\id 1JN - Arabela NT + OT portions -Peru 2009 (DBL -2013) 
\h 1 JUAN 
\toc1 Coteenujuanaa Juan naajionee 
\toc2 1 Carta de San Juan 
\toc3 1 Jn 
\mt1 COTEENUJUANAA JUAN NAAJIONEE 
\c 1  
\s1 Pueya samiitianijia rupaa 
\p  
\v 1 Jiya shipinishaacarijiyojua, Jesucristoori quijiajuhuanajaj. Canaari niaara naajiyani, canaa niishitiniuria niajaniya nojuajiniji canaa tojishano, canaa niquishanojuhuaj. Pueyanaa, canaari seetanujuanaa na niquiquiaari canaa namijiatani, pueyaracaanu nata canaa quishacari mijiria. Canaari na cooquiaarijiuhuaj canaa rupuesacari nojuaja. Nojuajaari pueyaracaanu quijia cutara, pa Samiitianijiajaariuhuaj, pueyaracaanu quijia pa quiniuriajuhuaj, na sequesanoocua pa tiuushacari.  
\v 2 Cuno pueyaracaanu Quijiani, nojuajaari pueyanora jataquiaari. Canaari na niquiquiaarini. Naaratej, canaari pueya pohuataquiaarini, nojuajaari seetanujuanaa pa Samiitianijia. Canaari quiarijia cuno pueyaracaanu Rishijiajiniji nia pohuataajaaniuhuaj. Coteenu na Queta quijia jiyocuacaanuuri. Na nuhuaji, canaacua muetaquiaariiri.  
\v 3 Canaari seetanujuanaa nia pohuataa canaa niquishanoni, canaa tojishanojuhuaj. Canaa pohuatasanoocua nia tiuushacari, pocua rupuetooreni, taa canaa quiya pa Que Pueyaso rupuesanocuaani, Neyanu Jesucristo rupuesanonio.  
\v 4 Niaa jaara nio naajiojinia canaa sequesano tojiri, niaari seetanujuanaa shuquiriaatia quijiaca quiniutianiya. Canaa jaara niaacuaji tojiriquiani, canaari shuquiriniutianiyajaacuhuaj. 
\s1 Pueyaso pa cuhuatana 
\p  
\v 5 Jesucristocuajaari nio rupaa canaa niishitioquiaari, canaa nia pohuataani. Nojuajaari naa canaa sequequiaari: “Pueyasoori Cuhuatana cutara. Nojuajaari maja ninishiqui quijia quenaaja”.  
\v 6 Naacuajitij, paa jaara sequereni: “Pueyaso rupueja cutaranijia”, na rupaa pa tojiyaquishacari, paari saaja najuhuana sapojiyani. Paari juhua ninishiqui quijia quiyajaani.  
\v 7 Paa jaara seetanujuanaa cuhuashiqui quiyani, taa Pueyaso quiya cuhuashiquicuaani, paari juhua rupuetootesano quiya parta Pueyaso muerasuta cutarani. Naa juhua rupuetootesano pa quishacaritij, Neyanu Jesucristo nanacaari puetunu sesa pa miishanojuanaa tuujuquiaa poojiajiniji. 
\p  
\v 8 Paa jaara sequereni: “Janiya sesa miyashijiani”, paari tama pa cuaqueyajaaja sapojiyani naa pa sequesacaritij. Majaari Pueyaso rupaa tojijia pa quiniu.  
\v 9 Paa jaara sesa pa miishano pohuatare saniniunijia, Pueyasoori jiyanootio cutara, na jiyanooniuria pajaniya, taa na sequequiaaricuajani. Poojiajiniji jeequenutaniya puetunu sesa casaajanaari.  
\v 10 Paa jaara saniniuujia sequereni: “Maja sesa cua miiniu”, paari Pueyaso jiyateya juhua sapojojuarani. Paa jaara naa quirini, majaari seetanujuanaa na rupaa quiniu poojiajinia. 
\c 2  
\s1 Jesucristo pocuaji tacuna 
\p  
\v 1 Quiquiohuaniyojuanaa cua tojitiare. Nio naajiya niaaranijia, maja juhuajaniya nia miiniuria sesa. Paa jaara sesa miirini, paacuajaari pa Que Pueyaso shuriucua jiitiaa pocuaji Tacunani, na Que Pueyaso na jiyanootiniuria pajaniya. Nojuajaari Jesucristo, pueyaracaanu maninia miijia cutarani.  
