\id REV - Apinayé NT -Brazil 2008 (DBL 2013) 
\h Apokarip 
\toc1 Juãw kot Jejus nhỹ hã mẽmoj kukamã harẽnh 
\toc2 Apokarip 
\toc3 Ap 
\mt1 Apokarip 
\mt2 Juãw kot Jejus nhỹ hã mẽmoj kukamã harẽnh 
\ip Juãw na pre mẽ pamã kagàja nhĩpêx. Juãw Paxis kêt axtem Jejus nhỹ hã hkrajê jahkre ho mẽ pa xwỳnhjê hõ pê Juãw na pre hipêx. Na pre Jejus ã mẽ kãm hkurê xwỳnhjaja unê nẽ ma gô hipôk pê Patos wỳr kumẽ nhũm kêp prês nẽ gô hipôk kãm pa ho pa nẽ aa kurũm kator kêt rãhã ty. 
\ip Jakamã kormã htĩr ri nhũm Tĩrtũm kapẽr o wrỳk xwỳnhjê hõ gô hipôkja wỳr wrỳ nẽ kãm mẽmoj kukamã awjarẽ nhũm kuma nẽ hkôt mẽmoj pumu. Te hpimtir kãm mẽmoj pumunh pyràk. Hãmri nẽ omu nẽ kuma nẽ amnhĩ xô ri mẽ pamã hã kagà. Na pre mẽmoj to axkrunẽpxi nẽ hã kagà. Mẽ kot Jejus kutã amnhĩ xunhwỳr xwỳnhjaja kot Jejus ã tanhmã kêp hkwỳjê to ho pa nhũm mẽ hkwỳjaja pikaprãr ã kagà. Nẽ Jejus kêp Pahi Maati hã kot nhỹrmã mẽ kot Tĩrtũm kutã amnhĩ xunhwỳr xwỳnh piitã ma mẽ kot amnhĩ xà htỳx kamã hamak tũm xà hwỳr mẽ rẽnh par ã kagà. Nẽ Tĩrtũm kot nhỹrmã hkrajê ho mex kumrẽx ã nhũm mããnẽn hã kagà. Hãmri nẽ mẽ pamã hã kagà o: 
\c 1  
\p  
\v 1-2 E kot paj mẽ amã awjarẽ nẽ hã kagà. Ixpê Juãw ixte Tĩrtũm mã tanhmã amnhĩ anhĩpêx to ho ixpa xwỳnh kot paj mẽmoj jarẽ nẽ hã kagà. Na pre Tĩrtũmja Jejus mã mẽmoj kukamã tanhmã ujarẽnh to ho ra kãm ho amnhĩrĩt pa. Kot amnhĩ xô ri mẽ pahte hkôt amnhĩ xunhwỳr xwỳnhjê mã harẽnh kaxyw. Hãmri nhũm kuma nẽ kot amnhĩ xô ri inhmã ujarẽnh kaxyw man ixwỳr kapẽr o wrỳk xwỳnh mẽ nhũm man ixwỳr wrỳ nẽ ô ri inhmã mẽmoj to amnhĩrĩt pa. Ãm hãmri ã inhmã mẽmoj to amnhĩrĩt anẽ. Tã kot paj amnhĩ xwar mẽ apê Jejus kôt ri mẽ apa xwỳnhjê mã harẽ nẽ hã kagà. Mẽ ate mar nẽ axkãm ajamak rom nẽ ri apa kaxyw. Nà ixte hã kagà mã xwỳnhja koja tanhmã amnhĩ to nẽ tokyx mẽ pahwỳr wrỳ.  
\v 3 Jakamã kwa kêr ka mẽ aprĩ hã kagàja kamã harẽ nẽ ama nẽ hkôt pix mã amnhĩ nhĩpêx nẽ mẽ piitã mẽ kãm kamã harẽnh o ri mẽ hkôt apa. Kot kaj mẽ ã amnhĩ nhĩpêx anẽ nhũm Tĩrtũm ja hã mẽ ato mex ka mẽ akĩnh nẽ apa ho apa. Nẽ mẽ kot mẽ axujarẽnh mar nẽ hkôt amnhĩ nhĩpêx xwỳnhjaja koja Tĩrtũm ja hã mẽ omu nẽ mẽ ho mex nẽ nhũm mẽ apyrà nẽ hkĩnh nẽ pa ho pa. 
\s1 Juãw kot krĩ pê 7 kôt Jejus kwỳjê hwỳr kagà rẽnh 
\p  
\v 4 E ixpê Juãw kot paj atar pika pê As kamã krĩ pê 7 piitã hkôt mẽ apê Jejus kwỳ hã axpẽn wỳr mẽ apikuprõnh xwỳnhjê hwỳr kagà nẽ kurẽ ka mẽ kamã harẽ nẽ ama. 
\p Na pa hte mẽ ato Tĩrtũm wỳr rãhã ho ri ixpa. Nẽ mẽ ato hwỳr o: 
\p —Pa Tĩrtũm. Kwa kêr ka pika pê As kamã akrajê ho mex nẽ mẽmoj to mẽ kutã anojarêt rãhã ho apa. Kê mẽ hamakêtkati nẽ àmnhĩx ri pa ho pa. Ja na inhmã hprãm. Anẽ. 
\p Tĩrtũmja rãhã ho rãhã. Amnepêm kormã mẽmoj kêt ri nhũm pre ra rãhã ho rãhã. Nẽ koja nhỹrmã mẽmoj akupỹm hapêx par tã nhũm Tĩrtũm aa hapêx kêt kumrẽx. Koja arĩ rãhã ho rãhã. Na hte kaxkwa kamã kot mẽ pahto amnhĩptàr ã hkrĩ xà kamã mẽ papytàr rãhã ho hkrĩ. 
\p Nẽ Tĩrtũm Karõ te kot Tĩrtũm kot mẽ pahto amnhĩptàr xà hã hkrĩ xà kapem kanê maati pixi kamã kwrỳt pê 7 xãm xwỳnhta pyràk. Na hte Tĩrtũm nhĩhkô hã hkrĩ ho hkrĩ. Tã kê mẽ ato mex rãhã ho pa. 
\p  
\v 5 Nẽ Jejusja na pre hte Tĩrtũm kapẽr o mẽ ahkre mex o pa nẽ aa hkaga hkêt nẽ. Tã nhũm prem axtem nẽ kupĩ. Hãmri nhũm Tĩrtũm akupỹm ho htĩr. Jejus kumrẽx ho htĩr nhũm htĩr o htĩr. Nẽ kêp pika piitã hkôt pahi piitã nhõ Pahihti. Kãm mẽ pajapê htỳx jakamã na pre mẽ panê ty nẽ hkamrôja te mẽ panê hpikapĩr pyràk o amnhĩ nhĩpêx. Nẽ htyk o mẽ pahte amnhĩ tomnuj pãnhã amnhĩre. Jao te mẽ pahte amnhĩ tomnuj pê mẽ papytàr par pyràk o mẽ panhĩpêx.  
\v 6 Nẽ na pre mẽ pahpê patre nẽ mẽ piitã mẽ ho Hipêêxà Tĩrtũm wỳr o papa kaxyw mẽ paxunhwỳ. Nẽ kêp mẽ panhõ Pahi Maati hã kãm hprãm xà hkôt mẽ pahte kãm tanhmã amnhĩ nhĩpêx to ho papa kaxyw mẽ paxunhwỳ. Jakamã kwa kêr pu mẽ kãm mex o mex nẽ hihtỳx o hihtỳx ã mãn harẽnh rãhã ho papa. 
\p  
\v 7 Nẽ koja tokyx akupỹn mẽ pahwỳr kakrã kamã wrỳ pu mẽ pahpiitã wrỳk kãm omu. Nhũm mẽ kot hpĩr xwỳnhjaja tee ri amnhĩ wỳr omu. Nẽ pika piitã hkôt ri mẽ pa xwỳnhjaja omu nẽ mẽ kot amnhĩ tomnuj jakamã tee ri amnhĩ kukamã hamaxpẽr o kãm ma htỳx kumrẽx. Hãmri nẽ kãm ma xàj mur nẽ htertet o kuhê. Koja nhỹrmã Jejus akupỹn wrỳ nhũm mẽ amnhĩ wỳr omu nẽ ã amnhĩ nhĩpêx anẽ. 
\p  
\v 8 Nẽ Tĩrtũm na hihtỳx o hihtỳx nẽ àhpumunh o àhpumunh. Nẽ aa kot mẽhõ ni rũm kator kêt. Na hte amnhĩ jarẽnh o: 
\p —Ixrãhã ixpa xwỳnh na pa. Amnepê mã kormã mẽmoj piitã hkêt ri pa pre ra ixrãhã ri ixpa ho ixpa. Nẽ koja nhỹrmã mẽmoj akupỹm hapêx tã pa arĩ ixrãhãã. Anẽ. 
\s1 Juãw kot Jejus akupỹm htĩr ã omunh 
\p  
\v 9 Nẽ ixpê Jejus kôt mẽ atõ Juãw na pa hte mẽ apyrà nẽ Jejus kôt amnhĩ nhĩpêx nhũm hte mẽ kãm Jejus kurê xwỳnhjaja mẽ apyrà nẽ hã inhĩpêx kati ho pa. Mẽ pahte hkôt ri amnhĩ nhĩpêx o papa jakamã na htem hã mẽ pahtomnuj tỳx rãhã ho pa. Tã pu htem ỹ hã mẽ kutã amnhĩ to htỳx nẽ arĩ hkôt amnhĩ nhĩpêx. Jakamã na pa pre Tĩrtũm kapẽr o mẽ ajahkre rãhã ho ri mẽ akôt ixpa. Nẽ Jejus kêp mẽ panhõ Pahihti hã mẽ amã harẽ. Mỳrapê na prem hã ixpynê nẽ man amnẽ ixto tẽ nẽ jar gô hipôk pê Patos kãm inhmẽ pa kamã ixpê prês nẽ ixpa ho ixpa. 
\p  
\v 10 Tã nhũm tômĩk pa Tĩrtũm mã amnhĩ jarẽnh o nhỹ. Hãmri nhũm Karõ tanhmã ixkrã hto pa te ixpimtir kãm mẽmoj pumunh pyrà nẽ amnhĩ katut kôt mẽhõ kapẽr ma. Te kot pifti kakôr tỳx pyràk pa kuma.  
\v 11 Hãmri nhũm inhmã kapẽr nẽ inhmã: 
\p —Pa Juãw? E kot paj amã mẽmoj to amnhĩrĩt ka omu nẽ akwỳjê mã hã kagà. Nẽ hã kagà hpa hãmri nẽ ahpỹnhã krĩ hkwỳ hkôt mẽ kêp ixkwỳ hã axpẽn wỳr mẽ pikuprõnh xwỳnhjê hwỳr arẽ. Mẽ kot kamã harẽnh nẽ mar nẽ axkãm hamak rom nẽ ri pa kaxyw. Epes wỳr nẽ Emĩnã hwỳr nẽ Pekamõ hwỳr nẽ Xijaxir wỳr nẽ Satre hwỳr nẽ Pirate hwỳr nẽ Raxisej wỳr. Krĩ pê 7ja piitã hwỳr ixkapẽr ã kagà nẽ mẽ hwỳr arẽ kê mẽ apyrà nẽ mẽmoj jarẽnhja ma. Anẽ. 
\p  
\v 12 Hãmri pa ixte mẽhõja pumunh kaxyw ho ijakẽx nẽ kanê hkwỳ pumu. Kanê kêp 7 nẽ piitã ôr o. 
\p  
\v 13 Nẽ kanê nhĩpôk ri mẽhõja te panhĩ pyrà nẽ pahi hã ê mex kãm xa. êja hpar kõn kôt hitep nhũm xa. Nẽ pahi hã mẽ hinô hpre xà ho amnhĩ nhĩnô hpre nẽ xa. Hinô pre xàja ôr pix o.  
\v 14 Nẽ hkrã hkĩ te kaxàt nhĩ jaka pyrà nẽ hakaajre. Nẽ no te kuwy hpôk pyrà nẽ hkarỳr tỳx nẽ.  
\v 15 Nẽ hpar te mẽmo kàx karỳr tỳx pyràk. Nẽ kapẽr te gô hprõt tỳx koko pyràk.  
\v 16 Na pre upôk rũm kanhêti ho 7 nẽ hamỳ nẽ o xa. Nẽ hakwa rũm wapo põm kato nẽ akutã wa gixre nẽ ajêt. Nẽ hkuk kamã hirã htỳx kumrẽx. Te myt kot mẽ pano hã harir nhũm gêk tỳx pyràk. Ã mẽhõja kot anhỹr. 
\p  
\v 17 Pa tee ri tanhmã kute hã omu nẽ inhmã ma htỳx kumrẽx nẽ umaj tẽm nẽ hpar pê te ixtyk pyrà nẽ nõ. Hãmri nhũm ixtã upôk rũm ĩhkraja xi nẽ inhmã kapẽr nẽ inhmã: 
\p —Kwa amã ixpuma hkêt nẽ. Pa na pa. Amnepê mã kormã mẽmoj kator kêt ri pa pre raa. Nẽ ixrãhãã. Koja nhỹrmã mẽmoj akupỹm hapêx pa arĩ ixrãhã ixpa ho ixpa. 
\p  
\v 18 —Na pa pre ty tã akupỹm ixtĩr. Nẽ ixtĩr o ixtĩr. Kam ixpumu. Kot paj axte ixtyk kêt nẽ. Ixpê mẽhtykjê hpãm jakamã papxipix na pa hte mẽ htyk ã arĩgro jarẽ nhũm mẽ hã ty nẽ ma mẽhtykjê papxà hwỳr ma pa. 
\p  
\v 19 —E kêr ka ate mẽmoj pumunh xwỳnhta pumunh tỳx nẽ akwỳjê mã hã kagà. Nẽ mẽmoj kormã kot amnhĩ nhĩpêx kêt nhũm ate omunh mã xwỳnhta ka inhỹ hã mẽ kãm hã kagà. Mẽ kot kamã harẽnh nẽ mar tỳx kaxyw. 
\p  
\v 20 —Nẽ kot paj axte ixprĩ hã ate mẽmoj pumunh xwỳnhta jarẽ ka inhma. Nà kanê pê 7ta te mẽ kot krĩ hkwỳ pê 7 kamã mẽ kêp ixkwỳ hã axpẽn wỳr mẽ pikuprõnh xwỳnhjê pyràk. Nẽ inhĩhkra kamã kanhêti pê 7ta te kêp inhmã mẽ kot mẽ hamãr xwỳnhjê pyràk. Anẽ. 
\c 2  
\s1 Epes kamã Jejus kwỳjê hwỳr kagà 
\p  
\v 1 Nhũm Jejus arĩ inhmã kapẽr nẽ inhmã: 
\p —E kêr ka krĩ pê Epes kamã ixkwỳjê jamãr xwỳnh wỳr kagà nẽ amẽ. Nẽ kagàja kamã mẽ kãm ixkapẽr jarẽ nẽ mẽ kãm: 
\pm Pa Epes kamã ixkapẽr mar kaxyw axpẽn wỳr apikuprõnh xwỳnhjaja. Ot pa mẽ awỳr ixpẽr mẽ. Ixpê ixupôk o kanhêti ho 7 nẽ hamỳnh nẽ ho ixãm xwỳnhta na pa. Nẽ ixpê ôr o kanê pê 7 nhĩpôk ri ixpa xwỳnhta na pa ã mẽ awỳr ixpẽr mẽnh anẽ. 
\pm  
\v 2 Na pa hte tanhmã mẽ ate amnhĩ nhĩpêx to ho apa hã mẽ apumunh mex o ixpa. Na ka htem inhmã amnhĩ nhĩpêx mex nẽ pa ja hã mẽ apumu. Mẽ kot ixtã mẽ anhĩpêx kati htã ka mẽ kutã amnhĩ to htỳx nẽ ixkaga hkêt nẽ. Nẽ mẽ kot amnhĩ tomnuj xwỳnhjê hkôt amnhĩ nhĩpêx o ri apa hkêt nẽ. Nhũm ixte mẽ awỳr mẽ rẽnh ã amnhĩ to hêx xwỳnhjaja mẽ awỳr pan pôj ka mẽ aprĩ hã mẽ kot amnhĩ to hêx ã mẽ omu. Hãmri nẽ tee ri mẽ kot amnhĩ nhĩpêx ã mẽ omu nẽ amnhĩ nê mẽ hanor kurê kumrẽx. Ãm hãmri na ka htem ã mẽ hipêx anẽ. 
\pm  
\v 3 Nẽ mẽ kãm ixkurê xwỳnhjaja kot tanhmã ixtã mẽ atomnuj tỳx to htã ka mẽ kutã amnhĩ to htỳx nẽ aa ixkaga hkêt nẽ. Nẽ ixkôt amnhĩ nhĩpêx mex rãhã ho ri apa. Ãm hãmri na ka htem ã amnhĩ nhĩpêx anhỹr o ri apa. 
\pm  
\v 4 ãm mẽmoj pixi na ixpê omnuj. Amnepê mã kormã mẽ ate ixkôt amnhĩ xunhwỳr nyw ri na ka prem amã axpẽn kĩnh nẽ axpẽn to mex o ri apa. Nẽ mẽ amã axpẽn tã ma ho te mẽ amã amnhĩ tã ma pyràk o axpẽn nhĩpêx. Tã tanhmã ajamaxpẽr to nẽ axte ã axpẽn nhĩpêx anhỹr kêt nẽ. Jao te mẽ amã ixkĩnh kêt pyràk o amnhĩ nhĩpêx. Pa tee ri ja hã mẽ apumu nhũm ja inhmã mex kêt nẽ. 
\pm  
\v 5 Kwa mẽ tokyx ja hã amnhĩ pumu nẽ akupỹm mẽ ate ixkôt amnhĩ xunhwỳr nyw ri mẽ ate axpẽn nhĩpêxta o akupỹm axpẽn nhĩpêx o apa. Kot kaj mẽ anhỹr kêt kot paj te mẽ apê mẽ anhõ kanê hpyr nẽ kapôt ã mẽnh pyràk o mẽ anhĩpêx ka mẽ ri apa nẽ gaa nẽ apikaprãr pa. Tã mẽhõ koja mẽ amỳr pê mẽ anhõ krĩ kamã mẽ kãm ijarẽnh o pa? 
\pm  
\v 6 Nẽ mẽ kêp Nikoraw nhõ xwỳnhjaja na ka htem mẽ kot tanhmã amnhĩ tomnuj to hã mẽ omu nẽ ixpyrà nẽ apê ja hprãm nõkati nẽ mẽ hkôt ri amnhĩ nhĩpêx kêt nẽ. Pa ja hã mẽ apumu nẽ ixkĩnh nẽ. 
\pm  
\v 7 Tã ixte mẽ amã ixkapẽr jatur xà na ja. Kot kaj mẽ amã ixkapẽr mar prãm hã kot kaj mẽ ã Tĩrtũm mẽ wa Ixkarõ nhỹ hã ixte mẽ amã ixkapẽr anhỹrja ma nẽ kãm ajamaxpẽr tỳx rãhã ho ri apa. 
\pm Tĩrtũm nhõ krĩ kamã mẽmo pĩ hpàr kuhê xwỳnh. Mẽ kot ô hkur nẽ axte htyk kêt nẽ pa ho pa mã xwỳnhta. Kot kaj mẽ ate amnhĩ tomnuj nê amnhĩ to htỳx nẽ arĩ inhmã hprãm xà hkôt amnhĩ nhĩpêx rãhã ty pa akupỹm mẽ ato mẽ atĩr nẽ ma pĩ hpàrta wỳr mẽ arẽ. Ka mẽ ma hwỳr mra nẽ ô hõ hta nẽ akrẽ nẽ axte atyk kêt kumrẽx nẽ apa ho apa. 
\pm E ãm ja pix na hapêx. Anẽ. 
\m —E Juãw. Kêr ka Epes kamã ixkwỳjê jamãr o pa xwỳnhta wỳr ã ixkapẽr ã kagà anẽ nẽ mẽ hwỳr amẽ. Anẽ. 
\p Hãmri pa kuma nẽ ô ri mẽ kãm hã kagà hpa. 
\s1 Emĩnã kamã Jejus kwỳjê hwỳr kagà 
\p  
\v 8 Hãmri nhũm hpãnhã Emĩnã nhõ xwỳnhjê kaxyw inhmã kapẽr nẽ inhmã: 
\p —Nẽ hpãnhã Emĩnã kamã ixkwỳjê jamãr xwỳnh wỳr kagà nẽ mẽ hwỳr amẽ. Nẽ mẽ kãm ixkapẽr jarẽ nẽ nẽ mẽ kãm: 
\pm Pa Emĩnã kamã ixkapẽr mar kaxyw axpẽn wỳr mẽ apikuprõnh xwỳnhjaja. Ot pa mẽ awỳr ixpẽr mẽ. Ixrãhã ho ixrãhã ixpa xwỳnhta na pa. Amnepêm kormã mẽmoj piitã hkêt ri na pa pre ixrãhã nẽ ri ixpa. Koja nhỹrmã mẽmoj akupỹm hapêx pa arĩ ixrãhã ho ixrãhã nẽ ri ixpa. Na pa pre ty no ãm akupỹm ixtĩr o ixtĩr. Tã pa ã mẽ awỳr ixpẽr mẽnh anẽ. 
\pm  
\v 9 Nà na pa hte mẽ ate tanhmã amnhĩ nhĩpêx to ho apa hã mẽ apumunh rãhã ho ixpa. Na hte mẽ kãm ixkurê xwỳnhjaja ixtã mẽ atomnuj to ka mẽ apê amrakati nẽ ri apa. Nom mẽ ate tãm amnhĩ nhĩpêx jakamã te mẽ apê mẽ hikukrêx rũnh kumrẽx xwỳnhjê kot amnhĩ nhĩpêx pyrà nẽ ixkukwak ri akĩnh rãhã ri apa. Na hte mẽ kêp Ijaew ã amnhĩ to hêx xwỳnhjaja mẽ ato kapẽr punuj rũnh o pa. Mẽ kot Tĩrtũm kôt amnhĩ nhĩpêx ã amnhĩ jarẽnh tã no ãm hkôt amnhĩ nhĩpêx kêt nẽ. Ãm Satanasti kôt pix mã na htem amnhĩ nhĩpêx o pa. 
\pm  
\v 10 Tã mẽ kãm ixkurê xwỳnhjaja kot ixtã mẽ atomnuj tỳx o pa htã kêr ka mẽ amnhĩ tã mẽ omu nẽ tee ri amnhĩ kukamã ajamaxpẽr kêt nẽ. Nẽ arĩ mẽ kutã amnhĩ to htỳx nẽ. Koja Satanasti mẽ akwỳjê pynê nẽ mẽ ajagjê. Hãmri nẽ mẽ ate ixkaga hprãm xàj tanhmã mẽ anhĩpêx kati hto ka mẽ hagjênh xà kamã amnhĩ xà htỳx kamã ajamak o atã arĩgro pê 10. Nom kêr ka mẽ kutã amnhĩ to htỳx nẽ ixkaga hkêt nẽ. Mẽ kot mẽ apar mã tã ka mẽ kutã amnhĩ to htỳx nẽ. Kot kaj mẽ aa ixkaga hkêt nẽ ixkôt ri amnhĩ nhĩpêx rãhã ty pa akupỹm mẽ ato mẽ atĩr nẽ ma amnhĩ wỳr mẽ ato api. Hãmri ka mẽ Tĩrtũm mẽ wa ixri amex nẽ atĩr tũm nẽ apa ho apa nẽ axte atyk kêt nẽ apa. 
\pm  
\v 11 E ixkrajaja. Kot kaj mẽ amã ixkapẽr mar prãm hã kot kaj mẽ ã Tĩrtũm mẽ wa Ixkarõ nhỹ hã ixte mẽ amã ixkapẽrja anhỹr ma nẽ kãm ajamaxpẽr tỳx rãhã ho ri apa. Kot kaj mẽ ate amnhĩ tomnuj nê amnhĩ to htỳx nẽ inhmã hprãm xà hkôt pix mã amnhĩ nhĩpêx rãhã ty. Hã kot paj akupỹm mẽ ato mẽ atĩr ka mẽ ma kuwyta wỳr apa hkêt nẽ. 
\pm E. Ãm ja pix. Na hapêx. Anẽ. 
\m —E Juãw. Kêr ka Emĩnã kamã ã ixkrajê mã ixkapẽr ã kagà anẽ. Anẽ. 
\p Hãmri pa kuma nẽ ô ri mẽ kãm hã kagà. 
\s1 Pekamõ kamã Jejus kwỳjê hwỳr kagà 
\r Sikũn Korĩt 6.14–7.1 
\p  
\v 12 Nhũm Jejus arĩ inhmã kapẽr nẽ hpãnhã inhmã: 
\p —E hpãnhã Pekamõ kamã ixkrajê jamãr o pa xwỳnhja wỳr kagà nẽ mẽ hwỳr amẽ. Nẽ mẽ kãm ixkapẽr jarẽ nẽ mẽ kãm: 
\pm Pa Pekamõ kamã ixkapẽr mar kaxyw axpẽn wỳr mẽ apikuprõnh xwỳnhjaja. Ot pa mẽ awỳr ixpẽr mẽ. Ixpê ijakwa rũm põm wapo akutã wa gix nẽ kator nẽ ãm xwỳnhta na pa mẽ awỳr ixpẽr mẽ. 
\pm  
\v 13 Na pa hte mẽ anhõ krĩ nhõ xwỳnhjaja kot tanhmã amnhĩ tomnuj to ho pa hã mẽ omunh mex nẽ. Mẽ kot Satanasti kôt pix mã ri amnhĩ nhĩpêx o pa jakamã mẽ anhõ krĩ te kêp Satanasti nhõ krĩ pyràk. Ãxipas kot mẽ hkôt mẽ kãm ixkapẽr o mẽ ahkre ho pa nẽ aa hkaga hkêt tã nhũm prem axtem nẽ ixtã kupĩ. Ka mẽ ja hã mẽ omunh tã mẽ umaj ixkaga hkêt nẽ arĩ ixkôt amnhĩ nhĩpêx rãhã ho ri apa. Ãm hãmri na ka htem ã amnhĩ nhĩpêx anẽ. 
\pm  
\v 14 Mẽmoj pixi na ixpê omnuj. Na hte mẽ akwỳjaja axtem nẽ Paraãw kapẽr kôt amnhĩ nhĩpêx o pa. Na pre Paraãwja Parak mã tanhmã kapẽr to nhũm kuma nẽ amnhĩ xô ri tanhmã mẽ anhĩgêt mã kapẽr to ho pa. Nom ixkapẽr kôt kêt ixkapẽr kuhpa hã tanhmã mẽ kãm kapẽr to nẽ mẽ kãm: “Mẽ mãmrĩ ma sãnti hã mẽ hkĩnh mã xwỳnhjê hkôt mra nẽ sãnti hã apku nẽ hã akĩnh. Nẽ mẽ uràk nẽ axpẽn pê axpẽn prõ ho amnhĩkati nẽ axpẽn pê ri axpẽn mjên o amnhĩkati nẽ mẽ ã ri amnhĩ nhĩpêx anhỹr o ri apa. Ja mex kênã.” Anhỹr o mẽ anhĩgêt mã kapẽr o pa nhũm mẽ kuma nẽ mẽ hkôt amnhĩ nhĩpêx. Tã ka mẽ akwỳjaja mẽ uràk nẽ ã amnhĩ nhĩpêx anhỹr o apa. Kwa ja mex kêt. 
\pm  
\v 15 Na hte mẽ akwỳjaja Nikorawjê kapẽr kôt ixkapẽr kuhpa hã tanhmã amnhĩ nhĩpêx to ho pa. Ja mããnẽn mex kêt.  
\v 16 Tã ra mẽ akwỳjaja ã amnhĩ tomnuj anhỹr o pa ka mẽ ja hã mẽ omu nẽ ãm mẽ omu nẽ nê tanhmã mẽ kãm akapẽr to hkêt nẽ. Kwa mẽ ate ã amnhĩ nhĩpêx anhỹr xwỳnhjaja. Kêr ka mẽ tokyx ja kaga nẽ akupỹm ixkôt ri amnhĩ nhĩpêx mex nẽ. Kot kaj mẽ anhỹr kêt kot paj tokyx mẽ awỳr wrỳ nẽ te ijakwa rũm põm wapo kator xwỳnhta o mẽ hkanhwỳr pyràk o mẽ anhĩpêx. Nom ixkapẽr xihtỳx pix o tanhmã mẽ anhĩpêx to. 
\pm  
\v 17 E kot kaj mẽ amã ixkapẽr mar prãm hã kot kaj mẽ ã Tĩrtũm mẽ wa Ixkarõ nhỹ hã ixte mẽ amã ixkapẽr anhỹrja ma nẽ kãm ajamaxpẽr tỳx rãhã ho ri apa. 
\pm Nẽ kot kaj mẽ ate amnhĩ tomnuj nê amnhĩ to htỳx nẽ inhmã hprãm xà hkôt amnhĩ nhĩpêx rãhã ty. Hã kot paj akupỹm mẽ ato mẽ atĩr hãmri nẽ ra pam mẽ amã mẽ anhõ ka mẽ hkur o apa. Te amnepêm Ijaew kapôt ã pa nhũm ixte mẽ hwỳr “manã” anhỹr xwỳnhta rẽnh nhũm mẽ kot hkur o pata pyràk. Nom ixte mẽ amã mẽ anhõja na hpimxur. Ãm papxipix na pa hte mẽ kãm õr o ixpa. 
\pm Nẽ kot paj mẽ atã mẽ anhĩxi nyw rẽ. Jao kẽn jakare hkwỳ hã ahpỹnhã mẽ anhĩxi nyw jaxwỳ nẽ mẽ amã kugõ. Ka mẽ hamỳ nẽ kapxipix amnhĩ nhĩxi nyw pumunh o apa. 
\pm E ãm ja pix. Na hapêx. Anẽ. 
\m —E Juãw. Kêr ka Pekamõ kamã ixkrajê hwỳr ã ixkapẽr anhỹr ã kagà nẽ mẽ hwỳr amẽ. Anẽ. 
\p Hãmri pa kuma nẽ ô ri mẽ kãm hã kagà. 
\s1 Xijaxir kamã Jejus kwỳjê hwỳr kagà 
\r Jutre 3-23 
\p  
\v 18 Nhũm Jejus arĩ inhmã kapẽr nẽ inhmã: 
\p —E hpãnhã Xijaxir kamã ixkwỳjê jamãr xwỳnh wỳr kagà nẽ amẽ nẽ mẽ kãm ixkapẽr jarẽ nẽ mẽ kãm: 
\pm Pa Xijaxir kamã ixkapẽr mar kaxyw mẽ apikuprõnh xwỳnhjaja. E ot pa mẽ awỳr ixpẽr mẽ. Ixpê Tĩrtũm Kra na pa. Ixpê inhno te kot kuwy hpôk karỳr tỳx pyràk xwỳnhta na pa. Nẽ ixpê ixpar te kot kàx karỳr tỳx pyràk xwỳnhta na pa mẽ awỳr ixpẽr mẽ. 
\pm  
\v 19 Na pa hte mẽ ate amnhĩ nhĩpêx kôt mẽ apumunh mex o ri ixpa. Na ka htem amnhĩ kaxyw inhmã ajamaxpẽr pê inhmã amnhĩ to mex o ri apa. Mẽ akwỳ kot ixtã tanhmã mẽ anhĩpêx to htã ka mẽ umaj aa ixkaga hkêt nẽ. Nẽ arĩ amã ixkĩnh tỳx kãm tanhmã amnhĩ nhĩpêx to ho ri apa. Nẽ axpẽn to mex nẽ ixkôt pix mã amnhĩ nhĩpêx o ri apa. Jao ra ixkôt amnhĩ nhĩpêx mex o wam mẽ ate ixkôt amnhĩ nhĩpêxta jakre. Nà ja inhmã mex kumrẽx. 
