\id 2TI - Ömie NT [aom] -Papua New Guinea 1991 (DBL 2014) 
\h 2 TIMOTHY 
\toc1 2 Timothy 
\toc2 2 Timothy 
\toc3 2 Ti 
\mt1 2 TIMOTHY  
\c 1  
\s1 Paul-hu Timothy jejamade jöhoje.  
\p
\v 1 O asëꞌe Timothy Paul naro ave jöho jajivoꞌiëꞌe. God-ro hesi nimëꞌëro ëhuꞌëro na Iesu Keriso-are apostle jevëꞌeje naro ae majëhiromo uënövoꞌirodego: God-hu nosi aruꞌaho iꞌovahuoꞌi uövuadëhi iae huro ëhi Iesu Kerisoꞌo gemuore ramuoꞌiramu iꞌovavuoꞌajë uëꞌirodego. Ëhuꞌëro na ëhi jiëꞌe ae jeve.   
\p
\v 2 Naro nasi harihe Timothy jasi örire dë vövöbajoꞌe ahoꞌo jejamije. Na nege God Vavuohuꞌo nosi Bada Iesu Kerisoꞌo jabesi vavaenimoromo ajamijego jero maro hiꞌiranego.   
\s1 Timothy-hu Keriso mae uehorovadohuni ëhuni Paul-hu God mae uavade jöhoje.  
\p
\v 3 Naro God-are örire mabëhe uave. God nasi hijo mionoꞌehu uehorovobe rovarëhi naꞌo dë mae jevego herovoromo hesi muoho vaejajeje. Vahie majae jene naro jasi jöho hesi örire jövoromo hu mabëhe uaꞌi hijajeje.  
\v 4 Jasi jöëni God mabëhe uaromo naro uehorovoromo uvajeje: Jero nani vavaenimoromo nivane hö uvoromo ëhuni naro ja gaꞌi nego avohajeje ja garomo nasi dë vövöbajoꞌe nimorohevoröhego.  
\v 5 Na uehorovajoho ja bogo döëremuoho God mae uehorovoꞌi uhohuꞌo mae uehorovanueje. Urimëꞌi jasi hije magonaho ihe Loisꞌo jasi vëme Euniceꞌo jaburo uhohuꞌo ëhi God mae uehorovonövareje. Röhu na uehorovajoho jabuhu uehorovonövarëhi jaꞌo ëhi gemuoho God mae uehorovanueje.   
\s1 Timothy-hu viꞌehe huë vavaene baeromo biririvoromo Keriso-are muemu vaeröhe jöhoje.  
\p
\v 6 Ëhuni naro ave jöho uaꞌiëꞌe uehorovoꞌiranego. Urimëꞌi naro nasi övohuro jasi simanoho taemahamu evare God-ro ja darugoho bojamijadeje jero hesi aribövioho muebejëvoꞌiranego. Ëhuni ë darugoho vëninöꞌe avoho muebejego bogo duorohoꞌiro.  
\v 7 Ëhesi bëhoho God-ro hesi Aruꞌahoho bojamuamu baejëꞌëro ëhuꞌëro bogo juhuonivoꞌi aꞌi daruge baeromo ae gö huë baejëvoromo avoho taemo raromarueje.   
\p
\v 8 Ëhuni nosi Badare jö majëhijanuoho nadi ëhunioho javojimone o na savoji gagore hijajohuni ëhuꞌo nadi javojimone. Nadi javojimoꞌi God-are darugoho uehorovoromo naehu huë vavaeni baejajëhi Keriso-are jö ma hesi jöëni huë vavaeni rovëꞌoho jaꞌo baene.  
\v 9 Ëhesi bëhoho no sisë javuamu God-ro no baejavuoromo maro bamavuoromo hesi ariböviemu javuojöro uövuadeje. Ëhi ajamuade hesi bëhoho hu bogo uvadeje no mu mae vaejëꞌe javuajë uvoromo ëhunioho hesi aribövioho javuojöro uövuadeje. Aꞌi hesi nimëꞌëro noni vavaenimoromo ëꞌadeje. Urimo saꞌa bövi biseꞌo bogo bamadevare evare God-ro noni vavaenimamu uvadeje ijonö Iesu Kerisoro no ajamuiꞌiröhego.  
