\id 1TH - Mufian NT (Balif dialect) -Papua New Guinea 1988 (web version -2013 bd) 
\h 1 Tesalonaikai 
\toc1 Basef Ifimba Pol Nandaꞌef Faliꞌ Fagafeꞌma Tesalonaikai 
\toc2 Faliꞌ Fagafeꞌma Tesalonaikai 
\toc3 1 Te 
\mt1 Basef Ifimba Pol Nandaꞌef Faliꞌ Fagafeꞌma Tesalonaikai  
\iot Basef bandafi Pol naliꞌ nandaꞌef fagafeꞌma esis Tesalonaikai  
\io1 1:1 Pol naꞌi basef buꞌwafi ma God naloma Jisas Krais mogatopalopas  
\io1 1:2-3:13 Pol naꞌipasa maol buꞌwani nandaꞌana nagatopalopas ama naꞌi nofoꞌo nogatilis  
\io1 4:1-12 Pol naꞌipasa waf buꞌwafi hililiꞌi sogailafi ma sondaꞌ okom Godi boꞌoma esis  
\io1 4:13-5:11 Pol naꞌipasa nemaf dembinai apeꞌinai nogafiꞌafii  
\io1 5:12-28 Basef akutaifi esis sogailafi  
\c 1  
\p
\v 1 Aeꞌ Pol aloma Sailas Timoti wape naꞌaꞌe. Eaꞌ andaꞌ basef ifimba fafeꞌmago ipaꞌ Kristen pagape wambel Tesalonaikai. Ipaꞌ pape paloma God ahamapa apeꞌinai naloma Dembinai Jisas Krais. Ipaꞌ Kristen pape paloma amom eaꞌ amamipai siꞌipa.  
\p Afaꞌ waꞌi atiasi God notopalopago ipaꞌ dowafa opalef ipeꞌilifi fegape awanelef.\x * \xo 1:1 \xt Fl 1:3-4; Kl 1:3; 2 Te 1:11; Ap 17:1-10; 2 Te 1:1\x*   
\s1 Esis Tesalonaika sahapifana banages sape hililiꞌ  
\p
\v 2 Nimaguf hiafi danda afaꞌ wanifela God lifilafi ma ipaꞌ. Eaꞌ waꞌi agof ipeꞌigufi wandaꞌ betenepa.\x * \xo 1:2 \xt 1 Ko 13:13; Kl 1:4-6\x*  
\v 3 Afaꞌ ina alaꞌuta tahafa ma wagaꞌipa God ahamapa apeꞌinai ma hapif ipeꞌini nigafilai waf fasifi ma ipaꞌ owaꞌ. Fowaꞌ ipaꞌ pasoꞌ nelelemba God naloma anis daias wapani. Eaꞌ deiꞌ pandaꞌ maol numaꞌwini. Ipaꞌ ukup pape banagepa pehafa Dembinai Jisas Krais. Eaꞌ wandabeten nimaguf danda ma ipaꞌ.  
\v 4 Ipaꞌ Kristen alipipai, God naseꞌepa nembel ipaꞌ. Eaꞌ afaꞌ ogawa anen nosaheꞌepa eaꞌ ananipai siꞌipa.\x * \xo 1:4 \xt 1 Ko 2:4-5; 1 Ko 4:20\x*   
\p
\v 5 Basef ifimba buꞌwafi Godi fowaꞌ ogofaꞌafii, ifimba ina fataga ma ipaꞌ dowaf siꞌi anif basef wafifi, owaꞌatin. Ambal buꞌunai Godi nowaꞌ banaga basef ifimba ma banagami ananimi eaꞌ wafiꞌi waꞌipipaef. Eaꞌ fandaꞌ ukup ipeꞌipi banagep pahapifana banagepa. Waf fowaꞌ wape walomepa wandaꞌafi, ipaꞌ pegawaf.\x * \xo 1:5 \xt 1 Ko 4:16; 2 Te 3:9; Ap 17:5-9\x*  
\v 6 Isimba atis deiꞌ pegawaf apaila Dembinai. Hiahaom akafimi matagamepa, apaꞌ owaꞌ pefaꞌ basef Godi, eaꞌ Ambal buꞌunai Godi nasaꞌmai opalef ipeꞌilifi, andagalaepa.\x * \xo 1:6 \xt 1 Pi 5:3\x*  
