\id 2PE - Arapesh NT (Central dialect) [aon] -Papua New Guinea 2003 (web version -2012 bd) 
\h 2 PITA 
\toc1 Pagiguk Iri Shup Douk Pita Nenekap Iri 
\toc2 2 Pita 
\toc3 2Pit 
\mt1 Pagiguk Iri Shup Douk Pita Nenekap Iri  
\imt1 Banenyi Baraen Um Enyudok Baraen Pita Nagiguk Nenyem Iri  
\io1 1:1-2 Pita nanadudareh um eshesh Kristen aria nakripesh Iruhin ananin baraen.  
\io1 1:3-21 Iruhin nanagraehap mape ananip atup um douk mupe munek ananih sabaihi yopihi aih mishagrakuk riguk marik mape menekeh um  
\io1 2:1-22 Amam henek rohwumesh iri profet apa henek yoweihi aih. Namudok aria Iruhin ta nuwanom-umom yoweishi inahos amam henekesh iri aria hurao debeiri eriger  
\io1 3:1-16 Debeini ananih nyumnah ta hutogur aria ihishmorim eneshenesh eshudok ta shunak shuwishuk. Namudok aria apak ta munek yopihi aih mupe mutrugun-umah  
\io1 3:17-18 Pita nakripesh nyatuh iri baraen um nyunekesh shupe dodogowish um bilip  
\c 1  
\p
\v 1 Eik Saimon Pita douk yape shakamum Jisas Krais yenek ananin mour aria nagraehe um inek mour aposel um inak ikripesh ananin baraen aria yenekumepogu apudok shup ipak. Eik yenekapumagu ipak arpesh douk parao enyudok atin dodogowinyi bilip kabi douk apak maraen iri um. Jisas Krais apakin Iruhin douk nataurumap narapi mape wosik iri nenek yopihi atih aih aria nataurumep pemnek ananin baraen pasuhwen dodog.  
\v 2 Ipak douk padukemesh um Iruhin nani apakin Debeini Jisas Krais. Douk namudok aria eik yakri um agundok ipak padukemesh um amam um hunek ehudok aih um amam hataurumep meyoh um huni enyudok um henekep ipakiruh aparuh hur wosik um hutogur debeh abom um ipak.   
\s1 Iruhin Nahwarap Aria Nanagraehap Abom Um Mupe Ananish Atish Arpesh  
\p
\v 3 Krais douk nahwarep um punaki puni anan purao ananih yopihi aih huni ananin debeinyi yopinyi dodog. Anan douk narao Iruhin ananin dodog aria nakop eneshenesh yopishi eshudok douk apak wokap-umesh um mupe wosik aria mugipesh Iruhin ananih aih um. Apak madukemesh um Krais aria anan douk nahwarap um nini apak murao ananin natrugun abomum iri nini ananih yopihi aih.  
\v 4 Aria um enyudok Jisas ananin debeinyi dodog atin, anan nakopesh jurug yopishi abom eshudok eneshenesh douk anan nakri adurin atinyi baraen um ta nukapeshi iri. Eshudok anan nakapesh iri ta shutaurumep pupe wosik. Ipak ta pupe namudok atin puni Iruhin aria pugipesh ananih yopihi aih. Um ipak puruwok-umaguk eneshenesh yoweishi inahos shape agundok atap iri douk apa shenek arpesh esheshish mishish shikitak-umesh um shunek yoweishi inahos iri.   
\p
\v 5 Douk namudok aria ipak ta gamo pudukemesh abom um punek yopihi atih aih. Aria pihanuh um enyudok um pasuhw Jisas ananin baraen dodog pugipeshen um. Aria purao yopinyi saki pinyanuh um yopihi aih.  
\v 6 Aria enyudok um pusuhw merik um ipak kanak um pinyanuh um yopinyi saki. Aria enyudok um piyotu dodogowip pusah enenyenen dodog um pinyanuh um enyudok um pusuhw merik um ipak kanak um. Aria enyudok um pugipesh Iruhin ananih aih um pihanuh um enyudok um piyotu dodogowip um.  