\v 10 Ëhi uvadoho jaruvoho mare ramuaje aho Iesu Kerisoro nosi örire rovëꞌëro ëhuꞌëro God-hu no huë baejavuaje muoho vaꞌorahoroje. Ëhesi bëhoho Iesu Kerisoro nosi örire rueromo vuovoꞌiröhe öroho ahahuadeje. Ahoromo hesi jö maho röjahuijëꞌëro ëhuꞌëro no ë jöho garomo uvarueje: No ioroꞌiore gemu maro raromemu raromoꞌejarëjo. Kerisohu ajamuade jö maho ëhije.   
\p
\v 11 Ëjö maho naro majëhiꞌirodego God-ro bamevadeje. Ëhuꞌëro na apostle o Keriso-are jö röjëhijaje ae jeve.  
\v 12 Ëhi jiëꞌe muoho vaebe juvëꞌëro ëhuro na viꞌehoho huë vavaenoho baejajeje. Iae ëhi jeve röhu na bogo javojege. Rabëni. Naro God mae uehorovoromo gavajeje hu mae jiego. Ëhi gavajëro jiëꞌëro uvajeje: Iae mae höjo. God-ro eni jiëꞌëro ëhuꞌëro hesi mu nasi övo döre bamehadoho huro avoho muebebe vaꞌiramu evare ë maja börömoho rueꞌaꞌajëjo. Ëhuni javojoho bogojeve.  
\v 13 Röhu naehu jö ma röjahibe rovamu hejanoho jaꞌo ëhi jiëꞌe jö mahuremu maꞌenone. Iesu Keriso-are uehoro maho baeromo God mae uehorovëꞌe ae gö huë baejëvëꞌe hiromo ë jöhuremu maꞌenone.  
\v 14 God-hu hesi jö ma jasi övo döre bamadoho avoho muebenego aho bogo jö göho jövoꞌiro. God-are Aruꞌahoho nosi dë vövöbajoꞌere hijëꞌe jiaje hesi darugoho baeromo ëhuro ëhi ëꞌone.   
\p
\v 15 Iae jaꞌo gavanue Asia saꞌa raje ae ahoꞌobëhe Phygelosꞌo Hermogenesꞌo jabuꞌo nasi jöho bogo uehorovoꞌi remo vaꞌoruomëꞌeje.  
\v 16 Röhu na nege Badaro Onesiphorus-are aganohuni vavaenimoromo ajëmiꞌiröhego. Ëhesi bëhoho urimëꞌi naro huë vavaene baeꞌego Onesiphorus-ro ajemiꞌego dëho sasohevonövadeje. O na savoji gagore hijamu hegorovo Onesiphorus-ro nasi jöënioho bogo javojimoꞌi  
\v 17 Rome amore ruenugoromo nahevemu nahevobe juvojuvo birohevadeje.  
\v 18 Ëhuni na nege Badare majaho rovego huro Onesiphorus-are jöëni vavaenimoromo ajamijego mae jioröhego. Na ëhi nege. Röhu urimëꞌi Onesiphorus-ro Ephesus amore hiromo muoho bövioho biseꞌoho ajeminövadeje. Jaꞌo iae gavanueje.   
\c 2  
\p
\v 1 Röhu nasi harihe no Iesu Kerisoꞌo gemuoro bimuvavuëꞌego God-ro hesi nimoromo huë baejavuoromo biriroho bojamuijëꞌe jiaje jero ë biriroho baeromo muoho vaenövone.  
\v 2 Na diehi jiëꞌe jö ae ahoꞌobëhe majëhijajoho iae ja henövaneje. Ëhenövane jöho baeromo a ma jabesi öroro röjëhijego jaburo jöho bavaꞌoromo a ioroꞌioroho jabuꞌo röjëhiꞌiro.   