\v 7 Eaꞌ pihimbaꞌmasa waf fasifi isimba hiasi anis amam nematawa sagahapifa Kraisi sagape itap apamba biefip luꞌwagoma Masedoniai Akaia.\x * \xo 1:7 \xt Ro 1:8\x*  
\v 8 Basef Dembinaii ipaꞌ pagaꞌipasafi fegal faꞌi fafeꞌ siꞌi wata taꞌi tagafeꞌ mehip. Ina fafeꞌ Masedoniai Akaia atogon, owaꞌatin. Anamba hiagoma esis sameꞌ basefa ipaꞌ pagahapifa God. Afaꞌ ina waꞌipa epes isimba, owaꞌ. Ipaꞌ paliꞌ pasoꞌ opalefa God andeandeꞌ.\x * \xo 1:8 \xt Ap 14:15\x*  
\v 9 Deiꞌ esis atis saꞌi basefa ipaꞌ pandagala paꞌi nemaf buꞌwafi ma afaꞌ eaꞌ pameꞌ basef afaꞌifi fowaꞌ afaꞌ wanofa wagafeꞌmago ipaꞌ. Esis saꞌi ipaꞌ apakwaha hiahaom amamba ambagof awami fowaꞌ ipaꞌ pandaꞌ lotumami. Eaꞌ pambema opalef pafeꞌma God. Eaꞌ deiꞌ pandaꞌ maola God endilisinai, owaꞌ nogagaꞌia, nagape atapinai.\x * \xo 1:9 \xt Ta 2:13; Ap 17:31; 1 Te 5:9\x*  
\v 10 Eaꞌ esis saꞌi ipaꞌ pape pehafa Nogamana ananinai anaf nokwaha heven notanima nogafiꞌi. Anen Jisas, fowaꞌ nagaꞌ God nafelanai wapani. Owagama God okom aꞌ numbutinama epes ami sandaꞌ waf awafii. Owaꞌ deiꞌ Jisas nelefatapa eaꞌ ma okom anamba aunai.   
\c 2  
\s1 Maol Pol nandaꞌan Tesalonaikai  
\p
\v 1 Alipipai, ipaꞌ pegawa eaꞌ, fowaꞌ afaꞌ wagafeꞌmago ipeꞌi, maol inimba afaꞌ wandaꞌani ina nenalo, owaꞌatin.\x * \xo 2:1 \xt Ap 16:19-24; Ap 17:1-9; 1 Te 1:5,9\x*  
\v 2 Fowaꞌ wagaliꞌ wafeꞌ wambel ambalemba Filipai eaꞌ sandaꞌafa aofa alop afaꞌinai, wameꞌ akafimi endilisi. Ipaꞌ pegawa eaꞌ. Owaꞌ God afaꞌinai nowaꞌ banaga nelelemb afaꞌilimbi. Eaꞌ afaꞌ ina ombal mahafa wandafaꞌma esis bousi, owaꞌatin. Afaꞌ banagefa wafoꞌo wawalapa basef buꞌwafi Godi ma ipaꞌ.  
\v 3 Basef kofagefa wagaꞌipipafi ina waꞌi ondaꞌ waf awafi ma ipaꞌ, owaꞌ. Afaꞌ ina waila basef ifimba putuputaꞌafi basoꞌafi waꞌipipaef, owaꞌatin.\x * \xo 2:3 \xt 1 Ti 1:11; Ga 1:10; Jer 11:20\x*  
\v 4 God atona nagwambafa natolofa wape hililiꞌ eaꞌ nasoꞌafa maol afaꞌ ma ogowalapa basef buꞌwafi ananifi. Eaꞌ ifimba atif deiꞌ wawalapef. Afaꞌ ina wandaꞌ maola epes siganifela maol afaꞌini, owaꞌ. Wandaꞌ opeha God atona sonogahana ma maol ananini, anen atona nawalogafa nogawafa.\x * \xo 2:4 \xt Ap 20:33; 2 Pi 2:3; Ro 1:9; 1 Te 2:10\x*  
\v 5 Ipaꞌ pegawa basef wagaꞌipipafi afaꞌ ina waꞌiꞌipipa, owaꞌatin endilisi. God natolofa nogawafa eaꞌ afaꞌ ina wandaꞌ maol wambahoꞌ basefa waf kowagalasafi, owaꞌatin.\x * \xo 2:5 \xt Jo 5:41,44\x*  
\v 6 Afaꞌ ina wandaꞌ opeha epes sogasaꞌma agofafa, o anis daias o ipaꞌ wapani piganifelofa, owaꞌatin.  