\v 7 Aria enyudok um punek urkwip um kupaishi Kristen putaurumesh um pinyanuh um enyudok um pugipesh Iruhin ananih aih um. Aria enyudok um ipak urkwip punawasham ihishmorim arpesh um pinyanuh um enyudok um punek urkwip um kupaishi Kristen putaurumesh um.   
\p
\v 8 Ipak padukemesh um apakin Debeini Jisas Krais anan douk baugos abom um ehudok iganigadae yarig yakriyeh iri aih. Aria ta ipak pugipesh ehudokmori aih aria pishagrakuk riguk pape penekeh um, ipakin saki um padukem um Jisas Krais um ta mare nyupe meyoh, uwok. Enyen ta nyukwarmori sabaihi yopihi aih. Aria shopunek ta punek Krais ananin mour nyutogur wosik.  
\v 9 Meinyi arpen douk ehudokmori aih madae hupenyen iri uwe ta mare nyutik eshudok douk shape rougun iri nyudukemesh, uwok. Enyen kabi douk enen nabes seshukenyi arpen um. Enyen douk urkum mekenyaguk um agundok Krais neshurokuhen aria neneken nyatogur yopin um.   
\p
\v 10 Douk namudok aria ipak Kristen, ipak ta punek mour dodogowip atip pishagrakuk seiwok pape peneken iri um pugipesh agundok douk Iruhin nahwarep um pupe ananip atip um. Aria ta ipak punekesh namudok um, ipak ta mare putu punek yoweishi inahos, uwok.  
\v 11 Aria shopunek, kweipon Iruhin ta nunadudareh-umep nukri wosik abom um ipak punak puwish pupe agundok douk ta apakin Debeini Jisas Krais nupe debeini king ihih nyumneh um. Abrudok wabur ababur douk apakin Debeini Jisas Krais douk narap mape wosik atin iri napenyaburi.   
\p
\v 12 Adur, ipak padukemesh um enyudok baraen aria pasuhwen dodog enyudok adurin atinyi baraen. Aria eik ta wata ipeum ikripep atin um ipuhur um urkwip purum enyudok baraen.  
\v 13 Eik yakri enyen douk wosik um agundok eik wata yape agundok atap obi nyutob um ihur ipak um urkwip purum enyudok baraen um.  
\v 14 Um maresh, eik yadukemesh, eik douk hurukatin um igok. Enyudok enyen douk apakin Debeini Jisas Krais nakripe.  
\v 15 Douk namudok aria eik ta inek mour dodogoiwe atuwe um inekumepoguk anah yah hupeimepaguk um eik igokuk um, ipak ta urkwip purum enyudok baraen eik yakripepen iri.   
\s1 Apak Matik Agundok Krais Natrugun Abom Um  
\p
\v 16 Apak douk makripep um agundok apakin Debeini Jisas Krais ta wata nutanamori um nyani agundok anan dodogowin abom um. Aria enyen douk madae mukripep enen sakihasin baraen douk shadukemesh iri arpesh shakripap-enyuk iri uwe, uwok. Apak matrun abom apakis nabes um agundok anan dodogowin abom natrugun um aria apak makripep.  
\v 17 Apak douk mani Krais mape aria matrun abom um agundok Yain Iruhin natuk ananin nyeigur nyato iruhw aria natauruman nenekan dodogowin natrugun abom um. Aria abudok nyutob anah mah hatograri gani dodogowini natrugun iri Iruhin napeum hanakumori Krais aria Iruhin nakri, “Anudok eikin Nuganin abom douk eik urkum manawashaman abom iri. Aria eikihw apahw shopunek douk hwanawashaman abom.”  
