\id 2TI - 2 Timothy Conrad/Simatab 24-Mar-2003 
\h 2 TIMOTI 
\toc1 Pagiguk Iri Shup Douk Pol Nenekap Panam Timoti Iri 
\toc2 2 TIMOTI 
\mt1 Pagiguk Iri Shup Douk Pol Nenekap Panam Timoti Iri  
\is1 Banenyi Baraen Um Enyudok Baraen Pol Nagiguk Neneken Nyanak Um Timoti Iri  
\io1 1:1-2 Pol nenekuman baraen Timoti nakri Iruhin nini Krais Jisas hutauruman  
\io1 1:3—2:26 Pol nakrip Timoti um nunek Iruhin ananin mour wosik abom  
\io1 3:1�17 Eshesh Kristen ta shiyotu dodog shusah amaen abudok nyutob hugiguk iri nyumnah hukri hutogur obi nyutob arpesh ta shukri uwok um Iruhin ananin baraen  
\io1 4:1-8 Pol dodogowin atun nakrip Timoti um nukripesh Iruhin ananin baraen wosik aria nishuhur um shunek yopihi aih  
\io1 4:9-22 Enen baraen um Pol nenek kwot um nyani nyatuh iri baraen  
\c 1  
\p
\v 1-2 O Timoti, eik kanak Pol yenek-umenyugu apudok shup um nyak. Eik douk urkum manawashamen abom. Aria nyak nyasuhw Iruhin ananin baraen nyagipeshen aria eik douk yahwaren nuganin. Eik douk Iruhin nagipesh ananim atum urkum aria Krais Jisas nagraehe um ipe ananin aposel aria inak ikripesh Iruhin ananin adurin baraen. Enyudok baraen um apak matukur Jisas aria morao agundok um mupe wosik abom ihih nyumneh um.  
\p Aria eik yakri Yain Iruhin nini apakin Debeini Krais Jisas hutaurumen meyoh aria nyakihw apahw hwur wosik.   
\s1 Apak Mare Munenek Abraen Um Mukripesh Iruhin Ananin Baraen Kupaishi Arpesh Um  
\p
\v 3 Eik yenek tenkyu um Iruhin. Anan douk eik yenek ananin mour wosik iri. Eik yenek ananin mour um, eik urkum mor wosik aria madae urkum mur um ikri eik yenek enesh yoweishi inahos uwe, uwok. Eik yeneken wosik kabi seiwok eikim yakenyim babukenyim heneken um. Aria ihih nyumneh eik yenek beten um Iruhin um, eik yenek urkum um nyak aria yarigan nyumnah wab um nutaurumen.  
\v 4 Riguk ohwak douk wape atugun. Aria douk eik yenek urkum um nahudok nyumnah eik yakutinyukuk ba yanaki ahi, ohwak wonakom roguhw aria nyak nyareh abih nyapeik aria eik yanaki. Douk namudok aria eik yakri abom um wata shopunek itrin aria wata inadudarehumen.  
\v 5 Aria shopunek, yenek urkum um agundok nyak nyasuhw Iruhin ananin baraen dodog nyagipeshen abom um. Seiwok nyakik babukek Lois kwarik kwasuwen dodog kwagipeshen. Aria nyakik amakek Yunis shopunek kwasuwen dodog kwagipeshen. Douk namudok aria eik yadukemesh abom um nyak shopunek douk nyasuwen nyagipeshen kabi owo um.  
\v 6 Namudok aria eik yakri ikripen enyudok baraen aria nyak mare urkum mukenyaguk. Baraen enyudok. Riguk eik yowem wis um nyakig barag aria Iruhin neken enyudok presen um nyuneken dodogowin atin abom um nyunek ananin mour um. Douk namudok aria nyak ta nyunek urkum um enyudok presen anan nekenyen iri aria nyupe dodogowin atin abom nyunek ananin mour.  
\v 7 Um maresh? Iruhin ananin Mishin douk nyape apak ananipari douk madae nyenekap munogugur uwe, uwok. Enyen douk nyenekap morao enyenyin dodog matogur dodogowip aria apak urkwip panawasham sabaishi arpesh mataurumesh. Aria shopunek douk ananin Mishin atin nyenekap masuhw merik um apak kanak wosik.   