\v 2 Sesa pa miishanoori jiyanooshaaquiaa Jesucristo cusonuucua pocuara. Majaari saaja jiyareta pa sesa miishano jiyanooshaanu quiquiaa, mariyata puetunu mijiria quiniaa sesa miishanojuanaari jiyanooshaaquiaajuhuaj. 
\p  
\v 3 Paa jaara pa Jiyaniijia rootasano tojirini, paari niishiyani paa tari Pueyaso niishirii cutarani.  
\v 4 Jesu rootasano tojiyashijia jaara sequeriquia: “Pueyaso niishiyanijia”, jiyano pueyanoori sapojojua. Majaari na jiitianu Pueyaso rupaa noojiajinia.  
\v 5 Cante saniniuujia pa Jiyaniijia sequesano tojijia cutarani, nojuajaari seetanujuanaa pa Que Pueyaso panijia cutara. Naacuajitij, paari niishiyani paari jatiqui quiya natani.  
\v 6 Cante sequejani: “Janiyari Pueyaso rupuejani”, nojuaja cuaara quiiria juhua Jesucristo, taa na quiquiaari maniniacuaani, mijiria na quishacari. 
\s1 Quiarinio Pueyaso rootasano pajaniyara 
\p  
\v 7 Cuarta Pueyaso muerasunaa, majaari quiarinio nio rootasano, janiya niaara na naajiyani. Niocuajaari tariucuacaanu nia tojishano, majaari quiarinio. Niaacuajaari tari na tojiquiaari, Pueyaso rupaa jaara shushajanaa nia niquiara pohuatasaaquiaari.  
\v 8 Naajaa, nio rootasano quiarijia cua naajiosanoni, nioori seetanujuanaa juhua quiarinio niaara. Niaari tari na tojiquiaa, pueya panijiaca nia quishacari, taa Jesucristo quiquiaari pueya panijiacuaani mijiria na quishacari. Na rootasano nia tojishacari, niniquiaari tari quiamacuaa nioojiajiniji. Pueyasoori nioojiajinia cuhuataa nia panitioosacari quiarijia. 
\p  
\v 9 Niaa jaara sequeriquia: “Pueyasoori coojia cuhuatarucuaani na rupaa cua niishishacari”, na nuhuaji majaari nia niquiniu paniniu niarta Pueyaso pueyano, niaari ninishiqui quiyajaa.  
\v 10 Cante narta Pueyaso pueya panijia cutarani, nojuajaari cuhuashiqui quijia cutara. Tamasacaari maja na naata sesa na miitiniu, naajuhuaj, tama nojuajaarijia maja sesa na miiniu quiniutianiya, pueya panijia na quishacari.  
\v 11 Cante narta Pueyaso pueya niquiniu paniyashijiani, cuno pueyanoori ninishiqui quiyajaa, juhua ninishiqui canujuucuaajaariuhuaj. Majaari na niishiniu tee na quiaani. Naa na quiniuucua juhua ninishiquitij, nojuajaari juhua cariyojuaru quiya. Majaari na niishiniu Pueyaso casaa. 
\p  
\v 12 Quiquiohuaniyojuanaa, niaara naajiya nionijia, Pueyaso jiyanooshano muerasu nia quiniuucua, Neyanu Jesucristo mosaanuucua pocuara.  
\v 13 Queyanaa, niaara naajiyanijia nia niishiniuucua pueyaracaanu Quijia, cante tari pocuaji quiquiaari jiya coteyaquishacarijiacuajani. Mashiquioriniaa, janiya niaara naajiyajaaniuhua cua timishacari nia shocotanuucua Sesaaca. 
\p Janiyari niaara naajiocanuni quiquiohuanaa, nia niishiniuucua pa Que Pueyaso, Neyanu Jesucristoocua nia tiuushacari.  
\v 14 Janiyari niaara naajiocanujuhua queyanaa, nia tiuuniuucua tariucua pocuaji Quijiaacua, nio jiya coteyaquishacarijia. Janiyari niaara naajiocanujuhuaj mashiquioriniaa, seetanujuanaa maninia nia tojiniuucua Pueyaso rupaa, niaa jaara na masequiaari nioojiajinia, Sesaaca nia shocotanuucuajuhuaj. 
\p  
\v 15 Majaari mijiria sesa miiniuucua nia jiaatianu, mijiria casamiicuanio. Cante mijiria casaacua jiaatiajani, cunoori maja pa Que Pueyaso panijia.  