\v 18 Abudok nyutob apak kanak mani Krais mape ahwudok yopuhwi yoduhw douk Iruhin ananihw aria memnek ahudok mah hanaki gani iruhw heven.   
\p
\v 19 Aria apak urkwip pormoguk enyudok baraen douk seiwok amam profet hakriyenyuk iri madukemen makri enyen douk adurin atin abom. Aria ta ipak pumnek amamin baraen pusuwen um, namudok douk wosik. Um maresh, amamin baraen douk nyape kabi enen lam hanin nyabuh nyakus arukwutigunum iri. Enyen ta hunin nyukus arigaha Debeini nunaki. Anan douk kabi okwudok unuk shuduwi douk apa kwakihi gagrukibus iri. Okwok ta kwukihi aria kwutrugun numun ipakip urkwip.  
\v 20 Aria sagomatin ipak ta pudukemesh um douk madae anan atun profet anan kanak urkum mur um enen baraen nukriyen aria nunyem Iruhin ananik Buk uwe, uwok.  
\v 21 Um maresh, seiwok douk madae enen baraen amam profet hakriyen iri nyutograri amam kanak amamip urkwip uwe. Amam douk Iruhin ananin Mishin atin nyawishom nyomuhur aria hakri enyudok Iruhin ananin baraen.   
\c 2  
\s1 Henek Rohwumesh Iri Profet Amamih Yoweihi Aih  
\p
\v 1 Seiwok anam henek rohwumesh iri profet hatogur hape orokohun um eshesh Israel aria hape henek rohwumesh. Aria douk shopunek ta namudok atin. Anam henek rohwumesh iri tisa omi ta hutogur hupe orokohun um ipak aria hunabeshuk hupe hukripep enenyenen madae adurin iri uwe baraen. Aria ta ipak pugipesh amamin baraen um, ipak ta punak puwishuk yoweiburi wabur. Douk Debeini nagok um amam nator eneshenesh yoweishi inahos amam henekesh iri aria amam wata hakanuguk agabus henek yoweishi inahos. Amam hape henekesh namudok aria Iruhin ta ahudok atuh nunekam hurao debeiri eriger aria nom hugok.  
\v 2 Amam ta hunek yoweishi inahos aria sabaishi arpesh ta shugipesh amamih yoweihi aih. Aria kupaishi ta shutik amamih abraenyih aih aria ta shukanuk agabus um Jisas Krais ananin yopinyi adurin atinyi baraen aria kupaishi shukri Jisas ananih yah yoweihi.  
\v 3 Amudok armam henek nyigiya um hakri amam atum hurao sabaishi eshudok eneshenesh. Douk namudok aria amam ta hukripep enen rohwin baraen douk amam kanak urkwip poromen hakriyen iri um hunatrip ipakibor utabor buni eneshenesh eshudok ipakish shopunek. Aria seiwok douk Iruhin nadukemam aria nakri amam henek yoweishi inahos aria nagraeh anah nyumnah um nusuhw amamit kwot aria amam ta hunak huwishuk abom. Aria shopunek, anudok douk nakri nunemam kwot iri douk wata nape natrugun aria nununum.   
\p
\v 4 Ipak padukemesh, seiwok enesh Iruhin ananish enselahos shenek yoweishi inahos aria Iruhin madae nupe nutrish meyoh uwe, uwok. Anan neshopokesh shanak shape yoweiburi abom wabur. Aria gagundok eshesh shonoweshik shape arukwutigun um shape shatrugun um nyumnah douk ta Iruhin nusuhw esheshig kwotog ahi.  
\v 5 Ipak padukemesh, seiwok Iruhin madae nupe nutrish mokureg uwe seiwokishi arpesh douk shakon agabus anan iri, uwok. Anan nenek debeihi eshah hor aria abar bakih atap aria baesh shagok shatuh. Aria anan nataurum Noa atun douk nakripesh um shugipesh Iruhin ananih yopihi aih iri nani 7-poreish arpesh shopunek naraesh shape wosik.  