\p
\v 8 Douk namudok aria nyak mare nyunenek abraen um agundok eik yakripesh Iruhin ananin baraen aria douk yonoweshik um, uwok. Aria shopunek, mare nyunenek abraen um nyukripesh apakin Debeini ananin baraen um. Nyak ta nyuni eik wiyotu atugun um ukripesh Iruhin ananin baraen. Ohwak mare unogugur um agundok arpesh shukri uwok um ukripesh Iruhin ananin baraen um aria shohw umnek eriger um, uwok. Anan ta nutaurumohw nunekohw wiyotu dodog.  
\v 9 Iruhin douk narap matanamori mape wosik aria nahwarap um mupe ananip atup abom aria mupe yopupari. Anan douk madae nutik eneh yopihi aih apak menekeh iri aria douk nuhwarap uwe, uwok. Anan nagipesh ananim atum urkum aria nahwarap meyoh. Um maresh? Seiwok baugos um, Iruhin urkum morum apak aria neshopoki Krais Jisas nanaki nataurumap narap meyoh.  
\v 10 Aria douk enyudok seiwok Iruhin nakriyen iri douk nyatogur. Krais Jisas douk nanaki aria narao apak matanamori mape wosik. Aria nabo agundok um apak mugok munak muwishuk abom um nabuhuk. Namudok aria apak ta mare mugok munak muwishuk abom, uwok. Apak ta mupe wosik ihih nyumneh kabi Iruhin ananin yopinyi baraen nyakripap um.  
\v 11 Aria Iruhin nagraeh eik aria neshopoke um inak ikrip arpesh um enyudok ananin baraen. Douk namudok aria eik douk yanak yakripeshen yenek skulum sabaishi arpesh.  
\v 12 Douk yenek skulumesh aria douk eik yape yemnek debeiri eriger. Aria eik madae inenek abraen uwe, uwok. Um maresh? Eik yadukeman wosik abom anudok eik yenek bilipuman iri aria yakan eik kanak abom yani eikin mour yor ananis wis. Aria eik yadukemesh abom um anan ta nutaurume nurukarube ipe wosik aria inek enyudok atin mour arigaha inak itogur um ahudok nyumnah anan nutanamori ahi.   
\p
\v 13 Enyudok yopinyi baraen douk riguk eik yakripenyen iri nyak ta nyusuwen nyugipeshen aria nyukripesh enyudok atin kupaishi arpesh. Aria nyak nyukripesh Iruhin ananin baraen obi nyutob, nyak ta nyugipesh ehudok aih um nyusuhw ananin baraen dodog nyugipeshen um, nyuni ehudok um nyak urkum munawasham anan nini ihishmorim arpesh um. Ehudok biyeh aih, eheh douk Iruhin nako apak douk matukur Krais Jisas iri.  
\v 14 Aria nyak ta nyutaurumen wosik Iruhin ananin baraen douk anan nakri nyak wosik um nyukripeshen iri. Aria Iruhin ananin Mishin douk nyape apak iri ta nyutaurumen um nyunek nyak nyutaurumen wosik Iruhin ananin baraen.  
\v 15 Nyak nyadukemesh eshudok ihishmorim arpesh shape agudok shokugi nahobig Esia iri shani amudok biom Figelus iri Hermogenes. Eshesh douk shakri uwok um eik aria shakutuwe-iguk.  
\v 16 Aria Onesiforus atun nataurume. Sabaihi nyumneh anan nanaki nataurume aria nenek eikihw apahw hwor wosik. Eik showeshike senab yape aria anan madae nunenek abraen um agundok eik yonoweshik yape um uwe, uwok. Sabaihi nyumneh anan nanaki nataurume aria neneke yatogur dodogoiwe. Namudok aria eik yakri apakin Debeini nukri gihaum Onesiforus nini ananip awirop aria nutaurumesh.  
\v 17 Aria nubokadae sagomatin anan nanaki abrudok debeiburi wabur Rom um, anan nenek urkum um eik aria naurime nanak arigaha nanaki naparuge.  