\pm  
\v 20 ãm mẽmoj pixi na ixpê omnuj. Mẽ akôt niti ri pa xwỳnh Jejapewtita. Kêp Tĩrtũm nhỹ hã kapẽr jarẽnh o pa xwỳnh ã amnhĩ to hêx xwỳnhtita. Na hte ixkapẽr kupa hã tanhmã mẽ ajahkre hto ka htem ama nẽ nê tanhmã kãm nẽ hkêt nẽ. Na hte mẽ amã: “Xê mẽ mãmrĩ ri mẽ hkuprỳjê hwỳr mra nẽ mẽ ho amnhĩkati. Nẽ axpẽn pê mẽ aprõ nẽ mẽ amjên o amnhĩkati. Nẽ mẽ kot sãnti hã mẽ hkĩnh nẽ hã apkur xwỳnhjê hkôt mra nẽ mẽ hkôt amnhĩ nhĩpêx. Tĩrtũm kãm ja mex kênã.” Anhỹr o mẽ amã kapẽr o pa. Nẽ inhmã ja mex ã ijarẽ nom inhmã ja mex kêt. Tã ra mẽ akwỳjaja kapẽr ma nẽ hkôt amnhĩ nhĩpêx ka mẽ ja hã mẽ omunh tã amnhĩ nê nitita janor kêt nẽ nhũm arĩ ri mẽ amã hêx o ri mẽ akôt pa.  
\v 21 Ra kot ã amnhĩ nhĩpêx anhỹr o mẽ akôt pa ry rax kumrẽx tã pa kormã ja hã tanhmã ho hkêt nẽ kormã amnhĩ tã hamã. Kot ã amnhĩ nhĩpêx anhỹr kaga kaxyw na pa kormã hamãr o ri ixpa. No nhũm aa hkaga hkêt nẽ. 
\pm  
\v 22 Mỳrapê kot paj tokyx tanhmã ho nhũm amnhĩ xà htỳx kamã hamak o hikwỹ. Tã mẽ kot kapẽr mar nẽ hkôt amnhĩ nhĩpêx xwỳnhjaja kot amnhĩ tomnuj ã amnhĩ pumu nẽ hkaga hkêt hã kot paj mã mẽ ho anẽ nẽ. Mããnẽn tanhmã mẽ homnuj to nhũm mẽ nitita pyrà nẽ amnhĩ xà htỳx kamã hamak o hikwỹ. 
\pm  
\v 23 Nẽ nitita kot paj kêp hkrajê nhĩmex pa. Ka mẽ apê ixkrajaja ja hã ixpumu nẽ ixte mẽ apiitã ahpỹnhã tanhmã mẽ ajamaxpẽr to hkôt mẽ apumunh ã ixpumu. Nẽ ixte ahpỹnhã mẽ apiitã tanhmã mẽ ate amnhĩ nhĩpêx to ho apa hã mẽ apumunh xà hkôt tanhmã mẽ anhĩpêx to hã ixpumu. 
\pm  
\v 24 Na hte mẽ akwỳjaja akwỳjê rom nita kapẽr ma nẽ ãm kuma nẽ hkôt amnhĩ nhĩpêx kêt nẽ. Nẽ mẽ kapẽrja mẽ kot kãm: “Satanasti kapẽr pimxur” anhỹr xwỳnhta kôt nhũm mẽ amnhĩ nhĩpêx kêt nẽ. Na htem ixkôt pix mã amnhĩ nhĩpêx mex o ri pa. Tã ã mẽ ate ixkôt amnhĩ nhĩpêx anhỹr o apa xwỳnhjaja kot paj mẽ amã ja pix ã karõ ka mẽ inhma.  
\v 25 Kêr ka mẽ arĩ ixkôt pix mã amnhĩ nhĩpêx o ri apa rãhã pa akupỹn mẽ awỳr wrỳ. Ãm ja pix ã kot paj mẽ amã karõ. 
\pm  
\v 26 Nẽ kot kaj mẽ ate amnhĩ tomnuj nê amnhĩ to htỳx nẽ arĩ inhmã hprãm xà hkôt amnhĩ nhĩpêx rãhã ty. Hãmri pa ja hã mẽ apumu nẽ nhỹrmã mẽ ate krĩ hkwỳ hkôt mẽ pa xwỳnhjê ho amnhĩptàr o apa kaxyw mẽ axunhwỳ. Ka mẽ apê mẽ õ pahihti nẽ inhmã mẽ ho amnhĩptàr o ri apa. 
\pm  
\v 27 Na pre Inhĩpêêxà ixte pika piitã hkôt ri mẽ pa xwỳnhjê ho amnhĩptàr kaxyw ixãm. 
\pm Tã kot paj nhỹrmã amnhĩ pyrà nẽ mẽ kaxyw mẽ axunhwỳ ka mẽ inhmã mẽ hamãr o apa. 
\pm Nhũm mẽhõ ixkapẽr kwỳm ri tanhmã amnhĩ nhĩpêx to ka mẽ ja hã omu nẽ hã tanhmã ho. Te mẽ kot poti punuj mỳnh nẽ mẽnh nẽ hkrakrak pyràk. 
\pm  
\v 28 Kot paj ã mẽ ate mẽ hipêx anhỹr o apa kaxyw mẽ axunhwỳ. No ãm ja pix kêt. Kot paj te ixte mẽ amã kanhêti hõ nhõr pyràk o mẽ anhĩpêx. Arĩgro hkôt kanhêti no hpôk rax japôx xwỳnhta kot paj te ixte mẽ amã õr pyràk ka mẽ ixri atĩr tũm nẽ apa ho apa. 
\pm  
\v 29 E ixkrajaja. Kot kaj mẽ amã ixkapẽr mar prãm hã kot kaj mẽ ã Tĩrtũm mẽ wa Ixkarõ nhỹ hã ixte mẽ amã ixkapẽr anhỹrja ma nẽ kãm ajamaxpẽr tỳx rãhã ho ri apa. Anẽ. 
\m —E Juãw. Kêr ka ã Xijaxir kamã ixkrajê kaxyw ixkapẽr ã kagà nẽ mẽ hwỳr mẽnh anẽ. Anẽ. 
\p Hãmri pa kuma nẽ ô ri mẽ kãm hipêx nẽ mẽ hwỳr kumẽ. 
\c 3  
\s1 Satre kamã Jejus kwỳjê hwỳr kagà 
\r Rukre 12.35-40 
\p  
\v 1 Nhũm Jejus arĩ inhmã kapẽr nẽ inhmã: 
\p —E hpãnhã Satre kamã ixkwỳjê jamãr xwỳnh wỳr kagà nẽ mẽ kãm ixkapẽr jarẽ nẽ mẽ kãm: 
\pm Pa Satre kamã ixkrajaja. E ot pa mẽ awỳr ixpẽr mẽ. Ixpê inhĩhkra ho kanhêti pê 7 jamỳnh nẽ xãm xwỳnhta na pa. Nẽ ixpê inhĩhkra ho Tĩrtũm Karõ ãm pyxi htã te kamã kêp 7 jamỳnh nẽ ho ixãm xwỳnhta na pa mẽ amã ixkapẽr. 
\pm Na pa hte mẽ ate tanhmã ri amnhĩ nhĩpêx to hã mẽ apumunh rãhã ho ixpa. Mẽ piitã kot axpẽn mã mẽ ate ixkôt amnhĩ nhĩpêx ã mẽ ajarẽnh tã ã mẽ ate amnhĩ nhĩpêx anhỹr kêt. Na ka htem ixkuhpa hã pix mã amnhĩ nhĩpêx o apa. Jakamã te inhmã ra mẽ atyk nẽ mẽ anhĩkwỹ pyràk. 
\pm  
\v 2 Na ka htem ãm akrành mã ixkôt ri amnhĩ nhĩpêx nom Tĩrtũm mẽ wa ixkôt amnhĩ nhĩpêx mex kêt nẽ. Ra Tĩrtũm mẽ wa ixte ja hã mẽ apumunh mex. Mẽ ate kormã wa inhnoo mã tãm ri amnhĩ nhĩpêx kêt jakamã kwa mẽ tokyx ja hã amnhĩ pumu nẽ ate amnhĩ tomnuj mã anhũre nẽ wa ixkôt amnhĩ xunhwỳr tỳx nẽ. 
\pm  
\v 3 Kêr ka mẽ amnepê mã kormã mẽ ate ixkôt amnhĩ nhĩpêx nyw ri mẽ kot ixkapẽr o tanhmã mẽ ajahkre htoja mã ajamaxpẽr nẽ amnhĩ tomnuj mã anhũre. Nẽ ixkapẽr kôt pix mã mãn amnhĩ nhĩpêx o ri apa. Kot kaj mẽ anhỹr kêt kot paj nhỹrmã mẽ ajaêr pê akupỹn mẽ awỳr wrỳ nẽ ja hã tanhmã mẽ ato. 
\pm  
\v 4 ãm mẽ agrêre nẽ amã ixkôt amnhĩ nhĩpêx prãm. Jao tãm ri amnhĩ nhĩpêx nẽ mẽ kot amnhĩ tomnuj xwỳnhjê hkôt amnhĩ nhĩpêx kêt nẽ. Te mẽ axê jakare kamã apa nẽ tanhmã amnhĩ pê htyk to hkêt pyràk. Tã kot kaj mẽ nhỹrmã ixri mẽ axê jakare kamã apa ho apa. Ra mẽ ate ja ho anhỹr mã tãm kênã. Ja na Tĩrtũm kãm hprãm. 
\pm  
\v 5 Nẽ krĩ piitã hkôt mẽ ate amnhĩ tomnuj nê amnhĩ to htỳx nẽ inhmã hprãm xà hkôt amnhĩ nhĩpêx rãhã atyk xwỳnh piitã kot ka mẽ nhỹrmã Tĩrtũm mẽ wa ixri amex nẽ atĩr tũm nẽ apa ho apa. Ra mẽ hixija Mẽpahpãm Maati nhõ kagàja kamã na. Kamã mẽ atĩr o mẽ atĩr mã xwỳnhjê nhĩxi piitã hã kagà. Kot paj kagàta kamã aa mẽ anhĩxi grành kêt nẽ. Hãmri nẽ Inhĩpêêxà mẽ kapẽr o mẽ wrỳk xwỳnhjê mã mẽ ajarẽnh o: “E mẽ jajê pumu. Ixkwỳ na mẽ.” Anhỹr o mẽ kãm mẽ ajarẽ. 
\pm  
\v 6 E ixkwỳjaja. Kot kaj mẽ amã ixkapẽr mar prãm hã kot kaj mẽ ã Tĩrtũm mẽ wa Ixkarõ nhỹ hã ixte mẽ amã ixkapẽr anhỹrja ma nẽ kãm ajamaxpẽr tỳx rãhã ho ri apa. 
\pm Tã ãm ja pix. Na hapêx. Anẽ. 
\m —E Juãw. Kêr ka ã Satrejê mã ixkapẽr ã kagà nẽ mẽ hwỳr mẽnh anẽ. Anẽ. 
\p Hãmri pa kuma nẽ ô ri mẽ kãm hã kagà. 
\s1 Pirate kamã Jejus kwỳjê hwỳr kagà 
\r Wam Tesarõn 2.13-16 
\p  
\v 7 Nhũm Jejus arĩ inhmã kapẽr nẽ inhmã: 
\p —E hpãnhã Pirate kamã ixkwỳjê jamãr xwỳnh hwỳr kagà nhĩpêx nẽ amẽ nẽ mẽ kãm ixkapẽr jarẽ nẽ mẽ kãm kãm: 
\pm Pa Pirate kamã mẽ ate ixkapẽr mar kaxyw mẽ apikuprõnh xwỳnhjaja. E ot pa mẽ awỳr ixpẽr mẽ. Inhmex o inhmex xwỳnh na pa. Aa ixêx kêt nẽ ixpa xwỳnh. Amnepê mã na pre mẽhõja pahi Tawi mã õrkwỹ mex ã saf jamãr o pa. Tã pa hte uràk nẽ Inhĩpêêxà Tĩrtũm nhõ krĩ hwỳr mẽ gjêx xà hã saf jamỳ nẽ ho ixpa. Ãm papxipix inhõ saf jakamã papxipix na pa hte mẽ ate ixkôt amnhĩ xunhwỳr xwỳnhjaja mẽ agjêx kaxyw mẽ amã kahê xà rẽ nẽ ixkra hkêt xwỳnhjê pê kahê. Kot paj mẽ apê ixkrajê mã kahê xà rẽ ka mẽ hwỳr agjê. Hãmri pa mẽ atã kahê nhũm ixkra hkêt xwỳnhjaja tee ri kãm mẽ akôt gjêx prãm kaprỳ. 
\pm  
\v 8 Na pa hte tanhmã mẽ ate amnhĩ nhĩpêx to ho apa hã mẽ apumunh mex o ri ixpa. Mẽ agrêre htã na ka htem ixkapẽr kôt amnhĩ nhĩpêx mex nẽ aa ixkaga hkêt nẽ. Jakamã kot paj te ixte mẽ amã Tĩrtũm nhõ hakwakre kahê xà mẽnh pyràk o mẽ anhĩpêx ka mẽ axàmnhĩx ajamakêtkati nẽ ma mẽ kãm Tĩrtũm kapẽr o mẽ ahkre ho ri mẽ hkôt apa. Nhũm mẽ hkwỳjaja tee ri ã mẽ ate amnhĩ nhĩpêx anhỹrja nê mẽ amã kapẽr kaprỳ ka mẽ arĩ ho mẽ ahkre ho ri mẽ hkôt apa. 
\pm  
\v 9 Nẽ mẽ anhõ krĩ kamã mẽ akwỳjaja na prem ra Satanasti hkôt amnhĩ xunhwỳ nẽ hêx rom mẽ amã amnhĩ to hêx nẽ mẽ amã: “E mẽ ixpê Ijaew mex jakamã kwa mẽ ixkapẽr ma nẽ mẽ ixkôt amnhĩ nhĩpêx.” Anhỹr o mẽ amã karõ htã no ãm mẽ kot Satanasti hkôt amnhĩ nhĩpêx xwỳnh na mẽ. Tã kot paj nhỹrmã tanhmã mẽ homnuj to nhũm mẽ tee ri amnhĩ pumu nẽ akupỹm mẽ awỳr mra nẽ mẽ akutã hkõnkrã ho rôrôk nẽ hkrĩ nẽ mẽ amã: “Nà mẽ kajaja na ka pẽr mẽ ixrom Jejus kôt amnhĩ nhĩpêx. Mãn kãm mẽ ajapêê.” Anẽ. 
\pm  
\v 10 Mẽ kot ixtã mẽ atomnuj tỳx nhũm mẽ ate amnhĩ xà htỳx kamã ajamak tã aa mẽ umaj ixkaga hkêt nẽ. Nẽ arĩ ixte mẽ amã mẽmoj tã karõ xà hkôt mẽ kutã amnhĩ to htỳx rãhã arĩ ixkôt ri amnhĩ nhĩpêx o apa. Jakamã mẽ kot nhỹrmã mẽ kãm ixkurê xwỳnhjaja pika piitã hkôt tanhmã mẽ homnuj tỳx to nhũm mẽ amnhĩ xà htỳx kamã ama. Tã kot paj mẽ anê mẽ omunh mex nẽ nhũm mẽ tanhmã mẽ ato hkêt nẽ ka mẽ amex nẽ ri apa ho apa. 
\pm  
\v 11 E kot paj tokyx akupỹn mẽ awỳr wrỳ nẽ mẽ ate ixkôt pix mã amnhĩ nhĩpêx ã mẽ ato mex rax kumrẽx. Jakamã kwa mẽ mãmrĩ ã amnhĩ nhĩpêx anhỹr o inhmã hprãm xà hkôt pix mã amnhĩ nhĩpêx rãhã ty. Kot ka mẽ anhỹr kêt kot pa mẽ amã mẽmoj mex nhõr kêt nẽ. 
\pm  
\v 12 Nẽ kot kaj mẽ kot amnhĩ tomnuj xwỳnhjê kutã amnhĩ to htỳx nẽ inhmã hprãm xà hkôt pix mã amnhĩ nhĩpêx rãhã ty. Hã kot paj amnhĩ kôt mẽ ato mẽ axihtỳx nẽ ka mẽ aa ixkaga hkêt nẽ. Nẽ kot paj nhỹhỹnh mẽ atã mẽ inhĩxi ho axkrunẽpxi nẽ haxwỳ. Inhĩpêêxà nhĩxi nẽ inhĩxi nyw nẽ Inhĩpêêxà nhõ krĩ nhĩxija kot paj nhỹhỹnh mẽ atã haxwỳ. Tĩrtũm nhõ krĩ mẽ kot kãm: “Jerujarẽ nyw” anhỹr xwỳnhta koja nhỹrmã tanhmã amnhĩ to nẽ ra kaxkwa rũm pika wỳr wrỳ. 
\pm  
\v 13 E ixkwỳjaja. Kot kaj mẽ amã ixkapẽr mar prãm hã kot kaj mẽ ã Tĩrtũm mẽ wa Ixkarõ nhỹ hã ixte mẽ amã ixkapẽr anhỹrja ma nẽ kãm ajamaxpẽr tỳx rãhã ho ri apa. 
\pm Tã ãm ja pix. Na ra hapêx. Anẽ. 
\m —E Juãw. Kêr ka ã Pirate kamã ixkrajê mã ixkapẽr ã kagà anẽ. Anẽ. 
\p Hãmri pa kuma nẽ ô ri mẽ kãm hã kagà. 
\s1 Raxisej kamã Jejus kwỳjê hwỳr kagà 
\p  
\v 14 Nhũm pre Jejus arĩ inhmã kapẽr nẽ inhmã: 
\p —E hpãnhã krĩ pê Raxisej kamã ixkrajê jamãr xwỳnh wỳr kagà nhĩpêx nẽ amẽ. Nẽ mẽ kãm ixkapẽr jarẽnh o: 
\pm Pa Raxisej kamã ixkrajaja. Ot pa mẽ awỳr ixpẽr mẽ. Ãm hãmri ixkapẽr o ixpa nẽ aa ixêx kêt xwỳnhta na pa. Jakamã ãm hãmri na pa hte Tĩrtũm kapẽr o mẽ ajahkre o ixpa nẽ aa ja kaga hkêt nẽ. Pa na ixpê mẽmoj piitã hpàr krax. 
\pm  
\v 15-16 Na pa hte mẽ ate tanhmã amnhĩ nhĩpêx to ho apa hã mẽ apumunh rãhã ho ixpa. Kop apu mẽ ate ixkôt amnhĩ nhĩpêx mex ronhỹx pa ja hã mẽ apumu nẽ ixkĩnh nẽ. Nom mẽ ate ã amnhĩ nhĩpêx anhỹr kêt. No mããnẽn aa ixkaga hkêt nẽ. Na ka htem ri atỳx amnhĩ krã hkôt pix mã tanhmã amnhĩ nhĩpêx to ho apa nhũm ja ixpê omnuj nẽ. Kot kaj mẽ arĩ ã amnhĩ nhĩpêx anhỹr o apa pa hpãnhã amnhĩ nê mẽ akurê. Te mẽ kot gô xenh nõkati janhir nẽ tee hkakinh nẽ akupỹm hkapĩr pyràk. 
\pm  
\v 17 Mẽ ate inhmã hprãm xà hkôt amnhĩ nhĩpêx ã amnhĩ jarẽnh tã ã amnhĩ nhĩpêx anhỹr kêt nẽ. Nẽ ixkapẽr mar tỳx nẽ amnhĩ kaxyw inhmã ajamaxpẽr mex kêt nẽ. 
\pm  
\v 18 Kwa mẽ tokyx ja hã amnhĩ pumu nẽ akupỹm ixkôt amnhĩ xunhwỳr tỳx nẽ. Kêr pa ja hã mẽ apumu nẽ amnhĩ katut kôt mẽ ate amnhĩ tomnuj rẽ nẽ tanhmã mẽ akrã hto ka mẽ inhnoo mã tãm amnhĩ nhĩpêx mex o ri apa. Hãmri pa mẽ amã tanhmã amnhĩ to amnhĩrĩt to ka mẽ aprĩ hã ixte amnhĩ nhĩpêx ã ixpumunh mex nẽ ixkôt amnhĩ nhĩpêx mex rãhã o ri apa. 
\pm  
\v 19 Xà inhmã mẽ ajapê hkêt ã na pa ã mẽ amã ixkapẽr anẽ? Nà inhmã mẽ apiitã mẽ ajapê htỳx kênã. Nom inhmã mẽ ajapê htã ka htem ixkôt amnhĩ nhĩpêx kêt nẽ. Na pa tee ri amnhĩ tã mẽ apumu nẽ ja hã tanhmã mẽ atomnuj tỳx to. Tokyx mẽ ate amnhĩ tomnuj mã anhũrer nẽ hpãnhã tãm amnhĩ nhĩpêx kaxyw. Jakamã kwa mẽ tokyx ate amnhĩ tomnuj kaga nẽ akupỹm amnhĩ kaxyw inhmã ajamaxpẽr ho ri apa. 
\pm  
\v 20 Na htem hkwỳjê nhõrkwỹ hwỳr gjêx kaxyw hakwa krem kãm àkjêr o kuhê nhũm mẽ kuma nẽ mẽ kãm anẽ nhũm mẽ hwỳr agjê. Nẽ mẽ ixkre hkre kamã axpẽn mã kapẽr o hkrĩ rỳ axpẽn mã kapẽr pê mẽmoj to hkõm o hkrĩ. Ja pyrà nẽ ot pa mẽ ajamãr o ixpa. Mẽ ate inhmã anhỹr nhũm ixte mẽ akôt ixpa ho ixpa nhũm mẽ pahte axpẽn to mex o papa kaxyw. \fig Apokarip 3.20|src="APIN0009.tif" size="col" ref="REV 3.20" \fig* 
\pm  
\v 21 Kormã mẽ kot ixpĩr kêt ri na pa pre mẽ kot amnhĩ tomnuj xwỳnhjê kutã amnhĩ to htỳx o ixpa. Amnhĩ to htỳx nẽ ri ixpa kamã ixtyk jakamã nhũm Inhĩpêêxà akupỹm ixto ixtĩr nẽ akupỹm amnhĩ wỳr ixto api. Hãmri nẽ amnhĩ nhĩhkô hã mẽ ho amnhĩptàr ã hkrĩ xà kamã inhỹr pa ixkrĩ ho ixkrĩ nẽ ĩhkô hã mẽ piitã mẽ ho amnhĩptàr o ixkrĩ. Tã kot kaj mẽ atõ ixpyrà nẽ ate amnhĩ tomnuj nê amnhĩ to htỳx nẽ. Nẽ inhmã hprãm xà hkôt pix mã amnhĩ nhĩpêx rãhã ty. Hã kot paj amnhĩ pyrà nẽ wa ixte mẽ ato amnhĩptàr ã ixkrĩ xàja kamã amnhĩ nhĩhkô hã mẽ akrĩ ka mẽ wa inhĩhkô hã wa inhmã mẽ ho amnhĩptàr o akrĩ. 
\pm  
\v 22 E ixkwỳjaja. Kot kaj mẽ amã ixkapẽr mar prãm hã kot kaj mẽ ã Tĩrtũm mẽ wa Ixkarõ nhỹ hã ixte mẽ amã ixkapẽr anhỹrja ma nẽ kãm ajamaxpẽr tỳx rãhã ho ri apa. 
\pm Tã ãm ja pix. Na hapêx. Anẽ. 
\m —E Juãw. Kêr ka Raxisej kamã ixkrajê mã ixkapẽr ã kagà nẽ mẽ hwỳr amẽ. Nẽ kagàja piitã krĩ hkwỳ kamã ahpỹnhã ixkwỳjê hwỳr arẽ kê mẽ kamã harẽ nẽ ixkapẽr ma. Anẽ. 
\p Nhũm pre ã Jejus inhmã kapẽr anẽ. Pa kuma nẽ ô ri mẽ piitã mẽ kãm hã kagà hpa. 
\c 4  
\s1 Tĩrtũm kot mẽ ho amnhĩptàr ã hkrĩ xà jarẽnh 
\p  
\v 1 Tã pa axte mẽmoj pumu nhũm kaxkwa hwỳr mẽ gjêx xà hã hakwakreja amnhĩ kahê xà mẽ pa omu. Hãmri nhũm axte mẽhõ kapẽr tỳx xwỳnhta. Te kot pifti kakôr tỳx pyràk xwỳnhta axte inhmã kapẽr nẽ inhmã: 
\p —E amnẽ ixwỳr api pa mẽmoj nhỹrmã kot tanhmã amnhĩ nhĩpêx to hkukamã amã ho amnhĩrĩt ka omu. Anẽ. 
\p  
\v 2 Hãmri nhũm Tĩrtũm Karõ tanhmã ixto nẽ ixto api pa kaxkwa kamã mẽmoj pumunh o xa. Tĩrtũm kot mẽ ho amnhĩptàr ã hkrĩ xà maatita pa pre omu. Nhũm kamã mẽhõja nhỹ.  
\v 3 Kuk kamã hirã htỳx kumrẽx. Te mẽmo kẽn kamrêk karỳr jaxênh tỳx pyràk. Nẽ kot mẽ ho amnhĩptàr ã hkrĩ xà puhã màxwỳxti grãgrãreja kãm hipôk nẽ harir pa omunh o xa. 
\p  
\v 4 Nhũm hkrĩ xà maati puhã mẽ ho amnhĩptàr o hkrĩ xà kêp 24. Kamã mẽ àptàr tũmjaja hkrĩ. Mẽ piitã ôr o mẽ ahkà htu nẽ ê jakare nẽ hkrĩ. 
\p  
\v 5 Nẽ Tĩrtũm hkrĩ xà maatija rũm na katõtõk nẽ hkrakrak nẽ haxênh japà nẽ hikwỹ. Nẽ hkrĩ xà kapem kanê maati pixi kamã kwrỳt pê 7ja pôk rãhã ho kuhê. Kanêja te Tĩrtũm Karõ pyràk. \fig Apokarip 4.5|src="BK00154C.tif" size="col" ref="REV 4.5" \fig* 
\p  
\v 6 Nẽ hkrĩ xà kapem mẽmo te gô rax pyràkja hkarỳr jaxênh tỳx kumrẽx nẽ nõ. Te ho kàx karỳr jaxênh tỳx pyrà nẽ hkarỳỳre. Nẽ hkrĩ xà puhã mẽmoj tĩr nẽ kuhê pê kwat kuhê. Nẽ õkwa nẽ katut piitã hkôt no. Ãm no xohtô rax kumrẽx. Na pre ã mẽmoj kêp kwatja no xohtô anẽ pa omu. 
\p  
\v 7 Wamta te kot mry pê rêãwti pyràk. Nẽ hkôt ja te kot môx myti pyràk. Nẽ hapu hã hkuk te panhĩ hkuk pyràk. No hapu hã ja te kot àànhàhti htor kaxyw hara koror pyràk. 
\p  
\v 8 Nẽ piitã hara kêp 6. Nẽ ĩ piitã kamã no. Nhũm prem Tĩrtũm mã mex o mex ã grer rãhã ho kuhê nẽ aa pinhkrênh kêt nẽ. Nẽ kãm grer o: 
\qc Amex o amex Tĩrtũm. 
\qc Nẽ axihtỳx o axihtỳx. 
\qc Nẽ aa ate amnhĩ tomnuj kêt kumrẽx. 
\qc Amnepê mã kormã mẽmoj kêt ri ka ra arãhã ri apa. Tã arĩ arãhã ri apa xwỳnh na ka. Kot kaj aa ajapêx kêt nẽ. 
\qc ãm hãmri na ka hte mẽ ixto mex rãhã ho apa. 
\qc Nẽ amex o amex Tĩrtũm. Anẽ. 
\m  
\v 9-10 Nhũm prem xatã mẽ ho amnhĩptàr hkrĩ xà kamã hkrĩ xwỳnhja mẽ kot kãm “Rãhã pa xwỳnh” anhỹr xwỳnhta mã ã grer anhỹr o kuhê. Kãm mex o mex ã grer pê tanhmã kot mẽ ho mex to hã harẽ. Hãmri nhũm mẽ àptàr tũm pê 24jaja mããnẽn kutã hkõn krã ho rôrôk nẽ hipô hpa nẽ hkrĩ. Nẽ amnhĩ krã rũm ôr o mẽ ahkàja kwrỳ nẽ hpar pê haxwỳ. Kêp mẽ õ Pahi Maati hã hã hpijaàm kaxyw wamtajê pyrà nẽ mex o mex ã harẽnh o hkrĩ nẽ kãm: 
\q1  
\v 11 ãm hãmri na pa htem amex o amex ã ajarẽ Tĩrtũm 
\q1 Apê mẽ inhõ Pahi Maati na ka. 
\q1 Nẽ apê mẽ inhõ Tĩrtũm na ka. 
\q1 Na ka pre mẽmoj piitã ho akato. Axàhpumunh tỳx nẽ ajamaxpẽr tỳx o mẽmoj piitã amã hprãm xà hkôt ho akator pa. 
\q1 Jakamã na pa htem ã amex o amex ã ajarẽnh anẽ. Mẽ ixrom axihtỳx mex kumrẽx na ka hte apa Tĩrtũm. Anẽ. 
\c 5  
\s1 Mẽ pahte amnhĩ tomnuj pãnhã amnhĩrer xwỳnh jarẽnh 
\r Juãw 1.29; Piripos 2.5-11 
\p  
\v 1 Tã pa pre arĩ te kaxkwa kamã mẽmoj pumu. Mẽ ho amnhĩptàr ã hkrĩ xà maatita kamã hkrĩ xwỳnh nhĩhkra kamã kagà pa omunh o xa. Upôk rũm omu. No ãm axtem kagà kaxkep na pre. Nẽ akutã hã kagà nẽ menh ê ho ho htỳx xàja kêp 7. 
\p  
\v 2 Hãmri nhũm Tĩrtũm kapẽr o wrỳk xwỳnh xihtỳx xwỳnhja kapẽr tỳx kãm kapẽr o: 
\p —E mẽ atõ na ate kagà mũj pyr nẽ ho htỳx xà hpôt mã tãm? Anẽ. 
\p  
\v 3 Hãmri nẽ tee ri mẽ piitã mẽ hkapi nom nhũm ja kaxyw mẽhõ amrakati kumrẽx. Kaxkwa kamã amrakati nẽ pika kamã mããnẽn amrakati nẽ pika hkrak ri amrakati. Nhỹri mẽhõ kot kagà kaxkepta pyr nẽ hpôt nẽ omunh mã tãm xwỳnhja amrakati ho amrakati. 
\p  
\v 4 Nhũm tee ri mẽhõ japêr nom mẽhõ pumunh kêt nẽ. Pa tee ri ja hã omu nẽ ixkaprĩ htỳx nẽ inhmỳr o xa. 