\v 6 Aria shopunek, anan nenek kwot um eshudok sabaishi arpesh shape arbudok biarub debeirubi warub Sodom bani Gomora iri aria nakri eshesh shenek yoweishi inahos. Aria anan naesh nenek debeihi nyih hanish hashahuk aria argabus atubus sakusuk. Enyudok anan douk neneken um neyabigap um anan ta nunekesh namudok atin um eshudok arpesh douk shape shakon agabus anan iri kabi douk seiwok nenekesh um eshesh Sodom iri Gomora um.  
\v 7 Ipak padukemesh, seiwok shopunek Iruhin nataurum anan yopuni arman nanahwarum Lot iri naran nape wosik. Lot ananihw apahw douk yowehw abom aria nakri uwok um ehudok yoweihi aih um shenek wehrur um.  
\v 8 Anudok yopuni arman Lot nani eshesh shape aria ihih nyumneh anan natrish aria nemnekesh um eneshenesh yoweishi inahos eshesh shenekesh iri. Aria ananihw apahw yowehw abom aria nakri uwok abom um esheshih aih.  
\v 9 Debeini Iruhin douk nenekesh namudok um eshesh, douk namudok aria apak madukemesh um anan apa nataurum ananish arpesh douk shagipesh anan iri naraesh shape wosik. Douk namudok aria meihi nyumnah enen amaen o kwiraeh nyutogrumesh um, Debeini douk nadukemesh um meihi yah ta anan nuraesh shupe wosik um. Aria kwiraeh ta mare nyunek uhwinyumesh, uwok. Aria shopunek, nadukemesh um meihi yah um nusuhw eshudok arpesh douk shakon agabus Iruhin iri um shupe shumnek debeiri eriger um. Aria nusuhwesh shupe shutrugun um hahudok nyumnah douk ta nusuhw esheshig kwotog ahi.  
\v 10 Enyudok baraen douk adurin abom. Aria eshudok arpesh douk shape shenek eneshenesh yoweishi inahos abom um shenek wehrur iri ta shumnek abom debeiri eriger. Eshudok arpesh, eshesh douk shakri uwok um Iruhin nupe debeini um eshesh iri.  
\p Amudok henek rohwumesh iri armam douk madae hunogugur uwe. Amam hakri hutuk amamish atish nyeiguhw shuto iruhw aria madae hunogugur uwe um hiyagwreh-umesh enenyenen yoweinyi baraen eshudok douk shape kabi enselahos douk shape iruhw iri um uwe, uwok.  
\v 11 Aria Iruhin ananish enselahos douk dodogowish abom sheshagrakuk amudok henek rohwumesh iri. Aria eshesh madae shatanam shiyotu shakon yomogos um Debeini aria shukripesh enenyenen yoweinyi baraen eshudok shape iruhw iri uwe, uwok.   
\p
\v 12 Aria amudok armam hakripesh enenyenen eshudok douk amam madae hudukemesh iri uwe. Amam hagugak kabi douk wanarish mahish shape debeihi urah iri um. Eshudok mahish douk madae enep yopipi urkwip pupenyesh uwe. Esheshish amakenyish douk sheshubuki um arpesh shunak shurimesh shuparugesh aria shesh shugok. Aria amudok armam shopunek douk namudok atin. Amam ta hugok hunak huwishuk kabi eshudok wanarish mahish um.  
\v 13 Amudok henek rohwumesh iri henek kupaishi arpesh sharao debeiri eriger. Aria kweipon Iruhin ta wata nuwanam amamish yoweishi inahos aria nenekam hurao debeiri eriger namudok atin. Amam hanadudareh um hawok sabaiguni worigun aria hagipesh yoweihi harik hapenyam iri aih henek eneshenesh yoweishi inahos yopugunum atugun. Aria amam hani ipak pape pawok debeguni worigun um, amam hanadudareh um agundok amam hape henek rohw aria henek amamih yoweihi aih um. Aria ehudok aih douk henekam hape kabi enen yoweinyi behrabinyi kak orokohun um ipak.  
