya necojuanaari nera muetuquiaarijiuhuaj. Na sesojoquiaariiri Isaac.  
\v 23 Pueyanaa, Agar jaara Abrahamra muetuquiaari, cunoori tama Abraham miishanojuaaja quiquiaari, mueya na panishacari. Maja cutaraari Pueyaso panishano. Saniniuujia, saniya necocuajanaa jaara nera muetuquiaari na nuhuaji, cunoori Pueyaso panishano quiquiaari cutara, na camishano maajijianaa muetusacari nera. Naacuajitij, Pueyasoori tarijia na sequesano Abraham tohuateequiaari. Naa na sequequiaariiri: “Abrahamnaa, quiaari niyanuraca quiniutianiya”. Naa Pueyaso sequenuucuatej, necocua Saaraari muetuquiaari, motaja na quishacari. Cunoori maja tama nojori cumaacatajaaja. Cunora, Isaacri Pueyaso sequesanojuanaa mueya cutara, maja juhua Ismael, seru mueya.  
\v 24 Nio caapiqui maajipohuani, Agar, Saaranio, nojoriiri juhua caapiqui seetanujuanaa Pueyaso sequesano na pueyara. Naacuajitij, Agarri miriqui juhua Moisés Rootasano, Sinaí tuhuananujinia Pueyaso niishitiojosano Moisés. Naaratej, Moisés Rootasano tojitiajacaari juhua seya quiquiaa, taa Agar quiquiaari serucuaani.  
\v 25 Seetanujuanaari, Agarri miriqui juhua Sinaí tuhuananu Arabia jiyajinia. Saniniuujia, nio pa quishacarini, Jerusalén tiacaari juhua Sinaí tuhuananu, cuno tiacajinia quiniaa pueya quiniuucua Moisés Rootasano tojijiaca. Cunora, Moisés Rootasanoori juhua nojori jiitiana quiya, juhua poonijiotesano seya nojori quiniuria.  
\v 26 Saniniuujia, quiarinio Jerusalén tiacani, jiyocuacaanu Pueyaso racatasano pa quiquioranoni, cunoori seetanujuanaa Pueyaso muerasurano cutara. Cunoori maja Moisés Rootasano tojijiacara. Cuno tiacaari miriqui juhua Saara. Paacuajaari juhua Saara niquiohua cutarani. Majaari tari pa quiniu seru niquiohua.  
\v 27 Tariucuacaanu Pueyaso sequesanocuajaari naa naajiotasano quiyajuhuaj: 
\q1 “Niyajaru maajiniaa, shuquiriaatia quia quiri. Quiaacuajaari mueya noonu saniyashijia. Naajaa, majaari quia taraajenu. Quia shuquiriniutia quia jaaquequejore cutara. Quiaacuajaari cartesaaquiaari niyajaru quia quiniuucua. Naajaa, quiaacuajaari socua queraatia niquiohuaraca quiriquiano cuno niyacaraca maajijiniji”. 
\p  
\v 28 Cuarta Pueyaso pueyanaa, paacuajaari juhua Isaacni. Na nucuarano Saara tiuuniuucua Pueyaso sequesanoocua, taa na muetunutaniyani, naacuajiti nojuajaari neyanu Isaac raquiaari. Quiarijiani, paari naajuhuaj. Jesucristo rupaacua pa tiuushacari, Pueyasoori na cumaacata pa jataniquiaari seetanujuanaa na muerasu pa quiniuria.  
\v 29 Maninia nia niishiri nio pohuatasano, pueyanaa. Abraham jaara mueya paniquiaari, nojuajaari neco seru manajoquiaari tamajaaja. Saniniuujia, saniya necocuajanaa jaara nera muetuquiaari, cunoori Pueyaso Sohuanu cumaacata rasaaquiaari cutara. Na nuhuaji, seru niyanuuri Pueyaso Sohuanu cumaacata rasano miitiaja quiquiaari. Quiarijiaari naajuhuaj, Pueyaso ruuretajaca pueyari Pueyaso Sohuanu jatanishano pueya miitiaquiaa.  