\v 7 Afaꞌ wape aposel Kraisi endilisi. Anen nasapaꞌafa ma ondaꞌ maol ananini. Eaꞌ deiꞌ wiꞌi ahoꞌai, aꞌ wiꞌipipa dindinipa pegasoꞌafa anis hiahawes gwaꞌaisi mais. Apaꞌ owaꞌatin. Nogota tatumba wape wagalomepa afaꞌ wandaꞌ waf nimanis endilisi ma ipaꞌ, siꞌi anoꞌw nemataꞌw kugumafi awasi akwaꞌusi andeandeꞌ.  
\v 8 Afaꞌ ukup paipailipa aꞌowaꞌ. Eaꞌ waseꞌepa basef buꞌwafi Godi. Ina waꞌipipa basef atif, owaꞌatin. Waseꞌepa opalef aꞌowaꞌ. Eaꞌ wandaꞌas dumbuli dombola ogaꞌ ogatopalopepa.\x * \xo 2:8 \xt Ap 20:34; 1 Ko 4:12\x*   
\p
\v 9 Endilisi atis ipaꞌ alipipai pegawa isimba, afaꞌ wandaꞌ maol banagambela wagawalapa basef buꞌwafi Godi ma ipaꞌ. Eaꞌ wandaꞌ maol wapani umafi alop afaꞌipi ma gwaꞌaisi mais. Wandaꞌ maol owamb alipa ina opoma ipaꞌ atipa ma ogofaꞌ gwaꞌaisi maisa ipaꞌ, owaꞌ.  
\v 10 Ipaꞌ patilis pegawas eaꞌ God wapani natilis nogawa eaꞌ waf wandaꞌafa ipaꞌ pagahapifa Kraisi. Waf afamba afaꞌifi buꞌwafi usiꞌifi, inaꞌ awafi, owaꞌ.\x * \xo 2:10 \xt Ap 20:31; Fl 1:27; 1 Pi 5:10\x*  
\v 11 Ipaꞌ pegawa waf afamba siꞌi ahamas nandaꞌmasaf awasi ananisi, eaꞌ naꞌamba atin siꞌi afaꞌ wandaꞌmepaf ipaꞌ atona atin. Afaꞌ wasaꞌma wawalapefa nomonas ipeꞌisi, owa banagaipa.  
\v 12 Waꞌipipaef naꞌamba ma ipaꞌ pendaꞌ waf fegafeꞌ andeandeꞌma God nitilipa noganifelipa. Eaꞌ nofalepa pafiꞌi piwis pegalomana anamba anen nagalaꞌambemagoma hiahaom ananimi atumi mogogalaꞌma.\x * \xo 2:12 \xt 1 Te 1:2; 2 Te 2:13; Ga 1:11-12\x*   
\p
\v 13 Fowaꞌ ipaꞌ pefaꞌ basef Godi malogof afaꞌigufi, eaꞌ pahapifif. Basef ifimba ina pefaꞌef siꞌi basef epesi atif, owaꞌatin. Pefaꞌ basef ifimba endilisifi Godi. Eaꞌ basef ifimba fatopalopa opalef ipeꞌilifi, deiꞌ paila waf buꞌwafi. Eaꞌ afaꞌ wanifela God dondola ipaꞌ pefaꞌ basef ananifi pagahapifana andeandeꞌ.\x * \xo 2:13 \xt Ap 17:5\x*  
\v 14 Ipaꞌ Kristen alipipai, pameꞌ akafimi naꞌamba atin siꞌi esis sagahapifa basef Godi sagape itap luꞌupa Judiai. Esis sahapifa Jisas Krais, eaꞌ amam nematawa Godi. Isimba atis deiꞌ esis Juda sasoꞌas akafimi anisa alop asasipi naꞌamba atin siꞌi ipaꞌ wambel atembel sagaseꞌepa akafimi.\x * \xo 2:14 \xt Ap 2:23, 7:52\x*  
\v 15 Esis Juda saha Dembinai Jisas naloma amom profet magaꞌ eaꞌ sandaꞌ wandaf banagef saliꞌamonafa. Sogosambala waf God okom magaꞌiefi sahambombaga epes hiasi.\x * \xo 2:15 \xt Mt 23:32-33\x*  
\v 16 Eaꞌ sasopama ufiaꞌwa afaꞌ ugaꞌipas basef Godi esis sogololama anini ma nowambilasi sotanimai sogape andeandeꞌ. Esis Juda sandaꞌas naꞌamba deiꞌ sowatani waf awafi asasifi atapif fataga luꞌuf aꞌowaꞌ. Fowaꞌ God natitilis dowaf apaꞌ deiꞌ okom wandafunai ananinai nafiꞌi natagamas nemaf akutaifi nondaꞌas awes lamonas.\x * \xo 2:16 \xt 1 Te 3:10\x*   
\s1 Pol okom mohafel aꞌowaꞌ ma naꞌi nogatilis wapani  
\p
\v 17 Ipaꞌ Kristen alipipai, esis Juda saliꞌamonafa nogota bandata ma wagape siꞌi awasi mamasas akasi. Endilisi afaꞌ ina wati amagahipama, apaꞌ ukup afaꞌipi pape palomepa. Isimba atis deiꞌ wandaꞌ maol banagambel aꞌowaꞌ ma uti anoꞌw ufiaꞌwa ofoꞌo ugati amagahipama. Afaꞌ ukup paipailipa aꞌowaꞌ ma ugatilipa.  