\v 14 Ihih nyumneh amamis nabes sape um satak sape weyotu yeh iri armago atuw. Ihih nyumneh amam hapeum hani owo shenek wehrur um. Amam madae hukri um hukutukuk ehudok yoweihi aih uwe, uwok. Amam honokunem um kupaishi arpesh douk madae shusuhw Krais ananin baraen dodog iri uwe um honukesh shugipesham shunek yoweishi inahos. Amam douk hadukemesh abom um hunek nyigiya um kupaishi esheshish eshudok eneshenesh. Aria Iruhin douk juwehosin napeum nunekam hurao debeiri eriger.  
\v 15 Amam hakutukuk yopuhi yah aria douk hagugak atin. Amam hagipesh Beor ananin nuganin Balam um ananih yoweihi aih. Balam ananim urkum mor abom um utabor aria nakri nunek yoweishi inahos um nurao sabaibori utabor.  
\v 16 Adur, donkihos madae shiyagwreh atin uwe. Aria enen donki nyeyagwreh aria enyenyih mah nyeyagwreh kabi arpenyih mah um. Enyen nyaho anudok profet Balam nyatap-uman yah um ehudok rohwih aih anan nakri nunekeh iri. Ehudok aih douk eshesh shagugak iri atish shenekeh.   
\p
\v 17 Amudok henek rohwumesh iri armam hape kabi agusudok waiyas douk abar boragasi. Aria shopunek, amam hape kabi orug douk debeinyi uhwin nyahur aria nyaraog gwanak sisiguk iri. Iruhin douk nogabe-imom anagun arukwutigun abom um amam kweipon hunak hupe um.  
\v 18 Amam hanadudareh heyagwreh wehinyi rohwinyi baraen um hutuk amamish nyeiguhw shuto iruhw. Aria honokunem um enesh arpesh um hohur esheshiruh aparuh um shugipesh yoweihi harik hapenyesh iri aih. Aria douk esheship urkwip por abom um ehudok aih um shenek wehrur um. Eshudok arpesh, eshesh douk shape shenek mour um shakri shukutukuk eshudok arpesh douk shenek yoweishi inahos aria madae shudukemesh um Iruhin iri uwe.  
\v 19 Amam hakripesh hakri amamin baraen douk adurin atin aria hakri, “Aria ipak pugipesh apakin baraen um, ipak ta mare enesh eshudok shuweshikep. Ipak ta pupe wosik atin.” Aria amam kanak douk amamih yoweihi aih howeshikam dodog aria hape shakamum eheh. Um maresh, aria eneh aih hunek uhwinyum enen arpen aria hasuhw merikw-umen um, enyudok arpen ta nyupe shakamum ehudok aih.  
\v 20 Aria ta enesh arpesh shudukemesh um apakin Debeini Jisas Krais douk nataurumap narap iri um, eshesh douk shakutukuk jurug agundok atapih yoweihi aih. Aria ta ehudok aih wata hapeum huweshikesh dodog um, eshesh ta shupe yowesh abom. Sagomatin eshesh shape shenek yoweishi inahos um, eshesh shape yowesh wosik atin. Aria douk eshesh shape yowesh abom sheshagrakuk sagomatin sharik shapeum.  
\v 21 Aria eshesh madae shudukemesh um ahudok yopuhi yah um shunek yopihi aih um, ehudok douk yoweihi. Aria ta eshesh shudukemesh um ahudok yah huni Iruhin ananin yopinyi lo, aria eshesh wata shukon agabus Iruhin um, ehudok douk yoweihi aih abom.  