\p  
\v 5 Hãmri nhũm pahi hõja ixpumu nẽ inhmã: 
\p —Kwa amỳr kêt nẽ. E mẽhõ mũj pumu. Juta kanrẽhã htàmnhwỳ xihtỳx xwỳnhta. Pahi Tawi kanrẽhã htàmnhwỳ te kêp mry pê rêãw xihtỳx pyràk o hihtỳx xwỳnh mũj pumu. Kot mẽ kãm hkurê xwỳnhjê kutã amnhĩ to htỳx nẽ mẽmoj punuj piitã ho hapêx kaxyw mã xwỳnh jakamã tapxipix na kot kagàta hpyr nẽ ho htỳx xà hpôt par mã tãm. E ka omu. Anẽ. \fig Apokarip 5.1-5|src="HK00153B.TIF" size="col" copy="© The British & Foreign Bible Society, 1954, 1967, 1972. Acréscimos e correções feitos por Louise Bass © The British & Foreign Bible Society, 1994" ref="Apokarip 5:5" \fig* 
\p  
\v 6 Hãmri pa kuma nẽ hwỳr rĩt nẽ Jejusja pumu. Kot mẽ pahte amnhĩ tomnuj pãnhã amnhĩrer xwỳnhta mẽ ho amnhĩptàr o hkrĩ xà maati kapem xa. Mẽmoj htĩr pê kwat mẽ àptàr tũm pê 24jê nhĩpôk ri xa. Mẽ kãm hkurê xwỳnhjaja kot hpĩr nhũm ra akupỹm htĩr nẽ xa. Nom ra axtem nẽ xa. àhpumunh tỳxja te kot pahi xàhpumunh pyràk. Nẽ hpàr kêp 7. Nẽ no mããnẽn kêp 7. Noja te Tĩrtũm Karõ pyrà nẽ kêp pika piitã hkôt pa xwỳnh. Ã Jejusja axtem nẽ ãm anẽ pa omu. 
\p  
\v 7 Hãmri nhũm mẽ pahto amnhĩptàr o hkrĩ xwỳnhta wỳr tẽ nẽ ĩhkra kamã kêp kagà kaxkepta py. 
\p  
\v 8 Hãmri nhũm mẽ htĩr pê kwat mẽ mẽ àptàr tũmjaja hpar pê hkõn krã ho rôrôk nẽ hkrĩ hpa nẽ hipô nẽ hkrĩ. Piitã wiorãwti jamỳ nẽ ôr o xijere kamã mẽhkuxwa xà jamỳ nẽ o hkrĩ. Nhũm Tĩrtũm krajaja Tĩrtũm mã tanhmã amnhĩ jarẽnh to nhũm mẽ mar o hkrĩ. Te xijere kamã mẽhkuxwa xà hpãr o hkrĩ pyrà nẽ mẽ kuma. 
\p  
\v 9-10 Jakamã nhũm mẽ hkõn krã ho hkrĩ xwỳnhjaja mẽ pahte amnhĩ tomnuj pãnhã amnhĩrer xwỳnhta kutã kãm grer o hkrĩ. Mẽ grer nyw o kãm gre nẽ kãm: 
\q1 Na prem apĩ ka atyk o mẽ piitã mẽ kot amnhĩ tomnuj pãnhã amnhĩrer pa. 
\q1 Ahpỹnhã pika piitã hkôt mẽ urojê piitã hpãnhã amnhĩrer pa. 
\q1 Nẽ ahpỹnhã ri mẽ kapẽr xwỳnh kwỳjê piitã mẽ hpãnhã amnhĩrer pa. Atyk o mẽ kot amnhĩ tomnuj piitã hpãnhã amnhĩrer pa. 
\q1 Jakamã nhũm mẽ kot akôt amnhĩ xunhwỳr xwỳnhjaja kêp Tĩrtũm kra nẽ ri pa. 
\q1 Ka ra mẽ panhõ Tĩrtũm mã mẽ kêp patre kaxyw mẽ unhwỳ nhũm htem pika piitã hkôt mẽ ho amnhĩptàr o pa. 
\q1 Tã atyk o ate pika piitã hkôt mẽ hpãnhã amnhĩrer jakamã kapxipix na ate kagàta pyr nẽ ho htỳx xà hpôt mã tãm. Anẽ. 
\m  
\v 11 Hãmri nhũm Tĩrtũm kapẽr o mẽ wrỳk xwỳnhjaja nhỹhỹnh hapôj nẽ kuhê. Mẽ ohtô rax o ohtô rax. Ohtô rax o mẽ pajamaxpẽr jakrenh. Hãmri nẽ Tĩrtũm kot mẽ ho amnhĩptàr ã hkrĩ xà maatija wỳr mra nẽ kãm hipôk pa. Nẽ mẽmoj tĩr nẽ kuhê xwỳnhjê mẽ mẽ àptàr tũmjê mã hipôk pa nẽ mẽ pahte amnhĩ tomnuj pãnhã amnhĩrer xwỳnhta mã kapẽr. 
\p  
\v 12 Kàx pê kãm kapẽr nẽ kãm: 
\q1 Ãm hãmri na pa htem amex o amex ã inhgrer o ixkuhê. 
\q1 Mẽ ixrom axihtỳx o axihtỳx. 
\q1 Nẽ mẽmoj piitã anhõõ. 
\q1 Nẽ ate mẽmoj piitã hkukamã axàhpumunh par. 
\q1 Nẽ amex o amex jakamã na pa htem amã amex pix ã inhgrer o ri ixpa. Anẽ. 
\m  
\v 13 Tã nhũm mẽmoj piitã Tĩrtũm mẽ Jejus wa kãm wa mex o wa mex ã harẽ. Pika hkôt panhĩ nẽ mry nẽ àk nẽ mẽmoj piitãã. Nẽ pika hkrak ri nẽ gô hkrak ri mẽmoj piitãã. Nẽ mẽ htykjaja. Nhũm mẽ piitã wa kãm wa mex o wa mex ã wa harẽ nẽ wa kãm: 
\q1 E ate mẽ ixto amnhĩptàr ã akrĩ xà kamã akrĩ xwỳnh mẽ kot mẽ ixte amnhĩ tomnuj pãnhã amnhĩrer xwỳnh mẽ war amex o wa amex. 
\q1 Nẽ war axihtỳx o war axihtỳx. 
\q1 Nẽ war axàhpumunh o war axàhpumunh. 
\q1 Na pa htem ã war ajarẽnh anhỹr rãhã ixpa ho ixpa. Anẽ. 
\m  
\v 14 Hãmri nhũm mẽmoj tĩr pê kwatjaja mẽ kuma nẽ mẽ kãm: 
\p —Nà ãm hãmri na ka mẽ ã wa harẽnh anẽ. 
\q1 Wa mex o wa mex kumrẽx. Anẽ. 
\p Hãmri nhũm mẽ àptàr tũmjaja Tĩrtũm mẽ Jejus wa hpar pê hkõn krã ho rôrôk nẽ hkrĩ hpa nẽ haxwỳja wa kãm wa mex o wa mex ã wa harẽ. 
\c 6  
\s1 Kagà ho htỳx xà pê 7 jarẽnh 
\r Matêwre 24.3-14; Sikũn Tesarõn 2.3; Wam Juãw 2.18 
\p  
\v 1 Tã pa arĩ kaxkwa kamã mẽ pahte amnhĩ tomnuj pãnhã amnhĩrer xwỳnh kot tanhmã amnhĩ nhĩpêx to hã omunh o xa. Nhũm kagà kaxkepta py nẽ wam ho htỳx xà pôt. Hãmri nhũm mẽmo tĩr pê kwatjê hõja kapẽr tỳx kumrẽx. Te na katõtõk tỳx pyràk o mẽhõj mã kapẽr nẽ kãm: 
\p —E amnẽ mẽ ixwỳr tẽ. Anẽ. 
\p  
\v 2 Hãmri nhũm kawar jakajre nhỹhỹnh hwỳr hpôx o tẽ. Nhũm mẽhõja õ kuxê mỳ nẽ hã nhỹ nẽ tẽ. Hãmri nhũm nhãm mẽhõja hwỳr tẽ nẽ kãm pahi hã mẽ ahkà htu. Hãmri nẽ kãm tanhmã kapẽr to nhũm kuma nẽ mẽ kot kãm Tĩrtũm mẽ Jejus wa kurê xwỳnhjê nhĩmex par kaxyw hakẽx nẽ ma pika hwỳr tẽn wrỳ. 
\p  
\v 3 Hãmri nhũm mẽ pahte amnhĩ tomnuj pãnhã amnhĩrer xwỳnhja wam kagà ho htỳx xàta kôt axte ja pôt. Hãmri nhũm mẽmoj tĩr pê kwatjê hõja axtem mẽhõj mã kapẽr nẽ kãm: 
\p —E amnẽ mẽ ixwỳr tẽ. Anẽ. 
\p  
\v 4 Hãmri nhũm kawar kamrêk mẽ hwỳr hpôx o tẽ. Nhũm mẽhõ hã nhỹ nẽ tẽ. Nhũm nhãm mẽhõja kãm wapo gõ nẽ ma pika hwỳr htẽm nẽ wrỳk kaxyw hano. Kot hwỳr wrỳk nẽ pikap mẽ pa xwỳnhjê kurê huk kaxyw. Mẽ kot axpẽn par kaxyw ma mẽ hwỳr kumẽ. Hãmri nhũm kuma nẽ wapota py nẽ hakẽx nẽ ma mẽ hwỳr tẽn wrỳ. 
\p  
\v 5 Hãmri nhũm mẽ pahte amnhĩ tomnuj pãnhã amnhĩrer xwỳnhja kagà ho htỳx xà hõ pôt. Na pre ra ho axkrut nẽ hpôt tã hpãnhã axte hkôt ja pôt. Hãmri nhũm mẽmoj tĩr pê 4jê hõta mẽhõj mã kapẽr nẽ kãm: 
\p —E amnẽ mẽ ixwỳr tẽ. Anẽ 
\p Hãmri nhũm kawar tykre mẽ hwỳr hpôx o tẽ. Nhũm hã ỹr xwỳnhja mẽmoj to peja xà hã parãs mỳ nẽ o tẽ. 
\p  
\v 6 Hãmri nhũm mẽ htĩr pê kwatjê rũm mẽhõja kãm kapẽr nẽ kãm: 
\p —E kêr ka ma pika hwỳr mẽ hwỳr tẽn wrỳ nẽ mẽ kãm myt pyxi kamã mẽ àpênh pãnhã mẽ kãm mẽmoj to hkryre nẽ anhõ parãsta kamã ho peja nẽ mẽ kãm õr o apa. Nom mẽ apkur xà hã orti nẽ wĩhti ka mẽ kêp tanhmã ho hkêt nẽ. Anẽ. 
\p Hãmri nhũm kuma nẽ hakẽx nẽ ma tẽn mẽ hwỳr wrỳ. \fig Apokarip 6.5-6|src="HK00156B.TIF" size="col" copy="© The British & Foreign Bible Society, 1954, 1967, 1972. Acréscimos e correções feitos por Louise Bass © The British & Foreign Bible Society, 1994" ref="Apokarip 6:6" \fig* 
\p  
\v 7 Tã nhũm mẽ pahte amnhĩ tomnuj pãnhã amnhĩrer xwỳnhja axte kagà ho htỳx xà hõ hpôt. Na pre ra ho axkrunẽpxi nẽ hpôt tã hpãnhã axte hkôt ja pôt. Hãmri nhũm mẽmoj tĩr pê kwat kot hitep xwỳnhja mẽhõj mã kãm: 
\p —E amnẽ mẽ ixwỳr tẽ. Anẽ. 
\p  
\v 8 Hãmri nhũm kawar ràrààre mẽ hwỳr hpôx o tẽ. Nhũm mẽhõ hã nhỹ nẽ tẽ. Hã ỹr xwỳnh nhĩxi na pre kêp “Mẽhtyk” anẽ. Hãmri nhũm mẽhõja kãm kapẽr nẽ kãm: 
\p —E ma pika hwỳr wrỳ nẽ tanhmã mẽ ho kê mẽ ohtô nẽ tanhmã amnhĩ to nẽ axkaprã. Kê mẽ hkwỳjaja pijapu kamã axpẽn pa nẽ mẽ hkwỳjaja prãm xàj ty nẽ mẽ hkwỳjaja tanhmã à htỳx kute kamã ty. Nẽ mẽmo mry xoprêja mẽ hkwỳjê pa. E ma mẽ hwỳr wrỳ nẽ tanhmã mẽ ho ho apa. Anẽ. 
\p Hãmri nhũm kuma nẽ hakẽx nẽ ma pika hwỳr tẽn wrỳ. Hãmri nhũm mẽ htykjê papxàja tanhmã amnhĩ to nẽ te kot hã jêt nẽ ma hkôt mõr nẽ pika hwỳr wrỳk pyràk pa pre arĩ omunh o xa. 
\p  
\v 9 Hãmri nhũm mẽ pahte amnhĩ tomnuj pãnhã amnhĩrer xwỳnhja axte kagà ho htỳx xà hõ hpôt. Na pre ra ho kwat nẽ hpôt tã hpãnhã axte ja pôt. Hãmri nẽ hpôtja kôt pa ra mẽ kot Tĩrtũm mã mẽmoj nhõr xà hã mêsti pumu. Nẽ hkrak ri mẽ hkarõjê pumu. Mẽ kot hkwỳjê hkôt ri mẽ kãm Tĩrtũm kapẽr jarẽnh nẽ Jejus kêp mẽ õ Pahihti hã harẽnh o pa nhũm mẽ kot hã mẽ hpar xwỳnhjê karõja pa pre mẽ omu. Nhũm mẽ mêsti hkrak ri amnhĩ to Tĩrtũm wỳr o hkrĩ.  
\v 10 Kỳx pê kãm kapẽr nẽ kãm: 
\p —Ãm hãmri amex o amex Pahi Maati. Aa ate mẽmoj tã tanhmã amnhĩ to axêx to hkêt kumrẽx. Kwa xà kot kaj tokyx pika hkôt mẽ kot mẽ inhĩmex xwỳnhjaja tanhmã mẽ ixtã mẽ ho nà? Anẽ. 
\p  
\v 11 Hãmri nhũm mẽhõja mẽ hwỳr tẽ nẽ mẽ kãm mẽ ê jakajre gõ nhũm mẽ hagjê. Hãmri nhũm mẽ kãm: 
\p —E mẽ mamrĩ atar akôkôt o akrĩ. Koja Tĩrtũm kormã tanhmã mẽ kot mẽ atomnuj xwỳnhjê ho hkêt nẽ. Kê mẽ axte mẽ apyrà nẽ mẽ akwỳjê nhĩmex mãn. Koja mẽ Tĩrtũm jamaxpẽr xà hkôt axte mẽ akwỳjê pa nhũm rĩ kormã mẽ ato hpimrààtã tanhmã mẽ atã mẽ hipêx to. Jakamã e mẽ atar kutêp mãmrĩ akôkôt o akrĩ. Anẽ. 
\p  
\v 12 Hãmri nhũm mẽ pahte amnhĩ tomnuj pãnhã amnhĩrer xwỳnhta axte kagà ho htỳx xà hõ hpôt pa omu. Na pre ra ho 5 nẽ hpôt tã hpãnhã hkôt axte ja pôt. Hãmri nhũm pika htertet tỳx kumrẽx. Nẽ myyti ahtyk nẽ mytwrỳre te kêp mẽ hkamrô kamrêk tỳx pyrà nẽ ajêt. 
\p  
\v 13 Nẽ kanhêti tanhmã amnhĩ to nẽ axrê nẽ pikap rôrôk pa. Te kôk xàpêr tỳx nẽ kot pàrerekre kormã ràx tã kot kãm hikranh par pyrà nẽ piitã rênh pa nhũm rôrôk. 
\p  
\v 14 Hãmri nhũm kaxkwaja te kagà kaxkep pyrà nẽ amnhĩ to kaxkep o tẽ. Nẽ pika piitã hkôt kẽn prêk nẽ hixêt prêk maati piitã te hkrĩ xà rũm hapôx nẽ mrar nẽ nhãm hkrĩ pyràk. Nhũm gô hipôk piitã haxwỳja te hikwỹ xà rũm hapôx nẽ mrar nẽ nhãm hikwỹ pyràk. Pika htertet tỳx nhỹ hã ã mẽmoj amnhĩ nhĩpêx anẽ.  
\v 15 Hãmri nhũm pika hkôt mẽ piitã tee ri mẽmoj ã amnhĩ nhĩpêx anhỹr ã omu nẽ kãm ma nẽ htertet tỳx kumrẽx. Mẽ ho amnhĩptàr xwỳnhjaja nẽ pôristi krãhtũmjaja nẽ mẽ kot amnhĩ to rũnh xwỳnhjaja nẽ mẽ hihtỳx xwỳnhjaja nẽ mẽ kãm mẽ àpênh xwỳnhjaja nẽ amnhĩ mã mẽ àpênh xwỳnhjaja. Ãm piitã mẽmoj ã kot amnhĩ nhĩpêx anhỹr ã omu nẽ tee ri amnhĩ kukamã hamaxpẽr nẽ kãm ma ho kãm ma. Hãmri nẽ hpimxur kaxyw ma kẽn prêk kre japêr o hprõt nẽ mra.  
\v 16-17 Hãmri nẽ amnhĩ to kẽn prêk wỳ nẽ kãm: 
\p —Kwa na ra mẽ ixto amnhĩptàr ã hkrĩ xà maati kamã hkrĩ xwỳnh mẽ kot mẽ ixte amnhĩ tomnuj pãnhã amnhĩrer xwỳnhta wa mẽ ixkamã gryk tỳx kumrẽx. Ra wa kot tanhmã mẽ ixtomnuj to xà hã arĩgrota kato. Koja wa mẽ ixtomnuj tỳx nẽ pa mẽ kutã hkêt nẽ. Kwa tokyx mẽ inhĩpy arôrôk nẽ wa kêp mẽ ixto amũxu. Anẽ. 
\c 7  
\s1 Mẽ kot Tĩrtũm mã hkrajê kagà 
\r Apokarip 9.4 
\p  
\v 1 Tã pa arĩ kaxkwa kamã mẽmoj pumu. Nhũm Tĩrtũm kapẽr o mẽ wrỳk xwỳnh pê kwatja piitã ahpỹnhã pika nhĩtep xà hkôt kôk jatur xà hã hamỳ nẽ ho kuhê. Pika piitã hkôt kôk hpinhkrênh par nẽ àpêr kêt nẽ gô xujanãr kôt àpêr kêt kaxyw hatur xà hã hamỳ nẽ ho kuhê. Nẽ pà piitã hkôt àpêr nẽ tanhmã pĩ hkwỳ ho pymaj nhũm mẽ ã amnhĩ nhĩpêx anẽ nẽ nê hatur xà hã hamỳ nẽ ho kuhê.  
\v 2 Na pre ra Tĩrtũm ja hã mẽ kãm karõ nẽ mẽ kãm: 
\p —E kêr ka mẽ ma pika hwỳr wrỳ nẽ pika nẽ gô xujanãrja tanhmã wa homnu hto. Anẽ. 
\p Hãmri nhũm mẽ kuma nẽ hwỳr wrỳ nẽ kormã nê kôk ho htỳx. Hãmri nhũm Tĩrtũm kapẽr o wrỳk xwỳnhjê hõja myt japôx xà rũm mẽ hwỳr hpôx o tẽ. Nẽ ĩhkra kamã mẽ kot Tĩrtũm kra hã mẽ hixi jarẽnh xà hã kagàta py nẽ o tẽ. Hãmri nẽ kàx pê mẽ kot pika mẽ gô xujanãr homnu mã xwỳnhjê mã kapẽr nẽ mẽ kãm: 
\p  
\v 3 —Kwa taxy pa Tĩrtũm krajê nhõkrã kagà hpa mãn. Kêr ka mẽ omu nẽ mẽ tapxipixjaja tanhmã mẽ ho hkêt nẽ. Anẽ. 
\p  
\v 4-8 Hãmri nẽ mẽ hkagà pa. Ahpỹnhã Ijaew pigrành xwỳnhjaja mẽ ho ohtô rax kumrẽx nẽ tanhmã mẽ hkagà hto. Pa tanhmã mẽ kute hã mẽ harẽnh ma nhũm xep mẽ ohtô rax kumrẽx. 
\li1 Juta kamã mẽ kêp 12.000. 
\li1 Nẽ Rupẽ kamã mẽ kêp 12.000. 
\li1 Nẽ Gax kamã mẽ kêp 12.000. 
\li1 Nẽ As kamã mẽ kêp 12.000. 
\li1 Nẽ Natari kamã mẽ kêp 12.000. 
\li1 Nẽ Manase kamã mẽ kêp 12.000. 
\li1 Nẽ Simeãw kamã mẽ kêp 12.000. 
\li1 Nẽ Rewi kamã mẽ kêp 12.000. 
\li1 Nẽ Isaka kamã mẽ kêp 12.000. 
\li1 Nẽ Jepurõ kamã mẽ kêp 12.000. 
\li1 Nẽ Juje kamã mẽ kêp 12.000. 
\li1 Nẽ Pẽjamĩ kamã mẽ kêp 12.000. 
\m à mẽ ohtô rax kot anhỹr. Hãmri nẽ mẽ piitã mẽ pikamỳr par kãm mẽ kêp 144.000. Piitã kêp Apraãw kanrẽhã htàmnhwỳ na pre mẽ. Tã ã axpẽn kaxyw mẽ ohtô rax kumrẽx kot anhỹr tã nhũm mẽ hkagà pa. 
\s1 Tĩrtũm kra hkwỳjê jarẽnh 
\r Apokarip 14.1-5 
\p  
\v 9 Tã pa axtem mẽmoj pumu. Nhũm mẽ ohtô rax nẽ Tĩrtũm nhõ krĩ kamã kuhê. Ahpỹnhã ri pika piitã hkôt mẽ urojaja. Nẽ ahpỹnhã ri mẽ kapẽr xwỳnhjaja nhũm prem pika piitã kurũm kot mẽ ho amnhĩptàr ã hkrĩ xà maatija kamã hkrĩ xwỳnh pê Tĩrtũm mẽ mẽ pahte amnhĩ tomnuj pãnhã amnhĩrer xwỳnhja wa kutã kuhê. Mẽ ohtô rax kumrẽx jakamã pa tee ri mẽ piitã mẽ ho kõta hpar prãm kaprỳ. Nẽ piitã ê jakare kamã kuhê. Nẽ hkĩnh nẽ hkĩnh xàj pô hkwỳ jamỳ nẽ ho àpêr o kuhê.  
\v 10 Hãmri nẽ kỳx pêê Tĩrtũm mẽ Jejus wa kãm kapẽr nẽ wa kãm: 
\q1 Hêxta waa nẽ. War amex o war amex Pahi Maati. 
\q1 Na ka pre Akra Jejus kukwak ri mẽ ixte amnhĩ tomnuj ã tanhmã mẽ ixto hkêt nẽ. 
\q1 War ajamẽ mẽ ixkamã axukaprĩ rãhã ho apa xwỳnh na ka wa. 
\q1 Jakamã pa mẽ inhmex nẽ war awỳr api nẽ war akuri inhmex nẽ ijamakêtkati nẽ ixpa ho ixpa. 
\q1 Ãm hãmri na ka hte wa mẽ ixto mex rax kumrẽx o apa. War amex o war amex. Anẽ. 
\m  
\v 11 Hãmri nhũm Tĩrtũm kapẽr o mẽ wrỳk xwỳnhjaja Tĩrtũm krĩ xà mã hipôk nẽ hkõn krã ho rôrôk nẽ hkrĩ hpa. Nẽ mẽ àptàr tũmjê mẽ mẽ htĩr nẽ kuhê xwỳnhjaja mẽ ĩhkô hã kãm hipôk nẽ wam tajê pyràk nẽ hkõn krã ho rôrôk nẽ hkrĩ. Hãmri nẽ mẽ ohtô kot Tĩrtũm mẽ Jejus wa kãm kapẽr ã mẽ kuma hãmri nẽ Tĩrtũm ã hpijaàm kaxyw hpar pê htu mỳr pê hikwỹ hpa nẽ kãm mex o mex ã harẽ nẽ kãm: 
\p  
\v 12 “Ãm hãmri na mẽ ã ajarẽnh anẽ Tĩrtũm. Amex o amex. 
\q1 Na ka hte mẽ ixto mex o apa. 
\q1 Mẽ ixrom axàhpumunh o axàhpumunh. 
\q1 Nẽ mẽ ixrom axihtỳx o axihtỳx. 
\q1 Jakamã na ka hte mẽ ixpiitã mẽ ixto mex kumrẽx rãhã ho apa. 
\q1 Ã ate anhỹr rãhã o rãhã jakamã na pa htem amã amex o amex ã ajarẽnh rãhã ho ixpa.” Anẽ. 
\m  
\v 13 Hãmri pa mẽ omunh o ixãm rôm nhũm mẽ àptàr tũmjê hõja ixwỳr tẽ nẽ mẽ ê jaka kamã mẽ hkĩnh xàj pô jamỳnh nẽ ho kuhê xwỳnhjê hã ixkukja nẽ inhmã: 
\p —E mãn ate mẽ ê jakare kamã mẽ kuhê xwỳnh mũjjê pumunh nà? Tanhmã na prem amnhĩ nhĩpêx to nẽ amnẽ api? Xà ate mẽ omunh? Anẽ. 
\p  
\v 14 Hãmri pa kuma nẽ kãm: 
\p —Nà ixte mẽ omunh kêt. Kêt ka na ixrom ate mẽ omunh. Anẽ. 
\p Hãmri nhũm inhmã mẽ harẽnh o: 
\p —Nà na pre mẽ hkwỳjaja Jejus ã mẽ homnuj tỳx kumrẽx nẽ mẽ kupa. Tã mẽ kêp Jejus kwỳ jakamã na pre mẽ nê mẽ kot amnhĩ tomnuj o hapêx nẽ te amnhĩ kamrô ho mẽ nê mẽ kot amnhĩ tomnuj piitã kuhõnh par pyràk o mẽ hipêx. Jakamã nhũm mẽ ê jaka kamã mex nẽ hkĩnh tỳx nẽ pa. 
\q1  
\v 15 Nẽ Tĩrtũm kot mẽ pahto amnhĩptàr ã hkrĩ xà maati kutã kãm mex o mex ã harẽnh rãhã ho kuhê. 
\q1 Na hte mẽ ho mex rãhã ho pa. Mẽ hkôt pa ho pa jakamã koja mẽmoj tanhmã kêp mẽ ho hkêt nẽ. 
\q1  
\v 16-17 Nẽ mẽ pahte amnhĩ tomnuj pãnhã amnhĩrer xwỳnh kot Tĩrtũm krĩ xà maati kamã ãm xwỳnhta na hte mẽ hamãr mex rãhã ho mẽ hkôt pa. 
\q1 Te mẽ kot mẽ hkrit jamãr mex pyràk. 
\q1 Nẽ te mẽ kot mẽ hkrit kõm o pa nhũm htĩr nẽ pa pyràk. 
\q1 Koja mẽ kuri htĩr tũm nẽ hkôt pa ho pa. 
\q1 Nẽ axte kãm prãm kêt nẽ. 
\q1 Nẽ axte kãm kôr kêt nẽ. 
\q1 Nhũm arĩgro htỳxja axte mẽ hkà ho hxêt kêt nẽ. 
\q1 Koja Tĩrtũm te mẽ kot mẽ hkra no kagô nhĩnhĩnh par pyràk o mẽ hipêx nhũm mẽ axte hkaprĩ nẽ mỳr o pa hkêt nẽ. 
\q1 Pãnhã hkĩnh nẽ mex rãhã kuri pa ho pa. Anẽ. 
\c 8  
\s1 Kagà kaxkep o htỳx xà kot hitep jarẽnh 
\p  
\v 1 Tã pa arĩ kaxkwa kamã mẽmoj pumu nhũm mẽ pahte amnhĩ tomnuj pãnhã amnhĩrer xwỳnhja kagà kaxkep o htỳx xà kot hitepta pôt. Hãmri nhũm kaxkwa kamã mẽmoj piitã hpinhkrênh pa nhũm mẽhõ kapẽr kêt kumrẽx. Nẽ hpinhkrênh par o ra hã ahtũm ry mex nẽ. 
\p  
\v 2 Hãmri nhũm Tĩrtũm kutã kapẽr o wrỳk xwỳnh pê 7 nẽ mẽ kuhê xwỳnhjaja. Nhũm kapẽr o wrỳk xwỳnhjê hõja mẽ hwỳr tẽ nẽ mẽ piitã mẽ kãm pifti gõ. \fig Apokarip 8.1-2|src="TRUMPETS.tif" size="col" ref="REV 8.2" \fig* 
\p  
\v 3-4 Hãmri nhũm kapẽr o wrỳk xwỳnhjê hõja ôr o xijere py nẽ Tĩrtũm mã mẽhkuxwa xà ho xêt xà hã mês kunĩhti hwỳr o tẽ. Mẽ ho amnhĩptàr ã hkrĩ xà maati kutã ôr o mêstija wỳr o tẽ nẽ kuri o xa. Hãmri nhũm mẽ kãm kamã mẽhkuxwa xà hkwỳ runh rax nẽ nhũm mêsti hã ho xêt o xa. Rôm nhũm Tĩrtũm krajaja Tĩrtũm mã tanhmã amnhĩ jarẽnh to. Jakamã nhũm mẽhkuxwa xà xêt kũm mẽ mẽ kot Tĩrtũm mã amnhĩ jarẽnh xàja mẽ nhũm ahkà nẽ Tĩrtũm kapẽr o wrỳk xwỳnh nhĩhkra kamã xijere rũm Tĩrtũm kutã kàx mã àpir o pa. 
\p  
\v 5 Hãmri nhũm kapẽr o wrỳk xwỳnhja xijere kamã kuwy hpôk kwỳ ho nỳt nẽ ahpar mã pika hwỳr kumẽ nhũm ma tẽ nẽ pikap tẽm nhũm pika htertet tỳx nẽ kamã na katõtõk nẽ haxênh nẽ hkrakrak. 
\s1 Mẽ kot pifti kakôr ã mẽ harẽnh 
\p  
\v 6 Hãmri nhũm Tĩrtũm kapẽr o wrỳk xwỳnh pê 7 kot pifti jamỳnh xwỳnhjaja ra kot pafti kakôr mã. 
\p  
\v 7 Jakamã nhũm wamta õ pifti kakô nhũm na mê te kot jêr krã jakot pyràk xwỳnh mẽ kuwy te kot mẽmo kamrô kamrêk pyràk xwỳnhta pikap rôrôk pa. Nẽ nhỹhỹnh pika hkwỳ ho rax nẽ ho kaxàr pa. Nẽ põti nẽ akunĩ hkwỳ ho rax kumrẽx nẽ ho kaxàr pa.  
\v 8 Hãmri nhũm wam ãm xwỳnh nhĩjuk ri ãm xwỳnhja õ pifti kakô nhũm mẽmoj te kẽn krã hprêk pôk pyrà nẽ kaxkwa rũm ahpar mã tẽ nẽ gô xujanãr nhĩkjê kamã hpôk rãhã tẽn mrõ. Hãmri nhũm gô nhĩkjê kamã gôja mẽmo hkamrô hã amnhĩ jahkre hpa.  
\v 9 Jakamã nhũm gôx kãm mẽmoj htĩr nẽ ri mrar xwỳnhjaja pikaprãr pa. Nẽ gôx kãm pàr gô krãhkà hã pa xwỳnhja haxwỳja gjêx pa. Nẽ pàr kãm mẽ pa xwỳnhjaja haxwỳja hagjê nẽ pikaprãr pa. No nhũm gô mex kãm pàr kãm mẽ pa xwỳnhjaja mẽ kurom arĩ htĩr nẽ. 
\p  
\v 10 Tã nhũm wam ãm xwỳnhta wa hijuk ri ãm xwỳnhja õ pifti kakô. Hãmri nhũm kanhêti rax kumrẽxja axta nẽ hpôk o ma ahpar mã tẽn pikap tẽm nẽ pyhti nẽ hino hkwỳ ho ohtô nẽ homnu hpa.  