\p
\v 3 Muoho ëhi vaeromo huë vavaeni rovëꞌoho nadi vuonugoꞌi aꞌi uvone: Iesu Keriso-are muorovo ariböviehu biririvoromo Satanꞌo muorovoromo huë vavaeni baejaruëhi naꞌo ëhi ëꞌejö uvoromo jaꞌo ëhi jiëꞌe huë vavaenoho baeromo biririvoromo Satanꞌo muorovone.  
\v 4 Röhu ë hesi uhu jö jajivoꞌiëꞌajoho gane. Bijo bunoꞌe baeromo sisë ariböviohuꞌo muorovëꞌiroho mu göho göho bogo gemuoroho havoromo muorovoꞌi ma-muorovo muohemu vaejarueje jabesi muorovo a börömohuro gëromo nimorohoröhego.  
\v 5 O uhu jö göho. Ajajovoromo tutuvoromo ae göehu gö iosirëmiꞌiëꞌiroho diehi ajajovarue jögoroho ejëhoromo evare tutuvarueje bogo ejahëꞌoho suvuoroho bogo baejöëni.  
\v 6 O uhu jö göho. Dë mu ravëꞌiroho biririvoromo mu vaejarue ariböviohuro urimoho ë ioho ueꞌahoꞌëꞌö.  
\v 7 Naehu jajivaje jöho uehorovo avohone. Jöe ahoꞌo Badaro ajamiꞌiramu bëhoho baeꞌaꞌanue.  
\v 8 Röhu Iesu Keriso uehorovonövone. Keriso hu Israel saꞌa muebenövade ae David-are ujeje. Huro guomoromo iꞌovoromo riꞌöjëꞌeje. Ëhi jiëꞌe jö maho naro majëhibe juvajeje.  
\v 9 Ëhi jiëꞌe jö maho naro majëhijëꞌëro ëhuni Keriso bijönimarue ariböviohuro uvoruomajeje: Nörö Keriso-are jö majahuajohuro ëhuro hu a sisë höjo. Ëhi uvoromo savoji gagore baꞌamevëꞌëro na huë vavaene baeje. Jabumëro na savoji gagore baꞌamevoromo taemevareje röhu God-are jöho bogo taemëꞌëro ae ahoꞌobëhe hebe vaꞌoruomajeje.  
\v 10 Ae ahoꞌobëhe God-are jö hebe vaꞌaruohuni ëhuni God-hu baejëvade ariböviohuni naro uehorovëvoromo biririvoromo huë vavaene bövie biseꞌe baejajeje. Ëhesi bëhoho na nege ë aribövioho jabuꞌo Iesu Keriso-are ae gemuohuro jëvëꞌëro bogo sisëroho vaꞌi maro vaꞌoromo ioroꞌiore gemu hesi ajire raromemu raromoröhego. Ëhuni naehu biririvoromo mu vaejajëhi jaꞌo ëhi biririvoromo muoho vaene.  
\v 11 Röhu noehu atoꞌi arijarue jöho iae jö maeje. Atoromo ëhi uvarueje:  
\q1 Nosi uehoro mamioho Iesu guomadëhi vuovahuëꞌoho huꞌo gemu mae raromoꞌejarëjo.   
\q1
\v 12 No bogo uꞌuhoꞌi ma-biririvëꞌoho huꞌo masije riravoromo hesi öri ariꞌoho muebeꞌejarëjo.  
\q1 Noehu hesinö dejo buꞌöjëꞌoho huro nosinö deje buꞌöꞌaꞌajëjo.   
\q1
\v 13 Noehu God mae uavare jö ahëꞌoho röhu God-ro mae uövuade jöho bogo ahoꞌaꞌajëjo  
\q1 huhu uvaje jö vuonugoꞌiröhoho bogo eni jiëꞌego.   
\s1 Timothy-hu mu mae God-are nunire vaeröhe jöhoje.  
\p
\v 14 Ëhi jiëꞌe jöho majëhijego Christian ariböviohuro heromo avoho uehorovoruomoꞌiro. Ëhi majëhiromo röhu God-are nunoro jögoroho darugoꞌo majëhiromo uëne: Bëhi rumoꞌe jöe gö gö nadi ma-jö ahoꞌahamirovorëne. Ëhi uëne. Ëhi jiëꞌe jö ahoꞌahamirovëꞌoho aho heromo bogo marëꞌi sisërërovarueje.  