\v 16 Mijiria niishijiaca coretanijiosano tama nojori niishishanojinijijiaajani, puetunu cunojuanaari maja pa Que Pueyaso niishitishano. Cunoori sacuaraatia tama mijiria pueya niishishanojuaaja. Naacuajitij, pueyano pa quishacari, paari sesa pa jiaatianuta pueyaracaanu casaa paniquiaani tama pa cuaqueya pa shuquiritiniuriajaaja. Paari pa niquishano pa maniniucuasano casaa paniquiaa pueyaracaanuni. Naajuhuaj, paari pueyaracaanu timiquiaani tamasaca timitiasacari pajaniya. Puetunu naa sacuaraatia pa niishishanojuanaani, cunoori mijiria niishishano. Majaari Pueyaso niishitiojonu naa pajaniyatej.  
\v 17 Nio jiyari tari tariucuashiyaree. Socua shaajasaanutaniya puetunujuanaari. Puetunu sesa pa jiaatianujuanaari cojiritiasaanutaniya shaajanu puetunu nio jiyatajanaa. Cante Pueyaso panishano miiquiaa saniniunijia, nojuaja cutaraari pueyaracaanu rishiniutianiya Pueyasota. 
\s1 Jesucristo paraa 
\p  
\v 18 Quiquiohuanaa, quiarijiaari quera jiya puequesacari tari. Niaacuajaari tari pohuatasaaquiaari Cristo Paracaari niniutianiya. Quiarijiani, queraatia na paraari tari supueree. Naacuajitij, paari niishiyani nio pa quishacariiri jiya puequesacari quera.  
\v 19 Cuno Cristo paraani, nojoriiri pajaniyajinijinio pueya quiquianucuaja. Pocuaji rupatetucanuuri maja seetanujuanaa Pueyaso muerasu nojori quishacari. Jaara seetanujuanaa Pueyaso muerasu quiquianu, mariqui pata quiyacuaateni. Naa nojori miiniuucuatej, paari niishiyani majaari puetunu pata rerejonaajanaa seetanujuanaa parta Pueyaso muerasu. 
\p  
\v 20 Saniniuujia niajaniya Pueyaso muerasunaa, Jesucristoori nia niquitioquiaari na Sohuanu. Naaratej puetunu niajaniyajanaari Pueyaso niishitiajaraca.  
\v 21 Majaari niaacuara cua naajionuni nia niishiyaquishacari Pueyaso rupaa. Niaacuajaari na niishiya cutara. Niaari niishiyajuhuaj, sapojojua sequesanoori maja Pueyasojiniji. 
\p  
\v 22 Pueyano jaara sequere: “Jesuuri maja Pueyaso Jiyarosano”, cunoori sapojojua. Cante sequejani: “Pueyasoori maja Jesu Que”, cunocuajaari Cristo paraca. Jaara sequerejuhuaj: “Jesuuri maja Pueyaso Niyanu”, cunoori Cristo paracajuhuaj.  
\v 23 Cante Pueyaso Niyanu Cristo tamacajani, majaari Pueyaso na jiitianu na Querajuhuaj. Cante Pueyaso Niyanu Cristo jiitiaa cutarani, pa Que Pueyaso jiitiaa na Querajaariuhuaj. 
\p  
\v 24 Naaratej, Pueyaso rupaa nia racatare nia numaama taa nia tojiquiaari tariucuacaanucuajani jaara shushajanaa pohuatasaaquiaari nia niquiara. Niaa jaara naa racatariquia na rupaa nioojiajiniate, seetanujuanaa nocua nia tiuushacari, niaari jatiqui quiya pa Que Pueyasota, Neyanu Jesucristotanio.  
\v 25 Jesucristocuajaari na Sohuanu niquitioquiaari pajaniya, pueyaracaanu pa rishiniuria. Nojuajanaari naa pa sequequiaari. 
\p  
\v 26 Nio naajioree niaaranijia cua niishitiniuria niajaniya, nia niishiniuria taa Jesu paraa niishitiojonuuquiaa sesa najuhuana na cuaracashiniuuniutiani.  
\v 27 ¿Casaara nojori nia tojiquiaani? Niaacuajaruhua tari Pueyaso Sohuanu jiitiaa, Jesucristo niquitiosano niajaniyani. Naacuajitij, majaari tari panishaanu tamasaca niishitiojonura socua niajaniya. Pueyaso Sohuanucuajaari nia niishitiojoquiaa puetunu casaajanaa. Puetunu na niishitiojosanojuanaari seetanujuanaa cutara, maja sapojonu. Naaratej, pueyaracaanu jatiqui nia quiriquia Jesucristota, taa Pueyaso Sohuanu niishitiojoquiaa nia quiniuriacuajani. 
