\id JON  
\h Jona 
\toc1 Jona 
\toc2 Jona 
\toc3 Jona 
\mt1 Jona  
\c 1  
\s1 Jona Te Rop Selal Dini Dalen \nd SUBU\nd*  
\p
\v 1 Tei vabwaleh ba \nd SUBU\nd* te doptop mini Jona niah tei nutsun Amitai nuhu,  
\v 2 “Ko van li vini kawu ah Niniva bi ko bep seresere dalek mini nii, igo nam gita ba noo lelian mwegapkapmwa tokol.”  
\v 3 Tehu ba Jona mo rop selal dini saalean non \nd SUBU\nd*, bi mwegam ban Tases. Tesip Jopa ba butdihi aga ah batvan Tases, bi mwe gele halan lin nuhu nemarop selal dini \nd SUBU\nd*. Bi ram rop ban Tases.   
\p
\v 4 Rat temlu nae, ba \nd SUBU\nd* mwasro bwera leng, bi teh mwegapkawu niah teleli ba aga tewelwel naa neewoowoo.  
\v 5 Goah rat um li aga nong ratemtatsi bos bi ram dangro bwabwalehlak mini noo takaa nii nuhu rama beetsi nii. Ram gabarani leut ah tedi li aga le teh, nuhu nema leli ba aga nemamdeptep. Jona tesip mwasi bwalken aga bi mamtsuu ah temtsuu. Tebam muililngi apma nga ah tekap.   
\p
\v 6 Atsi ah teli aga mwisip ben Jona bi bamta. Bep mini nuhu “Ko mamtsuu gavak? Ko dumre bi nedangro mini nom takaa. Ko mwatkoh ba mwan rorongtani kik bi baamwesa kidi.”   
\p
\v 7 Goah rat um li aga rabep nuhu “Tabonhi dopmi dais, bi atsi ah mwan neiah lin ba ni nae niah bibi butsun too tekapmwa ahee.” Rat gam bonhi dais nong ba mwaiah li Jona.  
\v 8 Ram uhleli ini nuhu “Ko vep mini gema nuhu itan ah mweleli too tekapmwa ahee vali kidi. Kom um le apmah? Bi kotepma ibeh? Kotepma li vini apmah, bi kom sokmasen atsi apma nii?”   
\p
\v 9 Jona bep nuhu “Nana Hibru, bi nam dangro nokon \nd SUBU\nd*, Takaa nan ut le bini niah teleli teh bi ut li tan.”   
\p
\v 10 Rat vaviruu salsal i apma ah Jona tevep. Bi ram uhleli ini nuhu “Kot leli apmah?” Rat teililngi nuhu Jona terop selal dini non \nd SUBU\nd* igo te vep mwasi mini nii.  
\v 11 Naanong ba teh temu gapkawu ngate. Bi ram uhleli ini nuhu “Kama leli apma naanong mini kik ba teh nematpo roonga?”   
\p
\v 12 Jona bep nuhu “Karu bonhi nana vale teh, ba teh mwan gabis bamul. Nam mwaililngi nuhu bwera leng ahee niah mwahi gimi ba bibi butsun ah nana.”   
\p
\v 13 Goah rat um li aga ram lel dopmi nuhu rama vilis i aga mwesak ut, ba teh mumu gapkawu ngate.  
\v 14 Ram dangro mini \nd SUBU\nd*, rabep nuhu “\nd SUBU\nd*, kon ba lel tean ba gema kamatmate uu mwasan non atsi ahee. Kon ba lel tean ba kam selkakte metenan atsi woswosan ahee, uugo apma ah kom mwalngi ba mwan dapmak nae.”  
\v 15 Ram selkani Jona, bi ra bonhi mwisip le teh. Entorah te was le teh bi teh mwatpo roonga bamul tekeni sileng.  
\v 16 Entorah rat gita tedapmak ba ratemtak bahngi \nd SUBU\nd*, bi ram leli noo sekakan mini \nd SUBU\nd*. Bi rabwatle ini mini nuhu ranei non atsi nii.   