\v 18 Aria nyak nyadukemesh um anan nenek sabainyi Iruhin ananin yopinyi mour gani Efesus um nataurum sabaishi arpesh aria nataurum eik shopunek. Douk namudok aria eik yakri enyudok. Hahudok nyumnah apakin Debeini Jisas nunaki ahi, anan ta nenek gihauman aria natauruman.   
\c 2  
\s1 Timoti Ta Nunek Jisas Krais Ananin Mour Dodogowin Atun Kabi Anan Soldia Um  
\p
\v 1 Nyak eikin nuganin Timoti douk nyani eik watukur Krais Jisas aria anan douk nataurumohw meyoh. Douk namudok aria nyak ta nyurao dodog um agundok anan nataurumohw meyoh um aria nyiyotu dodogowin atin.  
\v 2 Riguk apak sabaipari Iruhin ananish arpesh mantorum mape aria eik yakripen enen yopinyi baraen. Aria nyak ta nyukripam enyudok atin baraen mamudok douk henek mour wosik aria gamo hadukemesh um hunek skulum kupaishi arpesh iri. Nyak nyukripam aria amam ta hunek skulumesh wosik um enyudok atin baraen kupaishi arpesh.  
\v 3 Aria nyak nyani apak douk matukur Krais Jisas. Douk namudok aria abudok nyutob apak murao amaen aria mumnek eriger obi nyutob, nyak ta nyiyotu dodog aria mare nyunogugur nyuruwok, uwok. Apak ta miyotu dodog kabi anan soldia nemnek eriger aria neyotu dodog um.  
\v 4 Nyak nyadukemesh, anan soldia douk nakri nunek ananin debeini soldia nunadudareh-uman. Douk namudok aria anan nakutukuk ihinyumorim kupainyi mour aria napeum nenek nyanyudok amam soldia heneken iri atin mour.  
\v 5 Aria shopunek, nyak nyunek urkum um anan nenek resis iri. Aria anan nugipesh lo um resis aria nahur debeg nishagrakuk kupaishi um, anan ta nurao prais. Uwok um ta uwok.  
\v 6 Aria nyak nyunek urkum um anan nenek mour nubarig iri. Anan nenek debeinyi mour arigaha ananigun worigun jurugigun aria enyen douk wosik um anan nurik nunenek sagom-atinyigun worigun um.  
\v 7 Nyak ta nyunek urkum um enyudok biyen atin baraen iganigadae yarig yenyem iri aria Debeini ta nutaurumen um nyudukemesh um baugenyum um.   
\p
\v 8 Aria nyak ta nyunek urkum um Jisas Krais, king Devit ananin barhonin. Anan douk shan nagok aria Iruhin wata nonohur nakitak nape kabi douk Iruhin ananin yopinyi baraen eik yakripesh-enyi nyakrium.  
\v 9 Aria enesh arpesh shakri uwok um eik ikripesh enyudok baraen um aria eshesh sheneke yemnek debeiri eriger. Aria showeshike senab kabi douk showeshik shenek yoweishi inahos iri arpesh um. Eshesh shenekesh namudok aria eshesh madae dodogowish um shubo Iruhin ananin baraen nyubuhuk uwe, uwok. Enyen nyarahaen nyeyatak warub.  
\v 10 Douk namudok aria eik yosah ihinyumorim amaen aria yeyotu dodog um itaurum eshudok douk seiwok Iruhin nagraehesh iri. Anan nagraehesh um Jisas Krais nuraesh shutanamori shupe wosik abom agundok bogaragun um ihih nyumneh.  
\v 11 Enyudok baraen douk adurin atin aria apak ta munek bilipumen. Baraen enyudok.  
\q1 “Aria apak mutukur anan aria mugok um, apak shopunek ta wata mukitak muni anan mupe atugun.   
\q1
\v 12 Aria ta miyotu dodog abudok nyutob amaen nyutogrumap obi nyutob, apak ta muni anan mupe debeipari. Aria ta apak mukri uwok um anan um, anan shopunek ta nukri uwok um apak shopunek.   
\q1
\v 13 Aria ta apak mukutukuk ananin baraen um, anan ta mare nukutinyukuk, uwok. Anan ta nugipeshen wosik abom.”   