\p  
\v 28 Quiarijiani quiquiohuaniyojuanaa, jatiqui nia quiri Cristota, seetanujuanaa juhuajaniya nia quiniuria pa Jiyaniijia jaara tiuquiriohua pocua. Naa nia quiritij maja nia caririquiniuria nojuaja jaara pa jiitiasuhua. Na rupaa tojiyashijiacaari caririquiniutianiya cutara.  
\v 29 Niaacuajaari seetanujuanaa niishiya, Jesucristoori tojetaarucuajanaa sesa miyashijia cutara. Niaa cumaati niishiyajuhuaj, puetunu maninia miijiacajanaari Pueyaso muerasu. 
\c 3  
\s1 Pueyaso muerasu 
\p  
\v 1 Pueyanaa, pa Que Pueyasoori jiyanohua pa panijia. Pa sequeyari, “cua niquiohua”. Seetanujuanaa, paari necohuani. Naaratej, majaari mijiria quiniaa pueya niishiniu pajaniya. Pa niishitiuyaquiyari nojori niishiyaquiniuucua pa Que Pueyaso.  
\v 2 Cua panishano Pueyaso muerasunaa, paari tari Pueyaso muerasucuajani. Maja cutaraari pa niishiniu taamuecaquitijia pa quiniutianiya na nuhuajitijiaj. Paari saaja niishiya cutarani, Jesucristo jaara nimiohua, paari juhua nojuaja quiniutianiyani. Na tiuquishacariuhua, paari na niquiniutianiyani taa na quiyacuajani.  
\v 3 Puetunu na sashijiacajanaari tama na cuaqueyajaaja jeequequiaa sesa nojori miishanojiniji saaja maninia nojori quiniuria, taa Jesucristocuaani sesa miyashijia tojetaarucuajanaa. 
\p  
\v 4 Cante sesa miijiani, cunoori Pueyaso rootasano na rupaajinia tojiyaquijia. Puetunu sesa miiniujianaari Pueyaso rootasano tojiyaquiniu.  
\v 5 Niaari niishiyajuhuaj, Jesuuri mijiria pocua niquiaari poojia seque na jataniniuria. Nojuajaari tojetaarucuajanaa sesa miyashijia cutara.  
\v 6 Naacuajitij, cante jatiqui quiya pa Jiyaniijiatani, nojuajaari maja sesa na miiniu quiquiaa cutara. Cante saniniuujia sesa miijiani, majaari na niishiniu Jesu. Majaari nojuaja na niquiniu quiquiaarijiuhuaj.  
\v 7 Quiquiohuaniyojuanaa, tama nia cuaqueyajaaja nia cojuare niaa mariqui sapojosaareeri. Cante maninia miijiani, nojuajaari maninia pueyano cutara, taa pa Jiyaniijia Jesucuaani, pueyaracaanu maninia quijia cutara.  
\v 8 Saniniuujia, cante sesa miijiani, nojuajaari Sesaaca pueyano. Shusha jiya coteenujiniji, Sesaacacuajaari tari sesa miijia quiquiaari. Pueyaso Niyanuuri cunora niquiaari puetunu sesa na miijiosanojuanaa na shaajanura. 
\p  
\v 9 Puetunu Pueyaso pueyajanaari maja sesa miiniuucua na shiiniuquiuniu, quiarinio pueyara Pueyaso rootesano nojori quiniuucua. Nojoriiri quiarinio pueyara jatanishano quiya Pueyaso Sohuanu nojori jiitiasacari. Naacuajitij, seetanujuanaa Pueyaso muerasu nojori quishacari, majaari na naata sesa miijiaca nojori quiniu pueyaracaanu.  
\v 10 Naacuajitij, maatia niishishanocuajaari cante Pueyaso muerasuni. Saniniuujia, cante maninia miyashijiani, nojuajaari maja Pueyaso pueyano. Naajuhuaj, cante narta pueya paniyaquijiani, nojoriiri Sesaaca pueya. Naa niishishanoori cante Pueyaso muerasuni, cante Sesaaca muerasujaniuhuaj. 
\s1 Panitioojuaca pa quirij 
\p  
\v 11 Pueyanaa, shushajanaa Pueyaso rupaa nia tojishacari, niaacuajaari naa niishitiojosaaquiaaritij: “Panitioojuaca nia quiri”.  
\v 12 ¡Maja cutaraari pa quiniu juhua Caín! Nojuajaari tama tarajanujuaaja moquiaari, Sesaaca tojijia na quiniuucua. Nia niishiritio casaara Caín moquiaari tarajanuni. Nojuajaari tama tarajanujuaaja tacartaquiaari monu, tarajanu miishano quiniuucua maninia. Saniniuujia, tama na miishanojuaarijia sesa quiquiaari. Cunora tarajanu moquiaariiri. 