\v 30 Quiarijia nia niishiri cutara, naa naajiotasaaquiaaricuajaari tariucuacaanu Pueyaso sequesano Abraham: 
\q1 “Quia niquiocua seru quia taanuure neyanuta puetunujuanaa. Cuno, janiya seetanujuanaa quia sequequiaari niquitionuni, cunoori maja Agar niyanurano. Cunoori seetanujuanaa quia niquiocua muetusanorano, cua Sohuanu cumaacata rasano mueyaranotuhuaj”. 
\m  
\v 31 Paari naajuhuaj, cuarta Pueyaso pueyanaa. Paari maja seru niquiohuani. Paari Jiyaniijia niquiohuajanaa cutarani. 
\c 5  
\s1 Saaja Jesucristoocua tiuujiaca pa quiri 
\p  
\v 1 Jesucristo cusonuucua pocuara, nojuajaari Pueyaso niquiohuara pa jiyatequiaari, maja socua Moisés Rootasano tojijiaca pa quiniuria. Naarate pueyanaa, jiyanohua nia cojuare tama nia cuaqueyajaaja saaja Jesucristoocua nia tiuuniuria, Pueyaso jiyanooshano pueya nia quishacari tari. Majaari supuetanaa rootasano tojijiacara nia quiniuhua. ¿Moisés Rootasano tojijiacateeri jiyanooshaanutaniya? ¡Maja! Maja pa naata tama pa cuaqueyajaaja jiyanootiniu Pueyaso, Moisés Rootasano pa tojiniuucua.  
\v 2 Cua tojitiare pueyanaa. Janiyari Pabloni. Janiyajanaari seetanujuanaa nia sequeyani, niaacuajaari Jesucristoocua tiuujiaca, Gálata jiyajinia quiniaa pueyanaa. Cunora, Pueyasoori nia jiyatequiaari na muerasu nia quiniuria. ¿Niaateeri jiyaniya niaa seetanujuanaa Pueyaso pueyara quiniutianiya cutara, nia cararaatiuuquia co miatejosaanuucua? ¡Maja! Niaa jaara naa niishiriojiya, niaari Jesucristo cusonu jiyatenutaniya najuhuana na quiniuria niajaniyara. ¡Pueyanaa, majaari nia tojiniu cuno Judiocuaca, canapuete nia shiniujiuquiaa nia cararaatiuuquia co miatejosaanuracuajani, seetanujuanaa Pueyaso pueya nia quiniuria!  
\v 3 Janiyari socua sequenu paniya noo pojoririani, cararaatiuuquia co miatejonuujuacatej, nojori jiyaniniuucua naa nojori miishacaritij, nojori cutaraari seetanujuanaa Pueyaso muerasu. Cante naa miijiani, nojuaja cuaara tojiiria puetunu Moisés Rootasanojuanaa. ¿Niaateeri jiyaniya nia naata puetunu Moisés Rootasanojuanaa tojiniu, Pueyaso jiyanooniuria niajaniya? ¡Maja!  
\v 4 Naa tama nia cuaqueyajaaja nia jiyanootiniu panishacari Pueyasotej, Moisés Rootasano nia tojiniuucua, niaari Jesucristojiniji carejerucuaa. Majaari Pueyaso naata maninia miiniu niajaniya socua, taa maninia na miiquiaacuaa na panishano muerasuni.  
\v 5 Pajaniya saniniuujia, paari Pueyaso Sohuanuraca cutarani, Jesucristoocua pa tiuuniuucua. Naacuajitij, paari niishiyani paari tojetaarucuajanaa sesa miyashijiacara jiyatesaanutaniyani.  
\v 6 Quiarijiani, Jesucristo rupuesano pa quishacari nocua pa tiuuniuucua, paa jaara pa cararaatiuuquia co miatesano quirini, maja soj, naajaa. Cunoori najuhuanaj. Socua maninia cutaraari Jesuucua tiuuniu, Pueyaso panijiaca pa quiniuria, parta pueya pa paniniuriajuhuaj. 
\p  
\v 7 Cuarta Pueyaso pueyanaa, niaacuajaruhua Jesuucua tiuujiaca quijia seetanujuanaa. ¿Quiarijiaariuhuaj, cante nia tarinitiriohuacuaa seetanu rupaacuajanaa nia tiuyaquiniuriani?  
\v 8 Cuno pojori niishitiojosano Jesuucua tiuuniu nia tarinitianurani, cunoori maja Pueyaso niishitishano nojori.  