\v 15 Röhu jero muoho biririvoromo ömo gavego God-ro garomo uvoꞌiro: Ja eni javajëjo. God-are jö maho ma-ahorirëro majëhine. Jaehu ëhi ëꞌëꞌoho jaehu vaejanue muoho God-hu gavëꞌoho ja bogo javojagoꞌëꞌe.  
\v 16 Röhu God bogo uehorovëꞌe ëma atarue jöho nadi enövone. Ëhi jiëꞌe jö atëꞌoho aëro God rumonimobe vaꞌoruomoꞌëꞌe.  
\v 17 Ëhi jiëꞌe jö sisëho iae sagoho vaꞌëne jioꞌëꞌe. Sagohehu sino döre ibe vaꞌego rumorovoromo sino sisërëjëvobe vaꞌajëhi jabesi jö sisëhuro ëhi rumorovoꞌiramu aëro sisërëbe vaꞌoruomoꞌëꞌe. A ioroꞌiorohuro ëhi ëꞌarueje röhu Hymenaeusꞌo Philetusꞌo jaburo niöꞌiro ëhi jiëꞌe jöho majëhijarueje.  
\v 18 Majëhiromo God-are jö maho vuonugoromo ae sarerëmiromo uëvarueje: No ae ahoꞌobëhe mamiꞌe vuovoromo iꞌovoromo riꞌöjëꞌëro javuëꞌëro ë hesi majaho mamiꞌe barëjëꞌe höjo. Jö sisëho ëhi jörovamu hejëꞌëro Christian ae göëro göëro Keriso avoho uehorovaroho vuonugëꞌejö.  
\v 19 Ëaribövi ioroꞌiorehu God-are jö vuonugaroho röhu God-are aribövi maho jabumëro öbunöꞌe bibivoromo riravarueje. Jabumë God-are javu hesi öbu vaꞌëne jioruome. God-are javu hesi öbu vaꞌëne jioruome röhu God-are javu öbu hesi ahore ave jö niöꞌioho jajivëꞌeje. Göho uvëꞌeje: Badaro gëvaje höjo di aribövioho hesiroho jioruomego. O göho uvëꞌeje: Ae rahu uvëꞌoho: Na Bada mae uehorovaje ae jevajë uvëꞌoho ë ahuro mu sisëho vuonugoꞌirajo. Ëjöho jajivoꞌamëꞌeje.   
\p
\v 20 Röhu ekaresia jabesi uhu jö göho uehorovone. Osa börömore vaꞌëꞌoho gaꞌaꞌanue hevöe ramae nu anoꞌe gö gö jioꞌamoꞌiramu. Ioroꞌioroho inömo ma-mabëhëro avohoꞌamëꞌeje. Ioroꞌioroho ma-ijëro o saꞌaëro sisëꞌi sisëꞌi avohoꞌamëꞌeje. Röhu jabesi muoho gö gö jiorove. Hevö ioroꞌioroho maego maja börömohuni runoꞌe bahiꞌi hevö ioroꞌioroho sisëgo majae ëhi mue vaejarueje.  
\v 21 Ëhesi bëhoho ae rahu naehu jajivaje uehoro sisë gohöꞌöjëꞌoho ë aho hevö maho vaꞌëne jioꞌëꞌe. Ëhi jiëꞌe aho mae nugëꞌëro hesi Börömo hesi muoho mabëhe ajamiꞌëꞌe. Mu mae rabe rabe rovamu vaejëꞌoho eni jioꞌëꞌe.  
\v 22 Röhu a iꞌehu sisë ömoꞌi nimaruoho goroꞌi aꞌi aviëhi jiëꞌoho sivoho gane. Bada dë vövöbajoꞌo uhure uehorovoromo huhu ajëmijöro ua gavarue ariböviohuꞌo gemuoro hibe juvoromo mu mae vaeꞌi God mae uehorovoꞌi a ioroꞌioroho jasi dë vövöbajoꞌëro rajëhiꞌi ëꞌo gane. Ëhi jiëꞌe muoho nuninö bamone.  