\p  
\v 13 Cuarta Pueyaso muerasunaa, majaari nia jiyajenenu Pueyaso ruuretajaca jaara niquiniu paniyaquiriquia niajaniya.  
\v 14 Paacuajaari juhua macu samiitianijiosaaquiaariuhuani, seetanujuanaa saminiucua pa quiniuria. Paari seetanujuanaa na niishiyani panitioojuaca pa quishacari parta Pueyaso pueyata. Cante tapueyocuaca paniyaquijiani, nojuajaari juhua macu quiyajaa.  
\v 15 Naajuhuaj, narta pueyano niquiniu paniyashijiacani, nojuajaari juhua pueya mojua Pueyasora. Niaacuajaari niishiya, pueyano mojuaari Pueyaso samiitianiyaquishoojua pueyaracaanu na rishiniuria.  
\v 16 Paacuajaari niishiyani, Cristoori jiyanohua pa panijia na cusonuucua pocuara. Naacuajiti paari niishiyani taamuecate seetanujuanaa paniniuni. Paa cuaara naa panijia quiiriajuhuaj, tama pa cuaqueyajaaja pa tarinitianura parta Pueyaso pueyacuara, jiyanohua pa paniniutia nojori.  
\v 17 Niaa jaara nareja niquiya niarta Pueyaso pueya casamiijiuniucua, puetunu nia panishanojuanaa nia jiitiasacaricuaa, niaari najuhuana sequeya: “Pueyaso panijianijia”. ¿Pueyaso panijia pueyanoteeri jiyano pueyano, narta Pueyaso muerasu niquitioyaquijia na jiitiasanojiniji? ¡Maja!  
\v 18 Quiquiohuaniyojuanaa, majaari najuhuana pa sequenu: “Cuarta Pueyaso pueya panijianijia”. Paa jaara seetanujuanaa nojori panirini, nojoriicua pa taraajere, taraatia nojori miishacari. Pueyaracaanu maninia pa miiri, seetanujuanaa pa paniniutia pueya. Majaari najuhuana pa sequenu: “Nojori paniyanijia”. 
\s1 Pueyaso tojijiaari juhuajaniya quijia Pueyaso niquiara 
\p  
\v 19 Naacuajitij, paa jaara pueya panijia quirini, paari niishiyani paa seetanujuanaa Pueyaso tojijiani. Paari niishiyani paa pueyaracaanu rishiriquiano Pueyasotani. Majaari pa shaajenu quiniutianiya.  
\v 20 Pueyaso muerasu pa quishacari, poojia jaara pa taacanuutere saaja nocuaji, naajaa, Pueyaso cutaraari jiyanohua maninia niishijia socua poojia niishishanojiniji. Nojuacuajaari pa niishiya cutara.  
\v 21 Cua panishano Pueyaso muerasunaa, poojia jaara pa macuhuajaaquiri, paari shuquiriaatia quiya Pueyaso niquiarani.  
\v 22 Nojuajaari puetunu pa masesano niquitionutaniya pajaniya, na rupaa pa tojishacari, puetunu na panishanojuanaa pa miishacarijiuhuaj.  
\v 23 Pueyaso sequesano pueraari nio: Neyanu Jesucristoocua pa tiuuniuria, pa panitioonurajuhuaj taa na sequequiaaricuajani.  
\v 24 Canapuete Pueyaso rootasano tojijiacani, nojoriiri Pueyasota rupuetootesano quijiaca. Naajuhuaj, Pueyasoori nojorijinia quiyacujua. Nojuacuajaari na Sohuanu niquitioquiaari pajaniya. Naa na Sohuanu pa jiitiasacaritij, paari maatia niishiyani Pueyasoori poojiajinia quiya. 
\c 4  
\s1 Pueyaso Sohuanujiniji pohuatasano, Cristo Paraca sohuanujinijinio 
\p  
\v 1 Cuarta Pueyaso pueyanaa, quiarijiani, queraatia Pueyaso sequenu panishano caminiujiuniaa pueyari supueya. Majaari ritia nia tiuuniu puetunu nojoriicuajanaa. Coteenu nojori nia saniniujiuri, nia niishiniuria nojori caminiujiushanote seetanujuanaa Pueyaso Sohuanujiniji, tamonujiniji soj. Mijiria, queraatia sapojonuujuacaari caneya. Nojoriiri najuhuana cuaracashiniuya na sequesacari: “Janiyacuajaari Pueyaso sequenu panishano caminiujiuniani: Pueyaso Sohuanu niishitishano janiya”.  