\v 9 Cunora, seetanujuanaari nio sequesano: “Shiitianiyojua jereeca mashaca jaara shoqueeca mashacajinia shuushaare, cuno shiitianiyojuaari puetunu cuno mashacajanaa jereteja”. Naajaariuhuaj, shiitianiyojua sesa niishitiojosanoori puetunujuanaa pa sesojuajuhuaj.  
\v 10 Naajaa, janiyacuajaari pa Jiyaniijiaacua tiuya seetanujuanaani, majaari nia tojiniu quiniutianiya tamaatia cuno pojori niishitiojosano. Saniniuujia, Pueyasoori noo pojori saniitioriquiano, tamaatia na niishitiojonuusanota nia cushitiojoquiaani. Cante nia niishitiojiya sesani, jaara quiri cuarta Jesucristo jiyaramiquishano pueyano, tama janiyajaaja soj, naajaa, nojoriiri saniitiosaariquiano. 
\p  
\v 11 Cuarta Pueyaso pueyanaa, majaari cua niishitiojonu quiquiaa taucuacajinijinio Jesucristoocua tiuujiaca, nojori miatejonura na cararaatiuuquia co, seetanujuanaa Pueyaso muerasu nojori quiniuria. Janiya jaara naa seetanujuanaa niishitiojoriquiaani, cuarta Judiocuaca maara naquiya cua miitiaaquiriquiani. Saniniuujia, Jesucristo cusonuucua niyacutesanojinia pocuara, paari saaja naacua jiyanooshaaquiaani. Naa cua niishitiojonuucuatej, Judiocuacaari jiyanohua cua juaaquiaani.  
\v 12 Majaari nojori nia tojiniu, nojori niishitiojosacari nia cararaatiuuquia co miatejosaanura. Maninia juhuari cuno miatejonuunu porocua jayosaanura nia tajiniji, maja socua nojori cushitiojonura niajaniya. 
\p  
\v 13 Cuarta Pueyaso pueyanaa, Pueyasocuajaari nia sequequiaari na muerasuniyojua nia quiniuria, Neyanu Jesucristoocua nia tiuuniuucua. Naacuajitij, majaari tari nia quiniu juhua poonijiotesano pueya, taa nia quiquiaaricuaani Moisés Rootasano nia tojishacari pueyaracaanu. Naa Moisés Rootasano tojijiaca nia quiyaquishacari taritij, naajaa, majaari nia jiyaniniu nia naata miiniu puetunu nia cuaqueya miiniu panishanojuanaa. Maja. Maninia cutaraari niarta Pueyaso pueyata nia cumaquitioojonura, seetanujuanaa nia panitioonuta.  
\v 14 Niaa jaara naa miijiaca quiriquiatej, niaari puetunu Moisés Rootasanojuanaa tojiyacuaja, taa na rootasanojinia naajiotasano quiyacuajani. Naa sequeyari: 
\q1 “Panijia quia quiriquia, taa quia paniyacuaa tama quia cuaqueyajaajani”. 
\m  
\v 15 Naarate pueyanaa, tama nia cuaqueyajaaja nia cojuare. Majaari pueyaracaanu nia juayonuujutanu, naatej, taa sareya sayonuujutaquiaacuaani. Niaa jaara naa quiriquiatej, niaari socua puecootoonutaniyaquij. 
\s1 Taa quijiate tama na panishanojuaaja miijia pueyanoni, Pueyaso Sohuanu tojijia pueyanonio 
\p  
\v 16 Janiya nia sequeya cutarani pueyanaa. Cua tojiri. Pueyaso Sohuanu tojijiaca nia quiri pueyaracaanu. Naacuajitij, majaari sacuaraatia tama nia panishanojuaaja nia miiniu quiniutianiya.  
\v 17 Nio nia niishiri cutara. Cuno, poojiajinia sesa casaa pa panishanoni, cunoori Pueyaso Sohuanu paraca. Naajuhuaj, Pueyaso Sohuanuuri poojiajinia sesa casaa pa panishano paracajuhuaj. Naacuajitij, cuno pojori miaquetoojosacari poojiajinia, cunora, majaari pa naata miiniu taa pa miiniu paniyacuajani.  