\v 11 Kanhêti nhĩxi pê na pre “mẽmoj xỳ xà” anhỹr jakamã nhũm tẽm nẽ pyhti nẽ hino hkwỳ ho ohtô nẽ homnu pa. Nhũm prem hwỳr mra nẽ hkwỳ janhi nẽ ho ixkõ nhũm ỳ nẽ nhũm mẽ ohtô nẽ ho ixkõ nẽ axkaprã. 
\p  
\v 12 Hãmri nhũm hpãnhã Tĩrtũm kapẽr o wrỳk xwỳnhjê hõja õ pifti kakô. Na pre ra ho axkrunẽpxi nẽ hkakôr tã hpãnhã ra axte hõ ja kakô. Hãmri nhũm mẽhõja tẽ nẽ myyti kura nhũm hkwỳ ahtyk nẽ hirã hkêt nẽ. Nhũm mytwrỳre nẽ kanhêti mã ho anẽ nẽ myyti pyrà nẽ hkwỳ ahtyk nẽ hirã hkêt nẽ harir. Jakamã nhũm kamàt kãm hirã mex kêt nẽ. Nẽ arĩgro hã myytija haxwỳja hirã mex kêt nẽ. 
\p  
\v 13 Hãmri pa kaxkwa kamã àànhàhti pumu nhũm kỳx pê ri htor o pa pê tanhmã kapẽr to nẽ kapẽr o: 
\p —Hêxta waa nẽ. Kormã kot pifti kakôr xwỳnhjaja axkrunẽpxi nẽ kormã hkakôr kêt nẽ. Koja mẽ tokyx hkakô nhũm pika hkôt ri mẽ pa xwỳnhjaja amnhĩ xà htỳx kamã hamak tỳx o pa. Na pa tee ri mẽ hkukamã ijamaxpẽr nẽ inhmã mẽ hkaprĩ htỳx nẽ. Hêxta waa nẽ. Koja mẽ omnuj tỳx kumrẽx. Anẽ. 
\c 9  
\p  
\v 1 Tã pa axte mẽmoj pumu. Nhũm Tĩrtũm kapẽr o wrỳk xwỳnhjê hõ õ pifti kakô. Na prem ra ho kwat nẽ hkakôr tã hpãnhã axte hõja ja kakô. Hãmri nhũm kanhêti hõ axta nẽ pikap tẽm kurê kumrẽx nhũm mẽhõja omu nẽ hwỳr tẽ nẽ kãm mẽmoj tã saf gõ. Satanasti jagjênh xà hã ahkre xupỳm o htỳx xà hã safja nhũm kanhêti mã kugõ. 
\p  
\v 2 Hãmri nhũm kupy nẽ ahkrehtita wỳr o tẽ nẽ kahê xà mẽ nhũm kurũm kuwy hkũm hapôx rax nẽ. Nẽ ma kàx mã àpir o pa nẽ myyti hpro hpa nhũm kamàt kô rax kumrẽx. 
\p  
\v 3-11 Nẽ kuwy hkũmja rũm mẽmoj te krit pyràk xwỳnh kwỳjaja pikap rôrôk nẽ kuhê. Te kot krit pyràk tã mẽ hkuk te panhĩ hkuk pyràk. Nẽ mẽ hkrã hkĩ te mẽnijê hkrã hkĩ japjê pyràk. Nẽ ôr o mẽ ahkà jagjê. Nẽ mẽ wa japjê htỳx kumrẽx. Te rêãwti xwa japjê pyràk. Nẽ kàx o mẽ hinô hkà. Nhũm mẽ htor o hara hkoko htỳx o mra. Te ho kawar xohtô pijapu kaxyw kot mẽ hkjênh xà kamã mẽ htur nẽ mẽ hkjênh o hprõt nhũm hkoko htỳx pyràk. Nẽ mẽ hkamnhwỳr o pa kaxyw mẽ hanhyja te kot makre janhy pyràk. Ã kriitija kot anhỹr. Nẽ te nhỹhỹm oprê kaxyw nojarêt nẽ mẽ hkrit kawar hã hikukrêx mex rẽnh pyràk. Mẽõ pahija ahkre xupỳmta kamã kêp mẽ hkrãhtũm. Ijaew kapẽr kãm hixi pê “Apatõ.” No Gres kapẽr kãm kêp “Aporiãw.” No mẽ pakapẽr kãm kêp “mẽ hpar o pa xwỳnh.” Hãmri nhũm Tĩrtũm kriiti mã kapẽr nẽ mẽ kãm: 
\p —E kêr ka mẽ ma pika piitã hkôt te makre kot amnhĩ nhĩpêx pyrà nẽ ri mẽ hkôt mẽ hkamnhwỳr o apa. Ã amnhĩ nhĩpêx anhỹr o mẽ atã mytwrỳ pê sĩk. No ãm kêr ka mẽ hpar kumrẽx kêt nẽ. Ãm mẽ kot amnhĩ xà htỳx kãm hamak pix kaxyw tanhmã mẽ ho ho apa. Te makre kot mẽ hkamnhwỳr nhũm à htỳx kumrẽxta pyràk. No mẽ ate mẽ hkamnhwỳr nhũm mẽ hkamnhwỳr xàja koja à htỳx o makre kot mẽ hkamnhwỳr jakre. Nom ra mẽ kot Tĩrtũm kra hã mẽ hkagà xwỳnhjaja kêr ka mẽ omu nẽ ãm mẽ omu nẽ tanhmã mẽ ho hkêt nẽ. Mẽ kêp ixkwỳ na mẽ. Nẽ põ nẽ prãt ka mẽ ãm omu nẽ tanhmã ho hkêt nẽ. Ãm mẽ kot panhĩ nhõkrã kagà hkêt xwỳnh pixjaja ka ã mẽ hipêx anhỹr o ri mẽ hkôt apa. Nom kêr ka mẽ hpar kêt nẽ. Kê mẽ tee ri amnhĩ xà hã maj kãm tokyx htyk nẽ hapêx prãm hkaprỳ ho pa. E ma mẽ hwỳr mra nẽ ã mẽ hipêx anhỹr o ri apa. Anẽ. 
\p Hãmri nhũm mẽ kuma nẽ ma mẽ hwỳr mra. 
\p  
\v 12 Na ra pika hkôt wam mẽ homnu xà pyxi nẽ hapêx. No ãm arĩ hamẽxkrut. 
\p  
\v 13 Jakamã nhũm Tĩrtũm kapẽr o wrỳk xwỳnhjê hõja axte õ pifti kakô. Na prem ra ho sĩk nẽ hkakôr tã axte hkôt hõja hkakô. Nhũm Tĩrtũm kutã ôr o mêsti rũm mẽhõja tanhmã kapẽr to. Mêsti janhà rũm kapẽr.  
\v 14 Pifti kakôr xwỳnhta mã kapẽr nẽ kãm: 
\p —E na ra mẽ kot mẽ hkwỳjê nhĩmex ã arĩgrota kato. Jakamã kêr ka ma pyhti pê Erax wỳr wrỳ nẽ gô mỳ ri Satanasti mã mẽ àpênh xwỳnh pê kwatja pumu. Na prem ra mẽ hpa hpre nhũm mẽ gô mỳr ri arĩ hkrĩ ho hkrĩ. Ka mẽ omu nẽ mẽ kãm mẽ hpa hpre xà hpôt pa kê mẽ ma mẽ hkôt ri mẽ hpar o pa. Anẽ. 
\p  
\v 15 Na pre ra Tĩrtũm mẽ kot mẽ hkwỳjê nhĩmex o pa kaxyw mẽ kurê nẽ gô mỳ ri mẽ unhwỳ nhũm mẽ kormã mẽ hpar xà hã arĩgro jamãr o hkrĩ. Jakamã nhũm ã pifti kakôr xwỳnhta mã mẽ harẽnh anẽ nhũm kuma nẽ ma tẽ nẽ mẽ hwỳr wrỳ nẽ mẽ kãm mẽ hpa hpre xà hpôt pa. Hãmri nhũm mẽ ma pika piitã hkôt ri mẽ hpar o mẽ hkôt pa. Nẽ mẽ ho ohtô rax kumrẽx nẽ mẽ himex.  
\v 16 Nẽ ma amnhĩ kôt pôristi ho ohtô rax nẽ o pa. Piitã kawar ã hkrĩ nẽ mẽ hkôt hprõt nẽ hkoko ho mra. Mẽ kêp 200.000.000 hã mẽ harẽ pa mẽ harẽnh ma. Mẽ ohtô rax o mẽ ohtô rax. 
\p  
\v 17 Na pa pre arĩ te ixpimtir kãm mẽ omunh pyràk. Nhũm kawar ã mẽ hkrĩ xwỳnhjaja. Mẽ hinô kàja axtem kàx o. Nẽ hkamrêkja te kuwy hpôk kamrêk pyràk. Nẽ ràràrja te mẽ hkurôt kane xà pê ẽsôf ràràr pyràk. Nẽ kakrã htyk. Ã kàx o mẽ hinô hkà kot anhỹr. Nẽ mẽ hkrit kawarti hkrãja te rêãwti krã pyràk. Nẽ mẽ hakwa rũm kuwy hpôk mẽ ẽsôfti mẽ kuwy hkũm axpẽn kôt hapôx o pa.  
\v 18-19 Nẽ kawarti jamy axtem te kêp kagã xoprê hkrã pyràk nhũm mẽ hamy ho mẽ hkamnhar o mẽ kupa. Nẽ mẽ hakwa rũm kuwy hkũm mẽ kuwy hpôk mẽ ẽsôfti hapôx xwỳnhta mã mẽ ho anẽ nẽ. Jakamã nhũm kawartijaja mẽ hkôt ri hamy mẽ hakwa ho mẽ hpar o pa nẽ mẽ ohtô rax kumrẽx nẽ mẽ himex. \fig Apokarip 9.17-19|src="PAL94B.tif" size="col" ref="REV 9.18-19" \fig* 
\p  
\v 20-21 Tã nom nhũm arĩ mẽ htĩr nẽ ri mẽ pa xwỳnhjaja. Mẽ kot mẽ hkwỳjê hpar kêt xwỳnhjaja hãmri ja hã mẽ omunh tã arĩ amnhĩ tomnuj o pa nẽ kãm urer kêt nẽ. Arĩ tanhmã amnhĩ tomnuj to ho pa. Axpẽn pê hprõ nẽ mjên o amnhĩkati nẽ axpẽn pê ahkĩ. Nẽ axpẽn par o ri pa nẽ tanhmã axpẽn xy hto ho pa. Ã htỳx ri amnhĩ nhĩpêx anhỹr o pa nẽ kãm urer kêt nẽ. Ãm Satanasti hkôt pix mã ri amnhĩ nhĩpêx o pa. Nẽ amnhĩm sãnti hkwỳ nhĩpêx. Pĩ ho hipêx nẽ kàx o hipêx nẽ kẽn o hipêx. Nẽ hipêx pa nẽ amnhĩ to hwỳr o pa. Nom mo kot mẽ mar kaxyw sãnti jamak kre? Nẽ kot mẽ omunh kaxyw mo no? Nẽ ri mrar nẽ mẽ ho utàr kaxyw mo hte? Na htem arĩ ã amnhĩ to hwỳr kaprỳ anhỹr o pa. 
\c 10  
\s1 Kagà kaxkep grire jarẽnh 
\p  
\v 1 Tã pa arĩ mẽmoj pumu. Nhũm axte Tĩrtũm kapẽr o wrỳk xwỳnh xihtỳxjê hõja pika hwỳr wrỳk o tẽ. Nẽ êja kakrã ho na pre. Nẽ hkrã mỳ ri màxwỳxti ajêt. Nẽ hkuk te myt no kamã hirã htỳx pyràk. Nẽ akutã hte kamã te kuwy hpôk pyràk.  
\v 2 Nẽ ĩhkra kamã kagà kaxkep grire ra pipôt nhũm ma o tẽ nẽ o wrỳ nẽ o xa. Nẽ gô xujanãr kãm upôk rũm hte xãm nẽ kỳx pê amgrà kamã apke rũm hte xãm nẽ o xa pa ixprĩ hã omu. 
\p  
\v 3 Hãmri nhũm kàx pêê amỹra. Te rêãw hkàr tỳx pyràk. Nhũm hpãnhã kaxkwa kamã mẽhõja kãm kapẽr. Te na katõtõk o 7 wês pyràk pa ixprĩ hã tanhmã kapẽr to hã kuma.  
\v 4 Hãmri nẽ ra mẽ amã ã kagà kaxyw nhũm mẽ ja nê inhmã kapẽr nẽ inhmã: 
\p —Kwa nà kwarĩ ja kot kaj hã kagà hkêt nẽ. Ãm ja pix kot kaj akwỳjê mã hã kagà hkêt nẽ. Ãm kapxipix mãn ama nẽ ri hã apa. 
\p Anhỹr jakamã pa mẽ amã hã kagà hkêt nẽ. Ãm papxipix kuma nẽ ri hã ixpa. 
\p  
\v 5 Tã nhũm Tĩrtũm kapẽr o wrỳk xwỳnh kot gô xujanãr kãm upôk rũm hte xãm nẽ apke amgrà kamã ãm xwỳnhta hãmri Tĩrtũm nhỹ hã kapẽr kaxyw nẽ kànhmã ĩhkra pẽ.  
\v 6-7 Tĩrtũm pê kaxkwa nẽ pika nẽ gô xujanãr o kator nẽ kamã kot mẽmoj piitã ho kator xwỳnhja. Nẽ htĩr rãhã nẽ pa ho pa xwỳnhja. Nhũm ỹ hã kapẽr nẽ kapẽr o: 
\p —E hãmri. Amnepê mã na pre Tĩrtũm ỹ hã mẽ kãm kapẽr o ri mẽ pa xwỳnhjê mã tanhmã amnhĩ kukamã amnhĩ jarẽnh to. Tanhmã kot pika piitã hkôt mẽ pa xwỳnhjê nhĩpêx to hã amnhĩ jarẽ. Nẽ mẽmo arĩgro hã mẽ kot amnhĩ tomnuj mỳrapê tanhmã kot mẽ hipêx to hã mẽ hkukamã mẽ hã amnhĩ jarẽ. Tã ra ã mẽ hipêx anhỹr xà hã arĩgro kato. Jakamã koja kapẽr o wrỳk xwỳnh kot hitepta õ pifti kakô hãmri nhũm mẽmojja ã amnhĩ nhĩpêx anhỹr kurê kumrẽx. Ãm hãmri na pa mẽ amã ja jarẽ. Anẽ. 
\p  
\v 8 Pa mar o ixãm rôm nhũm wam inhmã kapẽr xwỳnhta axte inhmã kapẽr nẽ inhmã: 
\p —E ma pika hwỳr wrỳ nẽ gô xujanãr kãm upôk rũm hte xãm nẽ amgrà kamã apke rũm hte xãm xwỳnhta wỳr tẽ nẽ kêp kagà kaxkep grire pipôt xwỳnhta py. Anẽ. 
\p  
\v 9 Hãmri pa kuma nẽ ma hwỳr wrỳ nẽ hã kuwỳ nhũm inhmã kugõ nẽ inhmã: 
\p —E mĩ. Apy nẽ akrẽ. ànhre. Te kot menh xành pyràk. Nom kot kaj akrẽ nẽ anhõhy xà. Nom mãmrĩ apy nẽ akrẽ. E mĩ. Anẽ. 
\p  
\v 10 Hãmri pa kêp kupy nẽ hkaki nhũm ànhre. Pa hkrẽr pa hãmri nẽ inhõhy xà kurê kumrẽx. 
\p  
\v 11 Hãmri nhũm kot inhmã õr xwỳnhta inhmã: 
\p —Nà ãm hãmri na ka apy nẽ akrẽ. Jakamã kêr ka ano ho ate mẽmoj piitã omunh xwỳnhja nẽ ajamak o ate mẽmoj mar xwỳnhja nẽ ate tanhmã Tĩrtũm kapẽr mar toja ka piitã hã kagà hpa. Hãmri nẽ ate omunh xà hkôt akwỳjê mã piitã harẽnh o apa. Mẽ kot nhỹrmã Tĩrtũm kot tanhmã mẽ piitã mẽ hipêx to hã harẽnh mar kaxyw. Ahpỹnhã ri pika piitã hkôt mẽ urojê piitã koja nhỹrmã ã mẽ hipêx anẽ. Ahpỹnhã ri mẽ kapẽr xwỳnh piitã. Nẽ mẽ õ pahijaja. Ãm mẽ piitã koja nhỹrmã ã mẽ hipêx anẽ. Anẽ. 
\c 11  
\s1 Tĩrtũm nhỹ hã kapẽr xwỳnh pijakrut wa harẽnh 
\p  
\v 1 Tã nhũm mẽhõj inhmã mẽmoj to mĩdi xà hã pĩ ryre gõ nẽ inhmã: 
\p —E ja py nẽ Jerujarẽ hwỳr wrỳ nẽ kamã Tĩrtũm mã amnhĩ jarẽnh xà hã ixkreja o mĩdi. Nẽ ixkre kamã amnepêm mẽ kot amnhĩ tomnuj pãnhã Tĩrtũm mã ôwêhti nhõr xà hã mêstita mã ho anẽ nẽ ho mĩdi. Nẽ ixkre kamã mẽ kot Tĩrtũm mã amnhĩ jarẽnh o mẽ hkrĩ xwỳnhjaja ka aprĩ hã mẽ ho kõta. 
\p  
\v 2 —No ixkre kapem pikaja ka ho mĩdi hkêt nẽ. Ra Tĩrtũm kot mẽ kot amnhĩ tomnuj xwỳnhjê mã hkaga jakamã koja mẽ htỳx ri kãm hprãm xà hkôt tanhmã homnu hto ho pa. Nẽ Jerujarẽ piitã hkôt ri homnu ho paja ã hã amgrà axkrunẽpxi nẽ hkôt mytwrỳ kêp 6. 
\p  
\v 3 —Koja Tĩrtũm ma ỹ hã kapẽr xwỳnh ho hamẽxkrut nẽ mẽ hwỳr wa kumẽ nhũm wa ma mẽ hwỳr wrỳ nẽ mẽ kãm Tĩrtũm kapẽr jarẽnh o ri mẽ hkôt pa. Hãmri nẽ tee ri mẽ kot tanhmã amnhĩ tomnuj to hã mẽ omu nẽ hkaprĩ nẽ. Hãmri nẽ wa hkaprĩ xàj xak punure kaxô nẽ haxà nẽ mẽ kãm Tĩrtũm kapẽr jarẽnh o ri wa pa hã amgrà axkrunẽpxi nẽ hkôt mytwrỳ kêp 6. Jakamã e. Pĩja py nẽ ma mẽ hwỳr wrỳ nẽ ixkreta o mĩdi. Anẽ. 
\p  
\v 4 Wa pijakrut wa kot Tĩrtũm nhỹ hã kapẽr jarẽnh o wa pa xwỳnhta wa. Na htem wa kot amnhĩ nhĩpêx ã wa harẽnh ma nẽ mẽmo pĩ hpàr pê oriwêhti kot tanhmã amnhĩ nhĩpêx toja mã hamaxpẽr kurê kumrẽx. Nẽ amnepêm Tĩrtũm nhỹ hã kapẽr o pa xwỳnh pê Jakaris kot kanê hpôk xãmta mã mããnẽn hamaxpẽr. Oriwêhti xôja htwỳm rax kumrẽx nhũm htem htwỳm opôj nẽ ho kanê ho nỳt nẽ hpôk nẽ kỳx pê unhwỳ nhũm mẽ piitã hirã kamã rĩt mex o ri mra. Nẽ kanê hpôk mexja te kot Tĩrtũm kapẽr pyràk. Nẽ kanê xãm xàja te kot Tĩrtũm nhỹ hã kapẽr jarẽnh o wa pa xwỳnhta wa uràk. Nẽ oriwêhtija haxwỳja te kot wa uràk. Ra Tĩrtũm Karõ kot wa hkarõ mã àr jakamã na hte wa hprĩ hã mẽ kãm Tĩrtũm kapẽr jarẽnh o pa nhũm mẽ kot mar xwỳnhjaja te kanê nhĩrã kamã ri rĩt mex nẽ ri pa pyrà nẽ hprĩ hã mar tỳx nẽ. 
\p  
\v 5 Tã koja mẽhõ tanhmã wa hipêx to kaxyw wa hwỳr tẽ nhũm wa hakwa rũm kuwy hpôk kato nẽ kot tanhmã wa ho mã xwỳnhta o hxêt o kupĩ. 
\p  
\v 6 Nẽ koja wa Tĩrtũm xàhpumunh tỳx xà ho tanhmã ri mẽ hã mẽmoj nhĩpêx to pê mẽ kãm kapẽr jarẽnh o ri mẽ hkôt pa. Jao tanhmã na hto nhũm mẽ hã wrỳk kêt ry nẽ. Rỳ tanhmã mẽ kêp gô hto nhũm mẽ hkamrô hã mẽ kêp amnhĩ jahkre. Koja wa ã Tĩrtũm nhỹ hã mẽ kêp mẽmoj nhĩpêx anhỹr ho wa pa. Nẽ xatã wa kãm hprãm xà hkôt tanhmã mẽmoj tomnu hto.  
\v 7 Nẽ mẽ kãm kapẽr o pa pê ã mẽ hipêx anhỹr o wa hã amgrà axkrunẽpxi nẽ hkôt mytwrỳ kêp 6 nẽ rĩ kormã ho hapêx. Hãmri nhũm ahkre xupỳm rũm Satanasti nhõ kôwenatôja kato nẽ ma wa hwỳr tẽ nẽ nhỹri pry kahti ri wa unê nẽ wa kupĩ nhũm wa pry kamã ty nẽ nõ.  
\v 8 Hãmri nhũm mẽ wa haxàr kêt nẽ nhũm wa arĩ pry kamã nõ. Krĩ kapem na prem pĩ kahpa hã Jejus nhô nẽ kupĩ. Krĩ nhõ xwỳnhjaja mẽ kot amnhĩ tomnuj tỳx xwỳnh na mẽ. Te ho amnepêm krĩ pê Sotõ mẽ pika pê Ejit kamã mẽ kot amnhĩ tomnuj xwỳnhjê kot amnhĩ nhĩpêx pyràk.  
\v 9 Jakamã nhũm mẽ kot wa haxàr nê axpẽn kurê nhũm wa pry kamã arĩ ty nẽ nõ nhũm mẽ piitã wa hwỳr mra nẽ wa omu. Nẽ ahpỹnhã krĩ piitã hkôt mẽ pa xwỳnhjaja tanhmã amnhĩ to nẽ ja hã wa omu. Ahpỹnhã ri pika piitã hkôt mẽ urojaja. Nẽ ahpỹnhã ri mẽ kapẽr xwỳnh piitã. Hãmri arĩ ahpỹnhã mẽ õ krĩ kamã pa htã tanhmã amnhĩ to nẽ wa htyk ã wa omunh ã hã apkati axkrunẽpxi nẽ hkôt hã myt ahpa.  
\v 10 Koja mẽ wa htyk ã wa omu hãmri nẽ hkĩnh nẽ. Nẽ hkĩnh xàj axpẽn mã hkĩnh xà nhõr o pa. Wa kot kormã htĩr ri tanhmã mẽ homnuj to ho ri mẽ hkôt paja mã hamaxpẽr nẽ wa htyk ã wa omu nẽ hkĩnh tỳx nẽ. 
\p  
\v 11 Tã koja wa htyk ã apkati axkrunẽpxi nẽ hkôt hã myt ahpa hãmri nhũm Tĩrtũm wa kamã htyyxà rẽ nẽ akupỹm wa ho wa htĩr nhũm wa kànhmã xa nẽ ri mra. Hãmri nhũm mẽ kot wa omunh xwỳnhjaja tee ri hã wa omu nẽ kãm wa uma htỳx kumrẽx. Ãm kãm wa uma ho kãm wa uma. 
\p  
\v 12 Hãmri nhũm kaxkwa kamã mẽhõja wa kãm kapẽr nẽ wa kãm: 
\p —E war amnẽ mẽ ixwỳr war api. Anẽ. 
\p Hãmri nhũm wa kuma nẽ ma kakrã kamã àpir o mõ. Nhũm mẽ kãm wa hkurê xwỳnhjaja tee ri wa àpir ã wa omu. 
\p  
\v 13 Hãmri nhũm pika htertet tỳx nẽ. Nẽ krĩ kamã ixkre ohtô nẽ grành pa nẽ mẽ hkwỳ nhĩmex rax nẽ nhũm mẽ ohtô rax kumrẽx nẽ axkaprã. Mẽ kêp 7.000 nẽ pikaprãr pa. Hãmri nhũm arĩ mẽ htĩr nẽ ri mẽ pa xwỳnhjaja tee ri mẽ omu nẽ kãm ma xàj htertet tỳx nẽ axpẽn mã: 
\p —Kwa Tĩrtũm mãn ã mẽ panhĩpêx anẽ. Hihtỳx o hihtỳx jakamã kaxkwa rũm ã mẽ panhĩpêx anẽ pu mẽ pahpiitã pano ho ixkre pigrành ã omu. Anẽ. 
\p  
\v 14 E na ra amnhĩ xà htỳx kamã hamak xàja hamẽxkrut nẽ hapêx. Tã no ãm arĩ mẽ kaxyw pyxi nẽ arĩk. 
\s1 Mẽ kot pifti kot hitep kakôr ã harẽnh 
\r Apokarip 4.8, 5.9-14, 7.9-12, 14.2-5, 15.3-4, 19.1-2 
\p  
\v 15 Tã nhũm Tĩrtũm kapẽr o wrỳk xwỳnh kot hitepja õ pifti kakô nhũm kaxkwa kamã mẽ pa xwỳnhjaja kàx pê kapẽr o: 
\q1 E ãm hãmri. Na ra Mẽpahpãm Maati mẽ Jejus Krisja wa kêp krĩ piitã hkôt mẽ piitã mẽ õ Pahihti na wa. 
\q1 Koja Mẽpahpãm Maatija kêp Pahi Maati rãhã nẽ pa ho pa xwỳnh. Anẽ. 
\m  
\v 16 Hãmri nhũm mẽ àptàr tũm pê 24jaja. Tĩrtũm kot mẽ pahto amnhĩptàr o hkrĩ xà mã hipôk nẽ mẽ hkrĩ xwỳnhjaja. Hãmri ã mẽ kapẽr anhỹrja ma nẽ Tĩrtũm ã hpijaàm kaxyw hpar pê rôrôk pa nẽ htu mỳr pê hikwỹ. Hãmri nẽ kãm mex o mex ã harẽ nẽ kãm: 
\q1  
\v 17 Pa Pahi Maati Tĩrtũm. Nà ãm hãmri mẽ ixrom axàhpumunh o axàhpumunh nẽ axihtỳx o axihtỳx. 
\q1 Amnepê mã kormã mẽmoj kêt ri na ka pre arãhã apa ho apa. 
\q1 Tã arĩ arãhã apa ho apa. 
\q1 Ãm hãmri apê mẽ ixpiitã mẽ ixto amnhĩptàr xwỳnh. Nà ãm hãmri amex o amex. 
\q1  
\v 18 Kot kaj tokyx mẽ piitã tanhmã mẽ kot amnhĩ nhĩpêx to ho pa hã mẽ omunh xà hkôt tanhmã mẽ harẽnh to. 
\q1 Nẽ ra mẽ htyk xwỳnhjaja kot kaj mẽ piitã akupỹm mẽ ho mẽ htĩr pa nhũm mẽ pika rũm hapôx pa nẽ ma mra nẽ arĩ mẽ htĩr xwỳnhjê nhĩhkô hã akutã hkrĩ pa. 
\q1 Ka mẽ piitã mẽ omu nẽ tanhmã mẽ kot amnhĩ nhĩpêx to ho pa hã mẽ omunh hkôt tanhmã mẽ harẽnh to. 
\q1 Mẽ kot amnhĩ tomnuj xwỳnhjaja kot kaj ma mẽ kot amnhĩ xà htỳx kamã hamak o pa htũm xà hwỳr amnhĩ nê mẽ arẽ nhũm mẽ ma hwỳr hapêx. Hãmri nẽ tee ri amnhĩ kukamã hamaxpẽr nẽ gryk tỳx kumrẽx. 
\q1 Ka hpãnhã mẽ kot akôt amnhĩ xunhwỳr nẽ akapẽr kôt amnhĩ nhĩpêx o mẽ pa xwỳnh piitã mẽ omu nẽ tanhmã mẽ ho mex to. 
\q1 Mẽ kot amnhĩ to rũnh xwỳnhjaja nẽ mẽ kot amnhĩ to hkryre xwỳnhjaja. 
\q1 Nẽ amnepêm mẽ kot anhỹ hã mẽ kapẽr o mẽ pa xwỳnhjaja. 
\q1 Akrajê piitã kot atã hpijaàm xwỳnhjaja kot kaj kormã mẽ htĩr ri tanhmã amnhĩ to mex hã mẽ omunh xà hkôt tanhmã mẽ ho mex to. 
\q1 Ã kot kaj tokyx mẽ piitã ahpỹnhã mẽ omunh xà hkôt mẽ hipêx anẽ. Anẽ. 
\m  
\v 19 Hãmri nhũm kaxkwa kamã Tĩrtũm nhõrkwỹ hã hakwakre kahê xà amnhĩ mẽ pa kamã ôr o mês kunĩhtita pumu. Pu nhũm na hkatõtõk nẽ haxênh nẽ hkrakrak nẽ na mê te kot jêr krã hakotre pyràk xwỳnhja pikap rôrôk rax nẽ. Nẽ pika htertet tỳx o htertet tỳx pa arĩ omunh o xa. 
\c 12  
\s1 Mẽhõ ni mẽ kagãmnuti wa harẽnh 
\p  
\v 1 Tã pa axte mẽmoj pumu. Kaxkwa kamã aa mẽ pahte mẽmoj pumunh kêt xwỳnhja pa omu. Nhũm mẽhõ nija xê te myt no mã hirã htỳx pyràk. Nẽ hpar nhõkwa kamã mytwrỳre ajêt. Nẽ kanhêti ho 12 o mẽ ahkà tu nẽ o xa.  
\v 2 Na ra htujarô nẽ hpijagri kaxyw õhy xà nẽ amnhĩ kamnhêr o xa. 
\p  
\v 3 Tã pa axte mẽmoj pumu. Aa mẽ pahte mẽmoj ã kot anhỹr pumunh kêt xwỳnh õja pa omu. Kagãmnuti nom ãm axtem hkà kamrêk tỳx kumrẽx. Nẽ rax kumrẽx. Nẽ hkrã kêp 7. Nẽ hkrã piitã kamã ôr o pahi hã mẽ ahkà htu nẽ o nõ. Nẽ hkrã kamã pàr kêp 10. 
\p  
\v 4 Tã nhũm hamy ho apêr o kaxkwa kamã kanhêti ho ohtô nẽ pikap kurẽ. Hãmri nẽ õhy xà nẽ amnhĩ kamnhêr o ãm xwỳnhta wỳr tẽ nẽ hkra kator nhũm kot kêp krẽr kaxyw kutã hamãr o nõ. \fig Apokarip 12.3-4|src="PAL95B.tif" size="col" ref="REV 12.4" \fig* 
\p  
\v 5 Hãmri nhũm hkra kato nẽ myre. Hihtỳx o hihtỳx ã kot pika piitã hkôt mẽ piitã mẽ ho amnhĩptàr mã xwỳnh na pre. Nhũm kagãmnutija kot kêp utàr nẽ hkrẽr mã tã nhũm Tĩrtũm kapẽr o wrỳk xwỳnhjê hõja hwỳr wrỳ nẽ kêp kumỳ nẽ ma Tĩrtũm wỳr kaxkwa kamã kot mẽ pahto amnhĩptàr ã hkrĩ xà maatija wỳr ho api. 