\v 2 Niaari naa niishiniutianiya cante seetanujuanaa Pueyaso Sohuanu niishitishano caminiujiuniani: Pueyaso Sohuanu jiitiajaari naa sequeja: “Pueyaso jiyarosano Jesucristoori pueyanora quiquiaari, mijiria pocuara cusoriquiano”.  
\v 3 Cante saniniuujia jiyaniyani Jesu maja pueyanora na quiniu quiquiaari, cunoori maja Pueyaso Sohuanu na jiitianu. Saaja Sesaaca sohuanu jiitiaa noojiajinia cutaraari. Nojuacuajaari Jesucristo Paraca. Niaacuajaari tari pohuatasaaquiaari, Cristo Paraca sohuanuuri niniutianiya. Nojuacuajaari tari mijiria quiya. 
\p  
\v 4 Quiquiohuaniyojuanaa, niaacuajaari Pueyaso muerasu. Naacuajitij, niaari cuno sapojonuujuaca shocotacanu Pueyaso cumaacata. Nioojiajinia Quijiaari socua cumaacaraca nojori jiitiasano Sesaaca cumaacajiniji.  
\v 5 Cuno sapojonuujuacaari saaja Pueyaso niishiyashijiaca, maja Pueyaso muerasu. Naacuajitij, nojoriiri saaja mijiria casaajiniji pohuatanuuquiaa. Naarate narta Pueyaso ruuretajacaari nojori tojitiaquiaa.  
\v 6 Paa cutaraari Pueyaso pueyani. Naacuajitij, cante Pueyaso tojitiajacani, nojoriiri pa tojitiaquiaa. Canapuete saniniuujia maja Pueyaso pueyani, nojoriiri maja na tojitianu quiquiaa pajaniya. Naacuajitij, pa naata niishiniu cante seetanujuanaa Pueyaso Sohuanu jiitiaa cutarani, cante saniniuujia sapojojua sohuanu jiitiaanijia. 
\s1 Pueyaso pa panijia cutara 
\p  
\v 7 Cua panishano Pueyaso pueyanaa, jiyanohua panitioojuaca pa quirij. Pueyasocuajaari pa panijia. Nojuajaari pa panitijia na Sohuanuta, jiyanohua panijia pa quiniuriajuhuaj. Canapuete puetunu pueya panijiacajanaani, nojoriiri Pueyaso muerasu cutara, seetanujuanaa Pueyaso niishijiacajaariuhuaj.  
\v 8 Canapuete pueya paniyashijiacani, nojoriiri maja na niishiniu Pueyaso. Pueyasocuajaari panijia cutara.  
\v 9 Nojuajaari pa niishitiquiaari taa na paniquiaa jiyanohua pajaniyani, Neyanuniyojua na jiyarosacari mijiria pa samiitianijioriquiano, pocuara na cusosacari.  
\v 10 Naa cutarate seetanujuanaa paniniu sequesano: Pueyasoori pa panijia. Paari maja pa coteetanu quiquiaari Pueyaso paniniuni. Nojuajaari saniya coteetaquiaari na paniniuria pajaniya. Neyanu jiyaroquiaariiri pocuara mosocoriquiano, sesa pa miishano jiyanooshaanura. Naa cutarate seetanujuanaa paniniu. 
\p  
\v 11 Cua panishano Pueyaso muerasunaa, Pueyaso jaara naa pa paniquiaaricuaa, ¿casaara pa panitioyaquiyarinijia? Naa panitioojuacara pa quirijiuhuaj.  
\v 12 Majaari quenaaja pa niquiniu quiquiaari Pueyaso, taamuecatejanojoni. Naajaa, paa jaara tamasacata panitioojuaca quirini, Pueyasoori poojiajinia quiyacuaja. Naacuajitij, paari tojetaarucuajanaa panijiacara quiniutianiyani, na paniniu quishacari poojiajinia.  
\v 13 Nojuajaari na Sohuanu pa niquitioquiaari poojiajinia na quiniuria. Naacuajitij, paari niishiyani paacuajaari nata rupuetoojua quiyani.  
\v 14 Canaajanaari seetanujuanaa canaa niquishano pohuataani: Pueyasoori Neyanu jiyaroquiaari mijiria, mijiria quiniaa niti mosocoriquiano, nocua tiuujiaca jiyatesaanura Pueyaso pueyara.  
\v 15 Cante pueya niquiara sequejani: “Jesuuri seetanujuanaa Pueyaso Niyanu”, Pueyasoori noojiajinia quiya. Nojuajaari Pueyasota rupuetoojua quiyajuhuaj. 