\v 18 Saniniuujia, Pueyaso Sohuanu jaara nia cumaquiquiaacuaja saaja Pueyaso nia tojiniuria maninia, cunora, Moisés Rootasanoori tojiniu paniyaquishaanutaniya tari. Naacuajitij, niaacuajaari maninia miiniutianiya saa Pueyaso Sohuanutaja. 
\p  
\v 19 Maatia niquishanocuajaari taa pueya miiquiaani, noo pojori, canapuete tama na panishanojuaaja miijiacani. Nojoriiri juhuajaniya na camishoo maajipohua numuetucunuujuaca, sacuaraatia miitioojua narta canuutajaariuhuaj. Maajipohuari naa sacuaraatia miitioojua narta maajipohuatajuhuaj. Pueyari saaja naa miiniuucua jiaatiajaca sacuaraatiatej.  
\v 20 Naajuhuaj, nojoriiri tama nojori pueyasorajaaja nojori shipinishano casaa secojonuujuaca. Nojoriiri shimiacurijiuhuaj, narta pueyano shimiojonuujuaca. Narta pueyano niquiniu paniyashijiacajaariuhuaj. Nojoriiri juaatioojuacajuhuaj. Nojoriiri narta pueyano jiitiasanoocua jiaatiajacajuhuaj. Cunora, nojori niquiniu paniyaquijiaari. Nojoriiri maja na niishiniu rejetenu na juaaquiaca. Ritia juaajiacaari. Pueya nasojojua narta pueyanoocuarajaariuhuaj. Naacuajitij, nojoriiri narta pueya raquiriojotaquiaa narta pueyajiniji. Nojoriiri saaja tama nojori panishano pueyajaaja panijiaca, canapuete maninia miiquiaa nojoricuajani.  
\v 21 Cuno pojori, naa sacuaraatia miijiaca pueyaracaanu Pueyaso niquiarani, nojoriiri maja na niquiniu paniniu quijia narta pueyano, cante taquiya maninia miishaaree nocuajicuaani. Nojoriiri sacuaraatia mashaasequenuujuacajuhuaj. Nojori mashaasequenuusacari, puetunu sacuaraatia casaa miijioquiaajanaari. Jiyanohua miaquenu porocua. Nojori queranacusacari, nojoriiri socua tamaatia sesa casaa miiniu niishijiacajuhuaj. Niajaniya saniniuujia cuarta Pueyaso pueyanaa, cua tojiri. Cante naa sacuaraatia casaa miijiojuani, nojuajaari maja Pueyaso jiitiasano na quiniu quiniutianiya, pueyaracaanu rishijia na quiniuria shuquiriaatia. 
\p  
\v 22 Saniniuujia, paa jaara Pueyaso Sohuanu shanacure poojiajinia na poonijionurani, nojuajaari parta pueya panijiara pa jiyateja. Poojia jiyateya shuquiriaatia quijiaraari. Poojia cajitijiajaariuhuaj. Jacaria pocuajara pa jiyateyajaariuhuaj, juhuajaniya sashijianio. Pueyaso Sohuanuuri maninia pueyanora pa jiyatequiaa, jiyanoojianio. Pa sequesano miijiara pa jiyatejajaariuhuaj, pueya tiuuniuria pocua.  
\v 23 Pueyaso Sohuanuuri pa jiyateja pueya shocoteyashijiarajuhuaj. Pa niishitiquiaajaariuhua tama sesa casaa pa cuaqueya panishanojuaaja pa rejetenura. Paa jaara naa miijiaca quiriquia Pueyaso Sohuanu cumaacatani, majaari quenaaja niquiriyatu Moisés Rootasanojinijinio sesacanu quiniutianiya pajaniya.  
\v 24 Seetanujuanaari, paa jaara Jesucristo pueyanora quiquiaarini, pa rupuesacari nojuaja, paari tari poojia sesoriquia seque cusojuaquiaari Cristotani, puetunu sesa pa jiaatianujuanaanio.  
\v 25 Pueyaso Sohuanu jaara nia samiitianijioquiaari Pueyaso muerasu nia quiniuria, quiarijia seetanujuanaa pueyaracaanu na tojijiaca nia quiri cutara.  