\p  
\v 6 Hãmri nhũm kagãmnuti tee ri ma kot kêp o mõr ã omu nẽ hpãnhã nita o apkjê nẽ kot tanhmã ho kaxyw nhũm amnhĩ tã omu nẽ umaj hprõt nẽ ma tẽ nẽ nhỹri kapôt ã amũxu. Ra Tĩrtũm kot hkukamã kãm hpimxur xà nhĩpêx xà hwỳr hprõt nẽ ma tẽ nẽ kamã kêp amũxu. Nhũm Tĩrtũmja nê kagã pumunh mex nhũm kêp hpimxur mex ã amgrà axkrunẽpxi nẽ hkôt hã mytwrỳ kêp 6. 
\s1 Mẽ kot kaxkwa kamã mẽkarõmnuti kurê kaxàr ã mẽ harẽnh 
\p  
\v 7 Tã nhũm mẽ ra kaxkwa kamã kurê kaxàr kaxyw. Kagãmnuti mẽ hkwỳjaja nhũm mẽ ra Tĩrtũm kurê kaxàr kaxyw kutã amnhĩ xunhwỳ. Jakamã nhũm Tĩrtũm kapẽr o mẽ wrỳk xwỳnhjê hkrãhtũm Mikewja ma mẽ hwỳr amnhĩ kôt hkwỳjê o mra nẽ mẽ pijapu ho kuhê. 
\p  
\v 8 Hãmri nhũm kagãmnuti tee mẽ kutã amnhĩ to htỳx kaprỳ nhũm Tĩrtũm kapẽr o mẽ wrỳk xwỳnhjaja amnhĩ nê mẽ ho axtem nẽ kaxkwa rũm mẽ kator o mẽ kator. 
\p  
\v 9 Satanasti pê kagãmnutita kagã kot ni kator ewa mã hêx xwỳnh na pre. Nẽ hêx rom tanhmã hêx to ho pa xwỳnh. Jakamã nhũm Mikew mẽ hkwỳjaja hkwỳjê mẽ mẽ ho hpimrààtã amnhĩ nê pikap mẽ rẽnh pa. 
\p  
\v 10 Hãmri nhũm kaxkwa kamã mẽhõja axte kàxpê kapẽr nẽ kapẽr o: 
\q1 E ãm hãmri. Na ra Tĩrtũm hihtỳx o hihtỳx o mẽ panê mẽmoj punuj piitã ho hapêx par kumrẽx. 
\q1 Na pre hte Satanasti pê mẽkarõmnutija xatã hwỳr mra nẽ kãm tanhmã Jejus kwỳjê ho kapẽr punuj to ho pa. 
\q1 Tã koja axte mẽ ho kapẽr kêt kumrẽx. Ra Tĩrtũm kot amnhĩ nê kator o kator nhũm ra ma mõr o mõr kênã. 
\q1 Koja Tĩrtũm pika piitã hkôt mẽ ho amnhĩptàr xwỳnhjê japôx pa nẽ hpãnhã mẽ kaxyw Kra Krisja xãm nhũm pika piitã hkôt mẽ ho amnhĩptàr rãhã ho pa. 
\q1 Nà ãm hãmri. Ja mex o mex. 
\q1  
\v 11 Na pre Jejus kôt mẽ pahtõ nẽ mẽ pahtõxjaja mẽkarõmnuti kutã amnhĩ to htỳx nẽ pa. No ãm amnhĩ nhỹ hã ã kutã amnhĩ nhĩpêx anhỹr kêt. 
\q1 Mẽ pahte amnhĩ tomnuj pãnhã amnhĩrer xwỳnhta na pre ty nẽ hkamrô ho mẽ kuhõ nẽ mẽ nê mẽ kot amnhĩ tomnuj o hapêx. 
\q1 Jakamã nhũm prem kukwak ri Satanasti kutã amnhĩ to htỳx rãhã pa. 
\q1 Nhũm mẽ kot Jejus ã mẽ himex par kaxyw tã nhũm mẽ kãm htyk pyma hkêt nẽ. Ãm Jejus kôt arĩ amnhĩ to htỳx nẽ mẽ hkôt pa rãhã nẽ. 
\q1 Jao arĩ mẽ kãm Jejus kot mẽ panê tanhmã amnhĩ nhĩpêx to hã harẽnh o ri mẽ hkôt pa. 
\q1  
\v 12 Tã Tĩrtũm ra kot mẽ panê mẽmoj punuj o hapêx par jakamã kwa kaxkwa kamã mẽ apa xwỳnhjaja kêr ka mẽ akĩnh nẽ apa. 
\q1 Nom gô xujanãr kãm nẽ pika kamã mẽ pa xwỳnhjaja hêxta waa nẽ. Koja mẽ mex kêt nẽ. 
\q1 Nẽ ra Mikew mẽ hkwỳjaja kot amnhĩ nê kaxkwa rũm mẽkarõmnuti mẽ hkwỳjê kator nẽ pikap mẽ rẽnh par jakamã nhũm Satanastija gryk tỳx kumrẽx. 
\q1 Tĩrtũm kot ma mẽ kot amnhĩ xà htỳx kamã hamak o pa tũm xàta wỳr mẽnh xà hã arĩgro hwỳr amgrà grêre nhũm tee ri amnhĩ kukamã hamaxpẽr nẽ gryk tỳx o gryk tỳx. Anẽ. 
\m  
\v 13 Hãmri nhũm kagãmnutija mẽ kot amnhĩ nê kaxkwa rũm kator ã amnhĩ pumu nẽ gryk tỳx nẽ. Nẽ gryk xàj ma akupỹm ni kot hkra myre ho pijagri xwỳnhta wỳr tẽ nẽ tanhmã ho kaxyw hkôt ho krihkrit. 
\p  
\v 14-16 Hãmri nhũm Tĩrtũm kapẽr o mẽ wrỳk xwỳnhjê hõja omu nẽ nija mã àànhàhti jara gõ. Kot kagãmnuti pê ho htor nẽ ma nhỹri hpimxur xà wỳr htẽm kaxyw. Nẽ kormã htor kaxyw nhũm kagãmnuti omu nẽ kot gô ho hanhir kaxyw hkôt hakwa rũm gô kapĩ nhũm hpikapĩr rax kumrẽx. Te pyhti hprõt tỳx pyràk. Hãmri nhũm Tĩrtũm omu nẽ nija nê tanhmã pika hto nhũm kãm axkjê nhũm gô hprõt nẽ kamã pikapĩr pa. Jakamã nhũm mex pê àànhàhti jara ho to nẽ ma kapôt ã pimxur xà hwỳr ma tẽ. Nẽ kamã pa hã amgrà axkrunẽpxi nẽ hkôt mytwrỳ kêp 6 nhũm prem hamãr mex rãhã ho pa. 
\p  
\v 17 Hãmri nhũm kagãmnuti tee ri kãm hpĩr prãm kaprỳ nẽ gryk tỳx kumrẽx. Hãmri nẽ ma ni hkwỳjê hwỳr mõ. Mẽ kot Tĩrtũm mẽ Jejus wa hkôt amnhĩ nhĩpêx o mẽ pa xwỳnhjê hwỳr tanhmã mẽ homnuj to kaxyw ma mẽ hwỳr mõ. Hãmri nẽ tanhmã kot mẽ ho kaxyw gô xujanãr mỳ ri nõ. 
\c 13  
\s1 Satanasti nhõ kôwenatô wa kot gô xujanãr rũm kator ã wa harẽnh 
\r Sikũn Tesarõn 2.3-5 
\p  
\v 1 Tã pa axte mẽmoj pumu. Nhũm gô xujanãr rũm Satanasti nhõ kôwenatôjê hõja te mrymnuti pyrà nẽ àpir o mõ. Kagãmnuti pyrà nẽ hkrã kêp 7. Nẽ uràk nẽ hpàr kêp 10. Nẽ hpàr piitã kamã pahi hã mẽ ahkà. Nẽ ahkà piitã hã axtem tanhmã Tĩrtũm o kapẽr punuj to nẽ tanhmã haprỳ hto hã kagàja hikwỹ. 
\p  
\v 2 Nẽ hkà te kêp ropkrorti kà pyràk. Nẽ hakwa te kot rêãwti jakwa pyràk. Nẽ ĩhkra te kot pààti nhĩhkra pyràk. Jakamã na pre kagãmnuti nhỹ hã hihtỳx o kêp pahi hã pika nhõ xwỳnhjê ho amnhĩptàr o pa. 
\p  
\v 3 Nẽ hkrã hõ te mẽ kot hayr o hpĩr nhũm ra akupỹm htĩr nẽ arĩ hayr xà wakre rã nyw pyràk. Jakamã nhũm pika kamã mẽ pa xwỳnhjaja amnhĩ jaêr pê omu nẽ kamã no pyma nẽ. Hãmri nẽ hkôt amnhĩ nhĩpêx o pa. 
\p  
\v 4 Hãmri nẽ kagãmnuti kot tanhmã mrymnuti ho nhũm ỹ hã mẽ ho amnhĩptàr jakamã nhũm mẽ piitã hamẽ wa hã hpijaàm kaxyw wa kãm wa mex o wa mex ã wa harẽnh o pa. Nẽ mrymnuti hã axpẽn mã: 
\p —Hêxta waa nẽ. Mẽ pahtõ na mẽ pahte mrymnutita pyrà nẽ ã mẽ pahte amnhĩ nhĩpêx kot anhỹr? Mẽ pahtõ kot pu kutã xa nẽ paxihtỳx o hkurê kapa? Nà amrakati kumrẽx. Anẽ. 
\p  
\v 5-6 Hãmri nhũm Satanasti tanhmã mrymnuti ho nhũm kapẽr o ri mẽ hkôt pa nẽ mẽ ho amnhĩptàr o hã amgrà axkrunẽpxi nẽ hkôt mytwrỳ kêp 6. No ãm axtem nẽ Tĩrtũm o kapẽr punuj o ri mẽ hkôt pa. Nẽ ri tanhmã haprỳ hto nẽ õ krĩja mex kêt ã harẽnh o ri mẽ hkôt pa. 
\p  
\v 7 Hãmri nhũm Satanasti ra kot mẽ hkurê kaxàr kaxyw kãm anẽ nhũm axtem nẽ Tĩrtũm pê hkrajê kutã amnhĩ xãm nẽ mẽ hwỳr hprõt nẽ tanhmã hpijapu hto ho pa nẽ mẽ ho axtem nẽ mẽ ho krihkrit pa nẽ ahpỹnhã ri pika piitã hkôt mẽ uro hkwỳjê ho amnhĩptàr o pa. Nẽ ahpỹnhã mẽ kapẽr xwỳnh piitã mẽ ho amnhĩptà. 
\p  
\v 8 Jakamã nhũm mẽ ohtô rax kumrẽx nẽ mrymnuti hkôt amnhĩ nhĩpêx. Nẽ kutã hkõn krã ho rôrôk nẽ hkrĩ nẽ kãm mex o mex ã harẽ. No ãm mẽ piitã hkêt. Kot mẽ pahte amnhĩ tomnuj pãnhã amnhĩrer xwỳnh kôt ra mẽ kot amnhĩ xunhwỳr xwỳnhjaja tapxipixjaja na prem hkôt amnhĩ xunhwỳr kêt nẽ. Amnepê mã kormã amrakati ri Tĩrtũm mẽ Jejus wa õ kagà kamã mẽ htĩr tũm nẽ mẽ pa mã xwỳnh nhĩxi xwỳnh pixjaja na prem mrymnuti pumu nẽ hkwỳjê rom hprĩ hã kot amnhĩ nhĩpêx ã omunh kurê kumrẽx nẽ hkôt amnhĩ nhĩpêx kêt nẽ. 
\q1  
\v 9 E ka mẽ atõ axumar kaxyw ajamak kre hã kot kaj ixujarẽnh piitã ama nẽ kãm ajamaxpẽr tỳx rãhã ho apa. 
\q1  
\v 10 Jakamã kwa Tĩrtũm kôt ixkwỳjaja. Kwãr mẽ mãmrĩ mẽ apynê nẽ mẽ ajagjê. 
\q1 Nẽ kwãr mẽ mãmrĩ wapo ho mẽ ajayr o mẽ apa. 
\q1 Nom kêr ka mẽ umaj ixkaga hkêt nẽ. Ixkaga hkêt o ixkaga hkêt. 
\q1 Mẽ ãm ixkôt pix mã amnhĩ nhĩpêx o ri apa rãhã ty. 
\s1 Pika rũm mrymnuti hõ kator ã harẽnh 
\r Makre 13.22 
\p  
\v 11 Tã pa mrymnuti hõ pumu. Nom wamta pyrà nẽ gô xujanãr rũm kator kêt axtem pika rũm kato. Nẽ ôwêhti hkrare pyrà nẽ hpàr pijakrutre. Nẽ te ho kagãmnuti kapẽr tỳx pyrà nẽ kapẽr tỳx kumrẽx o pa. 
\p  
\v 12 Gô xujanãr rũm mrymnuti xàpir xwỳnhta nhỹ hã pika nhõ xwỳnhjê mã kapẽr tỳx nẽ mẽ kãm: 
\p —E pika piitã hkôt mẽ apa xwỳnhjaja mẽ inhma. Kêr ka mẽ kot hkrã hõ jayr o hpĩr nhũm akupỹm htĩr xwỳnhta kôt pix mã amnhĩ nhĩpêx rãhã ho ri apa. Nẽ kãm mex o mex ã harẽnh rãhã nẽ. 
\p Anhỹr o mẽ kãm kapẽr.  
\v 13 Hãmri nẽ Satanasti nhỹ hã mẽ kãm aa mẽ kot mẽmoj pumunh kêt kwỳ ho anhỹr o pa. Jao kaxkwa rũm tanhmã mẽ kãm kuwy ho wrỳk to nhũm pikap rôrôk nhũm mẽ amnhĩ jaêr pê omu nẽ kamã no pyma nẽ.  
\v 14 ã ri mẽ noo mã mẽ kãm amnhĩ nhĩpêx anhỹr o ri mẽ hkôt pa. Gô xujanãr rũm mrymnutija noo mã ã hêx rom amnhĩ nhĩpêx anhỹr o mẽ no kupyr o pa nhũm mẽ omu nẽ hkôt amnhĩ nhĩpêx. Hãmri nhũm mẽ kãm mẽmoj tã karõ nẽ mẽ kãm: 
\p —E wam mrymnutita. Mẽ kot hkrã hõ jayr o hpĩr nhũm akupỹm htĩr xwỳnhta kêr ka mẽ kãm hkarõ nhĩpêx nẽ ho mẽ anhõ sãnti. Kê mẽ piitã hwỳr mra nẽ kutã hkõn krã ho rôrôk nẽ hkrĩ nẽ amnhĩ to kuwỳ nẽ kãm mex o mex ã harẽ. 
\p Anhỹr o mẽ kãm hã karõ.  
\v 15 Hãmri nhũm mẽ kuma nẽ mar xà hkôt hipêx nẽ ãm nhũm xa. Hãmri nhũm mrymnuti kot hitepta omu nẽ hwỳr tẽ nẽ tanhmã ho nhũm ra kapẽr nẽ mẽ kãm: 
\p —E kêr ka mẽ kot inhmex ã ijarẽnh kêt xwỳnhjê pynê nẽ mẽ himex pa. Anẽ. 
\p  
\v 16 Hãmri nhũm pika rũm mrymnuti kator xwỳnhta haxwỳja mẽ kãm kapẽr nẽ mẽ kãm: 
\p —E koja ixkwỳjaja inhỹ hã mẽ apiitã mẽ apê ixkwỳ hã mẽ akagà. Mẽ ate amnhĩ to rũnh xwỳnhjaja nẽ mẽ ate amnhĩ to hkryre xwỳnhjaja. Nẽ amarĩ mẽ kãm mẽ axàpênh xwỳnhjaja nẽ amnhĩ mã mẽ axàpênh xwỳnhjaja. Nẽ mẽ akàxpore rũnh xwỳnhjaja nẽ mẽ apê amrakati xwỳnhjaja. Koja mẽ apiitã mẽ akagà hpa. Mẽ akwỳ nhõkrã kagà nẽ mẽ akwỳ xupôk rũm mẽ anhĩhkra katut kagà. 
\p  
\v 17 —Gô xujanãr rũm mrymnutita nhĩxi kot paj mẽ atã hipêx. Rỳ hixi hã nũm nhĩpêx. Hãmri ka mẽ axàpkur xà japrôr kaxyw nhỹhỹm mra nhũm mẽ atã hixita pumu nẽ rĩ kormã mẽ amã mẽmoj kwỳ ho wẽnê ka mẽ amnhĩm haprô nẽ ho axàpkur o ri apa. Nẽ mẽ ate mẽmoj to wẽnê xwỳnhjaja koja mẽ apê mẽmoj japrôr kaxyw mẽ awỳr mra ka mẽ tee ri nhỹhỹnh mẽ hã hixi japêr hãmri nẽ mẽ kãm mẽmoj to wẽnê hkêt nẽ. Ãm nhỹhỹnh mẽ atã hixi hã kagàta pumunh pix kukwak ri kot kaj mẽ awjaprô rỳ mẽmoj to wẽnê. Anẽ. 
\p  
\v 18 E kwa kêr ka mẽ ixte mẽmoj pumunh nẽ mẽ amã hã kagàta pumu nẽ ama nẽ kãm ajamaxpẽr tỳx o apa. Mrymnutita nhĩxi na kêp nũm. Nũmja kêp 666. E kaj mẽ akrã hi mex xwỳnhjaja kot kaj mẽ aprĩ hã ja mar tỳx kurê kumrẽx. 
\c 14  
\s1 Tĩrtũm mex ã mẽ grer 
\r Apokarip 7.1-8 
\p  
\v 1 Tã pa axte mẽmoj pumu. Nhũm mẽ pahte amnhĩ tomnuj pãnhã amnhĩrer xwỳnhja hixêt pê Siãwja nhĩmõk ã xa. Nẽ puhã mẽ ohtô rax kumrẽx nẽ kuhê. Mẽ ohtô ho mẽ ohtô. Piitã kamã mẽ kêp 144.000. Nẽ piitã õkrã hã mẽ pahte amnhĩ tomnuj pãnhã amnhĩrer xwỳnh mẽ Hipêêxà wa hixi jaxwỳr pa mẽ omu. 
\p  
\v 2 Nhũm mẽ kaxkwa kamã grer o kuhê. Mẽ grerja mex o mex. Te kot gô hprõt tỳx hkoko htỳx pyràk. Nẽ te na katõtõk tỳx pyràk. Nẽ te wiorãw môr xwỳnhjaja kot hkakrênh mex pyràk pa mẽ mar o xa. 
\p  
\v 3 Nẽ mẽ grer xwỳnhjaja. Jejus puhã mẽ ohtô rax kumrẽx nẽ mẽ kuhê xwỳnhjaja na prem Tĩrtũm kot mẽ ho amnhĩptàr ã hkrĩ xàta kuri grer o kuhê. Nẽ mẽmoj tĩr pê kwat xwỳnhjê mẽ mẽ àptàr tũm pê 24jê kuri grer o kuhê. Mẽ grer nyw o gre. Ãm mẽ tapxipixjaja mẽ kot mẽ grer nywja mar. Ra mẽ kêp Tĩrtũm kra hã mẽ kot mẽ õkrã hã Tĩrtũm mẽ Kra Jejus wa hixi ã kagà nhũm Tĩrtũm kot ra mrymnuti mẽ hõta wa kêp mẽ utàr nẽ amnhĩ wỳr mẽ ho àpir xwỳnh na pre mẽ. Ãm mẽ tapxipixjaja mẽ grer nywja ma nẽ wa kãm ho grer o kuhê. 
\p  
\v 4-5 Na prem tãm amnhĩ nhĩpêx nẽ Tĩrtũm kôt amnhĩ nhĩpêx rãhã ho pa. Te mẽ kot amnhĩ prõ pix tãnopxar rãhã ho pata pyràk. Nẽ ri tanhmã hêx to rỳ tanhmã ri amnhĩ tomnuj to ho pa hkêt nẽ. Ãm tãm ri amnhĩ nhĩpêx mex o pa. Mẽ kêp Tĩrtũm mẽ mẽ pahte amnhĩ tomnuj pãnhã amnhĩrer xwỳnh kwỳ jakamã na prem mẽ pahte amnhĩ tomnuj pãnhã amnhĩrer xwỳnhta kôt pix mã amnhĩ nhĩpêx o pa. Jakamã na prem mrymnuti kutã rôrôk nẽ kãm mex o mex ã harẽnh kêt nẽ. Tã mẽ kumrẽxjaja Tĩrtũm mẽ Kra wa kuri wa kãm grer o kuhê. 
\s1 Tĩrtũm kapẽr o wrỳk xwỳnh pijakrunẽpxi jarẽnh 
\p  
\v 6 Tã pa axte Tĩrtũm kapẽr o wrỳk xwỳnhjê hõ pumu nhũm kỳx pê ri htor o pa. Ahpỹnhã ri pika piitã hkôt mẽ uro hkwỳjê hkôt. Na ahpỹnhã ri mẽ kapẽr xwỳnhjê piitã mẽ hkôt mẽ kãm Tĩrtũm kot tanhmã mẽ hipêx to hã harẽnh kaxyw. Ahpỹnhã mẽ kapẽr xwỳnh piitã mẽ kãm harẽnh o pa. Nẽ htor o pa pê kỳx pê mẽ kãm kapẽr nẽ mẽ kãm: 
\p  
\v 7 “E na ra Tĩrtũm mẽ ate amnhĩ tomnuj mỳrapê tanhmã mẽ ato kaxyw. Jakamã kwa mẽ tokyx hã apijaàm kaxyw akõn krã ho arôrôk nẽ akrĩ nẽ kãm mex o mex ã harẽ. Kêp mẽmoj piitã ho kator xwỳnh na. Na pre kaxkwa ho kato nẽ pika ho kato nẽ gô xujanãr o kato nẽ hino ho kato nẽ mẽmoj piitã ho kator pa. Jakamã kwa kêr ka mẽ tapxipix ã mãn apijaàm nẽ kãm mex o mex hã harẽnh rãhã ho apa.” 
\p Anhỹr o mẽ kãm kapẽr.  
\v 8 Hãmri nhũm hõja wamta kôt tẽ nẽ uràk nẽ kỳx pê mẽ kãm kapẽr o: 
\p —Koja Tĩrtũm tokyx Papirõn grành pa. Na hte krĩ nhõ xwỳnhjaja amnhĩ tomnuj pix rãhã ho pa. Mẽ kot amnhĩ nhĩpêx te mẽ kot kagôxỳhti ho hkõm nẽ amnhĩ mẽ mẽ piitã mẽ kãm õr nẽ ho mẽ ho pipãnh pyràk. Na htem mẽnijê piitã ho amnhĩkati o pa. Nẽ amnhĩ kwỳjê pê mẽ hprõ ho amnhĩkati. Nẽ amnhĩ mẽ pika piitã hkôt mẽ pa xwỳnhjê mã anhỹr o pa. Mẽ kot mẽ uràk nẽ ã amnhĩ nhĩpêx anhỹr o pa kaxyw mẽ kãm anhỹr o pa. Ja mỳrapê na ra Tĩrtũm kot tanhmã mẽ ho kaxyw mẽ hã amnhĩ jarẽ. Anẽ. 
\p  
\v 9 Tã nhũm wa hkôt hõja tẽ nẽ wa uràk nẽ kàx pê pika nhõ xwỳnhjê mã kapẽr nẽ mẽ kãm: 
\p —E mẽ ate mrymnuti kutã akõn krã ho arôrôk nẽ akrĩ nẽ kãm mex ã harẽnh xwỳnhjaja. Nẽ mẽ ate karõ nhĩpêx nẽ kutã akõn krã ho akrĩ nẽ kãm mex ã harẽnh xwỳnhjaja. Nẽ mẽ anhõkrã nẽ mẽ anhĩhkra hã hixi hã kagà xwỳnhjaja. 
\p  
\v 10-11 —Tĩrtũm na tee ja hã mẽ apumu nẽ mẽ akamã gryk tỳx kumrẽx. Mẽ ate kapẽr kuhpa hã mrymnuti hkôt amnhĩ xunhwỳr jakamã nhũm mẽ akamã gryk tỳx o mẽ akamã gryk tỳx. Jakamã koja kuwy hpôk rãhã ho rãhã xwỳnhta kamã mẽ arẽnh pa ka mẽ amnhĩ xà htỳx kamã ajamak rãhã apa ho apa. Koja kuwy hpôkja aa hapêx kêt nẽ kurũm kàx mã hkũm àpir o pa rãhã nẽ. Koja ã mẽ ate amnhĩ tomnuj o mẽ apa xwỳnhjê nhĩpêx anẽ ka mẽ kamã apa ho apa nẽ aa kurũm ajapôx kêt nẽ kamã amnhĩ xà htỳx kãm ajamak rãhã apa ho apa. Arĩgro hãn kamàt kãm arĩ ã amnhĩ nhĩpêx anhỹr rãhã apa ho apa. Mẽ ate gôj rũm mrymnuti mẽ hkarõ ho sãnti wa kutã akõn krã ho arôrôk nẽ akrĩ nẽ wa kãm wa mex ã wa harẽnhja mỳrapê kot kaj mẽ ã amnhĩ nhĩpêx anẽ. Kot mẽ pahte amnhĩ tomnuj pãnhã amnhĩrer xwỳnh mẽ Tĩrtũm kapẽr o mẽ wrỳk xwỳnhjê noo mã kot kaj mẽ ã amnhĩ nhĩpêx anhỹr o apa. 
\p  
\v 12 Anhỹr o mẽ kãm kapẽr jakamã kwa kêr pu mẽ pahte Tĩrtũm kôt amnhĩ xunhwỳr xwỳnhjaja mẽ hkukamã mẽ harẽnhja ma nẽ Tĩrtũm kapẽr kôt pix mã amnhĩ nhĩpêx rãhã ho ri papa. Mẽ kot tanhmã hã mẽ pahto htã pu mẽ hkaga hkêt nẽ amnhĩ kaxyw Jejus kôt pajamaxpẽr tỳx rãhã nẽ. Hãmri nẽ nhỹrmã mẽ kurom ma õ krĩ hwỳr api nẽ kamã pamex kumrẽx nẽ papa ho papa. 
\s1 Mẽ kêp Jejus kwỳ hã mẽ htyk xwỳnhjê jarẽnh 
\r Wam Tesarõn 4.16 
\p  
\v 13 Tã nhũm kaxkwa kamã mẽhõja axte inhmã kapẽr nẽ inhmã: 
\q1 E Juãw. Kêr ka ã akwỳjê mã mẽmoj tã kagà anẽ nẽ mẽ kãm hã kagà ho: “E mẽ ate Tĩrtũm kôt ri amnhĩ nhĩpêx xwỳnhjaja. Mẽ kot Tĩrtũm ã mẽ apar nhũm mẽ atyk tã koja amnhĩ tã mẽ ato mex rax kumrẽx.” Anhỹr o mẽ kãm hã kagà. 
\p Anhỹr o inhmã kapẽr. Hãmri nhũm Tĩrtũm Karõja kuma nẽ kãm: 
\p —Nà ãm hãmri na ka ã mẽ harẽnh anẽ. Ra Tĩrtũm kot amnhĩ tã mẽ omunh rãhã ho pa. Mẽ kot kôt pix mã amnhĩ nhĩpêx o pa pê mẽ kãm mẽ hkurê xwỳnhjê kutã amnhĩ to htỳx rãhã htykja nhũm Tĩrtũm kot amnhĩ tã mẽ omunh mex. Koja mẽ ho mex kumrẽx. Mẽ kot Jejus ã mẽ hpar tã koja mẽ ho mex rax nẽ nhũm mẽ kuri mex rãhã nẽ pa ho pa nhũm mẽhõ axte tanhmã mẽ ho hkêt nẽ. Anẽ. 
\s1 Tĩrtũm kot tanhmã mẽ kãm hkĩnh xwỳnhjê nhĩpêx to 
\p  
\v 14 Tã pa axte mẽmoj pumu. Kaxkwa kamã kakrã jakajre pumu. Nẽ kamã mẽhõj te panhĩ pyrà nẽ nhỹ. Nhũm ôr o pahi hã mẽ ahkà htu nẽ kuteere xwagixre py nẽ o nhỹ. 
\p  
\v 15 Hãmri nhũm kaxkwa kamã Tĩrtũm kapẽr o mẽ wrỳk xwỳnhjê hõja Tĩrtũm mã amnhĩ jarẽnh xà hã ixkre rũm kato nẽ kakrã jaka kamã ỹr xwỳnhta mã kapẽr. Kàx pê kãm kapẽr nẽ kãm: 
\p —E pika nhõ xwỳnhjaja te mẽ hpur kãm mẽmo hy ra hkamrêk nẽ hikẽnh mã mex pyràk. Jakamã anhõ kuteere ata py nẽ ma mẽ hkôt tanhmã ri mẽ ho ho ri mẽ hkôt apa. Te mẽ kot mẽmo hy nhĩkẽnh o ri pa pyràk o mẽ hipêx nẽ ma ho mẽ himex o ri apa. Anẽ. 
\p  
\v 16 Hãmri nhũm kuma nẽ pika piitã mỳri õ kuteere ho apê nẽ te mẽmo hy jakàr pyràk o mẽ hipêx. 
\p  
\v 17 Hãmri nhũm axte Tĩrtũm mã amnhĩ jarẽnh xà hã ixkre rũm kapẽr o mẽ wrỳkjê hõja kato. ĩhkra kamã kuteere xwa gixre py nẽ o xa.  
\v 18 Hãmri nhũm axte hõja ixkre rũm kê hkôt kato nẽ hkukamã kator xwỳnhta mã kapẽr. Kàx pê kãm kapẽr nẽ kãm: 
\p —E na ra Tĩrtũm tanhmã mẽ kot amnhĩ tomnuj to hã tanhmã mẽ hipêx to kaxyw. Te mẽ kêp mẽ hpur kãm mẽmo xô pê uwa ra hkamrêk nẽ rênh mã tãm pyràk. Jakamã ma pika hwỳr mẽ hwỳr wrỳ nẽ mẽ hkôt ri anhõ kuteere ho mẽ himex o ri apa. Anẽ. 
\p  
\v 19 Hãmri nhũm kuma nẽ ma pika hwỳr wrỳ nẽ mẽ hipêx o te mẽ kot uwa xô rênh nẽ prẽs kãm hkapĩr nẽ kagô janênh pyrà nẽ mẽ hkôt ri kuteere ho mẽ hpar o pa. Tĩrtũm ra mẽ kamã gryk tỳx o mẽ kamã gryk tỳx jakamã nhũm ã mẽ hkôt mẽ hipêx anhỹr o ri pa. 
\p  
\v 20 Jakamã nhũm mẽ hkamrô hpikapĩr rax kumrẽx o uwa kagô jakre. Te ho pyhti hprõt o nõr pyràk. Jao upỳm o 2 met nẽ hkôt ho mêj met. Nom hprõt xà hkôt ry rax o ry rax. Ho 300 kirõm. Nhũm ã mẽ kamrô hprõt rax anẽ. 