\v 18 Eaꞌ deiꞌ waꞌi ofeꞌmago ipaꞌ. Aeꞌ Pol andaꞌas nimaguf hiafi aꞌi efoꞌo, owaꞌ Satan nahefamafa ufiaꞌw.\x * \xo 2:18 \xt Fl 2:15-16, 4:1; 2 Te 1:4\x*   
\p
\v 19-20 Anaf Dembinai apeꞌinai nugafiꞌi wapani, daoꞌ apaꞌ mulutu nogohnaep ananisi. Afamba afaꞌ ukup beꞌep pepoma main? Eaꞌ ondagala ma hiahawes mais fasisi? Owaꞌatin. Nemaf afamba afaꞌ ondagalama ipaꞌ atipa. Afamba afaꞌ hiapai mofeꞌ mope mogalomana.   
\c 3  
\s1 Pol nasapaꞌ Timoti nafeꞌma nogowaꞌ banagas  
\p
\v 1-2 Afaꞌ deiꞌ ina wameꞌ anif basefa ipaꞌ pape paꞌimama, ataꞌ owaꞌatin. Deiꞌ wandaiwaꞌma ataꞌ ogape nogota laota naꞌaꞌe. Eaꞌ waꞌi afaꞌ atofa biafa ope naꞌa wambel luꞌwambili Atens, eaꞌ wasapaꞌ owamafa afaꞌinai Timoti wandaꞌ maol atin Godi nofoꞌo ma nigaꞌipasa basef buꞌwafi Kraisi. Wasapaꞌana nafoꞌo nowa banagaipa notopalopepa ma pigahapifana banagepa.\x * \xo 3:1-2 \xt Ef 3:13; 2 Ti 3:12; Ap 17:15; Ap 16:1-3\x*  
\v 3 Naꞌamba atiasi anipa pendafaꞌma hiahaom amamba akafimi luꞌwami, eaꞌ pewa alafugaha God. Ipaꞌ pegawa eaꞌ, God atona nandandepapa ma mogofaꞌ hiahaom amamba akafimi.\x * \xo 3:3 \xt Ap 14:22\x*  
\v 4 Ahoꞌ, fowaꞌ afaꞌ wape wagalomepa, waꞌipipa waꞌi, “Anaf afaꞌ ofa akafimi.” Eaꞌ isimba deiꞌ satagamafa siꞌi fowaꞌ waꞌipipa pegegawas.\x * \xo 3:4 \xt Fl 2:16\x*  
\v 5 Aeꞌ ina ataꞌ epe esasa wapani, owaꞌ. Aꞌi aꞌ efoꞌo. Eaꞌ asapaꞌ anona amana nafoꞌo nogogawa hapif ipeꞌini ma nogatopalopepa. Naꞌamba aman anamba aunai Satan nandaꞌ kikipai niꞌiꞌipipa ma waf awafi, eaꞌ maol afaꞌ wandaꞌani nenalo dowaf.\x * \xo 3:5 \xt Ap 18:5\x*   
\s1 Pol sonahana ma Timoti nogofaꞌai basef fasifi  
\p
\v 6 Timoti nakwahepa eaꞌ deiꞌ atef nafiꞌmai afaꞌ, nawalapa basef fasifi ma afaꞌ. Naꞌipafa ma ipaꞌ pahapifa Kraisa ukup pagapagaila anis epes daias. Eaꞌ naꞌi ipaꞌ paꞌi petolofa, afaꞌ wapani waꞌi utilipa.\x * \xo 3:6 \xt 2 Te 1:4\x*  
\v 7 Ipaꞌ Kristen alipipai afaꞌipai, afaꞌ wameꞌ basef ifimba ogawa ipaꞌ pahapilif pape. Eaꞌ sonahafa ma ipaꞌ, wameꞌ ipaꞌ pahapifana pagape. Isimba atis sowaꞌ banagafa ma nimanimi hiami ogofaꞌami.  