\v 26 Majaari tama pa cuaqueyajaaja pa jiyaniniu, paa socua maninia pueyano parta pueyajinijini. Paa jaara pueya shocotejaca quiriquiani, paari parta Pueyaso pueya juaatiniutianiyani. Maja maninia, paa jaara juaatishaareni tamonu jaara socua tojishano pueyano quiri pajaniyajiniji, naajuhuaj, tamonu jaara socua maninia miishaare pajaniyajiniji. Majaari naa miijiaca nia quiniu Pueyaso pueyanaa. Saaja maninia quijiaca pa quiri cutara. 
\c 6  
\s1 Niarta Pueyaso pueyata nia cumaquitioojoriquia 
\p  
\v 1 Cuarta Pueyaso pueyanaa, niaa jaara parta Pueyaso pueyano niquiriquia sesa miyano, jacaria nia nacasure. Cuno niajaniyajinijinio canapuete Pueyaso Sohuanu niishitiajaraca cutarani, nojori cuaara jacaria na nacasuuranoj, sesa miiniu na tarinitianuhuara. Cante cuno sesa miijia nacasuyani, nojuaja cuaara na nacasuura seetanujuanaa na paniniutia narta pueyano. Naajuhuaj, jiyanohua nia cojuare tama nia cuaqueyajaaja Sesaaca mariqui nia saniniujiurijiaariuhuaj, sesa nia miiniuriajuhuaj.  
\v 2 Maninia cutaraari nia cumaquitioojonura niarta Pueyaso pueyata, niaa jaara taraatia miishaare. Naa pa cumaquishacari parta Pueyaso pueyatej, paari naa pa Jiyaniijia Cristo rootasano pajaniyarano tohuateenutaniyani. 
\p  
\v 3 Najuhuana quijia jaara jiyaniya nojuaja cutara niishijia pueyano, pueya tojishano pueyanotuhuaj, naa niishiriojojuaari tama na cuaqueya sapojiyajaacujua.  
\v 4 Puetunu niajaniyajanaa cumaati tama niishiriojoquiaajaacujua, taamueca pueyanote niajaniyani, maninia miijia, sesa miijia soj. Niaa jaara seetanujuanaa maninia miijiaca quiriquia, tama maninia nia miishanojuaaja nia timitiare. Niarta Pueyaso pueyano jaara socua maninia miijia quiri niajaniyajiniji, socua sesa miijia soj, niaara, naajaa. Maja cunora taraajenu, maja cunora shuquiriaatia quiniujiuhuaj. Saaja shuquiriaatia nia quiri, niaa jaara maninia miiquiaa taate nia naata miiniucuajani.  
\v 5 Puetunu pajaniyajanaari tamaatia poonijiosano jiitiaani. Tama niajaniyajaaja cumaati na miiquiaa maninia, Pueyaso shuquiritianura niajaniya, seetanujuanaa shuquiriaatia nia quiniuria. 
\p  
\v 6 Canapuete Pueyaso rupaa niishitiojosaaquiaani, cuno pojori cuaara na niishitiojonaa niquitiojoora nojori casamijiniji saniniuujia, nojori niishitiojonaa jiitianura nojori panishanojuhuaj. 
\p  
\v 7 Pueyanaa, maja tama nia cuaqueyajaaja nia sapojonu nia jiyanishacari niaari saniitioyaquishaanutaniya sesa nia miiniuucua. Majaari quenaaja tamonu pueyano na naata Pueyaso rerequetenu. Pueyasoori saniitiojua cutara. Naaratej, nio miriqui sequesano nia niishiri: “Casaa jajau pa natareeni, paari juhua cuno jajau senoonutaniyajaaniuhuaj”. Nio miriqui sequesanoori nio niishitiojiya: cante maninia miijiani, nojuajaari maninia miishaanutaniyajaacuhuaj. Naajuhuaj, cante sesa miijiani, nojuajaari sesa miishaanutaniyajaacuhuaj sesa na miiniuucua. Cunoori maja rimiajata.  
\v 8 Naacuajitij, canapuete tama na cuaqueyajaaja shuquiritijiaca sacuaraatia casaa na miishacari mijiriani, Pueyasoori cuno pojori quejoonutaniya cutara, pueyaracaanu na saniitiosocoriquiano. Saniniuujia, cante Pueyaso Sohuanu tojijiani, Pueyaso panishano na miiniuria puetunujuanaa, nojuajaari pueyaracaanu rishijiara jiyatesaanutaniya cutara. Nojuajaari shuquiriaatia quiniutianiya pueyaracaanu.  