\c 15  
\s1 Tĩrtũm mex ã mẽ grer 
\p  
\v 1 Tã pa axte kaxkwa kamã mẽmoj pumu. Hãmri nẽ amnhĩ jaêr pê omu nẽ tee ri hkukamã ijamaxpẽr. Aa mẽ pahte mẽmoj ã kot anhỹr pumunh kêt xwỳnh pa pre omu. Nhũm Tĩrtũm kapẽr o mẽ wrỳk xwỳnh pê 7jaja ahpỹnhã pika hkôt mẽ kot amnhĩ tomnuj xwỳnhjê homnuj kaxyw akuprõ nẽ kuhê. Ãm jajê pixjaja koja Tĩrtũm nhỹ hã axte tanhmã mẽ homnuj to nẽ ho anhỹr pa hãmri nhũm ra ja hapêx o hapêx. 
\p  
\v 2 Jakamã pa axte Tĩrtũm kapem gô rax pumu. Te kot kàx karỳr jaxênh mẽ kuwy hpôk o pihkàr pyràk xwỳnhja hprõt o nõ. Nhũm Tĩrtũm kra hkwỳjaja gô mỳ ri ohtô rax kumrẽx nẽ kuhê. Na pre ra mrymnutija tee ri amnhĩ kôt mẽ rẽnh mã nẽ tee ri mẽ hã amnhĩ nhĩxi hã kagà hprãm kaprỳ nom nhũm mẽ hkaga nẽ Jejus kôt amnhĩ nhĩpêx rãhã ho pa. Nẽ mrymnuti karõ ho sãnti mã mex ã harẽnh kêt rãhã ty nẽ kaxkwa hwỳr api. Jakamã nhũm Tĩrtũm amnhĩ tã mẽ omu nẽ mẽ kãm wiorãwti hkwỳ gõ nhũm mẽ piitã hamỳ nẽ gô rax mỳ ri ho kuhê. 
\p  
\v 3 Hãmri nẽ Tĩrtũm mã tanhmã amnhĩ to ho pa xwỳnh pê Mojes mẽ mẽ pahte amnhĩ tomnuj pãnhã amnhĩrer xwỳnhta wa kot Tĩrtũm mã grerta nhũm mẽ Tĩrtũm mã ho grer o kuhê nẽ grer o: 
\q1 E Pahi Maati Tĩrtũm. Na pa mẽ ra inhmex pê awỳr ixàpir pa. 
\q1 Ãm hãmri na ka hte tanhmã amnhĩ nhĩpêx to ho ri apa. 
\q1 Aa tanhmã axêx to hkêt. 
\q1 Nẽ mẽ ixrom axihtỳx o axihtỳx. 
\q1 Nẽ mẽ ixrom axàhpumunh o axàhpumunh. 
\q1 Jakamã na ka hte mẽ inhmã aa mẽ ixte mẽmoj pumunh kêt kwỳ ho anhỹr o apa. 
\q1 Pika piitã hkôt ahpỹnhã mẽ ho amnhĩptàr xwỳnhjê nhõ Pahi Maati na ka. 
\q1 Nẽ ate tãm amnhĩ nhĩpêx xwỳnh na ka. 
\q1  
\v 4 Jakamã na htem piitã atã hpijaàm o pa. 
\q1 Nẽ amã mẽ kapẽr xàptàr pix o amã kapẽr. 
\q1 Nẽ amã amex o amex ã ajarẽnh rãhã nẽ. Ãm hãmri mẽ ixrom kapxipix amex o amex. 
\q1 Jakamã koja ahpỹnhã pika piitã hkôt akrajê piitã ate tãm amnhĩ nhĩpêx nẽ tãm mẽ piitã tanhmã mẽ harẽnh to hã ajarẽnh ma nẽ awỳr mra nẽ akutã hkõn krã ho rôrôk nẽ hkrĩ nẽ amã amex o amex ã ajarẽ. Anẽ. 
\s1 Mẽ homnu xà hã xijere jamỳnh xwỳnh jarẽnh 
\p  
\v 5 Tã na pa axte mẽmoj pumu. Kaxkwa kamã Tĩrtũm nhõrkwỹ hã hitom xà piitã amnhĩ kahê xà rẽ nẽ kuhê pa omu. Nẽ ixkre kamã õ hitom mex maati haxwỳja amnhĩ kahê xà mẽ nẽ xa. 
\p  
\v 6 Hãmri nhũm ixkreja rũm Tĩrtũm kapẽr o mẽ wrỳk xwỳnh pê 7jaja hapôj nẽ kuhê. Mẽ ê hakajre nẽ hirã htỳx kumrẽx. Nẽ mẽ hinô pre xàja ôr pix o. Nẽ piitã Tĩrtũm mã tanhmã kot mẽ homnuj to xà hã xijere pê 7ta jamỳnh kaxyw kuhê. 
\p  
\v 7 Hãmri nhũm mẽmoj tĩr pê kwatjê õja mẽ kãm xijere hkwỳ jamỳ nẽ mẽ hwỳr o tẽ. Xijere kêp 7 nẽ piitã ôr o. Nhũm hamỳ nẽ Tĩrtũm kapẽr o mẽ wrỳk xwỳnhtajê hwỳr o tẽ nẽ ho mẽ hipêx nhũm mẽ ahpỹnhã hamỳ. Xijere kamã Tĩrtũm gryk xà jamỳ nẽ o kuhê. 
\p  
\v 8 Pu nhũm Tĩrtũm rũm kuwy hkũm hapôj. Tĩrtũm mex nẽ hihtỳx xwỳnhta rũm hapôx rax o ixkreta kunor pa nhũm mẽ tee ri hwỳr gjêx prãm kaprỳ. 
\c 16  
\s1 Xijere kamã mẽ homnu xà pê 7 jarẽnh 
\p  
\v 1 Tã pa arĩ mẽmoj pumu nhũm Tĩrtũm nhõrkwỹ kamã mẽhõja kapẽr o wrỳk xwỳnh pê 7jê mã kàx pê kapẽr nẽ mẽ kãm: 
\p —E na pa ra mẽ kot ixkapẽr kwỳm ri amnhĩ nhĩpêx xwỳnhjê pumu nhũm ixpê ja omnuj tỳx o ixpê omnuj tỳx. Jakamã e mẽ anhõ xijereta jamỳ nẽ ma pika hwỳr mẽ hwỳr wrỳ nẽ axpẽn pãnhã mẽ hã xijere kamã mẽ homnu xà kapĩ. E mẽ tokyx ma mẽ hwỳr wrỳ. Anẽ. 
\p  
\v 2 Hãmri nhũm mẽ kuma nẽ axpẽn pãnhã mẽ hwỳr wrỳ. Nhũm wamta kumrẽx pika piitã hkôt mẽ homnu xàta kapĩ. Pu nhũm mẽ kot mrymnuti mẽ õ sãnti wa kãm mex ã harẽnh nẽ amnhĩ tã wa hixi jaxwỳr xwỳnh piitã hkànhy hpa nẽ à htỳx kumrẽx nẽ ri pa. 
\p  
\v 3 Hãmri nhũm wamta kôt hõja õ xijere py nẽ gô xujanãr kãm hkapĩr pa nhũm gô te mẽ htykjê kamrô pyrà nẽ kamã mẽmo mry htyyxà rẽnh xwỳnh piitã pikaprãr pa. 
\p  
\v 4 Tã ra xijere kapĩr xwỳnh o axkrut nẽ õ xijere kapĩ hãmri nhũm hkôt hõta õ xijere py nẽ hpãnhã gô hkryre piitã hkôt hkapĩr pa. Pyhti nẽ ri hino piitã hkôt hkapĩr pa nhũm piitã gô xujanãr pyrà nẽ mẽ hkamrô hã amnhĩ jahkre hpa. 
\p  
\v 5 Hãmri nhũm axtem Tĩrtũm kapẽr o mẽ wrỳk xwỳnhjê hõ kot kãm gô piitã hamãr xwỳnhta ja hã omu nẽ Tĩrtũm mã kãm: 
\q1 Pa amex rãhã apa ho apa xwỳnh. Nẽ arãhã apa ho apa xwỳnh. 
\q1 Nà ãm hãmri na ka ã mẽ kêp gôta nhĩpêx anẽ. 
\q1  
\v 6 Na prem mẽ kot akôt amnhĩ nhĩpêx xwỳnhjê mẽ mẽ kãm ri akapẽr jarẽnh xwỳnhjê hpar o pa nhũm mẽ hkamrô hpikapĩr rax nẽ. 
\q1 Tã ka ra mẽ hã mẽ kêp mẽ hkõm xà homnu hpa nhũm mẽ kêp mẽ hkamrô ã amnhĩ jahkre nhũm mẽ tee ri ho hkõm mã. Nà ãm hãmri na ka ã mẽ kêp gô nhĩpêx anẽ Tĩrtũm. Anẽ. 
\m  
\v 7 Hãmri nhũm mẽ kot Tĩrtũm mã mẽmoj nhõr xà hã mêsti hpar pê hkrĩ xwỳnhjê hõja kuma nẽ kãm: 
\q1 Nà ãm hãmri na ã ajarẽnh anẽ Tĩrtũm. 
\q1 Ãm hãmri na ka ã akrajê hã mẽ hipêx anẽ. 
\q1 Ra ate mẽ hã amnhĩ jarẽnh xà hkôt na ka hte tanhmã mẽ hipêx to. 
\q1 Nà apê mẽ inhõ Tĩrtũm Maati na ka. Mẽ ixrom axihtỳx o axihtỳx nẽ axàhpumunh o axàhpumunh. Anẽ. 
\m  
\v 8 Tã ra axkrunẽpxi nẽ õ xijere kapĩ. Jakamã nhũm mẽ hpãnhã hõja õ xijere o tẽ nẽ myyti hã hkapĩr pa nhũm hkagro htỳx nẽ pika hkôt mẽ pa xwỳnhjê hkà ho hxêt o pa. 
\p  
\v 9 Kagro htỳx o hkagro htỳx jakamã mẽ hkà ho hxêt nhũm mẽ kamã hkà kajê hpa. Hãmri nẽ tee ri amnhĩ pumu nẽ hamaxpẽr o: 
\p —Nà Tĩrtũmtija na ã mẽ pahtomnuj tỳx anẽ. Anẽ. 
\p Hãmri nẽ kamã gryk tỳx nẽ haprỳ nẽ tanhmã ho kapẽr punuj to ho pa. Nom mẽ kot amnhĩ tomnuj kaga nẽ kãm mex o mex ã harẽnh kêt nẽ arĩ tanhmã amnhĩ tomnuj to ho pa. 
\p  
\v 10 Nhũm ra kêp kwat nẽ õ xijere kamã mẽmojja kapĩ. Jakamã nhũm ra hpãnhã hõja õ xijere o tẽ nẽ gôj rũm mrymnuti kot mẽ ho amnhĩptàr xà hã hkrĩ xà hã hkapĩr pa. Jakamã nhũm ra kot mẽ ho amnhĩptàr xà hã pikaja kamã kamàt kô htyk par kumrẽx. Hãmri nhũm mrymnuti mẽ hkôt mẽ kot amnhĩ nhĩpêx xwỳnhjê hã kamàt kô hpa nhũm mẽ amnhĩ xà htỳx ã maj amnhĩ nham o axpẽn kamnhar tỳx kumrẽx.  
\v 11 Nẽ ã Tĩrtũm kot mẽ hipêx anhỹr ã amnhĩ tã omu nẽ kamã gryk tỳx nẽ tanhmã ho kapẽr punuj to ho pa. No ãm kot amnhĩ tomnuj xwỳnh ã amnhĩ pumunh nẽ kot amnhĩ tomnuj kaga hkêt nẽ. 
\p  
\v 12 Nhũm prem ra kêp sĩk nẽ õ xijere kamã mẽmoj kapĩ. Jakamã nhũm hpãnhã hõja õ xijere kamã mẽmojta o tẽ nẽ pyhti pê Erax kamã hkapĩr pa nhũm gôja grà pa nẽ te kêp pry pyrà nẽ nõ. Jakamã nhũm myt japôx xà rũm mẽ ho amnhĩptàr xwỳnhjaja nẽ pôristijaja hãmri pijapu kaxyw Jerujarẽ hwỳr nojarêt nẽ hã hwỳr pa. 
\p  
\v 13 Tã nhũm kagãmnuti mẽ ỹ hã mẽ kãm hêx o pa xwỳnh mẽ mrymnutita wa mẽ hakwa rũm mẽmoj te priti pyrà nẽ hapôx o pa. No ãm priti hkêt mẽ kêp Satanasti mã mẽ àpênh xwỳnh kwỳỳ. 
\p  
\v 14 Jakamã na prem pika piitã hkôt mẽ kot aa mẽmoj pumunh kêt kwỳ ho anhỹr o hêx rom mẽ no kupyr o mẽ hkôt pa. Tã pika piitã hkôt mẽ ho amnhĩptàr xwỳnhjê mẽ ho pikuprõnh kaxyw mẽ hapêr o pa. Mẽ kot Tĩrtũm xihtỳx o hihtỳx kurê kaxàr kaxyw mẽ pijapu xà hã arĩgro kukamã mẽ ho pikuprõnh o pa. 
\s1 Jejus kot amnhĩ kwỳjê mã kapẽr ã harẽnh 
\p  
\v 15 Tã nhũm Jejus pika hkôt hkrajaja arĩ mẽ htĩr nẽ pa xwỳnhjê mã kapẽr nẽ mẽ kãm: 
\q1 E mẽ inhma ixkwỳjaja. Akupỹm ixte mẽ awỳr ixwrỳk xà hã arĩgroja ã kot paj te mẽ àhkĩnh xwỳnh kot amnhĩ nhĩpêx pyrà nẽ mẽ ajaêr pê mẽ awỳr wrỳ. Jakamã kêr ka mẽ amnhĩ wỳr ijamãr rãhã ho apa. Kêr pa akupỹn wrỳ ka mẽ amnhĩ wỳr ixpumu nẽ akĩnh nẽ amnhĩ kamã amã ixpuma hkêt nẽ. Anẽ. 
\s1 Mẽ kot axpẽn kurê kaxàr kaxyw mẽ pikuprõnh ã mẽ harẽnh 
\p  
\v 16 Tã nhũm Satanasti hkwỳjaja pika piitã hkôt mẽ ho amnhĩptàr xwỳnhjê ho pikuprõnh pa nẽ mẽ hkurê kaxàr kaxyw ma Ijaew kot kãm “Amaketõ” jarẽnhja wỳr mra. 
\p  
\v 17 Hãmri nhũm Tĩrtũm kapẽr o mẽ wrỳk xwỳnh pê 7 kot hitepta õ xijere py nẽ kàx mã kamã mẽmoj kapĩr pa. Jakamã nhũm Tĩrtũm nhõrkwỹ kamã mẽ ho amnhĩptàr ã hkrĩ xà rũm Tĩrtũm kàx pê kapẽr o: 
\p —E hãmri. Na pa ra mẽ kot amnhĩ tomnuj mỳrapê tanhmã mẽ ho jatur xàm mẽnh kaxyw. Anẽ. 
\p  
\v 18 Pu nhũm na hkatõtõk nẽ hkrakrak nẽ haxênh nhũm pika htertet tỳx nẽ. Aa mẽ kot pika htertet tỳx kot anhỹr ã omunh kêt kumrẽx. 
\p  
\v 19 Jakamã nhũm Papirõnja kajê axkrunẽpxi. Papirõn nhõ xwỳnhjaja kot amnhĩ tomnuj tỳx o paja mỳrapê nhũm Tĩrtũm ã mẽ hipêx anẽ. Nẽ pika htertet o pika piitã hkôt krĩ grành pa.  
\v 20 Nhũm gô hipôk piitã gôja hã axkamur nhũm hapêx pa. Nẽ kẽn prêk nẽ hkrã hixêt rôrôk nẽ hpigrành pa. Pika htertet tỳx kumrẽx jakamã ã mẽmoj amnhĩ nhĩpêx anẽ.  
\v 21 Nẽ na mê pê jêr krã jakootija mẽ piitã mẽ hipy rôrôk. No ãm hkrã hkryre hkêt hkrã rũnh kumrẽx. Ãm hpỹnh nẽ kamã kêp 40 kir nẽ mẽ hã rôrôk nhũm mẽ tee ri amnhĩ tã ã omu nẽ Tĩrtũm kamã gryk tỳx nẽ haprỳ nẽ ho kapẽr punuj nẽ. 
\c 17  
\s1 Tĩrtũm kra hkêt xwỳnhjê jarẽnh 
\p  
\v 1 Tã pa pre kê axte mẽmoj pumu. Nhũm kot xijere jamỳnh xwỳnhjê hõja ixwỳr tẽ nẽ inhmã: 
\p —E ma ixkôt tẽ nẽ mẽmoj pumu. Anẽ. 
\p Hãmri pa kuma nẽ ma hkôt tẽ nhũm inhmã: 
\p —Nà ahpỹnhã gô rax mỳri krĩ nhõ xwỳnhjaja te ho ni hkuprỳ gô mỳ ri ỹr nẽ kãm mẽmyjê piitã hkĩnh o ỹr xwỳnhta pyràk. Na htem uràk nẽ Tĩrtũm kapẽr kôt ri amnhĩ nhĩpêx kêt nẽ. Ãm htỳx ri tanhmã amnhĩ tomnuj to ho pa. Jakamã koja Tĩrtũm tanhmã mẽ homnuj tỳx to nẽ mẽ ho hapêx.  
\v 2 Krĩ piitã hkôt mẽ ho amnhĩptàr xwỳnhjaja na hte ma mẽ õ krĩ hwỳr mra nẽ te mẽ kot mẽ hkuprỳjê ho amnhĩkati pyràk o amnhĩ nhĩpêx. Nẽ te pipãnh nẽ htỳx ri amnhĩ nhĩpêx pyràk o amnhĩ nhĩpêx o pa. Nhũm krĩ nhõ xwỳnhjaja mẽ uràk nẽ amnhĩ krã hkôt pix mã tanhmã amnhĩ tomnuj to ho ri pa. E ma ixkôt tẽ nẽ ja hã mẽ omu. Anẽ. 
\p  
\v 3-4 Hãmri nhũm Tĩrtũm Karõ tanhmã ixto nhũm kapẽr o wrỳk xwỳnhja ma kapôt wỳr ixto mõ pa kapôt ã mrymnuti hkrã kêp 7 nẽ kamã hpàr kêp 10 xwỳnhta pumu nhũm hkamrêêti nẽ xa. Nẽ ĩ piitã hã tanhmã Tĩrtũm o kapẽr punuj to hã kagà. Nhũm katut ã mẽhõ ni kuprỳta nhỹ. Mẽ ho amnhĩptàr xwỳnh ã mẽ ê kakrã htyk nẽ hkamrêk o hkukàr jaxà nẽ hã nhỹ. Nẽ ôr o õkrexê. Nẽ ôr o hinwỳỳxê nẽ ĩhkra kamã kàx. Ãm ôr pix o hikukrêx. Nẽ kẽn mex karỳr pix o amnhĩ jamrêx. Nẽ ôr o kopti hõ py nẽ hã nhỹ. Kopti kamã ni kuprỳ kot amnhĩ tomnuj xà. Ãm kot mẽ kêp mẽ mjên o amnhĩkati ho pa xà pix nhũm kupy nẽ o nhỹ. 
\p  
\v 5 Nẽ õkrã hã amnhĩ nhĩxi hã kagà kot: 
\q1 Inhĩxi pimxur pê \sc PAPIRÕN RAXTI\sc*. 
\q1 Nẽ ixpê mẽ kêp mẽ mjênjê ho amnhĩkati ho mẽ pa xwỳnhjê nã na pa. 
\q1 Nẽ ixpê mẽ kot axpẽn prõ ho amnhĩkati o mẽ pa xwỳnhjê nã na pa. 
\q1 Nẽ ixpê mẽ kot Tĩrtũm nê mẽ kãm hêx o ri mẽ pa xwỳnhjê nã na pa. 
\q1 Nẽ ixpê mẽ kot Tĩrtũm kapẽr kôt amnhĩ nhĩpêx o pa hkêt xwỳnhjê nã na pa. 
\m Anhỹr o õkrã hã amnhĩ nhĩxi hã kagà kot anhỹr.  
\v 6 Nhũm axpã nẽ nhỹ pa omu. No ãm kagôxỳhti ho hpipãnh kêt. Mẽ kot Jejus kôt amnhĩ xunhwỳr nẽ ri mẽ kãm Jejus kêp mẽ õ pahihti hã harẽnh xwỳnhjê kamnhwỳr o mẽ hpar nhũm mẽ hkamrô pikapĩr xwỳnhjê kamrô ho na pre axpã nẽ nhỹ. Pa ã kot amnhĩ nhĩpêx anhỹr ã omu nẽ tee ri ijamaxpẽr. 
\p  
\v 7 Hãmri nhũm Tĩrtũm kapẽr o wrỳk xwỳnhja inhmã: 
\p —Kwa mon ka ri ja pumu nẽ tee ri ajamaxpẽr? E kot paj ixprĩ hã amã harẽ ka inhma. Niti mẽ hã ỹr xwỳnh pê mrymnutita. Krã pê 7 nẽ kamã hpàr pê 10 xwỳnhta kot paj ixprĩ hã amã hamẽ wa harẽ ka wa harẽnh ma. 
\p  
\v 8 —Nà mrymnutija na pre htĩr nẽ ri pa tã ty nẽ ahkre xupỳmti kamã hikwỹ. Nom koja akupỹm htĩr nẽ kurũm kato nhũm mẽ piitã omu nẽ ahpỹnhã tanhmã hamaxpẽr to. Amnepêm kormã amrakati ri Tĩrtũm kot õ kagà kamã mẽ htĩr tũm nẽ mẽ pa mã xwỳnhjê nhĩxi jaxwỳr xwỳnhjaja koja kator ã omu nẽ ãm omu nẽ tanhmã hamaxpẽr to hkêt nẽ. No mẽ kot Jejus kôt amnhĩ xunhwỳr kêt xwỳnhjaja koja mẽ amnhĩ jaêr pê akupỹm kator ã omu nẽ tee ri hkukamã hamaxpẽr. Hãmri nẽ axpẽn mã: “Kwa amnepêm htyk tã ra tanhmã amnhĩ to nẽ akupỹm htĩr nẽ api nẽ mõ.” Anhỹr o axpẽn mã harẽ. Hãmri nhũm kato nẽ ma tẽ nhũm Tĩrtũm tã ho hapêx kumrẽx nhũm hapêx o hapêx. 
\p  
\v 9 —Kwa inhma nẽ jam ajamaxpẽr tỳx nẽ. Mrymnuti krã pê 7ta te kêp hixêt prêk pê 7 pyrà nẽ hã ỹr xwỳnh ni kuprỳta te hixêt prêk pê 7ta ã ỹr pyràk. 
\p  
\v 10 —Nẽ mrymnuti hkrã pê 7ja te kêp mẽ ho amnhĩptàr xwỳnh pê 7 pyràk. Nhũm mẽ ho amnhĩptàr xwỳnhjaja te mẽ kêp 5 nẽ ra htyk pyràk nhũm hkôt hõja arĩ mẽ ho amnhĩptàr o pa. No kot hitepta kormã. Nom koja mẽ ho amnhĩptàr ry hkêt nẽ. 
\p  
\v 11 —Mrymnuti htĩr nẽ pa htã htyk nẽ ra akupỹm htĩr nẽ àpir xwỳnhta koja hkrã hitepta pãnhã mẽ ho amnhĩptàr o pa. Jakamã te mẽ ho amnhĩptàr xwỳnh pê 7jê hõ pyràk. Koja hkrã pê 7ja mẽ ho amnhĩptà nẽ gaa nẽ htyk mẽ nhũm hpãnhã mrymnutita hpãnhã mẽ ho amnhĩptà. Hãmri nhũm rĩ kormã Tĩrtũm tã mẽ ho hapêx par kumrẽx. 
\p  
\v 12 —Nẽ ate mrymnuti hkrã kamã pàr pê 10 pumunh xwỳnhta te mẽ kêp mẽ ho amnhĩptàr xwỳnh pê 10 pyràk. No ãm jaja na kormã mẽ ho amnhĩptàr kêt nẽ. Koja mẽ nhỹrmã anhĩpê mrymnuti nhỹ hã ahpỹnhã ri mẽ ho amnhĩptàr o pa nom mẽ ho amnhĩptàr japjê hkêt nẽ.  
\v 13 Koja mẽ tanhmã ja hã axpẽn mar to hãmri nẽ mrymnuti mã anẽ nhũm mẽ hpãnhã mẽ piitã mẽ ho amnhĩptà. 
\p  
\v 14 —Nẽ mẽ ho amnhĩptàr xwỳnh pê 10jaja koja mẽ pahte amnhĩ tomnuj pãnhã amnhĩrer xwỳnh kurê kaxàr kaxyw hwỳr mra nẽ kutã pijapu ho kuhê. No ãm tee ri kãm tanhmã ho hprãm hkaprỳ nhũm mẽ ho axtem nẽ amnhĩ tã mẽ himex pa. Hihtỳx o hihtỳx o kot mẽ ho hpimrààtã mẽ hakrenh par. Nẽ kêp pika piitã hkôt mẽ ho amnhĩptàr xwỳnhjê nhõ Pahihti. Tãm na pre amnhĩ wỳr mẽ kot hkôt amnhĩ nhĩpêx o mẽ pa xwỳnhjê wỳ nhũm htem amnhĩ kaxyw hkôt hamaxpẽr mex rãhã ho pa.  
\v 15 —Nẽ krĩ pê Papirõn kapem gô xohtô mỳ ri ni kuprỳ hkrĩ xwỳnhta. Gô xohtôja te kêp ahpỹnhã ri pika piitã hkôt mẽ uro hkwỳ pyràk. Nẽ te ahpỹnhã ri mẽ kapẽr xwỳnh kwỳ pyràk. 
\p  
\v 16 —Nẽ mrymnuti hpàr pê 10ta kêp mẽ ho amnhĩptàr xwỳnh pê 10 pyràk. Jakamã koja mẽ kãm ni kuprỳta prãm nõkati nẽ kamã gryk tỳx kumrẽx. Hãmri nẽ hwỳr mra nẽ kêp hikukrêx piitã utà nẽ kêp ê hkwrỳnh pa nhũm hkênh mex nẽ xa. Hãmri nhũm mẽ kupĩ nẽ ĩ hkrẽr pa nẽ kuwy kamã hi rẽ nhũm kaxàr pa nẽ hapêx. 
\p  
\v 17 —Na pre pahi pê 10jaja mrymnuti hkôt amnhĩ xunhwỳ nhũm Tĩrtũm ãm ja hã mẽ omu nẽ tanhmã nê mẽ kãm nẽ hkêt nẽ. Jakamã koja mẽ ãm hkôt pix mã amnhĩ nhĩpêx o pa rãhã nhũm Tĩrtũm mẽ ho hapêx. Nẽ mẽ õ krĩ mẽ mẽ ho hpimrààtã mẽ ho hapêx pa. Hãmri nẽ mẽ ho hapêx o mẽ ho hapêx. 
\p  
\v 18 —Nẽ ate mẽhõ ni kuprỳ pumunh xwỳnhta te kêp krĩ rax pê Papirõn nhõ xwỳnhjê pyràk. Nẽ mẽ ho amnhĩptàr xwỳnhja pika piitã hkôt mẽ ho amnhĩptàr xwỳnhjê hkrãhtũm na. Anẽ. 
\p à Tĩrtũm kapẽr o mẽ wrỳk xwỳnhja inhmã mẽ harẽnh anẽ. Pa kuma nẽ ô ri mẽ amã hã kagà. Mẽ ate kamã harẽnh nẽ aprĩ hã mar tỳx kaxyw. 
\c 18  
\s1 Tĩrtũm kot Papirõn grành par ã harẽnh 
\p  
\v 1 Tã pa kê axte mẽmoj pumu. Nhũm axte Tĩrtũm kapẽr o mẽ wrỳk xwỳnhjê hõja kaxkwa rũm ahpar mã wrỳk o tẽ. Tĩrtũm nhỹ hã hihtỳx nẽ kamã hirã rax kumrẽx o pika piitã hkôt mẽ kãm hirã pa.  
\v 2 Nẽ ahpar mã tẽn wrỳ nẽ kàx pê kapẽr o: 
\q1 E koja Papirõnja pigrành pa nẽ hpãnhã kêp Satanasti mã mẽ àpênh xwỳnhjê papxà nẽ kêp nhônhti papxà. Hãmri nẽ aa kamã mẽmoj mex kêt kumrẽx. 
\q1  
\v 3 Krĩ nhõ xwỳnhjaja na htem Tĩrtũm kapẽr kôt amnhĩ nhĩpêx kêt nẽ amnhĩ krã hkôt kãm prãm xà hkôt pix mã tanhmã amnhĩ tomnuj to ho pa. Te mẽhõ pipãnh nẽ htỳx ri amnhĩ nhĩpêx o pa pyràk. 
\q1 Nhũm krĩ piitã hkôt mẽ ho amnhĩptàr xwỳnhjaja mẽ hwỳr mra nẽ mẽnijê ho amnhĩkati ho pa. 
\q1 Nẽ krĩ nhõ xwỳnhjaja mẽmoj pumu nẽ kãm hkĩnh nẽ haprôr kurê kumrẽx o pa nẽ aa ujaprôr o hapêx kêt nẽ. 
\q1 Jakamã na hte krĩ hkwỳ nhõ xwỳnhjaja mẽ hwỳr mẽmoj to pa nẽ xatã mẽ kãm ho wẽnê nẽ mẽ kukwak ri mẽ hikàxpore rũnh nẽ pa. 
\m Anhỹr o kapẽr.  
\v 4 Hãmri nhũm Tĩrtũm Papirõn kamã hkrajê mã kapẽr nẽ mẽ kãm: 
\q1 E mẽ tokyx mẽ kot ri htỳx amnhĩ nhĩpêx xwỳnhjê nhõ krĩta rũm ajapôj ixkrajaja. 
\q1 Kot kaj mẽ anhỹr kêt nẽ ra mẽ hkôt amnhĩ nhĩpêx pa mẽ ato apimrààtã mẽ ate amnhĩ tomnuj ã mẽ atomnuj tỳx nẽ. 
\q1  
\v 5 Krĩ nhõ xwỳnhjaja na htem amnhĩ tomnuj rũnh o pa. 
\q1 Mẽ kot amnhĩ tomnuj xà te mẽ kot kẽn katutxô nhũm hprêk rax o kot kaxkwa kanhwỳr kaxyw pyràk. 
\q1 Na pa hte ã mẽ kot amnhĩ nhĩpêx anhỹr ã mẽ omunh rãhã ho ri ixpa. Jakamã kwa ixkrajaja mẽ tokyx mẽ kurũm ajapôj. 
\m Anhỹr o hkrajê mã kapẽr. Hãmri nẽ kapẽr o mẽ wrỳk xwỳnhjê mã kãm: 
\q1  
\v 6 E kwa mẽ ma mẽ hwỳr wrỳ nẽ tanhmã ixkrajê hã mẽ ho. 
\q1 No ãm kêr ka mẽ tanhmã mẽ ho htỳx o mẽ kot ra tanhmã ixpê ixkrajê nhĩpêx tota jakre. 
\q1 Kê mẽ tanhmã ixpê mẽ ho grire htã ka mẽ hã tanhmã mẽ ho htỳx kumrẽx o mẽ kot mẽ hipêxta jakre. 
\q1  
\v 7 Krĩ nhõ xwỳnhjaja na prem mex nẽ pa. 
\q1 Nẽ mẽ hikukrêx rũnh nẽ hkĩnh nẽ pa. 
\q1 Nẽ tanhmã amnhĩ to jarkrar to ho ri pa nẽ amnhĩ jarẽnh o: 
\q1 “Ot pa mẽ te pahi ni kot amnhĩ nhĩpêxta pyrà nẽ ixkrĩ xà mex pix kãm ixkrĩ pyràk. 