\v 8 Iꞌi ipaꞌ pepe banagepama Dembinai, afaꞌ wapani ope ondagala ambal namili endilisi.  
\v 9 Afaꞌ sonahafa endilisi ma naep God afaꞌinai. Ipaꞌ pahapifana laꞌifipa. Eaꞌ afaꞌ wanifela Goda dagala nagasoꞌafani.  
\v 10 Dondol owamb alip afaꞌ wandaꞌ betenepa dindinipa waꞌi ugati amagahipama ogogawa ipaꞌ pahapifana banagepa aꞌa owaꞌ? Afaꞌ waꞌi ofoꞌo ma ogatopalopepa pegasoꞌana opalef God banagambela pegape andeandeꞌ.\x * \xo 3:10 \xt 2 Te 2:16\x*   
\s1 Pol nandaꞌ betena Goda notopalopana nogafeꞌmago esis  
\p
\v 11 Afaꞌ wandabeten wahaliꞌ ahamafa afaꞌinai God naloma Dembinai Jisasa mondaꞌ ufiaꞌw kogal motopalopafa ogafeꞌmago ipaꞌ.  
\v 12 Afaꞌ waꞌi Dembinai notopalopepa ma waf afamba pendasosoꞌama opalef ipeꞌilifi hiꞌindalalef eaꞌ peseꞌasalef esis hiasi wapani, waf afamba aꞌ fendataga luꞌwifa ipaꞌ, siꞌi afaꞌ waliꞌ wagaseꞌepa nelelemb.\x * \xo 3:12 \xt Fl 1:10; 2 Te 1:7,10\x*  
\v 13 Waꞌi ipaꞌ pendaꞌ waf afambai ma God nogowaꞌ banaga opalef ipeꞌilifi. Ama anaf Dembinai apeꞌinai netambel nifiꞌi nogalumai esis hiasi sagahapifanai sagape hililiꞌi ma ipaꞌ pegape beꞌepa hililiꞌ diga basef akepa ma naep Godi ahamapa apeꞌinai.   
\c 4  
\p
\v 1 Alipipai, fowaꞌ afaꞌ waꞌipipa wihimbaꞌmepa waf ipaꞌ pepe pefeꞌ andeandeꞌ ma pigailafi, siꞌi God okom magaꞌiefi. Fowaꞌ pailaf deiꞌ wapani pilaf atapif. Eaꞌ afaꞌ wahaliꞌipa wasaꞌma ukup ipeꞌipi ma agol Dembinai Jisasa pilaf pendaꞌaf fefeꞌ atin fetaga luꞌuf.\x * \xo 4:1 \xt 2 Te 3:6\x*  
\v 2 Ipaꞌ pegawa basef ifimba wagawalapefa ipeꞌi ma agol Dembinai apeꞌinai Jisas.\x * \xo 4:2 \xt 1 Te 5:23; Hi 10:10; 1 Pi 1:16\x*  
\v 3 Okom Godi naꞌamba. Ipaꞌ amam nematawa pepe beꞌepa hililiꞌ ananipai atipa ma pindihiꞌama waf afamba soꞌa waulafi.\x * \xo 4:3 \xt 1 Ko 6:13,15; Sam 79:6\x*  
\v 4 Ipaꞌ amam hipai, nemaf mamahefa paꞌi pegasoꞌ nematawa pila waf God nagaꞌiefi pendasoꞌama andeandeꞌ pepe hililiꞌ. Nomonas sopaipa pimafi alop ipeꞌipi andeandeꞌ datima ma waf awafi soꞌa waulafi akepa.  