\s1 Timoti Ta Nunek Mour Um Nutogur Yopuni Nenek Iruhin Ananin Mour Wosik Abom Iri  
\p
\v 14 Timoti, nyak ta nyupe um nyukripesh enyudok atin baraen eik yakripenyen iri. Aria shopunek, nyukripesh wosik enyudok enen baraen shopunek um shumneken. Nyukri, “Iruhin nape natrip aria ipak mare pune rupanitak punotutukem debeg um enyudok sakihasin baraen, uwok. Ehudokmori aih ta mare hutaurumep um enesh eshudok eneshenesh. Aria eshudok shumnekep iri ta shukutukuk yopinyi baraen aria shupe yowesh abom.”  
\v 15 Aria nyak ta dodogowin um nyuneken wosik Iruhin ananin mour um nyuneken nunadudareh-umen. Aria shopunek, nyak ta nyunek skulumesh um ananin adurin atinyi baraen wosik abom um kweipon shopunek anan ta nunadudareh-umen. Aria nyak ta mare nyunenek abraen um anan, uwok.  
\v 16 Aria nyak mare nyuni kupaishi piyagwreh enenyenen rohwin baraen douk madae nyugipesh Iruhin ananin baraen iri uwe, uwok. Um maresh? Eshudok douk sheneyagwreh enyudokmori baraen iri ta shukutukuk Iruhin aria shunek yoweishi inahos shishagrakuk riguk sharik shape sheneken um.  
\v 17 Enyudokmori baraen douk apa nyenek arpesh shape kabi douk sagomatin shokuguni arabigun napenyesh, aria arigaha natogur debeibi arab iri. Aria enyudokmori baraen shopunek douk namudok atin. Sagomatin karowish shemneken, aria arigaha nyatogur debeinyi aria sabaishi shemneken aria shakutukuk Iruhin ananin baraen. Aria anam heyagwreh enyudokmori baraen iri douk Himeneus iri Filetus.  
\v 18 Amudok biom douk hakutukuk jurug adurin atinyi baraen aria hape henek rohw hakri shagok iri arpesh douk riguk shakitak shape. Amam henek rohwumesh namudok aria henek enesh arpesh shakutukuk agundok shasuhw Iruhin ananin baraen shagipeshen um.  
\v 19 Aria Iruhin ananish arpesh douk shape dodog kabi douk uroruh hosah urusag iri um. Aria Iruhin nowem enyudok baraen um nakri eshesh shupe ananish atish abom. Baraen enyudok.  
\q1 “Debeini douk nadukemesh wosik abom um ananish arpesh.”  
\m Aria enen nyakri namudok.  
\q1 “Eshudok arpesh douk shakrip kupaishi shakri eshesh douk Debeini ananish iri ta shukutukuk ihishmorim yoweishi inahos abom.”   
\p
\v 20 Numun anat debeiti urupat sabaisi marus sani dis iri yaureruh shakus. Enesh shenekesh shakwu gol iri siliwa, aria enesh shabar rowos shenekesh, aria enesh shakwu amnab shenekesh. Aria enesh shenekesh um shuruh yopuguni worigun um, aria enesh um shuruh yoweishi eshudok eneshenesh um.  
\v 21 Aria eshudok arpesh douk shakutukuk eneheneh yoweihi aih hani eshudok yoweishi arpesh, aria numun esheshiruh aparuh yopuruh iri douk shape kabi asudok yopusi marus sani dis iri yaureruh douk shakus urupat iri um. Aria eshesh douk wosik um shunek esheshin Debeini ananin mour. Aria eshesh ta shupe ananish atish abom shutrugun um shunek ihinyumorim yopinyi mour.   
\p
\v 22 Aria nyak ta nyukutukuk eshudok eneshenesh yoweishi inahos douk werorowishi apa mishish shakitakumesh aria shenekesh iri aria nyunek yopinyi atin namudok. Nyak ta nyusuhw Iruhin ananin baraen dodog nyugipeshen wosik aria nyak urkum ta munawasham kupaishi arpesh aria nyutaurumesh. Aria nyuni eshudok arpesh douk esheship urkwip douk porum yopinyi atin aria shenek beten shorig Iruhin iri um ta punagabe um pupe atugun.  