\v 22 Aria enen baraen douk arpesh shakriyen iri douk nyatogur adurin um eshesh. Baraen douk enyudok, “Nubat tagwugruk-wesh aria wata tatanam tanak teshuhur tashoh.” Aria enen shopunek baraen douk nyakri namudok, “Bur reshrokuhwi jurug aria wata ratanam ranak ranawatom.”   
\c 3  
\s1 Adur Atin Debeini Ta Wata Nutanamori  
\p
\v 1 O ipak eikish arpesh douk eik urkum manawashamep abom iri. Apudok shup douk yenekap-umepogu iri douk pagimagu papudok eik yarig yenekap-umepogu iri. Baraen eik yanyemagu asudok bias shus iri, eik yenyemagu um yakri ipuhur um ipak urkwip purum enyudok yopinyi atin baraen.  
\v 2 Eik yakri ipak punek urkwip abom um enyudok baraen douk seiwok Iruhin ananim profet hakriyenyuk iri. Nyuni enyudok dodogowinyi baraen apakin Debeini douk nataurumap narap mape wosik atin iri ananin douk apak ananip aposel makripepen iri.   
\p
\v 3 Sagomatin ipak ta pudukemesh um enyudok. Abudok nyutob ahudok hugiguk iri nyumneh hutogurum, anam armam douk ta hunekep enenyenen iri ta hutogur. Amam ta hutogur aria hugipesh harik hapenyam iri yoweihi aih aria ta hunek eneshenesh yoweishi inahos.  
\v 4 Amam ta hunumugep hukri, “Anan nakri adurin atin baraen um anan ta wata nutanamori aria anan douk madae nunaki uwe! Anan nape agunum? Apakim popehem yamehem hagok hanaki arigaha douk aria ihishmorim eshudok douk shape namudok atin kabi douk seiwok sagomatin agundok atap natogur napeum!”  
\v 5 Aria amam kanak urkwip pakomuk um agundok seiwok Iruhin neyagwreh baraen atin aria nenek iruhw atap natogur napeum. Anan narik nenek abar bor aria amnab bakih bape orokohun um abar.  
\v 6 Aria Iruhin nakwu abar atubar nenekabar hurigasarubar bato aria babo ihishmorim arpesh shape abudok nyutob iri shani eneshenesh eshudok shape agundok atap iri shagok shatuh.  
\v 7 Aria douk enyudok Iruhin ananin baraen atin abom nyasuhw iruhw atap nani eneshenesh douk shape iruhw atap iri shapeum kweipon nyih hunish. Iruhin nasuwesh shapeum kweipon ahudok nyumnah anan nusuhw eshudok arpesh douk shakonuguk agabus anan iri esheshig kwotog ahi. Aria eshesh ta shunak shuwishuk abom.   
\p
\v 8 Aria ipak eikish arpesh abom douk eik urkum manawashamep abom iri mare urkwip pukepaguk um enyudok: Debeini nakri atuh nyumnah ahah douk kabi eshudok sabaishi 1,000-poreish kwarahos um. Aria 1,000-poreish kwarahos douk nakri kabi atuh nyumnah um.  
\v 9 Debeini douk madae nukri um nunek mour shokubur atin um nunek eshudok anan nakri adurin baraen um ta nunekesh iri uwe. Anan douk madae kabi enesh arpesh douk shakri shunek mour shokubur um uwe, uwok. Aria anan nakri uwok um enen arpen nyunak nyuwishuk. Anan nakri ihishmorim shukeshuk agabus yoweishi inahos aria shatanam shukon aparuh anan. Douk namudok aria douk anan urkum morum ipak aria wata nape natrugun-umep um putanam punak um anan.   
\s1 Kweipon Iruhw Atap Ta Nunak Nuwishuk  
\p
\v 10 Aria kweipon hahudok nyumnah Debeini nunaki ahi ta hutogur kabi douk nakwuaruh iri nanaki um. Aria hahudok nyumnah, utag ta giyagwreh debeg aria tukurag gunak guwishuk. Aria ihishmorim eshudok douk shape utag iri ta nyih hunish shunak shuwishuk. Aria agundok atap shopunek nini ihishmorim eshudok arpesh shenekesh iri ta nyih hunish shunak shuwishuk.  