\v 5 Waf afamba naꞌamba. Nelelemb ipeꞌilimbi owaꞌi usihilimba waf awafi sandaꞌ soꞌa waulafia, siꞌi isimba sogololama God sandaꞌafi, owaꞌi. Hapaifi.\x * \xo 4:5 \xt Sam 94:1\x*  
\v 6 Eaꞌ ipaꞌ amam ina aꞌ pendaꞌ waf awafi ma esis sahin owan ipeꞌisi pefaꞌ nematawa anom amami, owaꞌi. Dembinai okom wandafunai nagapomasi epes isimbai sandaꞌ waf afambai ma naꞌi nogagwamasa waf afamba awafi esis sandaꞌafi. Fowaꞌ afaꞌ wawalapa isimba alihis waꞌipipas dindinip.\x * \xo 4:6 \xt 2 Te 2:13-14; 1 Pi 1:15-16\x*  
\v 7 Dembinai God ina nofalapa ma mondaꞌ waf afamba awafi, owaꞌatin. Anen nofalapa ma mugaila waf fasifi hililiꞌi.\x * \xo 4:7 \xt Lu 10:16; Esi 36:27; Esi 37:14; 2 Ko 1:22\x*  
\v 8 Basef Godi faꞌi apaꞌ ina mondaꞌ waf soꞌa waulafi, owaꞌatin. Eaꞌ epes mamahisa sogowaꞌ alafugaha basef ifimbai, ina sowaꞌ alafugaha epes atis, owaꞌatin. Sowaꞌ alafugaha God wapani. God atona naseꞌepa Ambal buꞌunai ananinai.\x * \xo 4:8 \xt Jo 13:34\x*   
\p
\v 9 Deiꞌ afaꞌ ina ataꞌ ondaꞌ anif basefa ipaꞌ ma waf afamba ipaꞌ ukup pigapigaila esis hiasi sahin owanasafi, owaꞌatin. God nawalipipa hiꞌalepa ma waf afambai.\x * \xo 4:9 \xt 2 Te 3:4\x*  
\v 10 Ipaꞌ pagasoꞌasa opalef esis sahin owani anamba itap luꞌupa Masedoniai. Ipaꞌ alipipai, afaꞌ waꞌipipa dindinip waꞌi, ipaꞌ ukup pipila esis sahin owan isimba pendaꞌ waf afambai fetaga fefeꞌ banagef.\x * \xo 4:10 \xt Ef 4:28; 2 Te 3:8,12\x*  
\v 11 Ipaꞌ nomonas solasefeꞌ banagesa pegape saꞌombel pigimafi hiahawes ipeꞌisi andeandeꞌ. Pendaꞌ maol lagof ipeꞌigufi siꞌi fowaꞌ wagaꞌipipa.\x * \xo 4:11 \xt 1 Ko 5:12-13; Kl 4:5\x*  
\v 12 Pendaꞌas naꞌamba ma pegafeꞌ andeandeꞌ naep esis isimba owaꞌ ataꞌ sombema nelelemb sogataga Kristenia. Eaꞌ pendaꞌas naꞌamba ma ina waowaola anis hiahawes, owaꞌatin endilisi.\x * \xo 4:12 \xt Ef 2:12\x*   
\s1 Atiasi Dembinai notanima nifiꞌi wapani  
\p
\v 13 Ipaꞌ sahin owan, afaꞌ waꞌi ipaꞌ pegawa andeandeꞌma amam nematawa isimba sagagaꞌi. Naꞌamba nelelemb ipeꞌilimbi ukup pipilas pelopas siꞌi isimba sogololama hapifi sandaꞌam. Esis owaꞌ sogawa ma sope sogasasa nemaf afamba anaf sotambel sogosafel wapani wandelefafia.\x * \xo 4:13 \xt Ro 14:9; 1 Ko 15:3-4,12\x*  
\v 14 Apaꞌ mahapifa Jisas, anen nagaꞌ sawana eaꞌ notanima nosafel. Isimba atis deiꞌ mogawa mahapifa Goda anaf nowambilai esis Kristen isimba sagahapifana endilisi ma sagagaꞌi sosafel wapani sufiꞌi sogalomai Jisas.\x * \xo 4:14 \xt 1 Ko 15:51\x*   
\p
\v 15 Afaꞌ wawalapa basef Dembinaii atifa ipaꞌ naꞌamba. Anaf Dembinai notanima nugafiꞌi, apaꞌ amam nematawa ataꞌ magape itapi ambagof ataꞌ fagapaipai, apaꞌ ina atiasi muliꞌ mofeꞌma esis isimba sagagaꞌi, owaꞌatin.\x * \xo 4:15 \xt 1 Te 1:10; 2 Te 1:7; 1 Ko 15:52\x*  
\v 16 Dembinai nifiꞌi niꞌi dindinip aꞌowaꞌ eaꞌ ensel Dembinai noga niꞌi basef banagafi mehip, nufapula alof luꞌunai Godi nondaꞌam nogal mehip. Nogota atamba Dembinai nokwaha heven nisilaꞌi. Eaꞌ sagahapifa Kraisi fowaꞌ saliꞌ sagagaꞌi, atiasi siliꞌ sosafel.\x * \xo 4:16 \xt Jo 12:26\x*  
\v 17 Ama main owaꞌ, nemaf afamba atef Dembinai nofaꞌapa amam nematawa ambagof fagapaipai molota otaga ilif moloma amam nematawa isimba muti Dembinai. Eaꞌ apaꞌ hiapai mope molomana dondol lifilafi.  