\p  
\v 16 Naacuajitij, paari niishiyani Pueyasoori jiyanohua pa panijia. Paari na niishiyajaaniuhua na rupaacua pa tiuushacari. Pueyaso cutaraari panijia. Paa jaara pueyaracaanu panijia quirini, paari seetanujuanaa Pueyaso rupuejani. Naajuhuaj, Pueyasoori poojiajinia quiya.  
\v 17 Naa Pueyaso quishacari poojiajiniatej, paari pueya panijiara jiyacatequiaa socuani. Naa seetanujuanaa panijia pa quishacaritij, paari juhuajaniya quiniutianiya Pueyaso nequesoreesacari puetunu pueyapuejanaani. Majaari pa puerenu quiniutianiya panijia pa quishacari taa panijia nojuaja quiyacuaani.  
\v 18 Cante seetanujuanaa Pueyaso panijiani, majaari na niishiniu puerenu. Naa pa paniniuuri puetunu pa puerenu jataajanaa. Cante puereja quiya saniniunijia, majaari juhuanojuaja na paniniu Pueyaso puetunu noojiatajanaa. Puerejaari niishiriojiya: “Saniitiosaanutaniyanijia”. 
\p  
\v 19 Niaacuajaari niishiya, Pueyasoori coteenujuanaa pa paniquiaari, naarate paari saniniuujia na paniyani.  
\v 20 Saniniuujia, cante sequejani: “Janiyari Pueyaso panijiani”, narta pueya niquiniu paniyaquiya saajaaraariuhuaj, jiyano pueyanoori sapojojua. Naa na paniyaquishacari tarajanu na niquishano na namijiata cutaratej, ¿maatucua taa Pueyaso panirini, na niquishoo socuani?  
\v 21 Pueyasocuajaari naa pa rootaquiaari: “Cante cua panijiani, cuaara paniiria narta pueyajuhuaj”. 
\c 5  
\s1 Taa pa shocotanutaniya mijiria niishishanoni 
\p  
\v 1 Niaa jaara Jesuucua tiuuri nojuaja seetanujuanaa Pueyaso Jiyarosano quiquiaari, niaari Pueyaso muerasu. Mijiria, cante muerasu que panijiani, necohua paniyajaariuhuaj.  
\v 2 Naacuajitij, pa panishacari Pueyaso, pa tojishacari na rootasanojuhuaj, jiyacariti paari niishiyani paari parta Pueyaso muerasu paniyajaacuhuaj.  
\v 3 Paa jaara Pueyaso panijia quiri seetanujuanaani, paari na sequesano tojijiaca quiyajaaniuhuaj. Na rootasano pajaniyani, majaari jiyajeneta na quiniu pajaniyara.  
\v 4 Cante seetanujuanaa Pueyaso muerasuni, nojuajaari mijiria sesa niishishano shocotaa. Paari na shocotajani Pueyasoocua pa tiuushacari.  
\v 5 Cante Jesu jiyateya seetanujuanaa Pueyaso Niyanurani, saaja jiyano pueyano na naata mijiria niishishano shocotanu cutara. 
\s1 Pueyaso Niyanujiniji pohuatasano 
\p  
\v 6 Pueyasoori canaa niishitiquiaari Jesuuri seetanujuanaa Neyanujuhuanajaj, Jesu jaara moojinia tiuquinishaaquiaari. Canaa niishitiquiaarijiaariuhuaj Neyanu jaara niyacutesanojinia naatequiaari. Jesuuri maja saaja moojinia na tiuquinishaanu quiquiaari canaa niishiniuria nojuaja. Maja. Naajuhuaj, janiyajanaari na niquiquiaari na nanaca shooteyano na shuucuajini. Naajuhuaj, poojiajinia quijia Pueyaso Sohuanuuri pa niishitiquiaa cunoori seetanujuanaa Pueyaso Niyanu quijiajuhuanajaj. Pueyaso Sohuanu cutaraari maja na niishiniu sapojonu.  
\v 7 Jiuujianaraca jiyocuacaanu quijiacaari pa niishitiya Jesucristoori mijiria niquiaari pueyano na quiniuria seetanujuanaa. Cuno pojoriiri nio: Pueyasojuanaa, na Rupaa, na Sohuanunio. Nio jiuujianaraca quijiacani, nojoriiri Pueyasojuhuanajaj.  
\v 8 Paari mijiria jiitiaa Jesujiniji pa niishitijiacajuhuaj. Cunoori jiuujianaraca quiyajuhuaj. Cuno pojoriiri nio: poojiajinia quijia Pueyaso Sohuanu, jiyocuacaanuji tojishano rupaa Jesu tiuquinishacari moojinia, naajuhuaj, na nanaca, pueya niquishano na shuucuaji shoyano. Puetunu cunojuanaari mariyata pa niishitiya Jesuuri seetanujuanaa Pueyaso Niyanu.  