\v 23 Aria nyak ta nyukutukuk wehinyi nyuni rohwish iri sheyagwrehen iri baraen. Um maresh? Nyak nyadukemesh, sheneyagwreh enyudokmori baraen iri apa juwehosishi aria shapeum um shanitok shanatutukem atin.  
\v 24 Aria mamudok douk henek apakin Debeini ananin mour iri mare huni kupaishi shunitok shunotutukem uwe, uwok. Amam ta huni eshesh shupe atugun aria hupe shakamum ihishmorim arpesh hutaurumesh aria hukripesh shokubur. Amam ta hukripesh wosik abom Iruhin ananin baraen um eshesh shudukemesh wosik. Aria ta enesh shunek enesh yoweishi inahos um amam um, amam ta hupe hunatrish meyoh.  
\v 25 Aria amam ta hupe shakamum eshudok douk shakri uwok um Iruhin ananin baraen iri aria hukripesh shokubur. Amam hukripesh namudok um Iruhin nutaurumesh aria shukeshuk agabus yoweishi inahos aria shatanam shukon aparuh shudukemesh um ananin adurin baraen aka, uwok?  
\v 26 Aria shopunek, hukripesh shokubur um shurao yopipi urkwip um shudukem Iruhin aria anan ta nukweshihesh um agundok Satan noweshikesh dodog aria shape shagipesh ananim urkum um.   
\c 3  
\s1 Hugiguk Iri Nyumneh Hutogur Um Ta Shunek Yoweishi Inahos  
\p
\v 1 Timoti, nyak douk nyadukemesh um enyudok enen baraen shopunek. Baraen enyudok. Hugiguk iri nyumneh hutogrum, apak ta mupe yoweihi nyumneh murao enenyenen amaen.  
\v 2 Ehudok nyumneh arpesh ta shunek urkum um eshesh atish. Aria eshesh ta mishish shukitak um shukri shurao sabaibori utabor. Eshesh ta shukri eshesh douk yopishi arpesh aria shenek yopinyi iri. Eshesh ta shunagunukuk aria shutuk esheshish nyeiguhw shuto iruhw aria ta shuho kupaishi shukripesh debeg. Aria shopunek, ta mare shumnek esheshish amakenyish esheshin baraen, uwok. Aria eshesh ta mare shunek tenkyu um kupaishi arpesh douk shenek yopinyi um eshesh iri. Aria eshesh ta mare shumnek Iruhin ananin baraen shugipeshen, uwok.  
\v 3 Aria eshesh ta mare urkwip punawasham kupaishi arpesh shutaurumesh, uwok. Eshesh ta shunekesh kabi douk bur nubat um. Eshesh madae shukweshih yoweishi inahos kupaishi shenekeshum eshesh iri aria eshesh ta shupe um shunitok atin. Eshesh ta shuhesh aria shukripesh baraen douk madae adurin iri uwe. Aria eshesh ta mare shusuhw merik um eshesh kanak, uwok. Aria eshudok yoweishi inahos douk eshesh urkwip porumesh um shunekesh iri, eshesh ta shunekesh. Eshesh ta shukri shunek wanohw atuhw shupe. Aria eshesh ta shukri uwok abom um yopinyi aria ta shupe um shunek yoweishi inahos atish.  
\v 4 Aria ta shiyagwreh-pesh rohwinyum baugeshi arpesh aria shiyabig esheshish horim um shunak shusuwesh shesh. Aria arigaha eshesh ta shunek eshudok yoweishi inahos douk eshesh urkwip poromesh iri. Aria ta shunagunukuk shukri eshesh douk yopishi shadukemesh um eneshenesh iri. Aria eshesh urkwip ta mare punawasham Iruhin, uwok. Eshesh ta mishish shikitak abom um shunek ehudok aih douk ta shunekeh aria hunekesh shumnek wosik abom atin iri.  
\v 5 Aria eshesh ta shukri eshesh douk yopishi shenek lotu iri. Aria eshesh ta shunek lotu meyoh. Eshesh ta shukri Iruhin douk madae dodogowin um nushanam um esheshih yoweihi aih um uwe. Eshudokmori arpesh nyak mare nyuni eshesh nyupe atin, uwok.  