\v 18 Isimba atis deiꞌ pendewaꞌ banagama atina nelelemb ipeꞌilimbi ma basef ifimba.   
\c 5  
\s1 Apaꞌ dumbili dombol mopoma Dembinai nogafiꞌi  
\p
\v 1 Ipaꞌ amam nematawa afaꞌipai alipipai, afaꞌ ina ondaꞌ anif basef laufi ma ugaꞌipipa nemaf afamba hiahawes isimba sogataga, owaꞌatin.\x * \xo 5:1 \xt Mt 24:42-44; 2 Pi 3:10; Re 3:3; Mt 24:36\x*  
\v 2 Ipaꞌ pegawa eaꞌ nemaf afamba Dembinai nigafiꞌafii. Anen nogafiꞌi nifiꞌi siꞌi epen nandaꞌ wali nagafiꞌi owamba paꞌoh pegelelamana.\x * \xo 5:2 \xt Esi 13:10; Mt 24:39; Lu 21:34-35; Jo 16:21-22\x*  
\v 3 Atiasi anis amam nematawa siꞌias siꞌi, “Eaꞌ deiꞌ aꞌ nemaf buꞌwafi ma tol mogape andeandeꞌ.”  
\p Esis owaꞌ siꞌias naꞌamba owaꞌ, nogota atamba atota hiahaom mogahambombaga alop asasipii motagamas kwafalis atis, siꞌi nemataꞌw kwagameꞌ akepa kogola batawin. Eaꞌ esis ina atiasi sindihiꞌama hiahaom amamba, owaꞌatin.  
\v 4 Apaꞌ ipaꞌ alipipai, ina ataꞌ pagape owamb akuti siꞌi isimba sogololama Dembinaii, owaꞌ. Ipaꞌ ina bombolalasipa ma nemaf afamba fegataga siꞌi bombolagalasipa ma aman nandaꞌ wali nagafiꞌi, owaꞌatin.\x * \xo 5:4 \xt Ro 13:12; Ef 5:9\x*  
\v 5 Ipaꞌ epes hipai pagape lagala alipi. Ina siꞌi epes sagape owamb akuti, owaꞌatin.  
\v 6 Eaꞌ ipaꞌ ina pendaꞌas siꞌi isimba anis ukup pasoꞌas saꞌoh sogololai, owaꞌatin. Andeandeꞌma apaꞌ ukup talambi mope naep pegetawa.  
\v 7 Apaꞌ mogawa esis isimba sagaꞌihi esis saꞌoh owamb atomb. Eaꞌ isimba saꞌ embela sahaga sagagauli sandaꞌam owamb atona.\x * \xo 5:7 \xt Ef 6:14,17\x*  
\v 8 Apaꞌ mape siꞌi epes sagape alipi, nomonas sondapaepa mumafi alop andeandeꞌ. Apaꞌ mofaꞌ waf afamba mogahapifana banagepa ma mogasoꞌas opalef anis, siꞌi sandaꞌ wandafi sofaꞌ walitah sandaꞌ wandafa magahagasa wambawa. Apaꞌ mogawa basef amamba owagama God nofaꞌapa mogotanimai. Ukup pendandaꞌ ma basef amamba siꞌi mogowaloꞌ anota hat banagitai tigiliꞌama balagah.\x * \xo 5:8 \xt 1 Te 1:10; 2 Te 2:14\x*  
\v 9 Dembinai God ina nosahoꞌapa ma mogofaꞌ okom wandafunai ananinai nogahambombagapa, owaꞌatin. Anen nosahoꞌapa ma Jisas Krais Dembinai apeꞌinai nowambelapa mogotanimai.\x * \xo 5:9 \xt Ro 14:8-9; 1 Te 4:14\x*  
\v 10 Fowaꞌ anen nagaꞌ ma nogatopalopapa, iꞌi nemaf afamba anen nogotanimai mope ambagof fopaepa aꞌa mogaꞌ, mofeꞌ mope namepa molomana.\x * \xo 5:10 \xt Ju 20\x*  
\v 11 Deiꞌ ipaꞌ hipai pewaꞌ banaga nelelemb ipeꞌilimbi pendatopalopa atin siꞌi deiꞌ pape pandaꞌas.\x * \xo 5:11 \xt 1 Ko 16:18; 1 Ti 5:17\x*   
\s1 Anif basef figawalipipai  
\p
\v 12 Ipaꞌ Kristen alipipai afaꞌipai, afaꞌ waꞌipipa naꞌamba, waꞌi amom agufumi mugumafi esis Kristeni, anom mandaꞌ maol numaꞌwini malomepa matopalopepa. Ipaꞌ pendafeꞌ lafela amom. Dembinai nandaꞌam mape agufumi ipeꞌimi ma mogawa mondaꞌ nomonas ipeꞌisi usiꞌis.  