\v 9 Paa jaara tojiriquia pueya pohuatanuusanoni, ¿casaara saniya Pueyaso sequesano pa tojiyaquiyarini? Pueyaso sequesano Neyanujinijiiri socua seetanu rupaajanaa cutara pueya pohuatanuusanojiniji.  
\v 10 Cante Pueyaso Niyanuucua tiuujiani, Pueyaso Sohuanuuri noojiajinia na niishitiya Jesuuri seetanujuanaa Pueyaso Niyanu. Saniniuujia, cante Pueyaso sequesano Neyanujiniji ruuretaja saniniunijia, nojuajaari Pueyaso jiyateya sapojojuara, na tiuyaquishacari tama Pueyaso sequesanoocuajaaja Neyanujiniji.  
\v 11 Pueyasocuajaari sequequiaari, Neyanuucua tiuujiacaari pueyaracaanu rishijiaca quiniutianiya.  
\v 12 Cante Pueyaso Niyanu jiitiaa noojiajiniani, nojuajaari tari samiitianishaarohua pueyaracaanu rishijia na quiniuria. Pueyaso Niyanu jiitiaashijiaari saniniuujia maja na rishiniu quiniutianiya. 
\s1 Nio naajio puequenu panishacari rootasano 
\p  
\v 13 Nio naajiya niaaranijia nia niishiniuria, Pueyaso Niyanuucua nia tiuushacari niaari tari samiitianijiosaarohua pueyaracaanu nia rishiniuria. 
\p  
\v 14 Paari Pueyasoocua tiuuquiaani, pa niishishacari nojuajaari pa tojiquiaa pa secojosacari nojuaja, pa masesano jaara quiri taa na paniyacuajani.  
\v 15 Naatej, taa pa niishiyacuaani Pueyasoori pa secojosano tojiquiaa, paari naa niishiyajuhuaj paari nojuaja pa masesano maseree tarini. 
\p  
\v 16 Cante narta Pueyaso pueyano niquiya sesa miyanoni, cuaara Pueyaso secojoora nocuara, sesa na miishano jaara na cusojuaashijia quiri. Naacuajitij, Pueyasoori cuno sesa miijia naataniniutianiuhua, sesa na miishano jaara cusojuaashijia quiri. Quiyajaariuhua tamonu sesa casaa miiniu. Paa jaara cuno sesa casaa miirini, paari cusoqueeni. Naa cua sequesacari niajaniyatej, majaari cua sequenu niajaniya nia secojonura jiyano sesa miishanoocuaratej.  
\v 17 Seetanujuanaa, puetunu sesa miishanojuanaari sesa Pueyasora. Naajaa, majaari puetunu sesa miishanojuanaa cusojuanu quiniutianiya pajaniya. 
\p  
\v 18 Paacuajaari niishiyani pueyanaa, cante Pueyaso jiitiaa juhua na Que cutarani, nojuajaari sesa miyaquiquiaa, Pueyaso Niyanu cojuasacari nojuaja. Naacuajitij, Sesaacaari maja na naata sesa na miitiniu. Majaari na naata sesa na miiniujiuhuaj. 
\p  
\v 19 Paari niishiyani paa cutaraari Pueyaso muerasuni. Sesaacaari saniniuujia puetunu mijiria quiniaa Pueyaso niishiyashijiacajanaa jiitiaacujua. Nojuajaari nio jiya camarnu. 
\p  
\v 20 Paari niishiyajuhuaj Pueyaso Niyanuuri mijiria pocua niquiaari. Nojuajaari na niishitiaja niquitioquiaari pajaniya, maninia pa niishiniuria na Que, na Que quiniuria pa Quejuhuaj. Nojuajaari Pueyasojuanaa cutara. Paari nata quiya jatiquini, Neyanu Jesucristota pa rupuetoosacari. Nojuajaari Pueyasojuhuanajaj, pa Samiitianijiajaariuhuaj, pueyaracaanu rishijiaca pa quiniuria.  
\v 21 Quiquiohuaniyojuanaa, saaja Pueyaso pa paniri. Tama pa cuaqueyajaaja pa cojuare, maja tamonu casaacua pa jiaatianura socua Pueyasojiniji. Paa jaara tamonu casaacua jiaatiareni, paari Pueyaso shocoteya nocuarani. Niojuanaa pueyanaa. Tariucuaja.