\v 23 Röhu nuni ramoramovëꞌëro simano sisërëromo jö ahoꞌahamirovarue jöho nadi ejëhone. Jaꞌo iae gavanue. Ëhi jiëꞌe jö ahoꞌahamirovëꞌiroho ëhuro iro muorovoꞌe vaejarueje.  
\v 24 Röhu Badare mu vaejaje ahuro bogo iro muorovoꞌoho vaeꞌi aꞌi ae ahoꞌo jabesi örire huë baejëvonövoꞌëꞌe. Ma-taemorovoromo jöho avoho röjëhinövoꞌëꞌe.  
\v 25 Ae göehu hesi jö ahëꞌiroho huro sanuꞌe jögoroho juvöꞌö majëhinövoꞌëꞌe. Juvöꞌö majëhijëꞌoho hesi naniꞌo nani God-ro jabesi simanoho huotovëhoꞌiramu jabumë uehoro sisëho vuonugoꞌi jö maho avoho gaꞌëꞌö.  
\v 26 Urimëꞌi ëhi jiëꞌe ariböviohuro Satan-are guare rireromo vaꞌoromo Satan-hu nimaje muohemu vaenövareje. Röhu jabumë jö ma avoho gavëꞌohuro ëhuro avoꞌavoho uehorovoromo Satan-are guare jëvajoho suorovoromo maro vaꞌëꞌö.   
\c 3  
\s1 Maja viture sisë ariböviehu huë vavaeni barueꞌiröhoho ëhi jiëꞌe aribövi Timothy-hu gorëvoꞌiröhe jöhoje.  
\p
\v 1 Röhu ave jöhuꞌo avoꞌavoho uehorovone. Saꞌa bövi biseꞌo barëꞌiröhe majaho dunovëꞌiroho huë vavaene böröme rueꞌëꞌe.  
\v 2 Ëhesi bëhoho ae ahoꞌobëhe jabesi sinohuremu rajahirovoꞌëꞌö. Bövie biseꞌe göꞌo göꞌo döre baebe vaꞌi nimoꞌëꞌö. Jö huhe ëꞌoromo jöe gö gö ëma atoꞌëꞌö. Jabesi simanëro ëma uehorovoromo uvoꞌëꞌö: No a ioroꞌioroho iosirëmiromo masijoho javuajëjo. Jö sisë atoꞌëꞌö. Vëmu vavuꞌo jabesi jöho ahoꞌëꞌö. Suvuoro bojëmamu baejëꞌoho huë ma jöho bogo uehorovoꞌi ma-baeꞌëꞌö. God-are mu maho ijumoꞌëꞌö.  
\v 3 Jabesi aganoho bogo huë baejëvoꞌëꞌö. Nue huoꞌi sanuëmëꞌoho bogo eꞌëꞌö. Ae gö jabesi jö sisëho sarerëmiromo atoꞌëꞌö. Mue bövie biseꞌe nimaruoho ëma ömoꞌëꞌö. A umijaje ö sisëho vaꞌëne jëvoꞌëꞌe. Mu maho bijönimo avohoꞌëꞌö.  
\v 4 Aganoho sarerëmiromo sisë vaejëvoꞌëꞌö. Bogo avoꞌavoho uehorovëꞌe mu sisëho ëma vaeꞌëꞌö. Simano bövie vaeromo uvoꞌëꞌö: No eni javuajëjo. God bogo nimoꞌirögoro sino sasohëꞌe nimorohëꞌe muohemu ëhemu nimoꞌëꞌö.  
\v 5 Ma-döëremu God uehorovoromo hesi muoho vaeꞌi uhoho God-are darugoho bogo herovarueje. Ëhi jiëꞌe aribövioho gorëvoꞌiranego uave.  
\v 6 Ëhesi bëhoho ëhi jiëꞌe aribövi ioroꞌiorohuro sarerisareriëmiromo sanuëmibe osare osare vaꞌoromo nu gö gö uehorovarue magonahoho sarerëmijego jabesinö vaꞌarueje. Ëhesi bëhoho ë magonahoho mu sisë vaebe rovëꞌëro ëhuꞌëro dë juhuoninëgajeje. Dë juhuoninëgego mue gö gö nimarueje.  