\v 6 Eshudokmori arpesh shape shenekesh namudok aria eshesh anam armam apa hape harahe hakripesh amamin baraen. Aria hanabeshuk hanak hawish ono armago owowig urusag aria hape hasumo merik. Aria oudok armago douk madae dodogowiyu um usuhw merik um owowip urkwip uwe. Owo wape um wenek yoweishi inahos atish aria wenek eneheneh yoweihi aih douk owo mishish shakitakumeh um unekeh iri aih.  
\v 7 Aria kupaishi arpesh shakripo baraen aria ihih nyumneh owo wape um umneken um urao saki aria owo madae udukemesh um Iruhin ananin adurin atinyi baraen uwe, uwok.  
\v 8 Aria amudok armam hakri uwok abom um Iruhin ananin adurin atinyi baraen. Douk namudok aria amam douk hakri hen nyubuhuk kabi seiwok amudok biom Janes iri Jambres hakri hubo Moses ananin baraen nyubuhuk um. Aria amam madae hudukemesh um Iruhin ananin baraen uwe, uwok. Amam henek rohw iri abom aria madae husuwen dodog hugipeshen uwe.  
\v 9 Aria sabaishi arpesh ta shudukemesh um shukri amam douk rohwimi kabi seiwok sabaishi shadukemesh um Janes iri Jambres shakri amam rohwimi um. Namudok aria sabaishi arpesh ta shumnek amamin baraen aria enyen ta mare nyuhur esheshiruh aparuh um shumneken shugipeshen uwe, uwok.   
\s1 Pol Nakripan Dodogowinyi Baraen Timoti Um Nusuhw Iruhin Ananin Baraen Dodog  
\p
\v 10-11 Riguk ohwak wape atugun um, nyak nyadukemesh abom um eikih aih. Aria shopunek nyadukeme um agundok yenek skulumesh um Iruhin ananin baraen aria yape yenek yopinyi atin mour um. Aria eik yakripen ihinyumorim baraen eik yenek urkum-umen iri. Eik yakripen um agundok yenek Iruhin ananin mour atin um, aria yasuhw ananin baraen dodog yagipeshen um. Aria eik yape shakamum ihishmorim arpesh. Aria meyagwreh baraen um, eik apa yeyagwreh yakripesh shokubur. Aria shopunek, eik urkum manawasham arpesh yataurumesh. Aria arpesh sheneke yemnek eriger um, eik yeyotu dodog yenek Iruhin ananin mour. Aria nyak nyadukemesh um agundok eshesh arbudok biarub atin debeirubi warub Antiok bani Aikoniam aria Listra sheneke yemnek debeiri eriger um. Aria Debeini nataurume um enenyenen amaen douk nyatogrume iri aria nanarae yape wosik.  
\v 12 Aria eshudok ihishmorim arpesh douk shatukur Krais Jisas aria shukri shugipesh anan shunek Iruhin nakriyen iri um, kupaishi ta shunekesh shumnek debeiri eriger.  
\v 13 Aria eshudok yoweishi arpesh shuni eshudok douk shape shenek rohwumesh iri ta shupe shunek yoweishi inahos shishagrakuk riguk sharik shape shenekesh um. Aria kupaishi ta shunek rohwumesh aria eshesh ta wata shukitak shunek rohw um enesh kupaishi shopunek.   
\p
\v 14 Aria nyak ta nyupe um nyugipesh enyudok atin baraen seiwok shenek skulumen shakrip-enyen aria nyenek bilipumen iri. Um maresh? Nyak nyadukemap apak douk munek skulumen iri.  
\v 15 Aria nyak nyadukemesh, seiwok nyak douk wata shokwin aria shakripen Iruhin ananin baraen nyetem ananik Buk iri aria nyak nyadukemen jurug. Enyudok baraen douk wosik um nyutaurumen nyusuhw Krais Jisas ananin baraen dodog nyugipeshen aria Iruhin wata nuraen nyutanamori nyupe wosik abom.   