\v 9 Cunora pueyanaa, niaa jaara maninia miijiaca quiri, majaari maninia miiniuria nia taajenu. Pueyaracaanu maninia miijiaca nia quiri. Niaacuajaari niishiya, pueyano jaara na cuhuariquia natare, nojuajaari na sashijia. Majaari ritia na senoonu. Nio miriqui sequesanoori pa niishitiya, paa jaara Pueyaso Sohuanu tojiniu tarinitiaaquirini, paa cuaara sashiiriajuhuaj. Na nuhuaji cutara paari jiyanohua shuquiriaatia quijiacara jiyatesaanutaniyani, maninia pa miiniuucua.  
\v 10 Naacuajitij, jaara pa naata quiriquia, maninia pa miiriquia puetunu pueyajanaa. Saniya maninia cutaraari puetunu parta Pueyaso pueyajanaa pa miiniuria maninia. 
\s1 Pablo nacasusacari pueya, quera na tucuatasacari na naajio 
\p  
\v 11 Nia niquiri cua naajio pueyanaa. Naa quera namijiaaca cua naajiosacari niaacuaratej, nia niishiri janiyajanaari nio naajiya tama cua juaashiquiatajaajani.  
\v 12 Socua cua tojiri pueyanaa. Cuno pojori, nia shiniujiuquiaa nia cararaatiuuquia co nia miatejonurani, nojoriiri naa nia miitiniu paniya saaja narta Judiocuaca timitianura nojori. Nojoriiri narta Judiocuaca puerequiaa. Nojoriiri niishiya narta Judiocuacaari nojori miiniutianiya naquiya, miatesoo nia cararaatiuuquia co quiniuucua. Majaari nojori tiuuniu quiquiaa saaja Jesucristoocua, Pueyaso pueya nojori quiniuria. Cunora, nojoriiri jiyanohua paniya nia cararaatiuuquia co miatesano pueya nia quiniuriajuhuaj, taa puetunu Judiocuacajanaacuaani.  
\v 13 Cuno pojori, canapuete na cararaatiuuquia co miatesanocuaani, nojorijianaari maja nojori tojiniu quiquiaa puetunu Moisés Rootasanojuanaa. Naajaa, nojoriiri nia panitiaa nia cararaatiuuquia co miatesano nia quiniuriajuhuaj. Niaa jaara miatejosaare, nojoriiri tama timiquionutaniyajaaja, nojori tojitiajaca nia quiniuucua.  
\v 14 Janiya saniniuujia, Pueyaso cuaara cojuaara janiya maja cua shuquiritianura tama cua miishanojuaaja. Janiyari saaja pa Jiyaniijia Jesucristo shuquiritianu paniquiaani, pocuara na cusonuucua niyacutesanojinia. Naacuajitij, janiyari mijiria niishishanoocua jiaatiaashijiara jatanishaaquiaarini. Mijiria casaari maja na naata shiniujiuniu janiya, nocua cua jiaatianura socua.  
\v 15 Pueyanaa, pa cararaatiuuquia co jaara miatesano quiri, naajaa. Naajuhuaj, pa cararaatiuuquia co jaara miatesoo quiri, naajaa. Majaari rimiajata pa quiniu Pueyaso niquiara cunora. Saaja panishano cutaraari, quiarinio pueyanora pa jatanishaanura Pueyaso Sohuanu cumaacata.  
\v 16 Puetunu nio sequesanoocua tiuujiacajanaani, Pueyasoori nojori jiuujia cajitiquiaa, na jiyanooshacari nojori. Cuno pojoriiri seetanujuanaa Pueyaso saquiriojosano pueya. 
\p  
\v 17 Tariucuajaari cua rootasano nio naajioneejinia. Quiarijiani, tamonu cuaara socua cua taajeteyaquiiria sesa na niishitiojosanota niajaniya. Janiya cutaraari pa Jiyaniijia Jesucristojiniji niishitiojonani. Cua cuaqueyajinia nio majacuyashiquiajinijini, cunojiniji maatia niishishiyari, janiya seetanujuanaa Jesu seruni. 
\p  
\v 18 Cua panishano cuarta Pueyaso pueyanaa, nioojia cuaara jiitiaara pa Jiyaniijia Jesucristo cumaaca, na niishitiajanio. Cuaara naa quiiriatej.