\p
\v 17 \nd SUBU\nd* mwasro bwera ik, bi modolmi Jona. Jona tetpo le tsinen bwera ik nong tei ren katsil bi bung katsil.   
\c 2  
\s1 Jona Te Dangro Mini Takaa 
\v 1 Entorah Jona tedi le tsinen ik nong bi mwe dangro mini \nd SUBU\nd* ah non Takaa,  
\v 2 bep nuhu,  
\q1 “\nd SUBU\nd*, entorah nat rong mwegapmwa bi nam deng vabem  
\q2 ba kot rorongtani nana.  
\q1 Nat teng vabem bwalken murun mete, nateura nom beebeetsikan,  
\q2 bi kot walu nok tsineng.   
\q1
\v 3 Kot wonhi nana vale teh ah tavangan sosol,  
\q2 bi lalang nan teh kapkawu lengleng te rori nana.   
\q1
\v 4 Natgam binhi nuhu kot wonhi nana naanong baiang dini lemtam,  
\q2 ba nan git mwetak ngamwa vale nom val sangbak.   
\q1
\v 5 Sileng te rori nana,  
\q2 bi tewelwel naa nama mat.  
\q1 Teh tetpo daltsi nana bwera watnede  
\q2 bi vilih nan teh rat vihvi butsuk.   
\q1
\v 6 Nat muu bi nam sip bwalken teh,  
\q2 bi teh morori baavaata nana mulngan tebulong.  
\q1 Ba \nd SUBU\nd* nok Takaa,  
\q2 kot lep dumre bamul i nok mwasan dini murun mete.   
\q1
\v 7 Entorah nat van uu goah nama ruhbodi  
\q2 ba nat vinhi bamla kik \nd SUBU\nd*  
\q1 bi nam dangro mini kik, bi nok tangroan te saket bis bem  
\q2 le nom val sangbak.   
\q1
\v 8 Goah rabuh baata rada i noo takaa getket  
\q2 ba ran basla nom mweegololoan niah mulngan tebulong niah batei noo.   
\q1
\v 9 Ani nana, ba nan sasa bavatla i ham  
\q2 bi nan neskani nok sekakan mini kik.  
\q1 Apma ah nat watle ini ba nan lel rada naa ini.  
\q1 Igo vaavaamwasan ba mwapma nante dini kik, \nd SUBU\nd*.”   
\p
\v 10 Bi \nd SUBU\nd* mweleli bwera ik nong mwesak ut bi mwiliaut i Jona vale on.   
\c 3  
\s1 Jona Te Van Niniva  
\p
\v 1 \nd SUBU\nd* mo doptop mwetak mini Jona, bep nuhu,  
\v 2 “Jona, ko dumre bi ko ban li bwera vini ah Niniva, bi kom ngari dalekte niah na mwaskani mini kik.”  
\v 3 Jona mudumre bi ban li vini ah Niniva tekeni goah \nd SUBU\nd* tevep. Niniva nong ba tei bwera vini ah tei kawu tokol. Teli ren katsil uu goah atsi bat hural lelen.  
\v 4 Tei le vaawoonan ren ba Jona, mwengaa i dalen Takaa. Bep nuhu, “Karu wuukak. Ren ngawul kavet mwiriak ba Takaa mwahi ut Niniva.”   
\p
\v 5 Tarut nii at Niniva rat rongo bi ra binhi mwetaknga nan dalen Takaa, bi ram lingling maa i nii. Ram goro korokoro bwelakte te vaawoora li noo \nd SUBU\nd* bi mwisip monok li haavak nii.   
\p
\v 6 Dalen Takaa niah Jona te ngaa ini Niniva, ba te dibwiri \nd SUBU\nd* nan ut iginan, bi \nd SUBU\nd* nong mudumre dini bwelakain, bi mo goro bwelan ah tekabis baiang bi mo goro korokoro bwelakte bi ban mwe sadok tavan le tanep.  
\v 7 Bi mwalngi saalean li bwera vini ah Niniva. Bep nuhu, “Nana \nd SUBU\nd*. Nam mwalngi saalean ahee le hak, bi le han nok saalean nii, nuhu atsi sera li vini ahee, bi bilada lalngan bo nii, tam lingling maa. Tan ba ganleut tean bi tan ba minte silengan.  