\p
\v 16-17 Enyudok ihinyumorim baraen nyetem Iruhin ananik Buk iri douk Iruhin ananin abom. Seiwok anan nohur armam henyemaguk. Aria enyen douk yopinyi abom um nyunek skulumap um mudukemen wosik aria nyiyabigap apakish yoweishi inahos mukeshuk agabus. Aria shopunek um nyukrip eshudok douk shakutukuk Iruhin ananin baraen shanak shagipeshuk kupainyi iri um shutanamori shugipesh ananin adurin baraen. Aria shopunek um nyunek skulumap um mugipesh yopihi atih aih um apak Iruhin ananip miyotu dodogowip aria wosik abom um munek ihinyumorim yopinyi mour.   
\c 4  
\s1 Timoti Ta Niyotu Dodogowin Aria Nukripesh Iruhin Ananin Baraen Ihih Nyumneh  
\p
\v 1 Ohwak douk Iruhin nani Krais Jisas hape hatruhw. Krais Jisas anan douk ta kweipon nutanamori aria nunek skelimum ihishmorim shagok iri shuni shape iri arpesh. Aria anan ta nupe Debeini um ihishmorim arpesh. Douk namudok aria eik yakri ikripen enyudok dodogowinyi baraen um nyugipeshen. Baraen enyudok.  
\v 2 Nyak ta nyiyotu dodog aria nyupe nyukripesh Iruhin ananin baraen yopugunum. Aria ta eshesh shukri wosik um shumneken o shukri uwok um, nyak ta gamo nyukripesh shopunek atin. Nyak ta nyukripesh um shudukemen aria shukri enyudok baraen douk adurin. Aria enyen nyiyabigesh um eshesh douk shenek yoweishi inahos abom aria eshesh ta shukutishukuk. Aria nyishuhur nyukripesh wosik Iruhin ananin baraen um shiyotu dodog aria shugipeshen. Aria abudok nyutob nyukripesh obi nyutob, nyak ta nyupe shakamum eshesh aria nyakihw apahw ta hwur wosik aria nyukripesh shokubur. Aria ihih nyumneh nyak ta nyupe um nyunek skulumesh um shudukemen wosik Iruhin ananin baraen.  
\v 3 Aria anob nyutob, enesh arpesh ta shukri uwok um shumnek Iruhin ananin adurin baraen um. Eshesh ta shukri shumnek enyudok baraen douk eshesh meyoh shakri shumneken iri. Aria eshesh ta shuhwar sabaishi arpesh um shunaki shunek skulumesh um enyudok atin baraen douk eshesh kanak mishish shakitak abom um shakri shumneken iri.  
\v 4 Aria eshesh ta shukri uwok um shumnek Iruhin ananin adurin atinyi baraen aria ta shukutinyukuk. Aria eshesh ta shumnek enyudok sakihasin baraen atin.  
\v 5 Aria nyak ta nyiyotu dodogowin atin aria nyutaurum nyak kanak. Aria ta enesh arpesh shuneken nyurao enen amaen um, nyak ta nyiyotu dodog. Aria nyukripesh Iruhin ananin baraen eshudok douk wata shutogur Kristen iri uwe um shukon aparuh Iruhin. Aria nyuneken wosik ihinyumorim mour douk Iruhin nakripen um nyuneken iri.   
\s1 Pol Ananin Mour Hurukatin Um Nyutuh  
\p
\v 6 Eik Pol douk hurukatin um she igok. Aria agundok she igok um douk kabi yenek ofa um eik kanak um Iruhin um. Eik yenek ofa um eik kanak kabi eshesh Juda apa shenek ofa um wainibar abar shako Iruhin aria shourak-baruk atap um.  
\v 7 Aria eik douk dodogeshiwe yabo yoweihi aih habuhuk kabi douk anan nenek boksen iri nenek uhwin nabo kupaini um. Aria eik douk yenek uhwin, yenek Iruhin ananin mour yeyaten kabi douk anan nahur nenek resis iri nenek uhwin um. Seiwok arigaha douk, eik yape yasuhw Iruhin ananin baraen dodog yagipeshen.  
\v 8 Aria hahudok nyumnah apakin Debeini Jisas nutanamori ahi, anan ta nunek skelimum arpesh nugipesh ananih yopihi atih aih abom. Aria hahudok nyumnah, anan ta nuke yopunyi mugu kabi douk shenek resis iri shenek uhwin sharaen iri. Enyudok mugu douk enyudok. Anan ta nuhware yopuweiri. Aria anan ta mare nuhwar eik atuwe yopuweiri, uwok. Anan ta nukripesh enyudok atin eshudok douk urkwip panawasham anan aria mishish shakitak abom um shakri shutrun nutanamori iri.   