\q1 Nẽ te Tĩrtũm kot amnhĩ nhĩpêx pyràk o na pa htem amnhĩ nhĩpêx o ri ixpa. 
\q1 Nẽ mẽ ixkĩnh nẽ mẽ inhmex rãhã ri ixpa. 
\q1 Ã mẽ ixte amnhĩ nhĩpêx anhỹr xwỳnh na pa mẽ.” 
\q1 Anhỹr ã amnhĩ to jarkrar o pa. 
\q1 Tã kêr ka mẽ tanhmã mẽ homnuj to kê mẽ mexta pãnhã omnuj tỳx nẽ pa. 
\q1 Nẽ kê mẽ hkaprĩ nẽ amnhĩ xà htỳx kãm hamak rãhã nẽ pa ho pa. 
\q1  
\v 8 E kê mẽ ã amnhĩ nhĩpêx anhỹr o pa. 
\q1 Jakamã koja mẽ arĩgro hpỹnh kãm mẽ hkwỳjaja hpikaprãr rũnh nẽ nhũm arĩ mẽ htĩr xwỳnhjaja omnuj nẽ pa. 
\q1 Nẽ tee ri amnhĩ pumu nẽ hkaprĩ xàj mỳr o pa. 
\q1 Nẽ amnhĩ xà htỳx kãm hamak o pa. 
\q1 Nẽ tee ri amnhĩ nhĩpêx o pa. 
\q1 Nẽ kãm prãm nẽ pa rãhã ty nhũm kuwy mẽ ho hkaxàr pa. 
\q1 Ixpê Pahi Maati Tĩrtũm kot paj ixihtỳx kãm ã mẽ hipêx anẽ. Anẽ. 
\m  
\v 9 Hãmri nhũm krĩ piitã kurũm mẽ ho amnhĩptàr xwỳnhjaja. Mẽ kot mẽ hwỳr mrar nẽ mẽ hkuprỳjê ho amnhĩkati nẽ mẽ uràk nẽ mẽmoj pumunh nẽ haprôr rãhã ho pa xwỳnhjaja tee ri krĩ kaxàr nẽ kàx mã kuwy hkũm àpir o paja pumu nẽ hkaprĩ nẽ mỳr o kuhê. 
\p  
\v 10 Nẽ Tĩrtũm kot mẽ ho hapêx par ã mẽ omu nẽ kãm ma htỳx kumrẽx. Amỳm mẽ omunh o kuhê nẽ tee ri amnhĩ kukamã hamaxpẽr nẽ htertet tỳx nẽ. Nẽ mỳr kãm kapẽr o: 
\q1 Hêxta waa nẽ Papirõn nhõ xwỳnhjaja. 
\q1 Mẽ amex nẽ axihtỳx mex nẽ apa htã nhũm Tĩrtũm mẽ anhĩmex pa. Hêxta waa nẽ. Anẽ. 
\m  
\v 11 Nẽ mẽ hwỳr mrar nẽ mẽ kãm mẽmoj to wẽnê ho mẽ pa xwỳnhjaja haxwỳja krĩ pumu nẽ tee ri amnhĩ kukamã hamaxpẽr nẽ hkaprĩ nẽ mỳr o kuhê. Nhỹri koja mẽ tokyx axte mẽmoj to wẽnê? Mẽ kêp mẽmoj japrôr rũnh xwỳnhjaja hkaxàr par kumrẽx kênã. 
\p  
\v 12 Na prem mẽmoj piitã ho pa nẽ mẽ kãm ho wẽnê. Mẽmoj mex piitã. ôr o mẽ hkukrêx nẽ prat o mẽ hkukrêx nẽ kẽn jaxênh ã kàxpore xohtôô. Nẽ kupẽxê mex. Kakrã htyk nẽ hkamrêk nẽ hkroore nẽ hã hapjê. Nẽ mẽmo pĩ kuxware nẽ pĩ htỳx nẽ kẽn jakàr nẽ kàx o ri mẽmo nhĩpêxja nhũm prem mẽ kãm ho wẽnê ho pa.  
\v 13 Nẽ mẽmo htwỳm nẽ mẽ hkuxwa xà. Nẽ mẽ õ ho ành xà nẽ mẽ õ kuxwa xà nẽ xwỳgrà nẽ harôj. Nẽ môx nẽ ôwêhti nẽ kawar nẽ kaxyw kawarti hkjênh xà hã karrotre. Nẽ nhỹhỹnh krĩ hõ kamã panhĩ hkwỳ pynê nẽ mẽ hwỳr mẽ o pa nẽ mẽ kãm mẽ ho wẽnê nhũm mẽ amarĩ mẽ hkôt ri àpênh rũnh o pa. Na prem ã mẽ kãm mẽmoj to wẽnê anhỹr o pa. Tã ra mẽ kot mẽ haprôr xwỳnh mẽ mẽ pimrààtã hapêx pa. 
\p  
\v 14 Jakamã nhũm mẽ tee ri mẽ hkukamã hamaxpẽr nẽ te kot mẽ kãm kapẽr pyrà nẽ mẽ kãm: 
\q1 Hêxta waa nẽ. Mẽ amã mẽmoj prãm nẽ amnhĩm haprôr xwỳnhta na mẽ apê hapêx par kumrẽx. 
\q1 Nẽ mẽ akàxpore rũnh nẽ mẽ akukrêx rũnhta mẽ mẽ apimrààtã ajapêx pa. Kot kaj mẽ axte tanhmã amnhĩ nhĩpêx to ho apa hkêt nẽ. Anẽ. 
\m  
\v 15 Hãmri nẽ amỳm ri Tĩrtũm kot tanhmã mẽ hipêx to hã mẽ omu nẽ kãm ma xàj mur nẽ htertet o kuhê. 
\p  
\v 16 Nẽ mỳr kãm kapẽr o: 
\q1 Hêxta waa nẽ. Na pre htem ê mex pix jagjê nẽ ri hã mra. Kakrã htykre nẽ hkamrêkre. 
\q1 Nẽ mẽ hikukrêx mex o amnhĩ jamrêx nẽ ri hã mra. 
\q1 Nẽ ôr nẽ kẽn mex ã ohtô xwỳnh o amnhĩ jamrêx nẽ ri hã mra. 
\q1  
\v 17 Tã ra hapêx par kumrẽx. Anẽ. 
\m Hãmri nhũm gô xujanãr kãm pàr nhõ dõn nẽ mẽ kot mẽ kãm pàr o ri mrar xwỳnhjaja nẽ mẽ kot kamã tep pynênh xà ho tep pynênh o ri mẽ pa xwỳnhjaja nẽ pàr kãm amarĩ mẽ pa xwỳnhjaja hãmri mẽ hwỳr mra nẽ wamtajê pyrà nẽ tee ri amỳm ri mẽ õ krĩ pumu nẽ mỳr o kuhê.  
\v 18 Nẽ kurũm kuwy hkũm xàpir o pa hã omu nẽ tee ri mẽ hkukamã hamaxpẽr nẽ axpẽn mã: 
\q1 Hêxta waa nẽ. Krĩ mũj na pre mex o mex. Mex o krĩ piitã hakrenh par htã hapêx pa. Anẽ. 
\m  
\v 19 Hãmri nẽ mur nẽ hkaprĩ xàj pika hkwỳ jamỳ nẽ ho amnhĩ kamĩ nẽ mỳr kãm kapẽr o: 
\q1 Hêxta waa nẽ. Krĩ mũj na pre rax o rax. 
\q1 Nhũm pre nhỹhỹnh pàr kãm mẽmoj to wẽnê ho pa xwỳnhjaja mẽ hwỳr mẽmoj to pa nẽ mẽ kãm ho wẽnê nẽ mẽ hkukwak ri hikàxpore rũnh nẽ ri pa. 
\q1 Tã hãmri mẽ hapêx pa. Anẽ. 
\p  
\v 20 Hãmri nhũm Tĩrtũmja krajê piitã mẽ kãm kapẽr nẽ mẽ kãm: 
\q1 E ixpê Tĩrtũm na pa ã mẽ hipêx anẽ. 
\q1 Mẽ kot mẽ apê ixkrajaja tanhmã mẽ atomnuj to ho paja mỳrapê na pa mẽ atã ã mẽ hipêx anẽ. 
\q1 Jakamã e kaxkwa kamã mẽ apê ixri mẽ apa xwỳnhjaja. 
\q1 Nẽ mẽ ate inhỹ hã ri mẽ kãm ixkapẽr jarẽnh o mẽ apa xwỳnhjaja. 
\q1 Nẽ Jejus nhỹ hã mẽ akapẽr o ri mẽ apa xwỳnhjaja. Mẽ apiitã mẽ apê ixkra na ka mẽ. 
\q1 E mẽ amnhĩ tã ja pumu nẽ akĩnh nẽ axpẽn mã apikunhar o akuhê. Pa na pa mẽ atã ã mẽ ho ijapêx anẽ. Anẽ. 
\m  
\v 21 Tã nhũm kapẽr o mẽ wrỳk xwỳnhjê hõja hihtỳx o kẽn rax kumrẽxja mỳ nẽ o tẽ nẽ gô xujanãr kamã kãm gêt nẽ kumẽ nhũm mrõ nẽ akunok. Hãmri nhũm kapẽr o: 
\q1 E krĩta koja Tĩrtũm te ho ixte gôx kãm kẽn mẽnh nhũm mrõr nẽ hpikunor pyràk o hipêx nhũm hapêx par kumrẽx. 
\q1  
\v 22-24 Na pre hte krĩja kamã mẽ kot ri mẽ kãm mẽmoj to wẽnê xwỳnhjaja amnhĩ to rũnh o krĩ piitã hkôt mẽ hakrenh pa. 
\q1 Nẽ krĩ nhõ xwỳnhjaja na prem pika piitã hkôt hêx rom tanhmã mẽ no kupyr to ho ri pa. Jakamã ra mẽmoj to wẽnê xwỳnhjê pyrà nẽ mẽ hikukrêx rũnh gryk ã Tĩrtũm kaga. 
\q1 No ãm ja pix kêt. Tĩrtũm krajê mẽ Tĩrtũm nhỹ hã kapẽr o mẽ pa xwỳnhjaja na prem mẽ himex rax nẽ. Hãmri nhũm krĩ piitã kamã mẽ pa xwỳnhjaja mẽ kot mẽ hipêx ã mẽ omu nẽ mẽ uràk nẽ ã mẽ hipêx anhỹr o pa. 
\q1 Tã Papirõn nhõ xwỳnhjaja kot mẽ hipêx anhỹrja mỳrapê koja Tĩrtũm mẽ himex par kumrẽx. 
\q1 Jakamã koja mẽ axte hkĩnh nẽ hkĩnh xàj ri grer kêt nẽ. 
\q1 Nẽ axte hkĩnh nẽ grer kãm hakwa kôr o ri pa kêt nẽ. 
\q1 Nẽ axte ri wiorãw kakrênh hkêt nẽ. 
\q1 Nẽ axte ri amnhĩm kawà hyr o hkrĩ hkêt nẽ. 
\q1 Nẽ axte harôj kahuk o kuhê hkêt nẽ. 
\q1 Nẽ axte mẽ õrkwỹ kamã kanê hpôk kêt nẽ. 
\q1 Nẽ axte axpẽn mã ri hkrajê rer o ri pa hkêt nẽ. Koja ã mẽmoj kot anhỹr piitã hapêx pa. Anẽ. 
\c 19  
\s1 Mẽ kot Tĩrtũm mex ã mẽ harẽnh 
\p  
\v 1 Tã pa kê axte mẽmoj pumu. Nẽ kaxkwa kamã mẽ kapẽr ma nhũm mẽ ohtô rax kumrẽx nẽ tanhmã axpẽn mã kapẽr to. Nẽ anhĩpê kàx pê kapẽr tỳx nẽ kapẽr o: 
\q1 E pu mẽ pahpiitã Tĩrtũm mã mex o mex ã harẽ. 
\q1 Tapxipix na hihtỳx o hihtỳx. 
\q1 Nẽ tapxipix na àhpumunh o àhpumunh. 
\q1 Nẽ tapxipix na mex o mex. 
\q1 Tapxipix na mex o kot mẽmoj piitã hakrenh par. 
\q1 Ra kot mẽmoj punuj pê mẽ papytàr par jakamã kêp mẽ papytàr xwỳnh ã pixi mex na. 
\q1  
\v 2 Na hte amnhĩ jarẽnh xà hkôt tanhmã mẽmoj to ho pa. 
\q1 Nẽ amnhĩ to hêx kêt nẽ. 
\q1 Tã ãm hãmri na ã Papirõn nhõ xwỳnhjê nhĩpêx anẽ. 
\q1 Na prem mẽ kãm Tĩrtũm kapẽr jarẽnh o mẽ pa xwỳnhjê nhĩmex rax kumrẽx. 
\q1 Nẽ krĩ piitã hkôt ri pa nẽ amnhĩ kôt mẽ kurẽ nhũm mẽ kuma nẽ mẽ hkôt amnhĩ tomnuj o pa. 
\q1 Nhũm Tĩrtũm tee ri hã mẽ omu nẽ ã hkrajê hã mẽ hipêx kati anẽ. Ãm hãmri na ã mẽ hipêx anẽ. 
\m Anhỹr o axpẽn mã harẽ.  
\v 3 Hãmri nẽ xatã axpẽn mã: 
\q1 Nà ãm hãmri na ã mẽ panhõ Tĩrtũmja mẽ hipêx anẽ nhũm mẽ kurũm kuwy hkũm kàx mã àpir o pa. 
\q1 Koja krĩ nhõ xwỳnhjaja amnhĩ xà htỳx kamã hamak rãhã ho pa nẽ aa à htỳx hapêx kêt. 
\q1 E pu mẽ hã Tĩrtũm mã mex o mex ã harẽ. Anẽ. 
\m  
\v 4 Hãmri nhũm mẽ àptàr tũm pê 24 mẽ mẽmoj tĩr pê kwatjaja hãmri Tĩrtũm kot mẽ ho amnhĩptàr ã hkrĩ xà maati kutã rôrôk nẽ kãm hipô hpa. Hãmri nẽ ã mẽ kapẽr anhỹr xwỳnhjê mã kapẽr nẽ kãm: 
\q1 Nà ãm hãmri na ka mẽ ã Tĩrtũm mex ã harẽnh anẽ. E pu mẽ pahpiitã kãm mex o mex ã harẽ. Anẽ. 
\m  
\v 5 Hãmri nhũm mẽhõja Tĩrtũm krĩ xà maati kamã kapẽr o: 
\q1 E mẽ axte Tĩrtũm mã mex o mex ã harẽ. 
\q1 Mẽ ate Mẽpahpãm kôt amnhĩ nhĩpêx o mẽ apa xwỳnhjaja. 
\q1 Nẽ mẽ apê mẽ ho amnhĩptàr xwỳnhjaja nẽ amarĩ ri mẽ apa xwỳnhjaja nẽ mẽ apiitã mẽ ate Tĩrtũm ã apijaàm o mẽ apa xwỳnhjaja kãm mex o mex ã harẽ. Anẽ. 
\s1 Kot mẽ pahpãnhã amnhĩrer xwỳnh mẽ hkwỳjê jarẽnh 
\p  
\v 6 Tã pa tanhmã mẽ kapẽr to hã mẽ kuma nhũm mẽ kàx pê kapẽr tỳx nẽ. Te mẽ ohtô rax kumrẽx kapẽr pyràk. Nẽ te gô koko htỳx rỳ na katõtõk tỳx pyràk. Hãmri nẽ mẽ kapẽr o: 
\q1 E na ra Tĩrtũm kêp mẽmoj piitã ho amnhĩptàr xwỳnh. 
\q1 Nẽ kêp mẽ panhõ Pahi Maati. 
\q1 Nẽ hihtỳx o hihtỳx nẽ àhpumunh o àhpumunh. 
\q1 E pu mẽ kãm mex o mex ã mãn harẽ. 
\q1  
\v 7-8 Nẽ hã pahkĩnh nẽ. 
\q1 Nẽ kãm hihtỳx o hihtỳx ã harẽ. 
\q1 Te mẽ kot axpẽn mã mẽ rer xwỳnh kot amnhĩ nhĩpêx pyràk. 
\q1 Jao mẽ pahte amnhĩ tomnuj pãnhã amnhĩrer xwỳnhta te kêp myja pyràk. 
\q1 Nẽ mẽ kot hkôt amnhĩ nhĩpêx xwỳnh piitã te mẽ kêp nija pyràk. 
\q1 Nẽ te mẽ kot axpẽn mã wa rer nhũm wa kot axpẽn kôt pa ho pa pyràk o koja mẽ amnhĩ nhĩpêx. 
\q1 Nẽ te mẽ kot mjên mã xwỳnh mã ê mex jakare nhõr nhũm kot hagjênh pyràk. Nẽ ê mexja te mẽ kot tãm amnhĩ nhĩpêx xà pyràk. Anẽ. 
\m  
\v 9 Hãmri nhũm Tĩrtũm kapẽr o wrỳk xwỳnhja inhmã: 
\p —E Juãw. Pa amã mẽmoj jarẽ ka mar tỳx nẽ akwỳjê mã hã kagà. Tĩrtũm kapẽr kwỳ kot paj amã harẽ. Kêp Tĩrtũm kapẽr jakamã ãm hãmri na. Na hte mẽmoj jarẽnh o hêx kêt nẽ. E kapẽr ã kagà ho: 
\q1 Na htem axpẽn mã mẽ rer kaxyw nẽ amnhĩ wỳr hkwỳjê wỳ nhũm mẽ hwỳr mra nẽ wa hã hkĩnh nẽ apkur mex nẽ. 
\q1 Ja pyrà nẽ Tĩrtũm kot amnhĩ wỳr mẽ hwỳr xwỳnhjaja koja mẽ nhỹrmã mẽ pahte amnhĩ tomnuj pãnhã amnhĩrer xwỳnhta wỳr api nẽ ã amnhĩ nhĩpêx anẽ nẽ hkĩnh nẽ apkur mex nẽ. 
\q1 Hãmri nhũm Tĩrtũm mẽ ho mex rax kumrẽx. Anẽ. 
\m —E kêr ka ã akwỳjê mã ja hã kagà anẽ Juãw. Anẽ. 
\p Hãmri pa kuma nẽ kagà ja kamã mẽ amã hã kagà.  
\v 10 Hãmri nẽ hã kagà hpa nẽ ra ixte kãm mex o mex ã harẽnh kaxyw kutã ixkõn krã ho tẽm nẽ nhỹ nhũm tee ri amnhĩ tã ixpumu nẽ inhmã: 
\p —Kwa ã ri inhĩpêx anhỹr kêt nẽ. Apyrà nẽ ixte Jejus mã tanhmã amnhĩ nhĩpêx to xwỳnh kênã. Jejusja apyrà nẽ kêp inhõ pahihti na. Jejus kapẽr na prem hkukamã mẽ kot Tĩrtũm nhỹ hã kapẽr o mẽ pa xwỳnhjaja hã kagà nẽ mẽ kãm harẽnh o pa. Jakamã kwa pu mẽ Tĩrtũm pix kutã mãn pahkõn krã ho parôrôk nẽ pahkrĩ nẽ kãm mex o mex ã harẽ. Anẽ. 
\s1 Kawar jaka hã ỹr xwỳnh jarẽnh 
\p  
\v 11-16 Tã pa kê axte mẽmoj pumu. Nhũm kaxkwa axkjê nhũm kamã kawar jakajre xa nhũm mẽhõja hã nhỹ. Hixi na pre kêp “Aa kot Tĩrtũm kaga hkêt xwỳnh.” Anẽ nẽ hixi hõ na pre kêp: “Tĩrtũm kôt pix mã amnhĩ nhĩpêx o pa xwỳnh.” Anẽ. Ã hixi kot anhỹr jakamã na hte katàt kôt ahpỹnhã mẽ kot amnhĩ nhĩpêx ã mẽ omunh xà hkôt tanhmã mẽ harẽnh to. Mẽ kot amnhĩ to mex ã mẽ omunh xà hkôt tanhmã mẽ hkwỳjê jarẽnh to nẽ mẽ kot amnhĩ tomnuj ã mẽ omunh xà hkôt ahpỹnhã tanhmã hkwỳjê jarẽnh to. Na pre mẽ kot tanhmã hkwỳjê nhĩpêx to ho pa xwỳnhjê kutã amnhĩ xunhwỳ nẽ mẽ hã tanhmã mẽ ho. Ã na pre kawar ã ỹr xwỳnhja amnhĩ nhĩpêx anhỹr o pa. 
\p Nẽ no te kot kuwy hpôk pyràk jakamã hprĩ hã mẽmoj piitã omu nhũm mẽmoj kêp hpimxur kêt nẽ. Nẽ kêp pahi hã mẽ ahkà ho ohtô nẽ kutu. Nẽ nhỹhỹnh ĩ hã hixi hõ hã kagà nom ãm tapxipix kot amnhĩ tã amnhĩ nhĩxija pumunh. Na pre ra amnhĩ kamrô ho ê xy hpa nẽ xa. Nẽ hixi hõ pê: 
\pc \sc TĨRTŨM KAPẼR O AMNHĨRĨT XWỲNH\sc* 
\m Nẽ ê ryti hã hixi hõ hã kagà. Nẽ ihkjê hã ãm tãm. Hã kagà jarẽnh kot: 
\pc Ixpê mẽ ho amnhĩptàr xwỳnh piitã mẽ õ Pahi Maati na pa. 
\p Nẽ hakwa rũm wapo xwa gixre põm katon ajêt. Kot ho tanhmã mẽ kot Tĩrtũm mẽ wa kutã amnhĩ xunhwỳr xwỳnhjê nhĩpêx to kaxyw. Jakamã ra mẽ piitã mẽ ho pikuprõnh pa nẽ mẽ hipêx o te mẽ kot prẽs kãm uwa xô kagô janênh pyràk nhũm mẽ hkamrô hpikapĩr rax kumrẽx. Tĩrtũm xihtỳx xwỳnh kot mẽ kamã gryk tỳx jakamã nhũm ã kãm mẽ hipêx anẽ. Mẽ kot amnhĩ tomnuj o paja mỳrapê. 
\p Nhũm õ pôristi piitã uràk nẽ kawar jakare hã hkrĩ nẽ hkôt ri pa. Mẽ ê jaka muxre jagjê nẽ hã ma hkôt ri pa. 
\p  
\v 17-18 Tã pa axte Tĩrtũm kapẽr o mẽ wrỳk xwỳnh õja pumu nhũm myyti kutã xa nẽ kàx pê nhônhti mã kapẽr nẽ mẽ kãm: 
\p —E mẽ amnẽ mẽ ixwỳr wrỳ nẽ Tĩrtũm ã akĩnh nẽ mẽ htyk nẽ mẽ hikwỹ xwỳnhjê hã atu nẽ aku. Mẽ ho amnhĩptàr xwỳnhjaja nẽ pôristijaja nẽ mẽ hkrãhtũm nẽ kawar nẽ kawar ã mẽ hkrĩ nẽ ri mrar xwỳnhjaja nẽ mẽ kot amnhĩ to rũnh xwỳnhjaja nẽ mẽ kot amnhĩ to hkryre xwỳnhjaja. Nẽ mẽ kãm mẽ àpênh xwỳnhjaja nẽ amnhĩ mã ri mẽ àpênh xwỳnhjaja. Ãm mẽ htyk nẽ mẽ hikwỹ xwỳnh mũj piitã mãmrĩ mẽ hwỳr wrỳ nẽ mẽ hã atu nẽ mẽ aku. E mẽ tokyx nhônhti. Anẽ. 
\p  
\v 19 Tã nhũm mrymnuti nẽ krĩ piitã hkôt mẽ õ pahi nẽ mẽ õ pôristijaja piitã axpẽn wỳr akuprõ. Wam kawar jakare hã ỹr nẽ htẽm xwỳnh mẽ õ pôristijê hwỳr hprõt nẽ mẽ hkurê kaxàr kaxyw axpẽn mar kaxyw akuprõ. 
\p  
\v 20-21 Hãmri nẽ mẽ hwỳr mra nẽ mẽ hkurê kapa. No ãm tee ri amnhĩ nhĩpêx nẽ tee ri kãm tanhmã mẽ ho hprãm hkaprỳ nhũm wam kawar jakare hã ỹr nẽ htẽm xwỳnhta hakwa rũm wapo xwagixre kator o mẽ himex pa. Hãmri nhũm mẽ hkwỳjê pyràn htyk pa nẽ hikwỹ. Nhũm nhônhti mẽ omu nẽ mẽ hwỳr wrỳk o mra nẽ mẽ kuku hãmri nẽ kãm mẽ hkur kaga nẽ mẽ hkaga. No nhũm mrymnuti nẽ ỹ hã mẽ kãm hêx o pa xwỳnhta wa nhũm mẽ axtem nẽ htĩr rãhã wa unê nẽ ma wa o tẽ nẽ ẽsôf o kuwy maati kamã wa kumẽ. Hãmri nhũm wa kamã htĩr tũm nẽ hxêt rãhã nẽ pa ho pa nẽ aa htyk kêt nẽ. 
\c 20  
\s1 Mẽ kot Satanasti hpa hpre hã mẽ harẽnh 
\r Wam Korĩt 15.20-28 
\p  
\v 1 Tã pa kê axte mẽmoj pumu. Nhũm Tĩrtũm kapẽr o mẽ wrỳk xwỳnhjê hõja kaxkwa rũm wrỳ nẽ ahkre xupỳmti hpro xà ho htỳx xà hã safja py nẽ kàx pytĩhti ho mẽ hpre xàja õ py.  
\v 2-3 Hãmri nẽ kagãmnuti pê hêx xwỳnh maati Satanastija pynê. Amnepêm Atãw mẽ Ewa wa kãm hêx xwỳnhta pynê nẽ kàx pytĩ o hpa hpre nẽ hte hpre hãmri nẽ ahkre xupỳmti nhĩtom xà mẽ nẽ kamã kumẽ. Hãmri nẽ akupỹm hpro xà ho hpro nẽ saf o hã ho htỳx. Kot pika piitã hkôt mẽ kãm hêx o pa pymaj ã hipêx anẽ. Koja tokyx kator kêt ry rax kumrẽx. Koja kamã arĩ hkrĩ hã amgrà xohtô nẽ. Hã amgrà pê 1.000 nhũm rĩ kormã Tĩrtũm akupỹm kator nhũm kato nẽ ri pa. Nom pa hkrãnre. 
\p  
\v 4 Tã pa mẽ htyk nẽ akupỹm mẽ htĩr xwỳnh kwỳjê pumu. Kormã mẽ htĩr ri na prem Tĩrtũm kapẽr kôt pix mã amnhĩ nhĩpêx o pa. Nẽ Jejus kêp mẽ õ pahihti hã harẽnh rãhã ho pa. Aa mẽ kot mrymnuti kutã hkõnkrã ho rôrôk nẽ kãm mex ã harẽnh kêt. Nhũm prem tee mẽ õkrã hã nẽ mẽ ĩhkra katut ã mrymnuti nhĩxi nhĩpêx kaxyw nom nhũm prem hkaga kamã hihtỳx nhũm prem kãm mẽ hkurê xwỳnhjaja tee ri ja hã mẽ omu nẽ mẽ mut jakàr o mẽ kupa. Hãmri nhũm Tĩrtũm akupỹm mẽ ho mẽ htĩr nẽ mẽ kot mẽ ho amnhĩptàr ã hkrĩ xà kamã mẽ hkrĩ. Jejus nhĩhkô hã mẽ hkrĩ hã amgrà pê 1.000 kaxyw.  
\v 5 Mẽ kumrẽx na pre Tĩrtũm akupỹm mẽ ho mẽ htĩr nhũm mẽ hkwỳjaja mẽ hkĩnh ã arĩ ty nẽ hikwỹ hã amgrà pê 1.000 jakre nhũm rĩ kormã akupỹm mẽ ho mẽ htĩr. 
\p  
\v 6 Wam akupỹm mẽ htĩr xwỳnhjaja kêp Tĩrtũm kra jakamã koja mẽ Tĩrtũm kra hkêt xwỳnhjê kurom hkĩnh nẽ pa ho pa. Nẽ mẽ kurom mẽ kot amnhĩ xà htỳx kamã hamak o pa htũm xà wỳr pa hkêt nẽ. Nẽ mẽ kurom Tĩrtũm mẽ Kra Jejus Kris wa kuri mex kumrẽx nẽ wa kãm tanhmã ri amnhĩ nhĩpêx to ho pa. Nẽ Jejus nhĩhkô hã mẽ ho amnhĩptàr o pa hã amgrà pê 1.000. 
\s1 Tĩrtũm kot kuwy hwỳr Satanasti mẽnh ã harẽnh 
\p  
\v 7 Tã koja amgrà pê 1.000 hapêx nhũm rĩ kormã Tĩrtũm kapẽr o wrỳk xwỳnhja akupỹm ahkre xupỳm wỳr tẽ nẽ Satanasti mã kahê xà mẽ nhũm kato.  
\v 8 Hãmri nẽ kê axte pika piitã hkôt tanhmã mẽ kãm hêx to ho ri pa. Gorti nhõ xwỳnhjê mã nẽ Makok nhõ xwỳnhjê mã nẽ krĩ piitã hkôt Tĩrtũm nê tanhmã mẽ kãm hêx to ho mẽ hkôt pa. Hãmri nẽ mẽ kot Tĩrtũm krajê kutã amnhĩ xunhwỳr nẽ mẽ hkurê kaxàr kaxyw amnhĩ kwỳjê ho akuprõ nhũm mẽ ohtô rax kumrẽx nẽ axpẽn wỳr akuprõ. Te pikahti grà xohtô pyràk. 
\p  
\v 9 Hãmri nẽ ma Tĩrtũm krajê nhĩmex par kaxyw mẽ hwỳr mra nẽ mẽ õ krĩ mã hipôk pa nẽ kuhê. Mẽ õ krĩja Tĩrtũm mã mex tã nhũm mẽ kot kêp grành par kaxyw ma hwỳr mra. Hãmri nhũm kaxkwa rũm kuwy hpôkja mẽ haêr pê mẽ hã rôrôk nẽ mẽ ho hxêt pa. 
\p  
\v 10 No mẽ kãm hêx xwỳnh maati Satanastita nhũm Tĩrtũm kapẽr o wrỳk xwỳnhja axte unê nẽ ma ẽsôf o kuwy maatita wỳr o tẽ nẽ kamã kumẽ. Ra mẽ kot kamã mrymnuti wa kot Tĩrtũm nê mẽ nokupyr o pa xwỳnh wa mẽnh tã wa hkôt Satanasti mã ho anẽ nẽ kamã kumẽ nhũm kamã pa ho pa. Koja mẽ aa kator kêt kumrẽx. Nẽ arĩ kamã amnhĩ xà htỳx kamã hamak rãhã nẽ pa ho pa. 
\s1 Tĩrtũm kot ahpỹnhã tanhmã mẽ piitã mẽ harẽnh to kaxyw 
\r Matêwre 25.31-46; Juãw 5.25-29 
\p  
\v 11 Tã pa axte mẽmoj pumu nhũm kaxkwa mẽ pikaja wa ra hapêx pa. Pa Tĩrtũm kot tanhmã mẽ piitã mẽ harẽnh to hã hkrĩ xà raxja pumu. Nhũm hakajre nhũm Tĩrtũm kamã nhỹ. 