\v 7 Mue gö gö nimoromo majae ëhi jöe gö gö hebe vaꞌarueje röhu jö ma baeꞌiröhoho bogo eni jëvo hesije. Ëhi jiëꞌe magonaho ömoꞌömoho sarerëmijarueje.  
\v 8 Sarerëmiromo God-are jö maho aharueje. Urimëꞌi a ihe Jannesꞌo Jambresꞌo Moses-are jö aharëhi ë sareriꞌe ariböviohuro ëhi God-are jö maho aharueje. Jabesi simanoho sisërëjëvëꞌëro uehoroho bogojëve. God mae uehorovaroho rireromëvëꞌeje.  
\v 9 Röhu ë aribövi jabesi muoho bogo marëꞌi urimëꞌi Jannesꞌo Jambresꞌo jabesi mu simano rumoꞌe jiamu aehu gavarëhi ëhi ae ahoꞌobëhe garuomoꞌëꞌe ë aribövi jabesi muohuꞌo simano rumoꞌe jiëꞌe jioꞌiramu.   
\s1 Paul-hu hesi majae barëꞌiaꞌamu Timothy jögoru börömo bojamade jöhoje.  
\p
\v 10 Röhu ja bogo ëhi jiëꞌe aho jave. Na diehi diehi röjëhibe rovodoho iae ja gavëꞌe jave. Na diehi hibe rovode öroho iae ja gavëꞌe jave. Bëhoho rabëni mu vaebe rovodoho iae ja gavëꞌe jave. Na God diehi mae uehorovobe rovodoho iae ja gavëꞌe jave. Naehu bogo nu huodëgoꞌi ma-sanuovoromo mu vaebe rovodoho iae ja gavëꞌe jave. Naehu a nasi dë vövöbajoꞌere uehorovëvobe rovodoho iae ja gavëꞌe jave. Naehu dë vövöbajoꞌo bogo uꞌuhoꞌi ma-biririvobe rovodoho iae ja gavëꞌe jave.  
\v 11 Aehu sisë vaejevoꞌi arijamu huë vavaene gö gö rueꞌi hijamu Antioch amore Iconium amore Lystra amore sisë vaejevoꞌi arijamu huë vavaeni diehi baebe rovodoho iae ja gavëꞌe jave. Ëhi jiëꞌe huë vavaenoho baejamu röhu God-ro ajemamu mae jevobe rovadeje.  
\v 12 Röhu na bogo gemuoho huë vavaenoho baeꞌi ae rahu Iesu Kerisoꞌo gemuore bimuvoromo God-are jöhemu ejahobe vaꞌi nëgëꞌoho a ioroꞌiorohuro ëho garomo bijönimoromo jabesi örire sisë vaejëvoꞌi ariꞌiramu huë vavaene baenövoꞌëꞌö.  
\v 13 Aribövi mahuro huë vavaene baeꞌi röhu sisë ariböviohuꞌo sareriꞌe jö majëhijarue ariböviohuꞌo avevejöꞌe mu sisë vaejaruoho jaburo ijonö göꞌo döre sisë börömo mae vaebe vaꞌëꞌö. Sisë vaebe vaꞌoromo ae gö sarerëminövoꞌëꞌö o jabuꞌo ae gö jabesi sareriꞌe jöho heromo mae höromo ejëhonövoꞌëꞌö.  
\v 14 Jabumë ëhi sisërëjëvoꞌëꞌe. Aꞌi jero heromo biririvoromo mae uehorovane jöhuremu maꞌeno titimoromo uehorovobe vaꞌone. Ëhesi bëhoho ë jö röjahijare aribövioho ja iae gövuanueje.  
\v 15 Iae jaꞌo gavanue ja biseꞌo javade majare jero aevoromo God-are surire jöho hebe rovaneje. Ësurire jö gavëꞌohuro ëhuro jasi simanoho ajivavoꞌiramu garomo uvoꞌaꞌanue: Naro ëhiꞌoromo Iesu Keriso mae uehorovoromo ëhuro bogo sisëroho vaꞌi maro vaꞌejöjo.  