\v 11-12 Douk namudok aria ipak ta punek mareh aih? Ipak pupe putrugun um ahudok Iruhin ananih debeihi nyumnah um hutogur obi nyutob, ipak ta pupe wosik abom pupe Iruhin ananip atip. Aria ipak pupe wosik pugipesh Iruhin ananih atih aih um punek ahudok nyumnah hutogur arigas. Hahudok nyumnah, debeihi nyih ta hunu utag gunak guwishuk. Aria ihishmorim eshudok shape iruhw utag iri ta nyih hukiyokesh hunish huyatesh aria shunenem um abar.  
\v 13 Aria apak douk mape matrugun um eshudok douk Iruhin nakri enen adurin atinyi baraen um ta nunekesh iri. Kweipon anan ta nunek namugi utag guni namubi amnab um arpesh douk shenek yopihi abom aih iri atish shupeum.   
\s1 Apak Ta Gamo Mudukemesh Aria Mupe Mutrugun Um Ahudok Nyumnah Debeini Nunaki Ahi  
\p
\v 14 Aria ipak eikish arpesh douk eik urkum manawashamep abom iri douk pape patrugun um eshudok. Douk namudok aria ipak ta punek mour dodogowip atip um Iruhin nutrip um, anan mare nutik enesh yoweishi inahos shupenyep aria nukri ipak yopipari. Aria puni anan pusuhw atum urkum aria ipakiruh aparuh hur wosik.  
\v 15 Aria ipak ta urkwip purum Debeini aria pudukemesh um anan douk wata nape natrugun um apak um nakri mutanam mukon aparuh aria kweipon anan wata nunarap munak mupe wosik abom. Enyudok baraen enyen douk kabi apakin ashuken Pol douk apak urkwip panawashaman iri nenyemori iri. Anan douk Iruhin nakon yopinyi saki aria nowem-umepaguk enyudok baraen ipak.  
\v 16 Ihismorim shus Pol nenekas iri, anan nakripap enyudok atin baraen. Anan nakripap um mupe wosik aria mupe mutrugun um ahudok nyumnah Debeini nutanamori ahi. Aria baugenyum enen baraen nyape ananis shus iri douk madae nyonowereh uwe, uwok. Apak matarihen aria mabirak madae mudukem um baugenyum uwe. Aria shashudok arpesh douk madae gamo shudukemesh wosik uwe aria madae shiyotu dodogowish um bilip iri uwe shenek rohw um enyudok baraen. Aria eshesh shenek rohw um sabainyi kupainyi baraen shopunek douk nyetem Iruhin ananik Buk iri. Eshesh shenekesh namudok aria kweipon eshesh ta shunak shuwishuk abom.   
\p
\v 17 Aria ipak eikish arpesh, ipak douk padukemesh um eshudok douk ta kweipon shutograri iri. Douk namudok aria ipak ta gamo pudukemesh. Um maresh, ta wosik atin amudok henek rohwumesh iri armam douk hekenyuk agabus Iruhin ananin yopinyi lo iri honukep putanam punek yoweishi inahos. Aria ta pukutukuk agundok douk ipak peyotu dodog aria pasuhw Krais ananin baraen pagipeshen um.  
\v 18 Aria ipak douk padukemesh um apakin Debeini Jisas Krais anan douk nataurumap meyoh aria narap mape wosik abom iri. Douk namudok aria ipak ta pupe um punek enyudok saki nyuni ananin dodog douk anan nekepen iri nyutogur deben atin abom um ipak. Aria douk arigaha kweipon, debeinyi nyeigur nyuni debeinyi dodog ta nyupe um anan atun ihih nyumneh. Adur atin.