\p  
\v 12-13 Hãmri nhũm ra mẽ htyk nẽ mẽ hikwỹ xwỳnh piitã akupỹm hapôx pa nẽ Tĩrtũm kot tanhmã mẽ harẽnh to hã hkrĩ xàta kutã hkrĩ pa. Mẽ piitãã. Mẽ kot amnhĩ to rũnh xwỳnhjaja nẽ mẽ kot amnhĩ to hkryre xwỳnhjaja nẽ mẽ ho amnhĩptàr xwỳnhjaja nẽ gô xujanãr kãm mẽ mrõr nẽ mẽ htyk xwỳnhjaja. Ra mẽ htyk nhũm mẽ kot mẽ hagjênh xwỳnhjaja piitã mẽ htykjê papxà rũm hapôx pa nẽ Tĩrtũm kutã ohtô ho ohtô nẽ hkrĩ. Hãmri nhũm Tĩrtũm õ kagà py nẽ kamã mẽ piitã mẽ hixi japêr. Kagà kamã ra mẽ hkukamã mẽ htĩr tũm nẽ mẽ pa ho mẽ pa mã xwỳnhjê nhĩxi japêr. Nẽ kagà hõ kamã mẽ htĩr ri tanhmã mẽ kot amnhĩ nhĩpêx to ho pa hã mẽ piitã mẽ hã kagàja. Nhũm kupy nẽ kamã tanhmã mẽ harẽnh to nẽ hkôt hprĩ hã mẽ piitã mẽ omunh pa nẽ rĩ kormã ahpỹnhã tanhmã mẽ harẽnh to. 
\p  
\v 14-15 Hãmri nẽ mẽ htĩr tũm nẽ mẽ pa mã xwỳnhjê nhĩxi hã kagàja kamã tee ri mẽ hkwỳjê nhĩxi japêr nhũm kamã amrakati. Jakamã nhũm mẽ ma kuwy maatita wỳr mẽ o mra nẽ kamã mẽ rẽnh pa. Te axte mẽ htyk nhũm mẽ kot kuwy kamã mẽ hagjênh pyràk nhũm mẽ kamã rôrôk nẽ tee ri amnhĩ xà htỳx kamã hamak rãhã nẽ pa ho pa nẽ aa kator kêt kumrẽx. 
\c 21  
\s1 Pika mẽ kaxkwa wa nyw jarẽnh 
\r Sikũn Pêtre 3.8-13 
\p  
\v 1 Tã pa axte mẽmoj pumu. Nhũm Tĩrtũm ra pika mẽ kaxkwa nyw wa ho kato. Ra pika nẽ kaxkwa nẽ gô xujanãr tũmja hapêx pa nhũm kaxkwa mẽ pika nyw wa ho kato. Nom axte gô xujanãr o kator kêt nẽ. 
\p  
\v 2 Hãmri nhũm Tĩrtũm nhõ krĩ mex pê Jerujarẽ nywja tanhmã amnhĩ to nẽ pika nyw wỳr wrỳk o mõ. Krĩja mex kumrẽx. Mex o mex. Te mjên mã xwỳnh ê mex jaxàr nẽ amnhĩ to muxre nẽ mjên wỳr htẽm pyrà nẽ pika nyw wỳr mex kumrẽx nẽ wrỳk o mõ. 
\p  
\v 3 Hãmri nhũm Tĩrtũm kot mẽ ho amnhĩptàr ã hkrĩ xà maatija kamã mẽhõja kapẽr o: 
\p —Nà ãm hãmri. Na ra Tĩrtũm hkrajê hkôt pa ho pa. Pika nyw kamã mẽ hkôt pa ho pa nhũm mẽ tã no ho omu nẽ hkôt pa ho pa rãhã nẽ. Nà ãm hãmri. Ja mex o mex. 
\p  
\v 4 —Koja hkrajaja hkôt pa ho pa nẽ axte htyk kêt kumrẽx. Nhũm Tĩrtũm mẽ nê mẽ no kagô nhĩnhĩnh pa nhũm mẽ axte hkaprĩ nẽ mỳr kêt nẽ. Nẽ ri axte amnhĩ xà kamã hamak kêt nẽ. Nẽ axte ri tanhmã omnu hto hkêt nẽ. Ra mẽ hkaprĩ nẽ à nẽ mỳr o pata hapêx par kumrẽx nhũm hpãnhã mẽmoj nyw pix. Anẽ. 
\p  
\v 5 Hãmri nhũm Tĩrtũm tãm tanhmã inhmã kapẽr to. Krĩ xà maati kamã ỹr xwỳnhta tãm inhmã kapẽr o: 
\p —E na pa ra akupỹm mẽmoj piitã ho nyw pa. Jakamã e Juãw. Ãm hãmri na pa ã amnhĩ kukamã amã mẽmoj jarẽnh anẽ. Ixêx kêt. Jakamã kêr ka akwỳjê mã piitã hã kagà hpa. Kê mẽ kamã harẽ nẽ tokyx kuma nẽ hkôt hamaxpẽr rãhã ho pa. 
\p  
\v 6 —Ra ixte amnhĩ kukamã mẽmoj mã ijamaxpẽr xwỳnhja na pa ra ho anhỹr pa. Ixpê mẽmoj piitã ho anhỹr o hkrax xwỳnh nẽ mããnẽn ixpê mẽmoj piitã ho ijapêx par xwỳnh. Nẽ ixrãhã ixpa xwỳnh. Amnepêm kormã mẽmoj kator kêt ri na pa pre ixrãhã ixpa. Nẽ ot pa arĩ ixrãhã ixpa. Tã mẽ kãm kôr nẽ kãm gô hkwỳ ho hkõm hprãm xwỳnhjê pyrà nẽ mẽ kãm ixpix prãm xwỳnhjaja kot paj te mẽ kãm inhõ hino rũm gô hkwỳ nhõr nhũm mẽ kot ho hkõm pyràk o mẽ hipêx. Hãmri nhũm mẽ htĩr tũm nẽ ixri pa ho pa nẽ axte htyk kêt nẽ. Kot paj ã mẽ hipêx mex anẽ. 
\p  
\v 7 —Mẽ ate tanhmã amnhĩ tomnuj to nê amnhĩ to htỳx nẽ ixkôt pix mã amnhĩ nhĩpêx o mẽ apa rãhã mẽ atyk xwỳnhjaja kot paj ã mẽ anhĩpêx mex anẽ. Ka mẽ apê ixkra hã amex nẽ ixkôt ri apa rãhã ho apa. Pa ixpê mẽ anhõ Tĩrtũm ã tanhmã mẽ ato mex to rãhã ho ixpa. 
\p  
\v 8 —No mẽ kot amnhĩ kaxyw ixkôt hamaxpẽr kêt xwỳnhjaja. Nẽ mẽ kot amnhĩ tomnuj xwỳnhjaja nẽ mẽ kot ri mẽ hpar prãm xwỳnhjaja. Nẽ mẽ kot nhãm ri mẽnijê ho amnhĩkati xwỳnhjaja. Nẽ wajagajaja. Nẽ mẽ kot amnhĩ to sãnti hwỳr o pa xwỳnhjaja. Nẽ ri mẽ hêx nhi xwỳnhjaja. Ã mẽ kot amnhĩ nhĩpêx anhỹr xwỳnh piitã koja mẽ apê ixkrajê hkĩnhã ma kuwy maati wỳr hapêx par kumrẽx. Te axte mẽ htyk pyràk nom koja mẽ axte htyk kêt nẽ. Anẽ. 
\s1 Jerujarẽ nyw jarẽnh 
\r Sikũn Korĩt 6.16; Karatas 4.26; Eprêw 12.22-24 
\p  
\v 9 Tã nhũm mẽ kot xijere pê 7 kamã Tĩrtũm gryk xà jamỳnh xwỳnhjê hõja hãmri ixwỳr tẽ nẽ inhmã: 
\p —E ma ixkôt tẽ nẽ mẽmoj pumu. Na ra krĩ nywja pika nyw wỳr wrỳk o mõ. Te mjên mã xwỳnh ê mex jaxàr nẽ amnhĩ to muxre nẽ mjên wỳr htẽm pyrà nẽ mex kumrẽx nẽ kaxkwa rũm pika nyw wỳr wrỳk o mõ. Nẽ kot ho mjên mã xwỳnhta te mẽ pahte amnhĩ tomnuj pãnhã amnhĩrer xwỳnhta pyràk. E tokyx tẽ nẽ omu. Anẽ. 
\p  
\v 10 Hãmri nhũm Tĩrtũm Karõ tanhmã ixto pa ma kot inhmã kapẽr xwỳnhta kôt tẽ nhũm ma ixto mõ nẽ kẽn krã hprêêti hwỳr ixto api nẽ himõk ã ixãm. Pa Tĩrtũm nhõ krĩ mex pê Jerujarẽ nywja pumunh o xa. Nhũm mex o mex. Ãm hãmri te mjên mã xwỳnh kot ê mex jaxàr nẽ amnhĩ to muxre nẽ mjên wỳr htẽm pyrà nẽ ahpar mã wrỳk o mõ pa ixprĩ hã omu. 
\p  
\v 11 Na pre rax o rax nẽ mex o mex. Tĩrtũm kamã pa ho pa jakamã nhũm kamã hirã htỳx kumrẽx. Te kẽn mex ã kàxpore xohtô jaxênh mex tỳx pyràk. 
\p  
\v 12-13 Nẽ krĩ puhã kahêja hprêk rax nẽ. Nẽ hwỳr mẽ gjêx xà kêp 12. Na pre myt japôx xà rũm axkrunẽpxi. Nẽ myt gjêx xà rũm haxwỳja axkrunẽpxi. Nẽ akutã kahpa hkôt haxwỳja axkrunẽpxi. Nẽ ahpỹnhã hakwakre hã Tĩrtũm kapẽr o wrỳk xwỳnhjaja hamãr o kuhê. Nẽ hakwa kre piitã hã Ijaew pê ahpỹnhã mẽ pikjêr kãm mẽ kêp 12jaja mẽ hixi hã kagà. 
\p  
\v 14 Nẽ kahê xunhwỳr xà hkukamã kẽn pytyrja ahpỹnhã kêp 12. Kẽn pytyrta ã na mẽ kot Jejus nhỹ hã mẽ ahkre o mẽ pa xwỳnh maati pê 12jê nhĩxi hikwỹ. 
\p  
\v 15 Tã nhũm kot ixto mõr nẽ inhmã mẽmoj jahkre xwỳnhta ôr o mẽmo pĩ py nẽ kot ho krĩ ho mĩdi kaxyw xa. Nẽ ho kahê piitã ho mĩdi kaxyw. Nẽ mẽ gjêx xàja ho mĩdi kaxyw. 
\p  
\v 16-17 Hãmri nẽ ho mĩdi hpa. Krĩja ry nẽ kahpa piitã axpẽn pyràk. Nẽ hprêk piitã mããnẽn axpẽn pyràk. Kamã mẽmoj piitã ahpỹnhã kêp 2.200 kirõm. No puhã kahêja hprêk o 64 met pix nẽ. 
\p  
\v 18 Nẽ kahêja kẽn jaxênh pix o kot amnhĩ nhĩpêx jakamã mex o mex. Nẽ hkarỳr tỳx kumrẽx. Nẽ kahê hkre kamã krĩ kamã ahpỹnhã ri ixkreja ôr pix o kot amnhĩ nhĩpêx. Nẽ piitã hkarỳr tỳx. 
\p  
\v 19-20 Nẽ kahê xunhwỳr xà hkukamã kẽn pytyrta ahpỹnhã ri kẽn mex pix o kot amnhĩ nhĩpêx. Piitã mex kumrẽx nẽ hkarỳrti. 
\li1 Wamta kawax pê grãgrãre. 
\li1 Nẽ hkôt ja kawax pê grãgrã kakrã htyk. 
\li1 Nẽ hkôt ja kakrã htyk. 
\li1 Nẽ hkôt hõja grãgrã karỳr. 
\li1 Nẽ hkôt ja hkamrêk pihkàrti. 
\li1 Nẽ hkôt ja grãgrã kakrã htyk. 
\li1 Nẽ hkôt ja hkamrêk tỳx kumrẽx. 
\li1 Nẽ hkôt ja ràrààre. 
\li1 Nẽ hkôt ja grãgrã mẽ pihkàr. 
\li1 Nẽ hkôt ja ràràr mẽ pihkàr. 
\li1 Nẽ hkôt ja grãgrã karỳỳre. 
\li1 Nẽ hkôt ja kakrã htyk pihkàr. 
\m à kẽn pytyr mex kot anhỹr. 
\p  
\v 21 Nẽ mẽ gjêx xà hã hakwakre kahê xà pê 12ja mẽmo kẽn jakooti rũnh kumrẽx pix o. Nẽ krĩ kahti hkôt pry nhĩkwỹ xwỳnhja ãm ôr pix o. Nẽ hkarỳỳre. 
\p  
\v 22 Pa pre tee ri krĩ kamã Tĩrtũm mã amnhĩ jarẽnh xà hã ixkre japêr nhũm amrakati. Mo kaxyw koja mẽ axte ixkreja hwỳr mra? Ra Pahi Maati Tĩrtũm xihtỳx xwỳnh mẽ mẽ pahte amnhĩ tomnuj pãnhã amnhĩrer xwỳnhta ra hkrajê kamã pa ho pa kênã kot kêt mẽ axte ri ixkreta o presija. Koja mẽ kãm wa mex ã wa kãm harẽnh prãm nẽ nhỹri tãm wa hwỳr mra nẽ ã wa kãm kapẽr anẽ. Te mẽ pahte pahi hwỳr pamrar nẽ kãm pakapẽrta pyrà nẽ wa hwỳr mra nẽ wa kãm kapẽr. 
\p  
\v 23 Nẽ koja krĩja kamã myyti nẽ mytwrỳre hkêt. Mo kaxyw kot kêt myyti nẽ mytwrỳreja arĩ ri hirã ho pa? Krĩ kamã Tĩrtũm pa ho pa jakamã kamã hirã mex kumrẽx. Nẽ mẽ pahte amnhĩ tomnuj pãnhã amnhĩrer xwỳnhta haxwỳja kamã pa ho pa. Te kêp kanê hpôk rax kumrẽx pyrà nẽ hirã mex o pa. Kot hirã mex o kot myyti jakrenh. Ã Tĩrtũm mẽ Kra wa krĩja kamã pa ho pa jakamã nhũm mẽ axte myyti ho presija hkêt nẽ. 
\p  
\v 24 Koja krĩ nhõ xwỳnhjaja hirã mex pix kãm ri pa ho pa nẽ tãm ri amnhĩ nhĩpêx o ri pa. Tã koja mẽ ho amnhĩptàr xwỳnhjaja Tĩrtũm wỳr mra nẽ amnhĩ rom kãm mex o mex ã harẽ nẽ kãm: 
\p —Na pre mẽ ixkwỳjaja mẽ ixpê mẽ ho amnhĩptàr xwỳnh ã axpẽn mã mẽ inhmex nẽ mẽ ixàhpumunh ã ri axpẽn mã mẽ ijarẽ. Nom mẽ ixrom amex o amex nẽ axàhpumunh o axàhpumunh. Jakamã ãm hãmri na htem amã amex o amex ã ajarẽ Tĩrtũm. Anẽ. 
\p  
\v 25 Nẽ krĩ hwỳr hakwakre koja amnhĩ kahê xà rẽnh rãhã kuhê nẽ aa amnhĩ kahê hkêt nẽ. Jar mẽ panhõ pika kamã na hte kamàt kaxyw nhũm htem amnhĩ tã hakwakre kahê hpa. No mo kaxyw koja mẽ axte pika nywja kamã ã amnhĩ nhĩpêx anẽ? Koja kamàt kêt nẽ hirã rãhã ho rãhã jakamã nhũm mẽ amnhĩ tã kahê hkêt rãhã nẽ pa ho pa. 
\p  
\v 26 Nẽ koja mẽ piitã Tĩrtũm wỳr mra nẽ kãm mex o mex ã harẽ nẽ kãm: 
\p —Pa Tĩrtũm. Hêxta waa nẽ. Anhõ krĩja mex kumrẽx. Mex o mex. Nẽ mẽ ixrom amex o amex nẽ axihtỳx o axihtỳx. Nẽ mẽ ixrom axàhpumunh o axàhpumunh. Ãm hãmri na ka ra mẽ ixpê akrajê kamã apa ho apa Tĩrtũm. Anẽ. 
\p  
\v 27 Nẽ koja mẽmoj punuj krĩja wỳr gjêx kêt kumrẽx. Mẽ hpijaàm kêt xwỳnhjaja nẽ ri mẽ hêx xwỳnhjaja hwỳr gjêx kêt nẽ. Ãm mẽ pahte amnhĩ tomnuj pãnhã amnhĩrer xwỳnhta nhõ kagà kamã Tĩrtũm ri mẽ htĩr tũm nẽ mẽ pa mã xwỳnhjê nhĩxi nhĩpêx xwỳnh pixjaja koja mẽ hwỳr agjê nẽ kamã pa ho pa. 
\c 22  
\p  
\v 1-2 Tã pa pre axte mẽmoj pumu. Nhũm Tĩrtũm kapẽr o wrỳk xwỳnhja axte inhmã mẽmoj jahkre. Nhũm Tĩrtũm mẽ kot mẽ pahpãnhã amnhĩrer xwỳnhja wa kot mẽ ho amnhĩptàr ã hkrĩ xà maati rũm pyhti hprõt. Krĩ kahti hkôt pry pohti nõr xwỳnhta kahti hkôt hprõt o nõ. Pyhti kamã gôja na htem ho ixkõ nẽ htĩr tũm nẽ pa ho pa. Gô karỳỳre. Nhũm mẽmo pĩ hpàr muxre xwỳnhja akutã hijê nẽ xa. Pĩ xôja na htem kuwô nẽ htĩr tũm nẽ pa ho pa. Na hte apkati mẽ ô rãhã nẽ kuhê. Nẽ axtem hôja mẽ piitã mẽ mex nẽ à hkêt kaxyw na hôja. 
\p  
\v 3 Amnepêm na pre Tĩrtũm Atãw mã kapẽr nẽ kãm: 
\p —Ate amnhĩ tomnuj mỳrapê kot paj tanhmã pika homnu hto nhũm apê mex kêt nẽ. Ka kamã apur nẽ kamã axàpênh rũnh o apa rãhã nẽ rĩ kormã kamã axàpkur o ri apa. Apê jamnuj tã kot kaj mẽ ã amnhĩ nhĩpêx anhỹr o apa rãhã ty. Anẽ. 
\p Tã ra Tĩrtũm nhõ krĩ nyw kamã mẽ omnuj xàja amrakati kumrẽx. Nẽ Tĩrtũm mẽ kot mẽ pahpãnhã amnhĩrer xwỳnhta wa õ krĩ kamã pa ho pa jakamã mẽ pahte kamã mẽ papa xwỳnhjaja kot puj mẽ wa kãm tanhmã amnhĩ nhĩpêx to ho ri papa. 
\p  
\v 4 Kot puj mẽ tã pano ho Tĩrtũm pumunh o papa. Hãmri nhũm te mẽ pahpiitã mẽ panhõkrã hã amnhĩ nhĩxi nhĩpêx pyràk o mẽ panhĩpêx. 
\p  
\v 5 Nẽ kot puj mẽ Pahi Maati Tĩrtũm nhĩrã kamã ri papa nẽ axte myyti nhĩrã ho presija hkêt nẽ. Koja kamàt hapêx pa pu mẽ axte kanê ho presija hkêt nẽ. Nẽ Jejus nhĩhkô hã hirã kamã mẽmoj to amnhĩptàr rãhã ho papa. 
\s1 Jejus tokyx akupỹn wrỳk ã harẽnh 
\r Apokarip 1.1-3 
\p  
\v 6 Tã nhũm Tĩrtũm kapẽr o mẽ wrỳk xwỳnh kot ixto mõr xwỳnhta axte inhmã kapẽr nẽ inhmã: 
\p —E nà ãm hãmri na ixte amã mẽmoj piitã harẽnh xwỳnhja. Ãm hãmri na. Jakamã kwa kêr ka arĩ hã ano htỳx rãhã ho apa. Amnepêm Tĩrtũmja ỹ hã mẽ kapẽr o pa xwỳnhjê mã tanhmã kapẽr o amnhĩrĩt to. Kot tanhmã amnhĩ nhĩpêx to hkukamã mẽ kãm ho amnhĩrĩt nhũm prem kuma nẽ ô ri ma hkwỳjê mã harẽnh o ri mẽ hkôt pa. Tã ra mẽ hpãnhã pa mẽ awỳr inhmẽ. Mẽ ate Tĩrtũm mã tanhmã amnhĩ to ho apa xwỳnhjê mã ixte ja jarẽnh kaxyw Pahihti Tĩrtũmja mẽ awỳr inhmẽ pa wrỳ. Nà koja mẽmoj tokyx ã amnhĩ nhĩpêx anẽ.  
\v 7 Na pre Jejus mẽ amã amnhĩ jarẽnh o: “Kot paj tokyx akupỹm mẽ awỳr wrỳ. Tã mẽ ate ijarẽnh ã kagà kamã harẽnh nẽ mar nẽ amnhĩ kaxyw hkôt ajamaxpẽr nẽ hkôt amnhĩ nhĩpêx xwỳnhjaja kot kaj mẽ akĩnh nẽ ri apa.” Anhỹr o amnhĩ jarẽ. Anẽ. 
\p  
\v 8 Nà ixpê Juãw na pa pre ã inhno ho mẽmoj pumunh anẽ. Hãmri nẽ omunh pa nẽ Tĩrtũm kapẽr o wrỳk xwỳnh kot inhmã harẽnh xwỳnhta kutã ixkõn krã ho ixtẽm nẽ inhỹr kaxyw. Nom nhũm amnhĩ nê inhmã kapẽr kãm hihtỳx nẽ inhmã: 
\p  
\v 9 —Kwa nà ri ã inhĩpêx anhỹr kêt nẽ. Ãm Tĩrtũm pix kutã na pu htem ã amnhĩ nhĩpêx anẽ. Apyrà nẽ ixpê Jejus kwỳ kênã. Na pa hte apyrà nẽ ỹ hã tanhmã amnhĩ nhĩpêx to ho ixpa. Nẽ mẽ apyrà nẽ kapẽr ã kagà hkôt pix mã amnhĩ nhĩpêx. Na pu htem axpẽn kutã pahkõn krã ho parôrôk kêt nẽ. Ãm Tĩrtũm pix kutã na pu htem ã amnhĩ nhĩpêx anẽ. 
\p  
\v 10 —E ã ate mẽmoj pumunh nẽ mar anhỹr xwỳnhja koja tokyx ã amnhĩ nhĩpêx anẽ. Jakamã kwa kêr ka akwỳjê pê ho apimxur kêt nẽ. Piitã hã kagà hpa kê mẽ kamã harẽ nẽ kuma nẽ mẽmoj kot ã amnhĩ nhĩpêx anhỹr mã xwỳnhta piitã hkukamã harẽnh ma. Koja tokyx mẽmoj ã amnhĩ nhĩpêx anẽ. 
\p  
\v 11 —Jakamã kwãr mẽ mãmrĩ piitã tanhmã kãm amnhĩ nhĩpêx to ho pa hprãm xà hkôt amnhĩ nhĩpêx o pa. Kwãr mẽ mẽ kot amnhĩ tomnuj xwỳnhjaja ã amnhĩ anhĩpêx anhỹr o pa. Nẽ kwãr mẽ kot tanhmã kapẽr punuj to xwỳnhjaja mãmrĩ ã amnhĩ nhĩpêx anhỹr o pa. Nẽ kwãr mẽ kot tãm amnhĩ nhĩpêx o ri mẽ pa xwỳnhjaja mãmrĩ Tĩrtũm kôt pix mã ri tãm amnhĩ nhĩpêx o pa. Anẽ. 
\p Nhũm pre ã kaxkwa hwỳr ixto àpir xwỳnhta inhmã kapẽr anẽ. 
\p  
\v 12 Hãmri nhũm hpãnhã Jejus tãm inhmã kapẽr nẽ inhmã: 
\p —E kot paj tokyx akupỹm mẽ awỳr wrỳ. Nẽ akupỹm pôj hãmri nẽ mẽ kot amnhĩ tomnuj o mẽ pa xwỳnhjaja pa ja mỳrapê ma mẽ kot amnhĩ xà htỳx kamã hamak tũm xàta wỳr mẽ rẽnh pa. No mẽ kot ixkôt amnhĩ nhĩpêx xwỳnhjaja kot paj akupỹn inhõ krĩ hwỳr amnhĩ kôt mẽ ho api. 
\p  
\v 13 —Nẽ ixrãhãã xwỳnh na pa. Amnepê mã kormã mẽmoj kêt ri na pa pre ra ixrãhãã. Nẽ koja nhỹrmã mẽmoj piitã akupỹm hapêx pa arĩ ixrãhã nẽ ixpa ho ixpa. 
\p  
\v 14 —Nẽ Tĩrtũm kot mẽ anê mẽ ate amnhĩ tomnuj kuhõnh par xwỳnhjaja kot kaj mẽ amex kumrẽx nẽ apa ho apa. Nẽ akĩnh nẽ ajamakêtkati nẽ ri atỳx apa ho apa. Te ho mẽ kot amnhĩ xê kahõnh nẽ mex jagjênh nẽ ri hã pata pyràk. Koja Tĩrtũm mẽ amã anẽ ka mẽ ajamakêtkati nẽ õ krĩ hwỳr agjê nẽ kamã ri amex kumrẽx nẽ ri apa ho apa. Nẽ kamã mẽmo pĩ xô mẽ kot kur nẽ htĩr tũm nẽ pa mã xwỳnhta wỳr mra nẽ amnhĩm ô rê nẽ hkur o ri apa. Ra mẽ ate Jejus kôt amnhĩ xunhwỳr jakamã kot kaj mẽ axàmnhĩx hwỳr mra nẽ amnhĩm hkwỳ rê nẽ hkur o ri apa. Kot kaj mẽ ã amnhĩ nhĩpêx anẽ. 
\p  
\v 15 —Nom mẽ kot amnhĩ tomnuj o mẽ pa xwỳnhjaja koja mẽ akĩnhã inhõ krĩ hwỳr gjêx kêt nẽ. Mẽ kot ri mẽ y ho mẽ pa xwỳnhjaja. Nẽ mẽ kot nhãm ri mẽnijê ho amnhĩkati ho mẽ pa xwỳnhjaja. Nẽ mẽ kot ri mẽ hpar o mẽ pa xwỳnhjaja. Nẽ mẽ kot ri sãnti nhĩpêx o te Tĩrtũm nhĩpêx pyràk o mẽ pa xwỳnhjaja. Nẽ mẽ kãm ri hêx prãm o ri mẽ pa xwỳnhjaja. Koja mẽ akĩnhã inhõ krĩ hwỳr pa hkêt nẽ. 
\p  
\v 16 —E Juãw. Nà ixpê Jejus na pa awỳr ixkapẽr o mẽ wrỳk xwỳnhta mẽ. Kot ixkwỳjê kaxyw amã ixkapẽr jarẽnh kaxyw. Ixpê Tawi pàr krax na pa. Te ixpê arĩgro hkôt kanhêti hpôk rax kot arĩgro ho mõr ã ho amnhĩrĩt xwỳnhta pyràk. Anẽ. 
\p Nhũm pre ã Jejus inhmã kapẽr anẽ.  
\v 17 Tĩrtũm Karõ mẽ Jejus kwỳjaja na htem ã Jejus kot amnhĩ jarẽnh anhỹrja ma nẽ hkĩnh nẽ. Nẽ kãm kapẽr o: 
\p —Hêxta waa nẽ. Kwa amnhĩm anojarêt nẽ tokyx akupỹn mẽ ixwỳr wrỳ Pahihti. Pa mẽ tokyx ã amnhĩ nhĩpêx anhỹr o ri war akôt ixpa. Anẽ. 
\p Nẽ mẽ ate ja mar xwỳnhjaja kêr ka mẽ uràk nẽ ã kãm akapẽr anẽ. 
\p Nẽ te mẽ amã kôr nẽ ri mẽ apa pyràk xwỳnhjaja kêr ka mẽ te Jejus wỳr amrar nẽ õ gô ho akõm pyrà nẽ hkôt amnhĩ xunhwỳ. Te Jejus amarĩ mẽ pamã õ gô nhõr pyràk o mẽ panhĩpêx pu mẽ hkôt amnhĩ xunhwỳ nẽ ra pahpê pahtĩr tũm nẽ papa mã xwỳnh. Hãmri nẽ amnhĩ pãnhã tanhmã kãm amnhĩrer to hkêt nẽ. 
\s1 Nhỹrmã mẽmoj nyw par ã harẽnh jatur xà 
\p  
\v 18 E ixpê Juãw na pa Jejus nhỹ hã mẽ amã mẽmoj tanhmã kot amnhĩ nhĩpêx to hkukamã ã mẽ amã hã kagà anẽ. Tã kwa mẽ o kora. Kêr ka mẽ atõ amnhĩ krã hkôt ri ajamaxpẽr o te ho ja pyrà nẽ hijuk ri axte mẽmoj nhĩpêx kêt nẽ. Ãm kwarĩ ho kwarĩ. Kot ka mẽ atõ anẽ nhũm Tĩrtũm ja hã apumu nẽ kagàja kamã tanhmã mẽ hipêx kati hto xàta o tanhmã anhĩpêx to ka arĩ amnhĩ pumu. 
\p  
\v 19 Rỳ ka mẽ atõ kagà kamã harẽ nẽ ama nẽ tanhmã ajamaxpẽr to nẽ ajamaxpẽr o: 
\p —Nà ja kot anhỹr kêt. Na mẽ ãm harẽnh o hêx. Kot paj kuma nẽ ãm kuma. 
\p Anhỹr o ajamaxpẽr japêr. Hãmri nhũm Tĩrtũm amnhĩ tã ama nẽ kagà mexta kamã kot tanhmã mẽ ho mex toja o ato mex kêt nẽ. Ka õ krĩ hwỳr axàpir nẽ mẽmo pĩ xô mẽ kot hkur nẽ htĩr tũm nẽ pa kaxyw mã xwỳnhta ka amnhĩm hõ hyr nẽ hkrẽr kêt nẽ. Jakamã e kwa mẽ o kora. Kêr ka mẽ kagàta kamã ã mẽmoj kot amnhĩ nhĩpêx anhỹr mã xwỳnhta jarẽnh ma nẽ aprĩ hã piitã hkôt ajamaxpẽr tỳx rãhã ho ri apa. 
\p  
\v 20 E Jejus kot inhmã mẽmoj kukamã tanhmã ujarẽnh to xwỳnhta na pre inhmã amnhĩ jarẽnh o: “Kot paj tokyx akupỹn mẽ awỳr wrỳ.” Anẽ. Ãm hãmri na pre ã amnhĩ jarẽnh anẽ. Koja tokyx akupỹn mẽ pahwỳr wrỳ hãmri nhũm mẽmoj piitã mex o mex. 
\q1 Jakamã kwa kêr ka amnhĩm anojarêt nẽ tokyx akupỹn mẽ ixwỳr wrỳ Pahihti Jejus. \fig Apokarip 22.20|src="cn01886B.tiF" size="col" copy="© 1978 David C. Cook Publishing Co." ref="Apokarip 22:20" \fig* 
\m  
\v 21 Nẽ ixpyrà nẽ mẽ apê Tĩrtũm krajaja na pa hte mẽ ato Pahihti Jejus wỳr rãhã ho ri ixpa nẽ kãm: 
\p —Kwa akwỳjê pumu nẽ mẽ kutã anojarêt rãhã ho ri apa Pahihti. Anẽ. 
\p E mẽ ujarẽnhja na hapêx. Ixpê Juãw na pa Jejus kot inhmã tanhmã ujarẽnh toja pa amnhĩ xô ri mẽ amã hã kagà hpa. E na hapêx.