\v 16 Röhu God-are surire jöho ahoꞌobëhe ëho God-hu bojëmamu jajivare jöhoje. Ëjö adahëꞌohuro ëhuro God-hu nimego noehu vaejarue muoho marëjajeje. Ëhuro God-are muoho huruoho majëhijarueje. Mu sisëho aharueje. Juvöꞌö majëhijarueje. Mu ma hesi öroho röjëhijarueje.  
\v 17 Noehu God-are surire jö adahoromo ëhi jiëꞌe mu vaejëꞌoho ëhuro God-are aribövioho no uehoro mae darugo mae bövie biseꞌe eni javuëꞌëro ëhuꞌëro mu mae ahoꞌo vaejëꞌoho eni javuoꞌëꞌe.   
\c 4  
\p
\v 1 Röhu God-are nunire Iesu Keriso-are nunire jögore bogo biseꞌo vaduꞌoho majahiꞌejo. Uvone: Iesu Kerisoro saꞌare raromarue ariböviohuꞌo vuovavuëꞌe ariböviohuꞌo no ahoꞌobëhe göromo mevavuoꞌajëjo. Huro nosi nunire rueromo böröme namiromo ahoꞌobëhe muebejavuoꞌajëjo. Ëjöho uehorovoromo uvone: Paul-hu Iesu Keriso-are nunire jögoru majehiꞌiëꞌajoho böröme hö uvoromo avoho ejehone.  
\v 2 God-are jöho darugoꞌo majëhine. Ae nimëꞌoho o bogo nimëꞌoho biririvoromo majëhine. Jöe majëhijego avoho uehorovoruomoꞌiro. Mu sisë vaejëꞌoho ahëvone. Darugoꞌe jö maho majëhijego heromo biririvoromo mu ma-maemu vaeruomoꞌiro. Nadi uꞌuhoꞌi biririvoromo jöho röjëhinövone.  
\v 3 Ëhesi bëhoho rabëni. Majae ijonöho aëro God-are jö maho bijönimoruomoꞌëꞌe. Jö maho bijönimoꞌi sareri sareriꞌe jöe gö gö heꞌi hiaꞌe avohoruomoꞌëꞌe. Hiaꞌe avohoromo ëhuni sareri sareriꞌe ae gö gö sö rueruomoꞌëꞌe ëhuro heꞌi nimarue jö bëhoho röjëhijego heruomoröhëro.  
\v 4 Ëhi jiëꞌe aribövioho sö rueromo jö maho vuonugoꞌi sareriꞌe jöhuremu uehorovoruomoꞌëꞌe.  
\v 5 Aꞌi jero rabe rabe rovëꞌiroho avoꞌavoho uehorovonövone. Huë vavaene rovëꞌoho nadi uꞌuhoꞌi biririvone. Keriso-are jö maho majëhinövone. Ëmuoho maꞌenone. Jasi muoho ahoꞌobëhe avoho maꞌeno titimone.   
\p
\v 6 Ëhesi bëhoho nasi majaho barëꞌirögoro ëꞌe. Jew rajehu God rajahiromo jovo otehoromo God bojamijaruëhi ëhi nasi sino hahoꞌoho God-are örire suvuore bojamiromo guomoꞌiëꞌe. Majae dunovoꞌiramu na ave saꞌaho vuonugoꞌejo.  
\v 7 Mu ma baejodoho naro nasi uehoroho darugoho ahoꞌo bojamiromo biririvoromo vaejëꞌëro ëhuꞌëro ruahöꞌöromo vae barëjëꞌe jeve. Noehu mae uehorovarue jöho maꞌenëꞌe jeve.  
\v 8 Ëhuꞌëro avevejöꞌe mu mae vaeromo ruahöꞌöjode hesi suvuoroho öꞌidöre nugehëꞌeje. Badare majaho rueꞌiramu huro no avoho mevavuoromo gövuajëro jiëꞌëro ë suvuoroho bojemiꞌëꞌe. Röhu bogo na gemuoho bojemiꞌi aꞌi ae rahu hu rovego gaꞌi nimarue ariböviohuꞌo ëhi jiëꞌe suvuoroho bojëmiꞌëꞌe.   