\v 8 Kidi sera mini bilada lalngan bo nii, tam goro korokoro bwelakte bi tamapma ut bwaleh nedingduu nokon Takaa bi nedeng nokon. Kidi sera ta buukak dini noda kapmwaan bi noda lelian tetkolsik niah tam leli.  
\v 9 Ko mwatkoh ba Takaa mwan gita bi binhi lihi, bi le non tsinek bwarek ba mwan wuukak bi binhi maluni non bwera leleekakat bi mwan bamu ih bamte kidi nga.”   
\p
\v 10 Entorah Takaa te kita goah tarut nii nong rat wuukak dini noo kapmwaan, bi bwaree modok nokon, bi tebam basuruni nii nga te dapmak goah te vep.   
\c 4  
\s1 Jona Te Rong Mwegapmwa igo Takaa Tega Vinhi Gabarani At Niniva  
\p
\v 1 Tehu ba rongnan nokon Jona tekapkapmwa tokol bi lelen tekakat rutrut.  
\v 2 Mwe dangro mini \nd SUBU\nd* bep nuhu, “\nd SUBU\nd*, tei apma naiah niah nat vep mini kik, entorah nat di ngamwa li vini nak. Bi tei naa ah te leli ba nat rop selal ban Tases. Nat teililngi nuhu kik, ba kobi Takaa nan tsinek bwarek bi mweegololoan, bi lelem teba kakat nga vilvil. Kik, kobi Takaa nan mweegololoan niah mulngan tebulong. Ko buh baata lelian tetkol uu goah teba gasmwani atsi nga.  
\v 3 Bi naanong \nd SUBU\nd*, ba ko lep gabarani nok mwasan. Tekabis ngate uu goah nabat mat sasviri goah nam mwas.”   
\p
\v 4 \nd SUBU\nd* bep mini Jona nuhu, “Jona? Lelem mwegakat uu apma? Ko binhi nuhu tewoswos na apma ah kom leli?”  
\v 5 Jona mamlu bi ban dini ut Niniva, bi ban mwe sadok al li mwaun ah lik. Mwe hani valin non silan bi mwe sadok alvan, bi boovani goah bat kita apma niah bat kap mini ut Niniva.  
\v 6 \nd SUBU\nd* Takaa te leli ba kasrael te miu nuhu bat beetsi Jona le non rong mwegabmwaan. Bi rongnan nokon Jona tekabis tokol ini.  
\v 7 Tei tsuubung bwaleh matsuubung nan ba Takaa mwasro mwamwal bi mwe gat bamte butsun kasrael nong bi mwatkuu.  
\v 8 Entorah metakal te dowoo bi Takaa mwe leli leng lik mwi rii, ah te mwapmwapos, bi mwi sina Jona ah tewel naa nematmul. Te rong nuhu bat mat naanong bi bep nuhu, “Tekabis na goah nam bat mat sasviri goah nam mwas.”   
\p
\v 9 Ba Takaa bep mini nuhu, “Jona! Uu apma ba lelem mwegakat uu kasrael i tetkuu ahee?”  
\p Jona bwalu bep nuhu “Apwin, lelek mwegakat ah mwegakat. Tekabis nuhu nama mat nge.”   
\p
\v 10 \nd SUBU\nd* bep mini nuhu “Bwaren kasrael ahee modok nokom tekeni goah kot ruwu bi kom rarei bi kot leli ba miu. Tei te miu nge bung bwaleh bi mat bamul nge matsuubung nan.  
\v 11 Ko kita. Ut Niniva ba tarutan hal kawu lengleng tokol, tesasviri tevataa va tewudelu vabwaleh bi ngawul karu mwatpo lin\f + \fr 4:11 \ft Tevataa va tewudelu vabwaleh bi ngawul karu mwatpo lin 120,000\f* niah rat baililngi apma nga niah tekabis io tekapmwa. Bi bilaa buluk tesesmuumuu tedapmak. Kot ba git dihi gongaa ah nam binhi gawu i nii?”