\v 13 Ipaꞌ ukup pepoma maol amamini, eaꞌ ukup pipilam beꞌep pepomam endilisi. Eaꞌ ukup atifip pindaima atin peloma esis sahin owan.\x * \xo 5:13 \xt 2 Te 3:6,11,15\x*  
\v 14 Ipaꞌ Kristen alipipai afaꞌipai, afaꞌ waꞌipipago dindinip wasaꞌma ukup ipeꞌipi ma pegatopalopago isimba alaꞌuta nagahasi banagambel piꞌipasa sokwahago waf alaꞌuta nagahasanai. Eaꞌ anis ambagof fondolaꞌasi ma owaꞌ sigaꞌi anif basefia, ipaꞌ pewaꞌ banagasa sigaꞌi anif basef. Eaꞌ pewaꞌ banaga anis owaꞌ sogahapifana banagesia. Pendaꞌ waf saꞌumbilifi ma esis hiasi.\x * \xo 5:14 \xt Pro 20:22; Ro 12:17; 1 Pi 3:9\x*   
\p
\v 15 Naꞌamba ipaꞌ pegwamasa waf awafi anis epes sandaꞌmepaf ipeꞌi, owaꞌi. Dondol pilutu banagepa ma waf buꞌwafi atef, pendandaꞌmaf atin. Eaꞌ pendaꞌmasaf isimba anis hiasi wapani.\x * \xo 5:15 \xt Fl 4:4\x*   
\p
\v 16 Ipaꞌ pendagala lifilafi.\x * \xo 5:16 \xt Lu 18:1\x*  
\v 17 Pendabeten pihaliꞌ God dondol owamb alip.\x * \xo 5:17 \xt Ef 5:20\x*  
\v 18 Ipaꞌ pinifelona hiahawes hiasi. Ipaꞌ pagape sisihipama Krais Jisasi, God naꞌi ipaꞌ pendaꞌ waf fasifi pinifelonama hiahawes hiasi.\x * \xo 5:18 \xt Ef 4:30\x*  
\v 19 Ipaꞌ ina pipihiꞌ nif ifimba ma maol Ambal buꞌunai Godi nandaꞌani, owaꞌi.\x * \xo 5:19 \xt 1 Ko 14:1,39\x*  
\v 20 Ipaꞌ ina pewaꞌ alafugaha basef Godi Ambal buꞌunai nasaꞌmas sagaꞌipipafi, owaꞌi.\x * \xo 5:20 \xt 1 Jo 4:1; Jop 1:1,8, 2:3\x*  
\v 21 Pewaloga basef hiafi, ma pihapila basef fasifi atif tatalaꞌif.  
\v 22 Eaꞌ pindihiꞌama hiahaom awami mamimami hiami.\x * \xo 5:22 \xt 1 Ko 1:9; 2 Te 3:3\x*   
\p
\v 23 God anen kofagonama nomonas awanisi. Aeꞌ aꞌi anen atona nondaꞌepa pepe beꞌepa hililiꞌ ananipai atipa. Aꞌi anen numafi ambagof foloma alop nomonas ipeꞌisi andeandeꞌma waf awafi akepa, pegape hililiꞌ ma nemaf afamba Dembinai apeꞌinai Jisas Krais nogotanimafii.  
\v 24 God nogofalipai, andeandeꞌ aꞌowaꞌ. Basef feloma maol main naꞌias eaꞌ ma nondaꞌasi, atiasi anen nondaꞌas endilisi andeandeꞌ datimai.\x * \xo 5:24 \xt Kl 4:3, 2 Te 3:1\x*   
\p
\v 25 Ipaꞌ Kristen alipipai, pendandaꞌ betena God nogatopalopafa.\x * \xo 5:25 \xt Ro 16:16\x*  
\v 26 Ipaꞌ pendasoꞌama lagof pendandaꞌma nemaf buꞌwafi peloma esis Kristen alipisi hiasi.   
\p
\v 27 Aeꞌ aꞌipipa dindinipa agol Dembinaii, ipaꞌ piꞌi basef ifimba ma esis Kristen alipisi hiasi.   
\p
\v 28 Afaꞌ wagaꞌias naꞌamba waꞌi, Jisas Krais notopalopepa dowaf nowaꞌ banagaipago. Eaꞌ maꞌuf.