\s1 Paul-hu hesi jö biseꞌo biseꞌo jajivade jöhoje.  
\p
\v 9 Röhu ma-burëro nasi öroro rueꞌi ëꞌo gane  
\v 10 rabëni hesi bëhoho Demas-ro saꞌare muohemu nimoromo na remoꞌi Thessalonica amore vaꞌirögoro Crescens-ro Galatia saꞌare vaꞌirögoro Titus-ro Dalmatia saꞌare vaꞌëꞌe jiaje.  
\v 11 Luke-ro gemuëro bogo vaꞌëꞌëro huro rueromo gevajeje. O Mark mae ajamuijaje ae jiaje ëhuni huꞌirae rovego huro muoho ajemiꞌiro.  
\v 12 Röhu naro Tychicus nugöꞌöjamu Ephesus amore vaꞌadeje.  
\v 13 Röhu urimëꞌi na Troas amore hijodevare nasi runoni niögoho Carpus-are osare nugo rovëꞌe jeve. Ëhuni ja rovëꞌiroho baejeho ruene. O biririꞌe suri suriohemu uehorovo avohoromo ujuoheho ruene suri suri ioroꞌiorohuꞌo ëhuꞌo.   
\p
\v 14 Röhu copper inömo avohoꞌamaje ae Alexander-ro nasi örire mu sisë bëhe vaejevadeje. Ëhuni hu sisë vaejevadëhi Badaro iꞌue ëhi mana bojamiꞌëꞌe.  
\v 15 Röhu jero gavëꞌi muoho vaene. Iahuro jaꞌo sisë vaejavoꞌëꞌe. Ëhesi bëhoho huro nosi jöho aho avohëꞌego uave.   
\p
\v 16 Röhu urimëꞌi na court vaejevarevaroho aho bogo naꞌoho riravoromo nasi jöho ajemiromo majëhijareje. Ae ahoꞌobëhe na vuororemijareje. Ëhi jiëꞌe muoho sisëgo na nege God-ro jabesi sisëho uehorovoromo vuonugojöro.  
\v 17 Ae ahoꞌobëhe vuororemiꞌi aꞌi Badaro naꞌo namiromo biriroho bojemadeje ëhuro naro hesi muoho vae barëromo hesi jöho majëhijego saꞌa ioroꞌioro raje ae ahoꞌobëhe heruomoröhego. Ëhiꞌoromo na vöröꞌe mi hesi jöꞌore jevanovamu Badaro ajemiromo baejevamu ëhuro sisëho bogo birohodeje.  
\v 18 Na sisëꞌi jevamu Badahu baejevadëhi na sisë birohevobe vaꞌëꞌoho huro ëhi baejevoromo avoho muebejevonövoꞌëꞌe ëhuro naro öꞌidöre vaꞌoromo huhu böröme namiromo muebejavuaje öri ariꞌere ë hiꞌirodego. Hesi ihoho ma-mae jiemu jiobe vaꞌëꞌe. Iae mae.   
\s1 Paul o Christian ae gö gö jabuhu Timothyꞌo a ioroꞌiorohuꞌo jejëmijare jöhoje.  
\p
\v 19 Röhu Priscaꞌo Aquilaꞌo jejëmiromo Onesiphorus-are aganohuꞌo jejëmijode höne.  
\v 20 Röhu Erastus Corinth amore hijadoho iae ëhi hije. O Trophimus guomo guome baejamu Miletus amore nugo rovodeje.  
\v 21 Ëhuni jero ma-burëro ruene. Buru börömo majaho rueromo ja rueꞌirane öroho tariojöëni uave.  
\p Eubulus Pudens Linus Claudia ö muenoꞌo ioroꞌioroho ëho jaburo jasi örire jejamijö.   
\p
\v 22 Badaro jasi aruꞌahohuꞌo jioromo jemë ae ahoꞌobëhe huë baeromo ajëminövëꞌe. Ahia minoꞌe.