\s1 Nyatuh Iri Baraen  
\p
\v 9 Aria nyak ta nyunekesh arigas atin um nyunaki nyutik eik.  
\v 10 Um maresh? Demas mishin nyakitak abom um nakri nurao yopishi eshudok eneshenesh um nupe wosik agundok atap. Douk namudok aria anan nakutukuk eik nanak um Tesalonaika. Aria Kresens nanak um shokugi nahobig Galesia, aria Taitus nanak um shokugi nahobig Dalmesia.  
\v 11 Aria eik yani Luk atun wapeik agundok. Douk namudok aria nyak nyurauri Mak niren punaki. Um maresh? Anan douk wosik um nutaurume um unek Iruhin ananin mour agundok.  
\v 12 Aria Tikikus, eik yeshopokan nanak um Efesus.  
\v 13 Aria nyak nyukri nyunakumori, nyak ta nyunak Troas aria nyuhurmei eikit debeiti saket douk takus Karpus ananit urupat aria nyusuwatume iri. Aria shopunek, eik yakri nyusuhume iri abom oudok bumeb douk shadaresho iri. Aria shopunek, nyak mare urkum mukenyaguk um oudok kupaiwori bumeb shopunek douk sheneko mahishis yegenyihwis iri. Nyak ta nyusuwoume iri.   
\p
\v 14 Anudok Aleksander douk apa nakwu bras nenek eneshenesh eshudok iri apa neneke yarao sabainyi amaen. Aria kweipon apakin Debeini ta nuwanaman yoweinyi poe um enyudok anan neneken um eik iri.  
\v 15 Aria nyak shopunek ta gamo nyudukemesh um anan. Um maresh? Riguk apak makripesh Iruhin ananin yopinyi baraen um, anan nakri abom um nubo apakin baraen nyubuhuk.   
\p
\v 16 Aria nubokadae sagomatin eshesh Rom shenekume kwot um, madae enen arpen nyutaurume uwe, uwok. Ihishmorim shanogugur aria shakutuweik sharuwok. Aria eik yakri Iruhin mare nuwanamesh yoweinyi poe eshudok arpesh douk sharuwokume iri.  
\v 17 Aria apakin Debeini nape nani eik neneke yeyotu dodogoiwe aria yakripesh abom um ananin baraen ihishmorim madae shudukemesh um Iruhin iri uwe douk shantorum shape shemnek kwotog iri shemneken. Aria eshesh hurukatin um she igok, aria uwok. Anan nataurume aria eik wata yape wosik. Enyudok kabi narae natriwe iri um debeinyi mahin laion enyenyit nokwat um.  
\v 18 Douk namudok aria yoweishi arpesh shukri she igok um, apakin Debeini ta nutaurume aria nurae inak ipe wosik agundok anan nape Debeini um ananish arpesh um. Aria eik yakri apak mutuk ananin nyeigur nyuto iruhw ihih nyumneh. Adur atin.   
\p
\v 19 Aria nyak ta nyukrip Prisila kwuni okwokwin arman Akwila shuni eshesh Onesiforus ananip awirop nyukri eik yenemeshugu yopuhi nyumnah eshesh.  
\v 20 Aria eik douk yadiguk Erastus napeik Korin aria Trofimus douk arugeh han ganik aria yadiyanuguk napeik Miletus.  
\v 21 Aria nyak ta nyunaki arigas. Um maresh? Ta debeinyi uhwin nyuhur youg yoweg aria nyak mare nyunaki. Aria Yubulus nani Pudens iri Linus hani okwudok armatok Klodia shani ihishmorim Kristen shape agundok iri shenek-menyugu yopuhi nyumnah nyak.   
\p
\v 22 Aria eik yakri apakin Debeini nini nyak abom nupe aria nuneken nyiyotu dodogowin atin. Aria shopunek yakri anan nutaurumep meyoh ipak ihishmorim aria nunekep pupe wosik.